1 Thessalonians (Zulu)

1

1:1b.1TH.001.001 OPawulu, noSilvanu, noThimothewu kulo ibandla labaseTheselonika elikuNkulunkulu uBaba, naseNkosini uJesu Kristu: Makube kini umusa nokuthula.

1:2b.1TH.001.002 Sibonga uNkulunkulu njalo ngani nonke, siniphatha emikhulekweni yethu,

1:3b.1TH.001.003 sikhumbula ngokungayeki isenzo senu sokukholwa, nomsebenzi wothando, nokukhuthazela kwethemba lenu eliseNkosini yethu uJesu Kristu phambi kukaNkulunkulu noBaba wethu,

1:4b.1TH.001.004 sikwazi, bazalwane abathandiwe nguNkulunkulu, ukukhethwa kwenu

1:5b.1TH.001.005 ukuthi ivangeli lethu alizanga kini ngezwi kuphela kodwa nangamandla, nangoMoya oNgcwele, nangokwethemba okukhulu, njengokuba nazi ukuthi saba ngabantu abanjani phakathi kwenu ngenxa yenu.

1:6b.1TH.001.006 Nani naba ngabalingisi bethu, nabeNkosi senilamukele izwi ekukhathazekeni okukhulu ngokuthokoza kukaMoya oNgcwele,

1:7b.1TH.001.007 naze naba yisibonelo kubo bonke abakholwayo eMakedoniya nase-Akhaya.

1:8b.1TH.001.008 Ngokuba udumo lwezwi leNkosi lwaphuma kinina, lwafika, angisho eMakedoniya nase-Akhaya kuphela, kepha ezindaweni zonke lapho ukukholwa kwenu nguNkulunkulu kuphumele khona; ngakho asisadingi ukukhuluma lutho.

1:9b.1TH.001.009 Ngokuba bona uqobo balanda ngathi ukuthi kwaba njani ukungena kwethu kinina nokuthi naphendukela kanjani kuNkulunkulu, nishiya izithombe, ukuba nikhonze uNkulunkulu ophilayo oweqiniso,

1:10b.1TH.001.010 nilindele iNdodana yakhe ivela ezulwini, ayivusa kwabafileyo, uJesu osihlangulisa olakeni oluzayo.

2

2:1b.1TH.002.001 Ngokuba niyazi nina bazalwane ukuthi ukungena kwethu kinina akubanga yize.

2:2b.1TH.002.002 Kepha noma sasihlushiwe kuqala saphathwa kabi eFilipi, njengokuba nazi, saba nesibindi kuNkulunkulu wethu sokunishumayeza ivangeli likaNkulunkulu ngokulwa okukhulu.

2:3b.1TH.002.003 Ngokuba ukuyala kwethu akusikho okokuduka nokokungcola nangenkohliso,

2:4b.1TH.002.004 kepha njengokuba sivunyiwe nguNkulunkulu ukuba siphathiswe ivangeli, siyakhuluma ngokunjalo, singenzeli ukuthokozisa abantu kepha uNkulunkulu ovivinya izinhliziyo zethu.

2:5b.1TH.002.005 Ngokuba asizange sibe namazwi okuthopha, njengokuba nazi; asizange futhi sibe nobuqili bokufisa, uNkulunkulu ungufakazi,

2:6b.1TH.002.006 singafunanga nokutuswa ngabantu, nakinina nakwabanye,

2:7b.1TH.002.007 ingani sasingaba namandla okunisinda njengabaphostoli bakaKristu, nokho saba mnene phakathi kwenu njengokuba umdlezane ondla abantwana bakhe.

2:8b.1TH.002.008 Ngokunjalo lokhu besinilangazelele, sasifuna ukuninika kungesilo ivangeli likaNkulunkulu kuphela, kepha nokuphila kwethu uqobo, ngokuba nase ningabathandekayo kithina.

2:9b.1TH.002.009 Ngokuba niyakhumbula, bazalwane, ukukhandleka nokushikashikeka kwethu; sisebenza ubusuku nemini, ukuze singasindi noyedwa kinina, sanishumayeza ivangeli likaNkulunkulu.

2:10b.1TH.002.010 Nina ningofakazi, naye uNkulunkulu, bokuthi sahlala kanjani phakathi kwenu nina enikholwayo ngobungcwele, nangokulunga, nangokungasoleki,

2:11b.1TH.002.011 njengokuba nazi ukuthi saniphatha abanye ngabanye njengoyise ephatha abantwana bakhe,

2:12b.1TH.002.012 siniyala, sinimisa isibindi, sifakazela ukuba nihambe ngokufaneleyo phambi kukaNkulunkulu onibizela embusweni nasebukhosini bakhe.

2:13b.1TH.002.013 Ngalokho nathi sibonga uNkulunkulu singaphezi, ngokuba, kuthe lapho namukela izwi likaNkulunkulu enalizwa ngathi, anilamukelanga njengezwi labantu kepha njengezwi likaNkulunkulu, njengokuba liyilo isibili, elona lisebenza futhi phakathi kwenu nina enikholwayo.

2:14b.1TH.002.014 Ngokuba nina bazalwane naba ngabalingisi bamabandla kaNkulunkulu aseJudiya akuKristu Jesu, ngokuba nani nahlushwa ngabesizwe sakini, njengalokho nawo ahlushwa ngabaJuda

2:15b.1TH.002.015 ababulala neNkosi uJesu nabaprofethi, basixosha nathi, bengamthokozisi uNkulunkulu, bemelana nabantu bonke,

2:16b.1TH.002.016 besivimbela ukukhuluma nabezizwe ukuba basindiswe, ukuze bagcwalise njalo izono zabo; kepha ulaka selufinyelele phezu kwabo ngokupheleleyo.

2:17b.1TH.002.017 Kepha thina, bazalwane, lokhu besahlukanisiwe nani isikhashana ngobuso kungenganhliziyo, kwaba yikhona sikhuthalela kakhulu ukubona ubuso benu ngokunxanela okukhulu.

2:18b.1TH.002.018 Ngakho besithanda ukuza kinina, mina Pawulu ngokwami kanye nakabili, kepha uSathane wasivimbela.

2:19b.1TH.002.019 Ngokuba liyini ithemba lethu, nokuthokoza, nomqhele wokuzibonga phambi kweNkosi yethu uJesu Kristu ekufikeni kwakhe, kungeyinina na?

2:20b.1TH.002.020 Ngokuba nina niludumo lwethu nokuthokoza kwethu.

3

3:1b.1TH.003.001 Ngalokho kwathi singasenakubekezela, sathi kuhle ukuba sisale sodwa e-Athene,

3:2b.1TH.003.002 sathuma uThimothewu umzalwane wethu, isikhonzi sikaNkulunkulu evangelini likaKristu, ukuba aniqinise, anivuse maqondana nokukholwa kwenu

3:3b.1TH.003.003 ukuba kunganyakaziswa muntu ngalezo zinhlupheko; ngokuba niyazi nina ukuthi simiselwe lokho.

3:4b.1TH.003.004 Ngokuba kuthe sisekhona kini, sanitshela ngaphambili ukuthi siyakuhlushwa, njengokuba kwaba njalo, nani nikwazi.

3:5b.1TH.003.005 Ngalokho nami, lapho ngingasenakubekezela, ngathumela ukuba ngiqonde ukukholwa kwenu, ingabe mhlawumbe umlingi unilingile yini, ukukhandleka kwethu kube yize.

3:6b.1TH.003.006 Kepha kalokhu uThimothewu esefikile kithi evela kini, esibikela izindaba ezinhle zokukholwa nothando lwenu, nokuthi nisikhumbula kahle njalo, nokuthi nilangazelela ukusibona, njengokuba nathi silangazelela ukubona nina,

3:7b.1TH.003.007 ngalokho, bazalwane, saduduzeka ngani ngokukholwa kwenu ekusweleni nasosizini lwethu lonke,

3:8b.1TH.003.008 ngokuba kalokhu siyaphila, uma nina nimi niqinile eNkosini.

3:9b.1TH.003.009 Ngokuba ngukubonga okunjani esingakubuyisela kuNkulunkulu ngani ngokuthokoza konke esithokoza ngakho ngenxa yenu phambi kukaNkulunkulu wethu na?

3:10b.1TH.003.010 Ubusuku nemini sinxusa nokunxusa ukuba sibone ubuso benu, siphelelise okusileleyo ekukholweni kwenu.

3:11b.1TH.003.011 Sengathi uNkulunkulu noBaba wethu uqobo neNkosi yethu uJesu angayiqondisa indlela yethu yokuza kini,

3:12b.1TH.003.012 iNkosi ininike ukwanda nokuchichima othandweni, omumye komunye nakubo bonke, njengokuba sinjalo kinina,

3:13b.1TH.003.013 ukuze iqinise izinhliziyo zenu, zingabi nakusoleka ebungcweleni phambi kukaNkulunkulu noBaba wethu ekufikeni kweNkosi yethu uJesu kanye nabangcwele bakhe bonke.

4

4:1b.1TH.004.001 Elokugcina-ke, bazalwane, siyaninxusa, siyaniyala ngeNkosi uJesu ukuba njengalokho nakwamukela kithi ukuthi nifanele ukuhamba nokumthokozisa kanjani uNkulunkulu, njengalokho nihamba kanjalo, manivame kakhulu kulokho.

4:2b.1TH.004.002 Ngokuba niyayazi imiyalo esaninika yona ngayo iNkosi uJesu.

4:3b.1TH.004.003 Ngokuba lokhu kuyintando kaNkulunkulu, ukungcweliswa kwenu, ukuba nidede ebufebeni

4:4b.1TH.004.004 ukuba yilowo nalowo kini akwazi ukuhlala nomkakhe ngobungcwele nangokuhlonipha,

4:5b.1TH.004.005 kungabi ngokushisa kwenkanuko njengabezizwe abangamazi uNkulunkulu

4:6b.1TH.004.006 ukuba kungabikho noyedwa omonayo, aphambe umfowabo ngento, ngokuba iNkosi ingumphindiseli kukho konke lokho, njengokuba sanitshela phambili, saqinisa.

4:7b.1TH.004.007 Ngokuba uNkulunkulu kasibizelanga amanyala, kepha wasibizela ebungcweleni.

4:8b.1TH.004.008 Ngakho-ke owalayo akali umuntu, kepha wala uNkulunkulu, yena oninika uMoya wakhe oNgcwele.

4:9b.1TH.004.009 Kepha maqondana nothando lobuzalwane anisweli ukuba umuntu anilobele, ngokuba nina uqobo ningabafundisiwe nguNkulunkulu ukuba nithandane;

4:10b.1TH.004.010 nempela niyakwenza lokho kubo bonke abazalwane abaseMakedoniya lonke. Kepha siyaniyala, bazalwane, ukuba nivame nokuvama kulokho,

4:11b.1TH.004.011 nikhuthalele ukuhlala ngokuthula, nokwenza okwenu, nokusebenza ngezandla zenu, njengokuba saniyala,

4:12b.1TH.004.012 ukuze nihambe ngokufaneleyo kwabangaphandle, ningasweli lutho.

4:13b.1TH.004.013 Kepha asithandi, bazalwane, ukuba ningabi nakwazi ngabalalayo, ukuze ningadabuki njengabanye abangenalo ithemba.

4:14b.1TH.004.014 Ngokuba uma sikholwa ukuthi uJesu wafa, wavuka, ngokunjalo-ke uNkulunkulu uyakubaletha nabaleleyo kuJesu kanye naye.

4:15b.1TH.004.015 Ngokuba lokho sikusho kini ngezwi leNkosi ukuthi thina, esisekhona sisasele kuze kube sekufikeni kweNkosi, asiyikubandulela nempela abaleleyo,

4:16b.1TH.004.016 ngokuba iNkosi uqobo iyakwehla ezulwini ngezwi lenhlokomo, ngephimbo lengelosi enkulu nangecilongo likaNkulunkulu, nabafileyo kuKristu bayakuvuka kuqala,

4:17b.1TH.004.017 khona thina, esisekhona sisasele siyakuhlwithwa kanye nabo emafwini, sihlangabeze iNkosi emoyeni; kanjalo-ke siyakuba nayo iNkosi njalo.

4:18b.1TH.004.018 Ngakho-ke duduzanani ngalawo mazwi.

5

5:1b.1TH.005.001 Kepha ngezikhathi nangemizuzu, bazalwane, anisweli ukulotshelwa,

5:2b.1TH.005.002 ngokuba nina uqobo niyazi kahle ukuthi usuku lweNkosi luza njengesela ebusuku.

5:3b.1TH.005.003 Nxa bethi: “Ngukuthula nokuhlala kahle,” khona ukubhujiswa kuyabazuma njengemihelo ifikela okhulelweyo, abasoze baphunyuka.

5:4b.1TH.005.004 Kepha nina bazalwane anikho ebumnyameni, ukuze lolo suku lunifice njengesela,

5:5b.1TH.005.005 ngokuba nina nonke ningabantwana bokukhanya, ningabantwana bemini. Asisibo abobusuku noma abobumnyama;

5:6b.1TH.005.006 ngalokho-ke masingalali njengabanye, kodwa masiqwashe, siqonde.

5:7b.1TH.005.007 Ngokuba abalalayo balala ebusuku, nabadakwayo badakwa ebusuku;

5:8b.1TH.005.008 kepha thina esingabemini masiqonde, sifake isivikelo sesifuba sokukholwa nesothando, isigqoko sibe yithemba lokusindiswa;

5:9b.1TH.005.009 ngokuba uNkulunkulu kasimiselanga ulaka kepha ukuba sizuze ukusindiswa ngeNkosi yethu uJesu Kristu

5:10b.1TH.005.010 owasifelayo ukuba, noma siqwashile noma silele, siphile kanye naye.

5:11b.1TH.005.011 Ngalokho-ke vuselelanani, nakhane njengokuba futhi nikwenza.

5:12b.1TH.005.012 Kepha siyanincenga, bazalwane, ukuba nibazi abakhandlekayo phakathi kwenu, nabaniphetheyo eNkosini, nabanilulekayo,

5:13b.1TH.005.013 nibazisise kakhulu othandweni ngenxa yomsebenzi wabo. Hlalisanani ngokuthula.

5:14b.1TH.005.014 Kepha siyaniyala, bazalwane, ukuba niluleke abangahambi ngomthetho, nithokozise abadanileyo, nisekele ababuthakathaka, nibabekezelele bonke.

5:15b.1TH.005.015 Qaphelani ukuba kungabikho ophindisela omunye okubi ngokubi; kepha jongani njalo ukwenza okuhle, omunye komunye nakubo bonke.

5:16b.1TH.005.016 Thokozani njalo;

5:17b.1TH.005.017 khulekani ningaphezi;

5:18b.1TH.005.018 kukho konke bongani; ngokuba lokhu kuyintando kaNkulunkulu kuKristu Jesu ngani.

5:19b.1TH.005.019 Ningamcimi uMoya;

5:20b.1TH.005.020 ningakudeleli ukuprofetha;

5:21b.1TH.005.021 vivinyani konke, nibambisise okuhle;

5:22b.1TH.005.022 dedani kukho konke okubonakala kukubi.

5:23b.1TH.005.023 Kepha uNkulunkulu wokuthula, yena uqobo, makaningcwelise ngokupheleleyo, kulondolozwe umoya wenu wonke nomphefumulo nomzimba, kungabi nacala ekufikeni kweNkosi yethu uJesu Kristu.

5:24b.1TH.005.024 Uthembekile yena onibizayo, oyakukwenza futhi.

5:25b.1TH.005.025 Bazalwane, sikhulekeleni.

5:26b.1TH.005.026 Khonzani kubazalwane bonke ngokwanga okungcwele.

5:27b.1TH.005.027 Ngiyanifungisa iNkosi ukuba le ncwadi ifundwe kubo bonke abazalwane.

5:28b.1TH.005.028 Umusa weNkosi yethu uJesu Kristu mawube nani.