Luke (Zulu)

1

1:1b.LUK.001.001 Njengokuba abaningi sebezamile ukulanda ngokuhlelekile ngalezo zindaba ezigcwaliseke phakathi kwethu,

1:2b.LUK.001.002 njengalokho basinika zona labo ababekhona kwasekuqaleni, bezibonela ngamehlo, beyizikhonzi zezwi,

1:3b.LUK.001.003 kwasengathi kuhle nakimina, lokhu ngizihlolisisile zonke izinto, kusukela ekuqaleni, ngikulobele ngokulandelana, Theyofilu odumileyo,

1:4b.LUK.001.004 ukuze wazi ukuqiniseka kwalezo zindaba ozifundisiweyo.

1:5b.LUK.001.005 Emihleni kaHerode inkosi yaseJudiya kwakukhona umpristi othile ogama lakhe nguZakariya, esigabeni sika-Abiya, nomkakhe engowamadodakazi ka-Aroni, igama lakhe ngu-Elisabethe.

1:6b.LUK.001.006 Babelungile bobabili phambi kukaNkulunkulu behamba ngayo yonke imiyalo nezimiso zeNkosi, bengasoleki.

1:7b.LUK.001.007 Kepha babengenamntwana, ngokuba u-Elisabethe wayeyinyumba; bobabili base bekhulile.

1:8b.LUK.001.008 Kwathi-ke esayenza inkonzo yobupristi phambi kukaNkulunkulu njengokuhlelwa kwesikhathi sesigaba sakubo,

1:9b.LUK.001.009 ngokomthetho wobupristi kwaba nguye owabelwa ukungena ethempelini leNkosi, azoshisa impepho.

1:10b.LUK.001.010 Isixuku sonke sabantu sasikhuleka ngaphandle ngesikhathi sempepho.

1:11b.LUK.001.011 Kwabonakala kuye ingelosi yeNkosi imi ngakwesokunene se-altare lempepho.

1:12b.LUK.001.012 UZakariya eyibona wethuka, wehlelwa luvalo.

1:13b.LUK.001.013 Kepha ingelosi yathi kuye: “Ungesabi, Zakariya, ngokuba isicelo sakho sizwakele; umkakho u-Elisabethe uzakukuzalela indodana, uyiqambe igama lokuthi uJohane.

1:14b.LUK.001.014 Uzakuba nokujabula nokuthokoza wena; nabaningi bazakujabula ngokuzalwa kwakhe.

1:15b.LUK.001.015 Ngokuba uzakuba mkhulu emehlweni eNkosi; kasoze waphuza iwayini nophuzo oludakisayo; uzakugcwaliswa nguMoya oNgcwele esesesiswini sikanina.

1:16b.LUK.001.016 Abaningi kubantwana bakwa-Israyeli uyakubaphendulela eNkosini uNkulunkulu wabo.

1:17b.LUK.001.017 Uyakuhamba ngaphambi kwayo emoyeni nasemandleni ka-Eliya ukuphendulela izinhliziyo zawoyise kubantwana nabangalaleliyo ekuqondeni kwabalungileyo, ukulungisela iNkosi isizwe esilungiselweyo.”

1:18b.LUK.001.018 UZakariya wathi engelosini: “Ngiyakukwazi ngani lokhu na? Ingani sengiyindoda endala mina, nomkami uqhubekile ezinsukwini zakhe.”

1:19b.LUK.001.019 Ingelosi yaphendula, yathi kuye: “NginguGabriyeli mina, omiyo phambi kukaNkulunkulu; ngithunyiwe ukuba ngikhulume kuwe, ngikubikele lezi zindaba ezinhle.

1:20b.LUK.001.020 Bheka-ke, uzakuba yisimungulu, ungakwazi ukukhuluma kuze kube lusuku okwenzeka ngalo lokhu, ngokuba ungakholwanga ngamazwi ami azakugcwaliseka ngesikhathi sawo.”

1:21b.LUK.001.021 Abantu bemlindele uZakariya bamangala ngokulibala kwakhe ethempelini.

1:22b.LUK.001.022 Kuthe esephuma, wahluleka ukukhuluma kubo; bazi ukuthi ubone umbono ethempelini; wayelokhu ebaqhweba, wahlala eyisimungulu.

1:23b.LUK.001.023 Kwathi seziphelile izinsuku zokukhonza kwakhe, wamuka waya ekhaya.

1:24b.LUK.001.024 Kepha emva kwalezo zinsuku u-Elisabethe umkakhe wakhulelwa, wazifihla izinyanga eziyisihlanu, wathi:

1:25b.LUK.001.025 “Yenze njalo iNkosi kimi emihleni eyangibheka ngayo ukususa ihlazo lami phakathi kwabantu.”

1:26b.LUK.001.026 Ngenyanga yesithupha ingelosi uGabriyeli yathunywa nguNkulunkulu emzini waseGalile ogama lawo yiNazaretha,

1:27b.LUK.001.027 entombini eyayimiselwe indoda ebizo layo nguJosefa wendlu kaDavide; ibizo lentombi nguMariya.

1:28b.LUK.001.028 Yangena ingelosi kuye, yathi: “E wena ophiwe umusa! INkosi inawe; ubusisiwe esifazaneni.”

1:29b.LUK.001.029 Kepha yena wethuka ngezwi layo ezindla ngokuthi kungaba ngukubingelela kuni lokhu.

1:30b.LUK.001.030 Ingelosi yathi kuye: “Ungesabi, Mariya, ngokuba ufumene umusa kuNkulunkulu.

1:31b.LUK.001.031 Bheka, uzakukhulelwa, uzale indodana, uyiqambe igama lokuthi uJesu.

1:32b.LUK.001.032 Yena uyakuba mkhulu, athiwe iNdodana yoPhezukonke; iNkosi uNkulunkulu iyakumnika isihlalo sobukhosi sikayise uDavide;

1:33b.LUK.001.033 uyakuba yinkosi yendlu kaJakobe kuze kube phakade, nombuso wakhe awuyikuba nakuphela.”

1:34b.LUK.001.034 UMariya wathi engelosini: “Lokhu kuyakwenzeka kanjani, njengokuba ngingayazi indoda na?”

1:35b.LUK.001.035 Ingelosi yaphendula, yathi kuye: “UMoya oNgcwele uzakuza phezu kwakho, amandla oPhezukonke akusibekele; ngakho-ke okungcwele okuzozalwa kuzakuthiwa iNdodana kaNkulunkulu.

1:36b.LUK.001.036 Bheka, u-Elisabethe isihlobo sakho naye ukhulelwe indodana esemdala; lena ngeyesithupha yakhe obethiwa inyumba.

1:37b.LUK.001.037 Ngokuba akukho lutho olungenzeke kuNkulunkulu.”

1:38b.LUK.001.038 UMariya wathi: “Bheka, ngiyincekukazi yeNkosi; akube kimi njengezwi lakho.” Ingelosi yamuka kuye.

1:39b.LUK.001.039 Ngalezo zinsuku uMariya wasuka waya ngokushesha kwelezintaba emzini wakwaJuda.

1:40b.LUK.001.040 Wangena endlini kaZakariya, wambingelela u-Elisabethe.

1:41b.LUK.001.041 Kwathi ukuba u-Elisabethe ezwe ukubingelela kukaMariya, umntwana waxhuma esiswini sakhe; u-Elisabethe wagcwala uMoya oNgcwele,

1:42b.LUK.001.042 wamemeza ngezwi elikhulu, wathi: “Ubusisiwe wena esifazaneni! Sibusisiwe nesithelo sesisu sakho!

1:43b.LUK.001.043 Ngehlelwe kanjani yilokhu ukuba unina weNkosi yami ahambele kimi na?

1:44b.LUK.001.044 Ngokuba bheka, kuthe izwi lokubingelela kwakho lifika ezindlebeni zami, umntwana waxhuma esiswini sami ngokujabula.

1:45b.LUK.001.045 Ubusisiwe owakholwayo, ngokuba kuzakuba khona ukufezeka kwalokho akutshelwa, kuvela eNkosini.”

1:46b.LUK.001.046 Wayesethi uMariya: “Umphefumulo wami uyayitusa Nkosi,

1:47b.LUK.001.047 nomoya wami uyathokoza kuNkulunkulu, uMsindisi wami,

1:48b.LUK.001.048 ngokuba ubhekile ubuphansi bencekukazi yakhe. Bheka, kusukela manje izizukulwane zonke ziyakuthi ngibusisiwe.

1:49b.LUK.001.049 Ngokuba uSomandla ungenzele izinto ezinkulu: igama lakhe lingcwele.

1:50b.LUK.001.050 Isihawu sakhe sikuzo izizukulwane ngezizukulwane kubo abamesabayo.

1:51b.LUK.001.051 Wenzile amandla ngengalo yakhe; uchithile abazidlayo ekuzidleni kwenhliziyo yabo.

1:52b.LUK.001.052 Uwisile amakhosi ezihlalweni, uphakamisile abantukazana.

1:53b.LUK.001.053 Abalambileyo ubasuthisile ngezinto ezinhle, abacebileyo ubamukise ze.

1:54b.LUK.001.054 Uyisizile inceku yakhe u-Israyeli, ukuze akhumbule isihawu,

1:55b.LUK.001.055 njengalokho akusho kokhokho bethu ku-Abrahama nenzalo yakhe kuze kube phakade.”

1:56b.LUK.001.056 UMariya wahlala naye kungathi izinyanga ezintathu, wabuyela ekhaya.

1:57b.LUK.001.057 Saphelela-ke isikhathi sika-Elisabethe sokuba abelethe; wazala indodana.

1:58b.LUK.001.058 Abakhelene naye nezihlobo zakhe bezwa ukuthi iNkosi yenze isihawu sayo saba sikhulu kuye, bathokoza naye.

1:59b.LUK.001.059 Kwathi ngosuku lwesishiyagalombili beza ukusoka umntwana, bamqamba ngegama likayise uZakariya.

1:60b.LUK.001.060 Unina wayesephendula ethi: “Qhabo, uzakuthiwa uJohane.”

1:61b.LUK.001.061 Bathi kuye: “Akakho noyedwa emndenini wakini obizwa ngalelo gama.”

1:62b.LUK.001.062 Bamqhweba uyise ukuthi ufuna ukumqamba ngaliphi.

1:63b.LUK.001.063 Wabiza isileti, waloba ukuthi. “NguJohane igama lakhe.” Bamangala bonke.

1:64b.LUK.001.064 Kwase kuvuleka umlomo wakhe khona lapho nolimi lwakhe, wakhuluma embonga uNkulunkulu.

1:65b.LUK.001.065 Bonke abakhelene nabo behlelwa ngukwesaba, bakhuluma ngazo zonke lezo zindaba kulo lonke lezintaba laseJudiya,

1:66b.LUK.001.066 nabo bonke abazizwayo bazigcina ezinhliziyweni zabo, bethi: “Kodwa lo mntwana uyakuba yini na?” Isandla seNkosi sasinaye.

1:67b.LUK.001.067 UZakariya uyise wagcwala uMoya oNgcwele, waprofetha wathi:

1:68b.LUK.001.068 “Mayibongwe iNkosi, uNkulunkulu ka-Israyeli, ngokuba ibahambele abantu bayo, yabenzela inkululeko.

1:69b.LUK.001.069 Yasivusela uphondo lwensindiso endlini kaDavide inceku yayo,

1:70b.LUK.001.070 njengalokho yakhuluma ngomlomo wabaprofethi bayo abangcwele basendulo,

1:71b.LUK.001.071 insindiso ezitheni zethu nasesandleni sabo bonke abasizondayo,

1:72b.LUK.001.072 ukwenzela okhokho bethu isihawu nokukhumbula isivumelwano sayo esingcwele,

1:73b.LUK.001.073 isifungo eyasifunga kubaba u-Abrahama,

1:74b.LUK.001.074 ukusinika ukuba sithi sikhululiwe esandleni sezitha zethu, siyikhonze singenakwesaba

1:75b.LUK.001.075 ngobungcwele nangokulunga phambi kwayo zonke izinsuku zethu.

1:76b.LUK.001.076 Nawe-ke mntwana, uyakuthiwa umprofethi woPhezukonke, ngokuba uyakuhamba phambi kweNkosi ukulungisa izindlela zayo

1:77b.LUK.001.077 ukunika abantu bayo ukuyazi insindiso ngokuthethelelwa kwezono zabo,

1:78b.LUK.001.078 ngemisesane yesihawu sikaNkulunkulu wethu esizakuhanjelwa ngayo ngukusa kwaphezulu,

1:79b.LUK.001.079 ukubakhanyisela abahlezi ebumnyameni nasethunzini lokufa nokuqondisa izinyawo zethu endleleni yokuthula.”

1:80b.LUK.001.080 Wakhula-ke umntwana, waba namandla emoyeni; wahlala ehlane kwaze kwaba lusuku lokubonakaliswa kwakhe ku-Israyeli.

2

2:1b.LUK.002.001 Kwathi ngalezo zinsuku kwaphuma isimemezelo kuKesari Awugustu sokuba kubalwe izwe lonke.

2:2b.LUK.002.002 Lokhu kubalwa kokuqala kwenziwa uKhureniyu engumbusi waseSiriya.

2:3b.LUK.002.003 Bonke baya kubalwa, yilowo nalowo emzini wakubo.

2:4b.LUK.002.004 Naye uJosefa wakhuphuka ephuma eGalile emzini waseNazaretha, waya eJudiya emzini kaDavide othiwa iBetlehema, ngokuba wayengowendlu nozalo lukaDavide,

2:5b.LUK.002.005 ukuyobalwa kanye noMariya owayemmiselwe ukuba abe ngumkakhe, ekhulelwe.

2:6b.LUK.002.006 Kwathi-ke beselapho, zaphelela izinsuku zokuba abelethe.

2:7b.LUK.002.007 Wazibula ngendodana, wayembesa, wayilalisa emkhombeni, ngokuba bantula indawo endlini yezihambi.

2:8b.LUK.002.008 Kwakukhona abelusi kulelo zwe ababehlezi endle, belinda umhlambi wabo ebusuku.

2:9b.LUK.002.009 Ingelosi yeNkosi yema phambi kwabo, inkazimulo yeNkosi yabakhanyisa nxazonke; besaba ngokwesaba okukhulu.

2:10b.LUK.002.010 Ingelosi yathi kubo: “Ningesabi; ngokuba bhekani, nginibikela izindaba ezinhle zokuthokoza okukhulu okuzakuba kubantu bonke,

2:11b.LUK.002.011 ukuthi nizalelwe namuhla uMsindisi onguKristu iNkosi emzini kaDavide.

2:12b.LUK.002.012 Nalokhu kuyisiboniso kini: niyakufumana umntwana embesiwe, elele emkhombeni.”

2:13b.LUK.002.013 Masinyane kwaba khona kanye nengelosi uquqaba lwebandla lasezulwini, lumdumisa uNkulunkulu, luthi:

2:14b.LUK.002.014 “Udumo kuNkulunkulu kweliphezulu, nokuthula emhlabeni kubantu abathokozelwa nguye.”

2:15b.LUK.002.015 Kwathi ukuba zimuke kubo izingelosi ziya ezulwini, abelusi bakhuluma bodwa, bathi: “Asihambe manje, size sifike eBetlehema, sibone leyo nto eyenzekileyo iNkosi esazisile yona.”

2:16b.LUK.002.016 Bephuthuma bafika, bafumanisa oMariya noJosefa, nomntwana olele emkhombeni.

2:17b.LUK.002.017 Sebebonile balanda ngalelo zwi ababetshelwe lona ngalowo mntwana.

2:18b.LUK.002.018 Bonke abezwayo bamangala ngokukhulunywe kubo ngabelusi.

2:19b.LUK.002.019 Kepha uMariya wagcina onke lawo mazwi ezindla ngawo enhliziyweni yakhe.

2:20b.LUK.002.020 Babuya-ke abelusi bemdumisa, bembonga uNkulunkulu ngakho konke abakuzwileyo nabakubonileyo, njengalokho kwakukhulunyiwe kubo.

2:21b.LUK.002.021 Kwathi seziphelile izinsuku eziyisishiyagalombili zokuba umntwana asokwe, igama lakhe lathiwa uJesu, elaliqanjiwe yingelosi, engakathatshathwa esiswini.

2:22b.LUK.002.022 Kwathi ukuba kuphelele izinsuku zokuhlanjululwa kwabo ngokomthetho kaMose, benyukela naye eJerusalema ukuba bammise phambi kweNkosi

2:23b.LUK.002.023 njengokulotshiwe emthethweni weNkosi ukuthi: “Konke okwesilisa okuyizibulo kuyakuthiwa okwahlukaniselwe iNkosi”,

2:24b.LUK.002.024 banikele ngomhlatshelo njengokushiwo emthethweni weNkosi: “Amahobhe amabili noma amaphuphu amabili amajuba.”

2:25b.LUK.002.025 Bheka, kwakukhona umuntu eJerusalema ogama lakhe linguSimeyoni; lo muntu wayelungile, emesaba uNkulunkulu, ebhekile induduzo ka-Israyeli; noMoya oNgcwele wayephezu kwakhe.

2:26b.LUK.002.026 Kwakubonakalisiwe kuye ngoMoya oNgcwele ukuthi akayikubona ukufa engakamboni uKristu weNkosi.

2:27b.LUK.002.027 Wafika ngoMoya ethempelini. Kwathi ukuba abazali balethe umntwana uJesu ethempelini ukuba benze kuye njengesiko lomthetho,

2:28b.LUK.002.028 wamamukela ngokumgona, wambonga uNkulunkulu, wathi:

2:29b.LUK.002.029 “Sale usumukisa ngokuthula inceku yakho, Somandla, njengezwi lakho,

2:30b.LUK.002.030 ngokuba amehlo ami abonile insindiso yakho

2:31b.LUK.002.031 oyilungisele ebusweni babantu bonke,

2:32b.LUK.002.032 ukukhanya kokwambulela abezizwe nenkazimulo yesizwe sakho u-Israyeli.”

2:33b.LUK.002.033 Uyise nonina bamangala ngalokho okukhulunywa ngaye.

2:34b.LUK.002.034 USimeyoni wababusisa, wathi kuMariya unina: “Bheka, lo umiselwe ukuwa nokuvuka kwabaningi ku-Israyeli, nesibonakaliso esiphikwayo —

2:35b.LUK.002.035 yebo, inkemba iyakudabula nowakho umphefumulo — ukuba kwambulwe izizindlo zezinhliziyo eziningi.”

2:36b.LUK.002.036 Kwakukhona nomprofethikazi, u-Ana, indodakazi kaFanuweli, owesizwe sika-Aseri; wayesekhulile kakhulu, ebehlalile nendoda iminyaka eyisikhombisa emva kobuntombi bakhe,

2:37b.LUK.002.037 engumfelokazi waze waba neminyaka engamashumi ayisishiyagalombili nane, engasuki ethempelini, ekhonza ngokuzila nangokukhuleka ubusuku nemini.

2:38b.LUK.002.038 Naye-ke efika ngasona leso sikhathi wamtusa uNkulunkulu, wakhuluma ngaye kubo bonke ababebheke ukukhululwa kweJerusalema.

2:39b.LUK.002.039 Kwathi sebefeze konke okungokomthetho weNkosi babuyela eGalile emzini wakubo iNazaretha.

2:40b.LUK.002.040 Wakhula umntwana, waba namandla, wagcwala ukuhlakanipha; nomusa kaNkulunkulu wawuphezu kwakhe.

2:41b.LUK.002.041 Abazali bakhe baya eJerusalema iminyaka yonke ngomkhosi wePhasika.

2:42b.LUK.002.042 Eseneminyaka eyishumi nambili, bakhuphuka njengokomthetho womkhosi.

2:43b.LUK.002.043 Sebeziqedile izinsuku, ekubuyeni kwabo, umntwana uJesu wasala eJerusalema, abazali bakhe bengazi.

2:44b.LUK.002.044 Bethi-ke bona uphakathi kwabahambisana nabo bahamba ibanga losuku, bamfuna phakathi kwezihlobo nabazana nabo.

2:45b.LUK.002.045 Bengamtholi babuyela eJerusalema, bemfuna.

2:46b.LUK.002.046 Kwathi emva kwezinsuku ezintathu bamfumana ethempelini ehlezi phakathi kwabafundisi, ebezwa, ebabuza.

2:47b.LUK.002.047 Bonke ababemuzwa bamangala ngokuqonda nangokuphendula kwakhe.

2:48b.LUK.002.048 Bathi bembona, bamangala; unina wathi kuye: “Mntanami, usenzeleni okunje na? Bheka, uyihlo nami besikufuna silusizi.”

2:49b.LUK.002.049 Wathi kubo: “Kukanjani, beningifunelani na? Beningazi yini ukuthi kumelwe ukuba ngibe kokukaBaba na?”

2:50b.LUK.002.050 Abaliqondanga lelo zwi abelikhuluma kubo.

2:51b.LUK.002.051 Wehla nabo, wafika eNazaretha, wabathobela. Kepha unina wawagcina onke lawa mazwi enhliziyweni yakhe.

2:52b.LUK.002.052 UJesu waqhubeka ekuhlakanipheni, nasekukhuleni, nasemseni kuNkulunkulu nakubantu.

3

3:1b.LUK.003.001 Kwathi ngomnyaka weshumi nanhlanu wokubusa kukaTiberiyu Kesari, uPontiyu Pilatu engumbusi waseJudiya, uHerode engumtetrarki waseGalile, uFiliphu umfowabo engumtetrarki wezwe lase-Itureya nelaseTrakhoniti, uLisaniya engumtetrarki wase-Abilene,

3:2b.LUK.003.002 u-Anase engumpristi omkhulu noKayafase, kwafika izwi likaNkulunkulu kuJohane indodana kaZakariya ehlane.

3:3b.LUK.003.003 Weza ezweni lonke laseJordani eshumayela umbhapathizo wokuphenduka, kube ngukuthethelelwa kwezono,

3:4b.LUK.003.004 njengokuba kulotshiwe encwadini yamazwi ka-Isaya umprofethi ukuthi: “Izwi lomemezayo ehlane, lithi: ‘Lungisani indlela yeNkosi, nenze imikhondo yayo iqonde.

3:5b.LUK.003.005 Izigodi zonke ziyakugqitshwa, zonke izintaba namagquma kuyakwehliswa; kuqonde izinsongansonga, nemigoxigoxi ibe yizindlela ezilelezekile;

3:6b.LUK.003.006 inyama yonke izakubona insindiso kaNkulunkulu.’ ”

3:7b.LUK.003.007 Ngakho-ke wathi ezixukwini ezaziphumela ukubhapathizwa nguye: “Nzalo yezinyoka, ubani onibonise ukubalekela intukuthelo ezayo na?

3:8b.LUK.003.008 Ngakho vezani izithelo ezifanele ukuphenduka, ningaqali ukuthi phakathi kini: ‘Sinobaba u-Abrahama;’ ngokuba ngithi kini: UNkulunkulu unamandla okumvusela u-Abrahama abantwana kulawa matshe.

3:9b.LUK.003.009 Namanje izembe selibekiwe empandeni yemithi; ngakho yonke imithi engatheli isithelo esihle iyanqunywa, iphonswe emlilweni.”

3:10b.LUK.003.010 Izixuku zambuza zathi: “Pho, sizakwenzani na?”

3:11b.LUK.003.011 Waphendula, wathi kubo: “Onezingubo ezimbili akamuphe ongenayo; naye onokudla enze njalo.”

3:12b.LUK.003.012 Kwafika nabathelisi ukuba babhapathizwe, bathi kuye: “Mfundisi, sizakwenzani na?”

3:13b.LUK.003.013 Wathi kubo: “Ningabizi lutho ngaphezu kwenikumiselweyo.”

3:14b.LUK.003.014 Namabutho ambuza athi: “Thina-ke, sizakwenzani na?” Wathi kuwo: “Ningamuki muntu lutho ngendluzula, ningamxabheleli; yaneliswani yizinkokhelo zenu.”

3:15b.LUK.003.015 Abantu besabhekile, bezindla bonke ezinhliziyweni zabo ngoJohane ukuthi ingabe unguKristu yini,

3:16b.LUK.003.016 uJohane waphendula, wathi kubo bonke: “Mina kambe nginibhapathiza ngamanzi, kepha uyeza onamandla kunami engingafanele ukuthukulula umchilo wezicathulo zakhe; yena uzakunibhapathiza ngoMoya oNgcwele nangomlilo;

3:17b.LUK.003.017 oqoma lakhe lokwela lisesandleni sakhe ukushanelisisa isibuya sakhe nokubuthela ukolweni enqolobaneni yakhe; kepha amakhoba uzakuwashisa ngomlilo ongacimekiyo.”

3:18b.LUK.003.018 Nangokunye okuningi washumayela ivangeli kubantu, ebayala.

3:19b.LUK.003.019 Kepha uHerode umtetrarki, esolwa nguye ngenxa kaHerodiya umkamfowabo nangenxa yakho konke okubi abekwenzile uHerode,

3:20b.LUK.003.020 wenezela nalokhu kokunye konke, wamvalela uJohane etilongweni.

3:21b.LUK.003.021 Kwathi bebhapathiziwe abantu bonke, naye uJesu esebhapathiziwe, ekhuleka, izulu lavuleka,

3:22b.LUK.003.022 uMoya oNgcwele enesimo somzimba njengejuba wehlela phezu kwakhe; kwavela izwi ezulwini, lithi: “Wena uyiNdodana yami ethandekayo; ngithokozile ngawe.”

3:23b.LUK.003.023 Yena uJesu, ukuqala kwakhe, wayeneminyaka engaba ngamashumi amathathu, eyindodana, njengokushiwoyo, kaJosefa ka-Eli

3:24b.LUK.003.024 kaMathati kaLevi kaMeliki kaJanayi kaJosefa

3:25b.LUK.003.025 kaMatathiya ka-Amose kaNahume ka-Eseli kaNagayi

3:26b.LUK.003.026 kaMati, kaMatathiya kaSemeyini kaJosefa kaJuda

3:27b.LUK.003.027 kaJohanani kaResa kaZorobabeli kaSalatiyeli kaNeri

3:28b.LUK.003.028 kaMeliki ka-Adi kaKosamu ka-Elimadamu ka-Eri

3:29b.LUK.003.029 kaJose ka-Eliyezeri kaJorimi kaMathati kaLevi

3:30b.LUK.003.030 kaSimeyoni kaJuda kaJosefa kaJonamu ka-Eliyakimi

3:31b.LUK.003.031 kaMeleya kaMena kaMathata kaNathamu kaDavide

3:32b.LUK.003.032 kaJesayi ka-Obede kaBowasi kaSala kaNasoni

3:33b.LUK.003.033 ka-Aminadaba ka-Adameyini ka-Arani ka-Esiromu kaFaresi kaJuda

3:34b.LUK.003.034 kaJakobe ka-Isaka ka-Abrabama kaThara kaNahori

3:35b.LUK.003.035 kaSeruki kaRagawu kaFaleki ka-Ebere kaSala

3:36b.LUK.003.036 kaKayinamu ka-Arfakisadi kaSemi kaNowa kaLameka

3:37b.LUK.003.037 kaMathusala ka-Enoke kaJarethi kaMaleleyeli kaKayinani

3:38b.LUK.003.038 ka-Enose kaSeti ka-Adamu kaNkulunkulu.

4

4:1b.LUK.004.001 UJesu egcwele uMoya oNgcwele wabuya eJordani, waholekela ngoMoya ehlane,

4:2b.LUK.004.002 elingwa nguSathane izinsuku ezingamashumi amane. Akadlanga lutho kulezo zinsuku; seziphelile, walamba.

4:3b.LUK.004.003 Wayesethi kuye uSathane: “Uma uyiNdodana kaNkulunkulu, yisho kuleli tshe ukuba libe yisinkwa.”

4:4b.LUK.004.004 UJesu wamphendula wathi: “Kulotshiwe ukuthi: ‘Akusinkwa sodwa umuntu azakuphila ngaso.’ ”

4:5b.LUK.004.005 Esemenyusela entabeni ende wambonisa imibuso yonke yezwe ngomzuzwanyana.

4:6b.LUK.004.006 USathane wathi kuye: “Amandla onke lana ngokunika wena kanye nenkazimulo yawo, ngokuba inikwe mina, futhi ngiyinika noma ubani ngokuthanda kwami.

4:7b.LUK.004.007 Ngakho-ke wena, uma ukhuleka phambi kwami, konke kuzakuba ngokwakho.”

4:8b.LUK.004.008 UJesu waphendula, wathi kuye: “Kulotshiwe ukuthi: ‘Wokhuleka eNkosini uNkulunkulu wakho, umkhonze yena yedwa.’ ”

4:9b.LUK.004.009 Wayesemholela eJerusalema, wammisa esiqongweni sethempeli, wathi kuye: “Uma uyiNdodana kaNkulunkulu, ziphonse phansi lapha,

4:10b.LUK.004.010 ngokuba kulotshiwe ukuthi:

4:11b.LUK.004.011 “ ‘Uyakuyaleza izingelosi zakhe ngawe, zikulinde,’ “nokuthi: “ ‘Ziyakukuthwala ngezandla, ungaze waqhuzuka etsheni ngonyawo lwakho.’ ”

4:12b.LUK.004.012 UJesu waphendula, wathi kuye: “Kwathiwa: ‘Ungayilingi iNkosi uNkulunkulu wakho.’ ”

4:13b.LUK.004.013 USathane eseqede ukulinga konke wamuka kuye isikhathi.

4:14b.LUK.004.014 UJesu wabuyela eGalile ngamandla kaMoya; udumo lwakhe lwanda kulo lonke izwe langakhona.

4:15b.LUK.004.015 Wafundisa emasinagogeni abo edunyiswa yibo bonke.

4:16b.LUK.004.016 Wafika eNazaretha, lapho wayondliwa khona, wangena esinagogeni ngosuku lwesabatha njengokwenza kwakhe, wasukumela ukufunda.

4:17b.LUK.004.017 Wanikwa incwadi ka-Isaya umprofethi, wayivula incwadi, wafumana indawo okulotshwe kuyo ukuthi:

4:18b.LUK.004.018 “UMoya weNkosi uphezu kwami, ngokuba ingigcobile ukuba ngishumayele ivangeli kwabampofu, ingithumele ukumemezela ukukhululwa kwabathunjiweyo, nokubona kwabayizimpumputhe, nokuhlenga abacindezelweyo,

4:19b.LUK.004.019 nokumemezela umnyaka omuhle weNkosi.”

4:20b.LUK.004.020 Wayigoqonga incwadi, wayinika isikhonzi, wahlala; amehlo abo bonke ababesesinagogeni amgqolozela.

4:21b.LUK.004.021 Waqala ukukhuluma kubo, ethi: “Namhlanje ugcwalisekile lo mbhalo ezindlebeni zenu.”

4:22b.LUK.004.022 Bonke bamfakazela bemangala ngamazwi omusa aphuma emlonyeni wakhe, bathi: “Lo akasiyo indodana kaJosefa na?”

4:23b.LUK.004.023 Wathi kubo: “Nempela niyakusho kimi lesi saga sokuthi: ‘Nyanga, zelaphe wena.’ Lokho esikuzwile kwenziwa eKapernawume, kwenze nalapha ezweni lakini.”

4:24b.LUK.004.024 Wathi-ke: “Ngiqinisile ngithi kini: Akukho mprofethi owamukelwa ezweni lakubo.

4:25b.LUK.004.025 Kepha ngempela ngithi kini: Kwakukhona kwa-Israyeli abafelokazi abaningi emihleni ka-Eliya, lapho izulu lalivalekile iminyaka emithathu nezinyanga eziyisithupha, kwaba khona indlala enkulu ezweni lonke;

4:26b.LUK.004.026 kepha u-Eliya kathunyelwanga nakoyedwa kubona, kuphela eSarepita laseSidoni kowesifazane ongumfelokazi.

4:27b.LUK.004.027 Kwakukhona futhi kwa-Israyeli abanochoko abaningi ngesikhathi sika-Elisha umprofethi; kepha akuhlanjululwanga namunye kubo, kuphela uNayimani umSiriya.”

4:28b.LUK.004.028 Bonke ababesesinagogeni bagcwala ulaka bekuzwa lokho.

4:29b.LUK.004.029 Basukuma, bamxosha emzini, bamqhubela ekwengameni kwentaba umuzi wabo owakhiwe phezu kwayo, ukuze bamkhalakathelisele phansi.

4:30b.LUK.004.030 Kepha yena edabula phakathi kwabo wamuka.

4:31b.LUK.004.031 Wehlela eKapernawume umuzi waseGalile. Wayebafundisa ngosuku lwesabatha.

4:32b.LUK.004.032 Bamangala ngokufundisa kwakhe, ngokuba izwi lakhe lalinamandla.

4:33b.LUK.004.033 Kwakukhona esinagogeni umuntu onomoya wedemoni elingcolileyo, wamemeza ngezwi elikhulu, wathi:

4:34b.LUK.004.034 “Hhiya! Sinamsebenzi muni nawe Jesu waseNazaretha? Uze ukusibhubhisa na? Ngiyakwazi ukuba ungubani: ungoNgcwele kaNkulunkulu.”

4:35b.LUK.004.035 UJesu wamkhuza wathi: “Thula, uphume kuye!” Idemoni lamphonsa phansi phakathi kwabo, laphuma kuye lingamlimazanga.

4:36b.LUK.004.036 Behlelwa ngukwesaba bonke, bakhuluma bodwa, bathi: “Yizwi lini leli lokuba ayale omoya abangcolileyo ngegunya nangamandla, baphume?”

4:37b.LUK.004.037 Kwanda udumo ngaye kuzo zonke izindawo zangakhona.

4:38b.LUK.004.038 Wasuka esinagogeni, wangena endlini kaSimoni. Kepha umkhwekazi kaSimoni wayebanjwe ngumkhuhlane omkhulu; bamnxusa ngaye.

4:39b.LUK.004.039 Wamengama, wakhuza umkhuhlane; wona wamyeka; wasuka masinyane, wabakhonza.

4:40b.LUK.004.040 Ukushona kwelanga bonke ababe nabagulayo izifo ngezifo babaletha kuye; ebeka izandla phezu kwabo ngabanye wabaphulukisa.

4:41b.LUK.004.041 Kwaphuma namademoni kwabaningi ememeza ethi: “Wena uyiNdodana kaNkulunkulu.” Kepha wawakhuza, kawavumelanga ukuba akhulume, ngokuba ayemazi ukuthi unguKristu.

4:42b.LUK.004.042 Sekusile, waphuma waya endaweni eyihlane; izixuku zamfuna, zaze zafika kuye impela, zambamba ukuba angamuki kuzo.

4:43b.LUK.004.043 Kepha wathi kuzo: “Nakweminye imizi ngimelwe ukushumayela ivangeli lombuso kaNkulunkulu, ngokuba ngithunyelwe lokho.”

4:44b.LUK.004.044 Washumayela emasinagogeni aseGalile.

5

5:1b.LUK.005.001 Kwathi isixuku simbunganyela ukuba sizwe izwi likaNkulunkulu, wayemi ngaselwandle lwaseGenesaretha,

5:2b.LUK.005.002 wabona imikhumbi emibili imi ngaselwandle; abadobi babephumile kuyo behlanza amanetha.

5:3b.LUK.005.003 Esengene komunye wemikhumbi ongokaSimoni wamcela ukuba asuke kancane emhlabathini. Wahlala phansi, wabafundisa abantu esemkhunjini.

5:4b.LUK.005.004 Kuthe esegcinile ukukhuluma, wathi kuSimoni: “Qhubekela ekujuleni, nehlise amanetha enu, nibambe.”

5:5b.LUK.005.005 USimoni waphendula wathi: “Nkosi, sishikile ubusuku bonke, asibambanga lutho; kepha ngezwi lakho ngiyakuwehlisa amanetha.”

5:6b.LUK.005.006 Sebekwenzile lokho babamba izinhlanzi eziningi kakhulu, aze agqabuka amanetha abo.

5:7b.LUK.005.007 Babaqhweba omana babo abakomunye umkhumbi ukuba beze, bababambise. Beza-ke, bayigcwalisa imikhumbi yomibili, yaze yathi ayizike.

5:8b.LUK.005.008 Kuthe uSimoni Petru ekubona lokho, waziphonsa phansi ngasemadolweni kaJesu, wathi: “Suka kimi, Nkosi, ngokuba ngingumuntu oyisoni.”

5:9b.LUK.005.009 Ngokuba ubehlelwa ngukwesaba, yena kanye nabo bonke ababe naye, ngobuningi bezinhlanzi ababezibambile,

5:10b.LUK.005.010 kanjalo-ke noJakobe noJohane amadodana kaZebedewu ababesebenzisana noSimoni. UJesu wathi kuSimoni: “Ungesabi; kusukela manje uzakubamba abantu.”

5:11b.LUK.005.011 Sebeyilethile imikhumbi emhlabathini bashiya konke, bamlandela.

5:12b.LUK.005.012 Kwathi ekomunye wemizi, bheka, nanso indoda egcwele uchoko. Kuthe embona uJesu, wawa ngobuso, wamnxusa wathi: “Nkosi, uma uthanda, ungangihlambulula.”

5:13b.LUK.005.013 Welula isandla sakhe, wamphatha, wathi: “Ngiyathanda; hlambuluka.” Masinyane uchoko lwasuka kuye.

5:14b.LUK.005.014 Wamyala ukuba angatsheli muntu, wathi: “Kepha suka, uzibonakalise kumpristi, unikele ngokuhlanjululwa kwakho, njengalokho uMose akuyalayo, kube ngubufakazi kubo.”

5:15b.LUK.005.015 Kwayilapho ukukhuluma ngaye kwanda kakhulu. Zabuthana izixuku eziningi ukuzwa nokuphulukiswa ezifweni zazo.

5:16b.LUK.005.016 Kepha yena wamonyukela ehlane, wakhuleka.

5:17b.LUK.005.017 Kwathi ngolunye lwalezo zinsuku yena esafundisa, kwakuhlezi khona abaFarisi nabafundisi bomthetho ababephuma emizini yonke yaseGalile neJudiya neJerusalema. Namandla eNkosi ayekuye ukuba aphulukise.

5:18b.LUK.005.018 Bheka-ke, nanko amadoda ethwele ohlakeni umuntu ofe uhlangothi, efuna ukumngenisa nokumbeka phambi kwakhe.

5:19b.LUK.005.019 Engafumani ukuthi angamngenisa kanjani ngenxa yesixuku akhwela phezu kwendlu, amehlisa ophahleni kanye nohlaka ngaphakathi phambi kukaJesu.

5:20b.LUK.005.020 Ebona ukukholwa kwawo wathi: “Mngane, uthethelelwe izono zakho.”

5:21b.LUK.005.021 Ababhali nabaFarisi baqala ukuzindla ngokuthi: “Ngubani lo okhuluma ngokuhlambalaza? Ngubani ongathethelela izono ngaphandle kukaNkulunkulu yedwa na?”

5:22b.LUK.005.022 Kepha uJesu ezazi izizindlo zabo waphendula, wathi kubo: “Nizindlani ezinhliziyweni zenu na?

5:23b.LUK.005.023 Yikuphi okulula ukuthi: ‘Uthethelelwe izono zakho,’ noma ukuthi: ‘Vuka uhambe,’ na?

5:24b.LUK.005.024 Kepha ukuze nazi ukuthi iNdodana yomuntu inamandla emhlabeni okuthethelela izono,” wayesethi kofe uhlangothi: “Kuwena ngithi: Vuka uthabathe uhlaka lwakho, uye endlini yakho.”

5:25b.LUK.005.025 Wasukuma khona lapho phambi kwabo, wathabatha lokho abelele kukho, wamuka waya endlini yakhe emdumisa uNkulunkulu.

5:26b.LUK.005.026 Ukumangala kwabehlela bonke, bamdumisa uNkulunkulu, bagcwala ukwesaba, bathi: “Sibonile izimanga namuhla.”

5:27b.LUK.005.027 Emva kwalokho waphuma, wabona umthelisi, igama lakhe nguLevi, ehlezi endaweni yokuthela, wathi kuye: “Ngilandele.”

5:28b.LUK.005.028 Washiya konke, wasukuma, wamlandela.

5:29b.LUK.005.029 ULevi wamenzela isidlo esikhulu endlini yakhe; kwakukhona isixuku esikhulu sabathelisi nabanye ababehlezi nabo ekudleni.

5:30b.LUK.005.030 AbaFarisi nababhali bakhonona kubafundi bakhe, bathi: “Yini ukuba nidle niphuze nabathelisi nezoni na?”

5:31b.LUK.005.031 Waphendula uJesu, wathi kubo: “Abaphilileyo abadingi inyanga, ngabagulayo bodwa.

5:32b.LUK.005.032 Kangizelanga ukubiza abalungileyo kodwa izoni ukuba ziphenduke.”

5:33b.LUK.005.033 Base bethi kuye: “Abafundi bakaJohane bazila kaningi, benze imikhuleko, kanjalo nababaFarisi, kepha abakho bayadla, baphuze.”

5:34b.LUK.005.034 Kepha uJesu, wathi kubo: “Ningabazilisa yini abayeni, umyeni esenabo na?

5:35b.LUK.005.035 Kodwa kuzakufika izinsuku, lapho umyeni ezakususwa kubo; yikhona bezakuzila ngalezo zinsuku.”

5:36b.LUK.005.036 Wabatshela nomfanekiso wokuthi: “Akakho odabula isiziba engutsheni entsha, asibekele engutsheni endala; uma enza lokho, uyayona entsha, futhi isiziba sentsha asizukuzwana nendala.

5:37b.LUK.005.037 Futhi akakho othela iwayini elisha ezimvabeni ezindala funa iwayini elisha liqhumise izimvaba, lichitheke lona, nezimvaba zonakale.

5:38b.LUK.005.038 Kodwa iwayini elisha limelwe ukuthelwa ezimvabeni ezintsha.

5:39b.LUK.005.039 Akakho othi ephuze iwayini elidala, afune elisha, ngokuba uthi elidala limnandi.”

6

6:1b.LUK.006.001 Kwathi ngesabatha wadabula amasimu; abafundi bakhe bakha izikhwebu, badla bezihlikihla ngezandla.

6:2b.LUK.006.002 Kepha abathile babaFarisi bathi: “Nenzelani lokho okungavunyelwe ngesabatha na?”

6:3b.LUK.006.003 UJesu ebaphendula wathi: “Anifundanga yini ngalokho akwenza uDavide mhla elambile yena nababe naye

6:4b.LUK.006.004 ukuthi wangena endlini kaNkulunkulu, wathatha izinkwa zokubukwa ezingavunyelwe ukudliwa muntu, ngabapristi bodwa, wadla, wanika nababe naye, na?”

6:5b.LUK.006.005 Wathi kubo: “INdodana yomuntu iyiNkosi neyesabatha.”

6:6b.LUK.006.006 Kwathi-ke ngelinye isabatha wangena esinagogeni, wafundisa. Kwakukhona umuntu lapho osandla sakhe sokunene sasishwabene.

6:7b.LUK.006.007 Ababhali nabaFarisi bamqaphelisisa ukuthi uyaphilisa yini ngesabatha, ukuze bathole ukumbeka icala.

6:8b.LUK.006.008 Kepha wazazi izizindlo zabo wathi kuyo indoda esandla sishwabene: “Sukuma, ume phakathi.” Wasukuma-ke, wema.

6:9b.LUK.006.009 UJesu wathi kubo: “Ngiyanibuza ukuthi kuvunyelwe ngesabatha ukwenza okuhle noma okubi yini, ukusindisa umuntu noma ukumbulala, na?”

6:10b.LUK.006.010 Esebaqalazile bonke wathi kuye: “Yelula isandla sakho.” Wenze njalo-ke saze saphiliswa isandla sakhe.

6:11b.LUK.006.011 Base begcwala ukuhlanya, bakhuluma bodwa ngokuthi bangamenze njani uJesu.

6:12b.LUK.006.012 Kwathi ngalezo zinsuku waphuma waya entabeni ukuyokhuleka; wahlala ubusuku bonke ekhuleka kuNkulunkulu.

6:13b.LUK.006.013 Kwathi sekusile, wababiza abafundi bakhe, wakhetha kubo abayishumi nambili, wabaqamba ngokuthi abaphostoli:

6:14b.LUK.006.014 uSimoni owamqamba ngokuthi uPetru, no-Andreya umfowabo, noJakobe, noJohane, noFiliphu, noBartolomewu,

6:15b.LUK.006.015 noMathewu, noTomase, noJakobe ka-Alfewu, noSimoni othiwa isishisekeli,

6:16b.LUK.006.016 noJuda kaJakobe, noJuda Iskariyothe owaba ngumkhapheli.

6:17b.LUK.006.017 Khona wehla nabo, wema endaweni eyithafa kanye nesixuku esikhulu sabafundi bakhe noquqaba lwabantu abavela kulo lonke laseJudiya, naseJerusalema, nangaselwandle lwaseTire neSidoni,

6:18b.LUK.006.018 ababezile ukumuzwa nokuphulukiswa ezifweni zabo; nababekhathazwa ngawomoya abangcolileyo baphulukiswa.

6:19b.LUK.006.019 Isixuku sonke safuna ukumthinta, ngokuba kwakuphuma kuye amandla abaphilisa bonke.

6:20b.LUK.006.020 Wayesephakamisela amehlo akhe ngakubafundi bakhe, wathi: “Nibusisiwe nina bampofu, ngokuba umbuso kaNkulunkulu ungowenu.

6:21b.LUK.006.021 Nibusisiwe nina balambileyo kalokhu, ngokuba niyakusuthiswa. Nibusisiwe nina bakhalayo kalokhu, ngokuba niyakuhleka.

6:22b.LUK.006.022 Nibusisiwe, nxa abantu benizonda nanxa benicwasa, benithuka, belilahla igama lenu ngokungathi libi ngenxa yeNdodana yomuntu.

6:23b.LUK.006.023 “Thokozani ngalolo suku, nigxume; ngokuba bhekani, umvuzo wenu mkhulu ezulwini; ngokuba oyise babo benze njalo kubaprofethi.

6:24b.LUK.006.024 “Kepha maye kinina bacebileyo, ngokuba niyamukele induduzo yenu!

6:25b.LUK.006.025 Maye kinina basuthiyo kalokhu, ngokuba niyakulamba! Maye kinina bahlekayo kalokhu, ngokuba niyakulila, nikhale!

6:26b.LUK.006.026 Maye kinina, nxa abantu bonke bekhuluma kahle ngani, ngokuba oyise babo benze njalo kubaprofethi bamanga!

6:27b.LUK.006.027 “Kepha ngithi kini enizwayo: Thandani izitha zenu, nenze okuhle kwabanizondayo,

6:28b.LUK.006.028 nibusise abaniqalekisayo, nibakhulekele abanidumazayo.

6:29b.LUK.006.029 Okushaya esihlathini, mnike nesinye; nokwaphuca ingubo, ungamnqabeli nebhantshi.

6:30b.LUK.006.030 Muphe yilowo nalowo ocela kuwe; nokwaphuca okwakho, ungabuyi ukubize kuye.

6:31b.LUK.006.031 Njengalokhu nithanda ukuba abantu benze kini, yenzani njalo kubo.

6:32b.LUK.006.032 “Uma nithanda abanithandayo, ninakubongwa kuni na? Ngokuba nezoni zithanda abazithandayo.

6:33b.LUK.006.033 Ngakho uma nenza okuhle kwabenza okuhle kini, ninakubongwa kuni na? Ngokuba nezoni zenza khona lokho.

6:34b.LUK.006.034 Uma nitsheleka labo enithemba ukwamukela kubo, ninakubongwa kuni na? Nezoni zitsheleka izoni ukuba zamukele okungako.

6:35b.LUK.006.035 Kepha thandani izitha zenu, nenze okuhle, nitsheleke, ningadikibali; nomvuzo wenu uyakuba mkhulu, nibe ngabantwana boPhezukonke, ngokuba umnene yena kwabangabongiyo nababi.

6:36b.LUK.006.036 Yibani nesihawu, njengokuba uYihlo enesihawu.

6:37b.LUK.006.037 “Ningahluleli, khona anisoze nahlulelwa; ningalahli, khona anisoze nalahlwa; thethelelani, khona niyakuthethelelwa.

6:38b.LUK.006.038 Yiphani, khona niyakuphiwa; bayakunipha esifubeni senu isilinganiso esihle, esigxushiweyo, esigqishiweyo, esichichimayo; ngokuba ngesilinganiso enilinganisa ngaso nani niyakulinganiselwa ngaso.”

6:39b.LUK.006.039 Wabatshela nomfanekiso wokuthi: “Impumputhe ingahola impumputhe na? Aziyikukhalakathela emgodini zombili na?

6:40b.LUK.006.040 Umfundi kaphezu komfundisi; kepha yilowo ophelelisiwe uyakuba njengomfundisi wakhe.

6:41b.LUK.006.041 “Ubhekelani ucezwana olusesweni lomfowenu, kanti ugongolo olukwelakho iso awuluboni na?

6:42b.LUK.006.042 Ungasho kanjani kumfowenu ukuthi: ‘Mfowethu, ake ngikhiphe ucezwana olusesweni lakho,’ wena ongaboni ugongolo olukwelakho iso, na? Mzenzisi, khipha kuqala ugongolo olukwelakho iso, yikhona uyakubonisisa ukukhipha ucezwana olusesweni lomfowenu.

6:43b.LUK.006.043 “Ngokuba akukho muthi omuhle othela isithelo esibi; futhi nomuthi omubi awutheli isithelo esihle.

6:44b.LUK.006.044 Ngokuba yilowo nalowo muthi waziwa ngesithelo sawo. Akukhiwa kambe amakhiwane emeveni, nezithelo zomvini azikhiwa ejikijolweni.

6:45b.LUK.006.045 Umuntu omuhle uveza okuhle emfuyweni enhle yenhliziyo, nomubi uveza okubi emfuyweni embi; ngokuba umlomo wakhe ukhuluma ngokuchichima kwenhliziyo.

6:46b.LUK.006.046 “Ningibizelani ngokuthi: ‘Nkosi, Nkosi,’ ningakwenzi engikushoyo, na?

6:47b.LUK.006.047 Yilowo nalowo oza kimi, ezwe amazwi ami, awenze, ngonikhombisa lowo afana naye.

6:48b.LUK.006.048 Ufana nomuntu owayakha indlu, wemba washonisa, wabeka isisekelo edwaleni. Ekufikeni kwesikhukhula umfula washaya leyo ndlu, kepha wawungenamandla okuyinyakazisa, ngokuba yayakhiwe kahle.

6:49b.LUK.006.049 Kodwa ozwayo engenzi unjengomuntu owakha indlu emhlabathini ingenasisekelo; umfula wayishaya, yawa masinyane; kwaba kukhulu ukudilika kwaleyo ndlu.”

7

7:1b.LUK.007.001 Kwathi eseqede onke amazwi akhe ezindlebeni zabantu, wangena eKapernawume.

7:2b.LUK.007.002 Inceku yenduna yekhulu ethile ethandekayo kuyo yayigula, isizakufa.

7:3b.LUK.007.003 Isizwile ngoJesu yathuma amalunga abaJuda kuye, imcela ukuba eze ayisindise inceku yayo.

7:4b.LUK.007.004 Esefikile kuJesu amncenga kakhulu, ethi: “Ifanele ukuba uyenzele lokho,

7:5b.LUK.007.005 ngokuba ithanda isizwe sakithi; yiyo esakhele isinagoge.”

7:6b.LUK.007.006 UJesu wayesehamba nawo. Kepha engasekude nendlu, induna yekhulu yathumela kuye abahlobo, bathi kuye: “Nkosi, ungazihluphi, ngokuba angifanele ukuba ungene phansi kophahla lwami.

7:7b.LUK.007.007 Ngakho angizibonanga ukuthi ngifanele ukuza kuwe; kepha yisho izwi, khona inceku yami iyakusinda.

7:8b.LUK.007.008 Ngokuba nami ngingumuntu ophansi kwamakhosi, nginamabutho phansi kwami; ngithi kwelinye: ‘Hamba,’ lihambe; nakwelinye: ‘Woza,’ lize; nasencekwini yami: ‘Yenza lokhu,’ ikwenze.”

7:9b.LUK.007.009 UJesu ekuzwa lokho wamangala ngayo, waphenduka, wathi esixukwini esimlandelayo: “Ngithi kini: Angizange ngifumane ukukholwa okungaka nakwa-Israyeli.”

7:10b.LUK.007.010 Ababethunyiwe sebebuyele ekhaya bafumana inceku isindile.

7:11b.LUK.007.011 Kwathi ngangomuso waya emzini othiwa iNayini; kwahamba naye abafundi bakhe nesixuku esikhulu.

7:12b.LUK.007.012 Esesondela esangweni lomuzi, bheka, kwaphunyiswa ofileyo, indodana eyodwa kanina, yena engumfelokazi; nabantu abaningi bomuzi babe naye.

7:13b.LUK.007.013 Yathi iNkosi isimbona, yamhawukela, yathi kuye: “Ungakhali.”

7:14b.LUK.007.014 Yasondela, yathinta uhlaka; abaluthweleyo base bema. Yayisithi: “Nsizwa, ngithi kuwe: Vuka!”

7:15b.LUK.007.015 Ofileyo wavuka, waqala ukukhuluma; yamnika unina.

7:16b.LUK.007.016 Bafikelwa ngukwesaba bonke, bamdumisa uNkulunkulu, bathi: “Kuvele umprofethi omkhulu phakathi kwethu,” nokuthi: “UNkulunkulu ubahambele abantu bakhe.”

7:17b.LUK.007.017 Kwaphumela leli zwi ngaye kulo lonke iJudiya nakulo lonke langakhona.

7:18b.LUK.007.018 Abafundi bakaJohane bambikela ngazo zonke lezo zinto.

7:19b.LUK.007.019 UJohane wayesebiza ababili kubafundi bakhe, wabathumela eNkosini, wathi: “Wena unguye ozayo, noma sobheka omunye na?”

7:20b.LUK.007.020 Amadoda esefikile kuyo athi: “UJohane uMbhapathizi usithumele kuwe, ethi: ‘Wena unguye ozayo, noma sobheka omunye na?’ ”

7:21b.LUK.007.021 Ngalowo mzuzu yayiphulukisa abaningi ezifweni nasebuhlungwini nakomoya ababi; nezimpumputhe eziningi yazipha ukubona.

7:22b.LUK.007.022 Yaphendula, yathi kuwo: “Hambani nimlandise uJohane lokho enikubonile nenikuzwile ukuthi: Izimpumputhe ziyabona, izinyonga ziyahamba, abanochoko bayahlanjululwa, izithulu ziyezwa, abafileyo bayavuswa, abampofu bayashunyayezwa ivangeli;

7:23b.LUK.007.023 ubusisiwe ongayikukhubeka ngami.”

7:24b.LUK.007.024 Sezimukile izithunywa zikaJohane, yaqala ukukhuluma ezixukwini ngoJohane, ithi: “Naphuma naya ehlane ukuyobonani na? Umhlanga ontengantengiswa ngumoya na?

7:25b.LUK.007.025 Kanti naphuma ukuyobonani na? Umuntu owembethe izingubo ezinothonotho na? Bhekani, abembethe okukhazimulayo, betamasa, basezindlini zamakhosi.

7:26b.LUK.007.026 Kodwa naphuma ukuyobonani na? Umprofethi na? Yebo, ngithi kini: Odlula umprofethi.

7:27b.LUK.007.027 Nguye okulotshwe ngaye ukuthi: “ ‘Bheka, ngiyathuma isithunywa sami phambi kobuso bakho esiyakulungisa indlela yakho phambi kwakho.’

7:28b.LUK.007.028 “Ngithi kini: Kwabazelwe ngabesifazane akakho omkhulu kunoJohane; kepha omncane embusweni kaNkulunkulu mkhulu kunaye.”

7:29b.LUK.007.029 Abantu bonke, yebo, nabathelisi sebezwile bamvuma uNkulunkulu, babhapathizwa ngombhapathizo kaJohane.

7:30b.LUK.007.030 Kepha abaFarisi nezazimthetho balenza ize icebo likaNkulunkulu maqondana nabo bengabhapathizwanga nguye.

7:31b.LUK.007.031 “Pho-ke, abantu balesi sizukulwane ngiyakubafanisa nani na? Bafana nani na?

7:32b.LUK.007.032 Bafana nabantwana abahlezi esigcawini bememezana bethi: “ ‘Sinibethele imitshingo, anisinanga; salilisela, anikhalanga.’

7:33b.LUK.007.033 “Ngokuba uJohane uMbhapathizi ufikile engadli sinkwa, engaphuzi wayini; nithi-ke: ‘Unedemoni.’

7:34b.LUK.007.034 Ifikile iNdodana yomuntu, idla, iphuza, senithi: ‘Bhekani, umuntu oyisiminzi nesiphuzi, umhlobo wabathelisi nezoni.’

7:35b.LUK.007.035 Kodwa ukuhlakanipha kuvunyiwe ngabantwana bakho bonke.”

7:36b.LUK.007.036 Omunye wabaFarisi wammema ukuba adle naye; esengene endlini yomFarisi wahlala ekudleni.

7:37b.LUK.007.037 Bheka, kwakukhona emzini owesifazane oyisoni; wathi esazi ukuthi uhlezi ekudleni endlini yomFarisi, weza nomfuma wamafutha,

7:38b.LUK.007.038 wema emuva ngasezinyaweni zakhe ekhala, waqala ukumatisa izinyawo zakhe ngezinyembezi, wazesula ngezinwele zekhanda lakhe, wazanga izinyawo zakhe, wazigcoba ngamafutha.

7:39b.LUK.007.039 Kuthe umFarisi obemmemile ekubona, wazindla wathi: “Uma lo ebengumprofethi, nga emazi lo wesifazane omphathayo ukuba ungubani nokuba unjani, ngokuba uyisoni.”

7:40b.LUK.007.040 UJesu waphendula, wathi kuye: “Simoni, kukhona engifuna ukukukhuluma kuwe.” Wathi: “Khuluma-ke, Mfundisi.”

7:41b.LUK.007.041 “Kwakukhona abantu ababili abanamacala kumtshelekisi othile; icala lomunye lalingodenariyu abangamakhulu ayisihlanu, elomunye amashumi ayisihlanu.

7:42b.LUK.007.042 Bengenanto yokukhokha, wabayekela bobabili. Ngumuphi kubo konje oyakumthanda kakhulu na?”

7:43b.LUK.007.043 USimoni waphendula wathi: “Ngithi yilowo amyekela okukhulu.” Wathi kuye: “Unqume kahle.”

7:44b.LUK.007.044 Ephendukela kowesifazane wathi kuSimoni: “Uyambona lo wesifazane na? Ngingene endlini yakho, awunginikanga amanzi ezinyawo, kepha yena uzimatisile izinyawo zami ngezinyembezi, wazesula ngezinwele zakhe.

7:45b.LUK.007.045 Awunganganga, kepha lo, yilokhu ngingenile, akayekanga ukwanga izinyawo zami.

7:46b.LUK.007.046 Ikhanda lami awuligcobanga ngamafutha, kepha lo uzigcobile izinyawo zami ngamafutha.

7:47b.LUK.007.047 Ngenxa yalokho ngithi kuwe: Izono zakhe eziningi zithethelelwe, ngokuba uthandile kakhulu; kepha othethelelwa okuncane uthanda kancane.”

7:48b.LUK.007.048 Wayesethi kuye: “Zithethelelwe izono zakho.”

7:49b.LUK.007.049 Ababehlezi naye ekudleni baqala ukusho phakathi kwabo ukuthi: “Ngubani lo othethelela nezono na?”

7:50b.LUK.007.050 Kepha wathi kowesifazane: “Ukukholwa kwakho kukusindisile; hamba, ube nokuthula.”

8

8:1b.LUK.008.001 Kwathi emva kwalokho wayehamba imizi nemizana eshumayela ememezela ivangeli lombuso, benaye abayishumi nambili

8:2b.LUK.008.002 nabesifazane abathile ababephulukiswe kubo omoya ababi nasezifweni: uMariya obizwa ngokuthi uMagdalena, okwakuphume kuye amademoni ayisikhombisa,

8:3b.LUK.008.003 noJowana umkaKhuza, induna kaHerode, noSusana, nabanye abaningi ababebakhonza ngempahla yabo.

8:4b.LUK.008.004 Sekubuthene kuye isixuku esikhulu sivela emizini ngemizi, wakhuluma ngomfanekiso, wathi:

8:5b.LUK.008.005 “Kwaphuma umhlwanyeli ukuyohlwanyela imbewu yakhe. Ekuhlwanyeleni kwakhe enye yawela ngasendleleni; yanyathelwa, izinyoni zezulu zayidla, zayiqeda.

8:6b.LUK.008.006 Enye yawela edwaleni; kuthe imila, yabuna, ngokuba ingenamswakama.

8:7b.LUK.008.007 Enye yawela phakathi kwameva, kwaze kwathi ameva esemila kanye nayo, ayiminyanisa.

8:8b.LUK.008.008 Enye yawela emhlabathini omuhle; kuthe imila, yathela ngekhulu.” Ekusho lokhu wamemeza wathi: “Onezindlebe zokuzwa makezwe.”

8:9b.LUK.008.009 Abafundi bakhe bambuza ukuthi ungaba yini lowo mfanekiso na?

8:10b.LUK.008.010 Wathi-ke: “Niphiwe nina ukwazi izimfihlakalo zombuso kaNkulunkulu, kepha abanye bakuphiwa ngemifanekiso ukuba bebona bangaboni, bezwa bangaqondi.

8:11b.LUK.008.011 “Umfanekiso yilokhu-ke: imbewu iyizwi likaNkulunkulu.

8:12b.LUK.008.012 Abangasendleleni yilabo abathi sebezwile, bese kufika uSathane, alisuse izwi enhliziyweni yabo ukuba bangakholwa, basindiswe.

8:13b.LUK.008.013 Abasedwaleni yilabo abathi sebezwile, balamukele izwi ngokuthokoza; kepha laba kabanampande, bakholwa isikhashana nje, kuthi ngesikhathi sokulingwa bahlubuke.

8:14b.LUK.008.014 Okuwele phakathi kwameva yilabo abathi sebezwile, bahambe, baminyaniswe ngeminako nengcebo nezinjabulo zokuphila, bangatheli izithelo ezivuthiwe.

8:15b.LUK.008.015 Okusemhlabathini omuhle yilabo abathi belizwile izwi, balibambe ngenhliziyo enhle nelungileyo, bathele izithelo ngokubekezela.

8:16b.LUK.008.016 “Akakho othi esokhela isibani, asimboze ngesitsha nokuba asibeke phansi kombhede, kepha usifaka othini, ukuze abangenayo babone ukukhanya.

8:17b.LUK.008.017 Ngokuba akukho okusithekileyo okungayikuhlaluka nokuyisifuba okungayikwaziwa, kube sobala.

8:18b.LUK.008.018 Ngakho-ke anobheka ukuba nizwa kanjani; ngokuba yilowo nalowo onakho uyakuphiwa; kepha lowo ongenakho uyakwamukwa nalokho athi unakho.”

8:19b.LUK.008.019 Kwase kufika kuye unina nabafowabo, kepha behluleka ukufinyelela kuye ngenxa yesixuku.

8:20b.LUK.008.020 Wabikelwa ukuthi: “Unyoko nabafowenu bemi ngaphandle befuna ukukubona.”

8:21b.LUK.008.021 Kepha waphendula, wathi kubo: “Umame nabafowethu yilabo abalizwa izwi likaNkulunkulu, balenze.”

8:22b.LUK.008.022 Kwathi-ke ngolunye lwalezo zinsuku wangena emkhunjini, yena kanye nabafundi bakhe, wathi kubo: “Asiwele siye ngaphesheya kolwandle.” Basuka-ke.

8:23b.LUK.008.023 Kuthe besahamba ngomkhumbi, walala ubuthongo; kwehlela-ke isivunguvungu somoya elwandle, bagcwala amanzi, babesengozini.

8:24b.LUK.008.024 Base besondela, bamvusa bathi: “Nkosi, Nkosi, safa.” Wavuka-ke, wakhuza umoya nokugubha kwamanzi. Kwanqamuka, kwathula kwathi du.

8:25b.LUK.008.025 Wayesethi kubo: “Kuphi ukukholwa kwenu na?” Besaba; bamangala, bathi omunye komunye: “Ungubani lo ukuba ayale nomoya namanzi, kumlalele?”

8:26b.LUK.008.026 Bafika ngomkhumbi ezweni lamaGerasa elibhekene neGalile.

8:27b.LUK.008.027 Esephumele emhlabathini, kwamhlangabeza indoda ethile yomuzi eyayinamademoni; kwase kuyisikhathi eside ingembathi ngubo, ingahlali endlini kodwa emathuneni.

8:28b.LUK.008.028 Isimbona uJesu yadazuluka, yawa phansi phambi kwakhe, yathi ngezwi elikhulu: “Nginamsebenzi muni nawe Jesu, Ndodana kaNkulunkulu oPhezukonke? Ngiyakuncenga, ungangihluphi.”

8:29b.LUK.008.029 Ngokuba wayala umoya ongcolileyo ukuba aphume kulowo muntu. Ngokuba wayesembambe kaningi; walindwa eboshwe ngawozankosi nangamaketanga ezinyawo; kepha wathi esegqabule izibopho, waqhutshelwa yidemoni ehlane.

8:30b.LUK.008.030 UJesu wambuza wathi: “Ungubani igama lakho?” Wathi: “ULegiyona,” ngokuba amademoni amaningi ayengene kuye.

8:31b.LUK.008.031 Amncenga ukuba angawayali ukuya kwalasha.

8:32b.LUK.008.032 Kwakukhona lapho umhlambi wezingulube eziningi ziklabile entabeni; amncenga ukuba awavumele angene kuzo; wawavumela.

8:33b.LUK.008.033 Aphuma-ke amademoni kuye umuntu, angena ezingulubeni, umhlambi wagulukudela eweni, waphonseka elwandle, waminza.

8:34b.LUK.008.034 Kwathi ababezalusa bebona okwenzekileyo, babaleka, bakubika emzini nasemaphandleni.

8:35b.LUK.008.035 Khona baphuma ukuyobona okwenzekileyo, bafika kuJesu, bamfumanisa umuntu okuphume kuye amademoni ehlezi ngasezinyaweni zikaJesu embethe, esangulukile; bashaywa luvalo.

8:36b.LUK.008.036 Ababekubonile babatshela ukuthi usinde kanjani owayekhwelwe ngamademoni.

8:37b.LUK.008.037 Abantu bonke bakulelo zwe lamaGerasa bamcela ukuba amuke kubo, ngokuba babephethwe ngukwesaba okukhulu; yena wayesengena emkhunjini, waphindela emuva.

8:38b.LUK.008.038 Kepha indoda okuphume kuyo amademoni yamnxusa ukuba ibe naye; kodwa wayimukisa, ethi:

8:39b.LUK.008.039 “Buyela ekhaya, ulande ukuthi kungakanani uNkulunkulu akwenzele khona.” Wamuka elanda emzini wonke ngokuthi kungakanani abekwenzelwe nguye uJesu.

8:40b.LUK.008.040 Kepha ekubuyeni kwakhe uJesu isixuku samthakazela; ngokuba bonke babembhekile.

8:41b.LUK.008.041 Bheka, kwafika indoda, nguJayiru igama layo, ingumphathi wesinagoge, yaziphonsa phansi ngasezinyaweni zikaJesu, yamncenga ukuba angene endlini yayo.

8:42b.LUK.008.042 Ngokuba yayinendodakazi eyodwa kungathi ineminyaka eyishumi nambili, yona isifa. Kepha esahamba, izixuku zamminyanisa.

8:43b.LUK.008.043 Owesifazane owayenomopho iminyaka eyishumi nambili, esekhokhele izinyanga konke abephila ngakho, engenakuphulukiswa muntu,

8:44b.LUK.008.044 weza ngasemuva, wathinta umphetho wengubo yakhe; kwanqamuka masinyane ukugobhoza kwegazi lakhe.

8:45b.LUK.008.045 UJesu wathi: “Ngubani ongithintileyo na?” Bephika bonke, wathi uPetru nababe naye: “Nkosi, izixuku ziyakuminyanisa, zikucindezele.”

8:46b.LUK.008.046 Kepha uJesu wathi: “Ukhona ongithintileyo, ngokuba ngizwile kuphuma amandla kimi.”

8:47b.LUK.008.047 Owesifazane ebona ukuthi kanakufihleka, weza ethuthumela, eziphonsa phansi phambi kwakhe, walanda phambi kwabantu bonke isisusa sokuba amthinte nokuthi usinde khona lapho.

8:48b.LUK.008.048 Wayesethi kuye: “Ndodakazi, ukukholwa kwakho kukusindisile; hamba, ube nokuthula.”

8:49b.LUK.008.049 Esakhuluma, kwafika othile evela kwamphathi wesinagoge, wathi kuye: “Indodakazi yakho isifile; ungabe usamkhathaza uMfundisi.”

8:50b.LUK.008.050 Kepha uJesu ekuzwa lokho wamphendula wathi: “Ungesabi, kholwa kuphela; izakusinda.”

8:51b.LUK.008.051 Esefike endlini kavumanga ukuba kungene muntu naye, kuphela oPetru, noJohane, noJakobe, noyise wentombazana, nonina.

8:52b.LUK.008.052 Babekhala bonke beyililela; kepha wathi: “Ningakhali; ayifile, kodwa ilele.”

8:53b.LUK.008.053 Bamhleka usulu, bazi ukuthi ifile.

8:54b.LUK.008.054 Kepha yena wayibamba ngesandla, wamemeza wathi: “Ntombazana, vuka!”

8:55b.LUK.008.055 Wabuyela umoya wayo, yavuka khona lapho; wayala ukuba inikwe ukudla.

8:56b.LUK.008.056 Abazali bayo bethuka; wabayala ukuba bangatsheli muntu okwenzekileyo.

9

9:1b.LUK.009.001 Wayesebabizela ndawonye abayishumi nambili, wabanika amandla negunya phezu kwamademoni onke nokuphulukisa izifo.

9:2b.LUK.009.002 Wabathuma ukushumayela umbuso kaNkulunkulu nokuphulukisa.

9:3b.LUK.009.003 Wathi kubo: “Ningaphathi lutho lwendlela, naludondolo, nasikhwama, nasinkwa, namali, ningabi namabhantshi amabili.

9:4b.LUK.009.004 Nakuyiphi indlu eningena kuyo, hlalani lapho, nize nimuke khona.

9:5b.LUK.009.005 Bonke abanganamukeliyo, anothi nxa nimuka kulowo muzi, nithintithe uthuli ezinyaweni zenu, kube ngubufakazi ngabo.”

9:6b.LUK.009.006 Bamuka-ke, bahamba imizi ngemizi beshumayela ivangeli, bephulukisa ezindaweni zonke.

9:7b.LUK.009.007 Kwathi uHerode umtetrarki ekuzwa konke okwenzekayo, wasambatheka ngokusho kwabanye ukuthi uJohane uvukile kwabafileyo,

9:8b.LUK.009.008 ngokwabanye ukuthi u-Eliya ubonakele, ngokwabanye ukuthi kuvukile umprofethi othile kwabadala.

9:9b.LUK.009.009 Kepha uHerode wathi: “UJohane ngamnquma ikhanda mina; kodwa ngubani lo engizwa ngaye okunje?” Wafuna ukumbona.

9:10b.LUK.009.010 Abaphostoli sebebuyile bamlandisa konke abakwenzileyo; wabathatha, wamuka nabo bebodwa ukuya emzini othiwa iBetsayida.

9:11b.LUK.009.011 Kepha izixuku sezazi zamlandela; wazithakazela, wakhuluma kuzo ngombuso kaNkulunkulu, wabaphulukisa abaswela ukuphulukiswa.

9:12b.LUK.009.012 Seliqala ukushona, beza kuye abayishumi nambili, bathi: “Bamukise abantu ukuba baye emizaneni nasezweni elizungezileyo, bangenise, bathole ukudla, ngokuba lapha sisendaweni eyihlane.”

9:13b.LUK.009.013 Kepha wathi kubo: “Bapheni nina ukudla.” Bathi-ke: “Esinakho yizinkwa eziyisihlanu nezinhlanzi ezimbili kuphela ngaphandle kokuba siyobathengela bonke laba bantu ukudla.”

9:14b.LUK.009.014 Ngokuba kwakukhona amadoda okungathi izinkulungwane eziyisihlanu. Wathi kubafundi bakhe: “Bahlaliseni ngezigaba ngamashumi ayisihlanu.”

9:15b.LUK.009.015 Benze njalo, babahlalisa bonke.

9:16b.LUK.009.016 Wazithabatha izinkwa eziyisihlanu nezinhlanzi ezimbili, wabheka ngasezulwini, wazibusisa, wazihlephula, wanika abafundi ukuba babele isixuku.

9:17b.LUK.009.017 Badla, basutha bonke, kwabuthwa imvuthuluka eyasala kubo, iziqabetho eziyishumi nambili.

9:18b.LUK.009.018 Kwathi ekhuleka ngasesitha, abafundi babe naye; wababuza ethi: “Abantu bathi ngingubani na?”

9:19b.LUK.009.019 Baphendula bathi: “UJohane uMbhapathizi; kepha abanye bathi: Ngu-Eliya; abanye kodwa bathi: Kuvukile umprofethi othile wabadala.”

9:20b.LUK.009.020 Wayesethi kubo: “Nina-ke nithi ngingubani na?” UPetru waphendula wathi: “UnguKristu kaNkulunkulu.”

9:21b.LUK.009.021 Wabayala, wagcizelela ukuba bangatsheli muntu lokho,

9:22b.LUK.009.022 wathi: “INdodana yomuntu imelwe ukuhlupheka ngokuningi, ilahlwe ngamalunga nabapristi abakhulu nababhali, ibulawe, ivuswe ngosuku lwesithathu.”

9:23b.LUK.009.023 Wayesethi kubo bonke: “Uma umuntu ethanda ukuza emva kwami, makazidele, athabathe isiphambano sakhe imihla ngemihla, angilandele.

9:24b.LUK.009.024 Ngokuba yilowo nalowo othanda ukusindisa ukuphila kwakhe uyakulahlekelwa yikho; kepha olahlekelwa ngukuphila kwakhe ngenxa yami uyakukusindisa.

9:25b.LUK.009.025 Ngokuba kuyakumsizani umuntu, uma ezuzile izwe lonke, yena uqobo alahleke nokuba alimale, na?

9:26b.LUK.009.026 Ngokuba yilowo nalowo onezinhloni ngami nangamazwi ami ngaye lo iNdodana yomuntu iyakuba nezinhloni, lapho iza ngenkazimulo yayo nekaYise neyezingelosi ezingcwele.

9:27b.LUK.009.027 Kepha nginitshela ngesiminya ukuthi bakhona abanye kwabemi lapha abangayikuzwa ngempela ukufa, baze babone umbuso kaNkulunkulu.”

9:28b.LUK.009.028 Kwathi emva kwalawo mazwi kungathi izinsuku zaba yisishiyagalombili wathatha oPetru, noJohane, noJakobe, wenyukela entabeni ukuyokhuleka.

9:29b.LUK.009.029 Kwathi ekukhulekeni kwakhe isimo sobuso bakhe saba ngesinye, nezingubo zakhe zaba mhlophe, zacwebezela.

9:30b.LUK.009.030 Bheka, kwakhuluma naye amadoda amabili ayengoMose no-Eliya;

9:31b.LUK.009.031 abonakala ngenkazimulo, akhuluma ngokumuka kwakhe abemelwe ukukufeza eJerusalema.

9:32b.LUK.009.032 UPetru nababe naye babekhwelwe ngubuthongo; kepha sebephapheme babona inkazimulo yakhe namadoda amabili emi naye.

9:33b.LUK.009.033 Kwathi ekwahlukaneni kwawo naye uPetru wathi kuJesu: “Nkosi, kuhle ukuba silapha; masakhe amadokodo amathathu, elinye libe ngelakho, elinye libe ngelikaMose, elinye libe ngelika-Eliya;” wayengazi ukuthi uthini.

9:34b.LUK.009.034 Esakhuluma lokhu, kwafika ifu, labasithibeza; besaba ekungeneni kwabo efwini.

9:35b.LUK.009.035 Kwavela izwi efwini, lathi: “Lo uyiNdodana yami ekhethiweyo; yizweni.”

9:36b.LUK.009.036 Kwathi livela izwi, uJesu wafunyanwa eyedwa. Bathula bona, ngaleyo mihla kabatshelanga muntu neyodwa yalezo zinto abazibonileyo.

9:37b.LUK.009.037 Kwathi ngangomuso sebehlile entabeni, isixuku esikhulu samhlangabeza.

9:38b.LUK.009.038 Bheka, indoda yasesixukwini yamemeza yathi: “Mfundisi, ngiyakunxusa ukuba ubheke indodana yami, ngokuba yiyo yodwa kimi.

9:39b.LUK.009.039 Bheka, umoya uyayibamba, idazuluke masinyane; uyihlukumeza, ikhihlize amagwebu, amuke kuyo eseyizukile.

9:40b.LUK.009.040 Ngibanxusile abafundi bakho ukuba bamkhiphe, kepha bahluleka.”

9:41b.LUK.009.041 UJesu waphendula wathi: “O sizukulwane esingakholwayo nesiphambeneyo, koze kube nini nginani, nginibekezelela, na? Yilethe lapha indodana yakho.”

9:42b.LUK.009.042 Kuthe iseza, idemoni layiwisa phansi, layihlukumeza kakhulu; uJesu wamkhuza umoya ongcolileyo, wamphulukisa umfana, wambuyisela kuyise.

9:43b.LUK.009.043 Bethuka bonke ngamandla amakhulu kaNkulunkulu. Besamangele bonke ngakho konke akwenzileyo, wathi kubafundi bakhe:

9:44b.LUK.009.044 “Khwezani lawo mazwi ezindlebeni zenu, ngokuba iNdodana yomuntu izakukhashelwa ezandleni zabantu.”

9:45b.LUK.009.045 Kepha abakuzwisisanga lokho kusho, kwakusithekile kubo, ukuze bangakuqondi; besaba ukumbuza ngalokho kusho.

9:46b.LUK.009.046 Kwavela ukuzindlisana phakathi kwabo kokuthi ngubani ongahle abemkhulu kubo.

9:47b.LUK.009.047 Kuthe uJesu ebona ukuzindla kwenhliziyo yabo, wathabatha umntwana, wammisa phambi kwakhe,

9:48b.LUK.009.048 wathi kubo: “Yilowo nalowo oyakwamukela lo mntwana ngegama lami uyangamukela mina, ongamukela mina uyamamukela ongithumileyo; ngokuba omncinyane kini nonke nguye omkhulu.”

9:49b.LUK.009.049 UJohane waphendula wathi: “Nkosi, sabona umuntu ekhipha amademoni ngegama lakho, samnqabela ngokuba engalandelani nathi.”

9:50b.LUK.009.050 Kepha uJesu wathi kuye: “Ningamnqabeli, ngokuba ongamelene nani ungakini.”

9:51b.LUK.009.051 Kwathi sezizakuphelela izinsuku zokwenyuswa kwakhe, wabhekisa ubuso bakhe ukuya eJerusalema.

9:52b.LUK.009.052 Wathuma izithunywa phambi kwakhe; zahamba, zangena emzini wamaSamariya ukuba zimlungisele.

9:53b.LUK.009.053 Kepha awamamukelanga, ngokuba ubuso bakhe babubheke eJerusalema.

9:54b.LUK.009.054 Kuthe abafundi bakhe oJakobe noJohane sebekubonile lokho, bathi: “Nkosi, uyathanda ukuba sibize umlilo wehle ezulwini, uwaqede, na?”

9:55b.LUK.009.055 Kepha waguquka, wabakhuza wathi: “Anazi ukuthi ningabomoya muni.

9:56b.LUK.009.056 Ngokuba iNdodana yomuntu ayizanga ukubhubhisa imiphefumulo yabantu kodwa ukuyisindisa;” base beya komunye umuzi.

9:57b.LUK.009.057 Kwathi behamba endleleni, umuntu othile wathi kuye: “Ngizakukulandela, noma uya ngaphi.”

9:58b.LUK.009.058 UJesu wayesethi kuye: “Izimpungushe zinemigodi, nezinyoni zezulu zinezidleke, kepha iNdodana yomuntu kayinandawo, lapho ingacamelisa khona ikhanda.”

9:59b.LUK.009.059 Wayesethi komunye: “Ngilandele.” Wathi yena: “Ngivumele ngiye kuqala ukuyakummbela ubaba.”

9:60b.LUK.009.060 Kepha wathi kuye: “Yeka abafileyo bembele abafileyo babo, kodwa hamba wena, ushumayele umbuso kaNkulunkulu.”

9:61b.LUK.009.061 Nomunye-ke wathi: “Ngizakukulandela, Nkosi; kepha ngivumele ngiye kuqala ukuyovalelisa abasekhaya.”

9:62b.LUK.009.062 Kodwa uJesu wathi kuye: “Akakho othi esebeke isandla sakhe egejeni, abuke emuva, ofanele umbuso kaNkulunkulu.”

10

10:1b.LUK.010.001 Emva kwalokho iNkosi yamisa abanye abangamashumi ayisikhombisa, yabathumela ngababili phambi kwayo emizini nasezindaweni zonke ebizakuya kuzo yona.

10:2b.LUK.010.002 Yathi kubo: “Ukuvuna kukhulu, kepha izisebenzi ziyingcosana; ngakho-ke nxusani inkosi yokuvuna ukuba ithumele izisebenzi ekuvuneni kwayo.

10:3b.LUK.010.003 Hambani; bhekani, ngiyanithuma ninjengezimvu phakathi kwezimpisi.

10:4b.LUK.010.004 Ningaphathi sikhwama, nayika, nazicathulo, ningabingeleli muntu endleleni.

10:5b.LUK.010.005 “Nakuyiphi indlu eningena kuyo, qalani nithi: ‘Ukuthula makube kule ndlu.’

10:6b.LUK.010.006 Kuyakuthi uma kukhona lapho indodana yokuthula, ukuthula kwenu kohlala phezu kwayo; kepha uma kungenjalo, kuzakubuyela kini.

10:7b.LUK.010.007 Hlalani kuleyo ndlu, nidle, niphuze abanipha khona; ngokuba isisebenzi sifanele inkokhelo yaso. Ningangenisi ezindlini ngezindlu.

10:8b.LUK.010.008 “Nakumuphi umuzi eningena kuwo, benamukele, yidlani okubekwa phambi kwenu,

10:9b.LUK.010.009 niphulukise abagulayo abakuwo, nithi kubo: ‘Umbuso kaNkulunkulu usondele kini.’

10:10b.LUK.010.010 Kepha nakumuphi umuzi eningena kuwo, benganamukeli, phumelani ezitaladini zawo, nithi:

10:11b.LUK.010.011 ‘Nothuli lomuzi wenu olunamathele ezinyaweni zethu siyaluhlangulela kini; nokho-ke yazini lokhu ukuthi umbuso kaNkulunkulu usondele.’

10:12b.LUK.010.012 Ngithi kini: Kuyakuba ngcono kwabaseSodoma ngalolo suku kunakulowo muzi.”

10:13b.LUK.010.013 “Maye kuwe Korazini! Maye kuwe Betsayida! Ngokuba uma kwakwenziwe eTire naseSidoni imisebenzi yamandla eyenziwe kini, ngakube kade yaphenduka, ihlala ngesaka nangomlotha.

10:14b.LUK.010.014 Kepha kuyakuba ngcono kulo iTire neSidoni ekwahlulelweni kunakini.

10:15b.LUK.010.015 Nawe Kapernawume uyakuphakanyiselwa ezulwini na? Uyakwehliselwa eHayidese.

10:16b.LUK.010.016 “Onizwayo nina uyangizwa mina; onalayo nina uyangala mina; ongalayo mina uyamala ongithumileyo.”

10:17b.LUK.010.017 Babuya-ke abangamashumi ayisikhombisa ngokujabula, bathi: “Nkosi, namademoni ayasithobela ngegama lakho.”

10:18b.LUK.010.018 Wathi kubo: “Ngabona uSathane ewa ezulwini njengonyazi.

10:19b.LUK.010.019 Bhekani, ngininikile igunya lokunyathela izinyoka nawofezela naphezu kwamandla onke esitha; anisoze noniwa lutho.

10:20b.LUK.010.020 Nokho ningathokozi ngalokhu kokuthi omoya bayanithobela, kepha thokozani ngokuthi amagama enu alotshiwe ezulwini.”

10:21b.LUK.010.021 Ngasona leso sikhathi wathokoza ngoMoya oNgcwele, wathi: “Ngiyakubonga, Baba, Nkosi yezulu nomhlaba, ngokuba ukufihlile lokho kwabahlakaniphileyo nabanokuqonda, wakwambulela izingane; yebo, Baba, ngokuba kwaba kuhle phambi kwakho ukuba kube njalo.

10:22b.LUK.010.022 Konke ngikunikelwe nguBaba; akakho owazi ukuthi iNdodana ingubani, kuphela uYise, nokuthi uYise ungubani, kuphela iNdodana nalowo iNdodana ethanda ukumambulela yena.”

10:23b.LUK.010.023 Waphendukela kubafundi bebodwa, wathi: “Abusisiwe amehlo abona enikubonayo.

10:24b.LUK.010.024 Ngokuba ngithi kini: Baningi abaprofethi namakhosi ababethanda ukubona enikubonayo, abakubonanga, nokuzwa enikuzwayo, abakuzwanga.”

10:25b.LUK.010.025 Bheka, kwase kusukuma isazimthetho esithile, samlinga sathi: “Mfundisi, ngizakwenzani ukuba ngidle ifa lokuphila okuphakade na?”

10:26b.LUK.010.026 Wathi kuso: “Kulotshweni emthethweni? Ufunda kanjani?”

10:27b.LUK.010.027 Saphendula sathi: “Woyithanda iNkosi uNkulunkulu wakho ngayo yonke inhliziyo yakho, nangawo wonke umphefumulo wakho, nangawo onke amandla akho, nangayo yonke ingqondo yakho, nomakhelwane wakho njengalokhu uzithanda wena.”

10:28b.LUK.010.028 Wayesethi kuso: “Uphendule kahle; yenza lokho, uzakuphila.”

10:29b.LUK.010.029 Kepha sona sithanda ukuzithetha sathi kuJesu: “Umakhelwane wami ngubani na?”

10:30b.LUK.010.030 UJesu waphendula wathi: “Umuntu othile wehla eJerusalema eya eJeriko; watheleka phakathi kwezigcwelegcwele, zamhlubula izingubo, zamshaya, zamuka zimshiya umndondo nje.

10:31b.LUK.010.031 Kwaqabuka kwehla umpristi othile ngaleyo ndlela; wathi embona, wamgwemela.

10:32b.LUK.010.032 Kanjalo nomLevi, efika kuleyo ndawo embona, wamgwemela.

10:33b.LUK.010.033 Kepha umSamariya othile owayesendleleni wafika kuye; wathi ukuba ambone, wamhawukela;

10:34b.LUK.010.034 waya kuye, wabopha amanxeba akhe ewathela ngamafutha newayini, wamkhwelisa esilwaneni sakhe, wamusa endlini yezihambi, wamgcina.

10:35b.LUK.010.035 Ngangomuso wakhipha odenariyu ababili, wabanika umninindlu, wathi kuye: ‘Mgcine, nalokho okwelekelayo ngiyakukubuyisela kuwe ekubuyeni kwami.’

10:36b.LUK.010.036 “Ngumuphi ngokubona kwakho kulaba abathathu owaba ngumakhelwane wakhe owatheleka phakathi kwezigcwelegcwele na?”

10:37b.LUK.010.037 Sathi: “Yilowo owamenzela isihawu.” Wayesethi uJesu kuso: “Hamba wenze njalo nawe.”

10:38b.LUK.010.038 Kwathi ekuhambeni kwabo wangena emzini othile; owesifazane othile, igama lakhe nguMarta, wamamukela endlini yakhe.

10:39b.LUK.010.039 Wayenodadewabo othiwa nguMariya, owahlala ngasezinyaweni zeNkosi, walizwa izwi layo.

10:40b.LUK.010.040 Kepha uMarta ekhathazekile ukusebenza okuningi waya kuye, wathi: “Nkosi, awukhathaleli ukuthi udadewethu ungishiyile, ngisebenze ngedwa, na? Ngakho yisho kuye ukuba angisize.”

10:41b.LUK.010.041 Kepha iNkosi yamphendula yathi: “Marta, Marta, unakekela, ukhathazeka ngezinto eziningi.

10:42b.LUK.010.042 Kodwa inye into edingekile; uMariya ukhethile isabelo esihle angayikwaphucwa sona.”

11

11:1b.LUK.011.001 Kwathi ekhuleka endaweni ethile, esegcinile, omunye wabafundi bakhe wathi kuye: “Nkosi, sifundise ukukhuleka, njengokuba uJohane naye wabafundisa abafundi bakhe.”

11:2b.LUK.011.002 Wayesethi kubo: “Nxa nikhuleka, anothi: “ ‘Baba wethu osezulwini, malingcweliswe igama lakho; mawufike umbuso wakho; mayenziwe intando yakho emhlabeni njengasezulwini;

11:3b.LUK.011.003 usiphe isinkwa sethu sezinsuku zonke imihla ngemihla;

11:4b.LUK.011.004 usithethelele izono zethu, ngokuba nathi sibathethelela bonke abanecala kithi; ungasingenisi ekulingweni, kodwa usikhulule kokubi.’ ”

11:5b.LUK.011.005 Wathi kubo: “Ngumuphi kini oyakuba nomhlobo, aye kuye phakathi kobusuku, athi kuye: ‘Mhlobo, ngitsheleke izinkwa zibe zintathu,

11:6b.LUK.011.006 ngokuba kufike kimi umhlobo wami evela ekuhambeni, kepha anginanto engingayibeka phambi kwakhe;’

11:7b.LUK.011.007 yena-ke ophakathi aphendule athi: ‘Ungangihluphi; sekuvaliwe emnyango, nabantwana bami balele kanye nami; anginakuvuka, ngikunike,’ na?

11:8b.LUK.011.008 Ngithi kini: Noma engazukuvuka amnike ngokuba engumhlobo wakhe, nokho ngenxa yokukhongisisa kwakhe uyakuvuka amnike konke akudingayo.

11:9b.LUK.011.009 “Ngithi kini: Celani, niyakuphiwa; funani, niyakufumana; ngqongqothani, niyakuvulelwa.

11:10b.LUK.011.010 Ngokuba yilowo nalowo ocelayo uyamukeliswa, nofunayo uyafumana, nongqongqothayo uyakuvulelwa.

11:11b.LUK.011.011 “Ngumuphi kini onguyise, oyakuthi nxa indodana icela inhlanzi, ayinike inyoka esikhundleni senhlanzi;

11:12b.LUK.011.012 uma icela iqanda, ayinike ufezela, na?

11:13b.LUK.011.013 Ngakho-ke uma nina eningababi nikwazi ukubapha abantwana benu izipho ezinhle, kakhulu kangakanani uYihlo osezulwini uzakubapha abacela kuye uMoya oNgcwele.”

11:14b.LUK.011.014 Wakhipha idemoni, laliyisimungulu; kwathi seliphumile idemoni, wakhuluma oyisimungulu; abantu bamangala.

11:15b.LUK.011.015 Kepha abanye kubo bathi: “Ukhipha amademoni ngoBelzebule umbusi wamademoni.”

11:16b.LUK.011.016 Abanye bemlinga bafuna kuye isibonakaliso esivela ezulwini.

11:17b.LUK.011.017 Kepha yena eyazi imicabango yabo wathi kubo: “Yilowo nalowo mbuso owahlukene wodwa uyachitheka, indlu idilike phezu kwendlu.

11:18b.LUK.011.018 NoSathane, uma ehlukene yedwa, umbuso wakhe uyakuma kanjani na? lokhu nithi ngikhipha amademoni ngoBelzebule.

11:19b.LUK.011.019 Uma mina ngikhipha amademoni ngoBelzebule, amadodana enu awakhipha ngobani na? Ngalokho-ke wona ayakuba ngabahluleli benu.

11:20b.LUK.011.020 Kepha uma ngikhipha amademoni ngomunwe kaNkulunkulu, umbuso kaNkulunkulu usufikile phela kini.

11:21b.LUK.011.021 “Uma isiqhwaga sihlomile, silinda umuzi waso, impahla yaso ihlezi ngokuthula.

11:22b.LUK.011.022 Kepha nxa onamandla kunaso esisukela, asinqobe, uyasaphuca izikhali zaso zonke ebesizethembile, ayabe impango yaso.

11:23b.LUK.011.023 “Ongenami umelene nami; ongabuthi nami uyahlakaza.

11:24b.LUK.011.024 “Nxa umoya ongcolileyo ephumile kumuntu, uyadabula izindawo ezomileyo efuna ukuphumula; engakufumani uthi: ‘Ngizakubuyela endlini yami engaphuma kuyo.’

11:25b.LUK.011.025 Uyafika-ke, ayifumane ishaneliwe, ihlotshisiwe.

11:26b.LUK.011.026 Khona abesehamba, azithathele abanye omoya abayisikhombisa ababi kunaye, bangene bahlale lapho, ukugcina kwalowo muntu kube kubi kunokwakuqala.”

11:27b.LUK.011.027 Kwathi esakhuluma lokhu, owesifazane othile esixukwini waphakamisa izwi, wathi kuye: “Sibusisiwe isisu esakuthwalayo namabele owawancelayo.”

11:28b.LUK.011.028 Kepha yena wathi: “Yebo, kodwa kakhulu babusisiwe abalizwa izwi likaNkulunkulu, balilondoloze.”

11:29b.LUK.011.029 Sekubuthana kuye izixuku, waqala ukukhuluma, wathi: “Lesi sizukulwane siyisizukulwane esibi; sifuna isibonakaliso, kepha asiyikunikwa sibonakaliso, kuphela isibonakaliso sikaJona.

11:30b.LUK.011.030 Ngokuba njengalokho uJona waba yisibonakaliso kwabaseNineve, iNdodana yomuntu iyakuba njalo kulesi sizukulwane.

11:31b.LUK.011.031 Inkosikazi yaseningizimu iyakusukuma ekwahlulelweni kanye namadoda alesi sizukulwane, iwalahle; ngokuba yavela emikhawulweni yomhlaba izakuzwa ukuhlakanipha kukaSolomoni; bhekani, lapha kukhona okukhulu kunoSolomoni.

11:32b.LUK.011.032 Amadoda aseNineve ayakusukuma ekwahlulelweni kanye nalesi sizukulwane, asilahle; ngokuba aphenduka ngokushumayela kukaJona; bhekani, lapha kukhona okukhulu kunoJona.

11:33b.LUK.011.033 “Akakho othi esokhela isibani, asibeke esitha nangaphansi kwesitsha, kepha usifaka othini ukuba abangenayo babone ukukhanya.

11:34b.LUK.011.034 Isibani somzimba siyiso lakho; nxa iso lakho liphilile, umzimba wakho wonke ungukukhanya; kepha nxa lilibi, umzimba wakho ungubumnyama.

11:35b.LUK.011.035 Ngakho qaphela ukuba ukukhanya okukuwe kungabi ngubumnyama.

11:36b.LUK.011.036 Njalo-ke uma umzimba wakho wonke ungukukhanya ungenandawo emnyama, uyakukhanya wonke njengesibani sikukhanyisa ngokukhanya kwaso.”

11:37b.LUK.011.037 Esakhuluma, umFarisi wammema ukuba adle naye; wangena, wahlala ekudleni.

11:38b.LUK.011.038 UmFarisi wamangala ebona ukuthi kaqalanga ngokuhlamba engakadli.

11:39b.LUK.011.039 Yayisithi iNkosi kuye: “Manje-ke nina baFarisi nihlambulula ingaphandle lenkezo nesitsha, kepha ingaphakathi lenu ligcwele ukuphanga nokubi.

11:40b.LUK.011.040 Ziwula, yena owalenza ingaphandle akalenzanga nengaphakathi na?

11:41b.LUK.011.041 Kepha yiphani okungaphakathi kube yisiphiwo sabampofu, bhekani-ke, kobe kuhlambulukile konke kini.

11:42b.LUK.011.042 “Kodwa maye kinina baFarisi, ngokuba nithela okweshumi kwesinkuntshane, nokwentshungu, nokwemifino yonke, ninganaki ukulunga nokumthanda uNkulunkulu! Benimelwe ukwenza lokhu, ningakuyeki nalokho.

11:43b.LUK.011.043 “Maye kinina baFarisi, ngokuba nithanda izihlalo eziphambili emasinagogeni nokubingelelwa ezigcawini zokuthengelana!

11:44b.LUK.011.044 “Maye kinina, ngokuba nifana namathuna angasabonakaliyo, nabantu abahamba ngaphezu kwawo bengawazi!”

11:45b.LUK.011.045 Wayesephendula omunye wezazimthetho, wathi kuye: “Mfundisi, ngokusho lokho uyasijivaza nathi.”

11:46b.LUK.011.046 Kepha wathi: “Maye nakinina zazimthetho, ngokuba nithwesa abantu imithwalo ethwaleka kalukhuni! Nina-ke uqobo lwenu aniyithinti leyo mithwalo nangowodwa weminwe yenu.

11:47b.LUK.011.047 “Maye kinina, ngokuba niyawakha amathuna abaprofethi, kanti oyihlo bababulala!

11:48b.LUK.011.048 Ngalokho ningofakazi, nivuma imisebenzi yawoyihlo; ngokuba bona bababulala, nina-ke niyawakha amathuna abo.

11:49b.LUK.011.049 Ngenxa yalokho ukuhlakanipha kukaNkulunkulu kwathi: ‘Ngiyakuthumela kubo abaprofethi nabaphostoli; abanye bayakubabulala, abanye babazingele,’

11:50b.LUK.011.050 ukuze kubizwe kulesi sizukulwane igazi labaprofethi bonke elachithwa kwasekusekelweni komhlaba,

11:51b.LUK.011.051 kusukela egazini lika-Abela kuze kufike egazini likaZakariya owabulawa phakathi kwe-altare nethempeli. Yebo, ngithi kini: Lizakubizwa kulesi sizukulwane.

11:52b.LUK.011.052 “Maye kinina zazimthetho, ngokuba nisisusile isihluthulelo sokwazi! Nina uqobo lwenu aningenanga, nabangenayo nabavimbela.”

11:53b.LUK.011.053 Kuthe ephuma lapho, ababhali nabaFarisi baqala ukumzonda kabi nokumbuzisisa ngokuninginingi,

11:54b.LUK.011.054 bemqamekela ukuba babambe into ephuma emlonyeni wakhe.

12

12:1b.LUK.012.001 Kwathi sezibuthene izigidi zabantu baze banyathelana, waqala ukukhuluma, ikakhulu kubafundi bakhe, ethi: “Xwayani imvubelo yabaFarisi engukuzenzisa.

12:2b.LUK.012.002 Akukho okusitshekelweyo okungayikwambulwa, nokufihliweyo okungayikwaziwa.

12:3b.LUK.012.003 Ngakho-ke konke enikukhuluma ebumnyameni kuyakuzwiwa ekukhanyeni, nalokho enikukhuluma endlebeni emakamelweni kuyakumenyezelwa phezu kwezindlu.

12:4b.LUK.012.004 “Kepha ngithi kinina bahlobo bami: Ningabesabi abawubulala umzimba, bengenakwenza okunye emva kwalokho.

12:5b.LUK.012.005 Kodwa ngiyakunitshengisa eniyakumesaba: Mesabeni lowo othi esebulele, abe namandla okuphonsa esihogweni. Yebo, ngithi kini: Mesabeni lowo.

12:6b.LUK.012.006 Akuthengwa yini imizwilili eyisihlanu ngezindibilishi ezimbili na? Akukhohlakele namunye kuyo emehlweni kaNkulunkulu.

12:7b.LUK.012.007 Kodwa nezinwele zekhanda lenu zibaliwe zonke. Maningesabi; nidlula imizwilili eminingi.

12:8b.LUK.012.008 “Futhi ngithi kini: Yilowo nalowo oyakungivuma phambi kwabantu neNdodana yomuntu iyakumvuma yena phambi kwezingelosi zikaNkulunkulu;

12:9b.LUK.012.009 kepha ongiphika phambi kwabantu uyakuphikwa phambi kwezingelosi zikaNkulunkulu.

12:10b.LUK.012.010 Nalowo okhuluma izwi elibi ngeNdodana yomuntu uyakuthethelelwa, kepha ohlambalaza uMoya oNgcwele kayikuthethelelwa.

12:11b.LUK.012.011 “Kepha nxa beniqhubela emasinagogeni, nakubabusi, nakuzo iziphathimandla, ningakhathazeki ngokuthi niyakuziphendulela kanjani nangokuthini, nokuba niyakukhulumani,

12:12b.LUK.012.012 ngokuba uMoya oNgcwele uyakunifundisa ngasona leso sikhathi okufanele nikukhulume.”

12:13b.LUK.012.013 Omunye wesixuku wathi kuye: “Mfundisi, shono kumfowethu ukuba abelane nami ifa.”

12:14b.LUK.012.014 Kepha wathi kuye: “Mngane, ubani ongimise ngibe ngumahluleli noma umahlukanisi phezu kwenu na?”

12:15b.LUK.012.015 Wayesethi kubo: “Bhekani, nixwaye ukuhaha konke, ngokuba ukuphila komuntu akumi ngobuningi bempahla yakhe.”

12:16b.LUK.012.016 Wabalandisa umfanekiso, wathi: “Izwe lomuntu othile onothileyo lathela kahle.

12:17b.LUK.012.017 Wazindla phakathi kwakhe, wathi: ‘Ngizakwenzani, lokhu ngingenandawo engingabuthela kuyo ukudla kwami, na?’

12:18b.LUK.012.018 “Wayesethi: ‘Ngizakwenza lokhu: ngizakudiliza izinqolobane zami, ngakhe ezinkulu, ngibuthele khona ukudla kwami konke nempahla yami.

12:19b.LUK.012.019 Bese ngithi kuwo umphefumulo wami: Mphefumulo, unempahla eningi ebekelelwe iminyaka emmingi; phumula, udle, uphuze, ujabule.’

12:20b.LUK.012.020 “Kepha uNkulunkulu wathi kuye: ‘Wena siwula, ngalobu busuku umphefumulo wakho uzakubizwa kuwe; pho-ke, izinto ozilungisileyo ziyakuba ngezikabani na?’

12:21b.LUK.012.021 “Kunjalo kozibekelela ingcebo enganothile kuNkulunkulu.”

12:22b.LUK.012.022 Wayesethi kubafundi bakhe: “Ngakho-ke ngithi kini: Ningakhathazeki ngokuphila kwenu ukuthi niyakudlani, nangomzimba wenu ukuthi niyakwembathani.

12:23b.LUK.012.023 Ngokuba ukuphila kukhulu kunokudla, nomzimba kunesambatho.

12:24b.LUK.012.024 Bhekani izingwababana ukuthi azihlwanyeli, azivuni, azinaxhiba nanqolobane, kepha uNkulunkulu uyazondla; nina nizidlula kakhulu kangakanani izinyoni.

12:25b.LUK.012.025 Ngumuphi kini ongathi ngokukhathazeka enezele ebudeni bakhe ingalo na?

12:26b.LUK.012.026 Ngalokho nxa ningenamandla okwenza nokuncinyane, yini ukuba nikhathazeke ngokunye na?

12:27b.LUK.012.027 “Bhekani iminduze ukuthi imila kanjani; ayiphothi, ayaluki, kepha ngithi kini noSolomoni ebukhazikhazini bakhe bonke wayengembathisile okomunye wayo.

12:28b.LUK.012.028 Uma uNkulunkulu embathisa kanjalo utshani basendle obukhona namuhla, ngomuso buphonswe eziko, kakhulu kangakanani uyakunembathisa nina eninokukholwa okuncane.

12:29b.LUK.012.029 Nani maningafuni eniyakukudla neniyakukuphuza; ningakhathazeki.

12:30b.LUK.012.030 Ngokuba konke lokho kufunwa ngabezizwe bomhlaba, kepha uYihlo uyazi ukuthi niyakudinga lokho.

12:31b.LUK.012.031 Kodwa funani umbuso wakhe, khona konke lokho kuyakwenezelwa nina.

12:32b.LUK.012.032 “Ungesabi, mhlambi omncane; ngokuba kwathandeka kuYihlo ukuninika umbuso.

12:33b.LUK.012.033 Thengisani ngeninakho, niphe abampofu; nizenzele izikhwama ezingagugiyo, ingcebo engapheliyo ezulwini, lapho kungasondeli sela, kungoni nundu khona.

12:34b.LUK.012.034 Ngokuba lapho kukhona ingcebo yenu, lapho iyakuba khona nenhliziyo yenu.

12:35b.LUK.012.035 “Izinkalo zenu mazibe ziboshiwe, nezibani zivutha.

12:36b.LUK.012.036 Nani yibani njengabantu ababheke inkosi yabo ibuya emshadweni ukuba, nxa ifika ingqongqotha, bayivulele masinyane.

12:37b.LUK.012.037 Zibusisiwe lezo zinceku okuyakuthi inkosi, nxa ifika, izifumane zilindile; ngiqinisile ngithi kini: Iyakuzibopha ukhalo, izihlalise ekudleni, ize izikhonze.

12:38b.LUK.012.038 Noma ifika ngomlindo wesibili noma ngowesithathu, ifumane kunjalo, zibusisiwe zona lezo.

12:39b.LUK.012.039 Kepha yazini lokhu kokuthi, uma umninindlu ebesazi isikhathi isela elizakufika ngaso, ubengayikuvuma ukuba ifohlwe indlu yakhe.

12:40b.LUK.012.040 Nani manibe nilungile, ngokuba iNdodana yomuntu iyeza ngesikhathi eningasicabangiyo.”

12:41b.LUK.012.041 UPetru wayesethi kuye: “Nkosi, usilandisa thina lo mfanekiso nokuba bonke na?”

12:42b.LUK.012.042 Yayisithi iNkosi: “Ngumuphi-ke umphathi othembekileyo noqondileyo, inkosi yakhe eyakumbeka phezu kwabendlu bayo ukuba abanike isabelo sabo sokudla ngesikhathi sakho?

12:43b.LUK.012.043 Ibusisiwe leyo nceku okuyakuthi inkosi yayo, nxa ifika, iyifumane yenze njalo.

12:44b.LUK.012.044 Impela ngithi kini: Iyakuyibeka phezu kwakho konke enakho.

12:45b.LUK.012.045 Kepha uma leyo nceku ithi enhliziyweni yayo: ‘Inkosi yami ilibele ukufika,’ iqale ukushaya abafana namantombazana, idle, iphuze, idakwe,

12:46b.LUK.012.046 inkosi yaleyo nceku iyakufika ngosuku engayibhekile ngalo nangomzuzu engawaziyo, iyinqumanqume, iyabele nabangakholekile.

12:47b.LUK.012.047 “Njalo-ke leyo nceku ebiyazi intando yenkosi yayo ingalungiselanga, ingenzanga ngokwentando yayo, iyakushaywa imivimbo eminingi;

12:48b.LUK.012.048 kepha ebingazi yenza okufanele imivimbo, iyakushaywa eyingcosana; yilowo nalowo ophiwe okuningi, kuyakubizwa okuningi kuye; nophathiswe okuningi, bayakubiza kuye okungaphezu kwalokho.

12:49b.LUK.012.049 “Ngize ukuphonsa umlilo emhlabeni; bengifunisisa kangakanani ukuba nga sewokhelwe.

12:50b.LUK.012.050 Kepha nginombhapathizo engizakubhapathizwa ngawo; ngikhathazekile kanjani, uze ufezeke.

12:51b.LUK.012.051 Nithi ngize ukuletha ukuthula emhlabeni na? Ngithi kini: Qha, kepha kakhulu ukwahlukana.

12:52b.LUK.012.052 Ngokuba kusukela manje kuyakuba khona abayisihlanu endlini inye bahlukene, abathathu nababili, ababili nabathathu;

12:53b.LUK.012.053 bayakwahlukana, uyise nendodana, indodana noyise; unina nendodakazi, indodakazi nonina; uninazala nomalokazana wakhe, umalokazana noninazala.”

12:54b.LUK.012.054 Wayesethi nakuzo izixuku: “Nxa nibona ifu likhuphuka entshonalanga, masinyane nithi: ‘Iyeza imvula,’ kube njalo.

12:55b.LUK.012.055 Futhi nxa kuphephetha iningizimu, nithi: ‘Lizakubalela,’ kube njalo.

12:56b.LUK.012.056 Bazenzisi, niyakwazi ukuchachisa ukuma komhlaba nokwezulu; kepha yini ukuba ningachachisi lesi sikhathi na?

12:57b.LUK.012.057 “Pho, yini ukuba ninganqumi ngokwenu okulungileyo na?

12:58b.LUK.012.058 Ngokuba, nxa uya enkosini nomelene nawe, ncengisisa usesendleleni ukuba ukhululeke kuye, funa mhlawumbe akuhudulele kumahluleli, umahluleli akunikele kulo iphoyisa, iphoyisa likuphonse etilongweni.

12:59b.LUK.012.059 Ngithi kuwe: Awusoze waphuma khona, uze ukhokhe ifadingi lokuphela.”

13

13:1b.LUK.013.001 Ngaleso sikhathi kwakukhona abathile abamtshela ngabaseGalile igazi labo uPilatu ayelixubanisile nemihlatshelo yabo.

13:2b.LUK.013.002 Waphendula, wathi kubo: “Nithi labo baseGalile babe yizoni kunabo bonke abaseGalile, ngokuba behlelwa yilokho, na?

13:3b.LUK.013.003 Ngithi kini: Qha, kepha uma ningaphenduki, niyakubhubha kanjalo nonke.

13:4b.LUK.013.004 Nalabo abayishumi nesishiyagalombili owawela phezu kwabo umbhoshongo waseSilowama, wababulala, nithi bona babe namacala kunabantu bonke abakhileyo eJerusalema na?

13:5b.LUK.013.005 Ngithi kini: Qha, kepha uma ningaphenduki, niyakubhubha ngokunjalo nonke.”

13:6b.LUK.013.006 Wayesebalandisa lo mfanekiso wokuthi: “Umuntu othile wayenomkhiwane utshalwe esivinini sakhe; weza efuna isithelo kuwo, akasifumananga.

13:7b.LUK.013.007 Wayesethi kuso isisebenzi sesivini: ‘Bheka, sekuyiminyaka emithathu ngiza ngifuna isithelo kulo mkhiwane, ngingasifumani; wunqume; yini ukuba uyone futhi inhlabathi?’

13:8b.LUK.013.008 “Sona saphendula, sathi kuye: ‘Nkosi, wuyeke nangalo mnyaka, ngize ngivukuze inhlabathi emaceleni awo, ngiwuthelele umquba;

13:9b.LUK.013.009 mhlawumbe ungaze uthele ngozayo; kepha uma kungenjalo, wowunquma.’ ”

13:10b.LUK.013.010 Wayefundisa kwelinye lamasinagoge ngesabatha.

13:11b.LUK.013.011 Bheka, kwaba khona owesifazane onomoya wobuthakathaka iminyaka eyishumi nesishiyagalombili, eseqhothile engenakululama nempela.

13:12b.LUK.013.012 Kwathi uJesu embona, wambiza, wathi kuye: “Mame, ukhululiwe ebuthakathakeni bakho.”

13:13b.LUK.013.013 Wabeka izandla phezu kwakhe; weluleka khona lapho, wamdumisa uNkulunkulu.

13:14b.LUK.013.014 Umphathi wesinagoge, ecunukile ngokuba uJesu ephulukisile ngesabatha, waphendula, wathi kuso isixuku: “Kukhona izinsuku eziyisithupha okufanele ukusetshenzwa ngazo; ngakho-ke anoza ngazo, niphulukiswe, kungabi ngosuku lwesabatha.”

13:15b.LUK.013.015 Kepha iNkosi yamphendula yathi: “Bazenzisi, kanti yilowo nalowo kini kayithukululi yini ngesabatha inkabi yakhe noma imbongolo yakhe emkhombeni, ayise ukuyoyiphuzisa, na?

13:16b.LUK.013.016 Kepha lona, eyindodakazi ka-Abrahama, uSathane abembophile, bhekani, iminyaka eyishumi nesishiyagalombili, bekungafanele yini ukuba akhululwe kuleso sibopho ngosuku lwesabatha na?”

13:17b.LUK.013.017 Wathi ukuba asho lokho, bajabha bonke ababemelene naye; isixuku sonke sathokoza ngemisebenzi yonke yenkazimulo eyenziwe nguye.

13:18b.LUK.013.018 Wayesethi: “Umbuso kaNkulunkulu ufana nani na? Ngiyakuwufanisa nani na?

13:19b.LUK.013.019 Ufana nenhlamvu yesinaphi ayithatha umuntu, wayihlwanyela ensimini yakhe; yamila, yaba ngumuthi, izinyoni zezulu zaze zakhela emagatsheni awo.”

13:20b.LUK.013.020 Wabuye wathi: “Umbuso kaNkulunkulu ngiyakuwufanisa nani na?

13:21b.LUK.013.021 Ufana nemvubelo ayithatha owesifazane, wayifaka emaqomeni amathathu empuphu, kwaze kwabila konke.”

13:22b.LUK.013.022 Wayesedlula, wahamba imizi ngemizi nemizana ngemizana, efundisa, eqonde eJerusalema.

13:23b.LUK.013.023 Umuntu othile wayesethi kuye: “Nkosi, bayingcosana abasindiswayo na?” Wathi kubo:

13:24b.LUK.013.024 “Phikelelani ukungena ngomnyango omncinyane; ngokuba ngithi kini: Abaningi bayakufuna ukungena, bahluleke.

13:25b.LUK.013.025 Nxa umninindlu esukumile wavala emnyango, niqale ukuma ngaphandle, ningqongqothe emnyango, nithi: ‘Nkosi, sivulele,’ uyakuphendula, athi: ‘Anginazi lapho nivela khona.’

13:26b.LUK.013.026 “Lapho-ke niyakuqala ukuthi: ‘Sasidla, siphuza phambi kwakho, wawufundisa emigwaqweni yakithi.’

13:27b.LUK.013.027 “Athi-ke: ‘Ngithi kini: Anginazi lapho nivela khona; sukani kimi nina nonke, basebenzi bokungalungi.’

13:28b.LUK.013.028 “Lapho kuyakuba khona ukukhala nokugedla amazinyo, nxa senibona o-Abrahama, no-Isaka, noJakobe, nabaprofethi bonke embusweni kaNkulunkulu, kepha nina nikhishelwe ngaphandle.

13:29b.LUK.013.029 Bayakufika bevela empumalanga, nasentshonalanga, nasenyakatho, naseningizimu, bahlale ekudleni embusweni kaNkulunkulu.

13:30b.LUK.013.030 Bhekani, bakhona abokugcina abayakuba ngabokuqala; bakhona abokuqala abayakuba ngabokugcina.”

13:31b.LUK.013.031 Ngawo lowo mzuzwana kweza abaFarisi abathile, bathi kuye: “Suka, umuke lapha, ngokuba uHerode ufuna ukukubulala.”

13:32b.LUK.013.032 Wathi kubo: “Hambani nithi kuleyo mpungushe: ‘Bheka, ngikhipha amademoni, ngiphulukise abagulayo namuhla nakusasa, kuthi ngosuku lwesithathu ngipheleliswe.’

13:33b.LUK.013.033 Nokho ngimelwe ukuba ngihambe namuhla nakusasa nangomhlomunye; ngokuba akunakwenzeka ukuba umprofethi abhubhe ngaphandle kweJerusalema.

13:34b.LUK.013.034 “Jerusalema, Jerusalema, wena obulala abaprofethi, okhanda ngamatshe abathunyelwe kuwe, bengithanda kangaki ukubuthela ndawonye abantwana bakho njengesikhukukazi sibuthela amazinyane aso phansi kwamaphiko; kepha anivumanga.

13:35b.LUK.013.035 Bhekani, indlu yenu isisala inxiwa kini; kepha ngithi kini: Anisoze nangibona, kuze kufike isikhathi sokuba nithi: ‘Ubusisiwe ozayo egameni leNkosi.’ ”

14

14:1b.LUK.014.001 Kwathi ekungeneni kwakhe ngesabatha endlini yomunye waba yizikhulu kubaFarisi ukuba adle ukudla, bona uqobo babemqaphele.

14:2b.LUK.014.002 Bheka, kwavela phambi kwakhe umuntu othile owayenesifo samanzi.

14:3b.LUK.014.003 UJesu wathatha, wathi kuzo izazimthetho nabaFarisi: “Kuvunyelwe yini ukuphulukisa ngesabatha noma qha?”

14:4b.LUK.014.004 Kepha bathula. Wayesemphatha, wamphulukisa, wammukisa.

14:5b.LUK.014.005 Wathi kubo: “Ngumuphi kini ongathi indodana noma inkabi iyele emgodini, angayikhiphi masinyane ngosuku lwesabatha, na?”

14:6b.LUK.014.006 Bahluleka ukuphendula kulokho.

14:7b.LUK.014.007 Wabalandisa abamenyiweyo umfanekiso, ebona ukuzikhethela kwabo izihlalo eziphambili, wathi kubo:

14:8b.LUK.014.008 “Nxa umenyiwe ngumuntu ukuya emshadweni, ungahlali esihlalweni esiphambili, funa ngabe ukhona omkhulu kunawe omenyiwe nguye,

14:9b.LUK.014.009 eze yena onimeme wena naye, athi: ‘Mdedele lo;’ khona uqale uhlale kwesisenzansi unamahloni.

14:10b.LUK.014.010 Kepha nxa umenyiwe, hamba uhlale endaweni esenzansi ukuba, nxa efika okumemileyo, athi kuwe: ‘Mhlobo, yenyukela enhla;’ khona uyakuba nodumo phambi kwabo bonke abahlezi nawe ekudleni.

14:11b.LUK.014.011 Ngokuba oziphakamisayo uzakuthotshiswa; nozithobayo uzakuphakanyiswa.”

14:12b.LUK.014.012 Wathi nakommemileyo: “Uma wenza isidlo sasemini noma esakusihlwa, ungabizi abahlobo bakho, nabafowenu, nomndeni wakho, nabakhelwane bakho abacebileyo, funa nabo babuye bakumeme, kube khona ukwenanana.

14:13b.LUK.014.013 Kepha uma wenza isidlo, mema abampofu, nezinyonga, nezimpumputhe;

14:14b.LUK.014.014 uyakubusiswa-ke, ngokuba bangekwenanisele; uyakwenaniselwa ekuvukeni kwabalungileyo.”

14:15b.LUK.014.015 Esezwile lokho omunye wababehlezi naye ekudleni, wathi kuye: “Ubusisiwe lowo oyakudla isinkwa embusweni kaNkulunkulu.”

14:16b.LUK.014.016 Kepha wathi kuye: “Umuntu othile wenza idili elikhulu, wamema abaningi.

14:17b.LUK.014.017 Ngesikhathi sedili wathuma inceku yakhe ukuba isho kwabamenyiweyo ukuthi: ‘Zanini, ngokuba sekulungisiwe konke.’

14:18b.LUK.014.018 “Kepha bonke baqala ukuzilandulela ngazwi linye; owokuqala wathi kuye: ‘Ngithengile insimu, kuswelekile ukuba ngiye ngiyibone; ngiyakuncenga, mawungilandulele.’

14:19b.LUK.014.019 “Omunye wathi: ‘Ngithengile izinkabi eziyishumi, sengiya ukuzilinga; ngiyakuncenga, mawungilandulele.’

14:20b.LUK.014.020 “Omunye wathi: ‘Ngithathile umfazi, ngalokho ngingeze.’

14:21b.LUK.014.021 “Isibuyile inceku yabika lokho enkosini yayo. Khona umninindlu wathukuthela, wathi encekwini yakhe: ‘Khawuleza, uye emigwaqweni nasemingcingweni yomuzi, ungenise lapha abampofu, nezilima, nezimpumputhe, nezinyonga.’

14:22b.LUK.014.022 “Yathi inceku: ‘Nkosi, sekwenziwe ngokuyala kwakho; kepha isekhona indawo.’

14:23b.LUK.014.023 “Yathi inkosi encekwini: ‘Phuma uye ezindleleni nasezintangweni, ubacindezele bangene ukuba igcwale indlu yami.

14:24b.LUK.014.024 Ngokuba ngithi kini: Ayikho neyodwa yalawo madoda abemenyiwe eyakulizwa idili lami.’ ”

14:25b.LUK.014.025 Kwakuhamba naye izixuku eziningi; waphenduka, wathi kuzo:

14:26b.LUK.014.026 “Uma umuntu eza kimi engamzondi uyise, nonina, nomkakhe, nabantwana, nabafowabo, nawodadewabo, yebo, nokuphila kwakhe, angebe ngumfundi wami.

14:27b.LUK.014.027 Nalowo ongathwali isiphambano sakhe, angilandele, angebe ngumfundi wami.

14:28b.LUK.014.028 “Ngokuba ngumuphi kini othi efuna ukwakha umbhoshongo, angaqali ahlale phansi, abale izindleko ukuthi unakho okokuwuqeda na?

14:29b.LUK.014.029 Funa kuthi esebeke isisekelo, engenamandla okuqeda, bonke abakubonayo baqale ukumhleka,

14:30b.LUK.014.030 bathi: ‘Lo muntu waqala kabanga namandla okuqeda.’

14:31b.LUK.014.031 “Noma yiyiphi inkosi eya kwenye inkosi ukuhlaselana nayo engaqali ihlale phansi, ihlole ukuba inamandla yini ukuhlangabezana ngezinkulungwane eziyishumi naleyo eza kuyo, inezinkulungwane ezingamashumi amabili na?

14:32b.LUK.014.032 Kepha uma kungenzeke, ingathi isekude leyo, ithuma amanxusa, icele okokuthula.

14:33b.LUK.014.033 Kunjalo-ke yilowo nalowo kini ongavalelisi nakho konke anakho angebe ngumfundi wami.

14:34b.LUK.014.034 “Usawoti uyinto enhle; kepha uma usawoti edumele, uyakuhlaziywa ngani na?

14:35b.LUK.014.035 Akasafanele namhlabathi namquba; uyalahlwa nje phandle; onezidlebe zokuzwa makezwe.”

15

15:1b.LUK.015.001 Kwase kusondela kuye bonke abathelisi nezoni ukumuzwa.

15:2b.LUK.015.002 AbaFarisi nababhali base bakhonona bethi: “Lo muntu wamukela izoni, adle nazo.”

15:3b.LUK.015.003 Wayesebalandisa lo mfanekiso, ethi:

15:4b.LUK.015.004 “Ngumuphi umuntu kini onezimvu eziyikhulu, alahlekelwe ngenye kuzo, angazishiyi ezingamashumi ayisishiyagalolunye nesishiyagalolunye ehlane, aye kwelahlekileyo, aze ayithole, na?

15:5b.LUK.015.005 Athi eseyitholile, ayetshathe ethokoza.

15:6b.LUK.015.006 Esefike ekhaya ameme abahlobo nabakhelwane, athi kubo: ‘Thokozani nami, ngokuba ngiyitholile imvu yami ebilahlekile.’

15:7b.LUK.015.007 Ngithi kini: Kanjalo kuyakuba khona ukuthokoza ezulwini ngesoni sisinye esiphendukayo, kunabalungileyo abangamashumi ayisishiyagalolunye nesishiyagalolunye abangasweli ukuphenduka.

15:8b.LUK.015.008 “Noma ngumuphi owesifazane othi enezinhlamvu zesiliva eziyishumi, uma elahlekelwe luhlamvu lwaba lunye, angokheli isibani, ashanele indlu, afunisise, aze aluthole?

15:9b.LUK.015.009 Athi ukuba aluthole, abize abahlobo nabakhelwane, athi: ‘Thokozani nami, ngokuba ngilutholile uhlamvu lwami obelungilahlekele.’

15:10b.LUK.015.010 Ngithi kini: Kanjalo kukhona ukuthokoza phambi kwezingelosi zikaNkulunkulu ngesoni sisinye esiphendukayo.”

15:11b.LUK.015.011 Wayesethi: “Umuntu othile wayenamadodana amabili.

15:12b.LUK.015.012 Encane yawo yayisithi kuyise: ‘Baba, nginike isabelo sefa esiqondene nami;’ wawahlukanisela impahla.

15:13b.LUK.015.013 “Kwathi emva kwezinsuku ezingeziningi indodana encane yayisibutha konke, yamuka, yaya ezweni elikude, yachitha khona imfuyo yayo ihamba ngokonakala.

15:14b.LUK.015.014 Isisaphaze konke, kwavela indlala enkulu kulelo zwe; yaqala ukuswela.

15:15b.LUK.015.015 Yayisiya kukhonza komunye umuntu walelo zwe; yena wayithuma emadlelweni akhe ukuba yaluse izingulube.

15:16b.LUK.015.016 Yafisa ukuzisuthisa ngemidumba edliwa yizingulube; kepha kayiphiwanga muntu.

15:17b.LUK.015.017 “Kuthe sekusile kuyo, yathi: ‘Bangaki abaqashwa bakababa abanokudla okuningi, kanti mina ngifa indlala lapha.

15:18b.LUK.015.018 Ngiyakusuka, ngiye kubaba, ngithi: Baba, ngonile kulo izulu naphambi kwakho;

15:19b.LUK.015.019 angisafanele ukuthiwa indodana yakho; ngenze ngibe njengomunye wabaqashwa bakho.’

15:20b.LUK.015.020 Yayisisuka, yafika kuyise; kepha kuthe isekude, uyise wayibona, waba nesihe, wagijima, wayisingatha entanyeni, wayanga.

15:21b.LUK.015.021 “Indodana yayisithi kuye: ‘Baba, ngonile kulo izulu naphambi kwakho; angisafanele ukuthiwa indodana yakho.’

15:22b.LUK.015.022 “Kepha uyise wathi ezincekwini zakhe: ‘Sheshani nikhiphe ingubo enhle kunazo zonke, niyembathise, nifake indandatho esandleni sayo nezicathulo ezinyaweni,

15:23b.LUK.015.023 nilethe ithole elikhuluphalisiweyo, nilihlabe, sidle, sijabule;

15:24b.LUK.015.024 ngokuba le ndodana yami ibifile, yabuye yaphila; ibilahlekile, seyatholakala;’ base beqala ukujabula.

15:25b.LUK.015.025 “Kepha indodana yakhe enkulu yayisensimini; yathi iseza isondela endlini, yezwa ukuhlabelela nokusina.

15:26b.LUK.015.026 Yabiza omunye wabafana, yabuza ukuthi kwenze njani lokho.

15:27b.LUK.015.027 Wathi kuyo: ‘Kufike umfowenu; uyihlo wahlaba ithole elikhuluphalisiweyo, ngokuba ubuye wamthola ephilile.’

15:28b.LUK.015.028 “Kepha yathukuthela, kayivumanga ukungena; uyise wayesephuma, wayincenga.

15:29b.LUK.015.029 Kodwa yaphendula, yathi kuyise: ‘Bheka, iminyaka engaka ngikukhonzile; angizange ngeqe umyalo wakho, kepha mina awuzange ungiphe nazinyane lembuzi ukuba ngijabule nabahlobo bami,

15:30b.LUK.015.030 kodwa kuthe ukuba ifike leyo ndodana yakho eqede imfuyo yakho nezifebe, wayihlabisa ithole elikhuluphalisiweyo.’

15:31b.LUK.015.031 “Wayesethi kuyo: ‘Mntanami, wena uhlala nami njalo; konke okwami kungokwakho.

15:32b.LUK.015.032 Kepha simelwe ukujabula, sithokoze, ngokuba umfowenu lo wayefile, wabuye waphila; wayelahlekile, sewatholakala.’ ”

16

16:1b.LUK.016.001 Wayesekhuluma nakubafundi bakhe, ethi: “Kwakukhona umuntu othile oyisicebi, owayenomphathi; yena wamangalelwa kuye ngokuthi uchitha impahla yakhe.

16:2b.LUK.016.002 Wambiza, wathi kuye: ‘Kuyini lokhu engikuzwa ngawe na? Landa ngobuphathi bakho, ngokuba ungebe usaba ngumphathi.’

16:3b.LUK.016.003 “Wayesethi umphathi phakathi kwakhe: ‘Ngizakwenze njani, lokhu inkosi yami ingaphuca ubuphathi? Anginamandla okulima, nginamahloni ukunxiba.

16:4b.LUK.016.004 Ngiyakwazi engiyakukwenza ukuba bangamukele ezindlini zabo, nxa ngikhishwa ebuphathini.’

16:5b.LUK.016.005 “Wababiza ngabanye abanamacala enkosini yakhe, wathi kowokuqala: ‘Unecala elingakanani enkosini yami na?’

16:6b.LUK.016.006 “Wathi: ‘Amabhati ayikhulu amafutha.’ “Wayesethi kuye: ‘Thatha incwadi yakho, usheshe uhlale phansi, ulobe amashumi ayisihlanu.’

16:7b.LUK.016.007 “Khona wathi komunye: ‘Wena-ke unecala elingakanani na?’ “Wathi: ‘Izilinganiso eziyikhulu zikakolweni.’ “Wathi kuye: ‘Thatha incwadi yakho, ulobe amashumi ayisishiyagalombili.’

16:8b.LUK.016.008 “Inkosi yambabaza umphathi ongalungile ngokuthi wenze ngokuhlakanipha, ngokuba abantwana balesi sikhathi bahlakaniphile esizukulwaneni sabo kunabantwana bokukhanya.

16:9b.LUK.016.009 Nami ngithi kini: Zenzeleni nina abahlobo ngokukaMamona ongalungile, ukuze kuthi, nxa kuphelile, banamukele ezindlini eziphakade.

16:10b.LUK.016.010 “Othembekile kokuncinyane uthembekile nakokukhulu; ongalungile kokuncinyane kalungile nakokukhulu.

16:11b.LUK.016.011 Ngakho uma beningathembeki kokukaMamona ongalungile, ubani oyakuniphathisa okuyikhonakhona na?

16:12b.LUK.016.012 Futhi uma beningathembeki kokomunye, ubani oyakuninika okungokwenu na?

16:13b.LUK.016.013 “Akukho nceku engakhonza amakhosi amabili, ngokuba kokunye iyakuzonda enye, ithande enye, noma ibambelele kwenye, iyeyise enye. Ningeze nakhonza uNkulunkulu noMamona.”

16:14b.LUK.016.014 AbaFarisi ababethanda imali bakuzwa konke lokho, bamklolodela.

16:15b.LUK.016.015 Wayesethi kubo: “Nina ningabazishaya abalungileyo emehlweni abantu; kepha uNkulunkulu uyazazi izinhliziyo zenu, ngokuba lokho okuphakemeyo phakathi kwabantu kuyisinengiso emehlweni kaNkulunkulu.

16:16b.LUK.016.016 “Umthetho nabaprofethi kwakukhona kwaze kwafika uJohane; kusukela kuleso sikhathi ivangeli lombuso kaNkulunkulu liyashunyayelwa, wonke umuntu uphika ngokufuzula kuwo.

16:17b.LUK.016.017 Kepha kulula ukuba kudlule izulu nomhlaba kunokuba kuwe ibalana elilodwa lomthetho.

16:18b.LUK.016.018 “Yilowo nalowo olahla umkakhe, aganwe ngomunye, uyaphinga; noganwa ngolahliwe yindoda uyaphinga.

16:19b.LUK.016.019 “Kwakukhona umuntu othile onothileyo, owayegqoka ezibubende nezelineni elihle, ezijabulisa imihla ngemihla etamasa.

16:20b.LUK.016.020 Kwakukhona futhi ompofu othile, nguLazaru igama lakhe, owayelahliwe ngasesangweni lakhe egcwele izilonda,

16:21b.LUK.016.021 enxanela ukusuthiswa ngemvuthuluka ewa etafuleni lesicebi; yebo, kweza nezinja, zamkhotha izilonda.

16:22b.LUK.016.022 “Kwase kuthi wafa ompofu, wathwalwa yizingelosi, wasiwa esifubeni sika-Abrahama; nesicebi safa, sembelwa.

16:23b.LUK.016.023 SesiseHayidese saphakamisa amehlo aso, sisebuhlungwini, sambona u-Abrahama ekude, noLazaru esesifubeni sakhe.

16:24b.LUK.016.024 Samemeza sathi: ‘Baba Abrahama, ngihawukele, uthume uLazaru, agcobhoze isihloko somunwe wakhe emanzini, aphozise ulimi lwami, ngokuba ngiyahlushwa kuleli langabi.’

16:25b.LUK.016.025 “Kepha u-Abrahama wathi: ‘Ndodana, khumbula ukuba wamukela okuhle kwakho usesekuphileni noLazaru kanjalo okubi; kodwa manje uyaduduzwa yena lapha, wena uyahlushwa.

16:26b.LUK.016.026 Nangaphezu kwakho konke lokho kubekiwe umhosha omkhulu phakathi kwethu nani ukuba abafuna ukusuka lapha baye kini bangekwenze, nabalapho bangaweleli kithi.’

16:27b.LUK.016.027 “Sase sithi: ‘Njalo ngiyakucela, baba, ukuba umthumele endlini kababa,

16:28b.LUK.016.028 ngokuba nginabafowethu abayisihlanu, ukuze afakaze kubo, bangezi nabo kule ndawo yobuhlungu.’

16:29b.LUK.016.029 “Kepha u-Abrahama wathi: ‘BanoMose nabaprofethi; mabezwe bona.’

16:30b.LUK.016.030 “Sathi-ke: ‘Qha, baba Abrahama, kodwa uma kusuka umuntu kwabafileyo, aye kubo, bayakuphenduka.’

16:31b.LUK.016.031 “Kepha wathi kuso: ‘Uma bengalaleli uMose nabaprofethi, kabayikuvunyiswa, noma kuvuka umuntu kwabafileyo.’ ”

17

17:1b.LUK.017.001 Wayesethi kubafundi bakhe: “Kungeze kwenzeka ukuba kungaveli izikhubekiso; kodwa maye kulowo ezivela ngaye!

17:2b.LUK.017.002 Kungcono kuye ukuba itshe lokusila ligaxwe entanyeni yakhe, alahlwe elwandle, kunokuba akhubekise abe munye kulaba abancinyane.

17:3b.LUK.017.003 Xwayani nina. Uma umfowenu ona, mkhuze; uma ephenduka, mthethelele.

17:4b.LUK.017.004 Noma ekonela kasikhombisa ngosuku, abuyele kuwe kasikhombisa, ethi: ‘Ngiyaphenduka,’ womthethelela.”

17:5b.LUK.017.005 Abaphostoli base bethi eNkosini: “Yandisa ukukholwa kwethu.”

17:6b.LUK.017.006 Yayisithi iNkosi: “Uma beninokukholwa okungangenhlamvu yesinaphi, beningasho kulo mthombe: ‘Simbuka, utshaleke elwandle,’ ubuyakunilalela.

17:7b.LUK.017.007 “Ngumuphi kini onenceku elimayo nokuba eyalusayo, athi kuyo ibuya endle: ‘Sondela masinyane, uhlale phansi, udle’?

17:8b.LUK.017.008 Kodwa akayikusho kuyo ukuthi: ‘Lungisa engizakukudla, uzibophe, ungiphakele, ngize ngidle, ngiphuze, andukuba udle, uphuze wena,’ na?

17:9b.LUK.017.009 Uyayibonga yini inceku, ngokuba yenzile ekuyaliweyo na?

17:10b.LUK.017.010 Kunjalo nani, nxa nikwenzile konke enikuyaliweyo, anothi: ‘Asizinceku zalutho; sikwenzile nje ebesifanele ukukwenza.’ ”

17:11b.LUK.017.011 Kwathi esehamba ukuya eJerusalema, wadabula iSamariya neGalile.

17:12b.LUK.017.012 Esangena emzaneni othile, kwahlangana naye amadoda ayishumi anochoko, amela kude,

17:13b.LUK.017.013 aphakamisa izwi, athi: “Jesu Nkosi, sihawukele!”

17:14b.LUK.017.014 Kuthe ewabona, wathi kuwo: “Hambani, niyoziveza kubapristi.” Kwathi esahamba, ahlanjululwa.

17:15b.LUK.017.015 Enye yawo isibona ukuthi iphulukisiwe, yabuya imdumisa uNkulunkulu ngezwi elikhulu,

17:16b.LUK.017.016 yawa ngobuso ngasezinyaweni zakhe imbonga; yayingumSamariya.

17:17b.LUK.017.017 Kepha uJesu waphendula wathi: “Akuhlanjululwanga abayishumi na? Baphi, pho, abayisishiyagalolunye na?

17:18b.LUK.017.018 Abafunyaniswanga yini ababuyela ukumnika uNkulunkulu udumo, kuphela lona wezizwe na?”

17:19b.LUK.017.019 Wayesethi kuye: “Sukuma uhambe; ukukholwa kwakho kukusindisile.”

17:20b.LUK.017.020 Ebuzwe ngabaFarisi ukuthi umbuso kaNkulunkulu uzakufika nini, wabaphendula wathi: “Umbuso kaNkulunkulu awufiki ubonwa ngamehlo.

17:21b.LUK.017.021 Futhi kabayikusho ukuthi: ‘Bhekani, nanku,’ nokuba, ‘nankuya;’ ngokuba bhekani, umbuso kaNkulunkulu uphakathi kini.”

17:22b.LUK.017.022 Wayesethi kubafundi bakhe: “Kuzakufika izinsuku, lapho niyakufisa ukubona lube lunye lwezinsuku zeNdodana yomuntu, kepha aniyikulubona.

17:23b.LUK.017.023 Bayakuthi kini: ‘Bhekani, nansiya; bhekani, nansi;’ maningayi, ningalandeli.

17:24b.LUK.017.024 Ngokuba njengonyazi, nxa lunyazima kwenye indawo phansi kwezulu, lukhanya luze lufike kwenye indawo phansi kwezulu, yoba njalo iNdodana yomuntu ngosuku lwayo.

17:25b.LUK.017.025 Kepha kuqala imelwe ukuhlupheka ngokuningi, yaliwe yilesi sizukulwane.

17:26b.LUK.017.026 “Njengokuba kwenzeka emihleni kaNowa, kuyakuba njalo nasemihleni yeNdodana yomuntu.

17:27b.LUK.017.027 Babedla, bephuza, beganwa, bendiswa, kwaze kwafika usuku uNowa angena ngalo emkhunjini, kwafika uzamcolo, wababhubhisa bonke.

17:28b.LUK.017.028 “Kanjalo njengokuba kwenzeka nasemihleni kaLoti, babedla, bephuza, bethenga, bethengisa, betshala, bakha;

17:29b.LUK.017.029 kepha ngosuku uLoti aphuma ngalo eSodoma lana umlilo nesibabule kuvela ezulwini, kwababhubhisa bonke;

17:30b.LUK.017.030 kuyakuba njalo ngosuku eyakwambulwa ngalo iNdodana yomuntu.

17:31b.LUK.017.031 Ngalolo suku oyakuba phezu kwendlu, impahla yakhe isendlini, kangehli ukuyithatha; njalo nosensimini kangabuyeli emuva.

17:32b.LUK.017.032 Khumbulani umkaLoti.

17:33b.LUK.017.033 Ofuna ukuzuza ukuphila kwakhe uyakulahlekelwa yikho, kepha olahlekelwa yikho uyakukulondoloza.

17:34b.LUK.017.034 Ngithi kini: Ngalobo busuku kuyakuba khona ababili embhedeni munye; omunye uyakuthathwa, omunye ashiywe.

17:35b.LUK.017.035 Kuyakuba khona ababili besila ndawonye; omunye uyakuthathwa, omunye ashiywe.

17:36b.LUK.017.036 Kuyakuba khona ababili ensimini; omunye uyakuthathwa, omunye ashiywe.”

17:37b.LUK.017.037 Base bephendula, bethi kuye: “Kuphi, Nkosi?” Wathi kubo: “Lapho kukhona isidumbu, kulapho amanqe eyakubuthana khona.”

18

18:1b.LUK.018.001 Wabalandisa umfanekiso wokuthi bamelwe ukukhuleka njalo, bangadangali.

18:2b.LUK.018.002 Wathi: “Kwakukhona emzini othile umahluleli othile owayengamesabi uNkulunkulu, enganaki muntu.

18:3b.LUK.018.003 Kulowo muzi kwakukhona futhi umfelokazi owayelokhu efika kuye, ethi: ‘Ngizwele esitheni sami.’

18:4b.LUK.018.004 “Kwaba yisikhathi engavumi; kepha ngasemuva wathi phakathi kwakhe: ‘Nakuba ngingamesabi uNkulunkulu, nginganaki muntu,

18:5b.LUK.018.005 nokho-ke ngokuba lo mfelokazi engikhathaza njalo, ngiyakumzwela, funa angizuke ngokufika njalonjalo.’ ”

18:6b.LUK.018.006 Yayisithi iNkosi: “Yizwani okushiwo ngumahluleli ongalungile.

18:7b.LUK.018.007 UNkulunkulu kayikubezwela yini abakhethiweyo bakhe abakhala kuye imini nobusuku, ababekezelele, na?

18:8b.LUK.018.008 Ngithi kini: Uzakubezwela masinyane. Nokho nxa ifika iNdodana yomuntu, imbala iyakufumana ukukholwa emhlabeni na?”

18:9b.LUK.018.009 Wayesekhuluma kwabathile ababezethemba ukuthi balungile, bedelela abanye, ebalandisa lo mfanekiso ngokuthi:

18:10b.LUK.018.010 “Abantu ababili benyukela ethempelini beya kukhuleka, omunye engumFarisi, omunye engumthelisi.

18:11b.LUK.018.011 UmFarisi wema wazikhulekela ngokuthi: ‘Nkulunkulu, ngiyakubonga ngokuba ngingenjengabanye abantu: izigcwelegcwele, abangalungile, iziphingi, nanjengalo mthelisi.

18:12b.LUK.018.012 Ngizila ukudla kabili ngeviki, nginikela okweshumi kukho konke enginakho.’

18:13b.LUK.018.013 “Kepha umthelisi emi kude wayengafuni nakuphakamisela amehlo akhe ngasezulwini, kodwa washaya isifuba sakhe, ethi: ‘Nkulunkulu, ngihawukele mina soni.’

18:14b.LUK.018.014 “Ngithi kini: Lo wehlela endlini yakhe elungisisiwe kunomunye. Ngokuba yilowo nalowo oziphakamisayo uzakuthotshiswa, kodwa ozithobayo uzakuphakanyiswa.”

18:15b.LUK.018.015 Baletha kuye nabantwanyana ukuba abaphathe; kepha abafundi bekubona babakhuza.

18:16b.LUK.018.016 Kodwa uJesu wababizela kuye, wathi: “Vumelani abantwana beze kimi, ningabenqabeli, ngokuba umbuso kaNkulunkulu ungowabanjalo.

18:17b.LUK.018.017 Ngiqinisile ngithi kini: Yilowo nalowo ongamukeli umbuso kaNkulunkulu njengomntwana kasoze angena kuwo.”

18:18b.LUK.018.018 Umbusi othile wayesembuza ethi: “Mfundisi omuhle, ngiyakwenzani ukuba ngidle ifa lokuphila okuphakade na?”

18:19b.LUK.018.019 Kepha uJesu wathi kuye: “Ungibizelani ngokuthi ngimuhle na? Kakho omuhle, munye kuphela, uNkulunkulu.

18:20b.LUK.018.020 Uyayazi imiyalelo ukuthi: ‘Ungaphingi, ungabulali, ungebi, ungafakazi amanga, yazisa uyihlo nonyoko.’ ”

18:21b.LUK.018.021 Kepha wathi: “Konke lokho ngikugcinile kwasebusheni bami.”

18:22b.LUK.018.022 UJesu ekuzwa lokho wathi kuye: “Usasilalelwe into inye: thengisa ngakho konke onakho, wabele abampofu, khona uzakuba negugu ezulwini; uze ungilandele.”

18:23b.LUK.018.023 Kuthe ekuzwa lokho, wadabuka impela, ngokuba wayenothile kakhulu.

18:24b.LUK.018.024 UJesu embona wathi: “Kulukhuni kangakanani kwaba nomnotho ukungena embusweni kaNkulunkulu.

18:25b.LUK.018.025 Kulula ukuba ikamela lingene ngentunja yosungulo kunokuba onothileyo angene embusweni kaNkulunkulu.”

18:26b.LUK.018.026 Abezwayo base bethi: “Pho, kungasindiswa bani na?”

18:27b.LUK.018.027 Kepha wathi: “Okungenzeki kubantu kungenzeka kuNkulunkulu.”

18:28b.LUK.018.028 Wayesethi uPetru: “Bheka, thina sishiye okwethu, sakulandela.”

18:29b.LUK.018.029 Wathi kubo: “Ngiqinisile ngithi kini: Akukho muntu oshiye indlu, noma umkakhe, noma abafowabo, noma abazali, noma abantwana ngenxa yombuso kaNkulunkulu,

18:30b.LUK.018.030 ongayikwamukeliswa okuphindwe kaningi kulesi sikhathi nasenkathini ezayo ukuphila okuphakade.”

18:31b.LUK.018.031 Wayesebasondeza kuye abayishumi nambili, wathi kubo: “Bhekani, sikhuphukela eJerusalema; konke okulotshwe ngabaprofethi ngeNdodana yomuntu kuyakugcwaliseka.

18:32b.LUK.018.032 Ngokuba izakukhashelwa kwabezizwe, iklolodelwe, idunyazwe, ikhafulelwe ngamathe,

18:33b.LUK.018.033 bayishaye, bayibulale; kepha ngosuku lwesithathu izakuvuka.”

18:34b.LUK.018.034 Kepha bona kabaqondanga lutho lwalokho; lelo zwi lalifihlakele kubo, abakuqondanga obekushiwo.

18:35b.LUK.018.035 Kwathi esesondela eJeriko, impumputhe ethile yayihlezi ngasendleleni inxiba.

18:36b.LUK.018.036 Isizwa isixuku sidlula, yabuza ukuthi: “Kuyini lokhu?”

18:37b.LUK.018.037 Base beyitshela ukuthi: “Kudlula uJesu waseNazaretha.”

18:38b.LUK.018.038 Yayisimemeza ithi: “Jesu, Ndodana kaDavide, ngihawukele!”

18:39b.LUK.018.039 Ababehamba phambili bayikhuza ukuba ithule kepha kwayikhona imemeza kakhulu yona, ithi: “Ndodana kaDavide, ngihawukele!”

18:40b.LUK.018.040 Wema-ke uJesu, wayala ukuba ilethwe kuye. Isisondele, wayibuza wathi:

18:41b.LUK.018.041 “Ufuna ukuba ngikwenzeleni na?” Yathi: “Nkosi, ukuba ngibone.”

18:42b.LUK.018.042 UJesu wathi kuyo: “Bona! Ukukholwa kwakho kukusindisile.”

18:43b.LUK.018.043 Yayisibona khona lapho, yamlandela imdumisa uNkulunkulu, nabantu bonke bekubona bamnika uNkulunkulu indumiso.

19

19:1b.LUK.019.001 Wangena eJeriko, wadabula khona.

19:2b.LUK.019.002 Bheka, kwakukhona indoda, igama layo linguZakewu, ingumthelisi omkhulu, icebile.

19:3b.LUK.019.003 Yayifuna ukumbona uJesu ukuthi ungubani; yahluleka ngenxa yesixuku, ngokuba yayimfushane.

19:4b.LUK.019.004 Yagijimela phambili, yakhwela emthombeni ukuba imbone, ngokuba ebezakudlula ngakhona.

19:5b.LUK.019.005 Esefikile uJesu kuleyo ndawo wabheka phezulu, wathi kuyo: “Zakewu, shesha wehle, ngokuba namuhla ngimelwe ukuhlala endlini yakho.”

19:6b.LUK.019.006 Washesha wehla, wamamukela ngokuthokoza.

19:7b.LUK.019.007 Kuthe bekubona, bakhonona bonke, bathi: “Uye kungenisa kwandoda eyisoni.”

19:8b.LUK.019.008 Kodwa uZakewu wasukuma, wathi eNkosini: “Bheka, Nkosi, ngipha abampofu inxenye yempahla yami; kuthi uma ngimaphucile umuntu into ngamacebo, ngiyibuyisa iphindwe kane.”

19:9b.LUK.019.009 UJesu wathi kuye: “Namuhla insindiso ifikile kule ndlu, lokhu naye eyindodana ka-Abrahama.

19:10b.LUK.019.010 Ngokuba iNdodana yomuntu ize ukufuna nokusindisa okulahlekileyo.”

19:11b.LUK.019.011 Kuthe ukuba bakuzwe lokho, weleka walandisa umfanekiso, ngokuba ebeseduze neJerusalema nangokuba bebethi umbuso kaNkulunkulu uzakubonakala masinyane.

19:12b.LUK.019.012 Wathi-ke: “Umuntu othile wohlanga olukhulu waya ezweni elikude eyozithathela umbuso, abuye.

19:13b.LUK.019.013 Wayesebiza izinceku zakhe eziyishumi, wazinika omina abayishumi, wathi kuzo: ‘Hwebani ngabo, ngize ngibuye.’

19:14b.LUK.019.014 “Kepha abantu bomuzi wakhe babemzonda, bathuma amanxusa emva kwakhe, bethi: ‘Asithandi ukuba lo abuse phezu kwethu.’

19:15b.LUK.019.015 “Kwathi esebuyile ekuthatheni umbuso, wathi azibizelwe kuye lezo zinceku abezinike imali ukuba azi ukuthi yileyo naleyo izuzeni ngokuhweba.

19:16b.LUK.019.016 “Yavela-ke eyokuqala, yathi: ‘Nkosi, umina wakho uzuze omina abayishumi.’

19:17b.LUK.019.017 “Wathi kuyo: ‘Kuhle-ke, nceku enhle; lokhu ufunyanwe uthembekile kokuncinyane, uzakubusa phezu kwemizi eyishumi.’

19:18b.LUK.019.018 “Yafika neyesibili, yathi: ‘Umina wakho, Nkosi, uzuze omina abayisihlanu.’

19:19b.LUK.019.019 “Wathi nakuleyo: ‘Nawe yiba phezu kwemizi eyisihlanu.’

19:20b.LUK.019.020 “Kwafika nenye, yathi: ‘Nkosi, nangu umina wakho ebengimkhwezile esongwe endwangwini.

19:21b.LUK.019.021 Ngokuba bengikwesaba, lokhu ungumuntu olukhuni; uthabatha ongakubekanga, uvuna ongakuhlwanyelanga.’

19:22b.LUK.019.022 “Wathi kuyo: ‘Ngizakukwahlulela ngomlomo wakho wena nceku embi. Ubuwazi ukuba ngingumumtu olukhuni, ngithabatha engingakubekanga, ngivuna engingakuhlwanyelanga;

19:23b.LUK.019.023 awufakanga ngani imali yami ebhange, mina-ke ekufikeni kwami ngabe ngiyibizile kanye nenzalo, na?’

19:24b.LUK.019.024 “Wayesethi kwababemi khona: ‘Maphuceni umina, nimnike onawomina abayishumi.’

19:25b.LUK.019.025 “Kepha bathi kuye: ‘Nkosi, unawomina abayishumi.’

19:26b.LUK.019.026 “Ngithi kini: Yilowo nalowo onakho uyakuphiwa, kepha ongenakho uyakwaphucwa nalokho anakho.

19:27b.LUK.019.027 Kodwa lezo zitha zami ezazingathandi ukuba ngibuse phezu kwazo, ziletheni lapha, nizibulale phambi kwami.”

19:28b.LUK.019.028 Eseshilo lokho waqhubekela phambili, wakhuphukela eJerusalema.

19:29b.LUK.019.029 Kwathi esondele eBetfage naseBethaniya ngasentabeni ethiwa eYeminqumo, wathuma ababili kubafundi bakhe,

19:30b.LUK.019.030 ethi: “Hambani niye emzaneni obhekene nani, nothi ukuba ningene kuwo, nizakufumana ithole lembongolo likhulekiwe, okungazange kuhlale muntu kulo; lithukululeni, nililethe.

19:31b.LUK.019.031 Uma umuntu enibuza ethi: ‘Nilithukululelani na?’ anothi: ‘INkosi iyalidinga.’ ”

19:32b.LUK.019.032 Ababethunyiwe bahamba-ke, bafumana kunjengokusho kwakhe kubo.

19:33b.LUK.019.033 Kuthe besalithukulula ithole, abaninilo bathi kubo: “Nilithukululelani ithole na?”

19:34b.LUK.019.034 Bathi: “INkosi iyalidinga.”

19:35b.LUK.019.035 Base beliletha kuJesu; babeka izingubo zabo phezu kwethole, bamkhwelisa uJesu.

19:36b.LUK.019.036 Esahamba, babendlala izingubo zabo endleleni.

19:37b.LUK.019.037 Esesondela ekwehleleni kweNtaba Yeminqumo, isixuku sonke sabafundi saqala ukuthokoza nokumdumisa uNkulunkulu ngezwi elikhulu ngemisebenzi yonke yamandla esiyibonileyo,

19:38b.LUK.019.038 sithi: “Ubusisiwe uMbusi ozayo egameni leNkosi, ukuthula ezulwini nenkazimulo kweliphezulu!”

19:39b.LUK.019.039 Abanye babaFarisi besesixukwini bathi kuye: “Mfundisi, bakhuze abafundi bakho.”

19:40b.LUK.019.040 Waphendula wathi: “Ngithi kini: Uma bethula laba, amatshe azakumemeza.”

19:41b.LUK.019.041 Kwathi esondela, ewubona umuzi, wawukhalela.

19:42b.LUK.019.042 Wathi: “Sengathi nga wazi nawe ngalolu suku okokuthula. Kepha kalokhu kufihlakele emehlweni akho.

19:43b.LUK.019.043 Ngokuba uyakufikelwa yizinsuku, lapho izitha ziyakukukaka ngodonga lwempi, zikuhaqe, zikuvimbezele nxazonke,

19:44b.LUK.019.044 zikuwise phansi, wena nabantwana abakuwe, zingashiyi itshe phezu kwetshe phakathi kwakho, ngokuba ungasazanga isikhathi sokuhanjelwa kwakho.”

19:45b.LUK.019.045 Wangena ethempelini, waqala ukuxosha abathengisayo,

19:46b.LUK.019.046 wathi kubo: “Kulotshiwe ukuthi: ‘Indlu yami iyakuba yindlu yokukhuleka,’ kepha nina niyenze ‘umhume wabaphangi’.”

19:47b.LUK.019.047 Wayefundisa ethempelini imihla ngemihla. Kepha abapristi abakhulu, nababhali, nezikhulu zabantu bafuna ukumbulala.

19:48b.LUK.019.048 Kodwa babengatholi ukuthi bangenzani, ngokuba abantu bonke babebambelela kuye bemuzwa.

20

20:1b.LUK.020.001 Kwathi ngolunye lwezinsuku lezo esafundisa abantu ethempelini, eshumayela ivangeli, abapristi abakhulu nababhali bekanye namalunga bamvukela.

20:2b.LUK.020.002 Bakhuluma, bathi kuye: “Sitshele ukuthi lokhu ukwenza ngagunya lini, nokuba ngubani okunike leli gunya na?”

20:3b.LUK.020.003 Waphendula, wathi kubo: “Nami ngizakunibuza izwi, nize ningitshele.

20:4b.LUK.020.004 Ukubhapathiza kukaJohane kwavela ezulwini noma kubantu na?”

20:5b.LUK.020.005 Bazindlisana bodwa, bathi: “Uma sithi: ‘Ezulwini,’ uzakuthi: ‘Anikholwanga nguye ngani na?’

20:6b.LUK.020.006 Kepha uma sithi: ‘Kubantu,’ abantu bonke bazakusikhanda ngamatshe, ngokuba bakholiwe ukuthi uJohane ungumprofethi.”

20:7b.LUK.020.007 Base bephendula ukuthi abazi lapho evela khona.

20:8b.LUK.020.008 UJesu wayesethi kubo: “Nami-ke anginitsheli ukuthi ngenza lokhu ngagunya lini.”

20:9b.LUK.020.009 Wayeseqala ukulandisa lo mfanekiso, ethi kubantu: “Umuntu watshala isivini, wasiqashisa kubalimi, waya kwelinye izwe isikhathi eside.

20:10b.LUK.020.010 Ngenkathi efaneleyo wayesethumela inceku kubalimi ukuba bamnike ezithelweni zesivini; kepha abalimi bayishaya, bayimukisa ze.

20:11b.LUK.020.011 Waphinda wathuma enye inceku; naleyo bayishaya, bayidumaza, bayimukisa ze.

20:12b.LUK.020.012 Wayesephinda ethuma neyesithathu; nalena bayilimaza, bayiphonsa ngaphandle.

20:13b.LUK.020.013 “Khona wathi umninisivini: ‘Ngizakwenze njani na? Ngizakuthuma indodana yami ethandekayo; mhlawumbe lena bazakuyazisa.’

20:14b.LUK.020.014 “Kepha abalimi beyibona bakhulumisana bathi: ‘Lo uyindlalifa; masiyibulale ukuba ifa libe ngelethu.’

20:15b.LUK.020.015 Bayiphonsa ngaphandle kwesivini, bayibulala; ngakho-ke umninisivini uzakwenze njani kubo na?

20:16b.LUK.020.016 Uzakuza, ababhubhise labo balimi, isivini asinike abanye.” Bekuzwa bathi: “Qha, makungabi njalo.”

20:17b.LUK.020.017 Kepha wababheka, wathi: “Yini, pho, lokhu okulotshiweyo ukuthi: “ ‘Itshe abalinqabayo abakhi lona laba yinhloko yegumbi’?

20:18b.LUK.020.018 “Yilowo nalowo owayo phezu kwalelo tshe uyakuphohlozwa, kepha lowo eliyakuwela phezu kwakhe liyakumcolisa.”

20:19b.LUK.020.019 Ababhali nabapristi bafuna ukumbamba khona lapho, kepha besaba abantu, ngokuba bazi ukuthi uwukhulumile lo mfanekiso ngabo.

20:20b.LUK.020.020 Bamqaphela, bathuma izinhloli ezizishaya abalungileyo ukuba bamhile ngezwi lakhe, baze bamkhaphele emandleni nasegunyeni lombusi wezwe.

20:21b.LUK.020.021 Bambuza-ke bathi: “Mfundisi, siyazi ukuthi ukhuluma, ufundisa ngokuqondileyo, awukhethi buso bamuntu, kepha ufundisa indlela kaNkulunkulu ngokuqinisileyo.

20:22b.LUK.020.022 Sivunyelwe ukuthela kuKesari noma qha?”

20:23b.LUK.020.023 Kepha eqonda ubuqili babo wathi kubo:

20:24b.LUK.020.024 “Ngiboniseni udenariyu; unomfanekiso nombhalo kabani?” Bathi: “OkaKesari.”

20:25b.LUK.020.025 Wayesethi kubo: “Ngakho-ke nikani uKesari okukaKesari noNkulunkulu okukaNkulunkulu.”

20:26b.LUK.020.026 Abaze baba namandla ukumhila ngezwi lakhe phambi kwabantu; bamangala ngokuphendula kwakhe, bathula.

20:27b.LUK.020.027 Kwase kufika kuye abathile babaSadusi abathi akukho ukuvuka kwabafileyo;

20:28b.LUK.020.028 bambuza bathi: “Mfundisi, uMose wasilobela ukuthi, uma kufa umfowabo womuntu enomfazi kepha engenamntwana, umfowabo makamthathe umkakhe, amvusele umfowabo inzalo.

20:29b.LUK.020.029 Kwakukhona izelamani eziyisikhombisa; owokuqala wathatha umfazi; wafa engenamntwana,

20:30b.LUK.020.030 nowesibili;

20:31b.LUK.020.031 nowesithathu wamthatha; kanjalo-ke abayisikhombisa; bafa bengashiyanga bantwana.

20:32b.LUK.020.032 Ukugcina wafa nomfazi.

20:33b.LUK.020.033 Ngakho-ke ekuvukeni owesifazane uyakuba ngumfazi wamuphi kubo, lokhu abayisikhombisa babe naye engumkabo.”

20:34b.LUK.020.034 UJesu wathi kubo: “Abantwana bale nkathi bayaganwa, bayendiswa.

20:35b.LUK.020.035 Kepha labo abazakuthiwa bafanele ukufinyelela kuleyo nkathi nasekuvukeni kwabafileyo kabaganwa, kabendiswa;

20:36b.LUK.020.036 ngokuba bangebuye bafe, banjengezingelosi; bangabantwana bakaNkulunkulu bengabantwana bokuvuka.

20:37b.LUK.020.037 Kepha ukuthi bayavuswa abafileyo, noMose wakubonakalisa esihlahleni, lapho eyibiza iNkosi ngokuthi uNkulunkulu ka-Abrahama, noNkulunkulu ka-Isaka, noNkulunkulu kaJakobe.

20:38b.LUK.020.038 UNkulunkulu kasiye owabafileyo kodwa owabaphilayo, ngokuba bonke baphila kuye.”

20:39b.LUK.020.039 Abathile bababhali baphendula bathi: “Mfundisi, ukhulume kahle.”

20:40b.LUK.020.040 Ngokuba babengasenasibindi sokumbuza lutho.

20:41b.LUK.020.041 Wayesethi kubo: “Basho kanjani ukuthi uKristu uyindodana kaDavide na?

20:42b.LUK.020.042 lokhu uDavide uqobo uthi eNcwadini yamaHubo: “ ‘INkosi yathi eNkosini yami: “Hlala ngakwesokunene sami,

20:43b.LUK.020.043 ngize ngibeke izitha zakho zibe yisenabelo sezinyawo zakho.” ’

20:44b.LUK.020.044 “Ngakho uDavide umbiza ngokuthi iNkosi; pho, uyindodana yakhe kanjani na?”

20:45b.LUK.020.045 Besalalele abantu bonke, wathi kubafundi bakhe:

20:46b.LUK.020.046 “Xwayani ababhali abafuna ukuhamba bembethe izingubo ezinde, bethanda ukubingelelwa ezigcawini nokuhlala phambili emasinagogeni nasezindaweni ezingenhla ekudleni,

20:47b.LUK.020.047 abadla izindlu zabafelokazi, bekhuleka isikhathi eside ngokuzenzisa; laba bayakwamukeliswa ukulahlwa okukhulu.”

21

21:1b.LUK.021.001 Kwathi ebheka, wabona abacebileyo bebeka iminikelo yabo emphongolweni womnikelo.

21:2b.LUK.021.002 Wabona nomfelokazi othile ompofu ebeka khona amafadingi amabili;

21:3b.LUK.021.003 wathi: “Ngiqinisile ngithi kini: Lo mfelokazi ompofu ubeke okuningi kunabo bonke.

21:4b.LUK.021.004 Ngokuba bonke laba babeka eminikelweni kokuchichimileyo kwabo, kepha yena ebumpofini bakhe ubeke konke abephila ngakho.”

21:5b.LUK.021.005 Besakhuluma abanye ngethempeli ukuthi lihlotshiswe ngamatshe amahle nangezipho, wathi kubo:

21:6b.LUK.021.006 “Kuyakufika izinsuku, lapho kungayikushiywa kulokhu enikubonayo itshe phezu kwetshe elingayikudilizelwa phansi.”

21:7b.LUK.021.007 Base bembuza bethi: “Mfundisi, lokhu kuyakuba nini na? Nesibonakaliso siyakuba yini, lapho sekuyakwenzeka lokhu, na?”

21:8b.LUK.021.008 Wathi: “Qaphelani ningadukiswa, ngokuba kuyakuza abaningi ngegama lami, bathi: ‘Nginguye;’ bathi futhi: ‘Isikhathi sesisondele;’ maningabalandeli.

21:9b.LUK.021.009 Nxa nizwa ngezimpi neziyaluyalu, ningethuki, ngokuba kumelwe ukuba kwenzeke lokho kuqala, kepha ukuphela akukabikho masinyane.”

21:10b.LUK.021.010 Khona wathi kubo: “Isizwe siyakuvukela isizwe, nombuso uvukele umbuso;

21:11b.LUK.021.011 kuyakuba khona ukuzamazama okukhulu komhlaba, nobhici, nendlala izindawo ngezindawo, kube khona izinto ezesabekayo nezibonakaliso ezinkulu ezivela ezulwini.

21:12b.LUK.021.012 “Kepha ngaphambi kwakho konke lokho bayakunibamba, banizingele, banikhaphele emasinagogeni nasematilongweni, baniyise phambi kwamakhosi nababusi ngenxa yegama lami.

21:13b.LUK.021.013 Kuyakunehlela kube ngubufakazi.

21:14b.LUK.021.014 Ngakho kugcineni ezinhliziyweni zenu ukuba ningazindli ngaphambili eniyakuziphendulela ngakho;

21:15b.LUK.021.015 ngokuba mina ngiyakuninika umlomo nokuhlakanipha abangemelane nakho, bakuphike, bonke abayimpi kini.

21:16b.LUK.021.016 Yebo, niyakukhashelwa nangabazali, nabafowenu, nezihlobo, nabangane; abanye benu bayakubulawa yibo.

21:17b.LUK.021.017 Niyakuzondwa yibo bonke ngenxa yegama lami.

21:18b.LUK.021.018 Akuyikulahleka nalunwele lwekhanda lenu.

21:19b.LUK.021.019 Ngokukhuthazela kwenu niyakuzuza imiphefumulo yenu.

21:20b.LUK.021.020 “Kepha nxa nibona iJerusalema lihaqiwe yizimpi, yazini ukuthi sekusondele ukuchithwa kwalo.

21:21b.LUK.021.021 Khona abaseJudiya mababalekele ezintabeni, abaphakathi kwalo baphume, abasemaphandleni bangangeni kulo.

21:22b.LUK.021.022 Ngokuba lezi ziyizinsuku zempindiselo ukuba kugcwaliseke konke okulotshiweyo.

21:23b.LUK.021.023 Maye kwabakhulelweyo nabancelisayo ngalezo zinsuku! Ngokuba kuyakuba khona ukuhlupheka okukhulu emhlabeni nentukuthelo phezu kwalesi sizwe.

21:24b.LUK.021.024 Bayakuwa bedliwa yinkemba, bathunjelwe ezizweni zonke; iJerusalema liyakunyathelwa phansi ngabezizwe, kuze kugcwaliseke izikhathi zabezizwe.

21:25b.LUK.021.025 “Kuyakuba khona izibonakaliso elangeni nasenyangeni nasezinkanyezini; nasemhlabeni usizi luyakwehlela izizwe, zixakeke ngokuduma kolwandle namaza,

21:26b.LUK.021.026 abantu baphele amandla ngokwesaba nangokubheka okuvelela umhlaba ngokuba amandla ezulu ayakunyakaziswa.

21:27b.LUK.021.027 Khona bayakuyibona iNdodana yomuntu iza efwini, inamandla nenkazimulo enkulu.

21:28b.LUK.021.028 Kepha nxa kuqala ukuvela lokho, lulamani, niphakamise amakhanda enu, ngokuba kusondele ukukhululwa kwenu.”

21:29b.LUK.021.029 Wabalandisa umfanekiso wokuthi: “Bhekani umkhiwane nemithi yonke.

21:30b.LUK.021.030 Nxa isihluma, niyabona, nazi ngokwenu ukuthi ihlobo seliseduze.

21:31b.LUK.021.031 Kanjalo nani, nxa nibona lezo zinto zenzeka, yazini ukuthi umbuso kaNkulunkulu useduze.

21:32b.LUK.021.032 “Ngiqinisile ngithi kini: Lesi sizukulwane asiyikudlula, kungakenzeki konke.

21:33b.LUK.021.033 Kuyakudlula izulu nomhlaba, kepha amazwi ami awasoze adlula.

21:34b.LUK.021.034 “Xwayani ukuba izinhliziyo zenu zingasindwa ngukuminza nokudakwa nokunaka okwalokhu kuphila, lunizume lolo suku ningazelele,

21:35b.LUK.021.035 ngokuba luyakufika njengogibe phezu kwabo bonke abahlezi emhlabeni wonke.

21:36b.LUK.021.036 Ngakho lindani ngesikhathi sonke, nikhuleke ukuba nibe namandla okuphepha kukho konke lokhu okuyakwenzeka nawokuma phambi kweNdodana yomuntu.”

21:37b.LUK.021.037 Njalo wayefundisa ethempelini emini, kepha kusihlwa wayephuma ayokulala entabeni ethiwa eyemiNqumo.

21:38b.LUK.021.038 Ekuseni abantu bonke beza kuye ethempelini ukumuzwa.

22

22:1b.LUK.022.001 Kwasondela umkhosi wesinkwa esingenamvubelo othiwa iPhasika.

22:2b.LUK.022.002 Abapristi abakhulu nababhali bafuna ukuba bangambulala kanjani; ngokuba babesaba abantu.

22:3b.LUK.022.003 Kepha uSathane wangena kuJuda othiwa u-Iskariyothe engowabayishumi nambili.

22:4b.LUK.022.004 Wasuka wakhuluma nabapristi abakhulu nezinduna ngokuthi angamkhaphela kanjani kubo.

22:5b.LUK.022.005 Bathokoza, bavumelana naye ukumnika imali.

22:6b.LUK.022.006 Wavuma-ke, waze wafuna ithuba lokumkhaphela kubo, singekho isixuku.

22:7b.LUK.022.007 Lwase lufika usuku lwesinkwa esingenamvubelo okumelwe ukuba kuhlatshwe ngalo iphasika.

22:8b.LUK.022.008 Wathuma oPetru noJohane, wathi: “Hambani niye ukusilungisela iphasika ukuba sidle.”

22:9b.LUK.022.009 Bathi kuye: “Uthanda ukuba sikulungiselephi na?”

22:10b.LUK.022.010 Wathi kubo: “Bhekani, seningene emzini niyakuhlangana nomuntu othwele imbiza yamanzi; mlandeleni, niye endlini angena kuyo,

22:11b.LUK.022.011 nize nithi kumninindlu: ‘Uthi uMfundisi kuwe: Liphi ikamelo lokungenisa, lapho ngingadlela khona iphasika nabafundi bami, na?’

22:12b.LUK.022.012 Lowo-ke uzakunikhombisa ikamelo elikhulu eliphezulu, elendlelweyo; lungiselani lapho.”

22:13b.LUK.022.013 Basuka, bafumana kunjengokusho kwakhe kubo; base belungisa iphasika.

22:14b.LUK.022.014 Kwathi ukuba kufike isikhathi, wahlala phansi, nabaphostoli kanye naye.

22:15b.LUK.022.015 Wayesethi kubo: “Nginxanele nokunxanela ukudla nani leli phasika ngingakahlupheki.

22:16b.LUK.022.016 Ngokuba ngithi kini: Angisayikulidla ngempela lize ligcwaliseke embusweni kaNkulunkulu.”

22:17b.LUK.022.017 Wamukela isitsha, wabonga wathi: “Thabathani lokhu, nabelane;

22:18b.LUK.022.018 ngokuba ngithi kini kusukela manje angisayikuphuza okwesithelo somvini, uze ufike umbuso kaNkulunkulu.”

22:19b.LUK.022.019 Wayesethabatha isinkwa, wabonga, wasihlephula, wabanika, wathi: “Lokhu kungumzimba wami onikelwa nina; yenzani lokhu ukuba ningikhumbule.”

22:20b.LUK.022.020 Kanjalo-ke nesitsha emva kokudla, ethi: “Lesi sitsha siyisivumelwano esisha egazini lami elithululelwa nina.

22:21b.LUK.022.021 Kepha bhekani, isandla songikhaphelayo sinami etafuleni.

22:22b.LUK.022.022 Ngokuba iNdodana yomuntu isihamba njengokumisiweyo, kepha maye kulowo muntu ekhashelwa ngaye!”

22:23b.LUK.022.023 Base beqala ukubuzana bodwa ukuthi kungase kube ngubani kubo ozakukwenza lokho.

22:24b.LUK.022.024 Kwavela nokuphikisana phakathi kwabo kokuthi ngumuphi kubo ongathiwa omkhulu.

22:25b.LUK.022.025 Wayesethi kubo: “Ababusi bezizwe bazenza amakhosi phezu kwazo, neziphathimandla zazo zithiwa abazenzela okuhle.

22:26b.LUK.022.026 Kepha nina aninjalo; kodwa omkhulu kini makabe njengomncinyane, nobusayo makabe njengokhonzayo.

22:27b.LUK.022.027 Ngokuba ngumuphi omkhulu, ohlezi ekudleni noma okhonzayo, na? Akusiye ohlezi ekudleni na? Kepha mina ngiphakathi kwenu njengokhonzayo.

22:28b.LUK.022.028 Nina-ke ningababekhuthazela nami ekulingweni kwami;

22:29b.LUK.022.029 nanjengokuba uBaba engimisele umbuso, nami nginimisela wona

22:30b.LUK.022.030 ukuba nidle, niphuze etafuleni lami embusweni wami; niyakuhlala ezihlalweni zobukhosi, nahlulele izizwe eziyishumi nambili zakwa-Israyeli.

22:31b.LUK.022.031 “Simoni, Simoni, bheka, uSathane unifunile ukuba anihlunge njengokolweni;

22:32b.LUK.022.032 kepha mina ngikunxusele ukuba ukukholwa kwakho kungapheli; wena-ke, nxa usuphendukile, uqinise abafowenu.”

22:33b.LUK.022.033 Wathi kuye: “Nkosi, ngilungele ukuya nawe nasetilongweni nasekufeni.”

22:34b.LUK.022.034 Wayesethi: “Ngiyakutshela, Petru, ukuthi iqhude aliyikukhala namhlanje, ungakangiphiki kathathu ukuthi awungazi.”

22:35b.LUK.022.035 Wathi kubo: “Mhla nginithuma ningenasikhwama, nayika, nazicathulo, naswela utho na?” Bathi: “Lutho.”

22:36b.LUK.022.036 Wayesethi kubo: “Kepha manje onesikhwama kasithathe, neyika futhi; oswelayo kathengise ngengubo yakhe, athenge inkemba.

22:37b.LUK.022.037 Ngokuba ngithi kini: Kumelwe ukugcwaliseka kimi lokho okulotshiweyo kokuthi: ‘Wabalwa kanye nezelelesi;’ ngokuba okuqondene nami sekuyaphelela.”

22:38b.LUK.022.038 Base bethi: “Nkosi, bheka, nazi izinkemba ezimbili.” Wathi kubo: “Kwanele.”

22:39b.LUK.022.039 Wayesephuma, waya eNtabeni Yeminqumo njengomkhuba wakhe, nabafundi bakhe bamlandela.

22:40b.LUK.022.040 Esefikile endaweni wathi kubo: “Khulekani ukuba ningangeni ekulingweni.”

22:41b.LUK.022.041 Wamonyuka kubo kungathi ibanga lokuphonsa itshe, waguqa phansi, wakhuleka,

22:42b.LUK.022.042 wathi: “Baba, uma uthanda, susa lesi sitsha kimi; nokho makungenziwa intando yami kodwa eyakho.”

22:43b.LUK.022.043 Kwabonakala kuye ingelosi ivela ezulwini, imqinisa.

22:44b.LUK.022.044 Esosizini olunzima wakhuleka eqinisela, izithukuthuku zakhe zaba njengamathonsi egazi, aconsela emhlabathini.

22:45b.LUK.022.045 Esesukume ekukhulekeni weza kubafundi bakhe, wabafumana belele ngokudabuka.

22:46b.LUK.022.046 Wathi kubo: “Nilaleleni na? Vukani nikhuleke ukuba ningangeni ekulingweni.”

22:47b.LUK.022.047 Esakhuluma, bheka, kwafika isixuku; naye othiwa uJuda, omunye wabayishumi nambili, wayehamba phambi kwabo, wasondela kuJesu ukumanga.

22:48b.LUK.022.048 Kepha uJesu wathi kuye: “Juda, uyayikhaphela iNdodana yomuntu ngokuyanga na?”

22:49b.LUK.022.049 Kuthe ababengakuye sebebona okuzakwenzeka, bathi: “Nkosi, sigadle ngenkemba na?”

22:50b.LUK.022.050 Omunye othile kubo wayigadla inceku yompristi omkhulu, wayinquma indlebe yokunene.

22:51b.LUK.022.051 Kepha uJesu wathatha wathi: “Musani; sekwanele.” Wayiphatha indlebe, wayipholisa.

22:52b.LUK.022.052 Wathi uJesu kubapristi abakhulu, nezinduna zethempeli, namalunga ababeze kuye: “Niphumile kungathi nize kumphangi niphethe izinkemba nezinduku.

22:53b.LUK.022.053 Benginani imihla ngemihla ethempelini, anelulanga zandla kimi; kepha lokhu kuyihora lenu namandla obumnyama.”

22:54b.LUK.022.054 Base bembamba, bamuka naye, bamusa endlini yompristi omkhulu. UPetru walandela ekude.

22:55b.LUK.022.055 Sebebasile umlilo phakathi egcekeni bahlala phansi ndawonye; uPetru wahlala phakathi kwabo.

22:56b.LUK.022.056 Intombazana ethile, imbona ehlezi ngasemlilweni, yamgqolozela yathi: “Nalona ube naye.”

22:57b.LUK.022.057 Kepha waphika, wathi: “Sifazane, angimazi.”

22:58b.LUK.022.058 Emva kwesikhashana omunye wambona, wathi: “Nawe ungomunye wabo.” Kepha uPetru wathi: “Muntundini, angisiye.”

22:59b.LUK.022.059 Sekudlulile okungathi ihora linye, omunye umuntu waqinisa wathi: “Impela nalona ube naye, ngokuba futhi ungowaseGalile.”

22:60b.LUK.022.060 Kepha uPetru wathi: “Muntundini, angikwazi ukuthi uthini.” Masinyane esakhuluma, lakhala iqhude.

22:61b.LUK.022.061 INkosi yayisiphenduka, yambheka uPetru. UPetru walikhumbula izwi leNkosi, njengokuba ithe kuye: “Iqhude lingakakhali namhlanje, uzakungiphika kathathu.”

22:62b.LUK.022.062 Waphumela phandle, wakhala kamunyu.

22:63b.LUK.022.063 Amadoda abembambile uJesu ambhinqa emshaya.

22:64b.LUK.022.064 Ammboza ubuso, ambuza ethi: “Profetha ukuthi ngubani okushayileyo na?”

22:65b.LUK.022.065 Nokunye okuningi akukhuluma kuye emthuka.

22:66b.LUK.022.066 Kwathi sekusile, kwabuthana amalunga abantu nabapristi abakhulu nababhali, bamyisa emphakathini wabo,

22:67b.LUK.022.067 bathi: “Uma unguKristu, sitshele.” Wathi kubo: “Uma nginitshela, anisoze nakholwa;

22:68b.LUK.022.068 noma ngibuza, anisoze naphendula.

22:69b.LUK.022.069 Kepha kusukela manje iNdodana yomuntu izakuhlala ngakwesokunene samandla kaNkulunkulu.”

22:70b.LUK.022.070 Base bethi bonke: “Kanti uyiNdodana kaNkulunkulu na?” Wathi kubo: “Nisho khona, ngokuba ngiyiyo.”

22:71b.LUK.022.071 Bathi: “Pho, sisaswele bufakazi na? Ngokuba sesizwile uqobo lwethu ngomlomo wakhe.”

23

23:1b.LUK.023.001 Kwase kusuka uquqaba lonke, lwamyisa kuPilatu.

23:2b.LUK.023.002 Baqala ukumthwesa icala, bathi: “Simfumene lo edukisa isizwe sakithi, enqaba ukuba kuthelwe imali kuKesari, ethi nguye onguKristu inkosi.”

23:3b.LUK.023.003 UPilatu wambuza wathi: “Wena uyinkosi yabaJuda na?” Wamphendula wathi: “Usho khona.”

23:4b.LUK.023.004 Wayesethi uPilatu kubapristi abakhulu nakuzo izixuku: “Angifumani cala kulo muntu.”

23:5b.LUK.023.005 Kwayikhona beqinisa kakhulu, bethi: “Uvusa abantu efundisa kulo lonke laseJudiya, eqalile kwelaseGalile, waze wafika lapha.”

23:6b.LUK.023.006 UPilatu esezwa lokho wabuza ukuba lowo muntu ungowaseGalile yini.

23:7b.LUK.023.007 Esethole ukwazi ukuthi ungowesifunda sikaHerode, wamthumela kuHerode owayekhona naye eJerusalema ngalezo zinsuku.

23:8b.LUK.023.008 Kwathi uHerode embona uJesu, wathokoza kakhulu, ngokuba kwase kukade efuna ukumbona, lokhu ebezwile ngaye; wayethemba ukuthi uzakubona isibonakaliso esithile senziwa nguye.

23:9b.LUK.023.009 Wambuza ngamazwi amaningi, kepha yena kamphendulanga ngalutho.

23:10b.LUK.023.010 Abapristi abakhulu nababhali babemi bemmangalela kakhulu.

23:11b.LUK.023.011 Kepha uHerode namabutho akhe bameyisa, bambhinqa, baze bamembathisa ingubo ecwebezelayo, bambuyisela kuPilatu.

23:12b.LUK.023.012 Ngalolo suku oPilatu noHerode baba ngabahlobo; ngokuba ngaphambili kwakukhona ubutha phakathi kwabo.

23:13b.LUK.023.013 UPilatu wabizela ndawonye abapristi abakhulu nababusi nabantu,

23:14b.LUK.023.014 wathi kubo: “Nilethe kimi lo muntu ngokuthi ungodukisa abantu. Bhekani, mina ngimhlolile phambi kwenu, kepha angifumananga cala lalezo zinto enimmangalela ngazo;

23:15b.LUK.023.015 kunjalo noHerode futhi ngokuba umbuyisele kithi; bheka-ke, akenzanga lutho afanele ukufa ngalo.

23:16b.LUK.023.016 Ngakho-ke ngiyakumshaya, ngimkhulule.”

23:17b.LUK.023.017 Ubemelwe phela ukubakhululela abe munye ngomkhosi.

23:18b.LUK.023.018 Kepha bamemeza kanyekanye, bathi: “Susa lo, usikhululele uBaraba,”

23:19b.LUK.023.019 yena owayefakwe etilongweni ngenxa yesiyaluyalu esithile esasenzeka emzini, nangenxa yokubulala.

23:20b.LUK.023.020 UPilatu wabuye wakhuluma kubo efuna ukumkhulula uJesu;

23:21b.LUK.023.021 kodwa bamemeza bathi: “Mbethele, mbethele esiphambanweni!”

23:22b.LUK.023.022 Wayesethi kubo ngokwesithathu: “Kanti lo wenze bubi buni na? Angifumananga kuye icala lokufa; ngakho ngiyakumshaya, ngimkhulule.”

23:23b.LUK.023.023 Kepha bamcindezela ngokumemeza okukhulu befuna ukuba abethelwe. Ukumemeza kwabo kwanqoba.

23:24b.LUK.023.024 Wayesenquma uPilatu ngokuthi akwenziwe abakufunayo.

23:25b.LUK.023.025 Wayesemkhulula owayefakwe etilongweni ngenxa yesiyaluyalu nokubulala, ababemcela, kepha wamnikela uJesu kubo njengokuthanda kwabo.

23:26b.LUK.023.026 Kwathi bemuka naye, babamba uSimoni waseKhurene evela endle, bamthwesa isiphambano ukuba asithwale emva kukaJesu.

23:27b.LUK.023.027 Kwamlandela isixuku esikhulu sabantu, kukhona nabesifazane ababemkhalela, bemlilela.

23:28b.LUK.023.028 Kepha uJesu ephendukela kubo wathi: “Madodakazi aseJerusalema, ningangikhaleli mina, kodwa zikhaleleni nina nabantwana benu.

23:29b.LUK.023.029 Ngokuba bhekani, kuyeza izinsuku abayakusho ngazo ukuthi: ‘Zibusisiwe izinyumba nezizalo ezingazalanga namabele angancelisanga.’

23:30b.LUK.023.030 Khona “ ‘bayakuqala ukuthi ezintabeni: “Welani phezu kwethu,” nasemagangeni: “Sisibekeleni.” ’

23:31b.LUK.023.031 “Ngokuba uma benza lokho emthini oluhlaza, kuyakwenziwani kowomileyo.”

23:32b.LUK.023.032 Kwakukhona nabanye, izelelesi ezimbili, abayiswa ukuba babulawe kanye naye.

23:33b.LUK.023.033 Sebefikile endaweni ethiwa iKhanda bambethela khona nazo izelelesi, esinye ngakwesokunene nesinye ngakwesokhohlo.

23:34b.LUK.023.034 Kepha uJesu wathi: “Baba, bathethelele, ngokuba abakwazi abakwenzayo.” Babelana izingubo zakhe, benzelana inkatho.

23:35b.LUK.023.035 Abantu bema, bebukela; nababusi bamklolodela bathi: “Wasindisa abanye; kazisindise yena, uma enguKristu okhethiweyo kaNkulunkulu.”

23:36b.LUK.023.036 Namabutho ambhinqa, eza kuye, amnika uviniga,

23:37b.LUK.023.037 ethi: “Uma uyinkosi yabaJuda, zisindise.”

23:38b.LUK.023.038 Kwakukhona nombhalo phezu kwakhe othi: LO YINKOSI YABAJUDA.

23:39b.LUK.023.039 Njalo esinye sezelelesi ebeziphanyekiwe samhlambalaza sathi: “Wena awusiye uKristu na? Zisindise kanye nathi.”

23:40b.LUK.023.040 Sase siphendula esinye, sasithethisa sathi: “Nawe awumesabi uNkulunkulu, ingani ukulokhu kulahlwa nawe na?

23:41b.LUK.023.041 thina kambe ngokufaneleyo, ngokuba samukela okulingene nesikwenzile; kepha lo akenzanga lutho olubi.”

23:42b.LUK.023.042 Sase sithi: “Jesu, ngikhumbule, nxa usufike embusweni wakho.”

23:43b.LUK.023.043 Wathi kuso: “Ngiqinisile ngithi kuwe: Namuhla uzakuba nami eParadisi.”

23:44b.LUK.023.044 Kungaba yihora lesithupha kwase kuba mnyama emhlabeni wonke, kwaze kwaba yihora lesishiyagalolunye;

23:45b.LUK.023.045 kwafiphala ilanga, isihenqo sethempeli sadabuka phakathi.

23:46b.LUK.023.046 UJesu wamemeza ngezwi elikhulu, wathi: “Baba, ezandleni zakho ngiyawubeka umoya wami.” Eseshilo lokho wafa.

23:47b.LUK.023.047 Induna yekhulu ibone okwenzekileyo yamdumisa uNkulunkulu, yathi: “Nempela lowo muntu ube ngolungileyo.”

23:48b.LUK.023.048 Zonke izixuku ezazibuthanele ukubukela lokho sezibonile okwenzekileyo, zabuyela emuva, zishaya izifuba zazo.

23:49b.LUK.023.049 Bonke abazana naye nabesifazane ababemlandela bevela eGalile bema kude, bebuka lezo zinto.

23:50b.LUK.023.050 Bheka-ke, kwakukhona indoda, igama layo nguJosefa, eyilungu lomphakathi, indoda enhle nelungileyo —

23:51b.LUK.023.051 yona yayingavumanga icebo nesenzo sabo — eyase-Arimatheya umuzi wabaJuda, eyayibheke umbuso kaNkulunkulu;

23:52b.LUK.023.052 yona yaya kuPilatu, yacela isidumbu sikaJesu.

23:53b.LUK.023.053 Yasehlisa, yasisonga ngendwangu enhle, yasibeka ethuneni elaliqoshwe edwaleni, lapho kungakabekwa muntu khona.

23:54b.LUK.023.054 Kwakulusuku lokulungisela; isabatha lase lizakuqala.

23:55b.LUK.023.055 Abesifazane abeza naye bevela eGalile balandela, balibona ithuna nokubekwa kwesidumbu sakhe.

23:56b.LUK.023.056 Base bebuyela emuva, balungisa amakha namafutha; kepha ngesabatha baphumula njengokomthetho.

24

24:1b.LUK.024.001 Kepha ngosuku lokuqala lweviki, kuntwela ngenzansi, bafika ethuneni bephethe amakha ababewalungisile.

24:2b.LUK.024.002 Bafumana itshe ligingqiwe ethuneni.

24:3b.LUK.024.003 Kuthe bengena, abasifumananga isidumbu seNkosi uJesu.

24:4b.LUK.024.004 Kwathi besasambathekile yilokho, bheka, nanko amadoda amabili emi ngakubo, enezingubo ezicwebezelayo.

24:5b.LUK.024.005 Besesaba bekhothamela phansi ngobuso, athi kubo: “Nifunelani ophilayo kwabafileyo na?

24:6b.LUK.024.006 Kakho lapha, kepha uvukile; khumbulani ukukhuluma kwakhe kini eseseGalile,

24:7b.LUK.024.007 ethi: ‘INdodana yomuntu imelwe ukukhashelwa ezandleni zabantu abayizoni, ibethelwe, ivuke ngosuku lwesithathu.’ ”

24:8b.LUK.024.008 Bawakhumbula-ke amazwi akhe.

24:9b.LUK.024.009 Base bebuya ethuneni, babika konke lokho kwabayishumi nanye nakubo bonke abanye.

24:10b.LUK.024.010 KwakungoMariya Magdalena, noJowana, noMariya unina kaJakobe; nabanye ababe kanye nabo babatshela abaphostoli lokho.

24:11b.LUK.024.011 Kepha lawo mazwi aba njengokukhuluma okuyize kubo, kabaze bakholwa yibo.

24:12b.LUK.024.012 Khona uPetru wasuka, wagijimela ethuneni, wakhothama, wabona izindwangu zizodwa; wamuka, waya ekhaya emangele ngokwenzekileyo.

24:13b.LUK.024.013 Bheka-ke, ababili babo babehamba ngalona lolo suku, beya emzaneni othiwa i-Emawuse, ukude neJerusalema amastadiyu angamashumi ayisithupha.

24:14b.LUK.024.014 Babekhulumisana omunye nomunye ngazo zonke lezo zinto ezehlakeleyo.

24:15b.LUK.024.015 Kwathi besakhuluma bebuzana, uJesu uqobo wasondela, wahambisana nabo.

24:16b.LUK.024.016 Kepha amehlo abo abebambekile ukuba bangamazi.

24:17b.LUK.024.017 Wathi kubo: “Zindaba zini lezi enikhuluma ngazo omunye nomunye nihamba na?” Base bema benyukumele.

24:18b.LUK.024.018 Omunye, nguKleyophase igama lakhe, waphendula, wathi kuye: “Wena uyisihambi eJerusalema, ungoyedwa ongazazi izinto ezenzekileyo khona ngalezi zinsuku na?”

24:19b.LUK.024.019 Wayesethi kubo: “Zinto zini na?” Bathi kuye: “NgoJesu waseNazaretha obengumprofethi onamandla ngesenzo nangezwi phambi kukaNkulunkulu nabantu bonke,

24:20b.LUK.024.020 ukuthi abapristi abakhulu nababusi bethu bamkhaphela ukunqunyelwa ukufa, baze bambethela esiphambanweni.

24:21b.LUK.024.021 Thina-ke besethemba ukuthi nguye ozakuhlenga u-Israyeli; kodwa phezu kwalokho konke sekulusuku lwesithathu lezo zinto zenzekile.

24:22b.LUK.024.022 Futhi nabesifazane abathile bakithi basethusile, ababeyile ethuneni ekuseni;

24:23b.LUK.024.023 kuthe bengasifumani isidumbu sakhe, bafika bathi babone nombono wezingelosi ezithi uyaphila.

24:24b.LUK.024.024 Nabathile babakithi baya ethuneni, bakufumana kunjalo njengokuba beshilo abesifazane, kodwa yena uqobo abambonanga.”

24:25b.LUK.024.025 Wayesethi kubo: “O nina eningaqondiyo nenilibele enhliziyweni ukukholwa yikho konke abakushilo abaprofethi!

24:26b.LUK.024.026 UKristu ubengamelwe yini ukuhlupheka ngalokho, aze angene enkazimulweni yakhe na?”

24:27b.LUK.024.027 Wayesethathela kuMose nakubaprofethi bonke, wabachasisela emibhalweni okuqondene naye.

24:28b.LUK.024.028 Base besondela emzaneni ababeya kuwo yena washaya sengathi udlulela phambili.

24:29b.LUK.024.029 Bamncengisisa bathi: “Hlala nathi, ngokuba sekuzakuhlwa, nemini isiyadlula.” Wangena wahlala nabo.

24:30b.LUK.024.030 Kwathi esehlezi nabo ekudleni, wathabatha isinkwa, wabonga, wasihlephula, wabanika.

24:31b.LUK.024.031 Amehlo abo ayesevuleka, bamazi; wayesenyamalala kubo.

24:32b.LUK.024.032 Bathi omunye komunye: “Inhliziyo yethu ibingavuthi yini phakathi kwethu, lapho ekhuluma kithi endleleni, nalapho esivulela imibhalo, na?”

24:33b.LUK.024.033 Base besuka ngasona leso sikhathi, baphindela eJerusalema, bafumana abayishumi nanye nababe nabo behlangene ndawonye,

24:34b.LUK.024.034 bethi: “Impela iNkosi ivukile, ibonakele kuSimoni.”

24:35b.LUK.024.035 Base belanda nabo okwenzekileyo endleleni, nokuthi yaziwa kanjani yibo ekuhlephuleni isinkwa.

24:36b.LUK.024.036 Besakhuluma lokho, yena uqobo wema phakathi kwabo, wathi kubo: “Ukuthula makube kinina.”

24:37b.LUK.024.037 Kepha bashaywa luvalo, besaba bethi babona ithongo.

24:38b.LUK.024.038 Wayesethi kubo: “Nikhathazekeleni na? Kuvelelani imizindlo ezinhliziyweni zenu na?

24:39b.LUK.024.039 Bhekani izandla zami nezinyawo zami ukuthi yimina uqobo; ngiphatheni, nibone, ngokuba ithongo alinanyama namathambo, njengokuba ningibona nginakho.”

24:40b.LUK.024.040 Esekushilo lokho wababonisa izandla nezinyawo.

24:41b.LUK.024.041 Kepha bengakakholwa ngenxa yentokozo bemangala, wathi kubo: “Ninakho ukudla lapha na?”

24:42b.LUK.024.042 Bamnika iqatha lenhlanzi eyosiweyo neqa lezinyosi.

24:43b.LUK.024.043 Wakuthatha, wadla phambi kwabo.

24:44b.LUK.024.044 Wayesethi kubo: “Yiwo lawo mazwi ami engawakhuluma kini ngisenani okuthi: ‘Kumelwe ukugcwaliseka konke okulotshwe ngami emthethweni kaMose, nakubaprofethi nasemaHutsheni.’ ”

24:45b.LUK.024.045 Khona wayesevula ingqondo yabo, ukuze baqonde imibhalo.

24:46b.LUK.024.046 Wathi kubo: “Kulotshiwe kanje ukuthi uzakuhlupheka uKristu, avuke kwabafileyo ngosuku lwesithathu,

24:47b.LUK.024.047 kushunyayelwe egameni lakhe ukuphenduka, kube ngukuthethelelwa kwezono ezizweni zonke, kuqalwe eJerusalema.

24:48b.LUK.024.048 Nina-ke ningofakazi balezi zinto.

24:49b.LUK.024.049 Bhekani, ngiyathumela kini isithembiso sikaBaba; kepha hlalani emzini, nize nembathiswe amandla avela phezulu.”

24:50b.LUK.024.050 Wabahola, baze bafika ngaseBethaniya, waphakamisa izandla zakhe, wababusisa.

24:51b.LUK.024.051 Kwathi esababusisa, wahlukana nabo, wenyuselwa ezulwini.

24:52b.LUK.024.052 Bakhuleka kuye, baphindela eJerusalema benokuthokoza okukhulu.

24:53b.LUK.024.053 Babekhona ethempelini njalo bemdumisa uNkulunkulu.