Mark (Zulu)

1

1:1b.MAR.001.001 Ukuqala kwevangeli likaJesu Kristu, iNdodana kaNkulunkulu.

1:2b.MAR.001.002 Njengokulotshwe kumprofethi u-Isaya ukuthi: “Bheka, ngiyasithuma isithunywa sami phambi kwakho esiyakulungisa indlela yakho,” —

1:3b.MAR.001.003 “izwi lomemezayo ehlane, lithi: ‘Lungisani indlela yeNkosi, nenze imikhondo yayo iqonde,’ ”

1:4b.MAR.001.004 kwavela uJohane ebhapathiza ehlane, eshumayela umbhapathizo wokuphenduka, kube ngukuthethelelwa kwezono.

1:5b.MAR.001.005 Kwaphumela kuye izwe lonke laseJudiya nabo bonke abaseJerusalema, babhapathizwa nguye emfuleni iJordani, bevuma izono zabo.

1:6b.MAR.001.006 UJohane wayembethe eyoboya bekamela, enoqhotho lwesikhumba okhalweni lwakhe, edla izinkumbi nezinyosi zasendle.

1:7b.MAR.001.007 Washumayela wathi: “Emva kwami kuyeza onamandla kunami, engingafanele ukuba ngikhothame ngithukulule umchilo wezicathulo zakhe.

1:8b.MAR.001.008 Mina nginibhapathize ngamanzi, kepha yena uzakunibhapathiza ngoMoya oNgcwele.”

1:9b.MAR.001.009 Kwathi ngaleyo mihla kwafika uJesu evela eNazaretha laseGalile, wabhapathizwa nguJohane eJordani.

1:10b.MAR.001.010 Wanele ukukhuphuka emanzini, wabona izulu livuleka, noMoya ehlela phezu kwakhe njengejuba.

1:11b.MAR.001.011 Kwavela izwi ezulwini, lithi: “Wena uyiNdodana yami ethandekayo; ngithokozile ngawe.”

1:12b.MAR.001.012 Masinyane uMoya wayesemqhubela ehlane.

1:13b.MAR.001.013 Wayekhona ehlane izinsuku ezingamashumi amane elingwa nguSathane; wayendawonye nezilwane; izingelosi zamkhonza.

1:14b.MAR.001.014 Emva kokuboshwa kukaJohane uJesu wafika eGalile eshumayela ivangeli likaNkulunkulu,

1:15b.MAR.001.015 wathi: “Isikhathi sigcwalisekile, umbuso kaNkulunkulu ususondele; phendukani, nikholwe yivangeli.”

1:16b.MAR.001.016 Kwathi edlula ngaselwandle lwaseGalile, wabona oSimoni no-Andreya umfowabo kaSimoni bephonsa inetha elwandle, ngokuba babe ngabadobi.

1:17b.MAR.001.017 UJesu wayesethi kubo: “Ngilandeleni; ngiyakunenza nibe ngabadobi babantu.”

1:18b.MAR.001.018 Base bewashiya masinyane amanetha, bamlandela.

1:19b.MAR.001.019 Eseqhubekile ingcosana wabona uJakobe kaZebedewu noJohane umfowabo besemkhunjini, belungisa amanetha.

1:20b.MAR.001.020 Wababiza masinyane; base bemshiya uyise uZebedewu emkhunjini kanye nezisebenzi, bamlandela.

1:21b.MAR.001.021 Bangena eKapernawume. Kwathi masinyane ngesabatha wangena esinagogeni, wafundisa.

1:22b.MAR.001.022 Bamangala ngokufundisa kwakhe; ngokuba wabafundisa njengonamandla, kungenjengababhali.

1:23b.MAR.001.023 Kwakukhona-ke esinagogeni umuntu onomoya ongcolileyo, wamemeza,

1:24b.MAR.001.024 wathi: “Sinamsebenzi muni nawe Jesu waseNazaretha? Uze ukusibhubhisa na? Ngiyakwazi ukuba ungubani — ungoNgcwele kaNkulunkulu.”

1:25b.MAR.001.025 UJesu wamkhuza wathi: “Thula, uphume kuye!”

1:26b.MAR.001.026 Umoya ongcolileyo wamhlukumeza, wakhala ngezwi elikhulu, waphuma kuye.

1:27b.MAR.001.027 Bethuka bonke, babuzana bodwa, bathi: “Kuyini lokhu? Yisifundiso esisha esinamandla; nawomoya abangcolileyo uyabayala, bamlalele.”

1:28b.MAR.001.028 Udumo lwakhe lwase lwanda masinyane kuso sonke isifunda saseGalile.

1:29b.MAR.001.029 Sebephume esinagogeni bangena masinyane endlini kaSimoni no-Andreya, benoJakobe noJohane.

1:30b.MAR.001.030 Umkhwekazi kaSimoni wayelele enomkhuhlane; bashesha bamtshela ngaye.

1:31b.MAR.001.031 Waya kuye, wamlulamisa embamba ngesandla; umkhuhlane wamyeka, wabakhonza.

1:32b.MAR.001.032 Kwathi ukuba kuhlwe, selishonile ilanga, baletha kuye bonke abagulayo nabakhwelwe ngamademoni.

1:33b.MAR.001.033 Umuzi wonke wawubuthene ngasemnyango.

1:34b.MAR.001.034 Waphulukisa abaningi abaphethwe yizifo ngezifo, wakhipha amademoni amaningi, wayengawavumeli amademoni ukukhuluma, ngokuba ayemazi.

1:35b.MAR.001.035 Ekuseni kusemnyama kakhulu, wavuka waphuma, waya endaweni eyihlane, wakhuleka khona.

1:36b.MAR.001.036 USimoni nababe naye bamlandela ngokuphuthuma.

1:37b.MAR.001.037 Sebemfumene bathi kuye: “Bonke bayakufuna.”

1:38b.MAR.001.038 Wathi kubo: “Masiye kwezinye izindawo emizaneni eseduze ukuba ngishumayele nakhona; ngokuba ngiphumele khona lokho.”

1:39b.MAR.001.039 Wahamba eshumayela emasinagogeni abo kulo lonke iGalile, ekhipha amademoni.

1:40b.MAR.001.040 Kwafika kuye onochoko, wamncenga eguqa ngamadolo, ethi kuye: “Uma uthanda, ungangihlambulula.”

1:41b.MAR.001.041 UJesu wamhawukela, welula isandla, wamphatha, wathi kuye: “Ngiyathanda; hlambuluka.”

1:42b.MAR.001.042 Lwasuka masinyane uchoko kuye, wahlambuluka.

1:43b.MAR.001.043 Esemyalisisile washesha wammukisa,

1:44b.MAR.001.044 wathi kuye: “Bheka, ungasho lutho kumuntu, kepha hamba uzibonakalise kumpristi, unikele ngokuhlanjululwa kwakho lokho okwayalelwa nguMose, kube ngubufakazi kubo.”

1:45b.MAR.001.045 Kepha yena esephumile waqala ukuyandisa kakhulu nokuyidumisa le ndaba, ngangokuba uJesu wayengasenakungena emzini obala; wayesehlala ngaphandle ezindaweni eziyihlane; beza kuye bevela nxazonke.

2

2:1b.MAR.002.001 Wabuye wangena eKapernawume emva kwezinsuku ezithile; kwezwakala ukuthi usendlini.

2:2b.MAR.002.002 Kwase kubuthana abaningi, akwabe kusabakho ndawo nangasemnyango; wakhuluma izwi kubo.

2:3b.MAR.002.003 Beza kuye bethwele umuntu ofe uhlangothi, ephethwe ngabantu abane.

2:4b.MAR.002.004 Bengenakusondela kuye ngenxa yesixuku baqaqa uphahla lapho ekhona, bathi sebebhobozile behlisa uhlaka alele kulo ofe uhlangothi.

2:5b.MAR.002.005 UJesu ebona ukukholwa kwabo wathi kofe uhlangothi: “Ndodana, uthethelelwe izono zakho.”

2:6b.MAR.002.006 Kepha kwakukhona ababhali abathile behlezi khona, bezindla ezinhliziyweni zabo ngokuthi:

2:7b.MAR.002.007 “Lo ukhulumelani kanje na? Uyahlambalaza. Ngubani ongathethelela izono, kungeyena uNkulunkulu yedwa na?”

2:8b.MAR.002.008 UJesu ekwazi masinyane emoyeni wakhe ukuthi bazindla kanjalo phakathi kwabo, wathi kubo: “Nizindlelani ngalokhu ezinhliziyweni zenu na?

2:9b.MAR.002.009 Yikuphi okulula ukuthi kofe uhlangothi: ‘Uthethelelwe izono zakho,’ noma ukuthi: ‘Vuka, uthathe uhlaka lwakho, uhambe,’ na?

2:10b.MAR.002.010 Kepha ukuze nazi ukuthi iNdodana yomuntu inamandla emhlabeni okuthethelela izono” — wathi kofe uhlangothi —

2:11b.MAR.002.011 “ngithi kuwe: Vuka, uthathe uhlaka lwakho, uye endlini yakho.”

2:12b.MAR.002.012 Wayesevuka, wathatha masinyane uhlaka lwakhe, waphuma phambi kwabo bonke, baze bamangala bonke, bamdumisa uNkulunkulu, bathi: “Asizange sikubone okunje.”

2:13b.MAR.002.013 Waphuma futhi, waya ngaselwandle; isixuku sonke sabantu seza kuye, wabafundisa.

2:14b.MAR.002.014 Wathi edlula, wambona uLevi ka-Alfewu ehlezi endaweni yokuthela, wathi kuye: “Ngilandele.” Wasuka-ke, wamlandela.

2:15b.MAR.002.015 Kwathi ehlezi ekudleni endlini yakhe, abathelisi abaningi nezoni bahlala noJesu nabafundi bakhe; ngokuba babe baningi, bamlandela.

2:16b.MAR.002.016 Khona ababhali babaFarisi bembona edla nezoni nabathelisi bathi kubafundi bakhe: “Yini ukuba adle nabathelisi nezoni na?”

2:17b.MAR.002.017 UJesu ekuzwa lokho wathi kubo: “Abaphilileyo abadingi inyanga, ngabagulayo bodwa; kangizelanga ukubiza abalungileyo kodwa izoni.”

2:18b.MAR.002.018 Abafundi bakaJohane nabaFarisi babezila ukudla; beza bathi kuye: “Yini ukuba abafundi bakaJohane nabafundi babaFarisi bazile ukudla, kodwa abafundi bakho bangazili na?”

2:19b.MAR.002.019 UJesu wathi kubo: “Abayeni bangazila yini, umyeni esenabo na? Bese naye umyeni bangezile.

2:20b.MAR.002.020 Kodwa zizakufika izinsuku, lapho umyeni ezakususwa kubo; yikhona-ke bezakuzila ngalolo suku.

2:21b.MAR.002.021 Akakho othungela isiziba esingakashukeki engutsheni endala, funa okusha okubekelwayo kuklebhule kwendala, kwande ukuklebhuka.

2:22b.MAR.002.022 Futhi akakho othela iwayini elisha ezimvabeni ezindala, funa iwayini liqhumise izimvaba, lichitheke iwayini, nezimvaba zonakale; kodwa iwayini elisha lithelwa ezimvabeni ezintsha.”

2:23b.MAR.002.023 Kwathi edabula amasimu ngesabatha, abafundi bakhe baqala ukukha izikhwebu behamba.

2:24b.MAR.002.024 Base bethi kuye abaFarisi: “Bheka, bakwenzelani ngesabatha okungavunyelwe na?”

2:25b.MAR.002.025 Wathi kubo: “Anizange nifunde yini akwenzayo uDavide mhla eswele, elambile yena nababe naye

2:26b.MAR.002.026 ukuthi wangena endlini kaNkulunkulu enkathini ka-Abiyathara umpristi omkhulu, wadla izinkwa zokubukwa ezingavunyelwe ukudliwa muntu, ngabapristi bodwa, wanika nababe naye, na?”

2:27b.MAR.002.027 Wayesethi kubo: “Isabatha lenzelwa umuntu, umuntu akenzelwanga isabatha.

2:28b.MAR.002.028 Ngokunjalo iNdodana yomuntu iyinkosi neyesabatha.”

3

3:1b.MAR.003.001 Khona wabuye wangena esinagogeni. Kwakukhona lapho umuntu onesandla esishwabeneyo.

3:2b.MAR.003.002 Bamqaphela ukuba uzakumphilisa yini ngesabatha, ukuze bambeke icala.

3:3b.MAR.003.003 Wathi kumuntu onesandla esishwabeneyo: “Sukuma, ume phakathi.”

3:4b.MAR.003.004 Wayesethi kubo: “Kuvunyelwe ngesabatha ukwenza okuhle noma okubi yini, ukusindisa umuntu noma ukumbulala na?” Kepha bathula.

3:5b.MAR.003.005 Waqalaza ebabuka ngokuthukuthela, edabukile ngobulukhuni benhliziyo yabo; wayesethi kulowo muntu: “Yelula isandla.” Waselula, saphiliswa isandla sakhe.

3:6b.MAR.003.006 AbaFarisi base bephuma masinyane bacebisana ngaye nabakaHerode ukuthi bangambhubhisa kanjani.

3:7b.MAR.003.007 UJesu wasuka kanye nabafundi bakhe, waya ngaselwandle; isixuku esikhulu samlandela sivela eGalile, naseJudiya,

3:8b.MAR.003.008 naseJerusalema, nase-Idumiya, nangaphesheya kweJordani, nangaseTire, naseSidoni; isixuku esikhulu sesizwile konke akwenzayo seza kuye.

3:9b.MAR.003.009 Wayeseyala abafundi bakhe ukuba isikebhe simlindele ngenxa yesixuku sabantu, ukuze bangamcindezeli,

3:10b.MAR.003.010 ngokuba wayephulukisa abaningi, kwaze kwathi bonke abanezifo bawela phezu kwakhe ukuba bamnamathe.

3:11b.MAR.003.011 Nawomoya abangcolileyo bathi ukuba bambone, bawa phansi phambi kwakhe, bamemeza bathi: “Wena uyiNdodana kaNkulunkulu.”

3:12b.MAR.003.012 Wabayalisisa ukuba bangamzwakalisi.

3:13b.MAR.003.013 Wayesenyukela entabeni, wabizela kuye abebafuna yena; beza kuye.

3:14b.MAR.003.014 Wamisa abayishumi nambili ukuba babe naye nokuba abathume baye kushumayela,

3:15b.MAR.003.015 babe namandla okukhipha amademoni.

3:16b.MAR.003.016 Wayesemisa laba abayishumi nambili: uSimoni owamqamba igama lokuthi uPetru,

3:17b.MAR.003.017 noJakobe kaZebedewu, noJohane umfowabo kaJakobe; laba wabaqamba igama lokuthi oBowanergesi okungukuthi amadodana okuduma;

3:18b.MAR.003.018 no-Andreya, noFiliphu, noBartolomewu, noMathewu, noTomase, noJakobe ka-Alfewu, noThadewu, noSimoni umKhanani,

3:19b.MAR.003.019 noJuda Iskariyothe owamkhaphelayo.

3:20b.MAR.003.020 Wayesefika ekhaya; isixuku sabuthana futhi, ababe besaba nathuba lokudla nasinkwa.

3:21b.MAR.003.021 Abakubo sebekuzwile baphuma ukuyombamba, ngokuba bathi uyahlanya.

3:22b.MAR.003.022 Nababhali abehla bevela eJerusalema bathi: “UnoBelzebule, ukhipha amademoni ngombusi wamademoni.”

3:23b.MAR.003.023 Wayesebabiza, wakhuluma kubo ngemifanekiso, ethi: “USathane angakhipha kanjani uSathane na?

3:24b.MAR.003.024 Uma umbuso wahlukene wodwa, lowo mbuso ungeme.

3:25b.MAR.003.025 Nendlu, uma yahlukene yodwa, leyo ndlu ayizukuma.

3:26b.MAR.003.026 NoSathane, uma ezivukela yena, ahlukane, akanakuma, kepha uyaphela.

3:27b.MAR.003.027 Yebo, akakho ongangena endlini yesiqhwaga, aphange impahla yaso, uma engabophi kuqala isiqhwaga, andukuba aphange indlu yaso.

3:28b.MAR.003.028 Ngiqinisile ngithi kini: Abantwana babantu bayakuthethelelwa izono zonke nokuhlambalaza noma kungakanani abangahlambalaza ngakho,

3:29b.MAR.003.029 kepha lowo ohlambalaza uMoya oNgcwele kanakuthethelelwa naphakade, kodwa unecala lesono esingapheliyo.”

3:30b.MAR.003.030 Ngokuba bathi unomoya ongcolileyo.

3:31b.MAR.003.031 Kwase kufika unina nabafowabo, bema ngaphandle, bathumela kuye bembiza.

3:32b.MAR.003.032 Isixuku sabantu sasimphahlile; bathi kuye: “Bheka, unyoko nabafowenu nawodadewenu bangaphandle bekufuna.”

3:33b.MAR.003.033 Wabaphendula wathi: “Ngubani umame nabafowethu na?”

3:34b.MAR.003.034 Waqalaza ebuka ababehlezi bemphahlile, wathi: “Bhekani, nangu umame nabafowethu.

3:35b.MAR.003.035 Ngokuba owenza intando kaNkulunkulu nguye ongumfowethu nodadewethu nomame.”

4

4:1b.MAR.004.001 Khona wabuye waqala ukufundisa ngaselwandle. Kwabuthana kuye isixuku esikhulu kakhulu, waze wangena emkhunjini, wahlala elwandle; isixuku sonke sasisemhlabathini ngaselwandle.

4:2b.MAR.004.002 Wabafundisa okuningi ngemifanekiso; wathi kubo ekufundiseni kwakhe:

4:3b.MAR.004.003 “Lalelani; bhekani, kwaphuma umhlwanyeli ukuyohlwanyela.

4:4b.MAR.004.004 Kwathi ekuhlwanyeleni kwakhe enye imbewu yawela ngasendleleni; kwafika izinyoni, zayidla zayiqeda.

4:5b.MAR.004.005 Enye yawela edwaleni, lapho yayingenamhlabathi omningi khona; yamila masinyane, ngokuba ingenamhlabathi ojulileyo.

4:6b.MAR.004.006 Kwathi ukuba liphume ilanga, yahamuka; nangokuba ingenampande, yabuna.

4:7b.MAR.004.007 Enye yawela emeveni; ameva akhula, ayiminyanisa, ayaze yathela isithelo.

4:8b.MAR.004.008 Enye yawela emhlabathini omuhle; yahluma, yakhula, yathela isithelo, yaveza ngamashumi amathathu, nangamashumi ayisithupha, nangekhulu.”

4:9b.MAR.004.009 Wayesethi: “Onezindlebe zokuzwa makezwe.”

4:10b.MAR.004.010 Lapho esengasesitha, ababe naye kanye nabayishumi nambili bambuza ngale mifanekiso.

4:11b.MAR.004.011 Wathi kubo: “Nina niphiwe imfihlakalo yombuso kaNkulunkulu, kodwa abangaphandle benzelwa konke ngemifanekiso,

4:12b.MAR.004.012 ukuze ngokubona babone, bangabonisisi, nangokuzwa bezwe, bangaqondi, funa baphenduke, bathethelelwe.”

4:13b.MAR.004.013 Wayesethi kubo: “Aniwazi lo mfanekiso; pho, niyakuyazi kanjani yonke imifanekiso na?

4:14b.MAR.004.014 Umhlwanyeli uhlwanyela izwi.

4:15b.MAR.004.015 Abangasendleleni yilabo abathi lapho kuhlwanyelwa khona izwi, nanxa sebelizwile, kufike masinyane uSathane, alisuse izwi elihlwanyelwe kubo.

4:16b.MAR.004.016 Kanjalo abahlwanyelwe edwaleni yilabo abathi sebelizwile izwi, balamukele masinyane ngokuthokoza;

4:17b.MAR.004.017 kepha kabanampande phakathi kwabo, kodwa bahlala isikhashana nje, kuthi sekuvele ukuhlupheka nokuzingelwa ngenxa yezwi, bakhubeke masinyane.

4:18b.MAR.004.018 Abanye bangabahlwanyelwe emeveni; yibo abalizwile izwi,

4:19b.MAR.004.019 kepha iminako yalesi sikhathi, nokukhohlisa kwengcebo, nokunxanela ezinye izinto kungena kuliminyanise izwi, libe ngelingatheliyo.

4:20b.MAR.004.020 Nabahlwanyelwe emhlabathini omuhle yilabo abalizwa izwi, balamukele, bathele isithelo ngamashumi amathathu, nangamashumi ayisithupha, nangekhulu.”

4:21b.MAR.004.021 Wayesethi kubo: “Imbala isibani siza ukuba sibekwe phansi kwesitsha nokuba phansi kombhede yini, singabekwa othini, na?

4:22b.MAR.004.022 Ngokuba akukho okusithekileyo okungayikuhlalukiswa; akukho okuyisifuba okungayikuba sobala.

4:23b.MAR.004.023 Uma ekhona onezindlebe zokuzwa, makezwe.”

4:24b.MAR.004.024 Wayesethi kubo: “Qaphelani enikuzwayo; ngaleso silinganiso enilinganisa ngaso nani niyakulinganiselwa ngaso, nenezelwe nina.

4:25b.MAR.004.025 Ngokuba onakho uyakuphiwa; kepha ongenakho uyakwamukwa nalokho anakho.”

4:26b.MAR.004.026 Wayesethi: “Unjalo umbuso kaNkulunkulu; unjengokuba umuntu ephonsa imbewu emhlabathini,

4:27b.MAR.004.027 alale, avuke ubusuku nemini, imibewu imile, ikhule, engazi ukuthi kanjani.

4:28b.MAR.004.028 Umhlabathi uthela isithelo ngokwawo, kuqala ikhaba, khona isikhwebu, besekuba yizinhlamvu ezipheleleyo esikhwetshini.

4:29b.MAR.004.029 Nxa sesivuthiwe isithelo, afake masinyane isikela, ngokuba ukuvuna sekufikile.”

4:30b.MAR.004.030 Wathi futhi: “Siyakuwufanisa nani umbuso kaNkulunkulu? Siyakuwuchaza ngamfanekiso muni na?

4:31b.MAR.004.031 Unjengenhlamvu yesinaphi ethi, nxa ihlwanyelwe emhlabathini, incinyane kunazo zonke izimbewu ezisemhlabeni,

4:32b.MAR.004.032 kodwa nxa isihlwanyelwe imila ibe nkulu kunazo zonke izilimo, ixhante amagatsha amakhulu, ukuze izinyoni zezulu zakhele emthunzini wawo.”

4:33b.MAR.004.033 Walikhuluma izwi kubo ngemifanekiso eminingi enjalo njengamandla abo okuzwa;

4:34b.MAR.004.034 kodwa ngaphandle komfanekiso kakhulumanga kubo; kepha sebebodwa wabachasisela abafundi bakhe konke.

4:35b.MAR.004.035 Ngalolo suku sekuhlwile, wathi kubo: “Asiwele siye ngaphesheya.”

4:36b.MAR.004.036 Base bemukisa isixuku, bahamba naye, njengalokho ebesemkhunjini; kwakukhona neminye imikhumbi ihambisana naye.

4:37b.MAR.004.037 Kwase kuvuka isivunguvungu esikhulu somoya, amaza aphonseka phakathi emkhunjini, umkhumbi waze waqala ukugcwala.

4:38b.MAR.004.038 Kepha yena wayengasemuva emkhunjini elele esicamelweni; bamvusa, bathi kuye: “Mfundisi, awunaki, nakuba sibhubha, na?”

4:39b.MAR.004.039 Wayesevuka, wakhuza umoya, wathi kulo ulwandle: “Thula, uthi du.” Kwanqamuka umoya, kwaba khona ukuthula okukhulu.

4:40b.MAR.004.040 Wathi kubo: “Yini ukuba nesabe kangaka na? Yini ukuba ningabi nakukholwa na?”

4:41b.MAR.004.041 Besaba ngokwesaba okukhulu, bathi omunye komunye: “Kanti lo ungubani, lokhu nomoya nolwandle kuyamlalela?”

5

5:1b.MAR.005.001 Base befika phesheya kolwandle ezweni lamaGerasa.

5:2b.MAR.005.002 Esephume emkhunjini, kwahlangana naye masinyane umuntu ovela emathuneni, enomoya ongcolileyo.

5:3b.MAR.005.003 Wayehlala emathuneni, kungasekho muntu ongambopha nangeketanga;

5:4b.MAR.005.004 ngokuba wayeseboshwe kaningi ngawozankosi nangamaketanga, kepha amaketanga ayegqashuliwe nguye nawozankosi babephuliwe, kungekho noyedwa owayenamandla okumthambisa.

5:5b.MAR.005.005 Ngesikhathi sonke ubusuku nemini wayesemathuneni nasezintabeni, ememeza, ezilimaza ngamatshe.

5:6b.MAR.005.006 Wathi ukuba ambone uJesu esekude, wagijima, wakhuleka kuye;

5:7b.MAR.005.007 wayesememeza ngezwi elikhulu, ethi: “Nginamsebenzi muni nawe Jesu, Ndodana kaNkulunkulu oPhezukonke? Ngikufungisa uNkulunkulu, ungangihluphi.”

5:8b.MAR.005.008 Ngokuba wathi kuye: “Phuma kulo muntu, moya ongcolileyo.”

5:9b.MAR.005.009 Wayesembuza ethi: “Ngubani igama lakho?” Wathi kuye: “NginguLegiyona igama lami, ngokuba sibaningi.”

5:10b.MAR.005.010 Wamncenga kakhulu ukuba angabamukisi kulelo zwe.

5:11b.MAR.005.011 Kwakukhona lapho ngasentabeni umhlambi omkhulu wezingulube ziklabile.

5:12b.MAR.005.012 Bamncenga bathi: “Sithumele ezingulubeni ukuba singene kuzo.”

5:13b.MAR.005.013 Wabavumela. Omoya abangcolileyo baphuma, bangena ezingulubeni; umhlambi wagulukudela eweni, waphonseka elwandle kungathi izinkulungwane ezimbili, zaminza elwandle.

5:14b.MAR.005.014 Ababezalusa babaleka, baya babika emzini nasemaphandleni; base beza ukuyobona okwenzekileyo.

5:15b.MAR.005.015 Bafika kuJesu, bambona obekhwelwe ngamademoni ehlezi embethe, esangulukile, yena owayenelegiyona; base besaba.

5:16b.MAR.005.016 Ababekubonile babatshela ukuthi kwenzeke kanjani kowayekhwelwe ngamademoni, nangezingulube.

5:17b.MAR.005.017 Base beqala ukumncenga ukuba amuke ezweni lakubo.

5:18b.MAR.005.018 Wathi ukuba angene emkhunjini, lowo owayekhwelwe ngamademoni wamncenga ukuba abe naye.

5:19b.MAR.005.019 Akamvumelanga, kepha wathi kuye: “Hamba uye ekhaya kwabakini, ubabikele ukuthi kungakanani iNkosi ekwenzele khona, yakuhawukela.”

5:20b.MAR.005.020 Wamuka-ke, waqala ukulanda eDekapholi ngokuthi kungakanani abekwenzile kuye uJesu; bamangala bonke.

5:21b.MAR.005.021 Khona uJesu esebuye ewelele ngaphesheya ngomkhumbi, kwabuthana isixuku esikhulu kuye engaselwandle.

5:22b.MAR.005.022 Kwase kufika omunye wabaphathi besinagoge, nguJayiru igama lakhe, owathi ukuba ambone, waziphonsa phansi ngasezinyaweni zakhe,

5:23b.MAR.005.023 wamncenga kakhulu, wathi: “Indodakazi yami isiyalela; ake uze, ubeke izandla phezu kwayo ukuba isindiswe, iphile.”

5:24b.MAR.005.024 Wahamba naye. Isixuku esikhulu samlandela, samcindezela.

5:25b.MAR.005.025 Owesifazane owayenomopho iminyaka eyishumi nambili,

5:26b.MAR.005.026 ehluphekile ngokuningi ezinyangeni eziningi, echithile konke ayenakho, engasizakalanga ngalutho, kodwa kwayilokhu kuqhubeka,

5:27b.MAR.005.027 esezwile ngoJesu, weza esixukwini ngasemuva, wathinta ingubo yakhe,

5:28b.MAR.005.028 ngokuba wathi: “Uma ngingathinta nje izingubo zakhe, ngizakusindiswa.”

5:29b.MAR.005.029 Kwanqamuka masinyane umthombo wegazi lakhe, wezwa emzimbeni ukuthi uphulukile enhluphekweni yakhe.

5:30b.MAR.005.030 Wanele ukuzwa uJesu phakathi kwakhe ukuthi amandla aphumile kuye, waphendukela esixukwini, wathi: “Ngubani othinte izingubo zami na?”

5:31b.MAR.005.031 Abafundi bakhe bathi kuye: “Uyabona isixuku sikucindezela, usuthi: ‘Ngubani ongithintileyo na?’ ”

5:32b.MAR.005.032 Waqalaza ukuba ambone owenzile lokho.

5:33b.MAR.005.033 Khona owesifazane esaba ethuthumela, azi okwenzekile kuye, weza waziphonsa phansi phambi kwakhe, wamtshela iqiniso lonke.

5:34b.MAR.005.034 Wayesethi kuye: “Ndodakazi, ukukholwa kwakho kukusindisile; hamba ube nokuthula; usuphulukile enhluphekweni yakho.”

5:35b.MAR.005.035 Esakhuluma, kwafika abomphathi wesinagoge, bathi: “Indodakazi yakho isifile; usamkhathazelani uMfundisi na?”

5:36b.MAR.005.036 Kwathi ukuba uJesu ezwile izwi elishiwoyo, wathi kumphathi wesinagoge: “Ungesabi, kholwa kuphela.”

5:37b.MAR.005.037 Akavumelanga muntu amlandele, kuphela oPetru, noJakobe, noJohane umfowabo kaJakobe.

5:38b.MAR.005.038 Bafika-ke endlini yomphathi wesinagoge, wabona isiyaluyalu nabakhalayo nabalila kakhulu.

5:39b.MAR.005.039 Wangena, wathi kubo: “Niyaluzelani, nikhalelani na? Umntwana akafile, kodwa ulele.”

5:40b.MAR.005.040 Bamhleka usulu. Kepha yena wabakhipha bonke, wathatha uyise womntwana nonina kanye nababe naye, wangena lapho kulele khona umntwana.

5:41b.MAR.005.041 Wabamba umntwana ngesandla, wathi kuye: “Thalitha, kumi,” okungukuthi ngokuhunyushwa: “Ntombazana, ngithi kuwe, vuka!”

5:42b.MAR.005.042 Yayisivuka masinyane intombazana, yahamba; ngokuba yayineminyaka eyishumi nambili. Khona bamangala ngokumangala okukhulu.

5:43b.MAR.005.043 Wabayalisisa ukuba lokhu kungaziwa muntu; futhi wathi mayiphiwe ukudla.

6

6:1b.MAR.006.001 Khona wamuka lapho, waya ezweni lakubo; abafundi bakhe bamlandela.

6:2b.MAR.006.002 Sekufikile isabatha, waqala ukufundisa esinagogeni. Abaningi abamuzwayo bamangala bathi: “Lo ukuthathaphi lokhu na? Ukuhlakanipha kuni akunikiwe lona na? Nemisebenzi yamandla enje yenziwe ngezandla zakhe na?

6:3b.MAR.006.003 Lo akusiye umbazi, indodana kaMariya, nomfowabo kaJakobe, noJose, noJuda, noSimoni, na? Nawodadewabo abakho yini lapha kithi na?” Base bekhubeka ngaye.

6:4b.MAR.006.004 Wayesethi kubo uJesu: “Umprofethi kadelelwa ngaphandle kwasezweni lakubo, nasezihlotsheni zakhe, nasendlini yakwabo.”

6:5b.MAR.006.005 Wayengenakwenza lapho nowodwa umsebenzi wamandla ngaphandle kokuthi wabeka izandla phezu kwabagulayo abayingcosana, wabaphulukisa.

6:6b.MAR.006.006 Wamangala ngokungakholwa kwabo. Wahamba imizi ngemizi efundisa.

6:7b.MAR.006.007 Wayesebabiza abayishumi nambili, waqala ukubathuma ngababili, wabanika amandla phezu kwawomoya abangcolileyo.

6:8b.MAR.006.008 Wabayala ukuba bangaphathi lutho lwendlela, kuphela udondolo lodwa, bangaphathi nasinkwa, nasikhwama, nathusi emixhakeni,

6:9b.MAR.006.009 kepha bafake izicathulo, bangembathi kodwa amabhantshi amabili.

6:10b.MAR.006.010 Wathi kubo: “Nakuphi lapho ningena khona endlini, hlalani kuyo, nize nimuke khona.

6:11b.MAR.006.011 Nayiphi indawo engayikunamukela, nalapho bengayikunizwa khona, anothi nimuka kuyo, nivuthulule uthuli oluphansi kwezinyawo zenu, kube ngubufakazi kubo.”

6:12b.MAR.006.012 Base behamba beshumayela ukuba abantu baphenduke.

6:13b.MAR.006.013 Bakhipha amademoni amaningi, bagcoba abagulayo abaningi ngamafutha, babaphulukisa.

6:14b.MAR.006.014 Yayisikuzwa inkosi uHerode, ngokuba lalidumile igama lakhe. Kwathiwa uJohane uMbhapathizi uvukile kwabafileyo; kungalokho lawa mandla asebenza kuye.

6:15b.MAR.006.015 Kodwa abanye bathi: “Ngu-Eliya;” abanye bathi: “Ngumprofethi njengomunye wabaprofethi.”

6:16b.MAR.006.016 Kepha uHerode ekuzwile wathi: “UJohane engamnquma ikhanda nguye ovukile.”

6:17b.MAR.006.017 Ngokuba yena uHerode wayethumele wambamba uJohane, wambopha etilongweni ngenxa kaHerodiya umkaFiliphu umfowabo, ngokuba wayeganwe nguye.

6:18b.MAR.006.018 Ngokuba uJohane wayethe kuHerode: “Awuvunyelwe ukuthatha umkamfowenu.”

6:19b.MAR.006.019 Njalo uHerodiya wambambela amagqubu, wafuna ukumbulala; kepha kabanga namandla,

6:20b.MAR.006.020 ngokuba uHerode wayemesaba uJohane emazi ukuthi uyindoda elungileyo engcwele, wamlonda; nalapho emuzwa, wayesambatheka kaningi, nokho kwabamnandi kuye ukumuzwa.

6:21b.MAR.006.021 Kwathi sekufikile usuku oluhle, lapho uHerode ngosuku lokuzalwa kwakhe ezenzela idili izikhulu zakhe, nezinduna zempi, nabanumzane baseGalile,

6:22b.MAR.006.022 kwangena indodakazi kaHerodiya uqobo, yasina, yajabulisa uHerode nababehlezi naye. Inkosi yayisithi entombazaneni: “Cela kimi noma yini okuthandayo, ngizakukunika.”

6:23b.MAR.006.023 Wafunga kuyo, wathi: “Noma yini ongakucela kimi ngizakukunika, nakuba kungaze kube yinxenye yombuso wami.”

6:24b.MAR.006.024 Yayisiphuma, yathi kunina: “Ngizakucelani na?” Yena wathi: “Ikhanda likaJohane uMbhapathizi.”

6:25b.MAR.006.025 Yakhawuleza yangena masinyane enkosini, yacela yathi: “Ngithanda ukuba ungiphe khona manje ngoqwembe ikhanda likaJohane uMbhapathizi.”

6:26b.MAR.006.026 Inkosi yadabuka kakhulu, kepha ngenxa yezifungo nangenxa yababehlezi nayo ekudleni ayithandanga ukuyilandulela.

6:27b.MAR.006.027 Inkosi yayisithuma masinyane ibutho, waliyala ukuba lilethe ikhanda lakhe. Lahamba, lamnquma ikhanda etilongweni.

6:28b.MAR.006.028 Laletha ikhanda lakhe ngoqwembe, layinika intombazana, intombazana yamnika unina.

6:29b.MAR.006.029 Kwathi ukuba abafundi bakhe bakuzwe lokho, beza bathatha isidumbu sakhe, basibeka ethuneni.

6:30b.MAR.006.030 Abaphostoli babuthana kuJesu, bambikela ababekwenzile nababekufundisile.

6:31b.MAR.006.031 Wayesethi kubo: “Zanini nina nodwa endaweni eyihlane, niphumule ingcosana.” Ngokuba babe baningi abezayo nabahambayo, abaze bathola nasikhathi sokudla.

6:32b.MAR.006.032 Base bemuka ngomkhumbi, baya endaweni eyihlane bebodwa.

6:33b.MAR.006.033 Abaningi sebebabona bemuka, baqonda, baze bagijimela khona ngezinyawo, bephuma kuyo yonke imizi, babandulela.

6:34b.MAR.006.034 Wathi ephuma, wabona isixuku esikhulu, waba nesihe ngabantu, ngokuba babe njengezimvu ezingenamalusi; waqala ukubafundisa okuningi.

6:35b.MAR.006.035 Kwathi isikhathi sesihambile, beza kuye abafundi bakhe, bathi: “Le ndawo iyihlane, isikhathi sesidlulile;

6:36b.MAR.006.036 bamukise ukuba baye emaphandleni nasemizaneni ezungezileyo, bazithengele ukudla.”

6:37b.MAR.006.037 Wayesephendula, ethi kubo: “Bapheni nina ukudla.” Bathi kuye: “Sihambe yini, siyothenga izinkwa zawodenariyu abangamakhulu amabili, sibaphe badle na?”

6:38b.MAR.006.038 Wathi kubo: “Ninezinkwa ezingaki na? Hambani nibone.” Sebazi bathi: “Ziyisihlanu, nezinhlanzi ezimbili.”

6:39b.MAR.006.039 Wabayala ukuba bonke bahlale phansi etshanini obuluhlaza izigaba ngezigaba.

6:40b.MAR.006.040 Base behlala phansi amaviyo ngamaviyo, kwaba ngamakhulu nangamashumi ayisihlanu.

6:41b.MAR.006.041 Wazithabatha izinkwa eziyisihlanu nezinhlanzi ezimbili, wabheka ngasezulwini, wazibusisa, wazihlephula izinkwa, wazinika abafundi ukuba bazibeke phambi kwabo; nezinhlanzi ezimbili wababela bonke ngazo.

6:42b.MAR.006.042 Badla bonke, basutha.

6:43b.MAR.006.043 Babutha imvuthuluka, iziqabetho eziyishumi nambili ezigcwele, neyezinhlanzi.

6:44b.MAR.006.044 Ababedlile izinkwa babe ngamadoda ayizinkulungwane eziyisihlanu.

6:45b.MAR.006.045 Wayesecindezela masinyane abafundi bakhe ukuba bangene emkhunjini, bamandulele ukuya phesheya eBetsayida, yena aze amukise isixuku.

6:46b.MAR.006.046 Esebavalelisile wahamba waya entabeni ukuyokhuleka.

6:47b.MAR.006.047 Kwathi sekuhlwile, umkhumbi wawuphakathi nolwandle, yena eyedwa emhlabathini.

6:48b.MAR.006.048 Wababona behlupheka ekugwedleni, ngokuba umoya wawuphambene nabo, weza kubo ngomlindo wesine wobusuku ehamba phezu kolwandle. Kwangathi uyadlula kubo.

6:49b.MAR.006.049 Sebembonile ehamba phezu kolwandle, bacabanga ukuthi yisithunzi; bakhala.

6:50b.MAR.006.050 Ngokuba bonke bambona, bethuka. Kepha washesha wakhuluma nabo, wathi kubo: “Yimani isibindi; yimina, ningesabi.”

6:51b.MAR.006.051 Wayesekhwela emkhunjini kubo, umoya wanqamuka; bamangala kakhulu impela phakathi kwabo.

6:52b.MAR.006.052 Ngokuba abaqondanga okwezinkwa, lokhu inhliziyo yabo yayilukhuni.

6:53b.MAR.006.053 Sebewelile bafika ezweni laseGenesaretha, babopha ogwini.

6:54b.MAR.006.054 Ukuphuma kwabo emkhunjini yena wayaziwa masinyane.

6:55b.MAR.006.055 Bagijimela kulo lonke lelo zwe, baqala ukuletha abagulayo ngezinhlaka, lapho bemuzwa ukuthi ukhona.

6:56b.MAR.006.056 Kwathi nomaphi lapho engena khona, emizaneni, nasemizini, nasemaphandleni, babeka abagulayo ezigcawini, bamncenga ukuba bathinte noma umphetho wengubo yakhe kuphela; bonke abamthinta basindiswa.

7

7:1b.MAR.007.001 Kwabuthana kuye abaFarisi nabanye bababhali bevela eJerusalema.

7:2b.MAR.007.002 Sebebonile ukuthi abanye babafundi bakhe badla izinkwa ngezandla ezimbi okungukuthi ezingahlanjiwe —

7:3b.MAR.007.003 ngokuba abaFarisi kanye nabaJuda bonke abadli bengahlambisisanga izandla, bebamba isiko labadala;

7:4b.MAR.007.004 nanxa bevela endalini, abadli bengakahlambi; kukhona nezinye izinto eziningi abazamukeleyo ukuba bazibambe, njengokuhlanza izinkezo, nezinkamba, nezitsha zethusi —

7:5b.MAR.007.005 abaFarisi nababhali bambuza bathi: “Abafundi bakho abahambi ngani ngesiko labadala, kepha badla isinkwa ngezandla ezimbi na?”

7:6b.MAR.007.006 Wayesethi kubo: “U-Isaya waprofetha kahle ngani nina bazenzisi njengokulotshiweyo ukuthi: “ ‘Lesi sizwe singidumisa ngezindebe zomlomo, kepha inhliziyo yaso ikude nami;

7:7b.MAR.007.007 kodwa bangikhonza ngeze befundisa izifundiso eziyimiyalo yabantu.’

7:8b.MAR.007.008 “Niyeka umyalo kaNkulunkulu, nibambe isiko labantu.”

7:9b.MAR.007.009 Wayesethi kubo: “Yebo, nichitha umyalo kaNkulunkulu ukuba nigcine isiko lenu.

7:10b.MAR.007.010 Ngokuba uMose wathi: ‘Yazisa uyihlo nonyoko,’ nokuthi: ‘Othuka uyise noma unina makafe nokufa;’

7:11b.MAR.007.011 kepha nina nithi: ‘Uma umuntu ethi kuyise noma kunina: YiKorbana, okungukuthi umnikelo, lokho ongabe usizwa yimi ngakho,’

7:12b.MAR.007.012 anisamvumeli ukuba enzele uyise noma unina utho.

7:13b.MAR.007.013 Izwi likaNkulunkulu nilenza libe yize ngesiko lenu enilivezileyo; nokunye okuningi okunjalo niyakwenza.”

7:14b.MAR.007.014 Khona wabuye wabiza isixuku, wathi kuso: “Ngizweni nonke, niqonde.

7:15b.MAR.007.015 Alukho utho olungaphandle komuntu lungene kuye olungamngcolisa; kepha okuphumayo kuye yilokho okumngcolisayo umuntu.

7:16b.MAR.007.016 Uma ekhona onezindlebe zokuzwa, makezwe.”

7:17b.MAR.007.017 Kuthe esengene endlini, evela esixukwini, abafundi bakhe bambuza ngalowo mfanekiso.

7:18b.MAR.007.018 Wayesethi kubo: “Kanti nani ningabangaqondiyo na? Aniqondi yini ukuthi konke okungaphandle okungena kumuntu kungemngcolise na?

7:19b.MAR.007.019 Ngokuba akungeni enhliziyweni yakhe, kodwa kungena esiswini, kuphumele ngaphandle, kuhlambulula ukudla konke.”

7:20b.MAR.007.020 Wayesethi: “Okuphumayo kumuntu yilokho okumngcolisayo umuntu;

7:21b.MAR.007.021 ngokuba ngaphakathi enhliziyweni yabantu kuphuma imicabango emibi, nobufebe, nokweba, nokubulala,

7:22b.MAR.007.022 nokuphinga, nokufisa, nokushinga, nenkohliso, nokungabi nanhloni, neso elibi, nokuhlambalaza, nokuzidla, nobuwula.

7:23b.MAR.007.023 Zonke lezo zinto ezimbi zivela ngaphakathi, zimngcolise umuntu.”

7:24b.MAR.007.024 Wayesemuka lapho, waya emikhawulweni yaseTire. Wangena endlini, akathanda ukwaziwa muntu, kodwa wayengenakufihlakala.

7:25b.MAR.007.025 Kwathi masinyane owesifazane ondodakazi yakhe encane inomoya ongcolileyo esezwile ngaye, weza waziphonsa phansi ngasezinyaweni zakhe.

7:26b.MAR.007.026 Kepha owesifazane lo wayengumGreki engumSirofenike ngokuzalwa, wamnxusa ukuba akhiphe idemoni endodakazini yakhe.

7:27b.MAR.007.027 UJesu wayesethi kuye: “Ake kusuthe abantwana kuqala, ngokuba akukuhle ukuthatha isinkwa sabantwana, usiphonse ezinjaneni.”

7:28b.MAR.007.028 Kodwa waphendula, wathi kuye: “Yebo, Nkosi; kepha nezinjana zidla imvuthuluka yabantwana phansi kwetafula.”

7:29b.MAR.007.029 Wayesethi kuye: “Ngenxa yalelo zwi, hamba-ke; idemoni seliphumile endodakazini yakho.”

7:30b.MAR.007.030 Wayesemuka, waya endlini yakhe, wafumana umntwana elele embhedeni, idemoni liphumile.

7:31b.MAR.007.031 UJesu waphuma futhi emikhawulweni yaseTire, wadabula iSidoni, weza ngaselwandle lwaseGalile edabula izwe laseDekapholi.

7:32b.MAR.007.032 Baletha kuye isithulu esinamalimi, bamncenga ukuba abeke isandla phezu kwaso.

7:33b.MAR.007.033 Wagudluka naso esixukwini bebodwa, wafaka iminwe yakhe ezindlebeni zaso, wafela amathe, waphatha ulimi lwaso,

7:34b.MAR.007.034 wabheka ngasezulwini, wabubula, wathi kuso: “Efatha!” okungukuthi: “Vuleka!”

7:35b.MAR.007.035 Zase zivuleka izindlebe zaso, wathukuluka masinyane umthambo wolimi lwaso, sakhuluma kahle.

7:36b.MAR.007.036 Wabayala ukuba bangatsheli muntu. Kepha kwathi nakuba ebayala kakhulu, kwayikhona bekwandisa kakhulu impela.

7:37b.MAR.007.037 Bamangala nokumangala, bathi: “Wenze kahle konke; nezithulu uzenza zizwe, nezimungulu zikhulume.”

8

8:1b.MAR.008.001 Ngalezo zinsuku sekukhona futhi isixuku esikhulu singenakudla, wabiza abafundi bakhe, wathi kubo:

8:2b.MAR.008.002 “Ngiyasihawukela isixuku, ngokuba sekuyizinsuku ezintathu sihlezi kimi, singenanto yokudla.

8:3b.MAR.008.003 Uma ngibamukisa, baye ekhaya bengadlanga, bayakuphela amandla endleleni, ngokuba abanye babo bavela kude.”

8:4b.MAR.008.004 Abafundi bakhe bamphendula bathi: “Umumtu angatholaphi lapha ehlane izinkwa zokusuthisa laba na?”

8:5b.MAR.008.005 Wababuza wathi: “Ninezinkwa ezingaki na?” Bathi: “Eziyisikhombisa.”

8:6b.MAR.008.006 Wayala isixuku ukuba sihlale phansi; wazithabatha izinkwa eziyisikhombisa, wabonga, wazihlephula, wanika abafundi bakhe ukuba bababele; basabela isixuku.

8:7b.MAR.008.007 Babe nezinhlanzana eziyingcosana futhi; esezibusisile wathi abababele nazo.

8:8b.MAR.008.008 Badla, basutha, babutha imvuthuluka eseleyo, amaqoma ayisikhombisa.

8:9b.MAR.008.009 Babengathi izinkulungwane ezine; wabamukisa.

8:10b.MAR.008.010 Wayesengena masinyane emkhunjini kanye nabafundi bakhe, weza ezweni laseDalmanutha.

8:11b.MAR.008.011 Khona kwafika abaFarisi, baqala ukuphendulana naye befuna kuye isibonakaliso esivela ezulwini, bemlinga.

8:12b.MAR.008.012 Wabubula emoyeni wakhe, wathi: “Lesi sizukulwane sifunelani isibonakaliso na? Ngiqinisile ngithi kini: Lesi sizukulwane asiyikunikwa sibonakaliso.”

8:13b.MAR.008.013 Wabashiya, wabuye wangena emkhunjini, wamuka, waya ngaphesheya.

8:14b.MAR.008.014 Kepha babekhohliwe ukuphatha izinkwa, bengenalutho, isinkwa sisinye kuphela emkhunjini.

8:15b.MAR.008.015 Wayesebayala ethi: “Anobheka nixwaye imvubelo yabaFarisi nemvubelo kaHerode.”

8:16b.MAR.008.016 Baphendulana bodwa, bathi abanazinkwa.

8:17b.MAR.008.017 UJesu ekwazi wathi kubo: “Yini ukuba niphendulane ngokuthi aninazinkwa na? Anikaboni, anikaqondi, na? Inhliziyo yenu iselukhuni na?

8:18b.MAR.008.018 Ninamehlo aniboni yini, ninezindlebe anizwa na? Anikhumbuli yini

8:19b.MAR.008.019 mhla ngihlephulela abayizinkulungwane eziyisihlanu izinkwa eziyisihlanu ukuthi nabutha iziqabetho ezingaki ezigcwele imvuthuluka na?” Bathi kuye: “Ishumi nambili.”

8:20b.MAR.008.020 “Mhla ziyisikhombisa kwaba yizinkulungwane ezine, nabutha amaqoma amangaki agcwele imvuthuluka na?” Bathi: “Isikhombisa.”

8:21b.MAR.008.021 Wathi kubo: “Anikaqondi na?”

8:22b.MAR.008.022 Bafika eBetsayida. Base beletha kuye impumputhe, bamncenga ukuba ayiphathe.

8:23b.MAR.008.023 Wayibamba impumputhe ngesandla, wayiholela ngaphandle komuzi, wafela amathe emehlweni ayo, wabeka izandla phezu kwayo, wayibuza wathi: “Ubona utho na?”

8:24b.MAR.008.024 Yabheka, yathi: “Ngibona abantu, ngibabona behamba; kungathi yizihlahla.”

8:25b.MAR.008.025 Khona waphinda wabeka izandla phezu kwamehlo ayo, yabhekisisa, yasinda, yabonisisa konke.

8:26b.MAR.008.026 Wayithumela ekhaya layo, wathi: “Ungangeni emzini wabantu.”

8:27b.MAR.008.027 UJesu wayesephuma kanye nabafundi bakhe, waya emizini yaseKesariya Filipi. Besendleleni, wababuza abafundi bakhe, wathi kubo: “Abantu bathi ngingubani na?”

8:28b.MAR.008.028 Bamtshela bathi: “UJohane uMbhapathizi;” abanye bathi: “Ngu-Eliya;” abanye bathi: “Ngomunye wabaprofethi.”

8:29b.MAR.008.029 Wayesebabuza ethi: “Nina-ke nithi ngingubani na?” UPetru waphendula, wathi kuye: “Wena unguKristu.”

8:30b.MAR.008.030 Wabayalisisa ukuba bangatsheli muntu ngaye.

8:31b.MAR.008.031 Khona waqala ukubafundisa ukuthi iNdodana yomuntu imelwe ukuhlupheka ngokuningi, ilahlwe ngamalunga nabapristi abakhulu nababhali, ibulawe, ivuswe emva kwezinsuku ezintathu.

8:32b.MAR.008.032 Leli zwi walikhuluma ngokusobala. UPetru wamthatha, waqala ukumkhuza.

8:33b.MAR.008.033 Kepha waphenduka, wabheka abafundi bakhe, wamkhuza uPetru, wathi: “Buyela emva kwami, Sathane, ngokuba awuqondi okukaNkulunkulu kepha okwabantu.”

8:34b.MAR.008.034 Wayesebiza isixuku nabafundi bakhe, wathi kubo: “Uma umuntu ethanda ukuza emva kwami, makazidele, athabathe isiphambano sakhe, angilandele.

8:35b.MAR.008.035 Ngokuba yilowo nalowo othanda ukusindisa ukuphila kwakhe uyakulahlekelwa yikho; kepha olahlekelwa ngukuphila kwakhe ngenxa yami nangenxa yevangeli uyakukusindisa.

8:36b.MAR.008.036 Ngokuba kuyakumsizani umuntu ukuzuza izwe lonke, alahlekelwe ngukuphila kwakhe, na?

8:37b.MAR.008.037 Yingabe angakhiphani umuntu, kube yisihlengo sokuphila kwakhe, na?

8:38b.MAR.008.038 Ngokuba yilowo nalowo onezinhloni ngami nangamazwi ami kulesi sizukulwane esiphingayo nesonakeleyo, neNdodana yomuntu iyakuba nezinhloni ngaye, lapho iza ngenkazimulo kaYise kanye nezingelosi ezingcwele.”

9

9:1b.MAR.009.001 Wayesethi kubo: “Ngiqinisile ngithi kini: Bakhona abanye kwabemi lapha abangayikuzwa ngempela ukufa, baze babone umbuso kaNkulunkulu ufikile ngamandla.”

9:2b.MAR.009.002 Emva kwezinsuku eziyisithupha uJesu wathatha oPetru, noJakobe, noJohane, wakhuphukela nabo entabeni ende bebodwa; waphenduka esinye isimo phambi kwabo.

9:3b.MAR.009.003 Izingubo zakhe zacwazimula zaba mhlophe qwa, ngangokuba umhlanzi wasemhlabeni angezenze zibe mhlophe kangaka.

9:4b.MAR.009.004 Kwabonakala kubo u-Eliya enoMose; babekhuluma noJesu.

9:5b.MAR.009.005 Wathatha uPetru, wathi kuJesu: “Rabi, kuhle ukuba silapha; masakhe amadokodo amathathu, elinye libe ngelakho, elinye libe ngelikaMose, elinye libe ngelika-Eliya.”

9:6b.MAR.009.006 Wayengazi ukuthi uzakuphendula ngokuthini, ngokuba babesaba kakhulu.

9:7b.MAR.009.007 Kwase kufika ifu, libasithibeza; kwavela izwi efwini, lithi: “Lo uyiNdodana yami ethandekayo; yizweni.”

9:8b.MAR.009.008 Kwathi masinyane beqalaza, ababe besabona muntu, kuphela uJesu yedwa enabo.

9:9b.MAR.009.009 Besehla entabeni, wabayala ukuba bangatsheli muntu abakubonileyo, iNdodana yomuntu ingakavuki kwabafileyo.

9:10b.MAR.009.010 Bazigcinela lelo zwi bebuzana ngokuthi kuyini lokho ukuvuka kwabafileyo.

9:11b.MAR.009.011 Base bembuza, bethi: “Basholoni ababhali ukuthi u-Eliya umelwe ukufika kuqala na?”

9:12b.MAR.009.012 Wayesethi kubo: “Nempela u-Eliya uyeza kuqala ukuba abuyisele konke; kepha kulotshiwe kanjani ngeNdodana yomuntu ukuthi izakuhlupheka ngokuningi, idelelwe, na?

9:13b.MAR.009.013 Kodwa ngithi kini: U-Eliya sewafika, benza kuye abakuthandayo, njengalokho kulotshiwe ngaye.”

9:14b.MAR.009.014 Kwathi sebeza kubafundi, babona isixuku esikhulu sibahaqile nababhali bebuzana nabo.

9:15b.MAR.009.015 Isixuku sonke sambona qede sashaywa luvalo, sagijimela kuye, sambingelela.

9:16b.MAR.009.016 Wayesebabuza ethi: “Nibuzana nabo ngantoni na?”

9:17b.MAR.009.017 Omunye wesixuku wamphendula wathi: “Mfundisi, ngilethe kuwe indodana yami enomoya oyisimungulu.

9:18b.MAR.009.018 Kuthi lapho eyibambayo, uyidonsela phansi, ikhihlize amagwebu, igedle amazinyo, iphele amandla. Ngikhulume nabafundi bakho ukuba bamkhiphe, kepha bahluleka.”

9:19b.MAR.009.019 Waphendula wathi: “O sizukulwane esingakholwayo, koze kube nini nginani na? Koze kube nini nginibekezelela na? Yiletheni kimi.”

9:20b.MAR.009.020 Bayiletha kuye. Kwathi umoya embona, wayihlukumeza kakhulu masinyane, yawa phansi emhlabathini, yazigingqa ikhihliza amagwebu.

9:21b.MAR.009.021 Wayesebuza kuyise ukuthi isikhathi sesingakanani ifikelwe yilokhu na? Wathi: “Kwasebuntwaneni.

9:22b.MAR.009.022 Uyiphonsile kaningi emlilweni nasemanzini ukuba ayibhubhise; kodwa uma unamandla okwenza utho, sihawukele, usisize.”

9:23b.MAR.009.023 UJesu wayesethi kuye: “Uma unamandla! Konke kungenzeka kokholwayo.”

9:24b.MAR.009.024 Uyise womntwana wayesememeza masinyane, wathi: “Ngiyakholwa, siza ukungakholwa kwami.”

9:25b.MAR.009.025 UJesu esebona ukuthi isixuku sigijimela ndawonye, wamkhuza umoya ongcolileyo, wathi kuye: “Wena moya oyisimungulu nesithulu ngiyakuyala mina, ngithi: Phuma kuye, ungabe usangena kuye.”

9:26b.MAR.009.026 Wamemeza, wamhlukumeza kakhulu, waphuma; waba njengofileyo, baze bathi abaningi: “Usefile.”

9:27b.MAR.009.027 Kepha uJesu wambamba ngesandla, wamvusa; wasukuma.

9:28b.MAR.009.028 Kuthe esengenile endlini, abafundi bakhe bambuza bebodwa, bathi: “Thina besingemkhiphe ngani na?”

9:29b.MAR.009.029 Wayesethi kubo: “Lolu hlobo lungephume ngalutho, kuphela ngokukhuleka nangokuzila ukudla.”

9:30b.MAR.009.030 Bamuka lapho, badabula iGalile, wayengathandi ukuba kwaziwe muntu,

9:31b.MAR.009.031 ngokuba wabafundisa abafundi bakhe, wathi kubo: “INdodana yomuntu ikhashelwa ezandleni zabantu, bazakuyibulala; kuthi isibulewe, izakuvuka emva kwezinsuku ezintathu.”

9:32b.MAR.009.032 Kepha abakuzwisisanga lokho kusho, besaba nokumbuza.

9:33b.MAR.009.033 Base beza eKapernawume. Kwathi esengene endlini, wababuza wathi: “Beniphendulana ngantoni endleleni na?”

9:34b.MAR.009.034 Kepha bathula, ngokuba bebekhulumisene endleleni ngokuthi ngubani omkhulu.

9:35b.MAR.009.035 Wayesehlala phansi, wababiza abayishumi nambili, wathi kubo: “Uma umuntu ethanda ukuba ngowokuqala, makabe ngowokugcina kubo bonke nesikhonzi sabo bonke.”

9:36b.MAR.009.036 Wayesethatha umntwana, wammisa phakathi kwabo, wamgona, wathi kubo:

9:37b.MAR.009.037 “Yilowo nalowo oyakwamukela abe munye kubantwana abanje ngegama lami uyangamukela mina, ongamukela mina akamukeli mina kodwa ongithumileyo.”

9:38b.MAR.009.038 UJohane wayesethi kuye: “Mfundisi, sabona umuntu ongasilandeli ekhipha amademoni ngegama lakho; samnqabela ngokuba engasilandeli.”

9:39b.MAR.009.039 Kepha uJesu wathi: “Ningamnqabeli, ngokuba akakho owenza umsebenzi wamandla ngegama lami ongasuka masinyane, akhulume kabi ngami.

9:40b.MAR.009.040 Ngokuba ongamelene nathi ungakithi.

9:41b.MAR.009.041 Yilowo nalowo oniphuzisa inkezo yamanzi ngegama lami ngokuba ningabakaKristu, ngiqinisile ngithi kini: Akasoze alahlekelwa ngumvuzo wakhe.

9:42b.MAR.009.042 Nalowo okhubekisa abe munye kulaba abancinyane abakholwayo kungangcono kuye ukuba itshe lokusila ligaxwe entanyeni yakhe, aphonswe elwandle.

9:43b.MAR.009.043 Uma isandla sakho sikukhubekisa, sinqume; kungcono ungene ekuphileni uyingini kunokuba uye esihogweni, emlilweni ongacimekiyo, unezandla zombili,

9:44b.MAR.009.044 lapho impethu yabo ingafi, nomlilo ungacimi.

9:45b.MAR.009.045 Uma unyawo lwakho lukukhubekisa, lunqume; kungcono ungene ekuphileni ulunyonga kunokuba uphonswe esihogweni, emlilweni ongacimekiyo, unezinyawo zombili,

9:46b.MAR.009.046 lapho impethu yabo ingafi, nomlilo ungacimi.

9:47b.MAR.009.047 Uma iso lakho likukhubekisa, likhiphe; kungcono ungene embusweni kaNkulunkulu uneso linye kunokuba uphonswe esihogweni unamehlo omabili,

9:48b.MAR.009.048 lapho impethu yabo ingafi, nomlilo ungacimi.

9:49b.MAR.009.049 Ngokuba bonke bazakugqunyiswa ngomlilo.

9:50b.MAR.009.050 “Usawoti muhle, kepha uma usawoti engasenabusawoti, niyakumhlaziya ngani na? Yibani nosawoti phakathi kwenu, nihlalisane ngokuthula.”

10

10:1b.MAR.010.001 Wasuka lapho, weza emikhawulweni yaseJudiya nangaphesheya kweJordani; izixuku zabuye zabuthana kuye, waphinda wabafundisa abantu njengokujwayela kwakhe.

10:2b.MAR.010.002 Kwase kusondela kuye abaFarisi, bambuza ukuthi kuvunyelwe yini ukuba indoda ilahle umkayo, bemlinga.

10:3b.MAR.010.003 Waphendula, wathi kubo: “UMose waniyala ngokuthini na?”

10:4b.MAR.010.004 Bathi: “UMose wavuma ukuba kulotshwe incwadi yesahlukaniso, alahlwe.”

10:5b.MAR.010.005 UJesu wayesethi kubo: “Ngenxa yobulukhuni benhliziyo yenu wanilobela lowo myalo.

10:6b.MAR.010.006 Kepha kusukela ekuqaleni kokudalwa uNkulunkulu wabenza owesilisa nowesifazane.

10:7b.MAR.010.007 Ngenxa yalokho umuntu uyakushiya uyise nonina, anamathele kumkakhe;

10:8b.MAR.010.008 labo ababili bayakuba nyamanye; ngakho abasebabili, kepha sebenyamanye.

10:9b.MAR.010.009 Ngakho-ke lokho akuhlanganisileyo uNkulunkulu makungahlukaniswa ngumuntu.”

10:10b.MAR.010.010 Besendlini abafundi babuye bambuza ngalokho.

10:11b.MAR.010.011 Wathi kubo: “Yilowo nalowo olahla umkakhe, aganwe ngomunye, uyaphinga kuye.

10:12b.MAR.010.012 Naye, uma elahla indoda yakhe, agane enye, uyaphinga.”

10:13b.MAR.010.013 Khona baletha kuye abantwanyana ukuba abaphathe; kepha abafundi babakhuza.

10:14b.MAR.010.014 Kodwa uJesu ekubona wathukuthela, wathi kubo: “Vumelani abantwana beze kimi, ningabenqabeli, ngokuba umbuso kaNkulunkulu ungowabanjalo.

10:15b.MAR.010.015 Ngiqinisile ngithi kini: Yilowo nalowo ongamukeli umbuso kaNkulunkulu njengomntwana kasoze angena kuwo.”

10:16b.MAR.010.016 Wabagona, wababusisa ebeka izandla phezu kwabo.

10:17b.MAR.010.017 Ekuphumeni kwakhe ukuya endleleni umuntu wagijimela kuye, waguqa ngamadolo phambi kwakhe, wambuza wathi: “Mfundisi omuhle, ngiyakwenzani ukuba ngidle ifa lokuphila okuphakade na?”

10:18b.MAR.010.018 Kepha uJesu wathi kuye: “Ungibizelani ngokuthi ngimuhle na? Kakho omuhle, munye kuphela, uNkulunkulu.

10:19b.MAR.010.019 Uyayazi imiyalelo ukuthi: Ungabulali, ungaphingi, ungebi, ungafakazi amanga, ungamamuki umuntu utho, yazisa uyihlo nonyoko.”

10:20b.MAR.010.020 Kepha wathi kuye: “Mfundisi, konke lokho ngikugcinile kwasebusheni bami.”

10:21b.MAR.010.021 UJesu wayesembheka, emthanda, wathi kuye: “Usasilalelwe into inye; hamba uthengise ngakho konke onakho, uphe abampofu, khona uzakuba negugu ezulwini; uze ungilandele.”

10:22b.MAR.010.022 Kepha wanyukumala ngalelo zwi, wamuka edabukile, ngokuba wayenengcebo enkulu.

10:23b.MAR.010.023 UJesu waqalaza, wathi kubafundi bakhe: “Kulukhuni kangakanani kwabanomnotho ukungena embusweni kaNkulunkulu.”

10:24b.MAR.010.024 Kepha abafundi bethuka ngamazwi akhe. UJesu wabuye waphendula, wathi kubo: “Bantwana, kulukhuni kangakanani kwabethemba umnotho ukungena embusweni kaNkulunkulu.

10:25b.MAR.010.025 Kulula ukuba ikamela lingene ngentunja yosungulo kunokuba onothileyo angene embusweni kaNkulunkulu.”

10:26b.MAR.010.026 Bamangala kakhulu, bathi omunye komunye: “Pho, kungasindiswa bani na?”

10:27b.MAR.010.027 UJesu ebabheka wathi: “Kubantu akunakwenzeka, kepha kuNkulunkulu akunjalo; ngokuba kuNkulunkulu kungenzeka konke.”

10:28b.MAR.010.028 UPetru wathatha, wathi kuye: “Bheka, thina sishiye konke, sakulandela.”

10:29b.MAR.010.029 UJesu wathi: “Ngiqinisile ngithi kini: Akukho muntu oshiye indlu, noma abafowabo, noma odadewabo, noma unina, noma uyise, noma abantwana, noma amazwe ngenxa yami nangenxa yevangeli,

10:30b.MAR.010.030 ongayikwamukeliswa ngekhulu: manje kulesi sikhathi izindlu, nabafowabo, nawodadewabo, nawonina, nabantwana, namazwe kanye nokuzingelwa, nasenkathini ezayo ukuphila okuphakade.

10:31b.MAR.010.031 Kepha abaningi abokuqala bayakuba ngabokugcina, nabokugcina babe ngabokuqala.”

10:32b.MAR.010.032 Babesendleleni bekhuphukela eJerusalema; uJesu wayehamba phambi kwabo; ababelandela babethukile, besaba. Wayesethatha futhi abayishumi nambili, waqala ukubatshela okuzakumehlela, ethi:

10:33b.MAR.010.033 “Bhekani, sikhuphukela eJerusalema; iNdodana yomuntu izakukhashelwa kubapristi abakhulu nababhali; bazakuyinqumela ukuba ife, bayikhaphele kwabezizwe;

10:34b.MAR.010.034 bazakuyiklolodela, bayikhafulele ngamathe, bayishaye, bayibulale; kepha emva kwezinsuku ezintathu izakuvuka.”

10:35b.MAR.010.035 Kwase kusondela kuye oJakobe noJohane amadodana kaZebedewu, bathi kuye: “Mfundisi, siyathanda ukuba usenzele lokhu esizakukucela kuwe.”

10:36b.MAR.010.036 Wathi kubo: “Nifuna ukuba nginenzeleni na?”

10:37b.MAR.010.037 Bathi kuye: “Siphe ukuba sihlale, omunye ngakwesokunene sakho, omunye ngokwesokhohlo sakho enkazimulweni yakho.”

10:38b.MAR.010.038 Kepha uJesu wathi kubo: “Anikwazi enikucelayo. Ningasiphuza yini isitsha engisiphuzayo mina, nibhapathizwe ngombhapathizo engibhapathizwa ngawo na?”

10:39b.MAR.010.039 Bathi kuye: “Singakwenza.” UJesu wathi kubo: “Isitsha engisiphuzayo mina niyakusiphuza, nibhapathizwe ngombhapathizo engibhapathizwa ngawo mina;

10:40b.MAR.010.040 kepha ukuhlala ngakwesokunene sami nangakwesokhohlo akusikho okwami ukuphana ngakho, kodwa kungokwalabo abakulungiselweyo.”

10:41b.MAR.010.041 Bathi ukuzwa lokho abayishumi, baqala ukuthukuthelela oJakobe noJohane.

10:42b.MAR.010.042 UJesu wayesebabiza, wathi kubo: “Niyazi ukuthi abathiwa babusa izizwe bazenza amakhosi phezu kwazo, nezikhulu zazo ziphethe amandla phezu kwazo.

10:43b.MAR.010.043 Kepha akunjalo phakathi kwenu, kodwa yilowo nalowo ofuna ukuba mkhulu phakathi kwenu makabe yisikhonzi senu,

10:44b.MAR.010.044 nalowo ofuna ukuba ngowokuqala phakathi kwenu makabe yinceku yabo bonke.

10:45b.MAR.010.045 Ngokuba nayo iNdodana yomuntu ayizelanga ukukhonzwa kepha ukukhonza nokunikela ukuphila kwayo, kube yisihlengo sabaningi.”

10:46b.MAR.010.046 Khona bafika eJeriko. Kwathi esaphuma eJeriko nabafundi bakhe nesixuku esikhulu, indodana kaThimewu uBartimewu, isinxibi esiyimpumputhe, wayehlezi ngasendleleni.

10:47b.MAR.010.047 Wathi ukuba ezwe ukuthi nguJesu waseNazaretha, waqala ukumemeza ethi: “Jesu, Ndodana kaDavide, ngihawukele!”

10:48b.MAR.010.048 Abaningi bamkhuza, bathi kathule; kepha kwayikhona wamemeza kakhulu, ethi: “Ndodana kaDavide, ngihawukele!”

10:49b.MAR.010.049 Wayesema uJesu, wathi: “Mbizeni.” Bayibiza impumputhe, bathi kuyo: “Yima isibindi, usukume; uyakubiza.”

10:50b.MAR.010.050 Yayisilahla ingubo yayo, yagxuma, yaya kuJesu.

10:51b.MAR.010.051 UJesu washo kuyo, wathi: “Ufuna ukuba ngikwenzeleni na?” Impumputhe yathi kuye: “Rabuni, ukuba ngibone.”

10:52b.MAR.010.052 UJesu wathi kuyo: “Hamba-ke; ukukholwa kwakho kukusindisile.” Yayisibona khona lapho, yamlandela endleleni.

11

11:1b.MAR.011.001 Kwathi ukuba basondele eJerusalema, naseBetfage, naseBethaniya ngaseNtabeni Yeminqumo, wathuma ababili kubafundi bakhe,

11:2b.MAR.011.002 wathi kubo: “Hambani niye emzaneni obhekene nani; kothi nisangena kuwo, nizakufumana ithole lembongolo likhulekiwe, okungakaze kuhlale muntu kulo; lithukululeni, nililethe.

11:3b.MAR.011.003 Uma umuntu ethi kini: ‘Nikwenzelani lokhu na?’ anothi: ‘INkosi iyalidinga; izakulibuyisela lapha masinyane.’ ”

11:4b.MAR.011.004 Bahamba, bafumana ithole likhulekiwe ngasesangweni ngaphandle emgwaqweni; balithukulula.

11:5b.MAR.011.005 Abanye kwababemi khona bathi kubo: “Nenzani nilithukulula ithole na?”

11:6b.MAR.011.006 Basho kubo njengokusho kukaJesu; base bebayeka.

11:7b.MAR.011.007 Baliletha ithole kuJesu, babeka izingubo zabo phezu kwalo, wakhwela kulo.

11:8b.MAR.011.008 Abaningi bendlala izingubo zabo endleleni, abanye amahlamvu ababewagawule endle.

11:9b.MAR.011.009 Ababehamba phambili nababelandela bamemeza bathi: “Hosiyana! Ubusisiwe ozayo egameni leNkosi.

11:10b.MAR.011.010 Ubusisiwe umbuso ozayo kababa uDavide. Hosiyana kweliphezulu!”

11:11b.MAR.011.011 UJesu wangena eJerusalema, waya ethempelini; esekubukile konke waphuma, sekuhlwile, waya eBethaniya kanye nabayishumi nambili.

11:12b.MAR.011.012 Ngangomuso ekuphumeni kwabo eBethaniya walamba.

11:13b.MAR.011.013 Wabona umkhiwane ukude, unamaqabunga, wasondela ethi mhlawumbe angathola utho kuwo; esefikile kuwo akafumananga lutho, amaqabunga odwa, ngokuba kwakungesiso isikhathi samakhiwane.

11:14b.MAR.011.014 UJesu wakhuluma, wathi kuwo: “Akungabe kusadla noyedwa isithelo kuwe kuze kube phakade.” Abafundi bakhe bakuzwa.

11:15b.MAR.011.015 Bafika eJerusalema. Wangena ethempelini, waqala ukuxosha abathengisayo nabathengayo ethempelini, wagumbuqela amatafula abashintshelana imali nezihlalo zabathengisa ngamajuba;

11:16b.MAR.011.016 wayengavumi ukuba umuntu adabule ithempeli ethwele isitsha.

11:17b.MAR.011.017 Wafundisa, wathi kubo: “Akulotshiwe yini ukuthi, ‘indlu yami iyakubizwa ngokuthi indlu yokukhuleka yezizwe zonke’ na? Kepha nina niyenze ‘umhume wabaphangi.’ ”

11:18b.MAR.011.018 Abapristi abakhulu nababhali bekuzwa lokho bazindla ngokuthi bangambhubhisa kanjani, ngokuba babemesaba, lokhu isixuku sonke samangala ngokufundisa kwakhe.

11:19b.MAR.011.019 Njalo ngokuhlwa baphuma emzini.

11:20b.MAR.011.020 Kusasa bedlula babona umkhiwane ubunile kusukela ezimpandeni.

11:21b.MAR.011.021 UPetru ekhumbula wathi kuye: “Rabi, bheka, umkhiwane owuqalekisileyo ubunile.”

11:22b.MAR.011.022 UJesu waphendula, wathi kubo: “Kholwani nguNkulunkulu.

11:23b.MAR.011.023 Ngiqinisile ngithi kini: Yilowo nalowo oyakuthi kule ntaba: ‘Nqukuleka, uphonseke elwandle,’ engangabazi enhliziyweni yakhe kepha ekholwa ukuthi lokho akushoyo kuyenzeka, uzakuba nakho.

11:24b.MAR.011.024 Ngalokho ngithi kini: Konke enikukhulekelayo nenikucelayo, kholwani ukuthi nikwamukele, nizakuba nakho.

11:25b.MAR.011.025 Futhi nxa nimi nikhuleka, thethelelani, uma ninamagqubu nomunye, ukuze noYihlo osezulwini anithethelele iziphambeko zenu.

11:26b.MAR.011.026 Kepha uma nina ningathetheleli, noYihlo osezulwini akayikunithethelela iziphambeko zenu.”

11:27b.MAR.011.027 Babuye bafika eJerusalema; kwathi ehamba ethempelini, beza kuye abapristi abakhulu, nababhali, namalunga,

11:28b.MAR.011.028 bathi kuye: “Lokhu ukwenza ngagunya lini na? Ngubani okunike leli gunya ukuze wenze lokhu na?”

11:29b.MAR.011.029 Kepha uJesu wathi kubo: “Ngizakunibuza izwi libe linye, nize ningiphendule; yikhona ngizakunitshela ukuthi ngenza lokhu ngagunya lini.

11:30b.MAR.011.030 Ukubhapathiza kukaJohane kwavela ezulwini noma kubantu na? Ngiphenduleni.”

11:31b.MAR.011.031 Bakhulumisana bodwa, bathi: “Uma sithi: ‘Ezulwini,’ uzakuthi: ‘Pho, anikholwanga nguye ngani na?’

11:32b.MAR.011.032 Kepha uma sithi: ‘Kubantu,’ ” besaba isixuku, ngokuba bonke bathi uJohane ungumprofethi impela.

11:33b.MAR.011.033 Base bemphendula uJesu, bathi: “Asazi.” Wayesethi uJesu kubo: “Nami anginitsheli ukuthi ngenza lokhu ngagunya lini.”

12

12:1b.MAR.012.001 Wayeseqala ukukhuluma kubo ngemifanekiso, ethi: “Umuntu watshala isivini, wasibiyela ngothango, wemba isikhamo, wakha isiqongo sokulinda, wasiqashisa kubalimi, waya kwelinye izwe.

12:2b.MAR.012.002 Ngenkathi efaneleyo wayesethuma inceku kubalimi ukuba ithathe kubalimi ezithelweni zesivini.

12:3b.MAR.012.003 Bayibamba, bayishaya, bayimukisa ze.

12:4b.MAR.012.004 Waphinda wathuma kubo enye inceku; yona bayilimaza ekhanda, bayithuka.

12:5b.MAR.012.005 Wathuma enye futhi; yona bayibulala, nezinye eziningi: ezinye bazishaya, ezinye bazibulala.

12:6b.MAR.012.006 “Kwase kusele umuntu munye, indodana ethandekayo; yona wayithuma kubo ekugcineni, ethi: ‘Bayakuyazisa indodana yami.’

12:7b.MAR.012.007 “Kepha labo balimi bakhuluma bodwa, bathi: ‘Lo uyindlalifa; wozani siyibulale, ifa libe ngelethu.’

12:8b.MAR.012.008 Base beyibamba bayibulala, bayiphonsa ngaphandle kwesivini.

12:9b.MAR.012.009 “Uzakwenzani umninisivini na? Uzakuza, ababhubhise labo balimi, isivini asinike abanye.

12:10b.MAR.012.010 Aniwufundanga yini lo mbhalo othi: “ ‘Itshe abalinqabayo abakhi lona laba yinhloko yegumbi;

12:11b.MAR.012.011 lona lavela eNkosini; liyisimangaliso emehlweni ethu,’ na?”

12:12b.MAR.012.012 Base befuna ukumbamba, kepha besaba isixuku; ngokuba bazi ukuthi ukhulume lo mfanekiso ngabo. Base bemshiya bamuka.

12:13b.MAR.012.013 Khona abanye babaFarisi nabakaHerode bathunyelwa kuye ukuba bamhile ngezwi.

12:14b.MAR.012.014 Beza bathi kuye: “Mfundisi, siyazi ukuthi uqinisile nokuthi awukhathali ngamuntu, ngokuba awubheki ubuso babantu, kodwa indlela kaNkulunkulu uyifundisa ngeqiniso. Kuvunyelwe ukuthela kuKesari noma qha? Sithele nokuba singatheli na?”

12:15b.MAR.012.015 Kepha yena ekwazi ukuzenzisa kwabo wathi kubo: “Ningilingelani na? Lethani kimi udenariyu, ngimbone.”

12:16b.MAR.012.016 Bamletha. Wayesethi kubo: “Ngokabani lo mfanekiso nalo mbhalo na?” Bathi kuye: “NgokaKesari.”

12:17b.MAR.012.017 UJesu wathi kubo: “Nikani uKesari okukaKesari, noNkulunkulu okukaNkulunkulu.” Bamangala ngaye.

12:18b.MAR.012.018 Khona kwafika kuye abaSadusi abathi akukho ukuvuka kwabafileyo, bambuza bathi:

12:19b.MAR.012.019 “Mfundisi, uMose wasilobela ukuthi, uma kufa umfowabo womuntu, eshiya umkakhe engashiyi mntwana, umfowabo makamthathe umkakhe, amvusele umfowabo inzalo.

12:20b.MAR.012.020 Kwakukhona izelamani eziyisikhombisa, owokuqala wathatha umfazi; wafa engashiyanga nzalo.

12:21b.MAR.012.021 Nowesibili wamthatha; naye wafa engashiyanga nzalo; kanjalo nowesithathu.

12:22b.MAR.012.022 Abayisikhombisa kabashiyanga nzalo. Ekugcineni kwabo bonke kwafa nomfazi.

12:23b.MAR.012.023 Ekuvukeni mhla bevukayo uyakuba ngumkabani kubo, lokhu abayisikhombisa babe naye engumkabo, na?”

12:24b.MAR.012.024 UJesu wathi kubo: “Angithi nidukile ngenxa yokuba ningayazi imibhalo namandla kaNkulunkulu na?

12:25b.MAR.012.025 Ngokuba mhla bevuka kwabafileyo abaganwa, abendiswa, kodwa banjengezingelosi ezulwini.

12:26b.MAR.012.026 Kepha maqondana nabafileyo ukuthi bayavuswa anifundanga yini encwadini kaMose ngesihlahla ukuthi uNkulunkulu wakhuluma kuye, wathi: ‘NginguNkulunkulu ka-Abrahama, noNkulunkulu ka-Isaka, noNkulunkulu kaJakobe,’ na?

12:27b.MAR.012.027 Akasiye uNkulunkulu wabafileyo kodwa owabaphilayo. Nidukile kakhulu.”

12:28b.MAR.012.028 Kwase kusondela omunye wababhali owayebezwile bebuzana, eqonda ukuthi wayebaphendule kahle, wambuza wathi: “Ngumuphi umyalo wokuqala kuyo yonke na?”

12:29b.MAR.012.029 UJesu waphendula wathi: “Owokuqala ngowokuthi: ‘Yizwa, iNkosi uNkulunkulu wethu, iNkosi, yinye.

12:30b.MAR.012.030 Woyithanda iNkosi, uNkulunkulu wakho ngayo yonke inhliziyo yakho, nangawo wonke umphefumulo wakho, nangayo yonke ingqondo yakho, nangawo onke amandla akho.’

12:31b.MAR.012.031 Owesibili yilo: ‘Womthanda umakhelwame wakho njengalokhu uzithanda wena.’ Awukho omunye umyalo omkhulu kunale.”

12:32b.MAR.012.032 Umbhali wayesethi kuye: “Yebo, Mfundisi, ushilo ngeqiniso ukuthi yinye, ayikho enye ngaphandle kwayo;

12:33b.MAR.012.033 futhi ukuyithanda yona ngenhliziyo yonke, nangengqondo yonke, nangamandla onke, nokuthanda umakhelwane njengalokhu umuntu ezithanda yena kudlula yonke iminikelo yokushiswa nemihlatshelo.”

12:34b.MAR.012.034 UJesu embona ukuthi uphendule ngokuqonda, wathi kuye: “Awukude nombuso kaNkulunkulu.” Akwabe kusabakho onesibindi sokumbuza.

12:35b.MAR.012.035 Khona uJesu efundisa ethempelini wabuza wathi: “Basho kanjani ababhali ukuthi uKristu uyindodana kaDavide na?

12:36b.MAR.012.036 UDavide uqobo lwakhe washo ngoMoya oNgcwele ukuthi: “ ‘INkosi yathi eNkosini yami: “Hlala ngakwesokunene sami, ngize ngibeke izitha zakho phansi kwezinyawo zakho.” ’

12:37b.MAR.012.037 “UDavide uqobo lwakhe umbiza ngokuthi iNkosi. Pho, uyindodana yakhe kanjani na?” Isixuku esikhulu sasimuzwa ngokujabula.

12:38b.MAR.012.038 Ekufundiseni kwakhe wathi: “Xwayani ababhali abathanda ukuhamba bembethe izingubo ezinde, nokubingelelwa ezigcawini,

12:39b.MAR.012.039 nezihlalo eziphambili emasinagogeni, nezindawo ezingenhla ekudleni,

12:40b.MAR.012.040 abadla izindlu zabafelokazi, bekhuleka isikhathi eside ngokuzenzisa; laba bayakwamukeliswa ukulahlwa okukhulu.”

12:41b.MAR.012.041 Wayesehlala phansi maqondana nomphongolo womnikelo, wabuka isixuku sibeka umnikelo emphongolweni. Abaningi abacebileyo babeka kakhulu.

12:42b.MAR.012.042 Kwase kufika umfelokazi ompofu wabeka amafadingi amabili okuyisitebela.

12:43b.MAR.012.043 Wayesebabiza abafundi bakhe, wathi kubo: “Ngiqinisile ngithi kini: Lo mfelokazi ompofu ubekile kakhulu kunabo bonke ababeke emphongolweni,

12:44b.MAR.012.044 ngokuba bonke babeka kokuchichimileyo kwabo, kepha yena ebumpofini bakhe ubeke konke anakho, konke abephila ngakho.”

13

13:1b.MAR.013.001 Kuthe ephuma ethempelini, omunye wabafundi bakhe wathi kuye: “Mfundisi, bheka amatshe anjani nezakhiwo ezinjani!”

13:2b.MAR.013.002 UJesu wathi kuye: “Uyabona lezi zakhiwo ezinkulu na? Akuyikushiywa itshe phezu kwetshe elingayikudilizelwa phansi.”

13:3b.MAR.013.003 Esahlezi eNtabeni Yeminqumo maqondana nethempeli, oPetru noJakobe noJohane no-Andreya bambuza bebodwa,

13:4b.MAR.013.004 bathi: “Sitshele ukuthi lokhu kuyakuba nini, nesibonakaliso siyakuba yini, lapho sekuyakufezeka konke lokhu, na?”

13:5b.MAR.013.005 Khona uJesu waqala ukukhuluma kubo, ethi: “Qaphelani ningadukiswa muntu.

13:6b.MAR.013.006 Kuyakuza abaningi ngegama lami, bathi: ‘Nginguye,’ badukise abaningi.

13:7b.MAR.013.007 Nxa nizwa izimpi namahemuhemu ezimpi, ningethuki; kumelwe ukuba kwenzeke, kepha ukuphela koba kungakafiki.

13:8b.MAR.013.008 Ngokuba isizwe siyakuvukela isizwe, nombuso uvukele umbuso; kuyakuba khona ukuzamazama komhlaba izindawo ngezindawo, kube khona indlala; lokhu kungukuqala kwemihelo.

13:9b.MAR.013.009 “Kepha ziqapheleni nina. Bayakunikhaphela emiphakathini; niyakushaywa emasinagogeni; niyakumiswa phambi kwababusi namakhosi ngenxa yami, kube ngubufakazi kubo.

13:10b.MAR.013.010 Kepha ivangeli limelwe ukushunyayelwa kuqala ezizweni zonke.

13:11b.MAR.013.011 Uma beniqhuba, benikhaphela, ningakhathaleli ngaphambili eniyakukukhuluma, kodwa lokho eniyakukunikwa ngaleso sikhathi, kukhulumeni; ngokuba kakunina enikhulumayo kodwa nguMoya oNgcwele.

13:12b.MAR.013.012 “Khona umuntu uyakukhaphela umfowabo ekufeni noyise umntanakhe, yebo, abantwana bayakuvukela abazali babo, bababulale.

13:13b.MAR.013.013 Niyakuzondwa yibo bonke ngenxa yegama lami, kodwa okhuthazelayo kuze kube sekupheleni nguyena oyakusindiswa.

13:14b.MAR.013.014 “Kepha nxa nibona amanyala encithakalo emi lapho kungafanele khona — ofundayo makaqaphele — khona abaseJudiya mababalekele ezintabeni,

13:15b.MAR.013.015 ophezu kwendlu angehli, angangeni ukuyothatha utho endlini yakhe,

13:16b.MAR.013.016 osensimini angabuyeli emuva ukuyothatha ingubo yakhe.

13:17b.MAR.013.017 Kepha maye kwabakhulelweyo nabancelisayo ngalezo zinsuku!

13:18b.MAR.013.018 Khulekani ukuba kungabi sebusika.

13:19b.MAR.013.019 Ngokuba lezo zinsuku ziyakuba nosizi olungazange lube khona olunjalo kwasekuqaleni kokudalwa akudalayo uNkulunkulu kuze kube manje, nolungasayikuba khona.

13:20b.MAR.013.020 Uma iNkosi ibingazifinyezi lezo zinsuku, bekungesindiswe muntu, kepha ngenxa yabakhethiweyo eyabakhetha yazifinyeza lezo zinsuku.

13:21b.MAR.013.021 Khona-ke uma umuntu ethi kini: ‘Bhekani, nangu uKristu,’ noma: ‘Bhekani, nanguya,’ ningakholwa.

13:22b.MAR.013.022 Ngokuba kuyakuvela okristu bamanga nabaprofethi bamanga, benze izibonakaliso nezimangaliso, ukuze badukise abakhethiweyo, uma kungenzeka.

13:23b.MAR.013.023 Kepha qaphelani nina; senginitshele konke ngaphambili.

13:24b.MAR.013.024 “Kodwa ngalezo zinsuku emva kwalolo sizi ilanga liyakufiphazwa, nenyanga ayiyikukhanya,

13:25b.MAR.013.025 nezinkanyezi ziyakuwa ezulwini, namandla asezulwini ayakuzanyazanyiswa.

13:26b.MAR.013.026 Khona-ke bayakubona iNdodana yomuntu iza emafwini, inamandla amakhulu nenkazimulo.

13:27b.MAR.013.027 Lapho iyakuthuma izingelosi, iqoqe abakhethiweyo bayo emimoyeni yomine, kusukela emkhawulweni womhlaba kuze kube semkhawulweni wezulu.

13:28b.MAR.013.028 “Fundani umfanekiso emkhiwaneni; nxa igatsha lawo selithamba, lihlume amaqabunga, niyazi ukuthi ihlobo seliseduze.

13:29b.MAR.013.029 Kanjalo nani, nxa nibona lokhu kwenzeka, yazini ukuthi iseduze ngasemnyango.

13:30b.MAR.013.030 Ngiqinisile ngithi kini: Lesi sizukulwane asiyikudlula, kungakenzeki konke lokhu.

13:31b.MAR.013.031 Kuyakudlula izulu nomhlaba, kepha amazwi ami awayikudlula.

13:32b.MAR.013.032 “Kepha lolo suku nalelo hora akakho owazi lutho ngalo, nazingelosi ezulwini, naNdodana, nguBaba kuphela.

13:33b.MAR.013.033 Qaphelani, nilinde, ngokuba anisazi isikhathi ukuthi siyakuba nini.

13:34b.MAR.013.034 Kunjengomuntu owahambela kwelinye izwe; washiya indlu yakhe, wanika izinceku zakhe amandla, yileyo naleyo wayinika umsebenzi wayo, wayala umlindisango ukuba alinde.

13:35b.MAR.013.035 “Ngakho lindani, ngokuba anazi ukuthi inkosi yendlu iyakufika nini, noma ngokuhlwa, noma phakathi kobusuku, noma ngokukhala kwezinkuku, noma ekuseni,

13:36b.MAR.013.036 funa ifike ngokuzuma, inifumane nilele.

13:37b.MAR.013.037 Kepha lokhu engikusho kini ngikusho kubo bonke, ngithi: ‘Lindani.’ ”

14

14:1b.MAR.014.001 Emva kwezinsuku ezimbili kwaba khona iPhasika nomkhosi wesinkwa esingenamvubelo; abapristi abakhulu nababhali bafuna isu lokumbamba ngobuqili, bambulale.

14:2b.MAR.014.002 Ngakho bathi: “Makungabi ngomkhosi, kungaze kube khona isiyaluyalu esizweni.”

14:3b.MAR.014.003 Kwathi eseBethaniya endlini kaSimoni owayenochoko, ehlezi ekudleni, kwafika owesifazane ephethe umfuma we-alabaste wamafutha enadi lodwa elibiza kakhulu; wachoboza umfuma wathela amafutha ekhanda lakhe.

14:4b.MAR.014.004 Kepha kwakukhona abanye abakhuluma bodwa ngokuthukuthela, bethi: “Kwenzelweni lokho kuchithwa kwamafutha na?

14:5b.MAR.014.005 Ngokuba lawa mafutha nga ethengisiwe ngawodenariyu abangaphezu kwamakhulu amathathu, kwaphiwa abampofu.” Bamthukuthelela kakhulu.

14:6b.MAR.014.006 Kepha uJesu wathi: “Myekeni; nimhluphelani na? Usebenzile umsebenzi omuhle kimi.

14:7b.MAR.014.007 Ngokuba abampofu ninabo njalo; nanini, uma nithanda, ningabenzela okuhle: kepha mina aninami njalo.

14:8b.MAR.014.008 Wenzile abengakwenza; wandulele ukuwugcobela umzimba wami ukumbelwa.

14:9b.MAR.014.009 Ngiqinisile ngithi kini: Nomaphi lapho liyakushunyayelwa khona ivangeli ezweni lonke, kuyakukhulunywa nangalokho akwenzileyo, kube yisikhumbuzo ngaye.”

14:10b.MAR.014.010 UJuda Iskariyothe, omunye wabayishumi nambili, wayeseya kubapristi abakhulu ukuba amkhaphele kubo.

14:11b.MAR.014.011 Sebezwile bathokoza, bathembisa ukumnika imali. Wayesefuna ithuba lokumkhaphela.

14:12b.MAR.014.012 Ngosuku lokuqala lwesinkwa esingenamvubelo okwakuhlatshwa ngalo iphasika abafundi bakhe bathi kuye: “Uthanda ukuba siye silungiselephi ukuba udle iphasika na?”

14:13b.MAR.014.013 Wayesethuma ababili kubafundi bakhe, wathi kubo: “Hambani niye emzini; khona nizakuhlangana nomuntu othwele imbiza yamanzi; mlandeleni.

14:14b.MAR.014.014 Lapho engena khona, anothi kumninindlu: ‘Uthi uMfundisi: Iphi indlu yami, lapho ngingadlela khona iphasika nabafundi bami, na?’

14:15b.MAR.014.015 Yena uzakunikhombisa ikamelo elikhulu eliphezulu, elendlelweyo, lilungisiwe; silungiseleni khona.”

14:16b.MAR.014.016 Bahamba abafundi bafika emzini, bafumana kunjengokusho kwakhe kubo; base belungisa iphasika.

14:17b.MAR.014.017 Kusihlwa wafika nabayishumi nambili.

14:18b.MAR.014.018 Sebehlezi ekudleni, uJesu wathi: “Ngiqinisile ngithi kini: Omunye kini, odla nami, uzakungikhaphela.”

14:19b.MAR.014.019 Baqala ukudabuka, bathi kuye ngamunye: “Kungaba yimi na?”

14:20b.MAR.014.020 Wathi kubo: “Ngomunye wabayishumi nambili, okha kanye nami esitsheni.

14:21b.MAR.014.021 INdodana yomuntu iyamuka kambe njengokulotshiwe ngayo, kepha maye kulowo muntu iNdodana yomuntu ekhashelwa ngaye! Nga kukuhle kulowo muntu ukuba kazalwanga.”

14:22b.MAR.014.022 Kwathi besadla, uJesu wathabatha isinkwa, wasibusisa, wasihlephula, wabanika, wathi: “Thabathani nidle; lokhu kungumzimba wami.”

14:23b.MAR.014.023 Wayesethabatha isitsha, wabonga, wabanika; baphuza kuso bonke.

14:24b.MAR.014.024 Wathi kubo: “Lokhu kuyigazi lami lesivumelwano elithululwa ngenxa yabaningi.

14:25b.MAR.014.025 Ngiqinisile ngithi kini: Angisayikuphuza okwesithelo somvini, kuze kufike lolo suku engiyakusiphuza ngalo sisisha embusweni kaNkulunkulu.”

14:26b.MAR.014.026 Kwathi sebehlabelele igama lokubonga, baphuma baya eNtabeni Yeminqumo.

14:27b.MAR.014.027 UJesu wathi kubo: “Nonke nizakukhubeka, ngokuba kulotshiwe ukuthi: ‘Ngiyakushaya umalusi, izimvu zihlakazeke.’

14:28b.MAR.014.028 Kepha emva kokuvuswa kwami ngiyakunandulela ukuya eGalile.”

14:29b.MAR.014.029 UPetru wathi kuye: “Noma beyakukhubeka bonke, hhayi mina.”

14:30b.MAR.014.030 UJesu wathi kuye: “Ngiqinisile ngithi kuwe: Namhlanje ngalobu busuku, lingakakhali kabili iqhude, uzakungiphika kathathu.”

14:31b.MAR.014.031 Kepha waqinisa ngamandla, wathi: “Noma ngingaze ngife nawe, angisoze ngakuphika.” Basho njalo bonke.

14:32b.MAR.014.032 Bafika endaweni ethiwa iGetsemane; wathi kubafundi bakhe: “Hlalani lapha, ngisaya kukhuleka.”

14:33b.MAR.014.033 Wathatha oPetru noJakobe noJohane, waqala ukuba novalo nosizi.

14:34b.MAR.014.034 Wathi kubo: “Umphefumulo wami ulusizi kakhulu kuze kube sekufeni; hlalani lapha, nilinde.”

14:35b.MAR.014.035 Waqhubeka ingcosana, wawa phansi, wakhuleka ukuba, uma kungenzeka, kudlule kuye lo mzuzu.

14:36b.MAR.014.036 Wathi: “Aba, Baba, konke kungenzeka kuwe; ake ususe kimi lesi sitsha, kepha kungabi njengokuba ngithanda mina, kodwa njengokuba uthanda wena.”

14:37b.MAR.014.037 Wayeseza, wabafumana belele; wathi kuPetru: “Simoni, ulele na? Ubungelinde ihora libe linye na?

14:38b.MAR.014.038 Lindani, nikhuleke ukuba ningangeni ekulingweni; umoya uyavuma, kepha inyama ibuthakathaka.”

14:39b.MAR.014.039 Wabuye wasuka waya kukhuleka, esho lona lelo zwi.

14:40b.MAR.014.040 Esebuya futhi wabafumana belele, ngokuba amehlo abo ayenzima; babengazi ukuthi bazakumphendula ngokuthini.

14:41b.MAR.014.041 Weza ngokwesithathu, wathi kubo: “Nisalele namanje niphumula. Kwanele, ihora lifikile; bhekani, iNdodana yomuntu isiyakhashelwa ezandleni zezoni.

14:42b.MAR.014.042 Sukumani sihambe. Bhekani, ongikhaphelayo usesondele.”

14:43b.MAR.014.043 Khona masinyane esakhuluma, kwafika uJuda, omunye wabayishumi nambili, enesixuku esinezinkemba nezinduku, sivela kubapristi abakhulu nababhali namalunga.

14:44b.MAR.014.044 Kepha omkhaphelayo wayebanike isiboniso sokuthi: “Lowo engiyakumanga, nguye; mbambeni, nihambe naye, nimqinise.”

14:45b.MAR.014.045 Esefikile wasondela kuye masinyane, wathi: “Rabi!” Wamanga.

14:46b.MAR.014.046 Base bembeka izandla, bambamba.

14:47b.MAR.014.047 Omunye kwababemi khona wahosha inkemba, wayigenca inceku yompristi omkhulu, wayinquma indlebe.

14:48b.MAR.014.048 UJesu wathatha wathi kubo: “Niphumile kungathi nize kumphangi, niphethe izinkemba nezinduku ukungibamba.

14:49b.MAR.014.049 Benginani imihla ngemihla ethempelini ngifundisa, anangibamba; kepha nga kugcwaliseka imibhalo.”

14:50b.MAR.014.050 Bamshiya bonke, babaleka.

14:51b.MAR.014.051 Insizwa ethile yamlandela yembethe indwangu nje emzimbeni; bayibamba.

14:52b.MAR.014.052 Yayisiyishiya indwangu, yabaleka ze.

14:53b.MAR.014.053 Base bemusa uJesu kumpristi omkhulu; kwabuthana bonke abapristi abakhulu namalunga nababhali.

14:54b.MAR.014.054 UPetru wamlandela ekude, waze wangena egcekeni lompristi omkhulu; wayehlezi kanye nezikhonzi otha umlilo.

14:55b.MAR.014.055 Abapristi abakhulu nomphakathi wonke bafuna ubufakazi ngoJesu ukuba bambulale, kepha ababufumananga.

14:56b.MAR.014.056 Ngokuba abaningi bafakaza amanga ngaye, kepha ubufakazi babo abuhlangananga.

14:57b.MAR.014.057 Kwasukuma abathile, bafakaza amanga ngaye, bathi:

14:58b.MAR.014.058 “Thina simzwile ethi: ‘Ngiyakulidiliza leli thempeli elenziwe ngezandla, ngakhe ngezinsuku ezintathu elinye elingenziwe ngezandla.’ ”

14:59b.MAR.014.059 Nakuba kunjalo ubufakazi babo abuhlangananga.

14:60b.MAR.014.060 Kwase kusukuma umpristi omkhulu phakathi kwabo, wambuza uJesu, wathi: “Awuphenduli lutho na? Kuyini abakufakaza ngawe laba na?”

14:61b.MAR.014.061 Kepha wathula, akaphendula lutho. Umpristi omkhulu wabuye wambuza, wathi kuye: “UnguKristu, iNdodana yoBongekayo na?”

14:62b.MAR.014.062 Wathi uJesu: “Nginguye. Niyakubona iNdodana yomuntu ihlezi ngakwesokunene saMandla, iza ngamafu ezulu.”

14:63b.MAR.014.063 Khona umpristi omkhulu waklebhula izingubo zakhe, wathi: “Sisaswelelani ofakazi na?

14:64b.MAR.014.064 Senikuzwile ukuhlambalaza; nithini na?” Bamlahla bonke ngokuthi ufanele ukufa.

14:65b.MAR.014.065 Abanye base beqala ukumkhafulela ngamathe nokumgubuzela ubuso nokumdushuza, bathi kuye: “Profetha.” Nezikhonzi zamthatha zammukula.

14:66b.MAR.014.066 UPetru esesegcekeni ngaphansi, kwafika enye yamantombazana ompristi omkhulu,

14:67b.MAR.014.067 yambona uPetru otha, yambheka, yathi: “Nawe ubunoJesu waseNazaretha.”

14:68b.MAR.014.068 Kepha waphika wathi: “Angikwazi, yebo, angikuzwisisi okushoyo;” waphumela enkundleni; lakhala iqhude.

14:69b.MAR.014.069 Intombazana imbona yabuye yaqala ukusho kwababemi khona ukuthi: “Lona ungomunye wabo.”

14:70b.MAR.014.070 Kepha waphinda waphika. Emva kwesikhashana futhi ababemi khona bathi kuPetru: “Nempela ungomunye wabo, ngokuba ungowaseGalile.”

14:71b.MAR.014.071 Wayeseqala ukuthuka nokufunga, ethi: “Angimazi lowo muntu enikhuluma ngaye.”

14:72b.MAR.014.072 Lase likhala masinyane iqhude ngokwesibili. UPetru wayesekhumbula izwi abelishilo kuye uJesu lokuthi: “Iqhude lingakakhali kabili, uzakungiphika kathathu;” wakhala nokukhala izinyembezi.

15

15:1b.MAR.015.001 Kwathi masinyane ekuseni abapristi abakhulu namalunga nababhali nomphakathi wonke benza icebo, bambopha uJesu, bamqhuba, bamnikela kuPilatu.

15:2b.MAR.015.002 UPilatu wambuza wathi: “Wena uyinkosi yabaJuda na?” Waphendula, wathi kuye: “Usho khona.”

15:3b.MAR.015.003 Abapristi abakhulu bammangalela ngokuningi.

15:4b.MAR.015.004 UPilatu wabuye wambuza, wathi: “Awuphenduli lutho na? Bheka, bakuthwesa icala ngokuningi kangaka.”

15:5b.MAR.015.005 Kodwa uJesu akabe esaphendula lutho, waze wamangala uPilatu.

15:6b.MAR.015.006 Kwathi ngomkhosi wayehleze ebakhululela isiboshwa sibe sinye abasicelayo.

15:7b.MAR.015.007 Kwakukhona-ke omunye, nguBaraba igama lakhe, owayeboshiwe kanye namahlubuka; wona ayebulele umuntu ekuhlubukeni.

15:8b.MAR.015.008 Isixuku senyuka, saqala ukucela ukuba abenzele njengalokho ebehleze ebenzela.

15:9b.MAR.015.009 Kepha uPilatu wabaphendula wathi: “Nithanda ukuba nginikhululele inkosi yabaJuda na?”

15:10b.MAR.015.010 Ngokuba wayekwazi ukuthi abapristi abakhulu bamnikele ngomhawu.

15:11b.MAR.015.011 Kepha abapristi abakhulu babhebhezela isixuku ukuba okungcono asikhululele uBaraba.

15:12b.MAR.015.012 UPilatu wabuye waphendula, wathi kubo: “Pho-ke, ngimenzenjani lo enithi uyinkosi yabaJuda na?”

15:13b.MAR.015.013 Babuye bamemeza, bathi: “Mbethele esiphambanweni!”

15:14b.MAR.015.014 Kodwa uPilatu wathi kubo: “Ngokuba wenze bubi buni na?” Kepha bamemeza kakhulu, bathi: “Mbethele esiphambanweni!”

15:15b.MAR.015.015 Khona uPilatu ethanda ukudelisa isixuku wasikhululela uBaraba, kepha wamshaya uJesu, wamnikela ukuba abethelwe esiphambanweni.

15:16b.MAR.015.016 Amabutho ayesemngenisa phakathi endlini ethiwa iPretoriyu, abizela ndawonye ibutho lonke.

15:17b.MAR.015.017 Ayesemembathisa ingubo ebubende, amcwashelisa ngomqhele ayeweluke ngameva.

15:18b.MAR.015.018 Aqala ukumkhulekela, athi: “Bayede, nkosi yabaJuda!”

15:19b.MAR.015.019 Amshaya ekhanda ngomhlanga, amkhafulela ngamathe, aguqa ngamadolo, akhuleka kuye.

15:20b.MAR.015.020 Esembhinqile amhlubula ingubo ebubende, amembathisa izingubo zakhe. Ayesephuma naye ukuba ambethele esiphambanweni.

15:21b.MAR.015.021 Acindezela umuntu obedlula, uSimoni waseKhurene, evela endle, uyise ka-Aleksandru noRufu, ukuba athwale isiphambano sakhe.

15:22b.MAR.015.022 Ayesemyisa endaweni yaseGolgotha okungukuthi ngokuhunyushwa iNdawo Yekhanda.

15:23b.MAR.015.023 Amnika iwayini elixutshwe nemure; kepha akalamukelanga.

15:24b.MAR.015.024 Ayesembethela esiphambanweni, abelana izingubo zakhe, enzelana inkatho ngazo ukuthi yilowo nalowo uyakuthathani.

15:25b.MAR.015.025 Kwakuyihora lesithathu esembethela esiphambanweni.

15:26b.MAR.015.026 Umbhalo wecala lakhe ubulotshiwe ngaphezulu wokuthi: INKOSI YABAJUDA.

15:27b.MAR.015.027 Kwabethelwa kanye naye abaphangi ababili, omunye ngakwesokunene nomunye ngakwesokhohlo sakhe.

15:28b.MAR.015.028 Kwase kugcwaliseka umbhalo othi: “Wabalwa kanye naboni.”

15:29b.MAR.015.029 Abadlulayo bamhlambalaza benikina amakhanda abo, bathi: “Eya wena odiliza ithempeli, ubuye ulakhe ngezinsuku ezintathu;

15:30b.MAR.015.030 zisindise, wehle esiphambanweni.”

15:31b.MAR.015.031 Kanjalo nabapristi abakhulu bambhinqa bebodwa kanye nababhali, bathi: “Wasindisa abanye, angezisindise yena.

15:32b.MAR.015.032 UKristu, iNkosi yakwa-Israyeli, makehle manje esiphambanweni, ukuze sibone, sikholwe.” Nababebethelwe kanye naye bamdumaza.

15:33b.MAR.015.033 Sekufikile ihora lesithupha kwaba mnyama emhlabeni wonke, kwaze kwaba yihora lesishiyagalolunye.

15:34b.MAR.015.034 Ngehora lesishiyagalolunye uJesu wamemeza ngezwi elikhulu, wathi: “Eloi, Eloi, lama sabaktani?” okungukuthi ngokuhunyushwa: “Nkulunkulu wami, Nkulunkulu wami, ungishiyeleni na?”

15:35b.MAR.015.035 Abanye kwababemi khona bekuzwa bathi: “Bheka, ubiza u-Eliya.”

15:36b.MAR.015.036 Wayesegijima omunye, wagcwalisa ilula ngoviniga, walichoma emhlangeni, wamphuzisa, wathi: “Yekani, sibone uma u-Eliya eza ukumehlisa.”

15:37b.MAR.015.037 UJesu wayesememeza ngezwi elikhulu, wafa.

15:38b.MAR.015.038 Khona isihenqo sethempeli sadabuka kabili, kusukela phezulu kuze kufike phansi.

15:39b.MAR.015.039 Kepha induna yekhulu eyayimi maqondana naye imbona efa ngokunjalo, yathi: “Nempela lo muntu ube yiNdodana kaNkulunkulu.”

15:40b.MAR.015.040 Kwakukhona nabesifazane bebukela, bekude; phakathi kwabo kwakukhona noMariya Magdalena, noMariya unina kaJakobe omncane nokaJose, kanye noSalome

15:41b.MAR.015.041 ababemlandela eseseGalile, bemkhonza, nabanye abesifazane abaningi abenyukela naye eJerusalema.

15:42b.MAR.015.042 Kwathi ukuba kuhlwe, ngokuba kwakulusuku lokulungisela okungukuthi olwandulela isabatha,

15:43b.MAR.015.043 kwafika uJosefa wase-Arimatheya, ilunga elidumileyo lomphakathi, owayewubheka naye umbuso kaNkulunkulu; wangena ngesibindi kuPilatu, wacela isidumbu sikaJesu.

15:44b.MAR.015.044 Kepha uPilatu wamangala ngokuthi ngabe usefile, wabiza induna yekhulu, wabuza kuyo ukuthi sekukade efile na?

15:45b.MAR.015.045 Esezwile enduneni yekhulu wamnika uJosefa isidumbu.

15:46b.MAR.015.046 Wathenga indwangu enhle, wamehlisa, wamsonga ngaleyo ndwangu, wambeka ethuneni elaliqoshwe edwaleni, wagingqela itshe emnyango wethuna.

15:47b.MAR.015.047 OMariya Magdalena noMariya unina kaJose babona lapho abekwa khona.

16

16:1b.MAR.016.001 Selidlulile isabatha, oMariya Magdalena, noMariya unina kaJakobe, noSalome bathenga amakha ukuba beze bamgcobe.

16:2b.MAR.016.002 Ekuseni kakhulu ngosuku lokuqala lweviki beza ethuneni ekuphumeni kwelanga.

16:3b.MAR.016.003 Bakhuluma bodwa, bathi: “Ngubani oyakusigingqela itshe, lisuke emnyango wethuna na?”

16:4b.MAR.016.004 Bathi ukubheka, babona ukuthi itshe seligingqiwe; ngokuba lalilikhulu kakhulu.

16:5b.MAR.016.005 Kuthe bengena ethuneni, babona insizwa ihlezi ngakwesokunene yembethe ingubo ende emhlophe; bethuka.

16:6b.MAR.016.006 Kepha yathi kubo: “Ningethuki; nifuna uJesu waseNazaretha obebethelwe esiphambanweni; uvukile; kakho lapha; bhekani nansi indawo lapho bebembeke khona.

16:7b.MAR.016.007 Kodwa hambani nitshele abafundi bakhe kanye noPetru ukuthi uyanandulela ukuya eGalile; nizakumbona lapho, njengalokho eshilo kini.”

16:8b.MAR.016.008 Base bephuma, babaleka ethuneni, ngokuba babefikelwe ngukuthuthumela nokumangala, kabashongo lutho kumuntu, ngokuba babesaba.

16:9b.MAR.016.009 Esevukile, kusekuseni ngosuku lokuqala lweviki, wabonakala kuqala kuMariya Magdalena ayekhiphe kuye amademoni ayisikhombisa.

16:10b.MAR.016.010 Yena wahamba wababikela labo ababe naye uJesu, besalila bekhala.

16:11b.MAR.016.011 Kwathi bona sebezwile ukuthi uyaphila nokuthi uboniwe nguye, abaze bakholwa.

16:12b.MAR.016.012 Emva kwalokho wabonakala ngesinye isimo kwababili kubo behamba beya emaphandleni.

16:13b.MAR.016.013 Nabo bahamba babikela abanye; nalabo abaze bakholwa.

16:14b.MAR.016.014 Ngasemuva wabonakala kwabayishumi nanye behlezi ekudleni, wabasola ngokungakholwa kwabo nangobulukhuni benhliziyo yabo, ngokuba bengakholwanga yilabo abambonileyo esevukile.

16:15b.MAR.016.015 Wayesethi kubo: “Hambani niye ezweni lonke, nishumayele ivangeli kukho konke okudaliweyo.

16:16b.MAR.016.016 Okholwayo abhapathizwe uyakusindiswa, kepha ongakholwayo uyakulahlwa.

16:17b.MAR.016.017 Lezi zibonakaliso ziyakubalandela abakholwayo: ngegama lami bayakukhipha amademoni, bashumayele ngezilimi ezintsha,

16:18b.MAR.016.018 baphathe izinyoka; uma bephuza okubulalayo, akusoze kwaba nangozi; bayakubeka izandla phezu kwabagulayo, basinde.”

16:19b.MAR.016.019 Njalo-ke iNkosi uJesu isikhulumile kubo yakhushulelwa ezulwini, yahlala ngakwesokunene sikaNkulunkulu.

16:20b.MAR.016.020 Kepha bona bephuma bashumayela ezindaweni zonke, iNkosi isebenza nabo, iqinisa izwi ngezibonakaliso ezilandelayo.