Lamentations (Zarma)

1

1:1b.LAM.001.001 Gallo neeya kaŋ waato a gonda boro nga me fo, Sohõ nga neeya ga goro faaji ra, boro kulu si. Nga kaŋ gonda beeray waato ndunnya dumey ra, Wayboro bonkooni no laabey ra, A ciya danga wayboro kaŋ kurnyo bu. A go ga doole goy te.

1:2b.LAM.001.002 Hẽeni korno no a ga te cin haray, A mo mundey ga dooru a garbey gaa. A baakoy kulu ra sinda boro kaŋ ga kaa k'a kunfa. A corey kulu n'a amaana ŋwa. I ciya a se konnakoyaŋ.

1:3b.LAM.001.003 Yahuda koy yawtaray laabu fo, A di taabi nda tamtaray laalo. A go ga goro dumi cindey game ra, fulanzamay si. A kankamo ra a gaaraykoy kulu n'a to.

1:4b.LAM.001.004 Sihiyona* koyyaŋ fondey gonda bu baray. Boro kulu siino ga koy batey kaŋ i daŋ din do koyne. Boro kulu si no mo ga gana a birni meyey kulu ra. A alfagey go ga duray, I n'a wandiyey taabandi. Nga bumbo din mo gonda bine saray kaŋ ga fottu.

1:5b.LAM.001.005 A ibarey du a boŋ mayray, A konnakoy mo go ga goro baani. Zama Rabbi n'a taabandi a taali boobey sabbay se. A zanka kayney mo koy tamtaray ibarey jine.

1:6b.LAM.001.006 Sihiyona ize wayo darza kulu daray a se. A boro beerey ciya sanda jeeriyaŋ kaŋ jaŋ kuray nangu. I go gaaraykwa jine ga zuru, gaabi si.

1:7b.LAM.001.007 Urusalima* taabey d'a dira-ka-windiyaŋ jirbey ra, A fongu nga waato kaani maayaŋey kulu gaa. Waato kaŋ cine a borey kaŋ ibara kambe ra, gaako si no. Ibarey di a k'a hahaara a halaciyaŋo sabbay se.

1:8b.LAM.001.008 Urusalima na zunubi te gumo, Woodin sabbay se no a ciya danga fanta hari cine. Borey kaŋ g'a bay waato, ngey no ciya a dondakoy, Zama i di a gaa-koono. Oho, a go ga duray ka bare ka ye banda.

1:9b.LAM.001.009 A kazaamatara goono ga naagu a bankaarayey gaa. A mana fongu nga kokora gaa. A kaŋyaŋo ya dambara hari no, A sinda bine gaabandiko mo. A ne: «Ya Rabbi, m'ay taabo guna, Zama ay konnakwa na nga boŋ beerandi.»

1:10b.LAM.001.010 Ibara na nga kamba salle a kaani maayaŋ jiney kulu boŋ, A di dumi cindey go ga furo nangu hananta ra, Borey kaŋ ni lordi* ka ne i ma si furo ni marga ra.

1:11b.LAM.001.011 A jama kulu goono ga duray, }waari no i goono ga ceeci. I jin ka ngey arzakey wi ka ŋwaari day ngey fundey baano se. Ya Rabbi, guna ka di, Zama ay bare ka ciya furku.

1:12b.LAM.001.012 Ya araŋ kulu kaŋ go ga bisa, araŋ baa fo, wala? Wa guna ka di hal ay bine sara wo kaŋ i te ay se din dumi go no, Wa guna mate kaŋ cine Rabbi n'ay gurzugandi nd'a a futay korna hane.

1:13b.LAM.001.013 A na danji taŋ a ma fun beene ka kaa ay biriyey ra, Danjo hin i gaabo mo. A na korfo hirrimi daaru ay cey diire se, A n'ay bare ka ye banda. A n'ay daŋ faaji ra, Hala zaari me-a-me ay go ga yangala.

1:14b.LAM.001.014 A kamba no a n'ay taaley calo* haw d'a. I go ga care kubay ka kaaru ay jinda boŋ. A naŋ ay gaabo kulu ma gaze. Koy Beero naŋ ay ma furo kambe, Ay si hin ka naan ka tun.

1:15b.LAM.001.015 Koy Beero n'ay wane yaarukomey kulu taamu-taamu ay bindo ra. A na wongu margu ka gaaba nd'ay kaŋ g'ay wane sahãkooney halaci. Koy Beero na Yahuda ize wandiya taamu-taamu danga reyzin* hari kankamyaŋ nangu ra.

1:16b.LAM.001.016 Woodin yaŋ kulu se no ay goono ga hẽ. Ay mwa, ay mwa goono ga mundi dooru! Zama kunfako kaŋ g'ay yaamar k'ay fundo yayandi mooru ay. Ay izey go ngey hinne, zama konnakwa te zaama.

1:17b.LAM.001.017 Sihiyona na nga kambey salle, Day kunfako si no a se. Rabbi no ka lordi ka ne Yakuba ibarey m'a windi. Urusalima ciya kazaamataray hari i game ra.

1:18b.LAM.001.018 Rabbi ya adilitaraykoy no, zama ay murte a lordo* gaa. Ya araŋ ndunnya dumey kulu, ay g'araŋ ŋwaaray, Araŋ ma maa, k'ay bine sara guna. Ay arwasey da wandiyey, i kulu koy tamtaray ra.

1:19b.LAM.001.019 Ay n'ay baakoy ce, amma i n'ay halli. Ay alfagey d'ay boro beerey na ngey fundey taŋ ka bu gallo ra, waato kaŋ i goono ga ŋwaari ceeci i fundey baano se.

1:20b.LAM.001.020 Guna, ya Rabbi, zama ay go taabi ra. Ay bina goono ga dooru gumo. Ay bina goono ga manne ay ra. Zama ay na murteyaŋ te saray! Taray haray takuba go ga mursandi, Windo ra mo si hima kala buuyaŋ.

1:21b.LAM.001.021 I maa baaru kaŋ ay goono ga bine jisi. Kunfako kulu si no ay se. Ay konnakoy kulu maa ay masiiba baaru, I farhã mo za kaŋ ni na woodin te ay se. Zaaro kaŋ ni fe din, ni ga kand'a, Ngey mo ga ciya ay cine.

1:22b.LAM.001.022 Naŋ i laalayaŋo kulu ma bangay ni jine. Ma te i se mo sanda mate kaŋ cine ni te ay se ay taaley kulu sabbay se. Zama ay durayyaŋey baa gumo, Ay bine-gaabo ban.

2

2:1b.LAM.002.001 Wa guna mate kaŋ Koy Beero na Sihiyona ize wayo daabu nda buru nga futa ra! A na Israyla darza jindaw a ma fun beene ka kaŋ ganda. A futa zaaro ra a mana fongu nga ce taamey furkanga gaa.

2:2b.LAM.002.002 Koy Beero na Yakuba gorokoy kulu gon, Bakaraw man'a di mo. A futa ra a na Yahuda ize wayo wongu fuwey bagu-bagu k'i zeeri. A na mayra nda nga koyey kulu ziibandi.

2:3b.LAM.002.003 Futay korno ra no a na Israyla hillo kulu pati. A na nga kambe ŋwaaro hibandi ka kaa waato kaŋ konnakoy kaa ka maan. A na Yakuba ton danga danji beele cine, Danjo din ga hay kulu kaŋ go nga windanta ŋwa.

2:4b.LAM.002.004 A na nga birawo candi danga konnako. A kay da nga gaabo sanda ibare cine. Sihiyona ize wayo bukka ra a na boro kulu kaŋ ga kaan iri diyaŋ gaa wi. A na nga futa gusam sanda danji cine.

2:5b.LAM.002.005 Koy Beero ciya danga konnako, a na Israyla gon k'a faadey kulu mo gon. A n'a wongu fuwey kulu bagu-bagu, Yahuda ize wayo se mo a naŋ bu baray da hẽeni ma baa.

2:6b.LAM.002.006 Gaabi no a na nga bukka bagu nd'a, danga kali wane cine. A na nga marga nango halaci. Rabbi naŋ borey ma dinya alwaati kosante margey da asibtey* gaa Sihiyona ra. A futay korna ra mo a wangu bonkooni nda alfaga*.

2:7b.LAM.002.007 Koy Beero na nga sargay feema furu, A nangu hananta ciya a se fanta hari mo. A na gallo faadey windi cinarey daŋ a konnakoy kambe ra. I kuuwa Rabbi windo ra danga sududuyaŋ marga zaaro ra cine.

2:8b.LAM.002.008 Rabbi no ka miila i ma Sihiyona ize wayo birni cinaro bagu-bagu. A na neesiyaŋ korfo candi, A mana nga kamba hibandi mo halaciyaŋ gaa. Wongu cinaro da windi cinarey, A naŋ i kulu ma bu baray te, Zama care banda no i gaabo bu.

2:9b.LAM.002.009 A birni me daabirjey sundu laabo ra, A n'a karangaley mo ceeri ka halaci. I kond'a bonkoono d'a mayraykoyey dumi cindey laabey ra, asariya si no koyne. Oho, a annabey si du bangandi kaŋ ga fun Rabbi do.

2:10b.LAM.002.010 Sihiyona ize wayo arkusey go ga goro ganda siw. I na laabu say ngey boŋey boŋ, I na bufu zaarayaŋ haw ngey cantey gaa. Urusalima* wandiyey go ga ngey boŋey sumbal hala ganda.

2:11b.LAM.002.011 Ay moy zabu ka kayna mundi sabbay se. Ay bina goono ga dooru gumo, Ay bina gusam ganda ay jama ize wayo halaciyaŋo sabbay se, Zanka kayney da naanandey mo go ga kasam gallo fondey ra.

2:12b.LAM.002.012 I go ga ne ngey nyaŋey se: «Man ntaasu nda duvan*?» Mate kaŋ cine i go ga kasam sanda maranteyaŋ gallo fondey gaa, I go ga ngey fundey taŋ nyaŋey gandey ra.

2:13b.LAM.002.013 Ya Urusalima ize wayo, Ifo n'ay ga ni kaseeti nd'a koyne? Ifo no ay ga ni misa te d'a? Ya Sihiyona wandiya, ifo gaa no ay ga ni deedandi, Zama ay ma ni bina yayandi se? Zama ni kortimo beeri sanda teeku cine. May no ga hin ka ni no baani?

2:14b.LAM.002.014 Ni annabey bangando kaŋ i goono ga di ni se din, Tangari nda saamotaray koonu no. I mana ni zunubey fisi ka kaa taray ni se mo, Kaŋ ga naŋ i ma ye ka kande nin ka fun da nin tamtara do. Amma i di tangari nda halliyaŋ bangayyaŋ ni se.

2:15b.LAM.002.015 Borey kaŋ ga bisa kulu na kambe kobi ni gaa. I go ga cuusu, I ga boŋ zinji Urusalima ize wayo boŋ ka ne: «Gallo neeya kaŋ borey ne a se darza timmantekoy, wala? Bine kaani hari no ndunnya kulu se, wala?»

2:16b.LAM.002.016 Ni ibarey kulu na ngey meyey feeri ni boŋ. I goono ga cuusu ka ngey hinjey kaama mo ka ne: «Iri n'a gon sukutum! Daahir hano kaŋ iri goono ga laakal dake a gaa neeya. Iri to a gaa, iri di a mo.»

2:17b.LAM.002.017 Rabbi te haŋ kaŋ nga miila. Nga sanno kaŋ a lordi za doŋ-doŋ jirbey ra din, A n'a toonandi. A na ni soote ganda, bakaraw man'a di. A naŋ konnakoy ma farhã ni boŋ, A na ni ibarey hillo beerandi mo.

2:18b.LAM.002.018 I biney hẽ Rabbi gaa ka ne: «Ya Sihiyona ize wayo birni cinaro, naŋ mundi ma fun. I ma sululu sanda gooru cine, cin da zaari. Ni bumbo ma si fulanzam, ni mo gurey mo ma si naŋ.»

2:19b.LAM.002.019 Tun cin haray ka zalba, Za saaya kaŋ batukoy goyo ga tun. Ma ni bina soogu sanda hari cine Rabbi jine. Ma ni kambey sambu a jine ka ni ize kayney fundey ŋwaaray, Kaŋ yaŋ goono ga kasam da haray fondo gaaruyaŋ kulu gaa.

2:20b.LAM.002.020 Ya Rabbi, guna ka di ka laakal da boro kaŋ se ni na woodin te! Wayborey ga hima ka ngey izey ŋwa no, Ngey izey kaŋ i saajaw? I ga hima ka alfaga nda annabi* wi Koy Beero nangu hananta ra no?

2:21b.LAM.002.021 Arwasu nda dottijo zeeno go ganda ga furu kwaara batamey ra. Ay wane wandiyey da arwasey kulu, takuba n'i zeeri. Ni futa hane no ni n'i wi, Ni n'i halaci, bakaraw mana ni di.

2:22b.LAM.002.022 Sanda alwaati kaŋ i kosu marga zaaro ra cine, Yaadin cine no ni na humburkumay hariyaŋ margu ay se kambey kulu gaa. Boro si no kaŋ du ka yana, Boro kaŋ cindi mo si no Rabbi futa hane. Ngey kaŋ ay naanandi, ngey kaŋ ay biiri, Ay ibara n'i halaci.

3

3:1b.LAM.003.001 Ay no ga ti bora kaŋ di taabi Rabbi futa goobo do.

3:2b.LAM.003.002 A n'ay candi k'ay daŋ ay ma dira kubay ra, Manti kaari ra bo.

3:3b.LAM.003.003 Daahir no, a na banda bare ay gaa, A ga nga kamba bare ay se zaaro me-a-me.

3:4b.LAM.003.004 A naŋ ay hamo d'ay kuuro ma soobay ka zabu, A n'ay biriyey ceeri-ceeri mo.

3:5b.LAM.003.005 A na cinariyaŋ te k'ay koli ka bare da forti nda taabi.

3:6b.LAM.003.006 A n'ay gorandi kubay nangey ra, Danga borey kaŋ bu za gayyaŋ.

3:7b.LAM.003.007 A n'ay windi nda kali kal ay si hin ka fatta. A n'ay guuru-say sisiro tiŋandi ay se.

3:8b.LAM.003.008 Oho, d'ay hẽ, ay ce, Ay goono ga gaakasinay ceeci, A ga wangu ay adduwa se.

3:9b.LAM.003.009 A na fonda daabu ay jine da tondi jabante yaŋ, Hal ay fondayzey siiri.

3:10b.LAM.003.010 Sanda urs* cine no a go ga gum ay se, Da muusu beeri cine kaŋ go nga tuguyaŋ nango do.

3:11b.LAM.003.011 A n'ay kambandi ka kaa fonda ra, a n'ay tooru-tooru, A fay d'ay faaji ra.

3:12b.LAM.003.012 A na nga biraw candi, A n'ay ciya goo hari hangaw se.

3:13b.LAM.003.013 A naŋ nga tonga ra hangawey m'ay fun hal ay ganda ra.

3:14b.LAM.003.014 Ay ciya hahaarayaŋ hari ay jama kulu se d'i dooni hari mo, zaari me-a-me.

3:15b.LAM.003.015 A n'ay toonandi nda forti, A n'ay bugandi nda absint* hari mo.

3:16b.LAM.003.016 A n'ay hinjey ceeri nda tond'izeyaŋ, A n'ay daabu nda boosu.

3:17b.LAM.003.017 Ni n'ay fundo furu k'a moorandi laakal kanay, Ay dinya baa haŋ kaŋ ti albarka.

3:18b.LAM.003.018 Ay ne: «Ay gaabo ban, Hala nda beeje kaŋ ay ga sinji Rabbi gaa.»

3:19b.LAM.003.019 Ma fongu ay kankamo d'ay yawtaray gora gaa, Kaŋ ga ti absint da hari forto.

3:20b.LAM.003.020 Daahir hala hõ ay bina goono ga fongu i gaa, Hal ay gungum ka ye ganda.

3:21b.LAM.003.021 Amma ay goono ga fongu hayey wo hal ay goono ga beeje sinji:

3:22b.LAM.003.022 Rabbi baakasinay suujo se no iri mana halaci, Zama a bakarawo si ban.

3:23b.LAM.003.023 A ga taji no susubay kulu. Ni naanayo ya ibeeri no!

3:24b.LAM.003.024 Ay fundo ne: «Rabbi ya ay baa no, Ay binde ga beeje sinji a gaa.»

3:25b.LAM.003.025 Rabbi ya gomnikoy no borey kaŋ g'a hangan se, Da fundo kaŋ g'a ceeci din se.

3:26b.LAM.003.026 A ga boori no boro ma beeje sinji ka dangay ka Rabbi faabayaŋ batu.

3:27b.LAM.003.027 A ga boori no boro se a ma taabi dondon za nga zankatara waate.

3:28b.LAM.003.028 A ma goro nga hinne ka dangay, Zama woodin no Rabbi dake a boŋ.

3:29b.LAM.003.029 A ma nga meyo daŋ laabu ra, Zama hambara a gonda beeje.

3:30b.LAM.003.030 A ma nga garba no boro kaŋ g'a kar se, A ma to nda wowi haŋyaŋ.

3:31b.LAM.003.031 Zama Koy Beero si boro furu hal abada.

3:32b.LAM.003.032 Baa day a na bine saray daŋ, Kulu nda yaadin a ga ye ka bakar nga baakasinay suuji booba boŋ.

3:33b.LAM.003.033 Zama manti ibaay boŋ no Rabbi ga taabi wala bine saray dake Adam-izey boŋ.

3:34b.LAM.003.034 I ma ndunnya ra hawantey kulu taamu-taamu,

3:35b.LAM.003.035 I ma boro ganji haŋ kaŋ ga wazibi a se Beeray-Beeri-Koyo jine,

3:36b.LAM.003.036 I ma boro cimo siirandi ciito do, Koy Beero mana yadda nda woodin yaŋ.

3:37b.LAM.003.037 May no ga ci, a ma to mo, Da manti Koy Beero lordi no?

3:38b.LAM.003.038 Masiiba nda gomni, Manti i kulu ga fun Beeray-Beeri-Koyo me ra no?

3:39b.LAM.003.039 Yaadin gaa binde, mate no? Boro fundikooni ga guuni-guuni d'i n'a gooji nga zunubey sabbay se no?

3:40b.LAM.003.040 Iri ma fintalyaŋ te, Iri m'iri muraadey neesi, Iri ma bare ka ye Rabbi do haray.

3:41b.LAM.003.041 Iri m'iri biney d'iri kambey sambu beene Irikoy gaa beena ra ka ne:

3:42b.LAM.003.042 «Iri na taali te, iri murte _ni gaa|_, Ni mo, ni mana iri yaafa.»

3:43b.LAM.003.043 Ni na ni boŋ didiji nda futay k'iri gaaray. Ni wi, ni mana bakar mo.

3:44b.LAM.003.044 Ni tugu buru ra zama adduwa kulu ma si bisa ka koy ni do.

3:45b.LAM.003.045 Ni n'iri ciya ziibi nda fisi ndunnya dumey game ra.

3:46b.LAM.003.046 Iri ibarey kulu na ngey meyey feeri iri gaa.

3:47b.LAM.003.047 Joote nda guusu hirrimi da halaciyaŋ da lemunyaŋ ga ti iri wane.

3:48b.LAM.003.048 Ay mundey go ga dooru ka fun ay moy ra sanda gooru hari cine, Ay borey ize wayo halaciyaŋo sabbay se.

3:49b.LAM.003.049 Ay moy go ga mundi dooru kaŋ sinda kayyaŋ, I mana naŋ,

3:50b.LAM.003.050 Hala Rabbi kaŋ go beene ma guna ka di.

3:51b.LAM.003.051 Ay moy g'ay bina daŋ a ma maa doori zama ay go ga di ay gallo wandiyey kulu taabey.

3:52b.LAM.003.052 Ngey kaŋ yaŋ ciya ay ibarey sabaabu kulu si, I n'ay gaaray da himma danga curayze cine.

3:53b.LAM.003.053 I n'ay fundo pati guuso ra, I n'ay catu nda tondiyaŋ.

3:54b.LAM.003.054 Haro din kulu no ka soobay ka gana ay boŋ, Hal ay ne: «I n'ay halaci.»

3:55b.LAM.003.055 Ya Rabbi, guuso kaŋ ku gumo, Hal a daba gaa no ay na ni maa ce.

3:56b.LAM.003.056 Ni maa ay jinda. Ma si ni hangey lutu d'ay hẽ ka gaakasinay ceeci.

3:57b.LAM.003.057 Hano kaŋ hane ay na ni ce, Ni maan, ni ne ay ma si humburu.

3:58b.LAM.003.058 Ya nin Koy Beero, ni faasa ay se k'ay fundo fansa*.

3:59b.LAM.003.059 Ya Rabbi, ni di kankamo kaŋ i te ay se, Ni m'ay sabaabo ciiti dumbu.

3:60b.LAM.003.060 Ni di banayaŋ da me-hawyaŋ kulu kaŋ i goono ga te ay boŋ.

3:61b.LAM.003.061 Ya Rabbi, ni maa i wowey d'i me-hawyaŋ kulu kaŋ i goono ga te ay boŋ,

3:62b.LAM.003.062 Da borey kaŋ tun ay se yaŋ din guuni-guuney, Da dabarey kaŋ i goono ga gurum ngey biney ra ay boŋ zaari me-a-me.

3:63b.LAM.003.063 Kala ni ma guna i gora d'i tunyaŋo. Ay ciya i se dooni hari.

3:64b.LAM.003.064 Ya Rabbi, ni ga alhakku bana i gaa, I kambe goyey hina me.

3:65b.LAM.003.065 Ni g'i no bine ra danawtaray, Kaŋ ga ti ni laaliyaŋo i se.

3:66b.LAM.003.066 Ni m'i gaaray da futay k'i halaci i ma ban Rabbi beeno wo cire.

4

4:1b.LAM.004.001 Kaari! Wura ciya ibi. Wura kaŋ hanan d'i kulu barmay. I na nangu hananta tondey gusam fondey gaarey kulu ra.

4:2b.LAM.004.002 Sihiyona ize darzantey kaŋ waato i darza ga saba nda wura hansante, A go, i n'i himandi sanda botogo foobuyaŋ, Kusu cinako kambe goy.

4:3b.LAM.004.003 Baa zoŋey ga ngey fafa no, I ga ngey izey naanandi, Amma ay jama ize wayo te bine-bi sanda saajo ra taatagayey cine.

4:4b.LAM.004.004 Attaciriya kaŋ go ga naan, A deena go ga naagu a daana gaa jaw maayaŋ sabbay se. Zankey go ga ŋwaari ŋwaaray, Amma boro kulu si zaban i se.

4:5b.LAM.004.005 Borey kaŋ waato i ga ndunnya kaani maayaŋ ŋwaari ŋwa, Sohõ i go ga halaci fondey boŋ. Ngey mo kaŋ i biiri sanda bonkooni izeyaŋ, Sohõ i go ga fisi begunu ganday.

4:6b.LAM.004.006 Zama ay jama ize wayo taalo alhakko bisa Saduma* zunubo alhakko, Kwaara kaŋ i zeeri fap! folloŋ! Baa kaŋ boro kulu mana kambe dake a gaa.

4:7b.LAM.004.007 A boro beerey bisa neezu* hanan yaŋ, I bisa wa gani kwaaray yaŋ mo. I gaahamey bisa koral* ciray yaŋ caw, I n'i ziiri sanda safir* tondiyaŋ.

4:8b.LAM.004.008 Amma sohõ i alhaaley bi da kusu banda, Boro si baa i bay fondey gaa. I kuurey sukum ka naagu i biriyey gaa, A koogu sanda bundu cine.

4:9b.LAM.004.009 Boro ma bu nda takuba baa a ma bu da haray. Hara g'a kombandi, a ga komso mo fari nafa-jaŋay sabbay se.

4:10b.LAM.004.010 Wayborey kaŋ biney ga baan, I kambey no ka ngey izey hina. I ciya i se ŋwaari ay jama ize wayo halaciyaŋo ra.

4:11b.LAM.004.011 Rabbi na nga dukuro toonandi, A na nga futay korna gusam. A na danji daŋ Sihiyona gaa kaŋ n'a ton kal a tiksa gaa.

4:12b.LAM.004.012 Ndunnya bonkooney da ndunnya gorokoy kulu mo, doŋ i si ta hal a ga hin ka te yanjekaari nda ibare ma furo Urusalima* meyey ra.

4:13b.LAM.004.013 Amma woodin te a annabey zunubey sabbay se, D'a alfagey goy laaley sabbay se, Ngey kaŋ na adilanteyaŋ kuri mun gallo ra.

4:14b.LAM.004.014 Sohõ i goono ga dira ka tatanji kwaara fondey ra sanda danawyaŋ. Kuri n'i ziibandi hal a to naŋ kaŋ boro kulu s'i bankaarayey ham.

4:15b.LAM.004.015 Borey wurru i gaa ka ne i se: «Ya araŋ ziibikoyey, wa tun, wa koy! Wa tun ka koy, wa si lamba iri gaa!» Ngey mo zuru, i soobay ka dira ka tatanji. Dumi cindey ra borey goono ga ne: «I si ye ka goro noodin koyne.»

4:16b.LAM.004.016 Rabbi futa n'i say-say, A si ye k'i saal koyne. Borey baa si da alfagey beera, I mana gomni te arkusey se mo.

4:17b.LAM.004.017 Iri wo, iri moy gaze, Zama gaakasinay kaŋ iri hangan ya yaamo no. Iri na mo daaru ka guna hala ndunnya dumi go no -- amma a si hin ka faaba te.

4:18b.LAM.004.018 I goono ga iri ce daarey gana, Kal iri si hin ka baa furo iri kwaarey fondey ra. Iri bananta maan, iri jirbey kubay, iri kokora kaa.

4:19b.LAM.004.019 Iri gaaraykoy waasu nda zeeban kaŋ ga deesi beene. I n'iri kankam da gaarayyaŋ tondi kuukey boŋ, I na gumandiyaŋ te iri se mo saajey ra.

4:20b.LAM.004.020 Iri niiney ra funsuyaŋo, Kaŋ ga ti Rabbi wane suubananta, Nga kaŋ iri ne a biyo cire no iri ga goro dumi cindey ra, I n'a di ngey guusu hirrimo ra.

4:21b.LAM.004.021 Ya nin, Edom ize wayo, ni ma farhã. Nin kaŋ goono ga goro Uz laabo ra, ma te bine kaani. Amma haŋ-gaasiya din ga bisa kal a ma koy ni do. Ni mo ga haŋ ka bugu, ka ni boŋ kaa koonu.

4:22b.LAM.004.022 Ya nin, Sihiyona ize wayo, ni laalayaŋo alhakko kubay. Rabbi si ye ka konda nin tamtaray koyne. Ya nin, Edom ize wayo, a ga ni laala alhakko bana ni gaa, A ma ni zunubey gundo fisi ka kaa taray mo.

5

5:1b.LAM.005.001 Ya Rabbi, ma fongu nda haŋ kaŋ du iri. Ma guna ka di iri haawo.

5:2b.LAM.005.002 I n'iri tubey ta ka no yawey se, K'iri windey mo no laabu fo boroyaŋ se.

5:3b.LAM.005.003 Iri ya alatuumiyaŋ no, iri sinda baaba, Iri nyaŋey mo kurnyey bu.

5:4b.LAM.005.004 Iri go g'iri haŋyaŋ harey day da nzarfu. Iri tuuri, kala hay boŋ no iri ga du a.

5:5b.LAM.005.005 Borey kaŋ n'iri gaaray n'iri ce kondo ŋwa. Iri farga, i si g'iri no fulanzamay mo.

5:6b.LAM.005.006 Iri na kambe salle Misirancey da Assiriyancey gaa, Zama iri ma du ŋwaari kaŋ ga wasa iri se.

5:7b.LAM.005.007 Iri baabey na zunubi te, i si no mo, Kal iri m'i taaley alhakko sambu.

5:8b.LAM.005.008 Bannyayaŋ go g'iri may, Iri sinda boro kulu kaŋ g'iri faaba i kambe ra.

5:9b.LAM.005.009 Iri fundey kataru no iri goono ga du ŋwaari nd'a, Saajo ra borey takuba sabbay se.

5:10b.LAM.005.010 Iri kuurey koroŋ sanda feema cine, Haray dunga korno sabbay se.

5:11b.LAM.005.011 I na wayborey sara Sihiyona ra, Da wandiyey mo Yahuda kwaarey ra.

5:12b.LAM.005.012 I na mayraykoyey sarku i kambey gaa, I mana arkusey beerandi mo.

5:13b.LAM.005.013 Sahãkooney na hinji sambu ka duru, Zankey go ga kati tuuri jaraw cire.

5:14b.LAM.005.014 Arkusey ban faada meyey ra, Arwasey mo fay da dooni teeyaŋ.

5:15b.LAM.005.015 Iri biney farhã ban, Iri gaani kulu bare ka ciya bu baray.

5:16b.LAM.005.016 Koytaray fuula fun iri boŋey gaa ka kaŋ. Kaari iri sohõ! Zama iri na zunubi te.

5:17b.LAM.005.017 Woodin se no iri biney yangala, Woodin se mo no iri moy te kusa-kusa.

5:18b.LAM.005.018 Sihiyona tondo ciya kurmu. Zoŋoyaŋ go ga bar-bare noodin.

5:19b.LAM.005.019 Nin ya Rabbi, ni go no hal abada. Ni karga go no zamana ka koy zamana.

5:20b.LAM.005.020 Ifo no ka naŋ ni ga dinya iri gaa duumi? Ifo se no ni n'iri furu banda za gayyaŋ?

5:21b.LAM.005.021 Ya Rabbi, m'iri ye ni do haray. Iri mo, iri ga bare ka ye ka kaa. M'iri jirbey tajandi sanda doŋ waney cine.

5:22b.LAM.005.022 Da manti ni n'iri furu parkatak no, Ka futu iri gaa gumo mo.