Psalms (Zarma)

1

1:1b.PSA.001.001 Albarkante no boro kaŋ si boro laaley saawara gana, A si kay zunubikooney fondey ra, A si goro mo hahaaraykoy nangora ra.

1:2b.PSA.001.002 Amma a kaani maayaŋ kulu si kala Rabbi asariya* ra, A asariya ra mo no a ga soobay ka miila cin da zaari.

1:3b.PSA.001.003 Nga wo ga ciya sanda tuuri-nya kaŋ i tilam hari zuray me gaa, Kaŋ ga nga izey hay nga alwaato ra. A kobta mo si lakaw, Haŋ kaŋ a ga te me-a-me mo ga te albarka.

1:4b.PSA.001.004 Manti yaadin cine no boro laaley bara nd'a bo, Amma i ga hima sanda du kaŋ haw ga faaru.

1:5b.PSA.001.005 Woodin sabbay se no boro laaley si du ka kay ciiti zaaro ra, Zunubikooney mo si kay adilantey jama ra.

1:6b.PSA.001.006 Zama Rabbi ga adilantey fonda bay, Amma boro laaley fonda ga halaci.

2

2:1b.PSA.002.001 Ifo se no ndunnya dumey follo, Jamayaŋ mo ga hari yaamo yaŋ miila?

2:2b.PSA.002.002 Ndunnya bonkooney tun ka kay, Mayraykoyey mo goono ga me haw ka gaaba nda Rabbi nda nga Almasihu.

2:3b.PSA.002.003 I goono ga ne: «Iri m'i sisirey pati-pati, Iri m'i korfey feeri ka furu ka kaa iri gaa.»

2:4b.PSA.002.004 Beeney ra gorokwa ga haaru; Koy Beero ga dond'ey.

2:5b.PSA.002.005 Waato din gaa no a ga salaŋ i se nga futa ra, K'i taabandi nga dukuri konna ra, ka ne:

2:6b.PSA.002.006 «Kulu nda yaadin ay g'ay bonkoono sinji ay tondi hananta Sihiyona boŋ.

2:7b.PSA.002.007 Daahir ay ga Rabbi waado baaru fe. A ne ay se: ‹Ni ya ay izo no. Hunkuna no ay na ni hay.

2:8b.PSA.002.008 Ni m'ay hã, ay mo, Kala ay ma ni no ndunnya dumey ni tubu hari, Ndunnya nangu moorey me mo ma ciya ni mayray hari.

2:9b.PSA.002.009 Ni g'i ceeri-ceeri nda guuru-bi goobu. Ni g'i bagu-bagu sanda kusu cinako cambu cine.› »

2:10b.PSA.002.010 Yaadin gaa binde, ya araŋ, koyey, wa te laakal fa. Ya araŋ, ndunnya ciitikoy, wa gooji nda bayray.

2:11b.PSA.002.011 Wa may Rabbi se da humburkumay, Wa farhã da jijiriyaŋ.

2:12b.PSA.002.012 Wa izo garba sunsum, zama a ma si futu hala mo araŋ ma halaci fonda boŋ, Zama a futay korna ga tara ka tun. Albarkante no borey kulu kaŋ yaŋ ga koru a do.

3

3:1b.PSA.003.001 Dawda wane no kaŋ a te waato kaŋ a zuru nga izo Absalom se.

3:2b.PSA.003.002 Ya Rabbi, ay ibarey tonton hal i si lasaabu, Borey kaŋ yaŋ goono ga tun ay gaa ga baa gumo.

3:3b.PSA.003.003 Boro boobo no goono ga ne ay fundo boŋ: «Gaakasinay kulu s'a se Irikoy do.» (Wa dangay)

3:4b.PSA.003.004 Amma, ya Rabbi, ni ya koray no ay se, Ni ya ay darza d'ay bina gaabandikwa mo no.

3:5b.PSA.003.005 Ay jinda no ay hẽ d'a Rabbi gaa, A tu ay se mo nga tondi hananta ra. (Wa dangay)

3:6b.PSA.003.006 Ay kani, ay jirbi, Ay mo hay, zama Rabbi goono g'ay kuru.

3:7b.PSA.003.007 Boro zambarey baayaŋ kaŋ n'ay windi nda gaaba, I humburkumay s'ay di.

3:8b.PSA.003.008 Ya Rabbi, tun! Ya ay Irikoyo, m'ay faaba! Zama ni n'ay ibarey kulu kar garbe gaa. Ni na laalakoyey hinjey bagu-bagu.

3:9b.PSA.003.009 Faaba wo Rabbi kambe ra n'a go. Ni albarka ma goro ni borey boŋ. (Wa dangay)

4

4:1b.PSA.004.001 Doonkoy jine bora se. I m'a doon da moolo beeri karyaŋ. Dawda wane no.

4:2b.PSA.004.002 Ya ay Irikoyo, ay adilitara, Ma tu ay se waati kaŋ ay ga ni ce, Zama waato kaŋ ay go kankami ra ni na dogonay te ay se. M'ay suuji, ma maa ay adduwa se.

4:3b.PSA.004.003 Ya araŋ Adam-izey, waati fo no i g'ay darza bare ka ciya kayna yaŋo wo naŋ? Araŋ ga ba yaamo, araŋ ga tangari ceeci, Waati fo no araŋ g'i naŋ? (Wa dangay)

4:4b.PSA.004.004 Amma araŋ ma bay kaŋ Rabbi na nga se mayko fay waani nga boŋ se. Rabbi ga maa waati kaŋ ay g'a ce.

4:5b.PSA.004.005 Wa humburu, araŋ ma si zunubi te mo. Wa saaware da araŋ biney araŋ daarijey boŋ, ka dangay. (Wa dangay)

4:6b.PSA.004.006 Wa adilitaray sargayyaŋ no, Wa de Rabbi gaa mo.

4:7b.PSA.004.007 Boro boobo go ga ne: «May no ga booriyaŋ cabe iri se?» Ya Rabbi, ma ni moyduma annura bare iri do haray.

4:8b.PSA.004.008 Ni na farhã daŋ ay bina ra kaŋ ga bisa i waney waati kaŋ cine i ntaaso d'i reyzin* harey ga baa gumo.

4:9b.PSA.004.009 Ay ga kani ka jirbi nda laakal kanay, Zama nin, ya Rabbi, ni hinne no g'ay gorandi fitina si yaŋ ra.

5

5:1b.PSA.005.001 Doonkoy jine bora se. I m'a doon da seese karyaŋ. Dawda wane no.

5:2b.PSA.005.002 Ya Rabbi, ma hanga jeeri ay sanno se, Ma laakal d'ay miila-miiley.

5:3b.PSA.005.003 Ya ay Koyo, ay Irikoyo, m'ay hẽeno jinde hangan, Zama ni gaa no ay ga adduwa te.

5:4b.PSA.005.004 Ya Rabbi, susubay ni ga maa ay jinde. Susubay ay g'ay miila ye ni do haray d'ay adduwa, Ay ga batu mo.

5:5b.PSA.005.005 Zama nin wo manti Irikoy kaŋ ga maa laala kaani no, Laala si goro ni banda.

5:6b.PSA.005.006 Foomakoy mo si du ka kay ni jine. Goy laalo teekoy kulu, ni wang'ey.

5:7b.PSA.005.007 Ni ga tangari ciikoy halaci. Boro kaŋ ga kuri mun, a ga gulinci mo, Rabbi g'a fanta.

5:8b.PSA.005.008 Amma day ay wo, ni baakasinay suuji yulwanta ra no ay ga furo ni windo ra. Ni humburkuma ra mo no ay ga sududu, Ay moyduma ga guna ni fu hananta do haray.

5:9b.PSA.005.009 Ya Rabbi, ma jina candi ay se ni adilitaray ra ay ibarey sabbay se. Ma ni fonda kayandi ay jine zar!

5:10b.PSA.005.010 Zama cimi si i meyey ra, halaciyaŋ no i biney ra. I karrey ya saaray feeranteyaŋ no, I deenayzey no i ga me-kaanay te d'a.

5:11b.PSA.005.011 Ya Irikoy, m'i taaley dake i boŋ. I bumbey saawarey m'i zeeri. M'i furu i taali boobey ra, zama i murte ni gaa.

5:12b.PSA.005.012 Amma borey kaŋ yaŋ ga de ni gaa kulu ma te bine kaani. I ma jinde tunandi farhã sabbay se duumi, Zama se ni ga te i se kosaray. Borey kaŋ yaŋ ga ba ni maa mo ma farhã gumo ni do.

5:13b.PSA.005.013 Zama ni wo, ya Rabbi, ni ga adilante* albarkandi. Ni g'a windi nda gomni mo sanda koray cine.

6

6:1b.PSA.006.001 Doonkoy jine bora se. I m'a doon da moolo hamni ahakkukoy karyaŋ. Dawda wane no.

6:2b.PSA.006.002 Ya Rabbi, ma si deeni ay ga ni futa ra, Ma s'ay gooji mo ni futay korna ra.

6:3b.PSA.006.003 Ya Rabbi, m'ay suuji, zama ay lakaw parkatak. Ya Rabbi, m'ay no baani, zama ay biriyey goono ga kaama,

6:4b.PSA.006.004 Ay fundo mo maa doori gumo. Ni mo, ya Rabbi, kala waati fo?

6:5b.PSA.006.005 Ya Rabbi, ma ye ka kaa k'ay fundo faaba. M'ay faaba ni baakasinay suujo se.

6:6b.PSA.006.006 Zama buuyaŋ ra sinda ni fonguyaŋ, Alaahara ra mo may no ga saabu ni se?

6:7b.PSA.006.007 Ay farga ay hẽeni booba sabbay se. Cin kulu ay go g'ay daarijo tayandi, Ay dima mo tay d'ay mundey.

6:8b.PSA.006.008 Ay moy kayna bine saray sabbay se, I zeen ay yanjekaarey kulu sabbay se.

6:9b.PSA.006.009 Ya araŋ goy laalo teekoy kulu, wa fay nd'ay, Zama Rabbi maa ay hẽeno jinda.

6:10b.PSA.006.010 Rabbi maa ay ŋwaara. Rabbi g'ay adduwa ta.

6:11b.PSA.006.011 Ay ibarey kulu, haawi nda humburkumay m'i di gumo. I ma bare, haawi m'i di sahãadin-sahãadin.

7

7:1b.PSA.007.001 Dawda hẽeno kaŋ a te baytu Rabbi se, Benyamin bora Kus boŋ.

7:2b.PSA.007.002 Ya Rabbi ay Irikoyo, ni do no ay ga tuguyaŋ do ceeci. M'ay faaba, M'ay soolam ka kaa ay gaaraykoy kulu kambe.

7:3b.PSA.007.003 Zama i ma s'ay kortu-kortu sanda muusu beeri cine kaŋ ga tooru-tooru, faabako mo si.

7:4b.PSA.007.004 Ya Rabbi, ay Irikoyo, hala day ay na woone yaŋ te no: Da day laala go ay kambe ra,

7:5b.PSA.007.005 Wala ay bana ay naanay bora gaa da goy laalo, Wala ay n'ay yanjekaaro zamba sabaabu kulu si --

7:6b.PSA.007.006 Naŋ ay ibara m'ay fundo kankam da gaarayyaŋ kal a m'a di. Naŋ a m'ay fundo taamu ganda, A m'ay darza mutukuru bulungu ra. (Wa dangay)

7:7b.PSA.007.007 Ya Rabbi, ma tun ni futa ra, Ma tun ka kay ka gaaba nda ay yanjekaarey futa. Ma mo hay ay sabbay se, ma cimi ciiti te.

7:8b.PSA.007.008 Dumey marga ma ni windi, Ni ma ye beene ka kaaru i boŋ.

7:9b.PSA.007.009 Rabbi ga ciiti te ndunnya dumey se. Ya Rabbi, ma ciiti te ay se ay adilitara hino me, Da hananyaŋo kaŋ go ay se me mo.

7:10b.PSA.007.010 Naŋ laalakoyey laala ma ban, Amma ni ma adilantey tabbatandi. Zama Irikoy ya adilitaraykoy no, A ga bine da nga gundu neesi.

7:11b.PSA.007.011 Ay korayo go Irikoy do, Nga kaŋ ga bine ra adilantey faaba.

7:12b.PSA.007.012 Irikoy ya adilitaray ciitiko no. Oho, Irikoy ga dukur han kulu.

7:13b.PSA.007.013 Da boro mana bare ka tuubi, kala Irikoy ma nga takuba kaanandi. A ma haw daŋ nga birawo ra mo.

7:14b.PSA.007.014 A na buuyaŋ wongu jinayyaŋ soola a se. A na nga hangawey ciya danjikoyyaŋ.

7:15b.PSA.007.015 Guna, boro ga hay-zaŋay da laala. Oho, a ga zamba gunde sambu ka tangari hay.

7:16b.PSA.007.016 A na guusu soola, a n'a fansi. A kaŋ guusu hirrimo kaŋ a te din ra.

7:17b.PSA.007.017 A zamba ga ye a bumbo boŋ. A toonya mo ga zumbu a boŋ bindo ra.

7:18b.PSA.007.018 Ay ga saabu Rabbi se a adilitara boŋ. Ay ga sifayaŋ baytu te Rabbi kaŋ bisa ikulu maa gaa.

8

8:1b.PSA.008.001 Doonkoy jine bora se. I m'a doon da moolo hamni ahakkukoy karyaŋ. Dawda wane no.

8:2b.PSA.008.002 Ya Rabbi Irikoy, Man gaa ni maa darza misa ndunnya kulu ra? Nin no ka ni beera daŋ beeney boŋ.

8:3b.PSA.008.003 Ni na gaabi sinji attaciriyey da naanandey me ra ni yanjekaarey sabbay se, Zama ni ma ibara da fansa banakwa ganji sanni.

8:4b.PSA.008.004 Waati kaŋ ay goono ga laakal da beeney kaŋ ni te, Kaŋ ga ti ni kambe goyey, Hando da handariyayzey mo kaŋ yaŋ ni daŋ,

8:5b.PSA.008.005 Adam-ize ya ifo no binde kaŋ ni ga fongu a gaa, Wala ifo no boro izo kaŋ ni g'a kunfa?

8:6b.PSA.008.006 Ni n'a gazandi malaykey gaa kayna, Ni n'a didiji nda darza nda beeray mo.

8:7b.PSA.008.007 Ni n'a daŋ a ma mayray te ni kambe goyey boŋ. Ni na hay kulu daŋ a cey cire:

8:8b.PSA.008.008 Feejey da hawey kulu, Oho, hala nda ganji hamey,

8:9b.PSA.008.009 Da beene curayzey da teeku hamey, Da hay kulu kaŋ ga gana teeku fondey ra.

8:10b.PSA.008.010 Ya Rabbi Irikoy, Man gaa ni maa darza misa ndunnya kulu ra?

9

9:1b.PSA.009.001 Doonkoy jine bora se. I m'a doon da subo kaŋ ga ne: «Ma bu ize aro se». Dawda wane no.

9:2b.PSA.009.002 Ay ga saabu Rabbi se d'ay bina kulu. Ay ga ni dambara goyey kulu dede.

9:3b.PSA.009.003 Ya nin kaŋ ga bisa ikulu, Ay ga farhã da farhã beeri ni do, Ay ma sifayaŋ baytu te ni maa gaa.

9:4b.PSA.009.004 D'ay ibarey na banda bare, I ga kati no ka halaci ni jine.

9:5b.PSA.009.005 Zama ni n'ay cimo d'ay sabaabo tabbatandi. Ni goro karga boŋ ka cimi ciiti te.

9:6b.PSA.009.006 Ni deeni dumi cindey gaa, ni na boro laaley halaci. Ni n'i maa tuusu hal abada abadin.

9:7b.PSA.009.007 Ibarey ban parkatak, i ciya batama koonu hal abada, Gallu beerey mo kaŋ ni zeeri, boro si baa fongu i gaa.

9:8b.PSA.009.008 Amma Rabbi goono ga goro hal abada. A na nga karga sinji ciiti sabbay se.

9:9b.PSA.009.009 A ga ciiti ndunnya se adilitaray ra. Mate kaŋ ga saba boŋ no a ga ciiti te ndunnya dumey se.

9:10b.PSA.009.010 Rabbi ga ciya wongu fu kuuku borey kaŋ yaŋ i goono ga kankam din se, Wongu fu kuuku no taabi alwaati ra.

9:11b.PSA.009.011 Borey kaŋ yaŋ na ni maa bay mo ga de ni gaa, Zama nin, ya Rabbi, ni si ni ceecikoy furu.

9:12b.PSA.009.012 Wa sifayaŋ baytu te Rabbi se, Nga kaŋ goono ga goro Sihiyona ra. W'a goyey baaru fe ndunnya dumey se.

9:13b.PSA.009.013 Zama nga kaŋ ga kuri munyaŋ faasa goono ga fongu taabantey gaa, A si dinya i hẽeno mo.

9:14b.PSA.009.014 Ya Rabbi, nin kaŋ g'ay sambu ay ma fun buuyaŋ windi meyey gaa, M'ay suuji, ma guna taabi kaŋ ay goono ga haŋ ay ibarey kambe ra,

9:15b.PSA.009.015 Zama ay ma du ka ni saabuyaŋey kulu dede Sihiyona* ize wayo windi meyey ra, Zama ay ma farhã ni faaba ra mo.

9:16b.PSA.009.016 Dumi cindey kaŋ guusey kaŋ i fansi din ra. I cey sarku asuuta kaŋ i hirri din gaa mo.

9:17b.PSA.009.017 Rabbi na nga boŋ bangandi nga cimi ciito do. I ga ilaalo zorti k'a di da nga bumbo kambe goyey. Wa fongu woodin gaa ka dangay.

9:18b.PSA.009.018 I ga boro laaley ye Alaahara, Sanda ndunnya dumey kulu kaŋ dinya Irikoy nooya.

9:19b.PSA.009.019 Zama manti waati kulu no Irikoy ga dinya laamikoy gaa bo, Taabante beeje mo si halaci hal abada.

9:20b.PSA.009.020 Ya Rabbi, ma tun! Boro ma si du ka te zaama. I ma dumi cindey ciiti ni jine.

9:21b.PSA.009.021 Ya Rabbi, m'i humburandi. Dumi cindey ma bay kaŋ ngey ya boroyaŋ hinne day no. (Wa dangay)

10

10:1b.PSA.010.001 Ya Rabbi, ifo se no ni go ga kay nangu mooro? Ifo se mo no ni go ga tugu taabi alwaati ra?

10:2b.PSA.010.002 Laalakoyey boŋbeera ra i ga taabante ce kondo ŋwa da waasi. Naŋ i m'i di i me-hawyaŋo kaŋ i saaware din ra.

10:3b.PSA.010.003 Zama laalakoy ga niine jare no nga bina ra bina biniya boŋ, Boro kaŋ ga canse sifa no, kaŋ ga donda Rabbi mo.

10:4b.PSA.010.004 Boro laalo, nga niine jareyaŋo ra, A ga ne nga si Irikoy ceeci. A fonguyaŋ kulu si kala noodin, a ma ne way: «Irikoy si no.»

10:5b.PSA.010.005 A muraadey go ga feeri waati kulu. Ni ciitey mooru a se beene hal a si du k'i fonnay. A yanjekaarey kulu, a ga me nyatte i gaa no.

10:6b.PSA.010.006 A ga ne nga bina ra: «I si hin k'ay zinji me! Kal a ma koy hala zamaney kulu gaa, taabi si du ay.»

10:7b.PSA.010.007 A meyo to da laaliyaŋ da gulinci da kankami. Zamba nda laala go a deena boŋ.

10:8b.PSA.010.008 Kwaara kambey ra gumyaŋ nangey ra no a ga nga goray te, Tuguyaŋ nangu ra a ga borey kaŋ yaŋ sinda taali wi, A goono ga mo cale daŋ ka gazantey guna.

10:9b.PSA.010.009 A go ga lamba tuguyaŋ do sanda muusu beeri go nga guuso ra, A goono ga gum zama nga ma taabante di se, A ga taabante di waati kaŋ a n'a zorti nga asuuta ra.

10:10b.PSA.010.010 A gungum, a taŋ ka gum, a ce camsey ga gazantey zeeri.

10:11b.PSA.010.011 Nga bine ra a ga ne: «Irikoy dinya, A na nga moyduma tugu, a si di hal abada.»

10:12b.PSA.010.012 Ya Rabbi, ma tun. Ya Irikoy, ma ni kamba sambu. Ma si dinya taabantey gaa.

10:13b.PSA.010.013 Ifo se no laalakoy ga donda Irikoy, Hala nga bina ra a ga ne: «Ni s'ay hã d'a.»?

10:14b.PSA.010.014 _Ya Rabbi|_, ni di, Zama ni go ga laakal da zamba nda taabi, Zama ni m'i bana da ni kamba. Ni do no gazante ga nga boŋ talfi. Nin no ga ti alatuumey gaako.

10:15b.PSA.010.015 Ni ma laalakoyey kambey ceeri. Boro laalo mo, ni m'a laala fisi ka kaa taray hala hay kulu ma si cindi.

10:16b.PSA.010.016 Rabbi wo Koy no hal abada abadin. Dumi cindey halaci a laabo ra.

10:17b.PSA.010.017 Ya Rabbi, ni maa taabantey muraadey se. Ni g'i biney gaabandi, Ni ga ni hanga jeeri mo hala ni ma maa.

10:18b.PSA.010.018 Ni ma du ka alatuumey da borey kaŋ yaŋ di kankami mo alhakko kaa taray i se. Zama boro kaŋ ga ti ndunnya wo wane, A ma si ye ka humburandi.

11

11:1b.PSA.011.001 Doonkoy jine bora se. Dawda wane no. Rabbi do no ay ga tugu. Mate se no araŋ ga ne ay fundo se: «Zuru ka koy ni tondi beero do sanda curayze cine»?

11:2b.PSA.011.002 Zama guna, laalakoyey na biraw naan, I na ngey hangawey daŋ biraw korfey gaa, Zama ngey ma bine ra adilante hay kubay ra.

11:3b.PSA.011.003 Hala day dabey bagu, Ifo no adilante ga te?

11:4b.PSA.011.004 Rabbi go nga fu hanna ra. Rabbi wo, a karga go beena ra. A moy goono ga Adam-izey guna, A mo-ka-mi yaŋey goono g'i neesi.

11:5b.PSA.011.005 Rabbi ga adilante gosi, Amma a bina ga konna laalakoy da toonye baako.

11:6b.PSA.011.006 A ga hirrimiyaŋ gusam laalakoyey boŋ. Danji da sufar* da haw kaŋ ga koroŋ, Woodin yaŋ no ga ti i haŋ-gaaso baa.

11:7b.PSA.011.007 Zama Rabbi ya adilitaraykoy no, A ga ba adilitaray goy mo. Bine daahirantekoy ga di a moyduma.

12

12:1b.PSA.012.001 Doonkoy jine bora se. I m'a doon da moolo hamni ahakkukoy karyaŋ. Dawda wane no.

12:2b.PSA.012.002 Ya Rabbi, ma gaakasinay te, Zama hanante si no koyne, Naanaykoy si no mo Adam-izey ra.

12:3b.PSA.012.003 I afo kulu, tangari no a ga hawa nga gorokasin gaa da tangari sifaw me-kuuruyaŋ, Bine hinka mo no a ga salaŋ d'a.

12:4b.PSA.012.004 Tangari sifaw me-kuurey kulu da deeney kaŋ ga sanni yaamo beeriyaŋ te, Rabbi m'i dangandi.

12:5b.PSA.012.005 Ngey no ka ne: «Iri deeney no iri ga te zaama nd'a. Iri me-kuurey iri bumbey wane yaŋ no. May ga ti jine boro iri boŋ?»

12:6b.PSA.012.006 Yaa no Rabbi ci: «Ay ga tun sohõ, Taabantey kankamo da laamikoyey durayyaŋey sabbay se, Ay m'i daŋ baani kaŋ i go ga ceeci ra.»

12:7b.PSA.012.007 Rabbi me sanney ya sanni hananteyaŋ no, Sanda nzarfu kaŋ i gosi guuru hinayaŋ sintilo ra cine, Wo kaŋ i hanandi hala sorro iyye.

12:8b.PSA.012.008 Ya Rabbi, nin no g'i batu, Ni g'i haggoy k'i wa da zamana wo dumi borey hal abada.

12:9b.PSA.012.009 D'i na kazaamataray beerandi Adam-izey ra, Boro laaley ga zankam no nangu kulu.

13

13:1b.PSA.013.001 Doonkoy jine bora se. Dawda wane no.

13:2b.PSA.013.002 Hala waatifo, ya Rabbi? Ni ga dinya ay gaa pat no? Waatifo no ni ga fay da ni moyduma tuguyaŋ ay se?

13:3b.PSA.013.003 Ay go ga saaware ay bina ra, Ay bina goono ga hasara zaari me-a-me. Waatifo n'a ga ban? Ay ibara du beeray ay boŋ. Waatifo n'a ga ban?

13:4b.PSA.013.004 Ya Rabbi ay Irikoyo, ma laakal ye, ma tu ay se. M'ay moy no kaari, zama ay ma si buuyaŋ jirbi te.

13:5b.PSA.013.005 Zama ay ibara ma si ne: «Ay te a boŋ zaama!» Ay yanjekaarey mo ma si farhã waati kaŋ ay zinji.

13:6b.PSA.013.006 Amma ay de ni baakasinay suujo gaa. Ay bina ga farhã ni faaba sabbay se. Ay ga baytu te Rabbi se zama a boriyandi ay se.

14

14:1b.PSA.014.001 Doonkoy jine bora se. Dawda wane no. Saamo ga ne nga bina ra: «Irikoy si no.» I fumbu, i na fanta goyyaŋ te. Goy hanno teeko si no, baa afo.

14:2b.PSA.014.002 Rabbi go hala beene, a na Adam-izey guna ganda, Nga ma di hala fahamante go no kaŋ ga Irikoy ceeci.

14:3b.PSA.014.003 I kulu kamba, i fumbu care banda. Goy hanno teeko si no; baa afolloŋ si no.

14:4b.PSA.014.004 Laala goy-teekoy wo sinda bayray no? Ngey kaŋ yaŋ g'ay borey ŋwa sanda mate kaŋ cine i ga buuru ŋwa, I si Rabbi ce mo.

14:5b.PSA.014.005 Noodin no humburkumay boobo n'i di, Zama Irikoy go adilantey dumey banda.

14:6b.PSA.014.006 Araŋ na taabante saaware haawandi, Day Rabbi no ga ciya a se tuguyaŋ do.

14:7b.PSA.014.007 Doŋ day Israyla* faaba ma fun Sihiyona ra! Alwaati kaŋ Rabbi ga ye ka kande nga borey i ma fun tamtaray, Yakuba ga farhã, Israyla ga te bine kaani.

15

15:1b.PSA.015.001 Dawda wane no. Ya Rabbi, may no ga zumbu ni hukumo ra? May no ga goro ni tondi hananta boŋ?

15:2b.PSA.015.002 Kala nga kaŋ goono ga dira zar-zar, A goono ga adilitaray goy te, A ga cimi ci mo nga bina ra.

15:3b.PSA.015.003 Kala boro kaŋ si nga deena daŋ kormoto ra, A si goy laalo te nga hangasin se, A si nga gorokasin wow mo.

15:4b.PSA.015.004 Kaŋ nga wo diyaŋ gaa furkante ya donda-caray hari no, Day a ga borey kaŋ ga humburu Rabbi beerandi. A ga baa ze hala nda nga boŋ hasaraw hari go a ra, A si barmay mo.

15:5b.PSA.015.005 A si nga nooru garaw nooru nda hari boŋ, A si me-daabu ta zama nga ma boro kaŋ sinda taali zeeri se. Boro kaŋ ga woodin yaŋ te si zinji hal abada.

16

16:1b.PSA.016.001 Dawda baytu fo no. Ya Irikoy, m'ay hallasi, zama ni do no ay ga tugu.

16:2b.PSA.016.002 Ay ne Rabbi se: «Nin no ga ti ay Koyo. Ay sinda booriyaŋ fo kala nin.»

16:3b.PSA.016.003 Hanantey kaŋ go laabo ra ciine ra mo, Ngey no ga ti borey kaŋ yaŋ bisa i kulu beeray, Borey kaŋ yaŋ ay kaani maayaŋ kulu go i do.

16:4b.PSA.016.004 Ngey kaŋ yaŋ ga Rabbi barmay da de-koy* fo, Bine saray ga baa i se gumo. Ay s'i kuri sargayey salle. Baa i maayey, ay s'i ce d'ay meyo.

16:5b.PSA.016.005 Rabbi no ga ti ay tubo baa d'ay haŋ-gaasiya mo. Nin no k'ay baa tabbatandi.

16:6b.PSA.016.006 Ay baa go baani nangey ra. Oho, ay gonda tubu hanno.

16:7b.PSA.016.007 Ay ga Rabbi sifa, nga kaŋ ga saaware ay gaa. Oho, cin ay bina g'ay yaamar.

16:8b.PSA.016.008 Ay na Rabbi daŋ ay jine waati kulu. Za kaŋ a go ay kambe ŋwaaro gaa, ay si zinji.

16:9b.PSA.016.009 Woodin sabbay se no ay bina ga farhã, Ay darza mo ga beeri, Ay gaahamo mo ga fulanzam fitina si.

16:10b.PSA.016.010 Zama ni s'ay fundo naŋ Alaahara, Ni si naŋ ni wane Hanna ma fumbu.

16:11b.PSA.016.011 Ni naŋ ay ma fundi fonda bay, Ni jine gonda farhã kunji, Ni kambe ŋwaaro gaa gonda kaani maayaŋ hal abada.

17

17:1b.PSA.017.001 Dawda adduwa fo no. Ya Rabbi, ma maa cimi sanni, m'ay hẽeno hangan. Ma hanga jeeri ay adduwa se, Kaŋ si fun me gulincikoy ra.

17:2b.PSA.017.002 Ay ciito ma fun ni do, Ni moy mo ma guna nda sabayaŋ.

17:3b.PSA.017.003 Ni jin k'ay bina neesi, ni n'ay kunfa cin. Ni n'ay gosi, ni mana taali kulu gar. Ay sijiri mo ay meyo ma si harta.

17:4b.PSA.017.004 Borey goyey ciine ra binde, Ni me sanno boŋ no ay n'ay boŋ batu ka fay da toonyantey fondey.

17:5b.PSA.017.005 Ay cey na ni fondey gana, Ay ce taamey mana tansi baa ce fo.

17:6b.PSA.017.006 Ya Irikoy, ay na ni ce zama ni ga tu ay se. Ma ni hanga jeeri ay se, ma maa ay sanno.

17:7b.PSA.017.007 Ya nin kaŋ ga borey kaŋ ga de ni gaa faaba nda ni kambe ŋwaaro, K'i kaa borey kaŋ yaŋ tun ka gaaba nd'ey kambe ra, Ma ni baakasinay suujo kaŋ ga dambarandi cabe.

17:8b.PSA.017.008 Ni m'ay haggoy sanda ni mo gura cine, Ni m'ay tugu mo ni fatey biyo ra,

17:9b.PSA.017.009 Laalakoyey kaŋ g'ay arzaka ku sabbay se, D'ay ibarey kaŋ goono g'ay fundo ceeci, Kaŋ yaŋ goono g'ay windi mo sabbay se.

17:10b.PSA.017.010 I si bakar, i goono ga boŋbeeray sanni te.

17:11b.PSA.017.011 Sohõ i na iri daŋ game iri dirawo ra. I na mo sinji iri gaa zama ngey m'iri soote ganda se.

17:12b.PSA.017.012 A ga hima sanda muusu beeri kaŋ ga bini nga ma kortu, Sanda muusu beeri ize kaŋ goono ga batandi tuguyaŋ ra.

17:13b.PSA.017.013 Ya Rabbi, ma tun ka kay, m'a gandu k'a zeeri. M'ay faaba boro laalo kambe ra da ni takuba.

17:14b.PSA.017.014 Ya Rabbi, m'ay faaba borey gaa da ni kamba, Ndunnya borey gaa kaŋ ngey wo baa, Fundi woone hinne ra no a go, Ngey kaŋ ni n'i gundey toonandi nda ni jisiro. I izey kungu, I ga haŋ kaŋ cindi mo naŋ ngey attaciriyey se.

17:15b.PSA.017.015 Amma ay wo, ay ga ni moyduma guna adilitaray ra. Ay ga ne a wasa waati kaŋ ay ga mo hay ni himando ra.

18

18:1b.PSA.018.001 Doonkoy jine bora se. Rabbi tamo Dawda wane no. A na baytu woone sanney ci Rabbi se hano kaŋ hane Rabbi n'a kaa nga ibarey kulu da Sawulu mo kambe ra. A ne:

18:2b.PSA.018.002 Ya Rabbi ay gaabo, ay ga ba nin.

18:3b.PSA.018.003 Rabbi ya ay tondo no, d'ay wongu fuwo, d'ay faabakwa mo, D'ay Irikoyo, ay tondi gaabikoono. A ra no ay ga tugu. Ay korayo d'ay faaba hillo, D'ay cinari kuuko mo no koyne.

18:4b.PSA.018.004 Ay ga ce Rabbi gaa, nga kaŋ to sifayaŋ. Woodin ga naŋ ay ma du faaba ka fun ay ibarey kambe ra.

18:5b.PSA.018.005 Buuyaŋ korfey didiji ay gaa, Irikoy jaŋ-ka-ganayaŋ baayaŋo n'ay humburandi.

18:6b.PSA.018.006 Alaahara korfey n'ay koli ka windi, Buuyaŋ hirrimey n'ay di.

18:7b.PSA.018.007 Ay kankamo ra ay na Rabbi ce, Ay na jinde tunandi ay Irikoyo gaa. A maa ay jinda nga fuwo ra, Ay hẽeno kaŋ ay te a jine din mo furo a hangey ra.

18:8b.PSA.018.008 Saaya din no laabo gaan, a zinji. Tondi kuukey tiksey nyooti, I zinji-zinji, zama Rabbi futu.

18:9b.PSA.018.009 Dullu fun a niina ra ka ciciri, Danji mo kaŋ ga ŋwa ka ban fun a meyo ra. A na danji-bi yaŋ diyandi.

18:10b.PSA.018.010 A na beena gungumandi ka zumbu ganda. Kubay bi tik go a ce taamey cire.

18:11b.PSA.018.011 A kaaru ciiti malayka* boŋ ka tun beene. Oho, a tun da waasi haw fatey boŋ ka deesi.

18:12b.PSA.018.012 A na kuba ciya nga tuguyaŋ do. A bukka no kaŋ go g'a windi, hari kubay, beene hirriyaŋ beerey no.

18:13b.PSA.018.013 A beene hirriyaŋ beerey bisa, zama kaari go a jine, Da gari da danj'ize.

18:14b.PSA.018.014 Rabbi kaati beeney ra, Beeray-Beeri-Koyo na nga jinda beerandi, gari da danji ize.

18:15b.PSA.018.015 A na nga hangawey donton k'i say-say. Oho, a maliyaŋ booba no, ka n'i kar ka say mo.

18:16b.PSA.018.016 Ya Rabbi, ni kaatiyaŋo da ni niina funsuyaŋo yooja mo gaa, Goorayze kuukey bangay, ndunnya tiksey mo fun taray.

18:17b.PSA.018.017 A go beene, a donton k'ay sambu, A n'ay candi ka kaa hari-yaa* bambatey ra.

18:18b.PSA.018.018 A n'ay hamay ka kaa ay ibare gaabikoono kambe ra, Da borey kaŋ yaŋ konna ay kambe ra mo, Zama i bisa ay gaabi.

18:19b.PSA.018.019 I kaŋ ay boŋ ay masiiba zaaro ra, Amma Rabbi ciya ay se deyaŋ hari.

18:20b.PSA.018.020 A kande ay nangu yulwanta ra. A n'ay kaa kambe, zama a ga farhã d'ay.

18:21b.PSA.018.021 Rabbi n'ay bana ay adilitara hino me, Ay kambey hananyaŋo me no a yeti ay se.

18:22b.PSA.018.022 Zama ay na Rabbi fondey haggoy, Ay mana laala mo ka fay d'ay Irikoyo.

18:23b.PSA.018.023 Zama a farilley kulu go ay jine, Ay man'a hin sanney mo ganandi.

18:24b.PSA.018.024 Ay ya toonante no a do haray. Ay n'ay fundo gaay mo ay laalayaŋ ciine ra.

18:25b.PSA.018.025 Woodin se no Rabbi bana ay se ay adilitara hino me, D'ay kambey hananyaŋ hino me nga jine.

18:26b.PSA.018.026 Suujikoy se ni ga ni boŋ cabe Suujikoy. Boro toonante se mo ni ga ni boŋ cabe toonante.

18:27b.PSA.018.027 Boro kaŋ bina ga hanan se ni ga ni boŋ cabe bine-hanno-koy. Siirante mo, ni ga ni boŋ cabe a se carmaykom.

18:28b.PSA.018.028 Zama ni ga taabantey faaba, Amma ni ga boŋ-jarekoy kaynandi.

18:29b.PSA.018.029 Zama ni g'ay fitilla diyandi, Rabbi ay Irikoyo g'ay kuba hanandi.

18:30b.PSA.018.030 Zama ni hino no ay na wongu sata gaaba nd'a, Ay Irikoyo hino no ay ga cinari sar ka daaru nd'a.

18:31b.PSA.018.031 Irikoy wo, a fonda ya toonante no. Rabbi sanno ya neesante mo no, Koray mo no boro kulu kaŋ ga tugu a ra se.

18:32b.PSA.018.032 Zama may no ga ti Irikoy, kala Rabbi? May no ga ti tondi, kala iri Irikoyo?

18:33b.PSA.018.033 Irikoy kaŋ n'ay guddama da gaabi, A n'ay fonda ciya toonante.

18:34b.PSA.018.034 A n'ay cey ciya sanda jeeri wane yaŋ cine, A g'ay daŋ ay nangu beerey boŋ.

18:35b.PSA.018.035 A g'ay kambayzey dondonandi wongu, Hala ay kambey ga haw daŋ guuru-say birawo ra.

18:36b.PSA.018.036 Ni n'ay no ni faaba korayo mo, Ni kambe ŋwaaro n'ay gaay, Ni baano mo n'ay beerandi.

18:37b.PSA.018.037 Ni n'ay taamu-taamu yaŋ feeri ay cire, Ay ce jindey mo mana mulay.

18:38b.PSA.018.038 Ay n'ay ibarey ce banda gana, ay n'i to mo, Ay mana bare ka ye mo kala kaŋ ay n'i ŋwa ka ban.

18:39b.PSA.018.039 Ay n'i gooru k'i fun hala i mongo ka hin ka tun, I kaŋ ay ce taamey cire.

18:40b.PSA.018.040 Zama ni n'ay guddu nda gaabi wongu sabbay se. Borey kaŋ yaŋ tun ay gaa mo, ni naŋ i ma sumbal ay cire.

18:41b.PSA.018.041 Ni naŋ mo ay ibarey ma jinde banda no ay se, Zama ay m'ay konnakoy tuusu.

18:42b.PSA.018.042 I kuuwa, amma faabako si no. I hẽ baa Rabbi gaa, amma a mana tu i se.

18:43b.PSA.018.043 Waato din gaa no ay n'i kar hala i ciya sanda kusa kaŋ haw goono ga gaaray. Ay n'i mun sanda kwaara ra fondo gaa potor-potor cine.

18:44b.PSA.018.044 Ni n'ay faaba borey canda-canda gaa. Ni n'ay ciya dumi cindey mayko. Dumi kaŋ doŋ ay s'a bay, a go ga may ay se.

18:45b.PSA.018.045 Ay baaru maayaŋ gaa i g'ay gana, Yawey ga boŋ ye ay se ganda.

18:46b.PSA.018.046 Yawey ga lakaw, I ga fatta ngey wongu fuwey ra, i gaahamey go ga jijiri.

18:47b.PSA.018.047 Rabbi ya fundikooni no! W'ay tondo sifa! Ay faaba Irikoyo, w'a beerandi gumo!

18:48b.PSA.018.048 Irikoy no ga bana ay se, A ga dumi waani-waani daŋ ay mayra cire.

18:49b.PSA.018.049 A g'ay hamay ka kaa ay ibarey kambe ra. Daahir, ni g'ay beerandi borey kaŋ tun ay se yaŋ boŋ. Ni g'ay soolam ka kaa toonyantey kambe ra.

18:50b.PSA.018.050 Ya Rabbi, woodin se no ay ga saabu ni se dumi cindey game ra. Ay ma sifayaŋ baytu te ni maa gaa.

18:51b.PSA.018.051 A ga faaba beeriyaŋ no bonkoono kaŋ a daŋ din se, A ga baakasinay suuji cabe mo nga wane suubananta se, Kaŋ ga ti Dawda nda nga banda se hal abada.

19

19:1b.PSA.019.001 Doonkoy jine bora se. Dawda wane no.

19:2b.PSA.019.002 Beeney go ga Irikoy darza bangandi, Beene batama mo go g'a kambe goyey cabe.

19:3b.PSA.019.003 Zaari ka kaa zaari no i go ga salaŋ, Cin ka kaa cin mo i go ga bayray cabe.

19:4b.PSA.019.004 I sinda ciinay wala sanni, boro si maa i jinde mo.

19:5b.PSA.019.005 I yooja koy hala laabey kulu ra, I sanney mo to hala ndunnya me. I ra no a na bukka te wayna se,

19:6b.PSA.019.006 A ga hima sanda arhiiji kaŋ goono ga fun nga fu ra. A ga farhã sanda boro gaabikooni kaŋ goono ga yonay te.

19:7b.PSA.019.007 Wayna funyaŋ, beena me fa gaa no, A gana ka bisa yaŋ mo ga koy beena me fa gaa. Hay kulu si no kaŋ ga tugu wayna korno se.

19:8b.PSA.019.008 Rabbi asariya ya toonante no, a ga fundi ye. Rabbi seeda ya tabbatante no, A ga naŋ boro kaŋ sinda bayray ma ciya laakalkooni.

19:9b.PSA.019.009 Rabbi hin sanney ya kayanteyaŋ no, I ga bine kaanandi. Rabbi lordo ya hanante no, a ga mo no kaari.

19:10b.PSA.019.010 Rabbi humburkumay gonda hananyaŋ, A ga duumi mo no hal abada. Rabbi ciitey ya cimikoyyaŋ no, Adilitaraykoyyaŋ mo no, i kulu.

19:11b.PSA.019.011 I ga beejandi ka bisa wura, Oho, ka bisa wura hanno boobo. I bisa yu da yu fanta kaani.

19:12b.PSA.019.012 I do no i ga ni tamo kaa baaru, I haggoyyaŋ ra mo no gonda alhakku beeri.

19:13b.PSA.019.013 May no ga hin ka nga darayyaŋey bay? Ni m'ay taali tugantey yaafa.

19:14b.PSA.019.014 Ma ay, ni tamo haggoy k'ay wa da haw-ka-te zunubey. Ma si naŋ i ma du hin ay boŋ. Waato din gaa no ay ga ciya toonante. Ay ga ciya taali si mo zunubi beeri gaa.

19:15b.PSA.019.015 Ya Rabbi, ay tondo d'ay fansakwa, Naŋ ay me sanney d'ay bina miiley ma ciya taayaŋ hari ni jine.

20

20:1b.PSA.020.001 Doonkoy jine bora se. Dawda wane no.

20:2b.PSA.020.002 Rabbi ma tu ni se kankami alwaati ra, Yakuba Irikoyo maa ma ni dake beene,

20:3b.PSA.020.003 A ma gaakasinay samba ni se kaŋ ga fun Nangu Hananta ra, A ma ni gaa da gaakasinay kaŋ ga fun Sihiyona ra,

20:4b.PSA.020.004 A ma fongu ni ŋwaari sargayey kulu gaa, A ma ni sargay kaŋ i ga ton ta ni se. (Wa dangay)

20:5b.PSA.020.005 A ma ni bina muraado feeri ni se, A ma ni saawara kulu toonandi mo.

20:6b.PSA.020.006 Iri ga ni zaamayaŋo zamu. Iri Irikoyo maa ra no iri ga iri liiliwaley sinji. Rabbi ma ni ŋwaarayey kulu toonandi ni se.

20:7b.PSA.020.007 Sohõ kay, Ay bay kaŋ Rabbi ga nga wane suubananta faaba. A ga tu nga suubananta se, Tuyaŋo ga fun a beene hananta ra haray, D'a kambe ŋwaaro gaabo kaŋ ga faaba te.

20:8b.PSA.020.008 Boro fooyaŋ, torkey no i ga fooma nd'a, Afooyaŋ mo bariyey, Amma iri wo, Rabbi iri Irikoyo maa no iri ga fooma nd'a.

20:9b.PSA.020.009 Ngey wo gungum, i kaŋ. Amma iri wo tun, iri goono ga kay.

20:10b.PSA.020.010 Ya Rabbi, ma faaba te. Koyo ma tu iri se waati kaŋ iri ga ce.

21

21:1b.PSA.021.001 Doonkoy jine bora se. Dawda wane no.

21:2b.PSA.021.002 Ya Rabbi, bonkoono ga farhã ni gaabo ra. Farhã kaŋ a ga te ni faaba ra binde, man a misa cine?

21:3b.PSA.021.003 Ni n'a bine muraadey feeri a se, Ni man'a ganji a meyo ŋwaarayey. (Wa dangay)

21:4b.PSA.021.004 Zama ni n'a kubay da gomni albarka, Ni na koytaray fuula daŋ a boŋo gaa, Wura suubanante wane.

21:5b.PSA.021.005 A na fundi ceeci ni gaa, ni n'a no nd'a mo, Jirbi boobo hal abada abadin nooya.

21:6b.PSA.021.006 A darza gonda beeray ni faaba sabbay se. Darza nda beeray kaŋ ga bisa i kulu no ni g'a didiji nd'a.

21:7b.PSA.021.007 Zama ni n'a daŋ a ma goro albarkante gumo hal abada. Ni n'a bina kaanandi nda farhã ni jine.

21:8b.PSA.021.008 Zama bonkoono ga de Rabbi gaa, Beeray-Beeri-Koyo baakasinay suujo do mo hay kulu s'a zinjandi.

21:9b.PSA.021.009 Ni kamba ga ni ibarey kulu fisi ka kaa taray, Ni kambe ŋwaaro ga ni wangey fisi ka kaa taray.

21:10b.PSA.021.010 Ni futay alwaato ra no ni g'i ciya sanda feema bambata kaŋ goono ga di. Rabbi g'i gon nga futa ra, danji g'i ŋwa.

21:11b.PSA.021.011 Ni g'i izey tuusu ndunnya ra, I bandey mo Adam-izey ra.

21:12b.PSA.021.012 Zama i na laala miila ni gaa. I na hasaraw dabari soola, amma i si hin k'a toonandi.

21:13b.PSA.021.013 Zama ni ga naŋ i ma banda bare, Ni ga ni hangawey daŋ biraw korfey gaa k'i deedandi.

21:14b.PSA.021.014 Ya Rabbi, ma beeri ka bisa i kulu ni gaabo ra, Iri mo, iri ga baytu ka ni hino saabu.

22

22:1b.PSA.022.001 Doonkoy jine bora se. I m'a doon da subo kaŋ se i ga ne: «Susubay jeeri no». Dawda wane no.

22:2b.PSA.022.002 Ya ay Irikoyo, ay Irikoyo, ifo se no ni n'ay furu? Ifo se no ay go ga duray, Day ni mooru ay gaakasinay se?

22:3b.PSA.022.003 Ya ay Irikoyo, zaari ay go ga hẽ, ni mana tu, Cin mo yana fulanzam.

22:4b.PSA.022.004 Amma ni ya hananyankoy no, Israyla saabuyaŋey ya ni nangoray no.

22:5b.PSA.022.005 Iri kaayey de ni gaa, I na deyaŋ te, ni n'i kaa kambe mo.

22:6b.PSA.022.006 I na jinde tunandi ni gaa, i du faaba. I de ni gaa, i mana haaw.

22:7b.PSA.022.007 Amma ay wo noon'ize no, manti boro bo, Taali dakeyaŋ hari no borey se, Dondayaŋ hari no jama se.

22:8b.PSA.022.008 Boro kulu kaŋ ga di ay, Donda-caray haari no a ga te ay se. I ga me nyatte ay gaa ka ngey boŋey zinji. I goono ga ne:

22:9b.PSA.022.009 «A de Rabbi gaa, naŋ Rabbi m'a kaa kambe me. Naŋ a m'a faaba, za kaŋ Rabbi ga maa a kaani.»

22:10b.PSA.022.010 Amma nin no k'ay zumandi ay ma fun gunde ra. Ni naŋ ay ma deyaŋ te za ay go ay nyaŋo fafa gaa.

22:11b.PSA.022.011 I n'ay sarku ni gaa za i n'ay hay. Za ay nyaŋo gunda ra nin no ga ti ay Irikoyo.

22:12b.PSA.022.012 Ma si mooru ay, zama taabi ga maan, gaako si no mo.

22:13b.PSA.022.013 Yeeji boobo n'ay windi, Basan yaaru gaabikooney tun ay gaa k'ay daŋ game.

22:14b.PSA.022.014 I goono g'ay gomdo ka me kombandi ay gaa. Sanda muusu beeri kaŋ ga koli ham tooru-tooru, A ga dundu mo.

22:15b.PSA.022.015 I n'ay soogu sanda hari, ay biriyey kulu na care taŋ. Ay bina mo yu fanta cine no, a manne ay bindo ra.

22:16b.PSA.022.016 Ay gaabo koogu sanda car-cambu cine. Ay deena go ga naagu ay daana gaa. Ni kande ay buuyaŋ kusa ra.

22:17b.PSA.022.017 Zama hansey n'ay windi, laalakoyey jama n'ay daŋ game. I n'ay kambey d'ay cey fun,

22:18b.PSA.022.018 Hala a to naŋ kaŋ ay g'ay biriyey kulu kabu. I go g'ay guna ka mo sinji ay gaa.

22:19b.PSA.022.019 I goono g'ay bankaarayey fay-fay ngey nda care game ra, Ay kwaayo boŋ mo, i goono ga kurne te.

22:20b.PSA.022.020 Amma ni, ya Rabbi, ma si mooru ay. Ya nin ay gaakwa, ma te waasi ay gaayaŋ sabbay se.

22:21b.PSA.022.021 M'ay fundo faaba takuba kaani gaa, K'ay fundi follonka mo faaba hansi hina gaa.

22:22b.PSA.022.022 M'ay faaba muusu beeri me ra, Da haw-bi hilli gaa mo. Za kaŋ ni tu ay se,

22:23b.PSA.022.023 Ay ga ni maa fe ay nya-izey se, Jama bindo ra no ay ga ni sifa.

22:24b.PSA.022.024 Araŋ kaŋ ga humburu Rabbi, w'a sifa. Araŋ kulu Yakuba banda, w'a beerandi ka bisa i kulu. Araŋ Israyla banda kulu, wa humbur'a.

22:25b.PSA.022.025 Zama a mana donda kayna ra wane kankamo bo, A man'a fanta mo. A mana nga moyduma tugu a se mo, Amma waato kaŋ a na jinde tunandi a gaa, kulu a maa.

22:26b.PSA.022.026 Ni do no ay sifayaŋ ga fatta jama bambata ra. Ay g'ay sartey bana borey kaŋ yaŋ ga humbur'a jine.

22:27b.PSA.022.027 Alfukaarey ga ŋwa ka kungu. Borey kaŋ yaŋ ga Rabbi ceeci mo g'a sifa. Araŋ biney ma funa hal abada.

22:28b.PSA.022.028 Ndunnya kulu me-a-me ga fongu, I ma ye ka bare Rabbi do. Ndunnya dumey kundey kulu mo ga sududu ni jine.

22:29b.PSA.022.029 Zama mayray ya Rabbi wane no, Nga mo no ga ti ndunnya dumey mayko.

22:30b.PSA.022.030 Ndunnya arzakantey kulu ga ŋwa ka sududu. Borey kaŋ yaŋ ga ye ka ciya bulungu kulu ga sududu a jine, Sanda boro kaŋ sinda hina ka nga fundo gaay.

22:31b.PSA.022.031 Banda fo ga may a se. I ga Koy Beero baaro dede zamana fo kaŋ ga kaa se. I ga kaa k'a adilitara dede mo ndunnya dumi kaŋ i ga hay se, Ka ne: «Nga no ka woodin te.»

23

23:1b.PSA.023.001 Dawda dooni fo no. Rabbi ya ay hawji no, ay si jaŋ hay kulu.

23:2b.PSA.023.002 A g'ay naŋ ya kani kuray nangu tayey ra, A g'ay jine candi mo fulanzamyaŋ hari zurey me gaa,

23:3b.PSA.023.003 A g'ay fundo yeenandi, A g'ay candi mo adilitaray fondey ra nga maa sabbay se.

23:4b.PSA.023.004 Daahir, baa ay goono ga dira bu biya gooru bindi ra, Ay si humburu masiiba kulu zama ni go ay banda. Ni goobo da ni kuray saro goono g'ay yaamar.

23:5b.PSA.023.005 Ni ga taabal hanse ay jine, ay ibarey moy go ga di. Ni g'ay boŋo tuusu nda ji, Ay gaasiya mo to kal a go ga mun.

23:6b.PSA.023.006 Booriyaŋ da suuji hinne no g'ay gana ay fundo jirbey kulu, Ay ga goro Rabbi windo ra mo hal abada.

24

24:1b.PSA.024.001 Dawda baytu fo no. Ganda laabo ya Rabbi wane no, Nga nda hay kulu kaŋ go a ra, Ndunnya da nga gorokoy mo kaŋ go a ra.

24:2b.PSA.024.002 Zama a n'a sinji teekoy boŋ, A n'a gaabandi mo isey boŋ.

24:3b.PSA.024.003 May no ka kaaru ka koy Rabbi tondo boŋ? May mo no ga kay a nangu hananta ra?

24:4b.PSA.024.004 Kala boro kaŋ gonda kambeyaŋ kaŋ ga hanan, Da bine hanante. Kala boro kaŋ mana nga fundo sambu ka daŋ tangari hari ra, A si ze da gulinci mo.

24:5b.PSA.024.005 Nga no ga du albarka Rabbi do, Da adilitaray mo koyne Irikoy a faabakwa do.

24:6b.PSA.024.006 A ceecikoy zamana nooya, Boro kaŋ ga ni moyduma ceeci, Kaŋ ga ti Yakuba. (Wa dangay)

24:7b.PSA.024.007 Ya araŋ windi me daabirjey, wa araŋ boŋ tunandi. Oho, w'i tunandi beene, Ya araŋ windi meyey kaŋ ga duumi, Zama darzakoyo ma furo.

24:8b.PSA.024.008 May no ga ti darzakoyo? Rabbi no, gaabikoy, hinkoy, Rabbi no, hinkoy wongu ra.

24:9b.PSA.024.009 Ya araŋ windi me daabirjey, wa araŋ boŋ tunandi. Oho, w'i tunandi beene, Ya araŋ windi meyey kaŋ ga duumi, Zama darzakoyo ma furo.

24:10b.PSA.024.010 May no ga ti darzakoyo din? Rabbi Kundeykoyo no, nga no ga ti darzakoy. (Wa dangay)

25

25:1b.PSA.025.001 Dawda wane no. Ya Rabbi, ni gaa no ay g'ay bina ye!

25:2b.PSA.025.002 Ya ay Irikoyo, ni gaa no ay ga de, Ma s'ay naŋ ya haaw. Ma si naŋ ay ibarey ma zaama te ay boŋ.

25:3b.PSA.025.003 Oho, boro kaŋ ga hangan ni se, a si haaw. Borey kaŋ yaŋ ga amaana ŋwa sabaabu kulu si, Ngey no ga haaw.

25:4b.PSA.025.004 Ya Rabbi, ma ni fondey cabe ay se, M'ay dondonandi nda ni fondey.

25:5b.PSA.025.005 M'ay candi ni cimo ra, m'ay dondonandi. Zama nin no ga ti Irikoy, ay faaba wano. Ni se no ay ga hangan zaari muudu.

25:6b.PSA.025.006 Ya Rabbi, ma fongu ni bakarawo da ni baakasinay suujey, Zama za doŋ-doŋ kaŋ sinda me i go no.

25:7b.PSA.025.007 Ma si fongu ay zankataray zunubey, wala ay taaley. Ya Rabbi, ma fongu ay gaa ni baakasinay suujo boŋ, Ni booriyaŋo sabbay se.

25:8b.PSA.025.008 Rabbi ya booriyankoy da adilitaraykoy no, Woodin se no a ga zunubikooney dondonandi fonda ra.

25:9b.PSA.025.009 A ga borey kaŋ yaŋ sinda boŋbeeray candi cimi ciiti ra. A ga ngey kaŋ yaŋ sinda boŋbeeray dondonandi nga fonda.

25:10b.PSA.025.010 Rabbi fondey kulu ya baakasinay suuji nda cimi no borey kaŋ yaŋ ga haggoy d'a alkawlo d'a seedey se.

25:11b.PSA.025.011 Ya Rabbi, ni maa sabbay se m'ay zunubo yaafa, zama a ga beeri no.

25:12b.PSA.025.012 Boro woofo no ga humburu Rabbi? Rabbi no g'a koy dondonandi fondo kaŋ a ga hima ka suuban.

25:13b.PSA.025.013 A koy ga goro nda albarka, a banda mo ga laabo tubu.

25:14b.PSA.025.014 Rabbi gundo go borey kaŋ yaŋ ga humbur'a banda, A ga nga sappa cabe i se mo.

25:15b.PSA.025.015 Ay moy, waati kulu Rabbi do haray no i ga guna, Zama a g'ay cey soolam ka kaa hirrimi ra.

25:16b.PSA.025.016 Ma bare ay do, ma gomni goy te ay se mo, Zama ay go faaji nda taabi ra.

25:17b.PSA.025.017 Ay bina taabo tonton, ni m'ay kaa ay masiibey ra.

25:18b.PSA.025.018 Ma laakal ye ay kankamo d'ay taabey gaa, M'ay zunubey kulu yaafa mo.

25:19b.PSA.025.019 Ma laakal d'ay ibarey, zama i ga baa, I ga konna ay mo da konnari laalo.

25:20b.PSA.025.020 M'ay fundo haggoy k'ay faaba, Hala ay ma si haaw, zama ni do no ay ga tugu.

25:21b.PSA.025.021 Naŋ cimi toonante da sabayaŋ m'ay hallasi, Zama ni se no ay ga hangan.

25:22b.PSA.025.022 Ya Irikoy, ni ma Israyla fansa ka kaa nga taabey kulu ra.

26

26:1b.PSA.026.001 Dawda wane no. Ya Rabbi, m'ay no cimi, Zama ay hananyaŋo ra no ay dira. Ay de Rabbi gaa mo, fappeyaŋ si.

26:2b.PSA.026.002 Ya Rabbi, m'ay gosi, m'ay deedandi. M'ay gunda d'ay bina neesi.

26:3b.PSA.026.003 Zama ni baakasinay suujo go ay jine, Ni cimo ra no ay dira.

26:4b.PSA.026.004 In da boro yaamey mana margu ka goro care banda, In da munaficey mo mana dira care banda.

26:5b.PSA.026.005 Ay ga konna laala teekoy jama. Ay si yadda in da boro laaley ma goro care banda.

26:6b.PSA.026.006 Ya Rabbi, ay g'ay kambey nyun taali-jaŋay ra ka ni sargay feema windi,

26:7b.PSA.026.007 Zama ay ma saabuyaŋ jinde beeri tunandi, Ay ma ni dambara goyey kulu baaru fe.

26:8b.PSA.026.008 Ya Rabbi, ay ga ba ni windo ra goray, Da ni darza nangora mo.

26:9b.PSA.026.009 Ni ma s'ay biya sambu ka marga nda zunubikooney, Wala ay fundo mo boro-wiyey banda,

26:10b.PSA.026.010 Borey kaŋ yaŋ zamba muraadu go i kambey ra, I kambe ŋwaarey ga to no da me-daabu taayaŋ.

26:11b.PSA.026.011 Amma ay wo, ay hananyaŋo ra no ay ga dira. M'ay fansa, ka gomni goy te ay se mo.

26:12b.PSA.026.012 Ay cey ga kay naŋ kaŋ go banda fo ra. Ay ga Rabbi kuku jama marga ra.

27

27:1b.PSA.027.001 Dawda wane no. Rabbi no ga ti ay kaari d'ay faaba mo. May n'ay ga humburu? Rabbi no ga ti ay fundo gaabo. Day may no g'ay humburandi?

27:2b.PSA.027.002 Waati kaŋ goy laalo teekoy kaŋ ay boŋ zama ngey m'ay hamo ŋwa se, Ngey, ay yanjekaarey d'ay ibarey kati ka kaŋ.

27:3b.PSA.027.003 Baa wongu marga ga gata sinji ay se, ay bina si humburu. Baa wongu ga tun ay se, Kulu nda yaadin ay gonda bine-gaabi.

27:4b.PSA.027.004 Hari folloŋ no ay ŋwaaray Rabbi gaa, Nga no ay ga ceeci, ga ti: Ya goro day Rabbi windo ra ay fundo jirbey kulu me, Zama ay ma Rabbi booriyaŋo guna, Ay ma soobay ka miila a marga windo ra.

27:5b.PSA.027.005 Zama masiiba zaari ra a g'ay tugu nga bukka ra, A hukumo tuguyaŋ nango ra no a g'ay daabu, A g'ay sambu ka dake tondi daari boŋ.

27:6b.PSA.027.006 Sohõ mo a g'ay beerandi ay ibarey kaŋ yaŋ goono g'ay windi boŋ. Ay mo ga farhã sargay no a hukumo ra da cililiyaŋ. Ay ga baytu, oho, ay ga sifayaŋ baytu te Rabbi se.

27:7b.PSA.027.007 Ya Rabbi, ma maa ay se waati kaŋ ay goono ga ce d'ay jinda. Ma gomni goy te ay se ka tu ay se.

27:8b.PSA.027.008 Saaya kaŋ cine ni ne: «M'ay moyduma ceeci,» Kal ay bina ne ni se: «Ya Rabbi, ni moyduma no ay ga ceeci.»

27:9b.PSA.027.009 Ma si ni moyduma tugu ay se, Ma si ni tamo gaaray futay ra, Za kaŋ nin no ga ti ay gaako. Ya Irikoy, ay faaba wano, Ma si dira k'ay naŋ! Ma s'ay furu!

27:10b.PSA.027.010 Baa ay baabo d'ay nyaŋo n'ay furu, Kulu nda yaadin, Rabbi g'ay sambu.

27:11b.PSA.027.011 Ya Rabbi, m'ay dondonandi ni fonda, M'ay candi mo fonda kaŋ go banda fo ra ay ibarey sabbay se.

27:12b.PSA.027.012 Ma s'ay daŋ ay yanjekaarey kambe ra hal i ma ngey miila te ay boŋ, Zama tangari seedayaŋ tun zama ngey ma gaaba nd'ay, Ngey da wo kaŋ yaŋ ga toonye funsu.

27:13b.PSA.027.013 Da manti ay cimandi kaŋ ay ga di Rabbi gomno fundikooney laabo ra, doŋ ay kasam.

27:14b.PSA.027.014 Ma hangan Rabbi se. Ma gaabu, A ga ni bina gaabandi mo. Oho, ma hangan Rabbi se.

28

28:1b.PSA.028.001 Dawda wane no. Ya Rabbi, ni gaa no ay ga ce. Ya ay tondi daaro, ma si te ay se suntaŋ. Zama ay ma si ciya sanda borey kaŋ yaŋ goono ga gunguray ka do guusu ra, Da ni dangay ay se.

28:2b.PSA.028.002 Ma maa ay ŋwaara jinda, Waati kaŋ ay goono ga hẽ ni gaa. Saaya kaŋ cine ay g'ay kambey sambu ka guna ni Nangu Hananta gaa haray.

28:3b.PSA.028.003 Ma s'ay kurru boro laaley da goy yaamo teekoy banda, Ngey kaŋ yaŋ ga baani sanni te ngey gorokasin se, Amma laala go i biney ra.

28:4b.PSA.028.004 Ma bana i se i goyey boŋ, D'i goyey laala hina me mo. Ma bana i se i kambe goyey boŋ, M'i alhakko yeti i se.

28:5b.PSA.028.005 Za kaŋ i mana laakal da Rabbi goyey, Wala mo a kambey goyey, A ga i bagu no, a si i cina bo.

28:6b.PSA.028.006 I ma Rabbi sifa, zama a maa ay ŋwaara jinda.

28:7b.PSA.028.007 Rabbi ya ay gaabo no, d'ay korayo mo. Ay bina de a gaa, ay du gaakasinay mo. Woodin se no ay bina ga farhã gumo, Ay bayto mo no ay g'a saabu nd'a.

28:8b.PSA.028.008 Rabbi ga ti i gaabo, Nga no ga ti faaba wongu fu nga suubananta se.

28:9b.PSA.028.009 Ma ni jama faaba, ma albarka daŋ ni wane borey gaa. Ma ciya i kurukwa, ma soobay k'i tambe hal abada.

29

29:1b.PSA.029.001 Dawda baytu fo no. Ya araŋ Irikoy malaykey, wa no Rabbi se -- Wa darza nda gaabi no Rabbi se.

29:2b.PSA.029.002 Wa Rabbi no darza kaŋ ga hima nd'a maa. Wa sududu Rabbi se zama a gonda darza hanno.

29:3b.PSA.029.003 Rabbi jinda go harey boŋ, Irikoy darzakoyo goono ga kaati, Rabbi go hari bambatey boŋ.

29:4b.PSA.029.004 Rabbi jinda ya hinkoy no, Rabbi jinda go toonante nda beeray beeri.

29:5b.PSA.029.005 Rabbi jinda ga sedre nyayaŋ zeeri. Oho, Rabbi ga Liban sedre* nyaŋey ceeri-ceeri.

29:6b.PSA.029.006 A ga naŋ i ma sar-sar sanda handayze cine. Liban da Siriyon mo sanda haw-bi ize.

29:7b.PSA.029.007 Rabbi jinda ga danji deeneyaŋ zortandi,

29:8b.PSA.029.008 Rabbi jinda ga saaji jijirandi, Rabbi ga Kades saajo jijirandi.

29:9b.PSA.029.009 Rabbi jinda ga naŋ jeerey ma hay, A ga tuuri zugey jallandi. A marga fuwo ra hay kulu ga ne: «Darza!»

29:10b.PSA.029.010 Rabbi goro tunfaana boŋ. Oho, Rabbi goro, Koy no hal abada.

29:11b.PSA.029.011 Rabbi ga gaabi no nga borey se, Rabbi ga nga borey albarkandi nda laakal kanay.

30

30:1b.PSA.030.001 Baytu. I m'a doon Rabbi fuwo hanandiyaŋo hane. Dawda wane no.

30:2b.PSA.030.002 Ya Rabbi, ay ga ni zamu, zama ni n'ay sambu beene, Ni mana naŋ ay ibarey ma farhã ay boŋ.

30:3b.PSA.030.003 Ya Rabbi ay Irikoyo, ay hẽ ni gaa, Ni n'ay no baani mo.

30:4b.PSA.030.004 Ya Rabbi, ni n'ay fundo kaa taray a ma fun Alaahara, Ni n'ay fundo yeti waato kaŋ ay gunguray ka koy guuso ra.

30:5b.PSA.030.005 Ya araŋ a ganakoy, wa baytu te Rabbi se, W'a saabu a hananyaŋo se.

30:6b.PSA.030.006 Zama a futa, sanda mo-ka-miyaŋ misa cine no, A gomno mo ga to fundi muudu. Hẽeni ga hanna cin folloŋ, Amma mo boyaŋ ga kande farhã zamuuyaŋ.

30:7b.PSA.030.007 Ay wo kay, ay laakal kanay gora ra ay ne: «I s'ay zinjandi hal abada.»

30:8b.PSA.030.008 Ya Rabbi, ni gomno boŋ ni naŋ ay tondi kuuko ma sinji nda gaabi. Ni na ni moyduma tugu, ay binde boŋ haw.

30:9b.PSA.030.009 Ya Rabbi, ay hẽ ni gaa, Ay Koyo gaa no ay ŋwaaray.

30:10b.PSA.030.010 Nafa fo ka bara ay kuro gaa d'ay gunguray ka do guuso ra? Laabu bulungo ga ni sifa no? Wala a ga ni cimo baaru fe no?

30:11b.PSA.030.011 Ya Rabbi, ma maa, ma gomni goy te ay se! Ya Rabbi, ma ciya ay gaako!

30:12b.PSA.030.012 Ni n'ay bine sara bare ka ciya gaani, Ni n'ay seew bankaarayey feeri, Ni n'ay guddama da bine kaani.

30:13b.PSA.030.013 Zama ay bina ma sifayaŋ baytu te ni se, A ma si dangay mo. Ya Rabbi, ay Irikoyo, ay ga saabuyaŋ te ni se hal abada.

31

31:1b.PSA.031.001 Doonkoy jine bora se. Dawda baytu fo no.

31:2b.PSA.031.002 Ya Rabbi, ni do no ay ga tuguyaŋ do ceeci, Ma si naŋ ya haaw hal abada. M'ay faaba mo ni adilitara ra.

31:3b.PSA.031.003 Ma ni hanga jeeri ay se, m'ay faaba nda cahãyaŋ. Ma ciya tondi gaabikooni ay se, wongu fu mo ay faaba se.

31:4b.PSA.031.004 Za kaŋ nin no ga ti ay tondo d'ay wongu fuwo, Kala ni m'ay candi k'ay daŋ fondo ni maa sabbay se.

31:5b.PSA.031.005 Ni g'ay candi ka kaa taaru beero ra, Kaŋ i hirr'ay se tuguyaŋ ra, Zama ni ga ti ay gaabo.

31:6b.PSA.031.006 Ni kamba ra no ay g'ay biya talfi. Ya Rabbi, ya Irikoy cimikoyo, ni n'ay fansa.

31:7b.PSA.031.007 Ay konna borey kaŋ yaŋ ga gaabu tooru yaamey gaa, Amma ay ga de Rabbi gaa.

31:8b.PSA.031.008 Ay ga farhã ka te bine kaani ni baakasinay suujo ra, Zama ni di ay kankamo, ni g'ay fundo masiibey bay mo.

31:9b.PSA.031.009 Ni mana ay daŋ ay ibara kambe ra, Amma ni n'ay cey sinji nangu tafo ra.

31:10b.PSA.031.010 Ya Rabbi, ma gomni goy te ay se, Zama kankami ra no ay go. Ay moy diyaŋo goono ga zabu bine saray sabbay se, Oho, d'ay fundo d'ay gaahamo kulu mo.

31:11b.PSA.031.011 Zama ay fundo jirbey go ga kokor da bine saray, Ay jiirey mo da bine jisiyaŋ. Ay gaabo go ga gaze ay laala sabbay se, Ay biriyey mo ban ka te ikaynayaŋ.

31:12b.PSA.031.012 Ay ciya taali dakeyaŋ hari ay yanjekaarey kulu se, Oho, sanku fa binde ay gorokasiney se. Ay ya humburandi no ay mo-ka-bayrayey se. Borey kaŋ yaŋ ga di ay taray ga zur'ay se.

31:13b.PSA.031.013 I dinya ay gaa sanda buuko kaŋ i si fong'a. Ay ciya sanda gaasu camse cine.

31:14b.PSA.031.014 Zama ay maa boro boobo alaasiray sanni. Humburkumay go kuray kulu. I na saawareyaŋ te ay boŋ, I na dabari te mate kaŋ cine no ngey ga te k'ay fundo sambu nd'a.

31:15b.PSA.031.015 Amma, ya Rabbi, ay wo, ay de ni gaa, Ay ne: «Nin no ga ti ay Irikoyo.»

31:16b.PSA.031.016 Ay jirbey, ni kambe ra no i go, M'ay faaba ay ibarey kambe ra, D'ay gaaraykoy mo gaa.

31:17b.PSA.031.017 Ma naŋ ni moyduma ma kaari ni tamo do haray, M'ay faaba mo ni baakasinay suujo ra.

31:18b.PSA.031.018 Ya Rabbi, ma si naŋ ya haaw, zama ay na ni ce. Ma naŋ laalakoyey ma haaw, i ma te siw Alaahara.

31:19b.PSA.031.019 Meyey kaŋ ga tangari ma dangay, Ngey kaŋ yaŋ ga salaŋ adilantey boŋ da mo-koogay, Da boŋbeeray, da donda-caray mo.

31:20b.PSA.031.020 Man ni gomno beera misa kaŋ ni jisi ngey kaŋ ga humburu nin yaŋ se? Kaŋ ni goy mo ni gaa de-koy se Adam-izey jine!

31:21b.PSA.031.021 Ni g'i tugu ni do tuguyaŋ nango ra hal i ma wa da borey me-hawyaŋey. Ni g'i jisi tugante bukka ra, Hal ni m'i wa da deeney masiiba.

31:22b.PSA.031.022 I ma Rabbi sifa, zama a na nga baakasinay suujo kaŋ ga dambarandi cabe ay se gallu birnikoyo ra.

31:23b.PSA.031.023 Ay wo kay, ay cahãyaŋo ra no ay ne: «I n'ay pati ka kaa ni jine.» Kulu nda yaadin ni maa ay adduwey jinde, Waato kaŋ ay na ni ce.

31:24b.PSA.031.024 Ya Rabbi wane hanantey kulu, wa ba r'a. Rabbi ga naanaykoyey haggoy. A ga banandi toonante te mo boŋbeeray goy teeko se.

31:25b.PSA.031.025 Araŋ kulu kaŋ ga Rabbi hangan, wa gaabu. Araŋ biney ma te gaabi.

32

32:1b.PSA.032.001 Dawda baytu fo no. Albarkante no boro kaŋ Irikoy n'a taalo yaafa a se, A n'a zunubey daabu mo.

32:2b.PSA.032.002 Albarkante no alboro kaŋ Rabbi si laala lasaabu a se, Kaŋ sinda gulinci nga biya ra mo.

32:3b.PSA.032.003 Waati kaŋ cine ay dangay, Ay biriyey zeenu ay wurro kaŋ ay foy ka te sabbay se.

32:4b.PSA.032.004 Zama cin da zaari ni kamba ga tin ay boŋ. I n'ay darza bare ka ciya sanda hayni waate koogay cine. (Wa dangay)

32:5b.PSA.032.005 Ay n'ay zunubo seedandi ni jine, Ay man'ay laala mo tugu. Ay ne: «Ay g'ay laala ci no Rabbi se.» Ni mo n'ay zunubey taalo yaafa. (Wa dangay)

32:6b.PSA.032.006 Woodin sabbay se no boro kulu kaŋ ga ni gana ma te adduwa ni gaa alwaati kaŋ a ga du nin ra. Daahir, waati kaŋ harey kaŋ ga guusu ga tun ka yooje, I si to a do.

32:7b.PSA.032.007 Nin no ga ti ay tuguyaŋ nango, Ni g'ay hallasi k'ay wa taabi, Ni g'ay kali mo da faaba baytuyaŋ. (Wa dangay)

32:8b.PSA.032.008 Ay ga ni bayrandi, ay ga ni dondonandi fonda kaŋ ni ga gana din ra, Ay ma ni no saaware, ay moy go ni boŋ.

32:9b.PSA.032.009 Wa si ciya sanda bari wala alambaana kaŋ yaŋ sinda carmay fo. I taalamey ga ti alzam da kasiji kaŋ i g'i gooji nd'a. Da manti yaadin no, i si maan ni do bo.

32:10b.PSA.032.010 Bine saray bambata no ga ciya laalakoy baa, Amma boro kaŋ de Rabbi gaa, Baakasinay suuji ga te a se kali.

32:11b.PSA.032.011 Ya araŋ adilantey, wa te bine kaani ka farhã Rabbi do. Araŋ kulu kaŋ yaŋ biney ga saba, Wa kuuwa farhã sabbay se.

33

33:1b.PSA.033.001 Ya araŋ adilantey, wa cilili Rabbi se! Sifayaŋ ga hagu cimikoyey se.

33:2b.PSA.033.002 Wa Rabbi sifa nda moolo beeri, Wa sifayaŋ baytu te a se da moolo hamni-way-koy.

33:3b.PSA.033.003 Wa baytu taji te a se; Araŋ ma subo boriyandi da yooje beeri.

33:4b.PSA.033.004 Zama Rabbi sanno ya cimikoy no, A goyey kulu mo, naanay ra no a g'i te.

33:5b.PSA.033.005 A ga ba adilitaray da cimi ciiti. Ndunnya go toonante da Rabbi baakasinay suujo.

33:6b.PSA.033.006 Rabbi sanno no a na beeney te d'a. Beene kundey mo, a n'i te da nga meyo fulanzama.

33:7b.PSA.033.007 A ga teeku harey margu-margu ka gusam, A ga guusuyaŋey mo jisi nga jisiri nangey ra.

33:8b.PSA.033.008 Ndunnya kulu ma humburu Rabbi, Ndunnya gorokoy kulu ma di a gaakuro.

33:9b.PSA.033.009 Zama a salaŋ, haya kubay mo. A na lordi* te, sanno tabbat mo.

33:10b.PSA.033.010 Rabbi ga dumi cindey saawarey ciya yaamo, A ga borey dabarey ganji mo.

33:11b.PSA.033.011 Rabbi saawara tabbat hal abada, A bina miiley mo hala zamaney kulu me.

33:12b.PSA.033.012 Albarkante no dumo kaŋ Rabbi no ga ti a Irikoyo, Borey kaŋ a suuban i ma ciya nga wane jama.

33:13b.PSA.033.013 Rabbi go beene, a goono ga guna. A ga di Adam-izey kulu.

33:14b.PSA.033.014 A nangora ra a ga ndunnya gorokoy kulu fonnay.

33:15b.PSA.033.015 Nga kaŋ na i biney kulu taka goono ga laakal daŋ i goyey kulu gaa.

33:16b.PSA.033.016 Bonkooni si no kaŋ ga faaba nga wongu marga baayaŋo sabbay se, Wongaari mo si yana nga gaabi beero sabbay se.

33:17b.PSA.033.017 Yana-ka-faaba ciina ra, bari ya hay fo yaamo no, A si boro kulu faaba mo nga gaabi beero sabbay se.

33:18b.PSA.033.018 A go, Rabbi moy go borey kaŋ yaŋ ga humbur'a gaa, Ngey kaŋ yaŋ ga beeje sinji a baakasina ra din gaa,

33:19b.PSA.033.019 Zama a m'i fundey faaba buuyaŋ gaa, A m'i haggoy mo haray jirbey ra.

33:20b.PSA.033.020 Iri fundey goono ga hangan Rabbi se. Nga no ga ti iri gaakasina da iri korayo.

33:21b.PSA.033.021 Oho, iri biney ga farhã a do, Zama iri de a maa hanna gaa.

33:22b.PSA.033.022 Ya Rabbi, ni baakasinay suujo ma goro iri boŋ, Hanganyaŋo kaŋ iri te ni se din boŋ.

34

34:1b.PSA.034.001 Dawda wane no waato kaŋ a na nga boŋ himandi follokom Abimelek jine, nga mo n'a gaaray, hal a dira.

34:2b.PSA.034.002 Ay ga Rabbi sifa alwaati kulu, A saabuyaŋo mo ga goro ay me ra duumi.

34:3b.PSA.034.003 Ay fundo ga fooma nda Rabbi. Boro kaŋ sinda boŋbeeray ga maa, a ga farhã mo.

34:4b.PSA.034.004 Wa Rabbi beerandi ay banda, Iri m'a maa beerandi gumo mo care banda.

34:5b.PSA.034.005 Ay na Rabbi ŋwaaray, a tu ay se mo. A n'ay soolam mo ka kaa ay humburkuma kulu ra.

34:6b.PSA.034.006 I guna a do haray, i kaari, I moydumey mo, haawi s'i di abada.

34:7b.PSA.034.007 Taabante woone hẽ, Rabbi maa a se mo, A n'a faaba k'a kaa nga taabey kulu ra.

34:8b.PSA.034.008 Rabbi malayka ga gata sinji borey kaŋ yaŋ ga humbur'a windanta, a g'i faaba mo.

34:9b.PSA.034.009 Wa taba ka maa kaŋ Rabbi ya gomnikoy no. Albarkante no boro kaŋ ga de a gaa.

34:10b.PSA.034.010 Ya araŋ a hanantey, wa humburu Rabbi. Zama jaŋay si no borey kaŋ yaŋ ga humbur'a se.

34:11b.PSA.034.011 Muusu beeri izey ga jaŋ, i ga maa haray mo, Amma borey kaŋ yaŋ ga Rabbi ceeci si jaŋ hari hanno kulu.

34:12b.PSA.034.012 Ya araŋ zankey, wa kaa, wa hanga jeeri ay se, Ay g'araŋ dondonandi Rabbi humburkumay.

34:13b.PSA.034.013 May no boro kaŋ ga ba fundi, Kaŋ ga ba nga ma di jirbi hanney?

34:14b.PSA.034.014 To! Kal ni ma ni deena gaay laala ciyaŋ gaa, Ni meyo mo ma si gulinci salaŋ.

34:15b.PSA.034.015 Ma fay da goy laalo ka ihanno te, Ma laakal kanay ceeci k'a gana mo.

34:16b.PSA.034.016 Rabbi moy go adilantey gaa, A hangey mo go feerante i hẽeney se.

34:17b.PSA.034.017 Rabbi moyduma ga bare ka gaaba da goy laalo teekoy, Zama nga m'i fonguyaŋ tuusu ndunnya boŋ.

34:18b.PSA.034.018 Adilantey ga hẽ, Rabbi ga maa, A g'i soolam ka kaa i taabey kulu ra mo.

34:19b.PSA.034.019 Rabbi ga maan bine-saray-koyey, A ga borey kaŋ yaŋ gonda bine suugay faaba.

34:20b.PSA.034.020 Adilante masiibey wo iboobo no, Day Rabbi g'a soolam ka kaa i kulu ra.

34:21b.PSA.034.021 A ga haggoy d'a biriyey kulu, I ra baa afolloŋ si ceeri.

34:22b.PSA.034.022 Laala ga boro laaley wi, Borey kaŋ yaŋ ga konna adilantey mo, ciiti g'i zeeri.

34:23b.PSA.034.023 Rabbi ga nga tamey fundey fansa. Borey kaŋ yaŋ ga de a gaa mo, Ciiti si baa afolloŋ zeeri i ra.

35

35:1b.PSA.035.001 Dawda wane no. Ya Rabbi, ma gurjay da borey kaŋ yaŋ ga gurjay da ay. Ma wongu nda ngey kaŋ yaŋ ga wongu ay.

35:2b.PSA.035.002 Ma sambu koray kayna nda koray beeri, Ma te garbas ay gaakasinay sabbay se,

35:3b.PSA.035.003 Ma yaaji da allag sambu beene, K'ay fundo kankamkoy fonda kosaray. Ma ne ay fundo se: «Ay no ga ti ni faaba.»

35:4b.PSA.035.004 Ngey kaŋ goono g'ay fundo ceeci ma kayna haŋ, I ma haaw mo. Borey kaŋ yaŋ g'ay ceeci hasaraw se mo ma bare, I boŋ ma haw.

35:5b.PSA.035.005 I ma ciya sanda du kaŋ go haw jine, Rabbi malayka goono g'i gaaray.

35:6b.PSA.035.006 I fonda ma te kubay, a ma te tansi mo, Rabbi malayka goono g'i gaarayyaŋo kankamandi.

35:7b.PSA.035.007 Zama i na ngey asuuta tugu guusu ra ay se sabaabu kulu si, I na guusu fansi ay fundo se sabaabu kulu si.

35:8b.PSA.035.008 Halaciyaŋ ma kaŋ i boŋ jirsiyaŋ ra. Asuuta kaŋ i tugu din m'i cey di. Halaciyaŋo kaŋ i soola din, i ma kaŋ a ra.

35:9b.PSA.035.009 Ay fundo mo ga farhã Rabbi ra, A ga farhã gumo a faaba ra.

35:10b.PSA.035.010 Ay biriyey kulu ga ne: «Ya Rabbi, may no ga hima nin kaŋ ga taabante faaba boro kaŋ bis'a gaabi kambe ra?» Oho, taabante da laamikoy, A g'i faaba ngey komkoy kambe ra.

35:11b.PSA.035.011 Ay zaari sambukoy tun ka tangari seeda te. I goono g'ay hã da haŋ kaŋ ay si bay.

35:12b.PSA.035.012 I goono ga laala bana ay se booriyaŋ nangu ra, K'ay fundo hasara.

35:13b.PSA.035.013 Amma ay wo, waati kaŋ i goono ga zaŋay, Ay bankaarayey ya zaara-zaarayaŋ no. Ay n'ay fundo kaynandi nda mehaw, Ay soobay ka adduwa te mo ay bina ra.

35:14b.PSA.035.014 Alhaalo kaŋ ay cabe, sanda day ay coro no, Wala mo ay nya-ize. Ay sooli, ay goono ga bu hẽeni te, Sanda boro kaŋ goono ga nga nya bu baray te.

35:15b.PSA.035.015 Amma ngey wo, waati kaŋ ay simbar, Kal i soobay ka farhã, i margu mo. Karkoy kulu margu ay gaa, ay sinda baaru mo. I soobay k'ay tooru-tooru, i mana naŋ.

35:16b.PSA.035.016 Sanda borey kaŋ yaŋ si Irikoy gana, Kaŋ ga hahaaray ngey batey ra, Yaadin cine no i na ngey hinjey kaama ay gaa.

35:17b.PSA.035.017 Ya ay Koyo, waatifo no ni ga gunayaŋ hinne naŋ? M'ay fundo faaba ka kaa i halacandiyaŋo ra! M'ay fundi follonka mo faaba muusu beerey gaa!

35:18b.PSA.035.018 Ay ga ni saabu marga bambata ra, Ay ga ni sifa mo jama gaabikooni ra.

35:19b.PSA.035.019 Borey kaŋ yaŋ ga wangu ay yaamo-yaamo ma si farhã ay boŋ. Borey kaŋ yaŋ ga konna ay sabaabu kulu si ma si du ka baa mo kar.

35:20b.PSA.035.020 Zama i mana baani sanni te bo, Amma i goono ga zamba sanniyaŋ soola ka dake bine-baani-koyey boŋ laabo ra.

35:21b.PSA.035.021 Daahir i na ngey meyey feeri gumo. I ne: «Ahãa, ahãa, iri moy di a!»

35:22b.PSA.035.022 Ya Rabbi, ni di woodin. Ma si dangay. Ya ay Koyo, ma si mooru ay.

35:23b.PSA.035.023 Ya ay Irikoyo, ay Koy Beero, ma tun ka kay, Ma mo hay ay cimo d'ay sanno gaa.

35:24b.PSA.035.024 Ya Rabbi ay Irikoyo, Ma ciiti ay se ni adilitara boŋ. I ma si du ka farhã ay boŋ.

35:25b.PSA.035.025 I ma si ne ngey biney ra: «Ahãa, yaawo no iri ga ba!» I ma si ne: «Iri n'a gon sukutum.»

35:26b.PSA.035.026 Ngey kaŋ yaŋ ga farhã d'ay hasarawo ma haaw, I ma butugu care banda. Borey kaŋ yaŋ ga ngey boŋ beerandi ay boŋ, Haawi nda kayna m'i daabu.

35:27b.PSA.035.027 Amma borey kaŋ yaŋ ga maa ay cimo kaani ma cilili bine kaani sabbay se, i ma farhã mo. Duumi i ma soobay ka ne: «Rabbi ma beeri, Nga kaŋ ga maa nga tamo albarka kaani.»

35:28b.PSA.035.028 Ay deena mo ga ni adilitara sanni te. Zaari me-a-me a ga ni sifa mo.

36

36:1b.PSA.036.001 Doonkoy jine bora se. Rabbi tamo Dawda wane no.

36:2b.PSA.036.002 Murteyaŋ go ga salaŋ boro laalo se a bina ra. Irikoy humburkumay si a jine.

36:3b.PSA.036.003 Zama a ga nga boŋ fafagu no nga boŋ diyaŋ ra, Ga miila nga laala si bangay ka ciya haŋ kaŋ i ga konna.

36:4b.PSA.036.004 A me sanno, laala da gulinci koonu no. A fay da laakal, a na ihanno teeyaŋ mo naŋ.

36:5b.PSA.036.005 A ga laala miila nga daarijo boŋ, A ga kay fondo kaŋ si boori boŋ, a si laala fanta mo.

36:6b.PSA.036.006 Ya Rabbi, ni baakasinay suujo go beeney ra, Ni naanayo mo to hala beeney gaa.

36:7b.PSA.036.007 Ni adilitara ga hima Irikoy tondi beerey, Ni ciitey guusuyaŋ, ibambata no. Ya Rabbi, nin no ga haggoy da boro nda alman kulu.

36:8b.PSA.036.008 Ya Irikoy, man ni baakasinay suujo darza misa? Adam-izey mo ga du koruyaŋ do ni fatey biyo ra.

36:9b.PSA.036.009 I ga haŋ ka yeesi mo da ni windo yulwa, Ni g'i haŋandi mo ni do fundi kaani maayaŋ isa gaa.

36:10b.PSA.036.010 Zama ni do no fundi hari zuro go. Ni kaaro ra no iri ga di hananyaŋ.

36:11b.PSA.036.011 Ma naŋ ni baakasinay suujo ma soobay ka te borey kaŋ yaŋ ga ni bay se. Ni adilitara mo ngey kaŋ yaŋ gonda cimi ngey biney ra se.

36:12b.PSA.036.012 Ma si naŋ boŋbeeraykoy m'ay taamu, Ma si naŋ boro laaley kambe m'ay gaaray.

36:13b.PSA.036.013 Noodin no goy laalo teekoy kaŋ. I n'i naan, kal i si hin ka tun koyne.

37

37:1b.PSA.037.001 Dawda wane no. Ma si ni boŋ taabandi laalakoyey sabbay se. Ma si canse mo da borey kaŋ ga adilitaray-jaŋay te.

37:2b.PSA.037.002 Zama i g'i dumbu da waasi sanda subu cine. I ma lakaw mo sanda kobto tayo.

37:3b.PSA.037.003 Ma de Rabbi gaa, ma booriyaŋ goy te, Ma goro laabo ra, ma munye da naanay mo.

37:4b.PSA.037.004 Ni bina ma kaan Rabbi ra, Nga mo ga ni bina muraado feeri ni se.

37:5b.PSA.037.005 Ma ni fundo daŋ Rabbi kambe ra, Ma de a gaa, nga mo ga goy.

37:6b.PSA.037.006 A ga naŋ ni adilitara ma bangay sanda annura cine, Ni cimo mo sanda zaari bindi cine.

37:7b.PSA.037.007 Ma fulanzam hinne Rabbi ra, Ma hin suuru ka hangan a se. Ma si ni boŋ taabandi boro kaŋ goono ga te albarka nga fonda ra sabbay se, Nga kaŋ ga dabari laaloyaŋ kaa taray, I ga ŋwa mo.

37:8b.PSA.037.008 Ma fay da bine fortay, ma futay naŋ mo. Ma si ni boŋ taabandi, Woodin si kande hay kulu kala laala teeyaŋ.

37:9b.PSA.037.009 Zama Irikoy ga laala goykoyey halaci, Amma borey kaŋ yaŋ ga hangan Rabbi se, Ngey no ga laabo tubu.

37:10b.PSA.037.010 Zama d'a gay kayna, kulu laalakoy si no. Daahir, anniya no ni g'a nangora guna nd'a, A si ye ka bara noodin mo.

37:11b.PSA.037.011 Amma borey kaŋ yaŋ sinda boŋbeeray ga laabo tubu, I ga ngey biney kaanandi mo baani yulwanta ra.

37:12b.PSA.037.012 Boro laalo ga me-hawyaŋ te adilante boŋ, A ga hinje kaama a se mo.

37:13b.PSA.037.013 Amma Koy Beero g'a haaru, Zama a di kaŋ a alwaato goono ga kaa.

37:14b.PSA.037.014 Laalakoyey na takuba foobu, i na haw daŋ biraw ra zama ngey ma taabante da laamikoy zeeri, Ngey ma fonda ra cimikoyey halaci.

37:15b.PSA.037.015 I takubey ga furo ngey bumbey biney ra, I birawey mo ga ceeri-ceeri.

37:16b.PSA.037.016 Dambe hari kayna kaŋ go adilante se, A ga bisa arzaka gusam kaŋ go laalakoy boobo se.

37:17b.PSA.037.017 Zama laalakoyey kambey ga ceeri-ceeri, Amma Rabbi ga adilante gaabandi.

37:18b.PSA.037.018 Rabbi ga cimi-toonante-koyey jirbey bay, I tubo mo tabbatante no hal abada.

37:19b.PSA.037.019 I si haaw masiiba jirbey ra bo, Haray jirbey ra mo i ga kungu.

37:20b.PSA.037.020 Amma laalakoyey ga halaci, Rabbi ibarey mo ga ciya sanda kuray do darza. I ga say ka daray, i ga say sanda dullu cine.

37:21b.PSA.037.021 Laalakoy ga garaw sambu, a si bana mo, Amma adilante ya gomnikoy no, a ga nooyaŋ no.

37:22b.PSA.037.022 Zama borey kaŋ yaŋ du albarka Irikoy do, Ngey no ga laabo tubu, Amma borey kaŋ yaŋ a laali, a g'i tuusu.

37:23b.PSA.037.023 Rabbi ga boro ce taamuyaŋey tabbatandi, A ga farhã d'a fonda mo.

37:24b.PSA.037.024 Baa a kaŋ, a si gay ganda bo, Zama Rabbi goono g'a gaay nga kambe ra.

37:25b.PSA.037.025 Doŋ ay ya zanka no, sohõ mo ay zeen, Amma ay mana di i ma adilante furu baa ce fo, Wala mo a banda ma nga ŋwaaro ŋwaaray.

37:26b.PSA.037.026 Zaari me-a-me a goono ga gomni goy te, A goono ga garaw daŋ, A bandey mo albarkanteyaŋ no.

37:27b.PSA.037.027 Ma fay da laala, ma booriyaŋ te. Woodin gaa no ni ga goro hal abada.

37:28b.PSA.037.028 Zama Rabbi ga ba cimi ciiti, A si nga hanantey furu mo. I g'i haggoy no hal abada, Amma a ga boro laalo ganji banda.

37:29b.PSA.037.029 Adilantey ga laabo tubu, i ma goro a ra hal abada.

37:30b.PSA.037.030 Adilante me ga laakal sanni salaŋ, A deena mo ga cimi ciiti sanni te.

37:31b.PSA.037.031 A Irikoyo asariya go a bina ra, A taamuyaŋey kulu si te tansi.

37:32b.PSA.037.032 Boro laalo ga gum ka adilante batandi, A goono ga ceeci nga m'a wi.

37:33b.PSA.037.033 Rabbi si adilanta naŋ a kambe ra. A s'a zeeri mo waati kaŋ i goono g'a ciiti.

37:34b.PSA.037.034 Ma hangan Rabbi se, m'a fondey haggoy, Nga mo ga ni beerandi ni ma laabo tubu. Waati kaŋ a ga boro laaley tuusu, ni ga di a.

37:35b.PSA.037.035 Ay doona ka di boro laalo kaŋ toonyante no. A go ga daaru ka yandi sanda tuuri tayo kaŋ go nga batama ra.

37:36b.PSA.037.036 Amma a bisa, a si no mo. Oho, hala ay n'a ceeci zaati, Amma boro si ye ka di a koyne.

37:37b.PSA.037.037 Ma laakal daŋ cimi-toonante-koy gaa, Ma adilante guna mo, Zama baani boro gonda kokora hanno.

37:38b.PSA.037.038 Day zunubikooney ga halaci no care banda, Boro laaley kokora ga ti i m'i tuusu.

37:39b.PSA.037.039 Amma adilantey faaba wo, Rabbi do no a ga fun. Nga no ga ti i gaabi do taabi alwaati ra.

37:40b.PSA.037.040 Rabbi g'i gaakasinay, a g'i kaa kambe. Boro laaley kambe ra n'a g'i kaa, A g'i faaba mo zama i tugu a do.

38

38:1b.PSA.038.001 Dawda baytu fo kaŋ a te fongandiyaŋ se.

38:2b.PSA.038.002 Ya Rabbi, ma si deen'ay gaa ni futa ra, Ma s'ay gooji mo ni dukuri korna ra.

38:3b.PSA.038.003 Zama ni hangawey furo ay ra, Ni kamba mo goono g'ay naan da gaabi.

38:4b.PSA.038.004 Ay sinda baani ay hamo ra ni dukuro sabbay se, Gaabi mo si no ay biriyey ra ay zunubey sabbay se.

38:5b.PSA.038.005 Zama ay hartayaŋey ku d'ay boŋo, Sanda jaraw tiŋo cine, i bis'ay gaabi.

38:6b.PSA.038.006 Ay biyey te haw, i fumbu ay saamotara sabbay se.

38:7b.PSA.038.007 Ay gungum; ay sooli gumo, Zaaro me muudu ay goono ga dira nda bina sunnay.

38:8b.PSA.038.008 Zama ay gunde calbey to da tonyaŋ, Ay hamo kulu ra mo sinda baani.

38:9b.PSA.038.009 Ay dusu, ay tutubu-tutubu, Ay wurru bine ra laakal-kanay-jaŋay sabbay se.

38:10b.PSA.038.010 Ya Koy Beero, haŋ kaŋ ay ga laami kulu go ni jine, Ay durayyaŋo mo si tugante ni se.

38:11b.PSA.038.011 Ay bina go ga fittaw, ay gaabo fay d'ay, Baa ay moy annura mo daray ay se.

38:12b.PSA.038.012 Ay baakoy d'ay corey kay nangu mooro, I goono ga di ay masiiba, Ay dumey mo go ga kay nangu mooro.

38:13b.PSA.038.013 Ay fundo ceecikoy mo na hirrimiyaŋ sinji ay se. Ngey mo kaŋ yaŋ ga ba ngey m'ay zamba goono ga halaciyaŋ ci, Zaari me-a-me i goono ga gulinci soola.

38:14b.PSA.038.014 Amma ay wo hima sanda lutu, yana maa. Ay ga hima beebe kaŋ si nga me fiti.

38:15b.PSA.038.015 Oho, ay ga hima sanda boro kaŋ si maa, Kaŋ kobay si no a me ra.

38:16b.PSA.038.016 Ya Rabbi, za kaŋ ni gaa no ay ga beeje sinji, Ya Koy Beero, ay Irikoyo, ni ga tu.

38:17b.PSA.038.017 Zama ay ne: «Waati kaŋ ay cey ga tansi, Kaŋ i ga boŋ jare ay se ka gaaba nd'ay, I ma si farhã ay boŋ.»

38:18b.PSA.038.018 Zama ay wo ga ba ka kaŋ, Ay bine sara mo go ay jine waati kulu.

38:19b.PSA.038.019 Zama ay g'ay taalo bangandi, Ay to da humburkumay ay zunubo sabbay se.

38:20b.PSA.038.020 Amma ay ibarey ya iboobo no, i gonda hina mo. Borey kaŋ yaŋ wongu ay sabaabu kulu si, Ngey wo tonton gumo.

38:21b.PSA.038.021 Borey mo kaŋ ga laala bana ihanno se ya yanjekaariyaŋ no ay se, Zama haŋ kaŋ ga boori no ay goono ga gana.

38:22b.PSA.038.022 Ya Rabbi, ma s'ay furu; ya ay Irikoyo, ma si mooru ay.

38:23b.PSA.038.023 Ya ay Koyo, ya ay faaba, ma waasu k'ay gaa.

39

39:1b.PSA.039.001 Doonkoy jine bora Yedutun se. Dawda baytu fo no.

39:2b.PSA.039.002 Ay ne: «Ay ga haggoy d'ay muraadey, Zama ay ma si zunubi te d'ay deena. Duumi da laalakoy go ay jine, Ay g'ay me daabu danga nda takunkum.»

39:3b.PSA.039.003 Ay goro siw, ay dangay baa ihanno ciyaŋ gaa, Ay bine sara mo tonton.

39:4b.PSA.039.004 Ay bina ton ay ganda ra, Ay go fonguyaŋ gaa, kala danji di. Gaa no ay salaŋ d'ay deena ka ne:

39:5b.PSA.039.005 «Ya Rabbi, ma naŋ ay m'ay bananta bay, Ay jirbey baayaŋo lasaabo mo, Ya bay mate kaŋ cine no a go. Naŋ ay m'ay jaŋ-ka-gayyaŋo bay.

39:6b.PSA.039.006 A go, ni n'ay jirbey te sanda kambe gaaba cine. Ay jiirey baayaŋo mo manti hay fo no ni jine. Daahir, boro fo kulu ya funsar no, Mate kulu kaŋ cine a goono yaŋ ga bara nd'a. (Wa dangay)

39:7b.PSA.039.007 Daahir, boro kulu ga nga bar-bareyaŋ te no sanda yuumay cine. Daahir, i ga kosongu yaamo day no. A ga arzaka margu-margu, a s'a ŋwakwa bay mo.

39:8b.PSA.039.008 Sohõ binde, ya ay Koyo, ifo no ay goono ga hangan? Ay beeja, ni do no a go.

39:9b.PSA.039.009 M'ay faaba ay hartayaŋey kulu gaa. Ma si naŋ ya ciya wowi hari borey kaŋ yaŋ sinda laakal se.

39:10b.PSA.039.010 Ay te siw! Ay man'ay me fiti mo, Zama nin no ka woodin te.

39:11b.PSA.039.011 Ma ni karyaŋo hibandi ka kaa ay gaa, Ay halaci ni kamba sabbay se.

39:12b.PSA.039.012 Waati kaŋ ni ga boro gooji nda kaseetiyaŋ zunubi sabbay se, Ni ga naŋ a darza ma halaci sanda naana-baano. Daahir boro kulu ya funsar no. (Wa dangay)

39:13b.PSA.039.013 Ya Rabbi, ma maa ay adduwa, Ma hanga jeeri ay hẽeno mo se. Ma s'ay hẽeno dangay, zama ay ya yaw no ni do, Boro kaŋ kaa ka zumbu no, Sanda ay kaayey kulu cine za doŋ.

39:14b.PSA.039.014 Ma fay d'ay gunayaŋ zama ay ma du ka moyduma feeri, Za ay mana gana ne, za ay mana te ka si.»

40

40:1b.PSA.040.001 Doonkoy jine bora se. Dawda baytu fo no.

40:2b.PSA.040.002 Suuru no ay ga hangan d'a Rabbi se, A na hanga jeeri ka maa ay se, a maa ay hẽeno mo.

40:3b.PSA.040.003 A n'ay soolam ka kaa halacandiyaŋ guuso ra, Tibi botogo laalo ra. A n'ay cey sinji tondi daari boŋ, A n'ay taamuyaŋey mo kayandi.

40:4b.PSA.040.004 A na baytu taji daŋ ay meyo ra mo, Saabuyaŋ nooya iri Irikoyo se. Boro boobo ga di, i ma humburu, i ma de Rabbi gaa mo.

40:5b.PSA.040.005 Albarkante no boro kaŋ na Rabbi te nga deyaŋ hari. A si nga jine ye boŋbeeraykoyey do haray, wala borey kaŋ yaŋ ga kamba tangari do haray.

40:6b.PSA.040.006 Ya Rabbi ay Irikoyo, dambara goyey kaŋ ni te, Da ni fongu-fonguyaŋey mo kaŋ ni gonda iri do haray ga baa gumo. Afo kulu si no kaŋ i ga kar ni gaa. Baa d'ay ga ba ay m'i bangandi, ay m'i baaru dede, I bisa lasaabuyaŋ.

40:7b.PSA.040.007 Ni si ba sargay da nooyaŋ, Ni n'ay hanga fun. Sargay summaare kaŋ i ga ton, Da zunubi se sargay, ni s'i hã.

40:8b.PSA.040.008 Gaa no ay ne: «Ay neeya, ay kaa. I hantum ay boŋ tira kunkunanta ra.

40:9b.PSA.040.009 Ya ay Irikoyo, ay farhã ga ti ni miila teeyaŋo, Daahir, ni asariya go ay bina ra.»

40:10b.PSA.040.010 Ay na adilitaray baaru hanna fe jama marga bambata ra, A go, ay s'ay meyo ganj'a. Ya Rabbi, ni ga bay.

40:11b.PSA.040.011 Ay mana ni adilitara tugu ay bina ra bo, Ay na ni naanayo da ni faaba ci no. Ay mana ni baakasinay suujo da ni cimo daabu jama marga bambata se mo.

40:12b.PSA.040.012 Ya Rabbi, ni s'ay ganji ni bakarawo. Ni baakasinay suujo da ni cimo g'ay haggoy duumi.

40:13b.PSA.040.013 Zama masiibey kaŋ ga baa da lasaabuyaŋ n'ay windi, Ay taaley mo n'ay to hala ay si hin k'ay boŋ sambu ka beena guna. I baa da ay boŋ hamno, ay bina-gaabo mo gaze.

40:14b.PSA.040.014 Ya Rabbi, ma yadda k'ay kaa kambe. Ya Rabbi, ma cahã k'ay gaakasinay.

40:15b.PSA.040.015 Borey kaŋ yaŋ g'ay fundo ceeci zama ngey m'a halaci se, Naŋ i ma haaw, i boŋ ma haw me folloŋ. Ngey kaŋ yaŋ ga farhã nd'ay hasarawo, Naŋ i ma bare ka ye banda ka kayna haŋ.

40:16b.PSA.040.016 Ngey kaŋ ga ne ay se: «Ahãa! Ahãa!» Naŋ i ma dangay siw i haawo sabbay se,

40:17b.PSA.040.017 Borey kaŋ yaŋ ga ni ceeci kulu ma te bine kaani da farhã ni do. Ngey kaŋ yaŋ ga ba ni faaba ma soobay ka ne: «Wa Rabbi beerandi!»

40:18b.PSA.040.018 Ay wo taabante no kaŋ gonda laami, Kulu nda yaadin Koy Beero ga fongu ay gaa. Ni ga ti ay gaakasina d'ay faabakwa mo. Ya ay Irikoyo, ma si gay!

41

41:1b.PSA.041.001 Doonkoy jine bora se. Dawda baytu fo no.

41:2b.PSA.041.002 Albarkante no boro kaŋ ga taabantey saal, Rabbi g'a faaba taabi zaari ra.

41:3b.PSA.041.003 Rabbi g'a hallasi k'a funandi, A ga ciya albarkante mo ndunnya ra, Ni s'a no nga ibarey ibaayo se mo.

41:4b.PSA.041.004 Rabbi g'a gaabandi a baani-jaŋay daarijo boŋ. Ni ga daariji hanse a se a dooro ra.

41:5b.PSA.041.005 Ay ne: «Ya Rabbi, ma gomni goy te ay se, M'ay fundo yayandi, zama ay na zunubi te ni se.»

41:6b.PSA.041.006 Ay ibarey goono g'ay wow, i goono ga ne: «Waatifo no a ga bu, a maa ma halaci mo?»

41:7b.PSA.041.007 D'a kaa k'ay kunfa mo, Kala sanni yaamo kaŋ a ga soobay ka ci. A bina goono ga laala margu-margu nga boŋ se, D'a koy taray mo, kala a m'a ci.

41:8b.PSA.041.008 Borey kaŋ yaŋ ga konna ay kulu goono g'ay ciinay no. I goono g'ay hiila ngey m'ay zamba se, ka ne:

41:9b.PSA.041.009 «Doori laalo fo goono ga naagu a gaa. Sohõ mo kaŋ a ban ka kani wo, a si ye ka tun koyne.»

41:10b.PSA.041.010 Oho, ay cora bumbo, kaŋ ay yadda nd'a, Bora kaŋ n'ay ŋwaaro ŋwa na nga ce konda tunandi ay gaa.

41:11b.PSA.041.011 Amma nin, ya Rabbi, ma gomni goy te ay se. M'ay tunandi mo, Zama ay ma bana i gaa.

41:12b.PSA.041.012 Woodin gaa no ay ga bay kaŋ ni ga maa ay kaani, Za kaŋ ay ibara siino ga zamuuyaŋ te ay boŋ.

41:13b.PSA.041.013 Ay wo, nin no goono g'ay gaay ay hananyaŋo ra. Ni g'ay jisi ni jine hal abada.

41:14b.PSA.041.014 I ma Rabbi Israyla Irikoyo sifa, Za doŋ-doŋ kaŋ sinda me ka koy hal abada abadin. Amin. Amin.

42

42:1b.PSA.042.001 Doonkoy jine bora se. Kora izey baytu fo no.

42:2b.PSA.042.002 Sanda mate kaŋ cine me-kwaaray ga zuka nga ma du hari zurey, Ya Irikoy, yaadin cine no ay fundo goono ga zuka ni se.

42:3b.PSA.042.003 Ay fundo goono ga maa Irikoy jaw, Irikoy fundikoono. Waatifo no ay ga kaa ka bangay Irikoy jine?

42:4b.PSA.042.004 Ay mundo ciya ay se ŋwaari cin da zaari, Kaŋ waati kulu borey goono ga ne ay se: «Day man no ni Irikoyo go?»

42:5b.PSA.042.005 Hayey wo no ay fongu, ay goono g'ay fundo soogu ay ra, Dirawo kaŋ ay goro ka te jama banda, Ay goono g'i candi ka kond'ey Irikoy windo do, Ka farhã da saabuyaŋ jinde sambu, Batu teeyaŋ jama nooya.

42:6b.PSA.042.006 Ya ay fundo, ifo se no ni goono ga taagum? Ifo se mo no ni goono ga joote ay ra? Ma beeje sinji Irikoy boŋ, Zama ay ga ye k'a saabu a moyduma gaakasina sabbay se.

42:7b.PSA.042.007 Ya ay Irikoyo, ay fundo goono ga taagum ay ra, Woodin se no ay ga fongu ni gaa za Urdun* laabu, Da Hermon yolley, da Mizar tudo boŋ mo.

42:8b.PSA.042.008 Ni hari bondayey kaatiyaŋo maayaŋ gaa no guusuyaŋey ga care ce. Ni hari zurey da bondayey kulu n'ay yoole.

42:9b.PSA.042.009 Amma Rabbi ga nga baakasinay suujo lordi zaari haray, Cin mo a bayto go ay banda, Sanda ay fundo Irikoyo gaa adduwa nooya.

42:10b.PSA.042.010 Ay ga ne Irikoy kaŋ ti ay tondi daaro se: «Ifo se no ni dinya ay gaa? Ifo se mo no ay goono ga dira nda bine saray ibare kankamo sabbay se?»

42:11b.PSA.042.011 Ay yanjekaarey wowo ga hima ay se sanda mate kaŋ cine i g'ay biriyey tutubu, Kaŋ waati kulu no i ga ne ay se: «Man no ni Irikoyo go me?»

42:12b.PSA.042.012 Ya ay fundo, ifo se no ni goono ga taagum? Ifo se mo no ni goono ga joote ay ra? Ma beeje sinji Irikoy boŋ, Zama ay ga ye k'a saabu, Nga kaŋ ci ay moyduma gaakwa, ay Irikoyo mo no.

43

43:1b.PSA.043.001 Ya Irikoy, ma faasa ay se. M'ay sanno hanse ka gaaba nda dumey kaŋ siino ga ni gana. M'ay faaba mo boro kaŋ ga gulinci kambe ra, Kaŋ sinda adilitaray mo.

43:2b.PSA.043.002 Zama nin no ga ti Irikoy, ay gaabo wane. Ifo se no ni n'ay furu? Ifo se no ay goono ga dira nda bine saray ibare kankamo sabbay se?

43:3b.PSA.043.003 Ay ga ni ŋwaaray, ma ni annura da ni cimo donton, I ma jina candi ay se. I ma kande ay ni tondi hananta boŋ, ni nangorayey do mo.

43:4b.PSA.043.004 Waati din gaa no ay ga koy Irikoy feema do, Irikoy kaŋ ti ay farhã beero do nooya. Ya Irikoy, ay Irikoyo, Moolo beeri boŋ no ay ga ni saabu.

43:5b.PSA.043.005 Ya ay fundo, ifo se no ni goono ga taagum? Ifo se mo no ni goono ga joote ay ra? Ma beeje sinji Irikoy boŋ, Zama ay ga ye k'a saabu, Nga kaŋ ci ay moyduma gaakwa, ay Irikoyo mo no.

44

44:1b.PSA.044.001 Doonkoy jine bora se. Kora izey baytu fo no.

44:2b.PSA.044.002 Ya Irikoy, iri maa d'iri hangey, Iri kaayey mo ci iri se goy kaŋ ni te i jirbey ra, Za waato zamaney ra.

44:3b.PSA.044.003 Kaŋ ni na dumi cindey gaaray da ni kambe k'i sinji. Ni na kunda woodin yaŋ taabandi k'i say-say.

44:4b.PSA.044.004 Zama iri kaayey mana laabo ŋwa da ngey bumbey takuba bo, Manti mo i kambe jase no k'i faaba, Amma ni kambe ŋwaaro da ni jasa, Da ni moyduma annura no, zama ni yadda i gaa.

44:5b.PSA.044.005 Ya Irikoy, nin no ga ti ay Bonkoono, Ni ma faaba lordi Yakuba se.

44:6b.PSA.044.006 Ni do no iri ga du k'iri yanjekaarey tuti ka ye banda. Ni maa do mo no iri ga du ka borey kaŋ yaŋ ga gaaba nd'iri taamu-taamu.

44:7b.PSA.044.007 Zama ay si de ay birawo gaa bo, Ay takuba mo s'ay faaba.

44:8b.PSA.044.008 Amma nin no k'iri faaba iri yanjekaarey kambe ra, Ni n'iri konnakoy mo haawandi.

44:9b.PSA.044.009 Irikoy ra no iri ga fooma zaari me-a-me, Iri ga ni maa sifa mo hal abada. (Wa dangay)

44:10b.PSA.044.010 Amma sohõ ni n'iri furu, ni n'iri kaynandi mo, Ni siino ga fatta iri wongu margey banda.

44:11b.PSA.044.011 Ni naŋ iri ma banda bare iri yanjekaarey se, Ngey kaŋ konna iri du wongu arzaka ngey boŋ se.

44:12b.PSA.044.012 Ni n'iri nooyandi sanda wiyaŋ feeji, Ni n'iri say-say dumi cindey ra.

44:13b.PSA.044.013 Ni goono ga ni borey neera faala, Ni mana du riiba fo mo i hayo gaa.

44:14b.PSA.044.014 Ni n'iri ciya jomboyaŋ hari iri gorokasiney se, Donda-caray da hahaarayaŋ hari mo iri windante waney se.

44:15b.PSA.044.015 Ni n'iri ciya deedandiyaŋ laalo hari kundey ra, Me nyatteyaŋ hari mo dumi cindey game ra.

44:16b.PSA.044.016 Waati kulu ay kaynayaŋo go ay jine, Ay moyduma haawo n'ay daabu, sip!

44:17b.PSA.044.017 Wowko jinde sabbay se kaŋ goono ga sanni ziibo te, Ibare da daw banako mo sabbay se.

44:18b.PSA.044.018 Woodin yaŋ kulu kaŋ iri boŋ, Kulu nda yaadin iri mana dinya ni gaa, Iri mana tangari goy te da ni sappa mo.

44:19b.PSA.044.019 Iri biney mana bare ka ye banda, Iri taamuyaŋey mo mana kamba ka ni fonda taŋ,

44:20b.PSA.044.020 Baa day kaŋ ni n'iri tutubu zoŋey do, Ni n'iri daabu mo da buuyaŋ biya.

44:21b.PSA.044.021 D'iri dinya iri Irikoyo maa, Wala mo d'iri na kambe salle de-koy waani fo gaa,

44:22b.PSA.044.022 Doŋ manti Irikoy ga woodin fisi ka kaa taray no? Zama a ga bine gundu bay.

44:23b.PSA.044.023 Oho, ni sabbay se no i go g'iri wi zaari me-a-me, I n'iri himandi feejiyaŋ kaŋ i ga koy wi.

44:24b.PSA.044.024 Ya ay Koyo, ma mo hay! Ifo se no ni ga jirbi? Ma tun, ma si wangu iri hal abada.

44:25b.PSA.044.025 Ifo se no ni goono ga ni moyduma tugu? Ni goono ga dinya kayna da kankamo kaŋ i goono ga te iri se din no?

44:26b.PSA.044.026 Zama iri fundey sooli hala ganda, Iri gaahamey go ga naagu laabo gaa.

44:27b.PSA.044.027 Ma tun ka kay iri gaakasinay se, M'iri fansa mo ni baakasinay suujo sabbay se.

45

45:1b.PSA.045.001 Doonkoy jine bora se. I m'a doon da subo kaŋ ga ne: «Boosi Hannoyaŋ». Kora izey baytu fo no. Baakasinay dooni mo no.

45:2b.PSA.045.002 Ay bina goono ga to da muraadu hanno fo. Ay g'ay doono te Bonkoono se. Ay deena ya kalam no, hantumko kaŋ ga goni wane.

45:3b.PSA.045.003 Ni bisa Adam-izey booriyaŋ. I na gomni gusam kaŋ fun ni me ra. Woodin se no Irikoy na ni albarkandi hal abada.

45:4b.PSA.045.004 Ya nin wongaaro, Ma ni takuba koto a ma sooli ni tanja gaa, Ni beera da ni koytaray darza ra!

45:5b.PSA.045.005 Ni koytaray darza ra mo ni ma kaaru ka dira nda albarka, Cimi da boŋ-baanay da adilitaray sabbay se. Ni ga naŋ ni kambe ŋwaaro ma muraadey kaŋ ga humburandi kaa taray.

45:6b.PSA.045.006 Ni hangawey ya deenekoyyaŋ no. I go no koyo ibarey biney ra. Ndunnya dumey ga soobay ka kaŋ ni cire.

45:7b.PSA.045.007 Ya Irikoy, ni koytaray karga ya hal abada abadin wane no. Ni koytaray sarjilla ya sarjilla kayante no.

45:8b.PSA.045.008 Ni ga ba adilitaray, ni konna mo ilaalo. Woodin se no Irikoy, kaŋ ti ni Irikoyo na ni suuban ka farhã jiyo soogu ni boŋ ka bisa ni hangasiney.

45:9b.PSA.045.009 Ni bankaarayey kulu gonda zawul da alowes* da kaasiya haw kaano. Faadey kaŋ i cina nda cebeeri hinje, I ra mooley kaŋ ga hẽ na ni bina kaanandi ni se.

45:10b.PSA.045.010 Bonkooni ize wayyaŋ go ni wayboro darzakoyey ra. Ni kambe ŋwaaro gaa haray wayboro bonkoono goono ga kay da Ofir wura ga daabu nga gaa.

45:11b.PSA.045.011 Ya nin ize wayo, ma hangan ka maa, Ma fongu, ma ni hanga jeeri. Ma dinya ni dumey da ni baabo windo mo.

45:12b.PSA.045.012 Gaa no bonkoono ga ba ni sogotara gumo, Zama nga wo ni koy no, kala ni ma sumbal a jine.

45:13b.PSA.045.013 Tir kwaara ize wayo ga kande nooyaŋ, Jama ra arzakantey mo ga ni yadda ŋwaaray.

45:14b.PSA.045.014 Bonkoono ize wayo gonda darza nga bina ra gumo. Wura no i n'a bankaaray kaymo te d'a.

45:15b.PSA.045.015 I ga kond'a bonkoono do zaara taalamante ra. A coro wandiyey kaŋ g'a gana, i ga kand'ey ni do.

45:16b.PSA.045.016 Farhã da bine kaani ra no i ga kand'ey, I ga furo bonkoono faada ra.

45:17b.PSA.045.017 Ni izey ga furo ni kaayey nango ra. Ngey mo no ni ga daŋ ka te mayraykoyyaŋ ndunnya kulu ra.

45:18b.PSA.045.018 Ay ga naŋ i ma fongu ni maa gaa zamaney kulu ra, Woodin se no ndunnya dumey ga saabu ni se hal abada abadin.

46

46:1b.PSA.046.001 Doonkoy jine bora se. Kora izey baytu fo no, Wayboro no g'a doon.

46:2b.PSA.046.002 Irikoy ya iri koruyaŋ do no, da iri gaabo mo, Gaakasinay maano-maano mo no taabi ra.

46:3b.PSA.046.003 Woodin se no iri si humburu, baa da ndunnya bare, Wala baa tondi beerey kaŋ ka sundu teeko bindo ra,

46:4b.PSA.046.004 Baa a harey ga kungu beeri te, i goono ga kufu kar, Baa i fuusuyaŋo ga naŋ tondi beerey ma jijiri. (Wa dangay)

46:5b.PSA.046.005 Isa fo go no, kaŋ haro ga Irikoy gallo bine kaanandi, Beeray-Beeri-Koyo nangoray hanna no.

46:6b.PSA.046.006 Irikoy go a bindo ra, gallo si zinji bo. Irikoy g'a gaakasinay za da hinay.

46:7b.PSA.046.007 Dumi cindey follo, mayrayey mo zinji. A na nga jinde sambu, kala ndunnya manne.

46:8b.PSA.046.008 Rabbi Kundeykoyo go iri banda, Yakuba Irikoyo ya iri wongu fuwo no. (Wa dangay)

46:9b.PSA.046.009 Wa kaa ka Rabbi goyey guna, Kurmu kaŋ cine no a te ndunnya ra.

46:10b.PSA.046.010 A ga naŋ wongey ma ban hala ndunnya me. A ga biraw ceeri, a ga yaaji mo pati, A ga torkey ton danji ra.

46:11b.PSA.046.011 Wa dangay ka bay kaŋ ay no ga ti Irikoy. Ay ga beeri gumo dumi cindey do, Ay ga beeri gumo ndunnya ra mo.

46:12b.PSA.046.012 Rabbi Kundeykoyo go iri banda, Yakuba Irikoyo ya iri wongu fuwo no. (Wa dangay)

47

47:1b.PSA.047.001 Doonkoy jine bora se. Kora izey baytu fo no.

47:2b.PSA.047.002 Ya araŋ ndunnya dumey kulu, wa kambe kobi. Wa cilili nda farhã jinde Irikoy se.

47:3b.PSA.047.003 Zama Rabbi ya beeraykoy no kaŋ ga humburandi, Koy beeri no ndunnya kulu boŋ.

47:4b.PSA.047.004 A ga dumey mayray daŋ iri cire, Ndunnya dumey mo iri ce taamey cire.

47:5b.PSA.047.005 A ga iri tubo suuban iri se, Darza no Yakuba kaŋ a ga ba se. (Wa dangay)

47:6b.PSA.047.006 Irikoy kaaru nda kosongu jinde, Rabbi kaaru nda hilli jinde.

47:7b.PSA.047.007 Wa sifayaŋ baytu te Irikoy se, wa sifayaŋ baytu te. Wa sifayaŋ baytu te iri Koyo se. Wa sifayaŋ baytu te,

47:8b.PSA.047.008 Zama Irikoy ya dumey kulu Koy no. W'a sifa nda baytu kaŋ ga dondonandi.

47:9b.PSA.047.009 Irikoy no ga dumi cindey dabari, Irikoy goono ga goro nga koytaray karga hanna boŋ.

47:10b.PSA.047.010 Dumey mayraykoyey margu zama ngey ma ciya Ibrahim Irikoyo boroyaŋ, Zama ndunnya korayey ya Irikoy wane yaŋ no, Nga wo Beeraykoy no gumo-gumo.

48

48:1b.PSA.048.001 Dooni. Kora izey baytu fo no.

48:2b.PSA.048.002 Rabbi wo Beeraykoy no, kaŋ to sifayaŋ gumo, Iri Irikoyo gallo ra, a tondi kuuku hanna ra nooya.

48:3b.PSA.048.003 Sihiyona tondo ya Koy Beero gallo no kaŋ go azawa kambe, Kayyaŋ-hanno-koy no, farhã hari no ndunnya kulu se.

48:4b.PSA.048.004 Irikoy na nga boŋ bayrandi, Nga ya wongu fu no gallo faadey ra.

48:5b.PSA.048.005 Zama a go, bonkooney margu, care banda mo no i bisa.

48:6b.PSA.048.006 Kaŋ i di, i to da dambara, i laakaley tun hal i zuru.

48:7b.PSA.048.007 Jijiriyaŋ n'i di noodin, Sanda wayboro kaŋ goono ga hay-zaŋay gurzuga cine.

48:8b.PSA.048.008 _Ni n'i pati-pati mo, sanda mate kaŋ cine|_ ni na Tarsis hiyey pati-pati nda wayna funay hawo.

48:9b.PSA.048.009 Sanda mate kaŋ cine iri maa, yaadin cine mo no iri di, Rabbi Kundeykoyo gallo ra, iri Irikoyo gallo ra. Irikoy g'a sinji hal abada. (Wa dangay)

48:10b.PSA.048.010 Ya Irikoy, iri fongu ni baakasinay suujo gaa ni fuwo bindo ra.

48:11b.PSA.048.011 Ya Irikoy, mate kaŋ cine ni maa bara, Yaadin cine mo no ni sifayaŋo bara nd'a hala ndunnya me. Ni kambe ŋwaaro to da adilitaray.

48:12b.PSA.048.012 Sihiyona tondo ma farhã, Yahuda ize wayey ma te bine kaani ni ciitey sabbay se.

48:13b.PSA.048.013 Wa Sihiyona ra windi, w'a banda mo casu, W'a cinari kuukey kabu.

48:14b.PSA.048.014 W'a wongu fuwey guna ka boori, w'a faadey gana, Zama araŋ ma du ka ci zamana kaŋ ga dake araŋ gaa se.

48:15b.PSA.048.015 Zama Irikoyo wo iri Irikoyo no hal abada abadin. A ga ciya iri se jine candiko ka koy hal iri buuyaŋ hane.

49

49:1b.PSA.049.001 Doonkoy jine bora se. Kora izey baytu fo no.

49:2b.PSA.049.002 Ya araŋ ndunnya dumey kulu, wa maa woone wo. Ya araŋ ndunnya gorokoy kulu, --

49:3b.PSA.049.003 Boro kayney da boro beerey, Da arzakantey da talkey, wa hanga jeeri care banda:

49:4b.PSA.049.004 Ay meyo ga laakal _sanniyaŋ|_ ci, Ay bina fintalyaŋ mo ga ciya fahamay wane.

49:5b.PSA.049.005 Ay g'ay hangey jeeri yaasay se, Ay g'ay misa mo feeri da moolo beeri karyaŋ.

49:6b.PSA.049.006 Ifo se no humburkumay g'ay di masiiba jirbey ra, Saaya kaŋ ay ibarey laala go g'ay windi?

49:7b.PSA.049.007 Sanda borey kaŋ yaŋ ga de ngey arzakey gaa, Ngey kaŋ yaŋ ga fooma ngey duure baayaŋ sabbay se.

49:8b.PSA.049.008 I ra sinda boro kaŋ ga hin ka nga nya-ize fansa nda mate kulu kaŋ cine no, Wala a ma fansayaŋ hari no Irikoy se a se.

49:9b.PSA.049.009 Zama i fundey fansayaŋ hari ga caada, Kala a m'a naŋ hinne hal abada,

49:10b.PSA.049.010 Kaŋ ga naŋ a ma funa duumi, hal a ma si fumbu.

49:11b.PSA.049.011 Zama a go ga di laakalkooney go ga bu, Saamo nda alman alhaalikoy go ga halaci care banda, I ma ngey arzakey naŋ boro fooyaŋ se.

49:12b.PSA.049.012 I tammahãyaŋ gaa, Ngey windey wo ga tondo no hal abada, Ngey nangorayey mo hala zamaney kulu me. I ga ngey bumbey maayey daŋ ngey laabey gaa.

49:13b.PSA.049.013 Amma boro nda nga darza kulu si duumi bo, A ga hima day danga almaney kaŋ ga halaci.

49:14b.PSA.049.014 Saamey fonda nooya, Ngey d'i banda borey kaŋ yaŋ ga maa i sanney kaani. (Wa dangay)

49:15b.PSA.049.015 I na i waadu Alaahara se sanda feeji kuru cine. Buuyaŋ no g'i boy. Adilantey g'i may susubay. I gaakuro mo ga ciya Alaahara se ŋwaari. I ga daray ngey windey se nangu mooro.

49:16b.PSA.049.016 Amma Irikoy g'ay fundo fansa ka kaa Alaahara hino ra, Zama a g'ay sambu. (Wa dangay)

49:17b.PSA.049.017 Ma si humburu waati kaŋ i na boro fo arzakandi, Alwaati kaŋ a windo darza tonton.

49:18b.PSA.049.018 Zama d'a bu, a si konda hay kulu, A darza mo s'a gana ka koy ganda.

49:19b.PSA.049.019 Baa kaŋ ni ga ni boŋ saabu duumi ni baafuna ra, Borey ga ni sifa mo waati kaŋ ni goono ga boriyandi ni boŋ se,

49:20b.PSA.049.020 Kulu nda yaadin ni ga koy ni kaayey waddey do, kaŋ yaŋ si ye ka di kaari koyne hal abada.

49:21b.PSA.049.021 Boro kaŋ gonda beeray, a sinda mo fahamay, A ga hima sanda almaney kaŋ ga halaci.

50

50:1b.PSA.050.001 Asaf baytu fo no. Hinkoyo, Rabbi Irikoy salaŋ, A na ndunnya ce za wayna funyaŋ kal a kaŋyaŋ.

50:2b.PSA.050.002 Irikoy kaaro fun Sihiyona ra, Darza toonante no.

50:3b.PSA.050.003 Iri Irikoyo go kaa, a si dangay bo. Danji go ga di a jine, Danjo go ga follo mo a windanta gumo.

50:4b.PSA.050.004 A ga beeney ce beene, A ga ganda mo ce, zama a ma ciiti nga borey se.

50:5b.PSA.050.005 «W'ay hanantey margu ay se, Ngey, borey kaŋ yaŋ sappe nda ay sargay boŋ.»

50:6b.PSA.050.006 Beeney goono g'a adilitara baaro fe, Zama Irikoy bumbo ya ciitiko no. (Wa dangay)

50:7b.PSA.050.007 «Ya araŋ ay borey, wa maa, ay mo ga salaŋ. Ya Israyla, ay ga seeda ni boŋ mo. Ay no ga ti Irikoy, ni Irikoyo.

50:8b.PSA.050.008 Ay si kaseeti ni gaa ni sargayey se bo. Ni sargayey kaŋ i ga ton, waati kulu i go ay jine.

50:9b.PSA.050.009 Ay si yeeji ta ni windo ra, Wala jindiyaŋ ni hincin kurey ra.

50:10b.PSA.050.010 Manti ganji ham kulu ay wane no, Da tudu zambarey boŋ alman izey?

50:11b.PSA.050.011 Ay gonda tondey kulu boŋ curayzey bayray, Hay kulu kaŋ ga nyooti farey ra mo, ay wane yaŋ no.

50:12b.PSA.050.012 Baa ay ga maa haray, ay si ci ni se bo, Zama ndunnya ya ay wane no, nga nda nga tooyaŋo.

50:13b.PSA.050.013 Ay ga yeeji ham ŋwa, Wala ay ga hincin jindi kuri haŋ no?

50:14b.PSA.050.014 Ma saabuyaŋ sargay salle Irikoy se, Ma ni sarti kulu bana Beeray-Beeri-Koyo se.

50:15b.PSA.050.015 Ma ce ay maa boŋ mo masiiba zaari ra. Ay ga ni faaba, ni mo g'ay beerandi.»

50:16b.PSA.050.016 Amma boro laalo, Irikoy goono ga ne a se: «Ifo ga ti ni kobay kaŋ se ni g'ay hin sanney ci, Hala ni n'ay sappa sambu ni me ra?

50:17b.PSA.050.017 Zama ni wongu goojiyaŋ, Ni go g'ay sanney mo furu ni banda.

50:18b.PSA.050.018 Da ni di zay, nin d'a ga te me fo, Ni ga hangasinay da zina-teerey mo.

50:19b.PSA.050.019 Ni go ga ni meyo nooyandi mo sanni laalo se, Ni deena mo goono ga gulinci ci.

50:20b.PSA.050.020 Ni ga goro ka ni nya-ize beeri, Izo kaŋ ni nyaŋo hay, ni go g'a alaasiray.

50:21b.PSA.050.021 Ni na hayey din te, amma ay dangay. Ni go ga tammahã ay ya ni cine no. Day ay ga deeni ni gaa, ay ma ni cabe taray kwaaray.

50:22b.PSA.050.022 Ya araŋ kaŋ ga dinya Irikoy gaa, Wa te laakal da woodin fa! Zama ay ma si araŋ nyage-nyage, faabako si no.

50:23b.PSA.050.023 Boro kulu kaŋ na saabuyaŋ sarga no, A goono g'ay beerandi no. Boro kaŋ na nga muraadey sasabandi mo, Ay wo, Irikoy, ay g'ay faaba cabe a koy se.»

51

51:1b.PSA.051.001 Doonkoy jine bora se. Dawda baytu fo no kaŋ a te

51:2b.PSA.051.002 waato kaŋ annabi* Natan kaa a do Dawda nda Bat-Seba marguyaŋo banda.

51:3b.PSA.051.003 Ya Irikoy, ma gomni te ay se, ni baakasinay suujo boŋ. Ni bakaraw booba boŋ, m'ay taaley tuusu.

51:4b.PSA.051.004 M'ay bina nyun ay taaley kulu gaa, M'ay hanandi ay zunubey gaa.

51:5b.PSA.051.005 Zama ay g'ay taaley bay, ay zunubo mo go ay jine duumi.

51:6b.PSA.051.006 Ni se, ni hinne se no ay na zunubi te, Ay na haŋ kaŋ ga laala te ni jine. Zama ni ma bara nda cimi ni sanney ra, Ni ma te zaama mo waati kaŋ ni goono ga ciiti dumbu.

51:7b.PSA.051.007 A go, laala ra no i n'ay hay, Zunubi ra mo no ay go za ay nyaŋo n'ay gunda sambu.

51:8b.PSA.051.008 A go, cimi no ni go ga ceeci boro bine ra, Gundu nangu ra mo no ni g'ay bayrandi nda laakal.

51:9b.PSA.051.009 Ni m'ay hanandi nda hissop*, ay ga hanan mo. M'ay nyun, ay mo ga kwaaray da neezu*.

51:10b.PSA.051.010 Ma naŋ ya maa bine kaani da farhã, Zama biriyey kaŋ ni ceeri yaŋ din ma farhã.

51:11b.PSA.051.011 Ma ni moyduma tugu ay zunubey se, M'ay taaley kulu mo tuusu.

51:12b.PSA.051.012 Ya Irikoy, ma bine kaŋ ga hanan taka ay se. Ma biya kaŋ ga saba tajandi ay ra.

51:13b.PSA.051.013 Ma s'ay furu ka kaa ni jine, Ma si ni Biya Hanna mo sambu ka kaa ay boŋ.

51:14b.PSA.051.014 Ma ni faaba farhã yeti ay se. M'ay gaabandi nda bine yaddayaŋ biya.

51:15b.PSA.051.015 Gaa no ay ga taali-teerey dondonandi ni fondey, Zunubikooney mo ga bare ka ye ni do haray.

51:16b.PSA.051.016 Ya Irikoy, ay faaba Irikoyo, M'ay faaba kuri alhakku gaa. Ay deena mo ga ni adilitara doon da farhã.

51:17b.PSA.051.017 Ya ay Koyo, m'ay meyo fiti, Zama ay meyo ma ni sifayaŋo bangandi.

51:18b.PSA.051.018 Zama ni si maa sargay kaani, Da yaadin no, doŋ ay ga ni no nd'a. Ni si farhã mo da sargay kaŋ i ga ton.

51:19b.PSA.051.019 Irikoy se sargayey ga ti biya kaynandiyaŋ. Ya Irikoy, bine kaŋ ga sara ka ye ka tuubi, Ni si dond'a.

51:20b.PSA.051.020 Ni bine yadda boŋ ni ma gomni te Sihiyona se, Ni ma Urusalima* birni cinaro cina mo.

51:21b.PSA.051.021 Gaa no ni ga maa adilitaray sargayey kaani, Da sargay kaŋ i ga ton, Da sargay summaare kaŋ i ga ton mo. Waato din gaa no i ga yeejiyaŋ salle ni sargay feema ra.

52

52:1b.PSA.052.001 Doonkoy jine bora se. Dawda baytu kaŋ a te

52:2b.PSA.052.002 waato kaŋ Edomanca Doweg koy ka ci Sawulu se kaŋ Dawda koy Ahimelek kwaara.

52:3b.PSA.052.003 Nin boro kaŋ gonda hina, Ifo se no ni ga zankam da laala? Irikoy baakasinay suujo go no zaari me-a-me.

52:4b.PSA.052.004 Ya nin kaŋ ga gulinci goy, Ni deena goono ga halaciyaŋ soola, sanda siini kaano.

52:5b.PSA.052.005 Ni ga ba ilaalo ka bisa ihanno, Da tangari teeyaŋ mo ka bisa i ma adilitaray sanni te. (Wa dangay)

52:6b.PSA.052.006 Ya nin, deena kaŋ ga gulinci, Ni ga ba sanney kulu kaŋ ga halaciyaŋ te.

52:7b.PSA.052.007 Woodin se no Irikoy ga ni halaci hal abada, A ma ni dagu ka hamay ka kaa ni bukka ra, A ma ni dagu ka kaa fundikooney laabo ra. (Wa dangay)

52:8b.PSA.052.008 Adilantey mo ga di woodin, I ma humburu, i m'a haaru ka ne:

52:9b.PSA.052.009 «Haba, bora kaŋ mana Irikoy ye nga tuguyaŋ do neeya. Amma a de nga arzaka baayaŋo gaa, A na nga boŋ gaabandi nga ibaay laala ra.»

52:10b.PSA.052.010 Amma ay wo, ay ga hima sanda zeytun* tuuri tayo Irikoy windo ra. Ay ga de Irikoy baakasinay suujo gaa hal abada abadin.

52:11b.PSA.052.011 Ay ga saabu ni se hal abada, kaŋ ni na woodin te. Ay ga beeje sinji ni maa gaa ni wane hanantey jine, Zama ni maa ga boori no.

53

53:1b.PSA.053.001 Doonkoy jine bora se. I m'a doon da seese karyaŋ. Dawda baytu fo no.

53:2b.PSA.053.002 Saamo ga ne nga bina ra: «Irikoy si no.» I fumbu; i na adilitaray-jaŋay te mo, fanta wane. Goy hanno teeko si no, baa afo.

53:3b.PSA.053.003 Irikoy go hala beene, a na Adam-izey guna ganda, Nga ma di hala fahamante go no kaŋ ga Irikoy ceeci.

53:4b.PSA.053.004 I afo kulu kamba, banda, i fumbu care banda. Goy hanno teeko si no, baa afolloŋ si no.

53:5b.PSA.053.005 Laala goy-teerey wo, i sinda bayray no? Ngey kaŋ g'ay borey ŋwa sanda mate kaŋ cine i ga buuru ŋwa, I si Irikoy ce mo.

53:6b.PSA.053.006 Noodin binde humburkumay boobo n'i di, amma humburandi si no, Zama Irikoy na bora kaŋ na ni windi nda wongu marga din biriyey say-say. Ni n'i haawandi, zama Irikoy wang'ey.

53:7b.PSA.053.007 Doŋ day Israyla faaba ma fun Sihiyona. Waati kaŋ Irikoy ga nga borey tamtara bare ka ye ka kand'ey, Waati din gaa no Yakuba ga farhã, Israyla ga te bine kaani.

54

54:1b.PSA.054.001 Doonkoy jine bora se. I m'a doon da moolo beeri karyaŋ. Dawda baytu fo no kaŋ a te

54:2b.PSA.054.002 waato kaŋ Zif kwaara borey koy ka ci Sawulu se ka ne: «Ni mana bay kaŋ iri game ra no Dawda bara ga tugu?»

54:3b.PSA.054.003 Ya Irikoy, m'ay faaba nda ni maa. Ma ciiti ay se mo ni hino ra.

54:4b.PSA.054.004 Ya Irikoy, ma maa ay adduwa, Ma hanga jeeri ay me sanney se.

54:5b.PSA.054.005 Zama yawyaŋ tun ay gaa, Toonyanteyaŋ mo n'ay fundo ceeci, I mana Irikoy daŋ ngey jine mo. (Wa dangay)

54:6b.PSA.054.006 A go, Irikoy ya ay gaako no, Ay Koyo wo ay fundo gaayko no.

54:7b.PSA.054.007 A g'ay ibarey bana nda ngey laala. Ni m'i halaci ni naanayo ra.

54:8b.PSA.054.008 Ay ga sargay da nooyaŋ te ni se, bine yadda wane yaŋ. Ya Rabbi, ay ga saabu ni maa se, Zama ni ya ihanno no.

54:9b.PSA.054.009 Zama a n'ay kaa taabi kulu ra, Ay mwa mo di ay muraadey kulu feeri ay ibarey boŋ.

55

55:1b.PSA.055.001 Doonkoy jine bora se. I m'a doon da moolo beeri karyaŋ. Dawda baytu fo no.

55:2b.PSA.055.002 Ya Irikoy, ma hanga jeeri ay adduwa se, Ma si tugu ay ŋwaara se.

55:3b.PSA.055.003 Ma laakal ye ay gaa ka tu ay se mo. Ay bina go ga koy-da-ye te ay dooro ra. Ay go ga duray

55:4b.PSA.055.004 ibare jinde sabbay se, da boro laaley kankamo sabbay se, Zama i go ga laala taŋ ay boŋ, Futay mo no i go g'ay kuta nd'a.

55:5b.PSA.055.005 Ay bina go ga maa foyrayyaŋ gumo ay ra, Buuyaŋ humburkumay beerey kaa ay gaa.

55:6b.PSA.055.006 Humburkumay da gaa-jijiriyaŋ kaa ay gaa jirsi boŋ, Zici dumbay n'ay yoole mo.

55:7b.PSA.055.007 Hal ay ne: «Hala day ay gonda koloŋay fata cine, Doŋ kala ay ma deesi, ya koy nangu fo ka fulanzam.

55:8b.PSA.055.008 Doŋ kala ya koy nangu mooro fo ka zumbu saajo ra. (Wa dangay)

55:9b.PSA.055.009 Ay ma cahã ka koy ay tuguyaŋ nango do, ay ma koru hari nda haw bambata se.»

55:10b.PSA.055.010 Ya ay Koyo, m'i halaci, m'i deeney fay, Zama ay di toonye nda kusuuma gallo ra.

55:11b.PSA.055.011 Cin da zaari i goono g'a casu ka bar-bare a birni cinaro boŋ. Taabi nda izefututaray go a bindo ra.

55:12b.PSA.055.012 Halaciyaŋ go no a bindo ra, Kankami nda gulinci si fay d'a batamey.

55:13b.PSA.055.013 Zama manti ibare no k'ay wow bo. Da yaadin no, doŋ ay ga hin suuru. Manti mo konnako no ka nga boŋ beerandi ay gaa, Doŋ ay ga tugu a se.

55:14b.PSA.055.014 Amma nin no, boro ay wadde, Ay coro no, ay naanay bora.

55:15b.PSA.055.015 Waato iri ga saaware kaano te care se, Irikoy windo ra mo iri ga bar-bare jama banda.

55:16b.PSA.055.016 Buuyaŋ ma kaa i gaa jirsi boŋ, I ma koy Alaahara nda ngey fundey, Zama laala go i nangorayey ra d'i bindo ra mo.

55:17b.PSA.055.017 Ay wo, Irikoy gaa no ay ga hẽ, Rabbi g'ay faaba mo.

55:18b.PSA.055.018 Wiciri kambu nda susuba nda zaari bindi, Ay ga guunu-guunu, ay ma duray. A ga maa ay jinda mo.

55:19b.PSA.055.019 Laakal kanay no a g'ay fundo fansa nd'a wongu kaŋ tun ay se ra. Zama borey kaŋ yaŋ goono ga gaaba nd'ay ga baa.

55:20b.PSA.055.020 Irikoy kaŋ za doŋ tondoyaŋ koy no ga maa, (Wa dangay) A g'i taabandi mo, ngey kaŋ si barmay, Kaŋ yaŋ si humburu Irikoy.

55:21b.PSA.055.021 Boro laalo na nga kamba salle ka gaaba nda borey kaŋ yaŋ gonda amaana nd'a, A na nga sappa tunandi mo.

55:22b.PSA.055.022 A meyo ga yuttu nda haw ji, amma a bina ra, kala wongu. A sanney bisa ji baanyaŋ, Kulu nda yaadin takuba foobanteyaŋ no.

55:23b.PSA.055.023 Ma ni tiŋa gusam Rabbi boŋ, nga mo ga ni gaay. Abada, a si yadda adilantey ma zinji.

55:24b.PSA.055.024 Amma borey kaŋ gonda himma boro wiyaŋ gaa, I ga gulinci mo, Nin, ya Irikoy, ni g'i zeeri halaciyaŋ guuso ra. I si to ngey jirbey farsi bindo bo. Day ay wo, ay ga de ni gaa.

56

56:1b.PSA.056.001 Doonkoy jine bora se. I m'a doon da subo kaŋ ga ne: «Yongo tuuri-nyaŋey ra koloŋa». Dawda baytu no kaŋ a te waato kaŋ Filistancey n'a di Gat kwaara ra.

56:2b.PSA.056.002 Ya Irikoy, ma gomni te ay se, Zama boro ga ba nga m'ay ŋwa. Zaari me-a-me a goono g'ay taabandi, a go g'ay yanje.

56:3b.PSA.056.003 Ay ibarey ga ba ngey m'ay ŋwa zaari me-a-me, Zama borey kaŋ yaŋ goono ga boŋbeeray wongu te ay se ga baa.

56:4b.PSA.056.004 D'ay ga humburu, kulu ay ga de ni gaa.

56:5b.PSA.056.005 Irikoy gaa, nga kaŋ ay n'a sanno sifa, Irikoy gaa no ay de, ay si humburu. Ifo no Adam-ize ga te ay se?

56:6b.PSA.056.006 Zaari me-a-me i goono g'ay sanney siirandi. I fonguyaŋey kulu kaŋ i goono ga te ay boŋ ye laala do haray.

56:7b.PSA.056.007 I go ga margu ka lamba, I go ga laakal da naŋ kaŋ ay ga taamu, I go g'ay fundo batandi.

56:8b.PSA.056.008 Mate no, laala ga naŋ i ma koma, wala? Ya Irikoy, ma borey din soote da futay!

56:9b.PSA.056.009 Ni n'ay bar-bareyaŋey lasaabu, Ni m'ay mundey daŋ ni kolba ra, Manti ni tira ra no i go?

56:10b.PSA.056.010 Gaa no ay ibarey ga ye banda, zaari kaŋ ra ay ce. Woone ay n'a bay: Irikoy go ay do haray.

56:11b.PSA.056.011 Irikoy ra no ay g'a sanno sifa, Rabbi ra no ay g'a sanno sifa.

56:12b.PSA.056.012 Irikoy gaa no ay de, humburkumay s'ay di. Man haŋ kaŋ Adam-ize ga te ay se?

56:13b.PSA.056.013 Ya Irikoy, ni sartey go ay boŋ, Ay ga saabuyaŋ sargayyaŋ no ni se,

56:14b.PSA.056.014 Zama ni n'ay fundo faaba buuyaŋ gaa, Ay cey mo katiyaŋ gaa, Zama ay ma dira Irikoy jine fundikooney annura ra.

57

57:1b.PSA.057.001 Doonkoy jine bora se. I m'a doon da subo kaŋ ga ne: «Ma si halaci». Dawda baytu no kaŋ a te waato kaŋ Sawulu goono g'a gaaray, kaŋ a koy ka tugu tondi guuso ra.

57:2b.PSA.057.002 Ya Irikoy, ma gomni te ay se. Ma gomni te ay se, Zama ay fundo goono ga koru ni do. Oho, ni fatey biyo ra no ay ga koru, Hala masiiba woone yaŋ ma bisa.

57:3b.PSA.057.003 Ay ga hẽ Irikoy Beeray-Beeri-Koyo gaa, Ay ga hẽ Irikoy gaa no, Nga kaŋ ga muraadey kulu feeri ay se.

57:4b.PSA.057.004 A go hala beene, a ga donton k'ay faaba. A g'ay ce kondo ŋwaakwa foy. (Wa dangay) Irikoy ga nga baakasinay suujo da nga cimo donton.

57:5b.PSA.057.005 Ay fundo go muusu beeriyaŋ bindi ra. Ay go ga kani borey kaŋ yaŋ goono ga danji firsi do, Kaŋ yaŋ ga ti Adam-izey, I hinjey ya yaaji nda hangaw yaŋ no. I deeney mo takuba kaano yaŋ no.

57:6b.PSA.057.006 Ya Irikoy, ni ma beeri beeney boŋ, Ni darza ma beeri ndunnya kulu boŋ.

57:7b.PSA.057.007 I na kumsay hirri ay ce taamey se, Ay gungum ka ye ganda. I na guusu hirrimi daŋ ay jine, Ngey bumbey no ka kaŋ a ra. (Wa dangay)

57:8b.PSA.057.008 Ya Irikoy, ay bina sinji. Ay bina sinji. Ay ga baytu, oho, ay ga sifayaŋ baytu te.

57:9b.PSA.057.009 Ya ay bina, ma mo hay, Ya moolo nda moolo beero, wa mo hay! Ay bumbo ga mo hay za mo mana bo.

57:10b.PSA.057.010 Ya ay Koyo, ay ga saabu ni se dumey ra, Ay ga sifaw baytu te ni se dumi cindey ra.

57:11b.PSA.057.011 Zama ni baakasinay suujo ya ibeeri no, hala beene, Ni cimo mo hala beene burey gaa.

57:12b.PSA.057.012 Ya Irikoy, ni ma beeri beeney boŋ, Ni darza ma beeri ndunnya kulu boŋ.

58

58:1b.PSA.058.001 Doonkoy jine bora se. I m'a doon da subo kaŋ ga ne: «Ma si halaci». Dawda baytu fo no.

58:2b.PSA.058.002 Ya ciitikoy, adilitaray no araŋ goono ga salaŋ wo? Araŋ goono ga ciiti kaŋ ga saba te Adam-izey se, wala?

58:3b.PSA.058.003 Abada! Araŋ biney ra haray araŋ goono ga adilitaray-jaŋay goy te. Araŋ goono g'araŋ kambey toonyeyaŋo neesi ndunnya ra.

58:4b.PSA.058.004 Boro laaley daray za gunde ra. Za i hayyaŋ gaa no i ga fonda taŋ, I goono ga tangari ci.

58:5b.PSA.058.005 I naajo, sanda gondi naaji no, I ga hima gazama mo kaŋ ga nga hanga daabu,

58:6b.PSA.058.006 Nga kaŋ baa si nda gaddey jinde, I gadditaray waaniyaŋ kulu ra.

58:7b.PSA.058.007 Ya Irikoy, m'i hinjey bagu-bagu i meyey ra. Ya Rabbi, ma muusu izey hinje kuukey ceeri ka dagu!

58:8b.PSA.058.008 I ma dandi sanda hari kaŋ goono ga zuru nda waasi. D'a na nga hangawey dabu, I ma ciya sanda goso koonu no.

58:9b.PSA.058.009 I ma ciya sanda lu kaŋ ga mandi ka bisa, Sanda wayboro gunde hasaraw, kaŋ mana di wayna.

58:10b.PSA.058.010 Hala araŋ kusey ga maa yanga danjo, Itayey da wo kaŋ goono ga di, i kulu care banda, Irikoy g'i ku da alma haw.

58:11b.PSA.058.011 Adilante ga farhã d'a di banayaŋ, A ga nga cey nyun laalakoyey kuri ra.

58:12b.PSA.058.012 Hala borey ga ne: «Daahir adilante alhakku go no, Daahir Irikoy go no, nga kaŋ ga ciiti te ndunnya ra.»

59

59:1b.PSA.059.001 Doonkoy jine bora se. I m'a doon da subo kaŋ ga ne: «Ma si halaci». Dawda baytu no kaŋ a te waato kaŋ Sawulu donton i m'a fuwo windi zama i m'a wi se.

59:2b.PSA.059.002 Ya Irikoy, m'ay faaba ay ibarey kambe, M'ay dagu ka moorandi borey kaŋ ga tun ay gaa da gaaba yaŋ se.

59:3b.PSA.059.003 M'ay kaa laala goy-teekoy kambe ra, M'ay faaba boro-wiyey kambe ra.

59:4b.PSA.059.004 Zama a go, i goono ga gumandi te ay fundo se. Ya Rabbi, futaykooney goono ga margu ay gaa, Manti ay hartayaŋ se bo, manti mo ay zunubi sabbay se.

59:5b.PSA.059.005 I ga zuru ka ngey boŋ soola k'ay yanje, Manti zama ay na taali te i se. Ma mo hay ay gaakasinay sabbay se, ma guna mo.

59:6b.PSA.059.006 Ya Rabbi Irikoy Kundeykoyo, Israyla Irikoyo, Ni ya day, ma tun ka kay dumi cindey kulu banayaŋ se. Ma si gomni te halliko fo kulu kaŋ ga laala te se. (Wa dangay)

59:7b.PSA.059.007 I ga ye ka kaa wiciri kambu ka ballu sanda hansi cine, I ga casu ka gallo windi.

59:8b.PSA.059.008 A go, i meyey go ga kufu kaa, Takubayaŋ go i me kuurey ra, Zama i goono ga ne: «May no ga maa?»

59:9b.PSA.059.009 Amma nin, ya Rabbi, ni go g'i haaru, Ni go ga dumi cindey kulu guna da donda-caray.

59:10b.PSA.059.010 Ya nin ay gaabo, ni se no ay ga hangan, Zama Irikoy no ga ti ay cinari kuuko.

59:11b.PSA.059.011 Ay Irikoyo g'ay kubay nga baakasinay suujo ra. Irikoy ga yadda ay se ay ma di ay muraado feeri ay ibarey boŋ.

59:12b.PSA.059.012 Ma s'i wi, zama ay borey ma si dinya. Ya ay Koyo, iri korayo, m'i say-say da ni hino k'i kaynandi.

59:13b.PSA.059.013 I meyey zunubo, d'i me-kuurey sanney sabbay se, Naŋ i ma furu kambe ngey boŋbeera ra, Laaliyaŋ da tangari sanney kaŋ i ga te sabbay se.

59:14b.PSA.059.014 M'i halaci futay ra, ma n'i halaci i ma ban. Naŋ hala ndunnya me mo i ma bay kaŋ Irikoy no ga may Yakuba ra. (Wa dangay)

59:15b.PSA.059.015 I ga ye ka kaa wiciri kambu, I ga ballu sanda hansi cine, i ga casu ka gallo windi.

59:16b.PSA.059.016 I ga soobay ka bar-bare ka ŋwaari ceeci. Da i mana kungu, i ga kani haway.

59:17b.PSA.059.017 Amma ay wo ga ni gaabo baaru baytu te. Oho, susubay ay ga ni baakasinay suujo baaru baytu te da farhã, Zama nin no ga ti ay cinari kuuko, Koruyaŋ do mo no ay kankami zaaro ra.

59:18b.PSA.059.018 Ya ay gaabo, ni se no ay ga sifayaŋ baytu te, Zama Irikoy no ga ti ay cinari kuuko, Irikoy no ga baakasinay suuji cabe ay se.

60

60:1b.PSA.060.001 Doonkoy jine bora se. I m'a doon da subo kaŋ ga ne: «Seeda hanno». Dawda baytu no kaŋ a te dondonandiyaŋ se

60:2b.PSA.060.002 waato kaŋ a koy ka Suriyancey kaŋ go Mesopotamiya da Sooba ra wongu, kaŋ gaa Yowab ye ka kaa ka Edomance zambar way cindi hinka zeeri Ciiri Gooro ra.

60:3b.PSA.060.003 Irikoy, ni n'iri kokobe, ni n'iri ceeri-ceeri, Ni te bine. Kala ni m'iri ye koyne.

60:4b.PSA.060.004 Ni naŋ laabo ma zinji, ni n'a kortu mo. Ni m'a kortimo daabu, zama a go ga zinji.

60:5b.PSA.060.005 Ni na muraadu sandoyaŋ cabe ni borey se, Ni n'iri haŋandi duvan* kaŋ ga bugandi.

60:6b.PSA.060.006 Ni na liiliwal no borey kaŋ yaŋ ga humburu nin se zama i m'a tunandi beene cimi sabbay se. (Wa dangay)

60:7b.PSA.060.007 Ni ma faaba te da ni kambe ŋwaari ka tu iri se mo, Zama ni baakoy ma du faaba.

60:8b.PSA.060.008 Irikoy salaŋ nga hananyaŋo ra ka ne: «Ay wo, ay ga farhã gumo-gumo, Ay ga Sekem fay, ay ma Sukkot gooro neesi.

60:9b.PSA.060.009 Jileyad ay wane no, Manasse mo ay wane no, Ifraymu ay boŋo wongu fuula no, Yahuda mo ay koytaray sarjilla no.

60:10b.PSA.060.010 Mowab ay nyumayyaŋ cambu no, Edom boŋ no ay g'ay taamey catu, Ya Filistiya, kala ni ma zaama kaatiyaŋ te ay sabbay se.»

60:11b.PSA.060.011 May no ga konda ay gallo ra kaŋ i windi nda wongu cinaro? May no ga konda ay Edom ra?

60:12b.PSA.060.012 Manti nin no, ya Irikoy, nin kaŋ n'iri furu bo? Ya Irikoy, ni siino ga fatta iri wongu marga banda no?

60:13b.PSA.060.013 M'iri gaakasinay iri yanjekaarey gaa, Zama boro gaakasinay wo yaamo no.

60:14b.PSA.060.014 Irikoy do no iri ga hin ka yaarutaray te, Zama nga no g'iri yanjekaarey taamu-taamu.

61

61:1b.PSA.061.001 Doonkoy jine bora se. I m'a doon da moolo beeri karyaŋ. Dawda wane no.

61:2b.PSA.061.002 Ya Irikoy, ma maa ay hẽeno se, Ma hanga jeeri ay adduwa se mo.

61:3b.PSA.061.003 Za ndunnya me no ay ga ni ce, Waati kaŋ ay bina gaze. M'ay candi ka kond'ay tondo kaŋ ga ku da ay do.

61:4b.PSA.061.004 Zama ni ya koruyaŋ do no ay se, Cinari gaabikooni mo no kaŋ ra ay ga tugu ay ibare se.

61:5b.PSA.061.005 Naŋ ay ma goro ni bukka ra duumi, Naŋ ay ma kosaray ceeci ni fatey biyo cire. (Wa dangay)

61:6b.PSA.061.006 Zama nin, ya Irikoy, ni maa ay sartey, Borey kaŋ yaŋ ga humburu ni maa, ni n'ay no i tubo gaa.

61:7b.PSA.061.007 Ni ga bonkoono fundi jirbey kuukandi, A jiirey mo ga baa sanda zamana boobo.

61:8b.PSA.061.008 A ga goro Irikoy jine hal abada. Ni ma baakasinay suuji nda cimi daŋ kaŋ g'a haggoy.

61:9b.PSA.061.009 Yaadin gaa no ay ga sifaw baytu te ni maa gaa duumi, Zama ay m'ay sartey toonandi zaari kulu.

62

62:1b.PSA.062.001 Doonkoy jine bora Yedutun se. Dawda baytu fo no.

62:2b.PSA.062.002 Irikoy hinne se no ay fundo ga hangan dangayyaŋ ra, A do no ay faaba ga fun.

62:3b.PSA.062.003 Nga hinne no ga ti ay tondi daaro d'ay faaba. Nga no ga ti ay cinari gaabikoono; ay si zinji gumo.

62:4b.PSA.062.004 Ya araŋ kulu, alwaati marge no araŋ ga soobay ka tun boro gaa zama araŋ m'a wi se, Sanda cinari kaŋ ga siiri, wala sinkita kaŋ ga zinji?

62:5b.PSA.062.005 I si hay kulu saaware te kala day ngey m'a tuti k'a zumandi ka kaa nga beera ra. I go ga maa tangari kaani. Me ra kay, i ga albarka daŋ, Amma i biney ra i goono ga laaliyaŋ te. (Wa dangay)

62:6b.PSA.062.006 Ya ay fundo, ma hangan Irikoy hinne se dangayyaŋ ra, Zama a do no ay beeja ga fun.

62:7b.PSA.062.007 Nga hinne no ga ti ay tondi daaro d'ay faaba, D'ay cinari gaabikoono mo, ay si zinji bo.

62:8b.PSA.062.008 Irikoy do no ay faaba d'ay darza go. Ay gaabo tondi daaro d'ay koruyaŋo, Irikoy do no i go.

62:9b.PSA.062.009 Ya araŋ ndunnya dumey, wa de a gaa alwaati kulu. Wa araŋ biney gusam a jine. Irikoy ya koruyaŋ do no iri se. (Wa dangay)

62:10b.PSA.062.010 Daahir, Adam-izey wo yaamoyaŋ no, Jine borey mo ciya tangari hari yaŋ no. D'i g'i neesi tiŋay neesiyaŋ hari boŋ, I kulu care banda, i ga dogon no fakat! ka bisa haw kaŋ i ga fulanzam d'a.

62:11b.PSA.062.011 Wa si de kankami gaa, wa si zankam da komyaŋ, Da arzaka tonton mo, araŋ ma si laakal sinji a gaa.

62:12b.PSA.062.012 Irikoy salaŋ sorro folloŋ, Hala sorro hinka zaati ay maa woone: Hini ya Irikoy wane no.

62:13b.PSA.062.013 Ya ay Koyo, baakasinay suuji ya ni wane mo no, Zama ni ga boro kulu bana nga goyo boŋ.

63

63:1b.PSA.063.001 Dawda baytu no kaŋ a te waato kaŋ a go Yahuda ganjo ra.

63:2b.PSA.063.002 Ya Irikoy, nin no ga ti ay Irikoyo. Ay ga ni ceeci da anniya. Ay fundo gonda ni jaw, Ay baso yangala ni se laabu kogo kaŋ gonda jaw ra, Naŋ kaŋ hari kulu si no.

63:3b.PSA.063.003 Yaadin no ay na ni guna nangu hanna ra, Zama ay ma di ni hino da ni darza.

63:4b.PSA.063.004 Za kaŋ ni baakasinay suujo baa da fundi gande, Ay meyo ga ni sifa.

63:5b.PSA.063.005 Yaadin no ay ga ni sifa ay fundo me muudu, Ay g'ay kambey sambu ni maa ra.

63:6b.PSA.063.006 Ay fundo ga kungu danga _boro kaŋ du|_ maani ji da ham kaŋ gonda maani boobo. Ay meyo mo ga ni sifa da me kuurey kaŋ ga farhã.

63:7b.PSA.063.007 Saaya kaŋ ay goono ga fongu ni gaa ay daarijo boŋ cin alwaatey ra, Kal ay ma ni miila.

63:8b.PSA.063.008 Zama ni ya ay gaako no. Ni fatey biyo ra mo no ay ga doon farhã sabbay se.

63:9b.PSA.063.009 Ay fundo goono ga sarku ni ga, Ni kambe ŋwaaro goono g'ay sambu ka gaay.

63:10b.PSA.063.010 Amma borey kaŋ yaŋ goono g'ay fundo ceeci zama ngey m'a halaci se,

63:11b.PSA.063.011 Ni g'i nooyandi takuba hin se, i ga ciya zoŋey baa. I ga furo yongo ndunnya guusuyaŋo ra.

63:12b.PSA.063.012 Amma bonkoono ga te bine kaani Irikoy ra. Boro kulu kaŋ ga ze d'a mo, A koy ga du darza, zama i ga tangarikomey meyey daabu.

64

64:1b.PSA.064.001 Doonkoy jine bora se. Dawda baytu fo no.

64:2b.PSA.064.002 Ya Irikoy, ma maa ay jinde ay guunu-guunuyaŋ ra. M'ay fundo batu k'a wa da ibare humburkumay.

64:3b.PSA.064.003 M'ay tugu k'ay wa da laala goy-teerey saawarey, Da zamba goy-teekoy kosongo mo.

64:4b.PSA.064.004 I na ngey deeney kaanandi sanda takuba cine. I na ngey hangawey dabu, Kaŋ ga ti i sanni korney,

64:5b.PSA.064.005 Zama ngey ma cimi toonantekoy hay tuguyaŋ ra. Jirsi boŋ no i g'a hay, i si humburu mo.

64:6b.PSA.064.006 I ga ngey biney gaabandi miila laalo ra, I goono ga ciinay ga ne ngey ga hirrimiyaŋ te ka tugu. I ga ne: «May no ga di iri?»

64:7b.PSA.064.007 I ga adilitaray-jaŋay saaware gurum ka ne: «Iri na gonitaray me-hawyaŋ soola ka ban!» Boro kulu fundi fonguyaŋ d'a bina ya iguuso no.

64:8b.PSA.064.008 Amma Irikoy g'i hay jirsi boŋ k'i maray da hangaw.

64:9b.PSA.064.009 Yaadin no a ga naŋ i ma kati nd'a: I bumbey deene no ga gaaba nd'ey. Boro kulu kaŋ di ey ga ngey me nyatte i gaa no.

64:10b.PSA.064.010 Gaa no borey kulu ga humburu, i ga Irikoy goyey ci, I ga laakal d'a goyo mo.

64:11b.PSA.064.011 Adilante bine ga kaan Rabbi do, a ga de a gaa mo. Borey kulu kaŋ yaŋ biney ga saba mo g'a beerandi.

65

65:1b.PSA.065.001 Doonkoy jine bora se. Dawda baytu fo no kaŋ a doon.

65:2b.PSA.065.002 Ya Irikoy, sifaw ga hagu ni se dangayyaŋ ra Sihiyona ra. Ni do mo no borey ga sarti toonandi.

65:3b.PSA.065.003 Ya nin adduwa maakwa, ni do no fundikooney kulu ga kaa.

65:4b.PSA.065.004 Taali teeyaŋ muraadey te zaama ay boŋ. Day iri hartayaŋey, ni g'i tuusu.

65:5b.PSA.065.005 Albarkante no boro kaŋ ni suuban, Nga kaŋ ni daŋ a ma maan ka kaa ni do, Zama a ma goro ni windi batamey ra. Ni windi gomno, kaŋ ga ti ni fu hananta ga wasa iri se.

65:6b.PSA.065.006 Ya Irikoy, iri faaba wano, Nin kaŋ ci deyaŋ hari ndunnya me-a-me se, da ngey mo kaŋ yaŋ go teeko boŋ nangu mooro se. Muraaduyaŋ kaŋ ga dambarandi no ni ga tu d'a iri se adilitaray ra,

65:7b.PSA.065.007 Nin no ga tondi beerey sinji nda ni gaabo, I na ni guddu nda hin.

65:8b.PSA.065.008 Teekoy kosongo d'i hari bondayey, Da ndunnya dumey kosongey, ni ya i kanandiko no,

65:9b.PSA.065.009 Nangu moorey me gorokoy go ga humburu ni alaamey sabbay se. Ni ga naŋ wayna funay haray da wayna kaŋay haray ma cilili farhã sabbay se.

65:10b.PSA.065.010 Ni ga laabu kunfa, ni g'a haŋandi hari, Ni g'a yulwandi mo gumo. Irikoy gooro go toonante nda hari. Ni ga ntaaso kaa taray i se, Zama yaadin no ni na laabo soola nd'a.

65:11b.PSA.065.011 Ni g'a batey no hari boobo, Ni g'a bata guwey bagu ka say, Ni g'a leema nda buru hari, Ni ga albarka daŋ a buzugey gaa mo.

65:12b.PSA.065.012 Ni na jiiro kunga nda ni gomno, Ni fondey go ga maafe tolli-tolli.

65:13b.PSA.065.013 Saaji kuray nangey goono ga tolli-tolli. Tudu izey mo, farhã na i windi.

65:14b.PSA.065.014 I ga kuray nangey daabu nda feeji kuruyaŋ, Goorey batamey mo ga daabu nda ntaasu. I go ga cilili farhã sabbay se, oho, i go ga baytu.

66

66:1b.PSA.066.001 Doonkoy jine bora se. Dooni no, baytu mo no. Ya araŋ ndunnya kulu, wa farhã jinde sambu Irikoy se.

66:2b.PSA.066.002 Wa baytu k'a maa darza ci, w'a darza sifa.

66:3b.PSA.066.003 Araŋ ma ne Irikoy se: «Goyey kaŋ ni ga te ga dambarandi gumo! Ni hino beera sabbay se no ni ibarey ga tuubi alhaali cabe ni se.

66:4b.PSA.066.004 Ndunnya kulu ga sududu ni se, A ga sifaw baytuyaŋ te ni se mo. I ga sifaw baytuyaŋ te ni maa gaa.» (Wa dangay)

66:5b.PSA.066.005 Wa kaa ka di Irikoy goyey. Nga wo, humburkumay hari no a goyey kaŋ a te Adam-izey do ra.

66:6b.PSA.066.006 A na teeku ciya laabu kogo, Borey bisa isa ra ce gaa mo. Noodin no iri farhã d'a.

66:7b.PSA.066.007 A hino do a ga may hal abada. A moy goono ga ndunnya dumey fonnay, Murtantey ma si ngey boŋ beerandi bo. (Wa dangay)

66:8b.PSA.066.008 Ya araŋ dumey, wa iri Irikoyo maa sifa, Wa naŋ i ma maa a sifayaŋ jinde.

66:9b.PSA.066.009 Nga kaŋ g'iri fundey haggoy, A s'iri cey taŋ i ma cabu mo.

66:10b.PSA.066.010 Zama nin wo, ya Irikoy, ni na iri deedandi. Ni na iri hanandi sanda mate kaŋ cine i ga nzarfu hanandi.

66:11b.PSA.066.011 Ni kande iri taaru ra, Ni na jaraw tiŋo dake iri banda daarey boŋ.

66:12b.PSA.066.012 Ni naŋ borey ma kaaru iri boŋey boŋ. Iri gana ka bisa danji nda hari ra mo, Amma ni n'iri kaa noodin ka kande iri nangu yulwante ra.

66:13b.PSA.066.013 Ay ga furo ni windo ra da sargay kaŋ i ga ton yaŋ. Ay g'ay sartey bana ni se,

66:14b.PSA.066.014 Wo kaŋ yaŋ ay me-kuurey ci, Kaŋ ay meyo mo ci waato kaŋ cine ay go kankami ra.

66:15b.PSA.066.015 Ay ga sargayey kaŋ i ga ton yaŋ salle ni se, Da kurey ra alman naasey, Da feeji gaarey _maano kaŋ ga te|_ dugu a banda. Ay ga yeeji da hincin jindi yaŋ salle care banda. (Wa dangay)

66:16b.PSA.066.016 Ya araŋ kulu kaŋ ga humburu Irikoy, wa kaa ka maa; Ay mo, ay ga dede haŋ kaŋ a te ay fundo se.

66:17b.PSA.066.017 Ay n'a ce d'ay meyo, ay deena mo n'a beerandi.

66:18b.PSA.066.018 D'ay na laala jisi ay bina ra, doŋ Koy Beero si maa.

66:19b.PSA.066.019 Amma daahir Irikoy maa, A na hanga jeeri ay adduwa jinda se mo.

66:20b.PSA.066.020 I ma Irikoy sifa, nga kaŋ man'ay adduwa hibandi. A go, a mana nga baakasinay suujo hibandi ka kaa ay gaa.

67

67:1b.PSA.067.001 Doonkoy jine bora se. I m'a doon da moolo beeri karyaŋ. Baytu no, dooni mo no.

67:2b.PSA.067.002 Irikoy ma gomni te iri se, a m'iri albarkandi mo. A ma naŋ nga moyduma ma kaari iri do haray. (Wa dangay)

67:3b.PSA.067.003 Zama i ma ni fonda bay ndunnya ra, Ni faaba mo ndunnya dumey kulu game ra.

67:4b.PSA.067.004 Ya Irikoy, dumey ma ni saabu, Dumey kulu ma ni sifa.

67:5b.PSA.067.005 Dumey biney ma kaan. I ma baytu te farhã sabbay se, Zama ni ga ciiti te dumey se da cimi, Ni ga ndunnya dumey daŋ fondo mo. (Wa dangay)

67:6b.PSA.067.006 Ya Irikoy, naŋ dumey ma ni saabu, Dumey kulu ma ni sifa.

67:7b.PSA.067.007 Laabo na nga nafa no. Irikoy kaŋ ga ti iri Irikoyo go g'iri albarkandi.

67:8b.PSA.067.008 Irikoy goono g'iri albarkandi. Ndunnya me-a-me ma humbur'a.

68

68:1b.PSA.068.001 Doonkoy jine bora se. Dawda baytu fo no, dooni mo no.

68:2b.PSA.068.002 Irikoy ma tun, a ibarey mo ma say. Borey kaŋ yaŋ wang'a ma zuru a jine.

68:3b.PSA.068.003 Mate kaŋ cine i ga dullu gaaray, I m'i gaaray yaadin cine. Sanda mate kaŋ cine yu fanta ga manne danji gande, Boro laaley ma halaci yaadin cine Irikoy jine.

68:4b.PSA.068.004 Amma adilantey biney ma kaan. I ma ngey farhãyaŋo beerandi Irikoy jine. Oho, i ma te farhã da bine kaani.

68:5b.PSA.068.005 Wa baytu te Irikoy se, wa sifaw baytuyaŋ te a maa gaa! Wa fonda haabu kaarukwa kaŋ ga taasi beero gana se. A maa ga ti Rabbi, wa farhã beerandi a jine!

68:6b.PSA.068.006 Irikoy ya alatuumey baaba no nga nangoray hanna ra, Ciiti teeko mo no wayborey kaŋ kurnyey bu se.

68:7b.PSA.068.007 Irikoy ga fo-goroko naŋ a ma goro almayaaliyaŋ ra, A ga daabantey kaa taray, k'i arzakandi, Amma turantey wo go ga goro laabu kogo ra.

68:8b.PSA.068.008 Ya Irikoy, waato kaŋ ni fatta ka koy ni borey jine, Waato kaŋ ni na saajo gana, (Wa dangay)

68:9b.PSA.068.009 Kala laabo zinji, beeney mo tolli-tolli Irikoy jine. Oho, hala nda baa Sinayi mo, a zinji Irikoy jine, Kaŋ ga ti Israyla Irikoyo.

68:10b.PSA.068.010 Ya Irikoy, ni na beene hari boobo gusam, Ni na ni jama tabbatandi waato kaŋ a farga.

68:11b.PSA.068.011 Ni jama goro laabo ra. Ya Irikoy, ni gomno ra ni na talkey laamey bana.

68:12b.PSA.068.012 Koy Beero no ka sanno no, Wayborey kaŋ ga baaru hanna fe, kunda bambata no.

68:13b.PSA.068.013 I go ga ne: «Wongu margey bonkooney ga zuru, I ga zuru no. Nga mo, waybora kaŋ ga goro fu ga wongu arzaka fay.

68:14b.PSA.068.014 Araŋ mo go ga kani feeji kaley ra. Koloŋay fata go ga daabu nda nzarfu, a hamno mo da wura kaŋ ga nyaale.»

68:15b.PSA.068.015 Waato kaŋ Hina-Kulu-Koyo na bonkooney say noodin, Neezu* goono ga kaŋ Zalmon tondo boŋ.

68:16b.PSA.068.016 Basan tondo wo, Irikoy tondi kuuku no, Basan tondo, tondi kuuku yollo-boobo-koy no.

68:17b.PSA.068.017 Ya araŋ tondi kuukey, yollo-boobo-koyey, Ifo se no araŋ go ga tondo kaŋ Irikoy miila nga nangora se gullu nda canse? Daahir mo, Rabbi ga goro a ra hal abada.

68:18b.PSA.068.018 Irikoy torkey ya zambar-zambarey no. Oho, dubu-dubey boŋ no. Koy Beero go i game ra nangu hananta ra sanda mate kaŋ cine a go Sinayi.

68:19b.PSA.068.019 Ni ziji beene, ni na tamtaray izey ku ka kond'ey. Ni du nooyaŋey borey se, oho, hala nda turantey se, Zama Rabbi Irikoy ma goro i banda.

68:20b.PSA.068.020 Wa Koy Beero sifa, Nga kaŋ goono g'iri tiŋayey sambu zaari kulu, Irikoy nooya, kaŋ nga no ga ti iri faaba. (Wa dangay)

68:21b.PSA.068.021 Irikoy ya faaba-boobo-Koy no iri se. Faaba kaŋ ga boro kaa buuyaŋ gaa ya Rabbi, Koy Beero wane no.

68:22b.PSA.068.022 Amma Irikoy ga nga ibarey boŋey bagu, Boŋ kuuru kaŋ gonda hamni wo, Boro kaŋ ga soobay ka nga taaley te wane no.

68:23b.PSA.068.023 Rabbi ne: «Ay ga ye ka kand'ey i ma fun Basan, Ay ga ye ka kand'ey i ma fun teeku guusuyaŋey do.

68:24b.PSA.068.024 Zama ni ma ni ca sufu kuri ra, Ni hansey deenayzey mo ma du baa ni ibarey ra.»

68:25b.PSA.068.025 Ya Irikoy, i di ni fondey sata-sata. Ay Irikoyo, ay Bonkoono satey nooya. I ga furo nangu hananta ra.

68:26b.PSA.068.026 Baytu teekoy furo jina, moolo karey mo n'i banda gana, Can-caŋ karkoy mo go wandiyey game ra.

68:27b.PSA.068.027 Ya araŋ kaŋ fun Israyla banda gaa, Wa Irikoy sifa margey ra, nga kaŋ ga ti Koy Beero.

68:28b.PSA.068.028 I kayno Benyamin neeya kaŋ go ga i may, Da Yahuda mayraykoyey da ngey jama, Da Zabluna mayraykoyey, da Naftali mayraykoyey mo.

68:29b.PSA.068.029 Ni Irikoyo na ni gaabo lordi ni se. Ya Irikoy, ma ni gaabo bangandi, nin kaŋ goy iri se.

68:30b.PSA.068.030 Ni windo kaŋ go Urusalima* sabbay se no bonkooney ga kande ni se fooyaŋ.

68:31b.PSA.068.031 Ma kaseeti farru ganji hamey din gaa, Da yeeji beerey kuro, Da ndunnya dumey handayzey ngey banda, Kaŋ yaŋ ga ngey boŋ kaynandi ka kande nzarfu gudeyaŋ. A na dumey kaŋ yaŋ goono ga farhã da wongu say-say.

68:32b.PSA.068.032 Diyayaŋ ga kaa ka fun Misira, Etiyopi ga cahã ka nga kambey salle Irikoy do haray.

68:33b.PSA.068.033 Ya araŋ ndunnya mayrayey, wa baytu te Irikoy se, Wa sifaw baytu te Koy Beero se. (Wa dangay)

68:34b.PSA.068.034 Beene beeney kaŋ go no za doŋ-doŋ, kaarukwa kaŋ ga kaaru i boŋ, A go, a na nga jinda sambu ka salaŋ, Jinde gaabikooni mo no.

68:35b.PSA.068.035 Wa Irikoy hino ci. A koytaray darza go no Israyla boŋ, A hino go no beene batama ra.

68:36b.PSA.068.036 Ya Irikoy, ni ya humburkumay hari no ni nangu hananta ra. Israyla Irikoyo, Nga no ga hin nda gaabi no nga borey se. I ma Irikoy sifa!

69

69:1b.PSA.069.001 Doonkoy jine bora se. I m'a doon da subo kaŋ ga ne: «Boosi hannoyaŋ». Dawda wane no.

69:2b.PSA.069.002 Ya Irikoy, m'ay faaba, zama harey margu ay fundo boŋ.

69:3b.PSA.069.003 Ay sundu tibi guuso ra, nangu kaŋ kayyaŋ daama si no. Ay kaŋ harey kaŋ ga guusu ra, Nangu kaŋ hari zuru beerey n'ay yoole.

69:4b.PSA.069.004 Ay farga nd'ay hẽeno, ay karra koogu, Ay moy gaze ay Irikoyo batuyaŋo se.

69:5b.PSA.069.005 Borey kaŋ yaŋ ga konna ay sabaabu kulu si bisa ay boŋ hamno baayaŋ. Borey kaŋ yaŋ ga ceeci ngey m'ay halaci, kaŋ ay ibareyaŋ no yaamo-yaamo, hinkoyaŋ mo no. Tilas kal ay ma haŋ kaŋ ay mana kom yeti.

69:6b.PSA.069.006 Ya Irikoy, nin no g'ay saamotara bay, Ay taaley mo si ga tugu ni se.

69:7b.PSA.069.007 Ya Rabbi Kundeykoyo, Ma si naŋ borey kaŋ ga hangan ni se yaŋ ma haaw ay sabbay se. Ya Israyla Irikoyo, ma si naŋ borey kaŋ ga ni ceeci yaŋ ma di kayna ay sabbay se.

69:8b.PSA.069.008 Zama ni sabbay se no ay di wowi, Kayna mo n'ay moyduma daabu.

69:9b.PSA.069.009 Ay ciya yaw ay nya-izey se, Da ce-yaw mo ay nyaŋo izey se.

69:10b.PSA.069.010 Zama anniya kaŋ ay gonda ni fuwo se n'ay kankam, Ni wowkoy wowey mo kaŋ ay boŋ.

69:11b.PSA.069.011 Waato kaŋ ay hẽ ay bina ra da mehaw, Woodin kulu ciya ay se wowi hari.

69:12b.PSA.069.012 Waato kaŋ ay na bufu zaara haw, Ay ciya yaasay hari i se.

69:13b.PSA.069.013 Faada meyey gaa gorokoy goono g'ay fakaaray te. Ay ciya haŋ-ka-bugukoyey se dooni hari.

69:14b.PSA.069.014 Amma ay ya day, ya Rabbi, Ay adduwa go ni do, taayaŋ alwaati ra. Ya Irikoy, ni baakasinay suuji booba boŋ, Ma tu ay se da faaba naanaykoy.

69:15b.PSA.069.015 M'ay kaa botogo ra, ma si fay da ay ya sundu. Naŋ ay ma faaba ka fun borey kaŋ yaŋ wangu ay kambe ra, Da hari guusuyaŋey ra mo.

69:16b.PSA.069.016 Hari zuru beerey ma s'ay yoole, Teeku guusuyaŋ mo ma s'ay gon, Guuso ma si nga me daabu ay boŋ.

69:17b.PSA.069.017 Ya Rabbi, ma tu ay se, Zama ni baakasinay suujo gonda gomni. Ni bakaraw booba boŋ, ma bare ay do haray.

69:18b.PSA.069.018 Ma si ni moyduma tugu ay, ni tamo se, Zama ay go kankami ra. Ma tu ay se da waasi.

69:19b.PSA.069.019 Ma maan ay fundo gaa k'a fansa*, M'ay fansa ay ibarey sabbay se.

69:20b.PSA.069.020 Ni g'ay foyra, d'ay haawo, d'ay kayna bay. Ay yanjekaarey kulu go ni jine.

69:21b.PSA.069.021 Foyray n'ay bina doorandi, Ay go toonante nda tiŋay maayaŋ. Ay ceeci borey kaŋ yaŋ ga bakar, day boro kulu si no, Ay ceeci kunfakoyaŋ mo, amma ay mana du.

69:22b.PSA.069.022 I n'ay no tay ay ma ŋwa, Ay jaw maayaŋo ra mo i n'ay no hari mooro ya haŋ.

69:23b.PSA.069.023 I taablo ma ciya kumsay i jine. Waati kaŋ i goono ga baani goray te mo, A ma ciya hirrimi.

69:24b.PSA.069.024 I moy ma te kubay, hal i ma si du ka di. Ma naŋ mo i banda daarey ma soobay ka jijiri waati kulu.

69:25b.PSA.069.025 Ma ni dukuro gusam i boŋ, Ni futay korna m'i hamnay ka di.

69:26b.PSA.069.026 I nangorayey ma ciya kurmu, Boro kulu ma si goro i kuuru fuwey ra.

69:27b.PSA.069.027 Zama i goono ga bora kaŋ ni kar din gurzugandi, I goono ga bora kaŋ ni maray din ciinay.

69:28b.PSA.069.028 Ma laala dake i se i laalayaŋo boŋ, I ma si furo ni adilitara ra.

69:29b.PSA.069.029 M'i tuusu fundi tira ra, Ma si i hantum adilantey banda.

69:30b.PSA.069.030 Day ay wo, taabante no, ay go ga maa doori. Ya Irikoy, ni faaba m'ay sambu ka dake beene.

69:31b.PSA.069.031 Ay ga Irikoy maa sifa nda baytu, Ay g'a beerandi nda saabuyaŋ.

69:32b.PSA.069.032 Woodin ga kaan Rabbi se mo ka bisa yeejiyaŋ, Wala yeeji nda nga hilley da nga ce camsey.

69:33b.PSA.069.033 Borey kaŋ yaŋ sinda boŋbeeray di woodin, i maa kaani mo. Araŋ kaŋ ga Irikoy ceeci, araŋ biney ma funa.

69:34b.PSA.069.034 Zama Rabbi ga maa borey kaŋ go moori ra hẽeney, A si donda nga wane hawantey mo.

69:35b.PSA.069.035 Beena da ganda m'a sifa, Da teekoy mo da hay kulu kaŋ ga yooje i ra.

69:36b.PSA.069.036 Zama Irikoy ga Sihiyona faaba, A ga Yahuda galley mo cina. Borey ga goro noodin, a ga ciya i mayray hari mo.

69:37b.PSA.069.037 A tamey bandey mo g'a tubu, Ngey mo kaŋ yaŋ ga ba Irikoy maa ga goro a ra.

70

70:1b.PSA.070.001 Doonkoy jine bora se. Dawda wane no kaŋ a te fongandiyaŋ se.

70:2b.PSA.070.002 Ya Irikoy, ma waasu ay faabayaŋ se. Ya Rabbi, ma waasu ay gaayaŋ se.

70:3b.PSA.070.003 Borey kaŋ yaŋ goono g'ay fundo ceeci, Naŋ i ma haaw, i boŋ ma haw mo. Borey kaŋ yaŋ ga farhã d'ay hasaraw, Naŋ i ma ye banda ka di kayna.

70:4b.PSA.070.004 Borey kaŋ yaŋ ga ne: «Ahãa! Ahãa!», I ma ye banda haawo kaŋ g'i di sabbay se.

70:5b.PSA.070.005 Borey kaŋ yaŋ ga ni ceeci, I kulu ma farhã ka te bine kaani ni do. Ngey mo kaŋ ga ba ni faaba, i ma soobay ka ne: «Irikoy ma beeri ka bisa i kulu!»

70:6b.PSA.070.006 Amma ay ya taabante da laamikoy no. Ya Irikoy, ma waasu ka kaa ay do. Nin no ga ti ay gaakwa d'ay Faabakwa mo. Ya Rabbi, ma si gay.

71

71:1b.PSA.071.001 Ya Rabbi, ni gaa no ay ga de, Ma si naŋ ya haaw hal abada.

71:2b.PSA.071.002 M'ay faaba ni adilitara ra, m'ay kaa kambe mo. Ma ni hanga jeeri ay do haray, k'ay faaba.

71:3b.PSA.071.003 Ma ciya ay se goray tondi, Naŋ kaŋ ay ga soobay ka furo duumi. Ni lordi ka ne i m'ay faaba, Zama nin no ga ti ay tondo d'ay gaabi nango.

71:4b.PSA.071.004 Ya ay Irikoyo, m'ay kaa boro laalo kambe ra. Nga, bine-bi-koyo kaŋ sinda adilitaray kambe ra no.

71:5b.PSA.071.005 Zama nin no, ya Rabbi Koy Beero, nin no ga ti ay beeja, Nin no ga ti ay deyaŋ haro za ay go zanka.

71:6b.PSA.071.006 Nin no k'ay gaakasinay za gunde ra; Nin no k'ay kaa ay nyaŋo gunda ra, Nin no ay ga sifa duumi.

71:7b.PSA.071.007 Ay ya day, ay ciya dambara hari boro boobo se, Amma nin no ga ti ay koruyaŋ do gaabikoono.

71:8b.PSA.071.008 Ay meyo ga to da ni sifaw, da ni darza mo zaari me-a-me.

71:9b.PSA.071.009 Ma s'ay furu zeenay jirbey ra, Ma s'ay furu waati kaŋ ay gaabo ban,

71:10b.PSA.071.010 Zama ay ibarey goono ga salaŋ ka gaaba nda ay. Ngey mo kaŋ yaŋ goono g'ay fundo batandi goono ga saaware gurum.

71:11b.PSA.071.011 I goono ga ne: «Irikoy n'a furu. W'a gana k'a di, zama Faabako si no.»

71:12b.PSA.071.012 Ya Irikoy, ma si mooru ay! Ya ay Irikoyo, ma waasu k'ay gaa!

71:13b.PSA.071.013 Borey kaŋ yaŋ goono ga gaaba nd'ay fundo ma haaw, I ma ban mo. Borey kaŋ yaŋ goono ga taabi haŋyaŋ ceeci ay se, I ma daabu nda foyray da kayna.

71:14b.PSA.071.014 Amma ay wo, duumi ay gonda beeje, Ay ga ni sifawo te mo ka koy jina ka tonton.

71:15b.PSA.071.015 Ay meyo ga ni adilitara salaŋ, Da ni faaba mo zaari me-a-me. Zama ay si i baayaŋo me bay.

71:16b.PSA.071.016 Ay ga kaa ka Rabbi, Koy Beero goy hinkoyey ci, Ay ga ni adilitara ci, ni wano hinne.

71:17b.PSA.071.017 Ya Irikoy, za ay go zanka ni n'ay dondonandi, Hala ka kaa sohõ mo, ay goono ga ni dambara goyey ci.

71:18b.PSA.071.018 Oho, ya Irikoy, baa waati kaŋ ay zeen ka te hamni kwaaray, ni ma s'ay furu, Kala nda ay na ni hino cabe zamana woone se jina, Da ni gaabo boro kulu kaŋ ga kaa se.

71:19b.PSA.071.019 Ya Irikoy, ni adilitara ga beeri ka to hala beena gaa. Nin, ya Irikoy, kaŋ na muraadu bambatey te, May no ga hima nin?

71:20b.PSA.071.020 Nin kaŋ na iri cabe taabey kaŋ ga baa, i ga koroŋ mo, Ni ga ye ka iri funandi koyne. Ganda guusuyaŋey ra no ni ga ye ka iri fattandi.

71:21b.PSA.071.021 Ni g'ay beera tonton, ka ye ka bare k'ay kunfa koyne.

71:22b.PSA.071.022 Ya nin ay Irikoyo, ay ga ni naanayo sifa nda moolo. Ya nin, Israyla wane Hananyankoyo, Ay ga baytu te ni se da moolo beeri.

71:23b.PSA.071.023 Ay meyo ga farhã gumo waati kaŋ ay goono ga sifaw baytuyaŋ te ni se, Ay fundo kaŋ ni fansa mo ga farhã.

71:24b.PSA.071.024 Ay deena mo ga ni adilitara ci zaari me-a-me, Zama ngey kaŋ yaŋ ga taabi haŋyaŋ ceeci ay fundo se haaw, i di kayna mo.

72

72:1b.PSA.072.001 Suleymanu wane no. Ya ay Irikoyo, ma bonkoono no ni ciitey. Ni adilitara mo, ni m'a no bonkoono izo se.

72:2b.PSA.072.002 A ma ciiti te ni borey se da adilitaray, Ni talkey mo se da cimi ciiti.

72:3b.PSA.072.003 Tondi kuukey ma kande borey se laakal kanay, Tudey mo ma kand'a adilitaray ra.

72:4b.PSA.072.004 A ma ciiti te borey ra talkey se; A ma laamikoyey izey faaba, A ma taabandikoy mumuru mo.

72:5b.PSA.072.005 I ma humburu nin waati kaŋ wayna go no, Da waati kaŋ hando go no, Hal a ma koy zamaney kulu me.

72:6b.PSA.072.006 A ma zumbu sanda beene hari cine, subu kaŋ i dumbu boŋ, Sanda buru hariyaŋ kaŋ ga laabo tayandi.

72:7b.PSA.072.007 A jirbey ra adilante ma zaada, Laakal kanay ma baa mo, kala handu sanni ma ban.

72:8b.PSA.072.008 A ma may teeku fa gaa ka koy teeku fa gaa mo, Da Isa Beero gaa kal a ma koy ndunnya me.

72:9b.PSA.072.009 Saajo gorokoy ma gurfa a jine, a ibarey ma kusa loogu.

72:10b.PSA.072.010 Tarsis da gungey bonkooney ma jangal bana, Seba da Saba bonkooney mo ma kande fooyaŋ hari.

72:11b.PSA.072.011 Oho, bonkooney kulu ma sududu a se, Ndunnya dumey kulu ma may a se.

72:12b.PSA.072.012 Zama a ga borey kaŋ go moori ra faaba waati kaŋ i hẽ ka gaakasinay ceeci, Da taabante, da boro kaŋ sinda gaako mo.

72:13b.PSA.072.013 A ga bakaraw cabe talkey da laamikoyey se, A ga laamikoyey fundey faaba mo.

72:14b.PSA.072.014 A m'i fundey fansa* zamba nda toonye gaa, A diyaŋo gaa mo i kuro gonda darza.

72:15b.PSA.072.015 A ma funa, i ma Seba wura no a se mo. Borey ma adduwa te a se han kulu, I m'a sifa zaari me-a-me.

72:16b.PSA.072.016 Ntaaso ma te ka yulwa laabo tondi kuukey yolley gaa, Jeeney ma soobay ka teeni sanda Liban cine, Galley ra gorokoy mo ma zaada danga ganda subey cine.

72:17b.PSA.072.017 A maa ma tabbat hal abada, A maa ma yandi duumi nda wayna go no. I ma borey albarkandi a maa gaa, Ndunnya dumey kulu ma ne a se albarkante.

72:18b.PSA.072.018 I ma Rabbi Irikoy, Israyla Irikoyo, sifa, Nga kaŋ ga dambara goyey te, nga hinne.

72:19b.PSA.072.019 I m'a maa darzakoyo sifa hal abada. Ndunnya kulu ma to d'a darza. Amin! Amin! Yasse ize Dawda adduwey nooya, i ban.

73

73:1b.PSA.073.001 Asaf baytu fo no. Daahir, Irikoy ya gomnikoy no Israyla se, Ngey kaŋ gonda bine hanante se no.

73:2b.PSA.073.002 Amma ay wo, ay cey ga ba ka kati, Kayna ka cindi ay taamuyaŋey ma tansi.

73:3b.PSA.073.003 Zama ay bina canse foomantey se, Waato kaŋ ay di laalakoyey arzaka.

73:4b.PSA.073.004 Zama i buuyaŋ ra sinda doori maayaŋ durayyaŋ, I gaabey go toonante.

73:5b.PSA.073.005 I si taabi ra sanda boro cindey cine, I mana masiiba te i se sanda boro cindey cine.

73:6b.PSA.073.006 Woodin se no boŋbeeray goono ga sarku i jindey gaa sanda jinde gaa taalam hari cine, I gonda toonye ga daŋ sanda bankaaray cine.

73:7b.PSA.073.007 I moy go ga dor-doru maani sabbay se, I biney fonguyaŋey baa gumo.

73:8b.PSA.073.008 I goono ga hahaaray te, laala ra mo i ga kankami ci. I goono ga niine jare ka salaŋ,

73:9b.PSA.073.009 I na ngey meyey ye beene ka gaaba nda beeney, I deeney mo goono ga bar-bare ganda.

73:10b.PSA.073.010 Woodin se no a borey ga ye ka kaa neewo, I goono ga hari haŋ gumo.

73:11b.PSA.073.011 Foomantey din goono ga ne: «Mate no Irikoy ga te ka bay? Bayray woofo no go Beeray-Beeri-Koyo do?»

73:12b.PSA.073.012 A go, woone yaŋ, ngey no ga ti laalakoyey: I goono ga goro baani samay duumi, I goono ga tonton da arzaka.

73:13b.PSA.073.013 Daahir, yaamo no ay n'ay bina hanandi, Ay n'ay kambey nyun da taali-jaŋay.

73:14b.PSA.073.014 Zama zaari me-a-me masiiba no ay goono ga haŋ, Da goojiyaŋ mo susubay kulu.

73:15b.PSA.073.015 D'ay ne: «Yaadin cine no ay ga salaŋ,» A go, doŋ ay na ni izey zamana amaana ŋwa.

73:16b.PSA.073.016 Waato kaŋ ay ceeci ay ma woodin bay, kala a ciya haŋ kaŋ gaabu ay se.

73:17b.PSA.073.017 Day waato kaŋ ay furo Irikoy nangu hananta ra, Gaa no ay laakal d'i bananta.

73:18b.PSA.073.018 Daahir, ni n'i daŋ tansi nangey ra, Ni n'i furu halaci zulliyaŋey do.

73:19b.PSA.073.019 Guna mate kaŋ cine i kaŋ farap! folloŋ, I n'i haabu ka ban parkatak da humburkumay beeriyaŋ.

73:20b.PSA.073.020 Sanda hindiri cine waati kaŋ boro mo hay, Yaadin cine no, ya ay Koyo, da ni mo hay, Ni ga donda i alhaalo.

73:21b.PSA.073.021 Waati kaŋ a dooru ay gaa, A n'ay gooru mo ay bina ra,

73:22b.PSA.073.022 Ay na alman alhaali te, ay jaŋ bayray mo, Hal ay hima sanda ganji ham ni jine.

73:23b.PSA.073.023 Kulu nda yaadin, waati kulu ay go ni banda, Ni n'ay kambe ŋwaaro di ka gaay.

73:24b.PSA.073.024 Ni g'ay candi nda ni saawara, Woodin banda ni g'ay ta ay ma koy darza ra.

73:25b.PSA.073.025 May no ay se beene da manti nin no? Ndunnya ra mo sinda boro fo kaŋ g'ay beejandi kala nin.

73:26b.PSA.073.026 Ay bina d'ay hamo gaze, Amma Irikoy ga ti ay bina tondi daaro, D'ay baa mo hal abada.

73:27b.PSA.073.027 Zama a go, borey kaŋ yaŋ ga mooru nin ga halaci. Ngey kaŋ yaŋ fay da nin ka amaana ŋwaari gana, I kulu ni g'i halaci.

73:28b.PSA.073.028 Amma a boori ay se ya maan Irikoy, Ay na Rabbi, Koy Beero te ay koruyaŋ do, Zama ay ma ni goyey kulu baaru dede.

74

74:1b.PSA.074.001 Asaf baytu fo no. Ya Irikoy, ifo se no ni n'iri furu hal abada? Ifo se mo no ni futa goono ga te dullu ni kuray nango feejey se?

74:2b.PSA.074.002 Ma fongu ni jama kaŋ ni day za doŋ, Wo kaŋ ni fansa* zama a ma ciya ni wane dumo. Ma fongu Sihiyona tondo mo, kaŋ ra ni goro.

74:3b.PSA.074.003 Ma ni ce dagu, Ma miila ka koy kurmey kaŋ yaŋ ga duumi do haray. Ibare na hay kulu sara Nangu Hananta ra.

74:4b.PSA.074.004 Ni gaabakasiney na yooje beeri te ni marga nango bindo ra, I na ngey liiliwaley sinji i ma ciya alaama.

74:5b.PSA.074.005 I ga hima boro kaŋ ga deesi sambu saaji ra tuuri-nyayaŋ gaa.

74:6b.PSA.074.006 Sohõ mo a jabuyaŋ goyey kulu, I go g'i bagu-bagu nda deesi nda ndarka.

74:7b.PSA.074.007 I na danji daŋ ni Nangu Hananta gaa k'a kulu ton, I na ni maa goray nango ziibandi.

74:8b.PSA.074.008 I biney ra no i ne: «Iri m'i may da kankami care banda!» Laabo ra nangu kulu kaŋ borey ga kubay da Irikoy, I n'i ton.

74:9b.PSA.074.009 Iri si ga di iri alaamey, annabi mo si no koyne, Iri game ra mo sinda boro kaŋ ga bay hala waati fo no.

74:10b.PSA.074.010 Ya Irikoy, waati fo no yanjekaarey ga ni kaynayaŋ naŋ? Ibare ga soobay ka donda ni maa hal abada no?

74:11b.PSA.074.011 Ifo se no ni goono ga ni kambe kaa, Kaŋ ga ti ni kambe ŋwaaro? Ma ni kamba kaa ni ganda gaa k'i ŋwa.

74:12b.PSA.074.012 Kulu nda yaadin, Irikoy ya ay Bonkoono no za doŋ, Faaba goy teeko mo no laabo bindo ra.

74:13b.PSA.074.013 Nin no, ni gaabo no ni na teeko fay-fay d'a. Nin no ka teeku ham beerey boŋey bagu-bagu.

74:14b.PSA.074.014 Nin no ka Lebiyatan* boŋey bagu-bagu, Nin no k'a nooyandi a ma ciya ŋwaari saaji ra gorokoy se.

74:15b.PSA.074.015 Nin no ka hari-mo da hari zurey zortandi, Nin no ka naŋ isayaŋ ma koogu.

74:16b.PSA.074.016 Zaari ni wane no, cin mo ni wane no, Nin no ka annura nda wayna soola.

74:17b.PSA.074.017 Nin no ka ndunnya me hirrey kulu sinji, Nin no ka kaydiya nda jaw mo te.

74:18b.PSA.074.018 Ya Rabbi, ma fongu woone gaa: ibara na ni maa sara, Dumo kaŋ sinda carmay donda ni maa.

74:19b.PSA.074.019 Ma si ni koloŋa fundo no ganji ham se, Ma si dinya ni taabi hankwa fundo hal abada.

74:20b.PSA.074.020 Ma sappa guna, zama ndunnya kubay nangey ga to no da toonye nangorayyaŋ.

74:21b.PSA.074.021 Ma si naŋ borey kaŋ yaŋ i kankam ma ye ka kaa haawi ra. Ma naŋ alfukaaru nda moori ra gorokoy ma ni maa sifa.

74:22b.PSA.074.022 Ya Irikoy, ma tun ka ni sanno hanse. Ma fongu mate kaŋ cine boro kaŋ sinda carmay goono ga ni wow zaari me-a-me.

74:23b.PSA.074.023 Ma si dinya ni yanjekaarey jinda, Borey kaŋ yaŋ tun ka gaaba nda nin, I kosongo go ga ziji ka tonton duumi.

75

75:1b.PSA.075.001 Doonkoy jine bora se. I m'a doon da subo kaŋ ga ne: «Ma si halaci». Asaf baytu fo no, dooni mo no.

75:2b.PSA.075.002 Ya Irikoy, iri ga saabu ni se, iri ga saabu, Zama ni maa ga maan. Borey goono ga ni dambara harey baaru dede.

75:3b.PSA.075.003 Ni ne: «Saaya kaŋ alwaato kaŋ ay jisi din to, Ay no ga ciiti da mate kaŋ ga saba.

75:4b.PSA.075.004 Waati kaŋ ndunnya da nga ra gorokoy kulu ga jijiri, Ay no g'a bonjarey sinji. (Wa dangay)

75:5b.PSA.075.005 Ay ne foomantey se: ‹Wa si fooma.› Laalakoyey mo, ay ne i se: ‹Wa si boŋ jare.

75:6b.PSA.075.006 Wa si araŋ hilley tunandi beene, Araŋ ma si salaŋ da gande-gaabay.› »

75:7b.PSA.075.007 Zama manti wayna funay, manti wayna kaŋay, Manti mo dandi kambe haray no beeray ga fun bo,

75:8b.PSA.075.008 Amma Irikoy no ga ti Ciitikwa. A ga boro fo kaynandi, a ma afo mo beerandi.

75:9b.PSA.075.009 Zama Rabbi kambe ra gonda gaasiya, Duvaŋo* kaŋ go a ra mo ga te kufu, A ga to da marga-marga, Irikoy ga soogu ka kaa a ra mo. A zambo mo, daahir boro laaley kulu kaŋ go ndunnya g'a zinji-zinji ka zu.

75:10b.PSA.075.010 Amma ay wo, hal abada ay g'a baaro fe, Ay ma sifayaŋ baytu te Yakuba Irikoyo se.

75:11b.PSA.075.011 A ga boro laaley hilley kulu pati, Amma adilantey hilley ga du darza.

76

76:1b.PSA.076.001 Doonkoy jine bora se. I m'a doon da moolo beeri karyaŋ. Asaf baytu fo no, dooni mo no.

76:2b.PSA.076.002 I ga Irikoy bay Yahuda ra, a maa beeri Israyla ra.

76:3b.PSA.076.003 Salem ra no a nangora go, a gora do mo go Sihiyona ra.

76:4b.PSA.076.004 Noodin no a na hangawey kaŋ gonda danji ceeri-ceeri, Da koray, da takuba, da wongu jinayey mo. (Wa dangay)

76:5b.PSA.076.005 Ni gonda darza beeri da gaakuri mo ka bisa wongu arzaka citila,

76:6b.PSA.076.006 I na bine gaabikooney jinayey ku wongu ra, I kani ka jirbi kaŋ sinda tunyaŋ, Wongaarey din kulu ra sinda boro kaŋ ga hin ka nga kambe sambu.

76:7b.PSA.076.007 Ya Yakuba Irikoyo, ni deeno se torkey da bariyey kulu kaŋ jirbi tiŋo ra.

76:8b.PSA.076.008 Nin no ga humburandi gumo, nin no. May no ga kay ni jine da ni futu?

76:9b.PSA.076.009 Ciiti kaŋ fun beene, ni naŋ i ma maa ra, Ndunnya mo humburu, a te siw

76:10b.PSA.076.010 waato kaŋ Irikoy tun ciiti teeyaŋ sabbay se, Zama nga ma ndunnya ra lalabukoyey faaba. (Wa dangay)

76:11b.PSA.076.011 Zama daahir boro futay ga ni sifawo te. Futay cindo mo, ni g'a te guddama.

76:12b.PSA.076.012 Wa sartiyaŋ sambu k'i toonandi Rabbi araŋ Irikoyo se. Borey kulu kaŋ goono g'a windi ma kande fooyaŋ hari nga kaŋ to i ma humbur'a se.

76:13b.PSA.076.013 A ga mayraykoyey bonjareyaŋo ban. Irikoy ya humburkumay hari no ndunnya bonkooney se.

77

77:1b.PSA.077.001 Doonkoy jine bora se. I m'a doon da Yedutun subo. Asaf baytu no.

77:2b.PSA.077.002 Ay jinde no ay go ga hẽ d'a Irikoy gaa, Oho, ay jinde no ay go ga tunandi Irikoy gaa, Nga mo ga hanga jeeri ay se.

77:3b.PSA.077.003 Ay taabo zaaro ra ay na Koy Beero ceeci, Cin mo ay kambe go ga salle, a mana dusu. Ay fundo wangu ka yaamaryaŋ ta.

77:4b.PSA.077.004 D'ay fongu Irikoy gaa, ay laakalo no ga tun. D'ay ga miila mo, ay fundo no ga kasam. (Wa dangay)

77:5b.PSA.077.005 Ni go g'ay mo-kuurey di i ma goro feerante. Ay boŋo mo haw kala ay si du ka salaŋ.

77:6b.PSA.077.006 Ay fongu waato jirbey, za doŋ-doŋ jiirey nooya.

77:7b.PSA.077.007 Cin ra ay ga fongu nda ay doono, Ay ga saaware d'ay bina, Ay biya mo go ga fintalyaŋ te.

77:8b.PSA.077.008 Ay Koyo ga boro furu no hal abada? A si ye ka yadda no koyne?

77:9b.PSA.077.009 A baakasinay suujo ban hal abada no? A alkawlo mo tun hal abada abadin no?

77:10b.PSA.077.010 Wala Irikoy dinya gomni teeyaŋ no? A futa ra a na bakaraw daabu no, wala? (Wa dangay)

77:11b.PSA.077.011 Ay ne: «Woone ga ti ay bine sara: Kaŋ Beeray-Beeri-Koyo kambe ŋwaari si no danga waato wano cine.»

77:12b.PSA.077.012 Ay ga fongu Rabbi goyey, Daahir ay ga fongu ni waato dambara goyey.

77:13b.PSA.077.013 Ay ga soobay ka ni goyey kulu guna nda laakal, Ay ga miila mo ni te-goyey boŋ.

77:14b.PSA.077.014 Ya Irikoy, ni fonda ya hananyankoy no. Irikoy woofo no ka bara nda beeray sanda iri Irikoyo cine?

77:15b.PSA.077.015 Nin no ga ti Irikoy kaŋ ga dambara goyyaŋ te, Ni na ni gaabo cabe dumey game ra.

77:16b.PSA.077.016 Ni kambe no ni na ni borey fansa* nd'a, Kaŋ ga ti Yakuba nda Yusufu izey. (Wa dangay)

77:17b.PSA.077.017 Ya Irikoy, harey di nin, harey di nin, I bibiri, guusuyaŋey jijiri.

77:18b.PSA.077.018 Burey na hari taŋ ka dooru, beene batamey kaati. Ni hangawey mo ga koy, i ga ye.

77:19b.PSA.077.019 Ni kaatiyaŋ jinda go alma haw beero ra, Maliyaŋey na ndunnya kaarandi, Laabo jijiri ka zinji-zinji.

77:20b.PSA.077.020 Ni fonda go teeku ra, Ni fondayzey mo go hari bambatey ra, Ni ce gurbey mo, borey s'i bay.

77:21b.PSA.077.021 Ni na ni borey candi Musa nda Haruna kambe ra, Sanda feeji kuru cine.

78

78:1b.PSA.078.001 Asaf dooni fo no. Ya ay borey, wa hangan ay asariya se, W'araŋ hanga jeeri k'ay me sanney hangan.

78:2b.PSA.078.002 Ay g'ay meyo feeri nda yaasay, Ay ma waato sanney kaŋ ga sandi yaŋ ci,

78:3b.PSA.078.003 Wo kaŋ yaŋ iri maa, iri g'i bay, Iri kaayey mo ci iri se.

78:4b.PSA.078.004 Iri s'i tugu i izey se, Amma iri ga Rabbi sifawey, da Rabbi gaabo, D'a dambara goyey kulu kaŋ a te baaru dede zamana kaŋ ga kaa borey se.

78:5b.PSA.078.005 Zama a na seeda kayandi Yakuba ra, A na asariya daŋ Israyla ra, Wo kaŋ a lordi iri kaayey se, Zama i ma ngey izey bayrandi nd'a.

78:6b.PSA.078.006 Hala zamana kaŋ ga kaa din m'i bay, Danga izey kaŋ yaŋ i ga hay nooya, Ngey mo ma tun ka ci ngey izey se,

78:7b.PSA.078.007 Zama i ma ngey deyaŋ sinji Irikoy gaa, I ma si dinya Irikoy goyey gaa, Amma i ma haggoy d'a lordey.

78:8b.PSA.078.008 I ma si goro ka ciya sanda ngey kaayey cine, Zamana kaŋ boŋ ga sandi, kaŋ ga ture mo, Zamana kaŋ mana nga bina soola, Kaŋ a biya mana kay da naanay Irikoy gaa.

78:9b.PSA.078.009 Ifraymu izey, soojeyaŋ no kaŋ gonda birawyaŋ ga jare, Amma i na banda bare wongo hane.

78:10b.PSA.078.010 I mana ngey da Irikoy game ra sappa haggoy, I wangu ka dira a asariya ra.

78:11b.PSA.078.011 I dinya a goyey d'a dambara harey kaŋ a cab'i se,

78:12b.PSA.078.012 Goyyaŋ kaŋ ga boro di takooko no a te i kaayey jine, Misira laabo ra, da Zowan faro ra mo.

78:13b.PSA.078.013 A na teeku fay, a na haro gaay, A n'a te citila, a naŋ i ma gana ka bisa a ra mo.

78:14b.PSA.078.014 Zaari a n'i candi nda beene buru, cin mo da danji kaari.

78:15b.PSA.078.015 A na tondey kortu saajey ra k'i haŋandi, Danga day teeku guusey gaa no.

78:16b.PSA.078.016 Tondi ra a na gooruyaŋ candi ka kaa taray, A naŋ harey ma zuru ka dandi sanda isayaŋ cine.

78:17b.PSA.078.017 Kulu nda yaadin i soobay ka zunubi te a se, I go ga murte Beeray-Beeri-Koyo gaa laabu kogo ra.

78:18b.PSA.078.018 I na Irikoy si ngey biney ra waato kaŋ i na ham ceeci ngey biniya ra.

78:19b.PSA.078.019 Oho, i salaŋ ka gaaba nda Irikoy, I ne: "Day Irikoy gonda hina a ma taabal soola saajo wo ra no?

78:20b.PSA.078.020 A go, a na tondo kar hala hari bagu ka fatta, Goorey te yaa ka mun. A gonda hina kaŋ ga buuru mo no, wala? A ga hin ka ham soola ka jisi nga borey se no?"

78:21b.PSA.078.021 Woodin se no Rabbi maa, a futu mo gumo. Danji di ka gaaba nda Yakuba, Futay mo tun ka gaaba nda Israyla,

78:22b.PSA.078.022 Zama i mana Irikoy cimandi, i mana de a faaba gaa mo.

78:23b.PSA.078.023 Kulu nda yaadin a na burey lordi beene, A na beene meyey fiti,

78:24b.PSA.078.024 A na Manna* gusam i se, Sanda beene hari cine, i ma ŋwa. A n'i no beene ntaaso.

78:25b.PSA.078.025 Adam-izey na malaykey ŋwaaro ŋwa. A na ŋwaari samba i se kal i kungu.

78:26b.PSA.078.026 A daŋ wayna funay haw ma faaru beena ra. Nga hino no a na hawo gaaray d'a dandi kamba haray.

78:27b.PSA.078.027 A na ham gusam i se sanda kusa cine, Curayze fatakoy sanda teeku taasi baayaŋ cine no.

78:28b.PSA.078.028 A naŋ i ma soobay ka kaŋ jama gata bindo ra, I nangorayey windanta.

78:29b.PSA.078.029 Borey binde ŋwa kal i kungu gumo, Rabbi na i madde kaa i gaa.

78:30b.PSA.078.030 I laamo mana fun -- hamey go i meyey ra jina --

78:31b.PSA.078.031 Kala Irikoy futu i gaa. A na i ra borey kaŋ yaŋ naasu nd'i kulu wi, A na Israyla sahãkooney kar.

78:32b.PSA.078.032 Kulu nda yaadin, i soobay ka zunubi te ka tonton, I mana a dambara goyey mo cimandi.

78:33b.PSA.078.033 Woodin se no a n'i jirbey halaci yaamo, I jiirey mo halaci jirsi boŋ.

78:34b.PSA.078.034 Kaŋ a n'i wi, gaa no i n'a ceeci, I bare ka Irikoy ceeci da anniya.

78:35b.PSA.078.035 I fongu kaŋ Irikoy no ga ti ngey tondo, Irikoy Beeray-Beeri-Koyo mo i Fansakwa no.

78:36b.PSA.078.036 Kulu nda yaadin i na me-kaanay te a se, I taari a se mo da ngey deeney.

78:37b.PSA.078.037 Zama i biney mana sinji a do haray, I mana goro ka ciya naanaykoyyaŋ a sappa ra mo.

78:38b.PSA.078.038 Amma nga din, zama a go toonante da bakaraw, A se no a n'i taaley yaafa i se, A man'i halaci. Oho, sorro boobo a futa ga bare, A si nga dukuro kulu funsu.

78:39b.PSA.078.039 A fongu kaŋ ngey wo gaahamyaŋ hinne day no, Haw kaŋ ga bisa, kaŋ si ye ka kaa koyne.

78:40b.PSA.078.040 Sorro marge no i murte a gaa saajo ra, I n'a bine sara taasi beero ra.

78:41b.PSA.078.041 Sorro boobo mo i bare, i na Irikoy si, I na yanje ceeci Israyla wane Hananyankoyo gaa.

78:42b.PSA.078.042 I mana fongu a kambe gaabo, Wala mo zaaro kaŋ a n'i fansa ka kaa i yanjekaarey kambe ra.

78:43b.PSA.078.043 Mate kaŋ cine a na nga alaamey te Misira ra, Da nga dambara goyey kaŋ a te Zowan faro ra.

78:44b.PSA.078.044 A na Misira isey bare ka te kuri, I goorey mo, kala i si hin ka haŋ i gaa.

78:45b.PSA.078.045 A na hamni zugulayaŋ donton i gaa, kaŋ yaŋ n'i ŋwa, Balancawyaŋ* mo n'i halaci.

78:46b.PSA.078.046 A na i fari albarka nooyandi do izey se, I taabi goyey mo, a n'i nooyandi doy se.

78:47b.PSA.078.047 A na i reyzin* tiksey halaci nda gari, I durmi nyaŋey mo, leema n'i hasara.

78:48b.PSA.078.048 A na i almaney nooyandi gari se, I alman kurey mo, beene maliyaŋ n'i ton ka wi.

78:49b.PSA.078.049 A na nga futay korna gusam i boŋ, Dukuri nda futay da taabi, Hasaraw malaykey kunda nooya.

78:50b.PSA.078.050 A na fondo hanse nga futa se, A man'i fundey suuban ka faaba buuyaŋ gaa, Amma a n'i fundey nooyandi balaaw se.

78:51b.PSA.078.051 A na hay-jiney kulu kar Misira ra, Kaŋ ga ti i gaabi sintina Ham banda kuuru fuwey ra.

78:52b.PSA.078.052 Amma a na nga borey kaa taray sanda feejiyaŋ cine, A na jina candi i se saajo ra sanda alman kuru.

78:53b.PSA.078.053 A na fondo candi i se baani samay, hal i mana humburu, Amma teeko n'i ibarey gon.

78:54b.PSA.078.054 A kand'ey nga laabu hananta hirro me gaa, Ka koy tondo kaŋ a kambe ŋwaaro day za doŋ din do.

78:55b.PSA.078.055 A na dumi cindey gaaray i jine. Neesiyaŋ boŋ no a na laabo fay-fay i se tubu, A naŋ Israyla kundey ma goro i windey ra.

78:56b.PSA.078.056 Kulu nda yaadin i na Beeray-Beeri-Koyo Irikoy si, I murte a gaa, i man'a seedey haggoy mo.

78:57b.PSA.078.057 Amma i bare ka amaana ŋwaari te sanda mate kaŋ cine i kaayey te, I siiri ka kamba sanda biraw laalo.

78:58b.PSA.078.058 Zama i n'a zokoti nda ngey tudey boŋ sududuyaŋ nangey, I naŋ canse m'a di da ngey jabuyaŋ toorey.

78:59b.PSA.078.059 Waato kaŋ Irikoy maa, a futu, a na Israyla fanta gumo,

78:60b.PSA.078.060 Hal a na nangora kaŋ go Silo furu, Kaŋ ga ti hukumo kaŋ a sinji borey game ra.

78:61b.PSA.078.061 A na jama gaabo nooyandi tamtaray se, A darza mo yanjekaaro kambe ra.

78:62b.PSA.078.062 A na nga borey nooyandi mo takuba se, A futu mo nga wane jama se.

78:63b.PSA.078.063 Danji n'i sahãkooney ŋwa, I wandiyey mo mana du hiijay doono.

78:64b.PSA.078.064 Takuba n'i alfagey* zeeri, I wayborey kaŋ kurnyey bu mo mana bu seew te.

78:65b.PSA.078.065 Gaa no Koy Beero mo hay sanda boro kaŋ tun jirbi gaa, Sanda gaabikooni kaŋ goono ga kuuwa duvan* haŋyaŋ se.

78:66b.PSA.078.066 A na nga yanjekaarey kar i ma ye banda, A naŋ i ma di foyray hal abada.

78:67b.PSA.078.067 A wangu Yusufu kuuru fuwo mo, A mana Ifraymu kunda suuban,

78:68b.PSA.078.068 Amma a na Yahuda kunda suuban, Kaŋ ga ti Sihiyona tondo kaŋ a ga ba.

78:69b.PSA.078.069 A na nga Nangu Hananta cina mo sanda tondi kuukuyaŋ, Sanda ndunnya cine kaŋ a sinji hal abada.

78:70b.PSA.078.070 A na nga tamo Dawda suuban, A n'a sambu feeji kaliyaŋ ra,

78:71b.PSA.078.071 Feejey kaŋ ga naanandi ganayaŋ do no a n'a sambu ka kande, Zama a ma Rabbi jama Yakuba kuru, Kaŋ ga ti nga wane dumo Israyla.

78:72b.PSA.078.072 Dawda n'i kuru mo nga bine cimi toonante boŋ, A n'i candi nda nga kamba gonitara.

79

79:1b.PSA.079.001 Asaf baytu fo no. Ya Irikoy, dumi cindey furo ni laabo ra, I na ni fu hananta ziibandi, I na Urusalima zeeri ka te kurmu.

79:2b.PSA.079.002 I na ni tam buukoy nooyandi beene curey se i ma ŋwa, Ni hanantey hamey mo, i n'i no ndunnya ganji hamey se.

79:3b.PSA.079.003 I n'i kurey mun sanda hari cine Urusalima windanta, Fijiko si no mo.

79:4b.PSA.079.004 Iri ciya haawi hari iri gorokasiney se, Donda-caray da hahaarayaŋ hari mo borey kaŋ yaŋ goono g'iri windi se.

79:5b.PSA.079.005 Ya Rabbi, waati fo no a ga ban? Ni ga soobay ka futu hal abada no? Ni cansa ga soobay ka ŋwa no sanda danji cine?

79:6b.PSA.079.006 Ma ni futay korna gusam dumi cindey kaŋ si ni bay boŋ. Mayrayey boŋ mo koyne kaŋ siino ga ni maa ce.

79:7b.PSA.079.007 Zama i na Yakuba ŋwa ka ban, I n'a nangora ciya kurmu mo.

79:8b.PSA.079.008 Ma si fongu iri kaayey taaley gaa k'i dake iri boŋ mo. Ma naŋ ni bakarawo ma waasu ka kaa k'iri kubay, Zama iri di kayna gumo.

79:9b.PSA.079.009 Ya iri faaba Irikoyo, m'iri gaa ni maa darza sabbay se. M'iri kaa kambe, m'iri zunubey yaafa mo, Ni maa wo sabbay se.

79:10b.PSA.079.010 Ifo se no dumi cindey ga ne: «Man no i Irikoyo go me?» Ni tamey kurey kaŋ i mun din, I ma bay a fansa banayaŋo gaa ndunnya dumi cindey ra iri jine.

79:11b.PSA.079.011 Hawantey durayyaŋo ma to ni do. Ni hino beera boŋ ni ma borey kaŋ yaŋ i suuban buuyaŋ se din hallasi.

79:12b.PSA.079.012 Ya ay Koyo, wowo kaŋ iri gorokasiney na ni wow d'a din, M'a yeti i se i gandey ra hala labu-care iyye.

79:13b.PSA.079.013 Yaadin gaa no iri, ni borey, Kaŋ ga ti ni kuray nango feejey, Iri ga saabu ni se hal abada. Iri ga ni sifayaŋo cabe zamaney kulu se.

80

80:1b.PSA.080.001 Doonkoy jine bora se. I m'a doon da subo kaŋ ga ne: «Seeda hanno.» Asaf baytu fo no.

80:2b.PSA.080.002 Ya Israyla hawjiyo, ma hanga jeeri, Nin kaŋ goono ga Yusufu candi sanda alman kuru, Nin kaŋ go koytaray karga boŋ ciiti malaykey* se beene, Ma ni kaaro kaa taray.

80:3b.PSA.080.003 Ma ni gaabo tunandi Ifraymu da Benyamin da Manasse jine, Ma kaa ka iri faaba.

80:4b.PSA.080.004 Ya Irikoy, m'iri bare ka ye. Ma naŋ ni moyduma ma kaari, iri mo ga du faaba.

80:5b.PSA.080.005 Ya Rabbi Irikoy Kundeykoyo, Waatifo no ni ga futay naŋ ni borey adduwa se?

80:6b.PSA.080.006 Ni n'i ŋwaayandi nda buuru kaŋ ra mundi go, Ni n'i haŋandi mo da mundi boobo.

80:7b.PSA.080.007 Ni naŋ iri ciya canda-canda hari iri gorokasiney se, Iri ibarey mo goono ga haaru ngey nda care game ra.

80:8b.PSA.080.008 Ya Irikoy Kundeykoyo, m'iri bare ka ye, Ma naŋ ni moyduma ma kaari, iri mo ga du faaba.

80:9b.PSA.080.009 Ni na reyzin* tikse fo dagu ka kaa Misira ra. Ni na dumi cindey gaaray ka tiksa din sinji.

80:10b.PSA.080.010 Ni na nangu soola ka jisi a se, A na nga kaajey sinji nda guusuyaŋ, A na laabo toonandi mo.

80:11b.PSA.080.011 Tondi kuukey go ga daabu nd'a biyo, A kambey ga hima Irikoy sedreyaŋ.

80:12b.PSA.080.012 A go ga nga kambey salle ka koy hala teeko me gaa, A kobtey mo go hala Isa Beero me gaa.

80:13b.PSA.080.013 Ifo se no ni n'a sinkitey kalo zeeri hala fondo ganakoy kulu goono g'a izey kosu-kosu?

80:14b.PSA.080.014 Ganji birnyey go g'a halaci, Ganji hamey go g'a kuru.

80:15b.PSA.080.015 Ya Irikoy Kundeykoyo, iri ga ni ŋwaaray, ma bare sohõ! Ni go beene. Ma fonnay, ma guna, ma tiksa din kunfa.

80:16b.PSA.080.016 Tilamo kaŋ ni kambe ŋwaaro te no, Da tuuri kamba kaŋ ni gaabandi ni boŋ se.

80:17b.PSA.080.017 I n'a beeri, i n'a ton da danji, I goono g'a halaci ni moyduma kaseetiyaŋo sabbay se.

80:18b.PSA.080.018 Ni kamba ma goro ni kambe ŋwaari bora boŋ, Kaŋ ga ti Boro Izo kaŋ ni gaabandi ni boŋ se din.

80:19b.PSA.080.019 Waato din gaa no iri si bare ka fay da nin. M'iri funandi, iri mo ga ni maa ce.

80:20b.PSA.080.020 Ya Rabbi Irikoy Kundeykoyo, m'iri bare ka ye. Ma naŋ ni moyduma ma kaari, iri mo ga du faaba.

81

81:1b.PSA.081.001 Doonkoy jine bora se. I m'a doon da moolo hamni ahakku koy karyaŋ. Asaf wane no.

81:2b.PSA.081.002 Wa farhã baytu te Irikoy iri gaabo se, Wa farhã kuuwa te Yakuba Irikoyo se.

81:3b.PSA.081.003 Wa baytu tunandi, Wa kande bitti nda moolo beeri kaŋ jinde ga kaan, da moolo.

81:4b.PSA.081.004 Wa hilli kar handu kayyaŋ hane, Da handu farsiyaŋ hane, iri bato hane nooya.

81:5b.PSA.081.005 Zama woodin ya hin sanni no Israyla se, Yakuba Irikoyo farilla mo no.

81:6b.PSA.081.006 A n'a daŋ seeda Yusufu ra, Waato kaŋ a koy Misira laabo windiyaŋ, Nango kaŋ ay maa deene kaŋ ay si bay, kaŋ ne:

81:7b.PSA.081.007 «Ay n'a jase dogonandi k'a fay da jaraw sambuyaŋ, Ay n'a kambey fulanzam da cilla.

81:8b.PSA.081.008 Taabi ra ni ce, ay na ni faaba mo. Ay tu ni se, tuyaŋo fun beene hirriyaŋ lunkey ra, Ay na ni si mo Meriba harey me gaa. (Wa dangay)

81:9b.PSA.081.009 Ya ay borey, ya Israyla, wa maa, Ay mo ga kaseeti ni gaa da ni ga yadda ka hangan ay se!

81:10b.PSA.081.010 De-koy yaw fo ma si goro ni do, Ni ma si sududu mo de-koy yaw waani fo se.

81:11b.PSA.081.011 Ay no ga ti Rabbi ni Irikoyo kaŋ na ni kaa Misira laabo ra. Ma ni meyo feeri gumo, ay mo g'a toonandi.

81:12b.PSA.081.012 Amma ay borey mana hangan ay sanno se, Israyla mana ay gana.

81:13b.PSA.081.013 Woodin se no ay fay d'ey i ma ngey hanga sanda gana kaŋ ga naŋ i ma dira ngey bumbey dabarey boŋ.

81:14b.PSA.081.014 Doŋ day ay borey ma hangan ay se, Doŋ day Israyla ma dira ay fondey ra!

81:15b.PSA.081.015 Doŋ ay g'i ibarey kar ka ye ganda nda waasi, Ay m'ay kamba bare i yanjekaarey boŋ.

81:16b.PSA.081.016 Rabbi konnakoy mo, doŋ kal i ma boŋ ye a se ganda, I banayaŋ jirbey mo ga duumi hal abada.

81:17b.PSA.081.017 Amma ay ga ni ŋwaayandi nda alkama hamni baano, Ya ni kungandi mo da tondey ra yu.»

82

82:1b.PSA.082.001 Asaf baytu fo no. Irikoy goono ga kay nga jama marga ra, A goono ga ciiti koyey game ra.

82:2b.PSA.082.002 Waati fo no araŋ ga cimi-jaŋay ciito naŋ? Araŋ goono ga baar'a-baar'a te boro laaley se mo? (Wa dangay)

82:3b.PSA.082.003 Wa londibuuney da alatuumey no cimi, Wa cimi ciiti te kankami ra waney da alfukaarey se.

82:4b.PSA.082.004 Wa londibuuney da moori ra waney faaba, W'i kaa boro laalo kambe ra.

82:5b.PSA.082.005 I si bay, i si faham mo, I goono ga koy-da-ye te kubay ra, Ndunnya tiksey kulu mo zinji.

82:6b.PSA.082.006 Ay ne: «Araŋ ya irikoyyaŋ no, Araŋ kulu mo Beeray-Beeri-Koyo izeyaŋ no.

82:7b.PSA.082.007 Kulu nda yaadin araŋ ga bu sanda borey kulu cine, Araŋ ga kaŋ sanda mayraykoyey ra afo cine.»

82:8b.PSA.082.008 Ya Irikoy, ma tun ka ciiti ndunnya se, Zama nin no ka bara nda ndunnya dumey kulu mayra.

83

83:1b.PSA.083.001 Dooni. Asaf baytu fo no.

83:2b.PSA.083.002 Ya Irikoy, ma si te siw! Ya Irikoy, ma si jaŋ sanni, ma si te sulum!

83:3b.PSA.083.003 Zama a go, ni ibarey go ga kosongu hanya-hanya, Ni konnakoy na ngey boŋ tunandi.

83:4b.PSA.083.004 I goono ga munaficitaray dabariyaŋ te ni jama se, I goono ga saawareyaŋ gurum ni wane tugantey boŋ.

83:5b.PSA.083.005 I ne: «Kaa, iri m'i tuusu, I kundatara goono yaŋo ma ban, Zama boro kulu ma si ye ka fongu Israyla maa gaa koyne.»

83:6b.PSA.083.006 Zama care banda no i go ga saaware te da bine folloŋ, I goono ga sappe kayandi ka gaaba nda nin.

83:7b.PSA.083.007 Edom kuuru fuwey, da Isumeylancey, Da Mowab, da Hagarancey,

83:8b.PSA.083.008 Da Gebal, da Amon, da Amalek, Da Filistiya, da Tir gorokoy,

83:9b.PSA.083.009 Assiriya mo na nga boŋ margu nd'ey, I na Lotu izey no gaakasinay. (Wa dangay)

83:10b.PSA.083.010 Ma te i se sanda mate kaŋ cine ni te Midiyan se, Da Sisera da Yabin se mo Cison gooro ra,

83:11b.PSA.083.011 I halaci En-Dor ra, I ciya sanda birji laabo se.

83:12b.PSA.083.012 Ni ma naŋ i jine borey ma ciya sanda Oreb da Zeyeb cine, Oho, i mayraykoyey kulu ma ciya sanda Zeeba da Zalmunna,

83:13b.PSA.083.013 Ngey kaŋ ne: «Iri ma Irikoy kurey nangey ta i ma ciya iri bumbey mayray hari.»

83:14b.PSA.083.014 Ya ay Irikoyo, m'i ciya sanda alma haw kusa, Sanda du kaŋ go haw jine,

83:15b.PSA.083.015 Sanda danji kaŋ goono ga saaji ŋwa, Sanda danji beele kaŋ goono ga tondi kuukuyaŋ diyandi.

83:16b.PSA.083.016 M'i gana k'i kankamandi nda ni haw gaabikoono yaadin cine, M'i humburandi gumo mo da ni haw gaabikoono.

83:17b.PSA.083.017 Ya Rabbi, m'i moydumey toonandi nda haawi, Zama i ma ni maa ceeci.

83:18b.PSA.083.018 I ma haaw, i ma humburu ka sukurutu hal abada, Oho, naŋ i ma di kayna ka halaci.

83:19b.PSA.083.019 Zama i ma bay kaŋ nin, ni maa no ga ti Rabbi, Ni hinne no ga ti Beeray-Beeri-Koyo ndunnya kulu boŋ.

84

84:1b.PSA.084.001 Doonkoy jine bora se. I m'a doon da moolo hamni ahakku koy karyaŋ. Kora izey baytu fo no.

84:2b.PSA.084.002 Ya Rabbi Kundeykoyo, man ni nangorayey kaaniyo misa!

84:3b.PSA.084.003 Ay bina goono ga yalla-yalla hal a yangala zaati, Rabbi windey muraadu sabbay se. Ay bina d'ay baso goono ga farhã dooni te Irikoy fundikoono se.

84:4b.PSA.084.004 Oho, sasa du nga boŋ se fu, Kumbu-hanga mo na fiti te naŋ kaŋ a ga nga izey jisi, Kaŋ ga ti ni sargay feema, ya Rabbi Kundeykoyo, Ya ay Bonkoono, ya ay Irikoyo.

84:5b.PSA.084.005 Albarkanteyaŋ no, ni windo ra gorokoy, Duumi i ga soobay ka ni sifa no. (Wa dangay)

84:6b.PSA.084.006 Albarkante no boro kaŋ gaabo go ni do, Nga kaŋ fondo beerey _ganayaŋ|_ go a bina ra.

84:7b.PSA.084.007 I ga bisa Mundi Gooro ra k'a ciya hari-mo nangu, Burjina haro mo g'a daabu nda albarka.

84:8b.PSA.084.008 Gaabi ka kaa gaabi no i go ga dira nd'a, I afo kulu goono ga bangay Irikoy jine Sihiyona ra.

84:9b.PSA.084.009 Ya Rabbi Irikoy Kundeykoyo, ma maa ay adduwa se, Ya Yakuba Irikoyo, ma hanga jeeri. (Wa dangay)

84:10b.PSA.084.010 Ya Irikoy, m'iri korayo guna, Ma ni hananta moyduma guna mo.

84:11b.PSA.084.011 Zama ni windi batamey ra zaari folloŋ ga bisa nangu fo wane zambar. Dambe day ya goro windi me batuko ay Irikoyo windo ra, A ga bis'ay se ya goro laala kwaara ra.

84:12b.PSA.084.012 Zama Rabbi Irikoy ya wayna da koray no, Rabbi ga gomni nda darza no. Hari hanno kulu si no kaŋ a ga ganji borey kaŋ yaŋ dirawey ga kay se.

84:13b.PSA.084.013 Ya Rabbi Kundeykoyo, albarkante no boro kaŋ ga de ni gaa.

85

85:1b.PSA.085.001 Doonkoy jine bora se. Kora izey baytu fo no.

85:2b.PSA.085.002 Ya Rabbi, ni boori ni laabo se. Ni ye ka kande Yakuba, a ma fun tamtaray.

85:3b.PSA.085.003 Ni na ni borey zunubo yaafa, Ni n'i zunubey kulu daabu. (Wa dangay)

85:4b.PSA.085.004 Ni na ni futa kulu candi ka kaa, Ni bare ka fay da ni futay korna.

85:5b.PSA.085.005 Ya iri faaba Irikoyo, m'iri bare ka ye. Ma naŋ ni dukuro kaŋ ni gonda iri se ma ban.

85:6b.PSA.085.006 Ni ga futu iri se no hal abada? Ni ga ni futa kuukandi ka koy hala zamaney kulu me no?

85:7b.PSA.085.007 Wala ni si ye k'iri funandi koyne, Zama ni borey ma farhã ni do?

85:8b.PSA.085.008 Ya Rabbi, ma ni baakasinay suujo cabe iri se, M'iri no ni faaba mo.

85:9b.PSA.085.009 Ay ga hangan ka maa haŋ kaŋ Rabbi Irikoy ga ci, Zama a ga laakal kanay sanni te nga borey se, Kaŋ ga ti a wane hanantey. Day i ma si ye ka bare saamotaray do haray koyne.

85:10b.PSA.085.010 Daahir, a faaba ga maan borey kaŋ yaŋ ga humbur'a gaa, Zama darza ma goro iri laabo ra.

85:11b.PSA.085.011 Baakasinay suuji nda cimi kubay, Adilitaray da laakal kanay na care garbe sunsum.

85:12b.PSA.085.012 Cimi go ga zay ka fun ganda laabo ra, Adilitaray mo go beene ga fonnay.

85:13b.PSA.085.013 Oho, Rabbi ga gomni no, iri laabo mo ga nga nafa hay.

85:14b.PSA.085.014 Adilitaray ga koy Rabbi jine, A ga nga ce gurbey ciya ganayaŋ fondo.

86

86:1b.PSA.086.001 Dawda adduwa fo no. Ya Rabbi, ma ni hanga jeeri ka tu ay se, Zama ay ya taabante no, da moorikoy mo.

86:2b.PSA.086.002 M'ay fundo hallasi, zama ay ya ni ganako no. Ya ay Irikoyo, ma ni tamo kaŋ goono ga de ni gaa faaba.

86:3b.PSA.086.003 Ya ay Koyo, ma te ay se gomni goy, Zama zaari me-a-me ni gaa no ay ga hẽ.

86:4b.PSA.086.004 Ya ay Koyo, ma ni tamo bina kaanandi, Zama ni gaa no ay g'ay bina ye.

86:5b.PSA.086.005 Zama nin, ya ay Koyo, ni ya booriyankoy no kaŋ go soolante yaafa teeyaŋ se. Ni ya baakasinay suuji boobokoy mo no, Borey kulu kaŋ yaŋ ga ni ce se.

86:6b.PSA.086.006 Ya Rabbi, ma hanga jeeri ay adduwa se, Ma hangan mo ay ŋwaaray-ŋwaarayyaŋey jinda se.

86:7b.PSA.086.007 Ay taabi zaaro ra ay ga ni ce, zama ni ga tu ay se.

86:8b.PSA.086.008 Ya ay Koyo, ni cine si no de-koyey game ra, Ni goyey cine mo si no.

86:9b.PSA.086.009 Ya Irikoy, dumey kulu kaŋ ni te ga kaa ka sududu ni jine, I ma ni maa no darza mo.

86:10b.PSA.086.010 Zama ni ya Beeraykoy no, Dambara goy teeko, ni hinne no ga ti Irikoy.

86:11b.PSA.086.011 Ya Rabbi, m'ay dondonandi ni fonda, Ay mo, ay ma dira ni cimo ra. M'ay bina sasabandi a ma humburu ni maa.

86:12b.PSA.086.012 Ya ay Koyo, ay Irikoyo, Ay bina kulu no ay ga ni saabu nd'a, Ay ma ni maa darzandi mo hal abada.

86:13b.PSA.086.013 Zama ni baakasinay suujo ya ibambata no ay do haray, Ni n'ay fundo faaba ka kaa Alaahara ganda ra.

86:14b.PSA.086.014 Ya Irikoy, boŋbeeraykoyey tun ay se, Toonyante sata mo n'ay fundo ceeci, I mana ni daŋ ngey jine.

86:15b.PSA.086.015 Amma nin wo, ya ay Koyo, Ni ya Irikoy suuji nda gomnikoy no, Kaŋ ga suuru hala ni ga futu, Ni ya baakasinay suuji nda cimi yulwante Koy no.

86:16b.PSA.086.016 Ma bare ay do haray ka gomni te ay se. Ma ni gaabo no ay, ni tamo se ka ni koŋŋa izo faaba.

86:17b.PSA.086.017 Ma booriyaŋ alaama cab'ay se mo, Zama borey kaŋ yaŋ wangu ay ma di a. I ma haaw mo, zama nin, ya Rabbi, Ni n'ay gaa, ni n'ay kunfa mo.

87

87:1b.PSA.087.001 Kora izey baytu fo no, dooni mo no. Rabbi daba go tondi hanantey ra.

87:2b.PSA.087.002 A ga ba Sihiyona kwaara meyey ka bisa Yakuba ra nangorayey kulu.

87:3b.PSA.087.003 Ya nin Irikoy gallo, Muraadu darzante beeri yaŋ no i ga ni sanni te d'a. (Wa dangay)

87:4b.PSA.087.004 A ne: «Ay ga Rahab da Babila sanni te borey kaŋ yaŋ g'ay bay game ra. Guna Filistiya da Tir da Etiyopi. I ne: ‹I na bora din hay Sihiyona ra.› »

87:5b.PSA.087.005 Oho, i ga ne: «Filaana nda filaana wo, Sihiyona ra no i n'i hay.» Beeray-Beeri-Koyo bumbo mo no ga gallo tabbatandi.

87:6b.PSA.087.006 Rabbi ga kabu-kabu waati kaŋ a ga dumey lasaabuyaŋo hantum, Ka ne: «Woone, noodin no i n'a hay.» (Wa dangay)

87:7b.PSA.087.007 Doonkoy da gaankoy kulu ga ne: «Hay kulu kaŋ g'ay bina yeenandi si kala ni do.»

88

88:1b.PSA.088.001 Kora izey baytu fo no. Doonkoy jine bora se. I m'a doon da seese karyaŋ. Heman Ezra bora baytu fo no.

88:2b.PSA.088.002 Ya Rabbi, ay faaba Irikoyo, Cin da zaari ay hẽ ni jine.

88:3b.PSA.088.003 Naŋ ay adduwa ma furo ni do. Ma ni hanga jeeri ka maa ay hẽeno se.

88:4b.PSA.088.004 Zama ay fundo go ga to da masiiba maayaŋ, Ay fundo go ga maan Alaahara gaa mo.

88:5b.PSA.088.005 I g'ay lasaabu borey kaŋ yaŋ ga gunguray ka koy guuso ra banda, Ay ga hima boro kaŋ sinda gaabi.

88:6b.PSA.088.006 Furante no ay go buukoy ra, danga borey kaŋ yaŋ i wi, Kaŋ yaŋ ga kani saaray ra, Borey kaŋ yaŋ ni si ye ka fongu i gaa koyne, Dumbanteyaŋ no, i fun ni kamba ra.

88:7b.PSA.088.007 Ni n'ay jisi guuso ra hala ganda, Kubay nangey ra, guusuyaŋey ra.

88:8b.PSA.088.008 Ni futa go g'ay naan. Ni n'ay taabandi nda ni bondayey kulu. (Wa dangay)

88:9b.PSA.088.009 Ni n'ay corey moorandi ay, Ni n'ay ciya fanta hari i do. Ay go daabante, ay si hin ka fatta.

88:10b.PSA.088.010 Ay mwa suugu taabi sabbay se. Ya Rabbi, han kulu ay na ni ce, Ay n'ay kambey salle ni do haray.

88:11b.PSA.088.011 Ni ga dambara goyyaŋ te buukoy se no? Buuko biyey ga tun ka ni sifa, wala? (Wa dangay)

88:12b.PSA.088.012 I ga ni baakasinay suujo baaru dede saaray ra no? Wala ni naanayo mo halaciyaŋ ra?

88:13b.PSA.088.013 I ga ni dambara goyey bayrandi kubay ra no? I ga ni adilitara mo bayrandi dinyayaŋ laabu ra, wala?

88:14b.PSA.088.014 Amma nin, ya Rabbi, ni gaa no ay hẽ gaakasinay se, Susubay mo ay adduwey ga koy ni jine.

88:15b.PSA.088.015 Ya Rabbi, ifo se no ni n'ay fundo hibandi? Ifo se no ni na ni moyduma tugu ay se?

88:16b.PSA.088.016 Za ay go zanka ay na taabi haŋ, A go, ay ga ba ka bu mo. Ay go ni humburkumay beerey haŋyaŋ bindo ra, Ay boŋ haw.

88:17b.PSA.088.017 Ni futay korna gana ay boŋ, Ni humburkumay beerey n'ay halaci.

88:18b.PSA.088.018 I n'ay windi sanda hari boobo zaari me-a-me, I n'ay koli ka windi ce folloŋ.

88:19b.PSA.088.019 Ni _n'ay|_ baako da hangasin kulu moorandi ay, Ay mo-ka-bayray borey mo go kubay ra.

89

89:1b.PSA.089.001 Ezra bora Etan baytu fo no.

89:2b.PSA.089.002 Ay ga Rabbi baakasinay suujey baytu hal abada. Ay meyo no ay ga ni naanayo baaru seeda nd'a zamaney kulu se.

89:3b.PSA.089.003 Zama ay ne: «Baakasinay suuji ga tonton hal abada, Ni ga ni naanayo sinji hala beeney ra.»

89:4b.PSA.089.004 Ni ne: «Ay na alkawli sambu ay suubananta se, Ay ze ay tamo Dawda se

89:5b.PSA.089.005 ka ne: ‹Ay ga ni dumo sinji hal abada, Ay ma ni karga mo tabbatandi hala ka koy zamaney kulu gaa.› » (Wa dangay)

89:6b.PSA.089.006 Ya Rabbi, beeney ga ni dambara goyey sifa, I ga ni naanayo mo sifa hanantey marga jama ra.

89:7b.PSA.089.007 Zama may no ka bara beene kaŋ i ga deedandi Rabbi gaa? Hinkoyey izey ra, may no ga hima Rabbi?

89:8b.PSA.089.008 Irikoy ya humburkumay hari no hanantey faada ra, Dambarandiyankoy mo no ka bisa borey kulu kaŋ goono g'a windi.

89:9b.PSA.089.009 Ya Rabbi Irikoy Kundeykoyo, May no ga ti gaabikoy sanda ni cine, ya Rabbi Hinkoyo? Ni naanayo mo go ni windanta.

89:10b.PSA.089.010 Ni ga teeko boŋbeera dabari, Waati kaŋ bonday beerey ga tun ka ciciri, Ni ga i kanandi no.

89:11b.PSA.089.011 Ni bumbo no ka Rahab ceeri-ceeri, Sanda nga kaŋ i wi cine. Ni na ni ibarey say-say da ni kambe gaabikoono.

89:12b.PSA.089.012 Beeney ya ni wane no, ganda laabo mo ni wane no. Ndunnya da nga tooyaŋo, nin no k'i sinji.

89:13b.PSA.089.013 Azawa da dandi kamba, nin no k'i taka, Tabor da Hermon goono ga farhã kuuwa te ni maa ra.

89:14b.PSA.089.014 Ni gonda kambe gaabikooni, Ni kambe jasa ya gaabikooni no, Ni kambe ŋwaaro mo beeraykoy no.

89:15b.PSA.089.015 Adilitaray da cimi ciiti, ngey no ga ti ni karga tiksa. Baakasinay suuji nda cimi no go ga dira ni jine.

89:16b.PSA.089.016 Albarkante no dumo din kaŋ ga waani ni sifayaŋ, Ya Rabbi, i goono ga dira ni moyduma kaaro ra.

89:17b.PSA.089.017 I ga farhã ni maa ra zaari me-a-me, Ni adilitara ra mo no i du beeray.

89:18b.PSA.089.018 Zama nin no ga ti i gaabo darza, ni yaddayaŋo ra no ni g'iri hillo tunandi.

89:19b.PSA.089.019 Zama iri korayo ya Rabbi wane no, Sanda iri Bonkoono, Israyla wane Hananyankoyo nooya.

89:20b.PSA.089.020 Waato no ni salaŋ ni ganakoy se bangandi ra ka ne: «Ay na gaakasinay dake bora kaŋ gonda hina din boŋ. Ay na boro fo kaŋ i suuban borey ra beerandi.

89:21b.PSA.089.021 Ay du ay tamo Dawda, ay n'ay ji hananta tuusu a gaa.

89:22b.PSA.089.022 A do no ay kamba ga tabbat, ay kamba g'a gaabandi.

89:23b.PSA.089.023 Ibare s'a tilasandi a ma nooru nda hari bana, Laala izey mo s'a taabandi.

89:24b.PSA.089.024 Ay g'a yanjekaarey kar ka zeeri a jine, Ay ma borey kaŋ yaŋ ga konn'a mo kar.

89:25b.PSA.089.025 Amma ay naanayo d'ay baakasinay suujo ga goro a banda, Ay maa ra mo no a hillo ga beeri.

89:26b.PSA.089.026 Ay g'a kambe dake teeko boŋ, A kambe ŋwaaro mo isey boŋ.

89:27b.PSA.089.027 A g'ay ce ka ne: ‹Nin no ga ti ay Baaba, D'ay Irikoyo, d'ay faaba tondi daaro mo.›

89:28b.PSA.089.028 Ay mo g'a ciya ay hay-jina, Kaŋ gonda beeray ka bisa i kulu ndunnya bonkooney ra.

89:29b.PSA.089.029 Ay ga haggoy d'ay baakasinay suujo a do haray hal abada, Ay g'ay alkawlo mo tabbatandi a se.

89:30b.PSA.089.030 Ay ga naŋ a banda ma duumi hal abada, A karga mo sanda beene jirbey cine.

89:31b.PSA.089.031 D'a izey fay d'ay asariya, i mana ay ciitey gana mo,

89:32b.PSA.089.032 D'i n'ay hin sanney daaru, I mana ay lordey haggoy mo,

89:33b.PSA.089.033 Waati din gaa no ay ga kaa i lordi daaruyaŋo gaa da goobu, Ya kaa i taaley gaa mo da barzu.

89:34b.PSA.089.034 Amma ay s'ay baakasinay suujo hibandi ka kaa a gaa parkatak bo, Ay si fafagay goy te mo ay naanayo ra.

89:35b.PSA.089.035 Ay s'ay alkawlo feeri, Haŋ kaŋ fun ay me ra mo, ay s'a barmay.

89:36b.PSA.089.036 Sorro fo no ay ze ay hananyaŋo boŋ, Ay si tangari Dawda se bo,

89:37b.PSA.089.037 Nga ga ti: a banda ga tabbat hal abada, A karga mo sanda wayna cine no ay jine.

89:38b.PSA.089.038 A ga sinji sanda hando cine hal abada, Sanda seeda naanaykoy kaŋ go beene batama ra no.» (Wa dangay)

89:39b.PSA.089.039 Amma ni wane suubananta, ni n'a furu no, Ni futu a se gumo mo.

89:40b.PSA.089.040 Ni na alkawlo kaŋ ni sambu ni tamo se fanta, Ni n'a koytara fuula zeeri k'a ziibandi.

89:41b.PSA.089.041 Ni n'a birni cinarey kulu bagu-bagu, Ni n'a gallo ciya kurmu.

89:42b.PSA.089.042 Fonda ganakoy kulu go g'a ku, A ciya wowi hari nga gorokasiney se.

89:43b.PSA.089.043 Ni n'a yanjekaarey kambe ŋwaaro tunandi, Ni naŋ a ibarey kulu ma farhã.

89:44b.PSA.089.044 Oho, ni n'a takuba me kaana bare, Ni man'a gaabandi wongu ra.

89:45b.PSA.089.045 Ni n'a darza wi, ni n'a koytaray karga catu ganda.

89:46b.PSA.089.046 Ni n'a zankataray jirbey dunguriyandi, Ni n'a daabu nda haawi. (Wa dangay)

89:47b.PSA.089.047 Ya Rabbi, kala waatifo? Ni ga soobay ka tugu no hal abada? Waatifo no ni futa kaŋ ga ŋwa sanda danji cine wo ga ban?

89:48b.PSA.089.048 Ma fongu kaŋ ay aloomaro si ku, Ma fongu mate kaŋ ni na Adam-izey kulu taka i ga ciya yaamo.

89:49b.PSA.089.049 Man bora kaŋ ga funa, a ma jaŋ ka di buuyaŋ? Boro kaŋ ga nga fundo faaba Alaahara kambe, A go no, wala? (Wa dangay)

89:50b.PSA.089.050 Ya ay Koyo, man ni waato baakasinay suujey, Wo kaŋ yaŋ ni ze d'a Dawda se ni naanayo ra?

89:51b.PSA.089.051 Ya ay Koyo, ma fongu wowey kaŋ ni tamey go ga haŋ, Mate kaŋ cine ay go ga dumi cindey kulu wowey jare ay ganda ra,

89:52b.PSA.089.052 Nangey kaŋ ni ibarey na wowey te, ya Rabbi, Nangey kaŋ i na ni wane suubananta ce gurbey wow.

89:53b.PSA.089.053 I ma Rabbi sifa hal abada! Amin! Amin!

90

90:1b.PSA.090.001 Irikoy bora Musa adduwa fo no. Ya ay Koyo, nin no ga ti iri nangora za zamaney kulu ra.

90:2b.PSA.090.002 Za i mana tondi kuukey fattandi, Za ni mana laabo da ndunnya taka, Za doŋ-doŋ kaŋ sinda me ka koy hal abada abadin, Nin no ga ti Irikoy.

90:3b.PSA.090.003 Ni ga boro bare k'a ciya kusa. Ni ga ne mo: «Ya Adam-izey, wa ye ka ye.»

90:4b.PSA.090.004 Zama jiiri zambar fo ga hima ni se sanda bi kaŋ bisa, Danga cin ra batuyaŋ alwaati folloŋ.

90:5b.PSA.090.005 Ni g'i hibandi danga hari-yaa* no, i ga jirbi, Susubay mo i ga hima subu kaŋ go ga fun:

90:6b.PSA.090.006 Susubay a ga zaada, a ga beeri, Wiciri kambu mo i g'a wi, a ga koogu.

90:7b.PSA.090.007 Zama ni futa ra no ni na iri ŋwa, Ni futay korna ra mo, ni n'iri laakal tunandi.

90:8b.PSA.090.008 Ni n'iri laala daŋ ni jine, Iri zunubi tugantey mo, Ni n'i daŋ ni moyduma kaaro ra.

90:9b.PSA.090.009 Zama iri jirbey kulu bisa ni futa ra, Iri na iri jiirey ban sanda ciinay jinde cine.

90:10b.PSA.090.010 Iri fundey jirbey kulu, jiiri wayye no. Da boro gaaham gonda gaabi no, a ga to jiiri wahakku, I fooma ya taabi nda bine saray day no. Zama a ga bisa da waasi, iri ga tun ka deesi mo.

90:11b.PSA.090.011 May no ga faham da ni futa hina? Ni futay korna da ni humburando ga saba nda care.

90:12b.PSA.090.012 M'iri dondonandi iri m'iri jirbey kabu, Kaŋ ga naŋ iri ma du bine kaŋ gonda laakal.

90:13b.PSA.090.013 Ya Rabbi, kala waatifo no ni ga ye ka kaa? Ma bakar mo ni tamey se.

90:14b.PSA.090.014 M'iri kungandi susubay da ni baakasinay suujo, Zama iri ma doon farhã sabbay se, Iri ma te bine kaani mo iri jirbey kulu ra.

90:15b.PSA.090.015 M'iri biney kaanandi jirbey kaŋ ni na iri taabandi baayaŋo me, Da jiirey kaŋ ra iri di laala mo hina me.

90:16b.PSA.090.016 Ma naŋ ni goyo ma bangay ni tamey se, Ni darza mo i izey se.

90:17b.PSA.090.017 Rabbi, iri Irikoyo booriyaŋo ma goro iri boŋ. M'iri kambe goyey tabbatandi iri se. Oho, iri kambe goyey, m'i tabbatandi.

91

91:1b.PSA.091.001 Beeray-Beeri-Koyo bukka ra gorokwa ga tondo Hina-Kulu-Koyo biyo cire.

91:2b.PSA.091.002 Ay ga ne Rabbi se kaŋ nga ya ay koruyaŋ do no, d'ay gaabi nangu, D'ay Irikoyo mo. A gaa no ay ga de.

91:3b.PSA.091.003 Zama nga no ga ni kaa ni koliko hirrimi ra, Da balaaw kaŋ ga kande buuyaŋ mo ra.

91:4b.PSA.091.004 A ga ni daabu nda nga hamno, Ni ga du kosaray a fatey cire. A cimo ya koray da guuru kwaay no.

91:5b.PSA.091.005 Cin humburkumay si ni di, Wala mo hangaw kaŋ ga tun zaari,

91:6b.PSA.091.006 Wala balaaw kaŋ ga lamba kubay ra, Wala halaciyaŋ kaŋ ga leemun zaari bindi.

91:7b.PSA.091.007 Boro zambar ga kaŋ ni tanjay, Zambar way mo koyne ni kambe ŋwaari gaa, Amma a si maan ni gaa.

91:8b.PSA.091.008 Ni moy hinne no ni ga guna nd'a ka di boro laaley banando.

91:9b.PSA.091.009 Zama nin, ya Rabbi, nin no ga ti ay koruyaŋ do! Beeray-Beeri-Koyo ciya ni gora do.

91:10b.PSA.091.010 Laala si no kaŋ ga du nin, Balaaw fo mo si no kaŋ ga maan ni bukka gaa.

91:11b.PSA.091.011 Zama a ga lordi no nga malaykey se ni boŋ, I ma ni hallasi ni fondey kulu ra.

91:12b.PSA.091.012 I ga ni tambe ngey kambey ra, Zama ni ma si ni ce nuku tondi gaa.

91:13b.PSA.091.013 Ni ga muusu beeri nda firsa taamu, Muusu beeri ize da gondi beeri mo, Ni g'i taamu-taamu ni ce taamey cire.

91:14b.PSA.091.014 «Za kaŋ a na nga baakasina sinji ay gaa, Woodin sabbay se no ay mo g'a kaa kambe. Ay g'a hallasi zama a g'ay maa bay.

91:15b.PSA.091.015 A g'ay ce, ay mo ga tu a se. Kankami ra ay ga bara a banda. Ay g'a faaba, ay g'a beerandi mo.

91:16b.PSA.091.016 Ay g'a no aloomar kuuku hal a ma ne a wasa, Ay g'ay faaba mo bangandi a se.»

92

92:1b.PSA.092.001 Asibti* hane baytu.

92:2b.PSA.092.002 Rabbi se saabuyaŋ ga boori. Ya Beeray-Beeri-Koyo, i ma sifaw baytu te ni maa gaa, Nga mo ga boori.

92:3b.PSA.092.003 I ma ni baakasinay suujo ci susubay, Ni naanayo mo cin kulu,

92:4b.PSA.092.004 Da moolo beeri hamni way koy, da moolo kayna mo, Da moolo beeri kaŋ ga tu jinde.

92:5b.PSA.092.005 Zama ni goyo do, ya Rabbi, ni n'ay bina kaanandi. Ay ga farhã baytu te ni kambe goyey sabbay se.

92:6b.PSA.092.006 Ya Rabbi, man ni te-goyey beera misa! Ni fonguyaŋey ga guusu gumo.

92:7b.PSA.092.007 Boro alman alhaalikoy si bay, Saamo mo si faham da woone:

92:8b.PSA.092.008 Waati kaŋ cine laalakoyey ga zay ka fun sanda subu cine, Saaya kaŋ cine laala goy teekoy kulu ga zaada, I ma halaci hal abada sabbay se no.

92:9b.PSA.092.009 Amma nin, ya Rabbi, ni ya Beeraykoy no hal abada.

92:10b.PSA.092.010 Zama a go, ni ibarey, ya Rabbi, Zama a go, ni ibarey ga halaci, Laala goy teekoy kulu ga say-say.

92:11b.PSA.092.011 Amma ni n'ay hillo tunandi sanda haw-bi wane cine, I n'ay tuusu nda ji taji.

92:12b.PSA.092.012 Ay moy n'ay batandikoy guna nda farhã, Ay hangey maa laala goy teekoy kaŋ yaŋ ga tun ay se baaru.

92:13b.PSA.092.013 Adilante ga zaada sanda sabb'ize cine, A ga beeri sanda Liban ra sedre* nya cine.

92:14b.PSA.092.014 Ngey kaŋ yaŋ i tilam Rabbi windo ra ga zaada iri Irikoyo windi batama ra.

92:15b.PSA.092.015 I ga soobay ka hay baa ngey zeena ra, I ga goro nda maani nda tayyaŋ,

92:16b.PSA.092.016 Zama i ma cabe kaŋ Rabbi ya haŋ kaŋ ga saba teeko no. Ay tondi daaro no, a ra sinda adilitaray-jaŋay mo.

93

93:1b.PSA.093.001 Rabbi no ga may, a go ga daabu nda koytaray darza. Rabbi goono ga daabu nda hin, Nga mo no a na nga boŋ guddu nd'a. Daahir, ndunnya sinji, mate kaŋ a si gana mo.

93:2b.PSA.093.002 Ni karga, sinjante no a go za doŋ. Za doŋ-doŋ kaŋ sinda me mo, ni go no.

93:3b.PSA.093.003 Ya Rabbi, isa na jinde sambu. Isey na ngey jindey sambu, Isey na ngey bondayey tunandi.

93:4b.PSA.093.004 Rabbi ya Hinkoy no beene ka bisa hari boobo jinde, Ka bisa teeku bonday gaabikooney.

93:5b.PSA.093.005 Ni seedey ya tabbatanteyaŋ no gumo. Ya Rabbi, hananyaŋ ga hagu ni windo se hal abada.

94

94:1b.PSA.094.001 Ya Rabbi, banayaŋ Irikoyo, Nin, Irikoy banayankoy, ma kaari zortandi!

94:2b.PSA.094.002 Ya ndunnya Ciitikwa, ma tun ka kay! Ma bana boŋbeeraykoyey gaa.

94:3b.PSA.094.003 Ya Rabbi, hala waati fo? Waati fo no laalakoyey ga fay da ngey boŋ zamuuyaŋ?

94:4b.PSA.094.004 I goono ga sanni yaamo dooru, I goono ga boŋbeeray sanniyaŋ te. Laala goy teekoy kulu goono ga fooma.

94:5b.PSA.094.005 Ya Rabbi, i goono ga ni borey bagu-bagu, I na ni wane borey taabandi.

94:6b.PSA.094.006 I goono ga wayboro kaŋ kurnye bu, Da yaw, da alatuumi mo wi.

94:7b.PSA.094.007 I ga ne mo: «Rabbi si di. Yakuba Irikoyo si laakal ye bo.»

94:8b.PSA.094.008 Ya araŋ, borey ra alman laakalkoyey, wa haggoy fa! Araŋ mo saamey, waati fo no araŋ ga te laakal?

94:9b.PSA.094.009 Nga kaŋ na hanga sinji, nga wo si maa, wala? Wala mo nga kaŋ na mo te, a si di no?

94:10b.PSA.094.010 Nga kaŋ ga dumi cindey gooji si kaseeti bo? Nga kaŋ ga boro dondonandi bayray.

94:11b.PSA.094.011 Rabbi ga boro miiley bay, kaŋ yaamoyaŋ no.

94:12b.PSA.094.012 Ya Rabbi, albarkante no boro kaŋ ni ga gooji, Ni g'a dondonandi mo da ni asariya.

94:13b.PSA.094.013 Zama ni m'a no fulanzamay k'a waa taabi jirbey, Hal i ga guusu hirrimi fansi laalakoyey se.

94:14b.PSA.094.014 Zama Rabbi si fay da nga jama, A si nga waney furu mo.

94:15b.PSA.094.015 Zama ciiti ga ye ka ciya adilitaray wane, Borey kulu kaŋ bine ga saba mo g'a gana.

94:16b.PSA.094.016 May no ga furo ay se ka gaaba nda laala goy teekoy? May no ga kay ka gaaba nda taali-teerey ay se?

94:17b.PSA.094.017 Da manti kaŋ Rabbi no ga ti ay Gaakwa, Doŋ a si gay kaŋ ay fundo ga goro siw nango ra.

94:18b.PSA.094.018 Ya Rabbi, saaya kaŋ cine ay ne ay ce ga tansi, Ni baakasinay suujo n'ay gaay.

94:19b.PSA.094.019 Karhã boobo kaŋ go ay gaa waate ni kunfayaŋey goono g'ay bine kaanandi.

94:20b.PSA.094.020 Laala karga kaŋ ga zamba dabari te hin sanni boŋ, A ga gorokasinay da nin no?

94:21b.PSA.094.021 Wuup, folloŋ! i tun adilante fundo se, I goono ga boro kaŋ sinda taali zeeri nda buuyaŋ ciiti.

94:22b.PSA.094.022 Amma Rabbi ya ay cinari kuuko no, Ay Irikoyo mo, ay koruyaŋ tondo mo no.

94:23b.PSA.094.023 A n'i taaley ye i boŋ, A g'i tuusu i laalayaŋo ra, Rabbi iri Irikoyo g'i tuusu.

95

95:1b.PSA.095.001 Wa kaa, iri ma farhã baytu te Rabbi se, Iri ma cilili iri faaba tondo se.

95:2b.PSA.095.002 Iri ma kaa a jine da saabuyaŋ, Iri ma farhã kuuwa te a se da baytuyaŋ.

95:3b.PSA.095.003 Zama Rabbi ya Irikoy beeri no, Bonkooni bambata no de-koyey kulu boŋ.

95:4b.PSA.095.004 A kambe ra no ndunnya guusuyaŋey go, Tondi kuukey yolley mo, a wane yaŋ no.

95:5b.PSA.095.005 Teeko ya a wane no, nga mo no k'a te, A kambey mo no ka laabu koga te.

95:6b.PSA.095.006 Wa kaa, iri ma sududu, iri ma gungum, Iri ma sombu Rabbi iri Takakwa jine

95:7b.PSA.095.007 zama nga ya iri Irikoyo no, Iri mo a kuray nangey boroyaŋ no, A kambe feejiyaŋ mo no. Hunkuna, d'araŋ maa a jinda,

95:8b.PSA.095.008 Wa s'araŋ biney sandandi, sanda Meriba ra wano cine, Sanda Massa zaaro cine saajo ra,

95:9b.PSA.095.009 Naŋ kaŋ araŋ kaayey n'ay gosi k'ay si. I di ay goyo,

95:10b.PSA.095.010 Jiiri waytaaci no ay na zamana din izey fanta. Ay ne: «Jama no kaŋ go ga daray ngey biney ra, I man'ay fondey bay mo.

95:11b.PSA.095.011 Woodin se no ay ze ay futa ra ka ne: ‹Daahir i si furo ay fulanzamyaŋo ra.› »

96

96:1b.PSA.096.001 Wa baytu taji te Rabbi se! Ya araŋ ndunnya kulu, wa baytu Rabbi se.

96:2b.PSA.096.002 Wa baytu Rabbi se, w'a maa albarka sifa. W'a faaba baaru hanna fe hunkuna nda suba.

96:3b.PSA.096.003 W'a darza dede dumi cindey game ra, A dambara goyey mo dumey kulu game ra.

96:4b.PSA.096.004 Zama Rabbi ya Beeraykoy no, A to sifayaŋ beeri gumo. A to i ma humbur'a mo ka bisa de-koyey kulu.

96:5b.PSA.096.005 Zama dumi cindey de-koyey kulu tooruyaŋ day no, Amma Rabbi no ka beeney te.

96:6b.PSA.096.006 Beeray da koytaray darza go a jine, Gaabi nda gaakuri go no a Nangu Hananta ra.

96:7b.PSA.096.007 Ya araŋ dumey kulu almayaaley, wa Rabbi seeda! Wa Rabbi darza d'a gaabo seeda.

96:8b.PSA.096.008 Wa Rabbi darza kaŋ ga saba nd'a maa seeda. Wa kande ŋwaari sargay ka furo a windo batamey ra.

96:9b.PSA.096.009 Wa sududu Rabbi se, zama a gonda darza hanno. Ya araŋ ndunnya kulu, wa jijiri a jine.

96:10b.PSA.096.010 Dumi cindey ra i ma ne: «Rabbi no ga may! Daahir no ndunnya sinji hala mate kaŋ a si zinji. Rabbi ga ndunnya dumey ciiti da haŋ kaŋ ga saba.»

96:11b.PSA.096.011 Beeney ma maa kaani, ganda mo ma farhã, Teeko ma dundu, nga nda nga tooyaŋo.

96:12b.PSA.096.012 Saajo mo ma zamu, nga nda hay kulu kaŋ go a ra, Waato din gaa no, saajo tuuri-nyaŋey kulu mo ga doon Rabbi jine farhã sabbay se,

96:13b.PSA.096.013 Zama a goono ga kaa, A goono ga kaa ndunnya ciito sabbay se. A ga ciiti ndunnya se da adilitaray, Ndunnya dumey mo se da nga naanayo.

97

97:1b.PSA.097.001 Rabbi no ga may, ndunnya ma farhã. Gungey margey ma te bine kaani.

97:2b.PSA.097.002 Beene hirriyaŋey da kubay go g'a windi, Adilitaray da cimi ciiti no ga ti a karga daba.

97:3b.PSA.097.003 Danji go ga koy a jine, A g'a ibarey kaŋ go g'a windi ton.

97:4b.PSA.097.004 A maliyaŋey go ga ndunnya kaarandi, Ndunnya go ga di, a go ga jijiri mo.

97:5b.PSA.097.005 Tondi kuukey go ga manne Rabbi jine sanda yu fanta cine, Ndunnya kulu Koyo jine nooya.

97:6b.PSA.097.006 Beeney go g'a adilitara fe, dumey kulu mo di a darza.

97:7b.PSA.097.007 Danay tooru ganakoy kulu haaw, Kaŋ ga ti borey kaŋ yaŋ ga fooma nda tooru. Ya araŋ malaykey kulu kaŋ gaa borey ga de, Wa sududu Rabbi se.

97:8b.PSA.097.008 Sihiyona go ga maa woodin, a bine go ga kaan mo. Ya Rabbi, Yahuda ize wayey go ga farhã ni ciitey sabbay se.

97:9b.PSA.097.009 Zama ni ya Rabbi Beeray-Beeri-Koy no ndunnya kulu boŋ. Ni beera go beene ka bisa de-koyey kulu.

97:10b.PSA.097.010 Ya araŋ kaŋ yaŋ ga ba Rabbi, kal araŋ ma konna ilaalo, Nga wo a wane hanantey fundey hallasikwa no, A g'i kaa laalakoyey kambe ra mo.

97:11b.PSA.097.011 I ga annura duma adilante se, Da bine kaani mo borey kaŋ yaŋ biney ga kay se.

97:12b.PSA.097.012 Ya araŋ adilantey, wa te bine kaani Rabbi ra, Wa saabu a maa hanna se.

98

98:1b.PSA.098.001 Baytu no. Wa baytu taji te Rabbi se, Zama a na dambara goyyaŋ te. A kambe ŋwaaro d'a jasa hanna na faaba goy te a se.

98:2b.PSA.098.002 Rabbi na nga faaba bayrandi, A na nga adilitara mo cabe taray kwaaray dumi cindey jine.

98:3b.PSA.098.003 A fongu nga baakasinay suujo da nga naanayo gaa Israyla dumo se. Ndunnya me-a-me di iri Irikoyo faaba.

98:4b.PSA.098.004 Ya ndunnya kulu, wa farhã kuuwa te Rabbi se. Wa bagu nda baytuyaŋ farhã sabbay se, Oho, wa sifayaŋ baytu te.

98:5b.PSA.098.005 Wa sifayaŋ baytu te Rabbi se moolo beeri boŋ, I m'a te da moolo beeri nda subu kaŋ maayaŋ ga kaan,

98:6b.PSA.098.006 Da hilli kosongu, da seese jinde care banda. Wa farhã kuuwa te Bonkoono jine, kaŋ ga ti Rabbi.

98:7b.PSA.098.007 Teeko ma dundu, nga nda nga tooyaŋo, Ndunnya mo da nga ra gorokoy,

98:8b.PSA.098.008 Isey ma kobi care banda, tondi kuukey ma doon Rabbi jine farhã sabbay se,

98:9b.PSA.098.009 Zama a goono ga kaa hala nga ma ndunnya ciiti. A ga ndunnya ciiti da adilitaray, Dumey mo da haŋ kaŋ ga saba.

99

99:1b.PSA.099.001 Rabbi no ga may, dumey ma jijiri! A goono ga goro ciiti malaykey* boŋ, ndunnya ma zinji.

99:2b.PSA.099.002 Rabbi ya beeraykoy no Sihiyona ra, Beeray-Beeri-Koy no dumey kulu boŋ.

99:3b.PSA.099.003 I ma ni maa beero kaŋ ga humburandi sifa, Zama nga wo ihanno no.

99:4b.PSA.099.004 Ni ya Koy Beeri no, ni ga ba cimi ciiti. Ni ga haŋ kaŋ ga saba sinji, Ni ga cimi ciiti nda adilitaray te Yakuba ra.

99:5b.PSA.099.005 Wa Rabbi iri Irikoyo beerandi, Wa sududu a ce furkanga do, Zama nga wo Hananyankoy no.

99:6b.PSA.099.006 Musa nda Haruna go no a alfagey ra waato, Samuwila mo go borey kaŋ yaŋ g'a maa ce ra. I na Rabbi maa ce, a tu i se mo.

99:7b.PSA.099.007 A salaŋ i se buru sari himando ra, I n'a seedey da hin sanno kaŋ a no i se din haggoy.

99:8b.PSA.099.008 Ya Rabbi iri Irikoyo, ni tu i se. Ni ciya i se Irikoy kaŋ na yaafa, Amma ni n'i bana nda ngey goy laaley.

99:9b.PSA.099.009 Wa Rabbi iri Irikoyo beerandi, Wa sududu a tondi hananta boŋ, Zama Rabbi iri Irikoyo ya Hananyankoy no.

100

100:1b.PSA.100.001 Saabuyaŋ baytu. Ya ndunnya kulu, wa farhã kuuwa te Rabbi se,

100:2b.PSA.100.002 Wa may Rabbi se da bine kaani, Wa kaa a jine da farhã baytuyaŋ.

100:3b.PSA.100.003 Wa bay kaŋ Rabbi no ga ti Irikoy, Nga no k'iri te, iri ya a wane yaŋ mo no. Iri ya a boroyaŋ no, a kuray nango feejiyaŋ mo.

100:4b.PSA.100.004 Wa furo a windi meyey ra da saabuyaŋ, A windi batamey ra mo da sifaw. Wa saabu a se, w'a maa sifa.

100:5b.PSA.100.005 Zama Rabbi ya booriyankoy no, A baakasinay suujo go no hal abada. A naanayo mo hala ka koy zamaney kulu me no.

101

101:1b.PSA.101.001 Dawda baytu fo no. Ay ga baakasinay suuji nda cimi ciiti baytey te. Ya Rabbi, ay ga sifayaŋ baytu te ni se.

101:2b.PSA.101.002 Ay ga laakal d'ay muraadey fonda kaŋ go cimi toonante ra. Waati fo no ni ga kaa ay do? Bine sabayaŋ no ay ga dira nd'a ay windo ra.

101:3b.PSA.101.003 Ay si hay fo yaamo daŋ ay moy jine, Kambayankoyey goyo, ay konn'a. A s'ay di mo.

101:4b.PSA.101.004 Bine kaŋ ga siiri ga mooru ay, Ay si yadda ya goy laalo bay mo.

101:5b.PSA.101.005 Boro kaŋ ga tugu ka nga gorokasin maa sara, Ay g'a koy halaci. Boro kaŋ gonda boŋbeeray da fundi beeray, Ay si suuru nd'a.

101:6b.PSA.101.006 Ay moy go no laabo naanaykoyey gaa, Zama i ma goro ay banda. Boro kaŋ ga dira fondo cimi toonantekoy ra, Nga no ga goy ay se.

101:7b.PSA.101.007 Gulinci goykoy si goro ay windo ra, Tangarikom mo si kay ay jine.

101:8b.PSA.101.008 Susubay kulu ay ga soobay ka laabo ra boro laaley kulu halaci, zama i ma taali-teerey kulu halaci Rabbi gallo ra.

102

102:1b.PSA.102.001 Taabi hanko baytu no, waati kaŋ a gaabo gaze, A go ga nga hẽeno gusam Rabbi jine mo.

102:2b.PSA.102.002 Ya Rabbi, ma maa ay adduwa, Naŋ ay hẽeno ma furo ni do.

102:3b.PSA.102.003 Ma si ni moyduma tugu ay se ay taabi zaaro ra, Ma ni hanga jeeri ay se. Zaaro kaŋ ay ce mo, ma tu ay se da waasi.

102:4b.PSA.102.004 Zama ay jirbey go ga ban sanda dullu cine, Ay biriyey mo go ga di sanda danji ra tuuri cine.

102:5b.PSA.102.005 Ay bina lakaw sanda subu kaŋ i kar, kaŋ suugu mo, Hal ay dinya k'ay ŋwaaro ŋwa.

102:6b.PSA.102.006 Ay durayyaŋ jinda sabbay se, Kala baa ay biriyey naagu ay baso gaa.

102:7b.PSA.102.007 Ay ga hima sanda saajo ra bangu farka, Ay ciya sanda fu kurmu ra kuku.

102:8b.PSA.102.008 Ay ga te mo-fasiya, Ay ciya mo sanda sasa kaŋ go fu boŋ nga hinne.

102:9b.PSA.102.009 Zaari me-a-me ay ibarey goono g'ay foy. Ngey kaŋ yaŋ goono ga donda ay goono ga laaliyaŋ zeyaŋ te d'ay maa.

102:10b.PSA.102.010 Zama boosu no ay soobay ka ŋwa sanda buuru cine, Ay haŋyaŋ haro mo, ay n'a margu nda mundi.

102:11b.PSA.102.011 Woodin mo, ni dukuro da ni futa sabbay se no. Zama ni n'ay sambu beene, ni ye k'ay furu koyne.

102:12b.PSA.102.012 Ay jirbey ga hima sanda tuuri bi kaŋ ga sosoro, Ay lakaw sanda subu cine.

102:13b.PSA.102.013 Amma nin wo, ya Rabbi, ni go no hal abada. Ni gaa fonguyaŋo mo ga goro hala zamaney kulu gaa.

102:14b.PSA.102.014 Ni ga tun, ni ga bakar mo Sihiyona se, Zama a se gomni teeyaŋ waate to, Oho, alwaati jisanta to.

102:15b.PSA.102.015 Daahir ni tamey goono ga farhã d'a tondey, I ga bakar a laabo se.

102:16b.PSA.102.016 Woodin se no dumi cindey ga humburu Rabbi maa, Ndunnya bonkooney kulu mo ga humburu ni darza.

102:17b.PSA.102.017 Zama Rabbi no ka Sihiyona cina, A bangay mo nga darza ra.

102:18b.PSA.102.018 A maa moori ra gorokoy adduwa se, A mana donda i adduwa mo.

102:19b.PSA.102.019 I ga woone hantum zamana kaŋ ga kaa se, Hala zamana din borey kaŋ i ga taka mo ma Rabbi sifa.

102:20b.PSA.102.020 Zama a go nga nangu hanna ra ga ganda fonnay, Beene no Rabbi go, a na ndunnya guna,

102:21b.PSA.102.021 Zama nga ma maa hawantey durayyaŋ, A ma borey kaŋ yaŋ i na buuyaŋ ciiti dumbu i boŋ taŋ.

102:22b.PSA.102.022 Zama Adam-izey ma Rabbi maa baaru dede Sihiyona ra, A sifawo mo Urusalima* ra,

102:23b.PSA.102.023 Dumey da mayrayey mo ga margu nangu folloŋ zama ngey ma may Rabbi se.

102:24b.PSA.102.024 A n'ay gaabo londo wi fonda boŋ, A n'ay jirbey mo dunguriyandi.

102:25b.PSA.102.025 Ay ne: «Ya ay Irikoyo, ma s'ay sambu saaya kaŋ ay go ay jirbey bindo ra. Ni jiirey go no hala zamaney kulu me.

102:26b.PSA.102.026 Za doŋ ni na ganda sinji, Beeney mo ni kambe goyo no.

102:27b.PSA.102.027 I ga halaci, amma ni wo, ni go no duumi. I kulu ga zeen mo danga kwaay cine, Ni g'i barmay mo danga bankaaray cine, I alhaali ga bare mo.

102:28b.PSA.102.028 Amma nin wo, ni si bare, ni jiirey mo sinda me.

102:29b.PSA.102.029 Ni tamey izey mo ga du duumi nangoray, I banda mo ga sinji ni jine.»

103

103:1b.PSA.103.001 Dawda wane no. Ya ay fundo, ma Rabbi sifa. Haŋ kaŋ go ay ra kulu mo m'a maa hanna sifa.

103:2b.PSA.103.002 Ya ay fundo, ma Rabbi sifa, Ma si dinya a gomney kulu gaa, baa afo.

103:3b.PSA.103.003 Nga kaŋ ga ni taaley kulu yaafa, Nga no ga ni doorey kulu mo yayandi,

103:4b.PSA.103.004 A ga ni fundo fansa k'a wa da saaray, A ga baakasinay suuji nda bakaraw te ni se koytaray fuula.

103:5b.PSA.103.005 A ga ni fundo toonandi nda hari hannoyaŋ, Hal i ma ni zankatara tajandi koyne sanda zeeban cine.

103:6b.PSA.103.006 Rabbi ga adilitaray goyyaŋ da cimi ciiti mo te, Borey kaŋ yaŋ i goono ga kankam kulu sabbay se.

103:7b.PSA.103.007 A na Musa bayrandi nda nga fonda, A na Israyla izey mo bayrandi nda nga goyey.

103:8b.PSA.103.008 Rabbi go toonante nda bakaraw, booriyankoy mo no, A ga suuru hal a bina ga tun, suuji yulwantekoy mo no.

103:9b.PSA.103.009 A si kaseeti waati kulu bo, A si futay gaay mo hal abada.

103:10b.PSA.103.010 A mana goy iri gaa d'iri zunubey hina me, A mana bana iri gaa mo d'iri taaley hina me.

103:11b.PSA.103.011 Zama sanda mate kaŋ cine beena mooru ganda, Yaadin cine mo no a baakasinay suujo ga beeri borey kaŋ yaŋ ga humbur'a se.

103:12b.PSA.103.012 Sanda mate kaŋ cine wayna funay ga mooru wayna kaŋay, Yaadin cine no a na iri taaley hibandi k'i moorandi iri.

103:13b.PSA.103.013 Sanda mate kaŋ cine baaba ga bakar nga izey se, Yaadin cine mo no Rabbi ga bakar borey kaŋ ga humbur'a yaŋ se.

103:14b.PSA.103.014 Zama a ga iri naamey bay, A ga fongu mo kaŋ iri ya laabuyaŋ no.

103:15b.PSA.103.015 Boro mo, a jirbey si hima kala subu tayo, Sanda saajo ra tuuri boosi, Yaadin cine no a zaadayaŋo ga hima nd'a.

103:16b.PSA.103.016 Zama haw ga faaru ka gana a boŋ, hal a ma si no, A nango si ye ka fongu nd'a koyne.

103:17b.PSA.103.017 Amma Rabbi baakasinay suujo, Ya za doŋ-doŋ kaŋ sinda me ka koy hal abada abadin no, A go mo borey kaŋ yaŋ ga humbur'a boŋ. A adilitara mo ga koy hala haamey gaa,

103:18b.PSA.103.018 A sappa haggoykoyaŋ da borey kaŋ yaŋ ga fongu nd'a dondonandiyaŋey zama ngey m'i goyey te se.

103:19b.PSA.103.019 Rabbi na nga karga sinji beeney ra, A mayra mo go hay kulu boŋ.

103:20b.PSA.103.020 Ya araŋ, Rabbi malaykey, w'a sifa, Araŋ gaabikooney kaŋ gonda hina, Kaŋ g'a lordey toonandi, Araŋ goono ga hanga jeeri a sanno jinda se.

103:21b.PSA.103.021 Ya araŋ, Rabbi kundey kulu, w'a sifa, Araŋ kaŋ goono ga goy a se k'a miila te.

103:22b.PSA.103.022 Ya araŋ, Rabbi goyey kulu, w'a sifa, A mayray nangey kulu ra. Ya ay fundo, ma Rabbi sifa!

104

104:1b.PSA.104.001 Ya ay fundo, ma Rabbi sifa! Ya Rabbi ay Irikoyo, ni ya beeraykoy no gumo. Ni goono ga daabu nda beeray beeri, Da koytaray darza mo.

104:2b.PSA.104.002 Nin kaŋ goono ga ni boŋ daabu nda hananyaŋ sanda bankaaray cine, Ni goono ga beeney daaru sanda kosandi taafe cine.

104:3b.PSA.104.003 A na nga jidan bisey ganjey sinji harey ra, A na burey ciya nga torka, A ga dira haw fatayaŋ boŋ.

104:4b.PSA.104.004 A ga nga malaykey te haw faaruyaŋ. A ga nga goy-teerey mo te danji beele.

104:5b.PSA.104.005 A na ndunnya tiksa sinji, Zama a ma si zinji hal abada abadin.

104:6b.PSA.104.006 Ni n'a daabu nda teeku guusuyaŋ sanda taafe cine, Harey kay tondi kuukey boŋ.

104:7b.PSA.104.007 Kaŋ i maa ni deeniyaŋo i zuru, Kaŋ i maa ni kaatiyaŋ jinda i te nyagas! da zuray.

104:8b.PSA.104.008 Tondi kuukey tun, Goorey mo ye ganda ka koy hala nango kaŋ ni daŋ i se.

104:9b.PSA.104.009 Ni na hirri daŋ teeku harey se kaŋ ga naŋ i ma si daaru ka bisa, Zama i ma si ye ka kaa ka laabo daabu.

104:10b.PSA.104.010 A na hari-moy donton i ma koy gooro ra, I ga zuru tondi nda tondi game ra,

104:11b.PSA.104.011 I ga ganji ham kulu haŋandi, Ganji farkayey goono ga haŋ ka ngey jaw kaa.

104:12b.PSA.104.012 I jarga mo beene curey ga goro, I goono ga hẽ tuuri kambey boŋ.

104:13b.PSA.104.013 Rabbi ga hari kaa nga jidan bisey kaŋ go beene ra ka gusam tondey boŋ. Ndunnya kungu nd'a goyey nafa.

104:14b.PSA.104.014 A ga naŋ subu ma te almaney se, Da kobtoyaŋ mo kaŋ borey ga far, Zama a ma ŋwaari kaa taray, a ma fun laabo ra,

104:15b.PSA.104.015 Da duvan* kaŋ ga naŋ boro bine ma kaan, Da ji kaŋ ga naŋ a moyduma ma nyaale, Da ŋwaari kaŋ ga boro bine gaabandi.

104:16b.PSA.104.016 Rabbi tuuri-nyaŋey ga haŋ ka yeesi, Liban ra sedrey* nooya, kaŋ yaŋ a tilam,

104:17b.PSA.104.017 Nangey kaŋ curayzey ga ngey fitey te. Waaliya mo, sipres* tuurey no ga ti a kwaara.

104:18b.PSA.104.018 Tondi kuukey mo, tondi boŋ hinciney wane no, Tondey zullanta mo, tondi boŋ hansey tuguyaŋ do no.

104:19b.PSA.104.019 A na hando daŋ alwaatey se, Wayna mo ga nga kaŋyaŋo do bay.

104:20b.PSA.104.020 Ni ga kubay te a ma ciya mo cin, Alwaati kaŋ cine ganji hamey kulu ga fun taray moso-moso.

104:21b.PSA.104.021 Muusu beeri izey goono ga korro ngey hamey banda, I goono ga ngey ŋwaaro ceeci Irikoy gaa.

104:22b.PSA.104.022 Wayna fattanta ngey mo ga koy lamba, Ka kani ngey tuguyaŋ guusey ra.

104:23b.PSA.104.023 Adam-ize mo ga fatta ka koy nga goyo da nga taabey do hala wiciri kambu.

104:24b.PSA.104.024 Ya Rabbi, man ni goyey baayaŋ misa! Laakal no ni n'i kulu te d'a. Ndunnya go toonante da ni takaharey.

104:25b.PSA.104.025 Yongo teeko nooya, kaŋ ga beeri, a ga tafay mo, Naŋ kaŋ baafuney kaŋ si kabu bara, Hari hamey, ikayney da ibeerey.

104:26b.PSA.104.026 Noodin no hiyey ga dira, Noodin mo no Lebiyatan* go, Nga kaŋ ni taka zama a ma fooru haro ra.

104:27b.PSA.104.027 Woodin yaŋ kulu goono ga ni hangan, Ni m'i no ngey ŋwaarey i alwaatey ra.

104:28b.PSA.104.028 I ga haŋ kaŋ ni g'i no margu-margu, Ni ga ni kambe fiti, ngey mo ga kungu nda gomni.

104:29b.PSA.104.029 Ni ga ni moyduma tugu, i boŋ ga haw. Ni ga i biyey kaa, I ga bu ka ye ka te ngey laabu zeena koyne.

104:30b.PSA.104.030 Ni ga ni Biya donton, ngey mo ga taka, Ni ga laabo alhaalo tajandi.

104:31b.PSA.104.031 Rabbi darza ma goro hal abada. Rabbi ma farhã nga goyey ra.

104:32b.PSA.104.032 A ga ndunnya guna, nga mo ma zinji, D'a na tondi kuukey ham, kala i ma dullu kaa.

104:33b.PSA.104.033 Ay ga baytu Rabbi se ay fundo me-a-me, Ay g'ay Irikoyo sifa ay goonoyaŋ kulu ra.

104:34b.PSA.104.034 Ay fonguyaŋey ma ciya haŋ kaŋ ga kaan a se, Ay mo, ay ga farhã Rabbi ra.

104:35b.PSA.104.035 Zunubi teekoy ma ban ndunnya ra. Laalakoyey mo ma si ye ka bara. Ya ay fundo, ma Rabbi sifa! Alleluya!

105

105:1b.PSA.105.001 Wa saabu Rabbi se, w'a maa ce. W'a goyey bayrandi dumey game ra.

105:2b.PSA.105.002 Wa baytu te a se, wa sifayaŋ baytu te a se, Wa soobay k'a dambara goyey kulu dede.

105:3b.PSA.105.003 Wa fooma nd'a maa hanna. Rabbi ceecikoy biney ma kaan.

105:4b.PSA.105.004 Wa Rabbi nda nga hino ceeci, w'a ceeci duumi,

105:5b.PSA.105.005 Ya araŋ, a tamo Ibrahim banda, Ya araŋ Yakuba izey, a wane suubanantey, Wa fongu nd'a dambara goyey kaŋ a te, D'a alaamey, d'a meyo ciiti sanney mo.

105:7b.PSA.105.007 Nga no ga ti Rabbi iri Irikoyo, A ciitey go ndunnya kulu ra.

105:8b.PSA.105.008 A fongu nga alkawlo gaa hal abada, Sanno din kaŋ a lordi zamana zambar se.

105:9b.PSA.105.009 Alkawlo kaŋ a sambu Ibrahim se, Da zeyaŋo kaŋ a ze d'a Isaka se,

105:10b.PSA.105.010 A n'a tabbatandi Yakuba se a ma ciya hin sanni, Sanda Israyla se nooya a ma ciya alkawli kaŋ ga duumi,

105:11b.PSA.105.011 A goono ga ne: «Ni se no ay ga Kanaana laabo no, Ni baa tubo no.»

105:12b.PSA.105.012 Waato kaŋ i go boro ciraariyaŋ, Oho, ikayna fooyaŋ no, yawyaŋ mo no laabo ra,

105:13b.PSA.105.013 I di ka bar-bare kunda ka koy kunda, Koytaray fo ka koy jama fo do koyne.

105:14b.PSA.105.014 A mana naŋ boro fo kulu m'i kankam. A deeni bonkooniyaŋ gaa i sabbay se.

105:15b.PSA.105.015 A ne: «Araŋ ma s'ay wane suubanantey ham, Wa si hasaraw te ay annabey se mo.»

105:16b.PSA.105.016 A na haray candi ka kande laabo gaa, A na ŋwaari kaŋ gaa i ga de kulu ceeri.

105:17b.PSA.105.017 A na boro fo donton i jine, Kaŋ ga ti Yusufu, bora kaŋ i neera a ma ciya tam.

105:18b.PSA.105.018 I n'a cey maray da baka*, i n'a daŋ guuru-bi ra.

105:19b.PSA.105.019 Hala waati kaŋ a sanno to, Rabbi sanno n'a neesi mo.

105:20b.PSA.105.020 Bonkoono donton ka ne i m'a feeri. Sanda dumey dabarikwa nooya, a n'a kaa ka taŋ.

105:21b.PSA.105.021 A n'a daŋ a ma ciya nga windo jine boro, Kaŋ g'a mayray harey kulu dabari.

105:22b.PSA.105.022 Zama a ma bonkoono mayraykoyey haw mate kaŋ nga ga ba, A m'a arkusey dondonandi laakal muraadu.

105:23b.PSA.105.023 Israyla mo koy Misira ra, Yakuba binde na yawtaray te Ham laabo ra.

105:24b.PSA.105.024 Rabbi naŋ nga borey ma baa gumo, A naŋ i ma bisa ngey yanjekaarey gaabi.

105:25b.PSA.105.025 Rabbi na Misirancey biney bare i ma konna nga borey, I ma hiila te nga tamey se.

105:26b.PSA.105.026 Amma a na nga tamo Musa donton, Da Haruna mo kaŋ a suuban.

105:27b.PSA.105.027 I n'a alaamey cabe Misirancey game ra, A dambara goyey mo Ham laabo ra.

105:28b.PSA.105.028 A na kubay samba; a naŋ nango ma ciya kubay, A borey mana ture a sanno gaa bo.

105:29b.PSA.105.029 A n'i harey ciya kuri, a n'i hari hamey halaci.

105:30b.PSA.105.030 I laabo te balancaw marga zugulayaŋ, Hala baa a bonkooney fu lokotey ra.

105:31b.PSA.105.031 A salaŋ, kala hamni bi marga zugulayaŋ go, i kaa, Ganiyaŋ mo go kal i laabo hirrey kulu gaa.

105:32b.PSA.105.032 A n'i kar da gari, sanda hari himandi, Da danji kaŋ ga di mo i laabo ra.

105:33b.PSA.105.033 A n'i reyzin* nyaŋey da jeejay* nyaŋey kar ka zeeri, A n'i hirrey boŋ tuurey ceeri-ceeri.

105:34b.PSA.105.034 A salaŋ, kal a go, do kaa, Da sar-ganda mo kaŋ sinda me,

105:35b.PSA.105.035 I n'i laabo ra kobtey kulu ŋwa, I n'i laabo nafa kulu mo ŋwa.

105:36b.PSA.105.036 Rabbi n'i laabo ra hay-jiney kulu kar mo, Kaŋ ga ti i kulu gaabi sintina.

105:37b.PSA.105.037 Gaa no a na Israyla kaa taray, I gonda wura nda nzarfu ngey banda. Londibuuno si no i kunda ra mo, baa afolloŋ.

105:38b.PSA.105.038 Misira farhã waato kaŋ i tun, Zama i humburkumay n'i di.

105:39b.PSA.105.039 Rabbi na beene hirriyaŋ daaru ka te daabiri, Danji mo, zama a ma hananyaŋ no cin haray.

105:40b.PSA.105.040 I binde, kaŋ i ŋwaaray, a kande i se darfanda, A na i kungandi nda beene ŋwaari mo.

105:41b.PSA.105.041 A na tondi daari kortu, kala hari bagu ka fatta, A soobay ka te hari zuru mo laabu koga ra sanda isa ra cine.

105:42b.PSA.105.042 Zama a fongu nga sanni hanna gaa wo kaŋ a ci nga tamo Ibrahim se.

105:43b.PSA.105.043 A na nga borey kaa taray da farhã, A wane suubanantey mo da farhã kuuwayaŋ.

105:44b.PSA.105.044 A na dumi cindey laabey no i se, Hal i na dumey din taabi albarka ta.

105:45b.PSA.105.045 Zama i m'a hin sanney haggoy, i m'a asariyey gaay mo. Alleluya!

106

106:1b.PSA.106.001 Alleluya! Wa saabu Rabbi se, zama nga ya booriyankoy no. Zama a baakasinay suujo go no hal abada.

106:2b.PSA.106.002 May no ka bara nda hina a ma Rabbi goy bambatey ci, Wala mo a m'a sifawey kulu bangandi?

106:3b.PSA.106.003 Albarkanteyaŋ no gumo borey kaŋ yaŋ ga cimi ciiti haggoy, Da borey kaŋ yaŋ ga adilitaray te waati kulu mo.

106:4b.PSA.106.004 Ya Rabbi, ma fongu ay gaa. Waati kaŋ ni ga gomni te ni borey se, M'ay kunfa nda ni faaba.

106:5b.PSA.106.005 Zama ay ma di ni wane suubanantey arzaka, Zama ay ma farhã mo da ni jama wane bine kaani, Ay ma zankam ni wane borey banda.

106:6b.PSA.106.006 Iri na zunubi te sanda iri kaayey cine, Iri na taali te, iri na laala goy te.

106:7b.PSA.106.007 Iri kaayey mana faham da ni dambara goyey Misira laabo ra, I mana fongu ni baakasinay suuji booba gaa mo. Amma i murte teeko me gaa, kaŋ ga ti Teeku Cira.

106:8b.PSA.106.008 Kulu nda yaadin a n'i faaba nga maa sabbay se, Zama a ma nga hin beero bangandi.

106:9b.PSA.106.009 A kaseeti Teeku Cira gaa mo, hal a haro sundu. A n'i candi i ma gana hari guusey ra danga day saaji fimbi ra cine.

106:10b.PSA.106.010 A n'i faaba mo k'i kaa borey kaŋ yaŋ wang'ey kambe ra, A n'i fansa* k'i kaa ngey ibarey kambe ra.

106:11b.PSA.106.011 Haro n'i yanjekaarey daabu, Kaŋ yaŋ ra sinda boro kaŋ cindi.

106:12b.PSA.106.012 Waato din gaa no i n'a sanney cimandi, I n'a sifaw baytu te mo.

106:13b.PSA.106.013 A mana baa gay kaŋ i dinya a goyey gaa, I si g'a saawarey hangan koyne.

106:14b.PSA.106.014 I bini gumo saajo ra, i na Irikoy si saajo ra mo.

106:15b.PSA.106.015 A na i no haya kaŋ i ŋwaaray, Amma a na faabiri samba i se i fundey ra.

106:16b.PSA.106.016 Waato kaŋ i canse da Musa gata ra, Hala nda Haruna, Rabbi wane hananta,

106:17b.PSA.106.017 Kala laabo feeri ka Datan gon, A na Abiram jama mo daabu.

106:18b.PSA.106.018 Danji mo di i jama ra, danji beela na laalakoyey ŋwa.

106:19b.PSA.106.019 I na handayze te Horeb ra, I sududu tooru soogante se.

106:20b.PSA.106.020 Yaadin cine no i na ngey darza barmay d'a k'a himandi yeeji kaŋ ga subu ŋwa.

106:21b.PSA.106.021 I dinya Irikoy, kaŋ ti i Faabakwa, Nga kaŋ na dambara goyey te Misira laabo ra,

106:22b.PSA.106.022 Da goy kaŋ ga dambarandi Ham laabo ra, Da muraadu yaŋ kaŋ ga humburandi Teeku Cira me gaa.

106:23b.PSA.106.023 Woodin se no a ne nga g'i halaci, Da manti kaŋ a wane suubananta Musa kay a jine ka te i se kosaray, Zama nga ma Rabbi futa bare, hal a ma s'i halaci.

106:24b.PSA.106.024 Oho, i donda laabu kaana, I mana Rabbi sanno cimandi,

106:25b.PSA.106.025 Amma i soobay ka guunu-guunu ngey bukkey ra, I mana hangan Rabbi sanno se.

106:26b.PSA.106.026 Woodin se no a ze i se ka ne nga g'i zeeri saajo ra,

106:27b.PSA.106.027 Nga m'i banda mo jindaw dumi cindey game ra, Nga m'i say-say laabey ra.

106:28b.PSA.106.028 I te me fo mo koyne da Baal-Peyor ka buukoy se sargayey ŋwa.

106:29b.PSA.106.029 Yaadin cine no i soobay ka Rabbi yanje ceeci nd'a ngey goyey do, Balaaw binde kaa ka furo i game ra.

106:30b.PSA.106.030 Waato din gaa no Fineyas tun ka kay, A na kosaray te, hala balaawo kay.

106:31b.PSA.106.031 I na woodin lasaabu a se adilitaray, Hala ka koy zamaney kulu me hal abada.

106:32b.PSA.106.032 Meriba haro do haray mo i na Rabbi bine tunandi koyne, Hala Musa taabi gumo i sabbay se.

106:33b.PSA.106.033 Zama i murte Rabbi Biya gaa, Musa binde na nga me fiti nda sanni kaŋ si hagu.

106:34b.PSA.106.034 I mana dumey din halaci, Sanda mate kaŋ cine Rabbi ci i se din,

106:35b.PSA.106.035 Amma ngey da dumi woodin yaŋ diibi care ra, Hal i na dumey din goyey dondon.

106:36b.PSA.106.036 I may mo i toorey se. Haya binde ciya i se hirrimi.

106:37b.PSA.106.037 Oho, hal i na ngey ize arey da ize wayey salle sargay ganjiyaŋ se.

106:38b.PSA.106.038 I na borey kaŋ yaŋ sinda taali kuri mun, Kaŋ ga ti i ize arey d'i ize wayey. I n'i te sargay Kanaana toorey se, Hala laabo ziibi nda kuro.

106:39b.PSA.106.039 Yaadin cine no i ziibi nd'a ngey goyey do, I ciya zina-teeriyaŋ ngey goyey ra.

106:40b.PSA.106.040 Woodin se no Rabbi futa koroŋ nga borey gaa, Hal a na nga jama fanta.

106:41b.PSA.106.041 A n'i nooyandi mo dumi cindey se, I konnakoy mo n'i may.

106:42b.PSA.106.042 I ibarey n'i kankam, i n'i kayna mo ngey kambey cire.

106:43b.PSA.106.043 Sorro boobo no a g'i faaba, Amma i saawarey ra i go ga murte. I tibi mo ngey laalayaŋo ra.

106:44b.PSA.106.044 Kulu nda yaadin a goono g'i taabey saal waati kaŋ a maa i hẽeno.

106:45b.PSA.106.045 A fongu nga alkawlo kaŋ nga te i se din gaa, A baakasinay suuji beero boŋ mo a jalla i gaa.

106:46b.PSA.106.046 A naŋ mo i ma du bakaraw borey kulu kaŋ yaŋ kond'ey tamtaray do.

106:47b.PSA.106.047 Ya Rabbi iri Irikoyo, m'iri faaba. M'iri margu, iri ma fun dumi cindey ra, Zama iri ma saabu ni maa hanna se, Iri ma fooma mo ni sifayaŋ ra.

106:48b.PSA.106.048 Wa Rabbi, Israyla Irikoyo sifa, Za doŋ-doŋ kaŋ sinda me ka koy hal abada abadin. Jama kulu mo ma ne: "Amin!" Alleluya!

107

107:1b.PSA.107.001 Wa saabu Rabbi se, zama nga wo booriyankoy no, Zama a baakasinay suujo go no hal abada.

107:2b.PSA.107.002 Rabbi fansantey* ma ci yaadin, Ngey kaŋ a fansa k'i kaa yanjekaari kambe ra.

107:3b.PSA.107.003 A n'i margu, i ma fun laabey kulu ra -- wayna funay da wayna kaŋay, azawa nda dandi kambe.

107:4b.PSA.107.004 I te boŋdaray saajo laawaley ra, Naŋ kaŋ boro kulu si no, I mana du kwaara kaŋ ga goro.

107:5b.PSA.107.005 I fundey yangala i ra da haray da jaw.

107:6b.PSA.107.006 Waato din gaa no i na jinde sambu Rabbi gaa ngey taabey ra, A na i faaba mo k'i kaa i masiibey ra.

107:7b.PSA.107.007 A na i jine candi mo fondo kayante ra, Zama i ma koy gallu kaŋ ga goro do.

107:8b.PSA.107.008 Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se.

107:9b.PSA.107.009 Zama a ga fundi kaŋ gonda jaw yeesandi, A ga haraykom mo kungandi nda gomni.

107:10b.PSA.107.010 Boro fooyaŋ go no kaŋ goro kubay da bu biya ra, I go hawante da sisiri da kayna,

107:11b.PSA.107.011 Zama i murte Irikoy sanney gaa, I donda Beeray-Beeri-Koyo saawarey mo.

107:12b.PSA.107.012 Woodin se no a na i biney kaynandi nda taabi goy. I kati ka kaŋ, gaako mo si no.

107:13b.PSA.107.013 Waato din gaa no i na jinde sambu Rabbi gaa ngey taabey ra, A na i faaba mo k'i kaa i masiibey ra.

107:14b.PSA.107.014 A n'i kaa kubay da bu biya ra, A n'i bakey* ceeri-ceeri.

107:15b.PSA.107.015 Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se,

107:16b.PSA.107.016 Zama a na guuru-ciray me daabirjey ceeri, A na guuru-bi karangaley dumbu ka pati-pati.

107:17b.PSA.107.017 Saamey hartayaŋey d'i taaley mo sabbay se no i g'i kankam.

107:18b.PSA.107.018 I biney na ŋwaari dumi kulu fanta, I maan buuyaŋ meyey gaa.

107:19b.PSA.107.019 Waato din gaa no i na jinde sambu Rabbi gaa ngey taabey ra, A n'i faaba mo k'i kaa i masiibey ra.

107:20b.PSA.107.020 A na nga sanno samba k'i yayandi, A n'i soolam ka kaa i halaciyaŋey ra.

107:21b.PSA.107.021 Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se.

107:22b.PSA.107.022 Wa saabuyaŋ sargayyaŋ mo no, W'a goyey fe da farhã baytuyaŋ.

107:23b.PSA.107.023 Borey kaŋ yaŋ ga zulli ka koy teeko do hiyey ra, Kaŋ yaŋ ga muraadey te hari beerey ra,

107:24b.PSA.107.024 Ngey no ga di Rabbi goy, D'a dambara goyey teeku guusuyaŋey ra.

107:25b.PSA.107.025 Zama a ga lordi ka ne haw kaŋ ga hamay ma tun, Wo kaŋ g'a hari bonday beerey tunandi.

107:26b.PSA.107.026 I ga ziji hala beene, I ga ye ka zumbu guusuyaŋey ra, Borey biney ga jijiri masiiba sabbay se.

107:27b.PSA.107.027 I goono ga teeni, i goono ga langam sanda baji hanko, I ga fay da ngey laakaley parkatak!

107:28b.PSA.107.028 Waato din gaa no i na jinde sambu Rabbi gaa ngey taabey ra, A n'i faaba mo k'i kaa i masiibey ra.

107:29b.PSA.107.029 A na beene hirriyaŋ dangandi, Hala hari bondayey ma kani.

107:30b.PSA.107.030 Saaya din i maa kaani zama nango kani. Yaadin no a kand'ey d'a do-meyo kaŋ i ga ba din ra.

107:31b.PSA.107.031 Wa Rabbi sifa a baakasinay suujo se, D'a dambara goyey sabbay se kaŋ a ga te Adam-izey se.

107:32b.PSA.107.032 W'a beerandi mo jama marga ra, W'a sifa arkusey faada ra.

107:33b.PSA.107.033 A ga isey bare ka ciya taasi beeri, Hari-moy mo ma koogu ka ciya jaw laabu.

107:34b.PSA.107.034 Laabu albarkanta ga bare ka ciya ciiri batama, A ra gorokoy laala sabbay se.

107:35b.PSA.107.035 A ga taasey boŋ ciya bangu, Laabu kogo mo ma ciya hari-moyaŋ.

107:36b.PSA.107.036 Noodin binde no a ga naŋ harayzey ma goro, Zama i ma gallu cina k'a te nangoray.

107:37b.PSA.107.037 I ma fariyaŋ duma, i ma reyzin* kaliyaŋ tilam, I ma du heemaro din nafa.

107:38b.PSA.107.038 A ga albarka daŋ i se mo hal i ma tonton gumo, A si naŋ mo i almaney ma zabu.

107:39b.PSA.107.039 Koyne i ga kayna ka sumbal kankami nda taabi nda bine saray sabbay se,

107:40b.PSA.107.040 A ga donda-caray gusam bonkooney boŋ. A ma naŋ i ma te boŋdaray saajo taasi beerey boŋ, Naŋ kaŋ fondo si no.

107:41b.PSA.107.041 Amma a ga moori ra goroko sambu nga kayna din ra k'a dake beene, k'a ciya almayaali boobo hal a ma ciya kuru cine.

107:42b.PSA.107.042 Adilantey ga di woodin, i ga farhã mo. Laala kulu mo ga nga me daabu.

107:43b.PSA.107.043 May no gonda laakal? A ma haggoy da muraadu woodin yaŋ, A ma laakal mo da Rabbi baakasinay suujey.

108

108:1b.PSA.108.001 Dooni. Dawda baytu fo no.

108:2b.PSA.108.002 Ya Irikoy, ay bina sinji. Ay ga baytu, oho, ay ga sifawey baytu te, In d'ay bina kulu.

108:3b.PSA.108.003 Ya moolo kayna nda moolo beeri, wa mo hay, Ay bumbo mo, ay ga mo boyaŋ tunandi jirbi.

108:4b.PSA.108.004 Ya Rabbi, ay ga saabu ni se dumi cindey ra. Ay ga sifayaŋ baytu te ni se mo koyne dumey game ra.

108:5b.PSA.108.005 Zama ni baakasinay suujo ga beeri hal a bisa beeney gaa, Ni cimo mo koy ka to hala beene batama gaa.

108:6b.PSA.108.006 Ya Irikoy, ni ma beeri ka bisa beeney gaa, Ni darza mo ma bara ndunnya kulu boŋ.

108:7b.PSA.108.007 Ni ma faaba te da ni kambe ŋwaaro, ka tu ay se, Zama ni baakoy ma du faaba.

108:8b.PSA.108.008 Irikoy salaŋ nga hananyaŋo ra ka ne: «Ay ga farhã, Ay ga Sekem fay-fay, ay ma Sukkot gooro mo neesi.

108:9b.PSA.108.009 Jileyad ya ay wane no, Manasse mo ay wane no, Ifraymu ya ay wongu fuula no, Yahuda mo ay koytaray sarjilla no.

108:10b.PSA.108.010 Mowab ya ay nyumayyaŋ taasa no, Edom boŋ no ay n'ay taamo catu, Ay ga kuuwa Filistiya boŋ.»

108:11b.PSA.108.011 May no g'ay daŋ gallu cinarikoy ra? May no ga konda ay hala Edom?

108:12b.PSA.108.012 Ya Irikoy, manti ni n'iri furu no? Ya Irikoy, ni si fatta ka koy iri wongu marga banda no?

108:13b.PSA.108.013 Ma gaakasinay te iri se iri yanjekaaro gaa, Zama boro gaakasinay wo yaamo no.

108:14b.PSA.108.014 Irikoy gaakasinay do no iri ga alboro teera te, Zama nga no g'iri yanjekaarey taamu-taamu.

109

109:1b.PSA.109.001 Doonkoy jine bora se. Dawda baytu fo no. Ya ay sifawo Irikoyo, ma si dangay!

109:2b.PSA.109.002 Zama i na me laalo kaŋ gonda gulinci fiti ay gaa, I salaŋ ka gaaba nda ay da deene tangarikom.

109:3b.PSA.109.003 I n'ay windi mo da konnari sanni, I goono ga yanje da ay sabaabu kulu si.

109:4b.PSA.109.004 Baakasina kaŋ ay te nango ra no i ciya ay se kalimakoyaŋ, Amma ay wo go adduwa gaa.

109:5b.PSA.109.005 I n'ay booriyaŋo bana ay se da laala, I n'ay baakasina mo bana nda konnari.

109:6b.PSA.109.006 Ma boro laalo sinji a boŋ, Naŋ ibare ma kay a kambe ŋwaaro gaa.

109:7b.PSA.109.007 Waati kaŋ i ga ciiti a se, i ma taali dake a boŋ, A adduwa mo ma bare ka ciya zunubi.

109:8b.PSA.109.008 Naŋ a jirbey ma dunguriya, Boro fo mo m'a goyo sambu.

109:9b.PSA.109.009 Naŋ a izey ma ciya alatuumiyaŋ, A wando mo ma ciya boro kaŋ kurnyo bu.

109:10b.PSA.109.010 Naŋ a izey ma bar-bare ka bar kar, I ma ngey ŋwaaro ceeci ngey doŋ windi kurmey se nangu mooro.

109:11b.PSA.109.011 Naŋ gar-hãako ma hay kulu kaŋ go a se sambu, Yawyaŋ mo ma hay kulu kaŋ a du nga taabo ra ku wongu arzaka.

109:12b.PSA.109.012 I ma si du boro kulu kaŋ ga suuji cabe a se, I ma si du boro kaŋ ga bakar a alatuumey se.

109:13b.PSA.109.013 Naŋ a banda ma alandaaba, Zamana kaŋ ga tun ka kaa ra mo, a maa ma tuusu.

109:14b.PSA.109.014 Naŋ a kaayey laala ma goro Rabbi jine fonguyaŋ hari, I ma si a nyaŋo zunubey mo tuusu.

109:15b.PSA.109.015 Naŋ i ma goro Rabbi jine duumi, Zama a ma baa i fonguyaŋo tuusu ndunnya ra.

109:16b.PSA.109.016 Zama a mana fongu nga ma baakasinay suuji cabe, Amma a na talka nda alfukaaru nda bine-saray-koy gurzugandi, nga m'i wi se.

109:17b.PSA.109.017 Oho, a ga ba laaliyaŋ, kal a ma ye ka kaa a gaa. A si maa albarka daŋyaŋ kaani, kal a ma moor'a.

109:18b.PSA.109.018 A na laaliyaŋ daŋ ka nga boŋ daabu sanda nga bankaarayey cine, A binde ma furo a gunda teelo ra sanda hari cine, Da sanda ji cine mo a biriyey ra.

109:19b.PSA.109.019 Naŋ woodin ma ciya a se daabiri kaŋ a ga nga boŋ daabu nd'a, Da guddama mo kaŋ a ga nga canta haw d'a duumi.

109:20b.PSA.109.020 Ay kalimakoy da wo kaŋ yaŋ goono g'ay fundo laali mo, I banandi kaŋ ga fun Rabbi do nooya.

109:21b.PSA.109.021 Amma nin, ya Rabbi, Koy Beero, Ni ma gomni te ay se, ni maa sabbay se. M'ay faaba mo, Zama ni baakasinay suujo ga boori.

109:22b.PSA.109.022 Zama ay ya taabante no, kaŋ go moori ra, I n'ay bina mo maray ay ra.

109:23b.PSA.109.023 Ay ban sanda biya kaŋ salle, I n'ay kokobe sanda do cine.

109:24b.PSA.109.024 Ay kangey jijiri ka kar care gaa mehaw sabbay se, Ay gaahamo kulu faabu, maani si.

109:25b.PSA.109.025 Ay ciya wowi hari i do. Waati kaŋ i ga di ay, i ga ngey boŋey zinji.

109:26b.PSA.109.026 Ya Rabbi Irikoy, m'ay gaa. m'ay faaba ni baakasinay suujo boŋ.

109:27b.PSA.109.027 Zama borey ma du ka bay kaŋ woodin ni kambe no, Ya Rabbi, nin no k'a te.

109:28b.PSA.109.028 I ma soobay ka laali, amma nin wo ma albarka daŋ. Waati kaŋ i tun, i ga haaw, Amma ay, ni tamo ga maa kaani.

109:29b.PSA.109.029 Naŋ i m'ay ibarey daabu nda kayna danga bankaaray cine, I ma ngey boŋ daabu nda ngey haawo sanda alkuba cine.

109:30b.PSA.109.030 Ay ga saabuyaŋ boobo te Rabbi se d'ay meyo, Oho, ay g'a sifaw te jama ra.

109:31b.PSA.109.031 Zama a ga kay moori ra goroko kambe ŋwaari gaa, Zama a m'a faaba boro kaŋ goono g'a fundo ciiti kambe ra.

110

110:1b.PSA.110.001 Dawda baytu fo no. Rabbi ne ay Koyo se: «Ma goro ay kambe ŋwaaro gaa, Hal ay ma ni ibarey te ni ce taamey se furkange.»

110:2b.PSA.110.002 Rabbi ga ni sarjilla gaabikoono salle Sihiyona ra ka ne: «Ni ma koytaray ŋwa ni ibarey game ra.»

110:3b.PSA.110.003 Ni jama ga ngey boŋ nooyandi sargayyaŋ da bine yadda ni hino zaaro ra. Nin kaŋ gonda darza hanno mo boyaŋ gunda ra, Ni zankey ga kaa ni do danga harandaŋ cine.

110:4b.PSA.110.004 Rabbi ze, a zeyaŋo si tun mo. A ne: «Ni ya alfaga no hal abada, Malcizadaka wano cine.»

110:5b.PSA.110.005 Koy Beero go ni kambe ŋwaaro gaa, A ga bonkooniyaŋ bagu-bagu nga futa zaaro ra.

110:6b.PSA.110.006 A ga ciiti te dumi cindey ra, A ma nango toonandi nda buukoyaŋ. A ga jine boroyaŋ bagu-bagu laabu boobo ra.

110:7b.PSA.110.007 A ga gooru hari haŋ fonda boŋ, Woodin se no a ga ye ka boŋo sambu.

111

111:1b.PSA.111.001 Alleluya! Ay ga saabu Rabbi se d'ay bina kulu adilantey faada ra, da jama marga ra mo.

111:2b.PSA.111.002 Rabbi goyey ya ibeeriyaŋ no, Ceeciyaŋ hari mo no boro kulu kaŋ ga maa i kaani se.

111:3b.PSA.111.003 A goyo gonda beeray da koytaray darza, A adilitara mo tabbatante no hal abada.

111:4b.PSA.111.004 A naŋ i ma fongu nda nga dambara goyey. Rabbi ya gomnikoy no, kaŋ ga to da bakaraw.

111:5b.PSA.111.005 A na ŋwaari no borey kaŋ ga humbur'a se, A ga soobay ka fongu nga alkawlo gaa mo hal abada.

111:6b.PSA.111.006 A na nga goyo hino cabe nga jama se, Za kaŋ a na dumi cindey tubey no i se.

111:7b.PSA.111.007 A kambe goyey ya naanay da cimi ciiti no, A dondonandiyaŋ kulu mo tabbatanteyaŋ no.

111:8b.PSA.111.008 I sinji hal abada abadin, A n'i te cimi nda adilitaray ra.

111:9b.PSA.111.009 A kande nga jama se fansa, A na nga alkawlo kayandi hal abada. A maa ga hanan, a ga dambarandi mo.

111:10b.PSA.111.010 Rabbi humburkumay ga ti laakal sintinay. Boro kulu kaŋ g'a lordey goy te, A koy gonda fahamay hanno. Rabbi sifayaŋo go no hal abada.

112

112:1b.PSA.112.001 Alleluya! Albarkante no boro kaŋ ga humburu Rabbi, Kaŋ ga nga bine kaanandi gumo a lordey ra.

112:2b.PSA.112.002 Bora din banda ga ciya hinkoyaŋ ndunnya ra. Adilantey zamana borey ga ciya albarkanteyaŋ.

112:3b.PSA.112.003 Duure nda arzaka go a windo ra, A adilitara mo go no hal abada.

112:4b.PSA.112.004 Kaari ga fun kubay ra cimikoyey se, Rabbi ya gomni nda bakaraw da adilitaray koy no.

112:5b.PSA.112.005 Baani ga bara boro woone wo se: Nga kaŋ ga gomni goy te ka garaw daŋ. A ga nga muraadey te da cimi ciiti mo.

112:6b.PSA.112.006 Daahir a si zinji abada. Adilante ga ciya fonguyaŋ hari hal abada.

112:7b.PSA.112.007 A bina goono ga sinji no, A goono ga de Rabbi gaa, Baaru laalo s'a humburandi.

112:8b.PSA.112.008 A bina sinji, a si humburu hay kulu, Hal a ma di nga muraado feeri nga yanjekaarey boŋ.

112:9b.PSA.112.009 A zaban ka no alfukaarey se. A adilitara ga duumi hal abada, A hillo ga beeri mo ka tun beene.

112:10b.PSA.112.010 Boro laalo ga di woodin, a ma dukur, A ma nga hinje kaama, a ma komso mo. Boro laalo ibaayo ga halaci no.