Job (Zarma)

1

1:1b.JOB.001.001 Waato boro fo go no Uz laabo ra kaŋ maa ga ti Ayuba. Bora din binde toonante no, adilitaraykoy no, a ga humburu Irikoy ka banda bare ilaalo gaa mo.

1:2b.JOB.001.002 A gonda ize alboro iyye da wayboro hinza.

1:3b.JOB.001.003 Alman do haray mo a gonda feeji zambar iyye, da yo zambar hinza, da haw zambar fo, da farka nya zangu gu, da almayaali boobo gumo, hala mo zaati bora din bisa wayna funay izey kulu beeray.

1:4b.JOB.001.004 A ize arey mo ga gana ka batu te ngey afo-fo kulu kwaara, afo kulu nda nga zaaro. I ga donton mo ka ngey wayme hinza ce ngey mo ma kaa ka ŋwa ka haŋ ngey banda.

1:5b.JOB.001.005 Waati kaŋ i bato jirbey windi ka kaa ka to binde, Ayuba ga samba i m'i hanandi. A ga tun za susubay da hinay ka sargay kaŋ ga ton yaŋ te i afo kulu se. Zama Ayuba ne: «Hambara ay izey na zunubi te ka Irikoy wow ngey biney ra.» Ayuba doona ka woodin te, a mana fappe.

1:6b.JOB.001.006 Han fo Irikoy izey, _malaykayaŋ* no|_ kaa zama ngey ma bangay Rabbi jine. Saytan* mo kaa i banda.

1:7b.JOB.001.007 Kala Rabbi ne Saytan se: «Man gaa no ni fun?» Saytan tu Rabbi se ka ne: «Ay fun bar-bareyaŋ ndunnya ra, d'a ra koy-da-ye mo.»

1:8b.JOB.001.008 Kala Rabbi ne Saytan se: «D'a-ta day, ni ga faham d'ay tamo din Ayuba? A himandi kulu si no ndunnya ra. Toonante no, adilitaraykoy no, kaŋ ga humburu Irikoy ka banda bare ilaalo gaa mo.»

1:9b.JOB.001.009 Saytan binde tu Rabbi se ka ne: «E day! Yaamo no kaŋ Ayuba ga humburu Irikoy, wala?

1:10b.JOB.001.010 Manti ni n'a kali nda sinkita, nga nda nga windo kulu, hala nda hay kulu kaŋ go a se kuray kulu? Ni n'a kambe goyey mo albarkandi, a almaney mo tonton laabo ra.

1:11b.JOB.001.011 Sohõ day kala ni ma ni kambe salle ka hay fo kulu kaŋ ga ti a wane ham, ni ga di a ga ni wow ni jine!»

1:12b.JOB.001.012 Rabbi ne Saytan se: «Guna, hay kulu kaŋ go a se, i go ni kambe ra. Amma nga bumbo wo, ma si kambe dake a boŋ.» Saytan binde fatta ka fun Rabbi jine.

1:13b.JOB.001.013 Han fo binde Ayuba ize alborey da wayborey kulu goono ga ŋwa ka duvan* haŋ ngey beere beero kwaara,

1:14b.JOB.001.014 kala diya fo kaa Ayuba do ka ne: «Hawey goono ga far, farkayey mo goono ga kuru i jarga,

1:15b.JOB.001.015 kala Sabeyancey kaa ka kaŋ i boŋ k'i di ka kond'ey. Oho, hala i na goy-izey wi nda takuba, ay hinne mo no ka du ka yana ka kaa ka ci ni se sohõ.»

1:16b.JOB.001.016 A go sanno ra yaadin kal afo mo kaa ka ne: «Irikoy danjo fun beene ka kaŋ feejey boŋ k'i ŋwa. A na goy-izey mo ŋwa ka ban. Ay hinne mo no ka du ka yana ka kaa ka ci ni se sohõ.»

1:17b.JOB.001.017 Woodin mo go sanno ra, kal afo mo kaa ka ne: «Kaldancey te sata kanandi hinza ka zurandi ka kaa ka yoy di ka kond'ey. Oho, hal i na goy-izey mo wi nda takuba. Ay hinne mo no ka du ka yana ka kaa ka ci ni se sohõ.»

1:18b.JOB.001.018 Woodin go sanno ra, kal afo mo kaa. Nga mo ne: «Ni ize alborey da wayborey goono ga ŋwa ka duvan haŋ ngey beere beero windo ra.

1:19b.JOB.001.019 Kala alma haw beeri fo fun taasi beero boŋ haray ka kaa ka fuwo lokoto taaca kulu kar. Fuwo binde kaŋ ni izey boŋ hal i bu. Ay hinne mo no ka du ka yana ka kaa ka ci ni se.»

1:20b.JOB.001.020 Ayuba binde tun ka nga kwaayo tooru-tooru. A na nga boŋo mo cabu ka ye ganda ka sududu.

1:21b.JOB.001.021 A ne: «Koonu no ay fun ay nyaŋo gunda ra, koonu mo no ay ga dira. Rabbi no ka no, Rabbi no ka ta, i ma Rabbi maa sifa!»

1:22b.JOB.001.022 Woodin kulu ra Ayuba mana zunubi te, a mana harta mo ka Irikoy wow.

2

2:1b.JOB.002.001 Han fo koyne Irikoy izey ye ka koy zama ngey ma bangay Rabbi jine. Saytan mo furo i ra zama nga mo ma bangay Rabbi jine.

2:2b.JOB.002.002 Rabbi ne Saytan se: «Man gaa no ni fun?» Saytan mo tu Rabbi se ka ne: «Ay goono ga bar-bare no ndunnya ra, ka koy-da-ye te mo koyne a ra.»

2:3b.JOB.002.003 Rabbi ne Saytan se: «D'a-ta day, ni ga faham d'ay tamo din Ayuba? A cine si no ndunnya ra kaŋ toonante no, adilante* mo no, kaŋ ga humburu Irikoy ka banda bare ilaalo gaa mo. Hala sohõ mo a goono ga nga cimo gaay, baa kaŋ day ni n'ay zukku hal ay ma gaaba nd'a k'a halaci sabaabu kulu si.»

2:4b.JOB.002.004 Saytan binde tu Rabbi se ka ne: «Kuuru no ga kuuru bana! Daahir, hay kulu kaŋ go boro se a g'a no ka nga fundo fansa.

2:5b.JOB.002.005 To, ma ni kambe salle sohõ k'a biri nd'a baso ham. Sohõ a ga ni wow ni jine.»

2:6b.JOB.002.006 Rabbi mo ne Saytan se: «Guna, a go ni kambe ra, kal a fundo hinne kaŋ ni ga naŋ.»

2:7b.JOB.002.007 Saytan binde fun Rabbi do ka koy ka Ayuba kar da jombo laalo yaŋ kaŋ ga dooru, za a ce taamey gaa kal a boŋo ra.

2:8b.JOB.002.008 Kala Ayuba na car-cambu sambu ka soobay ka nga boŋ jirti nd'a. A koy ka goro mo boosu ra.

2:9b.JOB.002.009 A wando binde ne a se: «Hala sohõ ni goono ga ni cimo gaay, wala? Ma Irikoy wow ka bu!»

2:10b.JOB.002.010 Amma Ayuba ne nga wando se: «Wayborey kaŋ sinda laakal, i sanney dumi no ni goono ga te ya! E, mate nooya? iri ma gomni ta Rabbi kambe ra, iri ma si masiiba ta, wala?» Woodin yaŋ kulu ra Ayuba mana zunubi te da nga meyo.

2:11b.JOB.002.011 Waato kaŋ Ayuba coro hinza maa masiibey din kulu kaŋ yaŋ du a baaru, i kulu tun ngey windey ra ka kaa a do. Ngey neeya: Elifaz Timna bora, da Bildad Suhi bora, da Zofar Naamat bora. I soola care banda hala ngey ma kaa k'a kunfa, k'a yaamar mo.

2:12b.JOB.002.012 Waato kaŋ i n'a fonnay nangu mooro, i man'a bay mo, kal i na ngey jindey sambu ka soobay ka hẽ. I afo kulu mo na nga kwaay tooru-tooru ka kusa daŋ nga boŋo gaa.

2:13b.JOB.002.013 I goro ganda a banda kala jirbi iyye, cin da zaari. Boro kulu mana salaŋ a se zama i bay kaŋ a gurzuga baa gumo.

3

3:1b.JOB.003.001 Woodin banda no Ayuba na nga me fiti ka nga hayyaŋ zaaro laali.

3:2b.JOB.003.002 A sintin ka ne:

3:3b.JOB.003.003 «Naŋ zaaro kaŋ i n'ay hay din ma halaci. Cino din kaŋ i ne: ‹I du ize alboro,› Nga mo ma halaci.

3:4b.JOB.003.004 Zaari woodin ma ciya kubay. Irikoy kaŋ go beena ma s'a baaru ceeci, Kaari mo ma si kaari a boŋ.

3:5b.JOB.003.005 Kubay da buuyaŋ biya ma ne a se ngey wane. Beene hirriyaŋ ma soobay ka goro a boŋ. Hay kulu kaŋ ga wayna ciya kubay ma zaaro din humburandi.

3:6b.JOB.003.006 Kubay bi ma cino din di, I ma s'a kabu jiiro jirbi cindey banda, A ma si furo mo handey jirbey lasaabuyaŋ ra.

3:7b.JOB.003.007 Oho, naŋ cino din ma ciya waygunu. Farhã jinde kulu ma si te a ra.

3:8b.JOB.003.008 Laaliyankoyey ma zaaro din laali, Ngey kaŋ yaŋ ga waani ka Lebiyatan* tunandi.

3:9b.JOB.003.009 A almaari handariyayzey ma te kubay. A ma kaari ceeci, amma a ma si du a. A ma si di mo boyaŋ.

3:10b.JOB.003.010 Zama a mana ay nyaŋo gunda daabu, A mana taabi tugu mo ay moy se.

3:11b.JOB.003.011 Ifo se no ay mana bu za gunde ra? Ifo se no yan'ay fundo taŋ za waati kaŋ ay fun gunde ra?

3:12b.JOB.003.012 Ifo se no kangey n'ay ta? Ifo se no fafa go no binde, Hal ay ma du k'a sunsum?

3:13b.JOB.003.013 Zama doŋ ay kani ka dangay, Doŋ ay jirbi ka fulanzam,

3:14b.JOB.003.014 In da ndunnya koyey da ngey faadancey care banda, Wo kaŋ yaŋ na kurmu zeeney cina koyne ngey boŋ se.

3:15b.JOB.003.015 Wala in da koyey kaŋ yaŋ gonda wura care banda, Wo kaŋ yaŋ na ngey windey toonandi nda nzarfu.

3:16b.JOB.003.016 Ifo se no i man'ay nuusu sanda gunde hasaraw cine, Sanda attaciriya kaŋ mana di annura baa ce fo?

3:17b.JOB.003.017 Noodin no laalakoyey ga taabandiyaŋ naŋ, Noodin mo no fargantey ga fulanzam.

3:18b.JOB.003.018 Noodin mo no borey kaŋ yaŋ go hawante ga fulanzam care banda, I si ye ka maa barzukoy jinde koyne.

3:19b.JOB.003.019 Ikayney da ibeerey kulu go noodin. Bannya mo fun nga koyo kambe ra.

3:20b.JOB.003.020 Ifo se no i ga kaari no boro kaŋ go ga di bone se? Wala fundi mo borey kaŋ bine saray baa se?

3:21b.JOB.003.021 Borey kaŋ yaŋ goono ga beeje ngey ma bu se amma buuyaŋ si kaa. I goono ga fansi k'a ceeci ka bisa baa arzaka tugante.

3:22b.JOB.003.022 I ga farhã nda cimi, I ga maa kaani d'i hin ka du saaray.

3:23b.JOB.003.023 Ifo se no i ga kaari no boro kaŋ fonda ga tugu se, Bora kaŋ Irikoy windi nda sinkita?

3:24b.JOB.003.024 Zama bine jisiyaŋ go ga kaa ay gaa waati kaŋ ay di ay ŋwaaro. Ay duray-duray yaŋey mo go ga gusam sanda hari cine,

3:25b.JOB.003.025 Zama haya kaŋ ay joote din, Nga no ka kaŋ ay boŋ! Haŋ kaŋ n'ay humburandi mo no du ay.

3:26b.JOB.003.026 Ay fundo siino ga maa kaani, Ay sinda daama fo kulu, Ay sinda fulanzamay mo, kala day taabi.»

4

4:1b.JOB.004.001 Kala Elifaz Teman bora tu ka ne:

4:2b.JOB.004.002 «D'i ceeci i ma salaŋ da nin, ni si dukur, wala? Day may no ga hin ka dangay?

4:3b.JOB.004.003 A go, nin wo, ni na boro boobo yaamar, Ni na kambe londi-buunay-koyey gaabandi.

4:4b.JOB.004.004 Ni sanney doona ka borey kaŋ ga ba ka kaŋ kayandi, Borey kaŋ yaŋ kangey londi bu, ni n'i gaabandi.

4:5b.JOB.004.005 Amma sohõ kaŋ a kaa ni gaa, ni gaze, wala? Kaŋ a lamba ni gaa, ni laakalo tun, wala?

4:6b.JOB.004.006 Ni Irikoy cimandiyaŋo mana wasa ni se deyaŋ, bo? Ni fundo adilitara mo mana wasa ni se beeje hari, bo?

4:7b.JOB.004.007 Ma fongu day, ay ga ni hã, Boro kaŋ sinda taali doona ka halaci, wala? Wala man no i na adilante pati ce fo?

4:8b.JOB.004.008 Ay diyaŋ gaa, borey kaŋ yaŋ ga laala fansi ka fari soola, Da borey kaŋ yaŋ ga taabi duma, I ga haŋ kaŋ i duma din wi heemar.

4:9b.JOB.004.009 Irikoy funsaro no g'i halaci, A futay dunga no g'i ŋwa.

4:10b.JOB.004.010 Muusu beeri ga dundu, Muusu izey mo ga follay jinde tunandi, Amma muusu daŋ kaso hinjey no ga ceeri.

4:11b.JOB.004.011 Muusu beeri futo ga bu ham jaŋay se, Muusu way izey mo ga say-say.

4:12b.JOB.004.012 Han fo i na sanni fo ciinay te ay se. Ay hanga maa ciina din.

4:13b.JOB.004.013 Cin hindiri fonguyaŋ ra no, Saaya kaŋ cine jirbi tiŋo ga boro di.

4:14b.JOB.004.014 Kala humburkumay da gaaham jijiriyaŋ n'ay di, A n'ay gaa biriyey kulu jijirandi mo.

4:15b.JOB.004.015 Kala biya fo gaaru ka bisa ay jine. Ay gaa-haabiya kulu kay.

4:16b.JOB.004.016 Haya din binde ye ka kay, Amma ay mana hin k'a himando fayanka. Himandi fo go ga kay ay jine. Sum! Kal ay maa jinde kaŋ ne:

4:17b.JOB.004.017 ‹Boro kaŋ ga bu, A adilitara ga bisa Irikoy wane no? Boro beeri ga ciya hanante ka bisa nga Takakwa, wala?

4:18b.JOB.004.018 Guna, a mana nga tamey te deyaŋ hari, A malaykey mo, a na taali dake i boŋ,

4:19b.JOB.004.019 Sanku fa binde woone yaŋ kaŋ goono ga goro laabu fuyaŋ ra, Borey kaŋ yaŋ i ganda sinjiyaŋ si kala laabu bulungu ra, Ngey kaŋ yaŋ i g'i mutukuru danga naana-baano cine.

4:20b.JOB.004.020 Susuba nda wiciri kambu game ra no i g'i bagu-bagu, I ga halaci hal abada, boro kulu si saal.

4:21b.JOB.004.021 I n'i fundi korfa pati, I ga bu laakal-jaŋay ra mo.›

5

5:1b.JOB.005.001 Kala ni ma ce sohõ. Boro kaŋ ga tu ni se go no, wala? Hanantey ra haray binde, May do no ni ga koy?

5:2b.JOB.005.002 Zama dukuri no ga saamo wi, Bine tunay mo ga boro kaŋ si caram wi.

5:3b.JOB.005.003 Ay di saamo go ga te kaaji, Amma sahãadin ay n'a nangora laali.

5:4b.JOB.005.004 A izey ga mooru baani goray. Faada meyo gaa i n'i kankam, I sinda faabako mo.

5:5b.JOB.005.005 Harayzey no g'i fari nafa ŋwa ka ban, I g'a koba-koba baa karjey bindo ra, Jaw maakoy mo g'i duura gon.

5:6b.JOB.005.006 Zama masiiba wo, Manti ganda laabo ra no a ga fatta bo. Taabi mo, Manti ganda no a ga zay ka deene kaa taray bo.

5:7b.JOB.005.007 Amma i na boro hay taabi haŋyaŋ se, Danga nune-hansi cine no kaŋ ga tun beene.

5:8b.JOB.005.008 Amma d'ay wo no, Irikoy no ay ga ceeci, Irikoy gaa mo no ay g'ay muraado talfi.

5:9b.JOB.005.009 Nga no ga misa beerey goy te, Kaŋ yaŋ baa da fintalyaŋ, Harey kaŋ yaŋ ga dambarandi, Kaŋ yaŋ sinda me baayaŋ se.

5:10b.JOB.005.010 A ga hari no ndunnya boŋ, A ga hari samba farey ra,

5:11b.JOB.005.011 Hal a ga kayna ra borey beerandi, A ga borey kaŋ yaŋ ga bine saray hẽeni te beerandi i ma goro baani samay.

5:12b.JOB.005.012 Nga no ga hiilantey me-hawyaŋo ganji, Hal i kambey si du k'i dabarey toonandi.

5:13b.JOB.005.013 A ga laakalkooney di ngey boŋ hiila ra, A ga diibi-diiba-koyey saawarey gunguray ganda farap! folloŋ!

5:14b.JOB.005.014 Zaari sance no ngey nda kubay ga karba; Wayna go zaari bindi no i ga dira ka dadab sanda cin.

5:15b.JOB.005.015 A ga alfukaarey faaba takuba gaa da hiilantey meyey gaa, A g'i kaa hinkoyey kambe ra mo.

5:16b.JOB.005.016 Woodin gaa no alfukaarey gonda beeje, Adilitaray-jaŋay na nga me daabu.

5:17b.JOB.005.017 Guna, farhante no boro kaŋ Irikoy ga gooji, Ni binde ma si donda Hina-Kulu-Koyo goojiyaŋey.

5:18b.JOB.005.018 Zama a ga bi kaa, A ma safari haw a gaa mo, A ga marayyaŋ te, a kambey mo m'a yayandi.

5:19b.JOB.005.019 Taabi iddu ra a ga ni faaba, Oho, hala baa iyye ra masiiba fo si no kaŋ ga tuku ni gaa.

5:20b.JOB.005.020 Haray waate ra a ga ni fundo fansa buuyaŋ gaa, Wongu ra mo a ga ni kaa takuba hin gaa.

5:21b.JOB.005.021 A ga ni tugu ka ni wa da deene laaliyaŋ, Ni si humburu halaciyaŋ mo d'a kaa.

5:22b.JOB.005.022 Halaciyaŋ da gazeyaŋ wo, ni g'i haaru no, Ni si humburu ganji hamey mo.

5:23b.JOB.005.023 Zama saajo tondey ga amaana no ni se, Ganji hamey mo ga baani goray te ni se.

5:24b.JOB.005.024 Ni ga tabbatandi kaŋ ni windo go baani samay, Ni ga ni alman kurey kunfa, Ni si gar mo hay fo kulu kaŋ daray.

5:25b.JOB.005.025 Ni ga bay mo kaŋ ni banda ga ciya iboobo, Ni haamey mo ga baa sanda ganda subu.

5:26b.JOB.005.026 Jiiri toonante ra no ni ga koy ni saara do, Danga heemar hayni boko cine.

5:27b.JOB.005.027 Guna, iri na woodin fintal, yaadin mo no a bara. Kala ni ma maa, ma bay mo ni boŋ se.»

6

6:1b.JOB.006.001 Ayuba tu ka ne:

6:2b.JOB.006.002 «Hala day i g'ay fundo korno neesi, I ma nga nd'ay balaawo margu ka daŋ neesiyaŋ hari boŋ,

6:3b.JOB.006.003 A ga tin da teeku taasi. Woodin se no ay te me waasay.

6:4b.JOB.006.004 Zama Hina-Kulu-Koyo hangawey go ay ra, I naajey mo no ay biya goono ga haŋ. Irikoy humburkumay mo na daaga kayandi ay se.

6:5b.JOB.006.005 Ganji farka ga hẽ waati kaŋ a gonda subu, wala? Haw binde, a ga hẽ waati kaŋ a ŋwaaro go a jine, wala?

6:6b.JOB.006.006 Haŋ kaŋ ga tar, a ga ŋwa ciiri si, wala? Gunguri kwaaray gonda tabayaŋ fo a ra no?

6:7b.JOB.006.007 Ay fundo wangu k'i taba, I ga hima ay se sanda ŋwaari kaŋ ga bine tayandi.

6:8b.JOB.006.008 Doŋ ay muraado ma feeri! Irikoy mo ma yadda ay se da haŋ kaŋ ay ga ba gumo!

6:9b.JOB.006.009 Da Irikoy ga yadda, doŋ a m'ay bagu-bagu! A ma nga kamba salle k'ay fundo pati!

6:10b.JOB.006.010 Yaadin gaa doŋ ay ga du yaamaryaŋ kayna baa sohõ. Oho, hal ay ma cilili dooro kaŋ si bakar din ra, Zama ay mana Koy Hanna sanney kakaw.

6:11b.JOB.006.011 Man ay gaabo hal ay ma munye? Wala ifo ga ti ay kokora hal ay ma suuru?

6:12b.JOB.006.012 Ay gaabo ya tondi gaabi no, wala? Ay hamo mo guuru-say wane no?

6:13b.JOB.006.013 Wala manti yaadin no kaŋ ay sinda ay boŋ gaakasinay hina, Fahamay mo, i n'a gaaray ka moorandi ay gaa no?

6:14b.JOB.006.014 Boro kaŋ na laakal kaa, Kal a cora ma gomni cabe a se, Hal a ma si fay da Hina-Kulu-Koyo humburkuma.

6:15b.JOB.006.015 Ay nya-izey n'ay fafagu sanda hari zuru gooruyaŋ cine, Sanda gooruyaŋ kaŋ harey goono ga bambari ka daray.

6:16b.JOB.006.016 I ga butugu gari sabbay se, Da neezu* kaŋ manne i ra.

6:17b.JOB.006.017 Waati kaŋ i dungu kayna, Kal i ma manne ka daray, Konni waate mo, i si no koyne.

6:18b.JOB.006.018 Dirakoy marga kaŋ n'i fondey gana mo ga kamba ka fay d'ey, I ma zaa ka gana taasi beerey boŋ ka daray.

6:19b.JOB.006.019 Tema dirakoy marga na hari ceeci, Seba fatawc'izey na beeje sinji i gaa.

6:20b.JOB.006.020 Haawi n'i di beeje sinjiyaŋo kaŋ i te i se sabbay se. I kaa ka to nango do, kal i boŋ haw.

6:21b.JOB.006.021 Yaadin no araŋ mo, Araŋ na humburkumay hari fonnay, araŋ humburu mo.

6:22b.JOB.006.022 Ay wo ne araŋ se: ‹Araŋ m'ay no,› no? Wala ‹Araŋ ma me-daabu no ay sabbay se araŋ arzakey ra›?

6:23b.JOB.006.023 Wala ay ne: ‹Araŋ m'ay faaba yanjekaari kambe ra no?› Wala: ‹Araŋ m'ay fansa toonyantey kambe ra?›

6:24b.JOB.006.024 W'ay dondonandi, hal ay mo ma dangay, W'ay fahamandi nda nango kaŋ ay daray din.

6:25b.JOB.006.025 Cimi sanney wo, i gonda gaabi! Amma araŋ kaseeto wo, ifo no a ga kaa taray?

6:26b.JOB.006.026 Sanni-sanni yaŋ no araŋ ga ho ka kaseeti nd'a, wala? Za kaŋ boro kaŋ na laakal kaa wo, A sanney si hima kala haw kaŋ ga faaru.

6:27b.JOB.006.027 Oho, araŋ wo, araŋ ga kurne catu alatuumey boŋ, Araŋ ga coro himandi sanda neerandi.

6:28b.JOB.006.028 Kala day araŋ ma yadda k'ay guna, Ka di hal ay go ga taari araŋ jine.

6:29b.JOB.006.029 Wa ye ka kaa, ay ga araŋ ŋwaaray no, Araŋ ma si adilitaray-jaŋay te. Oho, wa ye ka kaa koyne! Kalima kaŋ ay ga kande gonda cimi.

6:30b.JOB.006.030 Ay meyo gonda cimi-jaŋay, wala? Wala ay deena si hin ka hasaraw taba no, Hal ay m'a fayanka?

7

7:1b.JOB.007.001 Boro sinda tamtaray alwaati no ndunnya? A jirbey mo, Manti i ga hima sufuray goy-izey jirbey cine bo?

7:2b.JOB.007.002 Sanda bannya kaŋ ga yalla-yalla nda tuuri bi, Wala mo goy-ize kaŋ goono ga laakal dake nga banando gaa.

7:3b.JOB.007.003 Yaadin cine no ay mo, I naŋ ay ma handu yaamoyaŋ ŋwa, Jirbiyaŋ kaŋ sinda fulanzamay no i waadu ay se.

7:4b.JOB.007.004 D'ay kani, ay ga ne: ‹Waati fo no ay ga tun, Waati fo no cino ga bisa?› Hala mo ma bo ay goono ga tangam nda bimbilkoyaŋey.

7:5b.JOB.007.005 Nooney da laabu gudey n'ay gaahamo daabu. Ay kuuro bagu-bagu, ka hari fumbo kaa taray,

7:6b.JOB.007.006 Ay jirbey waasu nda baa cakay gombo candiyaŋ, I go ga ban, beeje si no.

7:7b.JOB.007.007 Ma fongu kaŋ ay fundo wo funsar no, Ay moy si ye ka di gomni koyne.

7:8b.JOB.007.008 Boro kaŋ goono ga di ay, A mwa si ye k'ay guna koyne. Ni goono g'ay guna no, ay ga daray,

7:9b.JOB.007.009 Sanda mate kaŋ cine beene hirriyaŋ ga say ka daray. Yaadin cine mo no boro kaŋ ga zumbu ka koy Alaahara, A koy si ye ka kaa koyne.

7:10b.JOB.007.010 A si ye ka kaa nga windi koyne, A nangoray zeena mo si ye k'a bay koyne.

7:11b.JOB.007.011 Woodin sabbay se no ay si ye k'ay meyo gaay, Ay ga salaŋ no nda fundi doori. Ay biya forto ra no ay ga soobay ka salaŋ.

7:12b.JOB.007.012 Ay wo teeku no, wala? Wala ay ya teeku ham beeri no, Kaŋ ni na batuko daŋ ay se?

7:13b.JOB.007.013 D'ay ne: ‹Ay dima g'ay kunfa, Ay daarijo mo g'ay dooro dogonandi ay se,›

7:14b.JOB.007.014 Kala ni m'ay gartandi nda hindiriyaŋ, Ni g'ay humburandi nda bangayyaŋ.

7:15b.JOB.007.015 Hal ay fundo ga ne dambe day i m'ay koote, Dambe ya bu, a ga bisa ay go biriyey wo ra.

7:16b.JOB.007.016 Ay g'ay fundo fanta. Ay si funa hal abada. Kala ni ma fay d'ay, Zama ay jirbey ga hima funsar candiyaŋ folloŋ.

7:17b.JOB.007.017 Ifo ga ti boro, sanku fa ni m'a beerandi, Wala ni ma ni laakal dake a gaa mo?

7:18b.JOB.007.018 Ifo se no ni g'a kunfa susubay kulu? Ni g'a neesi alwaati kulu?

7:19b.JOB.007.019 Ni si fay d'ay gunayaŋ hal abada bo? Ni s'ay muray mo hal ay ma du k'ay yolla gon?

7:20b.JOB.007.020 Ya nin, borey haggoykwa, Baa ay na zunubi te, ifo no ay sara ni gaa? Ifo se no ni n'ay ciya gooyaŋ hari ni do, Hal ay ciya jaraw ay boŋ se?

7:21b.JOB.007.021 Ifo se no ni man'ay taaley yaafa, Ni man'ay laala mo ganandi? Zama doŋ sohõ ay ga kani bulungo ra. Ni g'ay ceeci nda himma, amma ay si bara.»

8

8:1b.JOB.008.001 Kala Bildad Suhi bora tu ka ne:

8:2b.JOB.008.002 «Waati fo no ni ga sanni woone yaŋ dumi teeyaŋ naŋ? Waati fo mo no ni ga fay da me sanney kaŋ ciya sanda haw bambata kaŋ ga faaru cine?

8:3b.JOB.008.003 Irikoy no ga cimi ciiti siirandi, wala? Wala Hina-Kulu-Koyo no ga adilitaray siirandi?

8:4b.JOB.008.004 Da ni izey na zunubi te a se, Nga mo n'i nooyandi i alhakko gaa.

8:5b.JOB.008.005 Da ni na Irikoy gande ceeci nda himma, Ka kande ni ŋwaarayyaŋo Hina-Kulu-Koyo do,

8:6b.JOB.008.006 Da ni gonda hananyaŋ da cimi, Doŋ daahir no a ga tun ka mo hay ka haggoy da nin sohõ. A ga albarka daŋ ni adilitaray nangora gaa.

8:7b.JOB.008.007 Koyne, baa kaŋ ni sintina ya ikayna no, Ni kokora wo ga yulwa gumo.

8:8b.JOB.008.008 Ni ya day, ay ga ni ŋwaaray, Ma waato zamaney fintal, Ma laakal ye haŋ kaŋ i baabey fisi ka kaa taray gaa.

8:9b.JOB.008.009 Zama iri ya bi wane yaŋ no, Iri si hay kulu bay, Zama iri ndunnya jirbey si hima kala bi cine.

8:10b.JOB.008.010 Manti doŋ borey ga ni dondonandi, Ka ci ni se bo? I ma sanniyaŋ kaa taray ka fun ngey biney ra?

8:11b.JOB.008.011 Gooru kwaari ga hin ka fun ka zay mansaara si no, wala? Wala kundu ga hin ka beeri, hari si no?

8:12b.JOB.008.012 Za a gonda nga tayyaŋo, I man'a beeri mo, A ga waasu ka lakaw da kobto kulu.

8:13b.JOB.008.013 To, yaadin cine no borey kulu kaŋ yaŋ dinya Irikoy, i fondey go. Wo kaŋ siino ga may Irikoy se mo, A beeje kulu ga halaci.

8:14b.JOB.008.014 A beeja ga ceeri, A deyaŋo mo sanda dadaara taaru cine no.

8:15b.JOB.008.015 Bora ga jeeri nga fuwo gaa, Amma a si kay, A g'a di da gaabi no, amma a si duumi.

8:16b.JOB.008.016 Bora wo sanda tuuri boogu no, Kaŋ ga tun wayna ra, A kambey ga salle kalo boŋ.

8:17b.JOB.008.017 A kaajey go didijante tondey gaa, A ga furo hala tondi fu ra.

8:18b.JOB.008.018 D'i n'a dagu ka kaa nga nango ra, Kala nango m'a ze ka ne: ‹Ay mana di nin baa ce fo.›

8:19b.JOB.008.019 Guna, Irikoy fonda farhã neeya: Ganda laabo ra no afooyaŋ ga zay ka fatta.

8:20b.JOB.008.020 Guna, Irikoy si naanay boro furu bo, hal abada. Goy laalo teekoy mo, a si i kayandi.

8:21b.JOB.008.021 A ga ye ka ni meyo toonandi nda haari, Ni me kuurey mo da farhã dooni.

8:22b.JOB.008.022 Borey kaŋ yaŋ konna nin, Haawi no g'i daabu. Laalakoyey bukkey mo ga daray.»

9

9:1b.JOB.009.001 Ayuba tu ka ne:

9:2b.JOB.009.002 «Oho, ay bay kaŋ daahir yaadin no, Amma mate no boro ga te ka ciya adilante Irikoy jine?

9:3b.JOB.009.003 Baa boro ga yadda nga ma kakaw d'a, Boro si hin ka tu a se baa ce fo hãayaŋ zambar ra.

9:4b.JOB.009.004 A gonda bine ra laakal, Hina da gaabi koy mo no. May no ka hanga sanday te a se ce fo ka goro baani?

9:5b.JOB.009.005 Nga no ga tondi kuukey sosorandi, I si baa bay a gaa mo, Saaya kaŋ a n'i bare ka gum nga futa ra.

9:6b.JOB.009.006 A ga ndunnya zinji-zinji k'a tuti ka zeeri, Hal a bonjarey kulu ma gasi.

9:7b.JOB.009.007 A ga wayna no lordi, a si fatta mo, A ga kawaatimi daŋ handariyayzey gaa mo.

9:8b.JOB.009.008 Nga hinne no ga ti beeney daarukwa, A ga taamu-taamu teeku bondayey boŋ.

9:9b.JOB.009.009 Yo nda Aliyu nda Dubi handariyayzey Takakwa no, Da mo handariyayzey marga kaŋ go dandi kambe haray.

9:10b.JOB.009.010 A goono ga muraadu bambata yaŋ te kaŋ yaŋ mongo fintalyaŋ. Oho, dambara muraaduyaŋ kaŋ sinda me no.

9:11b.JOB.009.011 Guna, a ga bisa ay gaa, Ay si di a mo, A ga koy jina, ay si faham d'a.

9:12b.JOB.009.012 D'a hamay, may no ga hin k'a ganji? May no ga ne a se: ‹Ifo no ni goono ga te?›

9:13b.JOB.009.013 Irikoy si nga bine tuna gaay. Borey kaŋ yaŋ ga boŋbeeray gaakasinay ga ngey boŋey sumbal ganda a jine.

9:14b.JOB.009.014 Sanku fa binde ay, hal ay ma tu a se! Mate ay ga te ka sanni suuban hal in d'a ma kakaw?

9:15b.JOB.009.015 Baa d'ay gonda cimi, Kulu nda yaadin ay si salaŋ ka tu a se, Kala y'ay Ciitikwa ŋwaaray a ma bakar ay se.

9:16b.JOB.009.016 Baa d'ay ce, hal a tu ay se mo, Kulu ay si cimandi kaŋ a n'ay jinda hangan.

9:17b.JOB.009.017 Zama a g'ay ceeri da beene hirriyaŋ, A ga naŋ ay marayyaŋey ma baa sabaabu kulu si.

9:18b.JOB.009.018 Baa funsar candiyaŋ, A siino ga yadda nd'a ay se, Amma a g'ay toonandi nda fotti.

9:19b.JOB.009.019 Da gaabi no, a go, nga wo Hinkoy no. Da cimi ciiti no, A ne: ‹May no g'ay kalima?›

9:20b.JOB.009.020 Baa ay gonda cimi, ay bumbo meyo g'ay zeeri. Baa ay sinda taali fo, Nga wo, kal a ma kande ay taalo seeda.

9:21b.JOB.009.021 Ay sinda taali! Ay s'ay boŋ saal! Ay fundo ya dondayaŋ hari no ay se.

9:22b.JOB.009.022 Ikulu afo no! Woodin sabbay se no ay ne: Boro kaŋ sinda taali, da taali-teeri, A g'ikulu halaci.

9:23b.JOB.009.023 Da balaaw ga wi da waasi, Kal a ma boro kaŋ sinda taali laakal kaayaŋo guna sanda foori hari.

9:24b.JOB.009.024 I na ndunnya salle laalakoy kambe ra. A g'a ciitikoy moydumey daabu. Da manti nga no, may no binde?

9:25b.JOB.009.025 Ay jirbey bisayaŋ ga bisa diya bisayaŋ waasi, I goono ga zuru no, Manti gomni fo no i goono ga di bo.

9:26b.JOB.009.026 Sanda hi kaŋ yaŋ diraw ga waasu cine no i goono ga dira ngey ma bisa se, Sanda zeeban cine kaŋ na haw sambu ga hay fo kar.

9:27b.JOB.009.027 D'ay ne: ‹Ay ga dinya ay dooro, Ay ga fay da mo-kuura hawyaŋ, ay ma farhã› --

9:28b.JOB.009.028 Hala hõ ay ga humburu ay masiibey kulu, Ay bay ni s'ay ciya adilante bo.

9:29b.JOB.009.029 Daahir no i g'ay zeeri. Ifo se binde no ay ga taabi yaamo?

9:30b.JOB.009.030 Baa ay nyumay da neezo* kaŋ manne hari, Y'ay kambey hanandi da soso,

9:31b.JOB.009.031 Kulu nda yaadin ni g'ay soote botogo guusu ra, Hal ay bankaarayey bumbey g'ay fanta.

9:32b.JOB.009.032 Zama Irikoy wo manti boro no sanda ay cine, Kaŋ ay ga tu a se ka ne, ‹Kaa, iri ma koy ciito do care banda.›

9:33b.JOB.009.033 Sasabandiko fo kulu si no iri game ra kaŋ ga nga kambe dake iri boro hinka kulu boŋ.

9:34b.JOB.009.034 A ma nga goobo hibandi ka kaa ay gaa, A ma s'ay bina pati mo nda nga humburandiyaŋ hari.

9:35b.JOB.009.035 Da yaadin no, doŋ ay ga salaŋ, ay si humbur'a, Amma manti yaadin no ay go d'a bo.

10

10:1b.JOB.010.001 Ay farga, ay farga nd'ay fundo kulu. Ay g'ay kalima kaa taray kwaaray, Ya salaŋ ay bine sara ra mo.

10:2b.JOB.010.002 Ay ga ne Irikoy se: Ni ma s'ay zeeri! Amma ma cabe ay se haŋ kaŋ se no ni goono ga canda-canda nd'ay.

10:3b.JOB.010.003 A boori ni se ni ma ni kambe goyo taabandi ka dond'a mo, wala? Hala ni ma kaari no boro laaley saawarey gaa?

10:4b.JOB.010.004 Wala ni moy ya gaaham wane dumi yaŋ no? Ni gunayaŋ mo, Adam-ize wane dumi no, wala?

10:5b.JOB.010.005 Ni jirbey mo, Adam-ize wane cine no, wala? Wala ni jiirey mo sanda boro fundi wane cine no?

10:6b.JOB.010.006 Hala ni m'ay taalo ce gana, K'ay zunubey fintal?

10:7b.JOB.010.007 Baa kaŋ ni ga bay kaŋ ay wo manti boro laalo no, Boro fo mo si no kaŋ ga hin ka boro kaa ni kambe ra.

10:8b.JOB.010.008 Ni kambey no k'ay te, I n'ay daŋ care gaa ka kubandi. Kulu nda yaadin ni g'ay halaci no?

10:9b.JOB.010.009 Ay ga ni ŋwaaray, Ma fongu kaŋ ni n'ay cina sanda botogo cine, Ni ga ye k'ay ciya bulungu no koyne?

10:10b.JOB.010.010 Manti ni n'ay soogu sanda wa, Ni n'ay sandandi koyne sanda cukku cine?

10:11b.JOB.010.011 Manti ni n'ay sutura nda basi nda kuuru, K'ay margu-margu ka haw da biri da kaaji yaŋ?

10:12b.JOB.010.012 Manti ni n'ay no fundi nda baakasinay suuji? Manti haggoyyaŋo kaŋ ni te ay se no k'ay fundo hallasi?

10:13b.JOB.010.013 Kulu nda yaadin ni na harey wo tugu ni bina ra, Ay bay kaŋ woodin kulu go ni do.

10:14b.JOB.010.014 D'ay harta, ni g'a seeda, Ni s'ay ciya adilante mo ay taaley boŋ.

10:15b.JOB.010.015 D'ay ya boro laalo no, kaari ay! Baa ay sinda taali, ay day s'ay boŋ tunandi. Kayna wasa ay se, masiiba day no ay goono ga di.

10:16b.JOB.010.016 Zama baa ay n'ay boŋ sambu, Ni day g'ay koli sanda muusu beeri cine. Ni ga ni gonitara cabe ay boŋ mo.

10:17b.JOB.010.017 Ni ga seedayaŋ tonton ay boŋ mo, Ni futa kaŋ ni gonda ay boŋ go ga tonton waati kulu, Marga ga marga boŋ no kaŋ yaŋ ga kand'ay gaa yanje.

10:18b.JOB.010.018 Yaadin gaa, ifo se no ni n'ay fattandi ka kaa gunde ra? Doŋ ay ma bu day, mo kulu ma si di ay.

10:19b.JOB.010.019 Doŋ ay ciya sanda hay fo kaŋ i mana te. Doŋ i ma kond'ay za gunde hayyaŋo ka koy saaray.

10:20b.JOB.010.020 Ay jirbey, manti ikayna fooyaŋ no? Yaadin gaa binde, ni ma naŋ ka fay d'ay, Ya farhã kayna

10:21b.JOB.010.021 za ay mana gana ka koy naŋ kaŋ ay si ye ka kaa koyne, Sanda ay ma koy kubay nda buuyaŋ biya laabo ra.

10:22b.JOB.010.022 Kubay bi tik! laabo ra, kubay no gumo, Buuyaŋ biya laabo ra, Hay kulu go parkatak kaŋ sinda lordi, Naŋ kaŋ kaari ga hima kubay.»

11

11:1b.JOB.011.001 Kala Zofar Naama bora mo tu ka ne:

11:2b.JOB.011.002 «Sanni boobo wo cine, i si tu i se da hay kulu bo? Boro kaŋ sanni ga baa ga jaŋ taali, wala?

11:3b.JOB.011.003 Ni boŋ sifayaŋo ga naŋ borey ma dangay, wala? Boro kulu si ni haawandi ni hahaaray sanney wo se?

11:4b.JOB.011.004 Zama ni go ga ne Irikoy se: ‹Haya kaŋ ay ga ci din ya cimi no, Ni diyaŋ gaa mo ay ga hanan.›

11:5b.JOB.011.005 Doŋ day Irikoy ma salaŋ, A ma nga meyo fiti ka gaaba nda nin.

11:6b.JOB.011.006 A ma laakal gundu cabe ni se, Zama laakal hanno wo, dumi-dumi no. Ma bay fa, kaŋ Irikoy ga dinya ni goy laalo jara gaa.

11:7b.JOB.011.007 Ni ga hin ka fintal hala ni ma Irikoy muraadu guusey fisi ka kaa taray no? Wala ni ga hin ka Hina-Kulu-Koyo fintal ka ban no?

11:8b.JOB.011.008 Zama beene mooray cine no, mate no ni ga te? A guusu nda Alaahara mo, ifo no ni ga bay?

11:9b.JOB.011.009 A kuuyaŋo bisa ndunnya, A bisa teeko tafayyaŋo mo.

11:10b.JOB.011.010 D'a gana ka bisa, d'a daabu, D'a na borey margu ciiti do, May no ga hin k'a ganji?

11:11b.JOB.011.011 Zama a ga bay kaŋ borey ya yaamo no. A ga di goy laalo, baa a mana laakal ye a gaa.

11:12b.JOB.011.012 Amma saamo ga caram han kaŋ hane i na ganji farkayze hay Adam-ize gaa.

11:13b.JOB.011.013 Da ni miila ni bina ma saba, Ka ni kambe salle Irikoy gaa,

11:14b.JOB.011.014 Da zunubi go ni do, Ni m'a hibandi ka ye nangu mooro. Ni ma si naŋ mo adilitaray-jaŋay ma goro ni windo ra.

11:15b.JOB.011.015 Saaya din daahir no ni ga ni moyduma tunandi Irikoy gaa laru si. Oho, ni ga kay a ma boori, humburkumay si ni di,

11:16b.JOB.011.016 Zama ni ga dinya ni masiiba. Sanda beene hirriyaŋ kaŋ bisa, Yaadin cine no ni ga fongu a gaa.

11:17b.JOB.011.017 Ni fundo mo ga kaari hal a ma bisa sanda wayno go zaari bindi cine. Baa kubay go no, kal a ma hima mo boyaŋ wane cine.

11:18b.JOB.011.018 Baani samay no ni ga goro, zama ni gonda beeje. Oho, ni ga guna-guna nangey kulu, ka kani baani samay.

11:19b.JOB.011.019 Ni ga kani nooya, kaŋ boro kulu si ni humburandi, Oho, hala boro boobo ga ni gomni ŋwaaray.

11:20b.JOB.011.020 Amma boro laaley moy ga gaze, I si du zuru-ka-yana yaŋ fondo mo. I jina fonnayyaŋ kaŋ ga cindi i se, Kala buuyaŋ hinne no.»

12

12:1b.JOB.012.001 Gaa no Ayuba tu ka ne:

12:2b.JOB.012.002 «Sikka si araŋ no ga ti bayraykooney, Laakal mo ga bu araŋ banda!

12:3b.JOB.012.003 Amma ay mo gonda fahamay, manti araŋ hinne no bo. Yana gaze araŋ gaa. Day, man boro kaŋ si harey din dumi bay?

12:4b.JOB.012.004 I n'ay ciya danga boro kaŋ te haari hari nga coro se. Ay, boro kaŋ na adduwa te Irikoy gaa, A tu ay se mo. Adilante no ay, cimi toonante koy, I n'ay ciya haari hari mo.

12:5b.JOB.012.005 Boro kaŋ goono ga maa ndunnya kaani, A bina ra a ga donda masiiba ka ne a go soolante boro kaŋ ca ga ba ka tansi din se.

12:6b.JOB.012.006 Fondo kosaraykoy nangorayey ga te albarka, Borey kaŋ yaŋ ga Irikoy zokoti mo ga goro baani samay, I gonda ngey tooro mo ga gaay ngey kambey ra.

12:7b.JOB.012.007 Amma sohõ ni ma ganji hamey hã, I ga ni dondonandi mo. Beene batama curayzey mo ga ci ni se.

12:8b.JOB.012.008 Wala ma salaŋ ganda laabo se, a ga ni dondonandi. Teeku hamey mo ga dede ni se.

12:9b.JOB.012.009 Woodin yaŋ kulu ra, Man wo kaŋ mana bay kaŋ Rabbi kamba no ka woodin goy?

12:10b.JOB.012.010 A kambe ra no fundikooni kulu fundi bara, Hala nda Adam-izey kulu fulanzam funsuyaŋey.

12:11b.JOB.012.011 Hanga, manti a ga sanni neesi no, Sanda mate kaŋ cine deene ga nga ŋwaaro taba?

12:12b.JOB.012.012 Laakal go arkusu zeeney do, Aloomar kuuku ra mo no fahamay bara.

12:13b.JOB.012.013 Irikoy se no laakal da hina bara, A do mo no saaware da fahamay go.

12:14b.JOB.012.014 A go, a ga zeeri, daama si no borey ma ye ka cina. A ga boro daabu, fitiyaŋ daama si no mo.

12:15b.JOB.012.015 A ga beene hari ganji, hala nango ma koogu, Koyne, a ga ye k'a taŋ mo, Hal a ma laabu ŋwa.

12:16b.JOB.012.016 Hina nda laakal si kal a se. Halliko da boro kaŋ a ga halli, ikulu a wane yaŋ no.

12:17b.JOB.012.017 A ga saawarekoy ku ka kond'ey, A ga alkaaley ciya saamoyaŋ.

12:18b.JOB.012.018 A ga bonkooney hawyaŋ sisirey feeri, K'i cantey haw da guddama.

12:19b.JOB.012.019 A ga alfagey ku ka kond'ey, A ga hinkoyey mo zeeri.

12:20b.JOB.012.020 A ga sanni gonitaraykoyey dangandi, A ga dottijey fayanka ta i gaa mo.

12:21b.JOB.012.021 A ga donda-caray gusam koy-izey boŋ, A ga gaabikooney guddamey feeri.

12:22b.JOB.012.022 A ga kubay ra gundu fisi ka kaa taray, A ga buuyaŋ biya bangandi taray kwaaray.

12:23b.JOB.012.023 A ga ndunnya dumey ciya iboobo, a ma ye k'i halaci. A m'i yulwandi, ka kond'ey tamtaray mo.

12:24b.JOB.012.024 A ga ndunnya boro beerey fahamay ta i gaa, A ga naŋ i ma te boŋdaray saaji ra naŋ kaŋ fondo si no.

12:25b.JOB.012.025 I goono ga dadab kubay ra, kaari si no. A ga naŋ i ma dira ka teeni sanda boro kaŋ bugu cine.

13

13:1b.JOB.013.001 Guna, woodin yaŋ kulu no ay moy di, Ay hanga maa ka faham mo.

13:2b.JOB.013.002 Haŋ kaŋ araŋ bay, ay mo n'a bay, Yana gaze araŋ gaa bo.

13:3b.JOB.013.003 Kala day ya to d'ay sanno Hina-Kulu-Koyo do, Irikoy jine no ay ga ba ay m'ay sabaabo cabe.

13:4b.JOB.013.004 Amma araŋ wo tangari teekoyaŋ no, Safarikoy yaamo yaŋ no araŋ kulu.

13:5b.JOB.013.005 D'araŋ yadda, doŋ araŋ ma dangay day, sum! I ga woodin mo ye araŋ do laakal no.

13:6b.JOB.013.006 Sohõ wa maa ay sabaabo, Wa hanga jeeri ay me ŋwaarayyaŋo wo se.

13:7b.JOB.013.007 Araŋ ga Irikoy gaakasinay da cimi-jaŋay sanni, wala? Araŋ m'a gaakasinay no koyne nda diibi-diiba sanni, wala?

13:8b.JOB.013.008 Araŋ ga baar'a-baar'a te a se no? Araŋ ga faasa Irikoy se no?

13:9b.JOB.013.009 A boori nooya d'a na araŋ fisi ka kaa taray? Wala araŋ ga hin k'a fafagu sanda mate kaŋ cine i ga boro fafagu?

13:10b.JOB.013.010 Daahir no a ga kaseeti araŋ gaa, D'araŋ goono ga baar'a-baar'a te tuguyaŋ ra.

13:11b.JOB.013.011 A beera si araŋ humburandi no? Wala a humburkuma joota si araŋ di?

13:12b.JOB.013.012 Araŋ sanney ciya sanda boosu cine, Araŋ sabaabey botogo wane yaŋ no.

13:13b.JOB.013.013 Wa dangay, wa fay d'ay hinne, ay ma salaŋ. Hay kulu kaŋ ga du ay, a ma soobay ka kaa.

13:14b.JOB.013.014 Ifo se no ay g'ay baso nama? Y'ay fundo daŋ kambey mo?

13:15b.JOB.013.015 Baa a g'ay wi, kulu nda yaadin ay ga de a gaa. Amma kulu nda yaadin ay ga kay ay cimo se a jine.

13:16b.JOB.013.016 Woodin mo ga ciya ay se faaba. Boro kaŋ siino ga may a se si koy a do.

13:17b.JOB.013.017 W'ay sanno wo hangan. Haŋ kaŋ ay ga ci mo, a ma furo araŋ hangey ra.

13:18b.JOB.013.018 Guna, ay n'ay kalima soola, Ay bay mo kaŋ ay ga ciya boro kaŋ sinda taali.

13:19b.JOB.013.019 Man bora kaŋ ga hin k'ay kakaw? D'a go no mo, kala ya dangay, y'ay fundo taŋ.

13:20b.JOB.013.020 Hari hinka hinne no ni ma si te ay se: Woodin gaa no ay si tugu ni se.

13:21b.JOB.013.021 Ma ni kamba sambu ay boŋ sap-sap! Ma s'ay humburandi mo nda ni humburandiyaŋ harey.

13:22b.JOB.013.022 Gaa no ni ma ce, ay mo ga tu. Wala ma naŋ ay ma ce, ni mo ma tu ay se.

13:23b.JOB.013.023 Ay zunubey d'ay goy laaley, ngey boro marge no? Ni m'ay bayrandi nd'ay hartayaŋ d'ay zunubo mo.

13:24b.JOB.013.024 Ifo se no ni go ga ni moyduma tugu ay se, Ni go ga ay himandi ni ibare no?

13:25b.JOB.013.025 Kobto kaŋ haw ga gaaray no ni ga taabandi, wala? Ni ga subu patarmi kogo kankam, wala?

13:26b.JOB.013.026 Zama sanni kaŋ yaŋ ga fortu no ni goono ga hantum ay boŋ. Ni goono mo g'ay tilasandi y'ay zankataray waate taaley alhakko tubu.

13:27b.JOB.013.027 Ni goono mo g'ay cey daŋ bundu baka* ra. Naŋ kaŋ ay taamu kulu ni go g'ay batu. Ni goono ga hirri daŋ ay ce taamey se.

13:28b.JOB.013.028 Ay ga hima hay fo fumbo kaŋ go ga halaci, Sanda kwaay kaŋ naana-baana ŋwa.

14

14:1b.JOB.014.001 Boro kaŋ wayboro ga hay, a jirbey ya ikaynayaŋ no, Toonante mo no nda taabi.

14:2b.JOB.014.002 Tuuri boosi cine no a ga bangay, A ga ye ka lakaw koyne. Sanda mate kaŋ cine bi go no, A ga bisa, a si duumi bo.

14:3b.JOB.014.003 To, woone dumi boŋ no ni ga ni mo sinji, wala? Ni ga konda ay, iri ma ciiti nda care no?

14:4b.JOB.014.004 May no ga hin ka hari hanno kaa haŋ kaŋ si hanan ra? A koy si no!

14:5b.JOB.014.005 Za kaŋ ni na boro jirbey waadu a se, A handey lasaabuyaŋo mo go ni do, Ni na hirri daŋ a se mo kaŋ a si hin ka bisa a gaa.

14:6b.JOB.014.006 Kala ni ma ni boŋ bare a se, a ma fulanzam, Hal a ma nga zaaro kubandi, Sanda boro kaŋ goono ga sufuray goy te.

14:7b.JOB.014.007 Tuuri kaŋ i pati, I ga du ka laakal dake a gaa hal a ga te kobto koyne, Daahir kay, i si jaŋ a gaa kobto kaynayaŋ.

14:8b.JOB.014.008 Baa day kaŋ a kaajey zeen ganda, A tiksa mo bu noodin laabo ra,

14:9b.JOB.014.009 Kulu nda yaadin hari kaani maayaŋ do no a ga te kobto, Ka kambayaŋ salle sanda tuuri cindey.

14:10b.JOB.014.010 Amma Adam-ize wo, a ga bu no, ka kani ganda. Oho, a ga nga fulanzama taŋ, man no a go koyne?

14:11b.JOB.014.011 Sanda mate kaŋ cine hari ga ziji ka daray teeko ra, Wala sanda gooru kaŋ koogu cine, A haro ga sundu ka ban,

14:12b.JOB.014.012 Yaadin cine no boro mo ga kani, Kaŋ a si ye ka tun koyne. A si ye ka mo hay koyne, kala beeney ma ban. I s'a tunandi nga jirbo gaa mo.

14:13b.JOB.014.013 Hala day ni yadda, doŋ m'ay tugu Alaahara ra, M'ay tugu hala waati kaŋ ni futa bisa. Ma zaari kosu ay se mo, gaa i ma ye ka fongu ay gaa.

14:14b.JOB.014.014 Da boro bu, a ga ye ka funa koyne, wala? Ay tangami jirbey kulu kala ya batu, Hala waati kaŋ ni n'ay barmay.

14:15b.JOB.014.015 Ni ga ce, ay mo ga tu ni se. Ni ga yalla-yalla nda ni kambe goyey.

14:16b.JOB.014.016 Amma sohõ ni go g'ay gana, ce daara fo-fo. Manti ni goono g'ay guna no, Zama ni m'ay zunubo fonnay?

14:17b.JOB.014.017 Ni n'ay taalo daabu zika ra, Ni g'ay laala daabu-daabu mo.

14:18b.JOB.014.018 Amma tondi kuuku kaŋ kaŋ, kal a ma halaci. I ga tondi daari hibandi ka kaa nga nango ra.

14:19b.JOB.014.019 Hari zuru do haray tond'ize yaŋ ga barmay, Hari yaa mo ga ganda laabo nyun ka kusa ku, Yaadin cine no ni mo, ni ga boro beeje wi.

14:20b.JOB.014.020 Ni bis'a gaabi duumi, kal a ma ban. Ni g'a moyduma barmay k'a sallama.

14:21b.JOB.014.021 A izey ga du beeray, amma nga ya s'a bay. I ga di kayna mo, a si bay a gaa.

14:22b.JOB.014.022 Nga boŋ se no a ga maa doori nga gaahamo ra, Nga boŋ se mo no a bine ga sara.»

15

15:1b.JOB.015.001 Gaa no Elifaz Teman boro tu ka ne:

15:2b.JOB.015.002 «Boro kaŋ gonda laakal ga sanni yeti da bayray yaamo, Wala a ga nga gundo toonandi nda wayna funay hawo no?

15:3b.JOB.015.003 A ma kakaw te da sanni kaŋ sinda nafa mo, Wala nda sanniyaŋ kaŋ si hay kulu hanse?

15:4b.JOB.015.004 Oho, yaadin no ni goono ga Irikoy humburkumay zeeri, Ni go ga Irikoy se sududuyaŋ mo ganji.

15:5b.JOB.015.005 Zama ni taalo ga daŋ ni meyo ma salaŋ, Ni na hiilantey deene suuban mo.

15:6b.JOB.015.006 Ni bumbo meyo go ga ni zeeri, manti ay bo. Ni bumbo sanno goono ga seeda ni boŋ.

15:7b.JOB.015.007 To, nin no ga ti bora kaŋ i sintin ka hay, wala? Wala i na ni kaa taray za i mana tudey te no?

15:8b.JOB.015.008 Irikoy saaware marge ra no ni goono ga goro ka maa? Ni goono ga ne ni hinne do no laakal bara, wala?

15:9b.JOB.015.009 Ifo no ni ga bay kaŋ iri wo si bay? Wala ifo no ni faham d'a kaŋ si iri wo banda?

15:10b.JOB.015.010 Iri do haray gonda hamni kwaaray koy yaŋ da arkusu zeeno boobo, Boroyaŋ kaŋ ga zeen ni baabo gumo.

15:11b.JOB.015.011 Irikoy yaamaryaŋey kayna ni se no? Wala baa sanni baana kaŋ i te ni se?

15:12b.JOB.015.012 Ifo se no ni ta ni bina ma ni halli? Ifo se mo no ni moy goono ga ciray?

15:13b.JOB.015.013 Hala nda ni bare ka fay da Irikoy ni biya ra, Kaŋ ni goono ga naŋ sanney wo dumi ma fun ni me ra.

15:14b.JOB.015.014 Adam-ize wo, ifo no? sanku fa a ma ciya hanante? Wayboro hayyaŋ mo, ifo no, hal a ma ciya adilante?

15:15b.JOB.015.015 Guna, baa a wane hanantey, Irikoy mana naanay i gaa bo. Oho, hala beeney bumbo sinda hananyaŋ a do.

15:16b.JOB.015.016 Sanku fa binde boro kaŋ go, Fanta hari no, ifumbo mo no! Adam-ize kaŋ ga laala haŋ sanda hari cine!

15:17b.JOB.015.017 Ma maa ay se ay ma woone cabe ni se mo. Haŋ kaŋ ay jin ka di, nga no ay ga ci.

15:18b.JOB.015.018 Haŋ kaŋ laakalkooney ci, Ngey kaayey do no i maa r'a, Ngey mo man'a tugu.

15:19b.JOB.015.019 Ngey hinne se no i na laabo no, Yaw fo kulu mana furo a ra.

15:20b.JOB.015.020 Boro laalo ga azaaba haŋ nga jirbey kulu ra, I na jiiri timmanteyaŋ jisi kankamandiko se.

15:21b.JOB.015.021 Humburkumay yooje maayaŋ go a hanga ra, A baani jirbey ra mo halaciko no ga kaŋ a boŋ.

15:22b.JOB.015.022 A ga laakal kaa hala nga ga ye ka kaa ka fun kubay ra, Takuba mo goono g'a batu.

15:23b.JOB.015.023 A ga windi-windi ka ŋwaari ceeci, Ka ne: ‹Man no a go?› A bay kaŋ kubay zaaro maan nga gaa.

15:24b.JOB.015.024 Kankami nda foyrayyaŋ goono g'a humburandi. I goono ga te a boŋ zaama mo, Sanda bonkooni kaŋ go soolante wongu se.

15:25b.JOB.015.025 Zama a na nga kambe salle ka gaaba nda Irikoy. A goono ga boŋbeeray te ka gaaba nda Hina-Kulu-Koyo.

15:26b.JOB.015.026 Boŋ sanday no a ga zuru ka koy d'a Irikoy gaa, A korayo banda gaa gonda wargayaŋ.

15:27b.JOB.015.027 Zama a na nga moyduma daabu nda maani, A na maani margu mo nga tanja boŋ.

15:28b.JOB.015.028 A goro mo gallu kurmuyaŋ ra, Windey kaŋ ra boro kulu si da goray, Wo kaŋ yaŋ zeen hala i ga ba ka kaŋ.

15:29b.JOB.015.029 A si te arzakante, a duura si duumi, A fari nafa mo si sumbal kala ganda.

15:30b.JOB.015.030 A si du ka fun kubay ra, Danji beela g'a tuuri kambey koogandi mo. Irikoy meyo ra funsaro no g'a ganandi.

15:31b.JOB.015.031 A ma si de yaamo gaa, ka nga boŋ halli mo, Zama yaadin gaa yaamo ga ciya a wane alhakku.

15:32b.JOB.015.032 A g'a kulu bana a se za da hinay. A tuuri kambe mo si zaada.

15:33b.JOB.015.033 A ga nga izey kaŋ mana nin yaŋ zama, Danga reyzin* nya cine. Danga zeytun* tuuri-nya mo, a ga nga booso dooru.

15:34b.JOB.015.034 Zama borey kaŋ yaŋ ga wangu Irikoy ganayaŋ, I jama si du banda, Danji mo ga ngey kaŋ yaŋ ga me-daabu ta windey ŋwa.

15:35b.JOB.015.035 I ga kun da hasaraw ka laala hay, I biney mo go ga halliyaŋ soola.»

16

16:1b.JOB.016.001 Ayuba tu ka ne:

16:2b.JOB.016.002 «Ay jin ka maa sanni woodin yaŋ dumi boobo. Araŋ kulu yaamarkoyaŋ no kaŋ ga taabandi.

16:3b.JOB.016.003 Haw sanni wo gonda kokor no? Wala ifo no ka ni zukku kaŋ naŋ ni goono ga tu?

16:4b.JOB.016.004 Ay mo gonda hina kaŋ ga salaŋ sanda araŋ cine. Amma d'a ma ciya araŋ fundey go sanda nango kaŋ ay wano go, Doŋ ay ga hin ka sanniyaŋ margu-margu araŋ boŋ, K'ay boŋ zinji araŋ gaa.

16:5b.JOB.016.005 Amma ay wo, kala day ya araŋ gaabandi nd'ay meyo. Yaamaryaŋo kaŋ ay meyo ga te araŋ se din g'araŋ gurzugayey dogonandi.

16:6b.JOB.016.006 Baa ay salaŋ, ay bine sara day si te daama, Wala baa ay naŋ mo, daama woofo no ay ga maa?

16:7b.JOB.016.007 Amma sohõ Irikoy n'ay fargandi. _Ya Irikoy_, ni n'ay jama kulu ciya yaamo.

16:8b.JOB.016.008 Ni n'ay daŋ ya koogu parkatak, ay taalo seeda nooya! Faabiri go ga tun ka gaaba nd'ay, Taray kwaaray ra a goono ga seeda ay boŋ.

16:9b.JOB.016.009 A futa ra a n'ay tooru-tooru, ka wangu ay fundo. A na nga hinjey kaama ay se, Ay yanjekaaro goono g'ay gullu nda nga moy.

16:10b.JOB.016.010 I na ngey meyey nyatte ay gaa k'ay wow, I go g'ay saŋ-saŋ da kayna, i go ga margu ay boŋ.

16:11b.JOB.016.011 Irikoy n'ay daŋ boro yaamo yaŋ kambe ra, A n'ay jindaw laalakoyey kambe ra.

16:12b.JOB.016.012 Doŋ ay goono ga goro baani goray ra, Kal a n'ay ceeri-ceeri. Oho, jinde gaa no a n'ay di k'ay bagu-bagu. A n'ay sinji, k'ay ciya nga se goo hari.

16:13b.JOB.016.013 A hangawey n'ay daŋ game. A n'ay teelo gooru-gooru, bakaraw si, A n'ay tay haro mun ganda.

16:14b.JOB.016.014 A go g'ay bagu, korti go korti boŋ. A ga kaŋ ay boŋ sanda wongaari fo cine.

16:15b.JOB.016.015 Ay na zaara-zaarayaŋ ta ka daŋ ay kuuro gaa, Ay n'ay hillo sara laabo ra.

16:16b.JOB.016.016 Ay moyduma sara nda hẽeni, Ay mo-kuurey gaa mo gonda buuyaŋ biya,

16:17b.JOB.016.017 Baa kaŋ toonye si no ay kambe ra, Ay adduwa mo ga hanan.

16:18b.JOB.016.018 Ya laabo, ma s'ay kuro fiji, Ay hẽeno mo ma si du kayyaŋ nangu.

16:19b.JOB.016.019 Baa sohõ, guna, ay gonda ay seeda beena ra, Yongo beene mo, boro go no kaŋ ga yadda ka kay ay se.

16:20b.JOB.016.020 Ay corey goono g'ay hahaara, Amma ay moy goono ga mundi dooru Irikoy gaa,

16:21b.JOB.016.021 Hala boro fo ma kalima gaakasinay te Irikoy do, Sanda mate kaŋ cine boro ga te nga gorokasin se.

16:22b.JOB.016.022 Zama hal a ga to jiiri kayna fooyaŋ, Ay ga fondo gana kaŋ ay si ye ka kaa koyne.

17

17:1b.JOB.017.001 Ay biya halaci, ay jirbey ban, Saaray hinne no ka cindi ay se.

17:2b.JOB.017.002 Daahir hahaaraykoyey go ay do, Ay g'ay moy basu i zokotiyaŋo gaa.

17:3b.JOB.017.003 Ya Irikoy, ma tolme jisi ni do ay se, Da manti nin, may no ga kay ay se binde?

17:4b.JOB.017.004 Zama ni na fahamay tugu i biney se, Woodin sabbay se no ni s'i beerandi.

17:5b.JOB.017.005 Boro kaŋ na nga corey amaana ŋwa zama nga ma du alhakku, Baa a izey moy ga te kubay-kubay.

17:6b.JOB.017.006 Irikoy n'ay ciya donda-caray hari borey se, I go no mo ga yollo tuf'ay se ay moyduma gaa.

17:7b.JOB.017.007 Ay mwa diyaŋ zabu ay bine sara sabbay se, Ay dabey kulu mo ciya sanda tuuri-nya bi cine.

17:8b.JOB.017.008 Boro adilantey ga te dambara nda woodin. Borey kaŋ yaŋ sinda taali ga tun ka gaaba nda ngey kaŋ yaŋ siino ga may Irikoy se.

17:9b.JOB.017.009 Amma adilanta ga koy nga koyyaŋ, Kambe hanantekoy mo ga soobay ka gaabu ka koy jine.

17:10b.JOB.017.010 Amma day wa ye ka kaa, araŋ kulu. Wa kaa day, Zama ay mana laakalkooni gar araŋ game ra.

17:11b.JOB.017.011 Ay jirbey bisa, ay miila-miiley mo halaci, Hala nd'ay bina fongu-fongu yaŋey.

17:12b.JOB.017.012 Cin ga barmay ka ciya sanda zaari cine. I ga ne: ‹Kaari ga maan, baa kaŋ i go kubay ra.›

17:13b.JOB.017.013 D'ay na laakal ye Alaahara gaa, a ma ciya ay windi, Da mo ay n'ay daaro daaru kubay ra,

17:14b.JOB.017.014 D'ay ne saaray se: ‹Ni ya ay baaba no,› Wala d'ay ne nooni se: ‹Ni ya ay nya d'ay wayme no.›

17:15b.JOB.017.015 Man gaa binde haŋ kaŋ gaa ay ga laakal dake? Ay beeja mo binde, may no ga di a?

17:16b.JOB.017.016 Yongo ganda Alaahara no a ga koy, D'iri koy care banda ka fulanzam laabo ra.»

18

18:1b.JOB.018.001 Gaa no Bildad Suhi bora tu ka ne:

18:2b.JOB.018.002 «Waati fo no araŋ ga sanney wo dumi naŋ? Wa lasaabu day, a banda iri mo ga salaŋ.

18:3b.JOB.018.003 Ifo se no ni go ga iri himandi danga almanyaŋ, Ni do no iri go danga harramyaŋ cine?

18:4b.JOB.018.004 Nin wo, kaŋ na ni boŋ tooru-tooru ni futa ra, I ga ndunnya naŋ koonu ni sabbay se no, Wala i ga tondi hibandi ka kaa nga nango ra?

18:5b.JOB.018.005 Daahir i ga boro laalo annura wi, A danji beela kaaro mo ga gaze.

18:6b.JOB.018.006 Kaari kaŋ go a nangora ra din ga ciya kubay, Fitilla kaŋ go a boŋ beene din mo ga bu.

18:7b.JOB.018.007 A ce taamuyaŋo gaabo ga kankam, Nga bumbo saawara mo g'a soote ganda.

18:8b.JOB.018.008 Zama a cey ga kond'a wufa ra, A go no mo ga taamu kumsay boŋ.

18:9b.JOB.018.009 Hirrimi g'a di ce kondo gaa, Asuuta mo g'a gaay.

18:10b.JOB.018.010 I na korfo hirrimi tugu a se ganda, Guusu hirrimi mo go fondo boŋ.

18:11b.JOB.018.011 Humburkumay beeri g'a humburandi kuray kulu. I g'a ce kondo ŋwa k'a gaaray.

18:12b.JOB.018.012 Haray g'a gaabo ŋwa, Masiiba go soolante a jarga.

18:13b.JOB.018.013 A g'a kuuro ŋwa, Oho, bu doori g'a dabey ŋwa.

18:14b.JOB.018.014 A nangora kaŋ gaa a ga de, a ra no i g'a hamay ka kond'a humburkumay bonkoono do.

18:15b.JOB.018.015 Haŋ kaŋ manti a wane no ga goro a windo ra, I ga sufar* say-say a nangora boŋ.

18:16b.JOB.018.016 A kaajey ga koogu ganda laabo ra, A kambey mo ga lakaw beene.

18:17b.JOB.018.017 Baa a gaa fonguyaŋ ga daray ndunnya ra, A si maa naŋ kwaara ra.

18:18b.JOB.018.018 I g'a gaaray ka kaa kaari ra ka kond'a kubay ra, I g'a gaaray hal a ma fun ndunnya ra.

18:19b.JOB.018.019 A ga jaŋ ize wala haama nga dumey ra, A sinda mo boro kulu kaŋ ga cindi a nangora ra.

18:20b.JOB.018.020 Wayna kaŋay borey dambara nd'a alwaato, Sanda mate kaŋ cine wayna funay borey mo zici dumbu a sabbay se.

18:21b.JOB.018.021 Haciika, yaadin cine no borey kaŋ yaŋ sinda adilitaray nangora ga bara. Ngey kaŋ si Irikoy bay mo, I kayyaŋo do yaadin no a ga bara.»

19

19:1b.JOB.019.001 Ayuba tu ka ne:

19:2b.JOB.019.002 «Waati fo no araŋ g'ay fundo taabandiyaŋo naŋ? Araŋ m'ay bagu-bagu nda sanniyaŋ mo naŋ.

19:3b.JOB.019.003 Sorro way wo kulu araŋ goono g'ay foy no, Haawi mana araŋ di nda mate kaŋ cine araŋ goono g'ay zamba?

19:4b.JOB.019.004 Baa da cimi no ay na taali te, Ay taalo day si bisa ay boŋo boŋ.

19:5b.JOB.019.005 Hala day daahir boŋbeeray no araŋ goono ga cabe ay se, Ka cabe kaŋ ay masiiba no ga ti ay taali dakeyaŋo sabaabu,

19:6b.JOB.019.006 Kulu araŋ ma woodin bay: Irikoy no k'ay zeeri, Nga no ka nga wufa daaru k'ay windi.

19:7b.JOB.019.007 Ay goono ga wurru! Ay goono ga yoy-yoy! toonye sabbay se, Yoy-yoy! amma boro kulu siino ga maa. Ay na gaakasinay ce, amma ay mana du cimi ciiti.

19:8b.JOB.019.008 A n'ay fonda kosaray hal ay si du ka bisa, A na kubay sinji ay se fonda gaa.

19:9b.JOB.019.009 A n'ay darza kulu kaa ay gaa, Ka boŋtoba kaa ay boŋo gaa.

19:10b.JOB.019.010 A n'ay bagu-bagu kuray kulu, ay ban mo. A n'ay beeja dagu mo sanda tuuri-nya.

19:11b.JOB.019.011 A na nga futa danjo diyandi ay boŋ, A n'ay ye nga yanjekaarey ra.

19:12b.JOB.019.012 A marga satey ga kaa care banda, Ka ngey fonda hanse zama ngey ma wongu nd'ay, I goono ga gata sinji k'ay nangora windi.

19:13b.JOB.019.013 A n'ay nya-izey moorandi ay gumo, Ay mo-ka-bayrayey mo n'ay fay waani.

19:14b.JOB.019.014 Ay dumey gaze, Ay goray corey mo dinya ay gaa.

19:15b.JOB.019.015 Borey kaŋ yaŋ ga zumbu ay kwaara, baa ay koŋŋey mo n'ay himandi sanda yaw cine. Ay ciya i se sanda mebaraw.

19:16b.JOB.019.016 Ay g'ay bannya ce, Amma a si tu ay se, Baa ay n'a ŋwaaray da sanni.

19:17b.JOB.019.017 Ay funsaro ciya hay fo yaw ay wando se, Ay ciya fanta hari ay nya ize gundey mo se.

19:18b.JOB.019.018 Baa zanka kayney go ga donda ay. D'ay tun ka kay, kal i m'ay wow.

19:19b.JOB.019.019 Ay saaware corey kulu no k'ay fanta, Ay baakoy mo bare ka wangu ay.

19:20b.JOB.019.020 Ay biriyey go ga naagu ay baso nd'ay kuuro gaa. Da cat no ay du ka faaba.

19:21b.JOB.019.021 Hay! wa bakar ay se, wa bakar ay se, ya araŋ ay corey, Zama Irikoy kambe n'ay ham.

19:22b.JOB.019.022 Ifo se no araŋ goono g'ay fundo gurzugandi sanda mate kaŋ cine Irikoy goono ga te? Ay gaa-baso mana wasa araŋ se bo?

19:23b.JOB.019.023 Doŋ d'i g'ay sanney hantum! Doŋ day i m'i hantum tira fo ra!

19:24b.JOB.019.024 Doŋ i m'i jabu tondi hantumyaŋ ra hal abada da guuru kalam, K'i kawaatimandi nda bidile.

19:25b.JOB.019.025 Zama ay bay kaŋ ay Fansakwa gonda fundi, Kokor banda mo a ga kay ndunnya boŋ.

19:26b.JOB.019.026 Ay gaaham woone halaciyaŋ banda, Kulu nda yaadin ay gaaham ra, ay ga di Irikoy.

19:27b.JOB.019.027 Ay ga di a mo, ay bumbo, Ay moy no ga di a, manti mo sanda boro fo wane bo. Ay bina go ga yalla-yalla ay ra.

19:28b.JOB.019.028 D'araŋ ne: ‹Mate kaŋ iri g'a fundo gurzugandi nd'a neeya!› Kulu sanno kaajo go ay do.

19:29b.JOB.019.029 Kal araŋ ma humburu takuba araŋ boŋ se, Zama dukuri ga takuba ciito candi ka kande, Zama araŋ ma bay kaŋ ciiti hane go no.»

20

20:1b.JOB.020.001 Zofar Naama bora tu ka ne:

20:2b.JOB.020.002 «Woodin se no ay fongu-fongu yaŋey ga naŋ ay ma tu, Laakal tunay kaŋ go ay gaa sabbay se.

20:3b.JOB.020.003 Ay maa taali dakeyaŋo kaŋ n'ay haawandi, Amma ay fahama ra no ay biya go ga naŋ ay ma tu.

20:4b.JOB.020.004 Ni mana bay kaŋ za doŋ, Za waati kaŋ i na boro daŋ ndunnya ra,

20:5b.JOB.020.005 Boro laalo zamuuyaŋ wo, idunguriyo no? Borey kaŋ yaŋ si may Irikoy se mo, i farhã ya mo-ka-mi yaŋ no.

20:6b.JOB.020.006 Baa a beera to kala beene, A boŋo mo ma to beene burey gaa,

20:7b.JOB.020.007 Kulu nda yaadin a ga halaci no, Sanda nga bumbo wuro cine hal abada, Hala borey kaŋ yaŋ di a doŋ ga ne: ‹Day, man no a go?›

20:8b.JOB.020.008 A ga tun ka deesi ka daray sanda hindiri cine, I si ye ka di a koyne. Oho, i g'a gaaray sanda cin hindiri cine.

20:9b.JOB.020.009 Mwa kaŋ di a waato si ye ka di a koyne. A nangora mo si ye ka di a koyne.

20:10b.JOB.020.010 A kambey mo ga ngey duura yeti, A izey ga gomni ceeci talkey gaa.

20:11b.JOB.020.011 A zankataray biriyey to nda gaabi, Amma nga nd'a no ga kani ganda laabo ra.

20:12b.JOB.020.012 Baa laala ga kaan a meyo ra, Wala baa a n'a tugu nga deena cire,

20:13b.JOB.020.013 Baa a n'a haggoy, a mana yadda nga m'a taŋ, Amma a n'a gaay nga me ra hala ka kaa sohõ,

20:14b.JOB.020.014 Kulu nda yaadin a ŋwaaro ga bare a gunda ra ka ciya gondi naaji a ra.

20:15b.JOB.020.015 A na arzaka gon, a ga ye k'a yeeri koyne. Irikoy no ga naŋ a m'a mun ka kaa nga gunda ra.

20:16b.JOB.020.016 A ga firsa naaji sunsum, Gondi deene no g'a zeeri.

20:17b.JOB.020.017 A si hari zuray goorey guna, Danga yu nda ji isey kaŋ yaŋ ga zuru nooya.

20:18b.JOB.020.018 Haŋ kaŋ a taabi ka du, Kal a ma ye k'a no, a s'a gon bo. A si farhã mo nda nga duura yulwayaŋ.

20:19b.JOB.020.019 Za kaŋ a na talkey kankam k'i furu mo, A windo, manti nga no k'a cina, A n'a kom no da gaabi kwaaray.

20:20b.JOB.020.020 Zama a biniya ra a si laakal kanay bay, Haŋ kaŋ a ga ba gumo kulu no a si du ka baa afo faaba.

20:21b.JOB.020.021 Hay kulu si no kaŋ n'a biniya yana, Woodin se no a arzaka si duumi.

20:22b.JOB.020.022 A arzaka yulwanta ra no a ga di kankami. Taabi hankoy kulu kambey ga kaŋ a boŋo boŋ.

20:23b.JOB.020.023 A goono ga soola ka nga gunda toonandi nooya, Kala Irikoy ma nga futay korna gusam a boŋ. A g'a dooru a boŋ sanda hari cine, Woodin mo no ga ciya a ŋwaari.

20:24b.JOB.020.024 A go zuray ra guuru wongu jinay se, Kala guuru-say biraw hayyaŋ g'a fun,

20:25b.JOB.020.025 I goono g'a dagu, kal a ma fatta banda haray, Oho, hangaw deena kaŋ ga nyaale din ga fatta a tayo ra. Humburkumay kaa a gaa nooya.

20:26b.JOB.020.026 I na kubay hinne jisi a arzaka se. Danji kaŋ boro kulu mana funsu no ga bora din ŋwa. Danjo ga haŋ kaŋ cindi a nangora ra ŋwa.

20:27b.JOB.020.027 Beeney g'a laala fisi ka kaa taray, Ganda mo ga tun nga ma kond'a kalima.

20:28b.JOB.020.028 A windo nafa ga say ka bambari Irikoy futa zaaro ra.

20:29b.JOB.020.029 Woodin yaŋ kulu laalakoy baa no Irikoy kambe ra, A tubo nooya kaŋ Irikoy waadu a se.»

21

21:1b.JOB.021.001 Ayuba tu ka ne:

21:2b.JOB.021.002 «Wa hanga jeeri nda himma ka maa ay sanno, Woone mo ma ciya araŋ suurandiyaŋ hari.

21:3b.JOB.021.003 Wa naŋ, ay mo ma salaŋ. D'ay salaŋ ka ban, Gaa araŋ mo ma soobay ka araŋ hahaaray sanney te.

21:4b.JOB.021.004 Ay wo, ay kalima ga margu nda boro no? Ifo no g'ay ganji ya suuru-jaŋay te binde?

21:5b.JOB.021.005 W'ay guna ka soobay ka dambara! Wa araŋ kambey daŋ mo ka araŋ meyey daabu.

21:6b.JOB.021.006 Baa waati kaŋ ay ga fongu, kala ya kankam, Ay gaahamo kulu ma gasi.

21:7b.JOB.021.007 Ifo se no boro laaley ga gay da fundi, I ma zeen, oho, i ma beeri mo da hin?

21:8b.JOB.021.008 I ga di ngey banda go ga sinji ngey nangey ra. I moy ga di ngey gunda izey.

21:9b.JOB.021.009 I nangorayey go baani samay, Humburkumay kulu si no, Irikoy goobo mo s'i kar.

21:10b.JOB.021.010 I yeejey ga gunde daŋ, i si fappe, I haw wayey ga hay, i si te gunde hasaraw,

21:11b.JOB.021.011 I ga ngey ize kayney donton, sanda kuru no, I izey go ga sar ka zimbi.

21:12b.JOB.021.012 I goono ga doon ka goojey da moolo beeri yaŋ kar, I ga farhã waati kaŋ i ga maa seese jinde,

21:13b.JOB.021.013 I goono ga ngey goray te nda arzaka. Amma sahãadin-sahãadin i ga gunguray ka koy Alaahara.

21:14b.JOB.021.014 Ngey binde no ga ne Irikoy se: ‹Fay da iri, Zama iri si ba iri ma ni muraadey bay.

21:15b.JOB.021.015 May no ga ti Hina-Kulu-Koyo hala iri ma may a se? Nafa woofo no iri ga du d'iri na adduwa te a gaa?›

21:16b.JOB.021.016 Guna, i arzakey, manti i kambey ra no a go bo! Borey laaley saawara din ga mooru ay.

21:17b.JOB.021.017 Sorro marge no boro laaley fitilley bu? Sorro marge no masiiba ga kaŋ i boŋ? Sorro marge mo no Irikoy ga bine saray zaban i se nga futa ra?

21:18b.JOB.021.018 Sorro marge mo no i ga ciya sanda bari subu kaŋ go haw jine? Wala danga du kaŋ hari haw bambata goono ga hamay ka kond'a?

21:19b.JOB.021.019 Araŋ wo go ga ne: ‹Irikoy ga boro laala alhakko jisi a izey se.› Dambe day a ma bana boro laalo bumbo gaa, Zama a ma du ka bay!

21:20b.JOB.021.020 Naŋ nga bumbo moy ma di nga halaciyaŋo, Nga bumbo din mo ma Hina-Kulu-Koyo futa haŋ.

21:21b.JOB.021.021 Zama a saalay go nga windo gaa a buuyaŋo banda, wala, Waati kaŋ a handey lasaabuyaŋo gaze?

21:22b.JOB.021.022 Boro kaŋ ga Irikoy dondonandi bayray, a go no, wala? Za kaŋ Irikoy ga beena ra waney ciiti.

21:23b.JOB.021.023 Boro fo ga bu nga gaabo bindi ra, A fundo go fulanzamay ra, fitina si,

21:24b.JOB.021.024 A gaasey ga to da wa, A biriyey londi mo igani no.

21:25b.JOB.021.025 Afo mo ga bu nga fundo gurzuga ra, A mana kaani taba baa ce fo.

21:26b.JOB.021.026 I kulu afolloŋ no, ganda laabo ra no i ga kani, Nooni no g'i daabu.

21:27b.JOB.021.027 Guna, ay na araŋ fonguyaŋey bay, Da me-hawyaŋey kaŋ araŋ goono ga te ay boŋ, Miila laalo waney.

21:28b.JOB.021.028 Zama araŋ go ga ne: ‹Man mayraykoyo windo? Man windo din kaŋ ra boro laaley goro waato?›

21:29b.JOB.021.029 Araŋ mana dirakoy hã bo? Araŋ mana i seedey bay no,

21:30b.JOB.021.030 Kaŋ i ga boro laalo fay waani masiiba zaari ra? I g'i kaa kambe mo futay zaari ra no?

21:31b.JOB.021.031 May no g'a daa cabe a se taray kwaaray? Wala may no g'a goyo alhakko bana a se?

21:32b.JOB.021.032 Kulu nda yaadin, borey g'a sambu ka kond'a saaray do. I ga haggoy d'a saara mo hal a ma boori.

21:33b.JOB.021.033 Gooru gu-guwey ga kaan a se, Borey kulu mo ga gana a banda, Sanda ngey kaŋ yaŋ jin, i bisa haŋ kaŋ ga lasaabu.

21:34b.JOB.021.034 Ifo se no binde araŋ goono g'araŋ kunfayaŋ yaamo wo te ay se, Za kaŋ sanney kaŋ araŋ goono ga kande yaŋ, I ra hay kulu mana cindi kala tangari?»

22

22:1b.JOB.022.001 Kala Elifaz Teman bora tu ka ne:

22:2b.JOB.022.002 «A ga hin ka te boro ma nafa fo te Irikoy se mate kaŋ laakalkooni ga nafa nga boŋ se?

22:3b.JOB.022.003 Ni adilitara ya hay kaano fo no Hina-Kulu-Koyo se? Wala ni cimi toonanta gonda nafa fo no a se?

22:4b.JOB.022.004 Zama a ga humburu nin se no a ga kaseeti ni gaa? Wala nin d'a ga koy ciiti do no?

22:5b.JOB.022.005 Ni laala, manti ibambata no? Ni zunubey mo, i sinda me.

22:6b.JOB.022.006 Ni na tolme ta ni nya-izo gaa yaamo-yaamo, Ni na dirakooney bankaarayey kaa i gaa.

22:7b.JOB.022.007 Ni mana fargantey no hari i ma haŋ, Ni na harayzey ganji ŋwaari mo.

22:8b.JOB.022.008 Amma gaabikooni ka bara nda ndunnya, Gaakurantey mo ga goro a ra.

22:9b.JOB.022.009 Ni na wayboro kaŋ kurnye bu yaŋ sallama kambe koonu, Ni na alatuumey kambey ceeri mo.

22:10b.JOB.022.010 Woodin sabbay se no kumsayyaŋ goono ga ni windi, Haŋ kaŋ ga kaŋ farap! folloŋ mo, A humburkuma goono ga ni taabandi.

22:11b.JOB.022.011 Kubay go no hala ni si hin ka di, Beene hirriyaŋ mo ga ni daabu.

22:12b.JOB.022.012 Irikoy si yongo beene no? Guna handariyayzey moora! Man i moora salleyaŋo misa?

22:13b.JOB.022.013 Ni ne mo: ‹Ifo no Irikoy ga bay? A ga hin ka haŋ kaŋ go kubay ra ciiti no?

22:14b.JOB.022.014 Beene hirriyaŋ beeray n'a daabu hal a si di, A goono mo ga taamu beene batamey boŋ.›

22:15b.JOB.022.015 Ni ga fondo zeeno gana, Wo kaŋ boro laaley taamu, wala?

22:16b.JOB.022.016 Borey kaŋ i n'i hamay ka kaa za i alwaato mana to, I n'i deyaŋ haro bagu-bagu danga hari zuru gooru.

22:17b.JOB.022.017 Ngey no ka ne Irikoy se: ‹Fay d'iri.› Wala i ne: ‹Ifo no Hina-Kulu-Koyo ga hin ka te iri se?›

22:18b.JOB.022.018 Amma nga no k'i windey toonandi nda albarka. Amma boro laaley saawarey ga mooru ay.

22:19b.JOB.022.019 Adilantey ga di woodin ka farhã, Borey kaŋ yaŋ sinda taali mo ga donda-caray haari te i se.

22:20b.JOB.022.020 I go ga ne: ‹Daahir, i duura halaci, Haŋ kaŋ cindi i se mo, danji g'a ŋwa.›

22:21b.JOB.022.021 Ni ma Irikoy bay gumo sohõ, ka goro baani, Woodin gaa no ni ga di gomni.

22:22b.JOB.022.022 Ay ga ni ŋwaaray, ma dondonandiyaŋ ta a meyo ra, K'a sanney jisi ni bina ra.

22:23b.JOB.022.023 Da ni ye ka kaa Hina-Kulu-Koyo do, ni ga tonton, Hala day ni na adilitaray-jaŋay hibandi ka moorandi ni nangora gaa,

22:24b.JOB.022.024 Ka ni arzaka jisi ganda kusa ra, Ofir wura mo, m'a jisi goorey tond'izey ra,

22:25b.JOB.022.025 Gaa no Hina-Kulu-Koyo ga ciya ni arzaka, A ga ciya nzarfu darzante mo ni se.

22:26b.JOB.022.026 Zama waato din gaa no ni ga farhã Hina-Kulu-Koyo do, Ni ga ni moyduma sambu ka Irikoy guna.

22:27b.JOB.022.027 Ni ga ni adduwa te a gaa, A ga maa ni se mo. Ni ga ni sarto mo toonandi a se.

22:28b.JOB.022.028 Haŋ kaŋ ni soola ni bina ra ga tabbat ni se, Annura mo ga ni fondey kaarandi.

22:29b.JOB.022.029 Saaya kaŋ i na ni soote ganda, Ni ga ne: ‹Tunyaŋ go no koyne.› A ga lalabuko faaba mo.

22:30b.JOB.022.030 Boro kaŋ si jaŋ taali mo, a g'a kaa kambe, Oho, a g'a faaba ni kambey hananyaŋo sabbay se.»

23

23:1b.JOB.023.001 Gaa no Ayuba tu ka ne:

23:2b.JOB.023.002 «Baa hunkuna bumbo, hẽeno kaŋ ay goono ga te wo ciya murteyaŋ. Ay kamba ga tin ay durayyaŋo se.

23:3b.JOB.023.003 Doŋ day ay ma bay naŋ kaŋ ay ga du a, Hal ay ma to a karga do!

23:4b.JOB.023.004 Kala y'ay hẽeno ŋwaarayyaŋ soola a jine, Ay m'ay meyo toonandi nda sabaabuyaŋ.

23:5b.JOB.023.005 Kal ay ma bay sanney kaŋ yaŋ a ga tu ay se d'a, Ya faham da haŋ kaŋ a ga ci ay se.

23:6b.JOB.023.006 A ga canda-canda nd'ay, Nga nda nga beera hino, wala? Abada! A ga hangan ay se no.

23:7b.JOB.023.007 Noodin no adilantey ga hin ka sabaabu cabe a se, Yaadin gaa no, I g'ay faaba ay ciitikwa kambe ra hal abada.

23:8b.JOB.023.008 Guna, ay n'a ceeci jina haray, Amma a si noodin. Banda mo, amma ay mana du k'a fayanka.

23:9b.JOB.023.009 Kambe wow haray, nango kaŋ a ga goy, Amma yan'a fonnay, A ga nga boŋ tugu kambe ŋwaari haray, Hal ay si hin ka di a.

23:10b.JOB.023.010 Amma a ga fonda kaŋ ay ga gana din bay, Saaya kaŋ a jin k'ay gosi, ay ga fatta sanda wura.

23:11b.JOB.023.011 Ay ca mana fay d'a fonda ganayaŋ, Ay soobay k'a cey gana, yana kamba bo.

23:12b.JOB.023.012 Ay mana ye da banda ka fay d'a me lordey, Ay haggoy d'a me sanney ka bisa ay ŋwaaro.

23:13b.JOB.023.013 Amma nga wo afolloŋ no, May no ga hin k'a bare binde? Haŋ kaŋ a bina ga ba, nga no a ga te.

23:14b.JOB.023.014 Zama haŋ kaŋ a waadu ay gaa, Nga no a ga goy ay gaa, Woodin yaŋ dumi hari boobo mo go no a do.

23:15b.JOB.023.015 Woodin se no ay laakal ga tun a jine, D'ay fongu mo, ay ga humbur'a.

23:16b.JOB.023.016 Zama Irikoy naŋ ay bina ma yangala, Hina-Kulu-Koyo n'ay laakal tunandi mo.

23:17b.JOB.023.017 Zama manti kubay no k'ay halaci bo, Manti mo kubay bi tik! no k'ay moyduma daabu.

24

24:1b.JOB.024.001 Ifo se no Hina-Kulu-Koyo mana alwaatiyaŋ kosu? Borey kaŋ yaŋ g'a bay mo, Ifo se no i mana di a jirbey?

24:2b.JOB.024.002 Boroyaŋ go no kaŋ yaŋ ga laabu hirri seeda hibandi, I ga alman kuruyaŋ kom, k'i kuru ngey boŋ se.

24:3b.JOB.024.003 I ga alatuumi farka gaaray, I ga wayboro kaŋ kurnye bu haw ta tolme.

24:4b.JOB.024.004 I ga alfukaaruyaŋ naŋ i ma kamba ka fondo taŋ, ndunnya talkey ga margu ka tugu.

24:5b.JOB.024.005 Guna, i go sanda ganji farkayyaŋ, Yaadin cine no borey din ga koy ngey goyo do ka ŋwaari ceeci da anniya, Saajo g'i no ŋwaari i izey sabbay se.

24:6b.JOB.024.006 I ga kurey subu dumbu fari ra, I ma laalakoyey reyzin* kaley nafa koobu.

24:7b.JOB.024.007 I ga kani gaa-koonu bankaaray si, I sinda hargu safari kaŋ i ga daabu nd'a.

24:8b.JOB.024.008 Beene hari g'i tayandi tondi kuukey ra, I ga tondi daari ganday fu-jaŋay se.

24:9b.JOB.024.009 Boro fooyaŋ go no kaŋ yaŋ ga attaciriya alatuumi hamay ka kaa fafa gaa, I ga tolme ta mo alfukaarey gaa,

24:10b.JOB.024.010 Hala alfukaarey go ga bar-bare gaa-koonu, Bankaaray si, i ga hayni dundumyaŋ goy te da haray.

24:11b.JOB.024.011 I ga ji duru boro woodin yaŋ windey ra, I ga reyzin hari kankamyaŋo taamu, Amma jaw go i gaa.

24:12b.JOB.024.012 Gallo ra borey goono ga duray, Marantey fundey mo goono ga hẽ ka gaakasinay ceeci, Amma Irikoy mana ne kaŋ saamotaray no.

24:13b.JOB.024.013 Woodin yaŋ go borey kaŋ ga murte kaari gaa yaŋ din ra, I si ba ngey m'a fondey bay, I s'a fondayzey gana mo.

24:14b.JOB.024.014 Boro-wi ga tun za mo boyaŋ, A ga alfukaarey da laamikoyey wi, Cin mo a go sanda zay cine.

24:15b.JOB.024.015 Zina-teeri mo goono ga wiciri kambu batu, A ga nga moyduma daabu ka ne: ‹Mo kulu si no kaŋ ga di ay.›

24:16b.JOB.024.016 Kubay ra no i ga windey fun, I ga tugu zaari, i si annura bay mo.

24:17b.JOB.024.017 Zama i kulu se susubay si hima kala kubay bi tik! Zama i ga bay mate kaŋ no buuyaŋ biya ga humburandi nd'a.

24:18b.JOB.024.018 Da waasi no i ga bisa hari boŋ, I baa wo laalante no ndunnya ra, I si ye ka reyzin kaley fonda gana.

24:19b.JOB.024.019 Kwaari da hayni waate wayno ga neezu* haro haŋ, Yaadin cine no Alaahara ga te zunubi teekoy se.

24:20b.JOB.024.020 Gunda kaŋ n'a hay din ga dinya a gaa, Nooni ga maa a baso kaani, Borey si ye ka fongu a gaa koyne. Boro kaŋ sinda adilitaray mo ga ceeri sanda tuuri-nya cine.

24:21b.JOB.024.021 A ga waygunu kaŋ mana hay ce fo ŋwa, Wayboro kaŋ kurnye bu mo, a si gomni te a se.

24:22b.JOB.024.022 Kulu nda yaadin Irikoy ga gaabikooney no aloomar nga hino ra. Saaya kaŋ cine i mana tammahã ngey ga funa, Kal i tun.

24:23b.JOB.024.023 Irikoy g'i naŋ i ma goro baani, I goono ga fulanzam yaadin cine mo, Amma a moy goono ga laakal d'i fondey.

24:24b.JOB.024.024 I du beeray, sum! kayna i daray. Oho, i ye ka kayna, I gana sanda cindey kulu cine. I n'i pati sanda ntaaso jeeni cine.

24:25b.JOB.024.025 Da manti yaadin no, may no g'ay seeda tangarandi, K'ay sanno ciya yaamo?»

25

25:1b.JOB.025.001 Kala Bildad Suhi bora tu ka ne:

25:2b.JOB.025.002 «Mayray da humburkumay ya Rabbi wane yaŋ no, Kaŋ ga laakal kanay kayandi nga do yongo beene.

25:3b.JOB.025.003 A wongu margey baayaŋ gonda me no, wala? May gaa mo no a annura mana kaari?

25:4b.JOB.025.004 Mate binde no boro ga te ka ciya adilante Irikoy jine? Haŋ kaŋ wayboro hay, Mate n'a ga te ka ciya hanante?

25:5b.JOB.025.005 Guna, baa handu kwaara sinda kaari, Handariyayzey mo sinda hananyaŋ a diyaŋ ra,

25:6b.JOB.025.006 Sanku fa boro kaŋ go, nooni no! Wala boro ize mo kaŋ go, Sanda nooni ize cine.»

26

26:1b.JOB.026.001 Kala Ayuba tu ka ne:

26:2b.JOB.026.002 «Guna day mate kaŋ ni na hina-buuno gaa d'a! Guna ka di mate kaŋ ni na kambe kaŋ sinda gaabi faaba nd'a.

26:3b.JOB.026.003 Guna mate kaŋ ni na saaware no boro kaŋ sinda laakal se d'a! Ni na bayray hanno ci mo kaŋ yulwa!

26:4b.JOB.026.004 May se no ni na ni sanney ci? May biya mo no ka fun ni do?

26:5b.JOB.026.005 Refayimey goono ga jijiri haro da nga ra gorokoy cire.

26:6b.JOB.026.006 Koonu no Alaahara bara Rabbi jine, Halaciyaŋ do mo sinda daabuyaŋ hari.

26:7b.JOB.026.007 A ga azawa kamba daaru batama kwaaray koono boŋ, A na ndunnya mo sarku, hay kulu si a cire.

26:8b.JOB.026.008 A ga harey kunsum nga beene hirriyaŋ kuba ra, Kulu nda yaadin hirriyaŋo mana kortu i cire.

26:9b.JOB.026.009 A ga nga karga alhaalo daabu, Ka nga buro daaru a boŋ.

26:10b.JOB.026.010 A na haro batama me kurkutu ka windi hal a koy ka kubay da kaari fay-fayyaŋ.

26:11b.JOB.026.011 Beene gaayyaŋ harey goono ga jijiri, Alyanga n'i di a deeniyaŋo se.

26:12b.JOB.026.012 A goono ga teeku kanandi nda nga hino, A n'a boŋbeera gooru nda nga fahama mo.

26:13b.JOB.026.013 A Biya no i ga beene batama taalam d'a, A kamba mo no ga gondi kaŋ ga zuru gooru.

26:14b.JOB.026.014 Guna, woodin yaŋ wo a hina muraadey caso hinne no, A baaro ciinay kayniyo no iri goono ga maa! Amma a hino kaatiyaŋo, May no hin ka faham d'a?»

27

27:1b.JOB.027.001 Ayuba ye ka nga misa feeri ka tonton ka ne:

27:2b.JOB.027.002 «Ay ze da Irikoy fundikoono kaŋ n'ay cimo ta ay gaa, Ay ze da Hina-Kulu-Koyo kaŋ n'ay fundo daŋ a ma koroŋ.

27:3b.JOB.027.003 Duumi d'ay fundo go ay gaa, Kaŋ Irikoy fulanzama mo go ay niine funey ra,

27:4b.JOB.027.004 Daahir ay meyo si adilitaray-jaŋay sanni te, Ay deena mo si gulinci ci.

27:5b.JOB.027.005 Irikoy ma boriyandi, way, Ay ma yadda kaŋ araŋ gonda cimi! Kala ya bu, ay si fay d'ay cimo.

27:6b.JOB.027.006 Ay goono g'ay adilitara gaay, Ay s'a taŋ mo. Ay fundo me muudu ay bina si taali dake ay boŋ.

27:7b.JOB.027.007 Ay ibara ma ciya sanda boro laalo cine, Boro kaŋ tun ay se mo ma ciya sanda boro kaŋ sinda adilitaray.

27:8b.JOB.027.008 Zama boro kaŋ si Irikoy gana, baa a du riiba, Ifo no a ga beeje da Irikoy n'a fundo ta a gaa?

27:9b.JOB.027.009 Irikoy ga maa a hẽeno no, Waati kaŋ taabi kaa a gaa?

27:10b.JOB.027.010 Wala a ga soobay ka farhã Hina-Kulu-Koyo do, Ka ce Irikoy maa gaa alwaati kulu?

27:11b.JOB.027.011 Ay ga araŋ dondonandi Irikoy kambe goy baaru, Ay si tugu araŋ se haŋ kaŋ go Hina-Kulu-Koyo banda.

27:12b.JOB.027.012 Guna, araŋ bumbey, araŋ kulu di woodin. Ifo se binde no araŋ ciya yaamo parkatak?

27:13b.JOB.027.013 Woone no ga ti boro laalo baa Irikoy do, Gurzugandikoy tubo neeya, Haŋ kaŋ Hina-Kulu-Koyo ga bana i se:

27:14b.JOB.027.014 Baa a izey baa gumo, i ga ciya takuba me ŋwaari, A banda mo si kungu nda ŋwaari.

27:15b.JOB.027.015 A dumey kaŋ cindi mo, i g'i fiji balaaw ra. A wayborey kaŋ kurnyey bu mo si bu baray te.

27:16b.JOB.027.016 Baa a na nzarfu margu sanda kusa cine, A ma bankaaray gusam sanda botogo cine,

27:17b.JOB.027.017 A ya day ma soola te, amma adilantey no g'i daŋ, Borey kaŋ yaŋ sinda taali mo no ga nzarfo fay.

27:18b.JOB.027.018 A ga nga windo cina sanda gangam ize, Sanda fari tanda kaŋ fari batuko ga te.

27:19b.JOB.027.019 A ga kani arzakante, amma nga mo nooya. D'a na mo hay, a go, arzaka si no!

27:20b.JOB.027.020 Humburkumay ga kaa a gaa sanda beene hirriyaŋ hari cine, Hari haw bambata ga kaa k'a hamay cin.

27:21b.JOB.027.021 Wayna funay hawo mo g'a ku ka kond'a, Kal a ma daray. A g'a haabu ka kaa nga nangora ra.

27:22b.JOB.027.022 Zama Irikoy g'a catu no, a s'a windi bo! Baa a ga ba nga ma zuru a kamba se.

27:23b.JOB.027.023 Borey ga ngey kambey kobi a gaa ka ne: ‹Koy! Koy!› I m'a gaaray nga nango ra nda cuusuyaŋ.

28

28:1b.JOB.028.001 Daahir, nzarfu guusu go no, Wura kaŋ i ga hanse mo, a nango go no.

28:2b.JOB.028.002 Ganda laabo ra no i ga guuru fansi, Tondi ra mo no i ga guuru-say mannandi.

28:3b.JOB.028.003 Boro ga hirri daŋ kubay se, A ga koy tondi ceeciyaŋ hala kubay da kubay bi tik ra, Hala hirro me gaa.

28:4b.JOB.028.004 A ga guusu fansi mo kaŋ ga mooru naŋ kaŋ borey ga goro. Nango dinya boro ce taamey gaa, Borey se nangu mooro i ga taŋ ka sooli.

28:5b.JOB.028.005 Zama laabo wo, a ra no ŋwaari ga fun, A cira mo i g'a bare, danga mate kaŋ danji ga te.

28:6b.JOB.028.006 Laabo tondey ra no i ga safir* gudey kaa, I ga du wura a gudey ra.

28:7b.JOB.028.007 Curo kaŋ ga ham ŋwa si fonda din bay, Gabu moy mana di a ce fo.

28:8b.JOB.028.008 Ganji hamey kaŋ ga zankam mana noodin taamu, Muusu beeri futo mana bisa noodin.

28:9b.JOB.028.009 A ga nga kambe salle captu tondi boŋ, A ga tondi kuukey sambu mo hala i tiksey gaa, K'i ganandi.

28:10b.JOB.028.010 A na hari zuray fondo fansi tondey ra, A moy goono ga di hay kulu kaŋ gonda darza.

28:11b.JOB.028.011 A ga goorey lutu hal i ma si zuru, Haŋ kaŋ go tugante mo, a g'a kaa taray kaari ra.

28:12b.JOB.028.012 Amma man gaa no i ga laakal gar? Fahamay mo, man no a go?

28:13b.JOB.028.013 Boro s'a hay bay, I s'a gar mo fundikooney laabo ra.

28:14b.JOB.028.014 Guusuyaŋ ne: ‹A si ay ra.› Teeku ne: ‹Manti ay banda no a go.›

28:15b.JOB.028.015 Wura si naŋ boro ma hin ka du a, I si nzarfu mo neesi ka ne i g'a hay bana.

28:16b.JOB.028.016 I s'a nooru kosu nda Ofir wura, Wala nda oniks* kaŋ nooro ga baa, wala safir tondi.

28:17b.JOB.028.017 Wura wala diji sinda hina ka ciya a wadde, I s'a barmay te mo da wura hanno jinay.

28:18b.JOB.028.018 I si koral* wala kristal* ciine te, Oho, laakal nooru bisa tondi hiir'ize caadante.

28:19b.JOB.028.019 Etiyopi laabo topaz*, i s'a kar a gaa, I si nga nda wura zalla deedandi care gaa ka neesi mo.

28:20b.JOB.028.020 To, mana gaa binde no laakal wo ga fun? Mana gaa no fahamay nango go?

28:21b.JOB.028.021 Za kaŋ tugante no a go fundikooni kulu se, Daabante mo no a go beene curey se.

28:22b.JOB.028.022 Halaciyaŋ nda buuyaŋ ne: ‹Iri maa a baaru nda hanga maayaŋ.›

28:23b.JOB.028.023 Irikoy hinne no ga faham d'a fonda, Nga mo no g'a nango bay.

28:24b.JOB.028.024 Zama a ga guna hala ndunnya me, A ga di hay kulu kaŋ go beena cire.

28:25b.JOB.028.025 Saaya kaŋ a na tiŋay daŋ haw se, Oho, hal a na harey neesi nda deedandiyaŋ hari,

28:26b.JOB.028.026 Saaya kaŋ a na lordi te beene hari se, Da fondo mo koyne maliyaŋ kaatiyaŋey se,

28:27b.JOB.028.027 Waato din no a di laakal, a n'a baaru dede mo. A n'a sinji, oho, a n'a gundu kaa taray.

28:28b.JOB.028.028 Boro mo se a ne: ‹Guna, boro ma humburu Koy Beero, nga no ga ti laakal. Boro ma fay da goy laaley mo, nga no ga ti fahamay.› »

29

29:1b.JOB.029.001 Ayuba ye ka nga misa sambu ka ne:

29:2b.JOB.029.002 «Doŋ d'ay go mate kaŋ ay go waato, handu bandey ra! Sanda jirbey kaŋ ra Irikoy go ga haggoy d'ay,

29:3b.JOB.029.003 Saaya kaŋ cine a fitilla ga kaari ay boŋ, A kaaro ra mo no ay ga dira kubay ra.

29:4b.JOB.029.004 Doŋ day ya ye ka te mate kaŋ cine ay go waato kaŋ ay ya sahãkooni no, Waato kaŋ Irikoy corotara g'ay nangora batu!

29:5b.JOB.029.005 Saaya din ra Hina-Kulu-Koyo go ay banda jina, Ay izey mo go g'ay windi.

29:6b.JOB.029.006 Saaya din cine i g'ay ce taamey nyun nda haw ji, Tondi mo go ga ji dooru ay se danga gooru cine.

29:7b.JOB.029.007 Saaya din cine, kaŋ ay ga fatta ka koy gallu meyo gaa, Ay g'ay nangora soola batama windanta ra,

29:8b.JOB.029.008 Arwasey ga di ay, i ga tugu, Dottijey mo ga tun ka kay.

29:9b.JOB.029.009 Mayraykoyey na sanney naŋ, I na kambe dake ngey meyey gaa ka dangay siw!

29:10b.JOB.029.010 Boro beerey jindey dangay, I deeney naagu i daaney gaa.

29:11b.JOB.029.011 Waato, hanga kaŋ maa ay se g'ay sifa, Saaya kaŋ mo di ay mo, a g'ay seeda.

29:12b.JOB.029.012 Zama ay na alfukaaru kaŋ hẽ faaba, Nga nda alatuumi mo kaŋ sinda gaako.

29:13b.JOB.029.013 Boro kaŋ go buuyaŋ me gaa albarka zumbu ay gaa. Ay na wayboro kaŋ kurnye bu bine daŋ a ma doon farhã sabbay se.

29:14b.JOB.029.014 Ay na adilitaray daŋ, a ciya ay se bankaaray. Ay cimo go sanda kwaay, boŋtobay mo no.

29:15b.JOB.029.015 Ay ciya danaw se mo, Ay ya ce no simbarko se.

29:16b.JOB.029.016 Ay ya baaba no alfukaaru se. Boro kaŋ ay s'a kalima bay mo, ay n'a fintal.

29:17b.JOB.029.017 Ay na boro laaley hinjey ceeri-ceeri, K'a duure hamay ka kaa a hinjey game ra.

29:18b.JOB.029.018 Gaa mo ay ne: ‹Ay ga bu ay fito ra, Ay ga naŋ ay jirbey ma baa sanda taasi cine.›

29:19b.JOB.029.019 Ay kaajo mo salle ka guna naŋ kaŋ hari go, Harandaŋ mo go ay kambey boŋ cino kulu.

29:20b.JOB.029.020 Darza taji no ay se waati kulu, Ay birawo mo go ga tajandi ay kambe ra.

29:21b.JOB.029.021 Ay se no borey doona ka hanga jeeri, I goono g'ay batu. I dangay siw, k'ay saawara hangan.

29:22b.JOB.029.022 Ay salaŋ ka ban yaŋ banda boro cindey kulu si ye ka salaŋ, Ay sanney ga dooru i boŋ.

29:23b.JOB.029.023 I n'ay batu sanda mate kaŋ boro ga beene hari batu, I na ngey me fiti danga heemar hari sabbay se.

29:24b.JOB.029.024 Ay na mumusu taŋ i se saaya kaŋ cine i go sikka ra, I mana ay moyduma kaaro ye hay fo kayna bo.

29:25b.JOB.029.025 Ay na fondo suuban i se, ay go jine boro goray ra. Wongu marga ra ay goro sanda bonkooni, Sanda boro kaŋ ga bine saraykoyey yaamar cine.

30

30:1b.JOB.030.001 Amma sohõ, borey kaŋ yaŋ ay zeen ey goono g'ay hahaara, Borey kaŋ yaŋ ay donda i baabey hal ay wongu k'i daŋ ay alman kuray hansey banda.

30:2b.JOB.030.002 Oho, i kambey gaabo, ifo no a hanse ay se waato din? Boro yaŋ nooya kaŋ halaci jiiri toonante ra.

30:3b.JOB.030.003 I faabu mo jaŋay da gazeyaŋ sabbay se. I ga laabu ŋwa naŋ kaŋ kurmu nda saaji fimbi go.

30:4b.JOB.030.004 I ga hanam dagu ka kaa karji gaa, Mufa kaaji ya i ŋwaari no.

30:5b.JOB.030.005 I n'i gaaray ka kaa borey ra, I g'i gana nda kuuwa sanda zay cine.

30:6b.JOB.030.006 Hala tilas i ma goro gooru kaŋ ga humburandi ra, Wala laabu nda tondi guusey ra.

30:7b.JOB.030.007 Tuurey game ra no i ga hẽ sanda farkay cine, Karji nyaŋey cire no i ga margu.

30:8b.JOB.030.008 Ngey wo saamoyaŋ no, Oho, boro yaamey izeyaŋ no, Goobu no i n'i gaaray d'a laabo ra.

30:9b.JOB.030.009 Sohõ mo ay ciya dooni hari i se. Oho, ay ciya hari yaamo i se!

30:10b.JOB.030.010 I goono g'ay fanta, I go ga kay ay se kuray fo waani. I ga soobay ka yollo tuf'ay moyduma gaa no,

30:11b.JOB.030.011 Zama Irikoy n'ay biraw korfa feeri ay se, k'ay taabandi, I goono ga kasiji furu ay jine.

30:12b.JOB.030.012 Ay kambe ŋwaari haray no, i jama tun ka kay, I goono g'ay cey tuti _ka kaa ay cire|_, I goono ga ngey halaciyaŋ fondey hanse ay jine.

30:13b.JOB.030.013 I g'ay fonda sara ay se, I ga du riiba ay masiiba do. Boro kulu s'i gaa.

30:14b.JOB.030.014 Danga day kortimi kaŋ ga tafay ra no i goono ga kaa ay gaa. Windi bagarmey bindi ra no i goono ga zulli ka kaa ay boŋ.

30:15b.JOB.030.015 Humburkumay kaa ay gaa, I g'ay beera gaaray mo sanda haw cine. Ay albarka mo say-say sanda beene buru cine.

30:16b.JOB.030.016 Sohõ binde ay fundo go ga soogu ay ra, Kankami jirbey n'ay di.

30:17b.JOB.030.017 Cin ay biriyey ga fara ay ra, Ay kaajey sinda fulanzamay.

30:18b.JOB.030.018 Ay bankaara sara ay kankamo sabbay se, A n'ay haw-haw sanda ay kwaay jinda cine.

30:19b.JOB.030.019 Irikoy n'ay catu botogo ziibo ra, Ay ciya sanda kusa nda boosu cine.

30:20b.JOB.030.020 Ay go ga hẽ ni gaa, amma ni mana tu ay se. Ay ga tun ka kay, amma ni si baa saal ay.

30:21b.JOB.030.021 Ni bare ka ciya ay se boro kaŋ si bakar, Ni kambe gaabo no ni goono g'ay gurzugandi nd'a.

30:22b.JOB.030.022 Ni g'ay sambu k'ay kaarandi haw boŋ, Ni ga naŋ ay ma yangala hari haw beeri ra.

30:23b.JOB.030.023 Zama ay bay kaŋ ni ga kond'ay buuyaŋ do, Kaŋ ga ti marga windo kaŋ ni te fundikooni kulu se.

30:24b.JOB.030.024 Amma boro kaŋ goono ga kaŋ kurmu citila ra, A ma si nga kambe salle no? Wala a masiibey ra, A ma si gaakasinay hẽeni te no?

30:25b.JOB.030.025 Manti ay doona ka hẽ taabi hanko se? Manti ay bine sara alfukaarey se?

30:26b.JOB.030.026 Waato kaŋ ay na laakal dake gomni gaa, Kala ilaalo go, a kaa. Saaya kaŋ ay na mo daaru ka ne ay ga di annura, Kala kubay go no.

30:27b.JOB.030.027 Ay bina go ga sakulla, a sinda fulanzamay. Kankami jirbiyaŋ kaa ay gaa.

30:28b.JOB.030.028 Ay te ibi, amma manti wayno sabbay se no, Ay ga tun ka kay jama marga ra ka gaakasinay ceeyaŋ te.

30:29b.JOB.030.029 Ay ciya zoŋoyaŋ nya-ize, taatagayyaŋ hangasin mo.

30:30b.JOB.030.030 Ay kuuro ibi no, a go ga hasara ay gaahamo gaa. Ay biriyey ton gaaham konni sabbay se.

30:31b.JOB.030.031 Woodin sabbay se no ay moola bare ka ye ka bu hẽeni te. Ay seesa mo bare ka ciya hẽekoyaŋ jinde.

31

31:1b.JOB.031.001 Za kaŋ ay na sarti sambu d'ay moy, Mate binde no ay ga laakal ye wandiyo gaa d'a?

31:2b.JOB.031.002 Zama baa woofo no ay ga du Irikoy do, beene wane? Tubu woofo mo no koyne kaŋ ga fun Hina-Kulu-Koyo do beene?

31:3b.JOB.031.003 Manti masiiba no boro laaley se? Manti halaciyaŋ mo no goy yaamo teekoy se?

31:4b.JOB.031.004 Irikoy si di ay fondey no? Ay ce daarey binde, manti a n'i kulu kabu?

31:5b.JOB.031.005 D'ay dira tangari ra, Wala d'ay ca cahã diibi-diiba teeyaŋ se,

31:6b.JOB.031.006 Kal a m'ay neesi cimi neesiji boŋ hal Irikoy m'ay cimo bay.

31:7b.JOB.031.007 D'ay kamba fonda gaa, D'ay bina n'ay moy miila gana, Wala mo da taali fo naagu ay kambey gaa,

31:8b.JOB.031.008 Kal a ma naŋ ay ma duma, boro fo ma ŋwa. Oho, a m'ay fari nafa dagu.

31:9b.JOB.031.009 Da wayboro cansay n'ay bina beejandi, Wala d'ay gum ay gorokasin fu me gaa,

31:10b.JOB.031.010 Kal a ma naŋ ay wando ma duru boro fo se, Boro fooyaŋ mo m'a ciya ngey way.

31:11b.JOB.031.011 Zama zina wo taali laalo no, Oho, goy laalo no kaŋ to i m'a ciiti alkaali kambe ra.

31:12b.JOB.031.012 Zama danji no kaŋ ga ŋwa hal a ma to halaciyaŋ do, Hay fo no kaŋ ga wasa k'ay nafa kulu dagu.

31:13b.JOB.031.013 D'ay donda ay bannya hẽeni, wala ay koŋŋa wane, Waati kaŋ i kande kalima ay boŋ,

31:14b.JOB.031.014 Ifo n'ay ga te binde waati kaŋ Irikoy ga tun ka kay? D'a ce ka ne ay ma kand'ay te-goyey, Ifo no ay ga tu a se d'a?

31:15b.JOB.031.015 Nga kaŋ n'ay te gunde ra, Manti nga no ka boro fa din mo te? Manti nga follonka no k'iri boro hinka kulu taka gunde ra bo?

31:16b.JOB.031.016 D'ay na alfukaarey ganji ngey muraadey, Wala d'ay na wayboro kaŋ kurnye bu moy fargandi nda batuyaŋ,

31:17b.JOB.031.017 Wala d'ay n'ay looma ŋwa ay hinne, Kaŋ alatuumi mana du baa kulu a ra --

31:18b.JOB.031.018 (Amma ay wo, za ay go arwasu no ay n'a biiri ay do, Danga a baabo do cine no, Waybora din mo, ay ciya a se fondo candiko, Za _ay fun|_ ay nyaŋo gunda ra.)

31:19b.JOB.031.019 D'ay di boro kaŋ bu bankaaray jaŋay sabbay se, Wala mo alfukaarey sinda haŋ kaŋ i ga daabu nd'a,

31:20b.JOB.031.020 D'a tanja mana ay saabu, d'a mana maa dungay d'ay feejey hamno,

31:21b.JOB.031.021 D'ay na kambe sambu zama ay ma hasaraw te alatuumi se, Zama se ay di faada meyo gaa borey g'ay gaakasinay,

31:22b.JOB.031.022 Kal i ma naŋ ay jase boŋo ma mulay ay walahã gaa banda, Ay kamba mo ma pati kambe golla do.

31:23b.JOB.031.023 Zama masiiba kaŋ ga fun Irikoy do, Humburkumay hari no ay se, A beera sabbay se mo no ay si hin ka hay kulu te.

31:24b.JOB.031.024 D'ay naanay wura gaa, D'ay ne wura hanante se: ‹Nin no ga ti ay deyaŋ haro!›

31:25b.JOB.031.025 D'ay fooma zama ay arzaka baa se, Zama ay kamba te duure boobo se mo,

31:26b.JOB.031.026 D'ay na wayna guna waati kaŋ a goono ga nyaale, Wala handu kwaara mo waati kaŋ a goono ga nga diraw te da darza,

31:27b.JOB.031.027 Hal ay bina ma furo i canse ra tugante, Ay meyo mo m'ay kamba sunsum _k'i beerandi|_ --

31:28b.JOB.031.028 Woodin mo ga ciya taali kaŋ to alkaaley m'a ciiti, Zama woodin teeyaŋ ga Irikoy kaŋ go beene ze.

31:29b.JOB.031.029 D'ay mana farhã d'ay ibara halaciyaŋ, Ay mana sar ka zimbi mo waato kaŋ masiiba fo kaŋ a boŋ,

31:30b.JOB.031.030 Daahir, ay mana yadda ay meyo ma zunubi te, Ay mana a fundo ceeci nda laaliyaŋ.

31:31b.JOB.031.031 Manti ay tanda ra borey ga ne: ‹May no ga du boro kaŋ mana kungu nd'a hamo?›

31:32b.JOB.031.032 Yaw mana kani taray baa ce fo, Amma ay g'ay windi meyey fiti dirakoy se.

31:33b.JOB.031.033 Ay n'ay taalo tugu k'ay laala daabu ay ganda ra no, Sanda mate kaŋ Adamu te, wala?

31:34b.JOB.031.034 Zama ay humburu jama marga se, Wala dumi donda-caray mo n'ay humburandi no, Hal ay dangay siw! ka jaŋ ka fatta windi me gaa?

31:35b.JOB.031.035 Doŋ day d'ay gonda boro kaŋ ga maa ay se no! (Ay kambe seeda neeya: Naŋ Hina-Kulu-Koyo ma tu ay se.) Doŋ day ay ma du ka maa kalima kaŋ ay ibare hantum ay boŋ!

31:36b.JOB.031.036 Daahir, kal ay m'a sambu ay jase gaa, Ay m'a haw sanda koytaray fuula cine ay boŋo gaa.

31:37b.JOB.031.037 Gaa no ay g'ay ce taamey lasaabo no a se, Ay ma kaa a jine sanda koy-ize cine.

31:38b.JOB.031.038 D'ay farey hẽ d'ay, D'i batey margu ka hẽ,

31:39b.JOB.031.039 D'ay n'i nafa ŋwa, amma yana bana, Wala mo d'ay daŋ farikoyey ma bu,

31:40b.JOB.031.040 Naŋ karji ma beeri alkama nango ra, Subey kaŋ i haw ga tin mo ma beeri sayir* nango ra.» Ayuba sanney ban.

32

32:1b.JOB.032.001 Boro hinza din binde fay da Ayuba se tuyaŋo, zama a diyaŋ gaa nga ya adilante no.

32:2b.JOB.032.002 Amma Elihu Barakel izo, Buza boro no, Ram windo boro no, a futa koroŋ gumo. Ayuba boŋ no a futa koroŋ, zama Ayuba na nga boŋ himandi sanda nga adilitara bisa Irikoy wano.

32:3b.JOB.032.003 A futa koroŋ mo a hangasin hinza boŋ, zama i mana du haŋ kaŋ i ga tu d'a a se. Kulu nda yaadin, i na taali dake Ayuba boŋ.

32:4b.JOB.032.004 Za doŋ mo Elihu wo goono ga batu no, nga ma du ka salaŋ Ayuba se, zama cindey zeen a.

32:5b.JOB.032.005 Amma Elihu, waato kaŋ a di tuyaŋ si no boro hinza din me ra, kal a futa koroŋ.

32:6b.JOB.032.006 Elihu Barakel izo, Buza bora tu ka ne: «Ay wo zanka no, araŋ wo, dottijo zeeno yaŋ no, Woodin se no ay suuru, Ay humburu ay m'ay diyaŋ cabe araŋ se.

32:7b.JOB.032.007 Ay ne a ga hima jirbi boobey ma salaŋ, Jiiri boobey mo ma laakal dondonandi.

32:8b.JOB.032.008 Amma biya go no boro ra, Kaŋ ga ti Hina-Kulu-Koyo fulanzama kaŋ g'a no fahamay.

32:9b.JOB.032.009 Manti han kulu no albeerey ga ciya laakalkooniyaŋ bo, Manti mo han kulu no arkusu zeeney ga faham da cimi ciiti bo.

32:10b.JOB.032.010 Woodin sabbay se no ay ne: ‹Araŋ ma hanga jeeri ay se, Ay mo m'ay diyaŋo cabe araŋ se.›

32:11b.JOB.032.011 Guna, ay hangan hal ay ma maa araŋ sanney. Ay na hanga jeeri ka maa araŋ lasaabey, Saaya kaŋ cine araŋ goono ga fintal, Ka di haŋ kaŋ araŋ ga ci.

32:12b.JOB.032.012 Oho, ay hangan araŋ se. Guna mo, boro kaŋ hin Ayuba si no, Araŋ ra sinda boro kaŋ na Ayuba sanney zeeri.

32:13b.JOB.032.013 Araŋ ma si ne: ‹Iri du laakal.› Irikoy no ga te a boŋ zaama, day manti boro.

32:14b.JOB.032.014 Zama manti ay no a te d'a bo, Ay si tu a se mo d'araŋ sanney.

32:15b.JOB.032.015 I takooko, i mana ye ka sanni fo yeti koyne, I jaŋ sanni kaŋ i ga tu d'a.

32:16b.JOB.032.016 Ay wo, ay ga batu zama se ngey wo si ga salaŋ, wala? Zama se i goono ga kay ka dangay siw, I mana tu da hay kulu ka tonton?

32:17b.JOB.032.017 Ay maa, kal ay ma tu. Ay mo y'ay laakalo diyaŋo cabe.

32:18b.JOB.032.018 Zama ay go toonante nda sanni, Biya kaŋ go ay do din goono g'ay kankam gumo.

32:19b.JOB.032.019 Guna, ay bina ga hima duvan* kaŋ sinda munyaŋ fondo, Sanda humbur tajiyaŋ kaŋ gonda reyzin* hari ngey me fo hala i ga ba ka bagu.

32:20b.JOB.032.020 Kal ay ma salaŋ zama ya du dogonay, Ay m'ay meyo fiti ka tu.

32:21b.JOB.032.021 Sohõ ay ma si baar'a-baar'a te, Wala ay ma s'ay boŋ zamu boro kulu se da me-kaanay.

32:22b.JOB.032.022 Zama ay si waani mate kaŋ boro ga me-kaanay sifaw te d'a. Da yaadin mo no, Kal ay Takakwa m'ay hibandi sahãadin-sahãadin.

33

33:1b.JOB.033.001 Kulu nda yaadin, ya nin Ayuba, Ay ga ni ŋwaaray ma maa ay sanney sohõ, Ma hanga jeeri ay sanney kulu se.

33:2b.JOB.033.002 Guna, sohõ ay n'ay meyo feeri, Ay deena ga salaŋ ay daana ra.

33:3b.JOB.033.003 Ay sanno g'ay bine cimo bangandi. Ay meyo ga bayray toonante salaŋ.

33:4b.JOB.033.004 Irikoy Biya no k'ay te, Hina-Kulu-Koyo fulanzama no k'ay no fundi.

33:5b.JOB.033.005 Da ni ga hin, kala ma tu ay se. Ma tun ka kay ka ni sanno soola ay jine.

33:6b.JOB.033.006 Guna, Irikoy do ay ya ni cine no. Ay mo, laabo ra no i n'ay sambu, k'ay cina.

33:7b.JOB.033.007 Guna, ay manti boro kaŋ ga humburandi, Sanku fa ya ni humburandi. Ay si ni naan da tiŋay mo.

33:8b.JOB.033.008 Daahir ni ci, ay maa mo. Ay maa ni sanno jinda mo, kaŋ ni ne

33:9b.JOB.033.009 ni ya hanante no kaŋ sinda hartayaŋ, Kaŋ sinda taali no, Laala fo mo si ni gaa.

33:10b.JOB.033.010 Irikoy goono ga kobay ceeci ni gaa, A na ni ciya nga ibare.

33:11b.JOB.033.011 A ga ni cey daŋ bundu baka* ra, A ga ni fondey kulu batandi mo.

33:12b.JOB.033.012 Woodin ra binde ni sinda cimi. Guna, ay ga tu ni se, Zama Irikoy bisa boro beeray.

33:13b.JOB.033.013 Ifo se no ni ga kakaw d'a? Zama se a si nga muraadey lasaabuyaŋ no, wala?

33:14b.JOB.033.014 Zama Irikoy ga salaŋ sorro folloŋ, Oho, hala sorro hinka zaati, Amma boro kulu si ga saal a.

33:15b.JOB.033.015 Hindiri ra, wala cin bangandi ra, Waati kaŋ jirbi tiŋo ga borey di, Waati kaŋ i ga hahaabiya ngey daarey boŋ,

33:16b.JOB.033.016 Alwaato din no a ga borey hangey fiti, A ga nga seeda daŋ goojiyaŋ kaŋ a te i se din gaa,

33:17b.JOB.033.017 Zama nga ma boro candi a ma fay da nga miila, A ma boro ganji boŋbeeray mo.

33:18b.JOB.033.018 A m'a fundo ganji guusu ra kaŋyaŋ, Yaaji mo s'a fundo halaci.

33:19b.JOB.033.019 A ga boro gooji da doori mo nga daaro boŋ, Da foyrayyaŋ waati kulu nga biriyey ra,

33:20b.JOB.033.020 Hal a fundo ga ŋwaari fanta, A bina mo ma wangu ŋwaari kaano.

33:21b.JOB.033.021 A hamo ma soobay ka halaci hal a ma ye ka komso, A biriyey mo kaŋ i si di waato ma fatta.

33:22b.JOB.033.022 A fundo goono ga maan guuso me gaa, A fundo goono ga maan halacikoy do mo.

33:23b.JOB.033.023 Da malayka go a banda, Sasabandiko mo, afolloŋ zambar game ra, Zama a ma boro cabe haŋ kaŋ ga saba nd'a a se,

33:24b.JOB.033.024 Kal a ma gomni te a se ka ne: ‹M'a faaba a ma si gunguray ka koy guuso ra, zama ay du fansa hari!›

33:25b.JOB.033.025 A hamo ma ye ka taji ka bisa zanka wane tajitaray, A ma ye ka kaa nga zankatara gaabo ra.

33:26b.JOB.033.026 Gaa no a ga adduwa te Irikoy gaa, Nga mo g'a ta da gomni, Hal a ga di Irikoy moyduma da farhã. Nga mo ga ye ka nga adilitara no bora se.

33:27b.JOB.033.027 Bora ga baytu borey jine mo ka ne: ‹Ay na zunubi te, ay na cimi fonda siirandi, A mana ay nafa mo.

33:28b.JOB.033.028 Irikoy n'ay fundo fansa hal a ma si gunguray ka koy guuso ra, Ay fundo ga di annura mo.›

33:29b.JOB.033.029 Guna, hayey wo kulu no Irikoy ga goy sorro hinka, Oho, hala sorro hinza zaati boro se,

33:30b.JOB.033.030 Zama a ma ye ka kand'a fundo ka fun d'a guuso ra, Zama a m'a kaarandi mo da fundi kaari.

33:31b.JOB.033.031 Ya Ayuba, ma laakal ye ka hanga jeeri ay se. Ma dangay, ay mo, ay ma salaŋ.

33:32b.JOB.033.032 Gaa no da ni gonda hay fo kaŋ ni ga ba ni ma ci, Ma tu ay se. Ni ma salaŋ, zama ay ga ba ay ma ni adilandi*.

33:33b.JOB.033.033 Da manti yaadin no, ma maa ay sanno. Ma dangay, ay mo ga ni dondonandi laakal.»

34

34:1b.JOB.034.001 Elihu soobay ka salaŋ ka ne:

34:2b.JOB.034.002 «Ya araŋ alborey kaŋ yaŋ gonda laakal, Wa maa ay sanney. Ya araŋ kaŋ yaŋ gonda bayray, Wa hanga jeeri ay se,

34:3b.JOB.034.003 Zama hanga ga sanni neesi sanda mate kaŋ cine me ga ŋwaari taba.

34:4b.JOB.034.004 Iri ma suuban iri boŋ se haŋ kaŋ ga saba, Iri game ra mo iri ma bay haŋ kaŋ ga boori.

34:5b.JOB.034.005 Zama Ayuba ne: ‹Ay ya adilante no, Amma Irikoy n'ay cimo kom.

34:6b.JOB.034.006 Ay ma taari no ay cimo boŋ, wala? Baa kaŋ ay sinda taali, ay biyo si ga yay.›

34:7b.JOB.034.007 Man boro kaŋ ga hima Ayuba, Kaŋ ga hahaaray haŋ sanda hari cine,

34:8b.JOB.034.008 Kaŋ ga dira laala teekoy banda, Kaŋ ga bar-bare boro laaley banda?

34:9b.JOB.034.009 Zama a ne: ‹A si hay kulu hanse boro se Irikoy ma maa a kaani.›

34:10b.JOB.034.010 Woodin sabbay se no, ya araŋ fahamantey, Araŋ ma hanga jeeri ay se. A ga mooru Irikoy gaa a ma ilaalo te, Wala Hina-Kulu-Koyo ma taali te mo!

34:11b.JOB.034.011 Zama a ga boro bana no a goyey boŋ, A ga naŋ mo boro kulu ma gar haŋ kaŋ ga saba nda nga daa alhaalo boŋ.

34:12b.JOB.034.012 Oho, daahir Irikoy si taali kulu te, Hina-Kulu-Koyo ya si ciiti siirandi.

34:13b.JOB.034.013 May no ka ndunnya talfi a gaa? May mo no ka ndunnya kulu tiŋay dake a boŋ?

34:14b.JOB.034.014 D'a miila nga bina ra nga ma nga Biya da nga fulanzama margu nga bumbo do,

34:15b.JOB.034.015 Kala fundikooni kulu ma halaci. Boro kulu mo, kal a ma ye ka ciya laabu.

34:16b.JOB.034.016 Amma da ni gonda fahamay, ma maa woone, Ma hanga jeeri ay sanney jinda se:

34:17b.JOB.034.017 Boro kaŋ wongu cimi ciiti teeyaŋ ga hin ka mayray te, wala? Ni ga hinkoy adilante zeeri no?

34:18b.JOB.034.018 May no ga ne bonkooni se: ‹Ni ya furku no›? Wala i ma ne mayraykoyey se: ‹Araŋ ya boro laalo yaŋ no›?

34:19b.JOB.034.019 A si baar'a-baar'a te koy-izey se, A si arzakantey darza guna mo ka ne i bisa alfukaarey, Zama ikulu Irikoy kambe goyyaŋ no.

34:20b.JOB.034.020 Mo-ka-mi yaŋ folloŋ no i ga bu. Baa cin bindo ra i ga borey zinji-zinji, i ga ban mo. Hinkoyey ga gana mo, kaŋ manti nda kambe.

34:21b.JOB.034.021 Zama a moy goono ga boro fondey guna, A goono ga di a ce daguyaŋ kulu mo.

34:22b.JOB.034.022 Kubay fo si no, wala biya, Kaŋ ra laala goy-teekoy ga du ka tugu.

34:23b.JOB.034.023 Zama a si laami nga ma tonton ka laakal ye boro gaa, Hala nd'a ma koy Irikoy jine ciiti se.

34:24b.JOB.034.024 A ga borey kaŋ yaŋ gonda hin bagu-bagu, fintalyaŋ si, Ka boro fooyaŋ daŋ i kayyaŋ nangey ra.

34:25b.JOB.034.025 Woodin se mo a na laakal ye i goyey gaa. A g'i zeeri cin k'i tutubu.

34:26b.JOB.034.026 A g'i kar danga boro laaley cine gomdokoy jine.

34:27b.JOB.034.027 Zama i kamba ka fay d'a ganayaŋ, I wangu ka saal a muraadey kulu,

34:28b.JOB.034.028 Hal i naŋ talkey hẽeno ma koy ka to a do, A ma maa kayna ra waney hẽeno.

34:29b.JOB.034.029 Da nga din ga laakal kanay no, May no ga hin ka ciiti ka zeeri koyne? Wala mo d'a na nga moyduma tugu, May no ga hin ka di a? Danga, d'a n'a te kunda se, Wala boro folloŋ se -- ikulu afolloŋ no.

34:30b.JOB.034.030 Boro kaŋ sinda Irikoy ganayaŋ mana hima ka mayray te, Zama a ma si ciya hirrimi hari talkey se.

34:31b.JOB.034.031 D'a-ta day, boro fo go no kaŋ doona ka ne Irikoy se: ‹Ay na goojiyaŋ haŋ, day ay si ye ka taali te?

34:32b.JOB.034.032 Haŋ kaŋ ay mana di, ni m'ay dondonandi nd'a. D'ay jin ka goy laalo te, Ay si ye ka filla koyne.›

34:33b.JOB.034.033 A ga bana ni se ni miila boŋ, Za kaŋ ni wangu no, wala? Zama daahir, nin no ga suuban, manti ay no. Woodin se no, kala ni ma ci haŋ kaŋ ni bay.

34:34b.JOB.034.034 Fahamantey ga ne ay se, Oho, laakalkooni kulu kaŋ maa ay sanno ga ne:

34:35b.JOB.034.035 ‹Ayuba goono ga salaŋ, kaŋ manti nda bayray, A sanno mo, haŋ kaŋ sinda laakal no.›

34:36b.JOB.034.036 Doŋ day i ma Ayuba neesi hala bananta, Za kaŋ a go ga sanni yeti sanda boro laaley cine!

34:37b.JOB.034.037 Zama a zunubey boŋ no a goono ga murteyaŋ tonton, A goono ga kooma kaa mo iri game ra. A go ga sanni boobo te ka gaaba nda Irikoy.»

35

35:1b.JOB.035.001 Elihu ye ka salaŋ koyne ka ne:

35:2b.JOB.035.002 «Woone ga saba ni diyaŋ gaa no, kaŋ ni ga ne: ‹Ay adilitara ga bisa Irikoy wane?›

35:3b.JOB.035.003 Zama ni goono ga ne, Nafa woofo no a ga te ni se? Wala: ‹Ifo no a ga hanse ay se, Kaŋ ay mana zunubi te?›

35:4b.JOB.035.004 Kal ay ma tu ni se, nin da ni corey kulu care banda:

35:5b.JOB.035.005 Guna beene haray ka di, Guna beene burey gaa haray, Wo kaŋ yaŋ go ni se beene.

35:6b.JOB.035.006 Baa ni na zunubi te, Zamba woofo dumi no ni te Irikoy se? Baa ni zunubey te labu-care, ifo no woodin ga te a se?

35:7b.JOB.035.007 Baa ni ya adilante no, ni n'a no hay fo, wala? Ifo mo no a ta ni kambe ra?

35:8b.JOB.035.008 A ga hin ka te ni laala ma boro sanda ni cine zamba, Ni adilitara mo ma Adam-ize fo nafa.

35:9b.JOB.035.009 Kankami boobo se no i go ga hẽ. I ga gaakasinay hẽeni te hinkoyey kambe gaabo sabbay se.

35:10b.JOB.035.010 Amma boro kulu si ne: ‹Man no Irikoy ay Takakwa go, Nga kaŋ ga borey no dooniyaŋ cin haray?

35:11b.JOB.035.011 A g'iri dondonandi bayray ka bisa ganji hamey wane, Ka naŋ iri ma bisa beene curey laakal.›

35:12b.JOB.035.012 Noodin no i ga hẽ, amma a si tu, Boro laaley boŋbeera sabbay se.

35:13b.JOB.035.013 Daahir, Irikoy si maa ceeyaŋ yaamo, Hina-Kulu-Koyo si woodin saal,

35:14b.JOB.035.014 Sanku fa binde kaŋ ni ga ne ni mana di a! Ciiti sanno go a jine, kala ni m'a batu.

35:15b.JOB.035.015 Sohõ mo, zama a mana bana nga futa ra, Wala a mana borey saamotara saal, baa kayna,

35:16b.JOB.035.016 Woodin se no Ayuba goono ga nga meyo fiti da sanni kaŋ sinda nafa. A goono ga sanni kaŋ yaŋ sinda bayray tonton.»

36

36:1b.JOB.036.001 Elihu ye ka ne:

36:2b.JOB.036.002 «Suuru ay se kayna, hal ay ma ni cabe, Zama hala ka kaa sohõ haŋ kaŋ boro ga ci Irikoy se go no.

36:3b.JOB.036.003 Nangu mooro no ay g'ay bayra candi ka kande, Ay g'ay Takakwa adilandi mo.

36:4b.JOB.036.004 Zama daahir ay sanney manti tangari wane yaŋ no, Boro fo kaŋ gonda bayray toonante go ni banda.

36:5b.JOB.036.005 Guna, Irikoy ya Hinkoy no, Amma a si donda boro kulu, Hinkoy mo no fahamay gaabi ra.

36:6b.JOB.036.006 A si boro laaley fundey haggoy, Amma a ga taabantey no haŋ kaŋ ga saba i se.

36:7b.JOB.036.007 A si nga moy kaa adilantey gaa mo, Amma a g'i daŋ bonkooney banda karga boŋ hal abada, i m'i beerandi mo.

36:8b.JOB.036.008 D'i n'i haw da sisiriyaŋ, I n'i di mo da taabi korfoyaŋ,

36:9b.JOB.036.009 Saaya din kal a m'i goyey d'i taaley bangandi i se, Mate kaŋ i na boŋbeeray cabe nd'a.

36:10b.JOB.036.010 A g'i hangey fiti i ma maa dondonandiyaŋ, A g'i lordi mo ka ne i ma bare ka fay da goy laalo.

36:11b.JOB.036.011 D'i saal, hal i may a se, I ga ngey jirbey kubandi albarka ra, I ma ngey jiirey te kaani maayaŋ ra.

36:12b.JOB.036.012 Amma d'i mana saal, Takuba no g'i halaci, I ma bu mo bayray si.

36:13b.JOB.036.013 Amma borey kaŋ yaŋ sinda Irikoy ganayaŋ ngey biney ra ga futay jisi no ngey boŋ se, I si gaakasinay hẽeni te d'a n'i haw.

36:14b.JOB.036.014 Arwasutaray ra no i ga bu. I fundey ga ban tooru maa gaa aru-ci-wayey banda.

36:15b.JOB.036.015 A ga taabantey faaba ngey taabi haŋyaŋo ra. A g'i hangey fiti kankami do.

36:16b.JOB.036.016 Oho, doŋ a goono ga ba nga ma ni candi ni ma fun taabi bi wo ra, A ma kande nin ka daŋ nangu tafo ra, Naŋ kaŋ sinda kankami. Naŋ kaŋ a dake ni taablo boŋ doŋ mo, woodin to da ji.

36:17b.JOB.036.017 Amma sohõ ni to da boro laaley boŋ ciiti, Hala ciiti nda cimi ciiti na ni di.

36:18b.JOB.036.018 Ma laakal hala biniyay ma si ni candi ni ma dond'a, Fansa beera mo ma naŋ ni ma kamba.

36:19b.JOB.036.019 Ni arzakey, wala mo ni gaabo hina kulu me, I ga wasa i ma ni wa da kankami no, wala?

36:20b.JOB.036.020 Ma si yalla-yalla nda cin, Naŋ kaŋ i ga borey daŋ i ma daray ngey nangora ra.

36:21b.JOB.036.021 Ma haggoy, ma si laakal bare ka ye goy laalo gaa, Zama woodin no ni suuban ka bisa taabi haŋyaŋ.

36:22b.JOB.036.022 Guna, Irikoy gonda koytaray nga hino ra, May no ga te dondonandiko sanda a cine?

36:23b.JOB.036.023 May no ka fondo daŋ a se? May no ga ne a se mo: ‹Ni na goy laalo te?›

36:24b.JOB.036.024 Ma fongu day, k'a goyo beerandi kaŋ borey doon.

36:25b.JOB.036.025 Borey kulu di a, Boro g'a fonnay za nangu mooro.

36:26b.JOB.036.026 Guna, Irikoy ya beeraykoy no, Iri s'a bay mo. A jiirey baayaŋ bisa haŋ kaŋ boro ga fintal.

36:27b.JOB.036.027 Zama a ga hari tolliyaŋ candi i ma ziji beene, I ga ciya buuda, i ma sarre.

36:28b.JOB.036.028 Beene burey g'i gusam ganda mo, I goono ga tolli boro boŋ da yulwa.

36:29b.JOB.036.029 Boro fo go no kaŋ g'a hirriyaŋey daaruyaŋ bay no? Sanda a nangoray tanda kaatiyaŋ nooya?

36:30b.JOB.036.030 Guna, a ga nga boŋ windi nda kaari, A ga teeko ganda daabu.

36:31b.JOB.036.031 Zama woodin yaŋ do no a ga dumey ciiti, A ga ŋwaari no mo nda yulwa.

36:32b.JOB.036.032 A ga nga kambey daabu nda maliyaŋ, A n'a no lordi mo a ma goo hay tak!

36:33b.JOB.036.033 A kaatiyaŋo g'a baaro no, Hawey mo ga maa hirriyaŋ kaŋ ga ba ka kaa baaru.

37

37:1b.JOB.037.001 Woodin boŋ mo ay bina goono ga jijiri. A ga fittaw ka sosoro nga nango ra.

37:2b.JOB.037.002 Wa hanga jeeri Irikoy kaatiyaŋo jinda se, Da dunduyaŋ mo kaŋ go ga fun a meyo ra!

37:3b.JOB.037.003 A g'a taŋ a ma koy hala beena me, A maliyaŋo mo go ga koy hala ndunnya jabo me.

37:4b.JOB.037.004 A banda mo kala jinde fo mo ma dundu, A ga kaati nda nga koytara jinda. A mana maliyaŋey ganji mo waati kaŋ borey maa a jinda.

37:5b.JOB.037.005 Irikoy ga kaati nda nga jinda kaŋ ga dambarandi. Goy bambata yaŋ no a ga te, Kaŋ ga bisa iri fahama.

37:6b.JOB.037.006 Zama a ga ne neezo* se: ‹Ma kaŋ ganda!› Yaadin mo no a ga ci buru harey da hirriyaŋ bambatey se, Ka ne: ‹Wa te gaabi!›

37:7b.JOB.037.007 A na kawaatimi daŋ boro kulu kambe gaa, Zama boro kulu kaŋ a taka, i m'a goyo bay.

37:8b.JOB.037.008 Waato din no ganji hamey ga tuguyaŋ do ceeci, I ga goro ngey guusey ra.

37:9b.JOB.037.009 Dandi kambe haray no hari haw bambata ga fun, Azawa kambe mo kala hargu.

37:10b.JOB.037.010 Irikoy fulanzama ra no gari ga kaa, Harey kaŋ yaŋ ga tafay mo ga sandi ka ciya glas*.

37:11b.JOB.037.011 Oho, a ga leema jaraw beeri dake hirriyaŋ kaso boŋ, A ga nga maliyaŋ buro daaru.

37:12b.JOB.037.012 Buro mo ga bare ka ye nango kaŋ Irikoy n'a miila zama a ma du ka hay kulu kaŋ a lordi te ndunnya fando me-a-me boŋ, Nango kaŋ borey bara da goray.

37:13b.JOB.037.013 Hala goojiyaŋ sabbay se no, Wala a laabo nafa sabbay se no, Wala mo suuji sabbay se no, A ga naŋ i ma te.

37:14b.JOB.037.014 Ya nin Ayuba, ni ma hangan ka maa woone. Ma kay hinne ka laakal ye Irikoy goyey kaŋ ga dambarandi yaŋ gaa.

37:15b.JOB.037.015 Ni ga bay waati kaŋ no Irikoy ga woodin yaŋ tabbatandi, wala? Ni ga bay mate kaŋ a ga naŋ nga hirriyaŋo maliyaŋ ga kaari nd'a, wala?

37:16b.JOB.037.016 Wala ni ga bay mate kaŋ cine no a ga burey sarku nd'a? Nga kaŋ bayray toonantekoy no dambara goyey ra.

37:17b.JOB.037.017 Nin kaŋ ni bankaaray gonda dungay, Waati kaŋ batama go siw, dandi kambe hawo sabbay se,

37:18b.JOB.037.018 Ni ga hin ka beene batama daabu sanda Irikoy cine no? Ni ga naŋ a ma sandi danga diji kaŋ i soogu cine no?

37:19b.JOB.037.019 To. M'iri dondonandi haŋ kaŋ iri ga ci a se, Zama iri wo si waani ka iri sanney soola kuba sabbay se.

37:20b.JOB.037.020 Boro ga ne a se: ‹Ay ga ba ya salaŋ›, wala? Wala baa boro salaŋ, daahir i g'a gon no.

37:21b.JOB.037.021 Sohõ binde borey si hin ka kaaro kaŋ goono ga kaari beene din guna. Da haw faaru ka bisa, a n'a haabu mo.

37:22b.JOB.037.022 Azawa ra no darza kaŋ ga hima wura goono ga fun. Irikoy goono ga daabu nda koytaray darza kaŋ ga humburandi.

37:23b.JOB.037.023 Hina-Kulu-Koyo! -- A bisa iri hal iri si du k'a bay. A beeri nda hay kulu hin ra. A si adilitaray kaŋ yulwa nda cimi ciiti sara mo.

37:24b.JOB.037.024 Woodin se no borey ga humbur'a, A si baar'a-baar'a te boro kulu kaŋ gonda laakal bine ra se.»

38

38:1b.JOB.038.001 Waato din gaa no Rabbi tu Ayuba se, Jinda fun hari haw bindi ra, ka ne:

38:2b.JOB.038.002 «May no woone binde kaŋ goono ga saaware te kubay da sanniyaŋ kaŋ ra sinda bayray?

38:3b.JOB.038.003 Ma guddu sohõ sanda alboro, Zama ay ga ni hã, kala ni ma dede ay se.

38:4b.JOB.038.004 Man no ni go waato kaŋ ay na ganda dabey sinji? Dede hinne day, da ni gonda fahamay!

38:5b.JOB.038.005 May no k'a hirro daŋ, za kaŋ ni ga bay? May no ka neesiyaŋ korfo salle a boŋ?

38:6b.JOB.038.006 Ifo boŋ no i n'a dabey cina? Wala may no k'a lokoto tondey sinji

38:7b.JOB.038.007 waato kaŋ susubay handariyayzey doon care banda, Irikoy izey kulu mo kuuwa farhã sabbay se?

38:8b.JOB.038.008 May mo no ka teeko daabu-daabu nda daabirjiyaŋ waati kaŋ a bagu, ka fun taray, Danga day gunde ra no a fun?

38:9b.JOB.038.009 Waati kaŋ ay n'a daabu nda beene hirriyaŋ sanda kwaay cine, Kubay bi tik! mo ciya a se sanda hayyaŋ zaara-zaara.

38:10b.JOB.038.010 Ay n'ay hirro daŋ a se mo, Ay na karangaleyaŋ nda kanjarey daŋ a gaa.

38:11b.JOB.038.011 Ay ne mo: ‹Naŋ kaŋ ni ga kaa neeya, Amma ni si bisa a gaa. Noodin binde no ni hari bonday boŋbeeraykoyey ga kay.›

38:12b.JOB.038.012 Za ni teeyaŋ, ni doona ka susubay no lordi, wala? Ni naŋ mo boyaŋ ma nga nango bay no?

38:13b.JOB.038.013 Zama a ma ndunnya hirro me di, ka boro laaley kokobe ka kaa a ra mo?

38:14b.JOB.038.014 Ndunnya ga bare sanda botogo kaŋ gaa i na kawaatimi kar, A ga fun taray kwaaray, danga kwaay taalamante cine.

38:15b.JOB.038.015 I ga boro laaley ganji ngey kaaro, Kambe sambante mo no ga ceeri.

38:16b.JOB.038.016 Nin wo, ni doona ka furo naŋ kaŋ teeku ga fatta no? Wala ni doona ka bar-bare a guusuyaŋey lokotey ra?

38:17b.JOB.038.017 I na buuyaŋ windi me dabirjey cabe ni se ce fo no? Wala ni jin ka di buuyaŋ biya windi me daabirjey?

38:18b.JOB.038.018 Ni ga ndunnya tafayyaŋo bay, wala? To. Ma ci, hala day ni ga woodin yaŋ kulu bay!

38:19b.JOB.038.019 Man fonda kaŋ ga koy kaari nangora do? Kubay binde, man no a nango go?

38:20b.JOB.038.020 Hala nda ni ma kond'a noodin a nango ra, Ni ma fondey mo bay kaŋ ga koy a kwaara!

38:21b.JOB.038.021 Sikka si ni ga bay, Zama alwaato din i na ni hay, Ni jirbey kuuyaŋo ga baa mo!

38:22b.JOB.038.022 Ni furo neezo* buwayaŋ ra ce fo no? Wala ni bay ka di gari buwayaŋ no?

38:23b.JOB.038.023 Wo kaŋ yaŋ ay jisi kankami jirbey sabbay se, Danga wongu nda tangami jirbey sabbay se no.

38:24b.JOB.038.024 Fondo woofo ra no i ga kaari fay-fay? Mate no i ga wayna funay hawo say-say d'a ndunnya boŋ?

38:25b.JOB.038.025 May no ka goota kortu hari-yaa se? Wala may no ka fondo kortu kaatiyaŋ maliyaŋ se?

38:26b.JOB.038.026 Zama beene hari ma kaŋ laabu kaŋ boro si no boŋ, Taasi beerey boŋ, naŋ kaŋ boro si no,

38:27b.JOB.038.027 Zama a ma laabu kogo nda gangani kungandi, A ma naŋ mo subu tayo ma zay ka fatta.

38:28b.JOB.038.028 Beene hari gonda baaba, wala? Wala may no ka harandaŋ tolliyaŋ hay?

38:29b.JOB.038.029 May gunda ra no gari fun? Beene gar'ize kwaarayey mo, may no k'i hay?

38:30b.JOB.038.030 Hari bare ka sandi sanda tondi cine, Guusuyaŋey batama ciya glas.

38:31b.JOB.038.031 Ni ga hin ka Dibi handariyayzey marga haw, wala? Wala ni ga hin ka Aliyu hawyaŋ korfey feeri?

38:32b.JOB.038.032 Handariya margey alaamey binde, Ni ga hin k'i daŋ fondo? Ni ga hin ka Ywa nda nga izey candi?

38:33b.JOB.038.033 Ni ga beeney farilley bay? Wala ni ga hin k'i mayray sinji ndunnya boŋ?

38:34b.JOB.038.034 Ni ga hin ka ni jinde sambu a ma to burey gaa, Zama hari kaŋ ga yulwa ma gusam ka ni daabu, wala?

38:35b.JOB.038.035 Ni ga hin ka maliyaŋ donton no? A ga koy ni se no ka ne ni se: ‹Iri neeya?›

38:36b.JOB.038.036 May no ka laakal daŋ hala boro bina ra? Wala may no ka fahamay no boro bina se?

38:37b.JOB.038.037 May no ga hin ka burey lasaabu nga laakalo do? Wala may no bora kaŋ ga hin ka beene foobey bare,

38:38b.JOB.038.038 Waati kaŋ ganda laabo margu nangu folloŋ ka sandi, Laabu guwey mo go ga naagu care gaa?

39

39:1b.JOB.039.001 Ni ga hin ka ham koli ka kande muusu beeri way se no? Wala ni ga muusu izey kungandi, i hara ma ban,

39:2b.JOB.039.002 Waato kaŋ i goono ga gum ngey guusu ra, I ga kani ka batandi ngey gumbo ra?

39:3b.JOB.039.003 May no ga gaaru ŋwaaro soola a se, Waato kaŋ cine a izey goono ga hẽ Irikoy gaa, Ka bar-bare ŋwaari-jaŋay sabbay se?

39:4b.JOB.039.004 Wala ni ga bay waati kaŋ cine no tondey ra hinciney ga hay? Wala ni ga hin ka ŋwe jirbey seeda?

39:5b.JOB.039.005 Ni ga hin k'i gunde handey lasaabu no? Wala ni ga bay alwaati kaŋ cine no i ga hay?

39:6b.JOB.039.006 I ga sombu ka ngey izey kaa taray, I ga ngey hay-zaŋay jarawo kaa.

39:7b.JOB.039.007 I izey ga te gaabi, saajo ra mo no i ga beeri. I ga dira, i si ye ka kaa koyne.

39:8b.JOB.039.008 May no ka ganji farka taŋ ka fay d'a? May no ka ganji farka tafar feeri?

39:9b.JOB.039.009 Ay n'a no saajo a ma ciya a windi, Ciiri laabo mo a nangoray no.

39:10b.JOB.039.010 A ga donda gallu kosongu, A si maa gaarayko kuuwa.

39:11b.JOB.039.011 A ga tondi kuuku yaŋ windi ka du kuray do, A ga kobto tayo kulu dumi ceeci.

39:12b.JOB.039.012 Haw-bi ga yadda ka may ni se, wala? A ga hanna ni alman gaa do, wala?

39:13b.JOB.039.013 Ni ga hin ka haw-bi haw nda korfo a ma ni bata far no? A ga ni gana ka gooro batamey far, wala?

39:14b.JOB.039.014 Ni ga naanay a gaa zama se a gaabo ga beeri no? Ni ga ni goyo talfi a gaa, wala?

39:15b.JOB.039.015 Ni ga de a gaa a ma ye ka kande ni se ni hayno fu, wala? A m'a margu-margu dubango do?

39:16b.JOB.039.016 Taatagay fatey goono ga kobi da farhã, Amma a fatey d'a hamney, i gonda gomni baakasinay, wala?

39:17b.JOB.039.017 Zama a ga nga gunguray jisi k'i naŋ ganda, A m'i dungandi kusa ra.

39:18b.JOB.039.018 A ga dinya mo hala hambara ce g'i taamu k'i tutubu, Wala ganji ham fo m'i taamu-taamu.

39:19b.JOB.039.019 A ga futu nga izey gaa, Danga day manti a wane yaŋ no, A si humburu hala nga goyo wo ma si ciya yaamo.

39:20b.JOB.039.020 Zama Irikoy n'a ganji laakal, A mana a no fahamay mo.

39:21b.JOB.039.021 Waati kaŋ a tun zuray se, Kal a ma donda bari nda nga kaarukwa.

39:22b.JOB.039.022 Nin no ka bari no nga gaabo? Nin no k'a jinda no jeza kaŋ ga feeni?

39:23b.JOB.039.023 Nin no ka naŋ a ma sar sanda do cine, wala? A funsuyaŋ gaakuranta ya humburkumay hari no.

39:24b.JOB.039.024 A ga zankam gooru batama ra, A ga maa nga gaabo kaani. A ga fatta ka koy kubay da wongu jinay.

39:25b.JOB.039.025 Humburkumay wo, a g'a hahaara no, a si sukurutu, A si banda bare mo takuba se.

39:26b.JOB.039.026 Tongo ga kosongu mo a boŋ, Hala nda yaaji da lolo kaŋ ga nyaale mo.

39:27b.JOB.039.027 A ga laabu fisi nda fundi korni nda futay, A si kay hilli hẽeni jinde sabbay se.

39:28b.JOB.039.028 Waati kaŋ cine i ga hilli kar, Kal a ma ne: ‹Ahãa!› Za nangu mooro no a ga wongu, Da wongaaray kaatiyaŋey, nda wongu kuuwa mani ka maa.

39:29b.JOB.039.029 Ni fahama do no gabu ga kaaru beene, A ma nga fatey salle ka koy dandi kambe?

39:30b.JOB.039.030 Wala ni lordi boŋ no zeeban ga tun ka ziji, Ka nga fito te beene?

39:31b.JOB.039.031 A nangora go tondi kuuku boŋ, Noodin no a gonda nga nangora, Tondi deene boŋ no, nangu gaabikooni ra.

39:32b.JOB.039.032 Noodin no a ga ŋwaari ceeci, Nangu mooro no a moy g'a fonnay.

39:33b.JOB.039.033 A izey mo ga kuri haŋ. Naŋ kaŋ borey kaŋ yaŋ i fun go, Noodin no ni g'a gar.»

39:34b.JOB.039.034 Saaya din Rabbi ne Ayuba se:

39:35b.JOB.039.035 «Janceko ga kakaw nda Hina-Kulu-Koyo no, wala? Boro kaŋ ga kakaw nda Irikoy, a ma tu woodin se!»

39:36b.JOB.039.036 Kala Ayuba tu Rabbi se ka ne:

39:37b.JOB.039.037 «Guna, ay wo manti hay fo no, Ifo no ay ga tu d'a ni se? Ay n'ay kambe daabu ay meyo gaa.

39:38b.JOB.039.038 Sorro folloŋ no ay salaŋ, Ay si ye ka tu koyne. Oho, hala sorro hinka, Amma baa sanni folloŋ ay si tonton.»

40

40:1b.JOB.040.001 Gaa no Rabbi tu Ayuba se, Jinda fun hirriyaŋ haw ra ka ne:

40:2b.JOB.040.002 «Ma guddu sohõ ka te alboro teera, Zama ay ga ni hã, ni ma dede ay se mo.

40:3b.JOB.040.003 Daahir, ni g'ay ciito ganandi no? Ni g'ay zeeri zama se nin wo ma ciya adilante no?

40:4b.JOB.040.004 Ni gonda kambe sanda Irikoy cine no? Wala ni ga hin ka kaati nda jinde sanda Irikoy cine no?

40:5b.JOB.040.005 To. Ma taalam sohõ da darza beeri nda gaakuri. Ma beeray da koytaray darza daŋ ka daabu ni gaa.

40:6b.JOB.040.006 Ma ni futay booba mun, Ma boŋbeeraykoy kulu guna k'a kaynandi.

40:7b.JOB.040.007 Ma boŋbeeraykoy kulu guna k'a ye ganda, Ma boro laaley taamu-taamu nangey kaŋ i bara ga kay.

40:8b.JOB.040.008 M'i tugu care banda kusa ra, M'i haw tuguyaŋ do.

40:9b.JOB.040.009 Waato din gaa kal ay ma ni seeda, Ka ne ni kambe ŋwaari hino no ga hin ka ni faaba.

40:10b.JOB.040.010 Guna Behemot kaŋ ay te ni banda, A ga subu ŋwa sanda haw cine.

40:11b.JOB.040.011 Guna, a gaabo go a kungurso ra. A hino mo go a gunde baso ra.

40:12b.JOB.040.012 A ga nga sunfa salle danga sedre* nya no, A tanje kaajey go no.

40:13b.JOB.040.013 A biriyey sanda guuru-say garu gomboyaŋ no, A cey mo sanda guuru-bi tafayyaŋ no.

40:14b.JOB.040.014 Nga no ga ti Irikoy danayey ra ijina wane, Nga kaŋ n'a te n'a no takuba.

40:15b.JOB.040.015 Daahir, tondi kuukey ga ŋwaari kaa taray a se, Noodin no ganji hamey kulu ga fooru.

40:16b.JOB.040.016 Lotus* tuuri cire no a ga kani, Kuubu zugu beeri nda farro ra no.

40:17b.JOB.040.017 Lotus tuurey ga te a se bi, Gooru ra windi bundu no g'a windi.

40:18b.JOB.040.018 Guna, baa isa na bonday tunandi, nga wo si jijiri. A laakalo ga kani, Baa Urdun* isa haro furo hal a meyo gaa.

40:19b.JOB.040.019 Boro fo go no kaŋ g'a di waati kaŋ a go ga batu? Wala man boro kaŋ g'a niina fun nda guuru darb'ize?

40:20b.JOB.040.020 Ni ga hin ka Lebiyatan* candi nda darb'ize no? Wala m'a deena naan da korfo?

40:21b.JOB.040.021 Ni ga hin ka korfo daŋ a niina ra no? Wala m'a garbey fun ka goti daŋ i gaa?

40:22b.JOB.040.022 A ga ni ŋwaaray gumo no? A ga sanni baano te ni se, wala?

40:23b.JOB.040.023 A ga alkawli sambu ni se no? Wala ni g'a di a ma ciya ni bannya no hal abada?

40:24b.JOB.040.024 Ni ga fooru nd'a sanda curayze cine no? Wala mo ni g'a haw zama a ma ciya ni wandiyey se foori hari no?

40:25b.JOB.040.025 Hari ham neerako jama g'a hayci yaŋ te, wala? Wala i g'a fay fatawc'izey game ra?

40:26b.JOB.040.026 Ni ga hin k'a kuuro hay nda harji no? Wala ni g'a boŋo toonandi nda hari-ham diire loloyaŋ?

40:27b.JOB.040.027 Da ni na kambe dake a gaa ce folloŋ, Ni ga fongu nda tangamo, ni si ye k'a filla bo!

40:28b.JOB.040.028 Guna, ni tammahãyaŋo wo yaamo no, Baa a diyaŋo, manti a ga naŋ boro gaa ma yay?

41

41:1b.JOB.041.001 Fundi kornokoy si no kaŋ g'a zokoti. Mana binde boro kaŋ ga hin ka kay ay jine?

41:2b.JOB.041.002 May no jin k'ay no, hal ay m'a yeti a se? Hay kulu me kaŋ go beene batama cire, kulu ay wane no.

41:3b.JOB.041.003 Ay si dinya a cey sanni mo, Wala a gaabi beero, wala a gaaham himandi hanna.

41:4b.JOB.041.004 May no ga hin k'a fooru? May no ga furo a kobtey game ra?

41:5b.JOB.041.005 May no ga hin k'a garbey feeri? A hinjey sasarey kulu ga humburandi.

41:6b.JOB.041.006 A banda kobto tiŋa mo ga ti a zamuuyaŋ haro, I goono ga lamba care gaa danga i n'i naagu care gaa no.

41:7b.JOB.041.007 I ga maan care gaa mo, Hala haw si hin ka furo i game ra.

41:8b.JOB.041.008 Kubanteyaŋ no care gaa, I go ga naagu care gaa, hala i si fay.

41:9b.JOB.041.009 A tissoyaŋo ga kaari kaa taray, A moy ga hima mo boyaŋ kaari.

41:10b.JOB.041.010 Danji yulba kaŋ ga di goono ga fatta a meyo ra, Nune hansey mo goono ga sar ka fittaw.

41:11b.JOB.041.011 A niina ra mo dullu go ga fatta, Sanda kusu kaŋ goono ga walay ra cine.

41:12b.JOB.041.012 A fulanzama ga danji bi diyandi, Danji beele goono ga fun a meyo ra.

41:13b.JOB.041.013 A jinda gaa no gaabi ga goro, Humburkumay go ga sar a jine.

41:14b.JOB.041.014 A basi gudey go ga kubay care gaa, I go ga kay da gaabi, i si yooje.

41:15b.JOB.041.015 A bina ga sandi sanda tondi cine. Oho a ga sandi sanda ganda fufuyaŋ tondi cine.

41:16b.JOB.041.016 Saaya kaŋ a ga nga boŋ sambu, hinkoyey ga humburu, I ga gartu dirim kala i ma fun ngey laakaley ra.

41:17b.JOB.041.017 Baa boro kaŋ a boŋ da takuba, A si hay kulu hanse, Wala yaaji, wala hangaw, wala lolo.

41:18b.JOB.041.018 A do guuru-bi wo, sanda subu no, Guuru-say mo sanda tuuri fumbo no.

41:19b.JOB.041.019 Hangaw si hin ka naŋ a ma zuru, Finga-finga tondiyaŋ ga hima a se subu tikse.

41:20b.JOB.041.020 Goobu kaso mo ga hima a se bari subu, Yaaji kungayaŋ g'a haarandi no.

41:21b.JOB.041.021 A gunda, sanda car-cambu kaano yaŋ no, Danga day i na safayaŋ guuru candi no botogo ra.

41:22b.JOB.041.022 A ga naŋ gooru guusuyaŋo ma walay sanda kusu cine, A ma teeku himandi sanda ji kolbo.

41:23b.JOB.041.023 A banda fonda go ga nyaale, Danga day hari guusuyaŋey gonda hamni kwaaray no.

41:24b.JOB.041.024 Ndunnya ra a wadde si no, Takahari kaŋ si humburkumay bay no.

41:25b.JOB.041.025 Takahari fo kulu nda nga darza, A g'a guna nda donda-caray, Bonkooni no boŋbeeray izey kulu boŋ.»

42

42:1b.JOB.042.001 Waato din gaa no Ayuba tu Rabbi se ka ne:

42:2b.JOB.042.002 «Ay bay kaŋ ni ga hin ka hay kulu te, Ni miila fo mo si no kaŋ i ga ganji.

42:3b.JOB.042.003 Ni ne: ‹May no woone kaŋ goono ga saaware ciya kubay da bayray-jaŋay?› Ay binde na hariyaŋ ci kaŋ ay mana faham d'a, Muraaduyaŋ kaŋ bisa ay gaabo, kaŋ yaŋ ay si bay.

42:4b.JOB.042.004 Ni ne: ‹Ay ga ni ŋwaaray, ma maa, ay ma salaŋ, Ay ga ni hã, kala ni m'ay dondonandi.›

42:5b.JOB.042.005 Ay maa ni baaro hanga maayaŋ do, Amma sohõ ay mo go ga di nin.

42:6b.JOB.042.006 Woodin se no ay n'ay boŋ fanta, Ay tun ay sanni zeena boŋ kusa nda boosu ra.»

42:7b.JOB.042.007 A ciya binde, waato kaŋ Rabbi na sanney din te Ayuba se, kala Rabbi ne Elifaz Teman bora se: «Ay futa koroŋ ni boŋ, da ni coro hinka mo boŋ, zama araŋ mana ay ciine te da cimi, sanda mate kaŋ cine ay tamo Ayuba te.

42:8b.JOB.042.008 Sohõ binde, kal araŋ ma yeeji iyye nda feeji gaaru iyye sambu. Araŋ ma koy ay tamo Ayuba do ka sargay kaŋ i ga ton te araŋ bumbey se. Ay tamo Ayuba mo ga gaara araŋ se, zama ay g'a adduwa ta, ay ma si bana araŋ gaa araŋ saamotara boŋ. Zama araŋ mana ay ciine te nda cimi, mate kaŋ cine ay tamo Ayuba te.»

42:9b.JOB.042.009 Elifaz Teman bora mo, da Bildad Suhi bora, nda Zofar Naamat bora koy ka goy Rabbi lordo boŋ. Rabbi mo yadda Ayuba se.

42:10b.JOB.042.010 Rabbi mo na Ayuba kaa taabi ra, waato kaŋ a gaara nga corey se. Rabbi na Ayuba no koyne hayey kaŋ yaŋ go a se waato hala labu-care hinka.

42:11b.JOB.042.011 Waato din gaa no a nya-izey kulu kaa a do, d'a waymey kulu, d'a za doŋ mo-ka-bayrayey kulu, ka ŋwa a banda a windo ra. I n'a suurandi, ka kunfa nda yaamar yaŋ te a se, masiibey kulu kaŋ Rabbi kande a gaa sabbay se. I boro fo kulu mo n'a no nzarfu gude fo nda wura korbay fo.

42:12b.JOB.042.012 Yaadin cine no Rabbi na Ayuba kokora albarkandi nd'a, hal a bisa a sintina. A du feeji zambar way cindi taaci, da yo zambar iddu, da haw zambar hinka, nda farka nya zambar fo koyne.

42:13b.JOB.042.013 A gonda mo ize alboro iyye, nda wayboro hinza.

42:14b.JOB.042.014 Ize way beero, a n'a maa daŋ Yemima, ihinkanta mo, a n'a maa daŋ Keziya, ihinzanta mo, Keren-Happuk.

42:15b.JOB.042.015 Laabo kulu ra mo, i si wayboro hanno gar sanda Ayuba ize wayey cine. I baabo mo n'i no tubu ngey armey banda.

42:16b.JOB.042.016 Woodin banda Ayuba ye ka tonton jiiri zangu nda waytaaci. A di nga izey, da nga hamey, da hala ka koy mo-si-di nyilu koyne.

42:17b.JOB.042.017 Ayuba binde bu da zeenay, a kungu nda ndunnya.