Lamentations (Xhosa)

1

1:1b.LAM.001.001 Yoo! Uhleli wodwa, umzi obantu baye bebaninzi; Obe umkhulu ezintlangeni Usuke waba njengomhlolokazi; umthethelikazi emazweni Usuke waba ngofakwa uviko.

1:2b.LAM.001.002 Ulila elilile ebusuku, iinyembezi zakhe zisezidleleni zakhe; Akanamthuthuzeli kuzo zonke izithandane zakhe; Onke amakholwane akhe ammenezelele, Aba lutshaba kuye.

1:3b.LAM.001.003 UYuda uye ekuthinjweni, ephuma ezintsizini nasezinkonzweni ezininzi; Yena uhleli ezintlangeni, akafumani kuphumla; Bonke abamsukelayo bamfikele ezingxingongweni.

1:4b.LAM.001.004 Iindlela zaseZiyon zenza isijwili, ngokungabikho kwabaya emithendelekweni; Onke amasango ayo akanamntu, ababingeleli bayo bayancwina; Iintombi zayo zinosizi, yona ke kukrakra kuyo.

1:5b.LAM.001.005 Ababandezeli bayo basuka bayintloko; iintshaba zayo zinobunqobo; Ngokuba uYehova uyenze yanosizi ngenxa yokreqo lwayo oluninzi; Abantwana bayo bemkile, bathinjiwe, baqhutywa ngumbandezeli.

1:6b.LAM.001.006 Buphumile entombini enguZiyon bonke ubungangamsha bayo; Abathetheli bayo baba njengamaxhama angafumani dlelo, Ahamba engenamandla phambi komsukeli.

1:7b.LAM.001.007 IYerusalem iyazikhumbula, ngemini yeentsizi zayo neyokudinga kwayo, Zonke izinto zayo ezinqwenelekayo ebinazo kwakwiimini zamandulo, Ekuweni kwabantu bayo esandleni sombandezeli, ingenamncedi; Ababandezeli bayo bayibona, bakuhleka ukucinywa kwayo.

1:8b.LAM.001.008 IYerusalem asikuko nokuba yonile yona; ngenxa yoko yaba lubhorha; Bonke ababeyizukisa bayayicukuceza, ngokuba babone ubuze bayo; Nayo ngokwayo iyancwina, ibuye umva.

1:9b.LAM.001.009 Ubunqambi bayo busezingutyeni zayo ezirhuqayo, ayilikhumbulelanga ikamva layo; Yehla ke ngokubalulekileyo; ayinamthuthuzeli; Ithi, Zikhangele, Yehova, iintsizi zam; ngokuba utshaba luzikhulisile.

1:10b.LAM.001.010 Umbandezeli usolule isandla sakhe phezu kwezinto zayo zonke ezinqwenelekayo; Kuba ibona iintlanga zingene engcweleni yayo, Owawuwise umthetho wena, ukuba zingangeni ebandleni lakho.

1:11b.LAM.001.011 Bonke abantu bayo bayancwina, befuna isonka; Barhole izinto zabo ezinqwenelekayo ngenxa yesonka, ukuze bawubuyise umphefumlo; Bona, Yehova, ukhangele, ukuba ndisuke ndacukucezeka.

1:12b.LAM.001.012 Akunto na oku kuni nonke, nina nidlula ngendlela? Bhekani nibone, ukuba kukho na umvandedwa onjengomvandedwa wam, endiwenziweyo, Athe uYehova wandenza lusizi ngemini yokuvutha komsindo wakhe.

1:13b.LAM.001.013 Engaphezulu, uthume umlilo emathanjeni am, wawanyathela; Uzanekele umnatha iinyawo zam, wandibuyisa umva; Undenze inxuwa, yonke imini ndityhafile.

1:14b.LAM.001.014 Idyokhwe yezikreqo zam ibotshwe sisandla sakhe; Zibhijelene, zenyuka zaba semqaleni wam, zawakhubekisa amandla am; INkosi yam indinikele ezandleni zabo ndingenakumisa kubo.

1:15b.LAM.001.015 INkosi yam izitshitshisile zonke iimbalasane zam eziphakathi kwam; Indimemele umthendeleko, ukuba yaphule amadodana am. INkosi yam ixovule inkazana enguYuda, ngokungathi kusesixovulweni sewayini.

1:16b.LAM.001.016 Ngenxa yezo zinto ndiyalila; iliso lam, iliso lam lihla amanzi, Ngokuba ekude kum umthuthuzeli, umbuyisi womphefumlo wam; Baziimpanza abantwana bam, ngokuba utshaba lwam lundoyisile.

1:17b.LAM.001.017 IZiyon iyazolula izandla zayo, ayinamthuthuzeli; UYehova ubawisele umthetho ngoYakobhi, ukuba ababandezeli bakhe bamngqonge: IYerusalem iyinto elubhorha phakathi kwabo.

1:18b.LAM.001.018 Ulilungisa uYehova; ngokuba bendiphikise umlomo wakhe. Khanive, nonke zizwe, niwubone umvandedwa wam; Umthinjana wam namadodana am emke nokuthinjwa.

1:19b.LAM.001.019 Ndibize izithandane zam, zandikhohlisa zona; Ababingeleli bam, namadoda amakhulu akwam, aphume umphefumlo phakathi komzi, Xa abezifunela ukudla, ukuba abuyise imiphefumlo yawo.

1:20b.LAM.001.020 Khangela, Yehova, ngokuba ndibandezelekile; izibilini zam ziyabila; Intliziyo yam iphendukile phakathi kwam; ngokuba ndasuka ndaba ziinkani kuphela; Ngaphandle ikrele landihlutha abantwana, ngaphakathi kwakukufa kodwa.

1:21b.LAM.001.021 Bandivile ukuba ndiyancwina; ndathi, Andinamthuthuzeli; Zonke iintshaba zam zibuvile ububi bam; zinemihlali, ngokuba oko kwenziwe nguwe. Uyayizisa imini oyimemileyo, ziya kuba njengam ke.

1:22b.LAM.001.022 Mabufike phambi kwakho bonke ububi bazo, Uziphathe njengoko wandiphatha ngako ngenxa yezikreqo zam zonke; Ngokuba kuninzi ukuncwina kwam, nentliziyo yam ityhafile.

2

2:1b.LAM.002.001 Yoo! Itheni na iNkosi yam ukuyisibekela kangaka ngomsindo wayo intombi enguZiyon? Isikhuphile ezulwini, yasikhahlela ehlabathini, isihombo sikaSirayeli, Ayasikhumbula isihlalo seenyawo zayo ngemini yomsindo wayo.

2:2b.LAM.002.002 INkosi yam iwaginyile, ayawaconga, onke amakriwa akwaYakobi; Izigungxule ngokuphuphuma komsindo wayo iinqaba ezinkulu zentombi enguYuda; Yazizisa emhlabeni; Ibungcolisile ubukumkani nabathetheli babo.

2:3b.LAM.002.003 Izixakazile ngokuvutha komsindo wayo zonke iimpondo zikaSirayeli; Isibuyise umva isandla sayo sokunene ebusweni botshaba; Yatshisa kwaYakobi njengomlilo olenyayo, odlayo ngeenxa zonke.

2:4b.LAM.002.004 Isityedile isaphetha sayo njengotshaba; imise isandla sayo sokunene, saxelisa esombandezeli, Yazibulala zonke izinto ezinqwenelekayo emehlweni; Ententeni yentombi enguZiyon, ibuphalazile ubushushu bayo njengomlilo.

2:5b.LAM.002.005 INkosi yam isuke yaba njengotshaba; imginyile uSirayeli, Iziginyile zonke iingxande zayo ezinde, izonakalisile iinqaba zayo ezinkulu; Yandisa entombini enguYuda uncwino nokukhala.

2:6b.LAM.002.006 Iyichithile indawo yayo ebiyiweyo njengomyezo; Iyitshabalalisile indawo yayo yentlangano; UYehova wenze walityalwa eZiyon umthendeleko nesabatha; Wabagiba ekubhavumeni komsindo wakhe ukumkani nombingeleli.

2:7b.LAM.002.007 INkosi yam isihlambele isibingelelo sayo, ithe nethe kuyo ingcwele yayo, Izivingcelele esandleni sotshaba iindonga zeengxande zayo ezinde; Baxokozela endlwini kaYehova njengemini yomthendeleko.

2:8b.LAM.002.008 UYehova ucinge ukonakalisa udonga lwentombi enguZiyon; Wolule ulutya lokulinganisela, akasibuyisa isandla sakhe ekuginyeni; Wenza ungqameko lomsele lwaba nesijwili, kwanodonga; zithokombisile kunye ezo zinto.

2:9b.LAM.002.009 Amasango ayo atshonile emhlabeni; uyitshabalalisile, uyaphule imivalo yayo; Ukumkani wayo nabathetheli bayo basezintlangeni, akukho myalelo; Abaprofeti bayo abafumani mbono kuYehova.

2:10b.LAM.002.010 Ahleli emhlabeni ethe cwaka amadoda amakhulu entombi enguZiyon; Azigalele ngomhlaba entloko, abhinqe ezirhwexayo; Uzithobele emhlabeni iintloko zawo umthinjana waseYerusalem.

2:11b.LAM.002.011 Amehlo am aphela ziinyembezi, ziyabila izibilini zam, Isibindi sam siphalalele emhlabeni, ngenxa yokwaphuka kwentombi yabantu bakowethu, Ngokutyhafa kwabantwana, nabasemabeleni, ezitratweni zomzi.

2:12b.LAM.002.012 Bamana ukuthi koonina, Iphi na ingqolowa newayini? Ekutyhafeni kwabo njengabangxwelerhiweyo ezitratweni zomzi, Ekuziphalazeni kwemiphefumlo yabo esifubeni sonina.

2:13b.LAM.002.013 Ndikungqinele, ngantoni na? Ndikufanekise nantoni na, ntombi yaseYerusalem? Ndikulinganise nantoni na, ukuze ndikuthuthuzele, ntombindini iyintombi, inguZiyon? Ngokuba kukhulu ngangolwandle ukwaphuka kwakho; ngubani na onokukuphilisa?

2:14b.LAM.002.014 Abaprofeti bakho bakubonele imibono yento engento nejavujavu; Ababutyhila ubugwenxa bakho, ukuba kubuyiswe ukuthinjwa kwakho; Bakubonele imibono ezizihlabo ezingezizo, nezokugxothwa.

2:15b.LAM.002.015 Babetha izandla ngawe bonke abadlula ngendlela; Benza umsondlo, bahlunguzele iintloko ngentombi enguYerusalem, besithi, Ngulo mzi na, lo kuthiwa kuphela kwenzwakazi, yimihlali yehlabathi lonke?

2:16b.LAM.002.016 Zonke iintshaba zakho zikwakhamisela umlomo; Zenza umsondlo, zitshixizela amazinyo; zithi, Siyiginyile; Inene, yiyo le imini ebe siyithembile; siyifumene, siyibonile.

2:17b.LAM.002.017 Ukwenzile uYehova abekunkqangiyele; Ulizalisile ilizwi lakhe, abeliwisele umthetho kususela kwiimini zamandulo; Ugungxule, akaconga; Wenze lwakuvuyelela utshaba lwakho, Uphakamise uphondo lwababandezeli bakho.

2:18b.LAM.002.018 Intliziyo yabo ikhala eNkosini yam; Ludonga lwentombi enguZiyon, mazihle iinyembezi njengomlambo imini nobusuku; Musa ukuyeka, malungaphezi ukhozo lweliso lakho.

2:19b.LAM.002.019 Vuka, uhlahlambe ebusuku, ekuqalekeni kwemilindo; Yiphalaze njengamanzi intliziyo yakho ebusweni beNkosi; Ziphakamisele kuyo izandla zakho, ngenxa yomphefumlo wabantwana bakho, Abatyhafileyo kukulamba ekujikeni kwezitrato zonke.

2:20b.LAM.002.020 Bona, Yehova, ukhangele, ngubani na lo wenjenje ukumphatha kakubi? Abafazi bangadla isiqhamo somzimba wabo na? Badle abantwana ababathantamisayo na? Angabulawelwa engcweleni yeNkosi na umbingeleli nomprofeti?

2:21b.LAM.002.021 Balele emhlabeni phandle oyinkwenkwe noyindoda enkulu; Umthinjana wam namadodana am awile likrele; Ubulele ngemini yomsindo wakho, usikile, akwaconga.

2:22b.LAM.002.022 Ukumemile ngokwemini yomthendeleko ukunxunguphala kwam ngeenxa zonke, Akwabakho usindayo, usalayo, ngemini yomsindo kaYehova. Endibathantamisileyo ndabakhulisa, utshaba lwam lubagqibele.

3

3:1b.LAM.003.001 Ndim indoda ebone iintsizi, ngentonga yokuphuphuma komsindo wakhe.

3:2b.LAM.003.002 Undikhokele wandihambisa ebumnyameni, akwaba sekukhanyeni.

3:3b.LAM.003.003 Ubuye wasiguqulela kum ndedwa isandla sakho imini yonke.

3:4b.LAM.003.004 Uyonakalisile inyama yam nolusu lwam; uwaphule amathambo am.

3:5b.LAM.003.005 Undakhele wandirhaqa ngenyongo nendiniso.

3:6b.LAM.003.006 Undibele ezindaweni ezimnyama, njengabafe ngonaphakade.

3:7b.LAM.003.007 Undibiyele ngeenxa zonke, andinakuphuma; uwenze aba nzima amakhamandela am obhedu.

3:8b.LAM.003.008 Noko ndikhalayo, ndizibikayo, uyawuvingcela umthandazo wam.

3:9b.LAM.003.009 Uzibiyele iindlela zam ngamatye aqingqiweyo, uzenze goso iingqushu zam.

3:10b.LAM.003.010 Kum uyibhere elalelayo, uyingonyama esezintsithelweni.

3:11b.LAM.003.011 Uzityekisile iindlela zam, wandidlavula; undenze inxuwa.

3:12b.LAM.003.012 Usigobile isaphetha sakhe, wandimisa ndaba yitekeni yotolo lwakhe.

3:13b.LAM.003.013 Uzise ezintsweni zam iintolo zomphongolo wakhe.

3:14b.LAM.003.014 Ndisuke ndayintlekisa kubantu bonke bakowethu; ndiyingoma yabo imini yonke.

3:15b.LAM.003.015 Undihluthise ngeento ezikrakra, wandiseza ndahlutha umhlonyane.

3:16b.LAM.003.016 Uwaphule ngohlalu amazinyo am; undixinzelele phantsi eluthuthwini.

3:17b.LAM.003.017 Uwuhlambile umphefumlo wam, awaba naluxolo; ndiyilibele into elungileyo.

3:18b.LAM.003.018 Ndathi, aphelile amandla am, nokulinda kwam kuYehova.

3:19b.LAM.003.019 Zikhumbule iintsizi zam, nokutshutshiswa kwam, umhlonyane nenyongo.

3:20b.LAM.003.020 Umphefumlo wam uyazikhumbula unangoku ezo zinto, usibekekile kum.

3:21b.LAM.003.021 Oko ndikunyamekele ngentliziyo: ngenxa yoko ndilindile.

3:22b.LAM.003.022 Kungeenceba zikaYehova le nto singagqityelwanga, ngokuba azipheli iimfesane zakhe.

3:23b.LAM.003.023 Zintsha imiso ngemiso; kukhulu ukuthembeka kwakhe.

3:24b.LAM.003.024 Isabelo sam nguYehova, utsho umphefumlo wam; ngenxa yoko ndilindele kuye.

3:25b.LAM.003.025 UYehova ulungile kwabathembele kuye, kumphefumlo omquqelayo.

3:26b.LAM.003.026 Kulungile ukuba umntu alulindele, ethe cwaka, usindiso lukaYehova.

3:27b.LAM.003.027 Kuyilungele indoda ukuba iyithwale idyokhwe kwasebutsheni bayo.

3:28b.LAM.003.028 Mayihlale yodwa ithe cwaka, xa iyithwalisiweyo.

3:29b.LAM.003.029 Mayiwubeke eluthulini umlomo wayo; kungabakho ithemba mhlawumbi.

3:30b.LAM.003.030 Mayisinikele isidlele sayo koyibethayo; mayihluthe yingcikivo.

3:31b.LAM.003.031 Ngokuba iNkosi yam ayiyi kumhlamba umntu ngonaphakade,

3:32b.LAM.003.032 Ngokuba naxa imhlisele usizi, noko yoba nemfesane ngokobuninzi benceba yayo.

3:33b.LAM.003.033 Ngokuba ayibacinezeli ngokuphuma entliziyweni yayo, ibenze babe nosizi oonyana babantu.

3:34b.LAM.003.034 Ekutyunyuzweni kwababanjiweyo bonke behlabathi phantsi kweenyawo;

3:35b.LAM.003.035 Ekulijikeni ityala lomfo phambi kobuso bOsenyangweni;

3:36b.LAM.003.036 Ekuphenulweni komntu ekubambaneni kwakhe nomnye: iNkosi yam ayiboni na?

3:37b.LAM.003.037 Ngubani na okhe wathetha, kwenzeka, iNkosi yam ingawisanga mthetho?

3:38b.LAM.003.038 Akuphumi okubi nokulungileyo emlonyeni wOsenyangweni na?

3:39b.LAM.003.039 Yini na ukuba umntu akhalaze ephilile? Umfo makakhalaze ngenxa yezono zakhe.

3:40b.LAM.003.040 Masiziphengulule iindlela zethu, sizigocagoce, sibuyele kuYehova.

3:41b.LAM.003.041 Masizinyuse iintliziyo zethu kunye nezandla zethu, sizise kuThixo emazulwini.

3:42b.LAM.003.042 Thina sikreqile saba neenkani; wena akuxolelanga.

3:43b.LAM.003.043 Uzigqubuthele ngomsindo, wasisukela; ubulele akwaconga.

3:44b.LAM.003.044 Uzigqubuthele ngelifu, ukuze ungaphumeli umthandazo wethu.

3:45b.LAM.003.045 Usenze inkunkuma, imvuthuluka esazulwini sezizwe.

3:46b.LAM.003.046 Zisakhamisele umlomo wazo zonke iintshaba zethu.

3:47b.LAM.003.047 Kokwethu ukunkwantya, nomgongxo, nesibatha, nokutshabalala, nokwaphuka.

3:48b.LAM.003.048 Iliso lam lihla imijelo yamanzi, ngenxa yokwaphuka kwentombi yabantu bakowethu.

3:49b.LAM.003.049 Iliso lam liyatyityizela, aliyeki, alinqamki,

3:50b.LAM.003.050 Ade aqondele abone uYehova, esemazulwini.

3:51b.LAM.003.051 Iliso lam liyawubulala umphefumlo wam, ngenxa yeentombi zonke zomzi wakowethu.

3:52b.LAM.003.052 Zindizingele zandizingela njengentaka iintshaba zam ngelize.

3:53b.LAM.003.053 Zibubhangisile ubomi bam ngokundeyelisela emhadini, zandigibisela ngamatye.

3:54b.LAM.003.054 Amanzi ahambe phezu kwentloko yam, ndathi, Ndinqanyulwe.

3:55b.LAM.003.055 Ndinqule igama lakho, Yehova, kongaphantsi umhadi.

3:56b.LAM.003.056 Izwi lam waliva; musa ukuyifihla indlebe yakho ekubefuzeni kwam, ekuzibikeni kwam.

3:57b.LAM.003.057 Wasondela ngemini yokukunqula kwam, wathi, Musa ukoyika.

3:58b.LAM.003.058 Uwathethile amatyala omphefumlo wam, Nkosi yam; ubukhulule ubomi bam ngokubumisela.

3:59b.LAM.003.059 Ukubonile, Yehova, ukuphenulwa kwam; ligwebe ityala lam.

3:60b.LAM.003.060 Uyibonile yonke impindezelo yabo, uzivile zonke iingcinga zabo ngam.

3:61b.LAM.003.061 Ukuvile ukungcikiva kwabo, Yehova, uzivile zonke iingcinga zabo ngam,

3:62b.LAM.003.062 Umlomo wabo basukela phezulu kum, nezicamango zabo ngam yonke imini.

3:63b.LAM.003.063 Ukuhlala kwabo nokusuka kwabo kubheke; ndiyingoma yabo.

3:64b.LAM.003.064 Babuyisele imbuyekezo, Yehova, ngokwezenzo zezandla zabo.

3:65b.LAM.003.065 Banike ubumfama bentliziyo; intshwabulo yakho mayibe kubo.

3:66b.LAM.003.066 Basukele ngomsindo, ubatshabalalise, bangabikho phantsi kwamazulu kaYehova.

4

4:1b.LAM.004.001 Yoo! Isuke igolide yaba mncumevu; isuke ecikizekileyo, elungileyo, yaba yeyimbi; Asuke aphalazwa amatye engcwele ekujikeni kwezitrato zonke.

4:2b.LAM.004.002 AbeZiyon abanqabileyo, abamelwe yigolide engcwengiweyo, Yoo! Babalelwa ekubeni yimiphanda yodongwe, umsebenzi wezandla zombumbi.

4:3b.LAM.004.003 Kanti neempungutye ziyalirhola ibele, zanyise amathole azo; Ke yona intombi yabantu bakowethu isuke yaba sisijorha, njengenciniba entlango.

4:4b.LAM.004.004 Ulwimi losebeleni lunamathela ekhuhlangubeni lakhe linxano; Abantwana bacela isonka, akukho ubaphulelayo.

4:5b.LAM.004.005 Ababesidla ubuncwane baphanzile ezitratweni; Ababephathwa ngeengubo ezibomvu bawola amazala.

4:6b.LAM.004.006 Bukhulile ubugwenxa bentombi yakowethu ngaphezu kwesono seSodom, Yona yabhukuqwayo ngephanyazo, kungasiwanga sandla kuyo.

4:7b.LAM.004.007 Babeqaqambile ababalulekileyo bayo ngaphezu kwekhephu; baye bemhlophe ngaphezu kwamasi; Babeyingqombela imizimba ngaphezu kwekorale, isibili sabo besinjengesafire;

4:8b.LAM.004.008 Imbonakalo yabo imnyama ngaphezu kocolothi; Abanakaneki ezitratweni; ulusu lwabo lutshele emathanjeni abo; lomile, lwanjengokhuni.

4:9b.LAM.004.009 Baneyhweba ababulewe ngekrele kunababulewe yindlala, Bona baphelayo ngokubulawa kukungabikho kweziqhamo zamasimi.

4:10b.LAM.004.010 Izandla zabafazi abanemfesane zipheke abantwanana babo, Baba kukudla kwabo ekwaphukeni kwentombi yabantu bakowethu.

4:11b.LAM.004.011 Ubuphelelisile ubushushu bakhe uYehova, ukuphalazile ukuvutha komsindo wakhe; Wafaka umlilo eZiyon, wazitshisa iziseko zayo.

4:12b.LAM.004.012 Bebengenakukholwa ookumkani behlabathi, nabemi bonke belimiweyo, Ukuba ubengangenayo umbandezeli notshaba emasangweni aseYerusalem.

4:13b.LAM.004.013 Kungenxa yezono zabaprofeti bayo, nobugwenxa bababingeleli bayo, Abaphalaze igazi lamalungisa phakathi kwayo.

4:14b.LAM.004.014 Baphamzela beziimfama ezitratweni, bedyobhekile ligazi, Bada abantu ababa nakuchukumisa nezambatho zabo.

4:15b.LAM.004.015 Sukani, nantso inqambi! Kwatshiwo ukumenyezwa kubo. Sukani, sukani, musani ukuphatha! Bakusaba, baphamzela nalapho, kwathiwa phakathi kweentlanga, Mabangaphindi baphambukele khona.

4:16b.LAM.004.016 Ubuso bukaYehova bubachithachithile, akasayi kubabheka; Ubuso bababingeleli ababubhekanga, amadoda amakhulu abawababalanga.

4:17b.LAM.004.017 Thina, amehlo ethu ayaphela, ekhangele uncedo olungamampunge; Ekuboniseleni kwethu sibonisela uhlanga olungayi kusisindisa.

4:18b.LAM.004.018 Bazingela amanyathela ethu, ukuze singabi nakuhamba ezitratweni zethu; Kusondele ukuphela kwethu, izalisekile imihla yethu; ewe, kufikile ukuphela kwethu.

4:19b.LAM.004.019 Abasisukelayo banamendu ngaphezu kwamaxhalanga asezulwini; Basisukela ezintabeni ngokushushu, basilalela entlango.

4:20b.LAM.004.020 Umoya wamathatha ethu, umthanjiswa kaYehova, ubanjisiwe emihadini yabo: Lowo besisithi, Siya kuhlala phantsi komthunzi wakhe ezintlangeni.

4:21b.LAM.004.021 Yiba nemihlali uvuye kambe, ntombi yakwaEdom, ihleliyo ezweni lakwaUtse; Iya kudlulela nakuwe indebe; uya kunxila, uzihlube.

4:22b.LAM.004.022 Bugqityiwe ubugwenxa bakho, ntombi inguZiyon; Akayi kuphinda akufuduse; Uya kubuvelela ubugwenxa bakho, ntombi yakwaEdom. Uya kuzityhila izono zakho.

5

5:1b.LAM.005.001 Kukhumbule, Yehova, okusihleleyo; Bheka, uyibone ingcikivo yethu.

5:2b.LAM.005.002 Ilifa lethu lisuke lenziwa elabasemzini, Izindlu zethu zalunga kwabolunye uhlanga.

5:3b.LAM.005.003 Siziinkedama, asinabawo; Oma banjengabahlolokazi.

5:4b.LAM.005.004 Amanzi ethu siwasela ngesilivere; Iinkuni zethu ziza kuthi ngexabiso.

5:5b.LAM.005.005 Intshutshiso iphezu kwentamo yethu; Sidiniwe, asinakuphumla.

5:6b.LAM.005.006 Isandla sisinika amaYiputa, Nama-Asiriya, ukuba sihluthe sisonka.

5:7b.LAM.005.007 Oobawo bonile, abasekho; Thina sithwele ubugwenxa babo.

5:8b.LAM.005.008 Silawulwa ngabakhonzi; Akukho usiqhiwulayo ezandleni zabo.

5:9b.LAM.005.009 Isonka sethu sisizuza ngomphefumlo wethu usisichenge. Ngenxa yekrele lasentlango.

5:10b.LAM.005.010 Ulusu lwethu luyavutha njengeziko Ngenxa yolophu lwendlala.

5:11b.LAM.005.011 Badlwengule abafazi eZiyon, Iintombi emizini yakwaYuda.

5:12b.LAM.005.012 Baxhome abathetheli ngezandla; Ubuso bamadoda amakhulu abubekwa.

5:13b.LAM.005.013 Amadodana athwala amatye okusila, Amakhwenkwe akhubeka phantsi kweenkuni.

5:14b.LAM.005.014 Amadoda amakhulu aphezile ukuya esangweni; Amadodana, ekubetheni uhadi.

5:15b.LAM.005.015 Iphelile imihlali yentliziyo yethu, Ukuqamba kwethu kujike kwaba kukumbambazela.

5:16b.LAM.005.016 Siwile isithsaba entlokweni yethu; Yeha ke thina! kuba sonile.

5:17b.LAM.005.017 Ngenxa yoko ityhafile intliziyo yethu; Ngenxa yezo zinto amnyama amehlo ethu;

5:18b.LAM.005.018 Ngenxa yentaba yaseZiyon, kuba ibharhile, Kuhamba iimpungutye phezu kwayo.

5:19b.LAM.005.019 Wena, Yehova, uhleli ngonaphakade; Itrone yakho ikwisizukulwana ngesizukulwana.

5:20b.LAM.005.020 Yini na ukuba usilibale ngonaphakade, Usilahle imihla emide?

5:21b.LAM.005.021 Sibuyisele kuwe, Yehova; sobuya; Hlaziya imihla yethu njengokwamandulo.

5:22b.LAM.005.022 Ungaba usicekise mpela na, Wanoburhalarhume kuthi ngokukhulukazi na?