1 Peter (Shuar)

11

11:1b.1PE.011.001 Wisha ju papin aajna nu Pítruitjai. Wisha Jesukrístu akatramurintjai. Israer-shuar Yus-shuar árum nuna atumin ankant ankant tsakinmakarum Chíkich Chíkich nunkanam matsatrumna nuna aatjarme. Puntu nunkanmasha, Karasea nunkanmasha, Kapatúsea nunkanmasha, Asia nunkanmasha, Pitinia nunkanmasha pujarmena nuna aatjarme.

11:2b.1PE.011.002 Yaunchu Apa Yus, "uwemtikrataj" Tímia Núnisan achikmaitrume. Tura, Winia ajasat tusa ni Wakanijiai akantamkamiarme. Umirtukat tusa nuna Túramiayi. Tura Jesukrístu numpejaisha Atumí Enentáin atsajkir chamir awajturmasmiarme. Wats, Yus tuke waitnentramar ti shiir awajtamsarat tusan wakerajrume.

11:3b.1PE.011.003 Wats, Yus, ii Uuntri Jesukrístu Apari ana nuna naari shiir awajsatai. Yussha ti waitnentrama asa, atak akiiniatniun suramsaitji. Jesukrístu jakamunmaya nantakin asamtai, iikia atak akiiniar tuke iwiaaku pujustiniaitiajnia nu arutramji.

11:4b.1PE.011.004 Tura nayaimpiniam ikiurtamsamu ana nuna achikmintrum tusa Yus wakerawai. Nu ikiurtamsamu meserchamnia amuukachminiaiti. Tura nusha yajauchichuiti.

11:5b.1PE.011.005 Yus nekas Enentáimta asakrumin ni kakarmarijiai wearmarme. Tura tuke uwemtikrampratniun, nunka amuuamunam paant iniakmastatna nu achikmintrum tusa tuke tsawant ni kakarmarijiai Wáitmarme.

11:6b.1PE.011.006 Nu Enentáimsarum wararme. Kame ju nunkanam pujakrum itiurchat Wáinkiashtarmeash. Tura ju nunkanam pujustin ishichkichukait. Ukunam pénker pujustaj tu Enentáimsarum wararme.

11:7b.1PE.011.007 Enentáimsatarum. Shuar kurin wakerana Núnisan atumniasha umirtukat tusa Yus wakerutmarme. Aents kurin jinium aesainiawai, aya kurik juakat tusar. Kurin ti wakeruinia ásar, amuukamnia ain Túruiniawai. Atumsha, itiurchat Wáinkiarmena nujai, Yusan nekas Enentáimtusartimpiash tusa nekapsamuitrume. Nu Enentáimtamu kurijiai nankaamas pénkeraiti. Ukunam, Jesukrístu Támatai, Yuska atumin "pénker Túraitrume" turamtajtsa wakerittiawai. Tura "Ashí shuar nuna nekaawar winia naarun uunt awajsarat" tusa Túrutmattarme. Nu tuma asamtai ju nunkanam nekapsamuitrume, itiurchat Wáintrumna nujai.

11:8b.1PE.011.008 Jesukrístu Wáinchaitiatrum anearme. Tura Yamái Wáinchiatrumek nekas Enentáimtarme. Tuma asarum ti wararme. Nu warastin nayaimpiniam warastatjinia Núniskete; nuka paant titin jeatsji.

11:9b.1PE.011.009 Iimiatarum. Uwemtikrurat tusarum Yus umirkachurmek. Nu uwempratin wainiu asarum waraarme.

11:11b.1PE.011.011 Yus aentsun waitnenta asa, uwemtikrataj tusa tuke wakerimiayi. Núnaka Yúsnan etserin etseriarmiayi. Kristu Wakani ni Enentáin pujuriarmia nu, Túruntsain Kristu Wáitsatniurin Jintíarmiayi. Tura ukunam ni ti shiir pujustintrincha etseriarmiayi. Túrasha "tuu aishmankait Kristu tutai, tura Urutiák Túrunat" tusar nu etserin émamkesar anintrusarmiayi.

11:12b.1PE.011.012 Tura nii pujuiniainkia Túrunashtinian, antsu ti ukunam, ii pujajnia jui Túrunatniun Yus nekaamtikiamiayi. Núnaka Yusa shiir chichamen ujatmakarmia Nú shuar nekaprutmarme. Nú shuar Yusa Wakani, nayaimpinmaya akupkamu ana nuna nekatairijiai ujatmakurme. Maa, nu uwempratniun Tájana nuna, nayaimpinmaya suntar nekaatai tusar wakeruiniawai, Túrasha tujintiainiawai.

11:13b.1PE.011.013 Tuma asamtai, pénker Enentáimsarum tura pénker iimiasrum wekasatarum. Tura Jesukrístu ukunam wantiniak waitnentramprattana nu yawetsuk Nákastarum.

11:14b.1PE.011.014 Umin uchi aintsarmek yaunchu nékachu asarum wakerimiarmena nu iniaisarum Yus umirin atarum.

11:15b.1PE.011.015 Ashí Túramurmijiai Timiá penker wekasatarum. Yus, untsurmakuana nu, pénker asamtai, átumka ni shuari asarum pénker wekasatarum.

11:16b.1PE.011.016 "Wi pénker asamtai atumsha pénker wekasatarum" Yus tana nu ni Papiriin aarchamukait.

11:17b.1PE.011.017 "Yus winia Aparuiti" Tárumna nu aneartarum. Ashí aentsu Túrutairin métek Yus nekaattawai. Nu neka asarum, ju nunkanam pujarmena jui Yus ashamkatarum.

11:18b.1PE.011.018 Warí, ántra wekasatniun Atumí uuntri jintintramarmena Nuyá Yus uwemtikramprarme. Túrasha kurisha kuitcha amuukamnia ainia nujai uwemtikrachmaitrume.

11:19b.1PE.011.019 Antsu Kristu numpe ti shiira nujai uwemtikramuitrume. Nu nékarme. Yaunchu, shuar Tunáa Túrakui, Yus Tímiayi, "murik yajauchichu tunamarcha maarum, Yus Sútainiam ikiustarum. Nuna numpen Wáinkian, Atumí tunaarin tsankurattajai" Tíniuyayi. Núnisan Kristu iin jarutramka asa ii Tunaarínia uwemtikrampraitji.

11:20b.1PE.011.020 Nunkan Nájantsuk aentsun jaruktinian Krístun anaikiamiayi Yus. Tura Wárik akupkachmiayi. Antsu Yamái tsawantin, átum pujarmin, pénker Pujusúk tusa wakerak, atumin jarutramkat tusa Krístun akupkamiayi.

11:21b.1PE.011.021 Niijiai átumka Yus umiirume. Yuska Krístun jakamunmayan iniantki nankaamantu awajsamiayi. Yus nekas Enentáimtakrum, aya pénkernak Túrawai titiarum tusa Túraiti.

11:22b.1PE.011.022 Yus nekas tana nuna, Yusa Wakani yainmakui, umirka asarum Atumí wakaniin pénker ajasuitrume. Yus-shuarjai yajauch Enentáimtunaitsuk mai anenai ajatai tusarum tura asarum, nekas shiir Enentáimtunaisrum mai anenai ajatarum.

11:23b.1PE.011.023 Nekaatarum. Yusa chichame umirka asarum atak akiiniaitrum nuka ju nunkanmayanchuiti. Antsu Yusa chichame iwiaaku tuke amuukachmin ana Nú chichamjai tuke iwiaaku átiniaitrume.

11:24b.1PE.011.024 Ju ayash tuke pujuschamniaiti. Yusa Papiriin junis aarmaiti: Ashí aentsti Nupáa aaniuitji. Ii pénkerisha kukujia aaniuiti. Nupa Wárik kaawai. Kukujsha Núnisan Wárik iniaawai.

11:25b.1PE.011.025 Tura Yusa chichamesha tuke amuukachminiaiti. Nu Chichamjai uwempramnia asamtai atumin etsernakuiti.

12

12:1b.1PE.012.001 Tuma asamtai, Ashí yajauch ana nu iniaisatarum. Anankatin, ántar-chichamtin átin, chikichna wakeruktin, Ashí tsanumpratniusha iniaisatarum.

12:3b.1PE.012.003 Antsu, Uunt Jesukrístu waitnenkartutairi nekapsa asarum, uchi yama akiinia muntsun ti wakeruinia aintsarmek, Yusa chichame aya penkerkea nu ti wakeruktarum. Yusa chichamejai tuke tsawant tsakakrum tuke uwemprami tusarum Túratarum.

12:4b.1PE.012.004 Ii Uuntri Kristu Kayáa aantsankete. Tura shuar kayan yajauchin nakitiainia Núnisan Jesukrístun nakitrarmiayi. Tura kayan ti penkeran wakeruinia Núnisan, Yuska, "winia Uchir ti penkeraiti" tusa Jesukrístun achikmiayi. Atumsha Jesukrístu weantuktarum. Nii iwiaaku kayaiti.

12:5b.1PE.012.005 Atumsha iwiaaku kaya aantsanketrume. Tuma asarum Yus wijiai ni jeen jeamti tusarum tsankamaktarum. Tura Nútiksarmek Jesukrístui Atumí iwiaakmari tsankamaktarum, Yus wakera nuna Túrutati tusarum. Jesukrístujai tura asarum Yus shiir Enentáimtikrume.

12:6b.1PE.012.006 Jesukrístunun Yusa Papiriin Júnis aarmaiti: "Iistarum. Kayan ti penkeran achikjai" Yus Tímiayi. Jean emka apujtuamuri Atí tusan Seunnum apujeajai. Niin Enentáimtana nu ántar Enentáimtatsui. Aarma ana nu penké kayan chichaatsui. Antsu Jesukrístun tawai.

12:7b.1PE.012.007 Yus umirkaitrumna nu, "kaya ti penkeraiti" tarume. Tura Yúsan umirainiatsna nuka Yusa Papiriin tana nujai métek ainiawai. Ju aarmaiti: Jean jeamin nakitrarmia Nú kaya jean emka apujtuamuri Atí tusa apujamuiti.

12:8b.1PE.012.008 Tura jusha aarma awai: Tukumak iniaartin kayaiti. Kame shuar Jesukrístunun etserkamun nakitiakka, ṡEnentáinium itiur pénker wekasat? Wats, Nú shuar, Krístun umirainiachu ásar, tuke Túrunatin asamtai tukumainiawai.

12:9b.1PE.012.009 Tura átumka Yus achikmaitrume. Tura, Wínian pujurtursarat tusa yajauchinmaya Uunt Yus akantamkaitrume. Yusna asarum pénker Enentáimin ajasurme. Tura Yus sumakmaitrume. Niisha winia pénkerun etserturkarat tusa Túraiti. Kame kiritniunmaya Jíinkirum ni Tsáapnintrin wekasatniun achirmakurme.

12:10b.1PE.012.010 Yaunchu Nusháa shuar áuyarme. Tura antsu yamaikia Yus-shuar ajasrum, Niiniu ajasurme. Yus-shuar ajatsrumnin, ṡya waitnentrampramia? Antsu yamaikia Yus waitnentramuitrume.

12:11b.1PE.012.011 Yatsurtirmin Tájarme, Yusna ajasrum, ju nunkanam írar matsatu asarum, Atumí ayashi wakerana nu tsankatkairap. Ayashim wakerana nu Túrakminkia ame Enentáim nujai yajauch ajastatui.

12:12b.1PE.012.012 Yus-shuarchanum pénker wekasatarum. Túrakrumninkia niisha Yamái "Yus-shuar yajauch Túruiniawai" ántar Tuíniayatan, ukunmanka, Yusjai inkiunaiktin tsawant jeamtai, pénker wekarmena nuna Enentáimturmasar, Nú shuarsha Yúsan shiir awajsartatui.

12:13b.1PE.012.013 Kristu Atumí Uuntri asamtai, ju nunkanam akupin ainiana nusha umirkatniuitrume. Uunt akupin Ashí akupin asamtai umirkatarum.

12:14b.1PE.012.014 Tura ni akupeamuri ainia nusha tunaan Túruinia Núnaka Asutiáti tura pénkeran Túruinia Núnaka shiir awajsati tusa uunt akupin akupkamu ásarmatai umirkatarum.

12:15b.1PE.012.015 Nekas penker wekaamurmijiai Enentáimcha ainia nu netse chichaamuri itiatmamtikiatarum tusa Yus wakerawai.

12:16b.1PE.012.016 Tunaanumia ankant ajasu asarum pénker wekasatarum. Túrasha wi ankant ajaschajak tusarum Nánkamsarum yajauch Túrawairap. Antsu Yusna asarum, ni wakera nuna umirkatjai tusarum anearum wekasatarum.

12:17b.1PE.012.017 Chíkichcha shiir Enentáimtustarum. Yus-shuar ainia nusha aneetarum. Yus pénker asamtai ashamkatarum. Uunt akupin shiir awajsatarum.

12:18b.1PE.012.018 Takarniutirmesha ame uuntrum pénker shiir Enentáimturmakuisha tura yajauchiitkuisha umirkatarum.

12:19b.1PE.012.019 Nekaatarum. Antar Wáitkiarmainia nui, "Yus iirui" tu Enentáimsa katsunteakrumka, ti penkeraiti.

12:20b.1PE.012.020 Yajauch Túrawakmin Asutiámamtai katsunteakmeka nuisha warin ati. Antsu pénker Túrawakmin Asutiámamtai katsunteakmeka juka ti penker Túrame Yusai.

12:21b.1PE.012.021 Núnisan Túrunatin achikmaitrume. Kristu waitrutmasmiarme nui, Wi Túraj Núnisan Túrawarmi tusar Wáitsamiayi.

12:22b.1PE.012.022 Krístuka tunaan penké Túrachmiayi. Tura chikichkinkesha penké anankachmiayi.

12:23b.1PE.012.023 Kátsekeamsha Ninkia katsekachmiayi. Wáitkiamsha "yapajmiaktaj" Tíchamiayi. Antsu "winia Apar Yus Iistí" Tímiayi, Yus pénker Túrin asamtai.

12:24b.1PE.012.024 Kristu Ninki ni ayashiin ii tunaarin entsaki Krúsnum jarutramkamiaji. Tunáa Enentáimtusairum tusa, antsu Yusai pénker wekasamniuram tusa jarutramkamiaji. Atumí Enentáin Tsuártaj tusa Kristu Asutniámiayi.

12:25b.1PE.012.025 Murik ni pujutairiin waketkitniun nékatsna ántsarmek atumsha menkaka wekaimiarme. Tura yamaikia Atumí Wáitmauriin waketkintrume. Atumí Wáitmau Krístuiti, Atumí Enentáin Wáinnia nu.

13

13:1b.1PE.013.001 Tuma asamtai, nuwatiram Atumí aishri umirkatarum. Amesha pénker, Yus umirka Weká asakmin, aishrum Yus-Chichaman umirchaitiat,

13:2b.1PE.013.002 ame Túramurmin Nekáa, ámeka chichaatsminin, niisha Yus-shuar ajastinian wakerittiawai.

13:3b.1PE.013.003 Nu asamtai aya Pátatek iwiarmampratniusha ti Enentáimtusairap. Intiash ti penker iwiaratniusha, kurijiai iwiarmampratniusha, Pushí ti kuitjai entsartincha ti Enentáimtusairap.

13:4b.1PE.013.004 Antsu, "nekas Shíirmach ajastaj" Tákumka, Enentáimin "shiir kajechu átajai" tu Enentáimsatarum. Nuka sakarchattawai. Tura nuka Yúsnumka ti penkeraiti.

13:5b.1PE.013.005 Yaunchu Núnisaran nuwa Yúsan Enentáimtusarmia nu, tura Yúsan shiir Enentáimtikratniun wakeriarmia nu, ni aishrin umirkar nujai ni Enentáin Shíirmach ajasar pujuarmiayi.

13:6b.1PE.013.006 Atumí weatri Sara ni aishrin Apraáman umirmiayi. Umirin asa, "winia uuntru" Tíniuyayi niin. Atumsha pénker Túrakrumka tura sapijmiatsuk wekaakrumka, Sarajai métek átatrume.

13:7b.1PE.013.007 Tura aishmantirmesha Yus wakerana nu nekaarum Atumí nuwe shiir Enentáimtusrum tsanintarum. Nuwemsha, nuwa asa, aishmanjai métek katsuntrachminiaiti. Tura niisha, ámijiai métek Yusa waitnenkartutairijiai tuke iwiaaku átinian takusminiaiti. Tu Enentáimta asam ame Núwem shiir Enentáimtustá. Yus áujkuram itiurchat atsuti tusarum Túratarum.

13:8b.1PE.013.008 Nuyasha Ashí Yús-shuartirmin Tájarme, aya Chikichík enentaik Atí. Waitnennairatarum. Nekas yatsum aneam Núnisrumek anenaitiarum. Aya áminiuk Enentáimtutsuk chikichan Yáintaj tu Enentáimsatarum.

13:9b.1PE.013.009 Yajauch turamainiakuisha "yapajkiataj" tiirap. Katsekramainiakuisha "iikkiataj" tiirap. Antsu "Yus winia shiir awajtusuiti" tu Enentáimsarum, yajauch turamainiana nu pénker awajsatarum.

13:12b.1PE.013.012 Yus-Chichamnum Júnis aarma asamtai nu Túratarum: Uunt Yus pénker wekaana nuna wainiui, tura ni áujmancha ántawai. Tura yajauchin Túrana nuna nakitrawai. Tuma asamtai, shiir pujustaj Tákunka tura tuke tsawant warastinian wakerana nu, pénker Iimiastí, yajauch chichakaij tusa tura Wáitruawaij tusa. Tunaanumia kanaki pénkeran Túratí. Tuke Enentáijiai shiir átinian eakti. Tu aarmaiti.

13:13b.1PE.013.013 ṡYaki yajauch Túrutmat pénker turamnisha?

13:14b.1PE.013.014 Túrasha pénker Túrayatmek Wáitiakminkia Yus shiir Enentáimtikramprattarme. Tuma asamtai ashamkartutsuk, sapijmiatsuk wekasatniuitrume.

13:15b.1PE.013.015 Tura "Kristu winia Uuntruiti" tu Enentáimtustarum. Tura "ṡurukamtia Yus-shuar ajasuitiam?" turamainiakuisha, pénker aimkiamnium iwiarnarum pujustarum. Waantu Enentáimtumatsuk, niin pénker Enentáimtikrataj tusam Túrata.

13:16b.1PE.013.016 "Yúsjai pénker wekasataj" tu Enentáimsarum wekasatarum. Yus-shuar asakrumin Chíkich shuar ántrar áujmatramainia nu ni ántar áujmatramsamun nekaawar natsaararat tusarum Yusjai pénker wekasatarum.

13:17b.1PE.013.017 Yajauch Túrakur Wáitsatniujainkia nankaamas, Yus wakerakuinkia pénker Túrakur Wáitsatniuka ti penkeraiti.

13:18b.1PE.013.018 Kristu ii tunaarin Asakártaj tusa jarutramkamiaji. Ashí Asakárma asamtai atak tunaan jarukchatniuiti. Niisha tunaan penké Túrichuitiat, ii Tunáa asakrin Wáitrutmasmiaji, Yúsnum ejetamtai tusa. Ayashiinkia jakayat ni Wakaníjiai ni ayashi ataksha iwiaaku ajasmiayi.

13:19b.1PE.013.019 Ni Wakaníjiai Jakáa wakanin emetamu armia nuna etserkataj tusa wémiayi.

13:20b.1PE.013.020 Nusha yaunchu Nuai uunt kanun Nájanuk siantu painti (120) uwi pujurmia nui Yuska umirtukarat tusa ti Nákamaitiat Nuai étserman umikcharmiayi. Nú kanunmasha ishichik, uchu, aents kanunam pujuinian yumijiai uwemtikrarmiayi.

13:21b.1PE.013.021 Nu yumi Yus-shuarti imiantinian nakumui. Ii ayashi chamir awajsatai tusar imiantsuji. Antsu ii Enentái pénker Atí tusar Yus sear imianji. Nujai iisha uwemji. Jesukrístu nantakin asamtai, nujai uwempraitji.

13:22b.1PE.013.022 Tura Niisha nayaimpiniam we akupin pujutainium Yusa Untsuuríini apujsamuiti. Túramtai nayaimpinmaya suntarsha, tura Ashí kakaram akupin ainiana nusha Jesukrístun umirainiawai.

14

14:1b.1PE.014.001 Kristu ni ayashiin Wáitsa asamtai atumsha Núnisrumek Wáitsatin ákuisha, katsuntratjai titiarum. Ni ayashiin Wáitiana Nú shuar yajauchin Páchiatsui.

14:2b.1PE.014.002 Antsu "iwiaakjana nuikia Yusa wakeramurin tuke umirkatjai" tu Enentáimiui. Ni ayashi wakerana nuna yamaikia Páchiatsui.

14:3b.1PE.014.003 Warí, Yúsan nékainiatsna Nú shuar Túruiniana nu atumsha Núkap Túrichmakuram. Yus-shuar ajatsuk tsanirmatin wakerimiarme. Yajauch Túratniusha, nampernum nampekrum ti Yurumárum, Enentáincha ajasrum charaatum ajatniusha, ántar-yusa namperiin yajauch ana nu najanatniusha nusha Ashí wakerimiarme.

14:4b.1PE.014.004 Tura surimiatsuk yajauch Túrimiarmena nu iniaisa asakrumin, yaunchu atumjai nuna Túrin armia nu, "urukamtai iniaisara?" tusar yajauch áujmatramprume.

14:5b.1PE.014.005 Túrasha ukunam nu aents ni Túramurin etserkartatui. Iwiaaku ainia nunasha tura Jákaru ainia nunasha Neka awai. Nii nu aentsun sumamtikiawartatui.

14:6b.1PE.014.006 Túrasha jaka armia nu Yusa shiir chichame ujankarmiayi. Ni ayashiin Ashí shuarjai métek jakamniaitiatan Yus iwiaaku pujana Núnisan ni Wakaníi iwiaaku pujusarat tusa ujankarmiayi.

14:7b.1PE.014.007 Ashí amuukatin jeatemayi. Tuma asamtai pénker Enentáimsatarum; Túrarum anearum Yus auju pujutarum.

14:8b.1PE.014.008 Aneniamujai Untsurí tunaasha tsankuratin awai. Tuma asamtai Ashí nankaamas nuamtak anenaistarum.

14:9b.1PE.014.009 Kajé-kajejainchu Atumí jeen Itiaaniátarum.

14:10b.1PE.014.010 Iin ankant ankant shiir awajtamsatniun Yus ti Núkap takakui. Tura iin shiir awajtamsamujai Chíkich shuarsha shiir awajsatarum tusa Chíkich Chíkich Túratniun suramsaitji. Tuma asamtai pénker takaawa aintsarmek Yus amasmania nujai ame írutramuram Yaintá.

14:11b.1PE.014.011 Etserkatniun Yus amasuitkiuinkia ame tamena nu, Yus tana nujai métek Atí. Chíkich shuar Yáintiniaitkiumka Yus amaana Nú kakarmajai Túrata. Ashí Túramna nu Yusa naari shiir Atí tusam Jesukrístu Náarijiai Túrata. Jesukrístun Ashí aents shiir Enentáimtusartí. Tura Ashí aentsnum ni kakarmari tuke Atí. Nuna tajai.

14:12b.1PE.014.012 Aneamu yatsurtiram, ti waitsatin nekapramsartin jeartampramna nu Nusháa Enentáimprairap. Wáitsatin Támatai, "ṡurukamtai waitsa pujaj?" tu Enentáimsairap. Kame Túrunamniaiti.

14:13b.1PE.014.013 Tuma ain shiir Enentáimsatarum. "Kristu Wáitsamurin métek-taku Wáitiakun pénkeraiti" tu Enentáimsatarum. Ukunam Kristu winchari Wáinkiarum Timiá warasmi tusarum Túratarum.

14:14b.1PE.014.014 Krístunu asakrumin katsekkramkachartimpiash. Túmaitkiuisha Yusa Wakani shiir ana nu atumiin pujurtamkui shiir awajsamuitrume. Katsekkramainia Nú shuar imia Yusa Wakanin yajauch áujmatainiawai. Tura átumka Yusa Wakani shiir awajearme.

14:15b.1PE.014.015 Túra atumsha yajauch Túrawairum aneartarum. Mankartana nu, kasamkana nu, Tunáa Túrana nu, tura chikichna Páchiana nusha ni Wáitsatniurinkete. Atumjainkia nu Wáitsatniuka Atsutí.

14:16b.1PE.014.016 Tura antsu Krístunuiti tusar wishikramuk Wáitkiarmainiakui natsaarairap. Krístunu asam Wáitiayatmek, natsamtsuk Kristu naari shiir awajsata.

14:17b.1PE.014.017 Yuska ni shuarin nekapsatajtsa nankamatniuiti. Tura nu tsawantcha jeayi. Yus imia iin nekapramkuisha Yus-Chichaman umirainiatsna Nú shuarsha urukawartin. Ti Asutniáwartatui.

14:18b.1PE.014.018 Imia Yus umirjinia nu uwempratniuri itiurchataitkiuisha tunaan Túruiniana nusha urukawartin.

14:19b.1PE.014.019 Tuma asamtai Yus wakeramujai Wáitiainia nu, niisha Yus najanamu asa Yus Iirsatí tusa tuke pénker Túratí. Warí, Yuska tuke pénker Túrichukait.

15

15:1b.1PE.015.001 Yamaikia Yus-shuara uuntritiram, jintintjiarme. Wisha Núnisnak Yus-shuara uuntrintjai. Kristu Wáitsamurin Wáinkiaitjai wisha. Tura ukunam ti shiir átatna nui Chíkich Yus-shuara uuntria Núnisnak wisha pachiinkiattajai.

15:2b.1PE.015.002 Yus-shuar ame iistiniaitmena nu, pénker Iistá, murikiu Wáinin ni murikrin wainnia aintsamek. Nakittsuk, shiir Enentáimsam Túrata, Yus wakerana nuke. "Chíkich akupta asamtai Túrattajai" Tútsuk tura nujai Kuítrintin ajastin Enentáimtsuk nekas wakeritia, Yusa takatri asamtai.

15:3b.1PE.015.003 Turasha, "Yús-shuara uuntri ajasan, Yus-shuaran akuptiaj" tu Enentáimsaip. Antsu shiir Túramurmijiai Yusa murikri jintintiata.

15:4b.1PE.015.004 Nuinkia murikiu wainniu Uuntri taa wantiniak iwiarmamtai tawasap ti Shíirmachia Núninian suramsattawai. Aents Súana Nú Shíirmach wari mamurtiniaiti. Tura Uuntrum ámin suramsattana nuka penké mamurchattawai.

15:5b.1PE.015.005 Tura natsatirmesha Atumí uuntri umirkatarum. Kame yaunchu Yús-Papinium aarma asamtai Ashí Yus-shuartiram nankaamantu Enentáimtumatsuk umirnaikiatarum. Waantu Enentáimtuma Núnaka Yus nakittiawai. Antsu nankaamantuchu Enentáimtuma nuna Yus waitnentak yayawai. Tu aarmaiti.

15:6b.1PE.015.006 Wats, Yus Timiá kakaram asamtai, amek nekamam, péejchach Enentáijiai Enentáimtumasta. Nuinkia tsawant jeamtai ni wakerak Yus ámin penkeri awajtamsattawai.

15:7b.1PE.015.007 Yus ámin ti Enentáimturmakui ame itiurchatrum ainia nu Yus Ashí iiktusta.

15:8b.1PE.015.008 Aneartarum tura iimiastarum. Iwianch Atumí nemasri ana nu, uunt Yawáa nuke, yanak emesraintiaj tusa eaak tentaa wekaawai.

15:9b.1PE.015.009 Tura tuke Yus nekas Enentáimtusrum surimiaktarum. Ashí nunkanam Yusnum Atumí yachi ainia nu átum Wáitiarmena Núnisaran Wáitiainiawai. Nusha kajinmakchatniuitrume.

15:10b.1PE.015.010 Wats, ishichik tsawant Wáitsarmena nu nankaamasmatai Yus ataksha pénker awajtamsattarme. Tura numi wewe wajana Núnisan Ikiakátmartatrume. Tura Yus Ikiakárma asarum ni jintiin tuke pénker wekasattarme. Ju Yus tuke iin waitnentramtsujik. Tura iisha Jesukrístunu asakrin Niijiai métek Yus ni shiir pujutainium tuke shiir pujusmintrum tusa achirmakuitji.

15:11b.1PE.015.011 Nú Yúsnasha Ashí aents shiir Enentáimtusartí. Tura Ashí aentsnum ni kakarmari tuke Atí. Nuke ati.

15:12b.1PE.015.012 Serpanujai ju papin ishichik aarmaj nuna akupeajai. Serpanu Yusjai pénker wekaak Yusnum winia yatsur ajasuiti; Núnaka nékajai. Yus waitnentrama asa ti yainmakmania nuna Enentáimtikeajrume ju papijiai. Tura tuke ni waitnenkartutairiin wekasatarum Tájarme.

15:13b.1PE.015.013 Papirúnianmaya atumjai métek Yus achikma ainia nu amikmaatmarme. Winia uchir Markus Núnisan amikmaatmawai.

15:14b.1PE.015.014 Yusai yachi ajasu asarum anenaisrum shiir awajnaisatarum. Jesukrístunu ajasuitrumna nuna Yus imiatkinchanum pujustinian suramsarat tusan wakerajai. Nu Atí.