Philippians (Quichua)

1

1:1b.PHI.001.001 Pablo, Timoteo, Jesucristora sirvijguna, tucui Filipospi tiaj Cristo Jesuspi quirijgunama, ricujgunandi yanapajgunandi, quillcaunchi.

1:2b.PHI.001.002 Dios Yayamanda, Señor Jesucristomandas, gracia nishca ali iyaira cushi shunguras charichi.

1:3b.PHI.001.003 Tucui horas cangunara iyarisha, Diosta agrasini, 4 caran cuti cushihua Diosta mañasha cangunamanda,

1:5b.PHI.001.005 imasna ñaupa punzhamanda cuna horasgama parijumanda ñucara yanapashcanguichi evangelio shimira rimaushcai.

1:6b.PHI.001.006 Caita ali yachani: Canguna shungüi ali rangaj callarij Dios, tucui pai rashcara pactachingami Jesucristo shamuna punzhagama.

1:7b.PHI.001.007 Ñuca cangunamanda cai samira iyarisha, alira rauni. Ñuca shungüi tucui cangunara llaquisha charini. Ñuca chonda cularbi ishcarishcaunai, ñuca evangelio shimira rimashcaunais, tucui canguna ñucahua pariju compañahuashcanguichi Diospa gracia nishca ali iyaibi.

1:8b.PHI.001.008 Yaya Dios yachan imasna ñuca cangunara munasha llaquiuni, Jesucristo llaquina tupui.

1:9b.PHI.001.009 Diosta rugauni canguna llaquina mas mas yaparichu, ali yachanahuas, ali intidinahuas.

1:10b.PHI.001.010 Canguna tucui ima ali ashcaras munangaj, canguna ali shunguyuj, causa illaj tucunauchu, Cristo shamuna punzhagama.

1:11b.PHI.001.011 Shinallara rugauni canguna ali ranahua talirijta aparisha tianauchu Jesucristomanda, Diosta alabangaj, paita ahuayachingaj.

1:12b.PHI.001.012 Uquiuna, munani canguna yachangaj imasna ñucahua pasashcauna ali tucunaushcami evangelio ali shimira yanapangaj.

1:13b.PHI.001.013 Shinallara ñuca Cristomanda ishcarishcauna yachashca tucunaushcami tucui gobernadorhua huasii, tucui chishujgunamas.

1:14b.PHI.001.014 Astaun, ñaca tucui uquiuna ñuca ishcarishcara yachasha cariyanaushcami, chimanda shinzhi tucunaun mana manzhasha, Diospa shimira mas mas rimangaj.

1:15b.PHI.001.015 Huaquingunaga chijnisha, ñucara tormendachingaj Cristo shutira rimanaun, shujgunaga ali munaimanda.

1:16b.PHI.001.016 Huaquinguna Cristo shimira rimanaun piñashcamanda, mana ali shungumanda, ñuca tormendariushcara mas yapashun nisha;

1:17b.PHI.001.017 shujgunaga llaquishcamanda, ñuca evangelio shimira rimashcamanda ishcai tucushcara yachasha.

1:18b.PHI.001.018 Shinajpi ¿imarai? Shinajllaira tucuibi, umachisha nijpis cierto ajpis, Cristo shutira rimashcami. Caimanda cushiyauni, maspas cushiyashami.

1:19b.PHI.001.019 Ñuca yachani, canguna mañashcamanda, Jesucristo Espíritu yanapashcamandas, cachari tucusha.

1:20b.PHI.001.020 Ñuca munani, shinallara chapauni mana imais pingari tucungaj, astaumbas ñuca ali cariyasha, cunallara tucui horas cuenta, ñuca causashas huañushas, yapa ashcara munani Cristo ahuayachishca achu ñuca aichai.

1:21b.PHI.001.021 Ñuca causanaga Cristomi, huañunaga gananami.

1:22b.PHI.001.022 Ñuca cai aichai causangaj valijpi Diosta sirvingaj, mana yachanichu maicanda ajllangaj.

1:23b.PHI.001.023 Cai ishquimanda maicanda chari munani. Riña munani Cristohua pariju tiangaj. Caimi imamandas yali valin.

1:24b.PHI.001.024 Randi, ñuca aichai saquirina mas ministirinmi canguna raigumanda.

1:25b.PHI.001.025 Yachani cangunahua saquirishami, tucui cangunahua chara tiasha, canguna ñaupasha ringaj, canguna quirishcai cushiyangaj,

1:26b.PHI.001.026 canguna Cristo Jesusta mas alabangaj ñucaraigumanda, ñuca cangunahua cuti tiashcamanda.

1:27b.PHI.001.027 Cristo evangelio valishca tonora causaichi, ñuca cangunara ricungaj shamushas, ñuca illashas, cangunamanda uyasha nini imasna canguna shinzhira shayaunguichi shu almallahua shu iyaillahuas, evangelio quirinamanda pariju macanausha.

1:28b.PHI.001.028 Cangunara arcajgunara ama imais manzhaichichu. Caita paigunama paiguna tularingaraushcara rimanga, astaun cangunama canguna quishpichingaraushcara rimangami. Caiga Diosmandami.

1:29b.PHI.001.029 Cangunara cushcami, Cristora llaquishcamanda mana paihuajpi quiringajlla, astaumbas shinallara tormendaringajpas.

1:30b.PHI.001.030 Shina tormendarinara charinguichi, imasna ñucajpi ricucanguichi, maspas cuna ñucajpi tiashcara uyanguichi.

2

2:1b.PHI.002.001 Ima cariyanas tiajpi Cristoi, ima cushiyanas tiajpi llaquina shungüi, ima compañanas Espirituhua, ima llaquinas, ima llaquishacahua ricunas,

2:2b.PHI.002.002 ñuca cushira undachichi, cangunapura chi tonollara iyarisha, chi tonollara llaquinausha, shu iyaillahua, parijulla chi tonollara iyarisha.

2:3b.PHI.002.003 Piñanaunamandas, ima mas tucunamandas imaras ama raichichu, astaun manso shungumanda; caran dueño shujgunara paimanda yali ajta iyaichi.

2:4b.PHI.002.004 Caran dueño ama paihua quiquimbajllara ricuchu, astaumbas shinallara shujgunajtas ricuchu.

2:5b.PHI.002.005 Cangunajpis tiachu cai Cristo Jesús iyashca sami.

2:6b.PHI.002.006 Paiga Dios sami ashallara, Diospa quiquin tupui tucungaj mana yapajta munacachu,

2:7b.PHI.002.007 astaun, pai imas illaj tucuca, sirvij cuenta tucusha, runa samillai rashca aca.

2:8b.PHI.002.008 Runa tonoi ricurimusha, pai quiquinllara mas mas mansoyarica huañunagama casusha, cruzpi huañuca.

2:9b.PHI.002.009 Chiraigumanda, Dios paita yalijta ahuayachica. Tucui shutimanda yali atun shutira paita cuca.

2:10b.PHI.002.010 Jesuspa shutii tucui cungurinauchu, ahua pachais, cai pachais, cai pacha ucuis.

2:11b.PHI.002.011 Shinallara, tucui shimi rimachu, Jesucristo atun Señormi nisha, Yaya Diosta alabangaj.

2:12b.PHI.002.012 Shinasha, llaquishcauna, canguna tucui horas ñucara casusha, mana ñuca cangunahua tiaushcallai, astaun cuna mas mas ñuca illaushcais, canguna alma quishpinamanda manzhasha tarabaichi.

2:13b.PHI.002.013 Dios canguna shungüi munaira cun, ranaras cun, paihua munaira pactachingaj.

2:14b.PHI.002.014 Tucuira raichi, mana rimarisha, mana piñarisha.

2:15b.PHI.002.015 Canguna causa illajguna aichai, ali shunguuna, Diospa churiuna, iruspas illajguna, manali istu miraiguna chaupi shungüi; paiguna chaupii velaunasna punzhayachinguichi cai pachai.

2:16b.PHI.002.016 Causana shimira ricuchichi, ñuca cangunamanda cushiyangaj Cristo shamuna punzhai, ñuca ama yangamanda causashca achu, ama yangamanda tarabashca achu.

2:17b.PHI.002.017 Ñucaga talishca ashas, imasna aceite yacu shu sacrificio ahuai talishcasna, canguna Jesusta quirina sacrificio ahuais, canguna sirvishca ahuais, cushi mani; ñuca cushiyauni tucui cangunahua.

2:18b.PHI.002.018 Shinallara canguna cushiyaichi ñucahua pariju.

2:19b.PHI.002.019 Shinasha, Señor Jesús yanapajpi, Timoteroa uctalla cangunama cachasha nini, ñuca canguna ali ashcara uyasha cariyangaj.

2:20b.PHI.002.020 Shu paisna iyaiyujta mana charinichu, shungumanda cangunara llaquijta.

2:21b.PHI.002.021 Tucui runauna paiguna quiquimbajllara mascanaun, astaumbas Cristo Jesuspajta mana mascanaunzhu.

2:22b.PHI.002.022 Canguna Timoteo rashcaunara yachanguichimi imasna pai, quiquin churi cuenta paihua yayara sirvisha, ñucara sirvishcami evangelio shimira rimaushcai.

2:23b.PHI.002.023 Chiraigumanda, imahoras ñucahua imasna tucungaraushcara ricusha, paita cangunama cachasha nini.

2:24b.PHI.002.024 Shinallara Diospi quirini imasna ñucas uctalla cangunajma shamusha.

2:25b.PHI.002.025 Epafrodito nishcara cangunama cachañara ministicani. Paimi ñuca uqui, ñucara yanapaj, ñucahua compañaj, soldaropura cuenta. Paimi cangunamanda rimaj, canguna cachamushca ñucara yanapaj ñuca ministishcaunai.

2:26b.PHI.002.026 Paiga tucui cangunara ashcara ricusha nica. Maspas ashcara turbarica canguna pai ungushcara uyashcaraigu.

2:27b.PHI.002.027 Cierto pacha pai huañunalla unguca, astaumbas Dios paita llaquisha ricuca, mana paulara astaun ñucaras, ñuca ama yapajta llaquiringaj.

2:28b.PHI.002.028 Chimanda paita mas uctalla cangunama cachauni, canguna paita cuti ricusha cushiyangaj, ñucas pishi llaquiyuj tucungaj.

2:29b.PHI.002.029 Paita Señorbi cushihua chasquichi. Cai samiunara ashcara llaquisha apinguichi.

2:30b.PHI.002.030 Paimi Cristora sirvinamanda ñaca ñaca huañuca, paihua causaira cusha, canguna ñucara yanapahuashcara ñucajma pactachingaj.

3

3:1b.PHI.003.001 Puchucaibi uquiuna, Señorbi cushiyaichi. Caita cangunama cuti quillcangaj mana amirinichu. Cangunaj valinmi.

3:2b.PHI.003.002 Allcu nishcaunamanda huacachichi. Manali rajgunamanda huacachichi. Aichara pitijgunamanda huacachichi.

3:3b.PHI.003.003 Ñucanchiga, espirituhua Diosta sirvijguna, cierto circuncisión nishcauna manchi, ñucanchi Cristo Jesuspi cushiyajguna, aicha rashcaunai mana ansas iyarijguna.

3:4b.PHI.003.004 Shinashas, ñuca aichai rashcaunamanda cushiyangaj charinimi. Shu runa aichamanda cushiyangaj iyarijpi, ñucas masta charini:

3:5b.PHI.003.005 Ñucaga, pusac punzhai circuncisionda rai tucucani, Israel atun aillumanda, Benjamín montonmanda, quiquin hebreo runa, camachishca shimii fariseo nishca macani.

3:6b.PHI.003.006 Ñuca ñaupa quirishca tonoi shinzhi acani, iglesiara tormendachij acani. Ñuca ali rana tupui, ley camachishca shimi ñaupajpi causa illaj acani.

3:7b.PHI.003.007 Astaun, ñuca ñaupa horas valishcaunara chingarishcauna cuenta iyashcani Cristora llaquishcamanda.

3:8b.PHI.003.008 Cierto pacha tucuira chingarishcauna cuenta iyauni, Cristo Jesús ñuca Señorda yachangaj tucuira yalijta valishcamanda. Paita llaquishcamanda tucuira pirdishcani, basurara cuenta iyauni, Cristora ganangaj.

3:9b.PHI.003.009 Cristo Jesuspi tarishca tucunai, mana ñuca quiquin ali causanara charijpi, ley camachishca shimira pactachishcamanda, astaumbas Cristoi quirishcamanda, Dios cushca ali causanara charisha.

3:10b.PHI.003.010 Ñuca paita yachasha nini, pai causarimuna ushairas. Pai tormendarishcaunai paihua pariju tiasha nini, pai huañunai paisna tucungaj,

3:11b.PHI.003.011 imais usharijpi ñuca huañushcaunamanda causarinama pactangaj.

3:12b.PHI.003.012 Caigama chara mana pactashcanichu, chara mana ali tupu tucushcanichu nisha iyauni. Astaumbas ñaupajmallara riuni, imamandas Cristo Jesús ñucara pactaca, ñucas chigamallara pactangaj.

3:13b.PHI.003.013 Uquiuna, ñucallara chigama pactangaj chara mani, nisha iyauni. Astaumbas shujllara rauni: ñaupa horas rashcaunara cierto pacha cungarisha, ñaupajpi tiajgunara pactangaj riunimi.

3:14b.PHI.003.014 Ganashcamanda paganara apingaj ñaupasha riunimi. Cai pagana Dios ahua pachama cayanami Cristo Jesuspi.

3:15b.PHI.003.015 Shinasha tucui ñucanchi shunguyujguna shuj iyaiyujlla tucushunchi. Huaquinguna shu samillara iyajpi, Dios caitas cangunara ricuchingami.

3:16b.PHI.003.016 Tucuibi, maigamas intindisha pactamushcanchi, shinallara catishunchi, shuj iyaillahua iyarisha.

3:17b.PHI.003.017 Uquiuna, ñucara catirichi. Shinallara tucui cai samira causajgunara ricuichi, ñucanchi rashca samii catijgunara.

3:18b.PHI.003.018 Ashca runaunamandaga ñuca cangunara ashca cuti cuentashcani, cutillara huacasha cuentauni, paiguna Cristo cruzta chijnijguna tucunaushcami.

3:19b.PHI.003.019 Puchucaibi casnauna llambura tulashca anaunga ucu pachai, paiguna dios paiguna quiquin icsa, paiguna pingarishcai cushiyanaun, paiguna iyaibi cai pachamandaunallara iyarinaun.

3:20b.PHI.003.020 Ñucanchiga ahua pacha runauna manchi. Chimanda ñucanchi Quishpichij Señor Jesucristora chapaunchi.

3:21b.PHI.003.021 Pai ñucanchi mana valij aichara turcangami, paihua sumaj aicha cuenta tucungaj, paihua ushaihua rasha, imasna pai tucuira vencinara ushanmi.

4

4:1b.PHI.004.001 Shinasha, ñuca uquiuna, llaquishcauna, munashcauna, ñuca cushi, ñuca llaitu, Señorbi ali shayarichi, llaquishcauna.

4:2b.PHI.004.002 Evodia Sintiqui nishcaunaras mañauni shina iyaillahua tucunauchu Señorbi.

4:3b.PHI.004.003 Shinallara canda rugauni, ñucara ali compañaj uqui, yanapai cai huarmiunara. Paiguna ñucahua pariju tarabanauca evangelio shimira rimangaj, Clemente nishcahuas, shujgunahuas, paiguna tucui ñucara yanapajguna anauca. Paiguna shutiuna causana quillcai quillcashca tianaun.

4:4b.PHI.004.004 Señorbi cushiyaichi tucui horas. Cutillara cangunara nini: Cushiyaichi.

4:5b.PHI.004.005 Canguna ali shungura tucui runauna yachanauchu. Señorga mayanllaimi.

4:6b.PHI.004.006 Imais ama turbarichichu, astaun tucuibi mañashcahuas rugashcahuas agrasishcahuas Diosta mañaichi.

4:7b.PHI.004.007 Shinasha, Diospa cushi, tucui intíndinara pasaj, canguna shunguras canguna iyairas huacachingami Cristo Jesuspi.

4:8b.PHI.004.008 Puchucaibi, uquiuna, tucui cierto ajta, tucui ali ajta, tucui ali gusto ajta, tucui chuyaj ajta, tucui llaquinallara tucui ali rimashcara, ima ali sumaj ajtas, ima alabanalla ajtas, cai samiunai iyaichi.

4:9b.PHI.004.009 Imara ñucamanda yachashcanguichi, apishcanguichi, uyashcanguichi, ricushcanguichi, caigunara raichi. Cushira cuj Dios cangunahua tiangami.

4:10b.PHI.004.010 Diospi ashcara cushiyacani imasna puchucaibi canguna ñucara cuti cuirahuashcanguichi. Cierto pacha ñucamanda iyarishcanguichi, astaun imasna ranaras mana yachacanguichi ñucara yanapangaj.

4:11b.PHI.004.011 Caita mana ninichu ñuca ministishcamanda. Ñucaga ña yachashcani ima charishcahuas cushi tucungaj.

4:12b.PHI.004.012 Cullqui illaj causanara yachani, shinallara charinara yachani. Tucuibis tucuimandas ña yachani, sajsana, yarcana, ashcara charina, imaras ministinas, ña yachashcani.

4:13b.PHI.004.013 Tucuira ushani ñucara shinzhiyachij Cristoi.

4:14b.PHI.004.014 Shinajllaira alimi rashcanguichi ñucama cachamusha ñucara yanapangaj ñuca tormendariushcai.

4:15b.PHI.004.015 Cangunas shinallara yachanguichi, Filipos runauna, evangelio shimira camachingaj callariushcai, ñuca Macedonia llactamanda riushcai, mana maican iglesias ñucara yanapacachu cuyanais chasquinais, astaun cangunalla shina rarcanguichi.

4:16b.PHI.004.016 Tesalónica nishca llactais, ñuca ministishcaunai huaquin cuti cachacanguichi.

4:17b.PHI.004.017 Ñucaga cuyanara mana mascanichu, astaumbas canguna rashcauna canguna cuentai yaparingaj munani.

4:18b.PHI.004.018 Shinashas, tucuira charini, taliríjta. Epafroditomanda canguna cuyashcara pactajta apishcani, gusto asnajta, chasquinalla sacrificiora, Dios munashcasna.

4:19b.PHI.004.019 Ñuca Dios canguna tucui ministishcara cungami, pai sumaj tiashcai charishca ashca vaUj tupura Cristo Jesuspi.

4:20b.PHI.004.020 Dios, ñucanchi Yaya, ahuayachishca achu huiñai huiñaigama. Amen.

4:21b.PHI.004.021 Tucui Cristo Jesuspi quirijgunara saluraichi. Ñucahua pariju tiaj uquiuna cangunara saluranaun.

4:22b.PHI.004.022 Tucui quirijguna cangunara saluranaun, maspas Cesarba huasimanda ajguna.

4:23b.PHI.004.023 Ñucanchi Señor Jesucristo gracia nishca ali iyai tucui cangunahua tiachu. Amen.