Galatians (Quichua)

1

1:1b.GAL.001.001 Pablo, apóstol nishca Dios cachashca runa, mana runaunamandachu, mana runa cachashca, astaun Jesucristo cachashca, shinallara Dios Yaya cachashca, Jesucristora huañushcaunamanda causachij,

1:2b.GAL.001.002 tucui ñucahua tiaj uquiunandi, Galacia nishca partii tiaj iglesiaunara saluranchi.

1:3b.GAL.001.003 Gracia nishca ali iyaira, cushi shunguras charichi Dios Yayamanda, Señor Jesucristomandas.

1:4b.GAL.001.004 Paiga pai quiquinllarara cuca ñucanchi uchamanda, ñucanchira cai manali tiempomanda cacharingaj, ñucanchi Dios Yaya munashcasna.

1:5b.GAL.001.005 Paiga sumacyachishca achu huiñai huiñaigama. Amen.

1:6b.GAL.001.006 Manzharisha tiauni imasnara canguna uctalla anzhurishcanguichi canguna cayaj runamanda. Pai cangunara cayaca Cristo gracia nishca yangamanda llaquishcaraigumanda, astaumbas shu tono evangelio shimira catishcanguichi.

1:7b.GAL.001.007 Shinashas, shu evangelio shimis illan, astaumbas huaquinguna cangunara turbachinaun, Cristo evangeliora turcasha nisha.

1:8b.GAL.001.008 Maspas ñucanchis, shu ahuapachamanda angelbas, shu tono evangeliora rimajpi, mana ñucanchi rimashca samira, pai maldiciashca achu.

1:9b.GAL.001.009 Imasnara ñaupa rimacanchi, shinallara cuti nini: Maican runas shu tono evangeliora cangunara rimajpi, mana canguna ñaupa apishca sami ajpi, pai maldiciashca achu.

1:10b.GAL.001.010 ¿Cunaga runauna llaquishcarachu mascauni? ¿Manzhu Dios llaquishcara mascauni? ¿Runaunara cushiyachingaj mascaunichu? Ñuca chara runaunara cushiyachisha, mana Cristora sirvijchu aima.

1:11b.GAL.001.011 Shinasha canguna yachangaj munani, uquiuna, ñuca rimaushca evangelio shimi mana runamandachu.

1:12b.GAL.001.012 Ñuca cai shimira mana apicanichu, mana yachacanichu runaunamanda, astaun Jesucristo ñucama ricuchihuaca.

1:13b.GAL.001.013 Ñuca ñaupa horas causashca tupura ña uyashcanguichi, ñuca judio yachaira catishca horas, imasna Diospa iglesiara ashcara tormendachicani, tulacani.

1:14b.GAL.001.014 Ñucaga judioguna yachaibi ashca ñuca tiempoi causajgunara yalicani ñuca llactai. Ashca munaihua ñuca yayauna yachaigunara llaquicani.

1:15b.GAL.001.015 Randi, Dios munashca horaspi, ñuca mama icsamanda pacha ñucara chicanyachisha, cayahuacami pai llaquishcamanda,

1:16b.GAL.001.016 paihua Churira ñucajpi ricuchingaj, ñuca paihua shutira yachachingaj gentilgunama, aichahuas yahuarhuas mana chi ratollai rimacanichu.

1:17b.GAL.001.017 Shinallara Jerusalenma mana ricanichu ñucamanda ñaupa aj cachashca runaunajma, astaun Arabia partima ricaní, chi huasha cuti tigracani Damasco llactama.

1:18b.GAL.001.018 Shinajpi, quinsa huata huasha, Jerusalenma ricani Pedrohua rimangaj, paihua pariju chunga pichca punzhara tiaucani.

1:19b.GAL.001.019 Jacobo, Señorba uquiras, ricucani, maspas shu cachashca runaunara mana ricucanichu.

1:20b.GAL.001.020 Cai ñuca cangunama quiilcashcai, Diospa ñaupajpi mana ansas llullanichu.

1:21b.GAL.001.021 Chimanda huasha, Siria Cilicia partiunama ricani.

1:22b.GAL.001.022 Cristoi tiaj iglesiauna, Judea partii tiajguna, ñucara chara mana ricsihuanaucachu ñahuipura.

1:23b.GAL.001.023 Chi rimashcallara uyanauca: Ñucanchira ñaupa horas tormendachij runaga, pai ñaupa horas chijnishca quirinara cuna camachiun.

1:24b.GAL.001.024 Ñucamanda Diosta ahuayachinauca.

2

2:1b.GAL.002.001 Chunga chuscu huata huasha, cutillara Jerusalenma ricani Bernabehua, Titoras ñucahua pariju pushasha.

2:2b.GAL.002.002 Dios ñucara ricuchishcaraigu chima sicacani. Sapallai atun ricurijgunahua ñuca gentilgunama rimashca evangelio shimira cuentacani, alichu manzhu ali nisha tapungaj.

2:3b.GAL.002.003 Astaun, ñucahua pariju tiaj Tito, griego ashallara, circuncisionda rangaj mana mandai tucucachu.

2:4b.GAL.002.004 Huaquin llulla uquiuna pacalla pacalla icunauca, ñucanchi Jesucristoi charishca liuri causanara ricungaj, ñucanchira cutillara sirvijta rangaj.

2:5b.GAL.002.005 Caigunara mana shu horashuallas uyacanchichu casungaj, evangelio cierto shimi cangunahua saquiringaj.

2:6b.GAL.002.006 Randi atun ricurijguna, (paiguna ñaupa horas imasna asnearas mana imas tucuhuanzhu, Dios runaunara mana chicanyachisha ricunzhu), cai atunguna ñucama mana ima mushuj shimiras cuentahuanaucachu.

2:7b.GAL.002.007 Randiga, paiguna ricunauca imasna ñucama cushca aca evangeliora rimangaj circuncisión nishcara mana rajgunama, shinallara Pedrora circuncisión nishcara rajgunama cushca aca rimangaj.

2:8b.GAL.002.008 Ushaira cuj Dios Pedrora cachaca circuncisionda apijgunama, shinallara ñucamas ushaira cuca gentilgunama yachachisha ringaj.

2:9b.GAL.002.009 Shinajpi Jacobo, Cefas, Juandi, iglesia istandi cuenta iyashcauna, ñucama cushca gracia nishcara ricusha, ali maquira cuhuanauca yanapangaj ñucamas Bernabemas, ñucanchi gentilgunama ringaj, paigunaga circuncisionda apijgunama ringaj.

2:10b.GAL.002.010 Ñucanchi tsuntsuunara iyaringaj, caillarara rugahuanauca. Shinallara caita munaihua rangaj camacani.

2:11b.GAL.002.011 Pedroga Antioquía llactama shamujpi, paita ñahui pambai piñacani, pai causayuj ajpi.

2:12b.GAL.002.012 Jacobomanda huaquinguna manara shamujllaira, Pedro gentilgunahua micuj aca; astaumbas paiguna shamushca huasha, chican micuj aca, circuncisionda catijgunara manzhashcamanda.

2:13b.GAL.002.013 Chishu judiogunas paihua pariju shina ranauca, shinallara Bernabé paiguna manali raushcai catica.

2:14b.GAL.002.014 Ñuca imasna paiguna evangelio shimii mana dirichu purishcara ricusha, Pedrora rimacani tucui runa ñaupajpi: Can, judio ashallara, gentilguna cuenta causausha, mana judio cuenta, ¿imaraigu gentilgunara camachingui judioguna yachaira catingaj?

2:15b.GAL.002.015 Ñucanchi judioguna miraimanda anchi mana uchasapa gentilgunamanda.

2:16b.GAL.002.016 Yachanchi imasnara shu runa Dioshua ali tucun, mana ley shimira rashcaunamanda, astaun Jesucristoi quirishcamanda. Ñucanchis shinallara Jesucristoi quirishcanchi ali tucungaj Cristoi quirishcamanda, mana ley shimi rashcaunamanda, imasna ley shimi rashcaunamanda mana pihuas ali tucungachu.

2:17b.GAL.002.017 Shinallara, ñucanchi Dioshua alichishcauna tucusha nijpi Cristoi, shina ashallara chara uchara raunchi, ¿caimandachu Cristo uchara rachij tucun? Mana pacha.

2:18b.GAL.002.018 Ñuca ñaupa horas tulashcaunara cutillara sicachishaga, uchara raj tucuni.

2:19b.GAL.002.019 Shinajpi ley raigumanda ñuca chi leyhuajta huañushcani, Diospa ñaupajllai causangaj.

2:20b.GAL.002.020 Cristohua pariju chacatashca mani, ña mana causaunichu ñuca, astaumbas Cristo ñucajpi causaun. Ñuca cai aichai cuna causaushca causaiga Diospa Churu quirishcai causauni. Pai ñucara llaquica, pai quiquinllarara cuca ñuca randimanda.

2:21b.GAL.002.021 Diospa gracia nishca yangamanda llaquishcara mana ichunichu. Ali causanaga ley shimimanda shamujpi, Cristo yangamanda huañuca.

3

3:1b.GAL.003.001 ¡Upa Gálatasguna! ¿Pita cangunara umachicachu cierto shimira ama uyangaj? Canguna ñahui pambai, canguna chaupi shungüi Jesucristo chacatashcara pajlla pambai ricuchishca aca.

3:2b.GAL.003.002 Caillara cangunamanda yachasha nini: ¿Ley shimi ranaunamandachu Espiritura chasquicanguichi? ¿Manzhu uyasha quirishcamanda chasquicanguichi?

3:3b.GAL.003.003 ¿Casna upauna anguichi? ¿Espirituhua callarishallara, cunaga aichamandachu ali tucushun nisha iyanguichi?

3:4b.GAL.003.004 ¿Yangamandachu chi tucuira tormendarishcanguichi? Yangamanda chari aca.

3:5b.GAL.003.005 Espiritura cangunama cuj Diosga, canguna chaupi shungüi munanaita Rajga, ¿pai cai tucuira rarca ley shimi ranaunamandachu? ¿Manzhu uyasha quirishcamanda aca?

3:6b.GAL.003.006 Shinallarami Abraham Diosta quirica, Dioshua alichishcami nishca aca.

3:7b.GAL.003.007 Caita yachaichi, quirijgunaga Abrahamba churiunami.

3:8b.GAL.003.008 Quillcashcaunai ñaupa ricurica imasnara Dios gentilgunara alichinma paiguna quirishcamanda. Ñaupa horasmanda caita rimasha, ali shimira Abrahamda cuentaca, shina nisha: Canmanda tucui ailluuna bendiciai tucunaungami.

3:9b.GAL.003.009 Shinajpi, quirijguna quirij Abrahamhua pariju bendiciai tucunaushcami.

3:10b.GAL.003.010 Tucui ley shimii rashcaunai quimirijguna maldiciashcaunami. Quillcashcami tian: Maican runas tucui ley shimü quillcashca ranaunaras mana rasha causausha maldiciashcami.

3:11b.GAL.003.011 Imasnara ley shimiunamanda mana pihuas Diospa ñaupajpi ali tucun casnami quillcashca tian: Ali runa pai quirishcamandami causanga.

3:12b.GAL.003.012 Ley shimiga mana quirinamandachu, astaumbas: Chita raj runa chimandami causanga, nin.

3:13b.GAL.003.013 Cristoga ñucanchira randica ley shimi maldiciashcamanda, ñucanchimanda pai maldiciai tucuca. Quillcashca tian: Maldiciashcami tucui runa yurai huarcushca huañuj.

3:14b.GAL.003.014 Cristo Jesús maldiciai tucuca Abrahamba bendición gentilgunama pactachu, ñucanchi quirishcamanda cusha nishca Espiritura apingaj.

3:15b.GAL.003.015 Uquiuna, runa tonoi rimauni. Shu pactachina shimi, runamanda ashas, ña ali nishca ashas, pi runas mana tucuchin, pi runas mana yapan.

3:16b.GAL.003.016 Dios cushca shimiunara Abrahanma cushcaca, paihua miraimas. Mana ninzhu paihua miraigunama, ashcaunama cushca cuenta, astaumbas shujmalla: Camba miraima, nisha. Cai miraiga Cristomi.

3:17b.GAL.003.017 Caitami nini: Chi ñaupa cushca pactachina shimira ñaupa horas Dios alimi nica. Shinajpi ley shimiga, chusca patsac quinsa chunga huata huasha shamujpi, ñaupa shamuj cushca shimira mana tucuchinzhu chi shimira huajlichingaj.

3:18b.GAL.003.018 Herencia nishca yayamanda saquishcaga ley shimimanda shamujpi, ña mana cushca shimimandachu. Astaumbas Dios Abrahanma cusha saquica, shimira cushcamanda.

3:19b.GAL.003.019 Shinajpi, ¿Imajta sirvin cai ley shimi? Manali rashcaunamanda cushca aca, ñaupa horas cushca shimi rimashca mirai shamunagama, paihuajma shimi cushcaraigu. Chi shimiga angelgunamanda cushca aca, shu alichij runahua.

3:20b.GAL.003.020 Alichij runaga mana ministirinzhu shu runallahua; Diosga shujllami.

3:21b.GAL.003.021 Shinajpi, ¿ley shimihua Dios cushca shimiunahua contrachu? Mana pacha. Ley shimi causachina ushajpi, cierto pacha ali causana ley shimimanda shamunmaca.

3:22b.GAL.003.022 Quillcashca shimiga tucuira ucha ucui ishcaca, Jesucristoi quirishcamanda cushca shimira quirijgunama cushca achu.

3:23b.GAL.003.023 Quirina horas manara pactamujllaira, huacachishca acanchi ley shimi ucui, ishcashca cuenta acanchi quirinara ricuchinagama.

3:24b.GAL.003.024 Shinasha, ley shimi ñucanchira cuiraj maca, ñucanchira Cristoma pushangaj, ñucanchi Cristo Jesuspi quirishalla ali tucungaj.

3:25b.GAL.003.025 Quirina horas pactamujpiga, cuirajta ña mana ministinchichu.

3:26b.GAL.003.026 Canguna tucui Diospa churiuna anguichi Cristo Jesuspi quirishcamanda.

3:27b.GAL.003.027 Tucui canguna Cristoi bautisashcauna Cristora churarishcanguichi.

3:28b.GAL.003.028 Ña judio illan, griego illan; shinallara sirvijpas liuri runas illan; shinallara caris huarmis illan. Tucui canguna shujlla anguichi Cristo Jesuspi.

3:29b.GAL.003.029 Shinallara, canguna Cristojguna asha, cierto pacha Abrahamba miraiguna anguichi, maspas shimi cushcamanda herencia nishcara apijguna anguichi.

4

4:1b.GAL.004.001 Caitami nini: Herencia nishca yayamanda cushcara apij huahua asha, mana imais sirvij runamanda shu tono ricurinzhu, pai tucuimanda dueño ashallara.

4:2b.GAL.004.002 Paiga cuirajguna yachachijguna maquiunai causaun, yaya rimashca horas pactamunagama.

4:3b.GAL.004.003 Shinallarami ñucanchis huahua horaspi cai mundu yachaira sirvijguna macanchi.

4:4b.GAL.004.004 Astaumbas tiempouna pactaríjpi, Dios paihua Churira cachamuca, huarmimanda pagarishca, ley shimi ucui pagarishca,

4:5b.GAL.004.005 ñucanchira, ley shimi ucui tiajgunara randingaj, ñucanchi churiuna tucungaj.

4:6b.GAL.004.006 Cangunaga, churiuna asha, Dios paihua Churi Espiritura cachamuca canguna shüngui: Abba, Yaya, nisha caparin.

4:7b.GAL.004.007 Shinasha, ña mana sirvijchu angui, astaumbas churi tucushcangui. Maspas, churi asha Diosmanda herencia nishca Yayamanda cushcara apij tucungui Cristoi.

4:8b.GAL.004.008 Cierto pacha ñaupa horas, Diosta mana ricsisha, yanga llulla disogunara sirvicanguichi.

4:9b.GAL.004.009 Cunaga Diosta ña ricsisha, astaun ali, Diosmanda ricsishca asha, ¿imarasha cutillara cai mana valij mundu yachaima tigrasha ninguichi chita cutillara sirvingaj.

4:10b.GAL.004.010 Huaquin punzhaunara, quillaunaras, tiempounaras, huataunaras huacachinguichi.

4:11b.GAL.004.011 Cangunamanda manzhauni, cangunara yangamanda chari yachachishcani.

4:12b.GAL.004.012 Uquiuna, cangunara rugauni, ñucasna aichi, imasna ñuca cangunasna tucucani. Ñucajta ima manaliras mana rashcanguichichu.

4:13b.GAL.004.013 Canguna iyaringuichimi imasna ñuca aichai tiaj ungüimanda, ñaupa punda cangunama evangelio shimira rimacani.

4:14b.GAL.004.014 Ñuca ungüimanda, aichai ricurimushcamanda, ñucara mana piñahuacanguichichu, mana ichuhuacanguichichu. Astaumbas ñucara chasquihuacanguichimi shu Diospa angelda cuenta, quiquin Cristo Jesusta cuenta.

4:15b.GAL.004.015 Canguna chi horas charishca ali shunguga, ¿cuna maibirai? Cangunara nini, usharijpi canguna quiquin ñahui muyura llucchinguichimaca ñucama cungaj.

4:16b.GAL.004.016 Cierto shimira cangunara rimashcamanda, ¿ñucaraga chijninguichichu?

4:17b.GAL.004.017 Chi runaunaga cangunara mascanaun, mana ali shungumanda, astaumbas cangunara ñucanchimanda anzhuchingaj, canguna paigunajma llutaringaj.

4:18b.GAL.004.018 Alimi valin alira mascangaj tucui horaspi, mana ñuca cangunahua tiaushca horasllai.

4:19b.GAL.004.019 Ñuca churihuauna, cangunamanda cutillara nanahuanmi huahuara pagarichina nanaigunahua cuenta, Cristo canguna ucui iñangagama.

4:20b.GAL.004.020 Cunallara cangunahua tiangaj munaimacani, ñuca rimanara turcangaj. Cangunamanda turbariuni.

4:21b.GAL.004.021 Canguna, ley camachishca shimira catisha nijguna, rimahuaichi: ¿Manzhu uyashcanguichi chi ley shimi rimashcara?

4:22b.GAL.004.022 Quillcashca tian imasna Abraham ishqui churiyuj maca, shujga sirvij huarmimanda, chishujga liuri huarmimanda.

4:23b.GAL.004.023 Sirvij huarmimanda huahua aichamandami pagarimuca, astaumbas liuri huarmimanda huahuaga Dios shimira cushcamanda pagarimuca.

4:24b.GAL.004.024 Caiga shu pacashca shimimi. Cai ishqui huarmi ishqui pactachina shimiunara iyarichin. Shujga cierto pacha Sinai urcumanda cushca aca, huahuaunara sirvingajlla pagarichij, caimi Agar nishca huarmi aca.

4:25b.GAL.004.025 Cai Agar Sinai nishca urcura iyarichin, Arabia nishca partii; shinallara cuna tiaj Jerusalenda ricuchin. Paiga paihua huahuaunandi sirvijguna tucunaushcami.

4:26b.GAL.004.026 Astaumbas, ahuamanda Jerusalén liurimi, paimi tucui ñucanchi mama cuenta.

4:27b.GAL.004.027 Quillcashca tian: Cushiyai, huahuara mana ricuj, mana pagar ichij. Cushihua capari huahuamanda nanai illaj huarmi. Ichushca huarmi mas huahuaunara charin cariyujmanda yali.

4:28b.GAL.004.028 Cunaga, uquiuna, ñucanchi Isac cuenta, shimi cushcamanda churiuna manchi.

4:29b.GAL.004.029 Shinashas, imasna ñaupa horaspi aichamanda pagarishca runa Espiritumanda pagarishca runara tormendachica, shinallarami tucun cuna horaspas.

4:30b.GAL.004.030 ¿Quillcashcaga imara ninzhu? Shinami nin: Sirvij huarmira paihua churindi ichui, sirvij huarmimanda churi ama herencia nishcara apingaj liuri huarmimanda churihua pariju.

4:31b.GAL.004.031 Shinasha, uquiuna, ñucanchi mana sirvij huarmimanda churiunachu anchi, astaun liuri huarmimanda anchi.

5

5:1b.GAL.005.001 Shinzhi tucuichi canguna liuri tucushcai, imasnara Cristo ñucanchira liuriyachihuaca. Ama voltiarichichu cutillara sirvijguna tucungaj.

5:2b.GAL.005.002 Caita, ñuca, Pablo, cangunara nini: canguna circuncisión nishcara rajpi, Cristo cangunajma imajpas mana valinzhu.

5:3b.GAL.005.003 Cutillara nini: Maican runas circuncisión ranara rausha, ña entero ley shimira pactachina anga.

5:4b.GAL.005.004 Cristomanda anzhurishcanguichi, canguna ley ranaunamanda ali tucusha nijguna. Gracia nishca ali iyaimanda urmashcanguichi.

5:5b.GAL.005.005 Ñucanchiga Diospa Espiritumanda pai cushca ali tucunara chapaunchimi, ñucanchi quirishcamanda.

5:6b.GAL.005.006 Cristo Jesuspi quirijpi, circuncisionda ranas mana ranas imajpas mana valinzhu, astaumbas valinmi ñucanchi llaquij shungumanda quirina.

5:7b.GAL.005.007 Ñaupa horas alimi purijguna acanguichi, ¿pita cangunara turbachica cierto shimira mana pactachingaj?

5:8b.GAL.005.008 Casna iyaiga mana cangunara cayaj Diosmandachu shamun.

5:9b.GAL.005.009 Ansalla punguichina polvo entero masashcara punguichin.

5:10b.GAL.005.010 Cangunamanda chapauni Señorbi, canguna shu tonoi ama iyaringaj. Astaun, cangunara turbachij runa taripai tucungami, maican ashas.

5:11b.GAL.005.011 Ñucaga, uquiuna, circuncisionda rana shimira chara camachijllaira, ¿imaraigu chara ñucara tormendachihuanaun? Casna ajpi cruzmanda tormendarina ña tucurishca.

5:12b.GAL.005.012 Cangunara turbachijguna paigunallara pitinauchu.

5:13b.GAL.005.013 Cangunaga, uquiuna, liuriuna tucungaj cayashca anguichi. Shinashas, liuriuna ajpi, canguna liuri tucushcara ama huajlichinguichichu ucha aicha munaira sirvingaj, astaumbas cangunapura parijumanda sirvinguichimi llaquinaushcamanda.

5:14b.GAL.005.014 Entero ley camachishca shimi cai shimii pactachishca tian: Camba mayambi tiajta can cuentallara llaquina mangui.

5:15b.GAL.005.015 Cangunapura parijumanda caninaushas micunaushas, ricupaichi cangunapura ama tucuringuichichu.

5:16b.GAL.005.016 Shinajpi nini: Espiritui purichi, ucha aicha munashcara ama ranguichichu.

5:17b.GAL.005.017 Aichaga Espirituhua, Espíritu aichahua macananaun. Caiguna chijnijpura tucunaun, can munashcara ama rangaj.

5:18b.GAL.005.018 Cangunaga Espíritu pushashca asha, ley shimira mana uyanachu.

5:19b.GAL.005.019 Aicha rashcaunaga pajllai ricurimunaun, caigunami: shujpa huarmira apiña, shujhua tacarina, irus iyai, aicha munashcara rana,

5:20b.GAL.005.020 runa rashca diosta alabana, sagranauna, chijninauna, pinanausha causana, tumbanauna, piñarinauna, macanauna, piñanauna, llulla quirinauna,

5:21b.GAL.005.021 shujguna charishcamanda chijninauna, huañuchinauna, machanauna, yali micuna upina istauna, casna ranaunandi. Cangunara nini: casnara rajguna Dios mandana pachara mana apinaungachu.

5:22b.GAL.005.022 Astaumbas, Espíritu iñachishcaunaga caigunami: Llaquina, cushiyana, ganaslla causana, ali chapana iyai, alirana iyai, ali shungu, quirina,

5:23b.GAL.005.023 Manso shungu, aicha munaira arcanas. Caigunahua ima ley shimis mana tianzhu.

5:24b.GAL.005.024 Cristojgunaga aichara chacatanaushcami, pai llaquishcaunandi, pai munashcaunandis.

5:25b.GAL.005.025 Ñucanchi Espiritui causausha, shinallara Espiritui purishunchi.

5:26b.GAL.005.026 Ama alabarishunchi, parijumanda ama piñanausha, parijumanda ama chijninausha.

6

6:1b.GAL.006.001 Uquiuna, shu runa uchai urmajpi, canguna Espirituhua undachishcauna cai runara alichichi manso shunguhua, canllara iyarisha cambas ama shinallara tentai tucungaj.

6:2b.GAL.006.002 Cangunaga shujguna cargara aparichi, shina rasha Cristo camachishcara pactachichi.

6:3b.GAL.006.003 Maican runas valij mani nisha iyasha, mana imas ashallara, pai quiquinllara umachin.

6:4b.GAL.006.004 Shinasha, caran dueño pai quiquin rashcara ricuchu, pai quiquin rashcamanda alabai tucungaj, astaun mana shujpajmanda.

6:5b.GAL.006.005 Caran dueño paihua quiquin aparinara aparichu.

6:6b.GAL.006.006 Diospa shimira yachachishca runa ima aliras cuyachu paita yachachij runama.

6:7b.GAL.006.007 Cangunallara ama umachichichu, Dios mana burlaihuajchu. Imaras shu runa tarpusha, chi samillarara pallangami.

6:8b.GAL.006.008 Pi runas paihua quiquin aicha munashcara tarpusha, aichamanda ismura pallangami. Astaumbas maicambas Espíritu munashcara tarpusha, paiga Espiritumanda huiñai causaira pallangami.

6:9b.GAL.006.009 Ama sambayashunchi alira rangaj. Ñucanchi mana sambayasha, pactarishca punzhai pallashunmi.

6:10b.GAL.006.010 Shinajpi, lugar tiajpi, alira rashunchi tucuiunahua, maspas quirijgunahuas.

6:11b.GAL.006.011 Ricupaichi ima atun letrahua cangunama quillcauni ñuca quiquin maquihua.

6:12b.GAL.006.012 Aichai ali ricurishun nijguna cangunara circuncisionda rangaj mandanaun, paigunalla ama tormendari tucungaj Jesuspa cruz raigumanda.

6:13b.GAL.006.013 Circuncisionda rangaj nijgunallara ley camachishca shimira mana pactachinaun. Astaumbas cangunara circuncisionda rangaj munanaun canguna aichamanda alabai tucungaj.

6:14b.GAL.006.014 Ñucajpi ama lugar tiachu ñucallara alabaringaj, astaumbas ñucanchi Señor Jesucristo cruzpi cushiyasha, paimanda mundu ñucajma chacatashca aca, ñucas munduma.

6:15b.GAL.006.015 Cristo Jesuspiga, circuncisionda ranas mana ranas imajpas mana valinzhu, astaumbas mushuj causanami valin.

6:16b.GAL.006.016 Tucui cai camachishcai purijguna cushiras llaquinaras charinauchu, shinallara Diospa Israel.

6:17b.GAL.006.017 Cunamanda ñaupajma pihuas ama molestahuachu. Ñuca aichai Señor Jesuspa sefíalgunara charini.

6:18b.GAL.006.018 Uquiuna, ñucanchi Señor Jesucristo gracia nishca ali iyai canguna espirituhua tiachu. Amen.