1 Corinthians (Quichua)

1

1:1b.1CO.001.001 Pablo, Diospa munaimanda cayashca Jesucristo cachashca runa tucungaj, ñucanchi uqui Sostenesndi,

1:2b.1CO.001.002 Corinto llactai tiaj Diospa iglesiama quilícanchi, Cristo Jesuspi chicanyachishcaunama, chuyajguna tucungaj cayashcauna, shinallara tucui Señor Jesucristo shutii mañajgunaras, maibi tiaushas, quilícanchi. Paiga paiguna Señormi, shinallara ñucanchijpas.

1:3b.1CO.001.003 Gracia nishca ali iyairas cushi shunguras charichi ñucanchi Yaya Diosmanda, Señor Jesucristomandas.

1:4b.1CO.001.004 Tucui horas, Pagarachu nisha, ñuca Diosta agrasiuni canguna raigumanda, shinallara cangunama cushca Diospa gracia nishca ali iyaimandas Cristo Jesuspi;

1:5b.1CO.001.005 imasna canguna Cristoi pactajta bendiciai tucushcanguichi tucui shimiunais, tucui intindinais;

1:6b.1CO.001.006 imasna Cristomanda cuentashca shimi ali cierto ajta ricuchishcara cangunama.

1:7b.1CO.001.007 Shina ajllaira canguna ñucanchi Señor Jesucristo ricurimunara chapausha, mana imas Dios cuyashca pishinzhu cangunahua.

1:8b.1CO.001.008 Paiga canguna quirishcai cangunara shinzhiyachingami puchucai punzhagama, canguna causa illaj tucungaj ñucanchi Señor Jesucristo shamuna punzha pactamujpi.

1:9b.1CO.001.009 Dios cierto quirihuajllami. Paiga cangunara cayaca paihua Churi ñucanchi Señor Jesucristohua pariju compañasha causangaj.

1:10b.1CO.001.010 Cangunara rugauni, uquiuna, Señor Jesucristo shutira llaquishcamanda, canguna tucui shina tonoi rimanguichi, ama chican montombi chaupirisha, astaun tucui parijulla shu iyaiyujlla tucusha, shu iyarinallahuas, shu ricunallahuas.

1:11b.1CO.001.011 Cloeguna cuentahuanauca imasna cangunapura piñanaunguichi, ñuca uquiuna.

1:12b.1CO.001.012 Casna rimasha nini: Cangunamanda shu runa nin: Ñuca Pablo runami ani; shujga, Apolospaj, shujga Cefaspaj, shujga Cristohuajmi ani, nisha.

1:13b.1CO.001.013 ¿Cristoga chaupirishca chari? ¿Pablo canguna randimanda chacatashcachu aca? ¿Pablo shutii bautisaricanguichiri?

1:14b.1CO.001.014 Diosta agrasini imasna cangunamanda mana pitas bautisacani, randi Crispollara Gayollaras,

1:15b.1CO.001.015 ama pihuas rimachu: Pablo shutii bautisaricani, nisha.

1:16b.1CO.001.016 Maspas Estéfanaspa aillura bautisacani. Chishujgunamanda mana pitas bautisacani yachin. Mana iyai tianzhu.

1:17b.1CO.001.017 Ñucaraga Cristo mana cachahuacachu bautisangaj, astaun evangelio ali shimira camachingaj. Mana rimacanichu yachashca shimihua, Cristo cruzta ama yanga rashca tucuchu.

1:18b.1CO.001.018 Chi cruzta cuentaj shimiga yanga shimimi nisha iyanaun chingariujguna, randi ñucanchima, quishpichiscauna asha, cai shimi Diospa ushaimi iyanchi.

1:19b.1CO.001.019 Quillcashcami tian: Yachajguna yachashcara huajlichishami, iyaiyujguna iyaira ichushami.

1:20b.1CO.001.020 ¿Maibirairi yachaj? ¿Maibirairi ley shimira yachachij? ¿Maibirairi cuna horas rimaisiqui runa? ¿Manzhu Dios cai pacha yachanara yanga shimira cuenta rashca?

1:21b.1CO.001.021 Dios pai yachashcamanda cushcasna, mundu paita mana tupacachu paihua quiquin yachanamanda. Astaun Dios cucami quirijgunara quishpichingaj yanga nishca shimira camachishcamanda.

1:22b.1CO.001.022 Judío runaunaga munanaita rashcara ricuchihuai, ninaun; griego runaunaga yachanara mascanaun.

1:23b.1CO.001.023 Astaun ñucanchi Cristora chacatashcara camachinchi, judioguna ricujpi shu nijtana shimi, gentilguna ricujpi shu yanga loco shimi cuenta.

1:24b.1CO.001.024 Randi cayashcauna ricujpi, judio ashas gentil ashas, Cristoga Diospa ushaimi, Diospa yachanami.

1:25b.1CO.001.025 Dios yanga samira rashcaga runa yachanara yalin. Dios irqui samira rashcaga runamanda yali shinzhimi.

1:26b.1CO.001.026 Ricuichi uquiuna, imasna cayashca acanguichi. Cangunahua mana yapa ashca yachajguna tian, runa ricujpi, mana yapa ashca ushajguna, mana yapa ashca charíjguna.

1:27b.1CO.001.027 Astaunga Dios mundumanda upa ajgunara ajllacami yachaiyujgunara pingachingaj; shinallara mundumanda mana ushajgunara Dios ajllacami ushajgunara pingachingaj.

1:28b.1CO.001.028 Mundumanda pogriunaras, chijnishcaunaras Dios ajllaca, maspas ima illajtas ajllaca tiajgunara tucuchingaj.

1:29b.1CO.001.029 Dios shinami rarca pihuas ama valijmi ani nisha rimachu paihua ñaupajpi.

1:30b.1CO.001.030 Cristo Jesuspi Diospajguna anguichi. Dios rashcamanda Cristo ñucanchima yachanas, ali tucunas, chicanyachinas, rándisha llushpichinas tucushcami;

1:31b.1CO.001.031 imasna quillcashcami tian: Pi runas alabasha nisha, Diosta alabachu.

2

2:1b.1CO.002.001 Shina ajllaira, uquiuna, ñuca cangunajma shamushca horas, Diospa shimira rimangaj, sumaj shimiunahua yachana shimiunahuas mana shamucanichu.

2:2b.1CO.002.002 Casna nisha iyacani: Cangunajpi tiausha mana imaras yachashachu astaun Jesucristollaras, pai chacatashcaras.

2:3b.1CO.002.003 Ñucaga sambayashca asha, manzhasha, chucchusha cangunahua tiaucani.

2:4b.1CO.002.004 Ñuca rimasha, ñuca camachisha, mana uyanalla shimihuas, mana runa yachanahuas rimacani, astaun Espíritu ricuchishcahuas ushaihuas rimacani.

2:5b.1CO.002.005 Casna rimacani canguna quirina ama runa yachashcai astaun Diospa ushanai shayarichu.

2:6b.1CO.002.006 Shinajpi yachana shimira ña yachajgunahua rimanchi. Cai yachanaga mana cai tiempomandachu, mana cai tiempo apuunamandachu. Chiguna tucui huañunaun.

2:7b.1CO.002.007 Ñucanchiga Dios pacashca yachana shimira rimanchi, paihua mana ricurij yachanara. Cai yachanaga callan horasmanda pacha Dios cuca ñucanchira sumacyachingaj.

2:8b.1CO.002.008 Cai yachanaraga cai tiempo apuunamandas mana pihuas intindicachu. Paiguna cai yachanara intindishca ashaga, Sumaj Ahua Pacha Señorda mana chacatanaunmaca.

2:9b.1CO.002.009 Randi, imasna quillcashca tian: Ima ñahui mana ricushcaras, ima rinri mana uyashcaras, runa shungüi mana iyashcaras, caigunara Dios puruntushcami paita llaquijguna gustangaj.

2:10b.1CO.002.010 Astaumbas Dios caigunara ñucanchima ricuchishcami paihua Espiritumanda. Espirituga tucuira mascan, ricun, Diospa atun yachanandi.

2:11b.1CO.002.011 ¿Pita yachan runa iyashcaunara? Dueño espiritullami yachan. Shinallara Dios iyashcaunara mana pihuas yachacachu. Diospa Espiritullami yachaca.

2:12b.1CO.002.012 Cai pachamanda espiritura mana apishcanchichu, astaun Diosmanda Espiritura apishcanchi, pai ñucanchima cuyashcara ricsingaj.

2:13b.1CO.002.013 Caitaga mana rimanchichu runamanda yachana shimiunahua, astaun Espíritu yachachishca shimiunahua, Espíritu iyashcara, Espíritu cushca shimiunahua rimasha

2:14b.1CO.002.014 Randi yanga runa Diospa Espíritu iyaigunara mana ansas ricsinzhu, yanga shimimi yachin, nisha. Shinallara intindinara mana ushanzhu. Espiritui intindinallami.

2:15b.1CO.002.015 Espirituyuj runaga tucuira caman, randi mana pihuas paita camanzhu.

2:16b.1CO.002.016 ¿Pita Señorba iyaira yachan? ¿Pi paita yachachinga? Randi ñucanchi quiquin Cristo iyaira charinchimi.

3

3:1b.1CO.003.001 Uquiuna, cangunahua rimanara mana ushanchichu Espirituyujgunama cuenta, astaun ucha aicha munaira catijgunama cuenta, Cristoi huahua cuenta ajgunama.

3:2b.1CO.003.002 Leche yacullara upichisha, micunara mana caracanichu. Chi horaspi, micunara mana ushacanguichi, cunagamas mana ushanguichichu.

3:3b.1CO.003.003 Chara aicha munaira catijguna anguichi. Chijnijguna, piñanaujguna cangunahua tiausha, ¿manzhu aicha munaira catijguna anguichi yanga runauna cuenta purisha?

3:4b.1CO.003.004 Shu runa nin: Ñuca Pablomanda quirij ani; shujga: Ñuca Apolosmanda ani, nin. Shina rimasha, ¿manzhu aicha munaira catijguna anguichi?

3:5b.1CO.003.005 ¿Pitairi Pablo? ¿Pitairi Apolos? Diosta sirvijgunami anchi cangunara quirichingaj, Dios caran dueñoma cushcasna.

3:6b.1CO.003.006 Ñuca tarpucani, Apolos yacura talica. Diosga iñachicami.

3:7b.1CO.003.007 Shinajpi tarpujpas yacura talijpas mana imaschu, randi iñachij Dioslla valin.

3:8b.1CO.003.008 Tarpujpas talijpas shujllami; shina ajllaira caran dueño pai rashca tupura apingami.

3:9b.1CO.003.009 Ñucanchi Dioshua pariju tarabajguna anchi, cangunaga Diospa chagra, Dios shayachishca huasi cuenta anguichi.

3:10b.1CO.003.010 Imasna Dios paihua gracia nishca ali iyaira cuhuaca, ñuca shu huasi rana yachaj cuenta istandi siquira churacani. Shu runaga chi ahuai huasira shayachin. Caran dueño cuirachu imasna rashara shayachin.

3:11b.1CO.003.011 Shu istandi siquiras mana pihuas ushanzhu churanara. Ña churashca istandi siqui Jesucristollami.

3:12b.1CO.003.012 Cai istandi siqui ahuai, maicambas curira, cullquira, valij rumiunara, caspira, quihuara, pangaunara paltasha shayachisha,

3:13b.1CO.003.013 caran dueño rashca tono ricuringami. Ricuchina punzhai ricsichishca anga. Ninai ricsichishca anga. Caran dueño rashca tupura ninahua camashca anga, ima tono ajpis.

3:14b.1CO.003.014 Maican runa rashcauna shayachishcai paltashca mana rupajpi, paganara apingami.

3:15b.1CO.003.015 Maican runa rashca tono rupajpi, pai pirdinga. Astaun pailla quishpingami, ninamanda quishpishcasna.

3:16b.1CO.003.016 ¿Manzhu yachanguichi imasna Diospa templo huasi anguichi, imasna Diospa Espíritu cangunajpi causan?

3:17b.1CO.003.017 Maicambas Diospa huasira tulajpi, Dios paita tulangami. Diospa huasiga chicanyachishcami, cangunami cai huasi anguichi.

3:18b.1CO.003.018 Ama pihuas paulara umachichu. Cangunamanda maican runas: Cai tiempoi yachajmi ani, nisha, paihua yachanara saquichu, ali yachanara apingaj.

3:19b.1CO.003.019 Dios ricujpi, cai mundu yachana yanga upa cuenta yachanami. Quillcashca tian: Yachajgunara paiguna quiquin yachaushcai apin.

3:20b.1CO.003.020 Shinallara nin: Yachajguna iyashcaunaras Señor yachan, mana imajpas valinzhu.

3:21b.1CO.003.021 Chiraigumanda pihuas runaunara ama alabarichu.

3:22b.1CO.003.022 Tucui imas cangunajmi: Pablo, Cefas, cai pacha, causai, huañui, cuna horas, huasha horas, tucui tucui cangunajllami.

3:23b.1CO.003.023 Cangunaga Cristojmi anguichi, Cristoga Diospajmi.

4

4:1b.1CO.004.001 Runauna ñucanchira ricsinauchu Cristora sirvijguna cuenta, Dios pacashca shimiunara yachachijguna cuenta.

4:2b.1CO.004.002 Maspas ministirinmi yachachijgunahua shimira pactachijguna anauchu.

4:3b.1CO.004.003 Cangunas, shu camajgunas ñucara camanaupi, mana yapa casunichu. Ñuca quiquinllaras mana camaunichu.

4:4b.1CO.004.004 Ñucajpi ima manali rana iyairas mana charinichu. Shina ajllaira mana chimandachu ali tucuni. Ñucara camajga Señormi.

4:5b.1CO.004.005 Shinajpi ama ñaupara taripanguichichu, Señor shamunagama. Paiga tucui llandui pacashcaras punzhai ricuchingami, tucui runa shungüi rasha nisha iyarishcaunaras. Chi horasllaira caran dueño Diosmanda paita alabashcara apingami.

4:6b.1CO.004.006 Cai tucuira ricuchishcani, uquiuna, ñucajpis Apolospajpis, shu ricuchina cuenta, cangunara llaquishcamanda, cangunaras yachachingaj quillcashca shimira casusha puringaj, ama mas tucusha, shu yachachijta valichisha shujtaga mana valichisha.

4:7b.1CO.004.007 ¿Pita canda chicanyachin shujgunamanda? ¿Imara mana cuyashcara charinguiri? ¿Cuyashca ajpiga, ima rasha mas tucungui mana apij cuenta asha?

4:8b.1CO.004.008 Ña basta sajsashcanguichi. Ña charijguna tucushcanguichi. Ñucanchi illaushcai rey apuuna cuenta mandanguichi. Canguna rey apuuna tucunauchu nisha munanchi, ñucanchi shinallara cangunahua pariju rey apuuna tucungaj.

4:9b.1CO.004.009 Ñuca ricujpi, ñucanchi Dios cachashca runauna asha, pai ñucanchira churashcami puchucaigunara cuenta ricui tucungaj, huañungaj tarípashcaunara cuenta. Ricui tucushcanchi mundu ñahui pambais, angelguna ñahui pambais, runauna ñahui pambais.

4:10b.1CO.004.010 Cristora llaquishcamanda upauna cuenta tucushcanchi, astaun cangunaga iyaiyujguna anguichi; ñucanchi sambauna, canguna ursayujguna; canguna ali rimashcauna, ñucanchiga mana valichishcauna.

4:11b.1CO.004.011 Cunagama yarcachisha, upinaichisha, llushti asha, sajmai tucusha, huasi illaj tiashcanchi.

4:12b.1CO.004.012 Sambayasha tarabanchi, ñucanchi quiquin maquillahua rasha. Maldiciashca ajpi, bendicianchi. Tormendachinaupis ahuantanchi.

4:13b.1CO.004.013 Caminaupis ruganchi. Cunagama cai mundumanda chinda cuenta tucushcanchi, tucui runauna ichushca basura cuenta.

4:14b.1CO.004.014 Caita mana quillcauni cangunara pingachingaj, randi camachingaj, ñuca quiquin llaquishca churiunara cuenta.

4:15b.1CO.004.015 Cristoi chunga huaranga yachachijgunara charishallara, mana ashca yayaunara charinguichi. Ñucaga Cristo Jesuspi canguna yaya tucucani, paihua evangelio ali shimimanda.

4:16b.1CO.004.016 Chimanda nini, ñucara catiríjguna tucuichi.

4:17b.1CO.004.017 Chi raigumandalla Timoteora cachacani, paiga ñuca llaquishca churimi Señorbi, ñuca shimira pactachij. Cangunara iyarichingami ñuca Cristo ñambü puriushcara, ima samira yachachiuni tucui partii, tucui iglesiaunai.

4:18b.1CO.004.018 Huaquingunaga mas tucuisiquiuna tucushcanguichi, ñuca mana imahoraspas shamungaraushca cuenta.

4:19b.1CO.004.019 Randi Señor munajpi uctalla shamushami. Shamushaga, mas tucuisiquiunara ricsisha; mana paiguna shimira, astaumbas paiguna ushaira yachangaj.

4:20b.1CO.004.020 Dios mandana pacha mana shimiunamandallachu, astaun ushaimandami.

4:21b.1CO.004.021 ¿Imara munanguichi? ¿Caspihuachu livachingaj shamusha? ¿Llaquij manso shunguhuachu shamusha cangunajma?

5

5:1b.1CO.005.001 Cierto pacha cangunamanda shu runa huarmihua tacarishca ninaun. Chi tupullara mana rimanaunlla gentilgunahua. Shu runa paihua quiquin yaya huarmihua causaun, ninaun.

5:2b.1CO.005.002 Cangunaga mas tucuisiqui anguichi. ¿Manzhu llaquirina acanguichi, casna raj runara cangunajmanda anzhuchingaj?

5:3b.1CO.005.003 Cierto pacha ñucaga ñuca aichai cangunahua pariju mana tiaushallara, astaun espiritui tiausha, cangunahua tiaushcasna chita raj runara ña taripashcani.

5:4b.1CO.005.004 Cangunaga tandarisha, ñuca espíritu cangunahua tiaushas, Señor Jesucristo ushaihua,

5:5b.1CO.005.005 Señor Jesucristo shutii chi runara Satanasma entregaichi, paihua aichara tucuchingaj, randi paihua espíritu quishpichi tucungaj Señor Jesuspa punzhai.

5:6b.1CO.005.006 Mana valinzhu canguna alimi anchi nishcara: ¿Manzhu yachanguichi imasna ansahualla tandara punguichina polvo enterora punguichin?

5:7b.1CO.005.007 Shinajpi, rucu punguichina polvora ichuichi, canguna mushuj tanda tucungaj, punguichina polvo illaj, canguna ashcasna. Cristo ñucanchira quishpichina borregora ña huañuchiscami ñucanchimanda, ñucanchi pascua nishca cuenta.

5:8b.1CO.005.008 Shinajpi, istara rashunchi, mana rucu punguichina polvohua, mana manali shungu manali rana punguichina polvounahuas, astaun mana punguirishca tanda cuenta ali ranahuas cierto shimihuas istara rashunchi.

5:9b.1CO.005.009 Cangunara quillcacani shujhua tacarijgunah.ua ama compañangaj, nisha.

5:10b.1CO.005.010 Randi, ñuca casna nisha, mana nicanichu cai pachai tiaj shujhua tacarijgunahua, cullquira yapajta munajgunahuas, shuhuajgunahuas, runa rashca diosta adorajgunahuas ama compañangaj. Ñuca casna nishca ajpiga, cai mundumanda llucshinara ministinguichima.

5:11b.1CO.005.011 Astaun, casnami nisha quillcacani: Shu uqui nishca runa shujhua tacarij ajpi, cullquira yapajta munaj ajpi, runa rashca diosta adoraj ajpi, maldiciaj, machaisiqui, shuhuaj ajpis, ama paihua puringuichi. Cai sami runahua ama micunguichichu.

5:12b.1CO.005.012 ¿Ima rasha iglesiamanda canzhai ajgunara taripaimacani? ¿Manzhu canguna iglesia ucui tiajgunara taripanguichi?

5:13b.1CO.005.013 Iglesiamanda canzhai ajgunara Diosmi taripanga. Chi uchara raj runara cangunajmanda anzhuchichi.

6

6:1b.1CO.006.001 Cangunamanda shuj shu uquira piñashaga, ¿manzhu pingaringuichima mana quirijguna ñaupajpi taripachingaj? ¿Manzhu quirijguna ñaupajma riña aca taripachingaj?

6:2b.1CO.006.002 ¿Manzhu yachanguichi imasna quirijguna mundura taripanara? Canguna mundura taripangaj rajguna asha, ¿manzhu ushanguichi ichilla taripanaunaras?

6:3b.1CO.006.003 ¿Manzhu yachanguichi imasna angelgunara taripashun? Shinashas, maspas cai causaimanda taripanaunara taripanami anchi.

6:4b.1CO.006.004 Cai causaimanda ima taripana tiajpis, ¿ima rasha quirijguna ricujpi pishi valijguna ñaupajpi taripachinguichi?

6:5b.1CO.006.005 Cangunara pingachingaj shina nini. ¿Illanzhu cangunajpi shu iyaiyuj runas uquipura taripangaj?

6:6b.1CO.006.006 Astaunga, shu uqui shu uquira taripachin, shina rasha mana quirijguna ñaupajpi raun.

6:7b.1CO.006.007 Cangunapura taripajpi yapa mana valinzhu. Astaun ¿ima rasha mana ahuantangui canda manali rashcara? ¿Ima rasha mana ahuantangui quichusha nishcara quichunauchu?

6:8b.1CO.006.008 Randi canguna quiquin uquiunara manalira raunguichi, shinallara uquiunamandas quichunguichi.

6:9b.1CO.006.009 ¿Manzhu yachanguichi, Dios mandana pachara mana apinaungachu manalira rajguna? Ama pandanguichichu: shujhua tacarijgunas, runa rashca diosta adorajgunas, huarmihua tacarijgunas, irusta rajgunas, caripura tacarijgunas,

6:10b.1CO.006.010 shuhuajgunas, munaisiquiunas, machajgunas, camijgunas, umachisha quichujgunas, Dios mandana pachara mana apinaungachu.

6:11b.1CO.006.011 Casna samira rajgunas acanguichi huaquinguna. Randi armachishca acanguichi, chicanyachishca acanguichi, alichi tucushcanguichi Señor Jesucristo shutii, ñucanchi Diospa Espiritumandas.

6:12b.1CO.006.012 Tucui imaras ranallami ñucahua, astaun mana tucui valinzhu; shinajllaira lugarda mana cunichu ima ranas ñucara vencingaj.

6:13b.1CO.006.013 Micunaga icsajmi, icsas micunajmi. Ishquindira Dios huasha tucuchinga. Runa aichaga mana rashcachu aca shujhua tacarisha causangaj. Runa aicha Señorbajmi, Señorbas runajmi.

6:14b.1CO.006.014 Señorda atarichij Diosga shinallara ñucanchira atarichingami paihua ushaihua.

6:15b.1CO.006.015 ¿Manzhu yachanguichi imasna canguna aicha quiquin Cristo aicha partimi? ¿Shinajpi Cristo aicha partira quichusha, shujhua tacarij huarmima cushachu? ¡Mana pacha!

6:16b.1CO.006.016 ¿Manzhu yachanguichi imasna shu cari shu shujhua tacarij huarmihua tacarisha paigunapura shu aichalla tucun? Quillcashca tian: Chi ishquiga shu aicha tucunaunga.

6:17b.1CO.006.017 Randi maicambas Señorhua llutarisha paihua shu espiritulla tucun.

6:18b.1CO.006.018 Shujhua tacarinamanda miticuichi. Shu tono uchaunaga aichamanda canzhaimi, randi shujhua tacarisha, dueño paihua quiquin aichara huajlichin.

6:19b.1CO.006.019 ¿Manzhu yachanguichi imasna canguna aicha Santo Espíritu causana huasi ashcara, paiga canguna shungüi tian, Diosmanda paita charinguichi? Mana canguna quiquimbajchu anguichi.

6:20b.1CO.006.020 Randishca mari acanguichi. Shina asha, Diosta ahuayachinguichi canguna aichai, canguna espirituis. Diospajmi anaun.

7

7:1b.1CO.007.001 Canguna quillcai tapushcamanda rimasha nini. Alimi cari huarmira ama llangachu.

7:2b.1CO.007.002 Astaun tacarisha tentarinamanda caran dueño paihua quiquin huarmira charichu, huarmis quiquin carira charichu.

7:3b.1CO.007.003 Cariga huarmihua casarashcai ranaunara pactachichu, shinallara huarmis carihua.

7:4b.1CO.007.004 Huarmi aichaga mana paihuajchu astaun paihua carijmi.

7:5b.1CO.007.005 Ama mitsanuichichu. Huaquin horasllai ishquindimanda munashaga saquinauchu, cungaillai Diosta mañangaj. Chi huashaga cutillara llutarinauchu, ama supai cangunara tentangaj ahuantanara mana ushashcamanda.

7:6b.1CO.007.006 Ñuca casna rimani mana mandasha, astaun lugarda cusha.

7:7b.1CO.007.007 Ñuca munani astaun, tucui runauna ñuca cuenta anauchu. Randi caran dueño Diosmanda paihua quiquin cuyashcara charin, shuj shu tonora, shujpas shu tonora.

7:8b.1CO.007.008 Maltaunaras, huaccha huarmiunaras nini: Alimi anma ñuca cuenta shinallara saquirinauchu.

7:9b.1CO.007.009 Randi ahuantanara mana ushashaga casaranauchu; casaranaipi huañuushaga, astaun alimi anma casarangaj.

7:10b.1CO.007.010 Casarashcaunaraga mandani, huarmi carimanda ama llushpirichu. Caitaga mana ñuca mandashca astaun Señor mandashcami.

7:11b.1CO.007.011 Llushpiríshaga, ama shujta apichu; mana casna rashaga cutillara llutarichu paihua quiquin carihua. Shinallara cariga ama ichuchu paihua huarmira.

7:12b.1CO.007.012 Shujgunama casna nini ñuca, mana Dios rimanzhu: Maican uqui shu mana quirij huarmira charisha, huarmi paihua pariju causasha nijpi, cari paita ama ichuchu.

7:13b.1CO.007.013 Shinallara huarmi mana quirij carira charisha, cari paihua pariju causasha nijpi, huarmi paita ama ichuchu.

7:14b.1CO.007.014 Mana quirij cari Diosma chicanyachishca tucun paihua huarmi raigumanda; shinallara mana quirij huarmi paihua cari raigumanda Diosma chicanyachishca tucun. Mana shina ajpi canguna churiuna yanga huahuaunami anaunma, astaun cuna chicanyachishca huahuaunami.

7:15b.1CO.007.015 Mana quirijga llushpirisha nijpi llushpirichu. Shina llushpirijpi, quirij uqui quirij pañi lugaryanmi. Dios ñucanchira cayahuaca cushihua causangaj.

7:16b.1CO.007.016 Huarmiga, ¿imara yachangui, camba carira quishpichingui chari? Cariga, ¿uñara yachangui, camba huarmira quishpichingui chari?

7:17b.1CO.007.017 Caran dueñoga Señor cushcallai causachu, Dios cayashcallais. Casnami mandani tucui iglesiaunai.

7:18b.1CO.007.018 ¿Shu runa pai cayashcai circuncisionda rashcachu acai? Shina asha saquirichu. ¿Shujga mana circuncisionda rashcai cayai tucucai? Ama rachu circuncisionda.

7:19b.1CO.007.019 Circuncisionda ranas mana ranas mana imaschu, randi Dios mandashca shimira pactachina yapa valinmi.

7:20b.1CO.007.020 Caran dueño Dios cayashca horaspi tiashcasna tiachu.

7:21b.1CO.007.021 ¿Can cayashca horaspi, sirvijchu acangui? Ama llaquirichu. Randi cacharinaupi llushpiringuilla.

7:22b.1CO.007.022 Maican runa sirvij ashcai cayashca tucujpi, Señorbi cacharishca runa cuenta tucun. Shinallara pihuas liuri ashcai cayashca tucujpi, Cristora sirvij runami tucun.

7:23b.1CO.007.023 Paganahua randishca acanguichi. Shinasha runaunara sirvijguna ama tucunguichichu.

7:24b.1CO.007.024 Shinajpi, uquiuna, imasna shu runa pai cayai tucushcasna, shinallara tiachu Diospa ñaupajpi.

7:25b.1CO.007.025 Huanra huarmiunamanda ima mandashca shimiras mana charinichu Señormanda, randi ñuca iyaimandalla rimani. Shina ajllaira, Señor ñucara llaquishcamanda, ñuca shimi quirinallami.

7:26b.1CO.007.026 Ñuca ricujpi, casna tormendarina horaspi alimi shu runa pai tiashcasnalla tiangaj.

7:27b.1CO.007.027 ¿Canga, huarmiyujchu angui? Ama mascaichu llushpiringaj. ¿Huarmi illajchu angui? Casarangaj ama mascaichu.

7:28b.1CO.007.028 Randi can huarmira apishaga mana uchara raungui. Huanra huarmis casarasha mana uchara raun. Shina ajllaira casarajguna tormendarinaungami cai causaibi. Cai tormendarinamanda cangunara quishpichisha nicani.

7:29b.1CO.007.029 Shina ajllaira uquiuna, cangunara nini, tiempouna tucurinaun. Cunamanda huarmiyujguna mana huarmiyujgunasna causanauchu.

7:30b.1CO.007.030 Huacajguna mana huacajgunasna anauchu. Cushiyajguna mana cushiyajgunasna anauchu. Randijgunas mana imaras charijgunasna anauchu.

7:31b.1CO.007.031 Cai mundura gustajguna mana gustajgunasna anauchu. Cai mundu ricurina tono ña pasariunmi.

7:32b.1CO.007.032 Ñuca munani canguna ama llaquirisha tianauchu. Malta runa Señorbajta iyarin imasna Señorda cushiyachingaj.

7:33b.1CO.007.033 Huarmiyuj cariga mundura ricun paihua huarmira cushiyachingaj.

7:34b.1CO.007.034 Cariyuj mana cariyujpas shinallara caran samira iyarinaun. Huanra huarmi Señorbajta ricun chicanyachishca tucungaj, aichais espirituis. Randi cariyuj huarmiga cai mundumandara iyarin imasna rashara carira cushiyachingaj.

7:35b.1CO.007.035 Ñuca caita nini cangunara yanapangaj; mana shu tugllai cuenta urmachingaj, astaun ima aliras ima ali ricurijtas rai tucuchu, shinallara mana imas arcarichu canguna Señorbajma mayanllayamungaj.

7:36b.1CO.007.036 Shu runa paihua huanra ushushira mana ali rasha iyajpi, pai ña rucuyaupi casarangaj, shinallara yapa ministirijpi huarmi casar achu, shina rasha mana uchara ran.

7:37b.1CO.007.037 Astaun, pai shinzhi runa asha, ushushi casarangaj mana ministijpi, paihua munaira shinzhi huacachij asha, paihua ushushira mana casarachisha iyasha, paita huanralla huacachisha nisha, alimi raun.

7:38b.1CO.007.038 Shinajpi casarachij yaya alirami raun, mana casarachij yayaga astaun alirami raun.

7:39b.1CO.007.039 Casarashca huarmi paihua carihua huatashcami cari causaushcai. Randi cari huañujpiga, huarmi ña lugaryashcami, maicandas casarasha nijpi ushanllami, pai Señorbi quirij ajpi.

7:40b.1CO.007.040 Randi ñuca ricujpi huarmi shinalla tiasha mas cushi tucunma. Casna nisha Diospa Espíritu munaira charinimi nisha iyauni.

8

8:1b.1CO.008.001 Runa rashca diosgunama ricuchishca micunamanda rimasha, ricsinchimi imasna tucui ñucanchi yachanimi nisha iyaunchi. Yachanaga runara yanga atunyachin, randi llaquinaga iñachin.

8:2b.1CO.008.002 Maicambas ñuca yachanimi nisha, chara mana imaras yachanzhu imasna rasha yachana anga.

8:3b.1CO.008.003 Maicambas Diosta llaquijpiga, Dios paita ricsin.

8:4b.1CO.008.004 Shinajpi runa rashca diosgunama ricuchishca micunamanda rimashaga, ñucanchi yachanchi imasna shu runa rashca dios mana imaschu cai mundui. Shu sapalla Diosmi tian.

8:5b.1CO.008.005 Huaquin dios nlshcauna tiashas cielois cai pachais, imasna ashca diosguna, ashca señorguna tianaun,

8:6b.1CO.008.006 shinajllaira ñucanchihua shu sapalla Dios tian, Dios Yayami. Paimandalla tucui rashcauna llucshinaun, ñucanchis paihuajta causaunchi. Shinallara shu Señor Jesucristollami tiaun. Paimandalla tucui imaras rashca aca, ñucanchis paimanda manchi.

8:7b.1CO.008.007 Randi mana tucui runauna caita intindinaunzhu. Huaquinguna ñaupa horasmanda runa rashca diosgunara adorajguna asha, cunagamas chi micunara micunaun chi diosgunama ricuchishcasna iyasha; shina rajpi, paiguna ali rana iyai samba asha huajlirin.

8:8b.1CO.008.008 Micunamanda mana mas chasquihuaj tucunchi Diospa ñaupajpi. Micusbas mana mas valij tucunchi, mana micushas mana pishi valij tucunchi.

8:9b.1CO.008.009 Ricuichi canguna liuri ashcara sambaunara ama urmachingaj.

8:10b.1CO.008.010 Shu runa canda runa rashca diospa huasi mesai tiajta ricusha, can Diosta ricsij runa asha, paiga samba runa asha, ¿manzhu runa rashca diosma ricuchishca micunara mas mas micungairi?

8:11b.1CO.008.011 Shina rasha, can yachashcamanda chi samba uqui urmasha chingarin. Chi uqui raigumandaga Cristo huañuca.

8:12b.1CO.008.012 Shina rasha, can uquiuna ñaupajpi uchara rasha, paiguna samba shungura chugrichisha, Cristo ñaupajpi uchara raungui.

8:13b.1CO.008.013 Chi raigumanda, micuna ñuca uquira urmachijpi, ñucaga imahoraspas mana micushachu aichara, ñuca uquira ama urmachingaj.

9

9:1b.1CO.009.001 ¿Manzhu Dios cachashca runa ani? ¿Manzhu liuri runa ani? ¿Manzhu ricushcani ñucanchi Señor Jesucristora? ¿Manzhu Señorbi canguna ñuca tarabana anguichi?

9:2b.1CO.009.002 Shujguna ñucara mana cachashca runachu ninaupis, cierto pacha canguna ricujpi cachashcami ani. Canguna ñuca cachashca ajta ricuchinami anguichi Señorbi.

9:3b.1CO.009.003 Ñucara causayachijgunama casna nisha cutipani:

9:4b.1CO.009.004 ¿Manzhu dirichura charinchi micungajpas upingajpas?

9:5b.1CO.009.005 ¿Manzhu dirichura charinchi quiquin casarashca quirij huarmira pushangaj, chishu cachashca runaunasna, Señorba uquiunasna, Cefasnas?

9:6b.1CO.009.006 Ñucas, Bernabés, ¿ñucanchillas tarabanara saquingaj mana ushanchichu?

9:7b.1CO.009.007 ¿Pi soldaros paihua quiquin cullquihuachu guerrara rarcai? ¿Pi runas uvillas yurara tarpusha, paihua muyumanda manzhu upingai? Pi runas chivounara cuirasha, paigunamanda lechera manzhu upingai?

9:8b.1CO.009.008 ¿Caita, yanga runasna rimasha ninichu? ¿Manzhu shinallara nin ley mandashca shimi?

9:9b.1CO.009.009 Moisés cushca ley shimii casna nin: Muyura aitasha llushtiu huagra shimira ama huataichu. ¿Dios huagrallarachu casna rimasha cuiran?

9:10b.1CO.009.010 ¿Manzhu ñucanchimandas iyarin? Ari, ñucanchira yachachingaj quillcashcami. Huachuj runa cushihua chapasha huachuchu. Muyura llushtij runas cushihua chapasha llushtichu, huasha micunara iyarisha.

9:11b.1CO.009.011 Ñucanchi canguna espiritui imaras tarpusha, ¿manzhu pallana anchi canguna charishcaunamanda?

9:12b.1CO.009.012 ¿Shujguna cangunajmanda pallanaupiga, manzhu ñucanchi maspas dirichura charinchi pallangaj? Casna rana dirichura mana apishcanchichu. Astaun imaras ahuantashcanchi Cristo aü evangelio shimira ama arcangaj.

9:13b.1CO.009.013 ¿Manzhu yachanguichi imasna Diospa huasii chicanyachishcaunai tarabajguna Diospa huasimanda micunaun, shinallara altarbi sirvijguna altarmanda micunaun?

9:14b.1CO.009.014 Shinallara Señor mandashcaga casnami: evangelio shimira camachijgunaga evangelio shimimanda causanauchu.

9:15b.1CO.009.015 Randi ñucaga cai apinaunara imaras mana apishcanichu. Shinallara cai quillcashcai, chi apinaunaras mana apisha nishachu quillcashcani. Pihuas cai ñuca cushira quichusha nijpi, astaun ali huañunara munaima.

9:16b.1CO.009.016 Ñuca evangelio shimira camachishaga, ahuayanara mana ushanichu. Ursamanda camachinami ani. ¿Imara tucushairi Diospa shimira mana camachishaga?

9:17b.1CO.009.017 Caita ñuca munaimanda rashaga, paganara charishami. Randi mana ali munaihua rashaga, ñucara mandashca shimira pactachiuni.

9:18b.1CO.009.018 Shina rashaga, ¿ima cuyashcara apishairi? Caimi ñucara pagana: Cristo evangelio shimira camachisha, mana imaras apisha, yangamanda camachiuni, shimira camachishcamanda apiñara ushashas, mana apinichu.

9:19b.1CO.009.019 Mana pihuas ñucara mandajllaira, ñuca tucui runaunara sirvij tucushcani mas runaunara ganangaj.

9:20b.1CO.009.020 Judiogunama, judio cuenta tucucani, judiogunara ganangaj. Ley mandashca shimira uyajgunama, ley shimira uyajsna tucucani, uyajgunara ganangaj, ñuca mana uyaj ashallara.

9:21b.1CO.009.021 Ley shimira mana charijgunama, ley shimira mana charij cuenta tucucani, paigunara ganangaj, ñuca mana Dios mandashca shimi illaj asha, astaun Cristo mandashca shimira uyaj ani.

9:22b.1CO.009.022 Samba ajgunama samba sami tucucani, sambaunara ganangaj. Tucui runaunama ima tonos tucucani, ima tonoras rasha huaquingunara quishpichingaj.

9:23b.1CO.009.023 Cai tucuira rauni evangelio shimira llaquishcaraigumanda, paihua bendicionmanda imaras apingaj.

9:24b.1CO.009.024 ¿Manzhu yachanguichi imasna pulazai callpajguna tucui callpanaun, astaun shujlla cuyashcara ganan? Shina callpanguichi ganangaj.

9:25b.1CO.009.025 Maicambas callpasha nisha, paihua aicha munaira arcan; paiguna callpanaun ismuihuaj panga llaitura ganangaj, astaun ñucanchiga mana ismuihuaj llaitura ganangaj callpaunchi.

9:26b.1CO.009.026 Ñuca casna callpauni, mana yanga callpasha. Nuca casna macanauni, mana huairallara macasha.

9:27b.1CO.009.027 Astaun ñuca quiquin aichallara macauni, ñuca quiquin aichara sirvichinimi, ñuca shujgunara camachij tucushca huasha ama ichui tucungaj.

10

10:1b.1CO.010.001 Uquiuna, mana munanichu canguna cungaringaj imasna ñucanchi yayauna tucui puyu ucui tianauca, tucui Puca Lamarda pasanauca.

10:2b.1CO.010.002 Moisesma tucui bautisarinauca puyuis lamarbis.

10:3b.1CO.010.003 Dios cushca micunara tucui chi tonollara micunauca.

10:4b.1CO.010.004 Dios cushca upinara tucui chi tonollara upinauca, Dios cushca rumimanda llucshij ta, paigunara catij rumimanda. Cai rumiga Cristomi aca.

10:5b.1CO.010.005 Shinajllaira paigunamanda ashcaunahua Dios mana cushiyacachu. Chimanda tiyu pambai ichurinauca.

10:6b.1CO.010.006 Casna tucuca ñucanchira yachachingaj, ama paiguna cuenta irusta munangaj paiguna munashcasna.

10:7b.1CO.010.007 Ama runa rashca diosgunara adoranguichichu paigunamanda huaquinguna rashca cuenta, imasna quillcashcasna: Runauna tiarinauca micungaj upingaj, chihuasha atarinauca pujllangaj, nisha.

10:8b.1CO.010.008 Ama shujhua tacarishunchi paigunamanda huaquinguna rashca cuenta, imasna paiguna shina rashcamanda ishqui chunga quinsa huaranga tupu huañunauca shu punzhallai.

10:9b.1CO.010.009 Ama tentashunchi Señorda paigunamanda huaquinguna rashca cuenta, imasna ashcauna shina rajpi machacuiguna huañuchinauca.

10:10b.1CO.010.010 Ama piñashunchi Diosta, paiguna piñashca cuenta; huañuchij ángel paigunara huañuchica.

10:11b.1CO.010.011 Cai tucui tucunauca shu ricuchina cuenta, ñucanchira yachachingaj quillcashca aca, ñucanchiga puchucai punzhaunai causajguna anchi.

10:12b.1CO.010.012 Shinasha, maicambas ali shayaunimi nisha iyashaga, ali iyarichu ama urmangaj.

10:13b.1CO.010.013 Runaunara apiña tentaciongunalla cangunara apishcami. Diosga paihua shimira pactachijmi, mana lugarda cunga shu mana ahuantaihuaj tentación canda apingaj, astaun tentacionhua pariju shu quishpinara cachamunga canguna ahuantangaj.

10:14b.1CO.010.014 Shinajpi llaquishcauna, runa rashca diosta adoranamanda miticuichi.

10:15b.1CO.010.015 Iyaiyujgunara cuenta cangunara rimauni. Nuca rimashcara camaichi.

10:16b.1CO.010.016 Ñucanchi bendiciana vasora bendiciasha, ¿manzhu upiusha Cristo yahuarda pariju iyariunchi? Ñucanchi paquina tandaraga, ¿manzhu micusha Cristo aichara pariju iyariunchi?

10:17b.1CO.010.017 Imasna tanda shujlla ajpi, ñucanchi ashca ashas, shu aichallami anchi, tucui ñucanchi shu tandallara micushcamanda.

10:18b.1CO.010.018 Israel runaunara iyarichi paiguna causana tonoi. Sacrificio rashcaunara micujgunaga, ¿manzhu altarmanda micunaun?

10:19b.1CO.010.019 ¿Imasna ajpira shina nini? ¿Runa rashca dios cierto diosmi ninichuiri? ¿Runa rashca diosgunama sacrificioi ricuchishca micunaga valijmi ninichuiri?

10:20b.1CO.010.020 Mana shina ninichu. Astaun caita nini: Gentilguna sacrificiora rashaga, supaigunama ricuchinaun, mana Diosma. Canguna supaigunahua pariju rangaj mana munanichu.

10:21b.1CO.010.021 Señorba vasora upiusha, supaihua vasoras mana ushanguichichu upinara. Señorba mesai tiarisha, supaiguna mesais mana ushanguichichu tiarínara.

10:22b.1CO.010.022 ¿Señorda piñachishunzhuiri? ¿Paimanda yali ushajchu anchi?

10:23b.1CO.010.023 Tucuira rangaj lugarmi ani, shinajllaira mana tucuichu sirvin rangaj. Tucuira rangaj lugar ani, shinajllaira mana tucuichu ñucara shinzhiyachin.

10:24b.1CO.010.024 Pihuas paihua quiquin ali tucunara ama mascachu, astaun shujpa ali tucunara mascachu.

10:25b.1CO.010.025 Imaras aicha catuna huasii catushcara micuichilla, ama imaras tapusha ali rana iyaimanda.

10:26b.1CO.010.026 Cai pacha Señorbajmi, shinallara cai pachai tiajpas paihuajllami.

10:27b.1CO.010.027 Shu mana quirij runa cangunara cayajpi micungaj, canguna rinara munashaga, imara carashcaras micuichilla, mana imaras tapusha ali rana iyaimanda.

10:28b.1CO.010.028 Randi, shuj cangunama nijpi: Caiga runa rashca diosma sacrificioi ricuchishcami aca, ama micunguichichu, chi runa raigumanda, paihua ali rana iyaimanda.

10:29b.1CO.010.029 Paihua ali rana iyaimanda, nini, mana cambajmandachu. ¿Imaraigu shujpa ali rana iyaimanda ñuca taripashca ashairi?

10:30b.1CO.010.030 Ñuca, Pagarachu, nisha micushaga, ¿ima rasha cami tucushai chi ñuca agrasishca micunamanda?

10:31b.1CO.010.031 Shinajpi, micushas upishas imara rashas, tucuira raichi Diosta ahuayachingaj.

10:32b.1CO.010.032 Ama imaras ranguichichu shujgunara urmachingaj, judio ajpis, griego ajpis, Diospa iglesia ajpis.

10:33b.1CO.010.033 Ñucas shinallara imaras rasha, tucui runaunara cushiyachisha nini, mana ñuca quiquin ali tucunara iyarisha, randi

11

11:1b.1CO.011.001 Ñucara catirichi imasna ñucas Cristora catirini.

11:2b.1CO.011.002 Cangunara nini: Alimi rashcanguichi, uquiuna, ñucara iyarishcamanda, shinallara yachachishca shimiunara ñuca rimashcasna huacachishcanguichi.

11:3b.1CO.011.003 Shinajllaira canguna yachangaj munani imasna caran cari umaga Cristomi; shinallara caran huarmi uma paihua carimi. Cristo umaga Diosmi.

11:4b.1CO.011.004 Maican cari paihua umara quillpashcahua Diosta mañasha, Diosmanda rimashas, paihua umara pingachin.

11:5b.1CO.011.005 Randi huarmiga, Diosta mañasha, Diosmanda rimashas, mana umara quillpasha, paihua umara pingachin. Paihua uma llambu rutushcasna tucun.

11:6b.1CO.011.006 Shu huarmi umara mana quillpasha nisha, aechara pitichu. Pinganaita tucuna ajpi aechara pitingaj rutungaj, umara quillpachu.

11:7b.1CO.011.007 Cariga umara ama quillpanachu. Pai Diospa ricurinami, Diospa sumajta ricuchin. Astaun huarmi cari sumajta ricuchin.

11:8b.1CO.011.008 Cari mana huarmimandachu, astaun huarmi carimanda rashcami aca.

11:9b.1CO.011.009 Shinallara cari mana huarmi raigumandachu rashca, randi huarmi cari raigumanda rashcami aca.

11:10b.1CO.011.010 Chimanda huarmi casuna señalda charinami anga umai, angelguna ricuushcamanda.

11:11b.1CO.011.011 Astaun Señorbi cari huarmira ministin imasna huarmis carira ministin.

11:12b.1CO.011.012 Imasna huarmi carimanda rashca aca, shinallara cuna cari huarmimanda pagarin. Randi tucui Diosmanda shamun.

11:13b.1CO.011.013 Canguna ricujpi, ¿shu huarmi umara mana quillpasha Diosta mañajpi alichu?

11:14b.1CO.011.014 ¿Manzhu canguna quiquin iyaibi pinganaitami shu cari suni aechara charingaj?

11:15b.1CO.011.015 Astaun huarmiga suni acchayuj asha, caiga paihuajta valin. Acchaga paima cushcami quillpangaj.

11:16b.1CO.011.016 Shinajllaira huaquinguna cai shimira mana munajpis, ñucanchiga huarmi mana quillpana yachaira mana charinchichu, shinallarami tucun Diospa iglesiaunai.

11:17b.1CO.011.017 Ñuca ña rimangaraushcai cangunara mana alabanichu. Canguna tandarishaga, alira mana raunguichichu astaun manalira.

11:18b.1CO.011.018 Ñaupa pundaga, casna nisha cuentahuanauca: canguna iglesiai tandarisha saa chicanyanguichi, caran monton tucusha. Caita ñaca ñaca quirinimi.

11:19b.1CO.011.019 Ministirinmi huaquin tono iyarijguna tiangaj cangunahua, ali valijguna ricsi tucungaj cangunahua.

11:20b.1CO.011.020 Shinajpi canguna tandarisha, Señorba cenara micungaj mana shamunguichichu.

11:21b.1CO.011.021 Astaun, caran dueño paihua quiquin micunara uctalla micusha nin. Shina rajpi, shu runa yarcaihua tian, shujga machan.

11:22b.1CO.011.022 ¿Manzhu huasiunara charinguichi chihui micungaj upingaj? ¿Casna rasha, Diospa iglesiara pishiyachinguichichu? ¿Mana charijgunaras pingachinguichichu? ¿Imara nishai ñuca? ¿Cangunara aiabashachu? Mana pacha. Caimanda mana alabanichu cangunara.

11:23b.1CO.011.023 Ñuca cangunara yachachishcara quiquin Señormandami apicani, imasna Señor Jesús paita entregana tutai tandara apica;

11:24b.1CO.011.024 Diosta agrasishca huasha, tandara paquica. Apichi, micuichi, nica; caiga ñuca aichami cangunajta paquishca. Caita ranguichi ñucara iyaringaj.

11:25b.1CO.011.025 Shinallara micui pasashca huasha vasora apica, casna nisha: Cai vasoga mushuj pactachina shimimi, ñuca yahuarbi cushcami. Caran cuti upishaga, ñucara iyarisha ranguichi.

11:26b.1CO.011.026 Shinajpi tucui cuti cai tandara micusha, vinora upishas, Señor huañushcara ricuchinguichi, pai shamunagama.

11:27b.1CO.011.027 Maicambas cai tandara mana iyarishcahua micusha, Señorba vasora mana iyarishcahua upishas, Señorba aicharas yahuardas pishiyachishcamanda causayai tucungami.

11:28b.1CO.011.028 Chimanda caran dueño paulara camachu, shina rashas tandara micuchu vasora upichu.

11:29b.1CO.011.029 Maicans yangamanda micusha upisha, Señorba aichara mana iyarisha, taripanara micun, upin paihuajta.

11:30b.1CO.011.030 Chimanda ashca sambauna, ashca ungushcauna tianaun cangunahua, ashcauna huañuibi puñunaun.

11:31b.1CO.011.031 Ñucanchiga ñucanchillara camasha, mana taripai tucunchimachu.

11:32b.1CO.011.032 Astaun taripai tucujpiga, Señorga ñucanchira livachin, ñucanchi ama munduhua pariju causayai tucungaj.

11:33b.1CO.011.033 Shina ajpi, ñuca uquiuna, canguna micungaj tandarishaga, parijumanda chapaichi.

11:34b.1CO.011.034 Maicambas yarcachishca ashaga, paihua quiquin huasii micuchu, canguna tandarishcai ama taripai tucungaj. Ñuca shamushaga shujgunaras alichishami.

12

12:1b.1CO.012.001 Mana munanichu uquiuna, canguna yachai illaj tucunara Espíritu cuyashcaunamanda.

12:2b.1CO.012.002 Canguna yachanguichi imasna mana quirishca horaspi runa rashca upa diosgunara caticanguichi maimas pushai tucusha.

12:3b.1CO.012.003 Chimanda intindipaichi mana pihuas Diospa Espirituhua: Jesús maldiciashca achu, nisha rimanzhu. Shinallara mana pihuas rimanara ushanzhu, Jesús Señormi nisha, Santo Espíritu mana yanapajpi.

12:4b.1CO.012.004 Ima tono cuyashcas tianmi, randi Espirituga chi tonollarami.

12:5b.1CO.012.005 Ima tono sirvinas tianmi, randi Señorga chi tonollarami.

12:6b.1CO.012.006 Ima tono tarabanas tianmi, randi tucuira raj Dios chi tonollarami.

12:7b.1CO.012.007 Caran dueñoma Espíritu ricurimunmi yanapangaj.

12:8b.1CO.012.008 Shujma, Espíritu ali iyarina shimira cun; shujmaga ali yachana shimira chi quiquin Espíritu cun.

12:9b.1CO.012.009 Shujma quirinara chi Espiritumanda cushcami; shujma ungüigunara alichinara chi Espiritumanda cushcami.

12:10b.1CO.012.010 Shujmaga munanaita ranara rangaj cushcami; shujma Diosmanda shimira rimangaj; shujma espirituunara ricsinara, shujma shu tono shimiunara rimanara; shujma shu tono shimiunara chimbachinara cushcami.

12:11b.1CO.012.011 Cai tucui ranauna shu Espiritumandallami, caran dueñoma cun pai munashcasna.

12:12b.1CO.012.012 Imasna runa aicha shujllami, shinajllaira ashca partiunara charin, chi tucui partiuna ashcauna ajllaira shu aichallami tucun; shinallarami Cristo.

12:13b.1CO.012.013 Shu Espiritullai tucui bautisashca anchi shu aichallai, judioguna ashas, griegouna ashas, sirvijguna ashas, liuríuna ashas. Tucui ñucanchi chi Espirítumandalla upichishca acanchi.

12:14b.1CO.012.014 Aichaga mana shu partiüachu, astaun ashca partiunara charin.

12:15b.1CO.012.015 Chaqui nijpi: Ñuca mana maqui asha, mana aichamandachu ani, ¿shina nijpi mana aichamandachu tucun?

12:16b.1CO.012.016 Rinri nijpi: Mana ñahui asha, mana aichamandachu ani, ¿shina nijpi, mana aichamandachu tucun?

12:17b.1CO.012.017 Entero aicha ñahuilla ajpi, ¿maibirairi rinri? Entero aicha rinrilla ajpiga, ¿maibirairi muctina?

12:18b.1CO.012.018 Cunaga Dios caran partira aichai churashcami, pai munashcasna.

12:19b.1CO.012.019 Tucui parti shu aichalla ajpi, ¿maibira angairi entero aichaga?

12:20b.1CO.012.020 Cuna randi, ashca partiuna tiashallara, shu aichallami tian.

12:21b.1CO.012.021 Ñahui maquira rimanara mana ushanzhu, canda mana ministinichu, nisha. Shinallara umas chaquira rimanara mana ushanzhu, canda mana ministinichu, nisha.

12:22b.1CO.012.022 Astaun aichamanda pishilla yachij partiuna maspas ministirinaun.

12:23b.1CO.012.023 Aicha partiuna pishi valijguna yachijpi, mas sumajlla churachinchi, mana ali ricurij partiunara mas alira cuiranchi.

12:24b.1CO.012.024 Ali ricurij partiunaga mana ministinaun yanapanara. Astaun Dios tucui aicha partiunara ali churashcami, mana ali ricurij partiunara mas valichisha,

12:25b.1CO.012.025 tucui aicha partiuna pariju valishca anauchu, tucui partiuna parijumanda cuirangaj.

12:26b.1CO.012.026 Shina ajpi shu parti tormendarijpi, tucui partiuna tormendarinaun. Shu parti ahuayachishca ajpi, tucui partiuna pariju cushiyanaun.

12:27b.1CO.012.027 Canguna Cristo aichami anguichi, caran dueño paihua aichamanda shu partillami.

12:28b.1CO.012.028 Dios paihua iglesiai caran tono cuyashcaunara churashcami; ñaupa punda pai cachashca runauna, chi huasha Diosmanda rimajguna, chi huasha yachachijguna, chi huasha munanaita rajguna, chi huasha ungüigunara alichijguna, shujgunara yanapajguna, mandajguna, shu tono shimiunara rimajguna.

12:29b.1CO.012.029 ¿Tucuichu cachashcauna anaun? ¿Tucuichu Diosmanda rimajguna? ¿Tucuichu yachachijguna? ¿Tucuichu munanaita rajguna?

12:30b.1CO.012.030 ¿Tucuichu ungushcaunara alichinara ushanaun? ¿Tucuichu shu tono shimiunara rimanaun? ¿Tucuichu shu tono shimiunara chimbachinaun?

12:31b.1CO.012.031 Mas valij cuyashcaunara mascaichi. Shinajllaira shu yali valij ñambiraga cangunara ricuchini.

13

13:1b.1CO.013.001 Ñuca runa shimiras, angelba shimiras mana llaquisha rimashaga, uyarij campana cuenta, tilin tilin nij yanga iru pulato cuenta ani.

13:2b.1CO.013.002 Diosmanda shimira rimanara ushashas, tucui pacashcaras, tucui yachanaras intindiushas, urcura anzhuchina tupu quirinara charishas, astaun mana llaquishaga, mana imajpas vahnichu.

13:3b.1CO.013.003 Ñuca tucui charishcaunara cuyashas mana charijgunara carangaj, ñuca quiquin aichara rupangaj cuyashas, astaun mana llaquishaga, mana ansas sirvihuanzhu.

13:4b.1CO.013.004 Llaquinaga unaira chapanmi, ali shunguyujmi. Llaquinaga mana chijninzhu; llaquinaga mana pimandas yali tucusha ninzhu; yapa valinimi nisha, mana ninzhu.

13:5b.1CO.013.005 Ima mana ricuihuajtas mana ranzhu, paihua quiquimbajtas mana mascanzhu, mana dsaslla piñarinzhu, ima manali rashcaras mana iyarinzhu.

13:6b.1CO.013.006 Llaquina manalira uyashaga mana cushiyanzhu, randi cierto shimira uyasha cushiyanmi.

13:7b.1CO.013.007 Llaquina tucuira ahuantanmi, tucuira quirinmi, tucuira chapanmi, tucuira ahuantasha chasquinmi.

13:8b.1CO.013.008 Llaquinaga mana imahoraspas tucurinzhu, astaun Diosmanda rimashcaunaga illanaungami, shu tono shimiunaga tucurinaungallami, shinallara yachanaga pasangami.

13:9b.1CO.013.009 Ñucanchi yachana mana pactajtachu, Diosmanda rimanas mana pactajtachu.

13:10b.1CO.013.010 Shina ajllaira ali pactajta shamujpiga, ima mana pactajtas pasangami.

13:11b.1CO.013.011 Ñuca huahua ashcai, huahua cuenta rimacani, huahua cuenta iyaricani, huahua cuenta intindicani. Astaun shunguyuj tucushaga huahua tono ranara saquicani.

13:12b.1CO.013.012 Cuna espejoi ricusha cuenta, mana chiujlla ricunchichu, randi huasha horas ñahuipura ricushun. Cuna ansallara yachani, huashaga tucuira ricsishami, imasna ñuca ali ricsishca acani.

13:13b.1CO.013.013 Shinajpi quirinas, chapanas, llaquinas saquirinaunmi, cai quinsa. Randi, caigunamanda yali valijga llaquinami.

14

14:1b.1CO.014.001 Llaquina nambira catichi. Espiritui cuyashcaunara mascaichi, maspas Diosmanda shimira rimangaj.

14:2b.1CO.014.002 Shu tono shimiunara rimajga Diosmalla riman, mana runaunama. Mana pihuas intindinzhu pai rimashcara, Espiritumanda pacashca shimira rimajpi.

14:3b.1CO.014.003 Astaun Diosmanda rimajga runaunama riman, paigunara iñachingaj, cariyachingaj, cushiyachingajpas.

14:4b.1CO.014.004 Shu tono shimira rimajga pai quiquinllara shinzhiyachin, randi Diosmanda rimaj iglesiara iñachin.

14:5b.1CO.014.005 Shinajllaira, ñuca munani tucui canguna shu tono shimiunara rimanauchu, chita munashallara mas munani canguna Diosmanda rimangaj. Shu tono shimira rimajmanda, pai shimira mana chimbachijpiga iglesiara intindichingaj, yali valinmi Diosmanda rimaj.

14:6b.1CO.014.006 Uquiuna, ñuca cangunajma shamujpiga, shu tono shimiunara rimajpi, ¿imajta valingai cangunara yanapangaj, ñuca mana

14:7b.1CO.014.007 Mana causaj tucanauna uyaríjpi, llautasna, guitarrasna, mana intindinalla uyaríjpi, ¿imasna rashara llautahua guitarrahua tucashcara yachana angai?

14:8b.1CO.014.008 Cormetara mana ali tucajpi, ¿pita yachangai guerrara ranara puruntungaj?

14:9b.1CO.014.009 Shinallara canguna mana intindihuajta rimajpi, ¿pita intindingai canguna rimashcara? Huairaí yanga rimashca cuenta tucunga.

14:10b.1CO.014.010 Cai mundui ashca ima tono shimiunas tianmi. Tucui shimi alimi uyarin.

14:11b.1CO.014.011 Shina ajllaira ñuca mana chi shimira intindisha, chi shimira rimajhua ñuca shu carumanda shamuj cuenta tucusha, shinallara paihuas shu carumanda runa cuenta angami ñucahua.

14:12b.1CO.014.012 Cangunahua shinallarami. Espiritumanda cuyashcaunara munaichi; iglesiara shinzhiyachina tono cuyashcaunara ashcara mascaichi.

14:13b.1CO.014.013 Chi raigumanda maicambas shu tono shimira rimasha, chimbachina ushaira Diosmanda mañachu.

14:14b.1CO.014.014 Ñuca shu mana ricsishca shimii Diosta mañajpi, ñuca espíritu manan, shina ajllaira ñuca iyaibi mana imaras intindinichu.

14:15b.1CO.014.015 ¿Imara rashai? Espirituhua rimasha, shinallara iyaihuas; espirituhua cantasha, shinallara iyaihuas.

14:16b.1CO.014.016 Can espirítullai Diosta bendiciajpi, shu mana intindij runa can rimashcara uyashas mana intindishas, ¿ima rashara chi Amen nishcara ningairi can agrasishcai, can rimashcara mana intindisha?

14:17b.1CO.014.017 Canga ali pacha agrasiungui, shina ajllaira chi runa mana intindisha, mana shinzhiyachi tucun.

14:18b.1CO.014.018 Diosta agrasini imasna ñuca tucui cangunamanda yali shu tono shimiunahua rimauni.

14:19b.1CO.014.019 Iglesiaiga mas munani pichca shimiunara rimangaj intindinahua, shujgunara yachachingaj; randi shu chunga huaranga shimira mana ricsishca shimii rimashca mana ansas valinzhu.

14:20b.1CO.014.020 Uquiuna, ama huahuauna cuenta iyanguichichu, astaunga uchara ranaunai huahuauna cuenta aichi; randi iyarinaiga rucuuna cuenta tucuichi.

14:21b.1CO.014.021 Ley mandashca shimii quillcashca tian: shu tono shimiunahuas, shu tono rimaj shimi caramandas cai runaunama urimashami, shina ajpis mana uyahuanaungachu, Señor nin.

14:22b.1CO.014.022 Shinajpi, shu tono shimiuna shu ricuchina cuenta tucun mana quirijgunama, astaun Diosmanda cushca shimiuna quirijgunama shu ricuchina cuenta tucunaun.

14:23b.1CO.014.023 Entero iglesiaga shujpi tandarijpi, tucui runauna mana ricsishca shimiunahua rimanaupi, mana intindij runauna, mana quirij runaunas icusha, ¿manzhu iyai illaj locounami, nisha rimanaungai?

14:24b.1CO.014.024 Randi tucui quirijguna Diosmanda rimanaupi, shu mana quirij, shu mana intindij runa icusha, uyasha, tucui runauna rimashcamanda paihua uchara riparanga, taripai tucunga.

14:25b.1CO.014.025 Paihua shungüi pacashcaga ricuringami. Shina tucujpi tuama urmasha, Diosta adorangami, cierto Dios caibi tiaunmi cangunahua, nisha.

14:26b.1CO.014.026 Shinajpi, ¿imarai, uquiuna? Canguna tandarijpi, caran dueño shu cantanara, shu yachachina shimira, shu Diosmanda shimira, shu mana ricsishca shimira, shu shimira chimbachishcara charin. Tucuira raichi shujgunara shinzhiyachingaj.

14:27b.1CO.014.027 Mana ricsishca shimiunara rimanaupi, ishquilla quinsalla rimanauchu, shuj shujlla rimasha; shujga chimbachichu rimashca shimiunara.

14:28b.1CO.014.028 Shu chimbachij runa illajpiga, chunlla saquirichu iglesiai. Shungu ucullai paularas Diostas rimachu.

14:29b.1CO.014.029 Shinallara Diosmanda rimajguna, ishquilla quinsalla rimanauchu, shujguna paiguna rimashcara camanauchu.

14:30b.1CO.014.030 Camba rayai tiau runama shu shimira cushcara charijpi, ñaupa rimaj randi saquichu.

14:31b.1CO.014.031 Tucuiga Diosmanda rimanara ushanguichimi, shuj shujlla rimasha, tucui yachanauchu, tucui cariyashca anauchu.

14:32b.1CO.014.032 Diosmanda rimajguna espirituuna Diosmanda rimajgunara uyanaun.

14:33b.1CO.014.033 Dios mana mulujta rajchu, randi sumajta raj Diosmi.

14:34b.1CO.014.034 Imasna tucui iglesiaunai, canguna huarmiuna chunlla tianauchu tandarishcaunai. Paigunara lugarda mana cushcachu rimangaj, astaun mandashcara uyanauchu, ley mandashca shimi mandashcasna.

14:35b.1CO.014.035 Huarmiuna imaras yachasha nisha, cariunara tapunauchu huasii. Shu huarmi tandarishcai rimajpi pinganaitami.

14:36b.1CO.014.036 ¿Imarairi? ¿Cangunamandachu llucshica Diospa shimi? ¿Cangunamallachu pactamuca?

14:37b.1CO.014.037 Maicambas, Diosmanda rimajmi ani, Espirituyujmi ani nisha, paiga ñuca quillcashcara Señor mandashcauna ajta ricsichu.

14:38b.1CO.014.038 Maicans caita mana ricsijpi, paihuas ama ricsi tucuchu.

14:39b.1CO.014.039 Shinajpi, uquiuna, Diosmanda rimangaj mascaichi; shinallara runauna shu tono shimiunara rimangaj ama arcaichichu.

14:40b.1CO.014.040 Tucui ranaunara ali ricuihuajlla raichi, caran shuj paihua tornoi.

15

15:1b.1CO.015.001 Uquiuna, cangunara cuentasha nini ñuca cangunara camachishca evangelio ali shimira. Cai shimira uyacanguichi, shinallara catiunguichi.

15:2b.1CO.015.002 Cai shimi cangunara quishpichinmi, canguna ñuca camachishca shimira ali huacachijpi, mana yanga quirishca ajpi.

15:3b.1CO.015.003 Ñaupa punda ñuca quiquin uyashcara cangunara yachachicani: Imasna Cristo ñucanchi uchamanda huañuca, Quillcai quillcashcasna.

15:4b.1CO.015.004 Pambashca aca, quinsa punzhai causarímuca, Quillcai quillcashcasna.

15:5b.1CO.015.005 Cefasma ricurimuca, huasha chunga ishqui yachachishca runaunamas.

15:6b.1CO.015.006 Chimanda huasha, pichca patsac yali runaunama ricurimuca. Chigunamanda ashcauna cunagama causanaunmi, huaquingunalla ña huañusha puñunaun.

15:7b.1CO.015.007 Chimanda huasha, Jacoboma ricurimuca, huashaga tucui cachashca runaunama.

15:8b.1CO.015.008 Tucuimanda puchucaibi, ñucamas ricurimuca, shu cungaimanda llucshij huahuama cuenta.

15:9b.1CO.015.009 Ñucaga cachashca runaunamanda pishi mani, mana valinichu cachashca runa ni tucungaj, ñuca Diospa iglesiara tormendachij ashcamanda.

15:10b.1CO.015.010 Shinajllaira Diospa gracia nishcamanda ñuca casna tucushcani. Paihua gracia ñucama mana yangachu ricuchishca aca. Astaun ñuca tucui chishu cachashca runaunamanda yali shinzhira tarabacani. Shinajllaira mana ñucachu acani astaun ñucajpi tiaj Diospa gracia nishca.

15:11b.1CO.015.011 Shina ajpi, ñuca ashas, paiguna ashas, shinami camachicanchi, shinallara quiricanguichi.

15:12b.1CO.015.012 Shina ajpi Cristo huañushcaunamanda causarishcami nisha camachijpi, ¿imasna ajpira cangunamanda huaquinguna ninaun, huañuimanda ima causarinas illanmi?

15:13b.1CO.015.013 Huañuimanda causarina illajpiga, Cristos mana causarinmachu aca.

15:14b.1CO.015.014 Cristo mana causarishca ajpiga, yangami anmaca ñucanchi camachishca shimi, yangamanda quirishcanguichí.

15:15b.1CO.015.015 Ñucanchi Diosmanda yanga llullasha rimajguna anchi. Ñucanchi Dios Cristora causachica nicanchi, astaun mana shinachu aca, huañushcauna cierto pacha mana causarijpi.

15:16b.1CO.015.016 Huañushcauna mana causarijpi, Cristos mana causarishcachu.

15:17b.1CO.015.017 Cristo mana causarishca ajpi, yangamanda quirishcanguichi, chara canguna uchallai causaunguichi.

15:18b.1CO.015.018 Shinallara Cristoi huañusha puñujgunas chingarinaushcami.

15:19b.1CO.015.019 Cai causaillai ñucanchi Cristoi quirisha chapaushaga, tucuigunamanda yali llaquinaitauna manchi.

15:20b.1CO.015.020 Randi, cierto pacha Cristo huañuimanda causarishcami, puñushcaunamanda ñaupa punda causarij tucushca.

15:21b.1CO.015.021 Imasna shu runamanda huañui shamuca, shinallara shu runamanda huañuimanda causarinas shamucami.

15:22b.1CO.015.022 Imasna Adanmanda tucui huañunaun, shinallara Cristomanda tucui causarinaungami.

15:23b.1CO.015.023 Caran dueñoga paihua horaspi causaringa, Cristo ñaupa punda causarij, chimanda huasha Cristoi ajguna pai shamushcai.

15:24b.1CO.015.024 Chimanda huasha, tucurina horas pactamunga. Cristo pai mandana pachara entregangami Yaya Diosma, tucui mandanaras, tucui gobiernoras, tucui ushanaras tulashca huasha.

15:25b.1CO.015.025 Mmistirinmi Churi mandangaj tucui paita chijnijgunara paihua chaqui ucui churangagama.

15:26b.1CO.015.026 Puchucai chijnij tulai tucungaj huañuimi anga.

15:27b.1CO.015.027 Dios tucuira paihua chaqui ucui mandasha churaca. Randi shina nijpis, tucuimi pai mandashcallai churashcami nisha, intindinchi imasna mandaj dueño paihua chaqui ucui mana churashcachu aca.

15:28b.1CO.015.028 Shinajpi, tucuira Churi mandashcallai churashca huasha, quiquin Churiga shinallarami tucuira mandaj Diosmanda mandashcami anga. Casna tucujpi, Dios tucuira mandaj sapalla Dios tucungami.

15:29b.1CO.015.029 Causarina illajpi, ¿ima rasha huañushcauna randimanda bautisarinaun huaquinguna, huañushcauna mana cierto causarijpi? ¿Ima rashara huañushcaunamanda bautisarinaunri?

15:30b.1CO.015.030 ¿Imara rasha caran horas ñaca huañunallai causaunchi?

15:31b.1CO.015.031 Ciertomi nini, uquiuna, imasna cangunamanda ahuayauni ñucanchi Señor Jesucristoi, caran punzha huañuchingaraushca cuenta causauni.

15:32b.1CO.015.032 Ñucaga runaunasna rimasha, Efeso llactai milli animalgunahua macanaushca ajpi, ¿imajta valinmairi ñucara? Huañushcauna mana causarinaujpiga micushunchi, upishunchi, cayandi punzha huañushunmi.

15:33b.1CO.015.033 Ama pandaichichu. Manali runaunahua compañausha, ali causanara huajlichin.

15:34b.1CO.015.034 Ripararos purisha ama uchara raichichu. Huaquinguna Diosta mana ricsinaunzhu. Caita nini cangunara pingachingaj.

15:35b.1CO.015.035 Maicambas tapunga: ¿Imasna rashara huañushcauna causarinaungai? nisha, ¿Ima sami aichayujta shamunaungai?

15:36b.1CO.015.036 Iyai illaj mangui. Can tarpushca muyu mana ñaupa huañushaga, mana iñanzhu.

15:37b.1CO.015.037 Mana tarpunguichu llucshina tonora. Astaun llushti muyura tarpungui, trigo muyu ajpis, shu muyu ajpis.

15:38b.1CO.015.038 Diosga pai quiquin ajllashca tonora cunmi, caran tono muyuma paihua quiquin tono aparijta cun.

15:39b.1CO.015.039 Tucui aichaga mana shu tonollachu. Runauna shu tono, sacha aicha shu tono, yacu aichahua shu tono, pishcuuna shu tono aichayujgunami.

15:40b.1CO.015.040 Cieloi tiajgunas shu tono ricurij, allpai tiajgunas shu tono ricurij. Randi cieloi tiajguna sumaj ricurina shujmi, allpai tiajguna sumaj ricurinaga shujmi.

15:41b.1CO.015.041 Indi sumaj ricurina shujmi, quilla sumaj ricurina shujmi, estrellas sumaj ricurina shujmi. Shu estrellas shu estrellasmanda chican tono ricurijmi.

15:42b.1CO.015.042 Shinallarami huañushcauna causarina. Ismushca aichara tarpushcami, causarishaga mana ismuihuajchu.

15:43b.1CO.015.043 Pinganai tarpushcami, randi sumajlla causarin. Sambayanai tarpushcaga, ushaihua causarin.

15:44b.1CO.015.044 Tarpushcami runa aicha, causarinmi espíritu sami aicha. Tianmi runa aicha; tiami espíritu sami aicha.

15:45b.1CO.015.045 Quillcashca tian: Adán nishca ñaupa punda runa causaj alma tucuca, puchucai Adanga causaira cuj Espíritu tucuca.

15:46b.1CO.015.046 Espirituga mana ñaupachu, astaun aicha ñaupa shamuj aca¿ chimanda huasha espiritumi.

15:47b.1CO.015.047 Ñaupa punda runa allpamandami, allpa polvomanda rashca, huasha tucuj runaga Señor asha, cielomandami.

15:48b.1CO.015.048 Imasna allpa polvomanda runa, shinallarami allpamanda runauna. Imasna cielomanda ajga, shinallarami cielomanda ajguna.

15:49b.1CO.015.049 Imasna ñucanchi allpamanda runa tonoi ricurij ashcanchi, shinallara cielomanda aj tonoi ricurij tucushun.

15:50b.1CO.015.050 Caitaga cangunara nini, uquiuna: aichas yahuarbas Dios mandana pachara apiñara mana ushanaunzhu. Shinallara ismuihuaj mana ismuihuajtas apiñara mana ushanzhu.

15:51b.1CO.015.051 Shu pacashca shimira cangunara cuentauni: Mana tucui puñushunzhu, astaun tucui turcai tucushun,

15:52b.1CO.015.052 shu ratollai, shu ñahui pin rashcallai, puchucai cormetara cormetaushcai. Cormetara cormetashca anga, huañushcauna mana ismuihuajlla causarinaunga, ñucanchisga turcai tucushun.

15:53b.1CO.015.053 Ministirinmi cai ismuihuaj mana ismuihuajta churaringaj, ministirinmi cai huañuihuaj mana huañuihuajta churaringaj.

15:54b.1CO.015.054 Cai ismuihuaj mana ismuihuajta churarijpi, huañuihuaj mana huañuihuajtas churarijpis, chi horaspi quillcashca shimi pactaringa: Vencina ña, huañuira ganashcami, nisha.

15:55b.1CO.015.055 Huañui, ¿maitiri can tucsina? Ucu pacha, ¿maitiri can vencina?

15:56b.1CO.015.056 Huañuihua tucsina uchami, ucha ushaiga ley mandashca shimimi.

15:57b.1CO.015.057 Pagarachu nisha, Diosta agrasinchi; pai ñucanchira vencichinmi, ñucanchi Señor Jesucristomanda.

15:58b.1CO.015.058 Shina ajpi, ñuca llaquishca uquiuna, shinzhi shayarichi, ama cuyunguichichu, tucui horas Diospa tarabanai yaparisha ringuichi, caita yachasha, canguna Señorbi tarabashcauna mana yangachu.

16

16:1b.1CO.016.001 Quirijgunama cuyana cullquira tandachinamanda rimasha nini. Ñuca Galacia llactai tiaj iglesiaunara mandashcasnallara ranami anguichi cangunas.

16:2b.1CO.016.002 Caran semana ñaupa punda punzhai, caran dueño pai munashca tupu cullquira chicanyachisha huacachinami, pai ushashca tupura. Shina rasha mana ñuca shamushcaira tandachina anga cuyashca cullquira.

16:3b.1CO.016.003 Ñuca pactamushaga, canguna quillcai rimaushca runaunara Jerusalenma cachasha canguna cuyashcara apangaj.

16:4b.1CO.016.004 Ñucas ringaj ministirijpi, paigunas ñucahua compañasha rinaunga.

16:5b.1CO.016.005 Macedonia partima pasanami ani, Macedonia llactara pasashca huasha cangunajma shamusha.

16:6b.1CO.016.006 Cangunahua saquirisha chari, tamia horaspas pasasha chari, ñuca chihuasha maima rijpis canguna ñucara pushahuanguichi.

16:7b.1CO.016.007 Ñuca cuna dsas pasaushcai cangunara ricungaj mana munanichu. Astaun unaira saquirinara munani cangunahua, Dios munajpi.

16:8b.1CO.016.008 Efeso llactai saquirishami Pentecostés istagama.

16:9b.1CO.016.009 Shu atun pungu cuenta pascarishcami ñucaj, ñuca tarabangaj. Shinajllaira ashca arcajguna tianaun.

16:10b.1CO.016.010 Timoteo shamujpiga, paita ali chasquipanguichi, pai cungailla cangunahua tiangaj. Pai Diospa tarabanara alimi raun, ñuca cuenta.

16:11b.1CO.016.011 Chimanda ama pihuas paita pishiyachichu, astaun paita sumajlla pushanguichi paihua ñambii, uctalla ñucajma pacta mungaj. Paita chapaunimi chishu uquiunahua.

16:12b.1CO.016.012 Ñucanchi uqui Apolosta mañacani chishu uquiunahua pariju cangunajma shamungaj. Astaun mana ansas muna cachu ringaj cuna. Huasha risha, nicami, ñuca ushashca horaspi.

16:13b.1CO.016.013 Ripararos tiaichi. Shinzhi shayarichi canguna quirinai. Shinzhi runauna cuenta raichi. Shinzhiyaichi.

16:14b.1CO.016.014 Tucui imaras rashaga, llaquinahua raichi.

16:15b.1CO.016.015 Ña yachanguichi, uquiuna, imasna Estéfanasguna ñaupa punda quirijguna anauca Acaya partii. Paigunallara cunauca quirijgunara yanapangaj.

16:16b.1CO.016.016 Cangunara nini, cai samiunara uyaichi, shinallara tucui pariju yanapajgunaras, tarabajgunaras.

16:17b.1CO.016.017 Estéfanas, Fortunatos, Acaicos nishcauna shamushcamanda yapa cushiyani. Canguna illashcai ñucara cushiyachihuanauca.

16:18b.1CO.016.018 Paiguna ñuca espiritura cangunajtas cushiyachinauca. Shina rajgunara llaquina anguichi.

16:19b.1CO.016.019 Asia partii tiaj iglesiauna cangunara saluranaun. Aquila Priscilandi, paiguna huasii tandarij iglesiandi cangunara saluranaun ashcara, Señorba shutii.

16:20b.1CO.016.020 Tucui uquiuna saluranaun cangunara. Cangunapura parijumanda chuyaj muchanahua saluraichi.

16:21b.1CO.016.021 Ñuca Pablo, ñuca quiquin maquihua cai saluranara cangunama quillcauni.

16:22b.1CO.016.022 Maicambas Señorda mana llaquisha maldiciashca achu. Ñucanchi Señor shamunmi.

16:23b.1CO.016.023 Ñucanchi Señor Jesucristo gracia nishca ali iyai cangunahua tiachu.

16:24b.1CO.016.024 Ñuca Cristo Jesuspi llaquishcahua tucui cangunara dispirini Amen.