Mark (Quichua)

1

1:1b.MAR.001.001 Diospa Churi Jesucristo rimashca evangelio nishca ali shimi callarin.

1:2b.MAR.001.002 Imasnara Diosmanda rimaj Isaías quillcashcai tian: Camba ñaupajma ñuca rimajta cachauni, camba nambira camba ñaupajpi alichingaj.

1:3b.MAR.001.003 Runa illashca partimanda caparij casna nin: Diospa nambira alichichi. Paihua nambira dirichuichi, nin.

1:4b.MAR.001.004 Runa illashca partii, Juan yacui bautisauca. Shina nisha camachica: Arrepentirichi, bautisarichi, canguna uchamanda perdonai tucungaj.

1:5b.MAR.001.005 Tucui Judea partí llactaunai causajguna, tucui Jerusalembi causajgunandi paihuajma shamunauca. Paiguna ucharashcaunara cuentajpi, Jordan yacui Juan paigunara bautisacami.

1:6b.MAR.001.006 Juanga camello illmahua ahuashcara churarishca aca, cara chumbillinahua chumbiilishca aca. Atun ijira sacha mishquiras micuj aca.

1:7b.MAR.001.007 Pai camachisha: Ñuca huashai, shu ñucamanda yali ushaj shamunmi, nica. Paihua zapatos huascara pascanallas mana pactanichu, nica.

1:8b.MAR.001.008 Ñucaga cierto pacha cangunara yacui bautisacani, nica. Pai randi Santo Espiritui bautisangami.

1:9b.MAR.001.009 Jesús Galilea partii tiaj Nazaret llactamanda shamuca. Jordan yacui Juan paita bautisaca.

1:10b.MAR.001.010 Chi ratollai, Jesús yacumanda sicasha, ahua pacha pascarishcara ricuca, Santo Espiritura urpisna paihua ahuai irgumujta ricuca.

1:11b.MAR.001.011 Ahua pachamanda shu shimi uyarica: Can ñuca llaquishca churimi angui. Canhua cushiyani, nica.

1:12b.MAR.001.012 Shinajpi Santo Espíritu Jesusta runa illashca partima cachaca.

1:13b.MAR.001.013 Chuscu chunga punzha runa illashca partii tiauca. Satanás nishca supai apu paita tentaca. Milli animalgunahua tiauca. Angelguna paita sirvinauca.

1:14b.MAR.001.014 Juanda chonda cularbi ishcashca huasha, Jesús Galilea partima shamuca. Dios mandana pachamanda rimaj evangelio ali shimira camachica.

1:15b.MAR.001.015 Horas pactamun, nica, Dios mandana pacha mayanllayamushcami. Arrepentirichi, evangelio ali shimira quirichi, nica.

1:16b.MAR.001.016 Galilea lamar patara purijpi, Jesús Simonda ricuca paihua uqui Andresndi. Lamarbi licara shitanauca, aichahuara mascajguna asha.

1:17b.MAR.001.017 Jesús paigunara nica: Catihuaichi. Cangunara runaunara licajgunara cuenta rasha.

1:18b.MAR.001.018 Chi horasllaira, licaunara saquisha paita catinauca.

1:19b.MAR.001.019 Chimanda pasasha, Jesús ansa ñaupajma riushcai, Zebedeo churi Jacobora ricuca, paihua uqui Juandi. Canoai licara remendasha tianauca.

1:20b.MAR.001.020 Chi ratollai Jesús paigunara cayaca. Paiguna Zebedeo yayara canoai saquisha tarabajgunandi, Jesusta catinauca.

1:21b.MAR.001.021 Capernaum llactai icunauca. Samana punzha asha, Jesús tandarina huasii icusha yachachica.

1:22b.MAR.001.022 Runauna pai yachachishcara uyasha manzharinauca. Ushaihua, mandaj cuenta yachachica, mana yachaira yachachijgunasna.

1:23b.MAR.001.023 Paiguna tandarina huasii shu irus supai apishca runa caparisha tiauca.

1:24b.MAR.001.024 ¿Imarasha ñucanchira inquitangui, Nazaretmanda Jesús? nica. ¿Ñucanchira tucuchingajchu shamushcangui? Can pi asnearas yachanimi. Diospa Santo Churimi angui.

1:25b.MAR.001.025 Jesús paita piñaca: Upalla, nica, llucshi paimanda.

1:26b.MAR.001.026 Irus supaiga, runara chucchuchisha, shinzhira caparisha, paimanda llucshica.

1:27b.MAR.001.027 Tucui manzharinauca. Paigunapura tapunauca: ¿Imarai? nisha, ¿Ima mushuj yachairairi caiga? Ushanahua irus supaigunara cachan, llucshinaun.

1:28b.MAR.001.028 Entero Galilea partiunai Jesús rashcara uctalla yacharica.

1:29b.MAR.001.029 Chimanda huasha, tandarina huasimanda llucshisha, Simomba Andrespa huasima shamunauca, Jacobo Juandis compañanauca.

1:30b.MAR.001.030 Simomba huarmi mama ungushca aca, calenturahua. Jesusta cuentanauca.

1:31b.MAR.001.031 Shinajpi Jesús paihua mayanma shamusha, paihua maquimanda apisha, paita atarichica. Chi ratollai calentura chiriyaca; huarmi paigunara sirvica.

1:32b.MAR.001.032 Tutayajpi, indi icushca huasha, tucui ungushcaunara tucui supai apishcaunaras Jesusma pushamunauca.

1:33b.MAR.001.033 Tucui llactai ajguna huasi pungumalla tandarimunauca.

1:34b.MAR.001.034 Ima tono ungushcaunaras Jesús ashcara alichicami. Ashca supaigunara pajllama ichuca, rimangaj mana lugarda cuca, supaiguna paita ricsishcamanda.

1:35b.MAR.001.035 Tuta ucura atarisha, chara llandu llandu ucura, Jesús llucshisha, pi runas illashca partima rica. Chihui Diosta mañaca.

1:36b.MAR.001.036 Simón, paihua pariju tiajgunandi, Jesusta mascanauca.

1:37b.MAR.001.037 Jesusta tupasha, paita ninauca: Tucui canda mascanaun.

1:38b.MAR.001.038 Jesús paigunara nica: Acuichi ñucanchi mayan partiunama, chihuis camachingaj. Chihuajmi shamucani.

1:39b.MAR.001.039 Tucui Galilea partiunai paiguna tandarina huasiunai camachica, supaigunara ichuca.

1:40b.MAR.001.040 Shu llagayuj runa Jesusma shamuca, paihua ñaupajpi cungurisha, rugasha nica: Can munasha, ñucara alichinara ushangui.

1:41b.MAR.001.041 Jesús paimanda llaquirisha, maquira chutachisha, paita llangaca. Munanimi, nica, alichishcangui.

1:42b.MAR.001.042 Casna rimashca huasha, ungüi chi ratollaira dsas llushpirica paimanda. Alichishca aca.

1:43b.MAR.001.043 Shinajpi Jesús paita dispirisha mandaca:

1:44b.MAR.001.044 Riqui, nisha, ama imaras ama pitas rimanguichu; randi sacerdotema ringui, can aliyashcara ricuchingaj. Shinallara can aliyashcamanda Moisés camachishca cuyanara cuyangui, can ali tucushcara paigunara ricuchingaj.

1:45b.MAR.001.045 Pai randi ña llucshishca huasha yapa rimangaj callarica. Chi rashcara pajlla pambai cuentaca. Shinajpi, Jesús llactai icunara mana ushacachu, randi pajllai tiauca, runa illashca partiunai. Tucui llactaunamanda paihuajma shamunauca.

2

2:1b.MAR.002.001 Ansa punzha huasha Jesús Capernaumbi cuti icuca. Pai huasii tiaushca uyarica.

2:2b.MAR.002.002 Chi horasllai ashca runa paihuajma tandarimunauca, huasi pungugama undajta shamunauca. Pai Diospa shimira camachica.

2:3b.MAR.002.003 Shinajpi huaquinguna Jesusma shamunauca, shu suchu runara huandusha. Chuscupura tucusha apamunauca.

2:4b.MAR.002.004 Ashca runa tiashcamanda. Jesusma pactanara mana ushasha, huasi ahuamanda uctunauca Jesús tiaushcai. Uctura rasha, suchu runara caitundi irguchinauca.

2:5b.MAR.002.005 Jesús paiguna quirishcara ricusha, suchu runara nica: Churi, can ucharashcara perdonashcangui.

2:6b.MAR.002.006 Huaquin yachaira yachachijguna chihui tianauca, paiguna shungüi piñasha iyarinauca:

2:7b.MAR.002.007 ¿Imarasha casna riman? nisha, Diosta camiunmi. ¿Pita uchara perdonanara ushangairi? Diosllami ushan.

2:8b.MAR.002.008 Jesús, paihua espiritui riparasha paiguna shungu ucui casna piñashcara, paigunara nica: ¿Imarasha casna piñanguichi canguna shungüi?

2:9b.MAR.002.009 ¿Imara mas rimanalla anga, suchu runara: Camba uchara perdonashcangui, nisha, paita rimangaj: Atari, camba caitura apasha ri?

2:10b.MAR.002.010 Shinajpi canguna yachangaj imasna ñuca, Runa Churi nishca, ushanara charinimi cai pachai uchara perdonangaj, Jesús suchura rimaca:

2:11b.MAR.002.011 Canda nini: Atari, caitura apai, camba huasima ri.

2:12b.MAR.002.012 Chi ratollai atarica, paihua caitura apasha, paiguna ñaupajmanda llucshica. Caita ricusha, tucui manzharinauca. Diosta alabanauca: Mana imahoraspas casnara ricushcanchichu, nisha.

2:13b.MAR.002.013 Cuti Jesús lamar patama rica. Tucui runauna paihuajma shamunauca. Paigunara yachachica.

2:14b.MAR.002.014 Jesusga ri pasausha, Alfeo churi Levi nishcara ricuca. Levi gobierno cullquira tandachina huasÜ tiauca. Jesús paita: Catihuai, nica. Atarisha caticami.

2:15b.MAR.002.015 Jesús Levi huasu tiausha, ashca cullquira tandachijguna ashca uchayujgunas mesai tiarinauca Jesushua pariju, pai yachachishca runaunandi. Ashca runauna paita catimunauca.

2:16b.MAR.002.016 Jesús cullquira tandachijgunandi uchayujgunandi micuca. Yachaira yachachijguna fariseogunandi Jesús casna micuuta ricusha, pai yachachishca runaunara ninauca: ¿Imarai? ¿Imarasha cullquira tandachijgunahua uchayujgunahua micunri?

2:17b.MAR.002.017 Jesús caita uyasha, paigunara nica: Ali ajguna ambijta mana ministinaun, astaun ungushcauna. Alira rajgunara cayangaj mana shamucanichu astaun uchayujgunara.

2:18b.MAR.002.018 Juan yachachishca runauna fariseoguna yachachishca runaunas sasinauca. Jesusma shamusha ninauca: ¿Imarasha Juan yachachishca runauna fariseoguna yachachishca runaunas sasinaun, randi can yachachishca runauna mana sasinaun?

2:19b.MAR.002.019 Jesús paigunara nica: ¿Borai, cari ñaupajpi tiajguna sasinaungachu? Carindi pariju tiausha, sasinara mana ushanaungachu.

2:20b.MAR.002.020 Huashaga, carira quichuna punzha pactamunga. Chi punzhaunaí sasinaungami.

2:21b.MAR.002.021 Mana pihuas rucu churanara mushuj llachapahua remendanzhu. Shina rajpi mushuj llachapa rucura cuti lliquinga. Churana astaun lliquirishca tucunga.

2:22b.MAR.002.022 Shinallara mana pihuas mushuj vinora churanzhu rucu cara bolsai. Shina rajpi cara lliquiringa, vino taliringa. Mushuj vino mushuj cara purui churana anga.

2:23b.MAR.002.023 Jesús samana punzhai shu tarpushca chagrara pasauca. Pai yachachishca runauna pasajpiga, trigo papajta aisangaj callarinauca.

2:24b.MAR.002.024 Shinajpi fariseoguna paita ninauca: Riqui, ¿imarasha samana punzhai mana raihuajta ranaun?

2:25b.MAR.002.025 Jesús paigunara nica: ¿Mana imahoras Quillcai ricucanguichu imara rarca David paita compañajgunandi paiguna ministiushcai, paiguna yarcachiushcai?

2:26b.MAR.002.026 ¿Manzhu ricucangui imasnara David Diospa huasii icusha, Abiatar nishca Diospa sacerdote apu ashcai, Diosma ricuchina tandara pai paihua compañajgunandi micunauca, cai tanda Diosta sirvijgunalla micuna ajta?

2:27b.MAR.002.027 Shinallara Jesús paigunara nica: Samana punzha runajta rashca aca, randi runauna mana ranaushcachu aca samana punzhajta.

2:28b.MAR.002.028 Casna ajpi, ñuca, Runa Churi nishca, samana punzhahua Señormi ani.

3

3:1b.MAR.003.001 Cuti Jesús tandarina huasii icuca; chihui shu chaquirishca maquiyuj runa tiauca.

3:2b.MAR.003.002 Chihui tiajguna paita chapanauca, samana punzha ungushcara alichingachu nisha ricungaj, paita causayachingaj.

3:3b.MAR.003.003 Shinajpi Jesús chaquirishca maquiyuj runara: Atarisha, chaupi shungüi shayari, nica.

3:4b.MAR.003.004 Jesús paigunara nica: ¿Samana punzhai alira manalira rana? ¿Imara ali anga, causachingaj, huañuchingaj? Paigunaga chunllayanauca.

3:5b.MAR.003.005 Jesús paihua shungüi piñarisha, muyujta ricuca. Paiguna shungu shinzhiyashcara llaquirisha, runara nica: Maquira chutachi. Paihua maquira chutachijpi alichishca aca.

3:6b.MAR.003.006 Shinajpi, fariseoguna llucshisha herodianos nishcaunahua rimananauca Jesusta huañuchingaj.

3:7b.MAR.003.007 Jesusga, pai yachachishca runaunandi, lamar patama anzhurica. Ashca runa Galileamanda Judeamandas catimunauca.

3:8b.MAR.003.008 Shinallara Jerusalenmanda, Idumeamanda, Jordan chimbamanda, Tiro partimandas, Sidón partimandas ashca runa Jesuspajma shamunauca, pai atun rashcaunara uyasha.

3:9b.MAR.003.009 Jesús pai yachachishca runaunara rimaca shu canoa puruntushcara charinauchu, ashca runauna tiashcamanda, ama paita nitinauchu.

3:10b.MAR.003.010 Ashca runaunara alichishcamanda, tucui ungüiyujguna paihuajma nitimunauca llangangaj.

3:11b.MAR.003.011 Irus supaiguna paita ricusha, paihua ñaupajpi tuama urmanauca: Canmi Diospa Churi angui, nisha.

3:12b.MAR.003.012 Jesús paigunara mandaca paita ama ricsichinauchu.

3:13b.MAR.003.013 Huasha, Jesús urcuma sicaca. Pai munashca runaunara paihuajma cayaca. Shamunaucami.

3:14b.MAR.003.014 Chunga ishquira ajllaca paihua pariju tiangaj, paigunara camachingaj cachangaj,

3:15b.MAR.003.015 ungüigunara alichina ushaira charingaj, supaigunara ichungajpas.

3:16b.MAR.003.016 Simonda cayaca. Mushuj shutira Pedro nishcara churaca.

3:17b.MAR.003.017 Jacobo paihua uqui Juandi, Zebedeo churiunara, cayaca. Paigunara Boanerges nishcauna shutichica. Caimi Rayo Churiuna nishca.

3:18b.MAR.003.018 Shujgunara: Andrés, Felipe, Bartolomé, Mateo, Tomás, Alfeo churi Jacobo, Tadeo, cananista Simón nishcaunaras cayaca.

3:19b.MAR.003.019 Shinallara Judas Iscariote nishcaras, Jesusta apuuna maquima entregajta, cayaca. Huasima shamunauca.

3:20b.MAR.003.020 Ashca runauna cuti tandarimunauca; paiguna shamushcamanda Jesús paihua tiajgunandi micungaj mana ushanaucachu.

3:21b.MAR.003.021 Jesuspa aillu caita uyasha, paita apingaj shamunauca, loco tucushcami, nisha.

3:22b.MAR.003.022 Jerusalenmanda shamuj yachaira yachachijguna ninauca: Beelzebú nishca supai apu paihua shungüi tian. Shinallara, supai apumanda supaigunara pajllama ichun, ninauca.

3:23b.MAR.003.023 Jesús paigunara cayasha, yachachingaj cuentanaunahua rimaca: ¿Imasna rasha Satanás nishca supai apu Satanasllara ichunara ushangachu? nisha.

3:24b.MAR.003.024 Ima llactas chaupirisha, paigunapuralla macananausha, cai llacta mana durangachu.

3:25b.MAR.003.025 Shinallara ima huasii tiaj aillu chaupirisha, paigunapuralla macananausha, cai aillu mana durangachu.

3:26b.MAR.003.026 Satanaspas paulara macanausha chaupirisha, shayarinara mana ushangachu; randi pai tucurina pactamushcami.

3:27b.MAR.003.027 Pihuas shu shinzhi runa huasimanda pai charishcara shuhuanara mana ushangachu manara paita huatajllaira. Huatai pasasha shuhuanara ushangami huasimanda.

3:28b.MAR.003.028 Cierto pacha nini: Runaunama tucui uchara perdonashca anga. Ima sami camisha rimashcaras perdonashca anga.

3:29b.MAR.003.029 Randi, pihuas Santo Espiritura camisha, mana imahoras perdonashcachu anga, astaun huiñaigama causayuj anga.

3:30b.MAR.003.030 Jesús cai shimira rimaca, paiguna: Irus supaiyujmi, nishcamanda.

3:31b.MAR.003.031 Huashaga Jesuspa uquiunandi mamandi shamunauca, canzhai chapausha. Paita cayangaj cachanauca.

3:32b.MAR.003.032 Pai muyujta tiau runauna paita ninauca: Camba mama camba uquiuna canzhai aj, canda mascanaun.

3:33b.MAR.003.033 Jesús cutipasha nica: ¿Pitai ñuca mama, ñuca uquiuna?

3:34b.MAR.003.034 Muyujta tiaugunara ricusha nica: Caimi ñuca mama, ñuca uquiuna.

3:35b.MAR.003.035 Maicans Diospa munaira rau, paimi ñuca uqui, ñuca pañi, ñuca mama, nica.

4

4:1b.MAR.004.001 Cutillara Jesús lamar patai yachachingaj callarica. Paihuajma ashca runauna tandarimunauca. Chiraigumanda, canoai icusha lamarbi tiarica. Randi tucui runauna pulayai tianauca lamar rayai.

4:2b.MAR.004.002 Yachachingaj cuentanaunahua ashcara yachachica. Jesús pai yachachiushcai nica:

4:3b.MAR.004.003 Uyaichi, nisha, shu tarpuj runa tarpungaj llucshica.

4:4b.MAR.004.004 Pai tarpujpiga, huaquin muyuuna ñambi rayai urmanauca. Pishcuuna shamusha llambura micunauca.

4:5b.MAR.004.005 Huaquin muyuunaga allpa illaj rumi pambai urmanauca. Allpa pishishcamanda uctalla iñanauca.

4:6b.MAR.004.006 Indi llucshimujpi rupaca. Angu illashcamanda chaquirica.

4:7b.MAR.004.007 Huaquin muyuunaga cashaunai urmanauca. Casha itayasha, muyuuna chingarisha, mana aparinaucachu.

4:8b.MAR.004.008 Randi shu muyuuna ali allpai urmanauca. Ali ahuara iñasha aparica, caran muyu quinsa chunga, socta chunga, patsac muyura cusha.

4:9b.MAR.004.009 Shinajpi Jesús nica: Uyana rinriyuj uyachu.

4:10b.MAR.004.010 Sapalla tucujpí, mayambi ajguna paihua chunga ishqui yachachishca runaunandi pai rimashca yachachina cuentanamanda tapunauca.

4:11b.MAR.004.011 Jesús paigunara nica: Cangunaga, Dios mandana pacha pacashca shimira yachanguichimi. Randi canzhai ajgunara yachachina cuentanaunahua tucuira yachachina anga;

4:12b.MAR.004.012 ricusha ama ricsinauchu, uyasha ama intindinauchu, ama tigranauchu ucharashcara perdonai tucungaj.

4:13b.MAR.004.013 Jesús paigunara nica: ¿Cai yachachina cuentanara manzhu intindinguichi? ¿Imasna rasha tucui yachachina cuentanaunara intindingachu raunguichi?

4:14b.MAR.004.014 Tarpuj runaga ñuca shimira tarpun.

4:15b.MAR.004.015 Ñambi rayai urmajguna caigunami: Shimira tarpushca huasha, uctalla supai apu uyashcara quichuj shamun paiguna shungumanda.

4:16b.MAR.004.016 Shinallara rumi pambai tarpushcauna, shimira uyasha, uctalla cushihua Diospa shimira chasquinaun.

4:17b.MAR.004.017 Randi, angu illajpi mana duranaun. Shimira apishcamanda llaqui tucusha, tormendachi tucusha, nijtasha urmanaun.

4:18b.MAR.004.018 Caimi casha ucui urmajguna. Shimira uyanaun,

4:19b.MAR.004.019 randi cai pachai tormendosmanda, cullquira munashcamanda umachisha, imaunaras munasha, uyashca shimi huañun, mana aparin.

4:20b.MAR.004.020 Ali allpai urmajguna shimira uyanaun, uyashcara chasquinaun, aparinaun, huaquinguna quinsa chungagama mirasha, huaquinguna socta chungagama, huaquinguna patsacgama.

4:21b.MAR.004.021 Shinallara Jesús paigunara rimaca: ¿Tasa ucui velara churanachu? ¿Caitu ucui churanachu? ¿Manzhu ricunallai churanami?

4:22b.MAR.004.022 Tucui pacashca pajllai tucungami; tucui mana ricushca pajllai ricuringami.

4:23b.MAR.004.023 Maicambas uyana rinrira charisha uyachu.

4:24b.MAR.004.024 Shinallara paigunara nica: Ricuichi uyashcara. Canguna tupushca tupullara shujguna cangunara tupunaunga, yapasha.

4:25b.MAR.004.025 Maican charijpi, paima cushca anga; randi mana charijmanda pai ima charishcahuaras astaun quichushca anga.

4:26b.MAR.004.026 Shinallara Jesús nica: Casnami Dios mandana pacha: Imasna shu runa muyura allpai tarpun.

4:27b.MAR.004.027 Runaga tuta puñun, punzha atarin. Muyuga llucshin, iñan. Imasna iñashcaras pai mana yachanzhu.

4:28b.MAR.004.028 Allpa paulara apachin: ñaupa quihuara. huasha papajta, papajpi muyuhua undarin.

4:29b.MAR.004.029 Ña muyu pucujpi, saulihua pitin, pallana horas pactamushcamanda.

4:30b.MAR.004.030 Shinallara Jesús nica: ¿Dios mandana pacha imahua ricuchina angai? ¿Ima yachachingaj cuentanahua ricuchishun?

4:31b.MAR.004.031 Dios mandana pacha shu mostaza muyu cuentami. Allpai tarpushcai tucui cai pachai tiaj muyumanda yali ichillami.

4:32b.MAR.004.032 Tarpushca huasha, tucui yuraunamanda yali iñan; atun pallcayuj tucun. Shinajpi, yura llandu ucui pisheuuna samanara ushanaunga.

4:33b.MAR.004.033 Casna yachachingaj cuentanaunahua Diospa shimira ashcara cuentaca, paiguna uyana tupura.

4:34b.MAR.004.034 Yachachingaj cuentanaunahua mana rimasha, mana cuentacachu. Pai yachachishca runaunaraga chicambi tucuira pajlla pambai yachachica.

4:35b.MAR.004.035 Chi punzhallaira tutayajpi, Jesús paigunara nica: Acuichi chimbama.

4:36b.MAR.004.036 Runaunamanda dispirishca huasha, yachachishca runauna pai tiaushca canoallaira Jesusta pushanauca. Paihua pariju shu ichilla canoauna rinauca.

4:37b.MAR.004.037 Shinzhi huaira atarisha, tsajlas shitashcamanda canoa pambariuca.

4:38b.MAR.004.038 Jesusga canoa siquii aj saunai puñusha sirica. Paita llicchachinauca, Yachachij, nisha, ¿ñucanchi huañungaraushcara manzhu ricunguiri?

4:39b.MAR.004.039 Jesús shayarisha huairara piñaca, lamardas rimasha nica: Upalla, chunllayai. Huaira shinalla pasarica, tucui ali chunlla tucuca.

4:40b.MAR.004.040 Paigunara nica: ¿Imarasha manzhanguichi? ¿Imaraigu mana quiringuichi?

4:41b.MAR.004.041 Ashca manzharishcahua paigunapura rimanauca: Caiga, ¿pitairi? nisha. Huairas lamarbas paita uyanaun.

5

5:1b.MAR.005.001 Lamar chimbama Gadarenos nishcauna partima Jesús pai yachachishca runaunandi shamunauca.

5:2b.MAR.005.002 Paiga canoamanda llucshishca ratollai, aya huasiunamanda shu irus supai apishca runa paigunara tupangaj llucshimuca.

5:3b.MAR.005.003 Cai supai apishca runa aya huasiunai causaca. Mana pihuas paita huatanara ushacachu, ima iru huascahuas.

5:4b.MAR.005.004 Ashca cuti iru huascahua huatashca aca maquiras chaquiras. Maqui huatashcara dsas dsas aisaca; chaqui huatashcara piti piti rarca. Mana pihuas paita vencinara ushacachu.

5:5b.MAR.005.005 Tucui horas, tutandi punzhandi, aya huasiunais urcuunais caparisha puricachaj aca. Rumiunahua chugrichisha causaca.

5:6b.MAR.005.006 Jesusta carumanda ricusha, paihuajma callpasha shamuca, paihua ñaupajpi cungurica.

5:7b.MAR.005.007 Shinzhira caparisha nica: Jesús, atun Diospa Churi, ¿imarasha ñucara inquitangui? Diosmanda, ama tormendachihuaichu.

5:8b.MAR.005.008 Supai casna caparica, Jesús: Irus supai, cai runamanda llucshi, nisha rimashcamanda.

5:9b.MAR.005.009 Jesús paita tapuca: ¿Ima shutirangui? nisha. Huaranga nishca ani, nica ñucanchi ashca supaipura ashcamanda.

5:10b.MAR.005.010 Jesusta ashcara rugaca: Ama cai partimanda cachahuaichu, nisha.

5:11b.MAR.005.011 Chi urcu mayanllai, shu atun cuchi monton micusha tianauca.

5:12b.MAR.005.012 Tucui supaiguna Jesusta ruganauca: Cuchiunama cachahuai icungaj. nisha.

5:13b.MAR.005.013 Jesús lugarda cuca. Irus supaiguna llucshisha, cuchiunai icunauca. Cuchi montonga peñasmanda lamarbi urmasha, chucasha huañunauca. Ishqui huaranga tupu anauca.

5:14b.MAR.005.014 Cuchira cuirajguna miticunauca. Llactais, maita purishas, cuentanauca. Uyajguna casna tucushcara ricungaj llucshinauca.

5:15b.MAR.005.015 Jesuspajma pactamusha, huaranga supaiguna tormendachishca runara ricunauca. Paita tiarishca, churarishca, ali iyaiyuj tiauta ricusha, manzharinauca.

5:16b.MAR.005.016 Ricujguna shamujgunara cuentanauca imasna supaiyujta alichishca aca. Shinallara cuchiunahua tucushcara rimanauca.

5:17b.MAR.005.017 Dueñouna Jesusta paiguna llactamanda llucshichu nisha rugangaj callarinauca.

5:18b.MAR.005.018 Jesús canoai icuupi, pai alichishca runa paita rugaca: Lugarda cuhuai, nisha, canhua tiangaj.

5:19b.MAR.005.019 Jesusga lugarda mana cucachu. Randi nica: Camba huasima ri, camba ailluma. Paigunara Dios atun rashcara cuentangui, imasna Dios canda llaquishcami.

5:20b.MAR.005.020 Pai ricami, Decápolis nishca partii Jesús atun rashcaunara, paita alichishcaras rimangaj callarica. Tucui manzharinauca.

5:21b.MAR.005.021 Jesús chimbamanda artillara canoai tigramuca. Ashca runa paita muyujta tandarimunauca. Paiga lamar patai tiauca.

5:22b.MAR.005.022 Shu Jairo nishca runa, judioguna tandarina huasimanda apu, shamuca. Jesusta ricusha, paihua chaquii tuama urmaca.

5:23b.MAR.005.023 Pai Jesusta ashcara rugaca: Ñuca ushushihua ali huañuira huañun, nica. Shamupai, camba maquira paihua ahuai churapangui paita ahchingaj, pai causangaj, nica.

5:24b.MAR.005.024 Jesús apuhua rica. Ashca runauna catisha paita nitinauca.

5:25b.MAR.005.025 Shu huarmi chunga ishqui huata paihua ungüihua ungüilla causaca.

5:26b.MAR.005.026 Ambijgunamanda ashca tormendachishca aca; pai tucui charishcara gastaca. Paiga mana aliyashcachu aca, astaun mas ungushca tucuca.

5:27b.MAR.005.027 Cai huarmi Jesús rashcaunara uyasha, runa montombi pactamusha, huashamanda Jesuspa churanara llangaca.

5:28b.MAR.005.028 Huarmiga nica: Ñuca paihua churanallais llangasha aliyashami.

5:29b.MAR.005.029 Cungaimanda yahuar saquirica; paihua aichai ali tucushcara riparaca.

5:30b.MAR.005.030 Shinajpi Jesús, ursa paihuajmanda ilucshishcara ricsisha, runaunama tigrarisha nica: ¿Pita ñuca churanara llangacachu?

5:31b.MAR.005.031 Pai yachachishca runauna paita ninauca: ¿Manzhu ricungui imasna runauna nitimurinaun? ¿Imarasha ningui: Pita llangahuaca?

5:32b.MAR.005.032 Paiga casna rajta ricsingaj muyujta ricuca.

5:33b.MAR.005.033 Shinajpi cai huarmi pai alichishcara yachasha, manzhasha chucchusha shamuca, Jesuspa ñaupajpi tuama urmasha tucuira paita cuentaca.

5:34b.MAR.005.034 Jesús nica: Ushushi, can quirishcamanda aliyashcangui. Ahila ringui, camba ungiiimanda llushpirishca tucungui.

5:35b.MAR.005.035 Jesús chara rimaushcai huaquinguna apu huasimanda shamusha apuma ninauca: Camba ushushi ña huañushcami, ¿imarasha Yachachijta yanga molestangui?

5:36b.MAR.005.036 Jesús paiguna rimashcara mana casusha tandarina huasimanda apura nica: Ama manzhaichu. Quirilla.

5:37b.MAR.005.037 Pitas mana lugarda cucachu paihua catingaj. Pedro, Jacobo paihua uqui Juandillara lugarda cuca catingaj.

5:38b.MAR.005.038 Apu huasima pactamuca. Jesús chihui ajguna nusparishcara ricuca, huacashcara caparishcaras uyaca.

5:39b.MAR.005.039 Jesús icusha paigunara nica: ¿Imarasha uyaringuichi, huacaunguichi? Huahua mana huañushcachu, puñunllami.

5:40b.MAR.005.040 Jesusta burlasha asinauca. Pai randi tucuira canzhama cachaca. Jesusga yayandi mamandi pai pushamushcaunandi huahua siriushcai icunauca.

5:41b.MAR.005.041 Huahuara maquimanda apisha, Jesús nica: Talita cumi. Caita runa shimii nin: Ushushihua, atari nini.

5:42b.MAR.005.042 Chi ratollai huahua atarisha puringaj callarica. Huahuaga chunga ishqui huatayuj aca. Chihui tiajguna ashcara manzharinauca.

5:43b.MAR.005.043 Jesús paigunara: Ama pimas cuentanguichichu, nica. Huahuara carangui, nisha rimaca.

6

6:1b.MAR.006.001 Chi partimanda llucshisha Jesús paihua quiquin llactama shamuca. Pai yachachishca runauna catimunauca.

6:2b.MAR.006.002 Samana punzhai judioguna tandarina huasii yachachingaj callarica. Ashca uyajguna manzharisha ninauca: ¿Paihua ushanara maimanda charingai? ¿Cai paima cushca yachai imarai? ¿Imarai caiguna paihua maquihua rashca sumaj atun rashcauna?

6:3b.MAR.006.003 Paiga, ¿manzhu carpintero runa? ¿Manzhu María churi? ¿Manzhu Jacobo, José, Judas, Simón nishcauna paihua uquiuna? ¿Manzhu paihua paniuna caibi ñucanchihua tianaun? Paimanda piñarinauca.

6:4b.MAR.006.004 Jesús paigunara nica: Maican Diosmanda rimaj llaquishca anga, astaun paihua aillullai paihua huasillai mana ali ricushca anga.

6:5b.MAR.006.005 Chi llactaiga mana ima sumaj ranaunara ushacachu. Huaquin ungushcaunallara maquira churasha alichicami.

6:6b.MAR.006.006 Jesús paiguna mana quirishcara ricusha llaquirica. Mayan llactaunara pasiasha yachachica.

6:7b.MAR.006.007 Chi huasha pai chunga ishqui yachachishca runaunara cayasha, ishqui ishquira caran partira cachaca. Irus supaigunara callpachina ushaira cuca.

6:8b.MAR.006.008 Ñambijta ama imaras apanguichichu, nica. Taunallara apanguichi, nica. Bolsaras tandaras cullquiras ama apanguichichu.

6:9b.MAR.006.009 Chaquii zapatosllara churaringuichi. Ishqui churanara ama apanguichichu.

6:10b.MAR.006.010 Jesús paigunara nica: Imahoras shu huasii icusha, chi llactamanda liucshingagama chi huasillai tiaunguichi.

6:11b.MAR.006.011 Imahoras cangunara mana chasquinaupi, mana uyanaupi, chi llactamanda llucshiusha canguna chaquimanda polvora chausinguichi, paiguna mana chasquishcara ricuchingaj. Cierto pacha cangunara nini, taripana punzhai Sodoma Gomorra nishca runauna livachishca tupu chi llactai ajguna livachishcamanda pishi angami.

6:12b.MAR.006.012 Paiguna llucshisha runaunara camachinauca: Arrepentirichi, huanaríchi, nisha.

6:13b.MAR.006.013 Shinallara ashca supaigunara ichunauca; ashca ungushcaunara aceitera uma ahuai talisha alichinauca.

6:14b.MAR.006.014 Jesuspa shuti yapa uyarishcamanda, Herodes rey apu pai rashcaunara uyasha, nica: Caimi bautisaj Juan anga; huañushcamanda causarisha cai sumaj ushanaunara raun.

6:15b.MAR.006.015 Shujguna: Elíasmi ninauca. Shujguna randi: Paimi shu Diosmanda rimaj yachin, ñaupa rimajguna cuenta.

6:16b.MAR.006.016 Caita uyasha, Herodes nica: Caimi uma pitisha huañuchishca Juan anga. Paiga huañushcaunamanda causarishcami.

6:17b.MAR.006.017 Ñaupaga Herodes cachasha Juanda apica. Paita huatasha chonda cularbi ishcaca, Herodías nishca rimashcamanda. Herodíasga paihua uqui Felipe huarmi aca, randi Herodes paita apica.

6:18b.MAR.006.018 Juan Herodesta nica: Mana raihuajchu camba uqui huarmira charingaj.

6:19b.MAR.006.019 Herodías Juanda chijnica, paita huañuchinara munaca, randi mana ushacachu.

6:20b.MAR.006.020 Herodesga Juanda manzhaca. Pai ali shungu, ali causaj ashcara ricsisha, paita huacachica. Herodes paita uyasha manzharica, munaihua paita uyaca.

6:21b.MAR.006.021 Herodes pagarishca punzha pactarijpi, paimi istara rarca apuunandi capitangunandi, Galileamanda valij runaunandi.

6:22b.MAR.006.022 Istai Herodíaspa ushushi icuca. Bailasha, Herodesta paihua mesai tiajgunandi cushiyachica. Shinajpi Herodes ushushira nica: Can munashcara mañahuai. Cushcangui.

6:23b.MAR.006.023 Herodes Diospa shutii rimasha nica: Tucui can mañashcara cushcangui. Ñuca rey apu chariushca chaupi allpagama cushcangui. nica.

6:24b.MAR.006.024 Ushushi llucshisha paihua mamara tapuca: ¿Imara mañashachu? nisha. Paihua mama rimaca: Bautisaj Juamba umara mañangui, nica.

6:25b.MAR.006.025 Uctalla ushushi rey apu ñaupajma icusha: Cunallara Bautisaj Juamba umara pitisha, pulatoi churasha cuhuai, nica. Shina nisha mañaca.

6:26b.MAR.006.026 Rey apu caita uyasha yapa llaquirica. Randi pai Diospa shutii rimashcamanda, mesai tiajgunamandas, Mana nisha rimanara mana munacachu.

6:27b.MAR.006.027 Chi ratollai rey apu soldarora Juamba umara pitisha apamungaj cachaca.

6:28b.MAR.006.028 Cai soldaro chonda cularbi icusha, umara pitisha, pulatoi churasha apamuca. Umara ushushima cuca, pai randi mamama cuca.

6:29b.MAR.006.029 Juan yachachishca runauna paita huañuchishcara uyasha shamunauca. Paihua aichara apasha, aya huasii pambanauca.

6:30b.MAR.006.030 Jesús cachashca runauna paihuajma tandarisha tucuira cuentanauca. Paiguna tucui rashcaunara paiguna yachachishcaras cuentanauca.

6:31b.MAR.006.031 Jesús paigunara nica: Runa illashca partima shamichi ansa samangaj. Paiguna tiaushcai pasamujguna shamushcamanda micungajllas lugarda mana charinaucachu.

6:32b.MAR.006.032 Canoai icusha runa illaj partima paigunalla rinauca.

6:33b.MAR.006.033 Paiguna riushcara ashca runauna ricunauca, Jesustas ricsinauca. Chaquihua purijguna llactaunamanda chillai tandarimunauca. Jesusguna manara pactamushcaira chima shamunauca.

6:34b.MAR.006.034 Jesús canoamanda llucshisha, ashca runaunara ricuca. Paigunamanda llaquirica, paiguna cuiraj illaj borregounasna asha. Paigunara ashcara yachachingaj callarica.

6:35b.MAR.006.035 Ña tutayaupi, Jesús yachachishca runauna paima shamunauca: Cai llactaga huasi illaj nisha, tutayaunmi.

6:36b.MAR.006.036 Runaunara dispiringui, ninauca mayan llactaunama rinauchu, tandara randinauchu. Caibi micunara mana charinaunzhu.

6:37b.MAR.006.037 Jesús paigunara cutipasha nica: Cangunalla runaunara caranguichi. Paiguna randi: ¿Ishqui patsaj cullqui tupu tandara randij rishun runaunara carangaj? tapunauca.

6:38b.MAR.006.038 Jesús paigunara: ¿Masna tandara charinguichi? nica. Ricui richi. Yachajpi, pichca tandandi ishqui challuandi, charinchi, ninauca.

6:39b.MAR.006.039 Paigunara verde quihua ahuai montombi montombi tiarichichi, nica.

6:40b.MAR.006.040 Montombi tiarinauca; shu montombi pichca chunga, shu montombi pichca chunga.

6:41b.MAR.006.041 Shinajpi Jesús pichca tandandi ishqui challuandi maquii apisha, ahuama ricusha, bendiciaca. Tandara paquisha yachachishca runaunama cuca, tucuima carangaj. Ishquindi challuaras paquisha caranma cunauca.

6:42b.MAR.006.042 Tucui amijta micunauca.

6:43b.MAR.006.043 Tanda puchuunara chunga ishqui suru tasa tupura pallanaucami, challuamanda puchuunandi.

6:44b.MAR.006.044 Micujguna pichca huaranga tupu cariuna aca.

6:45b.MAR.006.045 Chi ratollaira Jesús pai yachachishca runaunara: Canoai icuichi, nica. Ñuca runaunara dispiringagama, ñucamanda ñaupa Betsaida llactama chimbaichi.

6:46b.MAR.006.046 Runaunara dispirishca huasha Jesús urcuma rica Diosta mañangaj.

6:47b.MAR.006.047 Chishi llanduyanara canoa chaupi lamarbi tiauca. Jesús sapalla yacu patai shayarica.

6:48b.MAR.006.048 Huaira shujpurama apaupi, shinzhira cahuirianauca. Jesús paiguna sambayashcara ricuca. Punzhayanara Jesús yacu ahuara purisha paigunama shamuca, ñaupasha pasajsna.

6:49b.MAR.006.049 Paiguna Jesusta yacu ahuara puriuta ricusha, Ayami, nisha caparinauca.

6:50b.MAR.006.050 Tucui paita ricusha turbarinauca. Uctalla Jesús paigunara rimaca: Cushiyaichi, nisha, ñuca maní, ama manzhaichichu.

6:51b.MAR.006.051 Paigunajma canoai sicaca. Huaira saquirica. Ashca manzhaihua manzharinauca.

6:52b.MAR.006.052 Tandara mirachishcara chara mana intindinauca, paiguna shungu shinzhiyashcaraigu.

6:53b.MAR.006.053 Chimbai pasashca huasha, Genesaret partima shamunauca; pulayama llutarinauca.

6:54b.MAR.006.054 Paiguna canoamanda Ilucshijpi, chihui tiajguna Jesusta ricsinauca.

6:55b.MAR.006.055 Entero llacta partiuna muyujta purisha, ungushcaunara apamui callarinauca huanduunai, Jesús maibi tiaushcaras uyasha.

6:56b.MAR.006.056 Maitas pai puriushca, mai llactaunai, mai partiunais, ungushcaunara ñambiunai churanauca. Paihua churana pundahuallais llangangaj ruganauca. Casna rasha tucui llangajguna aliyanauca.

7

7:1b.MAR.007.001 Fariseogunandi huaquin yachaira yachachijgunandi Jerusalenmanda shamujguna, Jesusma llutarimunauca.

7:2b.MAR.007.002 Paigunaga Jesús yachachishca runaunara maquira mana maillasha tandara micuuta ricusha causayachinauca.

7:3b.MAR.007.003 Fariseoguna tucui judiogunandi rucuuna yachaira catisha, maquira mana ali maillasha mana micujguna aca.

7:4b.MAR.007.004 Pulasamanda tigramusha mana maillasha mana micunaun. Ashca shu mandashca shimiunara charinauca huacachingaj. Shinallara paiguna yachaira tucui upina cuya, tucui quisa, tucui iru manga, tucui caitu, tucuira maillajguna aca.

7:5b.MAR.007.005 Fariseoguna yachaira yachachijgunandi Jesusta tapunauca: ¿Imarasha can yachachishca runauna rucuuna camachishcasna mana purinaun, randi maquira mana maillasha micunaun? nisha.

7:6b.MAR.007.006 Jesús paigunara cutipaca: Ishqui shimiyujguna, alimi cangunamanda ñaupa horas rimaca Isaías, pai quillcashcasna: Cai runauna shimillahua llaquihuanaun; astaumbas paiguna shungu ñucamanda carui tiaun.

7:7b.MAR.007.007 Yangami ñucara ahuayachinaun; runauna mandashcaunara Dios camachishcasna yachachisha.

7:8b.MAR.007.008 Dios camachishca shimira saquisha, runa rimashca shimiunara huacachinguichi: quisaunara maillasha, upina cuyaunara maillasha, shinallara imaras ranguichi.

7:9b.MAR.007.009 Jesús shinallara nicami: Cierto pacha Dios camachishca shimira mana valijta ranguichi, canguna yachaira huacachingaj.

7:10b.MAR.007.010 Moisés rimacami: Camba yayara camba mamara llaquina mangui. Maicans paihua yayara mamara chijnisha rimasha, shu rai huañungami.

7:11b.MAR.007.011 Randi canguna rimanguichi: Shu runa paihua yayara mamara rimasha, Tucui ñuca charishcara canda valirinaunara Diosma cushcami, nisha,

7:12b.MAR.007.012 yayara mamara yanapangaj ña lugarda mana cunguichichu.

7:13b.MAR.007.013 Shina rasha Diospa shimira mana valijta ranguichi canguna yachaihua. Ashcaunara shina samira ranguichi.

7:14b.MAR.007.014 Jesús tucui tandarijgunara cayasha rimaca: Uyahuaichi, intindihuaichi, nisha.

7:15b.MAR.007.015 Pajllamanda runai icuj mana huajlichin, randi paiguna iyaimanda llucshij, caita runara cierto pacha huajlichin.

7:16b.MAR.007.016 Maicambas uyana rinrira charisha uyachu.

7:17b.MAR.007.017 Jesús runaunamanda anzhurisha, huasii icusha, chihuimi pai yachachishca runauna pai yachachingaj cuentanamanda tapunauca.

7:18b.MAR.007.018 Paigunara rimaca: ¿Canguna shinallara mana intindinguichichu? ¿Manzhu ricsinguichi pajllamanda runai icuj mana huajlichinzhu?

7:19b.MAR.007.019 Pajllamanda icuj mana shungüi icun, astaumbas icsai icusha ismana huasima pasan. Shina nisha tucui aichara ali micunalla rarca.

7:20b.MAR.007.020 Astaumbas, nica, runamanda llucshij iyaiguna, caiguna runara huajlichin.

7:21b.MAR.007.021 Runa shungu ucumandaga manali iyaiguna, shujhua tacarinauna, uchalinauna, runara huañuchinauna llucshinaun.

7:22b.MAR.007.022 Shinallara llucshinaun: Shuhuanauna, cullquira yapa muñanauna, manali ranauna, umachina, irus iyai, chijnina, camina, mas tucuisiqui iyai, mana racional iyaiguna.

7:23b.MAR.007.023 Shungu ucumanda cai tucui irusguna llucshinaun, runara huajlichinaun.

7:24b.MAR.007.024 Chimanda atarisha, Tiro Sidón nishca llactaunama rica. Shu huasii icusha, pis caita ama yachanauchu munaca. Paulara pacanara mana ushacachu.

7:25b.MAR.007.025 Shu huarmi, paihua ushushihua irus supaira charisha, Jesús pactamushcara uyasha, shamusha paihua chaquii tuama urmacami.

7:26b.MAR.007.026 Griego huarmi aca, Sirofenecia partimanda. Paiga Jesusta rugasha nica: Ñuca ushushimanda supaira ichupai.

7:27b.MAR.007.027 Jesús cutipaca: Ñaupara sajsanauchu churiuna. Mana valinzhu churiuna tandara apisha ichilla allcuunama shitangaj.

7:28b.MAR.007.028 Huarmiga cutipasha nica: Ari, Señor, randi mesa ucui tiaj allcuhuauna churiuna micushcamanda urmaj puchuhuaunara micunaun.

7:29b.MAR.007.029 Shinajpi Jesús paita rimaca: Caita rimashcamanda, canda: Ri, nini, camba ushushimanda supai ña llucshishcami.

7:30b.MAR.007.030 Huarmi paihua huasima pactajpi, ushushimanda supai llucshishcara tupaca. Ushushi caitui siriuca.

7:31b.MAR.007.031 Jesús Tiro llactamanda tigramusha, Sidón llactara pasasha, Galilea lamarma pactamuca. Decápolis nishca partí chaupi shungura pasaca.

7:32b.MAR.007.032 Shu upa rinriyuj upa shimiyuj runara paihuajma pushamunauca. Camba maquira paihua ahuai churapai, rugasha ninauca.

7:33b.MAR.007.033 Paita runaunamanda chicanma pushasha, Jesús rerounara rinri uctui satica, tiucasha paihua callura llangaca.

7:34b.MAR.007.034 Ahua pachama ricusha, Jesús llaquirica: Efata, nica. Caitaga runa shimii, Pascarichu, nin.

7:35b.MAR.007.035 Chi ratollaira paihua rinris paihua huatashca callus pascaricami, alimi rimaca.

7:36b.MAR.007.036 Pitas ama cuentanguichichu nisha camachica. Paigunara caita mas mandajpi astaun mas uyachinauca.

7:37b.MAR.007.037 Paiguna ashcara manzharinauca, casna nisha: Pai tucuira alirami rashca. Upa rinriuna uyanaun, upa shimiuna rimanaun.

8

8:1b.MAR.008.001 Chi punzhaunai ashca runauna tianauca. Micunara mana charinaucachu. Jesús pai yachachishca runaunara cayasha nica:

8:2b.MAR.008.002 Cai tucui runaunamanda llaquirini, nica. Ña quinsa punzha ñucahua tiasha mana micunaun.

8:3b.MAR.008.003 Yarcaira cachajpi paiguna huasiunama, ñambii desmayarinaungami. Huaquinguna carumanda shamunaushca.

8:4b.MAR.008.004 Pai yachachishca runauna cutipanauca: ¿Cai tucuira maimanda tandara carangaj ushashun casna illaj partii?

8:5b.MAR.008.005 Shinajpi Jesús tapuca: ¿Masna tandara charinguichi? Paiguna cutipasha: Canzhista, ninauca.

8:6b.MAR.008.006 Chi tucui runaunara allpai tiaringaj rimaca. Chi canzhis tandara apisha, Diosta agrasishca huasha, paquisha, pai yachachishca runaunama cuca, runauna ñaupajpi churangaj. Shina rasha churanaucami runauna ñaupajpi.

8:7b.MAR.008.007 Shinallara ansa yacu aichahuaunara charinauca. Bendiciashca huasha runauna ñaupajpi churangaj rimaca.

8:8b.MAR.008.008 Sajsajta micunauca. Puchuunara pallanaucami canzhis tasa tupura.

8:9b.MAR.008.009 Micujguna chuscu huaranga tupu anauca. Jesús paigunara dispirica.

8:10b.MAR.008.010 Shinajpi Jesús pai yachachishca runaunandi canoai icusha, Dalmanuta partima shamunauca.

8:11b.MAR.008.011 Fariseoguna paihuajma shamunauca. Jesushua rimananauca: Ahua pachamanda ricurinara ricuchihuai, nisha, paita tentangaj.

8:12b.MAR.008.012 Jesús paihua shungüi llaquirisha nica: ¿Imarasha ahua pachamanda ricurinara ricuchihuai, ninguichi? Cierto pacha cangunara nini: Mana ima ricurinaras ahua pachamanda ricuchishca anga cai horas ajgunama.

8:13b.MAR.008.013 Paigunara saquisha cutillara canoai icusha chimba partima rica.

8:14b.MAR.008.014 Tandara apañara cungarisha rinaushca aca. Shu tandahuallara paigunahua canoai charinauca.

8:15b.MAR.008.015 Jesús paigunara rimaca: Iyaihua puringuichi fariseoguna tandara punguich'na polvo samimanda, Herodespa tandara punguichina polvo samimanda.

8:16b.MAR.008.016 Paigunapura rimananauca: Tandara mana apamushcaraigu casnami riman.

8:17b.MAR.008.017 Jesusga paiguna rimaushcara intindisha nin: ¿Imara rimaunguichi cangunapura, tandara mana charishcamanda? ¿Mana riparanguichi, mana intindinguichi? ¿Chara canguna shungura shinzhiyashcara charinguichi?

8:18b.MAR.008.018 ¿Ñahuira charishallara mana ricunguichi? ¿Rinrira charíshaliara mana uyanguichi? ¿Manzhu iyaringuichi?

8:19b.MAR.008.019 Ñuca pichca tandara partiushca horas pichca huaranga runauna chaupii, ¿puchuunara masna tasahuara undaita pallacanguichi? Paiguna cutipanauca: Chunga ishquira.

8:20b.MAR.008.020 Chishu horas canzhis tandara chuscu huaranga runa chaupii particani. ¿Masna atun tasara undajta puchuunara pallacanguichi? Paiguna: Canzhista, cutipanauca.

8:21b.MAR.008.021 Jesús paigunara nica: ¿Imarasha charajpas mana intindinguichichu?

8:22b.MAR.008.022 Jesús Betsaida llactama pactamuca. Paihuajma shu ñausa runara pushamunauca. Llangapai nisha ruganauca.

8:23b.MAR.008.023 Shinajpi ñausa runara maquimanda apisha llacta huashama pushaca. Jesús ñausa runa ñahui muyui tiucasha maquira paihua ahuai churasha tapuca: ¿Imaras ricunguichu? nisha.

8:24b.MAR.008.024 Paiga ñahuira atarichisha ricuca: Runaunara ricunimi, nica, purij yuraunasna.

8:25b.MAR.008.025 Chi ratollaira Jesús cutillara maquira paihua ñahuii churajpi, runa ali ricuca. Alichishca aca. Tucuira carama pajlla pambai ricucami.

8:26b.MAR.008.026 Jesús paita: Camba huasima ri, nisha cachaca. Llactai ama icunguichu, llactai ama pitas rimanguichu, nica.

8:27b.MAR.008.027 Jesús pai yachachishca runaunandi llucshisha, Cesárea de Filipo llacta muyujta ichilla llactaunama rica. Ñambii pai yachachishca runaunara tapuca: ¿Pimi nishara iyanaun ñucara, runauna? nica.

8:28b.MAR.008.028 Paiguna cutipanauca: Huaquinguna Bautisaj Juan, ninaun; huaquinguna Elias; shujguna shu Diosmanda rimaj, ninaun.

8:29b.MAR.008.029 Shinajpi Jesús tapuca: ¿Cangunaga, pimi nishara iyahuanguichi? Pedro paima cutipasha: Canmi Cristo angui, nica.

8:30b.MAR.008.030 Jesús paigunama rimaca: Pitas caita ama uyachinguichi, nisha.

8:31b.MAR.008.031 Jesús paigunara yachachingaj callarica: Ñuca, Runa Churi nishca, ashca tormendarina ministirinmi, nisha; rucuuna, sacerdote apuuna, yachaira yachachijguna ñucara ichusha, huañuchihuanaunga; quinsa punzha huashaga causarishami.

8:32b.MAR.008.032 Jesús caita pajlla pambai rimaca. Shinajpi Pedro paita shu partima pushasha nanajta rimai callarica.

8:33b.MAR.008.033 Jesús voltiarisha, pai yachachishca runaunara ricusha, Pedrora piñaca: Ñucamanda anzhuri, Satanás, nisha, Diospajgunara mana ricungui, astaumbas runajgunaüara ricungui.

8:34b.MAR.008.034 Tucui runaunara pai yachachishca runaunandi cayasha, Jesús paigunara nica: Pihuas ñucallara catisha nisha, Mana imaschu ani nichu; paihua cruzta aparisha ñucara catimuchu.

8:35b.MAR.008.035 Maicans paihua causaira quishpichisha nisha, causaira pirdingami. Randi maicambas paihua causaira pirdisha ñucaraigumanda, evangelio ali shimimandas, paihua causaira quishpichingami.

8:36b.MAR.008.036 ¿Imajta valingai runara entero mundura ganashas astaun paihua almara pirdijpi?

8:37b.MAR.008.037 ¿Ima paganaras cungai shu runa paihua almamanda?

8:38b.MAR.008.038 Maican runas ñucamandas ñuca shimimandas pingarijpi cai tacarisiqui ucharaisiqui horasgunai, ñuca, Runa Churi nishca, shinallara paimanda pingarishami ñuca shamuna horas ñuca Yaya sumajhua santo angelgunahua shamushcai.

9

9:1b.MAR.009.001 Shinallara rimaca: Cierto pacha cangunara nini, huaquinguna caibi tiajguna manara huañujllaira Dios mandana pachara ushanahua shamushcara ricunaungami.

9:2b.MAR.009.002 Socta punzha huasha, Jesús Pedrora Jacoboras Juandas paiguna sapallara ahua urcuma pushaca. Paiguna ñaupajpi Jesús shu tono ricurica.

9:3b.MAR.009.003 Paihua churana sumaj chiujlla tucuca, rasu cuenta yurajmi ricurica. Mana maicans cai pachai tacsaj chi tupura yurajyachina ushanmachu aca.

9:4b.MAR.009.004 Elias Moisesndi ricurimunauca, Jesushua cuentanausha.

9:5b.MAR.009.005 Shinajpi Pedro Jesusta rimasha: Yachachij, nica, alimi ñucanchi caibi saquirishun. Quinsa huasihuara rashunchi; cambajta shuj, Moisespajta shuj, Eliaspajta shuj.

9:6b.MAR.009.006 Pai rimashcara mana yachaca. Manzharisha tianauca.

9:7b.MAR.009.007 Shu puyu shamusha llanducami. Puyumanda shu shimi rimashca uyarica: Caimi ñuca llaquishca Churi, nisha, paita uyaichi.

9:8b.MAR.009.008 Chi ratollaira, runauna cuti ricusha, Jesús sapalla shayauca; pihuas mana ricuricachu Jesushua.

9:9b.MAR.009.009 Paiguna urcumanda irgumusha, Jesús rimaca: Pitas canguna ricushcara ama rimanguichichu ñuca, Runa Churi nishca, huañushcaunamanda causarinagama.

9:10b.MAR.009.010 Paiguna cai shimira huacachinauca. Paigunapura rimananauca: ¿Imara angairí, nisha, cai huañushcaunamanda causarinaga?

9:11b.MAR.009.011 Jesusta tapunauca: ¿Imarasha ninaun yachaira yachachijguna, Elias ñaupara shamuna ministirin?

9:12b.MAR.009.012 Jesús cutipaca: Elias cierto pacha ñaupara shamungami

9:13b.MAR.009.013 Randi cangunara nini, Elias ña shamushcami. Runauna paiguna munaira imaras ranauca, paimanda quillcashcasna.

9:14b.MAR.009.014 Jesús pai yachachishca runaunama pactamusha, ashca runauna paiguna muyujta tandarishcara ricuca. Yachaira yachachijguna paigunahua rimananauca.

9:15b.MAR.009.015 Chi ratoi tucui runauna Jesusta ricusha, manzharisha callpamusha, paita saluranauca.

9:16b.MAR.009.016 Jesús tapuca: ¿Imara rimanaunguichi chigunahua?

9:17b.MAR.009.017 Runa montonmanda shuj rimaca: Yachachij, nisha, ñuca churira pushamucani. Paihuajpi shu upa shimi supaira charin.

9:18b.MAR.009.018 Chi supai maibis paita apishcai chucchuchin. Quiru mucusha puscu talirin; ricujpi huahua chaquirisha riunmi. Can yachachishca runaunara rimacani: Ichupai pajllama, nisha. Astaun paigunaga mana ushanaucachu.

9:19b.MAR.009.019 Jesús cutipasha paigunara: ¡Mana quirij miraiguna! ¿Imahorasgarna cangunahua tiana ani? ¿Imahorasgama cangunara ahuantana ani? Ñucama huahuara pushamichi.

9:20b.MAR.009.020 Shinajpiga pushamunaucami. Supaiga Jesusta ricusha huahuara chucchuchica, allpama urmachica. Puscu talirisha huahua allpai cahuirica.

9:21b.MAR.009.021 Jesús yayara tapuca: ¿Imahorasmanda pacha casna tucushcai? Yaya nica: Casna tucushca ichilla huahua horasmanda pacha.

9:22b.MAR.009.022 Ashca cuti ninais yacuis urmachin huahuara huañuchingaj. Imaras ushasha llaquihuapai, yanapahuapai ñucanchira.

9:23b.MAR.009.023 Jesús paita nica: Can quirinara ushasha, quirijgunaraga imaras usharin.

9:24b.MAR.009.024 Chi ratollai huahuayuj yaya caparisha rimaca: Quirinimi, astaumbas ñuca mana quirishcara yanapahuapai.

9:25b.MAR.009.025 Jesusga runauna nitirimushcara ricusha supaira piñacami, shina nisha: Upa shimi upa rinri supai, llucshi nini, huahuamanda; cuti paihuajpi ama icungui.

9:26b.MAR.009.026 Shinajpi supai caparisha. huahuara shinzhira chucchuchisha, paimanda llucshica. Huahuaga huañushcasna saquirica. Shinajpi huaquinguna, Huañushcami, ninauca.

9:27b.MAR.009.027 Randi, Jesús huahuara maquimanda apisha dirichuyachicami. Shina rajpiga huahua ataricami.

9:28b.MAR.009.028 Jesús huasi ucuma icusha, pai yachachishca runauna paita shujma cayasha tapunauca: ¿Imamanda ñucanchi supaira ichunara mana ushacanchichu? nisha.

9:29b.MAR.009.029 Shinajpi Jesús nica: Cai samiuna sasinallahua, Diosta mañashcallahuas llucshinaun.

9:30b.MAR.009.030 Chi partimanda llucshisha Galilea partira purinauca. Jesusga pihuas ama yachanauchu munaca.

9:31b.MAR.009.031 Pai yachachishca runaunara camachicami: Ñuca Runa Churi nishca, runauna maquii entregashca asha; ñucara huañuchihuanaungami. Huañushca huasha quinsa punzhai causarishami.

9:32b.MAR.009.032 Paigunaga cai shimira mana intindinaucachu. Jesusta tapungaj manzhanaucami.

9:33b.MAR.009.033 Capernaum llactama pactajpi, huasii tiausha, Jesús paigunara tapuca: ¿Cangunapura ñambii imara rimanaucanguichi?

9:34b.MAR.009.034 Paigunaga mana ansas cutipanaucachu, ñambii paigunapura pita ñaupa tucungai rimanaushcamanda.

9:35b.MAR.009.035 Shinajpi Jesús tiarisha paihua chunga ishqui runaunara cayasha paigunama rimaca: Maican runa ñaupa tucuna munajpi, tucuimanda huasha tucungami, tucuira sirvij tucungami.

9:36b.MAR.009.036 Jesús shu ichilla huahuara apisha, paiguna chaupi shungüi churasha, paihua maquii marcasha, paigunara rimaca:

9:37b.MAR.009.037 Maican ñuca shutii shu casna ichilla huahuara chasquisha, ñucaras chasquin; maican ñucara chasquisha, mana ñucallara chasquin, astaun ñucara cachamuj Diostas chasquin.

9:38b.MAR.009.038 Juan rimaca: Yachachij, shu runara ricucanchi, camba shutii supaigunara callpachica. Paiga mana ñucanchihua catimun. Mana catimushcamanda paita: Ama casna raichu nisha rimacanchi.

9:39b.MAR.009.039 Jesús cutipaca: Ama paita mitsaichichu. Maican runas ñuca shutii munanaita rau mana dsas manalira rimahuanga ñucamanda.

9:40b.MAR.009.040 Maicans mana ñucanchihua contra tiausha, ñucanchi partima tian.

9:41b.MAR.009.041 Maicambas ñuca shutii cangunama shu yacu vasora cujpi, canguna Cristojguna ashcamanda, cierto pacha cangunara nini: Pai cushcara mana pirdingachu.

9:42b.MAR.009.042 Maicans cai ñucajpi quiriu ichilla huahuaunara manalii urmachijpi, astaun ali anma paihua cungai shu atun cutana rumira huatasha lamarbi paita shitanauchu.

9:43b.MAR.009.043 Camba maqui canda uchai urmachijpi, piti. Ishqui maquihua ucu pachama, mana huañuihuaj ninama rinamanda astaun ali anma pullu maqui causanama icungaj.

9:44b.MAR.009.044 Ucu pachai paiguna aichai miraj curu mana huañungachu, ninas mana imahoras huañuringachu.

9:45b.MAR.009.045 Camba chaqui uchai urmachijpi, piti. Ishqui chaquihua ucu pachama, mana huañuihuaj ninama rinamanda astaun ali anma pullu chaqui causanama icungaj. Ucu pacha ninara mana huañuchihuajehu.

9:46b.MAR.009.046 Ucu pachai paiguna aichai miraj curu mana huañungachu, ninas mana imahoras huañuringachu.

9:47b.MAR.009.047 Camba ñahui canda uchai urmachijpi, llucchi. Ishqui ñahuihua ucu pachama rinamanda astaun ali anma chulla ñahuiyuj Dios mandana pachai icungaj.

9:48b.MAR.009.048 Ucu pachai paiguna aichai miraj curu mana huañungachu, ninas mana imahoras huañuringachu.

9:49b.MAR.009.049 Tucuira ninahua pichashca anga; shinallara tucui sacrificio nishcara cachihua pichashca anga.

9:50b.MAR.009.050 Cachi alimi. Cachi upa tucujpiga, ¿imahua mishquiyachinguichima? Cachira cuenta canguna shungüi charichi. Parijumanda cushiyaichi.

10

10:1b.MAR.010.001 Chimanda risha, Jesús Judea partima, Jordan yacu chimba partima shamuca. Runauna cutillara tandarimujpi Jesús pai ñaupa rashcasna cuti paigunara camachica.

10:2b.MAR.010.002 Jesusma llutarimusha fariseoguna, paita pandachisha nisha tapunauca: ¿Shu runa paihua huarmira ichunallachu?

10:3b.MAR.010.003 Jesús cutipasha rimaca: ¿Moisés imara camachica cangunara?

10:4b.MAR.010.004 Paiguna cutipanauca: Moisés lugarda cuca maqui llushpirina quillcara quillcasha huarmira cachangaj.

10:5b.MAR.010.005 Jesús paigunara cutipasha nica: Canguna shungu shinzhi ashcaraigumanda Moisés cai camachishcara quillcacami.

10:6b.MAR.010.006 Astaun cai pachara rashca horasmanda Dios runaunara cariras huarmiras iñachicami.

10:7b.MAR.010.007 Chiraigumanda shu cari paihua yayara mamara saquisha, quiquin huarmihua llutaringami.

10:8b.MAR.010.008 Ishquindi shu aichalla tucunaun; shinajpi ña mana ishquichu astaun shujllami tucun.

10:9b.MAR.010.009 Shinajpi Dios llutachishcáraga runa ama llushpichichu.

10:10b.MAR.010.010 Huasii icushaga, pai yachachishca runauna cuti chi rimashcara tapunaucami.

10:11b.MAR.010.011 Jesús nica: Maicans paihua huarmira ichusha, shujhua casarasha, paiga shujhua tacarij tucun.

10:12b.MAR.010.012 Shinallara huarmis paihua carira ichusha, shujhua casarasha, shujhua tacarij tucun.

10:13b.MAR.010.013 Huahuaunara Jesusma pushamunauca, paihua maquira paiguna ahuai churangaj. Pai yachachishca runaunaga pushamujgunara piñanauca.

10:14b.MAR.010.014 Jesús caita ricusha piñarica. Lugarda cuichi, nica, huahuauna ñucama shamunauchu. Paigunara ama arcaichichu. Paigunajmi Dios mandana pacha.

10:15b.MAR.010.015 Cierto pacha cangunara nini maicambas shu huahuasna Dios mandana pachara mana chasquijpiga mana icungachu.

10:16b.MAR.010.016 Jesús huahuaunara paihua maquii marcasha, maquira paiguna ahuai churasha, bendiciacami.

10:17b.MAR.010.017 Jesús llucshisha, pai nambira ringaj, shu runa callpasha shamuca. Jesuspa ñaupajpi cungurisha tapuca: Ali Yachachij, nisha, ¿imara rashai huiñai causaira apingaj?

10:18b.MAR.010.018 Jesús nica: ¿Imamanda ali nisha rimahuanguichu? Shujpas mana ali tian; Dioslla alimi.

10:19b.MAR.010.019 Dios camachishca shimiunara yachangui: Ama shujhua tacaringuichu. Ama huañuchinguichu. Shujgunamanda ama yanga llullanguichu. Ama umachinguichu. Camba yayara camba mamara llaquina mangui.

10:20b.MAR.010.020 Runa cutipasha nica: Yachachij, cai tucuira pactachishcanimi ñuca maltamanda pacha.

10:21b.MAR.010.021 Shinajpi Jesús paita ricusha llaquicami. Shujta pishinmi, nica. Ri, can tucui charishcara catuiri; tsuntsu runaunama cuyai. Randi ahua pachai ashca charij tucungui. Shami, camba cruzta aparisha catihuai.

10:22b.MAR.010.022 Cai shimira uyasha, chi runa llaquiricami. Llaquirisha tigracami. Paiga ashcara charij maca.

10:23b.MAR.010.023 Shinajpi Jesús muyujta ricusha, pai yachachishca runaunara nica: Charijguna tormendoshua icunaunga Dios mandana pachai.

10:24b.MAR.010.024 Pai yachachishca runauna cai shimira uyasha manzharinauca. Jesusga cutillara rimaca: Churiuna, maicanguna charishcaunara iyajpiga, tormendosmi icunaunga Dios mandana pachai.

10:25b.MAR.010.025 Mas raihuajmi camello nishca tupuili uctura pasangaj, randi pishi raihuajmi shu charij runa Dios mandana pachai icungaj

10:26b.MAR.010.026 Paigunaga maspas manzharinauca. Paiguna shungüi ninauca: ¿Pita quishpinara ushangairi?

10:27b.MAR.010.027 Shinajpi Jesús paigunara ricusha nica: Runaunajga mana ushaihuajchu, randi Dioshua imaras usharin. Dioshuaga tucui ushanallami.

10:28b.MAR.010.028 Shinajpi Pedro rimai callarica: Ñucanchiga tucuira saquisha canda catimushcanchi.

10:29b.MAR.010.029 Jesús cutipasha nica: Cierto pacha cangunara nini: Maicans ñucara llaquishcamanda, evangelio ali shimira llaquishcamanda, paihua huasira, uquíunara, paniunara, yayara, mamara, huarmira, churiunara, quiquin allpaunaras saquishca anga,

10:30b.MAR.010.030 paiga cierto pacha shu patsaj cuti yalijta cui tucungami, huasiunara, uquiunara, paniunara, yayaunara, mamaunara, churiunara, quiquin allpaunara cai horasgunai llaquiunandi; maspas shamuj horasgunai huiñai causaira charingami.

10:31b.MAR.010.031 Shinajpi ashcauna ñaupa ajguna puchucaiguna tucunaungami; randi puchucaiguna ñaupa anaungami.

10:32b.MAR.010.032 Jerusalenma riña nambira sicasha rinauca. Jesús paigunamanda ñaupa riucami. Paiguna llaquirinauca, manzharisha catimunauca. Shinajpi pai chunga ishqui yachachishca runaunara shu partima cayasha cutillara yachachingaj callarica paita ima samiuna tucungaraushcaras.

10:33b.MAR.010.033 Jerusalenma sicaunchi, nica. Ñuca, Runa Churi nishcara, sacerdote apuuna maquu yachaira yachachijguna maquiis cunaungami. Huañuchichu nisha causayachinaungami. Gentiles nishca runaunama cunaungami.

10:34b.MAR.010.034 Ñucara camisha asihuanaungami, livachihuanaungami, ñuca ñahuii tiucahuanangami. Shina rasha huañuchihuanaungami. Randi quinsa punzhai causarishami.

10:35b.MAR.010.035 Shinajpi Jacobo Juandi, Zebedeo churiuna, Jesusma llutarimunauca. Yachachij, ninauca, ñucanchi mañashcara rapai.

10:36b.MAR.010.036 Jesús cutipaca: ¿Imara ranara munanguichiri?

10:37b.MAR.010.037 Paiguna ninauca: Ñucanchima cuhuai, can sumaj tiashcai, shuj camba ali partima shujga lluqui partima tiaringaj.

10:38b.MAR.010.038 Jesús paigunara nica: Canguna mañashcara mana intindinguichichu. ¿Ñuca upina vasora cuenta ushanguichichu upinara? ¿Ñuca bautisanahua cuenta ushanguichichu bautisaringaj?

10:39b.MAR.010.039 Paiguna cutipanauca: Ushanchimi, nisha. Shinajpi Jesús paigunara nica: Cierto pacha nini, ñuca upina vasora cuenta upinguichimi, ñuca bautisanahua cuenta bautisarishca anguichimi.

10:40b.MAR.010.040 Astaun canguna mañashcara, ñuca ali maquima ñuca lluqui maquimas tiarinaraga, caita mana ñuca cunachu. Randi pigunajta ña alichishcami, chigunama cushca anga.

10:41b.MAR.010.041 Chi shu chunga ajguna uyashaga, Jacobohua Juanhuas piñari callarinauca.

10:42b.MAR.010.042 Jesús paigunara cayasha nica: Canguna yachanguichi imasna gentilgunajpi apu ajguna ahuayanaun paiguna ñaupajpi, atunguna paigunara mandanaun.

10:43b.MAR.010.043 Cangunapura mana shina angachu. Astaumbas maican cangunapurai atunyasha nisha, paiga cangunara sirvij tucungami.

10:44b.MAR.010.044 Cangunapuramanda maican ñaupa tucusha nijpi tucuira sirvij anga.

10:45b.MAR.010.045 Ñuca, Runa Churi nishca, mana sirvishca tucungaj shamucanichu astaun sirvingaj. Ashcauna randimanda ñuca causaira cungaj shamucanimi.

10:46b.MAR.010.046 Shinajpi Jérico llactama shamunauca. Huashaga Jesús llactamanda llucshimuca pai yachachishca runaunandi ashca taucarimujgunandi. Ñambi rayai shu ñausa runa, Bartimeo nishca, Timeo churi, tiauca. Cuyahuaichi nisha, rugasha tiauca.

10:47b.MAR.010.047 Bartimeoga Nazaretmanda Jesús shamuuta uyasha, caparingaj callarica: Jesús, Davidpa Churi, llaquihuapai, nisha.

10:48b.MAR.010.048 Ashca runauna piñanauca: Upalla, ama caparichu, nisha. Pai randi mas shinzhira caparica, Davidpa Churi llaquihuapai, nisha.

10:49b.MAR.010.049 Shinajpi Jesús shayarisha cayangaj cachaca. Ñausa runara cayasha rimanauca: Cushiyangui, atari, Jesús canda: Shami, nin.

10:50b.MAR.010.050 Paiga paihua churanara ichusha, atarisha, Jesusma shamuca.

10:51b.MAR.010.051 Jesús cutipasha rimaca: ¿Imara canhua rangaj munanguiri? Ñausa runa nica: Yachachij, ñuca ricuj tucungaj munani.

10:52b.MAR.010.052 Jesús paita nica: Ri, can quirishca canda quishpichishcami. Chi ratollaira ricuj tucuca. Pai Jesusta catica ñambii.

11

11:1b.MAR.011.001 Paiguna Jerusalén llactama mayanllayaushcai, Betfagé Betania llactauna mayambi pactamunauca, Olivos urcu rayai. Chihui Jesús pai yachachishca runaunamanda ishquira cachaca.

11:2b.MAR.011.002 Paigunara nica: Richi, canguna ñaupai ricurij llactama. Chihui pactai rishaga, shu malta burra huatashcara tupanguichi, maican runa paihua ahuai mana montashcachu. Pascasha apamichi.

11:3b.MAR.011.003 Maicambas rimajpiga: ¿Imamanda shina raunguichi? nisha, cutipanguichi: Señor ministin, nisha. Shina rashaga uctalla cuti cachamungami.

11:4b.MAR.011.004 Paiguna risha, burruhuara pungu rayai huatashcara canzhai tupanauca ñambi ishqui tucushcai. Pascanaucami.

11:5b.MAR.011.005 Huaquin chihui ajguna: ¿Imara rangaj burruhuara pascaunguichiri? ninauca.

11:6b.MAR.011.006 Paiguna cutipasha, Jesús rimashcasna cuentanauca. Apaichi, nisha, cutipanauca.

11:7b.MAR.011.007 Burruhuara pushamusha, paiguna churanara burra ahuai churanauca; Jesús tiarica burrui.

11:8b.MAR.011.008 Shinallara ashca runauna paiguna churanara ñambii mandanauca. Shujguna yuramanda pangaunara pitisha ñambii mandanauca.

11:9b.MAR.011.009 Ñaupa riujguna huashama shamujgunandi caparinauca: Alabashcangui, nisha, Diospa shutii shamuj bendiciashcami.

11:10b.MAR.011.010 Ñucanchi shamuj yaya David rey apu tucuna horas bendiciashca achu. Ahua pachai alabashca angui.

11:11b.MAR.011.011 Jesús Jerusalembi icuca, Templo huasii icuca. Muyujta ricusha tucuira ricuca. Ña chishi ajpi. Betania nishca llactama paihua chunga ishqui yachachishca runaunandi rica.

11:12b.MAR.011.012 Cayandi punzha, Betaniamanda llucshishaga, Jesús yarcachicami.

11:13b.MAR.011.013 Carumanda ricushaga, shu higo nishca upina muyu yurara ricusha, pangayuj aj, llutarisha imallas tiangami nisha mascaca. Pactasha ricujpiga, pangalla tiaca, mana pai muyu aparina horas ajpi.

11:14b.MAR.011.014 Jesusga, yurara rimasha: Imahoraspas maicambas canmanda muyura ama micuchu, nica. Pai yachachishca runauna casna rimashcara uyanauca.

11:15b.MAR.011.015 Jerusalenma shamunauca. Jesús templo huasii icusha, chihui tiaj catujgunara randijgunara canzhama callpachingaj callarica. Cullquira turcajguna mesaunara shinallara tulacami. Urpira catujguna tiarinaunaras voltiachicami.

11:16b.MAR.011.016 Maican ima cuyaras ima mangaras apasha, Diospa huasi ucura pasangaj lugarda mana cucachu.

11:17b.MAR.011.017 Jesús yachachisha nica: ¿Manzhu quillcashca tian: Ñuca huasi Diosta mañana huasi nishca anga tucui llactaunaj? Randi canguna shu shuhuajguna uctura rashcanguichimi.

11:18b.MAR.011.018 Yachaira yachachijguna sacerdote apuunandi Jesús rimashca shimiunara uyanauca. Imasna rashas paita huañuchingaj mascanauca. Paita manzhanauca, tucui runauna pai yachachishcaunara cushihua uyashcamanda.

11:19b.MAR.011.019 Tutayaupi, Jesús llactamanda llucshica.

11:20b.MAR.011.020 Tutamanda nambira pasasha, chi Jesús piñashca yurara anguunandi chaquirishcara ricunauca.

11:21b.MAR.011.021 Pedro iyarisha rimaca: Yachachij, ricupai, nisha, can piñasha saquishca yura chaquirishcami.

11:22b.MAR.011.022 Jesús cutipasha: Diosta quiri, nica:

11:23b.MAR.011.023 Ñucaga cierto pacha cangunara nini: Maican cai urcura rimasha, Caimanda ri, nisha, lamarbi urmai, paihua shungüi mana ansas manzhasha astaun quirisha, pai rimashcasna tucungami.

11:24b.MAR.011.024 Chiraigumanda nini: Imara Diosta mañashas, can mañashcara cierto pacha apishcanguichimi nisha quirichi. Can mañashca pactamungami.

11:25b.MAR.011.025 Shinallara imahoras Diosta mañausha, perdonanguichi, maicanhuas imaras charisha perdonangaj. Chasna rajpiga canguna ahua pachai tiaj Yaya canguna ucharashcaunara perdonangami.

11:26b.MAR.011.026 Canguna mana perdonajpiga, canguna ahua pachai tiaj Yaya shinallara cangunara mana perdonangachu.

11:27b.MAR.011.027 Jesús Jerusalenma tigramusha, Diospa templo huasii puriushcai, sacerdote apuuna yachaira yachachijgunandi rucuunandi paihuajma shamunauca.

11:28b.MAR.011.028 Jesusma rimanauca: ¿Ima ushaihua caigunara raungui? nisha, ¿Pi mandashcara casna raungui?

11:29b.MAR.011.029 Jesús cutipasha rimaca: Ñuca, shinallara, cangunara shu shimira tapunara munani. Canguna cutipahuaichi. Shina rajpi ñucas cangunara pimanda cai ñuca rashcaunara rauni cuentasha.

11:30b.MAR.011.030 Rimahuai, nica, Juan bautisana ¿ahua pachamandachu runamandachu aca?

11:31b.MAR.011.031 Shinajpi paigunapura rimananauca: Ñucanchi ahua pachamandami nijpiga, pai ¿imaraigumanda mana quiricanguichi? ningami.

11:32b.MAR.011.032 Randi ñucanchi: Runamandallami nishaga, runaunara manzhanchi, tucui runa Juan cierto pacha Diosmanda rimaj ajta quirishcamanda.

11:33b.MAR.011.033 Shinajpi Jesusta cutipasha: Mana yachanchichu, ninauca.

12

12:1b.MAR.012.001 Jesús yachachingaj cuentanaunahua rimai callarica. Casna nica: Shu runa uvillas chagrara tarpucami. Muyujta largasha arcaca. Allpara allasha, uvillas muyu tacana uctura rarca, huasira shayachica. Huaquin tarabaj runaunama pagara mañasha mañachisha, caru llactama rica.

12:2b.MAR.012.002 Muyu horasgunai mañachij dueño shu paita sirvijta cachaca tarabajgunama, paigunamanda muyura apingaj.

12:3b.MAR.012.003 Paigunaga sirvijta apisha, livachisha maquillahua cachanauca.

12:4b.MAR.012.004 Cuti shu sirvijta cachaca. Shinallara rumihua shitasha, umai chugrichisha, camishas, paitas cachanauca.

12:5b.MAR.012.005 Cuti shujta cachaca. Caitaga huañuchinauca. Huasha, shujgunara cachajpi, huaquingunara chugrichinauca, huaquingunara huañuchinauca.

12:6b.MAR.012.006 Shinallara shu sapalla churira charica, pai llaquishcara. Paitas puchucaibi cachaca, nisha: Ñuca churira casunaunga chari.

12:7b.MAR.012.007 Astaumbas chi tarabajguna paigunapura rimananauca: Caimi apij dueño tucunga, nisha. Shamichi, huañuchishunchi, allpa ñuchanchij tucungami.

12:8b.MAR.012.008 Paita apisha huañuchinauca; uvillas chagramanda canzhama ichunauca.

12:9b.MAR.012.009 Chagramanda dueño shamushaga, ¿Imara rangai chi tarabajgunara? Shamushaga chi tarabajgunara tucuchingami; chagraraga shujgunama cungami.

12:10b.MAR.012.010 ¿Cai quillcashcallaras manzhu ricushcanguichi: Huasira sicachijguna ichushca rumi ña huasi esquina rumi tucushcami.

12:11b.MAR.012.011 Caita Señor rashcami. Caiga ñucanchi ricujpi munanaitami?

12:12b.MAR.012.012 Paiguna Jesusta huañuchinara munanaucami. Cai yachachingaj cuentanara paigunamanda rimashcara intindinaucami. Taucarai runaunara manzhasha, paita saquisha rinaucami.

12:13b.MAR.012.013 Huaquin fariseogunara herodianos nisbcaunandi Jesusma cachanauca, paita ima panda shimiis apingaj.

12:14b.MAR.012.014 Chigunaga Jesusta rimanauca, Yachachij, nisha, canmi ciertora rimaj ajta ricsinchi. Ima sami ricurij runaras mana manzhajchu angui. Cierto pacha can Diospa nambira yachachingui. Rimahuai; ¿Cesar nishca atun apuma impuesto cullquira pagashunzhu, manzhu pagashun? ¿Cushunzhu, manzhu cushun?

12:15b.MAR.012.015 Jesús paiguna manali shungura ricsisha, paigunara rimaca: ¿Imamanda tentahuanguichi? Chi cullquira apamichi ñuca ricungaj.

12:16b.MAR.012.016 Shinajpi cullquira apamusha ricuchinauca. Jesusga nin: ¿Pihuajtai cai ñahui, pihuajtai cai quillcashca? Paigunaga, Cesarbaj, ninauca.

12:17b.MAR.012.017 Jesús cutipasha nica: Cesarbajta Cesarma cuichi; Diospajtaga Diosma cuichi. Cai shimira uyasha manzharinauca.

12:18b.MAR.012.018 Shinajpi Jesusma shamunauca saduceo nishca runauna, huañushcaunamanda causarina illanmi nijguna. Paita rimasha tapunaucami:

12:19b.MAR.012.019 Yachachij, nisha, Moisés ñucanchira quillcacami: Shu runa huañujpiga, paihua huarmi huahua illaj saquirijpiga, paihua uqui chi huarmira apichu huañu uqui miraira atarichingaj.

12:20b.MAR.012.020 Canzhis uquipura anauca. Ñaupa uqui shu huarmira apica. Chiga huañuca huahuaunara mana saquisha.

12:21b.MAR.012.021 Chi huasha shu quipa uqui cai huarmira apica. Chihuas shinallara huahua illaj huañuca. Chimanda shujpas shinallara cai huarmira apisha huahua illajllara huañuca.

12:22b.MAR.012.022 Canzhis uquiuna chi huarmira apinauca. Maicanmandas huahua illaj saquirica. Puchucaibi huarmis shinallara huañuca.

12:23b.MAR.012.023 Shina rajpiga causarinai, chi huarmi ¿maicambajta quiquin huarmi tucungái? Tucui canzhis uquipura paita apinauca.

12:24b.MAR.012.024 Shinajpi Jesús cutipasha rimaca: ¿Chimanda manzhu pandaunguichi, Diospa shimiras paihua ushanaras mana yachashcamanda?

12:25b.MAR.012.025 Causarinai mana casaranaunga, shinallara mana casarachinaunga. Astaumbas, ahua pachai tiaj angelguna cuenta tucunaungami.

12:26b.MAR.012.026 Huañushcauna causarinaga, ¿manzhu ricushcanguichi Moisés quillcashcai imasnara Dios yura ucumanda Moisesta rimaca: Nuca Abrahamba Dios, Isacpa Dios, Jacobpa Dios ani, nisha?

12:27b.MAR.012.027 Diosga mana huañushcauna Dioschu an, astaumbas causajguna Diosmi. Shinashaga, canguna ashcara pandaunguichi.

12:28b.MAR.012.028 Yachaira yachachijgunamanda shuj paima llutarimusha, ñaupa rimashcara uyasha, Jesús shujgunara ali cutipashcara ricsisha, paita tapuca: ¿Tucui camachishca shimiunamanda maicanda ñaupa angai?

12:29b.MAR.012.029 Jesús rimaca: Ñaupa camachishca shimi casnami riman: Uyaichi, Isarael runauna. Ñucanchi Señor Dios shujlla Diosmi.

12:30b.MAR.012.030 Camba quiquin Señor Diosta llaquina mangui tucui camba shunguhua, tucui camba almahua, tucui camba iyaihua, tucui camba ursahua. Caimi tucuimanda ñaupa punda mandashca shimi.

12:31b.MAR.012.031 Chimanda huasha mandashca shimi ñaupa aj cuentallarami: Camba rayai tiaj runara canda llaquishcasna llaquina mangui. Cai mandashca shimiunamanda yali mana mas tian.

12:32b.MAR.012.032 Shinajpi chi yachaira yachachij runa Jesusta nica: Yachachij, alirami rimashcangui. Shu sapalla Dios tian, shuj mana mas tianzhu.

12:33b.MAR.012.033 Diosta llaquinami, tucui shunguhua tucui iyaihua tucui almahua tucui ursahua, shinallara camba rayai tiaj runara canda llaquishcasna llaquingaj, caita tucui aichara rupachinamanda sacrificio nishcamandas mas yalimi.

12:34b.MAR.012.034 Shinajpi Jesús chi runa ali iyaihua cutipashcara ricusha,

12:35b.MAR.012.035 Jesús templo huasii yachachisha, shina nica: ¿Imasnara yachaira yachachijguna rimanaun, Cristo Davidpa churími nisha?

12:36b.MAR.012.036 Davidllara Santo Espiritumanda rimasha, casna nica: Señor ñuca Señorma rimaca: Ñuca ali maquima tiari, nisha, ñuca canda chijnijgunara camba chaqui ucui churanagama.

12:37b.MAR.012.037 Shinajpi Davidllara, Señor nisha, ¿imasnajpira paihua churimi ningái?

12:38b.MAR.012.038 Jesús paigunara yachachisha rimaca: Yachaira yachachijgunamanda iyanguichi. Paiguna suni churanahua purinara munanaun; shinallara pulasaunai salurai tucunara munanaun.

12:39b.MAR.012.039 Shinallara tandarina huasiunai ali tiarinaunara munanaun. Istaunai ñaupajma tiarinára munanaun.

12:40b.MAR.012.040 Paiguna huaccha huarmi huasiunara tucuchinaun. Unaira mañasha, umachisha yangamanda Diosta mañanaun. Caiguna astaumbas yali causaiyuj tucunaunga.

12:41b.MAR.012.041 Jesús Diosma cuyana cullquira tandachina mala ñaupajpi tiarica. Ricucami cullquira malai churajgunara. Yapa charijguna ashca cullquira churanauca.

12:42b.MAR.012.042 Shu huaccha huarmi llaquinaita shamuca. Pai ishqui mediohuara churacami malai. Ishqui medio shu real tucun.

12:43b.MAR.012.043 Shinajpi Jesús pai yachachishca runaunara cayasha paigunara rimaca: Cierto pacha cangunara nini, cai llaquinaita huaccha huarmi tucuimanda yali churashcami.

12:44b.MAR.012.044 Shujguna paiguna yalijta charishcamanda puchura churanauca. Randi cai huaccha huarmi pai charishca tupu llambura churaca, pai micuna randina cullquira.

13

13:1b.MAR.013.001 Jesús Diospa huasimanda llucshimushcai, shu pai yachachishca runa rimaca: Ricupai, Yachachij, nica, cai atun rumiunaras, cai huasiunaras.

13:2b.MAR.013.002 Jesús cutipasha paita rimaca: ¿Ricunguichu cai atun huasiunara? Mana ima rumis shu rumi ahuais saquiringachu. Tucui tulashca anga.

13:3b.MAR.013.003 Paiga Olivos nishca urcui tiarisha, Diospa huasi ñahuipurai, Pedro Jacobo Juan Andresndi chicambi paita tapunauca:

13:4b.MAR.013.004 Rimahuapai, ninauca, ¿imahoras tucui caiguna tucunaungai? ¿Ima sami ricuringa caiguna pactarinai?

13:5b.MAR.013.005 Jesús cutipasha rimai callarica: Iyanguichi maicambas cangunara ama umachichu.

13:6b.MAR.013.006 Ashca runauna ñuca shutü shamunaunga, Ñucami Cristo ani, nisha. Ashca runaunara umachinaunga.

13:7b.MAR.013.007 Imahoraspas guerraunara uyashaga, guerra shimiras, ama nusparinguichi. Casna tucuna ministirinmi. Shinashas cai pacha chara mana tucuringachu.

13:8b.MAR.013.008 Llactapura macananaungami; rey apuunapura macananaunga. Ashca llactaunai allpa cuyunga. Ashca yarcai shamunga. Tormendarinauna tianaunga. Caigunahua llaquiuna callarina angami.

13:9b.MAR.013.009 Canguna cangunallara iyanguichi. Taripaj maquii entregai tucunguichimi. Tandarina huasiunai cangunara azutinaungami. Gobierno apuuna ñaupajma rey apu ñaupajmas cayai tucunguichimi ñucara llaquishcamanda, paigunara rimangaj.

13:10b.MAR.013.010 Ñauparaga ministirinmi tucui llactaunama evangelio shimira rimashca achu.

13:11b.MAR.013.011 Imahoraspas cangunara entregangaj pushanaupi, imara rímanara ama ñaupa iyanguichi, ama iyarishas. Chi ratoi canguna iyaibi cushca shimira chillara rimanguichi. Mana canguna munaimanda rimangaraunguichi, randi Santo Espiritumanda rimana shimira cangunara cushca anga.

13:12b.MAR.013.012 Shu uqui paihua uquira huañuchingaj entregangami, shinallara yaya churiras. Shinallara churiuna yayaunahua atarinaungami, paigunara huañuchinaungami.

13:13b.MAR.013.013 Ñuca shutira llaquishcamanda canguna tucuiunamanda chijnishca anguichimi. Randi maicans puchucaigama ahuantasha, paimi quishpichishca anga.

13:14b.MAR.013.014 Imahoras Dios chijnishcara ricunguichi, Diosmanda rimaj Daniel rimashcasna, pai mana tiaihuaj tiaushcai shayarijta - ricuj runaga intindichu — chi horasllaira Judeai tiajguna urcuma miticunauchu.

13:15b.MAR.013.015 Maicans huasi ahuai tiaushaga huasi ucuma ama icuchu imaras apangaj.

13:16b.MAR.013.016 Maicans pajllama tiaushaga paihua churanara apangaj ama tigrachu.

13:17b.MAR.013.017 llaquinaita icsayujguna. llaquinaita llullu huahuayujguna chi punzhaunai.

13:18b.MAR.013.018 Diosta mañaichi canguna miticuna ama tamia tiempoi tucuchu.

13:19b.MAR.013.019 Chi punzhaunaiga atun tormendarina tiempo shamunga. Casna sami tormendos mana tiashcachu Dios cai pachara rasha callarishcamanda cuna horasgamas, maspas mana cuti tiangachu.

13:20b.MAR.013.020 Dios cai punzhaunara mana pishiyachijpiga manapihuas quishpichishca anma. Astaumbas pai ajllashcaunara llaquishcamanda chi punzhaunara pishiyachicami.

13:21b.MAR.013.021 Shinajpi maicans rimajpi: Riqui, nisha, Cristo caibimi, Cristo chihuimi, nisha, ama quiringuichi.

13:22b.MAR.013.022 Llulla Cristouna atarinaungami llulla rimajgunandi. Paiguna atun ricurinaunaras munanaita rashcaunaras umachisha ricuchinaungami, ushaihuaj ajpi quiquin ajllashcaunaras umachingaj.

13:23b.MAR.013.023 Astaun canguna ricunguichi. Ña fíaupallara tucuira cangunara rimashcani.

13:24b.MAR.013.024 Shinashaga chi llaqui punzhaunai tormendarinauna pasashca huasha, indi yanayangami quillas llanduyangami.

13:25b.MAR.013.025 Estrellasguna ahua pachamanda urmamunaunga. Ahua pachai tiaj ushanauna cuyuchishca anaunga.

13:26b.MAR.013.026 Chi ratollaira, ñuca, Runa Churi nishcara, ricunaungami puyui shamujta shinzhi ushanahua ali sumajhuas.

13:27b.MAR.013.027 Shinajpi ñuca angelgunara cachamushami. Ñuca ajllashcaunara tandachishami chuscu huaira shamuna partimanda, cai pacha pundamanda ahua pacha pundagamas.

13:28b.MAR.013.028 Higo muyu yuramanda yachaichi. Paihua pallcauna llulluyaupi, pangauna ña llucshiupi, ña yachanguichi rupai tiempo pactamun.

13:29b.MAR.013.029 Shinallara canguna cai tucui tucushcara ricusha, ña yachanguichimi pai mayanllaimi, ña pungüimi tiaun.

13:30b.MAR.013.030 Cierto pacha cangunara nini, cai horas aj runauna mana pasanaungachu cai tucui rimashcauna pactarinagama.

13:31b.MAR.013.031 Ahua pachas cai pachas chingarinaungami; randi ñuca rimashca shimi mana imahoras chingaringachu.

13:32b.MAR.013.032 Chi punzhara chi horasta pihuas mana yachanzhu. Ahua pachai tiaj angelgunas, Diospa Churis mana yachanaunzhu. Randi Yaya Dioslla yachanmi.

13:33b.MAR.013.033 Ricuichi, chapaichi, mañaichi. Cai horas pactamunara mana yachanguichi.

13:34b.MAR.013.034 Imasna caru partima rij runasna, paihua huasira saquica sirvijguna maquii, caran runama paihua quiquin tarabanara rimasha, pungüi cuirajta rimaca chapachu nisha.

13:35b.MAR.013.035 Shinajpi chapaichi. Huasiyuj dueño pactamuna horasta mana yachanguichi, chishi ashas, chaupi tuta, gallo cantanara, punzhayanaras;

13:36b.MAR.013.036 manashaga pai cungaimanda shamusha cangunara puñuriaita tupangami.

13:37b.MAR.013.037 Cangunara rimashcaunara tucuimas rimauni. Chapaichi, nini.

14

14:1b.MAR.014.001 Ishqui punzha huashaga, Pascua ista aca. Puscu illaj tandara micuna punzhauna pactamunauca. Sacerdote apuuna yachaira yachachijgunandi imasna rasha Jesusta umachisha apingaj, paita huañuchingajta rimananauca.

14:2b.MAR.014.002 Paiguna ninauca: Ista punzhaiga ama apinauchu, runauna ama nusparinauchu.

14:3b.MAR.014.003 Jesús Betania llactai tiaushcai, shu Simón nishca llagayuj runa huasii, mesai tiarijpiga shu huarmi ashca valij gusto asnaj ambira apamuca valij rumi purui. Huarmi punirá paquisha Jesuspa umai, ambira talicami.

14:4b.MAR.014.004 Huaquin chihui tiajguna shungu ucui piñarinauca. Shina ninauca: ¿Imarasha cai ali asnaj ambira yanga baratun?

14:5b.MAR.014.005 Caiga catuna usharicami, quinsa patsac yali cullquihua, tsuntsuunama cungaj. Huarmira piñanauca.

14:6b.MAR.014.006 Astaumbas Jesús rimaca: Saquichi, nisha, ¿imamanda paita piñanguichi? Alirami rashca ñucara.

14:7b.MAR.014.007 Tsuntsuuna imahoraspas cangunahua tianaungami. Canguna munashcai paigunara yanapana ushanguichi. Ñucaraga mana tucui horas charihuanguichichu.

14:8b.MAR.014.008 Caiga pai ushashca tupura rashca. Paiga ñuca aichara pambanai armachinara ñaupara rashcami.

14:9b.MAR.014.009 Cierto pacha cangunara nini: Maibis cai evangelio shimi rimarijpi, tucui cai pachai, cai huarmi rashcara cuentashca angami paita iyarichingaj.

14:10b.MAR.014.010 Shinajpi Judas Iscariote nishca, Jesuspa chunga ishquiunamanda shuj, sacerdote apuunama ricami, Jesusta paiguna maquii entregangaj.

14:11b.MAR.014.011 Apuunaga cushiyanaucami Judas rimashcara uyasha. Cullquira cushun ninauca. Imasna rasha Jesusta paiguna maquii entregangaj Judas iyarica.

14:12b.MAR.014.012 Ñaupa punda puscu illaj tanda micuna punzhaunai, Pascua ista sacrificio rana horaspi, Jesús yachachishca runauna paita rimanauca: ¿Maibi Pascua istara micunara muñanguichu alichingaj? nisha.

14:13b.MAR.014.013 Pai yachachishca runaunamanda ishquira cachaca. Paigunara nica: Richi llactama, chihui shu runara yacu quisara apauta tupanguichimi. Paita catichi.

14:14b.MAR.014.014 Maibi icujpiga huasiyuj runara tapunguichi: Ñucanchira yachachij nin, ¿maibira micuna ucu, ñuca yachachishca runaunandi Pascua istara micungaj?

14:15b.MAR.014.015 Pai shu ahua patai atun micuna ucura ricuchinga ña alichishcara. Chihui ñucanchijta puruntuichi.

14:16b.MAR.014.016 Pai yachachishca runauna llactama rinauca. Jesús rimashcasna tupanauca. Chihui Pascua ista micunara alichinauca.

14:17b.MAR.014.017 Ña tutayaupi paihua chunga ishqui runaunandi shamuca.

14:18b.MAR.014.018 Shinarasha mesai tiarishcai, paiguna micushca ratollai, Jesús nica: Cierto pacha cangunamanda shu ñucahua micuj ñucara entregangaraunmi.

14:19b.MAR.014.019 Shinajpi jaiguna llaquiringaj callarinauca. Caran shuj rimasha: ¿Ñuca chari ani? shujpas, ¿Ñuca chari ani? ninauca.

14:20b.MAR.014.020 Jesús cutipasha rimaca: Canguna chunga ishquimanda shuj ñucahua pacta pulatoi tan rajmi, paimi anga.

14:21b.MAR.014.021 Cierto pacha ñuca, Runa Churi nishca, riunimi, ñucamanda quillcashcasna. Astaun ayailla chi runa Runa Churira entregaj. Paihuaga astaumbas mana pagaringaj ali manmaca.

14:22b.MAR.014.022 Paiguna micuushcai Jesús tandara apica, bendiciasha paquicami. Paigunara rimasha: Apichi, nica, caimi ñuca aicha.

14:23b.MAR.014.023 Vasora apisha, agrasishca huasha, paigunama cucami. Paiguna tucui vasomanda upinauca.

14:24b.MAR.014.024 Paigunara nica: Caiga ñuca mushuj pactachina shimira valichina yahuar. Ashcaunamanda talishcami.

14:25b.MAR.014.025 Cierto pacha cangunara nini: Uvillas muyu yacura mana cuti upishachu Dios mandana pachai mushujta upina punzhagama.

14:26b.MAR.014.026 Paigunaga cantanara cantashca huasha, llucshisha Olivos nishca urcuma rinauca.

14:27b.MAR.014.027 Jesús rimaca: Tucui canguna ñucamanda cuna tutai pingaringuichimi. Quillcashca tian: Borregora cuirajta chugrichishami; borregouna callpasha chausirinaungami.

14:28b.MAR.014.028 Causarishca huashaga ñuca cangunamanda ñaupa Galilea partima risha.

14:29b.MAR.014.029 Shinajpi Pedro cutipaca: Tucui pingarinaupis, ñucaga mana.

14:30b.MAR.014.030 Jesús cutipaca: Cierto pacha canda nini, Can, cuna, cuna tutai, gallo manara ishqui cuti cantajllaira, ñucamanda quinsa cuti ninguimi: Paita mana ricsinichu.

14:31b.MAR.014.031 Pedroga shinzhi rimasha nica: Canhua huañuna ministirijpi canmanda mana nishachu, Paita mana ricsinichu. Tucui chi shujgunas shinallara ninauca.

14:32b.MAR.014.032 Getsemaní nishca sisa pambama shamunauca. Chihui Jesús pai yachachishca runaunara rimaca: Caibi tiarichi, nisha, ñucaga Diosta mañai risha.

14:33b.MAR.014.033 Jesús paihua pariju pushaca Pedrora, Jacobora Juandas. Pai ashca llaquiringaj callarica, turbaringajpas.

14:34b.MAR.014.034 Jesús paigunara rimaca: Ñuca alma huañunalla llaquirinmi. Shuyaichi caibi, chapaichi.

14:35b.MAR.014.035 Ansa ñaupasha rica. Allpai urmasha, Diosta mañaca: Usharijpiga, cai horas pasachu ñucamanda, nisha.

14:36b.MAR.014.036 Casnami nica: Abba, Yaya, canhua tucui raihuajllami. Cai tormendarina vasora cuenta anzhuchipai ñucamanda. Randi mana ñuca munashcasna, astaumbas can munashcasna rashca tucuchu.

14:37b.MAR.014.037 Jesús tigramusha, paihua runauna puñuriaita tupaca. Pedrora rimasha: Simón, nica, ¿puñunguichu? ¿Manzhu shu hora tupura chapanara ushashcangui?

14:38b.MAR.014.038 Chapaichi, mañaichi ama tentaciombi icungaj. Cierto pacha alma munanmi, astaun aicha sambayashcami, nica.

14:39b.MAR.014.039 Cutillara rica. Ñaupa cuentallara rimasha, Diosta mañaca.

14:40b.MAR.014.040 Jesús tigramusha, cutillara paigunara puñuriaita tupaca, paiguna puñunaihua singusha. Imara cutipanara mana yachanaucachu.

14:41b.MAR.014.041 Quinsa cuti tucunai shamuca. Paigunara rimaca: Puñuichi ña, samaichi. Chillami, horas ña pactarishca. Ñuca, Runa Churi nishca, uchayujguna maquii entregashca mani.

14:42b.MAR.014.042 Jesús nica: Atarichi, acuichi. Ñucara entregaj runa ña mayanllayamun.

14:43b.MAR.014.043 Jesús chara rimaushcallai Judas shamuca. Pai Jesuspa chunga ishquimanda shuj aca. Judashua pariju ashca runauna shamunauca esparaunahua caspiunahua. Sacerdote apuuna yachaira yachachijguna rucuunas paigunara cachamunauca.

14:44b.MAR.014.044 Jesusta entregaj runa paigunara rimaca: Maicanda ñuca muchajpi paimi anga. Paita apinguichi, ali cuirasha pushanguichi.

14:45b.MAR.014.045 Judas pactamusha Jesusma llutarica. Yachachij, yachachij, nisha, paita muchaca.

14:46b.MAR.014.046 Shinarasha paiguna Jesusta apinauca.

14:47b.MAR.014.047 Chihui ajgunamanda shuj paihua esparara llucchisha, sacerdote atun apura sirvijta rinri carara pitica.

14:48b.MAR.014.048 Jesús nica: ¿Shuhuajta cuenta ñucara apingaj llucshimucanguichi esparaunahua caspiunahua?

14:49b.MAR.014.049 Caran punzha cangunahua Diospa huasii yachachisha tiaucani. Mana apihuacanguichi. Shinajllaira casnami tucun Quillcashcauna pactaringaj.

14:50b.MAR.014.050 Shinajpi tucui Jesús yachachishca runauna paita saquisha miticunauca.

14:51b.MAR.014.051 Shu maltaga sabana llachapahua pillurisha catica. Soldarouna paita apinauca.

14:52b.MAR.014.052 Paiga llachapara saquisha llatan miticuca.

14:53b.MAR.014.053 Jesusta sacerdote atun apujma pushamunauca. Chihuiga tucui sacerdote apuuna rucuunandi yachaira yachachijgunandi tandarimunauca.

14:54b.MAR.014.054 Pedroga canilla canilla catisha ricami, sacerdoteuna atun huasi pungugama. Apu guardaunandi ninai cunusha tiauca.

14:55b.MAR.014.055 Sacerdote apuunaga tucui gobiernoi mandajgunandi shimiunara mascanauca Jesusta huañuchingaj. Astaumbas mana tupanaucachu.

14:56b.MAR.014.056 Ashca runauna yanga llullasha paimanda rimanauca. Randi paiguna rimashca shimiuna mana chi tonollachu aca.

14:57b.MAR.014.057 Shinajpi shujguna atarimusha Jesusta causayachisha yanga llullasha rimanauca.

14:58b.MAR.014.058 Pai rimashcara uyashcanchimi ninauca: Cai maquihua rashca templo huasira tulashami, nisha; randiga quinsa punzhai shujta mana maquihua rashcara sicachishami.

14:59b.MAR.014.059 Shina ajllaira paiguna shimiuna mana chi tonollachu aca.

14:60b.MAR.014.060 Shinajpi sacerdote atun apu paiguna chaupi shungüi atarisha Jesusta tapucami, nisha: ¿Mana imaras cutipangui? ¿Imara nisha canda causayachisha rimanaun?

14:61b.MAR.014.061 Jesusga chunlla saquirica, mana imaras cutipaca. Sacerdote atun apu cuti tapuca: Canga, ¿Cristochu angui? nisha, ¿Bendiciashca Diospa Churichu angui?

14:62b.MAR.014.062 Jesús cutipasha nica: Ñuca maní; ñuca, Runa Churi nishca, ushaj Diospa ali maquima tiarishcara ricunguichimi. Huashaga ahua pacha puyui shamujta ricunguichimi.

14:63b.MAR.014.063 Shinajpi sacerdote atun apu paihua churanara lliquisha rimaca: ¿Imara mas ministishun rimajgunara?

14:64b.MAR.014.064 Pai irus rimashcara uyashcanguichi. ¿Imara ninguichi? Paiguna tucui: Huañuchinami, ninauca.

14:65b.MAR.014.065 Huaquinguna paita tiucangaj callarinauca. Paihua ñahuira quillpasha sajmanauca, Rimai, nisha. Guardauna paita huactanauca maqui palahua.

14:66b.MAR.014.066 Pedroga allpai, huasi chaupi shungüi tiaj patioi tiaushcai, shu sacerdoteuna atun apura sirvij huarmi shamuca.

14:67b.MAR.014.067 Pedrora ninai cunusha tiauta ricusha, huarmi paita nica: Cambas Nazaretmanda Jesushua pariju tiaucangui.

14:68b.MAR.014.068 Pedro cutipaca: Mana ricsinichu, nisha. Imara chari ningui mana yachanichu. Pai punguma llucshica, chi ratollaira gallo cantaca.

14:69b.MAR.014.069 Chi sirvij huarmi Pedrora cuti ricusha, chihui tiajgunara rimai callarica: Cai runa chi montonmandami, nisha.

14:70b.MAR.014.070 Cutillara Pedro: Mana ricsinichu nica. Chihuashaga chihui tiajguna Pedrora rimanauca: Cierto pacha canga chi montonmanda angui, nisha. Galilea runa angui. Can paigunasna rimaj angui.

14:71b.MAR.014.071 Shinajpi Pedro manali shimiunara rimangaj callarica, Diospa shutii rimasha: Canguna rimaushca runara mana ansas ricsinichu, nica.

14:72b.MAR.014.072 Cutillara gallo cantaca. Pedroga Jesús rimashca shimiunara iyaricami: Manara gallo ishqui cuti cantajllaira, canga quinsa cuti, Mana paita ricsinichu nisha rimanguimi. Pedro caita iyarisha huacacami.

15

15:1b.MAR.015.001 Tutamandara, sacerdote apuuna rucuunandi yachaira yachachijgunandi gobierno mandajgunandi cuentananauca. Chihuasha paiguna Jesusta huatasha paita pushasha, Pilatoma entreganauca.

15:2b.MAR.015.002 Pilato Jesusta tapuca: ¿Canzhu Judioguna Rey Apu angui? nisha. Jesús cutipasha nica: Canda shina ningui.

15:3b.MAR.015.003 Sacerdote apuuna Jesusta ashcara causayachinauca.

15:4b.MAR.015.004 Pilato cutillara tapuca: ¿Mana imaras cutipangui? nisha. Riqui imasnara ashcara causayachinaun canda.

15:5b.MAR.015.005 Shina nijpis Jesús shu shimillas mana cutipacachu. Chiraigumanda Pilato manzharica.

15:6b.MAR.015.006 Astaumbas ista punzhai shu causayuj runara cacharij aca, maicandas paiguna mañashcara.

15:7b.MAR.015.007 Shu Barrabás nishca runa tiauca. Paiga compañajgunandi chonda cularbi ishcarishca aca shu macanaushcai shu runara huañuchishcamanda.

15:8b.MAR.015.008 Runauna shamushaga mañai callarinauca caran huata rashcasna rashca achu, nisha.

15:9b.MAR.015.009 Pilato cutipasha nica: ¿Munanguichi ñuca judioguna Rey Apura cacharingaj?

15:10b.MAR.015.010 Pilato ricsicami sacerdote apuuna Jesusta chijnishcamanda entreganauca.

15:11b.MAR.015.011 Astaumbas sacerdote apuuna tucui runaunara rimanauca Barrabasta cacharingaj.

15:12b.MAR.015.012 Pilato cutipasha cutillara nica: ¿Imara ranara munanguichi judioguna Rey Apu nishcara?

15:13b.MAR.015.013 Paiguna cutillara caparinauca: Chacatai, nisha.

15:14b.MAR.015.014 Pilatoga rimaca: ¿Ima manalira rashcachu? Paigunaga maspas caparinauca: Chacatai, nisha.

15:15b.MAR.015.015 Pilato runaunara cushiyachisha nisha Barrabasta cacharicami. Randi Jesusta azutishca huasha paiguna maquii entregacami chacatangaj.

15:16b.MAR.015.016 Shinajpi soldarouna Jesusta taripana huasi patioma pushanauca. Tucui soldarounara cayanauca.

15:17b.MAR.015.017 Puca llachapara churachinauca. Chihuasha shu cashahua ahuashca llaitura churachinauca.

15:18b.MAR.015.018 Paita salurasha cuenta: Cushiyai, judioguna Rey Apu, asisha ninauca.

15:19b.MAR.015.019 Umai caspihua chugrichinauca. Paita tiucanauca. Alabajsna rasha paihua ñaupajpi cungurinauca.

15:20b.MAR.015.020 Paita asishca huasha churachishca puca llachapara llatananauca. Shinarasha quiquin churanara churachinauca. Paita chacatangaj llucchimunauca.

15:21b.MAR.015.021 Shu Cirene llactamanda Simón shu partimanda shamusha pasauca. Paita Jesuspa cruzta apachinauca. Cai Simón Alejandro Rufo nishcauna yaya aca.

15:22b.MAR.015.022 Gólgota nishca pambama Jesusta pushanauca. Runa shimii caita Uma Tullu Pamba, nin.

15:23b.MAR.015.023 Paiguna mirra nishca ambihua masashca vinora Jesús upingaj ricuchinauca. Jesusga mana upicachu.

15:24b.MAR.015.024 Jesusta chacatashca huasha, paihua churanara paigunapura chaupinauca, maicanda lichayuj asha apanauchu.

15:25b.MAR.015.025 Ahualla punzha, las nueve tupui, Jesusta chacatanauca.

15:26b.MAR.015.026 Paihua causa quillcai quillcashca tiaca: Judioguna Rey Apu.

15:27b.MAR.015.027 Paihua pariju ishqui shuhuajgunara chacatanauca, shuj ali maquima, chishuj lluqui maquima.

15:28b.MAR.015.028 Shina rasha ñaupa horas Quillcashca Shimi pactaricami. Cai quillcashca nica: Uchayujgunandi yupashca aca.

15:29b.MAR.015.029 Pasajguna Jesusta camisha, umara cuyuchisha rimanauca: Aa, nisha, canmi Diospa huasira tulaj, quinsa punzhai shayachij,

15:30b.MAR.015.030 canllara quishpi, cruzmanda irgüi.

15:31b.MAR.015.031 Sacerdote apuuna yachaira yachachijgunandi shinallara asisha rimananauca: Shujgunara quishpichicami, nisha, randi pai quiquinllara mana ushanzhu quishpinara.

15:32b.MAR.015.032 Cristo, Israel runauna Rey Apu cruzmanda irguchu, ñucanchi ricusha quiringaj, ninauca. Shinallara paihua pariju chacatashca runauna paita caminauca.

15:33b.MAR.015.033 Ka doce horasmanda pacha chaupi punzhai tun llanduyamuca las tres tupugama.

15:34b.MAR.015.034 Chaupi chishira las tres mayanda Jesús shinzhira caparica: Eloi, eloi, ¿lama sabactani? nisha. Caiga runa shimii nin: Ñuca Dios, ñuca Dios, ¿imamanda ñucara saquihuashcangui?

15:35b.MAR.015.035 Huaquin chihui ajguna uyasha, Ricupaichi, ninauca, Elíasta cayaun.

15:36b.MAR.015.036 Shu runa callpasha rica, shu putusta ayaj vinohua tsungachisha, caspi pundai churasha, Jesús upingaj ricuchicami. Saquichi, nica, ricushunchi Elias shamunga chari paita irguchingaj.

15:37b.MAR.015.037 Jesusga shinzhi shimihua caparisha pitirica.

15:38b.MAR.015.038 Chi ratoi Diospa huasii huarcushca llachapa ahuamanda allpama pasajta lliquiricami.

15:39b.MAR.015.039 Paihua rayai shayarij capitán, Jesús huañusha capariuta ricusha: Caiga cierto pacha Diospa churirni, nica.

15:40b.MAR.015.040 Carumanda huaquin huarmiuna ricurianauca. Chigunahua tianauca María Magdalena, quipa Jacobohua Josehua mama María, Salomendi.

15:41b.MAR.015.041 Chigunaga Jesús Galilea partii ashcai, paita catisha sirvinaucami. Shinallara paígunandi shujguna Jesushua Jerusalenma sicamujguna tianauca.

15:42b.MAR.015.042 Tutayaupi, Puruntuna nishca punzha asha, samana punzha tucunai alichina horas aca.

15:43b.MAR.015.043 Arimatea llactamanda José, valij gobiernoi mandaj runa, paihuas Diospa gobierno pachara chapau, mana ansas manzhasha Pilatoma rica huañushca Jesús aichara mañangaj.

15:44b.MAR.015.044 Pilato Jesús ña huañushcara mana quirícachu. Capitanda cayachi cachasha tapucami. ¿Ña huañushcachu? nisha.

15:45b.MAR.015.045 Capitán rimashcara uyasha, huañushca Jesús aichara Josema cuca.

15:46b.MAR.015.046 José shu yuraj linzora randica. Jesusta cruzmanda irguchisha, linzohua pilluca, pambana uctui chingachica. Pambana uctu peñas ucui allashca aca. Shu rumira voltiachisha, uctu pungura ishcaca.

15:47b.MAR.015.047 María Magdalena, María Josehua mamandi, Jesusta chingachishcara ricunauca.

16

16:1b.MAR.016.001 Samana punzha pasashca huasha, María Magdalena, Jacobo mama María, Salomendi gusto asnaj ambiunara randinauca Jesusta armachi ringaj.

16:2b.MAR.016.002 Semana ñaupa punzhai, tutamanda indi llucshimushcai, Jesusta pambashcama shamunauca.

16:3b.MAR.016.003 Paigunapura ninauca: ¿Rumira uctu pungumanda pita voltiachisha cuhuangái?

16:4b.MAR.016.004 Paiguna ricujpiga, rumi ña voltiachishca aca. Rumiga yapa atun maca.

16:5b.MAR.016.005 Pambashca uctui icusha, shu malta ali maquima tiajta ricunauca. Paiga suni yuraj churanahua churarishca aca. Huarmiuna paita ricusha manzharinauca.

16:6b.MAR.016.006 Chi malta rimacami: Ama manzhaichichu, nisha. Chaca

16:7b.MAR.016.007 Astaumbas richi, nica. Pai yachachishca runaunara Pedroras rimai richi. Jesusga cangunamanda ñaupa Galileama riun. Chihui paita ricunguichimi, pai rimashcasna.

16:8b.MAR.016.008 Chi huarmiunaga miticusha rinauca pambashca uctumanda. Paiguna chucchurisha manzharinauca. Pitas mana imara rimanaucachu manzharishcamanda.

16:9b.MAR.016.009 Jesús semana ñaupa punzha tutamandai causaricami. María Magdálenama ñaupa punda ricurica, paimanda canzhis supaira ichushca aca.

16:10b.MAR.016.010 Pai rishaga, rimai ricami Jesushua purijgunara. Paiguna llaquirisha huacanauca.

16:11b.MAR.016.011 Paigunaga Jesús causarishcaras, chi huarmi ricushcaras uyasha, mana quirinaucachu.

16:12b.MAR.016.012 Chi huasha, ishquiunama Jesús shu tonoi ricurica paiguna shu partima puriushcai.

16:13b.MAR.016.013 Paiguna tigrasha chishujgunara cuentanauca. Chishujgunas mana quirinaucachu.

16:14b.MAR.016.014 Puchucaibi Jesús ricurimuca chi chunga shuj runaunama, paiguna mesai tiaushcai. Paiguna mana quirishcara, paiguna shungu shinzhiyashcaras rimacami, pai causarishcara ricujguna rimashcara mana quirishcamanda.

16:15b.MAR.016.015 Jesús paigunara nica: Richi entero mundura, evangelio ali shimira tucui runaunama camachichi.

16:16b.MAR.016.016 Maicans quirisha bautisarishas quishpichishca anga, maicans mana quirishaga causayachishca anga.

16:17b.MAR.016.017 Quirijgunahua munanaita ricurinauna pactarinaunga: Ñuca shutii supaigunara pajllama ichunaungami, shinallara mushuj shimiunara rimanaungami;

16:18b.MAR.016.018 machachuinara maquihua apinaunga, ima huañuna ambiras upijpis mana huajlichingachu; ungushca runauna ahuai maquira churajpi aliyanaungami.

16:19b.MAR.016.019 Jesús paigunara rimashca huasha ahua pachama apai tucuca. Diospa ali maqui partima tiaricami.

16:20b.MAR.016.020 Paiguna llucshisha, Diospa shimira tucui partii camachinauca. Dios paigunara yanapacami, shimira cierto ajta ricuchica munanaita ricurinaunahua. Amen.