Revelation (Ojibwa)

1

1:1b.REV.001.001 ᐅᑭᑫᑕᒨᔑᐌᐎᓐ ᒋᓴᔅ X ᑭᔐᒪᓂᑑᓐ ᑳᑮᒦᓂᑯᒡ ᒋᐙᐸᑕᐋᒡ ᐅᑕᓄᑮᐋᑲᓇᐞ ᐐᐸ ᑫᓂ ᐃᔑᐌᐸᓂᓂᒃ᙮ ᐅᑌᒐᓬᐃᒪᓐ ᐅᑮᐱᓈᔑᓂᔕᐙᓐ ᐁᑮᑭᑫᑕᒨᓈᓂᒡ ᐅᑕᓄᑮᐋᑲᓇᓐ ᒞᓇᓐ ᙮

1:2b.REV.001.002 ᔑᑾ ᒞᓐ ᐅᑮᑎᐹᑐᑖᓇᓐ ᑲᑭᓇ ᐃᓂ ᑳᑮᐙᐸᑕᕽ, ᒦ ᐅᐌᓂ ᐅᑎᑭᑐᐎᓂᓂ ᑭᔐᒪᓂᑑᓐ ᑲᔦ ᐅᑌᐺᐎᓂᓂ ᒋᓴᔅ Xᑕᓐ ᑳᑮᑭᑫᑕᒨᔑᐌᓂᒡ᙮

1:3b.REV.001.003 ᔕᐌᑖᑯᓯ ᐊᐊ ᑫᐊᓇᒥᑕᒫᑫᒡ ᐅᐅ ᒪᓯᓇᐃᑲᓐ ᑲᔦ ᑳᐱᓯᑕᒧᐙᒡ ᐅᓄ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ, ᐃᑭ ᑲᔦ ᑳᑲᓇᐌᑕᒧᐙᒡ ᐅᒫ ᑳᐅᔑᐲᐃᑳᑌᓂᑭᓐ᙮ ᐋᓃᔥ ᐯᔓ ᐋᔕ ᒋᐊᓂᐅᒋᒋᓭᓂᒃ᙮

1:4b.REV.001.004 ᓃᓐ ᒞᓐ ᓂᑑᔑᐲᐊᒪᐙᒃ ᐃᑭ ᐅᑌᐺᑕᒨᒃ ᐃᒫ ᑳᑕᔑᒫᒫᐗᒋᐃᑎᐙᒡ ᐁᓃᔣᒋᑭᓐ 7 ᐆᑌᓇᐗᓐ ᐁᔖᐗᑮᕽ ᙮ ᔕᐌᓂᒥᑰᐎᓐ ᑲᔦ ᐱᓵᓀᑕᒧᐎᓐ ᑭᑲᐅᒌᑕᒫᑯᐙ ᐊᐊ ᑭᔐᒪᓂᑑ ᐅᒫ ᓅᑯᒻ ᑳᐊᔮᒡ ᑲᔦ ᒣᐎᔕ ᑳᐱᐅᒋᐊᔮᒡ ᑲᔦ ᑳᐐᐱᐊᔮᒡ, ᑲᔦ ᐃᑭᐌᓂᐗᒃ ᓃᔣᓱ ᐊᒑᑾᒃ ᑳᐃᓈᓴᒥᑳᐸᐎᐙᒡ ᑭᔐᒪᓂᑑ ᐅᑭᑕᐱᐎᓂᕽ,

1:5b.REV.001.005 ᒋᓴᔅ X ᑲᔦ ᑳᑾᔭᑴᑖᑯᓯᒡ ᐅᑎᐹᒋᒧ, ᐊᐊᐌ ᓂᑕᒻ ᑳᓂᑖᐎᑭᒡ ᑭᔐᒪᓂᑑᓈᕽ, ᑳᑮᑮᐌᐱᒫᑎᓯᒡ, ᑳᑎᐯᓂᒫᒡ ᑭᒋᐅᑭᒫᐞ ᐊᑮᕽ ᑳᐊᔮᓂᒡ᙮ ᑭᓵᑭᐃᑯᓈᓐ ᓴ, ᐅᒥᔅᑸᒥᕽ ᑲᔦ ᑭᑮᐅᒋᐋᐸᐅᑯᓈᓐ ᒋᐴᓂᑎᐯᓂᒥᑯᔭᕽ ᑭᒪᒋᑑᑕᒧᐎᓂᓈᓂᓐ ᑳᑮᐱᑑᑕᒪᕽ᙮

1:6b.REV.001.006 ᑭᑮᐃᔑᐃᑯᓈᓐ ᐃᑕᔥ ᒋᑎᓄᐎᔭᕽ ᒋᑎᐯᓂᒥᐌᔭᕽ, ᒋᑕᔑᑭᒋᐊᓇᒥᐁᐎᑭᒫᐎᔭᕽ, ᒋᐊᓄᑮᑕᐎᒪᕽ ᐅᑭᔐᒪᓂᑑᒪᓐ ᑳᐅᔫᓯᒫᒡ᙮ ᐐᓐ ᐅᑲᐊᔮᓐ ᑭᒋ ᐃᓀᑖᑯᓯᐎᓐ ᑲᔦ ᑎᐯᒋᑫᐎᓐ ᐱᔑᔑᒃ ᐃᑯ ᐊᐸᓀ᙮ ᐁᒣᓐ᙮

1:7b.REV.001.007 ᐃᓇᔥᑫ ᑕᐱᓈᑯᓯ ᐗᑸᕽ! ᑲᑭᓇ ᑕᔥ ᐊᐎᔭ ᐅᑲᐙᐸᒫᐙᓐ, ᐃᐴᔥᑫ ᑲᔦ ᐃᑭ ᑳᑮᐸᔑᐸᐙᐙᒡ᙮ ᑲᑭᓇ ᑕᔥ ᑳᑕᓶᐙᓇᑭᓯᒡ ᐊᑮᕽ ᑕᐅᒋᒪᐎᐗᒃ ᐊᐲ ᐙᐸᒫᐙᒡ᙮ ᐊᒦ ᓴ ᑯ ᑕᐃᔑᐌᐸᓐ᙮ ᐁᒣᓐ᙮

1:8b.REV.001.008 ᓃᓐ ᐊᐊᐌ ᓂᑕᒻ ᑳᑮᐊᔮᒡ ᒦᓇᐙ ᐃᔥᒀᒡ ᑫᐊᔮᒡ, ᐃᑭᑐ ᑳᑎᐯᒋᑫᒡ ᑭᔐᒪᓂᑑ ᒫᐗᒡ ᑳᒪᔥᑲᐌᑖᑯᓯᒡ᙮ ᒦ ᐊᐊᐌ ᓅᑯᒻ ᑳᐊᔮᒡ ᑲᔦ ᐅᑖᓈᕽ ᑳᑮᐊᔮᒡ, ᑲᔦ ᑫᐱᐊᔮᒡ᙮

1:9b.REV.001.009 ᓃᓐ ᒞᓐ ᑮᒋᑭᐌᓯᐙ ᑫᓃᓐ ᐁᐐᒌᐗᒃ ᒋᓴᔅ, ᑭᐐᒌᐎᓂᓂᒻ ᐁᐃᔑᔕᔒᐯᑕᒣᒃ ᑭᒥᑯᔥᑳᒋᐃᑰᐎᓂᐙᕽ, ᐃᐃᐌ ᐅᒑᓂᒥᓯᐎᓐ ᐃᐃᒫ ᑳᐅᒌᒪᑲᒃ ᐁᐊᔮᒃ ᐅᑎᐯᒋᑫᐎᓂᕽ ᒋᓴᔅ᙮ ᓂᑮᓇᑲᓂᑰ ᐃᒫ ᒥᓂᓯᕽ ᐹᑎᒪᔅ ᑳᐃᔑᓂᑳᑌᒃ᙮ ᓂᑮᐅᒋᐊᓯᑰ ᐁᑮᐐᑕᒫᑫᔮᓐ ᑭᔐᒪᓂᑑ ᐅᑎᑭᑐᐎᓐ ᑲᔦ ᐅᑌᐺᐎᓐ ᒋᓴᔅ᙮

1:10b.REV.001.010 ᐊᐲ ᐁᑮᔑᑲᒃ ᑳᑎᐯᒋᑫᒡ ᐅᑮᔑᑳᒻ ᑳᐃᔑᐐᑌᒃ ᓂᑮᐐᒌᐎᒥᒃ ᐃᓂ ᑭᔐᒪᓂᑑ ᐅᑕᒑᑾᓐ᙮ ᓂᑮᓅᑖᓐ ᐃᑕᔥ ᐁᑭᒋᑭᔒᐌᒃ ᐃᓉᐎᓐ ᑖᐱᔥᑰ ᑭᒋᐴᑖᒋᑲᓂᕽ, ᐌᑎ ᓂᐱᑾᓂᕽ ᐊᐎᔭ ᐁᑲᓅᔑᒡ᙮

1:11b.REV.001.011 ᒦ ᐅᐌ ᐁᔑᒡ: ᐃᐃᐌ ᑳᐙᐸᑕᒪᓐ ᒦ ᐃᐌ ᐅᔑᐲᐊᓐ ᒪᓯᓇᐃᑲᓂᕽ᙮ ᒦ ᐃᒫ ᐃᔑᓂᔕᐊᒪᐤ ᐃᑭ ᐅᑌᐺᑕᒨᒃ ᐃᐃᒫ ᑳᑕᔑᒫᒫᐗᒋᐃᑎᐙᒡ ᐁᓃᔣᒋᑭᓐ 7 ᐆᑌᓇᐗᓐ᙮ ᒦᐗᓄᓄ ᐆᑌᓇᐗᓐ: ᐁᐱᓴᔅ, ᓯᒥᕒᓇ, ᐸᕒᑲᒪᒻ, ᑕᔭᑕᐃᕒᐊ, ᓵᕒᑎᔅ, ᐱᓬᐊᑌᓬᐱᔭ, ᓬᐁᔮᑎᓰᔭ ᙮

1:12b.REV.001.012 ᒦᑕᔥ ᓂᑮᑴᑭᑳᐸᐤ ᐁᐐᐙᐸᒪᒃ ᐊᐌᓀᓐ ᐅᑎᓉᐎᓐ ᑳᑲᓅᔑᒡ᙮ ᓂᑮᐙᐸᑖᓇᓐ ᐃᑕᔥ ᓃᔣᓱ ᐙᓴᑯᓀᒋᑲᓈᑎᑰᓐ ᐁᐅᓵᐎ ᔔᓂᔮᐗᑭᓐ᙮

1:13b.REV.001.013 ᒣᑴᔭᐄ ᐃᒫ ᐙᓴᑯᓀᒋᑲᓈᑎᑯᕽ ᐊᐎᔭ ᓂᑮᐙᐸᒫ ᑖᐱᔥᑰ ᐯᒫᑎᓯᒡ, ᐁᑭᑭᔥᑲᕽ ᑭᒋᒪᑰᑦ ᐅᓯᑎᕽ ᐁᐊᑴᑲᓂᓂᒃ, ᒦᓇᐙ ᐁᑭᒋᐱᓱᒡ ᐅᑳᑭᑲᓀᐱᓱᓐ ᐁᐅᓵᐎ ᔔᓂᔮᐎᓈᑾᓂᓂᒃ᙮

1:14b.REV.001.014 ᐅᑎᒀᓂᕽ ᐃᑕᔥ ᐐᓂᓯᓴᓐ ᑮᐙᐱᔥᑳᓂᐗᓐ ᑖᐱᔥᑰ ᒫᓇᒑᓂᔑᐲᐗᔨᕽ; ᑖᐱᔥᑰ ᑰᓐ ᑳᐙᐱᔥᑭᓯᒡ ᑮᐊᐲᒋᐙᐱᔥᑳᓂᐗᓐ᙮ ᑮᐙᓯᑌᓂᐗᓐ ᐃᑕᔥ ᐃᓂ ᐅᔥᑮᔑᑰᓐ ᑖᐱᔥᑰ ᑳᐊᐲᒋᐙᓯᑌᒃ ᐃᔥᑯᑌ᙮

1:15b.REV.001.015 ᐅᓯᑕᓐ ᐃᑕᔥ ᑲᔦ ᑖᐱᔥᑰ ᐅᓵᐙᐱᒃ ᐁᑮᐯᑳᐱᑭᑌᒃ ᑲᔦ ᐐᑫ ᐁᔔᔥᒀᐱᑲᒃ ᑮᐃᔑᓈᑾᓂᓂᐗᓐ᙮ ᒦ ᑲᔦ ᑳᐃᓂᑖᑯᓯᒡ ᑖᐱᔥᑰ ᑳᒪᑗᒋᐗᕽ ᑭᒋᐹᐎᑎᒃ᙮

1:16b.REV.001.016 ᐅᑭᒋᓂᑭᕽ ᐃᑕᔥ ᑮᐊᐱᐗᐞ ᓃᔣᓱ ᐗᓇᑯᔕᐞ᙮ ᐊᒦᔥ ᒦᓇᐙ ᐅᑑᓂᕽ ᑮᐅᒋᓭᓂ ᑳᐄᑕᐎᑳᔖᓂᒃ ᑭᒋᒨᑯᒫᓐ᙮ ᒦᔥ ᑲᔦ ᐁᔑᓈᑾᓂᓂᒃ ᐅᐗᑌᕽ ᑖᐱᔥᑰ ᑮᓯᔅ ᑳᐊᐲᒋᐙᓭᔮᓯᑫᒡ ᑮᐃᔑᓈᑾᓂᓂ᙮

1:17b.REV.001.017 ᐊᐲ ᐁᐙᐸᒪᒃ ᓂᑮᑲᐎᐸᓂᐅᐙᓐ ᐅᓯᑎᕽ᙮ ᑖᐱᔥᑰ ᐊᐎᔭ ᐁᓂᐳᒡ ᓂᑮᐃᔑᓈᑯᔅ᙮ ᓂᑮᑖᑭᓂᒃ ᐃᑕᔥ ᐅᑭᒋᓂᑭᕽ, ᐁᑮᐃᔑᒡ: ᑫᑯ ᓭᑭᓯᑫᓐ! ᓃᓐ ᐊᐊ ᓂᑕᒻ ᑳᑮᐊᔮᒡ ᑲᔦ ᐲᓂᔥ ᐃᔥᒀᒡ ᑫᐊᔮᒡ᙮

1:18b.REV.001.018 ᓃᓐ ᐊᐊ ᑳᐱᒫᑎᓯᒡ᙮ ᓂᑮᓂᑉ, ᒦᓇᐙᔥ ᓂᐱᒫᑎᔅ, ᑲᔦ ᓀᐱᒡ ᐱᔑᔑᒃ ᓂᑲᐱᒫᑎᔅ᙮ ᓃᓐ ᓂᑌᐃᓀᑖᑯᔅ ᒋᑎᐯᑕᒫᓐ ᓂᐳᐎᓐ ᑲᔦ ᐃᑭ ᐃᐃᒫ ᑳᓂᐳᐙᒡ ᑳᐃᔑᐊᔮᐙᒡ᙮

1:19b.REV.001.019 ᐅᔑᐲᐊᓐ ᐃᑕᔥ ᐃᓂ ᑳᐙᐸᑕᒪᓐ, ᒦᐗᓐ ᐃᓂᐌᓂᐗᓐ ᓅᑯᒻ ᑳᐊᔮᑭᓐ ᑲᔦ ᓃᑳᓐ ᐌᑎ ᑫᓂ ᐃᔑᓭᒃ᙮

1:20b.REV.001.020 ᑭᑭᑫᑕᒨᓂᓐ ᐃᐌ ᐁᓀᑖᑯᓯᐙᒡ ᐅᑯ ᓃᔣᓱ 7 ᐗᓇᑯᔕᒃ ᑳᑮᐙᐸᒪᑣ ᓂᑭᒋᓂᑭᕽ ᐁᐊᐱᐙᒡ, ᑲᔦ ᐃᓂ ᓃᔣᓱ ᐅᓵᐎ ᔔᓂᔮᐎ ᐙᓴᑯᓀᒋᑲᓈᑎᑰᓐ, ᐃᐃᐌ ᑳᑳᒋᑳᑌᒃ᙮ ᐅᑯ ᓃᔣᓱ ᐗᓇᑯᔕᒃ, ᒦᐗᐞ ᐅᑌᒐᓬᐃᒥᐙᐞ ᐅᑌᐺᑕᒨᒃ ᑳᑕᔑᒫᐗᒋᐊᓇᒥᐋᐙᒡ ᑳᓃᔣᒋᑭᓐ ᐆᑌᓇᐗᓐ᙮ ᐃᓂ ᑲᔦ ᓃᔣᓱ ᐙᓴᑯᓀᒋᑲᓈᑎᑰᓐ, ᒦᐗᑭᑭ ᐅᑌᐺᑕᒨᒃ ᐁᓃᔣᒋᑭᓐ ᐯᐸᑳᓐ ᑳᐃᔑᒫᒫᐗᒋᐃᑎᐙᒡ᙮

2

2:1b.REV.002.001 ᐅᔑᐲᐊᒪᐤ ᐃᓂ ᐅᑌᒐᓬᐃᒥᐙᓐ ᐅᑌᐺᑕᒨᒃ ᐁᐱᓴᔅ ᐆᑌᓈᕽ ᑳᑕᔑᐊᓇᒥᐋᐙᒡ᙮ ᒦ ᐅᐌ ᐃᔑᐲᐊᒪᐤ: ᐅᐅ ᑭᑎᑯᐙ ᐊᐊ ᑳᒥᒋᒥᓈᒡ ᐃᐃ ᓃᔣᓱ 7 ᐗᓇᑯᔕᐞ ᐅᑭᒋᓂᑭᕽ, ᐊᐊ ᒣᑴᔭᐄ ᑳᐱᒧᓭᒡ ᑳᐃᔑᓃᔣᒋᓂᓂᑭᓐ ᐅᓵᐎ ᔔᓂᔮᐎ ᐙᓴᑯᓀᒋᑲᓈᑎᑯᕽ᙮

2:2b.REV.002.002 ᓂᑭᑫᑖᓇᓐ ᑭᑎᔑᒋᑫᐎᓂᐙᓐ ᑲᔦ ᑭᑕᓄᑮᐎᓂᐙᓐ ᑲᔦ ᑭᔕᔒᐯᑕᒧᐎᓂᐙ᙮ ᑲᔦ ᑭᑭᑫᓂᒥᓂᓂᒻ ᐁᑳ ᐊᐙᒡ ᐁᐐᐅᑖᐱᓇᒪᐙᓯᐌᒀ ᐃᑭ ᒪᒋᐊᔨᐄᕽ ᑳᐃᔑᐱᒫᑎᓯᐙᒡ᙮ ᑭᑯᒋᐋᐙᒃ ᐃᑕᔥ ᐃᑭ ᑭᔐᒪᓂᑑ ᐅᑎᔑᓂᔕᐙᑲᓇᐞ ᑳᒥᒋ ᐃᔑᐃᑎᓱᐙᒡ, ᐁᑳ ᐁᑎᓄᑳᓂᐎᓯᒀ᙮ ᑭᑮᒥᑲᐙᐙᒃ ᑮᐗᓂᒧᐎᓐ ᐁᐋᐸᒋᑑᐙᒡ᙮

2:3b.REV.002.003 ᔑᑾ ᑫᔮᐱ ᑭᔕᔒᐯᑖᒻ ᑲᔦ ᓃᓐ ᐅᒋ ᑭᑮᐱᐅᒋᑲᒀᑕᑭᑑᒻ, ᑳᐐᓐ ᐃᑕᔥ ᑲᔦ ᑭᑮᐅᒋᐴᓂᒋᑫᓰᒻ᙮

2:4b.REV.002.004 ᐊᔮ ᑕᔥ ᐯᔑᒃ ᑫᑰᓐ ᐁᐃᓀᓂᒥᓇᑰᒃ: ᓂᑕᒻ ᑳᑮᐃᔑᓵᑭᐃᔦᒃ ᑳᐐᓐ ᓅᑯᒻ ᑭᑎᔑᓵᑭᐃᓰᒻ᙮

2:5b.REV.002.005 ᒫᒥᑴᑕᒧᒃ ᐃᑕᔥ ᐃᒫ ᑳᑮᐅᒋᐸᑭᔑᓀᒃ, ᑲᔦ ᐸᑭᑎᓇᒧᒃ ᑭᒪᒋᒋᑫᐎᓂᐙᓐ, ᒦᑕᔥ ᓂᑕᒻ ᑳᑮᑑᑕᒣᒃ ᒦᓇᐙ ᒦ ᐃ ᐃᔑᒋᑫᒃ᙮ ᑮᔥᐱᓐ ᐃᑕᔥ ᐅᒋᑴᑮᓯᐌᒃ, ᐱᒌᓇᒃ ᑭᑲᐅᑎᓯᓂᓂᒻ, ᓂᑲᐱᐅᒋᐅᑖᐱᓈᓐ ᐃᒫ ᑳᐃᔑᐊᑌᒃ ᑭᐙᓴᑯᓀᒋᑲᓈᑎᑯᐙ᙮

2:6b.REV.002.006 ᐯᔑᒃ ᐃᑕᔥ ᑫᑰᓐ ᑾᔭᒃ ᑭᑑᑖᒻ: ᑭᔒᑫᑖᒻ ᐅᑎᔑᒋᑫᐎᓂᐙ ᐃᑭ ᓂᑲᓬᐁᔭᑕᓇᒃ ᑲᔦ ᓃᓐ ᑕᔥ ᑳᐃᔑᔒᑫᑕᒫᓐ᙮

2:7b.REV.002.007 ᑮᓇᐙ ᑕᔥ ᑳᐅᓅᑕᒫᐎᓂᔦᒃ, ᐱᓯᑕᐎᒃ ᑭᔐᒪᓂᑑ ᐅᑕᒑᑾᓐ ᑳᐃᓈᓂᒡ ᐃᐃ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮ ᑫᔖᑰᒋᑣᐙᒡ ᒦᐗᒃ ᐃᑭᐌᓂᐗᒃ ᓂᑲᒦᓈᒃ ᒋᐊᒧᒥᓀᐙᒡ ᐃᒫ ᐱᒫᑎᓯᐎᓂ ᒥᑎᑯᕽ, ᑭᔐᒪᓂᑑ ᐅᑭᑎᑫᐎᓂᕽ ᑳᑕᔑᓂᑖᐎᑭᓂᒡ᙮

2:8b.REV.002.008 ᐃᓂ ᑕᔥ ᒦᓇᐙ ᐅᑌᒐᓬᐃᒥᐙᓐ ᐅᑌᐺᑕᒨᒃ ᓯᒥᕒᓈᕽ ᑳᐃᔑᒫᐗᒋᐃᑎᐙᒡ ᐅᔑᐲᐊᒪᐤ: ᐅᐌ ᐃᑭᑐ ᐊᐌ ᓂᑕᒻ ᑳᑮᐊᔮᒡ ᒦᓇᐙ ᐃᔥᒀᒡ ᑫᐊᔮᒡ, ᐊᐊᐌ ᑳᑮᓂᐳᒡ, ᒦᓇᐙ ᑕᔥ ᑳᑮᑮᐌᐱᒫᑎᓯᒡ:

2:9b.REV.002.009 ᑭᑭᑫᓂᒥᓂᓂᒻ ᐁᐅᒑᓂᒥᓯᔦᒃ ᑲᔦ ᐐᑫ ᐁᑭᑎᒫᑭᓯᔦᒃ᙮ ᑭᐌᓅᑎᓯᒻ ᐃᑕᔥ᙮ ᑲᔦ ᓂᑭᑫᑖᓐ ᐃᐃ ᐁᔑᒪᒋᑮᔣᓂᓀᒀ ᐃᑭ ᓂᒎᐎᒥᓐ ᑳᐃᑭᑐᐙᒡ, ᑳᐐᓐ ᐃᑕᔥ ᑌᐺ ᒎᐗᒃ ᑎᓄᐎᓰᐗᒃ, ᓭᑕᓐ ᐃᑕᔥ ᐅᒫᐗᒋᐃᑎᐎᓂᕽ ᐃᔑᐐᒋᑣᐗᒃ᙮

2:10b.REV.002.010 ᑫᑯ ᑯᑕᑫᒃ ᑳᐐᐊᓂ ᐃᔑᑯᑕᑭᐃᑰᔦᒃ᙮ ᐃᓇᔥᑫ ᐋᓂᑕ ᑳᑕᔑᔦᒃ ᑭᐐᑕᔑᑯᒋᐃᑯᐙ ᒪᒋᐊᔭᐋ ᑭᐸᐅᑏᐎᑲᒥᑯᕽ ᐁᐐᐃᔑᐌᐱᓂᑰᔦᒃ᙮ ᑭᑲᑕᔑᑲᒀᑕᑭᐃᑯᐙ ᒥᑖᓱᑮᔑᒃ ᒥᓂᒃ᙮ ᐊᔮᒀᒥᓯᒃ ᐃᑕᔥ, ᐃᐴᔥᑫ ᐲᓂᔥ ᐊᓂᐅᒋᓂᐳᔦᒃ, ᑭᑲᒦᓂᓂᓂᒻ ᐃᑕᔥ ᐱᒫᑎᓯᐎᓐ, ᒦ ᐃᐌ ᑭᑎᐸᐊᒫᑯᐎᓂᐙ ᐁᑮᔖᑰᒋᑣᔦᒃ᙮

2:11b.REV.002.011 ᐊᐌᓀᓐ ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᐃᓂ ᑭᔐᒪᓂᑑ ᐅᑕᒑᑾᓐ ᐃᐃᐌ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮ ᐊᒦ ᐅᐌ ᐁᑭᑐᒡ ᐊᒑᒃ: ᐊᐊᐌ ᑫᔖᑰᒋᑣᒡ ᑳᐐᓐ ᐅᑲᐙᐸᑕᓰᓐ ᐃᐃ ᓃᔣ ᓂᐳᐎᓐ, ᑳᐐᓐ ᑲᔦ ᐅᑲᐐᓴᑭᔥᑳᑯᓰᓐ᙮

2:12b.REV.002.012 ᐃᓂ ᑲᔦ ᐅᑌᒐᓬᐃᒥᐙᓐ ᐅᑌᐺᑕᒨᒃ ᑳᒫᒪᐎᐊᓇᒥᐋᐙᒡ ᐃᒫ ᐸᕒᑲᒪᒦᕽ, ᐅᐅᐌ ᐅᔑᐲᐊᒪᐤ: ᐅᐅ ᐃᑭᑐ ᐊᐊ ᑳᐊᔮᒡ ᑳᐄᑕᐎᑳᔖᓂᒃ ᑭᒋᒨᑯᒫᓐ:

2:13b.REV.002.013 ᑭᑭᑫᓂᒥᓂᓂᒻ ᑳᐃᔑᐅᑕᔮᐎᓂᔦᒃ ᐃᐃᒫ ᑳᐃᔑᐊᔮᓂᒃ ᓭᑕᓐ ᐅᑭᒋᐊᐱᐎᓐ᙮ ᑫᔮᐱ ᑕᔥ ᐌᐌᓂ ᑭᐱᒥᓂᔕᐅᒻ, ᑳᐐᓐ ᑲᔦ ᑭᑮᐋᓇᐌᒋᑫᓰᒻ ᐁᑮᑌᐺᑕᐎᔦᒃ, ᐃᐴᔥᑫ ᒣᒀ ᐁᐱᒥᑲᑮᔑᑲᓂᓂᒃ ᐁᑮᓂᓯᓐᒡ ᓂᑎᐹᒋᒨᒻ ᐁᑎᐸᔅ ᑳᑮᐊᔮᒀᒥᓰᑕᒪᐎᒡ, ᐁᑮᑕᔑᓂᓯᓐᒡ ᐃᐃᒫ ᑳᐃᔑᐊᔮᓂᒃ ᓭᑕᓇᓐ ᐅᑕᔮᐎᓂᓂ᙮

2:14b.REV.002.014 ᐸᑮ ᑕᔥ ᐊᔮᒪᑲᓐ ᑫᑰᓇᓐ ᑳᒥᓉᑕᓯᐙᓐ ᑳᐃᔑᒋᑫᔦᒃ᙮ ᐋᓂᓐᑦ ᐃᐃᒫ ᑳᐊᔮᔦᒃ ᐅᐱᒥᓂᔕᐋᓈᐙ ᐅᑭᑭᓄᐊᒫᑫᐎᓂᓂ ᐃᓂ ᐯᓬᐊᒨᓐ ᙮ ᐐᓐ ᐅᑮᑭᑭᓄᐊᒪᐙᓐ ᐃᓂ ᐯᕒᐊᑾᓐ ᐋᓃᓐ ᑫᐅᒋᐸᑭᔑᒫᓂᒡ ᐃᔅᕒᐃᔭᓬ ᐃᓂᓂᐗᐞ᙮ ᐊᐌᔥ ᐯᕒᐊᒃ ᐅᑮᑲᔥᑭᐋᐞ ᒋᒦᒋᓂᒡ ᐃᐃᐌ ᒪᓂᑑᑳᓂᕽ ᑳᑮᐸᑭᑎᓂᑳᑳᓂᐗᓂᓂᒃ, ᑲᔦ ᒋᑑᑕᒥᓂᒡ ᐱᔑᒀᑎᓯᐎᓐ᙮

2:15b.REV.002.015 ᒦᔥ ᐯᔑᑾᓐ ᐃᑯ ᐊᔮᐗᒃ ᐃᐃᒫ ᑳᑕᔑᔦᒃ ᑳᐱᒥᓂᔕᐊᒧᐙᒡ ᐅᑭᑭᓄᐊᒫᑫᐎᓂᓂ ᐃᓂ ᓂᑲᓬᐁᔭᑕᓇᐞ ᙮

2:16b.REV.002.016 ᐅᒋᑴᑮᒃ ᐃᑕᔥ! ᑮᔥᐱᓐ ᑴᑮᓯᐌᒃ, ᐌᔩᐱᑯ ᑭᑲᐱᐅᑎᓯᓂᓂᒻ, ᓂᑲᒦᑳᓈᒃ ᐃᑕᔥ ᐃᑭ ᑳᒪᒋᒋᑫᐙᒡ, ᓂᑲᐋᐸᒋᑑᓐ ᓂᑭᒋᒨᑯᒫᓐ ᓂᑑᓂᕽ ᑳᐅᒋᓭᒃ᙮

2:17b.REV.002.017 ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᐃᓂ ᑭᔐᒪᓂᑑ ᐅᑕᒑᑾᓐ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮ ᐊᐊᐌᔥ ᑫᔖᑰᒋᑣᒡ ᐃᒫ ᓂᑲᐅᒋᒦᓈ ᒪᔑ ᑳᓈᑯᓯᓯᓂᒃ ᐸᑴᔑᑲᓇᓐ ᒣᓇ ᑳᐃᓂᒥᓐᒡ᙮ ᑲᔦ ᓂᑲᒦᓈ ᐙᐱᔥᑭᐊᓯᓃᓐ, ᐅᑑᔥᑭᐐᓱᐎᓐ ᑳᐃᔑᐅᔑᐲᐃᑳᑌᓂᒃ, ᐁᑳ ᐊᐎᔭ ᐁᑭᑫᑕᓯᒃ, ᐱᑯ ᐁᑕ ᑫᒦᓂᓐᒡ ᐅᑲᑭᑫᑖᓐ᙮

2:18b.REV.002.018 ᒦ ᐅᐌᔥ ᑲᔦ ᐅᔑᐲᐊᒪᐤ ᐃᓂ ᐅᑌᒐᓬᐃᒥᐙᓐ ᐃᑭ ᐅᑌᐺᑕᒨᒃ ᐃᒫ ᑕᔭᑕᐃᕒᐊ ᑳᑕᔑᒫᐗᒋᐊᓇᒥᐋᐙᒡ᙮ ᐅᐅ ᐃᔑᐐᑕᒪᐤ: ᐅᐌ ᑭᑎᑯᐙ ᑭᔐᒪᓂᑑ ᐅᑯᓯᓴᓐ, ᑳᐃᔑᓈᑾᓂᓂᒃ ᐅᔥᑮᔑᑰᓐ ᐱᓵᓂᑯ ᐁᐙᓯᑌᒃ ᐃᔥᑯᑌ, ᑲᔦ ᐅᓯᑕᓐ ᐱᓵᓂᑯ ᐁᑮᔔᔥᒀᐱᑲᐃᑳᑌᒃ ᐅᓵᐙᐱᒃ:

2:19b.REV.002.019 ᓂᑭᑫᑖᓇᓐ ᑭᑎᔑᒋᑫᐎᓂᐙᓐ, ᒦ ᐃᐌ ᑳᐃᔑᓵᑭᐃᐌᔦᒃ ᑲᔦ ᑳᐃᔑᑌᐺᑕᒣᒃ ᑲᔦ ᑳᐃᔑᐸᒥᐃᐌᔦᒃ ᑲᔦ ᑳᐃᔑᔕᔒᐯᑕᒣᒃ᙮ ᐊᒦᑕᔥ ᓅᑯᒻ ᐃᔥᒀᒡ ᑳᐃᔑᒋᑫᔦᒃ ᓇᐗᒡ ᐊᐗᔑᒣ ᐹᑏᓇᑎᓐ ᐊᐲᒡ ᐐᓐ ᐃᐃ ᓂᑕᒻ ᑳᑮᐃᔑᒋᑫᔦᒃ᙮

2:20b.REV.002.020 ᐊᔮ ᑕᔥ ᐃᐃᐌ ᐁᑳ ᑳᒥᓉᑕᓯᐙᓐ ᑳᐃᔑᒋᑫᔦᒃ, ᐁᐸᑭᑎᓀᒃ ᐊᐌ ᐃᑴ ᒉᓴᐯᓬ ᐱᓵᓂᑯ ᐁᐃᔑᒋᑫᒡ ᐙᐃᔑᒋᑫᒡ᙮ ᑖᐱᔥᑰ ᐐᓐ ᑌᐺ ᐁᑲᓅᑕᒪᐙᒡ ᑭᔐᒪᓂᑑᓐ ᐃᓍᓂᑎᓱ᙮ ᐐᓐ ᐃᑕᔥ ᐅᑭᑭᓄᐊᒫᑫᐎᓂᕽ ᐅᑎᔑᐗᓂᔑᒫᐞ ᐃᓂᐌᓂᐗᐞ ᑳᐸᒥᐃᒥᒡ, ᒋᑑᑕᒥᓂᒡ ᐱᔑᒀᑎᓯᐎᓐ ᒦᓇᐙ ᒋᒦᒋᓂᒡ ᐃᐃᐌᓂ ᑳᐸᑭᑎᓇᒪᐎᒥᓐᒡ ᐃᓂ ᒪᓂᑑᑳᓇᐞ᙮

2:21b.REV.002.021 ᓂᑖᓇᑮᑕᐎᓇᒪᐙ ᐊᐌ ᐃᑴ ᒋᑴᑮᒡ, ᒋᐴᓂᑑᒡ ᐅᒪᒋᒋᑫᐎᓐ᙮ ᑳᐐᓐ ᐃᑕᔥ ᐃᓀᑕᓰ ᒋᐴᓂᑑᒡ ᐅᐱᔑᒀᑎᓯᐎᓐ᙮

2:22b.REV.002.022 ᒦᑕᔥ ᐃᐃᒫ ᓂᑲᐊᐸᑭᓈ ᓂᐯᐎᓂᕽ ᐊᐊ ᐃᑴ ᐃᐃ ᑲᔦ ᑳᑮᐐᒋᐱᔑᒀᑎᓰᒥᑯᒡ ᒋᑕᔑᐐᓴᑳᐱᓀᐙᒡ ᐃᐃᒫ᙮ ᒦ ᐃᐌ ᑫᑑᑕᒫᓐ ᑮᔥᐱᓐ ᐅᒋᑴᑮᓯᒀ ᐃᐃᒫ ᑳᑑᑕᒧᐙᒡ ᐁᑮᐐᒋᐃᐌᐙᒡ ᑳᐃᔑᒪᒋ ᐃᔑᒋᑫᒡ ᐊᐊ ᐃᑴ᙮

2:23b.REV.002.023 ᐃᐃᐌ ᑕᔥ ᑳᓂᔑᐗᓈᒋᐃᐌᒪᑲᒃ ᓂᑲᐃᔑᓂᓯᒫᐞ ᐅᑭᑭᓄᐊᒪᐙᑲᓇᐞ ᐊᐊ ᐃᑴ᙮ ᐃᑭ ᑕᔥ ᑲᑭᓇ ᐅᑌᐺᑕᒨᒃ ᑳᐃᔑᒫᒫᐗᒋᐃᑎᐙᒡ ᓂᑲᑭᑫᓂᒥᑰᒃ ᓃᓐ ᐁᐙᐸᑕᒫᓐ ᑲᑭᓇ ᐊᐎᔭ ᑳᐃᓀᑕᒧᐙᒡ ᑲᔦ ᑳᐃᔑᒥᓴᐌᑕᒧᐙᒡ᙮ ᑫᐃᔑᐙᐸᑕᒫᓐ ᐃᑕᔥ ᐃᑯ ᑳᑕᔑᔦᒃ ᒦ ᑯ ᐃ ᑫᔑᑎᐸᐊᒪᐎᓇᑰᒃ ᑳᐃᓇᑌᒃ ᑭᑎᔑᒋᑫᐎᓂᐙ᙮

2:24b.REV.002.024 ᑮᓇᐙ ᑕᔥ ᑭᑎᔑᑲᓅᓂᓂᓂᒻ ᑳᐸᑳᓂᓯᔦᒃ ᐃᐃᒫ ᑳᐊᔮᔦᒃ ᑕᔭᑕᐃᕒᐊ᙮ ᑳᐐᓐ ᑭᑮᐅᑖᐱᓇᓰᒻ ᐃᐃᐌ ᒪᒋᑭᑭᓄᐊᒫᑫᐎᓐ᙮ ᑳᐐᓐ ᑭᑮᐱᑭᑫᑕᓰᒻ ᐅᑎᔑᒋᑫᐎᓇᓐ ᓭᑕᓐ ᑳᐃᔥᐹᓂᑭᓐ ᐐᓇᐙ ᑳᐃᑕᒧᐙᒡ᙮ ᒦᑕᔥ ᐅᐌ ᐁᓂᓇᑰᒃ: ᑳᐐᓐ ᒦᓇᐙ ᑫᑰᓐ ᑭᒦᓂᓯᓅᓂᓂᒻ ᒋᐱᒥᐎᑑᔦᒃ᙮

2:25b.REV.002.025 ᐃᐃᐌ ᑳᐊᔮᔦᒃ ᒦ ᐱᑯ ᐃᐌ ᒥᒋᒥᓇᒧᒃ ᐲᓂᔥ ᒦᓇᐙ ᒋᐱᑕᑯᔑᓈᓐ᙮

2:26b.REV.002.026 ᐊᐊᐌ ᑕᔥ ᑫᔖᑰᒋᑣᒡ ᑲᔦ ᑳᑲᓇᐌᑕᕽ ᒥᓯᐌ ᓂᑎᔑᒋᑫᐎᓇᓐ, ᒦᑕᔥ ᐊᐌ ᓂᑲᒦᓈ ᒋᐅᓈᑯᓂᐌᒡ ᑖᐱᔥᑰ ᓂᑌᑌ ᑳᑮᐃᔑᒦᔑᒡ ᑫᓃᓐ᙮ ᒦ ᐃᐌ ᑫᐃᓈᑯᓈᒡ ᑳᑕᓱᐯᐸᑳᓂᓯᓂᒡ ᐯᒫᑎᓯᓂᒡ, ᐅᑲᔑᐅᓈᑯᓈᐞ ᐲᐙᐱᑯᐸᑲᒫᑲᓐ ᐁᑕᑯᓇᕽ᙮ ᑲᔦ ᑖᐱᔥᑰ ᐙᐱᑲᓂᓈᑲᓐ ᑳᐃᔑᐱᑭᔥᑭᐌᐸᐃᑳᑌᒃ, ᐅᑲᐃᔑᐲᓯᐌᐸᐙᐞ᙮

2:28b.REV.002.028 ᑲᔦᔥ ᐙᐸᓂᐗᓇᑯᔕᓐ ᓂᑲᒦᓈ᙮

2:29b.REV.002.029 ᑮᓇᐙ ᑕᔥ ᑳᐅᓅᑕᒫᐎᓂᔦᒃ, ᐱᓯᑕᐎᒃ ᑭᔐᒪᓂᑑ ᐅᑕᒑᑾᓐ ᐃᐃᐌ ᑳᐃᓈᓂᒡ ᐃᐃ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

3

3:1b.REV.003.001 ᐃᓂ ᐅᑌᒐᓬᐃᒪᓐ ᐅᑌᐺᑕᒨᒃ ᑳᑕᔑᒫᒪᐎᐊᓇᒥᐋᐙᒡ ᐃᐃᒫ ᓵᕒᑎᔅ, ᐅᐌ ᐅᔑᐲᐊᒪᐤ: ᐅᐅᐌ ᐃᑭᑐ ᐊᐊ ᑳᐊᔮᐙᒡ ᓃᔣᓱ 7 ᑭᔐᒪᓂᑑᓐ ᐅᑕᒑᑯᓂ ᑲᔦ ᐃᐃ ᓃᔣᓱ ᐗᓇᑯᔕᐞ: ᓂᑭᑫᑖᓐ ᐁᔑᒋᑫᔦᒃ᙮ ᐋᓇᐐᓐ ᐁᐱᒫᑎᓯᔦᒃ ᐁᐃᓇᑭᓱᔦᒃ, ᑭᓂᐳᒻ ᐃᑕᔥ᙮

3:2b.REV.003.002 ᑯᔥᑯᓯᒃ, ᒪᔥᑲᐎᓰᑑᒃ ᑫᔮᐱ ᑳᐊᔮᔦᒃ ᑫᑳ ᑳᓂᐴᒪᑲᑭᓐ᙮ ᑳᐐᓐ ᓂᑑᒋᒥᑲᓰᓐ ᒋᑮᔑᑑᔦᒃ ᑳᑮᐃᓀᓂᒥᓀᒃ ᓂᑭᔐᒪᓂᑑᒻ; ᐅᑎᔑᐙᐸᑖᓐ ᐃᑕᔥ ᐁᑮᔑᑖᐙᓯᐌᒃ᙮

3:3b.REV.003.003 ᒫᒥᑲᐎᒃ ᐃᐃᐌ ᑳᑮᐃᔑᒦᓂᑰᔦᒃ ᑲᔦ ᑳᑮᐃᔑᓅᑕᒣᒃ᙮ ᒦ ᐃᐌ ᑭᒋᐎᓇᒧᒃ, ᑲᔦ ᐸᑭᑎᓇᒧᒃ ᐃᐃᐌ ᑳᐃᔑᒪᒋᑑᑕᒣᒃ᙮ ᑮᔥᐱᓐ ᐃᑕᔥ ᐁᑳ ᑯᔥᑯᓯᓯᐌᒃ, ᑖᐱᔥᑰ ᐅᑭᒨᑎᔥᒃ ᑳᐃᔑᑯᔥᑯᐎᔑᐌᒡ ᑕᑶᔑᕽ ᒦ ᐃᐌ ᑫᐃᓀᑖᑯᓯᔮᓐ: ᑳᐐᓐ ᑭᑲᑭᑫᑕᓰᒻ ᐊᐲ ᒪᔮ ᑫᐱᐅᑎᓯᓇᑰᒃ᙮

3:4b.REV.003.004 ᐸᑮ ᐱᑯ ᑭᑕᔑᒻ ᐃᒫ ᓵᕒᑎᓯᕽ ᑳᐊᔮᔦᒃ ᒨᔕᒃ ᐁᐯᑭᑑᔦᒃ ᑭᑭᑭᔥᑭᑲᓂᐙᓐ᙮ ᑮᓇᐙ ᑯ ᑭᑲᐙᐱᔥᑭᑯᓇᔦᒻ ᒋᐐᒋᐱᒧᓭᒥᔦᒃ, ᐋᓃᔥ ᑭᑌᐊᐲᑌᑖᑯᓯᒻ᙮

3:5b.REV.003.005 ᐊᐌᓀᓐ ᐃᑯ ᑫᐸᑭᓈᑫᒡ ᒦ ᐃᐌ ᑫᐃᔑᑯᓇᔦᒡ: ᑕᐙᐱᔥᑳᓂᐗᓐ ᐅᑭᑭᔥᑭᑲᓇᓐ᙮ ᑳᐐᓐ ᑲᔦ ᓂᑲᑳᓯᐊᒪᐙᓰᓐ ᐃᒫ ᒪᓯᓇᐃᑲᓂᕽ ᑳᐅᔑᐲᐃᑳᓱᐙᒡ ᐅᑯ ᑌᐺ ᑳᐱᒫᑎᓯᐙᒡ᙮ ᒦᐗᒃ ᐃᑕᔥ ᐅᑯ ᑫᐙᐐᓇᒀ ᐁᑎᐯᓂᒪᒀ, ᐃᐃᒫ ᐁᓈᓴᒦᓂᒡ ᓂᑌᑌᓐ, ᐃᐃ ᑲᔦ ᑳᐃᔑᐊᔮᓂᒡ ᓂᑌᑌᓐ ᐅᑌᒐᓬᐃᒥᓂ ᓂᑲᐙᐐᓈᒃ᙮

3:6b.REV.003.006 ᐊᐊᐌ ᑕᔥ ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᑭᔐᒪᓂᑑᓐ ᐅᑕᒑᑯᓂ ᑳᐃᓈᓂᒡ ᐃᐃ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

3:7b.REV.003.007 ᑲᔦ ᐃᓂ ᐅᑌᒐᓬᐃᒥᐙᓐ ᐅᑌᐺᑕᒨᒃ ᐃᐃᒫ ᐱᓬᐊᑌᓬᐱᔮᕽ ᑳᑕᔑᒫᐗᒋᐃᑎᐙᒡ, ᐅᐌ ᐃᔑᐲᐊᒪᐤ: ᐅᐅ ᑭᑎᑯᐙ ᐊᐌ ᒥᓯᐌ ᑳᑾᔭᒀᑎᓯᒡ ᑲᔦ ᑳᑌᐺᐎᓂᐎᒡ, ᐊᐊ ᑳᐊᔮᒡ ᐋᐹᐱᑲᐃᑲᓐ ᑌᐱᑦ ᑳᑮᐊᔮᐸᓐ᙮ ᐗᐊ ᑕᔥ ᐃᓂᓂ ᐊᐲ ᐹᑭᓇᕽ ᐃᔥᒀᑌᒻ, ᑳᐐᓐ ᒦᓇᐙ ᐊᐎᔭ ᐅᑲᑲᔥᑭᑑᓰᓐ ᒋᑭᐸᐊᕽ, ᑲᔦ ᐊᐲ ᑭᐸᐊᕽ ᑳᐐᓐ ᒦᓇᐙ ᐊᐎᔭ ᐅᑲᑲᔥᑭᑑᓰᓐ ᒋᐹᑭᓇᕽ᙮

3:8b.REV.003.008 ᐐᓐ ᐃᑭᑐ: ᓂᑭᑫᑖᓐ ᐁᔑᒋᑫᔦᒃ᙮ ᐋᓇᐐᓐ ᐸᑮ ᐁᒪᔥᑲᐎᓰᔦᒃ, ᒥᓅᒡ ᑭᑮᑲᓇᐌᑖᒻ ᑳᑮᐃᑭᑐᔮᓐ᙮ ᑳᐐᓐ ᑲᔦ ᑭᑮᐋᓇᐌᓂᒥᓰᒻ ᒋᐴᓂᐱᒥᓂᔕᐅᔦᒃ᙮ ᓇᔥᑫ ᑭᑮᐹᑭᑌᓇᒪᐎᓂᓂᒻ ᒦᓇᐙ ᐊᐎᔭ ᑫᑭᐸᐊᓯᒃ᙮

3:9b.REV.003.009 ᐃᓇᔥᑫ ᒦ ᐅᐌ ᑫᑑᑕᐗᒀ ᐃᑭᐌᓂᐗᒃ ᑳᐐᒋᐃᐌᐙᒡ ᐃᐃᒫ ᓭᑕᓐ ᐅᒫᐗᒋᐃᐌᐎᓂᕽ᙮ ᒦᐗᑭᑭ ᐅᑮᐗᓂᒨᒃ, ᒎᐗᒃ ᓂᑎᓄᐎᒥᓐ ᑳᐃᑭᑐᐙᒡ, ᑳᐐᓐ ᑌᐺ ᑎᓄᐎᓰᐗᒃ᙮ ᓇᔥᑫ ᓂᑲᐃᔑᐋᒃ ᒋᐱᐅᒋᒌᑾᓇᐱᐙᒡ ᐃᒫ ᐁᔑᓯᑌᑳᐸᐎᔦᒃ᙮ ᐅᑲᑭᑫᑖᓈᐙ ᑕᔥ ᐁᓵᑭᐃᓇᑰᒃ᙮

3:10b.REV.003.010 ᑭᑮᑲᓇᐌᑖᒻ ᑳᑮᐃᓂᓇᑰᒃ ᒋᔕᔒᐯᑕᒣᒃ᙮ ᑲᔦ ᓃᓐ ᑭᑲᑲᓇᐌᓂᒥᓂᓂᒻ ᐊᐲ ᐸᑲᒥᔥᑳᒪᑲᒃ ᑲᑴᒋᐃᐌᐎᓐ, ᐊᒦᑕᔥ ᐅᐅ ᑫᑲᑴᒋᐃᑯᐙᒡ ᐅᒫ ᐊᑮᕽ ᑲᑭᓇ ᑳᐅᑖᐎᓂᐙᒡ᙮

3:11b.REV.003.011 ᐌᔩᑉ ᓂᑲᐲᔖ᙮ ᒥᒋᒥᓇᒧᒃ ᐃᑕᔥ ᐃᐃᐌ ᑳᐊᔮᔦᒃ, ᐁᑳ ᐊᐎᔭ ᒋᒪᑲᒥᓯᓄᐌᒃ ᑭᑎᐸᐊᒫᑰᐎᓂᐙ ᑳᐐᒦᓂᑰᔦᒃ ᐸᑭᓈᑫᔦᒃ᙮

3:12b.REV.003.012 ᐊᐊᐌ ᑕᔥ ᑫᐸᑭᓈᑫᒡ ᓂᑲᐃᔑᐋ ᐯᔑᒃ ᒋᑎᓄᐎᒡ ᐃᓂ ᑳᔑᐸᑕᑭᑌᑭᓐ ᑳᐋᔂᑾᐃᑳᑳᓂᐗᑭᓐ ᐃᐃᒫ ᐅᑭᒋᐊᓇᒥᐁᐎᑲᒥᑯᕽ ᓂᑭᔐᒪᓂᑑᒻ᙮ ᑳᐐᓐ ᒦᓇᐙ ᐐᑳ ᑕᓵᑲᐊᓰ᙮ ᒦᑕᔥ ᐅᐅ ᑫᐃᔑᐲᐗᒃ: ᓂᑲᐅᔑᐲᐊᒧᐙᓐ ᐅᐐᓱᐎᓂᓂ ᓂᑭᔐᒪᓂᑑᒪᓐ, ᐃᐃᐌᔥ ᑲᔦ ᓂᑭᔐᒪᓂᑑᒪᓐ ᐅᑑᑌᓈᒥᓂ ᑳᐃᔑᓂᑳᑌᓂᒃ, ᒦ ᐃᐌ ᐅᔥᑭ ᒉᕒᐆᓴᓬᐊᒻ, ᐃᐃᒫ ᑭᒋᑮᔑᑯᕽ ᑫᐱᐅᒋᓈᔑᔥᑳᓂᒃ, ᐃᐃᒫ ᓂᑭᔐᒪᓂᑑᒥᕽ ᑫᐱᐅᒌᓂᒃ᙮ ᓂᑑᔥᑭᐐᓱᐎᓐ ᑲᔦ ᓂᑲᐅᔑᐲᐊᒧᐙᓐ ᐅᐱᒫᑎᓯᐎᓂᕽ ᐊᐊ ᑫᐸᑭᓈᑫᒡ᙮

3:13b.REV.003.013 ᐊᐊ ᑳᐅᓅᑕᒫᐎᓂᒡ ᒫᓄ ᐅᑲᐱᓯᑕᐙᓐ ᐃᓂ ᑭᔐᒪᓂᑑᓐ ᐅᑕᒑᑯᓂ ᐃᐃ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

3:14b.REV.003.014 ᐃᓂ ᐅᑌᒐᓬᐃᒥᐙᓐ ᐅᑌᐺᑕᒨᒃ ᑳᒫᒪᐎᐊᓇᒥᐋᐙᒡ ᓬᐁᔮᑎᓰᔭ ᐆᑌᓈᕽ, ᐅᐅᐌ ᐃᔑᐲᐊᒪᐤ: ᐅᐅ ᑭᑎᑯᐙ ᐊᐊ ᐁᒣᓐ ᑳᐃᔑᓂᑳᓱᒡ, ᑳᐊᔮᑾᒥᓯᒡ ᑲᔦ ᑳᑌᐺᒡ ᐅᑎᐹᒋᒧ᙮ ᒦ ᐊᐌ ᑳᑮᐅᒋᒫᒋᓯᓂᓂᒃ ᒥᓂᒃ ᑫᑰᓐ ᑭᔐᒪᓂᑑ ᑳᑮᐅᔑᑑᒡ᙮

3:15b.REV.003.015 ᐅᐅᐌ ᐃᑭᑐ: ᓂᑭᑫᑖᓐ ᑳᑮᐱᒥ ᐃᔑᒋᑫᔦᒃ᙮ ᒦᔥ ᐃᐌ ᑭᑎᓀᓂᒥᓂᓂᒻ ᐃᐃ ᒦᒋᒻ ᐁᑳ ᐁᒥᓄᐳᑾᓯᓄᒃ ᐁᑳ ᐁᑌᑭᔑᑌᓯᓄᒃ ᐁᑳᔥ ᑲᔦ ᐁᑌᑕᑳᓯᓄᒃ᙮ ᐊᐯᔥ ᑲᓇᑫ ᐯᔑᒃ ᐅᐅ ᐃᔑᐊᔮᔦᒃ ᑳᑭᔑᑌᒃ ᑫᒫ ᑲᔦ ᑳᑕᑳᒃ ᑫᑰᓐ᙮

3:16b.REV.003.016 ᓂᒫᔑᐱᑖᓐ ᐃᑕᔥ ᐃᐃ ᑳᐃᓀᑖᑯᓯᔦᒃ ᐁᑳ ᐁᑭᔑᑌᓯᓄᒃ ᑭᑎᔑᐊᔮᐎᓂᐙ ᑲᔦ ᐁᑳ ᐗᐐᑫ ᐁᑕᑳᓯᓄᒃ, ᑭᑲᑭᑕᓀᐌᐸᒥᓂᓂᒻ ᐃᑕᔥ᙮

3:17b.REV.003.017 ᐋᓃᔥ ᒦ ᐃᐌ ᐁᑭᑐᔦᒃ: ᓂᐌᓅᑎᓯᒥᓐ, ᓂᑮᐊᓂᒫᐗᒋᒋᑫᒥᓐ, ᑳᐐᓐ ᑲᔦ ᑫᑰᓐ ᓂᓅᑌᓭᓰᒥᓐ᙮ ᑳᐐᓐ ᐃᑕᔥ ᑭᑭᑫᑕᓰᒻ ᐁᔑᐊᔮᔦᒃ, ᐁᑲᒀᑕᑭᐱᒫᑎᓯᔦᒃ ᑲᔦ ᐁᑰᐹᓯᓈᑯᓯᔦᒃ᙮ ᑭᑭᑎᒫᑭᓯᒻ ᐃᑕᔥ, ᑭᐙᓵᑯᓇᐌᒻ ᑲᔦ, ᑳᐐᓐ ᑲᔦ ᑭᐙᐱᓰᒻ᙮

3:18b.REV.003.018 ᐅᐅᐌ ᑕᔥ ᑭᑎᔑᑭᑭᓄᐊᒪᐎᓂᓂᒻ ᑫᔑᒋᑫᔦᒃ: ᓃᓐ ᐊᑖᒥᔑᒃ ᐅᓵᐎ ᔔᓂᔮ ᑳᑮᐯᑳᐱᑳᑭᓱᒡ ᒋᐌᓅᑎᓯᔦᒃ ᐃᑕᔥ᙮ ᑲᔦ ᐊᑖᒥᔑᒃ ᐙᐱᔥᑭ ᑭᑭᔥᑭᑲᓇᓐ ᒋᑭᑭᔥᑭᑫᔦᒃ, ᐋᑾᓇᐗᐱᓱᒃ ᐃᐌ ᑳᐃᔑᐙᓵᑯᓇᐌᔦᒃ ᐁᑳ ᒋᐊᑲᓯᓈᑯᓯᓯᐌᒃ᙮ ᐊᑖᒥᔑᒃ ᑲᔦ ᐴᓯᓂᑲᓐ ᒋᐴᓯᓇᒣᒃ ᑭᔥᑮᔑᑯᐙᓐ ᒋᐙᐸᑕᒫᔦᒃ᙮

3:19b.REV.003.019 ᓃᓐ ᐃᑕᔥ ᒥᓂᒃ ᓴ ᑯ ᑳᓵᑭᐊᒀ ᓂᒫᒦᓄᑭᑭᓄᐊᒪᐙᒃ, ᓂᐸᔕᔐᐙᒃ ᑲᔦ᙮ ᐊᔮᒀᒥᓯᒃ, ᐸᑭᑎᓇᒧᒃ ᐃᑕᔥ ᑳᐃᔑᒪᒋᑑᑕᒣᒃ᙮

3:20b.REV.003.020 ᐃᓇᔥᑫ ᐱᓯᑕᒧᒃ! ᓂᓃᐸᐤ ᐊᑾᒌᕽ ᐃᐃᒫ ᐃᔥᒀᑌᕽ, ᓂᐹᐹᐗᐃᑫ᙮ ᐊᐎᔭ ᑕᔥ ᓅᑕᐎᒡ ᐁᑮᑭᑐᔮᓐ, ᐹᑭᑌᓇᒪᐎᒡ, ᓂᑲᐲᑎᑲᐙ ᑕᔥ, ᓂᑲᐐᒋᐐᓯᓃᒥᒃ, ᑲᔦ ᐐᓐ ᑕᔥ ᓂᑲᐐᒋᐐᓯᓃᒫ᙮

3:21b.REV.003.021 ᐊᐊᐌ ᑫᔖᑰᒋᑣᒡ ᓂᑲᔑᒦᓈ ᒋᐐᑕᐱᒥᒡ ᓂᑭᒋᐊᐱᐎᓂᕽ ᑖᐱᔥᑰ ᓃᓂᑕᒻ ᑳᑮᐃᔑᔖᑰᒋᑣᔮᓐ ᑲᔦ ᓅᑯᒻ ᐁᐐᑕᐱᒪᒃ ᓂᑌᑌ ᐅᑭᒋᐊᐱᐎᓂᕽ᙮

3:22b.REV.003.022 ᐊᐊ ᑳᐅᓅᑕᒫᐎᓂᒡ ᐅᑲᐱᓯᑕᐙᓐ ᑭᔐᒪᓂᑑᓐ ᐅᑕᒑᑯᓂ ᐃᓂ ᑳᐃᓈᓂᒡ ᐅᑌᐺᑕᒨᐞ ᐯᐸᑳᓐ ᑳᐃᔑᒫᒫᐗᒋᐃᑎᓂᒡ᙮

4

4:1b.REV.004.001 ᐃᔥᒀᓭᑭᓐ ᐃᓂ ᑳᑮᐱᐙᐸᑕᒫᓐ, ᒦᑕᔥ ᒦᓇᐙ ᑫᑰᓐ ᓂᐙᐸᑖᓐ᙮ ᐊᔮ ᐃᐌᑎ ᐁᐹᑭᓯᕽ ᐃᔥᒀᑌᒻ ᑭᒋᑮᔑᑯᕽ᙮ ᐃᐌᑎ ᓂᑕᒻ ᑳᑮᓅᑕᐗᒃ ᑭᒋᐴᑖᒋᑲᓂᕽ ᑳᑮᐃᓉᒡ ᑳᑮᑲᓅᔑᒡ, ᒦᓇᐙ ᑮᐃᑭᑐ: ᐲᔖᓐ ᐅᐅᒫ ᐃᔥᐱᒥᕽ, ᒦᔥ ᐃᐌ ᑭᐐᐙᐸᑕᐃᓐ ᐃᓂ ᑫᑰᓇᓐ ᑫᒋᓈᒡ ᐃᑯ ᒋᐊᓂ ᐃᔑᐌᐸᑭᐸᓐ, ᓂᑎᒃ᙮

4:2b.REV.004.002 ᔐᒫᒃ ᐃᑕᔥ ᓂᑮᐐᒋ ᐃᓀᑕᒧᔥᑳᑯᐙᓐ ᑭᔐᒪᓂᑑ ᐅᑕᒑᑾᓐ᙮ ᓂᐙᐸᑖᓐ ᐁᐅᓇᑌᒃ ᑭᒋᑮᔑᑯᕽ ᑭᒋᐊᐱᐎᓐ, ᑲᔦ ᐊᐎᔭ ᓂᐙᐸᒫ ᐁᓇᒪᑕᐱᒡ ᐃᐃᒫ,

4:3b.REV.004.003 ᐁᐙᓰᑴᓱᒡ; ᑖᐱᔥᑰ ᑳᐃᔑᓈᑯᓯᐙᒡ ᐅᑯ ᑎᓄ ᓃᔑᓐ ᐊᓯᓃᒃ ᑳᐊᐲᒋᐅᓂᔑᔑᐙᒡ, ᒑᔅᐸᕒ ᐁᔑᐅᔖᐗᔥᒀᐱᑭᓯᒡ, ᑳᕒᓃᓬᐃᔭᓐ ᑲᔦ ᐁᔑᒥᔅᒀᐱᑭᓯᒡ, ᒦ ᐃ ᐁᔑᓈᑯᓯᒡ ᐁᐙᓰᑴᓱᒡ᙮ ᑮᓯᓶᔮᑉ ᑲᔦ ᐃᐃᒫ ᑮᐊᔮ ᐙᑳᔭᐄ ᑭᒋᐊᐱᐎᓂᕽ, ᑖᐱᔥᑰ ᐁᐃᓈᓴᑯᓀᒃ ᑳᐃᔑᓈᑯᓯᒡ ᐊᐊ ᐁᒪᕒᐊᓬᑦ ᐊᓯᓐ, ᔑᑯᐲᕽ ᐁᔑᔖᑆᑌᓈᑯᓯᒡ᙮

4:4b.REV.004.004 ᐃᒫᔥ ᑳᔑᐊᑌᒃ ᑭᒋᐊᐱᐎᓐ ᑮᐙᑳᑌᐗᓐ ᑭᒋᐊᐱᐎᓇᓐ ᓃᔥᑕᓇᔑᓃᐎᓐ 24 ᐁᑕᓯᑭᓐ᙮ ᓃᔥᑕᓇᔑᓃᐎᓐ ᐃᑕᔥ ᐃᐃᒫ ᐅᓃᑳᓂᓰᒃ ᑮᓇᒪᑕᐱᐗᒃ ᐁᑮᐙᐱᔥᑳᓂᑭᓐ ᐅᑭᑭᔥᑭᑲᓂᐙᓐ ᑲᔦ ᐁᑮᐅᓵᐎ ᔔᓂᔮᐎᐗᓂᓂᑭᓐ ᐃᓂ ᐅᑑᑭᒫᐙᓄᒀᓂᐙᓐ ᑳᑭᑭᔥᑲᒧᐙᒡ ᐅᑎᒀᓂᐙᕽ᙮

4:5b.REV.004.005 ᐃᒫ ᑕᔥ ᑭᒋᐊᐱᐎᓂᕽ ᑮᐅᒋᐙᐙᑌᓭ ᑲᔦ ᑮᐅᒋᒪᑗᐌᑖᑾᓐ ᐃᓂᑖᑯᓯᐎᓐ ᑲᔦ ᐁᐱᓀᓯᐗᕽ ᑳᐃᓂᑖᑾᒃ᙮ ᓃᔣᓱ 7 ᑕᔥ ᐃᒫ ᐙᓴᑯᓀᒋᑲᓇᓐ ᑮᑕᓇᑯᓀᐗᓐ ᐅᒋᔥᑲᐤ ᐃᓇᑫ ᑭᒋᐊᐱᐎᓂᕽ᙮ ᐊᒦᐗᐞ ᐃᓂ ᑳᓃᔣᒋᓂᒡ ᐅᑕᒑᑾᐞ ᑭᔐᒪᓂᑑ᙮

4:6b.REV.004.006 ᑲᔦ ᐁᐃᓈᓴᒪᑌᒃ ᑭᒋᐊᐱᐎᓐ ᒦ ᐃᒫ ᑳᐊᔮᒃ ᓵᑲᐃᑲᓃᕽ ᑳᐃᔑᓈᑾᒃ, ᑖᐱᔥᑰ ᐙᓭᒋᑲᓈᐱᒃ ᐁᑎᓄᐗᕽ, ᑖᐱᔥᑰ ᒥᑾᒦᕽ ᑳᐃᔑᔖᐳᓈᑯᓯᒡ ᒦᔥ ᐁᔑᓈᑾᒃ ᑳᐊᑌᒃ᙮ ᑲᔦ ᒣᑾᔭᐄ ᑲᔦ ᐙᑳᔭᐄ ᑭᒋᐊᐱᐎᓂᕽ ᓃᐎᓐ ᐊᐎᔭᒃ ᐅᐱᒫᑎᓰᒃ ᑮᐊᔮᐗᒃ, ᒥᓯᐌ ᐁᐅᔥᑮᔑᑯᐙᒡ, ᓃᑳᓇᔭᐄ ᑲᔦ ᐅᑖᓈᕽ ᑮᐅᔥᑮᔑᑯᐗᒃ᙮

4:7b.REV.004.007 ᐊᐌ ᑕᔥ ᓂᑕᒻ ᐅᐱᒫᑎᓰ ᑖᐱᔥᑰ ᒥᓯᐱᔑᐤ ᐃᔑᓈᑯᓯ᙮ ᐊᐌ ᑕᔥ ᑯᑕᒃ ᑖᐱᔥᑰ ᓈᐯᐱᔑᑭ᙮ ᔑᑾ ᒦᓇᐙ ᐊ ᑯᑕᒃ ᑮᐃᓇᑌᑴ ᐃᓂᓃᕽ᙮ ᒦᓇᐙᔥ ᐊᐊ ᑯᑕᒃ ᒥᑭᓯ ᐁᐱᒥᓭᒡ ᐃᔑᓈᑯᓯ᙮

4:8b.REV.004.008 ᒦ ᐁᑕᔑᐙᒡ ᐅᐱᒫᑎᓰᒃ ᑳᓃᐎᐙᒡ ᓂᑯᑡᒋᓂᓂᐗᓐ ᐅᓂᑸᑲᓂᐙᓐ᙮ ᒥᓯᐌᔥ ᐅᔥᑮᔑᑯᐗᒃ ᐙᑳᔭᐄ ᑲᔦ ᐲᒐᔭᐄ᙮ ᑳᐐᓐ ᐐᑳ ᐋᑌᓂᑲᒧᓰᐗᒃ, ᐁᑮᔑᑲᓂᓂᒃ ᓂᑲᒧᐗᒃ ᑲᔦ ᐁᑎᐱᑲᓂᓂᒃ, ᐅᐅᐌ ᐁᐃᓇᐊᒧᐙᒡ: ᐗᐐᑫ ᑾᔭᒀᑎᓯ! ᐗᐐᑫ ᑾᔭᒀᑎᓯ! ᐗᐐᑫ ᑾᔭᒀᑎᓯ ᑳᑎᐯᒋᑫᒡ ᑭᔐᒪᓂᑑ ᐗᐐᑫ ᑳᒪᔥᑲᐙᑎᓯᒡ! ᐊᐌᑎ ᑳᑮᐊᔮᒡ, ᐅᒫᔥ ᓅᑯᒻ ᑳᐊᔮᒡ, ᒦᓇᐙᔥ ᒋᐱᐊᔮᒡ! ᐃᓇᐊᒨᒃ᙮

4:9b.REV.004.009 ᐅᑎᐹᒋᒫᐙᓐ ᐁᔑ ᐊᐲᒋ ᐅᓂᔑᔑᐌᒋᑲᓂᐎᓂᒡ, ᑲᔦ ᐅᑭᑕᑭᒫᐙᓐ ᑲᔦ ᐅᓇᓈᑯᒫᐙᓐ ᐃᓂ ᑭᒋᐊᐱᐎᓂᕽ ᑳᓇᒪᑕᐱᓂᒡ ᐊᐸᓀ ᐱᔑᔑᒃ ᑳᐱᒫᑎᓯᓂᒡ᙮

4:10b.REV.004.010 ᐊᐲ ᑾ ᐁᔑᒋᑫᐙᒡ ᐅᐱᒫᑎᓰᒃ, ᑲᔦ ᐐᓇᐙ ᑳᓃᔥᑕᓇᔑᓃᐎᐙᒡ 24 ᐅᓃᑳᓂᓰᒃ ᐅᑑᒋᒌᑾᓇᐲᑕᐙᐙᓐ ᐃᓂ ᑭᒋᐊᐱᐎᓂᕽ ᑳᓇᒪᑕᐱᓂᒡ ᐊᐸᓀ ᐱᔑᔑᒃ ᑳᐱᒫᑎᓯᓂᒡ, ᑲᔦ ᐅᑕᐸᑭᑑᓈᐙᓐ ᐅᑭᒋᐅᑭᒫᐙᓄᒀᓂᐙᓐ ᐃᐃᒫ ᐁᓈᓴᒪᑌᒃ ᐃᐃ ᑭᒋᐊᐱᐎᓐ ᐁᐃᔥᐯᓂᒫᐙᒡ᙮ ᒦ ᐅᐌ ᐁᑭᑐᐙᒡ:

4:11b.REV.004.011 ᑮᓐ ᑳᑎᐯᓂᒥᔮᕽ ᓂᑭᔐᒪᓂᑑᒥᓈᓐ! ᑮᓐ ᑭᑌᐸᑫᑖᑯᔅ ᒋᐐᒋᑳᑌᒃ ᒋᐊᐲᒋ ᐅᓂᔑᔑᐌᒋᑲᓂᐎᔭᓐ, ᑲᔦ ᒋᐊᐲᒋ ᐃᔥᐯᓂᒥᑰᔭᓐ, ᑲᔦ ᒋᐊᐲᒋ ᑭᒋᒪᔥᑲᐌᑖᑯᓯᔭᓐ, ᐋᓃᔥ ᑲᑭᓇ ᑫᑰᓐ ᑭᑮᐅᔑᑑᓐ᙮ ᑮᓐ ᐃᑯ ᐁᑮᐃᓀᑕᒪᓐ ᑮᐅᒋᐊᔮᐗᓐ ᑲᔦ ᑮᐅᔑᒋᑳᑌᐗᓐ, ᐊᒦ ᐃᐌ ᐅᑎᓈᐙᓐ᙮

5

5:1b.REV.005.001 ᑫᔮᐱ ᐃᒫ ᓂᐙᐸᒫ ᐊᐊᐌ ᑭᒋᐊᐱᐎᓂᕽ ᑳᓇᒪᑕᐱᒡ ᐅᑭᒋᓂᑭᕽ ᐁᐊᑌᓂᒃ ᑎᑎᐲᑭᓂᑲᓂ ᒪᓯᓇᐃᑲᓐ, ᐊᓈᒥᕽ ᑲᔦ ᐗᑭᒐᔭᐄ ᐁᐅᔑᐲᐃᑳᑌᓂᒃ, ᑲᔦ ᐁᑭᐱᔥᑭᐗᓯᑳᑌᒃ ᓃᔣᒋᕽ 7᙮

5:2b.REV.005.002 ᓂᐙᐸᒫ ᑕᔥ ᑲᔦ ᐁᒪᔥᑲᐌᑖᑯᓯᒡ ᐁᒐᓬ ᐁᑭᔒᐌᒡ ᐁᐃᑭᑐᒡ: ᐊᐌᓀᓐ ᑫᑌᐃᓀᑖᑯᓯᒡ ᒋᐸᐹᑾᒋᐱᑑᒡ ᐃᓂ ᑭᐱᔥᑭᐗᓯᑲᓇᓐ? ᐊᐌᓀᔥ ᑫᐹᑮᑭᓇᕽ ᐃᐌ ᒪᓯᓇᐃᑲᓐ?

5:3b.REV.005.003 ᑳᐐᓐ ᐃᑕᔥ ᐊᐎᔭ ᑮᒥᑭᑲᓂᐎᓰ ᑭᒋᑮᔑᑯᕽ ᑲᔦ ᐊᑮᕽ ᑲᔦ ᐊᓈᒪᑲᒥᒃ ᑫᑲᔥᑭᑑᒡ ᒋᐹᑮᑭᓇᕽ ᐃᐌ ᒪᓯᓇᐃᑲᓐ ᑲᔦ ᒋᑲᓇᐙᐸᑕᕽ᙮

5:4b.REV.005.004 ᒦᑕᔥ ᓂᑮᑭᒋᒪᐤ ᐁᑳ ᐁᑮᒥᑲᐙᓯᐎᓐᒡ ᐁᑌᐃᓀᑖᑯᓯᒡ ᒋᐹᑮᑭᓇᕽ ᐃᐃ ᑎᑎᐲᑭᓂᑲᓂᒪᓯᓇᐃᑲᓐ ᑲᔦ ᒋᐙᐸᑕᕽ᙮

5:5b.REV.005.005 ᐯᔑᒃ ᐃᑕᔥ ᐊᐌ ᑳᓃᑳᓀᑖᑯᓯᒡ ᓂᑮᑲᓅᓂᒃ: ᑫᑯ ᒪᐎᑫᓐ᙮ ᐃᓇ ᐊᐌᑎ ᒥᔑᐱᔑᐤ, ᐐᓐ ᐊᐊᐌ ᐃᐃᒫ ᑳᑮᐅᒌᒡ ᐅᐯᔑᑴᐙᓇᑭᓯᐎᓂᕽ ᒎᑕ, ᑲᔦ ᑌᐱᑎᕽ ᐁᑮᐅᑕᑳᓀᓯᒡ, ᐐᓐ ᐁᐋᐎᒡ ᐊᐊ ᑳᔖᑰᒋᑣᒡ, ᐐᓐ ᐅᑲᔥᑭᑑᓐ ᐁᐸᐹᑾᒋᐱᑑᒡ ᑭᐱᔥᑭᐗᓯᑲᓇᓐ ᑲᔦ ᐁᐹᑮᑭᓇᕽ ᐃᐃ ᑎᑎᐲᑭᓂᑲᓂ ᒪᓯᓇᐃᑲᓐ, ᑮᐃᑭᑐ᙮

5:6b.REV.005.006 ᒦᑕᔥ ᐃᐃᒫ ᓂᑮᐙᐸᒫ ᒫᓇᒑᓂᔐᔅ ᐁᓃᐸᐎᒡ ᒣᑴᔭᐄ ᑭᒋᐊᐱᐎᓂᕽ, ᐁᐙᑳᑳᐸᐐᑖᑯᒡ ᐃᐃ ᓃᐎᓐ 4 ᐅᐱᒪᑎᓰᐞ ᑲᔦ ᐃᐃᐌᓂᐗᐞ ᑳᓃᔥᑕᓇᔑᓃᐎᓂᒡ 24 ᐅᓃᑳᓂᓰᐞ᙮ ᐱᓵᓂᑯ ᐁᑮᓂᒋᑲᓂᐎᑯᐸᓀᓐ ᑮᐃᔑᓂᓯᑕᐎᓈᑯᓯ ᐊᐊ ᒫᓇᒑᓂᔐᔅ᙮ ᑮᓃᔣᒋᐗᐞ 7 ᐅᑌᔥᑲᓇᐞ, ᑮᓃᔣᒋᓂᓂᐗᓐ 7 ᑲᔦ ᐅᔥᑮᔑᑰᓐ᙮ ᐅᓄ ᑕᔥ ᑳᓃᔣᒋᓂᓂᑭᓐ ᐅᔥᑮᔑᑰᓐ ᒦ ᐃ ᑳᐃᒋᑳᓱᓂᒡ ᑭᔐᒪᓂᑑ ᑳᓃᔣᒋᓂᒡ 7 ᐅᑕᒑᑾᐞ ᒥᓯᐌ ᐊᑮᕽ ᑳᐃᔑᓂᔕᐅᒥᓐᒡ᙮

5:7b.REV.005.007 ᑮᐃᔖ ᑕᔥ ᐊᐊ ᒫᓇᒑᓂᔐᔅ ᐁᑮᐅᑖᐱᓇᒪᐙᒡ ᐃᐃ ᑎᑎᐲᑭᓂᑲᓐ ᐃᐃᒫ ᐅᑭᒋᓂᑭᓃᕽ ᑳᐊᑌᓂᒃ ᐃᓂ ᑳᓇᒪᑕᐱᓂᒡ ᑭᒋᐊᐱᐎᓂᕽ᙮

5:8b.REV.005.008 ᐊᐲᔥ ᐁᑮᐅᑖᐱᓇᕽ ᐊᐊ ᒫᓇᒑᓂᔐᔅ, ᐅᑮᐅᒋᒌᑾᓃᑖᑰᐞ ᐃᐃ ᓃᐎᓐ 4 ᐅᐱᒫᑎᓰᐞ, ᐃᐃ ᑲᔦ ᓃᔥᑕᓇᔑᓃᐎᓐ 24 ᐅᓃᑳᓂᓰᐞ᙮ ᐅᓃᑳᓂᓰᒃ ᐃᑕᔥ ᐅᑮᐊᔮᐙᐙᐞ ᐯᐯᔑᒃ ᒪᑗᔮᐲᑭᐱᒋᑲᓇᐞ᙮ ᐅᑮᐊᔮᓈᐙᓐ ᐃᑕᔥ ᑲᔦ ᑳᐅᓵᐎ ᔔᓂᔮ ᐙᐱᑲᓂᓂᑭᓐ ᐅᓈᑲᓇᓐ ᐁᔑᒨᔥᑭᓀᓂᒃ ᐃᐃᐌ ᑳᒥᓄᒫᓯᑳᑌᓂᒃ᙮ ᒦ ᐅᐌᓂ ᐅᑕᓇᒥᐋᐎᓂᓂ ᑭᔐᒪᓂᑑ ᐅᐱᒫᑎᓰᒪᐞ᙮

5:9b.REV.005.009 ᑮᓂᑲᒧᐗᒃ ᐃᑕᔥ ᐅᔥᑭᓂᑲᒧᓐ ᐅᐅᐌ ᐁᐃᓇᐊᒧᐙᒡ: ᑮᓐ ᑭᑌᐊᐲᑌᑖᑯᔅ ᒋᐅᑖᐱᓇᒪᓐ ᐃᐃ ᑎᑎᐲᑭᓂᑲᓐ, ᑲᔦ ᒋᐸᐹᑾᒋᐱᑑᔭᓐ ᐃᓂ ᑭᐱᔥᑭᐗᓯᑲᓇᓐ᙮ ᐋᓃᔥ ᑭᑮᓂᓯᑰ, ᑭᒥᔅᑸᒻ ᐃᑕᔥ ᑭᑮᑎᐸᐃᑫᑕᒪᐙᒃ, ᐃᐃᒫ ᒥᓯᐌ ᑳᐅᒌᐙᒡ, ᑭᔐᒪᓂᑑᓐ ᒋᑎᐯᓂᒥᑯᐙᒡ᙮ ᑲᑭᓇ ᐯᐸᑳᓐ ᑕᓶᐙᓇᑭᓯᐎᓂᕽ ᐅᒌᐗᒃ, ᑲᑭᓇ ᑲᔦ ᐯᐸᑳᓂᑮᔗᐎᓂᕽ, ᑲᑭᓇ ᑲᔦ ᐁᔑᐙᐐᑌᑭᓐ ᐅᒌᐎᓂᕽ, ᑲᑭᓇ ᑲᔦ ᐯᐸᑳᓉᐙᓇᑭᓈᑯᓯᐎᓂᕽ᙮

5:10b.REV.005.010 ᒦᐗᒃ ᐃᑕᔥ ᐃᑭ ᑳᑮᐃᔑᐊᑣ ᒋᑎᓄᐎᐙᒡ ᑫᑎᐯᓂᒥᐌᐙᒡ ᒋᑕᔑᐊᓇᒥᐁᐎᑭᒫᐎᐙᒡ ᒋᐊᓄᑮᑕᐙᐙᒡ ᑭᑭᔐᒪᓂᑑᒥᓈᓇᓐ᙮ ᑲᔦ ᑕᔥ ᐅᒫ ᐗᑭᑕᑲᒥᒃ ᑕᑎᐯᒋᑫᐗᒃ, ᑮᐃᓇᐊᒨᒃ᙮

5:11b.REV.005.011 ᒦᓇᐙᔥ ᓂᑮᐃᓈᑉ, ᓂᑮᓅᑕᐙᒃ ᐃᑕᔥ ᐁᒐᓬᐊᒃ ᐁᐅᓵᒬᐎᑕᒧᐙᒡ, ᒫᐗᒡ ᐁᐹᑏᓄᐙᒡ, ᑳᐐᓐ ᐐᑳ ᑖᑌᐸᑭᒫᓰᐗᒃ ᐁᑕᔑᐙᒡ᙮ ᒦᔥ ᐃᐃᒫ ᑮᐙᑳᑳᐸᐎᐗᒃ ᐅᑯ ᑳᐅᓵᒦᓄᐙᒡ ᐁᒐᓬᐊᒃ ᐃᐃᒫ ᑭᒋᐊᐱᐎᓂᕽ ᑳᐊᑌᒃ ᑲᔦ ᐃᑭ ᓃᐎᓐ ᐅᐱᒫᑎᓰᒃ ᑲᔦ ᐃᑭ ᓃᔥᑕᓇᔑᓃᐎᓐ 24 ᐅᓃᑳᓂᓰᒃ ᑳᐃᔑᐊᔮᐙᒡ᙮

5:12b.REV.005.012 ᑮᑭᒋ ᐃᓉᐗᒃ ᐁᒐᓬᐊᒃ ᐁᐃᑭᑐᐙᒡ: ᐐᑫ ᒥᓯᐌ ᑌᐸᑫᑖᑯᓯ ᐊᐊ ᒫᓇᒑᓂᔐᔅ ᑳᑮᓂᓯᓐᒡ: ᑕᒦᓈ ᐌᓅᑎᓯᐎᓐ, ᑲᑮᑖᐌᑖᑯᓯᐎᓐ, ᒪᔥᑲᐌᑖᑯᓯᐎᓐ ᑲᔦ᙮ ᑕᑭᒋ ᐃᓀᓂᒫ, ᑕᐊᐲᒋᐅᓂᔑᔑᐌᒋᑲᓂᐎ, ᑲᔦ ᑕᓇᓈᑯᒫ᙮

5:13b.REV.005.013 ᑲᔦ ᑲᑭᓇ ᐊᐎᔭ ᑳᑮᐅᔑᐃᓐᒡ ᐃᒫ ᑭᒋᑮᔑᑯᕽ, ᐃᒫᔥ ᑲᔦ ᐊᑮᕽ, ᑲᔦ ᐊᓈᒪᑲᒥᒃ ᑲᔦ ᑭᒋᑲᒦᕽ ᑳᐊᔮᐙᒡ, ᑲᔦ ᑲᑭᓇ ᑫᑰᓐ ᒥᓯᐌᑲᒥᒃ ᑳᐱᒫᑕᑭᓐ, ᑲᑭᓇ ᓂᑮᓅᑕᐙᒃ ᐁᓂᑲᒧᐙᒡ: ᐊᐊᐌ ᑳᓇᒪᑕᐱᒡ ᐅᑭᒋᐊᐱᐎᓂᕽ ᐊᐊ ᑲᔦ ᒫᓇᒑᓂᔐᔅ ᑕᓇᓈᑯᒫᐗᒃ ᑲᔦ ᑕᑭᑕᑭᒫᐗᒃ, ᑲᔦ ᑕᐊᐲᒋᐅᓂᔑᔑᐌᒋᑲᓂᐎᐗᒃ, ᑕᐃᓇᑭᒫᐗᒃ ᒥᓯᐌ ᐁᒪᔥᑲᐌᑖᑯᓯᐙᒡ, ᒨᔕᒃ ᐃᑯ ᐊᐸᓀ ᐱᔑᔑᒃ, ᑮᐃᓇᐊᒨᒃ᙮

5:14b.REV.005.014 ᐃᑭᐌᓂᐗᒃ ᐃᑕᔥ ᓃᐎᓐ 4 ᐅᐱᒫᑎᓰᒃ ᑲᔦ ᐐᓇᐙ ᑮᐃᑭᑐᐗᒃ: ᐁᒣᓐ᙮ ᐃᑭ ᑲᔦ ᐅᓃᑳᓂᓰᒃ ᑮᐃᔑᐅᒋᒌᑾᓂᐸᓂᐅᐗᒃ ᐁᑭᒋ ᐃᓀᓂᒫᐙᒡ᙮

6

6:1b.REV.006.001 ᒦᑕᔥ ᐃᐃ ᐊᐲ ᓂᑮᐙᐸᒫ ᐊᐌ ᒫᓇᒑᓂᔐᔅ ᐯᔑᒃ ᐁᐸᑾᒋᐱᑑᒡ ᐃᐃ ᑭᐱᔥᑭᐗᓯᑲᓐ᙮ ᓂᑮᓅᑕᐙ ᑕᔥ ᐁᑲᑭᑐᒡ ᐯᔑᒃ ᐃᑭ ᑳᓃᐎᐙᒡ ᐅᐱᒫᑎᓰᒃ᙮ ᑖᐱᔥᑰ ᑭᒋᐱᓀᓯᐗᕽ ᑮᐃᓉ: ᐲᔖᓐ! ᐁᐃᑭᑐᒡ᙮

6:2b.REV.006.002 ᓂᑮᐃᓈᑉ ᐃᑕᔥ, ᐁᐙᐸᒪᒃ ᐁᐙᐱᔥᑭᓯᒡ ᒥᑕᑎᒻ, ᐁᐱᑌᓴᐱᒡ ᐊᐎᔭ ᒥᑎᒀᐲᓐ ᐁᑕᑯᓈᒡ᙮ ᑮᒦᓈ ᑕᔥ ᐃᐃ ᔖᑰᒋᐃᐌᐎ ᐋᓄᒀᓐ᙮ ᒦᑕᔥ ᐱᓵᓂᑯ ᑳᓂᑖᔖᑰᒋᐃᐌᒡ ᑮᐃᔑᓈᑯᓯ, ᐁᑮᐊᓂ ᐃᔑᑌᓴᐱᒡ ᑫᔮᐱ ᐁᐐᐊᓂᔖᑰᒋᑣᒡ᙮

6:3b.REV.006.003 ᒦᓇᐙ ᑕᔥ ᑯᑕᒃ ᑭᐱᔥᑭᐗᓯᑲᓐ ᐅᑮᐸᑾᒋᐱᑑᓐ ᐊᐊ ᒫᓇᒑᓂᔐᔅ᙮ ᒦᓇᐙ ᐯᔑᒃ ᓂᑮᓅᑕᐙ ᐅᐱᒫᑎᓯ, ᐲᔖᓐ! ᐁᐃᑭᑐᒡ᙮

6:4b.REV.006.004 ᒦᑕᔥ ᒦᓇᐙ ᐯᔑᒃ ᑮᐱᐅᒋᓵᑫᐌᔥᑳ ᒥᑕᑎᒻ ᐁᒥᔅᑯᓯᒡ᙮ ᐊᐊᐌ ᑳᑌᓴᐱᒡ ᑮᒦᓈ ᒋᒫᒌᑑᒡ ᒋᒪᒋᒦᑳᑎᓈᓂᐗᓂᓂᒃ ᐃᐃᒫ ᐊᑮᕽ, ᒦ ᐃ ᒋᓂᓯᑎᓈᓂᐗᕽ᙮ ᔑᑾ ᑮᒦᓈ ᐃ ᑳᒥᒑᐱᑲᓂᓂᒃ ᑭᒋᒨᑯᒫᓐ᙮

6:5b.REV.006.005 ᒦᓇᐙ ᑕᔥ ᑯᑕᒃ ᐅᑮᐸᑾᒋᐱᑑᓐ ᑭᐱᔥᑭᐗᓯᑲᓐ ᐊᐊ ᒫᓇᒑᓂᔐᔅ, ᒦ ᐃᐌ ᓂᓯᕽ 3᙮ ᒦᓇᐙᔥ ᐯᔑᒃ ᓂᑮᓅᑕᐙ ᐅᐱᒫᑎᓯ, ᐲᔖᓐ! ᐁᐃᑭᑐᒡ᙮ ᓂᑮᐃᓈᑉ ᐃᑕᔥ, ᐃᓇ ᐊᐌᑎ ᑳᒪᑲᑌᐎᓯᒡ ᒥᑕᑎᒻ᙮ ᐊᐊᐌ ᑕᔥ ᑳᑌᓴᐱᒡ ᐅᑕᑯᓈᓐ ᑎᐹᐱᔥᑰᒋᑲᓐ᙮

6:6b.REV.006.006 ᓂᑮᓅᑖᓐ ᐃᑕᔥ ᑖᐱᔥᑰ ᐃᓂᑖᑯᓯᐎᓐ ᐁᐃᓉᒪᑲᒃ᙮ ᒣᑴᔭᐄ ᐃᒫ ᑮᑕᓂᑖᑾᓐ ᐃᑭ ᓃᐎᓐ 4 ᐅᐱᒫᑎᓰᒃ ᑳᐊᔮᐙᒡ, ᒦ ᐅᐌ ᐁᐃᓉᒪᑲᒃ: ᐯᔑᑯᑮᔑᒃ ᐁᑲᔥᑭᐋᒡ ᐊᐎᔭ ᔔᓂᔮᓐ, ᐯᔑᑯᒀᐸᐃᑲᓐ ᐁᑕ ᑕᐊᑖᐌ ᐸᑴᔑᑲᓂᑭᑎᑳᓀᓴᓐ ᒋᒦᒋᒡ, ᔑᑾ ᓂᓱ 3 ᒀᐸᐃᑲᓐ ᐸᕒᓬᐄ ᒪᓅᒥᓐ ᐁᑕ ᑕᐊᑖᐌ ᐯᔑᑯᑮᔑᒃ ᐁᑲᔥᑭᐋᒡ ᔔᓂᔮᓐ᙮ ᑫᑯ ᑕᔥ ᐐᓐ ᓂᔑᐗᓈᒋᐋᑫᓐ ᐋᓬᐃᑉ ᑳᑎᓄᐎᐙᒡ ᑭᑎᑳᓈᑎᑰᒃ, ᑲᔦ ᐃᓂ ᔔᒥᓂᑭᑎᑫᐎᓇᓐ ᑳᐐᓐ ᑕᓂᔑᐗᓈᑕᓯᓅᓇᓐ, ᑮᐃᓉᒪᑲᓐ᙮

6:7b.REV.006.007 ᒦᑕᔥ ᒦᓇᐙ ᑯᑕᒃ ᐅᑮᐸᑾᒋᐱᑑᓐ ᐊᐊ ᒫᓇᒑᓂᔐᔅ ᑭᐱᔥᑭᐗᓯᑲᓐ, ᒦ ᐃ ᓃᐎᕽ᙮ ᒦᓇᐙ ᑕᔥ ᓂᑮᓅᑕᐙ ᐊᐊ ᐁᑯᓃᐎᒡ 4 ᐅᐱᒫᑎᓯ, ᐲᔖᓐ! ᐁᐃᑭᑐᒡ᙮

6:8b.REV.006.008 ᓂᑮᐃᓈᑉ ᐃᑕᔥ, ᐃᓇ ᐊᐌᑎ ᐁᐙᐸᒪᒃ ᐁᐙᐱᓇᐎᓈᑯᓯᒡ ᒥᑕᑎᒻ᙮ ᓂᐳᐎᓐ ᑮᐃᔑᓂᑳᓱ ᐊᐊ ᑳᑌᓴᐱᒡ᙮ ᐃᓂ ᑕᔥ ᐁᑏᔅ ᑳᐃᔑᐐᓱᓂᒡ ᐅᑖᓈᕽ ᐅᐱᐐᒌᐎᑰᓐ ᐁᐱᒥᑌᓴᐱᓂᒡ᙮ ᐅᑯ ᑕᔥ ᓃᔑᓐ ᑮᒦᓈᐗᒃ ᒋᑕᔑᓂᓵᐙᒡ ᐃᐃᐌᓂᐗᐞ ᐯᔑᒃ ᑳᑕᓱᓃᐎᓂᒡ (1/4) ᐊᐎᔭᐞ ᐃᒫ ᐊᑮᕽ ᑳᐊᔮᓂᒡ᙮ ᐅᑲᐋᐸᒋᑑᓈᐙ ᒦᑳᑎᐎᓐ, ᒪᑕᐐᐎᓐ, ᐅᒑᓂᒫᐱᓀᐎᓐ, ᑲᔦ ᑳᒪᒑᑎᓯᓂᒡ ᐊᔭᐋᐎᔕᐞ᙮

6:9b.REV.006.009 ᒦᑕᔥ ᒦᓇᐙ ᑯᑕᒃ ᑭᐱᔥᑭᐗᓯᑲᓐ ᐅᑮᐸᑾᒋᐱᑑᓐ ᐊᐊ ᒫᓇᒑᓂᔐᔅ, ᐊᒦ ᐃᐌ ᐋᔕ ᓈᓇᓐ᙮ ᔑᑾ ᓂᑮᐙᐸᒫᒃ ᐊᒑᑾᒃ ᔒᐹᔭᐄ ᐸᑭᑎᓈᓱᐎᓈᐱᑯᕽ ᐁᐊᔮᐙᒡ᙮ ᒦᐗᐃᐃ ᐅᑕᒑᑯᐙᐞ ᑳᑮᐅᒋᓂᓯᑣ ᐅᑎᑭᑐᐎᓂᓂ ᑭᔐᒪᓂᑑᓐ ᑲᔦ ᐅᑎᐹᒋᒧᐎᓂᐙ ᓀᐱᒡ ᐃᑯ ᑳᑮᐐᑕᒫᑫᐙᒡ᙮

6:10b.REV.006.010 ᑮᑭᒋ ᐃᓂᑖᑯᓯᐗᒃ ᐃᑕᔥ ᐅᐅᐌ: ᑮᓐ ᑌᐯᒋᑫᔭᓐ, ᑮᓐ ᒫᐗᒡ ᑳᒪᔥᑲᐌᑖᑯᓯᔭᓐ, ᒥᓯᐌ ᑳᑾᔭᒀᑎᓯᔭᓐ ᑲᔦ ᐁᑾᔭᑴᑖᑯᓯᔭᓐ! ᐋᓃᓐ ᒥᓂᒃ ᑫᓂ ᐃᔑᓭᒃ ᐊᐲ ᑫᑎᐹᑯᓇᑣ ᐃᑭ ᐊᑮᕽ ᑳᑮᓂᔑᔭᒥᑣ?

6:11b.REV.006.011 ᑲᑭᓇ ᑕᔥ ᐯᐯᔑᒃ ᑮᒦᓈᐗᒃ ᐙᐱᔥᑭ ᑭᑭᔥᑭᑲᓇᓐ ᒋᑭᓍᐲᑲᐊᔐᐙᒡ᙮ ᑮᐃᓈᐗᒃ ᐃᑕᔥ ᓇᑲᐌ ᐊᒋᓇ ᑫᔮᐱ ᒋᐊᓉᐱᐙᒡ, ᐲᓂᔥ ᐃᑕᔥ ᒋᐊᓂᑎᐱᓭᓂᒡ ᑳᑕᔑᓂᒡ ᐅᐐᒋᐊᓄᑮᒫᑲᓂᐙᐞ ᑲᔦ ᐅᐐᒋᐅᑌᐺᑕᒨᒥᐙᐞ ᑫᓂᓂᓯᒥᓐᒡ, ᐐᓇᐙ ᑯ ᑳᑮᐃᔑᓂᓯᑣ ᑲᔦ ᐃᓂᐌᓂᐗᐞ ᒋᓂᓯᒥᓐᒡ, ᒦ ᐃᐌ ᒋᑮᔕᑭᒋᑳᓱᐙᒡ ᐃᑭ ᑫᓂᓯᑣ᙮

6:12b.REV.006.012 ᒦᓇᐙ ᓂᑮᐙᐸᒫ ᑯᑕᒃ ᑭᐱᔥᑭᐗᓯᑲᓐ ᐁᑮᐸᑾᒋᐱᑑᒡ ᐊᐊ ᒫᓇᒑᓂᔐᔅ, ᒦ ᐋᔕ ᓂᑯᑣᓱ᙮ ᒦᔥ ᐃᐃ ᑮᑭᒋᓂᓂᑭᓭ ᐊᑭ᙮ ᑮᓯᔅ ᐃᑕᔥ ᑖᐱᔥᑰ ᐁᒪᑲᑌᐙᒃ ᐊᓴᐲᐌᑭᓉᐗᔥ ᑮᐃᔑᒪᑲᑌᐎᓯ᙮ ᔑᑾ ᒥᓯᐌ ᑮᒥᔅᑯᓈᑯᓯ ᑎᐱᑭᑮᓯᔅ ᑖᐱᔥᑰ ᒥᔅᑸᕽ᙮

6:13b.REV.006.013 ᐗᓇᑯᔕᒃ ᐃᑕᔥ ᑮᐅᒋᐸᑭᔑᓅᒃ ᑮᔑᑯᕽ, ᑖᐱᔥᑰ ᐁᑭᒋᐸᑭᔑᓄᐙᒡ ᐁᑳ ᐁᐊᑎᓱᓯᒀ ᐱᒃ ᑳᑎᓄᐎᐙᒡ ᑭᒋᔔᒥᓇᒃ ᐁᐗᐙᑲᐙᒀᔑᒡ ᐊᐊ ᑭᑎᑳᓈᑎᒃ᙮

6:14b.REV.006.014 ᑮᔑᒃ ᐃᑕᔥ ᑮᒫᒑᒪᑲᓐ ᑖᐱᔥᑰ ᐃ ᑎᑎᐯᔩᑭᓂᑲᓐ ᐁᐊᓂᑎᑎᐯᔩᑭᓂᑳᑌᒃ, ᐲᓂᔥ ᐁᑮᓈᑾᓯᓄᒃ᙮ ᐊᒦᔥ ᐃᓂ ᑲᑭᓇ ᐗᒋᐗᓐ ᑲᔦ ᒥᓂᓴᓐ ᑮᐋᒋᐊᔮᐗᓐ ᐃᐃᒫ ᑳᑮᐊᔮᑭᓐ᙮

6:15b.REV.006.015 ᒦ ᐊᐲ ᑭᒋᐅᑭᒫᒃ ᐊᑮᕽ, ᐃᑭᐌᓂᐗᒃ ᑲᔦ ᑳᐅᑭᒫᐌᑖᑯᓯᐙᒡ ᑲᔦ ᑭᒋᔑᒫᑲᓂᔒᐎᑭᒫᒃ ᑲᔦ ᑳᐌᓅᑎᓯᐙᒡ ᑲᔦ ᑳᒪᔥᑲᐌᑖᑯᓯᐙᒡ ᑲᔦ ᑲᑭᓇ ᑯᑕᒃ ᐯᒫᑎᓯᐙᒡ, ᑫᒫ ᑎᐯᓂᒫᑲᓇᒃ ᑫᒫ ᑲᔦ ᑳᑎᐯᓂᑎᓱᐙᒡ, ᑲᑭᓇ ᑮᑳᓱᐗᒃ, ᐃᒫ ᑳᐃᔑᐙᐐᐸᑲᒥᑳᒃ ᑲᔦ ᐊᓈᒪᓯᓐ ᑳᐃᔑᐸᐲᑾᑎᓈᒃ ᑮᐃᔑᑳᓱᐗᒃ᙮

6:16b.REV.006.016 ᐅᔖᑯᐙᑖᓈᐙᓐ ᐃᑕᔥ ᐃᓂ ᐗᒋᐗᓐ ᑲᔦ ᐊᓯᓃᐞ: ᐋᑲᐎᔥᑲᐎᔑᓈᒻ, ᑳᔑᔑᓈᒻ ᐁᑳ ᒋᐙᐸᒥᓯᔭᒥᓐᒡ ᐊᐊᐌ ᑭᒋᐅᑭᒫᐗᐱᐎᓂᕽ ᑳᓇᒪᑕᐱᒡ, ᐁᑳ ᑲᔦ ᒋᐸᑕᑯᔥᑳᑯᓯᐗᕽ ᐅᓂᔥᑳᑎᓯᐎᓐ ᐊᐊᐌ ᒫᓇᒑᓂᔐᔅ᙮

6:17b.REV.006.017 ᐋᔕ ᐅᒋᒋᓭᓂ ᐃᐌ ᐁᑮᔑᑲᓂᓂᒃ ᑳᐐᑯᑖᓀᑖᑾᒃ, ᐁᐐᓈᑾᓂᓂᒃ ᐅᓂᔥᑳᑎᓯᐎᓂᐙ᙮ ᑳᐐᓐ ᐊᐎᔭ ᐅᑲᑲᔥᑭᑑᓰᓐ ᐃᐃᒫ ᒋᔖᐾᐸᓐ᙮

7

7:1b.REV.007.001 ᑳᐃᔥᒀᓭᑭᓐ ᐅᓄ, ᓂᑮᐙᐸᒫᒃ ᓃᐎᓐ 4 ᐁᒐᓬᐊᒃ ᓃᐗᔭᒃ 4 ᐁᑯ ᑮᑭᑲᒥᑳᓂᒃ ᐁᓃᐸᐎᐙᒡ᙮ ᐯᐯᔑᒃ ᐅᑮᑭᒋᐎᓈᓈᐙ ᐃᐃᐌ ᐁᐅᑖᓂᒪᓂᓂᒃ, ᐁᑳ ᒋᓅᑎᓯᓄᒃ ᐊᑮᕽ ᑲᔦ ᑭᒋᑲᒦᕽ, ᐁᑳ ᑲᔦ ᒋᐸᑲᒥᓅᐌᓯᓄᒃ ᐃᒫ ᒥᑎᑯᕽ᙮

7:2b.REV.007.002 ᒦᓇᐙ ᑯᑕᒃ ᐯᔑᒃ ᓂᑮᐙᐸᒫ ᐁᒐᓬ ᐁᐱᐅᐱᔥᑳᒡ ᐙᐸᓄᕽ ᐁᐱᑭᑭᓯᒡ ᐃᐃ ᑫᐃᔑᑭᑭᓇᐙᒋᐋᒡ ᐃᐃᐌᓂᐗᐞ ᑳᐱᒫᑎᓯᓂᒡ ᑭᔐᒪᓂᑑᓐ ᑳᑎᐯᓂᒫᓂᒡ᙮ ᑮᑭᒋᓅᑖᑯᓯ ᐗᐊ ᐁᒐᓬ ᐁᔖᑯᐙᓈᒡ ᓃᐎᓐ 4 ᑯᑕᒃ ᐁᒐᓬᐊᐞ ᑳᑮᒦᓂᑣ ᑳᐐᒫᔑᑑᑕᒧᐙᒡ ᐃᐃ ᐊᑭ ᑲᔦ ᑭᒋᑲᒻ᙮

7:3b.REV.007.003 ᐊᒦ ᐅᐌ ᑳᐃᓈᒡ: ᑫᑯ ᑫᑰᓐ ᑑᑕᑫᒃ ᐃᐃ ᐊᑭ ᑲᔦ ᑭᒋᑲᒻ ᑲᔦ ᐃᑭ ᒥᑎᑰᒃ, ᐹᓂᒫ ᐁᑕ ᑭᑭᔐᒪᓂᑑᒥᓈᓐ ᐅᑕᓄᑮᐋᑲᓇᐞ ᑮᑭᑭᓇᐙᒋᐲᐗᑭᑣ ᐅᔅᑲᑎᑯᓃᕽ, ᒋᑭᑫᑖᑯᓯᐙᒡ ᐁᑎᓄᐎᐙᒡ᙮

7:4b.REV.007.004 ᓂᑮᓅᑖᓐ ᐃᑕᔥ ᐁᑕᔑᐙᒡ ᐃᑭ ᑳᑮᐃᔑᑭᑭᓇᐙᒋᐲᐅᑣ ᐅᔅᑲᑎᑯᐙᕽ: ᓂᑯᑣᒃ ᓃᒥᑕᓇᔑᓃᐎᕽ ᒥᑖᔂᒃ 144,000 ᒦ ᐃᐌ ᑳᑕᔑᐙᒡ ᑳᑮ ᑭᑭᓇᐙᒋᐲᐅᑣ, ᐃᐃᒫ ᐁᑮᐅᒌᐙᒡ ᒥᑖᔑᓃᔑᓐ 12 ᑳᑕᓶᐙᓇᑭᓯᐙᒡ ᐃᔅᕒᐃᔭᓬᐊᒃ ᙮

7:5b.REV.007.005 ᒥᑖᔑᓃᔑᕽ ᒥᑖᔂᒃ 12,000 ᑮᑕᔑᐗᒃ ᑳᑮ ᑭᑭᓇᐙᒋᐲᐅᑣ ᐃᒫ ᑳᑮᐅᒌᐙᒡ ᐁᑕᓱ ᐯᐯᔑᑴᐙᓇᑭᓯᐙᒡ᙮ ᒦᐗᓄᓄ ᐅᐐᓱᐎᓂᐙᓐ ᑳᐅᑕᑳᓀᓯᐙᒡ: ᒎᑕ, ᐅᕒᐆᐸᓐ, ᑫᑦ, ᐋᔕᕒ, ᓈᐱᑕᓬᐋᐃ, ᒪᓈᓴ, ᓯᒥᔭᓐ, ᓬᐄᐹᐃ, ᐃᓴᑳᕒ, ᓭᐱᔪᓬᐊᓐ, ᒎᓴᑉ, ᐯᒋᒪᓐ ᙮

7:9b.REV.007.009 ᒦᓇᐙ ᑕᔥ ᑳᐊᓂ ᐃᔑᓭᒃ, ᓂᑮᐃᓈᑉ, ᐃᓇᔥᑫ ᓂᑮᐙᐸᒫᒃ ᐁᐅᓵᒦᓄᐙᒡ ᐁᑳ ᐊᐎᔭ ᒋᑮᑮᔕᑭᒫᓯᒃ᙮ ᐃᐃᒫ ᑮᐅᒌᐗᒃ ᑲᑭᓇ ᑳᑕᓱᐯᐸᑳᓐ ᐃᔑᓈᑯᓯᐙᒡ ᑲᔦ ᑲᑭᓇ ᐯᐸᑳᓄᕽ ᑳᐅᑕᑳᓀᓯᐙᒡ ᑲᔦ ᑲᑭᓇ ᐁᔑᐙᐐᑌᑭᓐ ᑳᐅᒌᐙᒡ, ᑲᔦ ᐁᑕᓱᐯᐸᑳᓂᑮᔗᐙᒡ᙮ ᒦ ᐃᒫ ᑮᐃᓈᓴᒥᑳᐸᐎᐗᒃ ᑭᒋᐊᐱᐎᓂᕽ, ᐃᐃᒫ ᑲᔦ ᐁᔑᐊᔮᓂᒡ ᐃᓂ ᒫᓇᒑᓂᔐᓴᓐ᙮ ᐙᐱᔥᑮᑭᓄᕽ ᑮᑲᑳᓍᐲᑲᐊᔐᐗᒃ ᑲᔦ ᐅᑮᑕᑯᓈᓈᐙᓐ ᐗᑎᑾᓇᓐ ᐁᐊᓃᐲᔑᐗᓂᓂᑭᓐ ᐹᒻ ᐁᑎᓄᐙᑎᑯᐗᑭᓐ᙮

7:10b.REV.007.010 ᑮᑭᒋᔖᑯᐌᐗᒃ ᐃᑕᔥ: ᐱᒫᒋᐃᐌᐎᓐ ᐅᒌᒪᑲᓐ ᑭᑭᔐᒪᓂᑑᒥᓈᕽ, ᐊᐊᐌ ᑳᓇᒪᑕᐱᒡ ᑭᒋᐊᐱᐎᓂᕽ, ᐊᐊᐌ ᑲᔦ ᒫᓇᒑᓂᔐᔅ! ᐃᑭᑐᐗᒃ᙮

7:11b.REV.007.011 ᑲᑭᓇ ᑕᔥ ᐃᑭ ᐁᒐᓬᐊᒃ ᐅᑮᐙᑳᑳᐸᐐᑖᓈᐙ ᐃᐃ ᑭᒋᐊᐱᐎᓐ, ᑲᔦ ᐙᑳᔭᐄ ᐃᒫ ᐁᑮᐊᔮᓂᒡ ᐃᐃ ᑳᓃᑳᓀᑖᑯᓯᓂᒡ ᑲᔦ ᐅᐱᒫᑎᓰᐞ ᐁᓃᐎᓂᒡ᙮ ᑮᐊᓂᒥᑯᐸᓂᐅᐗᒃ ᐃᑭ ᐁᒐᓬᐊᒃ ᐁᑮᐅᒋᒌᑾᓇᐱᐸᓂᐅᐙᒡ ᐅᒋᔥᑲᐗᔭᐄ ᐃᒫ ᑭᒋᐊᐱᐎᓂᕽ ᐁᑭᒋ ᐃᓀᓂᒫᐙᒡ ᑭᔐᒪᓂᑑᓐ,

7:12b.REV.007.012 ᐁᑮᐃᑭᑐᐙᒡ ᐃᑕᔥ: ᐁᒣᓐ! ᑕᓇᓈᑯᒫ ᑭᔐᒪᓂᑑ, ᑕᐊᐲᒋᐅᓂᔑᔑᐌᒋᑲᓂᐎ, ᑕᐊᐲᒋᑲᑮᑖᐌᒋᑲᓂᐎ, ᑕᒦᑴᒋᐌᑖᑯᓯ! ᑕᑭᑕᑭᒫ ᑭᔐᒪᓂᑑ! ᑲᔥᑭᐁᐎᓯᐎᓐ, ᒪᔥᑲᐌᑖᑯᓯᐎᓐ ᑕᐃᓇᑭᒫ ᑭᑭᔐᒪᓂᑑᒥᓈᓐ ᒨᔕᒃ ᐊᐸᓐ ᐃᑯ ᐱᔑᔑᒃ! ᐁᒣᓐ! ᑮᐃᑭᑐᐗᒃ᙮

7:13b.REV.007.013 ᐯᔑᒃ ᐃᑕᔥ ᐊᐊ ᑳᓃᑳᓂᓯᒡ ᓂᑮᑲᑴᒋᒥᒃ ᐁᐃᔑᒡ: ᐅᑯ ᑳᐙᐱᔥᑭ ᑲᑳᓍᐲᑲᐊᔐᐙᒡ, ᐊᐌᓀᓇᒃ ᐅᑯ? ᐋᓃᑎ ᑕᔥ ᐌᒌᐙᒡ? ᓂᑮᐃᒃ᙮

7:14b.REV.007.014 ᒦᔥ ᐃᐃ ᐁᓇᒃ: ᓂᑑᑭᒫᒻ, ᑮᓐ ᑭᑭᑫᓂᒫᒃ᙮ ᒦᓇᐙᔥ ᓂᑮᐃᒃ: ᒦᐗᒃ ᐃᑭᐌᓂᐗᒃ ᑭᒋᐅᒑᓂᒥᓯᐎᓂᕽ ᐌᒋᔖᐾᐙᒡ᙮ ᐅᑮᑭᓰᓯᐸᑑᓈᐙᓐ ᐅᑭᑭᔥᑭᑲᓂᐙᓐ, ᐅᑮᐅᒋᐙᐱᔥᑳᐹᐗᑑᓈᐙᓐ ᐃᐃᒫ ᐅᒥᔅᑸᒥᓃᕽ ᐃᓂ ᒫᓇᒑᓂᔐᓴᓐ᙮

7:15b.REV.007.015 ᒦᔥ ᐃᐃᐌ ᑫᐅᒋᐊᔮᐙᒡ ᐃᐃᒫ ᐅᒋᔥᑲᐗᔭᐄ ᐅᑭᒋᐊᐱᐎᓂᓃᕽ ᑭᔐᒪᓂᑑᓐ᙮ ᐅᑲᐊᓄᑮᑕᐙᐙᓐ ᐃᑕᔥ ᐁᑮᔑᑲᓂᓂᒃ ᑲᔦ ᐁᑎᐱᑲᓂᓂᒃ ᐅᑭᒋᐊᓇᒥᐁᐎᑲᒥᑯᓃᕽ᙮ ᐊᐊᐌ ᑕᔥ ᑳᓇᒪᑕᐱᒡ ᑭᒋᐊᐱᐎᓂᕽ ᐅᑲᐐᒋᐊᔮᒫᐞ ᒋᑲᓇᐌᓂᒫᒡ᙮

7:16b.REV.007.016 ᑳᐐᓐ ᒦᓇᐙ ᐐᑳ ᑕᓅᑌᒪᑕᐐᓰᐗᒃ, ᑳᐐᓐ ᑲᔦ ᑕᓅᑌᐐᒥᓂᑴᓰᐗᒃ᙮ ᑳᐐᓐ ᑲᔦ ᐐᑳ ᐅᑲᐅᓵᒫᑭᓱᑯᓰᐙᓐ ᑮᓯᓲᓐ, ᑲᔦ ᐁᑭᒋᑭᔑᑌᓂᒃ ᑳᐐᓐ ᐅᑲᑑᑖᑯᓰᓈᐙ᙮

7:17b.REV.007.017 ᐊᐊ ᐋᓃᔥ ᒫᓇᒑᓂᔐᔅ ᒦ ᐊᐌ ᐃᒫ ᒣᑴᔭᐄ ᑭᒋᐊᐱᐎᓂᕽ ᑳᐊᔮᒡ, ᐅᑲᓇᐎᒫᓇᒑᓂᔑᐌ ᐅᑲᐃᓈᑯᒥᑰᐞ᙮ ᒦᑕᔥ ᐅᑲᐃᔑᑭᑭᓄᐎᓈᐞ ᐃᐃᒫ ᑳᐃᔑᒨᑭᒋᐗᑭᓐ ᐁᐱᒫᑎᓰᔥᑳᑫᒪᑲᒃ ᐃᐃ ᓂᐱ᙮ ᑭᔐᒪᓂᑑ ᑲᔦ ᐅᑲᑭᓰᐊᒪᐙᐞ ᑲᑭᓇ ᐅᑑᒋᑲᐙᐱᐎᓂᓂ ᐅᔥᑮᔑᑯᓃᕽ᙮

8

8:1b.REV.008.001 ᒦᓇᐙ ᑳᐸᑾᒋᐱᑑᒡ ᑯᑕᒃ ᑭᐱᔥᑭᐗᓯᑲᓐ ᐊᐊ ᒫᓇᒑᓂᔐᔅ, ᒦ ᐃᐌ ᓃᔣᓱ 7 ᑳᑮᐹᑾᒋᐱᑑᒡ, ᒦ ᐃ ᐊᐲ ᑳᐐᓐ ᑫᑰᓐ ᑮᓇᐐᑖᑏᒪᑲᓯᓅᓐ ᑮᔑᑯᕽ ᐋᐱᑕ ᑎᐸᐃᑲᓐ ᒥᓂᒃ᙮

8:2b.REV.008.002 ᒦᔥ ᓂᑮᐙᐸᒫᒃ ᐃᑭᐌᓂᐗᒃ ᑳᓃᔣᒋᐙᒡ ᐁᒐᓬᐊᒃ ᒦᐗᑭᑭ ᑳᓂᑖ ᐃᓈᓴᒥᑳᐸᐐᑕᐙᐙᒡ ᑭᔐᒪᓂᑑᓐ᙮ ᑮᒦᓈᐗᒃ ᓃᔣᓱ ᐴᑖᒋᑲᓇᓐ᙮

8:3b.REV.008.003 ᒦᓇᐙ ᑕᔥ ᑯᑕᒃ ᐁᒐᓬ ᐅᑮᐱᑕᑯᓈᓐ ᒥᓈᓯᑲᓈᐱᒃ ᐁᐅᓵᐎ ᔔᓂᔮᐗᓂᓂᒃ, ᐁᐱᐊᑕᓃᐸᐎᒡ ᐃᐃᒫ ᐸᑭᑎᓈᓱᐎᓈᐱᑯᕽ᙮ ᓃᐱᐗᐞ ᑮᒦᓈ ᒥᓄᒥᓈᓯᑲᓐ ᒋᑭᑭᑕᑯᓇᕽ ᒋᐊᓂᑭᑭᐊᔮᓂᒃ ᐃᐃᒫ ᐅᑕᓇᒥᐋᐎᓂᓃᕽ ᑲᑭᓇ ᑭᔐᒪᓂᑑ ᐅᑾᔭᒀᑎᓰᒪᐞ, ᒦ ᐃᒫ ᒋᑭᑭᐸᑭᑎᓇᕽ ᒋᒑᑭᓴᕽ ᐃᐌ ᒥᓄᒫᓯᑲᓐ, ᐃᐃᐌ ᐅᓵᐎ ᔔᓂᔮᐎ ᐸᑭᑎᓈᓱᐎᓈᐱᑯᕽ ᑳᐊᔮᓂᒃ ᐃᐃᒫ ᐃᓈᓴᒪᔭᐄ ᐃ ᑭᒋᐊᐱᐎᓂᕽ᙮

8:4b.REV.008.004 ᒦᑕᔥ ᐁᐃᔥᐹᐸᑌᓂᒃ ᐃᐃᐌ ᒥᓄᒫᓯᑲᓐ, ᑮᐊᓂᑕᑯᑭᑭᐅᐱᔥᑳᓂ ᐅᑕᓇᒥᐋᐎᓂᓂ ᑭᔐᒪᓂᑑ ᐅᑾᔭᒀᑎᓰᒪᐞ᙮ ᒦ ᐃᒫ ᐅᓂᒌᕽ ᐊᐊ ᐁᒐᓬ ᑮᐊᓂᐅᒋ ᐃᔥᐱᔥᑳᓂᐗᓐ ᐃᐃᒫ ᐁᓈᓴᒥᐊᔮᒡ ᐊᐊ ᑭᔐᒪᓂᑑ᙮

8:5b.REV.008.005 ᒦᑕᔥ ᐊᐊ ᐁᒐᓬ ᑳᐃᔑᐅᑖᐱᓇᕽ ᒥᓄᒫᓯᑲᓈᐱᒃ, ᐅᑮᒨᔥᑭᓇᑑᓐ ᐃᑕᔥ ᐃᐃᐌ ᑳᐃᔥᑯᑌᐗᓂᓂᒃ ᐸᑭᑎᓈᓱᐎᓈᐱᑯᕽ ᑳᐅᑎᓇᕽ᙮ ᒦᔥ ᐃᐃᒫ ᐊᑮᕽ ᑳᑮᐃᔑᐌᐱᓇᕽ᙮ ᒦᑕᔥ ᐊᐲ ᑮᓅᑖᑾᓐ ᐁᐱᑎᑯᐌᒃ ᑲᔦ ᐁᓅᑖᑯᓯᐙᒡ ᐱᓀᓯᐗᒃ ᑲᔦ ᑮᐙᐙᑌᓭ ᑲᔦ ᑮᐙᐙᑲᐎᓭ ᐃ ᐊᑭ᙮

8:6b.REV.008.006 ᐃᑭ ᑕᔥ ᑳᓃᔣᒋᐙᒡ ᐁᒐᓬᐊᒃ ᑳᐊᔮᐙᒡ ᐃᓂ ᓃᔣᓱ 7 ᐴᑖᒋᑲᓇᓐ ᑮᐅᔑᑳᐸᐎᐃᑎᓱᐗᒃ ᐁᐐᐊᔓᓅᑖᑯᑑᐙᒡ᙮

8:7b.REV.008.007 ᒦᔥ ᐃᐌ ᓂᑕᒻ ᐊᐊ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ᙮ ᐃᒫ ᑕᔥ ᐊᑮᕽ ᑮᐊᐸᑭᒋᑳᑌ ᐃ ᓭᓭᑲᓐ ᑲᔦ ᐃᔥᑯᑌ ᑲᔦ ᒥᔅᑶ ᐁᑮᒫᒪᐎᑭᓂᑲᐎᓭᑭᓐ᙮ ᑫᑳ ᐋᐱᑕ ᑮᒑᑭᓯᑳᑌ ᐊᑭ, ᑲᔦ ᑫᑳ ᐋᐱᑕ ᐱᑯ ᒥᑎᑰᒃ ᑮᒑᑳᑭᓱᐗᒃ, ᑲᔦ ᑲᑭᓇ ᑮᒑᑳᑭᑌ ᑳᐅᔖᐗᔥᑾᔥᑯᓯᐗᑳᒃ᙮

8:8b.REV.008.008 ᒦᑕᔥ ᐊᐌ ᑯᑕᒃ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᐊᒦ ᓃᔑᓐ 2 ᐁᓅᑖᑯᑑᐙᒡ᙮ ᑖᐱᔥᑰ ᑫᑰᓐ ᑳᐃᔑᓈᑾᒃ ᑭᒋᐗᒋᐤ ᐁᑭᒋ ᐃᔥᑯᑌᐗᕽ ᐃᐃᒫ ᑮᐊᐸᑭᒋᑳᑌ ᑭᒋᑲᒦᕽ᙮ ᒦᑕᔥ ᐃ ᑭᒋᑲᒻ ᒥᔅᑸᕽ ᑳᐃᔑ ᐃᓈᑲᒥᓭᒃ᙮

8:9b.REV.008.009 ᒦᔥ ᑫᑳ ᐋᐱᑕ ᐃᑭ ᑭᒋᑲᒦᕽ ᑳᐱᒫᑎᓯᐙᒡ ᑭᔐᒪᓂᑑᓐ ᑳᑮᐅᔑᐃᑯᐙᒡ ᑮᓂᐳᐗᒃ᙮ ᑲᔦ ᑫᑳ ᐋᐱᑕ ᓈᐱᒀᓇᓐ ᑮᓂᔑᐗᓈᑕᓅᓐ᙮

8:10b.REV.008.010 ᒦᑕᔥ ᑯᑕᒃ ᒦᓇᐙ ᑳᐃᔑᓅᑖᑯᑑᒡ ᐅᐴᑖᒋᑲᓐ ᐊᐊᐌ ᐁᒐᓬ, ᒦ ᓂᓯᓐ 3 ᐁᒐᓬᐊᒃ᙮ ᒦᑕᔥ ᑮᐅᒋᐸᑭᔑᓐ ᑭᒋᐗᓇᑯᔥ ᑮᔑᑯᕽ ᐁᐱᒫᑾᓀᒃ᙮ ᑮᐃᔑᐙᓴᑯᓀᑯᓀ ᑖᐱᔥᑰ ᐐᒀᔅ ᐁᐙᓴᑯᓀᒋᑳᑫᒡ ᐊᐎᔭ᙮ ᒦ ᐃᒫ ᑳᐃᔑᐸᑭᔑᕽ ᑫᑳ ᐋᐱᑕ ᐃᓂ ᓰᐲᓐ, ᐃᓂ ᑲᔦ ᑳᒨᑭᒋᐗᑭᓐ᙮

8:11b.REV.008.011 ᐐᓴᑳᐳ ᐃᔑᓂᑳᓱ ᐊ ᑭᒋᐗᓇᑯᔥ᙮ ᐊᒦ ᑮᐐᓴᑳᑲᒥᓭ ᐃᐌ ᓂᐱ, ᑫᑳ ᐋᐱᑕ ᐃ ᓂᐱ ᑮᐐᓴᑳᑲᒥᓐ᙮ ᓃᐱᐗᐞ ᐃᑕᔥ ᐃᑭ ᐯᒫᑎᓯᐙᒡ ᐅᑮᓂᓯᑯᓈᐙ ᐃᐃ ᓂᐲᓂ ᐁᑮᒥᓂᑴᐙᒡ ᑳᑮᐐᓴᑳᑲᒥᓭᓂᒃ᙮

8:12b.REV.008.012 ᔑᑾ ᒦᓇᐙ ᑯᑕᒃ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᐊᒦ ᓃᐎᓐ 4 ᐁᒐᓬᐊᒃ᙮ ᐊᐊᔥ ᑮᓯᔅ ᑮᐸᑭᑌᐙ, ᑫᑳ ᐋᐱᑕ ᒥᓂᒃ ᑮᐸᑭᑌᐙ᙮ ᒦᓇᐙ ᑲᔦ ᑫᑳ ᐋᐱᑕ ᒥᓂᒃ ᐊᐊ ᑎᐱᑭᑮᓯᔅ ᑮᐸᑭᑌᐙ, ᐃᑭ ᑲᔦ ᐗᓇᑯᔕᒃ ᑫᑳ ᐋᐱᑕ ᒥᓂᒃ ᑮᐸᑭᑌᐙᐗᒃ᙮ ᒦᑕᔥ ᑫᑳ ᐋᐱᑕ ᒥᓂᒃ ᐁᑮᑎᐱᑭᓈᑯᓯᐙᒡ᙮ ᔑᑾ ᑮᓈᓅᑌ ᑎᐱᑲᓐ ᑫᑳ ᐋᐱᑕ ᐁᑮᔑᑲᒃ᙮ ᑳᐐᓐ ᑲᔦ ᑮᐙᓭᔮᓯᓅᓐ ᑫᑳ ᐋᐱᑕ ᐁᓂᐊᑯᑎᐱᑲᒃ᙮ ᐐᑫ ᓴ ᑮᑲᔥᑮᑎᐱᑲᓐ᙮

8:13b.REV.008.013 ᓂᑮᐃᓈᑉ, ᓂᑮᓅᑕᐙ ᑕᔥ ᐁᑌᐺᐎᑕᕽ ᒥᑭᓯ ᐁᓈᐎᓈᑯᓯᒡ ᐁᐱᒥᐊᔮᒡ ᓀᐗᒋᑮᔑᑯᕽ, ᐁᑭᔒᐌᒡ: ᑲᒀᓂᓴᑫᑖᑾᓐ! ᑲᒀᓂᓴᑫᑖᑾᓐ! ᑕᑲᑾᓂᓴᑭ ᐃᔑᐌᐱᓯᐗᒃ ᐃᑭ ᐊᑮᕽ ᑳᐱᒫᑎᓯᐙᒡ᙮ ᐊᐲ ᓅᑖᑾᓂᓂᑭᓐ ᐅᐴᑖᒋᑲᓂᐙᓐ ᐃᑭ ᓂᓯᓐ 3 ᐁᒐᓬᐊᒃ ᑫᔮᐱ ᑫᓅᑖᑯᒋᑫᐙᒡ, ᑮᐃᑭᑐ᙮

9

9:1b.REV.009.001 ᒦᓇᐙ ᑯᑕᒃ ᐁᒐᓬ ᐅᑮᓅᑖᑯᑑᓐ ᐴᑖᒋᑲᓐ, ᐊᒦᐃᐌ ᓈᓇᓐ ᐁᑮᓅᑖᑯᑑᐙᒡ᙮ ᓂᑮᐙᐸᒫ ᑕᔥ ᐗᓇᑯᔥ ᐋᔕ ᐁᑮᐅᒋᐸᑭᔑᕽ ᑭᒋᑮᔑᑯᕽ ᐃᒫ ᐊᑮᕽ ᐁᐊᐱᒡ᙮ ᒦᐊᐌ ᑮᒦᓈ ᐋᐹᐱᑲᐃᑲᓐ, ᒦᐃᐌ ᑎᓄ ᑳᑭᐹᐱᑲᐃᑳᑳᓂᐗᕽ ᐃᐃᒫ ᑳᐃᔑᐐᐸᑲᒥᑳᒃ ᐃᐃᐌ ᐁᑳ ᑳᒥᔕᑮᔮᓯᓄᒃ᙮

9:2b.REV.009.002 ᐅᑮᐹᑭᓈᓐ ᐃᑕᔥ ᐲᑖᐱᑳᓂᕽ ᑳᐃᔑᐐᐸᑲᒥᑳᓂᒃ᙮ ᐃᐃᒫ ᑕᔥ ᑮᐅᑖᐸᑌ ᑖᐱᔥᑰ ᑳᐃᔑᐹᔥᑭᓀᒃ ᐃᐃ ᓂᑭᓯᑲᓐ ᑳᐃᔑ ᐃᔥᐹᐸᑌᒃ᙮ ᑮᐊᓂᑎᐱᑭᓈᑯᓯ ᑕᔥ ᐊᐊ ᑮᓯᔅ ᐁᐊᒀᐸᓱᒡ, ᓀᐗᒋᑮᔑᒃ ᑲᔦ ᑮᒪᑲᑌᐙᐸᑌ᙮

9:3b.REV.009.003 ᐊᒦᔥ ᐃᒫ ᐊᒀᐸᑌᕽ ᑮᐅᒌᐗᒃ ᑭᒋᐸᐸᑭᓀᒃ, ᐁᑮᐴᓃᐙᒡ ᐊᑮᕽ᙮ ᑮᐃᔑᒦᓈᐗᒃ ᐃᑕᔥ ᑖᐱᔥᑰ ᑭᒋᒪᓂᒎᔕᒃ ᑳᐅᒌᓱᐌᐎᓂᐙᒡ ᒦᐃ ᒋᐃᔑᒋᑫᐙᒡ᙮

9:4b.REV.009.004 ᑫᑯ ᓂᔑᐗᓈᒋᑑᑫᒃ ᒪᔥᑯᓯᐗᓐ, ᑮᐃᓈᐗᒃ, ᑲᔦ ᒥᑎᑰᒃ ᑲᔦ ᑲᑭᓇ ᓴ ᑫᑰᓐ ᑳᓂᑖᐎᑭᑭᓐ, ᒦ ᐱᑯ ᑕᓰᓐ ᐊᐎᔭ ᐁᑳ ᐅᔅᑲᑎᑯᐙᕽ ᐁᑭᑭᓇᐙᒋᐲᐙᓯᐎᑣ ᐁᑎᐯᓂᒥᑯᓯᒀ ᑭᔐᒪᓂᑑᓐ, ᒦᐗᑭᑭ ᑫᒌᔂᑲᓂᐎᐙᒡ᙮

9:5b.REV.009.005 ᑳᐐᓐ ᐃᑕᔥ ᑮᐃᔑᒦᓈᓰᐗᒃ ᐅᑯ ᐸᐸᑭᓀᒃ ᒋᓂᓵᐙᒡ ᐃᐃ ᐃᓂᓂᐗᐞ, ᒋᒥᒋᑲᒀᑕᑭᐋᐙᒡ ᐃᑕᔥ ᓈᓄᑮᓯᔅ ᒥᓂᒃ᙮ ᑕᐃᔑᑲᒀᑕᑫᑕᒨᒃ ᐃᑭ ᐃᓂᓂᐗᒃ ᑖᐱᔥᑰ ᐁᔑᑲᒀᑕᑭᐃᑯᒡ ᐊᐎᔭ ᑭᒋᒪᓂᒎᔕᓐ ᑳᐅᒌᓱᐌᐎᓂᓂᒡ ᐁᒌᓱᑯᒡ᙮

9:6b.REV.009.006 ᒦᐃᐌ ᐁᑲᑮᔑᑲᓂᓂᒃ ᐅᑲᓇᓈᑐᓈᓈᐙ ᑫᔑᓂᐳᐙᒡ, ᑳᐐᓐ ᐃᑕᔥ ᐅᑲᒥᑲᓰᓈᐙ᙮ ᐊᐯᔥ ᓂᐳᔮᓐ, ᑕᐃᓀᑕᒨᒃ, ᐅᑲᑕᐸᓰᐃᑯᓈᐙ ᑕᔥ ᐃᐌ ᓂᐳᐎᓐ᙮

9:7b.REV.009.007 ᑮᐃᔑᓈᑯᓯᐗᒃ ᐃᑕᔥ ᐃᑭ ᐸᐸᑭᓀᒃ ᑖᐱᔥᑰ ᒥᑕᑎᒨᒃ ᐁᐅᔒᑖᐃᑣ ᐁᐐᐊᑕᔮᐸᑎᓯᐙᒡ ᒦᑳᑎᐎᓂᕽ᙮ ᐅᑎᒀᓂᐙᕽ ᑮᐃᔑᓈᑯᓯᐗᒃ ᑖᐱᔥᑰ ᐅᓵᐎ ᔔᓂᔮᐎ ᐸᓯᑴᐱᓱᓇᓐ ᐁᐊᔮᓂᑭᓐ᙮ ᐃᓂᓃᕽ ᐃᑕᔥ ᑲᔦ ᑮᐃᓇᑌᑴᐗᒃ᙮

9:8b.REV.009.008 ᑮᐃᔑᐅᐐᓂᓯᓯᐗᒃ ᑖᐱᔥᑰ ᐃᑴᐗᐞ ᑳᐃᔑᑲᑳᓍᓂᑴᓂᒡ, ᔑᑾ ᒥᔑᐱᔑᐙᐱᑎᕽ ᑮᐃᓈᐱᑌᐗᒃ᙮

9:9b.REV.009.009 ᐅᑳᑭᑲᓂᐙᕽ ᑮᐃᓇᐊᑲᔦᐗᒃ ᑖᐱᔥᑰ ᐃᐃ ᐲᐙᐱᒃ ᔑᒫᑲᓂᔕᒃ ᑳᐱᓯᑲᒧᐙᒡ ᐅᑳᑭᑲᓂᐙᕽ᙮ ᔑᑾ ᐱᓵᓂᑯ ᑮᐃᓂᑖᑯᓯᐗᒃ ᒥᑕᑎᒨᒃ ᐁᐱᒬᐌᑖᐲᐸᐋᐙᒡ ᐅᑑᑖᐹᓈᑯᐙᐞ ᐁᐐᒨᑮᑖᑎᐙᒡ ᒦᑳᑎᐎᓂᕽ, ᒦᐃ ᑳᐃᔑᐱᒬᐌᔮᑫᐙᒡ ᐅᑯ ᐸᐸᑭᓀᒃ᙮

9:10b.REV.009.010 ᑭᒋᒪᓂᒎᔑᕽ ᑳᐅᒌᓱᐌᐎᓂᓂᒡ, ᒦᐃ ᑳᐃᓈᓄᐌᐙᒡ ᐃᑭ ᑭᒋᐸᐸᑭᓀᒃ᙮ ᐅᑮᒌᔂᑫᓈᐙᓐ ᐅᓲᐎᓂᐙᓐ᙮ ᒦᔥ ᐃᐃᒫ ᐌᒋᑲᔥᑭᑑᐙᒡ ᒋᑲᒀᑕᑭᐋᐙᒡ ᐃᐃ ᐯᒫᑎᓯᓂᒡ ᓈᓄᑮᓯᔅ ᒥᓂᒃ᙮

9:11b.REV.009.011 ᐅᑕᔮᐙᐙᓐ ᑳᐅᑭᒋᐅᑭᒫᒥᐙᒡ, ᒦᐗᓂᓂ ᐁᒐᓬᐊᓐ ᑳᑕᔑᐅᑭᒫᑲᑕᒥᓂᒡ ᑳᐃᔑᐐᐸᑲᒥᑳᓂᒃ, ᐃᐌ ᐁᑳ ᑳᒥᔕᑮᔮᓯᓂᓂᒃ᙮ ᒦ ᐁᔑᓂᑳᓱᒡ ᐊᐊᐌ ᐁᒐᓬ, ᐊᐹᑕᓐ ᐁᐃᔑᑮᔗᕽ ᐄᐸᕒᐆ ᙮ ᐊᑆᓬᐃᔭᓐ ᐃᑕᔥ ᑲᔦ ᐃᔑᓂᑳᓱ ᑲᕒᐄᒃ ᐁᐃᔑᑮᔗᕽ᙮ ᒦᐃᐌ ᐁᒋᑲᓂᐎᒡ ᐅᓂᔑᐗᓈᒋᐃᐌ᙮

9:12b.REV.009.012 ᓂᑕᒻ ᐃᐃᐌ ᑳᑲᒀᓂᓴᑫᑖᑾᒃ ᐋᔕ ᐊᐸᓐ ᑮᐃᔥᒀᓭ᙮ ᐃᓇᔥᑫ ᑫᔮᐱ ᓃᔑᓐ ᑕᐊᔮᐗᓐ ᑫᑲᒀᓂᓴᑫᑖᑾᑭᓐ᙮

9:13b.REV.009.013 ᒦᓇᐙ ᑕᔥ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᒦ ᐋᔕ ᓂᑯᑣᓱ ᐁᒐᓬᐊᒃ ᐁᑮᐴᑖᒋᑫᐙᒡ᙮ ᓂᑮᓅᑖᓐ ᐃᓉᐎᓐ ᐃᐃᒫ ᐁᐅᒋᓭᒃ ᑳᐃᔑᐅᑌᔥᑲᓂᐗᕽ ᑳᐃᔑᓃᔪᑮᑫᔮᒃ ᐃᐃ ᑳᐅᓵᐎ ᔔᓂᔮᐗᕽ ᐸᑭᑎᓈᓱᐎᓈᐱᒃ, ᒦᐃᐌᓂ ᑳᐅᒋᔥᑲᐎᔥᑳᑯᒡ ᑭᔐᒪᓂᑑ᙮

9:14b.REV.009.014 ᑮᑲᓅᓈ ᑕᔥ ᐊᐊᐌ ᐃᔥᒀᒡ ᐁᒐᓬ ᑳᐅᐴᑖᒋᑲᓂᒡ, ᐊᒦᐊᐌ ᓂᑯᑣᓱ ᑳᐃᓇᑭᒋᑳᓱᒡ: ᐊᐤ, ᐋᐱᔅᑯᓐ ᐃᑭ ᓃᐎᓐ ᐁᒐᓬᐊᒃ ᑳᒪᒫᒋᑾᐱᓱᐙᒡ ᐃᐃᒫ ᑭᒋᓰᐲᕽ ᐃᔫᐸᕒᐁᑏᔅ ᑳᐃᔑᓂᑳᑌᒃ, ᐅᑮᐃᑯᓐ ᐃᐃ ᐃᓉᐎᓐ᙮

9:15b.REV.009.015 ᒦᔥ ᑳᐃᔑᐋᐱᔅᑯᓂᑣ ᐃᑭ ᓃᐎᓐ ᐁᒐᓬᐊᒃ ᒋᐊᐎᓂᓵᐙᒡ ᑫᑳ ᐋᐱᑕ ᑳᑕᔑᓂᒡ ᐃᐃ ᐯᒫᑎᓯᓂᒡ ᐊᑮᕽ᙮ ᐋᓃᔥ ᓃᔮᒃ ᐃᑯ ᑮᐅᔒᑖᐋᐎᑣᐸᓐ ᐃᐃ ᒋ ᐃᔑᒋᑫᐙᒡ, ᒪᔮ ᐅᒋᒋᓭᓂᒃ ᑭᑭᓅᓄᐎᓐ, ᒪᔮ ᑲᔦ ᑮᓯᓲᓐ ᐱᒪᑭᓱᓂᒡ, ᒪᔮ ᑲᔦ ᐁᑮᔑᑲᓂᓂᒃ, ᒪᔮ ᑲᔦ ᐊᐲ ᑮᔑᑲᓂᓂᒃ, ᐲᓂᔥ ᑲᔦ ᒪᔮ ᑎᐸᐃᑲᓐ ᒋᓂᐅᒋᒋᓭᓂᒃ᙮

9:16b.REV.009.016 ᓂᑮᐐᑕᒫᑰ ᐁᑕᔑᐙᒡ ᐃᑭ ᐅᒦᑳᓲᒃ ᑳᑌᓴᐱᐙᒡ ᒥᑕᑎᒨᐞ᙮ ᓃᔣᒃ ᒥᓂᒃ ᑭᒋᒥᑖᔂᒃ ᑕᓯᕽ ᑭᒋᒥᑖᔂᒃ 200,000,000 ᑮᑕᔑᐗᒃ᙮

9:17b.REV.009.017 ᓂᑮᐃᔑᐙᐸᒫᒃ ᓂᑎᓈᐸᑕᒧᐎᓂᕽ ᑳᐃᔑᓈᑯᓯᐙᒡ ᐃᑭ ᒥᑕᑎᒨᒃ ᑲᔦ ᐃᑭ ᑳᐱᒥᐗᓀᐸᐃᑯᐙᒡ᙮ ᑖᐱᔥᑰ ᐃᔥᑯᑌ ᑳᐃᔑᒥᔅᑾᑯᓀᒃ ᑮᐃᔑᓈᑾᓂᓂᐗᓐ ᐅᑑᑳᑭᑲᓂᐋᑲᐗᐱᓱᓂᐙᓐ, ᐁᒪᑲᑌᐅᔖᐗᔥᒀᓂᑭᓐ ᑲᔦ ᐁᐋᑯ ᐅᓵᐙᓂᑭᓐ ᑲᔦ᙮ ᒥᔑᐱᔑᐎᑎᒀᓂᕽ ᑮᐃᔑᓈᑾᓂᓂᐗᓐ ᐅᑎᒀᓂᐙᓐ ᐃᑭ ᒥᑕᑎᒨᒃ᙮ ᑮᐅᒌᒪᑲᓂᓂ ᐅᑑᓂᐙᕽ ᐃᔥᑯᑌ, ᑭᑆᐸᑌ ᑲᔦ, ᐃᐃᐌᓂ ᑲᔦ ᑳᐐᓴᑳᐸᓱᐌᒡ ᑳᒑᑭᓱᒡ ᑎᓄ ᐅᓵᐎᐊᓯᓐ᙮

9:18b.REV.009.018 ᑫᑳ ᑕᔥ ᐋᐱᑕ ᐃᑭ ᐯᒫᑎᓯᐙᒡ ᐅᑮᓂᓯᑯᓈᐙ ᐅᓄ ᓂᓯᓐ 3 ᒪᒋᓭᐎᓇᓐ ᑳᐱᒥᐊᔮᒪᑲᓂᓂᑭᓐ, ᒦᐗᓄᓄ ᐃᔥᑯᑌ, ᑭᑆᐸᑌ, ᑳᐐᓴᑳᐸᓱᐌᒪᑲᓂᓂᒃ ᑲᔦ᙮

9:19b.REV.009.019 ᐅᒪᔥᑲᐎᓰᐎᓂᐙ ᐃᑭ ᒥᑕᑎᒨᒃ ᐃᐃᒫ ᑕᑯᔭᔮᓂ ᐅᑑᓂᐙᕽ ᑲᔦ ᐃᒫ ᐅᓲᐎᐙᕽ᙮ ᑭᓀᐱᑯᕽ ᑮᐃᔑᓈᑾᓂᓂᐗᓐ ᐅᓲᐎᐙᓐ, ᑲᔦ ᑮᐅᑎᒀᓂᐗᓂᓂᐗᓐ᙮ ᒦᑕᔥ ᐃᓂ ᐃᔮᐸᒋᑑᐙᒡ ᒋᐐᓴᑳᐱᓀᐋᐙᒡ ᐃᐃ ᐯᒫᑎᓯᓂᒡ᙮

9:20b.REV.009.020 ᐃᑭ ᑕᔥ ᐯᒫᑎᓯᐙᒡ ᑳᑮᐃᔥᑯᐃᑣ ᑳᑮᓂᓯᑯᓯᒀ ᐅᓄ ᒪᒋᓭᐎᓇᓐ, ᑳᐐᓐ ᑮᐅᒋᑭᐱᒌᓰᐗᒃ ᐁᔑᐊᓇᒥᐁᑕᒧᐙᒡ ᐐᓇᐙ ᐅᓂᒌᐙᕽ ᑳᑮᐅᒋᐅᔑᑑᐙᒡ᙮ ᐋᒋᑯ ᑳᐐᓐ ᐅᑮᐅᒋ ᐴᓂᑲᓅᓈᓯᐙᐙᐞ ᒪᒋᐊᒑᑾᐞ, ᐃᐃ ᑲᔦ ᐅᒪᓯᓂᑰᒋᑲᓂᐙᐞ ᐅᓵᐎ ᔔᓂᔮ ᐙᐱᑯᕽ ᑳᐅᒋᐅᔑᐋᐙᒡ, ᐙᐹᐱᑯᕽ ᑲᔦ, ᐅᓵᐙᐱᑯᕽ ᑲᔦ, ᐊᓯᓃᕽ ᑲᔦ, ᒥᑎᑯᕽ ᑲᔦ ᑳᑮᐅᒋᐅᔑᐋᐙᒡ᙮ ᑳᐐᓐ ᑕᔥ ᐙᐱᓰᐗᐞ, ᑳᐐᓐ ᑲᔦ ᓅᑕᒫᓰᐗᐞ, ᑳᐐᓐ ᑲᔦ ᐱᒧᓭᓰᐗᐞ᙮

9:21b.REV.009.021 ᑳᐐᓐ ᑲᔦ ᑮᐅᒋᑭᐱᒌᓰᐗᒃ ᐃᐃᐌ ᐅᒋ ᑳᑮᐃᔑ ᓂᑖ ᓂᔑᐌᐙᒡ, ᑳᑮᐃᔑ ᒪᒋᒪᔥᑭᑮᑫᐙᒡ ᑲᔦ᙮ ᑳᐐᓐ ᑲᔦ ᐅᑮᐐᐴᓂᑑᓰᓈᐙ ᐃᐃᐌᓂ ᐅᐱᔑᒀᑎᓯᐎᓂᐙ, ᐃᐌ ᑲᔦ ᐅᑭᒨᑎᐎᓂᐙ᙮

10

10:1b.REV.010.001 ᓂᑮᐙᐸᒫ ᑯᑕᒃ ᐁᑭᒋᒪᔥᑲᐎᓰᒡ ᐁᒐᓬ, ᑭᒋᑮᔑᑯᕽ ᐁᑮᐱᐅᒋᓈᔒᒡ, ᐁᑮ ᑭᑭᑯᓇᔮᑕᕽ ᐗᑶ᙮ ᑮᓯᓶᔮᑉ ᐃᑕᔥ ᑮᑭᔑᐹᓈᑾᓂᓂ ᐅᑎᒀᓂᕽ, ᑲᔦ ᐅᐗᑌᑯᕽ ᐱᓵᓂᑯ ᑮᓯᓱᕽ ᑮᐃᔑᓈᑯᓯ, ᐃᓂ ᑲᔦ ᐅᑳᑕᓐ ᐱᓵᓂᑯ ᐃᔥᑯᑌ ᐁᐸᑕᑲᑯᓀᒃ ᑮᐃᔑᓈᑾᓂᓂᐗᓐ᙮

10:2b.REV.010.002 ᑲᔦ ᐁᐱᑕᑯᓇᕽ ᑎᑎᐲᑭᓂᑲᓂ ᒪᓯᓇᐃᑲᓀᔅ ᐁᑮ ᐹᑮᑭᓂᑳᑌᓂᒃ, ᐅᓂᒌᕽ ᐁᐊᑌᓂᒃ᙮ ᐅᑭᒋᓂᑭᕽ ᐃᓇᑫ ᑮᐃᔑᑕᑯᑮ ᑭᒋᑲᒦᕽ, ᐅᓇᒪᑎᓂᑭᕽ ᐃᑕᔥ ᐃᓇᑫ ᐊᑮᕽ ᑮᐃᔑᑕᑯᑮ᙮

10:3b.REV.010.003 ᒦᑕᔥ ᑮᓲᑭᑖᑯᓯ ᐁᑮᑭᒋᔖᑯᐌᒡ ᑖᐱᔥᑰ ᒥᔑᐱᔑᐤ ᐁᐱᑎᑯᐌᓅᑖᑯᓯᒡ᙮ ᑳᐃᔥᒀᓅᑖᑯᓯᒡ ᐃᑕᔥ ᐊᐊ ᐁᒐᓬ, ᐅᑮᓇᑴᐌᒥᑰᐞ ᐅᓄ ᓃᔣᓱ 7 ᐱᓀᓯᐗᐞ ᐁᑮᐱᑎᑯᐌᓅᑖᑯᓯᓂᒡ᙮

10:4b.REV.010.004 ᐌᔩᑉ ᐃᑯ ᑳᑮᐱᑎᑯᐌᐙᒡ ᐃᑭ ᓃᔣᓱ ᐱᓀᓯᐗᒃ ᓂᑖᓇᐐᐞ ᐅᔑᐲᐋᓈᐸᓐ ᑳᑮᐃᓂᑕᒫᓐ᙮ ᓂᑮᓅᑖᓐ ᐃᑕᔥ ᐃᓉᐎᓐ ᑭᒋᑮᔑᑯᕽ ᐁᐅᒋᑲᓅᓂᑯᔮᓐ: ᑫᑯ! ᓂᑮᐃᑯᓐ᙮ ᑳᑮᐃᑭᑐᐙᒡ ᐃᑭ ᑳᓃᔣᒋᐙᒡ ᐱᓀᓯᐗᒃ ᑫᑯ ᐅᔑᐲᐊᑫᓐ᙮ ᒪᓈᑎᐹᒋᒧᓐ ᐊᐎᔭ ᒋᑭᑫᑕᓯᒃ, ᓂᑮᐃᑰ᙮

10:5b.REV.010.005 ᐊᐊᔥ ᑳᑮᐙᐸᒪᒃ ᐁᒐᓬ ᐁᓃᐸᐎᒡ ᑭᒋᑲᒦᕽ ᑲᔦ ᐊᑮᕽ, ᑭᒋᑮᔑᑯᕽ ᐃᓇᑫ ᑮᐃᔑ ᐃᔥᐱᓂᑫᓂ ᐅᑭᒋᓂᒃ,

10:6b.REV.010.006 ᐁᑮᐃᑭᑐᒡ, ᐁᑮᐊᐱᒧᒡ ᐃᓂ ᑭᔐᒪᓂᑑᓐ ᐊᐸᓂᑯ ᐱᔑᔑᒃ ᑳᐱᒫᑎᓯᓂᒡ, ᒦᐗᓂᓂ ᑳᑮᐅᔑᑑᓂᒡ ᑭᒋᑮᔑᒃ ᑲᔦ ᒥᓂᒃ ᑫᑰᓐ ᐌᑎ ᑳ ᐊᔮᓂᒃ, ᐊᑭ ᑲᔦ ᐁᑮᐅᔑᑑᓂᒡ ᑲᔦ ᒥᓂᒃ ᑫᑰᓐ ᐃᐃᒫ ᑳ ᐊᔮᓂᒃ, ᑲᔦ ᑭᒋᑲᒻ ᐁᑮᐅᔑᑑᓂᒡ ᑲᔦ ᑲᑭᓇ ᑫᑰᓐ ᐃᐃᒫ ᑳ ᐊᔮᓂᒃ᙮ ᑮᐃᑭᑐ ᐊ ᐁᒐᓬ: ᑳᐐᓐ ᐊᑲᐌ ᑕᐲᐆᒪᑲᓯᓅᓐ ᑫᑰᓐ᙮

10:7b.REV.010.007 ᐊᐲ ᑕᔥ ᐊᓂᑲᑮᔑᑲᓂᓂᒃ ᒋᒫᒌᐴᑖᒋᑫᒡ ᐊᐊ ᐁᒐᓬ, ᐊᐊᐌ ᐃᔥᒀᒡ ᐃᑭ ᑳᓃᔣᒋᐙᒡ 7 ᐁᒐᓬᐊᒃ, ᒦ ᐊᐲ ᑭᔐᒪᓂᑑ ᐅᑲᑎᐱᓭᑑᓐ ᐃᐌᓂ ᑳᑮᐃᓀᑕᕽ, ᐃᐌ ᒪᔑ ᐊᐎᔭ ᑳᑮ ᑭᑫᑕᓯᒃ, ᒦᐃᐌ ᑳᑮᐐᑕᒪᐙᒡ ᐊᐊ ᑭᔐᒪᓂᑑ ᐅᑕᓄᑮᐋᑲᓇᐞ ᐅᑎᐹᒋᒧᐎᓂᓃᒪᐞ ᑳᑮᑲᓅᑕᒫᑯᒡ, ᑮᐃᑭᑐ᙮

10:8b.REV.010.008 ᒦᓇᐙ ᑕᔥ ᓂᑮᑲᓅᓂᑯᓐ ᐃᐃᐌ ᐃᓉᐎᓐ, ᐃᐌ ᓂᑕᒻ ᑭᒋᑮᔑᑯᕽ ᑳᑮᐅᒋᓅᑕᒫᓐ, ᒦᐃᐌ ᐁᑮᐃᑯᔮᓐ: ᐊᐎᐅᑖᐱᓇᓐ ᐃᐌ ᑎᑎᐲᑭᓂᑲᓂ ᒪᓯᓇᐃᑲᓀᔅ ᑳᐹᑮᑭᓂᑳᑌᒃ ᐃᒫ ᐅᓂᒌᕽ ᑳ ᐊᑌᓂᒃ ᐊᐌ ᐁᒐᓬ ᐃᒫ ᑳᓃᐸᐎᒡ ᑭᒋᑲᒦᕽ ᑲᔦ ᐊᑮᕽ, ᓂᑮᐃᑰ᙮

10:9b.REV.010.009 ᓂᑮᐊᐎᑲᑴᒋᒫ ᐊᐌ ᐁᒐᓬ: ᒦᔑᔑᓐ ᐃᐃᐌ ᑎᑎᐲᑭᓂᑲᓂ ᒪᓯᓇᐃᑲᓀᔅ, ᐁᐃᓇᒃ᙮ ᓂᑮᐃᒃ ᐃᑕᔥ: ᐊᐤ ᐅᑖᐱᓇᓐ, ᒦᒋᓐ! ᑭᒥᓴᑖᕽ ᑭᑲ ᑭᔑᐗᔥᑲᑌᔥᑳᑯᓐ, ᑭᑑᓂᕽ ᐃᑕᔥ ᑖᐱᔥᑰ ᐋᒨᐎ ᓰᓯᐹᑾᑐᕽ ᑕᐃᔑ ᔒᐗᓐ᙮

10:10b.REV.010.010 ᓂᑮᐅᑖᐱᓇᒧᐙᓐ ᐃᐃ ᑎᑎᐲᑭᓂᑲᓂ ᒪᓯᓇᐃᑲᓀᔅ ᐅᓂᒌᕽ ᑳ ᐊᑌᓂᒃ ᐊᐌ ᐁᒐᓬ, ᑲᔦ ᓂᑮᒦᒋᓐ᙮ ᑖᐱᔥᑰ ᐋᒨᐎ ᓰᓯᐹᑾᑐᕽ ᑮᐃᐳᑾᓐ᙮ ᐊᐲᔥ ᑳᑯᑕᒫᓐ ᓂᑮᐐᓴᑭ ᑭᔑᐗᔥᑲᑌᔥᑳᑯᓐ᙮

10:11b.REV.010.011 ᐅᐅᐌᔥ ᓂᑮᐃᒃ: ᑭᓇᑕᐌᑖᑯᔅ ᒦᓇᐙ ᒋᑲᓅᑕᒪᐗᒡ ᑭᔐᒪᓂᑑ ᑫᐃᓈᒋᒥᑣ ᓃᐱᐗᐞ ᐊᐎᔭᐞ ᐯᐸᑳᓐ ᐊᑮᕽ ᑳᐅᒋᑎᐯᑖᑯᓯᐙᒡ, ᐯᐸᑳᓐ ᑲᔦ ᑳᑕᓶᐙᓇᑭᓈᑯᓯᐙᒡ, ᑳᑕᓱ ᐊᔨᔑᑮᔗᐙᒡ ᑲᔦ, ᓃᐱᐗᐞ ᑲᔦ ᑭᒋᐅᑭᒫᒃ ᑫᐃᓈᒋᒥᑣ᙮ ᒦ ᐃ ᑳᐃᔑᒡ ᐊᐊ ᐁᒐᓬ᙮

11

11:1b.REV.011.001 ᒦᑕᔥ ᓂᑮᒦᓂᑰ ᐃ ᑎᐸᐃᑲᓈᑎᒃ, ᑖᐱᔥᑰ ᓴᑲᐅᓈᑎᒃ ᐁᐃᔑᓈᑾᒃ᙮ ᔑᑾᔥ ᓂᑮᑲᓅᓂᑰ: ᐸᓯᑸᓐ, ᐊᐎᑎᐸᐊᓐ ᐅᑭᒋᐊᓇᒥᐁᐎᑲᒥᒃ ᐊᐊ ᑭᔐᒪᓂᑑ ᑲᔦ ᐃ ᐸᑭᑎᓈᓱᐎᓈᐱᒃ ᐃᐃᒫ ᑳᐊᔮᒃ᙮ ᐃᑭᐌᓂᐗᒃ ᐃᑕᔥ ᐃᒫ ᐲᑎᒃ ᑳᐊᓇᒥᐋᐙᒡ ᐊᑭᒻ᙮

11:2b.REV.011.002 ᐃᓂᐌ ᑕᔥ ᑳᐙᑳᐃᑳᑌᑭᓐ ᐃᒫ ᐊᑾᒋᔭᐄ ᑭᒋᐊᓇᒥᐁᐎᑲᒥᑯᕽ, ᑫᑯ ᐐᓐ ᐃᓂᐌ ᐱᒣᑕᑫᓐ, ᑫᑯ ᑎᐸᐊᑫᓐ᙮ ᑮᒦᓈᐗᒃ ᐃᑭ ᑎᓄ ᐸᑳᓐ ᑳᐊᔫᒌᐙᒡ ᐁᑳ ᑳᐊᓇᒥᐋᓯᒀ᙮ ᐅᐌ ᐆᑌᓇ ᑭᔐᒪᓂᑑ ᑳᑎᐯᑕᕽ ᐅᑲᑕᑖᑯᑳᑖᓈᐙ ᓃᒥᑕᓇᔑᓃᔑᓐ 42 ᑕᓱ ᑮᓯᔅ ᒥᓂᒃ᙮

11:3b.REV.011.003 ᓂᑲᒫᒋᓂᔕᐙᒃ ᐃᑕᔥ ᐃᑭ ᑳᓃᔑᐙᒡ ᑫᑎᐹᒋᒥᐙᒡ᙮ ᐊᓴᐲᐌᑭᓐ ᐅᑲᐱᑭᑭᔥᑳᓈᐙ᙮ ᒥᑖᔂᒃ ᑲᔦ ᓃᔣᒃ ᓂᑯᑣᓯᒥᑕᓇ 1,260 ᑕᓱ ᑮᔑᒃ ᒥᓂᒃ ᐅᑲᑲᓅᑕᒪᐙᐙᓐ ᑭᔐᒪᓂᑑᓐ, ᑮᐃᑭᑐ᙮

11:4b.REV.011.004 ᐅᑯ ᑳᓃᔑᐙᒡ ᑎᐹᒋᒧᐎᓂᓂᐗᒃ, ᐊᒦᐗᑯᑯ ᐁᒋᑳᓱᐙᒡ ᐃᑭ ᓃᔑᓐ ᐋᓬᐃᑉ ᔔᒥᓈᑎᑰᒃ, ᐃᑭ ᑲᔦ ᓃᔑᓐ ᐙᓴᑯᓀᒋᑲᓈᑎᑰᒃ ᐃᒫ ᑳᐸᑕᑭᓱᐙᒡ ᐃᒫ ᐁᓈᓴᒥᐊᔮᓂᒡ ᐃᓂ ᑳᑎᐯᑕᒥᓂᒡ ᐃᐌᓂ ᐊᑮᓂ᙮

11:5b.REV.011.005 ᑮᔥᐱᓐ ᐊᐎᔭᓐ ᑫᑰᓐ ᐐᑑᑖᑯᐙᒡ, ᐃᔥᑯᑌ ᑕᐅᒌᓂ ᐅᑑᓂᐙᕽ ᒋᑕᔑ ᓂᔑᐗᓈᑎᓯᓂᒡ ᐃᓂ ᑳᔒᑫᓂᒥᑯᐙᒡ᙮ ᐊᒦ ᐅᐌ ᓇᑫ ᑕᐃᔑᓂᓯᒫᐗᐞ ᐊᐌᓀᓇᐞ ᐃᑯ ᑳᐐᒪᒋᑑᑖᑯᐙᒡ᙮

11:6b.REV.011.006 ᐅᑕᔮᓈᐙ ᐅᑲᔥᑭᐁᐎᓯᐎᓂᐙ ᒋᑭᐸᐊᒧᐙᒡ ᐃᐃ ᑮᔑᒃ ᐁᑳ ᒋᑭᒥᐗᓯᓂᓂᒃ ᒣᒀ ᐁᐊᓂᑲᓅᑕᒪᐙᐙᒡ ᑭᔐᒪᓂᑑᓐ᙮ ᐅᑲᔥᑭᑑᓈᐙ ᑲᔦ ᓂᐲᓐ ᒋᑴᑭᑑᐙᒡ ᑳᒨᑭᒋᐗᓂᐲᑯᐗᓂᓂᑭᓐ, ᒥᔅᑸᕽ ᒋᐃᓈᑲᒥᓂᓂᑭᓐ᙮ ᐅᑲᔥᑭᑑᓈᐙᓐ ᑲᔦ ᑲᑭᓇ ᒋᐅᑎᔑᐌᒪᑲᓂᓂᑭᓐ ᑫᑲᒀᑕᑭᐃᐌᒪᑲᓂᓂᑭᓐ ᐅᐅᒫ ᐊᑮᕽ, ᑕᔂ ᐱᑯ ᑫᐃᓀᑕᒧᐙᑴᓐ ᑕᐃᔑᒋᑫᐗᒃ᙮

11:7b.REV.011.007 ᒦᔥ ᐃᐌ ᐊᐲ ᑫᑮᔑᑑᐙᒡ ᐅᑎᐹᒋᒧᐎᓂᐙ, ᒦ ᐊᐲ ᑫᒦᑳᓂᑯᐙᒡ ᐃᓂ ᐱᑾᒋᐊᔭᐋᐎᔕᓐ ᑳᐱᐅᒋᒨᑮᓂᒡ ᐃᐃᒫ ᑳᐃᔑᐐᐸᑲᒥᑳᒃ ᐃᐃᐌ ᑳᒥᔕᑮᔮᓯᓄᒃ᙮ ᐅᑲᔖᑰᒋᐃᑯᐙᓐ ᑲᔦ ᐅᑲᓂᓯᑯᐙᓐ᙮

11:8b.REV.011.008 ᐃᓂ ᑕᔥ ᐐᔭᐎᐙᓐ ᑳᑮᓂᐳᐙᒡ ᑕᐊᑌᓂᐗᓐ ᒪᔮᐎᑲᓇ ᐃᐃᒫ ᑭᒋᐆᑌᓈᕽ, ᐃᐃᒫ ᑲᔦ ᑳᑮᑕᔑ ᐊᒀᑯᓴᑲᐃᑲᓂᐎᓂᒡ ᐃᓂ ᑳᑎᐯᓂᒥᑯᐙᒡ᙮ ᒦ ᐅᐌ ᐁᔑᑭᑭᓇᐙᒋᐐᑌᒃ ᐃᐃ ᐆᑌᓇ, ᔂᑕᒻ ᑲᔦ ᐄᒋᑉ ᙮

11:9b.REV.011.009 ᒦ ᐃᒫ ᓂᓱᑮᔑᒃ ᐋᐱᑕ ᑲᑭᓇ ᐊᐎᔭᒃ ᐅᑲᔑᑲᓇᐙᐸᑕᒪᐙᐙᐞ ᑳᑮᓂᐳᓂᒡ ᐐᔭᐎᓂ, ᒥᓯᐌ ᑳᐅᒌᐙᒡ ᐯᐸᑳᓐ ᑳᐃᔑᐐᓱᐙᒡ, ᑲᑭᓇ ᑲᔦ ᑳᑕᓶᐙᓇᑭᓈᑯᓯᐙᒡ, ᐯᐸᑳᓐ ᑲᔦ ᑳᐃᔑᑮᔗᐙᒡ, ᒦ ᐅᑯ ᑲᑭᓇ ᐅᑲᑲᓇᐙᐸᑖᓈᐙᓐ ᐃᓂ ᐐᔭᐎᒫᓐ᙮ ᑳᐐᓐ ᑲᔦ ᐅᑲᐸᑭᑎᓇᓰᓈᐙ ᒋᓇᐊᒋᑳᑌᓂᑭᓐ ᐐᔭᐎᓂ᙮

11:10b.REV.011.010 ᐃᑭ ᐃᒫ ᐊᑮᕽ ᑳᐊᔮᐙᒡ ᑕᒨᒋᑫᑕᒨᒃ ᐁᑮᓂᐳᓂᒡ ᐅᐅ ᓃᔑᓐ ᐅᑎᐹᒋᒨᐞ᙮ ᑕᒨᒋᑲᑲᒥᑭᓯᐗᒃ, ᑕᒣᒣᔥᑾᒋᒦᓂᑎᐗᒃ ᑲᔦ᙮ ᐅᐅᐌ ᑕᐅᒋ ᐃᔑᒋᑫᐗᒃ, ᐋᓃᔥ ᑮᓂᐳᐗᐞ ᐅᐅ ᐅᑎᐹᒋᒨᐞ ᑳᑮᑭᒋ ᑲᒀᑕᑭᐃᑯᐙᐸᓐ᙮

11:11b.REV.011.011 ᓂᓱᑮᔑᒃ ᐋᐱᑕ ᑕᔥ ᐁᐃᔑᓭᓂᒃ, ᑳᑮᓂᓯᑣ ᐅᑯ ᐅᑎᐹᒋᒨᒃ, ᐅᑮᐲᒋᔥᑳᑯᓈᐙ ᐸᑭᑕᓈᒧᐎᓐ ᑭᔐᒪᓂᑑᕽ ᑳᐅᒌᓂᒃ ᐁᑮᑮᐌᐱᒫᑎᓯᐃᑯᐙᒡ; ᑮᐸᓯᑸᐗᒃ ᐃᑕᔥ᙮ ᒦᑕᔥ ᑮᑭᒋᓭᑭᓯᐗᐞ ᑲᑭᓇ ᑳᐙᐸᒥᑯᐙᒡ᙮

11:12b.REV.011.012 ᐅᑮᓅᑖᓈᐙ ᑕᔥ ᐃᑭ ᐅᑎᐹᒋᒨᒃ ᐁᑭᒋᑭᔒᐌᒃ ᐃᓉᐎᓐ ᑭᒋᑮᔑᑯᕽ ᐃᓇᑫ ᐁᑲᓅᓂᑯᐙᒡ: ᐅᐅᒫ ᐲᔖᒃ! ᒦᔥ ᐃᐃ ᑮᐊᓂᒫᒑᐗᒃ ᑭᒋᑮᔑᑯᕽ ᐗᑸᕽ, ᒣᒀ ᐁᑲᓇᐙᐸᒥᑯᐙᒡ ᐃᐃ ᑳᔒᑫᓂᒥᑯᐙᒡ᙮

11:13b.REV.011.013 ᒦᑕᔥ ᐃᐌ ᐊᐲ ᐁᐃᔑᓭᒃ, ᐐᑫ ᑮᑭᒋᓂᓂᑭᓭᓂ ᐊᑭ᙮ ᒦᔥ ᐃᐃ ᐊᐲ ᐁᑕᓱᒥᑖᒋᑭᓐ ᐙᑳᐃᑲᓇᓐ ᐃᐃᒫ ᐁᑭᒋᐆᑌᓇᐗᕽ ᐯᔑᒃ ᑮᓂᔑᐗᓈᑕᓐ᙮ ᓃᔣᒋᕽ ᒥᑖᔂᒃ 7,000 ᐃᑕᔥ ᑮᑕᔑᐗᒃ ᑳᑮᓂᔑᐗᓈᑎᓯᐙᒡ ᐁᑭᒋᓂᓂᑭᓭᓂᒃ ᐊᑭ᙮ ᑯᑕᒃ ᐃᑕᔥ ᑳᐃᔥᑯᐃᑣ ᑮᑭᒋᓭᑭᓯᐗᒃ ᑲᔦ ᐅᑮᑭᑕᑭᒫᐙᓐ ᑭᔐᒪᓂᑑᓐ ᑭᒋᑮᔑᑯᕽ ᑳᐊᔮᓂᒡ᙮

11:14b.REV.011.014 ᒦᐃᐌ ᓃᔑᕽ ᐋᔕ ᐅᐌ ᐁᑮᐴᓂᓭᒃ ᐅᒑᓂᒥᓯᐎᓐ ᑳᑲᒀᓂᓴᑫᑖᑾᒃ᙮ ᓇᔥᑫ ᓴ! ᑫᔮᐱ ᐯᔑᒃ ᑫᑲᒀᓂᓴᑫᑖᑾᒃ ᐅᒑᓂᒥᓯᐎᓐ ᑭᑖᑕᐱᑯ ᑕᐃᔑᓭ, ᒦᐃ ᓂᓯᕽ 3 ᒋᐃᔑᓭᒃ᙮

11:15b.REV.011.015 ᒦᓇᐙ ᑯᑕᒃ ᐁᒐᓬ ᐅᑮᓅᑖᑯᑑᓐ ᐅᐴᑖᒋᑲᓐ, ᒦ ᓃᔣᓱ ᐁᒐᓬᐊᒃ ᐁᑮᐴᑖᒋᑫᐙᒡ᙮ ᒦᔥ ᐁᑭᒋ ᐃᓂᑖᑾᑭᓐ ᐃᓉᐎᓇᓐ ᑭᒋᑮᔑᑯᕽ, ᐅᐅᐌ ᐁᐃᑭᑐᐙᒡ ᐁᒫᒪᐎᑖᑯᓯᐙᒡ: ᑮᒦᓈ ᐃᐃ ᐊᑭ ᒋᐅᑭᒫᑲᑕᕽ ᐊᐊ ᑳᑎᐯᓂᒥᓇᕽ ᑲᔦ ᐃᓂ ᑳᑮᐅᓈᐸᒫᒡ ᒋᐱᒫᒋᐃᐌᓂᒡ᙮ ᐐᓐ ᐃᑯ ᐊᐸᓂᑯ ᒨᔕᒃ ᐱᔑᔑᒃ ᑕᑎᐯᒋᑫ᙮

11:16b.REV.011.016 ᐃᑭᐌᓂᐗᒃ ᓃᔥᑕᓇᔑᓃᐎᓐ 24 ᐅᓃᑳᓂᓰᒃ, ᒦᐗᑭᑭ ᐅᑭᒋᐊᐱᐎᓂᐙᕽ ᑳᐃᓈᓴᒪᐲᑕᐙᐙᒡ ᑭᔐᒪᓂᑑᓐ, ᑮᐊᓂᒥᑯᐸᓂᐅᐗᒃ ᐁᓈᓴᒪᐱᓂᒡ, ᐁᑭᒋ ᐃᓀᓂᒫᐙᒡ ᑭᔐᒪᓂᑑᓐ,

11:17b.REV.011.017 ᐅᐅᐌ ᐁᐃᓈᐙᒡ: ᒦᑴᒡ ᑭᑎᑰ ᑮᓐ ᑌᐯᒋᑫᔭᓐ, ᑭᔐᒪᓂᑑ ᒥᔮᒪᐎ ᒪᔥᑲᐎᓰᔭᓐ, ᑮᓐ ᐅᐅᒫ ᓅᑯᒻ ᑳᐊᔮᔭᓐ, ᒣᐎᔕ ᑯ ᑲᔦ ᑳᐱᐅᒋᐊᔮᔭᓐ, ᒦᑴᒡ ᐁᒫᒌᐋᐸᒋᑑᔭᓐ ᑭᑭᒋᒪᔥᑲᐎᓰᐎᓐ ᐁᒫᒌᑎᐯᒋᑫᔭᓐ!

11:18b.REV.011.018 ᑳᑕᓶᐙᓇᑭᓯᐙᒡ ᐃᑭᐌᓂᐗᒃ ᑳᑭᑫᓂᒥᓯᓄᒀ ᑮᐅᒋᑭᒋᓂᔥᑳᑎᓯᐗᒃ, ᐁᐅᒋᒋᓭᒃ ᑭᓂᔥᑳᑎᓯᐎᓐ ᒋᐱᑕᑯᔑᓅᒪᑲᒃ, ᐃᑭ ᑕᔥ ᑲᔦ ᑳᓂᐳᐙᒡ ᒋᑎᐹᑯᓂᑣ᙮ ᐋᔕ ᐅᒋᒋᓭ ᒋᑎᐸᐊᒪᐗᑣ ᑭᑕᓄᑮᐋᑲᓇᒃ ᑳᑮᑲᓅᑕᒪᐎᒀ, ᐃᑭ ᑲᔦ ᑲᑭᓇ ᑳᑾᔭᑯᐱᒫᑎᓯᐙᒡ ᑳᑎᐯᓂᒪᑣ, ᐃᑭ ᑲᔦ ᑳᑭᒋ ᐃᓀᑕᒧᐙᒡ ᑭᐐᓱᐎᓐ, ᑳᑭᒋ ᐃᓀᑖᑯᓯᐙᒡ, ᐃᑭ ᑲᔦ ᐸᑮ ᐁᓀᑖᑯᓯᐙᒡ, ᑲᑭᓇ ᑕᒦᓈᐗᒃ᙮ ᒦ ᐅ ᐊᐲ ᐁᐅᒋᒋᓭᒃ ᒋᓂᔑᐗᓈᒋᐃᑣ ᐃᑭ ᑳᓂᔑᐗᓈᒋᑑᐙᒡ ᐃᐃ ᐊᑭ, ᐃᑭᑐᐗᒃ ᐅᓃᑳᓂᓰᒃ᙮

11:19b.REV.011.019 ᑮᐹᑭᓂᑳᑌᓂ ᑕᔥ ᑭᔐᒪᓂᑑ ᐅᑭᒋᐊᓇᒥᐁᐎᑲᒥᒃ ᑭᒋᑮᔑᑯᕽ ᑳᐊᔮᓂᒃ᙮ ᐃᐃᒫᔥ ᑮᓈᑾᓂᓂ ᐊᓇᒥᐁᒪᑲᒃ ᑳᐃᔑᐲᑌᓂᒃ ᐊᔓᑕᒫᑎᐎᓐ ᑭᔐᒪᓂᑑ ᑳᑮᒦᓈᒡ ᐅᐱᒫᑎᓰᒪᐞ᙮ ᑮᐅᒌ ᐃᒫ ᐁᐙᐙᑌᓭᒃ, ᑮᐸᐲᑎᑯᐌ ᑕᔥ ᑲᔦ, ᐱᓀᓯᐗᒃ ᑲᔦ ᑮᓅᑖᑯᓯᐗᒃ᙮ ᐊᑭ ᑲᔦ ᑮᓂᓂᑭᓭ, ᐐᑫ ᑲᔦ ᑮᑭᒋᓭᓭᑲᓐ᙮

12

12:1b.REV.012.001 ᒦᑕᔥ ᑭᒋᒫᒪᑳᓯᓇᒧᐎᓐ ᑮᓈᑾᓐ ᑭᒋᑮᔑᑯᕽ᙮ ᑮᓈᑯᓯ ᐯᔑᒃ ᐃᑴ ᑳᐃᔑᑯᓇᔦᒡ ᐃᓂ ᑮᓯᓲᓐ ᐁᑭᑭᔥᑲᐙᒡ, ᑲᔦ ᐊᓈᒥᕽ ᐅᓯᑎᕽ ᑮᐊᔮᐗᓐ ᑎᐱᑭᑮᓯᓲᓐ, ᐅᑎᒀᓂᕽ ᑲᔦ ᐁᐸᓯᑴᐱᓱᒡ ᒥᑖᔑᓃᔑᓐ 12 ᐗᓇᑯᔕᐞ᙮

12:2b.REV.012.002 ᐊᐱᓅᒌᔕᓐ ᐅᑮᑭᑭᔥᑲᐙᓐ, ᐁᒨᒀᐱᓀᒡ ᐁᐐᐙᐸᒫᐗᓱᒡ᙮

12:3b.REV.012.003 ᐸᑳᓐ ᒦᓇᐙ ᑫᑰᓐ ᑮᑭᑭᓇᐙᓯᓈᑾᓐ ᑭᒋᑮᔑᑯᕽ᙮ ᐃᐃᒫ ᑮᐊᔮ ᒫᐗᒡ ᐁᒥᑎᑐᒡ ᐅᑳᑏᑭᓀᐱᒃ ᐁᒥᔅᑯᓯᒡ, ᐁᓃᔣᒋᓂᓂᑭᓐ 7 ᐅᑎᒀᓇᓐ ᑲᔦ ᐁᒥᑖᒋᓂᒡ ᐅᑌᔥᑲᓇᐞ᙮ ᔑᑾ ᑳᑕᓯᓂᓂᑭᓐ ᐅᑎᒀᓇᓐ ᐅᑮᑭᑭᔥᑳᓇᓐ ᐃᓂ ᐸᓯᑴᐱᓱᓇᓐ᙮

12:4b.REV.012.004 ᒦᔥ ᐅᓲᐎᕽ ᐅᑮᓃᓵᑳᐲᑭᓈᐞ ᐃᓂ ᐗᓇᑯᔕᐞ, ᑫᑳ ᐋᐱᑕ ᑳᑕᔑᓂᒡ ᑳᐊᑰᒋᓂᓂᒡ ᑮᔑᑯᕽ ᐅᑮᐅᒋᓃᓯᐌᐱᓈᐞ ᐊᑮᕽ᙮ ᑮᐃᓈᓴᒥᑳᐸᐎ ᑕᔥ ᐃᓂ ᐃᑴᐗᓐ ᐁᐐᐙᐸᒫᐗᓱᓂᒡ, ᐊᐲᔥ ᓈᑯᓯᓂᒡ ᐁᐐᐊᒸᒡ ᐃᓂ ᐊᐱᓅᒌᔕᓐ᙮

12:5b.REV.012.005 ᑮᓈᑯᓯᐗᓐ ᐃᑕᔥ ᐁᑮᐅᑯᓯᓯᒡ ᐊᐊ ᐃᑴ, ᐊᒦᐗᓐ ᐃᓂ ᐲᐙᐱᑯᓴᑲᐅᓐ ᑫᑕᑯᓇᒥᓂᑦ ᑫᐅᓈᑯᓈᓂᒡ ᑲᑭᓇ ᑳᑕᓶᐙᓇᑭᓯᓂᒡ ᐃᐃ ᐯᒫᑎᓯᓂᒡ᙮ ᑮᑫᓯᑯᒪᓂᐱᓈ ᑕᔥ ᐊᐊᐌ ᐊᐱᓅᒌᔥ, ᐁᑮᐃᔑᐎᓂᓐᒡ ᐃᐃᒫ ᑭᔐᒪᓂᑑᓐ ᑳᐃᔑᐊᔮᓂᒡ, ᐃᒫᔥ ᑲᔦ ᑳᐃᔑᐊᔮᓂᒃ ᐅᑭᒋᐊᐱᐎᓂᓂ᙮

12:6b.REV.012.006 ᐊᐊᐌᔥ ᐃᑴ ᐱᑾᑕᑲᒥᒃ ᑮᐊᐸᐃᐌ, ᐌᑎ ᑳᑮᐃᔑ ᑮᔖᒋ ᐅᔑᑕᒫᑯᒡ ᑭᔐᒪᓂᑑᓐ ᐃᐃᒫ ᒋᐊᔮᒡ ᒋᑕᔑᑲᓇᐌᓂᒥᓐᒡ, ᒥᑖᔂᒃ ᓃᔣᒃ ᓂᑯᑣᓱᒥᑕᓇ 1,260 ᑕᓱᑮᔑᒃ ᐃᒫ ᒋᐊᔮᒡ᙮

12:7b.REV.012.007 ᒦ ᐃ ᐊᐲ ᑮᒫᒌᒦᑳᑎᓈᓂᐗᓐ ᑭᒋᑮᔑᑯᕽ᙮ ᐊᐊ ᒪᔨᑲᓬ ᑲᔦ ᐅᐐᒋᐁᒐᓬᐃᒪᐞ ᐅᑮᐊᐎᒦᑳᓈᐙᓐ ᐃᓂ ᑭᒋᐅᑳᑏᑭᓀᐱᑰᓐ᙮ ᑲᔦ ᐐᓐ ᑭᒋᐅᑳᑏᑭᓀᐱᒃ ᑮᒦᑳᓱ ᐁᐐᒋᐃᑯᒡ ᐅᑌᒐᓬᐃᒪᐞ᙮

12:8b.REV.012.008 ᑮᔖᑰᒋᒋᑲᓂᐎ ᑕᔥ ᐊᐊᐌ ᑭᒋᐅᑳᑏᑭᓀᐱᒃ᙮ ᑳᐐᓐ ᒦᓇᐙ ᐐᑳ ᑮᑕᐎᓇᒪᐙᓰ ᑭᒋᑮᔑᑯᕽ ᒋᐊᔮᒡ, ᐃᓂᐌᓂᐗᐞ ᑲᔦ ᑳᐐᒋᐃᑯᒡ᙮

12:9b.REV.012.009 ᐗᐊ ᑳᒫᐗᒋᒥᑎᑐᒡ ᑭᒋᐅᑳᑏᑭᓀᐱᒃ ᐃᑯᒋ ᑮᐃᔑᐌᐱᓈ᙮ ᒦ ᐊᐌ ᑭᒋᒣᐎᔕ ᑳᐅᒌᒡ ᑫᑌᒪᒋᑭᓀᐱᑯᔥ, ᒪᒋᐊᔭᐋ, ᓭᑕᓐ ᑲᔦ ᑳᐃᔑᓂᑳᓂᓐᒡ᙮ ᒦ ᐊᐌ ᑳᑮᐗᔦᔑᒫᒡ ᐊᐎᔭᐞ ᒥᓯᐌᑲᒥᒃ ᑳᐊᔮᓂᒡ᙮ ᐊᑮᕽ ᐃᑕᔥ ᑮᐃᔑᐌᐱᓈ, ᑕᑯ ᑲᔦ ᐅᒪᒋᐁᒐᓬᐃᒪᐞ ᑳᑮᐐᒌᐎᑯᒡ᙮

12:10b.REV.012.010 ᒦᑕᔥ ᓂᑮᓅᑖᓐ ᐊᐎᔭ ᐁᑭᒋᑭᔒᐌᒡ ᑭᒋᑮᔑᑯᕽ ᐁᐃᑭᑐᒡ: ᓅᑯᒻ ᐅᒋᒋᓭ ᐅᐱᒫᒋᐃᐌᐎᓐ ᑭᑭᔐᒪᓂᑑᒥᓈᓐ ᑲᔦ ᐁᐱᓈᑾᓂᓂᒃ ᐅᒪᔥᑲᐎᓰᐎᓐ ᑲᔦ ᐅᑎᐯᒋᑫᐎᓐ᙮ ᐃᓂ ᑲᔦ ᑳᑮᐅᓈᐸᒫᒡ ᒋᐱᒫᒋᐃᐌᓂᒡ ᐋᔕ ᐅᓈᑯᑑᓂ ᐅᑲᔥᑭᐁᐎᓯᐎᓂᓂ᙮ ᐋᓃᔥ ᑮᓃᓯᐌᐱᓈ ᐊᐌ ᒪᒋᐊᔭᐋ ᑳᑮᒪᒥᔑᒫᒡ ᐃᓂ ᑭᐐᒋᐅᑌᐺᑕᒨᒥᓈᓂᐞ᙮ ᐊᒦ ᐊᐌ ᒪᒋᐊᔭᐋ ᑳᑮᐃᓈᓴᒥᑳᐸᐐᑕᐙᒡ ᑭᑭᔐᒪᓂᑑᒥᓈᓂᓐ, ᐁᑮᔑᑲᓂᓂᒃ, ᐁᑎᐱᑲᓂᓂᒃ ᑲᔦ ᐁᑮᑲᑴᒪᒥᔑᒥᐌᒡ᙮ ᐋᔕ ᑕᔥ ᑮᐅᒋᓃᓯᐌᐱᓈ ᑭᒋᑮᔑᑯᕽ᙮

12:11b.REV.012.011 ᐃᑭ ᑕᔥ ᑭᐐᒋᐅᑌᐺᑕᒨᒥᓈᓂᒃ ᐅᑮᔖᑰᒋᐋᐙᓐ ᐃᓂ ᒪᒋᐊᔭᐋᓐ᙮ ᐃᐃᐌ ᒫᓇᒑᓂᔐᔅ ᐅᒥᔅᑸᒻ ᑮᐅᒋᔖᑰᒋᑣᐗᒃ, ᐃᐃᐌᓂ ᑕᔥ ᑲᔦ ᑌᐺᐎᓐ ᑳᑮᐐᑕᒫᑫᐙᒡ᙮ ᑳᐐᓐ ᐋᓃᔥ ᐅᑮᐅᓵᒣᑕᓰᓈᐙᓐ ᐅᐱᒫᑎᓯᐎᓂᐙᓐ, ᑳᐐᓐ ᐃᑯᑕᓄ ᓂᐳᔮᕽ ᐁᑮᐃᓀᑕᒧᐙᒡ᙮

12:12b.REV.012.012 ᑕᒥᓉᑕᒨᒪᑲᓐ ᑭᒋᑮᔑᒃ, ᑲᔦ ᐃᐃᒫ ᑳᐊᔮᔦᒃ ᒥᓉᑕᒧᒃ! ᑕᑲᒀᑕᑫᑖᑾᓐ ᐃᑕᔥ ᐃᐃᒫ ᐊᑮᕽ ᑲᔦ ᑭᒋᑲᒦᕽ, ᐋᓃᔥ ᐊᐊ ᒪᒋᐊᔭᐋ ᑭᑮᓈᓯᑳᑯᐙ ᐃᒫ ᑳᐊᔮᔦᒃ, ᐁᐊᔮᒡ ᑭᒋᓂᔥᑳᑎᓯᐎᓐ ᐁᑭᑫᑕᕽ ᐊᒋᓇ ᐱᑯ ᐁᑕ ᒋᐊᔮᒡ, ᒦ ᑳᐃᑭᑐᒡ᙮

12:13b.REV.012.013 ᐊᐲ ᑕᔥ ᐊᐊᐌ ᑭᒋᐅᑳᑏᑭᓀᐱᒃ ᐁᐙᐸᑕᕽ ᐊᑮᕽ ᐁᑮᓃᓯᐌᐱᓂᓐᒡ, ᐃᓂᐌᓂᔥ ᐃᑕᔥ ᐃᓂ ᐃᑴᐗᓐ ᐅᑮᒨᑮᑕᐙᓐ ᑳᑮᓂᑖᐎᑭᐋᓂᒡ ᐃᓂ ᑸᐎᓭᓴᓐ᙮

12:14b.REV.012.014 ᑮᒦᓈ ᑕᔥ ᐊᐊ ᐃᑴ ᓃᔑᓐ ᐃᓂ ᒥᓂᑸᑲᓇᓐ ᑭᒋᒥᑭᓯ ᑳᐃᔑᐅᓂᑸᑲᓂᒡ, ᒋᐃᔑᓭᐙᑫᒡ ᐱᑾᒋᐊᑮᕽ ᑳᑮᐃᔑ ᑾᔮᒋᑕᒪᐎᓐᒡ, ᐃᐃᒫ ᒋᐊᐎᐊᔮᒡ ᓂᓱᔭᑭ ᐋᐱᑕ, ᒦᔥ ᐌᑎ ᒋᐃᔑᑲᓇᐌᑖᑯᓯᒡ ᒋᑌᐱᓂᑯᓯᒃ ᒪᒋᑭᓀᐱᑯᔕᓐ᙮

12:15b.REV.012.015 ᐅᑯᓀᐎᕽ ᐃᑕᔥ ᐊᐊ ᒪᒋᑭᓀᐱᑯᔥ ᐅᑮᓅᓴᐎᓰᓱᐹᓈᓐ ᓂᐱ ᐱᓵᓂᑯ ᓰᐱ ᑳᐃᔑᐱᒥᒋᐗᕽ, ᒋᐅᒋᒫᒌᔮᐳᑯᓂᐸᓐ ᐃᓂ ᐃᑴᐗᓐ᙮

12:16b.REV.012.016 ᒦᔥ ᐃᐌᓂ ᐊᑮᓂ ᐅᑮᐐᒋᐃᑯᓐ ᐊᐊ ᐃᑴ᙮ ᐁᑕᐗᓃᒪᑲᒃ ᐅᑮᐃᔅᑲᑖᓐ ᐃᐌ ᓂᐲᓂ ᒪᒋᑭᓀᐱᑯᔥ ᐅᑯᓀᐎᕽ ᑳᑮᐅᒋᒋᐗᓂᓂᒃ᙮

12:17b.REV.012.017 ᐊᐊ ᑕᔥ ᑭᒋᐅᑳᑏᑭᓀᐱᒃ ᐅᑮᑭᒋᓂᔥᑫᓂᒫᓐ ᐃᓂ ᐃᑴᐗᓐ᙮ ᒦᔥ ᑳᐃᔑ ᐃᔖᒡ ᐁᐊᑕᒦᑳᓈᒡ ᐃᐃ ᑯᑕᒃ ᑳᐅᑕᑳᓀᓯᓂᒡ ᐃᐃᒫ ᐃᑴᕽ, ᐃᓂᐌᓂᐗᐞ ᑳᑲᓇᐌᑕᒥᓂᒡ ᑭᔐᒪᓂᑑᓐ ᐅᑑᓇᔓᐌᐎᓂᓂ ᑲᔦ ᑳᑭᒋᐎᓇᒥᓂᒡ ᑳᐃᔑᑎᐹᒋᒥᒥᓐᒡ ᒋᓴᓲᓐ᙮

13

13:1b.REV.013.001 ᐊᐊᐌ ᑕᔥ ᑭᒋᐅᑳᑏᑭᓀᐱᒃ ᐃᐃᒫ ᑮᓃᐸᐎ ᒌᑫᐤ ᒥᑖᐗᑳᕽ ᑭᒋᑲᒦᕽ᙮ ᓂᑮᐙᐸᒫ ᑕᔥ ᐯᔑᒃ ᐱᑾᒋᐊᔭᐋᐎᔥ ᐁᐱᐊᒀᓰᒡ ᑭᒋᑲᒦᕽ, ᐁᒥᑖᒋᓂᒡ ᐅᑌᔥᑲᓇᐞ ᑲᔦ ᐁᓃᔣᒋᓂᓂᑭᓐ ᐅᑎᒀᓇᓐ᙮ ᐁᑕᓱᐯᔑᑯᓂᒡ ᐃᑕᔥ ᐅᑌᔥᑲᓇᐞ ᒦ ᐃᒫ ᐯᔑᒃ ᐁᔮᓂᒃ ᐅᑭᒫᐎ ᐸᓯᑴᐱᓱᓐ᙮ ᒦᑕᔥ ᑳᑕᓯᓂᓂᑭᓐ ᐅᑎᒀᓇᓐ ᒪᒋᐐᓱᐎᓐ ᐁᒪᒋᐹᐱᓀᒥᓐᒡ ᑭᔐᒪᓂᑑ ᑮᐃᔑᐲᐃᑳᑌ᙮

13:2b.REV.013.002 ᐊᐊ ᑕᔥ ᐱᑾᒋᐊᔭᐋᐎᔥ ᑳᐙᐸᒪᒃ ᑭᒋᐴᔐᓯᕽ ᑮᐃᔑᓈᑯᓯ, ᐅᓯᑎᕽ ᑲᔦ ᑖᐱᔥᑰ ᒪᑯᓯᑖᓐ, ᐅᑑᓐ ᑲᔦ ᑖᐱᔥᑰ ᒥᔑᐱᔑᐎᑑᓐ ᑮᐃᔑᓈᑾᓂᓂ᙮ ᐃᓂ ᑕᔥ ᑭᒋᐅᑳᑏᑭᓀᐱᑰᓐ ᐅᑮᒦᓂᑰᓐ ᑎᐱᓇᐌ ᐅᒪᔥᑲᐎᓰᐎᓂᓂ, ᐅᑭᑕᐱᐎᓂᓂ ᑲᔦ ᐅᑭᒋᑎᐯᒋᑫᐎᓂᓂ ᑲᔦ᙮

13:3b.REV.013.003 ᐯᔑᒃ ᐃᑕᔥ ᐃᐃᐌᓂ ᐅᑎᒀᓐ ᐊᐊ ᐱᑾᒋᐊᔭᐋᐎᔥ ᐱᓵᓂᑯ ᑮᐃᔑᓈᑾᓂᓂ ᐁᑮᒫᑭᒋᑳᑌᓂᒃ ᒋᐅᒋᓂᐳᒡ᙮ ᒦᓇᐙ ᑕᔥ ᑮᒥᓄᔭᔮᒋᑳᑌᓂ ᑫᑮᓂᓯᑯᐸᓐ ᑳᑮᐃᔑᒫᑭᒋᑲᓂᐎᒡ ᐅᑎᒀᓂᕽ᙮ ᑲᑭᓇ ᑕᔥ ᒥᓯᐌᑲᒥᒃ ᑳᐊᔮᐙᒡ ᐅᑮᒫᒪᑳᑌᓂᒫᐙᓐ ᐃᓂ ᐱᑾᒋᐊᔭᐋᐎᔕᓐ ᐁᐱᒥᓂᔕᐙᐙᒡ᙮

13:4b.REV.013.004 ᑲᑭᓇ ᐃᑭ ᐯᒫᑎᓯᐙᒡ ᐅᑮᐅᒋᒌᑾᓃᑕᐙᐙᓐ ᐃᓂ ᑭᒋᐅᑳᑏᑭᓀᐱᑰᓐ ᐁᑭᒋ ᐃᓀᓂᒫᐙᒡ, ᐋᓃᔥ ᐅᑎᐯᒋᑫᐎᓂᓂ ᐁᑮᒦᓈᓂᒡ ᐃᓂ ᐱᑾᒋᐊᔭᐋᐎᔕᓐ᙮ ᑲᔦ ᐐᓐ ᐃᓂ ᐱᑾᒋᐊᔭᐋᐎᔕᓐ ᐅᑮᐅᒋᒌᑾᓃᑕᐙᐙᓐ ᐁᐃᑭᑐᐙᒡ: ᐊᐌᓀᓐ ᐁᔑᐊᔮᒡ ᑖᐱᔥᑰ ᐊᐌ ᐱᑾᒋᐊᔭᐋᐎᔥ? ᐊᐌᓀᔥ ᑫᑲᔥᑭᑑᐸᓐ ᒋᒦᑳᓈᒡ?

13:5b.REV.013.005 ᑮᐃᔑᒦᓈ ᒋᑲᑭᒋᒧᒡ ᒋᒪᒋᐹᐱᓀᒫᒡ ᐃᓂ ᑭᔐᒪᓂᑑᓐ᙮ ᑮᐃᔑᒦᓈ ᑲᔦ ᑎᐯᒋᑫᐎᓐ ᒋᐊᔮᒡ ᓃᒥᑕᓇᔑᓃᔑᓐ 42 ᑕᓱᑮᓯᔅ᙮

13:6b.REV.013.006 ᒦᑕᔥ ᐁᒫᒌᑲᑭᑐᒡ ᐅᑮᒪᒪᒋᑕᔑᒫᓐ ᑭᔐᒪᓂᑑᓐ, ᑲᔦ ᐅᑮᒪᒪᒋᑕᔑᑕᒪᐙᓐ ᐅᐐᓱᐎᓂᓂ ᑲᔦ ᐅᑕᔮᐎᓂᓂ, ᐌᑎ ᑲᔦ ᑲᑭᓇ ᑭᒋᑮᔑᑯᕽ ᑳᐅᑖᐎᓂᓂᒡ᙮

13:7b.REV.013.007 ᑮᒦᓈ ᑲᔦ ᒋᐊᐎᒦᑳᑕᒪᐙᒡ ᑭᔐᒪᓂᑑᓐ ᐅᐱᒫᑎᓰᒥᓂ ᑲᔦ ᒋᔖᑰᒋᐋᒡ᙮ ᑮᒦᓈ ᑲᔦ ᒋᑎᐯᓂᒫᒡ ᑲᑭᓇ ᐯᐸᑳᓐ ᑳᐋᔫᒌᓂᒡ ᑲᔦ ᑲᑭᓇ ᐯᐸᑳᓐ ᑳᐋᔫᒋᑎᐯᑖᑯᓯᓂᒡ ᑲᔦ ᐁᑕᓱᐯᐸᑳᓂᑮᔗᓂᒡ ᑲᔦ ᑲᑭᓇ ᑳᑕᓶᐙᓇᑭᓈᑯᓯᓂᒡ᙮

13:8b.REV.013.008 ᑲᑭᓇ ᐃᒫ ᐊᑮᕽ ᑳᐊᔮᐙᒡ ᐅᑲᐅᒋᒌᑾᓃᑕᐙᐙᓐ ᐃᓂ ᐱᑾᒋᐊᔭᐋᐎᔕᓐ᙮ ᐃᑭᐌᓂᐗᒃ ᐁᑕ ᑳᐅᔑᐲᐃᑳᓱᐙᒡ ᐱᒪᑎᓯᐎᓂᒪᓯᓇᐃᑲᓂᕽ, ᑳᐐᓐ ᑕᐃᔑᒋᑫᓰᐗᒃ᙮ ᐊᐌ ᐋᓃᔥ ᒫᓇᒑᓂᔐᔅ ᑳᑮᓂᓯᓐᒡ ᐅᑎᐯᑖᓐ ᒪᓯᓇᐃᑲᓐ ᐃᐃᒫ ᑳᐃᔑᐅᔑᐲᐃᑳᓱᐙᒡ ᐊᐌᓀᓇᐞ ᐱᔑᔑᒃ ᑫᐱᒫᑎᓯᐙᒡ᙮ ᐋᔕ ᑮᐅᔑᐲᐙᐗᒃ ᒋᑆ ᐅᔑᒋᑳᑌᒃ ᐊᑭ᙮ ᐊᒦᐗᒃ ᐁᑕ ᐅᑯ ᑳᐐᓐ ᐅᑲᐅᒋᒌᓋᓃᑕᐙᓰᐙᐙᓐ ᐃᓂ ᐱᑾᒋᐊᔭᐋᐎᓴᓐ᙮

13:9b.REV.013.009 ᑮᔥᐱᓐ ᐊᐎᔭ ᐌᓅᑕᒫᐎᓂᑴᓐ ᒫᓄ ᐅᑲᐱᓯᑖᓐ!

13:10b.REV.013.010 ᐊᐌᓀᓂᑯ ᐁᓀᑖᑯᓯᒡ ᒋᑳᒋᑎᓂᒡ ᑫᒋᓈᒡ ᑕᑳᒋᑎᓈ ᒋᒫᒌᓂᓐᒡ᙮ ᐊᐌᓀᓂᑯ ᐁᓀᑖᑯᓯᒡ ᒨᑯᒫᓂᕽ ᒋᐅᒋᓂᓯᓐᒡ, ᑕᐅᒋᓂᓵ ᒨᑯᒫᓂᕽ᙮ ᒦᔥ ᐃ ᐁᔑᐊᑕᐌᑖᑯᓯᓂᒡ ᑭᔐᒪᓂᑑ ᐅᑾᔭᒀᑎᓰᒪᐞ ᒋᒪᔥᑲᐌᑕᒥᓂᒡ ᑲᔦ ᒋᑲᐯᑌᐺᑕᒥᓂᒡ᙮

13:11b.REV.013.011 ᓂᐙᐸᒫ ᑕᔥ ᑯᑕᒃ ᐱᑾᒋᐊᔭᐋᐎᔥ ᐊᑮᕽ ᐁᐱᐅᒋᒨᑮᒡ, ᐁᓃᔑᓂᒡ ᐅᑌᔥᑲᓇᐞ ᑖᐱᔥᑰ ᑳᐃᔑᑌᔥᑲᓀᓂᒡ ᒫᓇᒑᓂᔐᓴᓐ᙮ ᑭᒋᐅᑳᑏᑭᓀᐱᑯᕽ ᐃᑕᔥ ᑮᐃᓂᑖᑯᓯ ᐁᑮᑭᑐᒡ᙮

13:12b.REV.013.012 ᐗᐊ ᑯᑕᒃ ᐊᔭᐋᐎᔥ ᐅᑮᐋᐸᒋᑕᒪᐙᓐ ᐅᑭᒋᑎᐯᒋᑫᐎᓂᓂ ᐃᓂ ᓂᑕᒻ ᐊᔭᐋᐎᔕᓐ ᒣᒀ ᐁᑲᓇᐙᐸᒥᑯᒡ᙮ ᐅᑮᑲᔥᑭᑑᓐ ᐊᑮᓂ ᑲᔦ ᐃᑭ ᐊᑮᕽ ᑳᐊᔮᐙᒡ ᒋᐅᒋᒌᑾᓃᑕᐙᓂᒡ ᐃᓂ ᓂᑕᒻ ᐱᑾᒋᐊᔭᐋᐎᔕᓐ ᐃᓂ ᑳᑮᒥᓄᔮᔮᒋᑳᑌᓂᒃ ᐅᓂᓯᑰᐎᓐ ᑳᐃᔑᒫᑭᒋᑲᓂᐎᒡ᙮

13:13b.REV.013.013 ᐊᐊ ᑕᔥ ᑯᑕᒃ ᐱᑾᒋᐊᔭᐋᐎᔥ ᐅᑮᑑᑖᓇᓐ ᑭᒋᒫᒪᑳᒋᒋᑫᐎᓇᓐ, ᐴᔥᑫ ᐊᐙᒡ ᒋᐱᓈᔕᑮᓭᓂᒃ ᐃᔥᑯᑌ ᐊᑮᕽ, ᑮᔑᑯᕽ ᒋᐅᒋᓭᓂᒃ, ᐁᐙᐸᒥᑯᒡ ᑲᑭᓇ ᐯᒫᑎᓯᓂᒡ᙮

13:14b.REV.013.014 ᒦᔥ ᐃᐃ ᐅᑮᐅᒋᐗᔦᔑᐋᐞ ᐃᓂ ᐊᑮᕽ ᑳᐊᔮᓂᒡ ᐃᓂ ᐅᒫᒪᑳᒋᒋᑫᐎᓇᓐ ᐁᑮᐋᐸᒋᑑᒡ ᑳᑮᒦᓂᓐᒡ ᒋᑑᑕᕽ ᐁᐙᐸᒥᑯᒡ ᐃᓂ ᓂᑕᒻ ᐱᑾᒋᐊᔭᐋᐎᔕᓐ᙮ ᐅᑮᐐᑕᒪᐙᐞ: ᐅᔑᐃᒃ ᒪᓂᑑᑳᓂᐎᑰᒋᑲᓐ, ᒋᑭᒋ ᐃᓀᒋᑲᓂᐎᒡ ᐊᐊ ᐯᔑᒃ ᐱᑾᒋᐊᔭᐋᐎᔥ ᑭᒋᒨᑯᒫᓂᕽ ᑳᑮᐅᒋᒫᑲᑲᓈᓱᒡ, ᒦᓇᐙ ᑕᔥ ᐁᐱᒫᑎᓯᒡ, ᑮᐃᑭᑐ᙮

13:15b.REV.013.015 ᐊᐊ ᑕᔥ ᑯᑕᒃ ᐊᔭᐋᐎᔥ ᑮᒦᓈ ᐁᑮᐸᑭᑕᓈᒧᓄᑕᐙᒡ ᐃᓂ ᐅᔑᑰᒋᑲᓇᓐ ᒋᐱᒫᑎᓯᓂᒡ, ᒦᐗᓂᓂ ᓂᑕᒻ ᐊᔭᐋᐎᔕᓐ ᑳᐃᔑᓈᑯᓯᓂᒡ ᐅᔑᑰᒋᑲᓇᓐ᙮ ᐗᐊᔥ ᐅᔑᑰᒋᑲᓐ ᐅᑮᑲᔥᑭᑑᓐ ᒋᑲᑭᑐᒡ ᑲᔦ ᒋᓂᓯᒥᓐᒡ ᐊᐌᓀᓇᓐ ᐃᑯ ᑳᐐᐅᒋᒌᑾᓃᑖᑯᓯᒃ᙮

13:16b.REV.013.016 ᐊᐊᐌ ᑕᔥ ᐊᔭᐋᐎᔥ ᐅᑮᑲᔥᑭᐋᐞ ᑲᑭᓇ ᐊᐎᔭᐞ ᒋᑭᑭᓇᐙᒋᒋᑲᓂᐎᓂᒡ ᐅᑭᒋᓂᑭᓃᕽ ᑫᒫ ᐅᔅᑲᑎᑯᓃᕽ᙮ ᑲᑭᓇ ᐊᐎᔭ ᑮᑭᑭᓇᐙᒋᐋ, ᑳᐊᑳᓭᑖᑯᓯᐙᒡ ᑲᔦ ᑳᑭᒋ ᐃᓀᑖᑯᓯᐙᒡ, ᑳᐌᓅᑎᓯᐙᒡ ᑲᔦ ᑳᑭᑎᒫᑭᓯᐙᒡ, ᑳᑎᐯᓂᑎᓱᐙᒡ ᑲᔦ ᑳᑎᐯᑖᑯᓯᐙᒡ᙮

13:17b.REV.013.017 ᑮᔥᐱᓐ ᐊᐎᔭ ᒦᓈᓯᐎᓐᒡ ᐃᐃᐌ ᑭᑭᓇᐙᒋᐲᐅᑰᐎᓐ, ᑳᐐᓐ ᑕᐊᑖᐌᓰ, ᑳᐐᓐ ᑲᔦ ᑫᑰᓐ ᑕᐊᑖᐙᑫᓰ, ᒦ ᐁᑕ ᐊᐎᔭ ᐃᔑᐅᔑᐲᐅᓐᒡ ᐅᐐᓱᐎᓂᓂ ᐃᓂ ᐱᑾᒋᐊᔭᐋᐎᔕᓐ ᑫᒫ ᐃᐌᓂ ᐅᑕᑭᑖᓱᐎᓂᓂ, ᒦ ᐅᐌ ᐅᐐᓱᐎᓂᓂ ᑳᐃᒋᑳᑌᓂᒃ᙮

13:18b.REV.013.018 ᐊᑕᐌᑖᑯᓯ ᐊᐎᔭ ᒋᑭᑫᑕᒫᐎᓯᒡ: ᐊᐌᓀᓂᑯ ᐊᐊ ᑳᑭᑫᑖᓱᒡ ᐅᑲᓂᐅᒋᒫᒥᑴᑖᓐ ᐋᓃᓐ ᑳᐃᒋᑳᑌᓂᒃ ᐃᐌ ᐅᑕᑭᑖᓱᐎᓂᓂ ᐃᓂ ᐱᑾᒋᐊᔭᐋᐎᔕᓐ᙮ ᐋᓃᔥ ᒦ ᐁᒋᑳᑌᒃ ᐃᓂᓃᐎ ᐐᓱᐎᓐ, ᐊᒦ ᐅᐌ ᐁᐃᓇᑭᑌᒃ ᐃᐃ ᐐᓱᐎᓐ: ᓂᑯᑣᔂᒃ ᓂᑯᑣᓯᒥᑕᓇᔑᓂᑯᑣᓱ 666.

14

14:1b.REV.014.001 ᒦᑕᔥ ᓂᑮᐃᓈᑉ᙮ ᐊᐊᐌᔥ ᒫᓇᒑᓂᔐᔅ ᑮᓃᐸᐎ ᐃᔥᐸᑎᓈᕽ, ᓵᔭᓐ ᐗᒋᐤ ᑳᐃᒋᑳᑌᒃ᙮ ᐅᑮᐐᒌᐎᑰᐞ ᐊᐎᔭᐞ ᓂᑯᑣᒃ ᓃᒥᑕᓇᔑᓃᐎᕽ ᒥᑖᔂᒃ 144,000 ᐁᑮᑕᔑᓂᒡ᙮ ᐃᐃᒫ ᑕᔥ ᐅᔅᑲᑎᑯᓃᕽ ᑮᐅᔑᐲᐃᑳᑌᓂᐗᓐ ᐅᐐᓱᐎᓐ, ᐅᑌᑌᓐ ᑲᔦ ᐅᐐᓱᐎᓂᓂ᙮

14:2b.REV.014.002 ᒦᔥ ᐃᐌ ᓂᑮᓅᑖᓐ ᐃᓂᑖᑯᓯᐎᓐ ᑭᒋᑮᔑᑯᕽ ᑳᐅᓯᑖᑾᒃ᙮ ᑖᐱᔥᑰ ᑭᒋᐹᐎᑎᒃ ᐁᒪᑗᒋᐗᕽ ᑮᐃᓂᑖᑾᓐ, ᑲᔦ ᑖᐱᔥᑰ ᐱᓀᓯᐗᒃ ᑳᐊᐲᒋᓲᑭᑖᑯᓯᐙᒡ᙮ ᔑᑾ ᐱᓵᓂᑯ ᐅᑭᑐᒋᑫᒃ ᐁᒪᑗᔮᐲᑭᐱᒋᑫᐙᒡ ᑮᐃᓂᑖᑾᓐ᙮

14:3b.REV.014.003 ᐃᑭ ᑕᔥ ᓂᑯᑣᒃ ᓃᒥᑕᓇᔑᓃᐎᕽ ᒥᑖᔂᒃ 144,000 ᑳᑕᔑᐙᒡ ᐃᐃᒫ ᑮᐅᒋᔥᑲᐎᑳᐸᐎᐗᒃ ᑭᒋᐊᐱᐎᓐ ᑳᐃᔑᐊᑌᓂᒃ ᑲᔦ ᑳᐃᔑᐊᔮᓂᒡ ᐃᐃ ᓃᐎᓐ ᐅᐱᒫᑎᓰᐞ ᑲᔦ ᐅᓃᑳᓂᓰᐞ᙮ ᐅᔥᑭᓂᑲᒧᐎᓐ ᐅᑮᓂᑲᒧᓈᑫᓈᐙ᙮ ᐐᓀᑕᐙ ᓴ ᑯ ᐅᑲᑭᑫᑖᓈᐙ ᐃ ᓂᑲᒧᓐ᙮ ᑳᐐᓐ ᐸᑳᓐ ᐊᐎᔭ ᐅᑖᑲᔥᑭᑑᓰᓐ, ᒦ ᐁᑕ ᐃᑭᐌᓂᐗᒃ ᐅᒋ ᐃᒫ ᒥᓯᐌ ᐊᑮᕽ ᑳᑮᐅᒋᑎᐸᐅᑣ ᑭᔐᒪᓂᑑᕽ ᒋᑎᐯᑖᑯᓯᐙᒡ᙮

14:4b.REV.014.004 ᒦᐗᒃ ᐅᑯᐌᓂᐗᒃ ᑲᔦ ᒥᓯᐌ ᑳᑲᓇᐌᓂᑎᓱᐙᒡ ᐁᑳ ᑳᑮᐅᒋᐐᒌᐙᓯᒀ ᐃᑴᐗᐞ ᑲᔦ ᐁᐯᑭᐱᒫᑎᓯᐙᒡ᙮ ᒦᐗᑯᑯ ᐯᐹᒥᓂᔕᐙᐙᒡ ᐃᓂ ᒫᓇᒑᓂᔐᓴᓐ ᒥᓯᐌ ᑯ ᐱᑯ ᐋᑎ ᑳᐸᐹᐃᔖᓂᒡ᙮ ᐃᐃᒫ ᐅᒋ ᑯᑕᒃ ᑳᐱᒫᑎᓯᓂᒡ ᑮᐅᒋᑎᐸᐙᐗᒃ ᐅᑯ᙮ ᓂᑕᒻ ᐸᑭᑎᓂᑫᐎᓂᕽ ᑮᐃᓀᑖᑯᓯᐗᒃ ᐁᑮᒦᓂᓐᒡ ᑭᔐᒪᓂᑑ ᑲᔦ ᒫᓇᒑᓂᔐᔅ᙮

14:5b.REV.014.005 ᒦᐗᑯᑯ ᒨᔕᒃ ᑳᑌᐺᐙᒡ; ᑳᐐᓐ ᐐᑳ ᑮᑭᑫᒋᑲᓂᐎᓰᐗᒃ ᒋᑮᐗᓂᒧᐙᒡ, ᑳᐐᓐ ᑲᔦ ᑫᑰᓐ ᐃᔑᐊᔮᓰᐗᒃ᙮

14:6b.REV.014.006 ᓂᑮᐙᐸᒫ ᑕᔥ ᒦᓇᐙ ᐯᔑᒃ ᐁᒐᓬ ᐙᓴ ᐃᔥᐱᒥᕽ ᐁᐱᒥᐊᔮᒡ ᐁᐊᔮᒡ ᐱᔑᔑᒃ ᑫᐊᔮᓂᒃ ᒥᓄᑎᐹᒋᒧᐎᓐ ᑲᑭᓇ ᒋᐐᑕᒪᐎᑣ ᐃᑭ ᐯᒫᑎᓯᐙᒡ ᐊᑮᕽ᙮ ᑲᑭᓇ ᑳᑕᓶᐙᓇᑭᓈᑯᓯᐙᒡ, ᒥᓯᐌ ᑲᔦ ᑳᐅᑕᑳᓀᓯᐙᒡ, ᑲᑭᓇ ᑲᔦ ᑳᑕᓱᐯᐸᑳᓂᑮᔗᐙᒡ, ᑲᑭᓇ ᑲᔦ ᐯᐸᑳᓐ ᑳᐅᒋᑎᐯᑖᑯᓯᐙᒡ ᑕᐐᑕᒪᐙᐗᒃ᙮

14:7b.REV.014.007 ᒦᔥ ᐃᐌ ᐁᑭᔒᐌᒡ: ᑯᑖᓀᓂᒥᒃ ᑭᔐᒪᓂᑑ, ᑭᒋ ᐃᓇᑭᒥᒃ! ᐋᔕ ᐅᒋᒋᓭᓂ ᑳᐐᑎᐹᑯᓂᐌᒡ᙮ ᐅᒋᒌᑾᓃᑕᐎᒃ ᐊᐊᐌ ᑳᑮᐅᔑᑑᒡ ᑮᔑᒃ, ᐊᑭ ᑲᔦ, ᑭᒋᑲᒻ ᑲᔦ, ᑳᐃᔑᒨᑭᒋᐗᓂᓂᑭᓐ ᑲᔦ, ᑮᐃᑭᑐ᙮

14:8b.REV.014.008 ᑯᑕᒃ ᒦᓇᐙ ᐯᔑᒃ ᐁᒐᓬ ᓈᐗᓐ ᑮᐱᒥᐊᔮ ᐁᒪᑗᐃᑭᑐᒡ: ᓂᔑᐗᓈᑕᓐ ᐃᐌ ᐹᐱᓬᐊᓐ ! ᐊᒦ ᐃ ᐐᑫ ᑮᓂᔑᐗᓈᑕᒃ ᐃᐌ ᑳᑭᒋ ᐃᓀᑖᑾᑭᐸᓐ ᐆᑌᓇ! ᐋᓃᔥ ᐅᐅᐌ ᐃᓀᑖᑾᓐ ᐃᐃ ᐆᑌᓇ, ᐁᐱᔑᒀᑎᓯᒡ ᐃᑴ ᐁᑮᒦᓈᒡ ᑲᑭᓇ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ ᐅᔔᒥᓈᐴᒻ ᒋᒥᓂᑴᓂᒡ᙮ ᒦ ᐃᐌ ᐁᑮᑲᔥᑭᐋᒡ ᐅᒪᒋᒥᓴᐌᑖᓱᐎᓐ ᒋᑑᑕᒥᓂᒡ, ᑮᐃᑭᑐ ᐊᐊ ᐁᒐᓬ᙮

14:9b.REV.014.009 ᑫᔮᐱ ᑕᔥ ᑯᑕᒃ ᐁᒐᓬ ᐅᑮᓈᐗᓅᓂᔕᐙᐞ ᐃᐃ ᓃᔑᓐ ᑳᑮᐱᐱᒥᐊᔮᓂᒡ, ᐁᑮᑭᔒᐌᒡ: ᑮᔥᐱᓐ ᐊᐎᔭ ᐅᒋᒌᑾᓃᑕᐙᒡ ᐃᓂ ᐱᑾᒋᐊᔭᐋᐎᔕᓐ ᑲᔦ ᐅᒪᓂᑑᑫᐎᑰᒋᑲᓂᓂ, ᑲᔦ ᐅᒋᑭᑭᓇᐙᒋᐃᓐᒡ ᐃᐃ ᐅᔅᑲᑎᑯᕽ ᑯᒫ ᐅᓂᒌᕽ,

14:10b.REV.014.010 ᐅᑯ ᑳᐃᔑᒋᑫᐙᒡ ᒦᐗᑯᑯ ᑫᐃᔑᒥᓂᑴᐙᒡ ᑭᔐᒪᓂᑑᓐ ᐅᔔᒥᓈᐴᒥᓂ ᒫᐗᒡ ᐁᒪᔥᑲᐙᑲᒥᓂᓂᒃ, ᑳᑮᒨᔥᑭᓀᐸᑑᓂᒡ ᐅᒥᓇᐃᐌᐎ ᒥᓂᒀᑲᓂᓃᕽ᙮ ᒦᐗᑯᑯ ᑫᐙᐸᑕᒧᐙᒡ ᑭᔐᒪᓂᑑᓐ ᐅᓂᔥᑳᑎᓯᐎᓂᓂ ᒫᐗᒡ ᐁᒪᔥᑲᐌᑖᑾᓂᓂᒃ, ᐗᐐᑫ ᐁᐐᐸᑕᑯᔥᑳᑯᐙᒡ, ᐁᐐᐃᔑᑎᐸᐊᒫᑯᐙᒡ ᐅᑎᔑᒋᑫᐎᓂᐙᓐ᙮ ᒦ ᐃᒫ ᑕᐃᔑᑲᒀᑕᑭᐋᐗᒃ ᐃᐃᒫ ᐃᔥᑯᑌᕽ ᑲᔦ ᑳᑕᔑᓂᑭᓱᒡ ᑎᓄ ᐊ ᐊᓯᓐ ᑳᐐᓴᑳᐸᓱᐌᒡ ᑮᒑᑭᓱᒡ᙮ ᑕᐃᔑᑲᒀᑕᑭᐋᐗᒃ ᐃᐃᒫ ᐁᐙᐸᒥᑯᐙᒡ ᑳᑾᔭᒀᑎᓯᓂᒡ ᐁᒐᓬᐊᐞ, ᐃᓂ ᑲᔦ ᒫᓇᒑᓂᔐᓴᓐ᙮

14:11b.REV.014.011 ᒨᔕᒃ ᐊᐸᓀ ᐱᔑᔑᒃ ᑕᐅᒋᐊᒀᐸᑌ ᐃᐃᒫ ᑳᑕᔑᑲᒀᑕᑭᐃᑣ᙮ ᑳᐐᓐ ᐐᑳ ᑕᐋᑌᐊᔮᓰᐗᒃ᙮ ᐁᑮᔑᑲᓂᓂᒃ ᑲᔦ ᐁᑎᐱᑲᓂᓂᒃ ᑕᑲᒀᑕᑭᐋᐗᒃ ᐊᐌᓀᓐ ᓴ ᑯ ᑫᐅᒋᒌᑾᓃᑕᐙᐙᒡ ᐃᓂ ᐱᑾᒋᐊᔭᐋᐎᔕᓐ, ᐃᓂ ᑲᔦ ᐅᒪᓂᑑᑳᓂᑰᒋᑲᓂᓂ, ᐊᐎᔭ ᑲᔦ ᐃᔑᑭᑭᓇᐙᒋᐃᓐᒡ ᐅᐐᓱᐎᓂᓂ᙮

14:12b.REV.014.012 ᒦ ᐅᐌ ᐁᔑᐊᑕᐌᑖᑾᒃ ᒋᒪᔥᑲᐌᑕᒥᓂᒡ ᑭᔐᒪᓂᑑ ᐅᑾᔭᒀᑎᓰᒪᐞ, ᐊᐌᓀᓇᒃ ᓴ ᑯ ᑳᑲᓇᐌᑕᒧᐙᒡ ᑭᔐᒪᓂᑑᓐ ᐅᑑᓇᔓᐌᐎᓂᓂ ᑲᔦ ᑳᑲᐯᑌᐺᑕᐙᐙᒡ ᐃᓂ ᒋᓴᓲᓐ᙮

14:13b.REV.014.013 ᓂᑮᓅᑖᓐ ᐃᓉᐎᓐ ᑭᒋᑮᔑᑯᕽ ᐅᒋ ᐁᑲᓅᓂᑯᔮᓐ: ᐅᔑᐲᐊᓐ ᐅᐅ: ᓅᑯᒻ ᐅᒫ ᐊᑯᓈᒃ ᑕᔕᐌᑖᑯᓯᐗᒃ ᐃᑭ ᑫᓂᐳᐙᒡ ᒣᒀ ᐁᐱᒥᐐᒌᐙᐙᒡ ᐃᓂ ᑳᑎᐯᒋᑫᓂᒡ, ᓂᑮᐃᑯᓐ᙮ ᐁᐊᐞ, ᒦᓇᑫ, ᐃᔑᓇᑯᑕᒨᓐ ᑭᔐᒪᓂᑑ ᐅᑕᒑᑾᓐ᙮ ᐅᑲᒀᑕᑲᓄᑮᐎᓂᐙᕽ ᑕᐅᒋᐊᓉᐱᐗᒃ᙮ ᐅᑲᒥᓄᐐᒌᐎᑯᓈᐙᓐ ᑕᔥ ᐃᐃᐌᓂ ᑳᐅᒋᑲᔥᑭᑑᐙᒡ ᐅᑕᓄᑮᐎᓂᐙᕽ, ᐃᑭᑐᐗᓐ᙮

14:14b.REV.014.014 ᒦᑕᔥ ᓂᑮᐃᓈᑉ, ᓂᑮᐙᐸᑖᓐ ᐃᑕᔥ ᐁᐙᓯᑌᒃ ᐗᑶ, ᐃᒫᔥ ᐗᑭᒋᐗᑶ ᐊᐎᔭ ᐁᓇᒪᑕᐱᒡ ᐃᓂᓃᕽ ᑳᐃᔑᓈᑯᓯᒡ, ᐅᓵᐎ ᔔᓂᔮᐎ ᐸᓯᑴᐱᓱᓐ ᐁᑭᑭᔥᑲᕽ, ᑲᔦ ᐁᑕᑯᓇᕽ ᐁᑳᔖᓂᒃ ᑮᔥᑭᔑᑲᓐ᙮

14:15b.REV.014.015 ᒦᓇᐙ ᑯᑕᒃ ᐁᒐᓬ ᑮᐱᐅᒋᓵᑲᐊᒻ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐅᒋ ᐁᑮᑭᔒᐌᔖᑯᐙᓈᒡ ᐃᓂ ᐗᑸᕽ ᑳᓇᒪᑕᐱᓂᒡ: ᐊᐤ ᐋᐸᒋᑑᓐ ᑭᑮᔥᑭᔑᑲᓐ, ᐊᐎᒪᓂᔑᑫᓐ! ᐋᔕ ᐅᒋᒋᓭ ᒋᒪᓂᔑᑫᕽ, ᐋᔕ ᑮᔑᑭᓐ ᐃᐃᒫ ᑳᐅᒋᓂᑖᐎᑭᒃ ᐊᑮᕽ!

14:16b.REV.014.016 ᒦᑕᔥ ᐊᐊᐌ ᐗᑸᕽ ᑳᓇᒪᑕᐱᒡ ᐅᑮᐃᔑᐌᐱᓈᓐ ᐅᑮᔥᑭᔑᑲᓐ, ᐁᑮᒪᓂᔑᑫᒡ ᐊᑮᕽ᙮ ᒦ ᐃᐌ ᐁᑮᑮᔑᒪᓂᔑᑳᑌᒃ ᐃᐌᓂ ᐊᑮᕽ ᑳᑭᑎᑳᒋᑳᑌᓂᒃ᙮

14:17b.REV.014.017 ᒦᓇᐙ ᑯᑕᒃ ᐁᒐᓬ ᑮᐱᐅᒋᓵᑲᐊᒻ ᐃᒫ ᑭᒋᐊᓇᒥᐁᐎᑲᒥᑯᕽ ᑭᒋᑮᔑᑯᕽ ᑳᐊᔮᓂᒃ, ᒦ ᐊᐌ ᑲᔦ ᐐᓐ ᐁᐊᔮᒡ ᑳᑳᔖᐱᑲᓂᓂᒃ ᑮᔥᑭᔑᑲᓐ᙮

14:18b.REV.014.018 ᒦᓇᐙ ᑕᔥ ᐯᔑᒃ ᐁᒐᓬ ᑮᐱᐅᒌ ᐃᐃᒫ ᐸᑭᑎᓈᓱᐎᓈᐱᑯᕽ ᑳᑕᔑᑎᐯᑕᕽ ᐃᐃ ᐃᔥᑯᑌᓂ, ᐁᑮᑭᔒᐌᔖᑯᐙᓈᒡ ᐃᓂ ᑳᑳᔖᓂᒃ ᐅᑮᔥᑭᔑᑲᓂᓂ: ᐃᔑᐌᐱᓇᓐ ᑭᑮᔥᑭᔑᑲᓐ, ᒪᓂᔓ ᐃᑭ ᔔᒥᓇᒃ ᑳᑕᔑᓂᑖᐎᑭᐙᒡ ᔔᒥᓂᑭᑎᑫᐎᓂᕽ ᐊᑮᕽ, ᐋᔕ ᑮᔑᐊᑎᓱᐗᒃ!

14:19b.REV.014.019 ᐊᒦ ᐃᐌ ᑳᐃᔑᐌᐱᓇᕽ ᐅᑮᔥᑭᔑᑲᓐ ᐊᑮᕽ ᐁᒪᓂᔣᒡ ᐃᐃ ᔔᒥᓇᐞ, ᒦᔥ ᐁᑮᐃᔑᐌᐱᓇᒡ ᐃᐃᒫ ᐃᐃ ᔔᒥᓇᐞ ᒋᒫᒫᑯᔥᑭᑲᓂᐎᓂᒡ ᐁᔔᒥᓈᐳᑳᑳᓂᐗᓂᓂᒃ, ᒦ ᐃᐌᓂ ᐁᓀᑖᑾᓂᓂᒃ ᑭᔐᒪᓂᑑ ᐅᑭᒋᓂᔥᑳᑎᓯᐎᓐ᙮

14:20b.REV.014.020 ᒦ ᐃᒫ ᐊᑾᒌᕽ ᐆᑌᓈᕽ ᑳᐃᔑᐊᔮᒡ ᔔᒥᓈᐴᑳᓐ ᑮᑕᔑᒫᒫᑯᔥᑭᑲᓂᐎᐗᒃ ᐃᑭ ᔔᒥᓇᒃ᙮ ᐊᒦ ᐃᒫ ᒫᑯᔥᑭᑲᓂᕽ ᑮᐅᒌ ᒥᔅᑶ ᐁᑭᒋᐅᒋᒋᐗᕽ, ᓃᔣᒃ 200 ᑕᓱᑎᐸᐃᑲᓐ ᐁᑮᐃᔑᒋᐗᕽ, ᓈᓄᒥᓯᑦ ᐁᑮᐊᐲᑖᔭᐙᒃ ᒥᔅᑶ᙮

15

15:1b.REV.015.001 ᒦᓇᐙ ᐯᔑᒃ ᓂᑮᐙᐸᑖᓐ ᐃᐃᐌ ᐁᐃᔑᒫᒪᑳᓯᓈᑾᒃ ᑭᒋᑮᔑᑯᕽ ᐁᐃᔑᑭᒋ ᐃᓀᑖᑾᒃ ᑲᔦ ᐁᐃᔑᒫᒪᑳᑌᑖᑾᒃ, ᓃᔣᓱ 7 ᐃᑭ ᐁᒐᓬᐊᒃ ᐁᐊᔮᐙᒡ ᐁᓃᔣᒋᓂᓂᑭᓐ ᑲᒀᑕᑭᐃᐌᐎᓇᓐ, ᐊᒦᐗᓄᓄ ᐃᔥᒀᒡ ᑫᓂᐊᔮᑭᓐ᙮ ᐋᓃᔥ ᐊᒦ ᐃᐌ ᑫᐃᔑ ᐃᔥᒀᐙᐸᑕᐃᐌᒡ ᑭᔐᒪᓂᑑ ᐅᓂᔥᑳᑎᓯᐎᓐ᙮

15:2b.REV.015.002 ᓂᑮᐙᐸᑖᓐ ᐱᓵᓂᑯ ᐁᐙᓭᒋᑲᓈᐱᑯᐗᕽ ᓵᑲᐃᑲᓐ ᐁᐊᔮᒃ ᐁᑭᓂᑲᐎᓈᑾᒃ ᐃᔥᑯᑌ᙮ ᐊᐎᔭᒃ ᐃᑕᔥ ᓂᑮᐙᐸᒫᒃ ᒌᑲᔭᐄ ᐙᓭᒋᑲᓈᐱᑯᓵᑲᐃᑲᓃᕽ ᐁᓃᐸᐎᐙᒡ᙮ ᒦᐗᑯᑯ ᑳᑮᔖᑰᒋᐋᐙᒡ ᐃᓂ ᐱᑾᒋᐊᔭᐋᐎᔕᓐ, ᐅᒪᓂᑑᑳᓂᑰᒋᑲᓂᓂ ᑲᔦ, ᐁᑮᔖᑰᒋᑕᒪᐙᐙᒡ ᑲᔦ ᐅᑕᑭᑖᓱᐎᓂᓂ ᑳᐅᒋᑭᑫᑖᑾᓂᓂᒃ ᐅᐐᓱᐎᓂᓂ᙮ ᐅᑯ ᐃᒫ ᑳᓃᐸᐎᐙᒡ ᐅᑮᑕᑯᓈᐙᐞ ᒪᑗᔮᐲᑭᐱᒋᑲᓇᐞ ᑭᔐᒪᓂᑑᓐ ᑳᑮᒦᓂᑯᐙᒡ᙮

15:3b.REV.015.003 ᑮᐃᔑᓂᑲᒧᐗᒃ ᐃᑕᔥ ᑳᑮᐃᔑᓂᑲᒧᓂᒡ ᒨᓯᓲᓐ ᑭᔐᒪᓂᑑ ᐅᑕᓄᑮᐋᑲᓇᓐ, ᐅᓂᑲᒧᓂᓂ ᑲᔦ ᐃᓂ ᒫᓇᒑᓂᔐᓴᓐ᙮ ᒦ ᐅᐌ ᑳᐃᔑᓂᑲᒧᐙᒡ: ᑮᓐ ᑳᑎᐯᒋᑫᔭᓐ ᑫᔐᒪᓂᑑᐎᔭᓐ, ᑮᓐ ᒥᔮᒪᐎᒪᔥᑲᐌᑖᑯᓯᔭᓐ! ᑭᒋ ᐃᓀᑖᑾᓅᓐ ᒫᒪᑳᑌᑖᑾᓅᓐ ᑲᔦ ᑭᑎᔑᒋᑫᐎᓇᓐ! ᑾᔭᑾᓐ ᑲᔦ ᑌᐺᐎᓂᐗᓐ ᑭᑎᔑᐱᒫᑎᓯᐎᓐ, ᑮᓐ ᑳᑭᒋᐅᑑᑭᒫᒥᐙᒡ ᐃᑭ ᒥᓯᐌᑲᒥᒃ ᑳᐋᔫᒋᑎᐯᑖᑯᓯᐙᒡ᙮

15:4b.REV.015.004 ᐊᐌᓀᔥ ᐁᑳ ᑫᑯᑖᓀᓂᒥᓯᓄᒃ, ᑮᓐ ᑌᐯᒋᑫᔭᓐ? ᐊᐌᓀᓐ ᑫᑭᒋ ᐃᓇᑭᑕᓯᒃ ᑭᐐᓱᐎᓐ? ᐋᓃᔥ ᑮᓐ ᐁᑕ ᒥᓯᐌ ᑭᑾᔭᒀᑎᓯᐗᑫᑖᑯᔅ᙮ ᑲᑭᓇ ᐱᑯ ᐊᐎᔭᒃ ᐁᑕᓶᐙᓇᑭᓯᐙᒡ ᑭᑲᐱᐊᑕᐅᒋᒌᑾᓇᐲᑖᑰᒃ, ᐋᓃᔥ ᑳᑾᔭᑾᑭᓐ ᑭᑎᔑᒋᑫᐎᓇᓐ ᒥᓯᐌ ᐙᐸᒋᑳᑌᐗᓐ, ᑮᐃᓇᐊᒨᒃ᙮

15:5b.REV.015.005 ᒦᓇᐙ ᑕᔥ ᓈᑫ ᓂᑮᐙᐸᑖᓐ ᐁᐹᑭᓯᕽ ᑭᒋᐊᓇᒥᐁᐎᑲᒥᒃ ᑭᒋᑮᔑᑯᕽ, ᒦ ᐃᐌ ᑭᒋᐸᒀᓀᑲᒥᒃ ᑭᔐᒪᓂᑑ ᑫᐅᒋᒫᒥᑲᐎᓄᑖᑯᒡ ᐁᐐᒌᐙᒡ ᐅᐱᒫᑎᓰᒪᐞ᙮

15:6b.REV.015.006 ᒦᑕᔥ ᐃᒫ ᑭᒋᐊᓇᒥᐁᐎᑲᒥᑯᕽ ᐁᐱᓵᑲᐊᒧᐙᒡ ᐃᑭ ᓃᔣᓱ 7 ᐁᒐᓬᐊᒃ, ᒦᐗᑯᑯ ᓃᔣᓱ ᑲᒀᑕᑭᐃᐌᐎᓇᓐ ᑳᐊᔮᐙᒡ᙮ ᑮᐙᐱᔥᑳᓂᐗᓐ ᐅᑭᑭᔥᑭᑲᓂᐙᓐ ᑲᔦ ᑮᐙᓯᑌᓂᐗᓐ᙮ ᔑᑾ ᑮᑭᒋᐱᓱᐗᒃ ᐅᑳᑭᑲᓂᐙᕽ ᐁᐅᓵᐎ ᔔᓂᔮᐎᓈᑾᓂᓂᑭᓐ ᐅᑳᑭᑲᓀᐱᓱᓇᓐ᙮

15:7b.REV.015.007 ᐯᔑᒃ ᐃᑕᔥ ᐃᑭ ᓃᐎᓐ ᐅᐱᒫᑎᓰᒃ ᐯᐯᔑᒃ ᐅᑮᒦᓈᐞ ᐃᓂ ᑳᓃᔣᒋᓂᒡ ᐁᒐᓬᐊᐞ, ᐃᓂ ᓃᔣᓱ ᐅᓵᐎ ᔔᓂᔮᐎ ᑭᒋᐅᓈᑲᓇᓐ ᐁᒨᔥᑭᓀᓂᒃ ᐅᓂᔥᑳᑎᓯᐎᓐ ᑭᔐᒪᓂᑑ, ᐊᐊ ᑳᐱᒫᑎᓯᒡ ᐱᔑᔑᒃ ᐊᐸᓀ ᐱᑯ᙮

15:8b.REV.015.008 ᐃᐃᒫ ᑭᒋᐊᓇᒥᐁᐎᑲᒥᑯᕽ ᑮᑕᔑᒨᔥᑭᓀᔮᐸᑌ᙮ ᑮᐅᒌ ᐃᒫ ᐊᒀᐸᑌ ᐅᐙᓭᔮᐎᓂᕽ ᑲᔦ ᐅᑭᒋᒪᔥᑲᐎᓰᐎᓂᕽ ᑭᔐᒪᓂᑑ ᐃᐃᒫ ᑳᐊᔮᓂᒃ᙮ ᑳᐐᓐ ᐃᑕᔥ ᐊᐎᔭ ᐅᑮᑲᔥᑭᑑᓰᓐ ᒋᐲᑎᑫᒡ ᑭᒋᐊᓇᒥᐁᐎᑲᒥᑯᕽ, ᐹᓂᒫ ᑯ ᑮᐴᓂᓭᓂᑭᓐ ᐃᓂ ᓃᔣᓱ ᑲᒀᑕᑭᐃᐌᐎᓇᓐ ᑳᐱᑕᑯᓇᒧᐙᒡ ᐃᑭ ᑳᓃᔣᒋᐙᒡ ᐁᒐᓬᐊᒃ᙮

16

16:1b.REV.016.001 ᓂᑮᓅᑕᐙ ᑕᔥ ᐊᐎᔭ ᐁᑭᒋᓅᑖᑯᓯᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐁᐅᒋᑮᑭᑐᒡ, ᐁᑲᓅᓈᒡ ᐅᓄ ᓃᔣᓱ 7 ᐁᒐᓬᐊᐞ: ᐊᓂᒫᒑᒃ, ᐊᐎᓰᑭᓇᒧᒃ ᐊᑮᕽ ᐃᐌ ᑭᔐᒪᓂᑑ ᐅᓂᔥᑳᑎᓯᐎᓐ ᐃᒫ ᑳᐃᔑᐊᑌᓂᒃ ᑳᓃᔡᒋᑭᓐ ᑭᒋᐅᓈᑲᓂᕽ, ᐃᓈᐗᐞ᙮

16:2b.REV.016.002 ᐊᒦᑕᔥ ᑳᐃᔑᒫᒑᒡ ᐊᐊ ᓂᑕᒻ ᐁᒐᓬ ᐁᑮᐊᐎᓰᑭᓇᕽ ᐅᑭᒋᐅᓈᑲᓂᕽ ᑳᐊᑌᓂᒃ, ᐁᑮᐃᔑᐸᑲᒥᓭᓂᒃ ᐊᑮᕽ᙮ ᒦᑕᔥ ᐃᐃᒫ ᑳᐅᒋᑭᒋᐅᒥᑮᐎᓈᓂᐗᕽ ᐊᑮᕽ ᐁᒫᓈᑕᓂᓂᒃ, ᐁᐐᓴᑫᑖᑾᓂᓂᒃ ᑲᔦ᙮ ᑕᓯᓐ ᐃᑯ ᐊᐎᔭᒃ ᑮᐃᔑᒫᑖᐱᓀᐗᒃ ᑳᑮᐅᒋᑭᑭᓇᐙᒋᐲᐃᑳᓱᐙᒡ ᐱᑾᒋᐊᔭᐋᐎᔕᓐ ᒋᑎᐯᓂᒥᑯᐙᒡ, ᑲᔦ ᑳᑮᐅᒋᒌᑾᓃᑕᒪᐙᐙᒡ ᐅᒪᓂᑑᑳᓂᑰᒋᑲᓂᓂ᙮

16:3b.REV.016.003 ᒦᓇᐙ ᐊ ᑯᑕᒃ ᐁᒐᓬ ᐅᑮᐊᓂᓰᑭᓈᓐ ᐃᐃᒫ ᑳᑮᐊᑌᓂᒃ ᐅᑭᒋᐅᓈᑲᓂᕽ ᐁᑮᐃᔑᓰᑭᓭᓂᒃ ᑭᒋᑲᒦᕽ᙮ ᒥᔅᑸᕽ ᐃᑕᔥ ᑮᐃᓈᑲᒥᓭ ᐃ ᓂᐱ᙮ ᑖᐱᔥᑰ ᐊᐎᔭ ᑳᓂᐳᒡ ᑳᐃᔑᓈᑾᓂᓂᒃ ᐅᒥᔅᑶ ᑮᐃᓈᑲᒥᓭ᙮ ᑲᑭᓇ ᑫᑰᓐ ᐃᐃᒫ ᑭᒋᑲᒦᕽ ᑳᐊᔮᒃ ᑮᓂᐴᒪᑲᓐ᙮

16:4b.REV.016.004 ᒦᓇᐙ ᐊ ᑯᑕᒃ ᐁᒐᓬ ᑮᒫᒑ, ᒦ ᐊᐌ ᓂᓯᓐ 3 ᑳᐃᓇᑭᒋᑳᓱᒡ᙮ ᐅᑮᓰᑭᓈᓐ ᐃᑕᔥ ᒦᓇᐙ ᐅᑭᒋᐅᓈᑲᓂᕽ ᑳᐊᑌᓂᒃ, ᐃᐃᒫ ᑕᔥ ᐁᑮᓰᑭᓭᓂᒃ ᑲᑭᓇ ᓰᐲᕽ ᑲᔦ ᑳᐃᔑᒨᑭᒋᐗᓂᓂᑭᓐ᙮ ᑮᒥᔅᑸᐙᑲᒥᓭᐗᓐ ᐃᑕᔥ᙮

16:5b.REV.016.005 ᓂᑮᓅᑕᐙ ᐊᐌ ᐁᒐᓬ ᑳᑎᐯᑕᕽ ᐃᐃᐌ ᑲᑭᓇ ᓂᐱ ᐁᑲᑭᑐᒡ: ᑮᓐ ᒥᓯᐌ ᑳᑾᔭᒀᑎᓰᐌᑖᑯᓯᔭᓐ! ᑮᐃᑭᑐ᙮ ᑮᓐ ᐅᐅᒫ ᓅᑯᒻ ᑳᐊᔮᔭᓐ ᑲᔦ ᒣᐎᔕ ᐃᑯ ᑳᐱᐅᒋᐊᔮᔭᓐ! ᑾᔭᑾᓅᓐ ᐅᓄ ᑳᐱᐊᔨᓈᑯᓂᑫᔭᓐ!

16:6b.REV.016.006 ᐅᑯ ᐯᒫᑎᓯᐙᒡ ᐅᑮᓰᑭᓇᒪᐙᐙᐞ ᐅᒥᔅᑸᒥᓂ ᑭᐱᒫᑎᓰᒪᐞ ᑲᔦ ᐅᑎᐹᒋᒨᐞ ᑳᑮᑲᓅᑕᒪᐎᒀ᙮ ᑮᓐ ᐃᑕᔥ ᑭᑮᒥᓇᐋᒃ ᒥᔅᑶ᙮ ᒦᔥ ᐃᐃᐌᓂ ᑫᔥᑭᑕᒫᓱᐙᒡ, ᑮᐃᑭᑐ᙮

16:7b.REV.016.007 ᓂᑮᓅᑖᓐ ᐃᑕᔥ ᐸᑭᑎᓈᓱᐎᓈᐱᑯᕽ ᐃᓉᐎᓐ ᐁᐃᑭᑑᒪᑲᒃ: ᐁᐊᐞ ᒦ ᓇᑫ, ᑌᐯᒋᑫᔭᓐ ᑭᔐᒪᓂᑑ ᑳᒫᒪᐌᑖᑯᓯᔭᓐ! ᑌᐺᐎᓂᐗᓅᓐ ᑲᔦ ᑾᔭᑾᓅᓐ ᑭᑎᓈᑯᓂᑫᐎᓇᓐ᙮

16:8b.REV.016.008 ᒦᔥ ᐊᐌ ᒦᓇᐙ ᑯᑕᒃ ᐁᒐᓬ ᑮᐊᓂᒫᒑ, ᒦ ᐊᐌ ᓃᐎᓐ ᐁᐃᓇᑭᒋᑳᓱᒡ᙮ ᐃᐃᒫᔥ ᑮᓯᓱᕽ ᐅᑮᓰᑭᓈᓐ ᐃᐌ ᐅᑭᒋᐅᓈᑲᓂᕽ ᑳᐊᑌᓂᒃ᙮ ᑮᐃᔑᒦᓂᑰᐎᓯ ᑕᔥ ᐊᐌ ᑮᓯᔅ ᐅᑎᔥᑯᑌᒥᕽ ᒋᐅᒋᒑᑭᔂᒡ ᐃᐃ ᐯᒫᑎᓯᓂᒡ᙮

16:9b.REV.016.009 ᐊᒦᑕᔥ ᑮᐅᒋᒑᑭᓱᐗᒃ ᒫᐗᒡ ᐁᑮᑭᒋᑭᔑᑌᒃ᙮ ᐅᑮᒪᒪᒋᑮᔣᓄᑕᒪᐙᐙᓐ ᐅᐐᓱᐎᓂᓂ ᑭᔐᒪᓂᑑᓐ ᑳᑎᐯᑕᒥᓂᒡ ᐅᓄ ᑲᒀᑕᑭᐃᐌᐎᓇᓐ, ᑲᔦ ᐋᒋᑯ ᑳᐐᓐ ᐅᑮᐐᐴᓂᑑᓰᓈᐙ ᐅᒪᒋᑑᑕᒧᐎᓂᐙᓐ᙮ ᑳᐐᓐ ᑲᔦ ᐅᑮᐐᑭᒋ ᐃᓀᓂᒫᓯᐙᐙᓐ ᑭᔐᒪᓂᑑᓐ᙮

16:10b.REV.016.010 ᒦᑕᔥ ᒦᓇᐙ ᑯᑕᒃ ᐁᒐᓬ ᑮᐊᓂᒫᒑ, ᒦ ᐊᐌ ᓈᓇᓐ ᑳᐃᓇᑭᒋᑳᓱᒡ᙮ ᐅᑮᓰᑭᓈᓐ ᐃᐃᐌᓂ ᐅᑭᒋᐅᓈᑲᓂᕽ ᑳᐊᑌᓂᒃ, ᐁᑮᐃᔑᐸᑲᒥᓭᓂᒃ ᐅᑭᒋᐊᐱᐎᓂᓃᕽ ᐃᓂ ᐱᑾᒋᐊᔭᐋᐎᔕᓐ᙮ ᐃᐃᒫ ᑕᔥ ᑮᐗᓂᑎᐱᑭᓭᓂ ᐅᑎᐯᒋᑫᐎᓂᓃᕽ᙮ ᐃᑭᐌᓂᐗᒃ ᐃᑕᔥ ᐃᐃᒫ ᑳᐊᔮᐙᒡ ᐅᑮᒫᒫᑾᑖᓈᐙᓐ ᐅᑌᓇᓂᐎᐙᓐ ᐁᐊᐲᒋᐐᓴᑫᑕᒧᐙᒡ᙮

16:11b.REV.016.011 ᐅᑮᒪᒋᑮᔣᓈᐙᓐ ᐃᑕᔥ ᑭᔐᒪᓂᑑᓐ ᑭᒋᑮᔑᑯᕽ ᑳᐊᔮᓂᒡ ᐅᐐᓴᑫᑕᒧᐎᓂᐙᓐ ᐅᒋ, ᐃᐌ ᑲᔦ ᐅᑑᒥᑮᐙᐱᓀᐎᓂᐙᓐ ᑳᑮᐊᔮᐙᒡ᙮ ᔖᑰᒡ ᑫᔮᐱ ᑳᐐᓐ ᐅᑮᐐᐴᓂᑑᓰᓈᐙᓐ ᐅᒪᒋᑑᑕᒧᐎᓂᐙᓐ᙮

16:12b.REV.016.012 ᒦᑕᔥ ᑮᐊᓂᒫᒑ ᐁᒐᓬ ᐃᑯᑣᓱ ᑳᐃᓇᑭᒋᑳᓱᒡ᙮ ᐃᐃ ᑕᔥ ᐅᑐᓈᑲᓂᕽ ᑳᐊᑌᓂᒃ ᐅᑮᓰᑭᓈᓐ ᐃᐃᒫ ᑭᒋᓰᐲᕽ ᐃᔫᐸᕒᐁᑏᔅ ᑳᐃᒋᑳᑌᒃ᙮ ᒦᑕᔥ ᑳᐃᔑᐹᑯᓭᒃ ᐃᐃ ᓰᐱ, ᐁᑮᐃᔑᑾᔮᒋᒋᑳᑌᒃ ᑫᐃᔑᐋᔕᐎᔥᑳᐙᒡ ᐃᑭ ᑭᒋᐅᑭᒫᒃ ᐙᐸᓄᕽ ᑫᐱᐅᒌᐙᒡ᙮

16:13b.REV.016.013 ᓂᑮᐙᐸᒫᒃ ᐃᑕᔥ ᓂᓯᓐ 3 ᑳᐐᓈᑎᓯᐙᒡ ᐊᒑᑾᒃ ᑖᐱᔥᑰ ᐅᒪᑲᑮᕽ ᑳᐃᔑᓈᑯᓯᐙᒡ᙮ ᐃᐃᒫ ᐅᑑᓂᓃᕽ ᐅᒋᓵᑲᐊᒨᒃ ᑭᒋᐅᑳᑏᑭᓀᐱᑰᓐ, ᐃᓂ ᑲᔦ ᐱᑾᒋᐊᔭᐋᐎᔕᓐ, ᐃᓂ ᑕᔥ ᑲᔦ ᑳᑲᓅᑕᒫᑯᓂᒡ ᑳᐗᔦᔑᑫᓂᒡ᙮

16:14b.REV.016.014 ᒦᐗᑯᑯ ᒪᒋᐊᒑᑾᒃ ᑎᓄ ᑳᓂᑖᒫᒪᑳᒋᒋᑫᐙᒡ᙮ ᐅᑯᐌᓂᐗᒃ ᐃᑕᔥ ᐊᓂᒫᒑᐗᒃ ᐁᓈᓯᑲᐙᐙᒡ ᑲᑭᓇ ᑭᒋᐅᑭᒫᐞ ᐊᑮᕽ ᒥᓯᐌᑲᒥᒃ ᑳᐊᔮᓂᒡ, ᐁᐊᑕᒫᐗᑑᓈᐙᒡ ᒋᐃᔖᓂᒡ ᑫᐃᔑᒦᑳᑎᓈᓂᐗᓂᓂᒃ ᐊᐲ ᑫᐅᑭᒋᑮᔑᑳᒥᒡ ᐊᐊᐌ ᒫᐗᒡ ᒣᔥᑲᐌᑖᑯᓯᒡ ᑭᔐᒪᓂᑑ᙮

16:15b.REV.016.015 ᐃᓇᔥᑫ ᐱᓯᑕᓐ! ᓂᑲᐱᑯᔥᑯᑕᑯᔑᓐ ᑖᐱᔥᑰ ᑭᒨᑎᔥᒃ ᐁᑭᑫᑖᑯᓯᓯᒃ ᐁᐐᐱᒥᑕᑶᔑᕽ᙮ ᑕᒥᓉᑕᒻ ᐊᐊᐌ ᑳᐊᔕᐙᐱᒡ, ᐌᐌᓂ ᑲᔦ ᑳᑲᓇᐌᑕᕽ ᐅᑭᑭᔥᑭᑲᓇᓐ ᐁᑳ ᒋᐙᓵᑯᓇᐌ ᐸᐹᒧᓭᓯᒃ, ᑳᐐᓐ ᑕᐊᑲᒋᓰ ᐁᐙᐸᒋᑲᓂᐎᒡ, ᐃᑭᑐ ᑳᑎᐯᒋᑫᒡ᙮

16:16b.REV.016.016 ᐃᑭ ᑕᔥ ᓂᓯᓐ 3 ᒪᒋᐊᒑᑾᒃ ᐆᑮᒫᐗᒋᐋᐙᐞ ᐃᓂ ᑭᒋᐅᑭᒫᐞ ᐃᐃᒫ ᐊᔮᐎᓂᕽ ᐋᕒᒪᑫᑕᓐ ᑳᐃᔑᓂᑳᑌᒃ ᐄᐸᕒᐆ ᐁᐃᔑᑮᔗᕽ᙮

16:17b.REV.016.017 ᒦᑕᔥ ᑮᐊᓂᒫᒑ ᐊᐌ ᐁᒐᓬ ᓃᔣᓱ 7 ᐁᑮᐃᓇᑭᒋᑳᓱᒡ᙮ ᐅᑮᓰᑭᓈᓐ ᐃᐃᐌ ᐅᑑᓈᑲᓂᕽ ᑳᐊᑌᓂᒃ, ᓀᐗᒋᑮᔑᑯᕽ ᐅᑮᐃᔑᓰᑭᓈᓐ᙮ ᑭᒋ ᐃᓉᐎᓐ ᐃᑕᔥ ᐃᐃᒫ ᑮᐅᒋᓅᑖᑾᓐ ᑭᒋᐊᐱᐎᓂᕽ ᑭᒋᐊᓇᒥᐁᐎᑲᒥᑯᕽ ᑳᐊᔮᒃ᙮ ᒦ ᐅᐌ ᑳᐃᑭᑑᒪᑲᒃ: ᐋᔕ ᑮᑮᔑᒋᑳᑌ!

16:18b.REV.016.018 ᑮᐙᐙᑌᓭ, ᑮᐱᑎᑯᓅᑖᑾᓐ, ᐱᓀᓯᐗᒃ ᑲᔦ ᑮᓅᑖᑯᓯᐗᒃ᙮ ᑲᔦ ᑮᐗᐙᑲᐎᓭ ᐃ ᐊᑭ, ᒦ ᐃᐌ ᑳᐊᐲᒋᐗᐙᑲᐎᓭᒃ ᐁᑳ ᐐᑳ ᐁᐱᒥ ᐃᔑᐌᐸᓯᓄᒃ ᐊᐸᓂᑯ ᑳᐅᔑᐃᑣ ᐯᒫᑎᓯᐙᒡ᙮ ᒦ ᐅᐌ ᒫᐗᒡ ᐁᑮᑭᒋᒪᔥᑲᐌᑖᑾᒃ᙮

16:19b.REV.016.019 ᓃᔣ 3 ᐃᐌ ᑮᐃᔑᑖᑖᔥᑭᓭ ᐃ ᑭᒋᐆᑌᓇ, ᑮᓂᔑᐗᓈᑕᓅᓐ ᐃᑕᔥ ᑲᑭᓇ ᐆᑌᓇᐗᓐ ᑲᑭᓇ ᑳᐊᔭᔮᑭᓐ ᑎᐯᒋᑫᐎᓂᕽ ᐊᑮᕽ᙮ ᔑᑾ ᑭᔐᒪᓂᑑ ᐅᑮᒫᒥᑲᐎᓄᑖᓐ ᐹᐱᓬᐊᓐ, ᐃᐃᐌ ᑳᑭᒋ ᐃᓀᑖᑾᓂᓂᒃ ᐆᑌᓇ᙮ ᒫᓄ ᐅᑮᒥᓇᐋᓐ ᐃᐃᐌᓂ ᔔᒥᓈᐳ ᐅᒥᓂᒀᑲᓂᕽ ᒋᐅᒋᒥᓂᑴᓂᒡ, ᒦᐃᐌ ᐁᔑᑎᐸᐊᒪᐙᒡ ᐅᑭᒋᓂᔥᑳᑎᓯᐎᓐ ᐁᐋᐸᒋᑑᒡ᙮

16:20b.REV.016.020 ᑲᑭᓇ ᒥᓂᓴᓐ ᐃᑯᒋ ᐌᑎ ᑮᐃᔖᒪᑲᓅᓐ, ᑳᐐᓐ ᐃᑯᒋ ᐗᒌᓐ ᑮᓈᑾᓯᓅᓇᓐ᙮

16:21b.REV.016.021 ᑲᔦ ᐁᓭᓭᑲᒃ ᑮᐃᔑᐸᐹ ᐸᑭᔑᓅᒃ ᑭᒋᒥᑾᒦᒃ ᐁᒪᒫᑎᑐᐙᒡ, ᐋᓂᑕ ᐲᓂᔥ ᓂᑯᑣᒃ ᑮᐊᐲᑎᓂᑾᓂᐗᒃ ᐯᐯᔑᒃ ᑮᔑᑯᕽ ᐁᐱᐅᒋ ᐸᑭᔑᓄᐙᒡ ᐁᑮᒦᑯᔥᑲᐙᐙᒡ ᐃᐃ ᐯᒫᑎᓯᓂᒡ᙮ ᐋᒋᑯ ᐅᑮᒪᒪᒋᑮᔣᓈᐙᓐ ᑭᔐᒪᓂᑑᓐ ᐃᓂ ᐅᒋ ᐁᓭᓭᑲᓂᓂᒃ, ᐋᓃᔥ ᐐᑫ ᑮᑭᒋᐅᒑᓂᒣᑖᑾᓐ ᐅᐅ ᑲᒀᑕᑭᑑᐎᓐ᙮

17

17:1b.REV.017.001 ᑮᐱᑕᑯᔑᓐ ᐯᔑᒃ ᐃᑭᐌᓂᐗᒃ ᑳᓃᔣᒋᐙᒡ 7 ᐁᒐᓬᐊᒃ ᑳᐊᔮᐙᒡ ᑭᒋᐅᓈᑲᓇᓐ ᓃᔣᓱ, ᐁᐱᑲᓅᔑᒡ ᐊᐊ ᐁᒐᓬ: ᐲᔖᓐ ᐅᐅᒫ, ᑭᐐᐙᐸᑕᐃᓐ ᑫᐃᔑᑎᐹᑯᓂᑲᓂᐎᒡ ᐊᐊ ᐱᔑᒀᒋᑴ ᒥᓯᐌ ᑫᑫᒋᑲᓂᐎᒡ, ᐊᒦ ᐊᐌ ᐆᑌᓇ ᐯᔓ ᑳᐃᔑᐊᔮᒃ ᓃᐱᐗᐞ ᑳᐃᔑᓴᓰᐲᐗᕽ᙮

17:2b.REV.017.002 ᐃᑭ ᑭᒋᐅᑭᒫᒃ ᐊᑮᓂ ᑳᑎᐯᑕᒧᐙᒡ ᐅᑮᐐᒋᐱᔑᒀᑎᓰᒫᐙᓐ ᐃᓂ ᐃᑴᐗᓐ᙮ ᐃᑭᐌᓂᐗᒃ ᐃᑕᔥ ᐊᑮᕽ ᑳᐱᒫᑎᓯᐙᒡ ᐅᑮᑮᐗᔥᑴᐲᔥᑳᑯᓈᐙ ᐅᐱᔑᒀᑎᓯᐎᓂᓂ, ᐁᑮᒥᓂᒀᑕᒧᐙᒡ, ᒦ ᐃᐌ ᐁᐃᓀᑖᑾᓂᓂᒃ ᐅᐱᔑᒀᑎᓯᐎᓂᓂ ᐃᓂ ᐃᑴᐗᓐ ᐁᔔᒥᓈᐳᐗᓂᓂᒃ᙮

17:3b.REV.017.003 ᓂᑮᐐᒌᐎᒥᒃ ᐃᑕᔥ ᐃᓂ ᑭᔐᒪᓂᑑ ᐅᑕᒑᑾᓐ, ᐱᑾᑕᑲᒥᒃ ᐃᑕᔥ ᐁᑮᐃᔑᐎᔑᒡ ᐊᐊ ᐁᒐᓬ᙮ ᒦ ᐃᒫ ᓂᑮᐙᐸᒫ ᐃᑴ ᐁᑌᓴᐹᓈᒡ ᐁᒥᔅᑾᑐᐌᓂᒡ ᐱᑾᒋᐊᔭᐋᐎᔕᓐ, ᒥᓯᐌ ᐐᔭᐎᓃᕽ ᐁᐊᔮᓂᒃ ᒪᒋᐐᓱᐎᓇᓐ ᐁᔑᓂᔑᐹᐱᓄᑕᐎᓐᒡ ᑭᔐᒪᓂᑑ᙮ ᐊᐊ ᑕᔥ ᐱᑾᒋᐊᔭᐋᐎᔥ ᑮᓃᔣᒋᓂᓂᐗᓐ 7 ᐅᑎᒀᓇᓐ, ᑮᒥᑖᒋᐗᐞ ᑲᔦ ᐅᑌᔥᑲᓇᐞ᙮

17:4b.REV.017.004 ᐊᐊ ᑕᔥ ᐃᑴ ᐅᑮᑭᑭᔥᑳᓐ ᐁᒪᑲᑌᒥᔅᑴᑲᓂᓂᒃ, ᑲᔦ ᐐᑫ ᐁᒥᔅᑴᑲᓂᓂᒃ᙮ ᐅᑮᐙᐌᔑᐅᐙᑫᓐ ᑲᔦ ᐅᓵᐎ ᔔᓂᔮᓐ ᑲᔦ ᑳᐋᑾᑭᓱᓂᒡ ᐊᓯᓃᐞ ᑲᔦ ᒦᑭᓴᐞ᙮ ᐅᑮᑕᑯᓈᓐ ᐃᑕᔥ ᐃᐃ ᐅᓵᐎ ᔔᓂᔮᐎ ᒥᓂᒀᑲᓐ, ᑲᑭᓇ ᐁᒨᔥᑭᓀᒃ ᑳᑲᒀᓂᓴᑫᑖᑾᓂᓂᑭᓐ ᑲᔦ ᑳᐐᓀᑖᑾᓂᓂᑭᓐ᙮ ᐊᒦᐗᓂᓂ ᐅᐱᔑᒀᒋᒋᑫᐎᓂᕽ ᑳᐅᒌᒪᑲᑭᓐ᙮

17:5b.REV.017.005 ᐅᔅᑲᑎᑯᕽ ᐃᑕᔥ ᐐᓱᐎᓐ ᑮᐅᔑᐲᐃᑳᑌᓂ, ᑳᑮᑳᒋᑳᑌᓂᒃ ᒋᒪᓈᑭᑫᒋᑳᑌᓂᒃ, ᒦᐅᐌ ᑳᐃᔑᓯᓂᓂᒃ: ᐹᐱᓬᐊᓐ ᑳᑭᒋ ᐃᓀᑖᑾᒃ ᐆᑌᓇ, ᒦ ᐊᐌ ᑲᑭᓇ ᑳᐅᒫᒫᒥᑯᒡ ᐃᓂ ᐱᔑᒀᒋᑴᐞ ᑲᔦ ᑳᑲᒀᓂᓴᑭᒋᑫᓂᒡ ᐊᑮᕽ᙮

17:6b.REV.017.006 ᔑᑾ ᓂᑮᐙᐸᒫ ᐊ ᐃᑴ ᐁᑮᐗᔥᑴᐲᔥᑳᑯᒡ ᐅᒥᔅᑸᓂ ᐃᓂ ᐅᑾᔭᒀᑎᓰᒪᐞ ᑭᔐᒪᓂᑑ ᑲᔦ ᐅᒥᔅᑸᓂ ᐃᓂᐌᓂᐗᐞ ᑳᑮᐅᒋᓂᓯᒥᓐᒡ ᐁᑮᑲᐯᐐᒌᐙᐙᒡ ᒋᓴᓲᓐ᙮ ᐐᑫ ᓂᑮᑭᒋᒫᒪᑳᑌᑕᒻ ᐊᐲ ᑳᐙᐸᒪᒃ᙮

17:7b.REV.017.007 ᓂᑮᑲᓅᓂᒃ ᐃᑕᔥ ᐊᐊ ᐁᒐᓬ: ᐋᓃᔛᓐ ᐌᒋᑭᒋᒫᒪᑳᑌᑕᒪᓐ? ᓂᑮᐃᒃ᙮ ᑭᑲᐐᑕᒪᐎᓐ ᐁᓀᑖᑯᓯᒡ ᐊᐊ ᐃᑴ, ᐃᓂ ᑲᔦ ᑳᐱᒥᐗᓈᓂᑯᒡ ᐱᑾᒋᐊᔭᐋᐎᔕᓐ, ᒦᐗᓂᓂ ᑳᓃᔣᒋᓂᓂᑭᓐ 7 ᐅᑎᒀᓂᓂ ᑲᔦ ᑳᒥᑖᒋᓂᒡ ᐅᑌᔥᑲᓇᐞ᙮ ᑮᑳᒋᑳᑌ ᐃᐌ ᒋᓂᓯᑐᑖᑾᓯᓄᒃ, ᐸᔦᔥ ᐁᐐᑌᒃ ᒋᑭᑫᒋᑳᑌᒃ᙮

17:8b.REV.017.008 ᐊᐌ ᐊᔭᐋᐎᔥ ᑳᑮᐙᐸᒪᒡ, ᐋᐱᑎᕽ ᑮᐊᔮ, ᑳᐐᓐ ᑕᔥ ᓅᑯᒻ ᐊᔮᓰ᙮ ᒦᓇᐙ ᐃᒫ ᑕᐱᐅᒋᒨᑭᔥᑳ ᑳᐃᔑᐐᐸᑲᒥᑳᓂᒃ ᐃᐃᐌ ᑳᒥᔕᑮᔮᓯᓄᒃ᙮ ᑕᓂ ᐃᔖ ᑕᔥ ᐃᐃᒫ ᑫᔑᓂᔑᐗᓈᒋᐃᓐᒡ᙮ ᐃᑭ ᑕᔥ ᐃᒫ ᐊᑮᕽ ᑳᐊᔮᐙᒡ ᐅᑲᒫᒪᑳᓯᓇᐙᐙᓐ ᐃᓂ ᐊᔭᐋᐎᔕᓐ᙮ ᐊᒦᐗᒃ ᐃᓴ ᐃᑭ ᐅᐐᓱᐎᓂᐙᓐ ᑳᑮᐅᔑᐲᐃᑳᑌᓯᓂᓂᑭᓐ ᐃᐃᒫ ᒪᓯᓇᐃᑲᓂᕽ ᑳᐃᔑᐅᔑᐲᐅᑣ ᐃᑭᐌᓂᐗᒃ ᑌᐺ ᑳᐊᔮᐙᒡ ᐱᒫᑎᓯᐎᓐ, ᒋᑆ ᐅᓇᒋᑳᑌᒃ ᐅᐅ ᐊᑭ ᐁᑮᐅᔑᐲᐃᑳᑌᒃ ᐃᐃ ᒪᓯᓇᐃᑲᓐ᙮ ᐊᐊᐌ ᑕᔥ ᐱᑾᒋᐊᔭᐋᐎᔥ ᐋᐱᑎᕽ ᑮᐊᔮ᙮ ᑳᐐᓐ ᓅᑯᒻ ᑫᔮᐱ ᐊᔮᓰ᙮ ᒦᓇᐙ ᑕᔥ ᐃᑯᑎᕽ ᑕᐅᒋᓈᑯᓯ᙮

17:9b.REV.017.009 ᐊᑕᐌᑖᑯᓯ ᐊᐎᔭ ᒋᐊᔮᒡ ᑭᑫᑕᒫᐎᓐ ᑲᔦ ᓂᓯᑐᑕᒧᐎᓐ᙮ ᐃᓂ ᓃᔣᓱ 7 ᐅᑎᒀᓇᓐ ᐊᐊ ᐱᑾᒋᐊᔭᐋᐎᔥ, ᐊᒦᐗᓂᓂ ᑳᓃᔣᒋᑭᓐ ᑳᐱᑾᑎᓈᑭᓐ ᒦ ᐃᒫ ᐃᑴ ᐁᔑᑌᓴᐱᒡ᙮ ᐃᓀᑖᑾᓂᓂᐗᓐ ᑲᔦ ᑳᓃᔣᒋᐙᒡ ᑭᒋᐅᑭᒫᒃ᙮

17:10b.REV.017.010 ᓈᓇᓐ ᐅᑯ ᑭᒋᐅᑭᒫᒃ ᐋᔕ ᑮᓂᔑᐗᓈᑎᓯᐗᒃ᙮ ᐊᐊᔥ ᐯᔑᒃ ᑯᑕᒃ ᓅᑯᒻ ᐅᑭᒫᐎ, ᒦᓇᐙ ᑕᔥ ᐊᐊ ᐯᔑᒃ ᑳ ᒪᔑ ᐱᐊᔮᓰ᙮ ᒦᔥ ᐊᐲ ᓈᑯᓯᒡ ᐊᒋᓇ ᐱᑯ ᑕᐊuᔮ᙮

17:11b.REV.017.011 ᐊᐊᐌᔥ ᐱᑾᒋᐊᔭᐋᐎᔥ ᐋᐱᑎᕽ ᑳᑮᐊᔮᒡ, ᓅᑯᒻ ᐃᑕᔥ ᐁᐱᒫᑎᓯᓯᒃ, ᒦ ᐊᐌ ᓂᔣᓱ 8 ᑳᐃᓇᑭᒋᑳᓱᒡ ᑭᒋᐅᑭᒫ᙮ ᐅᐐᒌᐎᑰᐞ ᐃᓂ ᑳᓃᔣᒋᓂᒡ 7 ᑭᒋᐅᑭᒫᐞ, ᒦᑕᔥ ᐃᐃᒫ ᓂᔑᐗᓈᑎᓯᐎᓂᕽ ᒋᐃᔖᒡ᙮

17:12b.REV.017.012 ᐃᓂ ᑕᔥ ᑳᒥᑖᒋᓂᒡ ᐅᑌᔥᑲᓇᐞ ᑳᑮᐙᐸᒥᒪᒡ, ᒦᐗᒃ ᒥᑖᓱ ᑭᒋᐅᑭᒫᒃ ᐁᑳ ᒪᔑ ᐁᒫᒌᐅᑭᒫᐎᓯᒀ᙮ ᐹᓂᒫ ᑕᔥ ᑕᒦᓈᐗᒃ ᑲᔥᑭᐁᐎᓯᐎᓐ ᐯᔑᑯ ᑎᐸᐃᑲᓐ ᒋᐐᒋᐅᑭᒫᐎᒫᐙᒡ ᐃᓂ ᐱᑾᒋᐊᔭᐋᐎᔕᓐ᙮

17:13b.REV.017.013 ᐯᔑᒃ ᐁᑕ ᐃᓀᑕᒧᐎᓐ ᐅᑕᔮᓈᐙ᙮ ᐅᑲᔥᑭᐁᐎᓯᐎᓂᐙ ᑲᔦ ᐅᒪᔥᑲᐌᑖᑯᓯᐎᓂᐙᓐ ᑲᑭᓇ ᐅᐸᑭᑎᓇᒪᐙᐙᓐ ᒋᑎᐯᑕᒥᓂᒡ ᐃᓂ ᐱᑾᒋᐊᔭᐋᐎᔕᓐ᙮

17:14b.REV.017.014 ᒫᒪᐤ ᐅᑲᒦᑳᓈᐙᓐ ᐃᓂ ᒫᓇᒑᓂᔐᓴᓐ᙮ ᐊᐌ ᑕᔥ ᒫᓇᒑᓂᔐᔅ ᐅᑲᔖᑰᒋᐋᐞ ᐅᐅ ᑭᒋᐅᑭᒫᐞ᙮ ᐋᓃᔥ ᐐᓐ ᐅᑎᐯᓂᒫᐞ ᑲᑭᓇ ᑳᑎᐯᒋᑫᓂᒡ, ᑲᑭᓇ ᑲᔦ ᐅᑑᑭᒫᑲᑕᐙᐞ ᑭᒋᐅᑭᒫᐞ᙮ ᐃᓂ ᑕᔥ ᐅᔖᑰᒋᑣᐎᓂᕽ ᑫᐐᒌᐎᑯᒡ, ᒦᓴ ᐃᐌᓂᐗᐞ ᑳᑮᐊᑐᒫᒡ, ᑳᐅᓈᐸᒫᒡ, ᑳᑲᐯᐐᒌᐎᑯᒡ ᑲᔦ᙮

17:15b.REV.017.015 ᒦᓇᐙ ᑕᔥ ᐅᐌ ᓂᑮᐃᒃ ᐊᐊ ᐁᒐᓬ: ᐃᓂ ᓰᐲᐗᓐ ᑳᑮᐙᐸᑕᒪᓐ ᐃᐃᒫ ᑳᐊᐲᑕᕽ ᐱᔑᒀᒋᑴ, ᒦᐗᑭᑭ ᐯᒫᑎᓯᐙᒡ ᐯᐸᑳᓐ ᑳᐅᒌᐙᒡ ᑲᔦ ᑳᐅᒋᑎᐯᑖᑯᓯᐙᒡ, ᐯᐸᑳᓐ ᑲᔦ ᑳᑕᓶᐙᓇᑭᓈᑯᓯᐙᒡ, ᐯᐸᑳᓐ ᑲᔦ ᑳᐃᔑᑮᔗᐙᒡ᙮

17:16b.REV.017.016 ᐊᐊ ᑕᔥ ᐱᑾᒋᐊᔭᐋᐎᔥ ᑳᑮᐙᐸᒪᒡ, ᐃᐃ ᑲᔦ ᑳᒥᑖᒋᓂᒡ ᐅᑌᔥᑲᓇᐞ, ᐅᑯ ᑲᑭᓇ ᐅᑲᔒᑫᓂᒫᐙᓐ ᐃᓂ ᐱᔑᒀᒋᑴᐗᓐ᙮ ᐅᐐᒑᑭᐅᑖᐱᓇᒪᐙᐙᓐ ᑲᑭᓇ ᐃᓂ ᑳᐊᔮᓂᒡ, ᒦᑕᔥ ᑲᔦ ᐅᑲᓇᑲᓈᐙᓐ ᑫᑰᓐ ᐁᑭᑭᔥᑲᓯᓂᒃ᙮ ᐅᑲᒦᒋᓈᐙ ᑕᔥ ᑲᔦ ᐅᐐᔮᓯᓂ᙮ ᐐᑫ ᓴ ᑯ ᐅᑲᒑᑭᔂᐙᓐ ᐃᔥᑯᑌᕽ᙮

17:17b.REV.017.017 ᑭᔐᒪᓂᑑ ᐋᓃᔥ ᐅᑮᒦᓈᐞ ᐃᐌ ᒋᐃᔑᑌᐁᓂᒡ, ᒪᔮ ᐱᑯ ᑳᐃᓀᑕᕽ ᒋᑑᑕᒥᓂᒡ, ᒋᐯᔑᑯᑑᓂᒡ᙮ ᔑᑾ ᐅᑯ ᑳᒥᑖᒋᐙᒡ ᐅᑲᒦᓈᐙᓐ ᐅᑲᔥᑭᐁᐎᓯᐎᓂᐙᓐ ᐃᓂ ᐱᑾᒋᐊᔭᐋᐎᔕᓐ, ᒦ ᐲᓂᔥ ᐗᐐᑫ ᒋᓈᑾᓂᓂᒃ ᐁᑌᐺᒪᑲᓂᓂᑭᓐ ᐃᓂ ᑭᔐᒪᓂᑑ ᐅᑎᑭᑐᐎᓇᓐ᙮

17:18b.REV.017.018 ᐊᐊᐌ ᐃᑴ ᑳᑮᐙᐸᒪᒡ, ᒦ ᐃᐌᓂ ᑭᒋᐆᑌᓇ ᑳᑎᐯᓂᒥᑯᐙᒡ ᑭᒋᐅᑭᒫᒃ ᐃᐃᒫ ᐊᑮᕽ ᑳᐊᔮᐙᒡ᙮

18

18:1b.REV.018.001 ᒦᑕᔥ ᒦᓇᐙ ᑯᑕᒃ ᓂᑮᐙᐸᒫ ᐁᒐᓬ ᐁᐱᐅᒋᓈᔑᔥᑳᒡ ᑭᒋᑮᔑᑯᕽ, ᑌᐺ ᐁᐊᔮᒡ ᑎᐯᒋᑫᐎᓐ᙮ ᒦᑕᔥ ᑳᐊᐲᒋᐙᓭᓯᒡ ᐊᐊ ᐁᒐᓬ ᑮᐅᒋᐙᓭᔮ ᐃᒫ ᐊᑮᕽ᙮

18:2b.REV.018.002 ᒦᑕᔥ ᐁᓂᑯᒃ ᑮᔖᑯᐌ ᐁᑮᐃᑭᑐᒡ: ᐋᔕ ᓂᔑᐗᓈᑕᓐ! ᓂᔑᐗᓈᑕᓐ ᑳᑭᒋ ᐃᓀᑖᑾᒃ ᐆᑌᓇ ᐹᐱᓬᐊᓐ ᙮ ᒦᔥ ᐃᐃᒫ ᐃᔑᐅᑖᐎᓂᐗᒃ ᒪᒋᐊᒑᑾᒃ ᑲᔦ ᑳᐐᓂᓯᐙᒡ ᐊᒑᑾᒃ, ᑲᔦ ᑲᑭᓇ ᐱᓀᔒᔕᒃ ᐃᐃᒫ ᐊᔮᐗᒃ ᑎᓄ ᑳᐐᓀᑖᑯᓯᐙᒡ ᑲᔦ ᑳᒥᓉᑖᑯᓯᓯᒀ᙮

18:3b.REV.018.003 ᑲᑭᓇ ᐯᒫᑎᓯᐙᒡ ᐯᐸᑳᓄᕽ ᑳᐅᒌᐙᒡ ᐅᑮᒥᓂᒀᑖᓈᐙ ᑳᒪᔥᑲᐙᑲᒥᓂᓂᒃ ᐅᔔᒥᓈᐴᒥᓂ, ᒦᓴ ᐃᐌᓂ ᐅᐱᔑᒀᒋ ᒥᓴᐌᑕᒧᐎᓂᓂ᙮ ᐃᑭ ᑭᒋᐅᑭᒫᒃ ᐃᐃᒫ ᐊᑮᕽ ᑳᐊᔮᐙᒡ ᐅᑮᐐᒋ ᐱᔑᒀᑎᓰᑖᓈᐙ ᐃᐌ ᑭᒋᐆᑌᓇ᙮ ᐅᑕᑖᐌᒃ ᐃᑕᔥ ᑮᐅᒋᐌᓅᑎᓯᐗᒃ, ᐋᓃᔥ ᑮᐅᓵᒦᓇᑎᓂᓂ ᑳᐅᒋᓇᐁᑕᒧᐃᑎᓱᓈᓂᐗᕽ ᐃᐃᒫ ᐆᑌᓈᕽ᙮

18:4b.REV.018.004 ᓂᑮᓅᑖᓐ ᐃᑕᔥ ᒦᓇᐙ ᑯᑕᒃ ᐃᓉᐎᓐ ᑭᒋᑮᔑᑯᕽ ᐁᐅᒋᓅᑖᑾᒃ: ᐱᐅᒋᒫᒑᒃ, ᓂᐱᒫᑎᓰᒪᒃ! ᐱᐅᒋᒫᒑᒃ ᐃᐃᒫ ᑭᒋᐆᑌᓈᕽ! ᑫᑯ ᐅᒪᒋᒋᑫᐎᓂᕽ ᐃᔑᐐᑑᑳᓱᑫᒃ, ᒋᑲᒀᑕᑭᑑᓯᐌᒃ ᐁᑲᒀᑕᑭᐃᑯᒡ!

18:5b.REV.018.005 ᐋᓃᔥ ᑮᐊᓂ ᐃᔥᐸᑌᓂᐗᓐ ᐃᓂ ᐅᒪᒋᒋᑫᐎᓇᓐ ᐲᓂᔥ ᐁᐊᓂᐅᒋᒋᓯᓂᓂᑭᓐ ᑭᒋᑮᔑᑯᕽ᙮ ᑭᔐᒪᓂᑑ ᐅᒥᑲᐎᓄᑖᓇᓐ ᑲᑭᓇ ᑫᑰᓐ ᑳᑮᐱ ᐃᔑᐗᓂᑑᑕᒥᓂᒡ᙮

18:6b.REV.018.006 ᒪᔮ ᑳᑑᑕᐎᓀᒃ ᐊᐊ ᐆᑌᓇ ᑭᑲᑮᐌᑎᐸᐊᒪᐙᐙ᙮ ᓃᔣ 2 ᒥᓂᒃ ᑑᑕᐎᒃ ᑲᑭᓇ ᑫᑰᓐ ᐃᐌ ᑳᑮᐃᔑᒋᑫᒡ᙮ ᐃᐃᐌ ᒥᓂᒀᑲᓐ ᑳᑮᐃᔑᒥᓇᐃᓀᒃ, ᑫᑮᓇᐙ ᓃᔣ ᑭᑲᑮᐌᒥᓇᐋᐙ ᒋᒥᓂᑴᒡ ᑲᒀᑕᑭᐃᑰᐎᓐ᙮

18:7b.REV.018.007 ᐃᐃᐌ ᒥᓂᒃ ᑳᑭᒋ ᐃᓇᑭᑎᓱᒡ ᐁᑲᔥᑭᑕᒫᓱᒡ ᐌᓅᑎᓯᐎᓐ ᑳᑮᒥᒋ ᓇᐁᑕᒥᐃᑎᓱᒡ, ᒦ ᐃ ᒥᓂᒃ ᑭᒋᑲᒀᑕᑭᑑᐎᓐ, ᐲᑴᑕᒧᐎᓐ ᑲᔦ, ᑎᐸᐊᒪᐎᒃ! ᐋᓃᔥ ᒦ ᐃᐌ ᐃᓀᓂᑎᓱ: ᐅᑭᒫᑴᕽ ᓂᑎᓇᑉ᙮ ᑳᐐᓐ ᓃᓐ ᓂᑮᐙᒋᑴᐎᓰ᙮ ᑳᐐᓐ ᐐᑳ ᓂᑲᐙᐸᑕᓰᓐ ᐲᑴᑕᒧᐎᓐ᙮

18:8b.REV.018.008 ᒦ ᐃᐌ ᐅᒋ ᑳᐃᑭᑐᒡ, ᐯᔑᑯ ᑮᔑᒃ ᐁᑕ ᐃᔑᓭᒃ ᑲᑭᓇ ᐅᑲᐅᑎᓯᑯᓇᓐ ᐅᓄ ᑲᒀᑕᑭᑑᐎᓇᓐ: ᓂᐳᐎᓐ, ᐲᑴᑕᒧᐎᓐ, ᐁᑲᐗᔅᑲᑌᓈᓂᐗᕽ᙮ ᐗᐐᑫᔥ ᑕᐅᒋᒑᑭᓱ ᐃᔥᑯᑌᕽ, ᐋᓃᔥ ᒪᔥᑲᐎᓰ ᑳᑎᐯᒋᑫᒡ ᑭᔐᒪᓂᑑ ᑳᐅᓈᑯᓈᒡ ᐃᓂ ᐃᑴᐗᓐ᙮

18:9b.REV.018.009 ᐃᑭ ᑕᔥ ᑭᒋᐅᑭᒫᒃ ᐊᑮᕽ ᑳᐊᔮᐙᒡ, ᑳᑮᐐᒌᐙᐙᒡ ᐅᐱᔑᒀᑎᓯᐎᓂᓃᕽ ᑲᔦ ᐅᓇᐁᑕᒥᐃᑎᓱᐎᓂᓃᕽ, ᑕᒪᐎᐗᒃ, ᑕᒨᑴᑕᒨᒃ, ᐊᐲ ᐙᐸᑕᒧᐙᒡ ᐁᐊᒀᐸᑌᒃ ᐁᓴᑭᑌᒃ ᐃᐃ ᑭᒋᐆᑌᓇ᙮

18:10b.REV.018.010 ᐙᓴ ᑯ ᐁᑯᑌᐱᓈᑾᒃ ᑕᓃᐸᐎᐗᒃ ᐁᑯᑕᒧᐙᒡ ᐅᑲᒀᑕᑭᑑᐎᓂᓂ ᑫᐐᓇᐙ ᒋᑑᑕᐎᑣ᙮ ᒦᔥ ᐁᑭᑐᐙᒡ: ᐆᔾ! ᑲᒀᓂᓴᑫᑖᑾᓐ! ᐅᐅ ᑳᒪᔥᑲᐌᑖᑾᒃ ᑭᒋᐆᑌᓇ ᐹᐱᓬᐊᓐ! ᐯᔑᑯᑎᐸᐃᑲᓐ ᐁᑕ ᐃᔑᓭ, ᒦ ᐋᔕ ᑲᒀᑕᑭᑑᐎᓐ ᐁᑎᐸᐊᒫᑰᔭᓐ! ᐅᑎᑖᓈᐙ ᐃ ᐆᑌᓇ᙮

18:11b.REV.018.011 ᑫᐐᓇᐙ ᑕᒪᐎᐗᒃ ᐅᑕᑖᐌᒃ ᐊᑮᕽ ᑳᐊᔮᐙᒡ, ᑕᒨᑴᑕᒨᒃ᙮ ᑳᐐᓐ ᐋᓃᔥ ᐊᐎᔭᓐ ᑫᔮᐱ ᐊᔮᓰᐗᓐ ᒋᐊᑖᒥᑯᐙᒡ᙮

18:12b.REV.018.012 ᑳᐐᓐ ᐊᐎᔭᓐ ᑕᐊᑖᐌᓰᐗᓐ ᐅᓵᐎ ᔔᓂᔮᓐ, ᑲᔦ ᐙᐱᔥᑭᔔᓂᔮᓐ, ᑳᐋᑾᑭᓱᓂᒡ ᐊᓯᓃᐞ ᑲᔦ ᒦᑭᓴᐞ ᑲᔦ ᐁᐅᓂᔑᔑᓂᓂᒃ ᐙᐱᔥᑮᑭᓐ, ᑲᔦ ᐁᒪᑲᑌᒥᔅᒀᒃ ᐃᔒᑭᓐ ᑲᔦ ᓭᓂᐹᐌᑭᓐ, ᑲᔦ ᐸᑲᑭᒥᔅᑴᑭᓐ, ᑲᔦ ᑲᑭᓇ ᑳᐅᓂᔑᔑᑭᓐ ᒪᔭᑳᑎᑰᓐ ᑲᑭᓇ ᑲᔦ ᑫᑰᓐ ᒥᓯᐌᑲᓐ ᐐᐱᑎᕽ ᑳᐅᒋᐅᔑᒋᑳᑌᒃ, ᑲᔦ ᐁᐋᑾᑭᑌᒃ ᒥᑎᑯᕽ ᐁᐅᒋᐅᔑᒋᑳᑌᒃ, ᑲᔦ ᐁᐅᓵᐙᐱᑯᐗᑭᓐ ᑲᔦ ᐁᐲᐙᐱᑯᐗᑭᓐ ᑲᔦ ᔔᔥᑾᓯᓃᒃ,

18:13b.REV.018.013 ᑲᔦ ᐐᑫᔥ ᓯᓇᒪᓐ ᑳᐃᒋᑳᑌᒃ ᑕᑯᓂᑲᓐ, ᑲᔦ ᐊᐸᒋᑲᓇᓐ, ᑲᔦ ᐐᑭᒫᓯᑲᓐ, ᑲᔦ ᐱᑭᐤ ᒥᓈᑾᐅᓐ ᒪᕒ ᑳᐃᔑᓂᑳᑌᒃ, ᑲᔦ ᐃ ᒥᓈᓯᑲᓐ ᐸᕒᐁᑭᓭᔅ ᑳᐃᔑᓂᑳᑌᒃ᙮ ᑳᐐᓐ ᑲᔦ ᔔᒥᓈᐳ, ᑲᔦ ᐱᒥᑌ, ᑲᔦ ᐁᐲᓯᐴᓂᓐᒡ ᐸᑴᔑᑲᓐ, ᑲᔦ ᐸᑴᔑᑲᓂᑭᑎᑳᓐ, ᑲᔦ ᐊᐗᑳᓇᒃ, ᒫᓇᒑᓂᔕᒃ, ᒥᑕᑎᒨᒃ, ᑎᑎᐱᑖᐹᓈᑾᒃ, ᑲᔦ ᑳᐊᐗᑳᓱᐙᒡ ᐊᓄᑮᐋᑲᓇᒃ, ᐊᐴᔥᑫ ᑲᔦ ᐃᓂᓂᐗᒃ ᐅᐱᒫᑎᓯᐎᓂᐙᓐ᙮ ᐅᓄ ᑲᑭᓇ ᑳᐐᓐ ᑫᔮᐱ ᑕᑕᔑᐊᑖᐙᑳᓂᐗᓯᓅᓇᓐ᙮

18:14b.REV.018.014 ᒦᓇᐙᔥ ᐅᑕᑖᐌᒃ ᐅᑎᓈᐙᓐ ᐃᓂ ᑭᒋᐆᑌᓇᐗᓐ: ᐋᔕ ᐊᐸᓐ ᑭᑮᓇᑲᓂᑯᓇᓐ ᐃᓂ ᑳᐅᓂᔑᔑᑭᓐ ᑳᑮᒥᓴᐌᑕᒪᓐ ᑳᐐᒫᐗᒋᑑᔭᐸᓐ, ᑲᔦ ᑲᑭᓇ ᑫᑰᓇᓐ ᑳᐋᑾᑭᑌᑭᓐ ᑲᔦ ᑳᒥᓄᓈᑾᑭᓐ᙮ ᑳᐐᓐ ᒦᓇ ᐐᑳ ᑭᑲᒥᑲᓰᓇᓐ᙮

18:15b.REV.018.015 ᐃᑭ ᐅᑕᑖᐙᑫᒃ ᒦᐗᒃ ᐅᑯᐌᓂᐗᒃ ᐃᐃᒫ ᑳᑮᐅᒋᐌᓅᑎᓯᐙᒡ ᐃᐃ ᐆᑌᓇ, ᐙᓴ ᑕᓃᐸᐎᐗᒃ ᐁᐊᐲᒋᑯᑕᒧᐙᒡ ᐁᑳ ᑫᐐᓇᐙ ᒋᑕᑯᑲᒀᑕᑭᑑᓯᒀ᙮ ᑕᑲᒀᑕᑫᑕᒧᐗᒃ, ᑕᒨᑴᑕᒧᐗᒃ

18:16b.REV.018.016 ᐁᐃᑭᑐᐙᒡ: ᐆᔾ! ᑲᒀᓂᓴᑫᑖᑾᓐ ᐃᐃᐌ ᑳᐃᔑᐌᐱᓯᒡ ᐊᐊ ᑭᒋᐆᑌᓇ! ᐊᐌ ᑳᑮᐃᔑᑭᑭᔥᑭᑫᒡ ᐃᐃᐌ ᑳᐅᓂᔑᔑᕽ ᐙᐱᔥᑮᑭᓐ ᑲᔦ ᐁᒪᑲᑌᒥᔅᒀᓂᒃ ᐃᔒᑭᓐ ᑲᔦ ᐸᑲᑭᒥᔅᑴᑭᓐ, ᑳᑮᐗᐌᔑᐅᐙᑫᒡ ᐅᓵᐎ ᔔᓂᔮᓐ ᑲᔦ ᐁᐋᑾᑭᓱᓂᒡ ᐊᓯᓃᐞ ᑲᔦ ᒦᑭᓴᐞ᙮

18:17b.REV.018.017 ᐯᔑᑯᑎᐸᐃᑲᓐ ᐁᑕ ᐃᔑᓭ ᐁᓂᔑᐗᓈᑕᓂᓂᒃ ᑲᑭᓇ ᐅᐌᓅᑎᓯᐎᓐ᙮ ᑲᑭᓇ ᑕᔥ ᓈᐱᒀᓂᐅᑭᒫᒃ ᑲᔦ ᑳᐴᓯᐙᒡ, ᑲᔦ ᐱᒫᔑᐎᓂᓂᐗᒃ, ᑲᔦ ᒥᓂᒃ ᐃᐃᒫ ᑳᑮᑲᔥᑭᒋᑫᐙᒡ ᑭᒋᑲᒦᕽ, ᐙᓴ ᑮᓃᐸᐎᐗᒃ ᐁᑲᓇᐙᐸᑕᒧᐙᒡ ᐃᐃᐌ ᐁᐊᒀᐸᑌᒃ ᐁᓴᑭᑌᒃ ᐃᐃ ᐆᑌᓇ, ᑲᔦ ᐁᔖᑯᐌᐙᒡ: ᑳᐐᓐ ᐐᑳ ᑮᐃᔑᓈᑾᓯᓅᓐ ᐆᑌᓇ ᑳᑮᐊᐲᒋ ᐅᓂᔑᔑᕽ ᐅᐅᐌ ᐆᑌᓇ!

18:19b.REV.018.019 ᑮᐱᑖᓄᒀᓀᐅᑎᓱᐗᒃ ᐃᐃ ᒥᑖᐗᕽ ᑳᐊᐲᒋᒫᓀᑕᒧᐙᒡ, ᐁᑮᑭᒋᒪᐎᐙᒡ ᐁᑮᑲᒀᑕᑭᑖᑯᓯᐙᒡ᙮ ᐆᔾ! ᐃᑭᑐᐗᒃ, ᑲᒀᓂᓴᑫᑖᑾᓐ ᐃᐃ ᑭᒋᐆᑌᓇ ᑳᐃᔑᐌᐸᒃ᙮ ᑲᑭᓇ ᑭᒋᑲᒦᕽ ᐁᐱᒥᐊᔮᓂᑭᓐ ᐅᓈᐱᒀᓂᐙᓐ ᑮᐅᒋᐌᓅᑎᓯᐗᒃ ᐃᐃᒫ ᐁᐲᒋᐌᓅᑕᒃ ᐃᐃ ᐆᑌᓇ᙮ ᐯᔑᑯᑎᐸᐃᑲᓐ ᐁᑕ ᑮᐃᔑᓭ ᑲᑭᓇ ᑫᑰᓐ ᐁᑮᓂᔑᐗᓈᒋᒋᑳᑌᒃ ᑳᑮᐊᔮᒃ ᐃᐃᒫ ᐆᑌᓈᕽ᙮

18:20b.REV.018.020 ᒥᓉᑕᓐ ᑮᓐ ᑭᒋᑮᔑᒃ! ᑲᔦ ᑮᓇᐙ ᑭᔐᒪᓂᑑ ᑳᑎᐯᓂᒥᓀᒃ ᑲᔦ ᐅᑎᔑᓂᔕᐙᑲᓇᐞ ᑲᔦ ᐅᑎᐹᒋᒨᒃ ᑳᑲᓅᑕᒪᐌᒃ, ᐋᓃᔥ ᐋᔕ ᑭᔐᒪᓂᑑ ᐅᑮᑮᐌᑎᐸᐊᒪᐙᑖᓐ ᐃᐃᐌ ᐆᑌᓇ ᑳᑮᑑᑖᑯᔦᒃ!

18:21b.REV.018.021 ᒦᑕᔥ ᐯᔑᒃ ᑳᒪᔥᑲᐌᑖᑯᓯᒡ ᐁᒐᓬ ᐅᑮᐅᑖᐱᓈᓐ ᐊᓯᓃᓐ ᑖᐱᔥᑰ ᐲᓯᐴᒋᑲᓇᓯᓃᓐ ᐁᓂᑯᒀᐱᑭᓯᓂᒡ, ᑭᒋᑲᒦᕽ ᐃᑕᔥ ᐅᐸᑯᐲᐌᐱᓈᓐ, ᐅᐅᐌ ᐁᐃᑭᑐᒡ: ᒦ ᐃᐌ ᑫᐃᔑᐌᐱᓂᑳᑌᒃ ᐃᐃ ᑭᒋᐆᑌᓇ ᐹᐱᓬᐊᓐ᙮ ᑳᐐᓐ ᒦᓇᐙ ᐐᑳ ᑕᒥᑭᑳᑌᓯᓅᓐ᙮

18:22b.REV.018.022 ᑮᓐ ᑭᒋᐆᑌᓇ! ᐃᐃᒫ ᑳᐃᔑᐊᔮᔭᓐ ᑳᐐᓐ ᒦᓇ ᐐᑳ ᑕᓅᑖᑯᓯᓰᐗᒃ ᐃᑭ ᑳᒪᑗᔮᐲᑭᐱᒋᑫᐙᒡ ᑲᔦ ᐅᓂᑲᒨᒃ᙮ ᐴᑖᒋᑲᓀᔅ ᑲᔦ ᑭᒋᐴᑖᒋᑲᓐ ᑳᓅᑖᑯᑑᐙᒡ ᑳᐐᓐ ᒦᓇᐙ ᐐᑳ ᑕᓅᑖᑯᓯᓰᐗᒃ᙮ ᑳᐐᓐ ᒦᓇᐙ ᐐᑳ ᑕᒥᑲᐙᓰᐗᒃ ᑳᓂᑖᐅᔑᒋᑫᐙᒡ, ᐋᓃᓐ ᐃᑯ ᑫᑰᓐ ᑳᑮᐱᐊᓄᑳᑕᒧᐙᒡ᙮ ᑳᐐᓐ ᒦᓇᐙ ᐐᑳ ᐅᑲᑕᔑᓅᑕᓰᓈᐙ ᐁᓂᑖᑾᓂᓂᒃ ᐁᑭᔑᐹᔥᑳᓂᒡ ᐲᓯᐴᒋᑲᓇᓯᓃᓐ᙮

18:23b.REV.018.023 ᑳᐐᓐ ᑲᔦ ᐐᑳ ᑕᓈᑾᓯᓅᓐ ᐙᓴᑯᓀᒋᑲᓐ ᒋᐙᓭᔮᒃ ᐃᐃᒫ ᑳᐃᔑᐊᔮᔭᓐ᙮ ᑳᐐᓐ ᒦᓇᐙ ᑕᓅᑖᑾᓯᓅᓐ ᒋᒌᑲᑲᒥᑭᓯᐙᒡ ᐁᐐᑭᑑᐙᒡ ᐃᓂᓂ ᑲᔦ ᐃᑴ᙮ ᑭᑕᑖᐌᐎᓂᓃᒪᒃ ᓇᐗᒡ ᑮᓃᑳᓂ ᑭᒋᐅᑭᒫᐎᐗᒃ ᐊᐲᒡ ᑲᑭᓇ ᐅᑕᑖᐌᒃ ᐊᑮᕽ ᑳᐊᔮᐙᒡ᙮ ᑲᔦ ᑭᒪᒋᒪᒫᑖᐎᒋᑫᐎᓐ ᑭᑮᐅᒋ ᐗᔦᔑᐋᒃ ᑲᑭᓇ ᑳᑕᓶᐙᓇᑭᓯᐙᒡ ᐃᓂᓂᐗᒃ ᐅᒫ ᐊᑮᕽ! ᑮᐃᑭᑐ ᐊᐊ ᐁᒐᓬ᙮

18:24b.REV.018.024 ᒦ ᐃᐌ ᑮᐃᔑᓂᔑᐗᓈᑕᓐ ᑭᒋᐆᑌᓇ ᐹᐱᓬᐊᓐ ᐅᒋ ᐃᐌ ᐁᑮᒥᑭᑳᑌᒃ ᐃᐃᒫ ᐅᒥᔅᑸᓂ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ ᑲᔦ ᐅᑾᔭᒀᑎᓰᒪᐞ, ᑲᔦ ᐅᒥᔅᑸᓂ ᑲᑭᓇ ᐊᐎᔭ ᑳᑮᐱᓂᓯᓐᒡ ᐊᑮᕽ᙮

19

19:1b.REV.019.001 ᐅᓄᐌᓂᐗᓐ ᐃᑕᔥ ᑳᐃᔥᒀᓭᑭᓐ, ᓂᑮᓅᑖᓐ ᑖᐱᔥᑰ ᐁᑭᔒᐌᐙᒡ ᐁᐹᑏᓄᐙᒡ ᐯᒫᑎᓯᐙᒡ ᐁᑕᓂᑖᑯᓯᐙᒡ ᑭᒋᑮᔑᑯᕽ: ᐋᓬᐃᓬᐆᔭ! ᐱᒫᒋᐃᐌᐎᓐ, ᑭᒋ ᐃᓀᑖᑯᓯᐎᓐ, ᑲᔥᑭᐁᐎᓯᐎᓐ ᐅᑕᔮᓐ ᑭᑭᔐᒪᓂᑑᒥᓈᓐ!

19:2b.REV.019.002 ᑌᐺᐗᓂᓂᐗᓐ ᑲᔦ ᑾᔭᑾᓂᓂᐗᓐ ᐃᓂ ᐅᑎᓈᑯᓂᑫᐎᓇᓐ᙮ ᐋᓃᔥ ᐅᑮᐃᔑᐅᓈᑯᓈᓐ ᐃᓂ ᑭᒋᐱᔑᒀᒋᑴᐗᓐ, ᐅᐱᔑᒀᑎᓯᐎᓂᓃᕽ ᑳᑮᐃᔑᓂᔑᐗᓈᒋᐋᓂᒡ ᐊᑮᕽ ᑳᐊᔮᓂᒡ᙮ ᑭᔐᒪᓂᑑ ᐅᑮᑎᐸᐊᒪᐙᓐ ᐃᓂ ᐱᔑᒀᒋᑴᐗᓐ ᐁᑮᓂᓵᓂᒡ ᐃᓂ ᐅᑕᓄᑮᐋᑲᓇᐞ᙮

19:3b.REV.019.003 ᒦᓇᐙ ᑕᔥ ᑮᑭᒋᔖᑯᐌᐗᒃ ᐌᑎ ᑭᒋᑮᔑᑯᕽ: ᐋᓬᐃᓬᐆᔭ! ᒨᔕᒃ ᐊᐸᓀ ᑕᐃᔥᐹᐸᑌ ᐁᒑᑭᑌᒃ ᑭᒋᐆᑌᓇ! ᐁᐃᑭᑐᐙᒡ᙮

19:4b.REV.019.004 ᑮᐊᒋᒋᐸᓂᐅᐗᒃ ᐃᑕᔥ ᐃᑭᐌᓂᐗᒃ ᓃᔥᑕᓇᔑᓃᐎᓐ 24 ᑳᓃᑳᓇᑭᓱᐙᒡ ᑲᔦ ᐃᑭ ᓃᐎᓐ ᐅᐱᒫᑎᓰᒃ, ᐁᐃᔥᐯᓂᒫᐙᒡ ᑭᔐᒪᓂᑑᓐ ᐃᐃᒫ ᑳᓇᒪᑕᐱᓂᒡ ᑭᒋᐊᐱᐎᓂᕽ᙮ ᔑᑾ ᑮᐃᑭᑐᐗᒃ: ᐁᒣᓐ! ᐋᓬᐃᓬᐆᔭ!

19:5b.REV.019.005 ᐃᓉᐎᓐ ᐃᑕᔥ ᑭᒋᐊᐱᐎᓂᕽ ᑮᐅᒋᓅᑖᑾᓐ ᐁᐃᑭᑑᒪᑲᒃ: ᓇᓈᑯᒥᒃ ᑭᑭᔐᒪᓂᑑᒥᓈᓐ, ᑲᑭᓇ ᑮᓇᐙ ᐅᑕᓄᑮᐋᑲᓇᐞ ᑲᔦ ᑲᑭᓇ ᐊᐎᔭ ᑳᑯᑖᓀᓂᒣᒃ, ᑳᐊᑳᓭᑖᑯᓯᔦᒃ ᑲᔦ ᑳᑭᒋ ᐃᓀᑖᑯᓯᔦᒃ, ᓇᓈᑯᒥᒃ!

19:6b.REV.019.006 ᒦᑕᔥ ᓂᑮᓅᑕᐙᒃ ᑖᐱᔥᑰ ᐁᐅᓵᒦᓄᐙᒡ ᐊᐎᔭᒃ, ᑲᔦ ᑖᐱᔥᑰ ᐁᒪᑗᒋᐗᕽ ᑭᒋᐹᐎᑎᒃ, ᑲᔦ ᑖᐱᔥᑰ ᑳᑭᒋᐱᓀᓯᐗᕽ ᐁᐃᓉᒃ, ᒫᒪᐤ ᐁᐃᑭᑐᐙᒡ: ᐋᓬᐃᓬᐆᔭ! ᐋᔕ ᓅᑯᒻ ᒫᒌᑭᒋᐅᑭᒫᐎ ᐊᐌ ᑳᑎᐯᒋᑫᒡ, ᑭᑭᔐᒪᓂᑑᒥᓈᓐ ᑳᒫᒪᐎᒪᔥᑲᐌᑖᑯᓯᒡ!

19:7b.REV.019.007 ᒥᓉᑕᑖ! ᑭᒋᒥᓉᑕᑖ! ᑭᒋ ᐃᓇᑭᒫᑖ! ᐋᔕ ᑎᐱᓭ ᒋᑭᒋᐐᑭᑑᒡ ᐊᐊ ᒫᓇᒑᓂᔐᔅ᙮ ᐋᔕ ᑮᐗᐌᔑᐃᑎᓱᐗᓐ ᐃᓂ ᑳᐐᐐᑎᑫᒫᒡ᙮

19:8b.REV.019.008 ᐊᐌ ᐃᑴ ᑮᒦᓈ ᒋᑭᑭᔥᑲᕽ ᐁᐅᓂᔑᔑᕽ ᐙᐱᔥᑮᑭᓐ ᐁᐙᓯᑌᒃ, ᐁᐯᑲᒃ᙮ ᐃᐌ ᑳᐅᓂᔑᔑᕽ ᐙᐱᔥᑮᑭᓐ ᒦ ᐅᐌᓂ ᑳᐃᒋᑳᑌᓂᒃ ᐅᑾᔭᑯᒋᑫᐎᓂᓂ ᑭᔐᒪᓂᑑ ᐅᑾᔭᒀᑎᓰᒪᐞ᙮

19:9b.REV.019.009 ᐅᐅᔥ ᓂᑮᐃᒃ ᐊᐊ ᐁᒐᓬ: ᐅᔑᐲᐊᓐ: ᔕᐌᑖᑯᓯᐗᒃ ᐃᑭ ᑳᐐᑾᒥᑣ ᐃᒫ ᐅᐐᑭᑑᐎ ᐐᑾᑎᐎᓂᕽ ᐊᐊ ᒫᓇᒑᓂᔐᔅ᙮ ᒦᔥ ᐅᐌ ᒦᓇᐙ ᓂᑮᐃᒃ: ᒦᐗᓄᓄ ᐅᑎᑭᑐᐎᓇᓐ ᑭᔐᒪᓂᑑ ᑳᑌᐺᒪᑲᓂᓂᑭᓐ᙮

19:10b.REV.019.010 ᒦᑕᔥ ᓂᑮᐊᒋᒋᐸᓂᐅᐙᓐ ᐅᓯᑎᕽ ᐊᐊ ᐁᒐᓬ ᐁᐐᐃᔥᐯᓂᒪᒃ᙮ ᒦᔥ ᐃᐃ ᓂᑮᑲᓅᓂᒃ: ᑫᑯ ᐃ ᑑᑕᑫᓐ! ᓃᓐ ᑭᐐᑕᓄᑮᒫᑲᓐ ᑲᔦ ᐅᐐᑕᓄᑮᒫᑲᓂᐙᓐ ᑭᐐᒋᐅᑌᐺᑕᒨᒃ, ᒦᐗᑯᑯ ᑳᑭᒋᐎᓇᒧᐙᒡ ᒋᓴᔅ ᐅᑌᐺᐎ ᑎᐹᒋᒧᐎᓐ᙮ ᑭᔐᒪᓂᑑ ᐁᑕ ᐃᔥᐯᓂᒻ! ᐋᓃᔥ ᐅᑎᐹᒋᒧᐎᓐ ᒋᓴᔅ ᒦ ᐃᐌ ᐁᔑᑮᑭᑐᐙᒡ ᑲᑭᓇ ᑳᑲᓅᑕᒪᐙᐙᒡ ᑭᔐᒪᓂᑑᓐ᙮

19:11b.REV.019.011 ᓂᑮᐙᐸᑖᓐ ᐃᑕᔥ ᑭᒋᑮᔑᒃ ᐁᑮᐹᑭᑌᓂᑳᑌᒃ᙮ ᒦ ᐌᑎ ᑳᐊᔮᒡ ᑳᐙᐱᔥᑭᓯᒡ ᒥᑕᑎᒻ᙮ ᐊᐊᐌᔥ ᑳᑌᓴᐱᒡ ᐅᑾᔭᑴᑖᑯᓰ ᑲᔦ ᑳᑌᐺᒡ ᐃᔑᓂᑳᓈ᙮ ᑾᔭᒀᑎᓯᐎᓂᕽ ᐃᔑᐅᓇᔓᐌ ᑲᔦ ᐃᔑᐊᑕᒦᑳᓱ᙮

19:12b.REV.019.012 ᐅᔥᑮᔑᑰᓐ ᑖᐱᔥᑰ ᑮᐙᓯᑌᓂᐗᓐ ᑳᐊᐲᒋᐙᓴᑯᓀᒃ ᐃᔥᑯᑌ, ᑲᔦ ᐅᑎᒀᓂᕽ ᐁᑮᐊᔮᓂᑭᓐ ᓃᐱᐗᐞ ᑭᒋᐅᑭᒫᐙᓄᒀᓇᓐ, ᐁᑮᐃᔑᐲᐃᑳᑌᓂᒃ ᐅᐐᓱᐎᓐ ᐸᑳᓐ ᐊᐎᔭ ᑳᑭᑫᑕᓯᒃ, ᐱᑯ ᐐᓀᑕ᙮

19:13b.REV.019.013 ᐃᐃᐌᓂ ᑳᑮᑭᑭᔥᑲᕽ ᒥᔅᑸᕽ ᑮᑭᑖᓂᑳᑌᓂ᙮ ᒦᔥ ᐃᐃ ᐃᔑᓂᑳᓈ: ᐅᑎᑭᑐᐎᓐ ᑭᔐᒪᓂᑑ᙮

19:14b.REV.019.014 ᐃᑭ ᑕᔥ ᑭᒋᑮᔑᑯᕽ ᑳᐊᔮᐙᒡ ᔑᒫᑲᓂᔕᒃ ᐅᑮᐊᔫᑯ ᐐᒌᐙᐙᓐ ᐁᑮᐱᒥᓂᔕᐙᐙᒡ, ᐁᐱᑌᓴᐱᐙᒡ ᐁᐙᐱᔥᑭᓯᓂᒡ ᒥᑕᑎᒨᐞ᙮ ᐅᑭᑭᔥᑳᓈᐙ ᐙᐱᔥᑮᑭᓐ ᐁᐙᐱᔥᑳᒃ ᐁᐯᑲᒃ᙮

19:15b.REV.019.015 ᐃᐃᒫᔥ ᐅᑑᓂᕽ ᐊᐊᐌ ᑳᐱᒥᓂᔕᐅᓐᒡ ᑮᐅᒌᒪᑲᓂᓂ ᐁᑳᔖᓂᒃ ᑭᒋᒨᑯᒫᓐ, ᒦ ᐃᐌ ᑳᐐᐅᒋᔖᑰᒋᐋᒡ ᑲᑭᓇ ᐯᒫᑎᓯᓂᒡ ᑳᑕᓶᐙᓇᑭᓯᓂᒡ᙮ ᐅᑲᐃᔑᑎᐯᓂᒫᐞ ᐃᑕᔥ ᐁᐲᐙᐱᑯᐗᓂᓂᒃ ᐅᓴᑲᐅᓈᑎᒃ ᑫᑕᑯᓇᕽ᙮ ᐅᑲᑕᔑ ᓰᔅᑯᐲᑭᔥᑲᐙᐞ ᐃᐃ ᔔᒥᓇᐞ ᐁᑕᔑ ᔔᒥᓈᐳᑳᑳᓂᐎᓂᒡ, ᒦ ᐃᐌ ᐁᓀᑖᑾᓂᓂᒃ ᐅᑭᒋᓂᔥᑳᑎᓯᐎᓐ ᐊᐊ ᑭᔐᒪᓂᑑ ᑳᒫᒪᐎᒪᔥᑲᐌᑖᑯᓯᒡ᙮

19:16b.REV.019.016 ᐊᐌ ᑕᔥ ᑳᑌᓴᐱᒡ ᐅᑭᑭᔥᑭᑲᓂᕽ ᑲᔦ ᐅᑆᒥᕽ ᑮᐅᔑᐲᐃᑳᑌᓂ ᐅᐌ ᐐᓱᐎᓐ: ᐅᑭᒋᐅᑭᒫᒥᐙᓐ ᑭᒋᐅᑭᒫᒃ ᑲᔦ ᑳᑎᐯᓂᒫᒡ ᐅᑎᐯᒋᑫᐞ᙮

19:17b.REV.019.017 ᓂᑮᐙᐸᒫ ᑕᔥ ᐁᒐᓬ ᐁᓃᐸᐎᒡ ᑮᓯᓱᕽ᙮ ᐁᓂᑯᒃ ᐁᑭᔒᐌᒡ ᐅᔖᑯᐙᓈᐞ ᑲᑭᓇ ᐱᓀᔒᔕᐞ ᑳᐸᐹᒥᓭᓂᒡ ᓀᐗᒋᑮᔑᑯᕽ: ᐱᐊᑕᒫᒪᐎᐃᑎᒃ, ᑭᔐᒪᓂᑑ ᑕᑭᒋᐐᑾᑫ! ᐅᑮᐃᓈᐞ᙮

19:18b.REV.019.018 ᐱᐊᑕᒦᒋᒃ ᐅᐐᔮᓯᐙᓐ ᑭᒋᐅᑭᒫᒃ, ᔑᒫᑲᓂᔒᐎᑭᒫᒃ, ᔑᒫᑲᓂᔕᒃ᙮ ᑲᔦ ᐅᐐᔮᓯᐙᓐ ᒥᑕᑎᒨᒃ, ᐃᑭ ᑲᔦ ᑳᑌᓴᐱᐙᒡ, ᑲᔦ ᑲᑭᓇ ᐯᒫᑎᓯᐙᒡ, ᐃᑭ ᑳᑎᐯᓂᒥᑣ ᑲᔦ ᑳᑎᐯᓂᑎᓱᐙᒡ, ᐃᑭ ᑳᑭᒋ ᐃᓀᑖᑯᓯᐙᒡ ᑲᔦ ᑳᐊᑳᓭᑖᑯᓯᐙᒡ, ᐅᐐᔮᓯᐙᓐ ᑲᑭᓇ ᐱᐊᑕᒦᒋᒃ! ᐅᑮᐃᓈᐞ᙮

19:19b.REV.019.019 ᓂᑮᐙᐸᒫᒃ ᐊᐊ ᐱᑾᒋᐊᔭᐋᐎᔥ ᑲᔦ ᑳᑭᒋᐅᑭᒫᐎᐙᒡ ᐊᑮᕽ ᑲᔦ ᐅᔒᒫᑲᓂᔒᒥᐙᐞ ᑲᑭᓇ ᐁᒫᐗᒋᐃᑎᓂᒡ, ᐁᐐᐊᑕᒦᑳᓈᐙᒡ ᐃᓂ ᑳᐱᒥᑌᓴᐱᓂᒡ ᑲᔦ ᐅᔒᒪᑲᓂᔒᒥᓂ ᑳᐆᑯᐐᒌᐎᑯᓂᒡ᙮

19:20b.REV.019.020 ᐊᐊᔥ ᐱᑾᒋᐊᔭᐋᐎᔥ ᑮᐅᑖᐱᓈ ᐊᔑᒡ ᑲᔦ ᐃᓂ ᐊᔭᐋᓐ ᑳᑮᑲᓅᑕᒫᑯᒡ ᑳᑮᐗᓂᒧᓂᒡ, ᒦᐗᓂᓂ ᑳᑮᒪᒫᑕᐎᒋᑫᓂᒡ ᐁᐙᐸᑕᕽ᙮ ᒦ ᐗᐊ ᐅᒪᒫᑕᐎᒋᑫᐎᓂᕽ ᐁᑮᐅᒋᐗᔦᔑᐋᒡ ᐃᐃᐌᓂᐗᐞ ᑳᑮᐅᒋᑭᑭᓇᐙᒋᐲᐃᑲᓂᐎᓂᒡ ᐱᑾᒋᐊᔭᐋᐎᔥ ᐅᑭᑭᓇᐙᒋᒋᑲᓐ, ᐃᓂᐌᓂᐗᐞ ᐅᒪᓯᓂᑰᒋᑲᓐ ᑳᑮᐅᒋᒌᑾᓇᐲᑕᒥᓂᒡ᙮ ᐊᐊ ᑕᔥ ᐱᑾᒋᐊᔭᐋᐎᔥ ᑲᔦ ᐃᓂ ᑳᑭᑲᓅᑕᒫᑯᒡ, ᒥᒋᓃᔥ ᐁᐱᒫᑎᓯᐙᒡ ᐃᐃᒫ ᑮᐊᐸᑭᓈᐗᒃ ᐃᔥᑯᑌᐎᓵᑲᐃᑲᓃᕽ, ᐃᐃᒫ ᐁᑕᑯᒑᑭᓱᒡ ᐊᐊ ᐊᓯᓐ ᑳᓂᑭᓱᒡ ᐁᐐᓴᑳᐸᓱᐌᒡ᙮

19:21b.REV.019.021 ᐅᔑᒫᑲᓂᔒᒥᐙᐞ ᐃᑕᔥ ᐅᑮᓂᓯᑯᓂ ᐃᐌ ᐅᒨᑯᒫᓐ ᐅᑑᓂᕽ ᑳᐅᒌᒪᑲᓂᓂᒃ ᐊᐊᐌ ᑳᑌᓴᐱᒡ ᒥᑕᑎᒧᕽ᙮ ᒦᔥ ᑲᑭᓇ ᐱᓀᔒᔕᒃ ᐗᐐᑫ ᑮᑌᐐᓯᓂᐗᒃ ᐁᒦᒋᐙᒡ ᐅᐐᔮᓯᓂ᙮

20

20:1b.REV.020.001 ᒦᑕᔥ ᓂᑮᐙᐸᒫ ᐁᒐᓬ ᑭᒋᑮᔑᑯᕽ ᐁᐱᐅᒋᓈᔕᑮᒡ, ᐁᑕᑯᓇᕽ ᐋᐹᐱᑲᐃᑲᓐ ᐃᐃᐌ ᑳᐃᔑᐐᐸᑲᒥᑳᒃ ᑳᒥᔕᑮᔮᓯᓄᒃ ᑫᑭᐸᐃᑳᑳᓂᐗᕽ, ᑲᔦ ᑭᒋᓴᑳᐹᓐ ᐁᑕᑯᓇᕽ᙮

20:2b.REV.020.002 ᐅᑮᐅᑎᑎᓈᓐ ᐃᓂ ᑭᒋᐅᑳᑏᑭᓀᐱᑰᓐ, ᒦᐗᓂᓂ ᒣᐎᔕ ᑳᑮᐅᒌᓂᒡ ᒪᒋᑭᓀᐱᑯᔕᓐ, ᒦᐊᐌ ᒪᒋᐊᔭᐋ ᑲᔦ ᓭᑕᓐ ᑳᑎᓄᐎᒡ᙮ ᒦᐗᓂᓂ ᐅᑮᒪᒫᒋᑾᐱᓈᓐ ᐊᐌ ᐁᒐᓬ, ᒥᑖᔂᒃ ᑕᓱ ᐊᑭ ᒥᓂᒃ ᒋᒪᒫᒋᑾᐱᓱᓂᒡ᙮

20:3b.REV.020.003 ᐅᑮᐲᒋᐌᐱᓈᓐ ᐃᐃᒫ ᑳᐃᔑᐐᐸᑲᒥᑳᒃ᙮ ᐊᒦᔥ ᐃᐃ ᐅᑮᑭᐸᐋᓐ, ᐅᑮᑭᐱᐊᑯᔥᑭᐗᓵᓐ, ᐁᑳ ᒦᓇᐙ ᐐᑳ ᒋᑲᔥᑭᐅᓯᓂᒃ ᒋᓵᑲᐊᓯᓂᒃ, ᒋᐗᔦᔑᐋᓯᓂᒃ ᐃᓂ ᑳᐯᐸᑳᓉᐙᓇᑭᓯᓂᒡ ᐊᑮᕽ, ᐹᓂᒫ ᒥᑖᔂᒃ ᑕᓱ ᐊᑭ ᑮᑭᔑᐱᐊᔮᒃ᙮ ᒦᑕᔥ ᐃᐃ ᐊᐲ ᒋᐋᐸᐅᓐᒡ ᐊᒋᓇ᙮

20:4b.REV.020.004 ᒦᑕᔥ ᓂᑮᐙᐸᑖᓇᓐ ᑭᒋᐊᐱᐎᓇᓐ᙮ ᐃᑭ ᑕᔥ ᑳᑌᓴᐱᐙᒡ ᑮᒦᓈᐗᒃ ᒋᐅᓈᑯᓂᑫᐙᒡ᙮ ᒦᓇᐙ ᑲᔦ ᓂᑮᐙᐸᒥᒫᐞ ᐅᑕᒑᑯᐙᐞ ᐃᑭᐌᓂᐗᒃ ᑳᑮᑮᔥᑭᑴᑕᐅᑣ, ᐅᑯ ᑳᑮᐅᒋᓂᓯᑣ ᐁᑮᑎᐹᒋᒫᐙᒡ ᒋᓴᓲᓐ, ᐁᑮᐐᑕᒫᑫᐙᒡ ᑲᔦ ᑭᔐᒪᓂᑑᓐ ᐅᑎᑭᑐᐎᓂᓂ᙮ ᑳᐐᓐ ᐅᑮᐅᒋᒌᑾᓃᑕᐙᓯᐙᐙᓐ ᐃᓂ ᐱᑾᒋᐊᔭᐋᐎᔕᓐ ᑲᔦ ᐅᒪᓂᑑᑫᐎᑰᒋᑲᓂᓂ᙮ ᑳᐐᓐ ᑲᔦ ᐃᐃᒫ ᑮᐅᒋᑭᑭᓇᐙᒋᐲᐙᓰᐗᒃ ᐅᔅᑲᑎᑯᐙᕽ ᑲᔦ ᐅᓂᒌᐙᕽ ᒋᑎᐯᓂᒥᑯᐙᐸᓐ᙮ ᐅᑯᐌᓂᐗᒃ ᒦᓇᐙ ᑮᐱᒫᑎᓯᐗᒃ, ᑲᔦ ᒥᑖᔂᒃ ᑕᓱ ᐊᑭ ᐅᑮᐐᒋᑎᐯᒋᑫᒫᐙᓐ ᐃᓂ Xᑕᓐ᙮

20:5b.REV.020.005 ᐃᑭᔥ ᐐᓐ ᑯᑕᒃ ᑳᓂᐳᐙᒡ, ᑳ ᒪᔑ ᑮᑮᐌᐱᒫᑎᓯᓰᐗᒃ, ᐹᓂᒫ ᑯ ᑮᐃᔥᒀᓭᒃ ᒥᑖᔂᒃ ᑕᓱ ᐊᑭ᙮ ᐅᑯᐌᓂᐗᒃ ᐃᑕᔥ ᐋᔕ ᑳᑮᐌᐱᒫᑎᓯᐙᒡ, ᒦᐅᐌ ᓂᑕᒻ ᒋᑮᐌᐱᒫᑎᓯᓈᓂᐗᕽ᙮

20:6b.REV.020.006 ᔕᐌᑖᑯᓯᐗᒃ ᐅᑯ ᐃᐃᒫ ᑳᐊᔑᑕᑭᒥᑣ ᓂᑕᒻ ᑮᐌᐱᒫᑎᓯᐎᓂᕽ᙮ ᐃᓇᑭᒫᐗᒃ ᐁᑎᐯᓂᒥᑯᐙᒡ ᑭᔐᒪᓂᑑᓐ᙮ ᐊᒦᐗᑯᑯ ᓃᔣ ᓂᐳᐎᓐ ᑳᐐᓐ ᐅᑲᑎᐯᓂᒥᑯᓰᓈᐙ᙮ ᑭᒋᐊᓇᒥᐁᐎᑭᒫᒃ ᐃᑕᔥ ᐅᑲᐃᓇᓄᑮᐃᑯᐙᓐ ᑭᔐᒪᓂᑑᓐ ᑲᔦ Xᑕᓐ᙮ ᒥᑖᔂᒃ ᑕᓱ ᐊᑭ ᐅᑲᐐᒋᑎᐯᒋᑫᒫᐙᓐ Xᑕᓐ᙮

20:7b.REV.020.007 ᐊᐲ ᑕᔥ ᒥᑖᔂᒃ ᑕᓱ ᐊᑭ ᑫᐴᓂᓭᓂᒃ, ᒦᑕᔥ ᐃᐃ ᓭᑕᓐ ᑕᔮᐸᐃᑲᓂᐎ ᐅᑭᐸᐅᑰᐎᓂᕽ ᐅᒋ᙮

20:8b.REV.020.008 ᑕᐱᓵᑲᐊᒻ, ᑕᒫᒑ ᒋᐗᔦᔑᐋᒡ ᐃᓂ ᐯᒫᑎᓯᓂᒡ ᑲᑭᓇ ᑳᑕᓶᐙᓇᑭᓯᓂᒡ ᒥᓯᐌ ᐊᑮᕽ ᑳᐊᔮᓂᒡ, ᒦᐗᐃᐃ ᒀᒃ, ᒣᒀᒃ ᑳᐃᓂᒥᓐᒡ᙮ ᐊᐊᐌ ᓭᑕᓐ ᐅᑲᒫᒪᐎᐋᐞ ᑲᑭᓇ ᒋᒦᑳᓱᓂᒡ ᐁᑕᔑᓂᒡ ᐅᓄᐌᓂᐗᐞ, ᑖᐱᔥᑰ ᐁᑕᔂᐗᑳᒃ ᒌᑫᐤ ᒥᑖᐗᕽ ᑳᐃᔑᓈᑾᒃ, ᒦᐃᐌ ᑫᐃᔑᓈᑯᓯᐙᒡ᙮

20:9b.REV.020.009 ᑮᐊᓂᒨᔥᑭᓀᓈᑯᓯᐗᒃ ᒥᓯᐌᑲᒥᒃ, ᑲᔦ ᐅᑮᐙᑳᔥᑳᓈᐙ ᑳᐃᔑᑲᐯᔑᓂᒡ ᐃᐃ ᑭᔐᒪᓂᑑᓐ ᐅᐱᒫᑎᓰᒥᓂ, ᐃᐌᓂ ᑕᔥ ᑲᔦ ᐆᑌᓇ ᑳᓵᑭᑑᓂᒡ᙮ ᐃᔥᑯᑌ ᑕᔥ ᑭᒋᑮᔑᑯᕽ ᑮᐱᐅᒋᓭ, ᐊᒦᑕᔥ ᓭᑕᓐ ᐅᒦᑳᓱᐎᓂᓃᒪᐞ ᐅᑮᒑᑳᑭᓱᑯᓈᐙ᙮

20:10b.REV.020.010 ᒦᑕᔥ ᐗᐊ ᒪᒋᐊᔭᐋ ᑳᑮᐗᔦᔑᐋᒡ ᐃᒫ ᑮᐃᔑᐌᐱᓈ ᓵᑲᐃᑲᓃᕽ, ᐃᔥᑯᑌ ᐁᔑᐊᔮᓂᒃ ᑲᔦ ᑳᐱᔅᑲᓀᓂᒡ ᐊᓯᓃᓐ ᑳᐐᓴᑳᐸᓱᐌᓂᒡ᙮ ᒦᐃᒫ ᐋᔕ ᑳᑮᐲᒋᐌᐱᓂᑣ ᐱᑾᒋᐊᔭᐋᐎᔥ ᑲᔦ ᐃᓂ ᑳᑮᑲᓅᑕᒫᑯᒡ ᑳᑮᐗᔦᔑᐃᐌᔥᑭᓂᒡ᙮ ᒦᐃᒫ ᑕᑲᒀᑕᑭᐋᐗᒃ ᐁᑮᔑᑲᓂᓂᒃ ᑲᔦ ᐁᑎᐱᑲᓂᓂᒃ, ᒦ ᑯ ᐊᐸᓂᑯ ᐱᔑᔑᒃ᙮

20:11b.REV.020.011 ᒦᓇᐙ ᑕᔥ ᓂᑮᐙᐸᑖᓐ ᐁᐙᐱᔥᑳᒃ ᑭᒋᐊᐱᐎᓐ ᐁᒥᔖᒃ᙮ ᑲᔦ ᓂᑮᐙᐸᒫ ᐊᐌ ᑳᑌᓴᐱᒡ᙮ ᐅᓈᑯᓯᐎᓂᕽ ᐃᑕᔥ ᑮᐅᒋ ᐅᔑᒨᒪᑲᓐ ᐊᑭ, ᐃᐃ ᑲᔦ ᑮᔑᒃ᙮ ᑳᐐᔥ ᒦᓇᐙ ᐐᑳ ᑮᓈᑾᓯᓅᓇᓐ᙮

20:12b.REV.020.012 ᓂᑮᐙᐸᒫᒃ ᐅᓂᐴᒃ ᑲᑭᓇ ᐁᓃᐸᐎᐙᒡ᙮ ᑳᑭᒋ ᐃᓀᑖᑯᓯᐙᒡ ᑲᔦ ᑳᐊᑳᓭᑖᑯᓯᐙᒡ ᑲᑭᓇ ᐅᑮᐅᒋᔥᑲᐎᑳᐸᐐᑖᓈᐙ ᐃ ᑭᒋᐊᐱᐎᓐ᙮ ᑮᐹᑮᑭᓂᑳᑌᐗᓐ ᑕᔥ ᒪᓯᓇᐃᑲᓇᓐ᙮ ᑲᔦ ᑯᑕᒃ ᒦᓇᐙ ᒪᓯᓇᐃᑲᓐ ᑮᐹᑮᑭᓂᑳᑌ᙮ ᒦᐅᐌ ᒪᓯᓇᐃᑲᓐ ᑳᐃᔑᐅᔑᐲᐅᑣ ᑌᐺ ᑳᐊᔮᐙᒡ ᐱᒫᑎᓯᐎᓐ᙮ ᐅᓂᐴᒃ ᐃᑕᔥ ᑮᐅᒋ ᑎᐹᑯᓈᐗᒃ ᐃᐃᐌ ᐅᒋ ᑳᐅᔑᐲᐃᑳᑌᓂᑭᓐ ᒪᓯᓇᐃᑲᓂᑳᕽ, ᒦᐃᒫ ᐁᔑᐊᑌᓂᑭᓐ ᐅᑎᔑᒋᑫᐎᓂᐙᓐ᙮

20:13b.REV.020.013 ᐊᐊ ᑭᒋᑲᒻ ᐅᑮᐸᑭᑎᓈᐞ ᐃᐃ ᑳᓂᐳᓂᒡ ᐃᐃᒫ ᑳᐊᔮᓂᒡ ᒦᓇᐙ ᒋᓈᑯᓯᓂᒡ᙮ ᑲᔦ ᓂᐳᐎᓐ ᑲᔦ ᐁᑏᔅ ᐅᑮᐸᑭᑎᓈᐙᐞ ᐃᐃ ᐅᓂᐴᐞ ᐃᒫ ᑳᐊᔮᓂᒡ᙮ ᒦᑕᔥ ᑲᑭᓇ ᑳᐃᔑᐅᓇᔓᐙᓂᑣ ᑳᐃᔑᓈᑾᓂᓂᑭᓐ ᐅᑎᔑᒋᑫᐎᓂᐙᓐ᙮

20:14b.REV.020.014 ᒦᔥ ᐅᐅᐌ ᓂᐳᐎᓐ ᐃᐃ ᑲᔦ ᐁᑏᔅ ᑮᐃᔑᐌᐱᓂᑳᑌᐗᓐ ᑳᐃᔥᑯᑌᐗᕽ ᓵᑲᐃᑲᓃᕽ᙮ ᐊᒦᐅᐌ ᑕᔥ ᓃᔣ 2 ᓂᐳᐎᓐ, ᑳᐃᔥᑯᑌᐗᕽ ᓵᑲᐃᑲᓐ᙮

20:15b.REV.020.015 ᐊᐌᓀᓐ ᐃᑕᔥ ᐃᑯ ᐁᑳ ᐁᐅᔑᐲᐙᓯᐎᓐᒡ ᐃᒫ ᒪᓯᓇᐃᑲᓂᕽ ᐃᑭ ᑌᐺ ᑳᐱᒫᑎᓯᐙᒡ ᑳᐃᔑᐲᐅᑣ, ᒦ ᐃᒫ ᑮᐃᔑᐌᐱᓈ ᐃᔥᑯᑌᐎᓵᑲᐃᑲᓃᕽ᙮

21

21:1b.REV.021.001 ᒦᓇᐙ ᑕᔥ ᓂᑮᐙᐸᑖᓐ ᐅᔥᑭᑭᒋᑮᔑᒃ ᐃᐃ ᑲᔦ ᐅᔥᑭᐊᑭ᙮ ᐃᐃ ᑕᔥ ᓂᑕᒻ ᑭᒋᑮᔑᒃ ᐃᐃ ᑲᔦ ᓂᑕᒻ ᐊᑭ ᑮᐃᔥᒀᓭᐗᓐ, ᑭᒋᑲᒻ ᑲᔦ ᑳᐐᓐ ᑫᔮᐱ ᑮᐊᔮᓯᓅᓐ᙮

21:2b.REV.021.002 ᓂᑮᐙᐸᑖᓐ ᑕᔥ ᐃᐃ ᐆᑌᓇ ᑭᔐᒪᓂᑑ ᑳᐃᔑᐊᔮᒡ, ᒦ ᐃᐌ ᐅᔥᑭ ᒉᕒᐆᓴᓬᐊᒻ, ᐁᐱᐅᒋᓈᔑᔥᑳᒃ ᑭᒋᑮᔑᑯᕽ, ᑭᔐᒪᓂᑑᕽ ᐁᐅᒌᒃ᙮ ᑮᐗᐌᔑᒋᑳᑌ ᑖᐱᔥᑰ ᐃᑴ ᐁᔑᐗᐌᔑᐅᑕᐙᒡ ᐅᓈᐯᒪᓐ ᐁᐐᑭᒋᐐᑎᑫᒫᒡ᙮

21:3b.REV.021.003 ᓂᑮᓅᑖᓐ ᐃᑕᔥ ᐁᑭᒋ ᐃᓂᑖᑾᒃ ᑭᒋᐊᐱᐎᓂᕽ ᐁᑮᐅᒋᑮᑭᑐᒡ ᐊᐎᔭ ᐅᐅᐌ ᐁᐃᑭᑐᒡ: ᐅᑖᐎᓐ ᑭᔐᒪᓂᑑ ᐃᓂᓃᓈᕽ ᐊᔮᓂ᙮ ᐊᒦᑕᔥ ᐅᑲᐐᒋᑖᒫᐞ, ᑲᔦ ᐐᓐ ᐃᑯ ᐅᑲᑎᐯᓂᒫᐞ ᒋᐅᑎᓂᓃᒥᒡ᙮ ᐐᓐ ᐃᑯ ᑎᐱᓇᐌ ᑭᔐᒪᓂᑑ ᐅᑲᐐᒋᐊᔮᒫᐞ, ᒋᐅᑭᔐᒪᓂᑑᒥᑯᒡ᙮

21:4b.REV.021.004 ᐅᑲᑳᓯᐊᒪᐙᐞ ᑲᑭᓇ ᐅᒋᑲᐙᐱᐎᓐ ᐅᔥᑮᔑᑯᓃᕽ ᐅᒋ᙮ ᑲᔦ ᓂᐳᐎᓐ ᑳᐐᓐ ᑫᑰᓐ ᑕᑭᑫᑖᑾᓯᓅᓐ, ᑳᐐᓐ ᑲᔦ ᑕᑭᑫᑖᑾᓯᓅᓐ ᐲᑴᑕᒧᐎᓐ᙮ ᐊᐴᔥᑫ ᒪᐎᐎᓐ, ᐐᓴᑫᑕᒧᐎᓐ ᑳᐐᓐ ᑕᐊᔮᒪᑲᓯᓅᓇᓐ᙮ ᐋᓃᔥ ᐃᓂ ᓂᑕᒻ ᑳᑮᐱᒥᐊᔮᑭᓐ ᐋᔕ ᑮᐴᓂᓭᐗᓐ᙮

21:5b.REV.021.005 ᐊᐊ ᑕᔥ ᑳᓇᒪᑕᐱᒡ ᑭᒋᐊᐱᐎᓂᕽ ᑮᐃᑭᑐ: ᐃᓇᔥᑫ ᑲᑭᓇ ᑫᑰᓐ ᓂᑑᔑᑑᓐ ᒋᐅᔥᑲᔭᐄᐗᕽ᙮ ᒦᑕᔥ ᐃᐃᐌ ᑳᐃᔑᒡ: ᐅᔑᐲᐊᓐ ᐅᓄᐌᓂᐗᓐ᙮ ᐋᓃᔥ ᑌᐺᒪᑲᓅᓐ ᐅᓄ ᐃᑭᑐᐎᓇᓐ, ᑌᐺᔦᑖᑾᓅᓐ ᑲᔦ᙮

21:6b.REV.021.006 ᒦᓇᐙ ᑕᔥ ᓂᑮᐃᒃ: ᑎᐱᓭ! ᓃᓐ ᐊᐊᐌ ᓂᑕᒻ ᑳᑮᐊᔮᒡ ᑲᔦ ᐃᔥᒀᒡ ᑫᐊᔮᒡ᙮ ᓃᓐ ᑳᒫᒋᓭᒃ ᒦᓇᐙᔥ ᑫᑮᔑᓭᒃ᙮ ᓂᑲᒥᒋᒦᓈ ᑳᓅᑌᐐᒥᓂᑴᒡ ᒋᐅᒋᒥᓂᑴᒡ ᐃᐃᒫ ᐁᒨᑭᒋᐗᓂᐲᑯᐗᕽ ᐁᐱᒫᑎᓰᔥᑳᑫᒪᑲᒃ ᐃᐃ ᓂᐱ᙮

21:7b.REV.021.007 ᐊᐎᔭ ᐱᑯ ᑫᔖᑰᒋᐃᐌᒡ ᐅᑲᑎᐯᑖᓇᓐ ᐅᓄ ᑳᐐᒦᓇᒃ: ᓂᑲᐅᑭᔐᒪᓂᑑᒥᒃ, ᐐᓐ ᑕᔥ ᑲᔦ ᓂᑲᐅᑯᓯᓯᒫ᙮

21:8b.REV.021.008 ᐃᑭᐌᓂᐗᒃ ᐃᑕᔥ ᐐᓐ ᑳᔖᑯᑌᐁᐙᒡ, ᑳᑌᐺᔦᑖᑯᓯᓯᒀ, ᑳᓂᑖ ᑲᒀᓂᓴᑭᒋᑫᐙᒡ, ᐃᑭ ᑲᔦ ᐅᓂᔑᐌᒃ, ᐅᐱᔑᒀᑎᓰᒃ, ᐅᑯᓵᐸᒋᑫᒃ, ᐅᒪᓂᑑᑫᔥᑲᒃ, ᑲᔦ ᑲᑭᓇ ᑳᑲᑮᓇᐎᔥᑭᐙᒡ, ᒦ ᐃᒫ ᐐᓇᐙ ᑫᐊᔮᐙᒡ, ᐃᐃᒫ ᓵᑲᐃᑲᓃᕽ ᑳᔑᒑᑭᑌᒃ ᐃᐃᐌ ᐃᔥᑯᑌ ᑲᔦ ᐊᐌ ᐊᓯᓐ ᑳᐱᔅᑲᓀᒡ ᐁᐐᓴᑳᐸᓱᐌᒡ᙮ ᒦ ᐅᐌ ᐃᔥᒀᒡ ᓃᔣ ᓂᐳᐎᓐ᙮

21:9b.REV.021.009 ᐯᔑᒃ ᐃᑕᔥ ᓂᑮᐱᓈᓯᑳᒃ ᑳᓃᔣᒋᐙᒡ 7 ᐁᒐᓬᐊᒃ ᓃᔣᓱ ᑳᐊᔮᐙᒡ ᐅᓈᑲᓇᓐ, ᓃᔣᓱ 7 ᐁᒨᔥᑭᓀᓂᑭᓐ ᑲᒀᑕᑭᑑᐎᓇᓐ, ᐊᒦᐗᓄᓄ ᐃᔥᒀᒡ ᑫᓂᐊᔮᓂᑭᓐ᙮ ᓂᑮᑲᓅᓂᒃ ᐊᐌ ᐁᒐᓬ: ᐲᔖᓐ ᐅᐅᒫ, ᐁᐃᔑᒡ, ᑭᑲᐙᐸᑕᐃᓐ ᐊᐊ ᑳᐅᔥᑭᐐᑎᑫᒥᓐᒡ ᐃᑴ, ᑳᐐᐐᑎᑫᒥᑯᒡ ᐃᓂ ᒫᓇᒑᓂᔐᓴᓐ, ᑮᐃᑭᑐ᙮

21:10b.REV.021.010 ᓂᑮᐐᒌᐎᒃ ᑭᔐᒪᓂᑑ ᐅᑕᒑᑾᓐ, ᐃᐃᒫ ᐁᐃᔑᐎᔑᒡ ᐊᐊ ᐁᒐᓬ ᐗᑭᒋ ᐱᑾᑎᓈᕽ ᐁᑭᒋ ᐃᔥᐸᑎᓈᒃ᙮ ᓂᑮᐙᐸᑕᐃᒃ ᑭᔐᒪᓂᑑ ᐅᑑᑌᓈᒻ ᒉᕒᐆᓴᓬᐊᒻ ᐃᒫ ᐁᐱᓈᔒᔥᑳᒃ ᑭᒋᑮᔑᑯᕽ ᑭᔐᒪᓂᑑᕽ ᐁᐅᒌᒃ,

21:11b.REV.021.011 ᑭᔐᒪᓂᑑ ᐅᐙᓭᓯᐎᓂᕽ ᐁᐅᒋᐙᓯᑌᓂᒃ᙮ ᑮᐃᔑᐙᓵᐱᑭᑌ ᑖᐱᔥᑰ ᐊᓯᓐ ᑳᐋᑾᑭᓱᒡ, ᑖᐱᔥᑰ ᒑᔅᐸᕒ ᐊᓯᓐ ᐐᑫ ᑳᔖᐳᓇᐃᓈᑯᓯᒡ᙮

21:12b.REV.021.012 ᑮᐙᑳᒣᓂᑲᓂᑲᑌ ᐃ ᐆᑌᓇ, ᐐᑫ ᐁᒥᔖᒃ ᑲᔦ ᐁᐃᔥᐹᒃ ᐊᓯᓃᐎ ᒣᓂᑲᓈᐱᒃ, ᒥᑖᔑᓃᔑᓐ 12 ᐁᐊᔮᒪᑲᑭᓐ ᑭᒋ ᐃᔥᒀᑌᒪᓐ᙮ ᐯᐯᔑᒃ ᐃᐃᒫ ᐃᔥᒀᑌᒥᕽ ᑮᐊᔮᐗᒃ ᐁᒐᓬᐊᒃ ᐁᒥᑖᔑᓃᔑᐙᒡ᙮ ᐯᐯᔑᒃ ᐐᓱᐎᓇᓐ ᑮᐅᔑᐲᐃᑳᑌᐗᓐ ᐃᐃᒫ ᐃᔥᒀᑌᒥᕽ, ᒦᐗᓄᓄ ᐅᐐᓱᐎᓂᐙᓐ ᒥᑖᔑᓃᔑᓐ ᑳᐯᐸᑳᓉᐙᓇᑭᓯᐙᒡ ᐃᔅᕒᐃᔭᓬ ᐃᓂᓂᐗᒃ᙮

21:13b.REV.021.013 ᐃᓂ ᑕᔥ ᑭᒋ ᐃᔥᒀᑌᒪᓐ ᑮᓀᓂᓯᓅᓐ 3 ᐙᐸᓄᕽ ᐃᓇᑫ ᐃᐌ ᐊᓯᓃᐎ ᒣᓂᑲᓈᐱᒃ ᑮᓂᓯᓅᓐ ᑭᒋ ᐃᔥᒀᑌᒪᓐ, ᒦᓇᐙ ᔖᐗᓄᕽ ᑮᓂᓯᓅᓐ, ᒦᓇᐙ ᑲᔦ ᑮᐌᑎᓄᕽ ᑮᓂᓯᓅᓐ, ᒦᓇᐙ ᓂᑳᐲᐊᓄᕽ ᐃᓇᑫ ᑮᓂᓯᓅᓐ᙮

21:14b.REV.021.014 ᔑᑾ ᑮᒥᑖᔑᓃᔑᐗᒃ ᐊᓯᓃᒃ ᐃᒫ ᑳᑮᐃᔑᐸᑕᑭᑌᒃ ᐃᐃ ᐊᓯᓃᐎ ᒣᓂᑲᓈᐱᒃ᙮ ᐯᐯᔑᒃ ᐃᑕᔥ ᐃᐃᒫ ᑮᐅᔑᐲᐃᑳᑌᓂᐗᓐ ᐅᐐᓱᐎᓂᐙᓐ ᑳᒥᑖᔑᓃᔑᓂᒡ ᐅᑎᔑᓂᔕᐙᑲᓇᐞ ᐊᐌ ᒫᓇᒑᓂᔐᔅ᙮

21:15b.REV.021.015 ᐊᐌ ᑕᔥ ᐁᒐᓬ ᑳᐐᒋᑲᑭᑑᒥᒡ ᐅᑮᐊᔮᓐ ᐁᐅᓵᐎ ᔔᓂᔮᐗᓂᓂᒃ ᑎᐸᐃᑲᓈᑎᒃ, ᒋᑎᐸᐊᕽ ᐃᐃ ᐆᑌᓇ, ᑲᔦ ᐁᐃᔥᒀᑌᒥᐗᓂᓂᒃ ᑲᔦ ᐁᐙᑳᐊᔮᓂᒃ ᐊᓯᓃᐎ ᒣᓂᑲᓈᐱᒃ᙮

21:16b.REV.021.016 ᓃᐎᕽ ᐁᑲᑲᑫᔮᒃ ᑮᐃᓇᑭᑌ ᐃᐌ ᐆᑌᓇ, ᐯᔑᑾᓐ ᐁᐊᒀᒃ ᑲᔦ ᐯᔑᑾᓐ ᐁᐊᐲᑕᑌᔮᒃ᙮ ᐅᑎᐸᐃᑲᓈᒃ ᐅᑮᐃᔑᑎᐸᐋᓐ ᐊᐌ ᐁᒐᓬ ᐃᐌ ᐆᑌᓇ, ᒥᑖᔑᓃᔑᓐ ᑕᓱ ᒥᑖᔂᒃ 12,000 ᐃᔅᑌᑎᔭ ᑮᐊᐲᒑ ᐁᐊᒀᒃ ᐃ ᐆᑌᓇ᙮ ᐯᔑᑾᓐ ᑮᐊᒀ ᑲᔦ ᐯᔑᑾᓐ ᑮᐊᐲᑕᑌᔮ ᑲᔦ ᐯᔑᑾᓐ ᑮᐊᐲᑖ᙮

21:17b.REV.021.017 ᒦᓇᐙ ᐅᑮᑎᐸᐋᓐ ᐃᐃ ᐊᓯᓃᐎ ᒣᓂᑲᓈᐱᒃ᙮ ᒦᔥ ᐃᐃᐌ ᓂᑯᑣᒃ ᓃᒥᑕᓇᔑᓃᐎᓐ 144 ᑕᓱ ᐯᒥᓂᒃ ᑮᐊᐲᑖ᙮ ᐯᔑᑾᓐ ᐃᓂᓂ ᑳᐃᔑᓂᑖᑎᐸᐃᑫᒡ ᑮᐃᔑᑎᐸᐃᑫ ᐊᐊ ᐁᒐᓬ᙮

21:18b.REV.021.018 ᑮᐅᒋᐅᔑᒋᑳᑌ ᐃᐃ ᐊᓯᓃᐎ ᒣᓂᑲᓈᐱᒃ ᐊᐊ ᒑᔅᐸᕒ ᐊᓯᓐ᙮ ᐃᐃᐌᔥ ᐆᑌᓇ ᐐᑫ ᒪᔮ ᐅᓵᐎ ᔔᓂᔮᐗᓯᓃᕽ ᑮᐅᒋᐅᔑᒋᑳᑌ᙮ ᑖᐱᔥᑰ ᐐᑫ ᑯ ᐁᔖᐳᓈᑾᒃ ᐙᓭᒋᑲᓈᐱᒃ ᐃᓈᐱᑭᓯ ᐅᓵᐎ ᔔᓂᔮ᙮

21:19b.REV.021.019 ᐃᑭ ᑕᔥ ᐊᓯᓃᒃ ᑳᐃᔑᐅᓈᐱᑭᓯᕽ ᐃᐃ ᐊᓯᓃᐎ ᒣᓂᑲᓈᐱᒃ, ᑮᐃᔑ ᐗᐌᔑᒋᑲᓂᐎᐗᒃ ᒑᑲᔭᒃ ᑎᓄ ᑳᐅᓂᔑᔑᐙᒡ ᐊᓯᓃᓴᒃ᙮ ᐊᐊᐌ ᑕᔥ ᓂᑕᒻ ᑭᒋᐊᓯᓐ ᒑᔅᐸᕒ ᑮᑎᓄᐎ, ᒦᓇᐙ ᐊ ᐯᔑᒃ ᐁᔖᐳ ᐅᔖᐗᔥᑯᓈᑯᓯᒡ ᓵᐸᔭᕒ ᐊᓯᓐ ᑮᑎᓄᐎ᙮ ᒦᓇᐙᔥ ᐯᔑᒃ ᐁᐯᐸᑳᓂ ᐯᐯᔖᐱᑭᓯᒡ ᐊᓯᓐ ᐁᑭᑦ ᐁᑎᓄᐎᒡ, ᒦ ᓂᓯᓐ 3. ᒦᓇᐙ ᐊ ᓃᐎᓐ ᑳᐃᓇᑭᒋᑳᓱᒡ ᔒᑯᐲᕽ ᐁᐃᔑᔖᑆᑌᓈᑯᓯᒡ ᐊᓯᓐ, ᐁᒪᕒᐊᓬᑦ ᑮᑎᓄᐎ᙮

21:20b.REV.021.020 ᒦᓇᐙᔥ ᐊᐊ ᓈᓂᕽ ᐁᓇᑭᒋᑳᓱᒡ ᐋᓂᑭᔅ ᑮᑎᓄᐎ ᐊᓯᓐ, ᐁᐃᔑᐯᐯᔖᐱᑭᓯᒡ ᐁᒥᔅᑯᓯᒡ, ᐁᐙᐱᔥᑭᓯᒡ ᑲᔦ᙮ ᒦᓇᐙ ᓂᑯᑣᓱ ᐁᐃᓇᑭᒋᑳᓱᒡ ᑳᕒᓃᓬᐃᔭᓐ ᑮᑎᓄᐎ ᐊᓯᓐ ᐁᒥᔅᒀᐱᑭᓯᒡ᙮ ᒦᓇᐙ ᓃᔣᓱ ᐁᐃᓇᑭᒋᑳᓱᒡ ᑲᕒᐃᓴᓬᐊᐃᑦ ᑮᑎᓄᐎ ᐊᓯᓐ ᐁᐅᓵᐎᓈᑯᓯᒡ ᐁᔖᐳᓈᑯᓯᒡ᙮ ᒦᓇᐙ ᓂᔣᓱ 8 ᐁᐃᓇᑭᒋᑲᓂᐎᒡ ᐯᕒᐊᓬ ᑮᑎᓄᐎ ᐊᓯᓐ ᐁᐅᔖᐗᔥᒀᐱᑭᓯᒡ᙮ ᒦᓇᐙ ᔖᑲᓱ ᐁᐃᓇᑭᒋᑳᓱᒡ ᑑᐹᔅ ᑮᑎᓄᐎ ᐁᔖᐳ ᐅᓵᐎᓈᑯᓯᒡ ᐊᓯᓐ᙮ ᒦᓇᐙᔥ ᒥᑖᓱ ᐁᐃᓇᑭᒋᑳᓱᒡ ᑲᕒᐃᓴᐸᕒᐁᔅ ᐁᑎᓄᐎᒡ ᐁᔒᑯᐲ ᐅᔕᐗᔥᑯᓯᒡ ᐊᐊ ᐊᓯᓐ᙮ ᒦᓇᐙᔥ ᒥᑖᔑᐯᔑᒃ ᐁᐃᓇᑭᒋᑳᓱᒡ ᐊ ᑭᒋᐊᓯᓐ, ᐅᔖᐗᔥᑾᓯᓐ ᑐᕒᑯᔨᔅ ᑮᑎᓄᐎ᙮ ᒦᓇᐙ ᒥᑖᔑᓃᔑᓐ ᑳᐃᓇᑭᒋᑳᓱᒡ ᑭᒋᐊᓯᓐ ᐋᒪᑎᔅᑦ ᑮᑎᓄᐎ ᔔᒥᓈᐳᕽ ᐁᐃᔑᓈᑯᓯᒡ ᐊᐊ ᐊᓯᓐ᙮

21:21b.REV.021.021 ᐃᓂ ᑕᔥ ᑳᒥᑖᔑᓃᔑᑭᓐ 12 ᑭᒋ ᐃᔥᒀᑌᒪᓐ, ᒥᑖᔀᔑᓃᔑᓐ ᒦᑭᓴᒃ ᑮᑎᓄᐗᓅᓐ᙮ ᐯᐯᔑᒃ ᐃᐃ ᐃᔥᒀᑌᒻ ᐯᔑᒃ ᒦᑭᓯᕽ ᑮᐅᒋᐅᔑᒋᑳᑌ᙮ ᔑᑾ ᐃᐌ ᒦᑲᓇ ᐃᒫ ᑳᐱᒪᒧᒃ ᐆᑌᓈᕽ, ᐐᑫ ᒪᔮ ᐅᓵᐎ ᔔᓂᔮᐗᓯᓐ ᑮᐅᒋᐅᔑᒋᑳᑌ ᒦᑲᓇ, ᑖᐱᔥᑰ ᐁᔖᐳᓈᑾᒃ ᐙᓭᓂᑲᓈᐱᒃ ᑮᐃᓈᐱᑭᓯ ᐅᓵᐎ ᔔᓂᔮ᙮

21:22b.REV.021.022 ᑳᐐᓐ ᑕᔥ ᓂᑮᐙᐸᑕᓰᓐ ᐃᐌᑎ ᑭᒋᐊᓇᒥᐁᐎᑲᒥᒃ ᒋᐊᔮᒪᑲᒃ᙮ ᑳᑎᐯᒋᑫᒡ ᑭᔐᒪᓂᑑ ᒫᒪᐤ ᐁᑭᒋᒪᔥᑲᐌᑖᑯᓯᒡ, ᑲᔦ ᐊ ᒫᓇᒑᓂᔐᔅ, ᒦᐗᒃ ᐅᑯ ᐋᐎᐗᒃ ᐁᑭᒋᐊᓇᒥᐁᐎᑲᒥᑯᐗᕽ ᐃᐃ ᐆᑌᓇ᙮

21:23b.REV.021.023 ᑳᐐᓐ ᒣᒬᒡ ᐃᐃᒫ ᐆᑌᓇ ᑕᓇᑕᐌᑖᑯᓯᓰ ᑮᓯᔅ ᑲᔦ ᑎᐱᑭᑮᓯᔅ ᐃᒫ ᒋᐙᓭᔮᒃ᙮ ᒦ ᐁᑕ ᐃᒫ ᑕᐅᒋᐙᓭᔮ ᑭᔐᒪᓂᑑ ᐅᐗᓭᔮᐎᓂᕽ, ᑲᔦ ᒦ ᐊᐌ ᐎᔮᓴᑯᓀᒋᑲᓂᐎᒡ ᐊᐊ ᒫᓇᒑᓂᔐᔅ ᐃᒫ ᐆᑌᓇ᙮

21:24b.REV.021.024 ᑳᑕᓶᐙᓇᑭᓯᐙᒡ ᐊᑮᕽ ᑕᐱᒧᓭᐗᒃ ᐃᒫ ᐁᔑᐙᓭᔮᒃ ᐃᐃ ᐆᑌᓇ᙮ ᑲᔦ ᑭᒋᐅᑭᒫᒃ ᐊᑮᕽ ᑳᐊᔮᐙᒡ ᐅᑲᐲᑎᑲᑑᓈᐙ ᐃᐃᒫ ᐅᑑᓂᔑᔑᐌᑖᑯᓯᐎᓂᐙ᙮

21:25b.REV.021.025 ᐃᓂ ᑕᔥ ᑭᒋ ᐃᔥᒀᑌᒪᓐ ᒨᔕᒃ ᑕᐹᑭᓯᓅᓐ ᑲᐯᑮᔑᒃ᙮ ᑳᐐᓐ ᐐᑳ ᒋᑭᐸᐃᑳᑌᓯᓄᑭᓐ᙮ ᑳᐐᓐ ᐋᓃᔥ ᐐᑳ ᐃᐃᒫ ᑕᑎᐱᑲᓯᓅᓐ᙮

21:26b.REV.021.026 ᑕᐲᑎᑲᒋᑳᑌᓂᐗᓐ ᐃᐃᒫ ᐆᑌᓈᕽ ᐅᑑᓂᔑᔑᐌᑖᑯᓯᐎᓂᐙ ᐃᑭ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᑲᔦ ᐅᐌᓅᑎᓯᐎᓂᐙᓐ᙮

21:27b.REV.021.027 ᑳᐐᓐ ᑕᔥ ᑫᑰᓐ ᑕᐲᑎᑲᒋᑳᑌᓯᓅᓐ ᐃᐌ ᑳᐐᓀᑖᑾᒃ, ᑳᐐᓐ ᑲᔦ ᑕᐲᑎᑫᓰ ᑳᑑᑕᕽ ᐃᐃ ᑳᔒᑫᑖᑾᒃ ᑲᔦ ᑳᑮᐗᓂᒧᒡ᙮ ᐃᑭ ᐁᑕ ᑳᐅᔑᐲᐃᑳᓱᐙᒡ ᐃᐃᒫ ᐅᒪᓯᓇᐃᑲᓂᕽ ᐊᐊ ᒫᓇᒑᓂᔐᔅ ᑳᐃᔑᐅᔑᐲᐅᑣ ᐊᐸᓀ ᐱᑯ ᑫᐱᒫᑎᓯᐙᒡ, ᒦᐗᒃ ᐁᑕ ᑫᐲᑎᑫᐙᒡ ᐃᐃᒫ ᐆᑌᓈᕽ᙮

22

22:1b.REV.022.001 ᒦᓇᐙ ᓂᑮᐙᐸᑕᐃᒃ ᐊᐊ ᐁᒐᓬ ᐃᐃ ᓰᐱ ᑳᐱᒫᑎᓰᔥᑳᑫᒪᑲᒃ ᐃᐃ ᓂᐱ ᐁᐲᒋᐙᔐᑲᒥᒃ ᑖᐱᔥᑰ ᐙᓭᒋᑲᓈᐱᒃ ᐁᔖᐳᓇᐃᓈᑾᒃ ᐃᔑᓈᑾᓐ ᐃ ᓰᐱ, ᐁᐱᐅᒋᒋᐗᕽ ᐃᐃᒫ ᐅᑭᒋᐊᐱᐎᓂᕽ ᑭᔐᒪᓂᑑ ᑲᔦ ᐊ ᒫᓇᒑᓂᔐᔅ᙮

22:2b.REV.022.002 ᓈᐗᔭᐄ ᐃᐃᒫ ᐃᔑᒋᐗᓐ ᐁᐱᒪᒧᒃ ᒦᑲᓇ ᐃᒫ ᐆᑌᓈᕽ᙮ ᐁᔩᑕᐗᑳᒻ ᑮᐃᔑᐸᑕᑭᓱ ᐱᒫᑎᓯᐎᓂ ᒥᑎᒃ᙮ ᐊᐊᔥ ᒥᑎᒃ ᑮᑮᔑᔔᒥᓂᐎ ᐁᑕᓱᑮᓯᔅ, ᒥᑖᔀᔑᓃᔑᕽ ᐁᑕᓱᐊᑭ᙮ ᐃᓂ ᐊᓃᐲᔕᓐ ᐁᐊᓃᐲᔑᐎᒡ ᐊᐊ ᔔᒥᓈᑎᒃ ᐃᓈᐸᑕᓅᓇᓐ ᒋᐅᒋᒥᓄᐊᔮᐃᑣ ᑲᑭᓇ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ᙮

22:3b.REV.022.003 ᔑᑾ ᑲᑭᓇ ᑫᑰᓐ ᑳᒪᒐᑭᑕᕽ ᑭᔐᒪᓂᑑ ᑳᐐᓐ ᐐᑳ ᐃᒫ ᑕᒥᑭᑳᑌᓯᓅᓐ ᐆᑌᓈᕽ᙮ ᐅᑭᒋᐊᐱᐎᓂᐙ ᑭᔐᒪᓂᑑ ᑲᔦ ᐊ ᒫᓇᒑᓂᔐᔅ ᐃᐃᒫ ᑕᐊᔮᓂ ᐆᑌᓈᕽ᙮ ᑲᔦ ᐅᑕᓄᑮᐋᑲᓇᐞ ᐅᑲᑭᒋ ᐃᓀᓂᒥᑰᐞ᙮

22:4b.REV.022.004 ᐅᑲᐙᐸᒥᑰᐞ ᐅᐗᑌᑯᕽ, ᑲᔦ ᐅᐐᓱᐎᓐ ᑭᔐᒪᓂᑑ ᑕᐅᔑᐲᐃᑳᑌᓂ ᐅᔅᑲᑎᑯᓃᕽ ᐅᑕᓄᑮᐋᑲᓇᐞ᙮

22:5b.REV.022.005 ᑳᐐᓐ ᒦᓇᐙ ᐐᑳ ᑕᑎᐱᑲᓯᓅᓐ᙮ ᑳᐐᓐ ᑲᔦ ᐅᑲᐊᑕᐌᑕᓰᓈᐙ ᐙᓴᑯᓀᒋᑲᓐ ᒋᐅᒋᐙᓭᔮᒃ, ᑳᐐᓐ ᑲᔦ ᑮᓯᔅ ᐅᐙᓭᓯᐎᓐ᙮ ᐋᓃᔥ ᑳᑎᐯᒋᑫᓂᒡ ᑭᔐᒪᓂᑑᓐ ᐅᑲᐙᓭᔥᑳᑯᐙᓐ᙮ ᒦᑕᔥ ᐃᐌ ᑕᑭᒋᐅᑭᒫᐎᐗᒃ ᐊᐸᓀ ᐱᑯ ᐱᔑᔑᒃ ᒋᑎᐯᒋᑫᐙᒡ᙮

22:6b.REV.022.006 ᓂᑮᐃᒃ ᐃᑕᔥ ᐊᐊ ᐁᒐᓬ: ᐊᔮᒀᒣᑖᑾᓅᓐ ᑲᔦ ᑌᐺᐎᓂᐗᓅᓐ ᐅᓄ ᐃᑭᑐᐎᓇᓐ᙮ ᑳᑎᐯᒋᑫᒡ ᑭᔐᒪᓂᑑ ᑳᒦᓈᒡ ᐅᑕᒑᑾᓐ ᐃᓂ ᐅᑎᐹᒋᒧᐎᓂᓃᒪᐞ ᑳᑲᓅᑕᒫᑯᒡ, ᒦ ᐊᐌ ᑳᐱ ᐃᔑᓂᔕᐙᒡ ᐅᑌᒐᓬᐃᒪᓐ ᒋᐙᐸᑕᐋᓂᒡ ᐅᑕᓄᑮᐋᑲᓇᐞ ᐃᐌ ᐌᔩᑉ ᑫᓂ ᐃᔑᓭᓂᒃ᙮

22:7b.REV.022.007 ᐱᓯᑕᓐ! ᐃᑭᑐ ᐊ ᒋᓴᔅ᙮ ᐌᔩᑉ ᓂᑲᐲᔖ! ᑕᔕᐌᑖᑯᓯ ᐊᐊ ᑳᑲᓇᐌᑕᕽ ᐅᓄ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ ᐅᐅᒫ ᒪᓯᓇᐃᑲᓂᕽ ᑳᐃᔑᐲᐃᑳᑌᓂᑭᓐ, ᐃᑭᑐ᙮

22:8b.REV.022.008 ᓃᓐ ᒞᓐ ᓂᑮᓅᑖᓇᓐ ᑲᔦ ᓂᑮᐙᐸᑖᓇᓐ ᑲᑭᓇ ᐅᓄ᙮ ᐊᐲ ᑳᐃᔥᒀᓅᑕᒫᓐ ᑲᔦ ᑳᐃᔥᒀᐙᐸᑕᒫᓐ ᓂᑮᐸᑕᐱᐸᓂᐞ ᐃᒫ ᐁᔑᓯᑌᑳᐸᐎᒡ ᐁᐐᑭᒋ ᐃᓀᓂᒪᒃ ᐊᐊ ᐁᒐᓬ ᑳᑮᐙᐸᑕᐃᒡ ᐅᓄ᙮

22:9b.REV.022.009 ᓂᑮᐃᒃ ᐃᑕᔥ: ᑫᑯ ᐃ ᑑᑕᑫᓐ! ᓃᓐ ᐊ ᐯᔑᒃ ᑭᐐᒋᐊᓄᑮᒫᑲᓐ ᑲᔦ ᐅᐐᑕᓄᑮᒫᑲᓂᐙᓐ ᐃᑭ ᑮᒋᑭᐌᔭᒃ, ᒦᐗᒃ ᐃᑭ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ ᑳᑲᓅᑕᒫᑯᒡ, ᑲᔦ ᑲᑭᓇ ᐊᐎᔭ ᑳᑲᓇᐌᑕᕽ ᐃᓂ ᐃᑭᑐᐎᓇᓐ ᐅᐅᒫ ᒪᓯᓇᐃᑲᓂᕽ ᑳᐊᔮᑭᓐ᙮ ᑭᒋ ᐃᓀᓂᒻ ᑭᔐᒪᓂᑑ, ᒦ ᐁᑕ ᐊᐌ᙮

22:10b.REV.022.010 ᑲᔦᔥ ᓂᑮᐃᒃ ᐊᐊ ᐁᒐᓬ: ᑫᑯ ᑭᐸᐊᑫᓐ ᐃᓂ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ ᐅᐅᒫ ᒪᓯᓇᐃᑲᓂᕽ ᑳᐊᔮᑭᓐ᙮ ᐋᓃᔥ ᐯᔓᓈᑾᓐ ᐅᓄ ᑲᑭᓇ ᒋᑎᐱᓭᑭᓐ᙮

22:11b.REV.022.011 ᐊᐌ ᑳᐐᑾᔭᑯᐱᒫᑎᓯᓯᒃ, ᒫᓄ ᑫᔮᐱ ᑕᑕᔑᒪᒋ ᐃᔑᐌᐱᓯ᙮ ᐊᐊᔥ ᑲᔦ ᑳᐐᓀᑖᑯᓯᒡ ᒫᓄ ᑫᔮᐱ ᑕᑕᔑᐐᓈᑎᓯ᙮ ᐊᐊᔥ ᑳᑾᔭᑯᐱᒫᑎᓯᒡ ᑕᑲ ᑳᐐᓐ ᐅᑲᐴᓂᑑᓰᓐ ᒋᑾᔭᑯᐱᒫᑎᓯᒡ᙮ ᐊᐌᔥ ᒦᓇ ᑳᐃᓇᑭᑎᓱᒡ ᒋᑎᐯᓂᒥᑯᒡ ᑭᔐᒪᓂᑑᓐ, ᑕᑲ ᒦ ᐃ ᑫᐃᓇᑭᑎᓱᒡ, ᓂᑮᐃᒃ ᐊᐊ ᐁᒐᓬ᙮

22:12b.REV.022.012 ᓇᔥᑫ ᐱᓯᑕᓐ! ᐃᑭᑐ ᒋᓴᔅ᙮ ᐌᔩᑉ ᓂᑲᑕᑯᔑᓐ, ᐃᑭᑐ᙮ ᓂᑲᐱᑭᑭᑕᑯᔑᓐ ᓂᑎᐸᐊᒫᑫᐎᓇᓐ᙮ ᐁᑕᓱᐯᔑᑯᐙᒡ ᓂᑲᒦᓈᒃ ᑳᐃᔑᓈᑾᓂᓂᒃ ᐅᑎᔑᒋᑫᐎᓐ᙮

22:13b.REV.022.013 ᓃᓐ ᐊᐊ ᓂᑕᒻ ᑳᑮᐊᔮᒡ, ᑲᔦ ᐲᓂᔥ ᐃᔥᒀᒡ ᑫᐊᔮᒡ᙮ ᓃᓐ ᐊᐊ ᑳᑮᒫᒋᓭᒃ ᑲᑭᓇ ᒦᓇᐙ ᑫᑮᔑᓭᒃ, ᐃᑭᑐ᙮

22:14b.REV.022.014 ᑕᔕᐌᑖᑯᓯᐗᒃ ᐃᑭ ᑳᑭᓰᐲᑭᓇᒧᐙᒡ ᐅᑭᑭᔥᑭᑲᓂᐙᓐ᙮ ᑕᑌᐸᑫᑖᑯᓯᐗᒃ ᐃᑕᔥ ᐃᑭ ᒋᓈᓯᑲᐙᐙᒡ ᐃᓂ ᐱᒫᑎᓯᐎᓂ ᒥᑎᑰᓐ ᒋᐅᒋᐐᓯᓂᐙᒡ, ᑲᔦ ᐃᐃᒫ ᑳᐃᔑ ᐃᔥᒀᑌᒥᐗᓂᓂᒃ ᒋᐅᒋᐲᑎᑫᐙᒡ ᐃᐃᒫ ᐆᑌᓈᕽ᙮

22:15b.REV.022.015 ᐊᑾᒌᕽ ᐃᑕᔥ ᑕᐊᔮᐗᒃ ᐃᑭ ᐊᓅᒋᑯ ᐁᔑᐌᐱᓯᐙᒡ, ᑲᔦ ᑳᑯᓵᐸᑕᒧᐙᒡ, ᑳᐱᔑᒀᑎᓯᐙᒡ, ᑳᓂᔑᐌᐙᒡ, ᑲᔦ ᑳᒪᓂᑑᑫᐙᒡ ᑫᑰᓐ, ᑲᔦ ᐊᐌᓀᓐ ᐃᑯ ᑳᓵᑭᑑᒡ ᐁᑮᐗᓂᒧᒡ ᑲᔦ ᐁᑲᑮᓇᐎᔥᑭᐊᔨᔑᒋᑫᒡ᙮

22:16b.REV.022.016 ᓃᓐ ᒋᓴᔅ ᓂᑮᐃᔑᓂᔕᐙ ᓂᑌᒐᓬᐃᒻ ᒋᑎᐹᒋᒧᑕᐎᓀᒃ ᐅᓄ ᐋᑎ ᐱᑯ ᑳᒫᐗᒋᐃᑎᐙᒡ ᐅᑌᐺᑕᒨᒃ᙮ ᓃᓐ ᐃᒫ ᐅᓂᑖᐎᑭᐋᑲᓂᕽ ᑌᐱᑦ ᓂᑑᑕᑳᓀᔅ᙮ ᓃᓐ ᐊᐊ ᑳᑮᑳᔮᓯᑫᒡ ᐙᐸᓇᕽ, ᐃᑭᑐ᙮

22:17b.REV.022.017 ᐱᑕᑶᔑᓂᓐ! ᐃᑭᑐᐗᒃ ᑭᔐᒪᓂᑑ ᐅᑕᒑᑾᓐ ᑲᔦ ᐊ ᐐᑭᑑᐎᑴ᙮ ᑲᔦ ᑲᑭᓇ ᑳᓅᑕᕽ ᐊᐊ ᒫᓄ ᑕᐃᑭᑐ: ᐱᑕᑶᔑᓂᓐ! ᑲᔦ ᑮᓐ ᐊᐌᓀᓂᐎᔭᓐ ᐃᑯ ᑳᓅᑖᔮᐹᑴᔭᓐ, ᐊᐯ ᐲᔖᓐ᙮ ᐱᑯ ᐊᐎᔭ ᐃᓀᑕᕽ ᐱᓵᓐ ᐃᑯ ᐅᑲᐅᑖᐱᓈᓐ ᑳᐱᒫᑎᓰᔥᑳᑫᒪᑲᒃ ᓂᐱ᙮

22:18b.REV.022.018 ᓃᓐ ᒞᓐ ᓂᑕᔮᒀᒥᒫᒃ ᑲᑭᓇ ᑳᓅᑕᒧᐙᒡ ᐅᓄ ᐃᑭᑐᐎᓇᓐ ᑭᔐᒪᓂᑑ ᑳᐃᔑᑲᓅᑕᒪᐎᓐᒡ, ᐅᐅᒫ ᒪᓯᓇᐃᑲᓂᕽ ᑳᐊᔮᓂᑭᓐ: ᑮᔥᐱᓐ ᓇᑭᑑᒡ ᐊᐎᔭ ᑫᑰᓐ ᐅᓄ ᐃᑭᑐᐎᓇᓐ, ᑫᐐᓐ ᑭᔐᒪᓂᑑ ᐅᑲᓇᑭᑕᒫᑰᓐ ᐅᑎᐸᐊᒫᑰᐎᓂᕽ ᐃᓂ ᑯᑕᑭᑑᐎᓇᓐ ᐅᒫ ᑳᐅᔑᐲᐃᑳᑌᑭᓐ ᒪᓯᓇᐃᑲᓂᕽ᙮

22:19b.REV.022.019 ᑮᔥᐱᓐ ᑲᔦ ᐊᐎᔭ ᐱᑯ ᑫᐊᒋᐎᓇᒧᑴᓐ ᐅᓄ ᐃᑭᑐᐎᓇᓐ ᐁᑳ ᒋᒥᓯᐌᔮᓯᓂᓂᒃ ᑭᔐᒪᓂᑑ ᐅᑲᓅᑕᒫᑰᐎᓐ ᐅᒫ ᒪᓯᓇᐃᑲᓂᕽ ᑳᐊᔮᓂᒃ, ᐅᑲᐅᑖᐱᓇᒫᑰᓐ ᑭᔐᒪᓂᑑᓐ ᑫᐐᓐ ᑫᐐᒋᐃᐌᐸᓐ ᐃᒫ ᐱᒫᑎᓯᐎᓂ ᒥᑎᑯᕽ ᒋᐅᒋᐊᒧᒥᓀᓯᒃ, ᑲᔦ ᑫᐐᒋᐃᐌᐸᓐ ᑭᔐᒪᓂᑑ ᐅᑑᑌᓈᒥᕽ, ᐅᒫ ᑳᑕᓈᑐᑌᑭᓐ ᒪᓯᓇᐃᑲᓂᕽ᙮

22:20b.REV.022.020 ᐊᐌ ᑳᑎᐹᑐᑕᕽ ᐁᑌᐺᒪᑲᑭᓐ ᐅᓄᐌᓂᐗᓐ ᑲᔦ ᐐᓐ ᐃᑭᑐ: ᑌᐺ! ᐐᐸ ᓂᑲᐱᑕᑯᔑᓐ! ᐊᐤ, ᒦ ᐃᐌ ᑫᐃᔑᐌᐸᒃ! ᐱᑕᑶᔑᓂᓐ, ᒋᓴᔅ ᑳᑎᐯᒋᑫᔭᓐ!

22:21b.REV.022.021 ᐅᔕᐌᒋᑫᐎᓐ ᑳᑎᐯᒋᑫᒡ ᒋᓴᔅ ᐅᑲᐐᐐᒌᐎᑯᓈᐙ ᑲᑭᓇ ᐊᐎᔭ᙮ ᐁᒣᓐ᙮