2 Peter (Ojibwa)

21

21:1b.2PE.021.001 ᓃᓐ ᓵᔨᒪᓐ ᐲᑕᕒ, ᒋᓴᔅ X ᐅᑕᓄᑮᐋᑲᓇᓐ, ᐅᑎᔑᓂᔕᐙᑲᓇᓐ ᑲᔦ᙮ ᑭᑑᔑᐲᐊᒪᐎᓂᓂᒻ ᑮᓇᐙ ᑳᑮᑌᐱᓇᒣᒃ ᑌᐺᔦᑕᒧᐎᓐ ᐯᔑᑾᓐ ᑳᑭᑕᑭᑌᒃ ᑖᐱᔥᑰ ᓃᓇᐎᓐᑦ ᑎᓄ ᑳᐊᔮᐗᑭᒡ, ᑳᑮᐅᒋᑌᐱᓇᒣᒃ ᐅᑾᔭᒀᑎᓯᐎᓂᕽ ᑭᑭᔐᒪᓂᑑᒥᓈᓐ, ᑭᐱᒫᒋᐃᐌᒥᓈᓐ ᑲᔦ ᒋᓴᔅ X᙮

21:2b.2PE.021.002 ᑕᑲ ᑭᔐᐙᑎᓯᐎᓐ, ᐱᓵᓂᓯᐎᓐ ᑲᔦ ᑭᑲᑭᒋᒦᓂᑰᐎᓯᒻ ᐃᐃ ᐅᒋ ᑳᐃᔑᑭᑫᓂᒣᒃ ᑭᔐᒪᓂᑑ ᐊᐊ ᑲᔦ ᒋᓴᔅ ᑳᑎᐯᓂᒥᓇᕽ᙮

21:3b.2PE.021.003 ᑭᔐᒪᓂᑑ ᓴ ᐅᒪᔥᑲᐎᓰᐎᓂᕽ ᑭᑑᒋᒦᓂᑰᒥᓐ ᑲᑭᓇ ᑫᑰᓐ ᑳᓅᑌᓭᔭᕽ ᐅᐅ ᑳᐱᒫᑎᓯᔭᕽ ᒋᐃᔑᒥᓄ ᐊᓇᒥᐁᐙᑎᓯᔭᕽ᙮ ᒦᑕᔥ ᐃᐃᒫ ᐌᒋᒦᓂᑰᐎᓯᔭᕽ ᐃᐃ ᐁᑭᑫᓂᒪᕽ ᑭᔐᒪᓂᑑ ᑳᑮᐊᑐᒥᓇᕽ᙮ ᒦ ᓴ ᑕᔥ ᑳᑮᐅᒋᐊᑐᒥᓇᕽ, ᒋᐊᔮᐗᕽ ᐐᓐ ᐃᑯ ᐅᑭᒋ ᐃᓀᑖᑯᓯᐎᓐ, ᐃᐃᐌᓂ ᑲᔦ ᑳᐃᔑᑾᔭᑯᓈᑯᓯᒡ᙮

21:4b.2PE.021.004 ᒦᑕᔥ ᐅᐅ ᑳᑮᐅᒋᒦᓂᓇᕽ ᑳᑭᒋ ᐃᓀᑖᑾᓂᓂᑭᓐ, ᑳᑭᑕᑭᑌᓂᑭᓐ ᐅᒦᑮᐌᐎᓇᓐ ᑳᑮᐊᔓᑕᒫᑫᒡ᙮ ᑮᓇᐙ ᓴ ᐅᒦᑭᐌᐎᓂᕽ ᒋᐅᒋ ᔖᐾᑲᑕᒧᐌᒃ ᐃᐃ ᑳᓂᔑᐙᓈᒋᐃᐌᒪᑲᒃ ᒥᓴᐌᒋᑫᐎᓐ ᐅᐅᒫ ᐊᑮᕽ ᑳᐊᔮᒃ, ᒋᔑᐐᑑᑳᓱᔦᑭᐸᓐ ᐃᑕᔥ ᐅᑎᓈᑎᓯᐎᓂᕽ ᑭᔐᒪᓂᑑ᙮

21:5b.2PE.021.005 ᒦᑕᔥ ᐅᐅ ᑫᐅᒋ ᑲᑭᓇ ᑫᑰᓐ ᐃᔑᒋᑫᔦᑭᐸᓐ ᑭᑌᐺᑕᒧᐎᓂᐙᕽ ᒋᓂᐊᔮᔦᒃ ᑳᑾᔭᑯᓈᑾᒃ ᐱᒫᑎᓯᐎᓐ, ᐃᐃ ᑕᔥ ᐁᐊᔮᔦᒃ ᐊᓂᐊᔮᒃ ᑭᑫᑕᒫᐎᓐ᙮

21:6b.2PE.021.006 ᐁᐅᑭᑫᑕᒫᐎᓂᔦᒃ ᐃᑕᔥ ᐊᓂᐊᔮᒃ ᐊᐎᔭ ᑳᑲᔥᑭᑑᒡ ᐌᐌᓂ ᒋᑎᐯᓂᑎᓱᒡ᙮ ᐅᐅ ᑕᔥ ᐁᔑᑲᔥᑭᑑᔦᒃ ᐊᓂᐊᔮᒃ ᔕᔒᐯᑕᒧᐎᓐ᙮ ᐁᐅᔕᔒᐯᑕᒧᐎᓂᔦᒃ ᑕᔥ ᐊᓂᐊᔮᒃ ᒥᓄᐊᓇᒥᐁᐙᑎᓯᐎᓐ᙮

21:7b.2PE.021.007 ᐁᔑᒥᓄᐊᓇᒥᐁᐙᑎᓯᔦᒃ ᐃᑕᔥ ᐊᓂ ᐃᔑᐊᔮᒃ ᑳᐃᔑᓵᑭᐃᑎᐙᒡ ᑳᐐᑕᓇᒥᐋᑎᐙᒡ; ᐅᐅ ᑕᔥ ᐃᔑᓵᑭᐃᑎᔦᒃ, ᐐᑫ ᐊᓂᔕᐌᓂᑎᒃ᙮

21:8b.2PE.021.008 ᑮᔥᐱᓐ ᓴ ᐊᔮᔦᒃ ᐅᓄ ᐃᔑᐊᔮᐎᓇᓐ, ᐊᓂᐌᓅᒋᑑᔦᒃ ᑲᔦ ᑭᐱᒫᑎᓯᐎᓂᐙᕽ, ᒦ ᓴ ᐃᓂ ᑫᐃᓂᔥᑳᑯᔦᒃ ᒋᑭᑖᐸᑎᓯᔦᒃ, ᓃᐱᐗᐞ ᑲᔦ ᒋᓂᓈᑾᑭᓐ ᑭᒥᓄᒋᑫᐎᓂᐙᓐ, ᐃᐃ ᑌᐺ ᑳᐃᔑᑭᑫᓂᒣᒃ ᑳᑎᐯᓂᒥᓇᕽ ᒋᓴᔅ X᙮

21:9b.2PE.021.009 ᐊᐌᓀᓐ ᑕᔥ ᑳᒪᓀᓯᒡ ᐅᓄ ᒦᐃ ᐁᔑᓈᑯᓯᒡ ᑖᐱᔥᑰ ᐊᐎᔭ ᐙᓴ ᑳᐊᒀᐱᓯᒃ, ᐋᐲᒋᑯ ᑳᐙᐱᓯᒃ᙮ ᒦᓴ ᐗᐊ ᑳᐗᓃᑫᒡ ᐁᑮᐯᑭᐃᑎᐸᓐ ᑳᑮᐃᔑ ᓂᑖ ᒪᒋᑑᑕᑭᐸᓐ᙮

21:10b.2PE.021.010 ᓃᒋᐅᑌᐺᑕᒨᒃ, ᑕᑲ ᑕᔥ ᐋᔅᑯᓀᑕᒧᒃ ᒋᑫᒋᓈᐅᐌᑖᑾᓂᓂᒃ ᑭᔐᒪᓂᑑ ᑳᑮᐃᔑᑲᓅᓂᓀᒃ᙮ ᑮᔥᐱᓐ ᓴ ᐅ ᐃᔑᒋᑫᔦᒃ, ᑳᐐᓐ ᐐᑳ ᑭᑲᐸᑭᔑᓰᒻ᙮

21:11b.2PE.021.011 ᒦᑕᔥ ᑫᑮᓇᐙ ᑳᐐᐅᒋ ᐌᓅᒋ ᑕᐎᓇᒫᑰᔦᒃ ᒋᐲᑎᑫᔥᑳᔦᒃ ᐃᐃᒫ ᐐᑳ ᑫᔑᐴᓂᓭᓯᓂᓂᒃ ᑳᐃᔑᑭᒋᐅᑭᒫᐎᒡ ᑳᑎᐯᓂᒥᓇᕽ ᑳᐱᒫᒋᐃᓇᕽ ᒋᓴᔅ X᙮

21:12b.2PE.021.012 ᓃᓐ ᓴ ᐱᑯ ᒨᔕᒃ ᓂᑲᐊᔛ ᒋᒫᒥᑰᑕᒪᐎᓇᑰᒃ ᐅᓄᐌᓂᐗᓐ, ᐋᓇᐐᓐ ᐋᔕ ᐁᑭᑫᑕᒣᒃ ᐅᓄ᙮ ᐃᐃ ᑕᔥ ᑌᐺᐎᓐ ᑳᑭᑫᑕᒣᒃ, ᒦ ᓴ ᐃᐃᒫ ᐁᔑᒪᔥᑲᐎᑳᐸᐎᔦᒃ᙮

21:13b.2PE.021.013 ᒦᑕᔥ ᐁᓀᑕᒫᓐ ᒥᓂᒃ ᐃᑯ ᑫᐱᒫᑎᓯᔮᓐ ᐅᐅᒫ ᓂᐐᔭᐎᕽ ᑾᔭᒃ ᒋᐃᔑᒋᑫᔮᐹᓐ, ᒋᐅᒻᐺᒥᓇᑰᑭᐸᓐ, ᒋᒫᒥᑰᑕᒪᐎᓂᓇᑰᒃ ᐅᓄᐌᓂᐗᓐ᙮

21:14b.2PE.021.014 ᐁᑭᑫᑕᒫᓐ ᑯᑕ ᐋᔕ ᑫᑳ ᐁᐐ ᑮᒋᑯᔥᑲᒫᓐ ᐅᐅ ᓂᐐᔭᐤ ᐅᐅᒫ ᐊᑮᕽ ᑳᑖᓄᑕᒫᓐ, ᑳᑮᐃᔑ ᐯᑌᐐᑕᒪᐎᒡ ᐊᐊ ᑳᑎᐯᒋᑫᒡ ᒋᓴᔅ X᙮

21:15b.2PE.021.015 ᒋᑆ ᓂᐳᔮᓐ ᓴ ᐌᐌᓂ ᑫᑰᓐ ᓂᑲᐃᔑᒋᑫ ᐅᓄᐌᓂᐗᓐ ᑫᐅᒋᒫᒥᑲᐎᓄᑕᒣᒃ᙮

21:16b.2PE.021.016 ᑳᐐᓐ ᓃᓇᐎᓐᑦ ᓂᑮᐋᐸᒋᑑᓯᒥᓐ ᐃᓂ ᑳᑲᑮᑖᐎᑖᑾᑭᓐ ᑎᐹᒋᒧᐎᓇᓐ ᑫᑮ ᒥᒋ ᐅᔑᑑᔮᑭᐸᓐ ᐊᐲ ᑮᑕᔑᑕᒫᑰᔦᒃ ᑳᐐᒪᔥᑳᐌᑖᑾᓂᓂᒃ ᐅᑕᑯᔑᓄᐎᓐ ᑳᑎᐯᒋᑫᒡ ᒋᓴᔅ X᙮ ᓃᓇᐎᓐᑦ ᐅᔕ ᓂᔥᑮᔑᑯᓈᓂᕽ ᓂᑮᐅᒋ ᐙᐸᑕᒧᐙᒥᓐ ᑳᐃᔑ ᒫᐗᒋ ᑭᒋᐅᑭᒫᐌᑖᑯᓯᒡ᙮

21:17b.2PE.021.017 ᐊᐲ ᓴ ᑭᔐᒪᓂᑑᓐ ᑳᐅᔫᓯᒥᒥᓐᒡ ᑮᒦᓂᑯᒡ ᑭᑌᑖᑯᓯᐎᓐ, ᑭᒋ ᐃᓀᑖᑯᓯᐎᓐ ᑲᔦ, ᐊᐲ ᑲᔦ ᑮᐅᒋᑲᓅᓈ ᐃᒫ ᑳᑮᐃᔑᐊᔮᓂᒡ ᑳᒫᐗᒋᑯ ᑭᒋ ᐃᓀᑖᑯᓯᓂᒡ ᐅᐅ ᐁᑮᐃᓂᓐᒡ: ᒦ ᓴ ᐗᐊ ᓃᓂᑯ ᓂᑯᓯᔅ ᑳᓵᑭᐊᒃ, ᐐᓐ ᓴ ᐱᑯ ᑳᒥᓍᐸᒪᒃ, ᑮᐃᓈ᙮

21:18b.2PE.021.018 ᓃᓇᐎᓐᑦ ᓴ ᐱᑯ ᓂᑮᓅᑕᒧᐙᒥᓐ ᑭᒋᑮᔑᑯᕽ ᑳᑮᐱ ᐅᒋ ᑲᓅᓂᓐᒡ, ᐊᐲ ᐌᑎ ᑮᐐᒌᐗᑭᒡ ᑭᒋᐗᒌᕽ ᑳᑮᑕᓀᑖᑯᓯᓂᒡ ᑭᔐᒪᓂᑑᓐ᙮

21:19b.2PE.021.019 ᒦᑕᔥ ᓃᓇᐎᓐᑦ ᑳᐅᒋ ᑫᒋᓈᐅᐌᑕᒧᐗᑭᒡ ᐅᑎᐹᒋᒧᐎᓂᐙᓐ ᐃᑭ ᑳᑮᑮᑭᑑᑕᒪᐙᐙᒡ ᑭᔐᒪᓂᑑᓐ᙮ ᐋᐱᒋ ᓴ ᑭᑖᒥᓄᒋᑫᒻ ᐱᓯᑕᒣᒃ ᐅᐅ, ᐋᓃᔥ ᒦᐃ ᐁᔑᓈᑾᒃ ᑖᐱᔥᑰ ᐙᓴᑯᓀᒋᑲᓐ ᑳᐙᓴᑯᓀᒃ ᑳᐃᔑᑲᔥᑮᑎᐱᑲᒃ ᐲᓂᔥ ᒋᓂᐲᑖᐸᕽ, ᐲᓂᔥ ᒋᐱᒨᑲᐊᕽ ᐙᐸᓇᓇᕽ ᑳᐃᓂᓐᒡ, ᒦᔥ ᐃᐃᒫ ᑭᑌᐃᐙᓐ ᑫᐅᒋᐙᓭᓈᑾᑭᓐ᙮

21:20b.2PE.021.020 ᐅᐅᐌ ᑕᔥ ᒫᐗᒡ ᐃᑯ ᑭᑫᑕᒧᒃ: ᑳᐐᓐ ᐊᐎᔭ ᐅᑖᑲᔥᑭᑑᓰᓐ ᐐᓂᑯ ᒋᐐᑕᑭᐸᓐ ᒪᔮ ᐃᐃ ᑳᐃᔑ ᑲᓅᑕᒪᐎᒥᓐᒡ ᑭᔐᒪᓂᑑᓐ ᑫᑌᐅᔑᐲᐃᑫᐎᓂᕽ᙮

21:21b.2PE.021.021 ᐋᓃᔥ ᑳᐃᔑ ᑲᓅᑕᒪᐎᓐᒡ ᑭᔐᒪᓂᑑ ᑳᐐᓐ ᐐᑳ ᐃᓂᓂ ᐅᑎᓀᑕᒧᐎᓂᕽ ᑮᐅᒌᒪᑲᓯᓅᓐ᙮ ᐃᑭᐌᓂᐗᒃ ᐅᔕ ᐃᓂᓂᐗᒃ ᑳᑮᒥᓯᐌᑎᐯᓂᒥᑯᐙᒡ ᑭᔐᒪᓂᑑᓐ ᐅᑕᒑᑯᓂ ᑮᐃᑭᑐᐗᒃ ᑳᐃᔑᐊᑕᐌᑕᒥᓂᒡ ᑭᔐᒪᓂᑑᓐ᙮

22

22:1b.2PE.022.001 ᐃᓇᔥᑫ ᑮᐅᒋᑭᑫᑖᑯᓯᐗᒃ ᐄᑐᒃ ᐃᑭ ᐅᑖᓈᕽ ᑳᑮᐃᓍᓂᑎᓱᐙᒡ ᐁᑮᑭᑑᑕᒪᐙᐙᒡ ᑭᔐᒪᓂᑑᓐ ᐃᐃᒫ ᒣᑴᔭᐄ ᑳᐃᔑᐊᔮᓂᒡ ᐯᒫᑎᓯᓂᒡ᙮ ᒦᑕᔥ ᐯᔑᑾᓐ ᑫᔑᐊᔮᐙᒡ ᐅᐗᓂᑭᑭᓄᐊᒫᑫᒃ ᑳᐃᔑᐊᔮᔦᒃ᙮ ᒦᐗᒃ ᓴ ᐃᑭ ᑫᐲᑑᐙᒡ ᑫᓂᔑᐗᓈᒋᐃᐌᒪᑲᓂᓂᑭᓐ ᑭᑭᓄᐃᑫᐎᓇᓐ ᑳᑌᐺᐗᓯᓂᓂᑭᓐ᙮ ᐅᑲᔮᓇᐌᓂᒫᐙᓐ ᑲᔦ ᑳᑎᐯᓂᒥᑯᐙᒡ Xᑕᓐ ᑳᑮᑎᐸᐅᑯᐙᒡ᙮ ᐐᓇᐙ ᑕᔥ ᐱᑯ ᑕᑲᔥᑭᑕᒫᓱᐗᒃ ᑫᐅᒋ ᑫᑕᑐ ᓂᔑᐗᓈᒋᐃᑎᓱᐙᒡ᙮

22:2b.2PE.022.002 ᑕᐹᑎᓄᐗᐞ ᐃᑕᔥ ᑲᔦ ᑫᓇᓈᐱᓈᑯᐙᒡ ᐃᐃ ᑳᐃᔑᐐᓈᑎᓯᐙᒡ᙮ ᒦ ᓴ ᑕᔥ ᐃᐃᒫ ᑫᐅᒋᐹᐱᓀᒋᑳᑌᒃ ᐃᐃ ᐱᒫᑎᓯᐎᓐ ᑳᐱᒧᓵᑕᒪᕽ ᑌᐺᐎᓂᕽ ᑳᐃᔑᓯᕽ᙮

22:3b.2PE.022.003 ᐅᑯ ᑕᔥ ᑳᐗᓂᑭᑭᓄᐃᑫᐙᒡ ᑳᓂᑖ ᐋᔅᑯᓂᓯᐙᒡ, ᒦ ᐁᑕ ᑯ ᐁᐃᓍᓂᓀᒀ ᐁᐐᐅᒋᑲᔥᑭᒋᑫᐙᒡ᙮ ᐋᓃᔥ ᐅᑲᐋᐸᒋᑑᓈᐙᓐ ᐃᓂ ᐐᓇᐙ ᐱᑯ ᐅᑲᑲᔦᓂᓯᐎᓂᐙᓐ᙮ ᐋᔕ ᐅᔕ ᒣᐎᔕ ᐅᑯ ᑎᓄ ᑮᑮᔖᑯᓈᐗᒃ ᑫᑑᑕᐎᑣ; ᐃᓂ ᑲᔦ ᑳᐐᓂᔑᐗᓈᒋᐃᑯᐙᒡ ᑳᐐᓐ ᓂᐹᓰᐗᓐ᙮

22:4b.2PE.022.004 ᐃᓇᔥᑫ ᑭᔐᒪᓂᑑ ᑳᐐᓐ ᐅᑮᒪᓈᒋᐋᓰᐞ ᐁᒐᓬᐊᐞ ᑳᑮᒪᒋᑑᑕᒥᓂᒡ, ᑳᐃᔑᑲᒀᑕᑭᑑᕽ ᓴ ᐅᑮᐃᔑᓃᓯᐌᐱᓈᐞ᙮ ᒦᑕᔥ ᐌᑎ ᐅᐅ ᐃᔑᐊᐲ ᐁᔑᑭᐸᐅᒥᓐᒡ ᑳᐃᔑᑲᔥᑮᑎᐱᑲᓂᓂᒃ, ᒦᔥ ᐃᐃᒫ ᑫᔑᑲᓇᐌᑖᑯᓯᓂᒡ ᐲᓂᔥ ᒋᐅᒋᒋᓭᓂᒃ ᑳᐐᑎᐹᑯᓂᑫᐎ ᑮᔑᑲᓂᓂᒃ᙮

22:5b.2PE.022.005 ᑭᔐᒪᓂᑑ ᑲᔦ ᑳᐐᓐ ᐅᑮᒪᓈᒋᐋᓰᐞ ᒣᐎᔕ ᑳᑮᐱᒫᑎᓯᓂᑯᐸᓀᓐ ᑳᑫᑌᐊᑮᐗᓂᓂᑯᐸᓀᓐ, ᐊᐲ ᑮᓂᑭᐸᓈᑯᐸᓀᓐ ᐅᐅᒫ ᑫᑌᐊᑮᕽ ᑳᑮᑭᑌᓂᒥᑯᓯᒃ᙮ ᒦ ᐁᑕ ᑯ ᓅᐗᐗᓐ ᑳᑮᓂᑖ ᑕᔑᑕᒥᓂᒡ ᑾᔭᒀᑎᓯᐎᓐ ᑳᑮᐱᒫᒋᐋᒡ᙮ ᓃᔣᓱ 7 ᑲᔦ ᑯᑕᒃ ᐊᐎᔭᐞ ᐅᑮᑕᑯᐱᒫᒋᐋᐞ᙮

22:6b.2PE.022.006 ᑭᔐᒪᓂᑑ ᐃᑕᔥ ᑲᔦ ᑮᑑᑕᐙᑯᐸᓐ ᒋᑕᑯᓂᔑᐗᓈᒋᐃᒥᓐᒡ ᐃᐃ ᐯᒫᑎᓯᓂᒡ ᐊᐲ ᑮᒑᑳᑭᓴᕽ ᑭᒋᐅᑌᓇᐗᓐ ᔂᑕᒻ ᐃᐃ ᑲᔦ ᑲᒸᕒᐊ ᑳᑮᐃᔑᓂᑳᑌᓂᑭᓐ᙮ ᐃᔥᑯᑌᓂ ᓴ ᐅᑮᐋᐸᒋᑑᓐ᙮ ᒦᑕᔥ ᐃᐃᒫ ᐁᔑᐙᐸᑕᐃᑰᔭᕽ ᐋᓃᓐ ᑫᐃᔑᓭᐙᒡ ᑳᑭᑌᓂᒫᓯᒀ ᑭᔐᒪᓂᑑᓐ᙮

22:7b.2PE.022.007 ᐅᑮᔖᐾᐋᓐ ᑕᔥ ᑲᔦ ᓬᐋᑕᓐ ᑾᔭᒃ ᑳᑮᐃᓂᓃᐎᓂᒡ᙮ ᓬᐋᑦ ᐄᑐᒃ ᐅᑮᑭᒋ ᒫᓀᑕᒧᐃᑰᐞ ᐃᐃ ᐯᒫᑎᓯᓂᒡ ᑳᑮᐃᔑᐐᓈᑎᓯᓂᒡ ᑳᑮᐃᔑᒋᑫᓂᒡ ᐙᐃᔑᒋᑫᓂᒡ ᐃᑯ᙮

22:8b.2PE.022.008 ᐗᐊ ᑕᔥ ᑳᑮᑾᔭᒀᑎᓯᒡ ᒣᑴᔭᐄ ᐁᑮᐃᔑᑖᒡ ᑮᐅᒋ ᑲᒀᑕᑫᑕᒻ ᐅᑕᒑᑯᕽ, ᐁᑕᓱᑮᔑᒃ ᐋᓃᔥ ᐅᑮᐙᐹᑖᓐ, ᐅᑮᓅᑖᓐ ᑲᔦ ᐋᓃᓐ ᑳᐃᔑᒪᒋ ᐃᔑᒋᑫᓂᒡ ᐯᒫᑎᓯᓂᒡ᙮

22:9b.2PE.022.009 ᒦᑕᔥ ᐃᐃᒫ ᐌᒋᓈᑾᓂᓂᒃ ᑳᑎᐯᒋᑫᒡ ᐁᓂᑖ ᔕᐾᐋᒡ ᐯᒫᑎᓯᓂᒡ ᑳᑭᑌᓂᒥᑯᒡ ᐃᐃᒫ ᑳᐃᔑ ᐗᓯᑖᐎᓭᓂᒡ᙮ ᐅᑲᔥᑭᑑᓐ ᑲᔦ ᐁᒪᒫᒋᑯᓈᒡ ᐃᐃ ᑳᒪᒋ ᐃᔑᐌᐱᓯᓂᒡ ᐹᓂᒫ ᑎᐹᑯᓂᑫᐎᑮᔑᑲᓂᓂᒃ ᐁᐐᓇᓇᐊᓵᒡ᙮

22:10b.2PE.022.010 ᐃᑭᐌᓂᐗᒃ ᓴ ᒣᒥᑕᑫ ᑳᐃᔑᒋᑫᐙᒡ ᐋᓃᓐ ᐁᔑᒪᒋ ᒥᓴᐌᑕᒨᒪᑲᓂᓂᑭᓐ ᐅᐐᔭᐎᐙᓐ; ᑳᐐᓐ ᑲᔦ ᐅᐸᐹᒥᑕᐙᓯᐙᐙᐞ ᐊᐌᓀᓇᐞ ᐃᑯ ᑳᓃᑳᓂᓯᓂᒡ᙮ ᐋᐱᒋ ᑲᔦ ᓲᑭᑌᐁᐗᒃ, ᑲᑳᒋᒡ ᑲᔦ ᑫᑰᓂᓂ ᐃᔑᒋᑫᐗᒃ; ᑳᐐᓐ ᑲᔦ ᑯᑖᒋᓰᐗᒃ ᐁᒪᓈᓱᒫᓯᒀ ᑳᓃᑳᓀᑖᑯᓯᓂᒡ ᐊᐌᑴᓇᐞ ᐃᔥᐱᒥᕽ ᑳᐊᔮᓂᒡ, ᑕᑾᒡ ᐃᑕᔥ ᐅᐹᐱᓄᑕᐙᐙᐞ᙮

22:11b.2PE.022.011 ᐃᑭ ᑕᔥ ᐐᓐ ᐁᒐᓬᐊᒃ ᓇᐗᒡ ᑳᓲᑫᑖᑯᓯᐙᒡ, ᑳᒪᔥᑲᐎᓰᐙᒡ ᑲᔦ, ᑳᐐᓐ ᑲᓇᑫ ᐅᒪᒋ ᐃᓈᓯᐙᐙᐞ ᑳᐗᓂᑭᑭᓄᐃᑫᓂᒡ ᐁᓈᓴᒦᓂᒡ ᑳᑎᐯᒋᑫᓂᒡ᙮

22:12b.2PE.022.012 ᐅᑯ ᑕᔥ ᐐᓐ ᑳᐗᓂᑭᑭᓄᐃᑫᐙᒡ ᐅᒪᒋ ᐃᑖᓈᐙᓐ ᑫᑰᓇᓐ ᑳᓂᓯᑐᑕᓯᒀ᙮ ᒦ ᐅᐌ ᐁᔑᓈᑯᓯᐙᒡ, ᑖᐱᔥᑰ ᑳᐁᔖᐙᑎᓯᓯᒀ ᐊᔭᐋᐎᔕᒃ, ᐅᑎᔑᐊᔮᐎᓂᐙᕽ ᐃᑯ ᑳᐃᔑᒋᑫᐙᒡ, ᒦ ᐁᑕ ᑳᐅᒋᓂᑖᐎᑭᐙᒡ ᒋᑳᒋᑎᓂᑣ, ᒋᓂᓯᑣ ᑕᔥ ᑲᔦ᙮ ᒦᑕᔥ ᐯᔑᑾᓐ ᑫᔑᓂᓯᑣ ᐅᐗᓂᑭᑭᓄᐃᑫᒃ ᑳᑑᑕᐎᒥᓐᒡ ᐊᔭᐋᐎᔕᐞ᙮

22:13b.2PE.022.013 ᐃᐃ ᑳᐃᔑᒪᒫᔒᑲᑖᑫᐙᒡ ᐃᑕᔥ, ᒦ ᐯᔑᑾᓐ ᑫᐐᓇᐙ ᑫᐃᔑᑎᐸᐊᒪᐎᑣ᙮ ᒦᓴᑯ ᐱᓵᓐ ᐁᑮᔑᑲᓂᓂᒃ ᐁᐃᔑᒋᑫᐙᒡ ᑫᒥᓉᑕᒧᔥᑳᑯᐙᒡ, ᐐᓇᐙ ᐱᑯ ᑳᐃᓀᑕᒧᐙᒡ ᐁᒥᓉᑖᑾᓂᓂᑭᓐ᙮ ᐐᓇᐙ ᓴ ᑭᑕᑲᓯᓈᑯᓯᐃᑯᐙᒃ, ᑭᒫᔑᔥᑳᑯᐙᒃ ᐁᐐᒋᐐᓯᓃᒥᓀᒀ; ᒦᑕᔥ ᐃᑯ ᑫᔮᐱ ᐁᔑᒥᓉᑕᒧᐃᑎᓱᐙᒡ ᐁᑲᑲᔦᓂᓯᐙᒡ᙮

22:14b.2PE.022.014 ᒦ ᐁᑕ ᑯ ᑲᔦ ᐃ ᑎᓄ ᑳᓇᓈᑕᐙᐸᒫᐙᒡ ᐃᑴᐗᐞ ᓅᒋᑯ ᑫᑑᑕᐙᐙᒡ᙮ ᑳᐐᓐ ᐐᑳ ᑌᒪᒋᑑᑕᓰᐗᒃ᙮ ᐋᐱᒋ ᑲᔦ ᓈᑲᒌᐗᒃ ᐁᑌᐱᓇᒧᐙᒡ ᑳᐊᑕᐌᑕᒧᐙᒡ᙮ ᑭᔐᒪᓂᑑᓐ ᐄᑐᒃ ᐅᑲᓂᔑᐙᓈᒋᐃᑯᐙᓐ᙮

22:15b.2PE.022.015 ᐁᑮᓇᑲᑕᒧᐙᒡ ᑕᔥ ᐃᐃ ᑾᔭᒃ ᐃᔖᐎᓐ, ᒦᑕᔥ ᑳᐃᔑᐗᓂᒫᒑᐙᒡ ᐁᑮᓈᐸᐊᒫᓈᐙᒡ ᑳᑮᐃᔑᐱᒧᓭᓂᒡ ᐯᓬᐊᒨᓐ, ᑳᑮᑲᓅᒋᑫᑕᒪᐙᒡ ᑭᔐᒪᓂᑑᓐ᙮ ᐋᐱᒋ ᐄᑐᒃ ᓴ ᐅᑮᓵᑭᑑᓂ ᓅᒋᑯ ᐁᐃᔑᒋᑫᓂᒡ ᐁᑮᐅᒋᑲᔥᑭᒋᑫᓂᒡ᙮ ᐲᐅᕒ ᑳᑮᐃᔑᓂᑳᓱᓂᑯᐸᓀᓐ ᐅᑌᑌᓂ᙮

22:16b.2PE.022.016 ᒫᔑᒥᑕᑎᒨᓐ ᐄᑐᒃ ᐅᑮᑭᔒᑲᓅᓂᑰᓐ ᐊᐊ ᐯᓬᐊᒻ ᐃᐃ ᑳᑮᐃᔑᒪᒫᔒᒡ, ᐊᔭᐋᐎᔕᓐ ᑳᓂᑖᑮᑭᑐᓯᓂᒃ ᐃᓂᓃᕽ ᑮᐃᓉᐗᓐ ᐁᑲᓅᓂᑯᒡ᙮ ᒦᑕᔥ ᑳᐃᔑᑭᐱᒌᒡ ᐯᓬᐊᒻ ᐊᐗᔑᒣ ᓅᒋᑯ ᒋᑲᑮᐹᒋᒋᑫᓯᒃ᙮

22:17b.2PE.022.017 ᒦᑕᔥ ᑲᔦ ᐁᔑᓈᑯᓯᐙᒡ ᑳᐗᓂᑭᑭᓄᐃᑫᐙᒡ ᑖᐱᔥᑰ ᓂᐱ ᑳᐃᔑᒨᑭᒋᐗᕽ ᑳᐃᔅᑲᑌᑭᓐ, ᐃᐃ ᑲᔦ ᑳᐹᔥᑭᓀᔮᒃ ᑳᐸᐹᒥᐌᐹᓯᕽ ᑮᑭᒋᓅᑎᕽ᙮ ᒦᐗᒃ ᓴ ᐃᑭ ᑳᑕᐎᓇᒪᐎᑣ ᒫᐗᒡ ᐃᑯ ᑳᐃᔑ ᑲᔥᑮᑎᐱᑲᓂᓂᒃ᙮

22:18b.2PE.022.018 ᐋᐱᒋ ᑲᔦ ᑭᔒᐌᐗᒃ ᐁᑲᑮᐹᒋ ᒪᒦᒀᓂᑎᓱᐙᒡ, ᐅᑖᐸᒋᑑᓈᐙᓐ ᑲᔦ ᐐᔭᐎᒫ ᑳᐃᔑ ᒪᒋ ᒥᓴᐌᒋᑫᒪᑲᓂᓂᒃ ᐁᐅᒋᑳᒋᒋᐋᐙᒡ ᐃᐃ ᐸᔦᔑᑯ ᑳᓂᒫᒋᑖᓂᒡ ᑳᑕᐸᓰᓄᑕᐙᓂᒡ ᐃᓂᐌᓂᐗᐞ ᐯᒫᑎᓯᓂᒡ ᑳᓂᑖ ᐗᐗᓃᓂᒡ᙮

22:19b.2PE.022.019 ᐁᐊᔓᑕᒪᐙᐙᒡ ᑫᑰᓇᓐ ᐃᓈᑯᓂᑫᐎᓇᓐ ᒋᑎᐯᓂᒥᑯᓯᓂᒃ, ᔖᑰᒡ ᐃᑕᔥ ᐐᓇᐙ ᐱᑯ ᐅᒥᓯᐌᑎᐯᓂᒥᑯᓈᐙ ᑫᓂᔑᐗᓈᒋᐃᑯᐙᒡ᙮ ᐌᑯᓀᓂᓂ ᓴ ᑯ ᐊᐎᔭ ᑳᔖᑯᒋᐃᑯᒡ, ᒦ ᓴ ᐃᐌᓂ ᑌᐯᓂᒥᑯᒡ᙮

22:20b.2PE.022.020 ᐊᐌᓀᓇᒃ ᓴ ᑯ ᑳᑮᔖᐼᑲᑕᒧᐙᒡ ᐃᐃ ᑳᓂᔑᐙᓈᒋᐃᐌᒪᑲᓂᓂᒃ ᑳᐃᔑᒋᑫᓂᒡ ᐯᒫᑎᓯᓂᒡ ᐅᐅᒫ ᐊᑮᕽ, ᐁᑭᑫᓂᒫᐙᒡ ᑳᑎᐯᓂᒥᒥᓇᕽ ᐅᐱᒫᒋᐃᐌᓐ ᒋᓴᔅ Xᑕᓐ; ᑮᔥᐱᓐ ᐃᑕᔥ ᒦᓇᐙ ᐅᑎᔑᒋᑫᐎᓂᐙᕽ ᐅᒋᑕᑯᐱᓂᑯᐙᒡ, ᔖᑰᒋᐃᑯᐙᒡ ᑲᔦ, ᓇᐗᒡ ᐄᑐᒃ ᓅᑯᒻ ᑭᒋ ᐃᔑᓈᑯᓯᐗᒃ ᐋᐲᒡ ᐐᓐ ᐌᑎ ᓂᑕᒻ ᑳᑮᐃᔑᓈᑯᓯᐙᒡ᙮

22:21b.2PE.022.021 ᓇᐗᒡ ᐄᑐᒃ ᑖᑮᐅᓂᔑᔑᓂᓂ ᐐᑳ ᑭᑫᑕᓯᒀᐸᓐ ᐃᐃ ᑳᑾᔭᑯᓈᑾᓂᓂᒃ ᐱᒫᑎᓯᐎᓐ, ᐊᐲᒡ ᐐᓐ ᐁᑮᐃᔥᒀ ᑭᑫᑕᒧᐙᒡ ᒋᓇᑲᑕᒧᐙᐸᓐ ᐃᐃ ᒥᓍᒋᒧᐎᓐ ᑭᔐᒪᓂᑑᕽ ᑳᑮᐅᒌᓂᒃ ᑳᑮᐐᑕᒪᐎᑣ᙮

22:22b.2PE.022.022 ᒦᓴᑯ ᒪᔮ ᑌᐺ ᐁᔑᓭᐙᒡ ᑳᐃᔑᓯᓂᓂᒃ ᐃᐃ ᓇᓀᑳᒻ ᐃᑭᑐᐎᓐ: ᐊᓂᒧᔥ ᐅᑮᐌᐊᑕᒦᒋᓐ ᑳᑮᔑᔑᑲᑯᐙᑕᕽ, ᐅᐅ ᑕᔥ ᑲᔦ ᐃᑭᑐᐎᓐ: ᐊᐊ ᑰᑰᔥ ᑮᐃᔥᒀ ᑭᓰᓯᐸᒋᑲᓂᐎᒡ, ᒦ ᐃ ᒦᓇᐙ ᐁᔑ ᑮᐌ ᑎᑎᐱᔑᒨᓄᒡ ᐊᔕᔥᑮᑳᕽ᙮

23

23:1b.2PE.023.001 ᑳᓵᑭᐃᓇᑰᒃ, ᒦ ᓴ ᐃ ᐅᐌ ᐋᔕ ᓃᔑᕽ 2 ᐁᐅᔑᐲᐊᒪᐎᓇᑰᒃ᙮ ᒦ ᓴ ᑕᔥ ᑳᑮᐅᒋ ᐅᔑᐲᐊᒪᐎᓇᑰᒃ ᓃᔣ ᒋᒫᒥᑲᐙᒥᓇᑰᒃ ᒋᐊᒪᒋᑑᔮᓐ ᑭᓈᓈᑲᑕᐌᑕᒧᐎᓂᐙᓐ ᑾᔭᒃ ᒋᐃᓀᑕᒣᒃ᙮

23:2b.2PE.023.002 ᑭᓇᑕᐌᓂᒥᓂᓂᒻ ᑲᔦ ᒋᒫᒥᑲᐎᓄᑕᒣᒃ ᑳᑮᐃᑭᑐᐙᒡ ᐃᑭ ᑳᑭᑌᑖᑯᓯᐙᒡ ᒣᐎᔕ ᑳᑮᑲᓅᑕᒪᐙᐙᒡ ᑭᔐᒪᓂᑑᓐ᙮ ᒋᒫᒥᑲᐎᔦᒃ ᑲᔦ ᐅᑎᐹᒋᒧᐎᓐ ᑳᑎᐯᒋᑫᒡ ᑳᐅᐱᒫᒋᐃᐌᒥᔭᕽ ᑳᑮᒦᓂᒥᓀᒃ ᐅᑎᔑᓂᔕᐙᑲᓇᐞ᙮

23:3b.2PE.023.003 ᐅᐅ ᑕᔥ ᒫᐗᒋᑯ ᒥᑴᑕᒧᒃ, ᐃᔥᒀᒡ ᐊᓂᑲᑮᔑᑲᒃ ᑕᓂᐊᔮᐗᒃ ᐯᒫᑎᓯᐙᒡ ᑫᑎᐯᓂᒥᑯᐙᒡ ᐅᒥᓴᐌᒋᑫᐎᓂᐙᓐ᙮ ᒦᐗᒃ ᓴ ᐃᑭ ᑫᐹᐱᓄᑕᐎᓀᒀ᙮

23:4b.2PE.023.004 ᒦ ᓴ ᑕᔥ ᑫᐃᑭᑐᐙᒡ: ᐋᓃᓐ ᑕᔥ ᑳᐃᔑᓭᓂᒃ ᑳᑮᐃᔑ ᐊᔓᑕᒫᑫᑯᐸᓀᓐ ᐁᐐᐱᑕᑯᔑᕽ? ᐃᓇᔥᑫ ᑭᑫᑌᔭᐋᒥᓈᓂᒃ ᐋᔕ ᑮᒑᑭᓂᐳᐗᒃ, ᒦᓴᑯ ᐯᔑᑾᓐ ᑫᔮᐱ ᐯᒥ ᐃᔑᐌᐸᒃ ᑳᑮᐃᔑᐌᐸᒃ ᑮᐅᔑᒋᑳᑌᒃ ᐅᐅ ᐊᑭ, ᑕᐃᑭᑐᐗᒃ᙮

23:5b.2PE.023.005 ᐅᒋᑕ ᐱᑯ ᐁᐗᓃᑫᓄᑕᒧᔑᑑᐙᒡ, ᑭᔐᒪᓂᑑᓐ ᐅᑎᑭᑐᐎᓂᓃᕽ ᐁᑮᐅᒋᐊᔮᓂᒃ ᑭᒋᑮᔑᒃ ᒣᐎᔕ, ᐃᐃᐌᓂ ᑲᔦ ᐊᑭ ᓂᐲᑳᕽ ᐁᐅᒋᓵᑭᐲᓂᒃ, ᓂᐲᓂ ᐁᑮᐋᐸᑕᓂᓂᒃ ᑮᐅᔑᒋᑳᑌᓂᒃ ᐊᑭ᙮

23:6b.2PE.023.006 ᒦ ᓴ ᐃᐃᒫ ᓂᐲᕽ ᑳᑮᐃᔑ ᓂᑭᐸᒋᑳᑌᑯᐸᓀᓐ ᐃᐃ ᑫᑌ ᐊᑭ ᑳᑮᐊᔮᑯᐸᓀᓐ, ᒦ ᐃᒫ ᑳᑮᐃᔑ ᓂᔑᐗᓈᒋᒋᑳᑌᒃ᙮

23:7b.2PE.023.007 ᐃᐃ ᑕᔥ ᑮᔑᒃ, ᐃᐃ ᑲᔦ ᐊᑭ ᓅᑯᒻ ᑳᐊᔮᑭᓐ, ᒦ ᓴ ᐯᔑᑾᓐ ᑭᔐᒪᓂᑑ ᐅᑎᑭᑐᐎᓂᕽ ᐌᒋᑲᓇᐌᑖᑾᓂᓂᑭᓐ ᐱᒌᓇᒃ ᐁᐐᒑᑭᓯᑳᑌᓂᑭᓐ᙮ ᒦ ᓴ ᑳᐅᒋ ᑲᓇᐌᑖᑾᑭᓐ ᐁᐐᑕᑯ ᓂᔑᐗᓈᒋᒋᑳᑌᑭᓐ ᐃᐃ ᐊᐲ ᑎᐹᑯᓂᑫᐎ ᑮᔑᑲᓂᓂᒃ, ᑳᐐᓂᔑᐗᓈᒋᐃᑣ ᐃᑭ ᑳᑭᑌᓂᒫᓯᒀ ᑭᔐᒪᓂᑑᓐ᙮

23:8b.2PE.023.008 ᑳᓵᑭᐃᓇᑰᒃ, ᑫᑯ ᑕᔥ ᐐᓐ ᐅᐅ ᐊᐙᒡ ᐸᑮ ᐗᓃᑫᓄᑕᑫᒃ, ᑳᑎᐯᒋᑫᒡ ᐁᐃᓀᑕᕽ ᐯᔑᑯ ᑮᔑᒃ, ᒥᑖᔂᒃ ᑕᓱᐱᐴᓐ᙮ ᒦ ᑲᔦ ᒥᑖᔂᒃ ᑕᓱᐱᐴᓐ ᐁᓀᑕᕽ ᐯᔑᑯ ᑮᔑᒃ᙮

23:9b.2PE.023.009 ᑳᑎᐯᒋᑫᒡ ᓴ ᑳᐐᓐ ᐸᐯᒌᓰ ᐁᐐᐃᔑᒋᑫᒡ ᐃᐃ ᑳᑮᐃᔑ ᐊᔓᑕᒫᑫᒡ, ᑖᐱᔥᑰ ᑳᐃᒋᑲᓂᐎᒡ ᐁᐸᐯᒌᒡ᙮ ᑭᔕᔒᐯᓂᒥᑯᐙ ᐅᔕ ᐁᐊᑕᐌᓂᒫᓯᒃ ᐊᐎᔭᓐ ᒋᓂᔑᐗᓈᑎᓯᓂᒡ᙮ ᑲᑭᓇ ᓴ ᐊᐎᔭᓐ ᐅᓇᑕᐌᓂᒫᓐ ᒋᑴᑳᑎᓯᓂᒡ᙮

23:10b.2PE.023.010 ᐃᐃ ᓴ ᑮᔑᑲᓂᓂᒃ ᑳᑎᐯᒋᑫᒡ ᑳᐐᑕᑯᔑᕽ ᑕᓭᓴᑰᒋ ᐅᒋᒋᓭ, ᑖᐱᔥᑰ ᐅᑮᒨᒋᔥᒃ ᓃᔮᒃ ᑳᑭᑫᑖᑯᓯᓯᒃ ᐁᐐᑕᑯᔑᕽ᙮ ᒦ ᓴ ᑕᔥ ᐃᐃ ᐊᐲ ᐃᔥᐱᒥᕽ ᑮᔑᒃ ᑫᐊᑯᓈᑾᒃ ᑭᔒᐌ ᓅᑖᑾᒃ ᑫᑰᓐ᙮ ᒦ ᑲᔦ ᐃᐃ ᐊᐲ ᑲᑭᓇ ᑫᑰᓇᓐ ᐃᔥᐱᒥᕽ ᑳᐊᔮᑭᓐ ᑳᐐᓂᔑᐗᓈᒋᒋᑳᑌᑭᓐ ᐃᔥᑯᑌ ᐁᐐᐋᐸᑕᒃ᙮ ᐃᐃ ᑲᔦ ᐊᑭ, ᑲᑭᓇ ᑲᔦ ᑫᑰᓐ ᐃᐃᒫ ᑳᐊᔮᑭᓐ ᑳᐐᓐ ᑕᑭᑫᑖᑾᓯᓅᓇᓐ᙮

23:11b.2PE.023.011 ᐅᐅᐌ ᑕᔥ ᐃᓇᑫ ᐁᐐᐃᔑ ᓂᔑᐗᓈᒋᒋᑳᑌᑭᓐ ᐅᓄ ᑲᑭᓇ, ᐋᓃᓐ ᐃᑕᔥ ᑮᓇᐙ ᑫᑮᐃᔑᐱᒫᑎᓯᔦᑭᐸᓐ? ᒦᐄᑐᒃ ᐁᔑᓈᑾᒃ ᒋᐯᑳᑎᓯᔦᒃ, ᒋᐸᑭᑎᓂᑎᓱᔦᒃ ᑲᔦ ᑭᔐᒪᓂᑑ ᒋᑎᐯᓂᒥᓀᒃ᙮

23:12b.2PE.023.012 ᐁᐲᑖᐌᒃ ᑮᔑᑲᓂᓂᒃ ᑭᔐᒪᓂᑑ ᑳᐐᑎᐹᑯᓂᐌᒡ, ᑲᑴ ᐌᔩᐱᑑᒃ ᐐᐸ ᒋᐃᔑᓭᒃ᙮ ᒦᐅᔕᐃ ᐊᐲ ᑮᔑᒃ ᑳᐐᐊᒀᑭᑌᒃ, ᑳᐐᓂᔑᐗᓈᒋᒋᑳᑌᒃ ᑲᔦ᙮ ᐃᓂ ᑲᔦ ᑲᑭᓇ ᐃᔥᐱᒥᕽ ᑳᐊᔮᑭᓐ ᑕᓂᑭᑌᐗᓐ ᑫᐊᐲᒋᑭᔑᑌᒃ᙮

23:13b.2PE.023.013 ᑳᑮᐃᔑ ᐊᔓᑕᒫᑫᑯᐸᓀᓐ ᐃᑕᔥ ᑮᓇᐎᓐᑦ ᑳᐅᒋᐲᑑᔭᕽ ᐃᐃ ᑳᐐᐅᔥᑭ ᐅᔑᒋᑳᑌᒃ ᑮᔑᒃ, ᐅᔥᑭ ᐊᑭ ᑲᔦ, ᒦ ᓴ ᐃᒫ ᑾᔭᒀᑎᓯᐎᓐ ᑫᔑᑖᒪᑲᒃ᙮

23:14b.2PE.023.014 ᑕᑲ ᑕᔥ, ᑳᓵᑭᐃᓇᑰᒃ, ᐁᐲᑑᔦᒃ ᐅᓄ, ᐋᑯᒋᑫᒃ ᐊᐲ ᑭᔐᒪᓂᑑ ᑕᑯᔑᕽ ᒋᒥᑲᐎᓀᒃ ᐁᐯᑳᑎᓯᔦᒃ, ᑫᑰᓐ ᑲᔦ ᒋᐃᔑ ᐊᓈᒣᑖᑯᓯᓯᐌᒃ, ᐱᓵᓂᑯ ᒋᐐᒌᐌᒃ᙮

23:15b.2PE.023.015 ᐃᓀᑕᒧᐙᒃ ᐃᑕᔥ ᐃᐃ ᑳᑎᐯᒋᑫᒡ ᐁᔑᔕᔒᐯᑕᕽ, ᒦ ᓴ ᐃᒫ ᐌᒌᒃ ᐱᒫᒋᐃᑰᐎᓐ᙮ ᑖᐱᔥᑰ ᑳᓵᑭᐊᑭᒡ ᑮᑕᓇᒥᐋᓈᓐ ᑆᓬ ᑳᑮᐃᔑᐲᐊᒪᐎᓀᒃ, ᐁᑮᐋᐸᒋᑑᒡ ᑲᑮᑖᐌᑕᒧᐎᓐ ᑭᔐᒪᓂᑑᓐ ᑳᑮᒦᓂᑯᒡ᙮

23:16b.2PE.023.016 ᒦᑕᔥ ᐯᔑᑾᓐ ᐃᓇᑫ ᐁᔑᐲᐃᑫᒡ ᑲᑭᓇ ᐅᑑᔑᐲᐃᑲᓂᕽ ᐅᓄᐌᓂᐗᓐ ᑮᑕᔑᑕᕽ᙮ ᐊᔮᓂᐗᓐ ᓴ ᐋᐱᒋ ᑫᑰᓇᓐ ᓭᓇᑭᑖᑾᓂᓂᑭᓐ ᐅᑑᔑᐲᐃᑲᓂᕽ᙮ ᒦᐗᓐ ᓴ ᐃᓂ ᓅᒋᑯ ᑳᐃᓉᑑᐙᒡ ᐃᑭ ᑳᑲᑮᐹᑎᓯᐙᒡ, ᑳᑭᓯᑲᐙᑎᓯᓯᒀ᙮ ᒦ ᓴ ᑲᔦ ᐁᑑᑕᒧᐙᒡ ᑯᑕᒃ ᑫᑰᓇᓐ ᑭᒋᒪᓯᓇᐃᑲᓂᕽ ᑳᐃᔑᐊᔪᔑᐲᐃᑳᑌᓂᑭᓐ᙮ ᐐᓇᐙ ᓴ ᑲᔥᑭᑕᒫᓱᐗᒃ ᓂᔑᐗᓈᑎᓯᐎᓐ᙮

23:17b.2PE.023.017 ᑮᓇᐙ ᑕᔥ ᑳᓴᑭᐃᓇᑰᒃ! ᐋᔕ ᐁᑭᑫᑕᒣᒃ ᐅᓄ, ᐊᔮᒀᒥᓯᒃ ᒋᑕᑯ ᐗᓂᔑᒥᓯᓄᐌᒀ ᑳᐃᔑᐗᔦᔑᑎᓱᐙᒡ ᑳᒪᒋ ᐃᔑᐌᐱᓯᐙᒡ, ᒋᐅᒋ ᐸᑭᔑᓯᐌᒃ ᐃᐃᒫ ᑳᐃᔑ ᐋᔩᒋᑳᐸᐎᔦᒃ᙮

23:18b.2PE.023.018 ᐃᔑᐱᒫᑎᓯᒃ ᓴ ᒋᐊᓂ ᐃᔑᒫᒌᑭᔦᒃ ᑭᑕᓇᒥᐁᐙᑎᓯᐎᓂᐙᕽ, ᒋᓂᑭᑫᓂᒣᒃ ᑳᑎᐯᓂᒥᓇᕽ ᑳᐱᒫᒋᐃᓇᕽ ᒋᓴᔅ X᙮ ᑕᑲ ᐐᓐ ᒨᔕᒃ ᑕᑭᒋ ᐃᓀᓂᒫ ᓅᑯᒻ ᓀᐱᒡ ᐃᑯ ᑲᔦ᙮ ᐁᒣᓐ᙮