James (Ojibwa)

1

1:1b.JAM.001.001 ᓃᓐ ᒌᒥᔅ ᑭᔐᒪᓂᑑ ᐅᑕᓄᑮᐋᑲᓇᓐ, ᐊᐊ ᑲᔦ ᑳᑎᐯᒋᑫᒡ ᒋᓴᔅ X᙮ ᑲᑭᓇ ᑭᐴᔔᐃᓂᓂᒻ ᑳᒥᑖᔑ ᓃᔗᐙᓇᑭᓯᔦᒃ ᐃᔅᕒᐃᔭᓬᐊᒃ ᐁᔮᔦᒃ ᒥᓯᐌ ᐯᐸᑳᓐ ᐊᑮᕽ᙮

1:2b.JAM.001.002 ᓃᒋ ᐅᑌᐺᑕᒨᒃ, ᑌᐱᓇᐌᐗᑫᑕᒧᒃ ᑮᓇᑭᔥᑲᒣᒃ ᑳᐯᐸᑳᓇᑎᑭᓐ ᑲᑭᓇ ᑯᒋᐃᑰᐎᓰᐎᓇᓐ᙮

1:3b.JAM.001.003 ᑭᑫᑕᒧᒃ ᐊᐲ ᑯᒋᐃᑰᐎᓰᒪᑲᒃ ᑭᑌᐺᑕᒧᐎᓂᐙ, ᒦ ᐃᒫ ᑫᐅᒌᒪᑲᒃ ᔕᔒᐯᑕᒧᐎᓐ᙮

1:4b.JAM.001.004 ᒦᑕᔥ ᐃᔑᑲᐯ ᔕᔒᐯᑕᒧᒃ ᒥᓯᐌ ᐱᑯ ᒋᐸᑭᒌᓯᐌᒃ, ᒦᔥ ᒋᑮᔑᐃᑰᐎᓯᔦᒃ, ᒋᑮᔑᓈᑯᓯᔦᒃ ᐃᑕᔥ ᑲᔦ ᑫᑰᓐ ᒋᓅᑌᓭᓯᐌᒃ᙮

1:5b.JAM.001.005 ᑮᔥᐱᓐ ᑳᑕᔑᔦᒃ ᐯᔑᒃ ᓅᑌᓭᒡ ᑲᑮᑖᐌᑕᒧᐎᓐ, ᐅᑲᐊᑐᑕᒪᐙᓐ ᑭᔐᒪᓂᑑᓐ, ᒦᔥ ᒋᒦᓂᓐᒡ ᐁᔑ ᑲᑴᑗᒡ᙮ ᐐᑫ ᐄᑐᒃ ᑭᔐᒪᓂᑑ ᐌᓅᒋ ᒦᑭᐌ, ᑳᐐᓐ ᑲᔦ ᐅᑲᑴ ᒥᑲᓰᓐ ᑫᔑ ᐊᓈᒥᒥᐌᒡ᙮

1:6b.JAM.001.006 ᐊᐲ ᑕᔥ ᐊᓇᒥᐋᒡ ᑕᑌᐺᔦᑕᒻ, ᑳᐐᓐ ᑕᔮᓉᑕᓰ᙮ ᐊᐎᔭ ᑳᑌᐺᑕᓯᒃ ᒦ ᐃ ᐁᔑᓈᑯᓯᒡ ᑖᐱᔥᑰ ᑳᐱᒫᔥᑳᒃ ᑭᒋᑲᒦᕽ, ᐋᑎ ᐱᑯ ᐌᑖᓂᒪᓂᓂᒃ ᐁᐃᔑᐌᐹᔑᒡ᙮

1:7b.JAM.001.007 ᐊᐊ ᑎᓄ ᑳᐐᓐ ᑕᐃᓀᑕᓰ ᑫᑰᓐ ᒋᒦᓂᑯᒡ ᑳᑎᐯᒋᑫᓂᒡ;

1:8b.JAM.001.008 ᐅᓵᒻ ᐁᓃᔑᓂᓂᑭᓐ ᐅᑎᓀᑕᒧᐎᓇᓐ, ᐁᑌᐺᐌᑖᑾᓯᓂᓂᒃ ᑲᑭᓇ ᑳᐃᔑᒋᑫᒡ᙮

1:9b.JAM.001.009 ᐊᐊᐌ ᓴ ᐐᓐ ᐅᑌᐺᑕᒨ ᑳᐌᓅᒋᑑᓯᒃ ᑫᑰᓂᓂ, ᑕᒥᓉᑕᒻ ᐁᐃᔥᐸᑭᒥᑯᒡ ᑭᔐᒪᓂᑑᓐ᙮

1:10b.JAM.001.010 ᐊᐊ ᑕᔥ ᐐᓐ ᑳᐌᓅᑎᓯᒡ ᑕᒥᓉᑕᒻ ᐁᓃᓴᑭᒥᑯᒡ ᑭᔐᒪᓂᑑᓐ ᑖᐱᔥᑰ ᑕᐃᓀᑖᑯᓯ ᐱᑾᒋᐙᐱᑾᓐ ᑳᓂ ᑭᑫᑖᑾᓯᓄᒃ᙮

1:11b.JAM.001.011 ᐊᐲ ᐁᐊᓂ ᐃᔥᐸᑰᒋᕽ ᑮᓯᔅ ᐁᐊᓂ ᑭᔖᓯᑫᒡ ᒦ ᐃ ᐁᓂᔑ ᐹᑌᒃ ᐃᐃ ᐙᐱᑾᓂᑭᑎᑳᓐ᙮ ᒦ ᐃ ᐁᓂᔑ ᐸᑭᓯᕽ ᐋᓇᐐᓐ ᐁᒥᓄ ᓈᑾᑭᐸᓐ ᐁᓂᔑᐗᓈᑕᒃ᙮ ᒦᑕᔥ ᐯᔑᑾᓐ ᑳᐌᓅᑎᓯᒡ ᐁᓂᐃᔑ ᓂᔑᐗᓈᑎᓯᒡ ᒣᒀ ᐱᑯ ᐁᐱᒪᓄᑮᒡ᙮

1:12b.JAM.001.012 ᔕᐌᑖᑯᓯ ᐊᐎᔭ ᑳᐸᑭᒌᓯᒃ ᑮᓇᑭᔥᑲᕽ ᐗᓯᑖᐎᓭᐎᓐ᙮ ᑮᔥᐱᓐ ᐋᓃᔥ ᑲᔥᑭᑑᒡ ᒋᔖᐾᑕᕽ ᑳᔑ ᑯᒋᐃᑰᐎᓯᒡ, ᐅᑲᑌᐱᓈᓐ ᐱᒫᑎᓯᐎ ᐅᑭᒫᐙᓄᒀᓐ ᑭᔐᒪᓂᑑᓐ ᑳᑮᐊᔓᑕᒫᑫᓂᒡ ᐁᐐᒦᓈᓂᒡ ᐃᐃ ᑳᓵᑭᐃᑯᓂᒡ᙮

1:13b.JAM.001.013 ᐊᐲ ᐊᐎᔭ ᑯᑌᓂᒥᓐᒡ ᒋᒪᒋᑑᑕᕽ ᑳᐐᓐ ᑖᐃᑭᑐᓰ: ᑭᔐᒪᓂᑑ ᓂᑯᑌᓂᒥᒃ᙮ ᑳᐐᓐ ᐄᑐᒃ ᑖᑯᑌᓂᒫᓰ ᑭᔐᒪᓂᑑ ᒋᒪᒋᑑᑕᕽ, ᑳᐐᓐ ᑲᔦ ᐊᐎᔭᓐ ᐅᑯᑌᓂᒫᓰᓐ ᒋᒪᒋᑑᑕᒥᓂᒡ᙮

1:14b.JAM.001.014 ᐊᐎᔭ ᐅᔕ ᐅᒋ ᑯᑌᓂᒫ ᐁᔑᒪᒋ ᒥᓴᐌᑕᕽ, ᒦᔥ ᐃᐃᒫ ᐌᒋ ᑳᒋᑎᓂᓐᒡ ᑲᔦ ᑕᔥ ᐌᒋ ᑕᑯᓂᓐᒡ᙮

1:15b.JAM.001.015 ᒪᒋ ᒥᓴᐌᑕᒧᐎᓂᕽ ᐅᔕ ᐅᒌᒪᑲᓐ ᒪᒋᑑᑕᒧᐎᓐ᙮ ᐊᐲ ᑕᔥ ᒪᒋᑑᑕᒧᐎᓐ ᑮᑮᔕᓄᑮᒪᑲᒃ, ᒦ ᐃᒫ ᐌᒌᒃ ᓂᐳᐎᓐ᙮

1:16b.JAM.001.016 ᑫᑯ ᑭᑲ ᐗᓂᒥᑰᓰᒻ, ᑳᓵᑭᐃᓇᑰᒃ ᓃᒋ ᐅᑌᐺᑕᒨᒃ᙮

1:17b.JAM.001.017 ᑲᑭᓇ ᒦᑭᐙᓇᓐ ᐌᓂᔑᔑᑭᓐ, ᑳᑮᔑ ᓈᑾᑭᓐ ᑲᔦ ᐃᔥᐱᒥᕽ ᐅᒌᒪᑲᓅᓐ᙮ ᐁᐅᒌᒪᑲᑭᓐ ᑭᔐᒪᓂᑑᕽ ᑳᑮᐅᔑᑑᒡ ᑳᐙᓭᔮᓂᑭᓐ ᑮᔑᑯᕽ᙮ ᑳᐐᓐ ᐐᑳ ᐸᑳᓐ ᑕᐃᔑ ᐊᔮᓰ ᑖᐱᔥᑰ ᑳᔑ ᐊᔮᒋᔥᑳᒪᑲᒃ ᑳᐊᑲᐙᑌᒃ᙮

1:18b.JAM.001.018 ᒦᑕᔥ ᐐᓐ ᐁᔑ ᒥᓉᑕᕽ ᑭᔐᒪᓂᑑ ᐁᑮ ᒦᓂᓇᕽ ᐅᔥᑭ ᐱᒫᑎᓯᐎᓐ ᐃᐃᒫ ᐅᒋ ᑳᑌᐺᒪᑲᓂᓂᒃ ᐅᑎᑭᑐᐎᓐ᙮ ᒦᑕᔥ ᑫᐃᔑᓈᑯᓯᔭᕽ ᑖᐱᔥᑰ ᐁᐅᔥᑭ ᐅᑕᐱᓅᒌᔑᒥᓇᕽ ᒫᐗᒡ ᐁᓃᑳᓀᓂᒥᓇᕽ ᐊᐲᒡ ᐐᓐ ᑲᑭᓇ ᑫᑰᓐ ᑳᑮ ᐅᔑᑑᒡ᙮

1:19b.JAM.001.019 ᓃᒋ ᐅᑌᐺᑕᒨᒃ, ᓇᐗᒡ ᐅᓂᔑᔑᓐ ᒋᓂᑖ ᐱᓯᑕᒣᑭᐸᓐ ᐊᐲᒡ ᐐᓐ ᒋᑳᑮᑭᑐᔦᑭᐸᓐ, ᑫᑯ ᑲᔦ ᐗᑫᐗᑭᑖᓱᑫᒃ᙮

1:20b.JAM.001.020 ᓂᔥᑳᑎᓯᐎᓂᕽ ᑳᐐᓐ ᐅᒌᒪᑲᓯᓅᓐ ᑭᑾᔭᒀᑎᓯᐎᓐ ᑭᔐᒪᓂᑑ ᑳᐊᑕᐌᑕᕽ᙮

1:21b.JAM.001.021 ᐌᐱᓇᒧᒃ ᑕᔥ ᑲᑭᓇ ᑫᑰᓐ ᑳᐐᓀᑖᑾᒃ, ᐃᐃ ᑲᔦ ᑲᑭᓇ ᒪᒋᑑᑕᒧᐎᓐ᙮ ᑕᐸᓭᓂᑎᓱᒃ ᒋᐅᑖᐱᓇᒧᐌᒃ ᐅᑎᑭᑐᐎᓐ ᑳᑭᑎᑳᑌᒃ ᑭᐱᒫᑎᓯᐎᓂᐙᕽ, ᒦ ᐄᑐᒃ ᐃᐃ ᑫᐱᒫᒋᐃᑯᔦᒃ᙮

1:22b.JAM.001.022 ᑫᑯ ᐐᓐ ᐗᓂᐎᓂᑎᓱᑫᒃ, ᑫᑯ ᒥᒋ ᐱᓯᑕᑫᒃ ᐃᐃ ᐃᑭᑐᐎᓐ, ᑑᑕᒧᒃ ᐋᓃᓐ ᐁᑭᑑᒪᑲᒃ᙮

1:23b.JAM.001.023 ᐊᐎᔭ ᑳᒥᒋ ᓅᑕᕽ ᐃᐃ ᐃᑭᑐᐎᓐ, ᐃᔑᒋᑫᓯᒃ ᑕᔥ ᑳᐃᑭᑑᒪᑲᓂᓂᒃ, ᒦ ᐃ ᐁᔑᓈᑯᓯᒡ ᐊᐎᔭ ᑳᐙᐸᑎᓱᒡ ᐙᐸᒧᓂᕽ᙮

1:24b.JAM.001.024 ᑳᐃᔥᒀ ᐙᐸᒧᒡ ᐃᑕᔥ ᐁᐊᓂᒫᒑᒡ, ᒦ ᐃ ᔐᒫᒃ ᐁᔑ ᐗᓃᑫᒡ ᐋᓃᓐ ᐁᔑᓈᑯᓯᒡ᙮

1:25b.JAM.001.025 ᐃᐃᐌ ᐃᔑᐱᒫᑎᓯᐎᓐ ᑳᐅᓇᑑᒡ ᑭᔐᒪᓂᑑ ᒥᓯᐌ ᒥᓍᔑᓐ᙮ ᑳᐐᓐ ᐃᐃᒫ ᐊᐎᔭ ᑫᑰᓂᓂ ᐅᑑᒋ ᑭᐱᑎᓂᑰᓰᓐ ᑾᔭᒃ ᒋᐃᔑ ᐱᒫᑎᓯᒡ᙮ ᐊᐌᓀᓐ ᐃᑕᔥ ᐯᔭᑕᒃ ᐁᑲᓇᐙᐸᑕᕽ, ᐗᓃᑫᓯᒃ ᐃᐃ ᑳᓅᑕᕽ, ᑭᔐᒪᓂᑑᓐ ᐃᑕᔥ ᐅᑲᔕᐌᓂᒥᑰᓐ ᐋᓃᓐ ᐱᑯ ᑳᐃᔑᒋᑫᒡ᙮

1:26b.JAM.001.026 ᑮᔥᐱᓐ ᓴ ᐊᐎᔭ ᐃᓀᓂᑎᓱᒡ ᐁᐊᓇᒥᐁᐙᑎᓯᒡ, ᑲᔥᑭᑑᓯᒃ ᐃᑕᔥ ᒋᒥᒋᒥᓇᕽ ᐅᑌᓇᓂᐤ, ᒦ ᐃ ᐄᓴᓐ ᐁᐗᔦᔑᑎᓱᒡ, ᐅᑕᓇᒥᐋᐎᓐ ᑳᐐᓐ ᑫᑰᓐ ᐃᓈᐸᑕᓯᓂᓂ᙮

1:27b.JAM.001.027 ᑭᔐᒪᓂᑑ ᑰᓯᓈᓐ ᓴ ᐅᒥᓍᐸᑖᓐ ᐃᐃ ᑎᓄ ᐊᓇᒥᐋᐎᓐ ᑳᐯᑲᓂᓂᒃ, ᑲᔦ ᑕᔥ ᑳᑌᐺᐗᓂᓂᒃ᙮ ᒋᓈᓈᑲᒋᐃᑣ ᑸᐗᔑᔖᓇᒃ, ᐃᑭ ᑲᔦ ᑮᐙᒋᑴᐗᒃ ᑳᑲᒀᑕᑭᑑᐙᒡ, ᐊᐎᔭ ᑲᔦ ᑳᑲᓇᐌᓂᑎᓱᒡ ᒋᐐᓂᔥᑳᑯᓯᒃ ᐊᑮᐎ ᐱᒫᑎᓯᐎᓐ᙮

2

2:1b.JAM.002.001 ᓃᒋ ᐅᑌᐺᑕᒨᒃ, ᐁᑌᐺᔦᓂᒪᕽ ᑳᑎᐯᓂᒥᓇᕽ ᒋᓴᔅ X ᑳᑭᒋ ᐃᓀᑖᑯᓯᒡ, ᑫᑯ ᐸᑳᓀᓂᒫᑫᓐ ᐊᐎᔭ ᐅᑎᔑᓈᑯᓯᐎᓂᕽ ᐅᒋ᙮

2:2b.JAM.002.002 ᑮᔥᐱᓐ ᐊᐎᔭ ᐅᑎᓯᓀᒃ ᑳᑕᔑᒫᐗᒋᐃᑎᔦᒃ ᑭᑭᔥᑲᐙᒡ ᐅᓵᐎ ᔔᓂᔮ ᐙᐱᑯ ᓈᐱᓂᒌᐱᓱᓇᓐ, ᐐᑫ ᑲᔦ ᒥᓄᑯᓇᔦᒡ, ᐅᒋ ᐲᑎᑫᒡ ᐃᑕᔥ ᐊᐎᔭ ᐁᑭᑎᒫᑭᓯᒡ ᐁᑰᐹᒋᑯᓇᔦᒡ᙮

2:3b.JAM.002.003 ᑮᔥᐱᓐ ᑕᔥ ᓇᐗᒡ ᑭᑌᓂᒣᒃ ᐊᐊ ᑳᒥᓄᑯᓇᔦᒡ ᐅᐅ ᐃᓀᒃ: ᐅᐅᒫ ᐃᔑᐊᐱᓐ ᒥᓋᐱᐎᓂᕽ᙮ ᐅᐅ ᑕᔥ ᐐᓐ ᐃᓀᒃ ᑳᑭᑎᒫᑭᓯᒡ: ᐌᑎ ᐊᐎ ᐃᔑ ᓃᐸᐎᓐ, ᑯᒫ ᑲᔦ ᐃᓀᒃ: ᐁᔑᓯᑌᐱᔮᓐ ᒥᒋᓴᒃ ᐃᔑᐊᐱᓐ᙮

2:4b.JAM.002.004 ᒦᑕᔥ ᐁᔑᒋᑫᔦᒃ ᐁᐸᑳᓀᓂᒣᒀ ᐊᐎᔭᒃ, ᐁᐅᒋ ᐅᓇᔓᐙᓀᒀ ᑭᒪᒋ ᐃᓀᑕᒧᐎᓂᐙᕽ᙮

2:5b.JAM.002.005 ᐱᓯᑕᐎᔑᒃ, ᑳᓵᑭᐃᓇᑰᒃ ᓃᒋ ᐅᑌᐺᑕᒨᒃ, ᑭᔐᒪᓂᑑ ᐅᔕ ᐅᑮᐅᓈᐸᒫᐞ ᑫᑎᒫᑭᓯᓂᒡ ᐅᐅᒫ ᐊᑮᕽ ᒋᐌᓅᒋᑑᓂᒡ ᑌᐺᔦᑕᒧᐎᓐ, ᒋᑎᐱᓇᐌᐎᓯᓂᒡ ᑲᔦ ᐅᑎᐯᒋᑫᐎᓐ᙮ ᐋᓃᔥ ᒦ ᐃᐌᓂ ᑳᑮᐊᔓᑕᒪᐙᒡ ᑳᓵᑭᐃᑯᒡ᙮

2:6b.JAM.002.006 ᑳᐐᓐ ᑕᔥ ᑭᑮ ᑭᑌᓂᒫᓯᐙᐙ ᑳᑭᑎᒫᑭᓯᒡ᙮ ᑳᐌᓅᑎᓯᐙᒡ ᐄᑐᒃ ᑳᑲᒀᑕᑭᐃᓀᒀ, ᒦᐗᒃ ᑲᔦ ᐃᑭ ᑳᐃᔑᐎᓂᓀᒀ ᐁᔑ ᐊᔮᓂᒡ ᐅᑎᐹᑯᐌᐞ᙮

2:7b.JAM.002.007 ᒦᐗᒃ ᐄᑐᒃ ᐃᑭ ᑳᒪᒋᐃᑕᒧᐙᒡ ᐃᐃᐌᓂ ᑫᒋ ᐃᓀᑖᑾᓂᓂᒃ ᐐᓱᐎᓐ ᑳᑮᒦᓂᑰᐎᓯᔦᒃ᙮

2:8b.JAM.002.008 ᑾᔭᒃ ᑭᑲ ᐃᔑᒋᑫᒻ ᑮᔥᐱᓐ ᓇᐃᑕᒣᒃ ᑫᒋ ᐃᓀᑖᑾᒃ ᐅᓇᔓᐌᐎᓐ ᑳᐃᔑᐲᐃᑳᑌᒃ: ᑭᑲᓵᑭᐋ ᑭᐐᒋᑖᒫᑲᓐ ᑖᐱᔥᑰ ᑳᔑ ᓵᑭᐃᑎᓱᔭᓐ᙮

2:9b.JAM.002.009 ᒦᑕᔥ ᐐᓐ ᐁᔑᓈᑾᒃ ᐁᐲᑯᓇᒣᒃ ᑭᔐᒪᓂᑑ ᐅᑐᓇᔓᐌᐎᓐ ᑮᔥᐱᓐ ᐊᐎᔭᒃ ᐅᑎᔑᓈᑯᓯᐎᓂᐙᕽ ᐃᔑ ᑲᑮᑭᓀᒀ, ᒦ ᐃ ᐁᒪᒋᑑᑕᒣᒃ᙮

2:10b.JAM.002.010 ᐊᐌᓀᓐ ᑕᔥ ᐃᑯ ᑮᐲᑯᓇᕽ ᐯᔑᒃ ᐃᓈᑯᓂᑫᐎᓐ, ᒦ ᐃ ᐄᓴᓐ ᐁᐲᑯᓇᕽ ᑲᑭᓇ ᐃᓈᑯᓂᑫᐎᓇᓐ, ᒦ ᐃ ᐁᒪᒋᑑᑕᕽ᙮

2:11b.JAM.002.011 ᑭᔐᒪᓂᑑ ᑕᔥ ᒦᓇᐙ ᑮᐃᑭᑐ: ᑫᑯ ᐱᔑᒀᒋᐋᑫᓐ ᐃᑴ ᑳᐐᑎᑫᒡ, ᒦᔥ ᑲᔦ ᐁᑭᑐᒡ: ᑫᑯ ᓂᔑᐌᑫᓐ᙮ ᐋᓇᐐᓐ ᐁᐱᔑᒀᑎᓯᓯᐗᓐ, ᓂᔑᐌᔭᓐ ᐃᑕᔥ, ᒦ ᐃ ᐁᐲᑯᓇᒪᓐ ᐃᐃ ᐃᓈᑯᓂᑫᐎᓐ᙮

2:12b.JAM.002.012 ᐃᔑ ᑳᑮᑭᑐᒃ ᐃᑕᔥ, ᐃᔑ ᐱᒫᑎᓯᒃ ᑲᔦ ᑖᐱᔥᑰ ᐃᑭ ᑎᓄ ᐯᒫᑎᓯᐙᒡ ᑳᐐᐅᒋ ᐅᓈᑯᓂᑣ ᐅᓇᔓᐌᐎᓂᕽ ᐊᐎᔭ ᑳᐅᒋ ᐸᑭᑎᓂᑰᐎᓯᒡ᙮

2:13b.JAM.002.013 ᑳᐐᓐ ᐅᔕ ᑭᔐᒪᓂᑑ ᐅᑲᑰᐹᑌᓂᒫᓰᓐ ᐊᐎᔭᓐ ᐊᐲ ᐅᓈᑯᓈᒡ ᐃᓂ ᑳᑰᐹᑌᓂᑫᓯᓂᒃ᙮ ᑰᐹᓯᓈᑫᐎᓐ ᓇᐗᒡ ᒪᔥᑲᐌᑖᑾᓐ ᐊᐲᒡ ᐐᓐ ᐅᓇᔓᐙᓂᑰᐎᓐ᙮

2:14b.JAM.002.014 ᓃᒋ ᐅᑌᐺᑕᒨᒃ, ᐋᓃᓐ ᑕᔥ ᐃᓇ ᑫᐃᓍᑕᑭᐸᓐ ᐊᐎᔭ ᑮᐃᑭᑐᒡ: ᓂᑕᔮᓐ ᑌᐺᐗᑫᑕᒧᐎᓐ, ᑮᔥᐱᓐ ᑕᔥ ᐃᔑᒋᑫᓯᒃ ᐋᓃᓐ ᑫᑮᐃᔑ ᐱᒫᑎᓯᐸᓐ? ᐅᑖ ᐱᒫᒋᐃᑯᓐ ᐃᓇ ᐅᑌᐺᔦᑕᒧᐎᓐ?

2:15b.JAM.002.015 ᑮᔥᐱᓐ ᑕᔥ ᑮᐐᒋ ᐅᑌᐺᑕᒨ ᑳᐃᓂᓃᐎᒡ ᑯᒫ ᑲᔦ ᐃᑴᐎᒡ ᓅᑌᓭᒡ ᑭᑭᔥᑭᑲᓇᓐ, ᑌᐱᓭᓯᒃ ᑲᔦ ᒦᒋᒻ ᐁᑕᓱᑮᔑᒃ,

2:16b.JAM.002.016 ᐋᓃᓐ ᑕᔥ ᐃᓈ ᑫᐃᓈᐸᑕᑭᐸᓐ ᑮᔥᐱᓐ ᐅᐅ ᐃᓀᒀ: ᐱᓵᓐ ᐊᓂᒫᒑᓐ, ᓂᐸᑯᓭᑖᓐ ᒋᒥᓄᓭᔭᓐ᙮ ᑾᔭᒃ ᑮᔔᓯᓐ, ᐌᐌᓂ ᑲᔦ ᐐᓯᓂᓐ᙮ ᑮᔥᐱᓐ ᑕᔥ ᐐᒋᐋᓯᐌᒃ ᐋᓃᓐ ᐁᔑ ᓅᑌᓭᒡ, ᑳᐐᓐ ᑫᑰᓐ ᑕᐃᓈᐸᑕᓯᓅᓐ᙮

2:17b.JAM.002.017 ᒦᑕᔥ ᒪᔮ ᐁᔑᓈᑾᒃ ᑌᐺᑕᒧᐎᓐ᙮ ᑮᔥᐱᓐ ᐊᐎᔭ ᑮᒥᒋ ᐃᑭᑐᒡ ᐁᑌᐺᑕᕽ ᐁᔑᒋᑫᓯᒃ ᑕᔥ ᐁᑭᑐᒡ, ᓂᐴᒪᑲᓐ ᐃᐃ ᑎᓄ ᑌᐺᑕᒧᐎᓐ᙮

2:18b.JAM.002.018 ᐯᔑᒃ ᒫᐐᓐ ᐊᐎᔭ ᑕᐃᑭᑐ: ᑮᓐ ᓴ ᑭᑕᔮᓐ ᑌᐺᑕᒧᐎᓐ ᓃᓐ ᑕᔥ ᐐᓐ ᓂᑕᔮᓐ ᐃᔑᒋᑫᐎᓐ᙮ ᐅᐅ ᒫᐐᓐ ᑕᐃᒋᑲᓂᐎ: ᐙᐸᑕᐃᔑᓐ ᑕᔥ ᐋᑎ ᐌᒋ ᐊᔮᔭᓐ ᑌᐺᑕᒧᐎᓐ ᑫᑰᓐ ᑕᔥ ᐃᔑᒋᑫᓯᐗᓐ᙮ ᓃᓐ ᑕᔥ ᐐᓐ ᓂᑎᔑᒋᑫᐎᓂᕽ ᑭᑲᐅᒋ ᐙᐸᑕᐃᓐ ᐁᐊᔮᔮᓐ ᑌᐺᑕᒧᐎᓐ᙮

2:19b.JAM.002.019 ᑭᑌᐺᑕᒻ ᐁᐯᔑᑯᒡ ᑭᔐᒪᓂᑑ᙮ ᒦ ᐃ ᑾᔭᒃ! ᒪᒋᐊᒑᑾᒃ ᑫᐐᓇᐙ ᐃᐃ ᐃᔑ ᑌᐺᑕᒨᒃ, ᒦᔥ ᑳᐅᒋ ᓂᓂᑭᔥᑳᐙᒡ ᐁᓭᑭᓯᐙᒡ᙮

2:20b.JAM.002.020 ᑮᓐ ᑳᑲᑮᐹᑎᓯᔭᓐ! ᑭᑭᑫᑖᓐ ᐃᓇ ᐃᐃ ᑌᐺᑕᒧᐎᓐ ᑫᑰᓐ ᐁᐃᓈᐸᑕᓯᓄᒃ ᑮᔥᐱᓐ ᑫᑰᓐ ᐃᔑᒋᑫᒪᑲᓯᓄᒃ?

2:21b.JAM.002.021 ᐋᓃᓐ ᑕᔥ ᑭᑫᑌ ᐊᔭᐋᒥᓈᐸᓐ ᐁᐸᕒᐊᐋᒻ ᑳᐅᒋ ᒥᓋᑭᒥᑯᒡ ᑭᔐᒪᓂᑑᓐ? ᐅᑎᔑᒋᑫᐎᓂᕽ ᐅᑮᐅᒋ ᒥᓋᑭᒥᑰᓐ ᐊᐲ ᑮᐸᑭᑎᓈᒡ ᐅᑯᓯᓴᓐ ᐋᐃᓯᑰᓐ ᐃᐃᒫ ᐸᑭᑎᓈᓱᐎᓂᕽ᙮

2:22b.JAM.002.022 ᑭᐙᐸᑕᒻ ᐃᓇ ᑕᔥ ᐃᐃ ᐅᑌᐺᑕᒧᐎᓐ, ᐃᐃ ᐅᑎᔑᒋᑫᐎᓐ ᑲᔦ ᐁᑮᓃᔓᐅ ᐊᓄᑮᒪᑲᓂᓂᑭᓐ? ᒦᑕᔥ ᐃᐃᒫ ᐅᑎᔑᒋᑫᐎᓂᕽ ᑳᑮᐅᒋ ᑮᔑᓈᑾᓂᓂᒃ ᐅᑌᐺᑕᒧᐎᓐ᙮

2:23b.JAM.002.023 ᒦᑕᔥ ᑭᒋᒪᓯᓇᐃᑲᓐ ᐁᑌᐺᒪᑲᒃ ᐅᐅ ᑳᐃᔑᐲᐃᑳᑌᒃ: ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᒦᔥ ᑳᑮᐅᒋ ᐃᓇᑭᒥᑯᒡ ᐁᑾᔭᒀᑎᓯᒡ, ᑳᓵᑭᐐᒌᐗᒃ ᑲᔦ ᐅᑮᐃᔑᓂᑳᓂᑰᓐ᙮

2:24b.JAM.002.024 ᒦᑕᔥ ᐃᐃᒫ ᐁᔑ ᐙᐸᑕᒪᕽ ᑭᑎᔑᒋᑫᐎᓂᓈᓂᕽ ᐁᐅᒋ ᒥᓋᑭᒥᓇᕽ ᑭᔐᒪᓂᑑ, ᑳᐐᓐ ᐐᓐ ᐁᑕ ᑭᑌᐺᑕᒧᐎᓂᓈᓂᕽ᙮

2:25b.JAM.002.025 ᐃᓇᔥᑫ ᒦ ᐯᔑᑾᓐ ᐊᐊ ᐅᕒᐁᐋᑉ ᐱᔑᒀᒋᑴ᙮ ᐅᑮᐅᒋ ᒥᓋᑭᒥᑰᓐ ᑭᔐᒪᓂᑑᓐ ᐋᓃᓐ ᑳᑮᐃᔑᒋᑫᒡ ᐁᑮ ᐲᑎᑲᓈᒡ ᐃᐃ ᐅᑮᒨᓵᐲᐞ ᐅᐙᑳᐃᑲᓂᕽ, ᐸᑳᓐ ᐃᓇᑫ ᐁᑮᐊᓂᐃᓈᒡ ᒋᐊᓂᐃᔑ ᑮᐌᓂᒡ᙮

2:26b.JAM.002.026 ᒦᑕᔥ ᑖᐱᔥᑰ ᒦᔭᐤ ᑳᐊᒑᑯᐗᓯᓄᒃ, ᓂᐴᒪᑲᓐ, ᒦᔥ ᑲᔦ ᑌᐺᑕᒧᐎᓐ ᑫᑰᓐ ᑳᐃᔑᒋᑫᒪᑲᓯᓄᒃ ᓂᐴᒪᑲᓐ᙮

3

3:1b.JAM.003.001 ᓃᒋ ᐅᑌᐺᑕᒨᒃ! ᑫᑯ ᐐᓐ ᑲᑴ ᐹᑏᓄᑫᒃ ᒋᐐ ᑭᑭᓄᐊᒫᑫᔦᒃ᙮ ᑭᑭᑫᑖᒻ ᐄᑐᒃ ᑮᓇᐎᓐᑦ ᑳᑭᑭᓄᐊᒫᑫᔭᕽ ᓇᐗᒡ ᑕᐋᑴᑖᑾᓐ ᐊᐲ ᐅᓈᑯᓂᑰᔭᕽ ᐊᐲᒡ ᐐᓐ ᐃᑭ ᑯᑕᒃ ᐊᐎᔭᒃ᙮

3:2b.JAM.003.002 ᑮᓇᐎᓐᑦ ᑕᔥ ᑳᐱᒫᑎᓯᔭᕽ ᒨᔕᒃ ᑭᐗᓂᑑᑖᒥᓐ᙮ ᑮᔥᐱᓐ ᑕᔥ ᐐᓐ ᐊᐎᔭ ᐐᑳ ᐗᐗᓃᓯᒃ ᐋᓃᓐ ᐁᑭᑐᒡ, ᒦ ᐊᐌ ᑳᑮᔑᓈᑾᓂᓂᒃ ᐅᐱᒫᑎᓯᐎᓐ, ᐁᑌᑕᑯ ᐁᑲᔥᑭᑑᒡ ᒋᑎᐯᓂᑎᓱᒡ ᒥᓯᐌ ᐅᐱᒫᑎᓯᐎᓂᕽ᙮

3:3b.JAM.003.003 ᐃᓇᔥᑫ ᐱᐙᐱᑰᔅ ᑭᑕᑖᐙᒥᓐ ᒥᑕᑎᒻ ᐅᑯᓀᐎᕽ ᑫᐅᒋ ᓇᐃᑕᐎᓇᕽ᙮ ᒦᔥ ᐃᐃᒫ ᐌᒋ ᑲᔥᑭᐊᕽ ᐊᐊ ᒥᑕᑎᒻ ᒋᐃᔖᒡ ᐁᔑ ᐊᑕᐌᓂᒪᕽ᙮

3:4b.JAM.003.004 ᐃᓇᔥᑫ ᑭᒋ ᒌᒫᓐ ᐋᓇᒥᒑᒃ, ᑭᒋ ᓅᑎᓄᕽ ᐅᒋ ᒫᒌᔮᓯᓐ᙮ ᐋᐱᒋ ᑕᔥ ᐊᑳᓯᓐ ᐃᐃ ᑕᑾᐃᑲᓐ, ᒦᔥ ᐃᐃᒫ ᒌᒫᓃᐎᑭᒫ ᐅᑖᑫᐎᓂᓂ ᐌᒋ ᑴᑴᑳᓯᑑᒡ ᐃᐃ ᒌᒫᓐ ᐋᑎ ᐱᑯ ᐙᐃᓈᔑᒡ᙮

3:5b.JAM.003.005 ᒦᑕᔥ ᒪᔮ ᐁᔑᓈᑾᒃ ᒥᑌᓇᓂᐤ ᐋᓇᐐᓐ ᐁᐊᑳᓯᕽ ᐃᐃᒫ ᐐᔭᐎᒫᕽ, ᔖᑰᒡ ᑭᒋ ᒫᒦᒀᓂᑎᓲᒪᑲᓐ᙮ ᐃᓇᔥᑫ ᐋᐱᑎᕽ ᑮᐸᑭᓀᒃ, ᒦ ᐃᒫ ᐌᒋᑭᒋ ᓴᑭᑌᒃ᙮

3:6b.JAM.003.006 ᒥᑌᓇᓂᐤ ᒪᔮ ᐃᔑᓈᑾᓐ ᑳᐸᑭᓀᒃ, ᐁᐅᒋ ᒫᒌᔥᑳᒪᑲᒃ ᐁᒥᓯᐌᔥᑳᒪᑲᒃ ᒪᒋ ᐃᔑᒋᑫᐎᓐ ᐃᐃᒫ ᑮᔭᐎᓈᕽ᙮ ᒦᑕᔥ ᐁᔑ ᒫᒌᑯᓀᒃ ᒥᓯᐌ ᑭᐱᒫᑎᓯᐎᓂᓈᕽ ᐃᐃᐌ ᐃᔥᑯᑌ ᑳᐅᒌᒪᑲᒃ ᒪᒋ ᐃᔥᑯᑌᕽ᙮

3:7b.JAM.003.007 ᑲᑭᓇ ᐊᔭᐋᐎᔕᐞ, ᐱᓀᔒᔕᐞ, ᑭᓀᐱᑯᐎ ᐊᔭᐋᐎᔕᐞ, ᐃᐃ ᑲᔦ ᐊᔭᐋᐎᔕᐞ ᐁᔮᓂᒡ ᑭᒋᑲᒦᕽ ᑲᔥᑭᐋᐗᒃ ᒋᐙᑲᐎᐃᑣ, ᐃᓂᓂ ᑲᔦ ᐁᐙᑲᐎᐋᒡ᙮

3:8b.JAM.003.008 ᑳᐐᓐ ᑕᔥ ᐊᐎᔭ ᐅᑲᔥᑭᑑᓰᓐ ᒋᐙᑲᐎᑑᒡ ᒥᑌᓇᓂᐤ᙮ ᒪᒉᑖᑾᓐ, ᐁᑲᔥᑭᒋᑳᑌᓯᓄᒃ ᒋᑎᐯᒋᑳᑌᒃ, ᒦ ᐃᒫ ᐁᔑ ᒨᔥᑭᓀᒃ ᑳᓂᔑᐌᒪᑲᒃ ᐱᒋᐳᐎᓐ᙮

3:9b.JAM.003.009 ᒦᑕᔥ ᐃᐃᒫ ᒥᑌᓇᓂᐎᕽ ᐌᒋ ᓇᓈᑯᒪᕽ ᑭᔐᒪᓂᑑᓐ ᑰᓯᓈᓐ᙮ ᒦ ᑲᔦ ᐃᒫ ᐌᒋ ᒪᒋᐃᓇᒀ ᐊᐎᔭᒃ ᑳᑮᐃᔑᐃᑯᐙᒡ ᑭᔐᒪᓂᑑᓐ ᒋᐃᔑᓈᑯᓯᐙᒡ ᐅᑎᔑᓈᑯᓯᐎᓂᓃᕽ᙮

3:10b.JAM.003.010 ᒦ ᐃᒫ ᐯᔑᑾᓐ ᐅᑑᓂᒫᕽ ᐌᒋᓭᒃ ᒥᓄ ᔕᐌᓂᒥᐌᐎᓐ, ᒦᔥ ᑲᔦ ᐃᒫ ᐌᒋᓭᒃ ᑮᑳᑎᐎᓐ᙮ ᓃᒋ ᐅᑌᐺᑕᒨᒃ, ᑳᐐᓐ ᐃᐃ ᑕᑮ ᐃᔑᓭᓯᓅᐸᓐ᙮

3:11b.JAM.003.011 ᑖᐃᔑᓭ ᓇ ᓂᐱ ᑳᐯᑳᑲᒥᒃ, ᐃᐃ ᑲᔦ ᓂᐱ ᑳᔒᐎᑖᑲᓈᑲᒥᒃ ᐯᔑᑾᓐ ᒋᐅᒋ ᒨᑭᒋᐗᑭᓐ?

3:12b.JAM.003.012 ᑳᐐᓐ ᐄᑐᒃ ᐱᒃ ᑎᓄᐙᑎᒃ ᐅᓂᑖᐎᑭᑑᓰᓇᓐ ᐋᓬᐃᑉ ᑎᓄᐎᒥᓇᓐ᙮ ᑳᐐᓐ ᑲᔦ ᔔᒥᓈᑎᒃ ᐅᓂᑖᐎᑭᑑᓰᓇᓐ ᐱᒃ ᑎᓄᐎᒥᓇᓐ᙮ ᑳᐐᓐ ᓂᐱ ᑳᐯᑳᑲᒥᒃ ᑖᐅᒌᓯᓅᓐ ᔒᐎᑖᑲᓂᐎᓂᐱ ᑳᐅᒋᒋᐗᕽ᙮

3:13b.JAM.003.013 ᐊᐌᓀᓐ ᑕᔥ ᑳᑕᔑᔦᒃ ᑫᑮᑖᐌᑕᕽ, ᐊᐌᓀᓐ ᑲᔦ ᐌᓂᓯᑐᑕᒧᐎᓂᒡ? ᐃᐃᒫ ᐅᑲᔑᓈᑯᑑᓐ ᐅᑾᔭᒀᑎᓯᐎᓂᕽ ᐁᑕᐸᓭᓂᒧᒡ ᑲᔦ ᑕᔥ ᐁᑲᑮᑖᐌᑕᕽ ᐋᓃᓐ ᐁᔑ ᐱᒫᑎᓯᒡ᙮

3:14b.JAM.003.014 ᑮᔥᐱᓐ ᑕᔥ ᐅᑌᑕᒣᒃ, ᓂᔥᑫᑕᒣᒃ ᑲᔦ, ᓃᑳᓀᓂᑎᓱᔦᒃ ᑲᔦ ᑭᑌᐃᐙᕽ, ᑫᑯ ᑕᔥ ᐐᓐ ᑭᒋ ᒫᒦᒀᓂᑎᓱᑫᒃ ᑫᐅᒋ ᐲᑯᓇᒣᒃ ᐃᐃ ᑌᐺᐎᓐ᙮

3:15b.JAM.003.015 ᐃᐃ ᓴ ᑎᓄ ᑲᑮᑖᐌᑕᒧᐎᓐ ᑳᐐᓐ ᐃᔥᐱᒥᕽ ᐅᒌᒪᑲᓯᓅᓐ, ᐅᐅᒫ ᐊᑮᕽ ᐅᒌᒪᑲᓐ᙮ ᑳᐐᓐ ᑲᔦ ᐊᒑᑯᐗᓯᓅᓐ, ᒪᒋᐊᒑᑯᕽ ᐅᒌᒪᑲᓐ᙮

3:16b.JAM.003.016 ᐋᑎ ᓴ ᐱᑯ ᐁᔮᑴᓐ ᐅᑌᑕᒧᐎᓐ, ᓃᑳᓀᓂᑎᓱᐎᓐ ᑲᔦ, ᒦ ᐃᒫ ᑲᔦ ᑫᐊᔮᒪᑲᒃ ᐲᑾᑲᒥᑭᓯᐎᓐ ᑲᑭᓇ ᑲᔦ ᑳᑕᓯᕽ ᒪᒋᑑᑕᒧᐎᓐ᙮

3:17b.JAM.003.017 ᐃᐃ ᑕᔥ ᑲᑮᑖᐌᑕᒧᐎᓐ ᐃᔥᐱᒥᕽ ᑳᐅᒌᒃ ᒫᐗᒡ ᐯᑫᑖᑾᓐ᙮ ᒦ ᐃᒫ ᐌᒌᒃ ᐱᓵᓀᑕᒧᐎᓐ, ᓵᑭ ᐐᒌᑎᐎᓐ, ᑰᐹᑌᓂᒥᐌᐎᓐ, ᒥᓋᓄᑮᐎᓇᓐ, ᑌᐺᐎᓐ ᑲᔦ, ᑳᐐᓐ ᑲᔦ ᐊᐎᔭ ᐅᒋ ᐸᑳᓀᓂᒫᓰ᙮

3:18b.JAM.003.018 ᐃᑭ ᓴ ᑳᐐᒋᑣᐙᒡ ᒋᒥᓄ ᐐᒌᑎᓈᓂᐗᓂᓂᒃ ᐊᐲ ᑭᑎᑳᑕᒧᐙᒡ ᐱᓵᓀᑕᒧᐎᓐ, ᐅᑲᓂᑖᐎᑭᑑᓈᐙ ᑾᔭᒀᑎᓯᐎᓐ᙮

4

4:1b.JAM.004.001 ᐋᑎ ᑕᔥ ᐌᒌᑭᓐ ᒦᑳᑎᐎᓇᓐ, ᑮᑳᑎᐎᓇᓐ ᑲᔦ? ᐃᐃᒫ ᓴ ᐅᒌᒪᑲᓅᓐ ᑳᔑ ᒥᓴᐌᑕᒣᒃ ᐁᐐᒥᓉᑕᒥᐃᑎᓱᔦᒃ᙮ ᒦᐗᓐ ᑕᔥ ᐃᓂ ᑳᒫᒦᑳᑏᒪᑲᑭᓐ ᑭᐱᒫᑎᓯᐎᓂᐗᕽ᙮

4:2b.JAM.004.002 ᑫᑰᓐ ᓴ ᑭᓇᑕᐌᑖᓈᐙ, ᑳᐐᓐ ᑕᔥ ᑭᑌᐱᓇᓰᒻ᙮ ᑭᓂᔑᐌᒻ, ᑭᒥᓴᐌᒋᑫᒻ ᑲᔦ, ᑳᐐᓐ ᑕᔥ ᑭᑌᐱᓇᓰᒻ ᐁᑕᐌᑕᒣᒃ᙮ ᑭᑮᑳᑎᒻ, ᑭᒦᑳᑎᒻ ᑲᔦ, ᑳᐐᓐ ᑕᔥ ᑭᑌᐱᓇᓰᒻ ᐁᑕᐌᑕᒣᒃ ᐋᓃᔥ ᑳᐐᓐ ᑭᑲᑴᒋᒫᓯᐙᐙ ᑭᔐᒪᓂᑑ᙮

4:3b.JAM.004.003 ᐋᐲ ᑕᔥ ᑮᑲᑴᑗᔦᒃ ᑳᐐᓐ ᑭᒦᓂᑰᓰᒻ ᐅᓵᒻ ᐋᓃᔥ ᑳᐐᓐ ᓭᓯᒃ ᑭᑎᓀᑕᓰᒻ᙮ ᐃᐃᐌ ᑳᑲᑴᑗᔦᒃ ᑭᐐᐃᓈᐸᒋᑑᒻ ᑮᓇᐙ ᐱᑯ ᐁᐐᒥᓉᑕᒥᐃᑎᓱᔦᒃ᙮

4:4b.JAM.004.004 ᑳᐐᓐ ᑭᑌᐺᔦᑖᑯᓯᓰᒻ ᑖᐱᔥᑰ ᐃᑴ ᑳᒥᓄ ᐐᒌᐙᓯᒃ ᐅᓈᐯᒪᓐ᙮ ᑳᐐᓐ ᐃᓇ ᑭᑭᑫᑕᓰᒻ ᐊᐎᔭ ᑮᓵᑭᑑᒡ ᐅᐅ ᐊᑮᓂ ᒦ ᐃ ᐄᓴᓐ ᐁᔒᑫᓂᒫᒡ ᑭᔐᒪᓂᑑᓐ? ᐊᐌᓀᓐ ᓴ ᐱᑯ ᑳᔑ ᐅᓀᑕᕽ ᐁᐐ ᓵᑭᑑᒡ ᐊᑮᓂ ᒦ ᐃ ᐁᐊᓂ ᑎᓄᐎᒡ ᑳᔒᑫᓂᒫᒡ ᑭᔐᒪᓂᑑᓐ᙮

4:5b.JAM.004.005 ᑫᑯ ᑕᔥ ᐋᓉᑕᑫᒃ ᑭᒋᒪᓯᓇᐃᑲᓐ ᑮᐃᔑᐲᐃᑳᑌᒃ: ᐋᐱᒋ ᐐᓐ ᐅᓇᑕᐌᓂᒫᓐ ᒋᑎᐱᓇᐌᐎᓯᒡ ᐃᓂᐌᓂᐗᓐ ᐊᒑᑾᓐ ᑳᑭᑭᔥᑲᒨᓂᓇᑭᒡ᙮

4:6b.JAM.004.006 ᐃᐃ ᓴ ᑭᔐᒪᓂᑑ ᑳᔑ ᔕᐌᓂᒥᓇᕽ ᒫᐗᒡ ᒪᔥᑲᐌᑖᑾᓂᓂ᙮ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑭᔐᒪᓂᑑ ᐅᓇᑳᔥᑲᐙᓐ ᑫᒋ ᐃᓀᓂᑎᓱᓂᒡ, ᐅᔕᐌᓂᒫᓐ ᑕᔥ ᐐᓐ ᐃᓂ ᑌᐸᓭᓂᒧᓂᒡ᙮

4:7b.JAM.004.007 ᐸᑭᑎᓂᑎᓱᑕᐎᒃ ᑭᔐᒪᓂᑑ᙮ ᓇᑳᔥᑲᐎᒃ ᒪᒋᐊᔭᐋ, ᒦᔥ ᒋᑕᐸᓰᑲᑕᐎᓀᒃ᙮

4:8b.JAM.004.008 ᐯᔓ ᐱᓈᓯᑲᐎᒃ ᑭᔐᒪᓂᑑ, ᑫᐐᓐ ᑕᔥ ᐯᔓ ᑭᑲ ᓈᓯᑳᒃ᙮ ᑭᓰᓂᒌᒃ ᑮᓇᐙ ᑳᒪᒋᑑᑕᒣᒃ᙮ ᐯᑭᑑᒃ ᑭᑌᐃᐙᓐ ᑮᓇᐙ ᓃᔡᔦᒃ ᑳᐃᓀᑕᒣᒃ᙮

4:9b.JAM.004.009 ᑲᒀᑕᑫᑕᒧᒃ, ᒫᓀᑕᒧᒃ ᑲᔦ ᒋᒪᐎᔦᒃ᙮ ᑭᐹᐱᐎᓂᐙ ᑕᔑ ᑴᑭᓂᑳᑌ ᒋᒫᓀᑕᒣᒃ ᑲᔦ ᑕᔥ ᑭᒥᓉᑕᒧᐎᓂᐙ ᑕᔑ ᑴᑭᓂᑳᑌ ᒋᓰᐱᔅᑳᑌᑕᒣᒃ᙮

4:10b.JAM.004.010 ᑕᐸᓭᓂᑎᓱᒃ ᐁᓈᓴᒦᒡ ᑳᑎᐯᒋᑫᒡ, ᒦᔥ ᒋᐅᐱᓂᓀᒃ᙮

4:11b.JAM.004.011 ᓃᒋ ᐅᑌᐺᑕᒨᒃ, ᑫᑯ ᐊᐎᔭ ᒪᒋᐃᓈᑫᒃ᙮ ᑮᔥᐱᓐ ᒪᒋ ᑕᔑᒪᒡ ᑯᒫ ᑲᔦ ᐅᓈᑯᓇᒡ ᑮᑕᓇᒥᐋ ᒦ ᐃ ᐁᒪᒋᐃᑕᒪᓐ ᐁᐅᓈᑯᓇᒪᓐ ᑲᔦ ᐅᓇᔓᐌᐎᓐ᙮ ᑮᔥᐱᓐ ᑕᔥ ᐅᓈᑯᓇᒪᓐ ᐅᓇᔓᐌᐎᓐ ᑳᐐᓐ ᑮᓐ ᑭᓇᐃᑕᓰᓐ ᐅᓇᔓᐌᐎᓐ, ᒦᔥ ᑮᓐ ᐄᓴᓐ ᐁᐅᓈᑯᓂᐌᔭᓐ᙮

4:12b.JAM.004.012 ᐯᔑᑯ ᐅᔐᑕ ᑳᒦᑭᐌᒡ ᐅᓇᔓᐌᐎᓐ, ᐅᓈᑯᓂᐌᒡ ᑲᔦ᙮ ᒦ ᓴ ᐊᐌ ᑳᑲᔥᑭᑑᒡ ᒋᐱᒫᒋᐃᐌᒡ, ᑳᑲᔥᑭᑑᒡ ᑲᔦ ᒋᓂᔑᐗᓈᒋᐃᐌᒡ᙮ ᐊᐌᓀᓐ ᑕᔥ ᑮᓐ ᐁᓀᓂᑎᓱᔭᓐ ᐁᐅᓈᑯᓇᒡ ᑮᒋᐱᒫᑎᔅ?

4:13b.JAM.004.013 ᐱᓯᑕᒧᒃ ᑮᓇᐙ ᑳᐃᑭᑐᔦᒃ: ᓅᑯᒻ ᑳᑮᔑᑲᒃ ᑯᒫ ᑲᔦ ᐙᐸᕽ ᑭᑲ ᐃᔖᒥᓐ ᐌᑎ ᑭᒋ ᐆᑌᓈᕽ ᒋᐊᐎ ᐊᔮᔭᕽ ᐯᔑᑯᐱᐴᓐ ᒋᐊᐎ ᐊᓄᑮᔭᕽ ᑲᔦ ᑕᔥ ᒋᔔᓂᔮᑫᔭᕽ᙮

4:14b.JAM.004.014 ᑳᐐᓐ ᐄᑐᒃ ᑭᑭᑫᑕᓰᒻ ᐋᓃᓐ ᑫᐃᔑᐌᐸᒃ ᐙᐸᕽ᙮ ᒦ ᓴ ᐃ ᐁᔑᓈᑯᓯᔦᒃ ᑖᐱᔥᑰ ᑳᐹᔥᑭᓀᒃ, ᐊᒋᓇ ᐁᑕ ᐁᐊᔮᒪᑲᒃ, ᒦᔥ ᐁᔑ ᐊᑯᓈᑾᒃ᙮

4:15b.JAM.004.015 ᐅᐅᐌ ᐅᔕ ᑭᑖᐃᑭᑐᒻ: ᑮᔥᐱᓐ ᑳᑎᐯᒋᑫᒡ ᐃᓀᑕᕽ, ᑭᑲ ᐱᒫᑎᓯᒥᓐ, ᐅᐅ ᑭᑲ ᐃᔑᒋᑫᒥᓐ, ᐃᐃ ᑲᔦ ᑭᑲ ᐃᔑᒋᑫᒥᓐ᙮

4:16b.JAM.004.016 ᒦᑕᔥ ᐁᔑᒋᑫᔦᒃ ᐁᑭᒋ ᐃᓀᓂᑎᓱᔦᒃ, ᑲᔦ ᑕᔥ ᐁᑭᒋ ᑳᑮᑭᑐᔦᒃ᙮ ᐃᐃ ᑎᓄ ᑭᒋ ᑳᑮᑭᑐᐎᓐ ᒪᒋᑑᑕᒧᐎᓂᐗᓐ᙮

4:17b.JAM.004.017 ᑮᔥᐱᓐ ᑕᔥ ᑭᑫᑕᒣᒃ ᒋᒥᓄᑑᑕᒣᑭᐸᓐ, ᐃᔑᒋᑫᓯᐌᒃ ᐃᑕᔥ, ᒦ ᐃ ᐎᓂᐗᓐ᙮

5

5:1b.JAM.005.001 ᑮᓇᐙ ᑳᐌᓅᑎᓯᔦᒃ, ᒪᐎᒃ ᒋᑲᒀᑕᑫᑕᒣᒃ᙮ ᑲᒀᑕᑭᓭᐎᓇᓐ ᐅᔕ ᑭᐐᐅᑎᓯᑯᒻ᙮

5:2b.JAM.005.002 ᑭᐌᓅᑎᓯᐎᓂᐙᓐ ᐅᔕ ᐗᓈᑕᓅᓐ, ᐃᑭ ᑲᔦ ᐱᓀᓯᐎᐅᑎᑯᒪᒃ ᐅᑮᑭᑖᓈᐙᓐ ᑭᑭᑭᔥᑭᑲᓂᐙᓐ᙮

5:3b.JAM.005.003 ᑭᑑᓵᐙᐱᑯ ᔔᓂᔮᒥᐙ, ᐊᐊ ᑲᔦ ᑭᐙᐹᐱᑯ ᔔᓂᔮᒥᐙ ᐐᑫ ᐊᒀᒀᐱᑭᔑᓅᒃ᙮ ᐃᐃᐌᓂ ᑕᔥ ᑳᔑ ᐊᒀᒀᐱᑭᔑᓄᐙᒡ ᑭᑎᐹᒋᒥᑯᐙᒻ ᐋᓃᓐ ᐁᔑ ᐊᔮᔦᒃ, ᒦᔥ ᑲᔦ ᐃᐌ ᑫᓂᔑᐗᓈᒋᐃᑯᔦᒃ ᑖᐱᔥᑰ ᐃᔥᑯᑌ ᑳᔑ ᒑᑳᑭᓱᐌᒪᑲᒃ᙮

5:4b.JAM.005.004 ᑳᐐᓐ ᐄᑐᒃ ᑭᑮ ᑎᐸᐊᒪᐙᓯᐙᐙᒃ ᑳᑮᐊᓄᑮᑕᐎᓀᒀ ᑭᑭᑎᑫᐗᑲᒥᑯᐙᕽ ᑮᒪᓂᔑᑫᐙᒡ᙮ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᐅᔕ ᐅᓅᑕᐙᐞ ᐁᔖᑯᐌᓂᒡ ᐃᐃ ᑳᑮᒪᓂᔑᑫᓂᒡ ᑭᑭᑎᑫᐗᑲᒥᑯᐙᕽ᙮

5:5b.JAM.005.005 ᒋᑭᒋ ᐌᓅᑎᓯᔦᒃ, ᒋᒥᓉᑕᒥᐃᑎᓱᔦᒃ ᐁᑕ ᑭᑎᔑ ᐱᒫᑎᓯᒻ ᐅᐅᒫ ᐊᑮᕽ᙮ ᐁᐋᒋᐴᓂᑎᓱᔦᒃ ᑖᐱᔥᑰ ᐱᔑᑭ ᑳᐋᒋᐴᓂᓐᒡ ᑳᔑᐎᓂᓐᒡ ᑕᔥ ᑫᑕᔑᓂᓯᓐᒡ ᒋᓇᓇᐎᔓᓐᒡ᙮

5:6b.JAM.005.006 ᑭᑮ ᑌᐱᒫᐙᒃ ᒋᓂᓯᑣ ᑲᔦ ᑕᔥ ᑭᑮᓂᓵᐙᒃ ᐃᓂᓂᐗᒃ ᑫᑰᓐ ᐁᔑ ᐊᓈᒣᑖᑯᓯᓯᒀ, ᑳᐐᓐ ᑲᔦ ᑭᑮᓇᓈᑯᓂᑯᓰᐙᒃ᙮

5:7b.JAM.005.007 ᓃᒋ ᐅᑌᐺᑕᒨᒃ, ᔕᔒᐯᑕᒧᒃ ᐲᓂᔥ ᒋᐱᑕᑯᔑᕽ ᑳᑎᐯᒋᑫᒡ᙮ ᐃᓇᔥᑫ ᑭᑎᑫᐎᓂᓂᐗᒃ ᐅᐲᑑᓈᐙᓐ ᐅᑭᑎᑳᓂᐙᓐ ᒋᐅᒋ ᓂᑖᐎᑭᓂᓂᑭᓐ ᐅᑭᑎᑫᐗᑲᒥᑯᐙᕽ᙮ ᔕᔒᐯᑕᒧᒃ ᐁᐲᑑᐙᒡ ᒋᑭᒥᐗᓂᓂᒃ ᐁᑕᒀᑭᓂᓂᒃ ᑲᔦ ᑕᔥ ᐁᓰᑾᓂᓂᒃ᙮

5:8b.JAM.005.008 ᒦᑕᔥ ᑫᑮᓇᐙ ᐃᔑ ᔕᔒᐯᑕᒧᒃ᙮ ᑫᑯ ᐸᑭᒌᑫᒃ ᐁᔑ ᐊᐯᓂᒧᔦᒃ, ᐋᔕ ᐅᔕ ᐯᔓᓈᑾᓂᓂ ᑳᑎᐯᒋᑫᒡ ᑳᐐ ᐱᑕᑯᔑᕽ᙮

5:9b.JAM.005.009 ᑫᑯ ᐅᒋ ᒫᔑᑲᑲᓅᓂᑎᑫᒃ ᑮᓇᐙ ᐅᒋ, ᑳᐐᓐ ᑕᔥ ᑭᑲ ᐅᓈᑯᓂᑰᓰᒻ᙮ ᐃᐃᒫ ᐅᔕ ᐃᔥᒀᑌᕽ ᓃᐸᐎ ᐅᑎᐹᑯᓂᐌ᙮

5:10b.JAM.005.010 ᓃᒋ ᐅᑌᐺᑕᒨᒃ, ᑭᑭᓇᐙᐸᒥᑾᒃ ᐃᑭ ᑫᑲᓅᑕᒪᐙᐙᒡ ᑭᔐᒪᓂᑑᓐ ᑳᑮᐋᐸᒋᑑᐙᒡ ᑳᑎᐯᒋᑫᓂᒡ ᐅᐐᓱᐎᓂᓂ ᐋᓃᓐ ᑳᑮ ᔕᔒᐯᑕᒧᐙᒡ ᐋᓇᐐᓐ ᐁᑮ ᑲᒀᑕᑭᑑᐙᒡ᙮

5:11b.JAM.005.011 ᔕᐌᑖᑯᓯᐗᒃ ᑭᑎᓈᓈᓂᒃ ᐃᑭ ᑳᐱ ᔕᔒᐯᑕᒧᐙᒡ᙮ ᑭᐱ ᓅᑖᒻ ᑲᔦ ᐋᓃᓐ ᒎᑉ ᑳᐃᔑ ᔕᔒᐯᑕᕽ, ᐋᓃᓐ ᑲᔦ ᑳᑎᐯᒋᑫᓂᒡ ᑳᐃᔑ ᐐᒋᐃᑯᒡ ᐌᑎ ᐃᔥᒀᒡ᙮ ᑳᑎᐯᒋᑫᒡ ᐅᔕ ᐅᐌᓅᒋᑑᓐ ᑰᐹᓯᓈᑫᐎᓐ, ᒥᓄᑑᑖᑫᐎᓐ ᑲᔦ᙮

5:12b.JAM.005.012 ᓃᒋ ᐅᑌᐺᑕᒨᒃ, ᒦ ᐃᐌ ᒫᐗᒡ ᐃᑯ ᐃᔑᒋᑫᒃ᙮ ᑫᑯ ᑫᑰᓐ ᐊᐱᒧᑫᒃ ᐊᐲ ᐊᔓᑕᒫᑫᔦᒃ᙮ ᑫᑯ ᐊᐱᒧᑫᒃ ᑮᔑᒃ, ᐊᑭ, ᑫᑰᓐ ᐃᓴ ᐱᑯ᙮ ᐁᐊᐞ ᑮᐃᑭᑐᔭᓐ, ᒦ ᐱᑯ ᐃ ᐁᐊᐞ; ᑳᐐᓐ ᐃᑭᑐᔭᓐ, ᒦ ᐱᑯ ᐅ ᑳᐐᓐ᙮ ᑳᐐᓐ ᑕᔥ ᑭᑲ ᑎᐹᑯᓂᑰᓰ᙮

5:13b.JAM.005.013 ᒫᔑᓭ ᓇ ᐊᐎᔭ ᑳᑕᔑᔦᒃ? ᑕᑲ ᑕᐊᓇᒥᐋ᙮ ᐊᐎᔭ ᓇ ᒥᓉᑕᒻ? ᑕᓂᑲᒧ ᑎᓄ ᒦᑴᒋᐎᓂᑲᒧᓇᓐ᙮

5:14b.JAM.005.014 ᐊᐎᔭ ᓇ ᐋᑯᓯ ᑳᑕᔑᔦᒃ? ᐅᑲᐊᑐᒫᐞ ᑳᓃᑳᓂᓯᓂᒡ ᐊᓇᒥᐁᐎᑲᒥᑯᕽ ᒋᐱ ᐊᓇᒥᐁᑖᑯᒡ ᑕᑯ ᑲᔦ ᒋᐴᓯᓂᑯᒡ ᐱᒥᑌᓂ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ᙮

5:15b.JAM.005.015 ᑌᐺᔦᑕᒧᓈᓂᐗᕽ ᐃᑕᔥ ᐊᐲ ᐊᓇᒥᐋᓂᐗᕽ, ᒦᔥ ᒋᒥᓄᐊᔮᒡ ᐊᐊ ᑳᐋᑯᓯᒡ᙮ ᑳᑎᐯᒋᑫᓂᒡ ᐅᑮ ᒥᓄᐊᔮᐃᑰᓐ᙮ ᑮᔥᐱᓐ ᑕᔥ ᑮᒪᒋᑑᑕᕽ, ᑕᐴᓀᑕᒪᐙᑲᓂᐎ᙮

5:16b.JAM.005.016 ᐙᐐᑕᒫᑎᒃ ᐃᑕᔥ ᐁᔑᒪᒪᒋᑑᑖᑎᔦᒃ, ᐊᓇᒥᐁᑕᒫᑎᒃ ᑲᔦ, ᒦᑕᔥ ᒋᐊᑕᐎᐃᑰᐎᓯᔦᒃ᙮ ᐁᔑ ᐊᓇᒥᐋᒡ ᐅᑾᔭᒀᑎᔅ ᒪᔥᑲᐙᓂ, ᐊᓄᑮᒪᑲᓂᓂ ᑲᔦ᙮

5:17b.JAM.005.017 ᐃᓬᐋᐃᒐ ᓴ ᐐᓐ ᑮᐃᔑ ᐃᓂᓃᐎ ᑖᐱᔥᑰ ᑮᓇᐎᓐᑦ᙮ ᐌᐌᓂ ᑕᔥ ᑮᐊᓇᒥᐋ ᒋᐅᒋ ᑭᒥᐗᓯᓂᓂᒃ᙮ ᓂᓱᐱᐴᓐ ᐃᔑ ᐋᐱᑕ ᑕᔥ ᑳᐐᓐ ᑮᐅᒋ ᑭᒥᐗᓯᓂᓂ᙮

5:18b.JAM.005.018 ᒦᓇᐙ ᑕᔥ ᑮᐊᓇᒥᐋ, ᒦᔥ ᑮᔑᑯᕽ ᑳᑮᐅᒋ ᑭᒥᐗᓂᓂᒃ᙮ ᑮᓂᑖᐎᑭᓅᓐ ᑕᔥ ᐅᐅᒫ ᐊᑮᕽ ᑭᑎᑫᐎᓇᓐ᙮

5:19b.JAM.005.019 ᓃᒋ ᐅᑌᐺᑕᒨᒃ, ᑮᔥᐱᓐ ᐊᐎᔭ ᑳᑌᐺᑕᕽ ᐸᑫᓄᑕᕽ ᑌᐺᐎᓐ, ᐊᐎᔭᓐ ᐅᔕ ᐅᑕᑲᑴ ᐱᑮᐌᐎᓂᑰᓐ᙮

5:20b.JAM.005.020 ᐅᐅ ᑕᔥ ᒫᒥᑲᐎᒃ; ᐊᐌᓀᓐ ᐃᑯ ᑫᑴᑭᓈᒡ ᐅᒪᒋᑑᑕᒨᓐ ᐁᔑ ᐗᓂᔑᓂᓂᒡ ᐅᑲᐱᒫᒋᐋᓐ ᒋᓂᐳᓯᓂᒃ, ᒦᔥ ᑲᔦ ᓃᐱᐗᐞ ᒪᒋᑑᑕᒧᐎᓇᓐ ᒋᐴᓀᒋᑳᑌᓂᑭᓐ᙮