Hebrews (Ojibwa)

1

1:1b.HEB.001.001 ᒣᐎᔕ ᑕᔥ ᐐᓐ ᑭᔐᒪᓂᑑ ᐯᐸᑳᓐ ᐃᓇᑫ ᐅᑮᐃᔑᑲᑲᓅᓈᐞ ᑳᑮᐅᑫᑌᔭᐋᒥᐗᕽ, ᐅᑫᑌᑎᐹᒋᒧᐎᓂᓃᒪᐞ ᐄᑐᒃ ᐁᑮᐋᐸᒋᐋᒡ,

1:2b.HEB.001.002 ᓅᑯᒻ ᐃᑕᔥ ᐅᓄ ᐃᔥᒀᒡ ᑳᓂᑲᑮᔑᑲᓂᓂᒃ ᐅᑯᓯᓴᓐ ᐅᑖᐸᒋᐋᓐ ᐁᑲᓅᓂᓇᕽ᙮ ᑭᔐᒪᓂᑑ ᐋᓃᔥ ᐅᑮᐅᓇᑭᒫᓐ ᑲᑭᓇ ᑫᑰᓂᓂ ᐱᒌᓇᒃ ᒋᑎᐯᑕᒥᓂᒡ, ᒦ ᑲᔦ ᐃᐃᒫ ᐅᑯᓯᓯᕽ ᑳᐅᒋᐅᔑᑑᒡ ᐊᑮᓂ᙮

1:3b.HEB.001.003 ᒦᑕᔥ ᐊᐊ ᐅᑯᓯᓯᒫ ᑳᓈᑯᑑᒡ ᑭᔐᒪᓂᑑᓐ ᑳᐃᔑᐙᓭᔮᓂᒃ ᐅᑭᒋ ᐃᓀᑖᑯᓯᐎᓂᓂ, ᒦ ᑲᔦ ᒪᔮ ᑭᔐᒪᓂᑑᓐ ᑳᐃᓀᑖᑯᓯᓂᒡ ᑳᐃᓈᑎᓯᒡ᙮ ᐅᑎᑭᑐᐎᓐ ᑳᑲᔥᑭᐁᐎᓰᒪᑲᓂᓂᒃ ᓴ ᐅᑑᒋᒥᒋᒥᓈᓐ ᑲᑭᓇ ᑫᑰᓂᓂ᙮ ᐊᐲ ᑕᔥ ᑳᑲᔥᑭᑑᒡ ᐋᓃᓐ ᑫᔑᐯᑭᐃᒥᓐᒡ ᐃᓂᓂᐗᐞ ᐅᒪᒋᑑᑕᒧᐎᓂᓃᕽ ᐅᒋ, ᒦᑕᔥ ᑳᐃᔑᐊᐱᒡ ᐅᑭᒋᓂᑭᓃᕽ ᐃᓇᑫ ᑭᔐᒪᓂᑑᓐ ᑳᐃᔑᐊᐱᓂᒡ, ᑳᒫᒪᐎ ᒪᔥᑲᐎᓰᓂᒡ ᐃᐃᒫ ᒫᐗᒡ ᐃᔥᐱᒥᕽ᙮

1:4b.HEB.001.004 ᐊᐊ ᓴ ᐅᑯᓯᓯᒫ ᑮᐱᑎᓄᐎ ᓇᐗᒡ ᒋᐃᔥᐯᑖᑯᓯᒡ ᐊᐲᒡ ᐐᓐ ᐃᐃ ᐁᒐᓬᐊᐞ, ᐊᒦᑕᔥ ᑲᔦ ᐯᔑᑾᓐ ᐊᐗᔑᒣ ᐁᐃᔑ ᐃᔥᐯᑖᑾᓂᓂᒃ ᐅᐐᓱᐎᓐ ᑭᔐᒪᓂᑑᓐ ᑳᑮᒦᓂᑯᒡ, ᐊᐲᒡ ᐐᓐ ᐃᐃ ᐁᒐᓬᐊᐞ ᑳᐃᔑᐐᓱᓂᒡ᙮

1:5b.HEB.001.005 ᑭᔐᒪᓂᑑ ᓴ ᑳᐐᓐ ᐐᑳ ᐅᑮᐃᓈᓰᓐ ᐯᔑᒃ ᐁᒐᓬᐊᓐ: ᑮᓐ ᓂᑯᓯᔅ, ᓅᑯᒻ ᑳᑮᔑᑲᒃ ᑭᒫᒌᐅᑌᑌᒥᔥ᙮ ᑳᐐᓐ ᑲᔦ ᐐᑳ ᐅᑮᐃᔑᑕᔑᒫᓰᓐ ᐁᒐᓬᐊᓐ: ᓂᑲᐅᑌᑌᒥᒃ ᓴ, ᑫᐐᓐ ᑕᔥ ᓂᑲᐅᑯᓯᓯᒫ᙮

1:6b.HEB.001.006 ᒦᓇᐙ ᑕᔥ, ᐊᐲ ᑭᔐᒪᓂᑑ ᑮᐲᒋᓂᔕᐙᒡ ᐅᐅᒫ ᐊᑮᕽ ᐃᓂ ᓂᑕᒻ ᑳᑮᐅᑯᓯᓯᒡ ᑮᐃᑭᑐ: ᑲᑭᓇ ᑭᔐᒪᓂᑑ ᐅᑌᒐᓬᐃᒪᐞ ᐅᑲᐊᓇᒥᐁᑕᐙᓂ᙮

1:7b.HEB.001.007 ᐅᐅ ᑕᔥ ᐐᓐ ᑭᔐᒪᓂᑑ ᐅᑎᓈᐞ ᐁᒐᓬᐊᐞ: ᑭᔐᒪᓂᑑ ᓴ ᒦ ᐃ ᐁᔑᐋᒡ ᐃᐃ ᐅᑌᒐᓬᐃᒪᐞ ᒋᓅᑎᓄᐎᓂᒡ, ᑳᐸᒦᑖᑯᒡ ᑲᔦ ᐅᑎᔑᐋᐞ ᒋᐃᔥᑯᑌᐎᓂᒡ᙮

1:8b.HEB.001.008 ᐅᐅ ᑕᔥ ᐐᓐ ᑭᔐᒪᓂᑑ ᐅᑎᓈᓐ ᐃᓂ ᐅᑯᓯᓴᓐ: ᑮᓐ ᑭᔐᒪᓂᑑ! ᑭᑑᑭᒫᐎᐎᓐ ᑳᐐᓐ ᐐᑳ ᑕᐴᓂᐊᔮᒪᑲᓯᓅᓐ᙮ ᐋᐱᒋ ᑲᔦ ᐌᐌᓂ ᑭᑲᑾᔭᑯᑑᑕᐙᒃ ᐃᑭ ᑳᑎᐯᓂᒪᑣ ᑭᑑᑭᒫᐎᐎᓂᕽ᙮

1:9b.HEB.001.009 ᐋᓃᔥ ᑭᓵᑭᑑᓐ ᐃᐃ ᑳᑾᔭᑯᓈᑾᒃ, ᑭᔒᑫᑖᓐ ᑲᔦ ᐃᐃ ᑳᒫᓈᑕᒃ᙮ ᒦᑕᔥ ᐅᐅᐌᓂ ᑭᔐᒪᓂᑑ ᑳᐅᑭᔐᒪᓂᑑᒥᔭᓐ, ᑳᑮᐅᒋᐅᓇᑭᒥᒃ ᒋᑭᒋᐅᑭᒫᐌᑖᑯᓯᐗᒡ; ᑳᑮᐅᒋᒦᓂᒃ ᑲᔦ ᒋᒥᓉᑕᒪᓐ ᐃᐃᒫ ᑭᑭᑌᑖᑯᓯᐎᓂᕽ; ᑳᐐᓐ ᐃᑕᔥ ᐐᓐ ᐅᑮᐃᔑᒦᓈᓰᐞ ᐃᐃ ᑭᐐᒌᐙᑲᓇᐞ᙮

1:10b.HEB.001.010 ᑲᔦ ᑮᐃᑭᑐ: ᑮᓐ, ᑳᑎᐯᒋᑫᔭᓐ, ᑭᑮᐅᓇᑑᓐ ᐅᐅ ᐊᑭ ᐊᐲ ᑮᒫᒋᓭᒃ ᑲᑭᓇ ᑫᑰᓐ, ᑕᐱᓇᐌ ᓴ ᑭᓂᒌᓐ ᑭᑮᐋᐸᒋᑑᓇᓐ ᐁᐅᔑᑑᔭᓐ ᐃᓂ ᑲᑭᓇ ᐃᔥᐱᒥᕽ ᑮᔑᑯᕽ ᑳᐊᔮᑭᓐ᙮

1:11b.HEB.001.011 ᐃᓂ ᓴ ᑕᓂᔑᐗᓈᑕᓅᓐ, ᑮᓐ ᐃᑕᔥ ᑫᔮᐱ ᑭᑲᐊᔮ᙮ ᑖᐱᔥᑰ ᑳᐃᔑᒑᑭᔥᑭᑳᑌᑭᓐ ᑭᑭᔥᑭᑲᓇᓐ ᑕᓂ ᐃᔑᐊᔮᐗᓐ᙮

1:12b.HEB.001.012 ᑭᑲᓇᐄᑭᓈᓐ ᑲᔦ ᑭᒋᑮᔑᒃ ᑖᐱᔥᑰ ᑳᐃᔑᓇᐄᑭᓂᑳᑌᒃ ᑲᔥᑮᑮᐎᓐ, ᑕᐋᒋᒋᑳᑌᐗᓐ ᑲᔦ ᑖᐱᔥᑰ ᑭᑭᔥᑭᑲᓇᓐ ᑳᐃᔑᐋᒋᔥᑭᑳᑌᑭᓐ᙮ ᑮᓐ ᐃᑕᔥ ᐐᓐ ᐯᔑᑾᓄᕽ ᑭᑲᐃᔑᐊᔮ, ᑭᐱᒫᑎᓯᐎᓐ ᑲᔦ ᑳᐐᓐ ᐐᑳ ᑕᐃᔥᒀᓭᓯᓅᓐ, ᐁᑮᐃᓈᒡ᙮

1:13b.HEB.001.013 ᑭᔐᒪᓂᑑ ᑲᔦ ᑳᐐᓐ ᐐᑳ ᐅᑎᓈᓰᓐ ᐯᔑᒃ ᐁᒐᓬᐊᓐ: ᐅᐅᒫ ᓴ ᐃᔑᐊᐱᓐ ᓂᑭᒋᓂᑭᕽ ᐃᓇᑫ, ᐹᓂᒫ ᑮᔖᑰᒋᑕᒪᐎᓈᓐ ᑳᒦᑳᓂᒀ ᒋᐊᔭᐱᓯᑌᐱᔭᓐ᙮

1:14b.HEB.001.014 ᐊᐌᓀᓇᒃ ᐃᑕᔥ ᐃᑭ ᐁᒐᓬᐊᒃ? ᒦ ᓴ ᐁᐊᒑᑯᐎᐙᒡ ᐁᐊᓄᑮᑕᐙᐙᒡ ᑭᔐᒪᓂᑑᓐ ᐁᐃᔑᓂᔕᐅᑣ ᑲᔦ ᒋᐐᒋᐋᐙᒡ ᐃᐃ ᑳᐐᒦᓂᒥᓐᒡ ᐱᒫᒋᐃᑰᐎᓐ᙮

2

2:1b.HEB.002.001 ᒦ ᓴ ᑕᔥ ᑫᐅᒋᒪᔥᑲᐎ ᒥᒋᒥᓇᒪᑭᐸᓐ ᐃᓂ ᑳᑮᐱᓅᑕᒪᕽ, ᒋᐗᓂᐎᓂᑯᓯᐗᕽ ᑯᑕᒃ ᑭᑭᓄᐊᒫᑫᐎᓇᓐ᙮

2:2b.HEB.002.002 ᐃᐃ ᑎᐹᒋᒧᐎᓐ ᑳᑮᐋᓂᑫ ᐐᑕᒫᑫᐙᑯᐸᓀᓐ ᐃᑭ ᐁᒐᓬᐊᒃ ᑮᑭᒋᐌᑖᑾᓂᓂ᙮ ᐊᐌᓀᓐ ᓴ ᑳᑮᐲᑯᓇᕽ, ᐅᒋᑕ ᑳᑮᐱᓯᑕᓯᒃ ᑲᔦ, ᐅᑮᐅᑎᓯᑯᓐ ᑲᒀᑕᑭᐃᑰᐎᓐ᙮

2:3b.HEB.002.003 ᐋᓃᓐ ᐃᑕᔥ ᑫᑮᓇᐎᓐᑦ ᑫᐅᒋᔖᐾᔭᑭᐸᓐ ᑮᔥᐱᓐ ᐋᓇᐌᑕᒪᕽ ᐃᐃ ᑳᒫᐗᒋ ᓃᑳᓀᑖᑾᒃ ᐱᒫᒋᐃᑰᐎᓐ? ᐋᓃᔥ ᐐᓐ ᐃᑯ ᑳᑎᐯᒋᑫᒡ ᐅᑮᑎᐹᑐᑖᓐ ᐅᐅ ᐱᒫᒋᐃᐌᐎᓐ, ᐃᑭ ᓴ ᑲᔦ ᑳᑮᓅᑕᒧᐙᒡ, ᒦᐗᒃ ᐃᑭᐌᓂᐗᒃ ᑳᓈᑯᑕᒪᐎᓇᑭᑣ ᐁᑌᐺᔦᑖᑾᓂᓂᒃ᙮

2:4b.HEB.002.004 ᑭᔐᒪᓂᑑ ᓴ ᑲᔦ ᐅᑮᑕᑯᐐᒋᑕᒪᐙᐞ ᐅᑎᐹᒋᒧᐎᓂᓂ ᑭᑭᓇᐙᒋᒋᑲᓇᓐ ᐁᑮᐋᐸᒋᑑᒡ, ᑳᒫᒪᑳᓯᓈᑾᓂᓂᑭᓐ ᑲᔦ, ᑭᒋ ᐃᔑᒋᑫᐎᓇᓐ ᑲᔦ, ᔑᑾ ᑳᐃᔑᒦᑭᐌᓂᒡ ᐅᑕᒑᑾᓐ ᑳᑮᐃᔑ ᒫᒫᑕᐆᑮᒡ ᐐᓐ ᐃᑯ ᐅᑎᓀᑕᒧᐎᓐ ᐁᐋᐸᒋᑑᒡ᙮

2:5b.HEB.002.005 ᐃᐃ ᓴ ᑳᑕᔑᑕᒫᕽ ᐅᔥᑭᐊᑭ ᐁᐐᐱᑕᑯᔑᓅᒪᑲᒃ, ᑳᐐᓐ ᑭᔐᒪᓂᑑ ᐅᑮᐃᔑᐸᑭᑎᓈᓰᐞ ᐁᒐᓬᐊᐞ ᒋᑎᐯᑕᒥᓂᒡ᙮

2:6b.HEB.002.006 ᐃᐃ ᓴ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑫᑰᓐ ᐃᓇ ᐃᓂᓂ ᐃᓀᑖᑯᓯ, ᒋᓈᓈᑲᑕᐌᓂᒪᑎᐸᓐ? ᐋᓃᓐ ᐃᑕᔥ ᐁᓀᑖᑯᓯᒡ ᐊᐎᔭ ᐯᒫᑎᓯᒡ ᒋᓈᓈᑲᒋᐊᑎᐸᓐ?

2:7b.HEB.002.007 ᐊᒋᓇ ᓴ ᐁᑕ ᑭᑮᑕᐸᓭᑖᑯᓯᐋ ᐋᓃᓐ ᑳᐊᐲᑌᑖᑯᓯᓂᒡ ᐁᒐᓬᐊᐞ, ᑭᑮᑭᑭᐱᑖᓄᒀᓀᐋ ᑭᒋ ᐃᓀᑖᑯᓯᐎᓐ, ᑭᑌᑖᑯᓯᐎᓐ ᑲᔦ᙮ [ᑭᑮᐃᔑᐋ ᑲᔦ ᑲᑭᓇ ᑫᑰᓂᓂ ᒋᑎᐯᑕᕽ ᑭᓂᒌᕽ ᑳᑮᐅᒋᐅᔑᑖᐗᒡ᙮]

2:8b.HEB.002.008 ᑭᑮᐃᔑᐋ ᑲᔦ ᑲᑭᓇ ᑫᑰᓂᓂ ᒋᑎᐯᑕᕽ ᒋᑕᑕᑯᑳᑕᕽ᙮ ᐁᐃᔑᐲᐃᑳᑌᒃ ᓴ ᑭᔐᒪᓂᑑ ᐁᑮᒦᓈᒡ ᐃᓂᓂᐗᓐ ᒋᑎᐯᑕᒥᓂᒡ ᑲᑭᓇ ᑫᑰᓂᓂ, ᑳᐐᓐ ᑫᑰᓐ ᐅᑮᐃᔥᑯᓇᓰᓐ ᑫᑎᐯᑕᓯᓂᒃ᙮ ᑳᐐᓐ ᐃᑕᔥ ᒪᔑ ᑭᐙᐸᒫᓯᐙᓈᓐ ᐃᓂᓂ ᒋᑎᐯᑕᕽ ᑲᑭᓇ ᑫᑰᓂᓂ᙮

2:9b.HEB.002.009 ᐊᐊ ᑕᔥ ᐐᓐ ᑭᐙᐸᒫᓈᓐ ᒋᓴᔅ ᑳᑮᐃᔑᐃᓐᒡ ᐊᒋᓇ ᒋᑕᐸᓭᑖᑯᓯᒡ ᐊᐲᒡ ᐐᓐ ᐃᐃ ᐁᒐᓬᐊᐞ, ᒦᑕᔥ ᑭᔐᒪᓂᑑᓐ ᐅᑭᔐᐙᑎᓯᐎᓂᓃᕽ ᐁᑮᐅᒋᓂᐴᑕᒪᐙᒡ ᑲᑭᓇ ᐊᐎᔭᓐ ᐯᒫᑎᓯᓂᒡ᙮ ᐃᓇᔥᑫ ᑕᔥ ᓅᑯᒻ ᑭᐙᐸᒫᓈᓐ ᐁᑭᑳᓄᒀᓈᑕᕽ ᑭᒋ ᐃᓀᑖᑯᓯᐎᓐ, ᑭᑌᑖᑯᓯᐎᓐ ᑲᔦ, ᐋᓃᔥ ᐐᓐ ᐱᑯ ᑮᑲᒀᑕᑭᑑ ᐊᐲ ᑮᐐᓂᐴᑕᒫᑫᒡ᙮

2:10b.HEB.002.010 ᑭᔐᒪᓂᑑ ᓴ ᑲᑭᓇ ᑫᑰᓂᓂ ᑳᐅᔑᑑᒡ, ᑲᑭᓇ ᑲᔦ ᑫᑰᓂᓂ ᑳᑲᓇᐌᑕᕽ᙮ ᐋᐱᒋ ᓴ ᑮᓇᐃᓈᑾᓂᓂ ᒋᐃᔑᐋᒡ ᒋᓴᓲᓐ ᐅᑲᒀᑕᑭᑑᐎᓂᓃᕽ ᒥᓯᐌ ᒋᐃᔑᑮᔑᓈᑯᒋᑲᓂᐎᓂᒡ, ᐁᐐᐲᓈᒡ ᐃᐃ ᑳᐹᑏᓄᓂᒡ ᐅᑯᓯᓯᒫᐞ ᒋᐐᑑᑳᓱᓂᒡ ᐅᑭᒋ ᐃᓀᑖᑯᓯᐎᓂᕽ᙮ ᒦᐗᓐ ᐃᑕᔥ ᐃᓂ ᒋᓴᓲᓐ ᑳᑭᑭᓄᐎᓈᓂᒡ ᑫᔑᐱᒫᒋᐃᒥᓐᒡ ᐃᐃ ᐅᑯᓯᓯᒫᐞ᙮

2:11b.HEB.002.011 ᐐᓐ ᐋᓃᔥ ᒋᓴᔅ ᐅᐯᑭᐋᐞ ᐯᒫᑎᓯᓂᒡ ᐅᒪᒋᑑᑕᒧᐎᓂᓃᕽ; ᐊᐊ ᓴ ᑳᐯᑭᐃᐌᒡ ᐃᑭ ᑲᔦ ᑳᐯᑭᐃᑣ ᐅᐯᔑᑯᐋᐙᓐ ᐅᑌᑌᐙᓐ᙮ ᒦᑕᔥ ᒋᓴᔅ ᑳᐅᒋᐊᑲᒋᓯᒃ ᒋᐃᔑᓂᑳᓈᒡ ᐅᐅ ᑳᑮᐯᑭᐋᒡ ᑎᐱᓇᐌ ᓃᒋᑭᐌᔭᒃ᙮

2:12b.HEB.002.012 ᐋᓃᔥ ᐅᐅ ᐅᑎᓈᓐ ᑭᔐᒪᓂᑑᓐ: ᓂᑲᑕᔑᑕᒪᐙᒃ ᓴ ᓃᒋᑭᐌᔭᒃ ᑭᐐᓱᐎᓐ ᑫᐅᒋᑭᑫᓂᒥᒀ ᐋᓃᓐ ᓀᑖᐃᔑᒋᑫᔭᓐ, ᐁᔑᒫᐗᒋᐃᑎᐙᒡ ᓴ ᓂᑲᐃᓇᐊᒻ ᑳᐃᔑ ᒦᑴᒋᐌᓂᒥᑰᔭᓐ᙮

2:13b.HEB.002.013 ᐅᐅᐌ ᓴ ᐁᑮᐊᓂ ᐃᑭᑐᒡ: ᑭᔐᒪᓂᑑ ᓴ ᓂᑲᑌᐺᔦᓂᒫ᙮ ᒦᓇᐙ ᑕᔥ ᑮᐊᓂ ᐃᑭᑐ: ᐃᓇᔥᑫ ᑕᔥ ᓃᓐ, ᓂᐐᒌᐎᒫᐞ ᓂᐱᒫᑎᓰᒪᐞ ᑭᔐᒪᓂᑑ ᑳᑮᒦᔑᒡ, ᑖᐱᔥᑰ ᓂᓃᒑᓂᓴᐞ ᐁᓀᑖᑯᓯᓂᒡ᙮

2:14b.HEB.002.014 ᐅᐅ ᑕᔥ ᐅᓃᒑᓂᓯᒫᐞ ᐁᐃᔑᐅᐐᔭᐎᓂᒡ, ᐁᐃᔑᐅᒥᔅᑸᒥᓂᒡ ᑲᔦ, ᒦᑕᔥ ᒋᓴᔅ ᑫᐐᓐ ᑳᐃᔑᐅᑖᐱᓇᕽ ᒋᐃᔑᓈᑯᓯᒡ ᑖᐱᔥᑰ ᑳᐃᔑᓈᑯᓯᓂᒡ ᐯᒫᑎᓯᓂᒡ᙮ ᒦᑕᔥ ᐅᐅ ᑳᑮᐅᒋ ᐃᔑᒋᑫᒡ ᐁᑮᓂᐳᒡ ᒋᐅᒋ ᓂᔑᐗᓈᒋᑕᒪᐙᒡ ᐅᒪᔥᑲᐎᓰᐎᓂᓂ ᐃᓂ ᑳᑎᐯᑕᒥᓂᒡ ᑳᔖᑰᒋᐃᐌᒪᑲᓂᓂᒃ ᓂᐳᐎᓐ, ᐊᒦᐗᓐ ᓴ ᐃᓂ ᒪᒋᐊᔭᐋᓐ᙮

2:15b.HEB.002.015 ᒦᑕᔥ ᐃᐃ ᑳᑮᐋᐸᐙᒡ ᐃᐃ ᒥᓂᒃ ᑳᐱᒫᑎᓯᓂᒡ ᑳᑮᒥᒋᒪᐱᓂᑯᓂᒡ ᐁᑮᑯᑕᒥᓂᒡ ᓂᐳᐎᓐ᙮

2:16b.HEB.002.016 ᐋᐱᒋ ᑕᔥ ᐯᑌᑖᑾᓂᓂ: ᑳᐐᓐ ᑕᔑᑌᓯᓂᓂ ᑭᔐᒪᓂᑑ ᐁᔑᐐᒋᐋᒡ ᐁᒐᓬᐊᐞ; ᐃᐃᐌᓂᐗᐞ ᐄᑐᒃ ᐁᐸᕒᐊᐋᒪᓐ ᐅᐲᐌᓰᒥᓂ ᑳᐐᒋᐋᒡ᙮

2:17b.HEB.002.017 ᒦᑕᔥ ᐃᐃ ᐅᒋᑕᑯ ᑮᐃᔑᓈᑾᓂᓂ ᒋᐃᔑᓈᑯᓯᒡ ᑳᐃᔑᓈᑯᓯᓂᒡ ᒥᓯᐌ ᐃᐃ ᐅᐐᒋᐱᒫᑎᓰᒫᑲᓇᐞ᙮ ᒦ ᓴ ᑕᔥ ᑳᐅᒋᑎᓄᐎᒡ ᑳᑰᐹᓯᓈᑫᒡ ᑳᑌᐺᔦᑖᑯᓯᒡ ᑲᔦ, ᒫᐗᒡ ᐁᑭᒋᐊᓇᒥᐁᐎᑭᒫᐎᒡ ᐃᐃᒫ ᑳᐃᔑᐊᓄᑮᑕᐙᒡ ᐃᓂ ᑭᔐᒪᓂᑑᓐ, ᒋᐴᓀᑕᒪᐎᒥᓐᒡ ᐃᓂ ᐯᒫᑎᓯᓂᒡ ᐅᒪᒋᑑᑕᒧᐎᓂᓂ᙮

2:18b.HEB.002.018 ᑫᐐᓐ ᓴ ᐁᑮᑲᒀᑕᑭᑑᒡ ᑮᑲᑴᒋᐃᓐᒡ, ᒦ ᓴ ᑳᐅᒋᑲᔥᑭᑑᒡ ᒋᓈᑕᒪᐙᒡ ᐃᐃᐌᓂᐗᐞ ᑳᑯᒋᐃᒥᓐᒡ᙮

3

3:1b.HEB.003.001 ᑮᓇᐙ ᑕᔥ ᓃᑕᓇᒥᐋᒃ ᑳᑎᐯᓂᒥᓀᒃ X, ᑫᑮᓇᐙ ᓴ ᑭᑮᑲᓅᓂᑯᐙ ᑭᔐᒪᓂᑑ! ᓈᓈᑲᑕᐌᓂᒥᒃ ᒋᓴᔅ ᑭᔐᒪᓂᑑ ᐅᑭᒋ ᐃᔑᓂᔕᐙᑲᓇᓐ ᑳᑎᓄᐎᒡ, ᒫᐗᒡ ᑭᒋᐊᓇᒥᐁᐎᑭᒫ ᑲᔦ, ᑫᑲᓇᐙᐸᑕᕽ ᓴ ᑲᔦ ᑭᑌᐺᔦᑕᒧᐎᓂᓈᓐ ᑳᐐᑕᒪᕽ᙮

3:2b.HEB.003.002 ᐋᐱᒋ ᓴ ᑮᑌᐺᔦᑖᑯᓯ ᑭᔐᒪᓂᑑᓐ ᐁᑮᐅᓇᑭᒥᑯᒡ ᐁᑮᒦᓂᑯᒡ ᐊᓄᑮᐎᓐ ᒋᑑᑕᕽ, ᑖᐱᔥᑰ ᒨᓯᔅ ᑳᑮᐃᔑ ᑌᐺᔦᑖᑯᓯᒡ ᐃᐃᒫ ᑭᔐᒪᓂᑑᓐ ᐅᐙᑳᐃᑲᓂᓃᕽ᙮

3:3b.HEB.003.003 ᐊᐎᔭ ᓴ ᑳᐅᔑᑑᒡ ᐙᑳᐃᑲᓂᓂ ᓇᐗᒡ ᑭᒋ ᐃᓀᑖᑯᓯ ᐊᐲᒡ ᐐᓐ ᐃᐃᐌᓂ ᐙᑳᐃᑲᓂᓂ ᑳᐅᔑᑑᒡ᙮ ᒦᑕᔥ ᐯᔑᑾᓐ ᒋᓴᔅ ᓇᐗᒡ ᑭᒋ ᐃᓀᑖᑯᓯ ᐊᐲᒡ ᐐᓐ ᐊᐊ ᒨᓯᔅ᙮

3:4b.HEB.003.004 ᐙᑳᐃᑲᓐ ᓴ ᑮᐊᔮᒃ, ᐊᐎᔭ ᐅᔕ ᐅᑮᐅᔑᑑᓈᑐᒃ᙮ ᑭᔐᒪᓂᑑ ᑕᔥ ᐐᓐ ᑲᑭᓇ ᑫᑰᓂᓂ ᑳᐅᔑᑑᒡ᙮

3:5b.HEB.003.005 ᒨᓯᔅ ᐃᑕᔥ ᐊᓄᑮᐋᑲᓐ ᐁᑮᑎᓄᐎᒡ, ᐋᐱᒋ ᐌᐌᓂ ᑮᐊᓄᑮ ᐃᐃᒫ ᑭᔐᒪᓂᑑᓐ ᐅᐙᑳᐃᑲᓂᓃᕽ, ᐁᑮᐊᓂᑕᔑᑕᒫᑫᒡ ᐋᓃᓐ ᑭᔐᒪᓂᑑᓐ ᐹᓂᒫ ᓈᑫ ᑫᓂ ᐃᑭᑐᓂᒡ᙮

3:6b.HEB.003.006 ᐊᐊ ᑕᔥ ᐐᓐ X ᐋᐱᒋ ᐌᐌᓂ ᑮᐅᑯᓯᓯᒫᐎ ᐁᑮᑲᓇᐌᑕᕽ ᑭᔐᒪᓂᑑᓐ ᐅᐙᑳᐃᑲᓂᓂ᙮ ᑮᓇᐎᓐᑦ ᓴ ᐃᐃ ᐙᑳᐃᑲᓐ ᑮᔥᐱᓐ ᑭᒋᐎᓇᒪᕽ ᐁᔑᒪᔥᑲᐌᑕᒪᕽ, ᐁᔑᑌᐺᔦᑕᒪᕽ ᑲᔦ ᐃᐃ ᑳᑭᒋ ᐃᓀᑕᒪᕽ ᐊᐯᓂᒧᐎᓐ᙮

3:7b.HEB.003.007 ᐅᐅ ᓴ ᑭᔐᒪᓂᑑ ᐅᑕᒑᑾᓐ ᐁᑮᐃᑭᑐᓂᒡ: ᑮᔥᐱᓐ ᓅᑕᐌᒃ ᑭᔐᒪᓂᑑ ᓅᑯᒻ ᑳᑮᔑᑲᓂᓂᒃ,

3:8b.HEB.003.008 ᑫᑯ ᔕᔒᐱᑕᑫᒃ ᑖᐱᔥᑰ ᑭᑫᑌᔭᐋᒥᐙᒃ ᑳᑮᐃᔑ ᔕᔒᐱᑕᐙᐙᒡ ᑭᔐᒪᓂᑑᓐ, ᐃᐃ ᐁᑮᔑᑲᓂᓂᒃ ᐌᑎ ᐱᑾᑕᑲᒥᒃ ᐁᑮᑲᑴᑌᓂᒫᐙᒡ ᑕᑲ ᑫᑰᓐ ᒋᑮᑑᑖᑯᐙᒡ᙮

3:9b.HEB.003.009 ᐅᐅ ᑕᔥ ᑭᔐᒪᓂᑑ ᐃᑭᑐ: ᒦ ᓴ ᐃᐃᐌᑎ ᑳᑮᐃᔑ ᑲᑴᑌᓂᒥᐙᒡ ᐁᑮᐊᑕᑭᑫᓂᒥᐙᒡ ᑲᔦ, ᐋᓇ ᑕᔥ ᐐᓐ ᓃᒥᑕᓇ ᑕᓱᐱᐴᓐ ᐁᑮᐙᐸᑕᒧᐙᒡ ᐋᓃᓐ ᑳᑮᐱ ᐃᔑᒋᑫᐗᒃ᙮

3:10b.HEB.003.010 ᒦᑕᔥ ᓂᑮᒫᓈᐸᒫᒃ ᐃᑭ ᐯᒫᑎᓯᐙᒡ ᐁᑮᐃᑭᑐᔮᓐ: ᒨᔕᒃ ᓴ ᐅᑎᓀᑕᒧᐎᓂᐙᓐ ᐅᐗᓂᐎᓂᑯᓈᐙᓐ, ᑳᐐᓐ ᑲᔦ ᐅᑑᑖᐱᓇᓰᓈᐙᓐ ᑳᓂᑖᐃᔑᒋᑫᐗᒃ᙮

3:11b.HEB.003.011 ᐁᑮᒫᓈᐸᒪᒀ ᑕᔥ ᒦ ᓴ ᑳᐃᔑᐊᔓᑕᒫᓐ: ᑳᐐᓐ ᓴ ᐐᑳ ᑕᐲᑎᑫᓰᐗᒃ ᐃᐃᐌᓂ ᐊᑮᓂ ᑫᑮᐃᔑᐊᓉᐱᐙᐸᓐ ᑳᐐᒦᓇᒀᐸᓐ᙮

3:12b.HEB.003.012 ᓃᒋᑌᐺᑕᒨᒃ! ᐋᐱᒋ ᓴ ᐊᔮᒀᒥᓯᒃ, ᑳᑕᔑᔦᒃ ᐊᐎᔭ ᒋᒪᒋᓈᑾᓯᓂᓂᒃ ᐅᑌᐞ ᒋᑌᐺᑕᒨᒪᑲᓯᓂᓂᒃ ᑲᔦ, ᑫᐅᒋᓇᑲᓀᑭᐸᓐ ᑳᐱᒫᑎᓯᒡ ᑭᔐᒪᓂᑑ᙮

3:13b.HEB.003.013 ᒣᒀ ᓴ ᑫᔮᐱ ᐁᑕᐎᓇᒫᑎᓈᓂᐗᕽ, ᓅᑯᒻ ᑳᑮᔑᑲᒃ ᑳᐃᔑᓂᑳᑌᒃ, ᐁᑕᓱᑮᔑᒃ ᓴ ᐙᐐᒋᐃᑎᒃ ᐁᑳ ᒋᐗᔦᔑᒥᑰᓯᐌᒃ ᐃᐃᒫ ᒪᒋᑑᑕᒧᐎᓂᕽ, ᒋᔕᔒᐱᑕᓯᐌᒃ ᑲᔦ, ᑲᑭᓇ ᑳᑕᓱᐯᔑᑯᔦᒃ᙮

3:14b.HEB.003.014 ᐋᓃᔥ ᑭᐐᒌᐙᓈᓐ X, ᑮᔥᐱᓐ ᐁᑕ ᒪᔥᑲᐎᒥᒋᒥᓇᒪᕽ ᐃᐃ ᑭᑫᒋᓈᐅᐎᓂᓈᓐ ᓂᑕᒻ ᑳᑮᐊᔮᔭᕽ, ᐲᓂᔥ ᐌᑎ ᐃᔥᒀᒡ ᑮᔑᑲᒃ᙮

3:15b.HEB.003.015 ᒦᑕᔥ ᐅᐅ ᑳᑮᐃᔑᐲᐃᑳᑌᒃ ᑭᒋᒪᓯᓇᐃᑲᓐ: ᑮᔥᐱᓐ ᓅᑕᐌᒃ ᑭᔐᒪᓂᑑ ᐁᑲᓅᓂᓀᒃ ᓅᑯᒻ ᑳᑮᔑᑲᓂᓂᒃ, ᑫᑯ ᔕᔒᐱᑕᑫᒃ ᑖᐱᔥᑰ ᑭᑫᑌᔭᐋᒥᐙᒃ ᐅᑖᓈᕽ ᑳᑮᐱᒫᑎᓯᐙᒡ, ᑳᑮᐃᔑ ᔕᔒᐱᑕᐙᐙᒡ ᑭᔐᒪᓂᑑᓐ᙮

3:16b.HEB.003.016 ᐊᐌᓀᓇᒃ ᐃᑕᔥ ᐃᑭ ᐯᒫᑎᓯᐙᒡ ᑳᑮᓅᑕᐙᐙᒡ ᑭᔐᒪᓂᑑᓐ, ᔖᑰᒡ ᐃᑕᔥ ᐁᑮᔕᔒᐱᑕᐗᐙᒡ? ᒦ ᓴ ᐃᐃ ᒨᓯᔅ ᑳᑮᓵᑭᒋᐎᓈᒡ ᐃᐃᒫ ᐄᒋᐸᑮᕽ ᙮

3:17b.HEB.003.017 ᐊᐌᓀᓇᐞ ᐃᑕᔥ ᑭᔐᒪᓂᑑ ᑳᑮᓂᔥᑭᐃᑯᒡ ᓃᒥᑕᓇ ᑕᓱᐱᐴᓐ? ᐃᐃ ᓴ ᐯᒫᑎᓯᓂᒡ ᑳᑮᒪᒋᑑᑕᒥᓂᒡ, ᐃᐃ ᐲᓂᔥ ᑳᑮᐊᓂᒑᑭᓀᓂᒡ ᐃᐃᒫ ᐱᑾᑕᑲᒥᒃ᙮

3:18b.HEB.003.018 ᐊᐌᓀᓇᐞ ᓴ ᑳᑮᐊᔓᑕᒪᐙᒡ ᒋᐲᑎᑫᓯᓂᒃ ᐅᑕᓉᐱᐎᓂᕽ? ᒦᐗᐞ ᓴ ᐃᐃ ᑳᑮᔕᔒᐱᑖᑯᒡ᙮

3:19b.HEB.003.019 ᒦᑕᔥ ᐁᔑᐙᐸᑕᒪᕽ, ᐋᓃᔥ ᐁᑮᑌᐺᑕᓯᒀ, ᑳᑮᐅᒋ ᑆᓇᐎᑑᐙᒡ ᒋᐲᑎᑫᐙᒡ ᐃᐃᒫ ᐊᑮᕽ ᑳᐐᐃᔑ ᐊᓉᐱᐃᑣᐸᓐ᙮

4

4:1b.HEB.004.001 ᑫᑮᓇᐎᓐᑦ ᓴ ᓅᑯᒻ ᑭᔐᒪᓂᑑ ᑭᐐᒦᓂᑯᓈᓐ ᑳᑮᐊᔓᑕᒫᑫᒡ, ᐊᓉᐱᐎᓐ ᑳᑮᑕᔑᑕᕽ ᒋᑌᐱᓇᒧᐗᑭᒡ᙮ ᑕᑲ ᑕᔥ ᐊᔮᒀᒥᓯᑖ, ᑮᓇᐙ ᑳᑕᔑᔦᒃ ᒋᒥᑲᐙᓯᐎᓐᒡ ᐊᐎᔭ ᒋᑆ ᓇᐎᑑᒡ ᒋᑌᐱᓇᕽ ᐃᐃ ᐊᓉᐱᐎᓐ ᑳᑮᐐᑌᓂᒃ᙮

4:2b.HEB.004.002 ᑭᑮᓅᑖᒥᓐ ᓴ ᐃᐃ ᒥᓍᒋᒧᐎᓐ ᑖᐱᔥᑰ ᑫᐐᓇᐙ ᑳᑮᐃᔑᓅᑕᒧᐙᒡ᙮ ᑳᐐᓐ ᐃᑕᔥ ᑫᑰᓂᓂ ᐅᑮᐃᓈᐸᒋᑑᓰᓈᐙ ᐃᐃ ᑎᐹᒋᒧᐎᓐ ᐋᓇᐐᓐ ᐁᑮᓅᑕᒧᐙᒡ, ᐋᓃᔥ ᑳᐐᓐ ᑌᐺᑕᒧᐎᓂᕽ ᐅᑮᐃᔑ ᐅᑖᐱᓇᓰᓈᐙ᙮

4:3b.HEB.004.003 ᑮᓇᐎᓐᑦ ᐃᑕᔥ ᑳᑌᐺᑕᒪᕽ ᑭᐲᑎᑫᒥᓐ ᐃᐃᒫ ᐊᓉᐱᐎᓂᕽ ᑭᔐᒪᓂᑑ ᑳᑮᐊᔓᑕᒫᑫᒡ᙮ ᐋᓃᔥ ᑮᐃᑭᑐ: ᐁᑮᒫᓈᐸᒪᒀ ᑕᔥ ᒦᐃ ᑳᐃᔑᐊᔓᑕᒫᓐ, ᑳᐐᓐ ᓴ ᐐᑳ ᑕᐲᑎᑫᓰᐗᒃ ᐃᐃᐌᓂ ᐊᑮᓂ ᑫᑮᐃᔑ ᐊᓉᐱᐙᐸᓐ ᑳᐐᒦᓇᒀᐸᓐ᙮ ᒦ ᓴ ᐅᐅ ᑳᐃᑭᑐᒡ ᐋᓇᐐᓐ ᐁᑮᐃᔑ ᑮᔑᓈᑾᓂᓂᑭᓐ ᐅᑕᓄᑮᐎᓇᓐ ᐊᐸᓀ ᑳᑮᐃᔥᒀᐅᔑᑑᒡ ᐅᐅᐌᓂ ᐊᑮᓂ᙮

4:4b.HEB.004.004 ᓂᑯᒋ ᓴ ᑭᒋᒪᓯᓇᐃᑲᓂᕽ ᑭᔐᒪᓂᑑ ᐅᑮᑕᔑᑖᓐ ᐃᐃ ᑳᓃᔣᓱ ᑮᔑᑾᑳᓂᒃ: ᑭᔐᒪᓂᑑ ᑮᐊᓉᐱ ᐁᓃᔣᓱ ᑮᔑᑾᑳᓂᒃ ᐃᐃᒫ ᐅᒋ ᐅᑕᓄᑮᐎᓂᕽ, ᐁᐃᔑᐲᐃᑳᑌᒃ᙮

4:5b.HEB.004.005 ᐃᐃ ᑕᔥ ᐯᔑᑾᓐ ᑫᔮᐱ ᐊᓂᑕᔑᒋᑳᑌ: ᑳᐐᓐ ᓴ ᐐᑳ ᑕᐲᑎᑫᔥᑳᓰᐗᒃ ᐃᐃᐌᓂ ᐊᑮᓂ ᑫᑮᐃᔑᐊᓉᐱᐙᐸᓐ ᑳᐐᒦᓇᒀᐸᓐ᙮

4:6b.HEB.004.006 ᑫᔮᐱ ᑕᔥ ᑕᐎᓂᑳᑌ ᐱᓵᓂᑯ ᐊᐎᔭ ᒋᐲᑎᑫᒡ ᐃᐃᒫ ᐊᓉᐱᐎᓂᕽ᙮ ᐃᑭ ᑕᔥ ᑳᑮᐐᑕᒪᐎᑣᐸᓐ ᒥᓄᑎᐹᒋᒧᐎᓐ ᑳᐐᓐ ᑮᐲᑎᑫᓰᐗᒃ, ᐋᓃᔥ ᑮᔕᔒᐱᑕᒨᒃ᙮

4:7b.HEB.004.007 ᒦ ᓴ ᑕᔥ ᐅᐅᒫ ᑌᐺ ᐁᔑᐙᐸᑕᒧᐗᕽ ᑭᔐᒪᓂᑑ ᐁᑮᐐᑕᕽ ᐯᔑᒃ ᑯᑕᒃ ᑳᑮᔑᑲᓂᓂᒃ, ᓅᑯᒻ ᑳᑮᔑᑲᒃ ᐁᑮᐃᔑᓂᑳᑕᕽ᙮ ᑌᐱᑑᓐ ᐅᑮᐋᐸᒋᐋᓐ ᐁᑮᐃᑭᑐᒡ ᑖᐱᔥᑰ ᐋᔕ ᒣᐎᔕ ᑳᑮᐃᑭᑐᑯᐸᓀᓐ: ᑮᔥᐱᓐ ᓅᑕᐌᒃ ᑭᔐᒪᓂᑑ ᐁᑲᓅᓂᓀᒃ ᓅᑯᒻ ᑳᑮᔑᑲᓂᓂᒃ, ᑫᑯ ᔕᔒᐱᑕᐙᑫᒃ᙮

4:8b.HEB.004.008 ᐃᓇᔥᑫ ᑮᔥᐱᓐ ᒑᔓᐙ ᑮᒦᓈᑯᐸᓀᓐ ᐊᓉᐱᐎᓂᓂ ᐃᐃ ᐯᒫᑎᓯᓂᒡ ᑳᑮᐱᒥᐎᓈᒡ, ᑳᐐᓐ ᐃᑕᔥ ᑭᔐᒪᓂᑑ ᐅᑖᑮᑕᔑᑕᓰᓐ ᒦᓇᐙ ᓈᓈᑫ ᑯᑕᒃ ᑫᑮᔑᑲᓂᓂᒃ ᒋᑮᐊᓉᐲᐎ ᑮᔑᑲᓂᓂᑭᐸᓐ᙮

4:9b.HEB.004.009 ᒦᑕᔥ ᐁᔑᓈᑾᒃ ᐯᒫᑎᓯᐙᒡ ᑳᑎᐯᓂᒥᑯᐙᒡ ᑭᔐᒪᓂᑑᓐ ᑫᔮᐱ ᐁᐃᔥᑯᓇᒪᐎᑣ ᒋᐊᓉᐱᐙᒡ ᑖᐱᔥᑰ ᑭᔐᒪᓂᑑ ᑳᑮᐃᔑ ᐊᓉᐱᑯᐸᓀᓐ ᐅᒋ ᐅᑕᓄᑮᐎᓂᕽ ᐁᓃᔣᓱ ᑮᔑᑾᑳᓂᒃ᙮

4:10b.HEB.004.010 ᐊᐎᔭ ᓴ ᑳᑌᐱᓇᕽ ᐃᐃ ᐊᓉᐱᐎᓐ ᑭᔐᒪᓂᑑᓐ ᑳᑮᐊᔓᑕᒫᑫᓂᒡ, ᑫᐐᓐ ᓴ ᑕᐊᓉᐱ ᐅᒋ ᐅᑕᓄᑮᐎᓂᕽ ᑖᐱᔥᑰ ᑭᔐᒪᓂᑑᓐ ᑳᐃᔑᐊᓉᐱᓂᒡ᙮

4:11b.HEB.004.011 ᑕᑲ ᑕᔥ ᑫᑮᓇᐎᓐᑦ, ᐌᐌᓂ ᐃᔑᒋᑫᑖ ᒋᑌᐱᓇᒪᕽ ᐃᐃ ᐊᓉᐱᐎᓐ, ᐊᐎᔭ ᓴ ᑮᓇᐎᓐᑦ ᒋᓅᑌᑆᓇᐎᐅᓯᐗᕽ, ᒋᐃᔑᒋᑫᐙᓯᐗᕽ ᑳᑮᐃᔑᒋᑫᐙᒡ ᐁᑮᔕᔒᐱᑕᒧᐙᒡ᙮

4:12b.HEB.004.012 ᑭᔐᒪᓂᑑ ᑳᐃᑭᑐᒡ ᓴ ᐱᒫᑕᓂᓂ, ᐊᓄᑮᒪᑲᓂᓂ ᑲᔦ, ᓇᐗᒡ ᑲᔦ ᑳᔖᓂ ᐊᐲᒡ ᐐᓐ ᑳᐄᑕᐎᑳᔖᓂᒃ ᐸᔑᐸᐃᑫᐎᑯᒫᓐ᙮ ᒦ ᓴ ᐁᐲᒋᑳᔖᓂᒃ ᐃᐃ ᐅᑎᑭᑐᐎᓐ, ᐁᑲᔥᑭᒋᑫᒪᑲᓂᓂᒃ ᒋᐅᒋᒋᔑᑫᒪᑲᓂᓂᒃ ᐋᑎ ᐁᔑᐋᓂᑲᐎᓯᓂᓂᒃ ᐱᒫᑎᓯᐎᓂᓂ ᐃᐃᒫ ᐊᒑᑯᕽ᙮ ᒥᑯᔑᑫᒪᑲᓂᓂ ᑲᔦ ᐋᑎ ᐅᑲᓂᓂ ᐃᐃ ᑲᔦ ᐹᓴᐃᐎᓈᓂᓂ ᐁᔑᐋᓂᑲᐎᓯᓂᓂᒃ᙮ ᑭᑫᑕᒫᒪᑲᓐ ᐊᐎᔭᓐ ᐁᔑᒥᓴᐌᒋᑫᓂᒡ ᐅᑌᐃᓃᕽ, ᐁᔑᓈᓈᑲᑕᐌᒋᑫᓂᒡ ᑲᔦ᙮

4:13b.HEB.004.013 ᑳᐐᓐ ᓴ ᑫᑰᓂᓂ ᑲᑭᓇ ᑳᐅᔑᒋᑳᑌᓂᒃ ᑖᑳᑕᒪᐙᓰ ᑭᔐᒪᓂᑑ ᒋᐙᐸᑕᓯᑭᐸᓐ᙮ ᑳᐐᓐ ᑲᔦ ᑫᑰᓐ ᐅᐱᔂᐸᑕᓰᓐ, ᑲᑭᓇ ᓴ ᑫᑰᓂᓂ ᒧᔐᓈᑾᓂᓂ ᐁᓈᓴᒦᒡ᙮ ᐐᓐ ᓴ ᑕᐱᓇᐌ ᑫᐐᑕᒪᐗᕽ ᐋᓃᓐ ᑳᑮᐱ ᐃᔑᒋᑫᐗᕽ᙮

4:14b.HEB.004.014 ᑕᑲ ᑕᔥ ᐋᔩᒋᒥᒋᒥᓇᑖ ᐃᐃ ᑭᑌᐺᑕᒧᐎᓂᓈᓐ ᑳᐐᑕᒪᕽ᙮ ᐋᓃᔥ ᑭᑕᔮᐙᓈᓐ ᐁᑭᒋ ᐃᓀᑖᑯᓯᒡ ᒫᐗᒡ ᑭᑭᒋᐊᓇᒥᐁᐎᑭᒫᒥᓈᓐ ᐃᔑᑾᔭᒃ ᐁᑮᐃᔖᒡ ᑭᔐᒪᓂᑑᓐ ᑳᐃᔑᐊᔮᓂᒡ᙮ ᒦ ᓴ ᐊᐊ ᒋᓴᔅ ᑭᔐᒪᓂᑑ ᐅᑯᓯᓴᓐ᙮

4:15b.HEB.004.015 ᐗᐊ ᑕᔥ ᒫᐗᒡ ᑭᑭᒋᐊᓇᒥᐁᐎᑭᒫᒥᓈᓐ, ᑳᐐᓐ ᐐᓐ ᑭᒥᒋᑰᐹᑌᓂᒥᑯᓰᓈᓐ ᑳᐃᔑᐱᒪᑎᓯᔭᕽ᙮ ᑫᐐᓐ ᐅᔕ ᒥᓯᐌ ᑮᐃᔑᑲᑴᒋᐋ ᑖᐱᔥᑰ ᑮᓇᐎᓐᑦ ᑳᐃᔑᑲᑴᒋᐃᑰᔭᕽ, ᑳᐐᓐ ᐃᑕᔥ ᐐᑳ ᑮᒪᒋᑑᑕᓰ᙮

4:16b.HEB.004.016 ᑕᑲ ᑕᔥ ᑮᓇᐎᓐᑦ ᓲᑭᑌᐁᑖ ᒋᓈᓯᑲᒧᐗᕽ ᑭᔐᒪᓂᑑ ᐅᑭᒋᐅᑭᒫᐗᐱᐎᓐ, ᒦ ᐋᓃᔥ ᐃᒫ ᐌᑎᓂᑳᑌᒃ ᑭᔐᐙᑎᓯᐎᓐ, ᒦ ᓴ ᐃᒫ ᑫᔑᑌᐱᓇᒪᕽ ᑰᐹᓯᓈᑰᐎᓐ, ᑭᑲᒦᓂᑰᒥᓐ ᑲᔦ ᑭᔐᐙᑎᓯᐎᓐ ᑫᐐᒋᐃᑯᔭᕽ ᐊᐲ ᓅᑌᓭᔭᕽ᙮

5

5:1b.HEB.005.001 ᑳᑕᓱᐯᔑᑯᒡ ᐃᓴ ᒫᐗᒡ ᑭᒋᐊᓇᒥᐁᐎᑭᒫ ᒣᑴ ᐃᓂᓃᑳᕽ ᐅᒋᐅᑖᐱᓂᑲᓂᐎ ᐁᐅᑖᐱᓂᓐᒡ ᒋᑲᓅᒋᑫᑕᒪᐙᒡ ᐃᓂᓂᐗᓐ ᑭᔐᒪᓂᑑᓐ ᒋᑲᓅᓈᒡ, ᒋᐸᑭᑎᓇᕽ ᑲᔦ ᒦᑭᐌᐎᓇᓐ, ᒋᐸᑭᑎᓂᑫᑕᒪᐙᒡ ᑲᔦ ᐃᓂᓂᐗᐞ ᑫᐅᒋᐴᓀᑕᒪᐎᒥᓐᒡ ᑳᑮᐃᔑ ᒪᒋᑑᑕᒥᓂᒡ᙮

5:2b.HEB.005.002 ᒦᑕᔥ ᑳᐅᒋᑲᔥᑭᑑᒡ ᐌᐌᓂ ᒋᐐᒌᐙᒡ ᐃᐃ ᑳᐊᔦᔖᐙᑎᓯᓯᓂᒃ ᐃᐃ ᑲᔦ ᑳᓂᑖ ᐗᓂᔑᓂᓂᒡ, ᐋᓃᔥ ᑫᐐᓐ ᒥᓯᐌ ᐅᒪᑎᓯᐎᓐ ᐅᓂᑖᐗᓂᔥᑴᐃᑯᓐ᙮

5:3b.HEB.005.003 ᑫᐐᓐ ᑕᔥ ᐁᐗᑫᐗᐗᓃᒡ ᒦ ᐃ ᐁᔑᓈᑾᓂᓂᒃ ᒋᐸᑭᑎᓂᑫᑕᒫᓱᒡ ᑫᐐᓐ ᒋᐴᓀᑕᒪᐎᓐᒡ ᑳᐃᔑᒪᒋᑑᑕᕽ, ᑖᐱᔥᑰ ᑳᐃᔑᐸᑭᑎᓂᑫᑕᒪᐙᒡ ᐯᒫᑎᓯᓂᒡ᙮

5:4b.HEB.005.004 ᑳᐐᓐ ᐃᑕᔥ ᐊᐎᔭ ᐅᓀᓂᑎᓱᓰ ᒋᐅᑖᐱᓇᕽ ᐅᐅ ᑳᑭᑕᑭᑌᓂᒃ ᐊᓄᑮᐎᓐ᙮ ᐹᓂᒫ ᓴ ᐊᐎᔭ ᐁᑲᓅᓂᑯᒡ ᐃᓂ ᑭᔐᒪᓂᑑᓐ, ᒦᑕᔥ ᐃᐃ ᐸᔦᔥ ᒋᑭᒋᐊᓇᒥᐁᐎᑭᒫᐎᒡ ᑖᐱᔥᑰ ᐁᕒᐊᓐ ᑳᑮᑑᑕᐎᓐᒡ᙮

5:5b.HEB.005.005 ᒦᑕᔥ ᐯᔑᑾᓐ ᐊᐊ X ᑳᐃᔑᒋᑫᒡ, ᑳᐐᓐ ᐐᓐ ᑮᑭᒋ ᐃᓀᑖᑯᐃᑎᓱᓰ ᒫᐗᒡ ᒋᑭᒋᐊᓇᒥᐁᐎᑭᒫᐎᒡ᙮ ᐅᐅ ᑕᔥ ᑭᔐᒪᓂᑑᓐ ᐅᑮᐃᑰᓐ: ᑮᓐ ᓂᑯᓯᔅ, ᓅᑯᒻ ᓴ ᑳᑮᔑᑲᒃ ᒦ ᐃ ᒋᒫᒌᐅᑌᑌᒥᔑᔭᓐ᙮

5:6b.HEB.005.006 ᐅᐅ ᑕᔥ ᑲᔦ ᑭᔐᒪᓂᑑ ᑮᐃᑭᑐ: ᑮᓐ ᓴ ᑭᑭᒋᐊᓇᒥᐁᐎᑭᒫᐤ ᓀᐱᒡ ᑖᐱᔥᑰ ᒣᓬᑭᓯᑌᒃ ᑳᑮᐃᔑ ᑭᒋᐊᓇᒥᐁᐎᑭᒫᐎᒡ᙮

5:7b.HEB.005.007 ᒋᓴᔅ ᓴ ᒣᒀ ᐅᐅᒫ ᐊᑮᕽ ᑮᐱᒫᑎᓯᒡ, ᑮᐃᔑᓂᑖᐊᓇᒥᐋ, ᑫᑰᓂᓂ ᑲᔦ ᐁᑮᑲᑴᒋᒫᒡ ᐃᓂ ᑭᔐᒪᓂᑑᓐ, ᐁᑮᒪᑗᒨᑴᑕᕽ ᑲᔦ, ᐁᑮᐅᒋᑲᐙᐱᒡ ᑲᔦ, ᐁᑮᑲᓅᓈᒡ ᑭᔐᒪᓂᑑᓐ ᑳᑮᑲᔥᑭᑑᓂᒡ ᒋᐱᒫᒋᐃᑯᒡ ᐃᐃᒫ ᐅᒋ ᓂᐳᐎᓂᕽ᙮ ᒦᑕᔥ ᐐᑫ ᐁᑮᑕᐸᓭᓂᒧᒡ, ᐌᐌᓂ ᑲᔦ ᐁᑮᑭᑌᓂᒫᒡ ᑭᔐᒪᓂᑑᓐ ᑳᑮᐅᒋᓅᑖᑯᒡ᙮

5:8b.HEB.005.008 ᐋᓇ ᑕᔥ ᐐᓐ ᑭᔐᒪᓂᑑᓐ ᐁᑮᐅᑯᓯᓯᒥᑯᒡ, ᐃᐃ ᓴ ᑳᑮᐃᔑ ᑲᒀᑕᑭᑑᒡ, ᒦ ᓴ ᐃᐃᒫ ᑳᐅᒋᑭᑫᑕᕽ ᐃᐃ ᓇᐃᑕᒧᐎᓐ᙮

5:9b.HEB.005.009 ᒦᑕᔥ ᐃᐃᒫ ᐁᑮᐅᒋᑮᔑᓈᑯᓯᒡ, ᒦ ᓴ ᐃᐃᒫ ᐌᒌᒃ ᐃᐃ ᐱᒫᑎᓯᐎᓐ ᑫᐃᔥᒀᓭᓯᓄᒃ᙮ ᐃᑭ ᑕᔥ ᑫᓇᐃᑕᐙᐙᒡ ᑕᐱᒫᑎᓯᐗᒃ᙮

5:10b.HEB.005.010 ᑭᔐᒪᓂᑑ ᑕᔥ ᐅᑮᐃᓈᓐ ᒋᓴᓲᓐ ᒋᑭᒋᐊᓇᒥᐁᐎᑭᒫᐎᓂᒡ ᒋᐃᓇᓄᑮᓂᒡ ᐃᐃ ᑳᑮᐃᓇᓄᑮᓂᑯᐸᓀᓐ ᐃᓂ ᒣᓬᑭᓯᑌᑰᓐ ᒫᐗᒡ ᑳᑮᐃᔑ ᑭᒋᐊᓇᒥᐁᐎᑭᒫᐎᓂᑯᐸᓀᓐ᙮

5:11b.HEB.005.011 ᐋᐱᒋ ᑕᔥ ᓃᐱᐗᐞ ᓂᑖᑮᐃᑭᑐᒥᓐ, ᐋᐱᒋ ᑲᔦ ᓴᓇᑲᓐ ᒋᐐᑕᒫᑰᔦᑭᐸᓐ ᒋᑕᔑᒪᑭᒡ ᐊᐊ ᐃᓂᓂ, ᑳᐐᓐ ᑕᔥ ᒥᓯᐌ ᑭᑎᔑᓈᑯᓯᓰᒻ ᒋᓂᓯᑐᑕᒣᑭᐸᓐ, ᒥᓴᐙ ᐋᓇᐐᑕᒫᑰᔦᒃ᙮

5:12b.HEB.005.012 ᒦ ᐅᔕ ᐃ ᐁᔑᓈᑾᒃ, ᐋᔕ ᑮᓇᐙ ᒋᑮ ᑭᑭᓄᐊᒫᑫᔦᑭᐸᓐ, ᔖᑰᒡ ᐃᑕᔥ ᑫᔮᐱ ᑭᓅᑌᓭᒻ ᐊᐎᔭ ᒋᑭᑭᓄᐊᒪᐎᓀᒃ ᒫᐗᒡ ᐃᑯ ᓂᑕᒻ ᑳᐃᔑᑭᑭᓄᐊᒫᑎᓈᓂᐎᒡ ᑭᔐᒪᓂᑑ᙮ ᒦᑕᔥ ᐁᔑᓈᑯᓯᔦᒃ ᑖᐱᔥᑰ ᑫᔮᐱ ᐁᓅᑌᓭᔦᒃ ᒎᒎᔖᐳ ᐁᒥᒋᒥᓂᑴᔦᒃ, ᐋᔕ ᑕᔥ ᒋᑮᒦᒋᔦᑭᐸᓐ ᑳᒪᔥᑲᐙᒃ ᒦᒋᒻ᙮

5:13b.HEB.005.013 ᐊᐎᔭ ᑕᔥ ᒎᒎᔖᐴᓂ ᐁᑕ ᑳᒥᓂᒀᑕᕽ, ᒦᑕᔥ ᑖᐱᔥᑰ ᐁᔑᓈᑯᓯᒡ ᑫᔮᐱ ᐁᐊᐱᓅᒌᔑᐎᒡ᙮ ᑳᐐᓐ ᐅᓇᑲᒋ ᓂᓯᑕᐎᓇᓰᓐ ᑾᔭᒀᑎᓯᐎᓐ᙮

5:14b.HEB.005.014 ᐃᑭ ᑕᔥ ᐐᓐ ᐋᔕ ᑳᑮᔖᐯᐎᐙᒡ, ᐅᑲᔥᑭᑑᓈᐙ ᐁᒦᒋᐙᒡ ᑳᒪᔥᑲᐙᓂᒃ ᒦᒋᒻ᙮ ᐋᓃᔥ ᐌᐌᓂ ᐅᓇᑲᒋ ᑭᑫᑖᓈᐙ ᐋᓃᓐ ᐁᓀᑖᑾᓂᓂᒃ ᑾᔭᒀᑎᓯᐎᓐ᙮

6

6:1b.HEB.006.001 ᑕᑲ ᑕᔥ ᓃᑳᓇᔭᐄ ᐃᓇᑫ ᐃᔑᒫᒑᑖ ᒋᓈᓯᑲᒪᕽ ᑳᐃᔑᑭᑭᓄᐊᒪᐎᑣ ᑳᑮᔖᐯᐎᐙᒡ, ᒋᓇᑲᑕᒪᕽ ᐃᓂ ᒫᐗᒡ ᐃᑯ ᓂᑕᒻ ᑳᑮᐃᔑ ᑭᑭᓄᐊᒫᑰᔭᑭᐸᓐ ᑮᒫᒌᐊᓇᒥᐁᐙᑎᓯᔭᕽ᙮ ᑳᐐᓐ ᒦᓇᐙ ᑭᑲ ᑲᑴ ᐅᓇᑑᓰᒥᓐ ᐅᓄ ᑳᐐᐐᑕᒫᓐ: ᐁᔑᑭᑭᓄᐊᒫᑎᕽ ᐊᐎᔭ ᒋᐅᒋᑴᑳᑎᓯᐸᓐ ᐃᔑᒋᑫᐎᓇᓐ ᓂᐳᐎᓂᕽ ᑳᐃᔑᐎᔑᐌᒪᑲᑭᓐ, ᐃᐃ ᑲᔦ ᑳᐃᔑᑌᐺᔦᓂᒥᓐᒡ ᐊᐊ ᑭᔐᒪᓂᑑ,

6:2b.HEB.006.002 ᐃᐃ ᑲᔦ ᑳᐃᔑ ᐊᓇᒥᐁ ᑭᓰᔮᐹᐗᓱᕽ, ᐊᐎᔭ ᑲᔦ ᑳᐃᔑ ᐊᓇᒥᐁ ᓵᒥᓂᓐᒡ, ᐃᐃ ᑲᔦ ᑫᐃᔑᑮᐌᐱᒫᑎᓯᐙᒡ ᑳᓂᐳᐙᒡ, ᐃᐃ ᑲᔦ ᑫᐴᓂᓭᓯᓂᓂᒃ ᐐᑳ ᑎᐹᑯᓂᑰᐎᓐ᙮

6:3b.HEB.006.003 ᑕᑲ ᑕᔥ ᓃᑳᓇᔭᐄ ᐃᔑᒫᒑᑖ᙮ ᒦ ᓴ ᐅᐅ ᑫᔑᒋᑫᔭᕽ ᑮᔥᐱᓐ ᑭᔐᒪᓂᑑ ᐃᓀᑕᕽ᙮

6:4b.HEB.006.004 ᐃᑭ ᑕᔥ ᐋᔕ ᑳᑮᓂᓯᑐᑕᒧᐙᒡ, ᑳᑮᒪᓯᐳᑕᒧᐙᒡ ᑲᔦ ᒦᑭᐌᐎᓐ ᑭᒋᑮᔑᑯᕽ ᑳᑮᐅᒌᓂᒃ, ᑳᑮᐐᑑᑳᓱᐙᒡ ᑲᔦ ᑭᔐᒪᓂᑑᓐ ᐅᑕᒑᑯᓂ ᐁᓇᓄᑮᓂᒡ,

6:5b.HEB.006.005 ᑳᑮᒥᓄᐳᑕᒧᐙᒡ ᑲᔦ ᑭᔐᒪᓂᑑᓐ ᑳᐅᓂᔑᔑᓂᓂᒃ ᐅᑎᑭᑐᐎᓂᓂ, ᐁᑮᑭᑫᑕᒧᐙᒡ ᑲᔦ ᒪᔥᑲᐎᓰᐎᓇᓐ ᑳᐐᐱ ᓈᑯᒋᑳᑌᓂᑭᓐ ᐌᑎ ᐱᒌᓇᒃ ᑳᐐᐊᓂ ᐃᔑᐌᐸᓂᓂᒃ –

6:6b.HEB.006.006 ᐅᓄ ᑕᔥ ᐁᑮᑭᑫᑕᒧᐙᒡ, ᐃᔑᓇᑲᑕᒧᐙᒡ ᐃᑕᔥ ᑳᐃᔑᑌᐺᑕᐙᐙᒡ Xᑕᓐ, ᑳᐐᓐ ᑕᐃᔑᓈᑾᓯᓂᓂ ᒦᓇᐙ ᒋᐅᔥᑭ ᑴᑳᑎᓯᐃᑣᐸᓐ᙮ ᐋᓃᔥ ᒦ ᐃ ᑖᐱᔥᑰ ᐐᓇᐙ ᐱᑯ ᐁᐃᔑᒋᑫᐙᒡ ᐁᑮᐌ ᐊᑯᓴᑲᐙᐙᒡ ᑭᔐᒪᓂᑑᓐ ᐅᑯᓯᓯᓂ ᐃᐃᒫ ᐋᔑᑌᔮᑎᑯᕽ᙮ ᒦ ᓴ ᑲᔦ ᑖᐱᔥᑰ ᐁᑑᑕᐙᐙᒡ ᐱᓂᔅᑴ ᐱᑯ ᒋᒫᓀᒋᑲᓂᐎᓂᒡ᙮

6:7b.HEB.006.007 ᐃᐃ ᓴ ᑭᑎᑳᓇᑲᒥᒃ ᑳᒥᓂᑴᒪᑲᒃ ᐊᐲ ᐁᑭᒥᐗᕽ, ᐋᐱᒋ ᓴ ᐃᓂ ᒦᒋᒥ ᑭᑎᑳᓇᓐ ᑕᒥᓄᑭᓅᓐ ᐃᐃᒫ ᑭᑎᑫᐗᑲᒥᑯᕽ᙮ ᐃᑭ ᓴ ᑳᓈᑲᒋᑕᒪᐎᑣ ᐃᐃ ᑭᑎᑫᐗᑲᒥᑯᓂ ᐋᐱᒋ ᐅᑲᑭᑖᐸᒋᑑᓈᐙᓐ ᐃᓂ ᒦᒋᒥ ᑭᑎᑳᓇᓐ᙮ ᑭᔐᒪᓂᑑ ᑲᔦ ᐅᑲᒥᓄᓭᑑᓐ ᐃᐃ ᑭᑎᑳᓇᑲᒥᒃ᙮

6:8b.HEB.006.008 ᑮᔥᐱᓐ ᐃᑕᔥ ᐐᓐ ᐅᑳᐎᒥᓇᑲᔒᒃ, ᒪᒑᑎᑰᒃ ᑲᔦ ᐁᑕ ᓂᑖᐎᑭᐙᒡ ᐃᐃᒫ ᑭᑎᑳᓇᑲᒥᑯᕽ, ᑳᐐᓐ ᑫᑰᓐ ᑕᐃᓈᐸᑕᓯᓅᓐ ᐃᐃ ᑭᑎᑳᓇᑲᒥᒃ᙮ ᒦ ᐁᑕ ᑯ ᐁᔑᓈᑾᓂᓂᒃ ᑭᔐᒪᓂᑑ ᒋᐃᑕᕽ ᒋᓂᔑᐗᓈᑕᓂᓂᒃ, ᒦᑕᔥ ᐃᐃ ᑲᔦ ᒋᒑᑭᓯᑳᑌᒃ᙮

6:9b.HEB.006.009 ᑳᓵᑭᐃᑰᔦᒃ, ᐋᓇᐐᓐ ᐅᐅ ᐁᐃᔑᑮᔗᔮᕽ, ᔖᑰᒡ ᐃᑕᔥ ᑭᑌᐺᔦᓂᒥᑰᒻ ᑮᓇᐙ ᓇᐗᒡ ᒋᒥᓄᓭᔦᒃ᙮ ᐋᓃᔥ ᑭᑲᐅᑎᓯᑯᒻ ᑳᐅᓂᔑᔑᑭᓐ ᐱᒫᒋᐃᑰᐎᓂᕽ ᑳᑕᑯ ᐅᒌᑭᓐ᙮

6:10b.HEB.006.010 ᐌᐌᓂ ᐋᓃᔥ ᑭᔐᒪᓂᑑ ᐊᐎᔭᓐ ᐅᑑᑕᐙᓐ᙮ ᑳᐐᓐ ᐅᑲᐸᓈᐸᑕᓰᓐ ᐋᓃᓐ ᑳᑮᐃᓇᓄᑮᔦᒃ᙮ ᑳᐐᓐ ᑲᔦ ᑕᐗᓃᑫᓰ ᐁᓈᑯᑕᐌᒃ ᐁᓵᑭᐁᒃ ᐁᐱᐐᑑᑲᐎᒣᒃ ᑫᔮᐱ ᑲᔦ ᐁᐸᒥᐃᒣᒃ ᑭᔐᒪᓂᑑ ᐅᐱᒫᑎᓰᒪᐞ᙮

6:11b.HEB.006.011 ᒦ ᓴ ᑕᔥ ᐁᔑᐸᑯᓭᓂᒥᑰᔦᒃ ᑮᓇᐙ ᑳᑕᓱᐯᔑᑯᔦᒃ ᒋᑖᐱᑕᐎᒋᑫᔦᒃ ᑳᐱ ᐃᔑᒋᑫᔦᒃ ᐲᓂᔥ ᐌᑎ ᐃᔥᒀᒡ, ᑫᒋᓈᒡ ᒋᐙᐸᑕᒣᒃ ᐃᐃ ᑳᐃᔑᐊᐯᓂᒧᔦᒃ᙮

6:12b.HEB.006.012 ᑳᐐᓐ ᐃᑕᔥ ᑭᓇᑕᐌᓂᒥᑰᓰᒻ ᒋᐊᓂᑭᑎᒫᑎᓯᔦᒃ᙮ ᓇᓈᐱᓇᐎᑰᒃ ᐃᑕᔥ ᐃᑭ ᑳᑮᐅᒋ ᑌᐱᓇᒧᐙᒡ ᑭᔐᒪᓂᑑᓐ ᐅᑕᔓᑕᒫᑫᐎᓂᓂ ᐅᑌᐺᑕᒧᐎᓂᐙᕽ, ᐅᔕᔒᐯᑕᒧᐎᓂᐙᕽ ᑲᔦ᙮

6:13b.HEB.006.013 ᐊᐲ ᑕᔥ ᑭᔐᒪᓂᑑ ᑮᐊᔓᑕᒪᐙᒡ ᐁᐸᕒᐊᐋᒪᓐ, ᐐᓐ ᐃᑯ ᐅᐐᓱᐎᓐ ᐅᑮᐋᐸᒋᑑᓐ ᐁᑮᐊᐱᒧᒡ, ᐋᓃᔥ ᑳᐐᓐ ᐊᐎᔭᓐ ᐸᑳᓐ ᐅᐐᓱᐎᓂᓂ ᐊᐗᔑᒣ ᑌᐊᐲᑌᑖᑾᓯᓂᓂ᙮

6:14b.HEB.006.014 ᒦᑕᔥ ᐅᐅ ᑳᑮᐃᑭᑐᒡ: ᑌᐺ ᓴ ᑭᑕᔓᑕᒪᐎᓐ ᐁᐐᔕᐌᓂᒥᓈᓐ, ᐋᐱᒋ ᑲᔦ ᑕᐹᑏᓄᐗᒃ ᐃᑭ ᑭᐲᐌᓰᒪᒃ᙮

6:15b.HEB.006.015 ᐁᐸᕒᐊᐋᒻ ᐃᑕᔥ ᐐᑫ ᑮᔕᔒᐯᑕᒻ᙮ ᒦᑕᔥ ᐃᐃ ᑳᑮᐅᒋᑌᐱᓇᕽ ᐃᐃ ᑳᑮᐃᔑ ᐊᔓᑕᒫᑯᒡ ᑭᔐᒪᓂᑑᓐ᙮

6:16b.HEB.006.016 ᐊᐲ ᓴ ᐃᓂᓂᐗᒃ ᑮᐐᐋᔩᒋᐊᔓᑕᒫᑎᐙᒡ, ᐊᐎᔭᓐ ᓴ ᐸᑳᓐ ᐅᑕᑯᐐᓈᐙᓐ ᓇᐗᒡ ᑫᒋ ᐃᓀᑖᑯᓯᓂᒡ ᐊᐲᒡ ᐐᓇᐙ᙮ ᒦᑕᔥ ᐃᐃᒫ ᑳᑮᐃᔑᐅᓇᑑᐙᒡ ᐁᑮᐊᐱᒧᐙᒡ, ᑳᐐᓐ ᐊᐗᔑᒣ ᑕᑲᑴᔖᑰᓱᑎᓰᐗᒃ᙮

6:17b.HEB.006.017 ᒦᑕᔥ ᐃᐃ ᑭᔐᒪᓂᑑ ᑳᑮᐅᒋᑑᑕᕽ ᐁᐐᓈᑯᑕᒪᐙᒡ ᐃᐃ ᑳᐐᑌᐱᓇᒥᓂᒡ ᐅᑕᔓᑕᒫᑫᐎᓐ, ᐁᑮᐊᑕᐌᓂᒫᒡ ᒋᑭᑫᑕᒥᓂᒡ ᐐᑳ ᐁᐐᐋᑌᑕᓯᒃ᙮ ᒦᑕᔥ ᐃᐃᒫ ᐅᑕᐱᒧᐎᓂᕽ ᑳᑮᐅᒋᐋᔩᑕᑑᒡ ᐅᑕᔓᑕᒫᑫᐎᓐ᙮

6:18b.HEB.006.018 ᐅᓄ ᑕᔥ ᓃᔑᓐ ᑫᑰᓇᓐ ᑳᐱᑕᔑᑕᒫᕽ ᑳᐐᓐ ᐐᑳ ᑖᐋᒋᓭᓯᓅᓇᓐ᙮ ᑳᐐᓐ ᐐᑳ ᑖᐃᔑᓈᑾᓯᓂᓂ ᑭᔐᒪᓂᑑ ᒋᑮᐗᓂᒧᒡ᙮ ᒦ ᓴ ᑕᔥ ᑳᐅᒋᒪᔥᑲᐌᑕᒪᕽ, ᐋᓃᔥ ᑭᑮᓈᒋᐸᐃᐙᑕᒧᐙᒥᓐ ᐁᑲᑴᑌᐱᓇᒧᐗᕽ ᐊᐯᓂᒧᐎᓐ ᑳᐐᒦᓂᓇᕽ᙮

6:19b.HEB.006.019 ᐃᐃ ᓴ ᑭᒋᐙᒥᑲᐃᑲᓐ ᑳᑭᒋᐙᒥᑭᓯᕽ, ᒦ ᓴ ᑖᐱᔥᑰ ᐁᔑᓈᑾᒃ ᐃᐃ ᑭᑕᐯᓂᒧᐎᓂᓈᓐ, ᑭᐱᒫᑎᓯᐎᓂᓈᓐ ᐁᔑᐋᔩᒋᒥᒋᒪᐱᑌᒃ᙮ ᐋᐱᒋ ᓴ ᑫᒋᓈᐅᐌᑖᑾᓐ, ᑳᐐᓐ ᐊᐎᔭ ᐅᑲᑲᔥᑭᑑᓰᓐ ᒋᐗᑲᐎᐱᑑᒡ! ᐅᐅ ᑕᔥ ᐊᐯᓂᒧᐎᓐ ᐁᑌᐹᐲᑲᒧᒃ ᐌᑎ ᒫᐗᒡ ᐲᑎᒃ ᑳᐃᔑᑭᐲᑲᑰᑌᒃ ᑭᒋᑮᔑᑯᕽ ᑳᐃᔑ ᑭᒋᐊᓇᒥᐁᐎᑲᒥᑯᐗᕽ᙮

6:20b.HEB.006.020 ᒋᓴᔅ ᐃᑕᔥ ᑭᑮᓃᑳᓂ ᐲᑎᑫᑕᒫᑯᓈᓐ ᐋᓃᔥ ᐐᓐ ᐱᔑᔑᒃ ᒫᐗᒡ ᑕᑭᒋᐊᓇᒥᐁᐎᑭᒫᐎ, ᐯᔑᑾᓐ ᒋᐃᔑᓈᑯᓯᒡ ᐃᐃ ᑳᑮᐃᓇᓄᑮᓂᑯᐸᓀᓐ ᐃᓂ ᒣᓬᑭᓯᑌᑰᓐ ᑳᑮ ᑭᒋᐊᓇᒥᐁᐎᑭᒫᐎᓂᑯᐸᓀᓐ᙮

7

7:1b.HEB.007.001 ᐊᐊ ᑕᔥ ᒣᓬᑭᓯᑌᒃ ᑳᑮᐃᔑᓂᑳᓱᒡ, ᑮᑭᒋᐅᑭᒫᐎ ᐃᐃᒫ ᐆᑌᓈᕽ ᓭᓬᐊᒻ ᑳᑮᐃᔑᓂᑳᑌᓂᒃ, ᒦᑕᔥ ᑲᔦ ᑮᑭᒋᐊᓇᒥᐁᐎᑭᒫᐎ ᐁᑮᐊᓄᑮᑕᐙᒡ ᒫᐗᒡ ᐁᐃᔥᐯᑖᑯᓯᓂᒡ ᑭᔐᒪᓂᑑᓐ᙮ ᐁᐸᕒᐊᐋᒻ ᑕᔥ ᐁᑮᐱᑮᐌᒡ ᑮᐃᔥᒀᔖᑰᒋᐋᒡ ᓃᐎᓐ ᑭᒋᐅᑭᒫᐞ ᒣᓬᑭᓯᑌᑰᓐ ᐅᑮᐊᑕᓇᑭᔥᑳᑰᓐ, ᐅᑮᐃᑰᓐ ᑲᔦ: ᑭᔐᒪᓂᑑ ᑭᑲᒥᓄᓭᐃᒃ᙮

7:2b.HEB.007.002 ᒦᑕᔥ ᑲᔦ ᑳᑮᐃᔑᒋᑫᒡ ᐁᐸᕒᐊᐋᒻ, ᐁᑕᓱᒥᑖᒋᓂᓂᑭᓐ ᑫᑰᓂᓂ ᑳᑮᒪᑲᑗᒡ, ᐯᔑᑾᔭᒃ ᐃᑕᔥ ᑫᑰᓂᓂ ᐅᑮᐅᒋᒦᓈᓐ ᐃᓂ ᒣᓬᑭᓯᑌᑰᓐ᙮ ᒦᑕᔥ ᐅᐅ ᒣᓬᑭᓯᑌᒃ ᐅᐐᓱᐎᓐ ᓂᑕᒻ ᐁᑭᑑᒪᑲᓂᓂᒃ ᑭᒋᐅᑭᒫ ᑳᑾᔭᒀᑎᓯᒡ; ᒦᔥ ᑲᔦ ᐁᑭᒋᐅᑭᒫᑲᑕᕽ ᑭᒋᐆᑌᓈᓂ ᓭᓬᐊᒻ, ᐱᓵᓂᓯᐎᓐ ᑳᐃᒋᑳᑌᓂᒃ, ᒦ ᐃ ᐁᒋᑲᓂᐎᒡ, ᑭᒋᐅᑭᒫ ᑳᒦᑭᐌᒡ ᐱᓵᓂᓯᐎᓐ᙮

7:3b.HEB.007.003 ᑳᐐᓐ ᐃᑯᒋ ᐅᔑᐲᐃᑳᑌᓯᓂᓂ ᐊᐌᓀᓇᓐ ᑳᐅᑌᑌᑯᐸᓀᓐ, ᐊᐌᓀᓇᓐ ᑲᔦ ᑳᐅᒫᒫᑯᐸᓀᓐ, ᐋᑎ ᑲᔦ ᑳᐱᐅᑕᑳᓀᓯᑯᐸᓀᓐ᙮ ᐅᓂᑖᐎᑭᐎᓐ, ᐅᓂᐳᐎᓐ ᑲᔦ ᑳᐐᓐ ᐃᑯᒋ ᐅᔑᐲᐃᑳᑌᓯᓂᓂ᙮ ᒦ ᓴ ᑖᐱᔥᑰ ᑭᔐᒪᓂᑑ ᐅᑯᓯᓴᓐ ᐁᔑᓈᑯᓯᒡ, ᐊᐸᓀ ᑯ ᒨᔕᒃ ᐁᐊᓂᑭᒋᐊᓇᒥᐁᐎᑭᒫᐎᒡ᙮

7:4b.HEB.007.004 ᐃᓇᔥᑫ ᑕᔥ ᐋᓇᐐᓐ ᐁᐸᕒᐊᐋᒻ ᐅᑭᒋᑫᑌᔭᐋᒥᒫ ᐁᑮᑭᒋ ᐃᓀᑖᑯᓯᒡ, ᔖᑰᒡ ᐃᑕᔥ ᐁᑕᓱᒥᑖᒋᓂᓂᒃ ᑲᑭᓇ ᑫᑰᓂᓂ ᑳᑮᒪᑲᑗᒡ ᐊᐲ ᑮᔖᑰᒋᑣᒡ, ᐯᔑᒃ ᐃᐃᒫ ᐅᑮᐅᒋᒦᓈᓐ ᒣᓬᑭᓯᑌᑰᓐ᙮ ᒦᑕᔥ ᐅᐅᒫ ᐁᔑᐯᑌᑖᑯᓯᒡ ᐊᐊ ᐃᓂᓂ ᒣᓬᑭᓯᑌᒃ ᐋᐱᒋ ᐁᑭᒋ ᐃᓀᑖᑯᓯᒡ᙮

7:5b.HEB.007.005 ᐃᑭ ᑕᔥ ᐊᓇᒥᐁᐎᑭᒫᒃ ᓬᐄᐹᔨᕽ ᑳᐅᑕᑳᓀᓯᐙᒡ, ᑳᑌᐱᓭᐙᒡ ᒋᐊᓇᒥᐁᐎᑭᒫᐎᐙᒡ, ᑮᐃᓇᑕᒪᐙᐗᒃ ᓴ ᐅᓇᔓᐌᐎᓂᕽ ᐱᓵᓂᑯ ᒋᐅᑖᐱᓇᒪᐙᐙᒡ ᐯᒫᑎᓯᓂᒡ ᐯᔑᒃ ᑫᑰᓂᓂ ᐁᑕᓱᒥᑖᓱ ᑳᑎᐯᑕᒥᓂᒡ, ᐁᐃᓇᐌᒫᐙᒡ ᐃᔅᕒᐃᔭᓬᐊᐞ ᑳᐅᑖᐱᓇᒫᐙᐙᒡ᙮ ᐋᓇᐐᓐ ᐁᐸᕒᐊᐋᒥᕽ ᐁᑮᐅᑕᑳᓀᓯᓂᒡ ᐅᑎᓇᐌᒫᑲᓂᐙᐞ᙮

7:6b.HEB.007.006 ᒣᓬᑭᓯᑌᒃ ᐃᑕᔥ ᐐᓐ ᑳᐐᓐ ᓬᐄᐹᔨᕽ ᑮᐅᑕᑳᓀᓯᓰ᙮ ᔖᑰᒡ ᐃᑕᔥ ᐅᑮᐅᑖᐱᓇᒪᐙᓐ ᐁᐸᕒᐊᐋᒪᓐ ᐯᔑᒃ ᐁᑮᒦᓂᑯᒡ ᑫᑰᓂᓂ ᐁᑕᓱᒥᑖᓱ ᑳᑮᐊᔮᓂᒡ, ᐁᑮᑕᑯᔕᐌᓂᒫᒡ᙮ ᐁᐸᕒᐊᐋᒻ ᐄᑐᒃ ᑳᑮᑌᐱᓇᕽ ᑭᔐᒪᓂᑑᓐ ᐅᑕᔓᑕᒫᑫᐎᓂᓂ᙮

7:7b.HEB.007.007 ᒦᑕᔥ ᐅᐅ ᑫᑫᑦ ᐁᔑᓈᑾᒃ, ᐊᐊ ᓴ ᑳᔕᐌᓂᒥᐌᒡ ᓇᐗᒡ ᐃᔥᐯᑖᑯᓯ ᐊᐲᒡ ᐐᓐ ᐊᐊ ᑳᔕᐌᓂᒥᓐᒡ᙮

7:8b.HEB.007.008 ᐃᑭ ᑕᔥ ᐐᓐ ᐊᓇᒥᐁᐎᑭᒫᒃ ᑳᓂᑖᐅᑖᐱᓇᒫᑫᐙᒡ ᐯᔑᒃ ᐁᑕᓱᒥᑖᓱ ᑳᓂᑖᐅᒋᒦᓂᑎᕽ, ᑲᑭᓇ ᓴ ᑕᓂᐳᐗᒃ᙮ ᐊᐊ ᑕᔥ ᐐᓐ ᒣᓬᑭᓯᑌᒃ ᑳᑮᐃᔑ ᐅᑖᐱᓇᒫᑫᒡ, ᒨᔕᒃ ᑕᐱᒫᑎᓯ᙮ ᐋᓃᔥ ᒦ ᐃ ᑭᒋᒪᓯᓇᐃᑲᓐ ᐁᔑᐲᐃᑳᑌᒃ᙮

7:9b.HEB.007.009 ᐊᐲ ᑕᔥ ᐁᐸᕒᐊᐋᒻ ᑳᑮᒦᓈᒡ ᒣᓬᑭᓯᑌᑰᓐ ᐃᐃ ᐯᔑᒃ ᐁᑕᓱᒥᑖᓱ ᑳᑮᑌᐱᓇᕽ, ᒦ ᓴ ᑖᐱᔥᑰ ᐁᔑᓈᑾᓂᓂᒃ ᓬᐄᐹᐃ ᑫᐐᓐ ᐁᑮᒦᑭᐌᒡ, ᒦ ᐅᒫ ᑳᐅᑕᑳᓀᓯᐙᒡ ᐊᓇᒥᐁᐎᑭᒫᒃ ᑳᓂᑖ ᐅᑖᐱᓇᒫᑫᐙᒡ᙮

7:10b.HEB.007.010 ᑳᐐᓐ ᐄᑐᒃ ᒪᔑ ᐃᐃ ᐊᐲ ᓬᐄᐹᐃ ᑮᐊᔮᓰ ᒣᓬᑭᓯᑌᑰᓐ ᑮᓇᑭᔥᑲᐙᓂᒡ ᐁᐸᕒᐊᐋᒪᓐ᙮ ᐲᒋ ᐁᐸᕒᐊᐋᒥᕽ ᐄᑐᒃ ᑫᔮᐱ ᑮᐊᔮ ᐃᐃ ᐊᐲ᙮

7:11b.HEB.007.011 ᐃᓂ ᑕᔥ ᐅᓇᔓᐌᐎᓇᓐ ᑳᑮᒦᓂᑣ ᐃᔅᕒᐃᔭᓬᐊᒃ ᒣᒬᒡ ᐃᑯ ᐁᑕ ᑮᐃᔑᑕᑯ ᐊᓄᑮᒪᑲᓂᓂᐗᓐ ᐃᐃᒫ ᑳᑮᐊᓇᒥᐁᐎᑭᒫᐎᓂᒡ ᓬᐄᐹᔨᕽ ᑳᑮᐅᒌᓂᒡ᙮ ᑮᔥᐱᓐ ᐃᑕᔥ ᐐᑫ ᒥᓄᓈᑾᓂᓂᑭᐸᓐ ᐅᑕᓄᑮᐎᓂᐙ ᐃᑭ ᓬᐄᐹᐃ ᐊᓇᒥᐁᐎᑭᒫᒃ, ᑳᐐᓐ ᐄᑐᒃ ᒣᒬᒡ ᑎᓄ ᐊᓇᒥᐁᐎᑭᒫ ᑖᑮᓈᑯᓯᓰ ᒋᐃᓀᑖᑯᓯᓯᑭᐸᓐ ᑳᑮᐃᓀᑖᑯᓯᓂᒡ ᐁᕒᐊᓅᓐ᙮ ᑳᐐᓐ ᒣᒬᒡ ᑖᑮᓈᑯᓯᓰ ᐊᐎᔭ ᒋᐃᓇᓄᑮᐸᓐ ᑖᐱᔥᑰ ᒣᓬᑭᓯᑌᑰᓐ ᑳᑮᐃᔑ ᑭᒋᐊᓇᒥᐁᐎᑭᒫᐎᓂᒡ,

7:12b.HEB.007.012 ᐋᓃᔥ ᒦ ᐃ ᐁᔑᓈᑾᒃ, ᑮᔥᐱᓐ ᐃᓴ ᐋᒋᒋᑳᑌᒃ ᐃᐃ ᐊᓇᒥᐁᐎᑭᒫᐎᐎᓐ, ᒦ ᓴ ᑲᔦ ᐁᔑᓈᑾᒃ ᒋᑮᐋᒋᒋᑳᑌᑭᐸᓐ ᐅᓇᔓᐌᐎᓐ᙮

7:13b.HEB.007.013 ᐊᐊ ᑕᔥ ᐐᓐ ᑳᑎᐯᓂᒥᓇᕽ ᑳᑕᔑᒪᕽ ᐸᑳᓐ ᑮᐅᑕᑳᓀᓯ᙮ ᑳᐐᓐ ᐃᑕᔥ ᐊᐙᒡ ᐯᔑᒃ ᑳᑮᐐᒋᐅᑕᑳᓀᓰᒫᒡ ᑮᐊᓇᒥᐁᐎᑭᒫᐎᓰᐗᓐ᙮

7:14b.HEB.007.014 ᑫᒋᓈᒡ ᐃᑕᔥ ᐐᑫ ᑭᑫᑖᑾᓐ ᐊᐊ ᑳᑎᐯᒋᑫᒡ ᒎᑕᑳᕽ ᐁᑮᐅᑕᑳᓀᓯᒡ᙮ ᑳᐐᓐ ᑕᔥ ᒨᓯᔅ ᐅᑮᒥᑰᒫᓰᓐ ᐃᐃ ᒎᑕᑳᕽ ᑳᑮᐅᑕᑳᓀᓯᓂᒡ ᐊᐲ ᑮᑕᔑᒫᒡ ᐃᐃ ᐊᓇᒥᐁᐎᑭᒫᐞ᙮

7:15b.HEB.007.015 ᑭᒋᑫᑰᓐ ᐃᑕᔥ ᐅᐅᒫ ᐯᑌᓈᑾᓐ᙮ ᑯᑕᒃ ᓴ ᑭᒋᐊᓇᒥᐁᐎᑭᒫ ᑮᐱᐊᔮ ᐁᑮᐃᔑᓈᑯᓯᒡ ᑖᐱᔥᑰ ᒣᓬᑭᓯᑌᑰᓐ ᑳᑮᐃᔑᓈᑯᓯᓂᒡ᙮

7:16b.HEB.007.016 ᑳᐐᓐ ᐃᐃᒫ ᑮᐅᒋ ᐃᔑᐋᓰ ᒋᐊᓇᒥᐁᐎᑭᒫᐎᒡ ᑳᑮᐃᓈᑯᓂᑫᒪᑲᓂᓂᒃ ᒣᒬᒡ ᓬᐄᐹᔨᕽ ᒋᐅᒌᐸᓐ ᒋᑭᒋᐊᓇᒥᐁᐎᑭᒫᐎᐸᓐ᙮ ᐃᐃᒫ ᓴ ᑮᐅᒋ ᐃᔑᐋ ᑳᔑᒪᔥᑲᐎᓰᒪᑲᓂᓂᒃ ᐱᒫᑎᓯᐎᓐ ᐐᑳ ᑫᓂᔑᐗᓈᒋᒋᑳᑌᓯᓂᓂᒃ᙮

7:17b.HEB.007.017 ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᑮᓐ ᓴ ᑭᑲᓀᐱᒋ ᑭᒋᐊᓇᒥᐁᐎᑭᒫᐤ ᑖᐱᔥᑰ ᒣᓬᑭᓯᑌᒃ ᑳᑮᐃᔑ ᑭᒋᐊᓇᒥᐁᐎᑭᒫᐎᒡ᙮

7:18b.HEB.007.018 ᐃᐃ ᑕᔥ ᑫᑌᐃᓈᑯᓂᑫᐎᓐ ᐋᔕ ᑮᐴᓂᐋᐸᑕᓐ, ᐋᓃᔥ ᐁᑮᓃᓇᒣᑖᑾᒃ, ᑫᑰᓐ ᑲᔦ ᐁᑮᐃᓈᐸᑕᓯᓄᒃ᙮

7:19b.HEB.007.019 ᐋᓃᔥ ᒨᓯᔅ ᐅᑑᓇᔓᐌᐎᓐ ᑳᐐᓐ ᑮᑲᔥᑭᐁᐎᓰᒪᑲᓯᓂᓂ ᑫᑰᓐ ᐃᐃᒫ ᐐᑫ ᒋᑮᐅᒋᒥᓄᒋᑳᑌᑭᐸᓐ᙮ ᐃᓇᔥᑫ ᑕᔥ ᓅᑯᒻ ᑭᒦᓂᑰᐎᓯᒥᓐ ᓇᐗᒡ ᑳᑌᐺᔦᑖᑾᒃ ᐊᐯᓂᒧᐎᓐ ᐋᑎ ᐯᔓ ᑫᐅᒋᓈᓯᑲᐗᕽ ᐊᐊ ᑭᔐᒪᓂᑑ᙮

7:20b.HEB.007.020 ᔑᑾ ᑕᔥ ᑲᔦ ᑭᔐᒪᓂᑑ ᑮᑕᑯᒦᑭᐌ ᐃᐃ ᐅᑖᔩᒋᐊᔓᑕᒫᑫᐎᓐ᙮ ᐃᓇᔥᑫ ᑯᑕᒃ ᐊᐎᔭᒃ ᑮᐊᓇᒥᐁᐎᑭᒫᐎᐃᑣ ᑳᐐᓐ ᐐᑳ ᑭᒋᐊᔓᑕᒫᑫᐎᓐ ᑮᐋᐸᑕᓯᓂᓂ᙮

7:21b.HEB.007.021 ᒋᓴᔅ ᐃᑕᔥ ᑮᐅᒋᑭᒋᐊᓇᒥᐁᐎᑭᒫᐎᐋ, ᐋᔩᒋᐊᔓᑕᒫᑫᐎᓐ ᐁᑮᐋᐸᑕᓂᓂᒃ, ᐊᐲ ᑭᔐᒪᓂᑑᓐ ᑮᐃᑯᒡ: ᑳᑎᐯᒋᑫᒡ ᓴ ᑭᑮᐋᔩᒋᐊᔓᑕᒫᒃ, ᑳᐐᓐ ᓴ ᑕᐋᑌᑕᓰ: ᑮᓐ ᓴ ᑭᑲ ᓀᐱᒋ ᑭᒋᐊᓇᒥᐁᐎᑭᒫᐤ᙮

7:22b.HEB.007.022 ᐅᐅ ᑕᔥ ᐁᐊᔮᒃ ᐋᔩᒋᐊᔓᑕᒫᑫᐎᓐ, ᒋᓴᔅ ᑕᔥ ᐅᑭᑭᓇᐙᒋᔥᑳᓐ ᒋᐙᐸᑕᒧᐗᕽ ᑫᒋᓈᒡ ᑳᐐᑌᐱᓇᒧᐗᕽ ᑳᑮᐃᔑ ᐊᔓᑕᒪᐎᓇᕽ᙮ ᓇᐗᒡ ᐃᑕᔥ ᐅᐅᐌᓂ ᐅᓂᔑᔑᓂᓂ ᐊᔓᑕᒫᑎᐎᓂᓂ᙮

7:23b.HEB.007.023 ᑫᔮᐱ ᑕᔥ ᑫᑰᓐ ᑭᑕᓂᐙᐸᑖᒥᓐ᙮ ᐃᑭ ᑕᔥ ᑳᑮᐹᑏᓄᐙᒡ ᐊᓇᒥᐁᐎᑭᒫᒃ, ᑲᑭᓇ ᑮᓂᐳᐗᒃ, ᒦᑕᔥ ᐅᑕᓄᑮᐎᓂᐙᓐ ᑳᐃᔑᐴᓂᓭᓂᑭᓐ᙮

7:24b.HEB.007.024 ᒋᓴᔅ ᑕᔥ ᐐᓐ ᓀᐱᒡ ᐱᒫᑎᓯ, ᑳᐐᓐ ᑲᔦ ᐊᐎᔭᓐ ᐅᑲᓈᐱᔥᑳᑯᓰᓐ ᐃᐃ ᑳᐃᓇᓄᑮᒡ᙮

7:25b.HEB.007.025 ᒦᑕᔥ ᐃᐃ ᑳᐅᒋᑲᔥᑭᑑᒡ ᓅᑯᒻ, ᒨᔕᒃ ᑲᔦ ᒋᐱᒫᒋᐋᒡ ᐃᐃ ᐊᐎᔭᐞ ᑳᐱᓈᓯᑲᐙᓂᒡ ᑭᔐᒪᓂᑑᓐ ᐐᓐ ᐅᒋ᙮ ᐋᓃᔥ ᒦ ᐃ ᐁᔑᒋᑫᑕᒪᐙᒡ ᒨᔕᒃ ᐁᐊᓇᒥᐁᑕᒪᐙᒡ, ᐁᑲᑲᓅᓈᒡ ᑭᔐᒪᓂᑑᓐ᙮

7:26b.HEB.007.026 ᒋᓴᔅ ᐃᑕᔥ ᒫᐗᒡ ᐃᔑᑭᒋᐊᓇᒥᐁᐎᑭᒫᐎ ᑳᑲᔥᑭᑑᒡ ᐁᒦᓂᓇᕽ ᑫᑰᓂᓂ, ᐋᓃᓐ ᐁᔑᓅᑌᓭᔭᕽ᙮ ᐋᐱᒋ ᓴ ᐅᓇᐁᑕᒥᐋᓐ ᑭᔐᒪᓂᑑᓐ᙮ ᑳᐐᓐ ᑲᔦ ᒪᒋᑫᑰᓐ, ᒪᒋᑑᑕᒧᐎᓐ ᑲᔦ ᐅᑭᑭᔥᑳᑯᓰᓐ᙮ ᐸᑳᓐ ᑲᔦ ᑮᐃᔑᐸᑭᑎᓂᑲᓂᐎ ᐌᑎ ᑳᐃᔑᐊᔮᓯᓂᒃ ᐅᒪᒑᑎᓰᐞ᙮ ᐋᐱᒋ ᑲᔦ ᓇᐗᒡ ᐃᔥᐱᒥᕽ ᐹᔑᒡ ᑭᒋ ᐃᓀᑖᑯᓯ ᐊᐲᒡ ᐐᓐ ᐃᐃ ᑳᐊᐲᑖᓂᒃ ᑮᔑᒃ᙮

7:27b.HEB.007.027 ᑳᐐᓐ ᑲᔦ ᐁᑕᓱᑮᔑᒃ ᑳᐃᔑᒋᑫᓂᒡ ᑭᒋᐊᓇᒥᐁᐎᑭᒫᐞ ᐃᔑᒋᑫᓰ᙮ ᑳᐐᓐ ᒣᒬᒡ ᐐᓐ ᐱᓇᒫ ᐸᑭᑎᓈᓱᓰ ᐅᒪᒋᑑᑕᒧᐎᓐ ᐅᒋ, ᒦᔥ ᐃᐃ ᐸᔦᔥ ᒋᐸᑭᑎᓈᓱᑕᒪᐙᒡ ᐃᐃ ᑯᑕᒃ ᐯᒫᑎᓯᓂᒡ᙮ ᒋᓴᔅ ᐃᑕᔥ ᐐᓐ ᐋᐱᑎᕽ ᐁᑕ ᑮᐸᑭᑎᓈᓱ, ᒦᑕᔥ ᐃᐃ ᐁᑮᑌᑎᐸᐊᕽ ᑲᑭᓇ ᑫᑰᓐ ᑮᐸᑭᑎᓇᕽ ᐅᐱᒫᑎᓯᐎᓐ ᐐᓐ ᐱᑯ ᐁᑮᑎᓄᐎᒡ ᐸᑭᑎᓈᓱᐎᓂᕽ᙮

7:28b.HEB.007.028 ᐃᓇᔥᑫ ᒨᓯᔅ ᐅᑑᓇᔓᐌᐎᓂᕽ ᑮᐅᒋ ᐃᓇᑭᒫᐗᒃ ᐃᓂᓂᐗᒃ ᒫᐗᒡ ᒋᑭᒋᐊᓇᒥᐁᐎᑭᒫᐎᐙᒡ, ᐋᓇᐐᓐ ᐁᑮᑲᔥᑭᑑᓯᒀ ᒪᔮ ᑫᑮᐃᔑᒋᑫᐙᐸᓐ᙮ ᐃᐃᒫ ᑕᔥ ᐐᓐ ᑭᔐᒪᓂᑑ ᐅᑖᔩᒋᐊᔓᑕᒫᑫᐎᓂᕽ ᑮᐅᒋ ᐃᓇᑭᒫ ᐊ ᐅᑯᓯᓯᒫ ᒫᐗᒡ ᒋᑭᒋᐊᓇᒥᐁᐎᑭᒫᐎᒡ, ᒥᓯᐌ ᑳᑮᔑᓈᑯᒋᑲᓂᐎᒡ ᓀᐱᒡ ᐃᑯ ᐃᐃᐌ ᑫᐃᔑᐊᔮᒡ᙮

8

8:1b.HEB.008.001 ᒦᑕᔥ ᐅᐅᐌ ᑳᑕᔑᑕᒫᕽ, ᐁᐊᔮᐗᕽ ᓴ ᒫᐗᒡ ᑭᒋᐊᓇᒥᐁᐎᑭᒫ᙮ ᒦ ᓴ ᐊᐊ ᑎᓄ ᐌᑎ ᑳᑮᐅᓇᐱᒡ ᐅᑭᒋᓂᑭᓃᕽ ᐃᓇᑫ ᑳᔑᐅᑭᒫᐗᐱᓂᒡ ᐃᓂ ᑳᑭᒋᐅᑭᒫᐙᑎᓯᓂᒡ ᑭᒋᑮᔑᑯᕽ᙮

8:2b.HEB.008.002 ᐃᐃᒫ ᑕᔥ ᑕᔑᐊᓇᒥᐁᐗᓄᑮ ᒫᐗᒡ ᐃᑯ ᑳᐃᔑᑯᑖᓀᑖᑾᒃ ᐲᑎᒃ ᐃᐃᒫ ᒪᔮ ᑭᒋᐊᓇᒥᐁᐸᒀᓀᑲᒥᑯᕽ᙮ ᑳᑎᐯᒋᑫᒡ ᓴ ᐐᓐ ᐃᑯ ᐅᑮᐅᓇᑭᑑᓐ ᐃᐃ ᑭᒋᐊᓇᒥᐁᐸᒀᓀᑲᒥᑯᓂ, ᑳᐐᓐ ᐐᓐ ᐃᓂᓂ ᐅᑮᐅᓇᑭᑑᓰᓐ᙮

8:3b.HEB.008.003 ᐁᑕᓱᐯᔑᑯᐙᒡ ᓴ ᑭᒋᐊᓇᒥᐁᐎᑭᒫᒃ ᑮᐃᓈᑯᓈᐗᒃ ᒋᐲᑕᒪᐙᐙᒡ ᑭᔐᒪᓂᑑᓐ ᐃᓂ ᒦᑭᐌᐎᓇᓐ, ᐃᓂ ᑲᔦ ᐸᑭᑎᓈᓱᐎᓇᓐ᙮ ᒦᑕᔥ ᐯᔑᑾᓐ ᐁᔑᓈᑾᓂᓂᒃ ᐊᐊ ᒫᐗᒡ ᑭᑭᒋᐊᓇᒥᐁᐎᑭᒫᒥᓈᓐ ᒋᓴᔅ ᑫᑰᓂᓂ ᒋᐊᔮᒡ ᒋᐸᑭᑎᓈᔂᑫᒡ᙮

8:4b.HEB.008.004 ᑮᔥᐱᓐ ᐃᑕᔥ ᐅᐅᒫ ᐊᑮᕽ ᐊᔮᑯᐸᓀᓐ, ᑳᐐᓐ ᐄᑐᒃ ᑖᑮᐊᓇᒥᐁᐎᑭᒫᐎᓰ᙮ ᐋᓃᔥ ᐊᔮᐗᒃ ᐊᓇᒥᐁᐎᑭᒫᒃ ᑳᐸᑭᑎᓇᒧᐙᒡ ᐃᓂ ᒦᑭᐌᐎᓇᓐ, ᐁᐃᔑᒋᑫᐙᒡ ᐃᐃ ᑳᐃᓇᑌᓂᒃ ᐅᓇᔓᐌᐎᓐ᙮

8:5b.HEB.008.005 ᐃᑭ ᑕᔥ ᐊᓇᒥᐁᐎᑭᒫᒃ ᑳᑮᐃᓇᓄᑮᐙᒡ, ᒦ ᓴ ᓅᐙᒡ ᐃᑯ ᐁᓈᐱᒋᑫᐙᒡ ᐋᓃᓐ ᐁᔑᐌᐸᓂᓂᒃ ᐌᑎ ᑭᒋᑮᔑᑯᕽ; ᑳᐐᓐ ᐃᑕᔥ ᒪᔮ ᐃᔑᓈᑾᓯᓂᓂ ᑳᑲᑴᓈᐱᑑᐙᒡ᙮ ᒦᑕᔥ ᐯᔑᑾᓐ ᒨᓯᔅ ᐊᐲ ᑮᐐᐅᓇᑭᑑᒡ ᐃᐃ ᑭᒋᐊᓇᒥᐁᐸᒀᓀᑲᒥᑯᓂ, ᑭᔐᒪᓂᑑᓐ ᐅᐅ ᐅᑮᐃᑰᓐ: ᐋᐱᒋ ᓴ ᐊᔮᒀᒥᓯᓐ ᒪᔮ ᐱᑯ ᒋᐃᔑᑑᔭᓐ ᒋᓈᐱᓈᑾᒃ ᑳᑮᐃᔑ ᑭᑭᓄᐊᒪᐎᓈᓐ ᐌᑎ ᑳᐃᔑᐱᑾᑎᓈᒃ᙮

8:6b.HEB.008.006 ᐊᐊ ᑕᔥ ᐐᓐ ᒋᓴᔅ ᐃᐃ ᑳᑮᒦᓂᓐᒡ ᐊᓇᒥᐁᐎᑭᒫᐗᓄᑮᐎᓂᓂ, ᐊᐗᔑᒣ ᐃᔥᐯᑖᑾᓂᓂ ᐊᐲᒡ ᐐᓐ ᐃᑭ ᐊᑮᐎ ᐊᓇᒥᐁᐎᑭᒫᒃ ᑳᐃᓇᓄᑮᐙᒡ᙮ ᒦᑕᔥ ᐯᔑᑾᓐ ᐁᐲᒋ ᑭᒋ ᐃᓀᑖᑾᓂᓂᒃ ᑳᑮᐅᓇᑕᒪᐙᒡ ᐋᔩᒋᐊᔓᑕᒫᑎᐎᓐ ᑭᔐᒪᓂᑑᓐ ᑫᐅᒋᐐᒌᐙᒡ ᐃᐃ ᐯᒫᑎᓯᓂᒡ, ᐋᓃᔥ ᒦ ᐃᒫ ᐁᔑᐊᐱᓯᓂᓂᒃ ᐃᓂᐌᓂᐗᓐ ᓇᐗᒡ ᑳᐅᓂᔑᔑᓂᓂᑭᓐ ᑳᑮᐃᔑᐊᔓᑕᒫᑫᒡ᙮

8:7b.HEB.008.007 ᑮᔥᐱᓐ ᐃᑕᔥ ᐃᐃ ᓂᑕᒻ ᐊᔓᑕᒫᑎᐎᓐ ᑫᑰᓐ ᐃᔑᒫᔑᓈᑾᓯᓄᑭᐸᓐ, ᑳᐐᓐ ᐄᑐᒃ ᒣᒬᒡ ᑯᑕᒃ ᑖᑮᒦᑭᐙᓂᐗᓯᓅᓐ᙮

8:8b.HEB.008.008 ᐅᐅᐌᓂ ᑕᔥ ᑭᔐᒪᓂᑑ ᑮᐃᑭᑐ ᐊᐲ ᐁᐙᐸᒫᒡ ᑳᑮᑎᐯᓂᒫᒡ ᐯᒫᑎᓯᓂᒡ ᐁᒪᒋᑑᑕᒥᓂᒡ: ᓂᑯᑎᕽ ᓴ ᑕᐅᒋᒋᓭ ᑮᔑᑲᒃ, ᐃᑭᑐ ᑳᑎᐯᒋᑫᒡ, ᐊᐲ ᒋᐅᔑᑕᒪᐗᒀ ᐃᐃ ᐅᔥᑭᐊᔓᑕᒫᑎᐎᓐ ᐃᑭ ᐯᒫᑎᓯᐙᒡ ᐃᐃᒫ ᐃᔅᕒᐃᔭᓬᐃᑳᕽ ᐃᑭ ᑲᔦ ᒎᑕᑳᕽ ᑳᐅᒌᐙᒡ᙮

8:9b.HEB.008.009 ᑳᐐᓐ ᑕᔥ ᑖᐱᔥᑰ ᐊᔓᑕᒫᑎᐎᓐ ᑳᑮᒦᓂᒪᒃ ᐃᐃ ᐅᑫᑌᔭᐋᒥᐙᐞ ᓂᐐᐃᔑᒦᓈᓰᒃ᙮ ᐋᓃᔥ ᐋᐱᑎᕽ ᐁᑮᔑᑲᓂᓂᒃ ᓂᑮᓵᑭᒋ ᓴᑭᓂᑫᓈᒃ ᐃᐃᒫ ᐄᒋᐸᑮᕽ ᐁᑮᒫᒌᓇᒀ, ᑳᐐᓐ ᑕᔥ ᐌᐌᓂ ᑮᐃᔑᒋᑫᓰᐗᒃ ᒋᑮᑑᑕᒧᐙᐸᓐ ᐃᐃ ᐊᔓᑕᒫᑎᐎᓂᓂ ᑳᑮᒦᓇᒀᐸᓐ, ᑳᐐᓐ ᑕᔥ ᑫᓃᓐ ᓂᑮᐸᐹᐱᔅᑫᓂᒥᑯᓰᒃ, ᑮᐃᑭᑐ ᑳᑎᐯᒋᑫᒡ᙮

8:10b.HEB.008.010 ᓂᑯᑎᕽ ᐃᑕᔥ ᑮᔑᑲᓂᓂᒃ, ᐃᑭᑐ ᑳᑎᐯᒋᑫᒡ, ᓂᑲᐅᔑᑕᒪᐙᒃ ᐃᐃ ᐯᒫᑎᓯᐙᒡ ᐃᐃᒫ ᐃᔅᕒᐃᔭᓬᐃᑳᕽ ᐊᔓᑕᒫᑎᐎᓐ ᐅᐅ ᑫᐃᑭᑑᒪᑲᓂᓂᒃ: ᓂᑲᐊᑖᐙᓇᓐ ᓂᑑᓇᔓᐌᐎᓇᓐ ᐃᐃᒫ ᐅᑎᓀᑕᒧᐎᓂᐙᕽ, ᓂᑲᐅᔑᐲᐊᒧᐙᓇᓐ ᑲᔦ ᐃᐃᒫ ᐅᑌᐃᐙᕽ, ᒦ ᓴ ᑕᔥ ᓂᑲᐅᒪᓂᑑᒥᑰᒃ, ᑫᐐᓇᐙ ᑕᔥ ᓂᑲᑎᐯᓂᒫᒃ᙮

8:11b.HEB.008.011 ᑳᐐᓐ ᐃᑕᔥ ᒣᒬᒡ ᐊᐎᔭ ᐅᑲᐃᓈᓰᓐ ᐐᒋᐱᒫᑎᓰᓐ, ᑯᒫ ᑲᔦ ᐐᒋᑭᐌᔭᓐ ᒋᐃᓈᒡ: ᑲᑴᑭᑫᓂᒻ ᑫᑮᓐ ᐊᐊ ᑳᑎᐯᒋᑫᒡ᙮ ᐋᓃᔥ ᑲᑭᓇ ᐯᒫᑎᓯᐙᒡ ᓂᑲᑭᑫᓂᒥᑰᒃ, ᐃᑭ ᑳᑕᐸᓭᑖᑯᓯᐙᒡ ᐃᑭ ᑲᔦ ᑳᑭᒋ ᐃᓀᑖᑯᓯᐙᒡ᙮

8:12b.HEB.008.012 ᓂᑲᐴᓀᑕᒧᐙᓇᓐ ᑕᔥ ᑳᐃᔑᑾᔭᑯᒋᑫᓯᒀ, ᓂᑲ ᓀᐱᒋ ᐗᓃᑫᓄᑕᒧᐙᓇᓐ ᑲᔦ ᑲᑭᓇ ᐅᒪᒋᑑᑕᒧᐎᓂᐙᓐ᙮

8:13b.HEB.008.013 ᐃᐃ ᑕᔥ ᐁᑕᔑᒋᑳᑌᒃ ᐃᐃ ᐅᔥᑭᐊᔓᑕᒫᑎᐎᓐ, ᒦᑕᔥ ᑖᐱᔥᑰ ᑭᔐᒪᓂᑑ ᐁᑮᐋᓇᐌᑕᕽ ᐃᐃ ᑫᑌᐊᔓᑕᒫᑎᐎᓐ᙮ ᑫᑰᓐ ᐋᓃᔥ ᑳᑫᑌᔭᐄᐗᕽ, ᑳᔒᑯᔥᑭᑳᑌᒃ, ᐋᐱᒋ ᐐᐸ ᑕᓂᐊᑯᓈᑾᓐ᙮

9

9:1b.HEB.009.001 ᐃᐃ ᑕᔥ ᓂᑕᒻ ᐊᔓᑕᒫᑎᐎᓐ ᑳᑮᐊᔮᒃ ᐋᐱᒋ ᓴ ᑮᐹᑏᓇᑎᓅᓐ ᐃᓈᑯᓂᑫᐎᓇᓐ ᐋᓃᓐ ᒪᔮ ᐊᐎᔭ ᑫᑮᐃᔑᒋᑫᐸᓐ ᐊᑕᐲᑎᑫᒡ ᐅᐅᒫ ᐊᑮᕽ᙮ ᐃᓂᓂ ᐋᓃᔥ ᐅᑮᐅᔑᑑᓐ ᐋᑎ ᑫᔑᐲᑎᑫᒡ᙮

9:2b.HEB.009.002 ᑮᐅᓇᑭᒋᑳᑌ ᑕᔥ ᐃᐃ ᑭᒋᐊᓇᒥᐁᐸᒀᓀᑲᒥᒃ᙮ ᐃᐃᒫ ᑕᔥ ᑳᑮᐃᔑᓂᑕᒥᐲᑎᑫᕽ, ᑳᐃᔑᑯᑖᓀᑖᑾᒃ ᑮᐃᔑᓂᑳᑌ᙮ ᒦᐗᓐ ᐃᑕᔥ ᐅᓄ ᐃᐃᒫ ᐲᑎᒃ ᑳᐊᑌᑭᓐ᙮ ᐙᓴᑯᓀᒋᑲᓈᒃ, ᑑᐳᐎᓈᒃ, ᐊᐊ ᑲᔦ ᐸᑴᔑᑲᓐ ᑳᑮᐊᐱᒡ ᑑᐳᐎᓈᑯᕽ ᑳᑮᐸᑭᑎᓇᒪᐎᓐᒡ ᑭᔐᒪᓂᑑ᙮

9:3b.HEB.009.003 ᒫᐗᒡ ᐃᑯ ᑳᐃᔑᑯᑖᓀᑖᑾᒃ ᐃᑕᔥ ᐊᐗᓯᓇᑫ ᑭᐲᑲᐃᑲᓂᕽ ᑮᐃᔑᐊᔮ᙮

9:4b.HEB.009.004 ᒦᑕᔥ ᐅᐅᒫ ᒫᐗᒡ ᐃᑯ ᑳᐃᔑᑯᑖᓀᑖᑾᒃ ᐲᑎᒃ ᐅᓄ ᑳᐊᑌᑭᓐ: ᐃᐃ ᑳᐅᓵᐙᐱᑯ ᔔᓂᔮᐗᕽ ᑳᑮᐃᔑ ᒥᓈᓯᑳᑌᒃ ᐃᐃ ᒥᓈᓯᑲᓐ; ᐃᐃ ᑕᔥ ᑲᔦ ᐊᓇᒥᐁᒪᑲᒃ ᑳᑮᐅᓵᐙᐱᑯ ᔔᓂᔮᐗᕽ ᑳᑮᐃᔑ ᑲᓇᐌᒋᑳᑌᓂᒃ ᑭᔐᒪᓂᑑ ᐅᑕᔓᑕᒫᑫᐎᓐ᙮ ᒦᐗᓐ ᐃᑕᔥ ᐅᓄ ᑫᑰᓇᓐ ᑳᑮᐲᑌᑭᓐ ᐃᐃᒫ ᒪᑲᑯᕽ: ᐅᓵᐎ ᔔᓂᔮ ᐙᐱᑯ ᐅᓈᑲᓐ ᒣᓇ ᐸᑴᔑᑲᓐ ᑳᑮᐃᔑᐲᓱᒡ; ᐁᕒᐊᓐ ᐅᓴᑲᐅᓈᒃ ᑳᑮᐊᓃᐲᔑᐗᓂᓂᑭᐸᓐ; ᓃᔑᓐ ᑲᔦ ᑳᑮᒥᓄ ᓇᐸᑳᐱᑭᓯᓂᒡ ᐊᓯᓃᐞ ᑳᑮᐃᔑ ᐅᔑᐲᐃᑳᑌᓂᒃ ᑭᔐᒪᓂᑑ ᑳᑮᐃᔑ ᐊᔓᑕᒫᑎᐙᑯᐸᓀᓐ ᐃᓂᓂᐗᐞ᙮

9:5b.HEB.009.005 ᐃᐃᒫ ᑕᔥ ᐗᑭᒋᒪᑲᑯᕽ ᑮᐊᐱᐗᒃ ᓃᔑᓐ ᒉᕒᐊᐲᑳᓇᒃ ᐋᐱᒋ ᐁᑮᒥᓄᓈᑯᓯᐙᒡ᙮ ᐅᓂᑸᑲᓂᐙᓐ ᐃᑕᔥ ᐅᑮᐋᐸᒋᑑᓈᐙᓐ ᐁᐋᑰᔥᑲᒧᐙᒡ ᐃᐃᒫ ᑳᑮᐃᔑ ᐴᓀᒋᑳᑌᓂᑭᓐ ᒪᒋᑑᑕᒧᐎᓇᓐ᙮ ᑳᐐᓐ ᐃᑕᔥ ᐐᓐ ᒪᔮ ᑫᑰᓐ ᑭᐐᐐᑕᒪᐎᓯᓅᓂᓂᒻ᙮

9:6b.HEB.009.006 ᒦᑕᔥ ᐅᐅ ᑳᑮᐃᓇᑌᓂᒃ ᒋᐃᔑᒋᑫᐙᒡ ᐃᐃᒫ ᑭᒋᐊᓇᒥᐁᐸᒀᓀᑲᒥᑯᕽ᙮ ᐊᓇᒥᐁᐎᑭᒫᒃ ᐃᑕᔥ ᐐᓐ ᑮᐲᑎᑫᐗᒃ ᐃᐃᒫ ᑳᐃᔑᑯᑖᓀᑖᑾᓂᓂᒃ ᐁᑕᓱᑮᔑᒃ ᐁᑮᑑᑕᒧᐙᒡ ᐅᑕᓄᑮᐎᓂᐙᓐ᙮

9:7b.HEB.009.007 ᐃᐃᒫ ᑕᔥ ᐐᓐ ᒫᐗᒡ ᐃᑯ ᑳᐃᔑᑯᑖᓀᑖᑾᓂᓂᒃ ᐲᑎᒃ, ᒫᐗᒡ ᑭᒋᐊᓇᒥᐁᐎᑭᒫ ᐁᑕ ᑮᐲᑎᑫ ᐋᐱᑎᕽ ᐁᑕᓱᑕᒀᑭᓐ᙮ ᐅᑮᑕᑯᐲᑑᓐ ᐃᑕᔥ ᐅᒥᔅᑸᓂ ᑳᑮᓂᓯᒥᓐᒡ ᐊᔭᐋᐎᔕᓐ ᐁᑮᐸᑭᑎᓇᒪᐙᒡ ᑭᔐᒪᓂᑑᓐ ᐐᓐ ᒋᐴᓀᑕᒫᑯᒡ ᐅᒪᒋᑑᑕᒧᐎᓇᓐ, ᒦᑕᔥ ᑲᔦ ᐯᔑᑾᓐ ᑳᐃᔑᒋᑫᒡ ᐊᐲ ᑮᐸᑭᑎᓂᑫᑕᒪᐙᒡ ᑯᑕᒃ ᐯᒫᑎᓯᓂᒡ, ᐃᐃ ᑳᑮᑭᑫᑕᓯᓂᒃ ᐁᑮᒪᒋᑑᑕᒥᓂᒡ᙮

9:8b.HEB.009.008 ᑭᔐᒪᓂᑑ ᐅᑕᒑᑾᓐ ᐃᑕᔥ ᐯᑌᓈᑾᓂᓂ ᑫᑰᓂᓂ ᐁᐅᒋᑭᑭᓄᐃᑫᒡ ᐃᐃᒫ ᑭᒋᐊᓇᒥᐁᐸᒀᓀᑲᒥᑯᕽ᙮ ᒥᓂᒃ ᐃᑯ ᑳᐸᑕᑭᑌᒃ ᐃᐃ ᓂᑕᒻ ᑭᒋᐊᓇᒥᐁᐸᒀᓀᑲᒥᒃ, ᒦ ᓴ ᑖᐱᔥᑰ ᐁᔑᓈᑾᒃ ᒪᔑ ᐁᑮᐹᑭᑌᓇᒪᐙᓯᐎᑣ ᐯᒫᑎᓯᐙᒡ ᒋᐲᑎᑫᐙᒡ ᐃᐃᒫ ᒪᔮ ᒫᐗᒡ ᐃᑯ ᑳᐃᔑᑯᑖᓀᑖᑾᓂᓂᒃ᙮

9:9b.HEB.009.009 ᒦᑕᔥ ᐃᐃᒫ ᐁᔑᐙᐸᑕᒪᕽ ᐋᓃᓐ ᒪᔮ ᐁᔑᓭᔭᕽ ᓅᑯᒻ ᑳᐱᒫᑎᓯᔭᕽ᙮ ᐃᓂ ᑕᔥ ᒦᑭᐙᓇᓐ, ᐸᑭᑎᓈᓱᐎᓇᓐ ᑲᔦ ᑳᐸᑭᑎᓇᒪᐎᓐᒡ ᑭᔐᒪᓂᑑ, ᑳᐐᓐ ᐃᐃ ᓇᑫ ᐊᐎᔭ ᑳᐊᓇᒥᐁᑕᐙᒡ ᑭᔐᒪᓂᑑᓐ ᑕᐅᒋᑾᔭᑯᒋᑳᑌᓯᓂᓂ ᑳᐅᒋᓈᓈᑲᑕᐌᑕᕽ᙮

9:10b.HEB.009.010 ᐋᓃᔥ ᒦᒋᒻ, ᑳᒥᓂᒀᑌᑭᓐ ᑲᔦ, ᑭᓰᓂᒌᐎᓇᓐ ᑮᐋᐸᑕᓅᓐ ᐊᐲ ᑮᐸᑭᑎᓈᓱᕽ᙮ ᒦᐗᓐ ᐃᑕᔥ ᐅᓄ ᑭᔐᒪᓂᑑ ᑳᑮᒦᑭᐌᒡ ᐃᔑᒋᑫᐎᓇᓐ ᒋᐋᐸᑕᓂᓂᑭᓐ᙮ ᐅᓄᐌᓂᐗᓐ ᐃᑕᔥ ᑮᐃᔥᒀᓭᐗᓐ ᐊᐲ ᑭᔐᒪᓂᑑ ᑮᐅᓇᑑᒡ ᐅᔥᑭᑫᑰᓂᓂ ᐋᓃᓐ ᐙᐃᔑᓈᑲᒋᐋᒡ ᐯᒫᑎᓯᓂᒡ᙮

9:11b.HEB.009.011 ᐋᔕ ᑕᔥ X ᑮᐱᑕᑯᔑᓐ ᒫᐗᒡ ᐁᑮᑭᒋᐊᓇᒥᐁᐎᑭᒫᐎᒡ, ᐁᐐᓈᑲᒋᑑᒡ ᐃᓂ ᑳᐅᓂᔑᔑᓂᓂᑭᓐ ᑫᑰᓇᓐ ᐋᔕ ᐅᐅᒫ ᑳᐊᔮᓂᑭᓐ᙮ ᐃᐃᒫ ᑕᔥ ᓅᑯᒻ ᑳᑕᔑᐸᒦᑖᑫᒡ ᑭᒋᐊᓇᒥᐁᐸᒀᓀᑲᒥᑯᕽ, ᓇᐗᒡ ᑭᒋ ᐃᓀᑖᑾᓂᓂ, ᓇᐗᒡ ᑲᔦ ᐌᐌᓂ ᑮᔑᓈᑾᓂᓂ᙮ ᐋᓃᔥ ᑳᐐᓐ ᐃᓂᓃᓈᕽ ᑮᐅᒋᐅᔑᒋᑳᑌᓯᓂᓂ ᐃᐃ ᑭᒋᐊᓇᒥᐁᐸᒀᓀᑲᒥᒃ, ᑳᐐᓐ ᑲᔦ ᑮᑕᑯ ᐅᔑᒋᑳᑌᓯᓅᓐ ᐊᐲ ᑮᐅᔑᒋᑳᑌᑭᓐ ᐅᐅᒫ ᐊᑮᕽ ᑳᐊᔮᑭᓐ᙮

9:12b.HEB.009.012 ᐊᐲ ᑕᔥ ᐐᓐ X ᑳᐊᓂᐲᑎᑫᒡ ᐃᐃᒫ ᑭᒋᐊᓇᒥᐁᐸᒀᓀᑲᒥᑯᕽ, ᐋᐱᑎᕽ ᓴ ᐁᑕ ᑮᐲᑎᑫ ᐃᐃᒫ ᒫᐗᒡ ᐃᑯ ᑳᐃᔑᑯᑖᓀᑖᑾᓂᓂᒃ᙮ ᐐᓐ ᐃᑕᔥ ᐃᑯ ᐅᒥᔅᑸᒻ ᐅᑮᐋᐸᒋᑑᓐ ᐁᑮᑌᐱᓇᒪᐎᓇᕽ ᐱᒫᒋᐃᑰᐎᓐ ᐐᑳ ᑫᐴᓂᓭᓯᓂᓂᒃ᙮ ᑳᐐᓐ ᐐᓐ ᒫᓇᑎᑾᐞ, ᑳᐐᓐ ᑲᔦ ᐋᐯ ᐱᔑᑮᓴᐞ ᐅᒥᔅᑸᓂ ᐅᑮᐋᐸᒋᑑᓰᓐ ᐊᐲ ᑮᐸᑭᑎᓈᓱᒡ᙮

9:13b.HEB.009.013 ᐃᑭ ᑕᔥ ᑳᑮᐯᑫᑖᑯᓯᓯᒀ ᑮᓯᓶᐌᐱᓇᒪᐙᐗᒃ ᐃᐃ ᒫᓇᑎᒃ ᐅᒥᔅᑸᓂ, ᐋᐯ ᐱᔑᑮᓴᓐ ᑲᔦ ᐅᒥᔅᑸᓂ, ᐃᐃ ᑲᔦ ᐅᑎᔥᒀᑭᓱᐎᓂᓂ ᐃᐃ ᓅᔐᐱᔑᑮᓴᐞ᙮ ᒦᑕᔥ ᐃᐃ ᑳᐃᓍᑌᓂᒃ ᐅᐅ ᐃᔑᒋᑫᐎᓐ ᐗᑭᒐᔭᐄ ᓇᑫ ᒋᐅᒋᐯᑲᑭᒥᑣ ᑳᑮᐃᔑ ᐯᑫᑖᑯᓯᓯᒀ᙮

9:14b.HEB.009.014 ᑮᔥᐱᓐ ᐃᑕᔥ ᐅᐅ ᑌᐺ ᐃᔑᓭᒃ, ᐊᐗᔑᒣ ᑕᔥ X ᐅᒥᔅᑸᒻ ᓃᐱᐗᐞ ᑕᑲᔥᑭᐁᐎᓰᒪᑲᓂᓂ᙮ ᐋᓃᔥ ᐊᒑᑾᓐ ᑳᓀᐱᒋᐊᔮᓂᒡ ᐁᑮᑭᑭᔥᑳᑯᒡ ᑳᑮᐅᒋᑲᔥᑭᑑᒡ ᒋᐸᑭᑎᓇᕽ ᐅᐱᒫᑎᓯᐎᓐ ᐁᑮᐸᑭᑎᓇᒪᐙᒡ ᑭᔐᒪᓂᑑᓐ, ᐋᐱᒋ ᑾᔭᒃ ᐁᑮᐃᔑᓈᑯᓯᒡ᙮ ᐃᐃᒫ ᓴ ᑕᔥ ᑳᐃᔑᓈᓈᑲᑕᐌᑕᒪᕽ, ᒦ ᐃᒫ X ᐅᒥᔅᑸᒻ ᑕᐃᔑᐯᑭᒋᑫᒪᑲᓂᓂ, ᒋᑭᑭᓯᐙᓯᐗᕽ ᑳᐹᑖᐃᑯᐗᕽ ᐃᔑᒋᑫᐎᓇᓐ᙮ ᒦᑕᔥ ᐃᐃ ᑫᐃᔑᐊᓄᑮᑕᐗᕽ ᑳᐱᒫᑎᓯᒡ ᑭᔐᒪᓂᑑ᙮

9:15b.HEB.009.015 ᐃᓇᔥᑫ ᑕᔥ X ᐐᓂᑯ ᐅᓈᑲᒋᑑᓐ ᐃᐃ ᐅᔥᑭᐊᔓᑕᒫᑎᐎᓐ᙮ ᐃᑭ ᓴ ᑳᑮᑲᓅᓂᑯᐙᒡ ᑭᔐᒪᓂᑑᓐ ᐅᑲᑌᐱᓈᓈᐙ ᑳᑮᐊᔓᑕᒫᑯᐙᒡ ᐐᑳ ᑫᐴᓂᓭᓯᓂᓂᒃ᙮ ᐃᓇᔥᑫ ᑕᔥ ᑮᓂᐳ ᐁᑮᑎᐸᐙᒡ ᒋᐋᐸᐅᒥᓐᒡ ᑳᑮᐃᔑ ᒪᒋᑑᑕᒥᓂᒡ ᒣᒀ ᑫᑌᐊᔓᑕᒫᑎᐎᓐ ᑮᐋᐸᑕᓂᓂᒃ᙮

9:16b.HEB.009.016 ᐊᐎᔭ ᑕᔥ ᑮᐅᔑᑑᒡ ᓂᐳᐎᒪᓯᓇᐃᑲᓐ ᐋᓃᓐ ᑫᑑᒋᑳᑌᓂᑭᓐ ᐅᑕᔭᐄᒪᓐ ᐃᔥᒀᐱᒫᑎᓯᒡ, ᒦ ᓴ ᐁᔑᓈᑾᓂᓂᒃ ᐱᓇᒫ ᒋᓂᐳᒡ ᒋᑆ ᐋᐸᑕᓂᓂᒃ ᐃᐃ ᐊᔓᑕᒫᑎᐎᓐ ᑳᑮᐅᔑᑑᒡ᙮

9:17b.HEB.009.017 ᑳᐐᓐ ᐃᑕᔥ ᑫᑰᓐ ᐃᓈᐸᑕᓯᓂᓂ ᐊᔓᑕᒫᑎᐎᓐ, ᐊᐊ ᑳᑮᐅᔑᑑᒡ ᒣᒀ ᐁᐱᒫᑎᓯᒡ᙮ ᐹᓂᒫ ᑕᔥ ᑮᓂᐳᒡ ᑕᐋᐸᑕᓂᓂ᙮

9:18b.HEB.009.018 ᒦᑕᔥ ᐃᐃ ᓂᑕᒻ ᐊᔓᑕᒫᑎᐎᓐ ᑳᑮᐊᔮᒃ ᑳᑮᐅᒋ ᒫᒌ ᐊᓄᑮᒪᑲᒃ ᐁᑕ ᒥᔅᑶ ᐁᑮᐋᐸᑕᒃ᙮

9:19b.HEB.009.019 ᒨᓯᔅ ᐃᑕᔥ ᐊᐲ ᑮᐙᐐᑕᒪᐙᒡ ᐯᒫᑎᓯᓂᒡ ᐋᓃᓐ ᐁᑭᑑᒪᑲᓂᓂᒃ ᐅᓇᔓᐌᐎᓐ, ᒦᑕᔥ ᐅᐅ ᐹᓂᒫ ᑳᑮᐃᔑᒋᑫᒡ᙮ ᐃᓂ ᓴ ᐋᐯ ᐱᔑᑮᓴᐞ, ᒫᓇᑎᑾᐞ ᑲᔦ ᐅᒥᔅᑸᓂ ᐅᑮᐅᑖᐱᓈᓐ᙮ ᓂᐲᓂ ᑕᔥ ᐅᑮᑕᒀᑲᒥᓈᓐ᙮ ᒦᑕᔥ ᒨᓯᔅ ᑳᐃᔑᑎᑎᐱᓇᕽ ᐃᐃᒫ ᐃᓴᑉ ᒦᔖᑎᑰᓯᕽ ᐅᐲᐗᔨᓂ ᒫᓇᒑᓂᔕᓐ ᑳᑮᒥᔅᑾᑕᑌᓂᑭᓐ᙮ ᐅᑮᒉᑭᐲᓈᓐ ᐃᑕᔥ ᐃᐃᒫ ᐅᑕᒀᑲᒥᓂᑲᓂᕽ᙮ ᒦᑕᔥ ᑳᐃᔑᐅᓶᐲᑭᐌᐱᓇᕽ ᐃᐃ ᐅᑕᒀᑲᒥᓂᑲᓐ ᐃᐃᒫ ᐅᓇᔓᐌᐎ ᒪᓯᓇᐃᑲᓂᕽ, ᐯᒫᑎᓯᓂᒡ ᑲᔦ ᐁᑮᓴᓰᓶᐲᑭᐌᐱᓇᒪᐙᒡ᙮

9:20b.HEB.009.020 ᒦᑕᔥ ᐅᐅ ᒨᓯᔅ ᑳᑮᐃᑭᑐᒡ: ᒦ ᓴ ᐅᐅᐌᓂ ᒥᔅᑸᓂ ᑭᔐᒪᓂᑑ ᐁᔑᐅᓇᑕᒪᐎᓀᒃ ᐃᐃ ᐊᔓᑕᒫᑎᐎᓐ᙮ ᑭᓇᑕᐌᓂᒥᑯᐙ ᑲᔦ ᒋᓇᐃᑕᒧᐌᒃ᙮

9:21b.HEB.009.021 ᒦᑕᔥ ᑲᔦ ᐯᔑᑾᓐ ᑳᑑᑕᕽ ᐃᐃ ᑭᒋᐊᓇᒥᐁᐸᒀᓀᑲᒥᑯᓂ, ᐃᓂ ᑲᔦ ᑲᑭᓇ ᑫᑰᓇᓐ ᑳᑮᐋᐸᑕᓂᓂᑭᓐ ᑮᐊᓇᒥᐋᕽ, ᒥᔅᑸᓂ ᒥᓯᐌ ᐁᑮᐲᐙᑲᒥᐌᐱᓇᕽ᙮

9:22b.HEB.009.022 ᒦᑕᔥ ᐃᐃᒫ ᐅᓇᔓᐌᐎᓂᕽ ᐁᔑᓈᑾᒃ, ᑫᑳ ᑲᑭᓇ ᑫᑰᓐ ᐁᐅᒋᐯᑭᒋᑳᑌᒃ ᐃᐃᒫ ᒥᔅᑸᕽ᙮ ᑳᐐᓐ ᑲᔦ ᒪᒋᑑᑕᒧᐎᓐ ᑖᐴᓀᒋᑳᑌᓯᓅᓐ ᑮᔥᐱᓐ ᒥᔅᑶ ᓰᑭᓂᑳᑌᓯᓄᑭᐸᓐ᙮

9:23b.HEB.009.023 ᐅᓄ ᓴ ᐊᑮᐎᑫᑰᓇᓐ ᑳᑮᑲᑴ ᓈᐱᒋᑫᒪᑲᑭᓐ ᐋᓃᓐ ᐁᔑᐌᐸᒃ ᐌᑎ ᑭᒋᑮᔑᑯᕽ, ᐅᒋᑕᑯ ᑮᐃᔑᓈᑾᓅᓐ ᐅᐅ ᓇᑫ ᒥᔅᑸᕽ ᒋᑮᐃᔑᐯᑭᒋᑳᑌᑭᐸᓀᓐ᙮ ᐃᓂ ᑕᔥ ᐐᓐ ᑭᒋᑮᔑᑰᐎ ᑫᑰᓇᓐ ᐐᐯᑭᒋᑳᑌᑭᓐ, ᒦ ᐃ ᐁᔑᓈᑾᒃ ᒫᐗᒡ ᐃᑯ ᐌᓂᔑᔑᕽ ᐸᑭᑎᓈᓱᐎᓐ ᒋᑮᐋᐸᑕᑭᐸᓐ᙮

9:24b.HEB.009.024 ᑳᐐᓐ ᐃᑕᔥ ᐐᓐ ᐃᓂᓂᐗᓐ ᐅᑮᐅᔑᑑᓰᓂ ᐃᐃ ᑳᐃᔑᑯᑖᓀᑖᑾᓂᓂᒃ X ᑳᑮᐃᔑᐲᑎᑫᒡ᙮ ᐃᐃ ᐄᑐᒃ ᐃᓂᓃᐎ ᐅᔑᒋᑲᓐ ᑮᒥᒋᑲᑴᓈᐱᓈᑾᓐ ᐋᓃᓐ ᐁᔑᓈᑾᒃ ᑭᒋᑮᔑᑯᕽ᙮ ᐌᑎ ᑕᔥ ᐃᑯ ᒪᔮ ᑭᒋᑮᔑᑯᕽ ᑮᐃᔑᐲᑎᑫ, ᐁᓃᐸᐐᑕᒪᐎᓇᕽ ᐁᓈᓴᒦᓂᒡ ᑭᔐᒪᓂᑑᓐ᙮

9:25b.HEB.009.025 ᐊᐊ ᓴ ᒎᐎᐎ ᑭᒋᐊᓇᒥᐁᐎᑭᒫ ᓂᑖᐲᑎᑫ ᐃᐃᒫ ᒫᐗᒡ ᐃᑯ ᑳᐃᔑᑯᑖᓀᑖᑾᓂᓂᒃ ᐁᑕᓱ ᐯᔑᑯ ᑕᒀᑭᓐ, ᐁᑮᐲᑎᑲᑑᒡ ᒥᔅᑸᓂ ᑳᑎᐱᓇᐌᐎᓯᓯᒃ᙮ ᐊᐊᐌ ᑕᔥ X ᑳᑮᐃᔑᐲᑎᑫᒡ ᑭᒋᑮᔑᑯᕽ ᑳᐐᓐ ᐹᑏᓍ ᒋᐸᑭᑎᓂᑎᓱᒡ ᑳᑮᐅᒋᐲᑎᑫᒡ᙮

9:26b.HEB.009.026 ᑮᔥᐱᓐ ᐃᑕᔥ ᐅᐅ ᐁᔑᒋᑫᑯᐸᓀᓐ, ᐋᔕ ᒫᐐᓐ ᐹᑏᓍ ᑖᑮᐱᑲᒀᑕᑭᑑ ᐌᑎ ᐅᑖᓈᕽ ᓂᑕᒻ ᑮᐅᔑᒋᑳᑌᓂᒃ ᐊᑮᓂ ᐲᓂᔥ ᓅᑯᒻ᙮ ᐃᓇᔥᑫ ᑕᔥ ᐋᔕ ᑫᑳ ᐁᐅᒋᒋᓭᒃ ᐁᐐᐃᔥᒀᓭᒃ ᐅᐅᐌ ᐊᑭ, ᐋᐱᑎᕽ ᐃᑯ ᑮᓈᑯᓯ ᒋᐴᓀᒋᑳᑌᓂᒃ ᐯᒫᑎᓯᓂᒡ ᑳᑮᐃᔑ ᒪᒋᑑᑕᒥᓂᒡ, ᐸᑭᑎᓈᓱᐎᓂᕽ ᐁᑮᑎᓄᐎᒡ᙮

9:27b.HEB.009.027 ᐅᒋᑕᑯ ᐃᔑᓈᑾᓂᓂ ᐊᐎᔭ ᐋᐱᑎᕽ ᒋᓂᐳᒡ᙮ ᑮᐃᔥᒀᓂᐳᒡ ᐃᑕᔥ ᒦ ᐃ ᒋᑎᐹᑯᓂᑯᒡ ᑭᔐᒪᓂᑑᓐ᙮

9:28b.HEB.009.028 ᒦᑕᔥ ᐯᔑᑾᓐ X ᑫᐐᓐ ᐋᐱᑎᕽ ᑳᑮᐅᒋᐸᑭᑎᓂᓐᒡ ᐸᑭᑎᓈᓱᐎᓂᕽ ᒋᑎᓄᐎᒡ, ᐁᑮᐅᒋᑲᒀᑕᑭᑑᒡ ᑳᐹᑏᓄᓂᒡ ᐯᒫᑎᓯᓂᒡ ᑳᑮᐃᔑ ᒪᒋᑑᑕᒥᓂᒡ᙮ ᒦᓇᐙ ᑕᔥ ᐱᑕᑯᔑᕽ ᑳᐐᓐ ᐐᓐ ᒪᒋᑑᑕᒧᐎᓇᓐ ᐅᑲᐸᐹᐱᓯᔅᑫᑕᓰᓇᓐ᙮ ᐃᐃ ᓴ ᑳᐋᔅᑯᓂᐲᐃᑯᒡ ᐅᑲᐱᒫᒋᐋᐞ᙮

10

10:1b.HEB.010.001 ᐃᐃ ᓴ ᒎᐎᐎ ᐅᓇᔓᐌᐎᓐ ᒦ ᐃ ᐁᔑᓈᑾᒃ, ᑖᐱᔥᑰ ᑫᑰᓐ ᑳᐋᑲᐙᑌᓯᕽ ᐁᑮᑲᑴ ᓈᐱᓈᑾᒃ ᑳᐐᐃᔑᓈᑾᑭᓐ ᐃᓂ ᑳᐅᓂᔑᔑᑭᓐ ᑫᑰᓇᓐ ᑳᐐᐱ ᑕᑯᔑᓅᒪᑲᑭᓐ᙮ ᐋᓃᔥ ᐅᓇᔓᐌᐎᓐ ᑳᐐᓐ ᒪᔮ ᐋᐗᓯᓅᓐ ᑳᐐᐱ ᑕᑯᔑᓅᒪᑲᒃ᙮ ᐃᓂ ᑕᔥ ᐯᔑᑾᓐ ᐸᑭᑎᓈᓱᐎᓇᓐ ᐸᑭᑎᓂᑳᑌᐗᓐ ᐁᑕᓱᑭᑭᓅᓄᐎᓐ᙮ ᐃᓂ ᑕᔥ ᐸᑭᑎᓈᓱᐎᓇᓐ ᒨᔕᒃ ᐁᐸᑭᑎᓂᑳᑌᑭᓐ ᑳᐐᓐ ᑌᐺ ᐅᒋᑮᔑᓈᑯᓯᓰᐗᒃ ᐃᑭ ᐯᔓ ᑳᐱᓈᓯᑲᐙᐙᒡ ᑭᔐᒪᓂᑑᓐ᙮

10:2b.HEB.010.002 ᑮᔥᐱᓐ ᑕᔥ ᑌᐺ ᐃᑭ ᐯᒫᑎᓯᐙᒡ ᑳᑮᐊᓇᒥᐁᑕᐙᐙᒡ ᑭᔐᒪᓂᑑᓐ ᑮᐯᑭᐋᐎᑣᐸᓐ ᐅᒪᒋᑑᑕᒧᐎᓂᐙᕽ ᐅᒋ, ᑳᐐᓐ ᐄᑐᒃ ᐅᑖᑭᒥᑯᔥᑳᑌᑕᒧᐃᑯᓰᓈᐙᓐ ᐅᒪᒋᑑᑕᒧᐎᓂᐙᓐ᙮ ᑲᑭᓇ ᑕᔥ ᐸᑭᑎᓈᓱᐎᓇᓐ ᑖᑮᐴᓂᓭᐗᓐ᙮

10:3b.HEB.010.003 ᐃᓂ ᑕᔥ ᑳᐃᔑ ᐸᑭᑎᓈᓱᓈᓂᐗᓂᓂᒃ ᐁᑕᓱᑭᑭᓅᓄᐎᓐ, ᒦ ᓴ ᐃᐃᒫ ᐋᒋᑯ ᐯᒫᑎᓯᐙᒡ ᑳᐃᔑ ᑮᐌ ᒫᒥᑲᐎᐙᒡ ᐅᒪᒋᑑᑕᒧᐎᓂᐙᓐ᙮

10:4b.HEB.010.004 ᐃᑭ ᑕᔥ ᐋᐯ ᐱᔑᑮᓴᒃ, ᒫᓇᑎᑾᒃ ᑲᔦ ᐅᒥᔅᑸᒥᐙᓐ ᑳᐐᓐ ᐐᑳ ᐃᐃᒫ ᒪᒋᑑᑕᒧᐎᓇᓐ ᑖᐅᒋ ᐅᑖᐱᓂᑳᑌᓯᓅᓇᓐ᙮

10:5b.HEB.010.005 ᐃᓇᔥᑫ ᑕᔥ ᐐᓐ ᐊᐲ X ᑮᐐᐱᑕᑯᔑᕽ ᐅᐅᒫ ᐊᑮᕽ, ᐅᐅ ᓴ ᐅᑮᐃᓈᓐ ᑭᔐᒪᓂᑑᓐ: ᑳᐐᓐ ᓴ ᑭᓇᑕᐌᑕᓰᓇᓐ ᐃᓂ ᐸᑭᑎᓈᓱᐎᓇᓐ ᐃᓂ ᑲᔦ ᐸᑭᑎᓂᑫᐎᓇᓐ᙮ ᑭᑮᑾᔮᒋᑕᒪᐎᔥ ᐃᑕᔥ ᐐᔭᐤ᙮

10:6b.HEB.010.006 ᑳᐐᓐ ᑲᔦ ᑭᒥᓍᐸᒫᓰᒃ ᐊᔭᐋᐎᔕᒃ ᑮᒥᓯᐌᒑᑭᓱᑣ ᐃᐃᒫ ᑳᔑᐸᑭᑎᓈᓱᕽ, ᑳᐐᓐ ᑲᔦ ᑭᒥᓍᐸᑕᓰᓇᓐ ᐃᓂ ᐸᑭᑎᓈᓱᐎᓇᓐ ᑳᐸᑭᑎᓂᑳᑌᑭᓐ ᒋᐅᒋᐅᑖᐱᓂᑳᑌᑭᓐ ᒪᒋᑑᑕᒧᐎᓇᓐ᙮

10:7b.HEB.010.007 ᒦᑕᔥ ᐅᐅ ᑳᐃᑭᑑᔮᓐ: ᐃᓇᔥᑫ ᑕᔥ ᓃᓐ ᓂᑕᑯᔑᓐ, ᐁᐐᑑᑕᒪᓐ ᑳᐃᔑᒥᓴᐌᑕᒪᓐ, ᑭᔐᒪᓂᑑ, ᐋᓃᔥ ᒦᐃ ᐁᔑᐲᐃᑳᑌᒃ ᐃᐃ ᐅᓇᔓᐌᐎᒪᓯᓇᐃᑲᓂᕽ ᑳᐃᔑᑕᔑᓱᔮᓐ᙮

10:8b.HEB.010.008 ᐅᐅᐌ ᑕᔥ ᑮᐃᑭᑐ: ᑳᐐᓐ ᑭᓇᑕᐌᑕᓰᓇᓐ, ᑳᐐᓐ ᑲᔦ ᑭᒥᓍᐸᑕᓰᓇᓐ ᐃᓂ ᐸᑭᑎᓈᓱᐎᓇᓐ, ᒦᑭᐌᐎᓇᓐ ᑲᔦ᙮ ᑳᐐᓐ ᑲᔦ ᑭᒥᓍᐸᒫᓰᒃ ᑳᒥᓯᐌᒑᑭᓱᑣ ᐊᔭᐋᐎᔕᒃ ᐃᐃᒫ ᑳᐃᔑᐸᑭᑎᓈᓱᕽ, ᐃᓂ ᑲᔦ ᐸᑭᑎᓈᓱᐎᓇᓐ ᑳᐸᑭᑎᓂᑳᑌᑭᓐ ᒋᐅᒋᐅᑖᐱᓂᑳᑌᑭᓐ ᒪᒋᑑᑕᒧᐎᓇᓐ᙮ ᔖᑰᒡ ᐃᑕᔥ ᐅᐅ ᑮᐃᑭᑐ ᐋᓇᐐᓐ ᐃᓂ ᐸᑭᑎᓈᓱᐎᓇᓐ ᐁᑮᑑᒋᑳᑌᑭᓐ ᐋᓃᓐ ᐁᑭᑑᒪᑲᒃ ᐃᐃ ᐅᓇᔓᐌᐎᓐ᙮

10:9b.HEB.010.009 ᒦᓇᐙ ᑕᔥ ᑮᐃᑭᑐ: ᐃᓇᔥᑫ ᑕᔥ ᓃᓐ ᓂᑕᑯᔑᓐ, ᐁᐐᑑᑕᒫᓐ ᑳᐃᔑᒥᓴᐌᑕᒪᓐ᙮ ᑭᔐᒪᓂᑑ ᑕᔥ ᐅᑮᐌᐯᑖᓇᓐ ᐃᓂ ᑫᑌᐸᑭᑎᓈᓱᐎᓇᓐ᙮ ᐃᐃᐌᓂ ᑕᔥ Xᑕᓐ ᑳᑮᐸᑭᑎᓈᓱᓂᒡ, ᒦ ᓴ ᐃᐃᐌᓂ ᑳᐅᑖᐱᓇᕽ᙮

10:10b.HEB.010.010 ᒋᓴᔅ X ᑕᔥ ᐁᑮᐃᔑᒋᑫᒡ ᐋᓃᓐ ᑳᑮᐃᔑᐊᑕᐌᑕᒥᓂᒡ ᑭᔐᒪᓂᑑᓐ, ᒦ ᓴ ᑮᓇᐎᓐᑦ ᑳᐅᒋᐯᑭᐃᑰᔭᕽ ᒪᒋᑑᑕᒧᐎᓂᕽ ᐅᒋ ᒋᓈᓯᑲᐎᒪᕽ ᑭᔐᒪᓂᑑᓐ᙮ ᐋᓃᔥ ᐅᑮᐸᑭᑎᓈᓐ ᐋᐱᑎᕽ ᐅᐐᔭᐤ, ᒦ ᐃ ᑲᑭᓇ ᑫᑰᓂᓂ ᐐᑫ ᑮᑌᑲᔥᑭᑑᒡ᙮

10:11b.HEB.010.011 ᒦᑕᔥ ᒎᐎ ᐊᓇᒥᐁᐎᑭᒫ ᓃᐸᐎ ᐁᔑᐊᓇᒥᐁᐗᓄᑮᒡ ᐁᑕᓱᑮᔑᒃ ᐁᐸᑭᑎᓇᕽ ᐃᓂ ᐯᔑᑾᓐ ᐸᑭᑎᓈᓱᐎᓇᓐ᙮ ᑳᐐᓐ ᑕᔥ ᐃᐃᒫ ᐐᑳ ᐃᓇᑫ ᐅᒋᐅᑖᐱᓂᑳᑌᓯᓅᓇᓐ ᒪᒋᑑᑕᒧᐎᓇᓐ᙮

10:12b.HEB.010.012 X ᐃᑕᔥ ᐐᓐ ᐋᐱᑎᕽ ᐁᑕ ᑮᐸᑭᑎᓈᓱ ᐅᒪᒋᑑᑕᒧᐎᓂᓂ ᐯᒫᑎᓯᓂᒡ ᐅᒋ, ᐐᓐ ᐃᑯ ᐁᑮᐸᑭᑎᓇᕽ ᐅᐱᒫᑎᓯᐎᓐ; ᑳᐐᓐ ᐃᑕᔥ ᐐᑳ ᑖᐃᔥᒀᓭᓯᓂᓂ ᐃᐃ ᑳᑮᐃᔑᒋᑫᒡ᙮ ᒦᑕᔥ ᑳᐃᔑᐅᓇᐱᒡ ᐅᑭᒋᓂᑭᓃᕽ ᐃᓇᑫ ᑭᔐᒪᓂᑑᓐ᙮

10:13b.HEB.010.013 ᒦᑕᔥ ᐌᑎ ᐁᑕᔑᐲᐋᒡ ᑭᔐᒪᓂᑑᓐ, ᒋᐸᑕᐱᓈᓂᒡ ᐃᐃ ᑳᔒᑫᓂᒥᑯᒡ ᑖᐱᔥᑰ ᐅᑕᐱᓯᑌᐱᐎᓂᕽ ᒋᐃᔑᓈᑯᓯᓂᒡ᙮

10:14b.HEB.010.014 ᐋᐱᑎᕽ ᐃᑕᔥ ᐁᑮᐸᑭᑎᓈᓱᒡ, ᒦ ᓴ ᐃᐃᒫ ᑳᐅᒋ ᓀᐱᒋ ᑮᔑᓈᑯᓯᐃᒥᓐᒡ ᐃᐃ ᑳᐯᑭᐃᒥᓐᒡ ᐅᒪᒋᑑᑕᒧᐎᓂᓃᕽ ᐅᒋ᙮

10:15b.HEB.010.015 ᑭᔐᒪᓂᑑ ᑕᔥ ᑲᔦ ᐅᑕᒑᑾᓐ ᑭᓈᑯᑕᒫᑯᓈᓐ ᐁᑌᐺᐗᓂᓂᒃ᙮ ᐋᓃᔥ ᐅᐅ ᓂᑕᒻ ᑮᐃᑭᑐᐗᓐ:

10:16b.HEB.010.016 ᓂᑯᑎᕽ ᐃᑕᔥ ᑮᔑᑲᓂᓂᒃ, ᐃᑭᑐ ᑳᑎᐯᒋᑫᒡ, ᓂᑲᐅᔑᑕᒪᐙᒃ ᐃᓴ ᐃᐃ ᐊᔓᑕᒫᑎᐎᓂᓂ᙮ ᓂᑲᐊᑖᐙᓇᓐ ᓂᑑᓇᔓᐌᐎᓇᓐ ᐃᐃᒫ ᐅᑌᐃᐙᕽ, ᓂᑲᐅᔑᐲᐊᒧᐙᓇᓐ ᑲᔦ ᐃᐃᒫ ᐅᑎᓀᑕᒧᐎᓂᐙᕽ᙮

10:17b.HEB.010.017 ᒦᑕᔥ ᐅᐅ ᐁᓂ ᐃᑭᑐᓂᒡ: ᓂᑲᓀᐱᒋ ᐗᓃᑫᓄᑕᒧᐙᓇᓐ ᓴ ᐅᒪᒋᑑᑕᒧᐎᓂᐙᓐ, ᐃᓂ ᑲᔦ ᓅᒋᑯ ᐅᑎᔑᒋᑫᐎᓂᐙᓐ᙮

10:18b.HEB.010.018 ᐅᓄ ᑕᔥ ᐋᔕ ᐁᑮᐴᓀᒋᑳᑌᑭᓐ, ᑳᐐᓐ ᒦᓇᐙ ᒣᒬᒡ ᐸᑭᑎᓈᓱᐎᓇᓐ ᑕᐋᐸᑕᓯᓅᓇᓐ᙮

10:19b.HEB.010.019 ᓃᒋᐅᑌᐺᑕᒨᒃ, ᑫᑮᓇᐎᓐᑦ ᐃᑕᔥ ᑭᑕᔮᒥᓐ ᑫᒋᓈᐅᐎᓐ ᑫᐅᒋᐲᑎᑫᔭᕽ ᒫᐗᒡ ᐃᑯ ᑳᐃᔑᑯᑖᓀᑖᑾᒃ ᐲᑎᒃ ᐃᐃᒫ ᑭᔐᒪᓂᑑ ᑳᐃᔑᐊᓇᒥᐁᑕᐎᓐᒡ; ᐋᓃᔥ ᒋᓴᔅ ᐅᒥᔅᑶ ᑮᒦᑭᐌ᙮

10:20b.HEB.010.020 ᑭᑮᐹᑭᑌᓇᒫᑯᓈᓐ ᐃᑕᔥ ᐅᔥᑭ ᐃᔖᐎᓐ, ᑭᑮᒦᓂᑯᓈᓐ ᑲᔦ ᐅᔥᑭᐱᒫᑎᓯᐎᓐ᙮ X ᐃᑕᔥ ᐅᐐᔭᐎᕽ ᑭᑲᐅᒋᑲᔥᑭᐅᐙᒥᓐ ᒋᐲᑎᑫᐗᕽ ᐃᐃᒫ ᐊᐗᓯᓇᑫ ᑭᐲᑲᐃᑲᓂᕽ ᑳᑮᑭᐸᑰᑌᓂᒃ᙮

10:21b.HEB.010.021 ᑭᑕᔮᐙᓈᓐ ᐋᓃᔥ ᐁᑭᒋ ᐃᓀᑖᑯᓯᒡ ᐊᓇᒥᐁᐎᑭᒫ ᑫᓇᐙᐸᑕᕽ ᑭᔐᒪᓂᑑᓐ ᐅᐙᑳᐃᑲᓂᓂ᙮

10:22b.HEB.010.022 ᐁᑫᒋᓈᐅᔭᕽ ᐃᑕᔥ ᑭᑌᐃᓈᓂᕽ, ᑫᒋᓈᒡ ᑲᔦ ᐁᑌᐺᔦᑕᒪᕽ, ᑕᑲ ᐯᔓ ᓈᓯᑲᐙᑖ ᑭᔐᒪᓂᑑ᙮ ᐋᓃᔥ ᑳᐅᒋᓈᓈᑲᑕᐌᑕᒪᕽ ᑮᐯᑳᐹᐗᒋᑳᑌᐗᓐ ᐐᑳ ᒦᓇᐙ ᒋᓈᓈᑲᑕᐌᑕᓯᐗᕽ ᑳᑮᐱ ᐃᔑ ᒪᒋᑑᑕᒪᕽ᙮ ᑭᐐᔭᐎᓈᓂᓐ ᑲᔦ ᑮᐯᑳᐹᐗᒋᑳᑌᐗᓐ ᐯᑭᓂᐱ ᐁᐋᐸᑕᒃ᙮

10:23b.HEB.010.023 ᑕᑲ ᑕᔥ ᐋᔩᒋᒥᒋᒥᓇᑖ ᐃᐃ ᑳᐐᑕᒪᕽ ᑭᑕᐯᓂᒧᐎᓂᓈᓐ, ᐋᓃᔥ ᑭᑌᐺᑕᐙᓈᓐ ᑭᔐᒪᓂᑑ ᒋᑑᑕᕽ ᐅᑕᔓᑕᒫᑫᐎᓐ᙮

10:24b.HEB.010.024 ᑕᑲ ᑕᔥ ᓈᓈᑲᑕᐌᑕᑖ ᐋᓃᓐ ᑫᔑᐙᐐᒋᐃᑎᔭᕽ ᒋᓵᑭᐃᑎᔭᕽ, ᒋᒥᓄᑑᑖᑎᔭᕽ ᑲᔦ᙮

10:25b.HEB.010.025 ᑕᑲ ᑲᔦ ᑳᐐᓐ ᑮᓇᐎᓐᑦ ᑭᑲᐸᑭᒌᓰᒥᓐ ᒋᐃᔖᔭᕽ ᑳᐃᔑᐊᔫᑾᐱᔭᕽ ᑳᐊᓇᒥᐋᔭᕽ᙮ ᐋᓃᔥ ᐋᓂᑕ ᐅᐅ ᐃᔑᒋᑫᐗᒃ᙮ ᑕᑲ ᑕᔥ ᒫᓄ ᑲᑴᐐᒋᐃᑎᑖ ᐁᑕᓱᐯᔑᑯᔭᕽ, ᐋᓃᔥ ᐋᔕ ᑫᑳ ᐅᒋᒋᓭᓂ ᓂᑯᑎᕽ ᑮᔑᑲᓂᓂᒃ ᑳᑎᐯᒋᑫᒡ ᒋᑕᑯᔑᕽ᙮

10:26b.HEB.010.026 ᑮᔥᐱᓐ ᐃᑕᔥ ᑲᑳᒋᒡ ᐊᓂᒪᒋᑑᑕᒪᕽ ᐁᑮᐃᔥᒀᑭᑫᑕᒪᕽ ᐃᐃ ᑌᐺᐎᓐ, ᑳᐐᓐ ᒦᓇᐙ ᐊᐗᔑᒣ ᐊᔮᓯᓅᓐ ᐸᑭᑎᓈᓱᐎᓐ ᑫᐅᒋᐴᓀᒋᑳᑌᑭᐸᓐ ᐃᐃ ᒪᒋᑑᑕᒧᐎᓐ᙮

10:27b.HEB.010.027 ᒦᑕᔥ ᐁᑕ ᑯ ᐁᔑᓈᑾᒃ ᒋᑯᑖᓀᑕᒪᑭᐸᓐ ᐃᐃ ᑳᐐᐱᑕᑯᔑᓅᒪᑲᒃ ᑎᐹᑯᓂᑫᐎᓐ, ᐃᐃ ᑲᔦ ᑳᐋᑾᑾᓀᒃ ᐃᔥᑯᑌ ᑫᓂᔑᐗᓈᒋᐃᑯᐙᒡ ᐃᑭ ᑳᔕᔒᐱᑕᐙᐙᒡ ᑭᔐᒪᓂᑑᓐ᙮

10:28b.HEB.010.028 ᐊᐎᔭ ᑮᔕᔒᐱᑕᕽ ᒨᓯᔅ ᐅᑑᓇᔓᐌᐎᓐ ᒣᐎᔕ, ᒦᑕᔥ ᐅᐅ ᑳᑑᒋᑲᓂᐎᒡ: ᑮᔥᐱᓐ ᓃᔑᓐ 2, ᑯᒫ ᑲᔦ ᓂᓯᓐ 3 ᐊᐎᔭᒃ ᑮᑎᐹᒋᒥᑯᒡ, ᒦ ᓴ ᔐᒫᒃ ᐃᑯ ᑳᐃᔑᓂᓯᓐᒡ᙮ ᑳᐐᓐ ᐐᓐ ᐊᐎᔭ ᑮᒪᓈᒋᒋᑲᓂᐎᓰ᙮

10:29b.HEB.010.029 ᐊᐎᔭ ᑕᔥ ᐐᓐ ᑳᐋᓇᐌᓂᒫᒡ ᑭᔐᒪᓂᑑᓐ ᐅᑯᓯᓯᓂ, ᐊᐎᔭ ᑲᔦ ᑳᐋᓇᐌᑕᕽ ᐃᐃ ᒥᔅᑸᓂ ᑭᔐᒪᓂᑑᓐ ᑳᑮᐃᔑᐅᓇᑕᒫᑫᓂᒡ ᐊᔓᑕᒫᑎᐎᓐ, ᒦ ᐄᑐᒃ ᐃᐃᒫ ᑳᑮᐅᒋᐯᑭᐃᓐᒡ, ᐋᒋᑯ ᑕᔥ ᑲᔦ ᐁᐹᐱᓄᑕᐙᒡ ᐃᓂ ᑳᑭᔐᐙᑎᓯᓂᒡ ᑭᔐᒪᓂᑑᓐ ᐅᑕᒑᑯᓂ – ᑳᐐᓐ ᐃᓇ ᑭᑎᓀᑕᓰᒻ ᐋᐱᒋ ᐊᐗᔑᒣ ᒋᑭᒋᑲᒀᑕᑭᐃᑎᐸᓐ?

10:30b.HEB.010.030 ᑭᑭᑫᓂᒫᓈᓐ ᑕᔥ ᐊᐊ ᑳᑮᐃᑭᑐᒡ: ᓃᓐ ᓴ ᐃᔑᓈᑾᓐ ᒋᓇᓈᑯᓇᒫᑫᔮᓐ, ᓃᓐ ᑲᔦ ᓂᑲᑮᐌᑎᐸᐃᑫ᙮ ᒦᓇᐙ ᑕᔥ ᑮᐊᓂ ᐃᑭᑐ: ᑳᑎᐯᒋᑫᒡ ᓴ ᐅᑲᑎᐹᑯᓈᐞ ᑳᑎᐯᓂᒫᒡ ᐅᐱᒫᑎᓰᒪᐞ᙮

10:31b.HEB.010.031 ᐋᐱᒋ ᐅᔕ ᑕᑭᒋᑯᑖᓀᑖᑾᓂᓂ ᐊᐎᔭ ᑌᐱᓂᑯᒡ ᑳᐱᒫᑎᓯᓂᒡ ᑭᔐᒪᓂᑑᓐ᙮

10:32b.HEB.010.032 ᒫᒥᑲᐎᒃ ᐃᑕᔥ ᐅᑖᓈᕽ ᑳᑮᐱ ᐃᔑᓭᔦᒃ ᐊᐲ ᑮᐃᔥᒀ ᑭᑫᑕᒣᒃ ᑳᐙᓭᔮᒃ, ᐋᐱᒋ ᓴ ᑭᑮᔕᔒᐯᑖᒻ ᐃᓂ ᑲᒀᑕᑭᑑᐎᓇᓐ, ᑳᐐᓐ ᑲᔦ ᑭᑮᔖᑰᒋᐃᑰᐎᓯᓰᒻ᙮

10:33b.HEB.010.033 ᓂᑯᑎᕽ ᑲᔦ ᐁᑮᐙᐸᒥᑰᔦᒃ ᒧᔐ ᐁᑮᑕᔑ ᒦᑭᓱᒥᑰᔦᒃ, ᓅᒋᑯ ᑲᔦ ᐁᑮᑑᑖᑰᔦᒃ, ᓂᑯᑎᕽ ᑲᔦ ᐁᑮᑮᔐᑕᒣᒃ ᐁᐐᐐᒋ ᑲᒀᑕᑭᑑᒣᒀ ᐃᑭ ᓅᒋᑯ ᑳᑮᑑᑕᐎᑣ᙮

10:34b.HEB.010.034 ᑭᑮᐐᒋ ᑲᒀᑕᑭᑑᒫᐙᒃ ᑲᔦ ᐃᑭ ᑕᑯᓂᑲᓇᒃ ᑳᐃᔑᑲᒀᑕᑭᑑᐙᒡ᙮ ᐊᐲ ᑲᔦ ᑮᒪᑲᒥᑰᔦᒃ ᑭᑕᔨᐄᒥᐙᓐ, ᐋᒋᑯ ᑭᑮᒌᑫᑖᒻ, ᐋᓃᔥ ᑭᑮᑭᑫᑖᒻ ᑫᔮᐱ ᐁᐊᔮᔦᒃ ᓇᐗᒡ ᑳᐅᓂᔑᔑᒃ ᐐᑳ ᑫᐴᓂᐊᔮᓯᓄᒃ᙮

10:35b.HEB.010.035 ᐅᐅ ᑕᔥ ᐁᐱᐊᔨᔑᓭᔦᒃ, ᑫᑯ ᑕᔥ ᐌᐱᓇᑫᒃ ᐃᐃ ᑳᐃᔑᑫᒋᓈᐅᔦᒃ, ᐋᓃᔥ ᒦ ᐃᒫ ᑫᐅᑎᓇᒣᒃ ᐃᐃ ᑭᒋᑎᐸᐊᒫᑰᐎᓐ᙮

10:36b.HEB.010.036 ᐃᔑᓈᑾᓐ ᐅᔕ ᒋᔕᔒᐯᑕᒣᒃ ᒋᑑᑕᒧᐌᒃ ᑭᔐᒪᓂᑑ ᑳᐃᔑᒥᓴᐌᑕᕽ, ᒋᑌᐱᓇᒧᐌᒃ ᑲᔦ ᐃᐃ ᑳᑮᐊᔓᑕᒫᑫᒡ᙮

10:37b.HEB.010.037 ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐋᐱᒋ ᓴ ᐐᐸ ᑕᑕᑯᔑᓐ ᐊᐊ ᑳᐐᑕᑯᔑᕽ, ᑳᐐᓐ ᑕᑆᑕᐐᓰ᙮

10:38b.HEB.010.038 ᐊᐊ ᓴ ᓂᑾᔭᒀᑎᓰᒻ ᐅᑌᐺᑕᒧᐎᓂᕽ ᑕᐃᔑᐱᒫᑎᓯ᙮ ᑮᔥᐱᓐ ᑕᔥ ᐊᐎᔭ ᓅᑌᐊᔐᑮᐌᒡ, ᑳᐐᓐ ᓂᑲᒥᓍᐸᒫᓰ᙮

10:39b.HEB.010.039 ᑮᓇᐎᓐᑦ ᐃᑕᔥ ᑳᐐᓐ ᑭᑎᓄᐎᓰᒥᓐ ᑳᓅᑌᑮᐌᐙᒡ ᑫᓂᔑᐗᓈᑎᓯᐙᒡ᙮ ᐃᑭ ᐅᔕ ᑭᑎᓄᐎᒥᓐ ᐅᑌᐺᑕᒧᐎᓂᐙᕽ ᑫᐅᒋᐱᒫᒋᐃᑣ᙮

11

11:1b.HEB.011.001 ᐃᓇᔥᑫ ᑕᔥ, ᑳᐅᑌᐺᔦᑕᒧᐎᓂᔭᕽ ᑭᑐᒋᑫᒋᓈᐅᒥᓐ ᐃᓂ ᑫᑰᓇᓐ ᑳᐊᐯᓂᒧᓄᑕᒪᕽ ᑌᐺ ᐁᐊᔮᑭᓐ, ᑭᑑᒋᑭᑫᑖᒥᓐ ᑲᔦ ᑫᒋᓈᒡ ᐁᐊᔮᑭᓐ ᑫᑰᓇᓐ ᑳᐙᐸᒋᑳᑌᓯᓄᑭᓐ᙮

11:2b.HEB.011.002 ᐅᑌᐺᔦᑕᒧᐎᓂᐙᕽ ᐄᑐᒃ ᒣᐎᔕ ᐃᓂᓂᐗᒃ ᑳᑮᐱᒫᑎᓯᐙᒡ ᐅᑮᐅᒋᒥᓍᐸᒥᑯᐙᓐ ᑭᔐᒪᓂᑑᓐ᙮

11:3b.HEB.011.003 ᑌᐺᔦᑕᒧᐎᓂᕽ ᓴ ᓂᑑᒋᓂᓯᑐᑖᒥᓐ ᑲᑭᓇ ᑫᑰᓇᓐ ᑮᔑᑯᕽ ᑳᐊᔮᑭᓐ ᐊᑮᕽ ᑲᔦ ᐁᑮᐅᒋᐅᔑᒋᑳᑌᑭᓐ ᐃᐃᒫ ᑭᔐᒪᓂᑑ ᐅᑎᑭᑐᐎᓂᕽ᙮ ᐃᓂ ᑕᔥ ᑳᓈᑾᑭᓐ ᑮᐅᒋᐅᔑᒋᑳᑌᐗᓐ ᐃᐃᒫ ᑫᑰᓂᕽ ᑳᓈᑾᓯᓄᑭᓐ᙮

11:4b.HEB.011.004 ᑌᐺᔦᑕᒧᐎᓂᕽ ᓴ ᐁᐸᓬ ᑳᑮᐅᒋᐸᑭᑎᓇᒪᐙᑯᐸᓀᓐ ᑭᔐᒪᓂᑑᓐ ᓇᐗᒡ ᑳᑮᐅᓂᔑᔑᓂᓂᒃ ᐸᑭᑎᓈᓱᐎᓐ ᐊᐲᒡ ᐐᓐ ᐃᓂᐌᓂᐗᓐ ᑫᓇᓐ ᙮ ᒦ ᓴ ᑕᔥ ᐃᐃ ᑳᑮᐅᒋᒥᓍᐸᒥᑯᑯᐸᓀᓐ ᑭᔐᒪᓂᑑᓐ ᐁᑮᐃᓇᑭᒥᑯᒡ ᐅᑾᔭᒀᑎᔅ, ᐋᓃᔥ ᐅᑮᒥᓍᐸᑕᒥᓂ ᐅᒦᑭᐌᐎᓐ᙮ ᐋᓇ ᑕᔥ ᐐᓐ ᓅᑯᒻ ᐁᐱᒫᑎᓯᓯᒃ ᒦ ᐃᐌ ᐁᔑᓈᑾᓂᓂᒃ ᐅᑌᐺᔦᑕᒧᐎᓂᕽ ᑫᔮᐱ ᐁᐅᒋᑳᑮᑭᑐᒡ᙮

11:5b.HEB.011.005 ᐄᓄᒃ ᐃᑕᔥ ᐅᑌᐺᔦᑕᒧᐎᓂᕽ ᑳᑮᐅᒋ ᐃᔑᐎᓂᓐᒡ ᐃᔥᐱᒥᕽ, ᑳᑮᐅᒋ ᐅᑎᓵᐸᑕᓯᑯᐸᓀᓐ ᒋᓂᐳᒡ᙮ ᑭᔐᒪᓂᑑᓐ ᓴ ᐅᑮᒥᒋ ᐅᑖᐱᓂᑰᓐ, ᒦᑕᔥ ᐊᐎᔭᐞ ᑳᑮᐅᒋᒥᑳᑯᓯᒃ᙮ ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ: ᐋᐱᒋ ᐄᓈᒃ ᐅᑮᒥᓍᐸᒥᑰᓐ ᑭᔐᒪᓂᑑᓐ ᒋᑆ ᒫᒌᓂᑯᒡ᙮

11:6b.HEB.011.006 ᑳᐐᓐ ᐃᑕᔥ ᐊᐎᔭ ᐅᑖᒥᓍᐸᒥᑯᓰᓐ ᑭᔐᒪᓂᑑᓐ ᑮᔥᐱᓐ ᐊᔮᓯᒃ ᑌᐺᔦᑕᒧᐎᓐ᙮ ᐊᐎᔭ ᓴ ᑳᐱᓈᓯᑲᐙᒡ ᑭᔐᒪᓂᑑᓐ ᒦ ᐃ ᐁᔑᓈᑾᓂᓂᒃ ᒋᑌᐺᔦᓂᒫᒡ ᐁᐊᔮᓂᒡ, ᐁᑎᐸᐊᒪᐙᓂᒡ ᑲᔦ ᐌᐌᓂ ᑳᐊᑐᓀᐅᑯᓂᒡ᙮

11:7b.HEB.011.007 ᓅᐗ ᐅᔕ ᐅᑌᐺᔦᑕᒧᐎᓂᕽ ᑳᑮᐅᒋᓅᑕᐙᑯᐸᓀᓐ ᑭᔐᒪᓂᑑᓐ ᓃᔮᒃ ᐁᑮᐐᑕᒫᑯᒡ ᐋᓃᓐ ᐙᐊᓂ ᐃᔑᐌᐸᓂᓂᒃ, ᐋᓇᐐᓐ ᐁᑮᐙᐸᑕᓯᒃ, ᐅᑮᓇᐃᑕᐙᓐ ᐁᑯᑖᓀᓂᒫᒡ ᑭᔐᒪᓂᑑᓐ᙮ ᒦᑕᔥ ᑳᑮᐅᔑᑑᒡ ᑭᒋᒥᑎᑯᒌᒫᓐ ᐋᑎ ᑫᐅᒋᐱᒫᑎᓯᒡ, ᐃᐃ ᑲᔦ ᑲᑭᓇ ᑳᑕᔑᒡ ᐅᑖᐎᓂᕽ᙮ ᒦᑕᔥ ᐅᑌᐺᑕᒧᐎᓂᕽ ᑳᑮᐃᔑᓈᑯᑕᒪᐙᒡ ᑯᑕᒃ ᐯᒫᑎᓯᓂᒡ ᓭᓯᒃ ᐁᑮᐃᔑᐱᒫᑎᓯᓯᓂᒃ, ᑳᑮᐅᒋᑌᐱᓇᕽ ᑲᔦ ᑾᔭᒀᑎᓯᐎᓐ ᑌᐺᔦᑕᒧᐎᓂᕽ ᑳᐅᒌᓂᒃ᙮

11:8b.HEB.011.008 ᐁᐸᕒᐊᐋᒻ ᓴ ᐅᑌᐺᔦᑕᒧᐎᓂᕽ ᑳᑮᐅᒋᓇᐃᑕᐙᑯᐸᓀᓐ ᑭᔐᒪᓂᑑᓐ ᑮᑲᓅᓂᑯᒡ ᐸᑳᓐ ᐊᑮᕽ ᒋᐃᔖᒡ, ᐁᑮᐊᔓᑕᒫᑯᒡ ᐊᑮᓂ ᐁᐐᒦᓂᑯᒡ ᒋᐊᔮᒡ᙮ ᐅᑮᓇᑲᑖᓐ ᐃᑕᔥ ᐅᑕᑮᒻ ᐁᑮᑭᑫᑕᓯᒃ ᐋᑎ ᐁᔖᒡ᙮

11:9b.HEB.011.009 ᐁᑮᑌᐺᑕᕽ ᐃᑕᔥ ᑳᑮᐅᒋ ᐊᔨᔑᑖᒡ ᐃᐃᒫ ᐊᑮᕽ ᑭᔐᒪᓂᑑᓐ ᑳᑮᐃᔑ ᐊᔓᑕᒫᑯᒡ, ᐁᑮᑕᔑᐲᐎᑌᐎᒡ ᐃᐃᒫ ᐊᑮᕽ, ᐸᒀᓀᑲᒥᑯᕽ ᐁᑮᐃᔑᑖᒡ᙮ ᒦᑕᔥ ᐯᔑᑾᓐ ᐋᐃᓯᒃ, ᒉᑲᑉ ᑲᔦ ᑳᐃᔑᒋᑫᐙᒡ, ᑫᐐᓇᐙ ᐯᔑᑾᓐ ᐁᑮᑌᐱᓇᒧᐙᒡ ᐅᑕᔓᑕᒫᑰᐎᓂᓂ᙮

11:10b.HEB.011.010 ᐁᐸᕒᐊᐋᒻ ᐋᓃᔥ ᐅᑮᐲᑑᓐ ᐃᐃ ᑳᐅᓈᐱᑭᓯᒋᑳᑌᓂᒃ ᑭᒋᐆᑌᓈᓂ ᑫᓀᐱᒋᐊᔮᓂᒃ, ᑭᔐᒪᓂᑑᓐ ᑳᑮᐅᓀᑕᒥᓂᒡ ᐋᓃᓐ ᑫᐃᔑᓈᑾᓂᓂᒃ, ᑳᑮᐅᔑᑑᓂᒡ ᑲᔦ᙮

11:11b.HEB.011.011 ᐅᑌᐺᔦᑕᒧᐎᓂᕽ ᐃᑕᔥ ᑳᑮᐅᒋᐅᑌᑌᒫᐎᒡ ᐋᓇᐐᓐ ᐁᑮᐊᑭᐌᓰᐎᒡ, ᐐᐗᓐ ᐃᑕᔥ ᑲᔦ ᓭᕒᐊᐗᓐ ᐁᑮᑲᔥᑭᑑᓯᓂᒃ ᒋᐅᑕᐱᓅᒌᔑᒥᓂᒡ, ᐁᑮᑫᒋᓈᐋᒡ ᑭᔐᒪᓂᑑᓐ ᒋᑲᓇᐌᑕᒥᓂᒡ ᑳᑮᐃᔑᐊᔓᑕᒫᑫᓂᒡ᙮

11:12b.HEB.011.012 ᐃᓇᔥᑫ ᑕᔥ ᐊᐊ ᐯᔑᒃ ᐃᓂᓂ ᐁᐸᕒᐊᐋᒻ ᐋᔕ ᐹᑲᒡ ᑮᐃᓀᑖᑾᓂᓂᑯᐸᓐ ᒋᐅᑌᑌᒫᐎᓯᒃ, ᒦ ᓴ ᐃᐃᒫ ᑕᑾᒡ ᓃᐱᐗᐞ ᐯᒫᑎᓯᓂᒡ ᑳᐅᒌᓂᒡ, ᐁᑮᐊᐲᒋ ᐹᑏᓄᓂᒡ ᑖᐱᔥᑰ ᑳᑕᔑᓂᒡ ᐗᓇᑯᔕᐞ ᐌᑎ ᑮᔑᑯᕽ, ᐁᑮᑕᔑᓂᒡ ᑲᔦ ᒋᑌᐸᑭᒥᒫᓯᐎᓐᒡ ᑖᐱᔥᑰ ᑳᐊᐲᒋ ᐹᑏᓉᐙᐗᑳᒃ ᐃᐃ ᓀᐗᕽ ᐃᐃᒫ ᑳᐃᔑ ᓇᓈᓀᐙᐗᑳᒃ ᑭᒋᑲᒦᕽ᙮

11:13b.HEB.011.013 ᐃᑭ ᑕᔥ ᑲᑭᓇ ᑳᑮᑌᐺᔦᑕᒧᐙᒡ ᐋᔕ ᑮᓂᐳᐗᒃ, ᐁᑮᑌᐱᓇᓯᒀ ᑳᑮᐊᔓᑕᒪᐎᑣᐸᓐ, ᔖᑰᒡ ᐃᑕᔥ ᓃᔮᒃ ᐅᑮᒥᒋᑌᐹᐸᑖᓈᐙᓐ ᐃᓂ ᑳᑮᐃᔑᐊᔓᑕᒪᐎᑣ, ᐙᓴ ᑲᔦ ᐅᑮᐅᓵᐸᑖᓈᐙᓐ, ᐅᑮᐅᑖᐱᓈᓈᐙᓐ ᐃᑕᔥ ᑲᔦ, ᐁᑮᐃᑭᑐᐙᒡ ᐁᑮᐲᐎᑌᐎᐙᒡ, ᐁᐅᒋᑎᐯᑖᑯᓯᓯᒀ ᐋᓇᐐᓐ ᐁᑮᐃᔑᑖᐙᒡ ᐅᐅᒫ ᐊᑮᕽ᙮

11:14b.HEB.011.014 ᐃᑭ ᑕᔥ ᐃᐃ ᑳᐃᑭᑐᐙᒡ, ᒦ ᐃᒫ ᐁᔑᓈᑾᓂᓂᒃ ᐁᓇᓈᑕᐙᐸᑕᒧᐙᒡ ᐊᑮᓂ ᐐᓇᐙ ᐱᑯ ᐁᐐᑎᐱᓇᐌᐎᓯᐙᒡ᙮

11:15b.HEB.011.015 ᑳᐐᓐ ᑕᔥ ᑲᔦ ᒨᔕᒃ ᐅᑮᓈᓈᑲᑕᐌᑕᓰᓈᐙ ᐃᐃ ᐊᑮᓂ ᑳᑮᐱᐅᒋᒫᒑᐙᒡ, ᐋᓃᔥ ᑮᔥᐱᓐ ᐃᐃ ᐃᔑᒋᑫᐙᐸᓐ, ᑖᑮᐃᔑᓭᓂ ᐄᑐᒃ ᒋᑮᑮᐌᐙᐸᓐ᙮

11:16b.HEB.011.016 ᐃᐃᐌᓂ ᑕᔥ ᓇᐗᒡ ᑳᐅᓂᔑᔑᓂᓂᒃ ᐊᑮᓂ ᐅᑮᐊᑕᐌᑖᓈᐙ᙮ ᑭᒋᑮᔑᑯᐎ ᐊᑮᓂ ᐅᑮᐊᑕᐌᑖᓈᐙ᙮ ᒦᑕᔥ ᐃᐃ ᑭᔐᒪᓂᑑ ᑳᐅᒋᐊᑲᒋᓯᒃ, ᓂᑭᔐᒪᓂᑑᒻ ᒋᐃᔑᓂᑳᓂᑯᒡ, ᐋᓃᔥ ᐅᑮᑾᔮᒋᑕᒪᐙᐞ ᑭᒋᐆᑌᓈᓂ ᑫᐃᔑᐊᔮᓂᒡ᙮

11:17b.HEB.011.017 ᐁᐸᕒᐊᐋᒻ ᐃᑕᔥ ᐅᑌᐺᑕᒧᐎᓂᕽ ᑳᑮᐅᒋᓇᐃᑕᐙᒡ ᑭᔐᒪᓂᑑᓐ ᐊᐲ ᑮᐊᑕᑭᑫᓂᒥᑯᒡ, ᑮᑲᓅᓂᑯᒡ ᒋᐸᑭᑎᓈᒡ ᐃᓂ ᐅᑯᓯᓴᓐ ᐋᐃᓯᑰᓐ ᒋᐃᓍᓈᒡ ᐸᑭᑎᓈᓱᐎᓂᕽ᙮ ᐐᓐ ᐄᑐᒃ ᑳᑮᐊᔓᑕᒫᑯᒡ ᑭᔐᒪᓂᑑᓐ, ᔖᑰᒡ ᐃᑕᔥ ᑮᐃᓀᑕᒻ ᐁᑮᐐᐸᑭᑎᓈᒡ ᐅᑯᓯᓴᓐ ᑳᑮᒥᒋᐯᔑᑯᓂᒡ᙮

11:18b.HEB.011.018 ᑭᔐᒪᓂᑑᓐ ᓴ ᐅᑮᐃᑯᐸᓃᓐ: ᐃᑭ ᓴ ᑳᑮᐊᔓᑕᒪᐎᓈᓐ ᑫᐅᐲᐌᓰᒥᔭᓐ, ᐋᐃᓯᑯᕽ ᑕᐅᒌᐗᒃ᙮

11:19b.HEB.011.019 ᐁᐸᕒᐊᐋᒻ ᐃᑕᔥ ᐅᑮᑭᑫᓂᒫᓐ ᑭᔐᒪᓂᑑᓐ ᒋᑲᔥᑭᐋᓂᒡ ᒋᑮᐌᐱᒫᑎᓯᐋᓂᒡ ᐋᐃᓯᑰᓐ ᑮᐃᔥᒀᓂᐳᓂᒡ᙮ ᐃᓇᔥᑫ ᑕᔥ ᑌᐺ ᐁᐸᕒᐊᐋᒻ ᐅᑮᐃᔑᓇᐙᓐ ᐋᐃᓯᑰᓐ ᑖᐱᔥᑰ ᐁᑮᓂᐳᓂᒡ, ᐁᑮᑮᐌᒦᓂᓐᒡ ᐃᑕᔥ ᑲᔦ ᑮᐃᔥᒀ ᑮᐌᐱᒫᑎᓯᐃᒥᓐᒡ᙮

11:20b.HEB.011.020 ᐋᐃᓯᒃ ᐃᑕᔥ ᐁᑮᑌᐺᔦᑕᕽ ᑳᑮᐅᒋ ᓃᑳᓂ ᔕᐌᓂᒫᒡ ᒋᐊᓂᒥᓄᓭᓂᒡ ᒉᑲᐴᓐ, ᐄᔂᓐ ᑲᔦ, ᐁᑮᑕᔑᑕᒪᐙᒡ ᐋᓃᓐ ᓃᔮᒃ ᑫᓂ ᐃᔑᓭᓂᒡ᙮

11:21b.HEB.011.021 ᒉᑲᑉ ᐃᑕᔥ ᐁᑮᑌᐺᔦᑕᕽ ᐋᔕ ᐱᑯ ᑫᑳ ᐁᐐᓂᐳᒡ ᑳᑮᐅᒋ ᔕᐌᓂᒫᒡ ᒋᐊᓂᒥᓄᓭᓂᒡ ᒎᓴᐴᓐ ᐅᑯᓯᓯᓂ᙮ ᐁᑮᐋᐸᑖᑸᒡ ᐃᑕᔥ ᐅᓴᑲᐅᓈᑯᕽ, ᐁᑮᐊᓇᒥᐁᑕᐙᒡ ᑭᔐᒪᓂᑑᓐ᙮

11:22b.HEB.011.022 ᒎᓴᑉ ᐃᑕᔥ ᐅᑌᐺᔦᑕᒧᐎᓂᕽ, ᐋᔕ ᑫᑳ ᐁᐐᐊᓂᓂᐳᒡ, ᓃᔮᒃ ᐅᑮᑕᔑᑖᓐ ᐃᔅᕒᐃᔭᓬᐊᐞ ᒋᓇᑲᑕᒥᓂᒡ ᐄᒋᐸᑮᓂ ᙮ ᒦᑕᔥ ᐃᐃ ᑳᑮᐐᑕᕽ ᐋᓃᓐ ᒪᔮ ᑫᑑᒋᑳᑌᓂᑭᓐ ᐅᑲᓇᓐ᙮

11:23b.HEB.011.023 ᒨᓯᔅ ᐃᑕᔥ ᐅᓃᑭᐃᑰᐞ ᐁᑮᑌᐺᔦᑕᒥᓂᒡ ᑳᑮᐅᒋᑳᓂᑯᒡ ᓂᓱᑮᓯᔅ 3 ᒥᓂᒃ ᑮᐃᔥᒀ ᓂᑖᐎᑭᒡ᙮ ᐋᓃᔥ ᐅᑮᐙᐸᒥᑰᐞ ᐁᑮᒥᓄᓈᑯᓯᒡ᙮ ᑳᐐᓐ ᑲᔦ ᑮᑯᑖᒋᓰᐗᐞ ᐁᑮᐃᔑᒋᑫᓯᓂᒃ ᑭᒋᐅᑭᒫᓐ ᑳᑮᐃᓈᑯᓂᑫᓂᒡ᙮

11:24b.HEB.011.024 ᒨᓯᔅ ᐃᑕᔥ ᐅᑌᐺᔦᑕᒧᐎᓂᕽ ᐊᐲ ᑮᑮᔖᐯᐎᒡ, ᑳᑮᐅᒋ ᐃᓀᑕᓯᒃ ᒋᐃᒋᑲᓂᐎᒡ ᐯᕒᐆ ᐅᑖᓂᓴᓐ ᓴ ᐃᓂ ᐅᑯᓯᓴᓐ᙮

11:25b.HEB.011.025 ᐊᐗᔑᒣ ᑕᔥ ᑮᐃᓀᑕᒻ ᐁᐐᐐᒋᑲᒀᑕᑭᑑᒫᒡ ᐃᐃ ᐐᒋᐱᒫᑎᓰᐞ ᑭᔐᒪᓂᑑᓐ ᑳᑮᑎᐯᓂᒫᓂᒡ, ᐊᐲᒡ ᐐᓐ ᒋᒌᑫᑕᑭᐸᓐ ᐊᒋᓇ ᑳᐃᔑᒥᓉᑖᑾᓂᓂᒃ ᒪᒋᑑᑕᒧᐎᓂᓂ᙮

11:26b.HEB.011.026 ᒦᑕᔥ ᑳᐃᓇᑭᑕᕽ ᓇᐗᒡ ᐁᐅᓂᔑᔑᓂᓂᒃ ᒋᐃᔑᒪᒋᑕᔑᒥᓐᒡ ᐃᓂ ᑭᔐᒪᓂᑑᓐ ᑳᐅᓀᓂᒫᓂᒡ ᑫᐃᔑᒪᒋᑕᔑᒥᒥᓐᒡ, ᐊᐲᒡ ᐐᓐ ᑫᑮᐃᔑᐌᓅᑎᓯᐸᓐ ᐄᒋᐸᑮᕽ᙮ ᐋᓃᔥ ᐅᑮᐊᔕᐙᐸᑖᓐ ᓃᑳᓇᔭᐄ ᑫᒦᓂᓐᒡ ᑎᐸᐊᒫᑰᐎᓐ᙮

11:27b.HEB.011.027 ᒨᓯᔅ ᐃᑕᔥ ᐁᑮᑌᐺᔦᑕᕽ ᑳᑮᐅᒋᓇᑲᑕᕽ ᐄᒋᑉ ᐁᑮᓭᑭᓯᓯᒃ, ᐋᓇᐐᓐ ᑭᒋᐅᑭᒫᓐ ᐁᑮᓂᔥᑳᑎᓯᓂᒡ᙮ ᑳᐐᓐ ᑮᐃᓀᑕᓰ ᒋᑮᐌᒡ, ᐋᓃᔥ ᐅᑮᐙᐸᒫᓐ ᑳᓈᑯᓯᓯᓂᒃ ᑭᔐᒪᓂᑑᓐ᙮

11:28b.HEB.011.028 ᐅᑌᐺᔦᑕᒧᐎᓂᕽ ᐃᑕᔥ ᑳᑮᐅᒋᐅᔑᑑᒡ ᒋᐃᔑᒋᑫᓈᓂᐗᓂᓂᒃ ᐃᐃ ᐱᒫᒋᐃᑰᐎ ᐐᑾᑎᐎᓐ, ᐃᐃ ᑲᔦ ᑳᑮᐊᓅᑮᒡ ᒥᔅᑸᓂ ᒋᐊᒋᑳᑌᓂᒃ ᐃᔥᒀᑌᒫᑎᑯᑳᕽ᙮ ᒦᑕᔥ ᑳᑮᐅᒋ ᐃᔑᒋᑫᐙᒡ ᐃᓂ ᓴ ᑳᓂᔑᐌᓂᒡ ᐁᒐᓬᐊᓐ ᒋᓂᓵᓯᓂᒃ ᐃᐃ ᑳᓴᓰᑭᓯᓂᒡ ᑸᐎᓭᓴᐞ ᐃᐃᒫ ᐃᔅᕒᐃᔭᓬᐃᑳᕽ᙮

11:29b.HEB.011.029 ᐅᑌᐺᔦᑕᒧᐎᓂᐙᕽ ᐃᑕᔥ ᐃᔅᕒᐃᔭᓬᐊᒃ ᑳᑮᐅᒋᑲᔥᑭᑑᐙᒡ ᐁᐋᔕᐎᔥᑳᐙᒡ ᐃᐃᒫ ᑭᒋᒥᔅᑯᑲᒦᕽ, ᐁᑮᐹᑾᑲᒥᑳᓂᒃ ᑳᑮᐃᔑᐱᒧᓭᐙᒡ᙮ ᐄᒋᐲᐎ ᔑᒫᑲᓂᔕᒃ ᐃᑕᔥ ᐁᑮᑲᑴᑲᔥᑭᑑᐙᒡ ᑫᐐᓇᐙ, ᑲᑭᓇ ᓴ ᒦ ᐃᒫ ᑳᐃᔑᓂᓵᐹᐌᐙᒡ᙮

11:30b.HEB.011.030 ᐅᑌᐺᔦᑕᒧᐎᓂᐙᕽ ᐃᑕᔥ ᐃᐃ ᑭᒋᐆᑌᓈᓂ ᒉᕒᐊᑯ ᑳᑮᐃᔑ ᐙᑳᔮᐱᑭᓂᑳᑌᓂᒃ ᑳᑮᐅᒋᓃᓯᓭᓂᒃ ᐊᐲ ᐃᔅᕒᐃᔭᓬᐊᒃ ᑮᐃᔥᒀ ᑭᔑᐹᔥᑳᐙᒡ ᓃᔣᓱ 7 ᑮᔑᒃ᙮

11:31b.HEB.011.031 ᐅᕒᐁᐋᑉ ᑳᑮᐱᔑᒀᒋᑴᐎᒡ, ᐁᑮᑌᐺᔦᑕᕽ ᑳᑮᐅᒋᓂᓵᓯᐎᓐᒡ ᐊᐲ ᑮᓂᔑᐗᓈᒋᒋᑲᓂᐎᓂᒡ ᐃᐃ ᑳᑮᔕᔒᐱᑕᐙᓂᒡ ᑭᔐᒪᓂᑑᓐ᙮ ᐋᓃᔥ ᐌᐌᓂ ᐱᓵᓐ ᐅᑮᐲᑎᑲᓈᐞ ᐃᓂᓂᐗᐞ ᑳᑮᓃᑳᓂ ᐊᔨᓈᐱᓂᒡ, ᐃᔅᕒᐃᔭᓬᐃᑳᕽ ᑳᑮᐅᒌᓂᒡ᙮

11:32b.HEB.011.032 ᑫᔮᐱ ᓇ ᑕᔥ ᓂᑲᐙᐐᓈᒃ ᐊᐎᔭᒃ? ᑳᐐᓐ ᐃᑕᔥ ᓂᑌᐱᓭᓰ ᒋᑕᔑᒪᒀᐸᓐ ᑮᑎᔭᓐ, ᐯᕒᐊᒃ, ᓵᒥᓴᓐ, ᒉᐱᑕ, ᑌᐱᑦ, ᓵᒥᔫ, ᐃᑭ ᑲᔦ ᑳᑮᑲᓅᒋᑫᑕᒪᐙᐙᒡ ᑭᔐᒪᓂᑑᓐ᙮

11:33b.HEB.011.033 ᐅᑌᐺᔦᑕᒧᐎᓂᐙᕽ ᐃᑕᔥ ᐊᐲ ᑮᒦᑳᓱᐙᒡ ᑳᑮᐅᒋᔖᑰᒋᑑᐙᒡ ᐃᓂᓃᐎ ᐅᑭᒫᐎᐎᓇᓐ᙮ ᐅᑮᐅᓇᑑᓈᐙ ᑾᔭᒃ ᒋᐃᔑᒋᑫᓈᓂᐗᓂᓂᒃ᙮ ᐅᑮᑌᐱᓈᓈᐙ ᑲᔦ ᑭᔐᒪᓂᑑᓐ ᐅᑕᔓᑕᒫᑫᐎᓂᓂ᙮ ᐅᑮᑭᐸᐊᒪᐙᐙᐞ ᑲᔦ ᒥᔑᐱᔑᐗᐞ ᐅᑑᓂᓂ᙮

11:34b.HEB.011.034 ᐅᑮᐋᑕᐌᔥᑳᓈᐙᓐ ᑲᔦ ᑳᑮᑭᔕᑾᓀᓂᑭᓐ ᐃᔥᑯᑌᓐ, ᐁᑮᒫᒌᐸᐃᐙᑕᒧᐙᒡ ᑲᔦ ᐸᔑᐸᐃᑫᐎᑯᒫᓇᓐ᙮ ᐁᑮᐃᔑᐃᑣ ᑲᔦ ᒋᒪᔥᑲᐌᑖᑯᓯᐙᒡ ᐋᓇᐐᓐ ᐁᑮᒪᒉᑖᑯᓯᐙᒡ; ᐁᑮᓲᑫᑖᑯᓯᐙᒡ ᑲᔦ ᑮᒦᑳᓱᐙᒡ; ᐁᑮᒫᒌᔮᒪᐙᐙᒡ ᑲᔦ ᑳᑮᒪᔭᑭᓯᓂᒡ ᔑᒫᑲᓂᔕᐞ᙮

11:35b.HEB.011.035 ᐅᑌᐺᔦᑕᒧᐎᓂᐙᕽ ᐃᑕᔥ ᑲᔦ ᐃᑴᐗᒃ ᑳᑮᐅᒋ ᑮᐌ ᐙᐸᒫᐙᒡ ᐅᑎᓇᐌᒫᑲᓂᐙᐞ ᑳᑮᓂᐳᓂᐸᓐ ᐁᑮᑮᐌᐱᒫᑎᓯᐃᒥᓐᒡ᙮ ᐋᓂᑕ ᑕᔥ ᑲᔦ ᑮᑲᒀᑕᑭᒋᑲᓂᐎᐗᒃ ᐁᑮᐊᑕᐌᑕᓯᒀ ᒋᐸᑭᑎᓂᑣ, ᐋᓃᔥ ᐅᑮᐊᑕᐌᑖᓈᐙ ᒋᑮᐌᐱᒫᑎᓯᐃᑣ ᒋᐊᔮᐙᒡ ᓇᐗᒡ ᑳᐐᐅᓂᔑᔑᓂᓂᒃ ᐱᒫᑎᓯᐎᓐ᙮

11:36b.HEB.011.036 ᐋᓂᑕ ᑕᔥ ᑮᐃᔑᑲᒀᑕᑭᐋᐗᒃ ᐁᑮᐹᐱᓄᑕᐎᑣ, ᐁᑮᐸᐸᔕᔐᐅᑣ ᑲᔦ᙮ ᑯᑕᒃ ᑲᔦ ᐲᐙᐱᑴᔮᐲᓂ ᑮᐋᐸᑕᓂᓂ ᐁᑮᒪᒫᒋᑾᐱᓂᑣ, ᐁᑮᑭᐸᐅᑣ ᑲᔦ᙮

11:37b.HEB.011.037 ᐋᓂᑕ ᑕᔥ ᑮᐸᐲᒶᓯᓇᐋᐗᒃ, ᑯᑕᒃ ᑮᑖᔥᑭᐴᒋᑲᓂᐎᐗᒃ, ᐋᓂᑕ ᑲᔦ ᑭᒋᒨᑯᒫᓂᓂ ᑮᐋᐸᑕᓂᓂ ᐁᑮᓂᓯᑣ᙮ ᒥᓯᐌ ᑕᔥ ᑮᐸᐹᒥᐊᔮᐗᒃ ᒫᓇᒑᓂᔑᐗᔮᓇᐞ, ᒫᓇᑎᑯᐗᔮᓇᐞ ᐁᑮᐅᑭᑭᔥᑭᑲᓂᐙᒡ, ᐁᑮᑭᑎᒫᑭᓯᐙᒡ, ᐁᑮᑲᒀᑕᑭᐃᑣ, ᓅᒋᑯ ᑲᔦ ᐁᑮᑑᑕᐎᑣ᙮

11:38b.HEB.011.038 ᐋᓃᔥ ᑳᐐᓐ ᐊᑮᓂ ᑮᑌᐊᐲᑌᑖᑾᓯᓂᓂ ᐅᐅᒫ ᒋᑮᐊᔮᐙᐸᓐ᙮ ᐸᑾᑕᑲᒥᒃ ᓴ ᑮᑕᔑᐸᐹᒥᐸᐃᐌᐗᒃ, ᑳᐃᔑᐸᐲᑾᑎᓈᓂᒃ ᑲᔦ ᑮᐊᐸᐃᐌᐗᒃ᙮ ᑳᐃᔑᐗᐐᐹᐱᑳᓂᒃ, ᑳᐃᔑᐸᐸᑯᓀᑲᒥᑳᓂᒃ ᑲᔦ ᐁᑮᐊᔨᔑᑖᐙᒡ᙮

11:39b.HEB.011.039 ᐅᑯᐌᓂᐗᒃ ᐃᑕᔥ ᐋᐱᒋ ᑮᑭᒋᒥᓍᐸᒋᑲᓂᐎᐗᒃ ᐅᑌᐺᔦᑕᒧᐎᓂᐙᕽ ᐅᒋ᙮ ᔖᑰᒡ ᐃᑕᔥ ᑳᐐᓐ ᐅᑮᑌᐱᓇᓰᓈᐙ ᐃᐃ ᑭᔐᒪᓂᑑᓐ ᑳᑮᐊᔓᑕᒫᑫᓂᒡ᙮

11:40b.HEB.011.040 ᑭᔐᒪᓂᑑ ᑕᔥ ᑮᐃᓀᑕᒻ ᐁᐐᐅᔑᑕᒪᐎᓇᕽ ᓇᐗᒡ ᑫᑰᓂᓂ ᑳᐅᓂᔑᔑᓂᓂᒃ᙮ ᐋᓃᔥ ᑮᐃᓀᑕᒻ ᐹᓂᒫ ᑯ ᐐᒌᐎᒪᕽ ᐁᐐᑮᔑᓈᑯᓯᐋᒡ᙮

12

12:1b.HEB.012.001 ᑮᓇᐎᓐᑦ ᐃᑕᔥ ᐐᓐ, ᐁᐋᔮᐙᒡ ᐁᐹᑏᓄᐙᒡ ᐊᐎᔭᒃ ᐙᑳᔭᐄ ᐁᐅᓵᐸᒥᓇᒀ ᐁᑲᓇᐙᐸᒥᓇᒀ, ᑕᑲ ᑕᔥ ᐌᐱᓇᑖ ᑲᑭᓇ ᑫᑰᓐ ᑳᐗᓂᔥᑴᐃᑯᔭᕽ, ᐃᐃ ᑲᔦ ᒪᒋᑑᑕᒧᐎᓐ ᑳᑭᒋᐎᔥᑳᑯᔭᕽ᙮ ᑕᑲ ᑲᑴᔕᔒᐯᑕᑖ ᐅᐅ ᑳᐱᒥᐸᐃᑎᔭᕽ ᐁᑲᑴᒋᑲᔑᐌᔭᕽ, ᓃᑳᓇᔭᐄ ᑳᐅᓇᑕᒫᑰᔭᕽ᙮

12:2b.HEB.012.002 ᑕᑲ ᒨᔕᒃ ᑲᓇᐙᐸᒫᑖ ᒋᓴᔅ ᑳᑮᒫᒋᑑᒡ, ᑳᑮᑮᔑᑑᒡ ᑲᔦ ᑭᑌᐺᔦᑕᒧᐎᓂᓈᓂᓐ᙮ ᑳᐐᓐ ᐃᑕᔥ ᑮᐸᑭᒌᓰ ᐋᓇᐐᓐ ᐁᑮᑭᑫᑕᕽ ᒋᓂᓯᓐᒡ ᐋᔑᑌᔮᑎᑯᕽ, ᐋᒋᑯ ᑕᔥ ᑳᐐᓐ ᐅᑮᐸᐹᐱᓯᔅᑫᑕᓰᓐ ᑳᑮᐐᐃᔑᐊᑲᒋᐃᓐᒡ, ᐋᓃᔥ ᐅᑮᑭᑫᑖᓐ ᐃᐃ ᒥᓉᑕᒧᐎᓐ ᑳᑮᐲᐃᑯᒡ᙮ ᐃᓇᔥᑫ ᑕᔥ ᓅᑯᒻ ᑭᔐᒪᓂᑑᓐ ᐅᐐᑕᐱᒫᓐ, ᐅᑭᒋᓂᑭᓃᕽ ᐃᓇᑫ ᐁᐃᔑᐊᐱᒡ᙮

12:3b.HEB.012.003 ᑕᑲ ᓈᓈᑲᑕᐌᑕᒧᐙᒃ ᐋᓃᓐ ᑳᐊᐲᒋᔕᔒᐯᑕᕽ ᒫᐗᒡ ᑳᑮᐃᔑᔒᑫᓂᒥᑯᒡ ᐅᒪᒑᑎᓰᐞ, ᑫᑯ ᑕᔥ ᑫᑮᓇᐙ ᐸᑭᒌᐌᑕᑫᒃ, ᑫᑯ ᑲᔦ ᓅᑌᐋᓇᐌᒋᑫᑫᒃ᙮

12:4b.HEB.012.004 ᑮᓇᐙ ᐋᓃᔥ ᑳᐐᓐ ᒪᔑ ᐐᑳ ᑭᑑᒋᐯᔣᐸᑕᓰᒻ ᒋᓂᓯᑰᔦᒃ ᐃᐃ ᑳᒦᑳᑕᒣᒃ ᒪᒋᑑᑕᒧᐎᓐ᙮

12:5b.HEB.012.005 ᐋᔕ ᓇ ᑭᑮᐗᓃᑫᒻ ᑳᑮᐃᑰᔦᒃ, ᐁᑮᑲᓅᓂᑰᔦᒃ ᒋᑲᑴᒪᔥᑲᐌᑕᒣᒃ, ᑭᔐᒪᓂᑑ ᐁᐅᑯᓯᓯᒥᓀᒃ, ᐁᐃᑭᑐᒡ: ᓂᑯᓯᔅ, ᐱᓯᑕᓐ ᐊᐲ ᑳᑎᐯᒋᑫᒡ ᑮᒫᒦᓄᒥᒃ, ᑫᑯ ᑲᔦ ᒪᒉᑕᑫᓐ ᐊᐲ ᑮᑭᒋᓅᒋᐃᒃ,

12:6b.HEB.012.006 ᐋᓃᔥ ᑳᑎᐯᒋᑫᒡ ᐅᒫᒦᓄᒫᓐ ᐊᐎᔭᓐ ᑳᓵᑭᐋᒡ, ᐅᒫᒦᓄᐸᔕᔐᐙᓐ ᑲᔦ ᑲᑭᓇ ᐊᐎᔭᓐ ᑳᐅᑖᐱᓈᒡ, ᓂᑯᓯᔅ ᐁᐐᐃᔑᓂᑳᓈᒡ᙮

12:7b.HEB.012.007 ᔕᔒᐯᑕᒧᒃ ᐃᑕᔥ ᐃᐃ ᑳᐃᔑᑲᒀᑕᑭᓭᔦᒃ ᐁᒫᒦᓄᐸᔕᔐᐅᑰᔦᒃ, ᐋᓃᔥ ᑭᔐᒪᓂᑑ ᑭᑑᑖᑯᐙ ᑖᐱᔥᑰ ᐁᐅᔾᐆᓯᒣᒃ᙮ ᐐᑳ ᓇ ᐊᔮ ᐅᑯᓯᓯᒫ ᑫᒫᒦᓄᓂᑯᓯᒃ ᐅᑌᑌᓐ?

12:8b.HEB.012.008 ᑮᔥᐱᓐ ᐃᑕᔥ ᑮᓇᐙ ᐐᑳ ᒫᒦᓄᐸᔕᔐᐅᑰᓯᐌᒃ ᑖᐱᔥᑰ ᑳᑑᑕᐎᑣ ᐃᑭ ᑯᑕᒃ ᐅᑯᓯᓯᒫᒃ, ᑳᐐᓐ ᐄᓴᓐ ᑌᐺ ᑭᑑᑯᓯᓯᒥᑰᓰᒻ᙮ ᒦᑕᔥ ᑖᐱᔥᑰ ᐱᑾᑑᔖᓂᕽ ᐁᓀᑖᑯᓯᔦᒃ᙮

12:9b.HEB.012.009 ᐃᑭ ᑕᔥ ᐐᓐ ᑳᑮᐅᑌᑌᔭᕽ ᐅᐅᒫ ᐊᑮᕽ ᑭᑮᒫᒦᓄᐸᔕᔐᐅᑯᓈᓂᒃ, ᑭᑮᑭᑌᓂᒫᓈᓂᒃ ᐃᑕᔥ ᑲᔦ᙮ ᓇᐗᒡ ᐄᑐᒃ ᑖᐅᓂᔑᔑᓐ ᒋᐸᑭᑎᓂᑎᓱᑲᑕᐗᑭᐸᓐ ᐊᐊ ᑭᑕᒑᑯᓈᓂᕽ ᐃᓇᑫ ᑳᔑᐅᑌᑌᔭᕽ, ᒋᐱᒫᑎᓯᔭᕽ ᐃᑕᔥ᙮

12:10b.HEB.012.010 ᐃᑭ ᓴ ᑳᑮᐅᑌᑌᔭᕽ ᐅᐅᒫ ᐊᑮᕽ ᐊᒋᓇ ᓴ ᐁᑕ ᑭᑮᒫᒦᓄᐸᔕᔐᐅᑯᓈᓂᒃ, ᐐᓇᐙ ᑳᑮᐃᔑᒥᓍᐸᑕᒧᐙᒡ᙮ ᑭᔐᒪᓂᑑ ᑕᔥ ᐐᓐ ᒋᒥᓄᓭᐗᕽ ᑳᐅᒋᑑᑕᐎᓇᕽ, ᒋᐃᔑᐐᑑᑳᓱᐗᕽ ᑲᔦ ᐃᐃᒫ ᐅᑭᔐᒪᓂᑑᐙᑎᓯᐎᓂᕽ᙮

12:11b.HEB.012.011 ᐃᐃ ᓴ ᑲᑭᓇ ᒫᒦᓄᓂᑰᐎᓐ ᒣᒀ ᐁᐋᐸᑕᒃ ᑳᐐᓐ ᒥᓉᑖᑾᓯᓅᓐ, ᐐᓴᑫᑖᑾᓐ ᐄᑐᒃ᙮ ᔖᑰᒡ ᐃᑕᔥ ᐃᑭ ᐃᐃ ᓇᑫ ᑳᐃᔑᑭᑭᓄᐊᒪᐎᑣ ᓈᓈᑫ ᑾᔭᒀᑎᓯᐎᓐ ᐅᑲᐅᑎᓈᓈᐙ, ᒦᑕᔥ ᐃᐃᒫ ᐌᒌᒃ ᐱᓵᓂᓯᐎᓐ᙮

12:12b.HEB.012.012 ᐃᓇᔥᑫ ᑕᔥ ᓰᑐᓂᑫᓂᒃ ᑳᐊᔦᑯᓂᑫᔦᒃ, ᓰᑐᑳᑌᑖᒃ ᑲᔦ ᑮᓇᐙ ᑳᓃᓇᒥᑳᑌᔦᒃ᙮

12:13b.HEB.012.013 ᐱᒧᓵᑕᒧᒃ ᐁᑕ ᐃᓂ ᒦᑲᓇᐗᓐ ᑳᑾᔭᑯᒧᑭᓐ, ᒦᑕᔥ ᐊᐗᔑᒣ ᒋᓂ ᐃᔑᐊᔮᓯᓄᒃ ᑳᔑᒫᑭᓯᑌᔦᒃ, ᒋᓂᒥᓄᐊᔮᒋᑳᑌᒃ ᐃᑕᔥ᙮

12:14b.HEB.012.014 ᐌᐌᓂ ᑕᔥ ᑲᑴᐐᒋᐱᒫᑎᓰᒥᑾᒃ ᑲᑭᓇ ᐃᓂᓂᐗᒃ, ᑲᑴᐯᑳᑎᓯᒃ ᑲᔦ, ᐋᓃᔥ ᑮᔥᐱᓐ ᐊᐎᔭ ᐊᔮᓯᒃ ᐯᑳᑎᓯᐎᓐ ᑳᐐᓐ ᐅᑲᐙᐸᒫᓰᓐ ᑭᔐᒪᓂᑑᓐ᙮

12:15b.HEB.012.015 ᐊᔮᒀᒥᓯᒃ ᐃᑕᔥ ᐊᐎᔭ ᒋᓅᑌᐋᓇᐌᑕᓯᒃ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ᙮ ᑫᑯ ᑲᔦ ᑕᐊᔮᓰ ᐊᐎᔭ ᑫᐃᔑᓈᑯᓯᒡ ᑖᐱᔥᑰ ᒪᒑᑎᒃ ᑳᒨᑭᑭᒡ ᑫᐅᒋᒫᔑᓭᐙᒡ ᐊᐎᔭᒃ᙮ ᑕᐹᑏᓄᐗᒃ ᐄᑐᒃ ᑫᐅᒋᐐᓂᐃᑣ᙮

12:16b.HEB.012.016 ᑫᑯ ᑲᔦ ᐊᐎᔭ ᑕᐱᔑᒀᑎᓯᓰ, ᑫᑯ ᑲᔦ ᐊᐎᔭ ᑕᐊᔮᓰ ᒋᐃᔑᑲᑮᐹᑎᓯᒡ ᑖᐱᔥᑰ ᐄᔂ ᙮ ᐯᔑᒃ ᐐᓯᓂᐎᓂᕽ ᐄᑐᒃ ᐅᑮᐃᓇᑖᐙᑫᓐ ᑫᑮᑎᐱᓇᐌᐎᓯᐸᓐ ᐐᓐ ᓂᑕᒻ ᐁᑮᓂᑖᐎᑭᒡ᙮

12:17b.HEB.012.017 ᑭᑭᑫᑖᒻ ᐃᑕᔥ ᓈᓈᑫ ᐁᑮᐊᑕᐌᓂᒫᒡ ᐅᑌᑌᓐ ᒋᒦᓂᑯᒡ ᑭᔐᒪᓂᑑᓐ ᐅᔕᐌᒋᑫᐎᓂᓂ, ᑮᐋᓇᐌᑖᑯᓯ ᑕᔥ᙮ ᐋᓃᔥ ᑳᐐᓐ ᐅᑮᑲᔥᑭᑑᓰᓐ ᒋᑮᑑᑕᓯᑭᐸᓐ, ᐋᔕ ᑳᑮᐃᔑᒋᑫᒡ, ᐋᓇᐐᓐ ᐁᑮᒪᒪᐎᒡ ᐌᐌᓂ ᐁᑮᑲᑴᐋᒋᑑᒡ ᑳᑮᑑᑕᑭᐸᓐ᙮

12:18b.HEB.012.018 ᑳᐐᓐ ᐃᑕᔥ ᑮᓇᐙ ᑭᐱᓈᓯᑲᓰᒻ ᐃᐃ ᑭᒋᐗᒋᐤ ᑫᑮᓵᒥᓂᑳᑌᑭᐸᓐ, ᑳᐃᔑᑭᔕᑾᓀᒃ ᑲᔦ ᐃᔥᑯᑌ, ᑳᐃᔑᑲᔥᑮᑎᐱᑲᒃ ᑲᔦ, ᑳᐃᔑᑲᔥᑮᑎᐱᑳᓇᑾᒃ, ᑳᐃᔑ ᑭᒋ ᑭᔑᐹᔮᓂᒪᓄᓭᒃ ᑲᔦ᙮

12:19b.HEB.012.019 ᑳᐐᓐ ᑲᔦ ᑭᐲᔖᓰᒻ ᑭᒋᐴᑖᒋᑲᓐ ᑳᐃᔑᓅᑖᑯᒋᑳᑌᒃ, ᐃᐃᒫ ᑲᔦ ᑳᐃᔑᓅᑕᐎᓐᒡ ᐊᐎᔭ ᐁᑮᑭᑐᒡ᙮ ᐃᑭ ᐄᑐᒃ ᑳᑮᓅᑕᐙᐙᒡ ᐁᑮᑭᑐᓂᒡ, ᑮᐃᔑᐸᑯᓭᓂᒧᐗᒃ ᑫᔮᐱ ᐁᐐᓅᑕᐙᓯᒀ᙮

12:20b.HEB.012.020 ᐋᓃᔥ ᑳᐐᓐ ᐅᑮᑲᔥᑭᑑᓰᓈᐙ ᒋᓅᑕᒧᐙᒡ ᑳᑮᐃᓂᑣ: ᐴᔥᑫ ᓴ ᐊᔭᐋᐎᔥ ᓵᒥᔥᑲᕽ ᐃᐃ ᑭᒋᐗᒋᐤ, ᒦ ᓴ ᐁᔑᓈᑾᓂᓂᒃ ᒋᓃᐗᓇᐃᑲᓂᐎᒡ ᐊᓯᓃᐞ ᒋᐋᐸᑎᓯᓂᒡ᙮

12:21b.HEB.012.021 ᒦᑕᔥ ᑳᐊᐲᒋ ᓭᑳᐱᔑᓄᐙᒡ, ᒦ ᐃ ᒨᓯᔅ ᑳᐃᑭᑐᒡ: ᐐᑫ ᓴ ᓂᓂᓂᑭᔥᑳ ᐁᐲᑖᓂᒥᓯᔮᓐ᙮

12:22b.HEB.012.022 ᐃᐃᒫ ᑕᔥ ᑮᓇᐙ ᑭᒋᐗᒋᐎᕽ ᓵᔭᓐ ᑳᐃᔑᓂᑳᑌᒃ ᑭᑮᐃᔑᑕᑯᔑᓂᒻ᙮ ᒦ ᐃ ᐄᑐᒃ ᐃᐃ ᑭᒋᑮᔑᑰᐎ ᒉᕒᐆᓴᓬᐊᒻ, ᐅᑭᒋᐆᑌᓈᒻ ᑳᐱᒫᑎᓯᒡ ᑭᔐᒪᓂᑑ, ᐁᑮᐃᔑᑕᑯᔑᓀᒃ ᑳᐃᔑᐊᔮᐙᒡ ᒥᑖᔂᒃ ᒥᑖᔂᒃ ᐁᒐᓬᐊᒃ;

12:23b.HEB.012.023 ᐁᑮᐃᔑᑕᑯᔑᓀᒃ ᑲᔦ ᑳᐃᔑᒥᓉᑕᒧᓈᓂᐗᕽ ᑳᐃᔑᒫᒪᐐᓄᓂᒡ ᑭᔐᒪᓂᑑ ᓂᑕᒻ ᑳᐅᑯᓯᓯᒫᒡ, ᐅᐐᓱᐎᓂᓂ ᑳᐅᔑᐲᐃᑳᑌᓂᑭᓐ ᑭᒋᑮᔑᑯᕽ; ᐁᑮᐱᓈᓯᑲᐌᒃ ᑲᔦ ᑭᔐᒪᓂᑑ ᑳᑎᐹᑯᓈᒡ ᑲᑭᓇ ᐯᒫᑎᓯᓂᒡ᙮ ᑭᐱᑕᑯᔑᓂᒻ ᑲᔦ ᑳᐃᔑᐊᔮᓂᒡ ᐅᑕᒑᑯᐙᐞ ᐃᑭ ᑾᔭᒃ ᐯᒫᑎᓯᐙᒡ ᐋᔕ ᑳᑮ ᑮᔑ ᐃᔑᓈᑯᓯᐃᑣ᙮

12:24b.HEB.012.024 ᐁᑮᓈᓯᑲᐌᒃ ᑲᔦ ᒋᓴᔅ ᑳᓈᑲᒋᑑᒡ ᐅᔥᑭᐊᔓᑕᒫᑎᐎᓐ; ᐁᑮᐱᑕᑯᔑᓀᒃ ᑲᔦ ᑳᑮᐃᔑ ᐲᐙᑲᒥᐌᐱᓂᑳᑌᓂᒃ ᐅᒥᔅᑸᒻ, ᓇᐗᒡ ᑳᒥᓋᔓᑕᒫᑫᒪᑲᒃ ᐊᐲᒡ ᐐᓐ ᐁᐸᓬ ᑳᑮᐃᔑ ᐸᑭᑎᓈᓱᑯᐸᓀᓐ᙮

12:25b.HEB.012.025 ᐊᔮᒀᒥᓯᒃ ᐃᑕᔥ, ᐱᓯᑕᐎᒃ ᐊᐊ ᑳᑲᑲᓅᓂᓀᒃ᙮ ᐃᑭ ᓴ ᑳᑮᐱᓯᑕᐙᓯᒀ ᐃᓂ ᑳᑮᑕᔑᑕᒫᑯᐙᒡ ᐃᐃ ᑎᐹᒋᒧᐎᓐ ᐅᐅᒫ ᐊᑮᕽ, ᑳᐐᓐ ᑮᔖᐾᓰᐗᒃ᙮ ᓇᐗᒡ ᐃᑕᔥ ᑮᓇᐎᓐᑦ ᑭᑲᓇᓃᓵᓂᓯᒥᓐ ᒋᔖᐾᓯᐗᕽ ᑮᔥᐱᓐ ᐱᓯᑕᐙᓯᐗᕽ ᐊᐊ ᑭᒋᑮᔑᑯᕽ ᑳᐅᒋᐊᔮᒀᒥᒥᓇᕽ᙮

12:26b.HEB.012.026 ᐊᐲ ᑕᔥ ᐁᑮᑮᑭᑐᒡ ᑮᑯᔥᑯᓭᓂ ᐊᑮᓂ᙮ ᓅᑯᒻ ᐃᑕᔥ ᐐᓐ ᑮᐃᔑᐊᔓᑕᒫᑫ: ᑫᔮᐱ ᐋᐱᑎᕽ ᓂᑲᐃᔑᒋᑫ, ᑳᐐᓐ ᐁᑕ ᐃᐃ ᐊᑭ ᓂᑲᑯᔥᑯᐌᐱᓇᓰᓐ, ᐃᐃ ᓴ ᑲᔦ ᑭᒋᑮᔑᒃ ᓂᑲ ᑕᑯ ᑯᔥᑯᐌᐱᓈᓐ᙮

12:27b.HEB.012.027 ᐃᐃ ᑕᔥ ᑳᑮᐃᑭᑐᒡ: ᑫᔮᐱ ᐋᐱᑎᕽ ᓂᑲᐃᔑᒋᑫ, ᒦ ᐃᒫ ᐁᔑᐙᐸᑕᒧᐗᕽ ᐃᓂ ᑳᑮᐅᔑᒋᑳᑌᑭᓐ ᐁᐐᑯᔥᑯᐌᐱᓂᑳᑌᑭᓐ, ᐁᐐᐅᑖᐱᓂᑳᑌᑭᓐ ᑲᔦ᙮ ᐃᓂ ᑕᔥ ᑫᑰᓇᓐ ᑳᑲᔥᑭᒋᑳᑌᓯᓄᑭᓐ ᒋᐗᑲᐎᐌᐱᓂᑳᑌᑭᓐ, ᒦᐗᓐ ᓴ ᐃᓂ ᐁᑕ ᑫᐊᔮᑭᓐ᙮

12:28b.HEB.012.028 ᑕᑲ ᑕᔥ, ᒦᑴᒋᐌᑕᑖ ᑫᑮᓇᐎᓐᑦ ᐁᒦᓂᑰᔭᕽ ᒋᐃᔑᐐᑑᑳᓱᔭᕽ ᐃᐃ ᑭᔐᒪᓂᑑ ᑳᔑᑎᐯᒋᑫᒡ, ᑳᑲᔥᑭᒋᑳᑌᓯᓄᒃ ᒋᐗᑲᐎᐌᐱᓂᑳᑌᒃ᙮ ᑕᑲ ᑲᔦ ᒦᑴᒋᐌᓂᒫᑖ, ᒋᐃᔑᐊᓇᒥᐁᑕᐗᕽ ᑭᔐᒪᓂᑑ ᐃᓇᑫ ᑳᐃᔑᒥᓍᐸᒥᓇᕽ᙮ ᑕᑲ ᑲᔦ ᐊᓇᒥᐁᐎᑭᒋ ᐃᓀᓂᒫᑖ, ᒋᑯᑖᓀᓂᒪᕽ ᑲᔦ᙮

12:29b.HEB.012.029 ᐋᓃᔥ ᑭᑭᔐᒪᓂᑑᒥᓈᓐ ᐃᔑᑯᑖᓀᑖᑯᓯ ᑖᐱᔥᑰ ᐃᔥᑯᑌ ᑳᐊᒀᑭᓯᑫᒪᑲᒃ᙮

13

13:1b.HEB.013.001 ᑮᓇᐙ ᑕᔥ ᑫᑯ ᐐᑳ ᐴᓂᑑᑫᒃ ᐃᐃ ᑳᐃᔑᓵᑭᐁᒀ ᑳᐐᒋᐅᑌᐺᑕᒨᒣᒀ᙮

13:2b.HEB.013.002 ᒫᒥᑲᐎᒃ ᑲᔦ ᒋᐲᑎᑲᓀᒀ ᐲᐎᑌᒃ ᐃᐃᒫ ᑭᑖᐎᓂᐙᕽ᙮ ᐋᓂᑕ ᓴ ᐃᐃ ᑮᐃᔑᒋᑫᐗᒃ, ᐁᑮᑭᑫᑕᓯᒀ ᑕᔥ ᐁᒐᓬᐊᐞ ᐁᐲᑎᑲᓈᐙᒡ᙮

13:3b.HEB.013.003 ᒫᒥᑲᐎᓄᑕᐎᑾᒃ ᐃᑕᔥ ᐃᑭ ᑳᑭᐸᐅᑣ, ᒋᐃᓀᑕᒣᒃ ᑖᐱᔥᑰ ᐁᐐᒌᐌᒀ᙮ ᒫᒥᑲᐎᓄᑕᐎᑾᒃ ᑲᔦ ᐃᑭ ᑳᒫᔑᑑᑕᐎᑣ, ᑖᐱᔥᑰ ᑮᓇᐙ ᐱᑯ ᐃ ᐁᔑᑲᒀᑕᑭᓭᔦᒃ᙮

13:4b.HEB.013.004 ᐐᑎᑫᑎᐎᓐ ᑕᔥ ᒫᐗᒡ ᐃᑯ ᑖᑭᒋ ᐃᓀᒋᑲᑌ᙮ ᐅᓈᐯᒥᒫ, ᐐᐎᒫ ᑲᔦ ᒦ ᐃ ᐁᔑᓈᑾᓂᓂᒃ ᑾᔭᒃ ᑌᐺ ᒋᑑᑖᑎᐙᐸᓐ᙮ ᑭᔐᒪᓂᑑ ᓴ ᐐᓐ ᐅᑲᑎᐸᐊᒪᐙᐞ ᑳᐐᓈᑎᓯᓂᒡ ᐃᐃ ᑲᔦ ᐊᐎᔭᐞ ᑳᐱᒣᓂᒫᓂᒡ ᐸᑳᓐ ᐊᐎᔭᓐ ᐅᐐᑎᑫᒫᑲᓂᓂ᙮

13:5b.HEB.013.005 ᒋᓵᑭᐋᓯᐌᒃ ᑲᔦ ᔔᓂᔮ ᐃᔑᐱᒫᑎᓯᒃ, ᒦ ᐃ ᑌᒥᓂᒃ ᐃᓀᑕᒧᒃ ᑫᑰᓐ ᑳᐊᔮᔦᒃ᙮ ᐋᓃᔥ ᑭᔐᒪᓂᑑ ᑮᐃᑭᑐ: ᑳᐐᓐ ᐐᑳ ᑭᑲᓇᑲᓂᓯᓅᓐ, ᑳᐐᓐ ᐐᑳ ᑭᑲᐌᐱᓂᓯᓅᓐ᙮

13:6b.HEB.013.006 ᑕᑲ ᑕᔥ ᓲᑭᑌᐁᑖ ᒋᐃᑭᑐᔭᕽ: ᑳᑎᐯᒋᑫᒡ ᐅᔕ ᑳᐐᒋᐃᒡ, ᑳᐐᓐ ᑕᔥ ᓂᑲᓭᑭᓯᓰ᙮ ᐋᓃᓐ ᑕᔥ ᐃᓂᓂ ᑫᑑᑕᐎᐸᓐ?

13:7b.HEB.013.007 ᒫᒥᑲᐎᓄᑕᐎᑾᒃ ᐃᑕᔥ ᐃᑭ ᑳᑮᓃᑳᓃᑕᒪᐎᓀᒀ, ᐃᑭ ᑳᑮᐙᐐᑕᒪᐎᓀᒀ ᑭᔐᒪᓂᑑᓐ ᐅᑎᑭᑐᐎᓂᓂ᙮ ᑲᓇᐙᐸᑕᒧᐙᒃ ᐃᑕᔥ ᑲᔦ ᐌᑯᓀᓐ ᑳᑮᐅᒌᓂᒃ ᐋᓃᓐ ᑳᑮᐃᔑᐱᒫᑎᓯᐙᒡ᙮ ᑳᐃᔑᑌᐺᑕᒧᐙᒡ ᑲᔦ ᑫᑮᓇᐙ ᒦ ᐃᓇᑫ ᐃᔑᑌᐺᑕᒧᒃ᙮

13:8b.HEB.013.008 ᒋᓴᔅ X ᓴ ᐯᔑᑾᓐ ᐃᔑᐋᐎ, ᑳᑮᑎᓄᐎᒡ ᐅᑖᓈᕽ, ᒦ ᓴ ᐯᔑᑾᓐ ᓅᑯᒻ ᑳᑮᔑᑲᓂᓂᒃ, ᒦ ᑲᔦ ᐯᔑᑾᓐ ᒨᔕᒃ ᑫᐃᔑᐋᐎᒡ᙮

13:9b.HEB.013.009 ᑫᑯ ᑕᔥ ᐃᔑᐸᑭᑎᓂᑎᓱᑫᒃ ᒋᐗᓂᔑᒥᑯᔦᒃ ᑳᐯᐸᑳᓇᑎᑭᓐ ᑭᑭᓄᐃᑫᐎᓇᓐ, ᑳᒪᔭᑭᑖᑾᑭᓐ ᑲᔦ᙮ ᐅᓂᔑᔑᓂᓂ ᐊᐎᔭ ᑳᐅᑎᓇᕽ ᒪᔥᑲᐎᓰᐎᓐ ᐃᐃᒫ ᑭᔐᒪᓂᑑᓐ ᐅᑭᔐᐙᑎᓯᐎᓂᓃᕽ, ᑳᐐᓐ ᐐᓐ ᐃᐃᒫ ᐅᒌᒪᑲᓯᓅᓐ ᑳᐃᔑᐱᒥᓂᔕᐃᑳᑌᒃ ᑳᐃᓇᑌᒃ ᐋᓃᓐ ᐊᐎᔭ ᑫᐃᓇᒋᑫᐸᓐ᙮ ᐃᑭ ᓴ ᐃ ᓇᑫ ᑳᐃᔑᒋᑫᐙᒡ ᑳᐐᓐ ᐃᐃᒫ ᐅᒋᐐᒋᐋᓰᐗᒃ᙮

13:10b.HEB.013.010 ᑮᓇᐎᓐᑦ ᓴ ᑭᑕᔮᒥᓐ ᑳᐃᔑᐸᑭᑎᓈᓱᕽ, ᐃᑭ ᑕᔥ ᐐᓐ ᑳᑕᔑᐸᒥᑖᑫᐙᒡ ᒎᐎ ᐊᓇᒥᐁᐸᒀᓀᑲᒥᑯᕽ ᑳᐐᓐ ᐐᓇᐙ ᐃᔑᓈᑾᓯᓂᓂ ᒋᑮᒦᒋᐙᐸᓐ ᐃᐃ ᑳᐸᑭᑎᓇᒧᐗᕽ᙮

13:11b.HEB.013.011 ᓇᔥᑫ ᑕᔥ ᒫᐗᒡ ᒎᐎ ᑭᒋᐊᓇᒥᐁᐎᑭᒫ ᐅᑮᓂᑖ ᐲᑎᑲᑑᓐ ᐊᔭᐋᐎᔑ ᒥᔅᑸᓂ ᐁᑮᐸᑭᑎᓇᕽ ᐃᐃᒫ ᒫᐗᒡ ᐃᑯ ᑳᐃᔑᑯᑖᓀᑖᑾᒃ, ᐅᒪᒋᑑᑕᒧᐎᓂᓂ ᐅᒋ᙮ ᐃᑭ ᑕᔥ ᐐᓐ ᐊᔭᐋᐎᔕᒃ ᐅᐐᔭᐎᐙᓐ ᓵᑭᒐᔭᐄ ᐃᓇᑫ ᑳᑮᐃᔑᑲᐯᔑᕽ ᑮᐃᔑᒑᑭᓯᑳᑌᓂᐗᓐ᙮

13:12b.HEB.013.012 ᒦᑕᔥ ᐯᔑᑾᓐ ᒋᓴᔅ ᑳᑮᐅᒋᓂᐳᒡ ᐊᑾᒌᕽ ᐃᓇᑫ ᑭᒋᐆᑌᓈᐎᔥᒀᑌᒥᕽ ᐁᐐᐯᑭᐋᒡ ᐯᒫᑎᓯᓂᒡ ᐅᒪᒋᑑᑕᒧᐎᓂᓃᕽ ᐅᒋ, ᐐᓐ ᐃᑯ ᐅᒥᔅᑸᒻ ᐁᑮᐋᐸᒋᑑᒡ᙮

13:13b.HEB.013.013 ᑕᑲ ᑕᔥ ᑫᑮᓇᐎᓐᑦ ᐃᔖᐙᑖ ᓵᑭᒐᔭᐄ ᑳᐃᔑᑲᐯᔑᕽ, ᑫᑮᓇᐎᓐᑦ ᐱᓵᓐ ᒋᑑᑖᑰᐗᕽ ᑳᑮᒣᓂᔐᑖᑾᓂᓂᒃ ᑳᑮᑑᑕᐎᓐᒡ᙮

13:14b.HEB.013.014 ᑳᐐᓐ ᐄᑐᒃ ᑮᓇᐎᓐᑦ ᐊᔮᓯᓅᓐ ᓀᐱᒡ ᑳᐊᔮᒃ ᑭᒋᐆᑌᓇ ᐅᐅᒫ ᐊᑮᕽ, ᐃᐃ ᓴ ᑳᓇᓈᑕᐙᐸᑕᒪᕽ ᑭᒋᐆᑌᓇ ᑳᐐᐱᑕᑯᔑᓅᒪᑲᒃ᙮

13:15b.HEB.013.015 ᑕᑲ ᑕᔥ ᑮᓇᐎᓐᑦ ᒨᔕᒃ ᒋᓴᓱᕽ ᐅᒋᒦᓈᑖ ᑭᔐᒪᓂᑑ ᐃᐃ ᑳᐃᔑᒦᑴᒋᐌᓂᒪᕽ, ᑭᑑᓂᓈᓂᕽ ᓴ ᐁᐅᒋ ᐃᑭᑐᔭᕽ, ᐁᐐᓇᕽ ᑲᔦ ᐁᑎᐯᓂᒥᓇᕽ᙮

13:16b.HEB.013.016 ᑫᑯ ᐗᓃᑫᑫᒃ ᒋᒥᓄᑑᑖᑫᔦᒃ ᒋᐙᐐᑑᑳᑫᔦᒃ ᑲᔦ, ᒦᑕᔥ ᐅᓄ ᑎᓄ ᐃᔑᒋᑫᐎᓇᓐ ᑭᔐᒪᓂᑑ ᐸᑭᑎᓈᓱᐎᓂᕽ ᑳᐃᔑᓇᕽ ᑳᒥᓍᐸᑕᕽ᙮

13:17b.HEB.013.017 ᓇᐃᑕᐎᑾᒃ ᓴ ᑳᓃᑳᓃᑕᒪᐎᓀᒀ, ᐃᔑᒋᑫᐙᒃ ᑲᔦ ᑳᐃᓂᓀᒀ, ᐋᓃᔥ ᑳᐐᓐ ᐋᐱᒋ ᐊᓉᐱᓰᐗᒃ ᐁᓈᑲᒋᑑᐙᒡ ᑭᑕᒑᑯᐱᒫᑎᓯᐎᓂᐙᓐ᙮ ᐋᓃᔥ ᐅᑲᑕᑾᑭᑕᒫᑯᐙᓐ ᑭᔐᒪᓂᑑᓐ ᐃᐃ ᑭᑎᔑᒋᑫᐎᓂᐙᓐ᙮ ᑮᔥᐱᓐ ᐃᑕᔥ ᐱᓯᑕᐌᒀ ᐋᐱᒋ ᓴ ᑕᒌᑲᓄᑮᐗᒃ᙮ ᑮᔥᐱᓐ ᐃᑕᔥ ᔕᔒᐱᑕᐌᒀ ᑕᒫᓀᑕᒨᒃ, ᑳᐐᓐ ᐃᑕᔥ ᐃᐃ ᓇᑫ ᑭᑖᐅᒋᒥᓄᓭᓰᒻ᙮

13:18b.HEB.013.018 ᑫᑯ ᑕᔥ ᐸᑭᒌᑫᒃ ᒋᐊᓇᒥᐁᑕᒪᐎᔮᕽ᙮ ᐐᑫ ᑲᔦ ᓂᑫᒋᓈᐅᒥᓐ ᐊᐙᒋᑯ ᐸᑮ ᑫᑰᓐ ᑳᐗᓯᑖᐎᓈᑾᒃ ᐁᐊᔮᓯᓄᒃ ᓂᐱᒫᑎᓯᐎᓂᓈᓂᕽ, ᒨᔕᒃ ᑾᔭᒃ ᐁᐊᑕᐌᑕᒫᕽ ᑾᔭᒃ ᒋᐃᔑᒋᑫᔮᕽ᙮

13:19b.HEB.013.019 ᒦᑕᔥ ᐃᐃ ᐁᔑᐸᑯᓭᓂᒥᓇᑰᒃ, ᐌᐌᓂ ᒋᑲᑴᒋᒣᒃ ᑭᔐᒪᓂᑑ ᒦᓇᐙ ᒋᐃᔑᓂᔕᐅᒡ ᐌᑎ ᑳᐃᔑᐊᔮᔦᒃ᙮

13:20b.HEB.013.020 ᑭᔐᒪᓂᑑ ᐅᔕ ᐅᑮᑮᐌᐱᒫᑎᓰᐋᓐ ᑳᑎᐯᒋᑫᓂᒡ ᒋᓴᓲᓐ ᑳᑮᓂᓯᒥᓐᒡ᙮ ᒦᐗᓂᓂ ᑳᑭᒋ ᐃᓀᑖᑯᓯᓂᒡ ᐁᑲᓇᐌᓂᒫᓂᒡ ᐃᐃ ᐅᒫᓇᒑᓂᔑᒥᓂ, ᐋᓃᔥ ᒋᓴᓲᓐ ᐅᑮᐸᑭᑎᓇᒥᓂ ᐅᒥᔅᑸᒥᓂ, ᑳᐅᒋᐋᔩᒋᓯᓂᓂᒃ ᐃᐃ ᑭᔐᒪᓂᑑ ᑳᑮᐃᔑ ᓀᐱᒋ ᐊᔓᑕᒫᑫᒡ᙮ ᑕᑲ ᑭᔐᒪᓂᑑ ᑳᒦᓂᓇᕽ ᐱᓵᓐ ᒋᐱᒫᑎᓯᐗᕽ,

13:21b.HEB.013.021 ᑭᑲᐅᑎᓇᒫᑯᐙ ᑲᑭᓇ ᑳᐅᓂᔑᔑᓂᓂᑭᓐ ᑫᑰᓇᓐ ᒋᑑᑕᒧᐌᒃ ᐅᑎᓀᑕᒧᐎᓐ᙮ ᑕᑲ ᑲᔦ ᒋᓴᔅ Xᐃᕽ ᑭᑲᐅᒋ ᐃᔑᐃᑯᓈᓐ ᒋᑑᑕᒧᐗᕽ ᐋᓃᓐ ᐁᔑᒥᓍᐸᑕᕽ᙮ ᑕᑲ X ᑕᑭᒋ ᐃᓀᑖᑯᓯ ᒨᔕᒃ ᐃᑯ ᐊᐸᓀ᙮ ᐁᒣᓐ᙮

13:22b.HEB.013.022 ᓃᒋᐅᑌᐺᑕᒨᒃ! ᑭᐸᑯᓭᓂᒥᓂᓂᒻ ᐃᑕᔥ ᒋᔕᔒᐯᑕᒣᒃ ᒋᐱᓯᑕᒣᒃ ᐅᐅ ᑳᐃᔑᑲᓅᓂᓇᑰᒃ ᒋᒪᔥᑲᐌᑕᒣᒃ᙮ ᐋᓃᔥ ᓂᑕᑰᓯᑑᓐ ᐅᐅ ᑳᐅᔑᐲᐊᒪᐎᓇᑰᒃ᙮

13:23b.HEB.013.023 ᑭᓇᑕᐌᓂᒥᓂᓂᒻ ᐃᑕᔥ ᒋᑭᑫᑕᒣᒃ, ᑮᑕᓇᒥᐋᓈᓐ ᑎᒪᑎ ᐁᑮᓵᑲᐊᕽ ᐃᐃᒫ ᑭᐸᐅᑏᐎᑲᒥᑯᕽ᙮ ᑮᔥᐱᓐ ᐃᑕᔥ ᐐᐸ ᐲᔖᒡ ᓂᑲᐱᐐᒌᐙ ᐊᐲ ᐊᑕᐙᐸᒥᓇᑰᒃ᙮

13:24b.HEB.013.024 ᓂᐴᔔᐋᒃ ᐃᑕᔥ ᑲᑭᓇ ᑳᓃᑳᓃᑕᒪᐎᓀᒀ, ᑲᑭᓇ ᑲᔦ ᑭᔐᒪᓂᑑ ᑳᑎᐯᓂᒫᒡ ᐅᐱᒫᑎᓰᒪᐞ᙮ ᑮᑕᓇᒥᐋᓈᓂᒃ ᑲᔦ ᐅᐅᒫ ᐃᑕᓬᐃ ᐊᑮᕽ ᑭᐴᔔᐃᑯᐙ᙮

13:25b.HEB.013.025 ᑕᑲ ᑭᔐᒪᓂᑑ ᐅᑭᔐᐙᑎᓯᐎᓐ ᑭᑲᐐᒌᐎᑯᒻ ᒨᔕᒃ ᑳᑕᔑᔦᒃ᙮ ᒦ ᐃᐌ᙮