Colossians (Ojibwa)

1

1:1b.COL.001.001 ᓃᓐ ᑆᓬ ᑭᔐᒪᓂᑑ ᐐᓐ ᓂᑮᐅᓀᓂᒥᒃ X ᒋᓴᔅ ᐅᑎᔑᓂᔕᐙᑲᓇᓐ ᒋᑎᓄᐎᔮᓐ᙮ ᑎᒪᑎ ᑮᒋᑌᐺᑕᒨᓈᓐ ᑕᔥ ᑲᔦ ᑳᐐᒌᐗᒃ, ᑭᐴᔔᐃᑯᐙ᙮

1:2b.COL.001.002 ᑭᑑᔑᐲᐊᒫᑰᒻ ᑮᓇᐙ ᑭᔐᒪᓂᑑ ᑳᑎᐯᓂᒥᓀᒃ ᐌᑎ ᑲᓬᐋᓰᕽ ᑳᐊᔮᔦᒃ, ᐋᓃᔥ ᑳᐐᑕᓇᒥᐋᒥᑰᔦᒃ ᑭᑌᐺᔦᑖᑯᓯᒻ ᐁᐐᒌᐌᒃ X᙮ ᑕᑲ ᑭᔐᒪᓂᑑ ᑳᐅᔫᓯᔭᕽ ᑭᑲᒥᓄᑑᑖᑯᐙ, ᐱᓵᓂᓯᐎᓐ ᑲᔦ ᑭᑲᒦᓂᑯᐙ᙮

1:3b.COL.001.003 ᒨᔕᒃ ᐃᑕᔥ ᓂᒦᑴᒋᐌᓂᒫᓈᓐ ᑭᔐᒪᓂᑑ ᑳᑎᐯᓂᒥᓇᕽ ᒋᓴᔅ X ᑳᐅᔫᓯᒡ, ᐊᐲ ᑮᐊᓇᒥᐁᑕᒫᑰᔦᒃ,

1:4b.COL.001.004 ᐋᓃᔥ ᓂᑮᓅᑖᒥᓐ ᐁᑌᐺᑕᐌᒃ X ᒋᓴᔅ, ᑲᔦ ᐁᓵᑭᐁᒀ ᑲᑭᓇ ᑭᔐᒪᓂᑑ ᑳᑎᐯᓂᒫᒡ ᐯᒫᑎᓯᓂᒡ᙮

1:5b.COL.001.005 ᐃᐃ ᑕᔥ ᑎᐹᒋᒧᐎᓐ ᑳᑌᐺᔦᑖᑾᒃ, ᐃᐃ ᒥᓍᒋᒧᐎᓐ ᓂᑕᒻ ᑮᐅᑎᓯᑯᔦᒃ, ᒦ ᓴ ᐃᐃᒫ ᑳᐅᒋᐊᐯᓂᒧᔦᒃ ᐁᑮᓅᑕᒣᒃ᙮ ᒦᑕᔥ ᐃᐃᒫ ᑭᑌᐺᑕᒧᐎᓂᐙ, ᑭᓵᑭᐃᐌᐎᓂᐙ ᑲᔦ ᐁᔑᓃᐸᐐᒪᑲᑭᓐ, ᐋᓃᔥ ᑭᐲᑑᒻ ᑳᑲᓇᐌᑕᒫᑰᔦᒃ ᐁᐐᒦᓂᑰᔦᒃ ᐌᑎ ᑭᒋᑮᔑᑯᕽ᙮

1:6b.COL.001.006 ᐃᐃ ᑕᔥ ᒥᓍᒋᒧᐎᓐ ᑳᑮᐅᑎᓯᑯᔦᒃ, ᒨᔕᒃ ᐊᓂᒥᓄᑑᑖᑫᒪᑲᓐ, ᒥᓯᐌ ᑲᔦ ᐊᓂ ᐃᔑᒥᓯᑌᔥᑳᒪᑲᓐ ᐅᐅᒫ ᐊᑮᕽ, ᑖᐱᔥᑰ ᑳᑮᑑᑖᑯᔦᒃ ᒥᓍᒋᒧᐎᓐ ᓂᑕᒻ ᐁᑮᔑᑲᒃ ᑳᑮᓅᑕᒣᒃ, ᐁᑮᑭᑫᑕᒧᐌᒃ ᑲᔦ ᐋᓃᓐ ᒪᔮ ᐁᓀᑖᑾᓂᓂᒃ ᑭᔐᒪᓂᑑ ᐅᑭᔐᐙᑎᓯᐎᓐ᙮

1:7b.COL.001.007 ᐊᐊ ᑕᔥ ᑳᔕᐌᓂᒪᑭᒡ ᓂᐐᑕᓄᑮᒫᑲᓂᓈᓐ ᐁᐸᐸᕒᐊᔅ ᑭᑮᑭᑭᓄᐊᒫᑯᐙ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ᙮ ᐋᐱᒋ ᑕᔥ ᐌᐌᓂ ᑌᐺᔦᑖᑯᓯ ᐁᐊᓄᑮᑕᐙᒡ Xᑕᓐ ᑮᓇᐙ ᐅᒋ᙮

1:8b.COL.001.008 ᓂᑮᑕᔑᑕᒫᑯᓈᓐ ᐃᐃ ᑭᓵᑭᐃᐌᐎᓂᐙ ᑭᔐᒪᓂᑑ ᐅᑕᒑᑾᓐ ᑳᒦᓂᒥᓀᒃ᙮

1:9b.COL.001.009 ᒦ ᓴ ᑕᔥ ᒨᔕᒃ ᑳᐅᒋᐊᓇᒥᐁᑕᒫᑰᔦᒃ ᐊᐲ ᐁᑮᓅᑕᒫᕽ ᐁᓈᒋᒥᑰᔦᒃ᙮ ᓂᑲᑴᒋᒫᓈᓐ ᑭᔐᒪᓂᑑ ᒋᒨᔥᑭᓀᑭᑫᑕᒧᐌᒃ ᐋᓃᓐ ᐁᔑᒥᓴᐌᑕᕽ, ᒋᑕᑯᐊᔮᔦᒃ ᑲᔦ ᑲᑮᑖᐌᑕᒧᐎᓐ, ᓂᓯᑐᑕᒧᐎᓐ ᑲᔦ ᐅᑕᒑᑾᓐ ᑳᒦᑭᐌᓂᒡ᙮

1:10b.COL.001.010 ᒦᑕᔥ ᐃᐃ ᒋᑲᔥᑭᑑᔦᒃ ᒋᐃᔑᐱᒫᑎᓯᐌᒃ ᑫᑮᐃᔑᐱᒫᑎᓯᐙᐸᓐ ᑳᑎᐯᓂᒥᑯᐙᒡ ᑳᑎᐯᒋᑫᓂᒡ, ᒨᔕᒃ ᑲᔦ ᒋᐃᔑᒋᑫᐌᒃ ᑳᐃᔑᒥᓉᑕᕽ᙮ ᐅᔥᑭᐱᒫᑎᓯᐎᓂᕽ ᐃᑕᔥ ᓅᑯᒻ ᐁᐃᔑᐱᒫᑎᓯᔦᒃ, ᒥᓄᒋᑫᐎᓇᓐ ᑭᑲᑑᑖᒻ, ᐲᓂᔥ ᑲᔦ ᐐᑫ ᑭᑲᑭᑫᓂᒫᐙ ᑭᔐᒪᓂᑑ᙮

1:11b.COL.001.011 ᒦ ᐃ ᑲᔦ ᒋᒪᔥᑲᐎᓰᔥᑳᑯᐌᒃ ᐃᐃ ᑳᑭᒋ ᐃᓀᑖᑾᓂᓂᒃ ᐅᒪᔥᑲᐎᓰᐎᓐ, ᒋᑲᔥᑭᑑᔦᒃ ᒋᔕᔒᐯᑕᒣᒃ ᑲᑭᓇ ᑫᑰᓐ ᑳᓇᑭᔥᑲᒣᒃ,

1:12b.COL.001.012 ᐁᒥᓉᑕᒣᒃ ᑲᔦ ᐁᒦᑴᒋᐌᓂᒣᒃ ᑳᐅᔫᓯᒥᓐᒡ᙮ ᐐᓐ ᐋᓃᔥ ᑭᑮᐃᔑᐃᑯᐙ ᒋᑌᐊᐲᑌᑖᑯᓯᔦᒃ ᑫᑮᓇᐙ ᒋᑕᑯᑌᐱᓇᒧᐌᒃ ᑭᔐᒪᓂᑑ ᑳᑮᑾᔮᒌᑕᒪᐙᒡ ᐯᒫᑎᓯᓂᒡ ᑳᑎᐯᓂᒫᒡ ᐁᐐᒦᓈᒡ ᐌᑎ ᐅᑑᑭᒫᐎᐎᓂᕽ ᐊᐊ ᑳᐙᓭᔦᑖᑯᓯᒡ᙮

1:13b.COL.001.013 ᐐᓐ ᐋᓃᔥ ᑲᔦ ᑭᑮᐐᒋᐃᑯᓈᓐ ᒋᐸᐲᐗᑭᒡ ᐃᐃᒫ ᑳᐃᔑᒪᔥᑲᐎᑎᐯᒋᑫᒪᑲᓂᓂᒃ ᑲᔥᑮᑎᐱᑭᓯᐎᓐ᙮ ᒦᑕᔥ ᑳᑮᐅᒋ ᐃᔑᐋᒋᐸᑭᑎᓂᓇᕽ ᐃᐃᒫ ᑳᑕᔑᑭᒋᐅᑭᒫᐎᓂᒡ ᐃᓂ ᑳᓵᑭᐋᒡ ᐅᑯᓯᓴᓐ᙮

1:14b.COL.001.014 ᒦ ᓴ ᑕᔥ ᐃᐃᒫ ᐅᑯᓯᓯᕽ ᑭᑮᐋᐸᐅᑯᓈᓐ ᑳᑮᐃᔑᐋᔩᑕᐱᓱᔭᕽ, ᐁᑮᐴᓀᑕᒫᑰᔭᕽ ᑭᒪᒋᑑᑕᒧᐎᓂᓈᓂᓐ᙮

1:15b.COL.001.015 X ᐃᑕᔥ ᐁᐙᐸᒥᓐᒡ ᒪᔮ ᐅᓈᑯᐋᓐ ᐋᓃᓐ ᐁᔑᓈᑯᓯᓂᒡ ᑳᓈᑯᓯᓯᓂᒃ ᑭᔐᒪᓂᑑᓐ᙮ X ᐃᑕᔥ ᐐᓐ ᒫᐗᒡ ᓃᑳᓐ ᑮᐅᑯᓯᓯᒫᐎ᙮ ᐐᓐ ᑲᔦ ᓇᐗᒡ ᐃᔥᐯᑖᑯᓯ ᐊᐲᒡ ᐐᓐ ᑲᑭᓇ ᑫᑰᓂᓂ ᑳᑮᐅᔑᒋᑳᑌᓂᒃ᙮

1:16b.COL.001.016 ᐐᓐ ᐃᑕᔥ ᐅᒋ X ᑭᔐᒪᓂᑑ ᐅᑮᐅᔑᑑᓐ ᑲᑭᓇ ᑫᑰᓂᓂ ᑮᔑᑯᕽ ᑳᐊᔮᓂᒃ, ᐊᑮᕽ ᑲᔦ ᑳᐊᔮᓂᑭᓐ, ᑫᑰᓇᓐ ᑳᓈᑾᓂᓂᑭᓐ, ᑳᓈᑾᓯᓂᓂᑭᓐ ᑲᔦ᙮ ᐅᑮᑕᑯ ᐅᔑᐋᐞ ᑲᔦ ᑳᐊᒑᑯᐌᑖᑯᓯᓂᒡ ᑳᐅᑭᒫᐗᐱᓂᒡ ᑳᐃᓂᒥᓐᒡ, ᑳᑎᐯᓂᒥᐌᓂᒡ ᑲᔦ, ᑳᐅᑭᒫᑲᑖᑫᓂᒡ ᑲᔦ, ᑳᑲᔥᑭᐁᐎᓯᓂᒡ ᑲᔦ – ᑲᑭᓇ ᑕᔥ ᑫᑰᓂᓂ ᑮᐅᔑᒋᑳᑌᓂ ᐐᓐ ᐅᒋ, ᐐᓐ ᑲᔦ ᑲᑭᓇ ᑫᑰᓂᓂ ᑮᐅᔑᑕᒪᐙ᙮

1:17b.COL.001.017 X ᐃᑕᔥ ᐋᔕ ᑮᐊᔮ ᑲᑭᓇ ᑫᑰᓂᓂ ᒋᑆ ᐊᔮᓂᒃ, ᐐᓐ ᐃᑕᔥ ᑲᔦ ᑲᑭᓇ ᑫᑰᓂᓂ ᑳᐅᒋᒥᒋᒥᔥᑳᓂᒃ᙮

1:18b.COL.001.018 ᐐᓐ ᐃᑕᔥ ᐅᓃᑳᓂᔥᑲᐙᐞ ᐅᑌᐺᑕᒨᐞ ᑳᒫᒪᔦᓄᓂᒡ, ᒦ ᓴ ᐃᐃᐌᓂ ᐅᐐᔭᐤ᙮ ᐐᓐ ᑲᔦ ᑳᐅᒋᐱᒫᑎᓰᒪᑲᓂᓂᒃ ᐃᐃ ᐅᐐᔭᐤ᙮ ᐐᓐ ᐃᑕᔥ ᑲᔦ ᒫᐗᒡ ᐃᑯ ᓂᑕᒻ ᑳᑮᐅᑯᓯᓯᒫᐎᒡ, ᑮᑮᐌᐱᒪᑎᓯ ᐋᔕ ᐁᑮᓂᐳᒡ, ᐐᓐ ᐃᑯ ᒋᓃᑳᓂᑭᒫᐎᒡ ᒋᑎᐯᑕᕽ ᑲᑭᓇ ᑫᑰᓐ ᑳᑕᓯᓂᓂᒃ᙮

1:19b.COL.001.019 ᑭᔐᒪᓂᑑ ᑕᔥ ᐐᓐ ᐃᑯ ᑮᐃᓀᑕᒻ ᐅᑯᓯᓴᓐ ᒋᑭᑭᔥᑲᒥᓂᒡ ᐃᐃ ᑲᑭᓇ ᐅᑭᔐᒪᓂᑑᐙᑎᓯᐎᓐ ᑳᔑᐌᓅᑕᓂᓂᒃ᙮

1:20b.COL.001.020 ᒦᑕᔥ ᑲᔦ ᐃᐃᒫ ᐅᑯᓯᓯᕽ ᑭᔐᒪᓂᑑ ᑮᐃᓀᑕᒻ ᑲᑭᓇ ᑫᑰᓂᓂ ᒋᑮᐌᓈᓯᑳᑯᒡ, ᐅᑯᓯᓴᓐ ᑕᔥ ᐁᑮᐃᔑᓰᑭᓇᒥᓂᒡ ᐅᒥᔅᑸᒥᓂ ᐃᐃᒫ ᐋᔑᑌᔮᑎᑯᕽ᙮ ᒦ ᓴ ᑕᔥ ᑳᑮᐅᒋᓈᒋᐐᑯᐱᑕᒫᓱᒡ ᑲᑭᓇ ᑫᑰᓂᓂ ᒋᒥᓄᐐᒌᐎᑯᒡ, ᑲᑭᓇ ᐊᑮᕽ ᑫᑰᓇᓐ ᑳᐊᔮᓂᑭᓐ, ᑮᔑᑯᕽ ᑲᔦ᙮

1:21b.COL.001.021 ᐅᑖᓈᕽ ᐃᑕᔥ ᑮᓇᐙ ᑭᑮᓈᐙᐸᒫᐙ ᑭᔐᒪᓂᑑ ᐁᑮᐃᔑᓈᑯᓯᔦᒃ ᑖᐱᔥᑰ ᐁᒦᑳᓀᒃ, ᐋᓃᔥ ᓅᒋᑯ ᑭᑮᐃᔑᒋᑫᒻ, ᓅᒋᑯ ᑲᔦ ᑭᑮᐃᓀᑖᒻ᙮

1:22b.COL.001.022 ᐃᓇᔥᑫ ᑕᔥ ᐁᑮᓂᐳᓂᒡ ᐃᓂ ᐅᑯᓯᓴᓐ ᐁᑮᑭᑭᔥᑳᑯᒡ ᐅᑕᑮᐎᐐᔭᐎᓂ, ᑭᔐᒪᓂᑑ ᑕᔥ ᑭᑮᐃᔑᓈᒋᐐᑯᐱᓂᑯᐙ ᒋᒥᓄᐐᒌᐌᒃ, ᐁᐐᐲᓂᓀᒃ ᐃᐃᒫ ᑳᐃᔑᐊᔮᒡ, ᒦ ᐃ ᒋᐃᓀᑖᑯᓯᔦᒃ ᐁᑎᐯᓂᒥᓀᒃ, ᐐᑫ ᐁᐯᑳᑎᓯᐌᒃ, ᐋᐲᒋᑯ ᑲᔦ ᐁᐊᓈᒣᑖᑯᓯᓯᐌᒃ᙮

1:23b.COL.001.023 ᑮᓇᐙ ᑕᔥ ᒦ ᐃ ᐁᔑᓈᑾᒃ ᑮᔥᐱᓐ ᒫᓄ ᐊᓂᒫᒑᔦᒃ ᐃᐃᒫ ᑭᑌᐺᑕᒧᐎᓂᐙᕽ, ᒪᔥᑲᐎᑳᐸᐎᔦᒃ ᑳᑮᐃᔑᐅᓇᓯᑰᔦᒃ᙮ ᑫᑯ ᑕᔥ ᐸᑭᑎᓂᑎᓱᑫᒃ ᒋᐸᑫᓄᑕᒣᒃ ᐃᐃ ᐊᐯᓂᒧᐎᓐ ᑳᑮᑌᐱᓇᒣᒃ ᐊᐲ ᑮᓅᑕᒣᒃ ᒥᓍᒋᒧᐎᓐ᙮ ᐃᐃ ᑕᔥ ᒥᓍᒋᒧᐎᓐ ᐋᔕ ᑲᑭᓇ ᐊᐎᔭ ᐁᑕᓱᐯᔑᑯᒡ ᑮᐐᑕᒪᐙ ᒥᓯᐌ ᐅᐅᒫ ᐊᑮᕽ᙮ ᓃᓐ ᑕᔥ ᑆᓬ ᒦ ᐃᐌ ᑳᐊᓄᑮᑕᒫᓐ᙮

1:24b.COL.001.024 ᓅᑯᒻ ᐃᑕᔥ ᐐᑫ ᓂᒥᓉᑕᒻ ᐃᐃ ᑳᐃᔑᑲᒀᑕᑭᑑᔮᓐ ᑮᓇᐙ ᐅᒋ᙮ ᐅᐅ ᐋᓃᔥ ᑳᐃᔑᑲᒀᑕᑭᑑᔮᓐ ᓂᐐᔭᐎᕽ, ᑫᓃᓐ ᓂᐐᒋᑣ ᒋᑮᔑᒋᑳᑌᒃ ᐃᐃ ᑲᒀᑕᑭᑑᐎᓐ ᑫᔮᐱ ᑳᐐᑲᒀᑕᑭᑑᓈᓂᐗᕽ, ᐃᓇᑫ X ᑳᑮᐃᔑᑲᒀᑕᑭᑑᒡ᙮ ᒦᑕᔥ ᑳᐅᒋ ᐃᔑᒋᑫᔮᓐ ᒋᐅᒋᐐᒋᐃᑣ ᐃᑭ ᑲᑭᓇ ᐅᑌᐺᑕᒨᒃ, ᒦ ᐋᓃᔥ ᐃᐃ X ᐅᐐᔭᐤ᙮

1:25b.COL.001.025 ᑭᔐᒪᓂᑑ ᑕᔥ ᐅᑎᔑᒋᑫᐎᓂᕽ ᓂᑮᐅᒋᐅᓀᓂᒥᒃ ᒋᐐᒋᐃᒪᒃ ᐅᑕᓇᒥᐋᐞ ᑳᒫᒪᐎᑎᐯᓂᒫᒡ, ᐐᓐ ᓂᑮᒦᓂᒃ ᐅᐅ ᐊᓄᑮᐎᓐ ᒋᑑᑕᒧᐗᒃ ᑮᓇᐙ ᒋᒥᓄᓭᔦᒃ, ᒋᐐᑕᒪᐎᓇᑰᒃ ᐋᓃᓐ ᒪᔮ ᐁᑭᑑᒪᑲᓂᓂᒃ ᑭᔐᒪᓂᑑ ᐅᑎᑭᑐᐎᓐ᙮

1:26b.COL.001.026 ᒦ ᓴ ᑕᔥ ᐃᐃ ᑳᑮᑭᑫᒋᑳᑌᓯᓂᓂᒃ ᐅᑎᓀᑕᒧᐎᓐ, ᑳᑮᑳᑑᒡ ᐅᑖᓈᕽ ᑳᑮᐱᐊᑮᐗᓂᓂᒃ, ᑳᑮᑳᑕᒪᐙᒡ ᑲᔦ ᐃᓂᓂᐗᐞ ᐅᑖᓈᕽ ᑳᑮᐊᔮᓂᒡ᙮ ᓅᑯᒻ ᐃᑕᔥ ᐋᔕ ᑲᑭᓇ ᐅᑮᐙᐸᑕᐋᐞ ᐃᐃ ᐅᑎᔑᒋᑫᐎᓐ ᑲᑭᓇ ᑳᑎᐯᓂᒫᒡ ᐯᒫᑎᓯᓂᒡ᙮

1:27b.COL.001.027 ᒦᐗᐞ ᐃᑕᔥ ᐃᐃ ᑭᔐᒪᓂᑑ ᑳᑮᐃᓀᓂᒫᒡ ᒋᑭᑫᑕᒥᓂᒡ ᐅᑎᓀᑕᒧᐎᓐ ᑳᑮᑭᑫᒋᑳᑌᓯᓂᓂᒃ᙮ ᐋᐱᒋ ᑕᔥ ᐌᓅᑕᓂᓂ, ᑭᒋ ᐃᓀᑖᑾᓂᓂ ᑲᔦ ᐅᑎᓀᑕᒧᐎᓐ ᑳᐐᑭᑫᑕᒨᓂᑣ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ᙮ ᒦᑕᔥ ᐅᐅ ᑳᑕᔑᑕᒫᕽ, X ᐁᐊᔮᒡ ᑭᐱᒫᑎᓯᐎᓂᐙᕽ, ᐐᓐ ᐋᓃᔥ ᑳᐅᒋᑫᒋᓈᐅᔦᒃ ᒋᑌᐱᓇᒧᐌᒃ ᑭᔐᒪᓂᑑ ᐅᑭᒋ ᐃᓀᑖᑯᓯᐎᓐ᙮

1:28b.COL.001.028 X ᐃᑕᔥ ᓃᓇᐎᓐᑦ ᑳᑕᔑᒪᑭᒡ ᑲᑭᓇ ᐊᐎᔭ ᐁᐐᑕᒪᐗᑭᒡ᙮ ᑲᑮᑖᐌᑕᒧᐎᓂᕽ ᐃᑕᔥ ᓂᑕᔑᐊᔮᒀᒥᒫᓈᓂᒃ, ᓂᑭᑭᓄᐊᒪᐙᓈᓂᒃ ᑲᔦ, ᑳᑕᔑᐙᒡ ᓴ ᒋᐲᓇᑭᑣ ᑭᔐᒪᓂᑑᓐ ᑳᐃᔑᐊᔮᓂᒡ, ᒋᑎᓄᐎᐙᒡ ᐋᔕ ᐁᑮᑮᔖᐯᐎᐙᒡ ᐃᐃᒫ Xᐃᕽ᙮

1:29b.COL.001.029 ᐅᐅ ᑕᔥ ᐁᑲᑴᑮᔑᑑᔮᓐ ᐋᐱᒋ ᓂᑭᒋᐊᓄᑮ, ᐁᑲᒀᑕᑲᓄᑮᔮᓐ ᑲᔦ ᐁᐋᐸᒋᑖᐗᒃ X ᐅᒪᔥᑲᐎᓰᐎᓐ ᑳᒦᔑᒡ, ᐁᒪᔥᑲᐗᓄᑮᒪᑲᓂᓂᒃ ᑲᔦ ᐃᐃᒫ ᓂᐱᒫᑎᓯᐎᓂᕽ᙮

2

2:1b.COL.002.001 ᑕᑲ ᑭᐐᐐᑕᒪᐎᓂᓂᒻ ᐋᓃᓐ ᐁᐲᒋᑭᒋᐊᓄᑮᔮᓐ ᑮᓇᐙ ᐅᒋ, ᐃᑭ ᑲᔦ ᐅᑌᐺᑕᒨᒃ ᓬᐁᔮᑎᓰᔮᕽ ᑳᐊᔮᐙᒡ, ᐃᑭ ᑲᔦ ᑲᑭᓇ ᑎᐱᓇᐌ ᒪᔑ ᑳᐙᐸᒥᓯᒀ᙮

2:2b.COL.002.002 ᒦᑕᔥ ᐅᐅ ᑳᐅᒋ ᐃᔑᒋᑫᔮᓐ ᑫᐐᓇᐙ ᑕᔥ ᒋᒪᔥᑲᐌᑕᒧᐙᒡ ᐅᑌᐃᐙᕽ, ᒫᓄ ᑲᔦ ᑲᑭᓇ ᒋᒫᒪᐎᐐᒋᐃᑎᐙᒡ ᐁᓵᑭᐃᑎᐙᒡ᙮ ᒦᑕᔥ ᑲᔦ ᐐᑫ ᓂᓯᑐᑕᒧᐙᒡ ᒋᐅᒋᐌᓅᒋᑑᐙᒡ ᑫᒋᓈᐅᐎᓐ᙮ ᒦᑕᔥ ᑫᐐᓇᐙ ᒋᐅᒋᑭᑫᑕᒧᐙᒡ ᑭᔐᒪᓂᑑᓐ ᐅᑎᓀᑕᒧᐎᓂᓂ ᐅᑖᓈᕽ ᑳᑭᑫᒋᑳᑌᓯᓂᓂᒃ, ᒦ ᓴ ᐄᑐᒃ ᐊᐊ X ᐐᓐ ᐃᑯ ᑳᑕᔑᒥᓐᒡ᙮

2:3b.COL.002.003 ᐐᓐ ᐄᑐᒃ X ᑳᐱᓂᔅᑯᓇᕽ ᒋᑭᑫᒋᑳᑌᓂᒃ ᑭᔐᒪᓂᑑᓐ ᑳᐌᓅᑕᓂᓂᒃ ᐅᑲᑮᑖᐌᑕᒧᐎᓂᓂ, ᐅᑭᑫᑕᒫᐎᓂᓂ ᑲᔦ᙮

2:4b.COL.002.004 ᑭᐐᑕᒪᐎᓂᓂᒻ ᐃᑕᔥ, ᑫᑯ ᐸᑭᑎᓈᑫᒃ ᐊᐎᔭ ᒋᐗᓂᒥᓀᒃ ᐊᐲ ᑲᑴᔖᑰᓱᒥᓀᒃ, ᐋᓇᐐᓐ ᐐᑫ ᒪᒥᓄᑮᔗᒡ᙮

2:5b.COL.002.005 ᐋᓇᐐᓐ ᐁᐐᒌᐎᓯᓄᐎᓇᑰᒃ ᓂᐐᔭᐎᕽ ᐌᑎ ᑳᐃᔑᐊᔮᔦᒃ, ᔖᑰᒡ ᐃᑕᔥ ᑭᐐᒌᐎᓂᓂᒻ ᓂᑎᓀᑕᒧᐎᓂᕽ᙮ ᐋᐱᒋ ᑲᔦ ᓂᒥᓉᑕᒻ ᐁᐙᐸᑕᒫᓐ ᐁᒪᔥᑲᐎᑳᐸᐎᔦᒃ ᐁᑌᐺᑕᐌᒃ X᙮

2:6b.COL.002.006 ᐋᔕ ᑕᔥ ᐁᑮᐅᑖᐱᓀᒃ X ᒋᓴᔅ ᒋᑎᐯᓂᒥᓀᒃ, ᐃᔑᐱᒧᓭᐙᒃ ᐃᑕᔥ X ᐅᑎᓈᑎᓯᐎᓂᕽ, ᐋᓃᔥ ᑭᐐᒌᐙᐙ᙮

2:7b.COL.002.007 ᑖᐱᔥᑰ ᑕᔥ ᐗᑕᐲᓐ ᐙᓴ ᑳᑯᑖᐎᑭᑭᓐ ᐊᑮᕽ, ᒦ ᓴ ᑕᔥ ᑫᑮᓇᐙ ᐯᔑᑾᓐ ᐃᔑᑯᑖᐎᑭᒃ ᐃᐃᒫ X ᐅᐱᒫᑎᓯᐎᓂᕽ᙮ ᑖᐱᔥᑰ ᑲᔦ ᐙᑳᐃᑲᓐ ᑳᐅᐸᑭᒋᑳᑌᒃ, ᒦ ᑲᔦ ᐃᔑᐅᐸᑭᑑᒃ ᑭᐱᒫᑎᓯᐎᓂᐙᓐ ᐃᐃᒫ Xᐃᕽ, ᒋᓂᒪᔥᑲᐙᑭᓐ ᑲᔦ ᑭᑌᐺᑕᒧᐎᓂᐙᓐ, ᑳᑮᐃᔑᑭᑭᓄᐊᒫᑰᔦᒃ᙮ ᒋᒨᔥᑭᓀᔥᑳᑯᔦᒃ ᑲᔦ ᒦᑴᒋᐌᑕᒧᐎᓐ᙮

2:8b.COL.002.008 ᐊᔮᒀᒥᓯᒃ ᐃᑯᒋ ᒋᐃᔑᐎᓂᓯᓄᐎᓀᒃ ᒋᒪᒫᒋᑾᐱᓂᑯᓯᐌᒃ ᐁᐐᑎᐯᓂᒥᓀᒃ ᐊᐎᔭ᙮ ᐋᓃᔥ ᐊᔮᐗᒃ ᐃᓂᓂᐗᒃ ᑫᑭᓄᐃᑫᐙᒡ ᐃᓂᓃᐎᑭᑭᓄᐃᑫᐎᓇᓐ ᑫᑰᓐ ᑳᐊᐲᑌᑖᑾᓯᓂᓂᑭᓐ᙮ ᐌᑎ ᑕᔥ ᐙᓴ ᐅᑖᓈᕽ ᐅᑑᑎᓈᓈᐙᓐ ᐃᓂᓃᓈᕽ ᑳᐱᑭᑭᓄᐃᑳᑌᓂᑭᓐ ᐁᐃᔑᑭᑭᓄᐃᑫᐙᒡ, ᐁᐅᑎᓇᒧᐙᒡ ᑲᔦ ᐊᒑᑾᐞ ᐅᐅᒫ ᐊᑮᕽ ᑳᐃᔑᑎᐯᒋᑫᓂᒡ, ᑳᐐᓐ ᑕᔥ ᐐᓐ Xᑕᓐ ᑳᐃᔑᑭᑭᓄᐃᑫᓂᒡ᙮

2:9b.COL.002.009 X ᑕᔥ ᐁᐃᓂᓃᐙᑎᓯᒡ ᐅᐐᔭᐎ, ᑲᑭᓇ ᓴ ᑭᔐᒪᓂᑑᓐ ᐅᑎᓈᑎᓯᐎᓂᓂ ᐅᑫᒋᔥᑭᑭᑭᔥᑳᑯᓐ᙮

2:10b.COL.002.010 ᑮᓇᐙ ᑕᔥ ᐁᐐᒌᐌᒃ X, ᒦ ᓴ ᐃᐃᒫ ᑳᐅᒋᒨᔥᑭᓀᔥᑳᑯᐌᒃ ᐌᓅᒋᐱᒫᑎᓯᐎᓐ; ᐐᓐ ᐋᓃᔥ ᑲᑭᓇ ᐅᓃᑳᓂᔥᑲᐙᐞ ᑲᑭᓇ ᑳᐊᒑᑴᑖᑯᓯᓂᒡ ᑳᐅᑭᒫᐎᓂᒡ, ᑳᑲᔥᑭᐁᐎᓯᓂᒡ ᑲᔦ᙮

2:11b.COL.002.011 ᐁᐐᒌᐌᒃ ᑕᔥ X, ᒦ ᐃ ᑳᐃᔑᓈᑯᓯᔦᒃ ᐁᐊᔮᔦᒃ ᑭᑭᓇᐙᑕᔕᑫᔓᑰᐎᓐ, ᑳᐐᓐ ᐐᓐ ᐃᓂᓂ ᑳᐃᔑᑭᑭᓇᐙᑕᔕᑫᔓᐌᒡ, ᐃᐃ ᓴ X ᑳᐃᔑᑭᑭᓇᐙᒋᐃᐌᒡ᙮ ᒦ ᓴ ᐁᔑᓭᔦᒃ ᐁᑮᔒᑯᔥᑲᒣᒃ ᑳᑮᓂᑖᒪᒋ ᐃᔑᒋᑫᒪᑲᒃ ᑫᑌᐃᓈᑎᓯᐎᓐ᙮

2:12b.COL.002.012 ᐊᐲ ᓴ ᑮᓰᑲᐊᑖᑰᔦᒃ ᒦ ᐃ ᑮᐐᒋᓂᑾᐅᑰᒣᒃ X, ᒦ ᐃᒫ ᑲᔦ ᑳᐃᔑᐐᒋᑮᐌᐱᒫᑎᓰᒣᒃ᙮ ᐋᓃᔥ ᑭᑮᑌᐺᑕᒧᐙᒻ ᑭᔐᒪᓂᑑ ᐅᒪᔥᑲᐎᓰᐎᓐ ᐁᑮᑮᐌᐱᒫᑎᓯᐋᒡ Xᑕᓐ ᑳᑮᓂᐳᓂᒡ᙮

2:13b.COL.002.013 ᑮᓇᐙ ᑕᔥ ᐋᐱᑎᕽ ᑭᑮᓂᐳᐗᑭᓱᒻ, ᐋᓃᔥ ᒪᒋᑑᑕᒧᐎᓐ ᑭᑮᑭᑭᔥᑳᑯᒻ, ᑭᑮᑎᓄᐎᒻ ᑲᔦ ᑳᑭᑭᓇᐙᑕᔕᑫᔣᓯᐎᑣ ᐁᑮᐊᔮᓯᐌᒃ ᑭᔐᒪᓂᑑ ᐅᑑᓇᔓᐌᐎᓐ᙮ ᓅᑯᒻ ᐃᑕᔥ ᑭᔐᒪᓂᑑ ᑭᑮᑕᑯᐱᒫᑎᓯᐃᑯᐙ ᑳᐃᔑᐱᒫᑎᓯᓂᒡ Xᑕᓐ, ᐁᑮᐴᓀᑕᒪᐎᓇᕽ ᑲᑭᓇ ᑭᒪᒋᑑᑕᒧᐎᓂᓈᓂᓐ᙮

2:14b.COL.002.014 ᑭᔐᒪᓂᑑ ᑕᔥ ᑲᔦ ᑭᑮᑳᓰᐊᒫᑯᓈᓐ ᑲᑭᓇ ᑳᐃᔑᐅᔑᐲᐃᑳᑌᑭᓐ ᐃᓂ ᑳᑮᑆᓇᐎᑑᔭᕽ ᐅᓇᔓᐌᐎᓐ ᑫᑮᑲᓇᐌᑕᒪᑭᐸᓐ, ᒦ ᐃᐌᓂ ᑳᑮᐊᑯᓴᑲᐊᕽ ᐃᐃᒫ ᐋᔑᑌᔮᑎᑯᕽ᙮

2:15b.COL.002.015 X ᐃᑕᔥ ᑮᓂᐳᒡ ᐃᐃᒫ ᐋᔑᑌᔮᑎᑯᕽ, ᑲᑭᓇ ᐅᑮᒪᔕᔥᑯᓇᒪᐙᐞ ᐃᐃ ᐅᒪᔥᑲᐎᓰᐎᓂᓂ ᑳᐊᒑᑴᑖᑯᓯᓂᑦ ᑳᐅᑭᒫᐎᓂᒡ ᐃᓂ ᑲᔦ ᑳᑲᔥᑭᐁᐎᓯᓂᒡ᙮ ᒦᑕᔥ ᑳᐃᔑᒋᑫᒡ, ᐁᑮᐱᒥᐎᓈᒡ ᐃᐃ ᑳᑮᔖᑰᒋᐋᒡ ᐱᓂᔅᑴ ᐱᑯ ᒋᐙᐸᒋᑲᓂᐎᓂᒡ᙮

2:16b.COL.002.016 ᑫᑯ ᑕᔥ ᐸᑭᑎᓈᑫᒃ ᐊᐎᔭ ᒋᐅᓀᑕᒪᐎᓀᒃ ᐌᑯᓀᓐ ᐃᓂ ᑎᓄ ᒦᒋᒻ ᑫᒦᒋᔦᒃ, ᐌᑯᓀᓐ ᐃᓂ ᑲᔦ ᑫᒥᓂᑴᔦᒃ, ᐋᓃᓐ ᑲᔦ ᑫᐃᔑᒋᑫᐌᒃ ᐊᐲ ᐊᓇᒥᐁᑲᒥᑲᓂᓂᒃ᙮ ᑫᑯ ᑲᔦ ᐸᑭᑎᓈᑫᒃ ᐊᐎᔭ ᒋᐅᓀᑕᒪᐎᓀᒃ ᐋᓃᓐ ᑫᐃᔑᒋᑫᐌᒃ ᑳᓂᑖᐃᓇᑲᒥᑭᓯᔦᒃ ᑮᐅᔥᑭᐊᑰᒋᕽ ᑎᐱᑭᑮᓯᔅ, ᑮᐊᓉᐲᐎ ᑮᔑᑲᓂᓂᑭᓐ ᑲᔦ᙮

2:17b.COL.002.017 ᐃᓂ ᓴ ᐃᓈᑯᓂᑫᐎᓇᓐ, ᒦ ᓴ ᐁᑕ ᓃᔮᒃ ᐁᑲᑴᓈᐱᓈᑾᑭᓐ ᐋᓃᓐ ᐱᒌᓇᒃ ᒪᔮ ᑳᐐᓈᑾᑭᓐ᙮ X ᐃᑕᔥ ᐐᓐ ᐊᐊ ᒪᔮ ᑳᐋᐎᒡ᙮

2:18b.COL.002.018 ᑫᑯ ᑕᔥ ᐸᑭᑎᓈᑫᒃ ᐊᐎᔭ ᒋᐅᑕᐱᓇᒪᐎᓀᒃ ᐃᐃ ᑳᐐᑎᐸᐊᒫᑰᔦᒃ᙮ ᐋᓃᔥ ᐊᔮᐗᒃ ᐃᓂᓂᐗᒃ ᑫᐅᒋᓇᐁᓂᑎᓱᐙᒡ ᐁᑲᒀᑕᑭᐃᑎᓱᐙᒡ ᒋᑕᐸᓯᓈᑯᓯᐙᒡ, ᐁᐊᓇᒥᐁᑕᐙᐙᒡ ᑲᔦ ᐁᒐᓬᐊᐞ᙮ ᐗᐊ ᑎᓄ ᐅᑕᐯᓂᒧᓄᑖᓐ ᑲᔦ ᐅᑎᔑᓇᒧᐎᓇᓐ, ᐊᓂᔖ ᐃᐃ ᑳᐅᒋᑭᑌᓂᒧᒡ ᐃᐃ ᓇᑫ ᐃᓂᓃᓈᕽ ᐁᐃᔑᓈᓈᑲᑕᐌᑕᒧᐙᒡ᙮

2:19b.COL.002.019 ᐊᐊ ᑎᓄ ᐃᓂᓂ ᑳᐐᓐ ᑲᔦ ᑫᔮᐱ ᐅᒥᒋᒣᓂᒫᓰᓐ Xᑕᓐ, ᑳᐅᑎᒀᓂᔥᑲᒥᓂᒡ ᐐᔭᐎᒫ, ᐅᑌᐺᑕᒨᒃ ᑳᐃᓂᑣ᙮ X ᑕᔥ ᐁᑎᐯᑕᕽ ᐅᒋᐱᒫᑎᓰᒪᑲᓂᓂ ᐃᐃ ᐐᔭᐎᒫ, ᒦᑕᔥ ᐃᐃᒫ ᑳᐃᔑᐊᔮᓂᑲᐎᑲᓀᕽ, ᑳᐃᔑᐅᒌᑕᑌᔮᐲᕽ ᑲᔦ ᐌᒋᒥᒋᒥᔥᑳᒃ, ᐁᐅᒋᒫᒌᑭᓂᓂᒃ ᑭᔐᒪᓂᑑᓐ ᑳᐃᔑᐊᑕᐌᑕᒥᓂᒡ᙮

2:20b.COL.002.020 ᑮᓇᐙ ᐃᑕᔥ ᐐᓐ, ᑭᑮᐐᒋᓂᐴᒫᐙ X, ᑳᐅᒋᑎᐯᓂᒥᓯᓄᐎᓀᒀ ᐃᑭ ᐊᒑᑾᒃ ᑳᐅᑭᒫᑲᑕᒧᐙᒡ ᑫᑰᓇᓐ ᑳᐅᔑᒋᑳᑌᓂᑭᓐ ᑮᔑᑯᕽ ᐅᒫ ᑲᔦ ᐊᑮᕽ᙮ ᐌᑯᓀᓐ ᐃᑕᔥ ᐌᒋ ᐃᔑᐱᒫᑎᓯᔦᒃ ᑖᐱᔥᑰ ᐅᐅᒫ ᐊᑮᕽ ᑫᔮᐱ ᐁᐅᒋᑎᐯᑖᑯᓯᔦᒃ? ᐌᑯᓀᓐ ᑲᔦ ᑫᔮᐱ ᐌᒋᓇᐃᑕᒣᒃ ᐅᓄ ᑎᓄ ᐃᓈᑯᓂᑫᐎᓇᓐ:

2:21b.COL.002.021 ᑫᑯ ᐸᐹᒣᑕᑫᓐ ᐅᐅ, ᑫᑯ ᑯᒋᐱᑕᑫᓐ ᐃᐃ, ᑫᑯ ᑲᔦ ᐃ ᐸᑳᓐ ᑫᑰᓐ ᓵᒥᓇᑫᓐ! ᑳᐃᑭᑑᒪᑲᑭᓐ᙮

2:22b.COL.002.022 ᐅᓄ ᑕᔥ ᑲᑭᓇ ᑳᑕᔑᑌᑭᓐ ᐃᐃᒫ ᐃᓈᑯᓂᑫᐎᓂᕽ, ᑳᐅᒋᐃᑰᔦᒃ ᒋᐱᒣᑕᓯᐌᒃ, ᐋᐱᑎᕽ ᐃᑯ ᑮᐋᐸᒋᒋᑳᑌᑭᓐ, ᒦ ᐃ ᐁᔑᐴᓂᓭᑭᓐ᙮ ᐅᓄ ᑕᔥ ᐃᓈᑯᓂᑫᐎᓇᓐ, ᑭᑭᓄᐃᑫᐎᓇᓐ ᑲᔦ, ᐃᓂᓃᓈᕽ ᐅᒌᒪᑲᓅᓐ᙮

2:23b.COL.002.023 ᐋᐱᒋ ᑕᔥ ᐃᓂ ᐅᑭᑭᓄᐃᑫᐎᓂᐙᓐ ᑲᑮᑖᐎᓈᑾᓂᓂᐗᓐ, ᒦᑕᔥ ᐁᑲᑳᓱᒥᐌᐙᒡ ᐁᒐᓬᐊᐞ ᒋᐊᓇᒥᐁᑕᐎᒥᓐᒡ, ᐁᑲᑴᑕᐸᓯᓈᑯᓯᐙᒡ, ᐁᑲᒀᑕᑭᐃᑎᓱᐙᒡ ᑲᔦ ᐅᐐᔭᐎᐙᕽ᙮ ᑳᐐᓐ ᐃᑕᔥ ᐐᓐ ᐅᓄ ᐃᓈᑯᓂᑫᐎᓇᓐ ᐅᑲᐅᒋᑲᔥᑭᑑᓰᓐ ᐊᐎᔭ ᒋᐴᓂᑑᒡ ᐅᒪᒋᒥᓴᐌᒋᑫᐎᓇᓐ᙮

3

3:1b.COL.003.001 ᐋᔕ ᑕᔥ ᑭᑮᑮᐌᐱᒫᑎᓰᐃᑰᒻ ᑮᑮᐌᐱᒫᑎᓯᐃᓐᒡ X᙮ ᒦ ᓴ ᐱᑯ ᐃ ᒨᔕᒃ ᐃᑯ ᐃᔑᐊᑐᓀᐊᒧᒃ ᐃᔥᐱᒥᕽ ᑳᐊᔮᑭᓐ, ᐋᓃᔥ ᒦ ᐃ ᐌᑎ X ᐁᔮᒡ, ᐁᐃᔑᐅᑭᒫᐗᐱᒡ ᐅᑭᒋᓂᑭᓃᕽ ᐃᓇᑫ ᑭᔐᒪᓂᑑᓐ᙮

3:2b.COL.003.002 ᓈᓈᑲᑕᐌᑕᒧᒃ ᑲᔦ ᐃᔥᐱᒥᕽ ᑳᐊᔮᑭᓐ, ᑳᐐᓐ ᐐᓐ ᑫᑰᓇᓐ ᐊᑮᕽ ᑳᐊᔮᑭᓐ᙮

3:3b.COL.003.003 ᐋᔕ ᐄᑐᒃ ᑭᑮᓂᐳᒻ᙮ ᑳᐐᓐ ᐃᑕᔥ ᒪᔑ ᓈᑾᓯᓅᓐ ᐋᓃᓐ ᑫᐃᔑᓈᑾᒃ ᑭᐱᒫᑎᓯᐎᓂᐙ, ᐁᐃᔑᐊᔮᒃ ᐃᐃᒫ X ᑳᐃᔑᐊᔮᒡ ᑭᔐᒪᓂᑑᓈᕽ᙮

3:4b.COL.003.004 ᐊᐲ ᑕᔥ X ᑳᐅᐱᒫᑎᓯᐎᓂᔦᒃ ᓈᑯᓯᒡ, ᒦ ᓴ ᑕᔥ ᑫᑮᓇᐙ ᒋᓈᑯᓯᔦᒃ ᐃᐃᒫ ᐅᑭᒋ ᐃᓀᑖᑯᓯᐎᓂᕽ᙮

3:5b.COL.003.005 ᒦ ᓴ ᑕᔥ ᐁᔑᓈᑾᒃ ᒋᓂᑑᔦᒃ ᐃᐃ ᑭᑫᑌᐱᒫᑎᓯᐎᓂᐙ ᑳᓂᑖᐃᔑᒋᑫᒪᑲᒃ ᐅᐅᒫ ᐊᑮᕽ᙮ ᐊᒦᐗᓐ ᑕᔥ ᐅᓄ ᑫᓂᑑᔦᒃ: ᐱᔑᒀᑎᓯᐎᓐ, ᐐᓂᓈᑯᓯᐎᓐ, ᐱᔑᒀᒋᒥᓴᐌᒋᑫᐎᓐ, ᒪᒋᒥᓴᐌᒋᑫᒨᔑᐅᐎᓐ, ᐊᔫᓵᒥᓯᐎᓐ ᑲᔦ; ᐋᓃᔥ ᐊᐎᔭ ᑳᐅᓵᒥᓯᒡ ᒦ ᐃ ᐁᔑᒋᑫᒡ ᑖᐱᔥᑰ ᐁᒪᓂᑑᑫᒡ᙮

3:6b.COL.003.006 ᐊᒦ ᐋᓃᔥ ᐅᓄ ᑎᓄ ᐃᔑᒋᑫᐎᓇᓐ ᐙᐅᒋᐸᑲᒥᔥᑳᒪᑲᓂᓂᒃ ᑭᔐᒪᓂᑑ ᐅᓂᔥᑳᑎᓯᐎᓐ ᒋᑲᒀᑕᑭᐋᒡ ᑲᑭᓇ ᐊᐎᔭᐞ ᑳᓇᐃᑖᑯᓯᒃ᙮

3:7b.COL.003.007 ᑫᑮᓇᐙ ᑕᔥ ᐋᐱᑎᕽ ᑭᑮᐃᔑᐱᒫᑎᓯᒻ ᐊᐲ ᑮᑎᐯᓂᒥᑯᔦᒃ ᐃᓂ ᐃᔑᒋᑫᐎᓇᓐ ᑳᑕᔑᑕᒫᑰᔦᒃ᙮

3:8b.COL.003.008 ᓅᑯᒻ ᐃᑕᔥ ᒦ ᐃ ᐅᒋᑕ ᐱᑯ ᐁᔑᓈᑾᒃ ᒋᐌᐱᓇᒣᒃ: ᓂᔥᑳᑎᓯᐎᓐ, ᐋᑯᑭᑖᓱᐎᓐ, ᔒᑫᒋᑫᐎ ᐃᓇᒪᒋᐅᐎᓇᓐ, ᒪᒋᑕᔑᑫᐎᓐ᙮ ᑫᑯ ᑲᔦ ᐐᑳ ᐐᓂᑮᔗᐎᓐ ᑕᐅᒋᓅᒋᑳᑌᓯᓅᓐ ᐃᐃᒫ ᑭᑑᓂᐙᕽ᙮

3:9b.COL.003.009 ᑫᑯ ᑲᔦ ᑮᐗᓂᒧᑖᑎᑫᒃ, ᐋᓃᔥ ᐋᔕ ᑭᑮᑮᒋᑯᔥᑳᒻ ᐃᐃ ᑭᑫᑌᐱᒫᑎᓯᐎᓂᐙ, ᑕᑯ ᑲᔦ ᑳᓂᑖᐃᔑᒋᑫᒪᑲᒃ᙮

3:10b.COL.003.010 ᐅᔥᑭᐱᒫᑎᓯᐎᓐ ᐋᓃᔥ ᑭᑮᐱᓯᑳᒻ, ᑭᔐᒪᓂᑑ ᒣᒀ ᐁᑕᔒᑲᕽ ᒋᐅᔥᑲᔭᐄᐗᓂᓂᒃ, ᐐᑫ ᐱᑯ ᒋᑖᐱᑕᐎᑭᑫᓂᒥᓐᒡ ᑳᐃᔑᓈᑯᓯᒡ᙮

3:11b.COL.003.011 ᐃᓇᔥᑫ ᑕᔥ ᓅᑯᒻ ᑳᐐᓐ ᐸᑳᓐ ᐁᑳ ᑳᒎᐎᐎᓯᒀ, ᒎᐗᒃ ᑲᔦ ᐃᓀᑖᑯᓯᓰᐗᒃ᙮ ᑳᑭᑭᓇᐙᑕᔕᑫᔑᑲᓂᐎᐙᒡ, ᐃᑭ ᑕᔥ ᑲᔦ ᑳᑭᑭᓇᐙᑕᔕᑫᔑᑲᓂᐎᓯᒀ ᑳᐐᓐ ᑫᐐᓇᐙ ᐯᐸᑳᓐ ᐃᓀᑖᑯᓯᓰᐗᒃ᙮ ᑳᐐᓐ ᑲᔦ ᐯᐸᑳᓐ ᐃᓀᑖᑯᓯᓰᐗᒃ ᐃᑭ ᑳᒪᔭᑭᓯᐙᒡ ᐙᓴ ᑳᐱᐅᒌᐙᒡ, ᐃᑭ ᑲᔦ ᑳᑭᑫᑕᓯᒀ ᐆᑌᓈᐙᑎᓯᐎᓐ, ᑳᑎᐯᓂᒥᑣ ᑲᔦ, ᐃᑭ ᑲᔦ ᐃᓂᓂᐗᒃ ᑳᑎᐯᓂᒫᓯᐎᑣ᙮ X ᐃᑕᔥ ᐐᓐ ᒫᐗᒡ ᑳᓃᑳᓀᑖᑯᓯᒡ, X ᑲᔦ ᑲᑭᓇ ᑭᑭᑭᔥᑲᐙᐙ᙮

3:12b.COL.003.012 ᑮᓇᐙ ᐯᒫᑎᓯᔦᒃ ᑭᔐᒪᓂᑑ ᑭᑎᐯᓂᒥᑯᐙ; ᐐᓐ ᑲᔦ ᑭᓵᑭᐃᑯᐙ, ᑭᑮᐅᓀᓂᒥᑯᐙ ᑲᔦ ᐐᓐ ᐃᑯ ᐁᐐᑎᐯᓂᒥᓀᒃ᙮ ᒦ ᓴ ᑕᔥ ᐁᔑᓈᑾᒃ ᒋᐱᓯᑲᒣᒃ ᑰᐹᑌᒋᑫᐎᓐ, ᒥᓄᑑᑖᑫᐎᓐ, ᑕᐸᓭᓂᒧᐎᓐ, ᓅᑳᑎᓯᐎᓐ ᑲᔦ, ᔕᔒᐯᓂᑎᐎᓐ ᑲᔦ᙮

3:13b.COL.003.013 ᑲᑴᔕᔒᐯᓂᑎᒃ ᑲᔦ, ᐴᓀᑕᒫᑎᒃ ᑲᔦ, ᑮᔥᐱᓐ ᒥᑴᑕᒧᐗᒡ ᐋᓃᓐ ᐁᔑᒫᓈᐸᒪᒡ ᐊᐎᔭ᙮ ᑖᐱᔥᑰ ᓴ ᑳᑎᐯᒋᑫᒡ ᑳᑮᐴᓀᑕᒪᐎᓀᒃ, ᒦ ᓴ ᑫᑮᓇᐙ ᐃᔑᐴᓀᑕᒫᑎᒃ᙮

3:14b.COL.003.014 ᐅᓄ ᑕᔥ ᑳᐐᑕᒫᓐ, ᐊᐗᔑᒣ ᓇᐗᒡ ᐱᓯᑲᒧᒃ ᓵᑭᐃᑎᐎᓐ, ᒦ ᐃᒫ ᑲᑭᓇ ᑫᑰᓇᓐ ᑳᐅᒋᒥᒋᒥᔥᑳᑭᓐ, ᑳᐅᒋᒫᒪᐎᑮᔑᓈᑾᑭᓐ ᑲᔦ᙮

3:15b.COL.003.015 ᑕᑲ ᐱᓵᓂᐐᒌᑎᐎᓐ X ᑳᒦᓂᓀᒃ ᑭᑲᑭᑭᓄᐎᓂᑯᐙᒻ ᐃᐃᒫ ᑭᑌᐃᐙᕽ; ᒦᑕᔥ ᐅᐅᒫ ᑫᐅᒋᐅᓀᑕᒣᒃ ᐋᓃᓐ ᐙᐃᔑᒋᑫᔦᒃ᙮ ᐋᓃᔥ ᑲᑭᓇ ᑭᑮᐊᑐᒥᑯᐙ ᑭᔐᒪᓂᑑ ᒋᐯᔑᑴᑖᑯᓯᔦᒃ ᐃᐃᒫ ᐐᔭᐎᒫᕽ ᒋᐱᓵᓂᐐᒌᑎᔦᒃ᙮ ᒨᔕᒃ ᐃᑕᔥ ᐃᑯ ᒦᑴᒋᐌᑕᒧᒃ!

3:16b.COL.003.016 ᐸᑭᑎᓇᒧᐙᒃ ᐃᑕᔥ X ᐅᑎᑭᑐᐎᓐ ᒋᐌᓅᑕᓂᓂᒃ ᐃᐃᒫ ᑭᑌᐃᐙᕽ, ᒋᐃᔑᑖᒪᑲᓂᓂᒃ᙮ ᑲᑮᑖᐌᑕᒧᐎᓐ ᑲᔦ ᒋᐋᐸᒋᑑᔦᒃ ᑭᑭᓄᐊᒫᑎᔦᒃ, ᐙᐐᑕᒫᑎᔦᒃ ᑲᔦ ᐋᓃᓐ ᑫᐃᔑᒋᑫᔦᒃ᙮ ᑭᒋᒪᓯᓇᐃᑲᓂ ᓂᑲᒧᓇᓐ ᐃᓇᐊᒧᒃ, ᐊᓇᒥᐁᓂᑲᒧᓇᓐ ᑲᔦ, ᒋᐃᓇᐊᒧᐌᒃ ᑲᔦ ᑭᔐᒪᓂᑑ ᐅᑕᒑᑾᓐ ᑳᒦᓂᓀᒃ ᓂᑲᒧᓇᓐ, ᐁᒦᑴᒋᐌᑕᒣᒃ ᐃᐃᒫ ᑭᑌᐃᐙᕽ᙮

3:17b.COL.003.017 ᑲᑭᓇ ᑫᑰᓐ ᑳᐃᔑᒋᑫᔦᒃ, ᑫᑰᓐ ᑲᔦ ᑳᐃᑭᑐᔦᒃ, ᑲᑭᓇ ᑫᑰᓐ ᐅᒋ ᐃᔑᒋᑫᒃ ᑳᑎᐯᒋᑫᒡ ᒋᓴᔅ ᐅᐐᓱᐎᓂᕽ, ᐐᓐ ᐅᒋ X ᐁᒦᑴᒋᐌᓂᒣᒃ ᑭᔐᒪᓂᑑ ᑳᐅᔫᓯᒥᓐᒡ᙮

3:18b.COL.003.018 ᑮᓇᐙ ᐐᐎᒫᒃ ᐸᑭᑎᓂᑎᓱᒃ ᒋᓇᐃᑕᐌᒀ ᑭᓈᐯᒥᐙᒃ᙮ ᒦᑕᔥ ᐅᐅ ᐁᔑᓈᑾᒃ ᒋᐃᔑᒋᑫᔦᒃ, ᐋᓃᔥ ᑭᐱᒥᓂᔕᐙᐙ ᑳᑎᐯᒋᑫᒡ᙮

3:19b.COL.003.019 ᑮᓇᐙ ᐅᓈᐯᒥᒫᒃ ᓵᑭᐃᑾᒃ ᑭᐐᐎᐙᒃ, ᑫᑯ ᑲᔦ ᓴᓇᑭᐋᑫᒀᓂᒃ᙮

3:20b.COL.003.020 ᑮᓇᐙ ᐊᐱᓅᒌᔕᒃ, ᒨᔕᒃ ᐃᑯ ᐃᔑᓇᐃᑕᐎᑾᒃ ᑭᓃᑭᐃᑯᐙᒃ; ᐋᐱᒋ ᐅᐌᓂ ᑳᑎᐯᒋᑫᒡ ᐅᒥᓍᐸᑖᓐ᙮

3:21b.COL.003.021 ᑮᓇᐙ ᐅᑌᑌᒫᒃ, ᑫᑯ ᐅᓵᒻ ᑲᑳᓱᒫᑫᒀᓂᒃ ᑭᓃᒑᓂᓯᐙᒃ, ᒫᑭᔖ ᑭᑲᓂᔥᑭᐋᐙᒃ, ᐋᓃᔥ ᐲᓂᔥ ᑕᓂᐸᑭᑌᑕᒨᒃ ᐃᐃ ᑑᑕᐌᒀ᙮

3:22b.COL.003.022 ᑮᓇᐙ ᐅᐸᒦᑖᑫᒃ ᑳᑎᐯᓂᒥᑰᔦᒃ, ᒥᓯᐌ ᐱᑯ ᐃᔑᓇᐃᑕᐎᑾᒃ ᐃᑭ ᑳᐅᑑᑭᒫᒥᔦᒃ ᐅᐅᒫ ᐊᑮᕽ᙮ ᑳᐐᓐ ᐐᓐ ᐁᑕ ᑮᑲᓇᐙᐸᒥᓀᒀ ᒋᐅᒋᓇᐁᑕᒧᐁᒀ᙮ ᐃᐃᒫ ᓴ ᑭᑌᐃᐙᕽ ᐅᒋ ᓇᐃᑕᒧᒃ, ᐁᑯᑖᓀᓂᒣᒃ ᑳᑎᐯᒋᑫᒡ᙮

3:23b.COL.003.023 ᐋᓃᓐ ᐃᑯ ᐁᔑᒋᑫᔦᒃ, ᐁᑯᑲᔥᑭᑑᔦᒃ ᐃᑯ ᑭᑌᐃᐙᕽ ᐅᒋ ᐃᓇᓄᑮᒃ, ᒋᐃᔑᒋᑫᔦᒃ ᑖᐱᔥᑰ ᑳᑎᐯᒋᑫᒡ ᐐᓐ ᐁᐊᓄᑮᑕᐌᒃ, ᑳᐐᓐ ᐐᓐ ᐃᓂᓂ᙮

3:24b.COL.003.024 ᒫᒥᑲᐎᓄᑕᐎᒃ ᑳᑎᐯᒋᑫᒡ ᑭᑲᒦᓂᑯᐙ ᐃᐃ ᐅᑎᐸᐊᒫᑫᐎᓐ ᑳᑲᓇᐌᑕᒪᐙᒡ ᐅᐱᒫᑎᓰᒪᐞ ᐁᐐᑎᐸᐊᒪᐙᒡ᙮ ᑳᑎᐯᒋᑫᒡ X ᐅᔕ ᑳᐊᓄᑮᑕᐌᒃ᙮

3:25b.COL.003.025 ᑲᑭᓇ ᑕᔥ ᐊᐎᔭ ᒫᓄ ᑳᒪᒋᑑᑕᕽ, ᒦ ᓴ ᐃ ᑫᔑᑮᐌᑎᐸᐊᒪᐎᓐᒡ ᑲᑭᓇ ᑫᑰᓂᓂ ᑳᐃᔑᒪᒋᑑᑕᕽ, ᐋᓃᔥ ᐯᔑᑾᔭᐄ ᐃᓇᑫ ᑲᑭᓇ ᐊᐎᔭᓐ ᑭᔐᒪᓂᑑ ᐅᑎᔑᑎᐹᑯᓈᓐ᙮

4

4:1b.COL.004.001 ᑮᓇᐙ ᑳᐅᑭᒫᐎᔦᒃ, ᑾᔭᒃ ᑑᑕᐎᑾᒃ, ᐌᐌᓂ ᑯ ᑲᔦ ᑑᑕᐎᑾᒃ ᐃᑭ ᑳᐸᒦᑕᐎᓀᒀ ᑳᑎᐯᓂᒣᒀ᙮ ᐃᔑᒫᒥᑲᐎᒃ ᑫᑮᓇᐙ ᐁᐊᔮᒡ ᑭᑑᑭᒫᒥᐙ ᑭᒋᑮᔑᑯᕽ᙮

4:2b.COL.004.002 ᑫᑯ ᐸᑭᒌᑫᒃ ᒋᐊᓇᒥᐁᑕᐌᒃ ᑭᔐᒪᓂᑑ, ᓇᐋᓯᒃ ᑲᔦ ᒣᒀ ᐁᐊᓇᒥᐋᔦᒃ, ᐁᒦᑴᒋᐌᓂᒣᒃ ᑲᔦ ᑭᔐᒪᓂᑑ᙮

4:3b.COL.004.003 ᒣᒀ ᑕᔥ ᐁᐊᓇᒥᐋᔦᒃ, ᐊᓇᒥᐁᑕᒪᐎᔑᓈᒻ ᑫᓃᓇᐎᓐᑦ, ᑭᔐᒪᓂᑑ ᒋᑕᐎᓇᒪᐎᓇᑭᒡ ᒋᐙᐐᑕᒫᑫᔮᕽ ᐅᑎᐹᒋᒧᐎᓐ ᑳᐃᔑᑕᔑᒥᒥᓐᒡ Xᑕᓐ, ᑳᑮᑭᑫᒋᑳᑌᓯᓂᓂᒃ ᐅᑖᓈᕽ᙮ ᒦᑕᔥ ᓃᓐ ᓅᑯᒻ ᑳᐅᒋᑭᐸᐅᑰᔮᓐ ᐁᐐᑕᒫᑫᔮᓐ᙮

4:4b.COL.004.004 ᒦᑕᔥ ᑲᔦ ᐃᔑᐊᓇᒥᐁᑕᒪᐎᔑᒃ ᓃᓐ ᐌᐌᓂ ᒋᓂᓯᑐᑖᑰᔮᓐ ᐋᓃᓐ ᐁᑭᑐᔮᓐ, ᐋᓃᔥ ᒦ ᐃᐌ ᐁᔑᒦᓂᑰᔮᓐ ᒋᐃᔑᒋᑫᔮᓐ᙮

4:5b.COL.004.005 ᑲᑮᑖᐐᒃ ᑲᔦ ᐋᓃᓐ ᐁᑑᑕᐌᒀ ᐃᑭ ᑳᑌᐺᑕᓯᒀ, ᐋᐱᒋ ᓴ ᑾᔭᒃ ᐃᓈᐸᒋᑑᒃ ᐃᐃ ᑳᔑᑕᐎᓇᒫᑰᔦᒃ᙮

4:6b.COL.004.006 ᑕᑲ ᑲᔦ ᑭᑎᑭᑐᐎᓂᐙᓐ ᑕᒥᓄᑖᑾᓅᓐ, ᒋᐃᓂᑖᑾᑭᓐ ᐊᐎᔭ ᒋᐐᓅᑕᕽ, ᒦᑕᔥ ᑲᔦ ᐁᔑᓈᑾᒃ ᒋᑭᑫᑕᒣᒃ ᑾᔭᒃ ᒋᐃᔑᓇᑴᑕᐌᒃ ᑲᑭᓇ ᐊᐎᔭ᙮

4:7b.COL.004.007 ᐊᐊ ᑕᔥ ᑳᔕᐌᓂᒪᑭᒡ ᓃᑕᓇᒥᐋᓈᓐ ᑎᑭᑲᔅ ᐋᐱᒋ ᑌᐺ ᐊᓄᑮ, ᑳᐐᑕᓄᑮᒥᒡ ᐃᐃᒫ ᑳᑎᐯᒋᑫᓂᒡ ᐅᑕᓄᑮᐎᓂᓃᕽ᙮ ᑭᑲᐐᑕᒫᑯᐙ ᐋᓃᓐ ᐁᔑᐊᔮᔮᓐ᙮

4:8b.COL.004.008 ᒦᑕᔥ ᐅᐅᐌᓂ ᑳᐅᒋ ᐃᔑᓂᔕᐗᒃ ᐌᑎ ᑳᐃᔑᐊᔮᔦᒃ, ᒋᐐᑕᒪᐎᓀᒃ ᐋᓃᓐ ᑲᑭᓇ ᐁᔑᓭᔮᕽ ᐅᐅᒫ ᑳᐃᔑᐊᔮᔮᕽ, ᑮᓇᐙ ᒋᐅᒋᒪᔥᑲᐌᑕᒣᒃ᙮

4:9b.COL.004.009 ᐃᓂ ᑕᔥ ᑮᒋᐅᑌᐺᑕᒨᓈᓂᓐ ᐅᓀᓯᒪᓴᓐ ᑳᑌᐺᔦᑖᑯᓯᓂᒡ ᑳᓵᑭᐃᒥᓐᒡ ᑲᔦ, ᐅᑲᐱᐐᒌᐙᓐ ᐊᐲ ᐅᑎᓯᓀᒃ᙮ ᐋᓃᔥ ᐅᓀᓯᒪᔅ ᐌᑎ ᑳᐃᔑᒫᐗᒋᐃᑎᔦᒃ ᐅᒋᑎᐯᑖᑯᓯ᙮ ᑭᑲᐐᑕᒫᑯᐙᒃ ᐃᑕᔥ ᐋᓃᓐ ᐁᔑᐌᐸᓂᓂᒃ ᐅᐅᒫ ᑳᐃᔑᐊᔮᐗᑭᒡ᙮

4:10b.COL.004.010 ᐁᕒᐃᔅᑖᕒᑲᔅ ᑳᐐᒋᑭᐸᐅᑰᒪᒃ ᑫᐐᓐ ᑭᐴᔔᐃᑯᐙ᙮ ᒫᕒᒃ, ᐹᕒᓇᐸᔅ ᐐᒋᑭᐌᓯᐗᓐ ᑲᔦ ᑭᐴᔔᐃᑯᐙ᙮ ᐋᔕ ᑭᑮᐐᑕᒫᑰᒻ ᐌᐌᓂ ᒋᐅᑖᐱᓀᒃ ᑮᔥᐱᓐ ᐅᑎᓯᓀᒃ᙮

4:11b.COL.004.011 ᒑᔓᐙ, ᒐᔅᑕᔅ ᑳᐃᔑᓂᑳᒋᑲᓂᐎᒡ ᑫᐐᓐ ᑭᐴᔔᐃᑯᐙ᙮ ᐅᑯ ᑕᔥ ᓂᓯᓐ ᑳᐐᓇᒀ, ᒦ ᓴ ᐃᑭ ᐁᑕ ᓂᓯᓐ ᐅᑴᑳᑎᓰᒃ ᑳᒎᐎᐎᐙᒡ ᑳᐐᑕᓄᑮᒪᒀ ᐅᐅ ᑳᐊᓄᑮᑕᒧᐗᒃ ᑭᔐᒪᓂᑑ ᐅᑑᑭᒫᐎᐎᓐ᙮ ᐋᐱᒋ ᑲᔦ ᓃᐱᐗᐞ ᓂᑎᔑᐐᒋᐃᑰᒃ ᒋᒪᔥᑲᐎᑌᐁᔮᓐ᙮

4:12b.COL.004.012 ᐁᐸᐸᕒᐊᔅ ᐃᑕᔥ ᑫᐐᓐ ᑭᐴᔔᐃᑯᐙ, ᐋᓃᔥ ᑫᐐᓐ ᒦ ᐌᑎ ᑳᐃᔑᒫᐗᒋᐃᑎᔦᒃ ᐌᒋᑎᐯᑖᑯᓯᒡ, X ᒋᓴᓲᓐ ᐃᑕᔥ ᑲᔦ ᐁᐊᓄᑮᑕᐙᒡ᙮ ᒨᔕᒃ ᐃᑕᔥ ᑫᐐᓐ ᐅᒋᑲᒀᑕᑲᓄᑮᐃᑎᓱ ᐁᐊᓇᒥᐁᑕᒪᐎᓀᒃ ᒋᒪᔥᑲᐎᑳᐸᐎᔦᒃ, ᒋᑮᔖᐯᐎᐌᒃ, ᑫᒋᓈᒡ ᒋᑫᒋᓈᐅᐌᒃ ᑳᐃᔑᑌᐺᑕᒧᐌᒃ, ᐐᑫ ᐱᑯ ᒋᓇᐃᑕᒧᐌᒃ ᑭᔐᒪᓂᑑ ᑳᐃᔑᒥᓴᐌᑕᕽ᙮

4:13b.COL.004.013 ᑫᓃᓐ ᐃᑕᔥ ᐃᑯ ᓂᐐᑕᒧᐙᓐ ᐋᐱᒋ ᐁᑭᒋᐊᓄᑮᒡ ᑮᓇᐙ ᐅᒋ, ᐃᐃ ᑲᔦ ᐌᑎ ᓬᐁᔮᑎᓰᔮᑳᕽ ᐌᑎ ᑲᔦ ᐋᔭᕒᐋᐸᓬᐃᓯᑳᕽ ᑳᐊᔮᓂᒡ᙮

4:14b.COL.004.014 ᓬᐅᒃ ᑲᔦ ᑳᓵᑭᒋᑲᓂᐎᒡ ᒪᔥᑭᑮᐎᓂᓂ ᑭᐴᔔᐃᑯᐙ᙮ ᑏᒪᔅ ᑫᐐᓐ ᑭᐴᔔᐃᑯᐙ᙮

4:15b.COL.004.015 ᐴᔔ ᑲᔦ ᓂᑎᓈᓈᓂᒃ ᓃᑕᓇᒥᐋᓈᓂᒃ ᐌᑎ ᓬᐁᔮᑎᓰᔮᑳᕽ ᑳᐊᔮᐙᒡ, ᐊᐊ ᑲᔦ ᓂᐴᔔᐋᓈᓐ ᓂᐸ, ᐅᑖᐎᓂᕽ ᑳᐃᔑᐲᑎᑫᓈᓂᐗᓂᓂᒃ᙮

4:16b.COL.004.016 ᐊᐲ ᑕᔥ ᑮᐃᔥᒀᐊᓇᒥᒋᑳᑌᒃ ᐅᐅ ᐅᔑᐲᐃᑲᓐ ᐌᑎ ᑳᐃᔑᐊᔮᔦᒃ, ᑫᒋᓈᒡ ᑲᔦ ᐌᑎ ᑳᐃᔑᐲᑎᑫᐙᒡ ᐃᑭ ᓬᐁᔮᑎᓰᔮᐎᓂᓂᐗᒃ ᑕᐊᓇᒥᒋᑳᑌ᙮ ᑫᑮᓇᐙ ᑕᔥ ᑭᑲᐊᓇᒥᑑᒻ ᐃᐃ ᐅᔑᐲᐃᑲᓐ ᓬᐁᔮᑎᓰᔮᐎᓂᓂᐗᒃ ᑳᑮᐅᔑᐲᐊᒪᐗᒀ᙮

4:17b.COL.004.017 ᐅᐅ ᑕᔥ ᐃᓂᒃ ᐊᐊ ᐃᓂᓂ ᐋᕒᑭᐸᔅ : ᑫᒋᓈᒡ ᐃᑯ ᑮᔑᑑᓐ ᐃᐃ ᐊᓄᑮᐎᓐ ᑳᑮᒦᓂᑰᔭᓐ ᑳᑎᐯᒋᑫᒡ ᐁᐊᓄᑮᑕᐗᒡ᙮

4:18b.COL.004.018 ᓃᓐ ᐃᑕᔥ ᐃᑯ ᓂᓂᓐᒡ ᓂᑖᐸᒋᑑᓐ ᐅᓄ ᐃᔥᒀᒡ ᐃᑭᑐᐎᓀᓴᓐ ᑳᐅᔑᐲᐊᒪᐎᓇᑰᒃ, ᓃᓐ ᑆᓬ ᐁᐴᔔᐃᓇᑰᒃ᙮ ᑫᑯ ᐗᓃᑫᑫᒃ ᐁᑭᐸᐅᑰᔮᓐ᙮ ᑕᑲ ᑭᔐᒪᓂᑑ ᐅᑭᔐᐙᑎᓯᐎᓐ ᑭᑲᐐᒌᐎᑯᒻ᙮