Galatians (Ojibwa)

1

1:1b.GAL.001.001 ᓃᓐ ᑆᓬ ᑳᐅᔑᐲᐊᒪᐎᓇᑰᒃ᙮ ᑳᐐᓐ ᐃᓂᓂ ᓂᑮᑲᓅᓂᑯᓰ, ᑳᐐᓐ ᑲᔦ ᐃᓂᓃᑳᕽ ᓂᑮᐅᒋ ᐃᓀᑖᑯᓯᓰ ᐃᔑᓂᔕᐙᑲᓐ ᒋᑎᓄᐎᔮᓐ᙮ ᑭᔐᒪᓂᑑ ᐅᔕ, ᐃᓂ ᑲᔦ ᐅᑯᓯᓴᓐ ᒋᓴᔅ Xᑕᓐ ᑳᑮᑮᐌᐱᒫᑎᓯᐋᒡ ᑳᑮᓂᐳᓂᐸᓐ, ᓂᑮᑲᓅᓂᑰᒃ᙮

1:2b.GAL.001.002 ᑲᑭᓇ ᓴ ᓃᒋᐅᑌᐺᑕᒨᒃ ᐅᐅᒫ ᑳᐊᔮᐙᒡ ᑭᑕᑯᐴᔔᐃᑯᐙᒃ᙮ ᑮᓇᐙ ᐅᑌᐺᑕᒨᒃ ᐌᑎ ᑳᐊᔮᔦᒃ ᑲᓬᐁᔑᔭ ᐊᑮᕽ ᐯᐸᑳᓐ ᑳᐃᔑᒫᒫᐗᒋᐃᑎᔦᒃ ᑭᑑᔑᐲᐊᒪᐎᓂᓂᒻ᙮

1:3b.GAL.001.003 ᑕᑲ ᑭᔐᒪᓂᑑ ᑳᐅᔫᓯᔭᕽ, ᑳᑎᐯᒋᑫᒡ ᑲᔦ ᒋᓴᔅ X, ᑭᑲᒦᓂᑯᐙ ᑭᔐᐙᑎᓯᐎᓐ, ᐱᓵᓀᑕᒧᐎᓐ ᑲᔦ᙮

1:4b.GAL.001.004 X ᑕᔥ ᐁᑮᓇᐃᑕᐙᒡ ᑭᑭᔐᒪᓂᑑᒥᓈᓂᓐ ᑳᐅᔫᓯᒥᒪᕽ ᑳᑮᐅᒋᐸᑭᑎᓇᕽ ᐅᐱᒫᑎᓯᐎᓐ ᑭᒪᒋᑑᑕᒧᐎᓂᓈᓂᓐ ᑮᓇᐎᓐᑦ ᐅᒋ ᒋᔖᐾᐗᕽ ᐅᐅᒫ ᑳᐃᔑᒪᒋᓈᑾᓂᓂᒃ ᐅᐅ ᓅᑯᒻ ᑳᐱᒥ ᐃᔑᐌᐸᒃ ᐊᑭ᙮

1:5b.GAL.001.005 ᑕᑲ ᑭᔐᒪᓂᑑ ᑕᑭᒋ ᐃᓀᑖᑯᓯ ᐊᐸᓀ ᐱᔑᔑᒃ᙮ ᐁᒣᓐ!

1:6b.GAL.001.006 ᐋᐱᒋ ᓴ ᑭᑯᔥᑯᐎᔑᒻ ᐃᐃ ᑳᑮᐃᔑᒋᑫᔦᒃ! ᐋᐱᒋ ᐐᐸ ᐁᓇᑲᓀᒃ ᐊᐊ ᑭᔐᒪᓂᑑ ᑳᑮᑲᓅᓂᓀᒃ ᐃᐃᒫ Xᑕᓐ ᑳᐃᔑᑭᔐᐙᑎᓯᓂᒡ, ᐸᑳᓐ ᑕᔥ ᒥᓍᒋᒧᐎᓐ ᐁᐅᑖᐱᓇᒣᒃ!

1:7b.GAL.001.007 ᑫᑫᑦ ᓴ, ᑳᐐᓐ ᑯᑕᒃ ᒥᓍᒋᒧᐎᓐ ᐊᔮᓯᓅᓐ! ᑭᐐᑕᒪᐎᓂᓂᒻ ᑕᔥ ᐁᐊᔮᐙᒡ ᐯᒫᑎᓯᐙᒡ ᐁᑲᑴᐗᓂᔥᑴᐃᓀᒀ, ᐁᑲᑴᐋᒋᑑᐙᒡ ᑲᔦ ᐃᐃᐌᓂ Xᑕᓐ ᐅᒥᓍᒋᒧᐎᓂᓂ!

1:8b.GAL.001.008 ᑮᔥᐱᓐ ᑕᔥ ᓃᓇᐎᓐᑦ ᐸᑳᓐ ᐃᓉᑑᔮᕽ ᑯᒫ ᑲᔦ ᒥᓴᐙ ᑯ ᐁᒐᓬ ᑭᒋᑮᔑᑯᕽ ᐱᐅᒌᒡ ᐸᑳᓐ ᑕᔥ ᐃᓉᑑᒡ ᐃᐃ ᒥᓍᒋᒧᐎᓂᓂ ᐋᔕ ᑳᑮᐐᑕᒫᑰᔦᒃ, ᑕᑲ ᑕᓂᔑᐗᓈᑎᓯᐗᒃ ᓂᑲᐃᑰᒥᓐ᙮

1:9b.GAL.001.009 ᐋᔕ ᑕᔥ ᐅᐅ ᐁᑮᐃᑭᑐᔮᓐ, ᒦᓇᐙ ᑕᔥ ᓂᐐᐃᑭᑦ: ᑮᔥᐱᓐ ᓴ ᐊᐎᔭ ᑲᑮᑭᒥᓀᒃ ᐸᑳᓐ ᑕᔥ ᐃᓉᑑᒡ ᐃᐃ ᐋᔕ ᑳᑮᐅᑖᐱᓇᒣᒃ ᒥᓍᒋᒧᐎᓂᓂ, ᑕᑲ ᑕᐃᓇᑭᒫ ᒋᓂᔑᐗᓈᑎᓯᒡ᙮

1:10b.GAL.001.010 ᒦ ᓇ ᐃ ᐁᓂᑖᑯᓯᔮᓐ ᑖᐱᔥᑰ ᐁᐊᑕᐌᓂᒪᒃ ᐃᓂᓂ ᒋᒥᓍᐸᒥᒡ? ᑳᐐᓐ! ᑭᔐᒪᓂᑑ ᐅᔕ ᓂᓇᑕᐌᓂᒫ ᒋᒥᓍᐸᒥᒡ᙮ ᒦ ᓇ ᐃ ᐁᔑᓈᑯᓯᔭᓐ ᐁᑲᑴᐃᔑᒋᑫᔮᓐ ᐃᓂᓂ ᒋᒥᓍᐸᒥᒡ? ᑮᔥᐱᓐ ᓴ ᐃ ᐃᔑᒋᑫᔮᐹᓐ, ᑳᐐᓐ ᐄᓴᓐ X ᓂᑖᐊᓄᑮᑕᐙᓰ᙮

1:11b.GAL.001.011 ᓃᑕᓇᒥᐋᒃ! ᑭᐐᑕᒪᐎᓂᓂᒻ ᑕᔥ, ᐃᐃ ᓴ ᒥᓍᒋᒧᐎᓐ ᑳᑲᑮᒀᑕᒫᓐ ᑳᐐᓐ ᐃᓂᓃᑳᕽ ᑮᐅᒌᓯᓅᓐ᙮

1:12b.GAL.001.012 ᑳᐐᓐ ᑲᔦ ᐃᓂᓃᑳᕽ ᓂᑮᐅᑎᓇᓰᓐ, ᑳᐐᓐ ᑲᔦ ᐊᐎᔭ ᐃᓂᓂ ᓂᑮᑭᑭᓄᐊᒫᑯᓰ᙮ ᒋᓴᔅ X ᐅᔕ ᐐᓐ ᐃᑯ ᓂᑮᐙᐸᑕᐃᒃ᙮

1:13b.GAL.001.013 ᐋᔕ ᐄᑐᒃ ᑭᑮᓅᑖᒻ ᐋᓃᓐ ᑳᐃᔑᐱᒫᑎᓯᔮᓐ, ᐋᐱᒋ ᐌᐌᓂ ᐁᑮᐱᒥᓂᔕᐊᒫᓐ ᐃᐃ ᒎᐎ ᐊᓇᒥᐁᒋᑫᐎᓐ᙮ ᐋᐱᒋ ᑲᔦ ᐁᑮᒪᓈᒋᐋᓯᐗᒀ ᐁᑮᑲᒀᑕᑭᐊᒀ ᐅᑌᐺᑕᒨᒃ ᑳᐃᔑᐊᔫᑯᐊᔮᐙᒡ ᑳᑎᐯᓂᒥᑯᐙᒡ ᑭᔐᒪᓂᑑᓐ, ᐁᑮᑲᑴᓂᔑᐗᓈᒋᐊᒀ ᑲᔦ᙮

1:14b.GAL.001.014 ᐃᑭ ᑲᔦ ᓃᒋ ᒎᐗᒃ ᑳᑮᐐᒋᐊᐲᑖᑎᓰᒪᒀ, ᓇᐗᒡ ᓃᓐ ᐊᐗᔑᒣ ᓂᑮᐃᔑᒋᑫ ᐁᑮᑑᑕᒫᓐ ᐃᐃ ᒎᐎ ᐊᓇᒥᐁᒋᑫᐎᓐ᙮ ᓇᐗᒡ ᓃᓐ ᑲᔦ ᓂᑮᑭᒋ ᐃᓀᑖᓇᓐ ᐃᓂ ᑳᑮᐃᔑᑣᐙᒡ ᐃᑭ ᒣᐎᔕ ᑳᑮᐱᒫᑎᓯᐙᒡ᙮

1:15b.GAL.001.015 ᑭᔐᒪᓂᑑ ᑕᔥ ᐅᑭᔐᐙᑎᓯᐎᓂᕽ ᓂᑮᐅᒋᐅᓀᓂᒥᒃ ᒋᑆ ᓂᑖᐎᑭᔮᓐ, ᐅᑭᔐᐙᑎᓯᐎᓂᕽ ᑲᔦ ᓂᑮᐅᒋᑲᓅᓂᒃ ᒋᐊᓄᑮᑕᐗᒃ, ᐁᑮᐃᓀᑕᕽ ᑕᔥ ᑲᔦ ᓂᐱᒫᑎᓯᐎᓂᕽ ᒋᐙᐸᒥᒥᓐᒡ ᐃᓂ ᐅᑯᓯᓴᓐ,

1:16b.GAL.001.016 ᐁᑮᐃᓀᑕᕽ ᑲᔦ ᒋᐐᑕᒪᐎᒪᒃ ᐃᐃ ᐁᑳ ᑳᒎᐎᐎᓯᓂᒃ ᒋᑕᔑᑕᒪᐎᒪᒃ ᐃᐃ ᒥᓍᒋᒧᐎᓐ, ᒋᑕᔑᒥᒪᒃ ᐃᓂ ᑭᔐᒪᓂᑑ ᐅᑯᓯᓴᓐ᙮ ᐊᐲ ᑕᔥ ᑳᑮᐙᐸᒥᒪᒃ ᑳᐐᓐ ᐊᐎᔭ ᓂᑮᓈᓯᑲᐙᓰ ᒋᐐᑕᒪᐎᒡ ᐋᓃᓐ ᑫᐃᔑᒋᑫᔮᓐ᙮

1:17b.GAL.001.017 ᑳᐐᓐ ᑲᔦ ᒉᕒᐆᓴᓬᐊᒥᕽ ᓂᑮᐃᔖᓰ ᒋᐊᑕᐙᐸᒪᒀ ᐃᑭ ᐃᔑᓂᔕᐙᑲᓇᒃ ᐋᔕ ᒣᐎᔕ ᑳᑮᐱᐅᒋ ᐃᓇᓄᑮᐙᒡ᙮ ᑕᑾᒡ ᑕᔥ ᐱᑾᑕᑲᒥᒃ ᐊᕒᐁᐱᔭ ᐊᑮᕽ ᑳᐃᔑᓂᑳᑌᒃ ᓂᑮᐃᔖ᙮ ᒦᑕᔥ ᑳᐃᔑᑮᐌᐃᔖᔮᓐ ᒦᓇᐙ ᑎᒫᔅᑲᔅ ᐆᑌᓈᕽ ᐁᑮᐃᔖᔮᓐ᙮

1:18b.GAL.001.018 ᐹᓂᒫ ᑕᔥ ᓂᓱᐱᐴᓐ 3 ᐁᑮᐃᔑᓭᒃ ᒉᕒᐆᓴᓬᐊᒥᕽ ᓂᑮᐃᔖ, ᐁᑮᐊᑕᐙᐸᒪᒃ ᐲᑕᕒ ᐁᐐᑭᑫᓂᒪᒃ᙮ ᒥᑖᔑᓈᓄᑮᔑᒃ 15 ᑕᔥ ᓂᑮᐐᒋᐊᔮᒫ᙮

1:19b.GAL.001.019 ᑳᐐᓐ ᑕᔥ ᑯᑕᒃ ᐃᔑᓂᔕᐙᑲᓇᒃ ᓂᑮᐙᐸᒫᓰᒃ, ᒦ ᐁᑕ ᑯ ᒌᒥᔅ ᑳᑎᐯᒋᑫᒡ ᐐᒋᑭᐌᔭᓐ ᑳᐙᐸᒪᒃ᙮

1:20b.GAL.001.020 ᑌᐺ ᐅᔕ ᐅᐅ ᑳᐃᔑᐲᐊᒪᐎᓇᑰᒃ᙮ ᑭᔐᒪᓂᑑ ᓂᑭᑫᓂᒥᒃ ᐁᑮᐗᓂᒧᓯᐙᓐ᙮

1:21b.GAL.001.021 ᓈᓈᑫ ᑕᔥ ᐌᑎ ᓂᑮᐊᓂ ᐃᔖ ᓰᕒᐃᔭ ᐊᑮᕽ ᔑᑾ ᓯᓬᐃᔑᔭ ᐊᑮᕽ᙮

1:22b.GAL.001.022 ᑳᐐᓐ ᑕᔥ ᐌᐌᓂ ᐃᐃ ᐊᐲ ᓂᑮᑭᑫᓂᒥᑯᓰᒃ ᑳᑌᐺᑕᐙᐙᒡ Xᑕᓐ ᐌᑎ ᒎᑏᔮᑳᕽ ᐯᐸᑳᓐ ᑳᐃᔑᐊᔫᑸᓄᐙᒡ᙮

1:23b.GAL.001.023 ᐃᐃᒫ ᑕᔥ ᐁᑕ ᑳᑮᐃᓈᒋᒥᑰᐗᒃ ᓂᑮᐅᒋᑭᑫᓂᒥᑰᒃ᙮ ᒦᑕᔥ ᐅᐅ ᑳᑮᐃᓈᒋᒥᑰᔮᓐ: ᐊᐊ ᓴ ᐃᓂᓂ ᑳᑮᑲᒀᑕᑭᐃᓇᕽ, ᓅᑯᒻ ᐅᐸᐹᑕᔑᑖᓐ ᐃᐃ ᑌᐺᑕᒧᐎᓂᓂ ᑳᑮᑲᑴᓂᔑᐗᓈᒋᑑᐸᓐ᙮

1:24b.GAL.001.024 ᒦᑕᔥ ᐃᐃᒫ ᑳᐃᔑᒦᑴᒋᐌᓂᒫᐙᒡ ᑭᔐᒪᓂᑑᓐ ᐃᐃ ᑳᑮᑑᑕᐎᒥᒡ ᐃᐃᒫ ᓂᐱᒫᑎᓯᐎᓂᕽ᙮

2

2:1b.GAL.002.001 ᒥᑖᔑᓃᐎᐱᐴᓐ 14 ᑕᔥ ᐁᑮᐊᓂ ᐃᔑᓭᒃ ᓂᑮᑮᐌᐃᔖ ᐌᑎ ᒉᕒᐆᓴᓬᐊᒥᕽ ᙮ ᐹᕒᓇᐸᔅ ᓴ ᓂᑮᐐᒌᐙ, ᑕᐃᑕᔅ ᑲᔦ ᓂᑮᑕᑯᐐᒌᐙᓈᓐ᙮

2:2b.GAL.002.002 ᑭᔐᒪᓂᑑ ᑕᔥ ᐁᑮᐙᐸᑕᐃᒡ ᒋᐃᔖᐗᒃ ᑳᑮᐅᒋ ᐃᔖᐗᒃ᙮ ᓂᑮᑮᒨᒋᓇᑭᔥᑲᐙᒃ ᑕᔥ ᐃᑭ ᐅᓃᑳᓂᓰᒃ ᐁᑮᐐᑕᒪᐗᒀ ᐋᓃᓐ ᒪᔮ ᑳᐃᔑᑲᑮᑭᒪᒃ ᐃᐃ ᐁᑳ ᑳᒎᐎᐎᓯᓂᒃ, ᐁᑮᑕᔑᑕᒪᐎᒪᒃ ᐃᐃ ᒥᓍᒋᒧᐎᓂᓂ᙮ ᐋᓃᔥ ᓂᑮᓇᓃᓵᓀᑖᓐ ᐃᐃ ᐅᑖᓈᕽ ᑳᑮᐃᓇᓄᑮᔮᓐ ᓅᑯᒻ ᑲᔦ ᑳᐃᔑᒋᑫᔮᓐ, ᐁᑳ ᑫᑰᓐ ᒋᐅᒌᓯᓄᒃ᙮

2:3b.GAL.002.003 ᐊᐊ ᑕᔥ ᑕᐃᑕᔅ ᑳᑮᐐᒌᐗᒃ ᑲᕒᐄᒃ ᑮᑎᓄᐎ᙮ ᑳᐐᓐ ᑕᔥ ᑮᑲᑳᒋᐋᓰ ᒋᑭᑭᓇᐙᑕᔕᑫᔑᑲᓂᐎᒡ᙮

2:4b.GAL.002.004 ᐋᓂᑕ ᓴ ᐋᓇᑮᐃᓀᑕᒨᒃ ᐃᐃ ᒋᑮᐃᔑᐃᒥᑎᐸᓐ᙮ ᐃᑭ ᑕᔥ ᐃᓂᓂᐗᒃ ᐁᑮᐊᓇᒥᐁᑳᓱᐙᒡ ᓂᑮᐐᒌᐎᑯᓈᓂᒃ ᐁᑮᑮᒨᒋᐲᑎᑲᓂᑎᓱᐙᒡ, ᐁᑮᑮᒨᒋᓈᓈᑲᒋᐃᓇᑭᑣ ᐁᑮᑲᑴᒥᑲᒧᐙᒡ ᐋᓃᓐ ᐁᔑᑎᐯᓂᒥᑯᓯᐙᕽ ᐃᐃ ᒨᓯᔅ ᐅᑑᓇᔓᐌᐎᓐ, ᐋᓃᔥ X ᒋᓴᓲᓐ ᑳᐋᐸᐅᒥᔭᒥᓐᒡ ᓂᐐᒌᐎᑯᓈᓂᓐ᙮ ᒦᑕᔥ ᐃᐃ ᑳᑮᐅᒋ ᐃᔑᒋᑫᐙᒡ ᐁᑮᐊᑕᐌᓂᒪᑭᑣ ᒦᓇᐙ ᒋᑎᐯᓂᒥᑯᔮᕽ ᐅᓇᔓᐌᐎᓂᓂ᙮

2:5b.GAL.002.005 ᑳᐐᓐ ᑕᔥ ᓂᑮᐸᑭᑎᓂᑎᓱᓰᒥᓐ ᐃᐃ ᒋᐃᔑᓭᔮᕽ᙮ ᑳᐐᓐ ᐃᑯ ᐯᔑᑯᑎᐸᐃᑲᓀᔅ ᓂᑮᐱᓯᑕᐙᓯᐙᓈᓂᒃ᙮ ᒦᑕᔥ ᐃᐃ ᑳᑮᐅᒋ ᐃᔑᒋᑫᔮᕽ: ᐃᐃ ᒥᓍᒋᒧᐎᓐ ᑳᐃᔑᑌᐺᒪᑲᒃ ᓂᑮᐊᑕᐌᑖᒥᓐ ᑫᔮᐱ ᒋᐐᒌᐎᑯᔦᒃ᙮

2:6b.GAL.002.006 ᐃᑭ ᑕᔥ ᑳᐃᓂᑣ ᐁᓃᑳᓀᑖᑯᓯᐙᒡ – ᒦ ᐅᐅ ᑕᔥ ᑳᐅᒋ ᐃᑭᑐᔮᓐ, ᑳᐐᓐ ᓃᓐ ᑫᑰᓐ ᓂᑎᓀᓂᒫᓰᒃ ᐋᓃᓐ ᑳᑎᓄᐎᐙᒡ, ᐋᓃᔥ ᑭᔐᒪᓂᑑ ᑳᐐᓐ ᐅᑎᔑᑲᓇᐙᐸᒫᓰᓐ ᐊᐎᔭᓐ ᐋᓃᓐ ᐁᔑᓈᑯᓯᓂᒡ ᓵᑭᒐᔭᐄ – ᐃᑭ ᑳᓃᑳᓀᑖᑯᓯᐙᒡ ᑳᐐᓐ ᐊᐗᔑᒣ ᑫᑰᓐ ᓂᑮᒦᓂᑯᓰᒃ ᑫᑭᑭᓄᐊᒫᑫᔮᓐ᙮

2:7b.GAL.002.007 ᔖᑰᒡ ᑕᔥ ᐅᑮᐙᐸᑖᓈᐙ ᐁᑮᒦᓂᑰᐗᒃ ᒋᐐᑕᒫᑫᔮᓐ ᒥᓍᒋᒧᐎᓂᓂ, ᒋᑲᑮᑭᒥᒪᒃ ᐃᐃ ᐁᑳ ᑳᒎᐎᐎᓯᓂᒃ, ᑖᐱᔥᑰ ᑫᐐᓐ ᐲᑕᕒ ᑳᑮᐃᔑᒦᓂᓐᒡ ᒋᐐᑕᒫᐙᒡ ᒥᓍᒋᒧᐎᓂᓂ ᐃᐃ ᒎᐗᐞ᙮

2:8b.GAL.002.008 ᑭᔐᒪᓂᑑ ᐅᔕ ᐅᒪᔥᑲᐎᓰᐎᓂᕽ ᐃᔑᓂᔕᐙᑲᓐ ᑳᐅᒋᑎᓄᐎᔮᓐ, ᒋᓈᓯᑲᐗᒀ ᐃᑭ ᐁᑳ ᑳᒎᐎᐎᓯᒀ, ᑖᐱᔥᑰ ᑫᐐᓐ ᐲᑕᕒ ᐃᔑᓂᔕᐙᑲᓐ ᑳᑮᐅᒋᑎᓄᐎᒡ ᒋᑲᑮᑭᒫᒡ ᐃᐃ ᒎᐗᐞ᙮

2:9b.GAL.002.009 ᒌᒥᔅ, ᐲᑕᕒ, ᒞᓐ ᑳᐃᓇᑭᒥᑣ ᐁᓃᑳᓃᐙᒡ ᐅᑮᓂᓯᑖᐎᓈᓈᐙ ᑭᔐᒪᓂᑑᓐ ᑳᑮᐃᔑᔕᐌᓂᒥᒥᒡ᙮ ᓂᑮᐅᒋ ᓴᑭᓂᒌᓂᑯᓈᓂᒃ ᐃᑕᔥ ᐹᕒᓇᐸᓴᓐ ᑫᓃᓐ, ᐁᐐᓈᑯᑑᐙᒡ ᐁᐐᐐᑕᓄᑮᑎᔮᕽ᙮ ᒦᑕᔥ ᑲᑭᓇ ᑳᐃᓀᑕᒫᕽ ᓃᓇᐎᓐᑦ ᐹᕒᓇᐸᔅ ᒋᑕᓇᓄᑮᔮᕽ ᐁᑳ ᑳᒎᐎᐎᓯᓂᒃ ᑳᐃᔑᔭᔮᓂᒡ, ᑫᐐᓇᐙ ᑕᔥ ᒎᐗᐞ ᑳᐃᔑᔭᔮᓂᒡ᙮

2:10b.GAL.002.010 ᒦᑕᔥ ᐁᑕ ᑳᐃᔑᐸᑯᓭᓂᒥᓇᑭᑣ ᒋᒫᒥᑲᐎᓄᑕᐎᒪᑭᒡ ᐃᐃ ᑳᑭᑎᒫᑭᓯᓂᒡ ᐅᑌᐺᑕᒨᐞ ᑳᑮᐊᔮᓂᒡ ᑳᑮᐃᔑᐊᔮᐙᒡ᙮ ᒦᑕᔥ ᐃᐃᐌ ᒫᐗᒡ ᐃᑯ ᑳᑮᐊᑕᐌᑕᒫᓐ ᐁᐐᐃᔑᒋᑫᔮᓐ᙮

2:11b.GAL.002.011 ᐊᐲ ᑕᔥ ᐲᑕᕒ ᑮᐱᑕᑯᔑᕽ ᐃᐃᒫ ᐁᑎᔮᑯᑳᕽ, ᓂᑮᑭᒋᓅᒋᐋ᙮ ᑲᑭᓇ ᑕᔥ ᐊᐎᔭᒃ ᑮᓅᑕᒨᒃ᙮ ᐋᓃᔥ ᑮᓈᑾᓂᓂ ᐐᓐ ᓭᓯᒃ ᐁᑮᐃᔑᒋᑫᓯᒃ᙮

2:12b.GAL.002.012 ᒦᑕᔥ ᐅᐅ ᐲᑕᕒ ᑳᐃᔑᒋᑫᒡ: ᒋᑆ ᑕᑯᔑᓂᓂᒡ ᑕᔥ ᐃᐃ ᐃᓂᓂᐗᐞ ᒌᒥᔅ ᑳᑮᐲᒋᓂᔕᐙᒡ, ᐲᑕᕒ ᐱᓵᓂᑯ ᐅᑮᐐᒋᐐᓯᓃᒫᐞ ᐃᐃ ᐁᑳ ᑳᒎᐎᐎᓯᓂᒃ ᐅᑌᐺᑕᒨᐞ᙮ ᐊᐲ ᑕᔥ ᑳᐱᑕᑯᔑᓂᓂᒡ, ᒦ ᐃ ᑳᐐᓐ ᐅᑮᐐᒋᐐᓯᓃᒫᓰᐞ ᐋᓃᔥ ᑮᑯᑖᒋ᙮ ᐋᓃᔥ ᐅᑮᑯᓵᐞ ᐃᐃ ᑳᑮᑭᒋ ᐃᓀᑕᒥᓂᒡ ᑭᑭᓇᐙᑕᔕᑫᔓᑰᐎᓂᓂ᙮

2:13b.GAL.002.013 ᒦᑕᔥ ᑯᑕᒃ ᑳᑮᐊᓇᒥᐋᐙᒡ ᒎᐗᒃ ᑳᐊᓂ ᐃᔑᒋᑫᐙᒡ ᐲᑕᕒᐆᓐ ᑳᑮᐃᔑᒋᑫᓂᒡ ᐁᑮᐌᐱᐃᑯᐙᒡ ᐁᑳ ᓭᓯᒃ ᐁᐃᔑᒋᑫᓯᓂᒃ᙮ ᐹᕒᓇᐸᔅ ᓴ ᑫᐐᓐ ᑮᐃᔑᒋᑫ ᑳᑮᐃᔑᒋᑫᓂᒡ ᐃᐃ ᑳᑯᓵᓂᒡ ᒎᐗᐞ᙮

2:14b.GAL.002.014 ᐊᐲ ᑕᔥ ᐁᑮᐙᐸᒪᒀ ᐁᑳ ᐁᑮᐃᔑᒋᑫᓯᒀ ᐋᓃᓐ ᑳᐃᓇᑌᓂᒃ ᐃᐃ ᑌᐺᐎᓐ ᑳᑕᔑᑌᒃ ᒥᓍᒋᒧᐎᓂᕽ, ᐲᑕᕒ ᓂᑮᑲᓅᓈ ᐁᓈᓴᒦᓂᒡ ᑲᑭᓇ ᐃᐃᒫ ᑳᑮᐊᔮᓂᒡ᙮ ᒦᑕᔥ ᐅᐅ ᑳᐃᓇᒃ: ᑮᓐ ᐄᑐᒃ ᑭᒎᐎᐤ, ᑳᐐᓐ ᑕᔥ ᐃᐃ ᑭᑎᔑᒋᑫᓰ᙮ ᐁᑳ ᑳᒎᐎᐎᓯᒀ ᓴ ᑳᐃᔑᐱᒫᑎᓯᐙᒡ ᑭᑎᔑᒋᑫ᙮ ᐋᓃᓐ ᑕᔥ ᑫᔑᑲᔥᑭᐊᑣᐸᓐ ᐃᐃ ᐁᑳ ᑳᒎᐎᐎᓯᒀ ᒋᐃᔑᒋᑫᐙᒡ ᒎᐗᐞ ᑳᐱᒫᑎᓯᐙᒡ? ᓂᑮᐃᓈ᙮

2:15b.GAL.002.015 ᓃᓇᐎᓐᑦ ᑕᔥ ᑌᐺ ᑳᒎᐎᐎᔮᕽ ᓂᑮᐃᔑᓂᑖᐎᑭᒥᓐ᙮ ᑳᐐᓐ ᐐᓐ ᓂᑎᓄᐎᓰᒥᓐ ᑖᐱᔥᑰ ᐃᑭ ᐁᑳ ᑳᒎᐎᐎᓯᒀ ᐅᒪᒋᑑᑕᒨᒃ ᑳᐃᔑᓂᑳᓂᑣ᙮

2:16b.GAL.002.016 ᓂᑭᑫᑖᒥᓐ ᐋᓃᔥ ᐊᐎᔭ ᑮᑌᐺᑕᐙᒡ ᒋᓴᔅ Xᑕᓐ, ᒦ ᓴ ᐃ ᐌᒋᒥᓄᐐᒌᐎᑯᒡ ᐃᓂ ᑭᔐᒪᓂᑑᓐ, ᑳᐐᓐ ᐐᓐ ᐁᑑᑕᕽ ᐃᐃ ᐅᓇᔓᐌᐎᓂᓂ ᑳᐃᓇᑌᓂᒃ᙮ ᑫᓃᓇᐎᓐᑦ ᑕᔥ ᓂᑮᑌᐺᑕᐙᓈᓐ X ᒋᓴᔅ᙮ ᐃᐃᒫ ᑕᔥ ᐁᑌᐺᑕᐗᑭᒡ X, ᒦ ᐃ ᑫᐅᒋᒥᓄᐐᒌᐎᓇᑭᒡ ᑭᔐᒪᓂᑑ, ᐋᓃᔥ ᑳᐐᓐ ᐊᐎᔭ ᐅᑑᒋᒥᓄᐐᒌᐎᑯᓰᓐ ᑭᔐᒪᓂᑑᓐ ᐁᒥᒋᑑᑕᕽ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ᙮

2:17b.GAL.002.017 ᑫᓃᓇᐎᓐᑦ ᑕᔥ ᐁᐊᑐᓀᐊᒫᕽ ᐃᐃ ᒥᓍᐸᒥᑰᐎᓐ ᐁᑌᐺᑕᐗᑭᒡ X, ᒦᑕᔥ ᐄᓴᓐ ᑫᓃᓇᐎᓐᑦ ᐁᔑᓈᑯᓯᔮᕽ ᑳᒪᒋᑑᑕᒧᐙᒡ᙮ ᒦ ᓇ ᑕᔥ ᐁᔑᓈᑾᓂᓂᒃ ᑖᐱᔥᑰ X ᐐᓐ ᐁᐊᓂᒫᒌᑭᑑᒡ ᒪᒋᑑᑕᒧᐎᓂᓂ? ᑫᑯ ᐃᐃ ᐃᓀᑕᑫᒃ!

2:18b.GAL.002.018 ᑮᔥᐱᓐ ᑮᐌᐅᔑᑑᔮᓐ ᐃᐃ ᑳᑮᓂᔑᐗᓈᒋᑑᔮᓐ, ᒦ ᐃᒫ ᐁᔑᓈᑾᒃ ᓃᓐ ᐁᐲᑯᓇᒫᓐ ᑭᔐᒪᓂᑑ ᐅᑑᓇᔓᐌᐎᓐ᙮

2:19b.GAL.002.019 ᒦᑕᔥ ᑖᐱᔥᑰ ᐁᔑᓈᑯᓯᔮᓐ ᐋᔕ ᐁᑮᓂᐳᔮᓐ, ᑖᐱᔥᑰ ᐅᓇᔓᐌᐎᓐ ᓴ ᐁᑮᓂᓯᑯᔮᓐ᙮ ᒦᑕᔥ ᐃᐃ ᑳᐅᒋᑎᐯᓂᒥᑯᓯᐙᓐ ᐅᓇᔓᐌᐎᓐ᙮ ᒦᑕᔥ ᐃᐃ ᑳᑮᐅᒋ ᐃᔑᓭᒃ ᒋᐃᔑᐱᒫᑎᓯᔮᓐ ᑳᔑᐊᑕᐌᓂᒥᒡ ᑭᔐᒪᓂᑑ᙮

2:20b.GAL.002.020 X ᓴ ᓂᑮᐐᒋᓂᐴᒫ ᐊᐲ ᐁᑮᓂᓯᓐᒡ ᐃᐃᒫ ᐋᔑᑌᔮᑎᑯᕽ᙮ ᑳᐐᓐ ᑕᔥ ᓃᓐ ᐗᐊ ᑳᐱᒫᑎᓯᔮᓐ, ᐐᓐ ᐅᔕ X ᑳᐱᒫᑎᓯᒡ ᓂᐱᒫᑎᓯᐎᓂᕽ᙮ ᐁᑌᐺᑕᐎᒪᒃ ᑭᔐᒪᓂᑑ ᐅᑯᓯᓴᓐ, ᑳᐅᒋᐱᒫᑎᓯᔮᓐ ᐅᐅ ᓅᑯᒻ ᐱᒫᑎᓯᐎᓐ ᑳᐱᒫᑎᓯᔮᓐ᙮ ᐋᓃᔥ X ᓂᑮᓵᑭᐃᒃ, ᐅᑮᐸᑭᑎᓈᓐ ᑲᔦ ᐅᐱᒫᑎᓯᐎᓐ ᓃᓐ ᐅᒋ᙮

2:21b.GAL.002.021 ᑳᐐᓐ ᓂᑖᓇᐌᑕᒧᐙᓰᓐ ᑭᔐᒪᓂᑑ ᐅᑭᔐᐙᑎᓯᐎᓐ᙮ ᑮᔥᐱᓐ ᑾᔭᒀᑎᓯᐎᓐ ᐅᒌᒪᑲᑭᐸᓐ ᐃᐃᒫ ᐅᓇᔓᐌᐎᓂᕽ, ᐊᓂᔖ ᐄᓴᓐ X ᑮᓂᐳᑯᐸᓐ᙮

3

3:1b.GAL.003.001 ᐁᑕᑕᐌ ᓴ ᑭᑲᑮᐹᑎᓯᒻ ᑳ ᑲᓬᐁᔑᔭᐎᓂᓃᐎᔦᒃ ! ᐊᐌᓀᓐ ᑕᔥ ᐋᔕ ᑳᔖᑰᑌᓂᒥᓀᒃ? ᐋᓃᔥ ᑖᐱᔥᑰ ᐁᑮᐙᐸᒣᒃ ᒋᓴᔅ X ᐁᓂᐳᒡ ᐋᔑᑌᔮᑎᑯᕽ ᐃᓀᑖᑾᓐ ᐋᐱᒋ ᑭᒋᐌᐌᓂ ᑳᐐᑕᒫᑰᔦᒃ ᐋᓃᓐ X ᑳᐃᔑᒋᑫᒡ᙮

3:2b.GAL.003.002 ᐯᔑᑾᔭᒃ ᑕᔥ ᑫᑰᓐ ᐐᑕᒪᐎᔑᒃ: ᐋᓃᑎ ᑳᐅᒋᑌᐱᓂᒣᒃ ᑭᔐᒪᓂᑑ ᐅᑕᒑᑾᓐ? ᐁᑑᑕᒣᒃ ᐃᓇ ᑳᐃᓇᑌᒃ ᐃᐃ ᐅᓇᔓᐌᐎᓐ, ᑯᒫ ᑲᔦ ᐁᑮᓅᑕᒣᒃ ᐃᐃ ᒥᓍᒋᒧᐎᓐ, ᐁᑮᑌᐺᑕᒣᒃ ᑕᔥ?

3:3b.GAL.003.003 ᐁᑕᑕᐌ ᓴ ᑭᑲᑮᐹᑎᓯᒻ! ᑭᔐᒪᓂᑑ ᐅᑕᒑᑯᕽ ᐁᑮᐅᒋᒫᒋᑖᔦᒃ, ᒦ ᓇ ᑕᔥ ᐙᐃᔑᒋᑫᔦᒃ ᐗᑭᒐᔭᐄ ᑭᐐᔭᐎᐙᕽ ᑳᓂᑖᐃᔑᒋᑫᔦᒃ ᐁᐐᐃᔑᑮᔑᑭᔦᒃ ᐊᓇᒥᐋᐎᓂᕽ?

3:4b.GAL.003.004 ᑳᐐᓐ ᐃᓇᔥ ᑫᑰᓐ ᑭᑎᓀᑕᓰᒻ ᐃᐃ ᑳᑮᐱᐊᔨᔑᓭᔦᒃ ᐅᑖᓈᕽ? ᑫᒋᓈᒡ ᒫᐐᓐ ᑫᑰᓐ ᐃᐃᒫ ᑭᑮᐅᑎᓈᒻ ᑫᑭᑖᐸᒋᑑᔦᒃ᙮

3:5b.GAL.003.005 ᑭᑮᒦᓂᑯᐙ ᑭᔐᒪᓂᑑ ᐅᑕᒑᑾᓐ ᔑᑾ ᑮᒪᔥᑲᐗᓄᑮ ᐁᑮᒫᒪᑳᒋᒋᑫᒡ ᑳᐃᔑᔭᔮᔦᒃ᙮ ᒦ ᓇ ᑕᔥ ᑳᐅᒋ ᐃᔑᒋᑫᒡ ᐁᐃᔑᒋᑫᐌᒃ ᐁᑑᑕᒣᒃ ᑳᐃᓇᑌᒃ ᒎᐎᐎ ᐅᓇᔓᐌᐎᓐ, ᑯᒫ ᑲᔦ ᐁᑌᐺᑕᒣᒃ ᑎᐹᒋᒧᐎᓐ ᑳᑮᓅᑕᒣᒃ?

3:6b.GAL.003.006 ᐃᓇᔥᑫ ᒦ ᐯᔑᑾᓐ ᐁᐸᕒᐊᐋᒻ ᑳᑮᐃᔑᓭᒡ, ᐁᐃᔑᐲᐃᑳᑌᒃ: ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᐁᑮᑌᐺᑕᐙᒡ ᑕᔥ ᑭᔐᒪᓂᑑᓐ, ᒦᑕᔥ ᑳᑮᐅᒋ ᐃᓇᑭᒥᓐᒡ ᐅᑾᔭᒀᑎᔅ᙮

3:7b.GAL.003.007 ᑭᑭᑫᑖᒻ ᐄᑐᒃ ᐅᐅ, ᐃᑭ ᓴ ᑳᑌᐺᑕᒧᐙᒡ ᐯᒫᑎᓯᐙᒡ ᒦᐗᒃ ᐃᓴ ᐃᑭ ᒪᔮ ᐁᐸᕒᐊᐋᒥᕽ ᑳᐅᑕᑳᓀᓯᐙᒡ᙮

3:8b.GAL.003.008 ᑭᒋᒪᓯᓇᐃᑲᓐ ᐋᓃᔥ ᓃᔮᒃ ᑮᑎᐹᒋᒨᒪᑲᓐ ᑭᔐᒪᓂᑑ ᐁᐐᑎᓄᐙᓈᒡ ᐁᑾᔭᒀᑎᓯᓂᒡ ᐃᐃ ᐁᑳ ᑳᒎᐎᐎᓯᓂᒃ ᐅᑌᐺᑕᒧᐎᓂᓃᕽ ᐅᒋ᙮ ᐋᓃᔥ ᑫᐐᓐ ᐁᐸᕒᐊᐋᒻ ᓃᔮᒃ ᐅᑮᒥᓍᒋᒧᑖᑯᓐ ᑭᒋᒪᓯᓇᐃᑲᓐ ᐁᑮᐃᑯᒡ: ᑮᓐ ᓴ ᑭᔐᒪᓂᑑ ᑳᐐᐅᒋᔕᐌᓂᒫᒡ ᑲᑭᓇ ᐯᒫᑎᓯᓂᒡ᙮

3:9b.GAL.003.009 ᐁᐸᕒᐊᐋᒻ ᐅᑮᑌᐺᑕᐙᓐ ᑭᔐᒪᓂᑑᓐ, ᒦᑕᔥ ᑳᑮᐅᒋᔕᐌᑖᑯᓯᒡ᙮ ᒦᑕᔥ ᑲᔦ ᓅᑯᒻ ᑲᑭᓇ ᑳᐅᑌᐺᑕᒧᐎᓂᐙᒡ ᑕᑯᔕᐌᑖᑯᓯᐗᒃ ᑖᐱᔥᑰ ᑳᑮᐃᔑᔕᐌᑖᑯᓯᒡ᙮

3:10b.GAL.003.010 ᐃᑭ ᑕᔥ ᐐᓐ ᑳᐊᐯᓂᒧᓄᑕᒧᐙᒡ ᐁᐐᓇᐃᑕᒧᐙᒡ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ, ᒦᑕᔥ ᒨᔕᒃ ᐃᓀᑖᑯᓯᐗᒃ ᐁᐐᓂᔑᐗᓈᑎᓯᐙᒡ, ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐊᐌᓀᓐ ᓴ ᒨᔕᒃ ᐁᑳ ᑳᐱᓯᑕᓯᒃ ᐁᑑᑕᓯᒃ ᑲᔦ ᑲᑭᓇ ᑫᑰᓂᓂ ᑳᐃᔑᐲᐃᑳᑌᓂᒃ ᐃᐃ ᐅᓇᔓᐌᐎᒪᓯᓇᐃᑲᓂᓂ, ᐃᓇᑭᒫ ᒋᓂᔑᐗᓈᑎᓯᒡ᙮

3:11b.GAL.003.011 ᐋᐱᒋ ᓴ ᐐᑫ ᐸᔭᑌᓈᑾᓐ, ᑳᐐᓐ ᓴ ᐊᐎᔭ ᐅᑑᒋᑾᔭᑾᑭᒥᑯᓰᓐ ᑭᔐᒪᓂᑑᓐ ᐁᒥᒋᑑᑕᕽ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ, ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐊᐎᔭ ᓴ ᑳᐅᒋᑾᔭᑾᑭᒥᓐᒡ ᐅᑌᐺᑕᒧᐎᓂᕽ ᑕᐱᒫᑎᓯ᙮

3:12b.GAL.003.012 ᐊᐎᔭ ᓴ ᑳᑲᓇᐌᑕᕽ ᐅᓇᔓᐌᐎᓐ ᑳᐐᓐ ᒣᒬᒡ ᐅᑖᐸᒋᑑᓰᓐ ᐅᑌᐺᔦᑕᒧᐎᓐ᙮ ᐅᐅ ᐄᑐᒃ ᑭᒋᒪᓯᓇᐃᑲᓐ ᐃᑭᑑᒪᑲᓐ: ᐊᐌᓀᓐ ᓴ ᐱᑯ ᑳᑑᑕᕽ ᑲᑭᓇ ᑫᑰᓂᓂ ᑳᐃᓇᑌᓂᒃ ᐃᐃ ᐅᓇᔓᐌᐎᓂᓂ, ᒦ ᓴ ᐃᐃᒫ ᐁᔑᐱᒫᑎᓯᒡ᙮

3:13b.GAL.003.013 X ᑭᑮᑎᐸᐅᑯᓈᓐ ᒋᐸᑭᑎᓂᑰᐗᕽ ᐅᓇᔓᐌᐎᓐ ᑳᑮᐃᔑᓂᐴᒥᑰᔭᑭᐸᓐ, ᐋᓃᔥ ᑮᑎᓄᐎᐋ ᐐᓐ ᑳᓇᓂᐴᒥᓐᒡ ᑮᓇᐎᓐᑦ ᐅᒋ᙮ ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᐊᐎᔭ ᓴ ᑯ ᒥᑎᑯᕽ ᑳᐊᑰᓂᓐᒡ ᒦ ᓴ ᐊᐌ ᑳᓇᓂᐴᒥᓐᒡ᙮

3:14b.GAL.003.014 ᒦᑕᔥ ᐅᐅ X ᒋᓴᔅ ᑳᑮᐅᒋ ᐃᔑᒋᑫᒡ, ᐁᑳ ᑳᒎᐎᐎᓯᒀ ᑫᐐᓇᐙ ᒋᒦᓂᑣ ᐃᐃ ᔕᐌᑖᑯᓯᐎᓂᓂ, ᑖᐱᔥᑰ ᑭᔐᒪᓂᑑ ᑳᑮᐃᔑᐊᔓᑕᒪᐙᒡ ᐁᐐᔕᐌᓂᒫᒡ ᐁᐸᕒᐊᐋᒪᓐ, ᑫᑮᓇᐎᓐᑦ ᑕᔥ ᑌᐺᔦᑕᒧᐎᓂᕽ ᑭᑲᐅᒋᑌᐱᓈᓈᓐ ᐊᐊ ᑭᔐᒪᓂᑑ ᐅᑕᒑᑾᓐ ᑳᑮᐊᔓᑕᒪᐎᓇᕽ᙮

3:15b.GAL.003.015 ᓃᑕᓇᒥᐋᒃ, ᑭᐐᐐᑕᒪᐎᓂᓂᒻ ᓴ ᑫᑰᓐ ᐋᓃᓐ ᑫᐅᒋᓂᓯᑐᑕᒣᒃ ᐅᐅ ᑳᐐᑕᒪᐎᓇᑰᒃ᙮ ᐊᐲ ᓴ ᓃᔑᓐ 2 ᐃᓂᓂᐗᒃ ᐁᑮᑮᔐᑕᒧᐙᒡ ᑫᑰᓂᓂ, ᐁᑮᐅᔑᐲᐊᒧᐙᒡ ᑲᔦ, ᑳᐐᓐ ᓴ ᐊᐎᔭ ᐅᑲᐲᑯᓇᓰᓐ᙮ ᑳᐐᓐ ᑲᔦ ᐊᐎᔭ ᐊᐗᔑᒣ ᐅᑖᓇᑭᑑᓰᓐ ᐃᐃ ᐋᔕ ᐊᔓᑕᒫᑎᐎᓂᕽ ᑳᑮᐅᔑᐲᐃᑳᑌᓂᒃ᙮

3:16b.GAL.003.016 ᐃᓇᔥᑫ ᑕᔥ ᑭᔐᒪᓂᑑ ᐅᑮᐊᔓᑕᒪᐙᓐ ᐁᐸᕒᐊᐋᒪᓐ ᐁᐐᔕᐌᓂᒫᒡ, ᐃᓂ ᑲᔦ ᐅᐲᐌᓰᒥᓂ᙮ ᑳᐐᓐ ᑕᔥ ᑭᒋᒪᓯᓇᐃᑲᓐ ᐃᔑᐲᐃᑳᑌᓯᓅᓐ, ᑭᐲᐌᓰᒪᒃ ᑳᐹᑏᓄᐙᒡ᙮ ᑭᐲᐌᓰᒻ ᐅᔕ ᐃᔑᐲᐃᑳᑌ, ᒦ ᓴ ᐊᐊᐌ ᐯᔑᒃ ᐊᐎᔭ, X ᑳᑕᔑᒥᓐᒡ᙮

3:17b.GAL.003.017 ᒦᑕᔥ ᐅᐅ ᑳᐃᑕᒫᓐ, ᑭᔐᒪᓂᑑ ᐊᐲ ᑮᒦᓈᒡ ᐁᐸᕒᐊᐋᒪᓐ ᐃᐃ ᐊᔓᑕᒫᑎᐎᓂᓂ, ᑮᐃᑭᑐ ᑲᔦ ᐁᐐᑲᓇᐌᑕᕽ᙮ ᓃᐙᒃ ᓂᓯᒥᑕᓇ 430 ᑕᓱᐱᐴᓐ ᑕᔥ ᐁᑮᐊᓂ ᐃᔑᓭᒃ, ᐅᓇᔓᐌᐎᓐ ᑮᐅᓇᒋᑳᑌ᙮ ᑳᐐᓐ ᑕᔥ ᐃᐃᒫ ᐅᓇᔓᐌᐎᓂᕽ ᑕᐅᒋᐋᓇᐌᒋᑳᑌᓯᓂᓂ ᑭᔐᒪᓂᑑ ᐋᔕ ᑳᑮᐋᔩᒋ ᐊᔓᑕᒫᑫᒡ, ᑳᐐᓐ ᑲᔦ ᑕᐅᒋᑳᓯᐃᑳᑌᓯᓂᓂ ᑳᑮᐃᑭᑐᒡ᙮

3:18b.GAL.003.018 ᑮᔥᐱᓐ ᑕᔥ ᑭᔐᒪᓂᑑ ᐅᒦᑭᐙᓐ ᐅᒋᐊᓄᑮᒪᑲᓂᓂᑭᐸᓐ ᐃᐃᒫ ᐁᑕ ᐁᑲᓇᐌᒋᑳᑌᓂᒃ ᐅᓇᔓᐌᐎᓐ, ᑳᐐᓐ ᐄᓴᓐ ᐊᐗᔑᒣ ᑭᔐᒪᓂᑑ ᑳᑮᐃᔑᐊᔓᑕᒫᑫᒡ ᐊᓄᑮᒪᑲᓯᓂᓂ᙮ ᐋᔕ ᑕᔥ ᑭᔐᒪᓂᑑ ᐁᑮᐊᔓᑕᒫᑫᒡ, ᑳᑮᐅᒋᒥᒋᒦᓈᒡ ᐁᐸᕒᐊᐋᒪᓐ ᐃᐃ ᐅᒦᑭᐙᓐ᙮

3:19b.GAL.003.019 ᐋᓃᓐ ᑕᔥ ᑳᐃᓇᑌᒃ ᐃᐃ ᐅᓇᔓᐌᐎᓐ? ᒦ ᐃ ᐄᑐᒃ ᑳᑮᐅᒋᓇᑭᑑᒡ ᐅᓇᔓᐌᐎᓂᓂ ᐁᐐᐯᔭᑌᓈᑯᑑᒡ ᐃᐃ ᒪᒋᑑᑕᒧᐎᓂᓂ᙮ ᒦ ᑲᔦ ᑳᑮᐃᓇᒋᑳᑌᒃ, ᐹᓂᒫ ᓴ ᐁᐸᕒᐊᐋᒻ ᐅᐲᐌᓰᒪᓐ ᐱᑕᑯᔑᓂᓂᒡ ᓃᔮᒃ ᑳᑮᐊᔓᑕᒪᐎᒥᓐᒡ, ᒦᑕᔥ ᐃ ᐹᒫ ᒋᐴᓇᓄᑮᒪᑲᒃ ᐃᐃ ᐅᓇᔓᐌᐎᓐ᙮ ᐁᒐᓬᐊᒃ ᑕᔥ ᑮᐋᐸᑎᓯᐗᒃ ᒋᐅᓇᑑᐙᒡ ᐃᐃ ᐅᓇᔓᐌᐎᓂᓂ᙮ ᐯᔑᒃ ᐃᑕᔥ ᐃᓂᓂ ᑮᐋᐸᑎᓯ ᒋᐋᓂᑫᒦᓈᒡ ᐃᐃ ᐯᒫᑎᓯᓂᒡ᙮

3:20b.GAL.003.020 ᑳᑮᑭᑐᑕᒫᑫᒡ ᑕᔥ ᑳᐐᓐ ᐋᐸᑎᓯᓰ ᐊᐎᔭ ᑮᒥᒋᐯᔑᑯᒡ ᑫᑰᓂᓂ ᑮᐃᔑᒋᑫᒡ᙮ ᑭᔐᒪᓂᑑ ᑕᔥ ᐊᐊ ᑳᒥᒋᐯᔑᑯᒡ᙮ ᐐᓐ ᐃᑯ ᑮᑭᑐᑕᒫᓱ ᐁᒦᑭᐌᒡ ᐅᑕᔓᑕᒫᑫᐎᓐ᙮

3:21b.GAL.003.021 ᐅᓇᔓᐌᐎᓐ ᐃᓇ ᑕᔥ ᐅᒦᑖᑴᔥᑳᓐ ᐃᐃ ᑭᔐᒪᓂᑑ ᐅᑕᔓᑕᒫᑫᐎᓂᓂ? ᑳᐐᓐ ᐃᐃ ᐐᑳ ᑖᐃᔑᓭᓯᓅᓐ! ᐋᓃᔥ ᑮᔥᐱᓐ ᐊᔮᓂᑭᐸᓐ ᐅᓇᔓᐌᐎᓐ ᐊᐎᔭ ᑫᑮᐅᑎᓇᑭᐸᓐ ᐱᒫᑎᓯᐎᓐ ᒦᑕᔥ ᐃᐃᒫ ᑭᔐᒪᓂᑑᓐ ᑫᑮᐅᒋᑾᔭᑾᑭᒥᑯᐸᓐ ᐁᑑᑕᕽ ᑳᐃᓇᑌᓂᒃ ᐃᐃ ᐅᓇᔓᐌᐎᓐ᙮

3:22b.GAL.003.022 ᑭᒋᒪᓯᓇᐃᑲᓂᕽ ᐃᑕᔥ ᐃᔑᐲᐃᑳᑌ, ᑲᑭᓇ ᓴ ᐯᒫᑎᓯᐙᒡ ᐊᑮᕽ ᐅᑭᒋᐎᔥᑳᑯᓈᐙ ᒪᒋᑑᑕᒧᐎᓐ᙮ ᒦᑕᔥ ᐃᐃ ᑭᔐᒪᓂᑑ ᑳᑮᐊᔓᑕᒪᐙᒡ ᐊᐌᓀᓇᐃᑯ ᑫᑌᐺᑕᐙᓂᒡ ᒋᓴᔅ Xᑕᓐ, ᒦ ᐃᐃᐌ ᑕᒦᓈᐗᒃ, ᐋᓃᔥ ᑌᐺᑕᒨᒃ᙮

3:23b.GAL.003.023 ᐃᐃ ᑕᔥ ᒋᑆ ᐃᔑᓭᒃ ᑌᐺᔦᑕᒧᐎᓐ ᒋᐊᓄᑮᒪᑲᒃ, ᐅᓇᔓᐌᐎᓐ ᐃᓴ ᑭᑮᑕᑯᓂᑯᒥᓐ᙮ ᐹᓂᒫ ᓴ ᑌᐺᔦᑕᒧᐎᓐ ᐁᑮᓈᑾᒃ ᒦᑕᔥ ᐃᐃ ᑳᐃᔑᐸᑭᑎᓂᑰᔭᕽ᙮

3:24b.GAL.003.024 X ᑕᔥ ᒋᑆ ᑕᑯᔑᕽ, ᐅᓇᔓᐌᐎᓐ ᑭᑮᑎᐯᓂᒥᑯᒥᓐ ᒋᑭᑭᓄᐎᓂᑯᔭᕽ X ᑫᑕᔑᑎᐯᓂᒥᓇᕽ᙮ ᒦᑕᔥ ᐃᐃ ᑳᑮᐅᒋ ᐃᔑᓭᒃ, ᑭᔐᒪᓂᑑ ᒋᐅᒋᑾᔭᑾᑭᒥᓇᕽ ᐃᐃᒫ ᑌᐺᔦᑕᒧᐎᓂᕽ᙮

3:25b.GAL.003.025 ᐃᓇᔥᑫ ᑕᔥ ᐋᔕ ᐁᑮᐅᒋᒋᓭᒃ ᑌᐺᔦᑕᒧᐎᓐ ᒋᐋᐸᑕᒃ, ᑳᐐᓐ ᐅᓇᔓᐌᐎᓐ ᐊᐗᔑᒣ ᑭᑎᐯᓂᒥᑯᓰᒥᓐ᙮

3:26b.GAL.003.026 ᐁᑌᐺᔦᓂᒣᒃ ᐅᔕ X ᒋᓴᔅ, ᑲᑭᓇ ᑳᐅᒋᐅᑯᓯᓯᒥᓀᒃ ᑭᔐᒪᓂᑑ᙮

3:27b.GAL.003.027 ᑲᑭᓇ ᓴ ᑳᑕᔑᔦᒃ, ᑳᑮᓰᑲᐊᑖᓱᔦᒃ ᒋᐐᒌᐌᒃ X, ᒦᑕᔥ ᐁᔑᓈᑯᓯᔦᒃ, ᐁᑭᑭᔥᑲᒧᐌᒃ ᐐᓐ ᐃᑯ X ᐅᐱᒫᑎᓯᐎᓐ᙮

3:28b.GAL.003.028 ᐊᐊ ᑕᔥ ᒎ, ᐊᐊ ᑲᔦ ᑳᒎᐎᐎᓯᒃ, ᐊᐊ ᑲᔦ ᐅᐸᒦᑖᑫ, ᐊᐊ ᑲᔦ ᑳᑎᐯᓂᑎᓱᒡ, ᐊᐊ ᐃᓂᓂ, ᐊᐊ ᐃᑴ, ᑳᐐᓐ ᐯᐸᑳᓐ ᐃᓀᑖᑯᓯᓰᐗᒃ᙮ ᑲᑭᓇ ᓴ ᑮᓇᐙ ᑭᐯᔑᑴᑖᑯᓯᒻ ᐃᐃᒫ Xᐃᕽ᙮

3:29b.GAL.003.029 ᑮᔥᐱᓐ ᑕᔥ Xᐃᕽ ᐃᔑᑎᐯᑖᑯᓯᔦᒃ ᑮᓇᐙ ᐄᓴᓐ ᐁᐸᕒᐊᐋᒥᕽ ᑭᑑᑕᑳᓀᓯᒻ, ᑭᑲᑌᐱᓇᒧᐙᒻ ᑲᔦ ᑭᔐᒪᓂᑑ ᑳᑮᐊᔓᑕᒫᑫᒡ᙮

4

4:1b.GAL.004.001 ᐅᐅ ᑕᔥ ᓂᑎᑭᑦ, ᐊᐊ ᓴ ᐅᑯᓯᓯᒫ ᒣᒀ ᐁᑸᐎᓭᓯᐎᒡ ᑳᐐᓇᑲᑕᒫᑯᒡ ᐅᑌᑌᓐ ᐅᑕᔭᐄᒥᓂ ᒋᑎᐯᑕᕽ, ᒦ ᓴ ᑫᐐᓐ ᐁᑑᒋᑲᓂᐎᒡ ᑖᐱᔥᑰ ᐅᐸᒦᑖᑫᓐ ᑳᑑᒋᑲᓂᐎᓂᒡ, ᐋᓇᐐᓐ ᑲᑭᓇ ᑫᑰᓂᓂ ᐁᑎᐯᑕᕽ ᐊᐊ ᐅᑯᓯᓯᒫ᙮

4:2b.GAL.004.002 ᒣᒀ ᑕᔥ ᐁᑸᐎᓭᓯᐎᒡ, ᐊᔮᐗᐞ ᓴ ᐃᓂᓂᐗᐞ ᑫᓇᐌᓂᒥᑯᒡ, ᑫᓈᑲᒋᑕᒫᑯᒡ ᑲᔦ ᐃᓂ ᐅᑌᑌᓐ ᑳᑮᓇᑲᑕᒫᑯᒡ᙮ ᐹᓂᒫ ᑕᔥ ᐁᐅᒋᒋᓭᓂᒃ ᐊᐲ ᑳᑮᐃᑭᑐᓂᒡ ᐅᑌᑌᓐ ᒋᐴᓂᓈᓈᑲᒋᐃᓐᒡ, ᒦ ᓴ ᐊᐲ ᑫᐴᓂᓈᓈᑲᒋᒋᑲᓂᐎᒡ᙮

4:3b.GAL.004.003 ᒦᑕᔥ ᐯᔑᑾᓐ ᑫᑮᓇᐎᓐᑦ, ᑭᑮᑎᐯᓂᒥᑯᓈᓂᒃ ᐃᑭ ᐊᒑᑾᒃ ᑳᑎᐯᑕᒧᐙᒡ ᐅᐅ ᒥᓯᐌ ᐊᑮᓂ ᒋᑆ ᑭᑫᑕᒪᕽ ᐃᐃ ᑌᐺᐎᓐ᙮

4:4b.GAL.004.004 ᐊᐲ ᑕᔥ ᑎᐸᐃᑲᓐ ᐁᑮᐅᒋᒋᓭᓂᒃ, ᑭᔐᒪᓂᑑ ᐐᓐ ᐃᑯ ᐅᑯᓯᓴᓐ ᐅᑮᐲᒋᓂᔕᐙᓐ᙮ ᐃᐃᒫ ᑕᔥ ᐃᑴᕽ ᑮᐃᔑᓂᑖᐎᑭ᙮ ᒦᑕᔥ ᑲᔦ ᐁᑮᐃᔑᐱᒫᑎᓯᒡ ᑳᑮᐃᔑᑲᓇᐌᒋᑳᑌᓂᒃ ᒨᓯᔅ ᐅᑑᓇᔓᐌᐎᓂᓂ᙮

4:5b.GAL.004.005 ᒦᑕᔥ ᐁᐐᑎᐸᐙᒡ ᒋᐸᑭᑎᓂᑯᓂᒡ ᐃᐃ ᐅᐱᒫᑎᓰᐞ ᑳᑮᑎᐯᓂᒥᑯᓂᒡ ᐅᓇᔓᐌᐎᓂᓂ ᑳᑮᐅᒋᐲᔖᒡ, ᒦ ᓴ ᑕᔥ ᑭᔐᒪᓂᑑ ᑲᑭᓇ ᑫᑮᓇᐎᓐᑦ ᑎᐱᓇᐌ ᒋᐅᑯᓯᓯᒥᓇᑭᒡ᙮

4:6b.GAL.004.006 ᐁᐅᑯᓯᓯᒥᓀᒃ ᐃᑕᔥ ᑭᔐᒪᓂᑑ ᑭᑮᐃᔑᓂᔕᐊᒫᑯᓈᓐ ᓴ ᐃᓂ ᐅᑯᓯᓴᓐ ᐅᑕᒑᑯᓂ ᐃᐃᒫ ᑭᑌᐃᓈᓂᕽ᙮ ᒦᑕᔥ ᐊᐊ ᐊᒑᒃ ᑳᐃᑭᑐᒡ: ᐋᐸ, ᑮᓐ ᓂᑌᑌ!

4:7b.GAL.004.007 ᑳᐐᓐ ᑕᔥ ᑫᔮᐱ ᐅᐸᒦᑖᑫ ᑭᑎᓄᐎᓰ, ᑭᔐᒪᓂᑑ ᓴ ᓅᑯᒻ ᑭᑑᑯᓯᓯᒥᒃ᙮ ᐁᐅᑯᓯᓯᒥᒃ ᐃᑕᔥ ᑭᐐᒦᓂᒃ ᑳᒦᓈᒡ ᐃᐃ ᐅᑯᓯᓴᐞ᙮

4:8b.GAL.004.008 ᐅᑖᓈᕽ ᑕᔥ ᑳᐐᓐ ᑭᑮᑭᑫᓂᒫᓯᐙᐙ ᑭᔐᒪᓂᑑ᙮ ᐃᑭ ᓴ ᑭᑮᑎᐯᓂᒥᑯᐙᒃ ᐁᑮᐊᓄᑮᑕᐌᒀ ᐊᐎᔭᐗᒃ ᐁᑳ ᑌᐺ ᑳᒪᓂᑑᐎᓯᒀ᙮

4:9b.GAL.004.009 ᐋᔕ ᑕᔥ ᑭᑭᑫᓂᒫᐙ ᑎᐱᓇᐌ ᑭᔐᒪᓂᑑ – ᓇᐗᒡ ᒫᐐᓐ ᑖᐅᓂᔑᔑᓐ ᒋᐃᑭᑐᔮᓐ ᑭᑭᑫᓂᒥᑯᐙ ᑭᔐᒪᓂᑑ᙮ ᐌᑯᓀᓐ ᑕᔥ ᐌᒋᐐᑮᐌᓄᑕᐌᒀ ᐅᑯ ᑎᓄ ᐊᒑᑾᒃ ᑳᓃᓇᒥᓯᐙᒡ, ᐃᑭ ᑲᔦ ᑳᑯᐹᓯᓈᑯᓯᐙᒡ ᑳᑲᑴᑎᐯᒋᑫᐙᒡ? ᒦ ᓇ ᐃ ᐁᔑᐊᑕᐌᓂᒣᒀ ᒦᓇᐙ ᒋᑎᐯᓂᒥᓀᒀ?

4:10b.GAL.004.010 ᐋᐱᒋ ᓴ ᐌᐌᓂ ᑭᑲᓇᐌᑖᒻ ᐅᓄ ᑳᑭᒋ ᐃᔑᑮᔑᑲᑭᓐ, ᑮᓯᓲᒃ ᑲᔦ, ᐙᐊᓂ ᐃᔑᐌᐸᒃ ᑲᔦ, ᐃᓂ ᑲᔦ ᐋᓂᑕ ᑳᑭᒋ ᐃᓀᑕᒣᒃ ᑭᑭᓅᓄᐎᓇᓐ᙮

4:11b.GAL.004.011 ᐋᐱᒋ ᓴ ᑭᑑᒑᓂᒣᓂᒥᓂᓂᒻ, ᑰᓂᑫ ᒦᐃ ᐁᔑᓈᑾᒃ ᐊᓂᔖ ᐁᑮᐅᒋᐊᓄᑮᔮᓐ ᐁᑮᑲᑴᐐᒋᐃᓇᑰᒃ᙮

4:12b.GAL.004.012 ᓃᑕᓇᒥᐋᒃ! ᒦᑕᔥ ᐁᔑᐸᑯᓭᓂᒥᓇᑰᒃ, ᑳᐃᔑᐱᒫᑎᓯᔮᓐ ᒋᐃᔑᐱᒫᑎᓯᔦᒃ, ᐋᓃᔥ ᑫᓃᓐ ᑳᑎᓄᐎᔦᒃ ᓂᑎᓄᐤ᙮ ᑳᐐᓐ ᐋᐲᒋᑯ ᑭᑮᒪᒋᑑᑕᐎᓰᒻ᙮

4:13b.GAL.004.013 ᑭᑭᑫᓂᒥᔑᒻ ᐄᑐᒃ ᐁᑮᐋᑯᓯᔮᓐ ᑳᑮᐅᒋ ᐃᔑᓭᒃ ᒋᐐᑕᒪᐎᓇᑰᒃ ᒥᓍᒋᒧᐎᓐ, ᒦᑕᔥ ᐃᐃ ᐸᔦᔥ ᐁᑮᓅᑕᐎᔦᒃ᙮

4:14b.GAL.004.014 ᐋᓇ ᑕᔥ ᐁᑮᓴᓇᑭᐃᑰᔦᒃ ᐃᐃ ᑳᑮᐃᔑᐊᔮᔮᓐ ᐃᐃᒫ ᓂᐐᔭᐎᕽ, ᑳᐐᓐ ᑕᔥ ᔖᑰᒡ ᑭᑮᐋᓇᐌᓂᒥᓰᒻ, ᑳᐐᓐ ᑲᔦ ᑭᑮᔒᑫᑕᓰᒻ ᑳᑮᐃᓈᐱᓀᔮᓐ᙮ ᒦᑕᔥ ᑳᐃᔑᒋᑫᔦᒃ, ᐁᑮᐅᑖᐱᓂᔦᒃ ᑖᐱᔥᑰ ᑫᑮᐃᔑᐅᑖᐱᓀᑭᐸᓐ ᐁᒐᓬ ᑭᔐᒪᓂᑑᕽ ᑳᑮᐅᒌᒡ, ᐁᑮᐃᔑᐅᑖᐱᓂᔦᒃ ᑲᔦ ᑖᐱᔥᑰ ᑫᑮᐃᔑᐅᑖᐱᓀᑭᐸᓐ X ᒋᓴᔅ᙮

4:15b.GAL.004.015 ᐋᐱᒋ ᓴ ᐁᑮᒌᑫᑕᒣᑭᐸᓐ! ᐋᓃᓐ ᑕᔥ ᑳᐃᔑᓭᔦᒃ? ᒦᑕᔥ ᐅᐅ ᑫᐃᓈᒋᒥᓇᑰᒃ, ᑮᔥᐱᓐ ᑲᔥᑭᑑᔦᑭᐸᓐ ᒋᐅᑖᐱᓇᒣᑭᐸᓐ ᑭᔥᑮᔑᑯᐙᓐ, ᑭᑖᑮᒦᔑᒻ ᐄᑐᒃ᙮

4:16b.GAL.004.016 ᒦ ᓇ ᑕᔥ ᐅᐅ ᓅᑯᒻ ᑳᐅᒋᐃᓀᓂᒥᔦᒃ ᐁᔒᑫᓂᒥᓇᑰᒃ, ᐁᐐᑕᒪᐎᓇᑰᒃ ᐃᐃ ᑌᐺᐎᓐ?

4:17b.GAL.004.017 ᒦᑕᔥ ᑳᐅᒋᑲᑴᓵᑭᐃᓀᒀ ᐃᑭ ᑯᑕᒃ ᐃᓂᓂᐗᒃ ᐸᑳᓐ ᑳᐃᓉᑑᐙᒡ ᐃᐃ ᒥᓍᒋᒧᐎᓐ, ᑳᐐᓐ ᐋᓃᔥ ᑭᓇᑕᐌᓂᒥᑯᓰᐙᒃ ᒋᐐᐐᒌᐎᔦᒃ᙮ ᑭᓇᑕᐌᓂᒥᑯᐙᒃ ᐅᔕ ᒋᐐᐐᒌᐌᒀ᙮ ᑳᐐᓐ ᑕᔥ ᑌᐺ ᑾᔭᒃ ᑭᐐᓵᑭᐃᑯᓰᐙᒃ᙮

4:18b.GAL.004.018 ᐋᐱᒋ ᑕᔥ ᐅᓂᔑᔑᓂᓂ ᐊᐎᔭᒃ ᑮᐐᓵᑭᐐᒌᐎᓀᒀ, ᑳᐐᓐ ᐁᑕ ᐌᑎ ᑮᐊᔮᔮᓐ, ᑮᔥᐱᓐ ᑯᑕ ᑾᔭᒃ ᐐᐐᒌᐎᓀᒀ᙮

4:19b.GAL.004.019 ᓂᓃᒑᓂᓴᒃ ᑳᐃᓇᐌᓂᒥᓇᑰᒃ! ᑖᐱᔥᑰ ᐃᑴ ᑳᐊᐲᒋᐐᓴᑫᑕᕽ ᑮᐐᐙᐸᒫᐗᓱᒡ, ᒦ ᑫᓃᓐ ᐯᔑᑾᓐ ᐁᐲᒋᐐᓴᑫᑕᒫᓐ ᑮᒥᑴᓂᒥᓇᑰᒃ, ᐁᒥᓴᐌᑕᒧᐗᒃ X ᐅᑎᔑᐊᔮᐎᓐ ᒋᓂᑖᐎᑭᓂᓂᒃ ᐃᐃᒫ ᑭᐱᒫᑎᓯᐎᓂᐙᕽ᙮

4:20b.GAL.004.020 ᐊᐯᔥ ᑕᔥ ᓅᑯᒻ ᐐᒌᐎᓇᑰᒃ ᐌᑎ ᑳᔑᐊᔮᔦᒃ! ᐸᑳᓐ ᐄᑐᒃ ᑭᑖᐃᓂᓂᓂᒻ᙮ ᐋᐱᒋ ᓴ ᑭᑸᓇᐎᑑᑖᑰᒻ!

4:21b.GAL.004.021 ᑕᑲ ᑭᐐᑲᑴᒋᒥᓂᓂᒻ ᑫᑰᓐ ᑮᓇᐙ ᑳᐊᑕᐌᑕᒣᒃ ᐅᓇᔓᐌᐎᓐ ᒋᑎᐯᓂᒥᑯᔦᒃ: ᑳᐐᓐ ᐃᓇ ᑭᓅᑕᓰᒻ ᐋᓃᓐ ᐁᑭᑑᒪᑲᒃ ᐃᐃ ᐅᓇᔓᐌᐎᓐ?

4:22b.GAL.004.022 ᐅᐅ ᐄᑐᒃ ᐃᔑᐲᐃᑳᑌ, ᐁᐸᕒᐊᐋᒻ ᑮᓃᔑᐗᐞ 2 ᐅᑯᓯᓴᐞ᙮ ᐃᓂ ᑕᔥ ᐃᑴᐗᓐ ᑳᑮᐸᒦᑖᑯᒡ, ᒦ ᐃᒫ ᐯᔑᒃ ᐅᑯᓯᓴᓐ ᑳᐅᑎᓈᒡ᙮ ᐃᓂ ᑕᔥ ᑯᑕᒃ ᐯᔑᒃ ᐅᑯᓯᓴᓐ, ᐐᐎᕽ ᓴ ᐱᑯ ᐅᑮᐅᑎᓈᓐ᙮

4:23b.GAL.004.023 ᐊᐊ ᑕᔥ ᑸᐎᓭᔅ ᐃᐃᒫ ᐅᐸᒦᑕᑫᐎᑴᕽ ᑳᑮᐅᒋᓂᑖᐎᑭᒡ, ᑲᑭᓇ ᐊᐎᔭ ᑳᐃᔑᓂᑖᐎᑭᓂᒡ ᐃᓴ ᑮᐃᔑᓂᑖᐎᑭ᙮ ᐊᐊ ᑕᔥ ᑯᑕᒃ ᑸᐎᓭᔅ ᐃᐃᒫ ᐁᐸᕒᐊᐋᒻ ᐐᐎᕽ ᑳᑮᐅᒌᒡ, ᑭᔐᒪᓂᑑ ᓴ ᐅᑕᔓᑕᒫᑫᐎᓂᕽ ᑮᐅᒌ᙮

4:24b.GAL.004.024 ᑎᐹᒋᒧᐎᓐ ᑕᔥ ᑭᒦᓂᑰᒻ ᑫᐅᒋᓂᓯᑐᑕᒣᒃ᙮ ᐃᑭ ᓴ ᓃᔑᓐ ᐃᑴᐗᒃ ᒦ ᑖᐱᔥᑰ ᐁᔑᓈᑯᓯᐙᒡ ᐃᓂ ᓃᔑᓐ ᐊᔓᑕᒫᑎᐎᓇᓐ ᑭᔐᒪᓂᑑᓐ ᑳᑮᐅᓇᑑᓂᒡ᙮ ᐁᑳᕒ ᑕᔥ ᑮᐃᔑᓂᑳᓱ ᐊᐊ ᐃᑴ ᑳᑮᓂᑖᐎᑭᐋᒡ ᐅᓃᒑᓂᓴᐞ ᒋᐸᒦᑖᑫᓂᒡ᙮ ᒦᑕᔥ ᑲᔦ ᐁᔑᓈᑯᓯᒡ ᑖᐱᔥᑰ ᐃᐃ ᐊᔓᑕᒫᑎᐎᓐ ᑳᑮᐅᓇᒋᑳᑌᒃ ᐃᐃᒫ ᑭᒋᐗᒋᐎᕽ ᓵᐃᓇᐃ ᙮

4:25b.GAL.004.025 ᐁᑳᕒ ᑕᔥ ᑲᔦ ᐃᔑᓈᑯᓯ ᑖᐱᔥᑰ ᐃᐃ ᑭᒋᐗᒋᐤ ᓵᐃᓇᐃ ᑳᑮᐃᔑᓂᑳᑌᓂᒃ ᐌᑎ ᐊᕒᐁᐱᔭ ᐊᑮᕽ ᑳᐊᔮᓂᒃ᙮ ᒦ ᓴ ᑲᔦ ᑖᐱᔥᑰ ᐁᔑᓈᑯᓯᒡ ᐃᐃ ᑭᒋᐆᑌᓈᓂ ᒉᕒᐆᓴᓬᐊᒻ ᓅᑯᒻ ᑳᐙᐸᑕᒣᒃ᙮ ᒉᕒᐆᓴᓬᐊᒻ ᐃᓴ ᐃᔑᓈᑾᓐ ᑖᐱᔥᑰ ᐅᐸᒦᑖᑫ, ᐃᑭ ᑲᔦ ᑲᑭᓇ ᐯᒫᑎᓯᐙᒡ ᐃᒫ ᑳᐃᔑᑎᐯᑖᑯᓯᐙᒡ᙮

4:26b.GAL.004.026 ᐃᐃᐌ ᑕᔥ ᐐᓐ ᒉᕒᐆᓴᓬᐊᒻ ᑭᒋᑮᔑᑯᕽ ᑳᐅᒋᑎᐯᑖᑾᒃ ᐱᓂᔅᑴ ᐱᑯ ᑎᐯᓂᑎᓲᒪᑲᓐ᙮ ᒦ ᓴ ᐁᔑᓈᑯᓯᔭᕽ ᐁᐅᒫᒫᑕᒪᕽ᙮

4:27b.GAL.004.027 ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ: ᒌᑫᑕᓐ ᑕᔥ ᑮᓐ ᐃᑴ ᐐᑳ ᑳᐊᔮᐙᓯᐗᒡ ᐊᐱᓅᒌᔥ! ᔖᑯᐌᓐ, ᒌᑭᑖᑯᓯᓐ, ᑮᓐ ᐐᑳ ᑳᒨᔑᑑᓯᐗᓐ ᐃᐃ ᑳᐃᔑᐐᓴᑫᑕᒧᐙᒡ ᐃᑴᐗᒃ ᑳᐐᐅᓃᒑᓂᓯᐙᒡ! ᐊᐊ ᓴ ᐃᑴ ᑳᑮᓇᑲᒋᑲᓂᐎᒡ ᓇᐗᒡ ᓃᐱᐗᐞ ᐅᑲᐊᔮᐙᐞ ᐊᐱᓅᒌᔕᐞ ᐊᐲᒡ ᐐᓐ ᐊᐊ ᐃᑴ ᐐᑳ ᑳᑮᓇᑲᓂᑯᓯᒃ ᐅᓈᐯᒪᓐ᙮

4:28b.GAL.004.028 ᓅᑯᒻ ᑕᔥ ᑮᓇᐙ ᓃᑕᓇᒥᐋᒃ, ᑭᔐᒪᓂᑑ ᐅᑕᔓᑕᒫᑫᐎᓂᕽ ᑭᑑᒋᐅᓃᒑᓂᓯᒥᑰᒻ, ᑖᐱᔥᑰ ᐋᐃᓯᒃ ᐊᔓᑕᒫᑫᐎᓂᕽ ᑳᑮᐃᔑᐅᓃᒑᓂᓯᒥᓐᒡ᙮

4:29b.GAL.004.029 ᐃᐃ ᑕᔥ ᐊᐲ, ᐊᐊ ᓴ ᑸᐎᓭᔅ ᑳᑮᐃᔑᓂᑖᐎᑭᒡ ᑲᑭᓇ ᐊᐎᔭ ᑳᐃᔑᓂᑖᐎᑭᓂᒡ, ᐅᑮᑲᒀᑕᑭᐋᓐ ᐃᓂ ᑯᑕᒃ ᑸᐎᓭᓴᓐ ᑳᑮᐅᒋᓂᑖᐎᑭᓂᒡ ᑭᔐᒪᓂᑑᓐ ᐅᑕᒑᑯᓂ ᐅᑎᔑᒋᑫᐎᓂᓃᕽ᙮ ᒦᑕᔥ ᑫᔮᐱ ᓅᑯᒻ ᐁᔑᓭᒃ᙮

4:30b.GAL.004.030 ᒦ ᓴ ᐅᐅ ᑭᒋᒪᓯᓇᐃᑲᓐ ᐁᔑᐲᐃᑳᑌᒃ: ᓂᑯᒋ ᓴ ᐃᔑᓂᔕᐅᒃ ᐊᐊ ᑳᐸᒦᑖᑫᒡ ᐃᑴ, ᐃᓂ ᑲᔦ ᐅᑯᓯᓴᓐ᙮ ᐋᓃᔥ ᐊᐊ ᑸᐎᓭᔅ ᑳᑮᐅᒫᒫᒡ ᐃᓂ ᐃᑴᐗᓐ ᑳᑮᐸᒦᑖᑫᓂᒡ, ᑳᐐᓐ ᑕᒦᓈᓰ ᑫᑰᓂᓂ ᐅᑌᑌᓐ ᐅᑕᔭᐄᒥᓂ ᑖᐱᔥᑰ ᑳᐐᐃᔑᒦᓂᓐᒡ ᐊᐊ ᑸᐎᓭᔅ ᑳᑮᐅᒫᒫᒡ ᐃᓂ ᐃᑴᐗᓐ ᑳᐸᒦᑖᑫᓯᓂᒃ᙮

4:31b.GAL.004.031 ᓃᑕᓇᒥᐋᒃ, ᑳᐐᓐ ᑕᔥ ᐊᐊ ᐃᑴ ᑳᐸᒦᑖᑫᒡ ᑭᑑᓃᒑᓂᓯᒥᑯᓰᓈᓐ, ᐊᐊ ᓴ ᐃᑴ ᑳᐸᒦᑖᑫᓯᒃ ᑭᑑᓃᒑᓂᓯᒥᑯᓈᓐ᙮

5

5:1b.GAL.005.001 X ᓴ ᑭᑮᐋᐸᐅᑯᓈᓐ ᐁᑳ ᒦᓇᐙ ᒋᑎᐯᓂᒥᑯᓯᐗᕽ ᐅᓇᔓᐌᐎᓐ᙮ ᒪᔥᑲᐎᑳᐸᐎᒃ ᐃᑕᔥ ᐃᐃᒫ ᑳᑮᐃᔑᐋᐸᐅᑰᔦᒃ᙮ ᑫᑯ ᒦᓇᐙ ᐸᑭᑎᓂᑎᓱᑫᒃ ᒋᑎᐯᓂᒥᑯᔦᒃ ᐅᓇᔓᐌᐎᓐ᙮

5:2b.GAL.005.002 ᐃᓇᔥᑫ ᐱᓯᑕᐎᔑᒃ, ᓃᓐ ᑆᓬ ᑭᐐᑕᒪᐎᓂᓂᒻ! ᑮᔥᐱᓐ ᐸᑭᑎᓂᑎᓱᔦᒃ ᒋᑭᑭᓇᐙᑕᔕᑫᔓᑰᔦᒃ, ᑳᐐᓐ ᐃᐃᒫ ᑲᓇᑫ X ᑭᑲᐅᒋᐐᒋᐃᑯᓰᐙ᙮

5:3b.GAL.005.003 ᒦᓇᐙ ᑭᑕᔮᒀᒥᒥᓂᓂᒻ, ᑮᔥᐱᓐ ᐊᐎᔭ ᐸᑭᑎᓂᑎᓱᒡ ᐱᓵᓂᑯ ᒋᑭᑭᓇᐙᑕᔕᑫᔓᓐᒡ, ᒦ ᓴ ᐁᔑᓈᑾᓂᓂᒃ ᐅᒋᑕᑯ ᒋᓇᐃᑕᕽ ᑲᑭᓇ ᐃᐃ ᐅᓇᔓᐌᐎᓐ ᑳᐃᓇᑌᓂᒃ᙮

5:4b.GAL.005.004 ᑮᓇᐙ ᑕᔥ ᑳᑲᑴᒋᑑᔦᒃ ᒋᐅᒋᒥᓋᑭᒥᓀᒃ ᑭᔐᒪᓂᑑ ᐁᐱᒥᓂᔕᐊᒣᒃ ᐃᐃ ᐅᓇᔓᐌᐎᓐ ᑳᐃᓇᑌᒃ, ᒦ ᓴ ᐃ ᑖᐱᔥᑰ ᐁᐃᔑᒋᑫᔦᒃ ᐁᓇᑲᓀᒃ X ᐁᐐᒌᐙᓯᐌᒃ᙮ ᒦ ᓴ ᐁᐊᔮᔦᒃ ᐋᑎ ᑭᔐᒪᓂᑑ ᐅᑭᔐᐙᑎᓯᐎᓐ ᑫᔑᐐᒋᐃᑯᓯᐌᒃ᙮

5:5b.GAL.005.005 ᓃᓇᐎᓐᑦ ᑕᔥ ᐐᓐ, ᒦ ᐃ ᐁᔑᐊᐯᓂᒧᔮᕽ ᑭᔐᒪᓂᑑ ᒋᐅᒋᑾᔭᑾᑭᒥᔭᒥᓐᒡ᙮ ᐅᑕᒑᑾᓐ ᐃᑕᔥ ᓂᐐᒌᐃᑯᐙᒥᓐ ᐁᑌᐺᔦᑕᒫᕽ ᑳᐅᒋᐲᑑᔮᕽ ᐃᐃ ᑾᔭᒀᑎᓯᐎᓐ᙮

5:6b.GAL.005.006 ᐊᐲ ᓴ ᑮᐐᒌᐎᓐᒡ X ᒋᓴᔅ, ᐊᐊ ᓴ ᑳᑭᑭᓇᐙᑕᔕᑫᔑᑲᓂᐎᒡ ᐊᐊ ᑲᔦ ᐁᑳ ᑳᑭᑭᓇᐙᑕᔕᑫᔑᑲᓂᐎᓯᒃ ᑳᐐᓐ ᐯᔑᒃ ᐊᐗᔑᒣ ᐊᐲᑌᑖᑯᓯᓰ᙮ ᑳᐐᓐ ᑕᔥ ᐐᓐ ᐃᐃ ᑳᑭᒋ ᐃᓀᑖᑾᒃ᙮ ᑌᐺᑕᒧᐎᓐ ᓴ ᐃᐃ ᓵᑭᐃᐌᐎᓂᕽ ᑳᐃᔑᐊᓄᑮᒪᑲᒃ, ᒦ ᓴ ᐃ ᑳᑭᒋ ᐃᓀᑖᑾᒃ᙮

5:7b.GAL.005.007 ᐋᐱᒋ ᑕᔥ ᐐᑫ ᐌᐌᓂ ᐁᒥᓄᐸᑑᔦᑭᐸᓐ ᐁᑲᑴᒋᑲᔑᐌᔦᒃ ᐁᐃᔑᒋᑫᔦᑭᐸᓐ! ᐊᐌᓀᓐ ᑕᔥ ᑳᑭᐱᑎᓂᓀᒃ ᐁᐱᒥᓂᔕᐊᒣᑭᐸᓐ ᐃᐃ ᑌᐺᐎᓐ? ᐋᓃᓐ ᑕᔥ ᑳᐃᑭᑐᒡ ᑳᑮᐅᒋᑲᔥᑭᒥᓀᒃ?

5:8b.GAL.005.008 ᑳᐐᓐ ᑕᔥ ᐐᓐ ᑭᔐᒪᓂᑑ ᑳᐊᑐᒥᓀᒃ ᐃᐃ ᑭᑮᐃᑯᓰᐙ!

5:9b.GAL.005.009 ᐋᐱᒋ ᓴ ᐸᑮ ᐅᐱᓯᑲᓐ ᐁᐋᐸᑕᒃ, ᒦ ᓴ ᒥᓯᐌ ᐸᑴᔑᑲᓐ ᐁᔑᐅᐱᔥᑳᒡ, ᒫᐐᓐ ᑖᐃᑭᑐᒻ᙮

5:10b.GAL.005.010 ᑭᑑᒋᑫᒋᓈᐃᓂᓂᒻ ᐁᐐᒋᐌᒃ ᑳᑎᐯᒋᑫᒡ, ᒋᐅᑖᐱᓇᓯᐌᒃ ᑫᑰᓐ ᐸᑳᓐ ᑳᐃᔑᑌᐺᑕᓯᐙᓐ᙮ ᑭᔐᒪᓂᑑ ᓴ ᐅᑲᓇᓇᐊᓵᓐ ᐃᓂ ᐃᓂᓂᐗᓐ ᐊᐌᓀᓂᐎᓂᑴᓐ ᑳᒥᑯᔥᑳᒋᐃᓀᒃ᙮

5:11b.GAL.005.011 ᓃᑕᓇᒥᐋᒃ, ᑮᔥᐱᓐ ᑕᔥ ᓃᓐ ᑫᔮᐱ ᑲᑮᒀᑕᒫᐹᓐ ᐃᐃ ᑭᑭᓇᐙᑕᔕᑫᔓᑰᐎᓐ, ᐌᑯᓀᓐ ᑕᔥ ᑫᔮᐱ ᐌᒋᑲᒀᑕᑭᐃᑰᔮᓐ? ᑮᔥᐱᓐ ᑕᔥ ᐃᐃ ᑌᐺ ᐃᔑᑲᑮᑴᔮᓐ, ᑳᐐᓐ ᐄᑐᒃ ᐊᐎᔭ ᓂᑖᒫᓂᑖᑯᓰ ᑲᑮᒀᓂᒪᒃ ᐃᓂ ᒋᓴᓲᓐ ᑳᑮᓂᐳᓂᒡ ᐋᔑᑌᔮᑎᑯᕽ᙮

5:12b.GAL.005.012 ᒦᑕᔥ ᐁᔑᒥᓴᐌᑕᒫᓐ ᐃᑭ ᓴ ᑳᒥᑯᔥᑳᒋᐃᓀᒀ ᐱᓵᓂᑯ ᒋᐊᓂᒪᓂᔕᒧᐙᒡ ᐅᑎᓂᓃᐎᓂᐙᓐ᙮

5:13b.GAL.005.013 ᑮᓇᐙ ᑕᔥ ᐐᓐ ᓃᑕᓇᒥᐋᒃ, ᑭᔐᒪᓂᑑ ᐅᔕ ᑭᑮᐊᑐᒥᑯᐙ ᐃᐃᒫ ᐋᐸᐅᑰᐎᓂᕽ ᒋᑎᐯᓂᑎᓱᔦᒃ᙮ ᑫᑯ ᑕᔥ ᐐᓐ ᐃᐃ ᑭᑎᐯᓂᒥᑎᓱᐃᑰᐎᓂᐙ ᐋᐸᒋᑑᑫᒃ ᒋᐅᒋᒪᒋᑑᑕᒣᒃ, ᑫᑯ ᑲᔦ ᐸᑭᑎᓇᑫᒃ ᐃᓂ ᑭᒪᒋᒥᓴᐌᑕᒧᐎᓂᐙᓐ ᒋᑎᐯᓂᒥᑯᔦᒃ᙮ ᐅᐅ ᑕᔥ ᐃᔑᒋᑫᒃ, ᓵᑭᐃᑎᐎᓂᕽ ᐃᔑᓈᓈᑲᒋᐃᑎᒃ᙮

5:14b.GAL.005.014 ᐋᓃᔥ ᑲᑭᓇ ᐅᓇᔓᐌᐎᓐ ᑖᐃᔑᒨᔥᑭᓀᑑᒋᑳᑌ ᐅᐅ ᐃᔑᒋᑫᓈᓂᐗᕽ: ᓵᑭᐞ ᑮᒋᐱᒫᑎᔅ ᑖᐱᔥᑰ ᑳᐃᔑᓵᑭᐃᑎᓱᔭᓐ᙮

5:15b.GAL.005.015 ᐊᔮᒀᒥᓯᒃ! ᑮᔥᐱᓐ ᐊᔭᐋᐎᔑᕽ ᑑᑖᑎᔦᒃ, ᒫᒫᑾᓂᑎᔦᒃ, ᐐᓴᑳᐱᓇᓂᑎᔦᒃ, ᒦ ᒫᐐᓐ ᐃᐃ ᒋᒑᑭᓇᓂᑎᔦᒃ!

5:16b.GAL.005.016 ᒦᑕᔥ ᐅᐅ ᐁᓂᓇᑰᒃ: ᐸᑭᑎᓂᒃ ᓴ ᐊᐊ ᑭᔐᒪᓂᑑ ᐅᑕᒑᑾᓐ ᒋᐱᒥᐎᑑᒡ ᐃᓂ ᑭᐱᒫᑎᓯᐎᓂᐙᓐ᙮ ᑳᐐᓐ ᑕᔥ ᑭᑲᐃᔑᒋᑫᓰᒻ ᑳᐃᔑᒪᒋᒥᓴᐌᑕᒨᒪᑲᒃ ᑭᑫᑌᐃᓈᑎᓯᐎᓂᐙ᙮

5:17b.GAL.005.017 ᐊᐎᔭ ᓴ ᐅᑫᑌᐃᓈᑎᓯᐎᓐ ᓇᐹᒡ ᐃᓇᑫ ᐃᔑᒥᓴᐌᑕᒨᒪᑲᓂᓂ, ᑳᐐᓐ ᐐᓐ ᑭᔐᒪᓂᑑ ᐅᑕᒑᑾᓐ ᑳᐃᔑᒥᓴᐌᑕᒥᓂᒡ ᐃᔑᒋᑫᒪᑲᓯᓂᓂ᙮ ᐊᐊ ᑕᔥ ᑲᔦ ᑭᔐᒪᓂᑑ ᐅᑕᒑᑾᓐ ᑳᐐᓐ ᐃᔑᒥᓴᐌᑕᓰᐗᓐ ᐃᐃ ᑫᑌᐃᓈᑎᓯᐎᓐ ᑳᐐᐃᔑᒋᑫᒪᑲᓂᓂᒃ᙮ ᐊᐊ ᑕᔥ ᐊᒑᒃ ᐅᒥᓴᐌᑕᒧᐎᓐ ᐃᐃ ᑲᔦ ᑭᑫᑌᐃᓈᑎᓯᐎᓂᐙ ᒦᑕᔥ ᒨᔕᒃ ᒦᑳᑏᒪᑲᓅᓐ᙮ ᒦᑕᔥ ᐃᐃ ᑳᐅᒋᑲᔥᑭᑑᓯᐌᒃ ᐃᐃ ᑳᔑᐊᑕᐌᑕᒣᒃ ᐁᐐᐃᔑᒋᑫᔦᒃ᙮

5:18b.GAL.005.018 ᑮᔥᐱᓐ ᑕᔥ ᑭᔐᒪᓂᑑ ᐅᑕᒑᑾᓐ ᐱᒥᐎᑑᓂᒡ ᑭᐱᒫᑎᓯᐎᓂᐙᓐ, ᑳᐐᓐ ᐄᓴᓐ ᑭᑎᐯᓂᒥᑯᓰᒻ ᐃᐃ ᐅᓇᔓᐌᐎᓐ᙮

5:19b.GAL.005.019 ᐋᐱᒋ ᑕᔥ ᐯᔭᑌᓈᑾᓐ ᐃᐃ ᑫᑌᐃᓈᑎᓯᐎᓐ ᐁᔑᒋᑫᒪᑲᒃ᙮ ᒦᑕᔥ ᐅᐅ ᐁᔑᐊᓄᑮᒪᑲᒃ: ᐱᔑᒀᑎᓯᐎᓐ, ᐐᓈᑎᓯᐎᓐ, ᓇᐹᒋᐱᔑᒀᒋᒋᑫᐎᓐ,

5:20b.GAL.005.020 ᒪᓂᑑᑫᐎᓐ, ᒪᒫᑕᐎᒋᑫᐎᓐ, ᔒᑫᓂᑎᐎᓐ, ᑮᑳᑎᐎᓐ, ᐊᔮᔐᓂᑎᐎᓐ, ᐗᑫᐎᑭᑖᓱᐎᓐ, ᑲᑴᓃᑳᓀᓂᑎᓱᐎᓐ, ᑲᑴᔖᑰᓱᑎᐎᓐ, ᐸᑫᐎᓂᑎᐎᓐ,

5:21b.GAL.005.021 ᒥᓴᐎᓈᑫᐎᓇᓐ, ᑮᐗᔥᑴᐲᐎᓐ, ᐸᐹᑲᑮᐹᑎᓯᐎᓐ ᑲᔦ ᑖᐱᔥᑰ ᒦᐗᓄᓄ ᑎᓄ᙮ ᒦᑕᔥ ᓃᔮᒃ ᐁᔑᐊᔮᒀᒥᒥᓇᑰᒃ, ᐊᐎᔭ ᑳᑑᑕᕽ ᐃᓂ ᑳᐐᑕᒫᓐ, ᑳᐐᓐ ᑕᐐᒋᑣᓰ ᑭᔐᒪᓂᑑᓐ ᐅᑑᑭᒫᐎᐎᓂᓃᕽ᙮

5:22b.GAL.005.022 ᐃᓂ ᑕᔥ ᑭᔐᒪᓂᑑ ᐅᑕᒑᑾᓐ, ᒦᐗᓄᓄ ᓀᑖᐎᑭᑑᓂᒡ: ᓵᑭᐃᐌᐎᓐ, ᒥᓉᑕᒧᐎᓐ, ᐱᓵᓂᓯᐎᓐ, ᔒᐯᑕᒧᐎᓐ, ᑭᔐᐙᑎᓯᐎᓐ, ᒥᓄᑑᑖᑎᐎᓐ, ᑌᐺᔦᑖᑯᓯᐎᓐ,

5:23b.GAL.005.023 ᓅᑳᑎᓯᐎᓐ, ᐌᐌᓂ ᑲᓇᐌᓂᑎᓱᐎᓐ᙮ ᐃᑭ ᑕᔥ ᐅᐅ ᑳᐃᔑᐱᒫᑎᓯᐙᒡ ᑳᐐᓐ ᐅᑲᐸᐹᒣᓂᒥᑯᓰᓈᐙ ᐅᓇᔓᐌᐎᓂᓂ᙮

5:24b.GAL.005.024 ᐃᑭ ᑕᔥ X ᒋᓴᓱᕽ ᑳᐃᔑᑎᐯᑖᑯᓯᐙᒡ ᐋᔕ ᐋᔑᑌᔮᑎᑯᕽ ᐅᑮᐃᔑᓂᑑᓈᐙᓐ ᐅᑫᑌᐃᓈᑎᓯᐎᓂᐙᓐ, ᐃᓂ ᑲᔦ ᑳᑮᐃᔑᑕᑯᐊᑕᐌᑕᒨᒪᑲᓂᓂᑭᐸᓃᓐ, ᑲᔦ ᑳᑮᐃᔑᒥᓴᐌᒋᑫᒪᑲᓂᓂᑭᐸᓃᓐ᙮

5:25b.GAL.005.025 ᐊᒑᑯᕽ ᐃᑕᔥ ᐁᐅᒋᐱᒫᑎᓯᔭᕽ, ᑕᑲ ᑕᔥ ᑲᔦ ᐊᒑᑯᕽ ᐃᔑᐱᒧᓭᑖ᙮

5:26b.GAL.005.026 ᑕᑲ ᑳᐐᓐ ᑭᑲᐗᐎᔣᓱᓰᒥᓐ ᑳᐐᓐ ᑲᔦ ᑭᑲᑲᑴᓂᔥᑭᐃᑎᓰᒥᓐ, ᑳᐐᓐ ᑲᔦ ᑭᑲᐊᔮᔐᓂᑎᓰᒥᓐ᙮

6

6:1b.GAL.006.001 ᓃᑕᓇᒥᐋᒃ, ᑮᔥᐱᓐ ᑕᔥ ᐊᐎᔭ ᐅᒋᒥᑲᐎᓐᒡ ᐋᓃᓐ ᐃᑯ ᐃᔑᒪᒋ ᐃᔑᒋᑫᒡ, ᑮᓇᐙ ᓴ ᑳᓇᐃᑕᐎᒣᒃ ᑭᔐᒪᓂᑑ ᐅᑕᒑᑾᓐ ᐐᒋᐃᒃ ᐊᐊ ᑳᑮᒪᒫᔒᒡ ᒦᓇᐙ ᑾᔭᒃ ᒋᐱᒧᓭᒡ᙮ ᐌᐌᓂ ᓴ ᑑᑕᐎᒃ ᐊᐲ ᐐᒋᐁᒃ᙮ ᑳᑕᓱᐯᔑᑯᔦᒃ ᐃᑕᔥ ᓈᓈᑲᒋᐃᑎᓱᒃ ᑫᑮᓇᐙ ᒋᑯᒋᐃᑰᓯᐌᒃ᙮

6:2b.GAL.006.002 ᐙᐐᒋᐃᑎᒃ ᑕᔥ ᒋᐱᒥᐎᑕᒫᑎᔦᒃ ᐃᓂ ᑳᐱᒥᐎᑑᔦᒃ᙮ ᐅᐅ ᑕᔥ ᑮᐃᔑᒋᑫᔦᒃ ᒦ ᓴ ᐃ ᐁᓇᐃᑕᒧᐌᒃ ᐅᓇᔓᐌᐎᓐ X ᑳᑮᐃᔑᑭᑭᓄᐃᑫᒡ᙮

6:3b.GAL.006.003 ᑮᔥᐱᓐ ᑕᔥ ᐃᓂᓂ ᑭᒋᑫᑰᓂᓂ ᐃᓀᓂᑎᓱᒡ, ᑫᑰᓂᓂ ᑕᔥ ᐁᐊᐲᑌᑖᑯᓯᓯᒃ, ᐋᐱᒋ ᑭᒋᐗᓀᓂᑎᓱ᙮

6:4b.GAL.006.004 ᒦ ᓴ ᐁᔑᓈᑾᓂᓂᒃ ᐊᐎᔭ ᐐᓐ ᐃᑯ ᒋᑲᓇᐙᐸᑕᕽ ᐋᓃᓐ ᐁᔑᒋᑫᒡ᙮ ᑮᔥᐱᓐ ᑕᔥ ᒥᓄᓈᑾᓂᓂᒃ ᐃᐃ ᐅᑎᔑᒋᑫᐎᓐ, ᐅᑕᔮᓐ ᓴ ᑫᑰᓂᓂ ᒋᐅᒋᑭᒋ ᐃᓀᑕᕽ᙮ ᑳᐐᓐ ᑕᔥ ᐐᓐ ᒣᒬᒡ ᐸᑳᓐ ᐊᐎᔭᓐ ᐅᑲᑲᓇᐙᐸᒫᓰᓐ ᑕᑲ ᑾᔭᒃ ᒋᐃᔑᐱᒫᑎᓯᑴᓐ᙮

6:5b.GAL.006.005 ᒦ ᓴ ᐁᔑᓈᑾᓂᓂᒃ ᑲᑭᓇ ᐊᐎᔭ ᐐᓐ ᐃᑯ ᒋᐱᒥᐎᑕᒫᓱᐸᓐ ᐅᐱᒥᐗᓈᓐ᙮

6:6b.GAL.006.006 ᐊᐊ ᑕᔥ ᐃᓂᓂ ᑳᑭᑭᓄᐊᒪᐎᓐᒡ ᐃᐃ ᑭᔐᒪᓂᑑ ᐅᑎᐹᒋᒧᐎᓂᓂ, ᒦ ᓴ ᐁᔑᓈᑾᓂᓂᒃ ᐃᐃᒫ ᑳᐅᓂᔑᔑᓂᓂᑭᓐ ᑫᑰᓇᓐ ᑳᑎᐯᑕᕽ ᒋᐅᒋᐐᒋᐋᒡ ᐃᓂ ᑳᑭᑭᓄᐊᒫᑯᒡ᙮

6:7b.GAL.006.007 ᑫᑯ ᑕᔥ ᐐᓐ ᐗᓀᑕᑫᒃ ᐅᐅ: ᑭᔐᒪᓂᑑ ᓴ ᑳᐐᓐ ᑎᓄᐎᓰ ᒋᐹᐱᓄᑕᐎᑎᐸᓐ᙮ ᐌᑯᓀᓐ ᓴ ᑯ ᐃᓂᓂ ᑫᑎᑳᑕᕽ, ᒦ ᓴ ᐃᐃᐌᓂ ᑫᒨᓇᐊᕽ᙮

6:8b.GAL.006.008 ᐊᐊ ᓴ ᐊᐎᔭ ᑳᐃᔑᑭᑎᑫᒡ ᐅᑫᑌᐃᓈᑎᓯᐎᓂᕽ, ᓂᐳᐎᓂᓂ ᑕᔥ ᐅᑲᒨᓇᐋᓐ ᐃᐃᒫ ᑳᑮᐃᔑᑭᑎᑫᒡ᙮ ᐊᐊ ᓴ ᐐᓐ ᐊᐎᔭ ᐃᐃᒫ ᑳᐃᔑᑭᑎᑫᒡ, ᑳᐃᔑᐐᒋᐃᐌᓂᒡ ᑭᔐᒪᓂᑑᓐ ᐅᑕᒑᑯᓂ, ᒨᔕᒃ ᑫᐊᔮᓂᒃ ᐱᒫᑎᓯᐎᓂᓂ ᐅᑲᒨᓇᐋᓐ ᐃᐃᒫ ᑳᑮᐃᔑᑭᑎᑫᒡ᙮

6:9b.GAL.006.009 ᑕᑲ ᑕᔥ ᑮᓇᐎᓐᑦ ᑳᐐᓐ ᑭᑲᐸᑭᑌᑕᓰᒥᓐ ᐃᐃ ᑳᐃᔑᑲᑴᒥᓄᑑᑕᒪᕽ ᒨᔕᒃ᙮ ᐋᓃᔥ ᑕᐅᒋᒋᓭ ᐊᐲ ᑫᑮᓇᐎᓐᑦ ᒋᒨᓇᐃᑫᔭᕽ, ᑮᔥᐱᓐ ᓅᑌᐸᑭᒌᓯᐗᕽ᙮

6:10b.GAL.006.010 ᑕᑲ ᑕᔥ ᑮᔥᐱᓐ ᐃᔑᓭᒃ ᐊᐎᔭ ᒋᒥᓄᑑᑕᐗᑭᒡ, ᑕᑲ ᑾᔭᒃ ᑑᑕᐙᑖᓂᒃ ᑲᑭᓇ ᐯᒫᑎᓯᐙᒡ, ᐃᑭ ᓴ ᐊᐗᔑᒣ ᐐᒋᐋᑖᓂᒃ ᑳᐅᒋ ᐃᓇᐌᒪᒀ ᑌᐺᑕᒧᐎᓂᕽ ᑳᐃᔑᑎᐯᑖᑯᓯᐙᒡ᙮

6:11b.GAL.006.011 ᑭᐙᐸᑖᒻ ᐄᑐᒃ ᓃᓐ ᐋᓃᓐ ᐁᐲᒋᒪᑭᐲᐃᑫᔮᓐ ᐅᐅ ᐃᔥᒀᒡ ᑳᐅᔑᐲᐊᒪᐎᓇᑰᒃ, ᓃᓐ ᐃᑯ ᓂᓂᓐᒡ ᐁᐋᐸᒋᑑᔮᓐ᙮

6:12b.GAL.006.012 ᐃᑭ ᑕᔥ ᐊᐎᔭᒃ ᑳᑲᑴᑲᔥᑭᒥᓀᒀ ᒋᑭᑭᓇᐙᑕᔕᑫᔑᑲᓂᐎᔦᒃ, ᒦᐗᒃ ᓴ ᐃᑭ ᐁᑕ ᑳᑲᑴᒥᓄᓈᑯᑑᐙᒡ ᒋᐙᐸᒋᑳᑌᓂᑭᓐ ᐅᑎᔑᒋᑫᐎᓂᐙ ᐐᔭᐎᒫᕽ ᐃᓇᑫ, ᐁᐐᐅᒋᒪᒦᒀᓂᑎᓱᐙᒡ ᐃᑕᔥ᙮ ᒦᑕᔥ ᐃᐃ ᐁᑕ ᑳᐅᒋ ᐃᔑᒋᑫᐙᒡ, ᑮᔥᐱᓐ ᐋᓃᔥ ᑕᔑᒫᐙᐸᓐ Xᑕᓐ ᑳᑮᐅᒋᓂᐳᓂᒡ ᐋᔑᑌᔮᑎᑯᕽ ᑫᐐᓇᐙ ᑖᑮᑲᒀᑕᑭᐋᐗᒃ᙮

6:13b.GAL.006.013 ᐃᑭ ᓴ ᑳᑭᑭᓇᐙᑕᔕᑫᔓᐌᐙᒡ ᑳᐐᓐ ᑕᔥ ᑲᔦ ᐐᓇᐙ ᐅᑑᑕᓰᓈᐙ ᐃᐃ ᐅᓇᔓᐌᐎᓂᓂ ᑳᐃᓇᑌᓂᒃ᙮ ᒦ ᓴ ᐁᑕ ᑕᔥ ᑳᐅᒋᐊᑕᐌᓂᒥᓀᒀ ᒋᑭᑭᓇᐙᑕᔕᑫᔓᑰᔦᒃ ᐁᐐᒪᒦᒀᓂᑎᓱᐙᒡ ᐁᑮᑲᔥᑭᒥᓀᒀ ᒋᐅᑖᐱᓇᒧᐌᒃ ᑳᐃᔑᑭᑭᓇᐙᒋᑑᐙᒡ ᐐᔭᐎᒫᓐ᙮

6:14b.GAL.006.014 ᑳᐐᓐ ᐃᑕᔥ ᓃᓐ ᐐᑳ ᓂᑖᐃᔑᒋᑫᓰ᙮ ᓃᓐ ᐃᑕᔥ ᐐᓐ ᐃᐃ ᐁᑕ ᓂᑲᑕᔑᑖᓐ ᒋᓴᔅ X ᐁᑮᓂᐳᒡ ᐃᐃᒫ ᐋᔑᑌᔮᑎᑯᕽ᙮ ᐅᐅᒫ ᐊᑮᕽ ᑳᑭᒋ ᐃᓀᑖᑾᒃ ᓃᓐ ᐐᓐ ᓂᑎᓇᑭᑖᓐ ᑖᐱᔥᑰ ᐁᓂᐴᒪᑲᒃ᙮ ᒦ ᑲᔦ ᓃᓐ ᐁᔑᓈᓱᔮᓐ ᐁᑮᓂᐳᔮᓐ ᒋᑑᑕᓯᐙᓐ ᑳᑭᒋ ᐃᓀᑖᑾᒃ ᐅᐅᒫ ᐊᑮᕽ᙮

6:15b.GAL.006.015 ᐊᐊ ᑕᔥ ᑳᑮᑭᑭᓇᐙᑕᔕᑫᔑᑲᓂᐎᒡ, ᑲᔦ ᑳᑭᑭᓇᐙᒋᒋᑲᓂᐎᓯᒃ ᑳᐐᓐ ᑲᓇᑫ ᑫᑰᓐ ᐃᓈᐸᑕᓯᓂᓂ ᑳᑑᑕᐎᑣ᙮ ᐊᐎᔭ ᐅᔕ ᑳᐅᔥᑭᐅᔑᒋᑲᓂᐎᒡ ᒦ ᓴ ᐅᐅᐌ ᑳᑭᒋ ᐃᓀᑖᐗᒃ᙮

6:16b.GAL.006.016 ᐃᑭ ᓴ ᑳᐐᐃᔑᐱᒫᑎᓯᐙᒡ ᐃᐃ ᑳᑮᐃᔥᒀᑕᔑᑕᒫᓐ ᐱᓵᓀᑕᒧᐎᓂᓂ, ᔕᐌᑖᑯᓯᐎᓂᓂ ᑲᔦ ᑕᒦᓈᐗᒃ, ᐃᑭ ᑲᔦ ᑲᑭᓇ ᐃᔅᕒᐃᔭᓬ ᑳᐃᓀᑖᑯᓯᐙᒡ, ᑭᔐᒪᓂᑑᓐ ᑳᑎᐯᓂᒥᑯᐙᒡ᙮

6:17b.GAL.006.017 ᒦᑕᔥ ᐅᐅ ᐁᑭᑐᔮᓐ ᐃᔥᒀᒡ, ᑕᑲ ᑫᑯ ᐊᐎᔭ ᐊᐗᔑᒣ ᓂᑲᒥᑯᔥᑳᒋᐃᑯᓰ, ᐋᓃᔥ ᓈᑾᓅᓐ ᐃᓂ ᓂᑲᒀᑕᑭᐃᑰᐎᓇᓐ ᐃᐃᒫ ᓂᐐᔭᐎᕽ᙮ ᒦᑕᔥ ᐃᐃᒫ ᐁᔑᑭᑭᓇᐙᓯᓈᑾᒃ ᐁᐊᓄᑮᑕᐗᒃ ᒋᓴᔅ᙮

6:18b.GAL.006.018 ᑕᑲ ᑕᔥ ᑳᑎᐯᒋᑫᒡ ᒋᓴᔅ X ᐅᑭᔐᐙᑎᓯᐎᓐ ᑭᑲᐐᒌᐎᑯᒻ ᑭᑕᒑᑯᐙᕽ ᑲᑭᓇ ᑳᑕᔑᔦᒃ, ᓃᑕᓇᒥᐋᒃ! ᐁᒣᓐ᙮