1 Corinthians (Ojibwa)

11

11:1b.1CO.011.001 ᓃᓐ ᑆᓬ ᐅᐅ ᓂᑑᔑᐲᐃᑲᓐ, ᓃᓐ ᑳᐅᓈᐸᒥᒡ ᑭᔐᒪᓂᑑ ᐁᐃᓀᑕᕽ ᒋᐅᐸᐹᒥᓯᐎᓂᔮᓐ X ᒋᓴᔅ ᒋᐅᑎᔑᓂᔕᐙᑲᓂᒥᒡ᙮ ᐊᐊ ᑕᔥ ᑭᐐᒋᐅᑌᐺᑕᒨᒥᓈᓐ ᓵᔅᑎᓃᔅ ᑳᐐᒌᐗᒃ᙮

11:2b.1CO.011.002 ᑭᑑᔑᐲᐊᒫᑰᒻ ᑮᓇᐙ ᐅᑕᓇᒥᐋᒃ ᐃᐃᒫ ᒀᕒᐃᑎᕽ ᑳᐊᔮᔦᒃ, ᑭᔐᒪᓂᑑ ᑳᑎᐯᓂᒥᓀᒃ ᑳᒫᐗᒋᐊᓇᒥᐋᔦᒃ᙮ ᑮᓇᐙ ᑳᐊᑐᒥᓀᒃ ᑭᔐᒪᓂᑑ ᐅᑾᔭᒀᑎᓰᒪᐞ ᒋᑎᓄᐎᔦᒃ, ᐐᓐ ᐁᑮᐅᓇᓯᓀᒃ ᒋᐃᔑᑎᐯᓂᒥᓀᒃ, ᐁᐐᒌᐎᒣᒃ X ᒋᓴᓲᓐ᙮ ᑕᑯ ᑲᔦ ᑲᑭᓇ ᓂᑑᔑᐲᐊᒪᐙᓈᓂᒃ ᐸᑳᓐ ᑳᑕᓇᑮᐙᒡ ᑳᐊᓇᒥᐁᑕᐙᐙᒡ X ᒋᓴᓲᓐ ᑳᑎᐯᓂᒥᓇᕽ᙮ ᒦ ᐊᐌ ᑲᑭᓇ ᐯᔑᑾᓐ ᑳᔑᑎᐯᓂᒥᓇᕽ᙮ ᑲᑭᓇ ᐅᐅ ᑳᑎᓄᐎᔦᒃ ᑭᑑᔑᐲᐊᒫᑰᒻ᙮

11:3b.1CO.011.003 ᒫᓄ ᑭᑲᔕᐌᓂᒥᑯᐙ, ᑭᑲᒪᒥᓄᓭᐃᑯᐙ ᑭᔐᒪᓂᑑ ᑰᓯᓈᓐ ᑲᔦ ᑳᑎᐯᒋᑫᒡ ᒋᓴᔅ X᙮

11:4b.1CO.011.004 ᒨᔕᒃ ᓂᑑᒋᓇᓈᑯᒫ ᓂᑭᔐᒪᓂᑑᒻ ᑮᓇᐙ ᐌᑎ ᐁᔮᔦᒃ ᐁᑮᐅᒌᑕᒪᐎᓀᒃ ᐅᔕᐌᒋᑫᐎᓐ ᐁᐅᒋᒦᓂᑯᐎᓯᔦᒃ X ᒋᓴᔅ ᐅᒋ᙮

11:5b.1CO.011.005 ᐐᓐ ᐃᑯ ᐁᐐᒌᐎᓀᒃ ᑭᑮᐌᓅᒋᐃᑯᐙ ᒥᓯᐌ ᑭᐱᒫᑎᓯᐎᓂᐙᕽ ᑕᑯ ᑲᔦ ᑲᑭᓇ ᑭᑎᔑᑮᑭᑐᐎᓂᐙᕽ ᑲᔦ ᑲᑭᓇ ᑭᑭᑫᑕᒧᐎᓂᐙᕽ᙮

11:6b.1CO.011.006 ᐁᑮᐊᐲᒋᐋᔩᑌᑕᒣᒃ X ᐅᑎᓈᒋᒥᑰᐎᓐ,

11:7b.1CO.011.007 ᑳᐐᓐ ᐊᐙᒡ ᐸᑮ ᑭᑮᓅᑌᓭᓰᒻ ᑭᔕᐌᓂᒥᑰᐎᓂᐙ ᒋᒦᓂᑰᐎᓯᔦᒃ, ᐁᐲᐁᒃ ᒋᓴᔅ X ᒋᐱᓈᑯᓯᒡ ᐌᑎ ᐃᔥᐱᒥᕽ᙮

11:8b.1CO.011.008 ᐐᓐ ᑭᑲᐋᔩᒋᐃᑯᐙ ᒋᒪᔥᑲᐎᓰᔦᒃ ᐲᓂᔥ ᐃᑯ ᒋᐌᒀᐊᔮᒃ, ᒦ ᓴ ᐃᐌ ᐁᑳ ᑫᑰᓐ ᒋᐃᔑᐊᓈᒣᑖᑯᓯᓯᐌᒃ ᐊᐲ ᐅᑮᔑᑳᒥᒡ ᐊᐊ ᑳᑎᐯᓂᒥᓇᕽ ᒋᓴᔅ X᙮

11:9b.1CO.011.009 ᑌᐺᔦᑖᑯᓯ ᓴ ᐊᐌ ᑭᔐᒪᓂᑑ, ᒦ ᐊᐌ ᑳᑮᐊᑐᒥᓀᒃ ᒋᐐᒌᐎᒣᒃ ᐃᓂ ᐅᑯᓯᓴᓐ ᒋᓴᔅ Xᑕᓐ, ᒦᐗᓂᓂ ᑳᑎᐯᓂᒥᒥᓇᕽ᙮

11:10b.1CO.011.010 ᓃᒋᐅᑌᐺᑕᒨᒃ! ᑭᑎᔑᑲᓅᓂᓂᓂᒻ ᐅᐐᓱᐎᓂᕽ ᑳᑎᐯᓂᒥᓇᕽ ᒋᓴᔅ X᙮ ᑭᐸᑯᓭᓂᒥᓂᓂᒻ, ᐯᔑᑾᓐ ᑲᑭᓇ ᒋᐃᑭᑐᔦᒃ, ᐁᑳ ᑫᑰᓐ ᐸᑫᐎᓂᑎᐎᓐ ᒋᐊᔮᒪᑲᓯᓄᒃ ᐃᐃᒫ ᐁᔑᐊᔮᔦᒃ, ᑾᔭᒃ ᓴ ᑯ ᒋᓈᐱᓭᒃ ᑭᐐᒋᐃᑎᐎᓂᐙ, ᐯᔑᑾᓐ ᒋᐃᓀᑕᒣᒃ, ᐯᔑᑾᓐ ᑲᔦ ᒋᑲᑴᐃᔑᒋᑫᔦᒃ᙮

11:11b.1CO.011.011 ᐋᓃᔥ, ᓃᒋᐅᑌᐺᑕᒨᒃ, ᑫᑰᓐ ᓂᐱᐐᑕᒫᑰᒃ ᐋᓂᓐᑦ ᐌᑎ ᐯᒥᐅᒋ ᐃᔖᐙᒡ ᑲᓬᐆᐎ ᐅᐙᑳᐃᑲᓂᕽ᙮ ᑾᔭᒃ ᐃᑯ ᓂᐐᑕᒫᑰᒃ, ᐋᓍᐸᑎᐎᓐ ᑮᓇᐙ ᐃᐃᒫ ᐁᐊᔮᒪᑲᒃ, ᐃᑭᑐᐗᒃ᙮

11:12b.1CO.011.012 ᒦ ᐅᐌ ᑳᐃᑕᒫᓐ: ᑳᑕᓱᐯᔑᑯᔦᒃ ᐯᐸᑳᓐ ᐁᐃᔑᐐᑕᒧᐙᒡ ᐁᔑᐱᒥᓂᔕᐃᑫᐙᒡ᙮ ᐯᔑᒃ ᐃᑭᑐ: ᓃᓐ ᐅᑭᑭᓄᐊᒪᐙᑲᓐ ᐊᐊ ᑆᓬ ᙮ ᑲᔦ ᐯᔑᒃ, ᓃᓐ ᐊᑆᓬᐊᔅ ᐅᑭᑭᓄᐊᒪᐙᑲᓇᓐ, ᐃᔑᐐᓂᑎᓱ᙮ ᐯᔑᒃ ᑲᔦ, ᓃᓐ ᐲᑕᕒ ᐅᑭᑭᓄᐊᒪᐙᑲᓇᓐ, ᐃᑭᑐ᙮ ᐯᔑᒃ ᐃᑕᔥ ᑲᔦ ᐃᑭᑐ: ᓃᓐ X ᐁᑕ ᓂᐱᒥᓂᔕᐙ᙮

11:13b.1CO.011.013 ᓇ! ᑕᐸᐲᑭᔑᐱᓈ ᓇ ᐊ X, ᐯᐸᑳᓐ ᒋᐊᔫᑴᓄᐃᓐᒡ? ᑆᓬ ᐃᓇ ᐊ ᑳᑮᓂᐳᑕᒪᐎᓀᒃ ᐋᔑᑌᔮᑎᑯᕽ? ᑭᑮᐃᔑᓰᑲᐊᑖᑰᒻ ᐃᓇ ᒋᐊᐱᐐᓂᓐᒡ ᑆᓬ ᒋᐅᒋᐅᑭᑭᓄᐊᒪᐙᑲᓂᒥᓀᒃ? ᑳᐐᓐ ᐄᑐᒃ!

11:14b.1CO.011.014 ᓂᓇᓈᑯᒫ ᑭᔐᒪᓂᑑ ᐁᑳ ᐁᑮᓰᑲᐊᑕᐙᓯᐗᒃ ᐊᐎᔭ ᑳᑕᔑᔦᒃ, ᒦ ᐁᑕ ᐅᑯ ᑲᕒᐃᔅᐸᔅ, ᑫᔭᔅ ᑲᔦ᙮

11:15b.1CO.011.015 ᑫᑯ ᐐᓐ ᐊᐎᔭ ᓂᑲᐃᑯᓰ ᓃᓐ ᓂᑎᔑᓂᑳᓱᐎᓂᕽ ᐁᑮᓰᑲᐊᑖᑰᔦᒃ ᒋᐅᑭᑭᓄᐊᒪᐙᑲᓂᒥᓇᑰᒃ᙮

11:16b.1CO.011.016 ᐊᐊᐌ ᑕᔥ ᑲᔦ ᓂᑮᓰᑲᐊᑕᐙ ᐃᔅᑌᐸᓇᔅ ᑲᔦ ᐃᓂᐌᓂᐗᐞ ᐅᐙᑳᐃᑲᓂᕽ ᑳᔑᑖᓂᒡ᙮ ᑳᐐᓐ ᒦᓇᐙ ᓂᒫᒥᑲᐎᓰ ᑯᑕᒃ ᐊᐎᔭ ᐃᐃᒫ ᒋᑮᓰᑲᐊᑕᐙᐗᑭᐸᓀᓐ᙮

11:17b.1CO.011.017 ᑳᐐᓐ ᐐᓐ ᒋᐸᐹᒥᓰᑲᐊᑖᑫᔮᓐ ᓂᑮᐱᐅᒋ ᐃᔑᓂᔕᐅᑯᓰ ᐊ X, ᐃᐃᔥ ᐐᓐ ᒥᓍᒋᒧᐎᓐ ᒋᐐᑕᒫᑫᔮᓐ, ᒦ ᒪᔮ ᐁᓇᓅᔑᒡ᙮ ᑳᐐᓐ ᐐᓐ ᓂᑮᑲᑴᐃᓂᑖᑯᓯᓰ ᐁᐅᑭᑫᑖᓱᐎᓂᔮᓐ, ᐋᓃᔥ ᑳᐐᓐ ᓂᑮᐊᑕᐌᑕᓰᓐ ᒋᑭᐱᔥᑲᒧᐗᒃ X ᐅᓂᐳᑕᒫᑫᐎᓐ ᐋᔑᑌᔮᑎᑯᕽ ᑳᔑᒪᔥᑲᐎᓰᒪᑲᓂᓂᒃ ᒋᐊᓄᑮᒪᑲᓯᓂᓂᒃ᙮

11:18b.1CO.011.018 ᐃᐃᐌ ᐋᓃᔥ ᑳᐃᓈᒋᒥᓐᒡ X ᐁᑮᓂᐳᒡ ᐋᔑᑌᔮᑎᑯᕽ, ᐅᐅᐌ ᐅᑎᓂᑖᓈᐙ ᐃᑭᐌᓂᐗᒃ ᑳᓂᐗᓂᔑᓄᐙᒡ, ᑖᐱᔥᑰ ᐁᑲᑮᐹᑕᓂᓂᒃ᙮ ᑮᓇᐎᓐᑦ ᐃᑕᔥ ᐐᓐ ᑳᓂᐱᒫᒋᐃᑰᔭᕽ, ᒦ ᐃᒫ ᑎᐹᒋᒧᐎᓂᕽ ᐁᐊᑌᓂᒃ ᐅᒪᔥᑲᐎᓰᐎᓐ ᑭᔐᒪᓂᑑ᙮

11:19b.1CO.011.019 ᐃᔑᐲᐃᑳᑌ ᐋᓃᔥ ᐃᐃ ᑭᒋᒪᓯᓇᐃᑲᓐ: ᐊᐊ ᑳᑲᑮᑖᐎᓯᒡ ᓂᑲᓂᔑᐗᓈᒋᑖᐙᓐ ᐅᑲᑮᑖᐎᓯᐎᓐ, ᐊᐊ ᑕᔥ ᑳᐅᑲᑮᑖᐌᑕᒧᐎᓂᒡ ᓂᑲ ᐸᑳᓐ ᐊᑖᐙᓐ ᐅᑭᑫᑖᓱᐎᓐ, ᐃᑭᑐ ᑭᔐᒪᓂᑑ᙮

11:20b.1CO.011.020 ᐋᓃᓐ ᑲᔦ ᐃᑭ ᐙᐃᓍᓱᐙᒡ ᑳᑲᑮᑖᐎᓯᐙᒡ, ᑲᔦ ᐃᑭ ᓂᔮᑲᒋᑑᐙᒡ ᒪᓯᓇᐃᑲᓇᓐ, ᑲᔦ ᐃᑭᐌᓂᐗᒃ ᐅᐅᒫ ᐊᑮᕽ ᑳᑲᑮᑖᐎᑖᑯᓯᐙᒡ? ᐋᓇᑮᑲᑮᑖᐎᓯᐙᒡ ᐃᑭ ᓅᑯᒻ ᐯᒫᑎᓯᐙᒡ ᐊᑮᕽ, ᑭᔐᒪᓂᑑ ᐅᑎᓇᑭᑖᓐ ᐁᑲᑮᐹᑕᓂᓂᒃ ᐅᑲᑮᑖᐎᓯᐎᓂᓂ᙮

11:21b.1CO.011.021 ᐐᓐ ᐋᓃᔥ ᑭᔐᒪᓂᑑ ᒫᐗᒡ ᐁᑲᑮᑖᐌᑕᕽ, ᑳᐐᓐ ᐅᑮᐸᑭᑎᓈᓰᐞ ᐅᐅ ᐯᒫᑎᓯᓂᒡ ᐐᓇᐙ ᑯ ᐅᑲᑮᑖᐎᓯᐎᓂᐙᕽ ᒋᐅᒋᑭᑫᓂᒥᑯᐸᓐ᙮ ᑮᐃᓀᑕᒻ ᐃᑕᔥ ᐁᐐᐱᒫᒋᐋᒡ ᐃᐃ ᑫᑌᐺᑕᒥᓂᒡ᙮ ᐅᑮᐋᐸᒋᑑᓐ ᐅᐅ ᑎᐹᒋᒧᐎᓐ ᑳᐐᑕᒫᑫᔮᕽ, ᐃᐃ ᑯ ᐁᐃᓀᑕᒧᐙᒡ ᐁᑲᑮᐹᑕᓂᓂᒃ ᐅᐅᒫ ᐊᑮᕽ᙮

11:22b.1CO.011.022 ᒎᐗᒃ ᐋᓃᔥ ᐅᐐᐙᐸᑖᓈᐙ ᒫᒪᑳᒋᒋᑫᐎᓇᓐ, ᒦ ᐸᔦᔥ ᒋᑌᐸᑫᑕᒧᐙᒡ᙮ ᐃᑭᔥ ᑲᔦ ᑲᕒᐄᑲᒃ ᐅᓇᑐᓀᐋᓈᐙ ᒥᓂᒃ ᓴ ᑯ ᑳᑲᑮᑖᐗᓂᓂᒃ᙮

11:23b.1CO.011.023 ᓃᓇᐎᓐᑦ ᐃᑕᔥ ᑳᐐᑕᒫᑫᔮᕽ, ᓂᑕᔑᒫᓈᓐ ᐊᐊ X ᑳᑮᐃᔑ ᐊᑯᓴᑲᐃᑲᓂᐎᒡ ᐋᔑᑌᔮᑎᑯᕽ᙮ ᐅᐅᐌ ᑕᔥ ᐁᑕᔑᑌᒃ ᐅᔒᑭᑖᓈᐙ ᐃᑭ ᒎᐗᒃ, ᐅᑯ ᑕᔥ ᑲᔦ ᑳᒎᐎᐎᓯᒀ ᐅᑲᑮᐹᓯᑖᓈᐙ᙮

11:24b.1CO.011.024 ᐃᑭ ᑕᔥ ᑭᔐᒪᓂᑑᓐ ᑳᐊᑐᒥᑯᐙᒡ, ᑫᒫ ᒎᐎᐙᒡ ᑫᒫ ᑲᕒᐄᑭᐎᐙᒡ, ᐅᓂᓯᑐᑖᓈᐙ X ᐐᓐ ᑭᔐᒪᓂᑑᓐ ᐁᐅᒪᔥᑲᐎᓰᒥᒥᑯᒡ, ᑲᔦ ᑭᔐᒪᓂᑑᓐ ᐁᐅᑲᑮᑖᐌᑕᒧᐎᓂᑯᒡ᙮

11:25b.1CO.011.025 ᐃᓇᔥᑫ ᑭᔐᒪᓂᑑᓈᕽ ᐋᓇᐃᔑᓈᑾᑭᐸᓐ ᑫᑰᓐ ᒋᑲᑮᐸᑕᒃ, ᐊᐗᔑᒣ ᑖᑲᑮᑖᐗᓐ ᐊᐲᒡ ᐃᓂᓃᓈᕽ ᑳᐊᔮᒪᑲᒃ᙮ ᐃᐃᐌᔥ ᐁᓃᓇᒪᒃ ᐋᓇᐃᔑᓈᑾᒃ ᑫᑰᓐ ᑭᔐᒪᓂᑑᓈᕽ, ᐊᐗᔑᒣ ᒪᔥᑲᐎᓰᒪᑲᓐ ᐊᐲᒡ ᐃᓂᓃᓈᕽ ᑫᔑᒪᔥᑲᐎᓰᒪᑲᒃ ᑫᑰᓐ᙮

11:26b.1CO.011.026 ᓃᒋᐅᑌᐺᑕᒨᒃ! ᒫᒥᑲᐎᔪᒃ ᐋᓃᓐ ᑳᑮᐃᓈᑎᓯᔦᒃ ᐃᐃ ᐊᐲ ᐁᐊᑐᒥᓀᒃ ᑭᔐᒪᓂᑑ᙮ ᑳᐐᓐ ᑭᑮᐹᑏᓄᓰᒻ ᑳᑲᑮᑖᐎᓯᔦᒃ ᐅᐅᒫ ᐊᑮᕽ ᐊᐎᔭᒃ ᑳᐃᔑᓈᑯᓯᐙᒡ, ᑳᐐᓐ ᑲᔦ ᐃᐃᐌ ᑭᑮᐃᔑᐅᑭᒫᐌᑖᑯᓯᓰᒻ, ᑳᐐᓐ ᑲᔦ ᓃᐱᐗᐞ ᐃᐃᐌ ᓇᑫ ᑭᑮᐃᔑᑭᒋ ᐃᓀᑖᑯᓯᓰᒻ᙮

11:27b.1CO.011.027 ᐅᐅᒫ ᑕᔥ ᐊᐎᔭᒃ ᐊᑮᕽ ᑳᐃᓀᑕᒧᐙᒡ ᑲᑮᐹᑕᓐ ᑲᔦ ᓃᓇᒪᓐ, ᒦ ᐅᐌᓂ ᑭᔐᒪᓂᑑ ᑳᑮᐅᓈᐸᑕᕽ ᒋᐅᒋᑕᐸᓯᓈᒡ ᐅᐅ ᑳᑲᑮᑖᐎᓯᓂᒡ ᑲᔦ ᑳᒪᔥᑲᐙᑎᓯᓂᒡ᙮

11:28b.1CO.011.028 ᑲᔦ ᐃᓂᐌᓂᐗᓐ ᐊᑮᕽ ᑳᑕᐸᓭᑖᑾᑭᓐ ᑲᔦ ᑳᐋᓍᐸᒋᑳᑌᑭᓐ, ᑲᔦ ᑫᑰᓇᓐ ᑳᐊᔮᒪᑲᓯᓄᑭᓐ, ᑭᔐᒪᓂᑑ ᐅᑮᑲᑮᑭᓈᓇᓐ, ᒋᐴᓂᓭᓂᒃ ᐃᑕᔥ ᐌᑯᓀᓐ ᓴ ᑯ ᐊᑮᕽ ᑳᔑᑭᒋ ᐃᓀᑖᑾᓂᓂᒃ᙮

11:29b.1CO.011.029 ᒦ ᐅᐌ ᑳᐅᒋᑑᑕᕽ ᐁᑳ ᐊᐎᔭᓐ ᐯᒫᑎᓯᓂᒡ ᒋᒫᒦᒀᓂᑎᓱᓯᓂᒃ ᐃᒫ ᑭᔐᒪᓂᑑ ᐁᓈᓴᒦᒡ᙮

11:30b.1CO.011.030 ᒦ ᐊᐌ ᑭᔐᒪᓂᑑ ᑳᐃᔑᒋᑫᐃᓀᒃ ᒋᒫᒌᐐᒌᐌᒃ X ᒋᓴᔅ᙮ ᐅᑮᐃᔑᐋᓐ Xᑕᓐ ᒦ ᐃᒫ ᒋᐊᔮᒪᑲᒃ ᑭᑲᑮᑖᐎᓯᐎᓂᓈᓐ᙮ ᒦ ᐊᐌ X ᐁᔑᒋᑫᐃᓇᕽ ᒋᑾᔭᑾᑭᒥᓇᕽ ᑭᔐᒪᓂᑑ, ᐐᓐ ᐅᑾᔭᒀᑎᓰᒪᐞ ᒋᑎᓄᐎᔭᕽ, ᑲᔦ ᒦ ᐊᐌ X ᑳᑮᐸᑭᑎᓂᓇᕽ ᐃᐃᒫ ᑳᑮᑭᒋᐎᓂᑯᔭᕽ ᒪᒋᑑᑕᒧᐎᓐ᙮

11:31b.1CO.011.031 ᒦ ᐋᓃᔥ ᐅᐅ ᐁᑭᑑᒪᑲᒃ ᑭᒋᒪᓯᓇᐃᑲᓐ: ᐊᐌᓀᓐ ᓴ ᑯ ᑫᑭᒋ ᐃᓀᑕᕽ ᑫᑰᓐ, ᐅᑲᑭᒋ ᐃᓀᑖᓐ ᐁᑕ ᑳᑑᑕᒥᓂᒡ ᑳᑎᐯᒋᑫᓂᒡ᙮

12

12:1b.1CO.012.001 ᓃᒋᐅᑌᐺᑕᒨᒃ! ᐊᐲ ᑳᐱᒥᐅᑎᓯᓇᑰᒃ, ᑭᑮᐱᐐᑕᒪᐎᓂᓂᒻ ᐃᐃᐌ ᑳᑎᐹᑐᑌᓂᒃ ᑭᔐᒪᓂᑑ ᐅᑎᔑᒋᑫᐎᓐ᙮ ᑳᐐᓐ ᐃ ᐊᐲ ᓂᑮᑲᑴᐋᐸᒋᑑᓰᓇᓐ ᐁᑲᑳᓍᑭᓐ ᐃᑭᑐᐎᓇᓐ ᑖᐱᔥᑰ ᐁᑭᑭᓯᔮᓐ ᑭᒋᑭᑫᑖᓱᐎᓐ᙮

12:2b.1CO.012.002 ᐋᓃᔥ ᓂᑮᐅᓀᑖᓐ ᑲᑭᓇ ᑫᑰᓐ ᒋᐗᓃᑫᓄᑕᒫᓐ ᒣᒀ ᐁᐐᒋᑖᒥᓇᑰᒃ, ᒦ ᐁᑕ ᐅᐌ ᒋᐐᑕᒫᑫᔮᓐ ᒋᓴᔅ ᐁᓈᒋᒥᓐᒡ, ᒣᒥᑕᑫ ᑳᔑᓂᐳᒡ ᐋᔑᑌᔮᑎᑯᕽ᙮

12:3b.1CO.012.003 ᐊᐲ ᑕᔥ ᐁᐅᑎᓯᓇᑰᒃ, ᓂᑮᓃᓇᒥᔅ, ᓂᑮᑭᒋᓂᓂᑭᔥᑳ ᐁᐲᒋᓭᑭᓯᔮᓐ᙮

12:4b.1CO.012.004 ᐊᐲ ᑕᔥ ᐁᑲᑭᑐᔮᓐ, ᐁᑲᑮᑴᔮᓐ ᑲᔦ, ᑳᐐᓐ ᓂᑮᑲᑴ ᐃᓂᑖᑯᓯᓰ ᒋᑭᒋᑭᑫᑕᒫᓐ ᑫᑰᓐ ᒋᐅᒋᑲᔥᑭᒪᒀ ᐊᐎᔭᒃ᙮ ᐃᐃᒫ ᑕᔥ ᓂᑲᑮᑴᐎᓂᕽ ᑮᐙᐸᒋᑳᑌ ᐁᑌᐊᐲᒌᓂᒡ ᑭᔐᒪᓂᑑ ᐅᑕᒑᑾᓐ᙮

12:5b.1CO.012.005 ᒦ ᐅᐌ ᐌᒋ ᐃᔑᒋᑫᔮᓐ, ᐁᑳ ᐐᓐ ᒋᐅᑎᓇᓯᐌᒃ ᑭᑌᐺᑕᒧᐎᓂᐙ ᐅᒋ ᐊᐎᔭ ᐃᓂᓂ ᐅᑭᑫᑖᓱᐎᓂᕽ, ᐃᐃᒫᔥ ᐐᓐ ᒪᔮ ᐅᒪᔥᑲᐎᓰᐎᓂᕽ ᑭᔐᒪᓂᑑ᙮

12:6b.1CO.012.006 ᑌᐺ ᓴ ᑯ ᑲᑮᑖᐎᓯᐎᓐ ᓂᑎᔑᑲᑮᑭᒫᓈᓂᒃ ᐃᑭ ᐊᓇᒥᐁᐙᑎᓯᐎᓂᕽ ᑳᒪᔥᑲᐎᑭᐙᒡ, ᐅᐅ ᑕᔥ ᑲᑮᑖᐎᓯᐎᓐ ᑳᐐᓐ ᐃᒫ ᐅᒌᒪᑲᓯᓅᓐ ᐅᐅᒫ ᓅᑯᒻ ᐊᑮᕽ, ᑳᐐᓐ ᑲᔦ ᐅᒋᑎᐯᑖᑾᓯᓅᓐ ᐃᑭ ᑳᓃᑳᓂᓰᑲᑕᒧᐙᒡ ᐅᐅ ᐊᑭ᙮ ᐋᓇᐐᓐ ᐁᒪᔥᑲᐎᓰᐙᒡ, ᑳᐐᓐ ᑕᓂᐊᔮᓰᐗᒃ᙮

12:7b.1CO.012.007 ᐃᐃᐌ ᑕᔥ ᓂᑲᑮᑴᓄᑖᓐ ᐃᐃ ᑭᔐᒪᓂᑑ ᐅᑲᑮᑖᐎᓯᐎᓐ, ᐃᐃᐌ ᐁᑳ ᐃᓂᓃᓈᕽ ᑫᑮ ᐃᓇᒪᒋᑳᑌᓯᓂᓂᒃ, ᑭᔐᒪᓂᑑ ᐁᑮᑳᑕᒫᑫᒡ᙮ ᓃᔮᒃ ᐃᑕᔥ ᒋᑆ ᐊᓂᒫᒋᓭᒃ ᐅᐅ ᐊᑭ, ᑭᑮᐅᓀᑕᒫᑯᓈᓐ ᐅᑲᑮᑖᐌᑕᒧᐎᓂᕽ ᑫᐃᔑᒋᑫᐃᓇᕽ ᒋᐅᒋᐊᔮᐗᕽ ᑭᒋ ᐃᓀᑖᑯᓯᐎᓐ᙮

12:8b.1CO.012.008 ᐅᐅ ᑲᑮᑖᐌᑕᒧᐎᓐ ᑳᐐᓐ ᐅᑮᑭᑫᑕᓰᓈᐙ ᐅᑯ ᑳᓃᑳᓂᓰᑲᑕᒧᐙᒡ ᐅᐅ ᐊᑭ᙮ ᑮᔥᐱᓐ ᑮᑭᑫᑕᒧᐙᐸᓐ, ᑳᐐᓐ ᐅᑖᑮᐊᑯᓴᑲᐙᓯᐙᐙᓐ ᐃᓂ ᑳᑎᐯᒋᑫᓂᒡ ᒫᐗᒡ ᑳᑭᒋ ᐃᓀᑖᑯᓯᓂᒡ᙮

12:9b.1CO.012.009 ᐅᐅᐌ ᑕᔥ ᐃᔑᐲᐃᑳᑌ: ᐃᐃᐌ ᐁᑳ ᐐᑳ ᐊᐎᔭ ᑳᐙᐸᑕᓯᒃ ᑲᔦ ᐁᑳ ᐊᐎᔭ ᐁᑮᐅᒋᓅᑕᓯᒃ ᐃᐃᐌᔥ ᑲᔦ ᐐᑳ ᐊᐎᔭ ᑳᐃᓀᑕᓯᒃ ᒋᐃᔑᐌᐸᑭᐸᓐ, ᒦ ᐃ ᒪᔮ ᑭᔐᒪᓂᑑ ᑳᑮᑾᔮᒌᑕᒪᐙᒡ ᐃᐃ ᑳᓵᑭᐃᑯᒡ᙮

12:10b.1CO.012.010 ᑮᓇᐎᓐᑦ ᐃᑕᔥ ᑭᑮᑭᑫᑕᒧᐃᑯᓈᓐ ᑭᔐᒪᓂᑑ, ᐃᓂ ᐅᑕᒑᑾᓐ ᐁᑮᐙᐸᑕᐃᓇᕽ᙮ ᐊᐌ ᐊᒑᒃ ᐅᒑᑭᑭᑫᑖᓐ ᑲᑭᓇ ᑫᑰᓐ, ᐊᐴᔥᑫ ᐁᔑ ᐃᔥᐹᓂᒃ ᑭᔐᒪᓂᑑ ᐅᑎᓀᑕᒧᐎᓐ᙮

12:11b.1CO.012.011 ᐃᓇᔥᑫ ᐊᐌᓀᓐ ᐃᓂ ᑫᑭᑫᑕᒫᑯᒡ ᐋᓃᓐ ᐁᓀᑕᕽ ᐊᐎᔭ? ᒦᐗᓐ ᐁᑕ ᐃᓂ ᐅᑕᒑᑾᓐ ᑳᐸᐹᑭᑭᓰᓄᑕᐙᒡ ᐅᑭᑫᑕᒫᑰᓐ᙮ ᒦ ᐃ ᐯᔑᑾᓐ ᑭᔐᒪᓂᑑ ᑳᐃᓀᑕᕽ ᑳᐐᓐ ᐸᑳᓐ ᐊᐎᔭᓐ ᐅᑲᑭᑫᑕᒫᑯᓰᓐ᙮ ᒦᐗᓐ ᐁᑕ ᐃᓂ ᑭᔐᒪᓂᑑ ᐅᑕᒑᑾᓐ ᑲᑭᓇ ᐅᑭᑫᑕᒫᑰᓐ᙮

12:12b.1CO.012.012 ᐃᐃᐌ ᑕᔥ ᐃᓀᑕᒧᐎᓐ ᒥᓯᐌ ᑳᐋᐸᒋᑑᐙᒡ ᐅᒫ ᐊᑮᕽ ᑳᐱᒫᑎᓯᐙᒡ, ᑳᐐᓐ ᑮᓇᐎᓐᑦ ᐃᐃ ᑭᑮᐅᑖᐱᓇᓰᒥᓐ᙮ ᑮᓇᐎᓐᑦ ᒣᔥᑾᒡ ᑭᑮᐅᑖᐱᓈᓈᓐ ᐊᐊ ᐊᒑᒃ ᑳᐱ ᐃᔑᓂᔕᐅᑯᒡ ᑭᔐᒪᓂᑑᓐ, ᒦ ᐊᐌ ᐊᒑᒃ ᑳᒦᓂᑰᔭᕽ ᒋᑭᑫᑕᒧᐗᕽ ᐅᓄᐌᓂᐗᓐ ᑳᑮᒦᓂᓇᕽ ᐁᑮᔕᐌᓂᒥᓇᕽ ᑭᔐᒪᓂᑑ᙮

12:13b.1CO.012.013 ᐃᓂᐌᓂᐗᓐ ᓴ ᑯ ᑳᔑᑲᑭᑐᔮᕽ, ᑳᐐᓐ ᐐᓐ ᓂᑖᐸᒋᑑᓰᒥᓐ ᐃᓂ ᑲᑮᑖᐎᑮᔗᐎᓇᓐ ᐃᓂᓃᓈᕽ ᐌᒋᑭᑭᓄᐃᑳᑌᓂᑭᓐ᙮ ᐃᓂ ᑕᔥ ᑭᔐᒪᓂᑑ ᐅᑕᒑᑾᓐ ᓂᑭᑭᓄᐊᒫᑯᓈᓐ ᒋᐃᔑᑲᑭᑐᔮᕽ, ᑲᔦ ᐃᓂ ᑳᐊᒑᑯᐗᓂᓂᑭᓐ ᓂᑎᔑᐸᔭᑌᓂᓯᑐᑕᒨᓈᓈᓂᒃ ᐃᑭ ᑳᑭᑭᔥᑲᐙᐙᒡ ᑭᔐᒪᓂᑑᓐ ᐅᑕᒑᑯᓂ᙮

12:14b.1CO.012.014 ᐊᐎᔭ ᑕᔥ ᐁᑳ ᑳᑭᑭᔥᑲᐙᓯᒃ ᑭᔐᒪᓂᑑᓐ ᐅᑕᒑᑯᓂ, ᑳᐐᓐ ᐅᑲᐅᑖᐱᓇᓰᓇᓐ ᐃᓂ ᑫᑰᓇᓐ ᐃᐃᒫ ᐊᒑᑯᕽ ᑳᐅᒌᒪᑲᓂᓂᑭᓐ᙮ ᐋᓃᔥ ᐅᑎᓂᑖᓇᓐ ᐁᑲᑮᐹᑌᑖᑾᓂᓂᑭᓐ᙮ ᑳᐐᓐ ᑲᓇᑫ ᐅᓂᓯᑐᑕᓰᓇᓐ᙮ ᒦ ᐁᑕ ᐐᒌᐎᑯᒡ ᑭᔐᒪᓂᑑᓐ ᐅᑕᒑᑯᓂ ᐅᑲᐅᒋᓂᓯᑐᑖᓐ᙮

12:15b.1CO.012.015 ᒦᑕᔥ ᐊᐎᔭ ᐁᔮᐙᒡ ᑭᔐᒪᓂᑑᓐ ᐅᑕᒑᑯᓂ, ᐐᓐ ᐅᑲᓂᓯᑕᐌᑖᓐ ᑲᑭᓇ ᑫᑰᓐ ᐋᓃᓐ ᐁᔑᐊᔮᓂᒃ᙮ ᑲᔦ ᑳᐐᓐ ᐅᑲᓂᓯᑕᐌᓂᒥᑯᓰᓐ ᐊᐎᔭᓐ ᑳᑭᑭᔥᑳᑯᓯᓂᒃ ᐃᓂ ᐊᒑᑾᓐ᙮

12:16b.1CO.012.016 ᐃᓇᔥᑫ ᒦ ᐅᐌ ᑳᐃᔑᐲᐃᑳᑌᒃ: ᐊᐌᓀᓐ ᑫᑫᑕᒪᐙᒡ ᑳᑎᐯᒋᑫᓂᒡ ᐋᓃᓐ ᐁᓀᑕᒥᓂᒡ? ᐊᐌᓀᓐ ᑫᑰᓐ ᑫᑭᑭᓄᐊᒪᐙᐸᓐ? ᐃᔑᐲᐃᑳᑌ᙮ ᑮᓇᐎᓐᑦ ᐃᑕᔥ ᑭᑕᔮᐙᒥᓐ ᐃᐃ X ᐅᑎᓀᑕᒧᐎᓐ᙮

13

13:1b.1CO.013.001 ᓃᒋᐅᑌᐺᑕᒨᒃ! ᐌᑎ ᐅᑖᓈᕽ ᑳᑮᐱᐙᐸᒥᓇᑰᒃ, ᑳᐐᓐ ᐃᐃᐌ ᑭᑮᑌᐊᐲᑖᑎᓯᓰᒻ ᒋᐃᔑᑲᓅᓂᓇᑰᒃ ᑖᐱᔥᑰ ᑳᐊᔮᐎᒣᒃ ᑭᔐᒪᓂᑑ ᐅᑕᒑᑾᓐ᙮ ᒦ ᐱᑯ ᐁᑕ ᑖᐱᔥᑰ ᑳᐊᑮᐙᑎᓯᐙᒡ ᑭᑮᐃᔑᑲᓅᓂᓂᓂᒻ, ᐋᓃᔥ ᑭᑮᐊᐱᓅᒌᔑᐌᑖᑯᓯᒻ ᐃᐃ ᐊᐲ ᐁᒫᒌᐱᒥᓂᔕᐌᒃ X᙮

13:2b.1CO.013.002 ᒦ ᐁᑕ ᒎᒎᔖᐳ ᑭᑮᒥᓇᐃᓂᓂᒻ, ᑳᐐᓐ ᐃᑯ ᑳᒪᔥᑲᐙᒃ ᒦᒋᒻ ᑭᑮᐊᔕᒥᓯᓅᓂᓂᒻ, ᐁᑳ ᒪᔑ ᐁᑮᑌᐃᔑᐊᔮᓯᐌᒃ᙮ ᓅᑯᒻ ᓴ ᑯ ᑳ ᒪᔑ ᑭᑎᔑᐊᔮᓰᒻ᙮

13:3b.1CO.013.003 ᑫᔮᐱ ᐋᓃᔥ ᑭᑎᔑᐱᒫᑎᓯᒻ ᑖᐱᔥᑰ ᐊᑮᕽ ᑳᐃᔑᑎᐯᑖᑯᓯᐙᒡ᙮ ᐋᓃᔥ ᑮᓇᐙ ᑯ ᐊᔮᒪᑲᓐ ᐅᑌᓂᑎᐎᓐ, ᐊᔮᓅᑎᐎᓐ, ᑳᐐᓐ ᐃᓇ ᐃᔑᓈᑾᓯᓅᓐ ᐅᐅ ᓴ ᐊᑮᕽ ᐁᐅᒋᑎᐯᑖᑯᓯᔦᒃ? ᑳᐐᓐ ᐃᓇ ᑭᑎᓈᑎᓯᓰᒻ ᑳᒥᒋᐊᑮᐙᑎᓯᐙᒡ?

13:4b.1CO.013.004 ᐃᐃ ᐯᔑᒃ ᐃᑭᑐᒡ: ᓃᓐ ᑆᓬ ᓂᐱᒥᓂᔕᐙ, ᑲᔦ ᑯᑕᒃ, ᓃᓐ ᐊᑆᓬᐊᔅ ᓂᐱᒥᓂᔕᐙ, ᐃᑭᑐᒡ, ᑳᐐᓐ ᐃᓇ ᐃᓂᓃᓈᕽ ᑭᑎᔑᐊᔮᓰᒻ?

13:5b.1CO.013.005 ᐊᐌᓀᓐ ᑕᔥ ᐊᐊ ᐊᑆᓬᐊᔅ? ᐊᐌᓀᓐ ᐊᐊ ᑲᔦ ᑆᓬ? ᓃᓇᐎᓐᑦ ᐁᑕ ᑭᔐᒪᓂᑑ ᐅᑕᓄᑮᐋᑲᓇᐞ ᓂᑎᓄᐎᒥᓐ ᑳᐅᑎᓇᒣᒃ ᑭᑌᐺᑕᒧᐎᓂᐙ᙮ ᐯᐸᑳᓐ ᑕᔥ ᓂᑎᓇᓄᑮᒥᓐ ᐃᐌ ᑳᔑᐸᒥᓇᒧᐃᔭᒥᓐᒡ ᐊᐊ ᑳᑎᐯᒋᑫᒡ᙮

13:6b.1CO.013.006 ᓃᓂᑕᒻ ᓂᑮᑭᑎᑳᑖᓇᓐ ᑭᑎᑳᓀᓴᓐ, ᒦᔥ ᐐᓂᑕᒻ ᐊᑆᓬᐊᔅ ᐅᑮᑎᐹᐹᐗᑑᓇᓐ᙮ ᐐᓐ ᐃᑕᔥ ᐃᑯ ᑭᔐᒪᓂᑑ ᐅᑮᒫᒌᑭᑑᓇᓐ᙮

13:7b.1CO.013.007 ᒦ ᓴ ᐃ ᑳᐐᓐ ᑫᑰᓐ ᐃᓀᑖᑯᓯᓰᐗᒃ ᐊᐊᐌ ᑳᑭᑎᑫᒡ, ᐊᐊᐌ ᑲᔦ ᑳᑎᐹᐹᐗᒋᑫᒡ, ᐊᐊᐌᔥ ᐁᑕ ᑭᔐᒪᓂᑑ ᑭᒋ ᐃᓀᑖᑯᓯ ᐁᒫᒌᑭᒋᑫᒡ᙮

13:8b.1CO.013.008 ᑳᐐᓐ ᐯᐸᑳᓐ ᑕᐃᓀᑖᑯᓯᓰᐗᒃ ᐊᐊ ᑳᑭᑎᑫᒡ, ᐊᐊ ᑲᔦ ᑳᑎᐹᐹᐗᒋᑫᒡ: ᐯᐯᔑᒃ ᐅᑲᑎᐸᐊᒫᑯᐙᓐ ᐃᓂ ᑭᔐᒪᓂᑑᓐ ᐋᓃᓂᑯ ᐁᔑᓈᑾᓂᓂᑭᓐ ᐅᑕᓄᑮᐎᓂᐙᓐ᙮

13:9b.1CO.013.009 ᓃᓇᐎᓐᑦ ᐃᓴ ᓂᐐᑕᓄᑮᑎᒥᓐ ᐁᐊᓄᑲᐗᑭᒡ ᑭᔐᒪᓂᑑ᙮ ᑮᓇᐙ ᑕᔥ ᐐᓐ ᑭᔐᒪᓂᑑ ᑳᔑᑭᑎᑫᒡ ᑭᑎᓀᑖᑯᓯᒻ᙮ ᑲᔦ ᓴ ᑭᑎᓀᑖᑯᓯᒻ ᑭᔐᒪᓂᑑ ᐁᐅᔑᑑᒡ ᐙᑳᐃᑲᓐ᙮

13:10b.1CO.013.010 ᓃᓐ ᓂᑮᐃᔑᒋᑫ ᐃᐌ ᑳᐃᔑᒦᔑᒡ ᐊᐊ ᑭᔐᒪᓂᑑ᙮ ᑖᐱᔥᑰ ᐊᐎᔭ ᐗᐐᑫ ᑳᓇᑲᒋᐙᑳᐃᑫᒡ ᓃᓐ ᓂᑕᒻ ᓂᑮᐅᓈᑯᓯᑑᓐ ᐃᐃᒫ ᑫᔑᐙᑳᐃᑳᑌᒃ᙮ ᐸᑳᓐ ᒦᓇᐙ ᐊᐎᔭ ᐗᑭᑖᐱᒃ ᑮᒫᒌᐙᑳᐃᑫ ᐃᐃᒫ ᑳᑮᐃᔑᐅᓈᑯᓯᒋᑫᔮᐹᓐ᙮ ᑕᓱᐯᔑᒃ ᐃᑕᔥ ᐌᐌᓂ ᑕᑲᑴᐃᔑᒫᒌ᙮

13:11b.1CO.013.011 ᑭᔐᒪᓂᑑ ᐋᔕ ᓂᑕᒻ ᐅᑮᐃᓇᓵᓐ ᒋᓴᔅ Xᑕᓐ ᐐᓐ ᒋᐅᓈᑯᓯᒋᑳᑳᓂᐎᓂᒡ᙮ ᑳᐐᓐ ᑖᐸᑳᓇᓯᓅᓐ ᑫᑰᓐ ᐊᐎᔭ ᒋᐃᓇᑑᒡ᙮

13:12b.1CO.013.012 ᐃᑭ ᑕᔥ ᐅᐅᒫ ᐗᑭᑖᐱᒃ ᑳᔑᐙᑳᐃᑫᐙᒡ, ᐋᓂᓐᑦ ᐅᓵᐎ ᔔᓂᔮᐗᓯᓃᓐ ᐅᑎᔑᐋᐸᒋᐋᐙᓐ, ᑲᔦ ᐙᐱᔥᑭᔔᓂᔮᐗᓯᓃᓐ, ᑲᔦ ᐁᑭᑕᑭᓱᓂᒡ ᐊᓯᓃᐞ᙮ ᐋᓂᓐᑦ ᐃᑕᔥ ᑲᔦ ᒥᑎᑰᓐ, ᒪᔥᑯᓰᓐ, ᑳᓅᑲᔥᑲᓂᓂᑭᓐ ᐅᑖᐸᒋᑑᓈᐙᓐ᙮

13:13b.1CO.013.013 ᑲᑭᓇ ᑕᔥ ᐊᐎᔭ ᑕᐙᐸᒋᑳᑌᓂ ᐅᑕᓄᑮᐎᓐ᙮ ᑕᐙᐸᑕᐃᐌᒪᑲᓐ ᐃᐃ ᑮᔑᑲᓐ ᑫᐱᐅᑮᔑᑳᒥᒡ ᐊᐊ X᙮ ᒦ ᐃᐌ ᐊᐲ ᑲᑭᓇ ᐊᐎᔭ ᐃᐃᒫ ᐃᔥᑯᑌᕽ ᑕᐅᒋᑭᑫᒋᑳᑌᓂ ᐋᓃᓐ ᒪᔮ ᐁᔑᐊᔮᓂᒃ ᐅᑕᓄᑮᐎᓐ᙮

13:14b.1CO.013.014 ᐃᐃᐌ ᐗᑭᑖᐱᒃ ᑳᐙᑳᐃᑳᑌᒃ, ᑮᔥᐱᓐ ᐃᔥᒀᑭᑌᒃ, ᑕᑎᐸᐊᒪᐙ ᐊᐌᑎ ᐅᑕᓄᑮ᙮

13:15b.1CO.013.015 ᒑᑳᑭᑌᓂᒃ ᐃᑕᔥ ᐊᐎᔭ ᐅᑑᔑᒋᑫᐎᓐ, ᒦ ᐃ ᒋᐗᓂᑑᒡ᙮ ᐐᓐ ᐁᑕ ᑕᐱᒫᒋᐋ᙮ ᑖᐱᔥᑰ ᒣᑴᔥᑯᑌ ᐁᐅᒋᐸᐲᒡ ᑕᐃᔑᓈᑯᓯ᙮

13:16b.1CO.013.016 ᑳᐐᓐ ᐃᓇ ᑭᑭᑫᑕᓰᒻ ᒫᒪᐤ ᐁᐃᓍᓂᑰᔦᒃ ᑭᔐᒪᓂᑑ ᐅᑭᒋᐊᓇᒥᐁᐎᑲᒥᒃ? ᐐᓐ ᐋᓃᔥ ᑭᔐᒪᓂᑑ ᐅᑕᒑᑾᓐ ᐃᔑᑖᐗᓐ ᐃᐃᒫ ᑳᔑᒫᒪᐎᐃᑎᔦᒃ᙮

13:17b.1CO.013.017 ᑮᔥᐱᓐ ᐊᐎᔭ ᓂᔑᐗᓈᒋᑕᒪᐙᒡ ᐅᐌᓂ ᐅᑭᒋᐊᓇᒥᐁᐎᑲᒥᑯᓂ ᑭᔐᒪᓂᑑᓐ, ᑲᔦ ᐐᓐ ᐅᑲᓂᔑᐗᓈᒋᐃᑰᓐ ᑭᔐᒪᓂᑑᓐ᙮ ᐋᓃᔥ ᐃᓇᒋᑳᑌ ᐁᑕ ᑭᔐᒪᓂᑑ ᒋᑎᐯᑕᕽ ᐅᑭᒋᐊᓇᒥᐁᐎᑲᒥᒃ᙮ ᒦ ᐃᐌ ᐁᑎᓄᐎᔦᒃ᙮

13:18b.1CO.013.018 ᑫᑯ ᐐᓐ ᐊᐎᔭ ᑕᐗᔦᔑᑎᓱᓰ᙮ ᑮᔥᐱᓐ ᐊᐎᔭ ᐃᓀᓂᑎᓱᒡ ᐁᐃᔑᑲᑮᑖᐎᓯᒡ ᓅᑯᒻ ᐅᑯᐌᓂᐗᒃ ᑳᐱᒫᑎᓯᐙᒡ ᐁᔑᓇᒧᐙᒡ ᑲᑮᑖᐎᓯᐎᓐ, ᒫᓄ ᒋᐌᐱᓇᕽ ᐃᐃ ᑳᔑᑭᑫᑕᒫᓱᒡ᙮ ᒦᔥ ᐃᐃᒫ ᑌᐺ ᒋᐅᒋᓂᑲᑮᑖᐌᑕᕽ᙮

13:19b.1CO.013.019 ᐃᐌ ᐋᓃᔥ ᐅᒫ ᐊᑮᕽ ᑳᐃᔑᓇᒧᐙᒡ ᒋᑲᑮᑖᐗᓂᓂᒃ, ᒦ ᐃᐌ ᐁᔑᓇᕽ ᑭᔐᒪᓂᑑ ᐁᑲᑮᐹᑕᓂᓂᒃ᙮ ᐋᓃᔥ ᐅᐅᐌ ᐃᔑᐲᐃᑳᑌ: ᐃᑭᐌ ᐅᑲᑮᑖᐎᓰᒃ ᐐᓇᐙ ᑯ ᐅᐗᔦᔑᒥᐌᐎᓂᐙᕽ ᐅᑲᔑᑕᓱᓂᑯᐙᓐ ᑭᔐᒪᓂᑑᓐ᙮

13:20b.1CO.013.020 ᑲᔦ ᐃᔑᐲᐃᑳᑌ: ᑳᑎᐯᒋᑫᒡ ᐅᑭᑫᑕᒪᐙᐞ ᐅᓈᓈᑲᑕᐌᑕᒧᐎᓂᓂ ᐃᓂ ᐅᑲᑮᑖᐎᓰᐞ, ᐁᑳ ᑫᑰᓐ ᐁᐃᓍᑌᓯᓂᓂᒃ᙮

13:21b.1CO.013.021 ᑫᑯ ᐐᓐ ᐊᐎᔭ ᐅᑲᒪᒦᒀᑕᓰᓐ ᐃᐃᐌ ᑫᑲᔥᑭᑑᒡ ᐯᒫᑎᓯᒡ᙮ ᐋᔕ ᑲᑭᓇ ᑫᑰᓐ ᑭᒦᓂᑰᒻ:

13:22b.1CO.013.022 ᑆᓬ, ᐊᑆᓬᐊᔅ, ᐲᑕᕒ, ᐅᐅ ᓅᑯᒻ ᐊᑮᕽ ᑳᐊᔮᒃ, ᐱᒫᑎᓯᐎᓐ, ᓂᐳᐎᓐ, ᐃᐃᐌ ᑲᔦ ᓅᑯᒻ ᑳᓂ ᐃᔑᐌᐸᒃ, ᓃᑳᓇᔭᐄ ᑲᔦ ᑫᐃᔑᐌᐸᒃ, ᑲᑭᓇ ᑫᑰᓐ ᑭᑎᐯᑖᓈᐙ᙮

13:23b.1CO.013.023 ᑮᓇᐙ ᑕᔥ ᑭᑎᐯᓂᒥᑯᐙ X, ᔑᑾ X ᐐᓐ ᑭᔐᒪᓂᑑᓐ ᐅᑎᐯᓂᒥᑰᓐ᙮

14

14:1b.1CO.014.001 ᒦ ᐃᐌ ᑫᐃᓀᓂᒥᑰᔮᕽ ᐁᐅᑕᓄᑮᐋᑲᓂᒥᔭᒥᓐᒡ X, ᐁᑮᑲᓇᐌᑕᐃᑰᔮᕽ ᐃᓂ ᑫᑰᓇᓐ ᐸᔦᔥ ᑳᑭᑫᑖᑯᑑᒡ ᑭᔐᒪᓂᑑ᙮

14:2b.1CO.014.002 ᔑᑾ ᑲᔦ ᐊᑕᐌᑖᑯᓯ ᐊᐌ ᑳᑲᓇᐌᑕᐃᓐᒡ ᒥᓯᐌ ᑯ ᒋᑫᒋᓈᐁᑖᑯᓯᒡ᙮

14:3b.1CO.014.003 ᓃᓐ ᐃᑕᔥ ᑳᐐᓐ ᓂᐐᓈᐸᑫᑕᓰᓐ ᑮᔥᐱᓐ ᑫᑰᓐ ᐃᔑᓈᓈᑲᓴᐙᐸᒥᔦᒃ ᓂᑕᓄᑮᐎᓂᕽ, ᑲᔦ ᐱᑯ ᐊᐎᔭ ᐯᒫᑎᓯᒡ, ᐋᓃᓐ ᐃᑯ ᑫᐃᓀᓂᒥᔑᒡ᙮ ᑳᐐᓐ ᓃᓐ ᐃᑯ ᓂᓈᓈᑲᒋᐃᑎᓱᓰ᙮

14:4b.1CO.014.004 ᑳᐐᓐ ᑫᑰᓐ ᓂᑎᔑᑭᑫᓂᑎᓱᓰ ᑫᑰᓐ ᒋᐃᔑᐊᔮᔮᓐ᙮ ᑳᐐᓐ ᑕᔥ ᐃᐃᒫ ᐅᒋᑭᑫᑖᑾᓯᓅᓐ ᐁᑾᔭᑯᓯᕽ ᓂᑎᔑᐊᔮᐎᓐ᙮ ᑳᑎᐯᒋᑫᒡ ᒦ ᐁᑕ ᑫᑾᔭᑯᓂᓯᑕᐎᓇᐎᒡ᙮

14:5b.1CO.014.005 ᒦ ᐃ ᑫᑮᓇᐙ, ᑫᑯ ᐅᓵᒻ ᐐᐸ ᐊᓅᒋᑯ ᐃᓀᓂᒫᑫᒃ ᐊᐎᔭ ᐅᑎᔑᒋᑫᐎᓐ ᒋᑆ ᓇᐃᓭᒃ᙮ ᐹᓂᒫ ᐁᑕ ᑕᑯᔑᕽ ᑳᑎᐯᒋᑫᒡ, ᐅᑲᐱᑑᑖᓐ ᐙᓭᔮᕽ ᒋᒧᔐᓈᑾᓂᓂᒃ ᑲᑭᓇ ᑫᑰᓐ, ᒥᓴᐙᑯ ᐗᓂᑎᐱᑲᓄᕽ ᐋᓇ ᑳᑑᓂᒡ ᐊᐎᔭᓐ ᐅᑎᔑᒋᑫᐎᓂᓂ᙮ ᑲᔦ ᐅᑲᑑᑖᓐ ᒋᒧᔐᔮᐸᒋᑳᑌᓂᒃ ᐋᓃᓐ ᐁᓀᑕᒧᐙᒡ ᐊᐌᓀᓇᒃ ᐅᑌᐃᐙᕽ᙮ ᒦ ᐃᐌ ᐊᐲ ᑲᑭᓇ ᐊᐎᔭ ᑫᔑᒥᓍᒋᒥᑯᒡ ᑭᔐᒪᓂᑑᓐ ᐋᓃᓂᑯ ᑳᔑᑲᔥᑭᑕᒫᓱᒡ᙮

14:6b.1CO.014.006 ᓃᒋᐅᑌᐺᑕᒨᒃ, ᐅᓄᐌᓂᐗᓐ ᑳᐱᑕᔑᑕᒫᓐ ᓂᑮᐋᐌᒋᑳᑫᓇᓐ ᑖᐱᔥᑰ ᓃᓀᑕᐎᓐᑦ ᐊᑆᓬᐊᔅ ᑳᑮᐃᑰᔮᕽ, ᒋᐅᒋᑭᑭᓇᐙᐸᒥᔑᓈᔮᕽ ᑫᔑᐊᔮᔦᒃ, ᒋᐅᓵᒥᒋᑫᓯᐌᒃ, ᐃᐃᐌ ᓴ ᐁᑕ ᑯ ᑳᐃᔑᐲᐃᑳᑌᒃ ᐃᐃ ᑭᒋᒪᓯᓇᐃᑲᓐ᙮ ᐃᒫ ᑕᔥ ᑳᑕᔑᔦᒃ ᑳᐐᓐ ᐊᐎᔭ ᑕᐃᔑᓈᑫᓰ ᐃᓂ ᐯᔑᒃ ᒋᐃᔥᐯᓂᒫᒡ ᑲᔦ ᑯᑕᒃ ᒋᑕᐸᓭᓂᒫᒡ, ᑳᐐᓐ ᑲᔦ ᒋᐃᔑᐋᓍᐸᑎᔦᒃ᙮

14:7b.1CO.014.007 ᐃᓇᔥᑫ ᐊᐌᓀᓐ ᑳᐃᔑᐃᒃ ᐊᐗᔑᒣ ᒋᑮᐃᓀᑖᑯᓯᔭᓐ? ᐌᑯᓀᔥ ᐐᓐ ᐃᐃ ᐁᔮᔭᓐ ᐐᑳ ᑳᒦᓂᑰᓯᐗᓐ? ᑮᔥᐱᓐ ᑕᔥ ᑌᐺ ᑳᒦᓂᑰᐗᓀᓐ ᑲᑭᓇ ᑫᑰᓐ, ᐋᓃᓐ ᑕᔥ ᑫᐅᒋᒪᒦᒀᓱᔭᓐ ᑖᐱᔥᑰ ᐁᑮᒥᒋᐊᔮᔭᓐ?

14:8b.1CO.014.008 ᐋᔕ ᓇ ᑲᑭᓇ ᑫᑰᓐ ᑭᑕᔮᒻ ᑳᐊᑕᐌᑕᒣᒃ? ᐋᔕ ᓇ ᑭᑌᐌᓅᑎᓯᒻ? ᐋᔕ ᓇ ᑭᑑᑭᒫᐎᒻ ᑫᓃᓇᐎᓐᑦ ᐃᑕᔥ ᐁᑎᓄᐎᓯᐙᕽ? ᐊᐯᔥ ᑌᐺ ᑮᑭᒋᐅᑭᒫᐎᔦᑭᐸᓐ, ᑭᑖᑮᐐᒌᐎᑰᒻ ᐁᔑᐅᑭᒫᐗᐱᔦᒃ᙮

14:9b.1CO.014.009 ᒦ ᐅᐌ ᐁᔑᓇᒫᓐ: ᓃᓇᐎᓐᑦ ᑭᔐᒪᓂᑑ ᐅᑎᔑᓂᔕᐙᑲᓇᐞ ᒫᐗᒡ ᐅᑖᓈᕽ ᒧᔐᐊᔭᐄ ᓂᑮᐃᓇᓯᑯᓈᓐ᙮ ᓂᑎᔑᓈᑯᓯᒥᓐ ᑖᐱᔥᑰ ᐃᑭᐌᓂᐗᒃ ᓂᐳᐎᓂᕽ ᑳᐃᓈᑯᓂᑲᓂᐎᐙᒡ ᐁᐐᑭᑖᐸᒥᑣ ᐋᓃᓐ ᑫᔑᓂᓯᑣ᙮ ᑲᑭᓇ ᒥᓯᐌᑲᒥᒃ ᑳᑕᓶᓄᐙᒡ ᐃᑭ ᐯᒫᑎᓯᐙᒡ ᑲᔦ ᐁᒐᓬᐊᒃ ᓂᑭᑖᐸᒥᑯᓈᓐ ᐁᔑᒋᑫᐃᑰᔮᕽ᙮

14:10b.1CO.014.010 ᐅᑲᑮᐹᑎᓰᒃ ᓂᑎᓀᑖᑯᓯᒥᓐ ᐁᐊᓄᑲᐗᑭᒡ ᐊᐊ X᙮ ᑮᓇᐙ ᑕᔥ ᓂᑲᑮᑖᐌᑖᒥᓐ ᐁᐐᒌᐎᓇᕽ X ᑭᑎᓀᑖᒻ᙮ ᓃᓇᐎᓐᑦ ᓂᒪᒉᑖᑯᓯᒥᓐ, ᑮᓇᐙ ᑕᔥ ᐐᓐ ᑭᑎᔥᐯᑖᑯᓯᒻ᙮

14:11b.1CO.014.011 ᐲᓂᔥ ᓴ ᑯ ᐅᐅ ᓅᑯᒻ ᓂᐸᐹᓅᑌᔅᑲᑌᒥᓐ, ᓂᓅᑌᔮᐹᑴᒥᓐ, ᓂᓅᑌᑯᓇᔦᒥᓐ, ᑲᔦ ᓂᐸᐸᑭᑌᐅᑰᒥᓐ, ᓂᑸᓇᐎ ᐃᔑᑖᒥᓐ,

14:12b.1CO.014.012 ᑲᔦ ᓂᓂᑖ ᒑᑮᐃᑎᓱᒥᓐ ᐁᑭᒋᐊᓄᑮᔮᕽ᙮ ᐋᓇᐐᓐ ᐁᒪᒋᐊᔓᑕᒫᑰᔮᕽ, ᐋᒋᑯ ᑕᔥ ᓃᓇᐎᓐᑦ ᑭᑲᔕᐌᓂᒥᑰᒻ ᓂᑎᓈᓈᓂᒃ᙮ ᐊᐲ ᑕᔥ ᐊᑯ ᐁᐅᒌᑳᑰᔮᕽ, ᓂᑲᑴᒪᔥᑲᐌᑖᒥᓐ᙮

14:13b.1CO.014.013 ᒦᑭᓱᒥᑰᔮᕽ ᑲᔦ, ᐋᒋᑯ ᓂᐙᑲᐎᒫᓈᓂᒃ᙮ ᑖᐱᔥᑰ ᐌᐱᓂᑲᓇᒃ ᓂᑎᓀᓂᒥᑰᒥᓐ, ᒫᐗᒡ ᐃᑯ ᓂᑕᐸᓭᓂᒥᑰᒥᓐ, ᐲᓂᔥ ᐃᑯ ᓅᑯᒻ᙮

14:14b.1CO.014.014 ᑳᐐᓐ ᐐᓐ ᒋᒣᓂᔑᐃᑰᔦᒃ ᑭᑎᔑᐲᐊᒪᐎᓯᓅᓂᓂᒻ᙮ ᑖᐱᔥᑰ ᓂᓃᒑᓂᓴᒃ ᑭᐐᐃᔑᑭᑭᓄᐊᒪᐎᓂᓂᒻ᙮

14:15b.1CO.014.015 ᐋᓃᔥ ᒥᑖᒋᕽ ᒥᑖᔂᒃ ᐋᓇ ᑕᔑᐙᒡ ᐁᑲᓇᐌᓂᒫᐗᔂᓂᓀᒀ ᐁᐐᒌᐌᒃ ᐊᐊ X, ᐯᔑᒃ ᐁᑕ ᑭᑑᔫᓯᒻ᙮ ᓃᓐ ᓴ ᑭᑮᐅᓃᒑᓂᓯᒥᓂᓂᒻ ᐁᑮᐱᐐᑕᒪᐎᓇᑰᒃ ᐃᐃ ᒥᓍᒋᒧᐎᓐ᙮ ᒦ ᐃᒫ ᑳᐱᐅᒋᐐᒌᐌᒃ ᐊᐊ X ᒋᓴᔅ᙮

14:16b.1CO.014.016 ᒦ ᐃᐌ ᑳᐅᒋᐸᑯᓭᓂᒥᓇᑰᒃ ᒋᑭᑭᓇᐙᐸᒥᔦᒃ᙮

14:17b.1CO.014.017 ᒦ ᐃᐌ ᓂᑎᓇᓅᓈ ᐊᐌ ᑎᒪᑎ ᒋᐊᑕᐙᐸᒥᓀᒃ᙮ ᒦ ᐊᐌ ᓂᑯᓯᔅ ᑳᓵᑭᐊᒃ, ᑳᑾᔭᑴᑖᑯᓯᒡ ᐁᐱᒥᓂᔕᐙᒡ ᐃᓂ ᑳᑎᐯᒋᑫᓂᒡ᙮ ᒦ ᐊᐌ ᑫᒥᑲᐙᓱᒥᓀᒃ ᐋᓃᓐ ᑳᐃᔑᐱᒥᓂᔕᐃᑫᔮᓐ ᐁᐊᓂᐐᒌᐗᒃ X ᒋᓴᔅ᙮ ᑲᔦ ᑭᑲᔑᐐᑕᒫᑯᐙ ᐋᓃᓐ ᑫᓃᓐ ᑳᔑᑭᑭᓄᐊᒫᑫᔮᓐ ᐋᑎ ᓴ ᑯ ᑳᐃᔑᒫᐗᒋᐃᑎᐙᒡ ᐅᑕᓇᒥᐋᒃ᙮

14:18b.1CO.014.018 ᐋᓂᑕ ᑕᔥ ᑮᓇᐙ ᐋᔕ ᑭᑌᐸᑫᓂᑎᓱᒻ᙮ ᑭᑮᐃᓀᓂᒥᒻ ᐁᑳ ᒦᓇᐙ ᐐᑳ ᒋᐱᒪᐗᑎᓯᓯᓅᓇᑰᒃ᙮

14:19b.1CO.014.019 ᐃᓀᑕᕽ ᐃᑕᔥ ᑳᑎᐯᒋᑫᒡ, ᐱᒌᓇᒃ ᑭᑲᐱᐊᑕᐙᐸᒥᓂᓂᒻ᙮ ᒦ ᐊᐲ ᑫᑕᔑᑭᑫᑕᒪᐗᒀ ᐅᑯ ᑳᑭᑌᓂᒧᐙᒡ, ᐋᓃᓐ ᐃᐃ ᑌᐺ ᐁᔑᒪᔥᑲᐎᓰᐙᒡ, ᑳᐐᓐ ᐁᑕ ᐅᑎᑭᑐᐎᓂᐙ᙮

14:20b.1CO.014.020 ᑳᐐᓐ ᐋᓃᔥ ᐃᒫ ᑲᑭᑐᐎᓂᕽ ᐁᑕ ᑕᐙᐸᒋᑳᑌᓯᓂᓂ ᐁᑕᔑᑭᒫᐎᒡ ᑭᔐᒪᓂᑑ, ᐃᒫᔥ ᐐᓐ ᐅᒪᔥᑲᐎᓰᐎᓐ ᐁᑕᔑᐊᓄᑮᒪᑲᓂᓂᒃ ᑕᑭᑫᒋᑳᑌᓂ᙮

14:21b.1CO.014.021 ᐋᓃᓐ ᑕᔥ ᑫᔑᒥᓉᑕᒣᒃ ᒋᐱ ᐃᔑᐅᑎᓯᓇᑰᒃ? ᐸᔕᔐᐃᑲᓐ ᐃᓇ ᓂᑲᐱᑭᑭᔅ, ᑯᒫ ᑲᔦ ᓵᑭᐃᐌᐎᓂᕽ ᒋᐱ ᐃᔑᒥᓄᑲᓅᓂᓇᑰᒃ?

15

15:1b.1CO.015.001 ᐋᔩᑎᐎᓐ ᐃᓴ ᑕᔥ ᐱᐃᓈᑐᑌ ᐁᐊᔮᒪᑲᒃ ᑳᔑᐊᔮᔦᒃ, ᐊᐎᔭ ᓴ ᑯ ᐁᐃᔑᐱᔑᒀᑎᓯᒡ ᐃᐃ ᑎᓄ ᒫᐗᒡ ᑳᒪᒋᓈᑾᒃ, ᐊᐴᔥᑫ ᐃᑭᐌᓂᐗᒃ ᑳᐊᓇᒥᐋᓯᒀ ᑫᐃᔑᒋᑫᓯᒀᐸᓐ: ᒦ ᐃᐌ ᐁᐃᑭᑐᕽ ᐊᐎᔭ ᐊ ᐯᔑᒃ ᐁᐐᒌᐙᒡ ᐅᑌᑌᓐ ᐐᐎᓂ᙮

15:2b.1CO.015.002 ᐋᓃᔛᓐ ᑳᐅᒋᑭᑌᓂᒧᔦᒃ! ᓇᐗᒡ ᐄᑐᒃ ᑭᑖᑮᒫᓀᑖᒻ! ᓇᐗᒡ ᑖᐅᓂᔑᔑᓐ ᒋᐃᓈᑯᓂᑫᔦᑭᐸᓐ ᒋᐐᒌᐎᓯᓄᐌᑭᐸᓐ ᐊᐊ ᑳᑑᑕᕽ᙮

15:3b.1CO.015.003 ᐋᓇᐐᓐ ᐃᑕᔥ ᐙᓴ ᐅᑌᑎᔮᓐ, ᑭᐐᒌᐎᓂᓂᒻ ᓂᑎᓀᑕᒧᐎᓂᕽ, ᑲᔦ ᑖᐱᔥᑰ ᐁᐐᒌᐎᓇᑰᒃ, ᐋᔕ ᑭᑎᐯᒋᑫᒥᓈᓐ ᒋᓴᔅ ᐅᐐᓱᐎᓂᕽ ᓂᑮᐅᓇᔓᐙᓈ ᐊᐌ ᐃᓂᓂ ᐅᐅ ᐁᒫᓂᓈᑾᓂᓂᒃ ᑳᑑᑕᕽ᙮

15:4b.1CO.015.004 ᐊᐲᔥ ᐁᒫᐗᒋᐃᑎᔦᒃ ᑭᑲᐐᒌᐎᓂᓂᒻ ᓂᑎᓀᑕᒧᐎᓂᕽ, ᑲᔦ ᑭᑲᐐᒌᐎᑯᒥᓐ ᐅᒪᔥᑲᐎᓰᐎᓐ ᐊᐊ ᑭᑎᐯᒋᑫᒥᓈᓐ ᒋᓴᔅ᙮

15:5b.1CO.015.005 ᒦᔥ ᐃ ᐊᐲ ᑭᑲᔑᐸᑭᑎᓇᒪᐙᐙ ᐊᐊ ᓭᑕᓐ ᒋᑑᑕᐙᒡ ᐅᓄ ᐃᓂᓂᐗᓐ ᒋᐅᒋᓂᔑᐗᓈᑕᓂᓂᒃ ᐐᔭᐎᓂ᙮ ᒦ ᐅᐌ ᒋᑑᑕᐌᒃ ᐊᐊ ᐃᓂᓂ ᒋᐱᒫᑎᓯᒡ ᐅᑕᒑᑯᕽ ᐹᓂᒫ ᐱᐅᑮᔑᑳᒥᒡ ᑳᑎᐯᒋᑫᒡ᙮

15:6b.1CO.015.006 ᑳᐐᓐ ᐅᓂᔑᔑᓯᓅᓐ ᒋᒪᒦᒀᓂᑎᓱᔦᑭᐸᓐ᙮ ᑭᑭᑫᑖᒻ ᐅᐅᐌ ᐁᓂᑖᐃᑭᑐᕽ: ᐸᑮ ᐊᒋᑳᑌᒃ ᐃᐃ ᐅᐱᓯᑲᓀᔅ, ᒥᓯᐌ ᑭᒋᐸᑴᔑᑲᓐ ᐃᔑᐅᐱᔥᑳ ᐁᑮᔑᓱᒡ᙮

15:7b.1CO.015.007 ᑖᐱᔥᑰ ᐅᐱᓯᑲᓀᓯᕽ ᐃᓀᑖᑾᓐ ᐃᐃ ᒪᒋ ᐃᔑᐌᐱᓯᐎᓐ, ᒦ ᐃ ᐅᒋᐌᐱᓇᒧᒃ ᐃᐃ ᑳᑮᐱᐋᐸᒋᑑᔦᒃ ᐅᐱᓯᑲᓀᔅ, ᒥᓯᐌ ᒋᐯᑳᑎᓯᔦᒃ, ᑖᐱᔥᑰ ᐅᔥᑭᐸᑴᔑᑲᓂᕽ ᒋᐃᓀᑖᑯᓯᔦᒃ ᐁᑳ ᐁᐊᔮᓯᓄᒃ ᐃᐃ ᐅᐱᓯᑲᓀᔅ᙮ ᐋᓃᔥ ᒦ ᐃᐌ ᐋᔕ ᐁᑎᓄᐎᔦᒃ᙮ ᐋᔕ ᑮᑮᔑᒋᑳᑌ ᑮᓇᐎᓐᑦ ᑫᔑᐐᑾᑎᔭᕽ, ᐋᔕ X ᐁᑮᐸᑭᑎᓈᔂᓂᐎᒡ, ᑭᒫᓇᒑᓂᔐᓯᒥᓈᓐ ᐁᐃᓀᑖᑯᓯᒡ ᑎᓄ ᑳᓂᓯᓐᒡ ᐁᐱᒫᒋᐃᑰᐎ ᐐᑾᑎᓈᓂᐗᕽ᙮

15:8b.1CO.015.008 ᒦᑕᔥ ᐅᐅ ᑫᐃᔑᓈᑯᓯᔭᕽ ᑖᐱᔥᑰ ᐁᐃᔑᐐᑾᑎᔭᕽ ᐅᐱᓯᑲᓀᔅ ᐁᐊᔮᓯᓄᒃ᙮ ᑳᐐᓐ ᒦᓇᐙ ᒪᒋ ᐃᓀᑕᒧᐎᓐ, ᒪᒋᒋᑫᐎᓐ ᑭᑲᐋᐸᒋᑑᓰᒥᓐ, ᐅᑖᓈᕽ ᑳᑮᐱ ᐃᓈᑎᓯᔭᕽ᙮ ᑾᔭᑯᐃᓀᑕᒧᐎᓐ, ᑾᔭᑯᒋᑫᐎᓐ ᑭᑲᐋᐸᒋᑑᒥᓐ, ᑖᐱᔥᑰ ᐁᐊᒧᓐᒡ ᐊᐊ ᐸᑴᔑᑲᓐ ᐁᐅᐱᓯᑲᓂᐎᓯᒃ᙮

15:9b.1CO.015.009 ᐸᑳᓐ ᐃᐃ ᐊᐲ ᐁᑮᐅᔑᐲᐊᒪᐎᓇᑰᒃ: ᑫᑯ ᐐᒋᐋᑫᒀᓂᒃ ᐊᐎᔭᒃ ᑳᐱᔑᒀᑎᓯᐙᒡ, ᑭᑮᐃᓂᓂᓂᒻ᙮

15:10b.1CO.015.010 ᑳᐐᓐ ᐐᓐ ᐃᐃ ᓂᑎᑭᑐᓰ ᐃᑭ ᑳᐊᓇᒥᐋᓯᒀ ᒋᒪᓈᐐᒌᐌᒀ, ᑮᔥᐱᓐ ᐱᔑᒀᑎᓯᐙᒡ ᑲᔦ ᐁᐊᔫᓵᒥᓯᐙᒡ ᑲᔦ ᐁᑭᒨᑎᔥᑭᐙᒡ ᑲᔦ ᐁᒪᓂᑑᑫᐙᒡ᙮ ᑳᐐᓐ ᑭᑖ ᐴᓂᐙᐸᒫᓯᐙᐙᒃ ᐃᑭ ᑎᓄ ᐅᒫ ᐊᑮᕽ ᐊᔮᔦᒃ᙮

15:11b.1CO.015.011 ᐃᐃᐌᔥ ᑳᐃᔑᐲᐊᒫᓐ, ᐊᐎᔭ ᑳᐃᑎᓱᒡ ᒋᐅᐐᒋᔖᓂᒥᓐᒡ ᐊᓇᒥᐋᐎᓂᕽ, ᐱᔑᒀᑎᓯᒡ ᐃᑕᔥ ᑫᒫ ᐊᔫᓵᒥᓯᒡ ᑫᒫ ᑲᔦ ᒪᓂᑑᑫᒡ, ᑕᔑᒥᐌᒡ, ᓂᑖᑮᐗᔥᑴᐲᒡ, ᒪᑲᑗᒡ: ᑫᑯ ᐊᐌ ᐐᒋᐋᑫᒃ᙮ ᐊᐴᔥᑫ ᑳᐐᓐ ᑭᑖ ᐐᒋᐐᓯᓃᒫᓯᐙᐙ ᐊᐊ ᑎᓄ᙮

15:12b.1CO.015.012 ᐃᓇᔥᑫ ᑳᐐᓐ ᓃᓐ ᓂᑑᐸᐹᒥᓯᐎᓂᓰ ᒋᐅᓇᔓᐙᓇᒀ ᑳᐐᒋ ᑎᐯᑖᑯᓰᒥᓯᓅᐗᒀ᙮ ᐐᓐ ᐅᔕ ᐅᑲᐅᓇᔓᐙᓈᐞ ᐊᐌ ᑭᔐᒪᓂᑑ᙮ ᑮᓇᐙ ᑕᔥ ᐐᓐ ᑭᑖ ᐅᓇᔓᐙᓈᐙᒃ ᐃᑭ ᑳᐐᒋ ᑎᐯᑖᑯᓰᒣᒀ᙮ ᒦ ᐃᐌ ᑳᐅᔑᐲᐃᑳᑌᒃ: ᐊᐊᐌ ᑳᓂᑖ ᒪᒋᒋᑫᒡ, ᐃᑯᒋ ᐃᔑᓂᔕᐅᒃ!

16

16:1b.1CO.016.001 ᑮᔥᐱᓐ ᐊᐎᔭ ᐅᑌᓂᑎᐙᒡ ᐁᐊᔮᔦᒃ, ᑳᐐᓐ ᐃᓇ ᑖᔖᑴᓂᒧᓰ ᐊᐎᔭ ᒋᐊᓵᒡ ᐅᐐᒋᐅᑌᐺᑕᒨᓐ ᐃᐃᒫ ᑎᐹᑯᓂᑎᐎᓂᕽ ᑳᔑᐅᓈᑯᓂᐌᓂᒡ ᐊᐎᔭᐞ ᐁᑳ ᑳᐊᓇᒥᐋᓯᓂᒃ? ᑳᐐᓐ ᐃᓇ ᑖᑮᓇᓇᐊᑕᒫᓱᓰᐗᒃ ᐁᐐᒋᐃᑯᐙᒡ ᑭᔐᒪᓂᑑ ᐅᑾᔭᒀᑎᓰᒪᐞ?

16:2b.1CO.016.002 ᑳᐐᓐ ᐃᓇ ᑭᑭᑫᑕᓰᒻ ᑭᔐᒪᓂᑑ ᐅᑾᔭᒀᑎᓰᒪᐞ ᒋᐅᓇᔓᐙᓈᓂᒡ ᑲᑭᓇ ᐊᑮᕽ ᑳᐊᔮᓂᒡ? ᑮᔥᐱᓐ ᑌᐺ ᐊᐎᔭᒃ ᑫᐅᓇᔓᐙᓀᒀ ᑲᑭᓇ ᐊᑮᕽ ᑳᐊᔮᐙᒡ, ᑳᐐᓐ ᐃᓇ ᑭᑌᐊᐲᑌᑖᑯᓯᓰᒻ ᑫᑰᓐ ᑳᐊᑳᓭᑖᑾᒃ ᒋᓇᓇᐃᓯᑑᔦᒃ?

16:3b.1CO.016.003 ᑳᐐᓐ ᐃᓇ ᑭᑭᑫᑕᓰᒻ ᑮᓇᐎᓐᑦ ᐃᑯᑎᕽ ᒋᐅᓇᔓᐙᓇᒀ ᐁᒐᓬᐊᒃ? ᒦ ᐃ ᐊᐗᔑᒣ ᑫᔑᑲᔥᑭᑑᔦᒃ ᐅᓄᐌᓂᐗᓐ ᓅᑯᒻ ᐱᒫᑎᓯᐎᓂᕽ ᒋᑌᐅᓇᔓᐙᑕᒪᕽ!

16:4b.1CO.016.004 ᑮᔥᐱᓐ ᑮᓂᐸᓯᑸᒪᑲᒃ ᐅᐅ ᑎᓄ, ᑭᑖᐃᓇᓵᐙᒃ ᐃᓇ ᐃᑭ ᐁᑳ ᑲᓇᑫ ᑳᐃᓀᑖᑯᓯᓯᒀ ᐁᔑᒫᐗᒋᐃᑎᔦᒃ, ᐐᓇᐙ ᒋᑲᑴ ᓇᓇᐃᓯᑑᐙᒡ?

16:5b.1CO.016.005 ᐅᐌ ᑭᑎᔑᑲᓅᓂᓂᓂᒻ ᒋᒣᓂᔐᑕᒣᒃ᙮ ᑫᒋᓈᒡ ᐯᔑᒃ ᑖᑮᐊᔮ ᑳᑕᔑᔦᒃ ᐁᐃᔑᐊᔮᒀᒥᓯᒡ ᒋᓇᓇᐃᓯᑕᒪᐙᒡ ᐐᒋᐅᑕᓇᒥᐋᐞ ᑫᑰᓇᓐ ᐁᔑᐅᑌᓂᑎᓂᒡ᙮

16:6b.1CO.016.006 ᐋᒋᑯ ᐸᑳᓐ ᑭᑎᔑᒋᑫᒻ, ᐯᔑᒃ ᐃᐃᒫ ᑎᐹᑯᓂᑎᐎᓂᕽ ᐁᐊᓵᒡ ᐐᒋᐅᑌᐺᑕᒨᓐ, ᐁᑳ ᑳᑌᐺᑕᓯᓂᒃ ᐁᐊᓅᓈᒡ ᒋᓇᓇᐃᓯᑑᓂᒡ᙮

16:7b.1CO.016.007 ᐃᐃᒫ ᐅᔕ ᐅᒋᑭᑫᑖᑾᓐ ᐋᔕ ᐁᑮᐗᓂᒋᑫᔦᒃ, ᐊᐲ ᐁᐅᑌᓂᑎᔦᒃ, ᐁᐅᓈᑯᓂᑎᔦᒃ᙮ ᑳᐐᓐ ᐃᓇ ᐊᐗᔑᒣ ᑖᑮᐅᓂᔑᔑᓯᓅᓐ ᐋᓇ ᒫᔑᑑᑕᐎᓐᒡ ᐊᐎᔭ ᒋᓇᓈᑸᓯᒃ? ᑳᐐᓐ ᐃᓇ ᑖᑮᐅᓂᔑᔑᓯᓅᓐ ᐋᓇ ᐗᔦᔑᒥᑯᒡ ᐊᐎᔭᓐ ᐁᑳ ᒋᒫᓈᑯᓈᓯᒃ?

16:8b.1CO.016.008 ᐋᒋᑯ ᒣᔥᑾᒡ ᑭᑑᑖᒻ ᐁᒫᔑᑑᑖᑫᔦᒃ, ᐁᐗᔦᔑᑫᔦᒃ, ᐊᐴᔥᑫ ᑭᐐᒋᐅᑌᐺᑕᒨᒥᐙᒃ ᐁᑑᑕᐌᒀ᙮

16:9b.1CO.016.009 ᑫᒋᓈᒡ ᑭᑖ ᑭᑫᑖᒻ: ᐃᑭ ᑳᒪᒋ ᐃᔑᐌᐱᓯᐙᒡ ᑳᐐᓐ ᑕᐊᔮᓰᐗᒃ ᐃᐃᒫ ᐁᑕᔑᑎᐯᒋᑫᓂᒡ ᑭᔐᒪᓂᑑᓐ᙮ ᑫᑯ ᑫᑰᓐ ᑭᑲᐗᓂᔑᒥᑯᓰᒻ: ᑳᐐᓐ ᐅᑯ ᑕᒦᓈᓰᐗᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ: ᐃᑭ ᑳᐱᔑᒀᑎᓯᐙᒡ, ᑲᔦ ᑳᒪᓂᑑᑫᐙᒡ, ᑲᔦ ᐊᐎᔭ ᑳᑮᒨᒋᐐᒌᐙᒡ ᐸᑳᓐ ᐊᐎᔭᓐ ᐅᐐᑎᑫᒫᑲᓂᓂ, ᑲᔦ ᐃᓂᓂᐗᒃ ᑳᐃᑴᔑᑑᐙᒡ, ᑲᔦ ᑳᐐᒋᐱᔑᒀᒋᑯᑖᑎᐙᒡ ᐃᑭ ᐃᓂᓂᐗᒃ,

16:10b.1CO.016.010 ᔑᑾ ᑳᑭᒨᑎᔥᑭᐙᒡ, ᑳᐅᓵᒥᓯᐙᒡ, ᑳᓂᑖ ᒥᓂᑴᐙᒡ, ᑳᑕᔑᒥᐌᐙᒡ, ᑳᐗᓂᒋᑫᐃᐌᐙᒡ ᑲᔦ᙮ ᑲᑭᓇ ᐅᑯ ᑎᓄ ᑳᐐᓐ ᑕᒦᓈᓰᐗᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮

16:11b.1CO.016.011 ᐋᓂᓐᑦ ᓴ ᑮᓇᐙ ᐅᐅ ᑭᑮᑎᓄᐎᒻ᙮ ᐋᔕ ᑕᔥ ᑭᑮᐊᑕ ᐯᑳᐹᐗᓂᑰᒻ, ᐋᔕ ᑭᑮᐅᓇᓯᑰᒻ ᑭᔐᒪᓂᑑ ᒋᑎᐯᓂᒥᓀᒃ, ᐋᔕ ᑭᑮᐃᔑᒋᑫᐃᑰᒻ ᒋᑾᔭᑾᑭᒥᓀᒃ ᑭᔐᒪᓂᑑ᙮ ᑳᑎᐯᒋᑫᒡ ᒋᓴᔅ X ᐅᐐᓱᐎᓂᕽ ᑳᐃᔑᒋᑫᐃᓀᒃ ᑲᔦ ᐃᓂᐌ ᐅᑕᒑᑾᓐ ᑭᑭᔐᒪᓂᑑᒥᓈᓐ᙮

16:12b.1CO.016.012 ᐅᐅᐌ ᒫᐐᓐ ᐊᐎᔭ ᑕᐃᑭᑐ: ᑲᑭᓇ ᑫᑰᓐ ᓂᑕᐎᓇᒫᑰ ᒋᑑᑕᒫᓐ᙮ ᐁᐊᐞ, ᑳᐐᓐ ᐃᑕᔥ ᑲᑭᓇ ᑭᑲᒥᓄᔥᑳᑯᓰᓐ ᐁᑑᑕᒪᓐ᙮ ᑲᔦ ᓃᓐ ᓂᑖᑮᐃᑭᑦ ᑲᑭᓇ ᑫᑰᓐ ᐁᑕᐎᓇᒫᑰᔮᓐ ᒋᑑᑕᒫᓐ᙮ ᑳᐐᓐ ᐃᑕᔥ ᑫᑰᓐ ᓂᑖ ᐸᑭᑎᓇᒪᐙᑕᓰᓐ ᒋᑎᐯᓂᒥᑯᔮᐹᓐ᙮

16:13b.1CO.016.013 ᑲᔦ ᐃᑭᑐᒻ: ᒦ ᐃ ᐌᒋᑾᔮᑕᑌᒃ ᐃᐃ ᒦᒋᒻ ᒋᒦᒋᓈᑳᑌᒃ, ᒦ ᐃ ᐁᓍᑌᒃ ᐅᒥᓴᑖᒫ ᒋᐅᒋᐐᓯᓂᕽ᙮ ᐁᐊᐞ, ᓂᑎᑭᑦ, ᓂᑯᑎᕽ ᐃᑕᔥ ᑭᔐᒪᓂᑑ ᒥᒋᑲᑭᓇ ᐅᑲᑭᐱᑎᓈᓇᓐ ᒦᒋᒻ ᑲᔦ ᐅᒥᓴᑖᒫ᙮ ᑳᐐᓐ ᐅᔕ ᐃᐌ ᑮᐅᒋ ᐃᓇᒋᑳᑌᓯᓅᓐ ᐃᐃ ᐐᔭᐎᒫ ᒋᐱᔑᒀᑎᓯᐎᓂᐗᕽ, ᐃᐃᔥ ᐐᓐ ᑳᑎᐯᒋᑫᒡ ᒋᐊᓄᑳᑯᒡ᙮ ᑲᔦ ᑳᑎᐯᒋᑫᒡ ᐐᓐ ᐅᑑᒌᑕᒪᐙᑖᓐ ᐃᐃ ᐐᔭᐎᒫ᙮

16:14b.1CO.016.014 ᑲᔦ ᑭᔐᒪᓂᑑ ᐅᑮᑮᐌᐱᒫᑎᓰᐋᓐ ᐃᓂ ᑳᑎᐯᒋᑫᓂᒡ ᑳᑮᓂᐳᓂᒡ᙮ ᑲᔦ ᑮᓇᐎᓐᑦ ᑎᐱᓇᐌ ᐅᒪᔥᑲᐎᓰᐎᓂᕽ ᑭᑲᐅᒋ ᑮᐌᐱᒫᑎᓰᐃᑯᓈᓐ᙮

16:15b.1CO.016.015 ᑳᐐᓐ ᐃᓇ ᑭᑭᑫᑕᓰᒻ ᑭᐐᔭᐎᐙᓐ ᐁᐅᐸᑫᐎᓯᐎᓂᒡ X? ᓂᑖᐅᑖᐱᓇᒪᐙᓐ ᐃᓇ X ᐅᐸᑫᐎᓯᐎᓐ ᒋᐋᑕᑕᒪᐗᒃ ᐅᐱᔑᒀᑎᓰᑴᓐ ᒋᐅᐸᑫᐎᓯᐎᓂᓂᒡ? ᑳᐐᓐ ᐃᐌ ᒋᐃᔑᓈᑾᑭᐸᓐ!

16:16b.1CO.016.016 ᑳᐐᓐ ᐃᓇ ᑭᑭᑫᑕᓰᒻ? ᐊᐌᓀᓐ ᓴ ᑯ ᑳᐐᒌᐙᒡ ᐅᐱᔑᒀᑎᓰᑴᓐ, ᐃᓀᑖᑾᓐ ᒋᐯᔑᑯᐐᔮᓭᐙᒡ᙮ ᐋᓃᔥ ᑭᔐᒪᓂᑑ ᑮᐃᑭᑐ ᑭᒋᐅᔑᐲᐃᑫᐎᓂᕽ: ᐃᑭ ᑳᓃᔑᐙᒡ ᒋᐯᔑᑯ ᐐᔭᐎᐙᒡ᙮

16:17b.1CO.016.017 ᐊᐎᔭ ᑕᔥ ᑳᐐᒌᐙᒡ ᑳᑎᐯᒋᑫᓂᒡ, ᐯᔑᑴᑖᑯᓯᐗᒃ ᐃᐃᒫ ᐊᒑᑯᕽ᙮

16:18b.1CO.016.018 ᒨᔕᒃ ᒫᒌᐸᐃᐙᑕᒧᒃ ᐱᔑᒀᑎᓯᐎᓐ᙮ ᑲᑭᓇ ᓴ ᑯ ᐃᐌ ᒪᒋᑑᑕᒧᐎᓐ ᑳᑑᑕᕽ ᐊᐎᔭ, ᒦ ᓴ ᐃᐌ ᓵᑭᒋ ᓇᑫ ᐐᔭᐎᕽ ᑳᐃᓀᑖᑾᒃ᙮ ᐊᐊᐌᔥ ᐱᔑᒀᑎᓯᐎᓐ ᑳᑑᑕᕽ ᐅᐗᓂᑑᑖᓐ ᑎᐱᓇᐌ ᐅᐐᔭᐤ᙮

16:19b.1CO.016.019 ᑳᐐᓐ ᐃᓇ ᑭᑭᑫᑕᓰᒻ ᑭᐐᔭᐎᐙᓐ ᐁᐅᑕᓇᒥᐁᐎᑲᒥᑯᒥᓂᒡ ᑭᔐᒪᓂᑑ ᐅᑕᒑᑾᓐ ᑳᑭᑭᔥᑲᐎᓀᒃ, ᑭᔐᒪᓂᑑ ᑳᒦᓂᓀᒃ? ᑳᐐᓐ ᑮᓇᐙ ᑎᐱᓇᐌ ᑭᑎᐯᓂᑎᓱᓰᒻ᙮

16:20b.1CO.016.020 ᐋᓃᔥ ᑭᑮᑎᐸᐅᑯᐙ ᑭᔐᒪᓂᑑ, ᐐᓐ ᐁᑮᐊᑑᒡ ᑎᐸᐃᑫᐎᓐ᙮ ᒦ ᐃᐌ ᐃᓈᐸᒋᑖᐙᒃ ᑭᐐᔭᐎᐙᓐ ᒋᐅᒋ ᑭᒋ ᐃᓀᑖᑯᐁᒃ ᑭᔐᒪᓂᑑ᙮

17

17:1b.1CO.017.001 ᔑᑾ ᓂᑲᓇᑴᑖᓇᓐ ᐃᓂ ᑫᑰᓇᓐ ᑳᑮᐱᐅᔑᐲᐊᒪᐎᔦᒃ᙮ ᐅᓂᔑᔑᓐ ᐊᐊ ᐃᓂᓂ ᐱᓵᓂᑯ ᐐᑳ ᐁᐅᑖᐱᓈᓯᒃ ᐃᑴᐗᓐ᙮

17:2b.1CO.017.002 ᐹᑏᓇᑎᓐ ᐃᑕᔥ ᐱᔑᒀᑎᓯᐎᓐ ᐁᐊᔮᒃ, ᒫᓄ ᑲᑭᓇ ᐊᐌ ᐃᓂᓂ ᐅᑲᑎᐯᓂᒫᓐ ᑎᐱᓇᐌ ᐐᐗᓐ᙮ ᒦᓇᐙ ᐊᐊᐌ ᐃᑴ ᒋᑎᐱᓇᐌᐎᓯᒡ ᐅᓈᐯᒪᓐ᙮

17:3b.1CO.017.003 ᐊᐊᐌ ᐃᓂᓂ ᒦ ᐃ ᒋᑎᐱᑑᑕᕽ ᐃᐃ ᑳᐃᓀᑖᑯᓯᒡ ᐁᐐᐎᒡ ᒋᓇᓇᐁᑕᒥᐋᒡ, ᑲᔦᔥ ᐊᐌ ᐃᑴ ᐅᑲᓇᓇᐁᑕᒥᐋᓐ ᐅᓈᐯᒪᓐ᙮

17:4b.1CO.017.004 ᐊᐊᐌ ᐃᑴ ᑳᐐᓐ ᐐᓀᑕ ᐅᑎᐯᑕᓰᓐ ᐅᐐᔭᐤ, ᐐᓐ ᑕᔥ ᑲᔦ ᐅᓈᐯᒪᓐ ᐅᑎᐯᑕᒥᓂ᙮ ᐯᔑᑾᓐ ᐊᐊᐌ ᐃᓂᓂ ᑳᐐᓐ ᐐᓀᑕ ᐅᑎᐯᑕᓰᓐ ᐅᐐᔭᐤ᙮ ᐃᓂᔥ ᑲᔦ ᐐᐗᓐ ᐅᑎᐯᑕᒥᓂ᙮

17:5b.1CO.017.005 ᑫᑯ ᐐᓐ ᐗᓃᑫᓄᑕᐙᑫᓐ ᑭᐐᑎᑫᒫᑲᓐ, ᐹᓂᒫ ᐁᑕ ᑮᑲᓅᓂᑎᔦᒃ ᓇᑯᑎᔦᒃ, ᒋᑲᑴ ᑌᐃᔑᓭᒃ ᐁᔑᐯᐯᔑᑯᔦᒃ ᒋᑲᓅᓀᒃ ᑭᔐᒪᓂᑑ᙮ ᒦᔥ ᐃᐃ ᒦᓇᐙ ᒋᐐᒌᑎᔦᒃ᙮ ᒦ ᐃ ᐁᑳ ᒋᐅᒋᑲᔥᑭᐃᓯᓄᐌᒃ ᐊᐊ ᓭᑕᓐ ᑭᓃᓇᒥᓯᐎᓂᐙᕽ᙮

17:6b.1CO.017.006 ᑳᐐᓐ ᐐᓐ ᒋᐃᓈᑯᓂᑫᔮᓐ ᑲᑭᓇ ᐊᐎᔭ ᒋᐐᑎᑫᐸᓐ᙮ ᑭᒥᒋᐐᑕᒪᐎᓂᓂᒻ ᐃᑕᔥ ᑫᑑᑕᒣᑭᐸᓐ᙮

17:7b.1CO.017.007 ᐊᐯᔥ ᑲᑭᓇ ᐊᐎᔭ ᐃᔑᐊᔮᐙᐸᓐ ᓃᓐ ᑳᔑᐊᔮᔮᓐ ᐁᐐᑎᑫᓯᐙᓐ᙮ ᐁᑕᔑᒡ ᐃᑕᔥ ᐊᐎᔭ ᒪᔮ ᐅᑕᔮᓐ ᐅᒦᓂᑰᐎᓯᐎᓐ, ᐁᑕᓱᐯᐯᔑᒃ ᐅᑎᔑᒦᓂᑰᓐ ᑭᔐᒪᓂᑑᓐ ᐅᑎᔑᐃᑰᐎᓐ᙮

17:8b.1CO.017.008 ᐅᐅ ᓴ ᑕᔥ ᓂᑎᓈᒃ ᐃᑭ ᑳᒥᒋᐯᐯᔑᑯᐙᒡ ᑲᔦ ᐅᑮᐙᑎᓰᒃ: ᑖᐅᓂᔑᔑᓐ ᐊᐸᓀ ᓴ ᑯ ᒋᐃᔑᐯᐯᔑᑯᔦᑭᐸᓐ ᑖᐱᔥᑰ ᑫᓃᓐ ᑳᐃᔑᐊᔮᔮᓐ᙮

17:9b.1CO.017.009 ᑮᔥᐱᓐ ᐐᓐ ᑲᔥᑭᑑᓯᐌᒃ ᒋᑲᓇᐌᓂᑎᓱᔦᒃ, ᒦ ᐃ ᐱᓵᓐ ᒋᓂᐐᑎᑫᔦᒃ᙮ ᓇᐗᒡ ᐅᓂᔑᔑᓐ ᐊᐎᔭ ᒋᐐᑎᑫᐸᓐ, ᐊᐲᒡ ᐐᓐ ᒋᑲᒀᑕᑭᐃᑯᐸᓐ ᐃᐃ ᐅᒥᓴᐌᑕᒧᐎᓐ᙮

17:10b.1CO.017.010 ᑮᓇᐙ ᑕᔥ ᑳᐐᑎᑫᑎᔦᒃ ᑭᑎᔑᐐᑕᒪᐎᓂᓂᒻ ᐅᐅ ᐃᓈᑯᓂᑫᐎᓐ – ᑳᐐᓐ ᓃᓐ ᐅᐅᐌ ᓂᑎᑭᑐᐎᓐ, ᐊᐊᐌᔥ ᑳᑎᐯᒋᑫᒡ: ᑳᐐᓐ ᐅᑲᓇᑲᓈᓰᓐ ᐊᐊ ᐃᑴ ᐅᓈᐯᒪᓐ, ᑭᑎᑰᒻ᙮

17:11b.1CO.017.011 ᑮᔥᐱᓐ ᑕᔥ ᓇᑲᓈᒡ, ᒦ ᐃᐌ ᒋᐸᐯᔑᑯᒡ, ᑫᒫ ᒦᓇᐙ ᒋᑮᐌᓄᑕᐙᒡ ᐅᓈᐯᒪᓐ᙮ ᐊᐎᔭ ᑲᔦ ᐐᐎᒡ ᑳᐐᓐ ᐅᑲᐌᐱᓈᓰᓐ᙮

17:12b.1CO.017.012 ᒦᓇᐙ ᐃᑭ ᐯᑳᓂᓯᐙᒡ ᓃᓐ ᐅᐅᐌ ᓂᑎᓈᒃ – ᑳᐐᓐ ᐐᓐ ᑳᑎᐯᒋᑫᒡ ᒪᔮ ᐅᑮᐐᑕᓰᓐ: ᐊᐊ ᐅᑌᐺᑕᒧ ᐊᔮᐙᒡ ᐁᑌᐺᑕᓯᓂᒃ ᐐᐗᓐ, ᑮᔥᐱᓐ ᐃᓀᑕᒥᓂᒡ ᐱᓵᓂᑯ ᒋᐐᒌᐎᑯᒡ, ᑳᐐᓐ ᐅᑲᐌᐱᓈᓰᓐ ᐃᓂ ᐐᐗᓐ᙮

17:13b.1CO.017.013 ᑲᔦ ᐊᐊ ᐃᑴ ᑳᐃᔑᐅᓈᐯᒥᒡ ᐁᑳ ᐁᑌᐺᑕᓯᓂᒃ, ᑮᔥᐱᓐ ᐃᓀᑕᒥᓂᒡ ᒋᐐᒌᐎᑯᒡ, ᑳᐐᓐ ᐅᑖᐌᐱᓈᓰᓐ᙮

17:14b.1CO.017.014 ᐃᓇᔥᑫ ᐋᓃᔥ ᐊᐊᐌ ᐅᓈᐯᒥᒫ ᑳᑌᐺᑕᓯᒃ, ᑲᔦ ᐐᓐ ᐃᓀᑖᑯᓯ ᐁᑎᐯᓂᒥᑯᒡ ᑭᔐᒪᓂᑑᓐ ᐁᐐᐎᒡ ᐃᑴᐗᓐ ᐁᐅᑌᐺᑕᒧᐎᓂᓂᒡ᙮ ᔑᑾ ᑲᔦ ᐃᑴ ᑳᐅᑌᐺᑕᒧᐎᓂᓯᒃ, ᐅᓈᐯᒥᒡ ᐃᑕᔥ ᐅᑌᐺᑕᒨᓐ, ᑲᔦ ᐐᓐ ᐃᓀᑖᑯᓯ ᐁᑎᐯᓂᒥᑯᒡ ᑭᔐᒪᓂᑑᓐ᙮ ᐃᓇᔥᑫ ᑮᔥᐱᓐ ᐅᐅᐌ ᐃᔑᓭᓯᓄᑭᐸᓐ, ᐃᑭ ᐅᓃᒑᓂᓯᒫᒃ ᑖᐱᔥᑰ ᑖᐃᓀᑖᑯᓯᐗᒃ ᐁᑎᐯᓂᒥᑯᓯᒀ ᑭᔐᒪᓂᑑᓐ᙮ ᐃᔑᓭ ᓴ ᑯ, ᒦ ᐃ ᐌᒋ ᐃᓀᑖᑯᓯᐙᒡ ᑫᐐᓇᐙ ᐁᑎᐯᓂᒥᑯᐙᒡ ᑭᔐᒪᓂᑑᓐ᙮

17:15b.1CO.017.015 ᑮᔥᐱᓐ ᐃᑕᔥ ᑳᑌᐺᑕᓯᒃ ᐐᓇᑲᓈᒡ ᐃᓂ ᐐᑎᑫᒫᑲᓇᓐ ᑳᑌᐺᑕᒥᓂᒡ, ᐱᓵᓂᑯ ᑕᒫᒑ᙮ ᑮᔥᐱᓐ ᐅᐅᐌ ᐃᔑᓭᒃ, ᐊᐊᐌ ᑳᓇᑲᓂᓐᒡ ᐃᔑᐸᑭᑎᓈ ᐋᓃᓂᑯ ᒋᐃᔑᒋᑫᒡ, ᐋᓃᓂᑯ ᐊᐊᐌ ᑫᒫ ᐃᓂᓂ, ᑫᒫ ᐃᑴ᙮ ᐋᓃᔥ ᑭᔐᒪᓂᑑ ᑭᑮᐃᔑᐊᑐᒥᑯᓈᓐ ᒥᓯᐌ ᑯ ᒋᑲᑴ ᒥᓄᐐᒌᑎᔭᕽ᙮

17:16b.1CO.017.016 ᑮᓐ ᐅᑌᐺᑕᒨᑴ, ᐋᑎ ᑫᐅᒋᑭᑫᑕᒪᐸᓐ ᒋᐱᒫᒋᐊᒡ ᑭᓈᐯᒻ? ᑲᔦ ᑮᓐ ᐅᓈᐯᒥᒫ, ᐋᑎ ᑫᐅᒋᑭᑫᑕᒪᐸᓐ ᒋᐱᒫᒋᐊᒡ ᑭᐐᐤ?

17:17b.1CO.017.017 ᐅᐅᐌ ᑕᔥ ᐐᓐ ᑭᑎᑰᒻ: ᐁᑕᔑᒡ ᐊᐎᔭ ᑕᓂ ᐃᔑᐱᒫᑎᓯ ᑳᐃᔑᒦᓂᑯᒡ ᑳᑎᐯᒋᑫᓂᒡ, ᑲᔦ ᑳᑮᐃᔑᐊᔮᐸᓐ ᐊᐲ ᑮᐊᑐᒥᑯᒡ ᐃᓂ ᑭᔐᒪᓂᑑᓐ᙮ ᒦ ᐅᐌ ᓃᓐ ᑳᐃᔑᐅᓇᑭᑕᒫᓐ ᒥᓯᐌ ᐁᑕᔑᐊᓇᒥᐋᕽ᙮

17:18b.1CO.017.018 ᐊᐎᔭ ᐃᓂᓂ ᐋᔕ ᑳᑮ ᑭᑭᓇᐙᑕᔕᑫᔓᒡ ᑮᐊᑐᒥᑯᒡ ᑭᔐᒪᓂᑑᓐ, ᑳᐐᓐ ᐅᑖᑲᑴ ᐋᒋᑑᓰᓐ ᐅᑭᑭᓇᐙᒋᔓᑰᐎᓐ᙮ ᐊᐌᔥ ᑲᔦ ᐃᓂᓂ ᐁᑳ ᒪᔑ ᐁᑭᑭᓇᐙᑕᔕᑫᔣᓯᐎᓐᒡ ᐊᐲ ᐁᐊᑐᒥᓐᒡ, ᑳᐐᓐ ᒣᒬᒡ ᑖᑭᑭᓇᐙᑕᔕᑫᔣᓰ᙮

17:19b.1CO.017.019 ᑳᐐᓐ ᐃᑯᑕᓄ ᐃᓀᑖᑾᓯᓅᓐ ᑫᒫ ᐁᑭᑭᓇᐙᑕᔕᑫᔓᓐᒡ ᐃᓂᓂ ᑫᒫ ᒋᑭᑭᓇᐙᑕᔕᑫᔣᓯᐎᓐᒡ᙮ ᒦ ᐃᐌ ᑳᑭᒋ ᐃᓀᑖᑾᒃ: ᐊᐎᔭ ᒋᓇᐃᑕᑭᐸᓐ ᑭᔐᒪᓂᑑᓐ ᐅᑎᓈᑯᓂᑫᐎᓂᓂ᙮

17:20b.1CO.017.020 ᑲᑭᓇ ᐊᐎᔭ ᐯᔑᑾᓐ ᑕᐃᔑᐊᔮ ᐅᑎᔑᐃᑰᐎᓂᕽ ᑳᑮᐃᔑᐊᔮᒡ ᐊᐲ ᑳᐊᑐᒥᓐᒡ᙮

17:21b.1CO.017.021 ᑮᓐ ᐃᓇ ᑭᑮᐊᓄᑮᐋᑲᓂᐤ ᐊᐲ ᑮᐊᑐᒥᑰᔭᓐ? ᑫᑯ ᐐᓐ ᐃᐃ ᐸᐹᐱᓯᔅᑫᑕᑫᓐ᙮ ᑮᔥᐱᓐ ᐃᑕᔥ ᐃᔑᓭᒃ ᒋᐸᑭᑎᓂᑰᔭᓐ, ᒦ ᐃ ᐅᑖᐱᓇᓐ᙮

17:22b.1CO.017.022 ᐊᐎᔭ ᓴ ᑯ ᐊᓄᑮᐋᑲᓐ ᐁᑎᓄᐎᒡ ᐊᐲ ᑮᐊᑐᒥᑯᒡ ᑳᑎᐯᒋᑫᓂᒡ, ᑳᑎᐯᒋᑫᒡ ᐅᑖᐸᐙᑲᓇᓐ ᐃᓀᑖᑯᓯ᙮ ᐯᔑᑾᓐ ᐃᑕᔥ ᐊᐎᔭ ᑳᐊᐗᑳᓂᐎᓯᒃ ᐊᐲ ᑮᐊᑐᒥᑯᒡ Xᑕᓐ, ᓅᑯᒻ ᐃᑕᔥ ᐅᑑᑕᓄᑮᐊᑲᓂᒥᑰᓐ ᐃᓂ Xᑕᓐ᙮

17:23b.1CO.017.023 ᑭᔐᒪᓂᑑ ᑭᑮᑎᐸᐅᑯᐙ ᒋᑎᐯᓂᒥᓀᒃ᙮ ᑳᐐᓐ ᑭᑲᑎᐯᓂᒥᑯᓰᐙᒃ ᐃᓂᓂᐗᒃ᙮

17:24b.1CO.017.024 ᓃᒋᐅᑌᐺᑕᒨᒃ! ᑲᑭᓇ ᐊᐎᔭ ᐯᔑᑾᓐ ᐅᑖᐊᓂ ᐃᔑᐐᒌᐙᓐ ᐃᓂ ᑭᔐᒪᓂᑑᓐ ᑖᐱᔥᑰ ᑳᑮᐃᔑᐊᔮᒡ ᐊᐲ ᑳᐊᑐᒥᑯᒡ᙮

17:25b.1CO.017.025 ᔑᑾ ᑳᐃᔑᑲᑴᒋᒥᔦᒃ ᐋᓃᓐ ᑫᐃᔑᒋᑫᐙᒡ ᐅᔥᑭ ᐃᑴᐗᒃ ᒪᔑ ᑳᐸᐹᒣᓂᒫᓯᐎᑣ᙮ ᑳᐐᓐ ᓂᑕᔮᐙᓰᓐ ᐊᒪᓐᒡ ᑳᐃᓈᑯᓂᑫᑯᐸᓀᓐ ᑳᑎᐯᒋᑫᒡ᙮ ᑭᐐᑕᒪᐎᓂᓂᒻ ᐃᑕᔥ ᓃᓐ ᐁᓀᑕᒫᓐ᙮ ᑳᑎᐯᒋᑫᒡ ᐅᔕᐌᒋᑫᐎᓂᕽ ᓂᑑᒋ ᐃᓀᑖᑯᔅ ᒋᑌᐺᔦᓂᒥᑰᔮᓐ᙮

17:26b.1CO.017.026 ᒣᒀ ᓴ ᑯ ᓅᑯᒻ ᒥᑯᔥᑳᒋᐃᐌᐎᓐ ᐁᐊᔮᒪᑲᒃ, ᓂᑎᓀᑕᒻ ᐁᐅᓂᔑᔑᕽ ᐊᐎᔭ ᐯᔑᑾᓂᑯ ᒋᐃᔑᐊᔮᐸᓐ᙮

17:27b.1CO.017.027 ᑭᐐᐤ ᐃᓇ? ᑳᐐᓐ ᑭᑖᑲᑴ ᐸᑫᐎᓈᓰ᙮ ᑫᔮᐱ ᓇ ᑭᐸᐯᔑᒃ? ᑳᐐᓐ ᑭᑖ ᐊᑐᓀᐙᓰ ᑫᐐᐎᔭᓐ᙮

17:28b.1CO.017.028 ᑮᔥᐱᓐ ᐃᑕᔥ ᒫᓄ ᐊᓂᐐᐎᔭᓐ, ᑳᐐᓐ ᐃᐃᒫ ᑭᑎᔑᐗᓂᑑᑕᓰ᙮ ᑮᔥᐱᓐ ᑲᔦ ᐅᔥᑭ ᐃᑴ ᐐᑎᑫᒡ, ᑳᐐᓐ ᑫᐐᓐ ᐗᓂᑑᑕᓰ᙮ ᓇᐗᒡ ᐃᑕᔥ ᓂᑖᒥᓉᑕᒻ ᒋᑭᒋᐎᓂᓇᑰᒃ ᒋᐊᓂᒣᒀᔥᑲᓯᐌᒃ ᐃᐃᐌ ᓴᓇᑭᓯᐎᓐ ᑳᓂᐅᑎᑕᒧᐙᒡ ᐅᐐᑎᑫᒃ᙮

17:29b.1CO.017.029 ᒦ ᐅᐌ ᐁᑕᒫᓐ, ᓃᒋᐅᑌᐺᑕᒨᒃ! ᑳᐐᓐ ᑫᔮᐱ ᑭᓉᔥ ᑕᑕᐙᓯᓅᓐ᙮ ᒦ ᐅᒫ ᐊᑯᓈᒃ ᐃᑭᐌᓂᐗᒃ ᑳᐐᐎᐙᒡ ᑕᐃᔑᐱᒫᑎᓯᐗᒃ ᑖᐱᔥᑰ ᐁᐅᑕᒥᐃᑯᓯᒀ ᐐᐎᐙᐞ᙮

17:30b.1CO.017.030 ᐃᑭᔥ ᑲᔦ ᑳᒪᐎᐙᒡ ᐁᑳ ᒋᓈᐃᑯᓯᒀ ᑲᔥᑫᑕᒧᐎᓐ᙮ ᐃᑭᐌᔥ ᑲᔦ ᑳᒌᑫᑕᒧᐙᒡ ᐁᑳ ᒋᐅᑕᒥᐃᑯᓯᒀ ᐃᐌ ᑳᐅᒋᒥᓉᑕᒧᐙᒡ᙮ ᐃᑭ ᑕᔥ ᑲᔦ ᑳᐊᑖᐌᐙᒡ ᑫᑰᓇᓐ ᑳᐐᓐ ᐅᑖᐅᓵᒣᑕᓰᓈᐙ, ᑖᐱᔥᑰ ᐁᑎᐯᑕᓯᒀ ᑫᑰᓐ ᑖᐃᓀᑕᒨᒃ᙮

17:31b.1CO.017.031 ᐃᑭᐌᓂᐗᒃ ᑲᔦ ᐊᑮᐎ ᑫᑰᓇᓐ ᑳᐊᓄᑳᑕᒧᐙᒡ, ᑳᐐᓐ ᐅᑖᐅᓵᒦᑲᓰᓈᐙ᙮ ᐅᐅᐌ ᐋᓃᔥ ᑳᐃᔑᓈᑾᒃ ᐅᐅ ᐊᑭ, ᑳᐐᓐ ᑭᓉᔥ ᑕᓂᐊᔮᒪᑲᓯᓅᓐ᙮

17:32b.1CO.017.032 ᑭᓇᑕᐌᓂᒥᓂᓂᒻ ᐁᑳ ᒥᑯᔥᑳᑌᑕᒧᐎᓐ ᒋᐊᔮᓯᐌᒃ᙮ ᒪᔑ ᐊᐎᔭ ᐁᐐᑎᑫᓯᒃ ᐅᑕᔮᒀᒣᑖᓐ ᑳᐃᓀᑕᒥᓂᒡ ᐃᓂ ᑳᑎᐯᒋᑫᓂᒡ, ᐋᓃᓐ ᑫᐃᔑᓇᐁᑕᒥᐋᒡ᙮

17:33b.1CO.017.033 ᐊᐊᐌ ᓴ ᑳᐐᑎᑫᒡ ᑲᔦ ᐅᐱᒣᑖᓐ ᐊᑮᐎ ᐊᓄᑮᐎᓐ, ᐁᐐᑲᑴ ᓇᓇᐁᑕᒥᐋᒡ ᐃᓂ ᐐᐗᓐ,

17:34b.1CO.017.034 ᒦ ᐃᐌ ᑳ ᐋᔮᔕᐌᑕᕽ᙮ ᔑᑾ ᑲᔦ ᐊᐌ ᑳᐅᓈᐯᒥᓯᒃ ᑫᒫ ᑲᔦ ᑭᒋᐅᔥᑭᓃᑭᑴ ᓇᐗᒡ ᐅᑕᔮᒀᒣᑕᒪᐙᓐ ᑳᑎᐯᒋᑫᓂᒡ ᐅᑎᔑᐊᓄᑮᐎᓂᓂ, ᒥᓯᐌ ᐁᐐᐸᑭᑎᓂᑎᓱᑲᑕᐙᒡ ᐐᔭᐎᕽ ᑲᔦ ᐅᑕᒑᑯᕽ᙮ ᐊᐊ ᑕᔥ ᐐᓐ ᑳᐅᓈᐯᒥᒡ ᐅᑕᔮᒀᒣᑖᓐ ᐊᑮᐎ ᐊᓄᑮᐎᓐ ᐁᐐᓇᓇᐁᑕᒥᐋᒡ ᐅᓈᐯᒪᓐ᙮

17:35b.1CO.017.035 ᑭᐐᑲᑴ ᐐᒋᐃᓂᓂᒻ ᐃᐌ ᑳᐅᒋ ᐃᑭᑐᔮᓐ᙮ ᑳᐐᓐ ᑭᐐᒥᒋ ᐅᒋᐃᓯᓅᓂᓂᒻ, ᐃᐃᐌᔥ ᑳᑾᔭᑯᓈᑾᒃ ᒋᑑᑕᒣᒃ ᑲᔦ ᒥᓯᐌ ᒋᐊᓄᑲᐌᒃ ᑳᑎᐯᒋᑫᒡ, ᐁᑳ ᐸᑳᓐ ᑫᑰᓐ ᒋᐅᑕᒣᑕᒥᐃᑯᓯᐌᒃ᙮

17:36b.1CO.017.036 ᔑᑾ ᐊᐎᔭ ᐅᑖᓂᓯᒡ ᐁᐅᔥᑭᓃᑭᑴᐎᓂᒡ, ᑮᔥᐱᓐ ᐁᓀᑕᕽ ᐁᑾᔭᑯᓈᑾᓯᓂᓂᒃ ᑳᑑᑕᐙᒡ ᐁᐐᑎᑫᐋᓯᒃ ᐋᔕ ᐁᑌᑕᓱᐱᐴᓉᓂᒡ ᒋᑮᐐᑎᑫᓂᐸᓐ, ᑮᔥᐱᓐ ᐃᔑᐊᑕᐌᑖᑾᒃ, ᐱᓵᓂᑯ ᐅᑲᑑᑕᐙᓐ ᐁᔑᐊᑕᐌᑕᕽ: ᐅᑲᐐᑎᑫᐋᓐ᙮ ᑳᐐᓐ ᐗᓂ ᐃᔑᒋᑫᓰ ᐁᐐᑎᑫᐋᒡ᙮

17:37b.1CO.017.037 ᐊᐎᔭ ᑕᔥ ᐁᐋᔩᑌᑕᕽ ᐁᑳ ᒋᐐᑎᑫᐋᓯᒃ ᐃᓂ ᐅᔥᑭᓃᑭᑴᓐ, ᐐᓐ ᐃᑯ ᐁᐊᔨᓀᑕᕽ, ᐁᑳ ᐊᐎᔭ ᐁᐃᔑᐃᑯᓯᒃ, ᑲᔦ ᐐᓐ ᐁᑲᔥᑭᑑᒡ ᐁᔑᐊᑕᐌᑕᕽ, ᒦ ᐃ ᒋᐅᓂᔑᔑᓂᓂᒃ ᐁᐐᑎᑫᐋᓯᒃ᙮

17:38b.1CO.017.038 ᒦ ᓴ ᑯ ᒥᓄᑑᑕᒻ ᐊᐊᐌ ᑳᐐᑎᑫᐋᒡ ᐃᓂ ᐅᔥᑭᓃᑭᑴᓐ᙮ ᐊᐊᐌ ᑕᔥ ᑲᐐᑎᑫᐋᓯᒃ ᓇᐗᒡ ᑕᒥᓄᑑᑕᒻ᙮

17:39b.1CO.017.039 ᔑᑾ ᐊᐌ ᐃᑴ ᑳᐅᓈᐯᒥᒡ ᐃᓀᑖᑯᓯ ᐃᒫ ᒋᐊᔭᔮᒡ ᐃᓂ ᐅᓈᐯᒪᓐ ᑫᐊᑯᐱᒫᑎᓯᓂᒡ᙮ ᑮᔥᐱᓐ ᓂᐳᓂᒡ ᐅᓈᐯᒪᓐ, ᒦ ᐃ ᐁᐸᑭᑎᓂᓐᒡ ᐱᑯ ᐊᐎᔭᓐ ᒦᓇᐙ ᒋᐅᓈᐯᒥᒡ ᐁᔑᐊᑕᐌᓂᒫᒡ᙮ ᒦ ᐁᑕ ᐅᑌᐺᑕᒨᓐ ᒋᐐᑎᑫᒫᒡ᙮

17:40b.1CO.017.040 ᓇᐗᒡ ᐃᑕᔥ ᑕᒥᓉᑕᒻ ᐯᔑᑾᓂᑯ ᒋᐃᔑᐊᔮᐸᓐ᙮ ᒦ ᐃᐌ ᓃᓐ ᐁᓀᑕᒫᓐ᙮ ᓂᑎᓀᑕᒻ ᐃᑕᔥ ᑫᓃᓐ ᐌᒋᑮᑭᑐᔮᓐ ᐁᑭᑭᔥᑲᐎᒪᒃ ᑭᔐᒪᓂᑑ ᐅᑕᒑᑾᓐ᙮

18

18:1b.1CO.018.001 ᔑᑾ ᐃᐌ ᑳᑮᐃᔑᐲᐊᒪᐎᔦᒃ, ᐋᓃᓐ ᐁᓀᑖᑾᒃ ᐃᐃ ᒦᒋᒻ ᐁᐸᑭᑎᓇᒪᐎᑣ ᒪᓂᑑᑳᓇᒃ: ᑌᐺᒪᑲᓐ ᐅᐅᐌ ᐃᑭᑐᐎᓀᔅ: ᑲᑭᓇ ᑭᑕᔮᒥᓐ ᑭᑫᑕᒧᐎᓐ᙮ ᐅᐌ ᑕᔥ ᐃᔑᑭᑫᑕᒧᐎᓐ ᐅᑭᑌᓂᒧᐃᑯᓐ ᐊᐎᔭ ᐁᐊᔮᒡ᙮ ᐊᐊᐌ ᑕᔥ ᓵᑭᐃᑎᐎᓐ ᑳᐋᐸᒋᑑᒡ, ᐅᑲᑴ ᒪᔥᑲᐎᑭᐋᓐ ᐅᐐᒋᐅᑌᐺᑕᒨᓐ᙮

18:2b.1CO.018.002 ᐊᐎᔭ ᓂᑭᑫᑖᓐ ᑫᑰᓐ ᑳᐃᓀᑕᕽ, ᑳᐐᓐ ᓴ ᑌᐺ ᑫᑰᓐ ᐅᑌᑭᑫᑕᓰᓐ ᐃᐃ ᑳᐃᔑᐊᑕᐌᑖᑯᓯᒡ᙮

18:3b.1CO.018.003 ᐊᐎᔭ ᑕᔥ ᑳᓵᑭᐋᒡ ᑭᔐᒪᓂᑑᓐ, ᐅᑭᑫᓂᒥᑰᓐ᙮

18:4b.1CO.018.004 ᐃᐃᐌᔥ ᒦᓇᐙ ᐁᓀᑖᑾᒃ ᐁᒦᒋᓈᑳᑌᒃ ᑫᑰᓐ ᑳᑮᐸᑭᑎᓇᒪᐎᑣ ᒪᓂᑑᑳᓇᒃ: ᑭᑭᑫᑖᒥᓐ ᐃᐃᐌ ᐁᔑᐋᐸᑎᓯᒡ ᒪᓂᑑᑳᓐ᙮ ᑳᐐᓐ ᑌᐺ ᐊᔮᓰ ᐊᐎᔭ᙮ ᑭᑭᑫᓂᒫᓈᓐ ᐯᔑᒃ ᐁᑕ ᐁᐊᔮᒡ ᑭᔐᒪᓂᑑ᙮

18:5b.1CO.018.005 ᐋᓇᐐᓐ ᐁᐊᔮᐙᒡ ᒪᓂᑑᒃ ᑳᐃᓂᑣ ᑮᔑᑯᕽ ᑫᒫ ᐊᑮᕽ ᐁᑕᓀᑖᑯᓯᐙᒡ, ᑲᔦ ᐋᓇ ᐹᑌᓄᐙᒡ ᒪᓂᑑᒃ ᑲᔦ ᐅᑎᐯᒋᑫᒃ ᑳᐃᓂᑣ,

18:6b.1CO.018.006 ᑮᓇᐎᓐᑦ ᐃᑕᔥ ᐯᔑᒃ ᐁᑕ ᐊᔮ ᑭᔐᒪᓂᑑ, ᒦ ᐊᐌ ᑳᐅᔫᓯᒥᓐᒡ, ᑲᑭᓇ ᑫᑰᓐ ᑳᑮᐅᔑᑑᒡ᙮ ᑲᔦ ᐐᓐ ᑭᑑᒋᐱᒫᑎᓯᒥᓐ ᒋᐊᓄᑮᑕᐗᕽ᙮ ᔑᑾ ᑲᔦ ᐯᔑᒃ ᐁᑕ ᐊᔮ ᑳᑎᐯᒋᑫᒡ, ᒦ ᐊᐌ ᒋᓴᔅ X᙮ ᒦ ᐅᔕ ᐊᐌ ᑲᑭᓇ ᑫᑰᓐ ᑳᑮᐅᒌᒪᑲᒃ ᑳᑮᐅᔑᒋᑳᑌᒃ, ᔑᑾ ᐐᓐ ᐊᐊᐌ ᑭᐱᒫᑎᓯᐎᓂᓈᓐ ᑳᐅᒌᒪᑲᒃ᙮

18:7b.1CO.018.007 ᑳᐐᓐ ᑕᔥ ᑲᑭᓇ ᐊᐎᔭ ᐅᑕᔮᓰᓐ ᐅᐅ ᑭᑫᑕᒧᐎᓐ᙮ ᐋᓃᔥ ᐋᓂᑕ ᐊᐎᔭᒃ ᐅᓇᓇᒫᔮᐸᑖᓈᐙ ᒪᓂᑑᑫᐎᓐ, ᐲᓂᔑᑯ ᓅᑯᒻ ᐊᐎᔭ ᐁᒦᒋᒡ ᑫᑰᓐ, ᒦ ᐃ ᐁᔑᓇᕽ ᑌᐺ ᐁᑎᐯᑕᒥᓂᒡ ᐃᓂ ᒪᓂᑑᑳᓇᓐ᙮ ᒦᑕᔥ ᐁᑾᔭᑴᓂᑎᓱᓯᒃ ᑳᐅᒋᒫᓀᓂᑎᓱᒡ ᐃᐃ ᐁᑮᒦᒋᒡ᙮

18:8b.1CO.018.008 ᐃᐃᐌ ᑕᔥ ᒦᒋᒻ ᐁᔑᐋᐸᒋᑑᔭᕽ, ᑳᐐᓐ ᐅᐅᐌ ᑭᑎᔑᐃᑯᓰᒥᓐ ᐊᐗᔑᒣ ᒋᒥᓄᐐᒌᐗᕽ ᑭᔐᒪᓂᑑ᙮ ᑮᔥᐱᓐ ᒪᓈᒦᒋᔭᕽ ᑳᐐᓐ ᐃᐃᒫ ᐊᐗᔑᒣ ᑭᑲᑕᐸᓭᑖᑯᓯᓰᒥᓐ᙮ ᔑᑾ ᒦᒋᔭᕽ ᑳᐐᓐ ᐊᐗᔑᒣ ᑭᑲᒥᓄᐃᔑᐌᐱᓯᓰᒥᓐ᙮

18:9b.1CO.018.009 ᑮᓇᐙ ᑕᔥ ᐋᓇᐐᓐ ᐁᐸᑭᑎᓂᑰᔦᒃ ᐋᓃᓂᑯ ᐁᔑᐊᑕᐌᑕᒣᒃ, ᐊᔮᒀᒥᓯᔪᒃ! ᒫᑭᔖ ᑫᑰᓐ ᐁᑑᑕᒣᒃ ᑖᑮᐅᒋ ᐱᓱᑫᔑᓐ ᐊᐎᔭ ᑎᓄ ᑳᒪᔥᑲᐎᑌᐺᑕᓯᒃ᙮

18:10b.1CO.018.010 ᑮᓐ ᑭᑕᔮᓐ ᐃᐃᐌ ᑭᑫᑕᒧᐎᓐ, ᐸᑳᓐ ᐃᑕᔥ ᐊᐎᔭ ᑳᑾᔭᑴᑕᓯᒃ ᐃᐃ ᐅᑎᔑᒋᑫᐎᓐ, ᑮᔥᐱᓐ ᐁᐙᐸᒥᒃ ᐃᐃᒫ ᒪᓂᑑᑫᐎᑲᒥᑯᕽ ᐁᑕᔑᐐᓯᓂᔭᓐ, ᑲᔦ ᐐᓐ ᒫᐐᓐ ᑕᐃᓀᑕᒻ ᐱᓵᓐ ᐃᑯ ᐃᒫ ᒋᐅᑕᒋᑫᐸᓐ ᐃᐃᐌ ᑳᑮᐸᑭᑎᓇᒪᐎᒥᓐᒡ ᒪᓂᑑᑳᓇᐞ?

18:11b.1CO.018.011 ᒦᑕᔥ ᐃᐃ ᒋᐅᒋᓂᔑᐗᓈᒋᐃᑯᒡ ᐊᐊ ᑭᐐᒋᐅᑌᐺᑕᒧ ᐁᓃᓇᒥᓯᒡ, ᐅᓵᒻ ᐃᑯ ᐁᑮᓈᑯᑑᔭᓐ ᑭᑭᑫᑕᒧᐎᓐ᙮ ᒦ ᐅᔕ ᐊᐌ ᐯᔑᒃ ᑳᑮᓂᐴᑕᒫᑯᒡ Xᑕᓐ᙮

18:12b.1CO.018.012 ᐅᐅᐌ ᑕᔥ ᐃᔑᒋᑫᔦᑭᐸᓐ, ᑭᑖᐗᓂᑑᑕᐙᐙ X, ᐋᓃᔥ ᑭᑎᔑᐗᓂᑑᑕᐙᐙᒃ ᑭᐐᒋᐅᑌᐺᑕᒨᒥᐙᒃ, ᐁᐗᑫ ᒫᓀᓂᑎᓱᐙᒡ ᐁᑾᔭᑴᑕᓯᒀ ᐅᑎᔑᒋᑫᐎᓂᐙ, ᐁᐃᔑᒫᓂᓭᐁᒀ᙮

18:13b.1CO.018.013 ᒦ ᐅᐌ ᓃᓐ ᐁᓀᑕᒫᓐ: ᑮᔥᐱᓐ ᐊᐎᔭ ᒪᒋᑑᑕᒧᐃᑯᒡ ᐃᐃᐌ ᑳᒦᒋᓈᑌᒃ, ᓂᑖᐃᓀᑕᒻ ᐐᑳ ᒦᓇᐙ ᐐᔮᔅ ᒋᒦᒋᓯᐙᐹᓐ, ᐁᑳ ᒋᐸᑭᔑᒫᓯᐗᑭᐸᓐ ᐊᐊ ᓃᒋᐅᑌᐺᑕᒧ᙮

19

19:1b.1CO.019.001 ᑳᐐᓐ ᐃᓇ ᓂᑎᐯᓂᑎᓱᓰ? ᑳᐐᓐ ᐃᓇ ᓂᑎᔑᓂᔕᐙᑲᓂᒥᑰᓰ? ᑳᐐᓐ ᐃᓇ ᓃᓐ ᓂᑮᐙᐸᒫᓰ ᐊᐌ ᒋᓴᔅ X ᑳᑎᐯᓂᒥᓇᕽ? ᑳᐐᓐ ᐃᓇ ᑮᓇᐙ ᑳᐅᒋᑌᐺᑕᒣᒃ ᐁᐊᓄᑮᑕᐗᒃ ᑳᑎᐯᒋᑫᒡ?

19:2b.1CO.019.002 ᐋᓇᐐᓐ ᐸᑳᓐ ᐊᐎᔭ ᐃᔑᐅᑖᐱᓂᓯᒀ ᒋᐃᔑᓂᔕᐙᑲᓂᐎᔮᓐ, ᑮᓇᐙ ᐁᓂᐌᒃ ᑭᑎᓀᓂᒥᒻ, ᐋᓃᔥ ᑮᓇᐙ ᑳᑎᐯᒋᑫᒡ ᐁᐐᒌᐌᒃ ᐅᒋᑭᑫᒋᑳᑌ ᐁᐃᔑᓂᔕᐙᑲᓂᐎᔮᓐ᙮

19:3b.1CO.019.003 ᐊᐲ ᑯ ᐁᑲᑴ ᓈᓈᑲᒋᐃᐙᒡ ᐊᐎᔭᒃ, ᐊᒦ ᐅᐌ ᐁᔑᓇᑴᑕᒫᓐ:

19:4b.1CO.019.004 ᑳᐐᓐ ᐃᓇ ᓂᑎᓇᑭᓱᓰ ᐅᐅ ᑳᔑᐊᓄᑮᑕᒫᑫᔮᓐ ᒋᐅᒋᐊᔕᒥᑰᔮᐹᓐ?

19:5b.1CO.019.005 ᑳᐐᓐ ᐃᓇ ᓃᓐ ᓂᑎᓇᑭᓱᓰ ᒋᓈᐱᒋᑫᔮᓐ ᑳᑑᑕᒧᐙᒡ ᐃᑭ ᑯᑕᒃ ᐃᔑᓂᔕᐙᑲᓇᒃ ᑲᔦ ᑳᑎᐯᒋᑫᒡ ᐐᒋᑭᐌᔭᐞ, ᑲᔦ ᐐᓐ ᐲᑕᕒ ᑳᑑᑕᕽ? ᑳᐐᓐ ᐃᓇ ᑲᔦ ᓃᓐ ᐯᔑᑾᓐ ᓂᑖᐸᐹᒥ ᐐᒌᐙᓰᐸᓐ ᐅᑌᐺᑕᒨᑴ ᐐᐎᔮᐹᓐ ᑫᐐᓐ ᒋᐊᔕᒥᑎᐸᓐ?

19:6b.1CO.019.006 ᑯᒫ ᓃᓇᐎᓐᑦ ᐁᑕ ᐹᕒᓇᐸᔅ ᐃᑕᐙ ᐁᐊᓄᑮᑕᒫᓱᔮᕽ ᒋᐊᔕᑎᓱᔮᕽ?

19:7b.1CO.019.007 ᐊᐌᓀᓐ ᑎᐱᓇᐌ ᑫᐅᑖᒋᐃᑎᓱᐸᓐ ᐁᔑᒫᑲᓂᔒᐎᒡ? ᐊᐌᓀᓐ ᐊᐊ ᑭᑎᑫᐎᓂᓂ ᑫᐊᒨᒥᓀᓯᑭᐸᓐ ᑎᐱᓇᐌ ᐅᔔᒥᓂᑭᑎᑫᐎᓂᕽ? ᐊᐌᓀᓐ ᐊᐊᐌ ᐅᑲᓇᐎᒫᓇᒑᓂᔑᐌ ᑫᐋᐸᒋᑑᓯᑭᐸᓐ ᐃᐃ ᒎᒎᔖᐴᓂ ᐐᓐ ᐃᐃᒫ ᐁᐅᑎᓇᕽ ᐅᒫᓇᒑᓂᔑᒥᕽ?

19:8b.1CO.019.008 ᑳᐐᓐ ᐐᓐ ᒣᒬᒡ ᐃᓂᓃᓈᕽ ᓂᑲᐅᑎᓇᓰᓐ ᐃᑭᑐᐎᓐ᙮ ᐋᓃᔥ ᐯᔑᑾᓐ ᐃᑭᑑᒪᑲᓐ ᑫᑌᐃᓈᑯᓂᑫᐎᓐ᙮

19:9b.1CO.019.009 ᒦ ᐃᐌ ᐁᔑᐲᐃᑳᑌᓂᒃ ᒨᓯᔅ ᐅᑎᓈᑯᓂᑫᐎᓐ: ᑫᑯ ᑭᐱᑑᓀᐱᓈᑫᓐ ᐊᐊ ᐱᔑᑭ ᐁᐸᐎᔥᑲᐙᒡ ᐸᑴᔑᑲᓇᓐ, ᐃᑭᑑᒪᑲᓐ᙮ ᑳ ᒫᐐᓐ ᒪᔮ ᐱᔑᑭᐗᐞ ᐁᓵᑭᐋᒡ ᑳᐅᒋ ᐃᑭᑐᒡ ᑭᔐᒪᓂᑑ᙮

19:10b.1CO.019.010 ᑳᐐᓐ ᐃᓇ ᑌᐺ ᑮᓇᐎᓐᑦ ᑳᑮᐅᒋ ᐃᑭᑐᒡ? ᑫᒋᓈᒡ ᑮᓇᐎᓐᑦ ᑮᐅᒋᐅᔑᐲᐃᑳᑌ᙮ ᐃᓇᔥᑫᔥ ᐊᐌ ᑭᑎᑫᐎᓂᓂ ᑳᐱᑭᔥᑲᑲᒥᑭᐱᒋᑫᒡ, ᑲᔦ ᐲᓂᔥ ᐊᐌ ᑳᐸᐎᔥᑭᑫᒡ, ᑲᑭᓇ ᑫᑰᓐ ᑕᐃᔑᐊᓄᑮᐗᒃ ᐁᐲᑑᐙᒡ ᐃᐃ ᐊᐲ ᑫᐅᑕᒋᑫᐙᒡ᙮

19:11b.1CO.019.011 ᐃᓇᔥᑫ ᓃᓇᐎᓐᑦ ᐃᐃᐌ ᑳᐊᒑᑴᑖᑾᒃ ᓂᑮᑭᑎᑳᑖᒥᓐ ᐃᐃᒫ ᑳᔑᐊᔮᔦᒃ᙮ ᐅᓵᒻ ᐃᓇ ᑭᑖ ᓴᓇᑫᑖᒻ ᐱᒪᓂᔑᑫᔮᑭᐸᓐ ᑭᑕᑮᐎ ᑫᑰᓂᒥᐙᓐ ᒋᐐᒋᐃᑯᔮᑭᐸᓐ?

19:12b.1CO.019.012 ᐯᑳᓂᓯᐙᒡ ᐅᐅᐌ ᐃᔑᑎᐯᓂᒥᓀᒀ, ᑳᐐᓐ ᐃᓇ ᓃᓇᐎᓐᑦ ᓇᐗᒡ ᓂᑎᓀᑖᑯᓯᓰᒥᓐ? ᑳᐐᓐ ᐃᑕᔥ ᓃᓇᐎᓐᑦ ᐃᐃᐌ ᓂᑮᐋᐸᒋᑑᓰᒥᓐ᙮ ᒫᓄ ᑕᔥ ᓂᑮᐃᓀᑖᒥᓐ ᑲᑭᓇ ᑫᑰᓐ ᒋᐱᒥᐎᑑᔮᕽ, ᐁᑳ ᑫᑰᓐ ᒋᑭᐱᔥᑲᓯᐙᕽ ᐃᐌ ᐅᒥᓍᒋᒧᐎᓐ X᙮

19:13b.1CO.019.013 ᑫᒋᓈᒡ ᑭᑭᑫᑖᓈᐙᑐᒃ, ᐊᐎᔭᒃ ᑭᒋᐊᓇᒥᐁᐎᑲᒥᑯᕽ ᑳᑕᓇᓄᑮᐙᒡ, ᐃᐃᒫ ᐅᑕᒋᑫᐗᒃ᙮ ᐃᑭ ᑕᔥ ᑲᔦ ᑳᐸᒥᓇᒧᐙᒡ ᑳᐃᔑᐸᑭᑎᓂᑫᕽ, ᐸᑴᓇᒪᐙᐗᒃ ᐸᑭᑎᓂᑫᐎᓂᕽ ᒋᐅᒋᐐᓯᓂᐙᒡ᙮

19:14b.1CO.019.014 ᒦ ᑯ ᐯᔑᑾᓐ ᑳᑎᐯᒋᑫᒡ ᐅᑮᐃᓇᑑᓐ ᐃᐃᐌᓂᐗᐞ ᑳᐐᑕᒫᑫᓂᒡ ᐃᐃ ᒥᓍᒋᒧᐎᓐ ᐃᐃᒫ ᒋᐅᑖᑎᓯᓂᐸᓐ᙮

19:15b.1CO.019.015 ᐅᓄᐌᓂᐗᓐ ᐃᑕᔥ ᑳᐃᓇᑌᑭᓐ, ᑳᐐᓐ ᓃᓐ ᓂᑮᐋᐸᒋᑑᓰᓇᓐ᙮ ᑳᐐᓐ ᑲᔦ ᓅᑯᒻ ᓂᑑᒋ ᐃᔑᐲᐊᓰᓐ ᒋᐅᑖᐱᓇᒫᓱᔮᓐ ᐅᐅ ᑳᐃᓇᑌᒃ ᒋᐐᒋᐃᑯᔮᓐ᙮ ᓇᐗᒡ ᓂᑖᓂᑉ ᐊᐲᒡ ᐊᐎᔭ ᐊᓂᔖ ᐃᑭᑐ ᒋᐃᔑᐸᓐ ᐅᐅ ᑳᔑᑭᒋ ᐃᓀᑕᒫᓐ᙮

19:16b.1CO.019.016 ᐋᓇᐐᓐ ᐃᐃ ᐁᒥᓍᒋᒧᔮᓐ, ᑳᐐᓐ ᓂᑕᔮᓰᓐ ᑫᐅᒋᒪᒦᒀᓱᔮᐹᓐ᙮ ᐃᓇᔥᑫ ᓂᑕᐲᒋ ᐊᑕᐌᓂᒥᑰ ᒦ ᐃᐌ ᒋᑑᑕᒫᓐ ᐃᐃ ᑳᐃᑰᔮᓐ᙮ ᑕᑯᑖᓀᑖᑾᓐ ᐃᐃ ᑫᐃᔑᓭᔮᐹᓐ ᐐᑕᒫᑫᓯᐙᓐ ᒥᓍᒋᒧᐎᓐ᙮

19:17b.1CO.019.017 ᐃᔑᐊᓄᑮᔮᐹᓐ ᓃᓐ ᐃᑯ ᑳᔑᐅᓀᑕᒫᓐ ᑖᐱᔥᑰ ᐊᓄᑮᐎᓐ ᐁᐅᑖᐱᓇᒫᓐ, ᓂᑖᐃᓀᑕᒻ ᒋᐅᑎᓯᔮᓐ᙮ ᐅᐅᐌ ᑕᔥ ᑳᑑᑕᒫᓐ ᓂᓇᑕᐌᑖᑯᔅ᙮ ᐋᓃᔥ ᓂᑮᐅᐸᐹᒥᓯᐎᓂᐃᒃ ᑭᔐᒪᓂᑑ᙮

19:18b.1CO.019.018 ᐌᑯᓀᓐ ᐃᑕᔥ ᐃᐃ ᑫᑎᐸᐊᒫᑰᔮᓐ? ᒦ ᐃᐌ ᒫᓂᑰᔮᓐ, ᒋᐐᑕᒫᑫᔮᓐ ᐃᐃ ᒥᓍᒋᒧᐎᓐ, ᑫᑰᓐ ᐁᐅᑎᓯᓯᐙᓐ, ᑲᔦ ᓴ ᑯ ᐁᐋᐸᒋᑑᓯᐙᓐ ᓂᐐᒋᐃᑰᐎᓐ ᑳᐃᓇᑕᒫᑰᔮᓐ, ᐃᐌ ᒥᓍᒋᒧᐎᓐ ᐁᐸᐹᒥᓰᓄᑕᒫᓐ ᑫᐅᒋᒦᓂᑰᔮᐹᓐ᙮

19:19b.1CO.019.019 ᑳᐐᓐ ᐊᐎᔭ ᐃᓂᓂ ᓂᑎᐯᓂᒥᑯᓰ᙮ ᓂᑎᔑᐃᑎᔅ ᐃᑕᔥ ᑲᑭᓇ ᐊᐎᔭᒃ ᒋᐅᑕᓄᑮᐋᑲᓂᒥᐙᒡ, ᐊᒦ ᐃᐌ ᐊᐗᔑᒣ ᓃᐱᐗᐞ ᒋᑲᔥᑭᐊᒀ ᒋᑌᐺᑕᒧᐙᒡ᙮

19:20b.1CO.019.020 ᒣᒀ ᐁᐐᒌᐗᒀ ᒎᐗᒃ, ᒦ ᐃᐌ ᓂᑎᔑᐱᒫᑎᔅ ᒋᐃᔑᑲᔥᑭᐊᒀ᙮ ᐋᓇᐐᓐ ᓃᓐ ᒨᓯᔅ ᐅᑎᓈᑯᓂᑫᐎᓐ ᐁᑎᐯᓂᒥᑯᓯᐙᓐ, ᑲᔦ ᓃᓐ ᓂᑎᔑᐱᒫᑎᔅ ᒋᑲᔥᑭᐊᒀ ᑳᑎᐯᓂᒥᑯᐙᒡ᙮

19:21b.1CO.019.021 ᔑᑾ ᐯᔑᑾᓐ ᐃᑭ ᑳᐋᐸᒋᑑᓯᒀ ᒎᐗᐞ ᐅᑎᓈᑯᓂᑫᐎᓂᓂ, ᐐᒌᐗᒀ, ᑫᓃᓐ ᓂᑎᔑᐱᒫᑎᔅ, ᐁᑳ ᑫᓃᓐ ᐁᐋᐸᒋᑑᓯᐙᓐ ᐃᐃ ᐃᓈᑯᓂᑫᐎᓐ, ᒦ ᐃ ᓇᐗᒡ ᒋᑲᔥᑭᐊᒀ᙮ ᑳᐐᓐ ᓂᑎᑭᑐᓰ ᐁᑲᓇᐌᑕᓯᐙᓐ ᑭᔐᒪᓂᑑ ᐅᑎᓈᑯᓂᑫᐎᓐ, ᐋᓃᔥ ᐊᐊ X ᓂᑎᐯᓂᒥᑯᐙᓐ ᐅᑎᓈᑯᓂᑫᐎᓐ᙮

19:22b.1CO.019.022 ᑲᔦ ᐊᐎᔭᒃ ᑳᐗᑫᐎᓯᐙᒡ ᐅᑌᐺᑕᒧᐎᓂᐙᕽ ᐐᒌᐗᒀ, ᑲᔦ ᓃᓐ ᓂᑖᐸᒋᑕᒪᐙᒃ ᐅᑎᔑᐊᔮᐎᓂᐙ, ᒦ ᐃᐌ ᒋᐃᔑᑲᔥᑭᐊᒀ᙮ ᐋᓃᓂᑯ ᓂᑲᑴᑎᓄᐎᐃᑎᔅ ᑲᑭᓇ ᐊᐎᔭᒃ ᑳᑎᓄᐎᐙᒡ, ᐋᓂᑕ ᓴ ᑯ ᒋᐱᒫᒋᐊᒀ᙮ ᐌᑯᓀᓐ ᐃᑯ ᓂᑑᑖᓐ ᑫᐅᒋᑲᔥᑭᒋᑫᔮᓐ᙮

19:23b.1CO.019.023 ᑲᑭᓇ ᑫᑰᓐ ᓂᑎᔑᒋᑫ ᒋᐸᐹᐐᑌᒃ ᐃᐃ ᒥᓍᒋᒧᐎᓐ, ᑲᔦ ᓃᓐ ᐃᐃᒫ ᒋᑕᑯ ᔕᐌᑖᑯᓯᔮᓐ᙮

19:24b.1CO.019.024 ᑫᒋᓈᒡ ᑭᑭᑫᑖᓈᐙ ᐐᑲᑴᒋᑲᓂᑎᕽ, ᓃᐱᐗᐞ ᐊᐎᔭ ᐐᒋᐃᐌᐗᒃ ᐁᒫᒌᐸᐃᑎᐙᒡ᙮ ᐯᔑᒃ ᐃᑕᔥ ᐁᑕ ᑕᐸᑭᓈᑫ ᒋᑎᐸᐊᒪᐎᓐᒡ᙮ ᒦ ᐃᐌ ᑮᓇᐙ ᑾᔭᒃ ᑲᑴᐱᒥᐸᑑᒃ ᒋᐸᑭᓈᑫᔦᒃ᙮

19:25b.1CO.019.025 ᔑᑾ ᑲᑭᓇ ᑳᑲᑴᒋᑲᔑᐌᒡ, ᒣᒀ ᐁᐅᔒᑖᐃᑎᓱᒡ, ᐌᐌᓂ ᑯ ᓈᑲᒋᑕᒫᓱ; ᒦ ᐹᓂᒫ ᑮᐸᑭᓈᑫᒡ ᒋᒦᓂᓐᒡ ᐅᐸᑭᓈᑫᐙᓄᒀᓐ ᐐᐸ ᑫᓂᔑᐗᓈᑕᓂᓂᒃ᙮ ᑮᓇᐎᓐᑦ ᐃᑕᔥ ᑭᑲᒦᓂᑰᒥᓐ ᐯᔑᒃ ᐐᑳ ᑫᓂᔑᐗᓈᑕᓯᓄᒃ᙮

19:26b.1CO.019.026 ᒦ ᐃᐌ ᓃᓐ ᑳᐅᒋᑾᔭᑯᐸᑑᔮᓐ ᐌᑎ ᒋᓃᑳᓂᐅᒋᒋᓭᔮᓐ᙮ ᑖᐱᔥᑰ ᑲᔦ ᓂᑎᔑᐊᔮ ᐁᑲᑴᑕᑲᓀᔮᓐ᙮ ᑳᐐᓐ ᐊᓂᔖ ᓂᒥᒋᐸᐸᓇᑲᓀᓰ᙮

19:27b.1CO.019.027 ᒦᑕᔥ ᑳᐅᒋᐸᐸᑭᑌᐊᒫᓐ ᐃᐃ ᓂᐐᔭᐤ ᒋᑲᔥᑭᑑᔮᓐ ᒥᓯᐌ ᒋ ᐃᔑᑎᐯᑕᒫᓐ᙮ ᑮᔥᐱᓐ ᐃᐃ ᐃᔑᒋᑫᓯᐙᓐ ᒫᑭᔖ ᑭᓅᑌᓭ ᓂᑖᐃᑰ, ᐋᓇᐐᓐ ᐯᑳᓂᓯᐙᒡ ᐁᑮᐊᑐᒪᒀ ᒋᑲᑴᒋᑲᔑᐌᐙᒡ᙮

110

110:1b.1CO.110.001 ᓃᒋᐅᑌᐺᑕᒨᒃ! ᒨᔕᒃ ᑭᑖᒫᒥᑲᐎᒻ ᐃᑭᐌᓂᐗᒃ ᑳᑮᐱ ᐃᓈᑎᓯᐙᑯᐸᓀᓐ ᑭᑫᑌᐊᔭᐋᒥᓈᐸᓃᒃ ᑳᑮᐱᒥᓂᔕᐙᐙᒡ ᐃᓂ ᒨᓯᓲᓐ ᔒᐹ ᐗᑸᕽ ᐁᑮᐊᓂᐊᔮᐙᒡ ᐁᑮᑕᐱᓇᐎᔥᑳᑯᐙᒡ, ᑲᔦ ᐁᑮᓂᔖᐳᔥᑲᒧᐙᒡ ᐃᐃ ᑭᒋᑲᒻ᙮

110:2b.1CO.110.002 ᐃᐃ ᐗᑶ ᐁᑮᐋᑲᐗᑰᑌᓂᒃ ᑲᔦ ᐃᐌ ᑭᒋᑲᒻ ᐁᑮᔖᐴᔥᑲᒧᐙᒡ, ᒦ ᑳᐃᓀᑖᑾᒃ ᐁᑮᓰᑲᐊᑖᓱᐙᒡ ᒨᓯᓯᕽ ᒋᐅᒋ ᑎᐯᑖᑯᓯᐙᒡ᙮

110:3b.1CO.110.003 ᔑᑾ ᑲᑭᓇ ᐯᔑᑾᓐ ᑳᐊᒑᑯᐗᕽ ᒦᒋᒻ ᑮᐃᔑᐐᓯᓂᐗᒃ᙮

110:4b.1CO.110.004 ᑲᔦ ᑲᑭᓇ ᐯᔑᑾᓐ ᑮᐃᔑᒥᓂᑴᐗᒃ ᐁᐊᒑᑯᐗᓂᓂᒃ ᒥᓂᑴᐎᓐ᙮ ᑮᐅᒋᒥᓂᑴᐗᒃ ᐃᒫ ᐁᐊᒑᑴᑖᑯᓯᒡ ᑭᑖᐱᑯᕽ ᑳᐱᒥᐐᒌᐎᑯᐙᒡ, ᐊᒦ ᐊᐌ ᑭᑖᐱᒃ X ᐁᐋᐎᒡ᙮

110:5b.1CO.110.005 ᐋᓇᐐᓐ ᐃᑯ ᐃᐃᐌ ᑳᐃᔑᐌᐱᓯᐙᒡ, ᓃᐱᐗᐞ ᑳᑕᔑᐙᒡ ᑳᐐᓐ ᐅᑮᒥᓄᓇᐌᐋᓯᐙᐙᓐ ᑭᔐᒪᓂᑑᓐ᙮ ᐊᒦ ᐃᐌ ᑳᐅᒋ ᐹᐲᐌᓯᓂᓂᑭᓐ ᐐᔭᐎᐙᓐ ᐱᑾᑕᑲᒥᑳᕽ᙮

110:6b.1CO.110.006 ᑲᑭᓇ ᑕᔥ ᐅᓄᐌᓂᐗᓐ ᑮᐃᔑᐌᐱᓯᐗᒃ ᑮᓇᐎᓐᑦ ᑭᑭᓇᐙᒋᒋᑲᓐ ᑫᐊᔮᒀᒫᐸᑕᒪᕽ, ᐁᑳ ᑫᑮᓇᐎᓐᑦ ᒋᒥᓴᐌᑕᓯᐗᕽ ᑳᐅᓂᔑᔑᓯᓄᒃ ᐐᓇᐙ ᐋᓂᓐᑦ ᑳᐃᔑᒋᑫᐙᒡ;

110:7b.1CO.110.007 ᐁᑳ ᑲᔦ ᐅᔑᒋᑲᓇᒃ ᒋᒪᓂᑑᑳᑫᓯᐗᕽ, ᐐᓇᐙ ᐋᓂᓐᑦ ᑳᐃᔑᒋᑫᐙᒡ᙮ ᐋᓃᔥ ᒦ ᐅᐌ ᐁᔑᐲᐃᑳᑌᒃ: ᑮᐅᑾᐱᐗᒃ ᐁᑮᑭᒋᐐᓯᓂᐙᒡ ᑲᔦ ᐁᑮᐊᓂᒥᓂᑴᐙᒡ ᐲᓂᔥ ᐁᑮᐊᓂᐅᒻᐺᐃᔑᐊᔮᐙᒡ ᐁᑮᐊᓂᓃᒥᐙᒡ, ᐃᑭᑑᒪᑲᓐ᙮

110:8b.1CO.110.008 ᑫᑯ ᑮᓇᐎᓐᑦ ᑭᑖᐱᔑᒀᒋᒋᑫᓰᒥᓐ ᑖᐱᔥᑰ ᐐᓇᐙ ᐋᓂᓐᑦ ᑳᑮᑑᑕᒧᐙᒡ᙮ ᒦ ᐊᐲ ᐯᔑᒃ ᐁᑮᔑᑲᒃ ᓃᔥᑕᓇᔑᓂᓯᓐ ᑕᓱ ᒥᑖᔂᒃ 23,000 ᑮᑕᔑᐗᒃ ᐁᑮ ᑫᑕᑣᐱᓀᐙᒡ ᐁᑮᓂᐳᐙᒡ᙮

110:9b.1CO.110.009 ᑳᐐᓐ ᑲᔦ ᑭᑲ ᑲᑳᒋᐋᓯᐙᓈᓐ ᐊᐊᐌ ᑳᑎᐯᒋᑫᒡ, ᐋᓃᓐ ᒥᓂᒃ ᑫᐸᑭᑎᓂᓇᕽ ᒋᑑᑕᒧᐗᕽ, ᐐᓇᐙ ᐋᓂᓐᑦ ᑳᑮᐃᔑᒋᑫᐙᒡ᙮ ᑭᓀᐱᑰᐞ ᐅᑮᓂᓯᑯᐙᐞ᙮

110:10b.1CO.110.010 ᑳᐐᓐ ᑲᔦ ᑭᑲᒥᑕᐎᒫᓯᐙᓈᓐ, ᐋᓂᓐᑦ ᐐᓇᐙ ᑳᑮᐃᔑᒋᑫᐙᒡ᙮ ᐅᑮᓂᔑᐗᓈᒋᐃᑯᐙᓐ ᐃᑕᔥ ᐃᓂ ᓂᔑᐗᓈᒋᐃᐌᐎ ᐁᒐᓬᐊᓐ᙮

110:11b.1CO.110.011 ᐃᓇᔥᑫ ᑲᑭᓇ ᐅᓄᐌᓂᐗᓐ ᑮᐃᔑᐌᐱᓯᐗᒃ, ᐸᑳᓐ ᐊᐎᔭᒃ ᑫᐅᒋᐊᔮᒀᒥᓯᐙᒡ᙮ ᔑᑾ ᑮᓇᐎᓐᑦ ᑮᐅᔑᐲᐃᑳᑌᐗᓐ ᒋᐊᔮᒀᒥᒥᑯᔭᕽ᙮ ᓅᑯᒻ ᐃᑯ ᐋᓃᔥ ᐁᔑᐱᒫᑎᓯᔭᕽ, ᐱᒌᓇᒃ ᐐᐊᓂ ᐃᔥᒀᓭᐗᓐ ᐅᓄ ᑳᐱᒥᓭᑭᓐ ᐅᐅᒫ ᐊᑮᕽ᙮

110:12b.1CO.110.012 ᐃᓇ ᑕᔥ, ᐊᐊᐌ ᓂᓱᑭᑳᐸᐤ ᑳᐃᓀᓂᑎᓱᒡ, ᐌᐌᓂ ᑖᐊᔮᒀᒥᓯ ᐁᑳ ᒋᐸᑭᔑᓯᒃ᙮

110:13b.1CO.110.013 ᑲᑭᓇ ᑯᒋᐃᑰᐎᓐ ᐊᓂᐙᐸᑕᒣᒃ, ᒦ ᐯᔑᑾᓐ ᑲᑭᓇ ᐊᐎᔭ ᒋᓂᐅᑎᑕᕽ᙮ ᐊᐌ ᑕᔥ ᑭᔐᒪᓂᑑ ᑳᐐᓐ ᐐᑳ ᐅᐐᐋᒋᑑᓰᓐ ᑳᔑᐊᔓᑕᒫᑫᒡ᙮ ᑳᐐᓐ ᐊᐗᔑᒣ ᑭᑲᐸᑭᑎᓇᒫᑯᓰᐙ ᒋᑲᑴᒋᐃᑰᔦᒃ ᑫᔑᒪᔥᑲᐎᑳᐸᐎᔦᒃ᙮ ᐊᐲ ᑕᔥ ᐁᑲᑴᒋᐃᑰᔦᒃ, ᑭᔐᒪᓂᑑ ᑭᑲᑌᐊᐲᒌᐃᑯᐙ ᒋᑌᑲᔥᑭᑑᔦᒃ᙮ ᒦ ᐃᐌ ᑭᑲᐃᔑᒦᓂᑯᐙ ᐋᓃᓐ ᑫᔑᔖᐴᔥᑲᒣᒃ᙮

110:14b.1CO.110.014 ᐊᐤ ᐃᑕᔥ ᑳᓵᑭᐃᓇᑰᒃ! ᑫᑯ ᐊᐙᒡ ᐸᑮ ᐐᒋᑣᑫᒃ ᐃᐃ ᒪᓂᑑᑫᐎᓐ᙮

110:15b.1CO.110.015 ᑭᑎᔑᑲᓅᓂᓂᓂᒻ ᐁᑲᑮᑖᐌᑕᒣᒃ᙮ ᑮᓇᐙ ᑯ ᒋᐅᓀᑕᒣᒃ ᐅᐅ ᑳᐃᓂᓇᑰᒃ᙮

110:16b.1CO.110.016 ᐃᐃᐌ ᐅᔕ ᒥᓂᒀᑲᓐ ᑳᓂᑖ ᐅᑖᐱᓇᒪᕽ ᐁᑕᑯᒦᑴᒋᐎᐊᕽ ᑭᔐᒪᓂᑑ, ᐊᐲ ᐅᒋᒥᓂᑴᔭᕽ, ᑳᐐᓐ ᐃᓇ ᑭᐐᑑᑲᒧᐙᓰᒥᓐ X ᐅᒥᔅᑸᒻ? ᐊᐊᐌᔥ ᑲᔦ ᐸᑴᔑᑲᓐ ᑳᓂᑖ ᐸᐸᑴᐱᓇᕽ, ᐊᐲ ᐁᐊᒶᕽ, ᑳᐐᓐ ᐃᓇ ᑭᐐᑑᑲᒧᐙᓰᒥᓐ X ᐅᐐᔭᐤ?

110:17b.1CO.110.017 ᐯᔑᒃ ᐁᑕ ᐋᐸᑎᓯ ᐊᐌ ᐸᑴᔑᑲᓐ᙮ ᒦᑕᔥ ᐃᐌ ᐋᓇ ᐹᑏᓄᔭᕽ, ᑲᑭᓇ ᑭᒫᒪᐎᑑᒥᓐ ᐃᐃ ᐯᔑᒃ ᐐᔭᐎᒫ, ᐋᓃᔥ ᐯᔑᒃ ᐊᐊ ᐸᑴᔑᑲᓐ ᑭᑑᑕᒫᓈᓐ᙮

110:18b.1CO.110.018 ᐃᓇ ᐃᐌ ᑳᐃᔑᒋᑫᐙᒡ ᐃᔅᕒᐃᔭᓬ ᐃᓂᓂᐗᒃ: ᐃᑭᐌᓂᐗᒃ ᑳᐅᑕᑕᒧᐙᒡ ᐃᐃ ᑳᐸᑭᑎᓈᔂᓂᐗᓂᓂᒃ, ᐅᐐᑑᑳᓈᐙ ᐃᐌ ᐁᐸᑭᑎᓈᓱᑲᑕᐎᓐᒡ ᑭᔐᒪᓂᑑ᙮

110:19b.1CO.110.019 ᐋᓃᓐ ᑕᔥ ᐁᑭᑐᔮᓐ? ᐊᐊᐌ ᐅᔑᒋᑲᓐ ᑳᒪᓂᑑᑳᑳᓂᐎᒡ, ᑌᐺ ᓇ ᐱᒫᑎᓯ? ᑳᐐᓐ ᐅᔕ ᑫᑰᓐ ᐃᓈᐸᑎᓯᓰ᙮ ᐃᐃᐌ ᑕᔥ ᑲᔦ ᒦᒋᒻ ᑳᐸᑭᑎᓈᓱᑲᑕᐎᓐᒡ ᐅᔑᒋᑲᓐ, ᑫᑰᓐ ᐃᓇ ᐃᓈᐸᑕᓐ?

110:20b.1CO.110.020 ᑳᐐᓐ ᑫᑰᓐ! ᐃᓇᔥᑫ ᓴ ᐃᐃᐌ ᑳᐸᑭᑎᓈᓱᐙᒡ ᐅᒪᓂᑑᑫᒃ ᐁᑕᔑᐸᑭᑎᓂᑫᐙᒡ, ᒪᒋᐊᒑᑾᐞ ᒪᔮ ᑳᒦᓂᒥᓐᒡ᙮ ᑳᐐᓐ ᑕᔑᒦᓈᓰ ᑭᔐᒪᓂᑑ᙮ ᔑᒀ ᑳᐐᓐ ᑭᓇᑕᐌᓂᒥᓯᓅᓂᓂᒻ ᒪᒋᐊᒑᑾᒃ ᒋᐐᑑᑲᐌᒀ᙮

110:21b.1CO.110.021 ᑳᐐᓐ ᐐᓐ ᑭᑖᑲᔥᑭᑑᓰᒻ ᒋᐅᒋᒥᓂᑴᔦᑭᐸᓐ ᒥᒋᓃᔥ ᑳᑎᐯᒋᑫᒡ ᐅᒥᓂᒀᑲᓂᕽ ᑲᔦ ᒪᒋᐊᒑᑾᒃ ᐅᒥᓂᒀᑲᓂᐙᕽ᙮ ᑳᐐᓐ ᑭᑖᑲᔥᑭᑑᓰᒻ ᒥᒋᓃᔥ ᑳᑎᐯᒋᑫᒡ ᐅᐐᓯᓂᐎᓈᑎᑯᕽ ᒋᐅᒋᐐᓯᓂᔦᑭᐸᓐ ᑲᔦ ᒪᒋᐊᒑᑾᒃ ᐅᐐᓯᓂᐎᓈᑎᑯᐙᕽ᙮

110:22b.1CO.110.022 ᑫᒫ, ᑭᑖᑲᑳᒋᐋᓈᓐ ᑳᑎᐯᒋᑫᒡ ᒋᐅᑌᑕᕽ? ᓇᐗᒡ ᐃᓇ ᑭᒪᔥᑲᐎᓰᒥᓐ ᐊᐲᒡ ᐐᓐ ᑳᑎᐯᒋᑫᒡ ᑭᑖᐃᓀᑖᒥᓐ?

110:23b.1CO.110.023 ᒫᑭᔖ ᐊᐎᔭ ᐃᑭᑐᒡ: ᑲᑭᓇ ᑫᑰᓐ ᓂᐸᑭᑎᓇᒫᑰᒥᓐ ᒋᑑᑕᒫᕽ᙮ ᑌᐺ, ᓂᑖᐃᓈ, ᑳᐐᓐ ᐃᑕᔥ ᑲᑭᓇ ᑫᑰᓐ ᐅᓂᔑᔑᓯᓅᓐ ᒋᑑᑕᒫᓐ᙮ ᐋᓇᐐᓐ ᐁᐃᑭᑐᕽ ᑲᑭᓇ ᑫᑰᓐ ᐁᐸᑭᑎᓇᒫᑰᔭᕽ, ᑳᐐᓐ ᑕᔥ ᑲᑭᓇ ᑫᑰᓐ ᐁᑑᑕᒪᕽ ᐅᑲᐐᒋᐃᑯᓰᓐ ᐸᑳᓐ ᐊᐎᔭ᙮

110:24b.1CO.110.024 ᑳᐐᓐ ᐋᓃᔥ ᑭᑖᐊᑕᐌᑕᓰᒥᓐ ᐁᑕ ᒋᐯᔑᑯᒥᓄᓭᔭᕽ, ᐸᑳᓐ ᐃᑕᔥ ᐊᐎᔭᒃ ᑲᔦ ᐐᓇᐙ ᒋᒥᓄᓭᐙᒡ᙮

110:25b.1CO.110.025 ᐱᑯ ᑫᑰᓐ ᑭᑲᒦᒋᒻ ᑳᑕᓇᑖᐙᑫᕽ ᐃᐃᒫ ᒦᒋᒥᑲᒥᑯᕽ᙮ ᑫᑯ ᒣᒬᒡ ᑲᑴᑗᑫᒃ ᐋᑎ ᑳᐅᑎᓂᑳᑌᒃ, ᒦ ᐃ ᐁᑳ ᒋᐅᒋᒫᓀᑕᓯᐌᒃ᙮

110:26b.1CO.110.026 ᐋᓃᔥ ᑲᑭᓇ ᐅᑎᐯᑖᓐ ᑳᑎᐯᒋᑫᒡ ᐅᐅ ᐊᑭ, ᑲᑭᓇ ᑲᔦ ᑫᑰᓐ ᐗᑭᑕᑲᒥᒃ ᑳᐊᔮᓂᒃ, ᐃᔑᐲᐃᑳᑌ᙮

110:27b.1CO.110.027 ᐊᐎᔭ ᑕᔥ ᑳᑌᐺᑕᓯᒃ ᐊᑐᒥᓀᒃ ᒋᐐᒋᐐᓯᓃᒥᓀᒃ, ᐃᓀᑕᒣᒃ ᐃᑕᔥ ᒋᐃᔖᔦᒃ, ᐱᓵᓂᑯ ᒦᒋᔪᒃ ᐃᐃ ᑳ ᐊᔕᒥᑰᔦᒃ᙮ ᑫᑯ ᑲᑴᑗᑫᒃ ᑳᒦᒋᔦᒃ, ᒫᑭᔖ ᑭᑖᐅᒋᒫᓀᑖᒻ ᓅᑕᒣᒃ᙮

110:28b.1CO.110.028 ᒫᑭᔖᔥ ᐊᐎᔭ ᑭᑲᐃᑯᐙ: ᒦ ᐅᐌ ᒦᒋᒻ ᒪᓂᑑᑳᓂᕽ ᑳᑮᐃᔑ ᐸᑭᑎᓂᑳᑳᓂᐗᕽ᙮ ᑮᔥᐱᓐ ᐅᐅ ᐃᓂᓀᒃ, ᑳᐐᓐ ᑭᑖᒦᒋᓰᒻ, ᐁᑳ ᑫᑰᓐ ᒋᐃᓀᑕᓯᒃ ᐊᐊᐌ ᑳᐐᑕᒪᐎᓀᒃ, ᑲᔦ ᐁᑳ ᒫᓀᓂᑎᓱᐎᓐ ᒋᐅᒌᒪᑲᓯᓄᒃ᙮

110:29b.1CO.110.029 ᑳᐐᓐ ᑳᐃᑕᒫᓐ ᑮᓇᐙ ᐃᐃᐌ ᒋᒫᓀᑕᒣᒃ ᑮᔥᐱᓐ ᒦᒋᔦᒃ, ᐊᐊᐌ ᓴ ᑳᑮᐐᑕᒪᐎᓀᒃ ᒫᑭᔖ ᑕᐅᒋᒥᑯᔥᑳᑌᑕᒻ ᐙᐸᒥᓀᒃ᙮ ᒫᑭᔖ ᑕᐃᑭᑐ ᐊᐎᔭ: ᓃᓐ ᑫᑰᓐ ᐁᐸᑭᑎᓇᒪᐙᑕᒫᓐ, ᐋᓃᔛᓐ ᑫᐅᒋᑭᐱᔥᑲᐎᐸᓐ ᐸᑳᓐ ᐊᐎᔭ ᐁᒫᓈᓯᓇᕽ ᒋᒪᓈᒫᓀᑕᒥᐊᒃ?

110:30b.1CO.110.030 ᑮᔥᐱᓐ ᒦᑴᒡ ᐁᑮᐃᓇᒃ ᑭᔐᒪᓂᑑ ᐃᐃᐌ ᑳᐐᒦᒋᔮᓐ, ᐋᓃᔛᓐ ᐊᐎᔭ ᑫᑰᓐ ᑫᐅᒋᐃᔑᐸᓐ ᐋᔕ ᐁᑮᐅᒋᓇᓈᑯᒧᔮᓐ ᐃᐃ ᒦᒋᒻ?

110:31b.1CO.110.031 ᒦ ᐃ ᐁᑭᑐᔮᓐ, ᐌᑯᓀᓐ ᓴ ᑯ ᐁᔑᒋᑫᔦᒃ, ᒫᑭᔖ ᐐᓯᓂᔦᒃ, ᒫᑭᔖ ᒥᓂᑴᔦᒃ, ᑲᑭᓇ ᑯ ᐃᔑᒋᑫᔪᒃ ᑭᔐᒪᓂᑑ ᒋᑭᑌᑖᑯᐃᓐᒡ᙮

110:32b.1CO.110.032 ᒦ ᐃᐌ ᐃᓈᑎᓯᒃ, ᐁᑳ ᑫᑰᓐ ᒋᐃᓀᓂᒥᓯᓄᐌᒀ ᒎᐗᒃ ᑲᔦ ᑳᒎᐎᐎᓯᒀ, ᑲᔦ ᑭᔐᒪᓂᑑ ᐅᒫᐗᒋᐋᑲᓇᐞ᙮

110:33b.1CO.110.033 ᓃᓐ ᐁᔑᒋᑫᔮᓐ, ᒦ ᐃᐌ ᑑᑕᒧᒃ᙮ ᑲᑭᓇ ᐊᐎᔭ ᓂᑲᑴ ᓇᓇᐁᑕᒥᐋ ᐋᓃᓂᑯ ᐁᔑᒋᑫᔮᓐ, ᑳᐐᓐ ᐁᑕ ᒋᑲᑴᐯᔑᑯᒥᓄᓴᐃᑎᓱᔮᓐ, ᐃᑭᔥ ᐐᓐ ᑲᑭᓇ ᒋᒥᓄᓴᐃᑣ ᒋᐱᒫᒋᐃᑣ᙮

111

111:1b.1CO.111.001 ᑮᓇᐙ ᑲᔦ ᑭᑭᓇᐙᐸᒥᔑᒃ ᑲᔦ ᓃᓐ ᐁᐃᔑᑭᑭᓇᐙᐸᒪᒃ X᙮

111:2b.1CO.111.002 ᑭᓇᓈᑯᒥᓂᓂᒻ ᒨᔕᒃ ᐁᒥᑴᓂᒥᔦᒃ ᑲᔦ ᐁᑲᑴ ᒥᒋᒣᑕᒣᒃ ᒥᓂᒃ ᑫᑰᓐ ᑳᑮᐋᓂᑫ ᐐᑕᒪᐎᓇᑰᒃ᙮

111:3b.1CO.111.003 ᐅᐅᐌ ᑕᔥ ᑭᓇᑕᐌᓂᒥᓂᓂᒻ ᒋᑭᑫᑕᒣᒃ: ᐊᐊᐌ X ᐁᓃᑳᓂᓰᑲᑕᐙᒡ ᑲᑭᓇ ᐃᓂᓂᐗᓐ᙮ ᔑᑾ ᐊᐌ ᐃᓂᓂ ᐐᓐ ᐅᓃᑳᓂᓰᑲᑕᐙᓐ ᐃᓂ ᐐᐗᓐ, ᔑᑾ ᐐᓐ ᐊᐊᐌ ᑭᔐᒪᓂᑑ ᐅᓃᑳᓂᓰᑲᑕᐙᓐ ᐃᓂ Xᑕᓐ᙮

111:4b.1CO.111.004 ᒦ ᓴ ᐃᐌ ᑮᔥᐱᓐ ᑭᑳᓄᒀᓀᒡ ᐃᓂᓂ ᐁᐊᓇᒥᐋᒡ ᑲᔦ ᐁᑲᓅᑕᒪᐙᒡ ᑭᔐᒪᓂᑑᓐ, ᑳᐐᓐ ᐅᑭᒋ ᐃᓀᑖᑯᐋᓰᓐ ᐃᓂ Xᑕᓐ ᑳᓃᑳᓂᓰᔥᑳᑯᒡ᙮

111:5b.1CO.111.005 ᐊᐊᐌ ᑕᔥ ᐃᑴ ᑮᔥᐱᓐ ᔖᔖᑲᓂᑎᒀᓀᒡ ᐁᐊᓇᒥᐋᒡ ᑲᔦ ᐁᑲᓅᑕᒪᐙᒡ ᑭᔐᒪᓂᑑᓐ, ᑲᔦ ᐐᓐ ᑳᐐᓐ ᐅᑭᒋ ᐃᓀᑖᑯᐋᓰᓐ ᐃᓂ ᐅᓈᐯᒪᓐ ᑳᓃᑳᓂᓰᔥᑳᑯᒡ᙮ ᑳᐐᓐ ᐸᑳᓐ ᑖᐃᓀᑖᑯᓯᓰ ᐊᐎᔭ ᐃᑴ ᑳᒥᑕᔅᑭᑎᒀᓀᔓᓐᒡ᙮

111:6b.1CO.111.006 ᒦᑕᔥ ᐃᐃ ᑮᔥᐱᓐ ᐐᑭᑳᓄᒀᓀᓯᒃ ᐊᐊ ᐃᑴ, ᐃᑕᐙ ᐱᑯ ᒋᒪᔕᔥᑯᔕᑭᐸᓐ ᐐᓂᓯᓴᓐ᙮ ᐅᒋ ᓴ ᑯ ᐁᒣᓂᔐᑖᑾᒃ ᐁᒥᑕᔅᑭᑎᒀᓀᔓᓐᒡ ᑫᒫ ᐁᑮᔥᑭᔕᕽ ᐐᓂᓯᓴᓐ ᐊᐊ ᐃᑴ, ᒦ ᓴ ᑯ ᐃ ᒋᑭᑳᓄᒀᓀᒡ᙮

111:7b.1CO.111.007 ᐊᐊᐌ ᑕᔥ ᐃᓂᓂ ᑳᐐᓐ ᐊᑕᐌᑖᑯᓯᓰ ᒋᑭᑳᓄᒀᓀᒡ, ᐋᓃᔥ ᐅᒋ ᐃᔑᐊᔮ ᑭᔐᒪᓂᑑᓐ ᐁᐃᓈᑎᓯᓂᒡ ᑲᔦ ᐁᔑᐊᐲᒋ ᑭᒋ ᐃᓀᑖᑯᓯᓂᒡ᙮ ᐊᐊᐌ ᑕᔥ ᐃᑴ ᐅᒋ ᐃᔑᐊᔮ ᑳᔑᑭᒋ ᐃᓀᑖᑯᓯᓂᒡ ᐃᓂ ᐃᓂᓂᐗᓐ᙮

111:8b.1CO.111.008 ᑳᐐᓐ ᐅᔕ ᐃᑴᕽ ᑮᐅᒋᐅᔑᐋᓰ ᐊᐌ ᐃᓂᓂ; ᐃᓂᓃᕽ ᓴ ᐐᓐ ᑮᐅᒋᐅᔑᐋ ᐊᐊ ᐃᑴ᙮

111:9b.1CO.111.009 ᑳᐐᓐ ᐋᓃᔥ ᒋᐐᒋᐋᐸᓐ ᐃᓂ ᐃᑴᐗᓐ ᑮᐅᒋᐅᔑᐋᓰ ᐊᐌ ᐃᓂᓂ; ᐊᐊᔥ ᐐᓐ ᐃᑴ ᑮᐅᒋᐅᔑᐋ ᒋᐐᒋᐋᒡ ᐃᓂ ᐃᓂᓂᐗᓐ᙮

111:10b.1CO.111.010 ᒦ ᐃᐌ ᑫᐅᒋᐋᑲᐗᐊᕽ ᐅᑎᒀᓐ ᐊᐊ ᐃᑴ, ᐁᐃᔑᓈᑯᑑᒡ ᐅᑭᒋ ᐃᓀᑖᑯᓯᐎᓐ᙮ ᒦ ᐃᐌ ᒣᒥᑕᑫ ᑕᐃᔑᒋᑫ ᐊᐊ ᐃᑴ, ᐁᑲᓇᐙᐸᒥᑯᐙᒡ ᐃᐃ ᐁᒐᓬᐊᐞ᙮

111:11b.1CO.111.011 ᐃᐃᒫ ᑕᔥ ᐁᔑᐐᒌᐎᓇᕽ ᑳᑎᐯᒋᑫᒡ, ᑳᐐᓐ ᑕᐱᓂᔅᑴᐱᒫᑎᓯᓰ ᐊᐊ ᐃᑴ ᐃᓂᓂᐗᓐ ᐃᑯ ᒋᐐᒋᐃᑯᐸᓐ᙮ ᐊᐊᐌᔥ ᑲᔦ ᐃᓂᓂ ᑳᐐᓐ ᑫᐐᓐ ᑕᐱᓂᔅᑴᐱᒫᑎᓯᓰ ᐃᑴᐗᓐ ᐃᑯ ᒋᐐᒋᐃᑯᐸᓐ᙮

111:12b.1CO.111.012 ᐋᓃᔥ ᐯᔑᑾᓐ ᐊᐊ ᐃᑴ ᐃᐃᒫ ᐃᓂᓃᕽ ᐁᑮᐅᒋᐅᔑᐋᑲᓂᐎᒡ, ᒦ ᑲᔦ ᐐᓐ ᐯᔑᑾᓐ ᐊᐊ ᐃᓂᓂ ᐃᐃᒫ ᐃᑴᕽ ᐅᑖᑎᓯ᙮ ᑭᔐᒪᓂᑑᓈᕽ ᐃᑕᔥ ᐐᓐ ᐅᒌᒪᑲᓂᓂ ᑲᑭᓇ ᑫᑰᓐ᙮

111:13b.1CO.111.013 ᑮᓇᐙ ᓴ ᑯ ᑲᑴᑾᔭᑯᓇᒧᒃ: ᒥᓄᓈᑾᓐ ᐃᓇ ᐊᐌ ᐃᑴ ᐁᔖᔖᑲᓂᑎᒀᓀᒡ ᐁᑲᓅᓈᒡ ᑭᔐᒪᓂᑑᓐ?

111:14b.1CO.111.014 ᐃᓇᔥᑫ ᐁᔑᐃᑰᐎᓯᔭᕽ ᑭᑖᐅᒋᑭᑫᑖᒻ ᐁᒣᓂᔐᑖᑯᓯᒡ ᑳᑕᑳᓂᑴᒡ ᐊᐊ ᐃᓂᓂ᙮

111:15b.1CO.111.015 ᐊᐊ ᑕᔥ ᐃᑴ ᑲᑳᓍᓂᓯᓭᒡ, ᒦ ᐃᐌᓂ ᐅᑭᒋ ᐃᓀᑖᑯᓯᐎᓐ᙮ ᐋᓃᔥ ᐃᔑᒦᓂᑰᐎᓯ ᒋᑲᑳᓍᓂᑴᒡ ᒋᐊᑾᓇᐊᕽ ᐅᑎᒀᓐ᙮

111:16b.1CO.111.016 ᑮᔥᐱᓐ ᐊᐎᔭ ᐁᐐᐋᓉᑕᕽ ᐅᐅ ᑭᑭᓄᐊᒫᑫᐎᓐ, ᑳᐐᓐ ᐸᑳᓐ ᓂᑕᔮᓰᒥᓐ, ᑳᐐᓐ ᑲᔦ ᐋᑎᑯ ᐃᐃᒫ ᐁᔑᒫᒫᐗᒋᐃᑎᐙᒡ ᐁᔑᐊᓇᒥᐁᑕᐙᐙᒡ ᑭᔐᒪᓂᑑᓐ᙮ ᑳᐐᓐ ᑲᔦ ᐐᓇᐙ ᐸᑳᓐ ᐃᔑᒋᑫᓰᐗᒃ᙮

111:17b.1CO.111.017 ᐅᓄ ᑕᔥ ᑳᐐᑭᑭᓄᐊᒪᐎᓇᑰᒃ ᑳᐐᓐ ᑭᐙᐎᔐᓂᒥᓯᓅᓂᓂᒻ᙮ ᑳᐐᓐ ᐋᐱᒋ ᐅᓂᔑᔑᓯᓅᓐ ᐁᔑᐲᑎᑲᓂᑎᔦᒃ, ᓇᐗᒡ ᓴ ᑯ ᒫᓂᓈᑾᓐ᙮

111:18b.1CO.111.018 ᓃᑳᓐ ᐃᑯ ᑭᑎᓂᓂᓂᒻ, ᓂᑮᐐᑕᒫᑰ ᐁᐊᔫᑯ ᐊᔮᓄᑎᔦᒃ ᐁᒫᐗᒋᐃᑎᔦᒃ᙮ ᓇᐗᒡ ᐃᑯ ᓂᑌᐺᑖᓐ᙮

111:19b.1CO.111.019 ᐅᒋᑕ ᑯ ᑕᓂ ᐃᔑᓭ ᐸᑫᐎᓂᑎᐎᓇᓐ ᒋᐊᔮᒪᑲᑭᓐ ᐁᐊᔮᔦᒃ, ᒦ ᐁᑕ ᐃᒫ ᒋᐸᔭᑌᓈᑯᓯᐙᒡ ᐃᑭᐌᓂᐗᒃ ᑳᑾᔭᑯᒋᑫᐙᒡ᙮

111:20b.1CO.111.020 ᐊᐲ ᑯ ᐁᒫᐗᒋᐃᑎᔦᒃ, ᑳᐐᓐ ᐐᓐ ᑳᑎᐯᒋᑫᒡ ᐅᑕᔕᑫᐎᓐ ᑭᑎᔑᓈᑯᒋᑫᓰᒻ ᑮᐐᓯᓂᔦᒃ᙮

111:21b.1CO.111.021 ᐋᓃᔥ ᑲᑭᓇ ᑯ ᐯᐯᔑᒃ ᐅᓅᑌ ᐅᑖᐱᓈᓈᐙ ᐐᓇᐙ ᑯ ᐁᐐᐐᓯᓂᐙᒡ᙮ ᒦᔥ ᐃᐃ ᐋᓂᑕ ᐊᐎᔭᒃ ᑫᔮᐱ ᓅᑌᔅᑲᑌᐙᒡ, ᐋᔕ ᐋᓂᓐᑦ ᐁᑮᐗᔥᑴᐲᐙᒡ᙮

111:22b.1CO.111.022 ᑳᐐᓐ ᐃᓇ ᑭᑑᐙᑳᐃᑲᓂᓰᒻ ᒋᑕᔑᐐᓯᓂᔦᒃ ᑲᔦ ᒋᑕᔑᒥᓂᑴᔦᒃ? ᑫᒫ ᓇ ᓇᐗᒡ ᑭᐐᒫᓀᓂᒥᒫᐙᐞ ᑭᔐᒪᓂᑑ ᐅᒫᐗᒋᐋᑲᓇᐞ? ᑭᑲᒣᓂᔑᐋᐙᒃ ᐃᓇ ᑕᔥ ᐃᑭ ᐁᑳ ᑫᑰᓐ ᑳᐊᔮᓯᒀ? ᐋᓃᓐ ᑫᐃᓂᓇᑰᒃ? ᑭᒥᓄᒋᑫᒻ ᐃᓇ ᑭᑲᐃᓂᓂᓂᒻ? ᑳᐐᓐ ᐊᐙᒡ ᑲᓇᑫ!

111:23b.1CO.111.023 ᓇᔥᑫ ᐋᓃᔥ ᑳᑎᐯᒋᑫᒡ ᓃᓐ ᐃᑯ ᓂᑮᐐᑕᒫᒃ, ᒦ ᐃᐌ ᐋᔕ ᑫᑮᓇᐙ ᑳᑮᐋᓂᑫ ᐐᑕᒪᐎᓇᑰᒃ, ᐃᐃᐌ ᑳᑮᐃᔑᒋᑫᒡ ᑳᑎᐯᒋᑫᒡ ᒋᓴᔅ ᒦ ᐃᐌ ᐊᐲ ᐁᑎᐱᑲᓂᓂᒃ ᒋᑆ ᐅᑖᐱᓂᑲᓂᐎᒡ᙮ ᐸᑴᔑᑲᓇᓐ ᐅᑮᐅᑖᐱᓈᓐ᙮

111:24b.1CO.111.024 ᐁᑮᓇᓈᑯᒧᒡ ᐃᑕᔥ ᐅᑮᐸᐸᑴᐱᓈᓐ, ᐅᐅᐌ ᐁᐃᑭᑐᒡ: ᒦ ᓴ ᐅᐌ ᓃᔭᐤ, ᐅᒋ ᑮᓇᐙ᙮ ᒦ ᐅᐌ ᐊᓂᐅᒋᑑᑕᒧᒃ ᐊᒬᒃ ᒋᒫᒥᑲᐎᓄᑕᐎᔦᒃ᙮

111:25b.1CO.111.025 ᒦ ᐃ ᐯᔑᑾᓐ ᑳᐃᔥᒀᐐᓯᓂᐙᒡ ᐅᑮᐅᑖᐱᓈᓐ ᐃᐃ ᒥᓂᒀᑲᓐ, ᑳᔑᒨᔥᑭᓀᐲᒃ ᔔᒥᓈᐳ, ᐅᐅᐌ ᐁᐃᓈᒡ: ᐅᐅ ᒥᓂᒀᑲᓐ ᑳᐃᔑᓈᑯᑑᒡ ᑭᔐᒪᓂᑑ ᐅᑑᔥᑭᐊᔓᑕᒫᑫᐎᓐ, ᓂᒥᔅᑸᕽ ᑫᐋᔩᒋᑑᒡ ᐅᑕᔓᑕᒫᑫᐎᓐ᙮ ᐊᐲ ᐱᑯ ᒥᓂᑴᔦᒃ ᐅᐅ ᑑᑕᒧᒃ ᒋᒫᒥᑲᐎᓄᑕᐎᔦᒃ᙮

111:26b.1CO.111.026 ᒦ ᐃ ᐁᓀᑖᑾᒃ, ᑕᓯᕽ ᐃᑯ ᐊᒬᒃ ᐗᐊ ᐸᑴᔑᑲᓐ ᑲᔦ ᐁᐅᒋᒥᓂᑴᔦᒃ ᐅᐅ ᒥᓂᒀᑲᓂᕽ, ᒨᔕᒃ ᑭᑲᐃᔑᓈᑯᑕᒫᑫᒻ ᑳᑮᐃᔑᓂᐴᑕᒫᑫᒡ ᑳᑎᐯᒋᑫᒡ, ᐲᓂᔥ ᐃᑯ ᒋᑕᑶᔑᕽ᙮

111:27b.1CO.111.027 ᒦ ᐃᐌ ᑮᔥᐱᓐ ᐊᐎᔭ ᑌᐱᓈᒃ ᐊᒸᒡ ᑳᑎᐯᒋᑫᓂᒡ ᐅᐸᑴᔑᑲᓂᒥᓂ, ᑲᔦ ᐃᔑᒥᓂᑴᒡ ᐅᒥᓂᒀᑲᓂᓃᕽ, ᐁᑳ ᑾᔭᒃ ᐁᑭᑌᓂᒫᓯᒃ ᑳᑎᐯᒋᑫᓂᒡ, ᑕᐃᓇᑭᒫ ᐊᐎᔭ ᐁᑮᐹᐱᓄᑕᒪᐙᒡ ᑳᑎᐯᒋᑫᓂᒡ ᐐᔭᐎᓂ ᑲᔦ ᐅᒥᔅᑸᒥᓂ᙮

111:28b.1CO.111.028 ᒦᑕᔥ ᐃᐃ ᑲᑭᓇ ᐊᐎᔭ ᐊᑲᐌ ᑕᑲᑴ ᑾᔭᑴᓂᑎᓱ ᐋᓃᓐ ᐁᔑᐊᔮᒡ, ᒦᑕᔥ ᐃᐃ ᒋᐊᒸᒡ ᐃᓂ ᐸᑴᔑᑲᓇᓐ ᑲᔦ ᒋᐅᒋᒥᓂᑴᒡ ᐃᐃ ᒥᓂᒀᑲᓂᓂ᙮

111:29b.1CO.111.029 ᑮᔥᐱᓐ ᐃᑕᔥ ᑾᔭᒃ ᐃᔑᓇᓯᒃ ᐋᓃᓐ ᐁᓍᑌᓂᒃ ᑳᑎᐯᒋᑫᓂᒡ ᐐᔭᐎᓂ ᐊᐲ ᐁᐊᒸᒡ ᐃᓂ ᐸᑴᔑᑲᓇᓐ ᑲᔦ ᐅᒋᒥᓂᑴᒡ ᐃᐃ ᒥᓂᒀᑲᓂᓂ, ᑕᐅᒋᑲᔥᑭᑕᒫᓱ ᒋᑎᐹᑯᓂᑲᓂᐎᒡ ᒣᒀ ᐁᐐᓯᓂᒡ ᑲᔦ ᐁᒥᓂᑴᒡ᙮

111:30b.1CO.111.030 ᒦ ᐅᐌ ᓃᐱᐗᐞ ᑳᐅᒋᐋᑯᓯᐙᒡ ᑲᔦ ᐁᐅᒋᓃᓇᒥᓯᐙᒡ ᑮᓇᐙ ᐃᐃᒫ ᑳᑕᔑᔦᒃ, ᑲᔦ ᑌᒥᓂᒃ ᐁᑮᓂᐳᐙᒡ ᐊᐎᔭᒃ᙮

111:31b.1CO.111.031 ᑮᔥᐱᓐ ᐃᑕᔥ ᐊᑲᐌ ᑲᑴᑾᔭᑯᓈᓱᔭᕽ, ᑳᐐᓐ ᒣᒬᒡ ᑭᑖ ᑎᐹᑯᓂᑰᓰᒥᓐ᙮

111:32b.1CO.111.032 ᑳᑎᐯᒋᑫᒡ ᐃᑕᔥ ᑭᑲᑴᑾᔭᑯᓈᑯᓈᓐ ᑲᔦ ᑭᑾᔭᑯᓂᑯᓈᓐ, ᐁᑳ ᒋᑕᒀᑯᓂᑰᓯᐗᕽ ᑫᐃᓈᑯᓂᑣ ᐃᑭᐌᓂᐗᒃ ᐊᑮᕽ ᑳᑎᐯᑖᑯᓯᐙᒡ᙮

111:33b.1CO.111.033 ᐃᓇ ᑕᔥ, ᓃᒋᐅᑌᐺᑕᒨᒃ! ᐊᐲ ᐊᑕ ᒫᐗᒋᐐᓯᓂᔦᒃ ᑳᑎᐯᒋᑫᒡ ᐅᑕᔕᑫᐎᓐ, ᐲᐃᑎᔪᒃ!

111:34b.1CO.111.034 ᐊᐎᔭ ᑕᔥ ᓅᑌᔅᑲᑌᒡ, ᐊᑲᐌ ᐐᓐ ᐅᑖᐎᓂᕽ ᑕᑕᔑᐐᓯᓂ᙮ ᒦ ᐃᐌ ᐃᔑᒫᐗᒋᐃᑎᔪᒃ, ᐁᑳ ᐃᓈᑯᓂᑰᐎᓐ ᒋᐅᑎᓯᑯᓯᐌᒃ᙮ ᐸᑳᓐ ᐃᑕᔥ ᑫᑰᓇᓐ ᓂᑲᓇᓇᐃᓯᑑᓇᓐ ᐹᓂᒫ ᑕᑯᔑᓈᓐ᙮

112

112:1b.1CO.112.001 ᔑᑾ ᐅᐌ ᓂᐐᓇᑴᑖᓐ ᑳᐃᔑᐲᐊᒪᐎᔦᒃ, ᐋᓃᓐ ᐁᓀᑖᑾᒃ ᐊᒑᑯᐎ ᐃᔑᐊᔮᐎᓐ᙮ ᓃᒋᐅᑌᐺᑕᒨᒃ, ᑭᓇᑕᐌᓂᒥᓂᓂᒻ ᐃᐃ ᒋᑭᑫᑕᒣᒃ᙮

112:2b.1CO.112.002 ᑭᑭᑫᑖᓈᐙ ᒋᑆ ᒪᔑ ᐊᓇᒥᐋᔦᒃ, ᐃᑯᒋ ᐃᒫ ᑭᑮᐗᐙᓂᔑᒥᑰᒻ ᒋᐸᒦᑕᐌᒀ ᒪᓂᑑᑳᓇᒃ ᑳᐱᒫᑎᓯᓯᒀ ᐁᑮᑭᑐᓯᒀ᙮ ᐋᑎ ᓴ ᑯ ᑭᑮᐃᔑᐎᓂᑰᒻ᙮

112:3b.1CO.112.003 ᒦ ᐃᐌ ᑳᐅᒋᓂᓯᑐᑕᒨᓂᓇᑰᒃ ᐅᐅᐌ: ᐊᐎᔭ ᑭᔐᒪᓂᑑ ᐅᑕᒑᑯᕽ ᐁᐅᑎᓇᕽ ᐃᑭᑐᐎᓐ, ᑳᐐᓐ ᑕᓂᔑᐗᓈᑎᓯ ᐅᑲᐃᓈᓰᓐ ᒋᓴᓲᓐ᙮ ᐊᐎᔭ ᑕᔥ ᒦ ᐊᐌ ᒋᓴᔅ ᑳᑎᐯᒋᑫᒡ ᐃᑭᑐᒡ, ᒦ ᐁᑕ ᑭᔐᒪᓂᑑ ᐅᑕᒑᑯᕽ ᑳᐅᒋᑮᑭᑐᒡ᙮

112:4b.1CO.112.004 ᐃᓇᔥᑫ ᐯᐸᑳᓐ ᑎᓄᐗᓅᓐ ᐊᒑᑯᐎ ᒦᓂᑰᐎᓇᓐ, ᒦᑕᔥ ᐁᑕ ᑭᔐᒪᓂᑑ ᐅᑕᒑᑾᓐ ᐁᔑᐯᔑᑯᓂᒡ ᑳᐅᓇᐆᔑᐌᓂᒡ᙮

112:5b.1CO.112.005 ᐯᐸᑳᓐ ᑲᔦ ᑎᓄᐗᓅᓐ ᐁᔑᐸᒦᑖᑫᐙᒡ ᐊᐎᔭᒃ, ᒦᔥ ᐁᑕ ᑳᑎᐯᒋᑫᒡ ᐁᔑᐯᔑᑯᒡ ᑳᐊᓄᑮᑕᐎᓐᒡ᙮

112:6b.1CO.112.006 ᔑᑾ ᐯᐸᑳᓐ ᑎᓄᐗᓅᓐ ᐁᔑᑲᔥᑭᑑᐙᒡ ᐊᐎᔭᒃ ᐅᑕᓄᑮᐎᓂᐙᓐ, ᒦᑕᔥ ᐁᑕ ᐊᐌ ᑭᔐᒪᓂᑑ ᐁᔑᐯᔑᑯᒡ ᐁᔑᐊᓄᑮᒡ ᐁᑕᓱᐯᔑᑯᓂᒡ ᐅᐱᒫᑎᓯᐎᓂᓃᕽ ᑲᑭᓇ ᑫᑰᓐ ᒋᑲᔥᑭᑑᓂᒡ᙮

112:7b.1CO.112.007 ᐁᑕᓱᐯᔑᑯᒡ ᐊᐎᔭ ᐃᔑᒦᓈ ᑫᑰᓐ ᑭᔐᒪᓂᑑ ᐅᑕᒑᑾᓐ ᐁᓈᑯᑑᓂᒡ ᐅᑎᔑᐊᔮᐎᓂᓂ᙮ ᒦᑕᔥ ᑲᑭᓇ ᐊᐎᔭ ᒋᐅᒋᒥᓄᓭᐙᒡ᙮

112:8b.1CO.112.008 ᐊᐊ ᐯᔑᒃ ᐅᒦᓂᑰᓐ ᑭᔐᒪᓂᑑᓐ ᐅᑕᒑᑯᓂ ᒥᓄᑭᑫᒋᑫᐎᓂᕽ ᒋᐃᔑᑮᔗᒡ᙮ ᒦᓇᐙ ᐯᔑᒃ ᐸᔭᑌᓂᓯᑐᑕᒧᐎᓐ ᐅᒦᓂᑰᓐ ᐃᓂ ᐯᔑᑾᓐ ᐊᒑᑾᓐ ᒋᐃᔑᑮᔗᒡ᙮

112:9b.1CO.112.009 ᒦᓇᐙ ᐯᔑᒃ ᐊᐎᔭ ᑭᒋᑌᐺᑕᒧᐎᓐ ᐅᒦᓂᑰᓐ ᐅᓄ ᐯᔑᑾᓐ ᐊᒑᑾᓐ, ᔑᑾ ᐸᑳᓐ ᐊᐎᔭ ᒥᓄᐊᔮᐃᐌᐎᓇᓐ ᐅᒦᓂᑰᓐ ᐅᓄ ᐯᔑᑾᓐ ᐊᒑᑾᓐ᙮

112:10b.1CO.112.010 ᒦᓇᐙ ᑕᔥ ᐯᔑᒃ ᒋᑲᔥᑭᑑᒡ ᒫᒪᑳᒋᒋᑫᐎᓇᓐ ᐃᔑᒦᓈ, ᒦᓇᐙ ᐯᔑᒃ ᑭᔐᒪᓂᑑᓐ ᒋᑲᓅᑕᒪᐙᒡ ᐃᔑᒦᓈ᙮ ᒦᓇᐙ ᑕᔥ ᐯᔑᒃ ᒋᓂᓯᑖᐌᔦᑕᕽ ᐁᑎᓄᐗᓂᓂᑭᓐ ᐃᓂ ᒦᓂᑰᐎᓇᓐ, ᑮᔥᐱᓐ ᑌᐺ ᑭᔐᒪᓂᑑᓐ ᐅᑕᒑᑯᓂ ᐁᐅᒌᒪᑲᓂᓂᑴᓐ ᑫᒫ ᑳᐐᓐ᙮ ᔑᑾ ᒦᓇᐙ ᐯᔑᒃ ᐯᐸᑳᓐ ᐃᔑᑮᔗᐎᓇᓐ ᐃᔑᒦᓈ, ᐯᔑᒃ ᐃᑕᔥ ᑲᔦ ᐃᔑᒦᓈ ᒋᐋᓂᑲᓅᑕᕽ ᐃᓂ ᐃᔑᑮᔗᐎᓇᓐ᙮

112:11b.1CO.112.011 ᒦᑕᔥ ᐃᐃ ᑲᑭᓇ ᐅᓄ ᐁᓇᓄᑮᒡ ᐊᐌ ᑳᐯᔑᑯᒡ ᐊᒑᒃ ᒫᒦᓈᒡ ᑲᑭᓇ ᐊᐎᔭᐞ, ᐐᓐ ᐃᑯ ᐁᓀᑕᕽ᙮

112:12b.1CO.112.012 ᐃᓇᔥᑫ ᒦ ᐅᐌ ᐁᓀᑖᑯᓯᒡ ᐊᐊ X ᑖᐱᔥᑰ ᐊᐎᔭ ᐐᔭᐎᕽ᙮ ᐋᓇ ᐯᔑᑾᒃ ᐅᐅ ᐐᔭᐤ, ᐹᑏᓇᑎᓅᓐ ᐃᑕᔥ ᐯᐸᑳᓐ ᐁᔑᓈᑾᑭᓐ ᑳᐃᔑᐋᐸᑕᑭᓐ᙮ ᑲᑭᓇ ᑕᔥ ᐐᓐ ᐅᓄᐌᓂᐗᓐ ᐋᓇᐐᓐ ᐋᓇᐹᑏᓇᑎᑭᓐ, ᒦᔥ ᐁᑕ ᐁᔑᐯᔑᑾᒃ ᐅᐅᐌ ᐐᔭᐤ᙮

112:13b.1CO.112.013 ᒦ ᓴ ᑯ ᐯᔑᑾᓐ ᑫᑮᓇᐎᓐᑦ ᒥᓂᒃ ᐁᔑᐯᐸᑳᓉᐙᓇᑭᓯᔭᕽ, ᑫᒫ ᒎᐗᒃ ᑫᒫ ᑲᔦ ᑳᒎᐎᐎᓯᒀ, ᑲᔦ ᑎᐯᓂᒫᑲᓇᒃ ᑲᔦ ᑳᑕᑎᐯᓂᑎᓱᐙᒡ, ᑲᑭᓇ ᑭᑮᐃᔑᓰᑲᐊᑖᑯᓈᓐ ᐃᓂ ᐯᔑᑾᓐ ᑭᔐᒪᓂᑑ ᐅᑕᒑᑾᓐ ᐃᐃᒫ ᐯᔑᒃ ᐐᔭᐎᒫᕽ ᒋᐅᒋᑎᐯᑖᑯᓯᔭᕽ᙮ ᔑᑾ ᐯᔑᑾᓐ ᑭᑮᐃᔑᒥᓇᐃᑰᒥᓐ ᐊᐊ ᐯᔑᑾᓐ ᐊᒑᒃ ᒋᒥᓂᒀᓇᕽ᙮

112:14b.1CO.112.014 ᐃᓇᔥᑫ ᐋᓃᔥ ᐅᐌ ᐐᔭᐎᒫ ᐁᔑᓈᑾᒃ ᑳᐐᓐ ᒥᒋᐯᔑᑯᓈᑾᓯᓅᓐ, ᐹᑏᓇᑎᓅᓐ ᐅᔕ ᐅᒫ ᑳᑕᓱᐃᔑᓈᑯᓯᕽ᙮

112:15b.1CO.112.015 ᐊᐊ ᑕᔥ ᐅᓯᑎᒫ ᐃᑭᑐᒡ: ᓃᓐ ᐁᐅᓂᒌᒫᐎᓯᐙᓐ, ᑳᐐᓐ ᐃᐃᒫ ᓂᑑᒋᑎᐯᑖᑯᓯᓰ ᐐᔭᐎᕽ, ᐅᐅ ᐋᓇᐃᑭᑐᐸᓐ, ᒪᔥᑲᐙᒡ ᐃᑯ ᐅᒋᑎᐯᑖᑾᓐ ᐃᐃᒫ ᐐᔭᐎᕽ ᐃᐃ ᐅᓯᑎᒫ᙮

112:16b.1CO.112.016 ᑫᒫ ᑲᔦ ᐅᑕᐗᑳᒫ ᐋᓇᐃᑭᑐᐸᓐ: ᓃᓐ ᐋᓃᔥ ᐁᐅᔥᑮᔑᑯᐎᓯᐙᓐ, ᑳᐐᓐ ᓃᓐ ᐃᐃᒫ ᓂᑑᒋᑎᐯᑖᑯᓯᓰ ᐐᔭᐎᕽ, ᐅᐅᐌ ᐋᓇᐃᑭᑐᒡ, ᒪᔥᑲᐙᒡ ᐃᑯ ᐅᒋᑎᐯᑖᑾᓐ ᐃᐃᒫ ᐐᔭᐎᕽ ᐃᐃ ᐅᑕᐗᑳᒫ᙮

112:17b.1CO.112.017 ᐃᓇᔥᑫ ᑮᔥᐱᓐ ᒥᓯᐌ ᐅᔥᑮᔑᑯᐗᑭᐸᓐ ᐃᐃ ᐐᔭᐎᒫ, ᐋᓃᑎ ᑫᐅᒋᓅᑕᒨᒪᑲᑭᐸᓐ? ᒥᓯᐌᔥ ᑲᔦ ᐅᑕᐗᑳᐗᑭᐸᓐ, ᐋᑎ ᑫᑮᐅᒋ ᒥᓈᒋᑫᒪᑲᑭᐸᓐ?

112:18b.1CO.112.018 ᐐᓐ ᐃᑕᔥ ᐐᓐ ᐊᐊ ᑭᔐᒪᓂᑑ ᐁᑕᓱᐯᔑᒃ ᐅᑮᒫᒪᐎᑑᓇᓐ ᐃᓂ ᑳᐯᐸᑳᓇᑎᓂᓂᑭᓐ ᑳᑕᓱᐃᔑᓈᑯᓯᕽ ᒋᐯᔑᑾᓂᓂᒃ ᐃᐃ ᐐᔭᐤ, ᐐᓐ ᐃᑯ ᐁᐃᔑᐅᓀᑕᕽ᙮

112:19b.1CO.112.019 ᑮᔥᐱᓐ ᐁᑕ ᐯᔑᑯᐊᔮᒃ ᐃᐌ ᐸᑫᓯᐎᓐ ᑳᐐᓐ ᐐᔭᐎᒫ ᑕᐃᔑᓈᑾᓯᓅᓐ᙮

112:20b.1CO.112.020 ᐹᑏᓇᑎᓅᓐ ᐃᑕᔥ ᐐᓐ ᐃᓂ ᐃᔑᓈᑯᓯᐎᓇᓐ, ᐁᐯᔑᑾᒃ ᐃᑕᔥ ᐃᐃ ᐐᔭᐎᒫ᙮

112:21b.1CO.112.021 ᒦᑕᔥ ᐃᐃ ᐅᔥᑮᔑᑯᒫ ᑳᐐᓐ ᐅᑲᑮᐃᓈᓰᓐ ᐃᓂ ᐅᓂᒌᒫ: ᑳᐐᓐ ᑫᑰᓐ ᑭᑎᓈᐸᒋᐃᓯᓅᓐ! ᐊᐊᐌᔥ ᑲᔦ ᐅᑎᒀᓂᒫ ᑳᐐᓐ ᐅᑖᓂᓈᓰᐞ ᐅᓯᑕᐞ: ᑳᐐᓐ ᑮᓇᐙ ᑫᑰᓐ ᑭᑎᓈᐸᒋᐃᓯᓅᓂᓂᒻ᙮

112:22b.1CO.112.022 ᑳᐐᓐ ᐃᐃ ᑕᐃᓀᑖᑾᓯᓅᓐ᙮ ᓇᐗᒡ ᐃᑕᔥ ᐐᓐ ᑭᑖᐸᑕᓅᓐ ᐃᓂ ᑫᑰᓇᓐ ᐐᔭᐎᒫᕽ ᑳᐗᑫᐎᓈᑾᑭᓐ᙮

112:23b.1CO.112.023 ᐃᓂᐌᓂᐗᓐ ᐃᑕᔥ ᐸᑮ ᑳᐊᐲᑌᑕᒪᕽ, ᓇᐗᒡ ᐃᑯ ᒋᒥᓄᐊᐲᑌᑖᑾᑭᓐ ᑭᑎᔑᑑᒥᓐ᙮ ᐃᓂᐌᔥ ᑲᔦ ᐁᑳ ᑳᒥᓄᓈᑾᓯᓄᑭᓐ, ᑫᔮᐱ ᐌᐌᓂ ᑭᑎᔑᑭᑭᔥᑭᑫᒥᓐ ᑾᔭᒃ ᒋᐃᔑᓈᑾᑭᓐ᙮

112:24b.1CO.112.024 ᐃᓂᔥ ᐐᓐ ᑳᒥᓄᓈᑾᑭᓐ ᑳᐐᓐ ᒣᒬᒡ ᒋᐃᔑᐆᒪᑲᓯᓄᑭᓐ᙮ ᐐᓐ ᑕᔥ ᑭᔐᒪᓂᑑ ᐅᑮᐃᔑᒫᒪᐎᑑᓐ ᐃᐃ ᐐᔭᐎᒫ, ᐅᓄᐌᓂᐗᓐ ᐃᑯᑕᓄ ᑳᐃᓀᑖᑾᓯᓄᑭᓐ, ᓇᐗᒡ ᐁᑮᐃᔑᑑᒡ ᒋᑭᒋ ᐃᓀᑖᑾᓂᓂᑭᓐ᙮

112:25b.1CO.112.025 ᒦ ᐃᐌ ᐁᓀᑖᑾᒃ ᐁᑳ ᐸᑫᐎᓂᑎᐎᓐ ᒋᐊᔮᒪᑲᓯᓄᒃ ᐐᔭᐎᒫᕽ, ᑲᑭᓇ ᑕᔥ ᑳᐯᐸᑳᓇᑎᑭᓐ ᐃᔑᓈᑯᓯᐎᓇᓐ ᐯᔑᑾᓐ ᐃᑯ ᒋᐃᔑᓈᑲᒋᐃᑏᒪᑲᑭᓐ᙮

112:26b.1CO.112.026 ᐊᐲ ᑯ ᐁᒪᒋᓭᒃ ᐯᔑᒃ ᐸᑫᓯᐎᓐ, ᒦ ᐯᔑᑾᓐ ᐃᑯ ᑲᑭᓇ ᐸᑫᓯᐎᓇᓐ ᐐᒋ ᐃᓇᒪᒋᐅᑏᒪᑲᓅᓐ᙮ ᐯᔑᒃ ᐃᑕᔥ ᑲᔦ ᑭᒋ ᐃᓀᒋᑳᑌᒃ ᐸᑫᓯᐎᓐ, ᒦ ᐯᔑᑾᓐ ᐃᑯ ᑲᑭᓇ ᐁᔑᒫᒪᐎ ᒌᑫᑕᒨᒪᑲᑭᓐ᙮

112:27b.1CO.112.027 ᑮᓇᐙ ᑳᑕᔑᔦᒃ ᒦ ᐃᐌᓂ ᐅᐐᔭᐤ X᙮ ᐁᑕᓱᐯᔑᑯᔦᒃ ᑭᑑᒋᑎᐯᑖᑯᓯᒻ ᒦ ᐃᒫ X ᐅᐐᔭᐎᕽ ᑳᑕᓱᐃᔑᓈᑯᓯᔦᒃ᙮

112:28b.1CO.112.028 ᐃᐃᒫ ᑕᔥ ᐁᔑᒫᐗᒋᐃᑎᐙᒡ ᐅᑌᐺᑕᒨᒃ ᑲᑭᓇ ᐊᐎᔭᐞ ᑭᔐᒪᓂᑑ ᐅᑮᐃᓇᓵᐞ ᑫᐅᒋᑎᐯᑖᑯᓯᓂᒡ᙮ ᓂᑕᒻ ᐅᑮᐃᓇᓵᐞ ᐃᔑᓂᔕᐙᑲᓇᐞ ᒋᓃᑳᓀᑖᑯᓯᓂᒡ᙮ ᒦᓇᐙ ᑕᔥ ᐅᑎᐹᒋᒨᐞ ᑳᑲᓅᒋᑫᑕᒫᑯᒡ ᐅᑮᐃᓇᓵᐞ ᒋᐋᓂᑫ ᓃᑳᓀᑖᑯᓯᓂᒡ᙮ ᒦᑕᔥ ᒦᓇᐙ ᐅᑭᑭᓄᐊᒫᑫᐞ ᐅᑮᐃᓇᓵᐞ ᒋᐊᓂᐋᓂᑫ ᓃᑳᓀᑖᑯᓯᓂᒡ᙮ ᒦᑕᔥ ᐃᒫ ᐁᓂᐋᓂᑲᐎᔥᑳᑫᐙᒡ ᑳᒫᒪᑳᒋᒋᑫᐙᒡ, ᒦᓇᐙ ᑕᔥ ᐃᑭ ᑳᔑᒦᓂᑰᐎᓯᐙᒡ ᒋᒥᓄᔭᔮᐃᐌᐙᒡ ᑲᔦ ᑳᐐᒋᐃᐌᐙᒡ, ᒦᓇᐙ ᑕᔥ ᐋᓂᑕ ᑳᓃᑳᓂᓰᑲᑖᑫᐙᒡ ᐃᓇᓵᐗᒃ, ᑲᔦ ᐯᐸᑳᓐ ᐃᔑᑮᔗᐎᓇᓐ ᑳᒦᓂᑣ᙮

112:29b.1CO.112.029 ᑳᐐᓐ ᑲᑭᓇ ᐊᐎᔭ ᐃᔑᓂᔕᐙᑲᓐ ᑎᓄᐎᓰᐗᒃ᙮ ᑳᐐᓐ ᑲᑭᓇ ᐃᔑᒦᓈᓰᐗᒃ ᒋᑲᓅᑕᒪᐙᐙᒡ ᑭᔐᒪᓂᑑᓐ᙮ ᑳᐐᓐ ᑲᔦ ᑲᑭᓇ ᐅᑭᑭᓄᐊᒫᑫᐎᓰᐗᒃ, ᑳᐐᓐ ᑲᑭᓇ ᒫᒪᑳᒋᒋᑫᓰᐗᒃ᙮

112:30b.1CO.112.030 ᑳᐐᓐ ᑲᑭᓇ ᒦᓂᑰᐎᓯᓰᐗᒃ ᒋᒥᓄᔭᔮᐃᐌᐙᒡ᙮ ᑳᐐᓐ ᑲᔦ ᑲᑭᓇ ᐃᔑᑮᑭᑐᓰᐗᒃ ᐯᐸᑳᓐ ᐊᔨᔑᑮᔗᐎᓇᓐ᙮ ᑳᐐᓐ ᑲᑭᓇ ᐊᐎᔭ ᐋᓂᑲᓅᑕᒫᑫᓰᐗᒃ᙮

112:31b.1CO.112.031 ᐃᓂ ᑕᔥ ᒫᐗᒡ ᑳᐅᓂᔑᔑᑭᓐ ᒦᓂᑰᐎᓯᐎᓇᓐ, ᒦᐗᓂᓂ ᑲᑴ ᐊᑕᐌᑕᒧᒃ᙮ ᐯᔑᒃ ᐃᑕᔥ ᐃᔑᐊᔮᐎᓐ ᑭᐐᐊᓂᐙᐸᑕᐃᓂᓂᒻ ᒫᐗᒡ ᐁᓃᑳᓂᐅᓂᔑᔑᕽ᙮

113

113:1b.1CO.113.001 ᐋᓇᐐᓐ ᑲᔥᑭᑑᔮᓐ ᐯᐸᑳᓐ ᑳᐃᔑᑮᔗᐙᒡ ᐃᓂᓂᐗᒃ ᑲᔦ ᐁᒐᓬᐊᒃ, ᑮᔥᐱᓐ ᐃᑕᔥ ᐁᑳ ᓵᑭᐃᐌᓯᐙᓐ, ᒦ ᐊᓂᔖ ᒋᒥᒋ ᓈᓅᑖᑯᓯᔮᓐ᙮ ᑖᐱᔥᑰ ᑲᒥᒋ ᐹᐹᐙᐱᑲᐃᑳᑌᒃ ᑲᔦ ᐁᒥᒋ ᐸᐸᓶᐌᔮᐱᑭᓭᒃ ᐁᐗᓂᔥᑴᐌᑖᑾᑭᓐ ᑖᐃᓀᑖᑾᓐ ᓂᑲᑭᑐᐎᓐ᙮

113:2b.1CO.113.002 ᒫᑭᔖ ᑲᔦ ᐊᔮᔮᓐ ᒦᓂᑰᐎᓯᐎᓐ ᒋᑲᓅᑕᒪᐗᒃ ᑭᔐᒪᓂᑑ, ᒫᑭᔖ ᑲᔦ ᑲᑭᓇ ᑫᑰᓐ ᑭᑫᑕᒧᐎᓐ ᐊᔮᔮᓐ, ᑲᔦ ᑲᑭᓇ ᑫᑰᓇᓐ ᒋᐅᒋᓂᓯᑐᑕᒫᓐ ᐁᑳ ᒪᔑ ᑳᑭᑫᑖᑾᓯᓄᑭᓐ, ᑲᔦ ᐁᑌᐱᓭᔮᓐ ᑌᐺᔦᑕᒧᐎᓐ ᒋᑲᓅᑕᒫᓐ ᐗᒋᐗᓐ ᒋᐋᑕᑌᑭᓐ; ᑲᑭᓇ ᐃᓂ ᐋᓇᑲᔥᑭᑑᔮᓐ, ᑮᔥᐱᓐ ᑕᔥ ᐁᑳ ᓵᑭᐃᐌᓯᐙᓐ, ᑳᐐᓐ ᐄᓴᓐ ᑫᑰᓐ ᓂᑖᐃᓈᐸᑎᓯᓰ᙮

113:3b.1CO.113.003 ᑲᔦ ᑲᑭᓇ ᐋᓇ ᒫᒫᑕᐆᑮᔮᓐ ᓂᑎᐱᓇᐌᐎᓯᐎᓐ, ᐴᔥᑫ ᓂᐐᔭᐤ ᐸᑭᑎᓇᒫᓐ ᒋᒑᑭᓯᑳᑌᒃ, ᑮᔥᐱᓐ ᑕᔥ ᓵᑭᐃᐌᓯᐙᓐ ᑳᐐᓐ ᑫᑰᓐ ᐃᐃᒫ ᓂᑲᐅᑎᓇᓰᓐ᙮

113:4b.1CO.113.004 ᓵᑭᐃᐌᒡ ᐊᐎᔭ ᑕᔕᔒᐯᑕᒻ, ᑕᑭᔐᐙᑎᓯ᙮ ᑳᐐᓐ ᐅᑲᐅᑌᓂᒫᓰᓐ ᐊᐎᔭᓐ᙮ ᑳᐐᓐ ᒪᒦᒀᓂᑎᓱᓰ, ᑳᐐᓐ ᑲᔦ ᐃᔥᐯᓂᑎᓱᓰ᙮

113:5b.1CO.113.005 ᓵᑭᐃᐌᒡ ᐊᐎᔭ ᑕᒪᓈ ᒫᔑᐙᐸᑕᐃᐌ᙮ ᑳᐐᓐ ᓃᑳᓀᓂᑎᓱᓰ, ᑳᐐᓐ ᐐᐸ ᓂᔥᑳᑎᓯᓰ᙮ ᑳᐐᓐ ᐅᐸᐹᒣᑕᓰᓐ ᑫᑰᓐ ᐁᐃᔑᒋᑫᐃᓐᒡ᙮

113:6b.1CO.113.006 ᐊᐊ ᓯᔮᑭᐃᐌᒡ ᑳᐐᓐ ᐅᒋᒥᓉᑕᓰ ᐊᐎᔭᓐ ᐁᒪᒋᒋᑫᓂᒡ᙮ ᓇᐗᒡ ᐃᑕᔥ ᐅᒋᒥᓉᑕᒻ ᐃᐃ ᑌᐺᐎᓐ ᐁᑑᒋᑳᑌᓂᒃ᙮

113:7b.1CO.113.007 ᑳᐐᓐ ᑕᐅᒋᐸᑭᒌᓰ᙮ ᑲᐯᐊᔭᐄ ᑌᐺᔦᑕᒻ, ᒪᔥᑲᐎᐊᐯᓂᒧ, ᐱᔑᔑᒃ ᐃᑯ ᒪᔥᑲᐌᑕᒻ᙮

113:8b.1CO.113.008 ᑳᐐᓐ ᐐᑳ ᑕᐃᔥᒀᓭᓯᓅᓐ ᐃᐃ ᓵᑭᐃᐌᐎᓐ᙮ ᐋᓂᑕ ᐊᓇᐃᔑᒦᓂᑣ ᑫᐃᔑᑲᓅᒋᑫᑕᒪᐙᐙᒡ ᑭᔐᒪᓂᑑᓐ, ᐹᓂᒫ ᑕᔥ ᑕᐴᓂᐊᔮ ᐃᐌ ᐃᔑᑮᑭᑐᐎᓐ᙮ ᐋᓂᑕ ᑲᔦ ᐸᑳᓂᑮᔗᐎᓐ ᐁᒦᓂᑣ, ᐹᓂᒫ ᐊᐲ ᑕᐴᓂᑮᔗᒻ᙮ ᐋᓂᑕ ᑭᑫᑕᒧᐎᓐ ᐋᓇ ᐊᔮᐙᒡ, ᐹᓂᒫ ᑕᓇᑲᒋᑳᑌ ᐃᐌ ᓅᑯᒻ ᑳᑭᑫᑖᑾᒃ᙮

113:9b.1CO.113.009 ᐅᐅᐌ ᐋᓃᔥ ᓅᑯᒻ ᑳᑭᑫᑕᒪᕽ, ᐸᑮ ᐁᑕ ᐃᐌ ᑭᑭᑫᑖᒥᓐ᙮ ᔑᑾ ᐋᓇᐐᓐ ᐃᔑᒦᓂᑰᔭᕽ ᑭᔐᒪᓂᑑ ᐁᑲᓅᒋᑫᑕᒪᐗᕽ, ᐸᑮ ᐁᑕ ᑭᐐᑖᒥᓐ ᐅᑎᓀᒋᑫᐎᓐ᙮

113:10b.1CO.113.010 ᐊᐲ ᑕᔥ ᐱᐅᒋᒋᓭᒃ ᐃᐃ ᑳ ᐊᐲᒋ ᒥᓯᐌᐊᔮᒃ, ᑳᐐᓐ ᑫᔮᐱ ᑕᓈᑾᓯᓅᓐ ᐃᐃᐌ ᐸᑮ ᑳ ᐊᔮᒃ᙮

113:11b.1CO.113.011 ᐊᐲ ᑮᐊᐱᓅᒌᔑᐎᔮᐹᓐ, ᐊᐱᓅᒌᔑᕽ ᓂᑮᐃᔑᑲᑭᑦ, ᓂᑮᐃᔑᓇᒻ, ᓂᑮᐃᓀᑕᒻ᙮ ᐹᓂᒫ ᑕᔥ ᐁᑮᑭᒋ ᐃᓂᓃᐎᔮᓐ, ᐋᔕ ᓂᑮᓇᑲᑖᓐ ᓂᑕᐱᓅᒌᔑᐎ ᐋᔨᑎᐎᓐ᙮

113:12b.1CO.113.012 ᐃᐃᐌ ᓅᑯᒻ ᑳᐙᐸᑕᒪᕽ ᑖᐱᔥᑰ ᐙᐸᒧᓂᕽ ᐁᒥᒋᐸᐎᓈᑾᒃ ᑭᑎᔑᓈᒥᓐ᙮ ᐱᒌᓇᒃ ᐃᑕᔥ ᐅᒋᒋᓭᒃ, ᑾᔭᒃ ᐃᑯ ᐯᔓ ᑭᑲᐙᐸᒫᓈᓐ᙮ ᒣᒀ ᐱᑯ ᐅᐅ ᐊᐲ ᐸᑮ ᐁᑕ ᓂᑎᔑᑭᑫᑕᒻ᙮ ᐹᓂᒫ ᑕᔥ ᐊᐲ ᓂᑲᒥᓯᐌ ᑭᑫᑕᒻ ᑖᐱᔥᑰ ᑭᔐᒪᓂᑑ ᑳᐃᔑᔖᐳᑭᑭᑫᓂᒥᔑᒡ᙮

113:13b.1CO.113.013 ᒣᒀ ᑕᔥ ᐊᔮᐗᓐ ᐅᓄ ᓂᓯᓐ ᐁᑳ ᑫᐃᔥᒀᓭᓯᓄᑭᓐ: ᑌᐺᔦᑕᒧᐎᓐ, ᐊᐯᓂᒧᐎᓐ, ᓵᑭᐃᐌᐎᓐ᙮ ᐃᐃᐌ ᑕᔥ ᓵᑭᐃᐌᐎᓐ ᒫᐗᒡ ᑭᒋ ᐃᓀᑖᑾᓐ᙮

114

114:1b.1CO.114.001 ᒦ ᐃᐌ ᓵᑭᐃᐌᐎᓐ ᐱᒥᓂᔕᐊᒧᒃ᙮ ᐊᑕᐌᑕᒧᒃ ᐃᑕᔥ ᑲᔦ ᐊᒑᑯᐎ ᒦᓂᑰᐎᓇᓐ᙮ ᒦ ᐃᐌ ᓇᐗᒡ ᐃᔑᐊᑕᐌᑕᒧᒃ ᒋᑲᓅᑕᒪᐌᒃ ᑭᔐᒪᓂᑑ᙮

114:2b.1CO.114.002 ᐊᐊᐌ ᐋᓃᔥ ᐁᐃᔑᑲᑭᑐᒡ ᐯᐸᑳᓐ ᐊᔨᔑᑮᔗᐎᓇᓐ, ᑳᐐᓐ ᒪᔮ ᐅᑎᔑᑲᓅᓈᓰᐞ ᐃᓂ ᐯᒫᑎᓯᓂᒡ, ᑭᔐᒪᓂᑑᓐ ᐁᑕ ᑯ᙮ ᑳᐐᓐ ᐸᑳᓐ ᐊᐎᔭᓐ ᐅᓂᓯᑐᑖᑯᓰᓐ᙮ ᐁᔑᒦᓂᑯᒡ ᐃᑕᔥ ᐃᓂ ᑭᔐᒪᓂᑑᓐ ᐅᑕᒑᑾᓐ, ᒦ ᐃᐌ ᐁᔑᐐᑕᕽ ᐃᓂ ᑫᑰᓇᓐ ᑳᑳᒋᑳᑌᓂᑭᓐ᙮

114:3b.1CO.114.003 ᐊᐎᔭ ᑕᔥ ᑳᑲᓅᑕᒪᐙᒡ ᑭᔐᒪᓂᑑᓐ ᐅᑎᔑᑲᓅᓈᐞ ᐃ ᐯᒫᑎᓯᓂᒡ ᒋᑲᑴ ᒪᔥᑲᐎᑭᐋᒡ᙮ ᐅᑲᑴᒦᓈᐞ ᒪᔥᑲᐌᑕᒧᐎᓐ, ᐅᑲᑴᓇᓇᐁᑕᒥᐋᐞ᙮

114:4b.1CO.114.004 ᐊᐎᔭ ᑳᐸᑳᓂᑮᔗᒡ ᐐᓐ ᐃᑯ ᐁᑕ ᒪᔥᑲᐎᑭᐃᑎᓱ᙮ ᐊᐎᔭ ᑕᔥ ᑳᑲᓅᒋᑫᑕᒪᐙᒡ ᑭᔐᒪᓂᑑᓐ, ᑲᑭᓇ ᐊᐎᔭᐞ ᐅᒪᔥᑲᐎᑭᐋᐞ ᐅᑌᐺᑕᒨᐞ ᑳᑕᔑᒫᐗᒋᐃᑎᓂᒡ᙮

114:5b.1CO.114.005 ᓂᑖᒥᓉᑕᒻ ᑲᑭᓇ ᐊᐎᔭ ᐯᐸᑳᓂᑮᔗᐎᓇᓐ ᐋᐸᒋᑑᔦᒃ᙮ ᓇᐗᒡ ᐃᑕᔥ ᓂᑖᒥᓉᑕᒻ ᑲᓅᑕᒪᐌᒃ ᑭᔐᒪᓂᑑ᙮ ᓇᐗᒡ ᐋᓃᔥ ᑭᑕᑭᒫ ᐊᐌ ᑳᑲᓅᑕᒪᐙᒡ ᑭᔐᒪᓂᑑᓐ ᐊᐲᒡ ᐐᓐ ᐊᐊ ᑳᐯᐸᑳᓂᑮᔗᒡ᙮ ᒦ ᐁᑕ ᑫᔑᑭᑖᐸᑎᓯᒡ, ᐃᐃᒫ ᐊᔮᒡ ᐊᐎᔭ ᑫᐊᓂᑲᓅᑕᒫᑫᒡ, ᑲᑭᓇ ᐃᒫ ᑳᑕᔑᒫᐗᒋᐃᑎᐙᒡ ᐅᑌᐺᑕᒨᒃ ᒋᐅᒋᒪᔥᑲᐎᐃᑯᐙᒡ ᐃᐃᐌ ᐃᑭᑐᐎᓐ᙮

114:6b.1CO.114.006 ᐋᓃᓐ, ᓃᒋᐅᑌᐺᑕᒨᒃ! ᐊᐲ ᐅᑎᓯᓇᑰᒃ ᐋᓃᓐ ᑫᐃᓈᐸᑎᓯᔮᐹᓐ ᐸᑳᓂ ᐃᔑᑮᔗᐎᓇᓐ ᐁᑕ ᐃᔑᑮᑭᑐᔮᓐ? ᑮᔥᐱᓐ ᐁᑕ ᐃᔑᑲᓅᓂᓇᑰᒃ ᑭᔐᒪᓂᑑ ᑳᐃᔑᑭᑫᑕᒨᔑᐌᒡ, ᑲᔦ ᑭᑫᒋᑫᐎᓐ ᒦᓂᓇᑰᒃ, ᑲᔦ ᑫᑰᓐ ᑭᔐᒪᓂᑑ ᐃᔑᑲᓅᑕᒪᐗᒃ ᑫᒫ ᑲᔦ ᑫᑰᓐ ᑭᑭᓄᐊᒪᐎᓇᑰᒃ, ᒦ ᐁᑕ ᐃᒫ ᑫᐃᔑᒥᓄᓭᐃᓇᑰᒃ᙮

114:7b.1CO.114.007 ᐃᓇᔥᑫ ᐋᓃᔥ ᑭᑐᒋᑲᓇᒃ ᐁᐱᒫᑎᓯᓯᒀ, ᒫᑭᔖ ᐴᑖᒋᑲᓐ ᑲᔦ ᒪᑗᔮᐲᑭᐱᒋᑲᓐ – ᐅᑲᓂᓯᑖᐎᑖᓐ ᐃᓇ ᐊᐎᔭ ᐃ ᓂᑲᒧᓐ ᓅᐙᒡ ᐃᑯ ᐃᓉᐌᒧᒋᑫᓈᓂᐗᓂᓂᒃ? ᑳᐐᓐ ᐄᑐᒃ᙮

114:8b.1CO.114.008 ᐊᐯ ᑲᔦ ᐁᐊᑕᒦᑳᓱᓈᓂᐗᕽ, ᐊᐊᐌ ᑳᓅᑖᑯᑕᒪᐙᒡ ᔑᒫᑲᓂᔕᐞ, ᑮᔥᐱᓐ ᓅᐙᒡ ᐃᔑᓅᑖᑯᑑᒡ ᐃᐃ ᐴᑖᒋᑲᓐ, ᐊᐌᓀᓇᓐ ᐃᑕᔥ ᑫᑭᑫᑕᒥᓂᐸᓐ ᒋᐗᐌᓃᓂᒡ?

114:9b.1CO.114.009 ᒦ ᐯᔑᑾᓐ ᑫᑮᓇᐙ᙮ ᑮᔥᐱᓐ ᐃᔑᑮᔗᓯᐌᒃ ᒋᐸᑲᑭᑖᑾᒃ, ᐋᑎ ᑫᐅᒋᑭᑫᒋᑳᑌᑭᐸᓐ ᐃᐃᐌ ᑳᐃᑭᑐᔦᒃ? ᐊᓂᔖ ᑭᑲᒥᒋᑲᑭᑐᒻ᙮

114:10b.1CO.114.010 ᐹᑏᓇᑎᓄᑐᑫᓇᓐ ᐃᔑᑮᔗᐎᓇᓐ ᐅᐅᒫ ᐊᑮᕽ᙮ ᑳᐐᓐ ᐊᐙᒡ ᐯᔑᒃ ᐃᔑᑮᔗᐎᓐ ᐊᓂᔖ ᐃᓉᒪᑲᓯᓅᓐ᙮

114:11b.1CO.114.011 ᑮᔥᐱᓐ ᐃᑕᔥ ᑭᑫᑕᓯᐙᓐ ᐃᔑᑮᔗᐎᓐ, ᓂᑲᒪᔭᑭᑕᐙ ᐊᐌ ᑳᐃᔑᑮᔗᒡ, ᔑᑾ ᑫᐐᓐ ᓂᑲᒪᔭᑭᑖᒃ᙮

114:12b.1CO.114.012 ᑮᓇᐙ ᑕᔥ ᐁᐋᑯ ᐊᑕᐌᑕᒣᒃ ᐊᒑᑯᐎ ᒦᓂᑰᐎᓇᓐ, ᒦᐗᓂᓂ ᒫᐗᒡ ᑲᑴᓇᑲᒋᑑᒃ ᐃᓂ ᒦᓂᑰᐎᓯᐎᓇᓐ ᐊᐗᔑᒣ ᑫᐅᒋᒥᓄᓭᐃᑯᐙᒡ ᑲᑭᓇ ᐅᑌᐺᑕᒨᒃ ᐃᐃᒫ ᑳᒫᐗᒋᐊᓇᒥᐋᐙᒡ᙮

114:13b.1CO.114.013 ᒦᑕᔥ ᐃᐃ ᐊᐌᓀᓐ ᓀᑖ ᐋᐸᒋᑑᒡ ᐸᑳᓐ ᐃᔑᑮᔗᐎᓐ ᐅᑲᑲᑴᒋᒫᓐ ᑭᔐᒪᓂᑑᓐ ᒋᒦᓂᑯᒡ ᒋᐋᓂᑲᓅᑕᒫᓱᒡ᙮

114:14b.1CO.114.014 ᑮᔥᐱᓐ ᐋᓃᔥ ᐃᔑᐊᓇᒥᐋᔮᓐ ᐸᑳᓐ ᐃᔑᑮᔗᐎᓂᕽ, ᓂᑕᒑᑯᕽ ᐄᓴᓐ ᓂᑐᒋᐊᓇᒥᐋ᙮ ᑳᐐᓐ ᐃᐃᒫ ᑳᔑᓈᑲᑕᐌᑕᒫᓐ ᐃᔑᐐᒋᐃᐌᒪᑲᓯᓅᓐ᙮

114:15b.1CO.114.015 ᐅᐅ ᑕᔥ ᐃᔑᓭᒃ, ᐋᓃᓐ ᑫᐃᔑᒋᑫᔮᓐ? ᓂᑕᒑᑯᕽ ᓂᑲᐅᒋᐊᓇᒥᐋ, ᑲᔦ ᓴ ᑯ ᑳᔑᓈᑲᑕᐌᑕᒫᓐ ᓂᑲᐅᒋᐊᓇᒥᐋ᙮ ᓂᑕᒑᑯᕽ ᓂᑲᐅᒋᓂᑲᒻ, ᐃᒫᔥ ᑲᔦ ᑳᔑᓈᑲᑕᐌᑕᒫᓐ ᓂᑲᐅᒋᓂᑲᒻ᙮

114:16b.1CO.114.016 ᑮᔥᐱᓐ ᐃᑕᔥ ᑭᑕᒑᑯᕽ ᐁᑕ ᐅᒋᓇᓈᑯᒪᒡ ᐊᐊ ᑭᔐᒪᓂᑑ, ᐲᑎᑫᒡ ᐃᑕᔥ ᐊᐎᔭ ᑳᐐᒋ ᐃᓀᑖᑯᓰᒥᓯᓄᐌᒃ, ᐋᓃᓐ ᑫᔑᓇᑯᑕᕽ ᐁᒣᓐ ᒋᐃᑭᑐᒡ? ᑳᐐᓐ ᐋᓃᔥ ᐅᑭᑫᑕᓰᓐ ᐃᐃ ᑳᐃᑭᑐᐎᓐᒡ᙮

114:17b.1CO.114.017 ᐋᓇᐐᓐ ᐁᑌᐅᓂᔑᔑᕽ ᑭᓇᓈᑯᒥᐌᐎᓐ, ᑳᐐᓐ ᑲᓇᑫ ᐅᒥᓄᓭᐃᑯᓰᓐ ᐊᐊᐌ ᑳᑭᑫᑕᓯᒃ᙮

114:18b.1CO.114.018 ᓃᓐ ᐃᑯ ᓂᓇᓈᑯᒫ ᑭᔐᒪᓂᑑ, ᐊᐌᓀᓐ ᐃᑯ ᑳᑕᔑᔦᒃ ᐯᐸᑳᓂ ᐃᔑᑮᔗᐎᓇᓐ ᐁᔑᐋᐸᒋᑑᒡ, ᓇᐗᒡ ᓃᓐ ᓃᐱᐗᐞ ᓂᑎᔑᑮᔗ᙮

114:19b.1CO.114.019 ᐊᐲᔥ ᐁᒫᐗᒋᐃᑎᓈᓂᐗᕽ, ᓇᐗᒡ ᓂᑖᐃᓀᑕᒻ ᓈᓇᓐ ᒋᐋᐸᒋᑑᔮᓐ ᐃᑭᑐᐎᓇᓐ ᑫᐃᔑᓂᓯᑐᑖᑾᑭᓐ, ᐸᑳᓐ ᐊᐎᔭ ᒋᑭᑭᓄᐊᒪᐗᒀ, ᐊᐲᒡ ᐐᓐ ᒥᑖᒋᕽ ᒥᑖᔂᒃ ᑕᓯᑭᓐ ᓂᑎᑭᑐᐎᓇᓐ ᐁᒪᔭᑭᑮᔗᔮᓐ᙮

114:20b.1CO.114.020 ᓃᒋᐅᑌᐺᑕᒨᒃ, ᑫᑯ ᐃᐌ ᐊᐱᓅᒌᐎ ᐃᓀᑕᒧᐎᓐ ᐃᔑᐋᐸᒋᑑᑫᒃ᙮ ᒦ ᐅᐌ ᑕᔥ ᐁᑕ ᒋᑲᑴᐃᔑᐊᔮᔦᒃ ᐅᔥᑲᐱᓅᒌᔑᕽ, ᒋᒪᓈᑭᑫᑕᒣᒃ ᑳᒫᔑᓈᑾᑭᓐ᙮ ᑭᓈᑲᑕᐌᒋᑲᓂᐙᕽ ᐃᑕᔥ ᑖᐱᔥᑰ ᑳᑮᔖᐯᐎᒡ ᐃᔑᐊᔮᔪᒃ᙮

114:21b.1CO.114.021 ᑫᑌᑭᒋᐅᔑᐲᐃᑫᐎᓂᕽ ᐃᔑᐲᐃᑳᑌ ᐅᐅᐌ: ᑳᑎᐯᒋᑫᒡ ᐃᑭᑐ: ᑳᒪᔭᑭᑮᔗᐙᒡ ᓂᑲᐊᓅᓈᒃ ᒋᑲᓅᓈᐙᒡ ᓂᐱᒫᑎᓰᒪᐞ᙮ ᒥᓴᐙ ᐲᐎᑌᒃ ᐅᑑᓂᐙᕽ ᓂᑲᐃᔑᑲᓅᓈᒃ ᐅᑯ ᓂᐱᒫᑎᓰᒪᒃ, ᑫᔮᐱ ᑕᔥ ᑳᐐᓐ ᓂᑲᐱᓯᑖᑯᓰᒃ, ᐃᑭᑐ᙮

114:22b.1CO.114.022 ᒦᑕᔥ ᐅᐅᐌ ᐃᔑᒦᓂᑰᐎᓯᐎᓐ ᐯᐸᑳᓂᑮᔗᐎᓇᓐ ᐁᐋᐸᑕᑭᓐ ᐁᓅᑖᑾᑭᓐ, ᑕᐅᒋᑭᑫᓂᑎᓱᐗᒃ ᐃᑭ ᑳᐅᑌᐺᑕᒧᐎᓂᓯᒀ ᐁᑎᓄᐎᐙᒡ᙮ ᑳᐐᓐ ᐐᓐ ᐃᓈᐸᑕᓯᓅᓐ ᐅᑌᐺᑕᒨᒃ ᒋᑭᑫᓂᑎᓱᐙᒡ᙮ ᐃᐃᐌ ᑕᔥ ᐃᔑᒦᓂᑰᐎᓯᐎᓐ ᑭᔐᒪᓂᑑ ᐁᑲᓅᑕᒪᐙᒡ ᐊᐎᔭ, ᒦ ᐃᒫ ᑕᐅᒋᑭᑫᓂᑎᓱᐗᒃ ᐅᑌᐺᑕᒨᒃ, ᐃᔑᑲᓅᓂᑣ᙮ ᑳᐐᓐ ᐐᓐ ᐃᐃᒫ ᑳᐅᑌᐺᑕᒧᐎᓂᓯᒀ ᑕᐅᒋᑭᑫᓂᑎᓱᓰᐗᒃ᙮

114:23b.1CO.114.023 ᒦᑕᔥ ᑮᔥᐱᓐ ᑲᑭᓇ ᐁᒫᐗᑑᐲᑎᑫᐙᒡ ᐅᑌᐺᑕᒨᒃ, ᑲᑭᓇ ᑕᔥ ᑕᔑᐯᐸᑳᓂᑮᔗᐙᒡ, ᑮᔥᐱᓐ ᐃᑕᔥ ᐅᒋᐲᑎᑫᐙᒡ ᐋᓂᑕ ᐃᑭᐌᓂᐗᒃ ᐁᑳ ᒪᔑ ᐁᐐᒋ ᐃᓀᑖᑯᓰᒥᓯᓄᐌᒀ ᑫᒫ ᑲᔦ ᑳᐅᑌᐺᑕᒧᐎᓂᓯᒀ, ᑳᐐᓐ ᐃᓇ ᑮᐗᔥᑴᔮᑎᓯᐗᒃ ᑭᑖᐃᑯᓰᐙᒃ?

114:24b.1CO.114.024 ᑮᔥᐱᓐ ᐃᑕᔥ ᑲᑭᓇ ᐅᒋᑲᓅᑕᒪᐙᐙᒡ ᑭᔐᒪᓂᑑᓐ ᐅᑎᑭᑐᐎᓂᓃᕽ, ᒦᔥ ᐊᐲ ᐁᐲᑎᑫᒡ ᐊᐎᔭ ᐁᑳ ᒪᔑ ᑳᐐᒋ ᐃᓀᑖᑯᓰᒥᐌᓯᒃ ᑫᒫ ᑲᔦ ᑳᐅᑌᐺᑕᒧᐎᓂᓯᒃ, ᐅᑲᒪᒦᑾᐅᑯᓐ ᐃᐃᐌ ᑳᓅᑕᕽ, ᐃᐃᐌᓂ ᑕᔥ ᑲᑭᓇ ᑳᐃᑭᑐᓂᒡ ᑾᔭᒃ ᐅᑲᐙᐸᑕᐃᑯᓐ ᐋᓃᓐ ᑳᐃᓈᑎᓯᒡ᙮

114:25b.1CO.114.025 ᐃᐃᐌᓂ ᑳᑮᑳᑑᐸᓐ ᐅᑎᓀᑕᒧᐎᓐ ᒧᔐᐊᔭᐄ ᑕᐃᔑᓯᒋᑳᑌᓂ᙮ ᑕᐊᓂᒥᑯᑖ, ᐅᑲᑭᒋ ᐃᓀᓂᒫᓐ ᐃᑕᔥ ᑭᔐᒪᓂᑑᓐ, ᑲᔦ ᑭᑲᐃᓈᒋᒥᑯᐙ ᑌᐺ ᐁᐐᒌᐎᓀᒃ ᑭᔐᒪᓂᑑ᙮

114:26b.1CO.114.026 ᐋᓃᓐ ᐃᑕᔥ, ᓃᒋᐅᑌᐺᑕᒨᒃ? ᐊᐲ ᐙᒫᐗᒋᐃᑎᔦᒃ ᐯᔑᒃ ᐅᑕᔮᓐ ᓂᑲᒧᐎᓐ, ᔑᑾ ᐯᔑᒃ ᐅᑕᔮᓐ ᑭᑭᓄᐊᒫᑫᐎᓐ, ᔑᑾ ᑲᔦ ᐯᔑᒃ ᐅᑭᑫᑕᒧᐃᑰᓐ ᑭᔐᒪᓂᑑᓐ ᒋᐐᑕᒫᑫᒡ᙮ ᔑᑾ ᐯᔑᒃ ᐸᑳᓐ ᐃᔑᑮᔗᐎᓐ ᐃᔑᒦᓈ, ᒦᓇᐙᔥ ᐊᐊ ᐯᔑᒃ ᐅᑖᓂᑲᓅᑕᒪᐙᓐ ᐃᓂ ᐸᑳᓐ ᑳᐃᔑᑮᔗᓂᒡ᙮ ᒦ ᑯ ᐃ ᑲᑭᓇ ᑕᑑᒋᑳᑌᐗᓐ ᒋᒫᒪᐎ ᒪᔥᑲᐎᑭᐃᑎᔦᒃ᙮

114:27b.1CO.114.027 ᑮᔥᐱᓐ ᐊᐎᔭᒃ ᐐᐸᑳᓂᑮᔗᐙᒡ, ᒫᑭᔖ ᓃᔑᓐ ᒫᑭᔖ ᑲᔦ ᓂᓯᓐ ᐁᑕ ᑕᑲᑭᑐᐗᒃ, ᑳᐐᓐ ᐊᐗᔑᒣ᙮ ᐸᑳᓐ ᐃᑕᔥ ᐃᑯ ᐊᐎᔭ ᐅᑲᐋᓂᑲᓅᑖᓐ ᐃᐌ ᑳᐃᑭᑐᐎᓐᒡ᙮

114:28b.1CO.114.028 ᐊᔮᓯᒃ ᐃᑕᔥ ᐊᐎᔭ ᑫᐋᓂᑲᓅᑕᕽ, ᒫᓄ ᑕᒥᒋᓇᒪᑕᐱ ᐊᐌ ᐸᑳᓂᑮᔗᐎᓐ ᑳᐊᔮᒡ᙮ ᐐᓀᑕ ᑕᑲᓅᓂᑎᓱ ᑲᔦ ᑭᔐᒪᓂᑑᓐ ᐅᑲᑲᓅᓈᓐ᙮

114:29b.1CO.114.029 ᐃᑭᐌᓂᐗᒃ ᐃᑕᔥ ᑳᓂᑖ ᑲᓅᑕᒪᐙᐙᒡ ᑭᔐᒪᓂᑑᓐ ᑕᓃᔑᐗᒃ ᑫᒫ ᑕᓂᓯᐗᒃ ᑫᑲᑭᑐᐙᒡ᙮ ᑯᑕᒃ ᐃᑕᔥ ᐊᐎᔭᒃ ᐅᑲᑲᑴᓯᑖᓈᐙ᙮

114:30b.1CO.114.030 ᐊᐎᔭ ᑕᔥ ᐃᑯ ᐁᒣᑴᓇᒪᑕᐱᒡ, ᑮᔥᐱᓐ ᐅᒋᑭᑫᑕᒧᐃᑯᒡ ᑭᔐᒪᓂᑑᓐ ᑫᑰᓐ ᒋᐐᑕᒫᑫᒡ, ᓃᑳᓐ ᐊᐊ ᑳᑲᑭᑐᒡ ᑕᑭᐱᒋᑲᑭᑐ᙮

114:31b.1CO.114.031 ᑲᑭᓇ ᐯᐯᔑᒃ ᑳᑕᔑᔦᒃ ᑭᑲᐸᑭᑎᓇᒫᑰᒻ ᒋᑲᓅᑕᒪᐌᒃ ᑭᔐᒪᓂᑑ, ᒦᑕᔥ ᐃᐌ ᑲᑭᓇ ᐊᐎᔭ ᒋᐃᔑᑭᑭᓄᐊᒫᑰᐎᓯᒡ ᑲᔦ ᑲᑭᓇ ᒋᐅᒋᒪᔥᑲᐌᑕᒧᐙᒡ᙮

114:32b.1CO.114.032 ᐊᐎᔭ ᑕᔥ ᐃᔑᒦᓂᑰᐎᓯᒡ ᒋᑲᓅᒋᑫᑕᒪᐙᒡ ᑭᔐᒪᓂᑑᓐ, ᐅᑲᑲᔥᑭᑑᓐ ᒋᑎᐯᑕᕽ ᐃᐃ ᐅᑎᔑᒦᓂᑰᐎᓯᐎᓐ ᑾᔭᒃ ᒋ ᐃᓈᐸᒋᑑᒡ᙮

114:33b.1CO.114.033 ᐃᓇᔥᑫ ᑳᐐᓐ ᐃᐌ ᓂᔑᐗᓈᑕᑲᒥᑭᓯᐎᓐ ᐅᑑᔑᑑᓰᓐ ᑭᔐᒪᓂᑑ, ᐃᐃᐌ ᓴ ᒋᓴᑲᑲᒥᑭᓯᕽ᙮ ᒦᓇᐙ ᑕᔥ ᐅᐌ ᐁᔑᒋᑫᐙᒡ ᑭᔐᒪᓂᑑ ᐅᐱᒫᑎᓰᒪᐞ ᐋᑎ ᐱᑯ ᑳᐃᔑᒫᐗᒋᐃᑎᓂᒡ, ᐯᔑᑾᓐ ᑫᑮᓇᐙ ᒋᐃᔑᒋᑫᔦᒃ:

114:34b.1CO.114.034 ᑕᑲ ᑕᑯᔅᒀᐙᑕᐱᐗᒃ ᐃᑭ ᐃᑴᐗᒃ᙮ ᑳᐐᓐ ᑕᐸᑭᑎᓇᒪᐙᓰᐗᒃ ᒋᑲᑭᑐᐙᒡ᙮ ᐃᓈᐗᒃ ᓴ ᐅᑖᓈᕽ ᒋᐃᓀᑖᑯᓯᐃᑎᓱᐙᒡ᙮ ᒦ ᐃᐌ ᐁᔑᓯᕽ ᑭᔐᒪᓂᑑ ᐅᑎᓈᑯᓂᑫᐎᓐ᙮

114:35b.1CO.114.035 ᑮᔥᐱᓐ ᐃᑕᔥ ᑫᑰᓐ ᐐᐊᑕᑭᑫᑕᒧᐙᒡ ᐁᑮᑌᓂᓯᑐᑕᓯᒀ, ᐅᑲᑕᔑᑲᑴᒋᒫᐙᓐ ᐅᓈᐯᒥᐙᓐ ᐹᓂᒫ ᑮᑮᐌᐙᒡ ᐅᐙᑳᐃᑲᓂᐙᕽ᙮ ᐊᑲᒋᐌᑖᑾᓐ ᐃᓴ ᐊᐌ ᐃᑴ ᐁᑲᑭᑐᒡ ᐃᒫ ᐁᑕᔑᒫᐗᒋᐃᑎᕽ᙮

114:36b.1CO.114.036 ᑯᒫ ᑮᓇᐙ ᐁᑕ ᑮᐅᒌᒪᑲᓄᑐᒃ ᐃᐃ ᑭᔐᒪᓂᑑ ᐅᑎᑭᑐᐎᓐ? ᑮᓀᑕᐙ ᓇ ᑭᑮᐱᐅᑎᓯᑯᒻ?

114:37b.1CO.114.037 ᑮᔥᐱᓐ ᐊᐎᔭ ᓃᓐ ᑳᑲᓅᑕᒪᐗᒃ ᑭᔐᒪᓂᑑ ᐁᐃᓀᑕᕽ, ᑯᒫ ᓃᓐ ᓂᑕᒑᑯᐙᑎᔅ ᐃᓀᑕᕽ, ᐅᑖᓂᓯᑖᐎᓈᓇᓐ ᐃᓂ ᓃᓐ ᐌᔑᐲᐊᒪᐎᓇᑰᒃ ᑳᑎᐯᒋᑫᒡ ᐅᑎᓈᑯᓂᑫᐎᓐ ᐁᐋᐗᓂᓂᑭᓐ᙮

114:38b.1CO.114.038 ᑮᔥᐱᓐ ᐃᑕᔥ ᐊᐎᔭ ᐐᓅᑕᓯᒃ ᐅᓄ ᐃᑭᑐᐎᓇᓐ, ᑳᐐᓐ ᑫᐐᓐ ᑕᐱᓯᑕᐙᑲᓂᐎᓰ᙮

114:39b.1CO.114.039 ᑮᓇᐙ ᑕᔥ ᓃᒋᐅᑌᐺᑕᒨᒃ, ᒫᐗᒡ ᒥᓴᐌᑕᒧᒃ ᒋᑲᓅᑕᒪᐌᒃ ᑭᔐᒪᓂᑑ᙮ ᑳᐐᓐ ᑲᔦ ᑭᑲᐅᒋᐋᓯᐙᐙᒃ ᐊᐎᔭᒃ ᒋᐯᐸᑳᓂᑮᔗᓯᒀ᙮

114:40b.1CO.114.040 ᒫᓄ ᓴ ᑲᑭᓇ ᑫᑰᓐ ᑾᔭᒃ ᒋᒥᓄᓈᑾᒃ, ᐊᐸᓀ ᓴ ᑯ ᒋᒥᓄᑑᒋᑳᑌᒃ ᑲᑭᓇ ᑫᑰᓐ᙮

115

115:1b.1CO.115.001 ᓃᒋᐅᑌᐺᑕᒨᒃ, ᑭᐐᐙᐸᑕᐃᓂᓂᒻ ᐋᓃᓐ ᐁᔑᓈᑾᒃ ᐃᐃ ᒥᓍᒋᒧᐎᓐ, ᒦ ᐃᐌ ᓂᑕᒻ ᑳᑮ ᑲᑮᑭᒥᓇᑰᑭᐸᓐ ᑲᔦ ᑳᑮᐅᑖᐱᓇᒣᒃ, ᐊᒦ ᐃᒫ ᐁᑕᔑᒪᔥᑲᐎᑳᐸᐎᔦᒃ᙮

115:2b.1CO.115.002 ᒦ ᓴ ᐅ ᒥᓍᒋᒧᐎᓐ ᑳᐱᒥᐅᒌᒪᑲᒃ ᒋᐱᒫᒋᐃᑰᔦᒃ ᑮᔥᐱᓐ ᓀᐱᒡ ᐃᑯ ᑭᒋᐎᓇᒣᒃ᙮ ᑮᔥᐱᓐ ᐃᑕᔥ ᑫᑰᓐ ᐃᓈᐸᑕᓯᓄᒃ ᑳᑮᐱᑌᐺᑕᒣᒃ ᑳᐐᓐ ᑭᑲᐱᒫᒋᐃᑰᓰᒻ᙮

115:3b.1CO.115.003 ᐃᐃᐌ ᓴ ᑕᔥ ᑳᒫᐗᒋ ᓃᑳᓀᑖᑾᒃ ᑳᑮᒦᓂᑰᔮᓐ, ᑫᑮᓇᐙ ᑭᑮᐊᓂᐐᑕᒪᐎᓂᓂᒻ᙮ ᒦ ᐅᐌ ᐁᐃᑭᑑᒪᑲᒃ: ᐊᐊ X ᐁᑮᐃᔑᓂᐳᒡ ᐅᒋ ᑭᒪᒋᑑᑕᒧᐎᓂᓈᓂᓐ, ᒦ ᐃᐌ ᓃᔮᒃ ᑳᑮᐃᔑᐲᐃᑳᑌᒃ ᑫᑌᒪᓯᓇᐃᑲᓐ᙮

115:4b.1CO.115.004 ᔑᑾ ᐃᐃ ᐁᑮᓇᐃᓂᓐᒡ, ᐁᑮᓂᓱᑮᔑᑾᑳᓂᒃ ᐃᑕᔥ ᐁᑮᑮᐌᐱᒫᑎᓯᐃᓐᒡ ᒪᔮ ᐁᑮᐊᓂ ᐃᔑᓭᒃ ᐃᐃ ᓃᔮᒃ ᑳᑮᐃᔑᐲᐃᑳᑌᒃ ᑫᑌᒪᓯᓇᐃᑲᓐ᙮

115:5b.1CO.115.005 ᔑᑾ ᐁᑮᐙᐸᒥᑯᒡ ᐃᓂ ᐲᑕᕒᐆᓐ, ᒦᑕᔥ ᑲᔦ ᑯᑕᒃ ᐃᐃᐌᓂᐗᐞ ᒥᑖᔑᓃᔑᓐ ᑳᑮᐃᓂᒥᓐᒡ ᐅᑮᐙᐸᒥᑰᐞ᙮

115:6b.1CO.115.006 ᒦᔥ ᐃᐃ ᐹᓂᒫ ᓈᑫ ᓈᓍᒃ ᐊᐗᔑᒣ ᐅᑮᐙᐸᒥᑰᐞ ᐅᑌᐺᑕᒨᐞ, ᐯᔑᑾᓐ ᐃᑯ ᐃᔭᐲ ᐅᑮᐙᐸᒥᑰᐞ᙮ ᑫᑳ ᑲᑭᓇ ᓅᑯᒻ ᑫᔮᐱ ᐱᒫᑎᓯᐗᒃ᙮ ᐋᓂᑕ ᑕᔥ ᐋᔕ ᑮᐃᔥᒀᐱᒫᑎᓯᐗᒃ᙮

115:7b.1CO.115.007 ᒦᓇᐙ ᑕᔥ ᐅᑮᐙᐸᒥᑰᓐ ᐃᓂ ᒌᒥᓴᓐ, ᓈᑫ ᒥᒋᑲᑭᓇ ᐅᑎᔑᓂᔕᐙᑲᓇᐞ᙮

115:8b.1CO.115.008 ᑲᔦ ᓃᓐ ᐃᑕᔥ ᐊᔪᑖᓈᕽ ᓂᑮᐙᐸᒫ, ᓃᓐ ᐋᓇ ᐃᓀᑖᑯᓯᔮᓐ ᐊᐎᔭ ᐁᑾᔭᑯ ᓂᑖᐎᑭᓯᒃ᙮

115:9b.1CO.115.009 ᓃᓐ ᒫᐗᒡ ᐅᑖᓈᕽ ᓂᑎᓀᑖᑯᔅ ᑲᑭᓇ ᐃᑭ ᐁᓇᑭᒥᑣ ᐃᔑᓂᔕᐙᑲᓇᒃ᙮ ᑳᐐᓐ ᓂᑌᐊᐲᑌᑖᑯᓯᓰ ᐃᔑᓂᔕᐙᑲᓐ ᒋᐃᑰᔮᐹᓐ᙮ ᐋᓃᔥ ᓂᑮᑲᒀᑕᑭᐃᒫᐞ ᑭᔐᒪᓂᑑ ᑳᒫᐗᒋᑌᐺᑖᑯᒡ᙮

115:10b.1CO.115.010 ᓂᑮᔕᐌᓂᒥᒃ ᐃᑕᔥ ᑭᔐᒪᓂᑑ, ᐁᐅᒋ ᐃᔑᐊᔮᔮᓐ ᓅᑯᒻ ᐁᓈᑎᓯᔮᓐ᙮ ᐃᐃᐌ ᑕᔥ ᐅᔕᐌᒋᑫᐎᓐ ᑳᒦᓂᑰᔮᓐ ᑳᐐᓐ ᑲᓇᑫ ᑮᐋᓇᐌᐗᓯᓅᓐ᙮ ᐊᐗᔑᒣ ᓂᑮᑭᒋᐊᓄᑮ ᐊᐲᒡ ᐐᓐ ᑲᑭᓇ ᐯᑳᓂᓯᐙᒡ ᐃᔑᓂᔕᐙᑲᓇᒃ᙮ ᐋᓇᐐᓐ ᑳᐐᓐ ᓃᓐ ᑎᐱᓇᐌ ᑌᐺ ᓂᑮᐊᓄᑮᓰ, ᐃᐃᐌ ᓴ ᐐᓐ ᑭᔐᒪᓂᑑ ᐅᔕᐌᒋᑫᐎᓐ ᑮᐊᓄᑮᒪᑲᓂᓂ ᐁᐐᑑᑳᑯᔮᓐ᙮

115:11b.1CO.115.011 ᒦ ᓴ ᑕᔥ ᐅᐅᐌ, ᐊᐌᓀᓐ ᐃᑯ ᐌᒋᓅᑕᒧᐌᒃ ᒥᓍᒋᒧᐎᓐ, ᑫᒫ ᓃᓐ ᐋᐎᔮᓐ, ᑫᒫ ᐐᓇᐙ ᐸᑳᓐ ᐃᔑᓂᔕᐙᑲᓇᒃ, ᒦᐗᓂᓂ ᐯᔑᑾᓐ ᐁᔑᑲᑮᑴᓄᑕᒫᕽ᙮ ᒦ ᐃᐌ ᒪᔮ ᑳᑌᐺᑕᒣᒃ᙮

115:12b.1CO.115.012 ᒦᑕᔥ ᐃᐃ ᓂᑎᓈᒋᒧᐎᓂᓈᓐ ᐁᔑᓯᕽ, X ᐁᑮᑮᐌᐱᒫᑎᓯᐃᓐᒡ ᐅᒋ ᓂᐳᐎᓂᕽ᙮ ᐋᓃᔛᓐ ᐋᓂᑕ ᑮᓇᐙ ᐌᒋ ᐃᑭᑐᔦᒃ ᐁᐊᔮᒪᑲᓯᓄᒃ ᒋᑮᐌᐱᒫᑎᓯᕽ ᐅᒋ ᓂᐳᐎᓂᕽ, ᐋᔕ ᐅᔕ ᐁᑮᑲᔥᑭᑑᒡ X?

115:13b.1CO.115.013 ᑮᔥᐱᓐ ᐊᔮᒪᑲᓯᓄᑭᐸᓐ ᒋᑮᐌᐱᒫᑎᓯᕽ ᐅᒋ ᓂᐳᐎᓂᕽ, ᒦ ᐃ ᑫᐐᓐ X ᒋᑮᑮᐌᐱᒫᑎᓯᓯᑭᐸᓐ᙮

115:14b.1CO.115.014 ᑮᔥᐱᓐ ᐃᑕᔥ X ᑮᑮᐌᐱᒫᑎᓯᓯᑭᐸᓐ, ᑳᐐᓐ ᑫᑰᓐ ᑖᑮᐃᓈᐸᑕᓯᓅᓐ ᓂᑲᑮᑴᐎᓂᓈᓐ, ᑭᑌᐺᑕᒧᐎᓂᐙ ᑲᔦ᙮

115:15b.1CO.115.015 ᑲᔦ ᓴ ᑕᔥ, ᐅᑲᑮᓇᐎᔥᑳᒋᒨᒃ ᓂᑖᐃᔑᓈᑯᓯᒥᓐ, ᐋᓃᔥ ᓂᑮᐃᓈᓈᓐ ᑭᔐᒪᓂᑑ ᐁᑮᑮᐌᐱᒫᑎᓯᐋᒡ Xᑕᓐ᙮ ᑮᔥᐱᓐ ᐃᑕᔥ ᑌᐺᐎᓂᐗᑭᐸᓐ ᐁᑳ ᐊᐎᔭ ᒋᑮᐌᐱᒫᑎᓯᓯᒃ, ᑳᐐᓐ ᐄᓴᓐ ᑫᐐᓐ ᑭᔐᒪᓂᑑ ᐅᑮᑮᐌᐱᒫᑎᓯᐋᓰᓐ ᐃᓂ Xᑕᓐ᙮

115:16b.1CO.115.016 ᐃᓇᔥᑫ ᓴ ᑮᔥᐱᓐ ᑮᐌᐱᒫᑎᓯᐋᓯᐎᑣ ᐃᑭ ᑳᐃᔥᒀᐱᒫᑎᓯᐙᒡ, ᑳᐐᓐ ᐄᓴᓐ ᑲᔦ ᐐᓐ X ᑖᑮᑮᐌᐱᒫᑎᓯᐋᓰ᙮

115:17b.1CO.115.017 ᑮᔥᐱᓐ ᐃᑕᔥ X ᑳᑮᐌᐱᒫᑎᓯᐋᓯᐎᑎᐸᓀᓐ, ᑳᐐᓐ ᐊᐙᒡ ᑫᑰᓐ ᐃᓈᐸᑕᓯᓅᓐ ᑭᑌᐺᑕᒧᐎᓂᐙ᙮ ᑫᔮᐱ ᐄᓴᓐ ᐃᒫ ᑭᑕᔮᒻ ᑭᒪᒋ ᐃᔑᐌᐱᓯᐎᓂᐙᕽ᙮

115:18b.1CO.115.018 ᒦ ᓴ ᐃᐌ ᑲᔦ ᑫᐃᔑᓈᑾᑭᐸᓐ, ᐃᑭ ᑳᑮᐊᐱᓂᐳᐙᒡ Xᑕᓐ ᐋᓇᑮᑌᐺᑕᐙᐙᒡ, ᐋᔕ ᐁᑮᓂᔑᐗᓈᑎᓯᐙᒡ᙮

115:19b.1CO.115.019 ᑮᔥᐱᓐ ᐅᒫ ᐱᒫᑎᓯᐎᓂᕽ ᐁᑕ ᐃᔑᐐᒋᐃᑯᐗᑴᓐ ᐁᐊᐯᓂᒧᓄᑕᐗᕽ X, ᒦᐃ ᑮᓇᐎᓐᑦ ᐊᐗᔑᒣ ᒋᐃᔑᑰᐹᑌᑖᑯᓯᔭᑭᐸᓐ ᐊᐲᒡ ᐐᓐ ᑲᑭᓇ ᐊᐎᔭ᙮

115:20b.1CO.115.020 ᑌᐺ ᑕᔥ ᑮᐅᒋᑮᐌᐱᒫᑎᓯᐋ ᓂᐳᐎᓂᕽ ᐊᐊ X! ᒦᑕᔥ ᐃᐃᒫ ᒋᐅᒋᐋᔩᒋᑭᑫᑖᑾᒃ ᒦᓇᐙ ᒋᑮᐌᐱᒫᑎᓯᐙᒡ ᑳᑮᐃᔥᒀᐱᒫᑎᓯᐙᒡ᙮

115:21b.1CO.115.021 ᐃᓇᔥᑫ ᐋᓃᔥ ᐃᐃᒫ ᑳᐊᔨᔑᒋᑫᑯᐸᓀᓐ ᐊᐊ ᐯᔑᒃ ᐃᓂᓂ, ᐊᒦ ᐃᒫ ᑳᐅᒌᒪᑲᓂᓂᒃ ᐃᐃ ᓂᐳᐎᓐ, ᐊᐊ ᑕᔥ ᐐᓐ ᑯᑕᒃ ᐃᓂᓂ ᑳᑮᐃᔑᒋᑫᒡ, ᒦ ᐃᒫ ᐌᒌᒪᑲᒃ ᒋᐅᒋᑮᐌᐱᒫᑎᓯᐃᑰᔭᕽ ᓂᐳᐎᓂᕽ᙮

115:22b.1CO.115.022 ᐃᐃᒫ ᓴ ᐋᑕᒥᕽ ᐁᐅᑕᑳᓀᓯᐙᒡ, ᒦ ᐃᒫ ᐌᒋᓂᐳᐙᒡ ᑲᑭᓇ ᐊᐎᔭᒃ᙮ ᒦ ᐯᔑᑾᓐ ᐁᐐᒌᐎᑯᐙᒡ Xᑕᓐ, ᒦ ᐃᒫ ᑲᑭᓇ ᑫᐅᒋᒦᓂᑣ ᐱᒫᑎᓯᐎᓐ᙮

115:23b.1CO.115.023 ᑾᔭᒃ ᐃᑕᔥ ᐃᑯ ᑕ ᐊᓂᑮᐌᐱᒫᑎᓯᐗᒃ: ᐊᐊᐌ X ᒫᐗᒡ ᓂᑕᒻ ᑮᑮᐌᐱᒫᑎᓯ᙮ ᐹᓂᒫᔥ ᒦᓇᐙ ᑕᑶᔑᕽ, ᒦᐗᐞ ᐃᐃᐌᓂᐗᐞ ᑫᓂᑮᐌᐱᒫᑎᓯᓂᒡ X ᑳᑎᐯᓂᒫᒡ᙮

115:24b.1CO.115.024 ᒦᑕᔥ ᐃᐃ ᐊᐲ ᑕᐊᓂᐌᒀᔥᑳᒪᑲᓐ ᑲᑭᓇ ᑫᑰᓐ᙮ ᐊᑲᐌ ᑲᑭᓇ X ᐅᑲᔖᑰᒋᐋᐞ ᐃᓂᐌᓂᐗᐞ ᑳᐅᑭᒫᐌᑖᑯᓯᓂᒡ ᑲᔦ ᑳᑲᔥᑭᐁᐎᓯᓂᒡ ᑲᔦ ᑳᒪᔥᑲᐌᑖᑯᓯᓂᒡ᙮ ᒦ ᐊᐲ ᐅᑎᐯᒋᑫᐎᓐ ᒋᒦᓈᒡ ᐃᓂ ᑭᔐᒪᓂᑑᓐ ᐌᔫᓯᒥᒥᓐᒡ᙮

115:25b.1CO.115.025 ᐐᓐ ᐃᓴ X ᐊᑕᐌᑖᑯᓯ ᒋᐅᑭᒫᐎᒡ ᐲᓂᔥ ᐃᑯ ᑲᑭᓇ ᑭᔐᒪᓂᑑᓐ ᑳᒑᑭᔖᑰᒋᑕᒫᑯᒡ ᐃᐃ ᑳᒦᑳᓂᑯᒡ᙮

115:26b.1CO.115.026 ᐃᐃᐌ ᑕᔥ ᐃᔥᒀᒡ ᒥᓯᐌ ᑫᔖᑰᒋᐋᑲᓂᐎᒡ ᑳᒦᑳᓱᒡ, ᒦ ᓴ ᐊᐌ ᓂᐳᐎᓐ᙮

115:27b.1CO.115.027 ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ ᐊᐊ X ᐁᑕᔑᒥᓐᒡ: ᑲᑭᓇ ᑫᑰᓐ ᒋᐊᐱᓯᑌᐱᒡ ᒋᑎᐯᑕᕽ ᐁᑮᐃᔑᑕᒫᑯᒡ ᑭᔐᒪᓂᑑᓐ᙮ ᐃᐃᐌ ᑕᔥ ᑳᐃᑭᑑᒪᑲᒃ: ᑲᑭᓇ ᑫᑰᓐ ᒋᑎᐯᑕᕽ ᐁᑮᐃᔑᑕᒫᑯᒡ, ᒦ ᐃᒫ ᐁᔑᑭᑫᑖᑾᒃ ᑭᔐᒪᓂᑑ ᐁᑕᑾᑭᒋᑳᓱᓯᒃ ᒋᑎᐯᓂᒥᑯᐸᓐ Xᑕᓐ᙮ ᐐᓐ ᐋᓃᔥ ᑲᑭᓇ ᐅᑕᑕᒪᐙᓐ ᐃᓂ Xᑕᓐ᙮

115:28b.1CO.115.028 ᐹᓂᒫ ᑕᔥ ᑲᑭᓇ ᑫᑰᓐ ᐁᑮᐊᑕᒪᐎᓐᒡ X ᒋᑎᐯᑕᕽ, ᒦ ᐊᐲ ᐊᐊᐌ ᐅᑯᓯᓯᒫ ᑫᐃᓇᓯᑎᓱᒡ ᑭᔐᒪᓂᑑᓐ ᒋᑎᐯᓂᒥᑯᒡ, ᒦᐗᓐ ᐃᓂᐌᓂᐗᓐ ᑳᑮᐊᑕᒫᑯᒡ ᑲᑭᓇ ᑫᑰᓐ ᒋᑎᐯᑕᕽ᙮ ᒦᑕᔥ ᐃᐃ ᐊᐲ ᒥᓯᐌ ᑫᒫᒌᑎᐯᑕᒥᓂᒡ ᑲᑭᓇ ᑫᑰᓐ ᑭᔐᒪᓂᑑᓐ᙮

115:29b.1CO.115.029 ᑮᔥᐱᓐ ᐃᑕᔥ ᐅᐅᐌ ᐁᔑᓭᑴᓐ, ᐋᓃᓐ ᑫᐃᓂᑣ ᐅᑯ ᑳᐃᔑᒋᑫᐙᒡ ᑳᐅᒋᓰᑲᐊᑖᑎᐙᒡ ᐃᐃ ᑳᑮᓂᐳᓂᒡ ᐁᑲᑴᐐᒋᐋᐙᒡ? ᐋᓃᓐ ᐃᑕᔥ ᐃᓈ ᐁᓍᑕᒧᐙᒡ? ᐅᐅ ᑕᔥ ᐃᔑᓭᑭᐸᓐ ᐃᑭ ᑳᑮᓂᐳᐙᒡ ᒦᓇᐙ ᒋᐱᒫᑎᓯᓯᒀᐸᓐ, ᐋᓃᓐ ᐁᓀᑕᒧᐙᒡ ᑳᐅᒋᓰᑲᐊᑖᑎᐙᒡ ᐃᐃ ᓀᐳᓂᒡ?

115:30b.1CO.115.030 ᑲᔦ ᓃᓇᐎᓐᑦ, ᐋᓃᔥ ᐌᒋᑑᑕᒫᕽ ᐁᑕᓱᑎᐸᐃᑲᓐ ᐁᓇᓃᓵᓂᐃᑎᓱᔮᕽ ᓂᔑᐗᓈᑎᓯᐎᓂᕽ?

115:31b.1CO.115.031 ᓃᒋᐅᑌᐺᑕᒨᒃ, ᐁᑕᓱᑮᔑᒃ ᓂᐯᔣᐸᑖᓐ ᐃᐃ ᓂᐳᐎᓐ᙮ ᐃᓇᔥᑫ ᓴ ᐐᑫ ᑭᑭᒋ ᐃᓀᓂᒥᓂᓂᒻ ᐃᐃᒫ ᐁᐅᒌᒪᑲᒃ ᐁᐐᒌᐎᓇᕽ ᐊᐊ X ᒋᓴᔅ ᑳᑎᐯᓂᒥᓇᕽ, ᒦ ᐃᐌ ᐁᓇᒪᒋᐅᔥᑳᑯᔮᓐ ᒋᐐᑕᒪᐎᓇᑰᒃ᙮

115:32b.1CO.115.032 ᐃᐃᐌ ᓴ ᑯ ᐁᑮᐱᒦᑳᓇᒀ ᐱᑾᒋᐊᔭᐋᐎᔕᒃ ᑳᐃᓀᑖᑯᓯᐙᒡ ᐅᐅᒫ ᐁᐱᓴᓯᕽ, ᑮᔥᐱᓐ ᐃᓂᓃᓈᕽ ᐁᑕ ᐅᑎᓇᒫᓐ ᓂᑎᓇᒪᒋᐅᐎᓐ ᐃᔑᐱᒫᑎᓯᔮᓐ, ᑳᐐᓐ ᐊᐙᒡ ᑫᑰᓐ ᓂᑖᐃᓈᐸᒋᑑᓰᓐ᙮ ᑮᔥᐱᓐ ᑮᐌᐱᒫᑎᓯᐋᓯᐎᑣ ᑳᑮᐃᔥᒀᐱᒫᑎᓯᐙᒡ, ᒦᓴ ᐃᑕᐙ ᐃᔑᒋᑫᑖ ᐁᓀᑳᒥ ᐃᑭᑐᕽ: ᐊᐤ ᐐᓯᓂᑖ, ᒥᓂᑴᑖ, ᒥᓴᐙ ᐅᔕ ᑭᑲᓂᐳᒥᓐ!

115:33b.1CO.115.033 ᑫᑯ ᐗᔦᔑᑎᓱᑫᒃ᙮ ᐋᓇ ᒥᓄᐃᔑᐌᐱᓯᔭᓐ, ᒪᒋ ᐃᔑᐌᐱᓯᐙᒡ ᐃᑕᔥ ᑳᐐᑑᑲᐗᑣ, ᑭᑲᓂᔑᐗᓈᒋᐃᑯᓐ᙮

115:34b.1CO.115.034 ᑾᔭᒃ ᐃᑯ ᒨᑫᑕᒧᒃ, ᐴᓂᑑᒃ ᑭᒪᒋ ᐃᔑᐌᐱᓯᐎᓂᐙᓐ᙮ ᐃᓇᔥᑫ ᒋᐊᑲᒋᐌᑕᒣᒃ ᐅᐅ ᑳᐐᑕᒪᐎᓇᑰᒃ: ᐋᓂᑕ ᑳᐐᓐ ᑭᑭᑫᓂᒫᓯᐙᐙ ᑭᔐᒪᓂᑑ᙮

115:35b.1CO.115.035 ᐊᐎᔭ ᑕᔥ ᑕᐃᑭᑐ: ᐋᓃᓐ ᐃᑕᔥ ᑫᑮᐃᔑ ᑮᐌᐱᒫᑎᓯᐃᑣᐸᓐ ᐃᑭᐌᓂᐗᒃ ᓀᐳᐙᒡ? ᐋᓃᓐ ᐃᑕᔥ ᑫᔑᐐᔭᐌᐙᒡ ᐊᐲ ᑮᔥᐱᓐ ᑌᐺ ᑮᐌᐱᒫᑎᓯᐙᒡ?

115:36b.1CO.115.036 ᑮᓐ ᑫᑮᐹᑎᓯᔭᓐ, ᓂᑖᐃᓈ᙮ ᐃᐃ ᓴ ᐐᓐ ᑫᑎᑳᑕᒪᓐ, ᑳᐐᓐ ᑕᐱᒫᑎᓰᑲᑌᓯᓅᓐ, ᐹᓂᒫ ᐁᑕ ᑮᓂᑾᐃᑳᑌᒃ ᐁᓂᐴᒪᑲᒃ ᐁᐃᔑᓈᑾᒃ᙮

115:37b.1CO.115.037 ᐃᐃᐌ ᓴ ᑳᑭᑎᑳᑕᒪᓐ ᑳᐐᓐ ᐃᐃᐌ ᐁᑮᔑᑭᒃ ᑳᐃᔑᓈᑾᒃ ᑭᑖ ᓂᒀᐗᑲᐊᓰᓐ, ᑭᑎᑳᓀᔅ ᐅᔕ ᐁᑕ ᑭᐸᑭᑎᓈᓐ, ᒫᑭᔖ ᐸᑴᔑᑲᓐ ᐁᑭᑎᑳᓀᓯᐎᒡ, ᒫᑭᔖ ᑲᔦ ᐸᑳᓐ ᑳᑎᓄᐗᕽ᙮

115:38b.1CO.115.038 ᑭᔐᒪᓂᑑ ᐅᑎᓇᑑᓐ ᐃᐃ ᑭᑎᑳᓀᔅ ᑫᔑᐐᔭᐐᒪᑲᒃ ᐋᓃᓂᑯ ᑳᐃᓀᑕᕽ᙮ ᐁᑕᓯᕽ ᓴ ᑯ ᑭᑎᑳᓀᔅ ᐃᔑᐐᔭᐎᐗᓐ ᒪᔮ ᐁᑎᓄᐗᕽ᙮

115:39b.1CO.115.039 ᔑᑾ ᑲᔦ ᑳᐐᔮᓯᐎᐙᒡ, ᑳᐐᓐ ᐯᔑᑾᓐ ᑲᑭᓇ ᐃᔑᐐᔮᓯᐎᓰᐗᒃ᙮ ᐊᐊᐌ ᓴ ᑯ ᐃᓂᓂ ᐐᓐ ᐁᑎᓄᐎᒡ ᐃᔑᐐᔮᓯᐎ᙮ ᐃᑭᔥ ᑲᔦ ᐊᔭᐋᐎᔕᒃ ᐸᑳᓐ ᐃᔑᐐᔮᓯᐎᐗᒃ᙮ ᑲᔦ ᐱᓀᔒᔕᒃ ᐸᑳᓐ ᑫᐐᓇᐙ ᐃᔑᐐᔮᓯᐎᐗᒃ᙮ ᐃᑭ ᑕᔥ ᑲᔦ ᑭᓅᔐᒃ ᐸᑳᓐ ᑫᐐᓇᐙ ᑎᓄᐎᐗᒃ ᐁᐅᔅᑲᐎᐎᐙᒡ᙮

115:40b.1CO.115.040 ᐊᔮᒪᑲᓅᓐ ᑕᔥ ᑲᔦ ᑮᔑᑯᕽ ᑳᑎᓄᐗᑭᓐ ᐐᔭᐎᐗᓐ ᑳᑕᔑᐱᒫᑎᓯᐙᒡ ᑲᔦ ᐊᑮᕽ ᑳᑎᓄᐗᑭᓐ ᑳᔑᐊᔮᐙᒡ᙮ ᔑᑾ ᐸᑳᓐ ᐃᔑᐅᓂᔑᔑᓂᓂᐗᓐ ᑮᔑᑯᕽ ᑳᑕᔑᐅᐐᔭᐎᐙᒡ, ᑲᔦ ᐅᒫ ᐊᑮᕽ ᑳᑕᔑᐅᐐᔭᐎᐙᒡ ᐁᔑᐅᓂᔑᔑᓂᓂᑭᓐ᙮

115:41b.1CO.115.041 ᐊᐊᐌ ᑕᔥ ᑲᔦ ᑮᓯᔅ ᐐᓐ ᐃᑯ ᑎᐱᓇᐌ ᐃᓈᓯᑫ᙮ ᐊᐊᐌᔥ ᑲᔦ ᑎᐱᑭᑮᓯᔅ ᑲᔦ ᐐᓐ ᐸᑳᓇᑎᓂᓂ ᐅᑎᓈᓯᑫᐎᓐ᙮ ᐊᐴᔥᑫ ᑲᔦ ᐗᓇᑯᔕᒃ ᐯᐸᑳᓐ ᐃᑯ ᑫᐐᓇᐙ ᐃᔑᐊᔨᓈᓯᑫᐗᒃ᙮

115:42b.1CO.115.042 ᒦ ᐅᐌ ᑫᐃᔑᓈᑾᒃ ᑫᑮᐌᐱᒫᑎᓯᐃᑣ ᑳᐃᔥᒀᐱᒫᑎᓯᐙᒡ᙮ ᐊᐲ ᐁᓇᐃᓂᑳᑌᒃ ᐃᐃ ᐐᔭᐎᒫ, ᑎᓄᐗᓐ ᐊᑲᐌ ᒋᓂᔑᐗᓈᑕᒃ᙮ ᐹᓂᒫᔥ ᑮᐌᐱᒫᑎᓯᓈᓂᐗᕽ ᒦ ᐃᐌ ᑫᐃᔑᐊᔮᑭᓐ ᐐᔭᐎᒫᓐ ᐐᑳ ᒋᓂᔑᐗᓈᑕᓯᓄᑭᓐ᙮

115:43b.1CO.115.043 ᑰᐹᑌᑖᑾᓐ ᐃᐃ ᐁᓇᐃᒋᑳᑌᒃ, ᒦᓇᐙ ᑕᔥ ᐱᒫᒋᒋᑳᑌᒃ ᐐᑫ ᑕᐅᓂᔑᔑᓐ᙮ ᐗᑫᐗᓐ ᐃᐃ ᑳᓇᐃᒋᑳᑌᒃ, ᐱᒫᒋᒋᑳᑌᒃ ᐃᑕᔥ ᑕᓲᑫᑖᑾᓐ᙮

115:44b.1CO.115.044 ᐃᐃ ᐐᔭᐤ ᑳᓇᐃᓂᑳᑌᒃ ᒦᐃᐌ ᑳᐊᔮᒪᑲᒃ ᐅᐅ ᓅᑯᒻ ᐱᒫᑎᓯᐎᓂᕽ᙮ ᐊᐲᔥ ᐃᐃᐌ ᑮᐌᐱᒫᒋᒋᑳᑌᒃ ᒦᐃᐌ ᑎᓄ ᐐᔭᐤ ᑫᔑᒥᓍᐸᑕᒃ ᐊᒑᑯᒫᕽ᙮ ᐊᔮ ᐃᐃᐌ ᐐᔭᐤ ᑳᐊᔮᒪᑲᒃ ᐅᐅ ᐅᒋ ᓅᑯᒻ ᐱᒫᑎᓯᐎᓂᕽ, ᑲᔦ ᐃᐌ ᑎᓄ ᐊᔮᒪᑲᓐ ᐐᔭᐤ ᑫᔑᒥᓍᐸᑕᒃ ᐊᒑᑯᕽ ᐅᒋ᙮

115:45b.1CO.115.045 ᐅᐅᐌ ᐋᓃᔥ ᐃᑭᑑᒪᑲᓐ ᑫᑌᒪᓯᓇᐃᑲᓐ: ᐊᐊᐌ ᒫᐗᒡ ᓃᑳᓐ ᑳᐅᔑᐃᓐᒡ ᐃᓂᓂ ᐋᑕᒻ, ᑮᐃᔑᐋ ᐯᒫᑎᓯᒡ ᐁᑭᑲᒑᑴᒡ, ᐃᔑᐲᐃᑳᑌ᙮ ᐊᐊᐌ ᑕᔥ ᐐᓐ ᐃᔥᒀᒡ ᑳ ᐋᐎᒡ ᐋᑕᒻ, ᒦ ᐊᐌ ᐊᒑᒃ ᑳᐱᒫᑎᓰᔥᑳᑫᒡ᙮

115:46b.1CO.115.046 ᑳᐐᓐ ᐌᑎ ᓂᑕᒻ ᐅᒌᒪᑲᓯᓅᓐ ᐃᐃ ᑳᐊᒑᑴᑖᑾᒃ, ᑳᐐᔮᓯᐗᕽ ᓴ ᐐᓐ ᓂᑕᒻ ᑮᐊᔮᒪᑲᓐ, ᒦᑕᔥ ᐃᐃ ᑮᐊᓂᐊᔮ ᓈᑫ ᑳᐊᒑᑴᑖᑾᒃ᙮

115:47b.1CO.115.047 ᐊᐌ ᓂᑕᒻ ᐃᓂᓂ ᐋᑕᒻ ᑳᑮᐃᔑᐊᔮᒡ, ᒥᑕᑲᒥᑯᕽ ᑮᐅᒋᐅᔑᒋᑳᓱ ᐅᐅᒫ ᐁᑮᐅᒌᒡ ᐊᑮᕽ᙮ ᐊᐊᐌ ᑕᔥ ᑯᑕᒃ ᐃᓂᓂ ᑳᑮᐃᔑᐊᔮᒡ ᑮᐱᐅᒌ ᑭᒋᑮᔑᑯᕽ᙮

115:48b.1CO.115.048 ᐃᑭ ᐅᒫ ᐊᑮᕽ ᑳᐅᒋᑎᐯᑖᑯᓯᐙᒡ, ᒦᐃ ᐁᓈᑎᓯᐙᒡ ᐊᐊᐌ ᒥᑕᑲᒥᑯᕽ ᑳᑮᐅᒋ ᐅᔑᒋᑳᓱᒡ᙮ ᐃᑭᐌᓂᐗᒃ ᐃᑕᔥ ᑭᒋᑮᔑᑯᕽ ᑳᐅᒋᑎᐯᑖᑯᓯᐙᒡ, ᒦᐃ ᐁᓀᑖᑯᓯᐙᒡ ᐁᓈᑎᓯᒡ ᐊᐊ ᑭᒋᑮᔑᑯᕽ ᑳᑮᐱᐅᒌᒡ᙮

115:49b.1CO.115.049 ᔑᑾ ᐯᔑᑾᓐ ᐃᑯ ᐁᐱᑭᑭᔥᑲᒧᐙᒡ ᐅᑎᔑᓈᑯᓯᐎᓐ ᐊᐊ ᓂᑕᒻ ᒥᑕᑲᒥᑯᕽ ᑳᑮᐅᒋᐅᔑᐃᓐᒡ, ᑲᔦ ᑭᑲᓈᐱ ᑭᑭᔥᑲᒧᐙᒥᓐ ᐅᑎᔑᓈᑯᓯᐎᓐ ᐊᐊᐌ ᐃᓂᓂ ᑭᒋᑮᔑᑯᕽ ᑳᐱᐅᒌᒡ᙮

115:50b.1CO.115.050 ᓃᒋᐅᑌᐺᑕᒨᒃ, ᒦ ᐅᐌ ᐁᑭᑐᔮᓐ: ᐊᐊᐌ ᑳ ᐊᔮᒡ ᐐᔮᔅ, ᒥᔅᑸᓂ ᑕᔥ ᑲᔦ ᐁᑕ, ᑳᐐᓐ ᐅᑖᐃᔑᑲᔥᑭᑑᓰᓐ ᒋᒦᓂᓐᒡ ᒋ ᐃᔑᐐᑑᑳᓱᒡ ᐃᐃᒫ ᑭᔐᒪᓂᑑ ᐅᑎᐯᒋᑫᐎᓂᕽ᙮ ᐃᐃ ᑕᔥ ᑲᔦ ᑫᓂᐴᒪᑲᒃ ᑳᐐᓐ ᐐᑳ ᑕᒦᓈᑲᓂᐗᓯᓅᓐ ᐃᐃ ᐱᔑᔑᒃ ᒋᐱᒫᑕᒃ᙮

115:51b.1CO.115.051 ᐋᓃᔥ, ᑭᐐᑕᒪᐎᓂᓂᒻ ᐃᐃ ᒪᔑ ᑳᑮᐸᔭᑌ ᑭᑫᒋᑳᑌᓯᓄᒃ: ᑳᐐᓐ ᑲᑭᓇ ᑭᑲᐃᔥᒀᐱᒫᑎᓯᓰᒥᓐ᙮ ᑲᑭᓇ ᑕᔥ ᑭᑲᐋᒋᐃᑰᒥᓐ᙮

115:52b.1CO.115.052 ᑫᓯᑳ, ᐯᔑᑯ ᐸᓴᑳᐱᕽ ᑕᐃᔑᑭᑖᑕᐱᓭ, ᐊᓂ ᐃᔥᒀᓭᒃ ᑲᑭᓇ ᑫᑰᓐ ᑫᓅᑖᑾᓂᓂᒃ ᑭᔐᒪᓂᑑ ᐅᑭᒋᐴᑖᒋᑲᓐ᙮ ᐋᓃᔥ ᑕᒪᑗᐃᓉᒪᑲᓐ, ᒦᔥ ᐃᐃ ᐊᐲ ᑫᑮᐌᐱᒫᑎᓯᐙᒡ ᐃᑭ ᓀᐳᐙᒡ ᐁᑳ ᒦᓇᐙ ᒋᓂᐳᓯᒀ᙮ ᒦᑕᔥ ᒥᒋᑲᑭᓇ ᒫᒪᐤ ᑭᑲᐋᒋᐃᑰᒥᓐ᙮

115:53b.1CO.115.053 ᐅᐌ ᐋᓃᔥ ᑳᐗᑫᓂᔑᐗᓈᑕᒃ ᓇᑕᐌᑖᑾᓐ ᒋᐋᒋᒋᑳᑌᒃ ᐐᑳ ᒋᓂᔑᐗᓈᑕᓯᓄᒃ, ᐃᐃᔥ ᑲᔦ ᑳᐗᑫᓂᐴᒪᑲᒃ ᑕᐃᔑᐋᒋᒋᑳᑌ ᐐᑳ ᒋᓂᐴᒪᑲᓯᓄᒃ᙮

115:54b.1CO.115.054 ᐊᐲ ᑕᔥ ᑮᐃᔑᓭᒃ ᑳᐗᑫᓂᔑᐗᓈᑕᒃ ᑲᔦ ᑳᓂᓂᐴᒪᑲᒃ ᐁᑮᐋᒋᒋᑳᑌᑭᓐ ᒋᓂᔑᐗᓈᑕᓯᓄᒃ ᑲᔦ ᒋᓂᐴᒪᑲᓯᓄᒃ, ᒦ ᐊᐲ ᑕᑎᐱᓭ ᐅᐅᐌ ᐃᑭᑐᐎᓐ ᑳᑮᐃᔑᐲᐃᑳᑌᒃ: ᓂᐳᐎᓐ ᓂᔑᐗᓈᒋᒋᑳᑌ, ᑭᔐᒪᓂᑑ ᐅᔖᑰᒋᑣᐎᓐ ᐋᔕ ᑮᑮᔑᒋᑳᑌ᙮

115:55b.1CO.115.055 ᑮᓐ ᓂᐳᐎᓐ, ᐋᑎ ᑕᔥ ᑫᐅᒋᔖᑰᒋᑣᔭᐸᓐ? ᑮᓐ ᓂᐳᐎᓐ, ᐋᑎ ᑫᐅᒋᐐᓴᑭᒌᓱᐌᔭᐸᓐ?

115:56b.1CO.115.056 ᐃᐃᒫ ᒪᒋ ᐃᔑᐌᐱᓯᐎᓂᕽ ᐅᒋᑲᔥᑭᑑᒪᑲᓐ ᐃᐃ ᓂᐳᐎᓐ ᒋᐐᓴᑲᐅᐌᒪᑲᒃ, ᐃᐃᐌᔥ ᑲᔦ ᒪᒋ ᐃᔑᐌᐱᓯᐎᓐ ᐅᒋᒪᔥᑲᐎᓰᒪᑲᓐ ᐃᐃᒫ ᐅᓇᔓᐌᐎᓂᕽ᙮

115:57b.1CO.115.057 ᒦᑴᒡ ᐃᑕᔥ ᑕᐃᓈ ᑭᔐᒪᓂᑑ ᑳᔑᒦᓂᓇᕽ ᑮᓇᐎᓐᑦ ᒋᔖᑰᒋᑣᔭᕽ ᐅᒋ ᐊᐌ ᑳᑎᐯᓂᒥᓇᕽ ᒋᓴᔅ X᙮

115:58b.1CO.115.058 ᐊᐤ ᐃᓴ ᓃᒋᐅᑌᐺᑕᒨᒃ ᑳᓵᑭᐃᓇᑰᒃ! ᓲᑭᑳᐸᐎᒃ, ᑫᑯ ᑫᑰᓐ ᑭᑲᐗᑲᐐᐃᑯᓰᒻ, ᒨᔕᒃ ᓴ ᒋᐌᓅᒋᐊᓄᑮᑕᐌᒃ ᐊᐊ ᑳᑎᐯᒋᑫᒡ᙮ ᑭᑭᑫᑖᓈᐙ ᐅᔕ ᐁᑳ ᐊᓂᔖ ᐁᐊᓄᑮᑕᐙᓯᐌᒃ ᑳᑎᐯᒋᑫᒡ᙮

116

116:1b.1CO.116.001 ᔑᑾ ᐃᐌ ᐁᑕᔑᒋᑳᑌᒃ ᐁᐐᒫᒪᐎ ᐸᑭᑎᓂᑫᕽ ᒋᐐᒋᐃᒥᓐᒡ ᑭᔐᒪᓂᑑ ᐅᐱᒫᑎᓰᒪᐞ ᐁᔑᓅᑌᓭᓂᒡ ᒎᑏᔭ ᐊᑮᕽ ᑳᐊᔮᓂᒡ: ᐃᐃᐌ ᓴ ᑳᑮᐃᔑ ᑭᑭᓄᐊᒪᐗᒀ ᐯᐸᑳᓐ ᑳᐃᔑᒫᐗᒋᐃᑎᐙᒡ ᐅᑌᐺᑕᒨᒃ ᑲᓬᐁᔑᔭ ᐊᑮᕽ, ᒦᐃᐌ ᑫᑮᓇᐙ ᒋᑑᑕᒣᒃ᙮

116:2b.1CO.116.002 ᐁᑕᓱ ᐊᓇᒥᐁᑮᔑᑲᒃ ᑳᑕᓱᐯᔑᑯᔦᒃ ᐸᑳᓐ ᐃᔑᐊᓯᒃ ᐸᑮ ᑭᔔᓂᔮᒥᐙ᙮ ᐋᓃᓂᑯ ᐊᐎᔭ ᐁᔑᑲᔥᑭᒋᑫᑴᓐ ᒋᒪᓈᒋᐋᒡ, ᐁᑳ ᒣᒬᒡ ᒋᒫᐗᒋᒋᑫᓯᐌᒃ ᐊᐲ ᑕᑯᔑᓈᓐ᙮

116:3b.1CO.116.003 ᐊᐲ ᑕᔥ ᑕᑯᔑᓈᓐ, ᐊᐌᓀᓇᒃ ᐃᑯ ᑫᑾᔭᑴᓂᒣᒀ ᓂᑲᒦᓈᒃ ᓂᑑᔑᐲᐃᑫᐎᓐ ᒋᐐᑌᓂᒃ ᐁᔑᐅᐸᐹᒥᓯᐎᓂᐙᒡ᙮ ᒦᔥ ᓂᑲᐃᔑᓂᔕᐙᒃ ᒉᕒᐆᓴᓬᐊᒥᕽ ᒋᐃᔑᐎᑑᐙᒡ ᑭᑭᔐᐙᑎᓯᐎ ᐸᑭᑎᓂᑫᐎᓂᐙ᙮

116:4b.1CO.116.004 ᑮᔥᐱᓐ ᑕᔥ ᑫᓃᓐ ᓇᐃᓈᑾᒃ ᒋᐃᔖᔮᓐ ᓂᑲᓂᐐᒌᐙᒃ᙮

116:5b.1CO.116.005 ᐱᒌᓇᒃ ᐃᑕᔥ ᑭᑲᐱᐅᑎᓯᓂᓂᒻ ᐹᓂᒫ ᑮᔖᐴᔥᑳᔮᓐ ᒫᓯᑑᓂᔮᐗᑮᕽ ᙮ ᒦ ᐋᓃᔥ ᐌᑎ ᐁᓀᑕᒫᓐ ᒫᓯᑑᓂᔮᐗᑮᕽ ᒋᐊᓂᐱᒥᐊᔮᔮᓐ᙮

116:6b.1CO.116.006 ᒫᑭᔖ ᐃᔑᓭᒃ ᑭᑲᐐᒋᔭᔮᒥᓂᓂᒻ, ᒫᑭᔖ ᑲᔦ ᒋᑕᔑᐱᐴᓂᔑᔮᓐ, ᒦᑕᔥ ᐃᐃ ᐊᐲ ᒋᐐᒋᐃᔦᒃ ᐋᑎ ᓴ ᑯ ᑫᐃᔖᔮᓐ᙮

116:7b.1CO.116.007 ᑳᐐᓐ ᓂᑎᓀᑕᓰ ᐁᑕ ᒋᐱᒥᒣᑴᔮᐸᒥᓇᑰᒃ᙮ ᓇᐗᒡ ᓂᑎᓀᑖᓐ ᑭᓉᔒᔥ ᒋᐐᒋᔭᔮᒥᓇᑰᒃ, ᑮᔥᐱᓐ ᐃᔑᐸᑭᑎᓇᒪᐎᒡ ᑳᑎᐯᒋᑫᒡ᙮

116:8b.1CO.116.008 ᑫᔮᐱ ᐊᑲᐌ ᐅᐅᒫ ᓂᑲᐊᔭᔮ ᐁᐱᓴᓯᕽ ᐲᓂᔥ ᐃᑯ ᐊᓂᐅᒋᒋᓭᒃ ᐯᑎᒀᔅᑎᐎ ᑮᔑᑲᓐ ᙮

116:9b.1CO.116.009 ᐋᓃᔥ ᐃᓇᑌ ᑫᔮᐱ ᐅᒫ ᐁᐹᑭᓯᕽ ᓃᐱᐗᐞ ᒋᑲᔥᑭᑑᔮᓐ ᑳᑭᒋ ᐃᓀᑖᑾᑭᓐ᙮ ᓃᐱᐗᐞ ᐃᑕᔥ ᐊᐎᔭ ᐊᔮᐗᒃ ᐁᑲᑴᑭᐱᔥᑲᐎᐙᒡ᙮

116:10b.1CO.116.010 ᑮᔥᐱᓐ ᐃᐃᒫ ᐱᐃᔑᑕᑯᔑᕽ ᐊᐊ ᑎᒪᑎ ᑳᔑᐊᔮᔦᒃ, ᑲᑴᒥᓄᐐᒋᐃᒃ ᐁᑳ ᒋᓭᑭᓯᓯᒃ᙮ ᐋᓃᔥ ᑖᐱᔥᑰ ᑲᔦ ᓃᓐ ᐁᔑᐊᓄᑲᐗᒃ ᑳᑎᐯᒋᑫᒡ, ᑲᔦ ᐐᓐ ᑕᔥ ᐅᑕᓄᑲᐙᓐ ᐊᐊ ᑎᒪᑎ᙮

116:11b.1CO.116.011 ᑳᐐᓐ ᐅᑖᐋᓍᐸᒥᑯᓰᓐ ᐊᐎᔭᓐ᙮ ᐐᒋᐃᒃ ᐃᑕᔥ, ᒋᓂᐅᒋᒥᓄᒫᒑᒡ ᒋᐱᐅᑎᔑᒡ ᒦᓇᐙ᙮ ᐋᓃᔥ ᓂᐲᐋ ᒋᐱᐐᒌᐎᑯᒡ ᐃᐃ ᐅᑌᐺᑕᒨᐞ ᑳᐐᐲᔖᓂᒡ᙮

116:12b.1CO.116.012 ᐊᐊᐌ ᑕᔥ ᑮᒋᑭᐌᔨᓈᓐ ᐊᑆᓬᐊᔅ ᑳᐃᓂᓐᒡ, ᓃᐱᐗᐋᕽ ᓂᑖᓇᑮᐃᓈ ᒋᓂᐙᐸᒥᓀᒃ ᒋᓂᐐᒌᐙᒡ ᑯᑕᒃ ᐐᒋᑭᐌᔨᒫᐞ, ᑳᐐᓐ ᑕᔥ ᑲᓇᑫ ᒪᔑ ᐃᓀᑕᓰ ᓅᑯᒻ ᒋᐃᔖᒡ᙮ ᐋᓃᓐ ᐃᓴ ᑯ ᐊᐲ ᐃᔑᓇᐃᓭᒃ, ᑕᐃᔖ᙮

116:13b.1CO.116.013 ᐊᔕᐙᐱᔪᒃ, ᒪᔥᑲᐎᑳᐸᐎᔪᒃ ᑌᐺᑕᒧᐎᓂᕽ, ᐊᐸᓀ ᒋᓲᑭ ᐃᓂᓃᐎᔦᒃ᙮ ᒪᔥᑲᐎᓰᒃ!

116:14b.1CO.116.014 ᑲᑭᓇ ᑫᑰᓐ ᓵᑭᐃᑎᐎᓂᕽ ᐃᔑᑑᑕᒧᒃ᙮

116:15b.1CO.116.015 ᓃᒋᐅᑌᐺᑕᒨᒃ, ᑫᑰᓐ ᑭᐐᐸᑯᓭᓂᒥᓂᓂᒻ᙮ ᑭᑭᑫᓂᒫᐙ ᐃᔅᑌᐸᓇᔅ ᑲᔦ ᐅᐙᑳᐃᑲᓂᕽ ᑳᐐᒋᑖᒫᒡ᙮ ᒦᐗᑭᑭ ᓃᑳᓐ ᑳᑮᑕᔑ ᑴᑳᑎᓯᐙᒡ ᐃᐃᒫ ᐊᑫᔮᐗᑮᕽ, ᔑᑾ ᐌᐌᓂ ᐁᑮᐃᓇᓯᑎᓱᐙᒡ ᐁᐐᒋᐋᐙᒡ ᐃᐃ ᑭᔐᒪᓂᑑ ᐅᐱᒫᑎᓰᒪᐞ᙮

116:16b.1CO.116.016 ᑭᓇᑕᐌᓂᒥᓂᓂᒻ ᒋᓃᑳᓇᑭᒣᒀ ᒋᐱᓯᑕᐌᒀ ᐅᑯᐌᓂᐗᒃ ᑎᓄ, ᑲᔦ ᑲᑭᓇ ᐊᐎᔭᐞ ᑳᐐᑕᓄᑮᒥᑯᐙᒡ ᐁᐃᔑᐸᒦᑖᑫᓂᒡ᙮

116:17b.1CO.116.017 ᓂᑑᒋᓇᐁᑕᒻ ᐁᑮᐱᐅᑎᔑᐙᒡ ᐃᔅᑌᐸᓇᔅ ᑲᔦ ᑆᕒᒐᓀᑕᔅ ᑲᔦ ᐊᑫᔨᑲᔅ ᙮ ᑭᑮᓈᐱᔥᑳᑯᐙᒃ ᐅᐅᒫ ᐁᐊᔮᓯᐌᒃ᙮

116:18b.1CO.116.018 ᓂᑮ ᑭᔑᔕᐎᓰᔥᑳᑰᒃ ᒦ ᐯᔑᑾᓐ ᐃᑯ ᑫᑮᓇᐙ ᑳᑮᐃᔑᒋᑫᐃᓀᒀ᙮ ᑭᑖᑭᑫᓂᒫᐙᒃ ᐅᑯ ᑳᑎᓄᐎᐙᒡ᙮

116:19b.1CO.116.019 ᑭᐴᔔᐃᑯᐙᒃ ᐅᑌᐺᑕᒨᒃ ᐯᐸᑳᓐ ᐁᔑᒫᐗᒋᐃᑎᐙᒡ ᐁᔖᐗᑮᕽ ᙮ ᐴᔔ ᑲᔦ ᑭᑎᑯᐙᒃ ᐊᑶᓬᐊ ᑲᔦ ᐸᕒᐃᓯᓬᐊ ᑲᔦ ᐃᑭ ᐅᒫ ᐅᐙᑳᐃᑲᓂᐙᕽ ᑳᑕᔑᒫᐗᒋᐃᑎᐙᒡ ᐅᑌᐺᑕᒨᒃ᙮ ᑳᑎᐯᒋᑫᓂᒡ ᑭᑎᔑᐊᐱᐴᔔᐃᑯᐙᒃ᙮

116:20b.1CO.116.020 ᑲᔦ ᑲᑭᓇ ᐅᐅᒫ ᑳᐊᔮᐙᒡ ᐅᐐᒋᑭᐌᔨᒫᒃ ᑫᐐᓇᐙ ᑭᐴᔔᐃᑯᐙᒃ᙮ ᐅᑌᐺᑕᒨᒃ ᐊᓇᒥᐁᐅᒌᒥᑾᒃ᙮ ᑮᐴᔔᐁᒀ, ᒦᐃ ᓇᑫ ᐃᔑᐴᔔᐃᑎᒃ᙮

116:21b.1CO.116.021 ᓃᓐ ᑆᓬ ᑭᐴᔔᐃᓂᓂᒻ, ᓃᓐ ᑎᐱᓇᐌ ᓂᓂᒌᕽ ᐁᐅᔑᐲᐊᒫᓐ᙮

116:22b.1CO.116.022 ᐊᐌᓀᓐ ᓴ ᑯ ᓯᔮᑭᐋᓯᒃ ᐃᓂ ᑳᑎᐯᒋᑫᓂᒡ, ᑕᐃᒋᑳᓱ ᒋᓂᔑᐗᓈᑎᓯᒡ! ᒪᕒᐊᓇ ᑖ! – ᓂᑎᐯᒋᑫᒥᓈᓐ, ᐐᐱᑕᑯᔑᓂᓐ!

116:23b.1CO.116.023 ᒫᓄ ᐅᑭᔐᐙᑎᓯᐎᓐ ᐊᐊ ᑳᑎᐯᓂᒥᓇᕽ ᒋᓴᔅ X ᑭᑲᐐᒌᐎᑯᐙᒻ᙮

116:24b.1CO.116.024 ᑲᑭᓇ ᑮᓇᐙ ᓂᓵᑭᐃᐌᐎᓐ ᑭᑲᐐᑕᔑ ᐐᒌᐎᑯᒻ ᐁᐃᔑᒫᒪᐎ ᐐᒌᑎᔭᕽ ᐃᐃᒫ X ᒋᓴᓱᕽ᙮