Acts (Ojibwa)

1

1:1b.ACT.001.001 ᑮᓐ ᑎᔮᐱᓬᐊᔅ ᓂᑕᒻ ᑳᑮᐅᔑᐲᐊᒪᐎᓈᓐ ᒪᓯᓇᐃᑲᓐ ᐁᑮ ᑕᔑᑕᒪᐎᓈᓐ ᑲᑭᓇ ᒋᓴᔅ ᑳᑮᐃᔑᒋᑫᒡ, ᐋᓃᓐ ᑲᔦ ᑳᐃᔑ ᑭᑭᓄᐊᒫᑫᒡ ᐊᐲ ᑮᒫᑕᓄᑮᒡ᙮

1:2b.ACT.001.002 ᐲᓂᔥ ᐃᑕᔥ ᐃᐃ ᐊᐲ ᐁᑮᔑᑲᓂᓂᒃ ᑳᑮᐃᔥᐱᔥᑳᒡ ᑭᒋᑮᔑᑯᕽ᙮ ᒋᑆ ᐅᐱᔥᑳᐃᓐᒡ ᐃᑕᔥ ᐅᑮ ᑲᓅᓇᐞ ᐅᑎᔑᓂᔕᐙᑲᓇᐞ ᑳᑮ ᐅᓈᐸᒫᒡ, ᑭᔐᒪᓂᑑᓐ ᐅᑕᒑᑯᓂ ᐁᑮᐅᒋ ᑭᑭᓄᐊᒪᐙᒡ ᑫᐃᔑᒋᑫᓂᒡ᙮

1:3b.ACT.001.003 ᐊᐲ ᑕᔥ ᑳᐴᓂᓭᓂᒃ ᐅᑲᒀᑕᑭᑑᐎᓐ, ᐅᑮᓈᑯᓰᑕᐙᐞ ᓃᐱᐗᐞ ᐯᒫᑎᓯᓂᒡ ᑫᐅᒋ ᑫᒋᓈᐁᑕᒥᓂᒡ᙮ ᓃᒥᑕᓇ ᑕᓱᑮᔑᒃ ᒥᓂᒃ ᐁᑮᐙᐸᒥᑯᒡ, ᐁᑮ ᑕᔑᑕᒪᐙᒡ ᐁᓀᑖᑾᓂᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮

1:4b.ACT.001.004 ᐋᐱᑎᕽ ᑕᔥ ᐁᐐᒋ ᐐᓯᓃᒫᒡ, ᒋᓴᔅ ᐅᑮᐊᔦᒀᒥᒫᐞ ᐁᑮᐃᓈᒡ: ᑫᑯ ᐅᒋ ᒫᒑᑫᒃ ᐅᐅᒫ ᒉᕒᐆᓴᓬᐊᒥᕽ, ᒋᐲᑑᔦᒃ ᐃᐃ ᓂᑌᑌ ᑳᑮᐊᔓᑕᒫᑫᒡ ᐁᐐᒦᑭᐌᒡ, ᑳᑮ ᓅᑕᐎᔦᒃ ᐁᑕᔑᑕᒪᐎᓇᑰᒃ᙮

1:5b.ACT.001.005 ᐃᓇᔥᑫ ᐐᓐ ᒞᓐ ᐅᓰᑲᐊᑖᑫ ᓂᐲᓂ ᐅᑮᐋᐸᒋᑑᓐ ᐁᓰᑲᐊᑖᑫᒡ᙮ ᑮᓇᐙ ᑕᔥ ᐐᓐ ᐐᐸ ᑭᑲ ᑭᑭᔥᑳᑯᐙᒻ ᑭᔐᒪᓂᑑ ᐅᑕᒑᑾᓐ, ᒦ ᐃ ᓇᑫ ᑮᓇᐙ ᑫᔑ ᓰᑲᐊᑖᑰᔦᒃ, ᐅᑮᐃᓈᐞ᙮

1:6b.ACT.001.006 ᐃᔑᓂᔕᐙᑲᓇᒃ ᑕᔥ ᐊᐲ ᐁᒫᒪᐎ ᐊᔮᐙᒡ ᐅᐅ ᐅᑮᐃᔑ ᑲᑴᒋᒫᐙᓐ ᒋᓴᓲᓐ: ᑌᐯᒋᑫᔭᓐ, ᒦ ᓇ ᐃ ᐋᔕ ᐁᐅᒋᒋᓭᒃ ᒋᑮᐌ ᒦᓇᑣ ᐃᔅᕒᐃᔭᓬᐊᒃ ᒋᑎᐯᓂᑎᓱᐙᒡ ᒋᐅᑭᒫᑲᑖᓱᐙᒡ?

1:7b.ACT.001.007 ᐅᐅ ᑕᔥ ᒋᓴᓲᓐ ᐅᑮᐃᔑ ᓇᑴᑖᑯᐙᓐ: ᑳᐐᓐ ᑮᓇᐙ ᑭᒦᓂᑰᐎᓯᓰᒻ ᒋᑭᑫᑕᒣᒃ ᐋᓃᓐ ᐊᐲ ᒪᔮ ᐃ ᑫᐃᔑᓭᒃ᙮ ᐌᔫᓯᒥᓐᒡ ᐄᑐᒃ ᑎᐱᓇᐌ ᐅᑮᐅᓇᑑᓐ ᒋᑲᔥᑭᑑᒡ ᐃᐃ ᐊᐲ ᒋᐃᔑᓭᓂᒃ᙮

1:8b.ACT.001.008 ᑭᑲ ᒦᓂᑰᐎᓯᒻ ᐃᑕᔥ ᑲᔥᑭᐁᐎᓯᐎᓐ ᐊᐲ ᐅᑎᓯᓀᒃ ᑭᔐᒪᓂᑑ ᐅᑕᒑᑾᓐ᙮ ᒦᑕᔥ ᐃᐃ ᒋᑎᐹᒋᒥᔦᒃ ᐁᑭᑫᓂᒥᔦᒃ, ᐃᐃᒫ ᒉᕒᐆᓴᓬᐊᒥᕽ ᒥᓯᐌ ᑲᔦ ᒎᑏᔭ ᐊᑮᕽ, ᓴᒣᕒᐃᔭ ᐊᑮᕽ, ᐲᓂᔥ ᐃᑕᔥ ᐁᑯ ᑲᑭᔑᐸᑲᒥᑳᒃ ᐊᑭ, ᐅᑮᐃᑯᐙᓐ᙮

1:9b.ACT.001.009 ᐊᐲ ᑕᔥ ᐅᐅ ᑳᐃᔥᒀᐃᑯᐙᒡ, ᒣᒀ ᐁᑲᓇᐙᐸᒫᐙᒡ, ᐃᔥᐱᒥᕽ ᑮᐃᔑ ᐅᐱᔥᑳᐗᓐ ᐲᓂᔥ ᐗᑸᕽ ᐁᑮᐊᓂ ᐃᔑ ᐊᑯᓈᑯᓯᓂᒡ᙮ ᐲᓂᔥ ᑕᔥ ᑳᐐᓐ ᐅᑮᐙᐸᒫᓯᐙᐙᓐ᙮

1:10b.ACT.001.010 ᒣᒀ ᑕᔥ ᐃᔥᐱᒥᕽ ᑭᒋ ᐌᐌᓂ ᐁᐃᓈᐱᐙᒡ ᑳᑮᐃᔑ ᐃᔥᐱᔥᑳᓂᒡ, ᑴᑕᑐ ᓃᔑᓐ ᐊᐎᔭᐞ ᐅᑮᐅᒋ ᐐᒋᑳᐸᐎᑖᑯᐙᐞ ᐁᐙᐱᔥᑭᑯᓇᔦᓂᒡ᙮

1:11b.ACT.001.011 ᒦᑕᔥ ᐅᐅ ᑳᐃᑯᐙᒡ: ᑮᓇᐙ ᑳᓬᐊᓬᐄᐎᓂᓂᐗᒃ ᐌᑯᓀᓐ ᐌᒋ ᐃᔑᑳᐸᐎᔦᒃ ᐃᔥᐱᒥᕽ ᐁᐃᓈᐱᔦᒃ? ᐊᐊ ᒋᓴᔅ ᓅᑯᒻ ᑳᓇᑲᓂᓀᒃ ᑭᒋᑮᔑᑯᕽ ᑳᔑ ᐅᐱᔥᑳᐃᓐᒡ, ᒦ ᐃ ᓇᑫ ᒦᓇᐙ ᐯᔑᑾᓐ ᑫᐱᔑ ᑕᑯᔑᕽ ᑳᔑ ᐙᐸᒣᒃ ᑭᒋᑮᔑᑯᕽ ᐁᐃᔖᒡ, ᐅᑮᐃᑯᐙᓐ᙮

1:12b.ACT.001.012 ᐃᐃᒫ ᑕᔥ ᐋᓬᐃᑉ ᐱᑾᑎᓈᕽ ᑳᑮᐃᔑ ᐊᔮᐙᒡ ᑮᐅᒋ ᒫᒑᐗᒃ, ᒉᕒᐆᓴᓬᐊᒥᕽ ᐁᑮᐃᔑ ᑮᐌᐙᒡ ᐁᑮ ᐯᔓᐗᓂᓂᒃ, ᐋᐱᑕ ᑎᐸᐃᑲᓐ ᐁᑕ ᐁᑮᐊᐲᒑᓂᒃ᙮

1:13b.ACT.001.013 ᐊᐲ ᑕᔥ ᑌᑯᔑᓄᐙᒡ ᒉᕒᐆᓴᓬᐊᒥᕽ, ᑮᐊᓂ ᐊᒀᑕᐌᐗᒃ ᐙᑳᐃᑲᓂᕽ ᐁᔑ ᐃᔥᐱᒦᑲᑌᓂᒃ ᐁᔑ ᐊᔮᓂᒡ ᐲᑕᕒᐆᓐ, ᐃᓂ ᑲᔦ ᒞᓇᓐ, ᒌᒥᓴᓐ, ᐁᑕᕒᐆᓐ, ᐱᓬᐊᐴᓐ, ᑣᒪᓲᓐ, ᐹᕒᑖᓬᐊᒥᔫᓐ, ᒫᑎᔫᓐ, ᒌᒥᓴᓐ ᑳᑮᐅᑯᓯᓯᒥᑯᓂᒡ ᐋᓬᐱᔭᓴᓐ ; ᐊᐊ ᑕᔥ ᑲᔦ ᓵᐃᒪᓐ ᑳᑮᐐᒋᐃᐌᒡ ᐁᒪᐎᓀᔥᑲᐎᒥᓐᒡ ᐸᑳᓐ ᐊᑮᕽ ᐁᔮᓂᒡ ᑭᒋᐅᑭᒫᓐ ᑳᑎᐯᓂᒥᑯᐙᒡ; ᒎᑕᔅ ᑲᔦ ᑳᑮᐅᑯᓯᓯᒥᑯᒡ ᑯᑕᒃ ᒌᒥᓲᓐ ᙮

1:14b.ACT.001.014 ᑲᑭᓇ ᓴ ᐅᑯᐌᓂᐗᒃ ᑮᓇᑭᔥᑯᑖᑎᐗᒃ ᐁᑮᒫᒪᐎ ᐃᓀᑕᒧᐙᒡ ᐁᑮᓂᑖᐊᓇᒥᐋᐙᒡ, ᐁᑮᐐᒌᐙᐙᒡ ᒣᕒᐄᓐ ᒋᓴᔅ ᐅᒫᒫᓐ, ᐃᓂ ᑲᔦ ᐐᒋᑭᐌᔨᓂ᙮

1:15b.ACT.001.015 ᒦᔥ ᐃᐃ ᐊᐲ ᐁᑮᔑᑲᓂᓂᒃ ᐁᒫᐗᒋᐃᑎᐙᒡ ᓃᐱᐗᐞ ᐅᑌᐺᑕᒨᒃ, ᓂᑯᒋ ᑯ ᓂᑯᑣᒃ ᓃᔥᑕᓇ 120 ᑮᑕᔑᐗᒃ᙮ ᐲᑕᕒ ᑕᔥ ᑮᐸᓯᑸ ᐁᑲᓅᓈᒡ ᐃᐃᒫ ᐁᔮᓂᒡ, ᐅᐅ ᐁᑮᐃᓈᒡ,

1:16b.ACT.001.016 ᓃᒋ ᐅᑌᐺᑕᒨᒃ, ᐅᒋᑕᑯ ᐃᔑᓈᑾᓐ ᒋᑮᐃᔑᓭᑭᐸᓐ ᑳᐃᓇᑌᒃ ᑭᒋᒪᓯᓇᐃᑲᓐ, ᑭᔐᒪᓂᑑ ᐅᑕᒑᑾᓐ ᑳᑮᐃᑭᑐᓂᑯᐸᓀᓐ ᒣᐎᔕ, ᑌᐱᑑᓐ ᐁᔮᐸᒋᐋᓂᒡ ᐁᑮ ᑕᔑᒫᓂᒡ ᒎᑕᓴᓐ᙮ ᒦ ᐃ ᐄᑐᒃ ᐊᐊ ᒎᑕᔅ ᑳᑮ ᑭᑭᓄᐎᓈᒡ ᐃᐃ ᑳᑮ ᑕᑯᓈᓂᒡ ᒋᓴᓲᓐ᙮

1:17b.ACT.001.017 ᒎᑕᔅ ᐅᔕ ᑫᐐᓐ ᑮᐃᔑ ᑕᑾᑭᓱ ᑮᓇᐎᓐᑦ ᐁᔑ ᐊᔮᔭᕽ, ᐁᑮᐅᓇᐸᒥᓐᒡ ᑫᐐᓐ ᒋᐐᑑᑳᓱᐸᓐ ᐅᐅ ᐁᓇᓄᑮᔭᕽ᙮

1:18b.ACT.001.018 ᐊᐊᐌ ᑕᔥ ᒎᑕᔅ ᑮᐊᑖᐌᑯᐸᓐ ᑭᑎᑫᐗᑮᓂ ᐁᑮ ᑎᐸᐃᑳᑫᒡ ᐅᒪᒋᑑᑕᒧᐎᓂᒃ ᑳᑮᐅᒋ ᑲᔥᑭᒋᑫᒡ᙮ ᒦᑕᔥ ᑳᑮᐊᒋᒋᐸᑭᔑᕽ ᐁᑮ ᐹᔥᑭᒌᔑᕽ, ᑲᑭᓇ ᐅᒥᓴᑖᕽ ᐁᔮᓂᑭᓐ ᑮᓵᑭᒋᓭᓂᐗᓐ᙮

1:19b.ACT.001.019 ᑲᑭᓇ ᑕᔥ ᐃᐃᒫ ᒉᕒᐆᓴᓬᐊᒥᕽ ᑳᑮᐊᔮᐙᒡ ᑮᓅᑕᒨᒃ ᐅᐅ ᐁᑮᐃᔑᓭᓂᒃ᙮ ᒦᑕᔥ ᐅᑎᔑᑮᔗᐎᓂᐙᕽ ᑳᑮᐐᑕᒧᐙᒡ ᐃᐃ ᑭᑎᑫᐗᑲᒥᒃ ᐊᑫᓬᑕᒫᒃ ᐁᑮᐃᑭᑑᒪᑲᓂᓂᒃ, ᐊᑭ ᒥᔅᑶ ᑳᔑᓰᑭᓭᒃ᙮

1:20b.ACT.001.020 ᐋᓃᔥ ᒦ ᐃ ᐁᔑᐲᐃᑳᑌᒃ ᐃᐃᒫ ᓂᑲᒧᓇᓐ ᑳᐃᒋᑳᑌᒃ ᑭᒋᒪᓯᓇᐃᑲᓂᕽ: ᑕᑲ ᐅᐙᑳᐃᑲᓐ ᑕᓀᐱᒋ ᐱᔑᔑᒀᓂ, ᐊᐎᔭᓐ ᐃᐃᒫ ᒋᐃᔑᑖᓯᓂᒃ᙮ ᒦᔥ ᐁᓂ ᐃᑭᑑᒪᑲᒃ, ᑯᑕᒃ ᐊᐎᔭᓐ ᐅᑲ ᐅᑖᐱᓇᒥᓂ ᐅᑕᓄᑮᐎᓐ᙮

1:21b.ACT.001.021 ᒦᑕᔥ ᐁᔑᓈᑾᒃ ᐯᔑᒃ ᐊᐎᔭ ᒋᐅᓈᐸᒥᑎᐸᓐ ᑫᐐᒌᐎᔭᒥᓐᒡ᙮ ᒋᐅᑎᓂᓐᒡ ᐃᐃᒫ ᑳᑮᓂᑖ ᐐᒌᐎᔭᒥᓐᒡ ᒣᒀ ᒋᓴᓲᓐ ᑮᐸᐹ ᐊᔮᓂᒡ ᒣᑴᔭᐄ ᐁᔑ ᐊᔮᐗᑭᒡ,

1:22b.ACT.001.022 ᒞᓇᓐ ᓰᑲᐊᑖᑫᐎᓂᓂᐗᓐ ᐊᐲ ᑮᒫᒌ ᓰᑲᐊᑖᑫᓂᒡ ᐲᓂᔥ ᒋᓴᓲᓐ ᑮᐅᒋ ᐗᓂᔥᑳᓂᒡ ᓂᐳᐎᓂᕽ᙮ ᒦ ᓴ ᐊᐌ ᑫᐐᒌᐎᔭᒥᓐᒡ ᑎᐹᑐᑌᓂᒃ ᑮᐌᐱᒫᑎᓯᐎᓐ, ᑮᐃᑭᑑ᙮

1:23b.ACT.001.023 ᓃᔑᓐ ᑕᔥ ᐃᓂᓂᐗᐞ ᐅᑮᐅᓈᐸᒫᐙᐞ, ᒎᓴᑉ ᐹᕒᓴᐸᓲᓐ ᑳᑮᐃᓂᒥᓐᒡ, ᒐᔅᑕᔅ ᑲᔦ ᑮᐃᔑᓂᑳᒋᑲᓂᐎ, ᐃᓂ ᑕᔥ ᑲᔦ ᒪᑖᔭᔅ ᑳᑮᐃᓂᒥᓐᒡ᙮

1:24b.ACT.001.024 ᒦᑕᔥ ᑳᐃᔑ ᐊᓇᒥᐋᐙᒡ ᐁᑮᐃᑭᑐᐙᒡ: ᑌᐯᒋᑫᔭᓐ, ᑮᓐ ᑭᑭᑫᓂᒫ ᐊᐎᔭ ᐋᓃᓐ ᐁᔑ ᐊᔮᒡ ᐅᑌᐃᕽ᙮ ᐙᐸᑕᐃᔑᓈᒻ ᐊᐌᓀᓐ ᐌᓈᐸᒪᒡ ᐅᑯ ᑳᔑ ᓃᔑᐙᒡ᙮

1:25b.ACT.001.025 ᒋᓈᐱᔥᑲᐙᒡ, ᒋᐃᓇᓄᑮᒡ ᒎᑕᓴᓐ ᐃᔑᓂᔕᐙᑲᓐ ᑳᑮ ᑎᓄᐎᓂᒡ, ᐁᑮᐃᔖᓂᒡ ᑳᑮᐃᔑᑲᔥᑭᑕᒫᓱᓂᒡ, ᑮᐃᔑ ᐊᓇᒥᐋᐗᒃ᙮

1:26b.ACT.001.026 ᒦᑕᔥ ᑳᐃᔑ ᐅᑖᐱᓇᒧᐙᒡ ᐐᓱᐎᓇᓐ᙮ ᒫᑖᔭᔅ ᐃᑕᔥ ᒪᔮ ᑮᒦᑲᐎ ᐅᑖᐱᓂᑳᑌᓂ ᐅᐐᓱᐎᓐ᙮ ᑫᐐᓐ ᑕᔥ ᐃᐃᒫ ᑮᐃᔑ ᑕᑾᑭᒫ ᐁᔑ ᐊᔮᓂᒡ ᒥᑖᔑᐯᔑᒃ ᐃᔑᓂᔕᐙᑲᓇ᙮

2

2:1b.ACT.002.001 ᐊᐲ ᑕᔥ ᐁᐅᒋᒋᓭᓂᒃ ᐃᐃ ᐯᑎᒀᔅᑦ ᑮᔑᑲᓐ ᑳᑮᐃᒋᑳᑌᓂᒃ, ᐯᔑᑾᓄᕽ ᑲᑭᓇ ᑮᐃᔑ ᒫᐗᒋᐃᑎᐗᒃ ᐅᑌᐺᑕᒨᒃ᙮

2:2b.ACT.002.002 ᑫᑕᑐ ᐃᑕᔥ ᑫᑰᓐ ᑭᒋᑮᔑᑯᕽ ᑮᐱᐅᒋ ᓅᑖᑾᓐ ᑖᐱᔥᑰ ᐁᑭᒋ ᒪᑗᓅᐌᒃ ᐁᑮᐃᓂᑖᑾᒃ, ᒥᓯᐌ ᐃᐃᒫ ᐙᑳᐃᑲᓂᕽ ᑮᒨᔥᑭᓀᑖᑾᓐ ᑳᑮᐃᔑ ᐊᐱᐙᒡ᙮

2:3b.ACT.002.003 ᒦᑕᔥ ᑳᑮᐙᐸᑕᒧᐙᒡ ᑫᑰᓇᓐ ᑖᐱᔥᑰ ᐃᔥᑯᑌᐎᑌᓇᓂᐎᒫᕽ ᐁᐃᔑᓈᑾᓂᓂᑭᓐ, ᐁᓃᑲᑌᔥᑳᓂᑭᓐ᙮ ᐯᐯᔑᒃ ᑕᔥ ᐅᑮᐱ ᓈᓯᑳᑯᓈᐙ ᐁᑮ ᓵᒥᔥᑳᑯᐙᒡ ᑳᑮ ᑕᔑᐙᒡ᙮

2:4b.ACT.002.004 ᑲᑭᓇ ᑕᔥ ᐅᑮᒨᔥᑭᓀᔥᑳᑯᐙᓐ ᑭᔐᒪᓂᑑᓐ ᐅᑕᒑᑯᓂᓂ᙮ ᒦᑕᔥ ᑳᐃᔑ ᒫᒌ ᑲᑭᑐᐙᒡ ᐯᐸᑳᓐ ᐁᑮᐃᔑᑮᔗᐙᒡ ᑭᔐᒪᓂᑑᓐ ᐅᑕᒑᑯᓂ ᐁᑮᒦᓂᑯᐙᒡ ᐅᐅ ᒋᔑ ᑲᔥᑭᑑᐙᒡ᙮

2:5b.ACT.002.005 ᐃᐃᒫ ᑕᔥ ᒉᕒᐆᓴᓬᐊᒥᕽ ᑮᐃᔑᑖᐗᐞ ᒎᐗᐞ ᐁᑮᐊᓇᒥᐁᐙᑎᓯᓂᒡ ᒥᓯᐌ ᐁᐅᒌᓂᒡ ᐁᔑ ᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ ᐅᐅᒫ ᐊᑮᕽ᙮

2:6b.ACT.002.006 ᐊᐲ ᑕᔥ ᐁᓅᑖᒥᓂᒡ ᐋᓃᓐ ᐁᓂᑖᑾᓂᓂᒃ, ᐯᒫᑎᓯᓂᒡ ᑳᑮ ᐹᑏᓄᓂᒡ ᑮᒫᒪᐎ ᐲᔖᐗᐞ ᐁᑮᐗᐙᓀᑕᒥᓂᒡ᙮ ᐋᓃᔥ ᑲᑭᓇ ᑳᑮ ᑕᔑᓂᒡ ᐅᑮᓅᑖᑯᐙᐞ ᐁᐃᔑᑮᔗᐙᒡ ᑎᐱᓇᐌ ᐅᑎᔑᑮᔗᐎᓂᓃᕽ᙮

2:7b.ACT.002.007 ᑲᑭᓇ ᓴ ᑯ ᑮᒫᒪᑳᑌᑕᒨᐞ, ᐁᑮᐗᐙᓀᑕᒥᓂᒡ ᐁᐃᑭᑐᓂᒡ: ᑳᐐᓐ ᐃᓇ ᑲᑭᓇ ᐅᑯᐌᓂᐗᒃ ᑳᓬᐊᓬᐄᐎᓂᓂᐗᒃ ᑳᑳᑮᑭᑐᐙᒡ?

2:8b.ACT.002.008 ᐋᓃᓐ ᐃᑕᔥ ᐌᒋ ᓅᑕᐗᑭᑣ ᐁᐃᔑᑮᔗᐙᒡ ᑲᑭᓇ ᐅᑯᐌᓂᐗᒃ ᐯᐸᑳᓐ ᑮᓇᐎᓐᑦ ᑎᐱᓇᐌ ᑳᐃᔑ ᑮᔗᔭᕽ?

2:9b.ACT.002.009 ᐯᐸᑳᓐ ᐄᑐᒃ ᑭᑕᐊᔪᒌᐙᒥᓐ: ᐹᕒᑎᔭ, ᒦᑎᔭ, ᐄᓬᐊᒻ, ᐃᑭ ᑲᔦ ᑳᑮᐅᒌᐙᒡ ᒣᓱᐳᑌᒥᔭ, ᒎᑏᔭ, ᑳᐸᑑᔕ, ᐹᑕᔅ, ᐁᔑᔭ,

2:10b.ACT.002.010 ᐸᕒᐃᒋᔭ, ᐹᐱᓬᐃᔭ, ᐄᒋᑉ, ᐃᐃᒫ ᑲᔦ ᐯᐸᑳᓐ ᑳᔑ ᐊᔮᓂᐗᕽ ᐯᔓ ᓵᐃᕒᐄᓂ ᐆᑌᓈᕽ ᓬᐃᐱᔭ ᐊᑮᕽ᙮ ᐃᑭ ᑕᔥ ᑲᔦ ᐅᕒᐆᒥᕽ ᑳᑮᐱ ᐅᒋ ᑮᔫᑌᐙᒡ᙮ ᐃᑭ ᑲᔦ ᐋᓂᑕ ᒎᐗᒃ ᑳᑮ ᑴᑭᓂᑣ ᒋᐱᒥᓂᔕᐊᒧᐙᒡ ᒎᐎ ᐊᓇᒥᐋᐎᓐ᙮

2:11b.ACT.002.011 ᐋᓂᑕ ᑕᔥ ᑲᕒᐄᑎᕽ, ᐊᕒᐁᐱᔭ ᐊᑮᕽ ᐁᐅᒌᔭᕽ᙮ ᐗᐐᑫ ᑕᔥ ᑭᓂᓯᑐᑕᐙᓈᓂᒃ ᒪᔮ ᑭᑎᔑᑮᔗᐎᓂᓈᓂᕽ ᐁᐃᔑ ᑕᔑᑕᒧᐙᒡ ᑭᔐᒪᓂᑑᓐ ᐁᔑ ᒪᔥᑲᐎᒋᑫᓂᒡ, ᑮᐃᑭᑐᐗᒃ᙮

2:12b.ACT.002.012 ᑲᑭᓇ ᑕᔥ ᑮᒫᒪᑳᑌᑕᒨᒃ ᐁᑮᐗᐙᓀᑕᒧᐙᒡ ᑲᔦ᙮ ᒦᑕᔥ ᑳᐃᑭᑐᐙᒡ: ᑳᓇᑲ ᐌᑯᑐᑴᓐ ᐅᐅ ᐌᒋ ᐃᔑᓭᑴᓐ?

2:13b.ACT.002.013 ᐋᓂᑕ ᑕᔥ ᑮᐹᐱᓄᑖᑫᐗᒃ ᐁᑮᐃᑭᑐᐙᒡ: ᐅᓵᒻ ᐅᔕ ᓃᐱᐗᐞ ᒥᓂᑴᐗᒃ ᐅᔥᑭ ᔔᒥᓈᐴᓂ, ᑮᐃᑭᑐᐗᒃ᙮

2:14b.ACT.002.014 ᐲᑕᕒ ᑕᔥ ᑮᐸᓯᑸ ᑳᑮ ᐐᒌᐙᒡ ᐃᐃ ᑯᑕᒃ ᒥᑖᔑᐯᔑᒃ ᐃᔑᓂᔕᐙᑲᓇᐞ᙮ ᑮᑭᔒᐌ ᑕᔥ ᐅᐅ ᐁᑮᐃᓈᒡ ᑳᑮ ᐹᑏᓄᓂᒡ: ᑮᓇᐙ ᓃᒋᒎᐗᒃ, ᑲᑭᓇ ᑲᔦ ᐅᐅᒫ ᒉᕒᐆᓴᓬᐊᒥᕽ ᐁᔑᑖᔦᒃ! ᐌᐌᓂ ᐱᓯᑕᐎᔑᒃ ᐅᐅᐌ ᑳᐐᐐᑕᒪᐎᓇᑰᒃ᙮

2:15b.ACT.002.015 ᑳᐐᓐ ᐅᔕ ᑮᐗᔥᑴᐲᓯᐗᒃ ᐅᑯᐌᓂᐗᒃ ᑮᐗᔥᑴᐲᐗᒃ ᑳᐃᓀᓂᒣᒀ᙮ ᐸᔨᔥ ᐄᑐᒃ ᐃᓈ ᔖᑲᓱ ᑎᐸᐃᑲᓀᔮ ᐁᑭᔐᐹᐗᑲᒃ᙮

2:16b.ACT.002.016 ᒦ ᓴ ᐅᐌᓂ ᑳᐃᑭᑐᑯᐸᓀᓐ ᒎᐗᓬ ᑭᔐᒪᓂᑑᓐ ᑳᑮ ᑲᓅᑕᒪᐙᒡ:

2:17b.ACT.002.017 ᑕᔨᔑᓭ ᐃᔥᒀᒡ ᐊᓂᑲᑮᔑᑲᒃ, ᐃᑭᑐ ᑭᔐᒪᓂᑑ, ᒋᓰᑭᓇᒪᐗᒀ ᓂᑕᒑᑾᓐ ᑲᑭᓇ ᐯᒫᑎᓯᐙᒡ᙮ ᑭᑯᓯᓯᐗᒃ, ᑭᑖᓂᓯᐗᒃ ᐃᑕᔥ ᑲᔦ ᐅᑲ ᑲᓅᑕᒪᐙᐙᓐ ᑭᔐᒪᓂᑑᓐ ᑭᑑᔥᑭᓃᑭᒥᐗᒃ ᑕᔥ ᑫᑰᓇᓐ ᐅᑲ ᐙᐸᑖᓈᐙᓐ ᐃᔑᓇᒧᐎᓇᓐ, ᑭᑭᒋᐊᔭᐋᒥᐗᒃ ᑕᔥ ᐐᓐ ᑕᐸᐙᒋᑫᐗᒃ᙮

2:18b.ACT.002.018 ᐃᑭ ᓴ ᑲᔦ ᑭᑕᓄᑮᐋᑲᓇᒃ ᑳᐃᓂᓃᐎᐙᒡ, ᑳᐃᑴᐎᐙᒡ ᐃᑕᔥ ᑲᔦ, ᐌᑎ ᐊᓂᑲᑮᔑᑲᓂᓂᒃ ᓂᑲ ᒦᓈᒃ ᑲᑭᓇ ᒋᓈᓯᑳᑯᐙᒡ ᓂᑕᒑᑾᓐ᙮ ᑲᑭᓇ ᑕᔥ ᐅᑲ ᑲᓅᑕᒪᐙᐙᓐ ᑭᔐᒪᓂᑑᓐ᙮

2:19b.ACT.002.019 ᓂᑲ ᐃᔑᒋᑫ ᑕᔥ ᑫᑰᓇᓐ ᒋᒫᒪᑳᓯᓈᑾᑭᓐ ᐃᔥᐱᒥᕽ ᑕᐸᓴᔭᐄ ᑲᔦ ᐊᑮᕽ᙮ ᑕᐙᐸᒋᑳᑌ ᒥᔅᑶ, ᐃᔥᑯᑌ, ᑕᑭᒋ ᐃᓈᐸᑌ ᑕᔥ ᑲᔦ᙮

2:20b.ACT.002.020 ᑮᓯᔅ ᑕᔥ ᑕᑲᔥᑮᑎᐱᑭᐋ, ᑎᐱᑭᑮᓯᔅ ᒥᔅᑸᕽ ᑕᔑ ᒥᔅᑯᓈᑯᓯ᙮ ᒦᐃᐌ ᑕᔥ ᑫᐃᔑᐌᐸᒃ ᒋᑆ ᐅᒋᒋᓭᓂᒃ ᐊᐲ ᑳᑎᐯᒋᑫᒡ ᐅᑮᔑᑲᓄᒻ ᑳᐐᑭᒋ ᐃᓀᑖᑾᓂᓂᒃ, ᑳᐐᒪᔥᑲᐌᑖᑾᓂᓂᒃ ᑲᔦ᙮

2:21b.ACT.002.021 ᑕᐃᔑᓭ ᑕᔥ, ᐊᐌᓀᓐ ᐃᑯ ᑫᑲᓅᓈᒡ ᑳᑎᐯᒋᑫᓂᒡ ᒋᓈᑕᒫᑯᒡ ᑕᐱᒫᒋᐋ᙮

2:22b.ACT.002.022 ᑮᓇᐙ ᐃᔅᕒᐃᔭᓬᐊᒃ, ᐱᓯᑕᒧᒃ ᑳᐐᐃᑭᑐᔮᓐ: ᒋᓴᔅ ᓈᓴᕒᐃᑎᕽ ᑳᑮᐅᒌᒡ ᐃᓂᓃᕽ ᑮᐃᓀᑖᑯᓯ ᐁᑮᐅᓈᐸᒥᑯᒡ ᑭᔐᒪᓂᑑᓐ᙮ ᑭᔐᒪᓂᑑ ᑕᔥ ᑭᑮ ᐯᑌᔮᐸᑕᐃᑯᐙ ᐁᑮᐅᓈᐸᒫᒡ ᒋᓴᓲᓐ, ᐁᑮ ᐋᐸᒋᐋᒡ ᒋᒫᒪᑳᒋᒋᑫᓂᒡ, ᒋᒪᒫᑖᐎᒋᑫᓂᒡ, ᒋᑭᑭᓇᐙᒋᒋᑫᓂᒡ ᑲᔦ᙮ ᑲᑭᓇ ᐄᑐᒃ ᑭᑭᑫᑖᒻ ᐅᐅ᙮

2:23b.ACT.002.023 ᑭᔐᒪᓂᑑ ᐄᑐᒃ ᓃᔭᒃ ᑮᐃᔑ ᐅᓀᑕᒧᑯᐸᓐ, ᓃᔭᒃ ᑲᔦ ᑮᑭᑫᑕᒧᑯᐸᓐ ᐱᓵᓐ ᒋᑳᒋᑎᓂᒥᓐᒡ᙮ ᑮᓇᐙ ᑕᔥ ᑳᑮᐊᑯᓴᑲᐅᒣᒃ ᐋᔑᑌᔮᑎᑯᕽ ᐁᑮᓂᓯᒣᒃ, ᐁᑮᐐᒋᐃᓀᒀ ᐃᑭ ᐃᓂᓂᐗᒃ ᐯᒥᓂᔕᐊᓯᒀ ᐁᔑ ᐊᑕᐌᑕᒥᓂᒡ ᑭᔐᒪᓂᑑᓐ᙮

2:24b.ACT.002.024 ᑭᔐᒪᓂᑑ ᑕᔥ ᐅᑮᑮᐌ ᐱᒫᑎᓰᐋᓐ, ᐁᑮ ᑭᐱᑎᓇᕽ ᒋᑲᒀᑕᑭᐃᑯᓯᓂᒃ ᐃᐃ ᓂᐳᐎᓐ᙮ ᐋᓃᔥ ᑳᐐᓐ ᑫᑰᓐ ᐅᑖ ᑲᔥᑭᐃᑯᓰᓂ ᒋᑭᒋᐎᓂᑯᓂᒡ ᐃᐃᒫ ᓂᐳᐎᓂᕽ᙮

2:25b.ACT.002.025 ᑌᐱᑦ ᑕᔥ ᐐᓐ ᑮᐃᑭᑐᑯᐸᓐ ᐁᑕᔑᒫᒡ ᐅᓄᐌᓂᐗᓐ: ᓂᑲᓇᐙᐸᒫ ᑳᑎᐯᒋᑫᒡ ᒨᔕᒃ ᐁᐅᒋᔥᑲᐎᔥᑲᐎᒡ᙮ ᓂᑭᒋᓂᑭᕽ ᐃᓇᑫ ᐁᐃᔑ ᐐᒋᐃᒡ, ᑳᐐᓐ ᑕᔥ ᐊᐎᔭ ᓂᑲ ᐗᑲᐎᓂᑯᓰ᙮

2:26b.ACT.002.026 ᒦᑕᔥ ᐃᐃᐌ ᐐᑫ ᒥᓯᐌ ᓂᑌᐃᕽ ᐌᒋ ᒨᒋᑫᑕᒫᓐ, ᒫᐗᒡ ᐃᑯ ᐁᒌᑫᑕᒫᓐ ᐅᐅ ᑳᑲᑭᑐᔮᓐ᙮ ᒥᓴᐙ ᐱᑯ ᓂᐐᔭᐤ ᒋᓂᐴᒪᑲᒃ, ᑌᐺ ᓴ ᓂᑫᒋᓇᐋ ᑭᔐᒪᓂᑑ ᐃᐃᐌ ᒋᐃᔑᒋᑫᐃᒡ᙮

2:27b.ACT.002.027 ᑳᐐᓐ ᐄᑐᒃ ᐊᐙᒡ ᑭᑲᐃᔑ ᓇᑲᔑᓰ ᐊᓈᒪᑲᒥᒃ ᐌᑎ ᐅᓂᐴᒃ ᑳᐃᔑ ᐊᔮᐙᒡ᙮ ᑳᐐᓐ ᑲᔦ ᑮᓐ ᑭᔐᒪᓂᑑ ᑭᑲ ᐸᑭᑎᓂᓰ ᑳᓇᐁᑕᒥᐃᓈᓐ ᒋᑕᔑᐗᓈᑕᒃ ᓂᐐᔭᐤ ᐃᐃᒫ ᓂᐳᐎᓂᕽ᙮

2:28b.ACT.002.028 ᑭᑮ ᑭᑫᑕᒨᐃᔥ ᑫᓂᐃᓇᐊᑑᔮᓐ ᑌᐺ ᒋᐱᒫᑎᓯᔮᓐ, ᐐᑫ ᓴ ᑭᑲ ᑌᐱᒨᒋᑫᑕᒧᐃᔥ ᐁᐐᒌᐎᔭᓐ᙮

2:29b.ACT.002.029 ᓃᒋ ᐅᑌᐺᑕᒨᒃ, ᐅᒋᑕ ᐃᑯ ᑭᐐᐐᑕᒪᐎᓂᓂᒻ ᑭᑫᑌᔭᐋᒥᓈᐸᓐ ᑳᑮ ᑭᑌᑖᑯᓯᒡ ᑌᐱᑦ ᐁᑮᓂᐳᒡ, ᑲᔦ ᑕᔥ ᐁᑮᓂᑾᐅᓐᒡ᙮ ᑳᑮᐃᔑ ᓇᐃᓂᓐᒡ ᑫᔮᐱ ᐅᐅ ᐃᔑᐊᐲ ᐁᐊᔮᓂᒃ ᐅᐅᒫ᙮

2:30b.ACT.002.030 ᑫᐐᓐ ᐄᑐᒃ ᑮᑎᓄᐎ ᑳᑲᓅᑕᒪᐙᒡ ᑭᔐᒪᓂᑑᓐ᙮ ᐅᑮᑭᑫᑖᓐ ᑳᑮᐃᔑ ᐊᔓᑕᒫᑯᒡ ᑭᔐᒪᓂᑑᓐ, ᐯᔑᒃ ᐅᐲᐌᓰᒪᓐ ᒋᐊᓂ ᑭᒋᐅᑭᒫᐎᓂᒡ, ᑖᐱᔥᑰ ᑌᐱᑦ ᑳᑮᐃᔑᑭᒫᐎᒡ᙮

2:31b.ACT.002.031 ᑌᐱᑦ ᓃᔭᒃ ᐅᑮᐙᐸᑖᓐ ᐋᓃᓐ ᐙᐃᔑᒋᑫᓂᒡ ᑭᔐᒪᓂᑑᓐ᙮ ᒦᑕᔥ ᑳᑮ ᑕᔑᑕᕽ ᑫᔑ ᑮᐌ ᐱᒫᑎᓯᐃᒥᓐᒡ ᐃᓂ ᐅᐱᒫᒋᐃᐌᓐ ᑭᔐᒪᓂᑑᕽ ᑫᐱᐅᒌᓂᒡ᙮ ᒦᑕᔥ ᑌᐱᑦ ᑳᑮᐃᑭᑐᒡ: ᑳᐐᓐ ᑮᓇᑲᓈᓰ ᒋᓀᐱᒋᐊᔮᒡ ᐊᓈᒪᑲᒥᒃ ᐁᔑ ᐊᔮᓂᒡ ᑳᓂᐳᓂᒡ, ᑳᐐᓐ ᐃᑕᔥ ᑲᔦ ᐅᐐᔭᐤ ᑕᐗᓈᑕᓯᓂᓂ᙮

2:32b.ACT.002.032 ᒦᑕᔥ ᑭᔐᒪᓂᑑᓐ ᑳᑮ ᑮᐌ ᐱᒫᑎᓯᐃᑯᒡ᙮ ᓃᓇᐎᓐᑦ ᐄᑐᒃ ᓂᑮ ᐙᐸᒫᓈᓐ ᐊᐊ ᒋᓴᔅ᙮

2:33b.ACT.002.033 ᒦᑕᔥ ᑳᑮᐅᐱᓂᓐᒡ ᐃᐃᒫ ᓇᑫ ᐅᑭᒋᓂᑭᓃᕽ ᑭᔐᒪᓂᑑᓐ ᒋᔑᑭᒋ ᐃᓀᑖᑯᓯᒡ᙮ ᒦᔥ ᐃᐃ ᑳᑮᒦᓂᑰᐎᓯᒡ ᐌᔫᓯᒥᒥᓐᒡ ᐅᑕᒑᑯᓂ ᑳᑮ ᐊᔓᑕᒪᐎᑎᐸᓐ᙮ ᒦᑕᔥ ᐃᐃᐌᓂ ᐅᒦᓂᑰᐎᓐ ᑳᓰᑭᓇᕽ ᑮᓇᐙ ᓅᑯᒻ ᑳᐙᐸᑕᒣᒃ, ᑳᓅᑕᒣᒃ ᑲᔦ᙮

2:34b.ACT.002.034 ᑳᐐᓐ ᐄᑐᒃ ᐐᓐ ᑌᐱᑦ ᑭᒋᑮᔑᑯᕽ ᑳᑮᐃᔑ ᐅᐱᔥᑳᒡ, ᐅᐅᐌ ᑕᔥ ᐐᓐ ᑮᐃᑭᑐ: ᑳᑎᐯᒋᑫᒡ ᐅᑮᐃᓈᓐ ᐃᓂ ᑳᑎᐯᓂᒥᒥᒡ: ᐃᐃᒫ ᐃᔑᓇᒪᑕᐱᓐ ᓂᑭᒋᓂᑭᕽ ᐃᓇᑫ,

2:35b.ACT.002.035 ᐹᓂᒫ ᓴ ᑭᑲ ᐃᔑᐃᓐ ᒋᔖᑰᒋᐊᑣ ᑳᓂᔥᑫᓂᒥᒀ᙮

2:36b.ACT.002.036 ᑕᑲ ᑕᔥ ᑲᑭᓇ ᑮᓇᐙ ᐃᔅᕒᐃᔭᓬᐊᒃ ᑳᑎᓄᐎᔦᒃ ᑫᒋᓈᒡ ᑭᑫᑕᒧᒃ, ᒦ ᐊᐌ ᒋᓴᔅ ᑳᑕᔑᒪᒃ ᑳᑮᐊᑯᓴᑲᐌᒃ ᐋᔑᑌᔮᑎᑯᕽ, ᐅᑮᐅᓇᓯᑰᓐ ᑭᔐᒪᓂᑑᓐ ᒋᒫᒪᐎ ᑎᐯᒋᑫᒡ, ᐐᓐ ᑲᔦ ᐅᑮᐅᓈᐸᒥᑰᓐ ᒋᐱᒫᒋᐃᐌᒡ᙮

2:37b.ACT.002.037 ᐋᐲ ᑕᔥ ᐯᒫᑎᓯᐙᒡ ᐁᓅᑕᒧᐙᒡ ᐅᐅ, ᑮᐅᒋ ᒥᑯᔥᑳᑌᑕᒨᒃ ᐁᑮᐃᓈᐙᒡ ᐲᑕᕒᐆᓐ, ᐃᐃ ᑲᔦ ᑯᑕᒃ ᐃᔑᓂᔕᐙᑲᓇᐞ: ᓃᒋ ᐅᑌᐺᑕᒨᒥᓈᓂᒃ, ᐋᓃᓐ ᑕᔥ ᑫᐃᔑᒋᑫᔮᕽ?

2:38b.ACT.002.038 ᐲᑕᕒ ᑕᔥ ᐅᑮᐃᔑ ᓇᑴᑕᐙᐞ: ᑴᑭᐱᒫᑎᓯᒃ, ᓰᑲᐊᑖᓱᒃ ᐃᑕᔥ ᑲᔦ ᑲᑭᓇ ᑳᑕᔑᔦᒃ ᐅᑎᔑᓂᑳᓱᐎᓂᕽ ᒋᓴᔅ, ᒋᐴᓀᒋᑳᑌᑭᓐ ᑭᒪᒋᑑᑕᒧᐎᓂᐙᓐ; ᒦᑕᔥ ᐃᐃ ᒋᒦᓂᑰᐎᓯᔦᒃ ᑭᔐᒪᓂᑑ ᐅᑕᒑᑾᓐ᙮

2:39b.ACT.002.039 ᒦ ᐅᐌᓂ ᑭᔐᒪᓂᑑ ᑳᑮᐊᔓᑕᒪᐎᓀᒃ ᐁᐐᒦᓂᓀᒃ, ᐃᐃ ᑲᔦ ᑭᓃᒑᓂᓯᐙᐞ, ᐃᐃ ᑲᔦ ᐙᓴ ᐁᔮᓂᒡ᙮ ᑲᑭᓇ ᓴ ᑯ ᐊᐎᔭᐞ ᑳᑎᐯᒋᑫᒡ ᑭᑭᔐᒪᓂᑑᒥᓈᓐ ᑫᐊᑐᒫᒡ ᒋᐱᓈᓯᑳᑯᒡ, ᑮᐃᑭᑐ᙮

2:40b.ACT.002.040 ᓃᐱᐗᐞ ᑕᔥ ᐲᑕᕒ ᑮᐊᔨᑭᑐ ᐁᑮᐊᔦᒀᒥᒫᒡ ᐁᑮ ᑲᑴ ᑲᔥᑭᒫᒡ: ᑕᐸᓰᓄᑕᒧᐗᒃ ᐅᑎᔑᐌᐱᓯᐎᓂᐙᓐ ᑳᒪᒑᑎᓯᐙᒡ, ᒋᐃᔑᓭᓯᐌᒃ ᑫᔑᓭᐙᒡ᙮

2:41b.ACT.002.041 ᐃᐃ ᑕᔥ ᑳᑮ ᑌᐺᑖᑯᒡ ᐁᑭᑐᒡ ᑮᓰᑲᐊᑖᓱᐗᐞ ᓂᓯᕽ ᒥᑖᔂᒃ 3,000 ᐁᑮ ᑕᔑᓂᒡ᙮ ᒦᔥ ᑳᐃᔑ ᑕᑾᑭᒥᒥᓐᒡ ᐃᐃᒫ ᐁᔑ ᐊᔮᓂᒡ ᐅᑌᐺᑕᒨᐞ᙮

2:42b.ACT.002.042 ᒦᑕᔥ ᐃᑯ ᒨᔕᒃ ᐃᐃᒫ ᑳ ᐊᔮᓂᒡ ᐁᑮ ᐱᓯᑕᒥᓂᒡ ᐁᔑ ᑭᑭᓄᐊᒫᑫᐙᒡ ᐃᔑᓂᔕᐙᑲᓇᒃ᙮ ᐁᑮᐃᔑ ᐐᑑᑳᓱᓂᒡ ᐃᑕᔥ ᑲᔦ ᐁᔑ ᐐᓯᓂᓈᓂᐗᓂᓂᒃ ᐯᑭᔥ ᐁᑮᐊᓇᒥᐁᓈᓂᐗᓂᓂᒃ᙮

2:43b.ACT.002.043 ᑲᑭᓇ ᑕᔥ ᐯᒫᑎᓯᐙᒡ ᑮᒫᒪᑳᑌᑕᒨᒃ ᐃᔑᓂᔕᐙᑲᓇᐞ ᓃᐱᐗᐞ ᐁᑮ ᑑᑕᒥᓂᒡ ᒫᒪᑳᒋᒋᑫᐎᓇᓐ, ᐃᓂ ᑲᔦ ᑭᑭᓇᐙᒋᒋᑫᐎᓇᓐ᙮

2:44b.ACT.002.044 ᑲᑭᓇ ᑕᔥ ᐅᑌᐺᑕᒨᒃ ᑮᒫᒫᐎᐃᑎᐗᒃ᙮ ᑲᑭᓇ ᑲᔦ ᐅᑕᔭᐄᒥᐙᓐ ᐯᐯᔑᑾᓐ ᐁᑮᐃᔑ ᒫᒪᐎᒋᑫᐙᒡ᙮

2:45b.ACT.002.045 ᐅᑮᐊᑖᐙᑫᓈᐙᓐ ᑕᔥ ᐅᑕᔭᐄᒥᐙᓐ, ᑌᐯᑕᒧᐙᒡ ᑲᔦ᙮ ᒦᑕᔥ ᑳᐊᓂ ᐃᔑ ᐊᔮᓂᑫ ᒫᒫᐗᑕᐆᓂᑎᐙᒡ ᐋᓃᓐ ᓴ ᑯ ᐊᐎᔭᓐ ᐁᔑ ᓅᑌᓭᓂᒡ᙮

2:46b.ACT.002.046 ᐁᑕᓱᑮᔑᒃ ᐃᑕᔥ ᑮᓂᑖ ᒫᐗᒋᐃᑎᐗᒃ ᐲᒐᔭᐄ ᑭᒋᐊᓇᒥᐁᐎᑲᒥᑯᕽ᙮ ᐅᑖᐎᓂᐙᕽ ᐁᑮᑕᔑ ᐸᑴᐱᓈᒡ ᐸᑴᔑᑲᓇᓐ ᐁᑮᒫᒪᐎ ᐐᓯᓂᐙᒡ, ᐐᑫ ᐁᑮ ᒌᑫᑕᒧᐙᒡ ᐅᑌᐃᐙᕽ᙮

2:47b.ACT.002.047 ᐁᑮᓇᓈᑯᒫᐙᒡ ᑭᔐᒪᓂᑑᓐ, ᑲᑭᓇ ᑲᔦ ᐊᐎᔭᐞ ᐁᑮᒥᓍᐸᒥᑯᐙᒡ᙮ ᑳᑎᐯᒋᑫᒡ ᑕᔥ ᐅᑮᐊᓂ ᑕᑾᑭᒫᐞ ᐃᐃ ᐁᑕᓱᑮᔑᒃ ᑳᑮ ᐱᒫᒋᐃᒥᓐᒡ᙮

3

3:1b.ACT.003.001 ᐋᐱᑎᕽ ᐁᑮᔑᑲᓂᓂᒃ ᐲᑕᕒ, ᐊᐊ ᑲᔦ ᒞᓐ ᑮᐃᔖᐗᒃ ᑭᒋᐊᓇᒥᐁᐎᑲᒥᑯᕽ ᐁᐃᔥᒀ ᓈᐗᑴᓂᒃ ᐊᐲ ᑳᑮ ᓂᑖ ᐊᓇᒥᐋᓂᐗᓂᓂᒃ ᐁᓂᓱ ᑎᐸᐃᑲᓀᔮᓂᒃ᙮

3:2b.ACT.003.002 ᐯᔑᒃ ᑕᔥ ᐃᓂᓂ ᑳᑮ ᑲᔥᑭᑑᓯᒃ ᒋᐱᒧᓭᒡ ᐁᑮᒫᑭᓂᑖᐎᑭᒡ ᑮᓂᑖ ᐲᒋᑲᓂᐎ ᐃᐃᒫ ᐌᒋ ᐲᑎᑫᕽ ᑭᒋᐊᓇᒥᐁᐎᑲᒥᑯᕽ ᐌᓂᔑᔑᕽ ᐁᒋᑳᑌᓂᒃ᙮ ᒦ ᐃᒫ ᑳᐃᔑ ᓂᑖ ᐸᑯᓭᓂᒧᒡ ᒋᒦᓂᑯᒡ ᐃᓂᐌᓂᐗᐞ ᑭᒋᐊᓇᒥᐁᐎᑲᒥᑯᕽ ᑳᐲᑎᑫᓂᒡ᙮

3:3b.ACT.003.003 ᐊᐊ ᑕᔥ ᐃᓂᓂ ᐁᐙᐸᒫᒡ ᐲᑕᕒᐆᓐ, ᒞᓇᓐ ᑲᔦ ᐁᐊᓂ ᐲᑎᑫᓂᒡ ᑭᒋᐊᓇᒥᐁᐎᑲᒥᑯᕽ ᐅᑮ ᑲᑴᒋᒫᐞ ᒌᒦᓂᑯᒡ ᔔᓂᔮᓐ᙮

3:4b.ACT.003.004 ᐲᑕᕒ ᐁᐐᒌᐎᑯᒡ ᒞᓇᓐ ᐅᑮ ᑲᓇᐙᐸᒫᐙᓐ ᐃᓂ ᐃᓂᓂᐗᓐ ᐁᑮᐃᓈᐙᒡ: ᑲᓇᐙᐸᒥᔑᓈᒻ!

3:5b.ACT.003.005 ᐅᑮ ᑲᓇᐙᐸᒥᑯᐙᓐ ᐃᑕᔥ, ᑫᑰᓐ ᓂᑲ ᒦᓂᑰᒃ ᐁᐃᓀᑕᒥᓂᒡ᙮

3:6b.ACT.003.006 ᐲᑕᕒ ᑕᔥ ᐅᑮᐃᓈᓐ: ᑳᐐᓐ ᓂᑕᔮᐙᓰ ᐙᐹᐱᑯ ᔔᓂᔮ, ᐅᓵᐙᐱᑯ ᔔᓂᔮ ᑲᔦ ᒋᒦᓂᓈᐸᓐ᙮ ᑳᐊᔮᔮᓐ ᑕᔥ ᐐᓐ ᑫᑰᓐ ᑭᑲ ᒦᓂᓐ᙮ ᒋᓴᔅ X ᐅᑎᔑᓂᑳᓱᐎᓂᕽ ᓈᓴᕒᐃᑎᕽ ᑳᐅᒌᒡ ᑭᑎᔑᑲᓅᓂᓐ: ᐸᓯᑸᓐ ᒋᐱᒧᓭᔭᓐ!

3:7b.ACT.003.007 ᐅᑮ ᑌᐱᓈᓐ ᐃᑕᔥ ᐅᑭᒋᓂᑭᓃᕽ ᐁᑮ ᐸᓯᑯᒋᐱᓈᒡ᙮ ᔐᒫᒃ ᑕᔥ ᐅᓯᑎᓂ, ᐅᓈᓂᓂ ᑲᔦ ᐃᓂ ᐃᓂᓂᐗᓐ ᑮᒪᔥᑲᐎ ᐊᔮᒪᑲᓂᓂᐗᓐ᙮

3:8b.ACT.003.008 ᔐᒫᒃ ᐃᑕᔥ ᐊᐊ ᐃᓂᓂ ᑮᐸᓯᑯᒋᓭ ᐁᑮᐊᔨᔥᐱᒀᔥᑾᓂᒡ, ᒦᔥ ᑳᐃᔑ ᐱᒧᓭᒡ ᐁᑮᐊᓂ ᐲᑎᑫᐐᒌᒞᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ᙮ ᐐᑫ ᑮᑭᒋ ᐊᔨᔥᐱᒀᔥᑾᓂ ᐁᑮᒦᑴᒋᐌᓂᒫᒡ ᑭᔐᒪᓂᑑᓐ᙮

3:9b.ACT.003.009 ᑲᑭᓇ ᑕᔥ ᐊᐎᔭᒃ ᐁᐙᐸᒪᐙᒡ ᐁᐱᒧᓭᓂᒡ, ᐁᓇᓈᑯᒫᓂᒡ ᑲᔦ ᑭᔐᒪᓂᑑᓐ,

3:10b.ACT.003.010 ᐅᑮᓂᓯᑕᐎᓇᐙᐙᓐ ᐁᔮᐎᓂᒡ ᑳᑮᓂᑖ ᓇᒪᑕᐱᓂᒡ ᐁᐸᑯᓭᓂᒥᐌᓂᒡ ᐃᐃᒫ ᐌᓂᔑᔑᕽ ᐃᔅᒀᑌᒻ ᐁᐃᒋᑳᑌᓂᒃ ᑭᒋᐊᓇᒥᐁᐎᑲᒥᑯᕽ᙮ ᐐᑫ ᑕᔥ ᑮᐗᐙᓀᑕᒨᒃ, ᑮᒫᒪᑳᑌᑕᒨᒃ ᑲᔦ ᐋᓃᓐ ᐃᐃ ᑳᑮᐃᔑᓭᓂᒡ᙮

3:11b.ACT.003.011 ᒣᒀ ᑕᔥ ᐊᐊ ᐃᓂᓂ ᑳᑮ ᒥᓄᐊᔮᐃᓐᒡ ᐁᑭᒋᐎᓈᒡ ᐲᑕᕒᐆᓐ, ᒞᓇᓐ ᑲᔦ, ᑲᑭᓇ ᐊᐎᔭᐞ ᑮᒫᒪᐎ ᐲᒋᐸᐃᑎᐗᐞ ᐃᐃᒫ ᑳᑮᐃᔑ ᐊᔮᐙᒡ ᐁᔑ ᐸᑕᑭᑌᓂᒃ ᔂᓬᐊᒪᓐ ᐅᑖᓂᑲᐎᒋᑲᓐ ᐁᒋᑳᑌᓂᒃ ᐁᑮᑭᒋ ᒫᒪᑳᑌᑕᒥᓂᒡ᙮

3:12b.ACT.003.012 ᐊᐲ ᑕᔥ ᐲᑕᕒ ᐁᐙᐸᒫᒡ ᐅᑮ ᑲᓅᓈᐞ ᐅᐅ ᐁᑮᐃᓈᒡ: ᑮᓇᐙ ᐃᔅᕒᐃᔭᓬᐊᒃ, ᐌᑯᓀᓐ ᐌᒋ ᒫᒪᑳᑌᑕᒣᒃ ᐅᐅ, ᐌᑯᓀᓐ ᑲᔦ ᐌᒋ ᑭᒋ ᑲᓇᐙᐸᒥᔮᕽ ᑖᐱᔥᑰ ᐁᐃᓀᑕᒣᒃ ᓃᓇᐎᓐᑦ ᐃᑯ ᓂᒪᔥᑲᐎᓰᐎᓂᓈᓃᕽ, ᑯᒫ ᑲᔦ ᐁᔑ ᑾᔭᑯ ᐊᓇᒥᐋᔮᕽ ᐁᐅᒋ ᑲᔥᑭᑑᒡ ᒋᐱᒧᓭᒡ᙮

3:13b.ACT.003.013 ᐅᑭᔐᒪᓂᑑᒥᐙᓐ ᐅᔕ ᐁᐸᕒᐊᐋᒻ, ᐋᐃᓯᒃ, ᒉᑲᑉ, ᐃᑭ ᑲᔦ ᐅᑭᔐᒪᓂᑑᒥᐙᓐ ᑭᑫᑌᔭᐋᒥᓈᐸᓃᒃ, ᒦ ᐅᔕ ᐊᐌ ᑭᔐᒪᓂᑑ ᑳᐙᐸᑕᐃᐌᒡ ᐋᓃᓐ ᐁᐲᒋ ᑭᒋ ᐃᓀᑖᑯᓯᓂᒡ ᐃᓂ ᐅᑕᓄᑮᐋᑲᓇᓐ ᒋᓴᓲᓐ᙮ ᑮᓇᐙ ᐄᑐᒃ ᑳᑮ ᐸᑭᑎᓂᒣᒃ ᒋᐅᓇᔓᐙᓱᓂᒡ, ᐁᑮᐋᓇᐌᓂᒥᒣᒃ ᑲᔦ ᐁᓈᓴᒦᓂᒡ ᐅᓇᔓᐌᐎᑭᒫᓐ ᐹᐃᓬᐊᑑᓐ ᐋᓇᑮᐃᓀᑕᒥᓂᒡ ᒋᐸᑭᑎᓂᒥᓐᒡ᙮

3:14b.ACT.003.014 ᔖᑰᒡ ᐃᑕᔥ ᑮᓇᐙ ᑭᑮᐋᓇᐌᓂᒫᐙ ᐊᐊ ᑫᑌᑖᑯᓯᒡ, ᑴᔭᒀᑎᓯᓂᒡ ᑲᔦ, ᒣᔥᑾᒡ ᐁᑮᐊᑐᑕᒫᑫᔦᒃ ᒋᒦᓂᑰᔦᒃ ᐅᓂᔑᐌ᙮

3:15b.ACT.003.015 ᑭᑮᓂᓵᐙ ᑕᔥ ᐊᐊ ᑌᐯᑕᕽ ᐱᒫᑎᓯᐎᓐ, ᑭᔐᒪᓂᑑᓐ ᐃᑕᔥ ᐅᑮᑮᐌ ᐱᒫᑎᓰᐃᑰᓐ᙮ ᓃᓇᐎᓐᑦ ᐅᔕ ᐅᐅ ᓂᑮᐱ ᐙᐸᑖᒥᓐ᙮

3:16b.ACT.003.016 ᐃᓇᔥᑫ ᑭᐙᐸᒫᐙ ᐗᐊ ᐃᓂᓂ, ᑭᑭᑫᓂᒫᐙ ᑲᔦ᙮ ᐁᑮ ᑌᐺᔦᑕᕽ ᐅᐐᓱᐎᓂᓂ ᒋᓴᓲᓐ, ᒦ ᐃ ᐌᒋ ᒥᓄᐊᔮᒡ᙮ ᐁᑮ ᑌᐺᔦᓂᒫᒡ ᒋᓴᓲᓐ, ᒦ ᐃ ᐗᐊ ᐃᓂᓂ ᐐᑫ ᐌᒋ ᒥᓄᐊᔮᒡ ᑲᑭᓇ ᐊᐎᔭᓐ ᑳᐙᐸᒥᑯᒡ᙮

3:17b.ACT.003.017 ᓂᑎᓇᐌᒫᑲᓇᒃ, ᓂᑭᑫᑖᓐ ᐅᔕ ᐁᑮᓂᓯᑐᑕᓯᐌᒃ ᐃᐃ ᑳᑮᐃᔑᒋᑫᔦᒃ᙮ ᒦᑕᔥ ᐯᔑᑾᓐ ᑳᐃᔑᒋᑫᐙᒡ ᑭᓃᑳᓂᓰᒥᐗᒃ᙮

3:18b.ACT.003.018 ᒦᑕᔥ ᐃᐃ ᓇᑫ ᑭᔐᒪᓂᑑ ᑳᐃᔑ ᒨᔥᑭᓀᓭᓂᒃ ᑳᑮᐃᑭᑐᑯᐸᓀᓐ ᑮᐋᐸᒋᐋᒡ ᑲᑭᓇ ᑫᓅᑕᒫᑯᒡ᙮ ᐁᑮᐱ ᐃᑭᑐᓂᒡ ᒋᑲᒀᑕᑭᑑᓂᒡ ᐃᓂ ᑳᑮᐅᓈᐸᒫᒡ᙮

3:19b.ACT.003.019 ᑴᑭ ᐱᒫᑎᓯᒃ ᐃᑕᔥ, ᐱᑮᐌ ᓈᓯᑲᐎᒃ ᑲᔦ ᑭᔐᒪᓂᑑ ᒋᐴᓀᒋᑳᑌᑭᓐ ᑭᒪᒋᑑᑕᒧᐎᓂᐙᓐ᙮ ᒦᑕᔥ ᒋᐃᔑᓭᓂᒃ ᑳᑎᐯᒋᑫᒡ ᒋᒦᓂᓀᒃ ᐊᓉᔑᓄᐎᓐ ᐃᐃᒫ ᑭᑕᒑᑯᐙᕽ,

3:20b.ACT.003.020 ᐁᑮ ᐲᒋᓂᔕᐙᒡ ᒋᓴᓲᓐ᙮ ᒦᐗᓐ ᐄᑐᒃ ᐃᓂ ᑭᔐᒪᓂᑑ ᑳᑮ ᑮᔖᒋ ᐅᓈᐸᑕᒪᐎᓀᒃ᙮

3:21b.ACT.003.021 ᒦᑕᔥ ᐌᑎ ᒋᓴᔅ ᑫᐊᔮᒡ ᑭᒋᑮᔑᑯᕽ ᐲᓂᔥ ᐊᐲ ᐅᒋᒋᓭᓂᒃ ᑭᔐᒪᓂᑑᓐ ᑳᐐ ᑮᐌ ᐅᔑᑑᒡ ᑲᑭᓇ ᑫᑰᓐ᙮ ᒦ ᐃ ᐄᑐᒃ ᑳᐃᔑ ᐊᔓᑕᒫᑫᑯᐸᓀᓐ ᒣᐎᔕ ᑮᐋᐸᒋᐋᒡ ᑫᑌᑖᑯᓯᓂᒡ ᐅᑲᓅᑕᒫᑫᐞ᙮

3:22b.ACT.003.022 ᒨᓯᔅ ᐄᑐᒃ ᑮᐃᑭᑐ: ᑳᑎᐯᒋᑫᒡ ᑭᑭᔐᒪᓂᑑᒥᐙ ᑭᑲᐃᔑᓂᔕᐊᒫᑯᐙ ᐅᑲᓅᑕᒫᑫᓐ ᑖᐱᔥᑰ ᓃᓐ ᑎᓄ ᒋᐅᑎᓈᒡ ᒣᑴᔭᐄ ᑭᐱᒫᑎᓰᒥᐗᕽ᙮ ᒦᐗᓐ ᑕᔥ ᐃᓂ ᑫᐱᓯᑕᐎᒣᒃ ᑲᑭᓇ ᑫᑰᓐ ᐁᔑ ᐐᑕᒪᐎᓂᒣᒃ᙮

3:23b.ACT.003.023 ᐊᐌᓀᓐ ᑕᔥ ᐃᑯ ᑫᐱᓯᑕᐙᓯᒃ ᐃᓂ ᐅᑲᓅᑕᒫᑫᓐ ᑕᑑᑕᐙ ᒋᐐᒌᐙᓯᒃ ᑭᔐᒪᓂᑑᓐ ᐅᐱᒫᑎᓰᒥᓂ᙮

3:24b.ACT.003.024 ᓵᒥᔫ ᑳᑮ ᐱᐃᑭᑐᒡ, ᐃᑭ ᑲᔦ ᑲᑭᓇ ᐅᑲᓅᑕᒫᑫᒃ ᑳᑮ ᐱᐋᐙᒡ ᑮᐃᔥᒀᐊᔮᓂᒡ, ᐅᑮ ᑕᔑᑖᓈᐙ ᐅᐅ ᓅᑯᒻ ᑳᐃᔑᓭᓂᒃ᙮

3:25b.ACT.003.025 ᑮᓇᐙ ᑕᔥ ᑭᒦᓂᑰᒻ ᐃᓂᐌᓂᐗᓐ ᑭᔐᒪᓂᑑ ᐅᑕᔓᑕᒫᑫᐎᓇᓐ ᑫᓅᑕᒫᑯᒡ ᑳᑮᐃᑭᑐᓂᒡ᙮ ᒦᑕᔥ ᑲᔦ ᑳᐅᒋ ᑎᐯᑖᑯᓯᔦᒃ ᑭᔐᒪᓂᑑ ᑳᑮᐃᔑ ᐊᔓᑕᒪᐙᒡ ᑭᑫᑌᔭᐋᒥᓈᐸᓃᐞ ᐁᑮᐃᓈᑯᐸᓀᓐ ᐁᐸᕒᐊᐋᒪᓐ : ᑮᓐ ᓴ ᑭᐲᐌᓰᒪᒃ ᐅᒋ, ᑲᑭᓇ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᑕᐅᒋ ᔕᐌᑖᑯᓯᐗᒃ᙮

3:26b.ACT.003.026 ᒦᑕᔥ ᑭᔐᒪᓂᑑ ᑳᑮᐅᓈᐸᒫᒡ ᐅᑕᓄᑮᐋᑲᓇᓐ᙮ ᐁᑮᐃᔑᓂᔕᐊᒪᐎᓀᒃ ᑮᓇᐙ ᓂᑕᒻ ᐋᓃᔥ ᑭᑮ ᔕᐌᓂᒥᑯᐙ ᐁᑕᓱ ᐯᔑᑯᔦᒃ, ᒋᓇᑲᑕᒧᐌᒃ ᑭᒪᒋ ᐃᔑᐌᐱᓯᐎᓂᐙᓐ, ᑮᐃᑭᑐ ᐲᑕᕒ ᙮

4

4:1b.ACT.004.001 ᒣᒀ ᑕᔥ ᐁᑲᓅᓈᐙᒡ ᐯᒫᑎᓯᓂᒡ ᐅᑮᐱ ᐅᑎᓯᑯᐙᓐ ᐊᓇᒥᐁᐎᑭᒫᓐ, ᐃᓂ ᑲᔦ ᑳᑮᐅᑭᒫᑲᑕᐙᓂᒡ ᑫᓇᐌᑕᒥᓂᒡ ᑭᒋᐊᓇᒥᐁᐎᑲᒥᒃ, ᐃᐃ ᑕᔥ ᑲᔦ ᓵᒐᓰᐞ ᙮

4:2b.ACT.004.002 ᑳᐐᓐ ᐅᑮᒥᓄᑖᑯᓰᐙᐞ ᐁᑮᐅᒋ ᒥᑯᔥᑳᑌᑕᒥᓂᒡ ᐁᑭᑭᓄᐊᒪᐙᐙᒡ ᐯᒫᑎᓯᓂᒡ᙮ ᐋᓃᔥ ᐅᑮ ᑕᔑᑖᓈᐙ ᐁᑮᑮᐌ ᐱᒫᑎᓯᓂᒡ ᒋᓴᓲᓐ, ᐊᐎᔭᓐ ᑲᔦ ᓂᐳᐎᓂᕽ ᐁᐅᒋ ᑮᐌ ᐱᒫᑎᓯᓂᒡ᙮

4:3b.ACT.004.003 ᒦᑕᔥ ᑳᐃᔑ ᐅᑎᑎᓂᑯᐙᒡ ᐁᑮ ᑭᐸᐅᑯᐙᒡ ᑲᐯᑎᐱᒃ, ᐋᓃᔥ ᐋᔕ ᑮᐅᓈᑯᔑᓂᓂ᙮

4:4b.ACT.004.004 ᓃᐱᐗᐞ ᐃᑕᔥ ᑳᑮᓅᑕᒥᓂᒡ ᐃᐃ ᑎᐹᒋᒧᐎᓐ ᑮᑌᐺᑕᒨᐞ, ᓂᑯᒋᑯ ᓈᓃᕽ ᒥᑖᔂᒃ 5,000 ᐁᑮ ᑕᔑᓂᒡ᙮

4:5b.ACT.004.005 ᐁᐊᓂ ᐙᐸᓂᓂᒃ ᑕᔥ ᐃᑭ ᐌᑭᒫᐎᐙᒡ ᒎᐗᒃ, ᑳᓃᑳᓂᓯᐙᒡ ᑲᔦ, ᐃᑭ ᑕᔥ ᑲᔦ ᑫᑭᓄᐊᒫᑫᐙᒡ ᐅᓇᔓᐌᐎᓐ ᑮᒫᐗᒋᐃᑎᐗᒃ ᐃᐃᒫ ᒉᕒᐆᓴᓬᐊᒥᕽ ᙮

4:6b.ACT.004.006 ᐋᓇᔅ ᑭᒋᐊᓇᒥᐁᐎᑭᒫ ᑕᔥ ᑲᔦ ᐃᐃᒫ ᑮᐊᔮ, ᑫᔭᐸᔅ ᑲᔦ, ᐊᐊ ᑲᔦ ᒞᓐ, ᐊᐊ ᑕᔥ ᑲᔦ ᐋᓬᐃᑭᓵᑕᕒ ᙮ ᐃᑭ ᑕᔥ ᑲᔦ ᑲᑭᓇ ᐁᓇᐌᒫᐙᒡ ᑭᒋᐊᓇᒥᐁᐎᑭᒫᓐ᙮

4:7b.ACT.004.007 ᓈᐗᔭᐄ ᑕᔥ ᐁᔑ ᐊᔮᐙᒡ ᐅᑮᐃᔑ ᓃᐸᐎᐋᐙᐞ ᐃᔑᓂᔕᐙᑲᓇᐞ ᐅᐅ ᐁᑮᐃᔑ ᑲᑴᒋᒫᐙᒡ: ᐌᑯᓀᓐ ᑎᓄ ᒪᔥᑲᐎᓰᐎᓐ ᐅᐅ ᐌᒋ ᑑᑕᒣᒃ, ᐊᐌᓀᓐ ᐃᑕᔥ ᑲᔦ ᐅᐐᓱᐎᓐ ᑳᔮᐸᒋᑖᐌᒃ? ᐅᑮᐃᓈᐙᐞ᙮

4:8b.ACT.004.008 ᐲᑕᕒ ᑕᔥ ᐁᒨᔥᑭᓀᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ ᐅᐅ ᐅᑮᐃᔑ ᓇᑴᑕᒻ: ᑮᓇᐙ ᐌᑭᒫᐎᔦᒃ ᐃᔅᕒᐃᔭᓬᐊᒃ, ᑳᓃᑳᓂᓯᔦᒃ ᑲᔦ,

4:9b.ACT.004.009 ᑮᔥᐱᓐ ᐐᑲᑴᒋᒥᔮᕽ ᐅᐅᐌ ᓅᑯᒻ ᑳᑮᔑᑲᒃ ᑳᑮᒥᓄᑑᑕᐎᓐᒡ ᐗᐊ ᐃᓂᓂ ᑳᒫᑭᓯᒡ ᐋᓃᓐ ᑳᐃᔑ ᒥᓄᐊᔮᐃᓐᒡ,

4:10b.ACT.004.010 ᑕᑲ ᓴ ᑭᑫᑕᒧᒃ ᐅᐅ ᑲᑭᓇ ᑳᑕᔑᔦᒃ, ᑫᑮᓇᐙ ᑕᔥ ᐃᔅᕒᐃᔭᓬᐊᒃ : ᐗᐊ ᐃᓂᓂ ᑳᓃᐸᐎᒡ ᐅᐅᒫ ᐐᑫ ᑮᐅᒋ ᒥᓄᐊᔮ ᐅᐐᓱᐎᓂᓃᕽ ᒋᓴᔅ Xᑕᓐ ᓈᓴᕒᐃᑎᕽ ᑳᑮᐅᒌᓂᒡ᙮ ᒦᐗᓐ ᐃᓂ ᑳᑮᐊᑯᓴᑲᐅᒣᒃ, ᑭᔐᒪᓂᑑᓐ ᐃᑕᔥ ᑳᑮ ᑮᐌ ᐱᒫᑎᓰᐃᑯᒡ᙮

4:11b.ACT.004.011 ᒋᓴᔅ ᓴ ᑳᑕᔑᒥᓐᒡ ᐅᐅ ᑳᐃᔑᐲᐃᑳᑌᒃ ᑭᒋᒪᓯᓇᐃᑲᓐ: ᐊᐊ ᓴ ᐊᓯᓐ ᑳᑮᐋᓇᐌᓂᒣᒃ ᑳᐙᑳᐃᑫᔦᒃ, ᒦᐊᐌ ᒪᔮ ᑫᐱ ᒫᒌ ᑭᒋ ᐃᓀᑖᑯᓯᒡ ᐊᓯᓐ, ᐃᔑᐲᐃᑳᑌ᙮

4:12b.ACT.004.012 ᑳᐐᓐ ᐄᑐᒃ ᑯᑕᒃ ᐊᐎᔭ ᐅᑕᔮᓰᓐ ᐱᒫᒋᐃᐌᐎᓐ, ᐋᓃᔥ ᑳᐐᓐ ᑯᑕᒃ ᐊᔮᓯᓅᓐ ᐃᔑᓂᑳᓱᐎᓐ ᐅᐅᒫ ᐊᑮᕽ ᐊᐎᔭ ᑫᐅᒋ ᐱᒫᒋᐃᑰᐎᓯᐸᓐ᙮

4:13b.ACT.004.013 ᐊᐲ ᑕᔥ ᐁᐙᐸᑕᒧᐙᒡ ᐋᓃᓐ ᐁᐲᒋ ᓲᑭᑌᐁᓂᒡ ᐲᑕᕒᐆᓐ, ᐃᓂ ᑲᔦ ᒞᓇᓐ, ᒦ ᐃ ᑳᑮ ᑭᑫᑕᒧᐙᒡ ᑫᑰᓐ ᐁᑮᐃᓇᑭᓱᓯᓂᒃ, ᐁᑮ ᑭᑭᓄᐊᒪᐙᓯᐎᒥᓐᒡ ᐃᑕᔥ ᑲᔦ, ᐐᑫ ᑮᑭᒋ ᒫᒪᑳᑌᑕᒨᒃ᙮ ᒦᑕᔥ ᑳᑮ ᑭᑫᓂᒫᐙᒡ ᐁᑮᐐᒌᐙᓂᒡ ᐃᓂ ᒋᓴᓲᓐ᙮

4:14b.ACT.004.014 ᐁᐙᐸᒫᐙᒡ ᐃᑕᔥ ᑲᔦ ᐃᓂ ᐃᓂᓂᐗᓐ ᑳᑮᒥᓄᐊᔮᐃᒥᓐᒡ ᐁᐐᒋᑳᐸᐎᑖᑯᓂᒡ, ᒦ ᐃ ᐐᑫ ᑳᐃᔑ ᑴᓇᐎᐃᑭᑐᐙᒡ᙮

4:15b.ACT.004.015 ᒦᑕᔥ ᑳᐃᔑ ᑲᓅᓈᐙᒡ ᐅᐱᒣᔭᐄ ᒋᐃᔖᓂᒡ ᑳᑮᐃᔑ ᒫᐗᒋᐃᑎᐙᒡ ᐅᓇᔓᐌᐎᑲᒥᑯᕽ, ᒦᔥ ᑳᐃᔑ ᒫᒌ ᑲᑲᓅᓂᑎᐙᒡ᙮

4:16b.ACT.004.016 ᒦᔥ ᑳᐃᑭᑐᐙᒡ: ᐋᓃᓐ ᑕᔥ ᑫᑑᑕᐗᒀ ᐅᑯ ᐃᓂᓂᐗᒃ᙮ ᑲᑭᓇ ᐊᐎᔭᐞ ᑳᑖᓂᒡ ᒉᕒᐆᓴᓬᐊᒥᕽ ᐅᑭᑫᑕᒥᓂ ᐅᐅ ᑳᑮᐃᔑᒋᑫᐙᒡ ᑭᒋ ᒫᒪᑳᒋᒋᑫᐎᓐ, ᑳᐐᓐ ᑕᔥ ᑭᑲ ᑲᔥᑭᑑᓰᒥᓐ ᒋᔮᓄᑕᒪᕽ᙮

4:17b.ACT.004.017 ᐅᐅ ᑕᔥ ᐊᐗᔑᒣ ᒋᒥᓯᑌᔥᑳᒪᑲᓯᓄᒃ ᐁᔑ ᐊᔮᐙᒡ ᐯᒫᑎᓯᐙᒡ, ᑕᑲ ᓴ ᑭᒋ ᓅᒋᐋᑖᓂᒃ ᒦᓇᐙ ᒋᑕᔑᑕᒪᐙᓯᒀ ᐊᐎᔭᐞ ᐅᐅ ᐐᓱᐎᓐ᙮

4:18b.ACT.004.018 ᐅᑮᑮᐌ ᐊᑐᒫᐙᐞ ᐃᑕᔥ ᒦᓇᐙ ᐃᔑᓂᔕᐙᑲᓇᐞ ᒋᐲᑎᑫᓂᒡ, ᒦᔥ ᑳᐃᔑ ᐊᔦᒀᒥᒫᐙᒡ ᐊᐗᔑᒣ ᒋᑕᔑᑕᓯᓂᕽ, ᒋᑭᑭᓄᐃᑫᓯᓂᒃ ᐅᑎᔑᓂᑳᓱᐎᓂᓃᕽ ᒋᓴᓲᓐ᙮

4:19b.ACT.004.019 ᐲᑕᕒ ᑕᔥ, ᐊᐊ ᑲᔦ ᒞᓐ ᑮᐃᔑ ᓇᑴᑕᒨᒃ: ᑮᓇᐙ ᐅᓀᑕᒧᒃ ᐋᓃᓐ ᐁᔑ ᒥᓄᓇᒧᑴᓐ ᑭᔐᒪᓂᑑ᙮ ᒫᑭᔖ ᑮᓇᐙ ᒋᓇᐃᑖᑰᔦᒃ, ᑯᒫ ᑲᔦ ᑭᔐᒪᓂᑑ ᒋᐱᓯᑕᐗᑭᐸᓐ᙮

4:20b.ACT.004.020 ᑳᐐᓐ ᐅᔕ ᓃᓇᐎᓐᑦ ᓂᑖ ᑲᔥᑭᑑᓰᒥᓐ ᒋᐴᓂ ᑕᔑᑕᒫᕽ ᑳᑮᐙᐸᑕᒫᕽ, ᑳᑮᓅᑕᒫᕽ ᐃᑕᔥ ᑲᔦ, ᑮᐃᑭᑐ᙮

4:21b.ACT.004.021 ᐋᐲ ᑳᐃᔥᒀ ᐊᔦᒀᒥᒥᑣ ᐊᐗᔑᒣ ᐁᐐ ᑲᒀᑕᑭᐃᑣ, ᒦᑕᔥ ᑳᐃᔑ ᐸᑭᑎᓂᑣ᙮ ᑳᐐᓐ ᑫᑰᓐ ᑮᒥᑭᑳᑌᓯᓂᓂ ᑫᐅᒋ ᐅᓈᑯᓂᑣᐸᓐ ᐋᓃᔥ ᑲᑭᓇ ᐯᒫᑎᓯᓂᒡ ᐅᑮᓇᓈᑯᒫᓂ ᑭᔐᒪᓂᑑᓐ ᐅᐅ ᐅᒋ ᑳᑮᐃᔑᓭᓂᒃ᙮

4:22b.ACT.004.022 ᐊᐊ ᑕᔥ ᑲᔦ ᐃᓂᓂ ᑳᑮᒫᒪᑳᒋᒥᓄᐊᔮᐃᓐᒡ ᐊᐗᔑᒣ ᓃᒥᑕᓇ 40 ᑮᑕᓱᐱᐴᓉ᙮

4:23b.ACT.004.023 ᐊᐲ ᑳᐃᔥᒀ ᐸᑭᑎᓂᑣ ᑮᐃᔑ ᑮᐌᐗᒃ ᐁᔑ ᐊᔮᓂᒡ ᐅᐐᒋ ᐅᑌᐺᑕᒨᒥᐙᐞ ᐁᑮ ᑎᐹᒋᒧᐙᒡ ᑲᑭᓇ ᑫᑰᓐ ᐋᓃᓐ ᑳᐃᑯᐙᒡ ᐃᐃ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑳᓃᑳᓂᓯᓂᒡ ᒎᐗᐞ᙮

4:24b.ACT.004.024 ᐊᐲ ᐅᑌᐺᑕᒨᒃ ᐁᓅᑕᒧᐙᒡ ᐅᐅ, ᐅᑮᒫᒪᐎ ᐊᓇᒥᐁᑕᐙᐙᓐ ᑭᔐᒪᓂᑑᓐ ᐁᐃᑭᑐᐙᒡ: ᐆ ᑌᐯᒋᑫᔭᓐ, ᑮᓐ ᑳᑮᐅᔑᑑᔭᓐ ᑭᒋᑮᔑᒃ, ᐊᑭ, ᑭᒋᑲᒻ ᑲᔦ, ᑲᑭᓇ ᑲᔦ ᐃᐃᒫ ᐁᔮᑭᓐ,

4:25b.ACT.004.025 ᑮᓐ ᑭᔐᒪᓂᑑ ᑭᑕᒑᒃ ᑭᑮᐋᐸᒋᐋ ᑮᒥᓇᒡ ᑭᑕᓄᑮᐋᑲᓐ ᑌᐱᑦ ᓂᑫᑌᔭᐋᒥᓈᐸᓐ ᐅᐅ ᑮᐃᑭᑐᑯᐸᓀᓐ: ᐌᑯᓀᓂᓂ ᐌᒋ ᑭᑖᓱᐙᒡ ᐸᑳᓐ ᐌᒌᐙᒡ ᐊᑮᕽ, ᐌᑯᓀᓂᓂ ᓴ ᑲᔦ ᐃᔑᐊᓂᔖ ᐌᒋ ᐃᓀᑕᒧᐙᒡ ᐃᐃ ᐁᐐᐃᔑᒋᑫᐙᒡ᙮

4:26b.ACT.004.026 ᑭᒋᐅᑭᒫᒃ ᐅᐅᒫ ᐊᑮᕽ ᑮᐅᔒᑖᐗᒃ, ᑌᐯᓂᒥᐌᐙᒡ ᑲᔦ ᑮᒫᐗᒋᐃᑎᐗᒃ ᐁᐐᒦᑳᓈᐙᒡ ᑳᑎᐯᒋᑫᓂᒡ, ᐃᓂᐌᓂᐗᓐ ᑲᔦ ᑳᑮᐅᓈᐸᒫᓂᒡ᙮

4:27b.ACT.004.027 ᐅᐅᒫ ᓴ ᐅᑌᓈᕽ ᑌᐺ ᑕᔑ ᒫᐗᒋᐃᑎᐗᒃ ᐊᐊ ᐁᕒᐊᑦ, ᐹᑎᔭᔅ ᐹᐃᓬᐊᑦ ᑲᔦ, ᐃᑭ ᑕᔥ ᑲᔦ ᑳᒎᐎᐎᓯᒀ᙮ ᐁᐐᒫᔑ ᑑᑕᐙᐙᒡ ᑳᓇᐁᑕᒥᐃᒥᒃ ᑫᑌᑖᑯᓯᓂᒡ ᑭᑕᓄᑮᐋᑲᓇᓐ ᒋᓴᓲᓐ ᑳᑮᐅᓈᐸᒥᒪᒡ᙮

4:28b.ACT.004.028 ᐁᑮᐃᔑᒋᑫᐙᒡ ᑭᒪᔥᑲᐎᓰᐎᓂᕽ, ᑭᑎᓀᑕᒧᐎᓂᕽ ᑲᔦ ᓃᔮᒃ ᑳᑮᐅᒋ ᐅᓇᑑᐗᐸᓀᓐ ᒋᐃᔑᓭᒃ᙮

4:29b.ACT.004.029 ᐃᓇᔥᑫ ᑕᔥ ᓅᑯᒻ ᑌᐯᒋᑫᔭᓐ, ᐙᐸᑕᒧᐤ ᐁᔑ ᐊᔓᑕᒪᐎᔭᒥᑣ ᐁᐐ ᑑᑕᐎᔭᒥᑣ᙮ ᑕᑲ ᓴ ᑕᔥ ᒦᔑᔑᓈᒻ ᓲᑭᑌᐁᐎᓐ ᐁᐅᑕᓄᑮᐋᑲᓂᒥᔮᕽ ᒋᐐᑕᒫᑫᔭᕽ ᑭᑎᑭᑐᐎᓐ᙮

4:30b.ACT.004.030 ᐙᐸᑕᐃᐌᓐ ᑲᔥᑭᐁᐎᓯᐎᓐ ᐁᐊᔮᔭᓐ ᒋᒥᓄᐊᔮᐃᐌᔭᓐ᙮ ᐸᑭᑎᓇᓐ ᑲᔦ ᑭᑭᓇᐙᒋᒋᑫᐎᓇᓐ, ᒫᒪᑳᒋᒋᑫᐎᓇᓐ ᑲᔦ ᒋᑑᒋᑳᑌᑭᓐ ᐅᐐᓱᐎᓂᕽ ᑳᑭᑌᑖᑯᓯᒡ ᑭᑕᓄᑮᐋᑲᓐ ᒋᓴᔅ᙮

4:31b.ACT.004.031 ᐊᐲ ᑕᔥ ᑳᐃᔥᒀ ᐊᓇᒥᐋᐙᒡ ᑮᑯᔥᑯᓭᓂ ᐃᐃᒫ ᐁᔑ ᐊᔮᐙᒡ᙮ ᑲᑭᓇ ᑕᔥ ᐅᑮᒨᔥᑭᓀᔥᑳᑯᐙᓐ ᑭᔐᒪᓂᑑᓐ ᐅᑕᒑᑯᓂ, ᒦᔥ ᑳᐃᔑ ᐙᐐᑕᒧᐙᒡ ᑭᔐᒪᓂᑑᓐ ᐅᑎᑭᑐᐎᓂᓂ ᐁᑮ ᓲᑭᑌᐁᐙᒡ᙮

4:32b.ACT.004.032 ᐁᒫᒪᐎ ᐊᔮᐙᒡ ᑕᔥ ᐅᑌᐺᑕᒨᒃ ᐯᔑᑾᓐ ᑮᐃᓀᑕᒨᒃ, ᐯᔑᑾᓐ ᑮᐃᔑᑌᐁᐗᒃ᙮ ᑳᐐᓐ ᑕᔥ ᐊᐎᔭ ᒋᑮᐃᑭᑐᒡ ᑫᑰᓇᓐ ᐁᐊᔮᒡ ᐐᓐ ᐁᑕ ᐁᑎᐱᓇᐌᐎᓯᒡ, ᑲᑭᓇ ᓴ ᑯ ᑫᑰᓇᓐ ᑮᒫᒪᐎᒋᑫᐗᒃ᙮

4:33b.ACT.004.033 ᐋᐱᒋ ᑕᔥ ᑮᑭᒋ ᒪᔥᑲᐎᒋᑫᐗᒃ ᐃᔑᓂᔕᐙᑲᓇᒃ ᐁᑎᐹᑐᑕᒧᐙᒡ ᑳᑮᐃᔑ ᑮᐌᐱᒫᑎᓯᓂᒡ ᑳᑎᐯᒋᑫᓂᒡ ᒋᓴᓲᓐ᙮ ᑲᑭᓇ ᑕᔥ ᑲᔦ ᑳᑕᔑᐙᒡ ᐅᑮᐅᑎᓯᑯᓈᐙ ᑭᔐᒪᓂᑑᓐ ᐅᑭᒋ ᔕᐌᒋᑫᐎᓂᓂ᙮

4:34b.ACT.004.034 ᑳᐐᓐ ᑕᔥ ᐊᐎᔭ ᑮᑭᑎᒫᑭᓯᓰ ᐁᔑ ᐊᔮᐙᒡ, ᐋᓃᔥ ᑲᑭᓇ ᑳᑮ ᑎᐯᑕᒧᐙᒡ ᐊᑮᓐ, ᐙᑳᐃᑲᓇᓐ ᐃᑕᔥ ᐅᑮᐊᑖᐙᑫᓈᐙᓐ᙮ ᔔᓂᔮᓐ ᑕᔥ ᑳᑮ ᑎᐸᐊᒪᐎᑣ ᐅᑮ ᐲᓈᐙᓐ,

4:35b.ACT.004.035 ᐁᑮᐃᔑ ᐸᑭᑎᓈᐙᒡ ᐁᔑ ᐊᔮᓂᒡ ᐃᔑᓂᔕᐙᑲᓇᐞ; ᒦᑕᔥ ᑳᑮᐃᔑ ᒫᒫᑕᐅᑮᓂᒡ᙮

4:36b.ACT.004.036 ᒦᑕᔥ ᐅᐅ ᒎᓴᑉ ᑳᐃᔑᒋᑫᒡ, ᐊᓇᒥᐁ ᐊᓄᑮᐋᑲᓐ ᓬᐄᐸᐃᑦ ᑳᑎᓄᐎᒡ ᑳᑮᐅᒌᒡ ᓵᐃᐸᕒᐊᔅ ᒥᓂᓯᕽ, ᐹᕒᓇᐸᔅ ᑳᑮᐃᔑᓂᑳᓂᑯᒡ ᐃᔑᓂᔕᐙᑲᓇᐞ᙮ ᐅᐐᓱᐎᓐ ᑕᔥ ᒣᓉᑕᒥᐃᐌᒡ ᑮᐃᑭᑑᒪᑲᓂᓂ᙮

4:37b.ACT.004.037 ᑭᑎᑫᐗᑮᓂ ᐅᑮᐊᔮᓐ, ᒦᔥ ᑳᐃᔑ ᐊᑖᐙᑫᒡ ᐁᑮ ᐲᓈᒡ ᔔᓂᔮᓐ ᑳᑮ ᑎᐸᐊᒪᐎᓐᒡ ᐃᐃᒫ ᐁᔑ ᐊᔮᓂᒡ ᐃᔑᓂᔕᐙᑲᓇᐞ᙮

5

5:1b.ACT.005.001 ᐯᔑᒃ ᑕᔥ ᐃᓂᓂ ᐋᓇᓈᔭᔅ ᐁᔑᓂᑳᓱᒡ, ᐐᐗᓐ ᑕᔥ ᐁᐐᒌᐎᑯᒡ ᓴᐸᐃᕒᐊ ᐁᐃᔑᓂᑳᓱᓂᒡ, ᐅᑮᐊᑖᐙᑫᓈᐙ ᐋᓂᑕ ᐅᑕᑮᒥᐙ ᑌᐯᑕᒧᐙᒡ᙮

5:2b.ACT.005.002 ᐐᐗᓐ ᑕᔥ ᐁᑮᐐᒋ ᐃᓀᑕᒨᒥᑯᒡ ᑮᑲᓇᐌᑕᒫᓱ ᐋᓂᑕ ᔔᓂᔮᓐ ᑳᑮᐅᑎᓯᒡ᙮ ᒥᓂᒃ ᐃᑕᔥ ᑳᐃᔥᑯᓭᓂᒡ ᐅᑮᐃᔑᐎᓈᓐ ᐁᑮ ᐸᑭᑎᓈᒡ ᐁᔑ ᐊᔮᓂᒡ ᐃᔑᓂᔕᐙᑲᓇᐞ᙮

5:3b.ACT.005.003 ᐲᑕᕒ ᑕᔥ ᐅᑮᐃᓈᓐ ᐋᓇᓈᔭᓲᓐ: ᐌᑯᓀᓐ ᑕᔥ ᐌᒋ ᐸᑭᑎᓇᒪᐗᒡ ᓭᑕᓐ ᒋᑎᐯᑕᕽ ᑭᑌᐃᓂ ᐁᑮᐗᓂᒧᑕᐎᒪᒡ ᑭᔐᒪᓂᑑ ᐅᑕᒑᑾᓐ, ᐁᑮ ᑭᒋᐎᓇᒫᓱᔭᓐ ᐋᓂᑕ ᔔᓂᔮ ᑳᑮᐃᓇᑭᑌᒃ ᑭᑕᑮᒻ᙮

5:4b.ACT.005.004 ᑮᓐ ᐄᑐᒃ ᑭᑮ ᑎᐱᓇᐌᐎᔅ ᐃᐃ ᐊᑭ ᒋᑆ ᐊᑖᐙᑫᔭᓐ᙮ ᑮᐃᔥᒀ ᐊᑖᐙᑴᔭᓐ ᑕᔥ, ᑮᓐ ᑭᑭᑎᐯᓂᒫ ᐊᐊ ᔔᓂᔮ᙮ ᐌᑯᓀᓐ ᑕᔥ ᑳᐅᒋ ᐃᓀᑕᒪᓐ ᓭᓯᒃ ᐁᐐᐃᔑᒋᑫᓯᐗᓐ? ᑳᐐᓐ ᐐᓐ ᐃᓂᓂ ᑳᑮᐗᓂᒧᑕᐗᒡ, ᑭᔐᒪᓂᑑ ᐅᔕ, ᐅᑮᐃᓈᓐ᙮

5:5b.ACT.005.005 ᐊᐲ ᑕᔥ ᐋᓇᓈᔭᔅ ᐁᓅᑕᕽ ᐋᓃᓐ ᐁᒋᑲᓂᐎᒡ, ᒦ ᐃ ᑳᐃᔑ ᑲᐎᓭᒡ ᐁᑮᓂᐳᒡ᙮ ᑲᑭᓇ ᑕᔥ ᑳᑮᓅᑕᒧᐙᒡ ᐅᐅ ᐐᑫ ᑮᓭᑭᓯᐗᒃ᙮

5:6b.ACT.005.006 ᐅᔥᑭᓃᑭᐗᒃ ᑕᔥ ᑮᐱᐲᑎᑫᐗᒃ ᐁᑮ ᑎᑎᐯᔩᑭᓇᒧᐙᒡ ᐃᐃ ᐐᔭᐤ᙮ ᒦᑕᔥ ᑳᐃᔑ ᓵᑭᓯᑑᐙᒡ ᐁᑮᐊᐎ ᓇᐃᓇᒧᐙᒡ᙮

5:7b.ACT.005.007 ᐹᓂᒫ ᑕᔥ ᓂᑯᒋ ᑯ ᓂᓱᑎᐸᐃᑲᓐ 3 ᐁᐃᔑᓭᓂᒃ, ᑮᐱᐲᑎᑫᐗᓐ ᐋᓇᓈᔭᔅ ᐐᐗᓐ ᐁᑮ ᑭᑫᑕᓯᓂᒃ ᐋᓃᓐ ᑳᑮᐃᓇᑲᒥᑲᓂᓂᒃ᙮

5:8b.ACT.005.008 ᐲᑕᕒ ᑕᔥ ᐅᑮᐃᓈᓐ ᐃᓂ ᐃᑴᐗᓐ: ᐐᑕᒪᐎᔑᓐ, ᒦ ᓇ ᐅᐌ ᒥᓂᒃ ᑳᐅᑎᓯᔦᒃ ᑮᐊᑖᐙᑫᔦᒃ ᑭᑕᑮᒥᐙ? ᐅᐅ ᑕᔥ ᐅᑮᐃᑰᓐ: ᐁᐊᐞ, ᒦ ᐃᐌ ᒥᓂᒃ ᑳᐅᑎᓯᔮᕽ, ᐅᑮᐃᑰᓐ᙮

5:9b.ACT.005.009 ᐲᑕᕒ ᑕᔥ ᐅᑮᐃᓈᓐ: ᐌᑯᓀᓐ ᑕᔥ ᒥᒋᓃᔥ ᑳᐅᒋ ᐃᓀᑕᒣᒃ ᐁᐐ ᑯᑌᓂᒥᒣᒃ ᑳᑎᐯᒋᑫᒡ ᐅᑕᒑᑾᓐ? ᐃᓇᔥᑫ ᐃᑭ ᐃᓂᓂᐗᒃ ᑳᑮᐊᐎ ᓇᐃᓈᐙᒡ ᑭᓈᐯᒪᓐ ᐋᔕ ᐅᐅᒫ ᐃᔥᒀᑌᕽ ᐱᒥᐊᔮᐗᒃ, ᑫᑮᓐ ᑕᔥ ᑭᑲ ᓵᑭᓯᐃᑰᒃ, ᐅᑮᐃᓈᓐ᙮

5:10b.ACT.005.010 ᔐᒫᒃ ᐃᑕᔥ ᑮᑲᐎᓭᐗᓐ ᐁᔑ ᓯᑌᑳᐸᐎᒡ ᐁᑮᓂᐳᓂᒡ᙮ ᐅᔥᑭᓃᑭᐗᒃ ᐁᐱᐲᑎᑫᐙᒡ ᐅᑮᐙᐸᒫᐙᓐ ᐁᓂᐳᓂᒡ᙮ ᒦᑕᔥ ᑳᐃᔑ ᓵᑭᓯᐋᐙᒡ ᐁᑮᐊᐎ ᓇᐃᓈᐙᒡ ᐃᔑᐅᐱᒣ ᐅᓈᐯᒥᐸᓂᓂ ᑳᑮᐃᔑ ᓇᐃᓂᒥᓐᒡ᙮

5:11b.ACT.005.011 ᓭᑭᓯᐎᓐ ᑕᔥ ᐅᑮᐅᑎᓯᑯᓈᐙ ᑲᑭᓇ ᐅᑌᐺᑕᒨᒃ ᑳᔑ ᒫᐗᒋᐃᑎᐙᒡ, ᐃᑭ ᑲᔦ ᑲᑭᓇ ᑳᑮᓅᑕᒧᐙᒡ ᐅᐅ᙮

5:12b.ACT.005.012 ᐃᔑᓂᔕᐙᑲᓇᒃ ᑕᔥ ᐅᑮ ᑑᑖᓈᐙᓐ ᓃᐱᐗᐞ ᒫᒪᑳᒋᒋᑫᐎᓇᓐ, ᑭᑭᓇᐙᓵᐸᑕᐃᐌᐎᓇᓐ ᐁᔑ ᐊᔮᓂᒡ ᐯᒫᑎᓯᓂᒡ᙮ ᑲᑭᓇ ᑕᔥ ᐅᑌᐺᑕᒨᒃ ᑮᐃᔑ ᒫᐗᒋᐃᑎᐗᒃ ᐃᐃᒫ ᔂᓬᐊᒪᓐ ᐅᑕᐱᓇᐎᒋᑲᓐ ᐁᐃᒋᑳᑌᓂᒃ᙮

5:13b.ACT.005.013 ᐃᓂᐌᓂᐗᐞ ᐃᑕᔥ ᐐᓐ ᐯᑳᓂᓯᓂᒡ ᑳᐐᓐ ᑮᑌᐸᑫᓂᒧᓰᐗᐞ ᒋᐐᒌᐎᑯᐙᒡ᙮ ᔖᑰᒡ ᓴ ᑯ ᐯᒫᑎᓯᓂᒡ ᐅᑮᑭᑕᑭᒥᑯᐙᐞ᙮

5:14b.ACT.005.014 ᐊᐗᔑᒣ ᓴ ᑮᐊᓂ ᐹᑏᓄᐗᒃ ᐅᑌᐺᑕᒨᒃ ᑳᑮ ᑌᐺᑕᐙᐙᒡ ᑳᑎᐯᒋᑫᓂᒡ, ᐃᓂᓂᐗᒃ, ᐃᑴᐗᒃ ᑲᔦ᙮

5:15b.ACT.005.015 ᒦᑕᔥ ᑳᐃᔑᒋᑫᐙᒡ ᐁᑮᐃᔑᐎᓈᐙᒡ ᑳᐋᑯᓯᓂᒡ ᒦᑲᓈᑳᕽ᙮ ᐁᑮᐃᔑ ᐱᒥᔑᒫᐙᒡ ᓂᐯᐎᓂᕽ, ᐊᐱᔑᒧᓂᕽ ᑲᔦ, ᑲᓇᑫ ᓴ ᑯ ᒋᓵᒥᔥᑳᑯᓂᒡ ᐅᑕᑲᐙᑌᔑᓄᐎᓂᓂ ᐲᑕᕒᐆᓐ ᐃᐃᒫ ᐱᒧᓭᓂᒡ᙮

5:16b.ACT.005.016 ᑮᐹᑏᓄᐗᐞ ᓴ ᐯᒫᑎᓯᓂᒡ ᑳᑮ ᐲᔖᓂᒡ, ᐙᑳᔭᐄ ᐆᑌᓇᐗᓐ ᐁᔮᓂᑭᓐ ᒉᕒᐆᓴᓬᐊᒥᕽ ᐁᑮᐊᔪᒌᓂᒡ᙮ ᐅᑮᐲᓈᓂ ᑳᑮᐋᑯᓯᓂᒡ, ᑳᑮ ᑲᒀᑕᑭᐃᑯᓂᒡ ᑲᔦ ᒪᒋᐊᒑᑾᐞ, ᑲᑭᓇ ᑕᔥ ᑮᒥᓄᐊᔮᐙᐞ᙮

5:17b.ACT.005.017 ᒦᑕᔥ ᐊᐊ ᑭᒋᐊᓇᒥᐁᐎᑭᒫ, ᐃᐃ ᑲᔦ ᑲᑭᓇ ᑳᑮᐐᒌᐎᑯᒡ ᓵᒐᓰᑳᕽ ᑳᑮᐃᔑ ᐐᒋᑣᓂᒡ, ᐐᑫ ᓴ ᐅᑮᐊᔮᔐᓂᒫᐙᐞ ᐃᔑᓂᔕᐙᑲᓇᐞ᙮ ᑫᑰᓐ ᐃᑕᔥ ᐅᑮᐐᑑᑕᐙᐙᐞ᙮

5:18b.ACT.005.018 ᐅᑮᐅᑎᑎᓈᐙᐞ ᐃᑕᔥ ᐃᔑᓂᔕᐙᑲᓇᐞ ᐁᑮ ᑕᑯᓈᐙᒡ, ᐁᑮᐃᔑ ᐲᒋᐌᐱᓈᐙᒡ ᓀᑖᑕᔑᐊᔮᓂᒡ ᑳᑭᐸᐅᒥᓐᒡ ᑯᑕᒃ ᐊᐎᔭᐞ᙮

5:19b.ACT.005.019 ᐁᑎᐱᑲᓂᕽ ᑕᔥ ᑳᑎᐯᒋᑫᒡ ᐅᑌᒐᓬᐃᒪᓐ ᑮᐲᔖᐗᓐ ᐁᑮ ᐹᑭᑌᓇᒥᓂᒡ ᑭᐸᐅᑏᐎ ᐃᔥᒀᑌᒻ᙮ ᒦᑕᔥ ᑳᐃᔑ ᓵᑭᒋᐎᓈᒡ ᐃᔑᓂᔕᐙᑲᓇᐞ ᐁᑮᐃᓈᒡ:

5:20b.ACT.005.020 ᒫᒑᒃ, ᐊᐎᓂᐃᐸᐎᒃ ᑭᒋᐊᓇᒥᐁᐎᑲᒥᑯᕽ ᒋᐐᑕᒪᐌᒀ ᐯᒫᑎᓯᐙᒡ, ᒋᒨᔥᑭᓀᔮᑐᑌᒃ ᐅᐅ ᐅᔥᑭ ᐱᒫᑎᓯᐎᓐ, ᐅᑮᐃᓈᐞ᙮

5:21b.ACT.005.021 ᑮᐃᔑᒋᑫᐗᒃ ᑳᑮᐃᓂᑣ᙮ ᑮᑎᐱᑭᓈᐙᓂᓂ ᐱᑯ ᐁᐲᑎᑫᐙᒡ ᑭᒋᐊᓇᒥᐁᐎᑲᒥᒃ, ᒦᔥ ᑳᐃᔑ ᒫᒌ ᑭᑭᓄᐃᑫᐙᒡ᙮ ᑭᒋᐊᓇᒥᐁᐎᑭᒫ ᑕᔥ, ᑳᐐᒌᐎᑯᒡ ᑲᔦ, ᐅᑮᒫᒪᐎ ᐊᑐᒫᐙᐞ ᐃᐃ ᑲᑭᓇ ᑳᐅᓇᔓᐌᓂᒡ, ᐃᐃ ᑲᔦ ᑳᓃᑳᓂᓯᓂᒡ ᒎᐗᐞ ᒋᐅᓈᑯᓂᑫᐙᒡ᙮ ᑮᐃᔑᓂᔕᐅᐌᐗᒃ ᑕᔥ ᑮᐸᐅᑏᐎᑲᒥᑯᕽ ᒋᐲᓂᒥᓐᒡ ᑕᑯᓂᑲᓇᐞ᙮

5:22b.ACT.005.022 ᔑᒫᑲᓂᔕᒃ ᑕᔥ ᐁᐃᔖᐙᒡ, ᑳᐐᓐ ᐅᑮᒥᑲᐙᓯᐙᐙᐞ ᐃᔑᓂᔕᐙᑲᓇᐞ᙮ ᑮᑮᐌᐗᒃ ᐃᑕᔥ ᐁᐊᐎ ᑎᐹᒋᒧᐙᒡ ᐁᑮᐃᑭᑐᐙᒡ:

5:23b.ACT.005.023 ᓂᑮᐙᐸᑖᒥᓐ ᑭᐸᐅᑏᐎ ᐃᔥᒀᑌᒪᓐ ᐁᔮᔩᒋ ᑭᐹᐱᑲᐃᑳᑌᑭᓐ, ᐅᑲᓇᐌᒋᑫᒃ ᑲᔦ ᐁᓃᐸᐎᐙᒡ ᐃᔥᒀᑌᒥᑳᕽ᙮ ᐊᐲ ᑕᔥ ᐁᐹᑭᑌᓇᒫᕽ, ᑳᐐᓐ ᐊᐎᔭ ᐲᑎᒃ ᓂᑮᒥᑲᐙᓯᐙᓈᓐ, ᑮᐃᑭᑐᐗᒃ᙮

5:24b.ACT.005.024 ᐊᐲ ᑕᔥ ᑲᓇᐌᒋᑫᐎ ᔑᒫᑲᓂᔒᐎᑭᒫ ᑭᒋᐊᓇᒥᐁᐎᑲᒥᑯᕽ, ᐊᐊ ᑕᔥ ᑲᔦ ᑭᒋᐊᓇᒥᐁᐎᑭᒫ ᐁᓅᑕᒧᐙᒡ ᐅᐅ ᐁᐃᑭᑐᓂᒡ, ᐐᑫ ᑮᒥᑯᔥᑳᑌᑕᒨᒃ ᐁᑮ ᑭᑫᑕᓯᒀ ᐋᓃᓐ ᑫᓂᐊᔨᔑᐌᐸᓄᑴᓐ᙮

5:25b.ACT.005.025 ᐯᔑᒃ ᐃᑕᔥ ᐊᐎᔭᓐ ᐅᑮᐱ ᐐᑕᒫᑯᐙᓐ: ᐃᓇᔥᑫ ᓈ ᐃᑭ ᐃᓂᓂᐗᒃ ᑳᑮ ᑕᑯᓀᒀ ᑭᐸᐅᑏᐎᑲᒥᑯᕽ, ᑮᒪᑗ ᓃᐸᐎᐗᒃ ᐃᓈ ᑭᒋᐊᓇᒥᐁᐎᑲᒥᑯᕽ ᐁᑭᑭᓄᐊᒪᐙᐙᒡ ᐯᒫᑎᓯᓂᒡ, ᐅᑮᐃᑯᐙᓐ᙮

5:26b.ACT.005.026 ᑮᐃᔖ ᑕᔥ ᐊᐊᐌ ᔑᒫᑲᓂᔒᐎᑭᒫ ᐁᑮᐐᒌᐙᒡ ᐅᔑᒫᑲᓂᔒᒪᐞ᙮ ᒦᑕᔥ ᑳᐃᔑ ᐲᓈᐙᒡ ᐃᔑᓂᔕᐙᑲᓇᐞ ᐌᐌᓂ ᐁᑮ ᑑᑕᐙᐙᒡ ᐋᓃᔥ ᐅᑮ ᑯᓵᐙᐞ ᐯᒫᑎᓯᓂᒡ ᒋᐸᐲᒶᓯᓇᐃᑯᐙᒡ᙮

5:27b.ACT.005.027 ᐊᐲ ᑕᔥ ᑳᐲᓈᐙᒡ, ᐅᑮᐃᓈᓴᒥᑳᐸᐎᐋᐙᐞ ᐁᔑ ᐊᐱᓂᒡ ᐅᓇᔓᐌᐎᓂᓂᐗᐞ᙮ ᑭᒋᐊᓇᒥᐁᐎᑭᒫ ᑕᔥ ᐅᑮ ᑲᑴᒋᒫᐞ,

5:28b.ACT.005.028 ᐁᑮᐃᑭᑐᒡ: ᐐᑫ ᐄᑐᒃ ᑭᑖᓇᑮᐊᔦᒀᒥᒥᑰᒻ ᐊᐗᔑᒣ ᒋᔑ ᑭᑭᓄᐊᒫᑫᓯᐌᒃ ᒋᓴᔅ ᐅᐐᓱᐎᓂᕽ᙮ ᐃᓇᔥᑫ ᑕᔥ ᒥᓯᐌ ᐊᔮᒪᑲᓐ ᐃᐃ ᑭᑭᑭᓄᐊᒫᑫᐎᓂᐙ ᐃᐃᒫ ᒉᕒᐆᓴᓬᐊᒥᕽ ᙮ ᒦᑕᔥ ᑫᑴᑑᑕᐎᔮᕽ ᓃᓇᐎᓐᑦ ᒋᐊᓈᒣᑖᑯᓯᔮᕽ ᐃᐃ ᑳᑮᐃᔑᓂᓯᓐᒡ, ᑮᐃᑭᑐ᙮

5:29b.ACT.005.029 ᐲᑕᕒ ᑕᔥ, ᐃᑭ ᑲᔦ ᑯᑕᒃ ᐃᔑᓂᔕᐙᑲᓇᒃ ᑮᐃᔑ ᓇᑴᑕᒨᒃ ᐁᑮᐃᑭᑐᐙᒡ: ᓇᐗᒡ ᑖᐃᔑᓈᒀᓐ ᒋᓇᐃᑕᐗᑭᑎᐸᓐ ᑭᔐᒪᓂᑑ ᐊᐲᒡ ᐃᓂᓂᐗᒃ᙮

5:30b.ACT.005.030 ᑳᑮᐅᑭᔐᒪᓂᑑᒥᐙᒡ ᑭᑫᑌᐊᔭᐋᒥᓈᐸᓃᒃ ᐅᔕ ᐅᑮᑮᐌ ᐱᒫᑎᓰᐋᓐ ᒋᓴᓲᓐ, ᑮᓇᐙ ᑳᑮᓂᓯᒣᒃ ᐋᔑᑌᔮᑎᑯᕽ᙮

5:31b.ACT.005.031 ᒦᐗᓐ ᐃᑕᔥ ᐃᓂ ᑭᔐᒪᓂᑑ ᑳᑮᐃᔑ ᐸᑭᑎᓈᒡ ᐅᑭᒋᓂᑭᓂᕽ ᐃᓇᑫ ᐁᑮᐃᓇᑭᒫᒡ ᐅᓃᑳᓃᑕᒫᑫ, ᑲᔦ ᑕᔥ ᐅᐱᒫᒋᐃᐌ ᒋᒦᓂᑰᐎᓯᓂᒡ ᐃᔅᕒᐃᔭᓬᐊᐞ ᒋᑴᑳᑎᓯᓂᒡ ᒋᐴᓀᑕᒪᐎᒥᓐᒡ ᐁᔑ ᒪᒋᑑᑕᒥᓂᒡ᙮

5:32b.ACT.005.032 ᓃᓇᐎᓐᑦ ᑕᔥ ᓂᑎᐹᑐᑖᒥᓐ ᐃᓂᐌᓂᐗᓐ ᑳᐙᐸᑕᒫᕽ, ᑭᔐᒪᓂᑑ ᐅᑕᒑᑾᓐ ᑲᔦ ᑎᐹᒋᒧᐗᓐ᙮ ᒦᐗᓐ ᐃᓴ ᐃᓂ ᑳᒦᑭᐙᑫᒡ ᐁᒦᓈᒡ ᐃᐃ ᑳᓇᐃᑖᑯᒡ, ᑮᐃᑭᑐᐗᒃ᙮

5:33b.ACT.005.033 ᐃᑭ ᑕᔥ ᑳᐅᓇᔓᐌᐙᒡ ᐊᐲ ᐁᓅᑕᒧᐙᒡ ᐃᐃ, ᐐᑫ ᓴ ᐅᑮᓂᔥᑭᒥᑯᐙᐞ ᐁᑮᐃᓀᑕᒧᐙᒡ ᒋᓂᓵᐙᒡ ᐃᔑᓂᔕᐙᑲᓇᐞ᙮

5:34b.ACT.005.034 ᐯᔑᒃ ᑕᔥ ᐯᕒᐊᓰ ᑲᒣᓬᐃᔭᓬ ᐁᔑᓂᑳᓱᒡ ᐁᑮᓂᑖ ᑭᑭᓄᐊᒫᑫᒡ ᐅᓇᔓᐌᐎᓐ, ᑲᑭᓇ ᑲᔦ ᐊᐎᔭᐞ ᐅᑮᑭᑌᓂᒥᑰᐞ᙮ ᒦᑕᔥ ᐊᐊ ᑳᑮ ᐸᓯᑸᒡ ᐁᑮᐊᓅᑮᒡ ᐱᓇᒫ ᒋᓵᑭᓯᐃᒥᓐᒡ ᐃᔑᓂᔕᐙᑲᓇᐞ᙮

5:35b.ACT.005.035 ᒦᑕᔥ ᐅᐅ ᑳᐃᓈᒡ: ᑮᓇᐙ ᐃᔅᕒᐃᔭᓬᐊᒃ, ᐊᔦᒀᒥᓯᒃ ᐋᓃᓐ ᑳᐐ ᑑᑕᐌᒀ ᐅᑯ ᐃᓂᓂᐗᒃ᙮

5:36b.ACT.005.036 ᐃᓇᔥᑫ ᒣᐎᔕᔩᔥᑯ ᑮᐱᐊᔮ ᑎᔫᑕᔅ ᐁᑮᑭᒋ ᐃᓍᓂᑎᓱᒡ, ᑫᑳ ᒫᐐᓐ ᓃᐙᒃ ᐃᓂᓂᐗᐞ ᐅᑮ ᐱᒥᓂᔕᐅᑰᐞ᙮ ᒦᑕᔥ ᐃᐃ ᑳᑮᓂᓯᓐᒡ, ᑳᑮ ᐱᒥᓂᔕᐅᑯᒡ ᐃᑕᔥ ᑮᐅᓶᔮᒧᑳᓱᐗᐞ᙮ ᑳᐐᓐ ᑕᔥ ᑮᑭᑫᑖᑾᓯᓂᓂ ᐅᑎᔑᒋᑫᐎᓐ᙮

5:37b.ACT.005.037 ᑳᐃᔥᒀ ᓂᓯᓐᒡ ᑕᔥ ᐊᐊ ᐃᓂᓂ, ᒎᑕᔅ ᑫᐐᓐ ᑮᐱᐊᔮ ᑳᓬᐊᓬᐃᐎᐊᑮᕽ ᐁᑮᐅᒌᒡ ᐊᐲ ᑮᐊᑭᒥᑣ ᑲᑭᓇ ᐊᐎᔭᒃ᙮ ᓃᐱᐗᐞ ᐃᑕᔥ ᐊᐎᔭᐞ ᐅᑮᑲᔥᑭᐋᐞ ᒋᐱᒥᓂᔕᐅᑯᒡ᙮ ᑫᐐᓐ ᑕᔥ ᑮᓂᒋᑲᓂᐎᒡ, ᑲᑭᓇ ᑳᑮ ᐱᒥᓂᔕᐅᑯᒡ ᑮᐅᓶᐸᐃᐌᐗᐞ᙮

5:38b.ACT.005.038 ᐅᐅ ᑕᔥ ᓅᑯᒻ ᑳᐃᓇᑲᒥᑲᒃ, ᒦ ᐅᐌ ᐁᓂᓇᑰᒃ, ᑫᑯ ᑫᑰᓐ ᑑᑕᐙᑫᒀᓂᒃ ᐃᑭ ᐃᓂᓂᐗᒃ᙮ ᑮᔥᐱᓐ ᓴ ᐃᐃ ᐁᓀᑕᒧᐙᒡ, ᐁᔑᒋᑫᐙᒡ ᑲᔦ, ᐃᓂᓃᕽ ᐌᒌᒪᑲᓂᓂᑴᓐ, ᑳᐐᓐ ᑕᓂ ᑭᑫᑖᑾᓯᓂᓂ᙮

5:39b.ACT.005.039 ᑮᔥᐱᓐ ᑕᔥ ᐐᓐ ᑭᔐᒪᓂᑑᕽ ᐌᒌᒪᑲᓂᓂᑴᓐ ᑳᐐᓐ ᑭᑲ ᔖᑰᒋᐋᓯᐙᐙᒃ᙮ ᒦᑕᔥ ᐃᐃ ᒋᑯᔥᑴᑕᒣᒃ ᑭᔐᒪᓂᑑ ᐄᓴᓐ ᐁᒦᑳᓀᒃ, ᑲᒣᓬᐃᔭᓬ ᑮᐃᑭᑐ᙮ ᑮᐃᔑᒋᑫᐗᒃ ᐃᑕᔥ ᑳᑮᐃᓂᑣ᙮

5:40b.ACT.005.040 ᒦᔥ ᑳᐃᔑ ᑮᐌᐲᑎᑲᓈᐙᒡ ᐃᔑᓂᔕᐙᑲᓇᐞ ᐁᑮ ᐸᔕᔐᐙᐙᒡ, ᐁᑮᑭᔒ ᑲᓅᓈᐙᒡ ᑲᔦ ᐊᐗᔑᒣ ᒋᐅᒋ ᑳᑮᑭᑐᓯᓂᒃ ᐅᐐᓱᐎᓂᓃᕽ ᒋᓴᓲᓐ᙮ ᒦᑕᔥ ᑳᐃᔑ ᐸᑭᑎᓈᐙᒡ᙮

5:41b.ACT.005.041 ᐃᔑᓂᔕᐙᑲᓇᒃ ᑕᔥ ᑮᐅᒋ ᒫᒑᐗᒃ ᐁᔑ ᐊᔮᓂᒡ ᐅᓇᔓᐌᐎᓂᓂᐗᐞ, ᐐᑫ ᐁᑮᒥᓉᑕᒧᐙᒡ ᐁᑮᐃᓇᑭᒥᑣ ᐁᑌ ᐊᐲᑌᑖᑯᓯᐙᒡ ᒋᐅᒋ ᐊᑲᒋᐃᑣ ᐅᐐᓱᐎᓂᓃᕽ ᒋᓴᓲᓐ ᐅᒋ᙮

5:42b.ACT.005.042 ᑳᐐᓐ ᑕᔥ ᒋᑮᑭᐱᒌᐙᒡ ᐁᑕᓱᑮᔑᒃ ᐁᑮ ᑭᑭᓄᐊᒫᑫᐙᒡ, ᐁᑮ ᑲᑮᑴᐙᒡ ᑲᔦ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐁᔨᔑᑖᓂᒡ ᑲᔦ ᐯᒫᑎᓯᓂᒡ ᐁᑮᐃᑭᑐᐙᒡ: ᒋᓴᔅ ᐅᔕ ᒦ ᐊᐌ ᑭᔐᒪᓂᑑᓐ ᑳᑮᐅᓈᐸᒥᑯᒡ ᒋᐱᒫᒋᐃᐌᒡ᙮

6

6:1b.ACT.006.001 ᒣᒀ ᓴ ᐊᐲ ᑮᓂ ᐹᑏᓄᐙᒡ ᑭᑭᓄᐊᒪᐙᑲᓇᒃ ᑳᑮ ᑌᐺᑕᐙᐙᒡ ᒋᓴᓲᓐ᙮ ᑲᕒᐄᒃ ᑕᔥ ᑳᑮᐃᔑᑮᔗᐙᒡ ᒎᐗᒃ ᐅᑮᐋᓍᐸᒫᐙᐞ ᐄᐸᕒᐆ ᐁᔑᑮᔗᓂᒡ ᒎᐗᐞ᙮ ᒦ ᐃ ᑳᐃᑭᑐᐙᒡ ᐁᐸᐹ ᐱᓯᔅᑫᒋᑲᓂᐎᓯᓂᒃ ᐅᑮᐙᒋᑴᒥᐙᐞ ᐊᐲ ᑮᐊᔕᑎᓈᓂᐗᓂᓂᒃ ᐃᐃ ᒦᒋᒻ ᑳᑮ ᓂᑖ ᐸᑭᑎᓂᑳᑌᓂᒃ ᐁᑕᓱᑮᔑᒃ᙮

6:2b.ACT.006.002 ᐃᑭ ᑕᔥ ᑳᒥᑖᔑᓃᔑᐙᒡ 12 ᐃᔑᓂᔕᐙᑲᓇᒃ ᐅᑮᐊᑐᒫᐙᐞ ᐁᒫᒪᐎ ᐊᔮᓂᒡ ᐅᑌᐺᑕᒨᐞ ᐅᐅ ᐁᑮᐃᓈᐙᒡ: ᑳᐐᓐ ᓴ ᑕᒥᓄ ᓈᑾᓯᓅᓐ ᓃᓇᐎᓐᑦ ᒋᑭᐱᒌᔮᑭᐸᓐ ᐁᐐᑕᒫᑫᔮᕽ ᑭᔐᒪᓂᑑ ᐅᑎᑭᑑᐎᓐ, ᒋᑮ ᑎᐯᑕᒫᑭᐸᓐ ᐁᔑ ᓈᓈᑲᒋᐃᑣ ᑳᓅᑌᓭᐙᒡ᙮

6:3b.ACT.006.003 ᐊᐤ ᓴ ᓃᒋ ᐅᑌᐺᑕᒨᒃ, ᑮᓇᐙ ᓴ ᐅᓈᐸᒥᑾᒃ ᓃᔣᓱ 7 ᑳᒥᓍᑎᓰᐗᑭᒥᑣ, ᑫᑮᑖᐌᑕᒧᐙᒡ, ᑳᒨᔥᑭᓀᔥᑳᑯᐙᒡ ᑲᔦ ᑭᔐᒪᓂᑑᓐ ᐅᑕᒑᑯᓂ᙮ ᒦᐗᒃ ᐃᑕᔥ ᐃᑭ ᑫᓈᓈᑲᒋᑑᐙᒡ ᐃᐃ ᐊᓄᑮᐎᓐ᙮

6:4b.ACT.006.004 ᓃᓇᐎᓐᑦ ᑕᔥ ᐐᓐ ᒨᔕᒃ ᐃᑯ ᓂᑲᐊᓇᒥᐋᒥᓐ, ᒋᐃᓇᓄᑮᔮᕽ ᑲᔦ ᒋᐐᑕᒫᑫᔮᕽ ᑭᔐᒪᓂᑑ ᐅᑎᑭᑐᐎᓐ᙮

6:5b.ACT.006.005 ᑳᒫᒪᐎᓄᐙᒡ ᐅᑌᐺᑕᒨᒃ ᑕᔥ ᐅᑮᒥᓄᑖᓈᐙ ᑳᑮᐃᓂᑣ᙮ ᒦᑕᔥ ᐅᐅ ᑳᑮᐃᔑᓂᑳᓱᓂᒡ ᐃᓂᓂᐗᐞ ᑳᑮᐅᓈᐸᒫᐙᒡ, ᐃᔅᑏᐱᓐ ᐁᔑᓂᑳᓱᓂᒡ ᑳᑮᒨᔥᑭᓀ ᑌᐺᔦᑕᒥᓂᒡ, ᑳᑮᒨᔥᑭᓀᔥᑳᑯᓂᒡ ᑲᔦ ᑭᔐᒪᓂᑑᓐ ᐅᑕᒑᑯᓂ᙮ ᐱᓬᐊᑉ, ᐸᕒᐋᑯᕒᐊᔅ, ᓂᑫᓇᕒ, ᑖᐃᒪᓐ, ᐹᕒᒥᓇᔅ, ᓂᑲᓬᐊᔅ ᑲᔦ ᑳᑮᒎᐎᐎᓯᒃ ᑮᐅᑖᐱᓇᒧᑯᐸᓀᓐ ᒎᐎᐊᓇᒥᐋᐎᓐ ᐁᑎᔮᒃ ᐆᑌᓈᕽ ᐁᑮᐅᒌᒡ᙮

6:6b.ACT.006.006 ᐃᐃ ᑕᔥ ᑳᑮᐅᓈᐸᒫᐙᒡ ᐃᓂᓂᐗᒃ, ᐅᑮ ᐲᓈᐙᐞ ᐁᔑ ᐊᔮᓂᒡ ᐃᔑᓂᔕᐙᑲᓇᐞ᙮ ᒦᑕᔥ ᑳᐃᔑ ᐊᓇᒥᐁᑕᒪᐙᓂᒡ ᐁᓵᒥᓈᓂᒡ᙮

6:7b.ACT.006.007 ᑫᔮᐱ ᑕᔥ ᑭᔐᒪᓂᑑ ᐅᑎᑭᑐᐎᓐ ᑮᐊᓂ ᒥᓯᑌᔥᑳᒪᑲᓂᓂ᙮ ᐋᒌᑫ ᑮᐊᓂ ᐹᑏᓄᐗᒃ ᐅᑌᐺᑕᒨᒃ ᒉᕒᐆᓴᓬᐊᒥᕽ ᙮ ᑮᐊᓂ ᐹᑏᓄᐗᒃ ᐃᑕᔥ ᑲᔦ ᐊᓇᒥᐁᐎᑭᒫᒃ ᑳᑮᐊᓂ ᑌᐺᑕᒧᐙᒡ᙮

6:8b.ACT.006.008 ᐃᔅᑏᐱᓐ ᐄᑐᒃ ᐐᑫ ᐅᑮᒨᔥᑭᓀᔥᑳᑰᓐ ᑭᔐᒪᓂᑑᓐ ᐅᑭᔐᐙᑎᓯᐎᓂᓂ, ᐅᑲᔥᑭᐁᐎᓯᐎᓂᓂ ᑲᔦ᙮ ᒦᑕᔥ ᑳᑮᐃᔑᒋᑫᒡ ᓃᐱᐗᐞ ᒫᒪᑳᒋᒋᑫᐎᓇᓐ, ᒫᒪᑳᒋᐙᐸᑕᐃᐌᐎᓇᓐ ᑲᔦ ᒣᑴᔭᐄ ᐁᔑ ᐊᔮᓂᒡ ᐯᒫᑎᓯᓂᒡ᙮

6:9b.ACT.006.009 ᐋᓂᑕ ᑕᔥ ᒎᐗᐞ ᑳᐐᓐ ᐅᑮᒥᓍᐸᒥᑯᓰᐞ ᐃᐃᒫ ᐯᔑᒃ ᐊᓇᒥᐁᐎᑲᒥᑯᕽ ᑳᑮᐅᒌᓂᒡ, ᑳᑕᑎᐯᓂᑎᓲᒪᑲᒃ ᐊᓇᒥᐁᐎᑲᒥᒃ ᐁᒋᑳᑌᒃ᙮ ᒦᐗᐞ ᐃᓴ ᐃ ᒎᐗᐞ ᑳᑮᐅᒌᓂᒡ ᓵᐃᕒᐄᓂ, ᐋᓬᐃᑭᓵᑕᕒᐃᔭ, ᐃᐃ ᑕᔥ ᑲᔦ ᒎᐗᐞ ᑳᑮᐅᒌᓂᒡ ᓯᓬᐃᔑᔭ ᐊᑮᕽ ᐌᑎ ᑲᔦ ᐁᔑᔭ ᐊᑮᕽ᙮ ᒦᐙᐞ ᐃᑕᔥ ᐃᐃ ᑳᑮ ᑲᑴ ᔖᑰᓱᒥᑯᒡ᙮

6:10b.ACT.006.010 ᑳᐐᓐ ᐃᑕᔥ ᐅᑮᑲᔥᑭᑑᓰᓂ ᒋᔖᑰᓱᒥᑯᒡ ᑳᐊᐲᒋ ᑲᑮᑖᐌᑕᕽ, ᐃᐃ ᑲᔦ ᑳᑮᐃᔑ ᒦᓂᑯᒡ ᑭᔐᒪᓂᑑᓐ ᐅᑕᒑᑯᓂ ᒋᔑ ᑳᑮᑭᑐᒡ᙮

6:11b.ACT.006.011 ᒦᑕᔥ ᑳᐃᔑ ᑮᒨᒋ ᑎᐸᐊᒪᐙᓂᒡ ᐋᓂᑕ ᐃᓂᓂᐗᐞ ᐅᐅ ᒋᐃᑭᑐᓂᒡ: ᓂᑮᓅᑕᐙᓈᓐ ᐃᔅᑏᐱᓐ ᐁᐹᐱᓄᑕᐙᒡ ᒨᓯᓲᓐ, ᑭᔐᒪᓂᑑᓐ ᑲᔦ᙮

6:12b.ACT.006.012 ᒦᑕᔥ ᐃᐃ ᑳᑮᐅᒋ ᐅᒻᐺᐋᓂᒡ ᐯᒫᑎᓯᓂᒡ, ᐃᐃ ᑲᔦ ᑳᓃᑳᓂᓯᓂᒡ ᒎᐗᐞ, ᐃᐃ ᑲᔦ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ᙮ ᒦᐗᐞ ᐃᑕᔥ ᐃᐃ ᐃᔅᑏᐱᓐ ᑳᑮ ᐱᐊᑕ ᐙᐸᒥᑯᒡ ᐁᑮᐅᑎᑎᓂᑯᒡ ᐁᑮᐃᔑᐎᓂᑯᒡ ᐁᔑ ᐊᔮᓂᒡ ᐅᓇᔓᐌᐎᓂᓂᐗᐞ᙮

6:13b.ACT.006.013 ᒦᔥ ᑳᑮ ᐲᓂᒥᓐᒡ ᐃᓂᐌᓂᐗᐞ ᓅᒋᑯ ᑫᐃᓈᒋᒥᑯᒡ ᐅᐅ ᐁᑮᐃᑯᒡ: ᑳᐐᓐ ᓴ ᐗᐊ ᐃᓂᓂ ᐅᒋ ᑭᐱᒌᓰ ᐁᐹᐱᓄᑕᕽ ᐅᐅ ᑭᒋᐊᓇᒥᐁᐎᑲᒥᑯᓂ ᑭᔐᒪᓂᑑᓐ ᑌᐯᑕᒥᓂᒡ, ᐃᐃ ᑲᔦ ᒨᓯᓲᓐ ᐁᓇᔓᐌᓂᒡ᙮

6:14b.ACT.006.014 ᓂᑮᓅᑕᐙᓈᓐ ᑲᔦ ᐁᐃᑭᑐᒡ ᐊᐊᐌ ᒋᓴᔅ ᓈᓴᕒᐃᑎᕽ ᑳᐅᒌᒡ ᐅᑲ ᓂᔑᐗᓈᒋᑑᓐ ᐅᐅᐌᓂ ᑭᒋᐊᓇᒥᐁᐎᑲᒥᒃ, ᐅᑲ ᔮᒋᑑᓇᓐ ᑲᔦ ᐃᔑᒋᑫᐎᓇᓐ ᒨᓯᓲᓐ ᑳᑮᒦᓂᓂᒪᕽ, ᑮᐃᑭᑐᐗᐞ᙮

6:15b.ACT.006.015 ᑲᑭᓇ ᑕᔥ ᐃᐃᒫ ᑳᑮᐊᐱᐙᒡ ᑳᑕᔑ ᐅᓇᔓᐌᕽ ᐅᑮᑭᒋ ᑲᓇᐙᐸᒫᐙᓐ ᐃᔅᑏᐱᓇᓐ, ᒦᑕᔥ ᑳᑮᐙᐸᒫᐙᒡ ᐁᐃᔒᑴᓂᒡ ᑖᐱᔥᑰ ᐁᐃᔑᓈᑯᓯᓂᒡ ᐁᒐᓬᐊᓐ᙮

7

7:1b.ACT.007.001 ᑭᒋᐊᓇᒥᐁᐎᑭᒫᓐ ᑕᔥ ᐅᑮ ᑲᑴᒋᒥᑰᓐ: ᑌᐺᐗᒃ ᐃᓇ ᐃ ᑳᐃᓂᒀ? ᐅᑮᐃᑰᓐ᙮

7:2b.ACT.007.002 ᒦᔥ ᐃᔅᑏᐱᓐ ᑳᐃᑭᑐᒡ: ᓂᑎᓇᐌᒫᑲᓇᒃ, ᑫᒋᐊᔭᐋᐎᔦᒃ ᑲᔦ! ᑭᔐᒪᓂᑑ ᑫᒋ ᐃᓀᑖᑯᓯᒡ ᐅᑮᓈᑯᓰᑕᐙᓐ ᑭᑫᑌᔭᐋᒥᓈᐸᓃᓐ ᐁᐸᕒᐊᐋᒪᓐ ᒣᒀ ᒣᓱᐳᑌᒥᔭᑮᕽ ᑮᐊᔮᓂᒡ, ᒋᑆ ᐃᔑᑖᓂᒡ ᐆᑌᓈᕽ ᐁᕒᐊᓂᕽ ᙮

7:3b.ACT.007.003 ᒦᔥ ᐅᐅ ᑳᐃᓈᑯᐸᓀᓐ: ᓇᑲᑕᓐ ᐃᐃ ᑭᑕᑮᒻ, ᓇᑲᔥ ᑲᔦ ᑭᑎᓇᐌᒫᑲᓇᒃ ᒋᐃᔖᔭᓐ ᐌᑎ ᐊᑮᕽ ᑳᐐᐙᐸᑕᐃᓈᓐ᙮

7:4b.ACT.007.004 ᒦᑕᔥ ᐃᐃ ᑌᐺ ᑳᑮᓇᑲᑕᕽ ᑳᓬᑎᔭ ᐊᑮᓂ ᐁᑮᐊᐎ ᐃᔑ ᑲᐯᔑᒡ ᐌᑎ ᐁᕒᐊᓂᕽ ᙮ ᐊᐲ ᑕᔥ ᐁᐸᕒᐊᐋᒻ ᐅᑌᑌᓐ ᑳᓂᐳᓂᒡ, ᑭᔐᒪᓂᑑᓐ ᐅᑮ ᐲᒋᑯᓰᐃᑰᓐ ᐅᐅᒫ ᐊᑮᕽ, ᑮᓇᐙ ᓅᑯᒻ ᑳᑖᓄᑕᒣᒃ᙮

7:5b.ACT.007.005 ᑳᐐᓐ ᑕᔥ ᑫᑰᓐ ᐅᑮᒦᓂᑯᓰᓐ ᒋᑎᐱᓇᐌᐎᓯᒡ, ᑳᐐᓐ ᐃᑯ ᑲᓇᑫ ᐁᓂ ᑯᑯᓯᑌᒡ ᒋᑕᑯᑳᑕᕽ ᐅᑮᐃᔑ ᒦᓂᑯᓰᓐ᙮ ᐅᑮᐊᔓᑕᒫᑰᓐ ᐃᑕᔥ ᐁᐐᒦᓂᑯᒡ ᒋᑎᐱᓇᐌᐎᓯᒡ, ᐃᐃ ᑲᔦ ᑫᓂ ᐅᐲᐌᓰᒥᒡ, ᐋᓇᐐᓐ ᒪᔑ ᐁᑮᐊᔮᐙᓯᒃ ᐊᐱᓅᒌᔕᓐ᙮

7:6b.ACT.007.006 ᒦᑕᔥ ᐅᐅ ᑳᐃᑯᒡ ᑭᔐᒪᓂᑑᓐ: ᑭᐲᐌᓰᒪᒃ ᓴ ᑕᐲᐎᑌᐎᐗᒃ ᒪᔭᑭᐊᑮᕽ, ᒦᑕᔥ ᐌᑎ ᑫᑕᔑ ᑲᒀᑕᑲᓄᑮᐃᑣ, ᐯᑭᔥ ᒋᑲᒀᑕᑭᐃᑣ ᓃᐙᒃ 400 ᑕᓱᐱᐴᓐ ᒥᓂᒃ᙮

7:7b.ACT.007.007 ᓂᑲ ᓇᓇᐊᓯᒫᐞ ᑕᔥ ᐯᒫᑎᓯᓂᒡ ᑫᑲᒀᑕᑲᓄᑮᐃᑯᐙᒡ, ᒦᑕᔥ ᒋᓇᑲᑕᒧᐙᒡ ᐃᐃ ᐊᑭ, ᒋᐲᔖᐙᒡ ᐅᐅᒫ ᒋᐱ ᐊᓇᒥᐁᑕᐎᐙᒡ᙮

7:8b.ACT.007.008 ᒦᑕᔥ ᐃᐃ ᑳᑮ ᒦᓂᑯᒡ ᑭᑭᓇᐙᑕᔕᑫᔓᑰᐎᓐ ᐁᑭᑭᓇᐙᒋᑑᓂᒡ ᐋᓃᓐ ᑳᐃᔑ ᐊᔓᑕᒫᑯᒡ᙮ ᐁᐸᕒᐊᐋᒻ ᑕᔥ ᑮᐊᓂ ᐅᑯᓯᓯ ᐋᐃᓯᑰᓐ, ᓂᔣᓱᑮᔑᒃ 8 ᑕᔥ ᐁᐃᔑᓭᓂᒃ ᐅᑮᑭᑭᓇᐙᑕᔕᑫᔣᓐ᙮ ᐋᐃᓯᒃ ᑕᔥ ᑮᐊᓂ ᐅᑯᓯᓯ ᒉᑲᐴᓐ, ᒦᔥ ᐯᔑᑾᓐ ᑳᑑᑕᐙᒡ᙮ ᒉᑲᑉ ᑕᔥ ᑫᐐᓐ ᒦ ᐯᔑᑾᓐ ᑳᑑᑕᐙᒡ ᒥᑖᔑᓃᔑᓐ 12 ᐅᑯᓯᓴᐞ᙮ ᒦᐗᒃ ᐄᑐᒃ ᐃᑭ ᑭᑫᑌᔭᐋᒥᓈᐸᓃᒃ᙮

7:9b.ACT.007.009 ᒦᐗᒃ ᐃᑕᔥ ᐃᑭ ᑭᑫᑌᔭᐋᒥᓈᐸᓃᒃ ᑳᑮᐊᔮᔐᓂᒫᐙᒡ ᐯᔑᒃ ᐐᒋᑭᐌᔨᐙᓐ ᒎᓴᑉ ᑳᑮᐃᔑᓂᑳᓱᓂᒡ᙮ ᑮᐃᔑᐊᑖᐙᑫᐗᒃ ᑕᔥ ᐌᑎ ᒋᐃᔑᑎᐯᓂᒥᒥᓐᒡ ᐄᒋᐸᑮᕽ ᙮ ᔖᑰᒡ ᐃᑕᔥ ᒎᓴᑉ ᐅᑮᐐᒌᐎᑰᓐ ᑭᔐᒪᓂᑑᓐ᙮

7:10b.ACT.007.010 ᒦᑕᔥ ᐃᐃ ᑳᑮ ᓈᑕᒫᑯᒡ ᐋᓃᓐ ᑲᑭᓇ ᑳᑮᐃᔑ ᐗᓯᑖᐎᓭᒡ᙮ ᐅᑮᑲᑮᑖᐌᑕᒧᐃᑰᓐ ᐃᑕᔥ ᑲᔦ, ᐁᑮ ᑑᑕᐙᓂᒡ ᑲᔦ ᒋᒥᓍᐸᒥᑯᒡ ᐃᓂ ᐯᕒᐆᓐ ᑳᑮ ᑭᒋᐅᑭᒫᐎᓂᒡ ᐃᐃᒫ ᐄᒋᐸᑮᕽ᙮ ᒦᑕᔥ ᑳᑮᐃᔑᐃᑯᒡ ᒋᑎᐯᑕᕽ ᑲᑭᓇ ᐄᒋᐸᑮᓂ, ᑲᑭᓇ ᑲᔦ ᐅᐙᑳᐃᑲᓂᓂ᙮

7:11b.ACT.007.011 ᒦ ᓴ ᐃ ᑳᑮ ᓅᑌᓭᒃ ᒦᒋᒻ ᒥᓯᐌ ᐄᒋᐸᑮᕽ, ᒥᓯᐌ ᑲᔦ ᑫᓇᓐ ᐊᑮᕽ, ᐐᑫ ᑕᔥ ᑮᑭᒋ ᑲᒀᑕᑲᔥᑲᑌᓈᓂᐗᓐ᙮ ᑭᑫᑌᔭᐋᒥᓈᐸᓃᒃ ᑕᔥ ᑳᐐᓐ ᐃᑯᒋ ᐅᑮᒥᑲᓰᓈᐙ ᒦᒋᒻ᙮

7:12b.ACT.007.012 ᐊᐲ ᑕᔥ ᒉᑲᑉ ᑳᓅᑕᕽ ᐁᐊᔮᓂᒡ ᐸᑴᔑᑲᓇᓐ ᐄᒋᐸᑮᕽ, ᒦ ᐃ ᑳᑮᐃᔑᓂᔕᐙᒡ ᐅᑯᓯᓴᐞ ᑭᑫᑌᔭᐋᒥᓈᐸᓂᐞ ᒋᐃᔖᓂᒡ᙮ ᒦ ᐃ ᓂᑕᒻ ᐃᐃ ᐁᑮᐃᔖᓂᒡ᙮

7:13b.ACT.007.013 ᒦᓇᐙ ᑕᔥ ᐁᐃᔖᓂᒡ ᒎᓴᑉ ᐅᑮ ᑭᑫᑕᒧᐋᐞ ᐐᒋᑭᐌᔭᐞ ᐐᓐ ᐁᐅᐐᒋᑭᐌᒥᑯᒡ᙮ ᒦᑕᔥ ᐃᐃ ᒎᓴᑉ ᑳᑮ ᑭᑫᓂᒥᑯᒡ ᐯᕒᐆᓐ ᑭᒋᐅᑭᒫᓐ ᐋᑎ ᐌᑕᑳᓀᓯᒡ᙮

7:14b.ACT.007.014 ᒎᓴᑉ ᑕᔥ ᐅᑮᐊᑐᒫᓐ ᐅᑌᑌᓐ ᒉᑲᐴᓐ, ᐃᐃ ᑲᔦ ᑲᑭᓇ ᐅᑎᓇᐌᒫᑲᓇᐞ, ᓃᔣᓯᒥᑕᓇᔑᓈᓈᓐ 75 ᐁᑮ ᑕᔑᓂᒡ᙮

7:15b.ACT.007.015 ᒦᑕᔥ ᒉᑲᑉ ᑳᑮᐃᔖᒡ ᐄᒋᐸᑮᕽ᙮ ᒦᔥ ᐌᑎ ᑳᑕᔑ ᐃᔥᒀ ᐱᒫᑎᓯᒡ, ᐃᑭ ᑲᔦ ᑭᑫᑌᔭᐋᒥᓈᐸᓃᒃ᙮

7:16b.ACT.007.016 ᐅᐐᔭᐎᐙᓐ ᑕᔥ ᑮᐃᔑᐎᒋᑳᑌᓂᐗᓐ ᐌᑎ ᔐᑲᒻ ᐊᑮᕽ ᐁᔑ ᐊᔮᓂᑭᓐ ᓇᐃᓂᑏᐎᑲᒥᑰᓐ ᐁᑮᐊᐎ ᓇᐃᓂᑳᑌᓂᑭᓐ᙮ ᒦ ᐄᑐᒃ ᐅᐅ ᐊᑮᓂ ᐁᐸᕒᐊᐋᒻ ᑳᑮᐊᑖᒫᑯᐸᓀᓐ ᐅᑯᓯᓯᒫᐞ ᐌᑌᑌᓂᒡ ᐁᒧᕒᐊᓐ ᔔᓂᔮᓐ ᐁᑮᐊᑖᐙᑫᑯᐸᓀᓐ᙮

7:17b.ACT.007.017 ᐊᐲ ᑕᔥ ᐋᔕ ᐁᐊᓂ ᐯᔓᓈᑾᓂᓂᒃ ᑭᔐᒪᓂᑑ ᒋᑑᑕᕽ ᑳᑮᐃᔑ ᐊᔓᑕᒪᐙᒡ ᐁᐸᕒᐊᐋᒪᓐ, ᐐᑫ ᓴ ᐃᔅᕒᐃᔭᓬᐊᒃ ᑮᐊᓂ ᐹᑏᓄᐗᒃ ᐃᐃᒫ ᐄᒋᐸᑮᕽ ᙮

7:18b.ACT.007.018 ᒦ ᓴ ᐃᐌ ᐊᐲ ᑮᐊᓂ ᐊᔮ ᑯᑕᒃ ᑭᒋᐅᑭᒫ ᐄᒋᐸᑮᕽ ᑳᑮ ᑭᑫᓂᒫᓯᒃ ᒎᓴᐴᓐ ᙮

7:19b.ACT.007.019 ᒦᑕᔥ ᐊᐊᐌ ᑳᑮ ᑲᔦᔑᑑᑕᐙᒡ ᑭᐐᒋ ᐅᒌᒫᑲᓂᓈᓃᐞ᙮ ᑳᐐᓐ ᑕᔥ ᑲᔦ ᓭᓯᒃ ᐅᑮ ᑑᑕᐙᓰᐞ ᑭᑫᑌᔭᐋᒥᓈᐸᓃᐞ, ᐁᑮᐃᔑᒋᑫᐋᒡ ᒋᐸᑯᐲ ᐌᐱᓈᓂᒡ ᐅᑑᔥᑲᐱᓅᒌᔑᒥᓂ ᒋᓂᓵᐹᐌᓂᒡ᙮

7:20b.ACT.007.020 ᒦ ᓴ ᐃ ᐊᐲ ᒨᓯᔅ ᑳᑮᓂᑖᐎᑭᒡ, ᐐᑫ ᑕᔥ ᑮᒥᓄᓈᑯᓯ ᐁᓈᓴᒦᓂᒡ ᑭᔐᒪᓂᑑᓐ᙮ ᓂᓱᑮᓯᔅ 3 ᐃᑕᔥ ᐅᑮ ᑲᓇᐌᓂᒥᑰᐞ ᐅᓃᑭᐃᑰᐞ ᐅᑖᐎᓂᓂᕽ᙮

7:21b.ACT.007.021 ᐊᐲ ᑕᔥ ᑳᓇᑲᓂᓐᒡ ᐊᑾᒌᕽ, ᐅᑮᐅᑖᐱᓂᑰᓐ ᐅᑖᓂᓯᓂ ᐯᕒᐆᓐ ᑭᒋᐅᑭᒫᓐ᙮ ᒦᐗᓐ ᑕᔥ ᐃᓂ ᑳᐅᐱᑭᐃᑯᒡ ᐁᑲᓇᐌᓂᒥᑯᒡ ᐁᑮᐅᑯᓯᓯᒥᑯᒡ᙮

7:22b.ACT.007.022 ᒨᓯᔅ ᑕᔥ ᒥᓯᐌ ᑮᐃᔑ ᑭᑭᓄᐊᒪᐙ ᐁᔑ ᑲᑮᑖᐌᑕᒥᓂᒡ ᐄᒋᐸᑮᕽ ᐌᒌᓂᒡ᙮ ᑮᐊᓂ ᑎᓄᐎ ᓴ ᐃᓂᓂ ᑳᒪᔥᑲᐎᑮᔗᒡ, ᑳᒪᔥᑲᐎᒋᑫᒡ ᑲᔦ᙮

7:23b.ACT.007.023 ᐊᐲ ᑕᔥ ᓃᒥᑕᓇ 40 ᐁᑕᓱ ᐱᐴᓉᒡ ᑮᐃᓀᑕᒻ ᒋᐊᑕ ᐙᐸᒫᒡ ᐅᐐᒋ ᐅᒌᒫᑲᓇᐞ ᐃᔅᕒᐃᔭᓬᐊᐞ᙮

7:24b.ACT.007.024 ᐅᑮᐙᐸᒫᓐ ᑕᔥ ᐯᔑᒃ ᐄᒋᐸᑮᕽ ᐌᒌᓂᒡ ᑾᔭᒃ ᐁᑑᑖᑯᓯᓂᒃ᙮ ᒦᑕᔥ ᑳᐃᔑ ᓈᑕᒪᐙᒡ ᐁᑮ ᑎᐸᐃᑫᑕᒪᐙᒡ, ᒦᔥ ᑳᐃᔑ ᓂᓵᒡ ᐃᓂ ᐄᒋᐱᔑᐎᓂᓂᐗᓐ᙮

7:25b.ACT.007.025 ᒨᓯᔅ ᒫᐐᓐ ᑮᐃᓀᑕᒻ ᒋᑭᑫᑕᒥᓂᒡ ᐅᐐᒋ ᐅᒌᒫᑲᓇᐞ ᑭᔐᒪᓂᑑᓐ ᐁᐐᐋᐸᒋᐃᑯᒡ ᒋᓈᑕᒪᐎᒥᓐᒡ, ᑳᐐᓐ ᑕᔥ ᐅᑮᐅᒋ ᑭᑫᑕᓰᓂ᙮

7:26b.ACT.007.026 ᐁᐊᓂ ᐙᐸᓂᓂᒃ ᑕᔥ ᐅᑮᐅᑎᓵᐞ ᓃᔑᓐ 2 ᐁᒦᑳᑎᓂᒡ᙮ ᒦᔥ ᑳᐃᔑ ᑭᐱᑎᓈᒡ ᐁᒦᑳᑎᓂᒡ ᐅᐅ ᐁᑮᐃᓈᒡ: ᐋᓃᓐ ᐃᓈ ᐅᓱᓵᒪᑲᒥᒃ, ᑭᑑᐐᒋᑭᐌᑎᒻ ᐄᑐᒃ! ᐌᑯᓀᓐ ᑕᔥ ᐌᒋ ᒦᑳᑎᔦᒃ? ᐅᑮᐃᓈᐞ᙮

7:27b.ACT.007.027 ᐃᓂᐌᓂᐗᓐ ᑕᔥ ᒪᔮ ᑳᑮᒦᑳᓈᓂᒡ ᐐᒋ ᐱᒫᑎᓰᓂ, ᐃᑯᒋ ᐅᑮᐃᔑ ᑳᒋ ᐌᐱᓂᑰᓐ ᐁᑮᐃᑯᒡ: ᐊᐌᓀᓐ ᑳᐃᔑᐃᒃ ᒋᑎᐯᓂᒥᔮᕽ, ᒋᓈᓈᑲᒋᐃᔮᕽ ᑲᔦ?

7:28b.ACT.007.028 ᑭᐐᓂᔑᔥ ᐃᓇ ᑖᐱᔥᑰ ᑳᑮᐃᔑ ᓂᓴᒡ ᐄᒋᐸᑮᕽ ᐌᒌᒡ ᐱᒌᓈᑯ? ᐅᑮᐃᑰᓐ᙮

7:29b.ACT.007.029 ᒦᑕᔥ ᒨᓯᔅ ᑳᑮ ᑕᐸᓰᒡ ᐅᐅ ᐁᓅᑕᕽ ᐁᐃᓂᓐᒡ᙮ ᒥᑎᔭᓐ ᐊᑮᕽ ᑕᔥ ᑮᐊᐸᐃᐌ, ᒦᐌᑎ ᑳᐃᔑ ᑲᐯᔑᒡ᙮ ᓃᔑᓐ 2 ᐅᑯᓯᓴᐞ ᐌᑎ ᑮᑕᔑ ᓂᑖᐎᑭᐗᐞ᙮

7:30b.ACT.007.030 ᐊᐲ ᑕᔥ ᓃᒥᑕᓇ 40 ᑕᓱ ᐱᐴᓐ ᑳᐃᔑᓭᓂᒃ, ᐁᒐᓬᐊᓐ ᐅᑮᓈᑯᓰᑖᑰᓐ ᒣᑴ ᐱᑯᑯᐹᕽ ᐁᐱᔅᑲᓀᓂᒃ ᐃᐃᒫ ᐱᑾᑕᑲᒥᒃ ᒌᑲᔭᐄ ᓵᐃᓇᐃ ᑭᒋᐗᒌᕽ᙮

7:31b.ACT.007.031 ᐊᐲ ᑕᔥ ᒨᓯᔅ ᐁᐙᐸᑕᕽ ᐅᑮ ᒫᒪᑳᑌᑖᓐ ᐃᐃ ᑳᑮᐃᔑᓇᕽ᙮ ᐯᔓ ᑕᔥ ᑮᐊᓂ ᐃᔖ ᐁᐐ ᐙᐸᑕᕽ᙮ ᐅᑮᐅᒋ ᓅᑕᐙᓐ ᑕᔥ ᑳᑎᐯᒋᑫᓂᒡ ᐁᑲᓅᓂᑯᒡ:

7:32b.ACT.007.032 ᓃᓐ ᐅᑭᔐᒪᓂᑑᒥᐙᓐ ᑳᑮᐅᑫᑌᔭᐋᒥᔭᓐ, ᐁᐸᕒᐊᐋᒻ, ᐋᐃᓯᒃ ᑲᔦ, ᐊᐊ ᑕᔥ ᑲᔦ ᒉᑲᑉ᙮ ᒨᓯᔅ ᑕᔥ ᑮᓇᓂᑳᓂᒥᓯ, ᑳᐐᓐ ᑕᔥ ᐊᐗᔑᒣ ᑮᐐᐃᓈᐱᓰ᙮

7:33b.ACT.007.033 ᒦᑕᔥ ᐅᐅ ᑳᐃᑯᒡ ᑳᑎᐯᒋᑫᓂᒡ: ᑮᑕᑭᓯᓀᓐ! ᐃᐃᒫ ᐅᔕ ᑳᔑ ᓃᐸᐎᔭᓐ, ᐐᑫ ᑭᑌᑖᑾᓐ᙮

7:34b.ACT.007.034 ᑌᐺ ᓴ ᓂᐙᐸᑕᒧᐙᓐ ᐁᔑ ᑲᒀᑕᑭᐃᑣ ᓂᐱᒫᑎᓰᒪᒃ ᐄᒋᐸᑮᕽ ᑳᐊᔮᐙᒡ, ᓂᓅᑕᐙᒃ ᑲᔦ ᑳᔑ ᒨᑯᓀᐙᒡ᙮ ᒦᑕᔥ ᑳᐱᐅᒋ ᓈᔑᔮᓐ ᐁᐐ ᐱᒫᒋᐊᒀ᙮ ᐊᐤ ᓴ ᐊᐯ, ᑮᓐ ᑕᔥ ᑭᐐᐃᔑᓂᔕᐅᓐ ᒋᐃᔖᔭᓐ ᐄᒋᐸᑮᕽ᙮

7:35b.ACT.007.035 ᒦ ᓴ ᐗᐊ ᒨᓯᔅ ᑳᑮᐋᓇᐌᓂᒥᑯᒡ ᐃᔅᕒᐃᔭᓬᐊᐞ ᐅᐅ ᐁᑮᐃᑯᑯᐸᓀᓐ: ᐊᐌᓀᓐ ᑮᓐ ᑳᐃᔑᐃᒃ ᒋᑎᐯᓂᒥᔮᕽ, ᒋᓈᓈᑲᒋᐃᔮᕽ ᑲᔦ? ᒦ ᐊᐌ ᑭᔐᒪᓂᑑᓐ ᑳᑮᐃᔑᓂᔕᐅᑯᒡ ᒋᑎᐯᓂᒥᐌᒡ, ᒋᓈᑕᒫᑫᒡ ᑲᔦ ᐁᑮ ᐐᒋᐃᑯᒡ ᐁᒐᓬᐊᓐ ᑳᑮ ᓈᑯᓰᑖᑯᒡ ᐌᑎ ᐱᑯᑯᐹᕽ᙮

7:36b.ACT.007.036 ᒦ ᓴ ᐊᐌ ᐃᓂᓂ ᑳᑮ ᓵᑭᒋᐎᓈᒡ ᐃᔅᕒᐃᔭᓬᐊᐞ ᐄᒋᐸᑮᕽ᙮ ᑮᒪᒫᑖᐎᒋᑫ, ᑮᒫᒪᑳᒋᒋᑫ ᑲᔦ ᐌᑎ ᐄᒋᐸᑮᕽ, ᑭᒋᒥᔅᑯᑲᒦᕽ ᑕᔥ ᑲᔦ, ᐌᑎ ᑕᔥ ᑲᔦ ᐱᑾᑕᑲᒥᒃ ᓃᒥᑕᓇ 40 ᑕᓱ ᐱᐴᓐ᙮

7:37b.ACT.007.037 ᒦᑕᔥ ᐅᐅ ᒨᓯᔅ ᑳᐃᓈᒡ ᐃᔅᕒᐃᔭᓬᐊᐞ: ᑭᑎᓇᐌᒫᑲᓂᐙᕽ ᑭᑲᐅᒋ ᒦᓂᑯᐙ ᐯᔑᒃ ᑭᔐᒪᓂᑑ ᑫᑲᓅᑕᒫᑯᒡ, ᑖᐱᔥᑰ ᓃᓐ ᑎᓄ, ᑮᐃᓈᑯᐸᓐ᙮

7:38b.ACT.007.038 ᒦ ᓴ ᐊᐌ ᑳᑮᐐᒌᐙᒡ ᑮᒫᐗᒋᐃᑎᓂᒡ ᐃᔅᕒᐃᔭᓬᐊᐞ ᐱᑾᑕᑲᒥᒃ; ᐁᑮᐐᒌᐙᒡ ᑭᑫᑌᔭᐋᒥᓈᐸᓃᐞ, ᐃᓂ ᑲᔦ ᐁᒐᓬᐊᓐ ᑳᑮ ᑲᓅᓂᑯᒡ ᐌᑎ ᐗᒌᕽ ᓵᐃᓇᐃ ᙮ ᒦᑕᔥ ᐃᐃ ᑳᑮ ᒦᓂᑰᐎᓯᒡ ᑎᐹᒋᒧᐎᓐ ᒨᔕᒃ ᑫᐊᔮᓂᒃ, ᒦᔥ ᐅᐅ ᑳᑮᐱ ᐊᔮᓂᑫ ᒦᓂᑰᔭᕽ᙮

7:39b.ACT.007.039 ᑳᐐᓐ ᑕᔥ ᑭᑫᑌᔭᐋᒥᓈᐸᓃᒃ ᑮᐃᓀᑕᓰᐗᒃ ᒋᓇᐃᑕᐙᐙᒡ, ᒦᑕᔥ ᑳᑮ ᐸᑫ ᐌᐱᔥᑲᐙᐙᒡ ᒨᓯᓲᓐ᙮ ᑌᑾᒡ ᐃᑕᔥ ᐁᑮᒥᓴᐌᑕᒧᐙᒡ ᐄᒋᐸᑮᕽ ᒋᔑ ᑮᐌᐙᐸᓐ᙮

7:40b.ACT.007.040 ᒦᑕᔥ ᐅᐅ ᑳᑮᐃᓈᐙᒡ ᐁᕒᐊᓅᓐ : ᐅᔑᑕᒪᐎᔑᓈᒻ ᒪᓂᑑᑳᓇᒃ ᑫᓃᑳᓃᑕᒪᐎᔭᒥᑣ᙮ ᐊᐊᐌ ᐐᓐ ᒨᓯᔅ ᑳᑮ ᓵᑭᒋᐎᔑᔭᒥᓐᒡ ᐄᒋᐸᑮᕽ ᑳᐐᓐ ᓂᑭᑫᓂᒫᓯᐙᓈᓐ ᐋᓃᑎ ᐁᔮᑴᓐ, ᐅᑮᐃᓈᐙᓐ᙮

7:41b.ACT.007.041 ᒦᔥ ᐃᐃ ᐊᐲ ᑳᑮᐅᔑᐋᐙᒡ ᐱᔑᑭᑳᓇᓐ, ᐁᑮ ᐲᑑᐙᒡ ᑫᐸᑭᑎᓈᓱᑕᒪᐙᐙᒡ ᒪᓂᑑᑳᓇᓐ, ᐐᑫ ᑲᔦ ᐁᑮᑭᒋ ᒌᑲᑲᒥᑭᓯᐙᒡ ᐁᑮᑭᒋ ᐃᓀᑕᒧᐙᒡ ᐅᓂᒌᐙᕽ ᑳᑮᐅᒋ ᐅᔑᑑᐙᒡ᙮

7:42b.ACT.007.042 ᑭᔐᒪᓂᑑ ᑕᔥ ᑮᑴᑭᑖ, ᐱᓵᓐ ᐁᑮᐸᑭᑎᓈᒡ ᒋᐊᓇᒥᐁᑕᐙᓂᒡ ᑳᐹᑏᓄᓂᒡ ᐗᓇᑯᔕᐞ ᑮᔑᑯᕽ ᐁᔮᓂᒡ᙮ ᒦᑕᔥ ᒪᔮ ᐁᔑᐲᐃᑳᑌᓂᒃ ᐅᒪᓯᓇᐃᑲᓂᐙ ᑭᔐᒪᓂᑑᓐ ᑳᑲᓅᑕᒪᐙᐙᒡ: ᑮᓇᐙ ᓴ ᐃᔅᕒᐃᔭᓬᐊᒃ! ᑳᐐᓐ ᐃᓇ ᑭᑮᓂᑖ ᐲᑕᒪᐎᔑᒻ ᑳᑮᓂᓭᒀ ᐊᔭᐋᐎᔕᒃ ᐁᐸᑭᑎᓈᓱᑕᒪᐎᔦᒃ ᓃᒥᑕᓇ 40 ᑕᓱ ᐱᐴᓐ ᐌᑎ ᐱᑾᑕᑲᒥᒃ?

7:43b.ACT.007.043 ᑌᑾᒡ ᐄᑐᒃ ᑭᑮᒫᒌᑖᐙᒻ ᒨᓬᐁᒃ ᐅᐸᒀᓀᑲᒥᒃ, ᑭᒪᓂᑑᑳᓂᐙ ᐗᓇᑯᔑᕽ ᐁᓍᓀᒃ ᐅᕒᐁᐸᓐ ᑳᐃᓀᒃ᙮ ᑭᑮᐅᔑᐋᐙᒃ ᒪᓂᑑᑳᓇᒃ ᑫᐊᓇᒥᐁᑕᐌᒀ, ᒦᔥ ᑳᐐᐅᒋ ᑑᑕᐎᓇᑰᒃ ᐙᓴ ᐊᐗᓯᓇᑫ ᐹᐱᓬᐊᓐ ᒋᐃᔑᐎᓂᑰᔦᒃ᙮

7:44b.ACT.007.044 ᑭᑫᑌᔭᐋᒥᓈᐸᓃᒃ ᑕᔥ ᑮᐱᒥ ᐊᔮᐙᒡ ᐱᑾᑕᑲᒥᒃ ᐅᑮ ᐱᒥᐎᑑᓈᐙ ᑭᒋ ᐸᒀᓀᑲᒥᑯᓂ ᐁᑮ ᓈᑯᑑᐙᒡ ᐁᐐᒌᐎᑯᐙᒡ ᑭᔐᒪᓂᑑᓐ᙮ ᒪᔮ ᑮᐃᔑᒋᑳᑌᓂ ᑭᔐᒪᓂᑑ ᑳᑮᐃᔑ ᐐᑕᒪᐙᒡ ᒨᓯᓲᓐ ᒋᐃᔑᑑᓂᒡ, ᒪᔮ ᐁᑮᐃᔑᓈᑾᓂᓂᒃ ᐃᐃ ᑳᑮᐃᔑ ᐙᐸᑕᐋᒡ᙮

7:45b.ACT.007.045 ᒦ ᐃᐌᓂ ᐯᔑᑾᓐ ᑭᒋ ᐸᒀᓀᑲᒥᑯᓂ ᑭᑌᑌᔭᐋᒥᓈᐸᓃᒃ ᑳᑮᐋᓂᑫ ᒦᓂᑯᐙᒡ ᑳᑮᐅᑫᑌᔭᐋᒥᐙᒡ᙮ ᒦᑕᔥ ᐃᐃ ᑳᑮ ᐲᑎᑲᑑᐙᒡ ᒣᒀ ᐁᐐᒌᐙᐙᒡ ᒑᔓᐙᓐ, ᐊᐲ ᑮᒪᑲᒫᐙᒡ ᐅᑖᑮᒥᓂ ᐃᐃᒫ ᑳᑮᐊᔮᓂᒡ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ᙮ ᑭᔐᒪᓂᑑᓐ ᓴ ᐅᑮᓵᑭᑖᒪᐙᓂ ᐊᐲ ᑮᓂᐲᑎᑫᔥᑳᐙᒡ ᐃᔅᕒᐃᔭᓬᐊᒃ᙮ ᒦᑕᔥ ᐃᐃᒫ ᑳᐊᔮᓂᒃ ᐃᐃ ᐸᒀᓀᑲᒥᒃ ᐲᓂᔥ ᑮᓂ ᐊᔮᓂᒡ ᑌᐱᑑᓐ ᙮

7:46b.ACT.007.046 ᒦᑕᔥ ᐊᐊ ᑌᐱᑦ ᑳᑮᒥᓍᐸᒥᑯᒡ ᑭᔐᒪᓂᑑᓐ, ᐅᑮ ᑲᑴᒋᒫᓐ ᑲᔦ ᒋᐸᑭᑎᓂᑯᒡ ᒋᐅᔑᑕᒪᐙᒡ ᑭᒋᐊᓇᒥᐁᐎᑲᒥᒃ ᑫᑕᓀᑖᑯᓯᓂᒡ ᐅᑭᔐᒪᓂᑑᒥᓂ ᒉᑲᐴᓐ᙮

7:47b.ACT.007.047 ᔂᓬᐊᒪᓐ ᑕᔥ ᒪᔮ ᑳᑮᐅᔑᑕᒪᐙᒡ ᑭᒋᐊᓇᒥᐁᐎᑲᒥᒃ᙮

7:48b.ACT.007.048 ᔖᑰᒡ ᐃᑕᔥ ᒫᐗᒡ ᐁᔥᐯᑖᑯᓯᒡ ᑭᔐᒪᓂᑑ ᑳᐐᓐ ᐊᔮᓰ ᐙᑳᐃᑲᓂᕽ ᐃᓂᓂᐗᓐ ᐌᔑᑑᓂᒡ᙮ ᒦ ᐅᐌ ᑭᔐᒪᓂᑑ ᑫᓅᑕᒫᑯᒡ ᑳᐃᑭᑐᓂᒡ:

7:49b.ACT.007.049 ᑭᒋᑮᔑᒃ ᐅᔕ ᓂᑑᑭᒫᐗᐱᐎᓐ ᐊᑭ ᑕᔥ ᓂᑕᐱᓯᑌᐱᐎᓐ᙮ ᐌᑯᓀᓐ ᑕᔥ ᐃᓈ ᑎᓄ ᐙᑳᐃᑲᓐ ᑫᐅᔑᑕᒪᐎᔦᑭᐸᓐ? ᐋᑎ ᑕᔥ ᑫᔑ ᐊᓉᐱᔮᓐ?

7:50b.ACT.007.050 ᑳᐐᓐ ᐃᓇ ᓃᓐ ᓂᓂᒌᕽ ᓂᑮᐅᒋ ᐅᓯᑑᓰᓇᓐ ᐅᓄ ᑲᑭᓇ ᑫᑰᓇᓐ? ᐃᑭᑐ ᑭᔐᒪᓂᑑ᙮

7:51b.ACT.007.051 ᐁᑕᑕᐌ ᑮᓇᐙ ᑭᓂᑖ ᔕᔒᐱᑖᒻ, ᐁᐃᔑ ᐊᔮᓯᐌᒃ ᑭᑌᐃᐙᕽ ᒋᐐ ᑌᐺᑕᒣᒃ, ᐁᓅᑕᓯᐌᒃ ᑲᔦ ᑌᐺᐎᓐ᙮ ᐱᔑᔑᒃ ᑭᓇᑳᔥᑲᐎᒫᐙᓐ ᑭᔐᒪᓂᑑ ᐅᑕᒑᑾᓐ, ᐁᐃᔑᒋᑫᔦᒃ ᒪᔮ ᑳᑮᐃᔑᒋᑫᐙᒡ ᑭᑫᑌᔭᐋᒥᐙᐸᓃᒃ᙮

7:52b.ACT.007.052 ᑯᓂᑫ ᑕᔥ ᑮᐊᔮᑐᑴᓇᓐ ᑭᔐᒪᓂᑑ ᑫᓅᑕᒫᑯᒡ ᑳᑮ ᑲᒀᑕᑭᐋᓯᒀ ᑭᑫᑌᔭᐋᒥᐙᐸᓃᒃ? ᐅᑮᓂᓵᐙᐞ ᐄᑐᒃ ᐃᐃ ᓃᔮᒃ ᑳᑮ ᐐᑕᒫᑫᓂᒡ ᒋᑕᑯᔑᓂᓂᒡ ᑭᔐᒪᓂᑑᓐ ᑫᐲᒋᓂᔕᐙᓂᒡ ᐅᑾᔭᒀᑎᓰᒥᓂ᙮ ᒦᐗᓐ ᐃᓂ ᐅᑾᔭᒀᑎᓰᒪᓐ ᑮᓇᐙ ᑳᑮᒪᒥᔑᐃᒣᒃ, ᒦᔥ ᑳᐃᔑ ᓂᓯᒣᒃ᙮

7:53b.ACT.007.053 ᑮᓇᐙ ᐄᑐᒃ ᑳᑮ ᒦᓂᑰᔦᒃ ᒨᓯᔅ ᐅᑑᓇᔓᐌᐎᓐ ᐁᒐᓬᐊᒃ ᑳᑮ ᐊᓂᑫ ᒦᑭᐌᐙᒡ, ᑳᐐᓐ ᐃᑕᔥ ᐊᐙᒡ ᑭᑮ ᓇᐃᑕᓰᒻ, ᐅᑮᐃᓈᐞ᙮

7:54b.ACT.007.054 ᐊᐲ ᑕᔥ ᐅᓇᔓᐌᐎᓂᓂᐗᒃ ᐁᓅᑕᒧᐙᒡ ᐅᐅ, ᐐᑫ ᑮᓂᔥᑭᒫᐗᒃ, ᐁᑮᒪᑗᑕᒧᐙᒡ ᐐᐱᑎᐙᓐ ᑳᐊᐲᒋ ᓂᔥᑭᒥᑯᐙᒡ᙮

7:55b.ACT.007.055 ᐃᔅᑏᐱᓐ ᑕᔥ ᐁᒨᔥᑭᓀᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ, ᐃᔥᐱᒥᕽ ᑭᒋᑮᔑᑯᕽ ᑮᐃᔑ ᑭᒋᐙᐱ᙮ ᒦᑕᔥ ᑳᑮᐙᐸᑕᕽ ᑭᔐᒪᓂᑑᓐ ᐅᑭᒋ ᐃᓀᑖᑯᓯᐎᓂᓂ, ᒋᓴᓲᓐ ᑲᔦ ᐁᓃᐸᐎᓂᒡ ᐅᑭᒋᓂᑭᓃᕽ ᐃᓇᑫ ᑭᔐᒪᓂᑑᓐ᙮

7:56b.ACT.007.056 ᒦᔥ ᐅᐅ ᑳᐃᑭᑐᒡ: ᐃᓇᔥᑫ ᓂᐙᐸᑖᓐ ᑭᒋᑮᔑᒃ ᐁᐹᑭᔥᑳᒃ, ᓂᐙᐸᒥᒫᓐ ᐃᓂᓂ ᐅᑯᓯᓴᓐ ᐁᓃᐸᐎᓂᒡ ᐅᑭᒋᓂᑭᕽ ᐃᓇᑫ ᑭᔐᒪᓂᑑ, ᑮᐃᑭᑐ᙮

7:57b.ACT.007.057 ᑲᑭᓇ ᑕᔥ ᐅᓇᔓᐌᐎᓂᓂᐗᒃ ᑮᔖᑯᐌᐗᒃ, ᐁᑮ ᑭᐱᑌᓂᑎᓱᐙᒡ, ᒦᑕᔥ ᑳᐃᔑ ᒨᑮᑕᐙᐙᒡ᙮

7:58b.ACT.007.058 ᒦᑕᔥ ᑳᐃᔑ ᓵᑭᒋᐌᐱᓈᐙᒡ ᐃᐃᒫ ᐆᑌᓈᕽ, ᐁᑮᒫᒌ ᐸᐲᒶᓯᓇᐋᐙᒡ᙮ ᐃᑭ ᑕᔥ ᑳᑮ ᑲᑮᓇᐎᔥᑳᒋᒧᐙᒡ ᐅᑮ ᑮᒋᑯᔥᑳᓈᐙᓐ ᐅᑲᔥᑮᑮᐎᓂᐙᓐ ᐁᑮᐃᔑ ᐸᑭᑎᓇᒧᐙᒡ ᐁᔑ ᓯᑌᑳᐸᐎᓂᒡ ᐅᔥᑭᓃᑭᐗᓐ ᔂᓬ ᐁᔑᓂᑳᓱᓂᒡ᙮

7:59b.ACT.007.059 ᐃᔅᑏᐱᓐ ᑕᔥ ᒣᒀ ᐁᐸᐲᒶᓯᓇᐃᓐᒡ ᐅᑮᐊᓇᒥᐁᑕᐙᓐ ᑳᑎᐯᒋᑫᓂᒡ ᐁᑮᐃᑭᑐᒡ: ᑌᐯᒋᑫᔭᓐ ᒋᓴᔅ, ᐅᑖᐱᓐ ᓂᑕᒑᒃ!

7:60b.ACT.007.060 ᑮᐅᒋᒌᑾᓇᐱ ᑕᔥ ᐁᑮ ᑭᔒᐌᒡ ᐁᑮᐃᑭᑐᒡ: ᑌᐯᒋᑫᔭᓐ, ᑫᑯ ᐊᑭᑕᒪᐙᑫᓐ ᐅᐅ ᒪᒋ ᐃᔑᒋᑫᐎᓐ ᑳᐃᔑᒋᑫᐙᒡ, ᑮᐃᑭᑐ᙮ ᐅᐅ ᑕᔥ ᑳᐃᔥᒀ ᐃᑭᑐᒡ, ᒦ ᐃ ᑳᐃᔑ ᐃᔥᒀ ᐱᒫᑎᓯᒡ᙮

8

8:1b.ACT.008.001 ᔂᓬ ᑕᔥ ᐅᑮᒥᓍᐸᑖᓐ ᐁᓂᓯᒥᓐᒡ᙮ ᒦᑕᔥ ᐃᐃ ᐊᐲ ᐁᑮᔑᑲᒃ ᑳᑮᒫᒋᓭᒃ ᐁᑮᑭᒋ ᑲᒀᑕᑭᐃᑣ ᐅᑌᐺᑕᒨᒃ ᒉᕒᐆᓴᓬᐊᒥᕽ ᐁᔮᐙᒡ᙮ ᑲᑭᓇ ᑲᔦ ᐅᑌᐺᑕᒨᒃ ᒥᓯᐌ ᑮᐃᔑ ᐊᔪᓶᑕᐸᓰᐗᒃ ᒎᑏᔭ ᐊᑮᕽ, ᓴᒣᕒᐃᔭ ᐊᑮᕽ ᑲᔦ᙮ ᐃᔑᓂᔕᐙᑲᓇᒃ ᐁᑕ ᑳᐐᓐ ᑮᑕᐸᓰᓰᐗᒃ᙮

8:2b.ACT.008.002 ᐋᓂᑕ ᑕᔥ ᐌᐌᓂ ᐁᓇᒥᐁᐙᑎᓯᐙᒡ ᐅᑮ ᓇᐃᓈᐙᓐ ᐃᔅᑏᐱᓇᓐ, ᐐᑫ ᑕᔥ ᐅᑮᑭᒋ ᒨᑲᐙᓈᐙᓐ᙮

8:3b.ACT.008.003 ᔂᓬ ᑕᔥ ᐐᓐ ᐅᑮᐌᓵᓂᐋᐞ ᐅᑌᐺᑕᒨᐞ ᐁᑮ ᐹᐲᑎᑫᒡ ᑲᑭᓇ ᐙᑳᐃᑲᓂᑳᕽ, ᐁᑮᐅᑎᑎᓈᒡ ᐃᓂᓂᐗᐞ, ᐃᑴᐗᐞ ᑲᔦ ᑭᐸᐅᑏᐎᑲᒥᑯᕽ ᐁᑮᐃᔑ ᐲᒋᐌᐱᓈᒡ᙮

8:4b.ACT.008.004 ᐃᑭᐌᓂᐗᒃ ᑕᔥ ᑳᑮᐅᓶ ᑕᐸᓰᐙᐸᓐ ᒥᓯᐌ ᑮᐸᐹ ᐃᔖᐗᒃ ᐁᑮᐐᑕᒫᑫᐙᒡ ᒥᓍᒋᒧᐎᓐ᙮

8:5b.ACT.008.005 ᐱᓬᐊᑉ ᐃᑕᔥ ᑮᐃᔖ ᐌᑎ ᑳᔑ ᓃᑳᓀᑖᑾᓂᓂᒃ ᐆᑌᓈᕽ ᓴᒣᕒᐃᔭᑮᕽ ᐁᑮ ᑕᔑᒫᒡ Xᑕᓐ ᙮

8:6b.ACT.008.006 ᑮᐹᑏᓄᐗᐞ ᐃᓴ ᑳᑮᓅᑖᑯᒡ ᐱᓬᐊᑉ, ᐁᐙᐸᑕᒥᓂᒡ ᑲᔦ ᒫᒪᑳᒋᒋᑫᐎᓇᓐ ᑳᑮ ᑑᑕᕽ, ᒦᔥ ᑲᑭᓇ ᐌᐌᓂ ᑳᐃᔑ ᐱᓯᑕᒥᓂᒡ ᐋᓃᓐ ᑳᐃᑭᑐᒡ᙮

8:7b.ACT.008.007 ᓃᐱᐗᐞ ᐋᓃᔥ ᑳᑮ ᑭᑭᔥᑳᑯᓂᒡ ᒪᒋᐊᒑᑾᐞ ᐅᑮᓇᑲᓂᑯᓂ ᐁᑮ ᔖᑯᐌᓂᒡ ᐁᑭᔒᐌᓂᒡ᙮ ᓃᐱᐗᐞ ᑲᔦ ᒣᒫᒋᒀᐱᓀᓂᒡ, ᑳᑮᒫᑭᔥᑳᓂᒡ ᑲᔦ ᑮᒥᓄᐊᔮᐗᐞ᙮

8:8b.ACT.008.008 ᐊᐱᒋ ᑕᔥ ᑮᐹᑎᓇᑦ ᒥᓉᑕᒧᐎᓐ ᐃᐃᒫ ᐆᑌᓈᕽ᙮

8:9b.ACT.008.009 ᑮᐊᔮ ᑕᔥ ᐯᔑᒃ ᐃᓂᓂ ᐃᐃᒫ ᐆᑌᓈᕽ ᓵᐃᒪᓐ ᐁᑮᐃᔑᓂᑳᓱᒡ, ᒣᐎᔕ ᐁᑮ ᐱᐅᒋ ᐋᐸᒋᑑᒡ ᒥᑌᐎᐎᓐ᙮ ᐅᑮᒫᒪᑳᑌᑕᒧᐋᐞ ᐃᑕᔥ ᐯᒫᑎᓯᓂᒡ ᓴᒣᕒᐃᔭᑮᕽ ᐁᔮᓂᒡ, ᐋᓃᔥ ᑮᐃᓍᓂᑎᓱ ᐁᑭᒋ ᐃᓀᑖᑯᓯᒡ᙮

8:10b.ACT.008.010 ᑲᑭᓇ ᑕᔥ ᐯᒫᑎᓯᓂᒡ ᑫᒋ ᐃᓀᑖᑯᓯᓂᒡ, ᑌᐸᓭᑖᑯᓯᓂᒡ ᑲᔦ ᐅᑮᑭᒋ ᐃᓂᑖᑰᐞ ᐅᐅ ᐁᑮᐃᑭᑐᓂᒡ: ᒦ ᓴ ᐗᐊ ᐃᓂᓂ ᑳᐃᓂᓐᒡ ᐅᑭᒋ ᒪᔥᑲᐎᓰᐎᓐ ᑭᔐᒪᓂᑑ᙮

8:11b.ACT.008.011 ᐋᐱᒋ ᑕᔥ ᐅᑮᑭᒋ ᐃᓂᑖᑰᐞ ᐋᓃᔥ ᐋᔕ ᒣᐎᔕ ᐅᑮᐱ ᐅᒋ ᒫᒪᑳᑌᑕᒧᐋᐞ ᐃᐃ ᑳᑮᐃᔑ ᒥᑌᐎᒋᑫᒡ᙮

8:12b.ACT.008.012 ᐊᐲ ᑕᔥ ᑳᑌᐺᑕᒧᐙᒡ ᐱᓬᐊᐴᓐ ᐁᔑ ᑕᔑᑕᒥᓂᒡ ᐁᔑ ᒥᓍᑐᑌᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ, ᐅᐐᓱᐎᓂᓂ ᑲᔦ ᒋᓴᔅ Xᑕᓐ, ᒦ ᓴ ᐃ ᑳᐃᔑ ᓰᑲᐊᑖᓱᐙᒡ ᐃᓂᓂᐗᒃ, ᐃᑴᐗᒃ ᑲᔦ᙮

8:13b.ACT.008.013 ᑫᐐᓐ ᑕᔥ ᓵᐃᒪᓐ ᑮᑌᐺᑕᒻ, ᒦᔥ ᑳᐃᔑ ᓰᑲᐊᑖᓱᒡ᙮ ᒥᓯᐌ ᐅᑮᐃᔑ ᐸᐹ ᐐᒌᐙᓐ ᐱᓬᐊᐴᓐ᙮ ᑮᒫᒪᑳᑌᑕᒻ ᐁᑮᐙᐸᑕᕽ ᐁᔑᒋᑫᓂᒡ ᒪᒫᑖᐎᒋᑫᐎᓇᓐ, ᒫᒪᑳᒋᒋᑫᐎᓇᓐ ᐃᑕᔥ ᑲᔦ᙮

8:14b.ACT.008.014 ᐊᐲ ᑕᔥ ᐃᔑᓂᔕᐙᑲᓇᒃ ᒉᕒᐆᓴᓬᐊᒥᕽ ᐁᔮᐙᒡ ᐁᓅᑕᒧᐙᒡ ᓴᒣᕒᐃᔭ ᐌᒌᓂᒡ ᐁᑌᐺᑕᒥᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ, ᒦᔥ ᑳᐃᔑ ᐃᔑᓂᔕᐙᐙᒡ ᐲᑕᕒᐆᓐ, ᒞᓇᓐ ᑲᔦ ᒋᐊᑕ ᐙᐸᒫᓂᒡ ᓴᒣᕒᐃᔭ ᐌᒌᓂᒡ᙮

8:15b.ACT.008.015 ᐊᐲ ᑕᔥ ᐁᐊᓂ ᑕᑯᔑᓂᓂᒡ ᐅᑮᐊᓇᒥᐁᑕᐙᓂ ᑳᑮ ᑌᐺᑕᒥᓂᒡ ᒋᒦᓂᑰᐎᓯᓂᒡ ᑭᔐᒪᓂᑑᓐ ᐅᑕᒑᑯᓂ᙮

8:16b.ACT.008.016 ᑳᐐᓐ ᒪᔑ ᐃᐃ ᐊᐲ ᒋᑮᐅᑎᓯᑯᓂᒡ ᑭᔐᒪᓂᑑᓐ ᐅᑕᒑᑯᓂ, ᑮᐃᔑ ᓰᑲᐊᑖᓱᐗᐞ ᐁᑕ ᐅᐐᓱᐎᓂᓃᕽ ᑌᐯᒋᑫᓂᒡ ᒋᓴᓲᓐ᙮

8:17b.ACT.008.017 ᐲᑕᕒ ᑕᔥ, ᐊᐊ ᑲᔦ ᒞᓐ ᐅᑮ ᓵᒥᓈᐙᐞ, ᒦᔥ ᑳᐃᔑ ᐅᑎᓯᑯᓂᒡ ᑭᔐᒪᓂᑑᓐ ᐅᑕᒑᑯᓂ᙮

8:18b.ACT.008.018 ᐊᐲ ᑕᔥ ᓵᐃᒪᓐ ᐁᐙᐸᒫᒡ ᐃᔑᓂᔕᐙᑲᓇᐞ ᐁᓵᒥᓈᓂᒡ ᐅᑌᐺᑕᒨᐞ ᐃᐃᒫ ᑕᔥ ᐁᐅᒋ ᒦᓂᑰᐎᓯᓂᒡ ᑭᔐᒪᓂᑑᓐ ᐅᑕᒑᑯᓂ, ᒦ ᐃ ᑳᑮᒦᓈᒡ ᔔᓂᔮᓐ ᐲᑕᕒᐆᓐ, ᒞᓇᓐ ᑲᔦ,

8:19b.ACT.008.019 ᐁᑮᐃᑭᑐᒡ: ᑫᓃᓐ ᒦᔑᔑᒃ ᐃᐃ ᑲᔥᑭᐁᐎᓯᐎᓐ, ᐊᐎᔭ ᐱᑯ ᑫᓵᒥᓇᒃ ᒋᐅᑎᓯᑯᒡ ᑭᔐᒪᓂᑑᓐ ᐅᑕᒑᑯᓂ, ᐅᑮᐃᓈᐞ᙮

8:20b.ACT.008.020 ᐲᑕᕒ ᑕᔥ ᐅᐅ ᐅᑭᐃᓈᓐ: ᑭᔑᓅᔮᒻ ᑭᑲ ᑭᑭᓂᔑᐗᓈᑎᔅ, ᐁᐃᓀᑕᒪᓐ ᔔᓂᔮᕽ ᒋᐅᒋ ᐊᑖᐌᐗᒡ ᑭᔐᒪᓂᑑ ᐅᒦᑭᐌᐎᓐ!

8:21b.ACT.008.021 ᑳᐐᓐ ᑲᓇᑫ ᑭᑕᑾᑭᒥᑰᓰ, ᐴᔥᑫ ᑳᐐᓐ ᑭᐐᑑᑳᓱᓰ ᐅᐅ ᐊᓄᑮᐎᓐ, ᐋᓃᔥ ᑳᐐᓐ ᑾᔭᑯᓈᑾᓯᓅᓐ ᑭᑌᐞ ᐁᓈᓴᒦᒡ ᑭᔐᒪᓂᑑ᙮

8:22b.ACT.008.022 ᐃᓇᔥᑫ ᑴᑳᑎᓯᓐ ᒋᓇᑲᑕᒪᓐ ᐃᐃ ᑭᑭᒋᒪᒋ ᐃᔑᐌᐱᓯᐎᓐ᙮ ᐊᓇᒥᐁᑕᐤ ᑳᑎᐯᒋᑫᒡ ᒫᑭᔖ ᑕᐃᓀᑕᒻ ᒋᐐ ᐴᓀᑕᒪᐎᒃ ᐁᓀᑕᒧᐗᒡ ᑭᑌᐃᕽ᙮

8:23b.ACT.008.023 ᓂᐙᐸᑖᓐ ᐅᔕ ᐁᒨᔥᑭᓀᔥᑳᑯᔭᓐ ᓂᔥᑫᑕᒧᐎᓐ ᐁᒥᒋᒥᓂᑯᔭᓐ ᑲᔦ ᒪᒋ ᐃᔑᐌᐱᓯᐎᓐ, ᐅᑮᐃᓈᓐ᙮

8:24b.ACT.008.024 ᐅᐅ ᑕᔥ ᓵᐃᒪᓇᓐ ᑮᐃᔑ ᓇᑴᑕᒻ: ᑕᑲ ᐊᓇᒥᐁᑕᐎᒃ ᑳᑎᐯᒋᑫᒡ ᓃᓐ ᐅᒋ ᑫᑰᓐ ᒋᐃᔑᓭᓯᐙᓐ ᐃᐃ ᑳᐃᑭᑐᔭᓐ, ᐅᑮᐃᑰᓐ᙮

8:25b.ACT.008.025 ᐊᐲ ᑕᔥ ᑳᐃᔥᒀ ᑎᐹᒋᒫᐙᒡ ᑳᑎᐯᒋᑫᓂᒡ, ᑳᐃᔥᒀ ᐐᑕᒫᑫᐙᒡ ᑲᔦ ᐅᑎᑭᑐᐎᓂᓂ, ᑮᐊᓂ ᑮᐌᐗᒃ ᒉᕒᐆᓴᓬᐊᒥᕽ᙮ ᑮᐊᓂ ᐐᑕᒫᑫᐗᒃ ᐃᑕᔥ ᒥᓍᒋᒧᐎᓐ ᓃᐱᐗᐞ ᐁᔑ ᐊᔭᔮᓂᑭᓐ ᐆᑌᓇᐗᓐ ᓴᒣᕒᐃᔭ ᐊᑮᕽ᙮

8:26b.ACT.008.026 ᐱᓬᐊᑉ ᐃᓴ ᐅᑮ ᑲᓅᓂᑰᓐ ᑳᑎᐯᒋᑫᒡ ᐅᑌᒐᓬᐃᒥᓂ: ᑕᑲ ᔖᐗᓄᕽ ᐃᓇᑫ ᐃᔑᒫᒑᓐ, ᒋᒣᒀᔥᑲᒪᓐ ᐌᑎ ᐃᐃ ᒦᑲᓇ ᑳᐃᓇᒧᒃ ᒉᕒᐆᓴᓬᐊᒥᕽ ᐲᓂᔥ ᐌᑎ ᑫᓴ ᙮ ᐃᐃ ᐄᑐᒃ ᒦᑲᓇ ᐱᑾᒐᔭᐄ ᐃᔑᐱᒪᒧᓐ᙮

8:27b.ACT.008.027 ᒦᑕᔥ ᑳᐃᔑ ᐅᔒᑖᒡ ᐁᑮᐊᓂ ᒫᒑᒡ᙮ ᒦᔥ ᑳᑮᒣᒀᔥᑲᐙᒡ ᐌᑭᒫᐌᑖᑯᓯᓂᒡ ᐃᓂᓂᐗᓐ ᐄᑎᔫᐱᔭ ᐊᑮᕽ ᐌᒌᓂᒡ᙮ ᐋᐱᒋ ᐁᑮᑕᑭᒥᑯᓂᒡ ᑭᒋᐅᑭᒫᑴᓐ ᑳᑕᔅ ᑳᐃᔑᓂᑳᓱᓂᒡ ᑳᑮ ᑎᐯᓂᒫᓂᒡ ᐄᑎᔫᐱᔭ ᐊᑮᕽ ᐌᒌᓂᒡ᙮ ᒦᐗᓐ ᐃᓂ ᑲᔦ ᑳᑮ ᑲᓇᐌᑕᒪᐙᓂᒡ ᐅᐌᓅᑎᓯᐎᓂᓂ᙮ ᒉᕒᐆᓴᓬᐊᒥᕽ ᐁᑮ ᐲᔖᓂᒡ ᐁᑮᐱᐊᓇᒥᐁᑕᐙᓂᒡ ᑭᔐᒪᓂᑑᓐ᙮

8:28b.ACT.008.028 ᑮᐱᒥ ᑮᐌᐗᓐ ᑕᔥ ᐁᓇᒪᑕᐱᓂᒡ ᐅᑑᑖᐹᓈᑯᓃᕽ, ᐁᐊᓇᒥᑑᓂᒡ ᑳᑮᐃᔑᐲᐃᑫᓂᒡ ᐋᐃᓭᔭᐗᓐ ᑳᑮ ᑲᓅᑕᒪᐙᓂᒡ ᑭᔐᒪᓂᑑᓐ᙮

8:29b.ACT.008.029 ᑭᔐᒪᓂᑑᓐ ᐅᑕᒑᑯᓂ ᑕᔥ ᐱᓬᐊᑉ ᐅᐅ ᐅᑮᐃᑰᓐ: ᐯᔓ ᓈᓯᑲᐤ ᐊᐊ ᑳᐱᒥᑖᐹᓱᒡ, ᐊᓂᐐᒋᐤ ᐃᑕᔥ ᑲᔦ, ᐅᑮᐃᑰᓐ᙮

8:30b.ACT.008.030 ᒦᔥ ᐱᓬᐊᑉ ᐯᔓ ᑮᐊᐸᑑ ᐲᓂᔥ ᐁᑮᓅᑕᐙᒡ ᐁᐊᓇᒥᑑᓂᒡ ᑳᑮᐃᔑᐲᐃᑫᓂᒡ ᐋᐃᓭᔭᐗᓐ ᐅᑲᓅᑕᒫᑫᓐ᙮ ᒦᔥ ᐅᐅ ᑳᐃᔑ ᑲᑴᒋᒫᒡ: ᑭᓂᓯᑐᑖᓐ ᐃᓇ ᐁᑭᑑᒪᑲᒃ ᑳᐊᓇᒥᑑᔭᓐ? ᐅᑮᐃᓈᓐ᙮

8:31b.ACT.008.031 ᒦᑕᔥ ᑳᐃᑯᒡ: ᐋᓃᓐ ᑕᔥ ᑫᔑ ᓂᓯᑐᑕᒫᐹᓐ, ᑳᐐᓐ ᐄᑐᒃ ᐊᐎᔭ ᓂᑭᑭᓄᐊᒫᑯᓰ? ᐅᑮᐃᑰᓐ᙮ ᒦᔥ ᑳᑮᐃᔑᑲᓅᓂᑯᒡ ᒋᐴᓯᒡ ᒋᐐᑕᐱᒫᒡ᙮

8:32b.ACT.008.032 ᐃᐃᒫ ᑕᔥ ᑳᑮᐃᔑ ᐊᓇᒥᑑᓂᒡ ᑭᒋᒪᓯᓇᐃᑲᓐ ᐅᐅ ᑮᐃᔑᐲᐃᑳᑌᓂ: ᑖᐱᔥᑰ ᓴ ᒫᓇᒑᓂᔥ ᑳᐃᔑᐎᓂᓐᒡ ᐙᑕᔑ ᓂᓯᓐᒡ, ᑖᐱᔥᑰ ᒫᓇᒑᓂᔐᔅ ᑳᓅᑖᑎᓯᒃ ᐁᐸᔥᑯᔓᓐᒡ, ᑳᐐᓐ ᐊᐙᒡ ᑫᑰᓐ ᑮᐅᒋ ᐃᑭᑐᓰ᙮

8:33b.ACT.008.033 ᑮᐊᑲᒋᑑᑕᐙᑲᓂᐎ ᑕᔥ, ᑳᐐᓐ ᑮᐊᔮᓯᓂᓂ ᐃᓈᑯᓂᑫᐎᓐ ᑫᑮᐅᒋ ᓈᑕᒪᐎᑎᐸᓐ, ᑳᐐᓐ ᐊᐎᔭᓐ ᑕᑎᐹᒋᒧᓰᐗᓐ ᒋᑕᔑᒫᓂᒡ ᐅᐲᐌᓰᒪᐞ, ᐋᓃᔥ ᐋᔕ ᑮᐃᔥᒀᓭᓂ ᐅᐱᒫᑎᓯᐎᓐ ᐅᐅᒫ ᐊᑮᕽ᙮ ᒦ ᐃ ᑳᐃᔑᐲᐃᑳᑌᓂᒃ ᑳᑮᐊᓇᒥᑑᓂᒡ᙮

8:34b.ACT.008.034 ᐃᓂ ᑕᔥ ᐌᑭᒫᐌᑖᑯᓯᓂᒡ ᐅᑮᐃᑰᓐ: ᑭᓇᑕᐌᓂᒥᓐ ᒋᐐᑕᒪᐎᔭᓐ ᐊᐌᓀᓇᓐ ᐅᐅ ᑳᐃᓈᒡ ᐗᐊ ᐅᑲᓅᑕᒫᑫ᙮ ᐐᓐ ᐃᓇ ᐃ ᑳᐃᑎᓱᒡ, ᑯᒫ ᑲᔦ ᐸᑳᓐ ᐊᐎᔭᓐ ᑳᑕᔑᒫᒡ? ᐅᑮᐃᑰᓐ᙮

8:35b.ACT.008.035 ᒦᑕᔥ ᐱᓬᐊᑉ ᑳᐃᔑ ᒫᒌ ᑲᑭᑐᒡ, ᐁᑮᒫᒌ ᑕᔑᑕᕽ ᐁᔑ ᐊᓇᒥᑑᓂᒡ ᐃᐃ ᑭᒋᐅᔑᐲᐃᑲᓐ, ᐁᑮᐐᑕᒪᐙᒡ ᐁᔑ ᒥᓍᒋᒥᒥᓐᒡ ᒋᓴᓲᓐ᙮

8:36b.ACT.008.036 ᐁᐊᓂᐱᒥ ᐊᔮᐙᒡ ᑕᔥ ᒦᑲᓈᕽ ᐅᑮᐅᑎᑖᓈᐙ ᐁᓂᐲᑳᓂᒃ᙮ ᐃᓂ ᑕᔥ ᐌᑭᒫᐌᑖᑯᓯᓂᒡ ᐅᑮᑰᓐ: ᐃᓇᔥᑫ ᑭᓃᓐ ᐃᓈ ᐅᐅ ᓂᐱ! ᑫᑰᓐ ᐃᓇ ᑕᔥ ᐊᔮ ᑫᐅᒋ ᓰᑲᐊᑖᓱᓯᐙᐹᓐ?

8:37b.ACT.008.037 ᐱᓬᐊᑉ ᑕᔥ ᐅᑮᐃᓈᓐ: ᑮᔥᐱᓐ ᒥᓯᐌ ᑭᑌᐃᕽ ᐃᔑᑌᐺᑕᒪᓐ, ᐱᓵᓐ ᑭᑲ ᓰᑲᐊᑖᔅ, ᐅᑮᐃᓈᓐ᙮ ᐅᐅ ᑕᔥ ᐅᑮᐃᑰᓐ: ᓂᑌᐺᑖᓐ ᒋᓴᔅ X ᐁᐅᑯᓯᓯᒥᑯᒡ ᑭᔐᒪᓂᑑᓐ, ᑮᐃᑭᑐᐗᓐ᙮

8:38b.ACT.008.038 ᒦᑕᔥ ᑳᐃᔑ ᐊᓅᓈᓂᒡ ᐌᑖᐸᐃᐌᓂᒡ ᒋᑭᐱᑎᓈᓂᒡ ᑎᑎᐱᑖᐹᓇᓐ᙮ ᒥᒋᓃᔥ ᑕᔥ ᑮᐸᑯᐲᐗᒃ ᐱᓬᐊᑉ, ᐊᐊ ᑲᔦ ᐌᑭᒫᐌᑖᑯᓯᒡ᙮ ᒦᔥ ᑳᐃᔑ ᓰᑲᐊᑕᐙᒡ᙮

8:39b.ACT.008.039 ᐊᐲ ᑳᐱ ᐊᒀᓰᐙᒡ, ᑭᔐᒪᓂᑑᓐ ᐅᑕᒑᑯᓂ ᐱᓬᐊᑉ ᑫᑕᑐ ᐅᑮᒫᒌᓂᑰᓐ᙮ ᑳᐐᓐ ᑕᔥ ᐊᐗᔑᒣ ᐅᑮᐙᐸᒥᑯᓰᓐ ᐌᑭᒫᐌᑖᑯᓯᓂᒡ, ᒦᔥ ᑳᐊᓂ ᐃᔑᒫᒑᓂᒡ ᐁᑭᒋ ᒥᓉᑕᒥᓂᒡ᙮

8:40b.ACT.008.040 ᐱᓬᐊᑉ ᑕᔥ ᑫᑕᑐ ᐅᑮᑭᑫᑖᓐ ᐊᓲᑕᔅ ᐆᑌᓈᕽ ᐁᐅᒋ ᐊᔮᒡ᙮ ᒦᑕᔥ ᐃᐃᒫ ᑳᐅᒋ ᒫᒑᒡ ᐁᑮᐊᓂ ᐙᐐᑕᒫᑫᒡ ᒥᓍᒋᒧᐎᓐ ᑲᑭᓇ ᑖᐎᓂᑳᕽ ᐲᓂᔥ ᓭᓴᕒᐄᔭ ᐆᑌᓈᕽ ᐁᑮᐊᓂ ᑕᑯᔑᕽ᙮

9

9:1b.ACT.009.001 ᔂᓬ ᑕᔥ ᑫᔮᐱ ᐅᑮ ᐋᒀᑎᓰᑲᑕᐙᐞ ᐁᐊᔓᓈᒡ ᐁᐐᓂᓵᒡ ᐃᐃ ᑳᑎᐯᒋᑫᓂᒡ ᐅᑭᑭᓄᐊᒪᐙᑲᓂᓂ᙮ ᐅᑮᐊᑕ ᐙᐸᒫᓐ ᑕᔥ ᒫᐗᒡ ᑭᒋᐊᓇᒥᐁᐎᑭᒫᓐ,

9:2b.ACT.009.002 ᐁᑮ ᑲᑴᑗᒡ ᒋᒦᓂᓐᒡ ᒪᓯᓇᐃᑲᓇᓐ ᑫᐅᒋ ᑭᑫᓂᒥᑯᒡ ᑎᒫᔅᑲᔅ ᐆᑌᓈᕽ ᑳᐊᔮᓂᒡ ᒎᐎᐊᓇᒥᐁᐎᑲᒥᑯᕽ᙮ ᑮᔥᐱᓐ ᑕᔥ ᒥᑲᐙᒡ ᐊᐎᔭᓐ ᐱᑯ ᐯᐱᒥᓂᔕᐊᒥᓂᒡ ᐃᔖᐎᓐ, ᐃᓂᓂᐗᓐ, ᑯᒫ ᑲᔦ ᐃᑴᐗᓐ, ᐁᐐᒪᒫᒋᑾᐱᓈᒡ ᒋᐃᔑᐎᓈᒡ ᒉᕒᐆᓴᓬᐊᒥᕽ ᙮

9:3b.ACT.009.003 ᐯᔓ ᑕᔥ ᐁᐊᓂ ᐱᒥᐊᔮᒡ ᐆᑌᓈᕽ ᑎᒫᔅᑲᓯᕽ, ᐅᑮ ᑯᔥᑯᐎᓂᑯᓐ ᐁᐙᑌᓭᓂᒃ ᐁᔑ ᐊᔮᒡ, ᑭᒋᑮᔑᑯᕽ ᐁᑮᐅᒋᓭᓂᒃ᙮

9:4b.ACT.009.004 ᒥᑕᑲᑲᒥᒃ ᑕᔥ ᑮᐃᔑ ᐸᑭᔑᓐ, ᐊᐌᑴᓇᓐ ᑕᔥ ᐅᑮᓅᑕᐙᓐ ᐁᑲᓅᓂᑯᒡ: ᔂᓬ, ᔂᓬ, ᐌᑯᓀᓐ ᐌᒋ ᑲᒀᑕᑭᐃᔭᓐ? ᐁᑮᐃᑯᒡ᙮

9:5b.ACT.009.005 ᒦᔥ ᑳᐃᑭᑐᒡ: ᑌᐯᒋᑫᔭᓐ, ᐊᐌᓀᓐ ᑮᓐ? ᐅᐅ ᑕᔥ ᐅᑮᐃᑰᓐ: ᓃᓐ ᐅᔕ ᐊᐊ ᒋᓴᔅ ᑳᑲᒀᑕᑭᐊᒡ᙮

9:6b.ACT.009.006 ᑕᑲ ᑕᔥ, ᐸᓯᑸᓐ᙮ ᐌᑎ ᐆᑌᓈᕽ ᐃᔖᓐ, ᒦᑕᔥ ᐌᑎ ᑫᔑ ᐐᑕᒫᑰᔭᓐ ᐋᓃᓐ ᑫᐃᔑᒋᑫᔭᓐ, ᐅᑮᐃᑰᓐ᙮

9:7b.ACT.009.007 ᐃᓂᐌᓂᐗᐞ ᑕᔥ ᐃᓂᓂᐗᐞ ᑳᑮᐐᒌᐎᑯᒡ ᑮᑭᐱᒌᐗᐞ ᑫᑰᓐ ᐁᑮᐃᑭᑐᓯᓂᒃ, ᐁᓅᑕᒥᓂᒡ ᐃᐃ ᑳᑮᐃᑭᑐᐎᓐᒡ᙮ ᑳᐐᓐ ᑕᔥ ᐊᐎᔭᓐ ᐅᑮ ᐙᐸᒫᓰᓂ᙮

9:8b.ACT.009.008 ᔂᓬ ᑕᔥ ᒥᑕᑲᒥᒃ ᑮᐅᒋ ᐸᓯᑸ᙮ ᐊᐲ ᑕᔥ ᐁᐃᓈᐱᒡ, ᑳᐐᓐ ᑮᐙᐱᓰ᙮ ᐌᑎ ᑕᔥ ᐆᑌᓈᕽ ᑎᒫᔅᑲᔅ ᑮᐃᔑᐎᒋᑲᓂᐎ ᐁᑮ ᓴᑭᓂᑫᓂᓐᒡ᙮

9:9b.ACT.009.009 ᓂᓱᑮᔑᒃ ᑕᔥ ᑳᐐᓐ ᑮᐙᐱᓰ, ᑳᐐᓐ ᒋᑮᐐᓯᓂᒡ, ᑳᐐᓐ ᑲᔦ ᒋᑮᐅᒋ ᒥᓂᑴᒡ᙮

9:10b.ACT.009.010 ᐃᐃᒫ ᑕᔥ ᐆᑌᓈᕽ ᑎᒫᔅᑲᓯᕽ ᑮᐊᔮ ᐯᔑᒃ ᐅᑌᐺᑕᒨ, ᐋᓇᓈᔭᔅ ᐁᔑᓂᑳᓱᒡ᙮ ᐃᔑᓇᒧᐎᓂᕽ ᑕᔥ ᐅᑮᐅᒋ ᑲᓅᓂᑰᓐ ᑳᑎᐯᒋᑫᓂᒡ ᐁᐃᑯᒡ: ᐋᓇᓈᔭᔅ! ᐅᑮᐃᑰᓐ᙮ ᐌᑯᓀᓐ, ᑌᐯᒋᑫᔭᓐ? ᑮᐃᑭᑐ᙮

9:11b.ACT.009.011 ᑳᑎᐯᒋᑫᓂᒡ ᑕᔥ ᐅᐅ ᐅᑮᐃᑰᓐ: ᐃᔖᓐ ᐌᑎ ᐱᒧᓭᑲᓈᕽ ᑾᔭᑾᒧᓐ ᐁᒋᑳᑌᒃ᙮ ᒎᑕᔅ ᐅᐙᑳᐃᑲᓂᕽ ᐃᔑᐲᑎᑫᓐ᙮ ᒦᑕᔥ ᐃᐃᒫ ᑫᔑᐊᑑᔥᑲᐗᒡ ᔂᓬ ᐁᔑᓂᑳᓱᒡ ᑖᕒᓴᔅ ᑳᐅᒌᒡ᙮ ᒣᒀ ᐅᔕ ᐊᓇᒥᐋ᙮

9:12b.ACT.009.012 ᑮᐃᔑᓇᒻ ᓴ ᐁᐙᐸᒫᒡ ᐃᓂᓂᐗᓐ ᐋᓇᓈᔭᔅ ᐁᐃᔑᓂᑳᓱᓂᒡ ᐁᐱ ᓈᓯᑳᑯᒡ ᐁᓵᒥᓂᑯᒡ ᒋᑮᐌ ᐙᐱᒡ, ᐅᑮᐃᑰᓐ᙮

9:13b.ACT.009.013 ᐋᓇᓈᔭᔅ ᑕᔥ ᑮᐃᔑ ᓇᑴᑕᒻ: ᑌᐯᒋᑫᔭᓐ, ᓃᐱᐗᐞ ᐅᔕ ᓂᓈᓅᑕᒻ ᐁᓈᒋᒥᓐᒡ ᐊᐊ ᐃᓂᓂ, ᐋᓃᓐ ᐁᔑ ᒫᔑ ᑑᑕᐙᒡ ᑳᑎᐯᓂᒥᒪᒡ ᐅᑌᐺᑕᒨᐞ ᐁᔮᓂᒡ ᒉᕒᐆᓴᓬᐊᒥᕽ᙮

9:14b.ACT.009.014 ᐅᑮᒦᓂᑰᓐ ᐄᑐᒃ ᑭᒋᐊᓇᒥᐁᐎᑭᒫᓐ ᑲᔥᑭᐁᐎᓯᐎᓐ ᒋᑕᑯᓈᒡ ᑲᑭᓇ ᑳᔑ ᑲᓅᓂᒥᒃ ᑭᐐᓱᐎᓂᓃᕽ, ᐅᑮᐃᓈᓐ᙮

9:15b.ACT.009.015 ᒦᔥ ᐅᐅ ᑳᐃᑯᒡ ᑳᑎᐯᒋᑫᓂᒡ: ᒫᒑᓐ, ᐃᔖᓐ! ᐐᓐ ᐅᔕ ᓂᑮᐅᓈᐸᒫ ᐁᐐᐋᐸᒋᐊᒃ ᒋᑭᑫᑕᒨᓈᒡ ᓂᐐᓱᐎᓐ ᑳᒎᐎᐎᓯᓂᒃ, ᑭᒋᐅᑭᒫᐞ ᑲᔦ, ᐃᐃ ᑕᔥ ᑲᔦ ᐃᔅᕒᐃᔭᓬᐊᐞ᙮

9:16b.ACT.009.016 ᓃᓐ ᐅᔕ ᐱᑯ ᓂᐐᐙᐸᑕᐋ ᐋᓃᓐ ᒥᓂᒃ ᑫᔑᑲᒀᑕᑭᑑᒡ ᓂᐐᓱᐎᓂᕽ ᐅᒋ, ᐅᑮᐃᑰᓐ᙮

9:17b.ACT.009.017 ᐋᓇᓈᔭᔅ ᑕᔥ ᑮᐊᓂ ᒫᒑ ᐁᑮᐊᐎ ᐲᑎᑫᒡ ᐙᑳᐃᑲᓂᕽ ᐁᔑ ᐊᔮᓂᒡ ᔂᓬᐊᓐ᙮ ᐅᑮ ᓵᒥᓈᓐ ᑕᔥ ᐁᑮᐃᓈᒡ: ᓃᒋ ᐅᑌᐺᑕᒧ, ᔂᓬ, ᑳᑎᐯᒋᑫᒡ ᒋᓴᔅ ᑳᑮ ᓈᑯᓰᑕᐎᒃ ᐌᑎ ᒦᑲᓈᕽ, ᓂᑮ ᐲᒋᓂᔕᐅᒃ ᒦᓇᐙ ᒋᐙᐱᔭᓐ, ᒋᒨᔥᑭᓀᔥᑲᐎᒃ ᑕᔥ ᑲᔦ ᑭᔐᒪᓂᑑ ᐅᑕᒑᑾᓐ, ᐅᑮᐃᓈᓐ᙮

9:18b.ACT.009.018 ᔐᒫᒃ ᐃᑕᔥ ᐅᔥᑮᔑᑯᕽ ᑫᑰᓇᓐ ᑮᐅᒋ ᐸᑭᓯᓂᓂᐗᓐ ᑖᐱᔥᑰ ᐗᓇᑲᔭᒃ ᐁᐃᔑᓈᑾᓂᓂᑭᓐ᙮ ᔐᒫᒃ ᑕᔥ ᑮᐙᐱ᙮ ᒦᑕᔥ ᑳᐃᔑ ᐸᓯᑸᒡ ᐁᑮ ᓰᑲᐊᑖᓱᒡ᙮

9:19b.ACT.009.019 ᑳᐃᔥᒀ ᐐᓯᓂᒡ ᑕᔥ ᒦᓇᐙ ᑮᑮᐌ ᒪᔥᑲᐙᑎᓯ᙮ ᐊᒋᓇ ᑕᔥ ᐅᑮ ᐐᒌᐙᐞ ᐅᑌᐺᑕᒨᐞ ᑎᒫᔅᑲᓯᕽ ᑳᑮᐊᔮᓂᒡ᙮

9:20b.ACT.009.020 ᒦᑕᔥ ᔐᒫᒃ ᒎᐎ ᐊᓇᒥᐁᐎᑲᒥᑯᑳᕽ ᑳᐃᔑ ᐸᐹ ᐐᑕᒫᑫᒡ ᒋᓴᓲᓐ ᐁᐅᑯᓯᓯᒥᑯᓂᒡ ᑭᔐᒪᓂᑑᓐ᙮

9:21b.ACT.009.021 ᑲᑭᓇ ᑕᔥ ᑳᑮ ᓅᑖᑯᒡ ᑮᒫᒪᑳᑌᑕᒨᐞ ᐁᑮᐃᑭᑐᓂᒡ: ᑳᐐᓐ ᐃᓇ ᒦ ᐊᐌ ᒉᕒᐆᓴᓬᐊᒥᕽ ᑳᑮ ᑲᒀᑕᑭᐋᒡ ᐃᐃ ᑳᐐᑕᒥᓂᒡ ᒋᓴᓲᓐ ᐅᐐᓱᐎᓂᓂ ᐁᓇᒥᐋᓂᒡ? ᑳᐐᓐ ᐃᓇ ᒦ ᐃ ᑳᐅᒋ ᐲᔖᒡ ᐅᐅᒫ ᐁᐐᑕᑯᓂᐌᒡ ᒋᐃᔑᐎᓈᒡ ᐁᔑ ᐊᔮᓂᒡ ᑭᒋᐊᓇᒥᐁᐎᑭᒫ? ᑮᐃᑭᑐᐗᐞ᙮

9:22b.ACT.009.022 ᔂᓬ ᑕᔥ ᐋᒌᑫ ᑮᐊᓂ ᒪᔥᑲᐙᓂ ᐁᔑ ᑲᑮᑴᒡ᙮ ᐅᑮᐗᐙᓀᑕᒥᐋᐞ ᐃᑕᔥ ᒎᐗᐞ ᐁᔑᑖᓂᒡ ᐃᐃᒫ ᑎᒫᔅᑲᓯᕽ ᐁᑮ ᐯᑌᓈᑯᑑᒡ ᒋᓴᓲᓐ ᐁᔮᐎᓂᒡ ᑳᑮ ᐲᒋᓂᔕᐅᑯᓂᒡ ᑭᔐᒪᓂᑑᓐ ᒋᐱᒫᒋᐃᐌᓂᒡ᙮

9:23b.ACT.009.023 ᓈᓈᑫ ᑕᔥ ᐁᐊᓂ ᑲᑮᔑᑲᓂᓂᒃ ᒎᐗᐞ ᑮᒫᐗᒋᐃᑎᐗᐞ ᐁᐅᓈᑯᓂᑫᓂᒡ ᐁᐐᓂᓯᑯᒡ ᔂᓬ᙮

9:24b.ACT.009.024 ᐅᑮ ᑭᑫᑖᓐ ᑕᔥ ᐋᓃᓐ ᐙᑑᑖᑯᒡ᙮ ᐁᑕᓱᑮᔑᒃ, ᐁᑕᓱ ᑎᐱᒃ ᑲᔦ ᐅᑮᐊᑲᒫᑰᐞ ᐁᔑ ᐊᔨᔥᒀᑌᒥᐗᓂᓂᒃ ᐃᐃ ᐆᑌᓇ ᐁᐐᓂᓯᑯᒡ᙮

9:25b.ACT.009.025 ᔂᓬ ᑕᔥ ᑳᑮ ᐱᒥᓂᔕᐅᑯᒡ ᐅᑮᓈᓯᑳᑰᐞ ᒣᒀ ᐁᑎᐱᑲᓂᓂᒃ᙮ ᐁᔑ ᐸᑯᓀᔮᓂᒃ ᑕᔥ ᐙᑳᔮᐱᑭᓂᑲᓐ ᐅᑮᐅᒋ ᓃᓵᐲᑭᓂᑰᐞ ᒪᔥᑯᓰᒪᑲᑯᕽ ᐁᑮᐃᔑ ᓇᒪᑕᐱᒡ᙮

9:26b.ACT.009.026 ᔂᓬ ᑕᔥ ᑮᐃᔖ ᒉᕒᐆᓴᓬᐊᒥᕽ, ᐁᑮᑲᑴ ᐐᒌᐙᒡ ᐃᔑᓂᔕᐙᑲᓇᐞ᙮ ᑲᑭᓇ ᑕᔥ ᐅᑮ ᑯᓯᑰᐞ, ᐁᑮ ᑌᐺᑕᓯᓂᒃ ᑫᐐᓐ ᐄᓴᓐ ᐃᔑᓂᔕᐙᑲᓐ ᐁᑎᓄᐎᒡ᙮

9:27b.ACT.009.027 ᐹᕒᓇᐸᔅ ᓴ ᐅᑮᐐᒋᐋᓐ ᐁᑮᐃᔑᐎᓈᒡ ᐁᔑ ᐊᔮᓂᒡ ᐃᔑᓂᔕᐙᑲᓇᐞ᙮ ᐅᑮᐐᑕᒪᐙᐞ ᒣᒀ ᐁᐱᒥᐊᔮᓂᒡ ᐋᓃᓐ ᑳᐃᔑ ᐙᐸᒫᓂᒡ ᑳᑎᐯᒋᑫᓂᒡ, ᐁᑮᑲᑲᓅᓂᑯᓂᒡ ᐃᑕᔥ ᑲᔦ᙮ ᐅᑮᐐᑕᒪᐙᐞ ᑲᔦ ᐋᓃᓐ ᐌᑎ ᑎᒫᔅᑲᓯᕽ ᑳᑮᐃᔑ ᓲᑭᑌᐁᓂᒡ ᐁᑲᑮᑴᓂᒡ ᐅᐐᓱᐎᓂᓃᕽ ᒋᓴᓲᓐ᙮

9:28b.ACT.009.028 ᔂᓬ ᑕᔥ ᐅᑮ ᐐᒌᐙᐞ ᐃᔑᓂᔕᐙᑲᓇᐞ ᒥᓯᐌ ᐁᑮᐸᐹ ᐃᔖᒡ ᒉᕒᐆᓴᓬᐊᒥᕽ, ᐁᑮ ᓲᑭᑌᐁᒡ ᐁᑲᑮᑴᒡ ᐅᐐᓱᐎᓂᓃᕽ ᑳᑎᐯᒋᑫᓂᒡ᙮

9:29b.ACT.009.029 ᐅᑮ ᑲᑲᓅᓈᐞ ᑕᔥ ᐁᑮᑲᑴ ᔖᑰᓱᒫᒡ ᐃᐃ ᑲᕒᐄᒃ ᑳᐃᔑᑮᔗᓂᒡ ᒎᐗᐞ᙮ ᔖᑰᒡ ᐃᑕᔥ ᐅᑮᑲᑴ ᓂᓯᑰᐞ᙮

9:30b.ACT.009.030 ᐊᐲ ᑕᔥ ᐅᑌᐺᑕᒨᐞ ᑳᑭᑫᑕᒥᓂᒡ ᐋᓃᓐ ᐙᑑᑕᐎᓐᒡ ᐅᑮᐃᔑ ᐐᒌᐎᑰᐞ ᓭᓴᕒᐄᔭᐃᕽ, ᒦᔥ ᐌᑎ ᑳᑮᐃᔑᓂᔕᐅᓐᒡ ᒋᐃᔖᒡ ᑖᕒᓴᔅ ᐆᑌᓈᕽ᙮

9:31b.ACT.009.031 ᐅᑌᐺᑕᒨᒃ ᑕᔥ ᒥᓯᐌ ᒎᑏᔭᑮᕽ, ᑳᓬᐊᓬᐄᕽ ᑲᔦ, ᓴᒣᕒᐃᔭᑮᕽ ᐃᑕᔥ ᑲᔦ ᐱᓵᓐ ᑮᐊᔭᔮᐗᒃ᙮ ᑮᐊᓂ ᒪᔥᑲᐎᓰᐗᒃ ᑲᔦ, ᐯᑭᔥ ᐃᑕᔥ ᑮᐊᓂ ᐹᑏᓄᐗᒃ ᐁᐐᒋᐃᑯᐙᒡ ᑭᔐᒪᓂᑑᓐ ᐅᑕᒑᑯᓂ᙮ ᑮᐃᔑᐱᒫᑎᓯᐗᒃ ᐃᑕᔥ ᑲᔦ ᐁᑮ ᑯᑖᓀᓂᒫᐙᒡ ᑳᑎᐯᒋᑫᓂᒡ᙮

9:32b.ACT.009.032 ᑮᐊᓂ ᐊᔨᔑᓭᓂ ᑕᔥ ᐲᑕᕒ ᒥᓯᐌ ᐁᑮᐃᔖᒡ ᐃᐃᒫ ᐊᑮᕽ, ᐁᑮᐊᓂ ᐅᑎᓵᒡ ᐅᑌᐺᑕᒨᐞ ᑭᔐᒪᓂᑑᓐ ᑌᐯᓂᒥᑯᓂᒡ ᓬᐃᑕ ᑳᐯᔑᐎᓂᕽ ᐁᔮᓂᒡ᙮

9:33b.ACT.009.033 ᐅᑮᐅᑎᓵᓐ ᑕᔥ ᐯᔑᒃ ᐃᓂᓂᐗᓐ ᐄᓃᔭᔅ ᐁᔑᓂᑳᓱᓂᒡ ᐁᒪᒫᒋᒀᐱᓀᓂᒡ᙮ ᐋᔕ ᓂᔣᓱ ᐱᐴᓐ 8 ᐃᐃ ᑮᔑ ᐊᔮᐗᓐ ᐁᑮᒥᒋ ᐱᒥᔑᓂᓂᒡ ᐁᐱᒧᓭᓯᓂᒃ᙮

9:34b.ACT.009.034 ᐲᑕᕒ ᑕᔥ ᐅᑮᐃᓈᓐ: ᐄᓃᔭᔅ, ᒋᓴᔅ X ᑭᒥᓄᐊᔮᐃᒃ᙮ ᐗᓂᔥᑳᓐ, ᒋᓇᐄᑭᓯᑑᔭᓐ ᑭᓂᐯᐎᓐ, ᐅᑮᐃᓈᓐ᙮ ᔐᒫᒃ ᑕᔥ ᑮᐗᓂᔥᑳᐗᓐ᙮

9:35b.ACT.009.035 ᑲᑭᓇ ᑕᔥ ᐃᐃᒫ ᐯᒫᑎᓯᓂᒡ ᑳᑮᐃᔑᑖᓂᒡ ᓬᐃᑕ ᑲᐯᔑᐎᓂᕽ, ᐃᐃ ᑲᔦ ᔐᕒᐊᓂᕽ ᐅᐅ ᐁᐃᔑ ᐙᐸᑕᒥᓂᒡ, ᐅᑮ ᑴᑮᓄᑕᐙᓂ ᑳᑎᐯᒋᑫᓂᒡ᙮

9:36b.ACT.009.036 ᐌᑎ ᑕᔥ ᐆᑌᓈᕽ ᒑᐸ ᐁᒋᑳᑌᒃ, ᑮᐊᔮ ᐯᔑᒃ ᐃᑴ ᐅᑌᐺᑕᒨ ᑖᐱᑕ ᐁᐃᔑᓂᑳᓱᒡ᙮ ᑲᕒᐄᑲᒃ ᐅᑎᔑᑮᔗᐎᓂᐙᕽ ᑣᕒᑲᔅ ᑮᐃᑭᑐᐗᒃ, ᐙᐙᔥᑫᔑ ᐁᑮᐃᒋᑳᑌᓂᒃ᙮ ᒦ ᐊᐌ ᐃᑴ ᒨᔕᒃ ᑮᓂᑖ ᒥᓄᒋᑫ, ᐁᑮ ᓂᑖ ᐐᒋᐋᒡ ᑲᔦ ᑫᑎᒫᑭᓯᓂᒡ᙮

9:37b.ACT.009.037 ᒦᑕᔥ ᐃᐃ ᐊᐲ ᑮᐊᓂ ᐋᑯᓯ ᐊᐊ ᐃᑴ, ᐁᑮᐊᓂ ᓂᐳᒡ᙮ ᐅᐐᔭᐤ ᐃᑕᔥ ᑮᑭᓰᓯᐸᒋᑳᑌᓂ, ᐃᔥᐱᒥᕽ ᐁᔑ ᐸᑫᒋᑳᑌᓂᒃ ᐙᑳᐃᑲᓐ ᐁᑮᐃᔑ ᐊᒋᑳᑌᓂᒃ᙮

9:38b.ACT.009.038 ᓬᐃᑕ ᐊᔮᐎᓂᕽ ᐃᑕᔥ ᑮᐅᒋ ᐯᔓᐗᓐ ᐃᐃᒫ ᐅᒋ ᒑᐸ ᐆᑌᓈᕽ᙮ ᐊᐲ ᓴ ᐅᑌᐺᑕᒨᒃ ᐁᓅᑕᒧᐙᒡ ᐲᑕᕒᐊᓐ ᐁᐊᔮᓂᒡ ᐌᑎ ᓬᐃᑕ ᑲᐯᔑᐎᓂᕽ, ᓃᔑᓐ 2 ᐃᓂᓂᐗᐞ ᐅᑮᐃᔑᓂᔕᐙᐙᐞ ᐅᐅ ᒋᐊᐎᐃᓈᓂᒡ: ᑫᑯ ᐊᔪᑕᒦᑫᓐ ᒋᐱ ᓈᓯᑲᐎᔮᕽ, ᒋᐃᓈᓂᒡ᙮

9:39b.ACT.009.039 ᔐᒫᒃ ᐃᑕᔥ ᐲᑕᕒ ᑮᐅᔒᑖ ᐁᑮᐊᓂ ᐐᒌᐙᒡ᙮ ᐊᐲ ᑕᔥ ᐁᑕᑯᔑᕽ, ᑮᐃᔑᐎᒋᑲᓂᐎ ᐸᑫᒋᑲᓂᕽ ᐃᔥᐱᒥᕽ᙮ ᑲᑭᓇ ᑕᔥ ᑮᐙᒋᑴᐗᐞ ᐅᑮᐙᑳᔥᑳᑰᐞ ᐁᑭᒋ ᒪᐎᓂᒡ ᐁᐙᐸᑕᐃᑯᒡ ᓈᐱᔥᑭᑲᓇᓐ, ᑭᑭᔥᑭᑲᓇᓐ ᑲᔦ ᑳᑮᐅᔑᑑᓂᐸᓐ ᒣᒀ ᐁᐱᒫᑎᓯᓂᒡ᙮

9:40b.ACT.009.040 ᒦᔥ ᐲᑕᕒ ᑳᐃᔑ ᑲᓅᓈᒡ ᑲᑭᓇ ᒋᓵᑲᐊᒥᓂᒡ᙮ ᒦᑕᔥ ᑳᐃᔑ ᐅᒋᒌᑾᓇᐱᑖᒡ ᐁᑮᐊᓇᒥᐋᒡ᙮ ᑮᑴᑮ ᑕᔥ ᐁᔑ ᐊᑌᓂᒃ ᐃᐃ ᐐᔭᐎᒫ ᐁᑮᐃᑭᑐᒡ: ᑖᐱᑕ ᐗᓂᔥᑳᓐ᙮ ᒦᔥ ᑳᐃᔑ ᐹᑳᐱᓂᒡ᙮ ᐁᐙᐸᒥᑯᒡ ᐃᑕᔥ, ᒦ ᐃ ᑳᐃᔑ ᒪᔮᐗᐱᓂᒡ᙮

9:41b.ACT.009.041 ᐅᑮ ᓴᑭᓂᑫᓈᓐ ᑕᔥ ᐁᐐᒋᐋᒡ ᐁᑮ ᐸᓯᑸᐋᒡ᙮ ᒦᑕᔥ ᑳᐃᔑ ᐊᑐᒫᒡ ᐅᑌᐺᑕᒨᐞ, ᐃᐃ ᑲᔦ ᑮᐙᒋᑴᐞ ᐁᑮᐙᐸᑕᐋᒡ ᐁᐱᒫᑎᓯᓂᒡ᙮

9:42b.ACT.009.042 ᒥᓯᐌ ᑕᔥ ᐃᐃᒫ ᒑᐸ ᐆᑌᓈᕽ ᑮᑭᑫᑖᑾᓐ ᐅᐅ᙮ ᓃᐱᐗᐞ ᑕᔥ ᐯᒫᑎᓯᐙᒡ ᐅᑮ ᑌᐺᑕᐙᐙᓐ ᑳᑎᐯᒋᑫᓂᒡ᙮

9:43b.ACT.009.043 ᑭᓉᔒᔥ ᑕᔥ ᐃᑯ ᐃᐃᒫ ᐲᑕᕒ ᑮᐊᔮ ᒑᐸ ᐆᑌᓈᕽ, ᐁᑮᐐᒋᐊᔮᒫᒡ ᑳᐸᔥᑴᑭᓄᑫᓂᒡ ᓵᐃᒪᓐ ᐁᔑᓂᑳᓱᓂᒡ᙮

10

10:1b.ACT.010.001 ᑮᐊᔮ ᑕᔥ ᐯᔑᒃ ᐃᓂᓂ ᓭᓴᕒᐄᔭ ᐆᑌᓈᕽ ᒀᕒᓃᓬᐃᔭᔅ ᐁᐃᔑᓂᑳᓱᒡ᙮ ᑮᔑᒫᑲᓂᔒᐎᑭᒫᐎ ᓂᑯᑣᒃ 100 ᔑᒫᑲᓂᔕᐞ ᐁᑮ ᑎᐯᓂᒫᒡ᙮ ᐃᐃ ᓴ ᔑᒫᑲᓂᔕᐞ ᐃᑕᓬᐃ ᑳᑮᐅᒌᓂᒡ ᐅᑮᓈᓈᑲᒋᐋᐞ᙮

10:2b.ACT.010.002 ᐊᐊ ᓴ ᐃᓂᓂ ᑮᐊᓇᒥᐁᐙᑎᓯ, ᐁᑮ ᑯᑖᓀᓂᒫᒡ ᑭᔐᒪᓂᑑᓐ, ᑲᑭᓇ ᑲᔦ ᐁᔮᓂᒡ ᐅᑖᐎᓂᕽ᙮ ᓃᐱᐗᐞ ᓴ ᑮᐃᔑᒋᑫ ᐁᑮᐐᒋᐋᒡ ᑫᑎᒫᑭᓯᓂᒡ ᒎᐗᐞ, ᒨᔕᒃ ᑲᔦ ᐁᑮᐊᓇᒥᐁᑕᐙᒡ ᑭᔐᒪᓂᑑᓐ᙮

10:3b.ACT.010.003 ᐋᐱᑎᕽ ᑕᔥ ᐁᑮᔑᑲᓂᓂᒃ ᓂᑯᒋᑯ ᐁᓂᓱ ᑎᐸᐃᑲᓀᔮᓂᒃ ᐁᐃᔥᒀ ᓈᐗᑴᓂᒃ, ᐅᑮᐙᐸᑖᓐ ᐃᔑᓇᒧᐎᓐ᙮ ᐅᑮᐙᐸᒫᓐ ᐁᒐᓬᐊᓐ ᐁᐱᐲᑎᑳᑯᒡ ᑭᔐᒪᓂᑑᓐ ᐁᑮ ᐲᒋᓂᔕᐅᑯᓂᒡ ᐅᐅ ᐁᐃᑯᒡ: ᒀᕒᓃᓬᐃᔭᔅ!

10:4b.ACT.010.004 ᐐᑫ ᑕᔥ ᑮᓭᑭᓯ ᐁᑮ ᑲᓇᐙᐸᒫᒡ ᐁᑮᐃᑭᑐᒡ: ᐌᑯᓀᓐ ᐁᑕᐌᑕᒪᓐ ᓂᑑᑭᒫᒻ? ᑮᐃᔑ ᓭᑭᑖᑯᓯ᙮ ᐅᐅ ᑕᔥ ᐅᑮᐃᑰᓐ ᐁᒐᓬᐊᓐ: ᑭᔐᒪᓂᑑ ᐅᔕ ᑭᒥᓍᐸᒥᒃ ᐃᐃ ᑳᔑ ᐊᓇᒥᐋᔮᓐ, ᐃᐃ ᑲᔦ ᑳᔑ ᐐᒋᐊᑣ ᑫᑎᒫᑭᓯᐙᒡ, ᑲᔦ ᑕᔥ ᐁᒫᒥᑴᓂᒥᒃ᙮

10:5b.ACT.010.005 ᑕᑲ ᓴ ᐃᔑᓂᔕᐅ ᐃᓂᓂᐗᒃ ᒑᐸ ᐆᑌᓈᕽ ᒋᓈᓯᑲᐙᐙᒡ ᐃᓂᓂᐗᓐ ᓵᐃᒪᓇᓐ ᐲᑕᕒ ᑳ ᐃᓂᒥᓐᒡ᙮

10:6b.ACT.010.006 ᐃᓂ ᓴ ᑳᐸᔥᑴᑭᓄᑫᓂᒡ ᓵᐃᒪᓐ ᐁᔑᓂᑳᓱᓂᒡ ᐅᐐᒋᐊᔮᒫᓐ, ᒋᑭᑭᒋᑲᒦᕽ ᑳᐃᔑᑖᓂᒡ, ᐅᑮᐃᑰᓐ᙮

10:7b.ACT.010.007 ᐊᐲ ᑕᔥ ᑳᓇᑲᓂᑯᒡ ᐃᓂ ᐁᒐᓬᐊᓐ ᑳᑮ ᑲᓅᓂᑯᒡ, ᒀᕒᓃᓬᐃᔭᔅ ᐅᑮᐊᑐᒫᐞ ᓃᔑᓐ 2 ᐅᑕᓄᑮᐋᑲᓇᐞ ᐅᐙᑳᐃᑲᓂᕽ ᐁᔮᓂᒡ, ᐃᓂ ᑲᔦ ᐁᓇᒥᐁᐙᑎᓯᓂᒡ ᔑᒫᑲᓂᔕᓐ ᒨᔕᒃ ᑳᑮ ᐸᒥᐃᑯᒡ᙮

10:8b.ACT.010.008 ᑳᐃᔥᒀ ᐙᐐᑕᒪᐙᒡ ᑕᔥ ᑲᑭᓇ ᑫᑰᓐ, ᒦ ᐃ ᑳᐃᔑ ᐃᔑᓂᔕᐙᒡ ᒑᐸ ᒋᐃᔖᓂᒡ᙮

10:9b.ACT.010.009 ᐁᐊᓂ ᐙᐸᓂᓂᒃ ᑕᔥ ᐁᐊᓂ ᓈᐗᑴᓂᒃ ᑫᑳ ᐁᐊᓂ ᐅᑎᑕᒥᓂᒡ ᐃᐃ ᐆᑌᓇ ᒑᐸ, ᒦ ᐃ ᓇᐃᑖᒃ ᐊᐲ ᐲᑕᕒ ᑳᑮᐃᔖᒡ ᐗᑭᒋ ᓇᐸᑭ ᐙᑳᐃᑲᓂᕽ ᐁᑮᐊᑕ ᐊᓇᒥᐋᒡ ᐁᐊᓂ ᓈᐗᑴᓂᒃ᙮

10:10b.ACT.010.010 ᐲᑕᕒ ᑕᔥ ᑮᓅᑌᔥᑲᑌ ᐁᑮᐊᑕᐌᑕᕽ ᑫᑰᓐ ᐁᐐᒦᒋᒡ᙮ ᒣᒀ ᑕᔥ ᐁᑾᔮᒋᒋᑳᑌᓂᒃ ᒦᒋᒻ, ᑫᑰᓐ ᑮᐃᔑᓇᒻ ᐁᓂᐹᐎ ᐃᔑᐊᔮᒡ᙮

10:11b.ACT.010.011 ᒦᑕᔥ ᑳᑮᐙᐸᑕᕽ ᑮᔑᒃ ᐁᐹᑭᔥᑳᓂᒃ, ᑫᑰᓐ ᑲᔦ ᐁᑮᐙᐸᑕᕽ ᑖᐱᔥᑰ ᐙᐱᔥᑮᑭᓄᕽ, ᐁᔑᓃᐎ ᑮᑫᔩᑲᓂᓂᒃ ᐃᑕᔥ ᑮᐅᒋ ᐸᑭᑖᐲᑭᓂᑳᑌᓂ᙮

10:12b.ACT.010.012 ᒦᑕᔥ ᐃᐃᒫ ᑮᐊᔮᐗᐞ ᑲᑭᓇ ᑳᓃᐎᑳᑌᓂᒡ ᐊᔭᐋᐎᔕᐞ, ᐃᐃ ᑲᔦ ᑮᓀᐱᑰᐞ ᐊᑮᕽ ᐁᔮᓂᒡ, ᐱᓀᔒᔕᐞ ᑲᔦ ᐃᔑᐱᒥᕽ ᐯᐹᒥᓭᓂᒡ᙮

10:13b.ACT.010.013 ᒦᔥ ᑳᑮᓅᑕᐙᒡ ᐊᐎᔭᓐ ᐁᐃᑭᑐᓂᒡ: ᐗᓂᔥᑳᓐ ᐲᑕᕒ, ᓂᔑ ᒋᐊᒶᑣ᙮

10:14b.ACT.010.014 ᐲᑕᕒ ᑕᔥ ᑮᐃᔑ ᓇᑴᑕᒻ: ᑳᐐᓐ ᑌᐯᒋᑫᔭᓐ! ᑳᐐᓐ ᐄᑐᒃ ᐐᑳ ᓂᐱᒦᒋᓰᓐ ᑫᑰᓐ ᓂᑕᓇᒥᐋᐎᓂᓈᓂᕽ ᐌᒋ ᒪᓈᒦᒋᓈᑳᑌᒃ ᑳᐐᓀᑖᑾᒃ᙮

10:15b.ACT.010.015 ᒦᓇᐙ ᑕᔥ ᐅᑮᓅᑕᐙᓐ ᐊᐎᔭᓐ ᐁᑲᓅᓂᑯᒡ: ᑫᑯ ᐃᓀᑕᑫᓐ ᒋᒪᓈ ᒦᒋᓈᑳᑌᒃ ᑭᔐᒪᓂᑑ ᑳᐃᑕᕽ ᐁᐯᑲᓂᓂᒃ, ᑮᐃᓈ᙮

10:16b.ACT.010.016 ᓃᔣ 3 ᑕᔥ ᐅᐅ ᑮᑑᒋᑳᑌᓂ, ᒦᑕᔥ ᒦᓇᐙ ᑮᔑᑯᕽ ᑳᐃᔑ ᑮᐌᐃᔥᐱᔥᑳᓂᒃ ᐃᐃ ᑳᑮ ᐙᐸᑕᕽ᙮

10:17b.ACT.010.017 ᒣᒀ ᑕᔥ ᐲᑕᕒ ᐁᐗᐙᓀᑕᕽ ᐋᓃᓐ ᐁᓍᑌᓂᑴᓐ ᐃᐃ ᑳᑮᐃᔑᓇᕽ, ᐃᓂᐌᓂᐗᐞ ᐃᓂᓂᐗᐞ ᑳᑮ ᐲᒋᓂᔕᐅᑯᓂᒡ ᒀᕒᓃᓬᐃᔭᓴᓐ, ᐅᑮ ᒥᑲᒥᓂ ᓵᐃᒪᓇᓐ ᐅᐙᑳᐃᑲᓂᓂ᙮ ᐊᑾᒌᕽ ᐃᑕᔥ ᑮᓃᐸᐎᐗᐞ᙮

10:18b.ACT.010.018 ᒦᑕᔥ ᑳᑮ ᑭᔒᐌᓂᒡ ᐁᑲᑴᑗᓂᒡ ᑮᔥᐱᓐ ᐁᔮᓂᑴᓐ ᐃᐃᒫ ᓵᐃᒪᓇᓐ ᐲᑕᕒ ᑳᐃᔑᓂᑳᓱᓂᒡ᙮

10:19b.ACT.010.019 ᒣᒀ ᑕᔥ ᐲᑕᕒ ᐁᓈᓈᑲᑕᐌᑕᕽ ᐃᐃ ᑳᑮᐃᔑᓇᕽ, ᑭᔐᒪᓂᑑ ᐅᑕᒑᑯᓂ ᐅᑮ ᑲᓅᓂᑰᓐ ᐁᑮᐃᑯᒡ: ᓂᓯᓐ ᐅᔕ ᐃᓂᓂᐗᒃ ᑭᐱᓇᓈᑕᐙᐸᒥᑰᒃ᙮

10:20b.ACT.010.020 ᐗᓂᔥᑳᓐ, ᒋᓃᓵᑕᐌᔭᓐ᙮ ᑫᑯ ᑆᑕᐌᑕᑫᓐ ᒋᐐᒌᐗᑣ, ᐋᓃᔥ ᓃᓐ ᓂᑮ ᐲᒋᓂᔕᐙᒃ, ᐅᑮᐃᑰᓐ᙮

10:21b.ACT.010.021 ᐲᑕᕒ ᑕᔥ ᑮᓃᓵᑕᐌ᙮ ᒦᑕᔥ ᑳᐃᓈᒡ ᐃᓂᐌᓂᐗᐞ: ᓃᓐ ᐅᔕ ᑳᓇᓈᑕᐙᐸᒣᒃ᙮ ᐌᑯᓀᓐ ᑕᔥ ᐌᒋ ᐲᔖᔦᒃ? ᐁᑮᐃᓈᒡ᙮

10:22b.ACT.010.022 ᒦᔥ ᐅᐅ ᑳᐃᑯᒡ: ᐊᐊᐌ ᓴ ᒀᕒᓃᓬᐃᔭᔅ ᔑᒫᑲᓂᔒᐎᑭᒫ ᓂᑮ ᐲᒋᓂᔕᐅᑯᓈᓐ᙮ ᑾᔭᒀᑎᓯ, ᐅᑯᑖᓀᓂᒫᓐ ᑲᔦ ᑭᔐᒪᓂᑑᓐ᙮ ᑲᑭᓇ ᓴ ᒎᐗᐞ ᐅᑭᑌᓂᒥᑰᐞ᙮ ᑭᔐᒪᓂᑑᓐ ᑕᔥ ᐅᑌᒐᓬᐃᒥᓂ ᐅᑮ ᐐᑕᒫᑰᓐ ᒋᐲᔖᐗᒡ ᐅᐙᑳᐃᑲᓂᕽ ᒋᓅᑕᐎᒃ ᐋᓃᓐ ᑫᐃᑭᑐᐗᒡ, ᐅᑮᐃᑰᐞ᙮

10:23b.ACT.010.023 ᐲᑕᕒ ᑕᔥ ᐅᑮ ᐲᑎᑫᐊᑐᒫᐞ ᐁᑮᓂᐯᐋᒡ᙮ ᐁᐊᓂ ᐙᐸᓂᓂᒃ ᑕᔥ ᐅᑮᒫᒌ ᐐᒌᐙᐞ; ᐋᓂᑕ ᑲᔦ ᐅᐐᒋ ᐅᑌᐺᑕᒨᐞ ᒑᐸ ᐆᑌᓈᕽ ᐌᒌᓂᒡ ᐁᑮᐊᓂ ᐐᒌᐎᑯᒡ᙮

10:24b.ACT.010.024 ᒦᓇᐙ ᑕᔥ ᐁᐊᓂ ᐙᐸᓂᓂᒃ ᑮᑕᑯᔑᓅᒃ ᓭᓴᕒᐄᔭ ᐆᑌᓈᕽ᙮ ᒀᕒᓃᓬᐃᔭᓴᓐ ᐃᐃᒫ ᑮᑕᔑ ᐲᐅᐗᓐ, ᐁᑮᐊᑐᒫᓂᒡ ᐅᑎᓇᐌᒫᑲᓂᓂ, ᑳᑮ ᓵᑭ ᐐᒌᐙᓂᒡ ᑲᔦ᙮

10:25b.ACT.010.025 ᐊᐲ ᑕᔥ ᐲᑕᕒ ᑳᐲᑎᑫᒡ ᐅᐙᑳᐃᑲᓂᓃᕽ, ᒀᕒᓃᓬᐃᔭᓴᓐ ᐅᑮᓇᑭᔥᑳᑰᓐ, ᐁᔑ ᓯᑌᑳᐸᐎᒡ ᐁᑮᐃᔑ ᐊᓂᒥᑯᑖᓂᒡ᙮

10:26b.ACT.010.026 ᐲᑕᕒ ᐅᑮ ᐸᓯᑸᐋᓐ ᐁᑮᐃᓈᒡ: ᐸᓯᑸᓐ! ᑫᓃᓐ ᐅᔕ ᓂᑎᓂᓂᐤ, ᐅᑮᐃᓈᓐ᙮

10:27b.ACT.010.027 ᐁᑲᑲᓅᓈᒡ ᐃᑕᔥ, ᑮᐊᓂ ᐲᑎᑫ᙮ ᒦᑕᔥ ᑳᑮ ᐙᐸᒫᒡ ᓃᐱᐗᐞ ᐊᐎᔭᐞ ᐁᒫᐗᒋᐃᑎᓂᒡ᙮

10:28b.ACT.010.028 ᒦᑕᔥ ᑳᐃᓈᒡ: ᑭᑭᑫᑖᓈᐙ ᐄᑐᒃ ᓂᑑᓇᔓᐌᐎᓂᓈᓐ ᐁᐃᓇᑌᒃ ᐊᐎᔭ ᑳᒎᐎᐎᒡ ᒋᐐᒌᐙᓯᒃ, ᒋᐲᑎᑲᐙᓯᒃ ᑲᔦ ᐸᑳᓐ ᐊᐎᔭᓐ ᐌᒌᓂᒡ᙮ ᑭᔐᒪᓂᑑ ᑕᔥ ᓂᑮᐙᐸᑕᐃᒃ ᐸᑳᓐ ᐊᐎᔭ ᓅᒋᑯ ᒋᐃᓇᑭᒫᓯᐗᒃ, ᒋᐃᑭᑐᓯᐙᓐ ᑕᔥ ᑲᔦ ᐸᑳᓐ ᐊᐎᔭ ᒋᒪᓈᐐᒌᐗᑭᐸᓐ᙮

10:29b.ACT.010.029 ᒦᑕᔥ ᑳᑮᐅᒋ ᑆᑕᐐᓯᐙᓐ ᐊᐲ ᑮᐊᑐᒥᑰᔮᓐ ᑫᑰᓐ ᐁᑮᐅᑕᒣᑕᓯᐙᓐ᙮ ᑭᑲᑴᒋᒥᓂᓂᒻ ᑕᔥ ᐌᑯᓀᓐ ᑳᐅᒋ ᐊᑐᒥᔦᒃ? ᐅᑮᐃᓈᐞ᙮

10:30b.ACT.010.030 ᒀᕒᓃᓬᐃᔭᓴᓐ ᑕᔥ ᐅᐅ ᐅᑮᐃᑰᓐ: ᓃᐎᑮᔑᒃ ᐋᔕ ᐃᔑᓭ ᑳᑮᐊᓇᒥᐋᔮᐹᓐ ᓂᐙᑳᐃᑲᓂᕽ ᐅᐅ ᐊᐲ ᐁᓂᓱ ᑎᐸᐃᑲᓀᔮᒃ ᐁᐃᔥᒀ ᓈᐗᑴᒃ᙮ ᒦᑕᔥ ᐃᐃ ᐊᐲ ᑳᑮᐙᐸᒪᒃ ᐃᓂᓂ ᐁᐅᒋᔥᑲᐎᑳᐸᐎᒡ ᐁᐙᓯᑌᓂᑭᓐ ᐅᑭᑭᔥᑭᑲᓇᓐ᙮

10:31b.ACT.010.031 ᒦᑕᔥ ᐅᐅ ᑳᐃᔑᒡ: ᒀᕒᓃᓬᐃᔭᔅ ᑭᔐᒪᓂᑑ ᐅᔕ ᐅᓅᑖᓇᓐ ᑭᑕᓇᒥᐋᐎᓇᓐ, ᐅᒫᒥᑲᐎᓄᑖᓐ ᑕᔥ ᑲᔦ ᑳᔑ ᒦᓂᒪᒡ ᑫᑎᒫᑭᓯᓂᒡ᙮

10:32b.ACT.010.032 ᐃᔑᓂᔕᐅᐌᓐ ᑕᔥ ᒑᐸ ᐆᑌᓈᕽ ᒋᐊᑐᒪᒡ ᒋᐱᐊᑕᐙᐸᒥᒃ ᓵᐃᒪᓐ ᐲᑕᕒ ᑳᐃᒋᑲᓂᐎᒡ᙮ ᐃᓂᐌᓂᐗᓐ ᑕᔥ ᐅᐐᒋᐊᔮᒫᓐ ᓵᐃᒪᓇᓐ ᑳᐸᔥᑴᑭᓄᑫᓂᒡ ᒌᑭᐲᒃ ᑭᒋᑲᒦᕽ ᑳᐃᔑᑖᓂᒡ, ᓂᑮᐃᒃ᙮

10:33b.ACT.010.033 ᔐᒫᒃ ᑕᔥ ᑭᑮ ᓈᒋᓂᔕᐅᓐ᙮ ᑭᒥᓄᒋᑫ ᑕᔥ ᑮᐲᔖᔭᓐ᙮ ᑲᑭᓇ ᑕᔥ ᐅᐅᒫ ᓂᑕᔮᒥᓐ ᐁᓈᓴᒦᒡ ᑭᔐᒪᓂᑑ ᐁᐐ ᐱᓯᑕᒫᕽ ᑲᑭᓇ ᑫᑰᓐ ᑳᑎᐯᒋᑫᒡ ᑳᑮᐃᔑ ᐊᓅᓂᒃ ᒋᔑ ᐐᑕᒪᐎᔮᕽ, ᐅᑮᐃᑰᓐ ᒀᕒᓃᓬᐃᔭᓴᓐ᙮

10:34b.ACT.010.034 ᐲᑕᕒ ᑕᔥ ᑮᒫᒌ ᑲᑭᑐ ᐅᐅ ᐁᑮᐃᑭᑐᒡ: ᑌᐺ ᓂᓂᓯᑕᐎᓇᒧᐙᓐ ᑭᔐᒪᓂᑑ ᑲᑭᓇ ᐊᐎᔭᓐ ᐯᔑᑾᓐ ᐁᐃᓀᓂᒫᒡ᙮

10:35b.ACT.010.035 ᑲᑭᓇ ᑕᔥ ᐃᑯ ᑳᑕᓶᐙᓇᑭᓯᓂᒡ ᐊᐎᔭᓐ ᑴᑖᓀᓂᒥᑯᒡ, ᑫᑑᑕᒥᓂᒡ ᐃᑕᔥ ᑲᔦ ᑳᑾᔭᑯ ᓈᑾᓂᕽ ᐅᑑᑖᐱᓈᓐ᙮

10:36b.ACT.010.036 ᑭᑭᑫᑖᒻ ᐄᑐᒃ ᐃᐃ ᑎᐹᒋᒧᐎᓐ ᑳᑮᐃᔑᓂᔕᐊᒪᐙᒡ ᐯᒫᑎᓯᓂᒡ ᐃᔅᕒᐃᔭᓬᐊᐞ, ᐁᑮᐐᑕᒪᐎᒥᓐᒡ ᐁᔑ ᒥᓍᑐᑌᓂᒃ ᐱᓵᓂᓯᐎᓐ ᐅᒋ ᒋᓴᔅ Xᐃᕽ ᑳᒫᒪᐎ ᑎᐯᒋᑫᓂᒡ᙮

10:37b.ACT.010.037 ᑭᑭᑫᑖᒻ ᑲᔦ ᐋᓃᓐ ᑳᐃᔑᐌᐸᒃ ᒥᓯᐌ ᒎᑏᔭᑮᕽ, ᐁᑮᐅᒋ ᒫᒋᓭᓂᒃ ᐃᐃᒫ ᑳᓬᐊᓬᐄᐗᑮᕽ ᐊᐲ ᒞᓇᓐ ᐅᓰᑲᐊᑖᑫᓐ ᑮᐃᔥᒀ ᑕᔑᑕᒥᓂᒡ ᓰᑲᐊᑖᓱᐎᓐ᙮

10:38b.ACT.010.038 ᑭᑭᑫᑖᒻ ᑲᔦ ᐋᓃᓐ ᐁᓈᒋᒥᓐᒡ ᒋᓴᔅ ᓈᓴᕒᐃᑎᕽ ᑳᐅᒌᒡ, ᑭᔐᒪᓂᑑᓐ ᐁᑮᐅᓈᐸᒥᑯᒡ ᐁᑮ ᒦᓂᑯᒡ ᐅᑕᒑᑯᓂ, ᒪᔥᑲᐎᓰᐎᓐ ᑲᔦ᙮ ᒥᓯᐌ ᐁᑮᐸᐹ ᐃᔖᒡ ᐁᒥᓄᑑᑖᑫᒡ, ᐁᑮ ᒥᓄᐊᔮᐋᒡ ᑲᔦ ᑲᑭᓇ ᑳᑭᑎᒪᐃᑯᓂᒡ ᒪᒋᐊᔭᐋᓐ, ᐋᓃᔥ ᑭᔐᒪᓂᑑᓐ ᐅᑮᐐᒌᐎᑰᓐ᙮

10:39b.ACT.010.039 ᓃᓇᐎᓐᑦ ᑕᔥ ᓂᑎᐹᑐᑖᒥᓐ ᑲᑭᓇ ᑫᑰᓐ ᑳᑮᐃᔑ ᐙᐸᒪᑭᒡ ᐁᐃᔑᒋᑫᒡ ᐃᐃᒫ ᒎᐗᒃ ᐅᑕᑮᒥᐙᕽ, ᐃᐃᒫ ᑲᔦ ᒉᕒᐆᓴᓬᐊᒥᕽ ᙮ ᒦᑕᔥ ᐃᐃ ᑳᑮ ᓂᓯᑯᒡ ᒎᐗᐞ, ᐋᔑᑌᔮᑎᑯᕽ ᐁᑮᐊᑯᓴᑲᐅᑯᒡ᙮

10:40b.ACT.010.040 ᑭᔐᒪᓂᑑᓐ ᑕᔥ ᐅᑮᑮᐌ ᐱᒫᑎᓰᐃᑰᓐ ᓂᓱᑮᔑᒃ ᐁᐃᔑᓭᓂᒃ, ᐁᑮ ᑑᑖᑯᒡ ᑲᔦ ᒋᓈᑯᓯᒡ᙮

10:41b.ACT.010.041 ᑳᐐᓐ ᑲᑭᓇ ᐊᐎᔭᓐ ᐅᑮᐙᐸᒥᑯᓰᓐ᙮ ᓃᓀᑕᐎᓐᑦ ᐁᑕ ᓃᑳᓐ ᑳᑮᐅᓈᐸᒥᔭᒥᓐᒡ ᒋᑎᐹᑐᑕᒪᐙᕽ ᑳᑮ ᐙᐸᑕᒫᕽ, ᑳᑮᐐᒋ ᐐᓯᓃᒪᑭᒡ, ᑳᑮ ᐐᒋ ᒥᓂᑴᒪᑭᒡ ᑲᔦ ᑮᐃᔥᒀ ᑮᐌ ᐱᒫᑎᓰᐃᓐᒡ᙮

10:42b.ACT.010.042 ᓃᓇᐎᓐᑦ ᑲᔦ ᓂᑮᐊᓅᓂᑯᓈᓐ ᒋᑲᑮᑭᒥᒪᑭᒡ ᐯᒫᑎᓯᓂᒡ, ᒋᑎᐹᒋᒧᐗᑭᒡ ᑲᔦ ᐐᓐ ᐁᔮᐎᒡ ᑭᔐᒪᓂᑑᓐ ᑳᑮᐅᓇᑭᒥᑯᒡ ᒋᐅᓈᑯᓈᒡ ᐯᒫᑎᓯᓂᒡ, ᐃᑭ ᑲᔦ ᑳᓂᐳᓂᒡ᙮

10:43b.ACT.010.043 ᒦᐗᓐ ᓴ ᐃᓂ ᑳᑮ ᑕᔑᒫᐙᒡ ᑭᔐᒪᓂᑑᓐ ᑫᓅᑕᒪᐙᐙᒡ ᐅᐅ ᑮᐃᑭᑐᐙᑯᐸᓀᓐ, ᑲᑭᓇ ᐊᐎᔭ ᐁᑕᓱ ᐯᔑᑯᒡ ᑫᑌᐺᔦᓂᒫᒡ ᐅᑲ ᑌᐱᓈᓐ ᒋᐴᓀᑕᒪᐎᓐᒡ ᐅᒪᒋᑑᑕᒧᐎᓇᓐ, ᐅᐐᓱᐎᓂᓃᕽ ᐅᒋ᙮

10:44b.ACT.010.044 ᒣᒀ ᑕᔥ ᑫᔮᐱ ᐲᑕᕒ ᐁᑕᔑᑕᕽ ᑳᑮᐃᔑᐌᐸᓂᓂᒃ, ᑭᔐᒪᓂᑑᓐ ᐅᑕᒑᑯᓂ ᐅᑮᐅᑎᓯᑯᓂ ᑲᑭᓇ ᑳᑮ ᓅᑕᒥᓂᒡ ᐃᐃ ᑎᐹᒋᒧᐎᓐ᙮

10:45b.ACT.010.045 ᐃᓂᐌᓂᐗᐞ ᑕᔥ ᑳᒎᐎᐎᓂᒡ ᐅᑌᐺᑕᒨᐞ ᐲᑕᕒ ᑳᑮᐱ ᐐᒌᐎᑯᒡ ᑮᒫᒪᑳᑌᑕᒨᐞ, ᐋᓃᔥ ᐃᐃ ᑳᒎᐎᐎᓯᓂᒃ ᑮᒦᓂᑰᐎᓯᐗᐞ ᐁᑮ ᓰᑭᓇᒪᐎᒥᓐᒡ ᑭᔐᒪᓂᑑᓐ ᐅᑕᒑᑯᓂ᙮ ᑳᑮ ᑭᑭᓇᐙᑕᔕᑫᔓᒥᓐᒡ ᐅᑌᐺᑕᒨᐞ

10:46b.ACT.010.046 ᐅᑮᓅᑕᐙᓂ ᐋᓃᔥ ᐯᐸᑳᓐ ᐁᐊᔨᔑᑮᔗᓂᒡ, ᐁᒦᑴᒋᐌᓂᒫᓂᒡ ᑕᔥ ᑲᔦ ᑭᔐᒪᓂᑑᓐ᙮

10:47b.ACT.010.047 ᐲᑕᕒ ᑕᔥ ᑮᐃᑭᑐ: ᐊᐎᔭ ᓇ ᑖᐅᒋᐃᐌ ᓂᐲᕽ ᒋᔑ ᓰᑲᐊᑖᓱᓯᓂᑭᐸᓐ ᐅᓄᐌᓂᐗᐞ ᑳᒦᓂᑰᐎᓯᓂᒡ ᑭᔐᒪᓂᑑᓐ ᐅᑕᒑᑯᓂ ᑖᐱᔥᑰ ᑮᓇᐎᓐᑦ᙮

10:48b.ACT.010.048 ᐲᑕᕒ ᑕᔥ ᑮᐊᓅᑮ ᒋᓰᑲᐊᑖᓱᓂᒡ ᐅᐐᓱᐎᓂᓃᕽ ᒋᓴᔅ Xᑕᓐ ᐅᒋ᙮ ᐅᑮᑲᑴᒋᒥᑰᐞ ᐃᑕᔥ ᐊᒋᓇ ᒋᐐᒋᐊᔮᒫᒡ᙮

11

11:1b.ACT.011.001 ᐃᔑᓂᔕᐙᑲᓇᒃ ᑕᔥ, ᐅᑌᐺᑕᒨᒃ ᑲᔦ ᒎᑏᔭᑮᕽ ᑳᐊᔮᐙᒡ ᑮᓅᑕᒨᒃ ᐃᐃ ᑳᒎᐎᐎᓯᓂᒃ ᐁᑮᐅᑖᐱᓇᒥᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ᙮

11:2b.ACT.011.002 ᐊᐲ ᑕᔥ ᐲᑕᕒ ᑳᑕᑯᔑᕽ ᒉᕒᐆᓴᓬᐊᒥᕽ ᐅᑮᐋᓍᐸᒥᑰᐞ ᐃᐃ ᑳᑭᑭᓇᐙᑕᔕᑫᔣᓱᐎᒥᓐᒡ ᐅᑌᐺᑕᒨᐞ ᐁᑮᐃᑯᒡ,

11:3b.ACT.011.003 ᑭᑮ ᐲᑎᑲᐙᒃ ᐃᐃ ᑳᑭᑭᓇᐙᑕᔕᑫᔣᓱᐎᑣ, ᑭᑮᐐᒋ ᐐᓯᓃᒫᒃ ᐃᑕᔥ ᑲᔦ, ᐅᑮᐃᑰᐞ᙮

11:4b.ACT.011.004 ᐲᑕᕒ ᑕᔥ ᑮᒫᒌ ᑲᑭᑐ ᐁᑮ ᐐᑕᒪᐙᒡ ᐋᓃᓐ ᒪᔮ ᑳᐃᔑᓭᓂᒃ ᐁᑮᐃᑭᑐᒡ:

11:5b.ACT.011.005 ᒣᒀ ᒑᐸ ᐆᑌᓈᕽ ᐁᐊᔮᔮᓐ ᐁᐊᓇᒥᐋᔮᓐ, ᑫᑰᓐ ᓂᑮᐃᔑᓇᒻ᙮ ᓂᑮ ᐙᐸᑖᓐ ᑫᑰᓐ ᑮᔑᑯᕽ ᐁᐲᓈᑾᒃ ᐁᐃᔑᓈᑾᒃ ᐃᔒᑭᓄᕽ ᑳᔑ ᓇᓃᐎᑮᑫᔩᑲᒃ ᐁᐱᐅᒋ ᓃᓵᐲᑭᓂᑳᑌᒃ᙮ ᓃᓐ ᓂᑮᐱ ᓈᓯᑳᑯᓐ᙮

11:6b.ACT.011.006 ᐁᑲᓇᐙᐸᑕᒫᓐ ᑕᔥ, ᓂᑮ ᐙᐸᒫᒃ ᑳᓃᐎ ᑳᑌᐙᒡ ᐊᔭᐋᐎᔕᒃ, ᐱᑾᒋᐊᔭᐋᐎᔕᒃ ᑲᔦ, ᑭᓀᐱᑰᒃ ᑲᔦ, ᐱᓀᔒᔕᒃ ᑲᔦ ᐃᔥᐱᒥᕽ ᐯᒫᒥᓭᐙᒡ᙮

11:7b.ACT.011.007 ᓂᑮᓅᑕᐙ ᑕᔥ ᐊᐎᔭ ᐁᑲᓅᔑᒡ ᐁᐃᑭᑐᒡ: ᐗᓂᔥᑳᓐ ᐲᑕᕒ! ᓂᔑ ᒋᐊᒶᑣ, ᓂᑮᐃᒃ᙮

11:8b.ACT.011.008 ᐅᐅ ᑕᔥ ᓂᑮᐃᓈ: ᑳᐐᓐ ᑌᐯᒋᑫᔭᓐ! ᑳᐐᓐ ᐐᑳ ᓂᐱᒦᒋᓰᓐ ᑳᐐᓀᑖᑾᒃ, ᑳᒪᓈ ᒦᒋᓈᑳᑌᒃ ᒦᒋᒻ᙮

11:9b.ACT.011.009 ᒦᓇᐙ ᑕᔥ ᑭᒋᑮᔑᑯᕽ ᐊᐎᔭ ᓂᑮᐅᒋ ᑲᓅᓂᒃ: ᑫᑰ ᐃᑕᑫᓐ ᐁᐐᓀᑖᑾᒃ ᑭᔐᒪᓂᑑ ᑳᐯᑭᑑᒡ, ᓂᑮᐃᒃ᙮

11:10b.ACT.011.010 ᓃᔣ ᐅᐅ ᑮᑑᒋᑳᑌ, ᒦᑕᔥ ᑮᔑᑯᕽ ᑳᐃᔑ ᑮᐌ ᐃᔥᐱᐱᒋᑳᑌᒃ᙮

11:11b.ACT.011.011 ᐃᓇᔥᑫ ᒦ ᐃ ᐊᐲ ᓂᓯᓐ ᐃᓂᓂᐗᒃ ᑮᑕᑯᔑᓅᒃ ᑳᑮ ᐲᒋᓂᔕᐅᑣ᙮ ᑮᐱᓃᐸᐎᐗᒃ ᐃᐃᒫ ᐙᑳᐃᑲᓂᕽ ᑳᑮᐃᔑ ᑲᐯᔑᔮᓐ, ᓭᓴᕒᐄᔭ ᐆᑌᓈᕽ ᑮᐱᐅᒌᐗᒃ ᐁᑮᐱ ᓈᓯᑲᐎᐙᒡ᙮

11:12b.ACT.011.012 ᑭᔐᒪᓂᑑ ᐅᑕᒑᑾᓐ ᑕᔥ ᓂᑮᐐᑕᒫᒃ ᒋᑆᑕᐐᓯᐙᓐ ᒋᐐᒌᐎᒪᒃ᙮ ᐅᑯ ᑕᔥ ᑲᔦ ᓂᑯᑣᓱ ᓃᒋ ᐅᑌᐺᑕᒨᒃ ᓂᑮ ᐐᒌᐎᑰᒃ᙮ ᒦᔥ ᑳᑮ ᐲᑎᑫᔮᕽ ᒀᕒᓃᓬᐃᔭᔅ ᐅᐙᑳᐃᑲᓐ᙮

11:13b.ACT.011.013 ᓂᑮᐐᑕᒫᑯᓈᓐ ᑕᔥ ᑳᐃᔑ ᐙᐸᒫᒡ ᐁᒐᓬᐊᓐ ᐁᓃᐸᐎᓂᒡ ᐅᐙᑳᐃᑲᓂᕽ ᐁᑮᐃᑯᒡ ᐄᓴᓐ: ᐃᔑᓂᔕᐅᐌᓐ ᒑᐸ ᐆᑌᓈᕽ ᓵᐃᒪᓐ ᐲᑕᕒ ᑳᐃᔑᓂᑳᓱᒡ ᒋᐊᑐᒪᒡ᙮

11:14b.ACT.011.014 ᒦᑕᔥ ᐊᐊᐌ ᑫᐐᑕᒪᐎᒃ ᐃᑭᑐᐎᓇᓐ ᑫᐅᒋ ᐱᒫᒋᐃᑰᐎᓯᔭᓐ, ᐃᑭ ᑲᔦ ᑲᑭᓇ ᐁᔮᐙᒡ ᐃᐃᒫ ᑳᔑᐊᔮᔭᓐ, ᐅᑮᐃᑰᓐ ᐄᓴᓐ᙮

11:15b.ACT.011.015 ᐊᐲ ᑕᔥ ᑳᒫᒌ ᑳᑮᑭᑐᔮᓐ, ᑭᔐᒪᓂᑑᓐ ᐅᑕᒑᑯᓂ ᐅᑮᐅᑎᓯᑯᐙᓐ ᑖᐱᔥᑰ ᑮᓇᐎᓐᑦ ᓂᑕᒻ ᑳᑮᐃᔑ ᐅᑎᓯᔭᒥᓐᒡ᙮

11:16b.ACT.011.016 ᒦᑕᔥ ᑳᑮᒫᒥᑲᐎᔮᓐ ᐅᐅ ᑳᑮᐃᑭᑐᐸᓐ ᑳᑎᐯᒋᑫᒡ: ᒞᓐ ᓂᐲᓂ ᐅᑮ ᔮᐸᒋᑑᓐ ᓰᑲᐊᑖᑫᒡ, ᑮᓇᐙ ᑕᔥ ᐐᓐ ᓰᑲᐊᑖᑰᔦᒃ, ᑭᔐᒪᓂᑑᓐ ᐅᑕᒑᑾᓐ ᑕᔮᐸᑎᓯᐗᓐ, ᑮᐃᑭᑐᐸᓐ᙮

11:17b.ACT.011.017 ᑮᔥᐱᓐ ᑕᔥ ᑭᔐᒪᓂᑑ ᒦᓈᒡ ᐃᐃ ᑳᒎᐎᐎᓯᓂᒃ ᐃᐃ ᐯᔑᑾᓐ ᑎᓄ ᒦᑭᐌᐎᓐ ᑳᑮᐃᔑ ᒦᓂᑰᐎᓯᔭᕽ ᐊᐲ ᑮᑌᐺᔦᓂᒪᕽ ᒋᓴᔅ X, ᐊᐌᓀᓐ ᑕᔥ ᓃᓐ ᑫᑎᓄᐎᔮᐹᓐ ᒋᑲᑴ ᓇᑳᔅᑲᐗᑭᐸᓐ ᑭᔐᒪᓂᑑ, ᑮᐃᑭᑐ ᐲᑕᕒ᙮

11:18b.ACT.011.018 ᐊᐲ ᑕᔥ ᑳᓅᑖᑯᒡ ᐅᐅ ᐁᓈᒋᒧᒡ ᑳᐐᓐ ᑮᓅᑖᑎᓰᐗᐞ᙮ ᒦᑕᔥ ᑳᐃᔑ ᓇᓈᑯᒫᓂᒡ ᑭᔐᒪᓂᑑᓐ ᐁᐃᑭᑐᓂᒡ: ᑭᔐᒪᓂᑑ ᐅᔕ ᐄᓴᓐ ᐅᐸᑭᑎᓇᒪᐙᐞ ᐃᐃ ᑳᒎᐎᐎᓯᓂᒃ ᒋᑴᑳᑎᓯᓂᒡ, ᒋᐅᒋ ᐱᒫᑎᓯᓂᒡ ᑲᔦ, ᑮᐃᑭᑐᐗᐞ᙮

11:19b.ACT.011.019 ᐊᐲ ᑕᔥ ᐃᔅᑏᐱᓐ ᑮᓂᓯᓐᒡ, ᒦ ᐃ ᐊᐲ ᑳᑮᒫᒌ ᑲᒀᑕᑭᐃᑣ ᐅᑌᐺᑕᒨᒃ᙮ ᐋᓂᑕ ᑕᔥ ᐅᑌᐺᑕᒨᒃ ᑳᑮ ᐲᐎᐸᐃᐌᐙᒡ ᑮᐃᔖᐗᒃ ᐱᓃᔑᔭ, ᒥᓂᓯᕽ ᑲᔦ ᓵᐃᐸᕒᐊᔅ ᐁᔑᓂᑳᑌᓂᒃ, ᐁᑎᔮᒃ ᐆᑌᓈᕽ ᑲᔦ ᐁᑮᐸᐹ ᒥᓍᒋᒧᐙᒡ, ᒎᐗᐞ ᐁᑕ ᐁᑮᐐᑕᒪᐙᐙᒡ᙮

11:20b.ACT.011.020 ᐋᓂᑕ ᑕᔥ ᐅᑌᐺᑕᒨᒃ ᑮᐲᐅᒌᐗᒃ ᓵᐃᐸᕒᐊᔅ, ᓵᐃᕒᐄᓂ, ᐁᑎᔮᒃ ᐆᑌᓈᕽ ᐁᑮᐃᔑ ᑕᑯᔑᓄᐙᒡ᙮ ᑳᒎᐎᐎᓯᓂᒃ ᐃᑕᔥ ᑲᕒᐄᒃ ᑎᓄ ᐅᑮᐐᑕᒪᐙᐙᐞ ᐃᐃ ᐁᔑ ᒥᓍᒋᒥᒥᓐᒡ ᑳᑎᐯᒋᑫᓂᒡ ᒋᓴᓲᓐ᙮

11:21b.ACT.011.021 ᐅᑲᔥᑭᐁᐎᓯᐎᓂᓂ ᑕᔥ ᑳᑎᐯᒋᑫᓂᒡ ᐅᑮ ᐐᒌᐎᑯᓈᐙ, ᓃᐱᐗᐞ ᑕᔥ ᐯᒫᑎᓯᓂᒡ ᑮᑌᐺᑕᒨᐞ ᐁᑮ ᑴᑮᓄᑕᐙᓂᒡ ᑳᑎᐯᒋᑫᓂᒡ᙮

11:22b.ACT.011.022 ᐅᑌᐺᑕᒨᒃ ᑕᔥ ᒉᕒᐆᓴᓬᐊᒥᕽ ᑳᐊᔮᐙᒡ ᑮᓅᑕᒨᒃ ᐅᐅ ᐁᐃᔑᓭᓂᒃ᙮ ᒦᑕᔥ ᑳᑮᐃᔑᓂᔕᐙᐙᒡ ᐹᕒᓇᐸᓴᓐ ᒋᐃᔖᓂᒡ ᐌᑎ ᐁᑎᔮᒃ ᐆᑌᓈᕽ᙮

11:23b.ACT.011.023 ᐊᐲ ᑕᔥ ᐹᕒᓇᐸᔅ ᐁᑕᑯᔑᕽ ᐅᑮ ᐙᐸᒫᐞ ᐅᑌᐺᑕᒨᐞ ᐁᑮ ᔕᐌᓂᒥᑯᓂᒡ ᑭᔐᒪᓂᑑᓐ᙮ ᐐᑫ ᑕᔥ ᑮᒌᑫᑕᒻ ᐁᑮᐊᔮᒀᒥᒫᒡ ᑲᔦ ᒨᔕᒃ ᐃᑯ ᑌᐺ ᒋᐱᒥᓂᔕᐙᓂᒡ ᑭᔐᒪᓂᑑᓐ᙮

11:24b.ACT.011.024 ᐋᐱᒋ ᓴ ᑮᓴᓭᑳ ᐃᓂᓃᐎ, ᐁᑮᒨᔥᑭᓀᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ, ᑌᐺᑕᒧᐎᓐ ᑲᔦ᙮ ᑮᐊᓂ ᓇᑭ ᐹᑏᓄᐗᒃ ᑕᔥ ᑳᑮ ᑌᐺᑕᐙᐙᒡ ᑭᔐᒪᓂᑑᓐ᙮

11:25b.ACT.011.025 ᑮᐃᔖ ᑕᔥ ᑖᕒᓴᔅ ᐆᑌᓈᕽ ᐁᑮᐊᑐᓀᐙᒡ ᔂᓬᐊᓐ ᙮

11:26b.ACT.011.026 ᐊᐲ ᑕᔥ ᑳᒥᑲᐙᒡ ᐅᑮ ᐲᓈᓐ ᐃᐃᒫ ᐁᑎᔮᒃ ᐆᑌᓈᕽ᙮ ᐯᔑᑯ ᐱᐴᓐ ᑕᔥ ᐃᐃᒫ ᑮᐊᔮᐗᒃ ᐁᑮᒫᒫᐗᒋᐋᐙᒡ ᐅᑌᐺᑕᒨᐞ, ᓃᐱᐗᐞ ᑲᔦ ᐁᑮ ᑭᑭᓄᒪᐙᐙᒡ᙮ ᒦᑕᔥ ᐃᐃᒫ ᐆᑌᓈᕽ ᐁᑎᔮᒃ ᐅᑌᐺᑕᒨᒃ ᓂᑕᒻ ᑳᑮᐃᔑᓂᑳᓂᑣ X ᐅᐱᒥᓂᔕᐙᑲᓇᐞ᙮

11:27b.ACT.011.027 ᒦᑕᔥ ᐃᐃ ᐊᐲ ᐋᓂᑖ ᑳᑮ ᑕᑯᔑᓄᐙᒡ ᑳᑲᓅᑕᒪᐙᐙᒡ ᑭᔐᒪᓂᑑᓐ ᐃᐃᒫ ᐁᑎᔮᒃ, ᐁᑮᐅᒌᐙᒡ ᒉᕒᐆᓴᓬᐊᒥᕽ᙮

11:28b.ACT.011.028 ᐯᔑᒃ ᑕᔥ ᐃᓂᓂ ᐋᑲᐸᔅ ᐁᔑᓂᑳᓱᒡ ᑮᐸᓯᑸ᙮ ᑭᔐᒪᓂᑑᓐ ᐅᑕᒑᑯᓂ ᑕᔥ ᐅᑮᒦᓂᑰᓐ ᒋᐐᑕᕽ ᐁᐐᓅᑌᓭᓂᒃ ᒦᒋᒻ ᒥᓯᐌ ᐊᑮᕽ᙮ ᒦᑕᔥ ᑌᐺ ᑳᐃᔑᐌᐸᓂᓂᒃ ᒣᒀ ᐊᐲ ᑲᓬᐋᑎᔭᓴᓐ ᑮᑭᒋᐅᑭᒫᐎᓂᒡ᙮

11:29b.ACT.011.029 ᐅᑌᐺᑕᒨᒃ ᑕᔥ ᐯᐯᔑᒃ ᑮᐃᓀᑕᒨᒃ ᐁᑯ ᑲᔥᑭᑑᐙᒡ ᒋᐃᔑᓂᔕᐊᒪᐙᐙᒡ ᐐᒋᐃᐌᐎᓐ ᐅᑌᐺᑕᒨᐞ ᐁᔮᓂᒡ ᒎᑏᔭᑮᕽ ᙮

11:30b.ACT.011.030 ᒦᑕᔥ ᐅᐅ ᑳᐃᔑᒋᑫᐙᒡ ᐁᑮᐃᔑᓂᔕᐊᒪᐙᐙᒡ ᑳᓃᑳᓀᑖᑯᓯᓂᒡ ᐊᓇᒥᐋᐎᓂᕽ᙮ ᐹᕒᓇᐸᔅ ᑕᔥ, ᔂᓬ ᑲᔦ ᑮᐊᓅᓈᐗᒃ ᒋᐃᔑᐎᑑᐙᒡ ᐃᐃ ᐐᒋᐃᑎᐎᓐ᙮

12

12:1b.ACT.012.001 ᒦᑕᔥ ᐅᐅ ᐊᐲ ᐁᕒᐊᑦ ᑭᒋᐅᑭᒫ ᑳᑮ ᒫᒌ ᑲᒀᑕᑭᐋᒡ ᐋᓂᑕ ᐅᑌᐺᑕᒨᐞ᙮

12:2b.ACT.012.002 ᑮᐊᓅᑮ ᑕᔥ ᐸᔑᐸᐃᑫᐎᑯᒫᓂᕽ ᒋᐅᒋ ᓂᓯᒥᓐᒡ ᒌᒥᓴᓐ ᑳᑮᐐᒋᑭᐌᒥᑯᓂᒡ ᒞᓇᓐ ᙮

12:3b.ACT.012.003 ᐊᐲ ᑕᔥ ᐁᐙᐸᑕᕽ ᒎᐗᐞ ᐁᒥᓉᑕᒥᓂᒡ, ᑮᐊᓅᑮ ᐲᑕᕒᐆᓐ ᒋᐅᑖᐱᓂᒥᓐᒡ᙮ ᒦ ᐃ ᐊᐲ ᑮᒪᔮᓭᒃ ᐁᐐᑾᑏᐗᑲᒥᑭᓯᓂᒡ ᒎᐗᐞ ᐁᐊᒸᓂᒡ ᐸᑴᔑᑲᓇᓐ ᑳᐅᐱᓯᑲᓂᐎᓯᓂᒃ᙮

12:4b.ACT.012.004 ᐊᐲ ᑕᔥ ᑳᑳᒋᑎᓈᒡ ᐅᑮ ᑭᐸᐙᓐ᙮ ᐅᑮᐃᔑ ᐸᑭᑎᓈᓐ ᑕᔥ ᒋᔑ ᑲᓇᐌᒋᑲᓂᐎᓂᒡ ᓃᐗᔦᒃ ᐁᔑ ᓀᓃᐎᓂᒡ ᔑᒫᑲᓂᔕᐞ᙮ ᐁᕒᐊᑦ ᑮᐃᓀᑕᒻ ᒧᔐ ᒋᑎᐹᑯᓂᒥᓐᒡ ᑲᑭᓇ ᐊᐎᔭᐞ ᒋᐙᐸᒥᑯᓂᒡ ᐃᔥᒀ ᐱᒫᒋᐃᑰᐎ ᐐᑾᑎᐎᓐᒡ᙮

12:5b.ACT.012.005 ᐲᑕᕒ ᑕᔥ ᑮᑲᓇᐌᓂᒫ ᑭᐸᐅᑏᐎᑲᒥᑯᕽ᙮ ᐅᑌᐺᑕᒨᐞ ᑕᔥ ᐌᐌᓂ ᑮᑭᒋ ᐊᓇᒥᐋᐗᐞ ᐁᑮ ᑲᑴᒋᒫᓂᒡ ᑭᔐᒪᓂᑑᓐ ᒋᐸᑭᑎᓂᑳᓱᒡ᙮

12:6b.ACT.012.006 ᐁᑎᐱᑲᓂᓂᒃ ᑕᔥ, ᒦ ᐃ ᐙᐸᓂᓂᒃ ᐁᕒᐊᑕᓐ ᒋᑎᐹᑯᓂᑯᒡ, ᐲᑕᕒ ᑮᓂᐹ ᓇᓴᐗᔭᐄ ᓃᔑᓐ ᔑᒫᑲᓂᔕᐞ᙮ ᓃᔑᓐ ᑕᔥ ᐲᐙᐱᑴᔮᐲᓐ ᑮᐋᐸᑕᓂᓂᐗᓐ ᐁᒪᒫᒋᑾᐱᓱᒡ᙮ ᑲᓇᐌᒋᑫᐎᔑᒫᑲᓂᔕᐞ ᑲᔦ ᑮᐊᔮᐗᐞ ᐁᔑ ᐃᔥᒀᑌᒥᐗᓂᓂᒃ ᑭᐸᐅᑏᐎᑲᒥᒃ᙮

12:7b.ACT.012.007 ᑴᑕᑐ ᑕᔥ ᐅᑮᓈᑯᓰᑖᑰᓐ ᐅᑌᒐᓬᐃᒥᓂ ᑳᑎᐯᒋᑫᓂᒡ, ᑭᐸᐅᑏᐎᑲᒥᒃ ᑕᔥ ᑮᐙᓭᔮᓂ᙮ ᐅᑮ ᑑᑭᐌᐱᓂᑰᓐ ᑕᔥ ᐅᐱᒣᓇᐤ ᐁᑮᐊᒪᒋᐌᐱᓂᑯᒡ ᐁᐃᑯᒡ: ᐌᔩᑉ ᐗᓂᔥᑳᓐ᙮ ᐲᐙᐱᑴᔮᐲᓐ ᐃᑕᔥ ᐅᓂᑭᕽ ᑮᐅᒋ ᐸᑭᓯᓂᓂᐗᓐ᙮

12:8b.ACT.012.008 ᒦᔥ ᐁᒐᓬᐊᓐ ᑳᐊᓂᐃᑯᒡ: ᑭᑭᒋᒌᐱᓂᑎᓱᓐ, ᐱᑕᑭᓯᓀᓐ ᐃᑕᔥ ᑲᔦ᙮ ᐱᓯᑲᓐ ᑭᑲᔥᑮᑮᐎᓐ, ᐱᒥᓂᔕᐅᔑᓐ ᐃᑕᔥ, ᐅᑮᐃᑰᓐ᙮ ᒦᑕᔥ ᐃᑯ ᐲᑕᕒ ᑳᐃᔑᒋᑫᒡ᙮

12:9b.ACT.012.009 ᐲᑕᕒ ᑕᔥ ᐅᑮ ᓵᑭᒋᐐᒌᐙᓐ ᐁᑮ ᐱᒥᓂᔕᐙᒡ᙮ ᑳᐐᓐ ᑌᐺ ᐅᑮ ᑭᑫᑕᓰᓐ ᐃᐃ ᐁᑮᐃᔑᓭᓂᒃ᙮ ᓂᒥᒋ ᐃᔑᓇᒻ ᑮᐃᓀᑕᒻ᙮

12:10b.ACT.012.010 ᐅᑮᐊᓂ ᒪᔮᔥᑳᓈᐙ ᑕᔥ ᐃᐃ ᓂᑕᒻ ᐁᔑ ᐊᔮᓂᒡ ᐅᑲᓇᐌᒋᑫᐞ, ᐃᐃ ᑕᔥ ᑲᔦ ᑯᑕᒃ ᐁᔑ ᐊᔮᓂᒡ ᐅᑲᓇᐌᒋᑫᐞ, ᐲᓂᔥ ᐌᑎ ᐁᔑ ᐊᔮᓂᒃ ᐲᐙᐱᑯ ᐃᔥᒀᑌᒻ ᐌᒋ ᓵᑭᒋᐊᔮᓂᒃ ᐃᓇᑫ ᑮᐃᔖᕽ ᐆᑌᓈᕽ᙮ ᐁᔥᒀᑦ ᑕᔥ ᐃᑯ ᑮᐹᑭᓭᓂ, ᒦᔥ ᑳᐃᔑ ᔖᐳᔥᑳᐙᒡ᙮ ᐁᐊᓂ ᐱᒧᓭᐙᒡ ᐃᑕᔥ ᒦᑲᓈᓂ, ᑴᑕᑐ ᐅᑮᓇᑲᓂᑰᓐ ᐃᓂ ᐁᒐᓬᐊᓐ᙮

12:11b.ACT.012.011 ᒦᔥ ᐲᑕᕒ ᑳᑮᐙᐹᑲᒣᑕᕽ ᐅᐅ ᐁᑮᐃᑭᑐᒡ: ᒦᑕᔥ ᑌᐺ ᐁᑭᑫᑕᒫᓐ ᑳᑎᐯᒋᑫᒡ ᐁᑮ ᐲᒋᓂᔕᐙᒡ ᐅᑌᒐᓬᐃᒪᓐ ᒋᓈᑕᒪᐎᒥᒡ ᐅᑲᔥᑭᐁᐎᓯᐎᓂᓃᕽ ᐁᕒᐊᑕᓐ ᐅᒋ, ᐃᐃ ᑲᔦ ᑲᑭᓇ ᒎᐗᐞ ᐁᔑ ᐸᑯᓭᑕᒥᓂᒡ᙮

12:12b.ACT.012.012 ᐊᐲ ᑕᔥ ᑳᓂᓯᑕᐌᑕᕽ ᑮᐃᔖ ᐅᐙᑳᐃᑲᓂᓃᕽ ᒣᕒᐄᓐ, ᒞᓐ ᐅᒫᒫᓐ, ᒫᕒᒃ ᑳᑮᐃᓂᒥᓐᒡ᙮ ᒦᓴ ᐃᒫ ᓃᐱᐗᐞ ᐊᐎᔭᐞ ᑳᑕᔑ ᒫᐗᒋᐃᑎᓂᒡ ᐁᐊᓇᒥᐋᓂᒡ᙮

12:13b.ACT.012.013 ᐊᐲ ᑕᔥ ᐁᐅᑎᑕᕽ ᐊᑾᒌᕽ ᑳᔑ ᐃᔥᒀᑌᒥᐗᓂᓂᒃ ᒣᓂᑲᓐ ᐅᑮ ᐹᐹᐗᐋᓐ᙮ ᐅᔥᑭᓃᑭᑴᐗᓐ ᑕᔥ ᐅᕒᐆᑕ ᐁᔑᓂᑳᓱᓂᒡ ᑮᐲᐊᑕ ᑭᑫᒋᑫᐗᓐ ᐊᐌᓀᓇᓐ ᑳᐹᐹᐗᐃᑫᓂᒡ᙮

12:14b.ACT.012.014 ᐊᐲ ᑕᔥ ᐅᕒᐆᑕ ᐁᓂᓯᑐᑕᐙᒡ ᐲᑕᕒᐊᓐ ᐁᔮᐎᓂᒡ, ᑳᐊᐲᒋ ᒥᓉᑕᕽ ᑕᔥ, ᑳᐐᓐ ᐅᑮ ᐹᑭᓇᒪᐙᓰᓐ᙮ ᑮᑮᐌ ᐲᑎᑫᐸᑑ ᐁᑮ ᑎᐹᒋᒧᒡ ᐲᑕᕒ ᐁᓃᐸᐎᓂᒡ ᐊᑾᒌᕽ᙮

12:15b.ACT.012.015 ᐅᐅ ᑕᔥ ᐅᑮᐃᑰᐞ: ᐊᓂᔕ ᐄᑐᒃ ᐃᐃ ᑳᐃᑭᑐᔭᓐ, ᑭᑮᐗᔥᑴ ᒫᐐᓐ! ᐅᑮᐃᑰᐞ᙮ ᐋᒋᑯ ᑕᔥ ᐅᑮᑲᑴ ᑌᐱᒫᐞ ᐁᑌᐺᒡ ᐃᐃ ᑳ ᐃᑭᑐᒡ᙮ ᒦᑕᔥ ᐋᒋᑯ ᑳᐃᑯᒡ: ᐅᑌᒐᓬᐃᒪᓐ ᒫᐐᓐ ᐃᓂ, ᐅᑮᐃᑰᐞ᙮

12:16b.ACT.012.016 ᐲᑕᕒ ᐋᒋᑯ ᑮᐹᐹᐗᐃᑫ᙮ ᐊᐲ ᑕᔥ ᑳᐹᑭᑌᓇᒪᐎᓐᒡ ᐁᐙᐸᒥᓐᒡ ᐃᑕᔥ ᐐᑫ ᑮᒫᒪᑳᑌᑕᒨᐞ᙮

12:17b.ACT.012.017 ᑮᐃᔑᓂᑫᑖ ᑕᔥ ᒋᒪᓈ ᓅᑖᑎᓂᒡ᙮ ᒦᑕᔥ ᑳᑮᐐᑕᒪᐙᒡ ᐋᓃᓐ ᑳᐃᔑ ᓵᑭᓯᐃᑯᒡ ᑳᑎᐯᒋᑫᓂᒡ ᐃᐃᒫ ᑭᐸᐅᑏᐎᑲᒥᑯᕽ᙮ ᒦᔥ ᑳᐃᓈᒡ: ᐐᑕᒪᐎᒃ ᐅᐅ ᒌᒥᔅ ᐃᑭ ᑲᔦ ᑯᑕᒃ ᐅᑌᐺᑕᒨᒃ᙮ ᒦᑕᔥ ᑳᐊᓂ ᐃᔑ ᒫᒑᒡ ᐸᑳᓐ ᐃᑯᒋ ᐁᑮᐃᔖᒡ᙮

12:18b.ACT.012.018 ᐁᐊᓂ ᑭᔐᐹᐗᑲᓂᓂᒃ ᑕᔥ ᐁᑕᑕᐌ ᑮᐅᒑᓂᒪᑲᒥᑭᓯᐗᒃ ᔑᒫᑲᓂᔕᒃ᙮ ᑳᓇᑲ ᑎᐱ ᐊᔮᑴᓐ ᐲᑕᕒ ᐁᑮᐃᓀᑕᒧᐙᒡ᙮

12:19b.ACT.012.019 ᐁᕒᐊᑦ ᑕᔥ ᐅᑮᓇᓈᑐᓀᐙᓐ, ᑳᐐᓐ ᑕᔥ ᐅᑮ ᒥᑲᐙᓰᓐ᙮ ᐌᐌᓂ ᓴ ᐅᑮᐊᑕ ᑭᑫᓂᒫᐞ ᑳᑮ ᑲᓇᐌᓂᒫᓂᒡ᙮ ᒦᑕᔥ ᑳᑮᐊᓅᑮᒡ ᒋᓂᓯᒥᓐᒡ᙮ ᐁᕒᐊᑦ ᑕᔥ ᒎᑏᔭᑮᕽ ᑮᐅᒋ ᒫᒑ ᐌᑎ ᓭᓴᕒᐄᔭ ᐁᑮᐊᐎ ᐊᔭᔮᒡ ᐊᒋᓇ᙮

12:20b.ACT.012.020 ᐁᕒᐊᑦ ᑕᔥ ᑳᐐᓐ ᐅᑮᒥᓍᐸᒫᓰᐞ ᐯᒫᑎᓯᓂᒡ ᐁᔮᓂᒡ ᑕᔭᕒ ᐆᑌᓈᕽ, ᓵᐃᑕᓐ ᐆᑌᓈᕽ ᑲᔦ᙮ ᒦᔥ ᑳᑮ ᐱᐊᑕ ᐙᐸᒥᑯᒡ᙮ ᐱᓇᒫ ᓴ ᐅᑮ ᔖᑰᓱᒫᓂ ᐸᓬᐋᔅᑕᔅ ᐁᔑᓂᑳᓱᓂᒡ ᑳᑮᓈᑲᒋᑑᓂᒡ ᑭᒋᐅᑭᒫᐎᑲᒥᒃ ᒋᑲᓅᒋᑫᑕᒫᑯᓂᒡ᙮ ᒦᔥ ᐁᕒᐊᑦ ᑳᑮ ᐱᐊᑕ ᐙᐸᒥᑯᒡ ᐁᑮ ᑲᑴᒋᒥᑯᒡ ᐱᓵᓐ ᒋᐐᒌᐙᒡ ᐋᓃᔥ ᒦ ᐌᑎ ᑳᐅᑎᓇᒧᐙᒡ ᒦᒋᒻ ᐅᑕᑮᒥᓃᕽ᙮

12:21b.ACT.012.021 ᐊᐲ ᑕᔥ ᐁᑮᔑᑲᓂᓂᒃ ᑳᑮᐅᓈᐸᑌᓂᒃ, ᐁᕒᐊᑦ ᐅᑮ ᐱᓯᑳᓇᓐ ᐅᑭᒋᐅᑭᒫ ᑭᑭᔥᑭᑲᓇᓐ ᐁᑮᐅᓇᐱᒡ ᐅᑭᒋᐅᑭᒫ ᐗᐱᐎᓂᕽ᙮ ᒦᑕᔥ ᒧᔐ ᑳᑮ ᑲᓅᓈᒡ ᑳᑮᐱ ᓈᓯᑳᑯᒡ᙮

12:22b.ACT.012.022 ᐯᒫᑎᓯᓂᒡ ᐃᑕᔥ ᑮᔖᑯᐌᐗᐞ ᐁᑮᐃᑭᑐᓂᒡ: ᒪᓂᑑ ᓴ ᐊ ᑳᐃᓉᒡ, ᑳᐐᓐ ᐃᓂᓃᐎᓰ, ᑮᐃᑭᑐᐗᐞ᙮

12:23b.ACT.012.023 ᔐᒪᒃ ᐃᑕᔥ ᐃᑯ ᑳᑎᐯᒋᑫᓂᒡ ᐅᑌᒐᓬᐃᒥᓂ ᐅᑮ ᑑᑖᑰᓐ ᒋᐋᑯᓯᒡ, ᐋᓃᔥ ᑳᐐᓐ ᐅᑮᒦᑴᒋᐌᓂᒫᓰᓐ ᑭᔐᒪᓂᑑᓐ᙮ ᒪᓂᒎᔕᐞ ᑕᔥ ᐅᑮᐊᒧᑰᐞ, ᒦᔥ ᐲᓂᔥ ᑳᐃᔑ ᓂᓯᑯᒡ᙮

12:24b.ACT.012.024 ᑭᔐᒪᓂᑑ ᑕᔥ ᐅᑎᑭᑐᐎᓐ ᑮᐊᓂ ᒥᓯᑌᔥᑳᓂ, ᓃᐱᐗᐞ ᐁᑮᐊᓂ ᑌᐺᑕᒥᓂᒡ᙮

12:25b.ACT.012.025 ᐹᕒᓇᐸᔅ ᑕᔥ, ᐊᐊ ᑲᔦ ᔂᓬ ᒉᕒᐆᓴᓬᐊᒥᕽ ᑮᐱᐅᒋ ᑮᐌᐗᒃ ᐊᐲ ᑳᑮᔑᑑᐙᒡ ᐅᑕᓄᑮᐎᓂᐙ᙮ ᒞᓐ ᒫᕒᒃ ᑕᔥ ᑳᐃᓂᒥᓐᒡ ᐅᑮᒫᒌ ᐐᒌᐙᐙᓐ᙮

13

13:1b.ACT.013.001 ᐃᐃᒫ ᑕᔥ ᐁᑎᔮᒃ ᐅᑌᐺᑕᒨᒃ ᑮᒫᐗᒋᐃᑎᐗᒃ᙮ ᑮᐊᔮᐗᒃ ᑕᔥ ᐃᐃᒫ ᐋᓂᑕ ᑎᓄ ᑳᑲᓅᑕᒪᐙᐙᒡ ᑭᔐᒪᓂᑑᓐ, ᑳᒦᓂᑰᐎᓯᐙᒡ ᑲᔦ ᒋᑭᑭᓄᐊᒫᑫᐙᒡ᙮ ᒦᐗᒃ ᓴ ᐃᑭ ᐹᕒᓇᐸᔅ, ᓯᒥᔭᓐ ᒪᑲᑌᐎᔅ ᑳᐃᔑᓂᑳᒋᑲᓂᐎᒡ, ᐊᐊ ᑕᔥ ᓬᐆᔑᔭᔅ ᓵᐃᕒᐄᓂ ᐆᑌᓈᕽ ᑳᐅᒌᒡ᙮ ᐊᐊᐌ ᑕᔥ ᑲᔦ ᒪᓀᐊᓐ ᑳᑮ ᐐᒋᓂᑖᐎᑮᒫᒡ ᐃᓂ ᑯᑕᒃ ᐁᕒᐊᑕᓐ, ᐊᐊ ᑕᔥ ᑲᔦ ᔂᓬ ᙮

13:2b.ACT.013.002 ᒣᒀ ᑕᔥ ᐅᑌᐺᑕᒨᒃ ᐁᐊᓇᒥᐁᑕᐙᐙᒡ ᑳᑎᐯᒋᑫᓂᒡ, ᐁᒪᑕᐐᐃᑎᓱᐙᒡ ᑲᔦ, ᐅᑮᐅᒋ ᑲᓅᓂᑯᐙᓐ ᑭᔐᒪᓂᑑᓐ ᐅᑕᒑᑯᓂ: ᐅᓇᑭᒥᒃ ᐹᕒᓇᐸᔅ, ᐊᐊ ᑲᔦ ᔂᓬ ᒋᐃᓇᓄᑮᐙᒡ ᐃᐃ ᐊᓄᑮᐎᓐ ᑳᔑ ᐊᑐᒪᒀ, ᐅᑮᐃᑯᐙᓐ᙮

13:3b.ACT.013.003 ᑫᔮᐱ ᑕᔥ ᑭᒪᑕᐐᐃᑎᓱᐗᒃ, ᑮᐊᓇᒥᐋᐗᒃ ᑕᔥ ᑲᔦ᙮ ᒦᔥ ᑳᐃᔑ ᓵᒥᓈᐙᒡ ᐁᑮᒫᒋᓂᔕᐙᐙᒡ᙮

13:4b.ACT.013.004 ᐹᕒᓇᐸᔅ ᑕᔥ, ᔂᓬ ᑲᔦ ᑳᐃᔥᒀ ᒫᒋᓂᔕᐅᑯᐙᒡ ᑭᔐᒪᓂᑑᓐ ᐅᑕᒑᑯᓂ, ᑮᐃᔖᐗᒃ ᓴ ᐌᑎ ᓯᓬᐆᔑᔭ ᐆᑌᓈᕽ᙮ ᒦᑕᔥ ᐌᑎ ᑳᐅᒋ ᒫᒌᔮᔑᐙᒡ ᐁᑮᐃᔖᐙᒡ ᒥᓂᓯᕽ ᓵᐃᐸᕒᐊᔅ ᙮

13:5b.ACT.013.005 ᐊᐲ ᑕᔥ ᐁᑕᑯᔑᓄᐙᒡ ᓵᓬᐊᒥᔅ ᐆᑌᓈᕽ, ᑮᐐᑕᒫᑫᐗᒃ ᑭᔐᒪᓂᑑᓐ ᐅᑎᑭᑐᐎᓂᓂ ᐅᑕᓇᒥᐁᐎᑲᒥᑯᓃᕽ ᒎᐗᐞ᙮ ᒞᓇᓐ ᓴ ᐅᑮᐐᒌᐙᐙᓐ ᐁᑮᐐᒋᐃᑯᐙᒡ᙮

13:6b.ACT.013.006 ᑮᐊᓂ ᑲᑮᐌᐗᒃ ᐃᑕᔥ ᐃᐃ ᒥᓂᔅ ᐲᓂᔥ ᐁᑮᐊᓂ ᑕᑯᔑᓄᐙᒡ ᐆᑌᓇ ᐯᐸᔅ ᙮ ᒦᔥ ᑳᑮᓇᑭᔥᑲᐙᐙᒡ ᒎᐎᐃᓂᓂᐗᓐ ᒣᒫᑖᐎᓯᓂᒡ, ᐁᐃᓍᓂᑎᓱᓂᒡ ᑳᑲᓅᑕᒪᐙᒡ ᑭᔐᒪᓂᑑᓐ, ᐹᕒ ᒌᓴᔅ ᐁᐃᔑᓂᑳᓱᓂᒡ᙮

13:7b.ACT.013.007 ᐅᑮᓵᑭ ᐐᒌᐙᓂ ᑕᔥ ᐃᓂ ᐌᑭᒫᑲᑖᑫᓂᒡ ᓴᕒᒋᔭᔅ ᑆᓬᐊᔅ ᑳᐃᓂᒥᓐᒡ ᑳᑮ ᑭᑫᑖᓱᓂᒡ᙮ ᒦᐗᓐ ᐃᑕᔥ ᐃᓂ ᐹᕒᓇᐸᔅ, ᔂᓬ ᑲᔦ ᑳᑮᐊᑐᒥᑯᐙᒡ ᐁᑮᐊᑕᐌᑕᒥᓂᒡ ᒋᓅᑕᒥᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ᙮

13:8b.ACT.013.008 ᐃᓂᐌᓂᐗᓐ ᑕᔥ ᒣᒫᑖᐎᓯᓂᒡ ᐅᑮᑲᑴ ᑭᐱᑎᓂᑯᐙᓐ ᐁᓬᐃᒪᓴᓐ ᐁᔑᓂᑳᓱᓂᒡ, ᒦ ᐃ ᑳᐃᔑᓂᑳᓱᒡ ᑲᕒᐄᒃ ᐅᑎᔑᑮᔗᐎᓂᓃᕽ᙮ ᐅᑮᑲᑴ ᐗᓂᔥᑴᐊᓐ ᐃᑕᔥ ᑲᔦ ᑳᐅᑭᒫᑲᑖᑫᓂᒡ ᒋᑌᐺᔦᓂᒫᓯᓂᒃ ᒋᓴᓲᓐ᙮

13:9b.ACT.013.009 ᔂᓬ ᑕᔥ, ᑆᓬ ᑳᐃᓂᓐᒡ, ᐁᒨᔥᑭᓀᔥᑳᑯᒡ ᑭᔐᒪᓂᑑᓐ ᐅᑕᒑᑯᓂ, ᐅᑮ ᑲᓇᐙᐸᒫᓐ ᐁᓬᐃᒪᓴᓐ,

13:10b.ACT.013.010 ᒦᔥ ᑳᐃᓈᒡ: ᑮᓐ ᑌᐯᓂᒥᒃ ᒪᒋᐊᔭᐋ, ᑳᔒᑫᑕᒪᓐ ᑲᔦ ᑳᑾᔭᑯᓈᑾᒃ! ᑭᒨᔥᑭᓀᔥᑳᑯᓐ ᑲᔦ ᑲᑭᓇ ᑲᑲᔦᓂᓯᐎᓐ, ᒪᒋ ᐃᔑᐌᐱᓯᐎᓐ ᑲᔦ᙮ ᒨᔕᒃ ᑭᑲᑴ ᑴᑭᓇᒧᐙᓐ ᒋᐸᑳᓂᓈᑾᓂᓂᒃ ᑭᔐᒪᓂᑑ ᐅᑎᑭᑐᐎᓐ!

13:11b.ACT.013.011 ᐃᓇᔥᑫ ᑕᔥ ᑳᑎᐯᒋᑫᒡ ᐅᓂᓐᒡ ᑭᑲᒫᑯᔥᑳᑯᓐ᙮ ᑳᐐᓐ ᑕᔥ ᑭᑲ ᐙᐱᓯ, ᐊᒋᓇ ᑳᐐᓐ ᑭᑲᐅᒋ ᐙᐸᒫᓰ ᑮᓯᔅ, ᐅᑮᐃᓈᓐ᙮ ᔐᒫᒃ ᑕᔥ ᐁᑲᔥᑮ ᑎᐱᑭᐃᔑ ᐊᔮᓂᒃ ᑫᑰᓐ ᐅᑮᐅᑎᓯᑯᓂ, ᒦᔥ ᑳᐃᔑ ᐸᐹ ᓇᓈᑐᓀᐙᓂᒡ ᑫᐸᐹ ᓴᑭᓂᑫᓂᑯᓂᒡ᙮

13:12b.ACT.013.012 ᐊᐲ ᑕᔥ ᐊᐊ ᐌᑭᒫᑲᑖᑫᒡ ᐁᐙᐸᑕᕽ ᐃᐃ ᑳᑮᐃᔑᓭᓂᒃ ᑮᑌᐺᑕᒻ ᐁᒫᒪᑳᑌᑕᕽ ᑳᑮᐃᔑ ᑭᑭᓄᐊᒪᐎᓐᒡ ᐅᒋ ᑳᑎᐯᒋᑫᓂᒡ᙮

13:13b.ACT.013.013 ᑆᓬ ᑕᔥ ᐃᐃ ᑲᔦ ᑳᑮᐐᒌᐎᑯᒡ ᑮᐅᒋ ᒫᒌᔮᔑᐗᒃ ᐃᐃᒫ ᐯᐸᔅ ᐁᑮᐃᔑ ᑕᑯᔑᓄᐙᒡ ᐯᕒᑲ ᐆᑌᓈᕽ ᐯᐱᓬᐃᔭ ᐊᑮᕽ᙮ ᒞᓐ ᒫᕒᑲᓐ ᑕᔥ ᐃᐃᒫ ᐅᑮᓇᑲᓂᑯᐙᓐ, ᒉᕒᐆᓴᓬᐊᒥᕽ ᐁᑮᐃᔑ ᑮᐌᓂᒡ᙮

13:14b.ACT.013.014 ᐃᐃᒫ ᑕᔥ ᐯᕒᑲ ᑮᐅᒋ ᒫᒑᐗᒃ ᐁᑮᐃᔖᐙᒡ ᐁᑎᔮᒃ ᐆᑌᓈᕽ ᐱᓯᑎᔭ ᐊᑮᕽ᙮ ᑮᐊᓉᐲᐎ ᑮᔑᑲᓂᓂ ᑕᔥ ᑮᐲᑎᑫᐙᒡ ᐊᓇᒥᐁᐎᑲᒥᑯᕽ, ᒦᔥ ᑳᐃᔑ ᐅᓇᐱᐙᒡ᙮

13:15b.ACT.013.015 ᑳᐃᔥᒀ ᐊᓇᒥᒋᑳᑌᓂᒃ ᑕᔥ ᐅᑐᓇᔓᐌᐎᓐ ᒨᓯᔅ, ᐃᐃ ᑲᔦ ᑳᑮᐃᔑᐲᐃᑫᓂᒡ ᑳᑮ ᑲᓅᑕᒪᐙᓂᒡ ᑭᔐᒪᓂᑑᓐ, ᒦᔥ ᑳᑮ ᓃᑳᓂᔥᑲᒥᓂᒡ ᐊᓇᒥᐋᐎᓐ ᐅᑮ ᐲᒋᓂᔕᐙᓂ ᐊᐎᔭᓐ ᐅᐅ ᐁᑮ ᐱᐃᑯᐙᒡ ᑆᓬ, ᐹᕒᓇᐸᔅ: ᓃᒋ ᐅᑌᐺᑕᒧᓈᓂᒃ, ᑮᔥᐱᓐ ᐁᔮᐌᑴᓐ ᐃᑭᑐᐎᓐ ᑫᐅᒋ ᒪᔥᑲᐌᑕᒧᐙᒡ ᐅᑯ ᐊᐎᔭᒃ, ᐱᓵᓐ ᐃᑯ ᑲᑭᑐᒃ, ᑮᐱᐃᓈᐗᒃ᙮

13:16b.ACT.013.016 ᑆᓬ ᑮᐸᓯᑸ, ᐁᑮᐊᔨᔑᓂᑫᓂᒡ ᒋᐱᓯᑕᐎᓐᒡ, ᒦᔥ ᑳᐃᑭᑐᒡ: ᑮᓇᐙ ᐃᔅᕒᐃᔭᓬ ᑳᑎᓄᐎᔦᒃ, ᑫᑮᓇᐙ ᑲᔦ ᑳᒎᐎᐎᓯᐌᒃ ᐁᓇᒥᐁᑕᐌᒃ ᑭᔐᒪᓂᑑ, ᐱᓯᑕᐎᔑᒃ!

13:17b.ACT.013.017 ᑭᔐᒪᓂᑑ ᑕᔥ ᐌᑭᔐᒪᓂᑑᒥᑯᒡ ᐯᒫᑎᓯᓂᒡ ᐃᔅᕒᐃᔭᓬᐊᐞ ᐅᑮᐅᓈᐸᒫᐞ ᑭᑫᑌᔭᐋᒥᓈᐸᓃᐞ, ᐅᑮᐃᔑᐋᐞ ᑲᔦ ᒋᒪᔥᑲᐌᑖᑯᓯᓂᒡ ᒣᒀ ᐄᒋᐸᑮᕽ ᑮᑕᔑ ᐲᐎᑌᐌᑖᑯᓯᓂᒡ᙮ ᐅᑭᒋ ᒪᔥᑲᐎᓰᐎᓂᕽ ᐃᑕᔥ ᐅᑮᐅᒋ ᓵᑭᒋᐎᓈᐞ ᐌᑎ ᐊᑮᕽ᙮

13:18b.ACT.013.018 ᓃᒥᑕᓇ 40 ᑕᔥ ᑕᓱ ᐱᐴᓐ ᐅᑮ ᔕᔒᐯᓂᒫᐞ ᑳᑮᐃᔑᒋᑫᓂᒡ ᒣᒀ ᐱᑾᑕᑲᒥᒃ ᑮᐊᔮᓂᒡ᙮

13:19b.ACT.013.019 ᒦᔥ ᑳᑮᓂᔑᐗᓈᒋᐋᒡ ᑳᑮᓃᔣᓶᐙᓇᑭᓯᓂᒡ 7 ᐯᒫᑎᓯᓂᒡ ᑫᓇᓐ ᐊᑮᕽ ᑳᑮᐊᔮᓂᒡ᙮ ᒣᔥᑾᒡ ᐃᑕᔥ ᐁᑮᒦᓈᒡ ᐅᐱᒫᑎᓰᒪᐞ ᐃᔅᕒᐃᔭᓬᐊᐞ ᒋᑎᐱᓇᐌᐎᓯᓂᒡ ᐃᐃ ᐊᑮᓂ᙮

13:20b.ACT.013.020 ᓃᐙᒃ ᓈᓂᒥᑕᓇ 450 ᑕᓱ ᐱᐴᓐ ᑕᔥ ᑮᐱᒥᓭ ᐅᐅ ᒋᐃᔑᓭᒃ᙮ ᒦᔥ ᑳᑮᒦᓈᒡ ᑫᐅᓈᑯᓂᑯᓂᒡ ᐲᓂᔥ ᑮᓂᐊᔮᓂᒡ ᓵᒥᔫᓐ ᑭᔐᒪᓂᑑᓐ ᑳᑮ ᑲᓅᑕᒪᐙᓂᒡ᙮

13:21b.ACT.013.021 ᐯᒫᑎᓯᓂᒡ ᑕᔥ ᐅᑮ ᑲᑴᒋᒥᑰᐞ ᒋᒦᓈᒡ ᑭᒋᐅᑭᒫᓐ᙮ ᔂᓬᐊᓐ ᑕᔥ ᑮᒦᑭᐌ ᒋᑭᒋᐅᑭᒫᐎᓂᒡ ᑳᑮᐅᑌᑌᓂᒡ ᑭᔕᓐ ᐯᒋᒪᓂᕽ ᑳᑮᐅᑕᑳᓀᓯᓂᒡ᙮ ᓃᒥᑕᓇ 40 ᑕᓱ ᐱᐴᓐ ᑕᔥ ᑮᑭᒋᐅᑭᒫᐎᐗᓐ᙮

13:22b.ACT.013.022 ᐊᐲ ᑕᔥ ᑳᐃᔑᒋᑫᒡ ᐊᐗᔑᒣ ᒋᑭᒋᐅᑭᒫᐎᓯᓂᒃ, ᑌᐱᑑᓐ ᑕᔥ ᐅᑮ ᑭᒋᐅᑭᒫᐎᐋᓐ᙮ ᒦᐗᓐ ᑕᔥ ᐃᓂ ᑳᑮ ᑕᔑᒫᒡ ᐅᐅ ᑮᐃᑭᑐᑯᐸᓀᓐ: ᓂᑮᒥᑲᐙ ᓴ ᑌᐱᑦ ᐌᑯᓯᓯᒥᑯᒡ ᒉᓰᓐ, ᒣᓉᑕᒥᐃᔑᒡ, ᒦ ᓴ ᐊᐌ ᑫᑑᑕᕽ ᑲᑭᓇ ᐁᓀᑕᒧᐗᒃ᙮

13:23b.ACT.013.023 ᒦᑕᔥ ᐃᐃᒫ ᑌᐱᑎᕽ ᑳᑮᐅᑕᑳᓀᓯᒡ ᒋᓴᔅ, ᑭᔐᒪᓂᑑᓐ ᑳᑮᐊᔓᑕᒫᑫᓂᒡ ᒋᐱᒫᒋᐋᓂᒡ ᐯᒫᑎᓯᓂᒡ ᐃᔅᕒᐃᔭᓬᐊᐞ᙮

13:24b.ACT.013.024 ᒋᑆ ᑕᑯᔑᓂᓂᒡ ᑕᔥ ᒋᓴᓲᓐ, ᒞᓐ ᐐᓐ ᓃᑳᓐ ᐅᑮ ᑲᑮᑭᒫᐞ ᐯᒫᑎᓯᓂᒡ ᐃᔅᕒᐃᔭᓬᐊᐞ ᒋᑴᑭ ᐱᒫᑎᓯᓂᒡ, ᒋᓰᑲᐊᑖᓱᓂᒡ ᐃᑕᔥ ᑲᔦ᙮

13:25b.ACT.013.025 ᒞᓐ ᑕᔥ ᐁᐊᓂ ᑮᔑᑑᒡ ᐅᑕᓄᑮᐎᓐ ᐅᑮᐃᓈᐞ ᑳᑮᐱ ᓈᓯᑳᑯᒡ: ᐊᐌᓀᓐ ᑮᓇᐙ ᐁᓀᓂᒥᔑᔦᒃ? ᑳᐐᓐ ᓃᓐ ᓂᑖᐎᓰ ᑳᐱᐁᒃ! ᑮᐃᔥᒀᐊᔮᔮᓐ ᓴ ᑯᑕᒃ ᑕᐱᐊᔮ᙮ ᑳᐐᓐ ᑕᔥ ᓂᑌᐊᐲᑌᑖᑯᓯᐙᓰᓐ ᐅᒪᑭᓯᓇᓐ ᒋᔮᐸᐊᒧᐗᑭᐸᓐ, ᒞᓐ ᑮᐃᑭᑐᑯᐸᓐ᙮

13:26b.ACT.013.026 ᓃᒋ ᐅᒌᒫᑲᓇᒃ, ᐁᐸᕒᐊᐋᒥᕽ ᐌᑕᑳᓀᓯᔦᒃ, ᑫᑮᓇᐙ ᑕᔥ ᑳᒎᐎᐎᓯᐌᒃ ᑳᑯᑖᓀᓂᒣᒃ ᑭᔐᒪᓂᑑ, ᑮᓇᐎᓐᑦ ᐅᔕ ᑳᑮᐱ ᐃᔑᓂᔕᐊᒫᑯᔭᕽ ᐅᐅ ᑭᔐᒪᓂᑑ ᐅᑎᐹᒋᒧᐎᓐ ᑫᔑ ᐱᒫᒋᐃᑰᔭᕽ᙮

13:27b.ACT.013.027 ᐃᓇᔥᑫ ᐃᑭ ᒉᕒᐆᓴᓬᐊᒥᕽ ᑳᑖᐙᒡ, ᐃᑭ ᑕᔥ ᑳᐅᑭᒫᑲᑖᑫᐙᒡ ᑳᐐᓐ ᐅᑮᓂᓯᑕᐎᓇᐙᓯᐙᐙᓐ ᒋᓴᓲᓐ᙮ ᑳᐐᓐ ᑲᔦ ᐅᑮ ᓂᓯᑐᑕᓰᓈᐙ ᑳᑮᐃᔑᐲᐃᑫᓂᒡ ᑭᔐᒪᓂᑑᓐ ᑫᓅᑕᒪᐙᓂᒡ ᐋᓇᐐᓐ ᐁᑕᓱ ᐊᓉᐲᐎ ᑮᔑᒃ ᐁᑮᐊᓇᒥᑕᒪᐎᑣ᙮ ᒦᑕᔥ ᐅᐅ ᒪᔮ ᑳᑮᐃᔑᓭᓂᒃ ᑳᑮᐱ ᐃᑭᑐᓂᒡ ᐊᐲ ᑮᐃᓈᐙᒡ ᒋᓴᓲᓐ ᒋᓂᓯᒥᓐᒡ᙮

13:28b.ACT.013.028 ᐁᑮᒥᑲᓯᒀ ᑕᔥ ᐐᓇᐙ ᑫᑰᓂᓂ ᑫᐅᒋ ᓂᓵᐙᒡ, ᐹᐃᓬᐊᑑᓐ ᓴ ᐅᑮ ᑲᑴᒋᒫᐙᓐ ᒋᐃᓈᑯᓈᓂᒡ ᒋᓂᓯᒥᓐᒡ ᒋᓴᓲᓐ᙮

13:29b.ACT.013.029 ᑳᐃᔥᒀ ᐃᔑᒋᑫᓂᒡ ᑕᔥ ᑲᑭᓇ ᐁᔑᐲᐃᑳᑌᓂᒃ ᐃᓂ ᐅᒋ, ᐊᔑᑌᔮᑎᑯᕽ ᑕᔥ ᐅᑮᐅᒋ ᐱᓇᐙᐙᓐ, ᒦᔥ ᑳᐃᔑ ᓇᐃᓈᐙᒡ ᓇᐃᓂᑏᐎᑲᒥᑯᕽ᙮

13:30b.ACT.013.030 ᑭᔐᒪᓂᑑᓐ ᑕᔥ ᐅᑮᑮᐌ ᐱᒫᑎᓰᐃᑰᓐ᙮

13:31b.ACT.013.031 ᓃᐱᐗᐞ ᐃᑕᔥ ᑕᓱᑮᔑᒃ ᐅᑮᓈᑯᓰᑕᐙᐞ ᐃᐃ ᑳᑮᐐᒌᐎᑯᓂᒡ ᐃᐃᒫ ᑳᓬᐊᓬᐄᐗᑮᕽ ᐲᓂᔥ ᐌᑎ ᒉᕒᐆᓴᓬᐊᒥᕽ᙮ ᒦᐗᐞ ᐃᑕᔥ ᐃᐃ ᓅᑯᒻ ᑳᑮᔑᑲᓂᓂᒃ ᑳᑎᐹᒋᒥᑯᒡ, ᐁᐐᑕᒪᐙᓂᒡ ᐃᔅᕒᐃᔭᓬᐊᐞ᙮

13:32b.ACT.013.032 ᓅᑯᒻ ᑕᔥ ᑭᐐᑕᒫᑰᒻ ᐃᐃ ᒥᓍᒋᒧᐎᓐ: ᐋᓃᓐ ᑭᔐᒪᓂᑑᓐ ᑳᑮᐃᔑ ᐊᔓᑕᒪᐙᑯᐸᓀᓐ ᐃᐃ ᑭᑫᑌᔭᐋᒥᓈᐸᓃᐞ,

13:33b.ACT.013.033 ᑮᓇᐎᓐᑦ ᐁᑮᐅᑎᓵᐸᑕᒧᐗᑭᒡ ᐁᑮᑮᐌ ᐱᒫᑎᓰᐋᒡ ᒋᓴᓲᓐ᙮ ᒦ ᐃ ᐄᑐᒃ ᐅᐅ ᓇᑫ ᐁᔑ ᑕᔑᓱᓂᒡ ᐃᐃᒫ ᓂᑲᒧᓂᕽ: ᑮᓐ ᓂᑯᓯᔅ᙮ ᓅᑯᒻ ᑳᑮᔑᑲᒃ ᑭᑑᑯᓯᓰᒥᓐ᙮

13:34b.ACT.013.034 ᐊᐲ ᑕᔥ ᑭᔐᒪᓂᑑᓐ ᑮᑮᐌ ᐱᒫᑎᓰᐃᑯᒡ ᓂᐳᐎᓂᕽ ᐅᒋ ᑳᐐᓐ ᒦᓇᐙ ᐐᑳ ᑕᐙᓈᑎᓯᓰ ᓇᐃᓂᑏᐎᑲᒥᑯᕽ, ᒦ ᐅᐌ ᑳᑮᐃᑕᒥᓂᒡ ᐅᐅ ᑮᐃᑭᑐᓂᑯᐸᓀᓐ: ᑌᐺ ᓴ ᑭᑲ ᒦᓂᑰᐎᓯᒻ ᑫᑌᑖᑾᒃ, ᑳᑫᒋᓇᐌᑖᑾᒃ ᑲᔦ ᑳᑮᐃᔑ ᐊᔓᑕᒪᐗᑭᐸᓐ ᑌᐱᑦ᙮

13:35b.ACT.013.035 ᒦᓇᐙ ᑕᔥ ᐸᑳᓐ ᓂᑲᒧᓂᕽ ᐃᔑᐲᐃᑳᑌ: ᑳᐐᓐ ᑭᑲ ᐸᑭᑎᓈᓰ ᑳᑎᐯᓂᒪᒡ ᑭᑕᓄᑮᐋᑲᓐ ᒋᓂᔑᐗᓈᑕᓂᓂᒃ ᐅᐐᔭᐤ ᐃᐃᒫ ᓂᐳᐎᓂᕽ᙮

13:36b.ACT.013.036 ᐃᓇᔥᑫ ᐐᓐ ᑌᐱᑦ ᑳᐃᔥᒀ ᐃᔑᒋᑫᒡ ᑳᑮᐃᓀᓂᒥᑯᒡ ᑭᔐᒪᓂᑑᓐ ᒋᑑᑕᕽ, ᒦ ᐃ ᑳᑮᐃᔥᒀ ᐱᒫᑎᓯᒡ᙮ ᑮᐃᔑ ᓇᐃᓂᑳᑌᓂ ᑕᔥ ᐅᐐᔭᐤ ᑳᑮᐃᔑ ᓇᐃᓂᒥᓐᒡ ᐅᑫᑌᔭᐋᒪᐞ, ᒦᔥ ᑳᑮᐗᓈᑕᓂᓂᒃ ᐅᐎᔭᐤ ᓇᐃᓂᑏᐎᑲᒥᑯᕽ᙮

13:37b.ACT.013.037 ᐊᐊᐌ ᑕᔥ ᑳᑮ ᑮᐌ ᐱᒫᑎᓰᐃᑯᒡ ᑭᔐᒪᓂᑑᓐ ᑳᐐᓐ ᒦᓇᐙ ᐐᑳ ᑕᓂᐳᓰ ᒋᑮᐗᓈᑕᓂᓂᑭᐸᓐ ᐅᐐᔭᐤ᙮

13:38b.ACT.013.038 ᑭᓇᑕᐌᓂᒥᓂᓂᒻ ᑕᔥ ᑮᓇᐙ ᓂᑎᓇᐌᒫᑲᓇᒃ ᒋᑭᑫᑕᒣᒃ, ᒦ ᐊᐌ ᒋᓴᔅ ᑳᐐᑕᒫᑰᔦᒃ, ᐐᓐ ᐅᒋ ᐁᐅᒋ ᐴᓀᒋᑳᑌᑭᓐ ᒪᒋᑑᑕᒧᐎᓇᓐ᙮

13:39b.ACT.013.039 ᐃᓇᔥᑫ ᐊᐎᔭ ᑮᑲᓇᐌᑕᕽ ᒨᓯᓲᓐ ᐅᑑᓇᔓᐌᐎᓂᓂ, ᑳᐐᓐ ᐃᐃᒫ ᑕᐅᒋ ᐸᑭᑎᓂᑳᓱᓰ᙮ ᒦ ᐁᑕ ᑯ ᐊᐎᔭ ᑌᐺᔦᓂᒫᒡ ᒋᓴᓲᓐ ᑫᐃᓇᑭᒥᓐᒡ ᐁᒥᓄ ᐐᒌᐙᒡ ᑭᔐᒪᓂᑑᓐ᙮

13:40b.ACT.013.040 ᐊᔦᒀᒥᓯᒃ ᑕᔥ ᑮᓇᐙ ᒋᐃᔑᐌᐱᓯᓯᐌᒃ ᐅᐅ ᑳᑮᐃᑭᑐᐙᑯᐸᓀᓐ ᐃᑭ ᑭᔐᒪᓂᑑᓐ ᑫᓅᑕᒪᐙᐙᒡ:

13:41b.ACT.013.041 ᐱᓯᑕᒧᒃ, ᑮᓇᐙ ᑳᓂᑖ ᒫᓀᒋᑫᔦᒃ, ᐌᐙᓀᑕᒣᒃ, ᑲᔦ ᑕᔥ ᑳᓂᐳᔦᒃ! ᑫᑰᓐ ᓴ ᓂᐐᐃᔑᒋᑫ ᓅᑯᒻ ᑳᑮᔑᑲᒃ ᒣᒀ ᐁᐱᒫᑎᓯᔦᒃ ᑫᑌᐺᑕᓯᐌᒃ, ᒥᓴᐙ ᑯ ᐊᐎᔭ ᐋᓇ ᐙᐐᑕᒪᐎᓀᒃ, ᑆᓬ ᑮᐃᑭᑐ᙮

13:42b.ACT.013.042 ᑆᓬ ᑕᔥ, ᐊᐊ ᑲᔦ ᐹᕒᓇᐸᔅ ᐁᐊᓂ ᓵᑲᐊᒧᐙᒡ ᐃᐃᒫ ᐊᓇᒥᐁᐎᑲᒥᑯᕽ, ᐯᒫᑎᓯᓂᒡ ᒦᓇᐙ ᐅᑮᐊᑐᒥᑯᐙᐞ ᐊᓉᐲᐎ ᑮᔑᑲᓂᕽ ᒋᐱᑕᔑᑕᒧᐙᒡ ᐃᓂ ᐋᔕ ᑳᑮᐐᑕᒫᑫᐙᒡ᙮

13:43b.ACT.013.043 ᐊᐲ ᑕᔥ ᐁᓵᑲᐊᒥᓂᒡ ᑳᑮᐃᔑ ᐲᑎᑫᕽ, ᓃᐱᐗᐞ ᒎᐗᐞ, ᐃᐃ ᑲᔦ ᑳᑮ ᒎᐎᐎᓯᓂᒃ ᑳᑮᐅᑖᐱᓇᒥᓂᒡ ᒎᐎᐊᓇᒥᐋᐎᓐ, ᐅᑮ ᐱᒥᓂᔕᐅᑯᐙᐞ ᐊᐊ ᑆᓬ, ᐊᐊ ᑲᔦ ᐹᕒᓇᐸᓴᓐ᙮ ᒦᑕᔥ ᑳᑮ ᐐᑕᒪᐙᐙᒡ ᐐᑲ ᒋᐴᓐ ᐃᐊᐯᓂᒧᑕᓯᓂᒃ ᐁᔑ ᑭᔐᐙᑎᓯᓂᒡ ᑭᔐᒪᓂᑑᓐ᙮

13:44b.ACT.013.044 ᒦᓇᐙ ᑕᔥ ᐁᐊᓉᐲᐎ ᑮᔑᑲᓂᓂᒃ, ᑫᑳ ᑲᑭᓇ ᐆᑌᓈᕽ ᐁᔮᓂᒡ ᑮᐲᔖᐗᐞ ᐁᐐᓅᑕᒥᓂᒡ ᑳᑎᐯᒋᑫᓂᒡ ᐅᑎᑭᑐᐎᓂᓂ᙮

13:45b.ACT.013.045 ᐊᐲ ᑕᔥ ᒎᐗᒃ ᐁᐙᐸᑫᐙᒡ ᐁᐹᑏᓄᓈᓂᐗᓂᓂᒃ, ᐐᑫ ᑮᒧᔥᑭᓀᐎ ᐅᑌᑕᒨᒃ᙮ ᐅᑮᐋᓉᑕᐙᐙᓐ ᑲᔦ ᑆᓬᐊᓐ ᑳᑮᐃᑭᑐᓂᒡ, ᓅᒋᑯ ᑲᔦ ᐁᑮᐊᔨᓈᐙᒡ᙮

13:46b.ACT.013.046 ᒦᔥ ᑆᓬ, ᐊᐊ ᑲᔦ ᐹᕒᓇᐸᔅ ᑳᑮ ᓲᑭᑌᐁ ᓇᑴᑕᒧᐙᒡ ᐁᑮᐃᑭᑐᐙᒡ: ᑮᓇᐙ ᐄᑐᒃ ᓂᑕᒻ ᑳᒎᐎᐎᔦᒃ ᑮᐃᔑᓈᑾᓅᐸᓐ ᒋᑮᐐᑕᒫᑰᔦᑭᐸᓐ ᑭᔐᒪᓂᑑ ᐅᑎᐹᒋᒧᐎᓐ᙮ ᐁᐋᓇᐌᑕᒧᐌᒃ ᑕᔥ, ᐁᑌ ᐊᐲᑌᓂᑎᓱᓯᐌᒃ ᑲᔦ ᒋᑮᐊᔮᔦᑭᐸᓐ ᐱᒫᑎᓯᐎᓐ ᐐᑳ ᑫᐴᓂᓭᓯᓄᒃ, ᒣᔥᑾᒡ ᑕᔥ ᓅᑯᒻ ᑳᒎᐎᐎᓯᒀ ᓂᑲ ᓈᓯᑲᐙᓈᓂᒃ᙮

13:47b.ACT.013.047 ᐋᓃᔥ ᒦ ᐅᐌᓂ ᑳᑎᐯᒋᑫᒡ ᑳᐃᓇᓅᔑᔭᒥᓐᒡ ᐅᐅ ᑮᐃᑭᑐᒡ: ᑭᑲᐃᔑᐃᓂᓂᒻ ᓴ ᒋᐙᓭᔥᑲᒪᐌᒀ ᑳᒎᐎᐎᓯᒀ, ᑲᑭᓇ ᐯᒫᑎᓯᐙᒡ ᑳᐊᔮᐙᒡ ᐅᐅᒫ ᒥᓯᐌ ᐊᑮᕽ ᒋᐅᒋ ᐱᒫᒋᐃᑰᐎᓯᐙᒡ, ᐅᑮᐃᓈᐞ᙮

13:48b.ACT.013.048 ᐊᐲ ᑕᔥ ᑳᒎᐎᐎᓯᒀ ᐁᓅᑕᒧᐙᒡ ᐅᐅ ᐐᑫ ᑮᑭᒋ ᒌᑫᑕᒨᒃ, ᐅᑮᑭᒋ ᐃᓀᑖᓈᐙ ᑲᔦ ᑭᔐᒪᓂᑑᓐ ᐅᑎᑭᑐᐎᓂᓂ᙮ ᑲᑭᓇ ᑕᔥ ᑳᑮ ᑮᔖᒋᐅᓇᑭᒥᑣ ᒋᐊᔮᐙᒡ ᐱᒫᑎᓯᐎᓐ ᑫᐴᓂᓭᓯᓂᓂᒃ ᑮᐊᓂ ᑌᐺᑕᒨᒃ᙮

13:49b.ACT.013.049 ᑳᑎᐯᒋᑫᒡ ᑕᔥ ᐅᑎᑭᑐᐎᓐ ᒥᓯᐌ ᑮᐊᓂ ᒥᓯᑌᔥᑳᓂ ᐃᐃᒫ ᓇᑫᑲᒥᒃ᙮

13:50b.ACT.013.050 ᒎᐗᒃ ᑕᔥ ᐅᑮᐅᒻᐺᐋᐙᐞ ᐃᑴᐗᐞ ᑳᑮ ᑭᑖᓀᓂᒫᓂᒡ ᑭᔐᒪᓂᑑᓐ, ᐃᐃ ᑲᔦ ᐃᓂᓂᐗᐞ ᑳᑮ ᓃᑳᓀᑖᑯᓯᓂᒡ ᐃᐃᒫ ᐆᑌᓈᕽ᙮ ᐅᑮᐅᒻᐺᐋᐙᐞ ᑲᔦ ᐊᐎᔭᐞ ᒋᒫᔑ ᑑᑕᐙᓂᒡ ᑆᓬᐊᓐ, ᐃᓂ ᑲᔦ ᐹᕒᓇᐸᓴᓐ ᙮ ᒦᑕᔥ ᑳᑮ ᓵᑭᒋ ᐌᐱᓈᐙᒡ ᐃᐃᒫ ᐅᑕᑮᐙᕽ ᐅᒋ᙮

13:51b.ACT.013.051 ᐃᔑᓂᔕᐙᑲᓇᒃ ᑕᔥ ᑮᐹᐹᐎᓯᑌᔑᒨᓄᐗᒃ ᒋᑭᑫᑕᒥᓂᒡ ᐁᑮᒪᒋᑑᑕᒥᓂᒡ᙮ ᑮᐊᓂ ᐃᔖᐗᒃ ᑕᔥ ᐌᑎ ᐋᐃᑰᓂᔭᒻ ᐆᑌᓈᕽ᙮

13:52b.ACT.013.052 ᐅᑌᐺᑕᒨᒃ ᑕᔥ ᐃᐃᒫ ᐁᑎᔮᒃ ᐁᔮᐙᒡ ᐐᑫ ᐅᑮᒨᔥᑭᓀᔥᑳᑯᓈᐙ ᒌᑫᑕᒧᐎᓐ, ᐅᑮᒨᔥᑭᓀᔥᑳᑯᐙᓐ ᑲᔦ ᑭᔐᒪᓂᑑᓐ ᐅᑕᒑᑯᓂ᙮

14

14:1b.ACT.014.001 ᐃᐃᒫ ᑕᔥ ᐋᐃᑰᓂᔭᒻ ᐆᑌᓈᕽ, ᑆᓬ ᐊᐊ ᑲᔦ ᐹᕒᓇᐸᔅ, ᑮᐲᑎᑫᐗᒃ ᐁᑮ ᓂᑖᐊᔨᑎᐙᒡ ᐅᑕᓇᒥᐁᐎᑲᒥᑯᓃᕽ ᒎᐗᐞ᙮ ᑳᐊᐲᒋ ᐌᐌᓂ ᑕᔥ ᑲᑭᑐᐙᒡ ᑮᐹᑏᓄᐗᐞ ᒎᐗᐞ, ᐃᐃ ᑲᔦ ᑳᒎᐎᐎᓯᓂᒃ ᑳᑮ ᑌᐺᑕᒥᓂᒡ᙮

14:2b.ACT.014.002 ᐃᓂᐌᓂᐗᐞ ᑕᔥ ᒎᐗᐞ ᑳᑮ ᑌᐺᑕᓯᓂᒃ ᐅᑮᐅᒻᐺᐋᓂ ᑳᒎᐎᐎᓯᓂᒃ ᐁᑮ ᔖᑰᓱᒫᓂᒡ ᒋᒪᒋ ᐃᓀᓂᒫᓂᒡ ᐅᑌᐺᑕᒨᐞ᙮

14:3b.ACT.014.003 ᑭᓉᔥ ᑕᔥ ᐃᐃᒫ ᑮᐊᔮᐗᒃ ᐁᑮ ᓲᑭᑌᐁᐙᒡ ᐁᑮ ᑕᔑᒫᐙᒡ ᑳᑎᐯᒋᑫᓂᒡ᙮ ᒦᐗᓐ ᓴ ᐃᓂ ᑳᒦᓂᑯᐙᒡ ᒋᑲᔥᑭᑑᐙᒡ ᒋᑑᑕᒧᐙᒡ ᒫᒪᑳᒋᒋᑫᐎᓇᓐ, ᒣᔮᒪᑳᑌᑖᑾᓂᓂᑭᓐ ᑲᔦ, ᑳᑎᐯᒋᑫᓂᒡ ᐁᑮᓈᑯᑑᓂᒡ ᐁᑌᐺᒪᑲᓂᓂᒃ ᐁᓍᑐᑕᒧᐙᒡ ᐅᑭᔐᐙᑎᓯᐎᓂᓂ᙮

14:4b.ACT.014.004 ᑲᑭᓇ ᑕᔥ ᐊᐎᔭᒃ ᑮᓀᓈᐎᐃᑎᐗᒃ; ᐋᓂᑕ ᒎᐗᐞ ᐁᑮᐐᒌᐙᐙᒡ, ᐋᓂᑕ ᑕᔥ ᑲᔦ ᐃᔑᓂᔕᐙᑲᓇᐞ᙮

14:5b.ACT.014.005 ᒎᐗᐞ ᐃᑕᔥ ᐃᐃ ᑲᔦ ᑳᒎᐎᐎᓯᓂᒃ ᐃᐃ ᑲᔦ ᑕᑯ ᑳᓃᑳᓂᑕᒫᑯᓂᒡ ᑮᒫᐗᒋᐃᑎᐗᐞ ᐁᐐᒪᒫᔑᑲᑖᑯᐙᒡ, ᐁᐐ ᐸᐲᒶᓯᓇᐃᑯᐙᒡ ᑲᔦ᙮

14:6b.ACT.014.006 ᐅᑮ ᑭᑫᑖᓈᐙ ᑕᔥ ᐃᐃ ᐁᐐ ᑑᑕᐎᑣ, ᐌᑎ ᑕᔥ ᑮᐊᐸᐃᐌᐗᒃ ᓬᐃᑫᔫᓂᔭ ᐊᑮᕽ, ᐁᔑ ᐊᔮᓂᑭᓐ ᐆᑌᓇᐗᓐ ᓬᐃᔅᑕᕒᐊ, ᑕᕒᐱ ᐁᔑᓂᑳᑌᓂᑭᓐ, ᐃᔑᐙᑳᔭᐄ ᑲᔦ ᐌᑎ᙮

14:7b.ACT.014.007 ᒦᑕᔥ ᐌᑎ ᑳᐃᔑ ᐙᐐᑕᒧᐙᒡ ᒥᓍᒋᒧᐎᓐ᙮

14:8b.ACT.014.008 ᐌᑎ ᑕᔥ ᓬᐃᔅᑕᕒᐊ ᐆᑌᓈᕽ ᑮᓇᒪᑕᐱᐗᓐ ᐯᔑᒃ ᐃᓂᓂᐗᓐ ᐁᑮ ᒫᑭᓯᓂᒡ ᐅᓯᑎᓃᕽ, ᐁᑮᐃᔑ ᓂᑖᐎᑭᓂᒡ ᐃᐃ ᓇᑫ ᐐᑳ ᐁᑮ ᐱᒧᓭᓯᓂᒃ᙮

14:9b.ACT.014.009 ᑆᓬ ᑕᔥ ᐅᑮ ᐱᓯᑖᑰᓐ ᐁᑲᑭᑐᒡ ᐃᓂ ᐃᓂᓂᐗᓐ᙮ ᐅᑮ ᑲᓇᐙᐸᒫᓐ ᑕᔥ, ᐁᓂᓯᑕᐎᓇᐙᒡ ᑕᔥ ᐁᐊᔮᓂᒡ ᑌᐺᔦᑕᒧᐎᓐ ᒋᒥᓄᐊᔮᐃᒥᓐᒡ,

14:10b.ACT.014.010 ᒦᔥ ᑳᐃᓈᒡ: ᐸᓯᑸᓐ ᒋᓃᐸᐎᔭᓐ! ᐅᑮᐃᓈᓐ᙮ ᔐᒫᒃ ᑕᔥ ᐃᑯ ᑮᐸᓯᑸᐗᓐ, ᐁᑮᒫᒌ ᐱᒧᓭᓂᒡ᙮

14:11b.ACT.014.011 ᐊᐲ ᑕᔥ ᑳᑮ ᒫᒪᐎ ᐊᔮᓂᒡ ᐁᐙᐸᑕᒥᓂᒡ ᑆᓬ ᑳᑮᐃᔑᒋᑫᒡ, ᓬᐃᑫᔫᓂᔭ ᐃᔑᑮᔗᐎᓐ ᓴ ᐅᑮ ᔮᐸᒋᑑᓂ ᐁᐃᑭᑐᓂᒡ: ᒪᓂᑑᒃ ᑭᑑᑎᓯᑯᓈᓂᒃ ᐃᓂᓃᕽ ᐁᐃᔑᓈᑯᓯᐙᒡ, ᑮᐃᑭᑐᐗᐞ᙮

14:12b.ACT.014.012 ᐹᕒᓇᐸᓴᓐ ᑕᔥ ᓲᔅ ᐅᑮᐃᔑᓂᑳᓈᐙᓐ᙮ ᑆᓬᐊᓐ ᑕᔥ ᐊᕒᒦᔅ ᐅᑮᐃᔑᓂᑳᓈᐙᓐ ᐋᓃᔥ ᑮᓃᑳᓂᑲᑭᑐᐗᓐ᙮

14:13b.ACT.014.013 ᑮᐊᔮᐗᓐ ᑕᔥ ᐃᐃᒫ ᐃᓂᓂᐗᓐ ᑳᑮᐊᓇᒥᐁᓄᑮᑕᐙᓂᒡ ᒪᓂᑑᓐ Zᐆᔅ ᐁᓂᒥᓐᒡ᙮ ᐅᑕᓇᒥᐁᐎᑲᒥᑯᓂ ᑕᔥ ᐊᑾᒌᕽ ᐆᑌᓈᕽ ᑮᐃᔑ ᐸᑕᑭᑌᓂ᙮ ᒦᐗᓐ ᑕᔥ ᐃᓂ ᑳᑮ ᐲᓈᓂᒡ ᐋᐯ ᐱᔑᑮᓴᓐ, ᑳᑮ ᐲᑑᓂᒡ ᑲᔦ ᐃᐃᒫ ᐁᔑ ᐃᔥᒀᑌᒥᐗᓂᓂᒃ ᐆᑌᓇ᙮ ᐅᑮᐊᑕᐌᑕᒥᓂ, ᐃᐃ ᑲᔦ ᑳᐹᑏᓄᓂᒡ ᐁᐐ ᐸᑭᑎᓈᓲᑕᒫᑯᐙᒡ᙮

14:14b.ACT.014.014 ᐊᐲ ᑕᔥ ᐹᕒᓇᐸᔅ, ᐊᐊ ᑲᔦ ᑆᓬ ᐁᓅᑕᒧᐙᒡ ᐙᐃᔑᒋᑫᐃᑣ, ᐅᑮ ᑖᔥᑮᑭᐱᑑᓈᐙᓐ ᐅᑭᑭᔥᑭᑲᓂᐙᓐ ᐁᑮᐅᓱᓵᒣᑕᒧᐙᒡ᙮ ᑮᐊᐸᑑᐗᒃ ᑕᔥ ᒣᑴᔭᐄ ᐁᔑ ᒫᒪᐎ ᐊᔮᓂᒡ ᐁᑮᐃᔑ ᔖᑯᐌᐙᒡ:

14:15b.ACT.014.015 ᐋᓃᓐ ᐃᓈ ᐅᓱᓵᒪᑲᒥᒃ ᐁᔑᒋᑫᔦᒃ! ᓂᒥᒋ ᐃᓂᓃᐎᒥᓐ ᐅᔕ ᑫᓃᓇᐎᓐᑦ ᑖᐱᔥᑰ ᑮᓇᐙ ᑳᐃᔑ ᐊᔮᔦᒃ᙮ ᑭᐱ ᐐᑕᒫᑰᒻ ᐅᔕ ᒥᓍᒋᒧᐎᓐ ᐁᐐᑕᒫᑰᔦᒃ ᒋᐴᓂᑑᔦᒃ ᑫᑰᓐ ᐁᓀᑖᑾᓯᓄᑭᓐ, ᒣᔥᑾᒡ ᐃᑕᔥ ᒋᓈᓯᑲᐌᑭᐸᓐ ᑭᔐᒪᓂᑑ ᑳᐱᒫᑎᓯᒡ, ᑳᑮᐅᔑᑑᒡ ᑮᔑᒃ, ᐊᑭ, ᑭᒋᑲᒻ ᑲᔦ, ᑲᑭᓇ ᑲᔦ ᐃᐃᒫ ᐁᔮᓂᑭᓐ᙮

14:16b.ACT.014.016 ᐃᓇᔥᑫ ᐅᑖᓈᕽ ᐅᑮ ᐸᑭᑎᓈᐞ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ ᐱᓵᓐ ᐃᑯ ᓇᑫ ᐙᐃᔑᐱᒫᑎᓯᓂᒡ ᒋᐃᔑᒋᑫᓂᒡ᙮

14:17b.ACT.014.017 ᐃᓇᔥᑫ ᑳᐐᓐ ᑫᑰᓐ ᑮᐃᔥᑯ ᐃᔑᒋᑫᓰ ᑫᒋᓈᒡ ᐃᑯ ᑫᐅᒋ ᑭᑫᑖᑯᓯᒡ ᐁᒥᓄᒋᑫᒡ᙮ ᐐᓐ ᐄᑐᒃ ᑮᔑᑯᕽ ᑳᐅᒋ ᑭᒥᐗᓄᑫᒡ, ᑳᒦᓂᓀᒃ ᑲᔦ ᑭᑎᑳᓇᓐ ᑫᒪᓂᔕᒧᐌᒃ, ᐐᓐ ᑲᔦ ᑳᒦᓂᓀᒃ ᒦᒋᒻ, ᑫᐅᒋ ᒥᓉᑕᒧᐌᒃ ᑲᔦ, ᐅᑮᐃᓈᐙᐞ᙮

14:18b.ACT.014.018 ᐅᐅᐌᓂ ᑕᔥ ᐋᓇᑮᐃᑭᑐᐙᒡ, ᐊᑳᐙ ᐅᑮ ᑲᔥᑭᒫᐙᐞ ᑳᒫᒪᐐᓄᓂᒡ ᒋᐸᑭᑎᓈᓱᑕᒫᑯᓯᒀ᙮

14:19b.ACT.014.019 ᐋᓂᑕ ᑕᔥ ᒎᐗᐞ ᑮᐱᑕᑯᔑᓅᐞ ᐁᑎᔮᒃ ᐆᑌᓈᕽ, ᐋᐃᑰᓂᔭᒻ ᐆᑌᓈᕽ ᑲᔦ ᐁᑮᐱᐅᒌᓂᒡ᙮ ᐅᑮ ᔖᑰᓱᒫᓂ ᐃᑕᔥ ᑳᒫᒪᐐᓄᓂᒡ᙮ ᒦᑕᔥ ᑆᓬ ᑳᑮ ᐸᐲᒶᓯᓇᐃᑯᒡ ᐁᑮ ᓵᑭᒋ ᑖᐲᐸᐃᑯᒡ ᐃᐃᒫ ᐆᑌᓈᕽ, ᓂᐳᐎᑐᒃ ᒫᐐᓐ ᐁᑮᐃᓀᓂᒥᑯᒡ᙮

14:20b.ACT.014.020 ᐅᑌᐺᑕᒨᐞ ᐃᑕᔥ ᑳᐃᔣ ᐙᑳᑳᐸᐎᑖᑯᒡ, ᑮᐗᓂᔥᑳ ᐆᑌᓈᕽ ᐁᑮᑮᐌᐃᔖᒡ᙮ ᐁᐊᓂ ᐙᐸᓂᓂᒃ ᑕᔥ ᐅᑮᒫᒌ ᐐᒌᐙᓐ ᐹᕒᓇᐸᓴᓐ ᑕᕒᐱ ᐆᑌᓈᕽ ᐁᑮᐃᔖᐙᒡ᙮

14:21b.ACT.014.021 ᐊᐲ ᑕᔥ ᑳᐐᑕᒫᑫᐙᒡ ᐃᐃ ᒥᓍᒋᒧᐎᓐ ᐃᐃᒫ ᑭᒋ ᐆᑌᓈᕽ, ᓃᐱᐗᐞ ᐊᐎᔭᐞ ᑮᒫᒌ ᑌᐺᑕᒨᐞ᙮ ᐌᑎ ᑕᔥ ᐃᓇᑫ ᑮᐃᔑ ᐊᔐ ᑮᐌᐗᒃ ᓬᐃᔅᑕᕒᐊ ᐆᑌᓈᕽ, ᐋᐃᑰᓂᔭᒻ ᐆᑌᓈᕽ, ᐌᑎ ᑲᔦ ᐁᑎᔮᒃ ᐆᑌᓈᕽ᙮

14:22b.ACT.014.022 ᒦᑕᔥ ᐃᐃᒫ ᑳᑕᔑ ᐐᒌᐙᐙᒡ ᐅᑌᐺᑕᒨᐞ ᑫᔮᐱ ᒋᒪᔥᑲᐌᑕᒥᓂᒡ, ᒋᐸᑭᒌᓯᓂᒃ ᐃᐃ ᑳᑮᐃᔑ ᑌᐺᑕᒥᓂᒡ ᐁᑮᐃᑭᑐᐙᒡ: ᐅᒋᑕᑯ ᐃᔑᓈᑾᓐ ᓃᐱᐗᐞ ᐗᓯᑖᐎᓭᐎᓐ ᒋᓇᑭᔥᑲᒪᕽ ᐐᐲᑎᑫᔭᕽ ᑭᔐᒪᓂᑑ ᐅᑎᐯᒋᑫᐎᓐ᙮

14:23b.ACT.014.023 ᐊᐲ ᑕᔥ ᑳᐅᓇᑭᒫᐙᒡ ᑫᓃᑳᓂᓯᓂᒡ ᑳᔑ ᒫᒫᐗᒋᐃᑎᓂᒡ ᐅᑌᐺᑕᒨᐞ, ᑮᐊᓇᒥᐋᐗᒃ ᑕᑯ ᑲᔦ ᑮᒪᑕᐐᐃᑎᓱᐗᒃ ᐁᑮ ᐸᑭᑎᓇᒪᐙᐙᒡ ᑳᑎᐯᒋᑫᓂᒡ ᒋᑲᓇᐌᓂᒫᓂᒡ ᐃᐃ ᑳᑮ ᑌᐺᑖᑯᓂᒡ᙮

14:24b.ACT.014.024 ᑮᐊᓂ ᔖᐳᔥᑳᐗᒃ ᐃᑕᔥ ᐱᓯᑎᔭ ᐊᑮᕽ, ᐃᐃᒫ ᑕᔥ ᐹᐱᓬᐃᔭ ᐊᑮᕽ ᑮᐃᔑ ᑕᑯᔑᓅᒃ᙮

14:25b.ACT.014.025 ᒦᑕᔥ ᐃᐃᒫ ᐯᕒᑲ ᐆᑌᓈᕽ ᑳᑕᔑ ᐐᑕᒫᑫᐙᒡ ᒥᓍᒋᒧᐎᓐ᙮ ᑮᐊᓂ ᐃᔖᐗᒃ ᑕᔥ ᐌᑎ ᐊᑖᓬᐃᔭ ᐁᔑᑖᓂᐗᓂᓂᒃ᙮

14:26b.ACT.014.026 ᒦᑕᔥ ᐃᐃᒫ ᑭᒋ ᒌᒫᓂᕽ ᑮᐅᒋ ᑮᐌᔮᔑᐗᒃ ᐁᑎᔮᒃ ᐃᓇᑫ ᐁᑮᐃᔖᐙᒡ᙮ ᒦ ᐄᑐᒃ ᐃᐃᒫ ᑳᑮᐅᒋ ᒫᒑᐙᐸᓐ ᑳᑮ ᐸᑯᓭᓂᒥᒥᓐᒡ ᑭᔐᒪᓂᑑᓐ ᐅᑭᔐᐙᑎᓯᐎᓂᓃᕽ ᒋᔑ ᑲᓇᐌᓂᒥᑯᐙᒡ ᒋᑑᑕᒧᐙᒡ ᐃᐃ ᐊᓄᑮᐎᓐ ᓅᑯᒻ ᑳᑮ ᑮᔑᑑᐙᒡ᙮

14:27b.ACT.014.027 ᐊᐲ ᑕᔥ ᑳᑕᑯᔑᓄᐙᒡ ᐅᑮᒫᒫᐎᐊᑐᒫᐙᐞ ᐅᑌᐺᑕᒨᐞ ᐁᑮ ᑎᐹᒋᒧᐙᒡ ᐋᓃᓐ ᑲᑭᓇ ᑫᑰᓐ ᑳᑮᐃᔑᒋᑫᓂᒡ ᑭᔐᒪᓂᑑᓐ ᐁᐐᑕᓄᑮᒥᑯᐙᒡ, ᐋᓃᓐ ᑲᔦ ᑳᑮᐃᔑ ᐹᑭᓇᒪᐙᓂᒡ ᐃᐃ ᑳᒎᐎᐎᓯᓂᒃ ᒋᑌᐺᔦᑕᒥᓂᒡ᙮

14:28b.ACT.014.028 ᑭᓉᔥ ᑕᔥ ᐃᐃᒫ ᑮᐊᔮᐗᒃ ᐁᑮᐐᒌᐙᐙᒡ ᐅᑌᐺᑕᒨᐞ᙮

15

15:1b.ACT.015.001 ᐋᓂᑕ ᑕᔥ ᐃᓂᓋᒃ ᑮᑕᑯᔑᓅᒃ ᐃᐃᒫ ᐁᑎᔮᒃ ᐁᑮᐱ ᐅᒌᐙᒡ ᒎᑏᔭᑳᕽ ᙮ ᒦᐗᒃ ᐃᑕᔥ ᐃᑭ ᑳᑮ ᑭᑭᓄᐊᒪᐙᐙᒡ ᐅᑌᐺᑕᒨᐞ ᐁᑮᐃᑭᑐᐙᒡ: ᑭᑭᓇᐙᑕᔕᑫᔓᑰᔦᒃ ᐁᑕ ᑭᑲ ᐱᒫᒋᐃᑰᐎᓯᒻ ᐃᔑᒋᑫᔦᒃ ᑳᐃᓇᑌᓂᒃ ᒨᓯᔅ ᐅᑑᓇᔓᐌᐎᓐ᙮

15:2b.ACT.015.002 ᒦ ᓴ ᐃ ᑆᓬ ᐊᐊ ᑕᔥ ᑲᔦ ᐹᕒᓇᐸᔅ ᑳᑮᑭᒋ ᑲᑲᓅᓈᐙᒡ ᑲᔦ ᑕᔥ ᐁᑮᑭᒋ ᑕᔑᑕᒧᐙᒡ ᐅᐅᐌᓂ᙮ ᒦᑕᔥ ᑳᑮᐃᓀᑕᒧᓈᓂᐗᓂᓂᒃ ᑆᓬ ᐊᐊ ᑲᔦ ᐹᕒᓇᐸᔅ, ᐃᐃ ᑲᔦ ᑯᑕᒃ ᐅᑌᐺᑕᒨᐞ ᒋᐃᔖᐙᒡ ᒉᕒᐆᓴᓬᐊᒥᕽ ᙮ ᐁᑮᐃᓂᑣ ᒋᐊᑕ ᐙᐸᒫᐙᒡ ᐃᔑᓂᔕᐙᑲᓇᐞ, ᐃᐃ ᑲᔦ ᑳᓃᑳᓂᓯᓂᒡ ᐅᐅᐌᓂ ᐅᒋ ᑳᑮ ᑕᔑᑕᒧᐙᒡ᙮

15:3b.ACT.015.003 ᒦᑕᔥ ᑳᑮᒫᒋᓂᔕᐅᑯᐙᒡ ᐅᑌᐺᑕᒨᐞ, ᐁᑮᐊᓂ ᔖᐳᔥᑳᐙᒡ ᐱᓃᔑᔭ ᐊᑭ, ᐃᐃ ᑲᔦ ᓴᒣᕒᐃᔭ ᙮ ᐁᑮ ᑎᐹᒋᒧᐙᒡ ᐋᓃᓐ ᑳᒎᐎᐎᓯᓂᒃ ᑳᐃᔑ ᑴᑮᓄᑕᐙᓂᒡ ᑭᔐᒪᓂᑑᓐ᙮ ᐐᑫ ᑕᔥ ᑮᑭᒋ ᒌᑫᑕᒨᐞ ᐅᑌᐺᑕᒨᐞ ᐁᓅᑕᒥᓂᒡ ᐅᐅ᙮

15:4b.ACT.015.004 ᐊᐲ ᑕᔥ ᑌᑯᔑᓄᐙᒡ ᒉᕒᐆᓴᓬᐊᒥᕽ, ᐅᑮ ᐲᑎᑲᓂᑯᐙᐞ ᐅᑌᐺᑕᒨᐞ, ᐃᔑᓂᔕᐙᑲᓇᐞ ᑲᔦ, ᐃᓂᐌᓂᐗᐞ ᑲᔦ ᑳᓃᑳᓂᓯᓂᒡ, ᐁᑮᐐᑕᒪᐙᐙᒡ ᐋᓃᓐ ᑲᑭᓇ ᑳᐃᔑᒋᑫᓂᒡ ᑭᔐᒪᓂᑑᓐ ᐐᓇᐙ ᐅᒋ᙮

15:5b.ACT.015.005 ᑮᐊᔮᐗᒃ ᐃᑕᔥ ᐃᐃᒫ ᐋᓂᑕ ᐅᑌᐺᑕᒨᒃ ᐯᕒᐊᓰᕽ ᑳᑮᐃᔑ ᐐᒋᑣᐙᒡ᙮ ᒦᐗᒃ ᐃᑕᔥ ᐅᑯ ᑳᑮ ᐸᓯᑸᐙᒡ ᐁᑮᐃᑭᑐᐙᒡ: ᐅᒋᑕᑯ ᐃᔑᓈᑾᓂᓂ ᒋᑭᑭᓇᐙᑕᔕᑫᔓᑣ, ᒋᐊᔮᒀᒥᒥᑣ ᑲᔦ ᒋᐱᒥᓂᔕᐊᒧᐙᒡ ᑲᔦ ᒨᓯᓲᓐ ᑳᑮᐃᓇᔓᐌᓂᒡ᙮

15:6b.ACT.015.006 ᒦᑕᔥ ᐃᔑᓂᔕᐙᑲᓇᒃ, ᐃᑭ ᑲᔦ ᑳᓃᑳᓂᓯᐙᒡ ᑳᑮᒫᐗᒋᐃᑎᐙᒡ ᐁᐐᓈᓈᑲᑕᐌᑕᒧᐙᒡ ᐅᐅᐌᓂ᙮

15:7b.ACT.015.007 ᑳᐃᔥᒀ ᑭᒋ ᑕᔑᑌᓂᒃ ᐃᑕᔥ ᐅᐅ, ᐲᑕᕒ ᑮᐸᓯᑸ ᐅᐅ ᐁᑮᐃᑭᑐᒡ: ᓃᒋ ᐅᑌᐺᑕᒨᒃ, ᑮᓇᐙ ᐄᑐᒃ ᑭᑭᑫᑖᒻ ᒣᐎᔕ ᑭᔐᒪᓂᑑ ᐁᑮᐅᒋ ᐅᓈᐸᒥᒡ ᐁᔑ ᐊᔮᐌᒃ᙮ ᓃᓐ ᐁᐐᐋᐸᒋᐃᒡ ᒋᐅᒋ ᓅᑕᒥᓂᒡ ᒥᓍᒋᒧᐎᓐ ᐃᐃ ᑳᒎᐎᐎᓯᓂᒃ, ᑲᔦ ᑕᔥ ᒋᑌᐺᑕᒥᓂᒡ᙮

15:8b.ACT.015.008 ᑭᔐᒪᓂᑑ ᑫᑫᑕᕽ ᐅᑌᐃᒫ ᐅᑮᐃᔑᓈᑯᑑᓐ ᐁᑮᐅᑖᐱᓈᒡ ᐁᑮᒦᓈᒡ ᒋᐅᑎᓯᑯᓂᒡ ᑭᔐᒪᓂᑑᓐ ᐅᑕᒑᑯᓂ ᑖᐱᔥᑰ ᑳᑮ ᑑᑕᐎᓇᑭᒡ᙮

15:9b.ACT.015.009 ᑳᐐᓐ ᐸᑳᓐ ᑭᑎᓀᓂᒥᑯᓰᓈᓐ ᐃᐃ ᑲᔦ ᑳᒎᐎᐎᓯᓂᒃ, ᐊᐎᔭ ᐅᑌᐺᑕᒧᐎᓂᕽ ᐁᐅᒋ ᐯᑭᒋᑲᓂᐎᒡ ᐅᒪᒋᑑᑕᒧᐎᓂᕽ ᐅᒋ᙮

15:10b.ACT.015.010 ᐌᑯᓀᓐ ᐃᑕᔥ ᐌᒋ ᐃᔑᒋᑫᔦᒃ ᐁᑲᑴᒋᐁᒃ ᑭᔐᒪᓂᑑ ᐁᑑᑕᐌᒀ ᐅᑌᐺᑕᒨᒃ ᒋᐃᔑᒋᑫᐙᒡ ᓭᓇᑲᓂᓂᑭᓐ᙮ ᑳᐐᓐ ᐄᑐᒃ ᑭᑫᑌᔭᐋᒥᓈᐸᓃᒃ, ᑫᑮᓇᐎᓐᑦ ᐃᑕᔥ ᑭᑲᔥᑭᑑᓰᒥᓐ ᐃᐃ ᒋᐃᔑᒋᑫᔭᕽ᙮

15:11b.ACT.015.011 ᑮᓇᐎᓐᑦ ᐃᑕᔥ ᑭᑌᐺᑖᒥᓐ ᐁᐅᒋ ᐱᒫᒋᐃᑰᔭᕽ ᐅᑭᔐᐙᑎᓯᐎᓂᕽ ᐅᒋ ᑳᑎᐯᒋᑫᒡ ᒋᓴᔅ ᑖᐱᔥᑰ ᑫᐐᓇᐙ ᑳᔑ ᐱᒫᒋᐃᑰᐎᓯᐙᒡ᙮

15:12b.ACT.015.012 ᑲᑭᓇ ᑕᔥ ᑳᑮᒫᒪᐎ ᐊᔮᐙᒡ ᐃᐃᒫ ᑳᐐᓐ ᑮᓅᑖᑎᓯᐗᒃ ᐁᑮ ᐱᓯᑕᐙᐙᒡ ᐹᕒᓇᐸᓴᓐ, ᑆᓬᐊᓐ ᑲᔦ ᐁᑕᔑᑕᒥᓂᒡ ᐋᓃᓐ ᑳᐃᔑ ᒫᒪᑳᒋᒋᑫᓂᒡ, ᐋᓃᓐ ᑲᔦ ᑳᐃᔑ ᑭᑭᓇᐙᒋᒋᑫᓂᒡ ᑭᔐᒪᓂᑑᓐ ᒣᑴᔭᐄ ᐁᔑ ᐊᔮᓂᒡ ᑳᒎᐎᐎᓯᓂᒃ᙮

15:13b.ACT.015.013 ᐊᐲ ᑳᐃᔥᒀ ᑲᑭᑐᓂᒡ, ᒌᒥᔅ ᑫᐐᓐ ᐅᐅ ᑮᐃᑭᑐ: ᓃᒋ ᐅᑌᐺᑕᒨᒃ, ᑕᑲ ᐱᓯᑕᐎᔑᒃ᙮

15:14b.ACT.015.014 ᓵᐃᒪᓐ ᐄᑐᒃ ᐌᐌᓂ ᐅᑮ ᑕᔑᑖᓐ ᐋᓃᓐ ᒫᐗᒡ ᐃᑯ ᓂᑕᒻ ᑭᔐᒪᓂᑑ ᑳᐃᔑ ᔕᐌᓂᒫᒡ ᑳᒎᐎᐎᓯᓂᒃ ᐁᑮᐅᑖᐱᓈᓂᒡ ᐐᓐ ᐃᑯ ᐁᐐ ᑎᐱᓇᐌᐎᓯᒡ ᐅᐐᓱᐎᓂᕽ ᐅᒋ᙮

15:15b.ACT.015.015 ᒦᐗᓐ ᐃᑕᔥ ᐅᓄ ᒪᔮ ᐃᑭᑐᐎᓇᓐ ᐯᔑᑾᓐ ᐃᓇᑫ ᑳᐃᓀᑕᒧᐙᒡ ᑭᔐᒪᓂᑑᓐ ᑫᓅᑕᒪᐙᐙᒡ ᐅᐅ ᐁᐃᔑᐲᐃᑳᑌᒃ:

15:16b.ACT.015.016 ᐊᓂᐃᔥᒀᓭᑭᓐ ᐃᓴ ᐃᓂ, ᒦ ᐃ ᒋᐱᑮᐌᔮᓐ᙮ ᓂᑲ ᑮᐌᐅᔑᑖᐙᓐ ᑲᔦ ᑌᐱᑦ ᐅᑭᒋᐊᓇᒥᐁᐎᑲᒥᒃ ᑳᑮ ᑲᐎᓭᓂᑭᐸᓐ᙮ ᓂᑲ ᑮᐌ ᐸᑕᑭᑑᓇᓐ ᑲᔦ ᑳᐲᑯᔥᑳᑭᓐ, ᐁᐐ ᓈᐸᑑᔮᓐ᙮

15:17b.ACT.015.017 ᒦᑕᔥ ᑯᑕᒃ ᑲᑭᓇ ᐯᒫᑎᓯᐙᒡ ᒋᓇᓈᑐᓀᐙᐙᒡ ᑳᑎᐯᒋᑫᓂᒡ, ᐃᑭ ᑲᔦ ᑳᒎᐎᐎᓯᒀ ᑳᑮᐊᑐᒪᒀ ᓂᐐᓱᐎᓂᕽ ᐁᐐ ᑎᐱᓇᐌᐎᓯᔮᓐ᙮

15:18b.ACT.015.018 ᒦ ᐃ ᐁᑭᑐᒡ ᑳᑎᐯᒋᑫᒡ, ᑳᑭᑫᓂᒥᓐᒡ ᒣᐎᔕ ᐁᑮ ᐱᐅᒋ ᐅᔑᑑᒡ ᐅᓄ ᑲᑭᓇ ᑫᑰᓐ᙮

15:19b.ACT.015.019 ᒌᒥᔅ ᑮᐊᓂ ᐃᑭᑐ: ᐋᔕ ᓂᑮ ᑮᔐᑕᒻ ᐊᐗᔑᒣ ᒋᒥᑯᔥᑳᒋᐋᓯᐗᒀᐸᓐ ᐃᑭ ᑳᒎᐎᐎᓯᒀ ᑳᑴᑮᓄᑕᐙᐙᒡ ᑭᔐᒪᓂᑑᓐ᙮

15:20b.ACT.015.020 ᒣᔅᑾᒡ ᐃᑕᔥ ᒋᐅᔑᐲᐊᒪᐎᑣ ᒋᐐᑕᒪᐎᑣ ᒋᐸᐹᒣᑕᓯᒀ ᑫᑰᓇᓐ ᑳᐅᒋ ᐐᓀᑖᑾᓂᓂᑭᓐ ᒪᓂᑑᑳᓂᕽ, ᐱᔑᒀᑎᓯᐎᓂᕽ ᐃᑕᔥ᙮ ᒋᐸᐹᒣᑕᓯᒀ ᑲᔦ ᒦᒋᒻ ᑫᐱᓀᐌ ᓂᒋᑳᑌᓂᒃ, ᒋᐱᒣᑕᓯᒀ ᑲᔦ ᒥᔅᑸᓂ᙮

15:21b.ACT.015.021 ᐃᓇᔥᑫ ᒨᓯᔅ ᐅᑑᓇᔓᐌᐎᓐ ᒣᐎᔕ ᐱᐅᒋ ᐊᓇᒥᒋᑳᑌᓂ ᐁᑕᓱ ᐊᓉᐲᐎ ᑮᔑᒃ ᒎᐎ ᐊᓇᒥᐁᐎᑲᒥᑯᑳᕽ᙮ ᐅᑎᑭᑐᐎᓇᓐ ᑲᔦ ᑕᔑᒋᑳᑌᓂᐗᓐ ᐁᑕᓱ ᐆᑌᓈᑳᕽ᙮

15:22b.ACT.015.022 ᒦᑕᔥ ᐃᔑᓂᔕᐙᑲᓇᒃ, ᑳᓃᑳᓂᓯᐙᒡ ᑲᔦ, ᐃᑭ ᑲᔦ ᐅᑌᐺᑕᒨᒃ ᑳᑮᒫᐗᒋᐃᑎᐙᒡ ᑮᒫᒪᐎ ᐃᓀᑕᒨᒃ ᒋᐅᒋ ᐃᔑᓂᔕᐙᐙᒡ ᐃᓂᓂᐗᐞ ᐁᔑ ᐊᔮᐙᒡ᙮ ᒦᐗᐞ ᐃᑕᔥ ᐅᐅ ᓃᔑᓐ ᑳᓃᑳᓂᓯᓂᒡ ᑳᑮᐅᓀᓂᒫᐙᒡ, ᒎᑕᔅ ᐹᕒᓴᐸᔅ ᑳᑮᐃᓂᒥᓐᒡ, ᐃᓂ ᑲᔦ ᓵᐃᓬᐊᓴᓐ ᒋᐊᓂ ᐐᒌᐙᓂᒡ ᑆᓬᐊᓐ, ᐹᕒᓇᐸᓴᓐ ᑲᔦ ᐃᔖᓂᒡ ᐌᑎ ᐁᑎᔮᒃ ᐆᑌᓈᕽ

15:23b.ACT.015.023 ᐁᑮᒦᓈᐙᒡ ᒋᒫᒌᑐᓂᒡ ᐅᔑᐲᐃᑲᓐ ᐅᐅ ᐁᔑᐲᐃᑳᑌᓂᒃ: ᓃᓇᐎᓐᑦ ᐅᑌᐺᑕᒨᒃ, ᐃᔑᓂᔕᐙᑲᓇᒃ, ᑳᓃᑳᓂᓯᐙᒡ ᑲᔦ, ᑭᑑᔑᐲᐊᒫᑰᒻ ᑮᓇᐙ ᐅᑌᐺᑕᒨᒃ ᑳᒎᐎᐎᓯᐌᒃ ᐌᒌᔦᒃ ᐁᑎᔮᒃ, ᓰᕒᐃᔭ ᐊᑮᕽ, ᓯᓬᐃᔑᔭ ᑲᔦ᙮ ᐴᔔ ᑭᑎᑰᒻ᙮

15:24b.ACT.015.024 ᓂᓅᑖᒥᓐ ᐋᓂᑕ ᐊᐎᔭᒃ ᐁᒥᑯᔅᑳᓱᒥᓀᒀ ᐌᒋ ᒥᑯᔥᑳᑌᑕᒣᒃ ᐅᐅᒫ ᑕᔥ ᐄᓴᓐ ᐁᐅᒌᐙᒡ ᑳᔑ ᐊᔮᔮᕽ᙮ ᑳᐐᓐ ᓃᓇᐎᓐᑦ ᓂᑮᐃᔑᓂᔕᐙᓯᐙᓈᓂᒃ᙮

15:25b.ACT.015.025 ᓂᑮᒫᒪᐎ ᐃᓀᑖᒥᓐ ᑕᔥ ᒋᐅᓈᐸᒪᑭᑣ ᐃᓂᓂᐗᒃ ᑫᐱᐊᑕ ᐙᐸᒥᓀᒀ ᒋᐱ ᐐᒌᐙᐙᒡ ᑆᓬᐊᓐ, ᐹᕒᓇᐸᓴᓐ ᑲᔦ ᑳᓵᑭᐃᒪᑭᒡ᙮

15:26b.ACT.015.026 ᒦᐗᒃ ᐃᓴ ᐅᑯ ᑳᐱ ᓇᓃᓵᓂᑑᐙᒡ ᐅᐱᒫᑎᓯᐎᓂᐙᓐ ᐅᑎᔑᓂᑳᓱᐎᓂᓃᕽ ᐅᒋ ᑳᑎᐯᒋᑫᓂᒡ ᒋᓴᓲᓐ Xᑕᓐ᙮

15:27b.ACT.015.027 ᒦᑕᔥ ᑳᐅᒋ ᐃᔑᓂᔕᐗᑭᒡ ᒎᑕᔅ ᐊᐊ ᑲᔦ ᓵᐃᓬᐊᓴᓐ, ᐐᓇᐙ ᐱᑯ ᐅᑑᓂᐙᕽ ᒋᐅᒋ ᐐᑕᒪᐎᓀᒀ ᐯᔑᑾᓐ ᐁᐃᑭᑐᔮᕽ᙮

15:28b.ACT.015.028 ᒦᑕᔥ ᐅᐅᐌᓂ ᑭᔐᒪᓂᑑ ᐅᑕᒑᑾᓐ ᑳᒥᓍᐸᑕᕽ, ᒦᔥ ᐯᔑᑾᓐ ᑫᓃᓇᐎᓐᑦ ᐁᓀᑕᒫᕽ ᐅᓵᒻ ᐹᔑᒡ ᒋᐃᔑᒋᑫᓯᐌᒃ, ᐃᓂ ᓴ ᐁᑕ ᐁᑕᐌᑖᑾᑭᓐ᙮

15:29b.ACT.015.029 ᒋᐸᐹᒣᑕᓯᐌᒃ ᒦᒋᒻ ᑳᐸᑭᑎᓇᒪᐎᑣ ᒪᓂᑑᑳᓇᒃ, ᐃᐃ ᑲᔦ ᒦᒋᒻ ᑳᑭᐱᓀᐌ ᓂᒋᑳᑌᒃ, ᒋᓅᒋᑐᓯᐌᒃ ᑲᔦ ᐱᔑᒀᑎᓯᐎᓐ᙮ ᑮᔥᐱᓐ ᐃᑕᔥ ᐃᔑᒋᑫᔦᒃ ᑳᐃᑰᔦᒃ, ᐋᐱᒋ ᑭᑲᑭᒋ ᒥᓄᒋᑫᒻ᙮ ᐴᔔ ᑭᑎᑰᒻ, ᒦ ᐃ ᑳᐃᔑᐲᐃᑳᑌᒃ ᐃᐃ ᐅᔑᐲᐃᑲᓐ᙮

15:30b.ACT.015.030 ᒦᑕᔥ ᑳᑮᒫᒋᓂᔕᐅᑣ ᐃᑭ ᐯᒥᐎᑑᐙᒡ ᐅᔑᐲᐃᑲᓐ ᒋᐃᔖᐙᒡ ᐌᑎ ᐁᑎᔮᒃ ᙮ ᐊᐱ ᑕᔥ ᑌᑯᔑᓄᐙᒡ ᐌᑎ ᐅᑮᐊᑐᒫᐙᐞ ᐅᑌᐺᑕᒨᐞ ᒋᒫᐗᒋᐃᑎᓂᒡ᙮ ᒦᔥ ᑳᑮᒦᓈᐙᒡ ᐃᐃ ᐅᔑᐲᐃᑲᓐ᙮

15:31b.ACT.015.031 ᐊᐲ ᓴ ᑕᔥ ᑳᐊᓇᒥᑑᓂᒡ ᐃᐃ ᐅᔑᐲᐃᑲᓐ, ᐐᑫ ᑮᐅᒋ ᒥᓉᑕᒨᐞ ᐁᑮᓅᑕᒥᓂᒡ ᐃᐃ ᒥᓍᒋᒧᐎᓐ᙮

15:32b.ACT.015.032 ᐊᐊ ᓴ ᒎᑕᔅ ᐊᐊ ᑕᔥ ᑲᔦ ᓵᐃᓬᐊᓴᓐ, ᑫᐐᓇᐙ ᑮᑎᓄᐎᐗᒃ ᑫᓅᑕᒪᐙᐙᒡ ᑭᔐᒪᓂᑑᓐ᙮ ᓃᐱᐗᐞ ᑮᐊᔨᑭᑐᐗᒃ ᑫᐅᒋ ᒪᔥᑲᐌᑕᒥᓂᒡ, ᒋᒪᔥᑲᐎ ᑌᐺᑕᒥᓂᒡ ᑲᔦ ᐅᑌᐺᑕᒨᐞ᙮

15:33b.ACT.015.033 ᑭᓉᔒᔥ ᐃᑕᔥ ᐃᑯ ᐃᒫ ᑮᐊᔮᐗᒃ, ᒦᔥ ᑳᑮᓇᑲᓈᐙᒡ ᐅᑌᐺᑕᒨᐞ ᐁᑮᐃᔖᐙᒡ ᒋᐊᑕ ᐙᐸᒫᐙᒡ ᑳᑮ ᐲᒋᓂᔕᐅᑯᐙᐸᓐ᙮ ᐅᑌᐺᑕᒨᐞ ᐃᑕᔥ ᐅᑮᐃᑯᐙᐞ ᒋᐊᓂᒥᓄ ᐱᒥᐊᔮᐙᒡ᙮

15:34b.ACT.015.034 ᓵᐃᓬᐊᔅ ᐄᑐᒃ ᑮᐊᑕᐌᑕᒧᑯᐸᓐ ᐃᐃᒫ ᒋᑮᐊᔮᐸᓐ᙮

15:35b.ACT.015.035 ᑆᓬ ᓴ ᐐᓐ ᐊᐊ ᑲᔦ ᐹᕒᓇᐸᔅ ᑮᐊᔮᐗᒃ ᐃᐃᒫ ᐁᑎᔮᕽ ᐃᐃ ᑲᔦ ᑯᑕᒃ ᑳᐹᑏᓄᓂᒡ ᐅᑌᐺᑕᒨᐞ᙮ ᑮᑭᑭᓄᐊᒫᑫᐗᒃ, ᐁᑮ ᑕᔑᑕᒧᐙᒡ ᑲᔦ ᑳᑎᐯᒋᑫᓂᒡ ᐅᑎᑭᑐᐎᓂᓂ᙮

15:36b.ACT.015.036 ᓈᓈᑫ ᑕᔥ ᐁᐊᓂ ᐃᔑᓭᒃ ᑆᓬ ᐅᑮᐃᓈᓐ ᐹᕒᓇᐸᓴᓐ : ᑕᑲ ᑮᐌ ᐃᔖᑖ ᑲᑭᓇ ᐆᑌᓇᐗᓐ ᑳᑮ ᐱᑕᔑ ᑲᑮᒀᓄᑕᒧᐗᕽ ᑳᑎᐯᒋᑫᒡ ᐅᑎᑭᑐᐎᓐ ᒋᒪᐗᑎᓴᒀ ᑲᑭᓇ ᐅᑌᐺᑕᒨᒃ ᒋᑭᑫᓂᒪᒀ ᐋᓃᓐ ᐁᔑᓭᐙᑴᓐ, ᐅᑮᐃᓈᓐ᙮

15:37b.ACT.015.037 ᐹᕒᓇᐸᔅ ᑕᔥ ᑮᐃᔑ ᐊᑕᐌᑕᒻ ᒋᐐᒌᐎᑯᐙᒡ ᒞᓐ ᒫᕒᒃ ᑳᐃᓂᒥᓐᒡ᙮

15:38b.ACT.015.038 ᑆᓬ ᑕᔥ ᐐᓐ ᑳᐐᓐ ᐃᐃ ᑮᐃᓀᑕᓰ ᒋᑮᐐᒌᐎᑯᐙᐸᓐ ᐋᓃᔥ ᐅᑮᓅᑌᓇᑲᓂᑯᐙᑯᐸᓐ ᐌᑎ ᐹᐱᓬᐃᔭ ᐊᑮᕽ ᑳᐐᓐ ᐅᑮᐐᒋᐃᑯᓰᐙᓐ ᐁᓇᓄᑮᐙᒡ᙮

15:39b.ACT.015.039 ᑳᐊᐲᒋ ᑭᒋ ᑲᑲᓅᓂᑎᐙᒡ ᑕᔥ ᒦ ᐃ ᑳᑮ ᐸᑫᐎᓂᑎᐙᒡ᙮ ᐹᕒᓇᐸᔅ ᐅᑮᐅᑖᐱᓈᓐ ᒫᕒᑲᓐ ᒋᐐᒌᐎᑯᒡ, ᒦᔥ ᑳᑮᐃᔖᐙᒡ ᒥᓂᓯᕽ ᓵᐃᐸᕒᐊᔅ ᒌᒫᓂᕽ ᐁᑮᐅᒋ ᐃᓈᔑᐙᒡ᙮

15:40b.ACT.015.040 ᑆᓬ ᑕᔥ ᐐᓐ ᓵᐃᓬᐊᓴᓐ ᐅᑮᐅᑖᐱᓈᓐ ᒋᐐᒌᐎᑯᒡ᙮ ᒦᔥ ᑳᐃᔑ ᒫᒑᐙᒡ ᐅᑌᐺᑕᒨᐞ ᐁᑮᐃᑯᐙᒡ ᐁᐃᔑ ᐸᑭᑎᓂᑯᐙᒡ ᐁᔑ ᑭᔐᐙᑎᓯᓂᒡ ᑳᑎᐯᒋᑫᓂᒡ᙮

15:41b.ACT.015.041 ᐅᑮᐊᓂ ᔖᐳᔥᑳᓐ ᐃᑕᔥ ᓰᕒᐃᔭ ᐊᑮᓂ, ᐃᐃ ᑲᔦ ᓯᓬᐃᔑᔭ ᐊᑮᓂ, ᐁᑮᒪᔥᑲᐌᑕᒧᐋᒡ ᐅᑌᐺᑕᒨᐞ ᐁᑕᔑ ᒫᐗᒋᐃᑎᓂᒡ᙮

16

16:1b.ACT.016.001 ᑆᓬ ᓴ ᑮᐱᑕᑯᔑᓐ ᐃᐃᒫ ᐁᔑ ᐆᑌᓈᐗᓂᓂᒃ ᑕᕒᐱ, ᓬᐃᔅᑕᕒᐊ ᑲᔦ ᑳᐃᒋᑳᑌᓂᑭᓐ᙮ ᑮᐊᔮᐗᓐ ᐃᑕᔥ ᐃᐃᒫ ᐯᔑᒃ ᐅᑌᐺᑕᒨᓐ ᑎᒪᑎ ᐁᔑᓂᑳᓱᓂᒡ᙮ ᐅᒫᒫᓂ ᓴ ᒎ ᑮᑎᓄᐎᑴᐎᐗᓐ, ᐅᑌᑌᓂ ᑕᔥ ᐐᓐ ᑲᕒᐄᒃ ᑮᑎᓄᐎᐗᓐ᙮

16:2b.ACT.016.002 ᑲᑭᓇ ᓴ ᐅᑌᐺᑕᒨᒃ ᐁᔮᐙᒡ ᐃᐃᒫ ᓬᐃᔅᑕᕒᐊ ᐆᑌᓈᕽ, ᐋᐃᑰᓂᔭᒻ ᐆᑌᓈᕽ ᑲᔦ ᐅᑮᒥᓄ ᑕᔑᒫᐙᓐ ᑎᒪᑏᓐ᙮

16:3b.ACT.016.003 ᒦᐗᓐ ᑕᔥ ᐃᓂ ᑆᓬ ᑳᑮᐊᑕᐌᓂᒫᒡ ᒋᐐᒌᐎᑯᒡ, ᒦᔥ ᑳᑮ ᑭᑭᓇᐙᑕᔕᑫᔣᒡ᙮ ᒦᑕᔥ ᑳᑮᐅᒋ ᑑᑕᐙᒡ ᐋᓃᔥ ᑲᑭᓇ ᒎᐗᐞ ᐃᐃᒫ ᑳᑮᐊᔮᓂᒡ ᐅᑮ ᑭᑫᑕᒥᓂ ᑎᒪᑏᓐ ᐅᑌᑌᓂ ᑲᕒᐄᒃ ᐁᑮ ᑎᓄᐎᓂᒡ᙮

16:4b.ACT.016.004 ᑮᐊᓂ ᐊᔨᔖᐗᒃ ᐃᑕᔥ ᐁᔑ ᐗᐆᑌᓈᐗᓂᓂᒃ, ᐁᑮᐐᑕᒫᑫᐙᒡ ᐋᓃᓐ ᑳᑮᐃᔑ ᐅᓀᑕᒥᓂᒡ ᐃᔑᓂᔕᐙᑲᓇᐞ ᑫᐃᔑᒋᑫᓈᐎᐗᓂᓂᒃ, ᑳᓃᑳᓂᓯᓂᒡ ᑲᔦ ᒉᕒᐆᓴᓬᐊᒥᕽ ᑳᐊᔮᓂᒡ᙮ ᒦᑕᔥ ᑳᑮᐃᓈᐙᒡ ᒋᑲᓇᐌᑕᒥᓂᒡ ᐃᓂ ᐃᓈᑯᓂᑫᐎᓇᓐ᙮

16:5b.ACT.016.005 ᐅᑌᐺᑕᒨᒃ ᑕᔥ ᐁᑕᔑ ᒫᒫᐗᒋᐃᑎᐙᒡ ᐊᐗᔑᒣ ᑮᐊᓂ ᒪᔥᑲᐎ ᑌᐺᑕᒨᒃ, ᑮᐊᓂ ᐹᑏᓄᐗᒃ ᑲᔦ ᐁᑕᓱᑮᔑᒃ᙮

16:6b.ACT.016.006 ᒥᓯᐌ ᑕᔥ ᑮᐃᔖᐗᒃ ᐃᐃᒫ ᐸᕒᐃᒋᔭ ᐊᑮᕽ, ᐃᐃᒫ ᑲᔦ ᑲᓬᐁᔑᔭ ᐊᑮᕽ᙮ ᑳᐐᓐ ᑕᔥ ᐅᑮ ᐸᑭᑎᓂᑯᓰᐙᓐ ᑭᔐᒪᓂᑑᓐ ᐅᑕᒑᑯᓂ ᒋᑕᔑᑕᒧᐙᒡ ᑳᑎᐯᒋᑫᓂᒡ ᐅᑎᑭᑐᐎᓂᓂ ᐁᔑᔭ ᑭᒋ ᐊᑮᕽ᙮

16:7b.ACT.016.007 ᐊᐲ ᑕᔥ ᑳᒪᔮᔥᑲᒧᐙᒡ ᒥᔑᔭ ᐊᑮᕽ ᑮᑲᑴ ᐃᔖᐗᒃ ᐱᑎᓂᔭ ᐊᑮᕽ᙮ ᑳᐐᓐ ᑕᔥ ᐅᑮ ᐸᑭᑎᓂᑯᓰᐙᓐ ᒋᓴᓲᓐ ᐅᑕᒑᑯᓂ ᐃᐃᒫ ᒋᐃᔖᐙᒡ᙮

16:8b.ACT.016.008 ᐅᑮ ᔖᐳᔥᑳᓈᐙ ᑕᔥ ᒥᔑᔭ ᐊᑭ, ᐌᑎ ᑕᔥ ᑮᐃᔑ ᑕᑯᔑᓅᒃ ᒐᕒᐆᐗᔅ ᐆᑌᓈᕽ᙮

16:9b.ACT.016.009 ᐊᐲ ᑕᔥ ᐁᑎᐱᑲᓂᓂᒃ ᑆᓬ ᐅᑮᐙᐸᑖᓐ ᐃᔑᓇᒧᐎᓐ᙮ ᐅᑮᐙᐸᒫᓐ ᐃᓂᓂᐗᓐ ᐁᒪᑗ ᓃᐸᐎᓂᒡ ᒫᓯᑑᓂᔭ ᐊᑮᕽ ᐁᐸᑯᓭᓂᒥᑯᒡ ᐅᐅ ᐁᑮᒪᑗᐃᑯᒡ ᐄᓴᓐ: ᐲᔖᓐ ᒋᐱ ᔮᔕᐎᔥᑳᔭᓐ ᒋᐐᒋᐃᔮᕽ, ᐅᑮᐃᑰᓐ᙮

16:10b.ACT.016.010 ᐊᐲ ᑕᔥ ᑳᐙᐸᑕᕽ ᐃᐃ ᐃᔑᓇᒧᐎᓐ ᔐᒫᒃ ᐃᑯ ᓂᑮᐅᔒᑖᒥᓐ ᐁᐐᐃᔖᔮᕽ ᒫᓯᑑᓂᔮ ᐊᑮᕽ᙮ ᓂᑮ ᑫᒋᓈᐅᒥᓐ ᑕᔥ ᑭᔐᒪᓂᑑ ᐌᑎ ᐁᑮᐃᔑ ᐊᑐᒥᔭᒥᓐᒡ ᒋᐐᑕᒪᐎᒪᑭᒡ ᒥᓍᒋᒧᐎᓐ ᐌᑎ ᐁᔮᓂᒡ᙮

16:11b.ACT.016.011 ᒐᕒᐆᐗᔅ ᐆᑌᓈᕽ ᑕᔥ ᓂᑮᐅᒋ ᒫᒌᔮᔑᒥᓐ ᑎᐌᒃ ᐃᑯ ᓵᒧᑖᕒᐁᔅ ᒥᓂᓯᕽ ᐁᑮᐃᔑ ᐸᑲᒫᔑᔮᕽ᙮ ᐁᐊᓂ ᐙᐸᕽ ᐃᑕᔥ ᓂᔮᐳᓬᐃᔅ ᐆᑌᓈᕽ ᓂᑮᐃᓈᔑᒥᓐ᙮

16:12b.ACT.016.012 ᒦᑕᔥ ᐌᑎ ᑳᐅᒋ ᑯᐲᔮᕽ ᐁᑮᐃᔖᔮᕽ ᐆᑌᓈᕽ ᐱᓬᐃᐹᐃ ᐁᔑᓂᑳᑌᒃ᙮ ᐃᐃ ᓴ ᐆᑌᓇ ᑮᓃᑳᓀᑖᑾᓐ ᑮᐅᒋ ᑎᐯᑖᑾᓐ ᒫᓯᑑᓂᔮ ᐊᑮᕽ, ᐅᕒᐆᒥᕽ ᑳᐅᒌᐙᒡ ᐅᑮᐅᔑᑑᓈᐙᑯᐸᓐ᙮ ᐹᑏᓄ ᑮᔑᒃ ᑕᔥ ᐃᐃᒫ ᓂᑮᐊᔮᒥᓐ᙮

16:13b.ACT.016.013 ᐊᐲ ᑕᔥ ᐁᐊᓉᐲᐎ ᑮᔑᑲᒃ ᓂᑮᐃᔖᒥᓐ ᐊᑾᒌᕽ ᑳᔑ ᐃᔥᒀᑌᒥᐗᕽ ᐆᑌᓇ, ᐁᔑ ᓰᐲᐗᕽ ᐃᓇᑫ ᐁᑮᐃᔖᔮᕽ, ᐁᑮᐃᓀᑕᒫᕽ ᑫᒋᓈᒡ ᒫᐐᓐ ᒋᒥᑲᒫᕽ ᒎᐗᒃ ᐁᑕᔑ ᐊᓇᒥᐋᐙᒡ᙮ ᓂᑮᐅᓇᐱᒥᓐ ᑕᔥ ᐁᑮ ᑲᑲᓅᓇᑭᑣ ᐃᑴᐗᒃ ᐃᐃᒫ ᑳᑮ ᒫᐗᒋᐃᑎᐙᒡ᙮

16:14b.ACT.016.014 ᐯᔑᒃ ᑕᔥ ᐃᑴ ᑳᑮ ᐱᓯᑕᐎᔭᒥᓐᒡ ᓬᐃᑎᔭ ᑮᐃᔑᓂᑳᓱ, ᑕᔭᑕᐃᕒᐊ ᐆᑌᓈᕽ ᐁᑮᐅᒌᒡ᙮ ᒦ ᓴ ᑳᐃᓇᓄᑮᒡ ᐁᐊᑖᐙᑫᒡ ᒪᑲᑌᒥᔅᑴᑭᓄᓂ, ᑳᐊᓇᒥᐁᑕᐙᒡ ᑭᔐᒪᓂᑑᓐ ᓴ ᑮᑎᓄᐎ᙮ ᒦᑕᔥ ᑳᑮᒦᓂᑰᐎᓯᒡ ᒋᓂᓯᑐᑕᕽ, ᒋᑌᐺᑕᕽ ᑲᔦ ᑲᑭᓇ ᑆᓬᐊᓐ ᑳᑮᐃᑭᑐᓂᒡ᙮

16:15b.ACT.016.015 ᐊᐲ ᑕᔥ ᑳᓰᑲᐊᑖᓱᒡ, ᐃᐃ ᑲᔦ ᐅᑖᐎᓂᕽ ᐁᔮᓂᒡ, ᓂᑮ ᑲᑳᓱᒥᑯᓈᓐ ᐁᑮᐃᔑᔭᒥᓐᒡ: ᑮᔥᐱᓐ ᐁᓇᑭᒥᐌᑴᓐ ᑾᔭᒃ ᐁᑌᐺᔦᓂᒪᒃ ᑳᑎᐯᒋᑫᒡ, ᐲᑎᑫᒃ ᓂᑖᐎᓂᕽ, ᒋᐐᒋᐊᔮᒥᔦᒃ, ᓂᑮᐃᑯᓈᓐ᙮ ᓂᑮ ᑲᔥᑭᒥᑯᓈᓐ ᐃᑕᔥ ᒋᐃᔖᐗᑭᒡ᙮

16:16b.ACT.016.016 ᐋᐱᑎᕽ ᑕᔥ ᐁᑮᔑᑲᒃ ᐁᐃᔖᔮᕽ ᐁᑕᔕᓇᒥᐋᓂᐗᕽ, ᓂᑮᒣᒀᔥᑲᐙᓈᓐ ᐅᔥᑭᓃᑭᑴ ᑳᐸᒦᑖᑫᒡ ᐁᑭᑭᔥᑳᑯᒡ ᒪᒋᐊᒑᑾᓐ, ᐁᑮᐃᓂᔥᑳᑯᒡ ᒋᑲᔥᑭᑑᒡ ᒋᐐᑕᕽ ᓃᔮᒃ ᑫᓂ ᐃᔑᓭᓂᒃ᙮ ᓃᐱᐗᐞ ᑮᐅᒋ ᔔᓂᔮᑫᐗᐞ ᐅᑑᑭᒫᒪᐞ ᐊᐊ ᐅᔥᑭᓃᑭᑴ ᐁᑮ ᑲᔥᑭᑑᒡ ᒋᓃᑳᓂᐐᑕᕽ ᐋᓃᓐ ᑫᑰᓐ ᑫᓂ ᐃᔑᓭᓂᒃ᙮

16:17b.ACT.016.017 ᒦ ᐊᐌ ᑳᑮ ᐱᒥᓂᔕᐙᒡ ᑆᓬᐊᓐ ᐁᐐᒌᐎᒪᑭᒡ ᐅᐅ ᐁᑮᐃᔑ ᔖᔖᑯᐌᒡ: ᒦᐗᒃ ᓴ ᐅᑯ ᐃᓂᓂᐗᒃ ᑳᐊᓄᑮᑕᐙᐙᒡ ᒫᐗᒡ ᐁᔥᐯᑖᑯᓯᓂᒡ ᑭᔐᒪᓂᑑᓐ, ᑫᐐᑕᒪᐎᓀᒀ ᐋᓃᓐ ᐃᓇᑫ ᑫᔑ ᐱᒫᒋᐃᑰᐎᓯᔦᒃ! ᐁᑮᐃᑭᑐᒡ᙮

16:18b.ACT.016.018 ᐹᑏᓄ ᑮᔑᒃ ᑕᔥ ᐅᐅ ᑮᐃᔑᒋᑫᐗᓐ᙮ ᑫᑲᐲ ᑕᔥ ᑆᓬ ᐅᑮᒥᑯᔥᑳᑌᑕᒧᐃᑰᓐ, ᒦᔥ ᑳᑮ ᑴᑭᑳᐸᐎᑕᐙᒡ ᐁᑮᐃᓈᒡ ᐃᓂ ᒪᒋᐊᒑᑾᓐ ᑳᑭᑭᔥᑲᐙᓂᒡ ᐅᔥᑭᓃᑭᑴᐗᓐ: ᒋᓴᔅ X ᐅᐐᓱᐎᓂᕽ ᑭᑎᔑ ᑲᓅᓂᓐ ᒋᓇᑲᓇᒡ ᐊᐊ ᐃᑴ, ᐅᑮᐃᓈᓐ᙮ ᔐᒫᒃ ᐃᑕᔥ ᐅᑮᓇᑲᓈᓂ᙮

16:19b.ACT.016.019 ᐊᐲ ᑕᔥ ᐅᔥᑭᓃᑭᑴ ᐅᑑᑭᒫᒪᐞ ᐁᑭᑫᑕᒥᓂᒡ ᐁᐗᓂᑑᓂᒡ ᑳᔑᐊᐯᓂᒧᓄᑖᑯᒡ ᑳᓂᑖ ᐅᒋ ᔔᓂᔮᑫᓂᐸᓐ, ᐅᑮᐅᑎᑎᓈᓂ ᑆᓬᐊᓐ, ᓵᐃᓬᐊᓴᓐ ᑲᔦ᙮ ᐅᑮᐃᔑ ᐙᐐᑯᐱᓈᓂ ᑕᔥ ᐃᐃᒫ ᑳᐃᔑ ᓂᑖ ᑕᓇᑖᐌᕽ ᒣᑴ ᐆᑌᓈᕽ ᐁᔑ ᐊᔮᓂᒡ ᐅᑑᓇᔓᐌᐞ᙮

16:20b.ACT.016.020 ᐅᑮ ᐲᓈᓂ ᑕᔥ ᐁᔑ ᐊᔮᓂᒡ ᐅᓇᔓᐌᐎᑭᒫᓐ ᐅᕒᐆᒥᕽ ᑳᐅᒋ ᑎᐯᑖᑯᓯᓂᒡ ᐅᐅ ᐁᑮᐃᓈᓂᒡ: ᐅᑯ ᓴ ᐃᓂᓂᐗᒃ ᑳᒎᐎᐎᐙᒡ ᐗᐙᓀᑕᒥᒋᑫᐗᒃ ᑭᑑᑌᓈᒥᓈᓂᕽ,

16:21b.ACT.016.021 ᐁᑭᑭᓄᐊᒫᑫᐙᒡ ᐃᔑᑣᐎᓇᓐ ᒋᐅᑖᐱᓇᒧᐗᕽ ᒋᑕᑯ ᐃᔑᒋᑫᐗᕽ ᐃᑕᔥ᙮ ᑳᐐᓐ ᑮᓇᐎᓐᑦ ᐄᑐᒃ ᑭᑖ ᐅᑖᐱᓇᒧᐙᓰᒥᓐ ᐁᑭᑐᐙᒡ ᐋᓃᔥ ᐅᕒᐆᒥᕽ ᑭᑑᒋ ᑎᐯᑖᑯᓯᒥᓐ, ᑮᐃᑭᑐᐗᐞ᙮

16:22b.ACT.016.022 ᐃᑭᐌᓂᐗᒃ ᑕᔥ ᑳᑮᒫᒪᐎ ᐊᔮᐙᒡ ᐃᐃᒫ ᑮᑕᑸᐗᒃ ᐁᒦᑳᓂᒥᓐᒡ ᑆᓬᐊᓐ, ᓵᐃᓬᐊᓴᓐ ᑲᔦ᙮ ᐅᓇᔓᐌᐎᑭᒫᒃ ᑮᐊᓅᑮᐗᒃ ᒋᑮᒋᑯᓇᔦᐱᒋᑲᓂᐎᓂᒡ ᒋᐸᐸᔕᔐᐅᒥᓐᒡ, ᒋᐸᐸᑭᑌᐅᒥᓐᒡ ᑲᔦ᙮

16:23b.ACT.016.023 ᑳᐃᔥᒀ ᑭᒋ ᐸᐸᔕᔐᐙᐙᒡ ᐃᑕᔥ ᐅᑮᐲᒋ ᐌᐱᓈᐙᐞ ᑭᐸᐅᑏᐎᑲᒥᑯᕽ᙮ ᑲᓇᐌᒋᑫᐎ ᔑᒫᑲᓂᔥ ᑕᔥ ᑮᐊᓅᓈ ᒋᔮᔩᒋ ᑭᐸᐙᒡ ᒋᑲᔥᑭᐅᓯᓂᒃ᙮

16:24b.ACT.016.024 ᐊᐲ ᑕᔥ ᐊᐊ ᑲᓇᐌᒋᑫᐎ ᔑᒫᑲᓂᔥ ᐃᐃ ᑳᐃᔑ ᐊᓅᓂᓐᒡ ᐅᑮ ᐲᑎᑫ ᐌᐱᓈᐞ ᒫᐗᒡ ᐊᓈᒥᕽ ᑭᐸᐅᑏᐎᑲᒥᑯᕽ, ᐅᓯᑎᓃᕽ ᑲᔦ ᐁᑮᐃᔑ ᑭᒋᐙᑾᐙᒡ᙮

16:25b.ACT.016.025 ᓂᑯᒋ ᑯ ᐁᐊᓂ ᐋᐱᑖᑎᐱᑲᓂᓂᒃ ᑆᓬ, ᓵᐃᓬᐊᔅ ᑲᔦ ᑮᐊᓇᒥᐋᐗᒃ, ᐁᑮᐊᓇᒥᐁ ᓂᑲᒨᑕᐙᐙᒡ ᑲᔦ ᑭᔐᒪᓂᑑᓐ᙮ ᑯᑕᒃ ᑕᑯᓂᑲᓇᐞ ᐅᑮ ᐱᓯᑖᑯᐙᐞ᙮

16:26b.ACT.016.026 ᒦᑕᔥ ᐃᐃ ᑴᑕᑐ ᑳᑮᑭᒋ ᑯᔥᑯᓭᒃ ᐊᑭ᙮ ᑮᐗᑲᐎᓭ ᑲᔦ ᑳᑮᐃᔑ ᐸᑕᑭᑌᒃ ᑭᐸᐅᑏᐎᑲᒥᒃ᙮ ᐃᔑᔐᒫᒃ ᑕᔥ ᑲᑭᓇ ᑭᐸᐅᑏᐎ ᐃᔥᒀᑌᒪᓐ ᑮᐹᑭᓭᐗᓐ, ᑲᑭᓇ ᑲᔦ ᐅᒪᒫᒋᑾᐱᓱᐎᓂᐙᓐ ᑮᐸᑭᓭᓂᐗᓐ᙮

16:27b.ACT.016.027 ᑲᓇᐌᒋᑫᐎ ᔑᒫᑲᓂᔥ ᑕᔥ ᐁᑯᔥᑯᓭᒡ ᐁᑮᐙᐸᑕᕽ ᐃᔥᒀᑌᒪᓐ ᐁᐹᑭᓯᓂᓂᑭᓐ, ᑮᐃᓀᑕᒻ ᑕᑯᓂᑲᓇᐞ ᐁᑮᒫᒌᐸᐃᐌᓂᒡ᙮ ᒦᑕᔥ ᑳᑮ ᑭᒋᐱᑑᒡ ᐅᐸᔑᐸᐃᑫᐎᑯᒫᓐ ᐁᐐᓂᓯᑎᓱᒡ᙮

16:28b.ACT.016.028 ᑆᓬ ᑕᔥ ᐅᑮ ᔖᑯᐙᓈᓐ: ᑫᑯ ᑫᑰᓐ ᑑᑖᓱᑫᓐ! ᑲᑭᓇ ᐅᔕ ᐅᒫ ᓂᑕᔮᒥᓐ, ᐅᑮᐃᓈᓐ᙮

16:29b.ACT.016.029 ᑮᐊᓅᑮᐗᓐ ᑕᔥ ᒋᐲᒋᑳᑌᓂᑭᓐ ᐙᓴᑯᓀᒋᑲᓇᓐ, ᒦᔥ ᑳᑮ ᐲᑎᑫᐸᑑᓂᒡ ᐁᑮᐊᓂᒥᑯᑖᓂᒡ ᐁᔑ ᐊᔮᐙᒡ ᑆᓬ, ᓵᐃᓬᐊᔅ ᑲᔦ, ᐁᑮᓂᓂᑭᔥᑳᓂᒡ ᐁᐲᒋᓭᑭᓯᓂᒡ᙮

16:30b.ACT.016.030 ᐅᑮ ᓵᑭᓯᐃᑯᐙᓐ ᑕᔥ ᐁᑮᐃᑯᐙᒡ: ᐋᓃᓐ ᑫᐃᔑᒋᑫᔮᓐ ᒋᐱᒫᒋᐃᑯᔮᓐ? ᐅᑮᐃᑯᐙᓐ᙮

16:31b.ACT.016.031 ᐅᐅ ᑕᔥ ᐅᑮᐃᔑ ᓇᑴᑕᐙᐙᓐ: ᑌᐺᔦᓂᒻ ᑳᑎᐯᒋᑫᒡ ᒋᓴᔅ, ᒦᑕᔥ ᐃᐃ ᒋᐱᒫᒋᐃᑰᔭᓐ, ᐃᑭ ᑲᔦ ᑭᑖᐎᓂᕽ ᐁᔮᐙᒡ, ᐅᑮᐃᓈᓐ᙮

16:32b.ACT.016.032 ᐅᑮ ᑲᑲᓅᓈᐙᓐ ᑕᔥ ᐁᑮᐐᑕᒪᐙᐙᒡ ᐅᑎᑭᑐᐎᓂᓂ ᑳᑎᐯᒋᑫᓂᒡ, ᐃᐃ ᑲᔦ ᑲᑭᓇ ᐃᐃᒫ ᐁᔮᓂᒡ ᐅᑖᐎᓂᓃᕽ᙮

16:33b.ACT.016.033 ᔐᒫᒃ ᑕᔥ ᐃᑯ ᐃᐃ ᐊᐲ ᐁᑎᐱᑲᓂᓂᒃ ᑲᓇᑴᒋᑫᐎ ᔑᒫᑲᓂᔕᓐ ᐅᑮᐃᔑᐎᓂᑯᐙᓐ ᐁᑮ ᑭᓰᓯᐸᑑᓂᒡ ᑳᑮᐃᔑ ᐊᔦᓇᑲᓈᓱᐙᒡ᙮ ᔐᒫᒃ ᑕᔥ ᑲᔦ ᑮᓰᑲᐊᑖᓱᐗᓐ, ᐃᓂ ᑲᔦ ᑲᑭᓇ ᐅᑖᐎᓂᓃᕽ ᐁᔮᓂᒡ᙮

16:34b.ACT.016.034 ᐅᑮᐃᔑᐎᓂᑯᐙᓐ ᑕᔥ ᐁᔑᑖᓂᒡ ᐁᑮ ᐲᑎᑲᓂᑯᐙᒡ ᐁᑮᐊᑕᒫᑯᐙᒡ ᑫᒦᒋᐙᒡ᙮ ᐐᑫ ᑮᑭᒋ ᒥᓉᑕᒨᓐ ᑲᑭᓇ ᑯ ᐁᑕᔑᓂᒡ ᐋᓃᔥ ᐅᑮ ᑌᐺᔦᓂᒫᓂ ᑭᔐᒪᓂᑑᓐ᙮

16:35b.ACT.016.035 ᐁᐊᓂ ᐙᐸᓂᓂᒃ ᑕᔥ ᐅᓇᔓᐌᐎᑭᒫᒃ ᐅᑮᐃᔑᓂᔕᐙᐞ ᐋᓂᑫᐎᑭᒫᐞ ᒋᐊᐎ ᑲᓅᓈᓂᒡ ᑲᓇᐌᒋᑫᐎ ᔑᒫᑲᓂᔕᓐ: ᒦ ᐃ ᐃᔑᐸᑭᑎᓐ ᐃᑭ ᐃᓂᓂᐗᒃ, ᒋᐃᓈᓂᒡ᙮

16:36b.ACT.016.036 ᑲᓇᐌᒋᑫᐎ ᔑᒫᑲᓂᔥ ᑕᔥ ᐅᑮᐐᑕᒪᐙᓐ ᑆᓬᐊᓐ ᐁᑮᐃᓈᒡ: ᐅᓇᔓᐌᐎᑭᒫᒃ ᑮᐱ ᐃᑭᑐᐗᒃ ᐱᓵᓐ ᒋᐸᑭᑎᓂᑰᔭᓐ, ᐊᐊ ᑲᔦ ᓵᐃᓬᐊᔅ᙮ ᓵᑲᐊᒧᒃ ᑕᔥ ᐌᐌᓂ ᒋᓂ ᒫᒑᔦᒃ, ᑮᐃᑭᑐᐗᓐ᙮

16:37b.ACT.016.037 ᑆᓬ ᐅᐅ ᐅᑮᐃᓈᐞ ᐋᓂᑫᐎᑭᒫᐞ: ᐐᑫ ᓴ ᒧᔐᔭᐄ ᓂᑮ ᐸᐸᔕᔐᐅᑯᓈᓂᒃ, ᑳᐐᓐ ᑲᓇᑫ ᓂᑮ ᑎᐹᑯᓂᑯᓰᓈᓂᒃ, ᐅᕒᐆᒥᕽ ᑕᔥ ᐁᐅᒋ ᑎᐯᑖᑯᓯᐗᑭᒡ᙮ ᑳᐐᓐ ᐃᐃ ᓂᑎᓀᑕᓰ ᒋᐃᔑᓭᑭᐸᓐ᙮ ᐐᓇᐙ ᓴ ᐱᑯ ᓂᑲ ᐱᓈᓯᑳᑯᓈᓂᒃ ᒋᓵᑭᒋ ᐐᒌᐎᔭᒥᑣ, ᐅᑮᐃᓈᐞ᙮

16:38b.ACT.016.038 ᐊᓂᑫᐎᑭᒫᒃ ᑕᔥ ᐅᑮᐊᐎ ᐐᑕᒪᐙᐙᐞ ᐅᓇᔓᐌᐎᑭᒫᐞ ᐋᓃᓐ ᑆᓬᐊᓐ ᑳᐃᑭᑐᓂᒡ᙮ ᐐᑫ ᑕᔥ ᑮᓭᑭᓯᐗᐞ ᐊᐲ ᐁᓅᑕᒥᓂᒡ ᐅᕒᐆᒥᕽ ᐁᑮᐅᒋ ᑎᐯᑖᑯᓯᓂᒡ ᑆᓬᐊᓐ ᐃᓂ ᑲᔦ ᓵᐃᓬᐊᓴᓐ᙮

16:39b.ACT.016.039 ᑮᐲᔖᐗᐞ ᐃᑕᔥ ᐁᑮᐱ ᑲᑴ ᐙᑲᐎᐃᑯᐙᒡ ᐯᑭᔥ ᐁᑮᐱ ᓵᑭᓯᐃᑯᐙᒡ ᑲᔦ᙮ ᒦᔥ ᑳᑮ ᑲᓅᓂᑯᐙᒡ ᓂᑯᒋ ᐃᒫ ᐆᑌᓈᕽ ᒋᐅᒋ ᐃᔖᐙᒡ᙮

16:40b.ACT.016.040 ᑭᐸᐅᑏᐎᑲᒥᑯᕽ ᑕᔥ ᑳᐃᔥᒀ ᐅᒋ ᓵᑲᐊᒧᐙᒡ, ᑮᐃᔖᐗᒃ ᓬᐃᑎᔭᐗᓐ ᐅᐙᑳᐃᑲᓂᓃᕽ᙮ ᒦᔥ ᐌᑎ ᑳᐃᔑ ᐙᐸᒫᐙᒡ ᐅᑌᐺᑕᒨᐞ ᐁᑮ ᑲᓅᓈᐙᒡ ᒋᒪᔥᑲᐌᑕᒥᓂᒡ᙮ ᒦᔥ ᑳᐊᓂᐃᔑᒫᒑᐙᒡ᙮

17

17:1b.ACT.017.001 ᑆᓬ, ᐊᐊ ᑕᔥ ᑲᔦ ᓵᐃᓬᐊᔅ ᐁᐱᒥ ᐊᔮᐙᒡ ᑮᔖᐳᔥᑳᐗᒃ ᐆᑌᓇᐗᓐ ᐋᐱᐸᓬᐃᔅ, ᐋᐸᓬᐆᓂᔭ ᐁᔑᓂᑳᑌᓂᑭᓐ᙮ ᐃᐃᒫ ᑕᔥ ᐆᑌᓈᕽ ᑌᓴᓬᐊᓇᐃᑲ ᐁᔑᓂᑳᑌᓂᒃ ᑮᐃᔑ ᑕᑯᔑᓅᒃ᙮ ᑮᐊᔮᓂ ᐃᒫ ᒎᐗᒃ ᐅᑕᓇᒥᐁᐎᑲᒥᑯᐙ᙮

17:2b.ACT.017.002 ᑆᓬ ᑕᔥ ᑳᑮ ᓂᑖ ᐃᔑᒋᑫᒡ, ᓂᓱ ᐊᓉᐲᐎ ᑮᔑᒃ ᑮᐲᑎᑫ ᒎᐎ ᐊᓇᒥᐁᐎᑲᒥᑯᕽ, ᐁᑮ ᑕᔑᑕᒫᑎᐙᒡ ᑭᒋᒪᓯᓇᐃᑲᓐ,

17:3b.ACT.017.003 ᐌᐌᓂ ᐁᑮᐐᑕᒪᐙᒡ, ᐁᑮᐙᐸᑕᐋᒡ ᑲᔦ ᐋᓃᓐ ᑳᑮᐅᒋ ᐃᔑᓭᓂᒃ ᒋᑲᒀᑕᑭᐃᒥᑎᐸᓐ ᑭᔐᒪᓂᑑ ᑳᑮᐅᓈᐸᒫᒡ ᒋᑮᐌ ᐱᒫᑎᓯᓂᒡ ᐃᑕᔥ ᐅᒋ ᓂᐳᐎᓂᕽ, ᐅᐅ ᐁᑮᐃᓈᒡ: ᒦ ᓴ ᐗᐊ ᒋᓴᔅ ᑳᑕᔑᑕᒪᐎᓇᑰᒃ, ᑭᔐᒪᓂᑑᓐ ᑳᑮᐅᓈᐸᒥᑯᒡ ᒋᐱᒫᒋᐃᐌᒡ᙮

17:4b.ACT.017.004 ᐋᓂᑕ ᑕᔥ ᒎᐗᒃ ᑮᑲᔥᑭᒫᐗᒃ ᒋᑌᐺᑕᒧᐙᒡ, ᒦᔥ ᑳᑮᐐᒌᐙᐙᒡ ᑆᓬᐊᓐ, ᓵᐃᓬᐊᓴᓐ ᑲᔦ᙮ ᒦᔥ ᐯᔑᑾᓐ ᑳᐊᔨᑎᐙᒡ ᑳᑮ ᐹᑏᓄᐙᒡ ᑳᓃᑳᓂᓯᐙᒡ ᐃᑴᐗᒃ᙮ ᐃᑭ ᑲᔦ ᑮᐹᑏᓄᐗᒃ ᑳᑮ ᑯᑖᓀᓂᒫᐙᒡ ᑭᔐᒪᓂᑑᓐ ᑲᕒᐄᑲᒃ ᑌᓄᐎᐙᒡ᙮

17:5b.ACT.017.005 ᒎᐗᒃ ᐃᑕᔥ ᑮᐋᔮᔐᑕᒨᒃ᙮ ᑳᑮ ᓂᑖ ᑕᓇᑖᐌᕽ ᑕᔥ ᐅᑮᐃᔑ ᓈᓯᑲᐙᐙᐞ ᐊᐎᔭᐞ ᑫᑰᓐ ᐁᓀᑖᑯᓯᓯᓂᒃ ᐁᑮᐅᑸᓄᐋᐙᒡ, ᒦᔥ ᑳᐃᔑ ᐅᒻᐺᑲᒥᑭᓯᐙᒡ ᐃᐃᒫ ᐆᑌᓈᕽ᙮ ᑮᐃᔑ ᒪᐎᓀᐃᑫᐗᒃ ᑕᔥ ᐅᐙᑳᐃᑲᓂᓃᕽ ᒉᓴᓇᓐ ᐁᑮᐊᑐᓀᐙᐙᒡ ᑆᓬᐊᓐ, ᓵᐃᓬᐊᓴᓐ ᑲᔦ, ᐁᐐᐃᔑᐎᓈᐙᒡ ᐁᔑ ᐹᑏᓄᓂᒡ ᐊᐎᔭᐞ᙮

17:6b.ACT.017.006 ᐊᐲ ᑕᔥ ᐁᒥᑲᐙᓯᒀ, ᒉᓴᓇᓐ ᓴ ᐃᐃ ᑲᔦ ᑯᑕᒃ ᐅᑌᐺᑕᒨᐞ ᐅᑮᐃᔑ ᐙᐐᑯᐱᓈᐙᐞ ᐁᔑ ᐊᔮᓂᒡ ᐆᑌᓈᐎᑭᒫᐞ ᐅᐅ ᐁᑮᐃᔑ ᔖᔖᑯᐌᐙᒡ: ᐃᑭ ᓴ ᐃᓂᓂᐗᒃ ᒥᓯᐌ ᐊᑮᕽ ᑳᐸᐹ ᐅᐯᑲᒥᑭᓯᐙᒡ ᑭᑑᑎᓯᑯᓈᓂᒃ᙮

17:7b.ACT.017.007 ᐗᐊ ᑕᔥ ᒉᓴᓐ ᐅᑮ ᐲᑎᑲᓈᐞ ᐅᐙᑳᐃᑲᓂᕽ᙮ ᓇᐹᒡ ᐃᓇᑫ ᐃᔑᑭᑭᓄᐃᑫᐗᐞ ᑳᐃᓇᑌᓂᑭᓐ ᒫᐗᒡ ᑭᒋᐅᑭᒫᓐ ᐁᓇᔓᐌᓂᒡ, ᐁᐃᑭᑐᓂᒡ ᑯᑕᒃ ᑭᒋᐅᑭᒫᓐ ᐁᐊᔮᓂᒡ ᒋᓴᔅ ᐁᐃᔑᓂᑳᓱᓂᒡ, ᑮᐃᔑ ᔖᑯᐌᐗᐞ᙮

17:8b.ACT.017.008 ᐃᑭ ᑕᔥ ᑳᑮ ᐹᑏᓄᐙᒡ ᐊᐎᔭᒃ, ᐃᑭ ᑲᔦ ᐆᑌᓈᐎᑭᒫᒃ ᐊᐲ ᐁᓅᑕᒧᐙᒡ ᐅᐅ, ᐐᑫ ᑮᓂᔑᐗᓈᑌᑕᒨᒃ᙮

17:9b.ACT.017.009 ᐅᑮ ᑎᐸᐃᑫᐋᐙᓐ ᐃᑕᔥ ᒉᓴᓇᓐ ᒥᓂᒃ ᑳᑮᓂᑖ ᑎᐸᐃᑫᐎᓐᒡ, ᐃᐃ ᑲᔦ ᑳᑮᐐᒌᐎᑯᓂᒡ, ᒦᔥ ᐸᔨᔥ ᑳᐃᔑ ᐸᑭᑎᓈᐙᒡ᙮

17:10b.ACT.017.010 ᔐᒫᒃ ᑕᔥ ᐁᑎᐱᑲᓂᓂᒃ ᐅᑌᐺᑕᒨᐞ ᑆᓬ, ᓵᐃᓬᐊᔅ ᑲᔦ ᐅᑮᐃᔑᓂᔕᐅᑯᐙᐞ ᒋᐃᔖᐙᒡ ᐱᕒᐄᔭ ᐆᑌᓈᕽ᙮ ᐊᐲ ᑕᔥ ᑌᑯᔑᓄᐙᒡ ᐌᑎ ᑮᐲᑎᑫᐗᒃ ᒎᐎ ᐊᓇᒥᐁᐎᑲᒥᑯᕽ᙮

17:11b.ACT.017.011 ᓇᐗᒡ ᑕᔥ ᐃᐃ ᐱᕒᐄᔭ ᐁᔮᓂᒡ ᑮᐱᓯᑕᒨᐞ, ᐁᑮᒨᒋᑫᑕᒥᓂᒡ ᑲᔦ ᐁᓅᑕᒥᓂᒡ ᐃᐃ ᑎᐹᒋᒧᐎᓐ ᐊᐲᒡ ᐐᓐ ᐃᐃ ᑌᓴᓬᐊᓇᐃᑲ ᐁᔮᓂᒡ᙮ ᐁᑕᓱ ᑮᔑᒃ ᑭᒋᒪᓯᓇᐃᑲᓂᕽ ᐅᑮᐃᔑ ᐊᑕᑭᑫᑕᒥᓂ ᑕᑲ ᒋᑌᐺᐗᓂᓂᑴᓐ ᑆᓬ ᑳᑮᐃᑭᑐᒡ᙮

17:12b.ACT.017.012 ᓃᐱᐗᐞ ᑕᔥ ᒎᐗᐞ ᑮᑌᐺᑕᒨᐞ, ᐃᐃ ᑲᔦ ᑳᑮᓃᑳᓀᑖᑯᓯᓂᒡ ᐃᑴᐗᐞ, ᓃᐱᐗᐞ ᑲᔦ ᑳᐃᓂᓃᐎᓂᒡ ᑲᕒᐄᑲᐞ ᑌᓄᐎᓂᒡ᙮

17:13b.ACT.017.013 ᒎᐗᒃ ᑕᔥ ᑌᓴᓬᐊᓇᐃᑲ ᑳᑮᐊᔮᐙᒡ ᑮᓅᑕᒨᒃ ᑆᓬᐊᓐ ᐱᕒᐄᔭ ᐆᑌᓈᕽ ᐁᑕᔑᑕᒥᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ᙮ ᑮᐃᔖᐗᒃ ᑕᔥ ᐌᑎ ᐁᑮᐊᐎ ᐅᒻᐺᐋᐙᒡ ᑳᑮ ᐹᑏᓄᓂᒡ ᐊᐎᔭᐞ ᐁᑮ ᒥᑯᔥᑳᑌᑕᒧᐋᐙᒡ᙮

17:14b.ACT.017.014 ᔐᒫᒃ ᑕᔥ ᐁᑎᐱᑲᓂᓂᒃ ᐅᑌᐺᑕᒨᐞ ᑆᓬ, ᐅᑮᐃᔑᓂᔕᐅᑯᐞ ᒋᐃᔖᒡ ᑭᒋᑲᒦᕽ ᐃᓇᑫ᙮ ᓵᐃᓬᐊᔅ ᐃᑕᔥ ᐐᓐ ᐊᐊ ᑲᔦ ᑎᒪᑎ ᑮᐊᐱᐗᒃ ᐃᒫ ᐱᕒᐄᔭ ᐆᑌᓈᕽ᙮

17:15b.ACT.017.015 ᐃᓂᓂᐗᐞ ᑕᔥ ᑳᑮᐐᒌᐎᑯᒡ ᑆᓬ ᐅᑮᐃᔑ ᐸᑲᒥᐐᒌᐎᑰᐞ ᐋᑎᓐᔅ ᐆᑌᓈᕽ᙮ ᒦᔥ ᐃᐃᒫ ᑳᐅᒋ ᑮᐌᓂᒡ ᐁᑮᐃᓈᒡ ᒋᐐᑕᒪᐙᓂᒡ ᓵᐃᓬᐊᓴᓐ, ᐃᓂ ᑲᔦ ᑎᒪᑏᓐ ᐐᐸ ᒋᐱ ᓈᓯᑳᑯᒡ᙮

17:16b.ACT.017.016 ᒣᒀ ᑕᔥ ᑆᓬ ᐁᐸᐲᐅᒡ, ᐋᐱᒋ ᑮᐅᒋ ᒥᑯᔥᑳᑌᑕᒻ ᐁᐙᐸᑕᕽ ᐃᐃ ᐆᑌᓇ ᒥᓯᐌ ᐁᐊᔮᓂᒡ ᒪᓂᑑᑳᓇᐞ᙮

17:17b.ACT.017.017 ᒦᑕᔥ ᑳᑮ ᑲᑲᓅᓈᒡ ᒎᐗᐞ ᐅᑕᓇᒥᐁᐎᑲᒥᑯᓃᕽ, ᐃᐃ ᑲᔦ ᑳᒎᐎᐎᓯᓂᒃ ᑴᑖᓀᓂᒫᓂᒡ ᑭᔐᒪᓂᑑᓐ᙮ ᐁᑕᓱ ᑮᔑᒃ ᑕᔥ ᑲᔦ ᐅᑮ ᑲᑲᓅᓈᐞ ᐃᐃ ᑳᑮᒪᔮᔥᑳᓂᒡ ᐃᐃᒫ ᑳᑮ ᑕᓇᑖᐌᕽ᙮

17:18b.ACT.017.018 ᐋᓂᑕ ᑕᔥ ᑭᑭᓄᐊᒫᑫᐎᓂᓂᐗᐞ ᑳᑮᐃᓂᒥᓐᒡ ᐁᐱᑯᕒᐄᔭᐗᒃ ᐃᐃ ᑲᔦ ᐃᔅᑑᐃᑾᒃ, ᐅᑮᒫᒌ ᑲᑴ ᔖᑰᓱᒥᑰᐞ᙮ ᐋᓂᑕ ᑕᔥ ᑮᐃᑭᑐᐗᐞ: ᐋᓃᓐ ᑕᔥ ᐃᓈ ᐁᑭᑐᒡ ᐊᐊ ᑳᑭᑫᑕᒨᑳᓱᒡ? ᑮᐃᑭᑐᐗᐞ᙮ ᐋᓂᑕ ᑕᔥ ᑲᔦ ᑮᐃᑭᑐᐗᐞ: ᒦ ᐃ ᐁᓂᑖᑯᓯᒡ ᐁᑕᔑᒫᒡ ᒪᔭᑭ ᒪᓂᑑ, ᑮᐃᑭᑐᐗᐞ᙮ ᒦᑕᔥ ᑳᑮᐅᒋ ᐃᑭᑐᓂᒡ ᐋᓃᔥ ᑆᓬ ᐅᑮ ᑕᔑᒫᓐ ᒋᓴᓲᓐ, ᐅᑮ ᑕᔑᑖᓐ ᑲᔦ ᑮᐌ ᐱᒫᑎᓰᐃᑰᐎᓐ᙮

17:19b.ACT.017.019 ᐅᑮᒫᒌ ᐐᔖᒥᑰᐞ ᑕᔥ ᐁᑮᐃᔑᐎᓂᑯᒡ ᐆᑌᓈᐎ ᐅᓇᔓᐌᐎᓂᓂᐗᐞ ᑳᑮᐃᔑ ᓂᑖ ᒫᐗᒋᐃᑎᓂᒡ, ᐁᕒᐃᔮᐸᑲᔅ ᐱᑾᑎᓈ ᐁᒋᑳᑌᓂᒃ᙮ ᒦᑕᔥ ᐃᐃᒫ ᑳᐃᔑ ᑲᑴᒋᒥᑯᒡ: ᓂᐐ ᑭᑫᑖᒥᓐ ᐅᐅ ᐅᔥᑭ ᑭᑭᓄᐃᑫᐎᓐ ᑳᐐᑕᒫᑫᔭᓐ᙮

17:20b.ACT.017.020 ᐋᓂᑕ ᓴ ᑫᑰᓇᓐ ᑳᐐᑕᒪᓐ ᐸᑳᓐ ᓂᑎᓂᑖᒥᓐ, ᓂᐐ ᑭᑫᑖᒥᓐ ᑕᔥ ᐋᓃᓐ ᐁᑭᑑᒪᑲᓄᑴᓇᓐ, ᐅᑮᐃᑰᐞ᙮

17:21b.ACT.017.021 ᑲᑭᓇ ᓴ ᐋᑎᓐᔅ ᐌᒌᐙᒡ, ᐃᑭ ᑕᔥ ᑲᔦ ᐸᑳᓐ ᐌᒌᐙᒡ ᐃᐃᒫ ᑳᑮᐃᔑ ᐆᑌᓈᑫᐙᒡ ᑳᐐᓐ ᑫᑰᓐ ᐅᑮᓅᒋᑑᓰᓈᐙ, ᒦ ᐁᑕ ᑯ ᐁᑮ ᑕᔑᑕᒧᐙᒡ, ᐁᑮ ᐱᓯᑕᒧᐙᒡ ᑲᔦ ᐅᔥᑭ ᑫᑰᓇᓐ᙮

17:22b.ACT.017.022 ᒦᔥ ᑆᓬ ᑳᑮ ᐸᓯᑸᒡ ᐁᓈᓴᒪᐱᓂᒡ ᑳᑮᒫᐗᒋᐃᑎᓂᒡ ᐃᐃᒫ ᐁᕒᐃᔮᐸᑲᓯᕽ ᐅᐅ ᐁᑮᐃᑭᑐᒡ: ᑮᓇᐙ ᐋᑎᓐᔅ ᐌᒌᔦᒃ! ᒥᓯᐌ ᓴ ᓇᑫ ᓂᑎᔑᐙᐸᑖᓐ ᐁᐊᓇᒥᐁᐎ ᐃᔑᐊᔮᔦᒃ᙮

17:23b.ACT.017.023 ᐁᐸᐹᒧᓭᔮᓐ ᓴ, ᐁᐙᐸᑕᒫᓐ ᑲᔦ ᐃᓂᐌᓂᐗᓐ ᐋᑎ ᐁᑕᔑ ᐊᓇᒥᐋᔦᒃ, ᓂᐙᐸᑖᓐ ᑲᔦ ᑳᔑ ᐸᑭᑎᓈᓱᔦᒃ ᐅᐅ ᐁᐃᔑᐲᐃᑳᑌᒃ: ᑳᐸᑭᑎᓇᒪᐎᓐᒡ ᑫᑫᒋᑲᓂᐎᓯᒃ ᒪᓂᑑ᙮ ᐃᐃ ᓴ ᑕᔥ ᑫᑰᓐ ᑳᐊᓇᒥᐁᑕᒣᒃ ᑫᑫᑕᓯᐌᒃ, ᒦ ᐃᐌ ᑳᐐ ᑕᔑᑕᒪᐎᓇᑰᒃ᙮

17:24b.ACT.017.024 ᑭᔐᒪᓂᑑ ᐅᑮᐅᔑᑑᓐ ᐊᑮᓂ, ᑲᑭᓇ ᑲᔦ ᑫᑰᓐ ᐃᐃᒫ ᐁᔮᓂᒃ, ᐅᑎᐯᑖᓐ ᑮᔑᒃ, ᐊᑮᓂ ᑲᔦ᙮ ᑳᐐᓐ ᐃᔑᑖᓰ ᐊᓇᒥᐁᐎᑲᒥᑯᕽ ᐅᓂᒌᒫᕽ ᑳᐅᒋ ᐅᔑᒋᑳᑌᓂᒃ᙮

17:25b.ACT.017.025 ᑳᐐᓐ ᐊᐎᔭᓐ ᓅᑌᓭᓰ ᒋᐸᒥᐃᑯᐸᓐ, ᑖᐱᔥᑰ ᑫᑰᓐ ᐁᓅᑌᓭᒡ᙮ ᐐᓐ ᐄᑐᒃ ᑳᒦᓈᒡ ᑲᑭᓇ ᐊᐎᔭᓐ ᐱᒫᑎᓯᐎᓐ, ᐸᑭᑕᓈᒧᐎᓐ ᑲᔦ, ᐐᓐ ᑲᔦ ᑲᑭᓇ ᑫᑰᓐ ᑳᒦᑭᐌᒡ᙮

17:26b.ACT.017.026 ᐯᔑᒃ ᑕᔥ ᐃᓂᓃᕽ ᐅᑮᐅᒋ ᐅᔑᐋᐞ ᑲᑭᓇ ᑳᑕᓶᐙᓇᑭᓯᓂᒡ ᐯᒫᑎᓯᓂᒡ ᒥᓯᐌ ᐅᐅᒫ ᐊᑮᕽ ᒋᑕᔑ ᐱᒫᑎᓯᓂᒡ᙮ ᐐᓐ ᐅᑮᐅᓇᑕᒪᐙᐞ ᐋᓃᓐ ᒪᔮ ᐊᐲ, ᐋᓃᑎ ᑲᔦ ᒪᔮ ᑫᔑ ᑲᐯᔑᓂᒡ᙮

17:27b.ACT.017.027 ᒦᑕᔥ ᑳᑮᐅᒋ ᐃᔑᒋᑫᒡ, ᐋᑎ ᐱᑯ ᐁᔑ ᐊᑐᓀᐅᑯᒡ, ᒋᒥᑳᑯᒡ᙮ ᑳᐐᓐ ᐄᑐᒃ ᐙᓴ ᑌᓀᑖᑯᓯᓰ᙮

17:28b.ACT.017.028 ᐅᐅ ᓴ ᐊᐎᔭ ᑮᐃᑭᑐᑯᐸᓐ: ᐐᓐ ᐄᑐᒃ ᐅᒋ ᑳᐅᒋ ᐱᒫᑎᓯᔭᕽ, ᑳᐅᒋ ᐗᑲᐐᔭᕽ ᑲᔦ, ᑲᔦ ᑕᔥ ᑳᐅᒋ ᐊᔮᔭᕽ᙮ ᒦᓴᐃ ᑳᐃᑭᑐᐙᑯᐸᓀᓐ ᑭᓂᑲᒨᐎᓂᓃᒥᐙᒃ: ᑮᓇᐎᓐᑦ ᓴ ᑭᑑᓃᒑᓂᓯᒥᑯᓈᓐ, ᑮᑭᑑᐙᑯᐸᓐ᙮

17:29b.ACT.017.029 ᑭᔐᒪᓂᑑ ᑕᔥ ᐁᐅᓃᒑᓂᓯᒥᓇᕽ, ᑳᐐᓐ ᑭᑖ ᐃᓀᓂᒫᓯᐙᓈᓐ ᐁᑎᓄᐎᒡ ᐅᓵᐙᐱᑯᕽ, ᑯᒫ ᑲᔦ ᐙᐹᐱᑯᕽ ᑳᐅᒋ ᐅᔑᒋᑲᓂᐎᒡ, ᑯᒫ ᑲᔦ ᐊᓯᓐ ᑳᒪᓯᓈᐱᑲᐅᑯᒡ ᐃᓂᓂᐗᐞ ᐁᔑ ᐗᐐᔒᓂᒡ᙮

17:30b.ACT.017.030 ᑳᐐᓐ ᐄᑐᒃ ᑭᔐᒪᓂᑑ ᑮᐸᐹᐱᓯᔅᑫᑕᓰ ᐅᑖᓇᕽ ᐁᑮ ᑭᑫᓂᒫᓯᐎᓐᒡ᙮ ᓅᑯᒻ ᑕᔥ ᐐᓐ ᐅᑲᓅᓈᐞ ᑲᑭᓇ ᐯᒫᑎᓯᓂᒡ ᒥᓯᐌ ᐁᔮᓂᒡ ᒋᑴᑭ ᐱᒫᑎᓯᓂᒡ᙮

17:31b.ACT.017.031 ᐋᔕ ᐅᔕ ᐅᑮᐅᓇᑑᓐ ᑮᔑᑲᓐ ᐅᑾᔭᒀᑎᓯᐎᓂᕽ ᐁᐐᐅᒋ ᑎᐹᑯᓈᒡ ᑲᑭᓇ ᐊᐎᔭᐞ ᐁᔮᓂᒡ ᐊᑮᕽ, ᐁᐐ ᔮᐸᒋᐋᒡ ᐃᓂ ᐃᓂᓂᐗᓐ ᑳᑮᐅᓈᐸᒫᒡ᙮ ᐐᑫ ᐅᑮᐯᑖ ᓈᑯᑕᒪᐙᓐ ᑲᑭᓇ ᐊᐎᔭᓐ ᐃᐃ ᐁᐐᐃᔑᒋᑫᒡ, ᒦᔥ ᑳᑮᐅᒋ ᑮᐌ ᐱᒫᑎᓰᐋᒡ ᒋᓴᓲᓐ ᓂᐳᐎᓂᕽ ᐅᒋ, ᐅᑮᐃᔑ ᑲᑲᓅᓈᐞ᙮

17:32b.ACT.017.032 ᐋᐲ ᑕᔥ ᑆᓬ ᐁᓅᑖᑯᒡ ᐁᑕᔑᑕᕽ ᑮᐌ ᐱᒫᑎᓯᐎᓐ, ᐋᓂᑕ ᑕᔥ ᐅᑮ ᐹᐱᓄᑖᑰᐞ᙮ ᐋᓂᑕ ᑕᔥ ᐐᓐ ᐅᑮᐃᑰᐞ: ᒦᓇᐙ ᓴ ᑭᐐᓅᑖᑰ ᐅᐅ ᒋᑕᔑᑕᒪᓐ, ᐅᑮᐃᑰᐞ᙮

17:33b.ACT.017.033 ᒦᑕᔥ ᐃᐃᒫ ᑆᓬ ᑳᐅᒋ ᒫᒑᒡ᙮

17:34b.ACT.017.034 ᐋᓂᑕ ᑕᔥ ᐊᐎᔭᐞ ᐅᑮᐐᒌᐎᑰᐞ, ᐁᑮ ᑌᐺᑕᒥᓂᒡ ᑲᔦ᙮ ᐃᓂ ᑕᔥ ᑲᔦ ᐯᔑᒃ ᑳᑮᐅᒋ ᑎᐯᑖᑯᓯᓂᒡ ᐅᓇᔓᐌᐎᓂᕽ ᐁᕒᐃᔮᐸᑲᔅ ᑳᔑ ᒫᐗᒋᐃᑎᓂᒡ, ᐃᓂ ᑲᔦ ᐃᑴᐗᓐ ᑖᒪᕒᐃᔅ ᐁᔑᓂᑳᓱᓂᒡ, ᑯᑕᒃ ᑲᔦ ᐊᐎᔭᐞ ᐅᑮᐐᒌᐎᑰᐞ᙮

18

18:1b.ACT.018.001 ᐊᐲ ᑕᔥ ᐅᐅ ᑳᐃᔥᒀ ᐃᔑᓭᒃ, ᑆᓬ ᐅᑮᓇᑲᑖᓐ ᐋᑎᓐᔅ ᐆᑌᓇ᙮ ᐌᑎ ᑕᔥ ᑮᐃᔑ ᑕᑯᔑᓐ ᒀᕒᐃᓐᑦ ᐆᑌᓈᕽ᙮

18:2b.ACT.018.002 ᒦᑕᔥ ᑳᑮ ᐙᐸᒫᒡ ᐯᔑᒃ ᒎᐗᓐ ᐊᑶᓬᐊ ᐁᔑᓂᑳᓱᓂᒡ ᐹᑕᔅ ᐊᑮᕽ ᐌᒌᓂᒡ᙮ ᓅᒪᔩᑫ ᐃᑕᓬᐃ ᐊᑮᕽ ᑮᐲᐅᒋ ᑕᑯᔑᓅᓐ ᐁᑮᐱ ᐐᒌᐙᓂᒡ ᐐᐎᓂ ᐸᕒᐃᓯᓬᐊ ᐁᔑᓂᑳᓱᓂᒡ᙮ ᒫᐗᒡ ᑭᒋᐅᑭᒫᓐ ᑲᓬᐋᑎᔭᓴᓐ ᐄᑐᒃ ᑮᐃᓈᑯᓂᑫᐗᓐ ᑲᑭᓇ ᒎᐗᐞ ᓂᑯᒋ ᐅᕒᐆᒻ ᐆᑌᓈᕽ ᒋᐅᒋ ᐃᔖᓂᒡ᙮

18:3b.ACT.018.003 ᒦᐗᓐ ᐃᑕᔥ ᐃᓂ ᑳᐐᒋᐊᔮᒫᒡ ᐁᑮᐐᑕᓄᑮᒫᒡ ᐋᓃᔥ ᐯᔑᑾᓐ ᑮᐃᓇᓄᑮᐗᒃ ᐁᑮᐅᔑᑑᐙᒡ ᐸᒀᓀᑲᒥᑰᓐ᙮

18:4b.ACT.018.004 ᐁᑕᓱ ᐊᓉᐲᐎ ᑮᔑᑲᓂᓂᒃ ᑕᔥ ᐊᓇᒥᐁᐎᑲᒥᑯᕽ ᐅᑮ ᑕᔑᑲᑴ ᑲᔥᑭᒫᐞ ᒎᐗᐞ, ᐃᐃ ᑲᔦ ᑲᕒᐄᒃ ᑌᓄᐎᓂᒡ᙮

18:5b.ACT.018.005 ᐊᐲ ᑕᔥ ᓵᐃᓬᐊᓴᓐ, ᑎᒪᑏᓐ ᑲᔦ ᒫᓯᑑᓂᔭ ᐊᑮᕽ ᑳᐱᐅᒋ ᑕᑯᔑᓂᓂᒡ, ᑆᓬ ᒦ ᐃ ᐱᔑᔑᒃ ᑳᐃᔑᒋᑫᒡ ᐁᑮ ᑕᔑᑕᒪᐙᒡ ᒎᐗᐞ ᐅᑎᑭᑐᐎᓂᓂ ᑳᑎᐯᒋᑫᓂᒡ, ᐁᑮᐐᑕᒪᐙᒡ ᒋᓴᓲᓐ ᐊᔮᐎᓂᒡ ᑳᑮᐅᓈᐸᒥᑯᓂᒡ ᑭᔐᒪᓂᑑᓐ᙮

18:6b.ACT.018.006 ᐊᐲ ᑕᔥ ᐁᓇᓈᑴᑖᑯᒡ ᒎᐗᐞ, ᓅᒋᑯ ᑲᔦ ᐁᐃᑯᒡ, ᒦᔥ ᑳᐃᔑ ᐹᐹᐎᐌᐱᓇᕽ ᐅᑭᑭᔥᑭᑲᓇᓐ ᐅᐅ ᐁᑮᐃᓈᒡ: ᑮᓇᐙ ᓴ ᐱᑯ ᑭᑲ ᓈᓯᑳᑯᒻ ᑫᑲᔥᑭᑕᒫᓱᔦᒃ, ᑳᐐᓐ ᑫᑰᓐ ᐃᐃ ᓂᑲ ᐸᐹᒥᓯᓰ᙮ ᒦᑕᔥ ᐃᑕᐙ ᒣᔥᑾᒡ ᒋᓈᓯᑲᐗᒀ ᑳᒎᐎᐎᓯᒀ, ᐅᑮᐃᓈᐞ᙮

18:7b.ACT.018.007 ᒦᑕᔥ ᐃᐃᒫ ᑳᐃᔑ ᓇᑲᓈᒡ᙮ ᐃᓂᓂᐗᓐ ᐃᑕᔥ ᑏᑎᔭᔅ ᒐᔅᑕᔅ ᐁᔑᓂᑳᓱᓂᒡ ᐅᑮ ᐲᑎᑲᐙᓐ ᐅᐙᑳᐃᑲᓂᓃᕽ ᐯᔓ ᐁᔑᑖᓂᒡ ᐊᓇᒥᐁᐎᑲᒥᑯᕽ᙮ ᒦᐗᓐ ᐃᓂ ᑳᑮᐊᓇᒥᐁᑕᐙᓂᒡ ᑭᔐᒪᓂᑑᓐ᙮

18:8b.ACT.018.008 ᑲᕒᐃᔅᐸᔅ ᑕᔥ ᑳᑎᐯᑕᕽ ᐊᓇᒥᐁᐎᑲᒥᒃ ᐅᑮ ᑌᐺᔦᓂᒫᓐ ᑳᑎᐯᒋᑫᓂᒡ, ᑲᑭᓇ ᑲᔦ ᐁᔮᓂᒡ ᐅᑖᐎᓂᕽ᙮ ᓃᐱᐗᐞ ᑕᔥ ᒀᕒᐃᓐᑦ ᐆᑌᓈᕽ ᐌᒌᓂᒡ ᑳᑮᓅᑕᒥᓂᒡ ᑮᑌᐺᑕᒨᐞ, ᑮᓰᑲᐊᑖᓱᐗᐞ ᑲᔦ᙮

18:9b.ACT.018.009 ᐁᑎᐱᑲᓂᓂᒃ ᑕᔥ ᑆᓬ ᐃᔑᓇᒧᐎᓂᕽ ᐅᑮᐅᒋ ᑲᓅᑭᑰᓐ ᑳᑎᐯᒋᑫᓂᒡ ᐁᑮᐃᑯᒡ: ᑫᑯ ᓭᑭᓯᑫᓐ, ᒫᓄ ᑯ ᑳᑮᑭᑐᓐ, ᑫᑯ ᓅᑌᐸᑭᒌᑫᓐ᙮

18:10b.ACT.018.010 ᓃᓐ ᐅᔕ ᑭᐐᒌᐎᓐ, ᑳᐐᓐ ᐊᐎᔭ ᑭᑲ ᒦᑳᓂᑯᓰ ᒋᐐᓴᑳᐱᓇᓂᒃ, ᓃᐱᐗᐞ ᐅᔕ ᐅᐅᒫ ᐆᑌᓈᕽ ᐊᔮᐗᒃ ᐊᐎᔭᒃ ᑌᐯᓂᒪᒀ, ᐅᑮᐃᑰᓐ᙮

18:11b.ACT.018.011 ᑆᓬ ᐃᐃᒫ ᑮᐊᔮ ᐯᔑᑯ ᐋᐱᑕ ᐱᐴᓐ ᐁᑮ ᑭᑭᓄᐊᒪᐙᒡ ᐯᒫᑎᓯᓂᒡ ᑭᔐᒪᓂᑑᓐ ᐅᑎᑭᑐᐎᓂᓂ᙮

18:12b.ACT.018.012 ᐊᐲ ᑕᔥ ᑳᓬᐃᐅ ᑮᐅᓇᔓᐌᐎᑭᒫᐎᒡ ᐊᑫᔭ ᐊᑮᕽ, ᒎᐗᐞ ᐅᑮᒫᒪᐎ ᐅᑎᑎᓂᑰᐞ ᑆᓬ ᐁᑮᐃᔑᐎᓂᑯᒡ ᐅᓇᔓᐌᐎᑲᒥᑯᕽ

18:13b.ACT.018.013 ᐁᑮᐃᑭᑐᓂᒡ: ᐗᐊ ᓴ ᐃᓂᓂ ᐅᑲᑴ ᑲᔥᑭᒫᐞ ᐊᐎᔭᐞ ᓇᐹᒡ ᐃᓇᑫ ᒋᔑ ᐊᓇᒥᐁᑕᐙᓂᒡ ᑭᔐᒪᓂᑑᓐ, ᑳᐐᓐ ᐁᔑᓯᓂᓂᒃ ᐅᓇᔓᐌᐎᓐ, ᑮᐃᑭᑐᐗᐞ᙮

18:14b.ACT.018.014 ᑆᓬ ᑕᔥ ᐃᑯ ᐁᐐᐊᓂ ᑮᑭᑐᒡ, ᑳᓬᐃᐅᓐ ᑮᐅᒋ ᑮᑭᑐᐗᓐ ᐁᐃᓈᓂᒡ ᒎᐗᐞ: ᑮᔥᐱᓐ ᐃᓴ ᐅᐌ ᓅᒋᑯ ᑫᑰᓐ, ᑯᒫ ᑲᔦ ᒪᒫᔑᐎᓐ ᑎᓄᐗᑭᐸᓐ, ᑖᑮᐃᔑᓈᑾᓅᐸᓐ ᐄᑐᒃ ᒋᑮ ᐱᓯᑕᐎᓇᑰᑭᐸᓐ᙮

18:15b.ACT.018.015 ᑮᔥᐱᓐ ᑕᔥ ᐐᓐ ᐁᑕ ᐃᑭᑐᐎᓇᓐ, ᐐᓱᐎᓇᓐ ᑲᔦ, ᐃᐃ ᑲᔦ ᐅᑑᓇᔓᐌᐎᓂᐙ ᐅᒋ ᑮᑳᑎᔦᒃ, ᑮᓇᐙ ᐱᑯ ᐐᓐ ᐃᐃ ᓇᓇᐊᑑᒃ᙮ ᑳᐐᓐ ᓃᓐ ᑫᑰᓐ ᓂᐐᐃᓈᑯᓂᑫᓰ, ᐅᑮᐃᓈᐞ᙮

18:16b.ACT.018.016 ᒦᑕᔥ ᑳᐃᔑ ᓵᑭᒋᓂᔕᐙᒡ ᐃᐃᒫ ᐅᓇᔓᐌᐎᑲᒥᑯᕽ᙮

18:17b.ACT.018.017 ᐅᑮᐅᑎᑎᓈᓂ ᑕᔥ ᓵᔅᑎᓃᓴᓐ ᑳᑎᐯᑕᒥᓂᒡ ᐊᓇᒥᐁᐎᑲᒥᒃ ᐁᑮ ᐸᐸᑭᑌᐙᐙᒡ ᐃᐃᒫ ᐊᑾᒌᕽ ᐅᓇᔓᐌᐎᑲᒥᑯᕽ᙮ ᑳᐐᓐ ᑳᓬᐃᐅ ᐊᐙᒡ ᐅᑮ ᐸᐹᐱᓯᔅᑫᓂᒫᓰᐞ᙮

18:18b.ACT.018.018 ᑭᓉᔥ ᑕᔥ ᐃᐃᒫ ᒀᕒᐃᓐᑦ ᐆᑌᓈᕽ ᑆᓬ ᑮᐊᔮ᙮ ᒦᑕᔥ ᑳᐃᔑ ᓇᑲᓈᒡ ᐅᑌᐺᑕᒨᐞ ᐁᑮᐃᓈᔑᒡ ᐌᑎ ᓰᕒᐃᔭ ᐊᑮᕽ, ᐁᑮᐐᒌᐎᑯᒡ ᐊᑶᓬᐊᐗᓐ, ᐸᕒᐃᓯᓬᐊᐗᓐ ᙮ ᒋᑆ ᒫᒌᔮᔑᒡ ᑕᔥ ᐌᑎ ᓭᑲᕒᐄᔭ ᐅᑮᐸᔥᑯᔖᓐ ᐅᑎᒀᓐ, ᐋᓃᔥ ᑮᐃᔑ ᐊᐱᒧᓄᑕᐙᑯᐸᓐ ᑭᔐᒪᓂᑑᓐ᙮

18:19b.ACT.018.019 ᑮᐱ ᑕᑯᔑᓅᒃ ᑕᔥ ᐃᐃᒫ ᐁᐱᓴᔅ ᐆᑌᓈᕽ ᐁᒋᑳᑌᓂᒃ᙮ ᒦᑕᔥ ᐃᐃᒫ ᑳᑮᐃᔑ ᓇᑲᓈᒡ ᐊᑶᓬᐊᐗᓐ, ᐸᕒᐃᓯᓬᐊᐗᓐ ᑲᔦ᙮ ᐐᓐ ᑕᔥ ᐐᓐ ᑮᐲᑎᑫ ᒎᐎᐊᓇᒥᐁᐎᑲᒥᑯᕽ ᐁᑮ ᑕᔑᑕᒪᐙᒡ ᒎᐗᐞ ᑫᑰᓇᓐ᙮

18:20b.ACT.018.020 ᐊᐲ ᑕᔥ ᐁᑲᑴᒋᒥᑯᒡ ᑫᔮᐱ ᑭᓉᔥ ᐃᐃᒫ ᒋᑮᐊᔮᐸᓐ, ᑳᐐᓐ ᑮᐃᓀᑕᓰ᙮

18:21b.ACT.018.021 ᐊᐲ ᑕᔥ ᑳᐴᔔᐋᒡ ᐅᑮᐃᓈᐞ: ᒦᓇᐙ ᑭᑲ ᐱᐊᑕ ᐙᐸᒥᓂᓂᒻ ᑮᔥᐱᓐ ᑭᔐᒪᓂᑑ ᐃᓀᑕᕽ, ᐅᑮᐃᓈᐞ᙮ ᐁᐱᓴᓯᕽ ᑕᔥ ᑮᐅᒋ ᒫᒌᔮᔑ᙮

18:22b.ACT.018.022 ᐊᐲ ᑕᔥ ᑳᑲᐹᒡ ᓭᓴᕒᐄᔭᐃᕽ ᑮᑯᐲ ᐁᑮᐃᔖᒡ ᐌᑎ ᒉᕒᐆᓴᓬᐊᒥᕽ ᐁᑮ ᐴᔔᐋᒡ ᐅᑌᐺᑕᒨᐞ ᑳᒫᐗᒋᐃᑎᓂᒡ᙮ ᒦᔥ ᑳᐃᔑ ᐃᔖᒡ ᐌᑎ ᐁᑎᔮᒃ ᐆᑌᓈᕽ᙮

18:23b.ACT.018.023 ᑭᓉᔒᔥ ᐃᑕᔥ ᐃᑯ ᐃᐃᒫ ᑮᐊᔮ᙮ ᒦᑕᔥ ᑳᑮᒫᒑᒡ ᒥᓯᐌ ᐁᑮᐸᐹ ᐃᔖᒡ ᑲᓬᐁᔑᔭ ᐊᑮᕽ, ᐸᕒᐃᒋᔭᑮᕽ ᑲᔦ, ᐁᑮᐸᐹ ᒪᔥᑲᐎᓰᐋᒡ ᑲᑭᓇ ᐅᑌᐺᑕᒨᐞ᙮

18:24b.ACT.018.024 ᐯᔑᒃ ᑕᔥ ᒎ ᐊᐹᓬᐊᔅ ᐁᔑᓂᑳᓱᒡ, ᐋᓬᐃᑭᓵᑕᕒᐃᔭ ᐆᑌᓈᕽ ᐁᐅᒌᒡ ᑮᐱ ᑕᑯᔑᓐ ᐃᐃᒫ ᐁᐱᓴᔅ ᐆᑌᓈᕽ᙮ ᐐᑫ ᑮᓂᑖ ᑲᑭᑐ, ᓃᐱᐗᐞ ᑲᔦ ᐅᑮ ᑭᑫᑖᓐ ᑭᒋᒪᓯᓇᐃᑲᓐ᙮

18:25b.ACT.018.025 ᐗᐊ ᓴ ᐃᓂᓂ ᑮᑭᑭᓄᐊᒪᐙᐎᑎᐸᓐ ᐃᓇᑫ ᑫᔑ ᓈᓯᑲᐎᒥᓐᒡ ᑳᑎᐯᒋᑫᓂᒡ, ᐐᑫ ᑕᔥ ᑮᐋᑯᒋᑫ ᐁᑕᔑᑕᕽ, ᐁᑭᑭᓄᐊᒫᑫᒡ ᐁᓈᒋᒥᒥᓐᒡ ᒋᓴᓲᓐ᙮ ᒞᓇᓐ ᑕᔥ ᑳᑮᐃᔑ ᓰᑲᐊᑖᑫᓂᒡ ᐁᑕ ᐅᑮ ᑭᑫᑖᓐ᙮

18:26b.ACT.018.026 ᑮᒫᒌ ᑲᑮᑴ ᑕᔥ ᐃᐃᒫ ᐊᓇᒥᐁᐎᑲᒥᑯᕽ ᐁᑮ ᓲᑭᑌᐁᒡ᙮ ᐊᐲ ᑕᔥ ᐊᑶᓬᐊᐗᓐ, ᐸᕒᐃᓯᓬᐊᐗᓐ ᑲᔦ ᐁᓅᑖᑯᒡ ᐅᑮᑮᐌ ᐐᔖᒥᑰᐞ ᐁᔑᑖᓂᒡ ᐊᐗᔑᒣ ᐁᑮᐯᑌ ᐐᑕᒫᑯᒡ ᐃᓇᑫ ᑳᔑ ᓈᓯᑲᐎᒥᓐᒡ ᑭᔐᒪᓂᑑᓐ᙮

18:27b.ACT.018.027 ᐊᐹᓬᐊᔅ ᑕᔥ ᑮᐃᓀᑕᒻ ᒋᐃᔖᒡ ᐊᑫᔭ ᐊᑮᕽ, ᐅᑌᐺᑕᒨᐞ ᑕᔥ ᐅᑮ ᑲᑳᓱᒥᑰᐞ ᐱᓵᓐ ᒋᐃᔖᒡ, ᐁᑮᐅᔑᐲᐊᒪᐙᓂᒡ ᐅᑌᐺᑕᒨᐞ ᐌᑎ ᐁᔮᓂᒡ ᒋᐲᑎᑲᓂᑯᒡ᙮ ᐊᐲ ᑕᔥ ᐌᑎ ᑳᑕᑯᔑᕽ ᐅᑮᑭᒋ ᐐᒋᐋᐞ ᐃᐃ ᑳᑮᐅᒋ ᑌᐺᑕᒥᓂᒡ ᑭᔐᒪᓂᑑᓐ ᐅᑭᔐᐙᑎᓯᐎᓂᓃᕽ᙮

18:28b.ACT.018.028 ᐐᑫ ᑕᔥ ᑮᒪᔥᑲᐎᑮᔗ ᐁᑮ ᔖᑰᓱᒫᒡ ᒎᐗᐞ ᐁᔑ ᐹᑏᓄᓈᓂᐗᓂᓂᒃ, ᑭᒋᒪᓯᓇᐃᑲᓂᕽ ᐁᑮᐅᒋ ᐯᑌᓈᑯᑑᒡ ᒋᓴᓲᓐ ᐁᔮᐎᓂᒡ ᑭᔐᒪᓂᑑ ᐅᑐᐅᓈᐸᒋᑲᓇᓐ ᒋᐱᒫᒋᐃᐌᓂᒡ᙮

19

19:1b.ACT.019.001 ᒣᒀ ᑕᔥ ᐊᐹᓬᐊᓴᓐ ᐁᐊᔮᓂᒡ ᒀᕒᐃᓐᑦ ᐆᑌᓈᕽ, ᑆᓬ ᑮᔖᐳᔥᑳ ᐃᐃᒫ ᐊᑮᕽ, ᐁᐱᓴᔅ ᐆᑌᓈᕽ ᑕᔥ ᑮᐃᔑ ᑕᑯᔑᓐ᙮ ᐅᑮᒥᑲᐙᐞ ᑕᔥ ᐋᓂᑕ ᐅᑌᐺᑕᒨᐞ᙮

19:2b.ACT.019.002 ᒦᑕᔥ ᑳᐃᓈᒡ: ᑭᑮᒦᓂᑰᐎᓯᒻ ᐃᓇ ᑭᔐᒪᓂᑑ ᐅᑕᒑᑾᓐ ᐊᐲ ᑮᑌᐺᔦᑕᒣᒃ? ᒦᔥ ᑳᐃᑯᒡ: ᑳᐐᓐ ᑲᓇᑫ ᓂᓅᑕᓰᒥᓐ ᐁᐊᔮᓂᑴᓐ ᑭᔐᒪᓂᑑ ᐅᑕᒑᑾᓐ, ᐅᑮᐃᑰᐞ᙮

19:3b.ACT.019.003 ᐅᑮᐃᔑ ᑲᑴᒋᒫᐞ ᐃᑕᔥ: ᐋᓃᓐ ᑕᔥ ᑳᐃᔑ ᓰᑲᐊᑖᑰᔦᒃ? ᒞᓐ ᐅᓰᑲᐊᑖᑫᐎᓂᕽ, ᐅᑮᐃᑰᐞ᙮

19:4b.ACT.019.004 ᑆᓬ ᑕᔥ ᐅᑮᐃᓈᐞ: ᒞᓐ ᓴ ᐅᑮ ᓰᑲᐊᑕᐙᐞ ᐃᐃ ᑳᑮ ᑴᑮᓄᑕᒥᓂᒡ ᐅᒪᒋᑑᑕᒧᐎᓂᓂ᙮ ᒞᓐ ᐅᑮ ᐐᑕᒪᐙᐞ ᐯᒫᑎᓯᓂᒡ ᑮᐃᔥᒀᐊᔮᒡ ᒋᑌᐺᔦᓂᒫᓂᒡ ᐃᓂ ᑫᐱ ᑕᑯᔑᓂᓂᒡ, ᒋᓴᓲᓐ ᑕᔥ ᐃᓂ ᑳᑮᐃᓈᒡ, ᐅᑮᐃᓈᐞ᙮

19:5b.ACT.019.005 ᐊᐲ ᑕᔥ ᐅᐅ ᐁᓅᑕᒥᓂᒡ, ᑮᓰᑲᐊᑖᓱᐗᐞ ᐅᐐᓱᐎᓂᓃᕽ ᑳᑎᐯᒋᑫᓂᒡ ᒋᓴᓲᓐ᙮

19:6b.ACT.019.006 ᐊᐲ ᑕᔥ ᑆᓬ ᑳᓵᒥᓈᒡ ᐅᑮᐅᑎᓯᑯᓂ ᑭᔐᒪᓂᑑᓐ ᐅᑕᒑᑯᓂ, ᒦᔥ ᐯᐸᑳᓐ ᑳᐃᔑ ᐊᔩᔑᑮᔗᓂᒡ, ᐁᑮᐐᑕᒫᑫᓂᒡ ᑲᔦ ᑭᔐᒪᓂᑑᓐ ᐅᑎᑭᑐᐎᓂᓂ᙮

19:7b.ACT.019.007 ᓂᑯᒋ ᑯ ᑮᒥᑖᔑᓃᔑᐗᐞ 12 ᑕᔥ ᐃᐃ ᐃᓂᓂᐗᐞ᙮

19:8b.ACT.019.008 ᑆᓬ ᑮᐲᑎᑫ ᒎᐎ ᐊᓇᒥᐁᐎᑲᒥᑯᕽ᙮ ᓂᓱᑮᓯᔅ 3 ᑕᔥ ᒥᓂᒃ ᐅᑮᑲᑴ ᔖᑰᓱᒫᐞ ᐁᑮ ᑕᔑᑕᕽ ᐁᓇᑌᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮

19:9b.ACT.019.009 ᐋᓂᑕ ᑕᔥ ᑮᒪᒪᔦᒋᐎᐗᐞ, ᐁᑮ ᔕᔒᐱᑕᒥᓂᒡ ᑲᔦ, ᒧᔐ ᑕᔥ ᐁᔑ ᐹᑏᓄᓈᓂᐗᓂᓂᒃ ᐅᑮᒪᒋᐃᑕᒥᓂ ᐌᒋ ᓈᓯᑲᐎᒥᓐᒡ ᐃᓇᑫ ᑭᔐᒪᓂᑑᓐ᙮ ᒦᑕᔥ ᑳᐃᔑ ᓇᑲᓈᒡ, ᐁᑮᒫᒌᓈᒡ ᐅᑌᐺᑕᒨᐞ᙮ ᐁᑕᓱ ᑮᔑᒃ ᑕᔥ ᑮᑕᔑ ᑲᑲᓅᔑᐌ ᐃᐃᒫ ᐙᑳᐃᑲᓂᕽ ᑕᐃᕒᐋᓇᓴᓐ ᑳᑮ ᓂᑖ ᑕᔑ ᑭᑭᓄᐊᒫᑫᓂᒡ᙮

19:10b.ACT.019.010 ᓃᔓ ᐱᐴᓐ ᑕᔥ ᐃᐃ ᑮᐃᔑᓭ, ᑲᑭᓇ ᑕᔥ ᒎᐗᒃ, ᑲᕒᐄᒃ ᑲᔦ ᑎᓄ ᑳᑮᐃᔑᑖᐙᒡ ᐃᐃᒫ ᐁᔑᔭ ᐊᑮᕽ ᐅᑮᓅᑖᓈᐙ ᐅᑎᑭᑐᐎᓂᓂ ᑳᑎᐯᒋᑫᓂᒡ᙮

19:11b.ACT.019.011 ᑭᔐᒪᓂᑑ ᑕᔥ ᓃᐱᐗᐞ ᒫᒪᑳᒋᒋᑫᐎᓇᓐ ᑮᐃᔑᒋᑫ ᑆᓬᐊᓐ ᐁᑮᐋᐸᒋᐋᒡ᙮

19:12b.ACT.019.012 ᓈᐱᑳᑲᓀᓴᐞ, ᐋᑰᐱᓱᓇᓐ ᑲᔦ ᑳᑮ ᓵᒥᔥᑳᑯᒡ ᑆᓬ ᑮᐃᔑᐎᑕᐙᐗᐞ ᐅᑖᑯᓰᐞ, ᒦᔥ ᑳᑮᓇᑲᓂᑯᓂᒡ ᐁᓈᐱᓀᓂᒡ, ᒪᒋᐊᒑᑾᐞ ᑲᔦ ᐁᑮᓇᑲᓂᑯᓂᒡ᙮

19:13b.ACT.019.013 ᐋᓂᑕ ᑕᔥ ᒎᐗᒃ ᑮᐸᐹᒥ ᐊᔮᐗᒃ ᐁᑮᐸᐹ ᓵᑭᒋᓂᔕᐙᐙᒡ ᒪᒋᐊᒑᑾᐞ᙮ ᐅᑮᑲᑴ ᐋᐸᒋᑑᓈᐙ ᐅᐐᓱᐎᓂᓂ ᑳᑎᐯᒋᑫᓂᒡ ᒋᓴᓲᓐ ᒋᑲᔥᑭᐋᐙᒡ ᐃᓂᐌᓂᐗᓐ ᑳᑮ ᑭᑭᔥᑳᑯᓂᒡ ᒪᒋᐊᒑᑾᓐ, ᐅᐅ ᐁᑮᐃᑭᑐᐙᒡ: ᑭᑑᒋ ᑲᓅᓂᓐ ᒋᓴᔅ ᐅᐐᓱᐎᓂᕽ, ᑆᓬ ᑳᑲᑮᒀᓈᒡ, ᒋᐅᒋ ᓵᑲᐊᒪᓐ ᐃᐃᒫ, ᑮᐃᑭᑐᐗᒃ᙮

19:14b.ACT.019.014 ᐊᐊ ᑕᔥ ᒎᐎᐊᓇᒥᐁᐎᑭᒫ ᓰᐸ ᑳᑮᐃᔑᓂᑳᓱᒡ, ᐅᑯᓯᓴᐞ ᑳᑮᓃᔣᒋᓂᒡ 7 ᐅᐅ ᑮᐃᔑᒋᑫᐗᐞ᙮

19:15b.ACT.019.015 ᒪᒋᐊᒑᑾᓐ ᑕᔥ ᐅᑮᐃᑯᐙᓐ: ᒋᓴᔅ ᓂᑭᑫᓂᒫ, ᑆᓬ ᑲᔦ ᓂᑭᑫᓂᒫ᙮ ᐊᐌᓀᓇᒃ ᑕᔥ ᑮᓇᐙ? ᐅᑮᐃᑯᐙᓐ᙮

19:16b.ACT.019.016 ᐃᓂᐌᓂᐗᓐ ᑕᔥ ᐃᓂᓂᐗᓐ ᑳᑮ ᑭᑭᔥᑳᑯᓂᒡ ᒪᒋᐊᒑᑾᓐ ᐅᑮᐅᑎᑎᓂᑯᐙᓐ ᐁᑮ ᒦᑳᓂᑯᐙᒡ, ᑲᑭᓇ ᐁᑮ ᔖᑰᒋᐃᑯᐙᒡ᙮ ᐙᑳᐃᑲᓂᕽ ᑕᔥ ᑮᐅᒋ ᒫᒌᐸᐃᐌᐗᒃ ᐁᑮ ᒫᑳᐱᓇᓂᑯᐙᒡ, ᐐᑫ ᐁᑮᐙᓵᑯᓇ ᐌᐱᓂᑯᐙᒡ᙮

19:17b.ACT.019.017 ᑲᑭᓇ ᑕᔥ ᒎᐗᒃ, ᑲᑭᓇ ᑲᔦ ᑳᒎᐎᐎᓯᒀ ᐁᐱᓴᔅ ᐆᑌᓈᕽ ᑳᐊᔮᐙᒡ ᐁᓅᑕᒧᐙᒡ ᐅᐅ, ᐐᑫ ᑮᓭᑭᓯᐗᒃ᙮ ᑳᑎᐯᒋᑫᒡ ᒋᓴᔅ ᑕᔥ ᐅᐐᓱᐎᓐ ᑮᑭᑌᒋᑳᑌᓂ᙮

19:18b.ACT.019.018 ᓃᐱᐗᐞ ᑕᔥ ᑳᑮ ᑌᐺᑕᒥᓂᒡ ᑮᐲᔖᐗᐞ ᒧᔐᔭᐄ ᐁᑮ ᑎᐹᑐᑕᒥᓂᒡ, ᐁᑮᐐᑕᒥᓂᒡ ᑲᔦ ᐋᓃᓐ ᑳᑮᓂᑖ ᐃᔑᒋᑫᓂᐸᓐ᙮

19:19b.ACT.019.019 ᓃᐱᐗᐞ ᑲᔦ ᑳᑮ ᓅᒋᑑᓂᒡ ᒥᑌᐎᐎᓐ ᐅᑮ ᒫᒪᐎ ᐲᑑᓂ ᐅᒪᓯᓇᐃᑲᓂᓂ ᐁᑮ ᓴᑲᐊᒥᓂᒡ ᒧᔐᔭᐄ᙮ ᐁᑮ ᓴᑲᑲᑭᑕᒧᐙᒡ ᑕᔥ ᐁᓇᑭᑌᓂᑭᓐ ᐃᓂ ᒪᓯᓇᐃᑲᓇᓐ, ᓈᓂᒥᑕᓇ ᑕᓯᕽ ᒥᑖᔂᒃ 50,000 ᑕᓱ ᐙᐹᐱᑯ ᔔᓂᔮᔅ ᑮᐃᔑᓭᓂᐗᓐ᙮

19:20b.ACT.019.020 ᒦᑕᔥ ᐅᐅ ᓇᑫ ᑳᑎᐯᒋᑫᒡ ᐅᑎᑭᑐᐎᓐ ᑳᐊᓂᔑ ᐊᐗᔑᒣ ᒥᓯᑌᔥᑳᓂᒃ, ᓃᐱᐗᐞ ᑲᔦ ᐯᒫᑎᓯᓂᒡ ᐁᑮᐊᓂ ᑌᐺᑕᒥᓂᒡ᙮

19:21b.ACT.019.021 ᐅᐅ ᑕᔥ ᑳᐴᓂᓭᓂᒃ ᑆᓬ ᑮᐃᓀᑕᒻ ᐁᐐᐃᔖᒡ ᒉᕒᐆᓴᓬᐊᒥᕽ ᐁᐐᐊᓂ ᔖᐳᔥᑳᒡ ᒫᓯᑑᓂᔭ ᐊᑮᕽ ᑲᔦᔥ ᐊᑫᔭ ᐊᑮᕽ᙮ ᐅᐅ ᑕᔥ ᑮᐃᑭᑐ: ᐊᐲ ᐌᑎ ᑮᐃᔥᒀ ᐃᔖᔮᓐ, ᒦᔥ ᐁᔑᓈᑾᒃ ᒋᑮᐙᐸᑕᒫᐹᓐ ᐅᕒᐆᒻ ᐆᑌᓇ, ᑮᐃᑭᑐ᙮

19:22b.ACT.019.022 ᓃᔑᓐ ᐃᑕᔥ ᑳᑮᐐᒋᐃᑯᒡ, ᑎᒪᑏᓐ, ᐃᓂ ᑲᔦ ᐄᕒᐋᔅᑕᓴᓐ ᐅᑮᐃᔑᓂᔕᐙᐞ ᒫᓯᑑᓂᔮ ᐊᑮᕽ ᒋᐃᔖᓂᒡ᙮ ᐐᓐ ᑕᔥ ᑫᔮᐱ ᑮᐊᔮ ᐃᐃᒫ ᐁᔑᔭ ᑭᒋ ᐊᑮᕽ᙮

19:23b.ACT.019.023 ᒦᑕᔥ ᐃᐃ ᐊᐲ ᑳᑮᒫᒌ ᐅᒻᐺᑲᒥᑲᒃ ᐁᐱᓴᔅ ᐆᑌᓈᕽ ᐃᐃ ᐅᒋ ᑳᔑ ᓈᓯᑲᐎᓐᒡ ᐃᓇᑫ ᑳᑎᐯᒋᑫᒡ᙮

19:24b.ACT.019.024 ᐯᔑᒃ ᐃᓂᓂ ᑮᐊᔮ ᐃᐃᒫ ᑎᒦᑕᕒᐃᔭᔅ ᐁᑮᐃᔑᓂᑳᓱᒡ ᐁᑮ ᐲᐙᐱᑯᑫᐎ ᐃᓂᓃᐎᒡ᙮ ᐙᐹᐱᑯ ᔔᓂᔮ ᐙᐱᑯᕽ ᓴ ᐅᑮᐅᒋ ᐅᔑᑑᓇᓐ ᐁᓇᒥᐁᐎᑲᒥᑰᓴᓐ ᐁᑮᐃᔑᓈᑾᓂᓂᑭᓐ ᑖᐱᔥᑰ ᐊᓇᒥᐁᐎᑲᒥᑯᕽ ᑳᑮ ᑕᔑ ᐊᓇᒥᐁᑕᐎᒥᓐᒡ ᐃᑴᐎ ᒪᓂᑑᑳᓇᓐ ᐋᕒᑎᒪᔅ ᐁᔑᓂᑳᓂᒥᓐᒡ᙮ ᓃᐱᐗᐞ ᓴ ᐃᐃᒫ ᑮᐅᒋ ᑭᒋ ᔔᓂᔮᑫᐗᐞ ᐅᑕᓄᑮᐞ᙮

19:25b.ACT.019.025 ᒦᔥ ᑳᑮᒫᒪᐎ ᐊᑐᒫᒡ ᐃᐃ ᐯᔑᑾᓐ ᐃᓇᑫ ᑳᑮᐃᓇᓄᑮᓂᒡ ᐁᑮᐃᓈᒡ: ᑮᓇᐙ, ᑭᑭᑫᑖᒻ ᐄᑐᒃ ᐅᐅ ᐊᓄᑮᐎᓐ ᐁᐅᒋ ᓴᓭᑳ ᑲᔥᑭᒋᑫᔭᕽ᙮

19:26b.ACT.019.026 ᐃᓇᔥᑫ ᑕᔥ ᑭᐙᐸᑖᒻ, ᑭᓅᑖᒻ ᑲᔦ, ᑳᐐᓐ ᐐᓐ ᐁᑕ ᐅᒫ ᐁᐱᓴᔅ ᐆᑌᓈᕽ, ᒥᓯᐌ ᓴᑯ ᐁᔑᔭ ᐊᑮᕽ, ᐋᓃᓐ ᐊᐊ ᐃᓂᓂ ᑆᓬ ᐁᔑ ᔖᑰᓱᒫᒡ ᐯᒫᑎᓯᓂᒡ᙮ ᓃᐱᐗᐞ ᐁᑌᐺᑖᑯᒡ ᐃᐃ ᑳᐃᑭᑐᒡ: ᐅᓂᒌᒫᕽ ᑳᐅᒋ ᐅᔑᐃᑣ ᑳᐐᓐ ᑌᐺ ᒪᓂᑑᐎᓰᔀᒃ, ᐁᐃᑭᑐᑴᓐ᙮

19:27b.ACT.019.027 ᑳᐐᓐ ᐐᓐ ᐁᑕ ᑭᑕᓄᑮᐎᓂᓈᓐ ᓇᓃᓵᓀᑖᑾᓯᓅᓐ ᓅᒋᑯ ᒋᐃᒋᑳᑌᒃ, ᐃᐃ ᓴ ᑲᔦ ᐊᓇᒥᐁᐎᑲᒥᒃ ᑳᐐᓐ ᑫᑰᓐ ᑕᐊᐲᑌᑖᑾᓯᓅᓐ ᑳᑕᔑ ᐊᓇᒥᐁᑕᐎᓐᒡ ᐃᑴᐎ ᒪᓂᑑ ᐋᕒᑎᒪᔅ ᐁᔑᓂᑳᓱᒡ᙮ ᑫᐐᓐ ᑕᔥ ᐊᐊ ᐃᑴᐎ ᒪᓂᑑ ᐁᓇᒥᐁᑕᐎᓐᒡ ᒥᓯᐌ ᐁᔑᔭ ᐊᑮᕽ, ᒥᓯᐌ ᑲᔦ ᐊᑮᕽ, ᑳᐐᓐ ᑫᑰᓐ ᑕᓂ ᐊᐲᑌᑖᑯᓯᓰ, ᐅᑮᐃᓈᐞ᙮

19:28b.ACT.019.028 ᐊᐲ ᑕᔥ ᐁᓅᑕᒥᓂᒡ ᐅᐅ ᑮᑭᒋ ᓂᔥᑳᑎᓯᐗᐞ, ᐅᐅ ᐁᑮᐃᔑ ᔖᑯᐌᓂᒡ: ᑭᒋᐃᓀᑖᑯᓯ ᐋᕒᑎᒪᔅ ᐁᐱᓴᓯᕽ ᑳᑕᔑ ᐊᓇᒥᐁᑕᐎᓐᒡ, ᑮᐃᑭᑐᐗᐞ᙮

19:29b.ACT.019.029 ᒥᓯᐌ ᑕᔥ ᐃᐃᒫ ᐆᑌᓈᕽ ᑮᐊᔮ ᐗᐙᓀᑕᒧᐎᓐ᙮ ᒦᑕᔥ ᑳᐃᔑ ᐅᑎᑎᓈᐙᒡ ᑫᔭᓴᓐ, ᐃᓂ ᑲᔦ ᐁᕒᐃᔅᑖᕒᑲᔅ ᑳᑮᐅᒌᓂᒡ ᒫᓯᑑᓂᔮ ᐊᑮᕽ, ᑆᓬᐊᓐ ᐅᐐᒌᐙᑲᓂᓂ᙮ ᐌᑎ ᑕᔥ ᐅᑮᐃᔑ ᑳᑳᒋᐌᐱᓈᐙᐞ ᑳᑮᐃᔑ ᓂᑖ ᒫᒪᐎᔥᑳᕽ ᐅᑕᒥᓄᐎᑲᒥᑯᕽ᙮

19:30b.ACT.019.030 ᑆᓬ ᑕᔥ ᑮᐃᓀᑕᒻ ᒋᑮ ᐲᑎᑫᐸᓐ ᐃᐃᒫ ᐁᔑ ᐊᔮᓂᐗᓂᓂᒃ ᐁᐐᐊᐎ ᐃᓈᓴᒥᑳᐸᐎᑕᐙᒡ ᐁᐐ ᑲᑲᓅᓈᒡ ᐅᑌᐺᑕᒨᐞ ᐃᑕᔥ ᑳᐐᓐ ᐅᑮ ᐸᑭᑎᓂᑯᓰᐞ᙮

19:31b.ACT.019.031 ᐋᓂᑕ ᓴ ᑳᑮᓃᑳᓀᑖᑯᓯᓂᒡ ᐃᐃᒫ ᐊᑮᕽ ᑫᑫᓂᒥᑯᒡ, ᑳᓵᑭ ᐐᒌᐎᑯᒡ ᑲᔦ, ᑮᐲᒋᓂᔕᐅᐌᐗᐞ ᐁᒥᓴᐌᓂᒥᑯᒡ ᒋᐲᑎᑫᓯᒃ ᐃᐃᒫ ᑳᑮᐃᔑ ᓂᑖ ᒫᒪᐎᔥᑳᕽ ᑮᐅᑕᒥᓄᕽ᙮

19:32b.ACT.019.032 ᐃᑭ ᑕᔥ ᐃᐃᒫ ᑳᑮᒫᒪᐎ ᐊᔮᐙᒡ ᑮᐗᐙᓀᑕᒨᒃ᙮ ᐋᓂᑕ ᐯᔑᑾᓐ ᑮᐃᔑ ᔖᑯᐌᐗᒃ, ᑯᑕᒃ ᐃᑕᔥ ᑲᔦ ᐸᑳᓐ ᑫᐐᓇᐙ ᑮᐃᔑ ᔖᑯᐌᐗᒃ᙮ ᑫᑳ ᑲᑭᓇ ᐃᐃᒫ ᑳᑮᐊᔮᐙᒡ ᑳᐐᓐ ᐅᑮ ᑭᑫᑕᓰᓈᐙ ᐌᑯᓀᓐ ᑳᑮᐅᒋ ᒫᒪᐎ ᐊᔮᐙᒡ᙮

19:33b.ACT.019.033 ᐋᓂᑕ ᑕᔥ ᐃᐃᒫ ᑳᑮᐊᔮᐙᒡ ᑮᐃᓀᑕᒨᒃ ᐋᓬᐃᑭᓵᑕᕒᐊᓐ ᒫᐐᓐ ᐃᐃ ᑳᑮᐅᒋ ᐃᓇᑲᒥᑲᓂᓂᒃ, ᐋᓃᔥ ᒎᐗᐞ ᐅᑮᐃᔑ ᑳᒋᐌᐱᓈᓂ ᐃᐃᒫ ᓃᑳᓇᔭᐄ᙮ ᒦᔥ ᐋᓬᐃᑭᓵᑕᕒ ᑳᑮᐃᔑᓂᑫᐸᓂᐅᒡ ᒋᓅᑖᑎᓯᓂᒃ ᐁᐐ ᑲᑭᑐᒡ ᐁᐐ ᑲᓅᑕᒪᐙᒡ ᒎᐗᐞ᙮

19:34b.ACT.019.034 ᐊᐲ ᑕᔥ ᐁᐙᐸᑕᒧᐙᒡ ᐁᒎᐎᐎᓂᒡ ᑲᑭᓇ ᑮᐯᔑᑯᑖᑯᓯᐗᒃ ᐁᑮᐃᔑ ᔖᑯᐌᐙᒡ ᓃᔓᑎᐸᐃᑲᓐ ᒥᓂᒃ: ᑭᒋ ᐃᓀᑖᑯᓯ ᐋᕒᑎᒪᔅ ᐁᐱᓴᓯᕽ ᑳᑕᔑ ᐊᓇᒥᐁᑕᐎᓐᒡ᙮

19:35b.ACT.019.035 ᐆᑌᓈᐎᑭᒫ ᑕᔥ ᐅᑮ ᑲᔥᑭᒫᐞ ᑳᑮ ᐹᑏᓄᓂᒡ ᐱᓵᓐ ᒋᐊᔮᓂᒡ ᐁᑮᐃᓈᒡ: ᑮᓇᐙ ᐅᒫ ᐁᐱᓴᓯᕽ ᐌᒌᔦᒃ, ᑲᑭᓇ ᐄᑐᒃ ᐊᐎᔭ ᐅᑭᑫᑖᓐ ᐁᐱᓴᔅ ᐆᑌᓈᕽ ᐁᐅᒋ ᑲᓇᐌᑖᑾᒃ ᐃᐃ ᐊᓇᒥᐁᐎᑲᒥᒃ ᑳᑕᔑ ᐊᓇᒥᐁᑕᐎᓐᒡ ᑫᒋ ᐃᓀᑖᑯᓯᒡ ᐋᕒᑎᒪᔅ, ᐊᐊᐌ ᐊᓯᓐ ᐁᓇᒥᐁᑕᐎᓐᒡ ᑭᒋᑮᔑᑯᕽ ᑳᑮᐅᒋ ᐸᑭᔑᕽ᙮

19:36b.ACT.019.036 ᑳᐐᓐ ᑕᔥ ᐊᐎᔭ ᐅᑖᔮᓉᑕᓰᓇᓐ ᐅᓄ᙮ ᒦᑕᔥ ᐃᐃ ᐱᓵᓐ ᐃᔑ ᑲᑴ ᐊᔮᒃ, ᒋᐃᔑᒋᑫᓯᐌᒃ ᑫᑰᓐ ᑫᒥᒋᓇᐌᐃᑯᔦᒃ᙮

19:37b.ACT.019.037 ᑭᑮ ᐲᓈᐗᒃ ᑕᔥ ᐅᑯ ᐃᓂᓂᐗᒃ, ᐊᓇᐐᓐ ᐁᑮᐅᒋ ᑭᒨᑎᓯᒀ ᐊᓇᒥᐁᐎᑲᒥᑯᕽ, ᑫᑰᓐ ᑲᔦ ᐁᑮᐃᔑ ᒪᒋ ᐃᓈᓯᒀ ᑭᑎᑴ ᒪᓂᑑᒥᓈᓂᓐ᙮

19:38b.ACT.019.038 ᑮᔥᐱᓐ ᑕᔥ ᑎᒦᑕᕒᐃᔭᔅ ᐃᐃ ᑲᔦ ᑳᐐᑕᓄᑮᒥᑯᒡ ᑫᑰᓐ ᐗᐃᔑ ᐊᓈᒥᒫᐙᑴᓐ ᐊᐎᔭᓐ, ᐹᑭᓯᓂᓂᐗᓐ ᐅᔕ ᐅᓇᔓᐌᐎᑲᒥᑰᓐ, ᐊᔮᐗᐞ ᑲᔦ ᐅᓇᔓᐌᐎᑭᒫᐞ, ᐱᓵᓐ ᑕᔥ ᑕᒪᒥᔑᑖᑯᓯᐗᒃ᙮

19:39b.ACT.019.039 ᑮᔥᐱᓐ ᑕᔥ ᑫᔮᐱ ᑫᑰᓐ ᐁᔮᑴᓐ ᐙᑕᔑᑕᒣᒃ, ᒦ ᐃ ᐁᔑᓈᑾᒃ ᐃᓈᑯᓂᑫᐎᓂᕽ ᒋᐅᒋ ᓇᓇᐊᒋᑳᑌᑭᐸᓐ᙮

19:40b.ACT.019.040 ᐃᓇᔥᑫ ᐐᑫ ᑭᓇᓃᓵᓂᐃᑎᓱᒥᓐ ᒋᒪᒥᔑᐃᑎᓱᔭᕽ ᒋᐃᓈᑯᓂᑰᔭᕽ ᑮᓇᐎᓐᑦ ᐁᐅᒻᐺᑲᒥᑭᓯᔭᕽ ᐅᐅ ᑳᐃᓇᑲᒥᑲᒃ ᓅᑯᒻ ᑳᑮᔑᑲᒃ᙮ ᑮᔥᐱᓐ ᑕᔥ ᐃᐃ ᐃᔑᓭᒃ, ᑳᐐᓐ ᑫᑰᓐ ᑭᑖ ᐃᑭᑐᓰᒥᓐ ᑫᐅᒋ ᔖᑰᓱᑖᑯᓯᔭᑭᐸᓐ, ᐋᓃᔥ ᐊᓂᔖ ᐅᐅ ᑭᑎᔑᒋᑫᒥᓐ, ᐅᑮᐃᓈᐞ᙮

19:41b.ACT.019.041 ᐊᐲ ᑕᔥ ᐅᐅ ᑳᐃᔥᒀ ᐃᑭᑐᒡ, ᐅᑮ ᑲᓅᓈᐞ ᒋᐊᓂ ᒫᒑᓂᒡ᙮

20

20:1b.ACT.020.001 ᐊᐲ ᑕᔥ ᐅᐅ ᑳᐃᔥᒀ ᐃᓇᑲᒥᑲᓂᓂᒃ, ᑆᓬ ᐅᑮᐊᑐᒫᐞ ᐅᑌᐺᑕᒨᐞ, ᑳᐃᔥᒀ ᑲᓅᓈᒡ ᐃᑕᔥ ᒋᒪᔥᑲᐌᑕᒥᓂᒡ, ᐅᑮ ᐴᔔᐋᐞ ᐁᑮᐊᓂ ᒫᒑᒡ ᒫᓯᑑᓂᔮ ᐊᑮᕽ ᐁᑮᐃᔖᒡ᙮

20:2b.ACT.020.002 ᒥᓯᐌ ᑕᔥ ᐃᐃᒫ ᓇᑫᑲᒥᒃ ᑮᐃᔖ, ᐁᑮᐸᐹ ᑲᓅᓈᒡ ᐅᑌᐺᑕᒨᐞ ᒋᒪᔥᑲᐌᑕᒥᓂᒡ, ᐲᓂᔥ ᐁᑮ ᑕᑯᔑᕽ ᑲᕒᐄᔅ ᐊᑮᕽ᙮

20:3b.ACT.020.003 ᓂᓱ ᑮᓯᔅ 3 ᑕᔥ ᐃᐃᒫ ᑮᐊᔮ᙮ ᐋᔕ ᑕᔥ ᑫᑳ ᐁᐊᓂ ᑮᔒᑖᒡ ᐁᑮᐐᐃᔖᒡ ᓰᕒᐃᔭ ᐊᑮᕽ, ᐅᑮᓅᑌ ᑭᑫᑖᓐ ᑫᑰᓐ ᐁᐐ ᑑᑖᑯᒡ ᒎᐗᐞ, ᒦᔥ ᑳᑮᐃᓀᑕᕽ ᒫᓯᑑᓂᔮ ᐊᑮᕽ ᐃᓇᑫ ᒋᓂ ᐃᔖᒡ᙮

20:4b.ACT.020.004 ᒦᐗᐞ ᐃᑕᔥ ᐅᐅ ᑳᐐᒌᐎᑯᒡ, ᓲᐸᑕᕒᐊᓐ ᐌᒌᓂᒡ ᐱᕒᐄᔭ ᐆᑌᓈᕽ ᑳᑮᐅᑌᑌᓂᒡ ᐱᕒᐊᓴᓐ ᙮ ᐁᕒᐃᔅᑖᕒᑲᓴᓐ ᑲᔦ, ᐃᓂ ᑲᔦ ᓯᑲᑕᓴᓐ ᐌᒌᓂᒡ ᑌᓴᓬᐊᓇᐃᑲ ᐆᑌᓈᕽ᙮ ᐃᓂ ᑲᔦ ᑫᔭᓴᓐ ᐌᒌᓂᒡ ᑕᕒᐱ ᐆᑌᓈᕽ, ᑏᒪᑎ ᑕᔥ ᑲᔦ᙮ ᐃᓂ ᑕᔥ ᑲᔦ ᑎᑭᑲᓴᓐ, ᒐᕒᐆᐱᒪᔅ ᑲᔦ ᐁᔑᔭ ᐊᑭᕽ ᐌᒌᓂᒡ᙮

20:5b.ACT.020.005 ᒦᔥ ᐅᑯ ᐃᓂᓂᐗᒃ ᑮᓃᑳᓂ ᒫᒑᐗᒃ, ᐁᑮ ᐲᐃᓇᑭᑣ ᐌᑎ ᒐᕒᐆᐗᔅ ᐆᑌᓈᕽ᙮

20:6b.ACT.020.006 ᐱᓬᐃᐹᐃ ᐆᑌᓇᓇᒃ ᑕᔥ ᓂᑮᐅᒋ ᒫᒌᔮᔑᒥᓐ ᐊᐲ ᑳᐃᔥᒀᑲᒥᑲᒃ ᑳᐊᒧᓐᒡ ᐸᑴᔑᑲᓐ ᐌᐱᓯᑲᓂᐎᓯᒃ᙮ ᓈᓄᑮᔑᒃ ᑕᔥ ᐁᐊᓂ ᐃᔑᓭᒃ ᒐᕒᐆᐗᔅ ᐆᑌᓈᕽ ᓂᑮᐃᔑ ᐅᑎᓵᓈᓂᒃ᙮ ᓃᔣᓱᑮᔑᒃ 7 ᑕᔥ ᐃᐃᒫ ᓂᑮᐊᔮᒥᓐ᙮

20:7b.ACT.020.007 ᑳᓂᑕᒥ ᑮᔑᑲᒃ ᑕᔥ ᑮᑕᐗᑌᒃ ᓂᑮᒫᒪᐎ ᐊᔮᒥᓐ ᐁᑮᐊᒶᑭᒡ ᐸᑴᔑᑲᓐ᙮ ᑆᓬ ᑕᔥ ᐅᑮ ᑲᑲᓅᓈᐞ ᐯᒫᑎᓯᓂᒡ, ᐲᓂᔥ ᑮᐊᓂ ᐋᐱᑖ ᑎᐱᑲᓂᓂ ᐁᑲᑭᑐᒡ, ᐋᓃᔥ ᐊᓂᐙᐸᓂᓂᒃ ᐁᐐᒫᒑᒡ᙮

20:8b.ACT.020.008 ᑮᐹᑏᓇᑎᓅᓐ ᑕᔥ ᐙᓴᑯᓀᒋᑲᓇᓐ ᐁᔑ ᐃᔥᐱᒦᑲᑌᒃ ᐃᐃᒫ ᑳᑮᑕᔑ ᒫᐗᒋᐃᑎᔮᕽ᙮

20:9b.ACT.020.009 ᐅᔥᑭᓃᑭ ᑕᔥ ᑮᓇᒪᑕᐱ ᐙᓭᒋᑲᓂᕽ ᐃᔫᑎᑲᔅ ᐁᐃᔑᓂᑳᓱᒡ, ᐐᑫ ᐁᑮᓅᑌᑾᔑᒡ, ᑭᓉᔥ ᐋᓃᔥ ᑆᓬᐊᓐ ᑮᑲᑭᑐᐗᓐ᙮ ᐁᑲᐎᑾᔑᒡ ᑕᔥ ᒥᑕᑲᒥᒃ ᑮᐃᔑ ᐸᑭᔑᓐ ᐁᑮᐃᓇᑰᒋᕽ ᓂᓱ ᐃᔥᐱᒦᑲᑌ᙮ ᐁᐅᑖᐱᓂᓐᒡ ᑕᔥ ᑮᐙᐸᒫ ᐁᓂᐳᒡ᙮

20:10b.ACT.020.010 ᑆᓬ ᑕᔥ ᑮᓃᓵᑕᐌ ᐁᑮᐊᐸᑭᓱᒡ ᐁᔑ ᐱᒥᔑᓂᓂᒡ ᐁᑮᐅᑖᐱᓈᒡ ᒦᔥ ᑳᐃᑭᑐᒡ: ᑫᑯ ᑫᑰᓐ ᐃᓀᑕᑫᒃ, ᑫᔮᐱ ᐅᔕ ᐱᒫᑎᓯ, ᐅᑮᐃᓈᐞ᙮

20:11b.ACT.020.011 ᒦᔥ ᒦᓇᐙ ᑮᐃᔑ ᐊᒀᑕᐌᒡ ᐁᑮ ᐸᑴᐱᓈᒡ ᐸᑴᔑᑲᓇᓐ ᐁᐐᒋ ᐐᓯᓃᒫᒡ ᐅᑌᐺᑕᒨᐞ, ᐲᓂᔥ ᑕᔥ ᑮᐲᑖᐸᓂᓂ ᐁᑮ ᑲᑲᓅᓈᒡ᙮ ᒦᔥ ᑳᐃᔑ ᒫᒑᒡ᙮

20:12b.ACT.020.012 ᑮᑮᐌ ᐐᒌᐎᒫᐗᓐ ᑕᔥ ᐃᓂ ᐅᔥᑭᓃᑭᐗᓐ ᐁᐱᒫᑎᓯᓂᒡ, ᐐᑫ ᐁᑮᒥᓉᑕᒧᓈᓂᐗᓂᓂᒃ᙮

20:13b.ACT.020.013 ᓂᑮᓃᑳᓂ ᐴᓯᒥᓐ ᑕᔥ ᒌᒫᓐ ᐁᑮᐃᓈᔑᔮᕽ ᐋᓴᔅ ᐆᑌᓈᕽ, ᒦ ᐌᑎ ᐁᐐᐅᒋ ᐴᓯᐊᑭᒡ ᑆᓬ᙮ ᓂᑮᐊᓅᓂᑯᓈᓐ ᐅᐅ ᒋᐃᔑᒋᑫᐗᑭᒡ ᐋᓃᔥ ᐐᓐ ᑮᒥᑐᓭ ᐌᑎ ᐁᐃᔖᒡ᙮

20:14b.ACT.020.014 ᐊᐲ ᑕᔥ ᑳᒣᒀᔥᑲᐗᑭᒡ ᐋᓴᔅ ᐆᑌᓈᕽ ᓂᑮ ᐴᓯᐋᓇᓐ, ᓂᑮᐊᓂᔑ ᐸᑲᒫᔑᒥᓐ ᑕᔥ ᐌᑎ ᒥᑎᓬᐄᓂ ᐆᑌᓈᕽ᙮

20:15b.ACT.020.015 ᐁᐊᓂ ᐙᐸᕽ ᑕᔥ ᒦ ᐃᒫ ᑳᐅᒋ ᒫᒌᔮᔑᔮᕽ ᑮᔭᔅ ᒥᓂᓯᕽ ᐁᑮᐃᔑ ᐸᑲᒫᔑᔮᕽ᙮ ᐁᐊᓂ ᐙᐸᕽ ᑕᔥ ᓭᒪᔅ ᐁᒋᑳᑌᒃ ᒥᓂᔅ ᓂᑮᐃᔑ ᐸᑲᒫᔑᒥᓐ᙮ ᒦᓇᐙ ᑕᔥ ᐁᐊᓂ ᐙᐸᕽ ᓂᑮᐃᔑ ᐸᑲᒫᔑᒥᓐ ᒫᐃᓬᐄᑕᔅ ᐆᑌᓇ ᐁᒋᑳᑌᒃ᙮

20:16b.ACT.020.016 ᑆᓬ ᑮᐃᓀᑕᒻ ᒋᔖᑆᔑᒡ ᒌᒫᓂᕽ ᐁᐱᓴᔅ ᐆᑌᓈᕽ, ᑳᐐᓐ ᑮᐃᓀᑕᓰ ᑭᓉᔥ ᒋᐊᓂ ᐅᑕᒥᐊᔮᒡ ᐃᐃᒫ ᐁᔑᔭ ᐊᑮᕽ᙮ ᑮᐌᔩᐱᓯ ᐋᓃᔥ ᐁᑮᑲᑴ ᑌᑕᑯᔑᕽ ᒉᕒᐆᓴᓬᐊᒥᕽ, ᑮᔥᐱᓐ ᑯᑕ ᑌᐊᔨᔒᒡ ᒋᒣᒀᔥᑲᕽ ᒫᑕᑲᒥᑲᓂᓂᒃ ᐯᑎᒀᔅᑎᐎ ᐃᔑᑮᔑᑲᓂᓂᒃ᙮

20:17b.ACT.020.017 ᒫᐃᓬᐄᑕᔅ ᐆᑌᓈᕽ ᓴ ᑆᓬ ᑮᐅᒋ ᐃᔑᓂᔕᐅᐌᑯᐸᓐ ᒋᐃᔖᓂᐗᓂᓂᒃ ᐁᐱᓴᔅ ᐆᑌᓈᕽ, ᒦ ᐌᑎ ᒋᔑᓇᑭᔥᑳᑯᒡ ᑳᓃᑳᓂᔥᑲᐙᓂᒡ ᑳᒫᐗᒋᐃᑎᓂᒡ ᐅᑌᐺᑕᒨᐞ᙮

20:18b.ACT.020.018 ᐊᐲ ᑕᔥ ᐌᑎᓯᑯᒡ ᐅᐅ ᐅᑮᐃᓈᐞ: ᒥᓂᒃ ᑳᐱ ᐐᒌᐎᓇᑰᒃ ᐄᑐᒃ ᑭᑭᑫᑖᒻ ᒫᐗᒡ ᐃᑯ ᓂᑕᒻ ᑭᑕᑯᑮᔮᓐ ᐅᐅᒫ ᐁᔑᔭ ᐊᑮᕽ, ᐋᓃᓐ ᑳᐃᔑᒋᑫᔮᓐ᙮

20:19b.ACT.020.019 ᐁᑮᐊᓄᑮᑕᐗᒃ ᑳᑎᐯᒋᑫᒡ ᒥᓯᐌ ᐁᑮᐃᔑ ᑕᐸᓭᓂᒧᔮᓐ, ᒨᔕᒃ ᑲᔦ ᐁᑮᐅᒋᑲᐙᐱᔮᓐ ᒣᒀ ᑮᐗᐙᓀᑕᒥᓭᔮᓐ ᐋᓃᔥ ᒎᐗᒃ ᑮᑮᒨᒋᒋᑫᐗᒃ ᑫᑰᓐ ᐁᐐ ᑑᑕᐎᐙᒡ᙮

20:20b.ACT.020.020 ᑭᑭᑫᑖᒻ ᐄᑐᒃ ᑲᔦ ᐁᑮ ᑭᒋᐎᓇᒪᐎᓯᓅᓇᑰᒃ ᑫᑰᓐ ᑫᐐᒋᐃᑯᔦᑭᐸᓐ ᑮᐙᐐᑕᒪᐎᓇᑰᒃ, ᒧᔐᔭᐄ ᑲᔦ ᐁᑮ ᑭᑭᓄᐊᒪᐎᓇᑰᒃ ᑳᐊᔨᔑᑖᔦᒃ᙮

20:21b.ACT.020.021 ᓂᑮ ᑲᓅᓈᒃ ᒎᐗᒃ, ᐃᑭ ᑲᔦ ᑳᒎᐎᐎᓯᒀ ᒋᑴᑮᓄᑕᐙᐙᒡ ᑭᔐᒪᓂᑑᓐ ᒋᓇᑲᑕᒧᐙᒡ ᐅᒪᒋ ᐃᔑᒋᑫᐎᓂᐙᓐ, ᒋᑌᐺᔦᓂᒫᐙᒡ ᑕᔥ ᑳᑎᐯᓂᒥᒥᓇᕽ ᒋᓴᔅ Xᑕᓐ᙮

20:22b.ACT.020.022 ᓅᑯᒻ ᑕᔥ ᓂᐐᐃᔖ ᒉᕒᐆᓴᓬᐊᒥᕽ ᐁᐃᔑ ᐐᔖᒥᒥᒡ ᑳᑎᐯᒋᑫᒡ ᐅᑕᒑᑾᓐ, ᑳᐐᓐ ᑕᔥ ᓂᑭᑫᑖᓰᓐ ᐊᒪᓐᒡ ᑫᐃᔑᓭᐙᓀᓐ ᐌᑎ᙮

20:23b.ACT.020.023 ᒦ ᐁᑕ ᐁᔑ ᑭᑫᑕᒫᓐ ᑕᓯᓐ ᐆᑌᓇᐗᓐ ᑳᐱ ᒪᔮᔥᑲᒫᓐ, ᑭᔐᒪᓂᑑ ᐅᑕᒑᑾᓐ ᐁᐊᔦᒀᒥᒥᓂᒡ ᒫᒫᒋᑾᐱᓱᓇᓐ, ᑲᒀᑕᑭᐃᑰᐎᓐ ᑲᔦ ᐁᐊᔓᓂᑯᐗᒃ᙮

20:24b.ACT.020.024 ᑳᐐᓐ ᑕᔥ ᓃᓐ ᑫᑰᓐ ᓂᑎᓀᑕᓰᓐ ᓂᐱᒫᑎᓯᐎᓐ ᒋᑭᒋ ᐃᓀᑕᒫᐹᓐ; ᒦ ᐁᑕ ᐙᐃᔑᒋᑫᔮᓐ ᒋᑮᔑᑖᐗᒃ ᐱᒥᐸᑑᐎᓐ, ᐊᓄᑮᐎᓐ ᑲᔦ ᑳᑮᒦᔑᒡ ᑳᑎᐯᒋᑫᒡ᙮ ᓂᑮᐃᔑᒦᓂᒃ ᒋᑎᐹᑐᑕᒧᐗᒃ ᐁᔑ ᒥᓍᑐᑌᓂᒃ ᑭᔐᒪᓂᑑ ᐅᑭᔐᐙᑎᓯᐎᓐ᙮

20:25b.ACT.020.025 ᓂᑮ ᐸᐹ ᐃᔖ ᓴ ᒣᑴᔭᐄ ᑲᑭᓇ ᑳᔑ ᐊᔮᔦᒃ, ᐁᑮ ᑕᔑᑕᒫᓐ ᑭᔐᒪᓂᑑ ᐅᑎᐯᒋᑫᐎᓐ᙮ ᓅᑯᒻ ᑕᔥ ᓂᑭᑫᑖᓐ ᑮᓇᐙ ᒦᓇᐙ ᐐᑳ ᒋᐙᐸᒥᓯᐌᒃ᙮

20:26b.ACT.020.026 ᒦᑕᔥ ᐁᓂᓇᑰᒃ ᓅᑯᒻ ᑳᑮᔑᑲᒃ, ᑳᐐᓐ ᓃᓐ ᓂᑲᐊᓈᒣᑖᑯᓯᓰ ᐊᐎᔭ ᓂᔑᐗᓈᑎᓯᒡ᙮

20:27b.ACT.020.027 ᑳᐐᓐ ᐄᑐᒃ ᑫᑰᓐ ᓂᑮ ᑭᒋᐎᓇᓰᓐ ᑮᐐᑕᒪᐎᓇᑰᒃ ᑲᑭᓇ ᑭᔐᒪᓂᑑ ᐅᑎᓀᑕᒧᐎᓐ᙮

20:28b.ACT.020.028 ᐊᔦᒀᒥᑲᓇᐌᓂᑎᓱᒃ ᑕᔥ, ᑲᓇᐌᓂᒥᑾᒃ ᑕᔥ ᑳᒫᒪᐎ ᐊᔮᐙᒡ ᐅᑌᐺᑕᒨᒃ ᑭᔐᒪᓂᑑ ᐅᑕᒑᑾᓐ ᑳᑮ ᒦᓂᒥᓀᒃ ᒋᓈᓈᑲᒋᐁᒀ᙮ ᑖᐱᔥᑰ ᐅᑲᓇᐎ ᒫᓇᒑᓂᔑᐌ ᑳᐃᔑᒋᑫᒡ, ᒦ ᐃᓇᑫ ᐃᔑ ᑲᓇᐌᓂᒥᑾᒃ ᑭᔐᒪᓂᑑ ᐅᒫᐗᒋᐋᑲᓇᐞ, ᐅᒥᔅᑸᒥᕽ ᑳᑮᐅᒋ ᑎᐸᐙᒡ᙮

20:29b.ACT.020.029 ᓂᑭᑫᑖᓐ ᐊᐲ ᒫᒑᔮᓐ ᒋᐅᑎᓯᓀᒀ ᑳᔮᒀᑎᓯᐙᒡ ᒪᐄᑲᓂᕽ ᐁᓀᑖᑯᓯᐙᒡ ᐁᔑ ᐊᔮᔦᒃ, ᑳᐐᓐ ᑕᔥ ᐅᑲ ᒪᓈᒋᐋᓯᐙᐙᐞ ᐅᑌᐺᑕᒨᐞ᙮

20:30b.ACT.020.030 ᐋᓂᑕ ᓴ ᑮᓇᐙ ᐁᔑ ᐊᔮᔦᒃ ᑕᓂ ᐅᒌᐗᒃ ᓭᓯᒃ ᑫᔑ ᑭᑭᓄᐃᑫᓯᒀ, ᒋᐗᓂᔑᒫᐙᒡ ᐅᑌᐺᑕᒨᐞ ᒋᐱᒥᓂᔕᐅᑯᐙᒡ᙮

20:31b.ACT.020.031 ᐊᔦᒀᒥᓯᒃ ᐃᑕᔥ᙮ ᒫᒥᑲᐎᒃ ᓂᓱᐱᐴᓐ ᒥᓂᒃ ᐁᑮᐅᒋ ᑭᐱᒌᓯᐙᓐ ᐁᐊᔦᒀᒥᒥᓇᑰᒃ ᐁᑕᓱ ᑎᐱᒃ, ᐁᑕᓱ ᑮᔑᒃ ᑲᔦ, ᐁᑮᐅᒋᑲᐙᐱᔮᓐ ᐁᑲᒀᑕᑫᑕᒫᓐ᙮

20:32b.ACT.020.032 ᓅᑯᒻ ᑕᔥ ᑭᑎᔑ ᐸᑭᑎᓂᓂᓂᒻ ᑭᔐᒪᓂᑑ ᒋᑲᓇᐌᓂᒥᓀᒃ, ᒋᑲᓇᐌᓂᒥᑯᐌᒃ ᑲᔦ ᐅᑎᑭᑐᐎᓐ ᑳᔑ ᑕᔑᑌᓂᒃ ᐅᑭᔐᐙᑎᓯᐎᓐ᙮ ᒦ ᐃᐌ ᑫᐅᐱᓂᐃᑯᔦᒃ, ᒦ ᑲᔦ ᐃᐃᒫ ᑫᐅᒋ ᒦᓂᑰᐎᓯᔦᒃ ᒋᑎᐱᓇᐌᐎᓯᔦᒃ ᑭᔐᒪᓂᑑ ᑳᐐᒦᓈᒡ ᑲᑭᓇ ᐅᐱᒫᑎᓰᒪᐞ᙮

20:33b.ACT.020.033 ᑳᐐᓐ ᓂᒥᓴᐌᓂᒥᒫᓰᓐ ᐊᐎᔭ ᐅᐙᐹᐱᑯ ᔔᓂᔮᒪᓐ, ᐅᑑᓵᐎ ᔔᓂᔮᒪᓐ, ᑳᐐᓐ ᑲᔦ ᓂᒥᓴᐌᑕᒨᐙᓰᓇᓐ ᐅᑭᑭᔥᑭᑲᓇᓐ᙮

20:34b.ACT.020.034 ᑭᑭᑫᑖᓈᐙ ᐄᑐᒃ ᓃᓐ ᐁᑮᐅᑎᓇᒫᓱᔮᓐ ᐋᓃᓐ ᐁᔑ ᓅᑌᓭᔮᓐ, ᐁᑮ ᐸᒥᐊᒀ ᑲᔦ ᓂᐐᒌᐙᑲᓇᒃ᙮

20:35b.ACT.020.035 ᑲᑭᓇ ᑫᑰᓐ ᓂᑮᐃᔑᒋᑫ ᒋᐙᐸᑕᒣᒃ ᐅᐅ ᓇᑫ ᒋᔑᑭᒋ ᐊᓄᑮᓈᓂᐗᑭᐸᓐ ᒋᐐᒋᐃᑣᐸᓐ ᒣᔥᑲᐙᑎᓯᓯᒀ, ᒋᒫᒥᑲᐎᓄᑌᓂᒃ ᐅᐅ ᑳᑮᐃᑭᑐᒡ ᑳᑎᐯᒋᑫᒡ ᒋᓴᔅ: ᓇᐗᒡ ᒥᓉᑖᑾᓐ ᑳᒦᑭᐌᓈᓂᐗᕽ ᑫᑰᓐ ᐊᐲᒡ ᐐᓐ ᑮᑌᐱᓂᑳᑌᒃ ᑫᑰᓐ᙮

20:36b.ACT.020.036 ᐊᐲ ᑕᔥ ᐅᐅ ᑆᓬ ᑳᐃᔥᒀ ᐃᑭᑐᒡ, ᐅᑮᐐᒋ ᐅᒋᒌᑾᓇᐲᑕᐙᐞ ᐁᑮᐊᓇᒥᐋᒡ

20:37b.ACT.020.037 ᑲᑭᓇ ᑕᔥ ᑮᑭᒋ ᒪᐎᐗᐞ ᐁᑮ ᑭᑭᒋᑴᓂᑯᒡ ᐁᐊᔫᒌᒥᑯᒡ᙮

20:38b.ACT.020.038 ᒦᑕᔥ ᑳᑮᐅᒋ ᒫᓀᑕᒥᓂᒡ ᐁᑮᐃᓈᒡ ᐐᑳ ᒦᓇᐙ ᒋᐙᐸᒥᑯᓯᒃ᙮ ᐅᑮᐃᔑ ᐐᒌᐎᑯᐞ ᐃᑕᔥ ᑭᒋ ᒌᒫᓂᒃ᙮

21

21:1b.ACT.021.001 ᐊᐲ ᑕᔥ ᑳᓇᑲᓇᑭᑣ ᓂᑮᒫᒌᔮᔑᒥᓐ, ᑾᔭᒃ ᐁᑮᐃᓈᔑᔮᕽ ᐌᑎ ᒥᓂᓯᕽ ᑰᔅ ᑳᐃᒋᑳᑌᒃ᙮ ᐁᐊᓂ ᐙᐸᕽ ᑕᔥ ᐅᕒᐆᑎᔅ ᒥᓂᔅ ᓂᑮᐅᑎᑖᒥᓐ, ᒦᔥ ᐌᑎ ᑳᐅᒋ ᑌᐱᔥᑳᔮᕽ ᐁᑮᐃᔑ ᐸᑲᒫᔑᔮᕽ ᐹᑕᕒᐊ ᐆᑌᓈᕽ᙮

21:2b.ACT.021.002 ᓂᑮᒥᑳᒥᓐ ᑕᔥ ᐃᐃᒫ ᒌᒫᓐ ᐁᐐᐃᔑ ᐋᔕᐎᑳᒣᔮᓯᕽ ᐱᓃᔑᔭ ᐊᑮᕽ ᐃᓇᑫ, ᒦᔥ ᐃᐃᒫ ᑳᐃᔑ ᐴᓯᔮᕽ ᐁᑮᒫᒌᔮᔑᔮᕽ᙮

21:3b.ACT.021.003 ᐊᐲ ᑕᔥ ᑳᑌᐹᐸᑕᒫᕽ ᓵᐃᐸᕒᐊᔅ ᒥᓂᔅ ᔖᐗᓄᕽ ᐃᓇᑫ ᓂᑮᐃᔑᐱᒥᐊᔮᒥᓐ ᐲᓂᔥ ᐁᑮᐅᑎᑖᔑᔮᕽ ᓰᕒᐃᔭ ᐊᑭᕽ᙮ ᐃᐃᒫ ᑕᔥ ᑕᔭᕒ ᐆᑌᓈᕽ ᓂᑮᐃᔑ ᑲᐹᒥᓐ ᐁᑮᐊᒀᓯᒋᑳᑌᑭᓐ ᐴᓯᑖᓱᓇᓐ᙮

21:4b.ACT.021.004 ᑳᒥᑲᐗᑭᑣ ᑕᔥ ᐃᐃᒫ ᐅᑌᐺᑕᒨᒃ, ᓃᔣᓱ ᑮᔑᒃ 7 ᓂᑮ ᐐᒋᐊᔮᒫᓈᓂᒃ᙮ ᒦᐗᒃ ᐃᑕᔥ ᐃᑭ ᐅᑌᐺᑕᒨᒃ ᑳᑮᐐᑕᒫᑯᐙᒡ ᑭᔐᒪᓂᑑᓐ ᐅᑕᒑᑯᓂ ᒋᑲᑳᓱᒫᐙᒡ ᑆᓬᐊᓐ ᒋᐃᔖᓯᓂᒃ ᒉᕒᐆᓴᓬᐊᒥᕽ ᙮

21:5b.ACT.021.005 ᓂᑮᐊᓂ ᒫᒑᒥᓐ ᑕᔥ ᐊᐲ ᐁᐅᒋᒋᓭᒃ ᒋᒫᒑᔮᕽ ᐁᑮᐊᓂ ᐱᒥᐊᔮᔮᕽ᙮ ᑲᑭᓇ ᐅᑌᐺᑕᒨᒃ, ᐅᐐᐎᐙᐞ ᑲᔦ, ᐃᑭ ᑲᔦ ᐊᐱᓅᒌᔕᒃ ᓂᑮᐃᔑ ᐐᒌᐎᑯᓈᓂᒃ ᓵᑭᒐᔭᐄ ᐆᑌᓇᕽ᙮ ᐃᐃᒫ ᑕᔥ ᒌᑭᐲᒃ ᓂᑮᐃᔑ ᐊᓂᒥᑯᑖᒥᓐ ᐁᑮᐊᓇᒥᐋᔮᕽ᙮

21:6b.ACT.021.006 ᓂᑮ ᐸᐴᔔᐃᑎᒥᓐ ᑕᔥ, ᓃᓇᐎᓐᑦ ᐁᑮ ᐴᓯᔮᕽ ᒌᒫᓂᕽ, ᐐᓇᐙ ᑕᔥ ᐐᓐ ᐁᑮᐊᓂ ᑮᐌᐙᒡ᙮

21:7b.ACT.021.007 ᓂᑮᐊᓂ ᒫᒑᒥᓐ ᑕᔥ ᑕᔭᕒ ᐆᑌᓈᕽ ᐁᑮᐅᒋ ᒫᒌᔮᔑᔮᕽ, ᐌᑎ ᐁᑮᐃᔑ ᐸᑲᒫᔑᔮᕽ ᑑᓬᐃᒣᔨᔅ ᐁᒋᑳᑌᒃ ᐆᑌᓇ᙮ ᓂᑮ ᐴᔔᐋᓈᓂᒃ ᑕᔥ ᐅᑌᐺᑕᒨᒃ ᐃᐃᒫ ᐁᔮᐙᒡ, ᐯᔑᑯ ᑮᔑᒃ ᑕᔥ ᓂᑮᐐᒋᐊᔮᒫᓈᓂᒃ᙮

21:8b.ACT.021.008 ᐁᐊᓂᐙᐸᕽ ᑕᔥ ᓂᑮᐊᓂ ᒫᒑᒥᓐ ᐁᑮᐊᓂ ᑕᑯᔑᓈᕽ ᓭᓴᕒᐄᔭ ᐆᑌᓈᕽ ᐁᒋᑳᑌᒃ᙮ ᓂᑮ ᐲᑎᑫᐙᒥᓐ ᑕᔥ ᐱᓬᐊᑉ ᐅᒥᓍᒋᒨᐎᓂᓂ ᐅᐙᑳᐃᑲᓂᕽ ᐁᑮᐐᒋᐊᔮᒪᑭᒡ᙮ ᒦ ᐗᐊ ᐯᔑᒃ ᐃᓂᓂ ᑳᑮᓃᔣᒋᐙᒡ 7 ᑳᑮᐃᓇᑭᒫᐎᑣᐸᓀᓐ ᒋᓈᑲᒋᑑᐙᒡ ᒦᒋᒻ ᐃᐃᒫ ᒉᕒᐆᓴᓬᐊᒥᕽ᙮

21:9b.ACT.021.009 ᐗᐊ ᑕᔥ ᐃᓂᓂ ᑮᓃᐎᐗᐞ ᐅᑖᓂᓴᐞ ᐁᐅᔥᑭᓃᑭᑴᐎᓂᒡ ᒪᔑ ᐁᐐᑎᑫᓯᓂᒃ ᑮᐃᔑ ᒦᓂᑰᐎᓯᐗᐞ ᒋᑲᓅᑕᒪᐙᓂᒡ ᑭᔐᒪᓂᑑᓐ᙮

21:10b.ACT.021.010 ᓃᐱᐗᐞ ᑕᓱ ᑮᔑᒃ ᐃᐃᒫ ᓂᑮᐊᔮᒥᓐ᙮ ᐯᔑᒃ ᐃᓂᓂ ᑳᑲᓅᑕᒪᐙᒡ ᑭᔐᒪᓂᑑᓐ ᐋᑲᐸᔅ ᐁᐃᔑᓂᑳᓱᒡ ᓂᑮᐅᑎᓯᑯᓈᓐ ᒎᑏᔭ ᐊᑮᕽ ᐁᑮᐱ ᐅᒌᒡ᙮

21:11b.ACT.021.011 ᐁᑮᐱ ᓈᓯᑲᐎᔭᒥᓐᒡ ᑕᔥ ᐅᑮᐅᑖᐱᓈᓐ ᑆᓬᐊᓐ ᐅᑭᒋᐱᓱᓂᓂ ᐁᑮ ᑕᑯᐱᑑᒡ ᐅᓯᑕᓐ, ᐅᓂᒌᓐ ᑲᔦ᙮ ᒦᔥ ᐅᐅ ᑳᐃᑭᑐᒡ: ᐅᐅ ᓴ ᐃᑭᑐᐗᓐ ᑭᔐᒪᓂᑑ ᐅᑕᒑᑾᓐ, ᒦ ᐅᐌ ᑫᑑᑖᑯᒡ ᒎᐗᐞ ᒉᕒᐆᓴᓬᐊᒥᕽ ᐁᔮᓂᒡ ᑳᑎᐯᑕᕽ ᐅᐅ ᑭᒋᐱᓱᓐ, ᒋᐃᔑ ᒦᑭᐙᓂᐎᒡ ᒋᑌᐱᓂᑯᒡ ᑳᒎᐎᐎᓯᓂᒃ ᒋᑕᑯᓂᑯᒡ, ᑮᐃᑭᑐ᙮

21:12b.ACT.021.012 ᐁᓅᑕᒫᕽ ᑕᔥ ᐅᐅ, ᐃᑭ ᑲᔦ ᑳᑮᐊᔮᐙᒡ ᐃᐃᒫ ᓂᑖᓇᑮ ᑲᑴ ᑲᔥᑭᒫᓈᓐ ᑆᓬ ᒋᐃᔖᓯᒃ ᐌᑎ ᒉᕒᐆᓴᓬᐊᒥᕽ᙮

21:13b.ACT.021.013 ᐅᐅ ᑕᔥ ᑮᐃᔑ ᓇᑴᑕᒻ: ᐌᑯᓀᓐ ᐌᒋ ᐃᔑᒋᑫᔦᒃ ᐁᒪᐎᔦᒃ, ᐁᒫᓀᑕᒥᐃᔦᒃ ᑲᔦ᙮ ᑳᐐᓐ ᐐᓐ ᐁᑕ ᓂᑎᔑ ᑮᔐᑕᓰ ᒋᒪᒫᒋᑾᐱᓂᑰᔮᓐ ᐌᑎ ᒉᕒᐆᓴᓬᐊᒥᕽ, ᐱᓵᓐ ᓴᑯ ᑲᔦ ᒋᐅᒋ ᓂᓯᑰᔮᓐ ᐅᐐᓱᐎᓂᕽ ᑳᑎᐯᒋᑫᒡ ᒋᓴᔅ, ᑮᐃᑭᑐ᙮

21:14b.ACT.021.014 ᐁᑮ ᐙᐸᒪᑭᒡ ᑕᔥ, ᐃᑕᐙ ᓂᑮ ᐴᓂᒫᓈᓐ ᐁᑮᐃᑭᑐᔮᕽ: ᑳᑎᐯᒋᑫᒡ ᐅᑎᓀᑕᒧᐎᓐ ᑕᐐᐃᔑᓭᓂ, ᓂᑮᐃᑭᑐᒥᓐ᙮

21:15b.ACT.021.015 ᑭᓉᔒᔥ ᑕᔥ ᐃᑯ ᐌᑎ ᑳᐃᔥᒀᐊᔮᔮᕽ, ᓂᑮᐅᔒᑖᒥᓐ ᐁᑮᐃᔖᔮᕽ ᒉᕒᐆᓴᓬᐊᒥᕽ ᙮

21:16b.ACT.021.016 ᐋᓂᑕ ᑕᔥ ᐅᑌᐺᑕᒨᒃ ᓭᓴᕒᐄᔭ ᐌᒌᐙᒡ ᓂᑮᐐᒌᐎᑯᓈᓂᒃ, ᐁᑮᐃᔑᐎᔑᔭᒥᑣ ᐁᔑ ᐊᔮᓂᒡ ᐃᓂ ᓀᓴᓇᓐ ᒋᐐᒋᐊᔮᒥᒪᑭᒡ᙮ ᓵᐃᐸᕒᐊᔅ ᑮᐅᒌᐗᓐ ᐋᔕ ᑭᓉᔥ ᐁᑮᐅᒋ ᑌᐺᔦᑕᒥᓂᒡ᙮

21:17b.ACT.021.017 ᐊᐲ ᑕᔥ ᑳᑕᑯᔑᓈᕽ ᒉᕒᐆᓴᓬᐊᒻ ᐆᑌᓈᕽ, ᐅᑌᐺᑕᒨᒃ ᑮᒥᓉᑕᒨᒃ ᐁᐅᑎᓴᑭᑣ᙮

21:18b.ACT.021.018 ᐁᐊᓂ ᐙᐸᕽ ᑕᔥ ᑆᓬ ᐁᐐᒌᐗᑭᒡ ᐅᑮ ᐲᑎᑲᐙᓐ ᒌᒥᓴᓐ, ᑲᑭᓇ ᑲᔦ ᑳᑮᓃᑳᓀᑖᑯᓯᓂᒡ ᐅᑌᐺᑕᒨᐞ ᐃᐃᒫ ᑮᐊᔮᐗᐞ᙮

21:19b.ACT.021.019 ᐅᑮᐴᔔᐋᐞ ᑕᔥ ᐌᐌᓂ ᐁᑮ ᐐᑕᒪᐙᒡ ᐋᓃᓐ ᑭᔐᒪᓂᑑᓐ ᑳᐃᔑᒋᑫᐋᓂᒡ ᑳᒎᐎᐎᓯᓂᒃ ᐅᑕᓄᑮᐎᓂᕽ ᐅᒋ᙮

21:20b.ACT.021.020 ᐊᐲ ᑕᔥ ᐁᓅᑕᒥᓂᒡ ᐅᑮᓇᓈᑯᒫᓂ ᑭᔐᒪᓂᑑᓐ, ᐅᐅ ᑲᔦ ᐁᑮᐃᑯᒡ: ᓃᒌᓈᓐ ᑆᓬ, ᐃᓇᔥᑫ ᐁᐲᒋᓂ ᓃᐱᐗᒥᑖᔂᒃ ᒎᐗᒃ ᐯᒥ ᑌᐺᑕᒧᐙᒡ, ᐌᐌᓂ ᑕᔥ ᑲᔦ ᑲᑴ ᐃᔑᒋᑫᐗᒃ ᐁᓇᑌᓂᒃ ᐅᓇᔓᐌᐎᓐ᙮

21:21b.ACT.021.021 ᑮᐐᑕᒪᐙᐗᒃ ᑕᔥ ᑮᓐ ᐁᐃᔑ ᑭᑭᓄᐊᒪᐗᑣᐌᓐ ᑲᑭᓇ ᒎᐗᒃ ᑳᐊᔮᐙᒡ ᐁᔑ ᐊᔮᓂᒡ ᑳᒎᐎᐎᓯᓂᒃ ᒋᓇᑲᑕᒧᐙᒡ ᒨᓯᓲᓐ ᐅᑑᓇᔓᐌᐎᓂᓂ᙮ ᐁᐃᔑ ᑭᑭᓄᐃᑫᐗᓀᓐ ᑲᔦ ᒋᑭᑭᓇᐙᑕᔕᑫᔣᓯᒀ ᐅᓃᒑᓂᓯᐙᐞ, ᒋᐃᔑᒋᑫᓯᒀ ᑲᔦ ᒎᐎ ᐃᔑᑣᐎᓐ᙮

21:22b.ACT.021.022 ᐋᓃᓐ ᑕᔥ ᑫᐃᔑᒋᑫᓈᓂᐗᕽ? ᑫᒋᓈᒡ ᒫᐐᓐ ᑕᓅᑕᒨᒃ ᐁᑮ ᑕᑯᔑᓇᓐ᙮

21:23b.ACT.021.023 ᐃᔑᒋᑫᓐ ᑕᔥ ᑳᐃᑰᔭᓐ᙮ ᓃᐎᓐ ᐅᔕ ᓂᑕᔮᐙᓈᓂᒃ ᐃᓂᓂᐗᒃ ᐁᑮᑭᒋ ᐊᔓᑕᒪᐙᐙᒡ ᑭᔐᒪᓂᑑᓐ ᑫᑰᓐ᙮

21:24b.ACT.021.024 ᒫᒑᓐ ᐃᔑᐐᒋᐤ ᐅᑯ, ᑫᑮᓐ ᒋᐐᑑᑳᓱᔭᓐ ᑳᔑ ᐊᓇᒥᐁ ᐯᑭᐃᑎᓱᕽ᙮ ᑲᔦ ᑕᔥ ᒋᑎᐸᐊᒧᐗᒡ ᐯᑭᐃᑎᓱᐙᒡ, ᒋᐸᔥᑯᔕᒧᐙᒡ ᑲᔦ ᐅᑎᒀᓂᐙᓐ᙮ ᒦᔥ ᑲᑭᓇ ᒋᑭᑫᑕᒧᐙᒡ ᐁᑌᐱᒥᑰᓯᐗᓐ ᐄᓴᓐ ᐃᐃ ᑲᑭᓇ ᑳᐃᓈᒋᒥᑰᐗᒡ᙮ ᑫᑮᓐ ᐃᑕᔥ ᐱᑯ ᐁᐐ ᑑᑕᒪᓐ, ᐁᑲᓇᐌᑕᒧᐗᒡ ᒨᓯᔅ ᐅᑑᓇᔓᐌᐎᓐ᙮

21:25b.ACT.021.025 ᐃᑭᐌᓂᐗᒃ ᑕᔥ ᐐᓐ ᑳᒎᐎᐎᓯᒀ ᑳᑌᐺᑕᒧᐙᒡ ᓂᑮᐅᔑᐲᐊᒪᐙᓈᓂᒃ ᐁᑮᐃᔑ ᐅᓀᑕᒫᕽ ᒋᐸᐹᒣᑕᓯᒀ ᒦᒋᒻ ᑳᐸᑭᑎᓇᒪᐎᒥᓐᒡ ᒪᓂᑑᑳᓇᐞ᙮ ᒋᐸᐹᒣᑕᓯᒀ ᑲᔦ ᒥᔅᑸᓂ, ᑫᑰᓐ ᑲᔦ ᑳᑭᐱᓀᐌᐆᒋᑳᑌᓂᒃ, ᒋᓅᒋᑑᓯᒀ ᑲᔦ ᐱᔑᒀᑎᓯᐎᓐ, ᒦᐃ ᑳᐃᑯᒡ᙮

21:26b.ACT.021.026 ᒦᔥ ᐁᐊᓂ ᐙᐸᓂᓂᒃ ᑆᓬ ᑳᑮᐃᔑᐎᓈᒡ ᐃᐃ ᐃᓂᓂᐗᐞ ᑫᐐᓐ ᐁᑮᐐᑑᑳᓱᒡ ᐁᐊᓇᒥᐁ ᐯᑭᐃᑎᓱᓂᒡ᙮ ᑮᐲᑎᑫ ᑕᔥ ᐊᓇᒥᐁᐎᑲᒥᑯᕽ ᐁᑮ ᑎᐹᒋᒧᒡ ᐋᓃᓐ ᐊᐲ ᐃᔑ ᑮᔑᑲᓂᓂᒃ ᑫᐃᔥᒀᓭᓂᒃ ᐅᐯᑭᐃᑎᓱᐎᓂᐙ, ᐊᐲ ᑲᔦ ᑫᐸᑭᑎᓈᓲᑕᒪᐙᒡ ᐁᑕᓱ ᐯᔑᑯᓂᒡ ᑳᑮᐐᒌᐎᑯᒡ᙮

21:27b.ACT.021.027 ᐊᐲ ᑕᔥ ᑫᑳ ᐁᐊᓂ ᐃᔥᒀᓭᓂᒃ ᓃᔣᓱ ᑮᔑᒃ, ᒎᐗᐞ ᐁᔑᔭ ᐊᑮᕽ ᑳᑮᐅᒌᓂᒡ ᐅᑮᐙᐸᒥᑰᐞ ᐃᐃᒫ ᐊᓇᒥᐁᐎᑲᒥᑯᕽ ᐁᐊᔮᒡ᙮ ᐅᑮᐅᒻᐺᐋᓂ ᑕᔥ ᑳᑮ ᐹᑏᓄᓂᒡ ᐊᐎᔭᐞ, ᒦᔥ ᑳᐃᔑ ᐅᑎᑎᓂᑯᒡ,

21:28b.ACT.021.028 ᐅᐅ ᐁᑮᐃᔑ ᔖᑯᐌᓂᒡ: ᒦ ᐅᔕ ᐗᐊ ᐃᓂᓂ ᒥᓯᐌ ᑳᐸᐹ ᑭᑭᓄᐊᒫᐙᒡ ᑲᑭᓇ ᐊᐎᔭᐞ ᒋᒪᒉᓂᒥᒥᓐᒡ ᐃᔅᕒᐃᔭᓬᐊᐞ, ᒋᒪᒉᒋᑳᑌᓂᒃ ᑲᔦ ᒨᓯᓲᓐ ᐅᑑᓇᔓᐌᐎᓐ, ᐅᐅ ᑕᔥ ᑲᔦ ᑭᒋᐊᓇᒥᐁᐎᑲᒥᒃ᙮ ᐯᑭᔥ ᑕᔥ ᑲᔦ ᐁᑮ ᐲᑎᑲᓈᒡ ᑲᕒᐄᑲᐞ ᐅᐅᒫ ᑭᒋᐊᓇᒥᐁᐎᑲᒥᑯᕽ, ᐁᑮᐐᓀᑖᑯᑑᓂᒡ ᐅᐅ ᑳᑕᓀᑖᑯᓯᓂᒡ ᑭᔐᒪᓂᑑᓐ, ᑮᐃᑭᑐᐗᐞ᙮

21:29b.ACT.021.029 ᐋᓃᔥ ᑮᐙᐸᒫᐙᑯᐸᓐ ᐃᐃᒫ ᐆᑌᓈᕽ ᑆᓬᐊᓐ ᐁᐐᒌᐙᓂᒡ ᒐᕒᐆᐱᒪᓴᓐ ᐁᐱᓴᔅ ᐆᑌᓈᕽ ᑳᑮᐅᒌᓂᒡ, ᒦᔥ ᐄᓴᓐ ᑳᐃᓀᑕᒧᐙᒡ ᐁᑮ ᐲᑎᑲᓈᓂᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ᙮

21:30b.ACT.021.030 ᑲᑭᓇ ᑕᔥ ᐃᐃᒫ ᐆᑌᓈᕽ ᐊᐎᔭᒃ ᑳᑮ ᐊᔮᐙᒡ ᑮᐅᒻᐺᐋᐗᒃ᙮ ᑮᒫᒪᐗᐸᐃᑎᐗᒃ ᑕᔥ ᐁᑮᐅᑎᑎᓈᐙᒡ ᑆᓬᐊᓐ, ᑭᒋᐊᓇᒥᐁᐎᑲᒥᑯᕽ ᐁᑮᐅᒋ ᓵᑭᒋ ᑖᐲᐸᐋᐙᒡ᙮ ᔐᒫᒃ ᑕᔥ ᐃᔥᒀᑌᒪᓐ ᑮᑭᐸᐃᑳᑌᐗᓐ᙮

21:31b.ACT.021.031 ᒣᒀ ᑕᔥ ᐁᑲᑴ ᓂᓵᐙᒡ, ᑮᐊᐎ ᐐᑕᒪᐙᐙᓐ ᐅᕒᐆᒥᕽ ᑳᐅᒌᓂᒡ ᑌᐯᓂᒫᓂᒡ ᔑᒫᑲᓂᔖᐞ ᐁᑮᐃᓂᒥᓐᒡ ᒥᓯᐌ ᒉᕒᐆᓴᓬᐊᒥᕽ ᐁᑮᐅᒻᐺᑲᒥᑭᓯᓈᓂᐗᓂᓂᒃ᙮

21:32b.ACT.021.032 ᔐᒫᒃ ᑕᔥ ᐅᑮ ᐱᒫᒌᓈᓂ ᐋᓂᑕ ᔑᒫᑲᓂᔕᐞ, ᔑᒫᑲᓂᔒᐎᑭᒫᐞ ᐁᑮᐱ ᑕᑯᔑᓂᓂᒡ ᐁᔑᐊᔮᐙᒡ᙮ ᐁᐙᐸᒫᐙᒡ ᑕᔥ ᔑᒫᑲᓂᔒᐎᑭᒫᓐ, ᔑᒫᑲᓂᔕᐞ ᑲᔦ, ᐅᑮ ᐴᓂᐋᐙᓐ ᑆᓬᐊᓐ ᐁᐸᐸᑭᑌᐙᐙᐸᓐ᙮

21:33b.ACT.021.033 ᔑᒫᑲᓂᔒᐎᑭᒫ ᑕᔥ ᐅᑮᓈᓯᑲᐙᓐ ᑆᓬᐊᓐ ᐁᑮ ᑕᑯᓈᒡ, ᐁᑮᐊᓅᑮᒡ ᒋᒪᒫᒋᑾᐱᓱᓂᒡ ᐲᐙᐱᑴᔮᐲᓐ ᒋᔮᐸᑕᓂᓂᑭᓐ᙮ ᑮᑲᑴᑗ ᑲᔦ ᐊᐌᓀᓇᓐ ᑌᓄᐎᓂᒡ, ᐋᓃᓐ ᑲᔦ ᑳᐃᔑᒋᑫᓂᒡ᙮

21:34b.ACT.021.034 ᐯᐸᑳᓐ ᑕᔥ ᑮᐃᔑ ᔖᔖᑯᐌᐗᐞ ᑳᑮ ᐹᑏᓄᓂᒡ᙮ ᐊᐲ ᑕᔥ ᐁᒥᑲᓯᒃ ᑌᐺ ᑫᑰᓐ ᑳᐅᒋ ᐅᒻᐺᑲᒥᑲᓂᓂᒃ, ᑮᐊᓅᑮ ᑆᓬᐊᓐ ᒋᐃᔑᐎᓂᒥᓐᒡ ᔑᒫᑲᓂᔒᐎᑲᒥᑯᕽ᙮

21:35b.ACT.021.035 ᐊᐲ ᑕᔥ ᐁᐅᒋᒋᐎᓈᐙᒡ ᑳᔑ ᒫᒌ ᔮᑕᐌᒧᓂᓂᒃ ᑕᑯᑮᐎᓇᓐ, ᑮᐃᔑᓈᑾᓂᓂ ᔑᒫᑲᓂᔕᒃ ᒋᐱᒥᐎᓈᐙᒡ ᐅᓵᒻ ᐋᓃᔥ ᑮᔮᑴᑖᑯᓯᐗᐞ ᑳᑮ ᐹᑏᓄᓂᒡ᙮

21:36b.ACT.021.036 ᑳᑮ ᐹᑏᓄᓂᒡ ᑕᔥ ᐁᐱᒥᓂᔕᐃᑫᓂᒡ ᑮᐃᔑ ᔖᑯᐌᐗᐞ: ᒫᒌᓂᒃ ᒋᐊᐎ ᓂᓭᒃ, ᐅᑮᐃᑭᑐᐗᐞ᙮

21:37b.ACT.021.037 ᑆᓬ ᑫᑳ ᐁᐊᓂ ᐲᑎᑲᓂᑯᒡ ᔑᒫᑲᓂᔕᐞ ᔑᒫᑲᓂᔒᐎᑲᒥᑯᕽ, ᐅᑮ ᑲᓅᓈᓐ ᔑᒫᑲᓂᔒᐎᑭᒫᓐ ᐁᑮᐃᓈᒡ: ᑯᓂᑫ ᑫᑰᓐ ᑭᑖᐃᓂᓐ? ᐅᑮᐃᓈᓐ᙮ ᒦᔥ ᑳᐃᑯᒡ: ᑭᑭᑫᑖᓐ ᐃᓇ ᑲᕒᐄᒃ ᐃᔑᑮᔗᐎᓐ?

21:38b.ACT.021.038 ᑳᐐᓐ ᐄᓴᓐ ᑮᓐ ᑭᑖᐎᓰᓈᑐᒃ ᐊᐊ ᐄᒋᐱᔑᐎᓂᓂ ᑳᑮᐱᐅᒻᐺᑲᒥᑭᓯᒡ ᒣᐎᔕ ᒋᒦᑳᓂᒥᓐᒡ ᐌᑭᒫᐎᓂᒡ, ᑲᔦ ᑕᔥ ᑳᑮᐃᔑᐎᓈᒡ ᐱᑾᑕᑲᒥᒃ ᓃᐐᕽ ᒥᑣᔂᒃ 4,000 ᑳᓂᔑᐌᔥᑭᓂᒡ, ᐅᑮᐃᑰᓐ᙮

21:39b.ACT.021.039 ᑆᓬ ᐅᐅ ᐅᑮᐃᓈᓐ: ᓃᓐ ᐅᔕ ᒎ ᓂᑎᓄᐤ᙮ ᑖᕒᓴᔅ ᐆᑌᓈᕽ ᓯᓬᐃᔑᔭ ᐊᑮᕽ ᓂᑑᒌ᙮ ᑭᒋ ᐃᓀᑖᑾᓐ ᐆᑌᓇ ᑳᐅᒌᔮᓐ᙮ ᑕᑲ ᐸᑭᑎᓂᔑᓐ ᐱᓵᓐ ᒋᑲᑲᓅᓇᒀ ᑳᐹᑏᓄᐙᒡ, ᐅᑮᐃᓈᓐ᙮

21:40b.ACT.021.040 ᐊᐲ ᑕᔥ ᑳᐸᑭᑎᓂᑯᒡ ᔑᒫᑲᓂᔒᐎᑭᒫᓐ ᒋᑲᑭᑐᒡ, ᑆᓬ ᑮᓃᐸᐎ ᑕᑯᑮᐎᓂᕽ ᐁᑮᐃᓈᑕᐊᒪᐙᒡ ᒋᓅᑖᑎᓯᓂᒃ; ᐊᐲ ᑕᔥ ᑳᓅᑖᑎᓯᓂᒃ ᐅᑮ ᑲᓅᓈᐞ ᐄᐸᕒᐆ ᐃᔑᑮᔗᐎᓐ ᐁᑮ ᔮᐸᒋᑑᒡ:

22

22:1b.ACT.022.001 ᓃᒋ ᐅᒌᒫᑲᓇᒃ, ᑫᑖᑎᓯᔦᒃ ᑕᔥ, ᐱᓯᑕᐎᔑᒃ ᐅᐅ ᓅᑯᒻ ᑳᐐᐃᓂᓇᑰᒃ ᐁᐐᓈᑕᒫᓱᔮᓐ, ᐅᑮᐃᓈᐞ᙮

22:2b.ACT.022.002 ᐊᐲ ᑕᔥ ᐁᓅᑖᑯᒡ ᐄᐸᕒᐆ ᐃᔑᑮᔗᐎᓂᕽ ᐁᐃᔑ ᑲᓅᓈᒡ, ᑳᐐᓐ ᑮᐊᓂ ᓅᑖᑎᓰᐗᐞ᙮ ᒦᑕᔥ ᐅᐅ ᑳᐃᑭᑐᒡ:

22:3b.ACT.022.003 ᑫᓃᓐ ᓴ ᒎ ᓂᑎᓄᐤ, ᐁᑮ ᑕᔑ ᓂᑖᐎᑭᔮᓐ ᑖᕒᓴᔅ ᐆᑌᓈᕽ ᓯᓬᐃᔑᔭ ᐊᑮᕽ, ᐅᐅᒫ ᑕᔥ ᐆᑌᓈᕽ ᒉᕒᐆᓴᓬᐊᒥᕽ ᓂᑮ ᑕᔑ ᐅᐱᒃ᙮ ᑲᒣᓬᐃᔭᓬ ᐅᔕ ᓂᑮ ᑭᑭᓄᐊᒫᒃ, ᐁᑮ ᓴᓇᑲᓂᓂᒃ ᐁᑭᑭᓄᐊᒪᐎᒡ ᐁᔑᓯᓂᓂᒃ ᐅᓇᔓᐌᐎᓐ ᑳᑮ ᒦᓂᒥᓐᒡ ᑭᑫᑌᔭᐋᒥᓈᐸᓃᐞ᙮ ᐐᑫ ᑕᔥ ᑲᔦ ᓂᑮᐋᑴᑖᓐ ᐁᑮᑲᑴ ᓇᐁᑕᒥᐊᒃ ᑭᔐᒪᓂᑑ ᑖᐱᔥᑰ ᑲᑭᓇ ᑫᑮᓇᐙ ᐅᐅᒫ ᑳᐊᔮᔦᒃ ᓅᑯᒻ ᑳᑮᔑᑲᒃ᙮

22:4b.ACT.022.004 ᓂᑮ ᑲᒀᑕᑭᐋᒃ ᓴ ᐃᑭ ᑳᐱᒥᓂᔕᐊᒧᐙᒡ ᐃᔖᐎᓐ ᐲᓂᔥ ᐁᑮᐊᓂ ᐅᒋ ᓂᓴᒀ, ᐁᑮ ᑕᑯᓇᒀ ᐃᑴᐗᒃ, ᐃᓂᓂᐗᒃ ᑲᔦ᙮ ᒦᑕᔥ ᑳᐃᔑ ᐲᒋᐌᐱᓇᒀ ᑭᐸᐅᑏᐎᑲᒥᑯᕽ᙮

22:5b.ACT.022.005 ᑭᒋᐊᓇᒥᐁᐎᑭᒫ ᐅᔕ ᑖᑎᐹᒋᒧ ᐁᑌᐺᐗᒃ, ᐃᑭ ᑲᔦ ᑲᑭᓇ ᒎᐎ ᐅᓇᔓᐌᐎᓂᓂᐗᒃ᙮ ᒦᐗᒃ ᐅᔕ ᐃᑭ ᑳᑮ ᒦᔑᐙᒡ ᐅᔥᐲᐃᑲᓇᓐ ᒋᒦᓂᒪᒃ ᑭᐐᒋ ᒎᐎᒥᓈᓂᐞ ᑎᒫᔅᑲᔅ ᐆᑌᓈᕽ ᑳᑮᐊᔮᓂᒡ᙮ ᓃᓐ ᑕᔥ ᓂᑮᐃᔖ ᐌᑎ ᐁᑮᓇᓇᑐᓀᐗᒀ ᐃᑭᐌᓂᐗᒃ ᐁᑮ ᐲᓇᒀ ᐅᐅᒫ ᒉᕒᐆᓴᓬᐊᒥᕽ ᒋᑲᒀᑕᑭᐃᑣ ᐲᐙᐱᑴᔮᐲᕽ ᐁᑮᐃᔑ ᒪᒫᒋᑾᐱᓱᐙᒡ᙮

22:6b.ACT.022.006 ᑫᑳ ᑕᔥ ᐁᐊᓂ ᓈᐗᑴᒃ ᐯᔓ ᐁᐊᓂ ᐱᒥ ᐊᔮᔮᓐ ᑎᒫᔅᑲᔅ ᐆᑌᓈᕽ, ᒦ ᐃ ᑴᑕᑐ ᑭᒋᑮᔑᑯᕽ ᑳᑮᐅᒋ ᐋᑾᑌᒃ ᐙᑳᔭᐄ ᐃᐃᒫ ᐁᔑ ᐊᔮᔮᓐ᙮

22:7b.ACT.022.007 ᒥᑕᑲᒥᒃ ᑕᔥ ᓂᑮᐃᔑ ᐸᑭᔑᓐ ᐁᑮᓅᑕᐗᒃ ᐊᐌᑴᓐ ᐁᑲᓅᔑᒡ ᐁᐃᔑᒡ: ᔂᓬ, ᔂᓬ, ᐌᑯᓀᓐ ᐌᒋ ᑲᒀᑕᑭᐃᔭᓐ? ᐁᑮᐃᔑᒡ᙮

22:8b.ACT.022.008 ᐊᐌᓀᓐ ᑕᔥ ᑮᓐ, ᑌᐯᒋᑫᔭᓐ? ᓂᑮᐃᔑ ᓇᑴᑕᐙ᙮ ᒦᔥ ᑳᐃᔑᒡ: ᓃᓐ ᒋᓴᔅ ᓈᓴᕒᐃᑎᕽ ᑳᐅᒌᔮᓐ, ᑳᑲᒀᑕᑫᑕᒥᐃᔭᓐ, ᓂᑮᐃᒃ᙮

22:9b.ACT.022.009 ᐃᑭᐌᓂᐗᒃ ᑕᔥ ᑳᑮ ᐐᒌᐎᐙᒡ ᐅᑮᐙᐸᑖᓈᐙ ᐁᐙᓭᔮᓂᒃ, ᑳᐐᓐ ᑕᔥ ᐅᑮᓅᑕᐙᓯᐙᐙᓐ ᐊᐌᑴᓇᓐ ᑳᑮ ᑲᓅᔑᒥᒡ᙮

22:10b.ACT.022.010 ᑌᐯᒋᑫᔭᓐ, ᐋᓃᓐ ᑕᔥ ᑫᐃᔑᒋᑫᔮᓐ? ᓂᑮᐃᓈ᙮ ᐅᐅ ᑕᔥ ᓂᑮᐃᒃ: ᐸᓯᑸᓐ, ᐊᓂᒫᒑᓐ ᒋᐃᔖᔭᓐ ᑎᒫᔅᑲᔅ ᐆᑌᓈᕽ, ᒦᑕᔥ ᐌᑎ ᑲᑭᓇ ᑫᔑ ᐐᑕᒫᑰᔭᓐ ᐋᓃᓐ ᐁᔑ ᐅᓇᑕᒫᑰᔭᓐ ᒋᐃᔑᒋᑫᔭᓐ, ᓂᑮᐃᒃ᙮

22:11b.ACT.022.011 ᑳᐐᓐ ᑕᔥ ᓂᑮᐙᐱᓰ ᑳᐊᐲᒋ ᔮᑾᑌᒃ᙮ ᓂᐐᒌᐙᑲᓇᒃ ᑕᔥ ᓂᑮᐃᔑ ᓴᑭᓂᑫᓂᑰᒃ ᑎᒫᔅᑲᔅ ᐆᑌᓈᕽ᙮

22:12b.ACT.022.012 ᐯᔑᒃ ᑕᔥ ᐃᓂᓂ ᐋᓇᓈᔭᔅ ᐁᔑᓂᑳᓱᒡ, ᑾᔭᒃ ᑳᑮᐊᓇᒥᐁᑕᐙᒡ ᑭᔐᒪᓂᑑᓐ, ᑳᑮ ᑲᓇᐌᑕᕽ ᑲᔦ ᐅᓇᔓᐌᐎᓐ, ᑳᑮ ᑭᑌᓂᒥᑯᒡ ᑲᔦ ᑲᑭᓇ ᒎᐗᐞ ᐃᐃᒫ ᑳᑮᐃᔑᑖᓂᒡ᙮

22:13b.ACT.022.013 ᒦ ᐊᐌ ᑳᑮ ᐱᐊᑕ ᐙᐸᒥᒡ ᐁᑮᐱ ᓃᐸᐎᒡ ᐁᔑ ᐊᔮᐗᒃ ᐁᑮᐃᑭᑐᒡ: ᔂᓬ ᓃᒋ ᐅᑌᐺᑕᒨ, ᑕᑲ ᒦᓇᐙ ᐙᐱᓐ, ᑮᐃᑭᑐ᙮ ᔐᒫᒃ ᑕᔥ ᓂᑮᐙᑉ, ᐁᑮᐙᐸᒪᒃ᙮

22:14b.ACT.022.014 ᐅᐅ ᑕᔥ ᑮᐊᓂ ᐃᑭᑐ: ᐅᑭᔐᒪᓂᑑᒥᐙᓐ ᑭᑫᑌᔭᐋᒥᓈᐸᓃᒃ ᐅᔕ ᑭᑮᐅᓇᑭᒥᒃ ᒋᑭᑫᑕᒧᐗᒡ ᐅᑎᓀᑕᒧᐎᓐ, ᒋᐙᐸᒥᒪᒡ ᑲᔦ ᑾᔭᒃ ᐅᑕᓄᑮᐋᑲᓇᓐ, ᒋᓅᑕᐎᒪᒡ ᐃᑕᔥ ᑲᔦ ᑲᓅᓂᒥᒃ᙮

22:15b.ACT.022.015 ᒦ ᓴ ᐃ ᑫᐃᓇᓄᑮᐃᒃ ᒋᑎᐹᒋᒪᒡ, ᒋᑎᐹᒋᒧᑕᐗᑣ ᑲᑭᓇ ᐊᐎᔭᒃ ᐋᓃᓐ ᑳᑮᐃᔑ ᐙᐸᑕᒪᓐ, ᐋᓃᓐ ᑲᔦ ᑳᑮᐃᓂᑕᒪᓐ᙮

22:16b.ACT.022.016 ᐌᑯᓀᓐ ᑕᔥ ᓅᑯᒻ ᑫᔮᐱ ᐸᔮᑑᔭᓐ? ᐸᓯᑸᓐ, ᒋᓰᑲᐊᑖᓱᔭᓐ, ᒋᐯᑭᐃᑰᔭᓐ ᑲᔦ ᑭᒪᒋᑑᑕᒧᐎᓂᕽ ᐅᒋ, ᒋᑲᓅᓇᒡ ᑳᑎᐯᒋᑫᒡ ᒋᓈᑕᒪᐎᒃ, ᓂᑮᐃᒃ᙮

22:17b.ACT.022.017 ᒦᔥ ᑳᐊᓂ ᐃᑭᑐᒡ: ᐊᐲ ᑕᔥ ᑳᐱᑮᐌᔮᓐ ᐅᐅᒫ ᒉᕒᐆᓴᓬᐊᒥᕽ, ᒣᒀ ᐁᐊᓇᒥᐋᔮᓐ ᑭᒋᐊᓇᒥᐁᐎᑲᒥᑯᕽ, ᐃᔑᓇᒧᐎᓐ ᓂᑮᐅᑎᓯᑯᓐ᙮

22:18b.ACT.022.018 ᒦᑕᔥ ᑳᑮ ᐙᐸᒪᒃ ᑳᑎᐯᒋᑫᒡ ᐁᑮᐃᔑᒡ: ᐌᔩᑉ, ᓂᑯᒋ ᐅᐅᒫ ᒉᕒᐆᓴᓬᐊᒥᕽ ᐅᒋᒫᒑᓐ ᐋᓃᔥ ᑳᐐᓐ ᑭᑲ ᑌᐺᑖᑯᓰᒃ ᐋᓃᓐ ᐁᓈᒋᒥᔭᓐ, ᓂᑮᐃᒃ᙮

22:19b.ACT.022.019 ᐅᐅ ᑕᔥ ᓂᑮᐃᓈ: ᑌᐯᒋᑫᔭᓐ, ᐐᓇᐙ ᐄᑐᒃ ᐅᑭᑫᑖᓈᐙ ᐁᑮᐸᐹ ᐃᔖᐗᒃ ᐊᓇᒥᐁᐎᑲᒥᑯᑳᕽ ᐁᑮ ᑭᐸᐗᒀ, ᑲᔦ ᑕᔥ ᐁᑮ ᐸᐸᑭᑌᐗᒀ ᐃᑭ ᑳᑌᐺᑕᐎᒀ᙮

22:20b.ACT.022.020 ᐊᐲ ᑲᔦ ᑮᓃᐗᓄᐅᓐᒡ ᐃᔅᑏᐱᓐ ᑳᑮ ᑎᐹᒋᒥᒃ, ᓂᑮᓃᐸᐤ ᐌᑎ ᐁᑮᒥᓍᐸᑕᒫᓐ ᑳᑮ ᑑᑕᐎᓐᒡ, ᐁᑮ ᑲᓇᐌᑕᒧᐗᒃ ᐅᑲᔥᑮᑮᐎᓂᓂ ᐃᐃ ᑳᑮ ᓃᐗᓇᐅᑯᒡ᙮

22:21b.ACT.022.021 ᐅᐅ ᑕᔥ ᓂᑮᐃᒃ: ᒦ ᐃ ᐃᔑᒫᒑᓐ, ᐙᓴ ᐅᔕ ᑭᐐᐃᔑᓂᔕᐅᓐ ᒋᐊᑕ ᐙᐸᒪᑣ ᑳᒎᐎᐎᓯᒀ, ᓂᑮᐃᒃ᙮

22:22b.ACT.022.022 ᐅᐅ ᑕᔥ ᐁᑮᐃᑭᑐᒡ, ᒦ ᐃ ᑳᐐᓐ ᐊᐗᔑᒣ ᐅᑮ ᐱᓯᑖᑯᓰᐞ ᐋᓃᓐ ᑳᑮᐃᓈᒡ᙮ ᒦᑕᔥ ᑳᐃᔑ ᒫᒌ ᔖᔖᑯᐌᓂᒡ ᐁᑮᐃᑭᑐᓂᒡ: ᓂᑯᒋ ᐃᔑᐎᓂᒃ, ᐊᐎᓂᓯᒃ! ᑳᐐᓐ ᐃᓀᑖᑾᓯᓂᓂ ᒋᐱᒫᑎᓯᐸᓐ! ᑮᐃᑭᑐᐗᐞ᙮

22:23b.ACT.022.023 ᑮᔖᔖᑯᐌᐗᐞ ᑕᔥ ᐁᑮ ᑮᒋᑯᐌᐱᔥᑲᒥᓂᒡ ᐅᑲᔥᑮᑮᐎᓂᓂ, ᒥᑖᐗᕽ ᑲᔦ ᐁᑮᐊᔨᔥᐱ ᐌᐱᓇᒥᓂᒡ᙮

22:24b.ACT.022.024 ᑭᒋ ᔑᒫᑲᓂᔒᐎᑭᒫᓐ ᑕᔥ ᑮᐊᓅᑮᐗᓐ ᑆᓬ ᒋᐲᑎᑲᓂᓐᒡ ᔑᒫᑲᓂᔒᐎᑲᒥᑯᕽ, ᐁᑮᐃᑭᑐᓂᒡ ᒋᐸᐸᔕᔐᐅᓐᒡ, ᒋᑲᑴᒋᒥᓐᒡ ᑲᔦ ᐌᑯᓀᓐ ᐃᐃ ᓇᑫ ᑳᐅᒋ ᔖᔖᑯᐙᓂᑯᒡ ᐯᒫᑎᓯᓂᒡ᙮

22:25b.ACT.022.025 ᐊᐲ ᑳᒪᒫᒋᑾᐱᓂᓐᒡ ᐁᐐ ᐸᐸᔕᔐᐅᓐᒡ, ᑆᓬ ᐅᑮᐃᓈᓐ ᔑᒫᑲᓂᔒᐎᑭᒫᓐ ᐃᐃᒫ ᑳᓃᐸᐎᓂᒡ: ᐃᓇᑌ ᓇ ᐃᓈᑯᓂᑫᐎᓐ ᒋᐸᐸᔕᔐᐅᑎᐸᓐ ᐊᐎᔭ ᐅᕒᐆᒥᕽ ᐌᒋ ᑎᐯᑖᑯᓯᒡ, ᒪᔑ ᑯᑕ ᑳᑎᐹᑯᓈᓯᐎᓐᒡ ᒋᒥᑭᑳᑌᓂᑭᐸᓐ ᐋᓃᓐ ᑳᐃᔑ ᒪᒫᔑᒡ?

22:26b.ACT.022.026 ᐊᐲ ᑕᔥ ᔑᒫᑲᓂᔒᐎᑭᒫᓐ ᑳᓅᑕᒥᓂᒡ ᐅᐅ, ᐅᑮᐊᑕ ᐙᐸᒫᓂ ᑭᒋ ᔑᒫᑲᓂᔒᐎᑭᒫᓐ ᐁᑮᐃᓈᓂᒡ: ᐋᓃᓐ ᑕᔥ ᐙᐃᔑᒋᑫᔭᓐ? ᐅᕒᐆᒥᕽ ᐅᔕ ᐊᐊ ᐅᒋ ᑎᐯᑖᑯᓯ, ᐅᑮᐃᓈᓂ᙮

22:27b.ACT.022.027 ᑭᒋ ᔑᒫᑲᓂᔒᐎᑭᒫᓐ ᑕᔥ ᐅᑮ ᐱᐊᑕ ᐙᐸᒥᑰᓐ ᐁᑮᐃᑯᒡ: ᐐᑕᒪᐎᔑᓐ, ᐅᕒᐆᒥᕽ ᐃᓇ ᑭᑑᒋ ᑎᐯᑖᑯᔅ? ᐅᑮᐃᑰᓐ᙮ ᐁᐊᐞ, ᑕᔥ ᐅᑮᐃᔑ ᓇᑴᑕᐙᓐ᙮

22:28b.ACT.022.028 ᑭᒋ ᔑᒫᑲᓂᔒᐎᑭᒫᓐ ᑕᔥ ᑮᐃᑭᑐᐗᓐ: ᓃᐱᐗᐞ ᓴ ᓃᓐ ᓂᑮ ᑎᐸᐃᑫ ᐃᐃᒫ ᐅᕒᐆᒥᕽ ᒋᐅᒋ ᑎᐯᑖᑯᓯᔮᓐ, ᐅᑮᐃᑰᓐ᙮ ᑆᓬ ᑮᐃᑭᑐ: ᓃᓐ ᑕᔥ ᐐᓐ ᓂᑮᐃᔑ ᓂᑖᐎᒃ ᐃᐃᒫ ᒋᐅᒋ ᑎᐯᑖᑯᓯᔮᓐ, ᐅᑮᐃᓈᓐ᙮

22:29b.ACT.022.029 ᐃᓂᐌᓂᐗᐞ ᑕᔥ ᑳᐐ ᑲᑴᒋᒥᑯᐸᓐ ᔐᒫᒃ ᐅᑮ ᐴᓂᐃᑰᐞ᙮ ᐃᓂᐌᓂᐗᓐ ᑕᔥ ᐐᓐ ᑭᒋ ᔑᒫᑲᓂᔒᐎᑭᒫᓐ ᐐᑫ ᑮᓭᑭᓯᐗᓐ ᐊᐲ ᐁᓅᑕᒥᓐᒡ ᐅᕒᐆᒥᕽ ᐁᐅᒋ ᑎᐯᑖᑯᓯᒡ ᐋᓃᔥ ᐲᐙᐱᑴᔮᐲᓐ ᐅᑮ ᔮᐸᒋᑑᓂ ᐁᑮᒪᒫᒋᑾᐱᓂᑯᒡ᙮

22:30b.ACT.022.030 ᐁᐊᓂ ᐙᐸᓂᓂᒃ ᑕᔥ ᑭᒋ ᔑᒫᑲᓂᔒᐎᑭᒫᓐ ᐅᑮᐐ ᑲᑴ ᑭᑫᑕᒥᓂ ᐌᑯᓀᓂᓂ ᒪᔮ ᒎᐗᐞ ᑳᑮᐃᔑ ᐊᓈᒥᒥᑯᒡ᙮ ᐅᑮ ᐸᑭᑎᓂᑰᓐ ᑕᔥ ᐁᑮᐃᓈᑯᓂᑫᓂᒡ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑲᑭᓇ ᒎᐗᐞ ᐅᑑᓇᔓᐌᐎᓂᓃᒥᓂ ᒋᒫᒪᐗᐱᓂᒡ᙮ ᑆᓬ ᑕᔥ ᑮᐃᔑᐎᒋᑲᓂᐎ ᐃᐃᒫ ᐁᑮᐃᔑ ᓃᐸᐎᐃᓐᒡ ᐁᓈᓴᒦᓂᒡ᙮

23

23:1b.ACT.023.001 ᑆᓬ ᑕᔥ ᐁᑭᒋ ᑲᓇᐙᐸᒫᒡ ᐅᓇᔓᐌᐎᓂᓂᐗᐞ ᐅᐅ ᐁᑮᐃᓈᒡ: ᓃᒋ ᐅᒌᒫᑲᓇᒃ, ᐌᑎ ᓴ ᐱᑯ ᑳᐅᒋ ᓈᓈᑲᑕᐌᑕᒫᓐ ᓂᑑᒋᑭᑫᑖᓐ ᑾᔭᒃ ᐃᑯ ᐁᑮᐱ ᐃᔑᐱᒫᑎᓯᐗᒃ ᐁᓈᓴᒦᒡ ᑭᔐᒪᓂᑑ ᐲᓂᔥ ᓅᑯᒻ ᑳᑮᔑᑳᒃ᙮

23:2b.ACT.023.002 ᐃᓂᐌᓂᐗᓐ ᑕᔥ ᑭᒋᐊᓇᒥᐁᐎᑭᒫᓐ ᐋᓇᓈᔭᔅ ᐁᔑᓂᑳᓱᓂᒡ ᐅᑮ ᑲᓅᓈᓂ ᐃᐃ ᑳᐐᒋᑳᐸᐎᑖᑯᓂᒡ ᒋᐸᓯᑑᓀᑲᓈᒥᑯᒡ ᐊᐊ ᑆᓬ᙮

23:3b.ACT.023.003 ᑆᓬ ᑕᔥ ᐅᑮᐃᓈᓐ: ᑭᔐᒪᓂᑑ ᑭᑲ ᐸᑭᑌᐅᒃ, ᑮᓐ ᑳᐙᐱᔥᑭᐲᐃᑳᑌᒃ ᐊᓯᓂᒣᓂᑲᓐ᙮ ᑭᒥᒋ ᓇᒪᑕᑉ ᐌᑎ ᐁᐐᐅᓈᑯᓂᔭᓐ ᐁᓇᑌᒃ ᐅᓇᔓᐌᐎᓐ, ᑮᓐ ᑕᔥ ᐃᑯ ᐁᐲᑯᓇᒪᓐ ᐅᓇᔓᐌᐎᓐ ᐁᐊᓅᑮᔭᓐ ᒋᐸᓯᑑᓀᑲᓈᒥᑰᔮᓐ, ᐅᑮᐃᓈᓐ᙮

23:4b.ACT.023.004 ᐃᓂᐌᓂᐗᐞ ᑕᔥ ᐃᐃᒫ ᐯᔓ ᑳᑮ ᐐᒋᑳᐸᐎᑖᑯᒡ ᑆᓬ ᑮᐃᑭᑐᐗᐞ: ᑳᐐᓐ ᐄᑐᒃ ᐃᔑᓈᑾᓯᓅᓐ ᑭᔐᒪᓂᑑ ᐅᑭᒋᐊᓇᒥᐁᐎᑭᒫᒪᓐ ᓅᒋᑯ ᒋᐃᓂᒥᑎᐸᓐ, ᑮᐃᑭᑐᐗᐞ᙮

23:5b.ACT.023.005 ᒦᑕᔥ ᑆᓬ ᑳᐃᑭᑐᒡ: ᓂᐐᒋ ᐅᒌᒫᑲᓇᒃ, ᑳᐐᓐ ᓂᑮ ᑭᑫᑕᓰᓐ ᐁᑭᒋᐊᓇᒥᐁᐎᑭᒫᐎᒡ ᐋᓃᔥ ᒦ ᐅᐌ ᐁᔑᐲᐃᑳᑌᒃ: ᑳᐐᓐ ᓅᒋᑯ ᑭᑲᐃᓈᓯᐙᐙ ᑳᓃᑳᓂᔥᑲᐙᒡ ᑭᐐᒋ ᐱᒫᑎᓰᒫᑲᓂᓂ, ᐅᑮᐃᓈᐞ᙮

23:6b.ACT.023.006 ᐊᐲ ᑕᔥ ᑆᓬ ᑳᑭᑫᑕᕽ ᐯᔑᑴᐙᓐ ᓵᒐᓰᐗᐞ ᐁᑎᓄᐎᓂᒡ, ᑯᑕᒃ ᑕᔥ ᐯᕒᐊᓰᐞ ᐁᑎᓄᐎᓂᒡ, ᐅᐅ ᑮᐃᔑ ᔖᑯᐌ ᐃᐃᒫ ᐁᔑ ᒫᐗᒋᐃᑎᐎᓐᒡ: ᓂᐐᒋ ᐅᒌᒫᑲᓇᒃ, ᑫᓃᓐ ᐅᔕ ᐯᕒᐊᓰ ᓂᑎᓄᐤ, ᓂᓃᑭᐃᑰᒃ ᑲᔦ ᐯᕒᐊᓰᒃ ᑭᑎᓄᐎᐗᒃ᙮ ᒦᑕᔥ ᑳᐅᒋ ᑎᐹᑯᓂᑰᔮᓐ ᐁᐲᑑᔮᓐ ᐁᑫᒋᓈᐅᔮᓐ ᑳᓂᐳᐙᒡ ᒋᑮᐌ ᐱᒫᑎᓯᐙᒡ, ᑮᐃᑭᑐ᙮

23:7b.ACT.023.007 ᐊᐲ ᑕᔥ ᐅᐅᐌᓂ ᑳᐃᑭᑐᒡ ᑮᒫᒌ ᑲᑲᓅᓂᑎᐗᐞ ᐃᐃ ᐯᕒᐊᓰᐞ, ᐃᐃ ᑲᔦ ᓵᒐᓰᐗᐞ ᑳᑮ ᒫᐗᒋᐃᑎᓂᒡ ᒦᔥ ᑳᐃᔑ ᓀᓈᐎᐃᑎᓂᒡ᙮

23:8b.ACT.023.008 ᓵᒐᓰᐗᒃ ᐋᓃᔥ ᑮᐃᑭᑐᐗᒃ ᐁᐊᔮᓯᓂᓂᒃ ᑮᐌ ᐱᒫᑎᓯᐎᓐ, ᑮᐃᑭᑐᐗᒃ ᑲᔦ ᐁᒐᓬᐊᐞ ᐁᐊᔮᓯᓂᒃ, ᐊᒑᑾᐞ ᑲᔦ ᐁᐊᔮᓯᓂᒃ᙮ ᐯᕒᐊᓰᒃ ᐃᑕᔥ ᐐᓐ ᐅᑮ ᑌᐺᑖᓈᐙᓐ ᑲᑭᓇ ᐅᓄ᙮

23:9b.ACT.023.009 ᑮᐊᓂ ᑭᔒᐌᐗᒃ ᐁᑲᑲᓅᓂᑎᐙᒡ᙮ ᐋᓂᑕ ᑕᔥ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᐯᕒᐊᓰᑳᕽ ᑳᑮᐅᒋ ᑎᐯᑖᑯᓯᐙᒡ ᑮᑲᑴ ᔖᑰᓱᑖᑯᓯᐗᒃ ᐁᑮᐃᑭᑐᐙᒡ: ᑳᐐᓐ ᑫᑰᓐ ᓂᒥᑲᒧᐙᓰᒥᓐ ᒋᐃᔑ ᐊᔮᒡ ᐗᐊ ᐃᓂᓂ, ᑯᒫᔥ ᑲᔦ ᑌᐺ ᐊᒑᑾᓐ ᑳᑲᓅᓂᑯᑴᓐ, ᑯᒫ ᑲᔦ ᐁᒐᓬᐊᓐ, ᑮᐃᑭᑐᐗᒃ᙮

23:10b.ACT.023.010 ᐊᐲ ᑕᔥ ᐐᑫ ᐁᐊᓂᑭᒋ ᑮᑳᑎᓈᓂᐗᓂᓂᒃ, ᐊᐊ ᑭᒋ ᔑᒫᑲᓂᔒᐎᑭᒫ ᐅᑮᓇᓃᓵᓀᓂᒫᓐ ᑆᓬᐊᓐ ᒋᐲᓯᐱᒋᑲᓂᐎᓂᒡ᙮ ᒦᑕᔥ ᑳᑮᐊᓅᓈᒡ ᐅᔑᒫᑲᓂᔒᒪᐞ ᒋᐃᔖᓂᒡ ᑳᑮᐃᔑ ᒫᒪᐎᐃᑎᓂᒡ ᒫᓄ ᑯ ᒋᓈᓯᑲᐙᓂᒡ ᑆᓬᐊᓐ ᐃᐃᒫ ᑕᔥ ᒋᔑ ᐲᓈᓂᒡ ᔑᒫᑲᓂᔒᐎᑲᒥᑯᕽ᙮

23:11b.ACT.023.011 ᐁᑎᐱᑲᓂᓂᒃ ᐃᓴ ᑆᓬ ᐅᑮᐐᒋᑳᐸᐎᑖᑰᓐ ᑳᑎᐯᒋᑫᓂᒡ ᐅᐅ ᐁᑮᐃᑯᒡ: ᑫᑯ ᓭᑭᓯᑫᓐ, ᒪᔥᑲᐌᑕᓐ᙮ ᑳᑮᐃᔑ ᑎᐹᒋᒥᔭᓐ ᐌᑎ ᒉᕒᐆᓴᓬᐊᒥᕽ, ᒦ ᓴ ᐃ ᐯᔑᑾᓐ ᑫᐃᔑ ᑎᐹᒋᒥᔭᓐ ᐅᕒᐆᒥᕽ, ᐅᑮᐃᑰᓐ᙮

23:12b.ACT.023.012 ᐁᐊᓂ ᑭᔐᐹᐗᑲᓂᓂᒃ ᑕᔥ ᐋᓂᑕ ᒎᐗᐞ ᑮᑭᒋ ᐊᔓᑕᒫᑎᐗᐞ ᐁᑮᐃᑭᑐᓂᒡ ᐁᐐᐅᒋ ᐐᓯᓂᓯᓂᒃ, ᐁᐐᐅᒋ ᒥᓂᑴᓯᓂᒃ ᑲᔦ ᐹᓂᒫ ᑮᓂᓯᑯᒡ ᑆᓬ᙮

23:13b.ACT.023.013 ᐊᐗᔑᒣ ᑕᔥ ᓃᒥᑕᓇ 40 ᑮᑕᔑᐗᐞ ᐃᐃ ᑳᑮᐃᔑ ᑮᒨᒋ ᐊᔓᑕᒫᑎᓂᒡ᙮

23:14b.ACT.023.014 ᐅᑮᐊᑕ ᐙᐸᒫᓂ ᑕᔥ ᑭᒋᐊᓇᒥᐁᐎᑭᒫᐞ, ᐃᓂ ᑲᔦ ᑳᓃᑳᓀᑖᑯᓯᓂᒡ ᒎᐗᐞ ᐅᐅ ᐁᑮᐃᓈᓂᒡ: ᓂᑮᐃᔑᒋᑫᒥᓐ ᓴ ᓂᑮᑭᒋ ᐊᔓᑕᒫᑎᒥᓐ ᑫᑰᓐ ᐁᐐᐅᒋ ᒦᒋᓯᐙᕽ ᐹᓂᒫ ᐱᑯ ᑆᓬ ᑮᓂᓴᑭᒡ᙮

23:15b.ACT.023.015 ᑮᓇᐙ ᑕᔥ, ᐃᑭ ᑲᔦ ᐅᑑᓇᔓᐌᒃ ᐐᑕᒪᐎᒃ ᑭᒋ ᔑᒫᑲᓂᔒᐎᑭᒫ ᒋᐱ ᓃᓵᑕᐌᐎᓈᓂᒡ ᑆᓬᐊᓐ ᐃᐃᒫ ᐁᔑ ᐊᔮᔦᒃ ᒋᐃᔑᒋᑫᑳᓱᔦᒃ ᐊᐗᔑᒣ ᐁᐐ ᑭᑫᑕᒧᐌᒃ ᑳᐃᔑ ᒪᒫᔑᓂᒡ᙮ ᓃᓇᐎᓐᑦ ᑕᔥ ᐐᓐ ᐋᔕ ᓂᑮ ᑮᔒᒥᓐ ᐁᐐᓂᓴᑭᒡ ᒋᑆᐅᑎᑕᕽ ᐅᐅᒫ, ᑮᐃᑭᑐᐗᐞ᙮

23:16b.ACT.023.016 ᑆᓬ ᑕᔥ ᐅᑕᐌᒫᓐ ᐅᑯᓯᓯᓂ ᐅᑮᓅᑕᐙᓂ ᐃᐃᒫ ᐁᐊᑲᒪᐎᓐᒡ᙮ ᒦᑕᔥ ᑳᑮ ᐲᔖᓂᒡ ᐃᐃᒫ ᔑᒫᑲᓂᔒᐎᑲᒥᑯᕽ ᐁᑮᐱ ᐐᑕᒫᑯᒡ᙮

23:17b.ACT.023.017 ᑆᓬ ᑕᔥ ᐅᑮᐊᑐᒫᓐ ᐯᔑᒃ ᔑᒫᑲᓂᔒᐎᑭᒫᓐ ᐅᐅ ᐁᑮᐃᓈᒡ: ᐃᔑᐎᔥ ᐗᐊ ᐅᔥᑭᓃᑭ ᒋᐙᐸᒫᒡ ᑭᒋ ᔑᒫᑲᓂᔒᐎᑭᒫᓐ, ᑫᑰᓂᓂ ᐅᔕ ᐅᑕᔮᓐ ᑫᐐᑕᒪᐙᒡ, ᐅᑮᐃᓈᓐ᙮

23:18b.ACT.023.018 ᑌᐺ ᑕᔥ ᐅᑮᐃᔑᐎᓈᓂ ᐌᑎ ᐁᔑ ᐊᔮᓂᒡ ᑭᒋ ᔑᒫᑲᓂᔒᐎᑭᒫᓐ ᐅᐅ ᐁᑮᐃᓈᓂᒡ: ᑆᓬ ᑳᑕᑯᓂᓐᒡ ᓂᑮᐊᑐᒥᒃ ᐁᑮ ᑲᑴᒋᒥᒡ ᒋᐲᓂᒪᒃ ᐅᓄ ᐅᔥᑭᓃᑭᐗᓐ ᐁᐊᔮᓂᒡ ᑫᑰᓐ ᒋᐐᑕᒪᐎᒥᒃ, ᐅᑮᐃᓈᓂ᙮

23:19b.ACT.023.019 ᑭᒋ ᔑᒫᑲᓂᔒᐎᑭᒫ ᑕᔥ ᐅᑮ ᓴᑭᓂᑫᓈᓐ ᐸᑳᓐ ᐁᑮᐃᔑᐎᓈᒡ ᐁᑮ ᑮᒨᒋ ᑲᑴᒋᒫᒡ ᐁᑮᐃᓈᒡ: ᐌᑯᓀᓐ ᐃᐃ ᐁᔮᔭᓐ ᑳᐐᐐᑕᒪᐎᔭᓐ? ᐅᑮᐃᓈᓐ᙮

23:20b.ACT.023.020 ᐅᐅ ᑕᔥ ᐅᑮᐃᑰᓐ: ᑳᓃᑳᓂᓯᐙᒡ ᒎᐗᒃ ᑮᐅᓀᑕᒨᒃ ᒋᑲᑴᒋᒥᒀ ᐙᐸᓂᓂᒃ ᒋᐲᓂᒪᒡ ᑆᓬᐊᓐ ᑳᔑ ᐅᓇᔓᐌᕽ, ᐁᐐᐃᔑᒋᑫᑳᓱᐙᒡ ᐊᐗᔑᒣ ᑫᑰᓐ ᐁᐐᑲᑴ ᑭᑫᓂᒫᐙᒡ ᐋᓃᓐ ᑳᐃᔑ ᒪᒫᔑᓂᒡ᙮

23:21b.ACT.023.021 ᑫᑯ ᑕᔥ ᑌᐺᑕᐙᑫᓐ᙮ ᐊᐗᔑᒣ ᐅᔕ ᓃᒥᑕᓇ 40 ᑕᔑᐗᒃ ᐃᓂᓂᐗᒃ ᑳᐊᑲᒪᐙᐙᒡ᙮ ᑮᒫᒪᐎ ᑭᒋ ᐊᔓᑕᒫᑎᐗᒃ ᐁᐐᐅᒋ ᐐᓯᓂᓯᒀ, ᐁᐐᐅᒋ ᒥᓂᑴᓯᒀ ᑲᔦ ᐹᓂᒫ ᑮᓂᓵᐙᒡ᙮ ᐋᔕ ᑕᔥ ᑮᑮᔒᐗᒃ ᐃᐃ ᐁᐐᐃᔑᒋᑫᐙᒡ, ᒦᔥ ᐁᒥᒋ ᐲᐃᒀ ᐋᓃᓐ ᑫᐃᑭᑐᐗᒡ, ᐅᑮᐃᑰᓐ᙮

23:22b.ACT.023.022 ᑭᒋ ᔑᒫᑲᓂᔒᐎᑭᒫ ᑕᔥ ᐅᑮ ᒫᒋᓂᔕᐙᓐ ᐃᓂ ᐅᔥᑭᓃᑭᐗᓐ ᐁᑮᐊᔦᒀᒥᒫᒡ ᐁᑮᐃᓈᒡ: ᑫᑯ ᐊᐎᔭ ᐐᑕᒪᐙᑫᓐ ᐅᓄ ᐁᑮᐱ ᐐᑕᒪᐎᔭᓐ, ᐅᑮᐃᓈᓐ᙮

23:23b.ACT.023.023 ᑭᒋ ᔑᒫᑲᓂᔒᐎᑭᒫ ᑕᔥ ᐅᑮᐊᑐᒫᐞ ᓃᔑᓐ ᔑᒫᑲᓂᔒᐎᑭᒫᐞ ᐁᑮᐊᓅᓈᒡ: ᑕᑲ ᑕᑾᔮᒌᐗᒃ ᓃᔣᒃ 200 ᔑᒫᑲᓂᔕᒃ ᒋᐃᔖᐙᒡ ᓭᓴᕒᐄᔭ ᐆᑌᓈᕽ᙮ ᓃᔣᓯᒥᑕᓇ 70 ᑲᔦ ᒥᑕᑎᒨᐞ ᑳᐱᒥᐗᓀᐸᐃᑯᐙᒡ, ᓃᔣᒃ 200 ᑲᔦ ᔑᒫᑲᓂᔕᒃ ᒌᐳᐌᐱᓂᑲᓇᓐ ᑳᔮᐸᒋᑑᐙᒡ ᒋᐅᔒᑖᐙᒡ ᒋᒫᒑᐙᒡ ᔖᑲᓱ 9 ᑎᐸᐃᑲᓀᔮᓂᒃ ᓅᑯᒻ ᐅᓈᑯᔑᓂᓂᒃ᙮

23:24b.ACT.023.024 ᐅᑎᓇᒪᐎᒃ ᑲᔦ ᒥᑕᑎᒨᐞ ᐊᐊ ᑆᓬ ᑫᓂ ᐋᔮᓂᑫ ᐱᒥᐗᓈᓂᑯᒡ ᑫᒋᓈᒡ ᐃᑯ ᐌᐌᓂ ᒋᐃᔑᐎᓀᒃ ᐁᔑ ᐊᔮᓂᒡ ᐲᓬᐃᑭᓴᓐ ᑳᑮᐋᓂᑫᐎᑭᒫᐎᓂᒡ, ᑮᐃᑭᑐ᙮

23:25b.ACT.023.025 ᒦᑕᔥ ᐅᐅᓇᑫ ᑳᐃᔑᐲᐃᑫᒡ ᐁᒫᒌᐲᐃᑫᒡ:

23:26b.ACT.023.026 ᓃᓐ ᑲᓬᐋᑎᔭᔅ ᓬᐃᓯᔭᔅ ᑭᑑᔑᐲᐊᒪᐎᓐ, ᑮᓐ ᐲᓬᐃᑭᔅ ᑫᒋᐃᓀᑖᑯᓯᔭᓐ ᑳᑎᐯᑕᒪᓐ ᒎᑏᔭ ᐊᑭ, ᐴᔔ ᑭᑎᓂᓐ᙮

23:27b.ACT.023.027 ᐗᐊ ᓴ ᐃᓂᓂ ᐅᑮᐅᑎᑎᓂᑰᐞ ᒎᐗᐞ ᑫᑳ ᑕᔥ ᐅᑮᓂᓯᑰᐞ᙮ ᐁᑮ ᑭᑫᑕᒧᐗᒃ ᑕᔥ ᐅᕒᐆᒥᕽ ᐁᐅᒋ ᑎᐯᑖᑯᓯᒡ, ᓂᑮᐃᔖᐙᓐ ᐁᑮᐃᔑᐎᓂᒪᒃ ᓂᔑᒫᑲᓂᔒᒪᐞ ᐁᑮᐊᐎ ᓈᑕᒪᐗᒃ ᐃᑕᐙ᙮

23:28b.ACT.023.028 ᓂᑮᐐ ᑭᑫᑕᒧᐙᓐ ᑕᔥ ᐋᓃᓐ ᑳᑮᐃᔑ ᐊᓈᒥᒥᓐᒡ, ᒦᔥ ᑳᑮᐃᔑᐎᓇᒃ ᐁᔑᐊᔮᓂᒡ ᐅᓇᔓᐌᐎᓂᓂᐗᐞ᙮

23:29b.ACT.023.029 ᒦᑕᔥ ᑳᑮ ᑭᑫᑕᒧᐗᒃ ᑳᐐᓐ ᑫᑰᓐ ᑮᐃᔑᒋᑫᓰ ᑫᑮᐅᒋ ᑕᑯᓂᑎᐸᓐ, ᑫᑮᐅᒋ ᓂᓯᑎᐸᓐ ᑲᔦ᙮ ᐃᐃ ᓴ ᑳᑮᐃᔑ ᐊᓈᒥᒥᓐᒡ ᐁᓇᔓᐌᓂᒡ ᐁᑕ ᑮᐅᒌᒪᑲᓂᓂ᙮

23:30b.ACT.023.030 ᐊᐲ ᑕᔥ ᑳᑮ ᑭᑫᑕᒧᐗᒃ ᐋᓃᓐ ᐙᑑᑕᐎᓐᒡ ᐁᐐ ᑮᒨᒋ ᓂᓯᓐᒡ ᐗᐊ ᐃᓂᓂ, ᔐᒫᒃ ᑕᔥ ᓂᑮᐃᓀᑕᒻ ᒋᐃᔑᓂᔕᐗᒃ ᐁᔑ ᐊᔮᔭᓐ᙮ ᓂᑮᐐᑕᒪᐎᒫᐞ ᑕᔥ ᑲᔦ ᐃᐃ ᑳᒪᒥᔑᒥᑯᒡ ᒋᐐᑕᒪᐎᒥᒃ ᐋᓃᓐ ᐁᔑ ᐊᓈᒥᒥᑯᒡ᙮

23:31b.ACT.023.031 ᔑᒫᑲᓂᔕᒃ ᑕᔥ ᑮᐃᔑᒋᑫᐗᒃ ᐃᐃ ᑳᑮᐃᓂᑣ, ᐁᑮ ᒫᒌᓈᐙᒡ ᑆᓬᐊᓐ ᒣᒀ ᐁᑎᐱᑲᓂᓂᒃ ᐁᑮᐃᔑᐎᓈᐙᒡ ᐊᑏᐸᑕᕒᐃᔅ ᑳᐃᒋᑳᑌᓂᒃ ᐆᑌᓇ᙮

23:32b.ACT.023.032 ᐌᔮᐸᓂᓂᒃ ᑕᔥ ᐃᑭ ᑳᒥᑐᓭᐙᒡ ᔑᒫᑲᓂᔕᒃ ᑮᐊᔐ ᑮᐌᐗᒃ ᐁᑮᐃᔖᐙᒡ ᔑᒫᑲᓂᔒᐎᑲᒥᑯᕽ, ᐃᑭ ᑕᔥ ᐐᓐ ᑳᐱᒥᐗᓀᐸᐃᑯᐙᒡ ᔑᒫᑲᓂᔕᒃ ᑫᔮᐱ ᐅᑮᐊᓂ ᐐᒌᐙᐙᓐ ᑆᓬᐊᓐ᙮

23:33b.ACT.023.033 ᐊᐲ ᑕᔥ ᐅᑯ ᑳᑕᑯᔑᓄᐙᒡ ᓭᓴᕒᐄᔭᐃᕽ, ᐅᑮᒦᓈᐙᓐ ᐅᔑᐲᐃᑲᓐ ᐃᓂ ᑳᑎᐯᑕᒥᓂᒡ ᐃᐃ ᐊᑭ, ᒦᔥ ᑲᔦ ᐃᒫ ᑳᐃᔑ ᐸᑭᑎᓈᐙᒡ ᑆᓬᐊᓐ ᐁᔑ ᐊᔮᓂᒡ᙮

23:34b.ACT.023.034 ᐊᐲ ᑕᔥ ᐲᓬᐃᑭᔅ ᑳᐊᓇᒥᑑᒡ ᐃᐃ ᐅᔑᐲᐃᑲᓐ ᐅᑮ ᑲᑴᒋᒫᓐ ᑆᓬᐊᓐ ᐋᓃᓐ ᐁᔑᓂᑳᑌᓂᒃ ᐊᑭ ᐌᒋ ᑎᐯᑖᑯᓯᓂᒡ᙮ ᐊᐲ ᑕᔥ ᑳᐐᑕᒪᐎᓐᒡ ᓯᓬᐃᔑᔭ ᐊᑮᕽ ᐁᐅᒋ ᑎᐯᑖᑯᓯᓂᒡ,

23:35b.ACT.023.035 ᐅᐅ ᑕᔥ ᐅᑮᐃᓈᓐ: ᓂᑲ ᓅᑖᓐ ᐃᓴ ᐋᓃᓐ ᐁᑰᐗᓀᓐ ᐊᐲ ᑕᑯᔑᓄᐙᒡ ᐃᑭᐌᓂᐗᒃ ᑳᒪᒥᔑᒥᒀ᙮ ᑮᐃᑭᑐ ᑕᔥ ᑆᓬᐊᓐ ᒋᔑ ᑲᓇᐌᓂᒥᒥᓐᒡ ᐁᕒᐊᑕᓐ ᐅᑭᒋ ᐙᑳᐃᑲᓂᓃᕽ᙮

24

24:1b.ACT.024.001 ᓈᓄᑮᔑᒃ ᑕᔥ ᐁᐊᓂ ᐃᔑᓭᓂᒃ ᑭᒋᐊᓇᒥᐁᐎᑭᒫ ᐋᓇᓈᔭᔅ ᐁᔑᓂᑳᓱᒡ ᑮᐲᔖ ᐁᐐᒌᐎᑯᒡ ᐋᓂᑕ ᑳᓃᑳᓀᑖᑯᓯᓂᒡ ᒎᐗᐞ, ᐃᓂ ᑲᔦ ᐯᔑᒃ ᐅᓈᑖᒫᑫᓐ ᑕᕒᑕᓬᐊᔅ ᐁᐃᔑᓂᑳᓱᓂᒡ᙮ ᒦᑕᔥ ᑳᑮ ᑕᔑᑕᒪᐙᐙᒡ ᐲᓬᐃᑭᓴᓐ ᑳᑎᐯᑕᒥᓂᒡ ᐊᑭ, ᐋᓃᓐ ᐁᔑ ᐊᓈᒥᒫᐙᒡ ᑆᓬᐊᓐ᙮

24:2b.ACT.024.002 ᒦᑕᔥ ᑆᓬ ᑳᔑ ᐊᑐᒥᓐᒡ᙮ ᑕᕒᑕᓬᐊᓴᓐ ᑮᒫᒌ ᑲᑭᑐᐗᓐ ᐁᒪᒥᔑᒥᑯᒡ ᐁᐃᑭᑐᓂᒡ: ᑮᓐ ᑫᒋ ᐃᓀᑖᑯᓯᔭᓐ ᐲᓬᐃᑭᔅ ! ᑮᓐ ᓴ ᐁᑲᑮᑖᐎ ᐅᑭᒫᑲᑖᑫᔭᓐ ᐋᔕ ᑭᓉᔥ ᑳᐅᒋ ᐱᓵᓇᑲᒥᑲᒃ ᓂᑕᑮᓈᓂᕽ, ᒦᔥ ᑲᔦ ᑳᓂᐅᒋ ᒥᓄᓭᒋᑳᑌᑭᓐ ᑫᑰᓇᓐ ᑳᒫᔑᓭᐃᑯᔮᕽ ᐊᐗᔑᒣ ᒋᒥᓄᓭᔮᕽ ᐅᐅᒫ ᓂᑕᑮᓈᓂᕽ᙮

24:3b.ACT.024.003 ᒥᓯᐌ ᑕᔥ ᓂᒥᓉᑖᒥᓐ ᐅᓄ ᒨᔕᒃ; ᑭᒋ ᒦᑴᒡ ᑕᔥ ᑭᑎᑰ᙮

24:4b.ACT.024.004 ᑳᐐᓐ ᑕᔥ ᐊᐗᔑᒣ ᓂᑎᓀᑕᓰ ᒋᐅᑕᒥᓇᒪᐎᓈᓐ ᑭᑎᐸᐃᑲᓐ, ᒦᔥ ᐁᔑ ᐸᑯᓭᓂᒥᓈᓐ ᑳᔑ ᓂᑖ ᒥᓄᒋᑫᔭᓐ ᐊᒋᓇ ᒋᐱᓯᑕᐎᔮᕽ ᑳᐐᐃᑰᔭᓐ᙮

24:5b.ACT.024.005 ᓂᑮᒥᑲᐙᓈᓐ ᓴ ᐗᐊ ᐃᓂᓂ ᐁᓂᔑᐗᓈᑕᑲᒥᑭᓯᒡ, ᒦ ᐄᑐᒃ ᐗᐊ ᑳᐸᐹ ᐅᒻᐺᑲᒥᑭᓯᒡ ᒥᓯᐌ ᐊᑮᕽ ᐁᔑ ᐊᔮᓂᒡ ᒎᐗᐞ᙮ ᐅᓃᑳᓂᔥᑲᐙᐞ ᑲᔦ ᐌᑸᓄᓂᒡ ᓈᓴᕒᐄᐎᓂᓂᐗᐞ ᙮

24:6b.ACT.024.006 ᐗᐊ ᑕᔥ ᑲᔦ ᐃᓂᓂ ᐅᑮᑲᑴ ᐐᓀᑖᑯᑑᓐ ᑭᒋᐊᓇᒥᐁᐎᑲᒥᒃ, ᐃᑕᐙ ᑕᔥ ᓂᑮᐅᑎᑎᓈᓈᓐ᙮ ᓃᓇᐎᓐᑦ ᓴ ᑯ ᓂᐐ ᑎᐹᑯᓈᓈᐸᓐ ᐁᔑᓯᓂᓂᒃ ᓂᑑᓇᔓᐌᐎᓂᓈᓐ᙮

24:7b.ACT.024.007 ᑭᒋ ᔑᒫᑲᓂᔒᐎᑭᒫ ᑕᔥ ᓬᐃᓯᔭᔅ ᓂᑮᒨᑮᑖᑯᓈᓐ ᐁᑮ ᒪᓈᒋᒋᑫᓯᒃ ᐁᒪᑲᒥᔭᒥᓐᒡ ᑆᓬᐊᓐ,

24:8b.ACT.024.008 ᐁᑮᐃᓈᑯᓂᑫᒡ ᐃᐃ ᑳᒪᒥᔑᒥᐌᓂᒡ ᐅᐅᒫ ᒋᐲᔖᓂᒡ ᐁᔑ ᐊᔮᐗᒡ᙮ ᐊᑕ ᑭᑫᓂᒪᒡ ᑕᔥ ᑮᓐ ᐃᑯ ᑭᑲ ᑭᑫᑖᓐ ᐁᑌᐱᒪᑭᒡ ᑲᑭᓇ ᐅᓄ ᑳᔑ ᐊᓈᒥᒪᑭᒡ, ᑮᐃᑭᑐ ᐊᐊ ᐅᓈᑕᒫᑫ᙮

24:9b.ACT.024.009 ᒎᐗᒃ ᑕᔥ ᑫᐐᓇᐙ ᐅᑮ ᐐᒋᑑᓈᐙ ᐃᐃᐌᓂ ᑳᑮᐃᔑ ᐊᓈᒥᒥᒥᓐᒡ, ᐁᑮᐃᑭᑐᐙᒡ ᑲᑭᓇ ᐃᓂ ᐁᑌᐺᐗᓂᓂᑭᓐ᙮

24:10b.ACT.024.010 ᐊᐲ ᑕᔥ ᑳᑎᐯᑕᒥᓂᒡ ᐃᐃ ᐊᑭ ᑳᐙᑕᐊᒫᑯᒡ ᒋᑮᑭᑐᒡ, ᑆᓬ ᑮᐃᔑ ᓇᑴᑕᒻ: ᓂᑭᑫᑖᓐ ᐋᔕ ᑭᓉᔥ ᑕᓱᐱᐴᓐ ᐁᐱ ᐅᓈᑯᓇᑣ ᐅᐅᒫ ᐊᑮᕽ ᐌᒋ ᑎᐯᑖᑯᓯᐙᒡ᙮ ᐐᑫ ᑕᔥ ᓂᒥᓉᑕᒻ ᒋᑮᑭᑑᑕᒫᓱᔮᓐ᙮

24:11b.ACT.024.011 ᑮᓐ ᓴᑯ ᑭᑲᐌᒋᒥᑳᓐ ᑳᐐᓐ ᐊᐗᔑᒣ ᒥᑖᔑᓃᔓ ᑮᔑᒃ 12 ᑮᐃᔑᓭᓯᓅᓐ ᑳᑮᐃᔖᔮᓐ ᒉᕒᐆᓴᓬᐊᒥᕽ ᐁᑮᐊᐎ ᐊᓇᒥᐋᔮᓐ᙮

24:12b.ACT.024.012 ᑳᐐᓐ ᓂᑮᒥᑳᑯᓰᒃ ᒎᐗᒃ ᒋᑲᑴ ᔖᑰᓱᒥᒪᒃ ᐊᐎᔭᐞ ᐲᒋ ᑭᒋᐊᓇᒥᐁᐎᑲᒥᑯᕽ, ᒋᐅᒻᐺᑲᒥᑭᓯᐗᒃ ᑲᔦ ᐁᔑ ᒫᒫᐎᐊᔮᓂᐗᓂᓂᒃ᙮ ᑳᐐᓐ ᑲᔦ ᐊᓇᒥᐁᐎᑲᒥᑯᑳᕽ, ᑳᐐᓐ ᑲᔦ ᐱᑯ ᐋᑎ ᐆᑌᓈᕽ᙮

24:13b.ACT.024.013 ᑳᐐᓐ ᑲᔦ ᐅᑲ ᑲᔥᑭᑑᓰᓈᐙ ᒋᐙᐸᑕᐃᒀ ᐁᑌᐱᒥᐙᒡ ᐃᐃ ᓅᑯᒻ ᑳᔑ ᒪᒥᔑᒥᐙᒡ᙮

24:14b.ACT.024.014 ᐅᐅᐌ ᑕᔥ ᐐᓐ ᑭᐐᑕᒪᐎᓐ, ᓃᓐ ᐁᐊᓇᒥᐁᑕᐎᒪᒃ ᑳᐅᑭᔐᒪᓂᑑᒥᐙᒡ ᓂᑫᑌᔭᐋᒥᓈᐸᓃᒃ ᐁᐱᒥᓂᔕᐊᒫᓐ ᐃᐃ ᐃᔖᐎᓐ, ᒎᐗᒃ ᑳᐃᑕᒧᐙᒡ ᐁᑌᐺᐗᓯᓂᓂᒃ᙮ ᓂᑌᐺᑖᓐ ᑕᔥ ᑲᔦ ᑲᑭᓇ ᑫᑰᓐ ᐁᓇᑌᓂᒃ ᒨᓯᔅ ᐅᑑᓇᔓᐌᐎᓐ, ᐃᐃ ᑲᔦ ᒪᓯᓇᐃᑲᓐ ᑳᔑ ᐅᔑᐲᐃᑳᑌᓂᑭᓐ ᐅᑎᑭᑐᐎᓂᐙᓐ ᑳᑮ ᑲᓅᑕᒪᐙᐙᒡ ᑭᔐᒪᓂᑑᓐ᙮

24:15b.ACT.024.015 ᒦᑕᔥ ᑫᓃᓐ ᐯᔥᑾᓐ ᐁᔑ ᑌᐺᔦᓂᒪᒃ ᑭᔐᒪᓂᑑ ᑖᐱᔥᑰ ᐅᑯᐌᓂᐗᒃ ᑳᔑ ᑌᐺᔦᑕᒧᐙᒡ: ᒋᑮᐌ ᐱᒫᑎᓯᐙᒡ ᐅᑾᔭᒀᑎᓰᒃ, ᐃᑭ ᑲᔦ ᐅᒪᒋ ᐃᔑᐌᐱᓰᒃ ᑳᓂᐳᐙᒡ᙮

24:16b.ACT.024.016 ᒦᑕᔥ ᒨᔕᒃ ᑳᐅᒋ ᐃᔑᒋᑫᔮᓐ, ᐁᑲᑴ ᑲᓇᐌᓂᑎᓱᔮᓐ ᑾᔭᒃ ᒋᐃᔑᓈᑾᒃ ᑳᔑ ᓈᓈᑲᑕᐌᑕᒫᓐ ᐁᓈᓴᒦᒡ ᑭᔐᒪᓂᑑ, ᐃᑭ ᑲᔦ ᐯᒫᑎᓯᐙᒡ᙮

24:17b.ACT.024.017 ᑭᓉᔥ ᑕᔥ ᑕᓱᐱᐴᓐ ᐁᑮᐅᑌᑎᔮᓐ, ᒉᕒᐆᓴᓬᐊᒥᕽ ᓂᑮᐱᔑ ᑮᐌ ᐁᑮ ᐲᑕᒪᐗᒀ ᑳᑭᑎᒫᑭᓯᐙᒡ ᒦᑭᐙᓇᓐ, ᑲᔦ ᑕᔥ ᒋᐸᑭᑎᓈᓱᔮᓐ᙮

24:18b.ACT.024.018 ᒣᒀ ᑕᔥ ᐅᐅ ᐁᐃᔑᒋᑫᐗᒃ, ᒦ ᐃ ᑳᑮ ᒥᑲᐎᐙᒡ ᑭᒋᐊᓇᒥᐁᐎᑲᒥᑯᕽ ᐋᔕ ᐁᑮᑮᔑ ᐃᔑᒋᑫᐗᒃ ᐃᐃ ᐃᔑᒋᑫᐎᓐ ᑳᓂᑖ ᐃᔑᒋᑫᕽ ᑫᐅᒋ ᐯᑫᑖᑯᓯᓈᓂᐗᕽ ᐁᓈᓴᒦᒡ ᑭᔐᒪᓂᑑ᙮ ᑳᐐᓐ ᓂᑮᐐᒌᐎᑯᓰᒃ ᐊᐎᔭᒃ ᒋᐹᑏᓄᐙᒡ, ᑳᐐᓐ ᑲᔦ ᓂᑮᐅᒻᐺᑲᒥᑭᓯᓰ᙮

24:19b.ACT.024.019 ᐊᔮᐗᒃ ᑕᔥ ᐋᓂᑕ ᒎᐗᒃ ᐁᔑᔭ ᐊᑮᕽ ᐌᒋᐙᒡ ᐅᐅᒫ ᑫᐐᓇᐙ ᑫᑮᐊᔮᐙᐸᓐ ᐁᔑ ᐊᔮᐗᒡ ᒋᑮᐐᑕᒪᐎᒀᐸᓐ ᑮᔥᐱᓐ ᑫᑰᓐ ᐊᔮᓂᑴᓐ ᐁᔑ ᒪᒥᔑᒥᐙᒡ᙮

24:20b.ACT.024.020 ᑯᒫᔥ ᑲᔦ ᐅᑯᐌᓂᐗᒃ ᐃᓂᓂᐗᒃ ᐅᐅᒫ ᑳᐊᔮᐙᒡ ᐅᑖ ᐐᑖᓈᐙ ᐌᑯᓀᓐ ᑎᓄ ᒪᒫᔑᐎᓐ ᑳᐃᔑᒋᑫᐗᒃ ᐊᐲ ᑮᐃᓈᓴᒥᑳᐸᐎᑕᐎᒪᒃ ᐅᑑᓇᔓᐌᐞ᙮

24:21b.ACT.024.021 ᑯᒫ ᑕᔥ ᑲᔦ ᐅᐅ ᓂᑮᐃᔑ ᒪᒫᔑᓈᑐᒃ ᐯᔑᒃ ᐃᑭᑐᐎᓐ ᑳᑮᐃᔑ ᔖᑯᐌᔮᓐ ᒣᒀ ᐌᑎ ᐁᓃᐸᐎᔮᓐ: ᐁᑌᐺᑕᒫᓐ ᓂᐳᐎᓂᕽ ᒋᐅᒋ ᑮᐌ ᐱᒫᑎᓯᓈᓂᐗᕽ, ᒦ ᐃ ᑳᐅᒋ ᑎᐹᑯᓂᔦᒃ ᓅᑯᒻ ᑳᑮᔑᑲᒃ ᐅᐅ ᐁᐃᓈᓴᒥᑳᐸᐎᑕᐎᓇᑰᒃ, ᑆᓬ ᑮᐃᑭᑐ᙮

24:22b.ACT.024.022 ᐊᐊ ᑕᔥ ᐲᓬᐃᑭᔅ ᐁᔑᓂᑳᓱᒡ, ᑳᓇᑲᒋᑭᑫᑕᕽ ᐃᔖᐎᓐ ᑮᐃᑭᑐ ᒋᐴᓂᒋᑳᑌᓂᒃ ᐃᐃ ᒫᐗᒋᐃᑎᐎᓐ᙮ ᒦᑕᔥ ᑳᐃᑭᑐᒡ: ᐊᐲ ᓬᐃᓯᔭᔅ ᑭᒋ ᔑᒫᑲᓂᔒᐎᑭᒫ ᑕᑯᔑᕽ ᓂᑲ ᐅᓀᑖᓐ ᐋᓃᓐ ᑫᐃᓈᑯᓂᑰᔭᓐ, ᑮᐃᑭᑐ᙮

24:23b.ACT.024.023 ᐅᑮᐊᓅᓈᓐ ᑕᔥ ᔑᒫᑲᓂᔒᐎᑭᒫᓐ ᑾᔭᒃ ᒋᑲᓇᐌᓂᒫᓂᒡ ᑆᓬᐊᓐ, ᐱᓵᓐ ᑲᔦ ᐗᐃᔑᒋᑫᓂᒡ ᒋᐃᔑᒋᑫᓂᒡ, ᐱᓵᓐ ᑲᔦ ᒋᐸᑭᑎᓈᓂᒡ ᐃᐃ ᑳᓵᑭ ᐐᒌᐎᑯᓂᒡ ᒋᐸᒥᐃᑯᓂᒡ᙮

24:24b.ACT.024.024 ᓈᓈᑫ ᑕᔥ ᐁᐊᓂ ᐃᔑᓭᓂᒃ, ᐲᓬᐃᑭᔅ ᑮᐲᔖ ᐁᐐᒌᐙᒡ ᐐᐗᓐ ᒐᕒᐅᓯᓬᐊ ᑳᐃᔑᓂᑳᓱᓂᒡ, ᐁᒎᐎᑴᐎᓂᒡ᙮ ᒦᑕᔥ ᑳᑮᐊᑐᒫᒡ ᑆᓬᐊᓐ ᒋᓈᓯᑲᐎᒥᓐᒡ᙮ ᐅᑮ ᐱᓯᑕᐙᓐ ᑕᔥ ᐁᑕᔑᑕᒥᓂᒡ ᐁᔑ ᑌᐺᔦᓂᒥᒥᓐᒡ X ᒋᓴᓲᓐ᙮

24:25b.ACT.024.025 ᐅᑮ ᑕᔑᑕᒥᓂ ᑾᔭᒀᑎᓯᐎᓐ, ᑾᔭᑯ ᑎᐯᓂᒥᑎᓱᐎᓐ, ᐃᐃ ᑲᔦ ᐱᒌᓇᒃ ᑳᐐ ᑎᐹᑯᓂᑫᐎ ᑮᔑᑲᓂᓂᒃ᙮ ᐲᓬᐃᑭᔅ ᑕᔥ ᑮᓭᑭᓯ ᐁᑮᐃᑭᑐᒡ: ᒦ ᐃ ᑌᒥᓂᒃ! ᐊᓂᒫᒑᓐ᙮ ᐊᐲ ᓇᐃᓭᔮᓐ ᒦᓇᐙ ᑭᑲᐊᑐᒥᓐ, ᐅᑮᐃᓈᓐ᙮

24:26b.ACT.024.026 ᑮᑕᑯ ᐸᑯᓭᓂᒧ ᔔᓂᔮᓐ ᒋᑮᒨᒋ ᒦᓂᑯᒡ ᑆᓬᐊᓐ᙮ ᒦᑕᔥ ᐃᐃ ᐗᐐᐸ ᑳᑮᐅᒋ ᓂᑖ ᓈᒋᓂᔕᐙᒡ, ᐁᑮᓂᑖ ᑲᑲᓅᓈᒡ ᑲᔦ᙮

24:27b.ACT.024.027 ᐊᐲ ᑕᔥ ᓃᔓ ᐱᐴᓐ ᐁᐃᔑᓭᓂᒃ ᐲᓬᐃᑭᔅ ᐅᑮᓈᐱᔥᑳᑰᓐ ᐃᓂ ᑆᕒᔑᔭᔅ ᐯᔅᑕᔅ ᐁᔑᓂᑳᓱᓂᒡ᙮ ᒋᒥᓍᐸᒥᑯᒡ ᑕᔥ ᒎᐗᐞ ᐲᓬᐃᑭᔅ ᑳᐐᓐ ᐅᑮ ᐸᐹᒣᓂᒫᓰᓐ ᑆᓬᐊᓐ ᐁᑕᑯᓂᒥᓐᒡ᙮

25

25:1b.ACT.025.001 ᐊᐊᐌ ᑕᔥ ᐯᔅᑕᔅ ᐁᑮ ᑕᑯᔑᕽ ᐃᐃᒫ ᒎᑏᔭ ᐊᑮᕽ ᑳᔑ ᑎᐯᑕᕽ, ᓂᓱ ᑮᔑᒃ ᐁᔑᓭᓂᒃ ᓭᓴᕒᐄᔭ ᐆᑌᓈᕽ ᑮᐅᒋ ᒫᒑ ᒉᕒᐆᓴᓬᐊᒥᕽ ᐁᑮᐃᔖᒡ᙮

25:2b.ACT.025.002 ᑭᒋᐊᓇᒥᐁᐎᑭᒫᐞ ᑕᔥ, ᐃᐃ ᑲᔦ ᑳᓃᑳᓂᓯᓂᒡ ᒎᐗᐞ ᐅᑮᐊᑕ ᐙᐸᒥᑰᐞ ᐁᑮ ᑎᐹᒋᒧᑖᑯᒡ ᐁᔑ ᒪᒥᔑᒥᒥᓐᒡ ᑆᓬᐊᓐ ᙮

25:3b.ACT.025.003 ᐅᑮ ᐸᑯᓭᓂᒥᑰᐞ ᑕᔥ ᐁᑮ ᑲᑴᒋᒥᑯᒡ ᑫᑰᓐ ᒋᐃᔑᒋᑫᑕᒪᐙᒡ ᒋᓈᒋᓂᔕᐙᒡ ᑆᓬᐊᓐ ᒋᐲᓂᒥᓐᒡ ᐃᐃᒫ ᒉᕒᐆᓴᓬᐊᒥᕽ᙮ ᐅᑮᐊᑲᒪᐙᓂ ᐄᑐᒃ ᓂᑯᒋ ᐱᑯ ᐁᐐᓂᓵᓂᒡ ᐱᐱᒥ ᐊᔮᓂᒡ᙮

25:4b.ACT.025.004 ᐯᔅᑕᔅ ᑕᔥ ᐅᑮᐃᔑ ᓇᑴᑕᐙᐞ: ᑆᓬ ᓴ ᑲᓇᐌᑖᑯᓯ ᐌᑎ ᓭᓴᕒᐄᔭ ᐆᑌᓈᕽ, ᐋᔕ ᑕᔥ ᑫᑳ ᓃᓐ ᐃᑯ ᐌᑎ ᓂᐐᐃᔖ᙮

25:5b.ACT.025.005 ᐃᓇᔥᑫ ᑭᓃᑳᓂᓰᒥᐙᒃ ᓂᑲᔑ ᐐᒌᐎᑰᒃ ᐃᔖᐗᒃ ᐌᑎ ᒋᒪᒥᔑᒫᐙᒡ ᐃᓂ ᐃᓂᓂᐗᓐ ᑮᔥᐱᓐ ᑯᑕ ᑫᑰᓐ ᑳᐃᔑ ᒪᒫᔑᓂᑴᓐ, ᑮᐃᑭᑐ᙮

25:6b.ACT.025.006 ᓂᔣᓱ ᑮᔑᒃ 8, ᑯᒫ ᑲᔦ ᒥᑖᓱ ᑮᔑᒃ 10 ᑕᔥ ᐃᐃᒫ ᑮᐊᔮ, ᒦᔥ ᑳᐃᔑ ᐃᔖᒡ ᓭᓴᕒᐄᔭ ᐆᑌᓈᕽ᙮ ᐁᐊᓂ ᐙᐸᓂᓂᒃ ᑕᔥ ᑮᐅᓇᐱ ᐅᓇᔓᐌᐗᐱᐎᓂᕽ ᒦᔥ ᐁᑮᐊᓅᑮᒡ ᑆᓬᐊᓐ ᒋᐲᓂᒥᓐᒡ᙮

25:7b.ACT.025.007 ᒦᑕᔥ ᑆᓬ ᑳᑮ ᐲᓂᓐᒡ᙮ ᒎᐗᐞ ᑕᔥ ᒉᕒᐆᓴᓬᐊᒥᕽ ᑳᑮ ᐱᐅᒋ ᑕᑯᔑᓂᓂᒡ ᐅᑮᐙᑳ ᑳᐸᐎᑖᑰᐞ ᓃᐱᐗᐞ ᑫᑰᓇᓐ ᓭᓇᑲᓂᓂᑭᓐ ᐁᑮᐃᔑ ᐊᓈᒥᒥᓐᒡ ᑳᐐᓐ ᐅᑮ ᑌᐱᒥᑯᓰᐞ᙮

25:8b.ACT.025.008 ᑆᓬ ᐐᓐ ᐃᑯ ᑮᑲᓅᑕᒫᓱ ᐁᑮᐃᑭᑐᒡ: ᑳᐐᓐ ᑫᑰᓐ ᓂᑑᒋ ᐃᔑᒋᑫᓰ ᒋᑮᒪᒫᔑᑲᑕᒫᐸᓐ ᐃᐃ ᒎᐎ ᐅᓇᔓᐌᐎᓐ, ᐃᐃ ᑲᔦ ᑭᒋᐊᓇᒥᐁᐎᑲᒥᒃ, ᒋᑮᒪᒫᔑᑲᑕᐗᑭᐸᓐ ᑲᔦ ᒫᐗᒡ ᑭᒋᐅᑭᒫ, ᑮᐃᑭᑐ᙮

25:9b.ACT.025.009 ᐯᔅᑕᓴᓐ ᑕᔥ ᐁᐃᓀᑕᒥᓂᒡ ᒋᓇᐁᑕᒥᐋᓂᒡ ᒎᐗᐞ ᐅᑮᐋᔑᑌᒥᑰᓐ ᐁᑮᐃᑯᒡ: ᐱᓵᓐ ᐃᓇ ᑕᔥ ᑭᑖ ᐃᔖ ᐌᑎ ᒉᕒᐆᓴᓬᐊᒥᕽ ᒋᐊᐎ ᑎᐹᑯᓂᑰᔭᓐ ᐃᐃ ᑳᔑ ᐊᓈᒥᒥᑰᔭᓐ, ᓃᓐ ᑕᔥ ᒋᐅᒋᔥᑲᐎ ᑳᐸᐎᑕᐎᔭᓐ ᒋᑎᐹᑯᓂᓈᓐ? ᐅᑮᐃᑰᓐ᙮

25:10b.ACT.025.010 ᑆᓬ ᑕᔥ ᑮᐃᑭᑐ: ᓅᑯᒻ ᐄᑐᒃ ᓂᓂᐸᐤ ᒫᐗᒡ ᑭᒋᐅᑭᒫ ᐅᑎᐹᑯᓂᑫᐎᑲᒥᑯᕽ, ᒪᔮ ᑫᔑ ᑎᐹᑯᓂᑰᔮᐸᓐ᙮ ᑳᐐᓐ ᑲᓇᑫ ᑫᑰᓐ ᓂᑮᐃᔑ ᒪᒫᔑᑲᑕᐙᓰᒃ ᒎᐗᒃ, ᑫᑮᓐ ᐄᑐᒃ ᑭᑭᑫᑖᓐ᙮

25:11b.ACT.025.011 ᑮᔥᐱᓐ ᓴ ᑌᐱᒥᑰᔭᓐ ᐁᑮᐗᓂᑑᑕᒧᐙᓀᓐ, ᑮᐃᔑᒋᑫᐙᓀᓐ ᑲᔦ ᑫᐅᒋ ᑲᔥᑭᑕᒫᓱᔮᓐ ᒋᓂᐳᔮᓐ, ᑳᐐᓐ ᓂᑲ ᔖᑴᓂᒧᓰ ᒋᓂᐳᔮᓐ᙮ ᑮᔥᐱᓐ ᑕᔥ ᐐᓐ ᑌᐺᓯᒀ ᐃᐃᐌᓂ ᑳᔑ ᐊᓈᒥᒥᐙᒡ ᒎᐗᒃ, ᑳᐐᓐ ᐄᓴᓐ ᐊᐎᔭ ᐅᑖ ᑲᔥᑭᑑᓰᓐ ᒋᔑ ᐸᑭᑎᓂᑰᐗᑭᐸᓐ ᑫᐅᒋ ᐅᑖᐱᓂᑰᐗᒃ᙮ ᓂᓇᑕᐌᑖᓐ ᑕᔥ ᒫᐗᒡ ᑭᒋᐅᑭᒫ ᒋᑎᐹᑯᓂᒡ, ᑮᐃᑭᑐ᙮

25:12b.ACT.025.012 ᐊᐲ ᑕᔥ ᐯᔅᑕᓴᓐ ᑳᐊᐎ ᐃᔥᒀ ᑲᑲᓅᓈᓂᒡ ᐅᑑᓇᔓᐌᐎᓂᓃᒥᓂ ᐁᑮ ᑕᔑᑕᒥᓂᒡ ᐅᐅ, ᒦᑕᔥ ᐅᐅ ᑳᐃᔑ ᐋᔥᑌᒥᑯᒡ: ᑭᑮᐊᑕᐌᑖᓐ ᒫᐗᒡ ᑭᒋᐅᑭᒫ ᒋᑎᐹᑯᓂᒃ᙮ ᒦᑕᔥ ᐊᐊ ᑫᐊᑕ ᐙᐸᒪᒡ ᒫᐗᒡ ᑭᒋᐅᑭᒫ, ᐅᑮᐃᑰᓐ᙮

25:13b.ACT.025.013 ᓈᓈᑫ ᑕᔥ ᐁᐃᔑᓭᓂᒃ ᑭᒋᐅᑭᒫ ᐋᑲᕒᐃᐸ ᐁᔑᓂᑳᓱᒡ, ᐊᐊ ᑲᔦ ᐃᑴ ᐯᕒᓇᐃᓯ ᑮᑕᑯᔑᓅᒃ ᐃᐃᒫ ᓭᓴᕒᐄᔭ ᐆᑌᓈᕽ, ᐁᐐᐙᐸᒫᐙᒡ ᐯᔅᑕᓴᓐ ᐁᐐᐃᓈᐙᒡ ᐁᒥᓉᑕᒧᐙᒡ ᒋᐙᐸᒫᐙᒡ᙮

25:14b.ACT.025.014 ᓃᐱᐗᐞ ᑕᓱ ᑮᔑᒃ ᐃᑕᔥ ᐃᐃᒫ ᑳᐊᔮᐙᒡ, ᑭᒋᐅᑭᒫ ᐅᑮᐐᑕᒫᑰᓐ ᐯᔅᑕᓴᓐ ᐋᓃᓐ ᑆᓬᐊᓐ ᑳᐃᔑ ᐗᓯᑖᐎᓭᓂᒡ ᐁᑮᐃᑯᒡ: ᐊᔮ ᐅᒫ ᐯᔑᒃ ᐃᓂᓂ ᐁᑕᑯᓂᑲᓂᐎᒡ ᐁᑮ ᐸᑭᑎᓂᑯᓯᒃ ᐃᓂ ᐲᓬᐃᑭᓴᓐ ᙮

25:15b.ACT.025.015 ᐌᑎ ᑕᔥ ᒉᕒᐆᓴᓬᐊᒥᕽ ᒣᒀ ᐁᐊᔮᔮᓐ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᓃᑳᓀᑖᑯᓯᐙᒡ ᒎᐗᒃ ᐅᑮᐱ ᒪᒥᔑᒫᐙᓐ ᐁᑮᐊᑕᐌᑕᒧᐙᒡ ᒋᐃᓈᑯᓂᒥᓐᒡ ᒋᓂᓯᒥᓐᒡ᙮

25:16b.ACT.025.016 ᓂᑮ ᐐᑕᒪᐙᒃ ᑕᔥ ᓃᓇᐎᓐᑦ ᐅᕒᐆᒥᕽ ᑳᐅᒋ ᑎᐯᑖᑯᓯᔮᕽ ᐃᐃ ᓇᑫ ᐁᐃᔑᒋᑫᓯᐙᕽ, ᐊᐎᔭ ᑯᑕ ᒋᐸᑭᑎᓂᑳᓱᐸᓐ ᑯᑕᒃ ᐊᐎᔭᐞ ᒋᑌᐱᓂᑯᐸᓐ᙮ ᐱᓇᒫ ᐊᐊ ᑳᒪᒥᔑᒥᓐᒡ ᒋᐅᒋᔥᑲᐎᔥᑲᐙᒡ ᐃᐃ ᑳᒪᒥᔑᒥᑯᒡ, ᒋᑕᐎᓇᒪᐎᓐᒡ ᒋᑲᑲᓅᑕᒫᓱᒡ ᐃᐃ ᑳᔑ ᐊᓈᒥᒥᓐᒡ᙮

25:17b.ACT.025.017 ᐊᐲ ᑕᔥ ᐅᐅᒫ ᑮᒫᒪᐎ ᐲᔖᐙᒡ ᑳᐐᓐ ᓂᑮ ᑆᑕᐐᓰ, ᔐᒫᒃ ᑕᔥ ᐁᐊᓂ ᐙᐸᕽ ᓂᑮᐅᓇᑉ ᑎᐹᑯᓂᐌᐎᑲᒥᑯᕽ, ᒦᔥ ᑳᑮᐃᓈᑯᓂᑫᔮᓐ ᒋᐲᑎᑲᓂᓐᒡ ᐊᐊ ᐃᓂᓂ᙮

25:18b.ACT.025.018 ᐊᐲ ᑕᔥ ᑳᑮᒪᒥᔑᒥᑯᒡ ᑳᐸᓯᑸᓂᒡ ᐁᑲᑭᑐᓂᒡ, ᑳᐐᓐ ᐅᑮᐃᔑ ᐊᓈᒥᒥᑯᓰᐞ ᒋᑮᐃᔑ ᒪᒫᔑᑴᓐ ᐃᓇᑫ ᑳᑮᐃᓀᑕᒧᐗᒃ᙮

25:19b.ACT.025.019 ᒦᑕᔥ ᐁᑕ ᑳᑮ ᑕᔑᑕᒧᐙᒡ ᑫᑰᓇᓐ ᐁᑮᐅᒋ ᑲᑲᓅᓈᐙᒡ ᐅᑕᓇᒥᐋᐎᓂᐙᕽ ᐅᒋ᙮ ᐅᑮᑕᔑᒫᐙᓐ ᑕᔥ ᐃᓂ ᐊᐎᔭᓐ ᒋᓴᔅ ᐁᐃᔑᓂᑳᓱᓂᑴᓐ ᐁᑮᓂᐳᓂᒡ, ᑆᓬ ᑕᔥ ᐐᓐ ᐁᑮᐃᑭᑐᒡ ᐁᐱᒫᑎᓯᓂᒡ ᐄᓴᓐ᙮

25:20b.ACT.025.020 ᓃᓐ ᑕᔥ ᐁᐗᐙᓀᑕᒫᓐ ᑫᐅᒋ ᑭᑫᑕᒫᓐ ᐃᓂᐌᓂᐗᓐ, ᓂᑮ ᑲᑴᒋᒫ ᑕᔥ ᑮᔥᐱᓐ ᒋᐃᓀᑕᒧᑯᐸᓀᓐ ᒋᐐᐃᔖᑴᓐ ᒉᕒᐆᓴᓬᐊᒥᕽ ᐌᑎ ᑕᔥ ᒋᑕᔑ ᑎᐹᑯᓂᒡ ᐃᐃ ᑳᔑ ᐊᓈᒥᒥᓐᒡ᙮

25:21b.ACT.025.021 ᑆᓬ ᑕᔥ ᑮᐃᔑ ᑲᑴᑗ ᒋᑲᓇᐌᓂᒥᓐᒡ ᐁᑮᐊᑕᐌᑕᕽ ᒫᐗᒡ ᑭᒋᐅᑭᒫᓐ ᒋᑎᐹᑯᓂᑯᒡ᙮ ᒦᑕᔥ ᑳᑮᐊᓅᑮᔮᓐ ᒋᑲᓇᐌᓂᒥᓐᒡ ᐲᓂᔥ ᒋᐅᒋᒋᓭᓂᒃ ᐊᐲ ᑫᐊᑕ ᐙᐸᒫᒡ ᒫᐗᒡ ᑭᒋᐅᑭᒫᓐ, ᑮᐃᑭᑐ᙮

25:22b.ACT.025.022 ᐋᑲᕒᐃᐸ ᐅᑮᐃᓈᓐ ᐯᔅᑕᓴᓐ: ᑫᓃᓐ ᓴ ᐱᑯ ᓂᑖᒥᓉᑖᓐ ᒋᑮᓅᑕᐗᑭᐸᓐ ᐊᐊ ᐃᓂᓂ, ᐅᑮᐃᓈᓐ᙮ ᒦᑕᔥ ᑳᐃᑯᒡ: ᐙᐸᓂᓂᒃ ᓴ ᑭᑲ ᓅᑕᐙ, ᐅᑮᐃᑰᓐ᙮

25:23b.ACT.025.023 ᐌᔮᐸᓂᓂᒃ ᑕᔥ ᐊᐲ ᐋᑲᕒᐃᐸ ᑳᑕᑯᔑᕽ ᐁᑮᐐᒌᐎᑯᒡ ᐯᕒᓇᐃᓯᐗᓐ, ᑮᐲᑎᑫᐗᒃ ᐃᐃᒫ ᑭᒋ ᐊᐲᐎᑲᒥᑯᕽ᙮ ᐁᑮ ᑭᑌᓂᒥᑣ ᑕᔥ ᑫᑰᓐ ᑮᐃᔑᒋᑫᓈᓂᐗᓂᓂ᙮ ᐅᑮᑕᑯ ᐲᑎᑫᐐᒌᐙᐙᐞ ᑕᔥ ᑭᒋ ᔑᒫᑲᓂᔒᐎᑭᒫᐞ, ᐃᐃ ᑲᔦ ᐃᓂᓂᐗᐞ ᑳᓃᑳᓂᔥᑲᒥᓂᒡ ᐆᑌᓇ᙮ ᐯᔅᑕᓴᓐ ᑕᔥ ᑮᐊᓅᑮᐗᓐ, ᑆᓬᐊᓐ ᒋᐱᐲᓂᒥᓐᒡ᙮ ᒦᔥ ᑳᐃᔑ ᓈᓯᑲᐎᒥᓐᒡ᙮

25:24b.ACT.025.024 ᐯᔅᑕᔅ ᑕᔥ ᑮᐃᑭᑐ: ᑭᒋᐅᑭᒫ ᐋᑲᕒᐃᐸ, ᑲᑭᓇ ᑲᔦ ᐅᒫ ᐁᔮᔦᒃ! ᑭᐙᐸᒫᐙ ᐗᐊ ᐃᓂᓂ᙮ ᒦ ᐃ ᑳᑮᐱ ᐅᒋ ᐊᑕ ᐙᐸᒥᐙᒡ ᑲᑭᓇ ᒎᐗᒃ ᐌᒌᐙᒡ ᒉᕒᐆᓴᓬᐊᒥᕽ ᐅᐅᒫ ᑲᔦ ᓭᓴᕒᐄᔭ ᐆᑌᓈᕽ᙮ ᐁᐃᔑ ᔖᔖᑯᐌᓂᒡ ᐊᐗᔑᒣ ᒋᐱᒫᑎᓯᓯᑭᐸᓐ᙮

25:25b.ACT.025.025 ᑳᐐᓐ ᑕᔥ ᓃᓐ ᑫᑰᓐ ᓂᒥᑲᒧᐙᓰᓐ ᒋᑮᐃᔑᒋᑫᑴᓐ ᑫᐅᒋ ᑲᔥᑭᑕᒫᓱᒡ ᒋᓂᓯᑎᐸᓐ᙮ ᐐᓐ ᐃᑕᔥ ᐃᑯ ᐁᑮᐃᔑ ᑲᑴᑗᒡ ᒋᑎᐹᑯᓂᑯᒡ ᒫᐗᒡ ᑭᒋᐅᑭᒫᓐ, ᓂᑮᐃᓀᑕᒻ ᐱᓵᓐ ᒋᐃᔑᓂᔕᐗᒃ ᐌᑎ ᐅᕒᐆᒥᕽ᙮

25:26b.ACT.025.026 ᑳᐐᓐ ᓴ ᑫᑰᓐ ᑫᒋᓈᒡ ᓂᑕᔮᓰᓐ ᑫᐃᓈᒋᒥᒪᑭᐸᓐ ᐅᔑᐲᐊᒪᐗᒃ ᒫᐗᒡ ᑭᒋᐅᑭᒫ᙮ ᒦᑕᔥ ᐅᐅ ᑳᐅᒋ ᐲᓇᒃ ᐁᓈᓴᒦᔦᒃ, ᒣᒥᑕᑫᑯ ᑮᓐ ᑭᒋᐅᑭᒫ ᐋᑲᕒᐃᐸ ᒋᐅᒋᔥᑲᐎ ᑳᐸᐎᑕᐎᒃ᙮ ᐊᐲ ᑕᔥ ᑮᐃᔥᒀ ᐊᑕ ᑭᑫᓂᒪᒡ, ᓂᑲᐊᔮᓐ ᒫᐐᓐ ᑫᑰᓐ ᑫᐃᔑᐲᐃᑫᔮᓐ᙮

25:27b.ACT.025.027 ᓂᑎᓀᑕᒻ ᐋᓃᔥ ᑳᐐᓐ ᑖᒥᓄ ᓈᑾᓯᓅᓐ ᑕᑯᓂᑲᓐ ᒋᐃᔑᓂᔕᐅᑎᐸᓐ ᒋᐐᒋᑳᑌᓯᓂᓂᑭᐸᓐ ᐋᓃᓐ ᒪᔮ ᐁᔑ ᐊᓈᒥᒥᓐᒡ, ᑮᐃᑭᑐ᙮

26

26:1b.ACT.026.001 ᐋᑲᕒᐃᐸᐗᓐ ᑕᔥ ᐅᑮᐃᑰᓐ ᑆᓬ : ᑭᐸᑭᑎᓇᒫᑰ ᒋᑲᓅᑕᒫᓱᔭᓐ, ᐅᑮᐃᑰᓐ᙮ ᑆᓬ ᑕᔥ ᑮᐃᔑᓂᑫᓂ ᒦᑕᔥ ᑳᐃᔑ ᒫᒌ ᑲᓅᑕᒫᓱᒡ:

26:2b.ACT.026.002 ᑮᓐ ᑭᒋᐅᑭᒫ ᐋᑲᕒᐃᐸ, ᐋᐱᒋ ᓂᒥᓄᓭᐌᑕᒻ ᐁᐅᒋᔥᑲᐎ ᑳᐸᐎᑕᐎᓈᓐ ᓅᑯᒻ ᑳᑮᔑᑲᒃ ᒋᑲᓅᑕᒫᓱᔮᓐ ᐃᐃ ᑲᑭᓇ ᑫᑰᓇᓐ ᑳᔑ ᐊᓈᒥᒥᐙᒡ ᒎᐗᒃ,

26:3b.ACT.026.003 ᒣᒥᑕᑫᑯ ᑮᓐ ᐁᓇᑲᒋ ᑭᑫᑕᒪᓐ ᑲᑭᓇ ᒎᐎ ᐃᔑᑣᐎᓇᓐ, ᐃᓂ ᑲᔦ ᑳᐗᐙᓀᑕᒧᐃᑯᐙᒡ᙮ ᑭᐸᑯᓭᓂᒥᓐ ᑕᔥ ᒋᔑ ᔒᐯᓂᒥᔭᓐ ᒋᐱᓯᑕᐎᔭᓐ᙮

26:4b.ACT.026.004 ᑲᑭᓇ ᐅᔕ ᒎᐗᒃ ᐅᑭᑫᑖᓈᐙ ᐋᓃᓐ ᑳᐱᐃᔑ ᐱᒫᑎᓯᐗᒃ ᑮᐅᔥᑳᑎᓯᐗᒃ, ᐁᑮᐅᒋ ᒫᒌ ᐱᒫᑎᓯᐗᒃ ᓂᑕᑮᒥᕽ, ᐃᐃᒫ ᑲᔦ ᒉᕒᐆᓴᓬᐊᒥᕽ ᙮

26:5b.ACT.026.005 ᐋᔕ ᑕᔥ ᑭᓉᔥ ᓂᐱᐅᒋ ᑭᑫᓂᒥᑰᒃ, ᑖᑎᐹᒋᒧᐗᒃ ᐅᔕ ᑮᔥᐱᓐ ᑯᑕ ᐃᓀᑕᒧᐙᒡ ᐁᐅᒋ ᑎᐯᑖᑯᓯᐗᒃ ᐯᕒᐊᓰᐞ ᑳᐃᔑᑣᓂᒡ ᐁᔮᑾᓇᒥᐋᓂᒡ, ᐃᐃ ᑲᔦ ᓇᑫ ᐁᑮᐃᔑ ᐱᒫᑎᓯᐗᒃ᙮

26:6b.ACT.026.006 ᐁᐊᐯᓂᒧᓄᑕᒧᐗᒃ ᑕᔥ ᑭᔐᒪᓂᑑ ᑳᑮᐃᔑ ᐊᔓᑕᒪᐙᒡ ᓂᑫᑌᔭᐋᒥᓈᐸᓃᐞ, ᒦ ᐅᒫ ᓅᑯᒻ ᑳᑮᔑᑲᒃ ᑳᐅᒋ ᓃᐸᐎᔮᓐ ᐁᑎᐹᑯᓂᑰᔮᓐ᙮

26:7b.ACT.026.007 ᒦ ᓴ ᐅᐌᓂ ᐊᔓᑕᒫᑰᐎᓐ ᑳᒥᑖᓱ ᓃᔗᐙᓇᑭᓯᐙᒡ ᓂᐐᑖᑎᓰᒫᑲᓂᓈᓂᒃ ᑳᑮ ᐋᑯᐲᑑᐙᒡ ᒋᑌᐱᓇᒧᐙᒡ᙮ ᒦᔥ ᑳᑮᐊᓄᑮᑕᐗᐙᒡ ᑭᔐᒪᓂᑑᓐ ᐁᑎᐱᑲᓂᓂᒃ ᐁᑮᔑᑲᓂᓂᒃ ᑲᔦ᙮ ᑮᓐ ᓴ ᐌᑭᒫᐎᔭᓐ! ᐅᐅ ᑕᔥ ᐃᓇᑫ ᐁᐃᔑ ᐊᐯᓂᒧᐗᒃ, ᒦ ᐃ ᒎᐗᒃ ᑳᐅᒋ ᒪᒥᔑᒥᐙᒡ᙮

26:8b.ACT.026.008 ᐌᑯᓀᓐ ᐃᑕᔥ ᐌᒋ ᑲᔥᑭᑑᓯᐌᒃ ᒋᑌᐺᑕᒣᒃ ᑭᔐᒪᓂᑑ ᐁᑮᐌ ᐱᒫᑎᓰᐋᒡ ᑳᓂᐳᓂᒡ!

26:9b.ACT.026.009 ᑌᐺ ᓃᓐ ᓂᑮᐃᔑ ᑌᐺᑖᓐ ᐁᑯ ᑲᔥᑭᑑᔮᓐ ᒋᑮᓇᑳᔥᑲᒧᐗᑭᐸᓐ ᐅᐐᓱᐎᓐ ᒋᓴᔅ ᓈᓴᕒᐃᑦ ᐆᑌᓈᕽ ᑳᐅᒌᒡ᙮

26:10b.ACT.026.010 ᒦᑕᔥ ᐅᐅ ᑳᐃᔑᒋᑫᔮᐹᓐ ᒉᕒᐆᓴᓬᐊᒥᕽ᙮ ᑭᒋᐊᓇᒥᐁᐎᑭᒫᒃ ᑕᔥ ᓂᑮᐃᔑ ᒦᓂᑰᒃ ᐱᓵᓐ ᒋᑭᐸᐅᐌᐗᒃ᙮ ᓃᐱᐗᐞ ᑕᔥ ᑭᔐᒪᓂᑑ ᐅᐱᒫᑎᓰᒪᐞ ᑭᐸᐅᑏᐎᑲᒥᑯᕽ ᓂᑮᐊᓯᒫᐞ᙮ ᐊᐲ ᑕᔥ ᐁᐃᓈᑯᓂᑣ ᒋᓂᓯᑣ, ᑫᓃᓐ ᓴ ᓂᑮ ᓇᐁᑖᓐ ᐃᐃᐌ ᒋᐃᔑᒋᑫᓈᓂᐗᕽ᙮

26:11b.ACT.026.011 ᓂᑮᐊᓅᑮᐙᓐ ᐃᑕᔥ ᒨᔕᒃ ᒋᑕᔑ ᑲᒀᑕᑭᐃᑣ ᒎᐎ ᐊᓇᒥᐁᐎᑲᒥᑯᑳᕽ᙮ ᓂᑮᑲᑴ ᑲᔥᑭᐋᒃ ᑲᔦ ᒫᓄ ᒋᐃᑭᑐᐙᒡ ᐁᑌᐺᑕᐙᓯᒀ Xᑕᓐ᙮ ᑳᐊᐲᒋ ᓂᔥᑭᐃᐙᒡ ᑕᔥ ᒦ ᐃ ᑳᑮᐃᔖᔮᓐ ᒪᒪᔭᑭ ᐆᑌᓈᑳᕽ ᐁᑮᓇᓈᑐᓀᐗᒀ, ᑮᐃᑭᑐ ᑆᓬ᙮

26:12b.ACT.026.012 ᑫᔮᐱ ᑮᐊᓂ ᐃᑭᑐ: ᒦ ᐃ ᑳᑮᐅᒋ ᐃᔖᔮᓐ ᑎᒫᔅᑲᔅ ᐆᑌᓈᕽ, ᑭᒋᐊᓇᒥᐁᐎᑭᒫᒃ ᐁᑮᐊᓅᔑᐙᒡ, ᑲᔦ ᑕᔥ ᐁᑮᒦᔑᐙᒡ ᑲᔥᑭᐁᐎᓯᐎᓐ᙮

26:13b.ACT.026.013 ᐃᓇᔥᑫ ᑕᔥ ᑭᒋᐅᑭᒫ! ᐁᐊᓂ ᐋᐱᑕᐎ ᑮᔑᑲᒃ ᑕᔥ ᒦᑲᓈᕽ ᐁᐊᓂᐱᒥ ᐊᔮᔮᓐ ᓂᑮᐙᐸᑖᓐ ᑭᒋᑮᔑᑯᕽ ᐁᐅᒋ ᐙᓭᔮᒃ, ᓇᐗᒡ ᐁᐙᓭᓈᑾᒃ ᐊᐲᒡ ᐐᓐ ᑮᓯᔅ᙮ ᓂᑮᐙᑳᔥᑳᑯᓐ ᐁᐙᓭᔮᒃ, ᐃᑭ ᑲᔦ ᑳᑮᐐᒌᐎᐙᒡ᙮

26:14b.ACT.026.014 ᑲᑭᓇ ᑕᔥ ᑳᑮ ᑕᔑᔮᕽ ᒥᑕᑲᒥᒃ ᓂᑮᐃᔑ ᐸᑭᔑᓂᒥᓐ, ᓂᑮ ᓅᑕᐙ ᑕᔥ ᐊᐎᔭ ᐁᑲᓅᔑᒡ ᐄᐸᕒᐆᕽ ᐁᐃᔑᑮᔗᒡ: ᔂᓬ! ᔂᓬ! ᐌᑯᓀᓐ ᐌᒋ ᒫᔑᑑᑕᐎᔭᓐ᙮ ᑮᓐ ᐅᔕ ᑯ ᑳᐐᓴᑲᐅᑎᓱᔭᓐ ᐃᐃ ᑳᑑᑕᒪᓐ, ᑖᐱᔥᑰ ᐱᔑᑭ ᑳᑕᑭᔥᑲᕽ ᐃᐃ ᐅᑳᒋᓂᔕᐃᑲᓈᑯᓂ ᐃᓂ ᑳᑎᐯᓂᒥᑯᒡ, ᓂᑮᐃᑰ᙮

26:15b.ACT.026.015 ᐅᐅ ᑕᔥ ᓂᑮᐃᓈ: ᐊᐌᓀᓐ ᑮᓐ, ᑌᐯᒋᑫᔭᓐ? ᑳᑎᐯᒋᑫᒡ ᑕᔥ ᓂᑮᐃᒃ: ᓃᓐ ᒋᓴᔅ ᑳᒫᔑ ᑑᑕᐎᔭᓐ᙮

26:16b.ACT.026.016 ᐸᓯᑸᓐ! ᒦ ᐅᔕ ᑳᐅᒋ ᓈᑯᓰᑕᐎᓈᓐ ᐁᐅᓇᑭᒥᓈᓐ ᓂᑕᓄᑮᐋᑲᓐ ᒋᑎᓄᐎᔭᓐ ᒋᑎᐹᒋᒥᔭᓐ, ᒋᑎᐹᑐᑕᒪᓐ ᑲᔦ ᐅᐅ ᓅᑯᒻ ᑳᐃᔑ ᐙᐸᒥᔭᓐ, ᐃᓂ ᑲᔦ ᑫᓂ ᐙᐸᑕᐃᓈᓐ᙮

26:17b.ACT.026.017 ᑭᑲᓈᑕᒪᐎᓐ ᑕᔥ ᑲᔦ ᑫᑰᓐ ᒋᑑᑕᐎᓯᓄᐎᒀ ᐃᑭ ᒎᐗᒃ, ᐃᑭ ᑲᔦ ᑳᒎᐎᐎᓯᒀ᙮ ᑭᑎᔑᓂᔕᐅᓐ ᑕᔥ

26:18b.ACT.026.018 ᒋᐙᐱᐊᑣ, ᒋᑴᑮᐊᑣ ᑲᔦ ᑲᔥᑮ ᑎᐱᑳᓄᕽ ᐅᒋ, ᒣᔥᑾᒡ ᑕᔥ ᐙᓭᔮᕽ ᒋᐃᔑ ᐱᒫᑎᓯᐙᒡ, ᒋᓇᑲᑕᒧᐙᒡ ᑲᔦ ᑳᑎᐯᓂᒥᑯᐙᒡ ᐁᔑ ᒪᔥᑲᐎᓰᓂᒡ ᒪᒋᐊᔭᐋᓐ, ᑭᔐᒪᓂᑑᓐ ᑕᔥ ᒣᔥᑾᒡ ᒋᓈᓯᑲᐙᐙᒡ᙮ ᒦᑕᔥ ᑌᐺᔦᓂᒥᐙᒡ ᒋᐴᓀᑕᒪᐎᑣ ᐅᒪᒋᑑᑕᒧᐎᓂᐙᓐ, ᑫᐐᓇᐙ ᑕᔥ ᒋᑕᑾᑭᒥᑣ ᐃᐃᒫ ᐁᔑ ᐊᔮᓂᒡ ᑭᔐᒪᓂᑑᓐ ᐅᐱᒫᑎᓰᒥᓂ ᑳᑮ ᐅᓈᐸᒫᓂᒡ, ᓂᑮᐃᒃ, ᐃᑭᑐ ᑆᓬ᙮

26:19b.ACT.026.019 ᑫᔮᐱ ᑕᔥ ᑮᐊᓂ ᐃᑭᑐ: ᑭᒋᐅᑭᒫ ᐋᑲᕒᐃᐸ ! ᑳᐐᓐ ᑕᔥ ᓂᑮ ᔕᔒᐱᑕᓰᓐ ᐃᐃ ᐃᔑᓇᒧᐎᓐ ᑭᒋᑮᔑᑯᕽ ᑳᑮᐅᒋ ᐙᐸᑕᐃᑰᐎᓯᔮᓐ᙮

26:20b.ACT.026.020 ᐃᐃᒫ ᑕᔥ ᓃᑳᓐ ᑎᒫᔅᑲᔅ ᐆᑌᓈᕽ, ᒉᕒᐆᓴᓬᐊᒥᕽ ᑲᔦ, ᒥᓯᐌ ᒎᑏᔭ ᐊᑮᕽ ᑲᔦ, ᑳᔑ ᐊᔮᐙᒡ ᑲᔦ ᑳᒎᐎᐎᓯᒀ, ᓂᑮ ᑕᔑ ᐐᑕᒪᐙᒃ ᒋᑴᑳᑎᓯᐙᒡ ᒋᓇᑲᑕᒧᐙᒡ ᐅᒪᒋᑑᑕᒧᐎᓂᐙᓐ᙮ ᒋᑴᑮᑕᐙᐙᒡ ᑲᔦ ᑭᔐᒪᓂᑑᓐ ᒋᑑᑕᒧᐙᒡ ᑫᐅᒋ ᓈᑯᑑᐙᒡ ᐁᑮ ᑴᑭ ᐱᒫᑎᓯᐙᒡ᙮

26:21b.ACT.026.021 ᒦ ᐅᐌᓂ ᐅᒋ ᒎᐗᒃ ᑳᑮᐅᒋ ᐅᑎᑎᓂᐙᒡ ᑭᒋᐊᓇᒥᐁᐎᑲᒥᑯᕽ ᐁᐊᔮᐗᑭᐸᓐ, ᐁᑮᐅᒋ ᑲᑴ ᓂᔑᐙᒡ᙮

26:22b.ACT.026.022 ᐲᓂᔥ ᑕᔥ ᓅᑯᒻ ᐅᐅ ᐃᔑᐊᐲ ᑳᑮᔑᑲᓂᓂᒃ ᓂᐱᐐᒋᐃᒃ ᑭᔐᒪᓂᑑ, ᒦᑕᔥ ᐅᐅᒫ ᑳᐅᒋ ᓃᐸᐎᔮᓐ ᑲᑭᓇ ᐯᔑᑾᓐ ᐁᐃᔑ ᑎᐹᒋᒧᑕᐗᒀ ᑳᐊᑳᓭᑖᑯᓯᐙᒡ ᐃᑭ ᑲᔦ ᑳᑭᑌᑖᑯᓯᐙᒡ᙮ ᑳᐐᓐ ᐊᐗᔑᒣ ᑫᑰᓐ ᐸᔦᔥ ᓂᑎᑭᑐᓰ ᑳᑮᐃᑭᑐᐙᑯᐸᓀᓐ ᑭᔐᒪᓂᑑ ᑳᑮ ᑲᓅᑕᒫᑯᒡ, ᐊᐊ ᑲᔦ ᒨᓯᔅ ᑳᑮᐃᑭᑐᑯᐸᓀᓐ ᐁᐐᑕᒧᐙᒡ ᑫᐊᓂ ᐃᔑᓭᒃ᙮

26:23b.ACT.026.023 ᐅᐅ ᐁᑮᐃᑭᑐᐙᑯᐸᓀᓐ: ᐃᓂ ᓴ ᑭᔐᒪᓂᑑ ᑫᐅᓈᐸᒫᒡ ᒋᐱᒫᒋᐃᐌᓂᒡ, ᑮᐃᓀᑖᑯᓯᐗᓐ ᒋᑲᒀᑕᑭᑑᓂᒡ, ᐐᓐ ᑲᔦ ᓂᑕᒻ ᒋᑲᔥᑭᑑᓂᒡ ᒋᑮᐌ ᐱᒫᑎᓯᒡ ᓂᐳᐎᓂᕽ ᐅᒋ᙮ ᒋᐐᑕᒪᐙᓂᒡ ᑳᒎᐎᐎᓂᒡ, ᐃᐃ ᑲᔦ ᑳᒎᐎᐎᓯᓂᒃ ᐱᒫᒋᐃᑰᐎᓐ ᒋᐙᓭᔥᑳᑯᓂᒡ, ᑆᓬ ᑮᐃᑭᑐ᙮

26:24b.ACT.026.024 ᒣᒀ ᑕᔥ ᑆᓬ ᐅᐅ ᐁᐃᑭᑐᒡ ᐁᑲᓅᑕᒫᓱᒡ ᐅᑮᐅᒋ ᑲᓅᓂᑰᓐ ᐯᑕᓲᓐ ᐁᔖᑯᐌᓂᒡ: ᑆᓬ, ᑭᑭᐗᔥᑴ ᒫᐐᓐ ᓰᔮᑫᓐ! ᑳᔑᑭᒋ ᑭᑫᑖᓱᔭᓐ ᐅᔕ ᑭᑮᐗᔥᑴᐃᑯᓐ! ᐅᑮᐃᑰᓐ᙮

26:25b.ACT.026.025 ᑆᓬ ᑕᔥ ᑮᐃᑭᑐ: ᑫᑌᑖᑯᓯᔭᓐ ᐯᔅᑕᔅ! ᑳᐐᓐ ᓃᓐ ᓂᑮᐗᔥᑴᓰ᙮ ᒦ ᓴ ᐱᑯ ᐁᔑ ᑌᐺᔮᓐ ᐅᐅ ᑳᐃᑭᑐᔮᓐ᙮

26:26b.ACT.026.026 ᑭᒋᐅᑭᒫ ᐋᑲᕒᐃᐸ ᐅᔕ ᐅᑭᑫᑖᓇᓐ ᐅᓄ ᑳᑕᔑᑕᒧᐗᒃ, ᒦᑕᔥ ᑳᐅᒋ ᐌᒋᑖᐗᒃ ᐁᑲᑲᓅᓇᒃ᙮ ᓂᑎᔑ ᑫᒋᓈᐞ ᑲᔦ ᑫᑰᓂᓂ ᐁᐸᓈᐸᑕᓯᒃ ᐋᓃᔥ ᑳᐐᓐ ᑫᑰᓐ ᑳᒐᔭᐃᕽ ᐃᔑᒋᑫᓈᓂᐗᓯᓂᓂ᙮

26:27b.ACT.026.027 ᑭᒋᐅᑭᒫ ᐋᑲᕒᐃᐸ! ᑭᑌᐺᑕᒧᐙᓐ ᐃᓇ ᑳᐃᑭᑐᓂᒡ ᑭᔐᒪᓂᑑ ᑫᓅᑕᒫᑯᒡ᙮ ᑭᑭᑫᓂᒥᓐ ᐄᑐᒃ ᐁᑌᐺᑕᐗᑣ! ᐅᑮᐃᓈᓐ᙮

26:28b.ACT.026.028 ᐅᐅ ᑕᔥ ᐅᑮᐃᑰᓐ ᐋᑲᕒᐃᐸᐗᓐ: ᑭᑎᓀᑕᒻ ᐃᓇ ᒋᑲᔥᑭᒥᔭᓐ X ᐅᐱᒥᓂᔕᐙᑲᓇᓐ ᒋᑎᓄᐎᔮᓐ, ᐊᒋᓇ ᐁᑕ ᐁᑲᓅᔑᔭᓐ? ᐅᑮᐃᑰᓐ᙮

26:29b.ACT.026.029 ᑆᓬ ᑕᔥ ᐅᑮᐃᓈᓐ: ᑮᔥᐱᓐ ᐊᒋᓇ ᑯᒫ ᑲᔦ ᑭᓉᔥ ᐃᔑᓭᒃ, ᒦ ᐃ ᐁᔑ ᐸᑯᓭᓂᒪᒃ ᑭᔐᒪᓂᑑ ᑳᐐᓐ ᑮᓐ ᐁᑕ, ᐅᑯ ᓴ ᑲᔦ ᑲᑭᓇ ᐅᐅᒫ ᑳᐊᔮᐙᒡ ᑳᓅᑕᐎᐙᒡ ᓅᑯᒻ ᑳᑮᔑᑲᓂᓂᒃ, ᒋᑎᓄᐎᐙᒡ ᑳᑎᓄᐎᐗᒃ, ᑳᐐᓐ ᐐᓐ ᐅᓄᐌᓂᐗᓐ ᐲᐙᐱᑴᔮᐲᓐ ᑳᐃᑕᒫᓐ! ᐅᑮᐃᓈᓐ᙮

26:30b.ACT.026.030 ᒦᑕᔥ ᑳᑮ ᐸᓯᑸᒡ ᑭᒋᐅᑭᒫ, ᐊᐊ ᑲᔦ ᐊᑮᓂ ᑳᑎᐯᑕᕽ, ᐊᐊ ᑲᔦ ᐯᕒᓇᐃᓯ, ᐃᐃ ᑲᔦ ᑲᑭᓇ ᐃᐃᒫ ᑳᑮᐊᔮᓂᒡ ᑮᐸᓯᑸᐗᐞ᙮

26:31b.ACT.026.031 ᐊᐲ ᑕᔥ ᐸᑳᓐ ᐸᑫᒋᑲᓂᕽ ᑳᐃᔖᐙᒡ ᑮᑲᑲᓅᓂᑎᐗᒃ ᐁᑮᐃᑭᑐᐙᒡ: ᐗᐊ ᐃᓂᓂ ᑳᐐᓐ ᑫᑰᓐ ᑮᐃᔑᒋᑫᓰ ᑫᐅᒋ ᓂᐳᐸᓐ, ᑫᐅᒋ ᑭᐸᐃᑲᓂᐎᐸᓐ ᑲᔦ, ᑮᐊᔨᑎᐗᒃ᙮

26:32b.ACT.026.032 ᐋᑲᕒᐃᐸ ᑕᔥ ᐅᑮᐃᓈᓐ ᐯᔅᑕᓲᓐ: ᑖᑮ ᐸᑭᑎᓈᑲᓂᐎ ᐗᐊ ᐃᓂᓂ ᑮᔥᐱᓐ ᐊᑕᐌᑕᓯᑭᐸᓐ ᒋᑎᐹᑯᓂᑯᒡ ᒫᐗᒡ ᑭᒋᐅᑭᒫᓐ᙮

27

27:1b.ACT.027.001 ᐊᐲ ᑕᔥ ᑳᑮᔐᒋᑳᑌᒃ ᐃᑕᓬᐃ ᐊᑮᕽ ᒋᐃᓈᔑᔮᕽ, ᑆᓬ ᐃᐃ ᑲᔦ ᑯᑕᒃ ᑭᐸᐙᑲᓇᒃ ᑮᐃᔑ ᐸᑭᑎᓂᑲᓂᐎᐗᒃ ᒋᑲᓇᐌᓂᒥᑯᐙᒡ ᔑᒫᑲᓂᔒᐎᑭᒫᓐ ᒎᓬᐃᔭᔅ ᐁᔑᓂᑳᓱᓂᒡ᙮ ᑮᐅᒋ ᑎᐯᑖᑯᓯᐗᓐ ᑳᐅᑾᑭᒥᑣ ᔑᒫᑲᓂᔕᒃ, ᒫᐗᒡ ᑭᒋᐅᑭᒫᓐ ᐅᕒᐆᒥᕽ ᑳᐊᔮᓂᒡ ᑳᑎᐯᓂᒥᑯᐙᒡ᙮

27:2b.ACT.027.002 ᐃᐃᒫ ᑕᔥ ᑭᒋᒌᒫᓂᕽ ᐋᑕᕒᐊᒥᑎᔭᒻ ᐌᒋᒪᑲᒃ ᓂᑮᐃᔑ ᐴᓯᒥᓐ ᐁᐐᐊᓂ ᓈᓀᐌᔮᔑᐙᒡ ᐌᑎ ᐁᐐᐊᓂ ᑲᑳᐱᒌᐙᒡ ᐯᐸᑳᓐ ᐊᔮᐎᓂᕽ ᐁᔑᔭ ᐊᑮᕽ᙮ ᒦᑕᔥ ᑳᑮ ᒫᒌᔮᔑᔮᕽ᙮ ᓂᑮᐐᒌᐎᑯᓈᓐ ᑕᔥ ᐁᕒᐃᔅᑖᕒᑲᔅ ᑳᐃᔑᓂᑳᓱᒡ ᐁᑮᐅᒌᒡ ᒫᓯᑑᓂᔭ ᐊᑮᕽ ᐌᑎ ᑌᓴᓬᐊᓇᐃᑲ ᐆᑌᓈᕽ᙮

27:3b.ACT.027.003 ᐁᓂ ᐙᐸᕽ ᑕᔥ ᓂᑮᐃᔑ ᐸᑳᒫᔑᒥᓐ ᓵᐃᑕᓐ ᐆᑌᓈᕽ᙮ ᒎᓬᐃᔭᓴᓐ ᑕᔥ ᐐᑫ ᐅᑮᒥᓄᑑᑕᑰᓐ ᐊᐊ ᑆᓬ, ᐁᑮ ᐸᑭᑎᓂᑯᒡ ᒋᐊᑕ ᐙᐸᒫᒡ ᑳᑭᑫᓂᒫᒡ ᒋᒥᓄ ᐸᒥᐃᑯᓂᒡ ᐋᓃᓐ ᐁᔑ ᓅᑌᓭᒡ᙮

27:4b.ACT.027.004 ᒦᑕᔥ ᐃᐃᒫ ᑳᐅᒋ ᓂᒥᓈᐌᔮᔑᔮᕽ ᐁᔑ ᑕᐱᓇᐙᒃ ᐃᓇᑫ ᓂᑮᐊᓂ ᐃᓈᔑᒥᓐ ᔖᐗᓄᕽ ᓵᐃᐸᕒᐊᔅ ᒥᓂᓯᕽ, ᐋᓃᔥ ᐅᓵᒻ ᑮᑭᒋ ᓅᑎᓐ ᐁᐅᒋᔥᑲᐗᐊᒫᕽ᙮

27:5b.ACT.027.005 ᒦᑕᔥ ᑳᐃᔑ ᐋᔕᐗᑳᒣ ᔮᔑᔮᕽ ᑭᒋᑲᒦᕽ ᓯᓬᐃᔑᔭ ᐊᑮᕽ ᐃᓇᑫ, ᐹᐱᓬᐃᔭ ᐊᑮᕽ ᑲᔦ᙮ ᐃᐃᒫ ᑕᔥ ᓂᑮᐃᔑ ᐸᑲᒫᔑᒥᓐ ᒪᐃᕒᐊ ᐆᑌᓈᕽ ᓬᐃᔑᔭ ᐊᑮᕽ᙮

27:6b.ACT.027.006 ᒦᑕᔥ ᐃᐃᒫ ᔑᒫᑲᓂᔒᐎᑭᒫ ᑳᑮ ᒥᑲᕽ ᑭᒋ ᒌᒫᓐ ᐋᓬᐃᑭᓵᑕᕒᐃᔭ ᐁᐅᒌᒪᑲᓂᓂᒃ, ᐃᑕᓬᐃ ᐊᑮᕽ ᐁᐐᐃᔖᒪᑲᓂᓂᒃ᙮ ᐊᒦᑕᔥ ᐃᐃᒫ ᑳᐃᔑ ᐋᒋ ᐴᓯᐃᑰᔮᕽ᙮

27:7b.ACT.027.007 ᓃᐱᐗᐞ ᑕᔥ ᑕᓱ ᑮᔑᒃ ᓂᑮᐱᒥ ᐊᔮᒥᓐ, ᐁᑮ ᐯᑖᔑᔮᕽ ᐁᑮᓇᓇᑳᔮᔑᔮᕽ᙮ ᑫᑲᐲ ᑕᔥ ᓂᑮᐅᑎᑖᔑᒥᓐ ᐁᔑᐊᔮᒃ ᓇᐃᑕᔅ ᐆᑌᓇ᙮ ᐐᑫ ᑮᑭᒋ ᓅᑎᓐ ᐁᑮ ᓴᓇᑲᒃ ᒋᑮᐅᒋᔥᑲᐗᐊᒫᑭᐸᓐ᙮ ᐃᑕᐙ ᑕᔥ ᐌᑎ ᓂᑮᐊᓂ ᐃᓈᔑᒥᓐ ᒌᑲᔭᐄ ᑳᔑ ᓀᔮᔑᐗᕽ ᓴᓬᒨᓂ ᐁᔑ ᑕᐱᓇᐙᒃ ᔖᐗᓄᕽ ᐃᓇᑫ ᑲᕒᐄᑦ ᒥᓂᓯᕽ ᐁᑮᐊᓂ ᐃᓈᔑᔮᕽ᙮

27:8b.ACT.027.008 ᐋᐱᒋ ᐯᔓ ᓂᑮ ᒋᑫᐌᔮᔑᒥᓐ ᐁᑮ ᓴᓇᑲᒃ ᐁᐱᒫᔑᔮᕽ᙮ ᓂᑮᐅᑎᑖᒥᓐ ᑕᔥ ᐁᐃᔑᓂᑳᑌᒃ ᐌᓂᔑᔑᒃ ᑕᐱᓇᐎᔑᒨᓄᐎᓐ, ᐯᔓ ᐃᒫ ᓬᐊᓰᔭ ᐆᑌᓈᕽ ᐁᔑ ᐊᔮᒃ᙮

27:9b.ACT.027.009 ᐅᓵᒻ ᑕᔥ ᑭᓉᔥ ᐃᐃᒫ ᓂᑮᐊᔮᒥᓐ, ᐋᔕ ᐁᑮᐅᒋᒋᓭᒃ ᐅᓵᒻ ᐁᓇᓃᓵᓀᑖᑾᒃ ᑫᔮᐱ ᒋᐱᒫᔑᕽ ᐋᓃᔥ ᐋᔕ ᑮᐊᐲᒋ ᑕᒀᑭᓐ᙮ ᐋᔕ ᑲᔦ ᑮᐃᔥᒀ ᐃᔑᑮᔑᑲᓐ ᒎᐗᒃ ᑳᔑ ᓂᑖ ᒫᐗᒋᐃᑎᐙᒡ ᐃᐃ ᑳᐴᓀᑕᒪᐎᑣ ᐅᒪᒋᑑᑕᒧᐎᓂᐙᓐ᙮ ᒦᑕᔥ ᑆᓬ ᐅᑮᐊᔦᒀᒥᒫᐞ ᐱᒫᔒᐎᓂᓂᐗᐞ᙮

27:10b.ACT.027.010 ᒦᑕᔥ ᐅᐌ ᑳᐃᓈᒡ: ᓂᐙᐸᑖᓐ ᐅᐌ ᑳᐱᒥ ᐊᔮᔭᕽ ᐋᐱᒋ ᐁᓇᓃᓵᓂᓯᔭᕽ, ᒋᑭᒋ ᐗᓂᒋᑫᔭᕽ ᑲᔦ᙮ ᐴᓯᑖᓱᓇᓐ ᑕᓂᔑᐗᓈᒋᓭᐗᓐ, ᑭᒋ ᒌᒫᓐ ᑲᔦ᙮ ᑭᐱᒫᑎᓯᐎᓂᓈᓂᓐ ᓴ ᑲᔦ ᓇᓃᓵᓀᑖᑾᓅᓐ᙮

27:11b.ACT.027.011 ᐃᓂ ᑕᔥ ᔑᒫᑲᓂᔒᐎᑭᒫᓐ ᓇᐗᒡ ᐅᑮ ᐱᓯᑕᐙᓂ ᑭᒋ ᒌᒫᓃᐎᑭᒫᓐ, ᐃᓂ ᑲᔦ ᑳᑎᐯᑕᒥᓂᒡ ᐃᐃ ᑭᒋ ᒌᒫᓐ, ᐊᐲᒡ ᐐᓐ ᐃᐃ ᑳᑮᐃᑭᑐᒡ ᑆᓬ᙮

27:12b.ACT.027.012 ᐃᐃᒫ ᑕᐱᓇᐎᔑᒨᓄᐎᓂᕽ ᑳᐐᓐ ᐋᐱᒋ ᑮᐅᓂᔑᔑᓯᓅᓐ ᒋᑕᔑ ᐱᐴᓂᔑᓈᓂᐗᕽ᙮ ᒦᑕᔥ ᓇᐗᒡ ᓃᐱᐗᐞ ᑳᑮᐃᓀᑕᒧᐙᒡ ᒋᓂᒥᓈᐌ ᔮᔑᓈᓂᐗᓂᓂᒃ ᐁᐐᑲᑴ ᑌᑕᑯᔑᓄᐙᒡ ᐌᑎ ᐆᑌᓈᕽ ᐃᐲᓂᑭᔅ ᑳᐃᒋᑳᑌᓂᒃ᙮ ᐃᐃ ᑕᔥ ᑕᐱᓇᐎᔑᒧᐎᓐ ᑲᕒᐄᑦ ᒥᓂᓯᕽ ᑮᐃᔑ ᐊᔮ, ᐁᑮ ᓂᑖ ᐋᓴᒪᐊᕽ ᔖᐗᓄᓂᑳᐲᐊᓄᕽ, ᑮᐌᑎᓄ ᓂᑳᐲᐊᓄᕽ ᑲᔦ᙮

27:13b.ACT.027.013 ᐊᐲ ᑕᔥ ᓂᔑᑳᒡ ᐁᐸᑲᒥᓅᐌᓂᒃ ᐁᔖᐗᓂᓅᑎᕽ, ᒦ ᐃ ᒋᒥᓄᓭᔮᕽ ᐁᐃᓀᑕᒧᐙᒡ, ᐅᑮᐊᒀᓯᐱᓈᐙᓐ ᑭᒋᐙᒥᑲᐃᑲᓇᓐ᙮ ᐋᐱᒋ ᑕᔥ ᒌᑫᐤ ᑮᐃᔑ ᐱᒫᔑᐗᒃ ᐃᐃᒫ ᑲᕒᐄᑦ ᒥᓂᓯᕽ᙮

27:14b.ACT.027.014 ᑳᐐᓐ ᐃᑕᔥ ᑕᔑᓈᓈᑫ ᑮᐃᔑᓭᓯᓅᓐ ᒦ ᐃ ᐋᔕ ᓅᐱᒥᕽ ᐃᓇᑫ ᑳᑮᐅᒋ ᐸᑲᒫᓂᒪᒃ ᓅᑎᓐ ᑮᐌᑎᓄ ᐙᐸᓂᓅᐌᓭ ᑳᑮᐃᒋᑳᑌᒃ᙮

27:15b.ACT.027.015 ᐊᐲ ᑕᔥ ᑳᒣᒀᔥᑲᒫᕽ ᐃᐃ ᐁᑭᒋ ᓅᑎᕽ, ᐁᑮ ᑲᔥᑭᑑᓯᐙᕽ ᑕᔥ ᒋᐅᒋᔥᑲᐗᐊᒫᕽ, ᐃᑕᐙ ᑕᔥ ᓂᑮᓈᒥᐗᓇᐋᒥᓐ, ᐁᑮᒥᒋ ᐱᒫᐅᑯᔮᕽ᙮

27:16b.ACT.027.016 ᐁᑮ ᑕᐱᓇᐙᒃ ᑕᔥ ᒥᓂᓭᓯᕽ ᒀᑕ ᐁᔑᓂᑳᑌᒃ, ᓂᑮᑭᒋ ᐊᓄᑮᒥᓐ ᐁᑮ ᑲᔥᑭᑑᔮᕽ ᒋᐗᓂᑑᓯᐙᕽ ᒥᑎᑯ ᒌᒫᓀᔅ ᑳᓴᑲᐱᑌᒃ᙮

27:17b.ACT.027.017 ᐊᐲ ᑕᔥ ᑳᐃᒀᐲᑭᐱᑑᐙᒡ ᐃᐃ ᒥᑎᑯ ᒌᒫᓀᔅ, ᐐᑫ ᐅᑮᐋᔩᑕᐱᑑᓈᐙ ᐁᑮ ᑎᑎᐸᐱᑑᐙᒡ ᑭᒋ ᒌᒫᓐ᙮ ᐁᑮ ᓭᑭᓯᐙᒡ ᑕᔥ ᒋᒥᔕᑮᔑᓈᕽ ᑳᐃᔑ ᐹᒀᑖᐗᑳᒃ ᐯᔓ ᐃᐃᒫ ᓬᐃᐱᔭ ᐊᑮᕽ᙮ ᐅᑮᓃᓵᐲᑭᐱᑑᓈᐙᓐ ᑕᔥ ᐱᒫᔒᐌᑭᓅᓐ ᒦᑕᔥ ᑳᐃᔑ ᒥᒋ ᐱᒫᐅᑯᔮᕽ᙮

27:18b.ACT.027.018 ᐐᑫ ᑕᔥ ᓂᑮᑭᒋ ᐅᒑᓂᒫᐅᑯᒥᓐ᙮ ᐌᔮᐸᓂᓂᒃ ᑕᔥ ᐅᑮᒫᒌ ᐸᐹᑯᐲ ᐌᐱᓈᓈᐙᓐ ᐴᓯᑖᓱᓇᓐ᙮

27:19b.ACT.027.019 ᓂᓱ ᑮᔑᒃ 3 ᑕᔥ ᐁᔑᓭᓂᒃ, ᐅᑮ ᐸᐹᑯᐲ ᐌᐱᓈᓈᐙᓐ ᑭᒋ ᒌᒫᓂᐎ ᐋᐸᒋᒋᑲᓇᓐ᙮

27:20b.ACT.027.020 ᐁᑮᐅᒋ ᓈᑯᓯᓯᒃ ᑕᔥ ᑮᓯᔅ, ᐗᓇᑯᔕᒃ ᑲᔦ ᓃᐱᐗᐞ ᑕᓱ ᑮᔑᒃ, ᐁᑮᐅᒋ ᐊᓍᓅᐌᓯᓄᒃ ᑲᔦ, ᒦ ᐃ ᑫᑲᐱ ᑳᑮ ᐸᑭᒌᔮᕽ ᒋᐱᒫᑎᓯᓯᐙᕽ᙮

27:21b.ACT.027.021 ᐋᔕ ᑕᔥ ᑭᓉᔥ ᐁᑮᐅᒋ ᐐᓯᓂᓯᓂᒃ ᐃᓂᓂᐗᐞ, ᑆᓬ ᑮᐊᑕᐎ ᓃᐸᐎ ᒣᑴᔭᐄ ᐁᔑ ᐊᔮᓂᒡ ᐁᑮᐃᓈᒡ: ᐃᓂᓂᐗᒃ ᑭᑖᑮᐅᓴ ᐱᓯᑕᐎᔑᒻ ᑳᑮᐃᓂᓇᑰᒃ ᒋᒫᒌᔮᔑᓯᐗᑭᐸᓐ ᐌᑎ ᑲᕒᐄᑦ ᒥᓂᓯᕽ᙮ ᑳᐐᓐ ᑕᔥ ᐅᐅ ᑭᑖᑮᐃᔑ ᐗᓯᑖᐎᓭᓰᒥᓐ, ᑳᐐᓐ ᑲᔦ ᑭᑖᑮᐗᓂᒋᑫᓰᒥᓐ᙮

27:22b.ACT.027.022 ᒫᓄ ᑕᔥ ᑭᑲᑳᓱᒥᓂᓂᒻ ᒋᒪᔥᑲᐌᑕᒣᒃ ᒋᐸᑭᑌᓂᒧᓯᐌᒃ, ᐋᓃᔥ ᑳᐐᓐ ᐊᐎᔭ ᑳᑕᔑᔦᒃ ᐅᑲ ᐗᓂᑑᓰᓐ ᐅᐱᒫᑎᓯᐎᓐ᙮ ᑭᒋ ᒌᒫᓐ ᐁᑕ ᑕᓂᔑᐗᓈᑕᓐ᙮

27:23b.ACT.027.023 ᑎᐱᑯᕽ ᐅᔕ ᓂᑮ ᓃᐸᐐᑖᑯᐙᓐ ᐅᑌᒐᓬᐃᒪᓐ ᑭᔐᒪᓂᑑ ᑳᑎᐯᓂᒥᒡ ᑳᐊᓄᑮᑕᐗᒃ᙮

27:24b.ACT.027.024 ᐅᐅ ᐁᑮᐃᔑᒥᒡ: ᑆᓬ, ᑫᑯ ᓭᑭᓯᑫᓐ! ᐅᒋᑕ ᑯ ᐃᔑᓈᑾᓐ ᒋᐅᒋᔥᑲᐎ ᑳᐸᐎᑕᐗᒡ ᒫᐗᒡ ᑭᒋᐅᑭᒫ ᒋᑎᐹᑯᓂᒃ, ᐃᓇᔥᑫ ᑕᔥ ᑭᔐᒪᓂᑑ ᑭᒥᓄᑑᑖᒃ ᐁᐸᑭᑎᓈᒡ ᑲᑭᓇ ᐃᓂᐌᓂᐗᐞ ᑳᐐᒌᐎᒥᒃ ᒋᐱᒫᑎᓯᓂᒡ᙮

27:25b.ACT.027.025 ᑮᓇᐙ ᑕᔥ ᐃᓂᓂᐗᒃ ᒪᔥᑲᐌᑕᒧᒃ! ᐋᓃᔥ ᓂᑌᐺᑕᐙ ᑭᔐᒪᓂᑑ ᒪᔮ ᒋᐃᔑᓭᓂᒃ ᑳᑮᐃᔑᒡ᙮

27:26b.ACT.027.026 ᔖᑰᒡ ᑕᔥ ᓂᑯᒋ ᑯ ᒥᓂᓯᕽ ᑭᑲ ᒥᔕᑳᒣᔮᐅᑯᒥᓐ, ᐅᑮᐃᓈᐞ᙮

27:27b.ACT.027.027 ᐊᐲ ᑕᔥ ᒥᑖᔑᓃᐎᑯᓐ 14 ᐁᔑᓭᒃ ᑫᔮᐱ ᓂᑮ ᐱᒫᐅᑯᒥᓐ ᐃᐃᒫ ᐁᑕᕒᐃᔮ ᑭᒋᑲᒦᕽ᙮ ᓂᑯᒋ ᑫᑳ ᐁᐊᓂ ᐋᐱᑖ ᑎᐱᑳᒃ ᒌᒫᓃᐎᓂᓂᐗᒃ ᐅᑮᐅᒋ ᑭᑫᑖᓈᐙ ᐯᔓ ᒫᐐᓐ ᐁᐱᒪᑳᒣᔮᓂᒃ᙮

27:28b.ACT.027.028 ᒦᑕᔥ ᑳᑮ ᑯᑕᑮᐃᑫᐙᒡ ᓂᑯᒋᑯ ᓃᔥᑕᓇ 20 ᑕᓱᓂᒃ ᑮᐊᐲᑖᔭᐙᓂ᙮ ᒦᓇᐙ ᑕᔥ ᓈᑫ ᑮᑯᑕᑮᐃᑫᐗᒃ ᓂᑯᒋᑯ ᑕᔥ ᒥᑖᔑᓈᓈᓐ 15 ᑕᓱᓂᒃ ᑮᐊᐲᑖᔭᐙᓂ᙮

27:29b.ACT.027.029 ᐁᑮᓇᓃᓵᓀᑕᒧᐙᒡ ᑕᔥ ᐁᔑ ᐊᓯᓃᑳᓂᒃ ᒋᔑᐊᒀᔮᐅᑯᐙᒡ ᐅᑮ ᐸᑯᐲᐋᓈᐙᓐ ᓃᐎᓐ ᑭᒋᐙᒥᑲᐃᑲᓇᓐ ᐅᑖᑫᔫᓇᒃ ᐃᓇᑫ᙮ ᐐᑫ ᐅᑮᓅᑌ ᐊᑕᐌᑖᓈᐙ ᒋᐙᐸᓂᓂᒃ᙮

27:30b.ACT.027.030 ᒌᒫᓃᐎᓂᓂᐗᒃ ᑕᔥ ᑮᐃᓀᑕᒨᒃ ᐁᐐ ᑮᒨᒋ ᒫᒌᐸᐃᐌᐙᒡ᙮ ᐅᑮᓃᓵᐲᑭᓈᓈᐙ ᑕᔥ ᒥᑎᑯ ᒌᒫᓀᔅ ᐁᐃᔑᒋᑫᑳᓱᐙᒡ ᐁᐸᑯᐲᐊᒧᐙᒡ ᑭᒋᐙᒥᑲᐃᑲᓇᓐ ᓂᒥᑖᒨᓇᒃ ᐃᓇᑫ᙮

27:31b.ACT.027.031 ᑆᓬ ᑕᔥ ᐅᑮᐃᓈᓐ ᔑᒫᑲᓂᔒᐎᑭᒫᓐ ᐃᐃ ᑲᔦ ᔑᒫᑲᓂᔕᐞ: ᑮᔥᐱᓐ ᐃᑭ ᐃᓂᓂᐗᒃ ᐊᔮᓯᒀ ᐅᐅᒫ ᑭᒋ ᒌᒫᓂᕽ, ᑳᐐᓐ ᑫᑮᓇᐙ ᑭᑲ ᐱᒫᑎᓯᓰᒻ, ᐅᑮᐃᓈᓐ᙮

27:32b.ACT.027.032 ᔑᒫᑲᓂᔕᒃ ᑕᔥ ᐅᑮ ᐸᑭᔖᓈᐙ ᑳᐅᒋ ᓴᑲᐱᑌᓂᒃ ᒥᑎᑯ ᒌᒫᓀᔅ ᐱᓵᓐ ᒋᑕᔑ ᒫᒌᔮᐊᓂᓂᒃ᙮

27:33b.ACT.027.033 ᐊᐲ ᑕᔥ ᐁᐊᓂ ᐙᓭᔮᐸᓂᓂᒃ ᑆᓬ ᐅᑮ ᐸᑯᓭᓂᒫᐞ ᑲᑭᓇ ᒋᐅᑖᐱᓇᒥᓂᒡ ᒦᒋᒻ ᒋᐐᓯᓂᓂᒡ ᐁᑮᐃᑭᑐᒡ: ᒦ ᐃ ᓅᑯᒻ ᑳᑮᔑᑲᒃ ᐋᔕ ᒥᑖᔑᓃᐎᑮᔑᒃ 14 ᐁᐃᔑᓭᒃ ᐁᒥᒋ ᐲᐅᔦᒃ, ᐁᐅᒋ ᐐᓯᓂᓯᐌᒃ ᑫᑰᓐ ᒋᑮᒦᒋᔦᑭᐸᓐ᙮

27:34b.ACT.027.034 ᑭᒥᓴᐌᓂᒥᓂᓂᒻ ᑕᔥ ᒋᐅᑖᐱᓇᒣᒃ ᒦᒋᒻ ᐋᓃᔥ ᒦ ᐃᒫ ᑫᐅᒋ ᐱᒫᑎᓯᔦᒃ᙮ ᑳᐐᓐ ᐅᔕ ᑲᓇᑫ ᐯᔑᒃ ᐊᐎᔭ ᐅᐐᓂᓯᔅ ᐅᑎᒀᓂᕽ ᑕᐅᒋ ᓂᔑᐗᓈᑕᓯᓂᓂ ᐅᐅᒫ ᑳᑕᔑᔦᒃ, ᐅᑮᐃᓈᐞ᙮

27:35b.ACT.027.035 ᐊᐲ ᑕᔥ ᐃᐃ ᑳᐃᔥᒀ ᐃᑭᑐᒡ ᐅᑮᐅᑖᐱᓈᓐ ᐸᑴᔑᑲᓇᓐ ᐁᑮᓇᓈᑯᒫᒡ ᑭᔐᒪᓂᑑᓐ᙮ ᑲᑭᓇ ᑕᔥ ᐅᑮ ᑲᓇᐙᐸᒥᑰᐞ᙮ ᒦᔥ ᑳᐃᔑ ᐸᑴᐱᓈᒡ ᐸᑴᔑᑲᓇᓐ ᐁᑮᒫᒌ ᐐᓯᓂᒡ᙮

27:36b.ACT.027.036 ᑲᑭᓇ ᑕᔥ ᑮᐅᒋ ᓲᑭᑌᐁᐗᐞ, ᒦᔥ ᑲᑭᓇ ᑳᐃᔑ ᐐᓯᓂᓂᒡ᙮

27:37b.ACT.027.037 ᑲᑭᓇ ᑕᔥ ᒫᒪᐤ ᑳᑮ ᐴᓯᔮᕽ ᐃᐃᒫ ᑭᒋ ᒌᒫᓂᕽ ᓃᔣᒃ ᓃᔣᓯᒥᑕᓇᔑ ᓂᑯᑣᓱ 276 ᓂᑮ ᑕᔑᒥᓐ᙮

27:38b.ACT.027.038 ᐊᐲ ᑕᔥ ᑳᑌ ᐐᓯᓂᐙᒡ ᐅᑮ ᐸᐹᑯᐲ ᐌᐱᓈᐙᓐ ᐸᑴᔑᑲᓂᐎ ᑭᑎᑳᓇᓐ ᑳᐅᒋ ᐅᔑᐃᒥᓐᒡ ᐸᑴᔑᑲᓇᓐ ᒋᓈᑾᑯᑌᓂᒃ ᑭᒋ ᒌᒫᓐ᙮

27:39b.ACT.027.039 ᐊᐲ ᑕᔥ ᐁᐊᓂ ᐲᑖᐸᓂᓂᒃ ᑳᐐᓐ ᐅᑮᓂᓯᑕᐎᓇᓰᓈᐙ ᐃᐃ ᐊᑮᓂ᙮ ᐅᑮᐙᐸᑖᓈᐙ ᑕᔥ ᐐᓐ ᐁᔑ ᐙᓂᓂᑲᒫᓂᒃ ᐁᒪᑗ ᒥᑖᐗᑳᓂᒃ᙮ ᒦᑕᔥ ᑳᑮᐃᓀᑕᒧᐙᒡ ᑮᔥᐱᓐ ᑲᔥᑭᑑᐙᒡ ᒋᑮᒉᑭᓯᑑᐙᐸᓐ ᑭᒋ ᒌᒫᓂᓂ ᐃᐃᒫ᙮

27:40b.ACT.027.040 ᐅᑮ ᐸᑭᔖᓈᐙᓐ ᑕᔥ ᐃᓂ ᑭᒋᐙᒥᑲᐃᑲᓇᓐ ᓂᐲᕽ ᐃᑯ ᐁᑮᐃᔑ ᓇᑲᑕᒧᐙᒡ᙮ ᐅᑮᐋᐸᐙᐙᓐ ᑲᔦ ᑕᑾᐃᑲᓇᓐ ᐁᑕᑯᐱᓱᓂᐸᓐ᙮ ᐅᑮᐃᒀᐲᑭ ᐱᑑᓈᐙ ᑕᔥ ᐱᒫᔒᐌᑭᓐ ᓂᒥᑖᒨᓇᒃ ᑳᑮᐊᔮᓂᒃ ᓃᑳᓇᔭᐄ ᓇᑫ ᒋᒫᒌᔮᔑᐙᒡ᙮ ᒦᔥ ᑳᑮ ᓈᑕᑳᒣᔮᔑᔮᕽ᙮

27:41b.ACT.027.041 ᑮᓅᑌ ᒥᔕᑮᓯᓐ ᑕᔥ ᐃᐃ ᑭᒋ ᒌᒫᓐ ᐁᔑ ᐹᒀᒃ᙮ ᓂᒥᑖᒨᓇᒃ ᑕᔥ ᑮᑭᒋᐗᑖᐗᑭᓭ᙮ ᐅᑖᑫᔫᓇᒃ ᑕᔥ ᑮᐊᓂ ᐲᑾᐊᓐ ᑳᐊᐲᒋ ᓲᑳᔥᑳᒃ᙮

27:42b.ACT.027.042 ᔑᒫᑲᓂᔕᒃ ᑕᔥ ᑮᐃᓀᑕᒨᒃ ᒋᓂᓵᐙᒡ ᑭᐸᐙᑲᓇᐞ ᐁᑮᓇᓃᓵᓀᑕᒧᐙᒡ ᒋᑮᒨᒋ ᒫᒌᔮᑕᑫᓂᒡ ᒋᔑᐸᓂᓈᐙᒡ ᐃᑕᔥ᙮

27:43b.ACT.027.043 ᔑᒫᑲᓂᔒᐎᑭᒫ ᑕᔥ ᐁᐐ ᐱᒫᒋᐋᒡ ᑆᓬᐊᓐ ᐅᑮ ᑭᐱᑎᓈᐞ ᑳᐐᐃᔑᒋᑫᓂᐸᓐ᙮ ᑮᐃᑭᑐ ᑕᔥ ᐃᐃ ᓀᑖᐙᑕᑫᓂᒡ ᓃᑳᓐ ᒋᐸᑯᐲ ᒀᔥᑾᓂᓂᒡ ᒋᓈᑕᑳᒣᔮᑕᑫᓂᒡ᙮

27:44b.ACT.027.044 ᐃᓂ ᑕᔥ ᑯᑕᒃ ᒋᔑᒥᒋᒦᓂᒡ ᓇᐸᑭᓴᑯᕽ ᑫᑰᓇᓐ ᑲᔦ ᑳᐲᐗᐊᓂᓂᑭᓐ ᒋᒥᒋᒥᓇᒥᓂᒡ᙮ ᑮᐃᔑᓭ ᑕᔥ ᑲᑭᓇ ᐊᐎᔭ ᐁᑮᒥᔕᑳᒣᔮᑕᑫᒡ, ᑫᑰᓐ ᐁᑮᐃᔑᓭᓯᒃ᙮

28

28:1b.ACT.028.001 ᐊᐲ ᑕᔥ ᑲᑭᓇ ᑳᐊᒀᓰᔮᕽ ᒦ ᐃ ᑳᑮᐐᑕᒫᑰᔮᕽ ᐃᐃ ᒥᓂᔅ ᒫᓬᑕ ᐃᓇᑾᓇ ᐁᐃᔑᓂᑳᑌᒃ᙮

28:2b.ACT.028.002 ᑳᑮ ᑕᔒᑫᐙᒡ ᑕᔥ ᐃᐃᒫ ᐐᑫ ᓂᑮᒥᓄᑑᑖᑯᓈᓂᒃ᙮ ᑮᐴᑕᐌᐗᒃ ᒋᐊᐗᓱᔮᕽ ᐋᓃᔥ ᑮᑭᒥᐗᓐ, ᑮᑭᓯᓈ ᑲᔦ᙮ ᑮᐃᑭᑐᐗᒃ ᑲᔦ ᐁᒥᓉᑕᒧᐙᒡ ᑲᑭᓇ ᐁᐙᐸᒥᔭᒥᑣ᙮

28:3b.ACT.028.003 ᑆᓬ ᑕᔥ ᐅᑮᒫᒨᔕᑭᓈᓇᓐ ᒥᑎᑰᓴᓐ᙮ ᐁᐸᑭᑎᓂᓭᒡ ᑭᓀᐱᑰᓐ ᑮᓵᑳᐲᑭᐸᓂᐅᐗᓐ ᐁᐊᓂ ᑭᔑᑌᓂᒃ ᐃᐃ ᐴᑕᐙᓐ, ᐅᑮᒫᑾᒥᑰᓐ ᑕᔥ ᑭᓀᐱᑰᓐ ᐅᓂᒌᕽ ᐁᑮ ᑭᒋᐗᒥᑯᒡ᙮

28:4b.ACT.028.004 ᐊᐲ ᑕᔥ ᐃᐃᒫ ᑳᑮ ᑕᔒᑫᓂᒡ ᐁᐙᐸᒥᑯᒡ ᑭᓀᐱᑰᓐ ᐁᐊᑰᒋᓂᓂᒡ ᐅᓂᒌᕽ ᑮᐃᑭᑐᐗᐞ: ᐗᐊ ᐃᓂᓂ ᑌᐺ ᑮᓂᔑᐌᑐᒃ! ᐋᓇᐐᓐ ᐁᑮ ᔖᐾᒡ ᑭᒋᑲᒦᕽ ᐅᒋ, ᔖᑰᒡ ᑕᔥ ᐅᑮᐌ ᓈᓯᑳᑯᓐ ᐅᑎᔑᒋᑫᐎᓐ, ᐁᓇᓇᐊᓯᑯᒡ᙮ ᑳᐐᓐ ᑕᔥ ᐃᓀᑖᑯᓯᓰ ᒋᑮ ᐱᒫᑎᓯᐸᓐ, ᑮᐃᑭᑐᐗᐞ᙮

28:5b.ACT.028.005 ᐃᔥᑯᑌᕽ ᑕᔥ ᐅᑮᐃᔑ ᐌᐱᓈᓐ ᐃᓂ ᑭᓀᐱᑰᓐ, ᑳᐐᓐ ᑕᔥ ᑫᑰᓐ ᑮᐃᔑ ᐊᔮᓰ᙮

28:6b.ACT.028.006 ᐅᑮᐊᑲᐙᐃᑰᐞ ᑕᔥ ᒋᐹᑭᓭᓂᒡ, ᑯᒫ ᑲᔦ ᑴᑕᑐ ᒋᑲᐎᓭᒡ ᒋᓂᐳᒡ᙮ ᐊᐲ ᑕᔥ ᑭᓉᔥ ᑳᐲᐃᑯᒡ, ᐁᐙᐸᒥᑯᒡ ᑕᔥ ᑫᑰᓐ ᐁᐃᔑ ᐊᔮᓯᒃ, ᐸᑳᓐ ᑮᐃᓀᑕᒨᐞ ᐁᐃᑭᑐᓂᒡ: ᒪᓂᑑᐎ ᐄᓴᓐ ᐗᐊ, ᑮᐃᑭᑐᐗᐞ᙮

28:7b.ACT.028.007 ᐯᔓ ᑕᔥ ᐃᐃᒫ ᑮᐊᔮᓂ ᐊᑮᓂ ᐁᑎᐯᑕᕽ ᑳᐅᑭᒫᑳᓂᐎᒡ ᐃᐃᒫ ᒥᓂᓯᕽ ᐸᐱᓬᐃᔭᔅ ᐁᐃᔑᓂᑳᓱᒡ᙮ ᓂᑮ ᐲᑎᑲᓂᑯᓈᓐ ᐅᑖᐎᓂᕽ, ᓂᓱᑮᔑᒃ 3 ᐐᑫ ᓂᑮᒥᓄ ᐸᒥᐃᑯᓈᓐ᙮

28:8b.ACT.028.008 ᑮᐊᓂ ᐊᔨᔑᓭ ᑕᔥ ᐸᐱᓬᐃᔭᔅ ᐅᑌᑌᓐ ᐁᑮ ᐱᒥᔑᓂᓂᒡ ᐁᑭᔑᓱᐙᐱᓀᓂᒡ ᑲᔦ ᑕᔥ ᑮᒥᔅᑸᐗᓂᓂ ᐅᑭᔑᐗᔥᑲᑌᔮᐱᓀᐎᓂᓂ᙮ ᒦᐗᓐ ᐃᓂᐌᓂᐗᓐ ᑆᓬ ᑳᑮ ᐲᑎᑲᐙᒡ ᐁᑮᐊᓇᒥᐋᒡ᙮ ᐁᓵᒥᓈᒡ ᑕᔥ ᑮᒥᓄᐊᔮᐗᓐ᙮

28:9b.ACT.028.009 ᐊᐲ ᑕᔥ ᐅᐅ ᑳᐃᔑᓭᒃ ᑯᑕᒃ ᐊᐎᔭᒃ ᐋᑯᓯᐎᓇᓐ ᑳᐊᔮᐙᒡ ᐃᐃᒫ ᒥᓂᓯᕽ ᑮᐲᔖᐗᒃ ᒦᔥ ᑳᐃᔑ ᒥᓄᐊᔮᐃᑣ᙮

28:10b.ACT.028.010 ᓃᐱᐗᐞ ᑕᔥ ᑫᑰᓇᓐ ᓂᑮᒦᓂᑯᓈᓂᒃ ᐁᓈᑯᑑᐙᒡ ᐁᑭᑌᓂᒥᔭᒥᑣ᙮ ᐊᐲ ᑳᑮᔒᔮᕽ ᒋᒫᒌᔮᔑᔮᕽ, ᓂᑮᒫᒌᑕᐃᑯᓈᓂᒃ ᑫᑰᓐ ᑫᔮᐸᒋᑑᔮᕽ᙮

28:11b.ACT.028.011 ᓂᓱ ᑮᓯᔅ 3 ᑕᔥ ᐃᐃᒫ ᑳᐃᔥᒀ ᐊᔮᔮᕽ ᓂᑮ ᐴᓯᒥᓐ ᑭᒋ ᒌᒫᓐ ᐁᑮᒫᒌᔮᔑᔮᕽ᙮ ᐃᐃ ᓴ ᑭᒋ ᒌᒫᓐ ᑮᑕᔑ ᐱᐴᓂᔒᒪᑲᓐ ᐃᐃᒫ ᐁᑮᐅᒌᒪᑲᒃ ᐋᓬᐃᑭᓵᑕᕒᐃᔮᑳᕽ᙮ ᓃᔓᑌᐎ ᒪᓂᑑᑳᓇᒃ ᑮᒪᓯᓂᔑᓅᒃ ᐃᐃᒫ ᑭᒋ ᒌᒫᓂᕽ᙮

28:12b.ACT.028.012 ᓯᕒᐊᑭᔫᔅ ᐆᑌᓈᕽ ᑕᔥ ᓂᑮᐃᔑ ᑕᑯᔑᓂᒥᓐ᙮ ᓂᓱᑮᔑᒃ 3 ᑕᔥ ᐃᐃᒫ ᓂᑮᐊᔮᒥᓐ᙮

28:13b.ACT.028.013 ᒦᑕᔥ ᐃᐃᒫ ᒦᓇᐙ ᑳᐅᒋ ᒫᒌᔮᔑᔮᕽ ᐲᓂᔥ ᐁᑮᐅᑎᑕᒫᕽ ᐅᕒᐄᒋᔭᒻ ᑳᐃᒋᑳᑌᒃ ᐆᑌᓇ᙮ ᐁᐊᓂ ᐙᐸᕽ ᑕᔥ ᑮᒫᒌ ᔖᐗᓂᓅᑎᓐ᙮ ᒦᓇᐙ ᐁᐊᓂ ᐙᐸᕽ ᓂᑮᐅᑎᑖᔑᒥᓐ ᐳᑎᔭᓬᐃ ᑕᐱᓇᐎᔑᓄᐎᓂᕽ᙮

28:14b.ACT.028.014 ᓂᑮᒥᑲᐙᓈᓇᒃ ᑕᔥ ᐃᐃᒫ ᐅᑌᐺᑕᒨᒃ᙮ ᓂᑮᐃᑯᓈᓂᒃ ᑕᔥ ᒋᐐᒋ ᐊᔮᒪᑭᑣ ᐯᔑᑯᑕᐗᑌ᙮ ᒦᑕᔥ ᑳᑮᐊᓂ ᑕᑯᔑᓈᕽ ᐌᑎ ᐅᕒᐆᒥᕽ ᙮

28:15b.ACT.028.015 ᐅᑌᐺᑕᒨᒃ ᑕᔥ ᐅᕒᐆᒥᕽ ᑳᑮᐊᔮᐙᒡ ᑮᓅᑕᒨᒃ ᐄᓴᓐ ᐁᐐᐱ ᑕᑯᔑᓈᕽ᙮ ᓂᑮ ᐱᐊᑕ ᓇᑭᔥᑳᑯᓈᓂᒃ ᑕᔥ ᐙᓴ ᐁᑮᐱ ᐅᒌᐙᒡ ᐆᑌᓇᐗᓐ ᑳᐃᒋᑳᑌᓂᑭᓐ ᐅᑕᑖᐌᐎᑲᒥᒃ ᐋᐱᔭᔅ, ᐃᐃ ᑕᔥ ᑲᔦ ᓂᓱ ᑲᐯᔑᐎᓐ᙮ ᐊᐲ ᑕᔥ ᑆᓬ ᑳᐙᐸᒫᒡ ᐅᑮᐅᒋ ᒦᑴᒋᐌᓂᒫᓐ ᑭᔐᒪᓂᑑᓐ, ᑮᐅᒋ ᒪᔥᑲᐎᐊᔮ ᑲᔦ᙮

28:16b.ACT.028.016 ᐊᐲ ᑕᔥ ᑳᑕᑯᔑᓈᕽ ᐅᕒᐆᒻ ᐆᑌᓇ, ᑆᓬ ᑮᐸᑭᑎᓇᒪᐙ ᐱᓵᓐ ᒋᓂᔑᑫᐊᔮᒡ ᐙᑳᐃᑲᓂᕽ᙮ ᔑᒫᑲᓂᔕᓐ ᑕᔥ ᐃᐃᒫ ᐅᑮ ᑲᓇᐌᓂᒥᑰᓐ᙮

28:17b.ACT.028.017 ᓂᓱ ᑮᔑᒃ 3 ᐁᐊᓂ ᐃᔑᓭᓂᒃ ᑆᓬ ᐅᑮ ᒫᒪᐎ ᐊᑐᒫᐞ ᑳᓃᑳᓂᓯᓂᒡ ᒎᐗᐞ᙮ ᐊᐲ ᑕᔥ ᑳᐱ ᒫᒪᐎ ᐲᔖᓂᒡ ᐅᑮᐃᓈᐞ: ᓂᐐᒋ ᐅᒌᒫᑲᓇᒃ, ᐋᓇᐐᓐ ᑫᑰᓐ ᐁᑮᐃᔑ ᒪᒫᔑᑲᑕᐙᓯᐗᒀ ᑭᐐᒋ ᐅᒌᒫᑲᓂᓈᓂᒃ, ᐃᔑᑣᐎᓇᓐ ᑲᔦ ᑳᑮᐱ ᒦᓂᓇᒀ ᑭᑫᑌᔭᐋᒥᓈᐸᓃᒃ, ᒦᑕᔥ ᑳᑮ ᑭᐸᐅᑰᔮᓐ ᐌᑎ ᒉᕒᐆᓴᓬᐊᒥᕽ, ᐁᑮᐃᔑ ᐸᑭᑎᓂᑰᔮᓐ ᒋᑕᑯᓂᒥᒡ ᐅᕒᐆᒥᕽ ᑳᐅᒌᓂᒡ᙮

28:18b.ACT.028.018 ᒦᐗᒃ ᑕᔥ ᐃᑭ ᑳᑮᐊᑕ ᑭᑫᓂᒥᐙᒡ᙮ ᑮᐃᓀᑕᒨᒃ ᑕᔥ ᒋᑮ ᐸᑭᑎᓂᑰᐗᑭᐸᓐ, ᐋᓃᔥ ᑳᐐᓐ ᑫᑰᓐ ᓂᑮᐃᔑ ᒪᒫᔑᐙᓰᓐ ᑫᐅᒋ ᓂᓯᑰᐗᑭᐸᓐ᙮

28:19b.ACT.028.019 ᐊᐲ ᑕᔥ ᒎᐗᒃ ᑳᐃᓀᑕᓯᒀ ᒋᐸᑭᑎᓂᑰᐗᒃ, ᐃᑕᐙ ᑕᔥ ᓂᑮᐃᑭᑦ ᒫᐗᒡ ᑭᒋᐅᑭᒫ ᒋᑎᐹᑯᓂᒡ, ᑳᐐᓐ ᐐᓐ ᑫᑰᓐ ᐁᐊᔮᔮᓐ ᑫᐅᒋ ᒪᒋᐃᓇᒀᐸᓐ ᓃᓐ ᑯ ᓂᐐᒋ ᐅᒌᒫᑲᓇᒃ᙮

28:20b.ACT.028.020 ᒦᑕᔥ ᑳᑮᐅᒋ ᐊᑐᒥᓇᑰᒃ ᐁᐐᐙᐸᒥᓂᓇᑰᒃ, ᐁᐐ ᑲᑲᓅᓂᓇᑰᒃ ᑲᔦ᙮ ᐋᓃᔥ ᓂᑌᐺᑕᐎᒫᓐ ᐃᔅᕒᐃᔭᓬᐊᒃ ᑳᐊᐯᓂᒧᓄᑕᐙᐙᒡ, ᒦ ᐃ ᑳᐅᒋ ᑕᑯᐱᓱᔮᓐ ᐅᓄ ᐲᐙᐱᑴᔮᐲᓐ, ᐅᑮᐃᓈᐞ᙮

28:21b.ACT.028.021 ᐅᐅ ᑕᔥ ᐅᑮᐃᑰ: ᑳᐐᓐ ᒎᑏᔭ ᐊᑮᕽ ᓂᑐᒋ ᐅᔑᐲᐊᒫᑰᓰᒥᓐ ᒋᑕᔑᒥᑰᔭᓐ᙮ ᐃᑭ ᑲᔦ ᐌᑎ ᒎᐗᒃ ᑳᑮᐱ ᐅᒋ ᑕᑯᔑᓄᐙᒡ ᑳᐐᓐ ᑫᑰᓐ ᒋᑮᐃᓈᒋᒧᐙᒡ, ᑳᐐᓐ ᑲᔦ ᓅᒋᑯ ᐊᐎᔭ ᑭᑎᑯᓰ᙮

28:22b.ACT.028.022 ᑭᐐᓅᑖᑰ ᑕᔥ ᐋᓃᓐ ᐁᓀᑕᒪᓐ, ᐋᓃᔥ ᓂᑭᑫᑖᒥᓐ ᒥᓯᐌ ᐊᐎᔭᒃ ᐁᒪᒋ ᑕᔑᑕᒧᐙᒡ ᐃᐃ ᐃᔑᑣᐎᓐ ᐌᒋ ᑎᐯᑖᑯᓯᐗᒡ, ᐅᑮᐃᑰᐞ᙮

28:23b.ACT.028.023 ᐅᑮᐅᓇᑑᓂ ᑕᔥ ᐊᐲ ᑮᔑᑲᓂᓂᒃ ᑫᐱᐊᑕ ᐙᐸᒥᑯᒡ᙮ ᑮᐹᑏᓄᐗᐞ ᑕᔥ ᑳᑮ ᐱᐊᑕ ᐙᐸᒥᑯᒡ ᐃᐃᒫ ᐁᔑ ᐊᔮᒡ᙮ ᐁᑭᔐᐹᐗᑲᓂᓂᒃ ᑕᔥ ᐲᓂᔥ ᐁᐊᓂ ᐅᓈᑯᔑᓂᓂᒃ ᑾᔭᒃ ᐁᑮᐙᐐᑕᒪᐙᒡ ᐁᑎᐹᒋᒧᑕᐙᒡ ᐋᓃᓐ ᐁᔑᓈᑾᓂᓂᒃ ᑭᔐᒪᓂᑑ ᐅᑑᑭᒫᐎᐎᓐ᙮ ᐅᑮᑲᑴ ᑲᔥᑭᒫᐞ ᑕᔥ ᑲᔦ ᒋᑌᐺᑖᑯᒡ ᐁᑕᔑᒫᒡ ᒋᓴᓲᓐ ᐁᑮᐐᑕᕽ ᐁᔑᓯᓂᓂᒃ ᐅᑑᓇᔓᐌᐎᓂᓂ ᒨᓯᓲᓐ, ᑳᑮᐃᔑᐲᐃᑫᓂᒡ ᑲᔦ ᑫᓅᑕᒪᐙᓂᒡ ᑭᔐᒪᓂᑑᓐ᙮

28:24b.ACT.028.024 ᐋᓂᑕ ᑕᔥ ᐅᑮ ᑌᐺᑕᒥᓂ ᐃᐃ ᑳᑮ ᐐᑕᒪᐙᒡ, ᐋᓂᑕ ᑕᔥ ᑳᐐᓐ ᑮᑌᐺᑕᓰᐗᐞ᙮

28:25b.ACT.028.025 ᑳᐐᓐ ᑕᔥ ᑖᐱᔥᑰ ᑮᐃᓀᑕᓰᐗᐞ ᐁᐊᓂ ᒫᒑᓂᒡ ᐅᐅ ᑆᓬ ᑳᐃᔥᒀ ᐃᑭᑐᒡ: ᐯᔑᒃ ᑫᑰᓐ ᓂᑕᔮᓐ ᒋᐃᓂᓇᑰᒃ: ᑌᐺ ᑾᔭᒃ ᑮᐃᑭᑐᓂᑯᐸᓐ ᑭᔐᒪᓂᑑ ᐅᑕᒑᑾᓐ ᑮᔮᐸᒋᐋᓂᒡ ᑫᓅᑕᒫᑯᒡ ᐋᐃᓭᔭᐗᓐ ᑮᑲᓅᓈᑯᐸᓀᓐ ᑭᑫᑌᔭᐋᒥᓈᐸᓃᐞ:

28:26b.ACT.028.026 ᒫᒑᓐ ᐊᑕᐙᐸᒻ ᐃᑭ ᐯᒫᑎᓯᐙᒡ ᐅᐅ ᒋᐃᓇᑣ: ᒥᓴᐙᑯ ᒨᔕᒃ ᐋᓇ ᓅᑕᒣᒃ, ᑳᐐᓐ ᑕᔥ ᑭᑲᓂᓯᑐᑕᓰᒻ᙮ ᒥᓴᐙᑯ ᑲᔦ ᒨᔕᒃ ᐋᓇ ᐙᐸᑕᒣᒃ, ᑳᐐᓐ ᑕᔥ ᑭᑲᓂᓯᑕᐎᓇᓰᒻ᙮

28:27b.ACT.028.027 ᐋᓃᔥ ᐅᑎᓀᑕᒧᐎᓂᐙᓐ ᐋᐱᒋ ᐯᒋ ᓂᓯᑐᑕᒨᒪᑲᓂᓂᐗᓐ, ᐅᑭᐱᓈᓈᐗᓐ ᑕᔥ ᑲᔦ ᐅᑕᐗᑳᐙᓐ᙮ ᐊᑲᐙᐱᓂᑎᓱᐗᒃ ᑕᔥ ᑲᔦ᙮ ᐅᐅ ᑕᔥ ᐁᐃᔑᒋᑫᐙᒡ ᒦ ᐃ ᑳᐅᒋ ᐙᐱᓯᒀ, ᒦ ᑲᔦ ᑳᐅᒋᓅᑕᓯᒀ, ᒦ ᑲᔦ ᐃ ᑳᐅᒋᓂᓯᑐᑕᓯᒀ ᐅᑎᓀᑕᒧᐎᓂᐙᕽ᙮ ᐱᑴᑮᓄᑕᐎᐙᒡ ᑕᔥ ᓂᑖᐱᒫᒋᐋᒃ, ᑮᐃᑭᑐᑯᐸᓐ ᑭᔐᒪᓂᑑ᙮

28:28b.ACT.028.028 ᑆᓬ ᑕᔥ ᑮᐊᓂ ᐃᑭᑐ: ᑭᑫᑕᒧᒃ ᐃᑕᔥ ᐅᐅ ᒥᓍᒋᒧᐎᓐ ᑳᔑ ᑕᔑᑌᓂᒃ ᑭᔐᒪᓂᑑ ᐅᐱᒫᒋᐃᐌᐎᓐ ᑫᐐᓇᐙ ᑳᒎᐎᐎᓯᒀ ᐁᐃᔑᓂᔕᐊᒪᐎᑣ, ᑕᓅᑕᒨᒃ ᑕᔥ ᐐᓇᐙ! ᐅᑮᐃᓈᐞ᙮

28:29b.ACT.028.029 ᐊᐲ ᑕᔥ ᐅᐅᐌ ᑳᐃᔥᒀ ᐃᑭᑐᒡ, ᒎᐗᐞ ᑮᐊᓂ ᒫᒑᐗᐞ, ᐐᑫ ᐁᑭᒋ ᑲᑲᓅᓂᑎᓂᒡ᙮

28:30b.ACT.028.030 ᓃᔓ ᐱᐴᓐ 2 ᑕᔥ ᐃᐃᒫ ᑮᐊᔮ ᐙᑳᐃᑲᓂᕽ ᑳᑮᐊᐎᐋᓱᒡ, ᑲᑭᓇ ᑲᔦ ᐁᑮ ᐲᑎᑲᓈᒡ ᑳᑮᐱ ᓈᓯᑳᑯᒡ᙮

28:31b.ACT.028.031 ᑮᓲᑭᑌᐁ ᑕᔥ, ᑳᐐᓐ ᑲᔦ ᐊᐎᔭᓐ ᐅᑮ ᑭᐱᑎᓂᑯᓰᓐ ᐁᐐᑕᒫᑫᒡ ᑭᔐᒪᓂᑑᓐ ᐅᑑᑭᒫᐎᓂᓂ, ᐁᑮ ᑭᑭᓄᐊᒫᑫᒡ ᑲᔦ ᐃᓂ ᑳᔑ ᑎᐹᒋᒥᒥᓐᒡ ᑳᑎᐯᒋᑫᓂᒡ ᒋᓴᔅ Xᑕᓐ᙮