Mark (Ojibwa)

1

1:1b.MAR.001.001 ᒦ ᐃᐌ ᒥᓍᒋᒧᐎᓐ ᑳᐃᔑ ᑎᐹᒋᒥᓐᒡ ᐊᐊᐌ ᒋᓴᔅ X ᐌᑯᓯᓯᒥᑯᒡ ᑭᔐᒪᓂᑑᓐ᙮ ᒦᐃᐌ ᑳᐃᔑ ᒫᒋᓭᒃ ᐃᐃ ᑎᐹᒋᒧᐎᓐ,

1:2b.MAR.001.002 ᒪᔮ ᑳᐃᓇᑌᓂᒃ ᐅᑑᔑᐱᐃᑫᐎᓐ ᐋᐃᓭᔭ ᐅᑎᐹᒋᒧ ᐌᔥᑲᒡ ᑳᑮ ᑲᓅᑕᒪᐙᒡ ᑭᔐᒪᓂᑑᓐ᙮ ᓃᓐ ᑭᔐᒪᓂᑑ ᓂᓃᑳᓂᓂᔕᐙ ᓂᐐᑕᒫᑫᐎᓂᓃᒻ᙮ ᓇᑲᐌ ᑭᑲ ᑾᔮᒋᑕᒫᒃ ᒦᑲᓇ ᑫᔑ ᑕᑶᔑᓇᓐ, ᐃᔑᐲᐃᑳᑌ᙮

1:3b.MAR.001.003 ᔑᑾ ᑮᐃᑭᑐ ᐋᐃᓭᔭ: ᒪᑗᐊᔮ ᐊᐎᔭ ᐱᑾᑕᑲᒥᑳᕽ ᐁᔖᔖᑯᐌᒡ: ᑾᔮᒋᑕᒪᐎᒃ ᐅᒦᑲᓈᒻ ᐊᐊ ᑌᐯᒋᑫᒡ, ᒋᑾᔭᑾᒧᓂᓂᒃ ᑫᐃᔑ ᐱᒥᐊᔮᒡ, ᐃᑭᑑᒪᑲᓐ᙮

1:4b.MAR.001.004 ᐹᓂᒫ ᑕᔥ ᐊᐊ ᒞᓐ ᓰᑲᐊᑖᑫᐎᓂᓂ ᑮᓈᓈᑯᓯ ᐃᐃᒫ ᐱᑾᑕᑲᒥᑳᕽ᙮ ᑮᐃᔑ ᐐᑕᒫᑫ ᑕᔥ ᐁᐃᑭᑐᒡ: ᑴᑭᐱᒫᑎᓯᒃ, ᓰᑲᐊᑖᓱᒃ, ᑭᔐᒪᓂᑑ ᑭᑲ ᐴᓀᑕᒫᑯᐙ ᑭᒪᒋᑑᑕᒧᐎᓂᐙᓐ, ᑮᐃᑭᑐ᙮

1:5b.MAR.001.005 ᒥᓯᐌ ᑯ ᑮᐱ ᐅᒌᐗᒃ ᐊᐎᔭᒃ ᐃᐃᒫ ᒎᑏᔮᐎ ᐊᑮᕽ ᑲᔦ ᑯ ᐃᐃᒫ ᒉᕒᐆᓴᓬᐊᒦᐎ ᐆᑌᓈᕽ, ᐁᑮ ᐱᓈᓯᑕᐙᐙᒡ ᐃᓂ ᒞᓇᓐ᙮ ᔑᑾ ᐁᑮᐱ ᑕᑎᐹᑐᑕᒧᐙᒡ ᐅᒪᒋᑑᑕᒧᐎᓂᐙᓐ, ᐅᑮ ᓰᑲᐊᑖᑯᐙᓐ ᐃᓂ ᒞᓇᓐ ᐃᐃᒫ ᒞᕒᑕᓇᐎ ᓰᐲᕽ ᙮

1:6b.MAR.001.006 ᔑᑾ ᐅᑖᑰᐅᓐ ᐊᐊ ᒞᓐ, ᐱᒀᐎᑲᓀᐎᒥᑕᑎᒻ ᐅᐲᐗᔨᕽ ᑮᐅᒌᒪᑲᓂᓂ ᑎᓄᐌᑭᓐ ᑳᑭᑭᔥᑲᕽ, ᐁᑮ ᑭᑎᒫᑭᓈᑯᓯᒡ ᐁᑮᐃᔑᐅᒡ᙮ ᔑᑾ ᑲᔦ ᑮᑭᒋᐱᓱ ᐃᐃ ᐸᔥᑴᑭᓅᓂ᙮ ᔑᑾ ᑕᔥ ᑮᐃᔑ ᐅᒦᒋᒥᒥ ᑭᒋᐸᐸᑭᓀᐞ ᐁᑮᐊᒸᒡ ᑲᔦ ᐱᑾᒋ ᐋᒨᐎ ᓰᓯᐹᑾᑦ᙮

1:7b.MAR.001.007 ᔑᑾ ᑮᐃᔑ ᐐᑕᒫᑫ ᐅᐅᐌ: ᐱᐊᔮᐲᑌᑎ ᓴ ᐱᒌᓇᒃ ᑫᐱᑕᑶᔑᕽ ᐃᓂᓂ, ᓇᐗᒡ ᑫᐃᔥᐯᑖᑯᓯᒡ ᐊᐲᒡ ᐃᑕᔥ ᓃᓐ᙮ ᐊᐊᐌ ᓴ ᑯ ᑳᐱ ᐱᒥᓂᔕᐅᒡ, ᐃᓇᔥᑫ ᑯ ᑳᐐᓐ ᓃᓐ ᑲᓇᑫ ᓂᑌᐊᐲᑌᑖᑯᓯᓰ ᒋᓇᐗᑮᔮᐹᓐ ᒋᐋᐸᐊᒧᐗᒃ ᐅᒪᑭᓯᓀᔮᐲᓐ᙮

1:8b.MAR.001.008 ᑭᑎᔑ ᓰᑲᐊᑕᐎᓂᓂᒻ ᓃᓐ ᓂᐲᕽ᙮ ᐐᓐ ᐃᑕᔥ ᐐᓐ ᑭᑲ ᑭᑭᔥᑲᒨᓂᑯᐙ ᑭᔐᒪᓂᑑᓐ ᐅᑕᒑᑯᓂ᙮ ᒦ ᐅᐌ ᑳᐐᐃᔑ ᓰᑲᐊᑕᐎᓀᒃ, ᑮᐃᑭᑐ ᐊᐊ ᒞᓐ᙮

1:9b.MAR.001.009 ᑮᐃᔑᓭ ᑕᔥ ᐃᐃ ᐊᐲ, ᐁᑮ ᑕᑶᔑᕽ ᐊᐊᐌ ᒋᓴᔅ, ᐁᑮᐱ ᐅᒌᒡ ᐌᑎ ᐆᑌᓇᐌᓯᕽ ᓈᓴᕒᐃᑦ ᐁᐃᔑᓂᑳᑌᓂᒃ, ᐃᐃᒫ ᑳᓬᐊᓬᐄᐎ ᐊᑮᕽ ᐁᐊᔮᓂᒃ ᐆᑌᓇᐌᔅ᙮ ᐅᑮ ᐱᓈᓯᑲᐙᓐ ᑕᔥ ᐃᓂ ᒞᓇᓐ, ᐁᑮ ᓰᑲᐊᑖᑯᒡ ᐃᐃᒫ ᒞᕒᑕᓇᐎ ᓰᐲᕽ ᙮

1:10b.MAR.001.010 ᐱᒌᓇᒃ ᐃᑕᔥ ᐁᐊᒀᓰᒡ ᐊᐊ ᒋᓴᔅ, ᐅᑮᐙᐸᑖᓐ ᐃᐃ ᑮᔑᒃ ᐁᐹᑭᓭᓂᒃ᙮ ᔑᑾ ᐅᑮᐙᐸᒫᓐ ᐃᓂ ᑭᔐᒪᓂᑑᓐ ᐅᑕᒑᑯᓂ ᐁᐱᓈᔒᓂᒡ, ᐅᒦᒦᓯᕽ ᐁᐃᔑᓈᑯᓯᓂᒡ ᐁᐱ ᐴᓃᓴᑖᑯᒡ ᐁᐱ ᐲᒋᔥᑳᑯᒡ ᐃᓂ ᐊᒑᑾᓐ᙮

1:11b.MAR.001.011 ᔑᑾ ᑮᑌᐱᑖᑾᓐ ᐃᓉᐎᓐ ᑮᔑᑯᕽ: ᑮᓐ ᐃᓴ ᓂᑯᓯᔅ ᓯᔮᑭᐃᓈᓐ, ᑮᓐ ᑳᓇᐁᑕᒥᐃᔭᓐ᙮

1:12b.MAR.001.012 ᔐᒫᒃ ᑕᔥ ᐌᑎ ᐅᑮᐃᔑ ᐐᑯᔥᑳᐃᑰᓐ ᒋᓴᔅ ᐃᓂ ᐊᒑᑾᓐ, ᐱᑾᑕᑲᒥᑳᕽ ᐁᑮᐃᔑ ᒫᒑᒡ᙮

1:13b.MAR.001.013 ᒦᑕᔥ ᐃᐃᒫ ᑳᐃᔑ ᓃᒥᑕᓇ ᑕᓱᑯᓂᒡ ᐱᑾᑕᑲᒥᑳᕽ᙮ ᐊᒦᑕᔥ ᐃᐃᒫ ᓭᑕᓐ ᐅᑮ ᑲᑴ ᑲᔥᑭᐋᓐ ᒋᓴᓲᓐ ᒋᒪᒋᑑᑕᒥᓂᒡ᙮ ᐱᑾᒋ ᐊᔭᐋᐎᔕᒃ ᑲᔦ ᑮᐊᔮᐗᒃ ᐌᑎ ᑳᑮᐃᔑ ᐊᔮᓂᒡ᙮ ᐃᐃᒫ ᑕᔥ ᐁᒐᓬᐊᒃ ᐅᑮᐱ ᑲᓇᐌᓂᒫᐙᓐ ᒋᓴᓲᓐ᙮

1:14b.MAR.001.014 ᐹᓂᒫ ᑕᔥ ᑳᑭᐸᐅᓐᒡ ᐊᐊ ᒞᓐ ᓰᑲᐊᑖᑫᐎᓂᓂ, ᑮᐊᓂ ᑕᑶᔑᓐ ᐊᐊ ᒋᓴᔅ ᐃᐃᒫ ᑳᓬᐊᓬᐄᐎ ᐊᑮᕽ ᐁᐐᑕᒫᑫᒡ ᐃᐃ ᑭᔐᒪᓂᑑ ᐅᒥᓍᒋᒧᐎᓐ,

1:15b.MAR.001.015 ᐅᐅᐌ ᐁᐃᑭᑐᒡ: ᒦ ᐋᔕ ᐁᐅᒋᒋᓭᒃ! ᐋᔕ ᐯᔓᓈᑾᓂᓂ ᐃ ᑭᔐᒪᓂᑑ ᒋᐅᑭᒫᑲᑖᑫᒡ! ᑴᑭᐱᒫᑎᓯᒃ, ᑌᐺᑕᒧᒃ ᐅᐅ ᒥᓍᒋᒧᐎᓐ! ᑮᐃᑭᑐ᙮

1:16b.MAR.001.016 ᒣᒀ ᑕᔥ ᐁᑮᐱ ᐱᒫᔕᑳᒣᒡ ᒋᓴᔅ ᑳᓬᐊᓬᐄᐎ ᓵᑲᐃᑲᓃᕽ ᐅᑮᐊᓂ ᐙᐸᒫᐞ ᓵᐃᒪᓇᓐ ᑲᔦ ᓵᔨᒪᓐ ᐐᒋᑭᐌᔭᓐ ᐁᑕᕒᐆᓐ, ᒣᒀ ᐁᐸᑯᐲᐙᓂᒡ ᐊᓴᐲᓐ᙮ ᐋᓃᔥ ᐃᐃ ᒦ ᐅᐌ ᐅᑕᓄᑮᐎᓂᐙ ᐃᐃ ᐸᑭᑕᐌᐎᓐ᙮

1:17b.MAR.001.017 ᐅᑮ ᑲᓅᓈᐞ ᐃᑕᔥ: ᐊᐤ ᐊᐯᔪᒃ, ᐱᐐᒌᐎᔑᒃ, ᐅᑮᐃᓈᐞ᙮ ᐃᓇᔥᑫ ᓴ ᑳᐱ ᐃᓇᓄᑮᔦᒃ ᐁᐸᑭᑕᐙᔦᒃ, ᓅᑯᒻ ᐃᑕᔥ ᑭᑲ ᒫᒌᑭᑭᓄᐊᒪᐎᓂᓂᒻ ᒋᐲᑕᒪᐎᔦᒃ ᐯᒫᑎᓯᐙᒡ, ᐅᑮᐃᓈᐞ᙮

1:18b.MAR.001.018 ᒦᑕᔥ ᔐᒫᒃ ᑳᐃᔑ ᓇᑲᓈᐙᒡ ᐅᑕᓴᐲᐙᐞ, ᐁᑮᐊᓂ ᐐᒌᐙᐙᒡ ᐃᓂ ᒋᓴᓲᓐ᙮

1:19b.MAR.001.019 ᒦᓇᐙ ᑕᔥ ᐃᑯ ᓈᑫᐙᓴ ᐁᐊᓂ ᑕᑶᔑᕽ ᒋᓴᔅ, ᐅᑮᐙᐸᒫᐞ ᐃᓂ ᒌᒥᓴᓐ ᑲᔦ ᒞᓇᓐ, ᐁᐐᒋᑭᐌᔨᑎᓂᒡ, ᐅᑯᓯᓴᐞ ᐊᐊ ᓭᐸᑏ ᙮ ᐃᐃᒫ ᑮᐊᔮᐗᐞ ᐲᑑᓇᒃ, ᒣᒀ ᐁᑾᔮᒋᐋᓂᒡ ᐅᑕᓴᐲᓂ᙮

1:20b.MAR.001.020 ᔐᒫᒃ ᐃᑕᔥ ᒋᓴᔅ ᐅᑮᐊᑐᒫᐞ᙮ ᒦᑕᔥ ᑳᐃᔑ ᓇᑲᓈᐙᒡ ᐅᑌᑌᐙᓐ ᓭᐸᑏᓐ, ᐃᐃᒫ ᒌᒫᓂᕽ ᐁᐊᔮᓂᒡ, ᐃᐃᐌᓂᐗᐞ ᑲᔦ ᐊᓄᑮᐊᑲᓇᐞ᙮ ᒦᑕᔥ ᑳᐊᓂ ᐃᔑ ᐐᒌᐙᐙᒡ ᐃᓂ ᒋᓴᓲᓐ᙮

1:21b.MAR.001.021 ᒦᑕᔥ ᐌᑎ ᑳᓂ ᐃᔑ ᑕᑶᔑᓄᐙᒡ ᐆᑌᓈᕽ, ᑲᐸᕒᓂᔭᒻ ᐁᐃᔑᓂᑳᑌᓂᒃ᙮ ᒦᑕᔥ ᐱᒌᓇᒃ ᐁᐃᔑᑮᔑᑲᒃ ᑳᐅᑕᓉᐲᐎ ᑮᔑᑲᓅᒥᐙᒡ ᐃᑭ ᒎᐗᒃ, ᒦᐃᒫ ᑳᐃᔑ ᐲᑎᑫᒡ ᐊᐊ ᒋᓴᔅ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ, ᐁᑮᒫᒌᑭᑭᓄᐊᒫᑫᒡ᙮

1:22b.MAR.001.022 ᐅᑮᒫᒪᑳᓯᑖᑰᐞ ᐃᑕᔥ ᐃᐃ ᐯᒫᑎᓯᓂᒡ ᐁᔑ ᑭᑭᓄᐊᒫᑫᒡ᙮ ᐐᓐ ᐋᓃᔥ ᐅᑮᐃᔑ ᑭᑭᓄᐊᒪᐙᐞ ᑖᐱᔥᑰ ᒦ ᐗᐊᐌ ᐁᐅᑭᒫᐌᑖᑯᓯᒡ᙮ ᑳᐐᓐ ᐐᓐ ᑖᐱᔥᑰ ᑮᐃᔑ ᐊᔮᓰ ᐅᑯ ᑳᑭᑭᓄᐊᒫᑫᐙᒡ ᐃᐃ ᒎᐗᐞ ᐅᑑᓇᔓᐌᐎᓂᓂ᙮

1:23b.MAR.001.023 ᒦᐃ ᐊᐲ ᑮᐲᑎᑫ ᐃᒫ ᐊᓇᒥᐁᐎᑲᒥᑯᕽ ᐊᐊ ᐯᔑᒃ ᐃᓂᓂ ᐁᑭᑭᔥᑲᐙᒡ ᒪᒋᐊᒑᑾᓐ, ᐁᑮᐃᔑ ᔖᑯᐌᒡ:

1:24b.MAR.001.024 ᑮᓐ ᒋᓴᔅ ᓈᓴᕒᐃᑎᕽ ᐌᒌᔭᓐ! ᐌᑯᓀᔥ ᐌᒋ ᐸᐹᒣᓂᒥᔮᕽ? ᑭᐱᐅᒋ ᐃᔖ ᓇ ᒋᓂᔑᐗᓈᒋᐃᔮᕽ? ᑭᑭᑫᓂᒥᓐ ᑮᓐ ᐊᐌᓀᓂᐎᔭᓐ, ᑮᓐ ᐊᐊ ᑳᐯᑭᓯᒡ ᑭᔐᒪᓂᑑᕽ ᑳᐅᒌᒡ! ᑮᐃᔑᑭᔒᐌ᙮

1:25b.MAR.001.025 ᒋᓴᔅ ᐃᑕᔥ ᐅᑮ ᑭᔒᑲᓅᓈᓐ: ᐱᓵᓐ! ᑫᑯ ᑫᑰᓐ ᐃᑭᑐᑫᓐ! ᓇᑲᔥ ᐊᐊ ᐃᓂᓂ! ᐅᑮᐃᓈᓐ ᐃᓂ ᒪᒋᐊᒑᑾᓐ᙮

1:26b.MAR.001.026 ᒦᑕᔥ ᐁᑮᐅᒋᐱᓂᑯᔥᑲᐙᒡ ᐃᓂ ᐃᓂᓂᐗᓐ ᐊᐊ ᒪᒋᐊᒑᒃ, ᐁᑮ ᑭᒋᓅᑖᑯᓯᒡ, ᒦᐃ ᑳᐃᔑ ᓇᑲᓈᒡ᙮

1:27b.MAR.001.027 ᑮᑭᒋᑯᔥᑴᑕᒨᒃ ᐃᑕᔥ ᑲᑭᓇ ᐃᑭ ᐯᒫᑎᓯᐙᒡ, ᑳᐅᒋ ᑲᑴᒋᑎᐙᒡ: ᐌᑯᓀᔥ ᐅᐅᐌ? ᒦ ᓴ ᐅᐌ ᐅᔥᑭᑭᑭᓄᐊᒫᑫᐎᓐ! ᑖᐱᔥᑰ ᐁᐅᑭᒫᐌᑖᑯᓯᒡ ᐅᑎᔑᑲᓅᓈᐞ ᐃᐃ ᒪᒋᐊᒑᑾᐞ, ᑲᔦ ᐅᓇᐃᑖᑰᐞ! ᑮᐃᑭᑐᐗᒃ᙮

1:28b.MAR.001.028 ᒦᑕᔥ ᐃᐃ ᐌᔩᑉ ᐁᑮ ᐸᐹᑎᐹᒋᒥᓐᒡ ᒥᓯᐌ ᐃᐃᒫ ᑳᓬᐊᓬᐄᐎ ᐊᑮᕽ ᙮

1:29b.MAR.001.029 ᒦᑕᔥ ᐃᐃ ᐁᐊᓂᐅᒋ ᒫᒑᐙᒡ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ, ᐌᔩᑉ ᐃᑯ ᑮᐊᓂ ᐃᔑ ᐲᑎᑫᐗᒃ ᐃᐃᒫ ᐁᔑᑖᓂᒡ ᓵᐃᒪᓐ ᑲᔦ ᐁᑕᕒᐆ, ᐁᑮᐊᓂ ᐐᒌᐎᑯᐙᒡ ᒌᒥᓴᓐ ᑲᔦ ᒞᓇᓐ ᙮

1:30b.MAR.001.030 ᐃᓂ ᑕᔥ ᓵᐃᒪᓐ ᐅᓯᑯᓴᓐ ᑮᑭᔑᓱᐙᐱᓀᐗᓐ ᐁᑮ ᐱᒥᔑᓂᓂᒡ᙮ ᒦᑕᔥ ᐃᐃ ᔐᒫᒃ ᑳᐃᔑ ᐐᑕᒪᐎᓐᒡ ᐊᐊ ᒋᓴᔅ ᐁᐃᔑ ᐊᔮᓂᒡ᙮

1:31b.MAR.001.031 ᒦᑕᔥ ᑳᐃᔑ ᓈᓯᑲᐙᒡ ᐁᑮ ᓴᑭᓂᑫᓈᒡ ᐁᑮᐃᔑ ᐗᓂᔥᑳᐱᓈᒡ᙮ ᒦᑕᔥ ᔐᒫᒃ ᑳᐃᔑ ᓇᑲᓂᑯᓂᒡ ᐃᐃ ᑭᔑᓱᐙᐱᓀᐎᓐ᙮ ᒦᑕᔥ ᑳᐃᔑ ᒫᒌᐸᒥᐃᑯᐙᒡ ᐃᓂ ᐃᑴᐗᓐ᙮

1:32b.MAR.001.032 ᐊᐲ ᑕᔥ ᐌᓈᑯᔑᓂᓂᒃ, ᐋᔕ ᐁᑮ ᐸᑭᔑᒧᓂᒡ ᑮᓯᓲᓐ, ᑮᐹᐲᑕᒪᐙ ᒋᓴᔅ ᑲᑭᓇ ᑳᐋᑯᓯᓂᒡ ᑲᔦ ᐊᐎᔭᐞ ᑳᑭᑭᔥᑲᐙᓂᒡ ᒪᒋᐊᒑᑾᐞ᙮

1:33b.MAR.001.033 ᐲᓂᔥ ᐃᑯ ᑲᑭᓇ ᒥᓂᒃ ᐁᔮᐙᒡ ᐃᐃᒫ ᐆᑌᓇᐌᓯᕽ ᑮᐱ ᒫᐗᒋᐃᑎᐗᒃ ᐃᐃᒫ ᐊᑾᒋ ᐃᔥᒀᑌᕽ᙮

1:34b.MAR.001.034 ᓃᐱᐗᐞ ᐃᑕᔥ ᐅᑮ ᐱᒫᒋᐋᐞ ᒋᓴᔅ ᐃᐃ ᐋᓃᓐ ᐃᑯ ᐁᓈᐱᓀᓂᒡ᙮ ᑲᔦ ᓃᐱᐗᐞ ᐅᑮ ᓵᑭᒋᓂᔕᐊᒪᐙᐞ ᒪᒋᐊᒑᑾᐞ ᑳᑭᑭᔥᑲᐙᓂᐸᓐ ᐊᐎᔭᐞ᙮ ᑳᐐᓐ ᐃᑕᔥ ᐅᑮ ᐸᑭᑎᓇᒪᐙᓰᐞ ᒋᑮᑭᑐᓂᒡ ᐃᐃ ᒪᒋᐊᒑᑾᐞ, ᐋᓃᔥ ᐅᑮ ᑭᑫᓂᒥᑰᐞ ᐁᐅᑯᓯᓯᒥᑯᒡ ᑭᔐᒪᓂᑑᓐ᙮

1:35b.MAR.001.035 ᐐᐸ ᑕᔥ ᐁᑭᔐᐹᐗᑲᓂᓂᒃ ᒋᑆ ᐲᑖᐸᓂᓂᒃ, ᑮᐗᓂᔥᑳ, ᐁᑮᐊᓂ ᓵᑲᐊᕽ, ᐁᑮᓂᔑᑫᐃᔖᒡ ᐃᑯᒋ᙮ ᒦᑕᔥ ᐃᐃᒫ ᑳᐃᔑ ᐊᓇᒥᐋᒡ᙮

1:36b.MAR.001.036 ᐹᓂᒫ ᑕᔥ ᐊᐊ ᓵᐃᒪᓐ ᑲᔦ ᐃᓂᐌᓂᐗᐞ ᑳᐐᒌᐎᑯᒡ ᐅᑮ ᐱᒪᐊᓈᐙᓐ ᐃᓂ ᒋᓴᓲᓐ ᐁᑮᓇᓈᑐᓀᐙᐙᒡ᙮

1:37b.MAR.001.037 ᒦᑕᔥ ᐁᒥᑲᐙᐙᒡ ᐅᑮ ᑲᓅᓈᐙᓐ: ᑲᑭᓇ ᐊᐎᔭ ᑭᓈᓈᑐᓈᒃ, ᐅᑮᐃᓈᐙᓐ᙮

1:38b.MAR.001.038 ᒋᓴᔅ ᐃᑕᔥ ᐅᑮᐃᓈᐞ: ᑕᑲ ᐌᑎ ᐃᔑ ᒫᒑᑖ ᒌᑲᔭᐄ ᐁᔮᑭᓐ ᐊᔮᐎᓇᓐ, ᐃᐃᒫ ᑲᔦ ᒋᑕᔑ ᐐᑕᒫᑫᔮᓐ ᑭᔐᒪᓂᑑ ᐅᑎᑭᑐᐎᓐ᙮ ᐋᓃᔥ ᒦᐃᐌ ᑳᐅᒋ ᐲᔖᔮᓐ, ᑮᐃᑭᑐ᙮

1:39b.MAR.001.039 ᒦᑕᔥ ᐃᐃ ᑳᐃᔑ ᐸᐹᒥᐊᔮᒡ ᐃᐃᒫ ᑳᓬᐊᓬᐄᐎ ᐊᑮᕽ ᒥᓯᐌ, ᐁᑮ ᐸᐹᑲᑮᑴᒡ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ᙮ ᔑᑾ ᑕᔥ ᑲᔦ ᐅᑮ ᓵᑭᒋᓂᔕᐊᒪᐙᐞ ᒪᒋᐊᒑᑾᐞ ᐊᐎᔭᐞ᙮

1:40b.MAR.001.040 ᐋᐱᑎᕽ ᐃᑕᔥ ᐁᑮᔑᑲᓂᓂᒃ ᐅᑮᐱ ᐅᑎᓯᑰᓐ ᒋᓴᔅ ᐯᔑᒃ ᐃᓂᓂᐗᓐ ᐁᑮᐅᒥᑮᐙᐱᓀᓂᒡ, ᐁᐱ ᐸᑯᓭᓂᒥᑯᒡ ᑲᔦ ᑯ ᐁᐅᒋᒌᑾᓇᐲᑖᑯᒡ, ᐁᐃᑯᒡ: ᑮᔥᐱᓐ ᐃᓀᑕᒪᓐ ᑭᑖ ᑲᔥᑭᑑᓐ ᒋᐯᑭᐃᔭᓐ, ᑮᐃᑭᑐᐗᓐ᙮

1:41b.MAR.001.041 ᒋᓴᔅ ᐃᑕᔥ ᐐᑫ ᐁᑮ ᑭᑎᒫᑫᓂᒫᒡ, ᐅᑮ ᔒᐱᓂᑫᑕᐙᓐ ᐁᑮ ᓵᒥᓈᒡ᙮ ᔑᑾᔥ ᐁᑮᐃᓈᒡ: ᐁᐊᐞ, ᓂᑎᓀᑕᒻ᙮ ᑭᑲ ᐯᑭᐃᑰᐎᔅ, ᐅᑮᐃᓈᓐ᙮

1:42b.MAR.001.042 ᒦᑕᔥ ᐃᐃ ᔐᒫᒃ ᑳᐃᔑ ᓇᑲᓂᑯᓂᒡ ᐃᐃ ᐅᑎᓈᐱᓀᐎᓂᓂ ᐃᓂ ᐃᓂᓂᐗᓐ᙮ ᑮᒥᓄᐊᔮᐗᓐ ᐁᓈᐱᓈᑯᓯᓂᒡ᙮

1:43b.MAR.001.043 ᔐᒫᒃ ᐃᑕᔥ ᐅᑮᒫᒌᓂᔕᐙᓐ ᐊᐊ ᒋᓴᔅ ᐃᓂ ᐃᓂᓂᐗᓐ᙮ ᐊᑲᐌ ᑕᔥ ᐐᑫ ᐅᑮᐊᔮᒀᒥᒫᓐ ᐅᐅ:

1:44b.MAR.001.044 ᐊᔮᒀᒥᓯᓐ, ᐅᑮᐃᓈᓐ᙮ ᑫᑯ ᑫᑰᓐ ᐊᐎᔭ ᐐᑕᒪᐙᑫᓐ᙮ ᐃᔖᓐ ᐃᑕᔥ ᐊᓇᒥᐁᐎᑭᒫ ᒋᐙᐸᒥᒃ᙮ ᒨᓯᔅ ᑮᐃᓈᑯᓂᑫ ᐃᐃ ᐸᑭᑎᓂᑫᐎᓐ ᒋᒦᑭᐌᒡ ᐊᐎᔭ ᐊᐲ ᑮᒥᓄᐊᔮᐃᓐᒡ᙮ ᒦᐃᐌ ᒦᑭᐌᓐ ᒋᑭᑫᓂᒥᒀ ᐯᒫᑎᓯᐙᒡ ᐁᒥᓄᐊᔮᔭᓐ, ᐅᑮᐃᓈᓐ᙮

1:45b.MAR.001.045 ᐐᓐ ᐃᑕᔥ ᐊᐊ ᐃᓂᓂ ᑳᑮᒥᓄᐊᔮᐃᓐᒡ, ᐋᒋᑯ ᑮᐊᓂ ᑎᐹᒋᒧᑖᑫ ᒥᓯᐌ ᐁᑮ ᑭᑫᑕᒨᔑᐌᒡ᙮ ᒦᑕᔥ ᐅᐅ ᐅᒋ, ᑳᐐᓐ ᑮᒥᒋᒉᑭᔥᑳᓰ ᐆᑌᓇᐌᓯᕽ ᐊᐊ ᒋᓴᔅ, ᐁᑳ ᒋᑭᑫᓂᒫᓯᐎᓐᒡ᙮ ᒦᑕᔥ ᐃᑕᐙᒡ ᐃᐃᒫ ᐱᑾᒐᔭᐄ ᐁᑳ ᑳᐃᔑᑖᓂᐗᓯᓂᓂᒃ ᑮᐊᔭᔮ᙮ ᒥᓯᐌ ᑕᔥ ᐅᑮᐱ ᐊᔪᒋᐅᑎᓯᑰᐞ ᐊᐎᔭᐞ᙮

2

2:1b.MAR.002.001 ᐹᓂᒫ ᐸᑮ ᑮᑕᓱᑰᓇᑳᓂᒃ ᒦᓇᐙ ᑮᐊᓂᐅᒋ ᑕᑯᔑᓐ ᐃᐃᒫ ᑲᐸᕒᓂᔭᒦᐎ ᐆᑌᓈᕽ ᙮ ᑮᑕᓈᒋᒫ ᑕᔥ ᐁᐊᔭᐱᒡ ᑳᔑᑖᒡ᙮

2:2b.MAR.002.002 ᓃᐱᐗᐞ ᐃᑕᔥ ᑮᐱ ᒫᐗᒋ ᐃᔖᐗᐞ, ᐲᓂᔥ ᐐᑫ ᑮᓵᑭᑕᔥᑭᓀᐗᐞ, ᐊᐴᔥᑫ ᐊᑾᒋ ᐃᔥᒀᑌᕽ᙮ ᒋᓴᔅ ᐃᑕᔥ ᒣᒀ ᐅᑮ ᑲᑲᑲᓅᓈᐞ ᐁᑮ ᑕᔑᑕᕽ ᑭᔐᒪᓂᑑᓐ ᐅᑎᑭᑐᐎᓂᓂ᙮

2:3b.MAR.002.003 ᑮᐲᔖᐗᒃ ᐃᑕᔥ ᐊᐎᔭᒃ ᐁᐲᓈᐙᒡ ᐯᔑᒃ ᐁᓂᐳᐙᐱᓀᓂᒡ᙮ ᑮᓃᐎᐗᒃ ᐃᑕᔥ ᐃᑭ ᑳᐱᒥᐎᓈᐙᒡ᙮

2:4b.MAR.002.004 ᑳᐐᓐ ᐃᑕᔥ ᐅᑮ ᑲᔥᑭᑑᓰᓈᐙ ᐯᔔ ᒋᓈᓯᑲᐙᐙᒡ ᒋᓴᓲᓐ, ᑳᐊᐲᒋ ᒨᔥᑭᓀᓂᒃ ᐃᐃ ᐙᑳᐃᑲᓂᓂ᙮ ᒦᑕᔥ ᐃᐃ ᑳᐃᔑ ᐃᒀᑕᐌᐙᒡ ᐁᓇᐸᑳᓂᒃ ᐗᑮᒡ ᐙᑳᐃᑲᓐ ᐁᑮ ᐸᐸᑾᒋᐱᑑᐙᒡ ᐊᐸᒀᓐ ᑎᐱᔥᑰ ᒋᓴᓲᓐ ᑳᐃᔑ ᓃᐸᐎᓂᒡ᙮ ᒦᔥ ᐃᐃᒫ ᑳᐃᔑ ᐸᑯᓀᐱᒋᑫᐙᒡ, ᑳᐃᔑ ᐸᑭᑖᐲᑭᓈᐙᒡ ᐃᓂ ᑳᓂᐳᐙᐱᓀᓂᒡ ᐊᐱᔑᒧᓂᕽ ᑳᐱᒥᔑᓂᓂᒡ᙮

2:5b.MAR.002.005 ᐊᐲ ᑕᔥ ᒋᓴᔅ ᐁᐙᐸᑕᕽ ᐁᐃᔑᒋᑫᓂᒡ ᐁᑌᐺᔦᓂᒥᑯᒡ ᐃᐃ ᐃᓂᓂᐗᐞ, ᒦᑕᔥ ᑳᐃᔑ ᑲᓅᓈᒡ ᐃᓂ ᑳᓂᐳᐙᐱᓀᓂᒡ: ᓃᒌ! ᐴᓀᒋᑳᑌᐗᓐ ᑭᒪᒋᑑᑕᒧᐎᓇᓐ, ᐅᑮᐃᓈᓐ᙮

2:6b.MAR.002.006 ᐋᓂᑕ ᑕᔥ ᐃᑭ ᑳᑭᑭᓄᐊᒫᑫᐙᒡ ᒎᐗᐞ ᐅᑑᓇᔓᐌᐎᓂᓂ ᐃᐃᒫ ᑮᓇᒪᑕᐱᐗᒃ, ᒦ ᐅᐌ ᐁᑮᐃᔑ ᓈᓈᑲᑕᐌᑕᒧᐙᒡ:

2:7b.MAR.002.007 ᐋᓃᔥ ᐗᐊ ᐌᒋ ᐃᔑᑮᔗᒡ? ᐅᐹᐱᓀᓂᒫᓐ ᐃᓂ ᑭᔐᒪᓂᑑᓐ! ᑮᐄᓀᑕᒨᒃ᙮ ᑳᐐᓐ ᐸᑳᓐ ᐊᐎᔭ ᐅᑖ ᑲᔥᑭᑑᓰᓐ ᒋᐴᓀᑕᒪᐙᒡ ᐊᐎᔭᓐ ᐅᒪᒋᑑᑕᒧᐎᓂᓂ; ᐐᓀᑕ ᑭᔐᒪᓂᑑ ᐅᑲᔥᑭᑑᓐ, ᑮᐃᓀᑕᒨᒃ᙮

2:8b.MAR.002.008 ᔐᒫᒃ ᐃᑕᔥ ᒋᓴᔅ ᐅᑮ ᑭᑫᓂᒫᐞ ᐅᐅᐌ ᐁᐃᔑ ᓈᓈᑲᑕᐌᑕᒥᓂᒡ᙮ ᐅᑮ ᑲᓅᓈᐞ: ᐌᑯᓀᔥ ᐌᒋ ᐃᔑᓈᓈᑲᑕᐌᑕᒣᒃ? ᐅᑮᐃᓈᐞ᙮

2:9b.MAR.002.009 ᐋᓃᓐ ᑕᔥ ᐁᔑ ᐌᑕᑭᐸᓐ? ᒋᑮ ᐃᓇᑭᐸᓐ ᐊᐊ ᑳᓂᐳᐙᐱᓀᒡ: ᑭᐴᓀᑕᒪᐎᓐ ᑭᒪᒋᑑᑕᒧᐎᓇᓐ, ᑫᒫ ᒋᑮ ᐃᓇᑭᐸᓐ: ᐸᓯᑸᓐ, ᐅᑖᐱᓇᓐ ᑭᑕᐱᔑᒧᓐ, ᐱᒧᓭᓐ?

2:10b.MAR.002.010 ᓃᓐ ᐃᓂ ᐃᓂᓂ ᐅᑯᓯᓴᓐ; ᑭᑲ ᑭᑫᓂᒥᒻ ᐁᒦᓂᑰᔮᓐ ᑲᔥᑭᐁᐎᓯᐎᓐ ᐅᐅᒫ ᐊᑮᕽ ᐁᐊᔮᔮᓐ ᒋᐴᓀᑖᐗᒃ ᐊᐎᔭ ᐅᒪᒋᑑᑕᒧᐎᓇᓐ, ᐅᑮᐃᓈᐞ᙮ ᒦᑕᔥ ᐅᑮ ᑲᓅᓈᓐ ᐃᓂ ᑳᓂᐳᐙᐱᓀᓂᒡ:

2:11b.MAR.002.011 ᐊᐤ ᐸᓯᑸᓐ, ᑭᑎᓂᓐ! ᐅᑖᐱᓇᓐ ᐃᐃ ᑭᑕᐱᔑᒧᓐ, ᐊᓂᑮᐌᓐ! ᐅᑮᐃᓈᓐ᙮

2:12b.MAR.002.012 ᒦᑕᔥ ᑳᐃᔑ ᐸᓯᑸᒡ ᐊᐊ ᐃᓂᓂ᙮ ᔐᒫᒃ ᐅᑮᐅᒋ ᐅᑖᐱᓈᓐ ᐅᑕᐱᔑᒧᓐ ᐁᑮᐊᓂ ᓵᑲᐊᕽ, ᑲᑭᓇ ᐊᐎᔭᐞ ᐁᐙᐸᒥᑯᒡ᙮ ᑮᐅᒋ ᒫᒪᑳᑌᑕᒨᒃ ᐃᑕᔥ ᑲᑭᓇ᙮ ᑌᐺ ᒫᒪᑳᓯᓈᑾᓐ ᑭᔐᒪᓂᑑ ᑳᑑᑕᕽ! ᑮᐃᑭᑐᐗᒃ᙮ ᑳᐐᓐ ᐐᑳ ᑭᑎᔑ ᐙᐸᑕᓰᒥᓐ! ᑮᐃᑭᑐᐗᒃ᙮

2:13b.MAR.002.013 ᒦᑕᔥ ᐃᐃ ᒦᓇᐙ ᑮᐊᓂ ᓈᓯᐲ ᑳᓬᐊᓬᐄᐎ ᓵᑲᐃᑲᓃᕽ, ᐁᑮ ᐱᒫᔕᑳᒣᒡ ᐊᐊ ᒋᓴᔅ᙮ ᑮᐱ ᒫᐗᒋ ᐃᔖᐗᐞ ᐃᑕᔥ ᑲᑭᓇ ᐃᓂ ᐯᒫᑎᓯᓂᒡ, ᐁᑮᒫᒌᑭᑭᓄᐊᒪᐙᒡ᙮

2:14b.MAR.002.014 ᒦᑕᔥ ᐃᐃ ᑳᐊᓂ ᐃᔑ ᒫᒑᒡ, ᐅᑮᐊᓂ ᐙᐸᒫᓐ ᐃᓂᓂᐗᓐ ᑳᐅᑖᐱᓇᒪᐙᓂᒡ ᑖᑭᔅ ᔔᓂᔮᓐ ᑭᒋᐅᑭᒫᓐ ᒋᑎᐸᐊᒪᐎᒥᓐᒡ᙮ ᓬᐄᐸᔾ ᑮᐃᔑᓂᑳᓱ ᐊᐊ ᐃᓂᓂ, ᐁᐅᔫᓯᒡ ᐋᓬᐱᔭᓴᓐ ᙮ ᒣᒀ ᑮᓇᒪᑕᐱ ᐊᐊ ᓬᐄᐸᔾ ᐃᐃᒫ ᐁᑕᔑ ᑎᐸᐊᒪᐎᓐᒡ᙮ ᐅᑮ ᑲᓅᓂᑰᓐ ᐃᑕᔥ ᐃᓂ ᒋᓴᓲᓐ: ᐱᒥᓂᔕᐅᔑᓐ, ᐅᑮᐃᑰᓐ᙮ ᒦᑕᔥ ᑳᐃᔑ ᐸᓯᑸᒡ ᐊᐊ ᓬᐄᐸᔾ, ᐁᐊᓂ ᐐᒌᐙᒡ᙮

2:15b.MAR.002.015 ᓈᓈᑫ ᑕᔥ ᑮᑕᔑᐐᓯᓂ ᐊᐊ ᒋᓴᔅ ᐃᐃᒫ ᐁᔑᑖᓂᒡ ᐃᓂ ᓬᐄᐸᔭᓐ᙮ ᓃᐱᐗᐞ ᐃᑕᔥ ᐃᐃᒫ ᑮᐊᔮᐗᒃ ᐃᑭ ᑳᒫᐗᑑᓈᐙᒡ ᑖᑭᔅ ᔔᓂᔮᓐ ᑳᑮᐋᓇᐌᑖᑯᓯᐙᒡ, ᐃᑭ ᑲᔦ ᑯᑕᒃ ᐊᐎᔭᒃ ᑳᑮᐋᓇᐌᑖᑯᓯᐙᒡ, ᐃᐃᒫ ᑮᐊᔮᐗᒃ᙮ ᐅᑮᐐᑕᐱᒫᐙᓐ ᐃᓂ ᒋᓴᓲᓐ ᑲᔦ ᐅᑭᑭᓄᐊᒪᐙᑲᓂᓂ᙮ ᐋᓃᔥ ᑮᐹᑏᓄᐗᒃ ᐅᑯ ᑎᓄ ᑳᐱᒥᓂᔕᐙᐙᒡ ᐃᓂ ᒋᓴᓲᓐ᙮

2:16b.MAR.002.016 ᐃᑭ ᑕᔥ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᒦᐗᑭᑭ ᐃᐃᒫ ᐯᕒᐊᓰᐎᓂᓂᐗ ᑳᐅᒋ ᑎᐯᑖᑯᓯᐙᒡ, ᐅᑮᐙᐸᒫᐙᓐ ᐃᓂ ᒋᓴᓲᓐ ᐁᐐᒋᐐᓯᓃᒫᓂᒡ ᐃᐃ ᑎᓄ ᑳᔮᓇᐌᑖᑯᓯᓂᒡ, ᐃᓂ ᑲᔦ ᑳᒫᐗᑑᓈᓂᒡ ᑖᑭᔅ ᔔᓂᔮᓐ᙮ ᒦᑕᔥ ᑳᐃᔑ ᑲᓅᓈᒡ ᐃᓂ ᒋᓴᓲᓐ ᐅᑭᑭᓄᐊᒪᐙᑲᓂᓂ: ᐋᓃᔛᓐ ᐌᒋ ᐐᒋᐐᓯᓃᒫᒡ ᒋᓴᔅ ᐃᓂᐌᓂᐗᐞ ᑳᑎᐸᐃᑫᐃᐌᓂᒡ, ᐃᐃ ᑲᔦ ᑳᔮᓇᐌᑖᑯᓯᓂᒡ? ᐅᑮᐃᓈᐙᐞ᙮

2:17b.MAR.002.017 ᐅᑮᓅᑖᓐ ᐃᑕᔥ ᐊᐊ ᒋᓴᔅ᙮ ᐅᑮ ᑲᓅᓈᐞ ᐃᐃ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ: ᐃᑭ ᑳᒥᓄᔭᔮᐙᒡ ᑳᐐᓐ ᐅᓇᑕᐌᓂᒫᓯᐙᐙᓐ ᐃᓂ ᒪᔥᑭᑮᐎᓂᓂᐗᓐ, ᐃᑭᐌᓂᐗᒃ ᐃᓴ ᑳᔮᑯᓯᐙᒡ᙮ ᑳᐐᓐ ᑲᔦ ᓃᓐ ᓂᑮᐅᒋ ᐲᔖᓰ ᒋᐱᐊᑐᒪᒀᐸᓐ ᐃᑭ ᑴᔭᑯᔅᐱᒫᑎᓯᐙᒡ ᑳᐃᓇᑭᒥᑣ ᒋᑴᑳᑎᓯᐙᒡ, ᐃᑭ ᓴ ᐐᓐ ᑳᔮᓇᐌᑖᑯᓯᐙᒡ, ᐅᑮᐃᓈᐞ᙮

2:18b.MAR.002.018 ᐃᐃ ᑕᔥ ᐊᐲ ᒞᓐ ᓰᑲᐊᑖᑫᐎᓂᓂ ᐅᑭᑭᓄᐊᒪᐙᑲᓇᐞ ᑲᔦ ᐃᑭ ᐯᕒᐊᓰᐎᓂᓂᐗᒃ ᑳᐐᓐ ᑮᐅᒋ ᐐᓯᓂᓰᐗᒃ ᐁᐃᔑᑣᐙᒡ ᒣᒀ᙮ ᐅᑮᐱ ᑲᑴᒋᒥᑰᐞ ᐃᑕᔥ ᒋᓴᔅ ᐊᐎᔭᐞ: ᐃᓂ ᒞᓐ ᐅᑭᑭᓄᐊᒪᐙᑲᓇᐞ ᑲᔦ ᐃᑭ ᐯᕒᐊᓰᐎᓂᓂᐗᒃ ᑲᑭᓇ ᑳᐐᓐ ᐅᒋ ᐐᓯᓂᓰᐗᒃ ᐁᐃᔑᑣᐙᒡ᙮ ᐋᓃᔛᓐ ᑮᓐ ᐌᒋ ᑑᑕᓯᒀ ᑭᑭᑭᓄᐊᒪᐙᑲᓇᒃ? ᐅᑮᐃᑰᐞ᙮

2:19b.MAR.002.019 ᒋᓴᔅ ᐃᑕᔥ ᐅᑮᐃᔑ ᓇᑴᑕᐙᐞ: ᐃᑭ ᑳᐐᑾᒥᑖ ᐁᑭᒋᐐᑎᑫᑎᕽ, ᑕ ᒪᑕᐐᐃᑎᓱᐗᒃ ᐃᓇ ᒣᒀ ᐁᐐᒌᐎᑯᐙᒡ ᐃᓂ ᑳᐐᑭᑑᓂᒡ ᐃᓂᓂᐗᓐ? ᑳᐐᓐ ᑲᓇᑫ! ᒥᓂᒃ ᓴ ᑯ ᑫᐐᒌᐎᑯᐙᒡ ᑳᐐᓐ ᑫᒋᓈᒡ ᑕᐃᔑᒋᑫᓰᐗᒃ᙮

2:20b.MAR.002.020 ᐃᑯᑎᕽ ᐃᑕᔥ ᑕᒫᒌᓈ ᐊᐌ ᑳᐐᑭᑑᒡ ᐃᓂᓂ᙮ ᒦᓴ ᐊᐲ ᒋᒪᑕᐐᐃᑎᓱᐙᒡ, ᐅᑮᐃᓈᐞ᙮

2:21b.MAR.002.021 ᒦᓇᐙ ᑮᐊᓂ ᐃᑭᑐ: ᑳᐐᓐ ᐊᐎᔭ ᐅᑕᑯᑕᐊᓰᓐ ᐸᑾᐃᑲᓐ ᐁᐅᔥᑭ ᐃᔒᑭᓄᐗᕽ ᑫᑌᑭᑭᔥᑭᑲᓂᕽ, ᑮᐃᑭᑐ᙮ ᑮᔥᐱᓐ ᐅᐅ ᐃᔑᒋᑫᕽ, ᐃᐃ ᐅᔥᑭᐸᑾᐃᑲᓐ ᑕᓈᓂᑭᔥᑭᑫᒪᑲᓐ ᐃᐃᒫ ᑫᑌᐃᔒᑭᓄᕽ᙮ ᒦᑕᔥ ᐃᐃ ᓇᐗᒡ ᒋᐲᑯᔥᑳᒃ, ᑮᐃᑭᑐ᙮

2:22b.MAR.002.022 ᑳᐐᓐ ᑲᔦ ᐊᐎᔭ ᐅᐲᓇᐊᓰᓐ ᐅᔥᑭᔔᒥᓈᐳ ᐃᐃᒫ ᑫᑌ ᐸᔥᑴᑭᓄᐊᑑᐹᓂᕽ᙮ ᑮᔥᐱᓐ ᐅᐅ ᐃᔑᒋᑫᑭᐸᓐ, ᐹᓂᒫ ᐊᓂ ᒪᔥᑲᐙᓂᒃ ᐃᐃ ᔔᒥᓈᐳ, ᑕᑖᑐᔥᑭᑫᒪᑲᓐ ᐃᓂ ᐸᔥᑴᑭᓄ ᐊᑑᐹᓇᓐ᙮ ᒦᑕᔥ ᐃᐃ ᒋᓂᔑᐗᓈᑕᑭᓐ ᐃᐃ ᔔᒥᓈᐳ ᑲᔦ ᐃᓂ ᐸᔥᑴᑭᓄᐊᑑᐹᓇᓐ᙮ ᐅᔥᑭᐸᔥᑴᑭᓄᐊᑑᐹᓂᕽ ᐁᑕ ᑕᐃᔑᐲᓇᐃᑳᑌ ᐃᐌ ᐅᔥᑭᔔᒥᓈᐳ, ᑮᐃᑭᑐ᙮

2:23b.MAR.002.023 ᐋᐱᑎᕽ ᐃᑕᔥ ᐁᑮᐊᓉᐲᐎ ᑮᔑᑲᓂᓂᒃ, ᑮᐊᓂ ᐃᔖ ᒋᓴᔅ ᐃᐃᒫ ᐸᑴᔑᑲᓂᑭᑎᑫᐎᓂᕽ᙮ ᒦᑕᔥ ᐁᐊᓂ ᐐᒌᐎᑯᒡ ᐅᑭᑭᓄᐊᒪᐙᑲᓇᐞ, ᑳᐃᔑ ᒫᒌᐅᒌᔑᐱᑑᓂᒡ ᐸᑴᔑᑲᓂᒪᔥᑯᓯᐗᓐ ᐁᑮᐅᒋ ᐐᓯᓂᐙᒡ᙮

2:24b.MAR.002.024 ᐃᐃ ᑕᔥ ᐯᕒᐊᓰᐎᓂᓂᐗᐞ ᐅᑮᐃᑰᐞ: ᐃᓇᔥᑫ ᓴ, ᐋᓃᓐ ᐌᒋ ᐃᔑᒋᑫᐙᒡ ᐅᑯ ᑭᑭᑭᓄᐊᒪᐙᑲᓇᒃ ᐁᑳ ᒋᑮ ᐃᔑᒋᑫᓯᒀᐸᓐ ᐁᐃᓇᑌᓂᒃ ᐊᓉᐲᐎ ᑮᔑᑲᓂᓂᒃ? ᐅᑮᐃᑰᐞ᙮

2:25b.MAR.002.025 ᐅᐅ ᑕᔥ ᐅᑮᐃᓈᐞ ᒋᓴᔅ: ᑳᐐᓐ ᐃᓇ ᐐᑳ ᑭᑮᐊᓇᒥᑑᓰᒻ ᐃᐃᐌ ᑳᑮᐃᔑᒋᑫᑯᐸᓀᓐ ᐊᐊᐌ ᑌᐱᑦ ᐊᐲ ᑮᒪᓀᓯᒡ, ᐁᑮ ᑕᑯᒪᑕᐐᒡ ᑲᔦ ᑕᔥ ᐃᐃᐌᓂᐗᐞ ᑳᑮᐐᒌᐎᑯᒡ? ᑭᑮᐊᓇᒥᑑᒻ ᑫᒋᓈᒡ,

2:26b.MAR.002.026 ᐁᑮ ᐲᑎᑫᒡ ᐃᐃᒫ ᐸᒀᓀᑲᒥᑯᕽ ᑭᔐᒪᓂᑑᓐ ᑳᔑ ᐊᓇᒥᐁᑕᐎᒥᓐᒡ, ᐃᐃ ᐊᐲ ᐁᔮᓂᑯᐸᓀᓐ ᐃᓂ ᑳᑮᓃᑳᓀᑖᑯᓯᓂᒡ ᑭᒋᐊᓇᒥᐁᐎᑭᒫᓐ ᐊᐹᔭᑕᕒ ᐁᑮᐃᔑᓂᑳᓱᓂᒡ᙮ ᐃᐃᒫ ᑕᔥ ᑮᐊᓵᐗᐞ ᐸᑴᔑᑲᓂᑳᓇᐞ ᐁᓈᓴᒦᒡ ᐊᐊ ᑭᔐᒪᓂᑑ᙮ ᑳᐐᓐ ᑮᐃᓀᑖᑯᓯᓰ ᐊᐎᔭ ᒋᐊᒸᐸᓐ ᐅᐅ ᐸᑴᔑᑲᓂᑳᓇᐞ, ᒦ ᐁᑕ ᐊᓇᒥᐁᐎᑭᒫᒃ ᑮᐸᑭᑎᓈᐗᒃ ᒋᐊᒸᐙᒡ᙮ ᑌᐱᑦ ᐃᑕᔥ ᐅᑮᐊᒸᐞ ᐃᓂ ᐸᑴᔑᑲᓂᑳᓇᐞ ᑲᔦ ᐃᐃᐌᓂᐗᐞ ᑳᐐᒌᐙᒡ ᐅᑮ ᑕᑯᒫᑕᐆᓈᐞ ᒋᐊᒸᓂᒡ, ᑮᐃᑭᑐ᙮

2:27b.MAR.002.027 ᒦᑕᔥ ᐅᑮᐃᓈᐞ: ᐃᓇᔥᑫ ᑭᔐᒪᓂᑑ ᐅᑮᐃᓍᑖᓐ ᒋᐊᓉᐲᐎ ᑮᔑᑲᓂᓂᒃ ᒋᐐᒋᐃᑯᐙᒡ ᐃᑭ ᐯᒫᑎᓯᐙᒡ᙮ ᑳᐐᓐ ᐅᔕ ᐐᓐ ᐁᑕ ᑮᐃᓇᓵᓰᐗᒃ ᐃᑭ ᐯᒫᑎᓯᐙᒡ ᒋᒥᒋ ᐊᓉᐲᐎ ᑮᔑᑲᓄᑫᐙᒡ᙮

2:28b.MAR.002.028 ᓃᓐ ᐃᓂ ᐃᓂᓂ ᐅᑯᓯᓴᓐ᙮ ᓂᑎᔑᐅᑭᒫᑲᑕᐙᒃ ᐃᑭ ᐯᒫᑎᓯᐙᒡ, ᐃᐴᔥᑫ ᐁᓇᒀ ᐁᐊᓉᐲᐎ ᑮᔑᑲᓂᓂᒃ ᑫᐃᔑᒋᑫᐙᒡ, ᑮᐃᑭᑐ ᒋᓴᔅ᙮

3

3:1b.MAR.003.001 ᒦᓇᐙ ᑕᔥ ᑮᐊᓂ ᐲᑎᑫ ᒋᓴᔅ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ᙮ ᑮᐊᔮ ᑕᔥ ᐃᐃᒫ ᐯᔑᒃ ᐃᓂᓂ ᐁᔒᑯᔥᑳᓂᒃ ᐅᓂᓐᒡ᙮

3:2b.MAR.003.002 ᐋᓂᑕ ᑕᔥ ᐃᐃᒫ ᑮᐊᔮᐗᒃ ᑳᐐ ᑲᑴ ᒪᒥᔑᒫᐙᒡ ᐃᓂ ᒋᓴᓲᓐ᙮ ᐅᑮ ᑲᓇᐙᐸᒫᐙᓐ, ᑕᑲ ᒋᒥᓄᔭᔮᐋᓂᑴᓐ ᒣᒀ ᐁᐊᓉᐲᐎ ᑮᔑᑲᓂᓂᒃ᙮

3:3b.MAR.003.003 ᒋᓴᔅ ᐃᑕᔥ ᐅᑮ ᑲᓅᓈᓐ ᐃᓂᓂᐗᓐ ᑳᔒᑯᔥᑳᓂᒃ ᐅᓂᒌᓂ: ᐲᔖᓐ ᐅᐅᒫ ᓃᑳᓇᔭᐄᕽ, ᐅᑮᐃᓈᓐ᙮

3:4b.MAR.003.004 ᒦᑕᔥ ᑳᐃᔑ ᑲᑴᒋᒫᒡ ᐃᐃ ᐯᒫᑎᓯᓂᒡ: ᑮᐃᓈᑯᓂᑳᑌ ᓇ ᐁᐊᓉᐲᐎ ᑮᔑᑲᒃ ᒋᒥᓄᒋᑫᕽ, ᑫᒫ ᒋᒫᔑᒋᑫᕽ? ᑮᐃᓈᑯᓂᑫᒻ ᐃᓇ ᒋᐱᒫᒋᐃᐌᕽ ᑫᒫ ᒋᓂᔑᐌᕽ? ᐅᑮᐃᓈᐞ᙮ ᑳᐐᓐ ᐃᑕᔥ ᑮᓇᐐᑖᑎᓰᐗᐞ᙮

3:5b.MAR.003.005 ᒋᓴᔅ ᐃᑕᔥ ᐁᑮᐙᑳᔮᐸᒫᒡ ᐅᑮᓂᔥᑳᐸᒫᐞ, ᐁᑮᐅᒋ ᐗᓯᑖᐌᓂᒫᒡ ᐁᑳ ᐁᑭᑎᒫᑭᓈᑫᓯᓂᒃ᙮ ᒦᑕᔥ ᐅᑮ ᑲᓅᓈᓐ ᐃᓂ ᐃᓂᓂᐗᓐ: ᓃᒥᓂᑫᓂᓐ, ᐅᑎᓈᓐ᙮ ᒦᑕᔥ ᐁᑮᓃᒥᓂᑫᓂᓂᒡ ᑮᒥᓄᔭᔮᓭᓂ ᐃᐌᓂ ᐅᓂᒌᓂ᙮

3:6b.MAR.003.006 ᒦᐃ ᑳᓂ ᐃᔑ ᓵᑲᐊᒧᐙᒡ ᐃᑭ ᐯᕒᐊᓰᐎᓂᓂᐗᒃ, ᐌᔩᑉ ᐃᑯ ᑮᒫᐗᒋᐃᑎᐗᒃ ᑕᑯ ᑲᔦ ᐃᑭᐌᓂᐗᒃ ᑳᐐᒌᐙᐙᒡ ᐁᕒᐊᑕᓐ ᑭᒋᐅᑭᒫᓐ᙮ ᐅᑯ ᑲᑭᓇ ᐅᑮ ᑕᔑᒫᐙᓐ ᒋᓴᓲᓐ, ᐋᓃᓐ ᐃᐃ ᑫᐃᔑ ᓂᓵᐙᐸᓐ᙮

3:7b.MAR.003.007 ᒋᓴᔅ ᐃᑕᔥ ᑲᔦ ᐅᑭᑭᓄᐊᒪᐙᑲᓇᐞ ᑮᐊᓂ ᐃᔑ ᒫᒑᐗᐞ ᐃᐃᒫ ᑳᓬᐊᓬᐄᐎ ᓵᑲᐃᑲᓃᕽ ᙮ ᑭᒋᓃᐱᐗᐞ ᐃᑕᔥ ᐃᓂ ᐯᒫᑎᓯᓂᒡ ᐅᑮ ᐱᒥᓂᔕᐅᑰᐞ, ᐃᐃᒫ ᑳᓬᐊᓬᐄᐎ ᐊᑮᕽ ᐁᐅᒌᓂᒡ, ᑲᔦ ᒎᑏᔮᐎ ᐊᑮᕽ,

3:8b.MAR.003.008 ᒉᕒᐆᓴᓬᐊᒦᐎ ᐆᑌᓈᕽ, ᐃᒍᒦᔮᐎ ᐊᑮᕽ ᔑᑾ ᐌᑎ ᐊᐗᓯᓇᑫ ᒞᕒᑕᓇᐎ ᓰᐲᕽ ᑮᐱ ᐅᒌᐗᒃ ᐋᓂᑕ, ᔑᑾ ᒦᑖᒃ ᐃᓂ ᐆᑌᓈᕽ ᑕᔭᕒ, ᓵᐃᑕᓐ ᐁᐃᔑᓂᑳᑌᓂᑭᓐ᙮ ᑮᑭᒋᐹᑏᓄᐗᒃ ᐃᑭ ᑳᑮᓅᑕᒧᐙᒡ ᐃᐃ ᑳᓂ ᐃᔑᒋᑫᓂᒡ ᒋᓴᓲᓐ, ᐁᑮᐱ ᐅᒋ ᐅᑎᓵᐙᒡ᙮

3:9b.MAR.003.009 ᐅᑮ ᑲᓅᓈᐞ ᐃᑕᔥ ᒋᓴᔅ ᐃᐃ ᐅᑭᑭᓄᐊᒪᐙᑲᓇᐞ ᒋᐌᐯᒥᓯᑕᒫᑯᒡ ᒌᒫᓂᓂ, ᐁᑳ ᐅᓵᒻ ᒋᓰᒋᔥᑳᑯᓯᒃ, ᐁᑮᐊᐲᒋ ᐹᑏᓄᓂᒡ᙮

3:10b.MAR.003.010 ᐋᓃᔥ ᐋᔕ ᐅᑮ ᐱᒫᒋᐋᐞ ᓃᐱᐗᐞ ᐊᐎᔭᐞ᙮ ᒦᑕᔥ ᐃᐃ ᑳᑮᐱ ᐅᒋ ᓰᒋᔥᑳᑯᒡ ᑲᑭᓇ ᑳᐋᑯᓯᓂᒡ ᐁᑮᐱ ᑲᑴᓵᒥᓂᑯᒡ᙮

3:11b.MAR.003.011 ᔑᑾ ᐊᐲ ᐱᑯ ᐁᐙᐸᒥᑯᒡ ᐃᓂ ᒪᒋᐊᒑᑾᐞ ᑳᑭᑭᔥᑳᑯᓂᒡ ᐊᐎᔭᐞ, ᑮᐃᔑ ᑲᐎᐸᓂᐅᐗᐞ ᐃᐃᒫ ᒋᓴᔅ ᐁᓈᓴᒥᑳᐸᐎᒡ, ᐁᑭᔒᐌᓂᒡ: ᑮᓐ ᑭᔐᒪᓂᑑ ᐅᑯᓯᓴᓐ! ᐁᐃᑯᒡ᙮

3:12b.MAR.003.012 ᒋᓴᔅ ᐃᑕᔥ ᑭᒋᐌᐌᓂ ᐅᑮᐅᒋᐋᐞ: ᑫᑯ ᐃᑭᑐᑫᒃ ᑮᓐ ᑭᔐᒪᓂᑑ ᐅᑯᓯᓴᓐ, ᐅᑮᐃᓈᐞ᙮

3:13b.MAR.003.013 ᐹᓂᒫ ᑕᔥ ᑮᐊᓂ ᐋᒪᒋᐌ ᒋᓴᔅ ᐃᐃᒫ ᐁᐱᑾᑎᓈᓂᒃ᙮ ᔑᑾ ᐅᑮᐊᑐᒫᐞ ᐃᓂᐌᓂᐗᐞ ᐐᓐ ᐃᑯ ᑳᑮᐅᓈᐸᒫᒡ᙮ ᔑᑾ ᑕᔥ ᐅᑮ ᐱᓈᓯᑳᑰᐞ ᐅᑑᓈᐸᒫᑲᓇᐞ᙮

3:14b.MAR.003.014 ᐅᑮᐅᓇᑭᒫᐞ ᐃᑕᔥ ᒥᑖᔑᓃᔑᓐ ᐃᓂᓂᐗᐞ, ᐁᐃᓈᒡ: ᑮᓇᐙ ᓂᑎᔑᓂᔕᐙᑲᓇᒃ᙮ ᑭᑮᐅᓇᑭᒥᓂᓂᒻ ᒋᐱᒥ ᐐᒋᐊᔮᒥᔦᒃ᙮ ᑲᔦ ᑕᔥ ᑭᑲ ᐃᔑᓂᔕᐅᓂᓂᒻ ᒋᐸᐹᑲᑮᑴᔦᒃ,

3:15b.MAR.003.015 ᑲᔦ ᑭᑲ ᒦᓂᑰᒻ ᑲᔥᑭᐁᐎᓯᐎᓐ ᒋᓵᑭᒋᓂᔕᐊᒪᐌᒀ ᒪᒋᐊᒑᑾᐞ ᐊᐎᔭᒃ, ᐅᑮᐃᓈᐞ᙮

3:16b.MAR.003.016 ᐅᑮᐅᓈᑯᓈᐞ ᐅᐅ ᒥᑖᔑᓃᔑᓐ᙮ ᐯᔑᒃ ᐃᓂ ᑳᑮᐅᓈᑯᓈᒡ ᓵᐃᒪᓐ ᑮᐃᔑᓂᑳᓱᐗᓐ᙮ ᐲᑕᕒ ᑲᔦ ᐅᑮᐃᔑ ᓇᑭᓂᑳᓈᓐ᙮

3:17b.MAR.003.017 ᔑᑾ ᑮᐊᔮᐗᒃ ᒌᒥᔅ, ᒞᓐ, ᑳᐐᒋᑭᐌᔨᑎᐙᒡ᙮ ᒦᐗᐞ ᐅᑯᓯᓴᐞ ᐊᐌ ᓭᐸᑏ ᙮ ᒦ ᓴ ᐃ ᑳᐃᔑ ᓇᑭᓂᑳᓈᒡ ᒋᓴᔅ, ᐳᐗᓀᕒᒌᓴᒃ, ᐅᐗᑫᓂᔥᑳᑎᓰᒃ ᐅᐅ ᐁᒋᑳᑌᒃ ᐃᔑᓂᑳᓱᐎᓐ᙮

3:18b.MAR.003.018 ᔑᑾ ᐅᑯ ᑮᐊᔮᐗᒃ, ᐁᑕᕒᐆ, ᐱᓬᐊᑉ, ᐹᕒᑖᓬᐊᒥᔪ, ᒫᑎᔪ, ᑣᒪᔅ, ᒌᒥᔅ ᑳᐅᑯᓯᓯᒥᑯᒡ ᐋᓬᐱᔭᓴᓐ, ᑖᑎᔭᔅ, ᓵᐃᒪᓐ ᑲᔦ, ᒦ ᐊᐌ ᐯᔑᒃ ᑳᐐ ᑲᑴ ᐋᒋᓭᑑᒡ ᐅᑭᒫᐎᐎᓐ ᑳᑎᓄᐎᒡ᙮

3:19b.MAR.003.019 ᔑᑾ ᒎᑕᔅ ᐃᔅᑫᕒᐃᔭᑦ, ᒦ ᐊᐌ ᐹᓂᒫ ᑫᐃᔑᒋᑫᐋᒡ ᒋᑕᑯᓂᒥᓐᒡ ᒋᓴᓲᓐ᙮

3:20b.MAR.003.020 ᒦᑕᔥ ᑳᐃᔥᒀ ᐅᓈᑯᓈᒡ ᐅᐅ ᐃᓂᓂᐗᐞ, ᑮᐊᓂ ᑮᐌ ᐊᐌ ᒋᓴᔅ ᑳᔑᑖᒡ᙮ ᒦᑕᔥ ᒦᓇᐙ ᑮᐱ ᒫᐗᒋ ᐃᔖᐗᐞ ᐯᒫᑎᓯᓂᒡ ᐃᐃᒫ ᐁᔑ ᐊᔮᐙᒡ ᒋᓴᔅ, ᐅᑭᑭᓄᐊᒪᐙᑲᓇᐞ ᑲᔦ᙮ ᐲᓂᔥ ᑳᐐᓐ ᑮᐃᔑᓭᓯᓂᓂ ᐃᐴᔥᑫ ᒋᐐᓯᓂᐙᒡ᙮

3:21b.MAR.003.021 ᐃᐃ ᑕᔥ ᐅᑎᓇᐌᒫᑲᓇᐞ ᒋᓴᔅ, ᐊᐲ ᑳᓅᑕᒥᓂᒡ, ᐅᑮ ᑲᑴᑌᐱᐱᓂᑰᐞ, ᑮᐗᔥᑴ ᐄᑐᒃ, ᐁᑮᐃᑯᒡ᙮

3:22b.MAR.003.022 ᐌᑎ ᑕᔥ ᑮᐱ ᐅᒌᐗᒃ ᒉᕒᐆᓴᓬᐊᒥᕽ ᐋᓂᑕ ᐃᑭ ᑳᑭᑭᓄᐊᒫᑫᐙᒡ ᐃᐃ ᒎᐗᐞ ᐅᑑᓇᔓᐌᐎᓂᓂ᙮ ᐅᐅ ᑕᔥ ᑮᐃᑭᑐᐗᒃ ᐁᑕᔑᒫᐙᒡ ᒋᓴᓲᓐ: ᐅᑭᑭᔥᑲᐙᓐ ᐃᓂ ᒪᒋᐊᔭᐋᓐ ᐱᐁᓬᓯᐳᓬᐆᓐ, ᑮᐃᑭᑐᐗᒃ᙮ ᔑᑾ ᑮᐃᑭᑐᐗᒃ ᐋᓂᑕ: ᒦᐗᓂᓂ ᐅᑑᑭᒫᒥᓂ ᐃᓂ ᒪᒋᐊᒑᑾᐞ ᑳᐐᒋᐃᑯᒡ ᒋᓴᔅ ᒋᓵᑭᒋᓂᔕᐊᒪᐙᒡ ᒪᒋᐊᒑᑾᐞ ᐊᐎᔭᐞ, ᑮᐃᑭᑐᐗᒃ᙮

3:23b.MAR.003.023 ᒋᓴᔅ ᐃᑕᔥ ᐅᑮᐊᑐᒫᐞ ᐃᐃ ᐯᒫᑎᓯᓂᒡ᙮ ᐅᑮ ᑲᑲᓅᓈᐞ ᐁᑮᐋᐌᒋᑫᒡ: ᐊᐊᐌ ᒪᒋᐊᔭᐋ ᓭᑕᓐ ᑳᐐᓐ ᐅᑖ ᑲᔥᑭᑑᓰᓐ ᒋᓵᑭᒋᓂᔕᐊᒫᓱᐸᓐ ᐃᐃ ᐐᒋᒪᒋᐊᒑᑾᐞ, ᒦ ᑳᐐᓐ ᐃᓇᔥ ᐃᐃ?

3:24b.MAR.003.024 ᔑᑾ ᑮᔥᐱᓐ ᓀᐱᒋᒦᑳᑎᕽ ᐃᐃᒫ ᐅᑭᒫᐎᐎᓂᕽ, ᑳᐐᓐ ᑫᔮᐱ ᑖᐅᑭᒫᑲᑖᑎᓰᒻ᙮

3:25b.MAR.003.025 ᔑᑾ ᑕᔥ ᐃᑭᐌᓂᐗᒃ ᑳᐯᔑᑴᐙᓇᑭᑖᐙᒡ, ᑮᔥᐱᓐ ᓀᐱᒋᒦᑳᑎᐙᒡ ᑳᐐᓐ ᑫᔮᐱ ᒋᐐᒋᑖᑎᐙᒡ, ᒋᒦᐌᐃᑎᐙᒡ ᐃᑕᔥ᙮

3:26b.MAR.003.026 ᑮᔥᐱᓐ ᑕᔥ ᑲᔦ ᐊᐌ ᓭᑕᓐ ᒦᑳᓈᐸᓐ ᐅᑑᔥᑭᓃᑮᒪᐞ ᑲᔦ ᐯᐸᑳᓀᓂᑎᐙᒡ, ᑳᐐᓐ ᑫᔮᐱ ᑕᒪᔥᑲᐎᓰᓰ, ᒦᐃ ᒋᐴᓂᔭᔮᐃᑎᓱᒡ᙮

3:27b.MAR.003.027 ᔑᑾ ᑳᐐᓐ ᐊᐎᔭ ᐅᑲᔥᑭᑑᓰᓐ ᒋᐲᑎᑫᒡ ᐅᑖᐎᓂᓃᕽ ᐃᓂ ᑳᒪᔥᑲᐎᓰᓂᒡ ᒋᒪᑲᒫᒡ ᐅᑕᔭᐄᒥᓂ, ᐹᓂᒫ ᐁᑕ ᐊᑲᐌ ᒪᒫᒋᑾᐱᓈᒡ ᐃᓂ ᑳᒪᔥᑲᐎᓰᓂᒡ, ᒦᑕᔥ ᐸᔦᔥ ᒋᓵᑭᓯᑑᐸᓐ ᐅᑕᔭᐄᒥᓂ᙮

3:28b.MAR.003.028 ᑾᔭᒃ ᑭᐐᑕᒪᐎᓂᓂᒻ: ᑲᑭᓇ ᒪᒋᑑᑕᒧᐎᓇᓐ ᑖᑮ ᐴᓀᑕᒪᐙᐗᒃ ᐯᒫᑎᓯᐙᒡ, ᑲᔦ ᒥᓂᒃ ᐃᑯ ᑫᑮ ᒪᒋ ᐃᓈᐙᑴᓐ ᐃᓂ ᑭᔐᒪᓂᑑᓐ ᐁᐹᐱᓄᑕᐙᐙᒡ ᑕᑮ ᐴᓀᑕᒪᐙᐗᒃ᙮

3:29b.MAR.003.029 ᐊᐊᐌ ᑕᔥ ᐐᓐ ᑫᒪᒋ ᐃᓈᑴᓐ ᐃᓂ ᑭᔐᒪᓂᑑᓐ ᐅᑕᒑᑯᓂ, ᑳᐐᓐ ᐐᑳ ᑕᐴᓀᑕᒪᐙᓰ᙮ ᐱᔑᔑᒃ ᐃᑕᔥ ᐃᑯ ᑕᑭᑭᓯ ᐅᒪᒋᑑᑕᒧᐎᓐ, ᐅᑮᐃᓈᐞ ᐊᐌ ᒋᓴᔅ᙮

3:30b.MAR.003.030 ᐋᓃᔥ ᐅᑮᐃᓈᐙᓐ ᐃᓂ ᒋᓴᓲᓐ: ᐅᑭᑭᔥᑲᐙᓐ ᐃᓂ ᒪᒋᐊᒑᑾᓐ᙮

3:31b.MAR.003.031 ᑮᐱᑕᑯᔑᓅᐞ ᐃᑕᔥ ᐃᐃ ᐐᒋᑭᐌᔭᐞ ᒋᓴᔅ ᑲᔦ ᐃᓂ ᐅᒫᒫᓐ᙮ ᐊᑾᒌᕽ ᐃᑕᔥ ᑮᓃᐸᐎᐗᐞ ᐁᑮᐃᔑᓂᔕᐅᐌᓂᒡ ᐁᐱᐊᑐᒥᑯᒡ᙮

3:32b.MAR.003.032 ᒋᓴᔅ ᐃᑕᔥ ᒣᒀ ᐅᑮᐙᐐᑕᐱᒥᑰᐞ ᐃᓂᐌᓂᐗᐞ ᑳᒫᒪᐐᓄᓂᒡ᙮ ᒦᑕᔥ ᑳᐃᓂᓐᒡ: ᓇ! ᑭᒫᒫ ᑲᔦ ᑮᒋᑭᐌᔭᒃ ᑭᐱ ᐊᑕᐌᓂᒥᑰᒃ ᐃᐃᒫ ᐊᑾᒌᕽ, ᑮᐃᓈ᙮

3:33b.MAR.003.033 ᐅᐅ ᑕᔥ ᑮᐃᔑ ᓇᑴᑕᒻ: ᐊᐌᓀᓐ ᐊᐊ ᓂᒫᒫ? ᐊᐌᓀᓇᒃ ᐃᑭ ᓃᒋᑭᐌᔭᒃ? ᑮᐃᑭᑐ᙮

3:34b.MAR.003.034 ᐅᑮᐙᑳᔮᐸᒫᐞ ᐃᓂᐌᓂᐗᐞ ᑳᐐᑕᐱᒥᑯᒡ ᐁᑮᐃᑭᑐᒡ: ᒦ ᓴ ᐐᓇᐙ ᓂᒫᒫ ᑲᔦ ᐅᑯ ᓃᒋᑭᐌᔭᒃ᙮

3:35b.MAR.003.035 ᐊᐌᓀᓇᒃ ᐃᑯ ᑫᐃᔑᒋᑫᐙᒡ ᐃᐃ ᑳᐃᓀᑕᕽ ᐊᐊ ᑭᔐᒪᓂᑑ, ᒦᐗᑯᑯ ᑫᐃᓇᒀ, ᓃᒋᑭᐌ, ᑲᔦ ᓂᑕᐌᒫ, ᑲᔦ ᓂᒫᒫ, ᑮᐃᑭᑐ᙮

4

4:1b.MAR.004.001 ᒦᓇᐙ ᑕᔥ ᑮᒫᒌᑭᑭᓄᐊᒫᑫ ᐊᐊ ᒋᓴᔅ ᐃᐃᒫ ᒌᑭᐲᒃ ᑳᓬᐊᓬᐄᐎ ᓵᑲᐃᑲᓃᕽ ᙮ ᒦᑕᔥ ᑳᐃᔑ ᒫᐗᒋᐃᑎᓂᒡ ᑫᒋᐹᑏᓄᓂᒡ ᐃᐃᒫ ᐁᐊᔮᒡ, ᐁᑮᐅᒋ ᐴᓯᒡ ᒌᒫᓂᕽ᙮ ᒦ ᑳᐃᔑ ᐅᓇᐱᒡ ᐁᑮᐊᑯᒧᒡ ᒌᑲᑳᒻ᙮ ᐃᐃᒫ ᑕᔥ ᑲᑭᓇ ᑮᐊᔮᐗᐞ ᐃᐃ ᐱᔮᑏᓄᓂᒡ ᒥᑕᑲᒥᒃ ᐁᑯᐊᑮᐗᓂᓂᒃ᙮

4:2b.MAR.004.002 ᓃᐱᐗᐞ ᐃᑕᔥ ᑫᑰᓇᓐ ᐅᑮᐅᒋ ᐐᑕᒪᐙᐞ ᐁᐋᐌᒋᑫᒡ᙮ ᒦᑕᔥ ᐁᑮ ᑭᑭᓄᐊᒫᑫᒡ ᐅᑮᐃᓈᐞ:

4:3b.MAR.004.003 ᐃᓇᔥᑫ ᐱᓯᑕᒧᒃ! ᐋᐱᑎᕽ ᑮᐃᔖ ᐯᔑᒃ ᑭᑎᑫᐎᓂᓂ ᐁᑮᐊᐎ ᓴᓰᓶᐌᐱᓇᕽ ᑭᑎᑳᓀᓴᓐ᙮

4:4b.MAR.004.004 ᐁᓴᓰᓶᐌᐱᓇᕽ ᑭᑎᑳᓀᓴᓐ, ᑮᐸᑭᓯᓅᓐ ᐋᓂᓐᑦ ᐃᐃᒫ ᑳᐃᔑ ᒪᔥᑲᐗᒧᒃ ᒦᑲᓀᔅ᙮ ᐱᓀᔒᔕᒃ ᐃᑕᔥ ᐃᐃᒫ ᑮᐱ ᐴᓂᓭᐗᒃ ᐁᑮᐊᓂᑭᑖᐙᒡ᙮

4:5b.MAR.004.005 ᔑᑾ ᐋᓂᓐᑦ ᑲᔦ ᑮᐃᔑ ᐸᑭᓯᓅᓐ ᐃᓂ ᑭᑎᑳᓀᓴᓐ ᐃᐃᒫ ᔔᔥᒀᐱᑳᕽ ᐁᐱ ᐸᑲᑲᒥᑳᓂᒃ᙮ ᔐᒫᒃ ᐃᑕᔥ ᑮᐱᓵᑲᑮᐗᓐ᙮ ᐋᓃᔥ ᑳᐐᓐ ᑮᑭᐸᑲᑲᒥᑳᓯᓅᓐ᙮

4:6b.MAR.004.006 ᐊᐲ ᑕᔥ ᐁᓂ ᐃᔥᐸᑰᒋᕽ ᑮᓯᔅ, ᑮᐊᓂ ᐹᑌᐗᓐ, ᑮᐊᓂ ᐸᐲᒀᑾᑑᔥᑳᐗᓐ᙮ ᐸᑮ ᐋᓃᔥ ᐁᑕ ᑮᐅᒌᐱᑯᐗᓅᓐ᙮

4:7b.MAR.004.007 ᔑᑾ ᐋᓂᑕ ᑲᔦ ᑮᐃᔑ ᐸᑭᓯᓅᓐ ᐃᓂ ᑭᑎᑳᓀᓴᓐ ᐃᐃᒫ ᐅᑳᐎᒥᓇᑭᔒᒃ ᑳᔑ ᓂᑖᐎᑭᐙᐸᓐ᙮ ᐊᐲ ᑕᔥ ᒦᓇᐙ ᐁᔑ ᓵᑲᑮᐙᒡ ᐅᑯ ᐅᑳᐎᒥᓇᑭᔒᒃ, ᐅᑮᐗᓈᑑᓈᐙᓐ ᐃᓂ ᑳᑮ ᑭᑎᑳᑌᓂᑭᓐ᙮ ᒦᑕᔥ ᑳᐐᓐ ᑮᑮᔑ ᓂᑖᐎᑭᓯᓅᓇᓐ, ᑳᐐᓐ ᑲᔦ ᒦᓇᐙ ᑭᑎᑳᓀᓴᓐ ᑮᐅᒋ ᓂᑖᐎᑭᓯᓅᓇᓐ ᐃᐃᒫ᙮

4:8b.MAR.004.008 ᔑᑾ ᐋᓂᓐᑦ ᑲᔦ ᑮᐸᑭᓯᓅᓐ ᐃᐃᒫ ᐁᔑ ᐅᓂᔑᔑᕽ ᐊᑭ᙮ ᒦᑕᔥ ᑮᓵᑲᑮᐗᓐ, ᐲᓂᔥ ᑲᔦ ᑮᐊᓂ ᑮᔑᑭᓅᓐ; ᑲᔦ ᑫᔮᐱ ᑮᐅᒋ ᓂᑖᐎᑭᓅᓐ ᑭᑎᑳᓀᓴᓐ, ᐲᓂᔥ ᐋᓂᓐᑦ ᓂᓯᒥᑕᓇ ᑕᓯᓐ ᑮᐅᒋ ᓂᑖᐎᑭᓅᓐ, ᑲᔦ ᐋᓂᓐᑦ ᓂᑯᑣᓯᒥᑕᓇ, ᑲᔦ ᐋᓂᓐᑦ ᓂᑯᑣᒃ ᑕᓯᓐ ᑮᐅᒋ ᓂᑖᐎᑭᓅᓐ ᐁᑕᓯᕽ, ᑮᐃᑭᑐ᙮

4:9b.MAR.004.009 ᔑᑾ ᑕᔥ ᐅᑮᐃᓈᐞ: ᑕᑲ ᐱᓯᑕᒧᒃ, ᒥᓂᒃ ᐌᑕᐗᑳᔦᒃ, ᑮᐃᑭᑐ᙮

4:10b.MAR.004.010 ᐊᐲ ᑕᔥ ᓂᔑᑫ ᑳᐊᔮᐙᒡ ᑳᑮᐐᒌᐎᑯᒡ, ᒫᒪᐤ ᐃᐃ ᒥᑖᔑᓃᔑᓐ ᐅᑭᑭᓄᐊᒪᐙᑲᓇᐞ, ᐅᑮ ᑲᑴᒋᒥᑰᐞ ᐋᓃᓐ ᑫᐃᔑ ᓂᓯᑐᑖᑾᓂᓂᑭᐸᓃᓐ ᐃᓂ ᐋᐌᒋᑲᓇᓐ᙮

4:11b.MAR.004.011 ᐅᐅ ᑕᔥ ᐅᑮᐃᓈᐞ: ᑮᓇᐙ ᑭᑭᑫᑕᒧᐃᑯᐙ ᑭᔐᒪᓂᑑ ᑳᓴᓇᑲᓂᓂᑭᓐ ᑫᑰᓇᓐ ᑳᑮ ᑭᑫᑖᑾᓯᓂᓂᑭᐸᓃᓐ, ᒦᐃᐌᓂ ᑭᔐᒪᓂᑑ ᐅᑎᐯᒋᑫᐎᓐ ᐁᑕᔑᑌᓂᒃ᙮ ᐃᑭᐌᓂᐗᒃ ᐃᑕᔥ ᐁᑳ ᑳᐐᒌᐎᓯᓄᐗᒀ, ᑲᑭᓇ ᑫᑰᓐ ᐋᐌᒋᑲᓂᕽ ᐃᔑᑭᑭᓄᐊᒪᐙᐗᒃ᙮

4:12b.MAR.004.012 ᒦ ᐅᐌ ᑳᐅᒋ ᐃᔑᒋᑫᐃᑣ: ᒥᓴᐙ ᓴ ᑯ ᐋᓇ ᐙᐙᐸᑕᒧᐙᒡ, ᑳᐐᓐ ᐅᑲ ᓂᓯᑖᐌᑕᓰᓈᐙ᙮ ᔑᑾ, ᒥᓴᐙ ᓴ ᑯ ᐋᓇ ᓈᓅᑕᒧᐙᒡ, ᑳᐐᓐ ᑕᓂᓯᑐᑕᓰᐗᒃ᙮ ᑮᔥᐱᓐ ᓂᓯᑐᑕᒧᐙᐸᓐ ᐅᑖ ᐱᑮᐌᓄᑕᐙᐙᓐ ᑭᔐᒪᓂᑑᓐ, ᒦᑕᔥ ᒋᑮ ᐴᓀᑕᒫᑯᐙᒡ, ᑮᐃᑭᑐ᙮

4:13b.MAR.004.013 ᔑᑾ ᑕᔥ ᐅᑮᐃᓈᐞ: ᑳᐐᓐ ᐃᓇ ᑭᓂᓯᑐᑕᓰᒻ? ᐋᓃᓐ ᑕᔥ ᑫᑮᐅᒋ ᓂᓯᑐᑕᒣᑭᐸᓐ ᑲᑭᓇ ᐃᓂ ᐋᐌᒋᑲᓇᓐ ᑮᔥᐱᓐ ᓂᓯᑐᑕᓯᐌᒃ ᐅᐅ ᐯᔑᒃ ᐋᐌᒋᑲᓐ?

4:14b.MAR.004.014 ᐊᐊ ᑭᑎᑫᐎᓂᓂ, ᒦ ᑳᐃᒋᑳᓱᒡ ᐊᐎᔭ ᐁᐸᐹᐐᑕᕽ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮

4:15b.MAR.004.015 ᐃᓇᔥᑫ ᐋᓂᑕ ᐊᐎᔭᒃ ᑖᐱᔥᑰ ᐃᔑ ᐊᔮᐗᒃ ᐃᐃᐌ ᑳᐃᔑ ᒪᔥᑲᐗᒧᒃ ᐃᐃᒫ ᑭᑎᑳᓀᓴᓐ ᐁᐃᔑ ᐸᑭᓯᑭᓐ᙮ ᐅᓅᑖᓈᐙ ᐃᐌ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮ ᐱᒌᓇᒃ ᐃᑕᔥ ᐁᓅᑕᒧᐙᒡ, ᐅᐱ ᐅᑖᐱᓇᒫᑯᐙᓐ ᐃᓂ ᓭᑕᓇᓐ ᒋᐗᓃᑫᐙᒡ ᐃᐃ ᑳᑮᓅᑕᒧᐙᒡ ᑎᐹᒋᒧᐎᓐ᙮

4:16b.MAR.004.016 ᔑᑾ ᐋᓂᑕ ᐊᐎᔭᒃ ᐃᓀᑖᑯᓯᐗᒃ ᑖᐱᔥᑰ ᑭᑎᑳᓀᓴᓐ ᐁᐸᑭᓯᑭᓐ ᐃᐃᒫ ᐁᔑ ᐱ ᐸᑲᑲᒥᑳᒃ ᐁᔔᔥᒀᐱᑳᒃ᙮ ᑮᓅᑕᒧᐙᒡ ᑎᐹᒋᒧᐎᓐ, ᔐᒫᒃ ᐃᑯ ᐅᑑᑖᐱᓈᓈᐙ ᐁᒨᒋᑫᑕᒧᐙᒡ᙮

4:17b.MAR.004.017 ᒦᑕᔥ ᑖᐱᔥᑰ ᑳᓂᑖᐎᑭᑭᓐ ᐁᐅᒌᐱᑳᐗᓯᓄᑭᓐ, ᑳᐐᓐ ᑭᓉᔥ ᐊᔮᓰᐗᒃ᙮ ᐊᒋᓇ ᐁᑕ ᑌᐺᑕᒨᒃ᙮ ᐹᓂᒫ ᑕᔥ ᐅᑑᒋ ᒥᑯᔥᑳᒋᐃᑯᐙᓐ ᐊᐎᔭᓐ ᑯᒫ ᑲᔦ ᐅᑑᒋ ᑲᒀᑕᑭᐃᑯᐙᓐ ᐁᑮᐅᑖᐱᓇᒧᐙᒡ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮ ᒦᑕᔥ ᐌᔩᑉ ᐃᑯ ᐃᔑ ᐸᑭᒌᐗᒃ᙮

4:18b.MAR.004.018 ᔑᑾ ᐋᓂᓐᑦ ᑖᐱᔥᑰ ᐃᔑ ᐊᔮᐗᒃ ᐁᑮᐃᔑ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᐊᑮᕽ ᐁᔑ ᐅᑳᐎᒥᓇᑭᔒᑳᒃ᙮ ᐅᑖᓇ ᓅᑖᓈᐙ ᑭᔐᒪᓂᑑᓐ ᐅᑎᐹᒋᒧᐎᓂᓂ᙮

4:19b.MAR.004.019 ᐅᑑᓵᒣᑖᓇᐙᓐ ᐃᑕᔥ ᐅᓄ ᑫᑰᓇᓐ ᐅᐅᒫ ᐊᑮᕽ ᑳᔭᔮᓂᑭᓐ, ᑲᔦ ᐅᒥᓉᑖᓈᐙ ᐌᓅᑎᓯᐎᓐ, ᑲᔦ ᐸᑳᓐ ᑫᑰᓇᓐ ᐅᓇᓈᑕᐌᑖᓈᐙᓐ᙮ ᒦ ᓴ ᐅᓄ ᑫᑰᓇᓐ ᑳᐗᓈᐃᑯᐙᒡ ᐁᑳ ᒋᐸᐹᒥᑕᓯᒀ ᑭᔐᒪᓂᑑᓐ ᐅᑎᐹᒋᒧᐎᓂᓂ, ᒦᑕᔥ ᑳᐐᓐ ᑫᑰᓐ ᑕᐅᒌᒪᑲᓯᓅᓐ᙮

4:20b.MAR.004.020 ᐋᓂᓐᑦ ᐃᑕᔥ ᐃᔑᔭᔮᐗᒃ ᑖᐱᔥᑰ ᐁᑮᐃᔑ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᐁᔑ ᒥᓄᑲᒥᑳᒃ᙮ ᒦᐗᒃ ᐅᑯ ᑳᓅᑕᒧᐙᒡ ᐃᐃ ᑭᔐᒪᓂᑑᓐ ᐅᑎᐹᒋᒧᐎᓂᓂ, ᐁᐅᑖᐱᓇᒧᐙᒡ ᑲᔦ᙮ ᒦᑕᔥ ᐁᐊᓂ ᐲᒋᓂᔥᑳᐙᒡ, ᑖᐱᔥᑰ ᑳᓂᑖᐎᑭᑭᓐ ᐁᐃᔑᓈᑯᓯᐙᒡ ᐃᐃᒫ ᑫᔮᐱ ᑳᓂᑖᐎᑭᑭᓐ ᑭᑎᑳᓀᓴᓐ, ᐋᓂᓐᑦ ᓂᓯᒥᑕᓇ 30 ᑕᓯᓐ, ᐋᓂᓐᑦ ᑲᔦ ᓂᑯᑣᓯᒥᑕᓇ 60 ᑕᓯᓐ, ᐋᓂᓐᑦ ᑲᔦ ᓂᑯᑣᒃ 100 ᑕᓯᓐ, ᒦᐃ ᐁᔑᓈᑯᓯᐙᒡ, ᑮᐃᑭᑐ᙮

4:21b.MAR.004.021 ᔑᑾ ᑕᔥ ᑮᐊᓂ ᐃᑭᑐ ᒋᓴᔅ: ᐊᐎᔭ ᐲᑎᑲᑑᒡ ᐙᓴᑯᓀᒋᑲᓐ, ᐅᑲᔭᓂᒥᑯᔑᒫᓐ ᐃᓇ ᐊᑑᐹᓇᑭᑾᓐ ᒋᑳᑑᒡ? ᔒᐹᓂᐯᐎᓈᒃ ᐃᓇ ᐅᑲᔑ ᔐᑯᓈᓐ? ᑳ ᒫᐐᓐ᙮ ᐃᓍᑌ ᐋᓃᔥ ᒋᐊᑰᑌᑭᐸᓐ ᐙᓴᑯᓀᒋᑲᓈᑎᑯᕽ᙮

4:22b.MAR.004.022 ᑲᑭᓇ ᑫᑰᓐ ᑳᑳᒋᑳᑌᒃ, ᒦᐃᐌ ᐱᒌᓇᒃ ᒋᒧᔐᔮᐸᒋᑳᑌᒃ᙮ ᔑᑾ ᑮᔥᐱᓐ ᐋᓇᑮᐋᑾᓇᐃᑳᑌᑭᐸᓐ ᑫᑰᓐ, ᒥᓴᐙ ᑕᓈᑾᓐ ᐙᓭᔮᕽ᙮

4:23b.MAR.004.023 ᒥᓂᒃ ᐌᑕᐗᑳᔦᒃ, ᐌᐌᓂ ᐱᓯᑕᒧᒃ! ᑮᐃᑭᑐ᙮

4:24b.MAR.004.024 ᔑᑾ ᑕᔥ ᐅᑮᐃᓈᐞ: ᐊᔮᒀᒣᑕᒧᒃ ᐅᐅ ᑳᐱᓯᑕᒣᒃ᙮ ᐃᐃᐌ ᐃᓈᑯᓂᑫᐎᓐ ᑫᐅᒋ ᑎᐹᑯᓀᒀ ᑮᒋᐱᒫᑎᓰᐙᒃ, ᐊᒦᐃᐌ ᐯᔑᑾᓐ ᐃᓈᑯᓂᑫᐎᓐ ᑫᑮᓇᐙ ᑫᐅᒋ ᑎᐹᑯᓂᓀᒃ ᑭᔐᒪᓂᑑ, ᑲᔦ ᐊᐗᔑᒣ ᑭᑲ ᐃᓇᑭᑕᒫᑯᐙ᙮

4:25b.MAR.004.025 ᐊᐊᐌ ᓴ ᑳᒥᓄᔮᐸᒋᑑᒡ ᐃᐌ ᑳᓂᓯᑐᑕᕽ, ᒦᐊᐌ ᑫᔮᐱ ᑫᒦᓂᓐᒡ ᓂᓯᑐᑕᒧᐎᓐ᙮ ᐊᐊᐌ ᑕᔥ ᑳᒪᓈᔮᐸᒋᑑᒡ ᐃᐌ ᑳᓂᓯᑐᑕᕽ, ᐊᐴᔥᑫ ᑕᐅᑖᐱᓇᒪᐙ ᐃ ᒥᓂᒃ ᐋᓇᑮᓂᓯᑐᑕᑭᐸᓐ, ᑮᐃᑭᑐ᙮

4:26b.MAR.004.026 ᐅᐅ ᑕᔥ ᑲᔦ ᑮᐊᓂ ᐃᑭᑐ: ᒦ ᓴ ᐅᐌ ᐁᔑ ᐊᔮᓂᒃ ᑭᔐᒪᓂᑑ ᐅᑎᐯᒋᑫᐎᓐ, ᑖᐱᔥᑰ ᐊᐎᔭ ᐃᓂᓂ ᐃᐃᒫ ᐁᐊᐸᑭᑑᒡ ᑭᑎᑳᓀᓴᓐ ᐊᑮᕽ᙮

4:27b.MAR.004.027 ᓂᐹ ᐁᑎᐱᑲᓂᓂᒃ, ᐗᓂᔥᑳ ᐁᑮᔑᑲᓂᓂᒃ᙮ ᐲᓂᔥ ᐃᓂᐌ ᑭᑎᑳᓀᓴᓐ ᐊᓂ ᓵᑲᑮᓂᐗᓐ, ᐁᐊᓂ ᓂᑖᐎᑭᓂᓂᑭᓐ, ᐋᓇᐐᓐ ᐁᑭᑫᑕᓯᒃ ᐊᐊ ᐃᓂᓂ ᐋᓃᓐ ᐁᔑ ᒫᒌᑭᑭᓐ᙮

4:28b.MAR.004.028 ᑎᐱᓇᐌ ᐋᓃᔥ ᐅᐅ ᐊᑭ ᓂᑖᐎᑭᒋᑫᒪᑲᓐ, ᓂᑕᒻ ᐁᐊᓂ ᒪᔥᑯᓯᐗᕽ, ᐲᓂᔥ ᐁᐊᓂ ᓃᔅᑲᓇᑭᑭᕽ, ᒦᑕᔥ ᐲᓂᔥ ᐁᑮᔑᑭᒃ᙮

4:29b.MAR.004.029 ᐊᐲ ᑕᔥ ᑳᑮᔑᑭᒃ, ᒦᑕᔥ ᐌᔩᑉ ᐁᔑ ᑮᔥᑭᔑᑫᒡ ᐃᓂᓂ, ᐋᓃᔥ ᒦ ᐅ ᐊᐲ ᒋᒫᐗᒋᒋᑫᒡ, ᑮᐃᑭᑐ᙮

4:30b.MAR.004.030 ᔑᑾ ᑲᔦ ᑮᐃᑭᑐ ᒋᓴᔅ: ᐌᑯᓀᔥ ᒦᓇᐙ ᑫᐐᑕᒪᐎᓇᑰᑭᐸᓐ ᒋᑭᑫᑕᒨᓂᓇᑰᒃ ᑭᔐᒪᓂᑑ ᐅᑎᐯᒋᑫᐎᓐ? ᐌᑯᓀᔥ ᑎᓄ ᐸᑳᓐ ᐋᐌᒋᑲᓐ ᑫᐅᒋ ᐙᐸᑕᐃᓇᑰᑭᐸᓐ ᐋᓃᓐ ᐃᐃ ᐁᔑᓈᑾᒃ?

4:31b.MAR.004.031 ᒦ ᐅᐌ ᐁᔑᓈᑾᒃ: ᑖᐱᔥᑰ ᐃᐌ ᐯᔑᒃ ᑭᑎᑳᓀᔅ, ᐃᐌ ᒫᐗᒡ ᑳᔭᑳᓯᕽ ᐅᐅᒫ ᐊᑮᕽ ᑳᐸᑭᑎᓂᑳᑌᒃ ᑭᑎᑳᓀᔅ᙮

4:32b.MAR.004.032 ᒦ ᓴ ᐅ ᑳᐅᒋ ᐲᒋᓂᑭᒃ ᐅᐅ ᒫᐗᒡ ᑳᒥᒑᑾᒃ, ᐃᓂ ᑕᔥ ᐐᓐ ᑲᑭᓇ ᑳᒥᒋᐱᒥᐊᔮᒪᑲᑭᓐ᙮ ᑭᒋᒪᒫᑲᑎᑾᓇᑭᓯ᙮ ᐃᑭ ᑕᔥ ᐱᓀᔒᔕᒃ ᐱ ᐃᔑᐗᓯᔀᓂᑫᐗᒃ ᐁᔑ ᐊᑲᐙᑌᓂᒃ, ᑮᐃᑭᑐ᙮

4:33b.MAR.004.033 ᓃᐱᐗᐞ ᐃᓴ ᐅᓄ ᑎᓄ ᐋᐌᒋᑲᓇᓐ ᐅᑮᐃᔑ ᐐᑕᒪᐙᐞ ᐃᐌ ᑭᔐᒪᓂᑑᓐ ᐅᑎᐹᒋᒧᐎᓂᓂ, ᒥᓂᒃ ᐃᓴ ᑳᐃᔑ ᑲᔥᑭᑑᓂᒡ ᒋᐃᔑ ᓂᓯᑐᑕᒥᓂᒡ᙮

4:34b.MAR.004.034 ᐋᐌᒋᑫᐎᓂᕽ ᐁᑕ ᐅᑮᐅᒋ ᑲᑲᓅᓈᐞ᙮ ᐊᐲ ᑕᔥ ᐁᓂᔑᑫᐊᔮᐙᒡ ᐅᑮᓂᓯᑐᑕᒨᓈᐞ ᑲᑭᓇ ᑫᑰᓐ ᐃᐃ ᐅᑭᑭᓄᐊᒪᐙᑲᓇᐞ᙮

4:35b.MAR.004.035 ᒦᑕᔥ ᐃᐃ ᐯᔑᑾᓐ ᐁᑮᔑᑲᓂᓂᒃ, ᐊᐲ ᐌᓈᑯᔑᓂᓂᒃ, ᐅᑮ ᑲᓅᓈᐞ ᐃᐃ ᐅᑭᑭᓄᐊᒪᐙᑲᓇᐞ: ᐊᐤ ᐃᓴ ᐃᔖᑖ ᐌᑎ ᐊᑳᒥᕽ, ᐅᑮᐃᓈᐞ᙮

4:36b.MAR.004.036 ᒦᑕᔥ ᐃᐃ ᑳᐃᔑ ᓇᑲᓈᐙᒡ ᐃᐃ ᒥᔮᒪᐌᓄᓂᒡ, ᐁᑮᐃᔑ ᒫᒌᐆᓈᐙᒡ ᒋᓴᓲᓐ ᐃᐃᒫ ᑳᑮᐃᔑ ᓇᒪᑕᐱᓂᒡ ᐲᑑᓇᒃ᙮ ᐸᑳᓐ ᐃᑕᔥ ᑲᔦ ᑮᐊᔮᐗᓐ ᒌᒫᓇᓐ ᑳᐐᑕᐆᒥᑯᒡ᙮

4:37b.MAR.004.037 ᒦᑕᔥ ᑫᑕᑐ ᑮᑭᒋᐸᑲᒫᓂᒪᓐ ᐁᑮ ᑭᒋᒪᒫᑳᔥᑳᓂᒃ ᐃᑕᔥ, ᑮᓵᓰᑲᐅᑯᐗᒃ ᐁᑮᐊᓂ ᒨᔥᑭᓀᐲᒃ ᐃᐃ ᒌᒫᓐ᙮

4:38b.MAR.004.038 ᐐᓐ ᐃᑕᔥ ᒋᓴᔅ ᐃᐃᒫ ᑮᑕᔑᓂᐹ ᐅᑖᑳᓂᕽ, ᐊᐸᐱᐎᓂᕽ ᐁᑮᐊᐱᑴᔑᕽ᙮ ᒦᑕᔥ ᐅᑮᐋᒪᒋᐃᑰᐞ ᐁᐃᑯᒡ: ᐅᑭᑭᓄᐊᒫᑫ! ᑳᐐᓐ ᐃᓇ ᑭᐐ ᐸᐹᒣᑕᓰᓐ ᐁᐐᓂᓵᐹᐌᔭᕽ? ᐅᑮᐃᑰᐞ᙮

4:39b.MAR.004.039 ᒦᑕᔥ ᑳᐃᔑ ᐗᓂᔥᑳᒡ᙮ ᐅᑮ ᑭᔒᑲᓅᑖᓐ ᓅᑎᓐ, ᑲᔦ ᐅᑮ ᑲᓅᑖᓐ ᐃᐃ ᓂᐱ: ᒦᐃ ᒥᓂᒃ! ᒦᐃ ᑫᔑ ᐋᓍᑎᕽ! ᐅᑮᐃᑖᓐ᙮ ᒦᑕᔥ ᑳᐃᔑ ᑭᐱᑖᓂᒪᓂᓂᒃ, ᐐᑫ ᑲᔦ ᑳᐃᔑ ᐋᓍᔮᔥᑳᓂᒃ᙮

4:40b.MAR.004.040 ᐅᐅᐌ ᑕᔥ ᐅᑮᐃᓈᐞ ᒋᓴᔅ ᐅᑭᑭᓄᐊᒪᐙᑲᓇᐞ: ᐋᓃᔛᓐ ᐌᒋ ᓭᑭᓯᔦᒃ? ᑳᐐᓐ ᐃᓇ ᒪᔑ ᑭᑕᐯᓂᒧᓄᑕᐙᓯᐙᐙ ᑭᔐᒪᓂᑑ? ᑮᐃᑭᑐ᙮

4:41b.MAR.004.041 ᐋᐱᒋ ᑕᔥ ᑮᑭᒋᓭᑭᓯᐗᒃ᙮ ᐅᐅᐌ ᑕᔥ ᑮᐃᑎᐗᒃ: ᐊᐌᓀᓐ ᐗᐊ? ᐊᐴᔥᑫ ᓅᑎᓐ ᑲᔦ ᓵᑲᐃᑲᓐ ᐅᓇᐃᑖᑯᓐ! ᑮᐃᑭᑐᐗᒃ᙮

5

5:1b.MAR.005.001 ᒦᑕᔥ ᑳᐊᓂ ᐋᔕᐗᐊᒧᐙᒡ ᒋᓴᔅ ᑲᔦ ᐅᑭᑭᓄᐊᒪᐙᑲᓇᐞ ᐌᑎ ᐊᑳᒥᕽ, ᐁᐊᓂ ᒥᔕᑳᐙᒡ ᐃᐃᒫ ᐊᑮᕽ ᑳᐊᔮᓂᒡ ᐃᐃ ᑫᕒᐊᓵᐎᓂᓂᐗᒃ ᙮

5:2b.MAR.005.002 ᐱᒌᓇᒃ ᐃᑕᔥ ᐃᑯ ᐁᑲᐹᒡ ᐊᐊ ᒋᓴᔅ, ᐅᑮᐱᐊᑕ ᓇᑭᔥᑳᑰᓐ ᐯᔑᒃ ᐃᓂᓂᐗᓐ ᐱᑾᒐᔭᐄ ᑳᐱ ᐅᒌᓂᒡ ᓇᐃᓂᑏᐎᑲᒥᑰᓐ ᐁᔮᓂᑭᓐ ᑳᔑ ᐐᐸᑲᒥᑳᓂᑭᓐ, ᐁᑭᑭᔥᑲᐙᓂᒡ ᒪᒋᐊᒑᑾᓐ᙮

5:3b.MAR.005.003 ᒦᐃᒫ ᑳᐃᔑᑖᒡ ᐊᐊ ᐃᓂᓂ ᒣᑴ ᓇᐃᓂᑏᐎᑲᒥᑯᑳᕽ᙮ ᑳᐐᓐ ᑫᔮᐱ ᐅᑮ ᑲᔥᑭᐃᑯᓰᓐ ᐊᐎᔭᓐ ᒋᒪᒫᒋᑾᐱᓂᑯᐸᓐ, ᐊᐴᔥᑫ ᓴᑳᐹᓇᓐ ᐋᓇ ᐋᐸᑕᓂᓂᑭᓐ᙮

5:4b.MAR.005.004 ᓴᓴᑾᓈ ᑮᑕᑕᑯᐱᓈ ᑕᑯᐱᓱᓈᐱᑰᓐ ᒦᓇ ᓴᑳᐹᓇᓐ, ᐅᓯᑎᕽ ᑲᔦ ᐅᓂᒌᕽ ᐊᐊ ᐃᓂᓂ᙮ ᐅᑮ ᐴᐴᒀᐱᑭᐱᑑᓇᓐ ᐃᑕᔥ ᐃᓂ ᓴᑳᐹᓇᓐ, ᑲᔦ ᑕᑯᐱᓱᓈᐱᑰᓐ ᐁᑮᐋᐸᑕᓂᓂᑭᓐ ᐐᑫ ᐅᑮ ᐲᓯᐱᑑᓇᓐ᙮ ᔑᑾ ᑳᐐᓐ ᐊᐎᔭ ᑮᑌᐊᐲᒌᓰ ᒋᐙᑲᐎᐋᐸᓐ᙮

5:5b.MAR.005.005 ᒦᐃᒫ ᒨᔕᒃ ᑳᐊᔮᒡ ᐊᐊ ᐃᓂᓂ ᒣᑴ ᓇᐃᓂᑏᐎᑲᒥᑯᕽ ᑲᔦ ᐁᔑ ᐸᐲᑾᑎᓈᓂᒃ, ᑲᐯᑮᔑᒃ, ᑲᐯᑎᐱᒃ, ᐊᓅᒋᑯ ᐁᑭᒋ ᐃᓂᑖᑯᓯᒡ, ᐁᐯᐯᔑᓱᑎᓱᒡ ᐊᓯᓃᐞ᙮

5:6b.MAR.005.006 ᒦᑕᔥ ᐁᑯ ᑌᐱᓈᑾᓂᓂᒃ ᐁᑮᐅᒋ ᐙᐸᒫᒡ ᐃᓂ ᒋᓴᓲᓐ, ᑳᐃᔑ ᐊᐸᑑᒡ, ᐁᑮᐊᐸᑭᓱᒡ ᐁᔑ ᓯᑌᑳᐸᐎᓂᒡ᙮

5:7b.MAR.005.007 ᐁᐲᑐᐌᒡ ᐃᑕᔥ ᐅᑮᐃᔑ ᔖᑯᐙᓈᓐ: ᑮᓐ ᒋᓴᔅ ᐌᑯᓯᓯᒥᒃ ᑭᔐᒪᓂᑑ ᒫᐗᒡ ᑳᐃᔥᐯᑖᑯᓯᒡ! ᐌᑯᓀᓐ ᐙᑑᑕᐎᔭᓐ? ᑭᐸᑯᓭᓂᒥᓐ ᒋᐃᓇᔓᑕᒪᐎᔭᓐ, ᐊᐱᒧᓐ ᐊᐌ ᑭᔐᒪᓂᑑ ᐁᑳ ᒋᑲᒀᑕᑭᐃᓯᐗᓐ! ᑮᐃᑭᑐ᙮

5:8b.MAR.005.008 ᐋᓃᔥ ᒋᓴᔅ ᐋᔕ ᐅᑮ ᑲᓅᓈᓐ ᐃᓂ ᒪᒋᐊᒑᑾᓐ: ᓇᑲᔥ ᐊᐊ ᐃᓂᓂ, ᑮᓐ ᒪᒋᐊᒑᒃ, ᐅᑮᐃᓈᓐ᙮

5:9b.MAR.005.009 ᔑᑾ ᑕᔥ ᐅᑮ ᑲᑴᒋᒫᓐ: ᐋᓃᓐ ᐁᔑᓂᑳᓱᔭᓐ? ᐅᑮᐃᓈᓐ᙮ ᒦᑕᔥ ᐁᔑ ᓇᑴᑖᑯᒡ: ᐅᐹᑏᓄ ᓂᑎᔑᓂᑳᔅ, ᐋᓃᔥ ᓂᐹᑏᓄᒥᓐ, ᑮᐃᑭᑐᐗᓐ᙮

5:10b.MAR.005.010 ᐁᓂᑯᒃ ᐃᑕᔥ ᐅᑮ ᐸᑯᓭᓂᒥᑰᓐ ᐊᐊ ᒋᓴᔅ ᐃᓂ ᒪᒋᐊᒑᑾᓐ: ᑫᑯ ᐃᑯᒋ ᐃᔑᓂᔕᐅᔑᓈᑳᕽ ᐅᐅᒫ ᐊᔮᐎᓂᕽ ᓂᐐᒋᒪᒋᐊᒑᑾᒃ! ᐅᑮᐃᑰᓐ᙮

5:11b.MAR.005.011 ᐃᐃᒫ ᑕᔥ ᓀᐗᑕᑎᓐ ᑭᒋᓃᐱᐗᐞ ᑮᐃᔑ ᐅᑴᓄᐗᒃ ᑰᑰᔕᒃ ᐁᑮᐅᑕᒋᑫᐙᒡ᙮

5:12b.MAR.005.012 ᐅᑮ ᐸᑯᓭᓂᒥᑰᐞ ᐃᑕᔥ ᒋᓴᔅ ᐃᐃ ᒪᒋᐊᒑᑾᐞ: ᒦᐃᒫ ᐃᔑᓂᔕᐅᔑᓈᒻ ᑰᑰᔕᒃ ᑳᐃᔑ ᐊᔮᐙᒡ, ᓂᑲ ᐊᑕ ᑭᑭᔥᑲᐙᓈᓂᒃ, ᑮᐃᑭᑐᐗᐞ᙮

5:13b.MAR.005.013 ᒦᑕᔥ ᑳᐃᔑ ᐸᑭᑎᓈᒡ ᐊᐊ ᒋᓴᔅ ᐃᐃ ᒪᒋᐊᒑᑾᐞ᙮ ᒦᑕᔥ ᑳᐃᔑ ᓇᑲᓈᓂᒡ ᐃᓂ ᐃᓂᓂᐗᓐ, ᐁᑮᐊᓂ ᐃᔑ ᐲᑎᑫᔥᑲᐙᐙᒡ ᐃᑕᔥ ᐃᐃ ᑰᑰᔕᐞ᙮ ᒦᑕᔥ ᑲᑭᓇ ᑰᑰᔕᒃ ᐃᐃᒫ ᑳᐃᔑ ᓈᓯᐲᐸᐃᑎᐙᒡ ᐁᔑᑮᔥᑳᒪᑎᓈᓂᒃ ᐁᑮ ᐸᑯᐲᐸᐃᑎᐙᒡ ᓵᑲᐃᑲᓃᕽ᙮ ᑲᑭᓇ ᑕᔥ ᑮᓂᓵᐹᐌᐗᒃ, ᓃᔑᕽ ᒥᑖᔂᒃ 2,000 ᑲᓇᐸᒡ ᐁᑮ ᑕᔑᐙᒡ᙮

5:14b.MAR.005.014 ᐃᑭᐌᓂᐗᒃ ᐃᑕᔥ ᑳᑮ ᑲᓇᐎᑰᑰᔑᐌᐙᒡ ᑮᒫᒌᐸᐃᐌᐗᒃ, ᐁᑮᐊᐎ ᐐᑕᒪᐙᐙᒡ ᐃᓂᐌᓂᐗᐞ ᐃᐃᒫ ᐆᑌᓈᕽ ᑳᐊᔮᓂᒡ ᑲᔦ ᐊᓅᒋᑯ ᐱᑯ ᑳᔑᑖᓂᐗᓂᓂᒃ ᑳᐊᔮᓂᒡ᙮ ᒦᑕᔥ ᑳᐱ ᐃᔑ ᐙᐸᑕᒥᓂᒡ ᐃᐃᐌ ᑳᐃᔑᐌᐸᓂᓂᒃ᙮

5:15b.MAR.005.015 ᐅᑮ ᐱᓈᓯᑲᐙᐙᓐ ᐃᑕᔥ ᐃᓂ ᒋᓴᓲᓐ, ᐁᑮᐙᐸᒫᐙᒡ ᐃᓂ ᐃᓂᓂᐗᓐ ᑳᑮ ᑭᑭᔥᑲᐙᓂᐸᓐ ᐃᓂ ᒪᒋᐊᒑᑾᐞ, ᐃᐃᒫ ᐁᐃᔑ ᑯᔥᒀᐙᑕᐱᓂᒡ, ᐁᑮ ᑭᑭᑯᓇᔦᓂᒡ, ᐁᑾᐞ ᑾᔭᒃ ᐁᑮᐃᔑᐊᔮᒡ ᐅᑎᓀᑕᒧᐎᓂᕽ᙮ ᒦᔥ ᐃᐃ ᑲᑭᓇ ᑳᐃᔑ ᓭᑭᓯᐙᒡ᙮

5:16b.MAR.005.016 ᒦᑕᔥ ᐃᑭ ᓂᑕᒻ ᑳᑮᐙᐸᑕᒧᐙᒡ, ᐅᑮᐐᑕᒪᐙᐙᐞ ᑲᑭᓇ ᐊᐎᔭᐞ ᐋᓃᓐ ᑳᐃᔑᐌᐱᓯᓂᒡ ᐃᓂ ᐃᓂᓂᐗᓐ ᑳᑮ ᑭᑭᔥᑲᐙᓂᐸᓐ ᒪᒋᐊᒑᑾᐞ, ᑲᔦ ᐃᐌ ᑳᐃᔑᐌᐱᓯᓂᒡ ᐃᐃ ᑰᑰᔕᐞ᙮

5:17b.MAR.005.017 ᒦᑕᔥ ᑳᐃᔑ ᒫᒌ ᐸᑯᓭᓂᒫᐙᒡ ᐃᓂ ᒋᓴᓲᓐ ᒋᐅᒋ ᒫᒑᓂᒡ ᐃᐃᒫ ᐅᑕᑮᒥᐙᕽ᙮

5:18b.MAR.005.018 ᒦᑕᔥ ᐁᑮᐃᔑ ᑮᐌᐴᓯᒡ ᐊᐊ ᒋᓴᔅ, ᐅᑮᐱ ᐸᑯᓭᓂᒥᑰᓐ ᑳᑮ ᑭᑭᔥᑲᐙᓂᐸᓐ ᐃᐃ ᒪᒋᐊᒑᑾᐞ: ᐊᐯ ᓴ ᑭᑲᓂ ᐐᒌᐎᓐ! ᐅᑮᐃᑰᓐ᙮

5:19b.MAR.005.019 ᑳᐐᓐ, ᐅᑮᐃᓈᓐ ᐊᐊ ᒋᓴᔅ᙮ ᐃᔖᓐ ᐌᑎ ᑭᐙᑳᐃᑲᓂᕽ, ᐊᐎ ᐐᑕᒪᐤ ᑭᑎᓇᐌᒫᑲᓇᒃ ᐃᐃᐌ ᑳᑭᑑᑕᐎᒃ ᑭᒋᑫᑰᓐ ᐊᐊ ᑭᔐᒪᓂᑑ, ᑲᔦ ᑳᑮᐃᔑ ᔕᐌᓂᒥᒃ, ᐅᑮᐃᓈᓐ᙮

5:20b.MAR.005.020 ᒦᑕᔥ ᑳᐊᓂ ᐃᔑ ᒫᒑᒡ ᐊᐊ ᐃᓂᓂ ᐁᑮ ᐸᐹᐃᔖᒡ ᐃᐃᒫ ᐊᑮᕽ, ᒥᑖᓱ ᐆᑌᓇᐎ ᐊᑭ ᐁᐃᔑᓂᑳᑌᓂᒃ, ᐁᑮ ᐸᐹᐐᑕᒫᑫᒡ ᐋᓃᓐ ᑳᑮᐃᔑᒋᑫᐃᑯᒡ ᐃᓂ ᒋᓴᓲᓐ᙮ ᐐᑫ ᑕᔥ ᑮᑭᒋᒫᒪᑳᑌᑕᒨᒃ ᑲᑭᓇ ᐊᐎᔭᒃ᙮

5:21b.MAR.005.021 ᒦᑕᔥ ᐃᐃ ᑳᓂ ᐃᔑ ᑮᐌᐋᔕᐗᐊᕽ ᐊᑳᒥᕽ ᐃᐃᒫ ᒌᒫᓂᕽ ᐊᐊ ᒋᓴᔅ᙮ ᐁᑮ ᐱᒥᔕᑳᒡ ᐃᑕᔥ ᐐᑫ ᑭᒋᓃᐱᐗᐞ ᐅᑮᓈᓯᐲᐗᒥᑰᐞ᙮

5:22b.MAR.005.022 ᐯᔑᒃ ᐃᑕᔥ ᑮᐱᑕᑯᔑᓐ ᐃᑭ ᑳᑮᐅᑭᒫᑲᑕᒧᐙᒡ ᐃᐃ ᒎᐗᐞ ᐅᑕᓇᒥᐁᐎᑲᒥᑯᓂ, ᒉᐃᕒᐊᔅ ᐁᑮᐃᔑᓂᑳᓱᒡ ᐊᐊ ᐃᓂᓂ᙮ ᐁᐙᐸᒫᒡ ᐃᑕᔥ ᐃᓂ ᒋᓴᓲᓐ, ᑮᐱ ᐊᐸᑭᓱ ᐃᐃᒫ ᐁᓈᓴᒥᑳᐸᐎᓂᒡ, ᐁᑮ ᑭᒋᐸᑯᓭᓂᒫᒡ:

5:23b.MAR.005.023 ᓂᑖᓂᓭᔅ ᐋᔕ ᐊᑳᐙ ᐱᒫᑎᓯ᙮ ᑕᑲ ᐱᑖᑭᓐ ᒋᐱᒫᒋᐊᒡ ᒋᓂᐳᓯᒃ! ᐅᑮᐃᓈᓐ᙮

5:24b.MAR.005.024 ᒦᑕᔥ ᑳᓂ ᐃᔑᐐᒌᐙᒡ ᐊᐊ ᒋᓴᔅ ᐃᓂ ᒉᐃᕒᐊᓴᓐ᙮ ᐅᑮᐊᓂ ᑯᐱ ᓰᒋᔥᑳᑰᐞ ᐃᑕᔥ ᑭᒋᓃᐱᐗᐞ ᐊᐎᔭᐞ ᑳᐱ ᐅᑴᓄᓂᒡ᙮

5:25b.MAR.005.025 ᐯᔑᒃ ᐃᑕᔥ ᐃᑴ ᐃᐃᒫ ᒣᑴᔭᐄ ᑮᐊᔮ᙮ ᒥᑖᔀᔑᓃᔓᔭᑭ 12 ᑮᒥᔅᑸᐎ ᐁᓀᐱᒋ ᐃᔑᐊᔮᒡ᙮

5:26b.MAR.005.026 ᐋᒋᑯ ᑕᔥ ᑮᐐᓴᑳᐱᓀ ᐋᓇᑮᐊᑕᐎᐃᑯᒡ ᓃᐱᐙ ᒪᔥᑭᑮᐎᓂᓂᐗᐞ᙮ ᐐᑫ ᑕᔥ ᐅᑭᒑᑭᓈᓐ ᑲᑭᓇ ᐅᔔᓂᔮᒪᓐ ᒥᓂᒃ ᐁᔮᐙᑯᐸᓀᓐ᙮ ᑳᐐᓐ ᐃᑕᔥ ᐊᐗᔑᒣ ᑮᐊᓂ ᒥᓄᐊᔮᓰ, ᐋᓃᔥ ᐊᐗᔑᒣ ᑮᐊᓂ ᐋᑯᓯ ᐊᐲᒡ ᓂᑕᒻ ᑮᒫᑖᐱᓀᒡ᙮

5:27b.MAR.005.027 ᐗᐊ ᑕᔥ ᐃᑴ ᑮᓅᑕᒻ ᐁᐲᑖᒋᒥᒥᓐᒡ ᐃᓂ ᒋᓴᓲᓐ᙮ ᒦᑕᔥ ᐃᐃ ᐁᑮ ᐱᓈᓯᑲᐙᒡ ᐃᐃᒫ ᐃᔥᑴᐊᔭᐄᕽ ᐁᒣᑴᔦᓄᐙᒡ ᐁᑮᐱ ᓵᒥᓇᒪᐙᒡ ᐅᑭᑭᔥᑭᑲᓂᓂ,

5:28b.MAR.005.028 ᐁᐃᑎᓱᒡ: ᑮᔥᐱᓐ ᐁᑕ ᓵᒥᓇᒪᐗᒃ ᐅᑭᑭᔥᑭᑲᓐ, ᓂᑲ ᒥᓄᐊᔮ, ᑮᐃᑭᑐ᙮

5:29b.MAR.005.029 ᒦᑕᔥ ᔐᒫᒃ ᐃᑯ ᑮᑭᐱᔅᑾᑭᓯ᙮ ᐅᑮᒨᔑᑑᓐ ᐐᔭᐎᕽ ᐁᑮᒥᓄᐊᔮᒡ ᐃᐃ ᐅᑎᓈᐱᓀᐎᓐ᙮

5:30b.MAR.005.030 ᐊᐊ ᑕᔥ ᒋᓴᔅ ᑮᑭᑫᓂᑎᓱ ᐁᑮ ᓵᑲᐊᒨᒪᑲᓂᓂᒃ ᐅᑲᔥᑭᐁᐎᓯᐎᓐ ᐃᐃᒫ ᐐᔭᐎᕽ᙮ ᑮᑴᑭᑳᐸᐎ ᑕᔥ ᐃᐃᒫ ᒣᑴᔦᓄᓂᒡ ᐁᐃᑭᑐᒡ: ᐊᐌᓀᓐ ᐊᐊ ᑳᓵᒥᓇᕽ ᐃᐃ ᓂᑭᑭᔥᑭᑲᓐ? ᑮᐃᑭᑐ᙮

5:31b.MAR.005.031 ᐅᐅᐌ ᑕᔥ ᐅᑮᐃᑰᐞ ᐅᑭᑭᓄᐊᒪᐙᑲᓇᐞ: ᑭᐙᐸᒫᒃ ᐄᑐᒃ ᐃᑭ ᑳᓰᒋᔥᑲᐎᒀ, ᑭᑎᑭᑦ ᐃᓇ ᑕᔥ, ᐊᐌᓀᓐ ᑳᓴᒥᓂᒡ? ᐅᑮᐃᑰᐞ᙮

5:32b.MAR.005.032 ᑫᔮᐱ ᑕᔥ ᑮᐊᔨᓈᐱ ᐊᐌ ᒋᓴᔅ ᐁᐐᐙᐸᒫᒡ ᐊᐌᓀᓇᓐ ᑳᑑᑕᒥᓂᒡ᙮

5:33b.MAR.005.033 ᐗᐊ ᑕᔥ ᐃᑴ ᐅᑮ ᑭᑫᑖᓐ ᐃᐃᐌ ᑳᑮᐃᔑᒋᑫᐃᓐᒡ᙮ ᒦᑕᔥ ᐃᐃᒫ ᑳᐱ ᐃᔑ ᐊᐸᑭᓱᒡ ᐁᓈᓴᒥᑳᐸᐎᓂᒡ ᒋᓴᓲᓐ, ᐁᓭᑭᓯᒡ ᐁᐅᒋ ᓂᓂᑭᔥᑳᒡ᙮ ᔑᑾ ᑕᔥ ᐅᑮ ᒑᑭᐐᑖᓐ ᐋᓃᓐ ᐃᐃ ᒪᔮ ᑳᑮᐃᔑᐌᐱᓯᒡ᙮

5:34b.MAR.005.034 ᒦᑕᔥ ᑳᐃᓈᒡ ᐊᐊ ᒋᓴᔅ ᐃᓂ ᐃᑴᐗᓐ: ᐁᐊᐯᓂᒧᓄᑕᐎᔭᓐ ᑭᑑᒋ ᒥᓄᐊᔮ᙮ ᐊᓂᒫᒑᓐ, ᒥᓉᑕᓐ᙮ ᑳᐐᓐ ᑫᔮᐱ ᑭᑲ ᐃᓈᐱᓀᓰ, ᐅᑮᐃᓈᓐ᙮

5:35b.MAR.005.035 ᒣᒀ ᑕᔥ ᐁᑕᓉᐌᑑᒡ ᒋᓴᔅ, ᐋᓂᓐᑦ ᐊᐎᔭ ᑮᐱ ᐅᑐᓭᐗᒃ ᐃᐃᒫ ᐁᔑᑖᓂᒡ ᐃᓂ ᐃᓂᓂᐗᓐ ᑳᐅᑭᒫᑲᑕᒥᓂᒡ ᐃᐃ ᐊᓇᒥᐁᐎᑲᒥᒃ᙮ ᐅᑮ ᑲᓅᓈᐙᓐ ᐃᓂ ᐃᓂᓂᐗᓐ: ᐋᔕ ᑮᓂᐳ ᑭᑖᓂᔅ᙮ ᑫᑯ ᑫᔮᐱ ᐅᑕᒥᐋᑫᓐ ᐊᐊ ᐅᑭᑭᓄᐊᒫᑫ, ᐅᑮᐃᓈᐙᓐ᙮

5:36b.MAR.005.036 ᑳᐐᓐ ᐃᑕᔥ ᐅᑮ ᐸᐹᒥᑕᐙᓰᐞ ᐊᐌ ᒋᓴᔅ᙮ ᐅᑮ ᑲᓅᓈᓐ ᐃᑕᔥ ᐃᓂ ᒉᐃᕒᐊᓴᓐ: ᑫᑯ ᓭᑭᓯᑫᓐ, ᐊᐯᓂᒧᓄᑕᐎᔑᓐ ᐁᑕ, ᐅᑮᐃᓈᓐ᙮

5:37b.MAR.005.037 ᑳᐐᓐ ᐊᐎᔭ ᐅᑮᐃᓈᓰᓐ ᒋᐐᒌᐎᑯᒡ, ᒦ ᐁᑕ ᐲᑕᕒᐆᓐ, ᒌᒥᓴᓐ, ᒞᓇᓐ, ᒦᐗᓂᓂ ᐐᒋᑭᐌᔭᓐ ᐊᐊ ᒌᒥᔅ᙮

5:38b.MAR.005.038 ᐁᐊᓂ ᑕᑶᔑᓄᐙᒡ ᐃᑕᔥ ᐃᐃᒫ ᑳᐃᔑᑖᓂᒡ ᐃᓂ ᐊᓇᒥᐁᐎᑲᒥᒃ ᑳᐅᑭᒫᑲᑕᒥᓂᒡ, ᐅᑮᐃᔑ ᐙᐸᑖᓐ ᐊᐊ ᒋᓴᔅ, ᐐᑫ ᐁᑮ ᑭᒋ ᐃᓇᑲᒥᑲᓂᓂᒃ ᐁᑭᒋᒪᐎᓈᓂᐗᓂᓂᒃ ᑲᔦ ᐁᑭᒋᓅᑖᑯᓯᓂᒡ ᐊᐎᔭᐞ᙮

5:39b.MAR.005.039 ᒦᑕᔥ ᐁᑮ ᐲᑎᑫᒡ ᐅᑮ ᑲᓅᓈᐞ ᐃᐃ ᑳᒪᐎᑳᓈᓂᒡ ᐃᑴᓭᓴᓐ: ᐋᓃᔛᓐ ᐌᒋ ᑭᒋ ᐃᓉᐎᑕᒣᒃ ᐁᑭᒋᒪᐎᔦᒃ? ᑳᐐᓐ ᓂᐳᓰ ᐊᐊ ᐃᑴᓭᔅ, ᓂᐹ ᐅᔕ, ᐅᑮᐃᓈᐞ᙮

5:40b.MAR.005.040 ᒦᑕᔥ ᐃᐃ ᑳᐃᔑ ᒥᒋ ᑲᑳᒋᐃᑯᒡ ᑲᑭᓇ᙮ ᒦᑕᔥ ᑳᐃᔑ ᓵᑭᒋᓂᔕᐙᑦ᙮ ᒦᑕᔥ ᑳᐃᔑ ᐐᒌᐙᑦ ᐃᓂ ᐅᑌᑌᓂ ᑲᔦ ᐅᒫᒫᓂ ᐃᓂ ᐃᑴᓭᓴᓐ, ᑲᔦ ᐃᓂᐌᓂᐗᐞ ᑳᐐᒌᐎᑯᒡ ᐊᐊ ᒋᓴᔅ, ᐃᐃᒫ ᐁᑮᐃᔖᐙᒡ ᑳᑮᐃᔑ ᐱᒥᔑᓂᓂᒡ ᐃᓂ ᐃᑴᓭᓴᓐ᙮

5:41b.MAR.005.041 ᒦᑕᔥ ᑳᐃᔑ ᓴᑭᓂᑫᓈᒡ ᐁᑮᐃᓈᒡ: ᑖᓬᐃᑕ ᑯᒻ! ᒦᐃᐌ ᐁᐃᑭᑐᒡ: ᐃᑴᓭᔅ, ᐗᓂᔥᑳᓐ, ᑭᑎᓂᓐ! ᐅᑮᐃᓈᓐ᙮

5:42b.MAR.005.042 ᔐᒫᒃ ᑮᐗᓂᔥᑳ ᐊᐌ ᐃᑴᓭᔅ, ᑮᐱᒧᓭ᙮ ᑮᒥᑖᔀᔑᓃᔓᐱᐴᓉ 12᙮ ᐗᐐᑫ ᑕᔥ ᑮᑭᒋᒫᒪᑳᑌᑕᒨᒃ ᐃᑭᐌ ᑳᐙᐸᑕᒧᐙᒡ᙮

5:43b.MAR.005.043 ᒋᓴᔅ ᐃᑕᔥ ᐅᑮᐊᔮᒀᒥᒫᐞ: ᑫᑯ ᐊᐎᔭ ᑭᑫᑕᒨᓈᑫᒃ᙮ ᐊᔕᒥᒃ ᐗᐊ ᐃᑴᓭᔅ, ᐅᑮᐃᓈᐞ᙮

6

6:1b.MAR.006.001 ᑮᐊᓂᐅᒋ ᒫᒑ ᑕᔥ ᐊᐊ ᒋᓴᔅ ᐁᑮᐃᔖᒡ ᐃᐃᒫ ᐅᑕᔮᐎᓂᕽ ᑳᑮ ᑕᔑᐅᐱᑭᒡ, ᐁᑮᐊᓂ ᐐᒌᐎᑯᒡ ᐃᓂ ᐅᑭᑭᓄᐊᒪᐙᑲᓇᐞ᙮

6:2b.MAR.006.002 ᒦᑕᔥ ᐁᑮᐃᔑᑮᔑᑲᒃ ᑳᐅᑕᓉᐲᐎ ᑮᔑᑲᓄᑫᐙᒡ ᐃᑭ ᒎᐗᒃ, ᑮᒫᒌᑭᑭᓄᐊᒫᑫ ᒋᓴᔅ ᐃᐃᒫ ᒎᐗᐞ ᐅᑕᓇᒥᐁᐎᑲᒥᑯᓃᕽ᙮ ᓃᐱᐗᐞ ᐃᑕᔥ ᐃᐃᒫ ᑮᐊᔮᐗᒃ᙮ ᑲᑭᓇ ᑕᔥ ᐊᐎᔭ ᐅᑮᒫᒪᑳᓯᑕᐙᐙᓐ ᐃᓂ ᒋᓴᓲᓐ, ᐁᐃᑭᑐᐙᒡ: ᐋᓃᑎ ᓈ ᐌᑎᓇᕽ ᐗᐊ ᐃᓂᓂ ᐅᓄ ᑫᑰᓇᓐ? ᐌᑯᓀᓐ ᑎᓄ ᑲᑮᑖᐌᑕᒧᐎᓐ ᑳᒦᓂᓐᒡ? ᐃᓇ ᑳᐊᐲᒋ ᒫᒪᑳᒋᒋᑫᒡ! ᑮᐃᑭᑐᐗᒃ᙮

6:3b.MAR.006.003 ᑳᐐᓐ ᐃᓇ ᒦ ᐗᐊ ᒥᑎᑯᓈᐯ, ᑳᐅᑯᓯᓯᒥᑯᒡ ᒣᕒᐄᓐ ? ᒦ ᐗᐊ ᑳᐅᔒᒣᔑᒡ ᒌᒥᓴᓐ, ᒎᓯᓴᓐ, ᒎᑕᓴᓐ, ᓵᔨᒪᓇᓐ ᙮ ᑳᐐᓐ ᐃᓇ ᑲᔦ ᒦ ᐗᐊ ᐅᑕᐌᒫᐞ ᑳᐐᒋᐊᔮᒪᒀ ᐅᐅᒫ ᐆᑌᓇᐌᓯᕽ? ᑮᐃᑭᑐᐗᒃ᙮ ᒦᑕᔥ ᐃᐃ ᑳᐐᓐ ᐅᑮᐐᐅᑖᐱᓈᓯᐙᐙᓐ᙮

6:4b.MAR.006.004 ᒦᑕᔥ ᑳᐃᑭᑐᒡ ᒋᓴᔅ: ᐊᐎᔭ ᐅᑎᐹᒋᒧ ᑭᔐᒪᓂᑑᓐ ᑳᑲᓅᑕᒪᐙᒡ ᐅᒪᒉᓂᒥᑰᐞ ᐅᐐᒋᐅᒌᒫᑲᓇᐞ ᐁᑕ, ᑲᔦ ᐅᑎᓇᐌᒫᑲᓇᐞ, ᐃᓂᐌᓂᐗᐞ ᑲᔦ ᑳᐐᒋᔭᔮᒥᑯᒡ᙮ ᐸᑳᓐ ᐊᐎᔭᓐ ᐅᑎᔥᐯᓂᒥᑰᓐ, ᑮᐃᑭᑐ᙮

6:5b.MAR.006.005 ᑳᐐᓐ ᐃᐃᒫ ᐅᑮ ᑲᔥᑭᑑᓰᓐ ᑭᒋᐊᓄᑮᐎᓐ ᒋᑑᑕᕽ, ᒦ ᐁᑕ ᒋᒥᒋ ᐃᔑᓂᒌᓂᒡ ᐸᑮ ᐊᐎᔭᐞ ᐁᐋᑯᓯᓂᒡ, ᐁᑮᒥᓄᐊᔮᐋᒡ᙮

6:6b.MAR.006.006 ᑮᒫᒪᑳᑌᑕᒻ ᐃᑕᔥ ᐊᐎᔭᓐ ᐁᑮ ᑌᐺᔦᓂᒥᑯᓯᒃ᙮ ᒦᑕᔥ ᐃᐃ ᑮᐸᐹᐃᔖ ᐃᐃᒫ ᐆᑌᓇᐌᓴᓐ ᐁᑮ ᑭᑭᓄᐊᒫᑫᒡ᙮

6:7b.MAR.006.007 ᐅᑮᐊᑐᒫᐞ ᐃᐃ ᑳᒥᑖᔑᓃᔑᓂᒡ ᐅᑭᑭᓄᐊᒪᐙᑲᓇᐞ, ᐁᑮᒫᒋᓂᔕᐙᒡ ᐁᑮᓀᓃᔑᓂᒡ, ᐁᑮᐃᓈᑯᓈᒡ ᒋᔖᑰᒋᐋᓂᒡ ᒪᒋᐊᒑᑾᐞ᙮

6:8b.MAR.006.008 ᐅᑮᐃᓈᐞ ᐃᑕᔥ: ᑫᑯ ᑫᑰᓐ ᐱᒥᐎᑑᑫᒃ ᐁᒫᒑᔦᒃ, ᒦ ᐁᑕ ᓴᑲᐅᓇᓐ᙮ ᑳᐐᓐ ᑲᔦ ᐸᑴᔑᑲᓐ, ᑳᐐᓐ ᑲᔦ ᐸᑯᓭᒋᑫᐎᐲᓇᐃᑲᓐ᙮

6:9b.MAR.006.009 ᑭᑲ ᑭᑲᑭᓯᓀᒻ ᐃᑕᔥ᙮ ᑫᑯ ᑕᔥ ᓃᔗᑭᑯᓇᔦᑫᒃ᙮ ᐁᔑᐅᔦᒃ ᐁᑕ ᑯ ᐃᔑ ᒫᒑᒃ, ᑮᐃᑭᑐ᙮

6:10b.MAR.006.010 ᒦ ᐅ ᑲᔦ ᑳᐃᓈᒡ: ᐃᐃᒫ ᑫᐃᔑ ᑮᔫᑌᔦᒃ ᐙᑳᐃᑲᓂᕽ, ᒦᐃᒫ ᐯᔑᑾᓐ ᐊᔮᒃ ᐲᓂᔥ ᐃᐃᒫ ᒋᐅᒋ ᒫᒑᔦᒃ ᐆᑌᓈᕽ᙮

6:11b.MAR.006.011 ᑮᔥᐱᓐ ᐃᑕᔥ ᐃᑯᒋ ᐊᓂ ᑕᑯᔑᓀᒃ ᐅᑖᐱᓂᑰᓯᐌᒃ, ᓀᐱᒋᐱᓯᑖᑰᓯᐌᒃ, ᐃᑯᒋ ᐃᒫ ᐅᒋ ᐃᔖᒃ᙮ ᐹᐹᐎᓯᑌᔑᒨᓄᒃ ᒋᐅᒋ ᑭᑫᑕᒧᐙᒡ ᐁᐗᓂᑑᑕᒧᐙᒡ, ᐅᑮᐃᓈᐞ᙮

6:12b.MAR.006.012 ᒦᑕᔥ ᑳᐃᔑ ᒫᒑᐙᒡ ᐃᑭ ᑭᑭᓄᐊᒪᐙᑲᓇᒃ, ᐁᑮᐃᔑ ᑲᑮᑴᐙᒡ, ᐃᐃ ᐯᒫᑎᓯᓂᒡ ᒋᑴᑳᑎᓯᓂᒡ᙮

6:13b.MAR.006.013 ᒦᑕᔥ ᓃᐱᐗᐞ ᐅᑮ ᓵᑭᒋᓂᔕᐊᒪᐙᐙᐞ ᒪᒋᐊᒑᑾᐞ ᐊᐎᔭᐞ, ᐁᑮ ᐴᓯᓈᐙᒡ ᑲᔦ ᓃᐱᐗᐞ ᑳᐋᑯᓯᓂᒡ ᐁᑮᒥᓄᐊᔮᐋᐙᒡ᙮

6:14b.MAR.006.014 ᐊᐊ ᑕᔥ ᐁᕒᐊᑦ ᑭᒋᐅᑭᒫ ᐅᑮᓅᑖᓐ ᐁᐸᐹᒥᒥᒥᓐᒡ ᐃᓂ ᒋᓴᓲᓐ᙮ ᐋᓂᓐᑦ ᑮᐃᑭᑐᐗᒃ: ᒦ ᓇᑾᓇ ᐗᐊ ᒞᓐ ᓰᑲᐊᑖᑫᐎᓂᓂ ᐁᑮ ᑮᐌᐱᒫᑎᓯᒡ᙮ ᒦ ᒫᐐᓐ ᐃᐃᒫ ᐌᑎᓇᒧᑴᓐ ᒋᒫᒪᑲᒋᒋᑫᒡ, ᑮᐃᑭᑐᐗᒃ᙮

6:15b.MAR.006.015 ᐋᓂᓐᑦ ᑕᔥ ᐐᓐ ᑮᐃᑭᑐᐗᒃ: ᒦ ᐗᐊ ᐃᓬᐋᐃᒐ ᙮ ᐋᓂᓐᑦ ᑲᔦ ᑮᐃᑭᑐᐗᒃ: ᒦ ᐗᐊ ᐯᔑᒃ ᐅᑎᐹᒋᒧ ᐯᔑᑾᓐ ᐁᐃᔑᓈᑯᓯᒡ ᐃᑭ ᐌᔥᑲᒡ ᑳᑮ ᑲᓅᑕᒪᐙᐙᑯᐸᓀᓐ ᑭᔐᒪᓂᑑᓐ, ᑮᐃᑭᑐᐗᒃ᙮

6:16b.MAR.006.016 ᐊᐲ ᑕᔥ ᐁᓅᑕᕽ ᐊᐊᐌ ᐁᕒᐊᑦ, ᑮᐃᑭᑑ: ᒦ ᐗᐊ ᒞᓐ ᓰᑲᐊᑖᑫᐎᓂᓂ ᑳᑮ ᑮᔥᑭᑴᑕᐗᒃ᙮ ᑮᑮᐌᐱᒫᑎᓯ ᑫᒋᓈᒡ! ᑮᐃᑭᑐ᙮

6:17b.MAR.006.017 ᐐᓐ ᐋᓃᔥ ᐁᕒᐊᑦ ᑮᐊᓅᑮᐸᓐ ᒋᑌᐱᐱᓂᒥᓐᒡ ᐃᓂ ᒞᓇᓐ ᑲᔦ ᒋᑕᔑᒪᒫᒋᑾᐱᓱᓂᒡ ᑭᐹᑾᐅᑏᐎᑲᒥᑯᕽ ᒋᐊᔮᓂᒡ᙮ ᒦ ᓴ ᐅᐌ ᑳᑮᐅᒋ ᐃᔑᒋᑫᒡ ᐁᕒᐊᑦ, ᒋᒥᓉᑕᒥᓂᒡ ᐃᑴᐗᓐ ᐃᕒᐆᑎᔭᔅ ᑳᐃᔑᓂᑳᓱᓂᒡ᙮ ᐋᓃᔥ ᒣᒀ ᐅᑮᐐᑎᑫᒫᓐ᙮ ᐗᐊ ᑕᔥ ᐃᑴ ᐋᔕ ᑮᐅᓈᐯᒥ ᐃᓂ ᐱᓬᐊᐴᓐ, ᒦᐗᓐ ᐃᓂ ᐐᒋᑭᐌᔭᓐ ᐊᐊ ᐁᕒᐊᑦ᙮

6:18b.MAR.006.018 ᒞᓐ ᐃᑕᔥ ᐅᑮᐃᓈᐸᓃᓐ ᐃᓂ ᐁᕒᐊᑕᓐ: ᑳᐐᓐ ᐃᓇᑌᓯᓅᓐ ᑮᒋᑭᐌ ᐅᐐᑎᑫᒫᑲᓇᓐ ᒋᐐᒋᔭᔮᒪᑎᐸᓐ, ᐅᑮᐃᓈᓐ᙮

6:19b.MAR.006.019 ᐊᐊ ᑕᔥ ᐃᑴ, ᒦ ᐊᐌ ᐃᕒᐆᑎᔭᔅ, ᐅᑮᐅᒋ ᓂᔥᑫᓂᒫᓐ ᐁᑮᐐᓂᓵᒡ ᐃᓂ ᒞᓇᓐ᙮ ᑳᐐᓐ ᐃᑕᔥ ᐅᑮ ᑲᔥᑭᑑᓰᓐ᙮

6:20b.MAR.006.020 ᐊᐊᐌ ᐋᓃᔥ ᐁᕒᐊᑦ ᐅᑮ ᑯᓵᓐ ᐃᓂ ᒞᓇᓐ, ᐁᑮ ᑭᑫᓂᒫᒡ ᑾᔭᒃ ᐁᐃᔑᐌᐱᓯᓂᒡ, ᑲᔦ ᐁᐅᓇᑭᒥᑯᓂᒡ ᐃᓂ ᑭᔐᒪᓂᑑᓐ᙮ ᒦᐃ ᑳᐃᔑ ᑲᓇᐌᓂᒫᒡ᙮ ᐅᑮᒥᓄᑕᐙᓐ ᐃᓂ ᒞᓇᓐ ᐁᐱᓯᑕᐙᒡ᙮ ᐊᐲ ᑕᔥ ᐃᑯ ᐁᓅᑕᐙᒡ, ᑮᒥᑯᔥᑳᑌᑕᒻ᙮

6:21b.MAR.006.021 ᐃᑯᑎᕽ ᐃᑕᔥ ᑮᐊᓂ ᑲᔥᑭᒋᑳᑌᓂ ᐃᐌ ᑳᒥᓴᐌᑕᕽ ᐊᐊ ᐃᑴ᙮ ᐃᑯᑎᕽ ᐁᑮᔑᑲᓂᓂᒃ ᐁᕒᐊᑦ ᑮᐐᑾᑫ ᐁᑎᐱᔥᑲᕽ᙮ ᒦᑕᔥ ᐁᑮᐐᑾᒫᒡ ᐃᓂᐌᓂᐗᐞ ᑳᓃᑳᓀᑖᑯᓯᓂᒡ ᐅᑭᒫᐎᐎᓂᕽ, ᑲᔦ ᔑᒫᑲᓂᔒᐎᑭᒫᐞ, ᐃᓂᐌᓂᐗᐞ ᑲᔦ ᑳᓃᑳᓀᑖᑯᓯᓂᒡ ᑳᓬᐊᓬᐄᐎ ᐊᑮᕽ ᙮

6:22b.MAR.006.022 ᐃᕒᐆᑎᔭᔅ ᐃᑕᔥ ᐅᑖᓂᓴᓐ ᑮᐱ ᐲᑎᑫᐗᓐ ᐁᑮᓃᒥᑕᐙᓂᒡ, ᐁᑮᒥᓉᑕᒥᐋᓂᒡ ᐃᓂ ᐁᕒᐊᑕᓐ, ᐃᓂᐌᓂᐗᐞ ᑲᔦ ᑳᑮᐐᑾᒥᒥᓐᒡ᙮ ᒦᑕᔥ ᑳᐃᓈᒡ ᐊᐊ ᐁᕒᐊᑦ ᐃᓂ ᐅᔥᑭᓃᑭᑴᓐ: ᐌᑯᓀᓐ ᐃᑯ ᒣᓴᐌᑕᒪᓐ ᑲᑴᒋᒥᔑᓐ, ᑭᑲ ᒦᓂᓐ, ᑮᐃᑭᑐ᙮

6:23b.MAR.006.023 ᔑᑾ ᑕᔥ ᑮᑭᒋᐊᔓᑕᒫᑫ, ᐁᑮᐊᐱᒧᒡ ᑭᔐᒪᓂᑑᓐ: ᐌᑯᓀᓐ ᐃᑯ ᑫᑲᑴᒋᒥᔭᓐ ᑭᑲ ᒦᓂᓐ, ᐃᐴᔥᑫ ᑲᑴᒋᒥᔭᓐ ᐋᐱᑕ ᑳᑎᐯᑕᒫᓐ ᑭᑲ ᒦᓂᓐ, ᐅᑮᐃᓈᓐ᙮

6:24b.MAR.006.024 ᒦᑕᔥ ᑳᐃᔑ ᓵᑲᐊᕽ ᐊᐊ ᐅᔥᑭᓃᑭᑴ, ᐁᑮᐊᐎ ᑲᓅᓈᒡ ᐃᓂ ᐅᒫᒫᓐ: ᐌᑯᓀᓐ ᑫᑲᑴᒋᒪᒃ? ᐅᑮᐃᓈᓐ᙮ ᒦᑕᔥ ᑳᐃᑯᒡ: ᒞᓐ ᓰᑲᐊᑖᑫᐎᓂᓂ ᐅᑎᒀᓐ, ᒦᐃᐌᓂ ᑲᑴᑗᓐ, ᐅᑮᐃᑰᓐ᙮

6:25b.MAR.006.025 ᒦᑕᔥ ᐌᔩᑉ ᑳᐃᔑ ᓈᓯᑲᐙᒡ ᐃᓂ ᑭᒋᐅᑭᒫᓐ ᐁᐃᓈᒡ: ᔐᒫᒃ ᓂᓇᑕᐌᑖᓐ ᐃᐃ ᒞᓐ ᓰᑲᐊᑖᑫᐎᓂᓂ ᐅᑎᒀᓐ ᑭᒋᐅᓈᑲᓂᕽ ᒋᐊᑌᓂᒃ, ᒋᒦᔑᔭᓐ, ᑮᐃᑭᑐ ᐊᐊ ᐅᔥᑭᓃᑭᑴ᙮

6:26b.MAR.006.026 ᒦᑕᔥ ᑳᐃᔑ ᑭᒋ ᒥᒋᓇᐌᓯᒡ ᐊᐊ ᑭᒋᐅᑭᒫ᙮ ᑳᐐᓐ ᐃᑕᔥ ᑮᐃᓀᑕᓰ ᒋᐋᓉᑕᐙᒡ, ᐁᑮ ᑭᒋᐊᔓᑕᒪᐙᒡ ᐁᑮᓅᑖᑯᒡ ᑲᑭᓇ ᐃᓂᐌᓂᐗᐞ ᑳᑮᐐᑾᒫᒡ᙮

6:27b.MAR.006.027 ᔐᒫᒃ ᐃᑕᔥ ᐯᔑᒃ ᐅᑮᐊᑐᒫᓐ ᔑᒫᑲᓂᔕᓐ ᐁᑮᐊᓅᓈᒡ ᒋᐲᑑᓂᒡ ᐃᐃ ᒞᓇᓐ ᐅᑎᒀᓂᓂ᙮ ᒦᑕᔥ ᔐᒫᒃ ᑳᐃᔑ ᐃᔖᓂᒡ ᐌᑎ ᑭᐹᑾᐅᑏᐎᑲᒥᑯᕽ ᐁᑮᐊᐎ ᑮᔥᑭᑴᑕᐙᓂᒡ᙮

6:28b.MAR.006.028 ᒦᑕᔥ ᑳᐃᔑ ᐲᑑᓂᒡ ᐃᐃ ᐅᑎᒀᓂᒫ ᐅᓈᑲᓂᕽ, ᐁᑮᒦᓈᓂᒡ ᐃᓂ ᐅᔥᑭᓃᑭᑴᓐ᙮ ᒦᐃ ᑳᐃᔑ ᒦᓈᒡ ᐅᒫᒫᓐ ᐃᐃ ᐅᑎᒀᓂᒫ, ᐊᐊ ᐅᔥᑭᓃᑭᑴ᙮

6:29b.MAR.006.029 ᐊᐲ ᑕᔥ ᑳᓅᑕᒥᓂᒡ ᐃᐃ ᒞᓐ ᐅᑭᑭᓄᐊᒪᐙᑲᓇᐞ ᐅᑮ ᐱᓈᓯᑲᒥᓂ ᐃᐃ ᐐᔭᐤ, ᐁᑮᓂᑾᐊᒥᓂᒡ᙮

6:30b.MAR.006.030 ᐃᓂᐌᓂᐗᐞ ᐃᑕᔥ ᒋᓴᔅ ᑳᑮᒫᒋᓂᔕᐙᐸᓐ ᑮᐱ ᐃᔑᑮᐌᐗᐞ ᐃᐃᒫ ᐁᔑ ᐊᔮᒡ, ᐁᑮᐱ ᐐᑕᒫᑯᒡ ᑲᑭᓇ ᑫᑰᓐ ᑳᐸᐹᐃᔑᒋᑫᓂᒡ, ᑲᔦ ᑕᔥ ᑳᐸᐹᐃᔑᑭᑭᓄᐊᒫᑫᓂᒡ᙮

6:31b.MAR.006.031 ᒦᑕᔥ ᑳᐃᓈᒡ: ᐊᐯᔪᒃ, ᐃᑯᒋ ᐃᔖᑖ ᑮᓀᑕᐎᓐᑦ ᓂᔑᑫᐊᔭᐄ ᒋᐊᔮᔭᕽ ᐱᓇᒫ ᒋᐊᓉᐱᔦᒃ, ᐅᑮᐃᓈᐞ᙮ ᐋᓃᔥ ᓃᐱᐗᐞ ᐅᑮ ᐱᓈᓯᑳᑯᐙᐞ ᑲᔦ ᑮᐊᓂ ᒫᒫᒑᐗᐞ, ᐁᑮᐃᔑ ᐅᒑᓂᒪᑲᒥᑭᓯᐙᒡ ᒋᓴᔅ ᑲᔦ ᐅᑭᑭᓄᐊᒪᐙᑲᓇᐞ᙮ ᐊᐴᔥᑫ ᑳᐐᓐ ᑮᑕᐎᓭᓰᐗᒃ ᒋᐐᓯᓂᐙᒡ᙮

6:32b.MAR.006.032 ᒦᑕᔥ ᐃᐃ ᒌᒫᓂᕽ ᑳᐃᔑ ᒫᒌᐅᐙᒡ ᐌᑎ ᓂᔑᑫᐊᔭᐄᕽ ᐁᐐᐃᔖᐙᒡ ᐐᓀᑕᐙ᙮

6:33b.MAR.006.033 ᓃᐱᐗᐞ ᐃᑕᔥ ᐅᑮᐙᐸᒥᑯᐙᐞ ᐁᐊᓂ ᒫᑾᑯᒧᐙᒡ, ᐁᑮ ᑭᑫᓂᒥᑯᐙᒡ᙮ ᒦᑕᔥ ᑳᓂ ᐃᔑ ᐱᒫᔕᑳᒣᐸᐃᑎᓂᒡ ᐁᑮᐋᓯᑳᑯᐙᑦ ᐁᑮᐅᒌᓂᒡ ᐃᐃᒫ ᑲᑭᓇ ᐆᑌᓈᕽ᙮

6:34b.MAR.006.034 ᐊᐲ ᐁᐱᒥᔕᑳᒡ ᐋᔕ ᐅᑮᐙᐸᒫᐞ ᒋᓴᔅ ᐁᐹᑌᓄᓂᒡ ᐊᐎᔭᐞ ᑳᐱᒫᐗᒋᐃᑎᓂᒡ᙮ ᐅᑮ ᑭᑎᒫᑫᓂᒫᐞ ᐁᐃᔑ ᐊᔮᓂᒡ ᒫᓇᒑᓂᔑᕽ ᐁᑳ ᐊᐎᔭ ᐁᑲᓇᐌᓂᒥᑯᓯᓂᒃ᙮ ᒦᑕᔥ ᑳᐃᔑ ᒫᒌ ᑭᑭᓄᐊᒪᐙᒡ ᓃᐱᐗᐞ ᑫᑰᓐ᙮

6:35b.MAR.006.035 ᐋᔕ ᑕᔥ ᐁᐊᓂ ᐅᓈᑯᔑᓂᓂᒃ ᐅᑮᐱ ᑲᓅᓂᑰᐞ ᐅᑭᑭᓄᐊᒪᐙᑲᓇᐞ: ᐱᑾᒐᔭᐄ ᐅᐅᒫ, ᐋᔕ ᑕᔥ ᓈᒋᐅᓈᑯᔑᓐ᙮

6:36b.MAR.006.036 ᑕᑲ ᒫᒌᓂᔕᐅ ᐌᑎ ᐁᔑ ᐯᔓᐗᑭᓐ ᐊᔮᐎᓇᓐ ᑲᔦ ᐆᑌᓇᐌᓴᓐ, ᒋᐐᐊᑖᐌᐙᒡ ᑫᒦᒋᐙᒡ, ᐅᑮᐃᑰᐞ᙮

6:37b.MAR.006.037 ᒦᑕᔥ ᑳᐃᓈᒡ: ᑮᓇᐙ ᑯ ᒦᓂᑰᒃ ᑫᒦᒋᐙᒡ, ᐅᑮᐃᓈᐞ᙮ ᐅᐅ ᑕᔥ ᐅᑮᐃᑰᐞ: ᐋᓃᓐ ᑕᔥ ᓃᓇᐎᓐᑦ ᑫᔑ ᐊᑖᐌᔮᑭᐸᓐ ᐊᐊ ᒥᓂᒃ ᐸᑴᔑᑲᓐ ᒋᐊᔕᒪᑭᑣ? ᐃᑯᑣᓱᑮᓯᔅ ᐊᐗᔑᒣ ᑖᑮᐊᓄᑮ ᐊᐎᔭ ᐃᓂ ᒥᓂᒃ ᒋᑲᔥᑭᐋᐸᓐ ᔔᓂᔮᓐ, ᐅᑮᐃᑰᐞ᙮

6:38b.MAR.006.038 ᒦᑕᔥ ᑳᐃᓈᒡ: ᐊᐎ ᐙᐸᒥᑰᒃ ᐋᓃᓐ ᑕᔂᑎᒃ ᐸᑴᔑᑲᓐ ᐁᔮᐌᒃ, ᐃᑭᑐ᙮ ᐊᐲ ᑕᔥ ᑳᑭᑫᓂᒫᐙᒡ ᐋᓃᓐ ᒥᓂᒃ ᐁᔮᐙᐙᒡ ᐅᑮᐱ ᐃᓈᐙᓐ: ᓈᓇᓐ ᐊᔮᐗᒃ, ᔑᑾ ᓃᔑᓐ 2 ᑭᓅᔐᒃ, ᐃᑭᑐᐗᒃ᙮

6:39b.MAR.006.039 ᒋᓴᔅ ᐃᑕᔥ ᐅᑮᐃᓈᐞ ᑲᑭᓇ ᒋᐊᔫᑾᐱᓂᒡ ᐃᐃᒫ ᐁᔑ ᒥᓋᔥᑯᓯᐗᓂᓂᒃ᙮

6:40b.MAR.006.040 ᒦᑕᔥ ᑳᐃᔑ ᐊᔫᑾᐱᓂᒡ, ᐋᓂᓐᑦ ᓀᓂᑯᑣᒃ, ᐋᓂᓐᑦ ᓀᓈᓂᒥᑕᓇ ᐁᑮ ᑌᑕᓱᐱᐙᒡ᙮

6:41b.MAR.006.041 ᐊᐊ ᑕᔥ ᒋᓴᔅ ᐅᑮᐅᑖᐱᓈᐞ ᐃᐃ ᓈᓇᓐ ᐸᑴᔑᑲᓇᐞ ᑲᔦ ᐃᐃ ᓃᔑᓐ ᑭᓅᔐᐞ᙮ ᐃᔥᐱᒥᕽ ᐃᑕᔥ ᑮᐃᓈᐱ, ᐁᑮᓇᓈᑯᒧᒡ, ᐁᑮ ᐸᐸᑴᐱᓈᒡ ᐸᑴᔑᑲᓇᐞ, ᐁᑮᓀᓈᐎᓇᒪᐙᒡ ᐅᑭᑭᓄᐊᒪᐙᑲᓇᐞ ᒋᒫᒫᑕᐆᑮᓂᒡ᙮ ᑲᔦ ᑯ ᐃ ᓃᔑᓐ ᑭᓅᔐᐞ ᐅᑮᓀᓇᐎᓇᒪᐙᐞ ᒋᒫᒫᑕᐆᓂᒥᓐᒡ ᐁᑕᔑᓂᒡ᙮

6:42b.MAR.006.042 ᒦᔥ ᐃᐃ ᑲᑭᓇ ᑳᐅᒋ ᑌᐐᓯᓂᓂᒡ᙮

6:43b.MAR.006.043 ᒦᑕᔥ ᑳᐃᔑ ᐸᐹ ᒫᐗᑑᓇᒧᐙᒡ ᐃᔥᑾᒋᑲᓇᓐ ᐃᑭᐌ ᑭᑭᓄᐊᒪᐙᑲᓇᒃ, ᐸᑫᔑᑲᓇᐞ ᑲᔦ ᑭᓅᔐᐞ᙮ ᒥᑖᔑᓃᔑᓐ ᐐᑯᐲᒪᑲᑰᓐ ᑮᒨᔥᑭᓀᓂᐗᓐ᙮

6:44b.MAR.006.044 ᐃᑭᐌᓂᐗᒃ ᐃᑕᔥ ᑳᑮᐐᓯᓂᐙᒡ, ᓈᓂᕽ ᒥᑖᔂᒃ 5,000 ᑮᑕᔑᐗᒃ ᐃᑭ ᐃᓂᓂᐗᒃ᙮

6:45b.MAR.006.045 ᒦᔥ ᐃᐃ ᔐᒫᒃ ᑳᐃᔑ ᑲᓅᓈᒡ ᐅᑭᑭᓄᐊᒪᐙᑲᓇᐞ ᐊᐌ ᒋᓴᔅ: ᒦᐃ ᑮᓇᐙ ᐊᓂ ᐃᔑᒫᒌᐅᒃ᙮ ᐌᑎ ᐊᑳᒥᕽ ᐆᑌᓇᐌᓯᕽ ᐊᓂ ᐃᔑᒥᔕᑳᒃ ᐯᓭᑕ ᑳᐃᔑᓂᑳᑌᒃ᙮ ᐹᓂᒫ ᑲᔦ ᓃᓐ ᓂᑲᐱ ᐃᔑ ᑕᑯᔑᓐ, ᐅᑮᐃᓈᐞ᙮ ᐊᑲᐌ ᑕᔥ ᐐᓐ ᐅᑮ ᑲᓅᓈᐞ ᐃᓂ ᑳᒫᒪᐌᓄᓂᒡ ᒋᐊᓂ ᑮᐌᓂᒡ᙮

6:46b.MAR.006.046 ᐊᐲ ᑕᔥ ᑳᐴᔔᐋᒡ, ᐐᓀᑕ ᑮᐃᔖ ᐁᐱᑾᑎᓈᓂᒃ ᐁᑮᐊᐎ ᐊᓇᒥᐋᒡ᙮

6:47b.MAR.006.047 ᐊᐲ ᑕᔥ ᐁᓂᒥᑮᔑᑲᓂᓂᒃ ᐋᔕ ᒥᔕᐗᑳᒻ ᑮᐊᔮᐗᐞ ᐅᑭᑭᓄᐊᒪᐙᑲᓇᐞ ᐃᐃᒫ ᒌᒫᓂᕽ᙮ ᐐᓐ ᐃᑕᔥ ᐐᓐ ᒋᓴᔅ ᓂᔑᑫ ᑮᐊᔮ ᒥᑕᑲᒥᒃ᙮

6:48b.MAR.006.048 ᐅᑮᐙᐸᒫᐞ ᐃᑕᔥ ᐅᑭᑭᓄᐊᒪᐙᑲᓇᐞ ᐁᑮᐅᒑᓂᒪᐅᑯᓂᒡ ᐁᑲᑴ ᐊᔐᐳᔦᓂᒡ ᐁᐅᒋᔥᑲᐗᐊᒥᓂᒡ᙮ ᐹᓂᒫ ᑕᔥ ᐊᐲ ᐹᑖᐸᓂᓂᒃ ᐅᑮᓈᓯᑲᐙᐞ, ᐁᑮ ᐱᒧᓭᒡ ᐗᑭᒋᐲᒃ ᐁᑮᐐᐊᓂ ᒪᔮᔥᑲᐙᒡ᙮

6:49b.MAR.006.049 ᐊᐲ ᑕᔥ ᑳᐙᐸᒫᐙᒡ ᐁᐗᑭᒋᐲᑭᓇᒥᓂᒡ, ᒌᐸᔾ ᒫᐐᓐ ᐊᐊᐌ, ᑮᐃᓀᑕᒨᒃ, ᐁᑮ ᔖᑯᐌᐙᒡ᙮

6:50b.MAR.006.050 ᐋᓃᔥ ᑲᑭᓇ ᐅᑮᐙᐸᒫᐙᓐ, ᑳᑮᐅᒋ ᓭᑭᓯᐙᒡ᙮ ᔐᒫᒃ ᐃᑕᔥ ᐅᑮ ᑲᓅᓂᑯᐙᓐ ᒋᓴᓲᓐ: ᒪᔥᑲᐎᑌᐁᒃ! ᐅᑮᐃᑯᐙᓐ᙮ ᓃᓐ ᐅᔕ! ᑫᑯ ᓭᑭᓯᑫᒃ, ᐅᑮᐃᑯᐙᓐ᙮

6:51b.MAR.006.051 ᒦᑕᔥ ᑳᐃᔑ ᐴᓯᓄᑖᑯᐙᒡ᙮ ᒦ ᑳᐃᔑ ᑭᐱᑖᓂᒪᒃ᙮ ᐐᑫ ᑕᔥ ᑮᑸᓇᐎ ᐃᓀᑕᒨᒃ᙮

6:52b.MAR.006.052 ᑳᐐᓐ ᐋᓃᔥ ᒪᔑ ᐅᑮᓂᓯᑖᐌᑕᓰᓈᐙ ᐃᐌ ᑳᑑᒋᑲᓂᐎᓂᒡ ᐸᑴᔑᑲᓇᐞ, ᐅᓵᒻ ᐁᑮ ᐯᑌᑕᒧᐙᒡ᙮

6:53b.MAR.006.053 ᒦ ᓴ ᑳᐃᔑ ᐋᔕᐗᐊᒧᐙᒡ, ᐁᑮᐃᔑ ᒥᔕᑳᐙᒡ ᐊᑮᕽ ᑫᓀᓴᕒᐃᑦ ᐁᐃᔑᓂᑳᑌᒃ, ᐁᑮ ᑭᒋᐙᑾᐱᑑᐙᒡ ᐅᒌᒫᓂᐙ᙮

6:54b.MAR.006.054 ᐱᒌᓇᒃ ᐃᑯ ᐁᑲᐹᐙᒡ ᐅᑮᓂᓯᑖᐎᓈᑰᐞ ᒋᓴᔅ ᐃᐃ ᐯᒫᑎᓯᓂᒡ᙮

6:55b.MAR.006.055 ᒥᓯᐌ ᐊᔮᐎᓂᕽ ᐊᐎᔭᒃ ᐅᑮ ᐸᐹ ᐃᔑ ᓈᒋᐸᐋᐙᐞ ᐅᑖᑯᓰᐞ ᐁᐱ ᐃᔑᐎᓈᐙᒡ ᐅᑕᐱᔑᒧᓂᓃᕽ ᐁᐱᒥᔑᓂᓂᒡ ᐃᐃᒫ ᐁᓅᑕᒧᐙᒡ ᒋᓴᓲᓐ ᐁᐊᔮᓂᒡ᙮

6:56b.MAR.006.056 ᒦᑕᔥ ᐋᑎ ᑯ ᑳᐃᔖᒡ ᒋᓴᔅ, ᐆᑌᓇᐌᓯᕽ ᑲᔦ ᑭᒋᐆᑌᓈᕽ, ᑲᔦ ᐅᐱᒣᔭᐄ, ᐅᑮᐃᔑ ᐱᒥᔑᒫᐙᐞ ᐅᑖᑯᓰᐞ ᐃᐃᒫ ᐁᑕᔑ ᐊᑖᐌᕽ᙮ ᔑᑾ ᑕᔥ ᐅᑮ ᐸᑯᓭᓂᒫᐙᓐ ᒋᓴᓲᓐ: ᑕᑲ ᐅᑲ ᒥᒋᓵᒥᓈᓈᐙ ᐗᓇᑴᒃ ᑭᑭᑭᔥᑭᑲᓂᕽ, ᐅᑮᐃᓈᐙᓐ᙮ ᐊᐌᓀᓇᒃ ᐃᑕᔥ ᐃᑯ ᑳᓵᒥᓇᕽ ᐗᐐᑫ ᑮᒥᓄᐊᔮᐗᒃ᙮

7

7:1b.MAR.007.001 ᐃᑯᑎᕽ ᐃᑕᔥ ᐁᑮᔑᑲᒃ ᐅᑮᐱ ᐅᑎᓯᑰᐞ ᒋᓴᔅ ᐃᐃ ᐯᕒᐊᓰᐎᓂᓂᐗᐞ ᑲᔦ ᐋᓂᓐᑦ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ, ᒉᕒᐆᓴᓬᐊᒥᕽ ᐁᑮᐱ ᐅᒌᓂᒡ᙮

7:2b.MAR.007.002 ᐅᑮᐙᐸᒫᓂ ᐋᓂᓐᑦ ᐃᐃ ᒋᓴᔅ ᐅᑭᑭᓄᐊᒪᐙᑲᓇᐞ ᐁᑮᐐᓯᓂᓂᒡ ᐁᑳ ᐁᐯᑭᓂᒌᓯᓂᒃ, ᐁᑳ ᐊᑲᐌ ᐁᑮᐃᔑ ᑭᓰᓂᒌᓯᓂᒃ ᑖᐱᔥᑰ ᐁᐃᔑᑣᐙᒡ ᐃᑭ ᐯᕒᐊᓰᐎᓂᓂᐗᒃ᙮

7:3b.MAR.007.003 ᐃᑭ ᐋᓃᔥ ᐯᕒᐊᓰᐎᓂᓂᐗᒃ ᑲᔦ ᐃᑭ ᒎᐗᒃ ᑲᑭᓇ ᑳᐐᓐ ᐐᓯᓂᓰᐗᒃ ᐁᑳ ᒪᔑ ᐌᐌᓂ ᐁᑭᓰᓂᒌᓯᒀ, ᐁᐃᔑ ᑲᓇᐌᑕᒧᐙᒡ ᐃᐃ ᑳᐃᔑ ᐋᔮᓂᑫ ᑭᑭᓄᐊᒫᑎᐙᒡ ᐃᑭ ᒣᐎᔕ ᑳ ᐱᒫᑎᓯᐙᑯᐸᓀᓐ᙮

7:4b.MAR.007.004 ᐊᐲ ᑕᔥ ᐃᑯ ᐃᐃᒫ ᑳᐱᐅᒋ ᑕᑯᔑᓄᐙᒡ ᐃᐃᒫ ᐊᑖᐌᐎᑲᒥᑯᕽ, ᑳ ᒪᔑ ᐐᓯᓂᓰᐗᒃ, ᐱᓇᒫᔥ ᒋᑭᓰᔮᐹᐗᓂᑎᓱᐙᒡ᙮ ᓃᐱᐗᐞ ᑲᔦ ᑫᑰᓇᓐ ᑳᐅᑖᐱᓇᒧᐙᒡ ᒋᑲᓇᐌᑕᒧᐙᒡ, ᐅᐌ ᑖᐱᔥᑰ ᐌᐌᓂ ᒋᑭᓰᓯᐸᑑᐙᒡ ᒥᓂᒀᑲᓇᓐ, ᐊᑑᐹᓇᓐ, ᐅᓵᐙᐱᑯᓈᑲᓇᓐ, ᓃᐯᐎᓈᑰᓐ ᑲᔦ᙮

7:5b.MAR.007.005 ᒦᑕᔥ ᑳᐃᔑ ᑲᑴᒋᒫᐙᒡ ᐃᑭ ᐯᕒᐊᓰᐎᓂᓂᐗᒃ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ: ᐌᑯᓀᔥ ᑳᐅᒋ ᐃᔑᒋᑫᓯᒀ ᐃᑭ ᑭᑭᑭᓄᐊᒪᐙᑲᓇᒃ ᐃᐃᐌ ᑳᑮᐋᓂᑫᑲᑲᓅᓂᒥᓇᒀ ᐃᓂᐌᓂᐗᐞ ᒣᐎᔕ ᑳᐱᒫᑎᓯᓂᑯᐸᓀᓐ, ᒦ ᑯ ᑭᑭ ᐐᓂᓂᓐᒡ ᐁᐃᔑᐐᓯᓂᐙᒡ? ᑮᐃᑭᑐᐗᒃ᙮

7:6b.MAR.007.006 ᐅᑮᓇᑴᑕᐙᐞ ᐃᑕᔥ ᒋᓴᔅ: ᑮᓇᐙ ᐅᒥᓍᑎᓰᔑᑑᒃ! ᑾᔭᒃ ᑭᑮ ᑎᐹᒋᒥᑯᐙ ᐊᐌ ᐋᐃᓭᔭ ᐁᑮ ᑲᓅᑕᒪᐙᒡ ᑭᔐᒪᓂᑑᓐ, ᒦ ᓴ ᐅ ᑳᐃᔑᐲᐊᕽ: ᑭᔐᒪᓂᑑ ᐃᑭᑐ: ᐗᑭᒐᔭᐄ ᓂᑖᓇ ᐊᐲᒋᒥᓄᑕᔑᒥᑰᒃ ᐅᑯ ᐯᒫᑎᓯᐙᒡ, ᐅᑌᐃᐙᕽ ᐃᑕᔥ ᓂᓈᐙᐸᒥᑰᒃ᙮

7:7b.MAR.007.007 ᐊᓂᔖ ᓂᑕᓇᒥᐁᑖᑰᒃ, ᐋᓃᔥ ᐃᔑᑭᑭᓄᐊᒫᑫᐗᒃ ᐃᓂᓃᓈᕽ ᐁᐅᒌᒪᑲᓂᓂᑭᓐ ᐃᓈᑯᓂᑫᐎᓇᓐ, ᑖᐱᔥᑰ ᐁᐋᐗᓂᓂᑭᓐ ᑭᔐᒪᓂᑑ ᐅᑭᑭᓄᐊᒫᑫᐎᓇᓐ, ᐃᔑᐲᐃᑳᑌ᙮

7:8b.MAR.007.008 ᒦᐃ ᑮᓇᐙ ᑯ ᑭᑖᓇᐌᑖᓈᐙ ᐃᐌ ᑭᔐᒪᓂᑑ ᐅᑎᓈᑯᓂᑫᐎᓐ᙮ ᒣᔥᑾᒡ ᑭᑲᓇᐌᑖᓈᐙᓐ ᐃᓂ ᐃᓂᓂᐗᒃ ᐅᑖᓂᑫ ᑭᑭᓄᐊᒫᑎᐎᓂᐙᓐ, ᐅᑮᐃᓈᐞ᙮

7:9b.MAR.007.009 ᔑᑾ ᑕᔥ ᑮᐊᓂ ᐃᑭᑐ: ᒫᒪᑳᒡ ᑭᑎᔑᒋᑫᒻ! ᐌᐌᓂ ᐁᐋᓇᐌᑕᒣᒃ ᑭᔐᒪᓂᑑ ᐅᑎᓈᑯᓂᑫᐎᓐ, ᓇᐗᒡ ᐁᐐ ᑲᓇᐌᑕᒫᑎᓱᔦᒃ ᑮᓇᐙ ᑭᑖᓂᑫ ᑭᑭᓄᐊᒫᑎᐎᓂᐙᓐ!

7:10b.MAR.007.010 ᒨᓯᔅ ᐋᓃᔥ ᐅᐅ ᑮᐃᓈᑯᓂᑫ: ᑭᑲ ᑭᒋ ᐃᓀᓂᒫ ᑭᑌᑌ ᑲᔦ ᑭᒫᒫ᙮ ᐅᐅᐌ ᑲᔦ ᑮᐃᑭᑐ: ᐊᐌᓀᓐ ᑫᐃᓈᒡ ᐅᑌᑌᓐ ᑯᒫ ᑲᔦ ᐅᒫᒫᓐ: ᑭᓇᑕᐌᓂᒥᓐ ᒋᒫᔑᓭᔭᓐ ᐃᓈᒡ, ᑫᒋᓈᒡ ᒋᓂᓵᑲᓂᐎᒡ, ᑮᐃᑭᑐ᙮

7:11b.MAR.007.011 ᑮᓇᐙᔥ ᐐᓐ ᑭᑎᑭᑐᒻ: ᐃᓂᓂ ᐅᑲ ᐃᓈᓐ ᐅᑌᑌᓐ ᑯᒫ ᑲᔦ ᐅᒫᒫᓐ: ᐅᐅᐌ ᑳᐐᒦᓂᓇᑰᑭᐸᓐ ᒋᐐᒋᐃᑯᔦᑭᐸᓐ, ᒦ ᐅᐌ ᒀᕒᐹᓐ, ᐅᑲ ᐃᓈᓐ᙮ ᒦ ᐅᐌ ᑳᐃᒋᑳᑌᒃ, ᑭᔐᒪᓂᑑ ᑳᑎᐯᑕᕽ᙮

7:12b.MAR.007.012 ᒦᑕᔥ ᐅᐌ ᓇᑫ ᐁᔑ ᑭᐱᑎᓀᒃ ᐊᐎᔭ ᐁᑳ ᒋᐐᒋᐋᓯᒃ ᐃᓂ ᐅᑌᑌᓐ ᑲᔦ ᐅᒫᒫᓐ᙮

7:13b.MAR.007.013 ᐋᓃᔥ ᒦᐃᐌ ᑳᐅᒋ ᐋᓂᓯᑑᔦᒃ ᑭᔐᒪᓂᑑ ᐅᑎᑭᑐᐎᓐ, ᑮᓇᐙ ᑯ ᐁᑭᑭᓄᐊᒫᑫᔦᒃ ᑭᑖᓂᑫ ᑭᑭᓄᐊᒫᑎᐎᓂᐙ᙮ ᓃᐱᐗᐞ ᐅᐌ ᑎᓄ ᑫᔮᐱ ᑭᑎᔑᒋᑫᒻ, ᑮᐃᑭᑐ ᒋᓴᔅ᙮

7:14b.MAR.007.014 ᒦᑕᔥ ᒦᓇᐙ ᑳᐃᔑ ᐊᑐᒫᒡ ᒋᓴᔅ ᐃᐃ ᑳᒫᒪᐌᓄᓂᒡ, ᐁᑮᐃᓈᒡ: ᐱᓯᑕᐎᔑᒃ ᑲᑭᓇ ᐁᑕᔑᔦᒃ! ᑲᑴᓂᓯᑐᑕᐎᔑᒃ ᐙᐃᓂᓇᑰᒃ᙮

7:15b.MAR.007.015 ᑳᐐᓐ ᐅᒋ ᐐᓈᑎᓯᓰ ᐊᐎᔭ ᐃᐃᐌᓂ ᑳᒦᒋᒡ᙮ ᐃᓇᔥᑫ ᒦᐃᐌ ᐅᑎᓀᑕᒧᐎᓐ ᑲᔦ ᐅᑑᑕᒧᐎᓐ ᑳᐅᒋ ᐐᓈᑎᓯᒡ, ᑮᐃᑭᑐ᙮

7:17b.MAR.007.017 ᐹᓂᒫ ᑕᔥ ᑮᓇᑲᓈᒡ ᒋᓴᔅ ᐅᐅ ᑳᐅᑴᓄᓂᒡ, ᐁᑮ ᐱᐲᑎᑫᒡ ᐙᑳᐃᑲᓂᕽ, ᐅᑮ ᑲᑴᒋᒥᑰᐞ ᐅᑭᑭᓄᐊᒪᐙᑲᓇᐞ: ᐋᓃᔥ ᐁᒋᑳᑌᒃ ᐅᐅ ᑭᑭᓄᐊᒫᑫᐎᓐ? ᐅᑮᐃᑰᐞ᙮

7:18b.MAR.007.018 ᐅᑮᐃᓈᐞ ᐃᑕᔥ: ᑳ ᒪᔑ ᑫᑮᓇᐙ ᑭᓂᓯᑐᑕᓰᒻ᙮ ᑳᐐᓐ ᐃᓇ ᒪᔑ ᑭᑭᑫᑕᓰᒻ? ᐃᐃ ᒦᒋᒻ ᐗᑭᒐᔭᐄ ᐁᐅᒌᒪᑲᒃ, ᐊᐲ ᒦᒋᒡ ᐊᐎᔭ, ᑳᐐᓐ ᐅᑖ ᐐᓈᒋᐃᑯᓰᓐ᙮

7:19b.MAR.007.019 ᐋᓃᔥ ᑳᐐᓐ ᐃᔖᒪᑲᓯᓂᓂ ᐃᐃ ᒦᒋᒻ ᐃᐃᒫ ᑳᐅᒋ ᓈᓈᑲᑕᐌᑕᕽ, ᐃᐃᒫᔥ ᐐᓐ ᐅᒥᓴᑖᕽ ᐃᔖᒪᑲᓂᓂ᙮ ᒦᐃᒫ ᐁᓂᐅᒋ ᓵᑲᐊᒨᒪᑲᓂᓂᒃ, ᑮᐃᑭᑐ᙮ ᒦ ᐅᐌ ᑳᐃᑕᕽ ᒋᓴᔅ, ᑲᑭᓇ ᑯ ᑎᓄ ᒦᒋᒻ ᐁᐯᑫᑖᑾᓂᓂᒃ᙮

7:20b.MAR.007.020 ᔑᑾ ᑮᐊᓂ ᐃᑭᑐ: ᐃᐃᐌ ᑳᐃᓀᑕᕽ ᒦᓇ ᑳᑑᑕᕽ ᐊᐎᔭ, ᒦᐃᐌ ᑳᐅᒋ ᐐᓈᑎᓯᒡ᙮

7:21b.MAR.007.021 ᒦ ᐋᓃᔥ ᐃᐃᒫ ᐌᒋ ᓈᑲᑕᐌᑕᒥᕽ ᐌᒌᒪᑲᓂᓂᑭᓐ ᐅᒪᒋ ᐃᓀᑕᒧᐎᓂᐙᓐ ᐊᐎᔭᒃ᙮ ᒦ ᐅᐌ ᑳᐅᒋ ᒪᒋᑑᑕᒧᐙᒡ᙮ ᐱᔑᒀᑎᓯᐗᒃ, ᑭᒨᑎᔥᑭᐗᒃ, ᓂᔑᐌᐗᒃ, ᐸᑳᓐ ᐊᐎᔭ ᐅᐐᑎᑫᒫᑲᓂᓂ ᐅᐱᒣᑕᒪᐙᐙᐞ᙮

7:22b.MAR.007.022 ᔑᑾ ᐅᒥᓴᐌᑕᒪᐙᐙᐞ ᐸᑳᓐ ᐊᐎᔭᐞ ᐅᑕᔭᐄᒥᓂ, ᔑᑾ ᐊᓅᒋᑯ ᐃᔑᒋᑫᐗᒃ᙮ ᐗᔦᔑᑫᐗᒃ, ᐊᓅᒋᑯ ᐅᒥᓉᑖᓈᐙ, ᐅᑌᑕᒨᒃ, ᑕᔑᒥᐌᐗᒃ, ᐃᔥᐯᓂᑎᓱᐗᒃ, ᑲᑮᐹᑎᓯᐗᒃ᙮

7:23b.MAR.007.023 ᒦᐗᓄᓄ ᑲᑭᓇ ᐌᒌᒪᑲᑭᓐ ᐌᒋ ᓈᑲᑕᐌᑕᕽ ᐊᐎᔭ᙮ ᒦᐃ ᑳᐅᒋ ᐐᓀᑖᑯᓯᒡ ᐃᓂᓂ, ᑮᐃᑭᑐ ᒋᓴᔅ᙮

7:24b.MAR.007.024 ᑮᐊᓂᐅᒋ ᒫᒑ ᒋᓴᔅ, ᐌᑎ ᓇᑫ ᐁᐊᓂ ᐃᔖᒡ ᐊᔮᐎᓂᕽ, ᐯᔓ ᐃᒫ ᑳᐃᔑ ᐆᑌᓇᐗᓂᓂᒃ, ᑕᔭᕒ ᐁᐃᔑᓂᑳᑌᓂᒃ ᐆᑌᓇ᙮ ᒦᑕᔥ ᑮᐊᓂ ᐲᑎᑫ ᐙᑳᐃᑲᓂᕽ, ᐁᑮᐃᓀᑕᕽ ᐁᑳ ᐊᐎᔭᓐ ᒋᑭᑫᓂᒥᑯᓯᒃ ᐃᐃᒫ ᐁᐊᔮᒡ᙮ ᑳᐐᓐ ᐃᑕᔥ ᐅᑮ ᑲᔥᑭᑑᓰᓐ ᒋᑮᒨᒋ ᐊᔮᒡ᙮

7:25b.MAR.007.025 ᐯᔑᒃ ᐃᑕᔥ ᑮᐊᔮ ᐃᑴ, ᐁᑮ ᑭᑭᔥᑲᐙᓂᒡ ᒪᒋᐊᒑᑾᓐ ᐅᑖᓂᓭᓴᓐ᙮ ᔐᒫᒃ ᐁᓅᑕᕽ ᐊᐊ ᐃᑴ ᐃᐃᒫ ᐁᐊᔮᓂᒡ ᒋᓴᓲᓐ, ᑮᐱ ᐃᔑ ᐊᓂᒥᑯᐸᓂᐅ ᐁᔑ ᓯᑌᑳᐸᐎᓂᒡ᙮

7:26b.MAR.007.026 ᑳᐐᓐ ᒎ ᐊᑮᕽ ᑮᐅᒌᓰ ᐊᐊ ᐃᑴ, ᐃᐃᒫ ᑕᔥ ᑮᐊᔨᑖ ᐱᓃᔑᔭ ᐊᑮᕽ ᓰᕒᐃᔭ ᐊᑮᕽ ᑳᐅᒋ ᑎᐯᑖᑾᓂᓂᒃ᙮ ᐅᑮ ᐸᑯᓭᓂᒫᓐ ᐃᓂ ᒋᓴᓲᓐ, ᐃᑯᒋ ᒋᐅᒋ ᒫᒌᓂᔕᐙᓂᒡ ᐃᓂ ᒪᒋᐊᒑᑾᓐ ᑳᑭᑭᔥᑲᐙᓂᒡ ᐅᑖᓂᓭᓴᓐ᙮

7:27b.MAR.007.027 ᒋᓴᔅ ᐃᑕᔥ ᐅᑮᐃᓈᓐ ᐃᓂ ᐃᑴᐗᓐ: ᑳᐐᓐ ᑾᔭᑯᒋᑫᓈᓂᐗᓯᓅᓐ ᒋᐅᑖᐱᓇᒪᐎᑣᐸᓐ ᐃᑭ ᐊᐱᓅᒌᔕᒃ ᐅᒦᒋᒥᒥᐙ ᒋᐊᔕᒥᑣᐸᓐ ᐃᑭ ᐊᓂᒨᓴᒃ᙮ ᐊᑲᐌ ᓂᑕᒻ ᑕᔭᔕᒫᐗᒃ ᐃᑭ ᐊᐱᓅᒌᔕᒃ, ᐅᑮᐃᓈᓐ᙮

7:28b.MAR.007.028 ᐅᑮᓇᑴᑖᑰᓐ ᐃᑕᔥ ᐃᓂ ᐃᑴᐗᓐ: ᑭᑌᐺ, ᐊᐴᔥᑫᔥ ᐐᓇᐙ ᐊᓂᒨᓴᒃ ᐅᒦᒋᓈᐙ ᐊᐱᓅᒌᔕᐞ ᑳᐲᐗᑕᒥᓂᒡ ᔒᐹᐐᓯᓂᐎᓈᑎᒃ, ᐅᑮᐃᑰᓐ᙮

7:29b.MAR.007.029 ᒦᑕᔥ ᑳᐃᓈᒡ ᒋᓴᔅ ᐃᓂ ᐃᑴᐗᓐ: ᐱᓵᓐ ᐊᓂᑮᐌᓐ, ᐅᒋ ᐃᐌ ᐁᑮᒥᓄᓇᑴᑕᒪᓐ᙮ ᒦᐃ ᑮᓇᑲᓂᑯᒡ ᑭᑖᓂᔅ ᐃᓂ ᒪᒋᐊᒑᑾᓐ, ᐅᑮᐃᓈᓐ᙮

7:30b.MAR.007.030 ᒦᑕᔥ ᑳᐊᓂ ᐃᔑᑮᐌᒡ ᐊᐊ ᐃᑴ᙮ ᐅᑮᒥᑲᐙᓐ ᐃᓂ ᐅᑕᐱᓅᒌᔑᒪᓐ ᐁᐱᒥᔑᓂᓂᒡ ᓂᐯᐎᓂᕽ, ᐁᑮᓇᑲᓂᑯᓂᒡ ᐃᓂ ᒪᒋᐊᒑᑾᓐ᙮

7:31b.MAR.007.031 ᒦᓇᐙ ᑕᔥ ᑮᐊᓂᐅᒋ ᒫᒑ ᒋᓴᔅ ᐃᐃᒫ ᐊᑮᕽ ᑳᑕᑯᓂᓂᒃ ᑕᔭᕒ, ᐌᑎ ᐁᑮᐊᓂ ᐃᔖᒡ ᓵᐃᑕᓃᐎ ᐆᑌᓈᕽ, ᐲᓂᔥ ᐌᑎ ᑳᓬᐊᓬᐄᐎ ᓵᑲᐃᑲᓃᕽ, ᐁᑮᐊᓂ ᑕᑶᔑᕽ ᑲᔦ ᐊᑮᕽ, ᒥᑖᓱ ᐆᑌᓇᐎ ᐊᑭ ᑳᐃᔑᓂᑳᑌᒃ᙮

7:32b.MAR.007.032 ᑮᐱ ᐃᔑᐎᑕᐙ ᑕᔥ ᐃᓂᓂᐗᓐ ᑳᑲᑮᐱᑌᓂᒡ, ᐸᑮ ᐁᑕ ᐁᐅᑲᑭᑐᐎᓂᓂᒡ, ᐁᐸᑯᓭᓂᒥᓐᒡ ᒋᓵᒥᓈᒡ ᒋᒥᓄᐊᔮᐋᒡ᙮

7:33b.MAR.007.033 ᐅᐱᒣᔭᐄ ᑕᔥ ᐅᑮᐃᔑᐎᓈᓐ ᐁᔑ ᐊᔮᓯᓂᒃ ᐃᐃ ᑳᐃᔑ ᒫᒪᐌᓄᓂᒡ᙮ ᒦᑕᔥ ᑳᐃᔑ ᐸᐲᒋᑕᐗᑫᓈᒡ᙮ ᒦᑕᔥ ᑳᐃᔑ ᓯᒀᑕᕽ ᐊᐊ ᒋᓴᔅ ᐅᓂᓐᒡ, ᐁᑮᐃᔑ ᓵᒥᓇᒪᐙᒡ ᐅᑌᓇᓂᐎᓂ᙮

7:34b.MAR.007.034 ᒦᑕᔥ ᑭᒋᑮᔑᑯᕽ ᐃᓇᑫ ᐁᐃᓈᐱᒡ, ᑮᑭᒋᐸᑭᑕᓈᒧ᙮ ᐅᑮᐃᓈᓐ ᐃᑕᔥ ᐃᓂ ᐃᓂᓂᐗᓐ: ᐁᐹᑖ! ᒦ ᐅᐌ ᑳᐃᑕᕽ, ᔐᓭᓐ!

7:35b.MAR.007.035 ᔐᒫᒃ ᑮᔐᑕᐗᑫᓭ ᐊᐊ ᐃᓂᓂ, ᑲᔦ ᐅᑌᓇᓂᐤ ᑮᓅᑲᓂᓂ᙮ ᒦᑕᔥ ᑲᔦ ᑾᔭᒃ ᑮᒫᒌᑮᑭᑐ᙮

7:36b.MAR.007.036 ᒦᑕᔥ ᒋᓴᔅ ᑳᐃᔑ ᐊᔮᒀᒥᒫᒡ ᑲᑭᓇ ᐁᑳ ᒋᐐᑕᒪᐙᓯᓂᒃ ᐊᐎᔭᓐ᙮ ᐋᓇᑮ ᑭᒋ ᐊᔮᒀᒥᒫᒡ, ᐋᒋᑯᔥ ᐊᐗᔑᒣ ᑮᑭᒋᐐᑕᒫᑫᐗᐞ᙮

7:37b.MAR.007.037 ᐐᑫ ᑕᔥ ᑲᑭᓇ ᑮᑭᒋᑯᔥᑴᑕᒨᒃ ᐁᐃᑭᑐᐙᒡ: ᒥᓯᐌ ᑮᒥᓄᒋᑫ! ᐊᐴᔥᑫ ᐅᑲᔥᑭᐋᐞ ᐃᓂᐌᓂᐗᐞ ᑳᑲᑮᐱᑌᓂᒡ ᒋᓅᑕᒫᓂᒡ, ᑲᔦ ᑳᓂᑖᐌᓯᓂᒃ ᒋᑲᑭᑐᓂᒡ! ᑮᐃᑭᑐᐗᒃ᙮

8

8:1b.MAR.008.001 ᒦᑕᔥ ᐹᓂᒫ ᐁᓂ ᑮᔑᑲᓂᓂᑭᓐ ᑭᒋᓃᐱᐗᐞ ᑳᒫᐗᒋᐃᑎᐙᒡ, ᑳᐐᓐ ᑫᑰᓐ ᐅᑮᐊᔮᓰᓈᐙ ᑫᒦᒋᐙᒡ᙮ ᐅᑮᐊᑐᒫᐞ ᐃᑕᔥ ᒋᓴᔅ ᐃᐃ ᐅᑭᑭᓄᐊᒪᐙᑲᓇᐞ ᐁᑮ ᑲᓅᓈᒡ:

8:2b.MAR.008.002 ᓂᑭᑎᒫᑫᓂᒫᒃ ᐃᓴ ᐅᑯ ᐯᒫᑎᓯᐙᒡ᙮ ᓂᓱᑮᔑᒃ ᐋᔕ ᓂᐐᒌᐎᑰᒃ, ᐁᑳ ᑫᔮᐱ ᑫᑰᓐ ᐁᐊᔮᓯᒀ ᑫᒦᒋᐙᒡ᙮

8:3b.MAR.008.003 ᑮᔥᐱᓐ ᐃᔑᑮᐌᓂᔕᐗᒀ, ᐁᑳ ᐊᑲᐌ ᐐᓯᓂᓯᒀ, ᑕᓅᑌᔑᓅᒃ, ᐋᓃᔥ ᐙᓴ ᐋᓂᑕ ᑮᐅᒌᐗᒃ, ᑮᐃᑭᑐ᙮

8:4b.MAR.008.004 ᒦᑕᔥ ᑳᐃᔑ ᓇᑴᑖᑯᒡ: ᐋᓐ ᑕᔥ ᑌᒥᓂᒃ ᑫᐅᒋ ᐊᔕᒪᒀᐸᓐ ᐸᑴᔑᑲᓇᐞ, ᐅᐅᒫ ᐱᑾᑕᑲᒥᑳᕽ ᐁᐊᔮᔭᕽ? ᐅᑮᐃᑰᐞ᙮

8:5b.MAR.008.005 ᒦᑕᔥ ᐅᑮ ᑲᑴᒋᒫᐞ: ᐋᓃᓐ ᒥᓂᒃ ᐁᔮᐌᒃ ᐸᑴᔑᑲᓐ? ᐅᑮᐃᓈᐞ᙮ ᓃᔣᔂᑎᒃ, ᐅᑮᐃᑰᐞ᙮

8:6b.MAR.008.006 ᒦᑕᔥ ᑳᐃᓈᒡ ᐃᐃ ᑳᒫᒪᐌᓄᓂᒡ ᒋᐅᓇᐱᓂᒡ ᐃᐃᒫ ᒥᑕᑲᒥᒃ᙮ ᒦᑕᔥ ᑳᐃᔑ ᐅᑖᐱᓈᒡ ᒋᓴᔅ ᐃᐃ ᐸᑴᔑᑲᓇᐞ ᓃᔣᔂᑎᒃ, ᐁᑮᓇᓈᑯᒧᒡ, ᐁᑮ ᐸᐸᑴᐱᓈᒡ, ᐁᑮᒫᒦᓈᒡ ᐅᑭᑭᓄᐊᒪᐙᑲᓇᐞ ᒋᒫᑕᐆᓈᓂᒡ ᐃᐃ ᑳᒫᒪᐌᓄᓂᒡ᙮ ᒦᑕᔥ ᐃᐃ ᑳᐃᔑᒋᑫᓂᒡ᙮

8:7b.MAR.008.007 ᐸᑮ ᑲᔦ ᐅᑮᐊᔮᐙᐙᐞ ᑭᓅᔐᓴᐞ᙮ ᒦᑕᔥ ᑳᐃᔥᒀᓇᓈᑯᒧᒡ ᒋᓴᔅ, ᐅᑮᐃᓈᐞ ᐅᑭᑭᓄᐊᒪᐙᑲᓇᐞ ᐅᓄᐌᓂᐗᐞ ᑲᔦ ᒋᐊᑕᒪᐙᓂᒡ᙮

8:8b.MAR.008.008 ᒦᑕᔥ ᑳᐃᔑ ᐐᓯᓂᓂᒡ ᑲᑭᓇ᙮ ᐐᑫ ᑮᑌᐐᓯᓂᐗᐞ᙮ ᐃᑯᒋ ᑯ ᓃᐎᕽ ᒥᑖᔂᒃ 4,000 ᑮᑕᔑᐗᐞ᙮

8:9b.MAR.008.009 ᒦᑕᔥ ᑳᐃᔑ ᒨᔕᑭᓇᒧᐙᒡ ᐃᔥᑾᒋᑲᓇᓐ ᐃᑭ ᑭᑭᓄᐊᒪᐙᑲᓇᒃ᙮ ᓃᔣᓱ 7 ᑮᒨᔥᑭᓀᓂᐗᓐ ᒪᔥᑯᓰᒪᑲᑰᓐ᙮ ᒦᑕᔥ ᑳᐃᔑ ᑮᐌᓂᔕᐙᒡ ᒋᓴᔅ ᑲᑭᓇ ᐊᐎᔭᐞ᙮

8:10b.MAR.008.010 ᐐᓐ ᐃᑕᔥ ᐐᓐ ᑮᐴᓯ ᑲᔦ ᐅᑭᑭᓄᐊᒪᐙᑲᓇᐞ, ᐌᑎ ᓇᑫ ᑖᓬᒪᓅᑕ ᐊᑮᕽ ᐁᑮᐱ ᐃᔑᒥᔕᑳᐙᒡ᙮

8:11b.MAR.008.011 ᐃᐃ ᑕᔥ ᐯᕒᐊᓰᐎᓂᓂᐗᐞ ᐅᑮᐱ ᐅᑎᓯᑰᐞ ᐁᐱ ᑲᑴᔖᑰᓱᒥᑯᒡ, ᐁᑮᐊᑕᐙᐸᑕᒫᑯᒡ ᐃᔥᐱᒥᕽ ᐌᒌᓂᒃ ᑭᑭᓇᐙᒋᒋᑲᓐ᙮

8:12b.MAR.008.012 ᒋᓴᔅ ᑕᔥ ᐐᑫ ᑮᑭᒋᓃᓴᓈᒧ ᐁᑮᐃᓇᒪᒋᐅᒡ, ᐁᐃᑭᑐᒡ: ᐋᓃᔥ ᐅᑯ ᓅᑯᒻ ᐯᒫᑎᓯᐙᒡ ᐌᒋ ᐊᑕᐙᐸᑕᒧᐙᒡ ᑭᑭᓇᐙᒋᒋᑲᓐ? ᓂᑌᐺ ᐁᐃᓂᓇᑰᒃ, ᑳᐐᓐ ᑫᑰᓐ ᑭᑭᓇᐙᒋᒋᑲᓐ ᑕᒦᓈᓰᐗᒃ ᐅᑯ ᓅᑯᒻ ᐯᒫᑎᓯᐙᒡ, ᑮᐃᑭᑐ᙮

8:13b.MAR.008.013 ᒦᑕᔥ ᑳᐃᔑ ᓇᑲᓈᒡ ᐁᑮᒫᒌᐅᒡ ᒦᓇᐙ ᐊᑳᒥᕽ᙮

8:14b.MAR.008.014 ᑳᐐᓐ ᐃᑕᔥ ᑮᒫᒥᑲᐎᓰᐗᐞ ᒋᓴᔅ ᐅᑭᑭᓄᐊᒪᐙᑲᓇᐞ ᒋᒫᒌᓈᓂᒡ ᐸᑴᔑᑲᓇᐞ᙮ ᒦ ᐁᑕ ᐯᔑᒀᑎᒃ ᐅᑮᒫᒌᓈᐙᓐ ᒌᒫᓂᕽ᙮

8:15b.MAR.008.015 ᐅᑮ ᑲᓅᓈᐞ ᐃᑕᔥ ᐅᑭᑭᓄᐊᒪᐙᑲᓇᐞ: ᐊᔮᒀᒥᓯᒃ! ᐅᑮᐃᓈᐞ᙮ ᑫᑯ ᐱᒣᑕᑫᒃ ᐃᐃ ᐅᑑᐱᓯᑲᓀᓯᒥᐙ ᐃᑭ ᐯᕒᐊᓰᐎᓂᓂᐗᒃ ᑲᔦ ᐁᕒᐊᑦ, ᐅᑮᐃᓈᐞ᙮

8:16b.MAR.008.016 ᒦᑕᔥ ᐁᓂᓯᑐᑕᓯᓂᒃ ᒋᓴᔅ ᐅᑭᑭᓄᐊᒪᐙᑲᓇᐞ ᑳᐃᔑ ᒫᒌ ᑕᔑᑕᒫᑎᓂᒡ, ᐁᐅᐸᑴᔑᑲᓂᒥᓯᓂᒃ᙮

8:17b.MAR.008.017 ᒋᓴᔅ ᐃᑕᔥ ᐁᑭᑫᓂᒫᒡ ᐁᑳ ᐁᓂᓯᑐᑕᓯᓂᒃ ᐅᑮᐅᒋ ᑲᓅᓈᐞ: ᐋᓃᓐ ᐁᔑ ᐸᐹᒥᑎᔦᒃ ᐁᐊᔮᐙᓯᐌᒃ ᐸᑴᔑᑲᓐ? ᑳᐐᓐ ᐃᓇ ᒪᔑ ᑭᑭᑫᑕᓰᒻ? ᑳᐐᓐ ᐃᓇ ᑭᓂᓯᑖᐌᑕᓰᒻ? ᐅᓵᒻ ᐃᓇ ᑭᐯᑌᑖᒻ?

8:18b.MAR.008.018 ᑭᑕᔮᓈᐙᓐ ᑭᔥᑮᔑᑯᐙᓐ! ᑳᐐᓐ ᐃᓇ ᑭᐙᐱᓰᒻ? ᑲᔦ ᑭᑑᑕᐗᑳᒻ! ᑳᐐᓐ ᐃᓇ ᑭᓅᑕᓰᒻ? ᑳᐐᓐ ᐃᓇ ᑲᔦ ᑭᒫᒥᑲᐎᓰᒻ

8:19b.MAR.008.019 ᓈᓂᕽ ᒥᑖᔂᒃ 5,000 ᐁᑮ ᑕᔑᐙᒡ, ᐁᑮ ᐸᐸᑴᐱᑕᒪᐗᒀ ᓈᓇᓐ ᐸᑴᔑᑲᓇᐞ? ᐋᓃᔥ ᒥᓂᒃ ᑳᐃᔥᑯᓭᑭᓐ ᐃᔥᑾᒋᑲᓇᓐ ᒥᓂᒃ ᑳᒨᔥᑭᓀᑭᓐ ᐐᑯᐲᒪᑲᑰᓐ? ᐅᑮᐃᓈᐞ᙮ ᒦᑕᔥ ᑳᐃᑯᒡ: ᒥᑖᔑᓃᔑᓐ 12᙮

8:20b.MAR.008.020 ᔑᑾᔥ ᐅᑮᐃᓈᐞ: ᒦᓇᐙ ᐃᑭ ᓃᐎᕽ ᒥᑖᔂᒃ 4,000, ᓃᔣᓱ 7 ᐸᑴᔑᑲᓇᐞ ᐁᑮ ᐸᐸᑴᐱᑕᒪᐗᒀ, ᐋᓃᓐ ᒥᓂᒃ ᑳᒨᔥᑭᓀᑭᓐ ᐃᓂ ᒪᔥᑯᓰᒪᑲᑰᓐ ᑳᒨᔕᑭᓇᒣᒃ ᐃᓂ ᐃᔥᑾᒋᑲᓇᓐ? ᐅᑮᐃᓈᐞ᙮ ᓃᔣᓱ 7, ᑮᐃᑭᑐᐗᐞ᙮

8:21b.MAR.008.021 ᑳᐐᓐ ᐃᓇ ᒪᔑ ᑭᓂᓯᑖᐌᑕᓰᒻ? ᐅᑮᐃᓈᐞ᙮

8:22b.MAR.008.022 ᒦᑕᔥ ᐃᐃᒫ ᑮᐱᒥᔕᑳᐗᒃ ᐆᑌᓇᐌᓯᕽ ᐯᓭᑕ ᐁᐃᔑᓂᑳᑌᓂᒃ᙮ ᑮᐲᑕᐙ ᑕᔥ ᒋᓴᔅ ᐯᔑᒃ ᐎᔮᐱᓯᓂᒃ ᐃᓂᓂᐗᓐ, ᐁᐸᑯᓭᓂᒥᓐᒡ ᒋᑖᑭᓈᒡ᙮

8:23b.MAR.008.023 ᒦᑕᔥ ᑳᐃᔑ ᓴᑭᓂᑫᓈᒡ ᐁᑮᐃᔑᐎᓈᒡ ᐅᐱᒣᔭᐄ ᐆᑌᓇᐌᓯᕽ᙮ ᒦᑕᔥ ᑳᐃᔑ ᓯᒀᑕᒪᐙᒡ ᐅᔥᑮᔑᑯᓂ, ᒥᒋᓃᔥ ᐅᓂᒌᓐ ᐅᑮ ᓵᒥᓈᓐ, ᐁᑲᑴᒋᒫᒡ: ᑭᐙᐸᑖᓐ ᐃᓇ ᑫᑰᓐ? ᐅᑮᐃᓈᓐ᙮

8:24b.MAR.008.024 ᒦᑕᔥ ᐁᐃᓈᐱᓂᒡ, ᑮᐃᑭᑐᐗᓐ: ᓂᐙᐸᒫᒃ ᐯᒫᑎᓯᐙᒡ᙮ ᒥᑎᑰᒃ ᐃᑕᔥ ᐁᐸᐹᒧᓭᐙᒡ ᓂᑎᔑᓇᐙᒃ, ᐅᑮᐃᑰᓐ᙮

8:25b.MAR.008.025 ᒦᑕᔥ ᒦᓇᐙ ᐋᐱᑎᕽ ᐅᑮ ᓵᒥᓇᒪᐙᓐ ᒋᓴᔅ ᐃᓂ ᐅᔥᑮᔑᑯᓂ ᐃᓂ ᐃᓂᓂᐗᓐ᙮ ᒦᑕᔥ ᑾᔭᒃ ᑮᐃᓈᐱᐗᓐ, ᐁᑮᒥᓄᐊᔮᓂᒡ ᐃᓂ ᐅᔥᑮᔑᑯᓂ᙮

8:26b.MAR.008.026 ᒦᑕᔥ ᑳᐃᔑ ᑮᐌᓂᔕᐙᒡ ᒋᓴᔅ ᐌᑎ ᐁᔑᑖᓂᒡ ᐃᓂ ᐃᓂᓂᐗᓐ᙮ ᑫᑯ ᐊᑲᐌ ᒉᑭᔥᑲᑫᓐ ᐆᑌᓇᐌᔅ, ᐅᑮᐃᓈᓐ᙮

8:27b.MAR.008.027 ᒦᑕᔥ ᑮᐊᓂ ᒫᒑ ᒋᓴᔅ ᑲᔦ ᐅᑭᑭᓄᐊᒪᐙᑲᓇᐞ, ᐌᑎ ᐁᑮᐃᔖᐙᒡ ᐆᑌᓇᐌᓯᕽ ᐯᔔ ᐃᒫ ᓭᓴᕒᐄᔭ ᐱᓬᐃᐹᔨᕽ ᑳᐊᔮᓂᑭᓐ᙮ ᒦᑕᔥ ᐁᐊᓂ ᐱᒧᓭᐙᒡ ᐅᑮ ᑲᑴᒋᒫᐞ: ᐋᓃᓐ ᐁᔑᐙᒡ ᐯᒫᑎᓯᐙᒡ ᐁᐋᐎᔮᓐ? ᐅᑮᐃᓈᐞ᙮

8:28b.MAR.008.028 ᒞᓐ ᓰᑲᐊᑖᑫᐎᓂᓂ ᑭᑎᑰᒃ, ᐅᑮᐃᑰᐞ᙮ ᐋᓂᓐᑦ ᑲᔦ ᐊᐎᔭ ᑭᑎᑰᒃ ᐃᓬᐋᐃᒐ, ᑲᔦ ᐋᓂᓐᑦ, ᐯᔑᒃ ᐃᓂ ᒣᐎᔕ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ ᑳᑮ ᑲᓅᑕᒫᑯᒡ ᐋᐎᐎᑐᒃ, ᑭᑎᑰᒃ, ᐅᑮᐃᑰᐞ᙮

8:29b.MAR.008.029 ᒦᑕᔥ ᑳᐃᔑ ᑲᑴᒋᒫᒡ: ᐊᐌᓀᓐ ᑮᓇᐙ ᐁᓀᑕᒣᒃ ᒋᐋᐎᔮᓐ? ᐅᑮᐃᓈᐞ᙮ ᒦᑕᔥ ᑳᐃᔑ ᓇᑴᑖᑯᒡ ᐃᓂ ᐲᑕᕒᐊᓐ : ᑮᓐ ᑭᑖᐤ ᑭᔐᒪᓂᑑᓐ ᑳᑮᐅᓀᓂᒥᑯᒡ ᒋᐱᒫᒋᐃᐌᒡ, ᐅᑮᐃᑰᓐ ᐊᐊ ᒋᓴᔅ ᐃᓂ ᐲᑕᕒᐊᓐ᙮

8:30b.MAR.008.030 ᐅᑮᐊᔮᒀᒥᒫᐞ ᐃᑕᔥ ᒋᓴᔅ ᐃᐃ ᐅᑭᑭᓄᐊᒪᐙᑲᓇᐞ: ᑫᑯ ᐊᐎᔭ ᐐᑕᒪᐙᑫᒃ ᐁᐋᐎᔮᓐ, ᐅᑮᐃᓈᐞ᙮

8:31b.MAR.008.031 ᒦᑕᔥ ᐅᑮᒫᒌ ᑭᑭᓄᐊᒪᐙᐞ ᐁᑮᐃᓈᒡ: ᓃᓐ ᐃᓂᓂ ᐅᑯᓯᓴᓐ, ᐅᒋᑕ ᓴ ᑯ ᓃᐱᐗᐞ ᒋᑲᒀᑕᑭᐃᑯᔮᓐ, ᑲᔦ ᒋᐸᑫᔮᑯᓂᐙᒡ ᐃᐃ ᒎᐗᒃ ᐅᓃᑳᓂᓰᒥᐙᐞ, ᐃᑭ ᑲᔦ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ᙮ ᔑᑾ ᓂᑲ ᓂᓯᑰ᙮ ᒦᓇᐙ ᑕᔥ ᓂᓱᑮᔑᑾᑳᒃ ᓂᑲ ᑮᐌᐱᒫᑎᔅ, ᑮᐃᑭᑐ᙮

8:32b.MAR.008.032 ᒦᐃᐌ ᑾᔭᒃ ᐅᑮᐐᑕᒪᐙᐞ ᒋᓴᔅ ᐅᑭᑭᓄᐊᒪᐙᑲᓇᐞ᙮ ᐲᑕᕒ ᐃᑕᔥ ᐅᐱᒣᔭᐄ ᐅᑮᐃᔑᐎᓈᓐ ᐃᓂ ᒋᓴᓲᓐ ᐁᒫᒌᑭᒋᑲᓅᓈᒡ ᒋᐅᒋᐋᒡ᙮

8:33b.MAR.008.033 ᒦᑕᔥ ᐁᑴᑭᑳᐸᐎᒡ ᒋᓴᔅ ᐁᐙᐸᒫᒡ ᑯᑕᒃ ᐅᑭᑭᓄᐊᒪᐙᑲᓇᐞ, ᐅᑮ ᑭᒋᑲᓅᓈᓐ ᐲᑕᕒᐊᓐ: ᐃᑯᒋ ᓴ ᐃᔖᓐ, ᓭᑕᓐ! ᐅᑎᓈᓐ᙮ ᑳᐐᓐ ᑮᓐ ᑭᐐᒋᐋᓰ ᑭᔐᒪᓂᑑ ᐁᓀᑕᕽ, ᐃᑭᔥ ᐐᓐ ᑭᐐᒋᐋᒃ ᐃᓂᓂᐗᒃ ᐁᓀᑕᒧᐙᒡ, ᐅᑮᐃᓈᓐ ᒋᓴᔅ ᐃᓂ ᐲᑕᕒᐊᓐ᙮

8:34b.MAR.008.034 ᒦᑕᔥ ᑲᑭᓇ ᐅᑮᐊᑐᒫᐞ ᐃᐃ ᑳᐅᑴᓄᓂᒡ ᑲᔦ ᐅᑭᑭᓄᐊᒪᐙᑲᓇᐞ, ᐁᑮ ᑲᓅᓈᒡ: ᑮᔥᐱᓐ ᐊᐎᔭ ᐐᐱᒥᐐᒌᐎᒡ, ᐅᒋᑕ ᑯ ᐃᔑᓈᑾᓂᓂ ᒋᐋᓇᐌᓂᑎᓱᐸᓐ, ᒋᐸᑭᑎᓂᑎᓱᐸᓐ, ᐊᐴᔥᑫ ᐲᓂᔥ ᒋᐃᔑ ᓂᐳᐸᓐ ᐋᔑᑌᔮᑎᑯᕽ᙮ ᒦᐃ ᒋᐃᔑ ᐱᒥᐐᒌᐎᒡ, ᐅᑮᐃᓈᐞ᙮

8:35b.MAR.008.035 ᐊᐌᓀᔥ ᐃᑯ ᐙᒪᓈᒋᑑᒡ ᐃᐃ ᐅᐱᒫᑎᓯᐎᓐ, ᑕᐃᔑ ᑎᐸᐊᒪᐙ ᒋᐗᓂᑑᒡ ᐅᐱᒫᑎᓯᐎᓐ᙮ ᐊᐌᓀᓐ ᐃᑕᔥ ᑫᐸᑭᑎᓇᕽ ᐅᐱᒫᑎᓯᐎᓐ ᓃᓐ ᐅᒋ ᑲᔦ ᐃ ᒥᓍᒋᒧᐎᓐ ᐅᒋ, ᐅᑲ ᐱᒫᒋᑑᓐ ᐅᐱᒫᑎᓯᐎᓐ, ᐅᑮᐃᓈᐞ᙮

8:36b.MAR.008.036 ᐌᑯᓀᔥ ᐃᐃ ᑫᐅᑎᓯᐸᓐ ᐊᐎᔭ ᑲᑭᓇ ᑫᑰᓐ ᐋᓇᑮ ᑌᐱᐱᑕᒫᓱᒡ ᐅᐅᒫ ᐊᑮᕽ, ᑮᔥᐱᓐ ᐗᓂᑑᒡ ᐃᐃ ᐅᐱᒫᑎᓯᐎᓐ? ᑳᐐᓐ ᑫᑰᓐ ᑕᐅᑎᓇᒫᓱᓰ᙮

8:37b.MAR.008.037 ᐌᑯᓀᔥ ᑫᒦᑭᐌᐸᓐ ᒦᓇᐙ ᒋᑮᐌ ᒦᓂᑎᐸᓐ ᐃᐃ ᐅᐱᒫᑎᓯᐎᓐ? ᑳᐐᓐ ᑫᑰᓐ, ᐅᑮᐃᓈᐞ᙮

8:38b.MAR.008.038 ᐃᓇᔥᑫ ᓃᐱᐗᐞ ᐅᑯ ᓅᑯᒻ ᐯᒫᑎᓯᐙᒡ ᐅᑮᓇᑲᓈᐙᓐ ᑭᔐᒪᓂᑑᓐ, ᐁᓂᑖ ᒪᒋ ᐃᔑᐌᐱᓯᐙᒡ᙮ ᐊᐌᓀᓐ ᐃᑕᔥ ᐃᑯ ᓅᑯᒻ ᐯᒫᑎᓯᒡ ᑫᐊᑲᑌᓂᒥᒡ ᑲᔦ ᑫᐊᑲᑌᑕᕽ ᓂᑎᑭᑐᐎᓇᓐ, ᒦ ᐊᐌ ᑫᓃᓐ ᑫᐊᑲᑌᓂᒪᒃ ᐱ ᑕᑶᔑᓈᓐ᙮ ᓃᓐ ᐋᓃᔥ ᐃᓂᓂ ᐅᑯᓯᓴᓐ ᐁᑎᓄᐎᔮᓐ ᓂᑲ ᐱᑭᑭᔅ ᑭᒋᐙᓭᓯᐎᓐ ᑖᐱᔥᑰ ᐁᔑ ᐙᓭᓯᒡ ᐊᐊ ᓂᑌᑌ, ᐱᐐᒌᐎᒪᒃ ᑲᔦ ᐃᐃ ᑭᔐᒪᓂᑑ ᐅᑌᒐᓬᐃᒪᐞ, ᒦᐃ ᑳᐃᓈᒡ᙮

9

9:1b.MAR.009.001 ᔑᑾ ᑕᔥ ᑮᐊᓂ ᐃᑭᑐ ᐊ ᒋᓴᔅ: ᓂᑌᐺ ᐁᑲᓅᓂᓇᑰᒃ᙮ ᐋᓂᓐᑦ ᑮᓇᐙ ᐅᐅᒫ ᑳᐊᔮᔦᒃ ᑳᐐᓐ ᑕᓂᐳᓰᐗᒃ, ᐹᓂᒫ ᐙᐸᑕᒧᐙᒡ ᐃᐃ ᑭᔐᒪᓂᑑ ᐅᑎᐯᒋᑫᐎᓂᓂ ᐱᓈᑾᓂᓂᒃ, ᑭᑭᒪᔥᑲᐎᓰᐎᓐ ᒋᐅᑭᒫᐎᓂᒡ, ᐅᑮᐃᓈᐞ᙮

9:2b.MAR.009.002 ᐹᓂᒫ ᑕᔥ ᓀᑯᑣᓱᑯᓇᑳᓂᒃ, ᒋᓴᔅ ᐅᑮᐐᒌᐙᐞ ᐲᑕᕒᐊᓐ, ᒌᒥᓴᓐ, ᒞᓇᓐ, ᐌᑎ ᑳᐃᔑ ᑭᒋᐱᑾᑎᓈᓂᒃ ᐁᑮᐃᔑᐎᓈᒡ, ᐐᓀᑕᐙ ᐁᑮᐊᓂ ᐋᒪᒋᐌᐙᒡ᙮ ᒦᑕᔥ ᒣᒀ ᐁᑲᓇᐙᐸᒥᑯᒡ, ᐸᑳᓐ ᑮᐃᔑᓈᑯᓯ ᐊᐊᐌ ᒋᓴᔅ᙮

9:3b.MAR.009.003 ᐗᐐᑫ ᑮᐙᓯᑯᓇᔦᓱ ᐁᐊᐲᒋ ᐙᐱᔥᑳᓂᑭᓐ ᐅᑭᑭᔥᑭᑲᓇᓐ᙮ ᑳᐐᓐ ᐊᐎᔭ ᐅᐅᒫ ᐊᑮᕽ ᐃᐃ ᑖᐊᐲᒋᐙᐱᔥᑭᐲᑭᓂᑫᓰ ᐃᐌ ᑳᐃᔑ ᐙᐱᔥᑳᓂᑭᓐ ᒋᓴᔅ ᐅᑭᑭᔥᑭᑲᓇᓐ᙮

9:4b.MAR.009.004 ᐅᑮᐙᐸᒫᐞ ᐃᑕᔥ ᐁᓈᑯᓯᓂᒡ ᐃᓬᐋᐃᒐᐗᓐ ᑲᔦ ᒨᓯᓲᓐ ᐁᑲᓅᓈᓂᒡ ᐃᓂ ᒋᓴᓲᓐ᙮

9:5b.MAR.009.005 ᐲᑕᕒ ᐃᑕᔥ ᐅᑮ ᑲᓅᓈᓐ ᒋᓴᓲᓐ: ᐅᑭᑭᓄᐊᒫᑫ, ᐅᓂᔑᔑᓐ ᐅᐅᒫ ᐁᐊᔮᔭᕽ᙮ ᑕᑲ ᓂᑲ ᐊᑲᐙᑌᐃᑫᒥᓐ᙮ ᓂᓯᓐ 3 ᓂᑲ ᐅᔑᑑᒥᓐ, ᐯᔑᒃ ᑮᓐ, ᑲᔦ ᒨᓯᔅ ᐯᔑᒃ, ᑲᔦ ᐯᔑᒃ ᐃᓬᐋᐃᒐ᙮

9:6b.MAR.009.006 ᐋᓃᔥ ᑮᑸᓇᐎ ᐃᑭᑐ, ᐁᑮ ᓭᑭᓯᐙᒡ᙮

9:7b.MAR.009.007 ᒦᑕᔥ ᑮᐱ ᐃᔑᓈᑾᓂᓂ ᐗᑶ, ᐁᑮᐱᔮᑲᐎᔥᑳᑯᐙᒡ᙮ ᒦᑕᔥ ᐃᐃᒫ ᑳᑮᐅᒋ ᓅᑕᐎᒥᓐᒡ ᐊᐎᔭᓐ ᐁᑮᑭᑐᓂᒡ: ᒦ ᐗᐊ ᓂᑯᓯᔅ᙮ ᓂᓵᑭᐋ᙮ ᒦ ᐊᐌ ᐱᓯᑕᐎᒃ! ᑮᐃᓈᐗᒃ᙮

9:8b.MAR.009.008 ᓭᓴᑰᒡ ᐃᑕᔥ ᑮᐊᔨᓈᐱᐗᒃ᙮ ᑳᐐᓐ ᑫᔮᐱ ᐊᐎᔭᓐ ᐅᑮᐙᐸᒫᓯᐙᐙᓐ, ᒦ ᐁᑕ ᒋᓴᓲᓐ ᑳᐐᒌᐎᑯᐙᒡ᙮

9:9b.MAR.009.009 ᐹᓂᒫ ᑕᔥ ᒣᒀ ᐁᓃᓴᒋᐌᐙᒡ, ᐌᐌᓂ ᐅᑮᐋᔩᓱᒫᐞ ᒋᓴᔅ ᐃᐃ ᓂᓯᓐ ᐅᑭᑭᓄᐊᒪᐙᑲᓇᐞ: ᑫᑯ ᐊᐎᔭ ᐐᑕᒪᐙᑫᒃ ᐃᐃ ᑳᐙᐸᑕᒣᒃ, ᐹᓂᒫ ᑮᑮᐌᐱᒫᑎᓯᔮᓐ, ᓃᓐ ᐃᓂᓂ ᐅᑯᓯᓴᓐ ᐁᐋᐎᔮᓐ, ᑮᐃᑭᑐ᙮

9:10b.MAR.009.010 ᒦᑕᔥ ᐅᑮᓇᓇᐃᑕᐙᐙᓐ ᐃᐃᐌ ᑳᐃᑯᐙᒡ, ᐐᓇᐙ ᑕᔥ ᐃᑯ ᐅᑮ ᑕᔑᑖᓈᐙ, ᐌᑯᓀᓐ ᐃᑕᔥ ᐅᐅᐌ ᑳᐃᑕᒥᓂᒡ ᒋᓴᓲᓐ, ᓂᑲ ᑮᐌᐱᒫᑎᔅ, ᐁᐃᑭᑐᓂᒡ᙮

9:11b.MAR.009.011 ᐅᑮ ᑲᑴᒋᒫᐙᓐ ᐃᑕᔥ: ᐃᑭ ᑳᑭᑭᓄᐊᒫᑫᐙᒡ ᐃᐃ ᒎᐗᐞ ᐅᑑᓇᔓᐌᐎᓂᓂ ᐃᑭᑐᐗᒃ ᐅᐅ: ᐊᑲᐌ ᓂᑕᒻ ᑕᐱ ᑕᑯᔑᓐ ᐊᐊ ᐃᓬᐋᐃᒐ᙮ ᐋᓃᔛᓐ ᐅᑯ ᐌᒋ ᐃᑭᑐᐙᒡ? ᐅᑮᐃᓈᐙᓐ᙮

9:12b.MAR.009.012 ᐅᑮᓇᑴᑕᐙᐞ ᐃᑕᔥ ᒋᓴᔅ: ᑌᐺ ᑮᐃᓇᑌᓂ ᐊᐌ ᐃᓬᐋᐃᒐ ᓂᑕᒻ ᒋᑕᑯᔑᕽ ᒋᐙᐌᓇᑑᒡ ᑲᑭᓇ ᑫᑰᓐ᙮ ᐋᓃᓐ ᑕᔥ ᐁᓀᑕᒣᒃ ᐃᐃᐌ ᓃᓐ ᐁᐃᔑᐲᐃᑳᓱᔮᓐ, ᐃᓂᓂ ᐅᑯᓯᓴᓐ ᒋᐐ ᑲᒀᑕᑭᐃᒥᓐᒡ ᒋᐋᓇᐌᓂᒥᒥᓐᒡ ᐁᐃᑭᑑᒪᑲᒃ?

9:13b.MAR.009.013 ᑭᐐᑕᒪᐎᓂᓂᒻ ᐃᑕᔥ, ᐋᔕ ᑌᐺ ᑮᐱᑕᑯᔑᓐ ᐊᐊ ᐃᓬᐋᐃᒐ᙮ ᐌᑯᓀᓐ ᐃᑯ ᑳᐃᓀᓂᒥᓐᒡ ᑮᑑᑕᐙ᙮ ᒦᐃᐌ ᒪᔮ ᑳᐃᔑᐲᐃᑳᑌᓂᒃ ᐁᑮ ᑕᔑᒥᓐᒡ, ᐅᑮᐃᓈᐞ᙮

9:14b.MAR.009.014 ᐊᐲ ᑕᔥ ᑳᐱ ᐅᑎᓵᐙᒡ ᐃᐃ ᑯᑕᒃ ᑭᑭᓄᐊᒪᐙᑲᓇᐞ, ᐅᑮᐙᐸᒫᐙᐞ ᐁᑮᐙᑳᔥᑳᑯᓂᒡ ᑭᒋᓃᐱᐗᐞ ᑳᒫᒪᐌᓄᓂᒡ, ᐃᐃ ᑲᔦ ᑳᑭᑭᓄᐊᒫᑫᓂᒡ ᒎᐗᐞ ᐅᑑᓇᔓᐌᐎᓂᓂ ᐁᑮ ᑲᑴ ᔖᑰᓱᒥᑯᓂᒡ᙮

9:15b.MAR.009.015 ᐊᐲ ᑕᔥ ᐁᐙᐸᒥᑯᒡ ᒋᓴᔅ ᐃᐃ ᑳᒫᒪᐌᓄᓂᒡ, ᑮᒌᑫᑕᒧᓭᐗᐞ, ᑮᐊᐸᐃᑎᐗᐞ ᑲᑭᓇ, ᐁᑮᐱ ᐴᔔᐃᑯᒡ᙮

9:16b.MAR.009.016 ᒋᓴᔅ ᐃᑕᔥ ᐅᑮ ᑲᑴᒋᒫᐞ ᐅᑭᑭᓄᐊᒪᐙᑲᓇᐞ: ᐌᑯᓀᓐ ᐃᐃ ᑳᐃᔑ ᑲᓅᓀᒀ? ᐅᑮᐃᓈᐞ᙮

9:17b.MAR.009.017 ᐯᔑᒃ ᐃᑕᔥ ᐃᐃ ᑳᐅᑴᓄᓂᒡ ᐅᑮᓇᑴᑖᑰᓐ: ᐅᑭᑭᓄᐊᒫᑫ ᑭᑖᓇᐐ ᐲᑕᒪᐎᓐ ᓂᑯᓯᔅ ᐁᑭᑭᔥᑲᐙᒡ ᒪᒋᐊᒑᑾᓐ ᑎᓄ ᑳᓂᑖ ᐌᔥᑳᑯᓯᒃ᙮

9:18b.MAR.009.018 ᐱᑯ ᐋᑎ ᐁᐅᑎᓯᑯᒡ, ᐅᐸᑭᔑᒥᑰᓐ᙮ ᐲᑌᐎᑑᓀ ᑲᔦ ᒪᒫᑗᔮᐱᑌᔥᑳ ᐁᐅᒋᐱᓂᑯᔥᑳᑯᒡ᙮ ᓂᑖᓇᑮ ᑲᑴᒋᒫᒃ ᐃᑭ ᑭᑭᑭᓄᐊᒪᐙᑲᓇᒃ ᒋᓵᑭᒋᓂᔕᐊᒪᐙᐙᒡ ᐃᓂ ᒪᒋᐊᒑᑾᓐ᙮ ᐅᑮ ᑆᓇᐎᐋᐙᓐ ᐃᑕᔥ, ᐅᑎᑰᓐ᙮

9:19b.MAR.009.019 ᐅᑮ ᑲᓅᓈᐞ ᐃᑕᔥ ᒋᓴᔅ: ᐅᐅᒫ ᑲᑭᓇ ᐁᔮᔦᒃ! ᐁᑕᑕᐌ ᑳᐐᓐ ᑭᓂᑖ ᑌᐺᔦᑕᓰᒻ! ᑳᓇᑲ ᓈ ᒥᓂᒃ ᑫᐐᒌᐎᓇᑰᑭᐸᓐ ᒋᑆ ᒫᒌ ᑌᐺᔦᑕᒣᒃ? ᑳᓇᑲ ᓈ ᒥᓂᒃ ᑫᔕᔒᐯᓂᒥᓇᑰᒃ? ᑕᑲ ᐲᑕᒪᐎᔑᒃ ᐊᐊ ᑸᐎᓭᔅ, ᐅᑮᐃᓈᐞ᙮

9:20b.MAR.009.020 ᒦᑕᔥ ᑳᐃᔑ ᐲᓈᐙᒡ ᐃᓂ ᑸᐎᓭᓴᓐ᙮ ᐊᐲᔥ ᐎᔮᐸᒫᒡ ᐊᐊ ᒪᒋᐊᒑᒃ ᐃᓂ ᒋᓴᓲᓐ, ᔐᒫᒃ ᐅᑮᐅᒋᐱᓂᑯᔥᑲᐙᓐ ᐃᓂ ᑸᐎᓭᓴᓐ᙮ ᒦᑕᔥ ᑳᐃᔑ ᑲᐎᓭᓂᒡ ᐁᑮ ᑎᑎᑎᐱᐸᓂᐅᓂᒡ ᐁᑮ ᐲᑌᐎᑑᓀᓂᒡ᙮

9:21b.MAR.009.021 ᒦᑕᔥ ᒋᓴᔅ ᐅᑮ ᑲᑴᒋᒫᓐ ᐃᓂ ᐌᓃᒑᓂᓯᓂᒡ: ᐋᓇᐲ ᐃ ᐌᒋ ᐃᔑᐊᔮᒡ? ᐅᑮᐃᓈᓐ᙮ ᒦᑕᔥ ᑳᐃᑯᒡ: ᐊᐸᓀ ᑯ ᐌᒋ ᐊᐱᓅᒌᔑᐎᒡ᙮

9:22b.MAR.009.022 ᓃᐱᐗᐋᕽ ᐅᑮᐊᐸᑭᓂᑰᓐ ᐃᐃᒫ ᐃᔥᑯᑌᕽ ᑲᔦ ᐃᐃᒫ ᓂᐲᕽ ᐁᐐ ᓂᓯᑯᒡ᙮ ᑮᔥᐱᓐ ᐃᑕᔥ ᑮᓐ ᑫᑰᓐ ᑲᔥᑭᑑᔭᓐ, ᑭᑎᒫᑫᓂᒥᔑᓈᒻ, ᐐᒋᐃᔑᓈᒻ! ᐃᑭᑐᐗᓐ ᐃᓂ ᐃᓂᓂᐗᓐ᙮

9:23b.MAR.009.023 ᒋᓴᔅ ᐃᑕᔥ ᐅᑮᐃᓈᓐ: ᑮᔥᐱᓐ ᑮᓐ ᑲᔥᑭᑑᔭᓐ ᑭᑎᓂᓐ! ᐊᐎᔭ ᑌᐺᔦᓂᒫᒡ ᑭᔐᒪᓂᑑᓐ, ᑲᑭᓇ ᑫᑰᓐ ᑕᑲᔥᑭᒋᑳᑌᓂ, ᑮᐃᑭᑐ᙮

9:24b.MAR.009.024 ᔐᒫᒃ ᑮᑭᔒᐌ ᐊᐊ ᐌᑯᓯᓯᒡ ᐁᐃᑭᑐᒡ: ᓂᑌᐺᔦᓂᒫ! ᐐᒋᐃᔑᓐ ᐅᓵᒻ ᐸᑮ ᐁᑌᐺᔦᓂᒪᒃ! ᑮᐃᑭᑐ᙮

9:25b.MAR.009.025 ᒦᑕᔥ ᐁᐙᐸᒫᒡ ᒋᓴᔅ ᒫᒪᐤ ᐁᐲᒋᐸᐃᑎᓂᒡ ᐃᐃ ᐯᒫᑎᓯᓂᒡ, ᐅᑮ ᑭᒋᑲᓅᓈᓐ ᐃᓂ ᒪᒋᐊᒑᑾᓐ: ᑮᓐ ᓀᑖᐌᐃᐌᓯᐗᓐ ᑲᔦ ᑫᑮ ᐱᑌᐃᐌᔭᓐ ᒪᒋᐊᒑᒃ! ᐅᒋᓇᑲᔥ ᐊᐊ ᑸᐎᓭᔅ ᑭᑎᓂᓐ! ᑫᑯ ᒦᓇᐙ ᐐᑳ ᐱᑭᑭᔥᑲᐙᑫᓐ! ᐅᑮᐃᓈᓐ᙮

9:26b.MAR.009.026 ᒦᑕᔥ ᑮᑭᔒᐌ ᐊᐊ ᒪᒋᐊᒑᒃ, ᐁᑮᐊᐲᒋ ᐊᔪᒋᐱᓂᑯᔥᑲᐙᒡ ᐃᓂ ᑸᐎᓭᓴᓐ᙮ ᐅᑮᓇᑲᓈᓐ ᐃᑕᔥ᙮ ᑖᐱᔥᑰ ᑕᔥ ᐁᑮᓂᐳᒡ ᑮᐃᔑᓈᑯᓯ ᐊᐊ ᑸᐎᓭᔅ᙮ ᒦᑕᔥ ᑳᐃᑭᑐᐙᒡ ᓃᐱᐗᐞ: ᐋᔕ ᓂᐳ, ᑮᐃᑭᑐᐗᒃ᙮

9:27b.MAR.009.027 ᒋᓴᔅ ᐃᑕᔥ ᐅᑮ ᓴᑭᓂᑫᓈᓐ ᐁᑮ ᐸᓯᑸᐋᒡ ᐃᓂ ᑸᐎᓭᓴᓐ᙮ ᒦᑕᔥ ᑳᐃᔑ ᓃᐸᐎᓂᒡ᙮

9:28b.MAR.009.028 ᐊᐲ ᑕᔥ ᑳᐲᑎᑫᒡ ᒋᓴᔅ ᐃᐃᒫ ᐙᑳᐃᑲᓂᕽ, ᓂᔑᑫ ᐅᑮ ᑲᓅᓂᑰᐞ ᐅᑭᑭᓄᐊᒪᐙᑲᓇᐞ: ᐋᓃᔥ ᓃᓇᐎᓐᑦ ᑳᐅᒋ ᑲᔥᑭᑑᓯᐙᕽ ᒋᓵᑭᒋᓂᔕᐊᒪᐗᑭᒡ ᐊᐊ ᑸᐎᓭᔅ ᐃᓂ ᒪᒋᐊᒑᑾᓐ? ᐅᑮᐃᑰᐞ᙮

9:29b.MAR.009.029 ᒦᑕᔥ ᐅᑮᐃᓈᐞ: ᐅᓄ ᑎᓄ ᒪᒋᐊᒑᑾᓐ ᑳᐐᓐ ᐊᐎᔭ ᐅᑖ ᑲᔥᑭᐋᓰᓐ ᒋᓵᑭᒋᓂᔕᐙᒡ; ᒦ ᐁᑕ ᐊᓇᒥᐁᑕᐙᒡ ᑭᔐᒪᓂᑑᓐ ᑫᑮᐅᒋ ᓵᑭᒋᓂᔕᐙᒡ ᐊᐎᔭ ᐃᓂ ᒪᒋᐊᒑᑾᓐ, ᑮᐃᑭᑐ᙮

9:30b.MAR.009.030 ᒦᑕᔥ ᐃᐃᒫ ᑳᐊᓂᐅᒋ ᒫᒑᐙᒡ ᐁᑮᐊᓂ ᔖᐳᔥᑳᐙᒡ ᑳᓬᐊᓬᐄᐎ ᐊᑮᕽ ᙮ ᑳᐐᓐ ᐃᑕᔥ ᑮᐃᓀᑕᓰ ᐊᐎᔭ ᒋᑭᑫᑕᒥᓂᒡ᙮

9:31b.MAR.009.031 ᐋᓃᔥ ᐅᑮ ᑭᑭᓄᐊᒪᐙᐞ ᐃᐃ ᐅᑭᑭᓄᐊᒪᐙᑲᓇᐞ ᐁᐃᓈᒡ: ᓃᓐ ᐃᓂᓂ ᐅᑯᓯᓴᓐ ᓂᑲᐃᔑ ᐸᑭᑎᓂᑰᐎᔅ ᒋᑕᑯᓂᐙᒡ ᐃᓂᓂᐗᒃ, ᑲᔦ ᓂᑲ ᓂᓯᑰᒃ᙮ ᒦᑕᔥ ᑮᓂᓱᑮᔑᑾᑳᒃ ᒦᓇᐙ ᓂᑲ ᑮᐌᐱᒫᑎᔅ, ᐅᑮᐃᓈᐞ᙮

9:32b.MAR.009.032 ᐐᓇᐙᔥ ᐐᓐ ᑳᐐᓐ ᑮᓂᓯᑐᑕᓰᐗᒃ ᐃᐃ ᑳᑮᐃᑕᕽ᙮ ᑮᔖᑴᓂᒧᐗᒃ ᐃᑕᔥ ᐁᑮᐅᒋ ᒪᓈᓱᒫᐙᒡ᙮

9:33b.MAR.009.033 ᐌᑎ ᑕᔥ ᑮᐱᑕᑯᔑᓅᒃ ᐆᑌᓇᐌᓯᕽ, ᑲᐸᕒᓂᔭᒻ ᐁᐃᔑᓂᑳᑌᓂᒃ᙮ ᒦᑕᔥ ᐁᑮ ᐲᑎᑫᐙᒡ ᐃᐃᒫ ᐙᑳᐃᑲᓂᕽ, ᐅᑮ ᑲᑴᒋᒫᐞ ᒋᓴᔅ ᐃᐃ ᐅᑭᑭᓄᐊᒪᐙᑲᓇᐞ: ᐌᑯᓀᔥ ᑳᐱ ᑕᔑᑕᒣᒃ ᑮᐱ ᐱᒧᓭᔭᕽ? ᐅᑮᐃᓈᐞ᙮

9:34b.MAR.009.034 ᑳᐐᓐ ᑕᔥ ᐃᑯᑕᓄ ᑮᐃᑭᑐᓰᐗᒃ᙮ ᒦ ᐋᓃᔥ ᐃᐃ ᑳᑮ ᑕᔑᑕᒧᐙᒡ, ᐊᐌᓀᓐ ᓇᐗᒡ ᐊᐊ ᑫᓃᑳᓂᓯᒡ, ᐁᑮ ᑲᑴᔖᑰᓱᑎᐙᒡ᙮

9:35b.MAR.009.035 ᒦᑕᔥ ᑳᐃᔑ ᐅᓇᐱᒡ, ᐁᑮᐊᑐᒫᒡ ᒋᓴᔅ ᐃᐃ ᑳᒥᑖᔑᓃᔑᓂᒡ᙮ ᒦᑕᔥ ᑳᐃᓈᒡ: ᐊᐎᔭ ᐐᓃᑳᓀᑖᑯᓯᒡ, ᒫᒪᐤ ᐅᑖᓈᕽ ᑕᐃᓀᓂᑎᓱ, ᑲᑭᓇ ᐊᐎᔭᐞ ᐅᑲ ᐊᓄᑮᑕᐙᐞ, ᐅᑮᐃᓈᐞ᙮

9:36b.MAR.009.036 ᒦᑕᔥ ᑳᐃᔑ ᓴᑭᓂᑫᓈᒡ ᐊᐱᓅᒌᔕᓐ, ᐁᐃᓈᒡ ᐃᑕᔥ ᐃᐃ ᐅᑭᑭᓄᐊᒪᐙᑲᓇᐞ:

9:37b.MAR.009.037 ᐊᐌᓀᓐ ᐃᑯ ᑫᐐᒋᐋᒡ ᐯᔑᒃ ᐅᐅ ᐊᐱᓅᒌᔕᐞ, ᓃᓐ ᐅᒋ ᐁᐅᒋ ᐃᔑᒋᑫᒡ, ᒦ ᐯᔑᑾᓐ ᑫᓃᓐ ᐁᐃᔑ ᐐᒋᐃᒡ᙮ ᐊᐌᓀᓐ ᐃᓴ ᐙᒋᐃᑴᓐ, ᑳᐐᓐ ᓃᓐ ᐁᑕ ᓂᐐᒋᐃᑯᓰ, ᐃᓂᐌᓂᐗᓐ ᐃᓴ ᐅᐐᒋᐋᓐ ᑭᔐᒪᓂᑑᓐ, ᒦᐗᓐ ᐃᓂ ᑳᐱ ᐃᔑᓂᔕᐅᓂᒡ, ᐅᑮᐃᓈᐞ᙮

9:38b.MAR.009.038 ᒦᑕᔥ ᑳᐃᔑ ᑲᓅᓂᑯᒡ ᐃᓂ ᒞᓇᓐ : ᐅᑭᑭᓄᐊᒫᑫ, ᓂᑮᐙᐸᒫᓈᓐ ᐯᔑᒃ ᐃᓂᓂ ᐁᓵᑭᒋᓂᔕᐊᒪᐙᒡ ᒪᒋᐊᒑᑾᐞ ᐊᐎᔭᐞ, ᑮᓐ ᐁᐊᐱᒧᒡ ᑭᑎᔑᓂᑳᓱᐎᓐ᙮ ᐃᑕᐙᔥ ᓂᑮᐅᒋᐋᓈᓐ, ᐋᓃᔥ ᑳᐐᓐ ᑭᐸᐹᐐᒌᐎᑯᓰᓈᓐ, ᐅᑮᐃᑰᓐ᙮

9:39b.MAR.009.039 ᒋᓴᔅ ᐃᑕᔥ ᐅᐅᐌ ᐅᑮᐃᓈᓐ: ᑫᑯ ᐅᒋᐋᑫᒃ᙮ ᐊᐎᔭ ᑳᑮᐃᔑ ᒫᒪᑳᒋᒋᑫᒡ ᓃᓐ ᐁᐊᐱᒧᒡ ᓂᑎᔑᓂᑳᓱᐎᓐ, ᑳᐐᓐ ᐐᐸ ᓂᑲ ᒪᒋᑕᔑᒥᑯᓰ᙮

9:40b.MAR.009.040 ᐊᐊᐌ ᓴ ᐐᓐ ᐊᐎᔭ ᐁᑳ ᑳᑲᑴᑭᐱᑎᓂᓯᓄᐗᕽ, ᑭᐐᒋᐃᑯᓈᓐ᙮

9:41b.MAR.009.041 ᑌᐺ ᑭᑎᓂᓂᓂᒻ, ᐊᐌᓀᓐ ᐃᑯ ᑫᒥᓇᐃᓄᐌᑴᓐ ᐯᔑᑯᒥᓂᒀᑲᓐ ᓂᐱ, ᐁᑭᑫᓂᒥᓀᒃ ᓃᓐ ᑭᔐᒪᓂᑑ ᐅᐱᒫᒋᐃᐌᐎᓂᓃᒪᓐ ᑳᐱᒥᓂᔕᐅᔦᒃ, ᐁᐅᒋ ᐃᔑᒋᑫᒡ, ᑕᑎᐸᐊᒪᐙ ᑫᒋᓈᒡ᙮

9:42b.MAR.009.042 ᔑᑾ ᑮᔥᐱᓐ ᐊᐎᔭ ᒪᒋᑑᑕᒧᐋᒡ ᐯᔑᒃ ᐅᓄᐌᓂᐗᐞ ᑳᐊᑳᔒᔑᓂᒡ ᑳᑌᐺᑕᐎᓂᒡ, ᓇᐗᒡ ᑖᐅᓂᔑᔑᓐ ᑳᒥᒑᐱᑭᓯᓂᒡ ᐊᓯᓃᓐ ᒋᑕᑯᐱᒋᑲᓂᐎᓂᐸᓐ ᐅᑴᑲᓂᕽ ᒋᐸᑯᐲᐌᐱᓂᑲᓂᐎᐸᓐ ᑭᒋᑲᒦᕽ, ᐊᐲᒡ ᐐᓐ ᒋᒪᒋᑑᑕᒧᐋᒡ ᐊᐱᓅᒌᔕᓐ᙮

9:43b.MAR.009.043 ᑮᔥᐱᓐ ᐌᒋ ᒪᒋᑑᑕᒧᐃᑯᐗᓀᓐ ᐃᐌ ᑳᐃᓈᐸᒋᑑᔭᓐ ᑭᓂᓐᒡ, ᑮᔥᑲᑕᐊᓐ! ᓇᐗᒡ ᑖᐅᓂᔑᔑᓐ ᓇᐸᓀᓂᒌᔭᐸᓐ ᒋᐅᑎᑕᒪᓐ ᐱᒫᑎᓯᐎᓐ ᑫᐴᓂ ᐊᔮᓯᓄᒃ, ᐊᐲᒡ ᐐᓐ ᓃᔓᓂᒌᔭᓐ ᒋᐃᔖᔭᐸᓐ ᒪᒋ ᐃᔥᑯᑌᕽ, ᐃᐃᐌ ᐁᑳ ᐐᑳ ᐃᔮᑕᐌᓯᓄᒃ᙮

9:45b.MAR.009.045 ᑮᔥᐱᓐ ᑲᔦ ᐌᒋ ᒪᒋᑑᑕᒧᐃᑯᐗᓀᓐ ᑭᓯᑦ ᑳᐃᓈᐸᒋᑑᔭᓐ, ᑮᔥᑭᔕᓐ! ᓇᐗᒡ ᑖᐅᓂᔑᔑᓐ ᒋᒫᑭᓭᔭᓐ, ᒋᐅᑎᑕᒪᓐ ᐃᐃ ᐱᒫᑎᓯᐎᓐ ᐐᑳ ᑫᐴᓂ ᐊᔮᓯᓄᒃ, ᐊᐲᒡ ᐐᓐ ᒥᒋᓃᔥ ᒋᐊᔮᔭᐸᓐ ᑭᓯᑕᓐ ᒋᐊᐸᑭᓂᑰᔭᓐ ᐃᐃᒫ ᒪᒋ ᐃᔥᑯᑌᕽ᙮

9:47b.MAR.009.047 ᑮᔥᐱᓐ ᑲᔦ ᐌᒋ ᒪᒋᑑᑕᒧᐃᑯᐗᓀᓐ ᑭᔥᑮᔑᒃ ᑳᐃᓈᐸᒋᑑᔭᓐ, ᑭᒑᐱᐌᐸᐅᑎᓱᓐ! ᓇᐗᒡ ᑖᐅᓂᔑᔑᓐ ᐯᔑᑾᒃ ᐁᑕ ᑭᔥᑮᔑᒃ, ᒋᐅᑎᑕᒪᓐ ᑭᔐᒪᓂᑑ ᐁᑕᔑ ᐅᑭᒫᐎᒡ, ᐊᐲᒡ ᐃᑕᔥ ᐐᓐ ᓃᔓᔥᑮᔑᑴᔭᓐ ᒋᐊᐸᑭᓂᑰᔭᐸᓐ ᐃᐃᒫ ᒪᒋ ᐃᔥᑯᑌᕽ,

9:48b.MAR.009.048 ᐃᐃᒫ ᐐᑳ ᐁᔑ ᓂᐳᓯᓂᒃ ᐃᐃ ᐆᑴᐞ ᑳᐸᓈᒋᐃᑯᒡ ᐊᐎᔭ, ᑲᔦ ᐐᑳ ᑳᐃᔑ ᐋᑕᐌᓯᓄᒃ ᐃᔥᑯᑌ ᑳᒑᑭᓱᑯᒡ, ᑮᐃᑭᑐ᙮

9:49b.MAR.009.049 ᔑᑾ ᑮᐃᑭᑐ: ᑲᑭᓇ ᐸᑭᑎᓈᓱᐎᓇᓐ ᔒᐎᑖᑲᓇᐃᑳᑌᐗᓐ ᑫᐅᒋ ᐯᑲᑭᓐ ᑫᐅᒋ ᐅᑖᐱᓂᑳᑌᑭᓐ᙮ ᒦᑕᔥ ᐯᔑᑾᓐ ᑲᑭᓇ ᐊᐎᔭ ᐁᔑᓈᑾᓂᓂᒃ ᑲᒀᑕᑭᑑᐎᓐ ᒋᐅᑎᓵᐸᑕᕽ ᑖᐱᔥᑰ ᐃᔥᑯᑌᓂ ᐁᐯᑭᐃᑯᒡ᙮

9:50b.MAR.009.050 ᐅᓂᔑᔑᓐ ᐃᐃ ᔒᐎᑖᑲᓐ᙮ ᑮᔥᐱᓐ ᐃᑕᔥ ᐐᐋᓂᓯᐳᑾᒃ ᐃᐃ ᔒᐎᑖᑲᓐ, ᐋᓃᔥ ᑫᑑᑕᒪᐸᓐ ᒦᓇᐙ ᒋᔒᐎᑖᑲᓂᐳᑾᑭᐸᓐ? ᑖᐱᔥᑰ ᑳᔑ ᒥᓄᐳᑾᒃ ᐃᐃ ᒦᒋᒻ ᐁᔒᐎᑖᑲᓂᐳᑾᒃ, ᒦᐃ ᐃᔑ ᒥᓄᐐᒌᑎᒃ ᐁᑕᓱᐯᔑᑯᔦᒃ, ᒋᒥᓄᓭᔦᒃ, ᑮᐃᑭᑐ᙮

10

10:1b.MAR.010.001 ᑮᐊᓂ ᐅᒋ ᒫᒑ ᑕᔥ ᐃᐃᒫ ᐊᔮᐎᓂᕽ᙮ ᐌᑎ ᑮᐃᔖ ᒎᑏᔮᐎ ᐊᑮᕽ ᐃᓇᑫ, ᔑᑾ ᑮᐋᔕᐎᔥᑳ ᒞᕒᑕᓇᐎ ᓰᐲᕽ ᙮ ᒦᓇᐙ ᐅᑮ ᐱᓈᓯᑳᑰᐞ ᐃᐃ ᑳᐱᒫᒪᐌᓄᓂᒡ᙮ ᔑᑾ ᑕᔥ ᐃᐃᐌ ᑳᑮᓂᑖ ᐃᔑᒋᑫᒡ, ᐅᑮᐊᓂ ᐃᔑᑭᑭᓄᐊᒪᐙᐞ᙮

10:2b.MAR.010.002 ᐋᓂᓐᑦ ᑕᔥ ᐅᑮᐱ ᑲᑴᐗᓂᑮᔗᐃᑰᐞ ᐃᐃ ᐯᕒᐊᓰᐎᓂᓂᐗᐞ, ᐁᑮ ᑲᑴᒋᒥᑯᒡ: ᐃᓈᑯᓈ ᓇ ᐃᓂᓂ ᒋᐌᐱᓈᒡ ᐅᐐᑎᑫᒫᑲᓇᓐ? ᐅᑮᐃᑰᐞ᙮

10:3b.MAR.010.003 ᒋᓴᔅ ᐃᑕᔥ ᐅᑮᓇᑴᑕᐙᐞ: ᐋᓃᓐ ᑳᑮᐃᓈᑯᓂᓀᒃ ᒨᓯᔅ ? ᐅᑮᐃᓈᐞ᙮

10:4b.MAR.010.004 ᐅᐅᐌ ᑕᔥ ᑮᐃᑭᑐᐗᐞ: ᒨᓯᔅ ᐅᑮ ᐸᑭᑎᓈᓐ ᐃᓂᓂᐗᓐ ᒋᐅᔑᐲᐊᒥᓂᒡ ᐃᐃ ᐌᐱᓂᐌᐎᒪᓯᓇᐃᑲᓐ, ᔑᑾ ᒋᐸᑫᓂᔕᐙᓂᒡ ᐃᓂ ᐅᐐᑎᑫᒫᑲᓂᓂ, ᐅᑮᐃᑰᐞ᙮

10:5b.MAR.010.005 ᒋᓴᔅ ᐃᑕᔥ ᐅᑮᐃᓈᐞ: ᑭᑮᐅᒋ ᐃᓈᑯᓂᑯᐙ ᒨᓯᔅ ᐅᐅ ᑭᔕᔒᐱᑕᒧᐎᓂᐙ ᐅᒋ᙮

10:6b.MAR.010.006 ᐊᐲ ᑕᔥ ᑳᐅᔑᑑᒡ ᑲᑭᓇ ᑫᑰᓐ ᑭᔐᒪᓂᑑ, ᑮᐃᑭᑐᒻ ᐅᐅᐌ: ᐅᑮᐅᔑᐋᐞ ᒋᓈᐯᔭᐋᐎᓂᒡ ᑲᔦ ᒋᓅᔐᔭᐋᐎᓂᒡ᙮

10:7b.MAR.010.007 ᔑᑾ ᑮᐃᑭᑐᒻ: ᒦ ᐅᐌ ᑫᐅᒋ ᓇᑲᓈᒡ ᐃᓂᓂ ᐅᑌᑌᓐ ᑲᔦ ᐅᒫᒫᓐ, ᒋᓀᐱᒋ ᐐᒋᔭᔮᒫᒡ ᐃᓂ ᐅᐐᑎᑫᒫᑲᓇᓐ,

10:8b.MAR.010.008 ᒦᑕᔥ ᓅᑯᒻ ᒋᐯᔑᑴᑖᑾᓂᓂᒃ ᐅᐱᒫᑎᓯᐎᓂᐙ, ᑮᐃᑭᑐᒻ᙮ ᒦᐃ ᑳᐐᓐ ᑫᔮᐱ ᓃᔗᑖᑯᓯᓰᐗᒃ ᐊᐊ ᐃᓂᓂ ᑲᔦ ᐅᐐᑎᑫᒫᑲᓇᓐ᙮ ᓅᑯᒻ ᐃᑕᔥ ᐯᔑᑴᑖᑯᓯᐗᒃ᙮

10:9b.MAR.010.009 ᒦᐃ ᐊᐎᔭ ᑫᐅᒋ ᐸᑫᐎᓈᓯᒃ ᐃᓂ ᐅᐐᑎᑫᒫᑲᓇᓐ, ᐋᔕ ᑭᔐᒪᓂᑑ ᐁᑮ ᐯᔑᑯᐋᒡ ᐃᓂᓂᐗᓐ ᑲᔦ ᐅᐐᑎᑫᒫᑲᓂᓂ, ᑮᐃᑭᑐ ᒋᓴᔅ᙮

10:10b.MAR.010.010 ᒦᓇᐙ ᐲᑎᒃ ᐁᐊᔮᐙᒡ ᐅᑮ ᑲᑴᒋᒥᑰᐞ ᐅᑭᑭᓄᐊᒪᐙᑲᓇᐞ ᐃᐃᐌ ᐌᐱᓂᑎᐎᓐ᙮

10:11b.MAR.010.011 ᒦᑕᔥ ᐅᐅ ᐅᑮᐃᓈᐞ: ᐊᐎᔭ ᐅᐐᑎᑫᒫᑲᓇᓐ ᐌᐱᓈᒡ, ᒦᓇᐙᔥ ᐯᔑᒃ ᐅᑖᐱᓈᒡ ᐃᑴᐗᓐ, ᐅᒪᒋᑑᑕᐙᓐ ᐃᓂ ᓂᑕᒻ ᑳᑮᐐᑎᑫᒫᒡ᙮

10:12b.MAR.010.012 ᑯᒫ ᑮᔥᐱᓐ ᐃᑴ ᐌᐱᓈᒡ ᐅᓈᐯᒪᓐ, ᔑᑾ ᐯᔑᒃ ᒦᓇᐙ ᐐᑎᑫᒫᒡ ᐃᓂᓂᐗᓐ, ᒪᒋᑑᑕᒻ ᑲᔦ ᐐᓐ ᐊᐊ ᐃᑴ, ᑮᐃᑭᑐ᙮

10:13b.MAR.010.013 ᒦ ᐅ ᐊᐲᔥ ᐋᓂᓐᑦ ᐊᐎᔭᒃ ᐅᑮ ᐹᐲᑕᒪᐙᐙᓐ ᐊᐱᓅᒌᔕᐞ ᒋᓴᓲᓐ ᒋᓵᓵᒥᓈᓂᒡ᙮ ᐃᑭ ᑕᔥ ᑭᑭᓄᐊᒪᐙᑲᓇᒃ ᐅᑮᐅᒋᐋᐙᐞ ᑳᑮ ᐲᓈᓂᒡ ᐊᐱᓅᒌᔕᐞ᙮

10:14b.MAR.010.014 ᒋᓴᔅ ᐃᑕᔥ ᐁᑮᐙᐸᑕᕽ ᑮᓂᔥᑳᑌᑕᒻ᙮ ᐅᑮ ᑲᓅᓈᐞ ᐃᑕᔥ ᐅᑭᑭᓄᐊᒪᐙᑲᓇᐞ: ᒫᓄ ᑭᑲ ᐸᑭᑎᓈᐙᒃ ᐃᑭ ᐊᐱᓅᒌᔕᒃ ᒋᐱᓈᓯᑲᐎᐙᒡ᙮ ᑫᑯ ᑭᐱᑎᓈᑫᒀᓂᒃ᙮ ᐃᑭᐌᓂᐗᒃ ᐋᓃᔥ ᐊᐱᓅᒌᔑᕽ ᐁᓀᑖᑯᓯᐙᒡ, ᒦᐗᒃ ᐃᑭ ᒪᔮ ᑳᐅᑭᒫᑲᑖᑯᐙᒡ ᑭᔐᒪᓂᑑᓐ᙮

10:15b.MAR.010.015 ᑌᐺ ᑭᑎᓂᓂᓂᒻ: ᐊᐎᔭ ᐐᐃᔑ ᐅᑖᐱᓈᓯᒃ ᑭᔐᒪᓂᑑᓐ ᒋᐅᑭᒫᑲᑖᑯᒡ ᑖᐱᔥᑰ ᐊᐱᓅᒌᔥ ᐁᐃᔑ ᐅᑖᐱᓈᒡ, ᑳᐐᓐ ᐐᑳ ᐅᑲ ᐅᑎᑕᓰᓐ ᐊᐎᔭ ᐃᐃᒫ ᐁᑕᔑ ᐅᑭᒫᐎᓂᒡ ᐃᓂ ᑭᔐᒪᓂᑑᓐ, ᑮᐃᑭᑐ᙮

10:16b.MAR.010.016 ᒦᑕᔥ ᐯᐯᔑᒃ ᐅᑮ ᑕᑯᓈᐞ ᐃᐃ ᐊᐱᓅᒌᔕᐞ ᐁᓵᒥᓈᒡ, ᑭᔐᒪᓂᑑ ᑲᔕᐌᓂᒥᒃ ᒋᒥᓄᓭᔭᓐ, ᐁᑮᐃᓈᒡ᙮

10:17b.MAR.010.017 ᒦᓇᐙ ᐁᑮᐊᔮᒋᒫᒑᒡ ᒋᓴᔅ, ᐯᔑᒃ ᐅᑮ ᐱᓈᒋᐸᑣᓂᑰᓐ, ᐁᑮᐱ ᐅᒋᒌᑾᓇᐲᑖᑯᒡ ᐃᓂ ᐃᓂᓂᐗᓐ, ᐁᑲᑴᒋᒥᑯᒡ: ᑮᓐ ᒣᓍᑎᓯᔭᓐ ᐅᑭᑭᓄᐊᒫᑫ! ᐁᐃᑯᒡ᙮ ᐋᓃᓐ ᑫᐃᔑᒋᑫᔮᓐ ᒋᐅᑎᓯᑯᔮᓐ ᐱᒫᑎᓯᐎᓐ ᑫᐴᓂ ᐊᔮᓯᓄᒃ? ᐅᑮᐃᑰᓐ᙮

10:18b.MAR.010.018 ᒋᓴᔅ ᐃᑕᔥ ᐅᑮᐃᓈᓐ: ᐋᓃᓐ ᐌᒋ ᐃᔑᔭᓐ ᐅᒥᓍᑎᓰ? ᑳᐐᓐ ᐅᔕ ᐊᐎᔭ ᒥᓍᑎᓯᓰ, ᒦ ᐁᑕ ᐊᐌ ᑭᔐᒪᓂᑑ ᑳᒥᓍᑎᓯᒡ᙮

10:19b.MAR.010.019 ᑭᑭᑫᑖᓇᓐ ᐅᓄ ᐅᓇᔓᐌᐎᓇᓐ: ᑫᑯ ᓂᔑᐌᑫᓐ, ᑫᑯ ᐱᒣᑕᒪᐙᑫᓐ ᐸᑳᓐ ᐊᐎᔭ ᐅᐐᑎᑫᒫᑲᓇᓐ, ᑫᑯ ᑭᒨᑎᑫᓐ, ᑫᑯ ᑮᐗᓂᒧᑫᓐ ᒋᐊᓈᒥᒪᒡ ᐊᐎᔭ ᑎᐹᑯᓂᑎᐎᓂᕽ, ᑫᑯ ᐗᔦᔑᑖᑯᓯᑫᓐ, ᑭᑲ ᑭᒋ ᐃᓀᓂᒫ ᑭᑌᑌ ᑲᔦ ᑭᒫᒫ, ᐅᑮᐃᓈᓐ᙮

10:20b.MAR.010.020 ᒦᑕᔥ ᑳᐃᑯᒡ: ᐅᑭᑭᓄᐊᒫᑫ, ᐅᓄ ᑲᑭᓇ ᓂᑮᐱ ᐅᒋ ᓈᑲᒋᑑᓇᓐ ᐊᐸᓀ ᐯᒥ ᐅᒋ ᐅᔥᑭᓃᑮᐎᔮᓐ, ᐅᑮᐃᑰᓐ᙮

10:21b.MAR.010.021 ᒋᓴᔅ ᐅᑮ ᓵᑭᐋᓐ ᐁᑲᓇᐙᐸᒫᒡ, ᐁᐃᓈᒡ: ᐯᔑᒃ ᑫᑰᓐ ᑭᓅᑌᓭ, ᐅᑮᐃᓈᓐ᙮ ᐊᐎ ᐊᑖᐙᑫᓐ ᑲᑭᓇ ᑳᑎᐯᑕᒪᓐ᙮ ᐃᐃᐌ ᑕᔥ ᑭᑑᑎᓯᐎᓐ ᑲᑭᓇ ᒦᔥ ᐃᑭ ᑫᑎᒫᑭᓯᐙᒡ, ᐌᑎ ᑭᑲ ᐊᔮᓐ ᐌᓅᑎᓯᐎᓐ ᑭᒋᑮᔑᑯᕽ᙮ ᒦᑕᔥ ᐱᐱᒥᓂᔕᐅᔑᓐ ᒋᑭᑭᓄᐊᒪᐎᓈᓐ, ᐅᑮᐃᓈᓐ ᒋᓴᔅ ᐃᓂ ᐃᓂᓂᐗᓐ᙮

10:22b.MAR.010.022 ᒦᑕᔥ ᐁᓅᑕᕽ, ᑳᐃᔑᓃᓭᑕᒧᓭᒡ ᐊᐊ ᐃᓂᓂ᙮ ᒦᑕᔥ ᑮᒫᒑ, ᐁᑮᐅᒋ ᑭᒋᑲᔥᑫᑕᕽ᙮ ᐋᓃᔥ ᑮᑭᒋᐌᓅᑎᓯ᙮

10:23b.MAR.010.023 ᒋᓴᔅ ᐃᑕᔥ ᐅᑮ ᑲᓇᐙᐸᒫᐞ ᐃᐃ ᑳᐙᑳᓂᑳᐸᐎᓂᒡ᙮ ᐅᑮ ᑲᓅᓈᐞ ᐃᑕᔥ ᐃᐃ ᐅᑭᑭᓄᐊᒪᐙᑲᓇᐞ: ᒦᐃ ᐁᐲᒋ ᓴᓇᑲᓂᓂᒃ ᐃᑭ ᑳᑭᒋᐌᓅᑎᓯᐙᒡ ᒋᐅᑎᑕᒧᐙᒡ ᐁᑕᔑ ᐅᑭᒫᐎᓂᒡ ᑭᔐᒪᓂᑑᓐ, ᐅᑮᐃᓈᐞ᙮

10:24b.MAR.010.024 ᐅᑮᒫᒪᑳᓯᑖᑰᐞ ᐃᑕᔥ ᐅᑭᑭᓄᐊᒪᐙᑲᓇᐞ᙮ ᒋᓴᔅ ᐃᑕᔥ ᑮᐊᓂ ᐃᑭᑐ: ᓯᔮᑭᐃᓇᑰᒃ, ᐐᑫ ᐊᐲᒋ ᓴᓇᑲᓂᓂ ᐊᐎᔭ ᒋᐅᑭᒫᑲᑖᑯᒡ ᑭᔐᒪᓂᑑᓐ!

10:25b.MAR.010.025 ᐃᓇᔥᑫ ᐅᑖᑆᓇᐎᑑᓐ ᐱᒀᐎᑲᓀᐎᒥᑕᑎᒻ ᐋᓇ ᑲᑴ ᑌᐸᐆᓱᒡ ᐁᔑ ᐸᑯᓀᔮᓄᐌᔮᓂᒃ ᔖᐳᓂᑲᓐ᙮ ᓇᐗᒡ ᐃᑕᔥ ᐊᐗᔑᒣ ᐅᑲ ᑆᓇᐎᑑᓐ ᑳᐌᓅᑎᓯᒡ ᐊᐎᔭ ᒋᐅᑭᒫᑲᑖᑯᒡ ᑭᔐᒪᓂᑑᓐ, ᑮᐃᑭᑐ᙮

10:26b.MAR.010.026 ᒦᑕᔥ ᑳᐊᐲᒋᒫᒪᑳᑌᑕᒧᐙᒡ ᐃᑭ ᑭᑭᓄᐊᒪᐙᑲᓇᒃ, ᐁᑮ ᑲᑴᒋᑎᐙᒡ: ᒦᑕᔥ ᒋᑲᔥᑭᑑᓯᑭᐸᓐ ᐊᐎᔭ ᒋᐱᒫᒋᐃᓐᒡ! ᑮᐃᑭᑐᐗᒃ᙮

10:27b.MAR.010.027 ᒦᔥ ᐃᐃ ᑳᐃᔑ ᑲᓇᐙᐸᒫᒡ ᐊᐊ ᒋᓴᔅ ᐁᐃᓈᒡ: ᐊᐎᔭ ᓴ ᑯ ᐅᑆᓇᐎᑑᓐ᙮ ᐊᐊᔥ ᐐᓐ ᑭᔐᒪᓂᑑ ᑳᐐᓐ ᐅᑆᓇᐎᑑᓰᓐ᙮ ᑭᔐᒪᓂᑑ ᑲᑭᓇ ᑫᑰᓐ ᐅᑲᔥᑭᑑᓐ, ᑮᐃᑭᑐ᙮

10:28b.MAR.010.028 ᐲᑕᕒ ᐃᑕᔥ ᐅᑮᐅᒋ ᑲᓅᓈᓐ ᒋᓴᓲᓐ: ᐃᓇᔥᑫ ᑲᑭᓇ ᑫᑰᓐ ᓂᑮᓇᑲᑖᒥᓐ ᐁᑮᐱ ᐐᒌᐎᑰᔭᓐ, ᐅᑮᐃᓈᓐ᙮

10:29b.MAR.010.029 ᑌᐺ, ᑮᐃᑭᑐ ᐊᐌ ᒋᓴᔅ᙮ ᐅᐅᐌ ᑕᔥ ᑭᐐᑕᒪᐎᓂᓂᒻ: ᐊᐌᓀᓐ ᐃᑯ ᑳᓇᑲᑕᕽ ᐅᑕᔮᐎᓐ, ᑯᒫ ᑲᔦ ᓇᑲᓈᒡ ᐐᒋᑭᐌᔭᐞ, ᐅᑕᐌᒫᐞ, ᐅᒫᒫᓐ, ᐅᑌᑌᓐ, ᐅᓃᒑᓂᓴᐞ, ᑯᒫ ᑲᔦ ᐅᑭᑎᑫᐎᓇᓐ, ᓃᓐ ᑲᔦ ᒥᓍᒋᒧᐎᓐ ᐁᐅᒋ ᐃᔑᒋᑫᒡ,

10:30b.MAR.010.030 ᐗᐊ ᑎᓄ ᑕᑭᒋᑎᐸᐊᒪᐙ ᓅᑯᒻ ᒣᒀ ᐱᒫᑎᓯᒡ᙮ ᑕᒦᓈ ᐃᑯᑣᒃ ᐊᐗᔑᒣ ᐊᔮᐎᓇᓐ, ᐐᒋᑭᐌᔭᐞ, ᐅᑕᐌᒫᐞ, ᐅᒫᒫᐞ, ᐅᓃᒑᓂᓴᐞ, ᑭᑎᑫᐎᓇᓐ᙮ ᑕᑯ ᑲᔦ ᑕᔒᑫᓂᒫ ᒋᐅᒌᑭᑲᓂᐎᒡ ᐃᐃᐌ ᐁᐱᒥᓂᔕᐅᒡ᙮ ᔑᑾ ᐹᓂᒫ ᐌᑎ ᓃᑳᓇᔭᐄ ᑫᓂ ᐃᔑᓭᒃ ᑕᒦᓈ ᐱᔑᔑᒃ ᒋᐱᒫᑎᓯᒡ᙮

10:31b.MAR.010.031 ᓃᐱᐗᐞ ᐃᑕᔥ ᐃᑭ ᓅᑯᒻ ᑳᑭᒋ ᐃᓀᑖᑯᓯᐙᒡ ᑕᐊᑳᓭᑖᑯᓯᐗᒃ, ᑲᔦ ᐅᑯ ᓅᑯᒻ ᑳᐊᑳᓭᑖᑯᓯᐙᒡ, ᒦ ᐊᐲ ᐌᑎ ᑕᑭᒋ ᐃᓀᑖᑯᓯᐗᒃ, ᑮᐃᑭᑐ ᒋᓴᔅ᙮

10:32b.MAR.010.032 ᑮᐊᓂ ᐃᔖᐗᒃ ᐌᑎ ᒦᑲᓈᕽ ᑳᐃᓇᒧᓂᓂᒃ ᒉᕒᐆᓴᓬᐊᒦᐎ ᐆᑌᓈᕽ, ᒋᓴᔅ ᐃᑕᔥ ᐁᑮᓃᑳᓄᓭᒡ᙮ ᑮᐅᒋ ᒥᑯᔥᑳᑌᑕᒨᒃ ᐃᑕᔥ ᐃᑭ ᑭᑭᓄᐊᒪᐙᑲᓇᒃ᙮ ᐃᑭ ᑕᔥ ᑯᑕᑭᔭᒃ ᐅᑖᓈᕽ ᑳᐱᒧᓭᐙᒡ ᑮᑯᑖᒋᐗᒃ᙮ ᒦᑕᔥ ᒦᓇᐙ ᐅᐱᒣᔭᐄ ᐁᑮᐃᔑᐎᓈᒡ ᒋᓴᔅ ᐃᐃ ᒥᑖᔑᓃᔑᓐ ᐅᑭᑭᓄᐊᒪᐙᑲᓇᐞ, ᐅᑮᒫᒌᐐᑕᒪᐙᐞ ᐋᓃᓐ ᑫᐃᔑᒋᑫᐃᓐᒡ ᐁᑮᐃᓈᒡ:

10:33b.MAR.010.033 ᐃᓇᔥᑫ ᓅᑯᒻ ᐃᑯ ᑭᑕᓂ ᐃᔖᒥᓐ ᐌᑎ ᒉᕒᐆᓴᓬᐊᒥᕽ᙮ ᓃᓐ ᐃᓂᓂ ᐅᑯᓯᓴᓐ ᓂᑲ ᐃᔑᒋᑫᐃᑰ ᒋᑕᑯᓂᐙᒡ ᐃᑭ ᑭᒋᐊᓇᒥᐁᐎᑭᒫᒃ ᑲᔦ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ᙮ ᓂᑲ ᐃᓈᑯᓂᑰᒃ ᐃᑕᔥ ᒋᓂᓯᑰᔮᓐ᙮ ᑲᔦ ᑕ ᐊᓅᑮᐗᒃ ᒋᑕᑯᓂᒥᒡ ᐃᐃ ᒎᐗᒃ ᑳᐲᐎᑌᔦᓂᒫᐙᒡ᙮

10:34b.MAR.010.034 ᒦᑕᔥ ᐃᑭᐌᓂᐗᒃ ᓂᑲ ᓂᔑᐹᐱᓄᑖᑰᒃ ᑲᔦ ᓂᑲ ᓴᓰᒀᓂᑰᒃ, ᔑᑾ ᓂᑲ ᐸᔕᔐᐅᑰᒃ, ᔑᑾ ᓂᑲ ᓂᓯᑰᒃ᙮ ᐹᓂᒫ ᑕᔥ ᑮᓂᓱᑮᔑᑾᑳᒃ ᓂᑲ ᑮᐌᐱᒫᑎᔅ, ᐅᑮᐃᓈᐞ᙮

10:35b.MAR.010.035 ᒦᑕᔥ ᐯᔓ ᐅᑮᐱ ᑲᓅᓂᑰᐞ ᒌᒥᓴᓐ ᑲᔦ ᒞᓇᓐ, ᓭᐸᑏ ᐅᑯᓯᓴᐞ᙮ ᐅᑭᑭᓄᐊᒫᑫ, ᐅᑮᐃᑰᐞ᙮ ᓂᓇᑕᐌᑖᒥᓐ ᐌᑯᓀᓐ ᐃᑯ ᑫᑲᑴᒋᒥᑰᔭᓐ ᒋᐃᔑᒋᑫᐃᔮᕽ, ᐃᑭᑐᐗᐞ᙮

10:36b.MAR.010.036 ᒦᑕᔥ ᑳᐃᓈᒡ ᐊᐊ ᒋᓴᔅ: ᐋᓃᓐ ᐁᔑ ᐊᑕᐌᑕᒣᒃ ᒋᐃᔑᒋᑫᐃᓇᑰᒃ? ᐅᑎᓈᐞ᙮

10:37b.MAR.010.037 ᒦᑕᔥ ᐅᑮᐃᑰᐞ: ᑕᑲ ᑫᓃᓇᐎᓐᑦ ᒋᐊᔪᑭᒫᐗᐱᔮᕽ, ᐯᔑᒃ ᑭᑭᒋᓂᑭᕽ ᐃᓇᑫ, ᐯᔑᒃ ᑲᔦ ᑭᓇᒪᑎᓂᑭᕽ, ᐊᐲ ᑮᐊᐲᒋ ᐅᑭᒫᐎᔭᓐ, ᐅᑮᐃᑰᐞ᙮

10:38b.MAR.010.038 ᐅᑮᓇᑴᑕᐙᐞ ᐃᑕᔥ ᐊᐊ ᒋᓴᔅ: ᑳᐐᓐ ᑭᑭᑫᑕᓰᒻ ᐌᑯᓀᓐ ᑫᑴᒋᒥᐌᔦᒃ᙮ ᑭᑖ ᑲᔥᑭᑑᒻ ᐃᓇᔥ ᐃᐃᒫ ᐙᐅᒋ ᒥᓂᑴᔮᓐ ᑫᑮᓇᐙ ᒋᐅᒋ ᒥᓂᑴᔦᒃ ᐃᐃ ᑳᐐ ᓴᑳᑲᒥᒃ? ᑭᑖ ᑲᔥᑭᑑᒻ ᐃᓇ ᒋᐃᔑ ᓰᑲᐊᑖᑰᔦᒃ ᓃᓐ ᐙᐃᔑ ᓰᑲᐊᑖᑰᔮᓐ? ᑮᐃᑭᑐ, ᒦ ᐅᐌ ᐁᑮᐃᑕᕽ: ᑭᑖ ᑲᔥᑭᑑᒻ ᐃᓇ ᑫᑮᓇᐙ ᒋᑲᒀᑕᑭᐃᑰᔦᒃ ᑫᓃᓐ ᑖᐱᔥᑰ ᑫᔑ ᑲᒀᑕᑭᐃᑰᔮᓐ?

10:39b.MAR.010.039 ᑮᓇᑴᑕᒨᒃ ᐃᑕᔥ ᒌᒥᔅ, ᒞᓐ: ᐁᐊᐞ, ᓂᑲ ᑲᔥᑭᑑᒥᓐ᙮ ᒋᓴᔅ ᐃᑕᔥ ᐅᑮᐃᓈᐞ: ᑌᐺ ᓴ ᑭᑲᐅᒋ ᒥᓂᑴᒻ ᑳᐐ ᓴᑳᑲᒥᒃ ᐃᐃᒫ ᒥᓂᒀᑲᓂᕽ ᑳᐐᐅᒋ ᒥᓂᑴᔮᓐ, ᑫᑮᓇᐙ ᑭᑲᐃᔑ ᓰᑲᐊᑖᑰᒻ ᑫᓃᓐ ᑳᐐᐃᔑ ᓰᑲᐊᑖᑰᔮᓐ᙮

10:40b.MAR.010.040 ᓃᓐ ᐃᑕᔥ ᑳᐐᓐ ᐊᐎᔭ ᓂᑑᓈᐸᒫᓰ ᑫᓇᒪᑕᐱᒡ ᐃᐃᒫ ᓂᑭᒋᓂᑭᕽ ᐃᓇᑫ, ᓂᓇᒪᑎᓂᑭᕽ ᑲᔦ᙮ ᐃᑭ ᓴ ᐁᑕ ᑳᑮᐊᑣᑲᓂᑲᐎᑣ, ᑕᓇᒪᑕᐱᐗᒃ, ᐅᑮᐃᓈᐞ᙮

10:41b.MAR.010.041 ᐃᑭ ᑕᔥ ᒥᑖᓱ ᑯᑕᒃ ᑭᑭᓄᐊᒪᐙᑲᓇᒃ, ᐁᑮᓅᑕᒧᐙᒡ ᐅᑮᓂᔥᑳᑌᓂᒫᐙᐞ ᒌᒥᓴᓐ ᑲᔦ ᒞᓇᓐ᙮

10:42b.MAR.010.042 ᒋᓴᔅ ᐃᑕᔥ ᒫᒪᐤ ᐅᑮᐊᑐᒫᐞ ᑲᑭᓇ ᐅᑭᑭᓄᐊᒪᐙᑲᓇᐞ, ᐁᑮᐃᓈᒡ: ᑭᑭᑫᓂᒫᐙᒃ ᐃᑭ ᒥᒋᑲᑭᓇ ᐸᑳᓐ ᑳᑕᓶᐙᓇᑭᓯᐙᒡ ᐊᑮᕽ, ᐋᓃᓐ ᐁᔑ ᐅᑭᒫᑲᑖᑎᐙᒡ᙮ ᐅᓴᓇᑭᓰᑲᑖᑰᐞ ᐃᓂᐌᓂᐗᐞ ᑳᐅᑭᒫᐌᓂᒫᐙᒡ᙮ ᔑᑾ ᐅᓃᑳᓂᓰᒥᐙᐞ ᐅᒪᔥᑲᐙᑯᓂᑯᐙᐞ᙮

10:43b.MAR.010.043 ᑳᐐᓐ ᐃᑕᔥ ᑫᑮᓇᐙ ᑭᑖᐃᔑᒋᑫᓰᒻ᙮ ᐊᐌᓀᓐ ᐃᑯ ᐃᐃᒫ ᑳᑕᔑᔦᒃ ᐙᑭᒋ ᐃᓀᑖᑯᓯᒡ, ᐅᒋᑕ ᓴ ᑯ ᑭᑲ ᐊᓄᑮᑖᑯᐙ ᐊᐎᔭ᙮

10:44b.MAR.010.044 ᐊᐊᐌ ᑲᔦ ᑳᐐᓃᑳᓀᑖᑯᓯᒡ, ᐅᒋᑕ ᓴ ᑯ ᑲᑭᓇ ᐊᐎᔭᓐ ᒋᐊᓄᑮᐃᑯᒡ ᐁᑳ ᒣᒬᒡ ᒋᐅᑎᓯᓯᒃ᙮

10:45b.MAR.010.045 ᐋᓃᔥ ᓃᓐ ᐃᓂᓂ ᐅᑯᓯᓴᓐ ᐁᐋᐎᔮᓐ, ᑳᐐᓐ ᓃᓐ ᓂᑮᐅᒋ ᐲᔖᓰ ᒋᐊᓄᑮᑕᐎᐙᒡ ᑯᑕᒃ ᐊᐎᔭᒃ, ᐃᐃ ᑕᔥ ᐐᓐ ᒋᐊᓄᑮᑕᐗᒀ, ᑲᔦ ᓂᑲ ᐸᑭᑎᓂᑎᓱᑲᑕᐙᒃ ᒋᑎᐸᐃᑳᑫᐗᒃ ᓂᐱᒫᑎᓯᐎᓐ ᓃᐱᐗᐞ ᐊᐎᔭᒃ ᑫᐐᓇᐙ ᒋᐅᒋ ᐱᒫᒋᐃᑣ, ᑮᐃᑭᑐ᙮

10:46b.MAR.010.046 ᑮᑕᑯᔑᓅᒃ ᐃᐃᐌᑎ ᒉᕒᐊᑯᕽ ᑳᐃᔑᓂᑳᑌᓂᒃ ᐆᑌᓇ᙮ ᔑᑾ ᑕᔥ ᐁᐅᒋ ᒫᒑᒡ ᒋᓴᔅ ᐁᐐᒌᐎᑯᒡ ᐅᑭᑭᓄᐊᒪᐙᑲᓇᐞ ᑲᔦ ᐸᑳᓐ ᐊᐎᔭᐞ ᐁᑮᐊᓂ ᐹᑏᓄᓂᒡ, ᐯᔑᒃ ᐃᑕᔥ ᐊᐎᔭᓐ ᐅᑮᒪᔮᔥᑲᐙᐙᓐ ᐁᑳ ᐁᐙᐱᓯᓂᒃ, ᐁᐸᑯᓭᒋᑫᓂᒡ ᐃᐃᒫ ᒌᑭᑲᓇ ᐁᓇᒪᑕᐱᓂᒡ᙮ ᐹᕒᑎᒦᔭᔅ ᑮᐃᔑᓂᑳᓱᐗᓐ, ᑎᒦᔭᓴᓐ ᐁᐅᑌᑌᒫᓂᒡ᙮

10:47b.MAR.010.047 ᐗᐊ ᑕᔥ ᐹᕒᑎᒦᔭᔅ ᐅᑮᓅᑖᓐ ᒦ ᐊᐌ ᒋᓴᔅ ᓈᓴᕒᐃᑏᐎᓂᓂ ᐁᐃᑭᑐᐎᓐᒡ᙮ ᐃᑭᑐ ᑕᔥ ᐁᑭᔒᐌᒡ: ᒋᓴᔅ! ᑮᓐ ᑌᐱᑎᕽ ᑳᐅᑕᑳᓀᓯᔭᓐ! ᑭᑎᒫᑭᓇᐎᔑᓐ! ᑮᐃᔑ ᔖᑯᐌ᙮

10:48b.MAR.010.048 ᒦᑕᔥ ᐅᑮᐅᒋ ᐃᑰᐞ ᓃᐱᐗᐞ: ᐁᑕᑕᐌ ᑭᓂᐹᑗᐎᑕᒻ! ᐅᑮᐃᑰᐞ᙮ ᓇᐗᒡ ᐃᑕᔥ ᐋᒋᑯ ᐁᓂᑯᒃ ᑮᔖᑯᐌ: ᑮᓐ ᑌᐱᑎᕽ ᑳᐅᑕᑳᓀᓯᔭᓐ, ᑭᑎᒫᑭᓇᐎᔑᓐ! ᐁᐃᑭᑐᒡ᙮

10:49b.MAR.010.049 ᒦᑕᔥ ᑳᐃᔑ ᑭᐱᒋᑳᐸᐎᒡ ᒋᓴᔅ᙮ ᐊᑐᒥᒃ, ᑮᐃᑭᑐ᙮ ᒦᑕᔥ ᑳᐃᔑ ᐊᑐᒫᐙᒡ ᐃᓂ ᐎᔮᐱᓯᓂᒃ: ᒪᔥᑲᐎᑌᐁᓐ! ᐸᓯᑸᓐ, ᑭᓇᑐᒥᒃ, ᐅᑮᐃᓈᐙᓐ᙮

10:50b.MAR.010.050 ᒦᑕᔥ ᑳᐃᔑ ᐸᑭᒋᐌᐱᓇᕽ ᐅᑲᔥᑮᑮᐎᓐ ᐊᐊ ᐎᔮᐱᓯᒃ, ᐁᑮ ᐸᓯᑶᒋᓭᒡ ᐁᑮᐃᔖᒡ ᒋᓴᓲᓐ᙮

10:51b.MAR.010.051 ᒦᑕᔥ ᒋᓴᔅ ᐅᑮ ᑲᑴᒋᒫᓐ: ᐌᑯᓀᔥ ᑫᐃᔑᒋᑫᐃᓈᓐ? ᐅᑮᐃᓈᓐ᙮ ᐅᑮᐃᑰᓐ ᐃᑕᔥ ᐃᓂ ᑳᐙᐱᓯᓂᒃ: ᐅᑭᑭᓄᐊᒫᑫ, ᐊᐯᔥ ᒦᓇᐙ ᐙᐱᔮᓐ! ᐃᑭᑐᐗᓐ᙮

10:52b.MAR.010.052 ᒦᑕᔥ ᑳᐃᓈᒡ ᒋᓴᔅ: ᐊᒦᐃ ᐱᓵᓂᑯ ᐊᓂ ᒫᒑᓐ᙮ ᑭᒥᓄᔭᔮᐃᑯᓐ ᐃᐃ ᑳᔑ ᐊᐯᓂᒧᓄᑕᐎᔭᓐ, ᐅᑮᐃᓈᓐ᙮ ᔐᒫᒃ ᐃᑕᔥ ᑮᐙᐱ ᐊᐊ ᐃᓂᓂ᙮ ᐅᑮ ᐱᒥᓂᔕᐙᓐ ᐃᑕᔥ ᒋᓴᓲᓐ ᐃᐃᒫ ᒦᑲᓈᕽ᙮

11

11:1b.MAR.011.001 ᐁᐊᓂ ᐯᔓ ᐃᔖᐙᒡ ᒉᕒᐆᓴᓬᐊᒥᕽ, ᑫᑳ ᐁᐊᓂ ᐅᑎᑕᒧᐙᒡ ᐯᐸᒋ ᑲᔦ ᐯᑕᓂ ᐁᐃᔑᓂᑳᑌᓂᑭᓐ ᐆᑌᓇᐌᓴᓐ, ᐃᐃᒫ ᓀᐗᑕᑎᓐ ᑳᔭᔮᓂᑭᓐ ᐋᓬᐃᑉ ᑭᑎᑳᓈᑎᑯᑳᕽ ᐁᐃᔑᓂᑳᑌᓂᒃ ᐱᑾᑎᓈ, ᒋᓴᔅ ᐃᑕᔥ ᐅᑮᓃᑳᓂᓂᔕᐙᐞ ᓃᔑᓐ ᐅᑭᑭᓄᐊᒪᐙᑲᓇᐞ

11:2b.MAR.011.002 ᐁᐃᓈᒡ: ᐃᔖᒃ ᐃᐃᒫ ᐌᑎ ᐆᑌᓇᐌᓯᕽ ᑳᐯᔓᐊᔮᒃ, ᐅᑎᓈ᙮ ᐊᓂ ᐊᐲᒋᑕᑯᔑᓀᒃ ᐃᑯ ᑭᑲ ᐙᐸᒫᐙ ᒫᔑᒥᑕᑎᒨᔅ, ᐐᑳ ᐊᐎᔭᓐ ᐁᑮ ᑌᓴᐱᓄᑖᑯᓯᒃ᙮ ᒦ ᐊᐌ ᐋᐸᐙᑫᒃ, ᐲᓈᑫᒃ ᐃᑕᔥ᙮

11:3b.MAR.011.003 ᑮᔥᐱᓐ ᐊᐎᔭ ᐃᓂᓀᒃ: ᐌᑯᓀᓐ ᐃᐃ ᐌᒋ ᐃᔑᒋᑫᔦᒃ? ᐅᐅ ᑭᑲ ᐃᑭᑐᒻ: ᑳᑎᐯᒋᑫᒡ ᐅᓇᑕᐌᓂᒫᓐ, ᔐᒫᒃ ᐃᑕᔥ ᐅᑲ ᐱᑮᐌᓂᔕᐙᓐ, ᐃᓂᒃ, ᐅᑮᐃᓈᐞ ᒋᓴᔅ ᐃᐃ ᓃᔑᓐ ᐅᑭᑭᓄᐊᒪᐙᑲᓇᐞ᙮

11:4b.MAR.011.004 ᒦᑕᔥ ᑳᐃᔑ ᐃᔖᐙᒡ᙮ ᒦᑕᔥ ᑳᑮᐙᐸᒫᐙᒡ ᐃᓂ ᒫᔑᒥᑕᑎᒨᓴᓐ ᐁᓴᑳᑾᐱᓱᓂᒡ ᐃᐃᒫ ᒌᑭᔥᒀᓐᑦ ᓈᐎᑲᓇ᙮ ᒦᑕᔥ ᑳᐃᔑ ᐋᐸᐙᐙᒡ᙮

11:5b.MAR.011.005 ᐊᐎᔭᐞ ᐃᑕᔥ ᐃᐃᒫ ᑳᓈᓃᐸᐎᓂᒡ ᐅᑮ ᑲᓅᓂᑯᐙᐞ: ᐋᓐ ᐁᔑᒋᑫᔦᒃ ᐁᐋᐸᐌᒃ ᐊᐊ ᒫᔑᒥᑕᑎᒨᔅ? ᐅᑮᐃᑰᐙᐞ᙮

11:6b.MAR.011.006 ᒦᑕᔥ ᑳᐃᔑ ᓇᑴᑕᐙᐙᒡ ᑳᑮᐃᑯᐙᒡ ᒋᓴᓲᓐ᙮ ᒦᑕᔥ ᑳᐃᔑ ᐴᓂᒥᑯᐙᒡ᙮

11:7b.MAR.011.007 ᒦᑕᔥ ᐃᐃ ᑳᐃᔑ ᐲᑕᒪᐙᐙᒡ ᒋᓴᓲᓐ ᐃᓂ ᒫᔑᒥᑕᑎᒨᓴᓐ᙮ ᐅᐗᑮᒋᑯᓇᔮᓂᐙᓐ ᐅᑮᐊᐸᑭᑑᓈᐙᓐ ᐗᑭᑖᐎᑲᓐ᙮ ᒦᑕᔥ ᑳᐃᔑᑌᓴᐱᒡ ᒋᓴᔅ᙮

11:8b.MAR.011.008 ᓃᐱᐗᐞ ᑲᔦ ᐅᑮ ᑕᔗᑭᓯᑑᓈᐙᓐ ᐅᐗᑮᒋᑯᓇᔮᓂᐙᓐ ᒦᑲᓈᕽ᙮ ᐋᓂᓐᑦ ᑲᔦ ᐅᑮᐅᒋ ᑮᔥᑮᔥᑭᑲᐋᓈᐙᓐ ᐌᑎ ᐅᐱᒣᔭᐄ ᐗᑎᑾᓀᓴᓐ ᑳᔭᓃᐲᔑᐗᓂᓂᑭᓐ, ᐁᑮ ᑕᔗᑭᐸᑭᓯᑑᐙᒡ ᒦᑲᓈᕽ᙮

11:9b.MAR.011.009 ᐃᑭ ᑕᔥ ᑳᓃᑳᓃᐙᒡ ᑲᔦ ᐅᑖᓈᕽ ᑳᐱᒥᔭᔮᐙᒡ ᑮᐊᓂ ᔖᔖᑯᐌᐗᒃ: ᓇᓈᑯᒥᒃ ᑭᔐᒪᓂᑑ! ᑮᐃᑭᑐᐗᒃ᙮ ᑕᔕᐌᑖᑯᓯ ᐊᐌ ᑳᐱᑕᑯᔑᕽ ᐁᐱ ᐅᒋᓂᔕᐅᑯᒡ ᑳᑎᐯᒋᑫᓂᒡ! ᑮᐃᑭᑐᐗᒃ᙮

11:10b.MAR.011.010 ᑭᔐᒪᓂᑑᓐ ᐅᑲ ᔕᐌᑕᒫᑰᓐ ᐅᑖᓂᑫᑭᒫᐎᐎᓐ ᐊᐊ ᑌᐱᑦ ᑭᑫᑌᔭᐊᒥᓈᐸᓐ᙮ ᐐᐸ ᑕᐱᓈᐱᓭᓂ ᐅᑑᑭᒫᐎᐎᓐ! ᑮᐃᑭᑐᐗᒃ᙮ ᑭᒋᓇᓈᑯᒥᒃ ᑭᔐᒪᓂᑑ! ᑮᐃᔑ ᔖᔖᑯᐌᐗᒃ᙮

11:11b.MAR.011.011 ᒦᑕᔥ ᐁᑮ ᒉᑭᔥᑳᒡ ᐃᐃᒫ ᒉᕒᐆᓴᓬᐊᒥᕽ, ᑮᐲᑎᑫ ᒋᓴᔅ ᐃᐃᒫ ᒎᐗᐞ ᐅᑭᒋᐊᓇᒥᐁᐎᑲᒥᑯᓃᕽ᙮ ᑳᐃᔥᒀ ᐙᐙᐸᑕᕽ ᐃᐃᒫ ᐲᑎᒃ ᒥᓂᒃ ᑫᑰᓐ ᐃᐃᒫ ᐁᔮᓂᒃ, ᒦᑕᔥ ᑮᐊᓂ ᒫᒑ ᑲᔦ ᐅᑭᑭᓄᐊᒪᐙᑲᓇᐞ ᒥᑖᔑᓃᔑᓐ, ᐁᑮᐊᓂ ᐃᔖᐙᒡ ᐆᑌᓇᐌᓯᕽ, ᐯᑕᓂ ᑳᐃᔑ ᐐᑌᓂᒃ᙮ ᐋᓃᔥ ᐋᔕ ᑮᐊᓂ ᓈᒋᐅᓈᑯᔑᓂᓂ᙮

11:12b.MAR.011.012 ᒦᑕᔥ ᐁᓂ ᐙᐸᓂᓂᒃ ᐁᐊᓂᐅᒋ ᒫᒑᐙᒡ ᐯᑕᓃᕽ, ᑮᓅᑌᔅᑲᑌ ᒋᓴᔅ᙮

11:13b.MAR.011.013 ᐅᑮ ᑌᐹᐸᒫᓐ ᐃᑕᔥ ᐁᐸᑕᑭᓱᓂᒡ ᑭᑎᑳᓈᑎᑰᓐ, ᐱᒃ ᐁᐃᔑᐐᓱᓂᒡ ᑎᓄᐙᑎᑰᓐ, ᐁᐊᓃᐲᔑᐎᓂᒡ᙮ ᒦᑕᔥ ᐁᐊᓂ ᓈᓯᑲᐙᒡ, ᑕᑲ ᑫᑰᓐ ᒋᑮᒥᑲᕽ ᐁᐐ ᐊᒧᒥᓀᒡ᙮ ᐁᐅᑎᓵᒡ ᐃᑕᔥ, ᑳᐐᓐ ᑫᑰᓐ ᐅᑮᒥᑲᓰᓐ᙮ ᑮᒥᒋᐊᓃᐲᔑᐎᐗᓐ᙮ ᐋᓃᔥ ᑳ ᒪᔑ ᒋᑮ ᔔᒥᓂᐎᓂᒡ᙮

11:14b.MAR.011.014 ᐅᑮᐅᒋ ᑲᓅᓈᓐ ᐃᑕᔥ ᐃᓂ ᒥᑎᑰᓐ: ᑫᑯ ᒦᓇᐙ ᐐᑳ ᐊᐎᔭ ᑕᐅᒋ ᐊᒧᒥᓀᓰ, ᐅᑮᐃᓈᓐ᙮ ᐅᑮᓅᑖᑰᐞ ᐃᑕᔥ ᐅᑭᑭᓄᐊᒪᐙᑲᓇᐞ᙮

11:15b.MAR.011.015 ᐊᐲ ᑕᔥ ᒦᓇᐙ ᐁᓂ ᑕᑯᔑᓄᐙᒡ ᒉᕒᐆᓴᓬᐊᒥᕽ, ᑮᐲᑎᑫ ᒋᓴᔅ ᐃᐃᒫ ᒎᐗᐞ ᐅᑭᒋᐊᓇᒥᐁᐎᑲᒥᑯᓃᕽ᙮ ᒦᑕᔥ ᐅᑮᒫᒌ ᓵᓵᑭᒋᓂᔕᐙᐞ ᐃᓂᐌᓂᐗᐞ ᑳᑕᔑ ᐊᑖᐌᓂᒡ ᑲᔦ ᑳᑕᓇᑖᐙᑫᓂᒡ ᑭᒋᐊᓇᒥᐁᐎᑲᒥᑯᕽ᙮ ᐅᑮᐅᐱᒣᐌᐱᓇᒪᐙᐞ ᐅᑕᑖᓱᓈᑯᓂ ᐃᓂᐌᓂᐗᐞ ᑳᒣᔥᑾᑑᓂᑫᓂᒡ, ᑲᔦ ᐅᑌᓴᐱᐎᓂᓂ ᐃᓂᐌᓂᐗᐞ ᑳᔭᑖᐙᑫᓂᒡ ᐅᒦᒦᓴᐞ᙮

11:16b.MAR.011.016 ᑳᐐᓐ ᑲᔦ ᐅᑮ ᐸᑭᑎᓇᒪᐙᓰᓐ ᐊᐎᔭᓐ ᒋᔖᐳᐎᑑᓂᒡ ᐅᐲᓇᐃᑲᓂᓂ ᐃᐃᒫ ᑭᒋᐊᓇᒥᐁᐎᑲᒥᑯᕽ᙮

11:17b.MAR.011.017 ᒦ ᑳᐃᔑ ᑭᑭᓄᐊᒪᐙᒡ ᐃᐃ ᑳᑕᓀᓄᓂᒡ ᐁᐃᑭᑐᒡ: ᐃᔑᐲᐃᑳᑌ ᐅᔕ, ᑭᔐᒪᓂᑑ ᐁᐃᑭᑐᒡ: ᓃᓐ ᓂᐙᑳᐃᑲᓐ ᑕᐃᔑᓂᑳᑌ ᐊᓇᒥᐁᐎᑲᒥᒃ ᑲᑭᓇ ᐊᐎᔭ ᐁᑕᓶᐙᓇᑭᓯᒡ ᐊᑮᕽ ᒋᑕᔑ ᐊᓇᒥᐋᒡ, ᐃᔑᐲᐃᑳᑌ᙮ ᑮᓇᐙ ᑕᔥ ᐐᓐ ᑭᑮᐋᒋᑑᒻ, ᑖᐱᔥᑰ ᒋᐅᑳᓱᐎᑲᒥᑯᐙᒡ ᐅᒪᑲᑗᒃ! ᐅᑮᐃᓈᐞ᙮

11:18b.MAR.011.018 ᐃᑭ ᑕᔥ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐅᑮᓅᑖᓈᐙ ᐃᐌ ᑳᑮᐃᔑᒋᑫᓂᒡ ᐃᓂ ᒋᓴᓲᓐ᙮ ᔑᑾᔥ ᐅᑮᐋᑐᓀᐋᓈᐙ ᐋᓃᓐ ᑫᔑ ᓂᓯᒥᓐᒡ᙮ ᐋᓃᔥ ᐅᑮ ᑯᓵᐙᓐ᙮ ᐋᓃᔥ ᑲᑭᓇ ᐯᒫᑎᓯᐙᒡ ᐅᑮᒫᒪᑳᓯᑕᐙᐙᓐ ᒋᓴᓲᓐ ᐁᑮ ᑭᑭᓄᐊᒫᑫᓂᒡ᙮

11:19b.MAR.011.019 ᐊᐲ ᑕᔥ ᐁᓂ ᑎᐱᑲᓂᓂᒃ ᑮᒫᒑᐗᒃ ᒋᓴᔅ ᑲᔦ ᐅᑭᑭᓄᐊᒪᐙᑲᓇᐞ ᐅᒋ ᐃᒫ ᐆᑌᓈᕽ᙮

11:20b.MAR.011.020 ᐁᓂ ᑭᔐᐹᐗᑲᓂᓂᒃ ᐃᑕᔥ ᐁᐱᒥᔭᔮᐙᒡ ᐅᑮᐙᐸᒫᐙᓐ ᐃᓂ ᑭᑎᑳᓈᑎᑰᓐ ᐋᔕ ᐁᐹᓱᓂᒡ ᐐᑫ, ᐊᐴᔥᑫ ᐃᐃᒫ ᐅᒌᐱᑳᓂᕽ᙮

11:21b.MAR.011.021 ᐲᑕᕒ ᐃᑕᔥ ᑮᒫᒥᑲᐎ, ᐁᐃᓈᒡ ᒋᓴᓲᓐ: ᐅᑭᑭᓄᐊᒫᑫ, ᐃᓇᔥᑫ ᑭᑮᐃᓈ ᒋᓂᔑᐗᓈᑎᓯᒡ ᐊᐊ ᑭᑎᑳᓈᑎᒃ᙮ ᐋᔕ ᐹᓲ! ᑮᐃᑭᑐ᙮

11:22b.MAR.011.022 ᒋᓴᔅ ᐃᑕᔥ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᐊᐯᓂᒧᓄᑕᐎᒃ ᑭᔐᒪᓂᑑ᙮

11:23b.MAR.011.023 ᑌᐺ ᑭᐐᑕᒪᐎᓂᓂᒻ, ᐊᐌᓀᓐ ᐃᑯ ᑫᐃᑕᒧᑴᓐ ᐅᐅ ᐱᑾᑎᓈ: ᐊᐎ ᐸᑯᐲᓭᓐ ᐃᐃᒫ ᑭᒋᑲᒦᕽ! ᐁᐃᑕᕽ, ᐁᑳ ᓃᔡᔭᑫᑕᓯᒃ, ᑌᐺᔦᑕᕽ ᐃᐃ ᒋᐃᔑᐌᐸᓂᓂᒃ ᐅᑎᑭᑐᐎᓐ, ᑌᐺ ᑕᐃᔑ ᐙᐸᑕᐃᑰᐎᓯ᙮

11:24b.MAR.011.024 ᒦᐃᐌ ᑳᐅᒋ ᐃᓂᓇᑰᒃ: ᐊᓇᒥᐋᔦᒃ, ᐌᑯᓀᓐ ᐃᑯ ᑫᑲᑴᑗᔦᒃ, ᑌᐺᔦᑕᒧᒃ ᐋᔕ ᐁᑮ ᑌᐱᓇᒣᒃ, ᑭᑲ ᐙᐸᑕᐃᑰᒻ᙮

11:25b.MAR.011.025 ᔑᑾ ᐊᐲ ᓃᐸᐎᐊᓇᒥᐋᔦᒃ ᑲᔦ ᐊᐎᔭ ᓂᔥᑫᓂᒣᒃ, ᐊᑲᐌ ᐴᓀᑕᒪᐎᒃ᙮ ᒦᑕᔥ ᑭᑌᑌᐙ ᑭᒋᑮᔑᑯᕽ ᑳᔭᔮᒡ ᒋᐴᓀᑕᒪᐎᓀᒃ ᑫᑮᓇᐙ ᑭᒪᒋᑑᑕᒧᐎᓂᐙᓐ᙮

11:27b.MAR.011.027 ᒦᓇᐙ ᑕᔥ ᑮᐱᑕᑯᔑᓅᒃ ᐃᐃᒫ ᒉᕒᐆᓴᓬᐊᒥᕽ ᙮ ᒦᑕᔥ ᐃᐃᒫ ᐲᑎᒃ ᐁᐱᒧᓭᒡ ᒋᓴᔅ ᒎᐗᐞ ᐅᑭᒋᐊᓇᒥᐁᐎᑲᒥᑯᓃᕽ ᐅᑮᐱ ᑲᓅᓂᑰᐞ ᑭᒋᐊᓇᒥᐁᐎᑭᒫᐞ ᑲᔦ ᐃᓂᐌᓂᐗᐞ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ, ᑲᔦ ᐃᐃ ᒎᐗᐞ ᐅᓃᑳᓂᓰᒥᓂ᙮

11:28b.MAR.011.028 ᒦᑕᔥ ᐅᑲᑴᒋᒥᑰᐞ: ᐋᑎ ᐌᒋ ᐃᓈᑯᓂᑰᔭᓐ ᒋᐃᔑᒋᑫᔭᓐ ᐅᓄ ᑫᑰᓇᓐ? ᐊᐌᓀᓐ ᑳᐃᓈᑯᓂᒃ ᒋᑑᑕᒪᓐ? ᐅᑮᐃᑰᐞ᙮

11:29b.MAR.011.029 ᒦᑕᔥ ᑳᐃᓈᒡ ᒋᓴᔅ: ᑫᓃᓐ ᐯᔑᒃ ᑭᑲᑴᒋᒥᓂᓂᒻ, ᓇᑴᑕᐎᔑᒃ᙮ ᒦᑕᔥ ᑭᑲ ᐐᑕᒪᐎᓂᓂᒻ ᐋᑎ ᐅᐅ ᐌᒋ ᐃᔑᒋᑫᔮᓐ᙮

11:30b.MAR.011.030 ᐊᐌᓀᓇᓐ ᑳᑮᐃᓈᑯᓂᑯᒡ ᐊᐌ ᒞᓐ ᒋᓰᑲᐊᑖᑫᒡ? ᑯᒫ ᑭᔐᒪᓂᑑᓐ, ᑯᒫ ᑲᔦ ᐃᓂᓂᐗᐞ? ᓇᑴᑕᐎᔑᒃ! ᐅᑮᐃᓈᐞ ᒋᓴᔅ᙮

11:31b.MAR.011.031 ᒦᑕᔥ ᑮ ᑲᑴᒋᑎᐗᒃ ᐁᐃᑭᑐᐙᒡ: ᑭᔐᒪᓂᑑ ᑳᑮᐃᓈᑯᓂᑯᒡ ᐋᓇ ᐃᓇᕽ, ᑭᑖ ᐃᑯᓈᓐ: ᐋᓃᔥ ᑳᐅᒋ ᑌᐺᑕᐙᓯᐌᒃ?

11:32b.MAR.011.032 ᑳᐐᓐ ᐃᑕᔥ ᑭᑖᐃᑭᑐᓰᒥᓐ ᐃᓂᓂᐗᐞ ᐅᑮ ᐃᓈᑯᓂᑰᐞ ᐊᐊ ᒞᓐ, ᑮᐃᑭᑐᐗᒃ᙮ ᐋᓃᔥ ᐅᑮ ᑯᓵᐙᐞ ᐃᐃ ᐯᒫᑎᓯᓂᒡ, ᑲᑭᓇ ᐊᐎᔭ ᐁᑮᐃᓇᑭᒫᓂᒡ ᒞᓇᓐ ᐁᑎᓄᐎᓂᒡ ᐯᔑᒃ ᑳᑲᓅᑕᒪᐙᓂᒡ ᑭᔐᒪᓂᑑᓐ᙮

11:33b.MAR.011.033 ᒦᑕᔥ ᑳᐃᔑ ᓇᑴᑕᐙᐙᒡ ᐃᓂ ᒋᓴᓲᓐ: ᑳᐐᓐ ᓂᑭᑫᓂᒫᓯᐙᓈᓐ, ᐊᐌᑴᓇᓐ ᑳᑮᐃᓈᑯᓂᑯᒡ ᐊᐊ ᒞᓐ ᒋᓰᑲᐊᑖᑫᒡ, ᐅᑮᐃᓈᐙᓐ᙮ ᒦᑕᔥ ᑳᐃᑯᐙᒡ: ᒦᔥ ᐃᐃ ᑳᐐᓐ ᑫᓃᓐ ᑭᑲ ᐐᑕᒪᐎᓯᓅᓂᓂᒻ ᐋᑎ ᑳᐅᒋ ᐃᓈᑯᓂᑰᔮᓐ ᒋᐃᔑᒋᑫᔮᓐ, ᐅᑮᐃᑯᐙᓐ᙮

12

12:1b.MAR.012.001 ᒦᑕᔥ ᐅᑮᒫᒌᑲᓅᓈᐞ ᒋᓴᔅ ᐁᐋᐌᒋᑫᒡ᙮ ᐅᐅ ᑮᐃᑭᑐ: ᐋᐱᑎᕽ ᐯᔑᒃ ᐃᓂᓂ ᐅᑮ ᑭᑎᑳᓈᐞ ᔔᒥᓈᑎᑰᐞ᙮ ᔑᑾ ᐅᑮᐙᑳᒣᓂᑲᓂᑲᑖᓐ ᐅᑭᑎᑫᐎᓐ᙮ ᔑᑾ ᑕᔥ ᑮᐙᓈᐱᑲᐃᑫ ᑫᔑ ᓰᓂᐲᑭᔥᑲᐎᑣ ᔔᒥᓇᒃ ᐁᒥᓋᑎᓱᐙᒡ᙮ ᔑᑾ ᑕᔥ ᐅᑮᐅᔑᑑᓐ ᐅᑕᔕᐙᐲᐎᑲᒥᒃ᙮ ᒦᑕᔥ ᐅᑮᐋᐎᐋᐞ ᑭᑎᑫᐎᓂᓂᐗᐞ ᐃᐃ ᑭᑎᑫᐎᓐ ᒋᑲᓇᐌᑕᒫᑯᒡ, ᔑᑾ ᐹᓂᒫ ᒋᐸᑴᓇᒫᑯᒡ ᑫᐅᑎᓯᓂᒡ ᑭᑎᑫᐎᓂᕽ᙮ ᒦᑕᔥ ᐸᑳᓐ ᐊᑮᕽ ᐁᐃᔖᒡ ᐙᓴ᙮

12:2b.MAR.012.002 ᐊᐲ ᑕᔥ ᐌᒋᒋᓭᒃ ᒋᒪᐎᔂᓂᑣ ᔔᒥᓇᒃ ᐁᒣᒀᑎᓱᐙᒡ, ᐅᑮᐃᔑᓂᔕᐙᓐ ᐃᓂ ᐯᔑᒃ ᐅᑕᓄᑮᐋᑲᓇᓐ ᒋᐸᑴᓇᒫᑯᒡ ᑭᑎᑫᐎᓂᓂᐗᐞ ᐅᑑᑎᓯᐎᓂᓂ, ᒥᓂᒃ ᐌᑎᓇᒥᓂᒡ ᐃᐃᒫ ᐁᐊᑖᐙᑫᓂᒡ ᐃᐃ ᔔᒥᓇᐞ᙮

12:3b.MAR.012.003 ᐃᑭ ᑕᔥ ᑭᑎᑫᐎᓂᓂᐗᒃ ᐅᑮᐅᑎᑎᓈᐙᓐ ᐃᓂ ᐊᓄᑮᐋᑲᓇᓐ ᐁᑮ ᐸᐸᑭᑌᐙᐙᒡ᙮ ᒦᑕᔥ ᐱᔑᔑᑾᔭᐄ ᑳᐃᔑ ᑮᐌᓂᔕᐙᐙᒡ ᐁᑳ ᑫᑰᓐ ᐁᑮᒦᓈᓯᒀ᙮

12:4b.MAR.012.004 ᒦᑕᔥ ᒦᓇᐙ ᐯᔑᒃ ᐅᑮᐊᓅᓈᓐ ᐊᓄᑮᐋᑲᓇᓐ ᐊᐊ ᐃᓂᓂ ᑳᑎᐯᑕᕽ ᑭᑎᑫᐎᓐ᙮ ᐃᑭ ᑕᔥ ᑭᑎᑫᐎᓂᓂᐗᒃ ᐅᑮ ᑭᒋ ᐸᐸᑭᑌᔮᑯᑎᒀᓀᐙᐙᓐ ᑲᔦ ᐁᑭᒋ ᐊᑲᒋᐎᓈᑾᓂᓂᒃ ᐅᑮ ᑑᑕᐙᐙᓐ ᐃᓂ ᐊᓄᑮᐋᑲᓇᓐ᙮

12:5b.MAR.012.005 ᔑᑾ ᒦᓇᐙ ᐯᔑᒃ ᐅᑮᐃᔑᓂᔕᐙᓐ ᐊᐊ ᐃᓂᓂ᙮ ᒦᑕᔥ ᑳᐃᔑᓂᓯᑯᓂᒡ ᑭᑎᑫᐎᓂᓂᐗᐞ᙮ ᓃᐱᐗᐞ ᑫᔮᐱ ᐅᑮᐊᓅᓈᐞ ᐊᓄᑮᐋᑲᓇᐞ ᐊᐌ ᑳᑎᐯᑕᕽ᙮ ᐋᓂᓐᑦ ᐃᑕᔥ ᐅᑮ ᐸᐸᑭᑌᐅᑯᓂ, ᐋᓂᓐᑦ ᑲᔦ ᐅᑮᓂᓯᑯᓂ ᐃᐃ ᑭᑎᑫᐎᓂᓂᐗᐞ᙮

12:6b.MAR.012.006 ᐲᓂᔥ ᐃᑕᔥ ᐯᔑᒃ ᐁᑕ ᐊᐎᔭᓐ ᐅᑮᐊᔮᐙᓐ, ᒦᐗᓂᓂ ᑳᑮ ᓵᑭᐋᒡ ᐅᑯᓯᓴᓐ ᐊᐊ ᐃᓂᓂ᙮ ᒦᐗᓐ ᐃᑕᔥ ᐃᓂ ᑫᑲᐲ ᐅᑮᐃᔑᓂᔕᐙᓐ, ᑫᒋᓈᒡ ᐅᑲ ᑭᒋ ᐃᓀᓂᒫᐙᓐ ᓂᑯᓯᓴᓐ, ᐁᐃᑭᑐᒡ᙮

12:7b.MAR.012.007 ᒦᑕᔥ ᐋᒋᑯ ᑮᐃᑭᑐᐗᒃ ᑭᑎᑫᐎᓂᓂᐗᒃ: ᒦᐗᓐ ᐅᔕ ᐅᓄ ᐅᑯᓯᓴᓐ ᐊᐊ ᑳᑎᐯᑕᕽ ᐅᐌ ᑭᑎᑫᐎᓐ! ᑕᑲ ᓂᓯᒫᑖᓂᓐ, ᒋᑌᐱᐱᑖᐗᕽ ᑳᐐ ᑎᐱᓇᐌᐎᓯᓂᐸᓐ, ᑮᐃᑭᑐᐗᒃ᙮

12:8b.MAR.012.008 ᒦᑕᔥ ᑌᐺ ᑳᐃᔑ ᑳᒋᑎᓈᐙᒡ ᐃᓂ ᑳᑎᐯᑕᕽ ᐅᑯᓯᓴᓐ, ᐁᑮᓂᓵᐙᒡ, ᐌᑎ ᐅᐱᒣᑭᑎᑫᐎᓐ ᐁᑮᐊᐸᑭᑑᐙᒡ ᐃᐃ ᒦᔭᐤ᙮

12:9b.MAR.012.009 ᐋᓃᓐ ᐃᑕᔥ ᑮᓇᐙ ᐁᓀᑕᒣᒃ ᑫᐃᔑᒋᑫᐸᓐ ᐊᐊ ᑳᑎᐯᑕᕽ ᑭᑎᑫᐎᓐ? ᑕᐱ ᑕᑶᔑᓐ ᓴ ᒋᐱᓂᓵᒡ ᐃᐃ ᑭᑎᑫᐎᓂᓂᐗᐞ, ᔑᑾ ᐅᑲᔮᐎᐋᐞ ᐸᑳᓐ ᐊᐎᔭᐞ ᐃᐃ ᔔᒥᓂᑭᑎᑫᐎᓐ ᒋᑲᓇᐌᑕᒫᑯᒡ᙮

12:10b.MAR.012.010 ᑫᒋᓈᒡ ᑭᑮᐊᓇᒥᑑᒻ ᐅᐅᐌ ᐁᔑᐲᐃᑳᑌᓂᒃ ᑭᔐᒪᓂᑑ ᐅᑎᑭᑐᐎᓐ: ᐃᑭ ᑳᐙᑳᐃᑫᐙᒡ ᐊᓂᔖ ᐅᑮᐌᐱᓈᐙᓐ ᐃᓂ ᐯᔑᒃ ᑳᐅᓂᔑᔑᓂᒡ ᐊᓯᓃᓐ, ᒦᐗᓂᓂ ᒪᔮ ᑳᔮᐸᒋᐋᒡ ᑳᑎᐯᒋᑫᒡ ᒋᑮᔑᒋᑳᑌᒃ ᐃᐃ ᐙᑳᐃᑲᓐ᙮

12:11b.MAR.012.011 ᒦᐅᐌ ᑳᒫᒪᑳᒋ ᐃᔑᒋᑫᒡ ᐊᐊ ᑳᑎᐯᒋᑫᒡ, ᐃᑭᑑᒪᑲᓐ, ᑮᐃᑭᑐ ᒋᓴᔅ᙮

12:12b.MAR.012.012 ᐃᑭᐌᓂᐗᒃ ᐃᑕᔥ ᑳᓃᑳᓇᑭᓱᐙᒡ ᒎᐗᒃ ᐅᑖᓇᐐ ᑕᑯᓈᐙᐸᓃᓐ ᒋᓴᓲᓐ᙮ ᐅᑮ ᑭᑫᓂᒫᐙᓐ ᐋᓃᔥ ᐁᐋᐌᒋᑫᓂᒡ ᐐᓇᐙ ᐁᑕᔑᒥᑯᐙᒡ᙮ ᐅᓵᒻ ᐃᑕᔥ ᐅᑮ ᑯᓵᐙᐞ ᐃᐃ ᑳᒫᒪᐌᓄᓂᒡ᙮ ᒦᑕᔥ ᑳᓂ ᐃᔑᓇᑲᓈᐙᒡ ᐁᑮᐊᓂ ᒫᒑᐙᒡ᙮

12:13b.MAR.012.013 ᒦᑕᔥ ᑮᐊᓅᓈᐗᒃ ᐃᑭ ᐋᓂᓐᑦ ᐯᕒᐊᓰᐎᓂᓂᐗᒃ, ᐃᐃ ᑲᔦ ᐁᕒᐊᑦ ᐅᐐᒌᐙᑲᓇᐞ ᑫᑰᓐ ᒋᑲᑲᑴᒋᒫᐙᒡ ᒋᓴᓲᓐ ᐁᐐᐅᒋ ᑳᒋᑎᓈᐙᒡ᙮

12:14b.MAR.012.014 ᐊᐲ ᑕᔥ ᐌᑎᓵᐙᒡ ᐅᑮᐃᓈᐙᓐ: ᐅᑭᑭᓄᐊᒫᑫ, ᓂᑭᑫᑖᒥᓐ ᐁᓂᑖᑌᐺᔭᓐ ᑲᔦ ᐁᑳ ᐐᑳ ᐊᐎᔭ ᐁᐸᐹᐱᓯᔅᑫᓂᒫᓯᐗᒡ ᐋᓃᓐ ᑫᐃᓀᓂᒥᒃ᙮ ᑖᐱᔥᑰ ᑲᑭᓇ ᐊᐎᔭ ᑭᑎᔑ ᑲᓅᓈ᙮ ᑳᐐᓐ ᐋᓃᔥ ᑭᐸᐹᐱᓯᔅᑫᑕᒧᐙᓰᓐ ᐊᐎᔭ ᐗᑭᒐᔭᐄ ᐁᔑ ᐊᔮᒡ᙮ ᑾᔭᒃ ᐃᑕᔥ ᑭᑭᑭᓄᐊᒫᑫ ᑭᔐᒪᓂᑑ ᑳᔑ ᐊᑕᐌᓂᒫᒡ ᐊᐎᔭᓐ ᒋᐃᓈᑎᓯᓂᒡ᙮ ᐐᑕᒪᐎᔑᓈᒻ ᐃᑕᔥ: ᐃᓇᑌ ᓇ ᒋᑎᐸᐊᒪᐗᕽ ᑖᑭᔅ ᔔᓂᔮᓐ ᐊᐊᐌ ᒫᐗᒡ ᐃᑯ ᑭᒋᐅᑭᒫ, ᑫᒫ ᑳᐐᓐ?

12:15b.MAR.012.015 ᑭᑲ ᑎᐸᐊᒪᐙᓈᓐ ᐃᓇ, ᑫᒫ ᑳᐐᓐ? ᐅᑮᐃᓈᐙᓐ᙮ ᒋᓴᔅ ᐃᑕᔥ ᐁᑭᑫᓂᒫᒡ ᐁᑲᑴᐗᔦᔑᒥᑯᒡ, ᐅᑮᐃᓈᐞ: ᐋᓃᔥ ᐌᒋ ᑯᒋᐃᔦᒃ? ᑕᑲ ᐲᑕᒪᐎᔑᒃ ᐯᔑᒃ ᐙᐹᐱᑯ ᔔᓂᔮᔅ ᒋᐙᐸᒪᒃ, ᐅᑮᐃᓈᐞ᙮

12:16b.MAR.012.016 ᐅᑮ ᐲᑕᒫᑰᐞ ᐃᑕᔥ᙮ ᒦᑕᔥ ᑳᐃᓈᒡ: ᐊᐌᓀᔥ ᐗᐊ ᑳᒪᓯᓂᓯᓂᓂᒃ ᐅᑎᒀᓐ, ᐊᐌᓀᔥ ᑲᔦ ᐅᐌ ᐅᐐᓱᐎᓐ? ᐅᑮᐃᓈᐞ᙮ ᒦᑕᔥ ᑳᐃᔑ ᓇᑴᑖᑯᒡ: ᒫᐗᒡ ᐃᑯ ᑭᒋᐅᑭᒫ ᐊᐌ, ᐅᑮᐃᑰᐞ᙮

12:17b.MAR.012.017 ᒦᑕᔥ ᑳᐃᓈᒡ: ᑭᑖ ᒦᓈᐙ ᐅᔕ ᐊᐊᐌ ᒫᐗᒡ ᐃᑯ ᑭᒋᐅᑭᒫ ᑳᑎᐱᓇᐌᐎᓯᒡ, ᑲᔦ ᐊᐌ ᑭᔐᒪᓂᑑ ᑭᑖ ᒦᓈᐙ ᐃᐃ ᐐᓐ ᑳᑎᐱᓇᐌᐎᓯᒡ, ᐅᑮᐃᓈᐞ᙮ ᐅᑮᒫᒪᑳᓯᑖᑰᐞ ᐃᑕᔥ᙮

12:18b.MAR.012.018 ᐅᑮᐱ ᐅᑎᓵᐙᓐ ᐃᑕᔥ ᐃᑭ ᓵᒐᓰᐎᓂᓂᐗᒃ ᙮ ᒦᐗᒃ ᐃᑭᐌᓂᐗᒃ ᑳᐃᑭᑐᐙᒡ ᐁᑳ ᐊᐎᔭ ᒋᑮᐌᐱᒫᑎᓰᐃᓐᒡ ᑮ ᐃᔥᒀᓂᐳᒡ᙮ ᒦᑕᔥ ᐁᑲᑴᒋᒫᐙᒡ ᒋᓴᓲᓐ:

12:19b.MAR.012.019 ᐅᑭᑭᓄᐊᒫᑫ, ᑭᑮᐅᔑᐲᐊᒫᑯᓈᓐ ᐅᐅᐌ ᐅᓇᔓᐌᐎᓐ ᐊᐊ ᒨᓯᔅ : ᐊᐎᔭ ᓂᐳᓂᒡ ᐐᒋᑭᐌᔭᓐ, ᐁᑳ ᑳᐅᓂᒑᓂᓯᓯᓂᒃ, ᒋᐅᑖᐱᓇᒪᐙᒡ ᐃᓂ ᐅᐐᑎᑫᒫᑲᓂᓂ ᑲᔦ ᒋᐅᓃᒑᓂᓯᒡ, ᒋᓂᑖᐎᑭᑕᒪᐙᒡ ᐃᓂ ᐐᒋᑭᐌᔨᐸᓃᓐ᙮

12:20b.MAR.012.020 ᐋᐱᑎᕽ ᐃᑕᔥ ᑮᓃᔣᒋᐗᒃ 7 ᐁᐅᐐᒋᑭᐌᔨᑎᐙᒡ᙮ ᔑᑾ ᑮᐐᑎᑫ ᐊᐊ ᑳᓴᓰᑭᓯᒡ᙮ ᒦᑕᔥ ᑳᐃᔑ ᓅᑌᓂᐳᒡ ᐁᑮᐅᓃᒑᓂᓯᓯᒃ᙮

12:21b.MAR.012.021 ᒦᑕᔥ ᒦᓇᐙ ᐊ ᑯᑕᒃ ᐃᐃᒫ ᑳᑮᐊᓂ ᐅᒋ ᐅᔒᒣᔑᒫᐎᒡ ᑳᐃᔑ ᐐᑎᑫᒫᒡ ᐃᓂ ᐃᑴᐗᓐ᙮ ᒦᑕᔥ ᑫᐐᓐ ᐯᔑᑾᓐ ᑳᐃᔑ ᓂᐳᒡ᙮ ᑳᐐᓐ ᑫᐐᓐ ᑮᐅᓃᒑᓂᓯᓰ᙮ ᒦᑕᔥ ᒦᓇᐙ ᐯᔑᑾᓐ ᑳᐃᔑᐌᐱᓯᒡ ᐊᐊ ᐁᑯᓂᓯᐙᒡ᙮

12:22b.MAR.012.022 ᒦᑕᔥ ᐲᓂᔥ ᐃᑭ ᑳᓃᔣᒋᐙᒡ ᑳᑮᐐᑎᑫᒫᐙᒡ ᑮᒑᑭᓂᐳᐗᒃ, ᑳᐐᓐ ᑮᐅᓃᒑᓂᓯᓰᐗᒃ᙮ ᒦᑕᔥ ᑫᑲᐲ ᑳᐃᔑ ᓂᐳᒡ ᑫᐐᓐ ᐊᐊ ᐃᑴ ᐃᔥᒀᒡ᙮

12:23b.MAR.012.023 ᐊᐌᓀᓐ ᐃᑕᔥ ᑫᐅᐐᑎᑫᒫᑲᓂᐸᓐ ᐃᓂ ᐃᑴᐗᓐ ᐹᓂᒫ ᐱ ᑮᐌᐱᒫᑎᓰᐎᑮᔑᑲᒃ? ᑮᐃᔑ ᑲᑴᑗᐗᒃ ᐃᑭ ᓵᒐᓰᐎᓂᓂᐗᒃ᙮

12:24b.MAR.012.024 ᒋᓴᔅ ᐃᑕᔥ ᐅᑮᓇᑴᑕᐙᐞ: ᒦ ᐅᔕ ᐃᐌ ᐌᒋ ᐗᓂᑮᔗᔦᒃ, ᐁᑳ ᐁᑭᑫᑕᓯᐌᒃ ᑭᔐᒪᓂᑑ ᐅᑎᑭᑐᐎᓐ, ᑲᔦ ᐁᔑ ᑲᔥᑭᐁᐎᓯᒡ ᑭᔐᒪᓂᑑ᙮

12:25b.MAR.012.025 ᐊᐲ ᑕᔥ ᑮᐌᐱᒫᑎᓯᕽ, ᑳᐐᓐ ᐊᐎᔭ ᐃᓂᓂ ᑕᐐᑎᑫᓰ, ᑳᐐᓐ ᑲᔦ ᐃᑴ ᑕᐐᑎᑫᒫᓰ᙮ ᑖᐱᔥᑰ ᑕᐃᔑᐱᒫᑎᓯᐗᒃ ᐁᒐᓬᐊᐞ ᑭᒋᑮᔑᑯᕽ ᐁᔮᓂᒡ ᐁᐐᑎᑫᑎᓯᓂᒃ᙮

12:26b.MAR.012.026 ᔑᑾ ᑕᔥ ᐃᐌ ᑳᓂᐳᐙᒡ ᒋᑮᐌᐱᒫᑎᓯᐃᑣ, ᑫᒋᓈᒡ ᑭᑮᐊᓇᒥᑑᒻ ᐃᐃ ᒪᓯᓇᐃᑲᓐ ᒨᓯᔅ ᑳᑮᐅᔑᐲᐊᕽ, ᐃᐃᒫ ᐁᑕᔑᑌᓂᒃ ᐃᐃ ᐱᑯᑯᐹᔅ ᐁᑮ ᓴᑭᑌᓂᒃ ᐁᑮᐊᒀᑭᑌᓯᓂᓂᒃ, ᑳᑮᐃᔑ ᑳᓅᓂᑯᒡ ᑭᔐᒪᓂᑑᓐ: ᓃᓐ ᐅᒪᓂᑑᒪᓐ ᐁᐸᕒᐊᐋᒻ, ᔑᑾ ᐅᒪᓂᑑᒪᓐ ᐋᐃᓯᒃ, ᔑᑾ ᐅᒪᓂᑑᒪᓐ ᒉᑲᑉ, ᒦᐃ ᑳᐃᑯᑯᐸᓀᓐ ᒨᓯᔅ ᐃᓂ ᑭᔐᒪᓂᑑᓐ᙮

12:27b.MAR.012.027 ᒦᐅᐌ ᐁᑭᑐᕽ, ᐅᑯ ᑳᐅᑭᔐᒪᓂᑑᒥᐙᒡ, ᒥᓴᐙ ᐋᓇ ᐃᓂᑣ ᐁᓂᐳᐙᒡ, ᑫᔮᐱ ᐅᔕ ᐱᒫᑎᓯᐗᒃ᙮ ᐗᐐᑫ ᑭᐗᓂᑭᑭᓄᐊᒫᑫᒻ ᐁᐃᑭᑐᔦᒃ ᐁᑳ ᑮᐌᐱᒫᑎᓯᐎᓐ ᐁᐊᔮᒪᑲᓯᓄᒃ, ᐅᑮᐃᓈᐞ ᒋᓴᔅ ᐃᐃ ᓵᒐᓰᐎᓂᓂᐗᐞ᙮

12:28b.MAR.012.028 ᐯᔑᒃ ᐃᑕᔥ ᐃᓂᓂ ᑳᑭᑭᓄᐊᒫᑫᒡ ᐅᓇᔓᐌᐎᓐ ᐅᑮᓈᓯᑕᐙᐞ ᐁᑲᑲᓅᓂᑎᓂᒡ᙮ ᔑᑾ ᐅᑮᓂᓯᑐᑕᐙᓐ ᐁᐅᓂᔑᔑᓂᓂᒃ ᐁᔑ ᓇᑴᑕᒥᓂᒡ ᐐᓐ ᒋᓴᓲᓐ᙮ ᒦᑕᔥ ᐃᐃ ᐅᐱᑲᑴᒋᒫᓐ: ᐌᑯᓀᓐ ᓈᑳᓀᑖᑾᒃ ᐅᓇᔓᐌᐎᓐ? ᐅᑮᐃᓈᓐ᙮

12:29b.MAR.012.029 ᒦᑕᔥ ᐁᔑ ᓇᑴᑕᕽ ᒋᓴᔅ: ᐅᐅ ᓴ ᓈᑳᓀᑖᑾᒃ ᐅᓇᔓᐌᐎᓐ: ᐱᓯᑕᒧᒃ ᑮᓇᐙ ᐃᔅᕒᐃᔭᓬ ᐃᓂᓂᐗᒃ! ᐯᔑᒃ ᐁᑕ ᐊᔮ ᑳᑎᐯᒋᑫᒡ᙮ ᒦᐊᐌ ᑭᔐᒪᓂᑑ ᑳᑎᐯᓂᒥᓇᕽ᙮

12:30b.MAR.012.030 ᒥᓯᐌ ᑕᔥ ᑭᑌᐃᐙᕽ ᑭᑲ ᓵᑭᐋᐙ ᐊᐌ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ ᑭᑲ ᓵᑭᐋᐙ ᒥᓂᒃ ᑫᐱᒫᑎᓯᔦᒃ᙮ ᔑᑾ ᑲᑭᓇ ᑫᑰᓐ ᐁᔑ ᓈᑲᑕᐌᑕᒣᒃ, ᑲᔦ ᑲᑭᓇ ᑫᑰᓐ ᐁᔑᒋᑫᔦᒃ ᒥᓂᒃ ᑫᔑ ᑲᔥᑭᑑᔦᒃ, ᑭᑲ ᓵᑭᐋᐙ ᑳᑎᐯᒋᑫᒡ᙮

12:31b.MAR.012.031 ᐅᐅ ᒦᓇᐙ ᐯᔑᒃ ᑫᒋ ᐃᓀᑖᑾᒃ ᐅᓇᔓᐌᐎᓐ: ᑭᑲ ᓵᑭᐋᐙᒃ ᑮᒋᐱᒫᑎᓰᐙᒃ, ᐋᓃᓐ ᐁᐲᒋ ᓵᑭᐃᑎᓱᔦᒃ, ᒦᐃ ᒋᐊᐲᒋ ᓵᑭᐁᒀ, ᐃᑭᑑᒪᑲᓐ᙮ ᑳᐐᓐ ᐊᐗᔑᒣ ᐊᐲᑌᑖᑾᓯᓅᓐ ᐅᓇᔓᐌᐎᓐ ᐊᐲᒡ ᐐᓐ ᐅᓄ, ᐅᑮᐃᓈᓐ᙮

12:32b.MAR.012.032 ᒦᑕᔥ ᐁᐃᑯᒡ ᐃᓂ ᐃᓂᓂᐗᓐ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ: ᐅᑭᑭᓄᐊᒫᑫ, ᑾᔭᒃ ᑭᑎᑭᑦ᙮ ᑌᐺ ᐯᔑᒃ ᐁᑕ ᐊᔮ ᑭᔐᒪᓂᑑ, ᑳᐐᓐ ᐸᑳᓐ ᐊᐎᔭ ᐊᔮᓰ᙮

12:33b.MAR.012.033 ᑲᔦ ᑭᑲ ᓵᑭᐋᓈᓐ ᑭᔐᒪᓂᑑ ᐁᓂ ᑯᑯᑌᐁᔭᕽ ᑲᔦ ᑲᑭᓇ ᑫᑰᓐ ᐁᔑ ᓈᑲᑕᐌᑕᒪᕽ, ᑲᔦ ᒥᓂᒃ ᐁᔑ ᑲᔥᑭᑑᔭᕽ᙮ ᑲᔦ ᑭᑲ ᓵᑭᐋᓈᓐ ᐊᐊ ᑮᒋᐱᒫᑎᓰᓈᓐ ᑖᐱᔥᑰ ᐁᔑ ᓵᑭᐃᑎᓱᔭᕽ᙮ ᐊᐗᔑᒣ ᑭᒋ ᐃᓀᑖᑾᓐ ᐃᔑᒋᑫᔭᕽ ᐅᓄ ᓃᔑᓐ ᐅᓇᔓᐌᐎᓇᓐ, ᐊᐲᒡ ᐐᓐ ᑲᑭᓇ ᐲᓇᑾ ᐊᐗᑳᓇᒃ ᒋᒑᑭᓱᑣ ᐁᐸᑭᑎᓂᑳᑳᓂᐎᐙᒡ, ᑲᔦ ᐊᐲᒡ ᐐᓐ ᐸᑳᓐ ᑫᑰᓇᓐ ᐸᑭᑎᓂᑫᐎᓇᓐ ᐋᓇ ᒦᓇᕽ ᑭᔐᒪᓂᑑ, ᑮᐃᑭᑐ ᐊᐌ ᐃᓂᓂ᙮

12:34b.MAR.012.034 ᒋᓴᔅ ᐃᑕᔥ ᐁᐙᐸᑕᒪᐙᒡ ᐌᐌᓂ ᐁᓇᑴᑕᒥᓂᒡ, ᐅᑎᓈᓐ: ᐋᔕ ᑫᑳ ᒋᐅᑑᑭᒫᒥᔭᓐ ᑭᔐᒪᓂᑑ, ᐅᑮᐃᓈᓐ᙮ ᒦᑕᔥ ᑳᐐᓐ ᐊᐙᒡ ᑮᐃᓇᒪᒋᐅᓰᐗᒃ ᐊᐎᔭᒃ ᑫᔮᐱ ᒋᑲᑴᒋᒫᐙᒡ ᒋᓴᓲᓐ ᑫᑰᓐ᙮

12:35b.MAR.012.035 ᐹᓂᒫ ᑕᔥ ᐁᑭᑭᓄᐊᒫᑫᒡ ᒋᓴᔅ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐅᐅᐌ ᑮᐊᓂ ᐃᑭᑐ: ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᐅᐅᐌ ᐃᑭᑐᐗᒃ: ᐊᐊᐌ ᑭᔐᒪᓂᑑᓐ ᑳᐅᓈᐸᒥᑯᒡ ᒋᐱᒫᒋᐃᐌᒡ, ᐃᐃᒫ ᑌᐱᑎᕽ ᑕᐅᑕᑳᓀᓯ᙮ ᐋᓃᓐ ᑕᔥ ᐌᒋ ᐃᑭᑐᐙᒡ ᐅᐅ?

12:36b.MAR.012.036 ᐐᓐ ᑌᐱᑦ ᑳᑮ ᑭᒋᐅᑭᒫᐎᑯᐸᓀᓐ, ᐁᑮ ᑲᓅᑕᒪᐙᒡ ᑭᔐᒪᓂᑑᓐ, ᑮᐃᑭᑑᐸᓐ ᐅᐅᐌ: ᑳᑎᐯᒋᑫᒡ ᐅᑮᐃᓈᓐ ᐃᓂ ᑳᑎᐯᓂᒥᓂᒡ: ᐃᐃᒫ ᐃᔑ ᓇᒪᑕᐱᓐ ᓂᑭᒋᓂᑭᕽ ᐃᓇᑫ, ᐱᒌᓇᒃ ᑭᑲ ᐃᔑᐃᓐ ᐐᑫ ᒋᔖᑰᒋᐊᑣ ᒋᑕᑯᑳᓇᑣ ᐃᑭ ᑳᓂᔥᑫᓂᒥᒀ, ᒦᐃ ᑳᐃᑭᑐᑯᐸᓀᓐ᙮

12:37b.MAR.012.037 ᐐᓐ ᑌᐱᑦ ᐁᑕᔑᒫᒡ ᐃᓂ ᑭᔐᒪᓂᑑᓐ ᑳᑮᐅᓈᐸᒫᓂᒡ, ᒦᐊᐌ ᑳᑎᐯᓂᒥᒡ, ᐅᑎᓈᓐ᙮ ᑳᐐᓐ ᑕᔥ ᐊᐎᔭ ᐅᐲᐌᓰᒪᓐ ᐁᑕᔑᒫᒡ, ᓂᑎᐯᓂᒥᒃ ᐅᑖ ᐃᓈᓰᓐ, ᑮᐃᑭᑐ ᒋᓴᔅ᙮ ᐃᑭ ᑕᔥ ᑳᒫᒪᐌᓄᐙᒡ ᐅᑮᒥᓄᑕᐙᐙᓐ ᐃᓂ ᒋᓴᓲᓐ᙮

12:38b.MAR.012.038 ᔑᑾ ᑕᔥ ᐁᑮᐊᓂ ᑭᑭᓄᐊᒫᑫᒡ ᐅᐅ ᑮᐃᑭᑐ: ᐊᔓᐎᓂᑰᒃ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐃᑭ ᑳᒥᓉᑕᒧᐙᒡ ᒋᑲᑳᓍᐲᑲᐊᔐᐙᒡ, ᑲᔦ ᐁᑭᒋᐴᔔᐃᑣ ᐁᑕᔑ ᐊᑖᐌᕽ᙮

12:39b.MAR.012.039 ᐊᐲ ᑕᔥ ᑲᔦ ᐁᔖᐙᒡ ᐃᐃᒫ ᐊᓇᒥᐁᐎᑲᒥᑯᕽ, ᐅᑲᑴ ᐐᑕᐱᒫᐙᐞ ᐃᐃ ᑳᓃᑳᓇᑭᓱᓂᒡ᙮ ᐃᐃᒫᔥ ᑲᔦ ᑳᑕᔑ ᐐᑾᑎᐎᓐᒡ ᒫᐗᒡ ᐐᑲᑴ ᓃᑳᓇᐱᐗᒃ᙮

12:40b.MAR.012.040 ᔑᑾ ᐅᐗᔦᔑᒫᐞ ᐃᐃ ᑳᑮᐙᑎᓯᓂᒡ ᐃᑴᐗᐞ ᒋᑮᒪᑲᒫᐙᒡ ᑲᑭᓇ ᐊᑖᔭᐄᒥᓂ᙮ ᒦᑕᔥ ᐃᐃ ᑲᑳᓉᔥ ᐁᓂᑯᒃ ᑳᐅᒋ ᐊᓇᒥᐋᐙᒡ ᐅᑯ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐁᑾᔭᑯᒋᑫᑳᓱᐙᒡ᙮ ᐐᑫ ᑕᔥ ᐊᐗᔑᒣ ᑕᑭᒋ ᑎᐹᑯᓂᑲᓂᐎᐗᒃ, ᑮᐃᑭᑐ ᒋᓴᔅ᙮

12:41b.MAR.012.041 ᒋᓴᔅ ᐃᑕᔥ ᑮᐅᓇᐱ ᐃᐃᒫ ᐃᔑᑎᐱᔥᑰ ᐁᔑ ᐊᑌᓂᒃ ᐃᐃ ᐁᔑ ᐸᑭᑎᓂᑫᕽ ᑭᒋᐊᓇᒥᐁᐎᑲᒥᑯᕽ᙮ ᐅᑮᐙᐸᒫᐞ ᐃᑕᔥ ᐃᐃ ᐯᒫᑎᓯᓂᒡ ᐁᐸᑭᑎᓈᓂᒡ ᔔᓂᔮᓐ᙮ ᐃᑭ ᑕᔥ ᑳᑮᐌᓅᑎᓯᐙᒡ ᓃᐱᐗᐞ ᑮᐸᑭᑎᓂᑫᐗᒃ᙮

12:42b.MAR.012.042 ᑮᐱᔭᔮ ᑕᔥ ᐯᔑᒃ ᐅᑮᐙᑎᓰᑴ ᐁᑮ ᑭᑎᒫᑭᓯᒡ, ᐁᐱ ᐸᑭᑎᓂᑫᒡ ᓃᔑᓐ ᐅᓵᐙᐱᑰᓴᐞ, ᒫᑭᔖ ᐯᔑᒃ ᐲᐙᐱᑰᔅ ᐁᐃᓇᑭᓱᓂᒡ᙮

12:43b.MAR.012.043 ᒦᑕᔥ ᑳᐃᔑ ᐊᑐᒫᒡ ᒋᓴᔅ ᐅᑭᑭᓄᐊᒪᐙᑲᓇᐞ ᐁᐃᓈᒡ: ᐃᓇ ᐗᐊᐌᑎ! ᑌᐺ ᑫᑰᓐ ᑭᐐᑕᒪᐎᓂᓂᒻ᙮ ᐗᐊᐌᑎ ᐅᑮᐙᑎᓰᑴ ᐁᑭᑎᒫᑭᓯᒡ, ᓇᐗᒡ ᑭᑕᑭᑌᓂ ᐅᐌ ᐐᓐ ᑳᑮ ᐸᑭᑎᓂᑫᒡ, ᐊᐲᒡ ᐃᑭ ᒥᓂᒃ ᑳᐸᑭᑎᓂᑫᐙᒡ᙮

12:44b.MAR.012.044 ᐃᑭᔥ ᐐᓐ ᑲᑭᓇ ᑮᐸᑭᑎᓂᑫᐗᒃ ᐁᑭᒋ ᐃᓇᔥᑭᓇᐋᐙᒡ ᐅᔔᓂᔮᒥᐙᓐ᙮ ᐊᐊᔥ ᐐᓐ ᐅᑮᐙᑎᓰᑴ, ᐋᓇ ᑭᑎᒫᑭᓯᒡ ᐅᑮᐃᔑ ᐸᑭᑎᓈᓐ ᑲᑭᓇ, ᐊᐴᔥᑫ ᑯ ᑫᑮᐅᒋ ᐱᒫᑎᓯᐸᓐ, ᑮᐃᑭᑐ᙮

13

13:1b.MAR.013.001 ᐊᐲ ᒋᓴᔅ ᐁᓂ ᓵᑲᐊᕽ ᐃᐃᒫ ᒎᐗᒃ ᐅᑭᒋᐊᓇᒥᐁᐎᑲᒥᑯᐙᕽ ᐅᑮ ᑲᓅᓂᑰᓐ ᐯᔑᒃ ᐅᑭᑭᓄᐊᒪᐙᑲᓇᓐ: ᐅᑭᑭᓄᐊᒫᑫ, ᐅᑯ ᑭᓃᓐ ᐌᓂᔑᔑᐙᒡ ᑭᒋᐊᓯᓃᒃ, ᑲᔦ ᐅᓄ ᐌᓂᔑᔑᑭᓐ ᑭᒋᐙᑳᐃᑲᓇᓐ! ᐅᑮᐃᑰᓐ᙮

13:2b.MAR.013.002 ᒋᓴᔅ ᐃᑕᔥ ᐅᑮᐃᓈᓐ: ᑭᐙᐸᑖᓐ ᐃᓇ ᐅᓄ ᑫᒋ ᐃᔑᓈᑾᑭᓐ ᐙᑳᐃᑲᓇᓐ? ᑳᐐᓐ ᑲᓇᑫ ᐊᐙᒡ ᐯᔑᒃ ᐊᓯᓐ ᑕᔭᑸᑕᐙᐱᑭᔑᓰ᙮ ᑲᑭᓇ ᑕᓃᓯᐌᐸᐃᑲᓂᐎᐗᒃ, ᑮᐃᑭᑐ᙮

13:3b.MAR.013.003 ᒦᑕᔥ ᐁᑮᐃᔑ ᓇᒪᑕᐱᒡ ᒋᓴᔅ ᐃᐃᒫ ᓀᐗᑕᑎᕽ ᐁᐱᑾᑎᓈᒃ ᐋᓬᐃᑉ ᑭᑎᑳᓈᑎᑯᑳᕽ ᑳᐃᔑᓂᑳᑌᒃ, ᐁᑮᐃᓈᓴᒪᐲᑕᕽ ᑭᒋᐊᓇᒥᐁᐎᑲᒥᒃ ᐁᔑ ᐊᔮᓂᒃ᙮ ᐅᑮ ᐱᓈᓯᑳᑰᐞ ᐃᑕᔥ ᐲᑕᕒᐊᓐ, ᒌᒥᓴᓐ, ᒞᓇᓐ, ᐁᑕᕒᐆᓐ, ᑮᒨᒡ ᐁᑮ ᐐᑲᓅᓂᑯᒡ᙮

13:4b.MAR.013.004 ᐐᑕᒪᐎᔑᓈᒻ, ᐋᓇᐲ ᐅᓄ ᑫᐃᔑᐌᐸᑭᓐ? ᐌᑯᓀᔥ ᑫᑭᑭᓇᐙᒋᓭᒃ ᐃᐃ ᐊᐲ ᐙᐅᒋᒋᓭᑭᓐ? ᐁᑮᐃᑯᒡ᙮

13:5b.MAR.013.005 ᒦᑕᔥ ᐅᑮᒫᒌᑭᑭᓄᐊᒪᐙᐞ ᒋᓴᔅ: ᐊᔮᒀᒥᓯᒃ, ᑫᑯ ᐊᐎᔭ ᑭᑲ ᐗᔦᔑᒥᑯᓰᐙ᙮

13:6b.MAR.013.006 ᓃᐱᐗᐞ ᐃᓴ ᐅᑲᐱ ᐋᐸᒋᑑᓈᐙ ᓂᐐᓱᐎᓐ ᐃᐃᐌ ᒋᐃᑭᑐᐙᒡ: ᓃᓐ ᐊᐊ ᓂᑖᐤ᙮ ᓃᐱᐗᐞ ᐊᐎᔭᐞ ᐅᑲ ᐗᔦᔑᒫᐙᐞ᙮

13:7b.MAR.013.007 ᔑᑾ ᐊᐲ ᓅᑕᒣᒃ ᐯᔓ ᐁᒪᑗᒦᑳᑎᕽ, ᑫᒫ ᑲᔦ ᒥᒋᑎᐹᑐᑌᒃ ᐙᓴ ᐁᒦᑳᑎᕽ, ᑫᑯ ᒥᑯᔥᑳᑌᑕᑫᒃ᙮ ᐋᓃᔥ ᑫᒋᓈᐅᐌᑖᑾᓅᓐ ᒋᐅᒋᒋᓭᑭᓐ᙮ ᑳᐐᓐ ᐃᑕᔥ ᒪᔑ ᑕᐃᔥᒀᓭᓯᓅᓐ ᐅᐅ ᑳᐱᒥᓭᒃ ᐊᑭ᙮

13:8b.MAR.013.008 ᑕᑭᒋ ᒦᑳᑎᐗᒃ ᐊᐎᔭᒃ ᐯᐸᑳᓐ ᑳᑕᓶᐙᓇᑭᓯᐙᒡ ᑲᔦ ᑳᑕᓯᑭᓐ ᐅᑭᒫᐎᐎᓇᓐ᙮ ᐊᔮᓂᓐᑦ ᐊᔮᐎᓂᕽ ᑕᑯᔥᑾᑲᒥᑭᓭ ᐃᐃ ᐊᑭ, ᔑᑾ ᑕᒪᑕᐐᓈᓂᐗᓐ᙮ ᐅᓄ ᑕᔥ ᑫᐱ ᐃᔑᐌᐸᑭᓐ ᑖᐱᔥᑰ ᐃᓀᑖᑾᓅᓐ ᐁᒫᒌ ᐐᓴᑳᐱᓀᒡ ᐃᑴ ᐁᐐ ᐙᐸᒫᐗᓱᒡ᙮

13:9b.MAR.013.009 ᑮᓇᐙ ᑕᔥ ᐊᔮᒀᒥᐃᑎᓱᒃ᙮ ᑭᑲ ᐃᔑᐎᓂᑰᒻ ᐃᐃᒫ ᐁᑕᔑ ᐅᓇᔓᐌᕽ᙮ ᑲᔦ ᑭᑲ ᑕᔑ ᐸᐸᔕᔐᐅᑰᒻ ᐃᐃᒫ ᒎᐗᒃ ᐅᑕᓇᒥᐁᐎᑲᒥᑯᐙᕽ᙮ ᔑᑾ ᐃᐌ ᓃᓐ ᐁᑌᐺᑕᐎᔦᒃ ᑭᑲᐅᒋ ᐃᔑᐎᓂᑰᒻ ᐃᐃᒫ ᐁᔑ ᐊᔮᐙᒡ ᑭᒋᐅᓇᔓᐌᐎᑭᒫᒃ ᑲᔦ ᑭᒋᐅᑭᒫᒃ᙮ ᒦᑕᔥ ᐃᐃ ᒋᐃᔑᓭᔦᒃ ᒋᐐᑕᒪᐌᒀ ᐃᐃ ᒥᓍᒋᒧᐎᓐ᙮

13:10b.MAR.013.010 ᐅᐅ ᑕᔥ ᒥᓍᒋᒧᐎᓐ ᐊᑲᐌ ᑕᐐᑕᒪᐙᐗᒃ ᑲᑭᓇ ᑳᑕᓶᐙᓇᑭᓯᐙᑦ ᐯᒫᑎᓯᐙᑦ᙮

13:11b.MAR.013.011 ᐊᐲ ᑕᔥ ᑕᑯᓂᑰᔦᒃ ᑲᔦ ᐃᔑᐎᓂᑰᔦᒃ ᐃᐃᒫ ᑎᐹᑯᓂᑎᐎᓂᕽ, ᑫᑯ ᑮᔖᒡ ᓈᓈᑲᑕᐌᑕᑫᒃ ᐋᓃᓐ ᑫᐃᔑ ᓇᑴᑕᒣᒃ᙮ ᐌᑯᓀᓂᑯ ᑫᒦᓂᑰᐎᓯᔦᒃ ᐃᐃ ᐊᐲ ᐁᐃᔑᓭᒃ, ᒦᐃ ᐃᑭᑐᒃ᙮ ᑳᐐᓐ ᑮᓇᐙ ᑭᑎᑭᑐᐎᓂᐙ ᑭᑲᔮᐸᒋᑑᓰᒻ᙮ ᐃᓂ ᓴ ᐐᓐ ᑭᔐᒪᓂᑑ ᐅᑕᒑᑾᓐ ᐅᑮᑭᑐᐎᓂᓂ ᑭᑲᔮᐸᒋᑑᒻ᙮

13:12b.MAR.013.012 ᐃᓂᓂᐗᒃ ᐅᑲ ᒪᒥᔑᒫᐙᐞ ᐃᓂ ᐐᒋᑭᐌᔨᐙᐞ ᒋᓂᓯᒥᓐᒡ᙮ ᐃᑭ ᑲᔦ ᐅᑌᑌᒫᒃ ᐅᑲ ᑑᑕᐙᐙᐞ ᐅᓃᒑᓂᓯᐙᐞ, ᔑᑾ ᐃᑭ ᐊᐱᓅᒌᔕᒃ ᐅᑲ ᔒᑫᓂᒫᐙᐞ ᐅᓃᑭᐃᑰᐙᐞ᙮ ᐅᑲ ᐃᔑᒋᑫᐋᐙᐞ ᐃᐃ ᒋᓂᓯᒥᓐᒡ᙮

13:13b.MAR.013.013 ᑲᔦ ᑮᓇᐙ ᐁᑌᐺᑕᐎᔦᒃ ᑭᑲᐅᒋ ᔒᑫᓂᒥᑯᐙ ᑲᑭᓇ ᐊᐎᔭ᙮ ᐊᐊ ᓴ ᐐᓐ ᑫᔕᔒᐯᑕᕽ ᐲᓂᔥ ᑲᑭᓇ ᑫᑰᓐ ᒋᐃᔥᒀᓭᓂᒃ, ᑕᐱᒫᒋᐋ᙮

13:14b.MAR.013.014 ᑭᑲ ᐙᐸᒫᐙ ᐊᐌ ᐁᑲᒀᓂᓴᑫᑖᑯᓯᒡ ᑳᐐᓂᔑᐗᓈᑕᑲᒥᑭᓯᒡ᙮ ᑕᓃᐸᐎ ᐃᐃᒫ ᑫᑮᐃᔑ ᓃᐸᐎᓯᑭᐸᓐ, ᑮᐃᑭᑐ᙮ (ᑕᑲ ᐊᐌ ᐁᓇᒥᑑᒡ ᐅᐅᐌᓂ ᑳᐃᔑᐲᐃᑫᐗᒃ ᐅᑲ ᓂᓯᑐᑖᓐ ᐌᑯᓀᓐ ᑳᐃᑕᒥᓂᒡ ᒋᓴᓲᓐ᙮) ᐊᐲ ᑕᔥ ᐙᐸᑕᒣᒃ, ᑮᐃᑭᑐ, ᒫᓄ ᐃᑭ ᐁᔮᐙᒡ ᒎᑏᔮᐎ ᐊᑮᕽ ᑕᔭᐸᐃᐌᐗᒃ ᐃᐃᒫ ᐁᔑ ᐊᔨᔥᐸᑎᓈᓂᒃ᙮

13:15b.MAR.013.015 ᐊᐎᔭ ᑕᔥ ᑫᐊᔭᐱᒡ ᐁᔑ ᑕᑕᒀᓂᒃ ᐗᑭᒋᐙᑳᐃᑲᓐ ᐃᐃ ᐊᐲ, ᔐᒫᒃ ᐃᑯ ᑕᑭᔒᓃᓵᑕᐌ ᒋᒫᒌᐸᐃᐌᒡ᙮ ᑳᐐᓐ ᐊᑲᐌ ᑕᐲᑎᑫᓰ ᐅᐙᑳᐃᑲᓂᕽ ᒋᒪᓂᐱᑑᒡ ᑫᑰᓐ ᒋᒫᒌᑑᒡ᙮

13:16b.MAR.013.016 ᔑᑾ ᐊᐎᔭ ᒣᒀ ᐁᐊᓄᑮᒡ ᑭᑎᑫᐎᓂᕽ ᐃᐃ ᐊᐲ, ᑫᑯ ᐊᑲᐌ ᑕᑮᐌᓰ ᐅᐙᑳᐃᑲᓂᕽ ᒋᒪᓂᐱᑑᒡ ᐅᐲᓯᑲᐙᑲᓐ᙮

13:17b.MAR.013.017 ᑕᐅᒑᓂᒥᓯᐗᒃ ᐃᑕᔥ ᐃᑭ ᑫᑭᑭᔥᑲᐙᐗᓱᐙᒡ ᑲᔦ ᑫᓅᓂᐋᐗᓱᐙᒡ ᐃᐃ ᐊᐲ ᑫᓂ ᐃᔑᐌᐸᓂᓂᒃ!

13:18b.MAR.013.018 ᐃᔑ ᐊᓇᒥᐋᒃ ᐃᑕᔥ ᐁᑳ ᒋᓂ ᐃᔑᐌᐸᓯᓄᒃ ᒣᒀ ᐁᐱᐴᕽ᙮

13:19b.MAR.013.019 ᐃᐃᐌ ᑫᐊᐲᒋ ᑲᒀᑕᑭ ᐃᔑᐌᐸᒃ, ᑳᐐᓐ ᐐᑳ ᑮᐅᒋ ᑭᑫᑖᑾᓯᓅᓐ, ᐊᐸᓀ ᑳᑮᐅᔑᑑᒡ ᑭᔐᒪᓂᑑ ᐃᐃ ᐊᑭ, ᐲᓂᔥ ᑲᔦ ᓅᑯᒻ ᐅᐌ ᐊᐲ, ᑳᐐᓐ ᑲᔦ ᒦᓇᐙ ᐐᑳ ᑕᐃᔑ ᑭᑫᑖᑾᓯᓅᓐ᙮

13:20b.MAR.013.020 ᐊᐊ ᑕᔥ ᐐᓐ ᑳᑎᐯᒋᑫᒡ ᑎᐱᓇᐌ, ᐅᑮᐅᒋ ᐅᓀᑖᓐ ᐊᒋᓇ ᐁᑕ ᒋᐃᔑᑮᔑᑲᓂᓂᒃ᙮ ᑮᔥᐱᓐ ᐅᐅᐌ ᑮᐃᔑᓭᓯᑭᐸᓐ, ᑳᐐᓐ ᐊᐎᔭ ᑖᑮ ᔖᐾᓰ᙮ ᐃᐃ ᑕᔥ ᐐᓐ ᐅᑑᓈᐸᒋᑲᓇᐞ ᑳᑮᐅᒋ ᐅᓇᑭᒫᒡ ᑎᐱᓇᐌ, ᐅᑮᐅᒋ ᐅᓀᑖᓐ ᐁᑳ ᐅᓵᒻ ᑭᓉᔥ ᒋᐃᔑᑮᔑᑲᓯᓂᓂᑭᓐ᙮

13:21b.MAR.013.021 ᑮᔥᐱᓐ ᐊᐎᔭ ᐃᐃ ᐊᐲ ᐃᓂᓀᒃ: ᐃᓇᔥᑫ ᐅᒫ ᐊᔮᐗᓐ ᐃᓂ ᑭᔐᒪᓂᑑ ᑳᑮᐅᓀᓂᒫᒡ ᒋᐱᒫᒋᐃᐌᓂᒡ! ᑯᒫ ᑲᔦ ᐃᑭᑐᒡ ᐊᐎᔭ: ᐃᓇᔥᑫ ᐊᔮ ᐌᑎ! ᐃᑭᑐᒡ, ᑫᑯ ᑌᐺᑕᐙᑫᒃ᙮

13:22b.MAR.013.022 ᑌᐺ ᑕᐱᔭᔮᐗᒃ ᐊᐎᔭᒃ ᓃᓐ ᑭᔐᒪᓂᑑ ᑳᐲᒋᓂᔕᐅᒡ ᒋᐱᒫᒋᐃᐌᐗᒃ, ᑫᐃᓍᓂᑎᓱᐙᒡ᙮ ᑯᒫ ᑲᔦ ᓃᓐ ᑳᑲᓅᑕᒪᐗᒃ ᑭᔐᒪᓂᑑ, ᑕᐃᑎᓱᐗᒃ, ᒋᐗᔦᔑᑫᐙᒡ ᐃᑕᔥ᙮ ᑕᐙᐸᑕᐃᐌᐗᒃ ᑭᑭᓇᐙᒋᒋᑫᐎᓇᓐ ᑲᔦ ᒫᒪᑳᒋᒋᑫᐎᓇᓐ ᑫᐅᒋ ᐗᔦᔑᑫᐙᒡ᙮ ᐊᐴᔥᑫ ᑭᔐᒪᓂᑑᓐ ᐅᑑᓈᐸᒋᑲᓂᓂ ᐅᑲᐐᐗᔦᔑᒫᐙᐞ ᑮᔥᐱᓐ ᒋᑮ ᑲᔥᑭᐋᐙᒡ᙮

13:23b.MAR.013.023 ᑮᓇᐙ ᑕᔥ ᐊᔛᒃ! ᐋᔕ ᑲᑭᓇ ᑫᑰᓐ ᑭᑮᓃᑳᓈᒋᒧᑕᐎᓂᓂᒻ ᑫᓂ ᐃᔑᐌᐸᒃ᙮

13:24b.MAR.013.024 ᐃᐃ ᑕᔥ ᐊᐲ ᓈᑫ, ᑮᐃᔥᒀ ᐅᒑᓂᒥᓯᕽ, ᑕᓂ ᑲᔥᑮᑎᐱᑭᓭ ᑮᓯᔅ, ᑲᔦ ᐊᐌ ᑎᐱᑭᑮᓯᔅ ᑳᐐᓐ ᑕᓵᑳᓯᑫᓰ᙮

13:25b.MAR.013.025 ᐃᑭ ᑕᔥ ᐗᓇᑯᔕᒃ ᑕᒪᑗ ᐸᑭᔑᓅᒃ ᐃᐃᒫ ᐅᒋ ᑮᔑᑯᕽ᙮ ᔑᑾ ᐃᓂ ᑫᑰᓇᓐ ᑳᓲᑫᑖᑾᑭᓐ ᑮᔑᑯᕽ ᑳᔭᔮᑭᓐ, ᑕᐗᔥᑭᓭᐗᓐ ᐃᐃᒫ ᐅᒋ ᐁᔑ ᑭᔑᐹᔥᑳᒪᑲᑭᓐ᙮

13:26b.MAR.013.026 ᔑᑾ ᒦᐃ ᐊᐲ ᒋᐸᔭᑌᓈᑯᓯᔮᓐ ᓃᓐ ᐃᓂᓂ ᐅᑯᓯᓴᓐ, ᒋᐱᔭᔮᔮᓐ ᐃᐃᒫ ᐗᑸᑳᕽ᙮ ᑭᒋᒪᔥᑲᐎᓰᐎᓐ ᑲᔦ ᐙᓭᓯᐎᓐ ᓂᑲᐱ ᑭᑭᓈᑯᔅ᙮

13:27b.MAR.013.027 ᒦᑕᔥ ᐃᐃ ᐊᐲ ᓂᑲᐱ ᐃᔑᓂᔕᐙᒃ ᓂᑌᒐᓬᐃᒪᒃ, ᓂᑲᐃᔑ ᒫᐗᑑᓈᒃ ᐃᑭ ᐯᒫᑎᓯᐙᒡ ᑳᑮᐅᓈᐸᒪᒀ, ᒥᓯᐌ ᑯ ᒋᐅᑎᓂᑣ ᑳᐅᑖᓂᒪᓂᓂᒃ ᐁᔑ ᒥᓯᐌᑲᒥᑳᓂᒃ᙮

13:28b.MAR.013.028 ᑕᑲ ᑲᑴᑭᑫᑕᒧᒃ ᐁᐃᔑ ᑭᑭᓇᐙᓯᓈᑯᓯᒡ ᐊᐊ ᑭᒋᔓᒥᓈᑎᒃ ᐱᒃ ᑳᑎᓍᑎᑯᐎᒡ, ᐁᐃᔑᒋᑫᒡ᙮ ᑭᑭᑫᑖᓈᐙ ᐊᐲ ᐁᓅᑲᑎᑾᓇᑭᓯᒡ ᐁᓵᑭᐸᑳᒃ, ᐋᔕ ᐯᔓ ᐁᐐ ᓃᐱᕽ᙮

13:29b.MAR.013.029 ᒦᓴᑯ ᑖᐱᔥᑰ, ᐊᓂ ᐃᔑ ᐙᐸᑕᒣᒃ ᐅᓄ ᑫᓂ ᐃᔑᐌᐸᑭᓐ, ᑭᑲᐅᒋ ᑭᑫᑖᓈᐙ ᐋᔕ ᐁᐯᔗᑖᑾᒃ ᒋᐅᒋᒋᓭᒃ᙮

13:30b.MAR.013.030 ᑌᐺ ᑭᐐᑕᒪᐎᓂᓂᒻ: ᑲᑭᓇ ᐅᓄ ᑫᑰᓇᓐ ᑕᓂ ᐃᔑᐌᐸᓅᓐ ᒋᑆ ᓂᐳᐙᒡ ᐅᑯ ᓅᑯᒻ ᑳᐱᒫᑎᓯᐙᒡ᙮

13:31b.MAR.013.031 ᑮᔑᒃ ᒦᓇ ᐊᑭ ᑲᑭᓇ ᑕᔭᑾᓅᓐ, ᐃᓂᔥ ᐐᓐ ᓃᓐ ᓂᑎᑭᑐᐎᓇᓐ ᑳᐐᓐ ᑕᐃᔥᒀᓭᓯᓅᓇᓐ, ᐱᔑᔑᒃ ᑕᑌᐺᐎᓂᐗᓅᓐ᙮

13:32b.MAR.013.032 ᔑᑾ ᑳᐐᓐ ᐊᐎᔭ ᐅᑭᑫᑕᓰᓐ ᐃᐃ ᐊᐲ ᐁᑮᔑᑲᓂᓂᒃ ᑫᐃᔑᐌᐸᓂᓂᒃ, ᑲᔦ ᑫᑕᓱᑎᐸᐃᑲᓀᔮᓂᒃ᙮ ᐊᐴᔥᑫ ᐁᒐᓬᐊᒃ ᑭᒋᑮᔑᑯᕽ ᐁᔮᐙᒡ ᑳᐐᓐ ᐅᑭᑫᑕᓰᓈᐙ, ᑲᔦ ᓃᓐ ᐅᑯᓯᓯᒫ ᑳᐐᓐ ᓂᑭᑫᑕᓰᓐ᙮ ᓂᑌᑌ, ᒦ ᐁᑕ ᐊᐌ ᑫᑫᑕᕽ᙮

13:33b.MAR.013.033 ᐊᔮᒀᒥᓯᒃ, ᐊᔕᐙᐱᒃ᙮ ᑳᐐᓐ ᐋᓃᔥ ᑭᑭᑫᑕᓰᒻ ᐋᓇᐲ ᑫᐅᒋᒋᓭᒃ᙮

13:34b.MAR.013.034 ᑖᐱᔥᑰ ᑕᐃᔑᓈᑾᓐ ᐊᐊ ᐯᔑᒃ ᐃᓂᓂ ᐙᓴ ᑳᐃᔖᒡ, ᑳᓇᑲᑕᕽ ᐅᑖᐎᓐ, ᐁᑲᓇᐌᑕᐋᒡ ᐅᑕᓄᑮᐋᑲᓇᐞ ᐁᑕᓱᐯᔑᒃ ᒋᐃᓇᓄᑮᓂᒡ, ᐁᐃᓈᒡ ᐃᓂ ᑳᑲᓇᐌᑕᒥᓂᒡ ᐃᔥᒀᑌᒻ ᒋᐊᔕᐙᐱᓂᒡ᙮

13:35b.MAR.013.035 ᑫᑮᓇᐙ ᑕᔥ ᐊᔕᐙᐱᒃ᙮ ᓃᓐ ᑖᐱᔥᑰ ᓂᑎᓀᑖᑯᔅ ᐊᐊ ᐃᓂᓂ ᑳᑎᐯᑕᕽ ᐙᑳᐃᑲᓐ᙮ ᑳᐐᓐ ᑭᑭᑫᓂᒥᓰᒻ ᐋᓇᐲ ᑫᑕᑶᔑᓈᓐ, ᑯᒫ ᐊᓂ ᐅᓈᑯᔑᒃ, ᑯᒫ ᐋᐱᑖ ᑎᐱᑲᒃ, ᑯᒫ ᑲᔦ ᐊᓂ ᐲᑖᐸᕽ, ᑯᒫ ᑲᔦ ᐐᐸ ᑭᑭᔐᑉ᙮

13:36b.MAR.013.036 ᐊᔕᐙᐱᒃ, ᓭᓴᑰᒡ ᑕᑯᔑᓈᓐ ᐁᑳ ᒋᒣᒀᓂᐹᓯᐌᒃ ᐊᐲ ᐱ ᐅᑎᓯᓇᑰᒃ᙮

13:37b.MAR.013.037 ᐅᐅ ᑕᔥ ᑳᐃᓂᓇᑰᒃ, ᒦᐃ ᑲᑭᓇ ᐊᐎᔭ ᐁᓇᒃ: ᐊᔕᐙᐱᒃ! ᑮᐃᑭᑐ ᒋᓴᔅ᙮

14

14:1b.MAR.014.001 ᑫᔮᐱ ᑮᓃᔓᑮᔑᑾᑳ ᒋᑆ ᐅᒋᒋᓭᓂᒃ ᑳᐐᐃᔑ ᒌᑲᑲᒥᑭᓯᓈᓂᐗᕽ ᐱᒫᒋᐃᑰᐎ ᐐᑾᑎᐎᓐ ᑲᔦᔥ ᐁᐃᔑ ᑮᔑᑲᒃ ᐁᐅᐱᓯᑲᓂᐎᓯᒃ ᐸᑴᔑᑲᓐ ᒋᐊᒧᓐᒡ᙮ ᐃᐃ ᑕᔥ ᒎᐗᒃ ᐅᑭᒋᐊᓇᒥᐁᐎᑭᒫᒥᐙᐞ ᑲᔦ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐅᑮᓈᓈᑐᓀᐋᓈᐙ ᑫᐃᔑ ᑮᒨᒋ ᑕᑯᓈᐙᒡ ᐃᓂ ᒋᓴᓲᓐ, ᐁᑮᐐᓂᓵᐙᒡ᙮

14:2b.MAR.014.002 ᑮᐃᑭᑐᐗᒃ ᐃᑕᔥ: ᑳᐐᓐ ᑭᑖᑕᑯᓈᓯᐙᓈᓐ ᒣᒀ ᐁᐐᑾᑎᓈᓂᐗᕽ, ᒫᑭᔖ ᑕᑭᒋ ᐅᒻᐺᑲᒥᑭᓯᐗᒃ, ᒋᐲᑾᑲᒥᑭᓯᐙᐸᓐ, ᑮᐃᑭᑐᐗᒃ᙮

14:3b.MAR.014.003 ᑮᐊᔮ ᑕᔥ ᒋᓴᔅ ᐃᐃᒫ ᐯᑕᓃᕽ ᐁᐃᔑᓂᑳᑌᓂᒃ ᐆᑌᓇᐌᔅ, ᐃᐃᒫ ᑳᐃᔑᑖᓂᒡ ᐯᔑᒃ ᐃᓂᓂᐗᓐ, ᓵᐃᒪᓐ ᐁᐃᔑᓂᑳᓱᓂᒡ, ᒦ ᐊᐌ ᑳᑮᐅᒥᑮᐙᐱᓀᐸᓐ᙮ ᒣᒀ ᑕᔥ ᐁᑕᔑ ᐐᓯᓂᓂᒡ ᒋᓴᔅ, ᑮᐱ ᐲᑎᑫ ᐯᔑᒃ ᐃᑴ ᐁᑮᐊᔮᒡ ᑳᔮᑾᑭᑌᓂᒃ ᒥᓈᑾᐅᓂᓂ, ᐁᑮᐃᔑ ᐲᑌᓂᒃ ᐃᐃᒫ ᐊᓯᓃᐎ ᐅᒨᑕᔮᐱᑯᕽ ᐋᓬᐊᐹᔅᑕᕒ ᑎᓄ ᐊᓯᓃᕽ ᑳᑮᐅᒋ ᐅᔑᒋᑳᑌᓂᒃ᙮ ᓈᕒᑦ ᑳᑮ ᑎᓄᐙᑲᒥᒃ ᒥᓈᑾᐅᓐ, ᑳᐐᓐ ᑫᑰᓐ ᑮᑕᒀᑲᒥᓂᑳᑌᓯᓅᓐ᙮ ᐅᑮ ᐴᒀᐱᑭᓈᓐ ᐃᑕᔥ ᐁᔑ ᐊᑳᓯᒌᑆᐱᑲᓂᓂᒃ ᐃᐃ ᐅᒨᑕᔮᐱᒃ ᐊᐊ ᐃᑴ, ᐁᑮ ᓰᑭᓇᒪᐙᒡ ᐃᐃ ᒥᓈᑾᐅᓐ ᐃᐃᒫ ᒋᓴᓲᓐ ᐅᑎᒀᓂᓃᕽ᙮

14:4b.MAR.014.004 ᐋᓂᓐᑦ ᐃᑕᔥ ᐃᐃᒫ ᐲᑎᒃ ᑳᔭᔮᐙᒡ ᑮᐗᓯᑖᐌᑕᒨᒃ ᐁᐋᔨᑎᐙᒡ: ᐋᓃᔛᓐ ᐌᒋ ᓂᔑᐗᓈᒋᑑᒡ ᐃᐃ ᒥᓈᑾᐅᓐ?

14:5b.MAR.014.005 ᓃᐱᐗᐞ ᔔᓂᔮ ᑖᑮᐃᓇᑖᐙᑳᓂᐗᓐ᙮ ᑫᑳ ᐯᔑᑯᐊᑭ ᑖᔭᓄᑮ ᐊᐎᔭ ᒋᑲᔥᑭᐋᒡ ᐃᓂ ᒥᓂᒃ ᔔᓂᔮᓐ᙮ ᑖᑮᐅᒋ ᒦᓈᐸᓃᒃ ᑫᑎᒫᑭᓯᐙᒡ ᑮᐃᓇᑖᐙᑳᓂᐗᑭᐸᓐ ᒥᓈᑾᐅᓐ, ᑮᐃᑭᑐᐗᒃ᙮ ᒦᐃ ᐁᑮ ᑭᔒᑲᓅᓈᐙᒡ ᐃᓂ ᐃᑴᐗᓐ᙮

14:6b.MAR.014.006 ᒋᓴᔅ ᐃᑕᔥ ᑮᐃᑭᑐ: ᐴᓂᒥᒃ! ᐋᓃᔛᓐ ᐌᒋ ᒥᑯᔥᑳᓱᒣᒃ? ᑫᒋᐅᓂᔑᔑᓂᓂᒃ ᑳᑮ ᑑᑕᐎᒡ, ᐅᑮᐃᓈᐞ᙮

14:7b.MAR.014.007 ᒨᔕᒃ ᐊᔮᐗᒃ ᐅᐅᒫ ᑳᔑ ᐊᔭᔦᒃ ᐃᑭ ᑫᑎᒫᑭᓯᐙᒡ, ᐱᑯ ᐊᐲ ᒋᒥᓄᒋᑫᐁᒀᐸᓐ ᐃᓀᑕᒣᒃ᙮ ᓃᓐ ᐃᑕᔥ ᑳᐐᓐ ᐱᔑᔑᒃ ᑭᑲᔭᔮᐎᓰᒻ᙮

14:8b.MAR.014.008 ᑮᐃᔑᒋᑫ ᓴ ᐗᐊ ᐃᑴ ᐃᐌ ᒥᓂᒃ ᐁᔑ ᑲᔥᑭᑑᒡ᙮ ᑮᔖᒡ ᐅᑮ ᓰᑭᓈᓐ ᐃᐃ ᒥᓈᑾᐅᓐ ᐃᐃᒫ ᓃᔭᐎᕽ ᐁᐐ ᓇᐊᓯᑰᔮᓐ᙮

14:9b.MAR.014.009 ᑌᐺ ᑭᐐᑕᒪᐎᓂᓂᒻ: ᐋᑎ ᑯ ᑫᔑ ᑎᐹᑐᒋᑳᑌᒃ ᐃᐃ ᒥᓍᒋᒧᐎᓐ ᒥᓯᐌᑲᒥᒃ, ᑲᔦ ᐅᐅ ᑳᑮᐃᔑᒋᑫᒡ ᑕᑕᔑᒫ ᐗᐊ ᐃᑴ ᒋᒫᒥᑰᒥᓐᒡ, ᑮᐃᑭᑐ᙮

14:10b.MAR.014.010 ᒦᑕᔥ ᑳᐃᔑ ᒫᒑᒡ ᐊᐊ ᐯᔑᒃ ᐃᑭ ᑳᑮᒥᑖᔑᓃᔑᐙᒡ ᑭᑭᓄᐊᒪᐙᑲᓇᒃ, ᒎᑕᔅ ᐃᔅᑫᕒᐃᔭᑦ ᑳᐃᔑᓂᑳᓱᒡ, ᐁᑮᐃᔖᒡ ᐃᐃ ᒎᐗᒃ ᐅᑭᒋᐊᓇᒥᐁᐎᑭᒫᒥᐙᐞ, ᐁᑮᐊᐎ ᑲᓅᓈᒡ: ᑭᑲ ᑭᑭᓄᐎᓂᓂᓂᒻ ᐃᐃᒫ ᑫᔑ ᑳᒋᑎᓀᒃ ᐊᐊ ᒋᓴᔅ, ᐁᑮᐃᓈᒡ᙮

14:11b.MAR.014.011 ᐐᑫ ᑕᔥ ᑮᒥᓉᑕᒨᒃ ᐃᑭ ᑭᒋᐊᓇᒥᐁᐎᑭᒫᒃ, ᐁᑮᐃᓇᔓᑕᒪᐙᐙᒡ ᔔᓂᔮᓐ ᒋᑎᐸᐊᒪᐙᐙᒡ ᐃᓂ ᒎᑕᓴᓐ᙮ ᒦᑕᔥ ᑳᐃᔑ ᐊᑐᓀᐊᕽ ᐊᐊ ᒎᑕᔅ ᐋᓃᓐ ᑫᔑ ᑳᒋᑎᓂᒥᓐᒡ ᐃᓂ ᒋᓴᓲᓐ᙮

14:12b.MAR.014.012 ᒫᐗᒡ ᐃᑕᔥ ᐃᑯ ᓂᑕᒻ ᐁᑮᔑᑲᒃ ᐁᒫᑕᑲᒥᑲᒃ ᐐᑾᑎᐎᓐ ᒦᐃ ᐊᐲ ᐁᒫᒌᐊᒧᓐᒡ ᐸᑴᔑᑲᓐ ᐁᑳ ᐁᐅᐱᓯᑲᓂᐎᓯᒃ, ᑲᔦ ᒦᐃ ᐊᐲ ᑳᐃᔑ ᓂᓯᑣ ᒫᓇᒑᓂᔐᓴᒃ ᑳᐐᐊᒧᑣ ᐁᐱᒫᒋᐃᑰᐎ ᐐᑾᑎᓈᓂᐗᕽ, ᒦᐃ ᐊᐲ ᒋᓴᔅ ᐅᑮ ᑲᑴᒋᒥᑰᐞ ᐅᑭᑭᓄᐊᒪᐙᑲᓇᐞ: ᐋᓃᑎ ᑕᔥ ᐁᔑ ᐊᑕᐌᑕᒪᓐ ᒋᐃᔑ ᐅᔒᑕᒫᑰᔭᓐ ᑫᑕᔑᐐᓯᓂᔭᓐ ᐁᐱᒫᒋᐃᑰᐎ ᐐᑾᑎᕽ? ᐅᑮᐃᑰᐞ᙮

14:13b.MAR.014.013 ᒦᑕᔥ ᑳᐃᔑ ᐊᓅᓈᒡ ᓃᔑᓐ ᐅᑭᑭᓄᐊᒪᐙᑲᓇᐞ ᐁᐃᓈᒡ: ᐃᔖᒃ ᐆᑌᓈᕽ, ᑭᑲ ᒣᒀᔥᑲᐙᐙ ᐃᓂᓂ ᐁᑮᓈᑕᐃᐲᒡ ᐅᑕᑑᐹᓐ᙮ ᒦ ᐊᐌ ᐱᒥᓂᔕᐅᒃ᙮

14:14b.MAR.014.014 ᐋᑎ ᑕᔥ ᐃᑯ ᑫᐃᔑ ᐲᑎᑫᒡ ᐊᐊ ᐃᓂᓂ, ᒦᐃᒫ ᐃᔑ ᑲᑴᒋᒥᒃ ᐊᐊ ᑳᑎᐯᑕᕽ ᐙᑳᐃᑲᓐ: ᐅᑭᑭᓄᐊᒫᑫ ᐃᑭᑐ: ᐋᑎ ᐁᔮᒃ ᑖᐎᓐ ᑫᑕᔑᐐᓯᓂᔮᕽ ᓂᑭᑭᓄᐊᒪᐙᑲᓇᒃ ᐁᐱᒫᒋᐃᑰᐎ ᐐᑾᑎᕽ ᑭᑎᒃ, ᒦᐃᐌ ᐃᓂᒃ᙮

14:15b.MAR.014.015 ᑭᑲ ᐙᐸᑕᐃᑯᐙ ᑕᔥ ᐃᐃᒫ ᐃᔥᐱᒥᕽ ᐁᒥᒑᒃ ᐸᑫᒋᑲᓐ ᐋᔕ ᐁᑕᔑ ᐗᐌᔑᒋᑳᑌᓂᒃ ᑲᔦ ᑲᑭᓇ ᑫᑰᓐ ᐁᑾᔮᑕᑌᒃ᙮ ᒦᐃᒫ ᐃᔑ ᐅᔒᑖᒃ ᒋᐐᓯᓂᔭᕽ, ᐅᑮᐃᓈᐞ᙮

14:16b.MAR.014.016 ᒦᑕᔥ ᑳᐃᔑ ᒫᒑᐙᒡ ᐁᑮᐃᔑ ᑕᑯᔑᓄᐙᒡ ᐆᑌᓈᕽ᙮ ᒪᔮ ᑕᔥ ᐅᑮᐃᔑ ᒥᑳᓈᐙ ᐃᐌ ᑳᐃᔑ ᐐᑕᒫᑯᐙᒡ ᒋᓴᓲᓐ᙮ ᒦᑕᔥ ᑳᐃᔑ ᐅᔒᑖᐙᒡ ᒋᐐᓯᓂᐙᒡ ᐁᐱᒫᒋᐃᑰᐎ ᐐᑾᑎᕽ᙮

14:17b.MAR.014.017 ᐊᐲ ᑕᔥ ᐌᓈᑯᔑᓂᓂᒃ ᐅᑮᐱ ᐐᒋᑕᑯᔑᓅᒫᐞ ᒋᓴᔅ ᐃᐃ ᒥᑖᔀᔑᓃᔑᓐ ᐅᑭᑭᓄᐊᒪᐙᑲᓇᐞ᙮

14:18b.MAR.014.018 ᒣᒀ ᑕᔥ ᐁᐅᐱᒣᔑᓄᐐᓯᓂᐙᒡ, ᐅᑮᐃᓈᐞ ᒋᓴᔅ: ᐱᓯᑕᒧᒃ ᐅᐅ: ᐯᔑᒃ ᐊᐊ ᓂᑲ ᐃᔑᒋᑫᐃᒃ ᑮᓇᐙ ᑳᐐᒋᐐᓯᓃᒥᓇᑰᒃ ᒋᑕᑯᓂᑰᔮᓐ, ᑮᐃᑭᑐ᙮

14:19b.MAR.014.019 ᒦᑕᔥ ᑳᐃᔑ ᒥᑯᔥᑳᑌᑕᒥᓂᒡ ᑲᑭᓇ, ᐁᑮᐅᒋ ᑲᑴᒋᒫᐙᒡ ᐯᐯᔑᒃ ᐁᐃᓈᐙᒡ: ᑳ ᒫᐐᓐ ᓃᓐ, ᐃᓇ? ᐅᑮᐃᑰᐞ᙮

14:20b.MAR.014.020 ᐅᑮᓇᑴᑕᐙᐞ ᐃᑕᔥ ᐊᐊ ᒋᓴᔅ: ᐯᔑᒃ ᑮᓇᐙ ᑳᒥᑖᔀᔑᓃᔑᔦᒃ, ᐯᔑᒃ ᑳᑭᑖᓈᒡ ᐅᐸᑴᔑᑲᓂᒪᓐ ᐁᐐᑑᐸᒥᒡ, ᒦᐊᐌ ᑫᐃᔑᒋᑫᐃᒡ᙮

14:21b.MAR.014.021 ᓃᓐ ᐃᓂᓂ ᐅᑯᓯᓴᓐ, ᑌᐺ ᓂᑕᐎᓂᑉ ᑖᐱᔥᑰ ᑳᐃᔑᐲᐃᑳᑌᓂᒃ ᑭᔐᒪᓂᑑ ᐅᑎᑭᑐᐎᓐ, ᐁᐃᓈᒋᒥᑰᔮᓐ᙮ ᑲᒀᓂᓴᑲᑲᒥᒃ ᐃᑕᔥ ᐊᐊ ᐃᓂᓂ ᑫᐃᔑᒋᑫᐃᒡ! ᓇᐗᒋᑯ ᑖᐅᓂᔑᔑᓐ ᐁᑳ ᐐᑳ ᒋᑮᓂᑖᐎᑭᓯᑯᐸᓀᓐ ᐊᐊ ᐃᓂᓂ, ᐅᑮᐃᓈᐞ᙮

14:22b.MAR.014.022 ᒣᒀᔥ ᐁᐐᓯᓂᐙᒡ ᐅᑮᐅᑖᐱᓈᓐ ᒋᓴᔅ ᐃᓂ ᐸᑴᔑᑲᓇᓐ, ᐁᑮᓇᓈᑯᒧᒡ, ᐁᑮ ᐸᐸᑴᐱᓈᒡ, ᐁᐃᔑ ᒫᒦᓈᒡ ᐅᑭᑭᓄᐊᒪᐙᑲᓇᐞ, ᐁᐃᓈᒡ: ᐅᑖᐱᓂᒃ᙮ ᒦᓴ ᐅᐌ ᓃᔭᐤ, ᑮᐃᑭᑐ᙮

14:23b.MAR.014.023 ᒦᑕᔥ ᑳᐃᔑ ᐅᑖᐱᓇᕽ ᒥᓂᒀᑲᓐ, ᐁᓇᓈᑯᒧᒡ᙮ ᒦᑕᔥ ᑳᐃᔑ ᒦᓈᒡ᙮ ᑲᑭᓇ ᑮᐅᒋ ᒥᓂᑴᐗᐞ᙮

14:24b.MAR.014.024 ᒦᑕᔥ ᐁᐃᑭᑐᒡ: ᒦᓴ ᐅᐌ ᓂᒥᔅᑸᒻ, ᑳᐐᐅᒋᑲᐎᒃ ᐊᐲ ᓂᐳᑕᒪᐗᒀ ᓃᐱᐗᐞ ᐊᐎᔭᒃ᙮ ᒦ ᐅᐌ ᒋᑭᑕᑌᒃ ᐃᐃ ᐊᔓᑕᒫᑎᐎᓐ ᑳᒦᓈᒡ ᑭᔐᒪᓂᑑ ᐃᐃ ᐯᒫᑎᓯᓂᒡ᙮

14:25b.MAR.014.025 ᐌᐌᓂ ᐱᓯᑕᒧᒃ ᐅᐅ: ᑳᐐᓐ ᑫᔮᐱ ᓇᓈᔥ ᓂᑲ ᒥᓂᒀᑕᓰᓐ ᔔᒥᓈᐳ, ᐹᓂᒫ ᐌᑎ ᐁᑮᔑᑲᒃ ᒋᒥᓂᒀᑕᒫᓐ ᐃᐃ ᐅᔥᑭᔔᒥᓈᐳ, ᐌᑎ ᐊᐲ ᑮ ᑮᔑ ᐅᔑᓯᑑᒡ ᑭᔐᒪᓂᑑ ᐅᑎᐯᒋᑫᐎᓐ, ᑮᐃᑭᑐ᙮

14:26b.MAR.014.026 ᒦᑕᔥ ᑳᐃᔥᒀ ᓇᓈᑯᒥᐌᐎ ᓂᑲᒧᐙᒡ ᑮᒫᒑᐗᒃ ᐌᑎ ᐱᑾᑎᓈᕽ ᐋᓬᐃᑉ ᑭᑎᑳᓈᑎᑯᑳᕽ ᐁᐃᔑᓂᑳᑌᒃ᙮

14:27b.MAR.014.027 ᒦᑕᔥ ᑳᐃᓈᒡ ᒋᓴᔅ ᐅᑭᑭᓄᐊᒪᐙᑲᓇᐞ: ᑲᑭᓇ ᑭᑲ ᓇᑲᔑᒻ᙮ ᒦᐃ ᐋᓃᔥ ᐁᔑᐲᐃᑳᑌᓂᒃ ᑭᔐᒪᓂᑑ ᐅᑎᑭᑐᐎᓐ: ᑭᔐᒪᓂᑑ ᐅᑲ ᓂᓵᓐ ᐃᓂ ᐅᑲᓇᐎᒫᓇᒑᓂᔑᐌᓐ, ᒦᑕᔥ ᐃᑭ ᒫᓇᒑᓂᔕᒃ ᑲᑭᓇ ᑫᐃᔑ ᐅᓶᐸᐃᐌᐙᒡ, ᐃᑭᑑᒪᑲᓐ᙮

14:28b.MAR.014.028 ᐹᓂᒫ ᑕᔥ ᑭᔐᒪᓂᑑ ᑮᑮᐌᐱᒫᑎᓯᐃᒡ, ᑭᑲ ᐊᐎ ᐲᐃᓂᓂᒻ ᑳᓬᐊᓬᐄᐎ ᐊᑮᕽ, ᑮᐃᑭᑐ᙮

14:29b.MAR.014.029 ᐅᑮ ᑲᓅᓂᑰᓐ ᐃᑕᔥ ᐲᑕᕒᐆᓐ : ᑲᑭᓇ ᐊᐎᔭᒃ ᐋᓇ ᓇᑲᓂᒀ, ᑳᐐᓐ ᑫᓃᓐ ᐃᐃ ᓂᑖ ᐃᔑᒋᑫᓰ, ᐅᑮᐃᑰᓐ᙮

14:30b.MAR.014.030 ᒋᓴᔅ ᐃᑕᔥ ᐅᑮᐃᓈᓐ: ᐌᐌᓂ ᒫᒥᑲᐎᓐ! ᓅᑯᒻ ᑳᑎᐱᑲᒃ, ᒋᑆ ᐊᑲᐙᐸᓉᒡ ᓃᔣ 2 ᐊᐊ ᓈᐯᐹᑲᐋᒀᓐ, ᑳᐐᓐ ᓂᑭᑫᓂᒫᓰ, ᓃᔣ 3 ᑭᑲ ᐃᔥ, ᐅᑮᐃᓈᓐ᙮

14:31b.MAR.014.031 ᓇᐗᒡ ᒦᓇᐙ ᐁᓂᑯᒃ ᑮᐃᔑ ᓇᑴᑕᒻ ᐊᐊ ᐲᑕᕒ: ᒥᓴᐙ ᐋᓇ ᐐᒋᓂᐴᒥᓈᓐ, ᑳᐐᓐ ᐐᑳ ᓃᓐ ᓂᑖ ᐃᑭᑐᓰ ᐁᑳ ᒋᑭᑫᓂᒥᓯᓄᐙᓐ! ᐅᑮᐃᓈᓐ᙮ ᒦᓴ ᑯ ᐯᔑᑾᓐ ᑲᑭᓇ ᑳᐊᔨᑭᑐᐙᒡ ᐃᑭ ᑭᑭᓄᐊᒪᐙᑲᓇᒃ᙮

14:32b.MAR.014.032 ᑮᐊᓂ ᑕᑯᔑᓅᒃ ᐃᑕᔥ ᐃᐃᒫ ᐊᔮᐎᓂᕽ, ᑫᓭᒪᓂ ᐁᐃᔑᓂᑳᑌᓂᒃ᙮ ᒦᑕᔥ ᑳᐃᓈᒡ ᒋᓴᔅ ᐅᑭᑭᓄᐊᒪᐙᑲᓇᐞ: ᐅᐅᒫ ᓇᓇᒪᑕᐱᒃ ᒣᒀ ᐊᓇᒥᐋᔮᓐ, ᐅᑮᐃᓈᐞ᙮

14:33b.MAR.014.033 ᐅᑮᐐᒌᐙᐞ ᐃᑕᔥ ᐲᑕᕒᐆᓐ, ᒌᒥᓴᓐ, ᒞᓇᓐ ᙮ ᒦᑕᔥ ᑮᑭᒋᑯᑖᒋᓭ ᐊᐊ ᒋᓴᔅ, ᐁᐊᐲᒋ ᒥᑯᔥᑳᑌᑕᕽ᙮

14:34b.MAR.014.034 ᔑᑾ ᐅᐌ ᐅᑮᐃᓈᐞ: ᐋᔕ ᑖᐱᔥᑰ ᐁᓂᓯᑯᔮᓐ ᐃᐃ ᓂᒫᓀᑕᒧᐎᓐ, ᐅᑮᐃᓈᐞ᙮ ᐅᐅᒫ ᐊᔮᒃ, ᐊᔕᐙᐱᒃ, ᐅᑮᐃᓈᐞ᙮

14:35b.MAR.014.035 ᐸᑮ ᑯ ᐊᐗᓶᑎ ᑮᐊᓂ ᐃᔖ ᒋᓴᔅ᙮ ᑮᐊᓂ ᒥᑯᐸᓂᐅ ᒥᑕᑲᒥᒃ ᐁᑮᐊᓇᒥᐋᒡ, ᐁᐸᑯᓭᓂᒧᒡ, ᑮᔥᐱᓐ ᐃᔑᓭᑭᐸᓐ, ᐊᐯᔥ ᒋᐸᑭᑎᓈᓯᐎᓐᒡ ᐃᐃᒫ ᒋᐃᔖᒡ ᑲᒀᑕᑭᑑᐎᓂᕽ ᑳᐐᐅᒋᒋᓭᓂᒃ᙮

14:36b.MAR.014.036 ᐋᐸ, ᓂᑌᑌ! ᑮᐃᑭᑐ᙮ ᑲᑭᓇ ᑫᑰᓐ ᑭᑲᔥᑭᑑᓐ᙮ ᐊᐯᔥ ᐃᑯᒋ ᒋᐅᒋ ᐅᑖᐱᓇᒪᐎᔭᓐ ᐅᐅ ᒥᓂᒀᑲᓐ ᐁᑳ ᒋᐅᒋ ᒥᓂᑴᓯᐙᓐ! ᓃᓐ ᐃᑕᔥ ᑳᒥᓴᐌᑕᒫᓐ ᑳᐐᓐ ᑕᐃᔑᐌᐸᓯᓅᓐ᙮ ᑮᓐ ᐃᓴ ᑳᐊᑕᐌᓂᒥᔭᓐ, ᑕᐃᔑᐌᐸᓐ, ᑮᐃᑭᑐ᙮

14:37b.MAR.014.037 ᒦᑕᔥ ᐅᑮ ᐱᑮᐌᓄᑕᐙᐞ ᒋᓴᔅ ᐃᐃ ᓂᓯᓐ 3 ᐅᑭᑭᓄᐊᒪᐙᑲᓇᐞ᙮ ᐅᑮᐙᐸᒫᐞ ᐁᓂᐹᓂᒡ᙮ ᐅᑮᐃᓈᓐ ᐃᑕᔥ ᐲᑕᕒᐆᓐ: ᓵᐃᒪᓐ, ᑭᓂᐹ ᓇ? ᑳᐐᓐ ᐃᓇ ᑭᑮ ᑲᔥᑭᑑᓰᓐ ᐯᔑᑯᑎᐸᐃᑲᓐ ᐁᑕ ᒋᔒᐱᑾᔑᔭᓐ? ᐅᑮᐃᓈᓐ᙮

14:38b.MAR.014.038 ᐊᔕᐙᐱᒃ, ᐅᑮᐃᓈᐞ᙮ ᐊᓇᒥᐋᒃ ᐁᑳ ᒋᐊᓂ ᑲᑴᒋᐃᑰᓯᐌᒃ᙮ ᐋᓇᐐᒪᔥᑲᐌᑕᒣᒃ, ᑳᐐᓐ ᑌᐊᐲᒌᒪᑲᓯᓅᓇᓐ ᑭᐐᔭᐎᐙᓐ, ᐅᑮᐃᓈᐞ᙮

14:39b.MAR.014.039 ᒦᓇᐙ ᑮᐃᔖ ᒋᓴᔅ ᑳᑮ ᑕᔑᐊᓇᒥᐋᒡ, ᐯᔑᑾᓐ ᐁᑮᐃᑭᑐᒡ᙮

14:40b.MAR.014.040 ᒦᑕᔥ ᒦᓇᐙ ᐁᐱᑮᐌᒡ ᐅᑮᐙᐸᒫᐞ ᐁᓂᐹᓂᒡ, ᐁᑮ ᑲᐎᑾᔑᓂᒡ᙮ ᐅᑮ ᑸᓇᐎ ᐃᑰᐞ ᐃᑕᔥ᙮

14:41b.MAR.014.041 ᒦᑕᔥ ᓃᔣ 3 ᐁᑮᐱ ᑲᓅᓈᒡ ᐅᑭᑭᓄᐊᒪᐙᑲᓇᐞ: ᑫᔮᐱ ᓇ ᑭᓂᐹᒻ? ᑭᑕᓉᔑᓂᒻ ᐃᓇᔥ? ᒦ ᑭᔥᑫ ᒥᓂᒃ ᓂᐹᒃ! ᒦ ᐋᔕ ᐁᐅᒋᒋᓭᒃ! ᓇ! ᐋᔕ ᓃᓐ ᐃᓂᓂ ᐅᑯᓯᓴᓐ ᓂᐸᑭᑎᓂᑰᐎᔅ ᒋᑕᑯᓂᐙᒡ ᐅᒪᒋᑑᑕᒨᒃ, ᐅᑮᐃᓈᐞ᙮

14:42b.MAR.014.042 ᐊᐤ ᐸᓯᑸᒃ, ᐃᔖᑖ! ᓇ ᐊᐌᑎ! ᐋᔕ ᑕᑯᔑᓐ ᐊᐊ ᑳᑭᑭᓄᐎᓈᒡ ᐃᐃ ᑫᑕᑯᓂᒥᒡ! ᑮᐃᑭᑐ᙮

14:43b.MAR.014.043 ᒦᑕᔥ ᒣᒀ ᐁᑲᑭᑐᒡ ᒋᓴᔅ, ᑮᐱᑕᑯᔑᓐ ᐊᐊ ᒎᑕᔅ, ᒦ ᐊᐌ ᐯᔑᒃ ᐃᑭ ᒥᑖᔑᓃᔑᓐ ᑭᑭᓄᐊᒪᐙᑲᓇᒃ᙮ ᑮᐱ ᑭᑭ ᑕᑯᔑᓐ ᓃᐱᐗᐞ ᐊᐎᔭᐞ ᐁᑮ ᑭᑰᑯᒫᓀᓂᒡ᙮ ᒦᓴ ᐌᑎ ᑳᐱᐅᒋ ᒫᒋᓂᔕᐅᑯᐙᒡ ᐃᐃ ᑭᒋᐊᓇᒥᐁᐎᑭᒫᐞ ᑲᔦ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᑲᔦ ᒎᐗᐞ ᐅᓃᑳᓂᓰᒥᓂ᙮

14:44b.MAR.014.044 ᐊᐊᐌ ᑕᔥ ᒎᑕᔅ, ᒦ ᐊᐌ ᑳᑮᐱ ᐃᔑᐎᓈᒡ ᐃᐃ ᑫᑕᑯᓈᓂᒡ ᒋᓴᓲᓐ, ᐅᑮ ᑮᔖᒋ ᑭᑭᓄᐊᒪᐙᐞ: ᒦ ᐊᐌ ᑫᐅᒌᒪᒃ ᐅᑎᑎᓈᑫᒃ, ᐌᐌᓂ ᒫᒌᓈᑫᒃ, ᐅᑮᐃᓈᐸᓃᐞ ᐊᐌ ᒎᑕᔅ ᐃᓂᐌᓂᐗᐞ ᑳᐐᒌᐎᑯᒡ᙮

14:45b.MAR.014.045 ᒦᑕᔥ ᐱᒌᓇᑭᑯ ᐁᐅᑎᑕᕽ ᐃᐃ ᐊᔮᐎᓐ ᐅᐱᑲᓅᓈᓐ ᒋᓴᓲᓐ: ᐅᑭᑭᓄᐊᒫᑫ! ᐅᑎᓈᓐ, ᐁᐅᒌᒫᒡ᙮

14:46b.MAR.014.046 ᒦᑕᔥ ᐅᑮ ᑌᐱᐱᓈᐙᓐ ᒋᓴᓲᓐ, ᐁᑮᒪᒫᒋᑯᓈᐙᒡ᙮

14:47b.MAR.014.047 ᐯᔑᒃ ᐃᑕᔥ ᐊᐊ ᑳᒌᑭᑳᐸᐎᐙᒡ ᐅᑮ ᑭᒋᑯᐱᑑᓐ ᐸᔑᐸᐃᑫᐎᑯᒫᓐ ᐁᑮ ᐸᑭᑌᐙᒡ ᐃᓂ ᐅᑕᓄᑮᐋᑲᓂᓂ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ, ᐁᑮᒪᔑᑕᐗᑫᐌᐸᐙᒡ᙮

14:48b.MAR.014.048 ᒋᓴᔅ ᐃᑕᔥ ᐅᑮ ᑲᓅᓈᐞ ᐃᓂᐌᓂᐗᐞ ᑳᑕᑯᓂᑯᒡ: ᑭᐱ ᑳᒋᑎᓂᒻ ᐃᓇ ᑖᐱᔥᑰ ᑮᒨᒋᔥᑮᐎᓂᓂ ᐁᑎᓄᐎᐙᓀᓐ, ᐁᑭᑭᓯᔦᒃ ᑭᒋᒨᑯᒫᓇᓐ ᑲᔦ ᐸᑲᒫᑲᓇᓐ?

14:49b.MAR.014.049 ᑕᓱᑮᔑᒃ ᑭᑮᐐᒌᐎᓂᓂᒻ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐁᑮ ᑭᑭᓄᐊᒫᑫᔮᓐ᙮ ᑳᐐᔥ ᐐᑳ ᑭᑮ ᑕᑯᓂᓰᒻ᙮ ᒦᑕᔑᑯ ᐃ ᒋᐅᒋᒋᓭᒃ ᐃᐃ ᑳᐃᔑᐲᐃᑳᑌᓂᒃ ᑭᔐᒪᓂᑑ ᐅᑎᑭᑐᐎᓐ, ᐅᑮᐃᓈᐞ᙮

14:50b.MAR.014.050 ᒦᑕᔥ ᑲᑭᓇ ᑮᒫᒌᐸᐃᐌᐗᐞ ᐅᑭᑭᓄᐊᒪᐙᑲᓇᐞ, ᐁᑮᓇᑲᓂᑯᒡ᙮

14:51b.MAR.014.051 ᐯᔑᒃ ᐃᑕᔥ ᐅᑮ ᐱᒥᓂᔕᐙᓐ ᒋᓴᓲᓐ ᐅᔥᑭ ᐃᓂᓂ, ᐙᐱᔥᑮᑭᓐ ᐁᑕ ᐁᑮ ᑲᔥᑮᑮᒡ᙮ ᐅᑮᐅᑎᑎxxa ᓂᑰᐞ ᐃᐃ ᐃᓂᓂᐗᐞ ᐁᐐ ᑲᑴ ᑕᑯᓂᑯᒡ᙮

14:52b.MAR.014.052 ᒦᑕᔥ ᑳᐃᔑ ᓇᑲᒋᐸᑣᒡ ᐅᔥᑭ ᐃᓂᓂ ᐃᐃ ᐙᐱᔥᑮᑭᓐ, ᐁᑮᒫᒌᐸᐃᐌᒡ ᑫᑰᓐ ᐁᑮᑭᑭᔥᑲᓯᒃ᙮

14:53b.MAR.014.053 ᒦᑕᔥ ᐁᓂ ᐃᔑᐎᓂᓐᒡ ᒋᓴᔅ ᐌᑎ ᐁᐊᔮᓂᒡ ᐃᓂ ᑳᓃᑳᓀᑖᑯᓯᓂᒡ ᑭᒋᐊᓇᒥᐁᐎᑭᒫᓐ᙮ ᐃᐃᒫ ᑕᔥ ᐋᔕ ᑮᒫᐗᒋᐃᑎᐗᒃ ᐃᑭ ᑭᒋᐊᓇᒥᐁᐎᑭᒫᒃ, ᑲᔦ ᒎᐗᒃ ᐅᓃᑳᓂᓰᒥᐙᐞ, ᑲᔦ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ᙮

14:54b.MAR.014.054 ᐊᐲ ᑕᔥ ᑳᐱᒥᐎᓂᒥᓐᒡ ᒋᓴᓲᓐ, ᐊᐊ ᐲᑕᕒ ᑮᐊᓂ ᒥᒋᐊᔫᓵᐱ, ᐲᓂᔥ ᐃᐃᒫ ᐅᐙᑳᐃᑲᓂᓃᕽ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ, ᐊᑾᒌᕽ ᐃᐃᒫ ᑳᔑ ᐐᐱᒋᑳᑌᓂᒃ ᐁᑮᐃᔑ ᐲᑎᑫᒡ᙮ ᒦᐃᒫ ᑳᐃᔑ ᐐᑕᐱᒫᒡ ᐃᐃ ᑲᓇᐌᒋᑫᐎᔑᒫᑲᓂᔕᐞ ᐁᑮᐅᒋ ᐊᐗᓱᒡ ᒌᑭᔥᑯᑌ᙮

14:55b.MAR.014.055 ᐌᑎ ᑕᔥ ᐲᑎᒃ ᐃᑭ ᑭᒋᐊᓇᒥᐁᐎᑭᒫᒃ ᑲᔦ ᑲᑭᓇ ᐃᑭ ᐅᓇᔓᐌᐎᓂᓂᐗᒃ ᐅᑮᓇᓈᑕᐅᑎᓈᓈᐙ ᑫᐃᔑ ᒫᓈᑯᓈᐙᐸᓐ ᐃᓂ ᒋᓴᓲᓐ ᑫᐅᒋ ᓂᓵᐙᒡ᙮ ᑮᑸᓇᐎ ᐅᑎᓂᑫᐗᒃ ᐃᑕᔥ᙮

14:56b.MAR.014.056 ᐋᓃᔥ ᓃᐱᐗᐞ ᐊᐎᔭᒃ ᐅᑮ ᑲᑮᓇᐎᔥᑭ ᐃᓉᐋᐙᓐ ᒋᓴᓲᓐ, ᑳᐐᓐ ᐃᑕᔥ ᐯᔑᑾᓐ ᑮᐃᓈᒋᒧᓰᐗᒃ᙮

14:57b.MAR.014.057 ᐋᓂᓐᑦ ᐃᑕᔥ ᑮᐱᐸᓯᑸᐗᒃ ᐁᑮ ᑲᑮᓇᐎᔥᑭᐙᒡ ᐁᐃᔑ ᑎᐹᒋᒫᐙᒡ ᒋᓴᓲᓐ ᐁᐃᓈᐙᒡ:

14:58b.MAR.014.058 ᓂᑮᓅᑕᐙᓈᓐ ᐁᐃᑭᑐᒡ: ᓂᑲ ᐲᑯᐱᑑᓐ ᐅᐅ ᑭᔐᒪᓂᑑ ᑳᔑ ᐊᓇᒥᐁᑕᐎᓐᒡ ᐃᓂᓃᕽ ᑳᑮᐅᒋ ᐅᔑᒋᑳᑌᓂᒃ᙮ ᑮᓂᓱᑮᔑᑾᑳᒃ 3 ᐃᑕᔥ ᓂᑲ ᑮᔑ ᐅᔑᑑᓐ ᐯᔑᒃ ᒣᒋ ᐅᔑᒋᑳᑌᓯᓄᒃ, ᑮᐃᑭᑐ, ᐅᑮᐃᓈᐙᓐ᙮

14:59b.MAR.014.059 ᐅᐅ ᓴ ᐐᓐ ᑳᐐᓐ ᐯᔑᑾᓐ ᑮᐃᑭᑐᓰᐗᒃ ᑫᐐᓇᐙ᙮

14:60b.MAR.014.060 ᒦᑕᔥ ᑳᐃᔑ ᐸᓯᑸᒡ ᐊᐊ ᒫᐗᒡ ᑭᒋᐊᓇᒥᐁᐎᑭᒫ᙮ ᓈᐗᔭᐄ ᑮᓃᐸᐎ ᐁᑮ ᑲᓅᓈᒡ ᐃᓂ ᒋᓴᓲᓐ: ᑳᐐᓐ ᐃᓇ ᑫᑰᓐ ᑭᐐᐃᔑ ᓇᑴᑕᓰ ᑳᐃᔑ ᒪᒑᒋᒥᒀ? ᐅᑮᐃᓈᓐ᙮

14:61b.MAR.014.061 ᒋᓴᔅ ᐃᑕᔥ ᑳᐐᓐ ᐊᐙᒡ ᑫᑰᓐ ᑮᐃᑭᑐᓰ᙮ ᑳᐐᓐ ᑮᓇᑴᑕᓰ᙮ ᒦᓇᐙ ᑕᔥ ᐊᐊ ᒫᐗᒡ ᑭᒋᐊᓇᒥᐁᐎᑭᒫ ᐅᑮ ᑲᑴᒋᒫᓐ ᐁᑮᐃᓈᒡ: ᑮᓐ ᐃᓇ ᐊᐌ ᑭᔐᒪᓂᑑ ᑳᐅᓈᐸᒫᒡ ᒋᐱᒫᒋᐃᐌᓂᒡ? ᑮᓐ ᐃᓇ ᐅᑯᓯᓴᓐ ᐊᐊ ᑭᔐᒪᓂᑑ ᑳᐃᔥᐯᑖᑯᓯᒡ? ᐅᑮᐃᓈᓐ᙮

14:62b.MAR.014.062 ᒋᓴᔅ ᐃᑕᔥ ᐅᑮᐃᓈᓐ: ᒦ ᐊᐌ ᓂᑎᓄᐤ᙮ ᓃᓐ ᐃᓂᓂ ᐅᑯᓯᓴᓐ ᑭᑲ ᐙᐸᒥᒻ ᒋᐅᑭᒫᐗᐱᔮᓐ ᐅᑭᒋᓂᑭᕽ ᐃᓇᑫ ᐊᐊ ᑳᒫᒪᐎᒪᔥᑲᐌᑖᑯᓯᒡ᙮ ᒣᑴ ᐗᑸᕽ ᓂᑲ ᐱᓈᑯᔅ ᑮᔑᑯᕽ, ᑮᐃᑭᑐ᙮

14:63b.MAR.014.063 ᒦᑕᔥ ᐁᔑ ᑖᔥᑭᐱᑑᒡ ᐅᑭᑭᔥᑭᑲᓇᓐ ᐊᐊ ᒫᐗᒡ ᑭᒋᐊᓇᒥᐁᐎᑭᒫ ᐁᓂᔥᑳᑎᓯᒡ, ᐁᐃᑭᑐᒡ: ᐊᐌᓀᓐ ᐊᐗᔑᒣ ᑫᑮᐃᑭᑐᐸᓐ?

14:64b.MAR.014.064 ᐋᔕ ᑭᑮᓅᑖᓈᐙ ᐁᑮᒪᒋᑮᔣᓈᒡ ᑭᔐᒪᓂᑑᓐ᙮ ᐋᓃᔥ ᑮᓇᐙ ᐁᓀᑕᒣᒃ? ᐅᑮᐃᓈᐞ᙮ ᒦᑕᔥ ᑲᑭᓇ ᑳᐃᔑ ᐹᑖᔮᑯᓈᐙᒡ ᐃᓂ ᒋᓴᓲᓐ, ᐁᐃᓈᐙᒡ ᐁᑲᔥᑭᑕᒫᓱᓂᒡ ᓂᐳᐎᓐ᙮

14:65b.MAR.014.065 ᔑᑾ ᐋᓂᓐᑦ ᐅᑮᒫᒌ ᓴᓰᒀᓈᐙᓐ ᐃᓂ ᒋᓴᓲᓐ᙮ ᔑᑾᔥ ᐁᑮ ᑭᑆᐸᐱᓈᐙᒡ, ᐅᑮ ᐸᐸᑭᑌᐙᐙᓐ᙮ ᑮᓐ ᐅᑭᑫᑕᒫ! ᐅᑮᐃᓈᐙᓐ᙮ ᐐᓐᔥ ᐊᐌᓀᓐ ᑳᐸᑭᑌᐅᒃ! ᐅᑮᐃᓈᐙᓐ᙮ ᔑᑾ ᐃᑭ ᑲᔦ ᑲᓇᐌᒋᑫᐎ ᔑᒫᑲᓂᔕᒃ ᐅᑮ ᐸᐸᓰᑴᑲᓈᒫᐙᓐ᙮

14:66b.MAR.014.066 ᐲᑕᕒ ᐃᑕᔥ ᐃᐃᒫ ᓃᓴᔭᐄ ᑮᐊᔮ ᐊᑾᒌᕽ ᐃᐃᒫ ᑳᔑ ᐐᐱᒋᑳᑌᓂᒃ ᐃᐃ ᐙᑳᐃᑲᓐ᙮ ᐅᑮᒪᔮᔥᑳᑰᓐ ᐃᑕᔥ ᐯᔑᒃ ᐅᔥᑭᓃᑭᑴᓐ, ᒦᐗᓂᓂ ᐯᔑᒃ ᐅᑕᓄᑮᐋᑲᓇᓐ ᐊᐊ ᒫᐗᒡ ᑭᒋᐊᓇᒥᐁᐎᑭᒫ᙮

14:67b.MAR.014.067 ᒦᑕᔥ ᐁᐙᐸᒥᑯᒡ ᐁᐊᐗᓱᒡ, ᐅᑮ ᑲᓇᐙᐸᒥᑰᓐ: ᑲᔦ ᑮᓐ ᐄᑐᒃ ᑭᑮᐐᒌᐙ ᐊᐌ ᒋᓴᔅ, ᐊᐌ ᓈᓴᕒᐃᑏᐎᓂᓂ, ᐅᑮᐃᑰᓐ ᐃᓂ ᐅᔥᑭᓃᑭᑴᓐ᙮

14:68b.MAR.014.068 ᒦᑕᔥ ᑳᐃᔑ ᐋᓉᑕᕽ ᐊᐊ ᐲᑕᕒ: ᐋᓃᓐ ᐁᑭᑐᔭᓐ? ᑳᐐᓐ ᓂᑭᑫᑕᓰᓐ, ᐅᑮᐃᓈᓐ᙮ ᑳᐐᓐ ᑭᓂᓯᑐᑕᐎᓯᓅᓐ ᐃᐃ ᑳᐃᑭᑐᔭᓐ, ᐅᑮᐃᓈᓐ ᐃᓂ ᐅᔥᑭᓃᑭᑴᓐ᙮ ᒦᔥ ᐁᓂ ᐃᔑ ᓵᑲᐊᕽ ᐃᐃᒫ ᓇᓴᐗᔭᐄ ᑳᓂ ᐅᒋ ᓵᑭᑕᒧᒃ᙮

14:69b.MAR.014.069 ᒦᑕᔥ ᐃᐃᒫ ᒦᓇᐙ ᑳᐃᔑ ᐙᐸᒥᑯᒡ ᐅᓄ ᐊᓄᑮᐋᑲᓂᑴᓐ, ᔑᑾ ᒦᓇᐙ ᐁᑮ ᑲᓅᓈᓂᒡ ᐃᓂᐌᓂᐗᐞ ᐃᐃᒫ ᑳᐐᒋᑳᐸᐐᑕᐙᓂᒡ: ᒦ ᐗᐊ ᐯᔑᒃ ᑳᐐᒌᐙᐙᒡ, ᑮᐃᑭᑐᐗᓐ᙮

14:70b.MAR.014.070 ᒦᓇᐙ ᑕᔥ ᑮᐋᓉᑕᒻ ᐊᐊ ᐲᑕᕒ᙮ ᓈᑫᔨᔥ ᒦᓇᐙ ᐅᑮᐃᑰᐞ ᐃᓂᐌᓂᐗᐞ ᑳᐐᒋᑳᐸᐐᑖᑯᒡ: ᑌᐺ ᐅᔕ ᑮᓐ ᐯᔑᒃ ᑭᑖᐤ! ᑳᓬᐊᓬᐄᐎ ᐊᑮᕽ ᑫᑮᓐ ᑭᑑᒌ! ᐅᑮᐃᑰᐞ᙮

14:71b.MAR.014.071 ᒦᑕᔥ ᑳᐃᔑ ᒪᔥᑲᐎᑮᔗᒡ ᐊᐊ ᐲᑕᕒ: ᒫᓄ ᑫᑰᓐ ᑭᔐᒪᓂᑑ ᓂᑲ ᑑᑖᒃ ᑮᔥᐱᓐ ᑌᐺᓯᐙᓐ! ᑳᐐᓐ ᓂᑭᑫᓂᒫᓰ ᐗᐊ ᐃᓂᓂ ᑳᑕᔑᒣᒃ! ᐅᑮᐃᓈᐞ᙮

14:72b.MAR.014.072 ᒦᑕᔥ ᐃᐃ ᔐᒫᒃ ᑮᓅᑖᑯᓯ ᒦᓇᐙ ᐊᐊ ᓈᐯᐹᑲᐋᒀᓐ᙮ ᒦᑕᔥ ᑳᐃᔑ ᒫᒥᑲᐎᓭᒡ ᐲᑕᕒ ᐃᐃ ᑲᑮᐃᑯᐸᓐ ᒋᓴᓲᓐ: ᒋᑆ ᓅᑖᑯᓯᒡ ᐊᐊ ᓈᐯᐹᑲᐋᒀᓐ ᓃᔣ 2, ᐋᔕ ᓃᔣ 3 ᒋᐋᓉᑕᒪᓐ ᒋᑭᑫᓂᒥᔭᓐ, ᐁᑮᐃᑯᒡ᙮ ᒦᑕᔥ ᑳᐃᔑ ᒨᑴᑕᕽ ᑳᐊᓂ ᐃᔑ ᑭᒋᒪᐎᒡ᙮

15

15:1b.MAR.015.001 ᐱᒌᓇᒃ ᐃᑕᔥ ᐁᐱᒨᑲᐊᒥᓂᒡ, ᐁᐸᐹᔒᕽ, ᑮᒫᐗᒋᐃᑎᐗᒃ ᐃᑭ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᓃᑳᓇᑭᓱᐙᒡ ᒎᐗᒃ, ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᑲᑭᓇ ᑲᔦ ᑳᓂᑖ ᐅᓈᑯᓂᑫᐙᒡ, ᒥᒋᑲᑭᓇ ᐁᑮᓈᓈᑲᓱᐌᐙᒡ᙮ ᒦᑕᔥ ᑳᐃᔑ ᒪᒫᒋᑾᐱᓈᐙᒡ ᒋᓴᓲᓐ, ᐃᑯᒋ ᐁᐃᔑᐎᓈᐙᒡ ᐁᒦᓈᐙᒡ ᐃᓂ ᐹᐃᓬᐊᑑᓐ ᙮

15:2b.MAR.015.002 ᒦᑕᔥ ᐁᔑ ᑲᑴᒋᒫᒡ ᐊᐊ ᐹᐃᓬᐊᑦ ᐃᓂ ᒋᓴᓲᓐ: ᑮᓐ ᐃᓇ ᐃᑭ ᒎᐗᒃ ᐅᑭᒋᐅᑭᒫᒥᐙᓐ? ᐅᑮᐃᓈᓐ᙮ ᒋᓴᔅ ᐅᑮᐃᔑ ᓇᑴᑕᐙᓐ: ᒦᐃᐌ ᐁᑭᑐᔭᓐ, ᐅᑮᐃᓈᓐ᙮

15:3b.MAR.015.003 ᐃᑭ ᑕᔥ ᑭᒋᐊᓇᒥᐁᐎᑭᒫᒃ ᓃᐱᐗᐞ ᑫᑰᓂᓂ ᐅᑲᑴᒋᒫᐙᓐ ᐃᓂ ᒋᓴᓲᓐ᙮

15:4b.MAR.015.004 ᒦᓇᐙ ᑕᔥ ᑮᐅᒋ ᑲᑴᑗ ᐊᐊ ᐹᐃᓬᐊᑦ: ᑳᐐᓐ ᐃᓇ ᑫᑰᓐ ᑭᐐᐃᔑ ᓇᑴᑕᓰ? ᐃᓇᔥᑫ ᒥᓂᒃ ᐁᔑ ᐊᓈᒥᒥᑰᔭᓐ! ᐅᑮᐃᓈᓐ᙮

15:5b.MAR.015.005 ᑫᔮᐱ ᑕᔥ ᒋᓴᔅ ᑳᐐᓐ ᑫᑰᓐ ᑮᓇᑴᑕᓰ᙮ ᒫᒪᑳᒡ ᐅᑮᐅᒋ ᐃᓀᓂᒥᑰᓐ ᐃᓂ ᐹᐃᓬᐊᑑᓐ᙮

15:6b.MAR.015.006 ᑕᓯᕽ ᐃᑕᔥ ᐁᐃᔑ ᒌᑲᑲᒥᑭᓯᓈᓂᐗᕽ ᐱᒫᒋᐃᑰᐎ ᐐᑾᑎᐎᓐ, ᑮᓂᑖ ᐃᔑᒋᑫ ᐊᐊ ᐹᐃᓬᐊᑦ, ᐁᑮ ᐸᑭᑎᓈᒡ ᐯᔑᒃ ᐊᐎᔭᓐ ᑳᑭᐸᐅᒥᓐᒡ, ᐊᐌᓀᓇᓐ ᐃᑯ ᒣᓴᐌᓂᒫᓂᒡ ᐃᐃ ᒎᐗᐞ᙮

15:7b.MAR.015.007 ᐃᐃ ᐊᐲ ᑮᑭᐹᑾᐃᑲᓂᐎ ᐊᐊ ᐯᔑᒃ ᐃᓂᓂ, ᐸᕒᐋᐸᔅ ᐁᐃᔑᓂᑳᓱᒡ᙮ ᐅᑮ ᑕᑯᑭᐸᐅᑰᒫᐞ ᑯᑕᒃ ᐊᐎᔭᐞ ᑳᑮᓂᔑᐌᓂᒡ ᐁᑮᒦᑳᓈᓂᒡ ᐃᓂ ᐌᑭᒫᐙᑎᓯᓂᒡ, ᐁᑮᓂᔑᐗᓈᑕᑲᒥᑭᓯᐙᒡ᙮

15:8b.MAR.015.008 ᒦᑕᔥ ᑳᐱ ᐃᔑ ᒫᐗᒋ ᐃᔖᐙᒡ ᓃᐱᐗᐞ ᐊᐎᔭᒃ ᐃᐃᒫ ᐹᐃᓬᐊᑑᓐ ᐅᐙᑳᐃᑲᓂᓃᕽ, ᐁᒫᒌᑲᑴᒋᒫᐙᒡ: ᐃᔑᒋᑫᐃᔑᓈᒻ ᑖᐱᔥᑰ ᒨᔕᒃ ᐁᔑᒋᑫᐃᔮᕽ ᐅᐅ ᐊᐲ! ᑮᐃᑭᑐᐗᒃ᙮

15:9b.MAR.015.009 ᒦᑕᔥ ᑳᐃᔑ ᓇᑴᑕᐙᒡ ᐊᐊ ᐹᐃᓬᐊᑦ: ᑭᑲ ᐸᑭᑎᓇᒪᐎᓂᓂᒻ ᐃᓇ ᐃᓂ ᒎᐗᒃ ᐅᑭᒋᐅᑭᒫᒥᐙᓐ? ᐅᑮᐃᓈᐞ᙮

15:10b.MAR.015.010 ᐋᓃᔥ ᐹᐃᓬᐊᑦ ᐐᑫ ᐅᑮ ᑭᑫᓂᒫᐞ ᐃᐃ ᑭᒋᐊᓇᒥᐁᐎᑭᒫᐞ ᐁᐅᑌᓂᒫᓂᒡ ᐃᓂ ᒋᓴᓲᓐ, ᒦᐃᐌ ᑳᐅᒋ ᐃᔑᐎᑕᒫᑯᒡ᙮ ᐋᓃᔥ ᑲᑭᓇ ᐊᐎᔭ ᐅᑮᒥᓄᑕᐙᐙᓐ ᒋᓴᓲᓐ᙮

15:11b.MAR.015.011 ᐃᑭ ᑕᔥ ᑭᒋᐊᓇᒥᐁᐎᑭᒫᒃ ᐅᑮ ᑲᑳᓱᒫᐙᐞ ᐃᐃ ᑳᐅᑴᓄᓂᒡ ᒋᑲᑴ ᑌᐱᒫᓂᒡ ᐃᓂ ᐹᐃᓬᐊᑑᓐ, ᒣᔥᑾᒡ ᒋᐸᑭᑎᓇᒪᐎᑣ ᐃᓂ ᐸᕒᐋᐸᓴᓐ᙮

15:12b.MAR.015.012 ᒦᑕᔥ ᒦᓇᐙ ᑳᐃᔑ ᑲᓅᓈᒡ ᐊᐊ ᐹᐃᓬᐊᑦ ᐃᐃ ᑳᐅᑴᓄᓂᒡ: ᐋᓃᓐ ᑕᔥ ᐁᓀᑕᒣᒃ ᒋᐃᔑᒋᑫᐊᒃ ᐊᐊᐌ ᑳᐃᓀᒃ ᐅᑭᒋᐅᑭᒫᒥᐙᓐ ᐃᑭ ᒎᐗᒃ?

15:13b.MAR.015.013 ᒦᑕᔥ ᑳᐃᔑ ᓇᑴᔖᑯᐌᐙᒡ: ᓴᑲᐅ ᐋᔑᑌᔮᑎᑯᕽ!

15:14b.MAR.015.014 ᑮᐃᔑ ᓇᑴᑕᒻ ᐃᑕᔥ ᐹᐃᓬᐊᑦ: ᐋᓃᓐ ᐃᑕᔥ? ᐋᓃᔥ ᑳᐃᔑ ᒪᒋᒋᑫᒡ? ᐅᑮᐃᓈᐞ᙮ ᓇᐗᒡ ᐃᑕᔥ ᐊᐗᔑᒣ ᑮᑭᒋᔖᔖᑯᐌᐗᒃ, ᓴᑲᐅ ᐋᔑᑌᔮᑎᑯᕽ! ᐁᐃᑭᑐᐙᒡ᙮

15:15b.MAR.015.015 ᒦᑕᔥ ᐃᐃ ᑳᐃᔑ ᐸᑭᑎᓈᒡ ᐊᐊ ᐹᐃᓬᐊᑦ ᐃᓂ ᐸᕒᐋᐸᓴᓐ, ᐁᐃᓀᑕᕽ ᒋᒥᓉᑕᒥᓂᒡ ᐃᐃ ᑳᐅᑴᓄᓂᒡ᙮ ᒦᑕᔥ ᑳᐃᔑ ᐊᓅᑮᒡ ᒋᐸᔕᔐᐅᒥᓐᒡ ᐃᓂ ᒋᓴᓲᓐ᙮ ᔑᑾ ᐅᑮ ᐸᑭᑎᓇᒪᐙᐞ ᔑᒫᑲᓂᔕᐞ ᒋᓴᑲᐙᓂᒡ ᐋᔑᑌᔮᑎᑯᕽ᙮

15:16b.MAR.015.016 ᐃᑭ ᑕᔥ ᔑᒫᑲᓂᔕᒃ ᐅᑮᐃᔑᐎᓈᐙᓐ ᐃᓂ ᒋᓴᓲᓐ ᐃᐃᒫ ᐲᑎᑲᒥᒃ, ᒦᐃᒫ ᑭᒋᐅᓇᔓᐌᐎᓂᓂ ᑳᐃᔑᑖᒡ, ᐸᕒᐄᑑᕒᐃᔭᒻ ᑳᐃᔑᓂᑳᑌᒃ ᐁᑮᐊᑐᒫᐙᒡ ᐃᐃ ᐁᓂ ᑯᑴᓄᓂᒡ ᔑᒫᑲᓂᔕᐞ᙮

15:17b.MAR.015.017 ᒦᑕᔥ ᐁᑮ ᑮᒋᑯᓇᔦᐋᐙᒡ ᐃᓂ ᒋᓴᓲᓐ, ᑳᐃᔑ ᐱᓯᑲᒧᐋᐙᒡ ᐃᐃ ᑳᒪᑲᑌᒥᔅᑴᑲᓂᓂᒃ ᑲᔥᑮᑮᐎᓐ᙮ ᔑᑾ ᐅᑮᐊᐱᑳᓈᐙᐞ ᐁᐅᔑᑑᐙᒡ ᐅᑳᐎᒥᓇᑲᔒᐞ ᐐᐗᒀᓐ, ᐁᑮ ᐱᓯᑲᒧᐋᐙᒡ᙮

15:18b.MAR.015.018 ᒦᑕᔥ ᑳᐃᔑ ᐊᓇᒥᑲᐙᐙᒡ ᐁᐃᓈᐙᒡ: ᐴᔔ ᑮᓐ ᑫᒋᐅᑭᒫᑲᑕᐗᑣ ᒎᐗᒃ! ᐅᑮᐃᓈᐙᓐ᙮

15:19b.MAR.015.019 ᒦᑕᔥ ᑳᐃᔑ ᐸᐸᑭᑌᐙᐙᒡ ᐃᐃᒫ ᐅᑎᒀᓂᓃᕽ ᐃᐃ ᐐᓯᑯᑉ, ᑲᔦ ᐁᓴᓰᒀᓈᐙᒡ ᑲᔦ ᐁᐅᒋᒌᑾᓇᐲᑕᐙᐙᒡ, ᐁᓇᓈᐗᑮᑕᐙᐙᒡ ᑲᔦ᙮

15:20b.MAR.015.020 ᒦᑕᔥ ᑳᐃᔥᒀ ᓂᔑᐹᐱᓄᑕᐙᐙᒡ ᐅᑮ ᑮᒋᑯᓇᔦᐋᐙᓐ ᐃᐃ ᑳᒪᑲᑌᒥᔅᑴᑲᓂᓂᒃ ᑲᔥᑮᑮᐎᓐ, ᒦᓇᐙ ᐐᓐ ᐃᑯ ᐅᑭᑭᔥᑭᑲᓂᓂ ᐁᑮ ᐱᓯᑲᒧᐋᐙᒡ᙮ ᒦᑕᔥ ᑳᐃᔑ ᒫᒌᓈᐙᒡ ᐁᑮᐊᑕ ᐊᑯᓴᑲᐙᐙᒡ ᐋᔑᑌᔮᑎᑯᕽ᙮

15:21b.MAR.015.021 ᑮᐱᒥᐊᔮ ᑕᔥ ᐯᔑᒃ ᐃᓂᓂ ᒣᒀ ᐁᐱᒪᑲᒥᑲᓂᓂᒃ, ᓵᐃᒪᓐ ᐁᐃᔑᓂᑳᓱᒡ, ᐃᐃᒫ ᓵᐃᕒᐄᓃᕽ ᑳᑮᐅᒌᒡ᙮ ᒦᐊᐌ ᑳᐅᑯᓯᓯᒡ ᐋᓬᐃᑭᓵᑕᕒᐆᓐ ᑲᔦ ᐅᕒᐆᐸᓴᓐ ᙮ ᐃᐃᒫ ᐅᐱᒣᐊᔭᐄ ᑮᐱᐅᒋ ᑕᑯᔑᓐ ᐁᐐ ᐊᓂᒉᑭᔥᑲᕽ ᐆᑌᓇ᙮ ᒦᐊᐌ ᑳᐃᔑ ᑰᑯᓂᑯᒡ ᔑᒫᑲᓂᔕᐞ ᒋᐱᒥᐎᑕᒪᐙᒡ ᒋᓴᓲᓐ ᐅᑖᔑᑌᔮᑎᑯᒥᓂ᙮

15:22b.MAR.015.022 ᒦᑕᔥ ᐌᑎ ᑳᐃᔑᐎᓂᓐᒡ ᒋᓴᔅ ᐃᐃᒫ ᐁᔑ ᐱᑾᑎᓈᓂᒃ ᑳᓬᑲᑖ ᐁᐃᔑᓂᑳᑌᓂᒃ, ᒦᐃᐌ ᐁᑭᑐᕽ ᐅᑎᒀᓂᑫᑲᓂᑳᕽ᙮

15:23b.MAR.015.023 ᐅᑖᓇᑮᐐᒥᓇᐋᐙᓐ ᐃᐃ ᔔᒥᓈᐳ ᐁᑮᐗᓂᓇᐌᔮᑲᒥᓂᑳᑌᓂᒃ ᑫᑰᓐ ᐁᑳ ᑫᐅᒋ ᓂᓯᑐᓯᓯᓂᒃ, ᒪᕒ ᐁᐃᔑᓂᑳᑌᓂᒃ᙮ ᑳᐐᓐ ᐃᑕᔥ ᑮᐐᒥᓂᑴᓰ᙮

15:24b.MAR.015.024 ᒦᑕᔥ ᐁᑮ ᑮᒋᑯᓇᔦᐱᓈᐙᒡ ᑳᐃᔑ ᐊᑯᓴᑲᐙᐙᒡ ᐋᔑᑌᔮᑎᑯᕽ᙮ ᒦᑕᔥ ᑳᐃᔑ ᐊᐸᑭᒋᑫᐙᒡ ᑫᐅᒋ ᑭᑫᑕᒧᐙᒡ ᐌᑯᓀᓐ ᐃᐃ ᑭᑭᔥᑭᑲᓐ ᑫᐅᑖᐱᓇᒧᐙᒡ ᐁᑕᓱᐯᔑᑯᐙᒡ᙮ ᒦᐃ ᓇᑫ ᑳᐃᔑ ᓀᓈᐗᐆᓂᑎᐙᒡ ᐅᑭᑭᔥᑭᑲᓂᓂ᙮

15:25b.MAR.015.025 ᑮᔖᑲᓱ ᑎᐸᐃᑲᓀᔮᓂ ᐁᑭᔐᐹᐗᑲᓂᓂᒃ, ᒦᐃ ᐊᐲ ᑳᑮᐊᑯᓴᑲᐙᐙᒡ᙮

15:26b.MAR.015.026 ᔑᑾ ᑮᐅᔑᐲᐃᑳᑌ ᑭᑭᓇᐙᒋᑕᒫᑫᐎᓐ, ᐌᑯᓀᓐ ᑳᐅᒋ ᐊᑯᓴᑲᐅᓐᒡ ᐊᐊ ᒋᓴᔅ᙮ ᒦ ᐗᐊ ᒎᐗᒃ ᐅᑭᒋᐅᑭᒫᒥᐙᓐ, ᑮᐃᑭᑑᒪᑲᓐ᙮

15:27b.MAR.015.027 ᔑᑾ ᓃᔑᓐ 2 ᐅᒪᑲᑗᔥᑲᒃ ᑫᐐᓇᐙ ᑮᐊᑯᓴᑲᐃᑳᓱᐗᒃ, ᑫᔮᐱ ᐁᓃᔑᓂᒡ ᐋᔑᑌᔮᑎᑰᐞ, ᐯᔑᒃ ᐃᐃᒫ ᐅᑭᒋᓂᑭᓃᕽ ᐃᓇᑫ, ᐯᔑᒃ ᐃᑕᔥ ᑲᔦ ᐅᓇᒪᑎᓂᑭᓃᕽ ᐃᓇᑫ ᐁᔑᐊᑰᒋᓂᓂᒡ ᒋᓴᓲᓐ᙮

15:28b.MAR.015.028 ᒦ ᐃ ᐐᑫ ᐁᑮᐃᔑᓭᓂᒃ ᐃᐃ ᑳᑮ ᑮᔖᒋᐲᐃᑳᑌᓂᒃ ᑭᔐᒪᓂᑑ ᐅᑎᑭᑐᐎᓐ: ᑮᑕᑾᑭᒫ ᐃᓂᐌᓂᐗᐞ ᑳᐲᑯᓇᒥᓂᒡ ᐃᓈᑯᓂᑫᐎᓐ, ᑮᐃᑭᑑᒪᑲᓂᓂ᙮

15:29b.MAR.015.029 ᒦᑕᔥ ᐃᑭ ᑳᒪᔮᔥᑲᐙᐙᒡ ᐅᑮᓂᔑᐹᐱᐋᐙᓐ ᐁᑮᓇᓈᒥᑴᓂᐙᒡ ᐁᐃᓈᐙᒡ: ᔪᐆ! ᑭᐐ ᐲᑯᐱᑑᓈᐸᓐ ᐄᑐᒃ ᐃᐃ ᑭᔐᒪᓂᑑ ᑳᔑ ᐊᓇᒥᐁᑕᐎᓐᒡ, ᒦᓇᐙ ᑮᓂᓱᑮᔑᑾᑳᒃ ᐁᐐ ᑮᐌ ᐅᔑᑑᔭᐸᓐ!

15:30b.MAR.015.030 ᑮᓐ ᐱᒫᒋᐃᑎᓱᓐ! ᐱᓃᓵᑕᐌᓐ ᐃᐃᒫ ᐋᔑᑌᔮᑎᑯᕽ! ᑮᐃᑭᑐᐗᒃ ᐁᐃᔑ ᒦᑭᓱᒫᐙᒡ᙮

15:31b.MAR.015.031 ᔑᑾ ᐯᔑᑾᓐ ᐃᑭ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᐅᑮ ᐹᐱᐋᐙᓐ ᒋᓴᓲᓐ ᐁᐃᑎᐙᒡ: ᐸᑳᓐ ᐊᐎᔭᐞ ᐅᑮ ᐱᒫᒋᐋᐞ᙮ ᐐᓐ ᐃᑕᔥ ᑳᐐᓐ ᐅᑲᔥᑭᑑᓰᓐ ᒋᐱᒫᒋᐃᑎᓱᒡ!

15:32b.MAR.015.032 ᒦ ᐊᐌ ᑳᐃᑎᓱᒡ ᑭᔐᒪᓂᑑ ᑳᐅᓀᓂᒫᒡ ᒋᐱᒫᒋᐃᐌᓂᒡ ᐁᐋᐎᒡ, ᑲᔦ ᑫᑭᒋᐅᑭᒫᑲᑕᐙᒡ ᐃᔅᕒᐃᔭᓬᐃᓂᓂᐗᐞ ᙮ ᑕᑲ ᒋᑮᐅᒋ ᓃᓵᑕᐌᒡ ᐃᐃᒫ ᐋᔑᑌᔮᑎᑯᕽ, ᑭᑲ ᑌᐺᑕᐙᓈᓐ ᐁᐋᐎᒡ, ᐙᐸᑕᒧᐗᕽ! ᑮᐃᑎᐗᒃ᙮ ᐃᑭ ᑲᔦ ᓃᔑᓐ ᐃᓂᓂᐗᒃ ᑳᑮᐐᒋ ᐊᑯᓴᑲᐅᑰᒫᐙᒡ ᒋᓴᓲᓐ, ᑲᔦ ᐐᓇᐙ ᐯᔑᑾᓐ ᐅᑮᐃᔑ ᑲᑳᓱᒫᐙᓐ᙮

15:33b.MAR.015.033 ᒦᑕᔥ ᐁᐋᐱᑕ ᑮᔑᑲᒃ ᑮᒫᒌ ᑲᔥᑮᑎᐱᑲᓐ ᒥᓯᐌ ᐊᑮᕽ, ᐲᓂᔥ ᐁᓂᓱᑎᐸᐃᑲᓀᔮᒃ᙮

15:34b.MAR.015.034 ᐁᓂᓱᑎᐸᐃᑲᓀᔮᒃ ᐃᑕᔥ ᑮᑭᔒᐌ ᐊᐊ ᒋᓴᔅ: ᐃᓬᐆᐃ! ᐃᓬᐆᐃ! ᓬᐊᒫ ᓴᐹᑕᓃ? ᑮᐃᑭᑐ᙮ ᒦᐃ ᐁᑭᑐᕽ: ᓂᒪᓂᑑᒻ! ᓂᒪᓂᑑᒻ! ᐋᓃᓐ ᑕᔥ ᑳᐅᒋ ᓇᑲᔑᔭᓐ?

15:35b.MAR.015.035 ᒦᑕᔥ ᑳᐃᑭᑐᐙᒡ ᐋᓂᓐᑦ ᐃᐃᒫ ᑳᒌᑭᑳᐸᐎᐙᒡ: ᐃᓇ ᑕᔥ, ᐅᓇᑗᐌᒫᓐ ᐃᓬᐋᐃᒐᐗᓐ !

15:36b.MAR.015.036 ᒦᑕᔥ ᐯᔑᒃ ᐃᓂᓂ ᑳᐃᔑ ᐲᒋᐸᑣᒡ ᐃᔅᑲᐃᐹᓐ ᐁᑮ ᑭᑖᐲᑭᓇᕽ ᔔᒥᓈᐴᕽ, ᐁᑮᓃᒫᑾᐊᕽ ᒥᑎᑰᓯᕽ, ᐁᑮᐃᓈᑾᐊᒪᐙᒡ ᐅᑑᓂᓃᕽ ᐃᓂ ᒋᓴᓲᓐ ᐁᐐ ᒥᓇᐋᒡ, ᐁᐃᑭᑐᒡ: ᑕᑲ ᒋᐱᓃᓯᓂᑯᒡ ᐃᓂ ᐃᓬᐋᐃᒐᐗᓐ!

15:37b.MAR.015.037 ᒋᓴᔅ ᐃᑕᔥ ᑮᑭᒋᑭᔒᐌ᙮ ᒦᑕᔥ ᑳᐃᔑ ᐴᓂᐱᒫᑎᓯᒡ᙮

15:38b.MAR.015.038 ᒦᑕᔥ ᐃᐃ ᐊᐲ ᐌᑎ ᑭᒋᐊᓇᒥᐁᐎᑲᒥᑯᕽ ᑳᐃᔑ ᑖᔥᑮᑭᓭᒃ ᑳᑭᐸᑳᒃ ᐋᑲᐌᑭᓂᑲᓐ ᐃᐃᒫ ᐲᑎᒃ ᑳᐊᑰᑌᒃ ᑭᔐᒪᓂᑑ ᐅᐙᑳᐃᑲᓃᕽ᙮ ᐃᔥᐱᒥᕽ ᐃᓇᑫ ᑮᐱᐅᒋ ᒫᒌ ᑖᔥᑮᑭᓭ ᐲᓂᔥ ᐌᑎ ᓈᔕᔭᐄ᙮

15:39b.MAR.015.039 ᐃᐃᒫ ᑕᔥ ᐯᔓ ᐋᔑᑌᔮᑎᑯᕽ ᑳᑮᓃᐸᐎᒡ ᐅᑭᒫᐎᔑᒫᑲᓂᔥ ᑳᐃᓈᓴᒥᑳᐸᐐᑕᐙᒡ ᐃᓂ ᒋᓴᓲᓐ, ᐊᐲ ᐁᐙᐸᒫᒡ ᐁᔑ ᐴᓂᐱᒫᑎᓯᓂᒡ, ᑮᐃᑭᑐ: ᑌᐺ ᐄᓴᓐ ᐗᐊ ᐃᓂᓂ ᑭᔐᒪᓂᑑᓐ ᐅᑮᐅᑯᓯᓯᒥᑰᓐ! ᑮᐃᑭᑐ᙮

15:40b.MAR.015.040 ᔑᑾ ᑮᐊᔮᐗᒃ ᐃᑴᐗᒃ ᐃᐃᒫ ᐁᑯᑌᐱᓈᑾᓂᓂᒃ ᐁᑮᐅᓵᐱᐙᒡ᙮ ᒣᑴᔭᐄ ᑯ ᑮᐊᔮᐗᒃ ᐅᑯ ᓂᓯᓐ 3 ᓴᓬᐆᒥ, ᔑᑾ ᒣᕒᐃ ᒦᐊᐌ ᒫᑲᑕᓬᐊ ᐆᑌᓇᐌᓯᕽ ᑳᑮᐅᒌᒡ, ᔑᑾ ᑯᑕᒃ ᐊᐊ ᒦᓇᐙ ᐯᔑᒃ ᒣᕒᐃ ᒦᐊᐌ ᐅᑯᓯᓴᐞ ᑳᐃᔑᓂᑳᓱᓂᒡ ᒎᓯᔅ ᑲᔦ ᒌᒥᔅ ᐅᔒᒣᔑᒫ᙮

15:41b.MAR.015.041 ᒦᐗᑯᑯ ᐃᑴᐗᒃ ᑳᑮ ᐱᒥᓂᔕᐙᐙᒡ ᐃᓂ ᒋᓴᓲᓐ ᑳᓬᐊᓬᐄᐎ ᐊᑮᕽ ᒣᒀ ᐃᐃᒫ ᐁᑮᐊᔮᓂᒡ, ᐁᑮ ᐸᐹᐸᒥᐋᐙᒡ᙮ ᔑᑾ ᑫᔮᐱ ᓃᐱᐗᐞ ᑮᐊᔮᐗᒃ ᐃᑴᐗᒃ ᑳᑮᐱ ᐐᒋ ᑕᑯᔑᓅᒫᐙᒡ ᐃᓂ ᒋᓴᓲᓐ ᐃᐃᒫ ᒉᕒᐆᓴᓬᐊᒥᕽ ᙮

15:42b.MAR.015.042 ᐋᔕ ᑮᐊᓂ ᐅᓈᑯᔑᓐ, ᐁᑳ ᒪᔑ ᐁᐸᑭᔑᒧᓯᒃ ᐁᑮ ᐸᑴᔑᑲᓂᑮᔑᑲᒃ᙮ ᒦᐃ ᐊᐲ ᐁᑮᐗᐌᔒᑖᐙᒡ ᒎᐗᒃ ᒋᑆ ᐊᓉᐲᐎ ᑮᔑᑲᓂᓂᒃ᙮

15:43b.MAR.015.043 ᑮᐊᔮ ᑕᔥ ᐯᔑᒃ ᐁᑭᒋ ᐃᓀᑖᑯᓯᒡ ᐅᓇᔓᐌᐎᓂᓂ, ᒎᓴᑉ ᑳᐃᔑᓂᑳᓱᒡ, ᐁᑮᐅᒌᒡ ᐆᑌᓇᐌᓯᕽ ᐁᕒᐊᒪᑏᔭ ᐁᐃᔑᓂᑳᑌᓂᒃ᙮ ᑫᐐᓐ ᐅᑮᐊᔕᐙᐸᑖᓐ ᑭᔐᒪᓂᑑᓐ ᒋᐅᔑᓯᑑᓂᒡ ᐅᑎᐯᒋᑫᐎᓂᓂ᙮ ᑮᓲᑭᑌᐁ ᒎᓴᑉ ᐁᑮᐃᔖᒡ ᐹᐃᓬᐊᑑᓐ, ᐁᑮ ᑲᑴᒋᒫᒡ ᐃᐃ ᒋᓴᓲᓐ ᐐᔭᐎᓂ ᒋᓇᐃᓇᕽ᙮

15:44b.MAR.015.044 ᑮᑯᔥᑴᑕᒻ ᐃᑕᔥ ᐊᐊ ᐹᐃᓬᐊᑦ ᐋᔕ ᐁᓂᐳᓂᒡ ᐃᓂ ᒋᓴᓲᓐ ᐁᐐᑕᒪᐎᓐᒡ᙮ ᔑᑾ ᑮᐊᓅᑮ ᒋᐱᓈᓯᑳᑯᒡ ᐃᓂ ᐅᑭᒫᐎᔑᒫᑲᓂᔕᓐ᙮ ᒦᑕᔥ ᐁᑲᑴᒋᒫᒡ: ᐋᔕ ᓇ ᑭᓉᔥ ᑳᑮ ᓂᐳᒡ ᒋᓴᔅ? ᐅᑮᐃᓈᓐ᙮

15:45b.MAR.015.045 ᐁᐊᐞ, ᐋᔕ ᑮᓂᐳ, ᐅᑮᐃᑰᓐ᙮ ᒦᑕᔥ ᑳᐃᔑ ᑲᓅᓈᒡ ᐊᐊ ᐹᐃᓬᐊᑦ ᐃᓂ ᒎᓴᐴᓐ: ᐊᐤ ᑭᑲ ᓇᐃᓈᓐ ᐃᐃ ᒦᔭᐤ, ᐅᑮᐃᓈᓐ᙮

15:46b.MAR.015.046 ᒦᑕᔥ ᑳᐊᐎ ᐃᔑ ᐊᑖᐌᒡ ᒎᓴᑉ ᐃᐃ ᐙᐱᔥᑮᑭᓐ᙮ ᒦᑕᔥ ᑳᐃᔑ ᐅᒋ ᐱᓇᐊᕽ ᐃᐃ ᐐᔭᐎᓂ ᒋᓴᓲᓐ ᑳᑮᐃᔑ ᐊᑰᑌᓂᒃ ᐋᔑᑌᔮᑎᑯᕽ, ᔑᑾ ᐁᑮ ᑎᑎᐯᔩᑭᓇᕽ ᐙᐱᔥᑮᑭᓄᕽ᙮ ᒦᑕᔥ ᑳᐃᔑ ᓇᐃᓇᕽ ᐃᐃᒫ ᓇᐃᓂᑏᐎᑲᒥᑯᕽ ᑳᐃᔑ ᐐᐹᐱᑲᐃᑳᑌᓂᒃ᙮ ᒦᑕᔥ ᑳᐃᔑᑎᑎᐱᓈᒡ ᐃᓂ ᑭᒋᐊᓯᓃᓐ ᑳᑭᐸᐃᑳᑳᓂᐎᓂᒡ ᐃᐃᒫ ᐁᔑ ᐃᔥᒀᑌᒥᐗᓂᓂᒃ ᓇᐃᓂᑏᐎᑲᒥᒃ᙮

15:47b.MAR.015.047 ᔑᑾ ᑲᔦ ᑮᐊᔮᐗᒃ ᒣᕒᐃ ᒫᑲᑕᓬᐊᐎᑴ ᑲᔦ ᐊᐊ ᑯᑕᒃ ᒣᕒᐃ ᑳᐅᑯᓯᓯᒡ ᒎᓯᓴᓐ ᙮ ᐅᑮᐙᐸᑖᓈᐙ ᐁᔑ ᐱᒥᔑᒥᒥᓐᒡ ᐃᓂ ᒋᓴᓲᓐ᙮

16

16:1b.MAR.016.001 ᑳᐃᔥᒀᓭᓂᒃ ᐃᑕᔥ ᑳᑮᐊᓉᐲᐎ ᑮᔑᑲᓂᓂᒃ ᒦᐃ ᐊᐲ ᑳᐃᔖᐙᒡ ᒣᕒᐃ ᒫᑲᑕᓬᐊᐎᑴ, ᑲᔦ ᒣᕒᐃ ᒌᒥᔅ ᐅᒫᒫᓐ, ᑲᔦ ᓴᓬᐆᒥ, ᐁᑮᐊᐎ ᐊᑖᐌᐙᒡ ᐃᓂ ᒥᓈᑾᐅᓇᓐ ᐁᐐᐊᐎ ᒥᓈᑾᐊᒪᐙᐙᒡ ᒋᓴᓲᓐ ᐐᔭᐎᓂ᙮

16:2b.MAR.016.002 ᒦᑕᔥ ᐌᔮᐸᓂᓂᒃ ᐁᐊᓇᒥᐁᑮᔑᑲᓂᓂᒃ, ᐱᒌᓇᒃ ᐃᑯ ᐁᐱᒨᑲᐊᒥᓂᒡ ᐁᑭᔐᐹᐗᑲᓂᓂᒃ, ᑮᐃᔖᐗᒃ ᐃᑭ ᐃᑴᐗᒃ ᐃᐃᒫ ᓇᐃᓂᑏᐎᑲᒥᑯᕽ᙮

16:3b.MAR.016.003 ᑮᐊᓂ ᑲᑴᒋᑎᐗᒃ ᐃᑕᔥ: ᐊᐌᓀᔥ ᐃᑯᒋ ᑫᔑ ᑎᑎᐱᓇᒪᐎᓇᕽ ᐃᓂ ᐊᓯᓃᓐ ᑳᑭᐱᔑᓂᓂᒡ ᓇᐃᓂᑏᐎᑲᒥᑯᕽ? ᑮᐃᑎᐗᒃ᙮

16:4b.MAR.016.004 ᐋᓃᔥ ᐐᑫ ᑮᒥᒑᐱᑭᓯᐗᓐ᙮ ᐊᐲ ᑕᔥ ᐌᑎ ᐁᐃᓈᐱᐙᒡ, ᐅᑮ ᑌᐹᐸᒫᐙᓐ ᐋᔕ ᐃᑯᒋ ᐁᑮᒪᑗ ᐊᐱᓂᒡ᙮

16:5b.MAR.016.005 ᒦᑕᔥ ᐁᐲᑎᑫᐙᒡ ᐅᑮᐙᐸᒫᐙᓐ ᐅᔥᑭ ᐃᓂᓂᐗᓐ ᐃᐃᒫ ᓇᑫ ᐅᑭᒋᓂᑭᐙᕽ ᐁᓇᒪᑕᐱᓂᒡ, ᐁᑭᓍᐲᑲᐊᔐᓂᒡ ᐁᐙᐱᔥᑭᐅᓂᒡ᙮ ᐐᑫ ᑮᓭᑭᓯᐗᒃ᙮

16:6b.MAR.016.006 ᐅᑮ ᑲᓅᓂᑯᐙᓐ ᐃᑕᔥ: ᑫᑯ ᓭᑭᓯᑫᒃ᙮ ᑭᐱ ᐊᑕᐙᐸᒫᐙ ᐊᐌ ᒋᓴᔅ ᓈᓴᕒᐃᑎᕽ ᑳᐅᒌᒡ, ᐋᔑᑌᔮᑎᑯᕽ ᑳᑮᐃᔑ ᐊᑯᓴᑲᐅᑎᐸᓐ᙮ ᐋᔕ ᑮᑮᐌᐱᒫᑎᓯ! ᑳᐐᓐ ᐊᐎᔭ ᐅᐅᒫ ᐊᔮᓰ᙮ ᐃᓇᔥᑫ ᑕᔥ ᐅᐅᒫ ᑳᑮᐃᔑ ᐱᒥᔑᒥᑎᐸᓐ!

16:7b.MAR.016.007 ᐊᓂ ᒫᒑᒃ ᐃᑕᔥ, ᐊᐎ ᐐᑕᒪᐎᑰᒃ ᐃᐃ ᐅᑭᑭᓄᐊᒪᐙᑲᓇᐞ ᑲᔦ ᐐᓐ ᐲᑕᕒ ᙮ ᒦ ᐅᐌ ᐃᓂᑰᒃ, ᐁᓃᑳᓂ ᐃᔖᒡ ᒋᓴᔅ ᐌᑎ ᑳᓬᐊᓬᐄᐎ ᐊᑮᕽ, ᑫᓂ ᐃᔖᔦᒃ᙮ ᒦ ᐌᑎ ᑫᐃᔑ ᐙᐸᒣᒃ ᑖᐱᔥᑰ ᑳᐃᓂᓀᑭᐸᓐ, ᐅᑮᐃᑯᐙᓐ ᐃᓂ ᐅᔥᑭ ᐃᓂᓂᐗᓐ᙮

16:8b.MAR.016.008 ᒦᑕᔥ ᑳᐃᔑ ᓵᑲᐊᒧᐙᒡ ᓇᐃᓂᑏᐎᑲᒥᑯᕽ, ᐁᑮᒫᒌᐸᐃᐌᐙᒡ ᐁᑮᓂᓂᑭᓭᐙᒡ ᐁᑮ ᑭᒋᓭᑭᓯᐙᒡ᙮ ᑳᐐᓐ ᐊᐎᔭ ᑫᑰᓐ ᐅᑮᐃᓈᓯᐙᐙᓐ ᑳᐊᐲᒋ ᓭᑭᓯᐙᒡ᙮

16:9b.MAR.016.009 ᐊᐲ ᑕᔥ ᐊᐊ ᒋᓴᔅ ᑳᑮᐌᐱᒫᑎᓯᒡ ᐐᐸ ᑭᑭᔐᑉ ᐁᐊᓇᒥᐁᑮᔑᑲᓂᓂᒃ, ᓂᑕᒻ ᐅᑮᓈᑯᓰᑲᑕᐙᓐ ᒣᕒᐃ ᒫᑲᑕᓬᐊᐎᑴᓐ, ᒦᐗᓐ ᐃᓂᐌᓂᐗᓐ ᓃᔣᓱ 7 ᑳᑮ ᓵᑭᒋᓂᔕᐊᒪᐙᒡ ᒪᒋᐊᒑᑾᐞ᙮

16:10b.MAR.016.010 ᐐᓐ ᐊᐊ ᐃᑴ ᐅᑮᐊᐎ ᑲᓅᓈᐞ ᐃᐃ ᒋᓴᔅ ᑳᑮᓂᑖᐐᒌᐙᒡ, ᒣᒀ ᐁᑕᓇᑌᒧᓂᒡ ᐁᒪᐎᓂᒡ᙮ ᐅᑮᐐᑕᒪᐙᐞ ᐅᐅᐌ ᑳᐃᔑᐌᐸᓂᓂᒃ᙮

16:11b.MAR.016.011 ᐊᐲ ᑕᔥ ᑳᓅᑕᒧᐙᒡ ᐁᐱᒫᑎᓯᓂᒡ ᒋᓴᓲᓐ ᑲᔦ ᐁᑮᐙᐸᒥᑯᓂᒡ ᒣᕒᐄᓐ, ᑳᐐᓐ ᑮᑌᐺᑕᓰᐗᒃ᙮

16:12b.MAR.016.012 ᐹᓂᒫ ᑕᔥ ᓈᑫ ᑮᐊᓂ ᐃᔖᐗᐞ ᓃᔑᓐ ᒋᓴᔅ ᐅᑭᑭᓄᐊᒪᐙᑲᓇᐞ, ᐅᐱᒣᔭᐄ ᑳᐃᔑ ᐆᑌᓇᐗᓂᓂᒃ ᐁᑮᐃᔖᓂᒡ᙮ ᒦᑕᔥ ᐃᐃᒫ ᐁᑮᓈᑯᐃᑎᓱᒡ ᐊᐌ ᒋᓴᔅ ᑳᐃᔑ ᐱᒧᓭᓂᒡ᙮ ᐸᑳᓐ ᐃᑕᔥ ᑮᐃᔑᓈᑯᓯ᙮

16:13b.MAR.016.013 ᒦᑕᔥ ᑳᐃᔑ ᑮᐌᐙᒡ ᐃᑭ ᓃᔑᓐ ᑭᑭᓄᐊᒪᐙᑲᓇᒃ, ᐁᑮᐊᐎ ᐐᑕᒪᐙᐙᒡ ᐃᐃ ᑯᑕᒃ ᑭᑭᓄᐊᒪᐙᑲᓇᐞ᙮ ᑳᐐᓐ ᐃᑕᔥ ᐅᑮ ᑌᐺᑖᑯᓰᐙᐞ᙮

16:14b.MAR.016.014 ᐹᓂᒫ ᒦᓇᐙ ᒋᓴᔅ ᐅᑮᓈᑯᓰᑲᑕᐙᐞ ᐃᐃ ᒥᑖᔑᐯᔑᒃ ᐅᑭᑭᓄᐊᒪᐙᑲᓇᐞ ᒣᒀ ᐁᐐᓯᓂᓂᒡ᙮ ᐅᑮᐅᒋ ᑭᔒᑲᓅᓈᐞ ᐃᐃᐌ ᐁᑮ ᑌᐺᔦᑕᓯᓂᒃ, ᐁᐯᒋ ᓂᓯᑐᑕᒥᓂᒡ ᑲᔦ, ᐋᓃᔥ ᑳᐐᓐ ᐅᑮᓀᐱᒋ ᑌᐺᑕᐙᓰᓂ ᐃᐃᐌᓂᐗᐞ ᑳᑮᐙᐸᒥᑯᒡ ᑮᑮᐌᐱᒫᑎᓯᐃᓐᒡ᙮

16:15b.MAR.016.015 ᐅᑮᐃᓈᐞ ᐃᑕᔥ ᒋᓴᔅ: ᐃᔖᒃ ᐃᐃᒫ ᒥᓯᐌᑲᒥᒃ᙮ ᐐᑕᒪᐎᑰᒃ ᑲᑭᓇ ᐯᒫᑎᓯᐙᒡ ᐅᐅ ᒥᓍᒋᒧᐎᓐ᙮

16:16b.MAR.016.016 ᐊᐌᓀᓐ ᐃᑯ ᑫᑌᐺᑕᕽ, ᑫᓰᑲᐊᑖᓱᒡ ᑲᔦ, ᑕᐱᒫᒋᐋ᙮ ᐊᐌᓀᓐ ᐃᑕᔥ ᐃᑯ ᑫᑌᐺᑕᓯᒃ ᑕᑎᐹᑯᓂᑲᓂᐎ᙮

16:17b.MAR.016.017 ᐃᑭ ᑕᔥ ᐅᑌᐺᑕᒨᒃ ᐅᑲ ᐐᒌᐎᑯᓈᐙᓐ ᐅᓄ ᒫᒪᑳᒋᒋᑫᐎᓇᓐ ᒋᑭᑫᓂᒥᑣ ᐁᑌᐺᐙᒡ: ᓃᓐ ᓂᐐᓱᐎᓐ ᐊᐱᐐᑕᒧᐙᒡ ᐅᑲ ᓵᑭᒋᓂᔕᐊᒪᐙᐞ ᒪᒋᐊᒑᑾᐞ ᐊᐎᔭᐞ, ᔑᑾ ᑕᐅᔥᑭ ᐃᔑᑮᔗᐗᒃ᙮

16:18b.MAR.016.018 ᔑᑾ ᑮᔥᐱᓐ ᐅᑖᐱᓈᐙᒡ ᑭᓀᐱᑰᐞ ᑳᐐ ᓴᑭᒌᓱᐌᓂᒡ, ᑳᐐᓐ ᐃᑯᑕᓄ ᐅᑲ ᑑᑖᑯᓰᐙᐞ᙮ ᑮᔥᐱᓐ ᑲᔦ ᑫᑰᓂᓂᑯ ᒥᓂᑴᐙᒡ ᐯᒋᐳᐙᑲᒥᓂᓂᒃ, ᑳᐐᓐ ᐊᐙᒡ ᐅᑲ ᒫᓂᔥᑳᑯᓰᓈᐙ᙮ ᑲᔦ ᓵᒥᓈᐙᒡ ᐅᑖᑯᓰᐞ, ᑕᒥᓄᐊᔮᐗᐞ, ᑮᐃᑭᑐ᙮

16:19b.MAR.016.019 ᒦᑕᔥ ᐊᐲ ᑳᐃᔥᒀ ᑲᓅᓈᒡ ᐊᐊ ᑌᐯᒋᑫᒡ ᒋᓴᔅ, ᑮᐅᑖᐱᓂᑲᓂᐎ ᑭᒋᑮᔑᑯᕽ, ᐌᑎ ᑭᔐᒪᓂᑑᓐ ᐅᑭᒋᓂᑭᓃᕽ ᐃᓇᑫ ᐁᑮᐃᔑ ᐐᑕᐱᒫᒡ᙮

16:20b.MAR.016.020 ᐃᑭ ᑕᔥ ᑭᑭᓄᐊᒪᐙᑲᓇᒃ ᑮᐃᔑ ᒫᒑᐗᒃ ᒥᓯᐌ, ᐁᐊᐎ ᐐᑕᒫᑫᐙᒡ ᒥᓍᒋᒧᐎᓐ᙮ ᔑᑾ ᐅᑮᐐᑕᓄᑮᒥᑯᐙᓐ ᐃᓂ ᑌᐯᒋᑫᓂᒡ ᒫᒪᑳᒋᒋᑫᐎᓇᓐ ᐁᑮᒦᓂᑯᐙᒡ ᒋᑑᑕᒧᐙᒡ, ᐁᑮᐃᔑ ᑭᑫᑕᒧᐃᐌᓂᒡ ᐁᑌᐺᒪᑲᓂᓂᒃ ᐅᑎᑭᑐᐎᓂᐙ᙮