Matthew (Ojibwa)

1

1:1b.MAT.001.001 ᒦᑕᔥ ᐅᐅᐌ ᐁᔑᐲᐃᑳᑌᓂᒃ ᐋᓃᑎ ᒋᓴᔅ X ᑳᐱᐅᒋ ᓂᑖᐎᑭᒡ, ᒦ ᐊᐌ ᑳᐅᑕᑳᓀᓯᒡ ᑌᐱᑎᕽ, ᑫᐐᓐ ᐁᑮᐅᑕᑳᓀᓯᓂᒡ ᐁᐸᕒᐊᐋᒥᕽ ᙮

1:2b.MAT.001.002 ᐁᐸᕒᐊᐋᒻ ᑮᐅᑯᓯᓯ ᐃᓂ ᐋᐃᓯᑰᓐ ᒦᓇᐙᔥ ᐊᐌ ᐋᐃᓯᒃ ᑮᐊᓂ ᐅᑯᓯᓯ ᐃᓂ ᒉᑲᐴᓐ, ᑲᔦ ᒉᑲᑉ ᑮᐊᓂ ᐅᑯᓯᓯ ᐃᓂ ᒎᑕᐗᓐ, ᐐᒋᑭᐌᔨᓂ ᑲᔦ᙮

1:3b.MAT.001.003 ᔑᑾ ᒎᑕ ᑮᐅᑯᓯᓯ ᐃᓂᐌᓂᐗᐞ ᐲᕒᐃᓴᓐ, ᓰᕒᐋᐗᓐ ᙮ ᑌᒫᕒ ᑕᔥ ᑮᐃᔑᓂᑳᓱᐗᓐ ᐅᒫᒫᐙᓐ᙮ ᑲᔦ ᐲᕒᐃᔅ ᑮᐅᑯᓯᓯ ᐃᓂ ᐁᔅᕒᐊᓇᓐ ᑲᔦ ᐁᔅᕒᐊᓐ ᑮᐅᑯᓯᓯ ᐃᓂ ᐅᕒᐋᒪᓐ,

1:4b.MAT.001.004 ᑲᔦ ᐅᕒᐋᒻ ᑮᐊᓂ ᐅᑯᓯᓯ ᐃᓂ ᐊᒥᓇᑖᐸᓐ, ᑲᔦ ᐊᒥᓇᑖᑉ ᑮᐊᓂ ᐅᑯᓯᓯ ᐃᓂ ᓈᔕᓇᓐ, ᒦᓇᐙᔥ ᓈᔕᓐ ᑮᐊᓂ ᐅᑯᓯᓯ ᐃᓂ ᓵᓬᒪᓇᓐ ᙮

1:5b.MAT.001.005 ᑲᔦ ᓵᓬᒪᓐ ᑮᐊᓂ ᐅᑯᓯᓯ ᐃᓂ ᐴᐙᓴᓐ ᙮ ᐅᕒᐁᐋᑉ ᑮᐃᔑᓂᑳᓱᐗᓐ ᐅᒫᒫᓐ᙮ ᑲᔦ ᐴᐙᔅ ᑮᐊᓂ ᐅᑯᓯᓯ ᐃᓂ ᐆᐱᑕᓐ ᙮ ᐅᕒᐆᑦ ᑮᐃᔑᓂᑳᓱᐗᓐ ᐅᒫᒫᓐ᙮ ᑲᔦ ᐆᐱᑦ ᑮᐊᓂ ᐅᑯᓯᓯ ᐃᓂ ᒉᓯᐗᓐ ᙮

1:6b.MAT.001.006 ᒉᓯ ᑮᐅᑯᓯᓯ ᐃᓂ ᑌᐱᑕᓐ ᑳᑮ ᑭᒋᐅᑭᒫᐎᓂᒡ᙮ ᑲᔦ ᑌᐱᑦ ᑮᐊᓂ ᐅᑯᓯᓯ ᐃᓂ ᔂᓬᐊᒪᓇᓐ ᙮ ᔪᕒᐋᔭ ᐐᐗᓐ ᑮᐅᒫᒫ ᔂᓬᐊᒪᓐ᙮

1:7b.MAT.001.007 ᑲᔦ ᔂᓬᐊᒪᓐ ᑮᐊᓂ ᐅᑯᓯᓯ ᐃᓂ ᐅᕒᐄᔭᐴᐗᒨᓐ, ᒦᓇᐙᔥ ᐅᕒᐄᔭᐴᐗᒻ ᑮᐊᓂ ᐅᑯᓯᓯ ᐃᓂ ᐊᐹᐃᒐᐗᓐ, ᑲᔦ ᐊᐹᐃᒐ ᑮᐊᓂ ᐅᑯᓯᓯ ᐃᓂ ᐁᓴᐗᓐ ᙮

1:8b.MAT.001.008 ᑲᔦ ᐁᓴ ᑮᐊᓂ ᐅᑯᓯᓯ ᐃᓂ ᒉᐆᔕᐹᑕᓐ, ᑲᔦ ᒉᐆᔕᐹᑦ ᑮᐊᓂ ᐅᑯᓯᓯ ᐃᓂ ᒎᕒᐊᒨᓐ, ᑲᔦ ᒎᕒᐊᒻ ᑮᐊᓂ ᐅᑯᓯᓯ ᐃᓂ ᐊᓵᔭᐗᓐ ᙮

1:9b.MAT.001.009 ᑲᔦ ᐊᓵᔭ ᑮᐊᓂ ᐅᑯᓯᓯ ᐃᓂ ᒎᑕᒨᓐ, ᑲᔦ ᒎᑕᒻ ᑮᐊᓂ ᐅᑯᓯᓯ ᐃᓂ ᐁᓯᑳᔭᐗᓐ,

1:10b.MAT.001.010 ᑲᔦ ᐁᓯᑳᔭ ᑮᐊᓂ ᐅᑯᓯᓯ ᐃᓂ ᒪᓈᓴᐗᓐ, ᑲᔦ ᒪᓈᓴ ᑮᐊᓂ ᐅᑯᓯᓯ ᐃᓂ ᐋᒪᓇᓐ, ᑲᔦ ᐋᒪᓐ ᑮᐊᓂ ᐅᑯᓯᓯ ᐃᓂ ᒍᓵᔭᐗᓐ ᙮

1:11b.MAT.001.011 ᑲᔦ ᒍᓵᔭ ᑮᐊᓂ ᐅᑯᓯᓯ ᐃᓂ ᒉᑲᓈᔭᐗᓐ, ᐐᒋᑭᐌᔭᐞ ᑲᔦ, ᐃᐃᐌ ᐊᐲ ᐃᔅᕒᐃᔭᓬᐃᓂᓂᐗᒃ ᑳᑮᐃᔑᐎᒋᑲᓂᐎᐙᑯᐸᓀᓐ ᐌᑎ ᐹᐱᓬᐊᓄᕽ ᙮

1:12b.MAT.001.012 ᐊᐲ ᑕᔥ ᑳᐃᔥᒀ ᐃᔑᐎᓂᑣ ᐃᐌᑎ ᐹᐱᓬᐊᓄᕽ, ᒉᑲᓈᔭ ᑮᐊᓂ ᐅᑯᓯᓯ ᐃᓂ ᔑᔮᓬᑏᔭᓬᐊᓐ ᙮ ᒦᓇᐙᔥ ᔑᔮᓬᑏᔭᓬ ᑮᐊᓂ ᐅᑯᓯᓯ ᐃᓂ ᓯᕒᐊᐸᐸᓬᐊᓐ ᙮

1:13b.MAT.001.013 ᒦᓇᐙ ᑲᔦ ᓯᕒᐊᐸᐸᓬ ᑮᐊᓂ ᐅᑯᓯᓯ ᐃᓂ ᐊᐹᔪᑕᓐ, ᑲᔦ ᐊᐹᔪᑦ ᑮᐊᓂ ᐅᑯᓯᓯ ᐃᓂ ᐃᓬᐋᔭᑭᒪᓐ ᙮ ᑲᔦ ᐃᓬᐋᔭᑭᒻ ᑮᐊᓂ ᐅᑯᓯᓯ ᐃᓂ ᐁᓱᕒᐊᓐ,

1:14b.MAT.001.014 ᑲᔦ ᐁᓱᕒ ᑮᐊᓂ ᐅᑯᓯᓯ ᐃᓂ ᓭᑕᑾᓐ, ᑲᔦ ᓭᑕᒃ ᑮᐊᓂ ᐅᑯᓯᓯ ᐃᓂ ᐁᑭᒪᓐ, ᑲᔦ ᐁᑭᒻ ᑮᐅᑯᓯᓯ ᐃᓂ ᐃᓬᐋᔪᑕᓐ ᙮

1:15b.MAT.001.015 ᑲᔦ ᐃᓬᐋᔪᑦ ᑮᐊᓂ ᐅᑯᓯᓯ ᐃᓂ ᐁᓬᐃᐁᓴᕒᐆᓐ, ᑲᔦ ᐁᓬᐃᐁᓴᕒ ᑮᐊᓂ ᐅᑯᓯᓯ ᐃᓂ ᒫᑕᓅᓐ, ᑲᔦ ᒫᑕᓐ ᑮᐊᓂ ᐅᑯᓯᓯ ᐃᓂ ᒉᑲᐴᓐ ᙮

1:16b.MAT.001.016 ᒉᑲᑉ ᑲᔦ ᑮᐊᓂ ᐅᑯᓯᓯ ᐃᓂ ᒎᓴᐴᓐ ᙮ ᐊᐊ ᑕᔥ ᒎᓴᑉ, ᒣᕒᐃ ᑮᐃᔑᓂᑳᓱᐗᓐ ᐐᐗᓐ, ᒦᐗᓐ ᐃᑕᔥ ᐃᓂ ᒋᓴᔅ ᑳᑮᐅᒫᒫᒡ᙮ ᒋᓴᔅ ᑕᔥ ᑳᑮᐃᓂᓐᒡ ᑭᔐᒪᓂᑑᓐ ᑳᑮᐅᓀᓂᒥᑯᒡ ᒋᐱᒫᒋᐃᐌᒡ᙮

1:17b.MAT.001.017 ᒦᑕᔥ ᑳᑮᐱ ᒥᑖᔑᓃᐎᐙᒡ 14 ᐁᑮᐱ ᐊᔮᓂᑫ ᓂᑖᐎᑭᐙᒡ ᐁᐃᓇᐌᑎᐙᒡ ᐁᑮᐱᐅᒋ ᒫᒋᐊᔮᐙᒡ ᐁᐸᕒᐊᐋᒥᕽ ᐲᓂᔥ ᑌᐱᑎᕽ, ᑲᔦ ᐁᑮᐱ ᒥᑖᔑᓃᐎᐙᒡ 14 ᒦ ᐅᒫ ᐅᒋ ᑌᐱᑎᕽ ᐲᓂᔥ ᑮᐱ ᐃᔑᐎᓂᑣ ᐌᑎ ᐹᐱᓬᐊᓄᕽ, ᒦᓇᐙ ᐁᑮᐊᓂ ᒥᑖᔑᓃᐎᐙᒡ 14 ᑳᑮᐃᔑ ᐱ ᓂᑖᐎᑭᐙᒡ ᐹᐱᓬᐊᓄᕽ ᐲᓂᔥ ᑮᐱ ᐅᒋᒋᓭᒃ ᑳᑮᐃᔑ ᓂᑖᐎᑭᒡ ᐊᐊ ᑭᔐᒪᓂᑑᓐ ᑳᑮᐅᓀᓂᒥᑯᒡ ᒋᐱᒫᒋᐃᐌᒡ᙮

1:18b.MAT.001.018 ᒦᑕᔥ ᐅᐅ ᓇᑫ ᒋᓴᔅ ᑳᑮᐃᔑ ᓂᑖᐎᑭᒡ᙮ ᒣᕒᐃ ᒋᓴᔅ ᐅᒫᒫᓐ ᐁᑮᐊᔓᑕᒫᑯᓂᒡ ᒋᐐᐐᑎᑫᒥᑯᓂᒡ ᐃᓂ ᒎᓴᐴᓐ, ᒋᑆ ᐐᑎᑫᑎᐙᒡ ᐃᑕᔥ ᐅᑮ ᑭᑫᑖᓐ ᐊᐊᐌ ᐃᑴ ᐊᐱᓅᒌᔕᓐ ᐁᐊᔮᐙᒡ, ᑭᔐᒪᓂᑑᓐ ᐅᑕᒑᑯᓂ ᐁᑮᒦᓂᑯᒡ ᐃᓂ ᐊᐱᓅᒌᔕᓐ᙮

1:19b.MAT.001.019 ᒎᓴᑉ ᐃᑕᔥ ᒣᕒᐄᓐ ᑳᐐᐐᑎᑫᒫᐸᓐ, ᐋᐱᒋ ᑾᔭᒃ ᑮᐃᔑᐱᒫᑎᓯ ᑲᔦ ᑳᐐᓐ ᐅᑮᐊᑕᐌᑕᓰᓐ ᒋᑎᐹᒋᒫᒡ ᐃᓂ ᒣᕒᐄᓐ ᐁᐐ ᐱᑾᑑᔐᓂᒡ᙮ ᑮᐃᓀᑕᒻ ᑕᔥ ᐁᐐ ᑮᒨᒋ ᐸᑭᑎᓈᒡ᙮

1:20b.MAT.001.020 ᒣᒀ ᑕᔥ ᐅᐅ ᐁᐃᔑ ᓈᓈᑲᑕᐌᑕᕽ, ᐅᑮᐙᐸᒫᓐ ᐃᓂ ᑭᔐᒪᓂᑑ ᐅᑌᒐᓬᐃᒪᓐ ᐃᐃᒫ ᐃᓈᐸᑕᒧᐎᓂᕽ ᐁᑮᐃᑯᒡ: ᒎᓴᑉ, ᑌᐱᑎᕽ ᑳᐅᑕᑳᓀᓯᔭᓐ! ᑫᑯ ᐐᓐ ᓭᑭᓯᑫᓐ ᒋᐐᐎᔭᓐ ᒣᕒᐃ᙮ ᑭᔐᒪᓂᑑ ᐅᑕᒑᑾᓐ ᐅᔕ ᐅᑮᒦᓂᑰᓐ ᐃᓂ ᐊᐱᓅᒌᔕᓐ᙮

1:21b.MAT.001.021 ᑸᐎᓭᓴᓐ ᐅᔕ ᐅᑲ ᓂᑖᐎᑭᐋᓐ᙮ ᒋᓴᔅ ᑕᔥ ᑭᑲ ᐃᔑᓂᑳᓈᐙ, ᐋᓃᔥ ᐅᑲ ᐱᒫᒋᐋᐞ ᐅᐱᒫᑎᓰᒪᐞ ᐃᐃᒫ ᐅᒪᒋᑑᑕᒧᐎᓂᓃᕽ, ᐅᑮᐃᑰᓐ᙮

1:22b.MAT.001.022 ᒦᑕᔥ ᐅᐅ ᑳᑮᐅᒋ ᐃᔑᓭᒃ ᒪᔮ ᐱᑯ ᒋᐃᔑᓭᓂᒃ ᑭᔐᒪᓂᑑ ᑳᑮᐃᑭᑐᑯᐸᓀᓐ ᒣᐎᔕ ᐅᑎᐹᒋᒧᐎᓂᓃᒪᓐ ᑳᑮ ᑲᓅᑕᒫᑯᒡ ᐅᐅᐌ ᐁᑮᐃᑭᑐᓂᒡ:

1:23b.MAT.001.023 ᑾᔭᒃ ᐯᑭᐅᔥᑭᓃᑭᑴ ᐅᑲ ᐊᔮᐙᓐ ᐊᐱᓅᒌᔕᓐ ᑲᔦ ᐅᑲ ᓂᑖᐎᑭᐋᓐ ᑫᐅᑯᓯᓯᒡ᙮ ᐃᒫᓂᔪᐁᓬ ᑕᔥ ᑕᐃᔑᓂᑳᓱᐗᓐ᙮ ᒦᐃᐌ ᑳᐃᒋᑳᑌᒃ: ᑭᔐᒪᓂᑑ ᑭᐐᒌᐎᑯᓈᓐ᙮

1:24b.MAT.001.024 ᒎᓴᑉ ᑕᔥ ᔐᒫᒃ ᑮᐙᓂᔥᑳ ᐁᑮᐃᔑᒋᑫᒡ ᐋᓃᓐ ᑳᑮᐃᑯᒡ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᓂ᙮ ᒣᕒᐄᓐ ᑕᔥ ᑮᐐᐎ᙮

1:25b.MAT.001.025 ᑳᐐᓐ ᑕᔥ ᐐᑳ ᐅᑮ ᐸᐹᒣᓂᒫᓰᓐ ᐃᓂ ᐐᐗᓐ ᒋᑆ ᓂᑖᐎᑭᓈᐗᓱᓂᒡ᙮ ᒋᓴᔅ ᑕᔥ ᐅᑮᐃᔑᓂᑳᓈᓐ ᒎᓴᑉ ᐃᓂ ᑸᐎᓭᓴᓐ᙮

2

2:1b.MAT.002.001 ᒋᓴᔅ ᑕᔥ ᑮᐃᔑᓂᑖᐎᑭ ᐃᐃᒫ ᐆᑌᓈᕽ ᐯᑕᓬᐃᐁᒦᕽ ᐃᐃᒫ ᐊᑮᕽ ᒎᑏᔭ ᑳᑮᐃᔑᓂᑳᑌᓂᒃ ᐊᐲ ᐁᕒᐊᑦ ᑮᑭᒋᐅᑭᒫᐎᒡ᙮ ᒦᑕᔥ ᐃᐃ ᐊᐲ ᑮᐲᔖᐗᒃ ᐃᐃᒫ ᒉᕒᐆᓴᓬᐊᒥᕽ ᐃᑭᐌᓂᐗᒃ ᐃᓂᓂᐗᒃ ᑳᓇᓈᑲᒋᐋᐙᒡ ᐗᓇᑯᔕᐞ ᐙᐸᓄᕽ ᑳᑮᐅᒌᐙᒡ᙮

2:2b.MAT.002.002 ᒦᑕᔥ ᑮᐃᑭᑐᐗᒃ: ᐋᑎ ᐊᐊᐌ ᐊᐱᓅᒌᔥ ᑳᓂᑖᐎᑭᒡ ᑳᐐᐅᑭᒫᑲᑕᐙᒡ ᐃᐃᐌᓂᐗᐞ ᒎᐗᐞ᙮ ᓂᑮᐙᐸᒥᒫᓈᓂᓐ ᐅᔕ ᐃᓂ ᐅᐗᓇᑯᔑᒪᓐ ᐃᐃᐌᑎ ᐙᐸᓄᕽ, ᒦᑕᔥ ᑳᐅᒋ ᐲᔖᔮᕽ ᐁᐐᐅᒋᒌᑾᓃᑕᐗᑭᒡ᙮

2:3b.MAT.002.003 ᐊᐲ ᑕᔥ ᑳᓅᑕᕽ ᐊᐊ ᐁᕒᐊᑦ ᐐᑫ ᑮᒥᑯᔥᑳᑌᑕᒻ, ᐃᑭ ᑲᔦ ᑲᑭᓇ ᑳᑮᐊᔮᐙᒡ ᐃᐃᒫ ᒉᕒᐆᓴᓬᐊᒥᕽ᙮

2:4b.MAT.002.004 ᑲᑭᓇ ᑕᔥ ᐅᑮᐊᑐᒫᐞ ᐃᐃ ᑭᒋᐊᓇᒥᐁᐎᑭᒫᐞ, ᑳᑭᑭᓄᐊᒫᑫᓂᒡ ᑲᔦ ᐅᓈᑯᓂᑫᐎᓐ, ᒦᑕᔥ ᑳᐃᔑ ᑲᑴᒋᒫᒡ: ᐋᑎ ᑳᐐᐃᔑ ᓂᑖᐎᑭᓂᒡ ᐃᓂ ᑭᔐᒪᓂᑑ ᑳᑮᐊᔓᑕᒫᑫᒡ ᒋᐱᒫᒋᐃᐌᓂᒡ?

2:5b.MAT.002.005 ᒦᑕᔥ ᐁᕒᐊᑦ ᑳᐃᔑ ᓇᑴᑕᐎᓐᒡ: ᐃᐃᒫ ᓴ ᐆᑌᓈᕽ ᐯᑕᓬᐃᐁᒦᕽ ᐃᐃᒫ ᐊᑮᕽ ᒎᑏᔭ ᑕᐃᔑ ᓂᑖᐎᑮ, ᐋᓃᔥ ᑭᔐᒪᓂᑑ ᒣᐎᔕ ᑳᑮ ᑲᓅᑕᒫᑯᒡ ᐅᐅ ᑮᐃᔑᐲᐃᑫᐗᓐ:

2:6b.MAT.002.006 ᐃᐃᐌ ᓴ ᐯᑕᓬᐃᐁᒻ ᐃᐃᒫ ᑳᐊᔮᒃ ᐊᑮᕽ ᒎᑕᑳᕽ, ᑳᐐᓐ ᐸᑮ ᐃᓇᑭᑌᓯᓅᓐ ᐃᒫ ᑳᑭᒋ ᐃᓀᑖᑾᑭᓐ ᐆᑌᓇᐗᓐ ᒎᑕ ᐊᑮᕽ᙮ ᒦ ᐅᔕ ᐃᒫ ᐯᑕᓬᐃᐁᒦᕽ ᑳᐐᐅᒌᒡ ᐊᐊ ᑳᐐᓃᑳᓃᑕᒫᑫᒡ ᑫᑭᑭᓄᐎᓈᒡ ᑲᔦ ᓂᑑᐱᒫᑎᓰᒪᐞ ᐃᐃ ᐃᔅᕒᐃᔭᓬᐊᐞ, ᑮᐃᑭᑐ ᑳᑎᐯᒋᑫᒡ᙮

2:7b.MAT.002.007 ᐁᕒᐊᑦ ᑕᔥ ᐅᑮ ᑮᒨᒋᑲᓅᓈᐞ ᐃᓂᐌᓂᐗᐞ ᐃᓂᓂᐗᐞ ᐙᐸᓄᕽ ᑳᑮᐅᒌᓂᒡ, ᑲᔦ ᐅᑮ ᑲᑴᒋᒫᐞ ᐋᓃᓐ ᒪᔮ ᐊᐲ ᑳᓈᑯᓯᓂᒡ ᐃᓂ ᐗᓇᑯᔕᓐ᙮

2:8b.MAT.002.008 ᒦᑕᔥ ᑳᐃᔑ ᐃᔑᓂᔕᐙᒡ ᐃᐃᐌᑎ ᐯᑕᓬᐃᐁᒦᕽ ᐁᑮᐃᓈᒡ: ᒫᒑᒃ, ᐌᐌᓂ ᑲᑴ ᒥᑲᐎᒃ ᐊᐊ ᐊᐱᓅᒌᔥ᙮ ᑮᒥᑲᐌᒃ ᐃᑕᔥ ᐱ ᐐᑕᒪᐎᔑᑫᒃ ᑫᓃᓐ ᓴ ᒋᐅᒋᒌᑾᓃᑕᐗᒃ, ᐅᑮᐃᓈᐞ᙮

2:9b.MAT.002.009 ᔐᒫᒃ ᐃᑕᔥ ᑮᒫᒑᐗᒃ᙮ ᒦᓇᐙ ᑕᔥ ᐅᑮᐊᓂ ᐙᐸᒫᐙᓐ ᐃᓂ ᐗᓇᑯᔕᓐ ᑳᑮᐙᐸᒫᐙᒡ ᐙᐸᓄᕽ, ᐁᑮᐊᓂ ᓃᑳᓃᑕᒫᑯᐙᒡ, ᐲᓂᔥ ᐁᓂ ᐅᑎᑕᒥᓂᒡ ᐁᑮᐊᓂ ᑭᐱᒋᔥᑳᓂᒡ ᑎᐱᔥᑰ ᑳᐃᔑ ᐊᔮᓂᒡ ᐃᓂ ᐊᐱᓅᒌᔕᓐ᙮

2:10b.MAT.002.010 ᐋᐱᒋ ᑕᔥ ᑮᑭᒋ ᒨᒋᑫᑕᒨᒃ ᐊᐲ ᑳᐙᐸᒫᐙᒡ ᐃᓂ ᐗᓇᑯᔕᓐ᙮

2:11b.MAT.002.011 ᒦᑕᔥ ᑳᐃᔑ ᐲᑎᑫᐙᒡ ᐃᐃᒫ ᐙᑳᐃᑲᓂᕽ, ᐁᑮᐙᐸᒫᐙᒡ ᐃᓂ ᐊᐱᓅᒌᔕᓐ, ᑲᔦ ᐅᒫᒫᓂ ᒣᕒᐄᓐ ᙮ ᔐᒫᒃ ᐃᑕᔥ ᐅᑮᐅᒋᒌᑾᓃᑕᐙᐙᓐ ᐃᓂ ᐊᐱᓅᒌᔕᓐ ᐁᑮ ᑭᒋ ᐃᓀᓂᒫᐙᒡ᙮ ᒦᑕᔥ ᑳᐃᔑ ᐹᑭᓇᒧᐙᒡ ᐅᒪᔥᑭᒧᑎᐙᓐ ᑭᒋᑫᑰᓇᓐ ᐁᑮᒦᓈᐙᒡ, ᐅᓵᐎ ᔔᓂᔮᓐ, ᒥᓈᓯᑲᓂᓂ ᑲᔦ, ᐱᑭᐎ ᒥᓈᑯᐅᓂᓂ ᑲᔦ᙮

2:12b.MAT.002.012 ᑮᐸᐙᒧᐗᒃ ᐃᑕᔥ ᐁᑮ ᑭᑫᑕᒨᓂᑯᐙᒡ ᑭᔐᒪᓂᑑᓐ ᒋᑮᐌ ᐃᔖᓯᒀ ᐌᑎ ᐁᕒᐊᑕᓐ ᑳᐃᔑ ᐊᔮᓂᒡ᙮ ᐸᑳᓐ ᐃᑕᔥ ᐃᓇᑫ ᑮᐃᔑ ᑮᐌᐗᒃ ᐅᑕᑮᐙᕽ᙮

2:13b.MAT.002.013 ᐊᐲ ᑕᔥ ᑳᐊᓂ ᒫᒑᓂᒡ ᐃᓂᐌᓂᐗᐞ ᐃᓂᓂᐗᐞ, ᑭᔐᒪᓂᑑ ᐅᑌᒐᓬᐃᒪᓐ ᐅᑮ ᐱᓈᓯᑲᐙᓐ ᒎᓴᐴᓐ ᐃᐃᒫ ᐃᓈᐸᑕᒧᐎᓂᕽ ᑳᑮᐃᓈᒡ: ᐗᓂᔥᑳᓐ, ᒫᒌᐸᐃᐌᒃ ᐊᐊ ᐊᐱᓅᒌᔥ ᑲᔦ ᐅᒫᒫᓐ, ᐄᒋᐸᑮᕽ ᐊᐸᐃᐌᒃ᙮ ᒦᑕᔥ ᐌᑎ ᑫᐊᔭᔮᔭᓐ ᐹᒫ ᑲᓅᓂᓈᓐ ᒫᒑᑲᓐ᙮ ᐁᕒᐊᑦ ᑭᒋᐅᑭᒫ ᐅᑲ ᑲᑴ ᒥᑲᐙᓐ ᐁᐐᓂᓵᒡ ᐃᓂ ᐊᐱᓅᒌᔕᓐ᙮

2:14b.MAT.002.014 ᔐᒫᒃ ᐃᑕᔥ ᒎᓴᑉ ᑮᐗᓂᔥᑳ ᐁᑎᐱᑲᓂᓂᒃ ᐁᑮᒫᒋᐸᐃᐌᐙᒡ ᐃᓂ ᐊᐱᓅᒌᔕᓐ, ᐅᒫᒫᓂ ᑲᔦ, ᐄᒋᐸᑮᕽ ᐁᑮᐊᐸᐃᐌᐙᒡ᙮

2:15b.MAT.002.015 ᒦᑕᔥ ᐃᐃᒫ ᑳᐃᔑ ᐊᔮᒡ ᐲᓂᔥ ᐁᑮᐃᔥᒀᐱᒫᑎᓯᓂᒡ ᐁᕒᐊᑕᓐ᙮ ᒦᑕᔥ ᐃᐃ ᐊᐲ ᐹᓂᒫ ᑳᑮ ᐱᑮᐌᐙᒡ᙮ ᒦᑕᔥ ᐅᐅ ᑳᑮᐅᒋ ᐃᔑᓭᒃ ᒪᔮ ᐱᑯ ᒋᐃᔑᓭᓂᒃ ᑳᑎᐯᒋᑫᒡ ᑳᑮᐃᑭᑐᑯᐸᓀᓐ ᐁᑮᐋᐸᒋᐋᒡ ᐅᑎᐹᒋᒧᐎᓂᓃᒪᓐ ᑳᑮ ᑲᓅᑕᒫᑯᒡ: ᓂᑮ ᑲᓅᓈ ᓂᑯᓯᔅ ᒋᓵᑲᐊᕽ ᐃᐃᒫ ᐄᒋᐸᑮᕽ, ᐁᑮᐃᑭᑐᒡ᙮

2:16b.MAT.002.016 ᐊᐲ ᑕᔥ ᐁᕒᐊᑦ ᐁᑮᐙᐸᑕᕽ ᐁᑮ ᐱᑮᐌ ᐐᑕᒫᑯᓯᒃ ᐃᐃ ᐃᓂᓂᐗᐞ ᐙᐸᓄᕽ ᑳᐅᒋ ᐃᓂᒡ, ᐋᐱᒋ ᑮᑭᒋᓂᔥᑳᑎᓯ᙮ ᒦᑕᔥ ᑳᐃᓈᑯᓂᑫᒡ ᑲᑭᓇ ᒋᐊᑕ ᐎᓂᓯᒥᓐᒡ ᑸᐎᓭᓴᐞ ᐃᐃᒫ ᐯᑕᓬᐃᐁᒦᕽ ᑳᐊᔮᓂᒡ ᑲᔦ ᐯᔓ ᐃᒫ ᑳᐊᔮᓂᒡ, ᑳᓃᔓᐱᐴᓉᓂᒡ 2 ᓇᐗᒡ ᑲᔦ ᑳᐅᔥᑳᑎᓯᓂᒡ ᒋᓂᒋᑲᓂᐎᓂᒡ᙮ ᐋᔕ ᒦᐃ ᓃᔓᐱᐴᓐ ᑮᐃᔑᓭᓂᒃ ᐊᐲ ᐊᐊ ᐗᓇᑯᔥ ᓂᑕᒻ ᑳᑮᓈᑯᓯᑯᐸᓀᓐ᙮

2:17b.MAT.002.017 ᔑᑾ ᒦᐃ ᑳᑮᐃᑭᑐᑯᐸᓀᓐ ᐊᐊ ᒉᕒᐊᒫᔭ ᑳᑮ ᑲᓅᑕᒪᐙᒡ ᑭᔐᒪᓂᑑᓐ, ᒪᔮ ᐱᑯ ᑮᐃᔑᓭᓂ᙮

2:18b.MAT.002.018 ᑫᑰᓐ ᓅᑖᑾᓐ ᐃᐃᒫ ᐅᕒᐁᒫᕽ, ᒦᐃ ᐁᓂᑖᑾᒃ ᑖᐱᔥᑰ ᐊᐎᔭ ᐁᑭᒋᒪᐎᒡ ᑲᔦ ᐁᑲᒀᑕᑲᑌᒧᒡ, ᐅᕒᐁᒐᓬ ᐁᒪᐎᒫᒡ ᐅᓃᒑᓂᓴᐞ, ᑳᐐᓐ ᑲᔦ ᑲᔥᑭᐋᓰ ᒋᒥᓉᑕᕽ, ᐋᓃᔥ ᑲᑭᓇ ᑮᓂᐳᐗᐞ᙮

2:19b.MAT.002.019 ᐊᐲ ᑕᔥ ᐁᕒᐊᑦ ᑳᐃᔥᒀᐱᒫᑎᓯᒡ, ᒎᓴᑉ ᐅᑮᐙᐸᒥᒫᓐ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᒥ ᐃᐃᒫ ᐃᓈᐸᒋᑲᓂᕽ

2:20b.MAT.002.020 ᐁᑮᐃᑯᒡ: ᐗᓂᔥᑳᓐ, ᒫᒌᔥ ᐊᐊ ᐊᐱᓅᒌᔥ, ᐅᒫᒫᓐ ᑲᔦ, ᐃᐃᐌᑎ ᐃᔑ ᑮᐌᓐ ᐊᑮᕽ ᐃᔅᕒᐃᔭᓬ ᑳᐃᔑᓂᑳᑌᒃ᙮ ᐋᓃᔥ ᐋᔕ ᑲᑭᓇ ᑮᓂᐳᐗᒃ ᐃᑭ ᑳᐐᓂᓵᐙᐸᓐ ᐃᓂ ᐊᐱᓅᒌᔕᓐ᙮

2:21b.MAT.002.021 ᔐᒫᒃ ᐃᑕᔥ ᒎᓴᑉ ᑮᐗᓂᔥᑳ ᐁᑮᒫᒌᓈᒡ ᐃᓂ ᐊᐱᓅᒌᔕᓐ, ᐅᒫᒫᓂ ᑲᔦ, ᐃᔅᕒᐃᔭᓬᐃᑳᕽ ᐁᑮᐃᔑ ᑮᐌᐎᓈᒡ᙮

2:22b.MAT.002.022 ᑮᑯᑖᒋ ᑕᔥ ᒎᑏᔭᐗᑮᕽ ᒋᐃᔖᒡ, ᐋᓃᔥ ᑮᐃᔑ ᓅᑕᒻ ᐋᕒᑭᓬᐁᔭᓲᓐ ᐁᑭᒋᐅᑭᒫᐎᓂᒡ ᐁᑮᓈᐱᔥᑲᐙᓂᒡ ᐃᓂ ᐅᓯᐸᓃᓐ ᐁᕒᐊᑕᓐ᙮ ᑮᑲᓅᒋᑲᓂᐎ ᑕᔥ ᒎᓴᑉ ᐃᐃᒫ ᐃᓈᐸᑕᒧᐎᓂᕽ, ᒦᑕᔥ ᑳᐃᔑ ᐃᔖᒡ ᐃᐃᐌᑎ ᓇᑫ ᑳᓬᐊᓬᐄᐎ ᐊᑮᕽ᙮

2:23b.MAT.002.023 ᐃᐃᒫ ᑕᔥ ᐆᑌᓈᕽ ᓈᓴᕒᐃᑦ ᑳᑮᐃᔑᓂᑳᑌᓂᒃ ᒦ ᐃᒫ ᑳᐃᔑ ᑲᐯᔑᒡ᙮ ᒦᑕᔥ ᐅᐅᐌ ᒦᓇᐙ ᑳᑮᐅᒋ ᐃᔑᓭᒃ ᒪᔮ ᐱᑯ ᒋᐃᔑᓭᓂᒃ ᒣᐎᔕ ᑳᑮᐱ ᐃᑭᑐᐙᑯᐸᓀᓐ ᐃᑭ ᑳᑮᐱ ᑲᓅᑕᒪᐙᐙᒡ ᑭᔐᒪᓂᑑᓐ ᐁᑕᔑᒫᐙᒡ ᐃᓂᐌᓂᐗᓐ ᑭᔐᒪᓂᑑ ᑳᑮᐊᔓᑕᒫᑫᒡ ᒋᐱᒫᒋᐃᐌᓂᒡ: ᒦᐃᐌ ᑫᐃᓂᓐᒡ, ᓈᓴᕒᐃᑎᕽ ᐁᐅᒌᒡ, ᑮᐃᑭᑐᐗᒃ᙮

3

3:1b.MAT.003.001 ᓂᑯᑎᕽ ᐃᑕᔥ ᐃᑯ ᒞᓐ ᓰᑲᐊᑖᑫᐎᓂᓂ ᑮᑕᑯᔑᓐ ᐁᑮᒫᒌᐐᑕᒫᑫᒡ ᐃᐃᒫ ᐱᑾᑕᑲᒥᑯᕽ ᒎᑏᔮᑳᕽ,

3:2b.MAT.003.002 ᐁᑮᐃᑭᑐᒡ: ᑴᑳᑎᓯᒃ ᐅᒋ ᑭᒪᒋᑑᑕᒧᐎᓂᐙᕽ! ᐋᔕ ᐯᔓᓈᑾᓐ ᐃᐃ ᑭᔐᒪᓂᑑ ᒋᐅᔑᓯᑑᒡ ᐅᑎᐯᒋᑫᐎᓐ!

3:3b.MAT.003.003 ᒞᓐ ᑕᔥ ᑳᑮ ᑕᔑᒥᑰᑯᐸᓀᓐ ᐃᓂ ᐋᐃᓭᔭᐗᓐ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐊᐲ ᐁᑮᐃᑭᑐᓂᑯᐸᓀᓐ ᒣᐎᔕ: ᐯᔑᒃ ᐊᐎᔭ ᑕᔑ ᔖᑯᐌ ᐱᑾᑕᑲᒥᒃ, ᐅᔑᑕᒪᐎᒃ ᑫᐃᔖᒡ ᐊᐊ ᑳᑎᐯᒋᑫᒡ, ᑾᔭᑯᒧᑕᒪᐎᒃ ᐃᐃᐌᓂ ᐅᒦᑲᓈᒻ ᑳᐐᐃᔑ ᐱᒧᓭᒡ᙮

3:4b.MAT.003.004 ᒦᑕᔥ ᐅᐅ ᒞᓐ ᑳᐃᔑᑯᓇᔦᒡ, ᐱᒀᐎᑲᓀᐎᒥᑕᑎᒻ ᐅᐲᐗᔭᓐ ᑮᐅᒋ ᐅᔑᒋᑳᑌᓂ ᑫᑭᔥᑲᕽ, ᐸᔥᑴᑭᓉᔮᐲᓂ ᑮᑭᒋᐱᓱ᙮ ᐸᐸᑭᓀᐞ ᐃᑕᔥ ᐅᑮᐊᒸᐞ, ᐋᒨᐎ ᓰᓯᐹᑾᑑᓂ ᑲᔦ ᐅᑮᒦᒋᓐ᙮

3:5b.MAT.003.005 ᐃᐃ ᑕᔥ ᐊᐎᔭᐞ ᑳᑮ ᐱᓈᓯᑳᑯᒡ ᒉᕒᐆᓴᓬᐊᒥᕽ ᑮᐅᒌᐗᐞ, ᐃᐃᒫ ᑲᔦ ᒥᓯᐌ ᒎᑏᔭᐗᑮᕽ, ᐃᐃᒫ ᑲᔦ ᒥᓯᐌ ᐯᔓ ᒞᕒᑕᓇᐎ ᓰᐲᕽ ᙮

3:6b.MAT.003.006 ᐅᑮᐐᑖᓈᐙᓐ ᐃᑕᔥ ᐅᒪᒋᑑᑕᒧᐎᓂᐙᓐ, ᒞᓐ ᑕᔥ ᐅᑮ ᓰᑲᐊᑕᐙᐞ ᐃᐃᒫ ᒞᕒᑕᓇᐎ ᓰᐲᕽ᙮

3:7b.MAT.003.007 ᐊᐲ ᑕᔥ ᒞᓐ ᐁᐙᐸᒫᒡ ᓃᐱᐗᐞ ᐁᐱᐊᑕ ᓰᑲᐊᑖᓱᓂᒡ ᐃᓂᐌᓂᐗᐞ ᐯᕒᐊᓰᐞ, ᓵᒐᓰᐞ ᑲᔦ, ᐅᐅ ᑕᔥ ᐅᑮᐃᓈᐞ: ᑮᓇᐙ ᑳᑭᓀᐱᑯᐎᔦᒃ! ᐊᐌᓀᓐ ᑳᑮᐃᓂᓀᒃ ᒋᑲᔥᑭᑑᔦᒃ ᒋᐸᓂᔥᑳᑯᔦᒃ ᑭᔐᒪᓂᑑ ᐅᓂᔥᑳᑎᓯᐎᓐ ᑳᐐ ᐲᔖᒪᑲᓂᓂᒃ?

3:8b.MAT.003.008 ᑫᑰᓇᓐ ᐃᑕᔥ ᐃᔑᒋᑫᒃ ᒋᓈᑯᑑᔦᒃ ᑫᑫᑦ ᐃᑯ ᐁᑮ ᑴᑳᑎᓯᔦᒃ ᐃᐃᒫ ᑭᒪᒋᑑᑕᒧᐎᓂᐙᕽ᙮

3:9b.MAT.003.009 ᒥᓴᐙ ᐱᑯ ᐋᓇ ᐃᑭᑐᔦᒃ ᐁᐸᕒᐊᐋᒻ ᓂᑭᒋᐊᔭᐋᒥᓈᐸᓐ, ᑳᐐᓐ ᑫᑰᓐ ᑭᑲᐃᔑ ᐐᒋᐃᑯᓰᒻ᙮ ᑭᐐᑕᒪᐎᓂᓂᒻ, ᑭᔐᒪᓂᑑ ᐅᑖᑲᔥᑭᐋᐞ ᐃᐃ ᐊᓯᓃᐞ ᒋᐃᓇᐌᒫᓂᐸᓐ ᐃᓂ ᐁᐸᕒᐊᐋᒪᓐ᙮

3:10b.MAT.003.010 ᐙᑳᑾᑦ ᑕᔥ ᑕᐋᐸᑕᓐ ᒋᑮᔥᑲᑕᐅᑣ ᐃᑭ ᒥᑎᑰᒃ ᑭᑭᒌᐱᒃ᙮ ᐊᐊᐌᑎ ᑕᔥ ᒥᑎᒃ ᑳᓂᑖᐎᑭᐋᓯᒃ ᐌᓂᔑᔑᓂᓂᒡ ᔔᒥᓇᐞ ᑕᑲᐗᐙ, ᑕᒪᒍᑌᐌᐱᓂᑲᓂᐎ ᑲᔦ᙮

3:11b.MAT.003.011 ᓂᐲᕽ ᐃᑕᔥ ᓃᓐ ᑭᑎᔑ ᓰᑲᐊᑕᐎᓂᓂᒻ ᒋᑭᑫᓂᒥᑰᔦᒃ ᐁᑴᑭᐱᒫᑎᓯᔦᒃ᙮ ᐊᐊ ᑕᔥ ᐐᓐ ᑳᐐ ᐱᑕᑯᔑᕽ ᑭᔐᒪᓂᑑᓐ ᐅᑕᒑᑯᓃᕽ, ᐃᔥᑯᑌᕽ ᑲᔦ ᑭᑲᐃᔑ ᓰᑲᐊᑖᑯᐙ᙮ ᓇᐗᒡ ᐐᓐ ᐃᔥᐯᑖᑯᓯ ᐊᐲᒡ ᓃᓐ᙮ ᑳᐐᓐ ᓂᑌ ᐊᐲᑌᑖᑯᓯᓰ ᒋᐱᒥᐎᑖᐗᒃ ᐅᒪᑭᓯᓇᓐ᙮

3:12b.MAT.003.012 ᑖᐱᔥᑰ ᐃᓀᑖᑯᓯ ᑭᑎᑫᐎᓂᓂ ᑳᑕᑯᓇᕽ ᐅᐸᐎᐌᐸᐃᑲᓈᑎᒃ, ᐁᐐ ᐸᐙᔑᒫᒡ ᐅᐸᑴᔑᑲᓂᒥᓇᓐ᙮ ᐅᑲ ᓇᐃᓈᓐ ᐃᑕᔥ ᐅᐸᑴᔑᑲᓂᒪᓅᒥᓂᒪᓐ᙮ ᐅᑲ ᒪᒍᑌᐌᐱᓈᓐ ᑕᔥ ᐐᓐ ᒪᔥᑯᓰᓂ ᐃᐃᒫ ᐐᑳ ᑳᔑ ᐋᑕᐌᓯᓂᓂᒃ ᐃᔥᑯᑌᓂ᙮

3:13b.MAT.003.013 ᒋᓴᔅ ᑕᔥ ᑳᓬᐊᓬᐄᕽ ᑮᐱ ᐅᒌ ᐁᑮ ᐱᓈᓯᑲᐙᒡ ᐃᓂ ᒞᓇᓐ ᒋᓰᑲᐊᑖᑯᒡ ᐃᐃᒫ ᒞᕒᑕᓇᐎ ᓰᐲᕽ ᙮

3:14b.MAT.003.014 ᒞᓐ ᑕᔥ ᐅᑮᐃᓈᓐ ᒋᓴᓲᓐ: ᑕᑾᒡ ᓃᓐ ᑭᑖ ᓰᑲᐊᑕᐤ᙮ ᔖᑰᒡ ᐃᑕᔥ ᑭᐱᓈᓯᑲᐤ᙮

3:15b.MAT.003.015 ᒋᓴᔅ ᑕᔥ ᐅᑮᐃᔑ ᓇᑴᑕᐙᓐ: ᐊᐤ ᒫᓄ ᐃᐃᐌ ᑕᐃᔑᓭ ᒋᐃᔑᒋᑫᔭᕽ ᐋᓃᓐ ᑳᔑ ᒥᓴᐌᑕᕽ ᑭᔐᒪᓂᑑ᙮

3:16b.MAT.003.016 ᐊᐲ ᑕᔥ ᒋᓴᔅ ᑳᐃᔥᒀ ᓰᑲᐊᑖᓱᒡ, ᐁᑮᐊᓂ ᐊᒀᓰᒡ, ᑭᒋᑮᔑᒃ ᑮᐹᑭᓂᑳᑌᓂ, ᐅᑮᐙᐸᒫᓐ ᑭᔐᒪᓂᑑᓐ ᐅᑕᒑᑯᓂ ᐁᐱᓈᓯᑳᑯᒡ ᑖᐱᔥᑰ ᐱᑯ ᐅᒦᒦᓯᕽ ᐁᑮᐃᔑᓈᑯᓯᓂᒡ, ᐁᐱᐴᓃᓴᑖᑯᒡ᙮

3:17b.MAT.003.017 ᑮᓅᑕᐙ ᑕᔥ ᐊᐎᔭ ᐁᑮᑭᑐᒡ ᐃᐃᒫ ᑭᒋᑮᔑᑯᕽ: ᒦ ᐗᐊ ᓂᑯᓯᔅ ᑳᓵᑭᐊᒃ᙮ ᐋᐱᒋ ᓂᒥᓍᐸᒫ᙮

4

4:1b.MAT.004.001 ᒋᓴᔅ ᑕᔥ ᐅᑮᐃᔑᐎᓂᑰᓐ ᑭᔐᒪᓂᑑᓐ ᐅᑕᒑᑯᓂ ᐌᑎ ᐱᑾᑕᑲᒥᒃ ᒋᑲᑴᒋᐃᑯᒡ ᐃᓂ ᒪᒋᐊᔭᐋᓐ᙮

4:2b.MAT.004.002 ᓃᒥᑕᓇ ᑕᓱᑮᔑᒃ, ᓃᒥᑕᓇ ᑕᓱᑎᐱᒃ ᑲᔦ ᑳᐐᓐ ᒋᓴᔅ ᑮᐅᒋ ᐐᓯᓂᓰ᙮ ᐐᑫ ᑕᔥ ᑮᓅᑌᔅᑲᑌ᙮

4:3b.MAT.004.003 ᑫᑫᑦ ᐃᑕᔥ ᒪᒋᐊᔭᐋᓐ ᐅᑮ ᐱᓈᓯᑳᑰᓐ ᐁᑮᐃᑯᒡ: ᑮᔥᐱᓐ ᑌᐺ ᐁᔮᐎᐗᓀᓐ ᑭᔐᒪᓂᑑ ᐅᑯᓯᓴᓐ, ᑲᓅᔥ ᐅᑯ ᐊᓯᓃᒃ ᒋᐸᑴᔑᑲᓂᐎᐙᒡ, ᐁᑮᐃᑯᒡ᙮

4:4b.MAT.004.004 ᒋᓴᔅ ᐃᑕᔥ ᐅᑮᐃᔑ ᓇᑴᑕᐙᓐ: ᐃᔑᐲᐃᑳᑌ: ᑳᐐᓐ ᐐᓐ ᐃᐃᒫ ᑕᐅᒋ ᐱᒫᑎᓯᓰ ᐊᐎᔭ ᐸᑴᔑᑲᓇᓐ ᐁᑕ ᑳᐊᒸᒡ, ᐃᒫ ᑕᔥ ᐐᓐ ᑳᑕᓱ ᐯᔑᑾᓂᓂᒃ ᑭᔐᒪᓂᑑᓐ ᑳᐃᑭᑐᓂᒡ, ᑕᐅᒋ ᐱᒫᑎᓯ, ᐅᑮᐃᓈᓐ᙮

4:5b.MAT.004.005 ᒦᓇᐙ ᑕᔥ ᒪᒋᐊᔭᐋᓐ ᐅᑮᐃᔑᐎᓂᑰᓐ ᐃᐃᒫ ᑭᔐᒪᓂᑑᓐ ᐅᑑᑌᓈᒥᓃᕽ ᐃᐃᒫ ᒉᕒᐆᓴᓬᐊᒥᕽ, ᐁᑮᐃᔑᐎᓂᑯᒡ ᒫᐗᒡ ᐃᑯ ᑳᐃᔑ ᐃᔥᐹᓂᒃ ᐃᐃ ᑭᒋᐊᓇᒥᐁᐎᑲᒥᒃ ᐁᑮᐃᔑ ᓃᐸᐎᐃᑯᒡ,

4:6b.MAT.004.006 ᐁᑮᐃᑯᒡ: ᑮᔥᐱᓐ ᐁᔮᐎᐗᓀᓐ ᑭᔐᒪᓂᑑ ᐅᑯᓯᓴᓐ, ᑕᑲ ᐱᓂᐸᓂᐅᓐ, ᐋᓃᔥ ᑮᐃᔑᐲᐃᑳᑌ: ᑭᔐᒪᓂᑑ ᐅᑲ ᑲᓅᓈᐞ ᐅᑌᒐᓬᐃᒪᐞ ᒋᑲᓇᐌᓂᒥᒀ, ᑭᑲ ᒥᒋᒥᓂᑰᒃ ᐃᐃᒫ ᐅᓂᒌᐙᕽ ᒋᐐᓴᑭᔑᓯᐗᓐ ᑭᓯᑎᕽ ᐃᐃᒫ ᑳᔑ ᐊᓯᓃᑳᒃ, ᐃᔑᐲᐃᑳᑌ, ᐅᑮᐃᑰᓐ ᒪᒋᐊᔭᐋᓐ᙮

4:7b.MAT.004.007 ᒋᓴᔅ ᑕᔥ ᐅᑮᓇᑴᑕᐙᓐ: ᒦᓇᐙ ᐃᔑᐲᐃᑳᑌ: ᑫᑯ ᑲᑴᒋᐋᑫᓐ ᑳᑎᐯᒋᑫᒡ ᑭᑭᔐᒪᓂᑑᒻ ᑕᑲ ᒋᑲᓇᐌᓂᒥᓄᑴᓐ᙮

4:8b.MAT.004.008 ᑫᔮᐱ ᐅᑮᐃᔑᐎᓂᑰᓐ ᒫᐗᒡ ᐃᑯ ᐁᔑ ᐃᔥᐸᑎᓈᓂᒃ, ᐁᑮᐙᐸᑕᐃᑯᒡ ᑲᑭᓇ ᑎᐯᒋᑫᐎᓇᓐ ᐅᐅᒫ ᐊᑮᕽ, ᑲᔦ ᐋᓃᓐ ᒫᐗᒡ ᐁᔑ ᑭᒋ ᐃᓀᑖᑾᑭᓐ᙮

4:9b.MAT.004.009 ᒦᑕᔥ ᑳᐃᑯᒡ: ᑲᑭᓇ ᐅᓄ ᑭᑲ ᒦᓂᓐ ᑮᔥᐱᓐ ᐅᒋᒌᑾᓃᑕᐎᔭᓐ, ᑭᒋ ᐃᓀᓂᒥᔭᓐ ᑲᔦ᙮

4:10b.MAT.004.010 ᒋᓴᔅ ᐅᑮᓇᑴᑕᐙᓐ: ᐃᑯᒋ ᐃᔖᓐ ᑮᓐ ᓭᑕᓐ ! ᒦᓇᐙ ᐃᔑᐲᐃᑳᑌ: ᑳᑎᐯᒋᑫᒡ ᑭᑭᔐᒪᓂᑑᒻ ᐐᓀᑕ ᑯ ᑭᑲ ᑭᒋ ᐃᓀᓂᒫ᙮

4:11b.MAT.004.011 ᐅᑮᓇᑲᓂᑰᓐ ᑕᔥ ᐃᓂ ᒪᒋᐊᔭᐋᓐ᙮ ᐁᒐᓬᐊᐞ ᐃᑕᔥ ᐅᑮ ᐱᓈᓯᑳᑰᐞ ᐁᑮᐐᒋᐃᑯᒡ᙮

4:12b.MAT.004.012 ᒋᓴᔅ ᑕᔥ ᐊᐲ ᑳᓅᑕᕽ ᒞᓇᓐ ᐁᑮ ᑕᑯᓂᑲᓂᐎᓂᒡ, ᑳᓬᐊᓬᐄᕽ ᐃᓇᑫ ᑮᐃᔖ᙮

4:13b.MAT.004.013 ᑳᐐᓐ ᑕᔥ ᐐᓐ ᑮᑭᐱᒌᓰ ᐃᐃᒫ ᓈᓴᕒᐃᑎᕽ ᙮ ᒦᑕᔥ ᐌᑎ ᑳᐊᓂ ᐃᔖᒡ ᐁᑮᐃᔑᑖᒡ ᐃᐃᒫ ᐆᑌᓈᕽ ᑲᐸᕒᓂᔭᒦᕽ ᐃᐃᒫ ᒌᑭ ᓵᑲᐃᑲᓃᕽ ᑳᓬᐊᓬᐄᕽ, ᐃᐃᒫ ᓭᐱᔪᓬᐊᓐ ᐊᑮᕽ ᑲᔦ ᓈᐱᑕᓬᐋᐃ ᐊᑮᕽ ᑳᐊᔮᒃ ᐆᑌᓇ᙮

4:14b.MAT.004.014 ᒦᑕᔥ ᐅᐅ ᑳᑮᐅᒋ ᐃᔑᓭᒃ ᒪᔮ ᐱᑯ ᒋᐃᔑᓭᓂᒃ ᑳᑮᐃᑭᑐᑯᐸᓀᓐ ᐊᐊ ᑎᐹᒋᒧᐎᓂᓂ ᐋᐃᓭᔭ ᑳᑮ ᑲᓅᑕᒪᐙᒡ ᑭᔐᒪᓂᑑᓐ,

4:15b.MAT.004.015 ᐃᐃᐌᓂᐗᐞ ᑳᑮ ᑕᔑᒫᒡ ᐃᐃᐌᓂᐗᐞ ᑳᐃᔑᑖᓂᒡ ᐃᐃᒫ ᓭᐱᔪᓬᐊᓐ ᐊᑮᕽ ᑲᔦ ᓈᐱᑕᓬᐋᐃ ᐊᑮᕽ, ᐃᐃᒫ ᒌᑫᐤ ᑭᒋᑲᒦᕽ, ᐙᐸᓄᕽ ᐃᓇᑫᑳᒻ ᒞᕒᑕᓇᐎ ᓰᐲᕽ, ᐃᐃᒫ ᑳᓬᐊᓬᐄ ᐊᑮᕽ ᐌᑎ ᑳᔑ ᐊᔮᐙᒡ ᑳᒎᐎᐎᓯᒀ᙮

4:16b.MAT.004.016 ᒦᑕᔥ ᐅᐅ ᑳᐃᑭᑐᒡ ᐋᐃᓭᔭ: ᐃᑭ ᑕᔥ ᑲᔥᑮᑎᐱᑲᓄᕽ ᑳᐊᔮᐙᒡ ᐅᑲ ᐙᐸᑖᓈᐙ ᐃᐃ ᑭᒋᐙᓭᔮᓯᐎᓐ᙮ ᐃᑭ ᑲᔦ ᑳᑕᔑᐱᒫᑎᓯᐙᒡ ᐃᐃᒫ ᐊᑮᕽ ᓂᐳᐎᓐ ᑳᔑ ᐹᑏᓇᑎᓂᓂᒃ, ᑕᐙᐸᒋᑳᑌ ᐃᐃ ᑳᐙᓭᔮᒃ᙮

4:17b.MAT.004.017 ᒦᑕᔥ ᐃᐃ ᐊᐲ ᒋᓴᔅ ᑳᑮᒫᒌ ᐸᐹᐐᑕᒫᑫᒡ ᐁᑮᐃᑭᑐᒡ: ᑴᑳᑎᓯᒃ ᑭᒪᒋᑑᑕᒧᐎᓂᐙᓐ ᐅᒋ, ᐋᔕ ᐅᒋᒋᓭ ᐊᐊ ᑭᔐᒪᓂᑑ ᒋᐅᔑᓯᑑᒡ ᐅᑎᐯᒋᑫᐎᓐ᙮

4:18b.MAT.004.018 ᒋᓴᔅ ᑕᔥ ᒣᒀ ᐁᐱᒧᓭᒡ ᐃᐃᒫ ᑭᒋᓵᑲᐃᑲᓃᕽ ᑳᓬᐊᓬᐄ ᐅᑮᐙᐸᒫᐞ ᓃᔑᓐ 2 ᐁᐐᒋᑭᐌᔨᑎᓂᒡ ᐁᐸᑭᑕᐙᓂᒡ᙮ ᐋᓃᔥ ᑮᐸᑭᑕᐌᐎᓂᓂᓃᐎᐗᐞ᙮ ᓵᐃᒪᓐ ᐲᑕᕒ ᑕᔥ ᐊᐊ ᐯᔑᒃ ᑮᐃᔑᓂᑳᓱ, ᑯᑕᒃ ᐃᑕᔥ ᐁᑕᕒᐆ ᑮᐃᔑᓂᑳᓱ᙮

4:19b.MAT.004.019 ᒋᓴᔅ ᑕᔥ ᐅᑮᐃᓈᐞ: ᐊᐯᔪᒃ, ᐐᒌᐎᔑᒃ! ᑳᐱ ᐃᓇᓄᑮᔦᒃ ᐁᐸᑭᑕᐙᔦᒃ, ᓅᑯᒻ ᐃᑕᔥ ᑭᑲ ᒫᒌᑭᑭᓄᐊᒪᐎᓂᓂᒻ ᒋᐲᑕᒪᐎᔦᒃ ᐯᒫᑎᓯᐙᒡ᙮

4:20b.MAT.004.020 ᔐᒫᒃ ᐃᑕᔥ ᐅᑮᒫᒋᐐᒌᐙᐙᓐ, ᐁᑮᓇᑲᓈᐙᒡ ᑲᑭᓇ ᐅᑕᓴᐲᐙᐞ᙮

4:21b.MAT.004.021 ᒦᓇᐙ ᑕᔥ ᒋᓴᔅ ᐅᑮᐊᓂ ᐙᐸᒫᐞ ᓃᔑᓐ ᐃᓂᓂᐗᐞ ᐁᑕᔑ ᐸᑾᐊᓴᐲᓂᒡ ᐲᒋᒌᒫᓂᕽ ᐅᑌᑌᐙᓐ ᐁᐐᒋᐋᓂᒡ᙮ ᐃᐃ ᑕᔥ ᐃᓂᓂᐗᐞ ᑮᐐᒋᑭᐌᑎᐗᐞ ᐁᑮᐃᔑᓂᑳᓱᓂᒡ ᒌᒥᔅ ᔑᑾ ᒞᓐ ᙮ ᐅᑌᑌᓂ ᑕᔥ ᓭᐸᑏ ᑮᐃᔑᓂᑳᓱᐗᓐ᙮ ᒋᓴᔅ ᑕᔥ ᐅᑮ ᑲᓅᓈᐞ᙮

4:22b.MAT.004.022 ᔐᒫᒃ ᐃᑕᔥ ᐅᑮᓇᑲᑖᓈᐙ ᐅᒌᒫᓂᐙ, ᐅᑮᓇᑲᓈᐙᓐ ᑲᔦ ᐅᑌᑌᐙᓐ, ᐁᑮᐊᓂ ᐐᒌᐙᐙᒡ ᒋᓴᓲᓐ᙮

4:23b.MAT.004.023 ᒥᓯᐌ ᑕᔥ ᒋᓴᔅ ᑮᐃᔖ ᐃᐃᒫ ᑳᓬᐊᓬᐄ ᐊᑮᕽ ᐁᑮ ᐸᐹᑭᑭᓄᐊᒫᑫᒡ ᒥᓯᐌ ᒎᐗᐞ ᐅᑕᓇᒥᐁᐎᑲᒥᑯᓃᕽ ᐁᑮᐐᑕᒫᑫᒡ ᑲᔦ ᒥᓍᒋᒧᐎᓐ ᐃᐃᐌ ᑭᔐᒪᓂᑑ ᐐᐸ ᑳᐐᐅᔑᓯᑑᒡ ᐅᑎᐯᒋᑫᐎᓐ, ᐁᑮᒥᓄᐊᔮᐋᒡ ᑲᔦ ᑲᑭᓇ ᑳᐋᑯᓯᓂᒡ ᐋᓃᓐ ᐃᑯ ᐁᐃᓈᐱᓀᓂᒡ᙮

4:24b.MAT.004.024 ᒥᓯᐌ ᑕᔥ ᑮᓅᑖᑳᓂᐎ ᐃᐃᒫ ᓰᕒᐃᔭ ᐊᑮᕽ, ᐋᐱᒋ ᑕᔥ ᑮᐹᑏᓄᐗᐞ ᑳᑮ ᐲᑕᒪᐎᓐᒡ ᐃᐃ ᐅᑖᑯᓰᐞ ᐯᐸᑳᓐ ᐁᐃᓈᐱᓀᓂᒡ᙮ ᐃᑭ ᑕᔥ ᐅᑖᑯᓰᒃ ᐋᓂᑕ ᒪᒋᐊᒑᑾᐞ ᐅᑮ ᑭᑭᔥᑳᑯᐙᐞ, ᐋᓂᑕ ᑲᔦ ᑮᐅᒋᐱᓂᑯᐙᐱᓀᐗᐞ, ᐋᓂᑕ ᑲᔦ ᑮᒪᒫᒋᑯᐙᐱᓀᐗᐞ᙮ ᒋᓴᔅ ᑕᔥ ᑲᑭᓇ ᐅᑮᒥᓄᐊᔮᐋᐞ᙮

4:25b.MAT.004.025 ᐋᐱᒋ ᑮᐹᑏᓄᐗᐞ ᑳᑮ ᐱᒥᓂᔕᐅᑯᒡ᙮ ᐃᐃᒫ ᑕᔥ ᑮᐅᒌᐗᐞ ᑳᓬᐊᓬᐄ ᐊᑮᕽ, ᐌᑎ ᑲᔦ ᒥᑖᓱ ᐆᑌᓈᐎ ᐊᑮᕽ, ᒉᕒᐆᓴᓬᐊᒥᕽ, ᒎᑏᔮᑳᕽ, ᐌᑎ ᑲᔦ ᐊᑮᕽ ᐊᑳᒪᔭᐄ ᒞᕒᑕᓇᐎ ᓰᐲᕽ ᙮

5

5:1b.MAT.005.001 ᐁᐙᐸᒫᒡ ᐃᑕᔥ ᒋᓴᔅ ᐋᐱᒋ ᐁᐅᓵᒦᓄᓂᒡ ᑳᐱᒥᓂᔕᐅᑯᒡ, ᑮᐊᓂ ᑯᐹᒪᒋᐌ ᐁᐱᑾᑎᓈᓂᒃ, ᐁᑮᐊᓂ ᐅᓇᐱᒡ᙮ ᐅᑭᑭᓄᐊᒪᐙᑲᓇᐞ ᐃᑕᔥ ᐅᑮᐱ ᐙᑳᔥᑳᑰᐞ᙮

5:2b.MAT.005.002 ᒦᑕᔥ ᐃᐃ ᑳᐃᔑ ᒫᒌ ᑭᑭᓄᐊᒪᐙᒡ:

5:3b.MAT.005.003 ᔕᐌᑖᑯᓯᐗᒃ ᐅᑯ ᑳᑭᑎᒫᑫᓂᒧᐙᒡ, ᑳᐊᐯᓂᒧᓄᑕᐙᐙᒡ ᑭᔐᒪᓂᑑᓐ᙮ ᐊᒦᐗᒃ ᐅᑯ ᒪᔮ ᑭᔐᒪᓂᑑᓐ ᑳᑭᒋ ᐅᑑᑭᒫᒥᐙᒡ!

5:4b.MAT.005.004 ᔕᐌᑖᑯᓯᐗᒃ ᐅᑯ ᑳᒫᓀᑕᒧᐙᒡ᙮ ᑭᔐᒪᓂᑑᓐ ᐅᑲ ᒥᓉᑕᒥᐃᑯᐙᓐ᙮

5:5b.MAT.005.005 ᔕᐌᑖᑯᓯᐗᒃ ᐅᑯ ᑳᑭᑌᓂᒧᓯᒀ᙮ ᑭᔐᒪᓂᑑᓐ ᐅᑲ ᒦᓂᑯᐙᓐ ᑫᑰᓇᓐ ᑳᑮᐃᔑ ᐊᔓᑕᒪᐙᓂᒡ ᐃᐃ ᐅᐱᒫᑎᓰᒥᓂ᙮

5:6b.MAT.005.006 ᔕᐌᑖᑯᓯᐗᒃ ᐃᑭᐌᓂᐗᒃ ᑳᐃᔑ ᐊᑕᐌᑕᒧᐙᒡ ᐋᐱᒋ ᒋᑑᑕᒧᐙᒡ ᑭᔐᒪᓂᑑᓐ ᑳᐃᔑ ᐊᑕᐌᓂᒥᑯᐙᒡ᙮ ᑭᔐᒪᓂᑑᓐ ᐅᑲ ᑌᐱᓇᐌᔦᑕᒥᐃᑯᐙᓐ᙮

5:7b.MAT.005.007 ᔕᐌᑖᑯᓯᐗᒃ ᐃᑭ ᑳᑭᑎᒫᑭᓈᑫᐙᒡ᙮ ᐋᓃᔥ ᑭᔐᒪᓂᑑᓐ ᐅᑲ ᑭᑎᒫᑭᓈᑯᐙᓐ᙮

5:8b.MAT.005.008 ᔕᐌᑖᑯᓯᐗᒃ ᐃᑭ ᑳᐯᑭᑌᐁᐙᒡ᙮ ᐅᑲ ᐙᐸᒫᐙᓐ ᐃᓴ ᑭᔐᒪᓂᑑᓐ ᐁᐐᒌᐎᑯᐙᒡ᙮

5:9b.MAT.005.009 ᔕᐌᑖᑯᓯᐗᒃ ᐃᑭ ᑳᐐᒋᐋᐙᒡ ᒋᒥᓄᐐᒌᑎᓂᒡ ᑲᑭᓇ ᐯᒫᑎᓯᓂᒡ᙮ ᑮᓇᐙ ᓂᓃᒑᓂᓴᒃ ᐅᑲ ᐃᑯᐙᓐ ᑭᔐᒪᓂᑑᓐ᙮

5:10b.MAT.005.010 ᔕᐌᑖᑯᓯᐗᒃ ᐃᑭ ᑳᑲᒀᑕᑭᐃᑣ ᐃᐌ ᐅᒋ ᐁᑑᑕᒧᐙᒡ ᑭᔐᒪᓂᑑᓐ ᑳᐃᔑ ᐊᑕᐌᑕᒥᓂᒡ᙮ ᐊᒦᐗᒃ ᐃᑭ ᒪᔮ ᑭᔐᒪᓂᑑᓐ ᑳᑭᒋ ᐅᑑᑭᒫᒥᐙᒡ᙮

5:11b.MAT.005.011 ᑭᑲ ᔕᐌᑖᑯᓯᒻ ᑮᓇᐙ ᐊᐲ ᐊᐎᔭᒃ ᐁᒪᒪᒋ ᐃᓂᓀᒀ, ᔑᑾ ᐗᓂᑑᑕᐎᓀᒀ, ᔑᑾ ᒪᒋᑮᐗᓂᒧᐎᓇᓐ ᐁᓂᓀᒀ, ᐁᑭᑫᓂᒥᓀᒀ ᓃᓐ ᐁᐱᒥᐐᒌᐎᔦᒃ᙮

5:12b.MAT.005.012 ᑭᒋᒥᓉᑕᒧᒃ, ᒌᑫᑕᒧᒃ! ᐋᓃᔥ ᑭᒋᑎᐸᐊᒫᑰᐎᓐ ᑭᑲ ᓇᐌᑕᒫᑰᒻ ᑭᒋᑮᔑᑯᕽ᙮ ᐊᒦ ᐅᐌ ᒪᔮ ᑫᐐᓇᐙ ᑳᑮᐃᔑ ᑲᒀᑕᑭᐃᑣ ᐃᑭ ᑭᔐᒪᓂᑑᓐ ᑳᑮ ᑲᓅᑕᒪᐙᐙᒡ ᑳᑮ ᐱᒫᑎᓯᐙᒡ ᒋᑆ ᐊᔮᔦᒃ᙮

5:13b.MAT.005.013 ᑮᓇᐙ ᒋᐋᐸᒋᐃᑰᔦᒃ ᐅᐅᒫ ᐊᑮᕽ ᐯᔑᑾᓐ ᑳᔑ ᐋᐸᑕᒃ ᐃᐃ ᔒᐎᑖᑲᓐ ᑳᑕᑯᓂᑳᑌᒃ ᒦᒋᒥᕽ᙮ ᑮᔥᐱᓐ ᑕᔥ ᔒᐎᑖᑲᓐ ᐊᓂ ᓂᓯᑐᐳᑾᓯᓄᒃ, ᐋᓃᓐ ᐃᑕᔥ ᒦᓇᐙ ᑫᑮᐃᔑ ᔒᐎᑖᑲᓂᐗᑭᐸᓐ? ᑳᐐᓐ ᐃᑯᑕᓄ ᑕᐃᓈᐸᑕᓯᓅᓐ, ᒦ ᐁᑕ ᒋᐌᐱᓂᑳᑌᑭᐸᓐ ᐃᒫ ᑫᐊᓂ ᐃᔑ ᑕᑖᑯᑳᑌᒃ᙮

5:14b.MAT.005.014 ᑮᓇᐙ ᑭᐙᓭᔥᑳᒻ ᐅᐌ ᐊᑭ᙮ ᐆᑌᓇ ᑳᐸᑕᑭᑌᒃ ᐗᑭᑕᑎᓐ ᑳᐐᓐ ᑕᑮ ᑳᒋᑳᑌᓯᓅᓐ᙮

5:15b.MAT.005.015 ᑳᐐᓐ ᐅᔕ ᐊᐎᔭ ᐅᑖ ᓴᑲᐊᓰᓐ ᐙᓴᑯᓀᒋᑲᓐ ᒋᐊᑾᓇᐊᕽ ᐊᓈᒪᔭᐄ ᒦᒋᒥᐗᔥ, ᐃᐃᒫ ᓴ ᐙᓴᑯᓀᒋᑲᓈᑎᑯᕽ ᒋᐊᑰᑑᒡ᙮ ᒦᑕᔥ ᐁᔑ ᐙᓴᑯᓀᓇᒪᐎᑣ ᑲᑭᓇ ᐲᑎᒃ ᑳᐊᔮᐙᒡ᙮

5:16b.MAT.005.016 ᒫᓄ ᔑᑾ ᑕᐃᔑ ᐙᓴᑯᓀ ᐃᐌ ᑭᐙᓴᑯᓀᐎᓂᐙ ᒋᐙᐸᒥᓀᒀ ᐯᒫᑎᓯᐙᒡ, ᒋᐙᐸᑕᒧᐙᒡ ᑭᒥᓄᒋᑫᐎᓂᐙᓐ, ᔑᑾ ᒋᑭᒋ ᐃᓇᑭᒫᐙᒡ ᑰᓯᐙᓐ ᑭᒋᑮᔑᑯᕽ ᑳᐊᔮᓂᒡ᙮

5:17b.MAT.005.017 ᑫᑯ ᐃᓀᑕᑫᒃ ᐁᐲᔖᔮᓐ ᒋᐱᓂᔑᐗᓈᒋᑑᔮᓐ ᐅᑑᓇᔓᐌᐎᓐ ᒨᓯᔅ ᑲᔦ ᐅᑭᑭᓄᐊᒫᑫᐎᓂᓂ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ ᑳᑮ ᑲᓅᑕᒫᑯᒡ᙮ ᑳᐐᓐ ᓂᑑᒋ ᐲᔖᓰ ᒋᓂᔑᐗᓈᒋᑑᔮᓐ᙮ ᐅᐅᐌ ᑕᔥ ᑳᑮᐅᒋ ᐲᔖᔮᓐ ᒋᑑᑕᒫᓐ ᐃᐃ ᒋᐃᔑᐌᐸᒃ ᐋᓃᓐ ᐁᔑᓭᒃ ᐃᐃ ᐅᓇᔓᐌᐎᓐ᙮

5:18b.MAT.005.018 ᐌᐌᓂ ᓈᑲᑕᐌᑕᒧᒃ ᐅᐅᐌ: ᒥᓂᒃ ᐅᐌ ᑭᒋᑮᔑᒃ ᔑᑾ ᐊᑭ ᑫᐊᓂ ᐊᔮᒪᑲᑭᓐ, ᑳᐐᓐ ᐊᐙᒡ ᐯᔑᒃ ᐅᔑᐲᐃᑲᓐ ᑲᔦ ᒐᑭᐲᐃᑲᓐ ᑕᓅᑌᓭᓯᓅᓐ ᐅᓇᔓᐌᐎᓂᕽ ᐅᒋ, ᐲᓂᔥ ᑲᑭᓇ ᒋᐊᓂ ᑎᐱᓭᑭᓐ᙮

5:19b.MAT.005.019 ᐊᐌᓀᓐ ᐃᑕᔥ ᐊᐌ ᑫᔕᔒᐱᑕᕽ ᐅᓄ ᐅᓇᔓᐌᐎᓇᓐ ᐴᔥᑫ ᒫᐗᒡ ᑳᐊᑳᓭᑖᑾᓂᓂᑭᓐ, ᐊᓂ ᐃᔑ ᑭᑭᓄᐊᒪᐙᒡ ᑯᑕᒃ ᐊᐎᔭᐞ, ᐊᒦ ᐊᐌ ᒫᐗᒡ ᐸᑮ ᑫᐃᓀᑖᑯᓯᒡ ᐊᐲ ᑭᔐᒪᓂᑑᓐ ᑫᐅᔑᓯᑑᓂᒡ ᐅᑎᐯᒋᑫᐎᓂᓂ᙮ ᐊᐌᓀᓐ ᐃᑕᔥ ᑫᑑᑕᕽ ᑲᔦ ᑫᑭᑭᓄᐊᒫᑫᒡ, ᓃᐱᐗᐞ ᑕᐃᓀᑖᑯᓯ ᐃᒫ ᑭᔐᒪᓂᑑᓐ ᐅᑎᐯᒋᑫᐎᓂᓃᕽ᙮

5:20b.MAT.005.020 ᐊᒦᑕᔥ ᐅᐌ ᐁᔑ ᐐᑕᒪᐎᓇᑰᒃ: ᐊᐗᔑᒣ ᐊᔮᒀᒥᓯᒃ ᑲᑭᓇ ᑫᑰᓐ ᐊᐌ ᑭᔐᒪᓂᑑ ᑳᐃᔑ ᐊᑕᐌᓂᒥᓀᒃ ᒋᑑᑕᒣᒃ᙮ ᑳᐐᓐ ᑖᐱᔥᑰ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᔑᑾ ᐃᑭ ᐯᕒᐊᓰᒃ ᑳᑑᑕᒧᐙᒡ᙮ ᒦ ᐁᑕ ᐅᐌ ᑭᔐᒪᓂᑑ ᑫᐃᔑ ᑭᒋᐅᑑᑭᒫᒥᔦᒃ, ᐊᐗᔑᒣ ᑭᒋ ᐊᔮᒀᒥᓯᔦᒃ᙮

5:21b.MAT.005.021 ᑭᑮᓅᑖᒻ ᑳᑮᐃᓂᑣ ᐃᑭ ᑳᐱᒫᑎᓯᐙᒡ ᒣᐎᔕ: ᑫᑯ ᓂᔑᐌᑫᓐ᙮ ᐊᐌᓀᓐ ᐊᐊ ᑫᓂᔑᐌᒡ, ᑕᐃᔑᐎᓈ ᐅᓇᔓᐌᐎᓂᓂᐗᓐ᙮

5:22b.MAT.005.022 ᓃᓐ ᐃᑕᔥ ᑭᑎᔑ ᐐᑕᒪᐎᓂᓂᒻ: ᐊᐎᔭ ᐁᓂᔥᑳᑎᓯᒡ, ᑫᑰᓐ ᐁᐃᓀᓂᒫᒡ ᐐᒋᑭᐌᔭᓐ, ᑕᐃᔑᐎᓈ ᐅᓇᔓᐌᐎᓂᓂᐗᓐ᙮ ᑲᔦ ᐊᐌᓀᓐ ᑫᐃᓈᑴᓐ ᐐᒋᑭᐌᔭᓐ, ᑳᐐᓐ ᐃᑯᑕᓄ ᑭᑎᓈᐸᑎᓯᓰ, ᒦᐃᒫ ᑫᐃᔑᐎᓂᓐᒡ ᑳᐃᔑ ᒫᐗᒋᐃᑎᓂᒡ ᑳᓂᑖ ᐅᓈᑯᓂᑫᓂᒡ᙮ ᐊᐎᔭ ᑕᔥ ᑫᐃᓈᑴᓐ ᐐᒋᑭᐌᔭᓐ: ᑮᓐ ᑮᐗᔥᑴᑳᓐ! ᑕᓇᓃᓴᓂᐃᑎᓱ ᒋᐃᔖᒡ ᒪᒋ ᐃᔥᑯᑌᕽ᙮

5:23b.MAT.005.023 ᒦᑕᔥ ᐅᐌ ᐅᒋ, ᑮᔥᐱᓐ ᐲᑑᔭᓐ ᑭᐸᑭᑎᓂᑫᐎᓐ ᐃᐃᒫ ᐸᑭᑎᓈᓱᐎᓈᐱᑯᕽ ᒋᐸᑭᑎᓇᒪᐎᓐᒡ ᑭᔐᒪᓂᑑ, ᒦᐃᒫ ᑕᔥ ᒣᑲᐎᓭᔭᓐ ᓂᑯᑕᓄ ᐁᐃᓀᓂᒥᒃ ᑮᒋᑭᐌ,

5:24b.MAT.005.024 ᓇᑲᑕᓐ ᐊᒦᐃᒫ ᑭᐸᑭᑎᓂᑫᐎᓐ ᒌᑲᔭᐄ ᐸᑭᑎᓈᓱᐎᓈᐱᑯᕽ᙮ ᐊᒦ ᐊᓂ ᐃᔑ ᒫᒑᓐ, ᐊᑲᐌ ᒋᐌᐱᓇᒪᐎᒃ ᑮᒋᑭᐌ, ᔑᑾ ᐱᑮᐌᓐ ᒋᐸᑭᑎᓂᑫᔭᓐ᙮

5:25b.MAT.005.025 ᑮᔥᐱᓐ ᐊᐎᔭ ᐐᑎᐹᑯᓂᒃ ᑲᔦ ᐃᔑᐎᓂᒃ ᐅᓇᔓᐌᐎᓂᕽ, ᔐᒫᒃ ᒋᑲᑴ ᑲᔥᑭᐊᒡ ᒋᐴᓂ ᓂᔥᑫᓂᒥᒃ ᑫᔮᐱ ᐁᔥᒀ ᐃᔑᓭᔭᓐ ᒋᑆ ᑕᑯᔑᓀᒃ ᐅᓇᔓᐌᐎᑲᒥᑯᕽ᙮ ᐹᑲᒡ ᐃᒫ ᑮᐊᔮᔭᓐ, ᐊᒦ ᑫᓂ ᐃᔑᐸᑭᑎᓂᒃ ᒋᐅᓇᔓᐙᓂᒥᒃ ᑎᐹᑯᓂᑫᐎᓂᓂᐗᓐ᙮ ᑎᐹᑯᓂᑫᐎᓂᓂ ᑕᔥ ᑭᑲ ᐸᑭᑎᓂᒃ ᔑᒫᑲᓂᔕᓐ ᒋᑭᐸᐅᒥᒃ᙮

5:26b.MAT.005.026 ᑌᐺ ᑭᑎᓂᓐ, ᐊᒦᑕᔥ ᐃᐃᒫ ᑫᐊᔮᔭᓐ ᑭᐸᐅᑏᐎᑲᒥᑯᕽ, ᐹᓂᒫ ᑮᑎᐸᐊᒪᓐ ᐃᐌ ᒥᓂᒃ ᑫᑎᐸᐃᑫᐃᑰᔭᓐ᙮

5:27b.MAT.005.027 ᑭᑮᓅᑖᒻ ᐁᐃᑭᑐᕽ: ᑫᑯ ᐸᐹᒣᓂᒫᑫᓐ ᐸᑳᓐ ᐊᐎᔭ ᐅᐐᒋᐙᑲᓇᓐ᙮

5:28b.MAT.005.028 ᓃᓐ ᑕᔥ ᑭᑎᔑ ᐐᑕᒪᐎᓂᓂᒻ: ᐊᐎᔭ ᐱᑯ ᑳᑲᓇᐙᐸᒫᒡ ᐁᒥᓴᐌᓂᒫᒡ ᐃᓂ ᐃᑴᐗᓐ, ᐋᔕ ᐅᐐᒋᐱᔑᒀᑎᓰᒫᓐ ᐃᐃᒫ ᐅᑎᓀᑕᒧᐎᓂᕽ᙮

5:29b.MAT.005.029 ᑮᔥᐱᓐ ᐃᑕᔥ ᑭᔥᑮᔑᒃ ᐅᒋ ᐗᓂᑑᑕᒪᓐ, ᐸᑾᒋᐱᑑᓐ, ᐌᐱᓇᓐ! ᓇᐗᒡ ᑖᐅᓂᔑᔑᓐ ᐯᔑᒃ ᑭᑎᔑᓈᑯᓯᐎᓐ ᒋᓂᔑᐗᓈᑕᒃ, ᐁᑳ ᑕᔥ ᒥᓯᐌ ᑭᐐᔭᐤ ᒪᒋ ᐃᔥᑯᑌᕽ ᒋᐃᔑᐌᐱᓂᑳᑌᓯᓄᒃ᙮

5:30b.MAT.005.030 ᑮᔥᐱᓐ ᑭᑭᒋᓂᒃ ᐅᒋ ᐗᓂᑑᑕᒪᓐ, ᑮᔥᑲᐊᓐ, ᐌᐱᓇᓐ! ᐋᓃᔥ ᓇᐗᒡ ᑖᐅᓂᔑᔑᓐ ᐯᔑᒃ ᑭᐸᑫᓯᐎᓐ ᒋᓂᔑᐗᓈᑕᒃ, ᐁᑳ ᑕᔥ ᒥᓯᐌ ᑭᐐᔭᐤ ᒪᒋ ᐃᔥᑯᑌᕽ ᒋᐃᔑᐌᐱᓂᑳᑌᓯᓄᒃ᙮

5:31b.MAT.005.031 ᐊᒦ ᐅᐌ ᑳᐃᑭᑐᓈᓂᐗᑭᐸᓐ: ᑮᔥᐱᓐ ᐃᓂᓂ ᐐᐌᐱᓈᒡ ᐃᓂ ᐐᐗᓐ, ᐊᑲᐌ ᐅᑲ ᒦᓈᓐ ᐌᐱᓂᑎᐎᒪᓯᓇᐃᑲᓀᔅ᙮

5:32b.MAT.005.032 ᓃᓐ ᐃᑕᔥ ᑭᐐᑕᒪᐎᓂᓂᒻ: ᐊᐎᔭ ᑫᐌᐱᓈᑴᓐ ᐐᐗᓐ, ᒥᓴᐙ ᑯ ᐋᓇᑮ ᐱᔑᒀᑎᓯᓯᓂᒃ, ᑮᔥᐱᓐ ᑕᔥ ᑯᑕᒃ ᐊᐎᔭᓐ ᐐᑎᑫᒫᓂᒡ, ᒦᐃᐌ ᐁᐃᔑᒋᑫᐋᒡ ᐃᓂ ᐃᑴᐗᓐ ᒋᐱᔑᒀᑎᓯᓂᒡ᙮ ᑲᔦ ᐊᐌᓀᓇᓐ ᐃᑕᔥ ᑫᐐᑎᑫᒫᓂᑴᓐ ᐃᓂᐌ ᑳᐌᐱᓂᒥᓐᒡ, ᒦ ᑲᔦ ᐁᓇᑭᒥᓐᒡ ᐁᐱᔑᒀᑎᓯᓂᒡ᙮

5:33b.MAT.005.033 ᑭᑮᓅᑖᒻ ᑳᑮᐃᓂᑣ ᒣᐎᔕ: ᑫᑯ ᐲᑯᓇᑫᓐ ᑳᑮᐃᔑ ᐊᔓᑕᒫᑫᔭᓐ᙮ ᑮᔥᐱᓐ ᑫᑰᓐ ᑮᐋᔩᒋ ᐊᔓᑕᒫᑫᔭᓐ ᑭᑲ ᑑᑕᒪᐙ ᑳᑎᐯᒋᑫᒡ ᐃᐃᐌ ᑳᑮᐃᔑ ᐊᔓᑕᒪᐗᒡ᙮

5:34b.MAT.005.034 ᓃᓐ ᐃᑕᔥ ᑭᐐᑕᒪᐎᓂᓂᒻ: ᑫᑯ ᐐᑕᑫᓐ ᑫᑰᓐ ᐐᒪᔥᑲᐎ ᐃᑭᑐᔭᓐ ᐁᐊᔓᑕᒫᑫᔭᓐ ᑫᑰᓐ᙮ ᑫᑯ ᐐᑕᑫᓐ ᑭᒋᑮᔑᒃ ᐐᒪᔥᑲᐎ ᐃᑭᑐᔭᓐ᙮ ᑭᒋᑮᔑᑯᕽ ᐅᔕ ᐌᑎ ᑳᔑ ᓇᒪᑕᐱᒡ ᐅᑑᑭᒫᐗᐱᐎᓂᕽ ᑭᔐᒪᓂᑑ᙮

5:35b.MAT.005.035 ᑫᑯ ᐐᑕᑫᓐ ᐅᐅ ᐊᑭ ᐐᒪᔥᑲᐎ ᐃᑭᑐᔭᓐ᙮ ᐊᑭ ᐅᔕ ᐃᐃᒫ ᑭᔐᒪᓂᑑ ᑳᐊᐱᓯᑌᐱᒡ᙮ ᑫᑯ ᑲᔦ ᐐᑕᑫᓐ ᒉᕒᐆᓴᓬᐊᒻ ᐋᓃᔥ ᐊᒦᐃᐌ ᐅᑑᑌᓇᐎᒻ ᑭᔐᒪᓂᑑ ᒫᐗᒡ ᑳᑭᒋᐅᑭᒫᐎᒡ᙮

5:36b.MAT.005.036 ᑫᑯ ᑲᔦ ᐊᐙᒡ ᐸᑮ ᐐᑕᑫᓐ ᐃᐃ ᑭᑎᒀᓐ ᐐᒪᔥᑲᐎ ᐃᑭᑐᔭᓐ ᐊᐲ ᑫᑰᓐ ᐊᔓᑕᒫᑫᔭᓐ᙮ ᑳᐐᓐ ᐅᔕ ᑭᑲ ᑲᔥᑭᑑᓰᓐ ᐯᔑᒀᐲᒃ ᑮᓂᓯᔅ ᒋᒪᑲᑌᐙᒃ ᔑᑾ ᒋᐙᐱᔥᑳᒃ ᐯᔑᒃ᙮

5:37b.MAT.005.037 ᐁᐊᐞ ᐁᑕ ᐃᑭᑐᓐ, ᔑᑾ ᑳᐐᓐ᙮ ᐌᑯᓀᓐ ᐊᐗᔑᒣ ᐁᔑᓭᒃ ᐊᐲᒡ ᐅᓄ, ᐊᒦᐃᒫ ᐌᒋᓭᒃ ᑳᒫᓈᑕᒃ᙮

5:38b.MAT.005.038 ᑭᑮᓅᑖᒻ ᐅᐅᐌ ᑳᐃᑭᑐᓈᓂᐗᑭᐸᓐ: ᐊᐎᔭ ᓴ ᑕᐃᔑ ᑲᒀᑕᑭᐋ ᐋᓃᓐ ᑳᑑᑕᕽ᙮ ᑮᔥᐱᓐ ᑭᒑᐱᐌᐸᑲᓈᒫᒡ ᐊᐎᔭᓐ, ᑫᐐᓐ ᐃᓴ ᑕᑭᒑᐱᐌᐸᑲᐃᑲᓂᐎ᙮ ᑮᔥᐱᓐ ᒪᓈᐱᑌᐌᐸᑲᓈᒫᒡ ᐊᐎᔭᓐ, ᑫᐐᓐ ᐃᓴ ᑕᒪᓈᐱᑌᐌᐸᑲᓈᓱ᙮

5:39b.MAT.005.039 ᓃᓐ ᐃᑕᔥ ᐐᓐ ᑭᑎᓂᓂᓂᒻ: ᑫᑯ ᑮᐌᑑᑕᐙᑫᓐ ᐊᐊ ᑮᒋᐱᒫᑎᔅ ᐃᐃ ᑳᑑᑕᐎᒃ᙮ ᐊᐎᔭ ᑕᔥ ᐸᓰᑴᑲᓈᒥᒃ ᑭᑭᒋᓂᑭᕽ ᐃᓇᑫ, ᑴᑸᑴᓄᑕᐤ ᑭᓇᒪᑎᓂᑭᕽ ᐃᓇᑫ ᒋᐃᔑ ᐸᓰᑴᑲᓈᒥᒃ᙮

5:40b.MAT.005.040 ᔑᑾ ᑮᔥᐱᓐ ᐊᐎᔭ ᐃᔑᐎᓂᒃ ᑎᐹᑯᓂᑫᐎᓂᓂᐗᓐ ᒋᑎᐸᐃᑫᐃᒃ ᑭᐸᐸᑭᐗᔮᓂᓂ, ᑭᐲᓯᑲᐙᑲᓂᓂ ᑲᔦ ᐊᓂᒦᔥ᙮

5:41b.MAT.005.041 ᐱᑯ ᐊᐎᔭ ᐸᑳᓐ ᐊᑮᕽ ᑳᐅᒌᐙᒡ ᔑᒫᑲᓂᔕᒃ ᑳᒋᓂᔕᐅᒃ ᒋᐃᓂᒃ ᐯᔑᑯᑎᐸᐃᑲᓐ ᒋᐃᔑᐎᑖᐗᒡ ᐅᐱᒥᐗᓈᓐ, ᑫᔮᐱ ᐯᔑᑯᑎᐸᐃᑲᓐ ᐃᔑᐎᑖᐤ ᐊᐗᔑᒣ᙮

5:42b.MAT.005.042 ᑮᔥᐱᓐ ᐊᐎᔭ ᑫᑰᓐ ᑲᑴᒋᒥᒃ, ᒦ ᐃᔑ ᒦᔥ᙮ ᑮᔥᐱᓐ ᐊᐎᔭ ᐐᐊᐎᐋᓱᒥᒃ ᑫᑰᓐ, ᒦ ᐃᔑᐊᐎᐞ᙮

5:43b.MAT.005.043 ᑭᑮᓅᑖᒻ ᑳᑮᐃᑭᑐᓈᓂᐗᕽ: ᓵᑭᐞ ᐃᑭ ᑳᓵᑭᐃᒀ, ᔒᑫᓂᒻ ᐃᑭ ᑳᔒᑫᓂᒥᒀ᙮

5:44b.MAT.005.044 ᓃᓐ ᐃᑕᔥ ᑭᑎᓂᓂᓂᒻ: ᓵᑭᐃᑯᒃ ᐃᑭ ᑳᔒᑫᓂᒥᓀᒀ, ᑲᔦ ᐊᓇᒥᐁᑕᒪᐎᑯᒃ ᑳᒪᒋᑑᑕᐎᓀᒀ᙮

5:45b.MAT.005.045 ᒦᑕᔥ ᒋᐅᓃᒑᓂᓯᒥᓀᒃ ᑭᑌᑌᐙ ᑭᒋᑮᔑᑯᕽ ᑳᐊᔮᒡ᙮ ᐋᓃᔥ ᐐᓐ ᐅᑎᔑᑕᒪᐙᐞ ᑮᓯᓲᓐ ᒋᓵᑳᓱᑯᓂᒡ ᒣᒋ ᐃᔑᐌᐱᓯᓂᒡ ᑲᔦ ᒣᓍᑎᓯᓂᒡ᙮

5:46b.MAT.005.046 ᐌᑯᓀᓐ ᑫᐅᒋ ᑎᐸᐊᒪᐎᓀᑭᐸᓐ ᑭᔐᒪᓂᑑ ᑮᔥᐱᓐ ᓵᑭᐁᒀ ᐁᑕ ᐃᑭ ᑳᓵᑭᐃᓀᒀ? ᐊᐴᔥᑫ ᒦ ᐯᔑᑾᓐ ᐁᔑᒋᑫᐙᒡ ᐃᑭ ᑳᒫᐗᑑᓈᐙᒡ ᑖᑭᔅ ᔔᓂᔮᓐ᙮

5:47b.MAT.005.047 ᑮᔥᐱᓐ ᐃᓇ ᐁᑕ ᐴᔔᐊᑣ ᐅᑯ ᑭᑕᓇᒥᐁᐎᓂᕽ ᑳᐅᒌᐙᒡ, ᐌᑯᓀᓐ ᐁᑑᑕᒣᒃ ᐊᐲᒡ ᑯᑕᒃ ᐊᐎᔭᒃ? ᐊᐴᔥᑫ ᐃᑭ ᑳᑭᑫᓂᒫᓯᒀ ᑭᔐᒪᓂᑑᓐ ᒦᐃ ᐁᔑᒋᑫᐙᒡ᙮

5:48b.MAT.005.048 ᑮᓇᐙ ᑕᔥ ᒋᒥᓄᐱᒫᑎᓯᔦᑭᐸᓐ ᒥᓯᐌ ᑭᐱᒫᑎᓯᐎᓂᐙᕽ, ᐋᓃᔥ ᐐᑫ ᑌᒥᓯᐌ ᒥᓄᐱᒫᑎᓯ ᑭᑌᑌᐙ ᑭᒋᑮᔑᑯᕽ ᑳᐊᔮᒡ᙮

6

6:1b.MAT.006.001 ᒋᓴᔅ ᐅᐅᐌ ᑮᐊᓂ ᐃᑭᑐ: ᐊᔮᒀᒥᓯᒃ! ᐊᐲ ᐙᒥᓄᑑᑕᒣᒃ ᐅᒋ ᐊᓇᒥᐋᐎᓂᕽ, ᑫᑯ ᑑᑕᑫᒃ ᐁᔑ ᐊᔮᐙᒡ ᐊᐎᔭᒃ ᒋᑲᓇᐙᐱᒥᓀᒀ᙮ ᑮᔥᐱᓐ ᑑᑕᒣᒃ ᑭᑌᑌᐙ ᑭᒋᑮᔑᑯᕽ ᑳᐊᔮᒡ ᑳᐐᓐ ᑭᑲ ᑎᐸᐊᒫᑯᓰᐙ᙮

6:2b.MAT.006.002 ᒦᐃᐌ ᑕᔥ ᐅᒋ, ᐊᐲ ᐁᒦᓇᒡ ᐊᐎᔭ ᑳᑭᑎᒫᑭᓯᒡ ᑫᑰᓐ, ᑫᑯ ᑲᑴ ᐙᐸᑕᐃᐌᑫᓐ, ᑖᐱᔥᑰ ᐐᓇᐙ ᑳᑑᑕᒧᐙᒡ ᑳᒥᓍᑎᓰᔑᑑᐙᒡ, ᐊᓇᒥᐁᐎᑲᒥᑯᕽ ᔑᑾ ᒦᑲᓈᕽ ᐁᑑᑕᒧᐙᒡ ᒋᑭᑕᑭᒥᑯᐙᒡ ᐊᐎᔭᐞ᙮ ᑫᑯ ᑮᓐ ᓇᓈᐱᓇᐙᑫᓐ᙮ ᑭᑫᑕᓐ ᐅᐅᐌ! ᐋᔕ ᑲᑭᓇ ᑮᑎᐸᐊᒪᐙᐗᒃ᙮

6:3b.MAT.006.003 ᑮᓐ ᐃᑕᔥ, ᐊᐲ ᐁᐐᒋᐊᑣ ᐃᑭ ᑫᑎᒫᑭᓯᐙᒡ, ᑫᑰ ᐊᐎᔭ ᐐᑕᒪᐙᑫᓐ, ᑑᑕᓐ ᐐᑫ ᒋᒪᓈᓈᑯᑑᔭᓐ,

6:4b.MAT.006.004 ᐐᑫ ᑮᒨᒋᒋᑫᓐ ᑲᔦ ᐊᐙᒡ ᐸᑮ ᐊᐎᔭᒃ ᒋᑭᑫᑕᓯᒀ᙮ ᒦᑕᔥ ᑮᓀᑕ ᒋᑭᑫᑕᒪᓐ᙮ ᐊᐊ ᑕᔥ ᑭᑌᑌ ᑳᐙᐸᑕᕽ ᓂᔑᑫ ᑳᑑᑕᒪᓐ, ᐐᓐ ᑭᑲ ᑎᐸᐊᒫᒃ᙮

6:5b.MAT.006.005 ᐊᐲ ᑕᔥ ᐊᓇᒥᐋᔦᒃ, ᑳᐐᓐ ᑭᑲ ᐃᔑᓈᑯᓯᓰᒻ ᑳᐃᔑᓈᑯᓯᐙᒡ ᑳᒥᓍᑎᓰᑳᓱᐙᒡ᙮ ᐅᓵᑭᑑᓈᐙ ᐁᓃᐸᐎᐙᒡ ᐁᐊᓇᒥᐋᐙᒡ ᐊᓇᒥᐁᐎᑲᒥᑯᕽ ᔑᑾ ᐁᑮ ᑫᒧᓂᓂᑭᓐ ᒦᑲᓇᐗᓐ, ᒋᐙᐸᒥᑯᐙᒡ ᑲᑭᓇ ᐊᐎᔭᐞ᙮ ᑭᑫᑕᒧᒃ ᐅᐅ! ᐋᔕ ᑲᑭᓇ ᑮᑎᐸᐊᒪᐙᐗᒃ᙮

6:6b.MAT.006.006 ᑮᓐ ᐃᑕᔥ ᐁᐊᓇᒥᐋᔭᓐ, ᐲᑎᑫᓐ ᑭᐸᑫᒋᑲᓂᕽ, ᑭᐸᐊᓐ ᑭᑎᔥᒀᑌᒻ, ᐊᓇᒥᐁᑕᐤ ᑭᑌᑌ ᑳᐙᐸᒫᓯᐎᓐᒡ᙮ ᐊᐊ ᑕᔥ ᑭᑌᑌ ᑳᑭᑫᑕᕽ ᓂᔑᑫ ᑳᐃᔑᒋᑫᔭᓐ, ᐐᓐ ᑭᑲ ᑎᐸᐊᒫᒃ᙮

6:7b.MAT.006.007 ᐊᐲ ᓴ ᐁᐊᓇᒥᐋᔦᒃ ᑫᑯ ᓈᐱᑮᔗᐎᓇᓐ ᑫᑰᓐ ᐁᓈᐸᑕᓯᓄᑭᓐ ᐋᐸᒋᑑᑫᒃ, ᑳᑑᑕᒧᐙᒡ ᐅᒪᓂᑑᑫᔥᑲᒃ᙮ ᐋᓃᔥ ᒦ ᐁᑕ ᑫᐃᔑ ᓅᑕᐎᔭᒥᓐᒡ ᒪᓂᑑ ᑮᔥᐱᓐ ᓃᐱᐗᐞ ᐃᐌ ᑳᑮᑭᑐᔮᕽ ᐁᐃᓀᑕᒧᐙᒡ᙮

6:8b.MAT.006.008 ᑫᑯ ᓈᓈᐱᓇᐙᑫᒀᓂᒃ, ᐋᓃᔥ ᑭᑌᑌᐙ ᐅᑭᑫᑖᓐ ᐌᑯᓀᓐ ᐁᔑ ᓅᑌᓭᔦᒃ ᒋᑆ ᑲᑴᒋᒣᒃ᙮

6:9b.MAT.006.009 ᐅᐅ ᑕᔥ ᑮᓇᐙ ᐃᔑ ᐊᓇᒥᐋᒃ: ᓂᑌᑌᓈᓐ ᑭᒋᑮᔑᑯᕽ ᐁᔮᔭᓐ! ᑭᑲᑴᒋᒥᑰ ᑲᑭᓇ ᐊᐎᔭ ᒋᑭᒋ ᐃᓀᑕᕽ ᑭᑎᔑᓂᑳᓱᐎᓐ᙮

6:10b.MAT.006.010 ᑭᑲᑴᒋᒥᑰ ᐃᐃᐌ ᒋᐱ ᐅᔑᓯᑑᔭᓐ ᑭᑑᑭᒫᐎᐎᓐ, ᑲᔦ ᑲᑭᓇ ᐊᐎᔭᒃ ᒋᑑᑕᒧᐙᒡ ᑭᑎᓀᑕᒧᐎᓐ ᐅᐅᒫ ᐊᑮᕽ ᑖᐱᔥᑰ ᑳᑑᒋᑳᑌᒃ ᐌᑎ ᑭᒋᑮᔑᑯᕽ᙮

6:11b.MAT.006.011 ᒦᔑᔑᓈᒻ ᓅᑯᒻ ᑳᑮᔑᑲᒃ ᒦᒋᒻ ᑫᐅᒋ ᐱᒫᑎᓯᔮᕽ᙮

6:12b.MAT.006.012 ᐴᓀᑕᒪᐎᔑᓈᒻ ᑳᑮᐃᔑ ᒪᒋᑑᑕᒫᕽ, ᑳᐃᔑ ᐴᓀᑕᒪᐗᑭᑣ ᐃᑭᐌᓂᐗᒃ ᑳᒪᒋᑑᑕᐎᔭᒥᑣ᙮

6:13b.MAT.006.013 ᑫᑯ ᐃᔑᐎᔑᔑᓈᑳᕽ ᑯᒋᐃᑰᐎᓂᕽ᙮ ᑲᓇᐌᓂᒥᔑᓈᒻ ᑕᔥ ᐅᒋ ᐊᐊ ᒪᒋᐊᔭᐋ ᒋᔖᑰᒋᐃᓯᓄᐎᔭᒥᓐᒡ᙮

6:14b.MAT.006.014 ᑮᔥᐱᓐ ᐃᑕᔥ ᐴᓀᑕᒪᐌᒀ ᐃᓂᐌᓂᐗᓐ ᑳᒪᒋᑑᑕᐎᓀᒀ, ᑭᑌᑌᐙ ᑭᒋᑮᔑᑯᕽ ᑳᐊᔮᒡ ᑲᔦ ᐐᓐ ᑭᑲ ᐴᓀᑕᒫᑯᐙ᙮

6:15b.MAT.006.015 ᑮᔥᐱᓐ ᐃᑕᔥ ᐁᑳ ᐴᓀᑕᒪᐙᓯᐌᒀ ᐃᓂ ᒪᒋᑫᑰᓇᓐ ᑳᑑᑕᐎᓀᒀ, ᑳᐐᓐ ᑲᔦ ᐐᓐ ᑭᑌᑌᐙ ᑭᑲ ᐴᓀᑕᒫᑯᓰᐙ ᑭᒪᒋᑑᑕᒧᐎᓂᐙᓐ᙮

6:16b.MAT.006.016 ᒦᓇᐙ ᑕᔥ, ᐊᐲ ᑮᐐᓯᓂᓯᐌᒃ ᐊᓇᒥᐋᐎᓂᕽ ᐅᒋ, ᑫᑯ ᐃᔑᓈᑯᓯᑫᒃ ᑳᐃᔑᓈᑯᓯᐙᒡ ᐅᒥᓍᑎᓰᔑᑑᒃ, ᐁᑲᔥᑫᑕᒥᓈᑯᓯᐙᒡ᙮ ᐋᓃᔥ ᑲᒀᑕᑭᓈᑯᓯᐃᑎᓱᐗᒃ ᒋᐙᐸᒥᑯᐙᒡ ᑲᑭᓇ ᐊᐎᔭᐞ ᐁᐐᓯᓂᓯᒀ ᐊᓇᒥᐋᐎᓂᕽ ᐅᒋ᙮ ᑭᑫᑕᒧᒃ ᐅᐅ: ᐋᔕ ᑲᑭᓇ ᑮᑎᐸᐊᒪᐙᐗᒃ᙮

6:17b.MAT.006.017 ᑮᓐ ᐃᑕᔥ ᐐᓐ, ᐊᐲ ᑮᐅᒋ ᐐᓯᓯᐗᓐ, ᑭᓰᔩᑴᓐ, ᐱᓈᑴᐅᓐ,

6:18b.MAT.006.018 ᐁᑳ ᒋᑭᑫᓂᒥᓯᓄᒀ ᑲᑭᓇ ᐊᐎᔭᒃ ᐁᐐᓯᓂᓯᐗᓐ, ᐐᓐ ᐁᑕ ᑭᑌᑌ ᑳᐙᐸᒫᓯᐎᓐᒡ᙮ ᐊᐌ ᑕᔥ ᑭᑌᑌ ᐅᑭᑫᑖᓐ ᓂᔑᑫ ᑳᐃᔑᒋᑫᔭᓐ᙮ ᐐᓐ ᑭᑲ ᑎᐸᐊᒫᒃ᙮

6:19b.MAT.006.019 ᑫᑯ ᓇᐊᑑᑫᒃ ᑭᑕᑣᑲᓂᑳᓱᐎᓂᐙᓐ ᐅᒫ ᐊᑮᕽ ᑫᑕᔑ ᓂᔑᐗᓈᒋᒪᓂᒎᔑᐗᑭᓐ, ᑲᔦ ᑫᑕᔑ ᐊᒀᒀᐱᑭᓯᑭᓐ, ᑲᔦ ᐃᒫ ᑭᒨᑎᔥᑲᒃ ᒋᐲᑾᐊᒧᐙᒡ ᒋᐲᑎᑫᐙᒡ ᒋᑭᒨᑎᐙᒡ᙮

6:20b.MAT.006.020 ᐊᑑᒃ ᐃᑕᔥ ᑭᐌᓅᑎᓯᐎᓂᐙᓐ ᑭᒋᑮᔑᑯᕽ, ᐃᒫ ᑫᑕᔑ ᓂᔑᐗᓈᒋᑑᓯᑾ ᒪᓂᒎᔕᒃ, ᑫᑕᔑ ᐊᒀᒀᐱᑭᓯᓯᓄᑭᓐ ᑲᔦ᙮ ᒦ ᐌᑎ ᑳᐐᓐ ᑕᐲᑾᐃᑫᓰᐗᒃ ᑭᒨᑎᔥᑲᒃ ᒋᐱ ᑭᒨᑎᐙᒡ᙮

6:21b.MAT.006.021 ᐋᑎ ᐃᒫ ᑫᐃᔑ ᐊᑌᒃ ᑭᐌᓅᑎᓯᐎᓂᐙᓐ, ᒦ ᑯ ᐃᒫ ᑲᔦ ᑮᓐ ᑫᐃᔑ ᒥᓴᐌᑕᒪᓐ ᒋᐊᔮᔭᓐ᙮

6:22b.MAT.006.022 ᑭᐙᑉ ᑭᔥᑮᔑᑰᓐ ᑖᐱᔥᑰ ᐙᓴᑯᓀᒋᑲᓐ ᐁᐙᑌᓇᒫᑯᔭᓐ᙮ ᑮᔥᐱᓐ ᐁᐅᓂᔑᔑᑭᓐ ᑭᔥᑮᔑᑰᓐ, ᑭᐸᑲᑭᓇᒻ, ᐙᓭᔮ ᐁᑭᑭᔥᑳᑯᔭᓐ᙮

6:23b.MAT.006.023 ᑮᔥᐱᓐ ᐃᑕᔥ ᐁᑳ ᐅᓂᔑᔑᓯᓄᑭᓐ ᑭᔥᑮᔑᑰᓐ, ᑳᐐᓐ ᑭᐙᐱᓰ, ᑎᐱᑭᓯᐎᓐ ᑭᑭᑭᔥᑳᑯᓐ᙮ ᑮᔥᐱᓐ ᐃᑕᔥ ᐃᐃᐌ ᑎᐱᑭᓯᐎᓐ ᐅᒋᐊᔮᔭᓐ ᐃᒫ ᑭᐙᐱᐎᓂᕽ, ᐋᓇ ᐃᓀᑖᑾᒃ ᒋᐙᑌᓇᒫᑰᔭᓐ, ᐅᒋᑕ ᐱᑯ ᑲᔥᑮᑎᐱᑲᓐ ᑭᑲ ᑭᑭᔥᑳᑯᓐ!

6:24b.MAT.006.024 ᑳᐐᓐ ᐊᐎᔭ ᐅᑲ ᑎᐯᓂᒥᑯᓰᐞ ᓃᔑᓐ ᐅᑭᒫᐞ᙮ ᐋᓃᔥ ᐯᔑᒃ ᐅᑲ ᔒᑫᓂᒫᓐ, ᔑᑾ ᐯᔑᒃ ᐅᑲ ᓵᑭᐋᓐ᙮ ᐯᔑᒃ ᐃᓂᐌ ᐅᑲ ᑭᒋᐎᓈᓐ, ᔑᑾ ᐯᔑᒃ ᐅᑲ ᐌᐱᓈᓐ᙮ ᑳᐐᓐ ᑭᑖ ᑎᐯᓂᒥᑯᓰ ᑭᔐᒪᓂᑑ ᑲᔦᔥ ᒋᑕᑯᑎᐯᓂᒥᑭᐸᓐ ᔔᓂᔮ᙮

6:25b.MAT.006.025 ᐊᒦ ᐅᐌ ᑳᐅᒋ ᑲᓅᓂᓇᑰᒃ: ᑫᑯ ᐅᒋ ᒥᑯᔥᑳᑌᑕᑫᒃ ᐌᑯᓀᓐ ᑫᒦᒋᔦᒃ ᑲᔦ ᑫᒥᓂᑴᔦᒃ, ᑲᔦ ᐃᒫ ᑭᐐᔭᐎᐙᕽ ᑫᑭᑭᔥᑲᒣᒃ᙮ ᑳᐐᓐ ᐃᓇ ᐊᐗᔑᒣ ᐃᓀᑖᑾᓯᓅᓐ ᐱᒫᑎᓯᐎᓐ ᐊᐲᒡ ᐃᐃᐌ ᒦᒋᒻ? ᑳᐐᓐ ᐃᓇ ᐊᐗᔑᒣ ᐊᐲᑌᑖᑾᓯᓅᓐ ᑭᐐᔭᐎᐙᓐ ᐊᐲᒡ ᑭᑭᔥᑭᑲᓇᓐ?

6:26b.MAT.006.026 ᓇᔥᑫ ᐱᓀᔒᔕᒃ ᑳᐸᐹᒥᓭᐙᒡ, ᑳᐐᓐ ᑭᑎᑫᓰᐗᒃ, ᑳᐐᓐ ᑲᔦ ᒫᐗᒋᒋᑫᓰᐗᒃ, ᑳᐐᓐ ᑲᔦ ᓇᐊᑕᒫᓱᓰᐗᒃ ᐊᑖᓱᐎᑲᒥᑯᕽ᙮ ᑫᔮᐱ ᑕᔥ ᑭᑌᑌᐙ ᑭᒋᑮᔑᑯᕽ ᑳᐊᔮᒡ ᑫᔮᐱ ᐅᑕᔕᒫᐞ᙮ ᑳᐐᓐ ᐃᓇ ᑮᓇᐙ ᐊᐗᔑᒣ ᑭᑕᐲᑌᑖᑯᓯᓰᒻ ᐊᐲᒡ ᐃᑭ ᐱᓀᔒᔕᒃ?

6:27b.MAT.006.027 ᑮᔥᐱᓐ ᐊᐎᔭ ᒥᑯᔥᑳᑌᑕᒣᒃ ᐋᓃᓐ ᑫᑮᐃᔑᐱᒫᑎᓯᒡ ᑭᓉᔥ, ᑫᑫᑦ ᐃᓇ ᑭᓉᔥ ᑕᐱᒫᑎᓯ?

6:28b.MAT.006.028 ᐌᑯᓀᔥ ᐌᒋ ᒥᑯᔥᑳᑌᑕᒣᒃ ᐋᓃᓐ ᑫᐅᒋ ᑭᑭᔥᑭᑫᔦᒃ? ᓇᔥᑫ ᐙᐱᑾᓃᓐ ᐱᑾᒐᔭᐄ ᑳᓂᑖᐎᑭᑭᓐ! ᐱᓵᓂᑯ ᓂᑖᐎᑭᓅᓐ, ᑳᐐᓐ ᐊᓄᑮᒪᑲᓯᓅᓇᓐ᙮ ᑳᐐᓐ ᐅᔑᑕᒫᓲᒪᑲᓯᓅᓇᓐ ᑭᑭᔥᑭᑲᓇᓐ᙮

6:29b.MAT.006.029 ᑭᐐᑕᒪᐎᓂᓂᒻ ᐃᑕᔥ: ᐊᐴᔥᑫ ᐊᐌ ᑭᒋᐅᑭᒫ ᔂᓬᐊᒪᓐ ᐋᓇᑮ ᑭᒋᐌᓅᑎᓯᒡ, ᑳᐐᓐ ᑮᐃᔑ ᐅᓂᔑᔑᓯᓂᓂᐗᓐ ᐅᑭᑭᔥᑭᑲᓇᓐ ᑖᐱᔥᑰ ᐯᔑᒃ ᐅᓄ ᐙᐱᑾᓃᓐ ᑳᐃᔑ ᒥᓄᓈᑾᒃ᙮

6:30b.MAT.006.030 ᑲᔦ ᐃᓂ ᒪᔥᑯᓰᓐ ᑳᓂᑖᐎᑭᑭᓐ, ᐐᐸ ᑳᐊᓂ ᓂᐴᒪᑲᑭᓐ, ᑳᐸᑾᒋᐱᑑᔭᕽ ᑫᐐ ᐴᑕᐙᑫᔭᕽ, ᐊᐴᔥᑫ ᒦᐗᓄᓄ ᑎᓄ ᒪᔥᑯᓰᓐ ᐅᐱᒋᑯᓇᔦᑑᓇᓐ ᑭᔐᒪᓂᑑ᙮ ᑫᒋᓈᒡ ᐄᑐᒃ ᑲᔦ ᑮᓇᐙ ᑭᑲ ᒦᓂᑯᐙ ᑫᑭᑭᔥᑲᒣᒃ! ᐁᑕᑕᐌ ᐊᑳᓯᓐ ᑭᑌᐺᔦᑕᒧᐎᓂᐙ!

6:31b.MAT.006.031 ᑫᑯ ᓇᔥᑫ ᒥᑯᔥᑳᑌᑕᑫᒃ ᒋᐃᑭᑐᔦᒃ: ᐋᑎ ᑫᐅᑎᓇᒫᕽ ᑫᒦᒋᔮᕽ ᑲᔦ ᑫᒥᓂᑴᔮᕽ? ᐋᑎ ᑲᔦ ᑫᐅᒋ ᑭᑭᔥᑭᑫᔮᕽ?

6:32b.MAT.006.032 ᐊᒦᐗᓄᓄ ᒨᔕᒃ ᑳᓇᓈᑐᓀᐊᒧᐙᒡ ᐃᑭ ᐁᑳ ᑳᑭᑫᓂᒫᓯᒀ ᑭᔐᒪᓂᑑᓐ᙮ ᑭᑌᑌᐙ ᑭᒋᑮᔑᑯᕽ ᑳᐊᔮᒡ ᐅᑭᑫᑖᓐ ᐁᓅᑌᓭᔦᒃ ᒦᐗᓄᓄ᙮

6:33b.MAT.006.033 ᑮᓇᐙ ᑕᔥ ᐐᓐ, ᒦ ᐅᐌ ᒫᐗᒡ ᑫᑮᐃᔑ ᐊᑐᓀᐊᒣᒃ, ᑭᔐᒪᓂᑑ ᒋᐅᑭᒫᑲᑕᐎᓀᒃ, ᑲᔦ ᒋᑑᑕᒣᒃ ᑲᑭᓇ ᑫᑰᓐ ᐃᐌ ᑳᐃᔑ ᐊᑕᐌᓂᒥᓀᒃ᙮ ᒦᑕᔥ ᐃᐃ ᑫᐃᔑ ᒦᓂᓀᒃ ᑲᑭᓇ ᑫᑰᓐ ᑫᐅᒋ ᐱᒫᑎᓯᔦᒃ᙮

6:34b.MAT.006.034 ᑫᑯ ᒥᑯᔥᑳᑌᑕᑫᒃ ᐋᓃᓐ ᐙᐃᔑᐌᐸᒃ ᐙᐸᕽ᙮ ᐙᐸᕽ ᑭᑲ ᐙᐸᑖᒻ ᑯᑕᒃ ᑫᑰᓇᓐ ᒋᓈᑲᑕᐌᑕᒣᒃ᙮ ᑫᑯ ᑕᔥ ᐐᓐ ᐊᓂᔖ ᐊᐗᔑᒣ ᐊᓂ ᐅᔑᑕᒫᓱᑫᒃ ᑫᐅᒋ ᒥᑯᔥᑳᑌᑕᒣᒃ᙮ ᐋᔕ ᑮᑌᐱᓭ ᓅᑯᒻ ᑳᑮᔑᑲᒃ ᑫᐅᒋ ᒥᑯᔥᑳᑌᑕᒣᒃ᙮

7

7:1b.MAT.007.001 ᑫᑯ ᒪᒐᑭᒫᑫᓐ ᐊᐊ ᑮᒋᐱᒫᑎᔅ, ᐁᑳ ᑲᔦ ᑮᓐ ᒋᑎᐹᑯᓂᓯᓄᒃ ᐊᐊ ᑭᔐᒪᓂᑑ᙮

7:2b.MAT.007.002 ᐋᓃᓐ ᑫᐃᔑ ᑲᓇᐙᐸᒪᒡ ᐊᐊᐌ ᑮᒋᐱᒫᑎᔅ, ᒦᐃᐌ ᑫᐃᔑ ᑲᓇᐙᐸᒥᒃ ᑭᔐᒪᓂᑑ᙮ ᔑᑾ ᐌᑯᓀᓐ ᐃᐃᐌ ᑫᐃᔑ ᑑᑕᐗᒡ ᐊᐊ ᑮᒋᐱᒫᑎᔅ, ᒦᐃᐌ ᑲᔦ ᐐᓐ ᑭᔐᒪᓂᑑ ᑫᐃᔑ ᑎᐸᐊᒪᐎᒃ᙮

7:3b.MAT.007.003 ᐋᓃᔛᓐ ᐌᒋ ᐱᓯᔅᑳᐸᑕᒧᐗᒡ ᐃᐌ ᑮᒋᑭᐌ ᑳᐊᑳᓯᓂᓂᒃ ᑳᐱᓯᓂᒡ ᐅᔥᑮᔑᑯᕽ, ᔑᑾ ᑮᓐ ᐁᑳ ᐁᐱᓯᔅᑳᐸᑕᓯᐗᓐ ᐃᐌ ᑭᒋᒥᑎᒃ ᑳᐱᒥᑖᑯᓯᕽ ᑭᔥᑮᔑᑯᕽ?

7:4b.MAT.007.004 ᐋᓃᓐ ᑲᔦ ᑫᑮ ᐃᔑ ᐃᓇᑎᐸᓐ ᑮᒋᑭᐌ: ᑕᑲ ᓂᑲ ᐅᑖᐱᓈᓐ ᐃᐃ ᑳᐱᓯᓂᔭᓐ, ᑲᔦ ᑮᓐ ᐃᑕᔥ ᐁᐱᒥᑖᑾᒧᒃ ᑭᒋᒥᑎᒃ ᑭᔥᑮᔑᑯᕽ?

7:5b.MAT.007.005 ᑮᓐ ᐅᒥᓍᑎᓰᔑᑑ! ᐊᑲᐌ ᑮᓐ ᓃᑳᓐ ᐌᐱᓇᓐ ᐃᐃ ᑳᐱᒥᑖᑾᒧᒃ ᑭᔥᑮᔑᑯᕽ, ᑭᑲ ᓇᐋᑉ ᐃᑕᔥ ᒋᐅᑖᐱᓇᒪᐗᒡ ᐃᐃ ᑳᐱᓯᓂᒡ ᑮᒋᑭᐌ!

7:6b.MAT.007.006 ᐌᑯᓀᓐ ᑳᑎᐯᑕᕽ ᑭᔐᒪᓂᑑ ᑫᑯ ᒦᓈᑫᒀᓂᒃ ᐃᑭ ᐊᓂᒨᒃ᙮ ᒫᑭᔖ ᑕᐱ ᑴᑮᐗᒃ, ᒋᒦᑳᓂᓀᒀ᙮ ᐃᑭ ᑲᔦ ᑳᑲᓇᐌᓂᒣᒀ ᑳᐋᑾᑭᓱᓂᒡ ᐊᓯᓃᐞ ᑫᑯ ᐊᐸᑭᑕᐙᑫᒀᓂᒃ ᐃᑭ ᑰᑰᔕᒃ᙮ ᒫᑭᔖ ᐅᑲ ᑕᑖᑯᑳᓈᐙᐞ᙮

7:7b.MAT.007.007 ᑲᑴᑗᒃ ᐃᓴ, ᑭᑲ ᒦᓂᑰᒻ᙮ ᓇᓈᑐᓂᑫᒃ, ᑭᑲ ᒥᑳᒻ ᐃᑕᔥ᙮ ᐹᐹᐗᐃᑫᒃ, ᑭᑲ ᐹᑭᑌᓇᒫᑰᒻ ᐃᑕᔥ᙮

7:8b.MAT.007.008 ᐊᐌᓀᓐ ᐊᐊ ᑳᑲᑴᑗᒡ, ᒦ ᐊᐌ ᑫᒦᓂᓐᒡ᙮ ᐊᐊ ᑳᓇᓈᑐᓂᑫᒡ ᐅᒥᑳᓐ᙮ ᑲᔦ ᐊᐌ ᑳᐹᐹᐗᐃᑫᒡ ᑕᐹᑭᑌᓇᒪᐙ᙮

7:9b.MAT.007.009 ᑮᓇᐙ ᑕᔥ ᑳᐅᑯᓯᓯᔦᒃ, ᑮᔥᐱᓐ ᐊᐎᔭ ᐅᑯᓯᓴᓐ ᑲᑴᒋᒥᑯᒡ ᐸᑴᔑᑲᓇᓐ, ᐊᓯᓃᓐ ᐃᓇ ᐅᑲ ᒦᓈᓐ? ᑳᐐᓐ ᐄᑐᒃ!

7:10b.MAT.007.010 ᑯᒫ ᑲᔦ ᑭᓅᔐᓐ ᑲᑴᒋᒥᑯᒡ ᐅᑯᓯᓴᓐ, ᑭᓀᐱᑰᓐ ᐃᓇ ᐅᑲ ᒦᓈᓐ? ᑳᐐᓐ ᐄᑐᒃ!

7:11b.MAT.007.011 ᓇᔥᑫ ᑮᓇᐙ ᐋᓇᐃᔑᒪᒋ ᐃᓂᓃᐎᔦᒃ, ᐁᓂᐌᒃ ᑭᑭᑫᑖᒻ ᑳᐅᓂᔑᔑᓂᓂᑭᓐ ᑫᐃᔑ ᒦᓀᒀ ᑭᓃᒑᓂᓯᐙᒃ᙮ ᑫᒋᓈᒡ ᐊᐗᔑᒣ ᑭᑌᑌᐙ ᑭᒋᑮᔑᑯᕽ ᑳᐊᔮᒡ ᐅᑲ ᒦᓈᐞ ᑫᑰᓇᓐ ᑳᐅᓂᔑᔑᓂᓂᑭᓐ ᐃᐃ ᑳᑲᑴᒋᒥᑯᒡ᙮

7:12b.MAT.007.012 ᒦ ᓴ ᐅᐌ ᐅᒋ, ᑫᐃᔑ ᐊᑕᐌᓂᒣᒀ ᑮᒋᐱᒫᑎᓯᐙᒃ ᒋᑑᑕᐎᓀᒀ, ᒪᔮ ᒦᐃᐌ ᑲᔦ ᑮᓇᐙ ᑑᑕᐎᑯᒃ᙮ ᐋᓃᔥ ᒦᐃᐌ ᑳᐃᓇᑌᓂᒃ ᑭᔐᒪᓂᑑ ᐅᑑᓇᔓᐌᐎᓐ, ᒦᐃᐌ ᑳᑮᐃᔑᐲᐃᑫᐙᒡ ᐃᑭ ᑭᔐᒪᓂᑑᓐ ᑳᑮ ᑲᓅᒋᑫᑕᒪᐙᐙᒡ᙮

7:13b.MAT.007.013 ᐅᒋᐲᑎᑫᒃ ᐃᐃ ᐃᔥᒀᑌᒻ ᑳᐊᑳᓴᑌᔮᒃ᙮ ᒪᑲᑌᔮ ᐅᔕ ᐃᔥᒀᑌᒻ, ᐌᑕᓐ ᐃᐃ ᑳᐃᓇᒧᒃ ᒦᑲᓇ ᓂᔑᐗᓈᑎᓯᐎᓂᕽ᙮ ᐹᑏᓄᐗᒃ ᐃᑕᔥ ᐃᑭᐌ ᐃᒫ ᑳᐱᒪᐊᑑᐙᒡ᙮

7:14b.MAT.007.014 ᐋᓃᔥ ᐊᑳᓴᑌᔮ ᐃᐌ ᐃᔥᒀᑌᒻ ᑲᔦ ᓴᓇᑲᓐ ᒦᑲᓇ ᑳᐃᓇᒧᒃ ᐱᒫᑎᓯᐎᓂᕽ᙮ ᐊᑳᓰᓄᐗᒃ ᐃᑕᔥ ᐃᑭ ᑫᒥᑲᒧᐙᒡ᙮

7:15b.MAT.007.015 ᐊᔛᑲᑕᐎᑯᒃ ᐃᑭ ᑳᐗᓂᔑᒥᐌᐙᒡ ᑳᑲᓅᑕᒪᐙᔑᑑᐙᒡ ᑭᔐᒪᓂᑑᓐ᙮ ᑭᐱᐅᑎᓯᑰᒃ ᒫᓇᒑᓂᔑᕽ ᐁᔑᓈᑯᓯᐙᒡ ᐗᑭᒐᔭᐄ᙮ ᐲᒋᓇᐤ ᐃᑕᔥ ᑖᐱᔥᑰ ᑳᐋᒀᑎᓯᐙᒡ ᒪᐄᑲᓇᒃ ᐃᔑᐊᔮᐗᒃ᙮

7:16b.MAT.007.016 ᒦᐃᒫ ᑫᐅᒋ ᑭᑫᓂᒣᒀ ᐁᐙᐸᒣᒀ ᐋᓃᓐ ᑫᐃᔑᐱᒫᑎᓯᐙᒡ᙮ ᐃᓇᔥᑫ ᑳᐐᓐ ᐊᐎᔭ ᐅᒪᐎᔂᓈᓰᐞ ᔔᒥᓇᐞ ᒋᐅᑎᓈᒡ ᐅᑳᐎᒥᓇᑲᔒᐙᑎᑯᕽ᙮ ᑳᐐᓐ ᑲᔦ ᑳᒦᒋᓈᑳᑌᓂᑭᓐ ᐅᒪᐎᔂᑕᓰᓇᓐ ᑳᔕᔥᑯᕽ ᒋᐅᑎᓇᕽ᙮

7:17b.MAT.007.017 ᐊᒦᑕᔥ ᐅᐌ ᐯᔑᑾᓐ, ᑳᐅᓂᔑᔑᒡ ᒥᑎᒃ ᑾᔭᒃ ᐅᓂᑖᐎᑭᑑᓐ ᑳᐅᓂᔑᔑᓂᓂᒃ ᑳᒦᒋᓈᑳᑌᓂᒃ, ᐊᐊ ᑕᔥ ᐐᓐ ᐁᑳ ᑳᐅᓂᔑᔑᓯᒃ ᒥᑎᒃ ᐅᓂᑖᐎᑭᑑᓐ ᑎᓄ ᑳᐅᓂᔑᔑᓯᓂᓂᒃ ᑳᒦᒋᓈᑳᑌᓯᓂᓂᒃ᙮

7:18b.MAT.007.018 ᐊᐌ ᑳᐅᓂᔑᔑᒡ ᒥᑎᒃ ᑳᐐᓐ ᐅᓂᑖᐎᑭᑑᓰᓐ ᑳᒦᒋᓈᑳᑌᓯᓂᓂᒃ᙮ ᑲᔦ ᐊᐌ ᐁᑳ ᑳᐅᓂᔑᔑᓯᒃ ᒥᑎᒃ ᑳᐐᓐ ᐅᓂᑖᐎᑭᑑᓰᓐ ᑳᒦᒋᓈᑳᑌᓂᒃ᙮

7:19b.MAT.007.019 ᐊᐌ ᑕᔥ ᒥᑎᒃ ᑭᑎᑫᐎᓂᕽ ᑳᐊᔮᒡ ᐁᑳ ᑳᒥᓄᓂᑖᐎᑭᑑᓯᒃ ᑳᒦᒋᓈᑳᑌᓂᒃ, ᑕᑮᔥᑲᑕᐙ ᒋᒪᒍᑌᐅᓐᒡ᙮

7:20b.MAT.007.020 ᐊᒦᑕᔥ ᐃᐌ ᐯᔑᑾᓐ, ᑭᑲᐅᒋ ᓂᓯᑕᐎᓇᐙᒃ ᐃᑭ ᑳᐗᓂᔑᒥᐌᐙᒡ ᑳᑲᓅᑕᒪᐙᔑᑑᐙᒡ ᑭᔐᒪᓂᑑᓐ ᐁᐙᐸᑕᒣᒃ ᐋᓃᓐ ᐁᑑᑕᒧᐙᒡ᙮

7:21b.MAT.007.021 ᑳᐐᓐ ᐐᓐ ᐃᑭ ᑲᑭᓇ ᑳᐃᔑᐙᒡ ᑌᐯᒋᑫᔭᓐ! ᑌᐯᒋᑫᔭᓐ! ᑕᐲᑎᑲᓈᓰᐗᒃ ᐃᒫ ᑭᔐᒪᓂᑑᓐ ᑳᐃᔑ ᑭᒋᐅᑭᒫᐎᓂᒡ᙮ ᐃᑭᐌᓂᐗᒃ ᐁᑕ ᑳᑑᑕᒧᐙᒡ ᐁᔑ ᐊᑕᐌᑕᒥᓂᒡ ᓂᑌᑌᓐ ᑭᒋᑮᔑᑯᕽ ᑳᐊᔮᓂᒡ᙮

7:22b.MAT.007.022 ᓃᐱᐗᐞ ᓂᑲ ᐃᑰᒃ ᐊᐲ ᐅᓇᔓᐌᐎᑮᔑᑲᓂᓂᒃ: ᑌᐯᒋᑫᔭᓐ! ᑌᐯᒋᑫᔭᓐ! ᓂᑮ ᑲᓅᒋᑫᑕᒪᐙᓈᓐ ᑭᔐᒪᓂᑑ ᑮᓐ ᐁᑮ ᐊᐱᒧᔮᕽ ᑭᐐᓱᐎᓐ! ᑲᔦ ᑮᓐ ᑭᐐᓱᐎᓂᕽ ᓂᑮ ᓵᑭᒋᓂᔕᐙᓈᓂᒃ ᒪᒋᐊᒑᑾᒃ᙮ ᑲᔦ ᑮᓐ ᑭᐐᓱᐎᓂᕽ ᓂᑮᐅᒋ ᑑᑖᒥᓐ ᓃᐱᐗᐞ ᒫᒪᑳᒋᒋᑫᐎᓇᓐ, ᓂᑲ ᐃᑰᒃ᙮

7:23b.MAT.007.023 ᔑᑾ ᓴ ᐅᐌ ᓂᑲ ᐃᓈᒃ: ᑳᐐᓐ ᐐᑳ ᑭᑑᒋ ᑭᑫᓂᒥᓯᓅᓂᓂᒻ! ᓂᑯᒋ ᐃᔖᒃ, ᑮᓇᐙ ᑳᒪᒋᑑᑕᒣᒃ! ᓂᑲ ᐃᓈᒃ᙮

7:24b.MAT.007.024 ᒦᑕᔥ ᐅᐅᐌ ᐅᒋ, ᐊᐎᔭ ᐱᓯᑕᕽ ᐅᓄ ᓂᑮᑭᑐᐎᓇᓐ ᑲᔦ ᐊᓂ ᑑᑕᕽ, ᒦ ᓴ ᐅᐌ ᑫᐃᔑ ᐋᐌᒋᑳᓇᒃ, ᐁᑲᑮᑖᐌᑕᕽ ᐃᓂᓂ ᑳᑮᐅᔑᑑᒡ ᐅᐙᑳᐃᑲᓐ ᐗᑭᒐᔭᐄ ᑭᑖᐱᑯᕽ᙮

7:25b.MAT.007.025 ᒦᑕᔥ ᑳᐃᔑ ᑭᒋᑭᒥᐗᕽ, ᔑᑾ ᑮᓂᑭᐲᓭ, ᐁᑭᒋᓅᑎᕽ ᐁᑮ ᐸᑭᑌᓭᒃ ᐃᒫ ᐙᑳᐃᑲᓂᕽ᙮ ᑳᐐᓐ ᐃᑕᔥ ᐅᒋ ᐸᑭᓯᓯᓅᓐ ᐃᐌ ᐙᑳᐃᑲᓐ, ᐋᓃᔥ ᐁᑮᐃᔑ ᐅᔑᒋᑳᑌᒃ ᐗᑭᒋ ᑭᑖᐱᑯᕽ᙮

7:26b.MAT.007.026 ᔑᑾ ᒦᓇᐙ ᐊᐎᔭ ᑮᓅᑕᕽ ᐅᓄ ᓂᑎᑭᑐᐎᓇᓐ, ᐁᑳ ᑕᔥ ᐐᑑᑕᓯᒃ, ᑕᐃᔑᓈᑯᓯ ᑖᐱᔥᑰ ᐊᐌ ᐃᓂᓂ ᑳᑲᑮᐹᑎᓯᒡ, ᑳᐙᑳᐃᑫᒡ ᒥᑖᐗᑳᕽ᙮

7:27b.MAT.007.027 ᑮᑭᒋᑭᒥᐗᓐ ᐃᑕᔥ, ᑭᒥᐗᓈᐳ ᒥᓯᐌ ᐁᑮᐅᒋ ᑭᒋ ᓭᓴᑰᒋᐲᒋᒋᐗᕽ ᐁᑭᒋᓅᑎᕽ ᐁᑮ ᐸᑭᑌᓭᑭᓐ ᐃᒫ ᐙᑳᐃᑲᓂᕽ᙮ ᒦᑕᔥ ᐃᐃ ᑳᐃᔑ ᑲᐎᓭᒃ ᐃᐃ ᐙᑳᐃᑲᓐ, ᑲᑭᓇ ᑫᑰᓐ ᑮᓂᔑᐗᓈᑕᓐ᙮

7:28b.MAT.007.028 ᐊᐲ ᑕᔥ ᒋᓴᔅ ᑳᐴᓂ ᑮᑭᑐᒡ ᐅᑮᒫᒪᑳᓯᑕᒥᓂ ᑲᑭᓇ ᐊᐎᔭᐞ ᑳᒫᒪᐌᓄᓂᒡ ᐅᓄ ᐅᑭᑭᓄᐊᒫᑫᐎᓇᓐ᙮

7:29b.MAT.007.029 ᐋᓃᔥ ᐅᑮᐃᔑ ᑭᑭᓄᐊᒪᐙᐞ ᐁᐊᔮᒡ ᐃᐃ ᑲᔥᑭᐁᐎᓯᐎᓐ, ᑳᐐᓐ ᐐᓐ ᐃᐃ ᑖᐱᔥᑰ ᑳᑮᐃᔑ ᑭᑭᓄᐊᒫᑫᓂᒡ ᐃᐃ ᑳᑭᑭᓄᐊᒫᑫᓂᒡ ᒎᐗᐞ ᐅᑑᓇᔓᐌᐎᓂᓂ᙮

8

8:1b.MAT.008.001 ᐊᐲ ᑕᔥ ᒋᓴᔅ ᐁᑮ ᐱᓃᓵᒪᒋᐌᒡ, ᐋᐱᒋ ᑮᐹᑏᓄᐗᐞ ᐊᐎᔭᐞ ᑳᑮ ᐱᒥᓂᔕᐅᑯᒡ᙮

8:2b.MAT.008.002 ᐯᔑᒃ ᐃᑕᔥ ᐃᓂᓂᐗᓐ ᐁᐅᒥᑮᐙᐱᓀᓂᒡ ᐅᑮ ᐱᓈᓯᑳᑰᓐ ᐁᑮᐅᒋᒌᑾᓇᐱᓂᒡ, ᐁᑮᐃᑯᒡ: ᑌᐯᒋᑫᔭᓐ, ᑮᔥᐱᓐ ᐃᓀᑕᒪᓐ ᑭᑖ ᑲᔥᑭᐃᔥ ᒋᐯᑭᐃᑰᐎᓯᔮᓐ᙮

8:3b.MAT.008.003 ᒋᓴᔅ ᑕᔥ ᔐᒫᒃ ᑮᐃᔑᓂᑫᓂ ᐁᑮ ᓵᒥᓈᒡ, ᐅᐅ ᑕᔥ ᐅᑮᐃᓈᓐ: ᓂᑎᓀᑕᒻ ᒋᒥᓄᐊᔮᐃᓈᓐ, ᒦᐃ ᐃᔑᒥᓄᐊᔮᓐ᙮ ᔐᒫᒃ ᐃᑕᔥ ᐅᑮᓇᑲᓂᑯᓂ ᐃᐃ ᑳᑮᐃᔑ ᐅᒥᑮᐙᐱᓀᓂᒡ᙮

8:4b.MAT.008.004 ᒋᓴᔅ ᑕᔥ ᐅᑮᐃᓈᓐ: ᐱᓯᑕᐎᔑᓐ, ᑫᑯ ᐐᓐ ᐊᐎᔭ ᐐᑕᒪᐙᑫᓐ᙮ ᔐᒫᒃ ᐃᑕᔥ ᐊᑕᐙᐸᒻ ᐊᐊ ᐊᓇᒥᐁᐎᑭᒫ ᒋᐊᑕᐎᒥᒃ᙮ ᒦᑕᔥ ᐃᔑ ᐸᑭᑎᓈᓲᑲᓐ ᑳᑮᐃᔑ ᑭᑭᓄᐊᒫᑫᒡ ᐊᐊ ᒨᓯᔅ ᑲᑭᓇ ᐊᐎᔭ ᒋᑌᐺᑕᐎᒃ ᐋᔕ ᐁᑮ ᐯᑭᐃᑰᔭᓐ, ᐅᑮᐃᓈᓐ᙮

8:5b.MAT.008.005 ᐊᐲ ᑕᔥ ᒋᓴᔅ ᐁᐱ ᑕᑯᔑᕽ ᐃᐃᒫ ᑲᐸᕒᓂᔭᒦᕽ, ᐅᕒᐆᒻ ᑳᐅᒋ ᑎᐯᑖᑯᓯᓂᒡ ᔑᒫᑲᓂᔒᐎᑭᒫᓐ ᐅᑮᓇᑭᔥᑳᑰᓐ ᐁᑮ ᐸᑯᓭᓂᒥᑯᒡ ᒋᐐᑑᑲᐙᒡ,

8:6b.MAT.008.006 ᐅᐅ ᐁᑮᐃᑯᒡ: ᑌᐯᒋᑫᔭᓐ, ᐯᔑᒃ ᓂᑕᓄᑮᐋᑲᓐ ᐐᑫ ᑭᒋᐋᑯᓯ ᐃᐃᐌᑎ ᑳᐃᔑᑖᔮᓐ᙮ ᒥᒋᐱᒥᔑᓐ ᐅᓂᐯᐎᓂᕽ, ᑳᐐᓐ ᑲᔦ ᐙᑲᐐᓰ, ᒫᐗᒡ ᐃᑯ ᐁᑲᒀᑕᑭᑑᒡ᙮

8:7b.MAT.008.007 ᒋᓴᔅ ᑕᔥ ᐅᑮᐃᔑ ᓇᑴᑕᐙᓐ: ᓂᑲ ᐃᔖ, ᓂᑲ ᐊᑕᒥᓄᐊᔮᐋ᙮

8:8b.MAT.008.008 ᔑᒫᑲᓂᔒᐎᑭᒫ ᑕᔥ ᑮᐃᑭᑐ: ᑳᐐᓐ ᓂᑌ ᐊᐲᑌᑖᑯᓯᓰ ᒋᐲᑎᑫᔭᓐ ᓂᐙᑳᐃᑲᓂᕽ᙮ ᒥᒋᑮᑭᑐᓐ ᐁᑕ, ᒦᑕᔥ ᒋᒥᓄᐊᔮᒡ ᓂᑕᓄᑮᐋᑲᓐ᙮

8:9b.MAT.008.009 ᐋᓃᔥ ᑫᓃᓐ ᓂᑕᔮᐙᒃ ᓂᑑᑭᒫᒪᒃ, ᓂᑑᑭᒫᑲᑕᐙᒃ ᑲᔦ ᔑᒫᑲᓂᔕᒃ᙮ ᑮᔥᐱᓐ ᐯᔑᒃ ᑮ ᐃᓇᒃ: ᒫᒑᓐ, ᒦᐃ ᐁᔑ ᒫᒑᒡ᙮ ᒦᓇᐙ ᐯᔑᒃ ᐁᐃᓇᒃ: ᐲᔖᓐ, ᒦᐃ ᐁᔑ ᐲᔖᒡ᙮ ᐗᐊ ᑲᔦ ᑮᐊᓅᓇᒃ ᑳᐸᒦᑕᒪᐎᒡ ᑫᑰᓂᓂ ᒋᐃᔑᒋᑫᒡ, ᒦᐃ ᐁᔑᒋᑫᒡ᙮

8:10b.MAT.008.010 ᐊᐲ ᑕᔥ ᒋᓴᔅ ᐁᑮᓅᑕᕽ, ᐋᐱᒋ ᑮᑭᒋᒫᒪᑳᑌᑕᒻ, ᐁᑮᐃᓈᒡ ᐃᐃ ᑳᑮᐐᒌᐎᑯᒡ: ᑫᑰᓐ ᑭᑎᓂᓂᓂᒻ: ᑳᐐᓐ ᐐᑳ ᓂᐙᐸᒫᓰ ᐊᐎᔭ ᐃᐃᒫ ᐃᔅᕒᐃᔭᓬᐃᕽ ᑳᐅᒌᒡ ᒋᐊᐲᒋ ᑌᐺᔦᑕᕽ ᑖᐱᔥᑰ ᐗᐊ ᑳᐃᔑ ᐙᐸᒪᒃ ᓅᑯᒻ᙮

8:11b.MAT.008.011 ᑲᑴ ᒫᒥᑲᐎᒃ ᑕᔥ ᐅᐅᐌ: ᐹᓂᒫ ᒫᐗᒋᓯᑑᒡ ᑭᔐᒪᓂᑑ ᐅᑎᐯᒋᑫᐎᓐ, ᐋᐱᒋ ᑕᐹᑏᓄᐗᒃ ᐊᐎᔭᒃ ᐙᐸᓄᕽ ᑲᔦ ᓂᑳᐲᐊᓄᕽ ᑫᐱ ᐅᒌᐙᒡ ᒋᐐᑕᐱᒫᐙᒡ ᒋᐐᒋᐐᓯᓃᒫᐙᒡ ᐁᐸᕒᐊᐋᒪᓐ, ᐋᐃᓯᑰᓐ, ᒉᑲᐴᓐ ᑲᔦ ᑳᐐᐃᔑ ᐐᑾᑎᓈᓂᐗᓂᓂᒃ᙮

8:12b.MAT.008.012 ᐃᑭ ᑕᔥ ᒪᔮ ᑫᑮᐊᔮᐙᐸᓐ ᐃᐃᒫ ᑭᔐᒪᓂᑑ ᐅᑎᐯᒋᑫᐎᓂᕽ, ᒦᐗᑭᑭ ᑫᐃᔑ ᐌᐱᓂᑣ ᐃᐃᒫ ᐗᓂᑎᐱᑲᓄᕽ, ᒦᑕᔥ ᐌᑎ ᑫᔑ ᒪᐎᐙᒡ, ᐅᑲ ᒪᑗᑖᓈᐙᓐ ᑲᔦ ᐐᐱᑎᐙᓐ, ᐅᑮᐃᓈᐞ᙮

8:13b.MAT.008.013 ᒦᑕᔥ ᐅᑮᐃᓈᓐ ᐃᓂ ᔑᒫᑲᓂᔒᐎᑭᒫᓐ: ᒫᒑᓐ, ᒦᐃ ᐃᔑ ᑮᐌᓐ, ᒦ ᑯ ᐱᑯ ᑫᐃᔑᓈᑾᒃ ᑳᐃᔑ ᑌᐺᑕᒪᓐ, ᐅᑮᐃᓈᓐ᙮ ᐅᑕᓄᑮᐋᑲᓇᓐ ᑕᔥ ᑮᒥᓄᐊᔮᐗᓐ ᐃᐃᐌ ᐊᐲ ᐯᔑᑾᓐ ᐁᑕᓱ ᑎᐸᐃᑲᓀᔮᓂᒃ᙮

8:14b.MAT.008.014 ᒋᓴᔅ ᐃᑕᔥ ᑮᐃᔖ ᐲᑕᕒᐆᓐ ᐁᔑᑖᓂᒡ᙮ ᐅᑮᐙᐸᒫᓐ ᐲᑕᕒᐆᓐ ᐅᓯᑯᓯᓂ ᐁᑭᔑᓱᐙᐱᓀᓂᒡ ᐁᒥᒋᐱᒥᔑᓂᓂᒡ ᐃᐃᒫ ᓂᐯᐎᓈᑯᕽ᙮

8:15b.MAT.008.015 ᐅᑮ ᓵᒥᓈᓐ ᐅᓂᒌᓃᕽ ᐃᓂ ᐃᑴᐗᓐ᙮ ᔐᒫᒃ ᐃᑕᔥ ᐅᑮᓇᑲᓂᑯᓂ ᐃᐃ ᐅᑖᑯᓯᐎᓂᓂ᙮ ᒦᑕᔥ ᑳᐃᔑ ᐗᓂᔥᑳᓂᒡ ᔐᒫᒃ ᐁᑮ ᐸᒥᐃᑯᐙᒡ᙮

8:16b.MAT.008.016 ᐊᐲ ᑕᔥ ᐁᐊᓂ ᐅᓈᑯᔑᓂᓂᒃ ᐊᐎᔭᒃ ᐅᑮ ᐲᑕᒪᐙᐙᓐ ᒋᓴᓲᓐ ᐃᐃᐌᓂᐗᐞ ᑳᑮ ᑭᑭᔥᑳᑯᓂᒡ ᒪᒋᐊᒑᑾᐞ᙮ ᒋᓴᔅ ᑕᔥ ᐯᔑᒃ ᐃᑭᑐᐎᓐ ᐅᑮᐋᐸᒋᑑᓐ ᐁᓵᑭᒋᐌᐱᓈᒡ ᐃᐃ ᒪᒋᐊᒑᑾᐞ, ᐁᑮᒥᓄᐊᔮᐋᒡ ᑲᔦ ᑲᑭᓇ ᑳᐋᑯᓯᓂᒡ᙮

8:17b.MAT.008.017 ᒦᑕᔥ ᐅᐅ ᑳᑮᐅᒋ ᐃᔑᒋᑫᒡ, ᒪᔮ ᐱᑯ ᒋᐃᔑᓭᓂᒃ ᐋᓃᓐ ᑳᑮᐃᑭᑐᑯᐸᓀᓐ ᐊᐊ ᐅᑎᐹᒋᒧ ᐋᐃᓭᔭ ᐊᐊ ᑳᑮ ᑲᓅᑕᒪᐙᒡ ᑭᔐᒪᓂᑑᓐ ᒣᐎᔕ: ᐐᓐ ᐃᓴ ᐱᑯ ᑭᑮᐅᑖᐱᓇᒫᑯᓈᓐ ᑭᑖᑯᓯᐎᓂᓈᓂᓐ ᑲᔦ ᐅᑮᒫᒌᑑᓇᓐ ᑲᑭᓇ ᑭᑎᓈᐱᓀᐎᓂᓈᓂᓐ᙮

8:18b.MAT.008.018 ᒋᓴᔅ ᑕᔥ ᐁᑮᐙᐸᒫᒡ ᐁᐲᒋ ᐹᑏᓄᓂᒡ ᐊᐎᔭᐞ ᐁᐙᑳᔥᑳᑯᒡ ᐅᑮ ᑲᓅᓈᐞ ᐅᑭᑭᓄᐊᒪᐙᑲᓇᐞ ᐊᑳᒥᓵᑲᐃᑲᓐ ᒋᐃᔖᐙᒡ᙮

8:19b.MAT.008.019 ᐯᔑᒃ ᐃᑕᔥ ᑳᑭᑭᓄᐊᒫᑫᓂᒡ ᐅᓇᔓᐌᐎᓐ ᐅᑮ ᐱᓈᓯᑳᑰᓐ ᐁᑮᐃᑯᒡ: ᑭᑭᓄᐊᒫᑫ, ᑭᑲ ᐐᒌᐎᓐ ᐋᑎ ᐱᑯ ᑫᐃᔖᔭᓐ᙮

8:20b.MAT.008.020 ᒋᓴᔅ ᑕᔥ ᐅᑮᐃᔑ ᓇᑴᑕᐙᓐ: ᐃᑭ ᐙᑯᔕᒃ ᐅᐙᔑᐗᒃ, ᐃᑭ ᑲᔦ ᐱᓀᔒᔕᒃ ᐅᐗᓯᔀᓂᐗᒃ᙮ ᓃᓐ ᑕᔥ ᐃᓂᓂ ᐅᑯᓯᓴᓐ ᑳᐐᓐ ᓂᑕᔮᓰᓐ ᐋᑎ ᑫᔑ ᐱᒥᔑᓈᓐ ᒋᐊᓉᔑᓈᓐ, ᑮᐃᑭᑐ᙮

8:21b.MAT.008.021 ᐃᓂᐌᓂᐗᓐ ᐃᑕᔥ ᐯᔑᒃ ᐅᑭᑭᓄᐊᒪᐙᑲᓇᓐ ᑳᑮ ᐱᒥᓂᔕᐅᑯᒡ ᐅᑮ ᑲᓅᓂᑰᓐ: ᑌᐯᒋᑫᔭᓐ, ᑕᑲ ᐸᑭᑎᓂᔑᓐ ᐊᑲᐌ ᒋᐐᐊᐎ ᓇᐃᓇᒃ ᓂᑌᑌ, ᐅᑮᐃᑰᓐ᙮

8:22b.MAT.008.022 ᒋᓴᔅ ᐃᑕᔥ ᐅᑮᐃᔑ ᓇᑴᑕᐙᓐ: ᐱᒥᓂᔕᐅᔑᓐ᙮ ᓇᑲᔥ ᐃᑭ ᑳᓂᐳᐌᑖᑯᓯᐙᒡ᙮ ᐐᓇᐙ ᑯ ᐅᑲ ᑕᔒᑳᓈᐙ ᒋᓇᐃᓈᐙᒡ ᐅᑎᓇᐌᒫᑲᓂᐙᐞ ᑳᐐᓂᐳᓂᒡ, ᐅᑮᐃᓈᓐ᙮

8:23b.MAT.008.023 ᒋᓴᔅ ᑕᔥ ᑮᐊᓂ ᐴᓯ ᐃᐃᒫ ᒌᒫᓂᕽ ᑲᔦ ᐅᑭᑭᓄᐊᒪᐙᑲᓇᐞ ᐅᑮᐊᓂ ᐐᒌᐎᑰᐞ᙮

8:24b.MAT.008.024 ᐋᐱᒋ ᑕᔥ ᑮᓭᓴᑰᒋ ᐸᑲᒫᓂᒪᓂᓂ ᐃᐃᒫ ᓵᑲᐃᑲᓃᕽ᙮ ᐋᐱᒋ ᑕᔥ ᑮᑭᒋᒪᒫᑳᔥᑳᓂ, ᐁᑮ ᑭᒋ ᓵᓰᑲᐅᑯᐙᒡ᙮ ᐋᒋᑯ ᑕᔥ ᐐᓐ ᒋᓴᔅ ᑮᓇᓂᐹ᙮

8:25b.MAT.008.025 ᐃᑭ ᑕᔥ ᑭᑭᓄᐊᒪᐙᑲᓇᒃ ᐯᔓ ᐅᑮᓈᓯᑲᐙᐙᓐ ᐁᑮᐋᒪᒋᐋᐙᒡ ᑲᔦ ᐁᑮᐃᓈᐙᒡ: ᑌᐯᒋᑫᔭᓐ, ᐱᒫᒋᐃᔑᓈᒻ! ᐋᔕ ᑭᓂᔑᐗᓈᑎᓯᒥᓐ!

8:26b.MAT.008.026 ᒋᓴᔅ ᐅᑮᐃᓈᐞ: ᑮᓇᐙ ᑳᔭᑳᓯᕽ ᑭᑌᐺᔦᑕᒧᐎᓂᐙ! ᐌᑯᓀᓐ ᐌᒋ ᓭᑭᓯᔦᒃ? ᑮᐙᓂᔥᑳ ᑕᔥ ᐁᑮ ᑲᓅᑕᕽ ᓅᑎᓂᓂ, ᓵᑲᐃᑲᓃᓂ ᑲᔦ, ᐐᑫ ᑕᔥ ᑮᐊᓂ ᐊᓍᑎᓂᓂ᙮

8:27b.MAT.008.027 ᑲᑭᓇ ᑕᔥ ᑮᑭᒋᒫᒪᑳᑌᑕᒨᒃ ᐁᑮᐃᑭᑐᐙᒡ: ᑳᓇᑲ ᐊᐌᑴᓐ ᐁᑎᓅᐎᑴᓐ ᐗᐊ ᐃᓂᓂ? ᐊᐙᒡ ᑲᔦ ᓅᑎᓐ, ᓵᑲᐃᑲᓐ ᑲᔦ ᐁᐱᓯᑖᑯᒡ!

8:28b.MAT.008.028 ᒋᓴᔅ ᑕᔥ ᐊᐲ ᑳᐱ ᑕᑯᔑᕽ ᐃᐃᒫ ᑳᑕᕒᐊ ᐊᑮᕽ ᐊᑳᒥᕽ ᐅᑮᓇᑭᔥᑳᑰᐞ ᓃᔑᓐ ᐃᓂᓂᐗᐞ ᐁᑮᐅᒌᓂᒡ ᐃᐃᒫ ᑳᐃᔑᑖᓂᒡ ᓇᐃᓂᑏᐎᑲᒥᑯᕽ ᐁᐊᔮᓂᑭᓐ ᑳᔑ ᐐᐸᑲᒥᑳᓂᑭᓐ᙮ ᐃᐃ ᑕᔥ ᑳᐊᐲᒋ ᑯᑖᓀᑖᑯᓯᓂᒡ ᐃᓂᓂᐗᐞ ᑳᐐᓐ ᐊᐎᔭ ᑮᐃᔖᓰ ᐃᐃᒫ ᒌᑲᔭᐄ, ᐋᓃᔥ ᒪᒋᐊᒑᑾᐞ ᐅᑮ ᑭᑭᔥᑳᑯᓂ᙮

8:29b.MAT.008.029 ᒦᑕᔥ ᑳᐃᔑᐲᐹᑭᐙᒡ: ᐋᓃᓐ ᐙᑑᑕᐎᔮᕽ ᑮᓐ ᑭᔐᒪᓂᑑ ᐅᑯᓯᓴᓐ! ᒦ ᓇ ᐃ ᐋᔕ ᐁᐐ ᑲᒀᑕᑭᐃᔮᕽ ᒋᑆ ᐅᒋᒋᓭᒃ ᐊᐲ ᑳᐐ ᑲᒀᑕᑭᑑᔮᕽ?

8:30b.MAT.008.030 ᑳᐐᓐ ᐋᐱᒋ ᐙᓴ ᐃᐃᒫ ᑮᑕᔑ ᐐᓯᓂᐗᒃ ᐁᑮ ᐹᑏᓄᐙᒡ ᑰᑰᔕᒃ᙮

8:31b.MAT.008.031 ᐃᑭ ᑕᔥ ᒪᒋᐊᒑᑾᒃ ᐅᑮᐃᓈᐙᓐ: ᑮᔥᐱᓐ ᐐ ᓵᑭᒋᓂᔕᐅᔑᔮᕽ ᐃᐃᒫ ᐃᔑ ᐲᑎᑫᓂᔕᐅᔑᓈᒻ ᑰᑰᔑᑳᕽ᙮

8:32b.MAT.008.032 ᒋᓴᔅ ᑕᔥ ᐅᑮᐃᓈᐞ: ᒫᒑᒃ᙮ ᒦᑕᔥ ᑳᐃᔑ ᓵᑲᐊᒥᓂᒡ, ᐁᑮᐊᐎ ᐲᑎᑫᔥᑲᐙᓂᒡ ᐃᐃ ᑰᑰᔕᐞ᙮ ᔐᒫᒃ ᑕᔥ ᑲᑭᓇ ᑳᐅᑴᓄᓂᒡ ᑰᑰᔕᐞ ᑮᒫᒌᐸᐃᑎᐗᐞ ᐁᔑ ᑮᔥᑳᒪᑎᓈᓂᒃ ᐁᑮ ᑲᑲᒋᐌ ᐸᑯᐲᐸᑑᓂᒡ ᐃᐃᒫ ᓵᑲᐃᑲᓃᕽ, ᑲᑭᓇ ᑕᔥ ᑮᓂᓵᐹᐌᐗᐞ᙮

8:33b.MAT.008.033 ᑳᑮ ᑲᓇᐌᓂᒫᐙᒡ ᐃᑕᔥ ᐃᐃ ᑰᑰᔕᐞ ᑮᑕᐸᓰᐗᒃ᙮ ᐆᑌᓈᕽ ᑮᐃᔖᐗᒃ ᐁᑮ ᒑᑭᑎᐹᒋᒧᐙᒡ ᐋᓃᓐ ᑳᐃᓇᑲᒥᑲᓂᓂᒃ᙮ ᐅᑮ ᑎᐹᒋᒫᐙᐞ ᑲᔦ ᐋᓃᓐ ᑳᐃᔑᓭᓂᒡ ᐃᐃ ᐃᓂᓂᐗᐞ ᑳᑮ ᑭᑭᔥᑳᑯᓂᐸᓐ ᒪᒋᐊᒑᑾᐞ᙮

8:34b.MAT.008.034 ᑲᑭᓇ ᑕᔥ ᐃᐃᒫ ᑳᑮᐅᒌᐙᒡ ᐆᑌᓈᕽ ᐅᑮᐱᐊᑕ ᓇᑭᔥᑲᐙᐙᓐ ᒋᓴᓲᓐ᙮ ᐊᐲ ᑕᔥ ᑳᐙᐸᒫᐙᒡ, ᐅᑮᐊᑕᐌᓂᒫᐙᓐ ᐃᑯᒋ ᐃᒫ ᒋᐅᒋ ᐃᔖᓂᒡ ᐅᑕᑮᒥᐙᕽ᙮

9

9:1b.MAT.009.001 ᒋᓴᔅ ᑕᔥ ᑮᐴᓯ ᒌᒫᓂᕽ ᐊᑳᒥᕽ ᐁᑮᐃᔖᒡ ᐁᑮ ᑮᐌᒡ ᑳᑮᐅᒌᒡ ᐆᑌᓈᕽ᙮

9:2b.MAT.009.002 ᑮᐲᑕᒪᐙ ᑕᔥ ᐯᔑᒃ ᐃᓂᓂᐗᓐ ᐁᑳ ᐁᑮ ᐱᒧᓭᓯᓂᒃ, ᐁᑮᒥᒋᐱᒥᔑᓂᓂᒡ ᓂᐯᐎᓂᕽ᙮ ᐊᐲ ᑕᔥ ᒋᓴᔅ ᐁᑮᐙᐸᑕᒪᐙᒡ ᐋᓃᓐ ᐁᐲᒋ ᑌᐺᔦᑕᒥᓂᒡ ᐃᓂᐌᓂᐗᐞ ᑳᐲᓂᑯᓂᒡ, ᐅᑮᐃᓈᓐ ᐃᓂ ᑳᐋᑯᓯᓂᒡ: ᒪᔥᑲᐌᑕᓐ, ᓃᒌ! ᑭᒪᒋᑑᑕᒧᐎᓇᓐ ᐴᓀᒋᑳᑌᐗᓐ᙮

9:3b.MAT.009.003 ᐋᓂᑕ ᑕᔥ ᐃᑭ ᑳᑮᐊᔮᐙᒡ ᐃᐃᒫ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᑮᐊᔨᓀᑕᒨᒃ: ᐗᐊ ᐃᓂᓂ ᐅᐹᐱᓀᓂᒫᓐ ᑭᔐᒪᓂᑑᓐ!

9:4b.MAT.009.004 ᒋᓴᔅ ᐅᑮ ᑭᑫᓂᒫᐞ ᐋᓃᓐ ᐁᓀᑕᒥᓂᒡ᙮ ᒦᑕᔥ ᑳᐃᓈᒡ: ᐌᑯᓀᓐ ᓅᒋᑯ ᐌᒋ ᐃᓀᑕᒣᒃ?

9:5b.MAT.009.005 ᐋᓃᓐ ᐃᐃᐌ ᑫᐌᑕᑭᐸᓐ ᒋᐃᑭᑐᔮᐹᓐ? ᐴᓀᒋᑳᑌᐗᓐ ᑭᒪᒋᑑᑕᒧᐎᓇᓐ, ᒫᑭᔖ ᑲᔦ ᒋᐃᑭᑐᔮᐹᓐ: ᐸᓯᑸᓐ ᒋᐱᒧᓭᔭᓐ?

9:6b.MAT.009.006 ᒋᐙᐸᑕᒣᒃ ᐃᑕᔥ ᐁᐊᔮᒡ ᒪᔥᑲᐎᓰᐎᓐ ᐊᐊ ᐃᓂᓂ ᐅᑯᓯᓴᓐ ᐅᐅᒫ ᐊᑮᕽ ᒋᐴᓀᑕᒫᑫᓂᒡ ᐃᓂ ᒪᒋᑑᑕᒧᐎᓇᓐ, ᒦᑕᔥ ᑳᐃᓈᒡ ᐃᓂ ᑳᐋᑯᓯᓂᒡ: ᐸᓯᑸᓐ, ᐅᑖᐱᓇᓐ ᑭᓂᐯᐎᓐ, ᑮᐌᓐ! ᐅᑮᐃᓈᓐ᙮

9:7b.MAT.009.007 ᐊᐊ ᑕᔥ ᐃᓂᓂ ᑮᐸᓯᑸ ᔐᒫᒃ ᐁᑮ ᑮᐌᒡ᙮

9:8b.MAT.009.008 ᐃᑭ ᑕᔥ ᐃᐃᒫ ᑳᒫᒪᐌᓄᐙᒡ ᐊᐲ ᑳᐙᐸᑕᒧᐙᒡ ᑳᑮᐃᓇᑲᒥᑲᓂᓂᒃ, ᐋᐱᒋ ᑮᓭᑭᓯᐗᒃ, ᐁᑮᒦᑴᒋᐌᓂᒫᐙᒡ ᑭᔐᒪᓂᑑᓐ ᑳᒦᓈᒡ ᐃᓂᓂᐗᐞ ᐅᐅ ᑎᓄ ᑲᔥᑭᐁᐎᓯᐎᓐ᙮

9:9b.MAT.009.009 ᒦᑕᔥ ᐃᒫ ᒋᓴᔅ ᐁᐊᓂᐅᒋ ᒫᒑᒡ, ᐅᑮᐙᐸᒫᓐ ᐃᓂᓂᐗᓐ ᐁᓇᒪᑕᐱᓂᒡ ᐃᐃᒫ ᑳᑮ ᑕᓇᓄᑮᓂᒡ, ᒫᑎᔪ ᐁᑮᐃᔑᓂᑳᓱᓂᒡ᙮ ᒫᑎᔪ ᑕᔥ ᑮᑎᓄᐎ ᑳᒫᐗᑑᓈᒡ ᑎᐸᐃᑫᐎᔔᓂᔮᓐ᙮ ᒋᓴᔅ ᐅᑮᐃᓈᓐ: ᐱᒥᓂᔕᐅᔑᓐ᙮ ᔐᒫᒃ ᐃᑕᔥ ᑮᐸᓯᑸᐗᓐ ᐁᑮ ᐱᒥᓂᔕᐅᑯᒡ᙮

9:10b.MAT.009.010 ᒣᒀ ᑕᔥ ᒋᓴᔅ ᐅᑭᑭᓄᐊᒪᐙᑲᓇᐞ ᑲᔦ ᐁᐐᓯᓂᐙᒡ ᐃᐃᒫ ᒫᑎᔫᓐ ᐅᐙᑳᐃᑲᓂᓃᕽ, ᑮᐹᑏᓄᐗᐞ ᑳᒫᐗᑑᓈᓂᒡ ᑖᑭᔅ ᔔᓂᔮᓐ, ᑯᑕᒃ ᑲᔦ ᑳᐋᓇᐌᓂᒥᒥᓐᒡ, ᐁᑮᐐᒋ ᐐᓯᓃᒥᑯᐙᒡ᙮

9:11b.MAT.009.011 ᐊᐲ ᑕᔥ ᐯᕒᐊᓰᒃ ᑳᐙᐸᑫᐙᒡ ᐅᑮᐃᓈᐙᓐ ᑭᑭᓄᐊᒪᐙᑲᓇᐞ: ᐌᑯᓀᓐ ᑕᔥ ᑭᑭᑭᓄᐊᒫᑫᒥᐙ ᐌᒋ ᐐᑑᐸᒫᒡ ᐃᐃ ᑎᓄ ᑳᒫᐗᑑᓈᓂᒡ ᑖᑭᔅ ᔔᓂᔮᓐ, ᑯᑕᒃ ᑲᔦ ᐊᐎᔭᐞ ᑳᐋᓇᐌᓂᒥᒥᓐᒡ?

9:12b.MAT.009.012 ᒋᓴᔅ ᐁᑮᓅᑕᐙᒡ ᐅᑮᐃᓈᐞ: ᐃᑭ ᐁᑳ ᑳᐋᑯᓯᓯᒀ ᑳᐐᓐ ᐅᓇᑕᐌᓂᒫᓯᐙᐙᓐ ᒪᔥᑭᑮᐎᓂᓂᐗᓐ, ᑳᐋᑯᓯᐙᒡ ᐁᑕ᙮

9:13b.MAT.009.013 ᐊᓂ ᒫᒑᒃ ᐃᑕᔥ ᒋᑲᑴ ᑭᑫᑕᒣᒃ ᐌᑯᓀᓐ ᐅᐅ ᑳᐅᒋ ᐃᔑᐲᐃᑳᑌᒃ: ᐅᐅ ᑳᐊᑕᐌᑕᒫᓐ ᐃᐃ ᒋᔕᐌᓂᑎᔦᒃ, ᑳᐐᓐ ᐐᓐ ᐁᑕ ᐊᐗᑳᓇᒃ ᒋᓂᓭᒀ ᒋᐸᑭᑎᓂᑳᑫᔦᒃ᙮ ᑳᐐᓐ ᑕᔥ ᐐᓐ ᓂᑮᐅᒋ ᐲᔖᓰ ᒋᐊᑐᒪᒀ ᐅᑾᔭᒀᑎᓰᒃ, ᐃᑭ ᓴ ᒋᐊᑐᒪᒀ ᑳᐋᓇᐌᓂᒥᑣ᙮

9:14b.MAT.009.014 ᐃᑭ ᑳᑮ ᐱᒥᓂᔕᐙᐙᒡ ᒞᓇᓐ ᓰᑲᐊᑖᑫᐎᓂᓂᐗᓐ ᐅᑮ ᐱᓈᓯᑲᐙᐙᓐ ᒋᓴᓲᓐ ᐁᑮᐃᓈᐙᒡ: ᓃᓇᐎᓐᑦ ᐃᑭ ᑲᔦ ᐯᕒᐊᓰᒃ ᒨᔕᒃ ᓂᑑᒋ ᐊᓇᒥᐁᒪᑕᐐᐃᑎᓱᒥᓐ᙮ ᐌᑯᓀᓐ ᑕᔥ ᐐᓇᐙ ᑭᑭᑭᓄᐊᒪᐙᑲᓇᒃ ᐐᑳ ᐌᒋ ᐊᓇᒥᐁᒪᑕᐐᐃᑎᓱᓯᒀ? ᑮᐃᑭᑐᐗᒃ᙮

9:15b.MAT.009.015 ᒋᓴᔅ ᐅᑮᐃᔑ ᓇᑴᑕᐙᐞ: ᒥᓂᒃ ᐃᑯ ᑫᐊᔮᒡ ᐃᐃᒫ ᐊᐊ ᐃᓂᓂ ᑳᑭᒋᐐᑎᑫᒡ, ᑭᑎᓀᑖᒻ ᐃᓇ ᒋᒫᓀᑕᒥᓂᐸᓐ ᐃᐃ ᑳᐱ ᐊᑕᐙᐸᒥᑯᒡ? ᑳᐐᓐ ᐄᑐᒃ! ᓂᑯᑎᕽ ᐃᑕᔥ ᑕᐃᔑᓭᓂ ᒋᒫᒌᒋᑲᓂᐎᒡ ᐊᐊ ᑳᑭᒋᐐᑎᑫᒡ ᐃᐃᒫ ᑳᔑ ᐊᔮᓂᒡ, ᒦᑕᔥ ᐃᐃ ᐊᐲ ᑫᒫᓀᑕᒥᓂᒡ ᒋᐅᒋ ᐐᓯᓂᓯᓂᒃ᙮

9:16b.MAT.009.016 ᐊᐎᔭ ᐁᐸᑾᐊᕽ ᑫᑌᐲᓯᑲᐙᑲᓂᓂ, ᑳᐐᓐ ᐐᓐ ᐅᑖᐸᒋᑑᓰᓐ ᐅᔥᑭ ᐃᔒᑭᓅᓂ᙮ ᐋᓃᔥ ᑮᔥᐱᓐ ᐯᑾᒋᓭᒃ ᐃᐃ ᐸᑾᐃᑲᓐ ᑖᑭᑭ ᐸᑾᒋᓭ ᐃᐃ ᑫᑌᐲᓯᑲᐙᑲᓐ᙮ ᐋᒌᑫ ᑕᔥ ᑖᒪᑭᐸᑯᓀᓭ᙮

9:17b.MAT.009.017 ᑳᐐᓐ ᑲᔦ ᐊᐎᔭ ᐅᓰᑭᓇᓰᓐ ᐅᔥᑭᔔᒥᓈᐳ ᐃᐃᒫ ᑫᑌᔔᒥᓈᐳᐗᔑᕽ᙮ ᐋᓃᔥ ᑮᔥᐱᓐ ᐃᔑᒋᑫᐸᓐ ᑖᑮ ᐲᑯᓭᐗᓐ ᔔᒥᓈᐳᐗᔕᓐ, ᑲᔦ ᐅᔥᑭᔔᒥᓈᐳ ᑖᑮ ᓰᑭᓭ, ᐃᓂ ᑕᔥ ᔔᒥᓈᐳᐗᔕᓐ ᑕᓂᔑᐗᓈᒋᒋᑳᑌᐗᓐ᙮ ᐃᒫ ᑕᔥ ᐅᔥᑭᔔᒥᓈᐴᐗᔒᕽ ᐃᔑᐲᒋᓰᑭᓂᑳᑌ ᐃᐃ ᐅᔥᑭᔔᒥᓈᐳ, ᒦᑕᔥ ᒥᒋᓃᔥ ᐁᔑ ᒥᓄᑲᓇᐌᒋᑳᑌᑭᓐ ᔔᒥᓈᐳ ᑲᔦ ᔔᒥᓈᐳᐗᔕᓐ᙮

9:18b.MAT.009.018 ᒣᒀ ᑕᔥ ᐅᐅ ᒋᓴᔅ ᐁᐃᑭᑐᒡ, ᐯᔑᒃ ᒎᐗᓐ ᑳᐅᑭᒫᐌᑖᑯᓯᓂᒡ ᐅᑮ ᐱᓈᓯᑳᑰᓐ ᐁᑮᐅᒋᒌᑾᓇᐲᑖᑯᒡ ᐁᑮᐃᑯᒡ: ᓂᑖᓂᔅ ᑮᐃᔥᒀᐱᒫᑎᓯ ᓅᑯᒻ᙮ ᑕᑲ ᐱᓵᒥᓐ ᒋᐱᒫᑎᓯᒡ, ᐅᑮᐃᑰᓐ᙮

9:19b.MAT.009.019 ᔐᒫᒃ ᐃᑕᔥ ᒋᓴᔅ ᑮᐸᓯᑸ ᐁᑮᐊᓂ ᐐᒌᐙᒡ᙮ ᐅᑭᑭᓄᐊᒪᐙᑲᓇᐞ ᑲᔦ ᑮᐃᔖᐗᐞ᙮

9:20b.MAT.009.020 ᐯᔑᒃ ᐃᑕᔥ ᐃᑴ ᒥᑖᔑᓃᔓᐱᐴᓐ ᐁᑮᐅᒋᑲᐎᓂᓂᒃ ᐅᒥᔅᑶ, ᐅᑖᓈᕽ ᐅᑮᐱᐅᒋ ᓈᓯᑲᐙᓐ ᒋᓴᓲᓐ᙮ ᐊᐊ ᑕᔥ ᐃᑴ ᐅᑮ ᓵᒥᓇᒪᐙᓐ ᒋᓴᓲᓐ ᑳᔑ ᑮᑫᔩᑲᓂᓂᒃ ᐅᑲᔥᑮᑮᐎᓂᓂ᙮

9:21b.MAT.009.021 ᐋᓃᔥ ᑮᐃᑎᓱ: ᑮᔥᐱᓐ ᐁᑕ ᓵᒥᓇᒧᐗᒃ ᐃᐃ ᐅᑲᔥᑮᑮᐎᓐ, ᒦᐃ ᒋᒥᓄᐊᔮᔮᓐ᙮

9:22b.MAT.009.022 ᒋᓴᔅ ᐁᑮ ᑴᑭᑖᒡ ᐅᑮᐙᐸᒫᓐ ᐁᑮᐃᓈᒡ: ᒪᔥᑲᐌᑕᓐ! ᑭᑌᐺᔦᑕᒧᐎᓐ ᑭᒥᓄᐊᔮᐃᑯᓐ᙮ ᔐᒫᒃ ᐃᑕᔥ ᑮᒥᓄᐊᔮ ᐊᐊ ᐃᑴ᙮

9:23b.MAT.009.023 ᐊᐲ ᑕᔥ ᒋᓴᔅ ᐁᑮ ᐲᑎᑫᒡ ᑳᐅᑭᒫᐌᑖᑯᓯᓂᒡ ᐅᐙᑳᐃᑲᓂᓃᕽ, ᐅᑮᐙᐸᒫᐞ ᑳᑮ ᑭᑐᒋᑫᐴᑖᒋᑫᓂᒡ ᐊᐎᔭᐞ ᑲᔦ ᐁᒥᑯᔥᑳᒋᒋᑫᓂᒡ᙮

9:24b.MAT.009.024 ᐅᑮᐃᓈᐞ ᐃᑕᔥ: ᑲᑭᓇ ᑳᑕᔑᔦᒃ ᓵᑲᐊᒧᒃ! ᐊᐊ ᐃᑴᓭᔅ ᑳᐐᓐ ᓂᐳᓰ, ᒥᒋᓂᐹ ᐅᔕ᙮ ᑲᑭᓇ ᑕᔥ ᐅᑮ ᐹᐱᐃᑰᐞ ᐁᑮᒫᓀᓂᒥᑯᒡ᙮

9:25b.MAT.009.025 ᐁᑮ ᓵᑭᒋᓂᔕᐅᑣ ᑕᔥ ᑲᑭᓇ, ᒋᓴᔅ ᑮᐲᑎᑫ ᐋᑎ ᑳᑮᐃᔑ ᐱᒥᔑᓂᓂᒡ ᐃᑴᓭᓴᓐ, ᒦᑕᔥ ᑳᑮᐃᔑ ᐅᑖᐱᓇᒪᐙᒡ ᐅᓂᒌᓂ᙮ ᔐᒫᒃ ᐃᑕᔥ ᑮᐗᓂᔥᑳᐗᓐ᙮

9:26b.MAT.009.026 ᒥᓯᐌ ᑕᔥ ᐃᐃᒫ ᐊᑮᕽ ᑮᓅᑖᑳᓂᐗᓂᓂ ᐅᐅ ᑳᑮᐃᓇᑲᒥᑲᒃ᙮

9:27b.MAT.009.027 ᐊᐲ ᑕᔥ ᒋᓴᔅ ᑳᐊᓂᐅᒋ ᒫᒑᒡ, ᒣᒀ ᑕᔥ ᐁᐊᓂ ᐱᒧᓭᒡ, ᓃᔑᓐ ᑳᑮᐙᐱᓯᓂᒃ ᐅᑮ ᐱᒥᓂᔕᐅᑰᐞ ᐁᑮᐃᔑ ᔖᑯᐌᓂᒡ: ᑮᓐ ᑌᐱᑎᕽ ᑳᐅᑕᑳᓀᓯᔭᓐ! ᑯᐹᑌᓂᒥᔑᓈᒻ!

9:28b.MAT.009.028 ᐊᐲ ᑕᔥ ᒋᓴᔅ ᐁᑮᐊᓂ ᐲᑎᑫᒡ ᐙᑳᐃᑲᓂᕽ ᐅᑮ ᐱᓈᓯᑳᑰᐞ ᐃᐃ ᑳᑮᐙᐱᓯᓂᒃ᙮ ᒦᑕᔥ ᑳᑮᐃᔑ ᑲᑴᒋᒫᒡ: ᑭᑌᐺᑖᒻ ᐃᓇ ᒋᑲᔥᑭᑑᔮᓐ ᐅᐅ ᒋᐃᔑᒋᑫᔮᓐ? ᒦᑕᔥ ᑳᑮᐃᑯᒡ: ᐁᐊᐞ᙮

9:29b.MAT.009.029 ᒋᓴᔅ ᑕᔥ ᐅᑮ ᓵᒥᓈᐞ ᐅᔥᑮᔑᑯᓃᕽ ᐁᑮᐃᓈᒡ: ᑕᐃᔑᓈᑾᓐ ᐋᓃᓐ ᑳᐃᔑ ᑌᐺᔦᑕᒣᒃ᙮

9:30b.MAT.009.030 ᔐᒫᒃ ᐃᑕᔥ ᑮᐙᐱᐗᐞ᙮ ᐋᐱᒋ ᑕᔥ ᐅᑮᐊᔮᒀᒥᒫᐞ ᐁᑮᐃᓈᒡ: ᑫᑯ ᐐᓐ ᐐᑕᒪᐙᑫᒀᓂᒃ ᐊᐎᔭᒃ᙮

9:31b.MAT.009.031 ᐱᓵᓐ ᐃᑕᔥ ᐃᑯ ᒦᐃ ᑳᐃᔑ ᐸᐹ ᑎᐹᒋᒥᑯᒡ ᐃᐃᒫ ᒥᓯᐌ ᐊᑮᕽ᙮

9:32b.MAT.009.032 ᐊᐲ ᑕᔥ ᑳᐊᓂ ᒫᒑᓂᒡ ᐃᐃ ᐃᓂᓂᐗᐞ ᑳᑮᐙᐱᐋᒡ, ᐊᐎᔭᒃ ᐅᑮ ᐲᑕᒪᐙᐙᓐ ᒋᓴᓲᓐ ᐯᔑᒃ ᐃᓂᓂᐗᓐ ᑳᑮᑭᑐᓯᓂᒃ, ᐋᓃᔥ ᐅᑮ ᑭᑭᔥᑳᑯᓂ ᒪᒋᐊᒑᑾᓐ᙮

9:33b.MAT.009.033 ᐊᐲ ᑕᔥ ᑳᐃᔥᒀ ᓵᑭᒋᐌᐱᓂᑲᓂᐎᒡ ᐊᐊ ᒪᒋᐊᒑᒃ, ᔐᒫᒃ ᑕᔥ ᑮᑲᑭᑐ ᐊᐊ ᐃᓂᓂ᙮ ᑲᑭᓇ ᐊᐎᔭᒃ ᑮᑭᒋᒫᒪᑳᑌᑕᒨᒃ᙮ ᑳᐐᓐ ᐐᑳ ᐙᐸᒋᑳᑌᓯᓅᓐ ᑫᑰᓐ ᒋᐃᔑᓈᑾᒃ ᐅᐅᒫ ᐃᔅᕒᐃᔭᓬᐃᑳᕽ ! ᑮᐃᑭᑐᐗᒃ᙮

9:34b.MAT.009.034 ᐯᕒᐊᓰᒃ ᑕᔥ ᐐᓇᐙ ᑮᐃᑭᑐᐗᒃ: ᑭᒋᐅᑭᒫ ᒪᒋᐊᒑᑾᓐ ᐅᔕ ᐅᒦᓂᑰᓐ ᒪᔥᑲᐎᓰᐎᓐ ᑳᐅᒋ ᑲᔥᑭᐋᒡ ᐁᓵᑭᒋᐌᐱᓈᒡ ᐃᐃ ᒪᒋᐊᒑᑾᐞ᙮

9:35b.MAT.009.035 ᒥᓯᐌ ᑕᔥ ᒋᓴᔅ ᑮᐸᐹ ᐃᔖ ᐆᑌᓇᐗᓐ ᑲᔦ ᑳᐊᔨᔑᑖᓂᐗᓂᓂᒃ ᐁᑮ ᐸᐹᑭᑭᓄᐊᒫᑫᒡ ᒎᐗᒃ ᐅᑕᓇᒥᐁᐎᑲᒥᑯᐙᕽ ᐁᑮ ᑲᑮᒀᑕᕽ ᒥᓍᒋᒧᐎᓐ, ᐃᐃᐌ ᑭᔐᒪᓂᑑ ᐐᐸ ᑳᐐᐅᔑᓯᑑᒡ ᐅᑎᐯᒋᑫᐎᓐ᙮ ᐅᑮᒥᓄᐊᔮᐋᐞ ᑲᔦ ᑲᑭᓇ ᑳᑮᐋᑯᓯᓂᒡ ᐋᓃᓂᑯ ᑳᑮᐃᓈᐱᓀᓂᒡ᙮

9:36b.MAT.009.036 ᐁᑮᐙᐸᒫᒡ ᐃᑕᔥ ᐁᐲᒋ ᐹᑏᓄᓂᒡ ᐊᐎᔭᐞ, ᐋᐱᒋ ᐅᑮ ᑭᒋᑰᐹᑌᓂᒫᐞ᙮ ᐋᓃᔥ ᑮᒥᑯᔥᑳᒋᐋᐗᐞ, ᑮᑆᓇᐎᒋᑫᐗᐞ ᑲᔦ, ᑖᐱᔥᑰ ᒪᓇᒑᓂᔕᒃ ᑳᐊᔮᐙᓯᒀ ᑳᑲᓇᐌᓂᒥᑯᐙᒡ᙮

9:37b.MAT.009.037 ᒦᑕᔥ ᑳᑮᐅᒋ ᑲᓅᓈᒡ ᐅᑭᑭᓄᐊᒪᐙᑲᓇᐞ: ᐃᓇᔥᑫ ᐹᑏᓇᑦ ᑫᒪᓂᔑᑳᑌᒃ᙮ ᐋᐱᒋ ᑕᔥ ᐸᑮᐎᐗᒃ ᑳᒨᔕᑭᓂᑫᐙᒡ᙮

9:38b.MAT.009.038 ᑲᑴᒋᒥᒃ ᐃᑕᔥ ᑭᔐᒪᓂᑑ ᑳᑎᐯᑕᕽ ᒪᓂᔑᑫᐎᓐ ᒋᐃᔑᓂᔕᐙᒡ ᑫᔮᐱ ᐅᑕᓄᑮᐋᑲᓇᐞ ᑫᒨᔕᑭᓇᒥᓂᒡ ᑫᒪᓂᔑᑳᑌᓂᑭᓐ, ᐅᑮᐃᓈᐞ᙮

10

10:1b.MAT.010.001 ᒋᓴᔅ ᑕᔥ ᐅᑮᐊᑐᒫᐞ ᐃᐃ ᑳᒥᑖᔑᓃᔑᓂᒡ ᐅᑭᑭᓄᐊᒪᐙᑲᓇᐞ ᐁᑮᒦᓈᒡ ᑲᔥᑭᐁᐎᓯᐎᓐ ᒋᓵᑭᒋᐌᐱᓈᓂᒡ ᒪᒋᐊᒑᑾᐞ, ᒋᒥᓄᐊᔮᐋᓂᒡ ᑲᔦ ᐊᐎᔭᐞ ᐋᓃᓐ ᐃᑯ ᑳᐃᓈᐱᓀᓂᒡ᙮

10:2b.MAT.010.002 ᒦᑕᔥ ᐅᐅ ᑳᐃᔑᓂᑳᓱᓂᒡ ᐃᓂᐌᓂᐗᐞ ᒥᑖᔑᓃᔑᓐ ᐅᑎᔑᓂᔕᐙᑲᓇᐞ: ᐊᐊᐌ ᓂᑕᒻ, ᓵᐃᒪᓐ ᑳᑮᐅᔑᓂᑳᓂᓐᒡ ᐲᑕᕒ, ᑲᔦ ᐐᒋᑭᐌᓯᐗᓐ ᐁᑕᕒᐆᓐ, ᔑᑾ ᒌᒥᔅ ᑲᔦ ᐐᒋᑭᐌᓯᐗᓐ ᒞᓇᓐ ᑳᑮᐅᑌᑌᐙᒡ ᓭᐸᑏᓐ ᙮

10:3b.MAT.010.003 ᔑᑾ ᐱᓬᐊᑉ ᑲᔦ ᐹᕒᑖᓬᐊᒥᔪ, ᔑᑾ ᑣᒪᔅ, ᑲᔦ ᒫᑎᔪ ᑳᑮ ᑎᐸᐃᑫᐃᐌᒡ, ᔑᑾ ᒌᒥᔅ ᑳᑮᐅᑌᑌᒡ ᐋᓬᐱᔭᓴᓐ, ᑲᔦ ᑖᑎᔭᔅ ᙮

10:4b.MAT.010.004 ᔑᑾ ᓵᐃᒪᓐ ᒦ ᐊᐌ ᐯᔑᒃ ᑳᐐ ᑲᑴ ᐋᒋᓭᑑᒡ ᐅᑭᒫᐎᐎᓐ ᑳᑎᓅᐎᒡ᙮ ᑲᔦ ᒎᑕᔅ ᐃᔅᑫᕒᐃᔭᑦ ᑳᐐᒪᒥᔑᐋᒡ ᒋᓴᓲᓐ᙮

10:5b.MAT.010.005 ᒋᓴᔅ ᐅᑮᒫᒋᓂᔕᐙᐞ ᐃᐃ ᑳᒥᑖᔑᓃᔑᓂᒡ ᐅᐅ ᐁᑮᐃᓈᒡ: ᑫᑯ ᐐᓐ ᐃᔖᑫᒃ ᑳᐃᓇᒧᒃ ᑳᒎᐎᐎᓯᒀ ᑳᐃᔑ ᐊᔮᐙᒡ, ᐃᐃᒫ ᑲᔦ ᑳᐃᔑ ᐆᑌᓇᐎᐃᑎᐙᒡ ᓴᒣᕒᐃᔮᐎᓂᓂᐗᒃ ᙮

10:6b.MAT.010.006 ᐃᐃᒫ ᑕᔥ ᐁᑕ ᐃᔖᒃ, ᐃᔅᕒᐃᔭᓬᐃᓂᓂᐗᒃ ᑳᔑ ᐊᔮᐙᒡ, ᑖᐱᔥᑰ ᒫᓇᒑᓂᔕᒃ ᑳᐗᓂᔑᓄᐙᒡ ᑳᐃᔑᓈᑯᓯᐙᒡ᙮

10:7b.MAT.010.007 ᒫᒑᒃ ᐃᑕᔥ ᒋᔑ ᐐᑕᒫᑫᔦᒃ ᐅᐅ ᐃᑭᑐᐎᓐ: ᐊᔕ ᐯᔓᓈᑾᓐ ᑭᔐᒪᓂᑑ ᐁᐐᐅᔑᓯᑑᒡ ᐅᑎᐯᒋᑫᐎᓐ᙮

10:8b.MAT.010.008 ᒥᓄᐊᔮᐃᑯᒃ ᐅᑖᑯᓰᒃ, ᐱᒫᒋᐃᑯᒃ ᑳᓂᐳᐙᒡ, ᒥᓄᐊᔮᐃᑯᒃ ᑳᐅᒥᑮᐙᐱᓀᐙᒡ, ᓵᑭᒋᐌᐱᓂᑯᒃ ᒪᒋᐊᒑᑾᒃ᙮ ᑳᐐᓐ ᑭᑮ ᑎᐸᐊᓰᒻ ᑳᑮᒦᓂᑰᔦᒃ: ᒦᔥ ᐃᐃ ᐯᔑᑾᓐ ᐃᔑ ᒦᑭᐌᒃ᙮

10:9b.MAT.010.009 ᑫᑯ ᐐᓐ ᑭᐲᑖᓱᓂᐙᕽ ᐃᔑ ᒫᒌᓈᑫᒃ ᐅᓵᐎ ᔔᓂᔮ, ᐙᐹᐱᑯ ᔔᓂᔮ ᑲᔦ, ᑫᑯ ᑲᔦ ᒫᒌᓈᑫᒃ ᐸᑮ ᑳᐃᓇᑭᓱᒡ ᐅᓵᐙᐱᑯ ᔔᓂᔮ᙮

10:10b.MAT.010.010 ᑫᑯ ᐐᓐ ᑲᔦ ᒫᒌᑑᑫᒃ ᒪᔥᑭᒧᑦ, ᑯᑕᒃ ᐸᐸᑭᐗᔮᓐ, ᑯᑕᒃ ᒪᑭᓯᓇᓐ, ᓴᑲᐅᓈᒃ ᑲᔦ᙮ ᐋᓃᔥ ᐅᑕᓄᑮ ᑖᒦᓈ ᐋᓃᓐ ᐁᔑ ᓅᑌᓭᒡ᙮

10:11b.MAT.010.011 ᐊᐲ ᐊᓂᑕᑯᔑᓀᒃ ᐌᑎ ᐆᑌᓈᕽ ᑯᒫ ᑲᔦ ᑖᐎᓂᕽ, ᓇᓈᑕᐙᐸᒥᒃ ᐊᐎᔭ ᑫᐃᓈᑎᓯᒡ ᑫᐲᑎᑲᓂᓀᒃ᙮ ᒦᑕᔥ ᐃᐃᒫ ᑫᐊᔮᔦᒃ ᐹᒫ ᐅᒋᒋᓭᒃ ᒋᓂ ᒫᒑᔦᒃ᙮

10:12b.MAT.010.012 ᐊᐲ ᑕᔥ ᐲᑎᑲᓂᑰᔦᒃ ᐃᐃᒫ ᐙᑳᐃᑲᓂᕽ, ᒦᑕᔥ ᑫᐃᑭᑐᔦᒃ: ᐱᓵᓂᓯᐎᓐ ᑭᑲ ᐐᒌᐎᑯᒻ᙮

10:13b.MAT.010.013 ᑮᔥᐱᓐ ᑕᔥ ᒥᓄᐐᒌᐎᓀᒀ ᐃᐃᒫ ᑳᐊᔮᐙᒡ ᐙᑳᐃᑲᓂᕽ, ᐃᐃᒫ ᐃᔑᓇᑲᑕᒧᒃ ᐃᐃᐌ ᑳᑮᐃᑭᑐᔦᒃ ᑮᐱ ᐲᑎᑫᔦᒃ᙮ ᑮᔥᐱᓐ ᑕᔥ ᐃᓈᑎᓯᓯᒀ ᐃᐃᒫ ᐙᑳᐃᑲᓂᕽ, ᑮᐌ ᐅᑖᐱᓇᒧᒃ ᐃᐃᐌ ᑳᑮᐃᑭᑐᔦᒃ: ᐱᓵᓂᓯᐎᓐ ᑭᑲ ᐐᒌᐎᑯᒻ᙮

10:14b.MAT.010.014 ᑮᔥᐱᓐ ᑕᔥ ᐲᑎᑲᓂᑰᓯᐌᒃ, ᐱᓯᑖᑰᓯᐌᒃ ᑲᔦ ᐃᐃᒫ ᐆᑌᓈᕽ, ᑯᒫ ᑲᔦ ᑖᐎᓂᕽ, ᒦᑕᔥ ᐃᔑ ᐹᐹᐎᓯᑌᔑᒨᓄᒃ, ᒋᓂ ᒫᒑᔦᒃ᙮

10:15b.MAT.010.015 ᓇᐗᒡ ᓃᐱᐗᐞ ᐅᑲ ᐃᓈᑯᓈᐞ ᑭᔐᒪᓂᑑ ᐃᐃᒫ ᑳᐊᔮᓂᒡ ᐆᑌᓈᕽ, ᐊᐲᒡ ᐐᓐ ᐃᐃᒫ ᑳᑮᐊᔮᓂᒡ ᔂᑕᒦᕽ, ᑲᒸᕒᐊ ᐆᑌᓈᕽ ᑲᔦ᙮

10:16b.MAT.010.016 ᐱᓯᑕᐎᔑᒃ! ᐅᐅ ᑳᐃᔑᓂᔕᐅᓇᑰᒃ, ᒦᐃ ᐁᔑᓈᑯᓯᔦᒃ ᑖᐱᔥᑰ ᑫᓈᑕᒫᑎᓱᓯᒀ ᒫᓇᒑᓂᔕᒃ ᑳᐃᔖᐙᒡ ᒣᑴ ᒪᐄᑲᓂᑳᕽ᙮ ᑳ ᐊᐲᒋ ᐊᔮᒀᒥᓯᒡ ᐃᑕᔥ ᑭᓀᐱᒃ ᒦᐃ ᓇᑫ ᐃᔑ ᐊᔮᒀᒥᓯᒃ; ᑳᐊᐲᒋ ᓅᑳᑎᓯᒡ ᐊᐊ ᐅᒦᒦᔅ, ᒦᐃ ᐊᐲᒋ ᓅᑳᑎᓯᒃ᙮

10:17b.MAT.010.017 ᐊᔮᒀᒥᓯᒃ! ᐊᔮᐗᒃ ᐅᔕ ᐃᓂᓂᐗᒃ ᑫᑕᑯᓂᓀᒀ ᑫᐃᔑᐎᓂᓀᒀ ᑲᔦ ᑎᐹᑯᓂᑫᐎᑲᒥᑯᕽ, ᑭᑲ ᐸᐸᔕᔐᐅᑯᐙᒃ ᑲᔦ ᐅᑕᓇᒥᐁᐎᑲᒥᑯᐙᕽ᙮

10:18b.MAT.010.018 ᓃᓐ ᐁᑎᐯᓂᒥᓇᑰᒃ ᑭᑲᐅᒋ ᐃᔑᐎᓂᑰᒻ ᐋᑎ ᑫᐃᔑ ᑎᐹᑯᓂᓀᒀ ᐃᑭ ᑳᐅᑭᒫᐌᑖᑯᓯᐙᒡ, ᑭᒋᐅᑭᒫᒃ ᑲᔦ, ᒋᐐᑕᒪᐌᒀ ᐃᐃ ᒥᓍᒋᒧᐎᓐ ᐃᑭ ᑳᑮ ᐲᓂᓀᒀ ᑲᔦ ᐃᑭ ᑳᒎᐎᐎᓯᒀ᙮

10:19b.MAT.010.019 ᑫᑯ ᐐᓐ ᐗᐙᓀᑕᑫᒃ ᐋᓃᓐ ᑫᐃᑭᑐᔦᒃ, ᐋᓃᓐ ᑲᔦ ᒪᔮ ᑫᐃᑭᑐᔦᒃ᙮ ᑭᑲ ᒦᓂᑰᒻ ᐅᔕ ᐋᓃᓐ ᑫᐃᑭᑐᔦᒃ ᐊᐲ ᐅᒋᒋᓭᒃ᙮

10:20b.MAT.010.020 ᑳᐐᓐ ᑕᔥ ᑮᓇᐙ ᑳᑮᑭᑐᔦᒃ, ᐃᓂ ᓴ ᑭᑌᑌᐙ ᐅᑕᒑᑾᓐ ᑭᑲ ᐐᒋᐃᑯᐙ ᐋᓃᓐ ᑫᐃᑭᑐᔦᒃ᙮

10:21b.MAT.010.021 ᐃᓂᓂᐗᒃ ᑲᔦ ᐱᓵᓂᑯ ᑕᒦᑭᐌᐗᒃ ᐐᒋᑭᐌᐙᐞ ᒋᓂᓯᒥᓐᒡ᙮ ᐅᑌᑌᒫᒃ ᑲᔦ ᒦ ᐯᔑᑾᓐ ᑫᑑᑕᐙᐙᒡ ᐅᓃᒑᓂᓯᐙᐞ᙮ ᐊᐱᓅᒌᔕᒃ ᑲᔦ ᐅᑲ ᔒᑫᓂᒫᐙᐞ ᐅᓃᑭᐃᑯᐙᐞ, ᐅᑲ ᐸᑭᑎᓈᐙᐞ ᑲᔦ ᐱᓵᓂᑯ ᒋᓂᓯᒥᓐᒡ᙮

10:22b.MAT.010.022 ᑲᑭᓇ ᐊᐎᔭᒃ ᑭᑲ ᔒᑫᓂᒥᑯᐙᒃ ᓃᓐ ᐅᒋ ᐁᑎᐯᓂᒥᓇᑰᒃ᙮ ᐊᐊ ᑕᔥ ᑫᒪᔥᑲᐌᑕᕽ ᐁᐸᑭᒌᓯᒃ, ᐲᓂᔥ ᐌᑎ ᑲᑭᓇ ᑫᑰᓐ ᑮᐃᔥᒀᓭᓂᒃ, ᒦ ᐊᐌ ᑫᐱᒫᒋᐃᓐᒡ᙮

10:23b.MAT.010.023 ᑲᒀᑕᑭᐃᑰᔦᒃ ᑲᔦ ᐃᐃᒫ ᐯᔑᒃ ᐆᑌᓈᕽ, ᐸᑳᓐ ᐆᑌᓈᕽ ᐊᐸᐃᐌᒃ᙮ ᑭᑎᔑ ᐐᑕᒪᐎᓂᓂᒻ, ᑳᐐᓐ ᑭᑲ ᑌᑮᔑᑑᓰᒻ ᑭᑕᓄᑮᐎᓂᐙ ᐃᐃᒫ ᐆᑌᓈᑳᕽ ᐃᔅᕒᐃᔭᓬᐃᑳᕽ, ᒦ ᐋᔕ ᒋᑕᑯᔑᓂᓂᒡ ᐃᓂᓂ ᐅᑯᓯᓴᓐ᙮

10:24b.MAT.010.024 ᐊᐊ ᑭᑭᓄᐊᒪᐙᑲᓐ ᑳᐐᓐ ᐊᐗᔑᒣ ᐊᐲᑌᑖᑯᓯᓰ ᑳᐊᐲᑌᑖᑯᓯᓂᒡ ᐃᓂ ᑳᑭᑭᓄᐊᒫᑯᒡ᙮ ᐊᐊ ᑲᔦ ᑳᐸᒦᑖᑫᒡ ᑳᐐᓐ ᐊᐗᔑᒣ ᐊᐲᑌᑖᑯᓯᓰ ᑳᐊᐲᑌᑖᑯᓯᓂᒡ ᐃᓂ ᐅᑑᑭᒫᒪᓐ᙮

10:25b.MAT.010.025 ᒦᑕᔥ ᐃᐃ ᑌᒥᓂᒃ ᒋᐃᓀᑕᑭᐸᓐ ᒋᐃᔑ ᐊᔮᒡ ᐊᐊ ᑭᑭᓄᐊᒪᐙᑲᓐ ᑳᐃᔑ ᐊᔮᓂᒡ ᑳᑭᑭᓄᐊᒫᑯᒡ, ᐊᐊ ᑲᔦ ᑳᐸᒦᑖᑫᒡ ᒋᐃᔑ ᐊᔮᒡ ᑳᐃᔑ ᐊᔮᓂᒡ ᐃᓂ ᐅᑑᑭᒫᒪᓐ᙮ ᑮᔥᐱᓐ ᒪᒋᐊᔭᐋ ᐱᐁᓬᓯᐳᓬ ᐃᔑᓂᑳᒋᑲᓂᐎᒡ ᐊᐊ ᑳᓃᑳᓂᔥᑲᕽ ᐃᐃ ᑖᐎᓐ, ᐊᐗᔑᒣ ᑕᔥ ᑕᑭᒋ ᐃᔑᓂᑳᒋᑲᓂᐎᐗᐞ ᑳᓃᑳᓂᔥᑲᐙᒡ᙮

10:26b.MAT.010.026 ᑫᑯ ᐐᓐ ᑯᓵᑫᒀᓂᒃ ᐃᓂᓂᐗᒃ᙮ ᐃᐃ ᑕᔥ ᑳᐊᑾᓇᐃᑳᑌᒃ ᐲᓂᔥ ᑕᓂ ᒧᔐᓯᓐ᙮ ᑲᑭᓇ ᑲᔦ ᑫᑰᓐ ᑳᑮ ᒨᑌᑖᑾᒃ ᒥᓯᐌ ᑕᑭᑫᒋᑳᑌ᙮

10:27b.MAT.010.027 ᐌᑯᓀᓐ ᑳᐐᑕᒪᐎᓇᑰᒃ ᐁᑎᐱᑲᒃ, ᑎᐹᑐᑕᒧᒃ ᒣᒀ ᐁᑮᔑᑲᒃ᙮ ᐌᑯᓀᓐ ᑲᔦ ᑳᑮ ᒨᒋᓅᑕᒣᒃ, ᐗᑭᒋᐙᑳᐃᑲᓂᑳᕽ ᑭᑲᐅᒋ ᑭᔒᐌᐐᑕᒫᑫᒻ᙮

10:28b.MAT.010.028 ᑫᑯ ᑕᔥ ᐐᓐ ᑯᓵᑫᒀᓂᒃ ᐃᑭ ᑳᓂᑑᐙᒡ ᐐᔭᐎᒫᓂ, ᑳᑆᓇᐎᐋᐙᒡ ᑕᔥ ᒋᓂᓵᐙᒡ ᐃᓂ ᐊᒑᑯᒫᓐ᙮ ᐊᐊ ᑕᔥ ᑯᓯᒃ ᑭᔐᒪᓂᑑ ᑳᑲᔥᑭᑑᒡ ᒋᓂᔑᐗᓈᒋᑑᒡ ᐐᔭᐎᓂ ᑲᔦ ᑳᑲᔥᑭᐋᒡ ᒋᓂᔑᐗᓈᒋᐋᒡ ᐊᒑᑯᒫᓐ ᐃᐃᒫ ᒪᒋ ᐃᔥᑯᑌᕽ᙮

10:29b.MAT.010.029 ᑮᔥᐱᓐ ᐯᔑᒃ ᐲᐙᐱᑰᔅ ᐊᔮᐗᒡ, ᓃᔑᓐ ᒥᔅᑯᒥᓂᑫᓯᐗᒃ ᑭᑖᑌᑎᐸᐙᒃ᙮ ᒥᓴᐙ ᐱᑯ ᐯᔑᒃ ᒥᔅᑯᒥᓂᑫᓯ ᑮᐸᑭᔑᕽ ᒥᑕᑲᒥᑳᕽ, ᑭᑌᑌᐙ ᐅᔕ ᐅᑭᑫᓂᒫᓐ᙮

10:30b.MAT.010.030 ᑮᓇᐙ ᑕᔥ ᐐᓐ, ᑳᑕᓱᐯᔑᑾᑭᓐ ᑮᓂᓯᓯᐙᓐ ᑲᑭᓇ ᑭᑫᒋᑳᑌᐗᓐ᙮

10:31b.MAT.010.031 ᑫᑯ ᑕᔥ ᑮᓇᐙ ᓭᑭᓯᑫᒃ, ᓇᐗᒡ ᑮᓇᐙ ᑭᑭᒋ ᐃᓀᑖᑯᓯᒻ ᐊᐲᒡ ᐐᓐ ᒥᔅᑯᒥᓂᑫᓯᐗᒃ᙮

10:32b.MAT.010.032 ᐊᐊᐌ ᓴ ᑫᐐᔑᒡ ᐁᐱᒥᓂᔕᐅᒡ ᐁᓈᓴᒦᓂᒡ ᐊᐎᔭᐞ, ᒦᐃ ᑫᓃᓐ ᓂᑲ ᐐᓈ ᐁᑎᐯᓂᒪᒃ ᐁᓈᓴᒦᓂᒡ ᓂᑌᑌᓐ ᑭᒋᑮᔑᑯᕽ ᑳᐊᔮᓂᒡ᙮

10:33b.MAT.010.033 ᐊᐊ ᑕᔥ ᐐᓐ ᑫᐃᑭᑐᒡ ᐁᐱᒥᓂᔕᐅᓯᒃ ᐁᓈᓴᒦᓂᒡ ᐊᐎᔭᐞ, ᒦᑕᔥ ᑫᓃᓐ ᐯᔑᑾᓐ ᑫᐃᓇᒃ ᐁᑎᐯᓂᒫᓯᐗᒃ ᐃᒫ ᐁᓈᓴᒦᓂᒡ ᓂᑌᑌᓐ ᑭᒋᑮᔑᑯᕽ ᑳᐊᔮᓂᒡ᙮

10:34b.MAT.010.034 ᑫᑯ ᐐᓐ ᐃᓀᑕᑫᒃ ᒋᒥᓄᐐᒌᑎᐙᒡ ᐊᐎᔭᒃ ᒋᐃᔑᐊᒀ ᑳᑮᐅᒋ ᐲᔖᔮᓐ ᐅᐅᒫ ᐊᑮᕽ᙮ ᑳᐐᓐ ᐐᓐ ᒥᓄᐐᒌᑎᐎᓐ ᓂᑮ ᐲᑑᓰᓐ, ᐃᐃ ᓴ ᒦᑳᑎᐎᓐ᙮

10:35b.MAT.010.035 ᑳᑮᐅᒋ ᐲᔖᔮᓐ, ᐊᐊ ᐃᓂᓂ ᒋᐅᒋ ᒫᓀᓂᒫᒡ ᐃᓂ ᐅᑌᑌᓐ, ᐅᑖᓂᓯᒫ ᑲᔦ ᒋᐅᒋ ᒫᓀᓂᒫᒡ ᐅᒫᒫᓐ, ᐅᔑᒥᓯᒫ ᑲᔦ ᒋᐅᒋ ᒫᓀᓂᒫᒡ ᐅᓯᑯᓴᓐ᙮

10:36b.MAT.010.036 ᐃᓂᓂ ᑕᔥ ᒫᐗᒡ ᑫᔑ ᐃᑫᓂᒥᑯᒡ ᐃᐃᒫ ᑕᐅᒌᐗᐞ ᑳᔑᑖᒡ᙮

10:37b.MAT.010.037 ᐊᐌᓀᓐ ᓇᐗᒡ ᑫᓵᑭᐋᒡ ᐃᓂ ᐅᑌᑌᓐ ᑯᒫ ᑲᔦ ᐅᒫᒫᓐ ᐊᐲᒡ ᓃᓐ ᑳᐃᔑ ᓵᑭᐃᒡ, ᑳᐐᓐ ᑌᐊᐲᑌᑖᑯᓯᓰ ᒋᐱᒥᓂᔕᐅᒡ᙮ ᐊᐌᓀᓐ ᑲᔦ ᓇᐗᒡ ᑫᓵᑭᐋᒡ ᐃᓂ ᐅᑯᓯᓴᓐ ᑯᒫ ᑲᔦ ᐅᑖᓂᓴᓐ ᐊᐲᒡ ᓃᓐ ᑳᐃᔑ ᓵᑭᐃᒡ, ᑳᐐᓐ ᑌᐊᐲᑌᑖᑯᓯᓰ ᒋᐱᒥᓂᔕᐅᒡ᙮

10:38b.MAT.010.038 ᐊᐌᓀᓐ ᑲᔦ ᐁᑳ ᑫᐱᒥᐎᓈᓯᒃ ᐅᑖᔑᑌᔮᑎᑯᒪᓐ, ᑳᐱᒥᓂᔕᐅᓯᒃ ᑲᔦ, ᑳᐐᓐ ᑕᑌᐊᐲᑌᑖᑯᓯᓰ ᒋᐱᒥᓂᔕᐅᒡ᙮

10:39b.MAT.010.039 ᐊᐊ ᑕᔥ ᑫᒪᓈᐗᓂᑑᒡ ᐅᐱᒫᑎᓯᐎᓐ, ᐋᒋᑯ ᑳᐐᓐ ᑕᑌᐱᓇᒫᓱᓰ ᑌᐺ ᑫᐅᒋ ᐱᒫᑎᓯᒡ᙮ ᐊᐊ ᑕᔥ ᑫᐸᑭᑎᓇᕽ ᐅᐱᒫᑎᓯᐎᓐ ᓃᓐ ᐅᒋ, ᑕᑌᐱᓇᒫᓱ ᑌᐺ ᑫᐅᒋ ᐱᒫᑎᓯᒡ᙮

10:40b.MAT.010.040 ᐊᐌᓀᓐ ᐃᑯ ᑳᐲᑎᑲᓂᒃ, ᓂᐲᑎᑲᓂᒃ᙮ ᐊᐌᓀᓐ ᐃᑯ ᑳᐲᑎᑲᔑᒡ ᐅᐲᑎᑲᓈᓐ ᐃᓂ ᑳᑮ ᐲᒋᓂᔕᐅᒥᒡ᙮

10:41b.MAT.010.041 ᐊᐌᓀᓐ ᐃᑯ ᑳᐲᑎᑲᓈᒡ ᐃᓂ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐋᓃᔥ ᐁᑲᓅᒋᑫᑕᒪᐙᓂᒡ ᑭᔐᒪᓂᑑᓐ, ᑫᐐᓐ ᓴ ᑕᑕᑯ ᑎᐸᐊᒪᐙ᙮ ᐊᐌᓀᓐ ᐃᑯ ᑳᐲᑎᑲᓈᒡ ᑳᑾᔭᑯ ᐱᒫᑎᓯᓂᒡ ᐋᓃᔥ ᐁᑾᔭᑯ ᐱᒫᑎᓯᓂᒡ, ᑫᐐᓐ ᓴ ᑕᑕᑯ ᑎᐸᐊᒪᐙ᙮

10:42b.MAT.010.042 ᒫᒥᑲᐎᒃ ᐃᑕᔥ ᐅᐅ! ᐊᐌᓀᓐ ᐃᑯ ᑫᒥᓇᐋᒡ ᑕᑭᐲᓂ ᐃᓂ ᐯᔑᒃ ᑳᐱᒥᓂᔕᐅᒥᒡ ᒥᓴᐙ ᑯ ᐸᑮ ᑳᐊᐲᑌᑖᑯᓯᓂᒡ, ᐁᐅᒋ ᒥᓇᐋᒡ ᐁᐱᒥᓂᔕᐅᒥᒡ, ᑫᑫᑦ ᐃᑯ ᑫᐐᓐ ᑕᑎᐸᐊᒫᑰᐎᓯ᙮

11

11:1b.MAT.011.001 ᐊᐲ ᑕᔥ ᒋᓴᔅ ᑳᐃᔥᒀᑲᓅᓈᒡ ᐅᑭᑭᓄᐊᒪᐙᑲᓇᐞ, ᑮᐊᓂ ᒫᒑ ᐁᐸᐹ ᑭᑭᓄᐊᒫᑫᒡ, ᐁᐸᐹ ᐐᑕᒫᑫᒡ ᑲᔦ ᐅᑎᐹᒋᒧᐎᓐ ᐃᐃᒫ ᐯᐸᑳᓐ ᐆᑌᓈᑳᕽ᙮

11:2b.MAT.011.002 ᒞᓐ ᓰᑲᐊᑖᑫᐎᓂᓂ ᑕᔥ ᑭᐹᑾᐅᑏᐎᑲᒥᑯᕽ ᐁᑮᐊᔮᒡ, ᐁᑮᓅᑕᕽ ᐋᓃᓐ ᐁᓇᓄᑮᓂᒡ ᐃᓂ Xᑕᓐ, ᐅᑮᐃᔑᓂᔕᐙᐞ ᐅᑭᑭᓄᐊᒪᐙᑲᓇᐞ ᑳᐃᔑ ᐊᔮᓂᒡ,

11:3b.MAT.011.003 ᐁᑮᐃᓈᐙᒡ ᒋᓴᓲᓐ: ᑮᓐ ᐃᓇ ᒞᓐ ᑳᑮ ᑎᐹᒋᒫᒡ ᐁᐐ ᑕᑯᔑᓂᓂᒡ, ᑯᒫ ᑲᔦ ᑯᑕᒃ ᓂᑲ ᐲᐋᓈᓐ?

11:4b.MAT.011.004 ᒋᓴᔅ ᑕᔥ ᐅᑮᐃᓈᐞ: ᒫᒑᒃ, ᑮᐌᒃ, ᐐᑕᒪᐎᒃ ᒞᓐ ᐌᑯᓀᓐ ᑳᓅᑕᒣᒃ, ᑳᐙᐸᑕᒣᒃ ᑲᔦ᙮

11:5b.MAT.011.005 ᐃᑭ ᑳᐙᐱᓯᒀ ᐁᐙᐱᐙᒡ, ᑳᐱᒧᓭᓯᒀ ᐁᐱᒧᓭᐙᒡ, ᑳᐅᒥᑮᐙᐱᓀᐙᒡ ᐁᑮᒥᓄᐊᔮᐃᑣ, ᑳᓅᑕᓯᒀ ᐁᓅᑕᒧᐙᒡ, ᑳᓂᐳᐙᒡ ᐁᐱᒫᒋᐃᑣ, ᐃᑭ ᑲᔦ ᑳᑭᑎᒫᑭᓯᐙᒡ ᐁᐐᑕᒪᐎᑣ ᒥᓍᒋᒧᐎᓐ᙮

11:6b.MAT.011.006 ᐋᐱᒋ ᑕᒥᓉᑕᒻ ᐊᐊ ᐐᑳ ᑫᐴᓂ ᑌᐺᔦᓂᒥᓯᒃ᙮

11:7b.MAT.011.007 ᒞᓐ ᐃᑕᔥ ᑳᐊᓂ ᒫᒑᓂᒡ ᐅᑭᑭᓄᐊᒪᐙᑲᓇᐞ, ᒋᓴᔅ ᐅᑮ ᑲᓅᓈᐞ ᑳᒫᒪᐌᓄᓂᒡ ᐁᑮ ᑕᔑᒫᒡ ᐃᓂ ᒞᓇᓐ: ᐊᐲ ᑮᐊᑕᐙᐸᒣᒃ ᐊᐊ ᒞᓐ ᐌᑎ ᐱᑾᑕᑲᒥᒃ, ᐌᑯᓀᓐ ᓂᑲ ᐙᐸᑖᒥᓐ ᑳᐃᓀᑕᒣᒃ? ᒪᔥᑯᓰᐤ ᓇ ᒋᐌᐌᐹᓯᕽ?

11:8b.MAT.011.008 ᐌᑯᓀᔥ ᑳᐊᑕᐙᐸᑕᒣᒃ? ᐊᐎᔭ ᓇ ᒋᒥᓄᑯᓇᔦᒡ ᑭᑮᐊᑕᐙᐸᒫᐙ? ᐃᑭ ᑳᒥᓄᑯᓇᔦᐙᒡ ᐃᐃᒫ ᐊᔮᐗᒃ ᑭᒋᐅᑭᒫᐞ ᑳᔑ ᐊᔮᓂᒡ᙮

11:9b.MAT.011.009 ᐌᑯᓀᓐ ᑕᔥ ᑳᐊᑕᐙᐸᑕᒣᒃ? ᑭᔐᒪᓂᑑ ᓇ ᐅᑎᐹᒋᒧᐎᓂᓃᒪᓐ? ᑌᐺ ᑭᑎᓂᓂᓂᒻ, ᒦ ᐊᐌ ᑎᓄ ᐃᓂᓂ ᑳᑮᐊᑕᐙᐸᒣᒃ! ᐊᐊ ᑕᔥ ᒞᓐ ᓇᐗᒡ ᑭᒋ ᐃᓀᑖᑯᓯ ᐊᐲᒡ ᐐᓐ ᑯᑕᒃ ᑎᐹᒋᒧᐎᓂᓂᐗᐞ ᑳᑲᓅᒋᑫᑕᒪᐙᓂᒡ ᑭᔐᒪᓂᑑᓐ᙮

11:10b.MAT.011.010 ᐃᐃᐌ ᑕᔥ ᑳᐃᔑᐲᐃᑳᑌᒃ: ᑭᔐᒪᓂᑑ ᐃᑭᑐ, ᒦ ᐊᐌ ᑳᐱᒥᐎᑑᒡ ᓂᑎᐹᒋᒧᐎᓐ, ᓂᑲ ᓃᑳᓂᓂᔕᐙ ᒋᐅᔒᑖᑕᒪᐎᒃ ᐋᑎ ᑫᐃᔖᐗᒡ᙮ ᒞᓐ ᑕᔥ ᐊᐊᐌ ᑳᑕᔑᒥᓐᒡ᙮

11:11b.MAT.011.011 ᒫᒥᑲᐎᒃ ᐅᐅ! ᒞᓐ ᓰᑲᐊᑖᑫᐎᓂᓂ ᓇᐗᒡ ᑭᒋ ᐃᓀᑖᑯᓯ ᐊᐲᒡ ᐐᓐ ᒥᓂᒃ ᐃᓂᓂᐗᐞ ᑳᑮ ᐱᐱᒫᑎᓯᓂᒡ᙮ ᔖᑰᒡ ᐃᑕᔥ ᐊᐌᓀᓐ ᐃᑯ ᐸᑮ ᑳᐊᐲᑌᑖᑯᓯᒡ ᐃᐃᒫ ᑭᔐᒪᓂᑑᓐ ᐅᑎᐯᒋᑫᐎᓂᓃᕽ, ᓇᐗᒡ ᐃᔥᐯᑖᑯᓯ ᐊᐲᒡ ᐐᓐ ᒞᓇᓐ᙮

11:12b.MAT.011.012 ᐃᐃ ᑕᔥ ᐊᐲ ᒞᓐ ᑳᑮᒫᒌ ᐐᑕᒫᑫᒡ ᐅᑎᐹᒋᒧᐎᓐ ᐲᓂᔥ ᐅᐅ ᐃᔑ ᐊᐲ ᓅᑯᒻ ᑳᑮᔑᑲᒃ, ᐁᐲᒌᐙᒡ ᐊᐎᔭᒃ ᐃᔑᑲᑴ ᐲᑎᑫᐗᒃ ᑭᔐᒪᓂᑑᓐ ᐅᑎᐯᒋᑫᐎᓂᓃᕽ, ᑳᒪᔥᑲᐎᒋᑫᐙᒡ ᑲᔦ ᐅᑑᑖᐱᓈᓈᐙ᙮

11:13b.MAT.011.013 ᑲᑭᓇ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ, ᒨᓯᔅ ᐅᑑᓇᔓᐌᐎᓐ ᑲᔦ ᐅᑮᓃᑳᓂᑎᐹᑐᑖᓈᐙ ᑫᐃᔑᓭᓂᒃ, ᐲᓂᔥ ᒞᓐ ᑮᑕᑯᔑᕽ᙮

11:14b.MAT.011.014 ᑮᔥᐱᓐ ᑕᔥ ᐐᑌᐺᑕᒣᒃ ᑳᑮᐃᑭᑐᐙᐸᓐ, ᒦᓴ ᒞᓐ ᐊᐊ ᐃᓬᐋᐃᒐ ᑳᑮᐐᓱᒡ ᐁᐐ ᑕᑯᔑᕽ᙮

11:15b.MAT.011.015 ᐱᓯᑕᒧᒃ ᑮᓇᐙ ᑳᐅᑕᐗᑳᔦᒃ!

11:16b.MAT.011.016 ᐋᓃᔥ ᑫᐃᔑ ᓈᐱᓈᑯᐊᒀ ᐅᑯᐌᓂᐗᒃ ᓅᑯᒻ ᑳᐱᒫᑎᓯᐙᒡ? ᒦ ᑖᐱᔥᑰ ᐊᐱᓅᒌᔕᒃ ᑳᐊᔫᑾᐱᐙᒡ ᐃᐃᒫ ᐊᑾᒌᕽ ᑳᑕᓇᑖᐌᕽ, ᐁᔖᑯᐙᓈᐙᒡ ᑳᐐᒌᐙᒡ ᐁᐅᑕᒥᓄᐙᒡ:

11:17b.MAT.011.017 ᓂᑖᓇᑮᐃᓉᐌᒧᒋᑫ ᐴᑖᒋᑫᒥᓐ ᒋᓃᒥᔦᒃ, ᑳᐐᓐ ᓴ ᓈ ᑭᑮᓃᒥᓰᒻ᙮ ᓂᑖᓇᑮᐃᓇᐋᒥᓐ ᑲᔦ ᓇᐃᓂᑫᓂᑲᒧᓇᓐ, ᑳᐐᓐ ᓴ ᓈ ᑭᑮᒪᐎᓰᒻ᙮

11:18b.MAT.011.018 ᒞᓐ ᑕᔥ ᑮᑕᑯᔑᓐ, ᑮᒪᑕᐎ ᐊᓇᒥᐋ, ᑳᐐᓐ ᑲᔦ ᑮᒥᓂᑴᓰ ᔔᒥᓈᐳ᙮ ᒦᑕᔥ ᑳᐃᒋᑲᓂᐎᒡ ᒪᒋᐊᒑᑾᓐ ᐅᑭᑭᔥᑲᐙᓐ᙮

11:19b.MAT.011.019 ᐃᓂᓂ ᐅᑯᓯᓴᓐ ᐃᑕᔥ ᑮᑕᑯᔑᓐ, ᑮᐐᓯᓂ, ᑮᒥᓂᑴ ᑲᔦ, ᒦᑕᔥ ᑳᐃᒋᑲᓂᐎᒡ: ᑳᔕᑫᔥᑭ, ᒥᓂᑴᔥᑭ, ᐅᓵᑭᐐᒌᐙᐞ ᑖᑭᔅ ᑳᑎᐸᐃᑫᐃᐌᓂᒡ, ᐃᐃ ᑲᔦ ᑯᑕᒃ ᑳᐋᓇᐌᓂᒥᒥᓐᒡ᙮ ᔖᑰᒡ ᐃᑕᔥ ᐊᐎᔭ ᐯᒥᓂᔕᐊᕽ ᑭᔐᒪᓂᑑᓐ ᐅᑲᑮᑖᐌᑕᒧᐎᓂᓂ, ᐱᒌᓇᒃ ᑕᓂ ᐯᑌᓈᑾᓂᓂ ᑌᐺ ᐃᐃ ᐁᑎᓄᐗᓂᓂᒃ ᐊᐲ ᑯᑕ ᐊᓂ ᓈᑾᓂᓂᒃ ᐌᑯᓀᓐ ᐃᐃᒫ ᐅᑎᔑᒋᑫᐎᓂᕽ ᐌᒋᓭᓂᒃ᙮

11:20b.MAT.011.020 ᐃᒫ ᑕᔥ ᑳᔑ ᐆᑌᓈᐗᑭᓐ ᓇᐗᒡ ᑳᑮ ᑕᔑ ᒫᒪᑳᒋᒋᑫᒡ ᑳᐐᓐ ᑮᓀᐱᒋ ᑴᑳᑎᓯᓰᐗᐞ ᐊᐎᔭᐞ, ᒦᑕᔥ ᑳᑮᐅᒋ ᑭᒋᓅᒋᐋᒡ, ᐅᐅ ᐁᑮᐃᓈᒡ:

11:21b.MAT.011.021 ᑮᓇᐙ ᑾᕒᐋᓯᓐ ᑳᐊᔮᔦᒃ ᑭᑲ ᐅᒑᓂᒥᓯᒻ! ᑫᑮᓇᐙ ᑭᑲ ᐅᒑᓂᒥᓯᒻ ᐯᓭᑕ ᑳᐊᔮᔦᒃ! ᑮᔥᐱᓐ ᐃᓂ ᑳᐙᐸᑕᒣᒃ ᒫᒪᑳᒋᒋᑫᐎᓇᓐ ᑮᓈᑯᒋᑳᑌᑯᐸᓀᓇᓐ ᐃᐃᒫ ᐆᑌᓈᕽ ᑕᔭᕒᐃᕽ, ᓵᐃᑕᓂᕽ ᑲᔦ, ᐋᔕ ᒣᐎᔕ ᐅᑖᑮ ᐱᓯᑳᓈᐙ ᑳᐊᓴᐱᐌᑲᓂᓂᑭᓐ ᑲᔦ ᒣᐎᔕ ᐅᑖᑮ ᐲᐎᐌᐱᓈᓈᐙ ᐲᑸᓂ ᐅᑎᒀᓂᐙᕽ ᒋᓈᑯᑑᐙᒡ ᑳᑮ ᑴᑳᑎᓯᐙᒡ᙮

11:22b.MAT.011.022 ᒫᒥᑲᐎᒃ ᐃᑕᔥ ᐅᐅ: ᐊᐲ ᑎᐹᑯᓂᑫᐎᑮᔑᑲᒃ, ᑭᔐᒪᓂᑑ ᓇᐗᒡ ᐅᑲ ᑰᐹᓯᓇᐙᐞ ᐃᐃ ᑕᔭᕒᐃᕽ, ᓵᐃᑕᓂᕽ ᑲᔦ ᑳᐃᔑ ᐊᔮᓂᒡ ᐊᐲᒡ ᑮᓇᐙ᙮

11:23b.MAT.011.023 ᑮᓇᐙ ᑕᔥ ᑲᐸᕒᓂᔭᒦᕽ ᑳᐊᔮᔦᒃ! ᑭᑮᐃᓀᑖᒻ ᐃᓇ ᐁᐐᐃᔥᐯᓂᑎᓱᔦᒃ ᑭᒋᑮᔑᑯᕽ ᐃᓇᑫ ᒫᐗᒡ ᒋᑭᒋ ᐃᓀᑖᑾᒃ ᑭᑑᑌᓈᒥᐙ? ᐌᑎ ᐅᓂᐴᒃ ᑳᔑ ᐊᔮᐙᒡ ᑭᑲ ᐃᔑᐌᐱᓂᑰᒻ! ᑮᔥᐱᓐ ᓈᑯᒋᑳᑌᑯᐸᓀᓇᓐ ᐃᓂ ᒫᒪᑳᒋᒋᑫᐎᓇᓐ ᐃᐃᒫ ᔂᑕᒦᕽ ᑖᐱᔥᑰ ᑳᔑ ᐙᐸᑕᒣᒃ, ᑫᔮᐱ ᔂᑕᒻ ᑖᑮᐊᔮ ᓅᑯᒻ᙮

11:24b.MAT.011.024 ᒫᒥᑲᐎᒃ ᐃᑕᔥ ᐅᐅ! ᐊᐲ ᑎᐹᑯᓂᑫᐎᑮᔑᑲᒃ, ᑭᔐᒪᓂᑑ ᓇᐗᒡ ᐅᑲ ᑰᐹᓯᓇᐙᐞ ᔂᑕᒦᕽ ᑳᑮᐊᔮᓂᒡ ᐊᐲᒡ ᑮᓇᐙ ᑲᐸᕒᓂᔭᒦᕽ ᑳᐊᔮᔦᒃ᙮

11:25b.MAT.011.025 ᐊᒦᑕᔥ ᐃᐃ ᐊᐲ ᒋᓴᔅ ᑮᐃᑭᑐ: ᓂᑌᑌ! ᑮᓐ ᑳᑎᐯᑕᒪᓐ ᑮᔑᒃ, ᐊᑭ ᑲᔦ, ᑭᓇᓈᑯᒥᓐ ᐋᓃᔥ ᑳᐐᓐ ᑭᑮ ᑭᑫᑕᒨᓈᓰᒃ ᐅᓄ ᑫᑰᓇᓐ ᐃᑭᐌᓂᐗᒃ ᑳᑲᑮᑖᐌᑕᒧᐙᒡ ᑳᑭᑫᑖᓱᐙᒡ ᑲᔦ, ᐃᑭ ᑕᔥ ᐐᓐ ᐋᐱᒋ ᑳᑭᑫᑕᓯᒀ ᑫᑰᓂᓂ ᑭᑮᐙᐸᑕᐋᒃ᙮

11:26b.MAT.011.026 ᐋᓃᔥ ᑮᓐ ᓂᑌᑌ, ᒦ ᐅᐌ ᒫᐗᒡ ᐁᔑ ᒥᓍᐸᑕᒪᓐ᙮

11:27b.MAT.011.027 ᒦᑕᔥ ᑳᐊᓂ ᐃᑭᑐᒡ: ᓂᑌᑌ ᑕᔥ ᑲᑭᓇ ᑫᑰᓂᓂ ᓂᑮᒦᓂᒃ᙮ ᑳᐐᓐ ᐊᐎᔭ ᐅᑭᑫᓂᒫᓰᓐ ᐃᓂ ᐅᑯᓯᓯᒫᓐ, ᒦ ᐁᑕ ᐊᐊ ᑳᐅᔫᓯᒥᓐᒡ᙮ ᑳᐐᓐ ᑲᔦ ᐊᐎᔭ ᐅᑭᑫᓂᒫᓰᓐ ᐃᓂ ᑳᐅᔫᓯᒥᒥᓐᒡ, ᒦ ᐁᑕ ᐊᐊ ᐅᑯᓯᓯᒫ᙮ ᐃᐃ ᑕᔥ ᐁᑕ ᑲᔦ ᑳᐃᓀᑕᕽ ᐅᑯᓯᓯᒫ ᒋᑭᑫᑕᒨᓈᒡ᙮

11:28b.MAT.011.028 ᐱᓈᓯᑲᐎᔑᒃ ᑲᑭᓇ ᑮᓇᐙ ᑳᐊᔦᑯᓯᔦᒃ, ᐁᑆᐗᓀᔦᒃ ᑲᔦ, ᑭᑲ ᒦᓂᓂᓂᒻ ᐃᑕᔥ ᐊᓉᐱᐎᓐ᙮

11:29b.MAT.011.029 ᐅᑖᐱᓇᒧᒃ, ᐱᓯᑲᒧᒃ ᓂᑕᐱᑲᓈᑎᒃ ᑭᑭᓇᐙᐸᒥᔑᒃ, ᐋᓃᔥ ᓂᓅᑳᑎᔅ, ᓂᑕᐸᓭᓂᒻ ᑲᔦ᙮ ᑭᑲ ᒥᑳᓈᐙ ᑕᔥ ᐊᓉᐱᐎᓐ᙮

11:30b.MAT.011.030 ᐃᐃ ᑕᔥ ᐊᐱᑲᓈᑎᒃ ᑫᒦᓂᓇᑰᒃ ᐋᐱᒋ ᑭᑲ ᒥᓄᐗᓀᐃᑰᒻ, ᓃᓐ ᑫᐱᒥᐗᓀᐃᓇᑰᒃ ᐋᐱᒋ ᑕᓈᑲᓐ, ᑮᐃᑭᑐ᙮

12

12:1b.MAT.012.001 ᓂᑯᑎᕽ ᐃᑕᔥ ᐁᐊᓂ ᐃᔑᓭᓂᒃ, ᒋᓴᔅ ᐅᑭᑭᓄᐊᒪᐙᑲᓇᐞ ᑲᔦ ᐁᐱᒧᓭᐙᒡ ᐃᐃᒫ ᐸᑴᔑᑲᓂ ᑭᑎᑳᓂᕽ ᐅᑮᒫᒋ ᐅᒌᔑᐱᑑᓂ ᐸᑴᔑᑲᓂ ᒪᔥᑯᓯᐗᓐ ᐁᑮᐅᒋ ᐐᓯᓂᓂᒡ, ᐋᓃᔥ ᑮᓅᑌᔅᑲᑌᐗᐞ ᐃᐃ ᐊᐲ᙮ ᑮᐊᓉᐲᐎ ᑮᔑᑲᓂᓂ ᑕᔥ᙮

12:2b.MAT.012.002 ᐊᐲ ᑕᔥ ᐯᕒᐊᓰᒃ ᑳᐙᐸᑫᐙᒡ ᐅᑮᐃᓈᐙᓐ ᒋᓴᓲᓐ: ᐃᓇᔥᑫ ᑭᑭᑭᓄᐊᒪᐙᑲᓇᒃ ᐅᐲᑯᓈᓈᐙ ᐅᓇᔓᐌᐎᓐ, ᐋᓃᔥ ᐊᓉᐲᐎ ᑮᔑᑲᓐ ᓅᑯᒻ᙮

12:3b.MAT.012.003 ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᐃᓇ ᐐᑳ ᑭᑕᓇᒥᑑᓰᒻ ᐋᓃᓐ ᑌᐱᑦ ᑳᑮᐃᔑᒋᑫᒡ ᐃᐃ ᑲᔦ ᑳᑮᐐᒌᐎᑯᒡ ᐊᐲ ᐁᐐ ᐐᓯᓂᐙᒡ?

12:4b.MAT.012.004 ᐁᑮ ᐲᑎᑫᒡ ᐃᐃᒫ ᐸᒀᓀᑲᒥᑯᕽ ᑭᔐᒪᓂᑑᓐ ᑳᐃᔑ ᐊᓇᒥᐁᑕᐎᒥᓐᒡ, ᐁᑮᐊᒸᐙᒡ ᐸᑴᔑᑲᓇᐞ ᑳᑮᒦᓂᒥᑎᐸᓐ ᐃᓂ ᑭᔐᒪᓂᑑᓐ, ᐋᓇᐐᓐ ᐁᑮ ᐲᑯᓇᒧᐙᒡ ᐅᓇᔓᐌᐎᓂᓂ᙮ ᐋᓃᔥ ᐊᓇᒥᐁᐎᑭᒫᒃ ᐁᑕ ᑮᐸᑭᑎᓈᐗᒃ ᒋᐊᒸᐙᐸᓐ ᐃᐃ ᐸᑴᔑᑲᓇᐞ᙮

12:5b.MAT.012.005 ᑳᐐᓐ ᐃᓇ ᑭᑕᓇᒥᑑᓰᒻ ᒨᓯᔅ ᐅᑑᓇᔓᐌᐎᓐ ᐁᐃᔑᐲᐃᑳᑌᓂᒃ, ᐊᓇᒥᐁᐎᑭᒫᒃ ᐁᐲᑯᓇᒧᐙᒡ ᐊᓉᐲᐎ ᑮᔑᑲᓂ ᐅᓇᔓᐌᐎᓐ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐁᑕᓱ ᐊᓉᐲᐎ ᑮᔑᑲᓂᓂᒃ, ᔑᑾ ᑕᔥ ᑳᐐᓐ ᑫᑰᓐ ᐃᓈᑯᓂᑲᓂᐎᓰᐗᒃ᙮

12:6b.MAT.012.006 ᑭᐐᑕᒪᐎᓂᓂᒻ, ᑫᑰᓐ ᐅᐅᒫ ᐊᔮ ᓇᐗᒡ ᐁᑭᒋ ᐃᓀᑖᑾᒃ ᐊᐲᒡ ᐐᓐ ᐃᐃᐌ ᑭᒋᐊᓇᒥᐁᐎᑲᒥᒃ᙮

12:7b.MAT.012.007 ᐅᐅ ᐋᓃᔥ ᐃᔑᐲᐃᑳᑌ: ᑳᐐᓐ ᐃᑭ ᐊᐗᑳᓇᒃ ᒋᐸᑭᑎᓈᔂᓂᐎᐙᒡ ᓂᓇᑕᐌᓂᒫᓰᒃ, ᐃᐃ ᑕᔥ ᑳᐊᑕᐌᑕᒫᓐ, ᒋᒥᓄᑑᑖᑫᔦᑭᐸᓐ᙮ ᑮᔥᐱᓐ ᑭᑫᑕᒣᑭᐸᓐ ᐋᓃᓐ ᐅᐅ ᐁᑭᑑᒪᑲᒃ, ᑳᐐᓐ ᑭᑖ ᒪᒋ ᐃᓈᓯᐙᐙᒃ ᐃᑭ ᑫᑰᓐ ᑳᑮᐃᔑ ᒪᒫᔒᓯᒀ᙮

12:8b.MAT.012.008 ᐃᓂᓂ ᐅᑯᓯᓴᓐ ᐅᔕ ᐅᑎᐯᑖᓐ ᑳᐊᓉᐲᐎ ᑮᔑᑲᓂᓂᒃ᙮

12:9b.MAT.012.009 ᒋᓴᔅ ᑮᐊᓂᐅᒋ ᒫᒑ ᐁᑮᐊᓂ ᐲᑎᑫᒡ ᐃᐃᒫ ᐊᓇᒥᐁᐎᑲᒥᑯᕽ᙮

12:10b.MAT.012.010 ᐃᓂᓂ ᑕᔥ ᐃᐃᒫ ᑮᐊᔮ ᐁᑮ ᔒᑯᔥᑳᓂᒃ ᐅᓂᓐᒡ᙮ ᑮᐊᔮᐗᒃ ᑲᔦ ᐃᓂᓂᐗᒃ ᐁᑮᒥᓴᐌᑕᒧᐙᒡ ᐁᐐ ᐊᓈᒥᒫᐙᒡ ᒋᓴᓲᓐ ᒋᒪᒋᑑᑕᒥᓂᒡ᙮ ᒦᑕᔥ ᑳᑮᐃᓈᐙᒡ: ᒦ ᓇ ᐃ ᒋᐲᑯᓂᑳᑌᑭᐸᓐ ᑭᑑᓇᔓᐌᐎᓂᓈᓐ ᑮᔥᐱᓐ ᐊᐎᔭ ᒥᓄᐊᔮᐃᓐᒡ ᐁᐊᓉᐲᐎ ᑮᔑᑲᓂᓂᒃ?

12:11b.MAT.012.011 ᒋᓴᔅ ᑕᔥ ᑮᐃᔑ ᓇᑴᑕᒻ: ᑮᔥᐱᓐ ᐊᐎᔭ ᐲᑖᓂᑳᓀᓭᓂᒡ, ᑆᓇᐎᐅᓂᒡ ᐅᒫᓇᒑᓂᔑᒪᓐ ᐁᐊᓉᐲᐎ ᑮᔑᑲᓂᓂᒃ, ᑳᐐᓐ ᐃᓇ ᐅᑖᑌᐱᓈᓰᓐ ᒋᑭᑖᓂᑳᓀᐱᓈᒡ?

12:12b.MAT.012.012 ᐃᓂᓂ ᑕᔥ ᓇᐗᒡ ᐃᔥᐯᑖᑯᓯ ᐊᐲᒡ ᐐᓐ ᐊᐊ ᒫᓇᒑᓂᔥ! ᒦᑕᔥ ᐱᓵᓂᑯ ᐅᓇᔓᐌᐎᓂᕽ ᐁᔑ ᐸᑭᑎᓂᑳᑌᒃ ᒋᐐᒋᐃᓐᒡ ᐊᐎᔭ ᐊᓉᐲᐎ ᑮᔑᑲᓂᓂᒃ᙮

12:13b.MAT.012.013 ᒦᑕᔥ ᑳᐃᓈᒡ ᐃᓂ ᐃᓂᓂᐗᓐ: ᓃᒥᓂᑫᓂᓐ! ᔐᒫᒃ ᐃᑕᔥ ᑮᓃᒥᓂᑫᓂᐗᓐ᙮ ᒦᑕᔥ ᑳᐃᔑ ᒥᓄᐊᔮᓂᒡ ᐅᓂᒌᓃᕽ ᑖᐱᔥᑰ ᐃᐃ ᐯᔑᒃ ᑯᑕᒃ ᐅᓂᒌᓂ᙮

12:14b.MAT.012.014 ᐯᕒᐊᓰᒃ ᐃᑕᔥ ᑮᐊᓂ ᒫᒑᐗᒃ ᐁᑮᓈᓈᑲᑕᐌᑕᒧᐙᒡ ᐋᓃᓐ ᑫᑮᐃᔑ ᓂᓵᐙᒡ ᒋᓴᓲᓐ᙮

12:15b.MAT.012.015 ᒋᓴᔅ ᑕᔥ ᐅᑮ ᑭᑫᑖᓐ᙮ ᒦᔥ ᐃᐃ ᑳᐃᔑ ᒫᒑᒡ᙮ ᐋᐱᒋ ᑲᔦ ᑮᐹᑏᓄᐗᐞ ᑳᑮ ᐱᒥᓂᔕᐅᑯᒡ᙮ ᐅᑮᒥᓄᐊᔮᐋᐞ ᑲᔦ ᑲᑭᓇ ᐅᑖᑯᓰᐞ᙮

12:16b.MAT.012.016 ᒦᑕᔥ ᑳᐃᓈᒡ ᐊᐎᔭᐞ ᒋᑎᐹᒋᒥᑯᓯᒃ᙮

12:17b.MAT.012.017 ᒦᐃᐌ ᑳᑮᐅᒋ ᑑᑕᕽ, ᒋᐃᔑᓭᓂᒃ ᒪᔮ ᐱᑯ ᑭᔐᒪᓂᑑᓐ ᑳᑮᐃᑭᑐᓂᑯᐸᓀᓐ, ᐋᐃᓭᔭᐗᓐ ᐁᑮᐋᐸᒋᐋᓂᑯᐸᓀᓐ ᑳᑮ ᑲᓅᑕᒫᑯᓂᒡ᙮

12:18b.MAT.012.018 ᒦ ᐊᐊᐌ ᓂᑕᓄᑮᐋᑲᓐ, ᑳᑮᐅᓀᓂᒪᒃ, ᒦ ᐊᐌ ᑳᓵᑭᐊᒃ ᑳᒥᓉᑕᒧᐃᒡ᙮ ᓂᑲ ᐸᑭᑎᓇᒪᐙ ᓂᑕᒑᑾᓐ, ᐅᑲ ᐐᑕᒪᐙᐞ ᓂᑎᓈᑯᓂᑫᐎᓐ ᑲᑭᓇ ᐁᑕᓶᐙᓇᑭᓯᓂᒡ ᐊᐎᔭᐞ᙮

12:19b.MAT.012.019 ᑳᐐᓐ ᑕᑲᑴ ᔖᑰᓱᑖᑯᓯᓰ, ᑳᐐᓐ ᑲᔦ ᑕᐲᐹᑭᓰ, ᑳᐐᓐ ᑲᔦ ᑕᑭᔒᐌᓰ ᒋᒫᒦᒀᓂᑎᓱᒡ ᐃᐃᒫ ᒦᑲᓈᑳᕽ᙮

12:20b.MAT.012.020 ᐃᐃ ᑲᔦ ᑳᐴᑯᔥᑳᓂᒃ ᒪᔥᑯᓰᐙᑎᒃ ᑳᐐᓐ ᐊᐗᔑᒣ ᐅᑲ ᐲᑯᓇᓰᓐ, ᐙᓴᑯᓀᒋᑲᓀᔮᐲᓂ ᑲᔦ ᑳᓂ ᐋᑕᐌᓂᒃ ᑳᐐᓐ ᐅᑲ ᐋᑕᐌᐊᓰᓐ᙮ ᑳᐐᓐ ᑕᐸᑭᒌᓰ ᐹᒫ ᑮᑲᔥᑭᑑᒡ ᑾᔭᒃ ᐃᓈᑯᓂᑫᐎᓐ ᒥᓯᐌ ᒋᐊᔮᓂᒃ᙮

12:21b.MAT.012.021 ᑲᑭᓇ ᑕᔥ ᐁᑕᓶᐙᓇᑭᓯᐙᒡ ᑳᐱᒫᑎᓯᐙᒡ ᐅᑲ ᐊᐯᓂᒧᓄᑕᐙᐙᓐ᙮

12:22b.MAT.012.022 ᒋᓴᔅ ᑕᔥ ᑮᐲᑕᒪᐙ ᐯᔑᒃ ᐊᐎᔭᓐ ᐁᐙᐱᓯᓂᒃ, ᐁᑮᑭᑐᓯᓂᒃ, ᐋᓃᔥ ᐅᑮ ᑭᑭᔥᑳᑯᓂ ᒪᒋᐊᒑᑯᓂ᙮ ᔐᒫᒃ ᐃᑕᔥ ᐅᑮᒥᓄᐊᔮᐋᓐ᙮ ᒦᑕᔥ ᑳᐃᔑ ᐙᐱᓂᒡ, ᐁᑮ ᑮᑭᑐᓂᒡ ᑲᔦ᙮

12:23b.MAT.012.023 ᐋᐱᒋ ᑕᔥ ᑮᑭᒋ ᒫᒪᑳᑌᑕᒨᒃ ᐁᑭᒋᐹᑏᓄᐙᒡ ᐊᐎᔭᒃ, ᐁᑮᐃᑭᑐᐙᒡ: ᑰᓂᑫ ᒦ ᐗᐊ ᑌᐱᑎᕽ ᑳᐅᑕᑳᓀᓯᒡ?

12:24b.MAT.012.024 ᐯᕒᐊᓰᒃ ᑕᔥ ᐁᑮᓅᑕᒧᐙᒡ ᑮᐃᑭᑐᐗᒃ: ᑭᒋᐅᑭᒫ ᒪᒋᐊᒑᑾᓐ ᐱᐁᓬᓯᐳᓬᐆᓐ ᐅᔕ ᐅᒦᓂᑰᓐ ᒪᔥᑲᐎᓰᐎᓐ ᒋᓵᑭᒋᐌᐱᓈᒡ ᒪᒋᐊᒑᑾᐞ᙮

12:25b.MAT.012.025 ᒋᓴᔅ ᐅᑮ ᑭᑫᓂᒫᐞ ᐋᓐ ᐁᓀᑕᒥᓂᒡ᙮ ᒦᑕᔥ ᑳᐃᓈᒡ: ᑮᔥᐱᓐ ᓴ ᑎᐯᒋᑫᐎᓂᕽ ᐊᐎᔭᒃ ᑳᐊᔮᐙᒡ ᐐᐯᐸᑳᓂᑑᐙᒡ ᒋᒦᑳᑎᐙᒡ, ᐋᐱᒋ ᐐᐸ ᑕᓂᔑᐗᓈᑕᓂᓂ ᐃᐃ ᑎᐯᒋᑫᐎᓐ᙮ ᑮᔥᐱᓐ ᑲᔦ ᐆᑌᓇ ᑯᒫ ᑲᔦ ᑖᐎᓐ ᐯᐸᑳᓂᐃᑎᓲᒪᑲᑭᓐ, ᒫᒦᑳᑎᓈᓂᐗᕽ ᑲᔦ, ᐋᐱᒋ ᐐᐸ ᑕᓂᔑᐗᓈᑕᓅᓐ᙮

12:26b.MAT.012.026 ᑮᔥᐱᓐ ᓭᑕᓐ ᑳᑕᔑᐅᑭᒫᐎᒡ ᒫᒦᑳᑎᓈᓂᐗᓂᓂᒃ, ᐋᐱᒋ ᐐᐸ ᑕᐸᑭᓯᓂᓂ᙮

12:27b.MAT.012.027 ᑭᑎᔑᒻ ᐃᑕᔥ ᑲᔦ ᐁᒦᔑᒡ ᐱᐁᓬᓯᐳᓬᐆᓐ ᒪᔥᑲᐎᓰᐎᓐ ᑳᐅᒋ ᓵᑭᒋᐌᐱᓂᒪᒃ ᒪᒋᐊᒑᑾᐞ᙮ ᐋᑎ ᑕᔥ ᑮᓇᐙ ᐌᑎᓇᒧᐙᒡ ᐃᑭ ᑳᐱᒥᓂᔕᐅᓀᒀ ᒪᔥᑲᐎᓰᐎᓐ ᒋᓵᑭᒋᐌᐱᓈᐙᒡ ᒪᒋᐊᒑᑾᐞ? ᐃᑭ ᓴ ᑳᐱᒥᓂᔕᐅᓀᒀ ᐅᓈᑯᑑᓈᐙ ᑮᓇᐙ ᐊᓂᔖ ᐁᐃᔑᔦᒃ᙮

12:28b.MAT.012.028 ᑭᔐᒪᓂᑑ ᐅᑕᒑᑾᓐ ᐅᔕ ᓃᓐ ᑳᒦᔑᒥᒡ ᒪᔥᑲᐎᓰᐎᓐ ᒋᓵᑭᒋᐌᐱᓂᒪᒃ ᐃᐃ ᒪᒋᐊᒑᑾᐞ᙮ ᒦᑕᔥ ᐅᐅᒫ ᐁᔑᓈᑾᒃ ᑭᔐᒪᓂᑑ ᐅᑎᐯᒋᑫᐎᓐ ᐋᔕ ᐁᑮᓈᓯᑳᑯᔦᒃ᙮

12:29b.MAT.012.029 ᑳᐐᓐ ᑲᔦ ᐊᐎᔭ ᐅᑖᑲᔥᑭᑑᓰᓐ ᒋᐲᑎᑫᒡ ᒋᑮ ᒪᑲᒫᒡ ᐅᑕᔭᐄᒥᓂ ᐅᐙᑳᐃᑲᓂᓃᕽ ᐃᓂ ᑳᒪᔥᑲᐎᓰᓂᒡ ᐃᓂᓂᐗᓐ᙮ ᐱᓇᒫ ᐁᑕ ᑕᑯᐱᓈᒡ ᐃᓂ ᐃᓂᓂᐗᓐ ᒦᐃ ᐹᒫ ᒋᑲᔥᑭᑑᐸᓐ ᒋᑮ ᒪᑲᒫᒡ ᐅᑕᔭᐄᒥᓂ ᐅᐙᑳᐃᑲᓂᓃᕽ᙮

12:30b.MAT.012.030 ᐊᐌᓀᓐ ᐃᓴ ᑳᐐᒌᐎᓯᒃ ᒦᐃ ᐁᔑᓈᑯᓯᒡ ᐁᓂᔥᑫᓂᒥᒡ, ᐊᐌᓀᓐ ᑲᔦ ᑳᐐᒋᐃᓯᒃ ᑮᒫᐗᑑᓂᑫᔮᓐ ᒦᐃ ᐁᔑᓈᑯᓯᒡ ᑳᐅᓶᐌᐱᓂᑫᒡ᙮

12:31b.MAT.012.031 ᒦᑕᔥ ᑳᐅᒋ ᐐᑕᒪᐎᓇᑰᒃ ᐅᐅ: ᐋᓃᓂᑯ ᐃᓂᓂ ᐁᔑ ᒪᒋ ᐃᔑᒋᑫᒡ, ᐋᓃᓂᑯ ᑲᔦ ᐁᔑ ᒪᒋ ᐃᑭᑐᒡ ᑕᐴᓀᑕᒪᐙ᙮ ᐊᐎᔭ ᑕᔥ ᐐᓐ ᒪᒋ ᐃᓈᒡ ᑭᔐᒪᓂᑑᓐ ᐅᑕᒑᑯᓂ ᑳᐐᓐ ᑕᐴᓀᑕᒪᐙᓰ᙮

12:32b.MAT.012.032 ᐊᐎᔭ ᐱᑯ ᑫᒪᒋ ᐃᓈᒡ ᐃᓂ ᑭᔐᒪᓂᑑᓐ ᐅᑲᔥᑭᐁᐎᓰᒥᓂ, ᑕᐴᓀᑕᒪᐙᑲᓂᐎ᙮ ᐊᐎᔭ ᑕᔥ ᐐᓐ ᒪᒋ ᐃᓈᒡ ᑭᔐᒪᓂᑑᓐ ᐅᑕᒑᑯᓂ ᑳᐐᓐ ᑕᐴᓀᑕᒪᐙᓰ, ᑳᐐᓐ ᓅᑯᒻ ᑕᐴᓀᑕᒪᐙᓰ ᑲᔦ ᑳᐐᓐ ᐐᑳ ᑕᐴᓀᑕᒪᐙᓰ᙮

12:33b.MAT.012.033 ᒥᓄᒥᑎᒃ ᐅᓂᑖᐎᑭᑑᓐ ᒥᓄᔒᐎᒦᒋᒻ᙮ ᒪᒋᒥᑎᒃ ᐃᑕᔥ ᐐᓐ ᐅᓂᑖᐎᑭᑑᓇᓐ ᐐᓴᑭᒥᓇᓐ᙮ ᐋᓃᔥ ᐊᐊ ᒥᑎᒃ ᐋᓃᓐ ᐁᔑ ᓂᑖᐎᑭᒋᑫᒡ ᐅᒋ ᑭᑫᒋᑲᓂᐎ ᐊᐌᓀᓐ ᐁᑎᓄᐙᑎᑯᐎᒡ᙮

12:34b.MAT.012.034 ᑮᓇᐙ ᑭᓀᐱᑰᒃ! ᐋᓃᓐ ᐃᑕᔥ ᑾᔭᒃ ᑫᐅᒋ ᐃᑭᑐᔦᑭᐸᓐ ᐁᒪᒋ ᐃᓂᓃᐎᔦᒃ᙮ ᐋᓃᔥ ᐊᐎᔭ ᑳᐃᔑ ᒨᔥᑭᓀᓂᒃ ᐅᑌᐞ ᐃᔑᑮᑭᑐ᙮

12:35b.MAT.012.035 ᑾᔭᒃ ᐃᓂᓂ ᐅᑑᒋᐲᑑᓇᓐ ᑾᔭᒃ ᑫᑰᓇᓐ ᐃᐃᒫ ᑳᐃᔑ ᑲᓇᐌᒋᑫᒡ ᐅᑌᐃᕽ, ᑲᔦ ᐊᐊ ᒪᒋ ᐃᓂᓂ ᐅᑑᒋᐲᑑᓇᓐ ᒪᒋᑫᑰᓇᓐ ᐃᐃᒫ ᑳᐃᔑ ᑲᓇᐌᒋᑫᒡ ᐅᑌᐃᕽ᙮

12:36b.MAT.012.036 ᑭᐐᑕᒪᐎᓂᓂᒻ, ᐊᐎᔭ ᑳᑕᓱ ᐃᔑᑮᔗᒡ, ᒥᓴᐙ ᑯ ᑌᐱᓈᒃ ᐁᐃᔑᑮᔗᒡ ᑕᑕᑾᑭᑕᒪᐙ ᐊᐲ ᑎᐹᑯᓂᑫᐎᑮᔑᑲᓂᓂᒃ᙮

12:37b.MAT.012.037 ᑭᑎᑭᑐᐎᓇᓐ ᐅᔕ ᑕᐋᐸᑕᓅᓐ ᐊᐲ ᐐᑎᐹᑯᓂᑰᔭᓐ᙮ ᑯᒫ ᑲᔦ ᑭᑎᑭᑐᐎᓂᕽ ᑭᑲᐅᒋ ᐃᑰ ᐁᑾᔭᒀᑎᓯᔭᓐ, ᑯᒫ ᑲᔦ ᑭᑎᑭᑐᐎᓂᕽ ᑭᑲᐅᒋ ᐃᑰ ᐁᑳ ᐁᑾᔭᒀᑎᓯᓯᐗᓐ᙮

12:38b.MAT.012.038 ᐃᑭ ᑕᔥ ᐅᓇᔓᐌᐎ ᑭᑭᓄᐊᒫᑫᐎᓂᓂᐗᒃ, ᐯᕒᐊᓰᒃ ᑲᔦ ᐅᑮᐃᓈᐙᓐ: ᐅᑭᑭᓄᐊᒫᑫ, ᑭᒥᓴᐌᓂᒥᑰ ᐁᐐ ᐙᐸᒥᑰᔭᓐ ᒋᒫᒪᑳᒋᒋᑫᔭᓐ᙮

12:39b.MAT.012.039 ᒋᓴᔅ ᑕᔥ ᑮᐃᑭᑐ: ᐋᐱᒋ ᒪᒋ ᐃᓇᑫ, ᐊᓅᒋᑯ ᑲᔦ ᐃᔑᐱᒫᑎᓯᐗᒃ ᓅᑯᒻ ᑳᐱᒫᑎᓯᐙᒡ, ᒦ ᐁᑕ ᑯ ᐁᔑᒋᑫᐙᒡ ᐁᓇᓈᑕᐙᐸᑕᒧᐙᒡ ᒫᒪᑳᒋᒋᑫᐎᓇᓐ᙮ ᐃᐃᐌᓂ ᑕᔥ ᐁᑕ ᒫᒪᑳᒋᒋᑫᐎᓐ ᑫᐙᐸᑕᒧᐙᒡ, ᑖᐱᔥᑰ ᒎᓇ ᑳᑮᐃᔑ ᒫᒪᑳᒋᓭᒡ᙮

12:40b.MAT.012.040 ᒎᓇ ᑳᑮ ᐲᓱᒡ ᑭᒋᑮᑰᔭᓐ ᐅᒥᓴᑖᓃᕽ ᓂᓱᑮᔑᒃ 3 ᓂᓱᑎᐱᒃ ᑲᔦ, ᒦ ᑖᐱᔥᑰ ᐃᓂᓂ ᐅᑯᓯᓴᓐ ᓂᓱᑮᔑᒃ ᓂᓱᑎᐱᒃ ᑲᔦ ᑫᐃᔑ ᐊᔮᓂᒡ ᐊᓈᒪᑲᒥᒃ᙮

12:41b.MAT.012.041 ᐊᐲ ᑕᔥ ᑎᐹᑯᓂᑫᐎᑮᔑᑲᒃ, ᓂᓂᐯ ᐆᑌᓈᕽ ᑳᑮ ᑖᐙᒡ ᐊᐎᔭᒃ ᑕᐸᓯᑸᐗᒃ ᒋᐊᓈᒥᒥᓀᒀ, ᐋᓃᔥ ᑮᑴᑳᑎᓯᐗᒃ ᐐᓇᐙ ᐊᐲ ᐁᑮᓅᑕᐙᐙᒡ ᒎᓇᐗᓐ ᐁᑲᑮᑴᓂᒡ᙮ ᑭᑎᓂᓂᓂᒻ ᐃᑕᔥ, ᓇᐗᒡ ᑫᑰᓐ ᐁᑭᒋ ᐃᓀᑖᑾᒃ ᐊᐲᒡ ᐐᓐ ᒎᓇ ᐅᐅᒫ ᐊᔮ᙮

12:42b.MAT.012.042 ᐊᐲ ᑕᔥ ᑎᐹᑯᓂᑫᐎᑮᔑᑲᒃ ᑭᒋᐅᑭᒫᑴ ᔖᐗᓄᕽ ᑳᑮᐅᒌᒡ ᑕᐸᓯᑸ ᒋᐊᓈᒥᒥᓀᒃ᙮ ᐋᓃᔥ ᐐᓐ ᐙᓴ ᑮᐱ ᐃᔖ ᐁᐐ ᓅᑕᐙᒡ ᔂᓬᐊᒪᓇᓐ ᑳᑮᐃᔑ ᑲᑮᑖᐎ ᑭᑭᓄᐊᒫᑫᓂᒡ᙮ ᑭᐐᑕᒪᐎᓂᓂᒻ ᐃᑕᔥ ᓇᐗᒡ ᐁᑭᒋ ᐃᓀᑖᑾᒃ ᐊᐲᒡ ᐐᓐ ᔂᓬᐊᒪᓐ ᐅᐅᒫ ᐊᔮ ᓅᑯᒻ᙮

12:43b.MAT.012.043 ᐊᐲ ᒪᒋᐊᒑᒃ ᑮᐅᒋ ᓵᑭᒋᐌᐱᓂᑲᓂᐎᒡ ᐃᓂᓃᕽ, ᒦᐃ ᒥᓯᐌ ᐁᔑ ᐸᐹᒥ ᐊᔮᒡ ᐱᑾᑕᑲᒥᒃ ᑳᐃᔑ ᐹᑌᓂᒃ ᐁᑲᑴ ᒥᑲᕽ ᐋᑎ ᑫᐃᔑ ᐊᓉᐱᒡ, ᑳᐐᓐ ᑕᔥ ᑫᑰᓂᓂ ᐅᒥᑲᓰᓐ᙮

12:44b.MAT.012.044 ᒦᑕᔥ ᐁᑭᑐᒡ: ᓂᑲ ᑮᐌ ᓂᐙᑳᐃᑲᓂᕽ ᐋᑎ ᑳᑮᐅᒋ ᓵᑲᐊᒫᓐ᙮ ᒦᑕᔥ ᐁᔑ ᑮᐌᒡ ᐁᒥᑲᕽ ᐅᐙᑳᐃᑲᓐ ᐐᑫ ᐁᐱᔑᔑᒀᓂᒃ, ᐁᑮ ᐯᑭᒋᑳᑌᓂᒃ, ᐁᓴᑲᑭᒋᑳᑌᓂᒃ ᑲᔦ᙮

12:45b.MAT.012.045 ᒦᑕᔥ ᐁᔑ ᑮᐌ ᑕᑯᔑᕽ ᐁᑕᑯᐲᓈᒡ ᓃᔣᓱ ᒪᒋᐊᒑᑾᐞ ᓇᐗᒡ ᐁᒪᒑᑎᓯᓂᒡ ᐊᐲᒡ ᐐᓐ᙮ ᒦᑕᔥ ᐁᔑ ᐲᑎᑫᐙᒡ ᐃᐃᒫ ᐁᐃᔑᑖᐙᒡ᙮ ᐊᐊ ᑕᔥ ᐃᓂᓂ ᓇᐗᒡ ᑭᒋ ᐃᔑ ᐊᔮ ᐊᐲᒡ ᐐᓐ ᑳᑮᐃᔑ ᐊᔮᐸᓐ ᓂᑕᒻ᙮ ᒦᑕᔥ ᒪᔮ ᑫᔑᓈᑯᓯᐙᒡ ᐅᑯ ᑳᒪᒑᑎᓯᐙᒡ ᓅᑯᒻ ᑳᐱᒫᑎᓯᐙᒡ᙮

12:46b.MAT.012.046 ᒣᒀ ᑕᔥ ᒋᓴᔅ ᐁᑲᑲᓅᓈᒡ ᐃᐃ ᑳᒫᒪᐌᓄᓂᒡ, ᐅᒫᒫᓐ, ᐐᒋᑭᐌᔭᐞ ᑲᔦ ᑮᐱ ᑕᑯᔑᓅᐞ ᐁᐐ ᑲᓅᓂᑯᒡ᙮ ᐊᑾᒌᕽ ᐃᑕᔥ ᑮᓃᐸᐎᐗᐞ᙮

12:47b.MAT.012.047 ᐯᔑᒃ ᐃᑕᔥ ᐊᐎᔭᓐ ᐅᑮᐃᑰᓐ: ᑕᑲ ᐱᓇᒫ, ᑭᒫᒫ ᑮᒋᑭᐌᔭᒃ ᑲᔦ ᐊᑾᒌᕽ ᓃᐸᐎᐗᒃ ᐁᐐ ᑲᓅᓂᒀ᙮

12:48b.MAT.012.048 ᒋᓴᔅ ᑕᔥ ᐅᑮᐃᓈᓐ: ᐊᐌᓀᓐ ᐃᑕᔥ ᓂᒫᒫ, ᐊᐌᓀᓇᒃ ᑲᔦ ᓃᒋᑭᐌᔭᒃ?

12:49b.MAT.012.049 ᑮᐃᔑᓂᑫᓂ ᑕᔥ ᐃᓇᑫ ᐁᔑ ᐊᔮᓂᒡ ᐃᐃ ᐅᑭᑭᓄᐊᒪᐙᑲᓇᐞ, ᒦᑕᔥ ᑳᐃᑭᑐᒡ: ᒦᐗᒃ ᐅᔕ ᐅᑯ ᓂᒫᒫ, ᓃᒋᑭᐌᔭᒃ ᑲᔦ᙮

12:50b.MAT.012.050 ᐊᐌᓀᓐ ᐃᑕᔥ ᑳᐃᔑᒋᑫᒡ ᑳᔑ ᐊᑕᐌᓂᒥᑯᒡ ᓂᑌᑌᓐ ᑭᒋᑮᔑᑯᕽ ᑳᐊᔮᓂᒡ, ᒦᐃ ᐅᔕ ᐊᐊᐌ ᓃᒋᑭᐌᓯ, ᓂᑕᐌᒫ, ᓂᒫᒫ ᑲᔦ᙮

13

13:1b.MAT.013.001 ᐯᔑᑾᓐ ᑕᔥ ᐁᑮᔑᑲᓂᓂᒃ, ᒋᓴᔅ ᐅᑮᓇᑲᑖᓐ ᐃᐃ ᐙᑳᐃᑲᓂᓂ, ᒦᑕᔥ ᑳᐃᔑ ᓈᓯᐲᒡ, ᐁᑮᐅᓇᐱᒡ ᐁᐐ ᑭᑭᓄᐊᒫᑫᒡ᙮

13:2b.MAT.013.002 ᐁᑮ ᐹᑏᓄᓂᒡ ᐃᑕᔥ ᑳᑮ ᐱᓈᓯᑳᑯᒡ, ᒌᒫᓂᕽ ᑮᐴᓯ ᐁᑮᐅᓇᐱᒡ ᐁᐐᐅᒋ ᑭᑭᓄᐊᒫᑫᒡ᙮ ᐃᑭ ᑕᔥ ᐐᓐ ᐊᐎᔭᒃ ᒌᑭᐲᒃ ᑮᓃᐸᐎᐗᒃ᙮

13:3b.MAT.013.003 ᐋᐌᒋᑲᓇᓐ ᑕᔥ ᐅᑮᐋᐸᒋᑑᓇᓐ ᓃᐳᐗᐞ ᑫᑰᓇᓐ ᐁᑕᑎᐹᒋᒧᑕᐙᒡ᙮ ᑮᐊᔮ ᓴ ᐃᓂᓂ ᐁᑮ ᑭᑎᑳᑕᕽ ᑭᑎᑳᓀᓴᓐ᙮

13:4b.MAT.013.004 ᒣᒀ ᑕᔥ ᐁᐅᓶᐌᐱᓇᕽ ᑭᑎᑳᓀᓴᓐ, ᐋᓂᑕ ᒦᑲᓈᕽ ᑮᐃᔑ ᐸᑭᓯᓂᓂᐗᓐ᙮ ᐱᓀᔒᔕᒃ ᐃᑕᔥ ᐅᑮ ᑭᑖᓈᐙᓐ᙮

13:5b.MAT.013.005 ᐋᓂᑕ ᑕᔥ ᑭᑎᑳᓀᓴᓐ, ᐁᔑ ᐊᓯᓃᑳᒃ ᑳᐃᔑ ᑕᐸᓴᑲᒥᑳᒃ ᑮᐃᔑ ᐸᑭᓯᓅᓐ᙮ ᐐᐸ ᑕᔥ ᑮᓂᑖᐎᑭᓅᓐ ᑭᑎᑳᓇᓐ᙮ ᐋᓃᔥ ᐅᓵᒻ ᑮᑕᐸᓴᑲᒥᑳ᙮

13:6b.MAT.013.006 ᐊᐲ ᑕᔥ ᑮᓯᔅ ᐁᓂ ᐃᔥᐸᑰᒋᕽ ᑲᑭᓇ ᑮᒑᑭᑌᐗᓐ ᐃᓂ ᑭᑎᑳᓇᓐ ᐋᓃᔥ ᑳᐐᓐ ᐙᓴ ᑮᑯᑖᐎᑭᓯᓅᓇᓐ᙮

13:7b.MAT.013.007 ᐋᓂᑕ ᑕᔥ ᑭᑎᑳᓀᓴᓐ ᐅᑳᐎᒥᓇᑲᔒᑳᕽ ᑮᐃᔑ ᐸᑭᓯᓅᓐ᙮ ᐅᑳᐎᒥᓇᑲᔒᓐ ᑕᔥ ᐁᐅᐱᑭᑭᓐ ᐅᑮ ᑭᐱᔥᑳᓈᐙᓐ ᐃᓂ ᑭᑎᑳᓀᓴᓐ᙮

13:8b.MAT.013.008 ᐋᓂᑕ ᑕᔥ ᑭᑎᑳᓀᓴᓐ, ᒫᐗᒡ ᐃᑯ ᐁᔑ ᒥᓄᑲᒥᑳᒃ ᑮᐃᔑ ᐸᑭᓯᓅᓐ᙮ ᐐᑫ ᑕᔥ ᑮᒥᓄᑭᓅᓐ ᐃᓂ ᑭᑎᑳᓇᓐ᙮ ᓂᑯᑣᒃ 100 ᑕᓯᓐ ᐃᑯ ᐋᓂᑕ ᑮᐅᑎᓂᑳᑌᐗᓐ ᐃᓂ ᑭᑎᑳᓇᓐ, ᑯᑕᒃ ᓂᑯᑣᓯᒥᑕᓇ 60, ᑯᑕᒃ ᓂᓯᒥᑕᓇ 30᙮

13:9b.MAT.013.009 ᒋᓴᔅ ᑕᔥ ᑮᐃᑭᑐ: ᐱᓯᑕᒧᒃ ᑮᓇᐙ ᑳᐅᑕᐗᑳᔦᒃ᙮

13:10b.MAT.013.010 ᒋᓴᔅ ᑕᔥ ᐅᑮ ᐱᓈᓯᑳᑰᐞ ᐅᑭᑭᓄᐊᒪᐙᑲᓇᐞ ᐁᑮᐃᔑ ᑲᑴᒋᒥᑯᒡ: ᐌᑯᓀᓐ ᐌᒋ ᐋᐸᒋᑖᐗᒡ ᐋᐌᒋᑲᓇᓐ ᑮᑲᓅᓇᑣ ᐯᒫᑎᓯᐙᒡ?

13:11b.MAT.013.011 ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᑮᓇᐙ ᐅᔕ ᑭᐸᑭᑎᓇᒫᑰᒻ ᒋᑭᑫᑕᒣᒃ ᐃᓂ ᑳᑮ ᑭᑫᒋᑳᑌᓯᓄᑭᓐ ᑫᑰᓇᓐ ᑭᔐᒪᓂᑑ ᐅᑎᐯᒋᑫᐎᓐ ᑳᑕᔑᑌᑭᓐ᙮ ᐐᓇᐙ ᑕᔥ ᐐᓐ ᑳᐐᓐ ᐸᑭᑎᓇᒪᐙᓰᐗᒃ ᒋᓂᓯᑐᑕᒧᐙᒡ᙮

13:12b.MAT.013.012 ᐊᐊ ᓴ ᑳᐊᔮᒡ ᑫᑰᓇᓐ ᑕᒦᓈᑲᓂᐎ ᑫᑰᓇᓐ ᐋᒋᑯ ᒋᐌᓅᑎᓯᒡ᙮ ᐊᐊ ᑕᔥ ᐐᓐ ᐸᑮ ᐁᑕ ᑫᑰᓂᓂ ᑳᐊᔮᒡ ᑕᐅᑖᐱᓇᒪᐙ ᑲᑭᓇ ᑫᑰᓂᓂ ᑳᐊᔮᒡ᙮

13:13b.MAT.013.013 ᒦᑕᔥ ᑳᐅᒋ ᐋᐸᒋᑖᐗᒃ ᐋᐌᒋᑲᓇᓐ ᑫᑰᓂᓂ ᐁᑮᐃᓇᒀ: ᒥᓴᐙ ᐋᓇ ᐃᓈᐱᐙᒡ, ᑳᐐᓐ ᐙᐱᓰᐗᒃ; ᒥᓴᐙ ᐋᓇ ᓅᑕᒧᐙᒡ, ᑳᐐᓐ ᐱᓯᑕᓰᐗᒃ, ᑳᐐᓐ ᑲᔦ ᓂᓯᑐᑕᓰᐗᒃ᙮

13:14b.MAT.013.014 ᐊᐊ ᑕᔥ ᐋᐃᓭᔭ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᑳᑮᐃᑭᑐᑯᐸᓀᓐ ᒪᔮ ᐃᔑᓭᓂ: ᐱᔑᔑᒃ ᐋᓇ ᓈᓅᑕᒣᒃ, ᑳᐐᓐ ᐃᑕᔥ ᑭᑲ ᓂᓯᑐᑕᓰᒻ᙮ ᐱᔑᔑᒃ ᐃᑕᔥ ᐋᓇ ᐙᐸᒋᑫᔦᒃ ᑳᐐᓐ ᑭᑲ ᓂᓯᑕᐎᓇᓰᒻ ᑳᐙᐸᑕᒣᒃ᙮

13:15b.MAT.013.015 ᐋᒋᑯ ᑲᑳᒋᒡ ᐃᓀᑕᓯᒀ ᒋᓂᓯᑐᑕᒧᐙᒡ, ᐅᑮ ᑭᐱᓈᓈᐙᓐ ᑲᔦ ᐅᑕᐗᑭᐙᓐ, ᐸᓴᒀᐱᐗᒃ ᑲᔦ᙮ ᑮᔥᐱᓐ ᐅᐅ ᐃᔑᒋᑫᓯᒀᐸᓐ ᑖᐙᐱᐗᒃ, ᑖᓅᑕᒨᒃ ᑲᔦ, ᑖᓂᓯᑐᑕᒨᒃ ᑲᔦ, ᓂᑖᐱ ᑴᑮᑖᑰᒃ ᑲᔦ, ᒋᒥᓄᐊᔮᐊᒀᐸᓐ ᑲᔦ, ᑮᐃᑭᑐᓂᑯᐸᓐ ᑭᔐᒪᓂᑑᓐ᙮

13:16b.MAT.013.016 ᑮᓇᐙ ᑕᔥ ᐐᓐ ᑭᔕᐌᑖᑯᓯᒻ, ᐋᓃᔥ ᑭᔥᑮᔑᑯᐙᕽ ᐁᐅᒋ ᐙᐸᑕᒣᒃ ᐃᓂ ᑳᐙᐸᑕᒣᒃ, ᑭᑕᐗᑭᐙᕽ ᐁᐅᒋ ᓅᑕᒣᒃ ᐃᓂ ᑳᓅᑕᒣᒃ᙮

13:17b.MAT.013.017 ᒫᒥᑲᐎᒃ ᐃᑕᔥ ᐅᐅᐌ: ᐋᐱᒋ ᓃᐳᐗᐞ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ ᑲᔦ ᐅᑾᔭᒀᑎᓰᒪᐞ ᑲᔦ, ᐅᑮᒥᓴᐌᑖᓈᐙ ᒋᑮᐙᐸᑕᒧᐙᐸᓐ ᑳᐙᐸᑕᒣᒃ, ᒋᑮᓅᑕᒧᐙᐸᓐ ᑲᔦ ᑳᓅᑕᒣᒃ; ᑳᐐᓐ ᑕᔥ ᐅᑮᓅᑕᓰᓈᐙ᙮

13:18b.MAT.013.018 ᐌᐌᓂ ᑕᔥ ᐱᓯᑕᒧᒃ ᒋᓂᓯᑐᑕᒣᒃ ᐊᐊ ᐃᓂᓂ ᑳᐋᐌᒋᑳᓱᒡ ᐁᑮ ᑭᑎᑫᒡ᙮

13:19b.MAT.013.019 ᐊᐎᔭ ᑳᓅᑕᕽ ᐁᑎᐹᑐᑌᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ, ᐁᓂᓯᑐᑕᓯᒃ ᐃᑕᔥ, ᒦ ᑖᐱᔥᑰ ᐁᔑᓈᑯᓯᒡ ᐃᓂ ᓴ ᑳᑮ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᒦᑲᓈᕽ᙮ ᒪᒋᐊᔭᐋ ᐁᐱ ᑕᑯᔑᕽ ᐁᐅᑖᐱᓇᕽ ᐃᐃ ᐋᔕ ᑳᑮ ᑭᑎᑳᑌᓂᑭᓐ᙮

13:20b.MAT.013.020 ᐃᓂ ᑕᔥ ᑳᑮ ᐸᑭᓯᑭᓐ ᑭᑎᑳᓀᓴᓐ ᑳᔑ ᐊᓯᓃᑳᒃ, ᒦᐃ ᐁᔑᓈᑯᓯᒡ ᐊᐊ ᔐᒫᒃ ᑳᐅᑖᐱᓇᕽ ᑭᔐᒪᓂᑑ ᐅᑎᐹᒋᒧᐎᓐ ᐊᐲ ᐁᓅᑕᕽ, ᐋᐱᒋ ᐁᒥᓉᑕᕽ᙮

13:21b.MAT.013.021 ᑳᐐᓐ ᐃᑕᔥ ᐙᓴ ᑯᑖᐐᒪᑲᓯᓂᓂ ᐃᐃ ᑎᐹᒋᒧᐎᓐ ᐅᑌᐃᕽ᙮ ᐋᐱᒋ ᑕᔥ ᐊᒋᓇ ᐁᑕ ᓃᐸᐎ᙮ ᐊᐲ ᑕᔥ ᐋᓇᒥᓯᐎᓐ, ᑲᒀᑕᑭᑑᐎᓐ ᑲᔦ ᐁᐱᓈᓯᑳᑯᒡ ᑎᐹᒋᒧᐎᓐ ᐅᒋ, ᒦᐃ ᐁᔑ ᐸᑭᒌᒡ᙮

13:22b.MAT.013.022 ᐃᓂ ᑕᔥ ᑳᑮ ᐸᑭᓯᑭᓐ ᑭᑎᑳᓀᓴᓐ ᑳᔑ ᐅᑳᐎᒥᓇᑲᔒᑳᒃ, ᒦᐃ ᐁᔑᓈᑯᓯᒡ ᐊᐊ ᑳᓅᑕᕽ ᑭᔐᒪᓂᑑ ᐅᑎᐹᒋᒧᐎᓐ, ᐅᓵᒻ ᐃᑕᔥ ᐁᐅᒑᓂᒣᑕᕽ, ᐅᓵᒻ ᑲᔦ ᐁᓵᑭᑑᒡ ᐌᓅᑎᓯᐎᓐ᙮ ᒦᑕᔥ ᑳᐅᒋ ᓵᑭᒋᐌᐱᔥᑭᑳᑌᒃ ᐃᐃ ᑎᐹᒋᒧᐎᓐ, ᑳᐐᓐ ᑲᔦ ᑫᑰᓐ ᐅᑲ ᓈᑯᑑᓰᓐ᙮

13:23b.MAT.013.023 ᐃᓂ ᑕᔥ ᑳᑮ ᐸᑭᓯᑭᓐ ᑭᑎᑳᓀᓴᓐ ᐃᐃᒫ ᑳᔑ ᒥᓄᑲᒥᑳᒃ ᒦᐃ ᐁᔑᓈᑯᓯᒡ ᐊᐎᔭ ᑳᓅᑕᕽ ᑭᔐᒪᓂᑑ ᐅᑎᐹᒋᒧᐎᓐ, ᑳᓂᓯᑐᑕᕽ ᑲᔦ᙮ ᐋᐱᒋ ᐅᑲ ᓈᑯᑑᓇᓐ ᑫᑰᓂᓂ ᐌᓂᔑᔑᓂᓂᑭᓐ᙮ ᐋᓂᑕ ᐊᐎᔭ ᓂᑯᑣᒃ 100 ᐊᐗᔑᒣ ᐃᔑᓈᑾᓂᓂ ᐃᐃ ᑳᑮᒦᓂᓐᒡ, ᐋᓂᑕ ᑲᔦ ᓂᑯᑣᓯᒥᑕᓇ 60 ᐊᐗᔑᒣ, ᐋᓂᑕ ᑲᔦ ᓂᓯᒥᑕᓇ 30᙮

13:24b.MAT.013.024 ᒋᓴᔅ ᑕᔥ ᐅᑮᐐᑕᒪᐙᐞ ᑯᑕᒃ ᐋᐌᒋᑲᓂᓂ᙮ ᒦᐃ ᑫᐃᔑᓈᑾᒃ ᐊᐲ ᑭᔐᒪᓂᑑ ᐱᐅᔑᓯᑑᒡ ᐅᑑᑭᒫᐎᐎᓐ, ᑖᐱᔥᑰ ᐃᓂᓂ ᑳᑭᑎᑳᑕᕽ ᐃᓂ ᓴᓭᑳ ᑭᑎᑳᓀᓴᓐ ᐃᐃᒫ ᐅᑕᑮᒥᕽ᙮

13:25b.MAT.013.025 ᐋᐱᑎᕽ ᐃᑕᔥ ᐁᑎᐱᑲᓂᓂᒃ, ᑲᑭᓇ ᐁᓂᐹᐙᒡ, ᐊᐎᔭᓐ ᑳᔑ ᐃᑫᓂᒥᑯᒡ ᑮᐲᔖᐗᓐ ᐁᑮ ᑭᑎᑳᑕᒥᓂᒡ ᒪᒋᑭᑎᑳᓂᓂ ᐃᐃᒫ ᑳᑮᐃᔑ ᑭᑎᑳᓈᐸᓐ ᐃᓂ ᐸᑴᔑᑲᓇᓐ᙮ ᒦᑕᔥ ᑳᐊᓂ ᐃᔑ ᒫᒑᓂᒡ ᐃᓂ ᐃᓂᓂᐗᓐ᙮

13:26b.MAT.013.026 ᐊᐲ ᑕᔥ ᐁᐊᓂ ᓵᑲᑮᓂᑭᓐ ᐃᓂ ᑳᑮ ᑭᑎᑳᑕᑭᐸᓐ, ᒦᑕᔥ ᐃᓂ ᒪᒋᑭᑎᑳᓇᓐ ᑲᔦ ᑮᐱ ᓵᑭᑭᓅᓐ᙮

13:27b.MAT.013.027 ᐊᐊ ᑕᔥ ᑭᑎᑫᐎᓂᓂ ᐅᑕᓄᑮᐋᑲᓇᐞ ᐅᑮ ᐱᓈᓯᑳᑰᐞ ᐁᑮᐃᑯᒡ: ᐅᑭᒫ, ᐁᑮ ᑭᑎᑳᑕᒪᓐ ᐃᑕᔥ ᐃᓂ ᓴᓭᑳ ᑭᑎᑳᓀᓴᓐ, ᐋᑎ ᑕᔥ ᑳᐅᒋ ᐃᑭᓐ ᐃᓂ ᒪᒋᑭᑎᑳᓇᓐ?

13:28b.MAT.013.028 ᒦᑕᔥ ᑳᐃᓈᒡ: ᑳᔒᑫᓂᒥᒡ ᑫᒋᓈᒡ ᐊᐊ ᑳᑮ ᑭᑎᑳᑕᕽ ᐃᓂ ᒪᒋᑭᑎᑳᓇᓐ᙮ ᐅᑮᐃᓈᐙᓐ ᐃᑕᔥ ᐅᑑᑭᒫᒥᐙᓐ: ᑭᓇᑕᐌᓂᒥᓈᒻ ᐃᓇ ᒋᐸᐹᑾᒋᐱᑑᔮᕽ ᐃᓂ ᒪᒋᑭᑎᑳᓇᓐ?

13:29b.MAT.013.029 ᐅᐅ ᑕᔥ ᐅᑮᐃᓈᐞ: ᑳᐐᓐ᙮ ᑮᔥᐱᓐ ᐸᑾᒋᐱᑑᔦᒃ ᒪᒋᑭᑎᑳᓇᓐ, ᑭᑲ ᑕᑯ ᐸᑾᒋᐱᑑᓈᐙᓐ ᐃᓂ ᐸᑴᔑᑲᓂ ᑭᑎᑳᓇᓐ᙮

13:30b.MAT.013.030 ᒫᓄ ᐸᑴᔑᑲᓐ, ᐃᓂ ᑲᔦ ᒪᒋᑭᑎᑳᓇᓐ ᑕᐃᔑ ᓃᔓᓂᑖᐎᑭᓅᓐ ᐲᓂᔥ ᐊᐲ ᒋᒪᓂᔑᑫᓈᓂᐗᕽ᙮ ᐃᐃ ᑕᔥ ᐊᐲ ᓂᑲ ᐃᓈᒃ ᐅᑕᓄᑮᒃ: ᐃᓂ ᐱᓇᒫ ᒪᒋᑭᑎᑳᓇᓐ ᒪᒪᓂᐱᑑᒃ, ᐅᑾᐱᑑᒃ ᒋᒪᒍᑌᐌᐱᓇᒣᒃ᙮ ᐊᐊ ᑕᔥ ᐸᑴᔑᑲᓐ ᒫᐗᑑᓂᒃ, ᒋᓇᐃᓀᒃ ᐃᐃᒫ ᓂᑕᑖᓱᐎᑲᒥᑯᕽ᙮

13:31b.MAT.013.031 ᒦᓇᐙ ᑕᔥ ᒋᓴᔅ ᑮᐋᐌᒋᑫ ᐁᑮᐃᑭᑐᒡ: ᑭᔐᒪᓂᑑ ᐅᑑᑭᒫᐎᐎᓐ ᒦᓴ ᐁᔑᓈᑾᒃ ᑖᐱᔥᑰ ᐃᓂᓂ ᑳᑭᑎᑳᑕᕽ ᐅᑭᑎᑫᐗᑲᒥᑯᕽ ᐊᐸᒋᑲᓂᑭᑎᑳᓀᔅ ᒪᔅᑕᕒᑦ ᑳᐃᔑᓂᑳᑌᓂᒃ ᑭᑎᑳᓀᔅ᙮

13:32b.MAT.013.032 ᒦᑕᔥ ᐅᐅ ᒫᐗᒡ ᐁᑳᓯᕽ ᐊᐲᒡ ᐐᓐ ᑯᑕᒃ ᑭᑎᑳᓀᓴᓐ᙮ ᐊᐲ ᑕᔥ ᐁᐊᓂ ᑮᔑᑭᒃ, ᓇᐗᒡ ᑭᓍᑾᓐ ᐊᐲᒡ ᐸᑳᓐ ᑫᑰᓇᓐ ᑳᓂᑖᐎᑭᑭᓐ, ᑖᐱᔥᑰ ᒥᑎᑯᕽ ᐁᐃᓂᑯᒀᒃ᙮ ᒦᑕᔥ ᐃᐃᒫ ᐁᔑ ᐴᓃᐙᒡ ᐱᓀᔒᔕᒃ, ᑫᔑ ᐗᓯᓱᓂᑫᐙᒡ ᐗᑎᑾᓂᑳᕽ᙮

13:33b.MAT.013.033 ᒦᓇᐙ ᑕᔥ ᒋᓴᔅ ᐅᑮ ᑎᐹᑐᑖᓐ ᑯᑕᒃ ᐋᐌᒋᑲᓂᓂ᙮ ᒦᓴ ᐁᔑᓈᑾᒃ ᑭᔐᒪᓂᑑ ᐅᑎᐯᒋᑫᐎᓐ ᑖᐱᔥᑰ ᐅᐱᓯᑲᓀᓯᕽ, ᐊᐊ ᐃᑴ ᑳᐅᑖᐱᓇᕽ ᐁᑕᑯᓇᕽ ᐃᐃᒫ ᐯᔑᑯᔥᑭᒧᑦ ᐸᑴᔑᑲᓂᕽ, ᒦᑕᔥ ᐲᓂᔥ ᒥᓯᐌ ᐁᔑ ᐅᐱᔥᑳᓂᒡ ᐅᐸᑴᔑᑲᓂᑳᓇᐞ᙮

13:34b.MAT.013.034 ᒋᓴᔅ ᑕᔥ ᐅᑮᐋᐸᒋᑑᓇᓐ ᐋᐌᒋᑲᓇᓐ ᑫᑰᓂᓂ ᐁᐃᓈᒡ ᐊᐎᔭᐞ᙮ ᑳᐐᓐ ᑫᑰᓂᓂ ᑮᐃᑭᑐᓰ ᑮᔥᐱᓐ ᐋᐌᒋᑲᓂᓂ ᐁᐋᐸᒋᑑᓯᒃ᙮

13:35b.MAT.013.035 ᒦᑕᔥ ᑳᑮᐅᒋ ᐃᔑᒋᑫᒡ, ᒪᔮ ᐱᑯ ᒋᐃᔑᓭᓂᒃ ᑳᑮᐃᑭᑐᓂᑯᐸᓀᓐ ᐃᓂ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ: ᐋᐌᒋᑲᓇᓐ ᐃᓴ ᓂᑲ ᐋᐸᒋᑑᓇᓐ ᐊᐲ ᑲᓅᓇᒀ, ᓂᑲ ᐐᑕᒪᐙᒃ ᑫᑰᓇᓐ ᑳᑮᐱ ᑭᑫᒋᑳᑌᓯᓄᑭᓐ ᐊᐲ ᑮᒫᒌᐊᑮᐗᕽ᙮

13:36b.MAT.013.036 ᒋᓴᔅ ᑕᔥ ᐅᑮᓇᑲᓈᐞ ᐃᐃ ᑳᐹᑏᓄᓂᒡ, ᒦᑕᔥ ᑮᐊᓂ ᐲᑎᑫ ᐙᑳᐃᑲᓂᕽ᙮ ᐅᑭᑭᓄᐊᒪᐙᑲᓇᐞ ᐃᑕᔥ ᐅᑮ ᐱᓈᓯᑳᑰᐞ ᐁᑮᐃᑯᒡ: ᓂᓯᑐᑕᒨᔑᔑᓈᒻ ᐃᐃ ᐋᐌᒋᑲᓐ, ᒪᒋᑭᑎᑳᓇᓐ ᑳᑮ ᑭᑎᑳᑌᑭᓐ ᐃᐃᒫ ᑭᑎᑳᓇᑲᒥᑯᕽ᙮

13:37b.MAT.013.037 ᒋᓴᔅ ᑕᔥ ᐅᑮᐐᑕᒪᐙᐞ: ᐊᐊ ᓴ ᐃᓂᓂ ᑳᑮ ᑭᑎᑳᑕᕽ ᐃᓂ ᓴᓭᑳ ᑭᑎᑳᓀᓴᓐ ᒦᓴ ᐊᐊ ᐃᓂᓂ ᐅᑯᓯᓴᓐ᙮

13:38b.MAT.013.038 ᐃᐃ ᑕᔥ ᑭᑎᑳᓇᑲᒥᒃ ᒦᓴ ᐃᐃᐌ ᐊᑭ᙮ ᐃᓂ ᑕᔥ ᓴᓭᑳ ᑭᑎᑳᓀᓴᓐ ᒦᐃ ᐃᑭᐌᓂᐗᒃ ᐅᐱᒫᑎᓰᒃ ᑭᔐᒪᓂᑑ ᐅᑎᐯᒋᑫᐎᓂᕽ ᑳᐅᒋ ᑎᐯᑖᑯᓯᐙᒡ᙮ ᐃᓂ ᑕᔥ ᒪᒋᑭᑎᑳᓀᓴᓐ, ᒦᐗᑭᑭ ᑳᒪᒋᐊᔭᐋᐎᓂᒡ ᑳᑎᐯᓂᒥᑯᐙᒡ᙮

13:39b.MAT.013.039 ᐊᐊ ᑕᔥ ᑳᑮ ᔒᑫᓂᒥᐌᒡ ᑳᑮ ᑭᑎᑳᑕᕽ ᒪᒋᑭᑎᑳᓀᓴᓐ, ᒦᓴ ᐊᐊ ᒪᒋᐊᔭᐋ ᐐᓂᑯ᙮ ᐃᐃ ᑕᔥ ᑳᒫᐗᑑᓂᑫᓈᓂᐗᕽ, ᒦᓴ ᐃᐃ ᐊᐲ ᑫᐃᔥᒀᓭᑭᓐ ᐅᓄ ᓅᑯᒻ ᑳᐱᒥᓭᑭᓐ᙮ ᐃᑭ ᑕᔥ ᐁᒐᓬᐊᒃ ᒦᓴ ᐃᑭᐌᓂᐗᒃ ᑳᒫᐗᑑᓂᑫᐙᒡ᙮

13:40b.MAT.013.040 ᑖᐱᔥᑰ ᑳᐐᐃᔑ ᐅᑯᓂᑳᑌᑭᓐ ᐁᐐ ᒑᑭᓯᑳᑌᑭᓐ ᐃᓂ ᒪᒋᑭᑎᑳᓀᓴᓐ, ᒦᓴ ᑫᐃᔑᐌᐸᒃ ᐊᐲ ᐃᔥᒀᓭᑭᓐ ᐅᓄ ᓅᑯᒻ ᑳᐱᒥᓭᑭᓐ᙮

13:41b.MAT.013.041 ᐃᓂᓂ ᐅᑯᓯᓴᓐ ᐃᓴ ᐅᑲ ᐃᔑᓂᔕᐙᓂ ᐅᑌᒐᓬᐃᒥᓂ ᒋᐅᒋ ᒫᒨᔕᑭᓈᓂᒡ ᐃᐃᒫ ᐅᑎᐯᒋᑫᐎᓂᕽ ᑲᑭᓇ ᑳᑲᑴ ᒪᒋᑑᑕᒧᐃᐌᓂᒡ, ᐃᐃ ᑲᔦ ᑯᑕᒃ ᐅᒪᒋᑑᑕᒨᐞ᙮

13:42b.MAT.013.042 ᒦᑕᔥ ᑫᔑ ᒪᒍᑌᐌᐱᓂᒥᓐᒡ ᐃᐃᒫ ᑳᐃᔑ ᑭᔕᑾᓀᓂᒃ ᐃᔥᑯᑌᓂ᙮ ᒦᑕᔥ ᐃᐃᒫ ᑫᔑ ᒪᐎᓂᒡ, ᒋᒪᑗᑕᒥᓂᒡ ᑲᔦ ᐐᐱᑖᓂ᙮

13:43b.MAT.013.043 ᐃᑭ ᑕᔥ ᑾᔭᒃ ᑳᐱᒫᑎᓯᐙᒡ ᑖᐱᔥᑰ ᑮᓯᓱᕽ ᑕᔑ ᐙᓭᓈᑯᓯᐗᒃ ᐊᐲ ᐅᑌᑌᐙᓐ ᐅᔑᓯᑑᓂᒡ ᐅᑎᐯᒋᑫᐎᓂᓂ᙮

13:44b.MAT.013.044 ᐃᐃ ᓴ ᑭᔐᒪᓂᑑ ᐅᑎᐯᒋᑫᐎᓐ ᒦᐃ ᐁᔑᓈᑾᒃ ᑖᐱᔥᑰ ᔔᓂᔮ ᐁᑮᓂᑾᐅᓐᒡ ᐃᐃᒫ ᑭᑎᑳᓇᑲᒥᑯᕽ᙮ ᐊᐲ ᑕᔥ ᐃᓂᓂ ᐁᐱᒋ ᒥᑲᐙᒡ, ᒦᐃ ᑳᐃᔑ ᑮᐌ ᓂᑾᐙᒡ᙮ ᐁᐲᒋ ᒥᓉᑕᕽ ᑕᔥ ᒦᐃ ᑳᐃᔑ ᐊᑖᐙᑫᒡ ᑲᑭᓇ ᑫᑰᓂᓂ ᑳᑎᐯᑕᕽ᙮ ᒦᑕᔥ ᑳᐃᔑ ᐊᑖᐌᒡ ᐃᐃᐌᓂ ᑭᑎᑳᓇᑲᒥᑯᓂ᙮

13:45b.MAT.013.045 ᒦ ᓴ ᐃ ᒦᓇᐙ ᑭᔐᒪᓂᑑ ᐅᑎᐯᒋᑫᐎᓐ ᐁᔑᓈᑾᓂᓂᒃ ᑖᐱᔥᑰ ᐊᑖᐌᐎᓂᓂ ᑳᐸᐹ ᓇᓈᑕ ᐊᑖᐌᒡ ᒫᐗᒡ ᑳᐅᓂᔑᔑᓂᒡ ᒦᑭᓴᐞ᙮

13:46b.MAT.013.046 ᐊᐲ ᑕᔥ ᐁᒥᑲᐙᒡ ᒫᐗᒡ ᐁᐋᑾᑭᓱᓂᒡ, ᒦᔥ ᑳᐊᐎ ᐃᔑ ᐊᑖᐙᑫᒡ ᑲᑭᓇ ᑫᑰᓇᓐ ᑳᐊᔮᒡ, ᐁᐊᑖᐌᒡ ᐃᓂ ᑳᐅᓂᔑᔑᓂᒡ ᒦᑭᓴᓐ᙮

13:47b.MAT.013.047 ᒦ ᑲᔦ ᑫᐃᔑᓈᑾᒃ ᐊᐲ ᑭᔐᒪᓂᑑ ᑮᔑᓯᑑᒡ ᐅᑎᐯᒋᑫᐎᓐ, ᑖᐱᔥᑰ ᐁᐸᑯᐲᐅᓐᒡ ᐊᓴᑉ ᓵᑲᐃᑲᓃᕽ, ᑮᑰᔭᒃ ᐃᑕᔥ ᐁᐱᑕᐌᐙᒡ᙮

13:48b.MAT.013.048 ᐊᐲ ᑕᔥ ᐁᒨᔥᑭᓀᐱᑕᐌᐙᒡ ᑮᑰᔭᒃ, ᒦᔥ ᐃᓂᓂᐗᒃ ᐁᔑ ᐊᒀᔑᒫᐙᒡ ᐃᓂ ᐊᓴᐲᓐ᙮ ᒦᑕᔥ ᐯᐸᑳᓐ ᐁᔑ ᐊᓵᐙᒡ ᐃᐃ ᑮᑰᔭᐞ᙮ ᐃᑭ ᑕᔥ ᑳᐅᓂᔑᔑᐙᒡ ᐊᑭᑯᕽ ᐃᔑᐊᓵᐗᒃ᙮ ᐃᑭ ᑕᔥ ᑳᒫᓈᑎᓯᐙᒡ ᐌᐱᓂᑲᓂᐎᐗᒃ᙮

13:49b.MAT.013.049 ᒦᑕᔥ ᒪᔮ ᑫᐃᔑᓈᑾᒃ ᐊᐲ ᐃᔥᒀᓭᓂᑭᓐ ᐅᓄ ᓅᑯᒻ ᑳᐱᒥᓭᑭᓐ ᐅᐅᒫ ᐊᑮᕽ᙮ ᐁᒐᓬᐊᒃ ᐅᑲ ᒫᐗᑑᓈᐙᐞ ᐅᒪᒋ ᐃᔑᐌᐱᓰᐞ ᐸᑳᓐ ᒋᐊᓵᐙᒡ᙮ ᐅᑾᔭᒀᑎᓰᐞ ᐃᑕᔥ ᑲᔦ ᐸᑳᓐ ᑕᐊᔮᐗᐞ᙮

13:50b.MAT.013.050 ᒦᑕᔥ ᐅᒪᒋ ᐃᔑᐌᐱᓰᒃ ᑫᐃᔑ ᐃᔑᐌᐱᓂᑣ ᐃᐃᒫ ᑳᐃᔑ ᑭᔕᑾᓀᓂᒃ ᐃᔥᑯᑌᓂ᙮ ᑕᒪᐎᐗᒃ ᑕᔥ, ᐅᑲ ᒪᑗᑖᓈᐙᓐ ᑲᔦ ᐐᐱᑎᐙᓐ᙮

13:51b.MAT.013.051 ᒋᓴᔅ ᑕᔥ ᐅᑮᐃᓈᐞ: ᑭᓂᓯᑐᑖᒻ ᐃᓇ ᑳᐃᓂᓇᑰᒃ? ᒦᑕᔥ ᑳᐃᑯᒡ: ᑫᑫᑦ᙮

13:52b.MAT.013.052 ᒦᑕᔥ ᑳᐃᓈᒡ ᐋᒋᑯ: ᒦᑕᔥ ᐅᐅᐌ ᑳᐐᑕᒪᐎᓇᑰᒃ: ᐁᑕᔑᒡ ᐊᐊ ᑳᑭᑭᓄᐊᒫᑫᒡ ᑭᔐᒪᓂᑑᓐ ᐅᑑᓇᔓᐌᐎᓂᓂ, ᐊᐲ ᑫᑭᓄᐊᒪᐎᓐᒡ ᐋᓃᓐ ᐁᓀᑖᑾᓂᓂᒃ ᑭᔐᒪᓂᑑᓐ ᐅᑎᐯᒋᑫᐎᓂᓂ, ᒦᐃᐌ ᐁᔑᓈᑯᓯᒡ ᑖᐱᔥᑰ ᐊᐎᔭ ᑖᐎᓐ ᑳᑎᐯᑕᕽ ᑳᐅᒋ ᓵᑭᓯᑑᒡ ᐅᔥᑲᔭᐄᐎ ᑫᑰᓇᓐ ᑲᔦ ᑫᑌᐊᔭᐄᐎ ᑫᑰᓇᓐ ᐃᐃᒫ ᐅᑕᑖᓱᐎᑲᒥᑯᕽ᙮

13:53b.MAT.013.053 ᐊᐲ ᑕᔥ ᒋᓴᔅ ᑳᐃᔥᒀ ᑭᑭᓄᐊᒫᑫᒡ ᐃᓂ ᐋᐌᒋᑲᓇᓐ, ᑮᐊᓂ ᒫᒑ᙮

13:54b.MAT.013.054 ᐃᐃᐌᑎ ᑕᔥ ᑮᐃᔖ ᑳᑮᐅᒌᒡ ᐆᑌᓈᕽ, ᐁᑮ ᑕᔑᑭᑭᓄᐊᒪᐙᒡ ᑳᐊᔮᓂᒡ ᐅᑕᓇᒥᐁᐎᑲᒥᑯᓃᕽ᙮ ᐃᐃ ᑕᔥ ᑳᑮᓅᑖᑯᒡ ᑮᐃᑭᑐᐗᐞ: ᑳᓇᑲ ᐋᑎ ᑳᐅᑎᓇᒧᑴᓐ ᐃᐃᐌᓂ ᑲᑮᑖᐌᑕᒧᐎᓐ, ᐃᓂ ᑯᑕ ᑲᔦ ᐅᒫᒪᑳᒋᒋᑫᐎᓇᓐ?

13:55b.MAT.013.055 ᒥᑎᑯᓈᐯ ᐄᑐᒃ ᐃᓂ ᐅᑯᓯᓴᓐ, ᒣᕒᐃ ᐄᑐᒃ ᐃᔑᓂᑳᓱᐗᓐ ᐃᓂ ᐅᒫᒫᓐ᙮ ᒌᒥᔅ, ᒎᓴᑉ, ᓵᐃᒪᓐ, ᒎᑕᔅ ᐄᑐᒃ ᐃᔑᓂᑳᓱᐗᐞ ᐐᒋᑭᐌᔭᐞ᙮

13:56b.MAT.013.056 ᔑᑾ ᐅᑕᐌᒫᐞ ᑲᔦ ᑲᑭᓇ ᐅᐅᒫ ᐃᔑᑖᐗᐞ᙮ ᐋᑎ ᑕᔥ ᐐᓐ ᑳᐅᑎᓇᒧᑴᓐ ᑲᑭᓇ ᐅᓄᐌᓂᐗᓐ? ᑮᐃᑭᑐᐗᐞ᙮

13:57b.MAT.013.057 ᒦᑕᔥ ᑳᐃᔑ ᐋᓇᐌᓂᒥᑯᒡ᙮ ᒋᓴᔅ ᑕᔥ ᑮᐃᑭᑐ: ᐊᐊ ᓴ ᑳᑲᓅᑕᒪᐙᒡ ᑭᔐᒪᓂᑑᓐ ᑭᒋ ᐃᓀᒋᑲᓂᐎ ᐸᑳᓐ ᐃᑯᒋ ᑮᐃᔖᒡ, ᐃᐃᒫ ᑕᔥ ᐐᓐ ᐅᑑᑌᓈᒥᕽ, ᐅᑖᐎᓂᕽ ᑲᔦ, ᑳᐐᓐ ᑭᒋ ᐃᓀᒋᑲᓂᐎᓰ᙮

13:58b.MAT.013.058 ᑳᐐᓐ ᐃᑕᔥ ᐋᐱᒋ ᑮᒫᒪᑳᒋᒋᑫᓰ ᐃᐃᒫ, ᐋᓃᔥ ᑳᐐᓐ ᐅᑮ ᑌᐺᔦᓂᒥᑯᓰᐞ᙮

14

14:1b.MAT.014.001 ᒦᔥ ᐯᔑᑾᓐ ᐊᐲ ᐁᕒᐊᑦ ᑳᑮᐋᓂᑫᐎᑭᒫᐎᐃᒡ ᐃᐃᒫ ᑳᓬᐊᓬᐄᕽ, ᑮᓈᓅᑕᒻ ᐁᐃᓈᒋᒥᒥᓐᒡ ᐃᓂ ᒋᓴᓲᓐ᙮

14:2b.MAT.014.002 ᒦᑕᔥ ᑳᐃᓈᒡ ᐅᑕᓄᑮᐋᑲᓇᐞ: ᒦ ᓴ ᐊᐌ ᒞᓐ ᓰᑲᐊᑖᑫᐎᓂᓂ ᐁᑮ ᑮᐌᐱᒫᑎᓯᒡ, ᒦ ᒫᐐᓐ ᐃᐃᐌ ᑳᐅᒋ ᐊᔮᒡ ᒪᔥᑲᐎᓰᐎᓐ ᑳᐅᒋ ᓈᑯᑑᒡ ᒫᒪᑳᒋᒋᑫᐎᓇᓐ, ᑮᐃᑭᑐ᙮

14:3b.MAT.014.003 ᒦᑕᔥ ᐅᐅᐌ ᒞᓐ ᑳᑮᐅᒋ ᑭᐸᐃᑲᓂᐎᑯᐸᓀᓐ, ᐁᕒᐊᑦ ᑮᐐᐎᑯᐸᓐ ᐃᓂ ᐃᑴᐗᓐ ᐃᕒᐆᑎᔭᓴᓐ, ᐃᓂ ᐐᒋᑭᐌᔭᓐ ᐱᓬᐊᑉ ᐐᐎᓂ᙮

14:4b.MAT.014.004 ᒞᓐ ᑕᔥ ᑮᐃᓈᑯᐸᓐ ᐃᓂ ᐁᕒᐊᑕᓐ: ᑳᐐᓐ ᑭᑖ ᐃᔑᒋᑫᓰ ᐃᐃ ᑳᐃᔑᒋᑫᔭᓐ ᒋᐅᑖᐱᓂᒪᒡ ᑮᒋᑭᐌᓯ ᐱᓬᐊᑉ ᐐᐗᓐ, ᒦᐃ ᑳᐃᓈᑯᐸᓀᓐ᙮

14:5b.MAT.014.005 ᐁᕒᐊᑦ ᐃᓴ ᐐᓂᓵᑯᐸᓐ ᒞᓇᓐ ᔖᑰᒡ ᐃᑕᔥ ᐅᑮ ᑯᓵᐞ ᒎᐗᐞ ᐋᓃᔥ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐅᑮᐃᓀᓂᒫᓂ ᒞᓇᓐ᙮

14:6b.MAT.014.006 ᐊᐲ ᑕᔥ ᐁᕒᐊᑦ ᐁᑮ ᑎᐱᔥᑲᕽ, ᐃᕒᐆᑎᔭᔅ ᐅᑖᓂᓴᓐ ᑮᓃᒥᐗᓐ ᐁᓈᓴᒪᐱᐙᒡ, ᐁᕒᐊᑦ ᐃᑕᔥ ᐐᑫ ᑮᒥᓉᑕᒻ᙮

14:7b.MAT.014.007 ᐅᑮᐊᔓᑕᒪᐙᓐ ᑕᔥ ᐃᓂ ᐅᔥᑭᓃᑭᑴᓐ ᐁᐐ ᒦᓈᒡ ᐌᑯᓀᓂᑯ ᑫᑲᑴᒋᒥᑯᒡ᙮

14:8b.MAT.014.008 ᐁᑮ ᑭᑭᓄᐊᒫᑯᒡ ᐃᑕᔥ ᐅᒫᒫᓐ ᐊᐊ ᐅᔥᑭᓃᑭᑴ, ᒦᐃ ᑳᐃᑭᑐᒡ: ᒞᓐ ᓰᑲᐊᑖᑫᐎᓂᓂ ᐅᑎᒀᓐ ᒦᔑᔑᓐ ᐅᐅᒫ ᔐᒫᒃ ᐅᓈᑲᓂᕽ ᒋᐲᒋᑳᑌᒃ, ᐁᑮᐃᑭᑐᒡ᙮

14:9b.MAT.014.009 ᑭᒋᐅᑭᒫ ᑕᔥ ᐐᑫ ᑮᒥᒋᓇᐌᓯ᙮ ᐋᔕ ᑕᔥ ᐁᑮ ᐹᑲᒋ ᐊᔓᑕᒫᑫᒡ, ᐁᐹᑏᓄᓂᒡ ᑲᔦ ᑳᑮᒪᐗᑎᓯᑯᒡ, ᑮᐃᑭᑐ ᐱᓵᓂᑯ ᒋᒦᓂᒥᓐᒡ ᐃᓂ ᐅᔥᑭᓃᑭᑴᓐ ᑳᑮᐃᔑ ᑲᑴᑗᓂᒡ᙮

14:10b.MAT.014.010 ᑭᒋᐅᑭᒫ ᑕᔥ ᑮᐊᓅᑮ ᒋᑮᔥᑭᑴᑕᐅᒥᓐᒡ ᒞᓇᓐ ᐃᐃᒫ ᑭᐸᐅᑏᐎᑲᒥᑯᕽ᙮

14:11b.MAT.014.011 ᐅᓈᑲᓂᕽ ᐃᑕᔥ ᑮᐃᔑ ᐲᑕᒪᐙ ᐃᐃᐌᓂ ᐅᑎᑾᓂᒫ᙮ ᐅᔥᑭᓃᑭᑴ ᑕᔥ ᑮᒦᓈᑲᓂᐎ᙮ ᒦᑕᔥ ᑳᐃᔑ ᒦᓈᒡ ᐃᓂ ᐅᒫᒫᓐ᙮

14:12b.MAT.014.012 ᒞᓐ ᐃᑕᔥ ᐅᑭᑭᓄᐊᒪᐙᑲᓇᐞ ᑮᐱ ᑕᑯᔑᓅᐞ ᐁᑮᒫᒌᑑᐙᒡ ᒞᓇᓐ ᐅᐐᔭᐎᓂ, ᐁᑮᓂᑾᐊᒧᐙᒡ ᑲᔦ᙮ ᒦᑕᔥ ᐅᑮᐊᐎ ᐐᑕᒪᐙᐙᓐ ᒋᓴᓲᓐ᙮

14:13b.MAT.014.013 ᐊᐲ ᑕᔥ ᒋᓴᔅ ᑳᓅᑕᕽ, ᒌᒫᓂᕽ ᑮᐴᓯ ᐸᑳᓐ ᐁᑮᐃᔖᒡ ᐐᓀᑕ ᑫᔑ ᐸᐯᔑᑯᒡ᙮ ᐁᑮᓅᑕᒧᐙᒡ ᐃᑕᔥ ᐃᑭ ᐯᒫᑎᓯᐙᒡ ᐋᑎ ᐁᔮᓂᒡ ᒋᓴᓲᓐ, ᑮᐃᓈᔕᑳᒣᐗᒃ ᐁᑮᓈᓯᑲᐙᐙᒡ᙮ ᒥᓯᐌ ᑕᔥ ᐆᑌᓈᑳᕽ ᑮᐱ ᐅᒌᐗᒃ᙮

14:14b.MAT.014.014 ᐁᑮ ᑲᐹᒡ ᐃᑕᔥ ᒌᒫᓂᕽ, ᐁᑮᐙᐸᒫᒡ ᐯᒫᑎᓯᓂᒡ ᐁᐲᒋ ᐹᑏᓄᓂᒡ, ᐋᐱᒋ ᐅᑮ ᑭᒋᑰᐹᑌᓂᒫᐞ, ᐁᑮᒥᓄᐊᔮᐋᒡ ᑲᔦ ᑲᑭᓇ ᐃᒫ ᑳᑮᐋᑯᓯᓂᒡ᙮

14:15b.MAT.014.015 ᐁᐊᓂ ᐅᓈᑯᔑᓂᓂᒃ ᐊᐲ ᐅᑭᑭᓄᐊᒪᐙᑲᓇᐞ ᐅᑮ ᐱᓈᓯᑳᑰᐞ ᐁᑮᐃᑯᒡ: ᐋᐱᒋ ᐅᔕ ᐋᔕ ᐅᓈᑯᔑᓐ, ᐱᑾᒐᔭᐄ ᑲᔦ ᐅᐅ ᑳᐊᔮᔭᕽ᙮ ᐃᑯᒋ ᑕᔥ ᐃᔑᓂᔕᐅ, ᐁᔨᔑᑖᓂᐗᓂᓂᒃ ᒋᐃᔖᐙᒡ ᒋᐊᑖᐌᐙᒡ ᑫᒦᒋᐙᒡ, ᐁᑮᐃᑯᒡ᙮

14:16b.MAT.014.016 ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᒣᒬᒡ ᐃᑯᒋ ᑕᐃᔖᓰᐗᒃ, ᑮᓇᐙ ᐊᔕᒥᑯᒃ, ᒦ ᑳᐃᓈᒡ᙮

14:17b.MAT.014.017 ᐅᑮᐃᔑ ᓇᑴᑖᑰᐞ ᐃᑕᔥ: ᓈᓇᓐ 5 ᐅᔐᑕ ᓂᑕᔮᐙᓈᓂᒃ ᐸᑴᔑᑲᓇᒃ, ᓃᔑᓐ 2 ᐃᑕᔥ ᑮᑰᔭᒃ, ᑮᐃᑭᑐᐗᐞ᙮

14:18b.MAT.014.018 ᒋᓴᔅ ᑕᔥ ᐅᑮᐃᓈᐞ: ᐅᐅᒫ ᓴ ᐱᒦᔑᔑᒃ, ᐅᑮᐃᓈᐞ᙮

14:19b.MAT.014.019 ᐅᑮ ᑲᓅᓈᐞ ᐃᑕᔥ ᑲᑭᓇ ᐊᐎᔭᐞ ᒋᓇᒪᑕᐱᓂᒡ ᐃᐃᒫ ᒪᔥᑯᓰᑳᕽ᙮ ᐁᑮᐅᑖᐱᓈᒡ ᐃᑕᔥ ᐃᓂ ᓈᓇᓐ ᐸᑴᔑᑲᓇᐞ, ᐃᐃ ᑲᔦ ᓃᔑᓐ ᑮᑰᔭᐞ, ᐃᔥᐱᒥᕽ ᑮᐃᓈᐱ ᐁᑮᓇᓈᑯᒫᒡ ᑭᔐᒪᓂᑑᓐ᙮ ᒦᑕᔥ ᑳᐃᔑ ᐸᐸᑴᐱᓈᒡ ᐃᐃ ᐸᑴᔑᑲᓇᐞ ᐁᑮᒫᒦᓈᒡ ᐅᑭᑭᓄᐊᒪᐙᑲᓇᐞ, ᒦᑕᔥ ᑳᐃᔑ ᒫᒫᑕᐆᓈᓂᒡ ᑲᑭᓇ ᑳᑮᓇᒪᑕᐱᓂᒡ᙮

14:20b.MAT.014.020 ᑲᑭᓇ ᑕᔥ ᐊᐎᔭ ᑮᑌᐐᓯᓂ᙮ ᑭᑭᓄᐊᒪᐙᑲᓇᒃ ᑕᔥ ᐅᑮᒫᒨᔕᑭᓈᓈᐙ ᑳᑮᐃᔥᑯᓭᓂᒃ ᒦᒋᒻ᙮ ᒥᑖᔑᓃᔓ 12 ᐐᑯᐲᒪᑲᒃ ᒥᓂᒃ ᑮᐃᔥᑯᓭᓂ᙮

14:21b.MAT.014.021 ᑯᒫ ᓈᓂᕽ ᒥᑖᔂᒃ 5,000 ᑮᑕᔑᐗᐞ ᐃᓂᓂᐗᐞ ᑳᑮᐊᔕᒫᒡ, ᔑᑾ ᑲᔦ ᐃᑴᐗᐞ, ᐊᐱᓅᒌᔕᐞ ᑲᔦ᙮

14:22b.MAT.014.022 ᒋᓴᔅ ᐃᑕᔥ ᐅᑮ ᐴᓯᓂᔕᐙᐞ ᐁᑮᓃᑳᓂ ᓂᔕᐙᒡ ᐅᑭᑭᓄᐊᒪᐙᑲᓇᐞ ᐊᑳᒥᕽ ᒋᐃᔖᓂᒡ, ᐁᑮ ᑲᓅᓈᒡ ᐃᐃ ᑲᔦ ᑳᒫᒪᐌᓄᓂᒡ ᐊᐎᔭᐞ ᒋᐊᓂ ᒫᒑᓂᒡ᙮

14:23b.MAT.014.023 ᐊᐲ ᑕᔥ ᑳᐸᑭᑎᓈᒡ ᒋᒫᒑᓂᒡ, ᐗᑭᑕᑎᓐ ᑮᐃᔖ ᐐᓀᑕ ᐁᑮᐊᑕ ᐊᓇᒥᐋᒡ᙮ ᐁᐅᓈᑯᔑᓂᓂᒃ ᑕᔥ ᐐᓀᑕ ᒋᓴᔅ ᑮᒥᒋᐯᔑᑯ ᐃᐃᐌᑎ᙮

14:24b.MAT.014.024 ᐅᐅ ᑕᔥ ᐊᐲ ᐋᔕ ᐙᓴ ᒥᔕᐗᑳᒻ ᑮᐊᓂ ᐊᔮᐗᒃ ᑭᑭᓄᐊᒪᐙᑲᓇᒃ ᐃᐃᒫ ᓵᑲᐃᑲᓃᕽ, ᐋᐱᒋ ᐁᑮᐅᒑᓂᒪᐅᑯᐙᒡ ᐁᑮ ᑭᒋᓅᑎᓂᓂᒃ, ᐁᑮᐅᒋᔥᑲᐙᓂᒪᓂᓂᒃ᙮

14:25b.MAT.014.025 ᓂᑯᒋᑯ ᑫᑳ ᐁᐊᓂ ᐲᑖᐸᓂᓂᒃ, ᒋᓴᔅ ᐅᑮᓈᓯᑲᐙᐞ ᐗᑭᒋᓂᐲᕽ ᐃᑕᔥ ᐁᑮ ᐱᒧᓭᒡ᙮

14:26b.MAT.014.026 ᑭᑭᓄᐊᒪᐙᑲᓇᒃ ᐃᑕᔥ ᐁᐙᐸᒫᐙᒡ ᐁᐱᓈᑯᓯᓂᒡ ᐗᑭᒋᓂᐲᕽ, ᐐᑫ ᑮᑭᒋ ᓭᑭᓯᐗᒃ, ᒌᐸᔾ! ᐁᑮᐃᑭᑐᐙᒡ᙮ ᒦᑕᔥ ᑳᐃᔑ ᔖᑯᐌᐙᒡ ᐁᓭᑭᓯᐙᒡ᙮

14:27b.MAT.014.027 ᒋᓴᔅ ᐃᑕᔥ ᔐᒫᒃ ᐅᑮ ᑲᓅᓈᐞ: ᒪᔥᑲᐌᑕᒧᒃ! ᓃᓐ ᐅᔕ! ᑫᑯ ᓭᑭᓯᑫᒃ, ᐅᑮᐃᓈᐞ᙮

14:28b.MAT.014.028 ᐅᑮ ᑲᓅᓂᑰᓐ ᐃᑕᔥ ᐲᑕᕒᐆᓐ : ᑌᐯᒋᑫᔭᓐ, ᑮᔥᐱᓐ ᑮᓐ ᐋᐎᐗᓀᓐ, ᑲᓅᔑᔑᓐ ᒋᐱᓈᓯᑲᐎᓈᓐ ᓂᐲᕽ, ᐅᑮᐃᑰᓐ᙮

14:29b.MAT.014.029 ᒋᓴᔅ ᑕᔥ ᐅᑮᐃᓈᓐ: ᐋᐎᓴ ᐊᐯ! ᐲᑕᕒ ᑕᔥ ᑮᑲᐹ ᒌᒫᓂᕽ ᐁᑮ ᐱᒧᓭᒡ ᐗᑭᒋᓂᐲᕽ ᐁᓈᓯᑲᐙᒡ ᒋᓴᓲᓐ᙮

14:30b.MAT.014.030 ᐁᐙᐸᑕᕽ ᐃᑕᔥ ᐁᑭᒋᓅᑎᓂᓂᒃ, ᑮᓭᑭᓯ᙮ ᒦᑕᔥ ᑳᑮᐊᓂ ᑯᓵᐲᒡ᙮ ᑮᐃᔑ ᔖᑯᐌ ᑕᔥ: ᑌᐯᒋᑫᔭᓐ ᐱᒫᒋᐃᔑᓐ! ᑮᐃᑭᑐ᙮

14:31b.MAT.014.031 ᔐᒫᒃ ᐃᑕᔥ ᒋᓴᔅ ᐅᑮ ᑌᐱᓈᓐ ᐁᑮᐐᑯᐱᓈᒡ ᐁᑮᐃᓈᒡ ᑲᔦ: ᑮᓐ ᑳᔭᑳᓯᕽ ᑭᑌᐺᔦᑕᒧᐎᓐ, ᐌᑯᓀᓐ ᑳᐅᒋ ᐋᓉᑕᒪᓐ? ᐅᑮᐃᓈᓐ᙮

14:32b.MAT.014.032 ᐁᑮ ᐴᓯᐙᒡ ᐃᑕᔥ ᒌᒫᓂᕽ, ᒦ ᓴ ᐐᑫ ᑳᐃᔑ ᐃᔥᒀ ᑭᒋᓅᑎᓂᓂᒃ᙮

14:33b.MAT.014.033 ᐃᓂ ᑕᔥ ᑳᑮ ᐴᓯᓂᒡ ᐃᐃᒫ ᒌᒫᓂᕽ, ᐅᑮᐅᒋᒌᑾᓇᐲᑖᑰᐞ ᐁᑮᐃᑯᒡ: ᑌᐺ ᓴ ᑮᓐ ᑭᔐᒪᓂᑑ ᐅᑯᓯᓴᓐ ᑭᑎᓄᐤ! ᐅᑮᐃᑰᐞ᙮

14:34b.MAT.014.034 ᐊᐲ ᑕᔥ ᐁᑮᐃᔥᒀ ᐋᔕᐎᔥᑳᐙᒡ ᐃᐃᐌᓂ ᓵᑲᐃᑲᓐ, ᑫᓀᓴᕒᐃᑎᑳᕽ ᐃᑕᔥ ᑮᐃᔑ ᒥᔕᑳᐗᒃ᙮

14:35b.MAT.014.035 ᐁᑮᓂᓯᑕᐎᓇᐙᐙᒡ ᑕᔥ ᒋᓴᓲᓐ ᐃᑭ ᐃᓂᓂᐗᒃ ᐃᐃᒫ ᑳᑮᐊᔮᐙᒡ, ᒦᔥ ᑳᐃᔑ ᒫᒌᔮᒋᒧᐙᒡ᙮ ᒦᔥ ᑲᑭᓇ ᐅᑖᑯᓰᒃ ᑳᑮ ᐲᒋᑲᓂᐎᐙᒡ ᐁᔑ ᐊᔮᓂᒡ ᒋᓴᓲᓐ᙮

14:36b.MAT.014.036 ᒦᑕᔥ ᑳᐃᓈᐙᒡ ᒋᓴᓲᓐ: ᑕᑲ ᐸᑭᑎᓐ ᐅᑖᑯᓰᒃ ᐱᓵᓐ ᒋᓵᒥᓇᒧᐙᒡ ᑳᐃᔑ ᓇᓃᓰᑭᒀᑌᓂᒃ ᑭᑲᔥᑮᑮᐎᓐ, ᒦ ᑳᐃᑯᒡ᙮ ᒥᓂᒃ ᐃᑕᔥ ᑳᑮ ᓵᒥᓇᒥᓂᒡ ᑲᑭᓇ ᑮᒥᓄᔭᔮᐗᐞ᙮

15

15:1b.MAT.015.001 ᐯᕒᐊᓰᒃ ᐃᑭ ᑲᔦ ᐅᓇᔓᐌᐎ ᑭᑭᓄᐊᒫᑫᒃ ᒉᕒᐆᓴᓬᐊᒥᕽ ᑮᐱ ᐅᒌᐗᒃ ᐁᑮ ᐱᓈᓯᑲᐙᐙᒡ ᒋᓴᓲᓐ ᐁᑮᐃᓈᐙᒡ:

15:2b.MAT.015.002 ᐌᑯᓀᓂᓂ ᑕᔥ ᑭᑭᑭᓄᐊᒪᐙᑲᓇᒃ ᐌᒋ ᑑᑕᓯᒀ ᐃᐃ ᑳᑮᐱ ᐋᔮᓂᑫ ᑭᑭᓄᐊᒫᑰᔭᕽ ᑳᑮᐱ ᓂᑖ ᐃᔑᒋᑫᓂᒡ ᐃᐃᐌᓂᐗᐞ ᐅᑖᓈᕽ ᑳᑮ ᐱᒫᑎᓯᓂᒡ᙮ ᑳᐐᓐ ᐄᑐᒃ ᑾᔭᒃ ᐃᓇᑫ ᐃᔑᑭᓰᓂᒌᓰᐗᒃ ᑭᑭᑭᓄᐊᒪᐙᑲᓇᒃ ᒋᑆ ᐐᓯᓂᐙᒡ, ᐅᑮᐃᓈᐙᓐ᙮

15:3b.MAT.015.003 ᒋᓴᔅ ᐃᑕᔥ ᑮᐃᑭᑐ: ᐌᑯᓀᓐ ᐃᑕᔥ ᑫᑮᓇᐙ ᐌᒋ ᑑᑕᓯᐌᒃ ᑭᔐᒪᓂᑑ ᐅᑲᑮ ᑭᒥᐌᐎᓐ, ᓇᐗᒡ ᐃᓂ ᑭᑖᓂᑫ ᑭᑭᓄᐊᒫᑎᐎᓂᐙ ᐁᑲᓇᐌᑕᒣᒃ?

15:4b.MAT.015.004 ᑭᔐᒪᓂᑑ ᑕᔥ ᑮᐃᑭᑐ: ᑭᑌᓂᒻ ᑭᑌᑌ, ᑭᒫᒫ ᑲᔦ᙮ ᑮᔥᐱᓐ ᐃᑕᔥ ᐊᐎᔭ ᒪᒋ ᐃᓈᒡ ᐅᑌᑌᓐ, ᐅᒫᒫᓐ ᑲᔦ, ᑕᑲ ᑕᓂᓵᑲᓂᐎ᙮

15:5b.MAT.015.005 ᑮᓇᐙ ᑕᔥ ᐅᐅ ᑭᑎᔑᒋᑫᒻ, ᐊᐎᔭ ᑫᑰᓂᓂ ᐁᐊᔮᒡ ᑫᑮᐅᒋ ᐐᒋᐋᐸᓐ ᐃᓂ ᐅᑌᑌᓐ ᑯᒫ ᑲᔦ ᐅᒫᒫᓐ, ᑮᔥᐱᓐ ᑕᔥ ᐃᑭᑐᒡ, ᑫᑮᒦᓂᓈᐹᓐ ᐋᔕ ᓂᑮᒦᓈ ᑭᔐᒪᓂᑑ,

15:6b.MAT.015.006 ᒦᑕᔥ ᑳᐐᓐ ᒣᒬᒡ ᐅᑲ ᑭᑌᓂᒫᓰᓐ ᐃᓂ ᐅᑌᑌᓐ, ᐁᑭᑐᔦᒃ᙮ ᒦᑕᔥ ᐁᔑ ᐲᑯᓇᒧᐌᒃ ᑭᔐᒪᓂᑑ ᐅᑎᑭᑐᐎᓐ, ᐃᐃᐌ ᓇᐗᒡ ᐁᐐ ᐱᒥᓂᔕᐊᒣᒃ ᑮᓇᐙ ᑭᑎᔑᑣᐎᓂᐙᓐ᙮

15:7b.MAT.015.007 ᑮᓇᐙ ᐅᒥᓍᑎᓰᔑᑑᒃ! ᐋᐱᒋ ᑾᔭᒃ ᑭᑮᐃᑯᐙᑯᐸᓐ ᐋᐃᓭᔭ ᐁᑮ ᑲᓅᑕᒪᐙᑯᐸᓀᓐ ᑭᔐᒪᓂᑑᓐ:

15:8b.MAT.015.008 ᑭᔐᒪᓂᑑ ᐃᑭᑐ, ᐅᑯ ᐯᒫᑎᓯᐙᒡ ᓂᑎᑰᒃ ᐁᑭᒋ ᐃᓀᓂᒥᐙᒡ᙮ ᐅᑌᐃᐙᕽ ᐃᑕᔥ ᐐᓐ ᓇᐹᒡ ᐃᓇᑫ ᐃᓀᑕᒨᒃ ᑳᐃᓀᑕᒧᐗᒃ᙮

15:9b.MAT.015.009 ᐊᓂᔖ ᓴ ᓂᑕᓇᒥᐁᑖᑰᒃ, ᐋᓃᔥ ᐊᐗᔑᒣ ᑭᑭᓄᐊᒫᑫᐗᒃ ᐃᓂ ᐃᓂᓃᐎ ᑭᑭᓄᐊᒫᑫᐎᓇᓐ ᑖᐱᔥᑰ ᐁᐃᓍᑕᒧᐙᒡ ᐃᓴ ᐃᓂ ᑭᔐᒪᓂᑑᓐ ᐅᑭᑭᓄᐊᒫᑫᐎᓂᓂ᙮

15:10b.MAT.015.010 ᒋᓴᔅ ᐃᑕᔥ ᐅᑮ ᑲᓅᓈᐞ ᐊᐎᔭᐞ ᒋᓈᓯᑳᑯᒡ, ᐁᑮᐃᓈᒡ: ᐱᓯᑕᒧᒃ, ᓂᓯᑐᑕᒧᒃ ᐅᐅ!

15:11b.MAT.015.011 ᑳᐐᓐ ᐐᓐ ᐊᐎᔭ ᑳᐃᓇᒋᑫᒡ ᐅᒋ ᐃᓇᑭᒫᓰ ᐁᑌᐊᐲᑌᑖᑯᓯᓯᒃ ᒋᐊᓇᒥᐁᑕᐙᒡ ᑭᔐᒪᓂᑑᓐ, ᐃᐃᐌᓂ ᓴ ᑳᐅᒋ ᑮᑭᑐᒡ ᐅᑑᓂᕽ ᐅᒋ ᐃᓇᑭᒫ ᐁᑌᐊᐲᑌᑖᑯᓯᓯᒃ᙮

15:12b.MAT.015.012 ᑭᑭᓄᐊᒪᐙᑲᓇᒃ ᐃᑕᔥ ᐅᑮᐃᓈᐙᓐ ᒋᓴᓲᓐ: ᑭᑭᑫᓂᒫᒃ ᐃᓇ ᐯᕒᐊᓰᒃ ᐋᓃᓐ ᐁᐲᒋ ᒫᓀᑕᒧᐙᒡ ᑳᑮᐃᑭᑐᔭᓐ? ᐅᑮᐃᓈᐙᓐ᙮

15:13b.MAT.015.013 ᒋᓴᔅ ᑕᔥ ᑮᐃᑭᑐ: ᑭᑎᑳᓇᓐ ᑳᑮ ᑭᑎᑳᑕᓯᒃ ᐊᐊ ᓂᑌᑌ ᑭᒋᑮᔑᑯᕽ ᑳᐊᔮᒡ, ᑲᑭᓇ ᑕᒪᓂᐱᒋᑳᑌᐗᓐ᙮

15:14b.MAT.015.014 ᑫᑯ ᐸᐹ ᐱᓯᔅᑫᓂᒫᑫᒀᓂᒃ! ᑳᐐᓐ ᐅᔕ ᐙᐱᓰᐗᒃ ᒥᓴᐙ ᐋᓇᑲᑴ ᓃᑳᓃᑕᐙᐙᒡ ᑳᐙᐱᓯᓂᒃ᙮ ᑮᔥᐱᓐ ᑳᐙᐱᓯᒃ ᓃᑳᓃᑕᐙᒡ ᐃᓂ ᑯᑕᒃ ᑳᐙᐱᓯᓂᒃ, ᒥᒋᓃᔥ ᑕᐲᑖᓂᑳᓀᓭᐗᒃ᙮

15:15b.MAT.015.015 ᐲᑕᕒ ᑕᔥ ᑮᐃᑭᑐ: ᐐᑕᒪᐎᔑᓈᒻ ᐋᓃᓐ ᒪᔮ ᐁᑭᑑᒪᑲᒃ ᐃᐃ ᐁᔑ ᑭᑭᓄᐃᑫᔭᓐ᙮

15:16b.MAT.015.016 ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᐃᓇ ᑫᑮᓇᐙ ᒪᔑ ᑭᑑᓂᓯᑐᑕᒫᐎᓂᓰᒻ?

15:17b.MAT.015.017 ᑳᐐᓐ ᐃᓇ ᑭᓂᓯᑐᑕᓰᒻ? ᑫᑰᓂᓂ ᐊᐎᔭ ᑳᒦᒋᒡ ᐅᒥᓴᑖᕽ ᐃᔑᓭᓂ, ᑕᓂ ᓵᑲᐊᒨᒪᑲᓂᓂ ᑕᔥ᙮

15:18b.MAT.015.018 ᐃᐃᐌᓂ ᑕᔥ ᑫᑰᓂᓂ ᑳᐱ ᐅᒌᓂᒃ ᐃᐃᒫ ᐅᑌᐃᕽ, ᒦᓴ ᐃᐃᐌᓂ ᑫᐅᒋ ᑌᐊᐲᑌᓂᒥᑯᓯᒃ ᑭᔐᒪᓂᑑᓐ᙮

15:19b.MAT.015.019 ᒦᑕᔥ ᐅᓄᐌᓂᐗᓐ ᑳᐅᒌᑭᓐ ᐃᐃᒫ ᐊᐎᔭ ᐅᑌᐃᕽ, ᒪᒋ ᐃᓀᑕᒧᐎᓇᓐ, ᓂᔑᐌᐎᓐ, ᑳᐱᒣᓂᒫᒡ ᐸᑳᓐ ᐊᐎᔭᓐ ᐅᐐᑎᑫᒫᑲᓂᓂ, ᐊᓅᒋᑯ ᐊᐎᔭ ᑳᔑ ᐱᔑᒀᑎᓯᒡ, ᑭᒨᑎᐎᓐ, ᑮᐗᓂᒧᐎᓐ, ᒪᒋᑕᔑᒥᐌᐎᓐ᙮

15:20b.MAT.015.020 ᒦᐗᓐ ᐃᑕᔥ ᐃᓂ ᑳᐅᒋ ᐃᓇᑭᒥᓐᒡ ᐊᐎᔭ ᐁᑌᐊᐲᑌᓂᒥᑯᓯᒃ ᑭᔐᒪᓂᑑᓐ᙮ ᐊᐊ ᑕᔥ ᐐᓐ ᑳᑭᓰᓂᒌᓯᒃ ᒋᑆ ᐐᓯᓂᒡ, ᑳᐐᓐ ᐃᐃᒫ ᐃᐃ ᐃᓇᑫ ᑕᐅᒋ ᐃᓇᑭᒫᓰ, ᑮᐃᑭᑐ᙮

15:21b.MAT.015.021 ᒋᓴᔅ ᑕᔥ ᑮᐊᓂᐅᒋ ᒫᒑ ᐌᑎ ᐁᑮᐃᔖᒡ ᐊᑮᕽ ᑕᔭᕒ ᔑᑾ ᓵᐃᑕᓐ ᑳᑮᐃᔑ ᐊᔮᓂᑭᓐ᙮

15:22b.MAT.015.022 ᐊᐊ ᑕᔥ ᐃᑴ ᐃᐃᒫ ᑫᓇᓐ ᐊᑮᕽ ᑳᑮᐅᒌᒡ, ᑳᑮ ᒎᐎᐎᓯᒃ ᐃᐃᒫ ᑳᐃᔑᑖᒡ ᐊᑮᕽ, ᐅᑮ ᐱᓈᓯᑲᐙᓐ ᒋᓴᓲᓐ ᐁᑮ ᑭᔒᐌᒡ: ᑮᓐ ᑌᐱᑎᕽ ᑳᐅᑕᑳᓀᓯᔭᓐ! ᑯᐹᓯᓇᐎᔑᓐ! ᓂᑖᓂᔅ ᐅᔕ ᐅᑭᑭᔥᑳᑯᓐ ᒪᒋᐊᒑᑾᓐ, ᒫᐗᒡ ᐃᑯ ᐁᑭᒋ ᒫᔑ ᐊᔮᒡ, ᐁᑮᐃᓈᒡ᙮

15:23b.MAT.015.023 ᒋᓴᔅ ᑕᔥ ᑳᐐᓐ ᐅᑮᓇᑴᑕᐙᓰᓐ᙮ ᐅᑭᑭᓄᐊᒪᐙᑲᓇᐞ ᐃᑕᔥ ᐅᑮᐃᑰᐞ: ᐃᑯᒋ ᐃᔑᓂᔕᐅ ᐊᐊ ᐃᑴ! ᑭᓂᐹᒋ ᓂᔕᐅᑯᓈᓐ, ᐅᐲᑭᓯ ᑲᔦ, ᐁᑮᐃᑯᒡ᙮

15:24b.MAT.015.024 ᒋᓴᔅ ᑕᔥ ᑮᐃᑭᑐ: ᐃᑭ ᐅᔕ ᑳᐱᒫᑎᓯᐙᒡ ᐃᐃᒫ ᐃᔅᕒᐃᔭᓬᐃᑳᕽ, ᑳᐗᓂᔑᓄᐙᒡ ᒫᓇᒑᓂᔕᒃ, ᑳᑮᐅᒋ ᐲᒋᓂᔕᐅᑰᔮᓐ᙮

15:25b.MAT.015.025 ᐅᐅ ᑕᔥ ᐊᐲ ᐊᐊ ᐃᑴ ᐅᑮ ᐱᓈᓯᑲᐙᓐ ᐁᑮᐅᒋᒌᑾᓇᐲᑕᐙᒡ, ᐁᑮᐃᑭᑐᒡ: ᑕᑲ ᓈᑕᒪᐎᔑᓐ᙮

15:26b.MAT.015.026 ᒋᓴᔅ ᑕᔥ ᑮᐃᑭᑐ: ᐃᑭ ᓴ ᐊᐱᓅᒌᔕᒃ ᐅᒦᒋᒥᒥᐙ ᑳᐐᓐ ᑖᒥᓄᓈᑾᓯᓅᓐ ᒋᐅᑖᐱᓇᒪᐎᑣᐸᓐ ᒋᐊᐸᑭᑕᒪᐎᑣᐸᓐ ᐃᑭ ᐊᓂᒧᔕᒃ᙮

15:27b.MAT.015.027 ᐃᑴ ᑕᔥ ᑮᐃᑭᑐ: ᑌᐺ ᐃᐃ ᑳᐃᑭᑐᔭᓐ, ᔖᑰᒡ ᐃᑕᔥ ᐊᓂᒧᔕᒃ ᐅᒦᒋᓈᐙᓐ ᐃᓂ ᐃᔥᑾᒋᑲᓇᓐ ᐐᓯᓂᐎᓈᑎᑯᕽ ᑳᐅᒋ ᐸᑭᓯᓂᓂᑭᓐ ᑮᐐᓯᓂᓂᒡ ᐃᐃ ᑳᑎᐯᓂᒥᑯᐙᒡ᙮

15:28b.MAT.015.028 ᒋᓴᔅ ᐅᑮᐃᓈᓐ: ᐋᐱᒋ ᑭᒪᔥᑲᐎᑌᐺᔦᑕᒻ! ᒦᓴ ᑫᑑᑖᑰᔭᓐ ᑳᔑ ᒥᓴᐌᑕᒪᓐ, ᐅᑮᐃᓈᓐ᙮ ᒦᑕᔥ ᐊᐲ ᑳᑮᒥᓄᐊᔮᓂᒡ ᐃᓂ ᐅᑖᓂᓴᓐ ᐊᐊ ᐃᑴ᙮

15:29b.MAT.015.029 ᒋᓴᔅ ᑕᔥ ᑮᐊᓂᐅᒋ ᒫᒑ᙮ ᐌᑎ ᑕᔥ ᓵᑲᐃᑲᓃᕽ ᑳᓬᐊᓬᐄᕽ ᑮᐊᓂ ᐃᔑ ᐱᒫᔕᑳᒣ᙮ ᑮᐊᒀᒪᒋᐌ ᑕᔥ ᐁᑮᐅᓇᐱᒡ᙮

15:30b.MAT.015.030 ᑮᐹᑏᓄᐗᐞ ᐃᑕᔥ ᑳᑮ ᐱᓈᓯᑳᑯᒡ, ᐁᑮ ᐲᓈᓂᒡ ᑳᒫᑭᔥᑳᓂᒡ, ᑳᐙᐱᓯᓂᒃ, ᑳᒫᑭᓯᓂᒡ, ᑳᑮ ᑭᑐᓯᓂᒃ, ᑯᑕᒃ ᑲᔦ ᐅᑖᑯᓰᐞ, ᐁᑮᐃᔑ ᐸᑭᑎᓂᒥᓐᒡ ᐃᐃᒫ ᐁᔑ ᓯᑌᐱᒡ᙮ ᒦᑕᔥ ᑳᐃᔑ ᒥᓄᐊᔮᐋᒡ᙮

15:31b.MAT.015.031 ᐅᑯ ᑕᔥ ᑳᑮᒫᒪᐎ ᐊᔮᐙᒡ ᐐᑫ ᑮᑭᒋ ᒫᒪᑳᑌᑕᒨᒃ ᐊᐲ ᐁᐙᐸᒫᐙᒡ ᑳᑮ ᑭᑐᓯᓂᒃ ᐁᑮᑭᑐᓂᒡ, ᑳᒫᑭᓯᓂᒡ ᑲᔦ ᐁᒥᓄᐊᔮᓂᒡ, ᑳᐱᒧᓭᓯᓂᒃ ᑲᔦ ᐁᐱᒧᓭᓂᒡ, ᑳᐙᐱᓯᓂᒃ ᑲᔦ ᐁᐙᐱᓂᒡ, ᐁᓇᓈᑯᒫᐙᒡ ᐃᓂ ᐃᔅᕒᐃᔭᓬᐊᒃ ᐅᑭᔐᒪᓂᑑᒥᐙᓐ᙮

15:32b.MAT.015.032 ᒋᓴᔅ ᑕᔥ ᐅᑮ ᑲᓅᓈᐞ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐋᐱᒋ ᓴ ᓂᑯᐹᑌᓂᒫᒃ ᐅᑯ ᑳᐹᑏᓄᐙᒡ, ᐋᓃᔥ ᐋᔕ ᓂᓱᑮᔑᒃ ᓂᐱᒥ ᐐᒌᐎᑰᒃ, ᑫᑰᓂᓂ ᑕᔥ ᐁᐊᔮᓯᒀ ᑫᒦᒋᐙᒡ᙮ ᑳᐐᓐ ᑲᔦ ᓂᑎᓀᑕᓰ ᒋᑮᐌ ᓂᔕᐗᒀ ᐊᑲᐌ ᐐᓯᓂᓯᒀ᙮ ᑕᓅᑌᑆᓇᐎᒋᑫᐗᒃ᙮

15:33b.MAT.015.033 ᑭᑭᓄᐊᒪᐙᑲᓇᒃ ᑕᔥ ᑮᐃᑭᑐᐗᒃ: ᐱᑾᑕᑲᒥᒃ ᐃᑕᔥ ᐁᐊᔮᔭᕽ, ᐋᑎ ᑕᔥ ᐃᓈ ᑫᐅᑎᓇᒪᑭᐸᓐ ᒦᒋᒻ ᒋᐊᔕᒥᑣᐸᓐ ᐅᑯ ᑳᐹᑏᓄᐙᒡ?

15:34b.MAT.015.034 ᒋᓴᔅ ᑮᐃᑭᑐ: ᐋᓃᒥᓂᒃ ᐸᑴᔑᑲᓐ ᐁᔮᐌᒃ? ᐅᑮᐃᓈᐙᓐ ᑕᔥ: ᓃᔣᓱ 7 ᐸᑴᔑᑲᓂᑳᓇᒃ ᐸᑮ ᑲᔦ ᑮᑰᔦᓴᒃ᙮

15:35b.MAT.015.035 ᒋᓴᔅ ᑕᔥ ᐅᑮ ᑲᓅᓈᐞ ᑲᑭᓇ ᒋᓇᒪᑕᐱᓂᒡ ᐃᐃᒫ ᒥᑕᑲᒥᒃ᙮

15:36b.MAT.015.036 ᐅᑮᐅᑖᐱᓈᐞ ᐃᑕᔥ ᐃᐃ ᓃᔣᓱ 7 ᐸᑴᔑᑲᓀᓯᑳᓇᐞ, ᐃᐃ ᑲᔦ ᑮᑰᔦᓴᐞ, ᐁᑮᓇᓈᑯᒫᒡ ᑭᔐᒪᓂᑑᓐ᙮ ᒦᑕᔥ ᑳᐃᔑ ᐸᐸᑴᐱᓈᒡ ᐁᑮᒫᒦᓈᒡ ᐃᐃ ᐅᑭᑭᓄᐊᒪᐙᑲᓇᐞ᙮ ᐅᑯ ᑕᔥ ᑭᑭᓄᐊᒪᐙᑲᓇᒃ ᐅᑮᐊᔕᒫᐙᐞ ᐃᐃᒫ ᑳᑮᐊᔮᓂᒡ᙮

15:37b.MAT.015.037 ᑲᑭᓇ ᑕᔥ ᑮᑌᐐᓯᓂᐗᒃ᙮ ᑭᑭᓄᐊᒪᐙᑲᓇᒃ ᑕᔥ ᐅᑮᐅᑖᐱᓈᓈᐙ ᓃᔣᓱ ᒪᔥᑯᓰᒪᑲᒃ ᑳᑮᐃᔥᑯᓭᓂᒃ ᒦᒋᒥᓂ᙮

15:38b.MAT.015.038 ᓃᐎᕽ ᒥᑖᔂᒃ 4,000 ᑕᔥ ᑮᑕᔑᐗᒃ ᐃᑭ ᐃᓂᓂᐗᒃ ᑳᑮᐊᔕᒥᑣ, ᑳᐐᓐ ᑕᔥ ᐐᓐ ᐁᑕᑾᑭᒥᑣ ᐃᑭ ᐃᑴᐗᒃ, ᐃᑭ ᑲᔦ ᐊᐱᓅᒌᔕᒃ᙮

15:39b.MAT.015.039 ᒦᑕᔥ ᒋᓴᔅ ᑳᐃᔑ ᑮᐌᓂᔕᐙᒡ ᐃᐃ ᑳᐹᑏᓄᓂᒡ, ᒌᒫᓂᕽ ᐃᑕᔥ ᑮᐴᓯ, ᐌᑎ ᓴ ᐁᑮᐃᔖᒡ ᐊᑮᕽ ᒫᑲᑕᓂᕽ ᙮

16

16:1b.MAT.016.001 ᐯᕒᐊᓰᒃ, ᐃᑭ ᑲᔦ ᓵᒐᓰᒃ ᐅᑮ ᐱᓈᓯᑲᐙᐙᓐ ᒋᓴᓲᓐ ᐁᑮ ᑲᑴᒋᐋᐙᒡ, ᐁᑲᑴᒋᒫᐙᒡ ᒫᒪᑳᒋᒋᑫᐎᓐ ᒋᑑᑕᒥᓂᒡ, ᒦᑕᔥ ᒋᐙᐸᑕᒧᐙᒡ ᑭᔐᒪᓂᑑᓐ ᐁᒥᓍᐸᒥᑯᓂᒡ᙮

16:2b.MAT.016.002 ᒋᓴᔅ ᑕᔥ ᐅᑮᐃᓈᐞ: ᑮᔥᐱᓐ ᐃᓴ ᑮᒥᔅᑾᑾᒃ ᐁᐊᓂ ᐅᓈᑯᔑᒃ, ᒦᐃ ᐁᑭᑐᔦᒃ: ᒦᓴ ᐃ ᐁᐐ ᒥᓄᑮᔑᑲᒃ᙮

16:3b.MAT.016.003 ᑮᔥᐱᓐ ᑲᔦ ᑮᒥᔅᑯ ᒪᑲᑌᐙᓇᑾᒃ ᐐᐸ ᑭᑭᔐᑉ, ᒦᐃ ᐁᑭᑐᔦᒃ: ᐐᒫᔑᑮᔑᑲᓐ ᓅᑯᒻ᙮ ᑭᓂᓯᑕᐎᓈᒻ ᐃᓴ ᐋᓃᓐ ᑫᐊᓂ ᐃᔑᐌᐸᒃ ᐁᒥᒋᑲᓇᐙᐸᑕᒣᒃ ᐃᐃ ᑮᔑᒃ᙮ ᐋᓇ ᑕᔥ ᐐᓐ ᐙᐸᑕᒣᒃ ᐅᓄ ᑫᑰᓇᓐ ᒣᒀ ᑳᐱᒥᓭᑭᓐ, ᔖᑰᒡ ᑳᐐᓐ ᐃᐃᒫ ᑭᑑᒋ ᓂᓯᑐᑕᓰᒻ ᐋᓃᓐ ᐙᓂ ᐃᔑᐌᐸᒃ᙮

16:4b.MAT.016.004 ᐋᐱᒋ ᓴ ᒪᒋᐱᒫᑎᓯᐗᒃ ᐁᑮᐌᐱᓈᐙᒡ ᑭᔐᒪᓂᑑᓐ ᓅᑯᒻ ᑳᐱᒫᑎᓯᐙᒡ᙮ ᑭᓇᑕᐌᓂᒥᔑᒻ ᑭᑭᓇᐙᓯᓈᑯᒋᑲᓐ ᒋᐙᐸᑕᐃᓇᑰᒃ ᑫᑰᓐ ᐙᐅᒋ ᑭᑫᓂᒥᔦᒃ᙮ ᒦᑕᔥ ᐁᑕ ᑳᑮᐃᔑᓭᑯᐸᓀᓐ ᐊᐊ ᒎᓇ, ᒦ ᐁᑕ ᐃ ᑫᔑ ᑭᑭᓇᐙᒋᑕᒫᑰᔦᒃ ᐋᓃᓐ ᑫᐅᒋ ᑭᑫᓂᒥᔦᒃ᙮ ᒦᐃ ᑳᐃᓈᒡ᙮ ᒦᑕᔥ ᑳᐃᔑ ᓇᑲᓈᒡ ᐁᑮᐊᓂ ᒫᒑᒡ᙮

16:5b.MAT.016.005 ᐊᐲ ᑕᔥ ᐁᑮᒥᔕᑳᐙᒡ ᐌᑎ ᐊᑳᒥᕽ, ᑭᑭᓄᐊᒪᐙᑲᓇᒃ ᑮᑭᑫᑕᒨᒃ ᐁᑮᐗᓂᓯᐙᒡ ᐸᑴᔑᑲᓇᓐ᙮

16:6b.MAT.016.006 ᒋᓴᔅ ᑕᔥ ᐅᑮᐃᓈᐞ: ᐊᔮᒀᒥᓯᒃ, ᑫᑯ ᐸᐹᒣᑕᑫᒃ ᐅᑑᐱᓯᑲᓂᐙ ᐃᑭ ᐯᕒᐊᓰᒃ, ᐃᑭ ᑲᔦ ᓵᒐᓰᒃ ᙮

16:7b.MAT.016.007 ᑭᑭᓄᐊᒪᐙᑲᓇᒃ ᑕᔥ ᑮᐃᑎᐗᒃ: ᐸᑴᔑᑲᓇᓐ ᐅᔕ ᐁᑮ ᐱᓇᐗᐳᓯᐗᕽ, ᑳᐅᒋ ᐃᓂᓇᕽ᙮

16:8b.MAT.016.008 ᐅᑮ ᑭᑫᓂᒫᐞ ᐃᑕᔥ ᐁᓀᑕᒥᓂᒡ, ᒦᑕᔥ ᑳᐃᓈᒡ: ᐌᑯᓀᓐ ᐌᒋ ᑲᑲᓅᓂᑎᔦᒃ ᐁᑮ ᐱᓇᐗᐳᓯᐌᒃ ᐸᑴᔑᑲᓐ? ᐋᐱᒋ ᐊᑳᓭᑖᑾᓐ ᑭᑌᐺᔦᑕᒧᐎᓂᐙ᙮

16:9b.MAT.016.009 ᑳᐐᓐ ᐃᓇ ᒪᔑ ᑭᓂᓯᑐᑕᓰᒻ? ᑳᐐᓐ ᐃᓇ ᐋᔕ ᑭᒫᒥᑲᐎᓰᒻ, ᓈᓂᕽ ᒥᑖᔂᒃ 5,000 ᐃᓂᓂᐗᒃ ᐁᑮᐅᒋ ᐐᓯᓂᐙᒡ ᐃᐃᒫ ᓈᓇᓐ ᐸᑴᔑᑲᓂᑳᓂᕽ? ᐋᓃᓐ ᒥᓂᒃ ᑳᑮᒨᔥᑭᓇᑑᔦᒃ ᐐᑯᐲᒪᑲᑰᓐ ᑮᒫᒨᔕᑭᓇᒣᒃ ᐃᔥᑾᒋᑲᓇᓐ?

16:10b.MAT.016.010 ᒦᓇᐙ ᑕᔥ ᓃᐎᕽ ᒥᑖᔂᒃ 4,000 ᐃᓂᓂᐗᒃ ᐁᑮᐅᒋ ᐐᓯᓂᐙᒡ ᐃᐃᒫ ᓃᔣᓱ ᐸᑴᔑᑲᓂᑳᓂᕽ, ᐋᓃᓐ ᒥᓂᒃ ᑳᒨᔥᑭᓇᑑᔦᒃ ᒪᔥᑯᓰᒪᑲᑰᓐ?

16:11b.MAT.016.011 ᐌᑯᓀᓐ ᑕᔥ ᒪᔑ ᐌᒋ ᓂᓯᑐᑕᐎᓯᐌᒃ? ᑳᐐᓐ ᑭᑕᔑᑕᒪᐎᓯᓅᓂᓂᒻ ᐊᐊ ᐸᑴᔑᑲᓐ᙮ ᐊᔮᒀᒥᓯᒃ ᑫᑯ ᒋᐸᐹᒣᑕᓯᐌᒃ ᐅᑑᐱᓯᑲᓂᐙ ᐃᑭ ᐯᕒᐊᓰᒃ, ᐃᑭ ᑲᔦ ᓵᒐᓰᒃ᙮

16:12b.MAT.016.012 ᒦᑕᔥ ᑭᑭᓄᐊᒪᐙᑲᓇᒃ ᑳᐃᔑ ᓂᓯᑐᑕᒧᐙᒡ, ᑳᐐᓐ ᐐᓐ ᒋᐊᔮᒀᒥᓰᑲᑕᒧᐙᒡ ᐃᐃ ᐸᑴᔑᑲᓂᐎ ᐅᐱᓯᑲᓂᓂ, ᐃᐃᐌᓂ ᓴ ᑳᑮᐃᔑ ᑭᑭᓄᐃᑫᓂᒡ ᐃᐃ ᐯᕒᐊᓰᐞ, ᐃᐃ ᑲᔦ ᓵᒐᓰᐞ᙮

16:13b.MAT.016.013 ᐊᐲ ᑕᔥ ᒋᓴᔅ ᑳᐱ ᑕᑯᔑᕽ ᐃᐃᒫ ᓭᓴᕒᐄᔭ ᐱᓬᐃᐹᔨᕽ, ᐅᑮ ᑲᑴᒋᒫᐞ ᐅᑭᑭᓄᐊᒪᐙᑲᓇᐞ: ᐊᐌᓀᓐ ᐁᑭᑐᐙᒡ ᐊᐎᔭᒃ ᐁᑎᓄᐎᓂᒡ ᐃᓂ ᐃᓂᓂ ᐅᑯᓯᓴᓐ?

16:14b.MAT.016.014 ᐅᐅ ᑕᔥ ᐅᑮᐃᓈᐙᓐ: ᐋᓂᑕ ᑭᑎᑰᒃ, ᒞᓐ ᓰᑲᐊᑖᑫᐎᓂᓂ᙮ ᑯᑕᒃ ᑭᑎᑰᒃ ᐃᓬᐋᐃᒐ ᙮ ᑯᑕᒃ ᑭᑎᑰᒃ ᒉᕒᐊᒫᔭ, ᑯᒫ ᑲᔦ ᐯᔑᒃ ᐃᑭ ᑳᑮ ᑲᓅᑕᒪᐙᑯᐸᓀᓐ ᑭᔐᒪᓂᑑᓐ ᐁᐋᐎᔭᓐ᙮

16:15b.MAT.016.015 ᒋᓴᔅ ᐃᑕᔥ ᐅᑮᐃᓈᐞ: ᐊᐌᓀᓐ ᑕᔥ ᑮᓇᐙ ᐁᑭᑐᔦᒃ ᐁᑎᓄᐎᔮᓐ?

16:16b.MAT.016.016 ᓵᐃᒪᓐ ᐲᑕᕒ ᑕᔥ ᐅᑮᐃᓈᓐ: ᑮᓐ ᐃᓴ ᐊᐊ ᑭᔐᒪᓂᑑᓐ ᑳᑮ ᑮᔖᒋ ᐅᓀᓂᒥᑯᒡ ᒋᐱᒫᒋᐃᐌᒡ, ᑮᓐ ᑭᔐᒪᓂᑑ ᑳᐱᒫᑎᓯᒡ ᐅᑯᓯᓴᓐ᙮

16:17b.MAT.016.017 ᒋᓴᔅ ᑕᔥ ᐅᑮᐃᓈᓐ: ᓵᐃᒪᓐ, ᒞᓐ ᑳᐅᑯᓯᓯᒥᒃ, ᐋᐱᒋ ᑭᔕᐌᑖᑯᔅ! ᑳᐐᓐ ᐐᓐ ᐃᓂᓃᑳᕽ ᑭᑮᐅᑎᓇᓰᓐ ᐃᐃ ᐃᑭᑐᐎᓐ, ᐊᐊ ᓴ ᓂᑌᑌ ᑭᒋᑮᔑᑯᕽ ᑳᐊᔮᒡ, ᑎᐱᓇᐌ ᑭᑮᒦᓂᒃ ᐃᐃᐌᓂ ᑳᐐᑕᒪᓐ᙮

16:18b.MAT.016.018 ᐅᐅ ᑕᔥ ᑭᑎᓂᓐ, ᐲᑕᕒ, ᑮᓐ ᐃᓴ ᐊᓯᓐ, ᒦᓴ ᐃᐃᒫ ᑭᑖᐱᑯᕽ ᑫᐃᔑ ᒫᐗᑑᓇᒀ ᑲᑭᓇ ᑳᑎᐯᓂᒪᒀ᙮ ᒥᓴᐙ ᑯ ᓂᐳᐎᓐ ᑳᐐᓐ ᐅᑲ ᔖᑰᒋᐃᑯᓰᓈᐙ᙮

16:19b.MAT.016.019 ᑭᑲ ᒦᓂᓐ ᐃᓂ ᐋᐹᐱᑲᐃᑲᓇᓐ ᑫᐅᒋ ᐹᑭᓇᒪᐎᑣ ᐊᐎᔭᒃ ᑭᔐᒪᓂᑑ ᐅᑎᐯᒋᑫᐎᓂᕽ᙮ ᐌᑯᓀᓐ ᐃᑯ ᑫᑭᐱᑎᓇᒪᓐ ᐅᐅᒫ ᐊᑮᕽ ᑫᒋᓈᒡ ᑕᑭᐱᑎᓂᑳᑌ ᑲᔦ ᑭᒋᑮᔑᑯᕽ᙮ ᐌᑯᓀᓐ ᐃᑯ ᑫᐸᑭᑎᓇᒪᓐ ᐅᐅᒫ ᐊᑮᕽ ᑫᒋᓈᒡ ᑕᐸᑭᑎᓂᑳᑌ ᑲᔦ ᑭᒋᑮᔑᑯᕽ, ᐅᑮᐃᓈᓐ᙮

16:20b.MAT.016.020 ᒦᑕᔥ ᒋᓴᔅ ᐅᑮᐊᔮᒀᒥᒫᐞ ᐅᑭᑭᓄᐊᒪᐙᑲᓇᐞ ᒋᑎᐹᒋᒥᑯᓯᒃ ᐐᓐ ᐁᐋᐎᒡ ᑭᔐᒪᓂᑑᓐ ᑳᑮ ᑮᔖᒋ ᐅᓀᓂᒥᑯᒡ ᒋᐱᒫᒋᐃᐌᒡ᙮

16:21b.MAT.016.021 ᒦᑕᔥ ᐃᐃ ᐊᐲ ᒋᓴᔅ ᑳᑮᒫᒌ ᐐᑕᒪᐙᒡ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐅᒋᑕ ᓴ ᑯ ᐃᔑᓈᑾᓐ ᒉᕒᐆᓴᓬᐊᒥᕽ ᒋᐃᔖᔮᓐ, ᒋᑲᒀᑕᑭᐃᐙᒡ ᐃᑭ ᑳᓃᑳᓂᓯᐙᒡ ᒎᐗᒃ, ᐃᑭ ᑲᔦ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ᙮ ᓂᑲᓂᓯᑰᒃ ᐃᑕᔥ, ᐊᓂᓂᓱᑮᔑᑲᒃ ᐃᑕᔥ ᓂᑲ ᑮᐌᐱᒫᑎᔅ᙮

16:22b.MAT.016.022 ᐲᑕᕒ ᐃᑕᔥ ᐸᑫᔭᐄ ᐅᑮᐃᔑᐎᓈᓐ ᐁᑮᒫᒋ ᐅᒋᐋᒡ ᐁᑮᐃᓈᒡ: ᑌᐯᒋᑫᔭᓐ, ᑳᐐᓐ ᑕᐃᓀᑕᓰ ᑭᔐᒪᓂᑑ ᐃᐃ ᒋᐃᔑᓭᔭᓐ!

16:23b.MAT.016.023 ᒋᓴᔅ ᑕᔥ ᑮᑴᑭᑖ ᐁᑮᐃᓈᒡ ᐲᑕᕒᐊᓐ: ᓭᑕᓐ, ᐃᑯᒋ ᐃᔖᓐ! ᑮᓐ ᐅᔕ ᑳᑭᐱᔥᑲᐎᔭᓐ, ᐃᓂᓂᐗᒃ ᐋᓃᔥ ᑳᔑ ᓈᑲᑕᐌᑕᒧᐙᒡ ᑭᑎᔑ ᓈᑲᑕᐌᑕᒻ, ᑳᐐᓐ ᐐᓐ ᑭᔐᒪᓂᑑ ᑳᔑ ᓈᑲᑕᐌᑕᕽ᙮

16:24b.MAT.016.024 ᒋᓴᔅ ᑕᔥ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᑮᔥᐱᓐ ᐊᐎᔭ ᐐᐐᒌᐎᒡ, ᒦ ᐁᑕ ᑯ ᒋᐋᓇᐌᓂᑎᓱᒡ, ᒋᐱᒥᐎᓈᒡ ᐅᑖᔑᑌᔮᑎᑯᒪᓐ, ᒋᐱᒥᓂᔕᐅᒡ ᐃᑕᔥ᙮

16:25b.MAT.016.025 ᐊᐊ ᓴ ᐃᓂᓂ ᑳᑲᑴ ᐱᒫᒋᑑᒡ ᐅᐱᒫᑎᓯᐎᓐ ᐋᒋᑯ ᑳᐐᓐ ᑕᑌᐱᓇᒫᓱᓰ ᑌᐺ ᒋᐅᒋ ᐱᒫᑎᓯᒡ, ᐊᐊ ᑕᔥ ᐐᓐ ᑫᐸᑭᑎᓇᕽ ᐅᐱᒫᑎᓯᐎᓐ ᓃᓐ ᐅᒋ ᑕᑌᐱᓇᒫᓱ ᑌᐺ ᑫᐅᒋ ᐱᒫᑎᓯᒡ᙮

16:26b.MAT.016.026 ᐌᑯᓀᓂᓂ ᑫᐅᑎᓯᐸᓐ ᐊᐎᔭ ᒥᓴᐙ ᑯ ᐋᓇ ᑌᐱᓇᕽ ᑲᑭᓇ ᑫᑰᓂᓂ ᑫᑮᐊᔮᑳᑌᓂᑭᐸᓐ, ᑮᔥᐱᓐ ᑕᔥ ᑌᐱᓇᒫᓱᓯᒃ ᑌᐺ ᑫᐅᒋ ᐱᒫᑎᓯᒡ? ᐌᑯᓀᓂᓂ ᒣᔥᑾᒡ ᑫᒦᑭᐌᐸᓐ ᒋᑌᐊᐲᑌᑖᑾᓂᓂᒃ ᐃᐃ ᓴ ᑫᐅᒋ ᒦᓂᑎᐸᓐ ᑌᐺ ᒋᐱᒫᑎᓯᒡ?

16:27b.MAT.016.027 ᐋᓃᔥ ᐐᐸ ᓂᑲ ᐱ ᑕᑯᔑᓐ, ᓃᓐ ᐃᓂᓂ ᐅᑯᓯᓴᓐ ᑳᑎᓄᐎᔮᓐ᙮ ᓂᑲᐱ ᐐᒌᐙᒃ ᐃᑭ ᓂᑌᒐᓬᐃᒪᒃ᙮ ᑳᔑ ᐙᓭᓈᑯᓯᒡ ᐊᐊ ᓂᑌᑌ ᑫᓃᓐ ᓂᑲ ᐃᔑ ᐙᓭᓈᑯᔅ᙮ ᒦᑕᔥ ᐃᐃ ᐊᐲ ᒋᑎᐸᐊᒪᐗᒀ ᑲᑭᓇ ᐁᑕᓱᐯᔑᑯᐙᒡ ᐋᓃᓐ ᑳᐱ ᐃᔑᒋᑫᐙᒡ᙮

16:28b.MAT.016.028 ᒫᒥᑲᐎᒃ ᐃᑕᔥ ᐅᐅᐌ! ᐋᓂᑕ ᓴ ᐅᐅᒫ ᑳᐊᔮᐙᒡ ᑳᐐᓐ ᑕᓂ ᐳᓰᐗᒃ ᐹᓂᒫ ᐙᐸᒫᐙᒡ ᐃᓂ ᐃᓂᓂ ᐅᑯᓯᓴᓐ ᐱᑕᑯᔑᓂᓂᒡ ᒋᑭᒋ ᐅᑭᒫᐎᓂᒡ᙮

17

17:1b.MAT.017.001 ᐹᓂᒫ ᑕᔥ ᓂᑯᑣᓱᑮᔑᒃ ᐁᐃᔑᓭᓂᒃ ᒋᓴᔅ ᐅᑮᒫᒌᓈᓐ ᐲᑕᕒᐆᓐ, ᐃᓂᐌᓂᐗᐞ ᑲᔦ ᑳᐐᒋᑭᐌᑎᓂᒡ ᒌᒥᓴᓐ ᔑᑾ ᒞᓇᓐ, ᐗᑭᑕᑎᓐ ᑕᔥ ᐁᑮᐃᔑᐎᓈᒡ, ᐐᓀᑕᐙ ᐌᑎ ᐁᑮᐃᔖᐙᒡ ᑳᑮᐃᔑ ᐃᔥᐸᑎᓈᓂᒃ᙮

17:2b.MAT.017.002 ᒣᒀ ᑕᔥ ᐁᑲᓇᐙᐸᒥᑯᒡ, ᐸᑳᓐ ᑮᐊᓂ ᐃᔑᓈᑯᓯ ᑖᐱᔥᑰ ᑮᓯᔅ ᑳᐊᐲᒋ ᐙᓭᓈᑯᓯᒡ, ᒦᔑᐃ ᑳᐊᐲᒋ ᐙᓭᓈᑯᓯᒡ ᐊᐊ ᒋᓴᔅ᙮ ᐅᑭᑭᔥᑭᑲᓇᓐ ᑲᔦ ᐐᑫ ᑮᐙᐱᔥᑭᐙᓭᓈᑾᓂᓂᐗᓐ᙮

17:3b.MAT.017.003 ᐃᑭ ᑲᔦ ᓂᓯᓐ ᑭᑭᓄᐊᒪᐙᑲᓇᒃ ᐅᑮᐙᐸᒫᐙᓐ ᒨᓯᓲᓐ ᔑᑾ ᐃᓬᐋᐃᒐᐗᓐ ᐁᑮᐐᒌᐙᓂᒡ ᒋᓴᓲᓐ, ᐁᑲᑲᓅᓂᑎᓂᒡ᙮

17:4b.MAT.017.004 ᐲᑕᕒ ᑕᔥ ᐅᑮᐅᒋ ᑲᓅᓈᓐ ᒋᓴᓲᓐ: ᑌᐯᒋᑫᔭᓐ, ᐋᐱᒋ ᓴ ᒦᐃ ᑾᔭᒃ ᐅᐅᒫ ᑳᐊᔮᔭᕽ, ᑮᔥᐱᓐ ᐃᔑ ᒥᓴᐌᑕᒪᓐ, ᓂᓯᓐ ᐊᑲᐙᑌᐃᑲᓇᓐ ᓂᑲ ᐸᑕᑭᑑᓇᓐ, ᑮᓐ ᐯᔑᒃ ᒋᐊᔮᔭᓐ, ᒨᓯᔅ ᑲᔦ ᐯᔑᒃ, ᐃᓬᐋᐃᒐ ᑲᔦ ᐯᔑᒃ, ᑮᐃᑭᑐ᙮

17:5b.MAT.017.005 ᒣᒀ ᑕᔥ ᐁᑲᑭᑐᒡ, ᐙᓭᐗᑸᓂ ᐅᑮᐋᑲᐎᔥᑳᑯᓈᐙ᙮ ᒦᑕᔥ ᐃᐃᒫ ᑳᑮᐅᒋ ᓅᑕᐎᒥᓐᒡ ᐊᐎᔭᓐ ᐁᑮᑭᑐᓂᒡ: ᒦ ᓴ ᐊᐊ ᑎᐱᓇᐌ ᓂᑯᓯᔅ ᑳᓵᑭᐊᒃ, ᑳᒥᓍᐸᒪᒃ ᑲᔦ᙮ ᐱᓯᑕᐎᒃ᙮

17:6b.MAT.017.006 ᐁᑮᓅᑕᐙᐙᒡ ᑕᔥ ᐊᐎᔭᓐ ᐁᑮᑭᑐᓂᒡ, ᐐᑫ ᑮᑭᒋ ᓭᑭᓯᐗᒃ ᑭᑭᓄᐊᒪᐙᑲᓇᒃ᙮ ᒦᑕᔥ ᑳᐃᔑ ᐊᓂᒥᑯᐸᓂᐅᐙᒡ ᐃᐃᒫ ᒥᑕᑲᒥᒃ᙮

17:7b.MAT.017.007 ᒋᓴᔅ ᐅᑮ ᐱᓈᓯᑲᐙᐞ ᐁᑮ ᓵᒥᓈᒡ ᐁᑮᐃᓈᒡ: ᐸᓯᑸᒃ᙮ ᑫᑯ ᓭᑭᓯᑫᒃ, ᐅᑮᐃᓈᐞ᙮

17:8b.MAT.017.008 ᐁᐃᓈᐱᐙᒡ ᐃᑕᔥ, ᑳᐐᓐ ᐸᑳᓐ ᐊᐎᔭᓐ ᐅᑮᐙᐸᒫᓯᐙᐙᓐ, ᒋᓴᓲᓐ ᐁᑕ᙮

17:9b.MAT.017.009 ᐁᐱ ᓃᓵᒪᒋᐌᐙᒡ ᑕᔥ ᒋᓴᔅ ᐅᑮᐃᓈᐞ: ᑫᑯ ᐐᓐ ᐐᑕᒪᐙᑫᒃ ᐊᐎᔭ ᐅᐅᐌ ᑳᐃᔑ ᐙᐸᑕᐃᑰᐎᓯᔦᒃ, ᐹᓂᒫ ᓴ ᑮᑮᐌᐱᒫᑎᓯᐃᒥᓐᒡ ᐃᓂ ᐃᓂᓂ ᐅᑯᓯᓴᓐ᙮

17:10b.MAT.017.010 ᑭᑭᓄᐊᒪᐙᑲᓇᒃ ᐃᑕᔥ ᐅᑮ ᑲᑴᒋᒫᐙᓐ ᒋᓴᓲᓐ: ᐌᑯᓀᓂᓂ ᐌᒋ ᐃᑭᑐᐙᒡ ᐃᑭ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐃᓬᐋᐃᒐ ᐱᓇᒫ ᑕᑕᑯᔑᓐ?

17:11b.MAT.017.011 ᒋᓴᔅ ᑕᔥ ᐅᑮᐃᓈᐞ: ᐃᓬᐋᐃᒐ ᓴ ᓂᑕᒻ ᑕᑕᑯᔑᓐ ᒋᐱ ᐅᓇᑑᒡ ᑲᑭᓇ ᑫᑰᓂᓂ᙮

17:12b.MAT.017.012 ᐅᐅᐌ ᑕᔥ ᑭᐐᑕᒪᐎᓂᓂᒻ: ᐃᓬᐋᐃᒐ ᓴ ᐋᔕ ᑮᑕᑯᔑᓐ, ᐯᒫᑎᓯᐙᒡ ᑕᔥ ᑳᐐᓐ ᐅᑮᓂᓯᑕᐎᓇᐙᓯᐙᐙᓐ, ᐅᑮ ᑑᑕᐙᐙᓐ ᑲᔦ ᐐᓇᐙ ᐋᓃᓐ ᑳᑮᐃᔑ ᒥᓴᐌᑕᒧᐙᒡ᙮ ᒦᑕᔥ ᐯᔑᑾᓐ ᑫᑑᑕᐙᐙᒡ ᐃᓂ ᐃᓂᓂ ᐅᑯᓯᓴᓐ᙮

17:13b.MAT.017.013 ᑭᑭᓄᐊᒪᐙᑲᓇᒃ ᐃᑕᔥ ᑮᐅᒋ ᓂᓯᑐᑕᒨᒃ ᒞᓐ ᓰᑲᐊᑖᑫᐎᓂᓂᐗᓐ ᐃᓴ ᑳᑮ ᑕᔑᒥᒥᓐᒡ᙮

17:14b.MAT.017.014 ᐊᐲ ᑕᔥ ᐁᑮ ᐱᓈᓯᑲᐙᐙᒡ ᐃᐃ ᑳᐹᑏᓄᓂᒡ, ᐃᓂᓂ ᐅᑮ ᐱᓈᓯᑲᐙᓐ ᒋᓴᓲᓐ ᐁᑮᐅᒋᒌᑾᓇᐲᑕᐙᒡ,

17:15b.MAT.017.015 ᐁᑮᐃᓈᒡ: ᑌᐯᒋᑫᔭᓐ, ᑯᐹᑌᓂᒻ ᓂᑯᓯᔅ! ᐅᒋᐱᓂᑯᐙᐱᓀ ᐅᔕ, ᑲᔦ ᒨᔕᒃ ᐁᑭᒋ ᐃᔑᐊᔮᒡ᙮ ᒪᒍᑌᓭ ᒨᔕᒃ, ᐸᑯᐲᓭ ᑲᔦ ᒨᔕᒃ᙮

17:16b.MAT.017.016 ᓂᑖ ᓇᑮᐲᑕᒪᐙᒃ ᐃᓴ ᐃᑭ ᑭᑭᑭᓄᐊᒪᐙᑲᓇᒃ, ᑳᐐᓐ ᑕᔥ ᐅᑮ ᑲᔥᑭᐋᓯᐙᐙᓐ ᒋᒥᓄᐊᔮᓂᒡ᙮

17:17b.MAT.017.017 ᒋᓴᔅ ᑕᔥ ᑮᐃᑭᑐ: ᐅᐅᒫ ᑲᑭᓇ ᐁᔮᔦᒃ, ᐁᑕᑕᐌ ᑳᐐᓐ ᑭᑌᐺᑕᓰᒻ, ᑳᐐᓐ ᑲᔦ ᑾᔭᒃ ᑭᑎᔑ ᐊᔮᓰᒻ! ᑳᓇᑲ ᓈ ᒥᓂᒃ ᑫᐐᒌᐎᓇᑰᑭᐸᓐ? ᑳᓇᑲ ᓈ ᒦ ᓇ ᑭᑖ ᔕᔒᐯᓂᒥᓂᓂᒻ! ᐲᑕᒪᐎᔑᓐ ᐅᐅᒫ ᐊᐊ ᑸᐎᓭᔅ!

17:18b.MAT.017.018 ᒋᓴᔅ ᑕᔥ ᐅᑮ ᑲᓅᓈᓐ ᐃᓂ ᒪᒋᐊᒑᑾᓐ, ᒦᑕᔥ ᔐᒫᒃ ᑳᐃᔑ ᓵᑲᐊᒥᓂᒡ᙮ ᔐᒫᒃ ᑕᔥ ᐐᑫ ᑮᒥᓄᐊᔮ ᐊᐊ ᑸᐎᓭᔅ᙮

17:19b.MAT.017.019 ᑭᑭᓄᐊᒪᐙᑲᓇᒃ ᑕᔥ ᐅᑮ ᑮᒨᒋ ᓈᓯᑲᐙᐙᓐ ᐁᑮᐃᓈᐙᒡ: ᐌᑯᓀᓐ ᑳᐅᒋ ᑆᓇᐎᐊᑭᒡ ᐊᐊ ᒪᒋᐊᒑᒃ ᒋᓵᑭᒋᐌᐱᓇᑭᒡ?

17:20b.MAT.017.020 ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᐋᓃᔥ ᐅᓵᒻ ᐸᑮ ᑭᑌᐺᔦᑖᒻ᙮ ᑮᔥᐱᓐ ᐃᓴ ᓵᐱᐊᔮᔦᒃ ᑌᐺᔦᑕᒧᐎᓐ, ᑖᐱᔥᑰ ᑳᐃᔑ ᓈᑾᒃ ᐃᐃ ᒫᐗᒡ ᑳᐊᑳᓯᕽ ᑭᑎᑳᓀᔅ ᒪᔅᑕᕒᑦ, ᐱᓵᓂᑯ ᑭᑖᑲᓅᑖᒻ ᐁᐱᑾᑎᓈᒃ ᒋᑮᐃᑭᑐᔦᑭᐸᓐ: ᑕᑲ ᐅᐅᒫ ᐅᒋᒫᒑᓐ, ᐌᑎ ᐃᔖᓐ! ᒦᑕᔥ ᐃᑯ ᑫᔑ ᒫᒑᒪᑲᒃ᙮ ᑲᑭᓇ ᑫᑰᓐ ᑭᑖ ᐃᔑᒋᑫᒻ, ᐅᑮᐃᓈᐞ᙮

17:21b.MAT.017.021 ᐊᐎᔭ ᐅᔕ ᐁᑕ ᐊᓇᒥᐁᑕᐙᒡ ᑭᔐᒪᓂᑑᓐ, ᐐᓯᓂᓯᒃ ᑮᐊᓇᒥᐋᒡ, ᒦ ᐁᑕ ᐃᒫ ᑫᐅᒋ ᓵᑭᒋᐌᐱᓈᐸᓐ ᐅᓄ ᑎᓄ ᒪᒋᐊᒑᑾᓐ, ᐅᑮᐃᓈᐞ᙮

17:22b.MAT.017.022 ᐊᐲ ᑕᔥ ᐃᑭ ᑲᑭᓇ ᑭᑭᓄᐊᒪᐙᑲᓇᒃ ᐁᒫᐗᒋᐃᑎᐙᒡ ᐃᐃᒫ ᑳᓬᐊᓬᐄᕽ, ᒋᓴᔅ ᐅᑮᐃᓈᐞ: ᓃᓐ ᐃᓂᓂ ᐅᑯᓯᓴᓐ ᓂᑲ ᐸᑭᑎᓂᑰ ᒋᐅᑖᐱᓂᐙᒡ

17:23b.MAT.017.023 ᐃᑭ ᑳᐐᓂᔑᐙᒡ᙮ ᓂᓱᑮᔑᒃ ᐃᑕᔥ ᐃᔑᓭᒃ ᒦᓇᐙ ᓂᑲ ᑮᐌᐱᒫᑎᔅ, ᑮᐃᑭᑐ᙮ ᑭᑭᓄᐊᒪᐙᑲᓇᒃ ᑕᔥ ᐐᑫ ᑮᒫᓀᑕᒨᒃ᙮

17:24b.MAT.017.024 ᐃᐃᒫ ᑕᔥ ᐆᑌᓈᕽ ᑲᐸᕒᓂᔭᒦᕽ ᑮᐱ ᐃᔑ ᑕᑯᔑᓅᒃ᙮ ᐲᑕᕒ ᑕᔥ ᐅᑮᐱ ᐊᑕᐙᐸᒥᑰᐞ ᐃᐃ ᑳᑮ ᑎᐸᐃᑫᐃᐌᓂᒡ ᔔᓂᔮᓐ ᑭᒋᐊᓇᒥᐁᐎᑲᒥᑯᕽ ᑳᑮᐃᔑ ᐋᐸᑎᓯᓂᒡ, ᒦᔥ ᐅᐅ ᑳᐃᑯᒡ: ᑳᑭᑭᓄᐊᒪᐎᓀᒃ ᐃᓇ ᐅᑎᐸᐋᓐ ᐃᐃ ᑳᑎᐸᐃᑳᑌᓂᒃ ᑭᒋᐊᓇᒥᐁᐎᑲᒥᑯᕽ? ᐅᑮᐃᑰᐞ᙮

17:25b.MAT.017.025 ᒦᓇᑫ, ᑕᔥ ᐲᑕᕒ ᑮᐃᔑ ᓇᑴᑕᒻ᙮ ᐁᐱ ᐲᑎᑫᒡ ᐃᑕᔥ, ᒋᑆ ᑮᑭᑐᒡ ᒋᓴᓲᓐ ᐅᑮᐃᑰᓐ: ᓵᐃᒪᓐ, ᐋᓃᓐ ᐁᓀᑕᒪᓐ? ᐃᑭ ᓴ ᑳᐊᑖᐙᑫᐙᒡ ᑫᑰᓇᓐ ᐃᔑᐋᐗᒃ ᒋᑎᐸᐊᒪᐙᐙᒡ ᐌᑭᒫᐙᑎᓯᓂᒡ᙮ ᑲᑭᓇ ᓴ ᑲᔦ ᐁᑕᔑᐙᒡ ᐊᐎᔭᒃ ᐅᑎᐸᐊᒪᐙᐙᓐ ᐌᑭᒫᐙᑎᓯᓂᒡ᙮ ᐊᐌᓀᓇᒃ ᐃᑕᔥ ᑳᑎᐸᐊᒪᐙᐙᒡ ᐅᐅᐌᓂ ᐊᑮᐎ ᑭᒋᐅᑭᒫᐞ? ᐊᐊ ᓇ ᑭᒋᐅᑭᒫ ᐅᑯᓯᓴᐞ ᐅᐙᑳᐃᑲᓂᕽ ᑳᐊᔮᓂᒡ ᑎᐸᐃᑫᐋᐗᐞ, ᑯᒫ ᑲᔦ ᑯᑕᒃ ᐊᐎᔭᒃ? ᐅᑮᐃᑰᓐ᙮

17:26b.MAT.017.026 ᐲᑕᕒ ᑕᔥ ᑮᐃᑭᑐ: ᑯᑕᒃ ᐃᓴ ᐊᐎᔭᒃ ᑎᐸᐃᑫᐋᐗᒃ᙮ ᒋᓴᔅ ᑕᔥ ᐅᑮᐃᓈᓐ: ᑌᐺ ᓴ, ᑭᒋᐅᑭᒫ ᐅᑯᓯᓴᐞ ᑳᐐᓐ ᒣᒬᒡ ᐅᑎᐸᐊᓰᓂ᙮

17:27b.MAT.017.027 ᑳᐐᓐ ᑕᔥ ᐐᓐ ᑭᓇᑕᐌᓂᒫᓯᐙᓈᓂᒃ ᒋᒫᓈᐸᒥᓇᒀ ᑳᐐ ᑎᐸᐃᑫᐃᓇᒀ ᑭᒋᐊᓇᒥᐁᐎᑲᒥᑯᕽ ᑳᐅᒌᐙᒡ᙮ ᒫᒑᓐ ᐃᑕᔥ, ᐊᑕᒀᔥᑴᐱᒋᑫᓐ ᐌᑎ ᓵᑲᐃᑲᓃᕽ᙮ ᓂᑕᒻ ᐃᑕᔥ ᑫᒀᔥᑴᐱᓇᒡ ᑮᑰᔾ, ᐅᑲᑕᑾᒫᓐ ᔔᓂᔮᓴᓐ᙮ ᒦᑕᔥ ᒋᑌᑎᐸᐊᒪᕽ ᐃᐃ ᐊᓇᒥᐁᐎᑲᒥᑯᕽ ᑳᐐᐅᒋ ᑎᐸᐃᑫᐃᑰᔭᕽ ᐅᐅ ᑳᐃᔑ ᓃᔑᔭᕽ᙮ ᐃᔑᐎᑖᐤ ᒋᐊᐎ ᒦᓇᑣ ᐃᐃᐌ ᑭᑎᐸᐃᑫᐎᓂᓈᓐ, ᐅᑮᐃᓈᓐ᙮

18

18:1b.MAT.018.001 ᒦᐃ ᑕᔥ ᐊᐲ ᑭᑭᓄᐊᒪᐙᑲᓇᒃ ᐅᑮᓈᓯᑲᐙᐙᓐ ᒋᓴᓲᓐ ᐁᑮ ᑲᑴᒋᒫᐙᒡ: ᐊᐌᓀᓐ ᒫᐗᒡ ᑫᑭᒋ ᐃᓀᑖᑯᓯᒡ ᐃᐃᒫ ᑭᔐᒪᓂᑑ ᐅᑎᐯᒋᑫᐎᓂᕽ?

18:2b.MAT.018.002 ᒋᓴᔅ ᑕᔥ ᐅᑮᐊᑐᒫᓐ ᐊᐱᓅᒌᔕᓐ, ᐁᑮᓃᐸᐎᐋᒡ ᐁᓈᓴᒥᑳᐸᐎᓂᒡ,

18:3b.MAT.018.003 ᐁᑮᐃᓈᒡ: ᑌᐺ ᑭᑎᓂᓂᓂᒻ, ᑮᔥᐱᓐ ᑴᑳᑎᓯᓯᐌᒃ, ᐃᔑ ᐊᔮᓯᐌᒃ ᑲᔦ ᑳᐃᔑ ᐊᔮᐙᒡ ᐊᐱᓅᒌᔕᒃ, ᑳᐐᓐ ᐐᑳ ᑭᑲᐅᒋ ᑎᐯᑖᑯᓯᓰᒻ ᑭᔐᒪᓂᑑ ᐅᑎᐯᒋᑫᐎᓂᕽ᙮

18:4b.MAT.018.004 ᐊᐊ ᓴ ᑳᑕᐸᓭᓂᒧᐃᑎᓱᒡ ᑖᐱᔥᑰ ᐗᐊ ᐊᐱᓅᒌᔥ ᑳᔑ ᑕᐸᓭᓂᒧᒡ, ᒦᓴ ᐊᐊ ᒫᐗᒡ ᑳᑭᒋ ᐃᓀᑖᑯᓯᒡ ᐃᐃᒫ ᑭᔐᒪᓂᑑ ᐅᑎᐯᒋᑫᐎᓂᕽ᙮

18:5b.MAT.018.005 ᐊᐌᓀᓐ ᐃᓴ ᑳᐅᑖᐱᓈᒡ ᐅᓄ ᑎᓄ ᐊᐱᓅᒌᔕᓐ ᓂᑎᔑᓂᑳᓱᐎᓂᕽ, ᓃᓐ ᐅᔕ ᑳᐅᑖᐱᓂᒡ᙮

18:6b.MAT.018.006 ᐊᐎᔭ ᓴ ᑳᐗᓂᔥᑴᐋᒡ ᐯᔑᒃ ᐅᓄ ᑳᐊᑳᔒᔑᓂᒡ ᑳᑌᐺᔦᓂᒥᓂᒡ ᒋᐴᓂᒋᑫᓂᒡ, ᓇᐗᒡ ᑖᐅᓂᔑᔑᓂᓂ ᑳᒥᒑᐱᑭᓯᓂᒡ ᐲᓯᐴᒋᑲᓇᓯᓃᓐ ᒋᑕᑯ ᐱᒋᑲᓂᐎᓂᐸᓐ ᐅᑴᑲᓂᕽ ᒋᓂᓵᐹᐗᒋᑲᓂᐎᐸᓐ ᐃᐃᒫ ᑳᔑ ᑮᔥᑳᔭᐙᓂᒃ ᑭᒋᑲᒦᕽ, ᐊᐲᒡ ᐐᓐ ᒋᐸᑭᔑᒫᐸᓐ ᐃᓂ ᑳᑌᐺᔦᓂᒥᓂᒡ᙮

18:7b.MAT.018.007 ᑰᐹᓯᓈᑾᓐ ᐃᓴ ᐅᐅᒫ ᐊᑮᕽ, ᐁᐊᔮᑭᓐ ᐃᓂ ᑳᐅᒋ ᒪᒋᑑᑕᒥᕽ! ᐃᔑᓈᑾᓐ ᑲᔦ ᐅᒋᑕ ᐱᑯ ᒋᑕᑯᔑᓅᒪᑲᑭᓐ᙮ ᐋᐱᒋ ᑕᔥ ᑕᑰᐹᓯᓈᑯᓯ ᐊᐊ ᐊᐎᔭ ᐐᓐ ᑳᐅᒋ ᐅᑎᔑᐌᒪᑲᓂᓂᑭᓐ᙮

18:8b.MAT.018.008 ᑮᔥᐱᓐ ᑭᓂᒌᕽ ᑯᒫ ᑲᔦ ᑭᓯᑎᕽ ᐅᒋ ᒪᒋᑑᑕᒪᓐ, ᒦᓴ ᐃᔑ ᑮᔥᑭᔕᓐ, ᐌᐱᓇᓐ ᑲᔦ᙮ ᓇᐗᒡ ᑖᐅᓂᔑᔑᓐ ᒋᐲᑎᑫᔥᑳᔭᐸᓐ ᐃᐃᒫ ᐱᒫᑎᓯᐎᓂᕽ ᒋᑮᔥᑭᓂᒌᔭᓐ, ᒋᑮᔥᑭᓯᑌᔭᓐ ᑲᔦ, ᐊᐲᒡ ᐐᓐ ᒋᑭᑭ ᒪᒍᑌᐌᐱᓂᑰᔭᓐ ᐃᐃ ᑭᓂᓐᒡ ᑯᒫ ᑲᔦ ᑭᓯᑦ ᐃᐃᒫ ᒪᒋ ᐃᔥᑯᑌᕽ ᐐᑳ ᑫᐋᑕᐌᓯᓄᒃ᙮

18:9b.MAT.018.009 ᑮᔥᐱᓐ ᑲᔦ ᑭᔥᑮᔑᑯᕽ ᐅᒋᒪᒋᑑᑕᒪᓐ ᐅᑖᐱᓇᓐ, ᐃᑯᒋ ᑲᔦ ᐊᐸᑭᑑᓐ᙮ ᓇᐗᒡ ᑖᐅᓂᔑᔑᓐ ᒋᐲᑎᑫᔥᑳᔭᐸᓐ ᐃᐃᒫ ᐱᒫᑎᓯᐎᓂᕽ ᒋᒥᒋᐯᔑᑯᔥᑮᔑᑴᔭᓐ, ᐊᐲᒡ ᐐᓐ ᒋᑭᑭ ᒪᒍᑌᐌᐱᓂᑰᔭᓐ ᐃᓂ ᒥᒋᓃᔥ ᑭᔥᑮᔑᑰᓐ ᐃᐃᒫ ᒪᒋ ᐃᔥᑯᑌᕽ ᑳᓀᐱᒋ ᐱᔅᑲᓀᓂᒃ᙮

18:10b.MAT.018.010 ᐊᔮᒀᒥᓯᒃ ᐃᑕᔥ ᒋᑕᐸᓭᓂᒫᓯᐌᒃ ᐗᐊ ᐯᔑᒃ ᐅᑯ ᑎᓄ ᑳᐊᑳᔒᔑᐙᒡ᙮ ᑭᑎᔑᐐᑕᒪᐎᓂᓂᒻ ᐃᑕᔥ, ᐅᑌᒐᓬᐃᒥᐙᐞ ᒨᔕᒃ ᐌᑎ ᐊᔮᐗᐞ ᑳᔑ ᐊᔮᓂᒡ ᓂᑌᑌᓐ ᑭᒋᑮᔑᑯᕽ᙮

18:11b.MAT.018.011 ᐃᓂᓂ ᐅᑯᓯᓴᓐ ᑮᐲᔖᐗᓐ ᒋᐱ ᒫᒋᐋᓂᒡ ᐃᐃ ᑳᐗᓂᔑᓂᓂᒡ᙮

18:12b.MAT.018.012 ᐋᓃᓐ ᐁᓀᑕᒣᒃ? ᑮᔥᐱᓐ ᐃᓂᓂ ᐊᔮᐙᒡ ᓂᑯᑣᒃ 100 ᒫᓇᒑᓂᔕᐞ, ᐯᔑᒃ ᑕᔥ ᐗᓂᔑᓂᓂᒡ, ᐋᓃᓐ ᑫᐃᔑᒋᑫᐸᓐ? ᐅᑖᓇᑲᓈᐞ ᒫᐐᓐ ᐃᐃ ᔖᑲᓯᒥᑕᓇᔑᔖᑲᓱ 99 ᒫᓇᒑᓂᔕᐞ ᐃᐃᒫ ᐋᓴᒪᑎᓈᕽ ᒋᐊᑐᓀᐙᐸᓐ ᐃᓂ ᐯᔑᒃ ᑳᐗᓂᔑᓂᓂᒡ᙮

18:13b.MAT.018.013 ᑭᐐᑕᒪᐎᓂᓂᒻ ᐃᑕᔥ ᐊᐲ ᒥᑲᐙᒡ, ᓇᐗᒡ ᐃᓂ ᑕᐅᒋ ᒌᑫᑕᒻ ᐊᐲᒡ ᐐᓐ ᐃᐃ ᔖᑲᓯᒥᑕᓇᔑᔖᑲᓱ ᑳᑮᐗᓂᔑᓯᓂᒃ᙮

18:14b.MAT.018.014 ᒦᑕᔥ ᐯᔑᑾᓐ ᑭᑌᑌᐙ ᑭᒋᑮᔑᑯᕽ ᑳᐊᔮᒡ ᑳᐐᓐ ᐅᓇᑕᐌᓂᒫᓰᐞ ᐅᐅ ᑳᐊᑳᔒᔑᓂᒡ ᒋᐗᓂᔑᓂᓂᒡ᙮

18:15b.MAT.018.015 ᑮᔥᐱᓐ ᑮᑕᓇᒥᐋ ᒪᒋᑑᑕᐎᒃ, ᓈᓯᑲᐤ ᒋᐙᐸᑕᐊᒡ ᐋᓃᓐ ᑳᑮᐃᔑ ᒪᒋᑑᑕᐎᒃ, ᑮᒨᒡ ᐃᑕᔥ ᑮᓀᑕᐙ ᒋᑲᑲᓅᓂᑎᔦᒃ᙮ ᑮᔥᐱᓐ ᑕᔥ ᐱᓯᑕᐎᒃ, ᒦᓴ ᐃ ᑮᑲᔥᑭᐊᒡ ᒦᓇᐙ ᒋᒥᓄ ᐐᒌᐎᒃ᙮

18:16b.MAT.018.016 ᑮᔥᐱᓐ ᑕᔥ ᐱᓯᑕᐎᓯᓄᒃ, ᐯᔑᒃ ᒫᒌᔥ ᑯᒫ ᑲᔦ ᑯᑕᒃ ᓃᔑᓐ ᒋᐊᑕᐙᐸᒣᒃ, ᐋᓃᔥ ᐃᔑᐲᐃᑳᑌ ᑭᒋᒪᓯᓇᐃᑲᓂᕽ, ᑮᔥᐱᓐ ᓃᔑᐙᒡ ᑯᒫ ᑲᔦ ᓂᓯᐙᒡ ᐊᐎᔭᒃ, ᐅᑎᑭᑐᐎᓂᐙ ᓴ ᑕᒥᒋᒣᒋᑳᑌᓂ᙮

18:17b.MAT.018.017 ᑮᔥᐱᓐ ᑕᔥ ᐱᓯᑕᐙᓯᒃ, ᑎᐹᑐᑕᒧᐙᒃ ᑕᔥ ᐅᐅ ᐃᐃᒫ ᐅᑌᐺᑕᒨᒃ ᑳᐃᔑ ᒫᐗᒋᐃᑎᐙᒡ᙮ ᑮᔥᐱᓐ ᑕᔥ ᑫᔮᐱ ᐱᓯᑕᓯᒃ, ᑖᐱᔥᑰ ᓴ ᐊᐎᔭ ᑳᑭᑫᓂᒫᓯᒃ ᑭᔐᒪᓂᑑᓐ ᑯᒫ ᑲᔦ ᑳᒫᐗᑑᓈᒡ ᑖᑭᔅ ᔔᓂᔮᓐ ᑭᑲ ᐃᓇᑭᒫᐙ᙮

18:18b.MAT.018.018 ᐅᐅᐌ ᓴ ᑌᐺ ᑭᐐᑕᒪᐎᓂᓂᒻ: ᐌᑯᓀᓐ ᑫᑭᐱᑎᓇᒣᒃ ᐅᐅᒫ ᐊᑮᕽ ᑕᑭᐱᑎᓂᑳᑌ ᑭᒋᑮᔑᑯᕽ᙮ ᐌᑯᓀᓐ ᑲᔦ ᑫᐸᑭᑎᓇᒣᒃ ᐅᐅᒫ ᐊᑮᕽ, ᑕᐸᑭᑎᓂᑳᑌ ᑭᒋᑮᔑᑯᕽ᙮

18:19b.MAT.018.019 ᑫᔮᐱ ᑕᔥ ᑭᑎᓂᓂᓂᒻ: ᑮᔥᐱᓐ ᓃᔑᔦᒃ ᑫᑰᓐ ᐯᔑᑾᓐ ᐃᓀᑕᒣᒃ ᐁᐐ ᐊᓇᒥᐋᔦᒃ, ᓂᑌᑌ ᑭᒋᑮᔑᑯᕽ ᑳᐋᔮᒡ ᐅᑲ ᑑᑖᓐ ᑳᐃᔑ ᒥᓴᐌᑕᒣᒃ᙮

18:20b.MAT.018.020 ᐋᑎ ᐱᑯ ᓃᔑᓐ ᑯᒫ ᑲᔦ ᓂᓯᓐ ᐁᔑ ᒫᐗᒋᐃᑎᐙᒡ ᓂᑎᔑᓂᑳᓱᐎᓂᕽ, ᒦᐃᒫ ᑫᓃᓐ ᐁᔮᐗᒃ ᐁᔑ ᐊᔮᐙᒡ᙮

18:21b.MAT.018.021 ᐅᑮ ᐱᓈᓯᑳᑰᓐ ᑕᔥ ᐲᑕᕒᐆᓐ ᐁᑮᐃᑯᒡ: ᐋᓃᓐ ᑕᔂ ᑫᐴᓀᑕᒪᐗᒃ ᓃᒋᑭᐌ ᑮᔥᐱᓐ ᒪᒋᑑᑕᐎᒡ? ᓃᔣᒋᕽ ᐃᓇ?

18:22b.MAT.018.022 ᒋᓴᔅ ᑕᔥ ᐅᑮᐃᓈᓐ: ᑳᐐᓐ ᐐᓐ ᓃᔣᒋᕽ ᐁᑕ, ᓃᔣᓯᒥᑕᓇ ᑕᓯᕽ ᓃᔣᒋᕽ ᐅᔕ᙮

18:23b.MAT.018.023 ᒦᑕᔥ ᐅᐅ ᐁᔑᓈᑾᓂᓂᒃ ᑭᔐᒪᓂᑑ ᐅᑎᐯᒋᑫᐎᓐ, ᑖᐱᔥᑰ ᑭᒋᐅᑭᒫ ᐁᐐ ᓴᑲᑲᑭᑕᕽ ᐅᑕᓄᑮᐎᓂᓂ ᐃᐃ ᐅᑕᓄᑮᐋᑲᓇᐞ᙮

18:24b.MAT.018.024 ᐋᔕ ᑕᔥ ᐁᑮᒫᒌ ᓴᑲᑲᑭᒋᑫᒡ, ᑮᐲᑕᒪᐙ ᓴ ᐯᔑᒃ ᐃᓂ ᑳᑮ ᑲᔦᔑᒥᑯᒡ ᒫᐗᒡ ᐃᑯ ᓃᐳᐗᐞ ᑕᔂᐱᒃ ᔔᓂᔮᓐ᙮

18:25b.MAT.018.025 ᐁᑮᐊᔮᐙᓯᓂᒃ ᑕᔥ ᐃᓂ ᔔᓂᔮᓐ ᒋᑎᐸᐊᒫᑯᒡ, ᑭᒋᐅᑭᒫ ᑕᔥ ᑮᐃᑭᑐ ᒋᐊᑖᐙᑳᓂᐎᓂᒡ ᐃᓂ ᐅᑕᓄᑮᐋᑲᓇᓐ, ᔑᑾ ᐅᐐᑎᑫᒫᑲᓂᓂ, ᔑᑾ ᐅᓃᒑᓂᓯᓂ, ᑲᑭᓇ ᑫᑰᓂᓂ ᑲᔦ ᑳᑮ ᑎᐯᑕᒥᓂᒡ, ᒦᓴ ᐃᒫ ᒋᐅᒋ ᑎᐸᐊᒥᓂᒡ ᑳᑮ ᑲᔦᔑᒥᑯᒡ᙮

18:26b.MAT.018.026 ᐊᐊ ᑕᔥ ᐊᓄᑮᐋᑲᓐ ᑮᐅᒋᒌᑾᓂᐸᓂᐅ ᐁᓈᓴᒪᐱᓂᒡ ᐃᓂ ᐅᑑᑭᒫᒪᓐ ᐁᑮᐃᓈᒡ: ᑕᑲ ᔕᔒᐯᓂᒥᔑᓐ, ᑭᑲ ᑎᐸᐊᒪᐎᓐ ᐃᓴ ᑲᑭᓇ ᑫᑰᓐ ᑳᒪᓯᓇᐊᒪᐎᓈᓐ!

18:27b.MAT.018.027 ᑭᒋᐅᑭᒫ ᑕᔥ ᐅᑮ ᑯᐹᑌᓂᒫᓐ, ᒦᑕᔥ ᑳᐃᔑ ᐸᑭᑎᓈᒡ, ᐁᑮ ᐴᓀᑕᒪᐙᒡ ᑲᔦ ᐃᐃᐌᓂ ᑳᑮᒪᓯᓇᐊᒫᑯᒡ᙮

18:28b.MAT.018.028 ᒦᑕᔥ ᑳᐃᔑ ᒫᒑᒡ ᐊᐊ ᐊᓄᑮᐋᑲᓐ ᐁᑮᓇᑭᔥᑲᐙᒡ ᐃᓂ ᐅᐐᑕᓄᑮᒫᑲᓇᓐ ᑳᑮᒪᓯᓇᐊᒫᑯᒡ ᐸᑮ ᐁᑕ ᑕᔂᐱᒃ᙮ ᒦᑕᔥ ᑳᐃᔑ ᓴᑳᑭᑲᓀᓈᒡ ᐁᑮ ᑭᐱᓀᐌᓈᒡ ᐁᑮᐃᓈᒡ ᑲᔦ: ᑎᐸᐊᒪᐎᔑᓐ ᑲᑭᓇ ᑳᒪᓯᓇᐊᒪᐎᔭᓐ!

18:29b.MAT.018.029 ᐅᐐᑕᓄᑮᒫᑲᓇᓐ ᑕᔥ ᑮᐅᒋᒌᑾᓇᐱᐸᓂᐅᐗᓐ ᐁᑮᐃᑯᒡ: ᔒᐱᐲᐃᔑᓐ ᑭᑲ ᑮᐌᑎᐸᐊᒪᐎᓐ ᐃᓴ᙮

18:30b.MAT.018.030 ᑳᐐᓐ ᑕᔥ ᑮᐃᓀᑕᓰ᙮ ᒦᑕᔥ ᑳᐃᔑ ᐊᓅᑮᒡ ᒋᐲᑎᑫᑰᑯᐌᐱᓂᒥᓐᒡ ᐃᐃᒫ ᑭᐹᑾᐅᑏᐎᑲᒥᑯᕽ, ᐹᒫ ᓴ ᑎᐸᐃᑫᓂᒡ ᒋᐴᓂ ᑭᐸᐅᒥᓐᒡ᙮

18:31b.MAT.018.031 ᐃᑭ ᑕᔥ ᑯᑕᒃ ᐊᓄᑮᐋᑲᓇᒃ ᐁᑮᐙᐸᑫᐙᒡ ᐋᓃᓐ ᐁᓇᑲᒥᑲᓂᓂᒃ, ᐐᑫ ᑮᒫᓀᑕᒨᒃ᙮ ᒦᑕᔥ ᑳᐃᔑ ᐐᑕᒪᐙᐙᒡ ᐃᓂ ᑭᒋᐅᑭᒫᓐ ᑲᑭᓇ ᑫᑰᓂᓂ ᑳᑮᐙᐸᑕᒧᐙᒡ᙮

18:32b.MAT.018.032 ᑭᒋᐅᑭᒫ ᑕᔥ ᐅᑮᐊᑐᒫᓐ ᐃᓂ ᐅᑕᓄᑮᐋᑲᓇᓐ ᐁᑮᐃᓈᒡ: ᐁᑕᑕᐌ ᐊᓅᒋᑯ ᐊᓄᑮᐋᑲᓐ ᑭᑎᓄᐤ! ᑭᑮ ᐴᓀᑕᒪᐎᓐ ᓴ ᒥᓂᒃ ᑳᑮ ᑲᔦᔑᒥᔭᓐ, ᐋᓃᔥ ᑭᑮ ᑲᑴᒋᒻ᙮

18:33b.MAT.018.033 ᒦᑕᔥ ᐯᔑᑾᓐ ᑫᑮᐃᔑ ᑰᐹᑌᓂᒪᑎᐸᓐ ᐊᐊ ᑭᐐᑕᓄᑮᒫᑲᓐ ᑖᐱᔥᑰ ᑳᑮᐃᔑ ᑰᐹᑌᓂᒥᓈᓐ᙮

18:34b.MAT.018.034 ᐐᑫ ᑕᔥ ᑮᓂᔥᑳᑎᓯ ᐊᐊ ᑭᒋᐅᑭᒫ᙮ ᒦᑕᔥ ᑳᐃᓈᑯᓂᑫᒡ ᒋᑭᐸᐅᒥᓐᒡ ᐃᓂ ᒪᒋᐊᓄᑮᐋᑲᓇᓐ, ᒋᑲᒀᑕᑭᐃᒥᓐᒡ ᐹᓂᒫ ᓴ ᑮᒥᓯᐌ ᑎᐸᐊᒪᐎᓐᒡ ᒥᓂᒃ ᑳᑮ ᑲᔦᔑᒥᑎᐸᓐ᙮

18:35b.MAT.018.035 ᒦᓴ ᐯᔑᑾᓐ ᑳᑕᔑᔦᒃ ᑫᑑᑕᐎᓀᒃ ᓂᑌᑌ ᑭᒋᑮᔑᑯᕽ ᑳᐊᔮᒡ ᑮᔥᐱᓐ ᐊᐎᔭ ᐅᑌᐃᕽ ᑌᐺ ᐅᒋ ᐴᓀᑕᒪᐙᓯᒃ ᐃᓂ ᐐᑕᓇᒥᐋᓐ᙮

19

19:1b.MAT.019.001 ᐊᐲ ᑕᔥ ᒋᓴᔅ ᐁᑮᐃᔥᒀᑲᑭᑐᒡ ᑮᐊᓂᐅᒋ ᒫᒑ ᑳᓬᐊᓬᐄᕽ ᐃᐃᐌᑎ ᐁᑮᐃᔑ ᑮᐌᒡ ᐊᑮᕽ ᒎᑏᔮᑳᕽ ᐊᑳᒥᓰᐱ ᒞᕒᑕᓐ ᙮

19:2b.MAT.019.002 ᐋᐱᒋ ᑕᔥ ᑮᐹᑏᓄᐗᐞ ᐯᒫᑎᓯᓂᒡ ᑳᑮ ᐱᒥᓂᔕᐅᑯᒡ ᑲᔦ ᐁᑮᒥᓄᐊᔮᐋᒡ ᐅᑖᑯᓰᐞ᙮

19:3b.MAT.019.003 ᐯᕒᐊᓰᒃ ᑕᔥ ᐅᑮ ᐱᓈᓯᑲᐙᐙᓐ ᐁᑮ ᑲᑴᒋᐋᐙᒡ ᐁᑮᐃᓈᐙᒡ: ᐅᓇᔓᐌᐎᓐ ᐃᓇ ᐃᑭᑑᒪᑲᓐ ᐱᓵᓂᑯ ᐃᓂᓂ ᒋᐌᐱᓈᒡ ᐐᐗᓐ ᐌᑯᓀᓐ ᐃᑯ ᐅᒋ?

19:4b.MAT.019.004 ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᐃᓇ ᑭᑕᓇᒥᑑᓰᒻ ᐁᐃᔑᐲᐃᑳᑌᒃ, ᐊᐲ ᑕᔥ ᑲᑭᓇ ᑫᑰᓐ ᑮᐅᔑᒋᑳᑌᒃ ᑭᔐᒪᓂᑑ ᐅᑮᐅᔑᐋᓐ ᐃᓂᓂᐗᓐ ᐃᓂ ᑲᔦ ᐃᑴᐗᓐ?

19:5b.MAT.019.005 ᐁᑮᐃᑭᑐᒡ ᑲᔦ: ᒦᑕᔥ ᐅᐅᐌᓂ ᑫᐅᒋ ᓇᑲᓈᒡ ᐃᓂ ᐅᑌᑌᓐ, ᐅᒫᒫᓐ ᑲᔦ ᐊᐊ ᐃᓂᓂ, ᒋᐐᒌᐙᒡ ᐃᓴ ᐃᓂ ᐐᐗᓐ᙮ ᐁᓃᔑᐙᒡ ᑕᔥ ᑕᐯᔑᑾᑭᑌᓂᐗᓐ ᐅᐐᔭᐎᐙᓐ᙮

19:6b.MAT.019.006 ᑳᐐᓐ ᑕᔥ ᓃᔑᓰᐗᒃ, ᒦᑕᔥ ᐁᔑ ᐯᔑᑯᐙᒡ᙮ ᐊᐌᓀᓇᐞ ᐃᓴ ᑳᑮᒫᒪᐎᓂᐃᔓᐸᑭᑎᓈᒡ ᑭᔐᒪᓂᑑ, ᑳᐐᓐ ᓴ ᐊᐎᔭ ᐅᑲᐸᑫᐎᓂᑎᐋᓰᐞ᙮

19:7b.MAT.019.007 ᐯᕒᐊᓰᒃ ᑕᔥ ᐅᑮᐃᔑ ᑲᑴᒋᒫᐙᓐ: ᐌᑯᓀᓂᓂ ᑕᔥ ᒨᓯᔅ ᑳᐅᒋ ᐃᓈᑯᓂᑫᒡ, ᐃᓂᓂ ᓴ ᒋᒦᓈᒡ ᐐᐗᓐ ᐃᐃ ᐌᐱᓂᐌᐎᒪᓯᓇᐃᑲᓀᓯᓂ ᒋᓵᑭᒋᓂᔕᐙᒡ ᑲᔦ ᐃᓂ ᐐᐗᓐ?

19:8b.MAT.019.008 ᒋᓴᔅ ᑕᔥ ᐅᑮᐃᓈᐞ: ᒨᓯᔅ ᓴ ᑭᑮ ᐸᑭᑎᓂᑯᐙ ᒋᐸᑫᐎᓂᒣᒃ ᑭᐐᐎᐙᐞ, ᐋᓃᔥ ᐐᑫ ᑭᔕᔒᐱᑖᒻ᙮ ᑳᐐᓐ ᑕᔥ ᐐᓐ ᐃᐃᐌ ᑮᐃᔑᓭᓯᓅᓐ ᓂᑕᒻ ᑮᒫᒋᓭᒃ ᑲᑭᓇ ᑫᑰᓐ᙮

19:9b.MAT.019.009 ᑭᐐᑕᒪᐎᓂᓂᒻ ᐃᑕᔥ, ᑮᔥᐱᓐ ᐃᓂᓂ ᐌᐱᓈᒡ ᐐᐗᓐ, ᒥᓴᐙ ᑯ ᐋᓇ ᐱᔑᒀᑎᓯᓯᓂᒃ, ᐐᑎᑫᒫᒡ ᐃᑕᔥ ᑯᑕᒃ ᐃᑴᐗᓐ, ᒦᓴ ᐃ ᐁᑮ ᐱᔑᒀᑎᓯᒡ᙮

19:10b.MAT.019.010 ᑭᑭᓄᐊᒪᐙᑲᓇᒃ ᐃᑕᔥ ᑮᐃᑭᑐᐗᒃ: ᑮᔥᐱᓐ ᐃᓴ ᐃᐃ ᐁᔑᓈᑾᓂᓂᑴᓐ ᐊᐊ ᐃᓂᓂ ᐊᐊ ᑲᔦ ᐃᑴ ᐁᐐᑎᑫᑎᐙᒡ, ᓇᐗᒡ ᐄᓴᓐ ᑖᐅᓂᔑᔑᓂᓂ ᐐᑳ ᒋᐐᑎᑫᑎᓈᓂᐗᓯᓄᑭᐸᓐ᙮

19:11b.MAT.019.011 ᒋᓴᔅ ᑕᔥ ᐅᑮᐃᓈᐞ: ᐅᐅ ᓴ ᑭᑭᓄᐃᑫᐎᓐ ᑳᐐᓐ ᑲᑭᓇ ᐊᐎᔭ ᒦᓂᑰᐎᓯᓰ, ᐃᑭ ᐁᑕ ᑳᔑ ᒦᓂᑯᐙᒡ ᑭᔐᒪᓂᑑᓐ᙮

19:12b.MAT.019.012 ᐹᑏᓇᑎᓂᓂᓂᐗᓐ ᐅᔕ ᐋᓂᑕ ᐃᓂᓂᐗᒃ ᑳᐅᒋ ᐐᑎᑫᓯᒀ᙮ ᐋᓂᑕ ᐃᔑ ᓂᑖᐎᑭᐗᒃ, ᐋᓂᑕ ᑲᔦ ᐃᔑᒋᑲᓂᐎᐗᒃ ᒋᐐᑎᑫᓯᒀ, ᐋᓂᑕ ᑕᔥ ᑳᐅᒋ ᐐᑎᑫᓯᒀ ᒦᓴ ᐃᐃᐌᓂ ᐌᐌᓂ ᒋᐊᓄᑮᑕᒧᐙᒡ ᑭᔐᒪᓂᑑᓐ ᐅᑎᐯᒋᑫᐎᓂᓂ᙮ ᐊᐊ ᑕᔥ ᑳᑲᔥᑭᑑᒡ ᒋᐅᑖᐱᓇᕽ ᐅᐅ ᑭᑭᓄᐃᑫᐎᓐ, ᐱᓵᓂᑯ ᐅᑲ ᐅᑖᐱᓈᓐ᙮

19:13b.MAT.019.013 ᒋᓴᔅ ᑕᔥ ᑮᐲᑕᒪᐙ ᐊᐱᓅᒌᔕᐞ ᒋᓵᒥᓈᒡ, ᒋᐊᓇᒥᐁᑕᒪᐙᒡ ᑲᔦ᙮ ᑭᑭᓄᐊᒪᐙᑲᓇᒃ ᑕᔥ ᐅᑮ ᑭᔒᑲᓅᓈᐞ ᐃᐃ ᑳᑮ ᐲᓈᓂᒡ᙮

19:14b.MAT.019.014 ᒋᓴᔅ ᑕᔥ ᑮᐃᑭᑐ: ᒫᓄ ᐊᐱᓅᒌᔕᒃ ᓂᑲ ᐱ ᓈᓯᑳᑰᒃ᙮ ᑫᑯ ᐐᓐ ᑭᐱᑎᓈᑫᒀᓂᒃ᙮ ᐋᓃᔥ ᒦᐗᒃ ᐃᓴ ᐃᑭ ᑎᓄ ᐯᒫᑎᓯᐙᒡ ᐅᑯ ᑳᐃᓈᑎᓯᐙᒡ ᐊᐱᓅᒌᔑᕽ ᑫᑎᐯᓂᒥᑯᐙᒡ ᑭᔐᒪᓂᑑᓐ᙮

19:15b.MAT.019.015 ᒦᑕᔥ ᐃᐃ ᑳᐃᔑ ᓵᓵᒥᓈᒡ, ᐁᑮᐊᓂ ᐃᔑ ᒫᒑᒡ᙮

19:16b.MAT.019.016 ᐋᐱᑎᕽ ᑕᔥ ᐃᓂᓂ ᐅᑮᓈᓯᑲᐙᓐ ᒋᓴᓲᓐ ᐁᑮᐃᓈᒡ: ᐅᑭᑭᓄᐊᒫᑫ, ᐌᑯᓀᓐ ᓴᓭᑳ ᐃᔑᒋᑫᐎᓐ ᑫᐃᔑᒋᑫᔮᐹᓐ ᑫᐅᒋ ᒦᓂᑰᔮᓐ ᐱᒫᑎᓯᐎᓐ ᐐᑳ ᑫᐴᓂᓭᓯᓄᒃ?

19:17b.MAT.019.017 ᒋᓴᔅ ᐅᑮᐃᔑ ᓇᑴᑕᐙᓐ: ᐌᑯᓀᓐ ᐌᒋ ᑲᑴᒋᒥᔭᓐ ᑫᑰᓐ ᑳᓴᓭᑳᐗᕽ? ᒥᒋᐯᔑᑯ ᐅᔕ ᑳᓴᓭᑳᐌᑖᑯᓯᒡ᙮ ᑮᔥᐱᓐ ᐃᓴ ᐊᑕᐌᑕᒪᓐ ᐱᒫᑎᓯᐎᓐ ᒋᒦᓂᑰᔭᓐ, ᑑᑕᓐ ᒨᓯᔅ ᐅᑑᓇᔓᐌᐎᓇᓐ᙮

19:18b.MAT.019.018 ᐊᐊ ᑕᔥ ᐃᓂᓂ ᑮᐃᔑ ᑲᑴᑗ: ᐋᓃᓐ ᐃᓂᐌᓂᐗᓐ? ᒋᓴᔅ ᑕᔥ ᐅᑮᐃᓈᓐ: ᑫᑯ ᓂᔑᐌᑫᓐ, ᑫᑯ ᐸᐹᒣᓂᒥᒫᑫᓐ ᐸᑳᓐ ᐊᐎᔭ ᐐᐗᓐ, ᑫᑯ ᑭᒨᑎᑫᓐ, ᑫᑯ ᑲᔦ ᐊᐎᔭ ᓅᒋᑯ ᐃᓈᒋᒫᑫᓐ ᑎᐹᑯᓂᓐᒡ,

19:19b.MAT.019.019 ᑭᒋ ᐃᓀᓂᒻ ᑭᑌᑌ, ᑭᒫᒫ ᑲᔦ, ᓵᑭᐞ ᑲᔦ ᑭᐐᒋᑖᒫᑲᓐ ᑖᐱᔥᑰ ᑳᔑ ᓵᑭᐃᑎᓱᔭᓐ᙮

19:20b.MAT.019.020 ᐅᔥᑭᓃᑭ ᑕᔥ ᑮᐃᑭᑐ: ᑲᑭᓇ ᐅᔕ ᐃᓂ ᐅᓇᔓᐌᐎᓇᓐ ᓂᓂᑖ ᑑᑖᓇᓐ᙮ ᐋᓃᔥ ᐊᐗᔑᒣ ᑫᐃᔑᒋᑫᔮᐹᓐ?

19:21b.MAT.019.021 ᒋᓴᔅ ᑕᔥ ᐅᑮᐃᓈᓐ: ᑮᔥᐱᓐ ᐐᑫ ᐐᑾᔭᑯᓈᑯᓯᔭᓐ, ᒫᒑᓐ, ᐊᐎ ᐊᑖᐙᑫᓐ ᑲᑭᓇ ᑫᑰᓇᓐ ᑳᐊᔮᔭᓐ, ᒋᒦᓇᑣ ᑲᔦ ᔔᓂᔮᓐ ᐅᑭᑎᒫᑭᓰᒃ᙮ ᐌᓅᑎᓯᐎᓐ ᑕᔥ ᑭᑲ ᐊᔮᓐ ᐌᑎ ᑭᒋᑮᔑᑯᕽ᙮ ᒦᑕᔥ ᐃᔑᐲᔖᑲᓐ ᒋᐱᒥᓂᔕᐅᔭᓐ᙮

19:22b.MAT.019.022 ᐁᑮᓅᑕᕽ ᐃᑕᔥ ᐊᐊ ᐅᔥᑭᓃᑭ ᐁᑮᐃᒋᑲᓂᐎᒡ, ᑮᐊᓂ ᒫᒑ, ᐁᑮᒫᓀᑕᕽ, ᐋᓃᔥ ᐐᑫ ᑮᐌᓅᑎᓯ᙮

19:23b.MAT.019.023 ᒋᓴᔅ ᐃᑕᔥ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᑭᐐᑕᒪᐎᓂᓂᒻ ᑌᐺᐎᓐ: ᐋᐱᒋ ᓴᓇᑲᓂᓂ ᑳᐌᓅᑎᓯᒡ ᒋᐅᑭᒫᑲᑖᑯᒡ ᑭᔐᒪᓂᑑᓐ᙮

19:24b.MAT.019.024 ᑫᔮᐱ ᑫᑰᓐ ᑭᐐᑕᒪᐎᓂᓂᒻ, ᓇᐗᒡ ᑖᐌᑕᓂᓂ ᐱᒀᐎᑲᓀᒥᑕᑎᒻ ᒋᔒᐹᔥᑳᐸᓐ ᐃᐃᐌᓂ ᑳᔑ ᐸᑯᓀᔮᓂᒃ ᔖᐳᓂᑲᓂᓂ, ᐊᐲᒡ ᐐᓐ ᑳᐌᓅᑎᓯᒡ ᐃᓂᓂ ᒋᐅᑭᒫᑲᑖᑯᐸᓐ ᑭᔐᒪᓂᑑᓐ᙮

19:25b.MAT.019.025 ᐅᑭᑭᓄᐊᒪᐙᑲᓇᐞ ᐃᑕᔥ ᐁᓅᑖᑯᒡ ᑮᑭᒋᒫᒪᑳᑌᑕᒨᐞ, ᐁᑮᐃᑭᑐᓂᒡ: ᐊᐌᓀᓐ ᑕᔥ ᐃᓈ ᑫᐱᒫᒋᐃᑰᐎᓯᐸᓐ?

19:26b.MAT.019.026 ᒋᓴᔅ ᐅᑮ ᑲᓇᐙᐸᒫᐞ ᐁᑮᐃᓈᒡ: ᐃᓂᓂ ᐐᓐ ᑳᐐᓐ ᐅᑖ ᑲᔥᑭᑑᓰᓐ ᐅᐅ ᒋᐃᔑᒋᑫᒡ, ᑭᔐᒪᓂᑑ ᑕᔥ ᐐᓐ ᑲᑭᓇ ᑫᑰᓂᓂ ᐅᐌᒋᑑᓐ᙮

19:27b.MAT.019.027 ᐅᑮᐃᑰᓐ ᐃᑕᔥ ᐲᑕᕒᐆᓐ : ᐃᓇᔥᑫ, ᑲᑭᓇ ᑫᑰᓐ ᓂᑮᓇᑲᑖᒥᓐ ᐁᐐ ᐱᒥᓂᔕᐅᑰᔭᓐ᙮ ᐌᑯᓀᓐ ᑕᔥ ᑫᐊᔮᔮᕽ?

19:28b.MAT.019.028 ᒋᓴᔅ ᑕᔥ ᐅᑮᐃᓈᐞ: ᑌᐺ ᓴ ᑭᑎᓂᓂᓂᒻ: ᐊᐲ ᓴ ᐃᓂᓂ ᐅᑯᓯᓴᓐ ᐊᐱᓂᒡ ᐅᑑᑭᒫᐗᐱᐎᓂᓃᕽ ᑫᔑ ᑭᒋ ᐃᓀᑖᑯᓯᓂᒡ, ᐊᐲ ᑲᑭᓇ ᑫᑰᓐ ᐅᔥᑭᐅᔑᒋᑳᑌᒃ, ᑫᑮᓇᐙ ᑳᒥᑖᔑᓃᔑᔦᒃ ᑳᐱᒥᓂᔕᐅᔦᒃ, ᑭᑲ ᐊᐱᒻ ᐅᑭᒫᐗᐱᐎᓂᕽ ᒋᐅᓇᔓᐙᓀᒀ ᐃᑭ ᑳᒥᑖᔑᓃᔗᐙᓇᑭᓯᐙᒡ ᐃᔅᕒᐃᔭᓬᐊᒃ ᙮

19:29b.MAT.019.029 ᐊᐎᔭ ᓴ ᑳᓇᑲᑕᕽ ᐅᐙᑳᐃᑲᓐ, ᑳᓇᑲᓈᒡ ᑲᔦ ᐐᒋᑭᐌᔭᐞ, ᐅᑕᐌᒫᐞ ᑲᔦ, ᐅᑌᑌᓐ ᑲᔦ, ᐅᒫᒫᓐ ᑲᔦ, ᐅᓃᒑᓂᓴᐞ ᑲᔦ, ᑯᒫ ᑲᔦ ᐅᑭᑎᑳᓇᑲᒥᒃ, ᓃᓐ ᐁᐅᒋ ᑑᑕᕽ, ᓂᑯᑣᒃ ᐊᐗᔑᒣ ᑕᓯᕽ ᑕᒦᓈ, ᑕᑕᑯ ᒦᓈ ᑲᔦ ᐱᒫᑎᓯᐎᓐ ᐐᑳ ᑫᐴᓂᓭᓯᓂᓂᒃ᙮

19:30b.MAT.019.030 ᐃᑭ ᓴ ᓅᑯᒻ ᑳᓃᑳᓂᓯᐙᒡ, ᐃᔥᒀᒡ ᑕᐊᔮᐗᒃ, ᐃᑭ ᑲᔦ ᓅᑯᒻ ᐃᔥᒀᒡ ᑳᐊᔮᐙᒡ ᑕᓃᑳᓂᓯᐗᒃ᙮

20

20:1b.MAT.020.001 ᐊᐲ ᑭᔐᒪᓂᑑ ᑮᔑᓯᑑᒡ ᐅᑎᐯᒋᑫᐎᓐ, ᒦᓴ ᐃᐌ ᑫᐃᔑᓈᑾᒃ, ᑖᐱᔥᑰ ᑭᑎᑫᐎᑭᒫ ᑳᑎᐯᑕᕽ ᔔᒥᓈᑎᑰᐎ ᑭᑎᑳᓂᓂ ᐁᑮᐊᓂ ᒫᒑᒡ ᐐᐸ ᑭᑭᔐᑉ ᐁᑮᓇᓈᑕᐙᐸᒫᒡ ᐊᐎᔭᐞ ᒋᐊᓄᑮᓂᒡ ᐃᐃᒫ ᐅᑭᑎᑳᓂᕽ᙮

20:2b.MAT.020.002 ᐁᑮᐊᔓᑕᒪᐙᒡ ᑕᔥ ᐯᔑᒃ ᐙᐹᐱᑯ ᔔᓂᔮᓴᓐ ᐁᐐ ᐃᔑ ᑎᐸᐊᒪᐙᒡ ᐯᔑᑯᑮᔑᒃ᙮ ᒦᔥ ᐃᐃ ᑳᐃᔑ ᓇᐁᑕᒥᓂᒡ᙮ ᒦᑕᔥ ᐅᑮᐃᔑᓂᔕᐙᐞ ᒋᐊᓄᑮᓂᒡ ᐃᐃᒫ ᐅᔔᒥᓈᑎᑯᐎ ᑭᑎᑳᓂᕽ᙮

20:3b.MAT.020.003 ᒦᓇᐙ ᑕᔥ ᐁᔖᑲᓱ ᑎᐸᐃᑲᓀᔮᓂᒃ ᑭᑎᑫᐎᑭᒫ ᐌᑎ ᐊᑾᒌᕽ ᑳᑕᓇᑖᐌᕽ ᑮᐃᔖ᙮ ᐅᑮᐙᐸᒫᐞ ᑕᔥ ᐃᓂᓂᐗᐞ ᐁᓈᓃᐸᐎᓂᒡ᙮

20:4b.MAT.020.004 ᒦᑕᔥ ᑳᐃᓈᒡ: ᒫᒑᒃ ᑫᑮᓇᐙ, ᐊᑕᐗᓄᑮᒃ ᓂᔔᒥᓈᑎᑰᐎ ᑭᑎᑳᓂᕽ, ᑾᔭᒃ ᑲᔦ ᑭᑲ ᑎᐸᐊᒪᐎᓂᓂᒻ᙮

20:5b.MAT.020.005 ᔐᒫᒃ ᑕᔥ ᑮᐊᑕᐗᓄᑮᐗᐞ᙮ ᒦᑕᔥ ᐯᔑᑾᓐ ᑳᐃᔑᒋᑫᒡ ᐁᓈᐗᑴᓂᒃ, ᐁᓂᓱᑎᐸᐃᑲᓀᔮᓂᒃ 3 ᑲᔦ᙮

20:6b.MAT.020.006 ᑫᑳ ᑕᔥ ᐁᓈᓄᑎᐸᐃᑲᓀᔮᓂᒃ ᒦᓇᐙ ᑮᐃᔖ ᐌᑎ ᑳᔑ ᐊᑖᐌᕽ᙮ ᐅᑮᐙᐸᒫᐞ ᑕᔥ ᑯᑕᒃ ᐃᓂᓂᐗᐞ ᐁᒥᒋ ᓈᓃᐸᐎᓂᒡ᙮ ᒦᑕᔥ ᐁᑮᐃᓈᒡ: ᐌᑯᓀᓐ ᐌᒋ ᑭᑎᒥᑳᐸᐎᔦᒃ ᑲᐯᑮᔑᒃ ᑫᑰᓐ ᐁᐃᔑᒋᑫᓯᐌᒃ?

20:7b.MAT.020.007 ᒦᑕᔥ ᑳᐃᔑ ᓇᑴᑖᑯᒡ: ᑳᐐᓐ ᐊᐎᔭ ᓂᑕᓄᑮᐃᑯᓰᓈᓐ᙮ ᐅᑮᐊᓂ ᐃᓈᐞ ᐃᑕᔥ: ᒫᒑᒃ, ᑫᑮᓇᐙ ᐊᑕᐗᓄᑮᒃ ᓂᔔᒥᓈᑎᑰᐎ ᑭᑎᑳᓂᕽ᙮

20:8b.MAT.020.008 ᐊᐲ ᑕᔥ ᐁᐊᓂ ᐅᓈᑯᔑᓂᓂᒃ, ᑭᑎᑫᐎᑭᒫ ᐅᑮ ᑲᓅᓈᓐ ᐋᓂᑫᐎᑭᒫᓐ: ᑲᓅᔥ ᐃᑭ ᐅᑕᓄᑮᒃ, ᑎᐸᐊᒪᐤ ᑲᔦ ᐅᑕᓄᑮᐎᓂᐙᓐ᙮ ᐃᑭ ᓴ ᐃᔥᒀᒡ ᑳᑮᐊᓄᑮᐃᑣ ᒦᐗᑭᑭ ᓂᑕᒻ ᑎᐸᐊᒪᐤ, ᐲᓂᔥ ᒋᓂ ᑎᐸᐊᒪᐗᑣ ᐃᑭ ᓂᑕᒻ ᑳᑮᐊᓄᑮᐃᑣ, ᐁᑮᐃᓈᒡ᙮

20:9b.MAT.020.009 ᐃᑭ ᑕᔥ ᐅᑕᓄᑮᒃ ᑳᑮᒫᑕᓄᑮᐙᒡ ᐁᓈᓄᑎᐸᐃᑲᓀᔮᓂᒃ ᑮᐅᑎᓯᐗᒃ ᐯᐯᔑᒃ ᐙᐹᐱᑯ ᔔᓂᔮᓴᓐ᙮

20:10b.MAT.020.010 ᐃᑭ ᑕᔥ ᓂᑕᒻ ᑳᑮᒫᑕᓄᑮᐙᒡ ᐁᐐ ᑎᐸᐊᒪᐎᑣ ᒦᐃ ᑳᐃᓀᑕᒧᐙᒡ: ᓇᐗᒡ ᓃᓇᐎᓐᑦ ᐊᐗᔑᒣ ᓂᑲ ᑎᐸᐊᒫᑰᒥᓐ᙮ ᑫᐐᓇᐙ ᑕᔥ ᐯᐯᔑᒃ ᐁᑕ ᐙᐹᐱᑯ ᔔᓂᔮᓴᓐ ᑮᑎᐸᐊᒪᐙᐗᒃ᙮

20:11b.MAT.020.011 ᐅᑮᐅᑖᐱᓈᐙᓐ ᑕᔥ ᐅᔔᓂᔮᒥᐙᓐ ᐁᑮᒫᔑᑲᓅᓈᐙᒡ ᐃᓂ ᐅᑑᑭᒫᒥᐙᓐ:

20:12b.MAT.020.012 ᐅᑯ ᓴ ᐃᔥᒀᒡ ᑳᑮᒫᑕᓄᑮᐙᒡ ᐯᔑᑯᑎᐸᐃᑲᓐ ᐁᑕ ᑮᐊᓄᑮᐗᒃ᙮ ᓃᓇᐎᓐᑦ ᑕᔥ ᑲᐯᑮᔑᒃ ᐋᓴᒫᑌᕽ ᓂᑮ ᐃᔑ ᑭᒋ ᐊᓄᑮᒥᓐ᙮ ᔖᑰᒡ ᐃᑕᔥ ᐯᔑᑾᓐ ᑭᑎᔑ ᑎᐸᐊᒪᐙᒃ ᑖᐱᔥᑰ ᑳᐃᔑ ᑎᐸᐊᒪᐎᔮᕽ!

20:13b.MAT.020.013 ᑭᑎᑫᐎᑭᒫ ᑕᔥ ᐅᑮᐃᓈᓐ ᐃᓂ ᐯᔑᒃ: ᓃᒌ, ᐱᓯᑕᐎᔑᓐ! ᑳᐐᓐ ᑭᑮᐗᔦᔑᒥᓯᓅᓐ᙮ ᑭᑮᐃᓀᑕᒻ ᐄᑐᒃ ᐁᐐ ᐊᓄᑮᔭᓐ ᒋᐅᑎᓯᔭᓐ ᐯᔑᒃ ᐙᐹᐱᑯ ᔔᓂᔮᔅ᙮

20:14b.MAT.020.014 ᐅᑖᐱᓐ ᑕᔥ ᐊᐊ ᑭᔔᓂᔮᒻ, ᐊᓂᑮᐌᓐ ᑲᔦ᙮ ᓂᑮᐃᓀᑕᒻ ᐅᔕ ᐯᔑᑾᓐ ᐁᐐ ᐃᔑ ᑎᐸᐊᒪᐗᒃ ᑖᐱᔥᑰ ᐯᔑᑾᓐ ᑳᑮᐃᔑ ᑎᐸᐊᒪᐎᓈᓐ ᐊᐊ ᐃᔥᒀᒡ ᑳᑮᒫᑕᓄᑮᒡ᙮

20:15b.MAT.020.015 ᓃᓐ ᐃᓴ ᓂᔔᓂᔮᒻ, ᐙᑑᑕᐗᒃ ᐃᑯ ᓂᑖ ᑑᑕᐙ᙮ ᒦ ᓇᔥ ᑳᐅᒋ ᒫᓈᐸᒥᔭᓐ ᐁᒥᓍᑎᓯᔮᓐ?

20:16b.MAT.020.016 ᒋᓴᔅ ᑕᔥ ᑮᓂ ᐃᑭᑐ: ᒦᐃᐌ ᐁᔑᓈᑾᒃ, ᐃᑭ ᓴ ᐅᑖᓈᕽ ᑳᐃᓀᑖᑯᓯᐙᒡ ᑕᓃᑳᓂᓯᐗᒃ, ᐃᑭ ᓴ ᑲᔦ ᑳᓃᑳᓂᓯᐙᒡ ᐅᑖᓈᕽ ᑕᐃᓇᑭᓱᐗᒃ᙮

20:17b.MAT.020.017 ᒋᓴᔅ ᑕᔥ ᐁᐃᔖᐙᒡ ᐌᑎ ᒉᕒᐆᓴᓬᐊᒥᕽ ᐸᑫᔭᐄ ᐅᑮᐃᔑᐎᓈᐞ ᐃᐃ ᒥᑖᔑᓃᔑᓐ ᐅᑭᑭᓄᐊᒪᐙᑲᓇᐞ, ᐁᑮ ᑮᒨᒋ ᑲᓅᓈᒡ ᓴ ᒣᒀ ᐁᐱᒧᓭᐙᒡ, ᐁᑮᐃᓈᒡ:

20:18b.MAT.020.018 ᐃᓇᔥᑫ ᐱᓯᑕᐎᔑᒃ, ᐅᐅ ᓴ ᑳᐃᔖᔭᕽ ᐌᑎ ᒉᕒᐆᓴᓬᐊᒥᕽ, ᒦᓴᐃ ᓃᓐ ᐃᓂᓂ ᐅᑯᓯᓴᓐ ᒋᐸᑭᑎᓂᑰᔮᓐ ᒋᐅᑖᐱᓂᐙᒡ ᐃᑭ ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᒦᑕᔥ ᒋᐃᑭᑐᐙᒡ ᐱᓵᓂᑯ ᒋᓂᓯᑰᐗᒃ᙮

20:19b.MAT.020.019 ᒦᓇᐙ ᑕᔥ ᐌᑎ ᓂᑲᔑ ᐸᑭᑎᓂᑰᒃ ᐁᑳ ᑳᒎᐎᐎᓯᓂᒃ ᒋᐅᑖᐱᓂᒥᒡ᙮ ᒦᐗᐞ ᐃᑕᔥ ᐃᐃ ᑫᒫᓀᓂᒥᒥᒡ, ᑫᐸᐸᔕᔐᐅᒥᒡ, ᒦᐗᐃᐃ ᑲᔦ ᑫᐊᑯᓴᑲᐅᒥᒡ ᐋᔑᑌᔮᑎᑯᕽ᙮ ᓂᓱᑮᔑᒃ ᑕᔥ ᐃᔑᓭᒃ ᑭᔐᒪᓂᑑ ᓂᑲ ᑮᐌᐱᒫᑎᓰᐃᒃ, ᑮᐃᑭᑐ᙮

20:20b.MAT.020.020 ᐅᑮ ᐱᓈᓯᑳᑰᓐ ᑕᔥ ᓭᐸᑏᓐ ᐐᐎᓂ ᐁᑮᐱ ᐐᒌᐙᓂᒡ ᑳᑮᓃᔑᓂᒡ 2 ᐅᑯᓯᓯᓂ᙮ ᒦᑕᔥ ᑳᐃᔑ ᐅᒋᒌᑾᓇᐲᑖᑯᒡ ᐁᑲᑴᒋᒥᑯᒡ: ᑫᑰᓐ ᑭᓇᑕᐌᓂᒥᓐ ᒋᑑᑕᐎᔭᓐ᙮

20:21b.MAT.020.021 ᒋᓴᔅ ᑕᔥ ᐅᑮᐃᓈᓐ: ᐌᑯᓀᓐ ᐁᑕᐌᑕᒪᓐ? ᒦᑕᔥ ᑳᐃᑯᒡ ᐃᑴᐗᓐ: ᐃᑭᑐᓐ ᐅᑯ ᓃᔑᓐ 2 ᓂᑯᓯᓴᒃ ᒋᐐᑕᐱᒥᒀ ᐊᐲ ᒫᒌᐅᑭᒫᐎᔭᓐ᙮ ᐊᐊ ᓴ ᐯᔑᒃ ᑭᑭᒋᓂᑭᕽ ᐃᓇᑫ ᒋᐃᔑ ᐊᐱᒡ, ᐊᐊ ᑕᔥ ᑯᑕᒃ ᑭᓇᒪᑎᓂᑭᕽ, ᐅᑮᐃᑰᓐ᙮

20:22b.MAT.020.022 ᒋᓴᔅ ᑕᔥ ᑮᐃᔑ ᓇᑴᑕᒻ: ᑳᐐᓐ ᐃᓴ ᑭᑭᑫᑕᓰᒻ ᐋᓃᓐ ᐁᔑ ᑲᑴᑗᔦᒃ᙮ ᑭᑖ ᑲᔥᑭᑑᒻ ᐃᓇ ᓂᒥᓂᒀᑲᓂᕽ ᒋᐅᒋ ᒥᓂᒀᑕᒣᒃ ᐃᐃ ᑳᐐᐃᔑ ᑲᒀᑕᑭᑑᔮᓐ? ᒦᔥ ᑳᐃᑭᑐᓂᒡ: ᒦᓇᑫ ᓂᑖ ᑲᔥᑭᑑᒥᓐ᙮

20:23b.MAT.020.023 ᒋᓴᔅ ᑕᔥ ᐅᑮᐃᓈᐞ: ᑌᐺ ᓴ ᑭᑲᐅᒋ ᒥᓂᑴᒻ ᐃᐃᒫ ᓂᒥᓂᒀᑲᓂᕽ᙮ ᑳᐐᓐ ᑕᔥ ᓃᓐ ᓂᑑᓀᓂᒫᓰᒃ ᐊᐌᓀᓇᒃ ᑫᐊᐱᐙᒡ ᓂᑭᒋᓂᑭᕽ ᐃᓇᑫ, ᓂᓇᒪᑎᓂᑭᕽ ᐃᓇᑫ ᑲᔦ᙮ ᐋᔕ ᐅᔕ ᓂᑌᑌ ᐅᑮᐅᓀᓂᒫᐞ ᐊᐌᓀᓇᐞ ᑫᐊᐱᓂᒡ᙮

20:24b.MAT.020.024 ᐊᐲ ᐁᓅᑕᒧᐙᒡ ᐃᑭ ᑯᑕᒃ ᒥᑖᓱ ᑭᑭᓄᐊᒪᐙᑲᓇᒃ ᐅᑮᓂᔥᑭᐃᑯᐙᐞ ᐃᐃ ᓃᔑᓐ 2 ᑳᐅᐐᒋᑭᐌᑎᓂᒡ᙮

20:25b.MAT.020.025 ᒋᓴᔅ ᑕᔥ ᐅᑮᐊᑐᒫᐞ ᐃᐃ ᑲᑭᓇ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᑭᑭᑫᑖᓈᐙ ᐄᑐᒃ ᐃᑭ ᑳᑎᐯᓂᒫᐙᒡ ᐯᒫᑎᓯᓂᒡ ᑳᑭᑫᓂᒫᓯᓂᒃ ᑭᔐᒪᓂᑑᓐ, ᐐᑫ ᐅᑎᐯᓂᒫᐙᐞ, ᐃᑭᔥ ᑲᔦ ᑳᑭᒋ ᐃᓀᑖᑯᓯᐙᒡ ᐐᑫ ᐅᒥᓄ ᑎᐯᓂᒫᐙᐞ ᐯᒫᑎᓯᓂᒡ᙮

20:26b.MAT.020.026 ᑮᓇᐙ ᑕᔥ ᐐᓐ ᑳᐐᓐ ᐃᐃ ᑭᑲ ᐃᔑᒋᑫᓰᒻ᙮ ᑮᔥᐱᓐ ᐊᐎᔭ ᒥᓴᐌᑕᕽ ᐐᑭᒋ ᐃᓀᑖᑯᓯᒡ, ᒦᓴ ᐊᐌ ᑫᐸᒥᐃᓀᒃ ᑯᑕᒃ ᑳᑕᔑᔦᒃ᙮

20:27b.MAT.020.027 ᑮᔥᐱᓐ ᐃᓴ ᐊᐎᔭ ᐐᓃᑳᓀᑖᑯᓯᒡ ᐃᐃᒫ ᑳᑕᔑᔦᒃ, ᒦᓴ ᐊᐌ ᑫᐃᓀᓂᑎᓱᒡ ᑲᑭᓇ ᐊᐎᔭᓐ ᐁᐅᑑᑭᒫᒥᒡ᙮

20:28b.MAT.020.028 ᒦ ᓃᓐ ᐁᔑᒋᑫᔮᓐ ᐃᓂᓂ ᐅᑯᓯᓴᓐ ᑳᑎᓄᐎᔮᓐ᙮ ᑳᐐᓐ ᐐᓐ ᓂᑮ ᐲᔖᓰ ᒋᐸᒥᐃᑰᔮᓐ, ᒋᐸᒥᐃᐌᔮᓐ ᐃᓴ ᑳᐅᒋ ᐲᔖᔮᓐ, ᐁᐐ ᐸᑭᑎᓇᒫᓐ ᑲᔦ ᓂᐱᒫᑎᓯᐎᓐ ᐁᐐ ᑎᐸᐗᒀ ᓃᐳᐗᐞ ᐯᒫᑎᓯᐙᒡ ᒋᐱᒫᒋᐃᑣ, ᑮᐃᑭᑐ᙮

20:29b.MAT.020.029 ᐁᑮᐊᓂᐅᒋ ᒫᒑᐙᒡ ᐃᑕᔥ ᐃᐃᒫ ᒉᕒᐊᑯᕽ, ᑮᐹᑏᓄᐗᐞ ᑕᔥ ᐯᒫᑎᓯᓂᒡ ᑳᑮ ᐱᒥᓂᔕᐅᑯᒡ᙮

20:30b.MAT.020.030 ᓃᔑᓐ 2 ᑕᔥ ᐃᓂᓂᐗᒃ ᑳᑮᐙᐱᓯᒀ ᒌᑭᑲᓇ ᐁᓇᒪᑕᐱᐙᒡ ᑮᓅᑕᒨᒃ ᒋᓴᓲᓐ ᐁᐱᒥᐊᔮᓂᒡ᙮ ᒦᑕᔥ ᑳᐃᔑ ᔖᑯᐌᐙᒡ: ᑌᐱᑎᕽ ᑳᐅᑕᑳᓀᓯᔭᓐ! ᑰᐹᑌᓂᒥᔑᓈᒻ! ᐁᑮᐃᓈᐙᒡ᙮

20:31b.MAT.020.031 ᐃᐃᒫ ᑕᔥ ᑳᐹᑏᓄᓂᒡ ᑳᑮᐊᔮᓂᒡ ᐅᑮ ᑭᔒᑲᓅᓂᑯᐙᐞ: ᑭᑑᐲᑭᓯᒻ! ᐅᑮᐃᑯᐙᐞ᙮ ᐋᒋᑯ ᑕᔥ ᐊᐗᔑᒣ ᑮᑭᔒᐌᐗᒃ: ᑌᐱᑎᕽ ᑳᐅᑕᑳᓀᓯᔭᓐ! ᑰᐹᑌᓂᒥᔑᓈᒻ!

20:32b.MAT.020.032 ᒦᑕᔥ ᑳᐃᔑ ᑭᐱᒌᒡ ᒋᓴᔅ ᐁᑮᐊᑐᒫᒡ: ᐋᓃᓐ ᐁᔑ ᐊᑕᐌᓂᒥᔦᒃ ᒋᑑᑕᐎᓇᑰᒃ? ᐅᑮᐃᓈᐞ᙮

20:33b.MAT.020.033 ᒦᑕᔥ ᑳᐃᑯᒡ: ᑌᐯᒋᑫᔭᓐ, ᑭᓇᑕᐌᓂᒥᑰ ᒋᐙᐱᐃᔮᕽ᙮

20:34b.MAT.020.034 ᒋᓴᔅ ᑕᔥ ᐅᑮ ᑰᐹᑌᓂᒫᐞ, ᐅᑮ ᓵᒥᓈᐞ ᐅᔥᑮᔑᑯᓃᕽ᙮ ᔐᒫᒃ ᐃᑕᔥ ᑮᐙᐱᐗᐞ, ᒦᑕᔥ ᑳᐃᔑ ᐱᒥᓂᔕᐅᑯᒡ᙮

21

21:1b.MAT.021.001 ᐊᐲ ᑕᔥ ᑫᑳ ᐁᐊᓂ ᑕᑯᔑᓄᐙᒡ ᒉᕒᐆᓴᓬᐊᒥᕽ, ᐅᑮᐊᓂ ᐅᑎᑖᓈᐙ ᐯᐸᒋ ᑳᑮᐃᔑᓂᑳᑌᓂᒃ ᑳᑮᐃᔑᑖᓂᐗᓂᓂᒃ᙮ ᐃᐃ ᓴ ᐯᐸᒋ ᑮᐃᔒᐊᔮᒪᑲᓐ ᐃᐃᒫ ᑳᑮᐃᔑ ᐱᑾᑎᓈᒃ ᐋᓬᐃᑉ ᑭᑎᑳᓈᑎᑯᑳᕽ ᑳᑮᐃᔑᓂᑳᑌᓂᒃ᙮ ᒋᓴᔅ ᑕᔥ ᐅᑮᓃᑳᓂᓂᔕᐙᐞ ᓃᔑᓐ 2 ᐅᑭᑭᓄᐊᒪᐙᑲᓇᐞ,

21:2b.MAT.021.002 ᐅᐅ ᐁᑮᐃᓈᒡ: ᐊᓂ ᓃᑳᓂ ᐃᔖᒃ ᑳᒪᑗᐊᔮᒃ ᑳᐃᔑᑖᓂᐗᕽ, ᑭᑲ ᐙᐸᒫᐙ ᑕᔥ ᒫᔑᒥᑕᑎᒻ ᒋᐐᒋᓴᑳᑯᐱᓲᒫᒡ ᐃᓂ ᒫᔑᒥᑕᑎᒨᓴᓐ᙮ ᐋᐸᐅᑾᒃ ᑕᔥ ᐲᓈᑫᒀᓂᒃ᙮

21:3b.MAT.021.003 ᑮᔥᐱᓐ ᑕᔥ ᐊᐎᔭ ᑫᑰᓂᓂ ᐃᓂᓀᒃ, ᒦᓴ ᑫᐃᓀᒃ: ᓂᑑᑭᒫᒥᓈᓐ ᐅᔕ ᐅᐐᐋᐸᒋᐋᐞ, ᔐᒫᒃ ᑕᔥ ᐅᑲ ᐲᒋᓂᔕᐙᐞ, ᐅᑮᐃᓈᐞ᙮

21:4b.MAT.021.004 ᒦᑕᔥ ᐅᐅ ᑳᐅᒋ ᐃᔑᓭᒃ, ᒋᐃᔑᓭᓂᒃ ᑳᑮᐃᑭᑐᓂᑯᐸᓀᓐ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ:

21:5b.MAT.021.005 ᐐᑕᒪᐎᑾᒃ ᐃᑭ ᓵᔭᓐ ᐆᑌᓈᕽ ᑳᐊᔮᐙᒡ, ᐃᓇᔥᑫ ᐙᐸᒥᒃ ᑭᑭᒋᐅᑭᒫᒥᐙ, ᑭᐱᓈᓯᑳᑯᐙ! ᐋᐱᒋ ᓅᑳᑎᓯ, ᐁᐱᒥᐗᓈᓱᒡ ᐃᐃᒫ ᒫᔑᒥᑕᑎᒧᕽ, ᐁᐱᒥᐗᓈᓱᒡ ᐃᐃᒫ ᒫᔑᒥᑕᑎᒨᓯᕽ, ᒫᔑᒥᑕᑎᒻ ᐅᑑᔥᑲᔭᐋᓯᒪᓐ᙮

21:6b.MAT.021.006 ᒦᑕᔥ ᐃᑭ ᑭᑭᓄᐊᒪᐙᑲᓇᒃ ᑳᐊᐎ ᐃᔑ ᐃᔑᒋᑫᐙᒡ ᐋᓃᓐ ᑳᐃᑯᐙᒡ ᒋᓴᓲᓐ᙮

21:7b.MAT.021.007 ᐅᑮ ᐲᓈᐙᓐ ᑕᔥ ᒫᔑᒥᑕᑎᒨᓐ, ᐃᓂ ᑲᔦ ᒫᔑᒥᑕᑎᒨᓴᓐ᙮ ᒦᑕᔥ ᑳᐃᔑ ᐗᑭᑕᑑᐙᒡ ᐅᑲᔥᑮᑮᐎᓂᐙᓐ; ᒦᑕᔥ ᐃᐃ ᑳᐃᔑ ᐊᐸᐱᓂᒡ ᒋᓴᓲᓐ᙮

21:8b.MAT.021.008 ᐯᒫᑎᓯᐙᒡ ᐁᑮ ᐹᑏᓄᐙᒡ ᐅᑮ ᑕᔗᑭᓯᑑᓈᐙᓐ ᐅᑲᔥᑮᑮᐎᓂᐙᓐ ᐃᐃᒫ ᒦᑲᓈᕽ᙮ ᐋᓂᑕ ᑕᔥ ᐅᑮ ᑮᔥᑭᑲᐋᓈᐙᓐ ᐗᑎᑾᓇᓐ ᐁᑮᐊᐸᑭᑑᐙᒡ ᒦᑲᓈᕽ ᑳᐐᐱ ᐃᔖᓂᒡ ᒋᓴᓲᓐ᙮

21:9b.MAT.021.009 ᑳᐹᑏᓄᐙᒡ ᑕᔥ ᑳᑮᓃᑳᓂᔥᑲᐙᐙᒡ, ᐅᑖᓈᕽ ᑲᔦ ᑳᑮ ᐱᒧᓭᐙᒡ ᑮᐃᔑ ᔖᔖᑯᐌᐗᒃ: ᐅᓵᓇ! ᑮᐃᑭᑐᐗᒃ᙮ ᑕᓇᓈᑯᒫ ᐊᐊ ᑌᐱᑎᕽ ᑳᐅᑕᑳᓀᓯᒡ᙮ ᔕᐌᑖᑯᓯ ᓴ ᐊᐊ ᑳᐱ ᑕᑯᔑᕽ ᐅᑎᔑᓂᑳᓱᐎᓂᓃᕽ ᐃᓂ ᑌᐯᒋᑫᓂᒡ᙮ ᑕᓇᓈᑯᒫ ᑭᔐᒪᓂᑑ!

21:10b.MAT.021.010 ᐊᐲ ᑕᔥ ᐁᑮᐊᓂ ᑕᑯᔑᕽ ᐃᐃᒫ ᒉᕒᐆᓴᓬᐊᒥᕽ, ᑲᑭᓇ ᓴ ᐊᐎᔭᒃ ᑮᑭᒋ ᐃᓉᐎᐃᑎᐗᒃ ᐁᑮᐃᑭᑐᐙᒡ: ᐊᐌᓀᓐ ᑕᔥ ᐊᐊ?

21:11b.MAT.021.011 ᑳᐹᑏᓄᐙᒡ ᑕᔥ ᑳᑮᐱ ᐐᒌᐙᐙᒡ ᒋᓴᓲᓐ ᑮᓇᑴᔖᑯᐌᐗᒃ: ᒦᓴ ᐗᐊ ᑭᔐᒪᓂᑑᓐ ᑳᑲᓅᒋᑫᑕᒪᐙᒡ, ᒋᓴᔅ ᑳᐃᔑᓂᑳᓱᒡ, ᓈᓴᕒᐃᑦ ᐆᑌᓈᕽ, ᑳᓬᐊᓬᐄ ᐊᑮᕽ ᑳᐅᒌᒡ, ᑮᐃᑭᑐᐗᒃ᙮

21:12b.MAT.021.012 ᒋᓴᔅ ᑮᐲᑎᑫ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐁᑮ ᓵᓵᑭᒋᓂᔕᐙᒡ ᑲᑭᓇ ᐃᐃ ᑳᑮᐊᑖᐌᐎᑲᒥᑯᑫᓂᒡ ᑲᔦ ᑳᑮᐊᑖᐌᓂᒡ ᐃᐃᒫ ᐲᒋ ᑭᒋᐊᓇᒥᐁᐎᑲᒥᑯᕽ, ᐁᑮᐅᐱᒣᐌᐱᓇᕽ ᑑᐳᐎᓈᑰᓐ ᑳᑮᐃᔑ ᐊᔮᓂᒡ ᐃᐃ ᑳᒣᔥᑯᑑᓂᑫᓂᒡ, ᐁᑮᐅᐱᒣᐌᐱᓇᕽ ᑲᔦ ᑌᓴᐱᐎᓇᓐ ᑳᑮᐃᔑ ᐊᔮᓂᒡ ᐃᐃ ᑳᑮᐊᑖᐙᑫᓂᒡ ᐅᒦᒦᐞ᙮

21:13b.MAT.021.013 ᐅᑮᐃᓈᐞ ᐃᑕᔥ: ᒦᓴ ᐁᔑᐲᐃᑳᑌᒃ ᑭᒋᒪᓯᓇᐃᑲᓐ ᑭᔐᒪᓂᑑ ᐁᑮᐃᑭᑐᒡ: ᓂᐙᑳᐃᑲᓐ ᓴ ᑕᐃᔑᓂᑳᑌ ᐊᓇᒥᐁᐙᑳᐃᑲᓐ, ᑮᓇᐙ ᑕᔥ ᐁᐃᔑᓈᑯᑑᔦᒃ ᑖᐱᔥᑰ ᒋᐅᑳᓱᐎᑲᒥᑯᐙᒡ ᐅᒪᑲᒒᔥᑲᒃ!

21:14b.MAT.021.014 ᑳᐙᐱᓯᓂᒃ ᐃᐃ ᑲᔦ ᑳᒫᑭᓯᓂᒡ ᐅᑮ ᐱᓈᓯᑳᑰᐞ ᐃᐃᒫ ᐲᒋ ᐊᓇᒥᐁᐎᑲᒥᑯᕽ, ᒦᑕᔥ ᑳᐃᔑ ᒥᓄᐊᔮᐋᒡ᙮

21:15b.MAT.021.015 ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᑮᓂᔥᑳᑎᓯᐗᒃ ᐁᐙᐸᑕᒧᐙᒡ ᐋᓃᓐ ᒋᓴᓲᓐ ᑳᑮᐃᔑ ᒫᒪᑳᒋᒋᑫᓂᒡ, ᐃᐃ ᑲᔦ ᐊᐱᓅᒌᔕᐞ ᐁᑮ ᔖᑯᐌᓂᒡ ᐃᐃᒫ ᐲᒋ ᑭᒋᐊᓇᒥᐁᐎᑲᒥᑯᕽ: ᑕᓇᓈᑯᒫ ᐊᐊ ᑌᐱᑎᕽ ᑳᐅᑕᑳᓀᓯᒡ!

21:16b.MAT.021.016 ᒦᑕᔥ ᑳᐃᓈᐙᒡ ᒋᓴᓲᓐ: ᑭᓅᑕᐙᒃ ᐃᓇ ᐁᑭᑐᐙᒡ? ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᒦᓇᑫ ᓂᓅᑕᐙᒃ᙮ ᑳᐐᓐ ᐃᓇ ᑭᑑᒋ ᐊᓇᒥᑑᓰᒻ ᐅᐅ ᐁᔑᐲᐃᑳᑌᒃ: ᑭᑮᐃᔑ ᑭᑭᓄᐊᒪᐙᒃ ᐃᓴ ᐃᑭ ᐊᐱᓅᒌᔕᒃ, ᐴᔥᑫ ᑲᔦ ᑳᓅᓂᐙᒡ, ᒋᓂᑖᑾᔭᒃ ᓇᓈᑯᒥᐌᐙᒡ, ᐅᑮᐃᓈᐞ᙮

21:17b.MAT.021.017 ᒦᑕᔥ ᐃᐃ ᑳᐃᔑ ᓇᑲᓈᒡ, ᐃᐃᒫ ᐆᑌᓈᕽ ᐁᑮᐅᒋ ᒫᒑᒡ᙮ ᐌᑎ ᑕᔥ ᐯᑕᓃᕽ ᑮᐃᔖ ᐁᑮᐊᑕ ᓂᐹᒡ᙮

21:18b.MAT.021.018 ᐁᐊᓂ ᐙᐸᓂᓂᒃ ᑕᔥ ᒋᓴᔅ ᑮᑮᐌᐃᔖ ᐌᑎ ᑭᒋᐆᑌᓈᕽ᙮ ᐁᓂᐱᒥ ᐊᔮᒡ ᑕᔥ ᑮᓅᑌᐐᐐᓯᓂ᙮

21:19b.MAT.021.019 ᐁᐙᐸᒫᒡ ᐃᑕᔥ ᔔᒥᓂ ᑭᑎᑳᓈᑎᑰᓐ ᐱᒃ ᐁᑎᓄᐙᑎᑯᐎᓂᒡ, ᐁᑮᒥᑲᓯᒃ ᑕᔥ ᑫᑰᓂᓂ, ᐊᓃᐲᔕᓐ ᐁᑕ, ᒦᑕᔥ ᑳᑮᐃᓈᒡ ᐃᓂ ᒥᑎᑰᓐ: ᑳᐐᓐ ᐃᓴ ᒦᓇᐙ ᐐᑳ ᑭᑲ ᔔᒥᓂᐎᓰ᙮ ᒦᑕᔥ ᐃᐃ ᔐᒫᒃ ᐊᐊ ᒥᑎᒃ ᑳᐃᔑ ᐹᓱᒡ᙮

21:20b.MAT.021.020 ᑭᑭᓄᐊᒪᐙᑲᓇᒃ ᑕᔥ ᑮᒫᒪᑳᑌᑕᒨᒃ ᐁᐙᐸᒫᐙᒡ ᒥᑎᑰᓐ ᑳᐃᔑᓭᓂᒡ, ᐁᑮᐃᑭᑐᐙᒡ: ᐌᑯᓀᓐ ᐌᒋᑭᔒᐹᓱᒡ ᐊᐊ ᒥᑎᒃ?

21:21b.MAT.021.021 ᒋᓴᔅ ᑕᔥ ᐅᑮᐃᓈᐞ: ᒦ ᓴ ᐱᑯ ᐁᔑ ᑌᐺᔮᓐ ᐅᐅ ᑳᐃᓂᓇᑰᒃ, ᑮᔥᐱᓐ ᑌᐺᔦᑕᒣᒃ, ᐋᓉᑕᓯᐌᒃ ᑲᔦ, ᑭᑖ ᑲᔥᑭᑑᒻ ᒋᐃᔑᒋᑫᔦᒃ ᑖᐱᔥᑰ ᑳᑮ ᑑᑕᐗᒃ ᐊᐊ ᔔᒥᓂᑭᑎᑳᓈᑎᒃ᙮ ᑳᐐᓐ ᐁᑕ ᐃᐃ ᑭᑖᐃᔑ ᑲᔥᑭᑑᓰᒻ᙮ ᑮᔥᐱᓐ ᓴ ᐃᑕᒣᒃ ᐃᐃ ᐱᑾᑎᓈ: ᒪᔮᐐᓐ, ᐊᑕᐸᑯᐲᒀᔥᑾᓂᓐ ᑭᒋᑲᒦᕽ, ᒦᓴᐃ ᑫᐃᔑᓭᑭᐸᓐ᙮

21:22b.MAT.021.022 ᑮᔥᐱᓐ ᑌᐺᑕᒣᒃ, ᑭᑲ ᒦᓂᑰᐎᓯᒻ ᐌᑯᓀᓂᑯ ᑫᑲᑴᑗᔦᒃ ᐊᐲ ᐊᓇᒥᐋᔦᒃ, ᐅᑮᐃᓈᐞ᙮

21:23b.MAT.021.023 ᒦᓇᐙ ᑕᔥ ᒋᓴᔅ ᐅᑮ ᐱᑮᐌ ᓈᓯᑳᓐ ᐃᐃ ᑭᒋᐊᓇᒥᐁᐎᑲᒥᒃ᙮ ᒣᒀ ᑕᔥ ᐁᑭᑭᓄᐊᒫᑫᒡ, ᑭᒋᐊᓇᒥᐁᐎᑭᒫᐞ ᐃᐃ ᑲᔦ ᑳᓃᑳᓂᓯᓂᒡ ᒎᐗᐞ, ᐅᑮ ᐱᓈᓯᑳᑰᐞ ᐁᑮᐃᔑ ᑲᑴᒋᒥᑯᒡ: ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐋᐸᒋᑑᔭᓐ ᐅᓄ ᑳᐃᔑᒋᑫᔭᓐ? ᐊᐌᓀᓐ ᑲᔦ ᑳᒦᓂᒃ ᐃᐃ ᑲᔥᑭᐁᐎᓯᐎᓐ?

21:24b.MAT.021.024 ᒋᓴᔅ ᑕᔥ ᐅᑮᐃᔑ ᓇᑴᑕᐙᐞ: ᐯᔑᒃ ᑕᔥ ᑫᑰᓐ ᑫᓃᓐ ᑭᐐ ᑲᑴᒋᒥᓂᓂᒻ᙮ ᑮᔥᐱᓐ ᓇᑴᑕᐎᔦᒃ, ᑭᑲ ᐐᑕᒪᐎᓂᓂᒻ ᑕᔥ ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐅᒋ ᐃᔑᒋᑫᔮᓐ ᐅᐅ ᑳᐃᔑᒋᑫᔮᓐ᙮

21:25b.MAT.021.025 ᐋᑎ ᑳᐅᒌᓂᒃ ᐊᐊ ᒞᓐ ᐅᓰᑲᐊᑖᑫᐎᓐ? ᑭᔐᒪᓂᑑᕽ ᐃᓇ ᑯᒫ ᑲᔦ ᐃᓂᓃᑳᕽ? ᐅᑮᐃᓈᐞ᙮ ᒦᑕᔥ ᑳᐃᔑ ᒫᒌ ᑲᑲᓅᓂᑎᓂᒡ ᐁᑮᐗᐙᓀᑕᒥᓂᒡ᙮ ᒦᑕᔥ ᑳᐃᑭᑐᓂᒡ: ᑮᔥᐱᓐ ᐃᑭᑐᔭᕽ ᑭᔐᒪᓂᑑᕽ, ᑭᑲ ᐃᑯᓈᓐ ᑕᔥ ᐌᑯᓀᓐ ᑕᔥ ᑳᐅᒋ ᑌᐺᑕᐙᓯᐌᒃ ᐊᐊ ᒞᓐ?

21:26b.MAT.021.026 ᑮᔥᐱᓐ ᑲᔦ ᐃᑭᑐᔭᕽ ᐃᓂᓃᑳᕽ, ᑭᑯᓵᓈᓂᒃ ᐃᓴ ᐃᑭ ᑳᐹᑏᓄᐙᒡ, ᐋᓃᔥ ᑲᑭᓇ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐅᑎᓇᑭᒫᐙᓐ ᐃᓂ ᒞᓇᓐ, ᑮᐃᑭᑐᐗᐞ᙮

21:27b.MAT.021.027 ᒦᑕᔥ ᑳᐃᑯᒡ ᒋᓴᔅ: ᑳᐐᓐ ᓂᑭᑫᑕᓰᒥᓐ᙮ ᒦᑕᔥ ᑳᐃᓈᒡ: ᑳᐐᓐ ᑕᔥ ᑫᓃᓐ ᑭᑲ ᐐᑕᒪᐎᓯᓅᓂᓂᒻ ᐌᑯᓀᓐ ᑎᓄ ᑲᔥᑭᐁᐎᓯᐎᓐ ᑳᐋᐸᒋᑑᔮᓐ ᐅᐅ ᑳᐃᔑᒋᑫᔮᓐ᙮

21:28b.MAT.021.028 ᐋᓃᓐ ᐁᓀᑕᒣᒃ? ᑮᐊᔮ ᓴ ᐃᓂᓂ ᐁᑮᓃᔑᓂᒡ 2 ᐅᑯᓯᓴᐞ᙮ ᐅᑮᐃᓈᓐ ᑕᔥ ᐃᓂ ᑳᑮ ᓴᓰᑭᓯᓂᒡ: ᓂᑯᓯᔅ, ᑕᑲ ᐊᑕᐗᓄᑮᓐ ᔔᒥᓈᑎᑯᐎᑭᑎᑳᓂᕽ ᓅᑯᒻ ᑳᑮᔑᑲᒃ᙮

21:29b.MAT.021.029 ᒦᑕᔥ ᑳᐃᑯᒡ: ᑕᑲ ᒦᐃ᙮ ᓈᓈᑫ ᑕᔥ ᑮᐋᑌᑕᒨᓐ, ᐁᑮᐊᑕ ᐗᓄᑮᓂᒡ᙮

21:30b.MAT.021.030 ᐅᑌᑌᒫ ᑕᔥ ᐅᑮᓈᓯᑲᐙᓐ ᐃᓂ ᑯᑕᒃ ᐅᑯᓯᓴᓐ ᐁᑮᐃᓈᒡ ᒋᐊᑕᐗᓄᑮᓂᒡ᙮ ᒦᑕᔥ ᑳᐃᑯᒡ: ᐊᐤ, ᓂᑲ ᐃᔖ᙮ ᑳᐐᓐ ᑕᔥ ᑮᐃᔖᓰᐗᓐ᙮

21:31b.MAT.021.031 ᐋᓐ ᐁᓀᑕᒣᒃ ᐊᐊᐌᑎ ᐅᑯᓯᓯᒫ ᑳᐃᔑᒋᑫᒡ ᑳᑮᐃᔑ ᒥᓴᐌᑕᒥᓂᒡ ᐅᑌᑌᓐ? ᒦᑕᔥ ᑳᐃᑯᒡ: ᑳᓴᓰᑭᓯᒡ ᒫᐐᓐ᙮ ᒋᓴᔅ ᑕᔥ ᐅᑮᐊᓂ ᐃᓈᐞ: ᑌᐺ ᑭᐐᑕᒪᐎᓂᓂᒻ, ᑳᑎᐸᐃᑫᐃᐌᐙᒡ, ᐱᔑᒀᒋᑴᒃ ᑲᔦ ᑭᑖᒋᓇᐃᑯᐙᒃ ᐁᐅᑑᑭᒫᑲᑖᑯᐙᒡ ᑭᔐᒪᓂᑑᓐ᙮

21:32b.MAT.021.032 ᒞᓐ ᓰᑲᐊᑖᑫᐎᓂᓂ ᐅᔕ ᑮᐲᔖ ᐁᑮᐙᐸᑕᐃᓀᒃ ᐃᐃ ᑫᑮᐃᔑᑾᔭᒀᑎᓯᔦᑭᐸᓐ᙮ ᑳᐐᓐ ᑕᔥ ᑭᑮ ᑌᐺᑕᐙᓯᐙᐙ᙮ ᐃᑭ ᑕᔥ ᐐᓐ ᑳᑎᐸᐃᑫᐃᐌᐙᒡ ᐃᑭ ᑲᔦ ᐱᔑᒀᒋᑴᒃ ᐅᑮ ᑌᐺᑕᐙᐙᓐ᙮ ᑮᓇᐙ ᑕᔥ ᐐᓐ ᒥᓴᐙ ᑯ ᐁᑮᐙᐸᒣᒀ ᑳᐐᓐ ᑭᑮᐋᑌᑕᓰᒻ, ᐴᔥᑫ ᓈᑫ ᐱᑯ ᒋᑮ ᑌᐺᑕᒣᑭᐸᓐ᙮

21:33b.MAT.021.033 ᒋᓴᔅ ᑕᔥ ᑮᐃᑭᑐ: ᐱᓯᑕᐎᔑᒃ ᒦᓇᐙ ᐁᐐᐋᐌᒋᑫᔮᓐ᙮ ᑮᐊᔮ ᓴ ᑭᑎᑫᐎᑭᒫ ᐁᑮ ᑭᑎᑳᓈᒡ ᔔᒥᓇᐞ ᑳᐃᔑ ᑭᑎᑳᓱᓂᒡ ᐅᔔᒥᓂᑭᑎᑳᓂᕽ᙮ ᐊᓯᓃᐞ ᐃᑕᔥ ᑲᔦ ᐅᑮᐙᑳᔮᐱᑭᔑᒫᐞ ᐅᑭᑎᑳᓂᕽ ᐁᑮᒣᓂᑲᓂᑫᒡ᙮ ᑮᐙᓂᑫ ᑲᔦ ᑫᑕᔑᓰᔅᑯᐲᑭᔥᑲᐎᒥᓐᒡ ᐃᐃ ᔔᒥᓇᐞ, ᐅᓵᐱᐎᓐ ᑲᔦ ᐅᑮᐅᔑᑑᓐ᙮ ᒦᑕᔥ ᑳᐃᔑ ᐊᐎᐋᒡ ᐅᑭᑎᑫᐞ ᒋᓈᑲᒋᑕᒫᑯᒡ, ᐹᓂᒫ ᑫᐐᓐ ᐃᐃᒫ ᒣᔥᑾᒡ ᒋᐅᒋ ᐅᑎᓯᒡ᙮ ᒦᑕᔥ ᑳᐃᔑ ᒫᒑᒡ᙮

21:34b.MAT.021.034 ᐊᐲ ᑕᔥ ᐁᐅᒋᒋᓭᓂᒃ ᒋᒪᐎᔂᓱᓂᒡ ᐃᐃ ᔔᒥᓇᐞ, ᐅᑮᐃᔑᓂᔕᐙᐞ ᐃᓴ ᐅᑕᓄᑮᐋᑲᓇᐞ ᐃᐃᒫ ᑳᐃᔑ ᑭᑎᑳᓱᓂᒡ ᔔᒥᓇᐞ ᑫᐐᓐ ᐃᐃᒫ ᐁᐐᐅᑎᓯᒡ ᒥᓂᒃ ᑫᑮᐅᑎᓯᐸᓐ᙮

21:35b.MAT.021.035 ᑳᑮᐊᐎᐃᑣ ᑕᔥ ᐅᑮᐅᑎᑎᓈᐙᐞ ᐃᐃ ᐊᓄᑮᐋᑲᓇᐞ, ᐁᑮ ᑭᒋᓃᐗᓇᐙᐙᒡ ᐯᔑᒃ, ᐁᑮᓂᓵᐙᒡ ᐃᓂ ᑯᑕᒃ ᐯᔑᒃ, ᐁᑮ ᐸᐲᒶᓯᓇᐋᐙᒡ ᑲᔦ ᐯᔑᒃ᙮

21:36b.MAT.021.036 ᒦᓇᐙ ᑕᔥ ᐊᐊ ᑭᑎᑫᐎᑭᒫ ᐅᑮᐃᔑᓂᔕᐙᐞ ᐅᑕᓄᑮᐋᑲᓇᐞ ᐊᐗᔑᒣ ᐁᑮ ᐹᑏᓄᓂᒡ, ᒦᑕᔥ ᐃᑭ ᑭᑎᑫᐎᓂᓂᐗᒃ ᐯᔑᑾᓐ ᑳᑑᑕᐙᐙᒡ᙮

21:37b.MAT.021.037 ᐃᔥᒀᒡ ᑕᔥ ᐅᑮᐃᔑᓂᔕᐙᓐ ᐅᑯᓯᓴᓐ, ᐁᑮᐃᑭᑐᒡ: ᐅᑲ ᑭᑌᓂᒫᐙᓐ ᐃᓴ ᐃᓂ ᓂᑯᓯᓴᓐ᙮

21:38b.MAT.021.038 ᐊᐲ ᑕᔥ ᑭᑎᑫᐎᓂᓂᐗᒃ ᐁᐙᐸᒫᐙᒡ ᐃᓂ ᐅᑯᓯᓯᒫᓐ, ᒦᑕᔥ ᑳᐃᑭᑐᐙᒡ: ᒦᓴ ᐃᓂ ᑭᑎᑫᐎᑭᒫ ᐅᑯᓯᓴᓐ᙮ ᐊᐯᔪᒃ ᑕᑲ ᓂᓯᒫᑖᓂᓐ, ᒋᐊᔮᐗᕽ ᐃᐃ ᑳᐐ ᑎᐱᓇᐌᐎᓯᓂᒡ!

21:39b.MAT.021.039 ᒦᑕᔥ ᐅᑮᐅᑎᑎᓈᐙᓐ, ᐁᑮ ᓵᑭᒋᐌᐱᓈᐙᒡ ᐃᐃᒫ ᑭᑎᑳᓂᕽ, ᐁᑮᓂᓵᐙᒡ ᑲᔦ᙮

21:40b.MAT.021.040 ᐋᓃᓐ ᑕᔥ ᑫᑑᑕᐙᒡ ᐊᐊ ᑭᑎᑫᐎᑭᒫ ᑳᑎᐯᑕᕽ ᔔᒥᓂ ᑭᑎᑳᓂᓂ ᐃᐃ ᑳᑮᐊᐎᐋᒡ ᐊᐲ ᑕᑯᔑᕽ? ᐅᑮᐃᓈᐞ᙮

21:41b.MAT.021.041 ᒦᑕᔥ ᑳᐃᑯᒡ: ᑫᑫᑦ ᐃᓴ ᒫᐐᓐ ᐅᑲ ᑲᒀᑕᑭᓂᓵᐞ ᐃᐃ ᒪᒋᑭᑎᑫᐎᓂᓂᐗᐞ, ᑯᑕᒃ ᑕᔥ ᑭᑎᑫᐎᓂᓂᐗᐞ ᐅᑲᐊᐎᐋᐞ ᑫᒦᓂᑯᒡ ᑫᑮᐅᒋ ᐅᑎᓯᐸᓐ ᐊᐲ ᒪᐎᔂᓂᐗᓂᓂᒃ, ᑮᐃᑭᑐᐗᐞ᙮

21:42b.MAT.021.042 ᒋᓴᔅ ᑕᔥ ᐅᑮᐃᓈᐞ: ᑳᐐᓐ ᐃᓇ ᑭᑐᒋ ᐊᓇᒥᑑᓰᒻ ᑳᐃᔑᐲᐃᑳᑌᒃ ᑫᑌᒪᓯᓇᐃᑲᓂᕽ? ᐃᓂ ᓴ ᐊᓯᓃᓐ ᑳᑮᐋᓇᐌᓂᒫᐙᒡ ᐃᑭ ᐅᐙᑳᐃᑫᒃ ᒦᓴ ᐊ ᒫᐗᒡ ᑳᑮ ᑭᒋ ᐃᓀᑖᑯᓯᒡ ᐊᓯᓐ᙮ ᐋᓃᔥ ᑳᑎᐯᒋᑫᒡ ᐃᐃ ᐅᑎᔑᒋᑫᐎᓐ᙮ ᐋᐱᒋ ᑕᔥ ᒫᒪᑳᓯᓈᑾᓐ, ᐃᔑᐲᐃᑳᑌ᙮

21:43b.MAT.021.043 ᒦᑕᔥ ᐅᐅᐌ ᐌᒋ ᐃᓂᓇᑰᒃ: ᑭᑲ ᒪᑲᒥᑰᒻ ᐃᓴ ᐃᐃ ᑭᔐᒪᓂᑑ ᐅᑎᐯᒋᑫᐎᓐ ᒣᔥᑾᒡ ᒋᒦᓂᑣ ᐃᑭ ᑯᑕᒃ ᐯᒫᑎᓯᐙᒡ ᑫᓈᑯᑑᐙᒡ ᑭᔐᒪᓂᑑᓐ ᑳᐊᑕᐌᑕᒥᓂᒡ, ᐅᑮᐃᓈᐞ᙮

21:44b.MAT.021.044 ᐊᐌᓀᓐ ᓴ ᑫᐸᑭᔑᕽ ᐃᐃᒫ ᐗᑭᒋᐊᓯᓐ ᑕᐱ ᑭᔥᑭᔑᓐ᙮ ᐊᐊ ᑕᔥ ᑫᐸᑕᑯᔥᑳᑯᒡ ᐃᓂ ᐊᓯᓃᓐ, ᐐᑫ ᑕᔑᑯᔥᑰᓱ, ᑖᐱᔥᑰ ᑫᑰᓐ ᑳᐹᔥᑭᓀᓭᒃ ᑕᐃᔑᓈᑯᓯ᙮

21:45b.MAT.021.045 ᑭᒋᐊᓇᒥᐁᐎᑭᒫᒃ ᑕᔥ, ᐯᕒᐊᓰᒃ ᑲᔦ, ᐁᑮᓅᑕᐙᐙᒡ ᒋᓴᓲᓐ ᐅᐅ ᐁᐃᔑ ᐋᐌᒋᑫᓂᒡ, ᐅᑮ ᑭᑫᑖᓈᐙ ᓴ ᐐᓇᐙ ᐁᑮ ᑕᔑᒥᑯᐙᒡ᙮

21:46b.MAT.021.046 ᒦᑕᔥ ᑳᐃᔑ ᑲᑴᑕᑯᓈᐙᒡ, ᔖᑰᒡ ᐃᑕᔥ ᐅᑮ ᑯᓵᐙᐞ ᐃᐃ ᑳᑮ ᐹᑏᓄᓂᒡ, ᐋᓃᔥ ᐅᑮᐃᓇᑭᒫᓂ ᐃᓂ ᒋᓴᓲᓐ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᐁᑎᓄᐎᓂᒡ᙮

22

22:1b.MAT.022.001 ᒦᓇᐙ ᓴ ᒋᓴᔅ ᑮᐋᐌᒋᑫ ᐁᑲᑲᓅᓈᒡ ᐊᐎᔭᐞ:

22:2b.MAT.022.002 ᐊᐲ ᑭᔐᒪᓂᑑ ᑮᔑᓯᑑᒡ ᐅᑎᐯᒋᑫᐎᓐ, ᒦᐃ ᑫᐃᔑᓈᑾᒃ, ᑖᐱᔥᑰ ᑭᒋᐅᑭᒫ ᑳᑮᐐᑾᑫᒡ ᐁᐐ ᑭᒋᐐᑎᑫᓂᒡ ᐅᑯᓯᓴᓐ᙮

22:3b.MAT.022.003 ᐅᑮᒫᒋᓂᔕᐙᐞ ᑕᔥ ᐅᑕᓄᑮᐋᑲᓇᐞ ᒋᐸᐹ ᐊᑐᑫᓂᒡ ᒋᐱᔖᓂᐗᓂᓂᒃ ᐃᐃᒫ ᑲᐐᐃᔑ ᐐᑾᑎᓈᓂᐗᓂᓂᒃ᙮ ᑳᐐᓐ ᑕᔥ ᑮᐐ ᐲᔖᓰᐗᐞ ᐃᐃ ᑳᑮᐊᑐᒫᐸᓐ᙮

22:4b.MAT.022.004 ᑯᑕᒃ ᐃᑕᔥ ᐅᑕᓄᑮᐋᑲᓇᐞ ᐅᑮᒫᒋᓂᔕᐙᐞ ᐁᑮᐃᓈᒡ: ᑲᓅᓂᑾᒃ ᐃᑭ ᐋᔕ ᑳᑮᐊᑐᒥᑣ: ᐋᔕ ᐅᔕ ᑮᑮᔑᒋᑳᑌ ᑳᐐᐐᑾᑳᑫᔮᓐ᙮ ᓂᑖᐯᐱᔑᑮᒪᒃ, ᐃᑭ ᑲᔦ ᑳᑮᐋᒋᐳᓂᑣ ᐱᔑᑮᓴᒃ ᐋᔕ ᑮᑮᔑᔑᑲᓂᐎᐗᒃ᙮ ᐋᔕ ᓴ ᑲᑭᓇ ᑫᑰᓐ ᑮᑮᔑᒋᑳᑌ᙮ ᐊᐤ ᐱᒥᐊᑕ ᐐᓯᓂᒃ ᑳᐐᐃᔑ ᐐᑾᑫᔮᓐ!

22:5b.MAT.022.005 ᐃᑭ ᑕᔥ ᑳᑮᐊᑐᒥᑣ ᑳᐐᓐ ᑮᐸᐹᒥᑕᓰᐗᒃ, ᐋᒋᑯ ᓴ ᐁᑮᐊᓄᑮᐙᒡ, ᐯᔑᒃ ᐁᑮᐃᔖᒡ ᐅᑭᑎᑳᓇᑲᒥᑯᕽ, ᑯᑕᒃ ᑕᔥ ᐅᑕᑖᐌᐎᑲᒥᑯᕽ;

22:6b.MAT.022.006 ᑯᑕᒃ ᑕᔥ ᐁᑮᐅᑎᑎᓈᐙᒡ ᐃᐃ ᐊᓄᑮᐋᑲᓇᐞ ᑳᑮ ᐸᐹ ᐊᑐᑫᓂᒡ, ᐁᑮ ᐸᐸᑭᑌᐙᐙᒡ, ᐁᑮᓂᓵᐙᒡ ᑲᔦ᙮

22:7b.MAT.022.007 ᑭᒋᐅᑭᒫ ᑕᔥ ᐐᑫ ᑮᓂᔥᑳᑎᓯ, ᐁᑮᐃᔑᓂᔕᐙᒡ ᐅᔑᒫᑲᓂᔒᒪᐞ, ᒋᓂᓵᓂᒡ ᐃᐃ ᑳᑮᓂᔑᐌᓂᒡ, ᐁᑮ ᓴᑲᐊᒥᓂᒡ ᑲᔦ ᐅᑑᑌᓈᒥᓂ᙮

22:8b.MAT.022.008 ᐅᑮ ᑲᓅᓈᐞ ᑕᔥ ᐅᑕᓄᑮᐊᑲᓇᐞ: ᐃᐃ ᓴ ᐐᑎᑫᐐᑾᑎᐎᓐ ᐋᔕ ᑮᑮᔑᒋᑳᑌ, ᔑᑾ ᑕᔥ ᐃᐃ ᑳᑮᐊᑐᒥᑣᐸᓐ ᑳᐐᓐ ᑮᑌ ᐊᐲᑌᑖᑯᓯᓰᐗᒃ᙮

22:9b.MAT.022.009 ᒫᒑᒃ ᑕᔥ ᑭᒋᒦᑲᓈᕽ ᒋᐃᔖᔦᒃ, ᒥᓂᒃ ᐃᑯ ᑫᐙᐸᒣᒀ ᐯᒫᑎᓯᐙᒡ, ᐊᑐᒥᑾᒃ ᒋᐱ ᐐᓯᓂᐙᒡ ᑳᐐᐃᔑ ᐐᑾᑫᔮᓐ, ᐅᑮᐃᓈᐞ᙮

22:10b.MAT.022.010 ᒦᑕᔥ ᐃᑭ ᐊᓄᑮᐋᑲᓇᒃ ᑳᐃᔑ ᐃᔖᐙᒡ ᒥᓯᐌ ᒦᑲᓈᕽ ᐁᑮᐊᑐᒫᐙᒡ, ᐋᓂᑕ ᓴ ᑾᔭᒃ ᐁᑮ ᐱᒫᑎᓯᓂᒡ, ᑯᑕᒃ ᑲᔦ ᐁᑮᒪᒋᐱᒫᑎᓯᓂᒡ ᐯᔑᑾᓐ ᐅᑮᐃᔑ ᒫᒪᐎᐊᑐᒫᐙᐞ, ᐲᓂᔥ ᐐᑫ ᑮᒨᔥᑭᓀᐱᐗᒃ ᑳᑮᐃᔑ ᑭᒋᐐᑎᑫᑎᓈᓂᐗᕽ᙮

22:11b.MAT.022.011 ᑭᒋᐅᑭᒫ ᑕᔥ ᑮᐲᑎᑫ ᐁᐐᐙᐸᒫᒡ ᐃᐃ ᑳᑮᐱᐊᑕ ᐐᓯᓂᓂᒡ᙮ ᐅᑮᐙᐸᒫᓐ ᑕᔥ ᐯᔑᒃ ᐃᓂᓂᐗᓐ ᑳᑮᒥᓄᐅᓯᓂᒃ᙮

22:12b.MAT.022.012 ᐅᑮᐃᓈᓐ ᑕᔥ: ᓃᒌ, ᐋᑎ ᑳᐅᒋ ᐲᑎᑫᔭᓐ ᐁᒥᓄᐅᓯᐗᓐ? ᐊᐊ ᑕᔥ ᐃᓂᓂ ᑮᑸᓇᐎ ᐃᑭᑐ᙮

22:13b.MAT.022.013 ᑭᒋᐅᑭᒫ ᑕᔥ ᐅᑮᐃᓈᐞ ᐅᑕᓄᑮᐊᑲᓇᐞ: ᒪᒫᒋᑾᐱᓂᒃ ᐊᐊ ᐃᓂᓂ ᐅᓂᒌᕽ, ᐅᓯᑎᕽ ᑲᔦ, ᐊᑾᒌᕽ ᐃᔑᐌᐱᓂᒃ ᑳᔑ ᑲᔥᑮᑎᐱᑲᓂᓂᒃ! ᒦᑕᔥ ᐌᑎ ᑳᔑ ᒪᐎᓈᓂᐗᕽ, ᒦ ᑲᔦ ᐌᑎ ᑫᔑ ᒪᒪᑗᔮᐱᑌᓭᓈᓂᐗᕽ ᑫᐊᐲᒋ ᐐᓴᑫᑕᒧᓈᓂᐗᕽ᙮

22:14b.MAT.022.014 ᒋᓴᔅ ᑮᐊᓂ ᐃᑭᑐ: ᓃᐳᐗᐞ ᓴ ᐋᓇ ᐊᑐᒫᐗᒃ, ᑕᐊᑳᓰᓄᐗᒃ ᑕᔥ ᐁᑕ ᑫᐅᑖᐱᓂᑣ᙮

22:15b.MAT.022.015 ᐯᕒᐊᓰᒃ ᑕᔥ ᐃᑯᒋ ᑮᐃᔖᐗᒃ ᐁᑮᐊᐎ ᑕᔑᑕᒧᐙᒡ ᐋᓃᓐ ᑫᐃᔑ ᑲᑴᒋᒋᑲᓂᐎᓂᒡ ᒋᓴᓲᓐ ᓭᓯᒃ ᑫᔑ ᓇᑴᑕᓯᓂᒃ᙮

22:16b.MAT.022.016 ᐅᑭᑭᓄᐊᒪᐙᑲᓂᐙᐞ ᐃᑕᔥ ᐅᑮᐃᔑᓂᔕᐙᐙᐞ, ᐁᑮ ᑕᑯᐐᒌᐙᓂᒡ ᐋᓂᑕ ᐁᕒᐊᑕᓐ ᑳᐐᒋᐃᑯᓂᒡ᙮ ᒦᑕᔥ ᐁᑮᐃᓈᓂᒡ: ᐅᑭᑭᓄᐊᒫᑫ, ᑭᑭᑫᓂᒥᑰ ᐋᐱᒋ ᐁᓂᑖᑌᐺᔭᓐ, ᑾᔭᒃ ᐁᐃᔑ ᑭᑭᓄᐊᒫᑫᐗᒡ ᑲᔦ ᐋᓃᓐ ᑭᔐᒪᓂᑑ ᑳᔑ ᐊᑕᐌᓂᒫᒡ ᐊᐎᔭᓐ ᒋᐃᔑᐱᒫᑎᓯᓂᒡ, ᑳᐐᓐ ᑲᔦ ᑭᐗᓂᔥᑴᐃᑯᓰᒃ ᐋᓃᓐ ᐊᐎᔭᒃ ᐁᓀᓂᒥᒀ, ᑭᑭᑫᓂᒥᑰ ᑲᔦ ᑲᑭᓇ ᐊᐎᔭ ᐯᔑᑾᓐ ᐁᑑᑕᐗᒡ ᑳᑑᑕᐗᒡ ᐊᐊ ᐯᔑᒃ ᐊᐎᔭ᙮

22:17b.MAT.022.017 ᐐᑕᒪᐎᔑᓈᒻ ᑕᔥ ᐋᓃᓐ ᐁᓀᑕᒪᓐ: ᑫᑮᓇᐎᓐᑦ ᐃᓇ ᐃᔑᓈᑾᓐ ᒋᑎᐸᐊᒪᕽ ᐃᐃ ᑖᑭᔅ ᑳᑎᐸᐃᑫᐃᐌᒡ ᐊᐊ ᒫᐗᒡ ᐃᑯ ᑭᒋᐅᑭᒫ ᐌᑎ ᐅᕒᐆᒥᕽ ᑳᐊᔮᒡ? ᐅᑮᐃᓈᓂ᙮

22:18b.MAT.022.018 ᒋᓴᔅ ᑕᔥ ᐅᑮ ᑭᑫᓂᒫᐞ ᐁᑮᒪᒋ ᐃᓀᑕᒥᓂᒡ, ᒦᑕᔥ ᑳᐃᓈᒡ: ᑮᓇᐙ ᐅᒥᓍᑎᓰᔑᑑᒃ! ᐌᑯᓀᓐ ᐌᒋ ᑲᑴᒋᐃᔦᒃ?

22:19b.MAT.022.019 ᐙᐸᑕᐃᔑᓐ ᐊᐊ ᐙᐹᐱᑯ ᔔᓂᔮᔅ ᑳᐋᐸᑎᓯᒡ ᑮᑎᐸᐊᒪᐎᒥᓐᒡ ᐌᑭᒫᐙᑎᓯᓂᒡ, ᐅᑮᐃᓈᐞ᙮ ᐅᑮ ᐲᑕᒫᑰᐞ ᐃᑕᔥ ᐯᔑᒃ ᐙᐹᐱᑯ ᔔᓂᔮᓴᓐ᙮

22:20b.MAT.022.020 ᒦᑕᔥ ᑳᐃᓈᒡ: ᐊᐌᓀᓐ ᐗᐊ ᑳᒪᓯᓂᔑᕽ? ᐊᐌᓀᓐ ᐅᐅᐌᓂ ᐅᐐᓱᐎᓐ? ᐅᑮᐃᓈᐞ᙮

22:21b.MAT.022.021 ᐅᑮᐃᑰᐞ ᐃᑕᔥ: ᒫᐗᒡ ᐃᑯ ᑭᒋᐅᑭᒫ᙮ ᒦᑕᔥ ᑳᐃᓈᒡ: ᒦᓂᒃ ᓴ ᐊᐊ ᒫᐗᒡ ᐃᑯ ᑭᒋᐅᑭᒫ ᑳᑎᐯᑕᕽ, ᒦᓂᒃ ᐃᑕᔥ ᑲᔦ ᐐᓐ ᑭᔐᒪᓂᑑ ᑳᑎᐯᑕᕽ, ᐅᑮᐃᓈᐞ᙮

22:22b.MAT.022.022 ᐊᐲ ᑕᔥ ᐁᓅᑖᑯᒡ, ᐐᑫ ᑮᑭᒋᒫᒪᑳᑌᑕᒨᐞ᙮ ᐅᑮᓇᑲᓂᑰᐞ ᐃᑕᔥ ᐁᑮᐊᓂ ᒫᒑᓂᒡ᙮

22:23b.MAT.022.023 ᐯᔑᑾᓐ ᑕᔥ ᐁᑮᔑᑲᓂᓂᒃ ᐋᓂᑕ ᓵᒐᓰᒃ ᐅᑮᐱ ᐊᑕᐙᐸᒫᐙᓐ ᒋᓴᓲᓐ᙮ ᒦᐗᒃ ᐅᑯᐌᓂᐗᒃ ᑳᐃᔑ ᑭᑭᓄᐃᑫᐙᒡ: ᑳᐐᓐ ᐊᐎᔭ ᒦᓇᐙ ᑕᑮᐌᐱᒫᑎᓯᓰ ᐃᔥᒀᐱᒫᑎᓯᒡ᙮

22:24b.MAT.022.024 ᐅᑮ ᑲᑴᒋᒫᐙᓐ: ᐅᑭᑭᓄᐊᒫᑫ, ᒨᓯᔅ ᑕᔥ ᑮᐃᔑ ᑭᑭᓄᐊᒫᑫ, ᑮᔥᐱᓐ ᐃᓂᓂ ᓂᐳᒡ ᐁᓇᑲᓈᒡ ᐃᓂ ᐐᐗᓐ, ᐁᑮᐊᔮᐙᓯᒀ ᐊᐱᓅᒌᔕᐞ, ᐐᒋᑭᐌᔭᓐ ᓴ ᐅᑲ ᐐᑎᑫᒫᓂ ᐃᓂ ᐐᐗᓐ ᒋᐊᔮᑕᒫᑯᒡ ᐊᐱᓅᒌᔕᐞ᙮

22:25b.MAT.022.025 ᐃᓇᔥᑫ ᑕᔥ ᑮᓃᔣᒋᐗᒃ ᐃᑭ ᐃᓂᓂᐗᒃ ᐁᑮᐐᒋᑭᐌᑎᐙᒡ ᐅᐅᒫ ᑳᔑ ᐊᔮᔮᕽ᙮ ᑳᓴᓰᑭᓯᒡ ᑕᔥ ᓂᑕᒻ ᑮᐐᐎ, ᐁᑮᓂᐳᒡ ᑕᔥ ᐁᑮᐊᔮᐙᓯᒃ ᐊᐱᓅᒌᔕᐞ᙮ ᒦᑕᔥ ᑳᐃᔑᓈᑾᓂᓂᒃ ᐃᓂ ᑳᑮᐊᓂ ᐅᔒᒣᔑᒡ ᒋᐐᑎᑫᒫᓂᒡ ᐃᓂ ᑳᑮᐐᐎᒡ᙮

22:26b.MAT.022.026 ᒦᑕᔥ ᐯᔑᑾᓐ ᐊᐊ ᐅᔒᒣᔑᒫ ᑳᐃᔑᓭᒡ ᐁᑮᓂᐳᒡ, ᐊᐊ ᑲᔦ ᑯᑕᒃ, ᐲᓂᔥ ᑕᔥ ᑲᑭᓇ ᑳᑮᓃᔣᒋᐙᒡ ᑳᑮᐐᒋᑭᐌᑎᐙᒡ ᐁᑮᐃᔑᓭᐙᒡ᙮

22:27b.MAT.022.027 ᑫᐐᓐ ᑕᔥ ᐊᐊ ᐃᑴ ᐃᔥᒀᒡ ᑮᓂᐳ᙮

22:28b.MAT.022.028 ᑮᐌᐱᒫᑎᓯᓈᓂᐗᕽ ᐃᑕᔥ, ᐊᐌᓀᓐ ᑕᔥ ᐊᐊ ᒪᔮ ᑫᐐᐎᒡ ᐃᓂ ᐃᑴᐗᓐ? ᐋᓃᔥ ᒥᒋᓃᔣᓱ ᐅᑮᐐᑎᑫᒫᐙᓐ᙮

22:29b.MAT.022.029 ᒋᓴᔅ ᑕᔥ ᐅᑮᐃᓈᐞ: ᐁᑕᑕᐌ ᓴ ᑭᑭᒋᐗᓂᑭᑭᓄᐃᑫᒻ ᐃᐃ ᑳᐃᑭᑐᔦᒃ ᐊᐎᔭ ᒋᑮᐌᐱᒫᑎᓯᓯᒃ᙮ ᒦᑕᔥ ᐃᐃ ᓇᑫ ᑳᐅᒋ ᐃᔑᑭᑭᓄᐃᑫᔦᒃ ᐁᑭᑫᑕᓯᐌᒃ ᐋᓃᓐ ᐁᔑᐲᐃᑳᑌᒃ ᑭᒋᒪᓯᓇᐃᑲᓐ, ᐁᑭᑫᑕᒧᐙᓯᐌᒃ ᑲᔦ ᑭᔐᒪᓂᑑ ᐅᒪᔥᑲᐎᓰᐎᓐ᙮

22:30b.MAT.022.030 ᐊᐲ ᓴ ᑮᐌᐱᒫᑎᓯᐙᒡ, ᑳᓂᐳᐙᒡ ᐃᓂᓂᐗᒃ, ᐃᑴᐗᒃ ᑲᔦ ᑳᐐᓐ ᑕᐐᑎᑫᓰᐗᒃ᙮ ᐋᓃᔥ ᐁᒐᓬᐊᐞ ᐁᓈᑎᓯᓂᒡ ᑭᒋᑮᔑᑯᕽ ᐁᔮᓂᒡ ᑕᐃᓈᑎᓯᐗᒃ᙮

22:31b.MAT.022.031 ᐃᐃ ᑕᔥ ᑳᑮᐌᐱᒫᑎᓯᓈᓂᐗᕽ, ᑳᐐᓐ ᐃᓇ ᐐᑳ ᑭᑕᓇᒥᑑᓰᒻ ᐋᓃᓐ ᑳᑮᐃᓂᓀᒃ ᑭᔐᒪᓂᑑ, ᐁᑮᐃᑭᑐᒡ:

22:32b.MAT.022.032 ᓃᓐ ᐃᓴ ᐁᐸᕒᐊᐋᒻ ᐅᒪᓂᑑᒪᓐ, ᐋᐃᓯᒃ ᐅᒪᓂᑑᒪᓐ, ᒉᑲᑉ ᑲᔦ ᐅᒪᓂᑑᒪᓐ᙮ ᒦᐅᐌ ᐁᑭᑐᕽ, ᐅᑯ ᑳᐅᑭᔐᒪᓂᑑᒥᐙᒡ, ᒥᓴᐙ ᐋᓇ ᐃᓂᑣ ᐁᓂᐳᐙᒡ, ᑫᔮᐱ ᐅᔕ ᐱᒫᑎᓯᐗᒃ, ᐅᑮᐃᓈᐞ᙮

22:33b.MAT.022.033 ᐁᑮᓅᑖᑯᒡ ᑕᔥ ᑳᐹᑏᓄᓂᒡ, ᐅᑮᒫᒪᑳᑌᓂᒥᑰᐞ ᐃᐃ ᑳᑮᐃᔑ ᑭᑭᓄᐃᑫᒡ᙮

22:34b.MAT.022.034 ᐯᕒᐊᓰᒃ ᑕᔥ ᑮᐅᑯᓈᓯᑯᑖᑎᐗᒃ ᐊᐲ ᐁᑮᓅᑕᒧᐙᒡ ᒋᓴᓲᓐ ᐁᑮ ᔖᑰᓱᒫᓂᒡ ᐃᐃ ᓵᒐᓰᐞ ᙮

22:35b.MAT.022.035 ᐯᔑᒃ ᑕᔥ ᑳᑭᑭᓄᐊᒫᑫᒡ ᐅᓇᔓᐌᐎᓐ ᐅᑮᑲᑴ ᐗᓂᑮᔗᐋᓐ ᐁᑮ ᑲᑴᒋᒫᒡ:

22:36b.MAT.022.036 ᐅᑭᑭᓄᐊᒫᑫ, ᐌᑯᓀᓐ ᒫᐗᒡ ᑫᒋ ᐃᓀᑖᑾᒃ ᐃᐃᒫ ᐅᓇᔓᐌᐎᓂᕽ? ᑮᐃᑭᑐ᙮

22:37b.MAT.022.037 ᒋᓴᔅ ᑕᔥ ᐅᑮᐃᓈᓐ: ᑭᑖᓵᑭᐋ ᑌᐯᒋᑫᒡ ᑭᑭᔐᒪᓂᑑᒻ ᐃᐃᒫ ᒥᓯᐌ ᑭᑌᐃᕽ, ᐃᐃᒫ ᑲᔦ ᒥᓯᐌ ᑭᑕᒑᑯᕽ, ᐃᐃᒫ ᑲᔦ ᒥᓯᐌ ᑭᓈᑲᑕᐌᑕᒧᐎᓂᕽ᙮

22:38b.MAT.022.038 ᒦ ᐅᔕ ᐃᐃᐌ ᒫᐗᒡ ᑳᓃᑳᓀᑖᑾᒃ ᑫᒋ ᐃᓀᑖᑾᒃ ᐅᓇᔓᐌᐎᓐ᙮

22:39b.MAT.022.039 ᑯᑕᒃ ᐃᑕᔥ ᐁᓂ ᐋᓂᑫ ᑭᒋ ᐃᓀᑖᑾᒃ ᐅᓇᔓᐌᐎᓐ, ᑫᑳ ᒦ ᐯᔑᑾᓐ ᐁᔑᓯᕽ: ᒋᓵᑭᐊᑎᐸᓐ ᑮᒋᐱᒫᑎᔅ ᑖᐱᔥᑰ ᑳᐃᔑ ᓵᑭᐃᑎᓱᔭᓐ᙮

22:40b.MAT.022.040 ᐅᓄ ᐅᔕ ᓃᔑᓐ ᐅᓇᔓᐌᐎᓇᓐ ᑳᐐᑕᒫᓐ, ᒦ ᐃᒫ ᐁᔑ ᒫᒪᐗᑌᓂᑭᓐ ᑲᑭᓇ ᐅᑑᓇᔓᐌᐎᓐ ᒨᓯᔅ, ᑳᔑ ᑭᑭᓄᐃᑫᓂᒡ ᑲᔦ ᑭᔐᒪᓂᑑ ᐅᑎᐹᒋᒧᐎᓂᓃᒪᐞ, ᑮᐃᑭᑐ᙮

22:41b.MAT.022.041 ᒣᒀ ᑕᔥ ᐁᒫᐗᒋᐃᑎᓂᒡ ᐯᕒᐊᓰᐞ, ᒋᓴᔅ ᐅᑮ ᑲᑴᒋᒫᐞ:

22:42b.MAT.022.042 ᐋᓃᓐ ᐁᓀᓂᒥᒣᒃ ᑭᔐᒪᓂᑑ ᑳᐅᓈᐸᒫᒡ? ᐋᑎ ᑫᐱᐅᑕᑳᓀᓯᒡ? ᐅᑮᐃᑰᐞ ᐃᑕᔥ: ᑌᐱᑎᕽ ᐅᔕ ᑕᐅᑕᑳᓀᓯ᙮

22:43b.MAT.022.043 ᒋᓴᔅ ᑕᔥ ᑮᐃᔑ ᑲᑴᑗ: ᐌᑯᓀᓂᓂ ᑕᔥ ᑌᐱᑦ ᐁᑭᑭᔥᑳᑯᒡ ᐃᓂ ᑭᔐᒪᓂᑑᓐ ᐅᑕᒑᑯᓂ, ᑳᐅᒋ ᐃᔑᓂᑳᓈᒡ, ᑌᐯᒋᑫᔭᓐ? ᐃᓇᔥᑫ ᑌᐱᑦ ᑮᐃᑭᑐ:

22:44b.MAT.022.044 ᑳᑎᐯᒋᑫᒡ ᐅᑮᐃᓈᓐ ᐃᓂ ᑳᑎᐯᓂᒥᒥᒡ: ᐃᐃᒫ ᐃᔑᓇᒪᑕᐱᓐ ᓂᑭᒋᓂᑭᕽ ᐃᓇᑫ, ᐹᓂᒫ ᓴ ᑭᑲ ᐃᔑᐃᓐ ᒋᔖᑰᒋᐊᑣ ᑳᓂᔥᑫᓂᒥᒀ᙮

22:45b.MAT.022.045 ᒦᔥ ᐃᐃ ᐊᐊ ᐅᓈᐸᒫᑲᓐ ᑳᐅᒋ ᐃᑯᒡ ᑌᐱᑕᓐ ᑌᐯᒋᑫᔭᓐ ᐁᐃᑯᒡ᙮ ᐋᓃᓐ ᑕᔥ ᐃᓈ ᑫᐃᔑᓭᑭᐸᓐ ᒋᐃᔑ ᐅᑕᑳᓀᓯᒡ ᑌᐱᑎᕽ? ᑮᐃᑭᑐ᙮

22:46b.MAT.022.046 ᑳᐐᓐ ᑕᔥ ᐊᐎᔭᓐ ᐋᐲᓐᒡ ᐃᑯ ᐅᑮᓇᑴᑖᑯᓰᓐ᙮ ᒦᑕᔥ ᐃᐃ ᐊᑯᓈᒃ ᐁᑮᔑᑲᓂᓂᒃ ᑳᐐᓐ ᐊᐎᔭᓐ ᒦᓇᐙ ᐐᑳ ᑫᑰᓂᓂ ᐊᐗᔑᒣ ᐅᑮᐅᒋ ᑲᑴᒋᒥᑯᓰᓐ, ᐋᓃᔥ ᑳᐐᓐ ᐊᐎᔭᓐ ᑮᑌ ᐸᑫᓂᒧᓰᐗᓐ ᒋᑲᑴᒋᒥᑯᒡ᙮

23

23:1b.MAT.023.001 ᒋᓴᔅ ᑕᔥ ᐅᑮ ᑲᑲᓅᓈᐞ ᑳᒫᒪᐐᓄᓂᒡ, ᐃᐃ ᑲᔦ ᐅᑭᑭᓄᐊᒪᐙᑲᓇᐞ

23:2b.MAT.023.002 ᐁᑮᐃᓈᒡ: ᐃᑭ ᓴ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ, ᐃᑭ ᑲᔦ ᐯᕒᐊᓰᒃ, ᐃᓇᓄᑮᐗᒃ ᒋᐙᐐᑕᒫᑫᐙᒡ ᐋᓃᓐ ᑳᐃᔑᐲᐃᑳᑌᒃ ᒨᓯᓲᓐ ᐅᑑᓇᔓᐌᐎᓂᓂ᙮

23:3b.MAT.023.003 ᐃᔑᒋᑫᐙᒃ ᑕᔥ ᑳᐃᓂᓀᒀ, ᑑᑕᒧᐙᒃ ᑲᔦ ᑳᔑ ᐊᓅᓂᓀᒀ᙮ ᑫᑯ ᑕᔥ ᐐᓐ ᐃᔑᒋᑫᑫᒃ ᑳᐃᔑᒋᑫᐙᒡ᙮ ᐋᓃᔥ ᒥᒋ ᐃᓍᓂᑎᓱᐗᒃ, ᑳᐐᓐ ᑕᔥ ᐃᔑᒋᑫᓰᐗᒃ ᑳᐃᑭᑐᐙᒡ᙮

23:4b.MAT.023.004 ᒦᑕᔥ ᑲᔦ ᐁᔑᒋᑫᐙᒡ, ᐁᑯᓯᑾᓂᓂᒃ ᑫᑰᓂᓂ ᐅᐱᒋᐗᓀᐋᐙᐞ ᐯᒫᑎᓯᓂᒡ, ᐁᐊᑯᐱᑕᒪᐙᐙᒡ ᐅᐱᑾᓂᓃᕽ ᑫᒋᓈᒡ ᐃᑯ ᒋᐱᒥᐎᑑᓂᒡ᙮ ᑳᐐᓐ ᑕᔥ ᐐᓇᐙ ᑲᓇᑫ ᐯᔑᒃ ᒋᐐᐋᐸᒋᑑᐙᒡ ᐅᓃᓰᑭᓂᒑᓂᐙ ᒋᐐᐐᒋᐋᐙᒡ ᐁᐱᒥᐗᓀᓂᒡ᙮

23:5b.MAT.023.005 ᑲᑭᓇ ᑲᔦ ᑫᑰᓂᓂ ᐃᔑᒋᑫᐗᒃ ᒋᐙᐸᒥᑯᐙᒡ ᐯᒫᑎᓯᓂᒡ᙮ ᐃᓇᔥᑫ ᐙᐸᑕᒧᐙᒃ ᐁᐲᒋ ᒥᒑᓂᑭᓐ ᐃᓂ ᐊᓇᒥᐁᒪᔥᑭᒨᑌᓴᓐ ᑳᓈᐱᔥᑲᒧᐙᒡ ᐅᔅᑲᑎᑯᐙᕽ, ᐅᓂᑭᐙᕽ ᑲᔦ᙮ ᐃᓇᔥᑫ ᑲᔦ ᐁᐲᒋ ᑭᓍᐲᑲᓂᓂᑭᓐ ᑳᔑ ᓃᓰᑭᒀᒋᑳᑌᓂᑭᓐ ᐅᑭᑭᔥᑭᑲᓂᐙᓐ᙮

23:6b.MAT.023.006 ᐋᐱᒋ ᑲᔦ ᐁᐐᒥᓋᐱᐙᒡ ᒨᔕᒃ ᑮᐐᑾᑎᓈᓂᐗᓂᓂᒃ, ᑲᔦ ᒪᒪᔦᒡ ᐃᑯ ᑳᐃᔥᐯᑖᑾᓂᓂᑭᓐ ᐊᐱᐎᓇᓐ ᐁᑕ ᐁᐐᐃᔑ ᐊᐱᐙᒡ ᐃᐃᒫ ᐊᓇᒥᐁᐎᑲᒥᑯᕽ᙮

23:7b.MAT.023.007 ᒦ ᐁᑕ ᐁᔑ ᐊᑕᐌᑕᒧᐙᒡ ᒋᑭᑌᓂᒥᑣ ᐁᐴᔔᐃᑣ ᐊᑖᐌᐎᑲᒥᑯᑳᕽ, ᒪᒪᔦᒡ ᐃᑯ ᑲᔦ ᐁᑕ ᒋᐃᓂᑣ ᐅᑭᑫᑖᓱ᙮

23:8b.MAT.023.008 ᑮᓇᐙ ᑕᔥ ᐐᓐ ᑳᐐᓐ ᐅᑭᑫᑖᓱ ᑭᑲ ᐃᔑᓂᑳᓂᑰᓰᒻ, ᐋᓃᔥ ᑮᓇᐙ ᑲᑭᓇ ᑭᑑᐐᒋᑮᐌᑎᒻ᙮ ᒥᒋᐯᔑᑯ ᐁᑕ ᑳᑭᑭᓄᐊᒪᐎᓀᒃ᙮

23:9b.MAT.023.009 ᑳᐐᓐ ᑲᔦ ᓂᑌᑌᓈᓐ ᑭᑲ ᐃᔑᓂᑳᓈᓯᐙᐙ ᐊᐎᔭ ᐅᐅᒫ ᐊᑮᕽ᙮ ᐋᓃᔥ ᒥᒋᐯᔑᑯ ᑭᑌᑌᐙ ᑭᒋᑮᔑᑯᕽ ᑳᐊᔮᒡ᙮

23:10b.MAT.023.010 ᑫᑯ ᑲᔦ ᑭᑲ ᐃᔑᓂᑳᓂᑰᓰᒻ ᑳᓃᑳᓂᔥᑳᑫᒡ᙮ ᐋᓃᔥ ᒥᒋᐯᔑᑯ ᐊᐊ ᑳᓃᑳᓂᔥᑲᐎᓀᒃ, ᒦᓴ ᑭᔐᒪᓂᑑᓐ ᑳᑮᐅᓈᐸᒥᑯᒡ ᒋᑎᐯᒋᑫᒡ᙮

23:11b.MAT.023.011 ᐊᐎᔭ ᓴ ᑳᑭᒋ ᐃᓀᑖᑯᓯᒡ, ᒦᓴ ᐊᐊ ᑫᐸᒥᐃᓀᒃ᙮

23:12b.MAT.023.012 ᐊᐎᔭ ᓴ ᑳᐃᔥᐯᓂᑎᓱᒡ, ᑕᑕᐸᓭᓂᒫ᙮ ᐊᐎᔭ ᓴ ᑳᑕᐸᓭᓂᑎᓱᒡ, ᒦ ᓴ ᐊᐌ ᑫᐃᔥᐯᑖᑯᓯᒡ᙮

23:13b.MAT.023.013 ᐋᐱᒋ ᓴ ᑭᑲ ᐅᒑᓂᒥᓯᒻ, ᑮᓇᐙ ᑳᑭᑭᓄᐊᒫᑫᔦᒃ ᐅᓇᔓᐌᐎᓐ, ᑫᑮᓇᐙ ᐯᕒᐊᓰᒃ ! ᑮᓇᐙ ᑳᒥᓍᑎᓰᔑᑑᔦᒃ! ᐋᓃᔥ ᑭᑭᐸᐊᒧᐙᒻ ᑭᔐᒪᓂᑑ ᐁᔑ ᐃᔥᒀᑌᒥᐗᓂᓂᒃ ᐅᑎᐯᒋᑫᐎᓐ ᒋᐲᑎᑫᓯᒀ ᐯᒫᑎᓯᐙᒡ, ᑳᐐᓐ ᑕᔥ ᑫᑮᓇᐙ ᑭᐲᑎᑫᓰᒻ᙮ ᑳᐐᓐ ᑲᔦ ᑭᐸᑭᑎᓈᓯᐙᐙᒃ ᐃᑭ ᑳᐐ ᐲᑎᑫᐙᒡ᙮

23:14b.MAT.023.014 ᑭᑲ ᐅᒑᓂᒥᓯᒻ ᐅᓇᔓᐌᐎᑭᑭᓄᐊᒫᑫᒃ, ᐯᕒᐊᓰᒃ ᑲᔦ, ᑳᒥᓍᑎᓰᔑᑑᔦᒃ! ᐋᓃᔥ ᑭᑑᑖᐱᓇᒪᐙᐙᒃ ᐅᐙᑳᐃᑲᓂᐙᓐ ᐃᑭ ᑳᑮᐙᒋᑑᐙᒡ ᐃᑴᐗᒃ, ᒦᑕᔥ ᑭᓉᔥ ᐁᔑ ᑳᑮᑭᑐᔦᒃ ᑮᐊᓇᒥᐋᔦᒃ ᒋᐙᐸᒥᑰᔦᒃ᙮ ᐋᐱᒋ ᑕᔥ ᑭᑲ ᓇᑭᒦᓂᑰᒻ ᑲᒀᑕᑭᑑᐎᓐ᙮

23:15b.MAT.023.015 ᑭᑲ ᐅᒑᓂᒥᓯᒻ, ᑳᑭᑭᓄᐊᒫᑫᔦᒃ ᐅᓇᔓᐌᐎᓐ, ᑫᑮᓇᐙ ᐯᕒᐊᓰᒃ! ᑮᓇᐙ ᑳᒥᓍᑎᓰᔑᑑᔦᒃ! ᒥᓯᐌ ᑭᐸᐹᐃᔖᒻ ᑭᒋᑲᒦᕽ, ᒥᓯᐌ ᑲᔦ ᐊᑮᕽ, ᐁᑲᑴᑲᔥᑭᒣᒃ ᐊᐎᔭ ᒋᐱᒥᓂᔕᐅᓀᒃ᙮ ᐊᐲ ᑕᔥ ᐁᑲᔥᑭᒣᒃ, ᒦᑕᔥ ᐊᐗᔑᒣ ᐁᔑᓈᑯᓯᒡ ᒋᐃᔖᒡ ᒪᒋ ᐃᔥᑯᑌᕽ ᐊᐲᒡ ᑮᓇᐙ᙮

23:16b.MAT.023.016 ᑭᑲ ᐅᒑᓂᒥᓯᒻ, ᑮᓇᐙ ᑳᐙᐱᓯᐌᒃ ᐁᓃᑳᓃᑕᒫᑫᔦᒃ ᑕᔥ, ᐅᐅ ᓴ ᐁᐃᔑ ᑭᑭᓄᐃᑫᔦᒃ: ᐊᐎᔭ ᓴ ᑮᐊᐱ ᐊᔓᑕᒫᑫᒡ ᑳᔑ ᑯᑖᓀᑖᑾᒃ ᐲᑎᒃ ᑭᒋᐊᓇᒥᐁᐎᑲᒥᑯᕽ, ᑳᐐᓐ ᒣᒬᒡ ᑕᐃᔑᒋᑫᓰ ᑳᐃᔑ ᐊᐱᒧᒡ᙮ ᐊᐎᔭ ᑕᔥ ᑮᐊᐱ ᐊᔓᑕᒫᑫᒡ ᐃᓂ ᐅᓵᐎ ᔔᓂᔮᓐ ᐃᐃᒫ ᐲᑎᒃ ᑳᐊᔮᓂᒡ ᑭᒋᐊᓇᒥᐁᐎᑲᒥᑯᕽ, ᒦᓴ ᐃᐌᓂ ᑫᑑᑕᕽ ᑳᑮᐊᔓᑕᒫᑫᒡ, ᒦ ᐃ ᐁᔑ ᑭᑭᓄᐃᑫᔦᒃ᙮

23:17b.MAT.023.017 ᑮᓇᐙ ᑫᑮᐹᑎᓯᔦᒃ, ᐁᐙᐱᓯᐌᒃ ᑲᔦ! ᐋᓃᓐ ᐃᐃᐌ ᒫᐗᒡ ᑫᒋ ᐃᓀᑖᑾᒃ? ᐅᓵᐎ ᔔᓂᔮ, ᑯᒫ ᑲᔦ ᑳᑯᑖᓀᑖᑾᒃ ᑭᒋᐊᓇᒥᐁᐎᑲᒥᒃ ᑳᔑ ᐋᐸᑎᓯᒡ ᐅᓵᐎ ᔔᓂᔮ? ᒦ ᐄᑐᒃ ᐃᐃᒫ ᑳᐅᒋ ᐃᓀᒋᑲᓂᐎᒡ ᐅᓵᐎ ᔔᓂᔮ ᐁᑎᐯᓂᒥᑯᒡ ᑭᔐᒪᓂᑑᓐ᙮

23:18b.MAT.023.018 ᐁᐃᑭᑐᔦᒃ ᑲᔦ: ᑮᔥᐱᓐ ᓴ ᐊᐎᔭ ᐊᐱ ᐊᔓᑕᒫᑫᒡ ᐃᐃᐌᓂ ᑳᔑ ᐸᑭᑎᓂᑫᕽ, ᑳᐐᓐ ᒣᒬᒡ ᑕᐃᔑᒋᑫᓰ ᐃᐃ ᑳᑮᐃᑭᑐᒡ᙮ ᐊᐎᔭ ᓴ ᑳᐊᐱ ᐊᔓᑕᒫᑫᒡ ᒦᑭᐌᐎᓐ ᐃᐃᒫ ᑳᔑ ᐸᑭᑎᓂᑫᕽ ᑳᐊᑌᓂᒃ, ᒦᓴ ᐊᐌ ᑫᐃᔑᒋᑫᒡ, ᐁᐃᑭᑐᔦᒃ᙮

23:19b.MAT.023.019 ᑮᓇᐙ ᑳᐙᐱᓯᐌᒃ! ᐌᑯᓀᓐ ᑫᒋ ᐃᓀᑖᑾᒃ ᒫᐗᒡ, ᐃᐃᐌ ᓇ ᒦᑭᐌᐎᓐ, ᑯᒫ ᑲᔦ ᑳᔑ ᐸᑭᑎᓂᑫᓈᓂᐗᕽ? ᐊᐗᔑᒣ ᐄᑐᒃ ᑭᒋ ᐃᓀᑖᑾᓐ ᐃᐃᐌ ᑳᔑ ᐸᑭᑎᓂᑫᕽ, ᐋᓃᔥ ᒦᐃᒫ ᐊᐲ ᑮᑕᔑ ᒦᑭᐙᓂᐗᕽ ᑭᔐᒪᓂᑑ ᐁᔑ ᒫᒌᑎᐯᑕᕽ᙮

23:20b.MAT.023.020 ᐊᐎᔭ ᓴ ᑳᐊᐱ ᐊᔓᑕᒫᑫᒡ ᐃᐃᐌᓂ ᑳᔑ ᐸᑭᑎᓂᑫᕽ, ᒦᓴ ᐁᐃᔑ ᐊᔓᑕᒫᑫᒡ ᐃᐃᐌᓂ ᑳᔑ ᐸᑭᑎᓂᑫᓈᓂᐗᓂᓂᒃ, ᐃᓂᐌᓂᐗᓐ ᑲᔦ ᑲᑭᓇ ᐸᑭᑎᓂᑫᐎᓇᓐ᙮

23:21b.MAT.023.021 ᐊᐎᔭ ᑲᔦ ᑳᐊᐱ ᐊᔓᑕᒫᑫᒡ ᐃᐃ ᑳᔑ ᑯᑖᓀᑖᑾᓂᓂᒃ ᑭᒋᐊᓇᒥᐁᐎᑲᒥᑯᕽ, ᒦᓴ ᐁᐃᔑ ᐊᔓᑕᒫᑫᒡ ᐃᐃᐌᓂ ᑭᒋᐊᓇᒥᐁᐎᑲᒥᑯᓂ, ᐃᓂ ᑲᔦ ᑭᔐᒪᓂᑑᓐ ᐃᐃᒫ ᑳᐃᔑᑖᓂᒡ ᐲᑎᒃ᙮

23:22b.MAT.023.022 ᐊᐎᔭ ᑲᔦ ᑳᐊᐱ ᐊᔓᑕᒫᑫᒡ ᐃᐃᐌᓂ ᑭᒋᑮᔑᑯᓂ, ᒦᓴ ᐁᔑ ᐊᔓᑕᒫᑫᒡ ᑭᔐᒪᓂᑑᓐ ᐅᑑᑭᒫᐗᐱᐎᓂᓃᕽ, ᐃᓂ ᑲᔦ ᐃᐃᒫ ᑳᐊᐱᓂᒡ᙮

23:23b.MAT.023.023 ᑭᑲ ᐅᒑᓂᒥᓯᒻ, ᑳᑭᑭᓄᐊᒫᑫᔦᒃ ᐅᓇᔓᐌᐎᓐ, ᑫᑮᓇᐙ ᐯᕒᐊᓰᒃ! ᐅᒥᓍᑎᓰᔑᑑᒃ! ᐌᐌᓂ ᓴ ᑭᑑᒋ ᒦᓈᐙ ᑭᔐᒪᓂᑑ ᐯᔑᒃ ᑫᑰᓂᓂ ᐁᑕᓱᒥᑖᒋᕽ ᑳᓂᑖᐎᑭᑑᔦᒃ, ᑖᐱᔥᑰ ᑳᔑ ᒦᑭᐌᔦᒃ ᑕᑯᓭᒀᓇᓐ ᒥᓐᑦ, ᑎᓬ, ᑲᒥᓐ ᑳᐃᒋᑳᑌᑭᓐ᙮ ᔑᑾ ᑕᔥ ᐁᑑᑕᓯᐌᒃ ᐃᓂ ᒪᔮ ᑳᑭᒋ ᐃᓀᑖᑾᑭᓐ ᐃᐃᒫ ᑳᐅᔑᐲᐃᑳᑌᑭᓐ ᐅᓇᔓᐌᐎᓂᕽ ᑫᑮ ᑑᑕᒣᑭᐸᓐ᙮ ᒦᐗᓐ ᐃᓴ ᐃᓂ ᐌᐌᓂ ᒋᐅᓈᑯᓀᒀᐸᓐ ᐊᐎᔭᒃ, ᒋᑰᐹᓯᓈᑫᔦᑭᐸᓐ, ᒋᑭᔐᐙᑎᓯᔦᑭᐸᓐ, ᒋᑌᐺᔦᑖᑯᓯᔦᑭᐸᓐ ᑲᔦ᙮ ᒦᐗᓐ ᐅᔕ ᐅᓄ ᑫᑮᐃᔑᒋᑫᔦᑭᐸᓐ, ᐃᓂ ᑲᔦ ᑯᑕᒃ ᒋᑑᑕᒣᑭᐸᓐ ᐅᓇᔓᐌᐎᓇᓐ᙮

23:24b.MAT.023.024 ᑮᓇᐙ ᑳᐙᐱᓯᐌᒃ, ᐁᓃᑳᓃᑕᒫᑫᔦᒃ ᑕᔥ! ᑭᓰᔅᑰᐲᑭᓈᒻ ᓴ ᓂᐱ ᒋᑆ ᒥᓂᑴᔦᒃ ᒋᑯᓈᓯᐌᒃ ᐱᑯᒌᓯ, ᔖᑰᒡ ᑕᔥ ᑭᑯᓈᐙ ᐱᒀᐎᑲᓀᒥᑕᑎᒻ᙮

23:25b.MAT.023.025 ᑭᑲ ᐅᒑᓂᒥᓯᒻ, ᑳᑭᑭᓄᐊᒫᑫᔦᒃ ᐅᓇᔓᐌᐎᓐ, ᑫᑮᓇᐙ ᐯᕒᐊᓰᒃ! ᑮᓇᐙ ᑳᒥᓍᑎᓰᔑᑑᔦᒃ! ᓵᑭᒐᔭᐄ ᐋᓃᔥ ᑭᑎᔑ ᐯᑭᑑᒻ ᑭᒥᓂᒀᑲᓂᐙᓐ, ᑭᑑᓈᑲᓂᐙᓐ ᑲᔦ᙮ ᐲᒐᔭᐄ ᑕᔥ ᑭᒨᔥᑭᓇᑑᒻ ᑫᑰᓇᓐ ᑳᑮᐅᑎᓇᒣᒃ ᑭᒪᑲᑗᐎᓂᐙᕽ, ᑭᑕᔫᓵᒥᓯᐎᓂᐙᕽ ᑲᔦ᙮

23:26b.MAT.023.026 ᑮᓐ ᑳᐙᐱᓯᐗᓐ ᐯᕒᐊᓰ! ᐱᓇᒫ ᓴ ᐯᑭᑑᓐ ᑭᒥᓂᒀᑲᓂᕽ, ᑭᑑᓈᑲᓂᕽ ᑲᔦ ᐲᒐᔭᐄ ᑳᐊᔮᑭᓐ, ᒦᑕᔥ ᐃᐃ ᐸᔦᔥ ᒋᐯᑭᓈᑾᑭᓐ ᓵᑭᒐᔭᐄ᙮

23:27b.MAT.023.027 ᑭᑲ ᐅᒑᓂᒥᓯᒻ ᑳᑭᑭᓄᐊᒫᑫᔦᒃ ᐅᓇᔓᐌᐎᓐ, ᑫᑮᓇᐙ ᐯᕒᐊᓰᒃ! ᑮᓇᐙ ᑳᒥᓍᑎᓰᔑᑑᔦᒃ! ᑖᐱᔥᑰ ᓴ ᒦᐃᐌ ᐁᓈᑎᓯᔦᒃ, ᑳᐙᐱᔥᑭᐲᐃᑳᑌᑭᓐ ᐃᓂ ᓇᐃᓂᑏᐎᑲᒥᑰᓐ, ᒦᓴ ᐁᐲᒋ ᒥᓄᓈᑾᑭᓐ ᐊᑾᒌᕽ᙮ ᐲᑎᒃ ᑕᔥ ᐐᑫ ᒨᔥᑭᓀᐗᓐ ᓂᐳᐎᑲᓇᓐ, ᐐᑫ ᑲᔦ ᐁᐱᔥᑲᓇᑕᑭᓐ ᐁᐗᓈᑕᑭᓐ᙮

23:28b.MAT.023.028 ᒦᑕᔥ ᐯᔑᑾᓐ ᐁᐲᒋ ᒥᓄᓈᑯᓯᔦᒃ ᐊᐎᔭᒃ ᐁᐙᐸᒥᓀᒀ᙮ ᐲᒐᔭᐄ ᑕᔥ ᑭᑎᔑᑌᐁᒻ ᒥᓯᐌ ᐁᒥᓍᑎᓰᔑᑑᔦᒃ, ᐐᑫ ᑲᔦ ᐹᑏᓇᑎᓐ ᒪᒋᑑᑕᒧᐎᓐ᙮

23:29b.MAT.023.029 ᑭᑲ ᐅᒑᓂᒥᓯᒻ ᑮᓇᐙ ᑳᑭᑭᓄᐊᒫᑫᔦᒃ ᐅᓇᔓᐌᐎᓐ, ᑫᑮᓇᐙ ᐯᕒᐊᓰᒃ! ᑮᓇᐙ ᑳᒥᓍᑎᓰᔑᑑᔦᒃ! ᐋᐱᒋ ᓴ ᑭᒥᓄᑑᒻ ᑳᐃᔑᓇᐃᓂᑣ ᐃᑭ ᑭᔐᒪᓂᑑᓐ ᑳᑮ ᑲᓅᑕᒪᐙᐙᐸᓐ, ᐋᐱᒋ ᑲᔦ ᐁᑲᑴᒥᓄᓈᑯᐁᒀ ᐊᓯᓃᐞ ᑳᑭᑭᓇᐙᒋᔑᒥᒥᓐᒡ ᐋᑎ ᐁᔑ ᐱᒥᔑᓄᐙᒡ ᐃᑭ ᑳᑮ ᑾᔭᒀᑎᓯᐙᒡ᙮

23:30b.MAT.023.030 ᑲᔦ ᓴ ᐁᐃᑭᑐᔦᒃ: ᑮᔥᐱᓐ ᓃᓇᐎᓐᑦ ᐱᒫᑎᓯᔭᑭᐸᓐ ᐊᐲ ᑮᐱᒫᑎᓯᐙᒡ ᐃᑭ ᒣᐎᔕ ᑳᑮᐅᑫᑌᔭᐋᒥᔭᕽ, ᑳᐐᓐ ᓃᓇᐎᓐᑦ ᓂᑖᑮᐃᔑᒋᑫᓰᒥᓐ ᑳᑮᐃᔑᒋᑫᐙᐸᓐ, ᐁᑮᓂᓵᐙᒡ ᑳᑮ ᑲᓅᑕᒪᐙᓂᐸᓐ ᑭᔐᒪᓂᑑᓐ᙮

23:31b.MAT.023.031 ᒦᑕᔥ ᐁᐐᑕᒣᒃ ᑮᓇᐙ ᐁᑮᐱ ᐅᒌᔦᒃ ᐃᐃᒫ ᓴ ᐃᑭ ᑳᑮᓂᓵᐙᒡ ᑳᑮ ᑲᓅᑕᒪᐙᓂᐸᓐ ᑭᔐᒪᓂᑑᓐ᙮

23:32b.MAT.023.032 ᐱᓵᓐ ᑕᔥ ᐃᑯ ᑮᔑᑑᒃ ᑳᑮᒫᒌ ᐃᔑᒋᑫᐙᑯᐸᓀᓐ ᒣᐎᔕ ᑭᑫᑌᔭᐋᒥᐙᒃ!

23:33b.MAT.023.033 ᑮᓇᐙ ᓴ ᑭᓀᐱᑰᒃ, ᒪᒋᑭᓀᐱᑰᒃ ᑲᔦ ᑳᓂᑖᐎᑭᐃᓀᒀ! ᐋᑎ ᑕᔥ ᐁᓀᑕᒣᒃ ᑫᐅᒋ ᑲᔥᑭᑑᔦᒃ ᒋᐃᓈᑯᓂᑰᓯᐌᒃ ᒪᒋ ᐃᔥᑯᑌᕽ ᒋᐃᔖᓯᐌᒃ?

23:34b.MAT.023.034 ᑭᐐᑕᒪᐎᓂᓂᒻ ᑕᔥ, ᑭᑲ ᐃᔑᓂᔕᐊᒪᐎᓂᓂᒻ ᓴ ᐃᑭ ᐅᑎᐹᒋᒨᒃ, ᑳᑲᑮᑖᐌᑕᒧᐙᒡ ᑲᔦ, ᐅᑭᑭᓄᐊᒫᑫᒃ ᑲᔦ᙮ ᐋᓂᑕ ᑕᔥ ᑭᑲ ᓂᓵᐙᒃ, ᐋᓂᑕ ᑲᔦ ᐋᔑᑌᔮᑎᑯᕽ ᑭᑲ ᐊᑯᓴᑲᐙᐙᒃ, ᐋᓂᑕ ᑕᔥ ᑭᑲ ᐸᐸᔕᔐᐙᐙᒃ ᐃᐃᒫ ᑳᔑ ᐊᔭᔮᓂᑭᓐ ᑭᑕᓇᒥᐁᐎᑲᒥᑯᐙᕽ ᒋᐸᐹᒫᒧᑮᔦᒃ ᐁᔑ ᐊᔫᑌᓈᐗᓂᓂᒃ᙮

23:35b.MAT.023.035 ᒦᑕᔥ ᐅᐅ ᑮᓇᐙ ᑫᐅᒋ ᓇᓇᐊᓯᑰᔦᒃ, ᑳᑮ ᑑᑕᐎᑣ ᑲᑭᓇ ᑳᑮ ᑾᔭᒀᑎᓯᐙᒡ ᑳᑮ ᐱᓂᓯᑣ᙮ ᑳᑮ ᑾᔭᒀᑎᓯᒡ ᐁᐸᓬ ᓂᑕᒻ ᑮᓂᒋᑲᓂᐎ᙮ ᐊᐊ ᑕᔥ ᓭᑲᕒᐋᔭ ᑳᑮᐅᑯᓯᓯᒥᑯᒡ ᐯᕒᐊᑳᔭᐗᓐ, ᐃᔥᒀᒡ ᑮᓂᒋᑲᓂᐎ᙮ ᒦ ᓴ ᐊᐌ ᑭᒋᐊᓇᒥᐁᐎᑲᒥᑯᕽ ᑳᑮ ᑕᔑᓂᓯᓐᒡ ᐃᐃᒫ ᓇᓴᐗᔭᐄ ᑳᑮᐃᔑ ᐊᔮᓂᒃ ᑳᑮᐃᔑ ᑯᑖᓀᑖᑾᓂᓂᒃ ᐲᑎᒃ, ᐃᐃᒫ ᑕᔥ ᑲᔦ ᑳᑮᐃᔑ ᐸᑭᑎᓈᓱᓈᓂᐗᓂᓂᒃ᙮ ᑮᓇᐙ ᓴ ᐄᑐᒃ ᑎᓄ ᑳᑮᓂᓭᒃ᙮

23:36b.MAT.023.036 ᑫᑫᑦ ᑕᔥ ᑭᑎᓂᓂᓂᒻ: ᐃᐃᐌᓂ ᓴ ᐅᑲᒀᑕᑭᐃᑰᐎᓂᐙ ᐃᑭ ᑲᑭᓇ ᑳᑮᓂᔑᐌᐙᒡ, ᐅᑲ ᐸᑲᒥᔥᑳᑯᓈᐙ ᓅᑯᒻ ᑳᐱᒫᑎᓯᐙᒡ᙮

23:37b.MAT.023.037 ᐆ ᒉᕒᐆᓴᓬᐊᒻ ! ᑮᓇᐙ ᒉᕒᐆᓴᓬᐊᒥᕽ ᑳᐊᔮᔦᒃ! ᑮᓇᐙ ᑳᓂᓭᒀ ᑳᑲᓅᑕᒪᐙᐙᒡ ᑭᔐᒪᓂᑑᓐ, ᑳᐸᐲᒧᓯᓇᐁᒀ ᑲᔦ ᐅᐐᑕᒫᑫᐞ ᑭᔐᒪᓂᑑ ᑳᐃᔑᓂᔕᐊᒪᐎᓀᒃ! ᒨᔕᒃ ᓴ ᐁᑮᐃᔑ ᒥᓴᐌᑕᒫᓐ ᐁᐐᒫᐗᑑᓂᓇᑰᒃ ᑖᐱᔥᑰ ᓅᔐ ᐹᑲᐋᒀᓐ ᑳᐃᔑ ᑕᐱᓇᐎᔥᑲᐙᒡ ᐅᓃᒑᓂᓴᐞ ᐃᐃᒫ ᐊᓈᒥ ᓂᑸᑲᓂᕽ᙮ ᑳᐐᓐ ᑕᔥ ᑭᑮ ᐸᑭᑎᓂᓰᒻ᙮

23:38b.MAT.023.038 ᒦᑕᔥ ᑭᑭᒋᐊᓇᒥᐁᐎᑲᒥᑯᐙ ᑕᓇᑲᒋᑳᑌ, ᑕᐱᔑᔑᒀ ᑲᔦ᙮

23:39b.MAT.023.039 ᑭᑎᓂᓂᓂᒻ, ᑳᐐᓐ ᑕᔥ ᐐᑳ ᒦᓇᐙ ᑭᑲ ᐙᐸᒥᓰᒻ, ᐹᒫ ᓴ ᐊᐲ ᐅᒋᒋᓭᒃ ᑮᐃᑭᑐᔦᒃ: ᑕᔕᐌᑖᑯᓯ ᐗᐊ ᑳᐱ ᑕᑯᔑᕽ ᐃᐃᒫ ᐅᑎᔑᓂᑳᓱᐎᓂᓃᕽ ᐃᓂ ᑳᑎᐯᒋᑫᓂᒡ᙮ ᒦ ᐃ ᑳᐃᑭᑐᒡ᙮

24

24:1b.MAT.024.001 ᒋᓴᔅ ᑕᔥ ᐁᑮᐊᓂᐅᒋ ᒫᒑᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐅᑭᑭᓄᐊᒪᐙᑲᓇᐞ ᐅᑮᐱ ᐊᑕᐙᐸᒥᑰᐞ ᐁᐐᐙᐸᑕᐃᑯᒡ ᐋᓃᓐ ᑳᐃᔑᒋᑳᑌᓂᑭᓐ ᑭᒋᐊᓇᒥᐁᐎᑲᒥᑯᕽ ᑳᑮᐅᒋ ᑎᐯᑖᑾᓂᓂᑭᓐ ᐃᔑᒫᒌᐎᓇᓐ᙮

24:2b.MAT.024.002 ᐅᑮᐃᓈᐞ ᐃᑕᔥ: ᐱᓵᓂᑯ ᐙᐸᑕᒧᒃ ᐅᓄ ᐃᔑᒫᒌᐎᓇᓐ᙮ ᑭᐐᑕᒪᐎᓂᓂᒻ ᑕᔥ, ᐃᑭ ᓴ ᐊᓯᓃᒃ ᑳᐙᐸᒣᒀ ᐃᐃᒫ ᑳᐃᔑ ᐊᐱᐙᒡ ᑳᐐᓐ ᑕᐊᐱᓰᐗᒃ, ᐋᓃᔥ ᑲᑭᓇ ᑕᓈᓃᓯᐌᐱᓂᑳᓱᐗᒃ᙮

24:3b.MAT.024.003 ᐁᓇᒪᑕᐱᒡ ᐃᑕᔥ ᐃᐃᒫ ᐱᑾᑎᓈᕽ ᐋᓬᐃᑉ ᑭᑎᑳᓈᑎᑯᑳᕽ ᐁᐃᔑᓂᑳᑌᓂᒃ, ᐅᑭᑭᓄᐊᒪᐙᑲᓇᐞ ᐅᑮ ᐱᓈᓯᑳᑰᐞ ᐁᑮ ᑮᒨᒋ ᑲᑴᒋᒥᑯᒡ: ᐐᑕᒪᐎᔑᓈᒻ ᐋᓃᓐ ᐊᐲ ᑫᐃᔑᓭᒃ ᐃᐃᐌ ᑳᐃᑭᑐᔭᓐ᙮ ᐋᓃᓐ ᑫᐅᒋ ᓂᓯᑕᐎᓈᑾᒃ ᐐᐱ ᑕᑯᔑᓇᓐ, ᐐᐃᔥᒀᓭᑭᓐ ᐅᓄ ᑫᑰᓇᓐ ᒣᒀ ᑳᐙᐸᑕᒪᕽ᙮

24:4b.MAT.024.004 ᒋᓴᔅ ᓴ ᑮᐃᑭᑐ: ᐊᔮᒀᒥᓯᒃ, ᒋᐗᓂᐎᓂᓯᓄᐎᓀᒃ ᐊᐎᔭ᙮

24:5b.MAT.024.005 ᐋᓃᔥ ᑕᐹᑏᓄᐗᒃ ᒋᐱ ᑕᑯᔑᓄᐙᒡ ᐃᐃᒫ ᓂᑎᔑᓂᑳᓱᐎᓂᕽ ᒋᐃᑭᑐᐙᒡ: ᓃᓐ ᓴ ᑭᔐᒪᓂᑑ ᐅᑑᓈᐸᒫᑲᓇᓐ᙮ ᓃᐳᐗᐞ ᐃᑕᔥ ᐅᑲ ᐗᓂᐎᓈᐙᐞ ᐯᒫᑎᓯᓂᒡ᙮

24:6b.MAT.024.006 ᑭᑲ ᑌᐱᑖᒻ ᓴ ᐃ ᒦᑳᑎᐎᓐ, ᑭᑲ ᓈᓅᑖᒻ ᑲᔦ ᐁᒫᒦᑳᑎᓈᓂᐗᕽ᙮ ᑫᑯ ᑕᔥ ᓭᑭᓯᑫᒃ᙮ ᐱᓇᒫ ᓴ ᐅᐅ ᑕᐃᔑᓭ ᒋᑆ ᐃᔥᒀᓭᑭᓐ ᐅᓄ ᑫᑰᓇᓐ ᒣᒀ ᑳᐙᐸᑕᒪᕽ᙮

24:7b.MAT.024.007 ᑕᑭᒋ ᒦᑳᑎᐗᒃ ᓴ ᐯᐸᑳᓐ ᑳᑕᓶᐙᓇᑭᓯᐙᒡ ᐅᐅᒫ ᐊᑮᕽ, ᑲᔦ ᑳᑕᓯᑭᓐ ᐅᑭᒫᐎᐎᓇᓐ᙮ ᐯᐸᑳᓐ ᒥᓯᐌ ᒦᒋᒻ ᑕᓈᓅᑌᓭ, ᐯᐸᑳᓐ ᑲᔦ ᐊᑮᕽ ᑕᐃᔑ ᑯᑯᔥᑯᓭ᙮

24:8b.MAT.024.008 ᐅᓄ ᑕᔥ ᑳᐐᑕᒫᓐ ᒦ ᑫᔑᓈᑾᑭᓐ ᑖᐱᔥᑰ ᐃᑴ ᑳᒫᒋᐋᑯᓯᒡ ᐁᐐᐙᐸᒫᐗᓱᒡ᙮

24:9b.MAT.024.009 ᑭᑲ ᑕᑯᓂᑰᒻ, ᑭᑲ ᒦᑭᐙᓂᐎᒻ ᑲᔦ ᒋᑲᒀᑕᑭᐃᑰᔦᒃ, ᒦᑕᔥ ᑫᔑ ᓂᓯᑰᔦᒃ᙮ ᑲᑭᓇ ᐊᐎᔭ ᐁᑕᓶᐙᓇᑭᓯᒡ ᑭᑲ ᔒᑫᓂᒥᑯᐙ ᓃᓐ ᐅᒋ᙮

24:10b.MAT.024.010 ᑕᐹᑏᓄᐗᒃ ᑲᔦ ᑫᐋᓇᐌᒋᑫᐙᒡ ᐃᐃ ᐊᐲ᙮ ᑕᒪᒥᔑᑎᐗᒃ ᑲᔦ, ᑕᔒᑫᓂᑎᐗᒃ ᑲᔦ᙮

24:11b.MAT.024.011 ᒦᑕᔥ ᐋᐱᒋ ᑕᐹᑏᓄᐗᒃ ᑫᐃᓍᓂᑎᓱᐙᒡ ᑳᑲᓅᑕᒪᐙᐙᒡ ᑭᔐᒪᓂᑑᓐ᙮ ᒦᑕᔥ ᓃᐳᐗᐞ ᑫᔑ ᐗᓂᔑᒫᐙᒡ ᐯᒫᑎᓯᓂᒡ᙮

24:12b.MAT.024.012 ᑫᓂ ᐊᐲᒋ ᐹᑏᓇᑎᒃ ᐃᑕᔥ ᒪᒋᑑᑕᒧᐎᓐ, ᐃᐃ ᓴ ᓃᐳᐗᐞ ᐯᒫᑎᓯᐙᒡ ᑳᐃᔑ ᓵᑭᐃᑎᐙᒡ, ᐲᓂᔥ ᑳᐐᓐ ᑕᓂ ᓵᑭᐃᑎᓰᐗᒃ᙮

24:13b.MAT.024.013 ᐊᐎᔭ ᓴ ᑫᔕᔒᐯᑕᕽ ᐲᓂᔥ ᐌᑎ ᐃᔑᐊᐲ ᑳᐐᐃᔥᒀᓭᒃ ᑫᑰᓇᓐ ᓅᑯᒻ ᑳᐙᐸᒋᑳᑌᒃ, ᒦᓴ ᐊᐊ ᑫᐱᒫᒋᐃᓐᒡ᙮

24:14b.MAT.024.014 ᐱᓇᒫ ᓴ ᐅᐅ ᑳᔑ ᒥᓍᑐᑌᒃ ᐅᐅ ᑭᔐᒪᓂᑑ ᐅᑎᐯᒋᑫᐎᓐ ᑕᐸᐹᑎᐹᑐᑌ ᒥᓯᐌ ᐊᑮᕽ ᑲᑭᓇ ᐯᒫᑎᓯᐙᒡ ᒋᓅᑕᒧᐙᒡ᙮ ᒦᑕᔥ ᐃᐃ ᐸᔦᔥ ᑲᑭᓇ ᑫᑰᓐ ᒋᐃᔥᒀᓭᒃ᙮

24:15b.MAT.024.015 ᑭᑲ ᐙᐸᑕᒧᐙᒻ ᐃᓴ ᐃᐃᐌᓂ ᑳᐐ ᑲᒀᓂᓴᑭᓈᑾᓂᓂᒃ ᑳᓂᔑᐗᓈᒋᒋᑫᒪᑲᓂᓂᒃ ᑖᓂᔫ ᑳᑮ ᑕᔑᑕᕽ ᑳᑮ ᑮᑭᑐᑕᒪᐙᒡ ᑭᔐᒪᓂᑑᓐ᙮ ᐃᐃᒫ ᓴ ᑭᒋᐊᓇᒥᐁᐎᑲᒥᑯᕽ ᑕᐃᔑ ᓃᐸᐐᒪᑲᓂᓂ᙮ ᑮᓇᐙ ᑫᐊᓇᒥᑑᔦᒃ ᐅᐅ, ᓂᓯᑐᑕᒧᒃ!

24:16b.MAT.024.016 ᒦᔥ ᐃᐃᐌ ᐊᐲ, ᐃᑭ ᓴ ᑳᑖᐙᒡ ᐃᐃᒫ ᒎᑏᔮᑳᕽ ᐌᑎ ᓴ ᑕᐊᐸᐃᐌᐗᒃ ᑳᔑ ᐸᐲᑾᑎᓈᓂᒃ᙮

24:17b.MAT.024.017 ᐊᐎᔭ ᑲᔦ ᑳᔑ ᓇᐸᑳᓂᒃ ᐗᑭᒋᐙᑳᐃᑲᓐ ᑳᐊᔮᒡ, ᑳᐐᓐ ᑕᐃᔑᓭᓰ ᐊᓂᓃᓵᑕᐌᒡ ᒋᓂ ᒫᒌᑑᐸᓐ ᐅᑕᔭᐄᒪᓐ ᐃᐃᒫ ᐅᐙᑳᐃᑲᓂᕽ᙮

24:18b.MAT.024.018 ᐊᐎᔭ ᑲᔦ ᑳᐊᓄᑮᒡ ᐌᑎ ᐅᑭᑎᑳᓂᕽ ᑳᐐᓐ ᐅᑲ ᐱᑮᐌᓄᑕᓰᓐ ᒋᐱᓈᓯᑲᕽ ᐃᐃ ᑳᑮ ᑮᒋᑯᔥᑲᕽ ᐅᑲᔥᑮᑮᐎᓐ᙮

24:19b.MAT.024.019 ᐃᐃᐌ ᑕᔥ ᐊᐲ ᑮᔑᑲᒃ, ᐋᐱᒋ ᑕᐅᒑᓂᒥᓯᐗᒃ ᐃᑭ ᐃᑴᐗᒃ ᑳᑭᑭᔥᑲᐙᐗᓱᐙᒡ, ᐃᑭ ᑲᔦ ᐅᒫᒫᒫᒃ ᑳᓅᓂᐋᐙᒡ ᐅᓃᒑᓂᓯᐙᐞ᙮

24:20b.MAT.024.020 ᐊᓇᒥᐁᑕᐎᒃ ᑕᔥ ᑭᔐᒪᓂᑑ, ᒋᐱᐴᓯᓄᒃ, ᒋᐊᓉᐲᐎ ᑮᔑᑲᓯᓄᒃ ᑲᔦ ᐃᐃ ᐊᐲ ᒫᒌᐸᐃᐌᔦᒃ᙮

24:21b.MAT.024.021 ᐃᐃᐌ ᓴ ᒫᐗᒡ ᑳᐐ ᑭᒋᐅᒑᓂᒪᑲᒥᑲᒃ, ᑳᐐᓐ ᐐᑳ ᐱᒥ ᐃᔑᐌᐸᓯᓅᓐ ᐊᐸᓀ ᑳᐅᒋ ᒫᒋᐊᑮᐗᕽ ᐲᓂᔥ ᓅᑯᒻ ᑳᑮᔑᑲᒃ᙮ ᑳᐐᓐ ᑲᔦ ᒦᓇᐙ ᐐᑳ ᑕᓂ ᐃᔑᐌᐸᓯᓅᓐ᙮

24:22b.MAT.024.022 ᑭᔐᒪᓂᑑ ᐋᔕ ᐅᑮ ᑕᑾᑭᑖᓐ ᐋᓃᓐ ᑕᓱᑮᔑᒃ ᑫᑭᒋ ᐃᔑᑮᔑᑲᓂᓂᒃ᙮ ᑮᔥᐱᓐ ᑕᔥ ᐃᐃ ᐃᔑᒋᑫᓯᑭᐸᓐ, ᑳᐐᓐ ᐊᐎᔭ ᑖᐱᒪᑎᓯᓰ᙮ ᐃᐃ ᑕᔥ ᐋᔕ ᑳᑮᐅᓈᐸᒫᒡ ᐁᐐ ᐱᒫᒋᐋᒡ ᐯᒫᑎᓯᓂᒡ, ᒦᑕᔥ ᑫᐅᒋ ᑕᑾᑭᑕᕽ ᑕᓱᑮᔑᒃ ᑫᑭᒋ ᐃᔑᑮᔑᑲᓂᓂᒃ᙮

24:23b.MAT.024.023 ᑮᔥᐱᓐ ᑕᔥ ᐊᐎᔭ ᐃᓂᓀᒃ: ᐃᓇ ᐅᓄᐌᓂᐗᓐ ᑭᔐᒪᓂᑑ ᐅᑑᓈᐸᒫᑲᓇᓐ! ᑯᒫ ᑲᔦ: ᐊᐊᐌᑎ ᓴ ᑳᒪᑗᐊᔮᒡ! ᑫᑯ ᐊᐙᒡ ᐸᑮ ᑌᐺᑕᑫᒃ᙮

24:24b.MAT.024.024 ᑕᐹᑏᓄᐗᒃ ᐃᓴ ᑫᐃᓍᓂᑎᓱᐙᒡ ᑭᔐᒪᓂᑑᓐ ᐅᑑᓈᐸᒫᑲᓂᓂ, ᐃᑭ ᑲᔦ ᑫᐃᓍᓂᑎᓱᐙᒡ ᐁᑮᑭᑐᑕᒪᐙᒡ ᑭᔐᒪᓂᑑᓐ᙮ ᒦᓴ ᐃᑭ ᑳᐗᓂᐎᔑᐌᐙᒡ᙮ ᐋᐱᒋ ᓴ ᑕᒪᒫᑕᐎᒋᑫᐗᒃ, ᒦᑕᔥ ᑫᐅᒋ ᒫᒪᑳᒋᒋᑫᐙᒡ, ᒋᐗᓂᐎᓈᐙᒡ ᐴᔥᑫ ᐋᔕ ᑭᔐᒪᓂᑑᓐ ᑳᑮᐅᓈᐸᒫᓂᒡ ᐯᒫᑎᓯᓂᒡ, ᑮᔥᐱᓐ ᑲᔥᑭᑑᐙᒡ᙮

24:25b.MAT.024.025 ᐱᓯᑕᐎᔑᒃ! ᑭᑮᔖᒋ ᐐᑕᒪᐎᓂᓂᒻ ᓴ ᐙᐃᔑᐌᐸᒃ᙮

24:26b.MAT.024.026 ᑮᔥᐱᓐ ᑕᔥ ᐊᐎᔭ ᐃᓂᓀᒃ: ᐌᑎ ᓴ ᐱᑾᑕᑲᒥᒃ ᐊᔮ, ᑫᑯ ᑕᔥ ᑮᓇᐙ ᐃᔖᑫᒃ᙮ ᑯᒫ ᑲᔦ ᑭᑲ ᐃᑯᐙᒃ: ᐃᓇᔥᑫ ᑮᒨᒋ ᐊᔮ ᐃᓴ ᐲᑎᒃ ᐃᐃᒫ᙮ ᑫᑯ ᑕᔥ ᑌᐺᑕᑫᒃ᙮

24:27b.MAT.024.027 ᑖᐱᔥᑰ ᓴ ᐙᐸᓄᕽ ᐁᐅᒋ ᐙᑌᓭᒃ, ᓂᑳᐲᐊᓄᕽ ᐃᑕᔥ ᐁᐃᓈᓴᑾᓀᓭᒃ, ᒦᓴ ᑫᐃᔑᓈᑾᓂᓂᒃ ᐊᐲ ᐱᑕᑯᔑᕽ ᐊᐊ ᐃᓂᓂ ᐅᑯᓯᓴᓐ᙮

24:28b.MAT.024.028 ᐋᑎ ᓴ ᑳᔑ ᐊᑌᒃ ᑳᓂᐴᒪᑲᒃ ᐐᔭᐎᒫ, ᒦᓴ ᐃᐃᒫ ᑫᔑ ᐅᑯᐲᒋᓭᐙᒡ ᐃᑭ ᒥᑕᔥᑭᑎᒀᓈᑫᒃ᙮

24:29b.MAT.024.029 ᔐᒫᒃ ᐃᑕᔥ ᑮᐃᔥᒀᓭᑭᓐ ᐃᓂ ᑳᐐᐅᒑᓂᒥᑮᔑᑲᑭᓐ, ᑮᓯᔅ ᐃᓴ ᑕᑲᔥᑮᑎᐱᑭᓯ, ᑎᐱᑭᑮᓯᔅ ᑲᔦ ᑳᐐᓐ ᑕᓵᑳᓯᑫᓰ, ᐗᓇᑯᔕᒃ ᑲᔦ ᐃᔥᐱᒥᕽ ᑕᐅᒋ ᐸᑭᔑᓅᒃ, ᑳᒪᔥᑲᐌᑖᑾᑭᓐ ᐃᔥᐱᒥᕽ ᑕᐯᐸᑳᓂᓭᐗᓐ᙮

24:30b.MAT.024.030 ᑫᑰᓐ ᓴ ᑕᓈᑾᓐ ᑫᐅᒋ ᓂᓯᑕᐎᓂᑳᑌᓂᒃ ᐁᐐ ᑕᑯᔑᕽ ᐊᐊ ᐃᓂᓂ ᐅᑯᓯᓴᓐ ᐃᐃᒫ ᑮᔑᑯᕽ᙮ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᐅᐅᒫ ᐊᑮᕽ ᓴ ᑕᒪᐎᐗᒃ ᐊᐲ ᐙᐸᒫᐙᒡ ᐃᓂ ᑭᔐᒪᓂᑑᓐ ᐅᑲᔥᑭᐁᐎᓰᒥᓂ ᐱᒥ ᐃᔑ ᑕᑯᔑᓂᓂᒡ ᐃᐃᒫ ᐗᑸᕽ ᐃᔥᐱᒥᕽ ᑳᐊᑰᑌᓂᑭᓐ, ᐁᔑ ᒪᔥᑲᐎᓰᓂᒡ ᑲᔦ ᐁᔑ ᑭᒋᐅᑭᒫᐌᑖᑯᓯᓂᒡ᙮

24:31b.MAT.024.031 ᑭᒋᐴᑖᒋᑲᓐ ᐃᓴ ᑕᓅᑖᑾᓐ, ᒦᑕᔥ ᐊᐊ ᑫᐱᑕᑯᔑᕽ ᑫᔑ ᐃᔑᓂᔕᐙᒡ ᐃᐃ ᐅᑌᒐᓬᐃᒪᐞ ᓃᐎᕽ ᐃᓇᑫ ᑳᐅᑖᓂᒪᓂᓂᒃ, ᒥᓯᐌ ᐊᑮᕽ ᒋᐅᒋ ᒫᒨᔕᑭᓈᓂᒡ ᐃᐃ ᐋᔕ ᑳᑮᐅᓈᐸᒫᒡ ᐯᒫᑎᓯᓂᒡ ᐁᐐ ᐱᒫᒋᐋᒡ᙮

24:32b.MAT.024.032 ᑫᑰᓐ ᑕᔥ ᐅᒋ ᑭᑫᑕᒧᒃ ᐊᐊ ᑳᐋᐌᒋᑳᓱᒡ ᑭᑎᑳᓈᑎᒃ, ᐱᒃ ᑳᑎᓍᑎᑯᐎᒡ᙮ ᑮᔥᐱᓐ ᓴ ᐃᐃ ᐗᑎᑾᓐ ᑮᐊᓂ ᓅᑲᒃ, ᐁᐊᓂ ᓵᑭᐸᑭᒃ, ᒦᓴᐃ ᐋᔕ ᐁᐐᓃᐱᕽ᙮

24:33b.MAT.024.033 ᑫᑮᓇᐙ ᑕᔥ ᐙᐸᑕᒣᒃ ᐃᐃ ᑲᑭᓇ ᑫᑰᓇᓐ, ᒦᓴ ᒋᑭᑫᑕᒣᒃ ᐋᔕ ᐁᐅᒋᒋᓭᒃ ᒋᒫᒋᓭᑭᓐ ᐃᓂ ᑳᐃᓂᓇᑰᒃ᙮

24:34b.MAT.024.034 ᒫᒥᑲᐎᒃ ᑕᔥ ᐅᐅ! ᑳᐐᓐ ᓴ ᑕᒑᑭᓂᐳᓰᐗᒃ ᐅᑯ ᑳᐱᒫᑎᓯᐙᒡ, ᒦᐃ ᐋᔕ ᑲᑭᓇ ᒋᐃᔑᐌᐸᑭᓐ ᐅᓄ ᑳᐐᑕᒪᐎᓇᑰᒃ᙮

24:35b.MAT.024.035 ᒥᓴᐙ ᑯ ᑮᔑᒃ, ᐊᑭ ᑲᔦ ᐃᔥᒀᓭᑭᓐ, ᓂᑎᑭᑐᐎᓇᓐ ᑕᔥ ᐐᓐ ᑳᐐᓐ ᐐᑳ ᑕᐃᔥᒀᓭᓯᓅᓇᓐ ᑳᔑ ᑌᐺᒪᑲᑭᓐ᙮

24:36b.MAT.024.036 ᑳᐐᓐ ᓴ ᐊᐎᔭ ᐅᑭᑫᑕᓰᓐ ᐊᐲ ᑮᔑᑲᓂᓂᒃ, ᐋᓃᓐ ᑲᔦ ᑫᑕᓱᑎᐸᐃᑲᓀᔮᓂᒃ ᐃᐃ ᐊᐲ ᐅᒋᒋᓭᓂᒃ᙮ ᐁᒐᓬᐊᒃ ᑭᒋᑮᔑᑯᕽ ᑳᐊᔮᐙᒡ ᑳᐐᓐ ᐅᑭᑫᑕᓰᓈᐙ, ᑲᔦ ᓃᓐ ᐅᑯᓯᓯᒫ ᑳᐐᓐ ᓂᑭᑫᑕᓰᓐ᙮ ᒦ ᐁᑕ ᐊᐊ ᐌᔫᓯᒥᓐᒡ ᑫᑫᑕᕽ᙮

24:37b.MAT.024.037 ᐃᐃ ᓴ ᑳᑮᐃᔑᐌᐸᒃ ᒣᐎᔕ ᐊᐲ ᓅᐗ ᑮᐱᒫᑎᓯᒡ, ᒦᓴ ᑫᐃᔑᐌᐸᒃ ᐊᐲ ᑭᔐᒪᓂᑑ ᐅᑲᔥᑭᐁᐎᓯᒪᓐ ᐱᑕᑯᔑᓂᓂᒡ᙮

24:38b.MAT.024.038 ᐊᐲ ᑕᔥ ᒋᑆ ᓂᑭᐲᒃ ᐃᐃ ᐊᑭ ᒣᐎᔕ ᐯᒫᑎᓯᐙᒡ ᑮᐙᐐᓯᓂᐗᒃ, ᑮᒥᓂᑴᐗᒃ ᑲᔦ, ᑮᐐᑎᑫᑎᐗᒃ ᑲᔦ, ᐲᓂᔥ ᐊᐸᓀ ᐁᑮᔑᑲᓂᓂᒃ ᓅᐗ ᑮᐴᓯᒡ ᐃᐃᒫ ᑭᒋᒌᒫᓂᕽ᙮

24:39b.MAT.024.039 ᑳᐐᓐ ᑕᔥ ᐅᑮ ᑭᑫᑕᓰᓈᐙ ᐋᓃᓐ ᑳᐃᓇᑲᒥᑲᓂᓂᒃ, ᐹᓂᒫ ᓴ ᓂᐲᓂ ᐁᑮᓂᑭᐸᓂᑯᐙᒡ ᐁᑮᒫᒌᔮᐳᑯᐙᒡ ᑲᑭᓇ᙮ ᒦᑕᔥ ᐯᔑᑾᓐ ᑫᐃᔑᐌᐸᒃ ᐊᐲ ᐃᓂᓂ ᐅᑯᓯᓴᓐ ᐱᑕᑯᔑᓂᓂᒡ᙮

24:40b.MAT.024.040 ᓃᔑᓐ 2 ᓴ ᐃᓂᓂᐗᒃ ᐊᓄᑮᐙᒡ ᑭᑎᑳᓂᕽ, ᐯᔑᒃ ᓴ ᑕᒫᒌᒋᑲᓂᐎ, ᑯᑕᒃ ᑕᔥ ᑕᓇᑲᒋᑲᓂᐎ᙮

24:41b.MAT.024.041 ᓃᔑᓐ 2 ᐃᑴᐗᒃ ᐸᑴᔑᑲᓇᓐ ᑳᐱᑭᔥᑲᑖᐗᑲᐙᐙᒡ, ᐯᔑᒃ ᓴ ᑕᒫᒌᒋᑲᓂᐎ, ᑯᑕᒃ ᑕᔥ ᑕᓇᑲᒋᑲᓂᐎ᙮

24:42b.MAT.024.042 ᐊᔕᐙᐱᒃ ᐃᑕᔥ, ᐋᓃᔥ ᑳᐐᓐ ᑭᑭᑫᓂᒫᓯᐙᐙ ᐊᐲ ᑮᔑᑲᓂᓂᒃ ᑫᑕᑯᔑᕽ ᑭᑎᐯᒋᑫᒥᐙ᙮

24:43b.MAT.024.043 ᒫᒥᑲᐎᒃ ᑕᔥ ᐅᐅ, ᑮᔥᐱᓐ ᐃᓂᓂ ᑳᑎᐯᑕᕽ ᐙᑳᐃᑲᓂᓂ ᑭᑫᓂᒫᒡ ᐊᐲ ᐙᐱᑕᑯᔑᓂᓂᒡ ᐅᑮᒨᒋᔥᑲᓐ, ᑳᐐᓐ ᑖᓂᐹᓰ, ᑳᐐᓐ ᑲᔦ ᐅᑖ ᐸᑭᑎᓈᓰᓐ ᐃᓂ ᐅᑮᒨᒋᔥᑲᓐ ᒋᐲᑾᐊᒥᓂᒡ ᒋᐱᐲᑎᑫᓂᒡ ᐅᐙᑳᐃᑲᓂᕽ᙮

24:44b.MAT.024.044 ᒦᑕᔥ ᐯᔑᑾᓐ ᑫᑮᓇᐙ ᑫᔑ ᐅᔒᑖᔦᑭᐸᓐ ᒨᔕᒃ, ᐋᓃᔥ ᐃᓂᓂ ᐅᑯᓯᓴᓐ ᑕᑕᑯᔑᓅᓐ ᐊᐲ ᑎᐸᐃᑲᓂᕽ ᑫᐲᐃᒫᓯᐌᒃ᙮

24:45b.MAT.024.045 ᐊᐌᓀᓐ ᓴ ᐊ ᑾᔭᒃ ᑳᑲᑮᑖᐌᑕᕽ ᐊᓄᑮᐋᑲᓐ? ᒦᓴ ᐊᐊᐌ ᑳᒦᓂᑯᒡ ᐅᑑᑭᒫᒪᓐ ᑳᒫᒑᓂᒡ, ᒋᑎᐯᓂᒫᒡ ᑯᑕᒃ ᐊᓄᑮᐋᑲᓇᐞ ᒋᐊᔕᒫᒡ ᐊᐲ ᐅᒋᒋᓭᓂᒃ ᒋᐐᓯᓂᓈᓂᐗᓂᓂᒃ᙮

24:46b.MAT.024.046 ᐋᐱᒋ ᓴ ᑕᒥᓄᓭ ᐊᐊ ᐊᓄᑮᐋᑲᓐ ᐊᐲ ᑕᑯᔑᓂᓂᒡ ᐅᑑᑭᒫᒪᓐ ᐁᐙᐸᒥᑯᒡ ᐁᐃᔑᒋᑫᒡ ᑳᑮᐃᔑ ᐊᓅᓂᑯᐸᓐ᙮

24:47b.MAT.024.047 ᑫᑫᑦ ᓴ ᑭᑎᓂᓂᓂᒻ, ᐊᐊ ᐊᓄᑮᐋᑲᓐ ᐅᑲ ᒦᓂᑰᓐ ᐅᑑᑭᒫᒪᓐ ᑲᑭᓇ ᐅᑕᔭᐄᒥᓂ ᒋᓈᓈᑲᒋᑑᒡ᙮

24:48b.MAT.024.048 ᑮᔥᐱᓐ ᑕᔥ ᐐᓐ ᒪᒋᐊᓄᑮᐋᑲᓐ ᑎᓄᐎᐸᓐ ᑖᐃᓀᑕᒻ: ᑳᐐᓐ ᓴ ᐐᐸ ᑕᑕᑯᔑᓰ ᓂᑑᑭᒫᒻ᙮

24:49b.MAT.024.049 ᒦᑕᔥ ᑫᔑ ᒫᒌᐸᐸᑭᑌᐙᒡ ᐅᐐᑕᓄᑮᒫᑲᓇᐞ, ᒋᐐᒋᐐᓯᓃᒫᒡ ᒋᐐᒋᒥᓂᑴᒫᒡ ᑲᔦ ᐃᐃ ᐅᒥᓂᑴᐞ᙮

24:50b.MAT.024.050 ᐊᐊ ᑕᔥ ᑎᓄ ᐊᓄᑮᐋᑲᓐ ᑕᑕᑯᔑᓅᓐ ᐅᑑᑭᒫᒪᓐ ᓂᑯᑎᕽ ᑮᔑᑲᓂᓂᒃ ᐊᐲ ᐁᐲᐋᓯᒃ, ᐁᑭᑫᓂᒫᓯᒃ ᐋᓃᓐ ᐊᐲ ᑕᓱᑎᐸᐃᑲᓀᔮᓂᒃ ᑫᑕᑯᔑᓂᓂᒡ᙮

24:51b.MAT.024.051 ᐐᑫ ᐅᑲ ᑲᒀᑕᑭᐃᑰᓐ ᐅᑑᑭᒫᒪᓐ, ᒦᑕᔥ ᑲᔦ ᑫᑑᑖᑯᒡ ᑖᐱᔥᑰ ᑳᑑᑕᐎᒥᓐᒡ ᐅᒥᓍᑎᓰᔑᑑᐞ᙮ ᒦᑕᔥ ᐌᑎ ᑫᑕᔑᒪᐎᒡ, ᒦ ᑲᔦ ᐌᑎ ᑫᑕᔑᒪᑗᔮᐱᑌᓭᒡ ᑫᐊᐲᒋᒥᒋᓇᐌᓯᒡ᙮

25

25:1b.MAT.025.001 ᐊᐲ ᓴ ᐃᓂᓂ ᐅᑯᓯᓴᓐ ᐱᐅᑭᒫᑲᑕᒥᓐᒡ ᑲᑭᓇ ᑫᑰᓐ, ᐊᒦᓴ ᑫᐃᔑᓈᑾᒃ ᑖᐱᔥᑰ ᒥᑖᓱ ᐯᑭᐅᔥᑭᓃᑭᑴᒃ ᑳᑮᒫᒌᑑᐙᒡ ᐅᐱᒥᑌᐙᓴᑯᓀᒋᑲᓂᐙᓐ, ᐁᑮᒫᒑᐙᒡ ᐁᐊᑕ ᒣᒀᔥᑲᐙᐙᒡ ᐃᓂ ᐃᓂᓂᐗᓐ ᑳᐊᑕ ᑭᒋᐐᑎᑫᓂᒡ ᐁᐐᐊᓂ ᐐᒌᐙᐙᒡ᙮

25:2b.MAT.025.002 ᓈᓇᓐ ᑕᔥ ᑮᑲᑮᑖᐌᑕᒨᒃ, ᐃᑭ ᑕᔥ ᑯᑕᒃ ᓈᓇᓐ ᑳᐐᓐ ᑮᐁᔖᐙᑎᓯᓰᐗᒃ᙮

25:3b.MAT.025.003 ᐃᑭ ᑕᔥ ᑳᑮᐁᔖᐙᑎᓯᓯᒀ ᑮᒫᒌᑑᐙᒡ ᐅᐱᒥᑌᐙᓴᑯᓀᒋᑲᓂᐙᓐ, ᑳᐐᓐ ᑕᔥ ᐱᒥᑌᓂ ᐅᑮ ᑕᑯᒫᒌᑑᓰᓈᐙ᙮

25:4b.MAT.025.004 ᐃᑭ ᑕᔥ ᐐᓐ ᑳᑮ ᑲᑮᑖᐌᑕᒧᐙᒡ ᐅᑮ ᑕᑯᒫᒌᑑᓈᐙ ᐱᒥᑌᓂ ᑮᒫᒌᑑᐙᒡ ᐃᓂ ᐅᐙᓴᑯᓀᒋᑲᓂᐙᓐ᙮

25:5b.MAT.025.005 ᑳᐐ ᑭᒋᐐᑎᑫᓂᒡ ᑕᔥ ᐃᓂᓂᐗᓐ ᑮᐯᓯᑳᐗᓐ᙮ ᒣᒀ ᑕᔥ ᐁᐲᐋᐙᒡ ᒦᐃ ᑳᐃᔑ ᑲᐐᑾᔑᐙᒡ ᐃᑭ ᐅᔥᑭᓃᑭᑴᒃ᙮

25:6b.MAT.025.006 ᐁᐋᐱᑖᑎᐱᑲᓂᓂᒃ ᑕᔥ ᐊᐎᔭ ᑮᔖᑯᐌ: ᒦ ᐅᔕᐃ ᐋᔕ ᐁᑕᑯᔑᕽ ᐊᐊ ᑳᐐ ᑭᒋᐐᑎᑫᒡ! ᐊᐯᔪᒃ ᓴ, ᐊᑕᒣᒀᔥᑲᐎᒃ!

25:7b.MAT.025.007 ᒦᑕᔥ ᑲᑭᓇ ᐅᔥᑭᓃᑭᑴᒃ ᑮᐃᔑ ᐗᓂᔥᑳᐗᒃ ᐁᑮᓇᓇᐋᔐᓇᒧᐙᒡ ᐅᐙᓴᑯᓀᒋᑲᓂᐙᓐ᙮

25:8b.MAT.025.008 ᑳᑲᑮᐹᑎᓯᐙᒡ ᑕᔥ ᐅᑮ ᑲᓅᓈᐙᐞ ᐃᐃ ᑳᑲᑮᑖᐌᑕᒥᓂᒡ: ᑕᑲ ᒦᔑᔑᓈᒻ ᐸᑮ ᑭᐱᒥᑌᒥᐙ, ᓂᐙᓴᑯᓀᒋᑲᓂᓈᓂᓐ ᐅᔕ ᐊᓂᐋᑕᐌᐗᓐ! ᑮᐃᑭᑐᐗᒃ᙮

25:9b.MAT.025.009 ᑳᑲᑮᑖᐌᑕᒧᐙᒡ ᑕᔥ ᑮᐃᔑ ᓇᑴᑕᒨᒃ: ᑕᑲ ᒦᐃ! ᑳᐐᓐ ᐅᔕ ᑭᑖ ᑌᐱᓭᓰᒥᓐ ᒥᓴᐙ ᑯ ᒦᓂᑰᔦᒃ ᐱᒥᑌ᙮ ᐃᓇᔥᑫ ᐃᔖᒃ ᐊᑖᐌᐎᓂᓂᐗᒃ ᒋᐊᑕᐊᑖᐌᑕᒫᓱᔦᒃ, ᑮᐃᑭᑐᐗᒃ᙮

25:10b.MAT.025.010 ᒣᒀ ᑕᔥ ᐁᐅᑌᑎᓂᒡ, ᐁᑮᓈᓯᑲᒥᓂᒡ ᐱᒥᑌᓂ, ᒦᓴ ᐃ ᐊᐲ ᐃᓂ ᑳᐊᑕ ᑭᒋᐐᑎᑫᓂᒡ ᐃᓂᓂᐗᓐ ᑮᐱ ᑕᑯᔑᓅᓐ᙮ ᐃᑭ ᑕᔥ ᑯᑕᒃ ᐅᔥᑭᓃᑭᑴᒃ ᑳᑮ ᑮᔒᑖᐙᒡ ᐅᑮᐊᓂ ᐲᑎᑫᐐᒌᐙᐙᓐ ᐃᐃᒫ ᑳᑮᐃᔑ ᑭᒋᐐᑎᑫ ᐐᓯᓂᓈᓂᐗᓂᓂᒃ᙮ ᐃᔥᒀᑌᒻ ᑕᔥ ᑮᑭᐸᐃᑳᑌ᙮

25:11b.MAT.025.011 ᓈᓈᑫ ᑕᔥ ᐃᑭ ᑯᑕᒃ ᐅᔥᑭᓃᑭᑴᒃ ᑮᐱ ᑕᑯᔑᓅᒃ ᐁᑮ ᑲᓅᓈᐙᒡ ᐃᓂᓂᐗᓐ ᑳᑭᒋᐐᑎᑫᓂᒡ: ᑕᑲ ᑫᓃᓇᐎᓐᑦ ᐹᑭᓇᒪᐎᔑᓈᒻ! ᐅᑮᐃᓈᐙᓐ᙮

25:12b.MAT.025.012 ᐅᐅ ᑕᔥ ᐅᑮᐃᑯᐙᓐ: ᑳᐐᓐ ᐊᐙᒡ ᓂᑖ ᑑᑕᓰ, ᑳᐐᓐ ᑭᑭᑫᓂᒥᓯᓅᓂᓂᒻ, ᒦ ᑳᐃᑯᐙᒡ᙮

25:13b.MAT.025.013 ᒋᓴᔅ ᑕᔥ ᑮᐊᓂ ᐃᑭᑐ: ᐊᔮᒀᒥᐊᔕᐙᐱᒃ, ᐋᓃᔥ ᑳᐐᓐ ᑭᑭᑫᑕᓰᒻ ᐊᐲ ᑮᔑᑲᒃ, ᑕᓱᑎᐸᐃᑲᓀᔮᒃ ᑲᔦ ᑫᐱ ᑕᑯᔑᓈᓐ᙮

25:14b.MAT.025.014 ᒦᓴ ᑫᔑᓈᑾᒃ, ᑖᐱᔥᑰ ᐃᓂᓂ ᑳᐐᒫᒑᒡ, ᐁᑮ ᑲᓅᓈᒡ ᓴ ᐅᑕᓄᑮᐋᑲᓇᐞ, ᐁᑮ ᑲᓇᐌᑕᐋᒡ ᒋᓈᑲᒋᑑᓂᒡ ᐃᐃ ᑳᑎᐯᑕᕽ᙮

25:15b.MAT.025.015 ᒦᑕᔥ ᑳᐃᔑ ᑲᓇᐌᑕᐋᒡ ᐅᑕᓄᑮᐊᑲᓇᐞ ᐋᓃᒥᓂᒃ ᑫᑲᔥᑭᑑᓂᒡ ᑫᑰᓂᓂ ᒋᓈᑲᒋᑑᓂᒡ᙮ ᐯᔑᒃ ᑕᔥ ᐅᑮᒦᓈᓐ ᓈᓂᕽ ᒥᑖᔂᒃ 5,000 ᐅᓵᐙᐱᑯ ᔔᓂᔮᓴᐞ᙮ ᑯᑕᒃ ᑕᔥ ᐅᑮᒦᓈᓐ ᓃᔑᕽ ᒥᑖᔂᒃ 2,000 ᐅᓵᐙᐱᑯ ᔔᓂᔮᓴᐞ, ᑯᑕᒃ ᑲᔦ ᒥᑖᔂᒃ 1,000 ᐅᓵᐙᐱᑯ ᔔᓂᔮᓴᐞ ᐅᑮᒦᓈᓐ᙮ ᒦᑕᔥ ᑳᐃᔑ ᒫᒑᒡ᙮

25:16b.MAT.025.016 ᐊᐊ ᑕᔥ ᐊᓄᑮᐋᑲᓐ ᑳᑮ ᑲᓇᐌᑕᐃᓐᒡ ᓈᓂᕽ ᒥᑖᔂᒃ ᐅᓵᐙᐱᑯ ᔔᓂᔮᓴᐞ, ᔐᒫᒃ ᑮᒫᒑ ᐁᑮ ᐸᑭᑎᓈᒡ ᐃᓂ ᔔᓂᔮᓐ ᐋᑎ ᑫᔑ ᑲᔥᑭᒋᑫᓂᒡ ᒦᓇᐙ ᓈᓂᕽ ᒥᑖᔂᒃ ᐅᓵᐙᐱᑯ ᔔᓂᔮᓴᐞ᙮

25:17b.MAT.025.017 ᒦᑕᔥ ᐯᔑᑾᓐ ᑳᐃᔑᒋᑫᒡ ᐊᐊ ᐊᓄᑮᐋᑲᓐ ᑳᑮ ᑲᓇᐌᑕᐃᓐᒡ ᓃᔑᕽ ᒥᑖᔂᒃ ᐅᓵᐙᐱᑯ ᔔᓂᔮᓴᐞ, ᐁᑮ ᑲᔥᑭᐋᒡ ᑯᑕᒃ ᓃᔑᕽ ᒥᑖᔂᒃ ᐅᓵᐙᐱᑯ ᔔᓂᔮᓴᐞ᙮

25:18b.MAT.025.018 ᐊᐊ ᑕᔥ ᐊᓄᑮᐋᑲᓐ ᒥᑖᔂᒃ ᑳᑮ ᑲᓇᐌᑕᐃᓐᒡ ᐅᓵᐙᐱᑯ ᔔᓂᔮᓴᐞ, ᑮᐊᐎ ᐙᓂᑫ ᒥᑕᑲᒥᑯᕽ, ᑳᐃᔑ ᑳᓈᒡ ᐅᑑᑭᒫᒪᓐ ᐅᔔᓂᔮᒥᓂ᙮

25:19b.MAT.025.019 ᓈᓈᑫ ᑕᔥ ᐐᑳ ᐁᐃᔑᓭᓂᒃ, ᐅᑭᒫ ᑮᐱ ᑕᑯᔑᓐ ᐁᐐᐊᑕ ᑭᑫᓂᒫᒡ ᐃᐃ ᐊᓄᑮᐋᑲᓇᐞ ᐋᓃᓐ ᒥᓂᒃ ᑳᑲᔥᑭᒋᑫᓂᒡ᙮

25:20b.MAT.025.020 ᐊᐊ ᑕᔥ ᐊᓄᑮᐋᑲᓐ ᓈᓂᕽ ᒥᑖᔂᒃ ᐅᓵᐙᐱᑯ ᔔᓂᔮᓴᐞ ᑳᑮ ᑲᓇᐌᑕᐃᑎᐸᓐ ᑮᒪᑌᑳᐸᐎ ᐁᑮᒦᓈᒡ ᐅᑑᑭᒫᒪᓐ ᐃᓂ ᑯᑕᒃ ᓈᓂᕽ ᒥᑖᔂᒃ ᑕᔂᐱᒃ ᐁᑮᐃᑭᑐᒡ: ᓂᑑᑭᒫᒻ, ᐃᑭ ᑕᔥ ᓈᓂᕽ ᒥᑖᔂᒃ ᐅᓵᐙᐱᑯ ᔔᓂᔮᓴᒃ ᑳᑮ ᑲᓇᐌᑕᐃᔑᔭᐸᓐ, ᓈᓂᕽ ᒥᑖᔂᒃ ᒦᓇᐙ ᐃᒫ ᓂᑮᐅᒋ ᑲᔥᑭᒋᑫ, ᑮᐃᑭᑐ᙮

25:21b.MAT.025.021 ᐅᑭᒫ ᑕᔥ ᐅᑮᐃᓈᓐ: ᐋᐱᒋ ᓴ ᑾᔭᒃ ᑭᑮᐃᔑᒋᑫ! ᐋᐱᒋ ᑲᔦ ᑾᔭᒃ ᑳᑌᐺᔦᓂᒥᑣ ᐊᓄᑮᐋᑲᓐ ᑭᑎᓄᐤ᙮ ᑾᔭᒃ ᑕᔥ ᐁᑮ ᑲᓇᐙᐸᑕᒪᓐ ᑫᑰᓀᓴᓐ, ᑭᑲ ᒦᓂᓐ ᓴ ᑭᒋᑫᑰᓇᓐ ᒋᑲᓇᐙᐸᑕᒪᓐ᙮ ᐊᐤ ᐊᐯ ᐱᐐᒋᐐᓯᓃᒥᔑᓐ ᐁᔑ ᐐᑾᑫᔮᓐ ᑫᑮᓐ ᒋᐐᒋᒥᓉᑕᒨᒥᔭᓐ! ᐅᑮᐃᓈᓐ᙮

25:22b.MAT.025.022 ᐊᐊ ᑕᔥ ᐊᓄᑮᐋᑲᓐ ᑳᑮ ᑲᓇᐌᑕᐃᑎᐸᓐ ᓃᔑᕽ ᒥᑖᔂᒃ ᑕᔂᐱᒃ ᑮᒪᑌᑳᐸᐎ, ᐁᑮᐃᑭᑐᒡ: ᓂᑑᑭᒫᒻ, ᐁᑮ ᑲᓇᐌᑕᐃᔑᔭᐸᓐ ᓃᔑᕽ ᒥᑖᔂᒃ ᐅᓵᐙᐱᑯ ᔔᓂᔮᓴᒃ, ᐃᓇᔥᑫ ᓂᑮ ᑲᔥᑭᐋ ᑯᑕᒃ ᓃᔑᕽ ᒥᑖᔂᒃ! ᑮᐃᑭᑐ᙮

25:23b.MAT.025.023 ᐅᑭᒫ ᑕᔥ ᐅᑮᐃᓈᓐ: ᐋᐱᒋ ᓴ ᑾᔭᒃ ᑭᑮᐃᔑᒋᑫ! ᐋᐱᒋ ᑲᔦ ᑾᔭᒃ ᑳᑌᐺᔦᓂᒥᑣ ᐊᓄᑮᐋᑲᓐ ᑭᑎᓄᐤ᙮ ᑾᔭᒃ ᑕᔥ ᐁᑮ ᑲᓇᐌᑕᒪᓐ ᑫᑰᓀᓴᓐ, ᑭᑲ ᒦᓂᓐ ᓴ ᑭᒋᑫᑰᓇᓐ ᒋᑲᓇᐙᐸᑕᒪᓐ᙮ ᐊᐤ ᐊᐯ ᐱᐐᒋᐐᓯᓃᒥᔑᓐ ᐁᔑ ᐐᑾᑫᔮᓐ, ᑫᑮᓐ ᒋᐐᒋᒥᓉᑕᒨᒥᔭᓐ! ᐅᑮᐃᓈᓐ᙮

25:24b.MAT.025.024 ᐊᐊ ᑕᔥ ᐐᓐ ᑳᑮ ᑲᓇᐌᑕᐃᓐᒡ ᒥᑖᔂᒃ ᐅᓵᐙᐱᑯ ᔔᓂᔮᓴᐞ ᐁᑮᒪᑌᑳᐸᐎᒡ, ᑮᐃᑭᑐ: ᓂᑑᑭᒫᒻ, ᑭᑮ ᑭᑫᓂᒥᓐ ᓴ ᐁᑲᒀᓂᓴᑭᓯᔭᓐ, ᐁᐃᔑ ᒨᔕᑭᓂᑫᔭᓐ ᓴ ᑳᑮᐃᔑ ᑭᑎᑫᓯᐗᓐ, ᐁᐅᑖᐱᓇᒪᓐ ᑲᔦ ᑭᑎᑳᓇᓐ ᑳᑮ ᑭᑎᑳᑕᓯᐗᓐ᙮

25:25b.MAT.025.025 ᑭᑮ ᑯᓯᓐ ᐃᑕᔥ, ᒦᔥ ᑳᑮᐅᒋ ᑳᓇᒃ ᑭᔔᓂᔮᒻ ᐃᐃᒫ ᒥᑕᑲᒥᒃ᙮ ᐃᓇᔥᑫ ᑕᔥ, ᐃᓇ ᐗᐊᐌ ᓴ ᑭᔔᓂᔮᒻ ᑳᑎᐯᓂᒪᒡ, ᑮᐃᑭᑐ᙮

25:26b.MAT.025.026 ᐅᑭᒫ ᑕᔥ ᐅᑮᐃᓈᓐ: ᐋᐱᒋ ᓴ ᑭᒪᒋᐊᔮ, ᑳᑭᑎᒥᐙᒡ ᓴ ᐊᓄᑮᐋᑲᓐ ᑭᑎᓄᐤ᙮ ᐁᑮ ᑭᑫᓂᒥᔭᓐ ᓴ ᐁᐃᔑ ᒨᔕᑭᓂᑫᔮᓐ ᓴ ᑳᑮᐃᔑ ᑭᑎᑫᓯᐙᓐ, ᐁᐅᑖᐱᓇᒫᓐ ᑲᔦ ᑭᑎᑳᓇᓐ ᑳᑮ ᑭᑎᑳᑕᓯᐙᓐ,

25:27b.MAT.025.027 ᑭᑖᑮ ᐸᑭᑎᓈ ᐅᔕ ᐊᐊ ᓂᔔᓂᔮᒻ ᐃᐃᒫ ᔔᓂᔮᐎᑲᒥᑯᕽ ᒋᑮᐊᓂ ᐹᑏᓄᐸᓐ᙮ ᐃᓇᔥᑫ ᑕᔥ ᑮᐱ ᑕᑯᔑᓈᓐ ᑲᑭᓇ ᓂᑖᑮᐅᑖᐱᓈ, ᐅᑮᐃᓈᓐ᙮

25:28b.MAT.025.028 ᒦᑕᔥ ᐅᐅ ᑳᐊᓂ ᐃᑭᑐᒡ: ᐅᑖᐱᓇᒪᐎᒃ ᓴ ᐃᓂ ᔔᓂᔮᓐ, ᐊᐊ ᓴ ᒥᑖᒋᕽ ᒥᑖᔂᒃ ᐅᓵᐙᐱᑯ ᔔᓂᔮᓴᐞ ᑳᐊᔮᐙᒡ, ᐅᑲ ᐊᔮᐙᓐ ᐃᓂ ᔔᓂᔮᓐ᙮

25:29b.MAT.025.029 ᐊᐎᔭ ᓴ ᑫᑰᓂᓂ ᑳᐊᔮᒡ, ᑕᒦᓈ ᑫᑰᓂᓂ ᐊᐗᔑᒣ, ᐌᐌᓂ ᓴ ᒋᑌᐱᓭᒡ᙮ ᐊᐊ ᑕᔥ ᐐᓐ ᑫᑰᓂᓂ ᑳᐊᔮᓯᒃ, ᒥᓴᐙ ᑯ ᐸᑮ ᑫᑰᓀᓯᓂ ᐊᔮᒡ ᓴ ᑕᐅᑖᐱᓇᒪᐙ᙮

25:30b.MAT.025.030 ᐊᐊ ᓴ ᑫᑰᓂᓂ ᑳᐃᓈᐸᑎᓯᓯᒃ ᐊᓄᑮᐋᑲᓐ, ᐃᔑᐌᐱᓂᒃ ᐃᐃᒫ ᑳᔑ ᑲᔥᑮᑎᐱᑲᓂᓂᒃ᙮ ᒦᑕᔥ ᐃᐃᒫ ᑫᑕᔑᒨᑯᑭᑖᓱᒡ, ᑫᑕᔑᒪᒪᑗᔮᐱᑌᓭᒡ ᑲᔦ᙮

25:31b.MAT.025.031 ᐊᐲ ᓴ ᐃᓂᓂ ᐅᑯᓯᓴᓐ ᐱᑕᑯᔑᓂᓂᒡ ᑳᐐᐱ ᑭᒋᐅᑭᒫᐎᓂᒡ, ᐅᑲᐱ ᐐᒌᐎᑯᓂ ᓴ ᐃᐃ ᑲᑭᓇ ᐁᒐᓬᐊᐞ᙮ ᒦᓴ ᐃᐃᒫ ᑳᑭᒋᐅᑭᒫᐌᑖᑾᓂᓂᒃ ᐅᑕᐱᐎᓂᓃᕽ ᑫᔑ ᐊᐱᓂᒡ᙮

25:32b.MAT.025.032 ᑲᑭᓇ ᑕᔥ ᐯᒫᑎᓯᐙᒡ ᒥᓯᐌᑲᒥᒃ ᑳᑕᓶᐙᓇᑭᓯᐙᒡ ᑕᐅᑯᐊᔮᐗᒃ ᐋᑎ ᑫᐊᔮᓂᒡ᙮ ᒦᓴ ᐊᐌ ᑳᐅᑭᒫᐗᐱᒡ ᓃᔡᔦᒃ ᐅᑲᐃᔑ ᐸᐹᐸᑭᑎᓈᐞ ᐃᓂ ᐯᒫᑎᓯᓂᒡ, ᑖᐱᔥᑰ ᓴ ᐅᑲᓇᐎᒫᓇᒑᓂᔑᐌ ᐯᐸᑳᓐ ᑳᐃᔑ ᐊᓵᒡ ᒫᓇᒑᓂᔕᐞ ᐃᐃ ᑲᔦ ᒫᓇᑎᑾᐞ᙮

25:33b.MAT.025.033 ᑳᑾᔭᒀᑎᓯᓂᒡ ᓴ ᐅᑭᒋᓂᑭᕽ ᐃᓇᑫ ᐅᑲᐃᔑ ᐊᓵᐞ, ᑯᑕᒃ ᑕᔥ ᐅᓇᒪᑎᓂᑭᕽ ᐅᑲᐃᔑ ᐊᓵᐞ᙮

25:34b.MAT.025.034 ᑭᒋᐅᑭᒫ ᑕᔥ ᐅᑲ ᐃᓈᐞ ᐃᐃ ᐯᒫᑎᓯᓂᒡ ᐅᑭᒋᓂᑭᕽ ᑳᐊᔮᓂᒡ: ᐲᔖᒃ ᓴ ᑮᓇᐙ ᑳᔕᐌᓂᒥᓀᒃ ᓂᑌᑌ, ᐲᔖᒃ ᒋᑎᐯᑕᒣᒃ ᐃᐃ ᐅᑭᒫᐎᐎᓐ ᑳᑮᐱ ᐅᔒᑕᒫᑰᔦᒃ ᐊᐲ ᑮᒫᒌᐊᑮᐗᕽ᙮

25:35b.MAT.025.035 ᐋᓃᔥ ᐁᐐᐐᓯᓂᔮᓐ, ᑭᑮᐊᔕᒥᔑᒻ, ᐁᐐᒥᓂᑴᔮᓐ ᑲᔦ ᑭᑮᒥᓇᐃᔑᒻ᙮ ᐁᐲᐎᑌᐎᔮᓐ ᑲᔦ ᑭᑮ ᐲᑎᑲᔑᒻ ᑭᑖ ᐎᓂᐙᕽ᙮

25:36b.MAT.025.036 ᐁᑮ ᑭᑭᑯᓇᔦᓯᐙᓐ ᑲᔦ ᑭᑮ ᐱᒋᑯᓇᔦᐃᒻ, ᐁᐋᑯᓯᔮᓐ ᑲᔦ ᑭᑮᓈᑲᒋᐃᔑᒻ, ᐁᑮ ᑭᐸᐅᑰᔮᓐ ᑲᔦ ᑭᑮᐊᑕᐙᐸᒥᔑᒻ, ᐅᑲᐃᓈᐞ᙮

25:37b.MAT.025.037 ᐅᑾᔭᒀᑎᓰᒃ ᑕᔥ ᐅᑲᐃᔑ ᑲᑴᒋᒫᐙᓐ: ᑌᐯᒋᑫᔭᓐ, ᐋᓇᐲ ᑳᐙᐸᒥᑰᔭᓐ ᐁᑲᐗᔅᑲᑌᔭᓐ, ᐁᑮᐊᔕᒥᑰᔭᓐ ᑕᔥ, ᐁᓅᑕᔮᐹᑴᔭᓐ ᑲᔦ, ᐁᑮᒥᓇᐃᑰᔭᓐ ᑕᔥ?

25:38b.MAT.025.038 ᐋᓇᐲ ᑲᔦ ᑳᐙᐸᒥᑰᔭᓐ ᐁᐲᐎᑌᐎᔭᓐ ᐁᑮ ᐲᑎᑲᓂᑰᔭᓐ ᑕᔥ ᓂᑖᐎᓂᓈᓂᕽ, ᐁᑮ ᑭᑭᑯᓇᔦᓯᐗᓐ ᑲᔦ ᐁᑮ ᐱᒋᑯᓇᔦᐃᑰᔭᓐ ᑕᔥ?

25:39b.MAT.025.039 ᐋᓇᐲ ᑲᔦ ᑳᐙᐸᒥᑰᔭᓐ ᐁᐋᑯᓯᔭᓐ, ᐁᑭᐸᐅᑰᔭᓐ ᑲᔦ, ᒦᑕᔥ ᐁᑮᐊᑕᐙᐸᒥᑰᔭᓐ? ᐅᑲ ᐃᓈᐙᓐ᙮

25:40b.MAT.025.040 ᑭᒋᐅᑭᒫ ᑕᔥ ᑕᐃᔑ ᓇᑴᑕᒻ: ᑭᐐᑕᒪᐎᓂᓂᒻ ᓴ, ᐊᐲ ᓴ ᐅᐅ ᑳᑮ ᑑᑕᐌᒃ ᐗᐊ ᐯᔑᒃ ᑫᑰᓐ ᑳᐊᐲᑌᑖᑯᓯᓯᒃ, ᓃᒋᑭᐌᓯ ᑳᐃᓇᒃ, ᓃᓐ ᓴ ᑳᑮ ᑑᑕᐎᔦᒃ, ᐅᑲ ᐃᓈᐞ᙮

25:41b.MAT.025.041 ᐃᐃ ᑕᔥ ᐅᓇᒪᑎᓂᑭᕽ ᐃᓇᑫ ᑳᐊᔮᓂᒡ ᐅᑲ ᐃᓈᐞ: ᓂᑯᒋ ᑮᓇᐙ ᐃᔖᒃ, ᑳᐃᓇᑭᒥᑰᔦᒃ ᒋᓂᔑᐗᓈᑎᓯᔦᒃ! ᐃᔖᒃ ᐌᑎ ᐐᑳ ᑫᔑ ᐋᑕᐌᓯᓄᒃ ᐃᔥᑯᑌ, ᑳᑮ ᑾᔮᒌᑕᒪᐎᑣ ᒪᒋᐊᔭᐋ, ᐃᐃ ᑲᔦ ᐅᑌᒐᓬᐃᒪᐞ᙮

25:42b.MAT.025.042 ᐋᓃᔥ ᐁᓅᑌᔅᑲᑌᔮᓐ ᑳᐐᓐ ᑭᑮᐊᔕᒥᓰᒻ, ᐁᓅᑕᔮᐹᑴᔮᓐ ᑲᔦ ᑳᐐᓐ ᑭᑮᒥᓇᐃᓰᒻ᙮

25:43b.MAT.025.043 ᐁᐲᐎᑌᐎᔮᓐ ᑲᔦ ᑳᐐᓐ ᑭᑮ ᐲᑎᑲᔑᓰᒻ ᑭᑖ ᐎᓂᐙᕽ, ᐁᑮ ᑭᑭᑯᓇᔦᓯᐙᓐ ᑲᔦ ᑳᐐᓐ ᑭᑮ ᐱᒋᑯᓇᔦᐃᓰᒻ, ᐁᐋᑯᓯᔮᓐ ᑲᔦ, ᐁᑮ ᑭᐸᐅᑰᔮᓐ ᑲᔦ ᑳᐐᓐ ᑭᑮᐊᑕᐙᐸᒥᓰᒻ, ᐅᑲ ᐃᓈᐞ᙮

25:44b.MAT.025.044 ᑫᐐᓇᐙ ᑕᔥ ᐅᑲᔑ ᓇᑴᑕᐙᐙᓐ: ᑌᐯᒋᑫᔭᓐ, ᐋᓇᐲ ᓴ ᑳᐙᐸᒥᑰᔭᓐ ᐁᓅᑌᔅᑲᑌᔭᓐ, ᐁᓅᑕᔮᐹᑴᔭᓐ, ᐁᐲᐎᑌᐎᔭᓐ, ᐁᑮ ᑭᑭᑯᓇᔦᓯᐗᓐ, ᐁᑮᐋᑯᓯᔭᓐ, ᐁᑮ ᑭᐸᐅᑰᔭᓐ ᑲᔦ, ᐁᑮᐃᔑ ᐐᒋᐃᑰᓯᐗᓀᓐ ᐃᑕᔥ? ᐅᑲ ᐃᓈᐙᓐ᙮

25:45b.MAT.025.045 ᑭᒋᐅᑭᒫ ᑕᔥ ᐅᑲᔑ ᓇᑴᑕᐙᐞ: ᑭᐐᑕᒪᐎᓂᓂᒻ ᓴ, ᐃᐃ ᓴ ᑳᑮᐃᔑ ᐐᒋᐋᓯᐌᒃ ᐯᔑᒃ ᐃᑯ ᐗᐊ ᑫᑰᓐ ᑳᐊᐲᑌᑖᑯᓯᓯᒃ, ᓃᒋᑭᐌᓯ ᑳᐃᓇᒃ, ᓃᓐ ᓴ ᑳᑮᐐᒋᐃᓯᐌᒃ, ᐅᑲ ᐃᓈᐞ᙮

25:46b.MAT.025.046 ᒦᐗᒃ ᐃᑕᔥ ᐅᑯ ᑫᐃᔑᓂᔕᐅᑣ ᐃᐃᒫ ᐐᑳ ᑫᐃᔑ ᐃᔥᒀᓭᓯᓂᓂᒃ ᑲᒀᑕᑭᐃᑰᐎᓐ᙮ ᐃᑭ ᑕᔥ ᑳᑾᔭᒀᑎᓯᐙᒡ ᑕᐃᔖᐗᒃ ᐐᑳ ᑫᐃᔑ ᐃᔥᒀᓭᓯᓂᓂᒃ ᐱᒫᑎᓯᐎᓐ᙮

26

26:1b.MAT.026.001 ᐁᑮᐃᔥᒀ ᑭᑭᓄᐊᒫᑫᒡ ᑕᔥ ᒋᓴᔅ ᑲᑭᓇ ᑫᑰᓂᓂ, ᐅᑮᐃᓈᐞ ᑕᔥ ᐅᑭᑭᓄᐊᒪᐙᑲᓇᐞ:

26:2b.MAT.026.002 ᓃᔓᑮᔑᑾᑳᓂᒃ ᐃᓴ ᐁᑭᑫᑕᒣᒃ ᒦᐃ ᐋᔕ ᒋᐱᒫᒋᐃᑰᐎ ᐐᑾᑎᓈᓂᐗᕽ, ᒦᑕᔥ ᐃᓂᓂ ᐅᑯᓯᓴᓐ ᒋᐃᔑᐎᒋᑲᓂᐎᓂᒡ ᒋᐊᑯᓴᑲᐅᒥᓐᒡ ᐋᔑᑌᔮᑎᑯᕽ, ᒦ ᑳᐃᑭᑐᒡ᙮

26:3b.MAT.026.003 ᐃᐃᔥ ᐯᔑᑾᓐ ᐊᐲ, ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᓃᑳᓂᓯᐙᒡ ᐅᓇᔓᐌᐎᓂᕽ ᑮᓇᑭᔥᑯᑖᑎᐗᒃ ᒋᐅᓈᑯᓂᑫᐙᒡ ᐃᐃᒫ ᐅᐙᑳᐃᑲᓂᓃᕽ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ ᑫᔭᐸᔅ ᑳᑮᐃᔑᓂᑳᓱᓂᒡ,

26:4b.MAT.026.004 ᐁᑮᐅᓀᑕᒧᐙᒡ ᐋᓃᓐ ᑫᑮᐃᔑ ᑮᒨᒋ ᑳᒋᑎᓈᐙᒡ ᒋᓴᓲᓐ ᐁᐐᓂᓵᐙᒡ᙮

26:5b.MAT.026.005 ᑳᐐᓐ ᐃᐃ ᑭᑖᑮᐃᔑᒋᑫᓰᒥᓐ ᒣᒀ ᐁᐐᑾᑎᓈᓂᐗᕽ, ᒫᑭᔖ ᐅᓵᒻ ᑖᐅᒻᐺᑲᒥᑭᓯᓈᓂᐗᓐ, ᑮᐃᑭᑐᐗᒃ᙮

26:6b.MAT.026.006 ᒣᒀ ᑕᔥ ᒋᓴᔅ ᐁᐊᔮᒡ ᐃᐃᒫ ᓵᐃᒪᓇᓐ ᑳᑮᐅᒥᑮᐙᐱᓀᓂᐸᓐ ᐅᐙᑳᐃᑲᓂᓃᕽ ᐃᐃᒫ ᐯᑕᓃᕽ ᐆᑌᓇᐌᓯᕽ,

26:7b.MAT.026.007 ᐃᑴᐗᓐ ᐅᑮ ᐱᓈᓯᑳᑰᓐ ᐁᑮ ᐲᑑᓂᒡ ᐴᓯᒥᓈᑾᐅᓂᓂ ᐐᑫ ᐁᑮᐋᑾᑭᑌᓂᒃ, ᑳᑮᐃᔑ ᐲᑌᓂᒃ ᐋᓬᐊᐹᔅᑕᕒ ᐊᓯᓃᐎᐅᒨᑕᔮᐱᑯᕽ᙮ ᒦᑕᔥ ᑳᐃᔑ ᓰᑭᓇᒥᓂᒡ ᒥᓈᑾᐅᓂᓂ ᐅᑎᒀᓂᕽ, ᒣᒀ ᐁᐊᔫᐱᒣᔑᕽ ᐁᐐᓯᓂᒡ᙮

26:8b.MAT.026.008 ᑭᑭᓄᐊᒪᐙᑲᓇᒃ ᐁᑮᐙᐸᑕᒧᐙᒡ ᑮᐃᑭᑐᐗᒃ ᐁᑮᒫᓈᐸᑕᒧᐙᒡ: ᐁᑕᑕᐌ ᑮᑭᒋᐗᓂᒋᑫᒻ!

26:9b.MAT.026.009 ᐃᐃ ᓴ ᒥᓈᑾᐅᓐ ᐋᐱᒋ ᓃᐳᐗᐞ ᑖᑮᐃᓇᑭᑌ ᑮᔥᐱᓐ ᐊᑖᐙᑲᓂᐗᑭᐸᓐ᙮ ᔔᓂᔮᓐ ᑕᔥ ᑖᑮᒦᓈᐗᒃ ᑳᑭᑎᒫᑭᓯᐙᒡ᙮ ᒦ ᑳᐃᑭᑐᐙᒡ᙮

26:10b.MAT.026.010 ᒋᓴᔅ ᐅᑮ ᑭᑫᓂᒫᐞ ᐋᓃᓐ ᑳᐃᑭᑐᓂᒡ, ᒦᑕᔥ ᐁᑮᐃᓈᒡ: ᐌᑯᓀᓐ ᐌᒋᑲᑴᐗᓈᐁᒃ ᐊᐊ ᐃᑴ? ᐋᐱᒋ ᓴ ᐅᓂᔑᔑᓐ, ᒥᓄᓈᑾᓂᓂ ᑲᔦ ᐃᐃ ᑳᑑᑕᐎᔑᒡ᙮

26:11b.MAT.026.011 ᑳᑭᑎᒫᑭᓯᐙᒡ ᐃᓴ ᒨᔕᒃ ᑭᐐᒌᐙᐙᒃ, ᓃᓐ ᑕᔥ ᑳᐐᓐ ᒨᔕᒃ ᑭᑲ ᐐᒌᐎᓰᒻ᙮

26:12b.MAT.026.012 ᐅᐅᐌᓂ ᓴ ᑳᓰᑭᓇᕽ ᒥᓈᑾᐅᓂᓂ ᓂᐐᔭᐎᕽ, ᒦᓴ ᐱᑯ ᑖᐱᔥᑰ ᐁᑾᔮᒋᑑᒡ ᓂᐐᔭᐤ ᐁᐐᓂᑾᐅᑰᔮᓐ᙮

26:13b.MAT.026.013 ᑫᑫᑦ ᑕᔥ ᑭᑎᓂᓂᓂᒻ, ᑕᔑᑌᒃ ᓴ ᐃᐃ ᒥᓍᒋᒧᐎᓐ ᒥᓯᐌ ᐊᑮᕽ, ᑕᑎᐹᒋᒫ ᓴ ᐊᐊ ᐃᑴ ᐋᓃᓐ ᑳᐃᔑᒋᑫᒡ ᒋᒫᒥᑲᐎᓄᑕᐎᓐᒡ, ᑮᐃᑭᑐ᙮

26:14b.MAT.026.014 ᒦᑕᔥ ᐃᐃ, ᐯᔑᒃ ᐃᑭ ᑳᒥᑖᔑᓃᔑᐙᒡ ᑭᑭᓄᐊᒪᐙᑲᓇᒃ, ᒎᑕᔅ ᐃᔅᑫᕒᐃᔭᑦ, ᑳᐃᔑ ᐊᑕᐙᐸᒫᒡ ᑭᒋᐊᓇᒥᐁᐎᑭᒫᐞ

26:15b.MAT.026.015 ᐁᑮ ᑲᓅᓈᒡ: ᐌᑯᓀᓐ ᑫᒦᔑᔦᑭᐸᓐ ᐃᔑᐎᓂᓇᑰᒃ ᑳᔑ ᐊᔮᒡ ᒋᓴᔅ? ᐅᑮᐃᓈᐞ᙮ ᒦᑕᔥ ᑳᐃᔑ ᓴᑲᑲᑭᒫᓂᒡ ᐃᓂ ᔔᓂᔮᓐ, ᓂᓯᒥᑕᓇ ᑭᒋᐙᐹᐱᑯ ᔔᓂᔮᓴᐞ ᐁᑮᒦᓂᑯᒡ᙮

26:16b.MAT.026.016 ᒦᑕᔥ ᐃᐃ ᐊᐲ ᒎᑕᔅ ᑳᐃᔑ ᒫᒌᐊᑕᐙᐸᑕᕽ ᑮᔥᐱᓐ ᐃᔑᓭᓂᒃ ᐁᐐᐃᔑᐎᓈᒡ ᐋᑎ ᐁᔑ ᐊᔮᓂᒡ ᐃᓂ ᒋᓴᓲᓐ᙮

26:17b.MAT.026.017 ᓂᑕᒻ ᐃᑕᔥ ᐁᐐᑾᑎᐎᑮᔑᑲᓂᓂᒃ ᐊᐲ ᑮᐊᒧᒥᓐᒡ ᐸᑴᔑᑲᓇᓐ ᑳᑮᐅᐱᓯᑲᓂᐎᓯᓂᒃ, ᑭᑭᓄᐊᒪᐙᑲᓇᒃ ᐅᑮᓈᓯᑲᐙᐙᓐ ᒋᓴᓲᓐ ᐁᑮᐃᓈᐙᒡ: ᐋᑎ ᑕᔥ ᓃᓇᐎᓐᑦ ᑫᔑ ᑾᔮᒋᑕᒫᑰᔭᓐ ᒋᐱᒫᒋᐃᑰᐎ ᐐᑾᑎᕽ? ᑮᐃᑭᑐᐗᒃ᙮

26:18b.MAT.026.018 ᐅᐅ ᑕᔥ ᐅᑮᐃᓈᐞ: ᐊᑕᐙᐸᒥᒃ ᓴ ᐯᔑᒃ ᐃᓂᓂ ᐃᐃᒫ ᐆᑌᓈᕽ᙮ ᐅᐅ ᑕᔥ ᑭᑲ ᐃᓈᐙ: ᓂᑭᑭᓄᐊᒫᑫᒥᓈᓐ ᓴ ᐃᑭᑐ: ᐋᔕ ᐯᔓᓈᑾᓐ ᐃᐃ ᑳᐐᐃᔑᓭᔮᓐ, ᓂᐐᐐᑑᐸᒫᒃ ᓴ ᓂᑭᑭᓄᐊᒪᐙᑲᓇᒃ ᐃᐃᒫ ᑭᐙᑳᐃᑲᓂᕽ, ᐁᐐᐐᒋᐐᓯᓃᒪᒀ ᐅᐅ ᐱᒫᒋᐃᑰᐎ ᐐᑾᑎᐎᓐ᙮

26:19b.MAT.026.019 ᑭᑭᓄᐊᒪᐙᑲᓇᒃ ᑕᔥ ᑮᐃᔑᒋᑫᐗᒃ ᑳᑮᐃᑯᐙᒡ ᒋᓴᓲᓐ ᐁᑮ ᑾᔮᒋᑑᐙᒡ ᑳᐐᐃᔑ ᐱᒫᒋᐃᑰᐎ ᐐᑾᑎᐙᒡ᙮

26:20b.MAT.026.020 ᐁᐊᓂ ᐅᓈᑯᔑᓂᓂᒃ ᐃᑕᔥ ᑮᐅᔑᔑᓅᒃ ᒋᓴᔅ, ᐅᑭᑭᓄᐊᒪᐙᑲᓇᐞ ᑲᔦ, ᐁᐐᐐᓯᓂᐙᒡ᙮

26:21b.MAT.026.021 ᒣᒀ ᑕᔥ ᐁᐐᓯᓂᐙᒡ ᒋᓴᔅ ᑮᐃᑭᑐ: ᑭᑎᓂᓂᓂᒻ, ᐯᔑᒃ ᐅᐅᒫ ᓂᑲ ᑑᑖᒃ ᒋᑕᑯᓂᑰᐗᒃ, ᑮᐃᑭᑐ᙮

26:22b.MAT.026.022 ᑭᑭᓄᐊᒪᐙᑲᓇᒃ ᑕᔥ ᑮᒫᓀᑕᒨᒃ ᐁᑮᐃᔑ ᑲᑴᒋᒫᐙᒡ ᒣᒣᔥᑾᒡ: ᑌᐯᒋᑫᔭᓐ, ᑳᐐᓐ ᐄᑐᒃ ᓃᓐ ᑳᐃᔑᔭᓐ?

26:23b.MAT.026.023 ᒋᓴᔅ ᑕᔥ ᑮᐃᔑ ᓇᑴᑕᒻ: ᑮᓇᐙ ᓴ ᑳᐐᒋᐐᓯᓃᒥᓇᑰᒃ ᐯᔑᒃ ᑳᒉᑭᐲᓈᒡ ᐅᐸᑴᔑᑲᓂᒪᓐ, ᑫᓃᓐ ᑳᐃᔑ ᒉᑭᐲᓂᒪᒃ ᓂᐸᑴᔑᑲᓂᒪᓐ ᐅᓈᑲᓂᕽ, ᒦᓴ ᐊᐌ ᑳᐐ ᑑᑕᐎᒡ᙮

26:24b.MAT.026.024 ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ ᒋᓂᐳᓂᒡ ᐃᓂ ᐃᓂᓂ ᐅᑯᓯᓴᓐ᙮ ᑌᐺ ᓴ ᓂᑲ ᓂᑉ᙮ ᐋᐱᒋ ᓴ ᑕᑰᐹᓯᓈᑯᓯ ᐊᐊ ᐃᓂᓂ ᑳᐐ ᑑᑕᐙᒡ ᐃᓂ ᐃᓂᓂ ᐅᑯᓯᓴᓐ ᒋᑕᑯᓂᒥᓐᒡ᙮ ᐋᐱᒋ ᑖᑮᐅᓂᔑᔑᓂᓂ ᐐᑳ ᓂᑖᐎᑭᓯᑭᐸᓐ ᐊᐊ ᐃᓂᓂ, ᑮᐃᑭᑐ᙮

26:25b.MAT.026.025 ᒎᑕᓴᓐ ᑕᔥ ᑳᐐᒪᒥᔑᒥᑯᒡ ᐅᑮᐃᑰᓐ: ᐅᑭᑭᓄᐊᒫᑫ, ᑳᐐᓐ ᐄᑐᒃ ᓃᓐ ᑳᐃᔑᔭᓐ? ᐅᑮᐃᑰᓐ᙮ ᒋᓴᔅ ᐅᑮᐃᓈᓐ: ᑮᓐ ᐄᑐᒃ ᑳᐃᑎᓱᔭᓐ᙮

26:26b.MAT.026.026 ᒣᒀ ᑕᔥ ᐁᐐᓯᓂᐙᒡ ᒋᓴᔅ ᐅᑮᐅᑖᐱᓈᓐ ᐸᑴᔑᑲᓇᓐ ᐁᑮᓇᓈᑯᒧᒡ᙮ ᒦᑕᔥ ᑳᐃᔑ ᐸᐸᑴᐱᓈᒡ, ᐁᑮᒫᒦᓈᒡ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᐅᑖᐱᓂᒃ ᐊᐊ ᐸᑴᔑᑲᓐ, ᐊᒧᒃ, ᒦ ᐄᑐᒃ ᐃᐃ ᓂᐐᔭᐤ, ᑮᐃᑭᑐ᙮

26:27b.MAT.026.027 ᒦᓇᐙ ᑕᔥ ᐅᑮᐅᑖᐱᓈᓐ ᒥᓂᒀᑲᓐ, ᐁᑮᓇᓈᑯᒧᒡ, ᐁᑮᒦᓈᒡ ᐁᑮᐃᓈᒡ: ᒦ ᓴ ᐃᒫ ᐅᒋ ᒥᓂᑴᒃ ᑲᑭᓇ ᑳᑕᔑᔦᒃ᙮

26:28b.MAT.026.028 ᒦᓴ ᐃᐌ ᓂᒥᔅᑸᒻ᙮ ᒦ ᐃᒫ ᑭᔐᒪᓂᑑ ᐅᑕᔓᑕᒫᑫᐎᓐ ᑳᐅᒋ ᒫᒋᐊᓄᑮᒪᑲᓂᓂᒃ᙮ ᒦᐃ ᑳᐹᑏᓄᐙᒡ ᑳᐅᒋ ᓰᑭᓇᒪᐎᑣ ᒥᔅᑸᓂ ᒋᐴᓀᑕᒪᐎᑣ ᐅᒪᒋᑑᑕᒧᐎᓂᐙᓐ᙮

26:29b.MAT.026.029 ᑭᐐᑕᒪᐎᓂᓂᒻ ᐃᑕᔥ, ᑳᐐᓐ ᓴ ᐐᑳ ᒦᓇᐙ ᓂᑲ ᒥᓂᑴᓰ ᐅᐅ ᔔᒥᓈᐳ, ᐹᒫ ᓴ ᐌᑎ ᑭᑲ ᐐᒋᒥᓂᑴᒥᓂᓂᒻ ᒋᒥᓂᑴᔭᕽ ᐅᔥᑭᔔᒥᓈᐳ ᐊᐲ ᓂᑌᑌ ᑮᔑᓯᑑᒡ ᐅᑎᐯᒋᑫᐎᓐ᙮

26:30b.MAT.026.030 ᒦᑕᔥ ᑳᐃᔑ ᐊᓇᒥᐁᓂᑲᒧᐙᒡ, ᐁᑮᐊᓂ ᒫᒑᐙᒡ ᐌᑎ ᐁᑮᐃᔖᐙᒡ ᐱᑾᑎᓈᕽ ᐋᓬᐃᑉ ᑭᑎᑳᓈᑎᑯᑳᕽ ᑳᑮᐃᔑᓂᑳᑌᒃ᙮

26:31b.MAT.026.031 ᒋᓴᔅ ᑕᔥ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᓅᑯᒻ ᓴ ᑳᑎᐱᑲᒃ ᑲᑭᓇ ᑳᑕᔑᔦᒃ ᑭᑲ ᑕᐸᓰᒻ, ᒋᓇᑲᔑᔦᒃ᙮ ᐋᓃᔥ ᑭᒋᒪᓯᓇᐃᑲᓐ ᐃᔑᐲᐃᑳᑌ, ᑭᔐᒪᓂᑑ ᓴ ᐅᑲ ᐸᑭᑌᐙᓐ ᐅᑲᓇᐎᒫᓇᒑᓂᔑᐌᓐ, ᑳᐅᑯᐊᔮᓂᒡ ᑕᔥ ᒫᓇᒑᓂᔕᐞ ᑕᒥᒋᐲᐎᐸᐃᐌᐗᐞ, ᐃᑭᑑᒪᑲᓐ᙮

26:32b.MAT.026.032 ᐊᐲ ᑕᔥ ᑮᐌᐱᒫᑎᓯᔮᓐ, ᑭᑲᐊᐎᐲᐃᓂᓂᒻ ᐌᑎ ᑳᓬᐊᓬᐄ ᐊᑮᕽ, ᐅᑮᐃᓈᐞ᙮

26:33b.MAT.026.033 ᐅᑮᐃᑰᓐ ᐃᑕᔥ ᐲᑕᕒᐆᓐ : ᒥᓴᐙ ᓴ ᑮᔥᐱᓐ ᑯᑕᒃ ᓇᑲᓂᒀ, ᑳᐐᓐ ᓃᓐ ᐐᑳ ᑭᑲ ᓇᑲᓂᓯᓅᓐ, ᐅᑮᐃᑰᓐ᙮

26:34b.MAT.026.034 ᒋᓴᔅ ᑕᔥ ᐅᑮᐃᓈᓐ: ᑭᑎᓂᓐ ᓴ, ᐅᐅ ᓴ ᓅᑯᒻ ᑳᑎᐱᑲᒃ, ᒋᑆ ᓅᑖᑯᓯᒡ ᓈᐯᐹᑲᐋᒀᓐ, ᒦ ᓴ ᐋᔕ ᓂᓯᕽ 3 ᒋᐃᑭᑐᔭᓐ ᐁᑭᑫᓂᒥᓯᐗᓐ, ᐅᑮᐃᓈᓐ᙮

26:35b.MAT.026.035 ᐲᑕᕒ ᑕᔥ ᑮᐃᑭᑐ: ᑳᐐᓐ ᐐᑳ ᓂᑖ ᐃᑭᑐᓰ ᐃᐃ ᑳᐃᔑᔭᓐ, ᒥᓴᐙ ᐱᑯ ᐐᐐᒋ ᓂᐴᒥᓈᓐ, ᑮᐃᑭᑐ᙮ ᒦᑕᔥ ᐯᔑᑾᓐ ᑯᑕᒃ ᑭᑭᓄᐊᒪᐙᑲᓇᒃ ᑳᐃᑭᑐᐙᒡ᙮

26:36b.MAT.026.036 ᒋᓴᔅ ᑕᔥ ᐅᑮᐃᔑᐎᓈᐞ ᐅᑭᑭᓄᐊᒪᐙᑲᓇᐞ ᐊᔮᐎᓂᕽ ᑫᓭᒪᓂ ᑳᐃᔑᓂᑳᑌᓂᒃ᙮ ᐅᐅ ᑕᔥ ᐁᑮᐃᓈᒡ: ᒦᓴ ᐅᐅᒫ ᐊᐱᒃ, ᐌᑎ ᑕᔥ ᓃᓐ ᓂᐐᐃᔖ ᐁᐐᐊᑕ ᐊᓇᒥᐋᔮᓐ, ᑮᐃᑭᑐ᙮

26:37b.MAT.026.037 ᒦᑕᔥ ᐅᐅ ᐁᑕ ᑳᒫᒌᓈᒡ, ᐲᑕᕒᐆᓐ, ᐃᓂᔥ ᑲᔦ ᓃᔑᓐ 2 ᓭᐸᑏᓐ ᐅᑯᓯᓯᓂ᙮ ᑲᒀᑕᑫᑕᒧᐎᓐ, ᐐᓴᑫᑕᒧᐎᓐ ᑲᔦ ᐅᑮᐅᑎᓯᑯᓐ ᒋᓴᔅ᙮

26:38b.MAT.026.038 ᒦᑕᔥ ᑳᐃᓈᒡ: ᑫᑳ ᐅᔕ ᓂᓂᓯᑯᓐ ᓂᒫᓀᑕᒧᐎᓐ ᐁᐲᒋ ᑲᒀᑕᑫᑕᒫᓐ᙮ ᒦᑕᔥ ᐅᐅᒫ ᐊᔮᒃ, ᑫᑯ ᑫᑮᓇᐙ ᓂᐹᑫᒃ, ᐅᑮᐃᓈᐞ᙮

26:39b.MAT.026.039 ᓈᑫ ᑕᔥ ᐐᓐ ᐙᓴ ᑮᐃᔖ ᐁᑮᐊᓂᒥᑯᑖᒡ, ᐁᑮᐃᔑ ᐊᓇᒥᐋᒡ: ᓂᑌᑌ! ᑮᔥᐱᓐ ᓴ ᐃᔑᓈᑾᑭᐸᓐ, ᑕᑲ ᐅᑖᐱᓇᒪᐎᔑᓐ ᐅᐅ ᒥᓂᒀᑲᓐ ᑳᐐᐃᔑ ᑲᒀᑕᑭᑑᔮᓐ᙮ ᑳᐐᓐ ᓴ ᓃᓐ ᐁᔑ ᒥᓴᐌᑕᒫᓐ, ᑮᓐ ᓴ ᐁᔑ ᐊᑕᐌᑕᒪᓐ ᑕᐃᔑᒋᑳᓂᐗᓐ, ᑮᐃᑭᑐ᙮

26:40b.MAT.026.040 ᐁᑮ ᑮᐌᓈᓯᑲᐙᒡ ᑕᔥ ᐃᐃ ᓂᓯᓐ 3 ᐅᑭᑭᓄᐊᒪᐙᑲᓇᐞ, ᐅᑮᐙᐸᒫᐞ ᐁᓂᐹᓂᒡ᙮ ᐲᑕᕒᐆᓐ ᓴ ᐅᑮᐃᓈᓐ: ᐌᑯᓀᓐ ᐃᑕᔥ ᐌᒋ ᑆᓇᐎᑑᔦᒃ ᒋᓂᐹᓯᐌᒃ ᑲᓇᑫ ᐯᔑᑯ ᑎᐸᐃᑲᓐ?

26:41b.MAT.026.041 ᐊᔕᐙᐱᒃ ᓴ, ᐊᓇᒥᐋᒃ ᑲᔦ, ᒋᐅᑎᓯᑯᓯᐌᒃ ᐃᐃ ᑳᐐᐃᔑ ᑯᒋᐃᑯᔦᒃ᙮ ᐋᓇᐐᓐ ᐁᒥᓴᐌᑕᒣᒃ ᒋᑑᑕᒣᑭᐸᓐ ᐃᐃ ᑳᑾᔭᑯᓈᑾᒃ, ᑳᐐᓐ ᑕᔥ ᑭᑌᐊᐲᒋᑌᐁᓰᒻ ᐃᐃ ᒋᐃᔑᒋᑫᔦᒃ, ᑮᐃᑭᑐ᙮

26:42b.MAT.026.042 ᒦᓇᐙ ᑕᔥ ᒋᓴᔅ ᑮᐊᓂ ᒫᒑ ᐁᑮᐊᑕ ᐊᓇᒥᐋᒡ᙮ ᓂᑌᑌ! ᑮᔥᐱᓐ ᐃᔑᓈᑾᒃ ᒋᐅᑖᐱᓂᑳᑌᓯᓄᒃ ᐅᐅ ᒥᓂᒀᑲᓐ ᑳᐐᐃᔑ ᑲᒀᑕᑭᑑᔮᓐ, ᐃᔑᓈᑾᒃ ᐃᑕᔥ ᒋᒥᓂᒀᑕᒫᓐ, ᑭᑎᓀᑕᒧᐎᓐ ᓴ ᑕᑑᒋᑳᑌ, ᑮᐃᑭᑐ᙮

26:43b.MAT.026.043 ᐁᑮ ᑮᐌᐊᑕᐙᐸᒫᒡ ᐃᑕᔥ ᐅᑭᑭᓄᐊᒪᐙᑲᓇᐞ, ᐅᑮᐙᐸᒫᐞ ᐁᓇᓂᐹᓂᒡ ᐁᑮ ᑲᐐᑾᔑᓂᒡ᙮

26:44b.MAT.026.044 ᒦᓇᐙ ᑕᔥ ᒋᓴᔅ ᐅᑮᓇᑲᓈᐞ, ᓂᓯᕽ 3 ᐁᑮᐊᓇᒥᐋᒡ, ᐯᔑᑾᓐ ᐁᑮᐊᐎ ᐃᑭᑐᒡ᙮

26:45b.MAT.026.045 ᒦᓇᐙ ᑕᔥ ᐅᑮᓈᓯᑲᐙᐞ ᐅᑭᑭᓄᐊᒪᐙᑲᓇᐞ ᐁᑮᐃᓈᒡ: ᑫᔮᐱ ᓇ ᑭᓂᐹᒻ, ᐁᐊᓉᔑᓀᒃ ᑲᔦ? ᐃᓇᔥᑫ ᒦ ᐅᔕ ᐃ ᐋᔕ ᐁᐯᔓᓈᑾᒃ ᑳᐐᐃᔑᓭᔮᓐ᙮ ᐃᓂᓂ ᐅᑯᓯᓴᓐ ᐃᓴ ᑕᐅᑖᐱᓂᑲᓂᐎᐗᓐ, ᒦᑕᔥ ᐅᒪᒋᑑᑕᒨᒃ ᒋᑑᑕᐙᐙᒡ ᐋᓃᓐ ᐃᑯ ᐁᔑ ᐊᑕᐌᑕᒧᐙᒡ᙮

26:46b.MAT.026.046 ᐗᓂᔥᑳᒃ, ᐊᓂ ᒫᒑᑖ! ᐃᓈᐱᒃ, ᒦᓴ ᐗᐊ ᐃᓂᓂ ᑳᒪᒥᔑᐃᒡ! ᑮᐃᑭᑐ᙮

26:47b.MAT.026.047 ᒣᒀ ᑕᔥ ᒋᓴᔅ ᐁᑳᑮᑭᑐᒡ, ᒎᑕᔅ ᑮᐱ ᑕᑯᔑᓐ, ᒦ ᓴ ᐃᓂ ᐯᔑᒃ ᑳᒥᑖᔑᓃᔑᓂᒡ ᒋᓴᔅ ᐅᑭᑭᓄᐊᒪᐙᑲᓇᐞ᙮ ᒎᑕᔅ ᐃᑕᔥ ᐅᑮᐱ ᐐᒌᐙᐞ ᐃᓂᓂᐗᐞ ᐁᐹᑏᓄᓂᒡ, ᐸᔑᐸᐃᑫᐎᑯᒫᓇᓐ, ᐸᑲᒫᑲᓇᓐ ᑲᔦ ᐁᑮ ᐲᑑᓂᒡ᙮ ᐅᑯ ᓴ ᑲᑭᓇ ᐅᑮ ᐲᒋᓂᔕᐅᑯᐙᐞ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑳᓃᑳᓂᓯᓂᒡ ᐅᓇᔓᐌᐎᓂᕽ᙮

26:48b.MAT.026.048 ᑳᑮᒪᒥᔑᒥᐌᒡ ᐃᑕᔥ ᐅᑮᐃᓈᑯᐸᓐ: ᐊᐊ ᓴ ᐃᓂᓂ ᑫᐅᒌᒪᒃ, ᒦᓴ ᐊᐊᐌ ᑳᐊᑕᐌᓂᒣᒃ, ᐅᑖᐱᓈᑫᒃ ᐃᑕᔥ᙮

26:49b.MAT.026.049 ᔐᒫᒃ ᐃᑕᔥ ᐊᐊ ᒎᑕᔅ ᐅᑮᓈᓯᑲᐙᓐ ᒋᓴᓲᓐ ᐁᑮᐃᓈᒡ: ᐴᔔ, ᐅᑭᑭᓄᐊᒫᑫ! ᐅᑮᐃᓈᓐ᙮ ᒦᑕᔥ ᑳᐃᔑ ᐅᒌᒫᒡ᙮

26:50b.MAT.026.050 ᒋᓴᔅ ᑕᔥ ᐅᑮᐃᓈᓐ: ᓃᒌ, ᐌᔩᑉ ᓴ ᐃᔑᒋᑫᓐ ᑳᐐ ᐃᔑᒋᑫᔭᓐ! ᐅᑮᐃᓈᓐ᙮ ᐃᓂᓂᐗᒃ ᐃᑕᔥ ᑮᐲᔖᐗᒃ, ᐁᑮᐅᑖᐱᓈᐙᒡ ᐁᑮᒪᒫᒋᑯᓈᐙᒡ᙮

26:51b.MAT.026.051 ᐯᔑᒃ ᑕᔥ ᒋᓴᔅ ᑳᑮᐐᒌᐎᑯᒡ, ᐅᑮᒪᓂᐱᑑᓂ ᐸᔑᐸᐃᑫᐎᑯᒫᓂᓂ, ᐁᑮ ᐸᑭᑌᐙᓂᒡ ᐯᔑᒃ ᐅᑕᓄᑮᐋᑲᓂᓂ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ, ᒦᑕᔥ ᐁᑮ ᑮᔥᑭᐌᐸᑲᓈᑕᒪᐙᒡ ᐅᑕᐗᑳᓂ᙮

26:52b.MAT.026.052 ᒋᓴᔅ ᑕᔥ ᐅᑮᐃᓈᓐ: ᐲᓇᐊᓐ ᓴ ᐃᐃ ᑭᐸᔑᐸᐃᑫᐎᑯᒫᓐ ᐋᑎ ᐁᔑᐲᑌᒃ᙮ ᑲᑭᓇ ᓴ ᑳᐋᐸᒋᑑᐙᒡ ᐃᐃ ᐸᔑᐸᐃᑫᐎᑯᒫᓐ, ᒦᓴ ᐃᐃᒫ ᑫᐅᒋ ᓂᔑᐗᓈᑎᓯᐙᒡ᙮

26:53b.MAT.026.053 ᑳᐐᓐ ᐃᓇ ᑭᑭᑫᑕᓰᓐ ᒋᑲᓅᓇᑭᐸᓐ ᓂᑌᑌ ᒋᓈᑕᒪᐎᒡ? ᔐᒫᒃ ᐃᓴ ᐅᑖ ᐲᒋᓂᔕᐙᐞ ᑳᒥᑖᔑᓃᔗᐙᓇᑭᓯᓂᒡ ᑳᐊᔫᑯᐹᑏᓄᓂᒡ ᐁᒐᓬᐊᐞ᙮

26:54b.MAT.026.054 ᑮᔥᐱᓐ ᓴ ᐃ ᐃᔑᒋᑫᔮᐹᓐ, ᑳᐐᓐ ᓴ ᐄᓴᓐ ᑖᐃᔑᓭᓯᓅᓐ ᑳᐃᔑᐲᐃᑳᑌᒃ ᑭᒋᒪᓯᓇᐃᑲᓐ, ᒦ ᐄᑐᒃ ᑳᐃᔑᐲᐃᑳᑌᒃ ᒋᐃᔑᓭᑭᐸᓐ, ᑮᐃᑭᑐ᙮

26:55b.MAT.026.055 ᒋᓴᔅ ᐃᐃ ᐊᐲ ᐅᑮ ᑲᓅᓈᐞ ᐃᐃ ᑳᐹᑏᓄᓂᒡ ᑳᑮ ᐱᓈᓯᑳᑯᒡ: ᑖᐱᔥᑰ ᑮᒨᒋᔥᑮᐎᓂᓃᕽ ᑭᑑᑕᐎᔑᒻ, ᐸᔑᐸᐃᑫᐎᑯᒫᓇᓐ, ᐃᓂ ᑲᔦ ᐸᑲᒫᑲᓇᓐ ᐁᐋᐸᒋᑑᔦᒃ ᐁᐱ ᑳᒋᑎᓂᔦᒃ᙮ ᐁᑕᓱᑮᔑᒃ ᑕᔥ ᐁᑮᓇᒪᑕᐱᔮᓐ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐁᑭᑭᓄᐊᒫᑫᔮᓐ, ᑳᐐᓐ ᑭᑮᐅᑖᐱᓂᓰᒻ᙮

26:56b.MAT.026.056 ᒦᑕᔥ ᐃᐃ ᑳᑮᐅᒋ ᐃᔑᓭᒃ, ᒪᔮ ᓴ ᑯ ᒋᐃᔑᓭᓂᒃ ᐋᓃᓐ ᑳᑮᐃᔑᐲᐃᑫᐙᒡ ᐃᑭ ᑳᑮ ᑲᓅᑕᒪᐙᐙᒡ ᑭᔐᒪᓂᑑᓐ, ᐅᑮᐃᓈᐞ᙮ ᒦᑕᔥ ᑲᑭᓇ ᐅᑭᑭᓄᐊᒪᐙᑲᓇᐞ ᑳᐃᔑ ᓇᑲᓂᑯᒡ ᐁᑮ ᑕᐸᓰᓂᒡ᙮

26:57b.MAT.026.057 ᑫᔭᐸᔅ ᒫᐗᒡ ᑭᒋᐊᓇᒥᐁᐎᑭᒫ ᐅᐙᑳᐃᑲᓂᕽ ᓴ ᑮᐃᔑ ᒫᐗᑑᐱᐃᑎᐗᒃ ᐅᓇᔓᐌᐎᑭᑭᓄᐃᑫᒃ, ᐃᑭ ᑲᔦ ᑳᓃᑳᓂᓯᐙᒡ᙮ ᒦᑕᔥ ᐃᐃᒫ ᑳᐃᔑᐎᓂᑯᒡ ᐊᐊ ᒋᓴᔅ ᐃᐃ ᑳᑮ ᑕᑯᓂᑯᒡ᙮

26:58b.MAT.026.058 ᐲᑕᕒ ᑕᔥ ᐁᑯᑌᐹᐱᒡ ᑮᐱᒥᓂᔕᐃᑫ᙮ ᐃᐃᒫ ᓴ ᒫᐗᒡ ᑭᒋᐊᓇᒥᐁᐎᑭᒫᓐ ᐅᐙᑳᐃᑲᓂᓃᕽ ᐊᑾᒌᕽ ᑳᑮᐃᔑ ᐐᐱᒋᑳᑌᓂᒃ ᑮᐃᔖ᙮ ᐅᑮᐐᑕᐱᒫᐞ ᑲᔦ ᐃᐃ ᔑᒫᑲᓂᔕᐞ ᑳᑮᓂᑖ ᑲᓇᐌᒋᑫᓂᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ, ᐁᐐᐙᐸᑫᒡ ᐋᓃᓐ ᑫᔑ ᐃᔥᒀᑲᒥᑲᓂᓂᒃ᙮

26:59b.MAT.026.059 ᑭᒋᐊᓇᒥᐁᐎᑭᒫᒃ ᑕᔥ ᐃᑭ ᑲᔦ ᑲᑭᓇ ᑳᓂᑖ ᐅᓈᑯᓂᑫᐙᒡ ᐅᑮ ᑲᑴᒥᑳᓈᐙ ᑫᑰᓂᓂ ᑳᑌᐺᐎᓂᐗᓯᓂᓂᒃ ᒋᐃᓈᒋᒥᒥᓐᒡ ᒋᓴᓲᓐ ᒋᐅᒋ ᓂᓯᒥᓐᒡ᙮

26:60b.MAT.026.060 ᐋᓇ ᑕᔥ ᐐᓐ ᐁᑮ ᐹᑏᓄᐙᒡ ᐊᐎᔭᒃ ᐁᑮᐱ ᓂᒥᓈᐌᑳᐸᐎᐙᒡ ᐁᑮ ᑮᐗᓂᒧᐙᒡ ᓅᒋᑯ ᐁᑮᐃᓈᐙᒡ ᒋᓴᓲᓐ, ᑳᐐᓐ ᓴ ᔖᑰᒡ ᑮᑌᐱᒥᒫᓰ ᐋᓃᓐ ᑳᐃᓂᒥᓐᒡ᙮ ᓃᔑᓐ ᐃᑕᔥ ᐃᓂᓂᐗᒃ ᑮᐸᓯᑸᐗᒃ

26:61b.MAT.026.061 ᐁᑮᐃᑭᑐᐙᒡ: ᐊᐊ ᓴ ᐃᓂᓂ ᑮᐃᑭᑐ: ᓂᑖ ᑲᔥᑭᑑᓐ ᓴ ᒋᐲᑯᐱᑑᔮᓐ ᐃᐃ ᑭᔐᒪᓂᑑ ᐅᑕᓇᒥᐁᐎᑲᒥᒃ, ᒋᑮᐌᐸᑕᑭᑑᔮᐹᓐ ᑕᔥ ᓂᓱᑮᔑᑾᑳᒃ, ᑮᐃᑭᑐ, ᐅᑮᐃᓈᐙᓐ᙮

26:62b.MAT.026.062 ᒫᐗᒡ ᑭᒋᐊᓇᒥᐁᐎᑭᒫ ᑕᔥ ᑮᐸᓯᑸ ᐁᑮᐃᓈᒡ ᒋᓴᓲᓐ: ᑳᐐᓐ ᐃᓇ ᑫᑰᓐ ᑭᐐᐃᑭᑐᓰ ᐅᐅ ᑳᐃᔑ ᐊᓈᒥᒥᑰᔭᓐ? ᐅᑮᐃᓈᓐ᙮

26:63b.MAT.026.063 ᒋᓴᔅ ᑕᔥ ᑳᐐᓐ ᑮᓅᑖᑎᓰ᙮ ᒫᐗᒡ ᑭᒋᐊᓇᒥᐁᐎᑭᒫᓐ ᑕᔥ ᐅᑮ ᑲᓅᓂᑰᓐ ᒦᓇᐙ᙮ ᐅᑎᔑᓂᑳᓱᐎᓂᕽ ᓴ ᑳᐱᒫᑎᓯᒡ ᑭᔐᒪᓂᑑ ᑭᑎᔑ ᑲᓅᓂᓐ ᒋᐃᔑᑌᐺᔭᓐ! ᐐᑕᒪᐎᔑᓈᒻ ᑮᔥᐱᓐ ᑮᓐ ᐁᑎᓄᐎᐗᓀᓐ ᑭᔐᒪᓂᑑ ᑳᐅᓀᓂᒫᒡ ᒋᐱᒫᒋᐃᐌᓂᒡ, ᑭᔐᒪᓂᑑ ᐅᑯᓯᓴᓐ, ᐅᑮᐃᑰᓐ᙮

26:64b.MAT.026.064 ᒋᓴᔅ ᑕᔥ ᐅᑮᐃᓈᓐ: ᒪᔮ ᑭᑌᐺ ᑳᐃᑭᑐᔭᓐ! ᐅᐅ ᑕᔥ ᑭᑎᓂᓂᓂᒻ: ᐐᐸ ᓴ ᑕᐃᔑᓭ ᒋᐙᐸᒥᒣᒃ ᐃᓂᓂ ᐅᑯᓯᓴᓐ ᒋᐊᐱᓂᒡ ᐅᑭᒋᓂᑭᓃᕽ ᐃᓇᑫ ᒫᐗᒋᑯ ᑳᒪᔥᑲᐎᓰᓂᒡ ᐱᑕᑯᔑᓂᓂᒡ ᐃᐃᒫ ᑭᒋᑮᔑᑰᐗᑸᕽ, ᑮᐃᑭᑐ᙮

26:65b.MAT.026.065 ᒫᐗᒡ ᑭᒋᐊᓇᒥᐁᐎᑭᒫ ᑕᔥ ᐁᓅᑕᕽ ᐅᐅᐌᓂ, ᐁᐲᒋ ᔒᑭᑕᕽ, ᐅᑮ ᑖᔥᑭᐱᑑᓇᓐ ᐅᑭᑭᔥᑭᑲᓇᓐ, ᐁᑮᐃᑭᑐᒡ: ᒦᓴ ᐅᐅ ᐁᐹᐱᓄᑕᐙᒡ ᑭᔐᒪᓂᑑᓐ! ᑳᐐᓐ ᓴ ᐊᐗᔑᒣ ᑭᓇᑕᐌᓂᒫᓯᐙᓈᓂᒃ ᐅᑎᐹᒋᒨᒃ᙮ ᑭᑮᓅᑕᐙᐙ ᐄᑐᒃ ᐁᐹᐱᓄᑖᑫᒡ᙮

26:66b.MAT.026.066 ᐋᓃᓐ ᓴ ᑫᑑᑕᐎᑎᐸᓐ? ᐅᑮᐃᓈᐞ ᑳᐅᓈᑯᓂᑫᓂᒡ᙮ ᒦᑕᔥ ᐅᐅ ᑳᐃᑯᒡ: ᒦᓴ ᐃ ᐁᑲᔥᑭᑕᒫᓱᒡ ᒋᑮᓂᐳᐸᓐ᙮

26:67b.MAT.026.067 ᒦᑕᔥ ᑳᐃᔑ ᓴᓰᒀᓈᐙᒡ ᒋᓴᓲᓐ ᐅᐐᒀᓂᓃᕽ, ᐁᑮ ᐸᐸᑭᑌᐙᐙᒡ ᑲᔦ᙮ ᐃᑭ ᑕᔥ ᑳᑮ ᐸᐸᑭᑌᐙᐙᒡ

26:68b.MAT.026.068 ᐅᑮᐃᓈᐙᓐ: ᑮᓐ ᐄᑐᒃ ᑭᔐᒪᓂᑑ ᑳᐅᓀᓂᒥᒃ ᒋᐱᒫᒋᐃᐌᔭᓐ! ᐐᑕᒪᐎᔑᓈᒻ ᓴ ᐊᐌᓀᓐ ᐊᐊ ᑳᐸᑭᑌᐅᒃ!

26:69b.MAT.026.069 ᐲᑕᕒ ᒣᒀ ᐁᓇᒪᑕᐱᒡ ᐃᐃᒫ ᐊᑾᒌᕽ ᑳᔑ ᐐᐱᒋᑳᑌᓂᒃ, ᐯᔑᒃ ᒫᐗᒡ ᑭᒋᐊᓇᒥᐁᐎᑭᒫ ᐅᑕᓄᑮᐋᑲᓇᓐ ᑳᑮᐃᑴᐎᓂᒡ ᐅᑮ ᐱᓈᓯᑳᑰᓐ ᐁᑮᐃᑯᒡ: ᑳᓬᐊᓬᐄᕽ ᓴ ᑳᐅᒌᒡ ᒋᓴᔅ, ᑫᑮᓐ ᓴ ᑭᑮᐐᒌᐙ, ᐅᑮᐃᑰᓐ᙮

26:70b.MAT.026.070 ᑮᐋᓉᑕᒻ ᐃᑕᔥ ᐁᑮ ᑲᓇᐙᐸᒥᑯᒡ ᑲᑭᓇ ᐊᐎᔭᐞ᙮ ᒦᑕᔥ ᑳᐃᑭᑐᒡ: ᐊᓂᔖ ᐅᔕ ᑭᑎᑭᑦ ᑳᐃᑭᑐᔭᓐ, ᐅᑮᐃᓈᓐ᙮

26:71b.MAT.026.071 ᐃᔥᒀᑌᕽ ᐃᑕᔥ ᑮᐊᓂ ᐃᔖ ᑳᑮᐅᒋ ᐲᑎᑫᓈᓂᐗᓂᓂᒃ᙮ ᑯᑕᒃ ᐃᑕᔥ ᐊᓄᑮᐋᑲᓇᓐ ᑳᑮᐃᑴᐎᓂᒡ ᐅᑮᐙᐸᒥᑰᓐ, ᐁᑮᐃᓈᓂᒡ ᐃᐃᒫ ᑳᑮᐊᔮᓂᒡ: ᑫᐐᓐ ᐅᔕ ᐗᐊ ᐅᑮᐐᒌᐙᓐ ᐃᓂ ᓈᓴᕒᐊᑎᕽ ᑳᐅᒌᓂᒡ ᒋᓴᓲᓐ, ᑮᐃᑭᑐᐗᓐ᙮

26:72b.MAT.026.072 ᒦᓇᐙ ᑕᔥ ᐲᑕᕒ ᑮᐋᓉᑕᒻ ᐁᑮᐃᑭᑐᒡ: ᑌᐺ ᓴ ᓂᑎᑭᑦ ᑳᐃᑭᑐᔮᓐ! ᑳᐐᓐ ᓂᑭᑫᓂᒫᓰ ᐊᐊ ᐃᓂᓂ! ᑮᐃᑭᑐ᙮

26:73b.MAT.026.073 ᓈᓈᑫ ᑕᔥ ᐁᐊᓂ ᐃᔑᓭᓂᒃ, ᐃᓂᓂᐗᐞ ᐃᐃᒫ ᑳᓈᓃᐸᐎᓂᒡ ᐅᑮ ᐱᓈᓯᑳᑰᐞ ᐁᑮᐃᑯᒡ: ᑫᑫᑦ ᓴ ᑮᓐ ᐯᔑᒃ, ᐋᓃᔥ ᑭᑎᔑᑮᔗᐎᓂᕽ ᑭᑑᒋ ᑭᑫᓂᒥᑰ, ᐅᑮᐃᑰᐞ᙮

26:74b.MAT.026.074 ᐲᑕᕒ ᑕᔥ ᑮᐃᑭᑐ: ᐐᑫ ᐱᑯ ᓂᑌᐺ ᑳᐃᑭᑐᔮᓐ! ᑭᔐᒪᓂᑑ ᓴ ᓂᑲ ᑲᒀᑕᑭᐃᒃ ᑮᔥᐱᓐ ᑌᐺᓯᐙᓐ᙮ ᑳᐐᓐ ᓴ ᓂᑭᑫᓂᒫᓰ ᐊᐊ ᐃᓂᓂ! ᒦᑕᔥ ᑳᑮᓅᑖᑯᓯᒡ ᐊᐊ ᓈᐯᐹᑲᐋᒀᓐ᙮

26:75b.MAT.026.075 ᐲᑕᕒ ᑕᔥ ᑮᒫᒥᑲᐎ ᑳᑮᐃᑯᒡ ᒋᓴᓲᓐ: ᒋᑆ ᓅᑖᑯᓯᒡ ᓴ ᓈᐯᐹᑲᐋᒀᓐ, ᒦᓴ ᐋᔕ ᓂᓯᕽ 3 ᒋᐃᑭᑐᔭᓐ ᐁᑭᑫᓂᒥᓯᐗᓐ, ᐁᑮᐃᑯᒡ᙮ ᒦᑕᔥ ᑳᐃᔑ ᓵᑲᐊᕽ ᐁᑮᐊᐎ ᑭᒋᒪᐎᒡ᙮

27

27:1b.MAT.027.001 ᐐᐸ ᑭᑭᔐᑉ, ᑲᑭᓇ ᑭᒋᐊᓇᒥᐁᐎᑭᒫᒃ, ᑳᓃᑳᓂᓯᐙᒡ ᑲᔦ ᐅᓇᔓᐌᐎᓂᕽ ᐅᑮᐅᓀᑖᓈᐙ ᒋᓂᓯᒥᓐᒡ ᒋᓴᓲᓐ᙮

27:2b.MAT.027.002 ᐲᐙᐱᑴᔮᐲᓐ ᑕᔥ ᑮᐋᐸᑕᓂᓂᐗᓐ ᐁᑮ ᑕᑕᑯᐱᓂᓐᒡ, ᐌᑎ ᓴ ᐁᑮᐃᔑᐎᒋᑲᓂᐎᒡ ᑳᑮᐃᔑ ᐊᔮᓂᒡ ᐹᐃᓬᐊᑑᓐ, ᑭᒋᐅᓇᔓᐌᐎᑭᒫᓐ ᐅᕒᐆᒥᕽ ᑳᐅᒋ ᑎᐯᑖᑯᓯᓂᒡ᙮

27:3b.MAT.027.003 ᐊᐲ ᑕᔥ ᒎᑕᔅ ᑳᑮᒪᒥᔑᐃᐌᒡ ᐁᑮ ᑭᑫᑕᕽ ᐁᐐᓂᒋᑲᓂᐎᓂᒡ ᒋᓴᓲᓐ, ᑮᒫᓀᑕᒻ᙮ ᒦᑕᔥ ᑳᐃᔑ ᑮᐌᒦᓈᒡ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑳᓃᑳᓂᓯᓂᒡ ᐅᓇᔓᐌᐎᓂᕽ ᐃᓂ ᓂᓯᒥᑕᓇ ᑭᒋᐙᐹᐱᑯ ᔔᓂᔮᓴᐞ ᑳᑮᒦᓂᑎᐸᓐ᙮

27:4b.MAT.027.004 ᒦᔥ ᑳᐃᓈᒡ: ᓂᑮᒪᒫᔒ ᓴ ᐁᑮᒪᒥᔑᐊᒃ ᐊᐊ ᐃᓂᓂ ᑫᑰᓂᓂ ᑳᑮᐃᔑ ᒪᒫᔒᓯᒃ, ᒋᓂᓯᓐᒡ, ᐅᑮᐃᓈᐞ᙮ ᐅᐅ ᑕᔥ ᐅᑮᐃᔑ ᓇᑴᑖᑰᐞ: ᑳᐐᓐ ᓃᓇᐎᓐᑦ ᑫᑰᓐ ᓂᑎᓀᑕᓰᒥᓐ, ᐋᓃᔥ ᑮᓐ ᐃᐃ ᑭᑎᔑᒋᑫᐎᓐ, ᐅᑮᐃᑰᐞ᙮

27:5b.MAT.027.005 ᒦᑕᔥ ᒎᑕᔅ ᑳᐃᔑ ᐲᑎᑫ ᐸᑭᑌᓴᑭᔑᒫᒡ ᐃᐃᒫ ᑭᒋᐊᓇᒥᐁᐎᑲᒥᑯᕽ ᐃᐃ ᑭᒋᐙᐹᐱᑯ ᔔᓂᔮᓴᐞ, ᐁᑮᐊᓂ ᒫᒑᒡ ᐁᑮᐊᐎ ᐊᑰᓂᑎᓱᒡ᙮

27:6b.MAT.027.006 ᑭᒋᐊᓇᒥᐁᐎᑭᒫᒃ ᑕᔥ ᐅᑮᐅᑖᐱᓈᐙᐞ ᐃᐃ ᔔᓂᔮᓴᐞ ᐁᑮᐃᑭᑐᐙᒡ: ᒦ ᓴ ᐗᐊ ᔔᓂᔮ ᑳᑮᐃᓈᐸᑎᓯᒡ ᒋᐅᒋ ᓂᓯᓐᒡ ᐊᐎᔭ᙮ ᑳᐐᓐ ᓴ ᐃᓇᑌᓯᓅᓐ ᐅᓇᔓᐌᐎᓐ ᒋᐊᓴᑭᐸᓐ ᐃᐃᒫ ᐊᓇᒥᐁᐎᐸᑭᑎᓂᑫᐎᓂᕽ᙮

27:7b.MAT.027.007 ᒦᑕᔥ ᑳᐃᔑ ᐅᓀᑕᒧᐙᒡ ᐁᐐᐃᓇᓄᑳᓈᐙᒡ ᐃᓂ ᔔᓂᔮᓐ ᒋᐊᑖᐌᐙᒡ ᐃᐃ ᐊᑭ ᐅᑑᓈᑲᓂᑫ ᐅᑕᑮᒻ ᑳᐃᔑᓂᑳᑌᓂᒃ᙮ ᒦᑕᔥ ᑳᑮᐅᒋ ᐊᑖᐌᐙᒡ ᑫᐃᔑ ᓇᐃᓂᒥᓐᒡ ᑳᓂᐳᓂᒡ ᐲᐎᑌᐞ᙮

27:8b.MAT.027.008 ᒦᑕᔥ ᑳᐅᒋ ᐃᔑᓂᑳᑌᒃ ᐃᐃ ᐸᑮ ᐊᑮᓂ, ᑳᐃᔑ ᒥᔅᑸᐗᑲᒥᑳᒃ, ᐲᓂᔥ ᐅᐅ ᐊᐲ ᓅᑯᒻ ᑳᑮᔑᑲᒃ᙮

27:9b.MAT.027.009 ᒦᑕᔥ ᐅᐅ ᑳᐅᒋ ᐃᔑᓭᒃ, ᒋᐃᔑᓭᓂᒃ ᓴ ᑭᔐᒪᓂᑑ ᐅᑎᐹᒋᒧᐎᓂᓃᒪᓐ ᒉᕒᐊᒫᔭ ᑳᑮᐃᑭᑐᓂᑯᐸᓀᓐ: ᐅᑮᐅᑖᐱᓈᐙᐞ ᐃᐃ ᓂᓯᒥᑕᓇ ᑭᒋᐙᐹᐱᑯ ᔔᓂᔮᓴᐞ ᑳᐃᓇᑭᒫᓂᒡ ᐃᔅᕒᐃᔭᓬᐊᐞ ᑳᐃᔑ ᐃᓇᓵᐙᒡ ᒋᐃᓇᑖᐙᑲᓂᐎᓂᒡ᙮

27:10b.MAT.027.010 ᒦᑕᔥ ᑳᐃᓈᐸᒋᐋᐙᒡ ᐃᓂ ᔔᓂᔮᓐ ᐁᑮᐊᑖᐌᐙᒡ ᐃᐃ ᐸᑮ ᐊᑮᓂ ᑳᑮᐅᑎᓈᐙᒡ ᐙᐱᑲᓇᓐ ᐅᓈᑲᓂᑫᒃ, ᑖᐱᔥᑰ ᑳᑎᐯᒋᑫᒡ ᑳᑮᐃᔑᐸᓐ ᒋᐃᔑᒋᑫᓈᓂᐗᓂᓂᒃ᙮ ᒦ ᑳᑮᐃᑭᑐᓂᑯᐸᓀᓐ᙮

27:11b.MAT.027.011 ᒋᓴᔅ ᐃᑕᔥ ᑮᓃᐸᐎ ᐁᓈᓴᒦᓂᒡ ᐃᓂ ᐹᐃᓬᐊᑑᓐ ᑭᒋᐅᓇᔓᐌᐎᑭᒫᓐ, ᐁᑮᐃᑯᒡ: ᑮᓐ ᐃᓇ ᑭᑎᓄᐤ ᒎᐗᒃ ᐅᑭᒋᐅᑭᒫᒥᐙᓐ? ᐅᑮᐃᑰᓐ᙮ ᒋᓴᔅ ᑕᔥ ᑮᐃᔑ ᓇᑴᑕᒻ: ᑭᑌᐺ ᑳᐃᑭᑐᔭᓐ, ᐅᑮᐃᓈᓐ᙮

27:12b.MAT.027.012 ᐃᐃ ᑕᔥ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑳᓃᑳᓂᓯᓂᒡ ᐅᓇᔓᐌᐎᓂᕽ ᐅᑮᐊᓈᒥᒥᑰᐞ ᓭᓯᒃ ᐁᑮᐃᔑᒋᑫᓯᒃ, ᑳᐐᓐ ᑕᔥ ᑫᑰᓂᓂ ᐅᑮᐃᔑ ᓇᑴᑕᐙᓰᐞ ᐃᐃ ᑳᑮᐃᔑ ᐊᓈᒥᒥᑯᒡ᙮

27:13b.MAT.027.013 ᐹᐃᓬᐊᑦ ᑕᔥ ᐅᑮᐃᓈᓐ: ᑳᐐᓐ ᐃᓇ ᑭᓅᑕᐙᓰᒃ ᐃᐃ ᑲᑭᓇ ᐁᔑ ᐊᓈᒥᒥᒀ? ᐅᑮᐃᓈᓐ᙮

27:14b.MAT.027.014 ᔖᑰᒡ ᑕᔥ ᒋᓴᔅ ᑳᐐᓐ ᐊᐙᒡ ᐸᑮ ᑮᑮᑭᑐᓰ, ᐁᑮ ᓇᑴᑕᓯᒃ ᐋᐲᓐᒡ ᐃᑯ ᐯᔑᒃ ᑳᑮᐃᔑ ᐊᓈᒥᒥᓐᒡ᙮ ᐋᐱᒋ ᑕᔥ ᑭᒋᐅᓇᔓᐌᐎᑭᒫ ᑮᑭᒋᒫᒪᑳᑌᑕᒻ᙮

27:15b.MAT.027.015 ᐊᐊ ᑕᔥ ᑭᒋᐅᓇᔓᐌᐎᑭᒫ ᑮᓂᑖ ᐃᔑᒋᑫ ᐁᑮ ᐸᑭᑎᓈᒡ ᐯᔑᒃ ᑭᐸᐙᑲᓇᓐ᙮ ᑮᔖᒡ ᐊᐎᔭᓐ ᐅᑮᐅᓀᓂᒫᐙᓐ ᐊᐌᓀᓇᓐ ᑫᐸᑭᑎᓂᒥᓐᒡ᙮ ᒦ ᓴ ᐅ ᑳᓂᑖᐃᔑᒋᑫᒡ ᐁᑕᔂ ᑳᐱᒫᒋᐃᑰᐎ ᐐᑾᑎᕽ᙮

27:16b.MAT.027.016 ᐃᐃ ᑕᔥ ᐊᐲ ᑮᐊᔮ ᐯᔑᒃ ᑭᐸᐙᑲᓐ ᐸᕒᐋᐸᔅ ᐁᑮᐃᔑᓂᑳᓱᒡ᙮ ᑲᑭᓇ ᓴ ᐊᐎᔭᐞ ᐅᑮ ᑭᑫᓂᒥᑰᐞ᙮

27:17b.MAT.027.017 ᐁᑮᐅᑸᓄᓂᒡ ᑕᔥ ᐊᐎᔭᐞ, ᐹᐃᓬᐊᑦ ᐅᑮ ᑲᑴᒋᒫᐞ: ᐊᐌᓀᓐ ᐁᑕᐌᓂᒥᔦᒃ ᒋᐸᑭᑎᓇᒪᐎᓇᑰᒃ? ᐸᕒᐋᐸᔅ ᐃᓇ? ᑯᒫ ᑲᔦ ᒋᓴᔅ, ᐃᓂ ᑭᔐᒪᓂᑑ ᑳᐅᓈᐸᒫᒡ ᑳᐃᓂᓐᒡ? ᐅᑮᐃᓈᐞ᙮

27:18b.MAT.027.018 ᐅᑮ ᑭᑫᓂᒫᐞ ᐋᓃᔥ ᐃᐃ ᑳᓃᑳᓂᓯᓂᒡ ᒎᐗᐞ ᐁᑮᒥᒋᐅᑌᓂᒫᓂᒡ ᒋᓴᓲᓐ᙮ ᒦᑕᔥ ᑳᑮᐅᒋ ᐲᑕᒪᐎᓐᒡ ᒋᓴᓲᓐ᙮

27:19b.MAT.027.019 ᒣᒀ ᑕᔥ ᐁᓇᒪᑕᐱᒡ ᑎᐹᑯᓂᑫᐗᐱᐎᓂᕽ, ᐊᐎᔭᓐ ᐅᑮᐱ ᑲᓅᓂᑰᓐ ᐁᑮᐃᓉᑕᒪᐙᓂᒡ ᐐᐗᓐ: ᑫᑯ ᐸᐹᒣᓂᒫᑫᓐ ᐊᐊ ᑾᔭᒃ ᐃᓂᓂ, ᐋᓃᔥ ᓃᐱᐗᐞ ᓂᑮ ᑲᒀᑕᑭᑑ ᐁᑮ ᐸᐙᓇᒃ ᑎᐱᑯᕽ᙮

27:20b.MAT.027.020 ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᓃᑳᓂᓯᐙᒡ, ᐅᑮᐅᒻᐺᐋᐙᐞ ᐃᐃ ᑳᐹᑏᓄᓂᒡ ᐅᐅ ᐁᑮᐃᑭᑐᐙᑦ: ᐐᑕᒪᐎᒃ ᐹᐃᓬᐊᑦ ᒋᐸᑭᑎᓈᒡ ᐃᓂ ᐸᕒᐋᐸᓴᓐ, ᒣᔥᑾᒡ ᐃᑕᔥ ᒋᓂᓯᒥᓐᒡ ᒋᓴᓲᓐ᙮

27:21b.MAT.027.021 ᐹᐃᓬᐊᑦ ᑕᔥ ᐅᑮ ᑲᑴᒋᒫᐞ: ᐊᐌᓀᓐ ᓴ ᑫᐸᑭᑎᓇᒃ ᐃᑭ ᑳᓃᔑᐙᒡ? ᒦᑕᔥ ᑳᐃᑯᒡ: ᐸᕒᐋᐸᔅ ᐸᑭᑎᓐ!

27:22b.MAT.027.022 ᐹᐃᓬᐊᑦ ᑕᔥ ᑮᐃᔑ ᑲᑴᑗ: ᐋᓃᓐ ᑕᔥ ᐐᓐ ᑫᑑᑕᐗᒃ ᒋᓴᔅ, ᑭᔐᒪᓂᑑ ᑳᐅᓈᐸᒫᒡ ᑳᐃᒋᑲᓂᐎᒡ? ᒦᑕᔥ ᑳᐃᑭᑐᓂᒡ ᑲᑭᓇ ᐊᐎᔭᐞ: ᑕᐊᑯᓴᑲᐙ!

27:23b.MAT.027.023 ᐹᐃᓬᐊᑦ ᓴ ᒦᓇᐙ ᑮᐃᔑ ᑲᑴᑗ: ᐋᓃᓐ ᑕᔥ ᑳᐃᔑ ᒪᒫᔒᒡ? ᒦᑕᔥ ᐋᒋᑯ ᐁᓂᑯᒃ ᑳᐃᔑ ᒫᒌᔖᔖᑯᐌᓂᒡ: ᑕᐊᑯᓴᑲᐙ! ᑮᐃᔑ ᔖᑯᐌᐗᐞ᙮

27:24b.MAT.027.024 ᐊᐲ ᑕᔥ ᐹᐃᓬᐊᑦ ᐁᑮᐙᐸᑕᕽ ᐊᐗᔑᒣ ᑫᑰᓂᓂ ᒋᐃᔑᒋᑫᓯᒃ, ᐁᑮᓇᓃᓵᓀᑕᕽ ᑲᔦ ᒋᑭᒋ ᐃᓇᑲᒥᑭᓯᓂᒡ ᑳᑮᐅᑸᓄᓂᒡ, ᒦᑕᔥ ᑳᐃᔑ ᐅᑖᐱᓇᕽ ᓂᐲᓂ ᐁᑮ ᑭᓰᓂᒌᒡ ᐁᓈᓴᒦᓂᒡ ᐁᑮᐃᑭᑐᒡ: ᑫᑯ ᑕᔥ ᓃᓐ ᑫᑰᓐ ᓂᑲ ᐸᑲᒥᔥᑳᑯᓰᓐ ᐗᐊ ᑳᐐᓂᓭᒃ ᐃᓂᓂ! ᑮᓇᐙ ᐋᓃᔥ ᐃᐃ ᑭᑎᔑᒋᑫᐎᓂᐙ᙮

27:25b.MAT.027.025 ᒦᑕᔥ ᐅᐅ ᑲᑭᓇ ᑳᐃᔑ ᓇᑴᔖᑯᐙᓂᑯᒡ: ᑕᑲ ᓃᓇᐎᓐᑦ ᐱᓵᓐ ᓂᑲ ᐃᓇᑭᒥᑰᒥᓐ, ᐁᑮᓂᓴᑭᒡ, ᓂᓃᒑᓂᓯᓈᓂᒃ ᑲᔦ, ᐅᑮᐃᑰᐞ᙮

27:26b.MAT.027.026 ᒦᑕᔥ ᐹᐃᓬᐊᑦ ᑳᐃᔑ ᐸᑭᑎᓇᒪᐙᒡ ᐃᐃ ᐸᕒᐋᐸᓴᓐ᙮ ᐁᑮᐃᔥᒀ ᐸᐸᔕᔐᐅᒥᓐᒡ ᑕᔥ ᒋᓴᓲᓐ, ᒦᑕᔥ ᑳᐃᔑ ᐸᑭᑎᓇᒪᐙᒡ ᔑᒫᑲᓂᓴᐞ ᒋᐊᑯᓴᑲᐙᓂᒡ᙮

27:27b.MAT.027.027 ᐹᐃᓬᐊᑦ ᐅᔑᒫᑲᓂᔒᒪᐞ ᐅᑮᐃᔑᐎᓈᓂ ᒋᓴᓲᓐ ᐅᑑᓇᔓᐌᐎ ᐙᑳᐃᑲᓂᕽ᙮ ᐃᐃ ᑕᔥ ᔑᒫᑲᓂᔕᐞ ᐃᐃᒫ ᑳᑮᐊᔮᓂᒡ ᐅᑮᐙᑳᔥᑲᐙᓂ ᒋᓴᓲᓐ᙮

27:28b.MAT.027.028 ᒦᑕᔥ ᐃᑭ ᔑᒫᑲᓂᔕᒃ ᑳᐃᔑ ᑮᒋᑯᓇᔦᐱᓈᐙᒡ ᐁᑮ ᐱᓯᑲᒧᐋᐙᒡ ᐁᒥᔅᑴᑲᓂᓂᒃ ᓈᐱᔥᑭᑲᓐ᙮

27:29b.MAT.027.029 ᐅᑳᐎᒥᓇᑲᔒᕽ ᑲᔦ ᐁᑮᐅᒋ ᐅᔑᑑᐙᒡ ᐸᓯᑴᐱᓱᓐ ᐁᑮ ᓈᐱᓈᑯᑑᐙᒡ ᑭᒋᐅᑭᒫᐎᐸᓯᑴᐱᓱᓂᕽ, ᐁᑮ ᐱᓯᑲᒧᐋᐙᒡ᙮ ᒥᑎᑯᓯᓂ ᑲᔦ ᐅᑮᒦᓈᐙᓐ ᒋᑕᑯᓇᒥᓂᒡ ᐅᑭᒋᓂᑭᕽ᙮ ᒦᑕᔥ ᑳᐃᔑ ᐅᒋᒌᑾᓇᐲᑕᐙᐙᒡ ᐁᑮᒫᓀᓂᒫᐙᒡ ᐁᑮᐃᑭᑐᐙᒡ: ᑭᑭᒋ ᐃᓀᓂᒥᑰ, ᑳᑭᒋᐅᑭᒫᑲᑕᐗᑣ ᒎᐗᒃ!

27:30b.MAT.027.030 ᒦᑕᔥ ᑳᐃᔑ ᓴᓰᒀᓈᐙᒡ, ᐁᑮᒪᑲᒫᐙᒡ ᐃᐃ ᒥᑎᑰᔅ ᑳᑮᒦᓈᐙᐸᓐ, ᐁᑮ ᐸᐸᑭᑌᔮᑯᑎᒀᓀᐙᐙᒡ᙮

27:31b.MAT.027.031 ᒦᑕᔥ ᐁᑮ ᑌᒦᑭᒋᐋᐙᒡ ᐁᑮ ᑮᒋᑯᓇᔦᐱᓈᐙᒡ ᓈᐱᔥᑭᑲᓐ, ᑳᐃᔑ ᑮᐌᐱᓯᑲᒨᓈᐙᒡ ᐃᓂ ᐅᑭᑭᔥᑭᑲᓂᓂ᙮ ᒦᑕᔥ ᑳᐃᔑ ᒫᒌᓈᐙᒡ ᐁᐐᐊᑯᓴᑲᐙᐙᒡ᙮

27:32b.MAT.027.032 ᐁᑮᐊᓂ ᒫᒑᐙᒡ ᐃᑕᔥ, ᐅᑮᓇᑭᔥᑲᐙᐙᓐ ᐃᓂᓂᐗᓐ ᓵᐃᒪᓐ ᐁᑮᐃᔑᓂᑳᓱᓂᒡ, ᓵᐃᕒᐄᓃᕽ ᐁᑮᐅᒌᓂᒡ᙮ ᒦᑕᔥ ᐃᓂ ᔑᒫᑲᓂᔕᒃ ᑳᐃᔑᐋᐙᒡ ᒋᐱᒥᐎᑕᒪᐙᓂᒡ ᒋᓴᓲᓐ ᐅᑖᔑᑌᔮᑎᑯᒥᓂ᙮

27:33b.MAT.027.033 ᐌᑎ ᑕᔥ ᐁᓂ ᐅᑎᑕᒧᐙᒡ ᓴ ᑳᓬᑲᑖ ᑳᑮᐃᒋᑳᑌᒃ᙮ ᒦᓴ ᐃᐌ ᐅᑎᒀᓂᑫᑲᓐ ᑳᐃᒋᑳᑌᒃ᙮

27:34b.MAT.027.034 ᒦᑕᔥ ᐃᐃᒫ ᑳᑮᐃᔑᐐᒥᓇᐋᐙᒡ ᒋᓴᓲᓐ ᔔᒥᓈᐳᓂ ᑳᑮ ᑕᒀᑲᒥᓂᑳᑌᒃ ᑫᑰᓂᓂ ᑳᐐᓴᑲᓂᓂᒃ᙮ ᐁᑮᒪᓯᐱᑕᕽ ᑕᔥ ᑳᐐᓐ ᑮᐐᒥᓂᑴᓰ᙮

27:35b.MAT.027.035 ᒦᑕᔥ ᑳᐃᔑ ᐊᑯᓴᑲᐙᐙᒡ ᐃᐃᒫ ᐋᔑᑌᔮᑎᑯᕽ, ᔑᑾ ᐁᑮᓀᓈᐎᓇᒫᑎᐙᒡ ᐅᑭᑭᔥᑭᑲᓂᓂ ᐁᑮᐊᐸᑭᒋᑫᐙᒡ ᐁᑮᐊᑕ ᐸᓇᐊᒧᐙᒡ ᐊᐌᓀᓐ ᑫᐊᔮᒡ ᐃᐃ ᐅᑭᑭᔑᑲᓂᓂ᙮

27:36b.MAT.027.036 ᒦᑕᔥ ᑳᐃᔑ ᐅᓇᐱᐙᒡ ᐁᑮ ᑲᓇᐌᓂᒫᐙᒡ᙮

27:37b.MAT.027.037 ᐁᓂᑴᑰᒋᕽ ᐃᑕᔥ ᑮᐊᑰᑌᓂ ᐅᔑᐲᐃᑲᓐ ᐅᑕᓈᒥᒥᑰᐎᓐ ᐁᑮᐃᔑᐲᐃᑳᑌᓂᒃ: ᒦ ᓴ ᐗᐊ ᒋᓴᔅ ᑳᑭᒋᐅᑭᒫᑲᑕᐙᒡ ᒎᐗᐞ᙮

27:38b.MAT.027.038 ᓃᔑᓐ 2 ᓴ ᐅᑮᒨᒋᔥᑲᐞ ᐅᑮ ᑕᑯᐐᒋ ᐊᑯᓴᑲᐅᑰᒫᐞ, ᐯᔑᒃ ᐅᑭᒋᓂᑭᕽ ᐃᓇᑫ ᐁᑮᐃᔑ ᐊᑰᒋᓂᓂᒡ, ᑯᑕᒃ ᑕᔥ ᐅᓇᒪᑎᓂᑭᕽ᙮

27:39b.MAT.027.039 ᐊᐎᔭᐞ ᓴ ᑳᑮᒪᔮᔥᑳᑯᒡ ᑮᐌᐌᐱᑴᐸᓂᐅᐗᐞ ᐁᑮ ᑲᑳᓱᒥᑯᒡ

27:40b.MAT.027.040 ᐁᑮᐃᑯᒡ: ᑮᓐ ᐃᓴ ᑳᐐ ᐲᑯᐱᑑᔭᐸᓐ ᐃᐃ ᑭᒋᐊᓇᒥᐁᐎᑲᒥᒃ, ᑳᐐ ᑮᔕᑭᑑᔭᐸᓐ ᑲᔦ ᓂᓱᑮᔑᑾᑳᒃ! ᐱᒫᒋᐃᑎᓱᓐ! ᑮᔥᐱᓐ ᑭᔐᒪᓂᑑ ᐅᑯᓯᓴᓐ ᑌᓄᐎᐗᓀᓐ, ᓃᓵᑕᐌᓐ ᐃᐃᒫ ᐋᔑᑌᔮᑎᑯᕽ! ᐅᑮᐃᑰᐞ᙮

27:41b.MAT.027.041 ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᐅᓇᔓᐌᐎᑭᑭᓄᐊᒫᑫᒃ, ᐃᑭ ᑲᔦ ᑳᓃᑳᓂᓯᐙᒡ ᒎᐗᒃ, ᒦᓴ ᐯᔑᑾᓐ ᑫᐐᓇᐙ ᑳᐃᔑ ᒦᑭᓱᒫᐙᒡ:

27:42b.MAT.027.042 ᐁᑮ ᐱᒫᒋᐋᒡ ᑕᔥ ᑯᑕᒃ ᐊᐎᔭᐞ, ᔑᑾ ᑕᔥ ᑳᐐᓐ ᐅᑲᔥᑭᑑᓰᓐ ᒋᐱᒫᒋᐃᑎᓱᒡ᙮ ᐐᓐ ᐄᑐᒃ ᐃᓈ ᐁᑭᒋᐅᑭᒫᑲᑕᐙᒡ ᐃᐃ ᐃᔅᕒᐃᔭᓬᐊᐞ᙮ ᑮᔥᐱᓐ ᓴ ᑲᔥᑭᐅᒡ ᒋᓃᓵᑕᐌᒡ ᐃᐃᒫ ᐋᔑᑌᔮᑎᑯᕽ, ᒦ ᓴ ᐃ ᐸᔦᔥ ᒋᑌᐺᑕᐗᕽ᙮

27:43b.MAT.027.043 ᑭᔐᒪᓂᑑᓐ ᐄᑐᒃ ᐅᑕᐯᓂᒧᓄᑕᐙᓐ᙮ ᑕᑲ ᓴ ᔐᒫᒃ ᐅᑲ ᓈᑕᒫᑰᓐ ᑮᔥᐱᓐ ᐁᑕᐌᓂᒥᑯᑴᓐ᙮ ᒦ ᐄᑐᒃ ᑳᐃᑭᑐᒡ: ᑭᔐᒪᓂᑑ ᓂᑑᑯᓯᓯᒥᒃ, ᑮᐃᑭᑐᐗᒃ᙮

27:44b.MAT.027.044 ᐃᑭ ᓴ ᐅᑮᒨᒋᔥᑲᒃ ᑳᑮᐐᒋᐊᑰᒋᓅᒫᐙᒡ, ᐯᔑᑾᓐ ᐅᑮᐃᔑ ᒦᑭᓱᒫᐙᓐ᙮

27:45b.MAT.027.045 ᐁᓈᐗᑴᒃ ᑕᔥ ᒥᓯᐌ ᐃᐃᒫ ᐊᑮᕽ ᑮᑲᔥᑮᑎᐱᑲᓐ ᓂᓱᑎᐸᐃᑲᓐ ᒥᓂᒃ᙮

27:46b.MAT.027.046 ᐁᓂᓱᑎᐸᐃᑲᓀᔮᓂᒃ ᑕᔥ ᒋᓴᔅ ᐁᓂᑯᒃ ᑮᐃᑭᑐ: ᐄᓬᐋᐃ, ᐄᓬᐋᐃ! ᓬᐊᒫ ᓴᐹᑖᓃ? ᒦ ᓴ ᐃᐃ ᑳᐃᒋᑳᑌᒃ: ᓂᑭᔐᒪᓂᑑᒻ, ᓂᑭᔐᒪᓂᑑᒻ! ᐌᑯᓀᓐ ᑳᑮᐅᒋ ᓇᑲᔑᔭᓐ?

27:47b.MAT.027.047 ᐃᑭ ᑕᔥ ᐋᓂᑕ ᐃᐃᒫ ᑳᑮᓃᐸᐎᐙᒡ ᐁᓅᑕᐙᐙᒡ ᐁᐃᑭᑐᓂᒡ ᑮᐃᑭᑐᐗᒃ: ᐃᓬᐋᐃᒐᐗᓐ ᐅᔕ ᐅᓇᑐᒫᓐ ᒋᐱᓈᑕᒫᑯᒡ᙮

27:48b.MAT.027.048 ᐯᔑᒃ ᑕᔥ ᑮᐊᐸᑑ ᐁᑮᐅᑖᐱᓈᒡ ᐃᔅᑲᐃᐹᓇᓐ, ᔔᒥᓈᐳ ᑳᐌᑕᑭᑌᒃ ᑎᓄ ᐁᑮ ᔖᐳᐸᓈᒡ ᐁᑮ ᒉᑭᐲᓈᒡ, ᐁᑮᓃᒫᑾᐊᒪᐙᒡ ᒋᓴᓲᓐ, ᐁᑮ ᑲᑴᒥᓇᐋᒡ᙮

27:49b.MAT.027.049 ᑯᑕᒃ ᑕᔥ ᑮᐃᑭᑐᐗᒃ: ᑕᑲ ᐲᐃᒫᑖᓂᓐ ᐃᓬᐋᐃᒐᐗᓐ ᒋᐱᐱᒫᒋᐃᑯᒡ᙮

27:50b.MAT.027.050 ᒋᓴᔅ ᑕᔥ ᒦᓇᐙ ᐁᓂᑯᒃ ᑮᑭᔒᐌ, ᒦᑕᔥ ᑳᐃᔑ ᐴᓂᐱᒫᑎᓯᒡ᙮

27:51b.MAT.027.051 ᐃᐃᒫ ᑕᔥ ᑭᒋᐊᓇᒥᐁᐎᑲᒥᑯᕽ ᐲᑎᒃ, ᑭᐲᑲᐃᑲᓐ ᑮᑕᔗᑲᑰᑌ, ᐁᑮᐋᑲᐗᑰᑌᒃ ᑳᔑ ᑯᑖᓀᑖᑾᒃ ᐲᑎᒃ᙮ ᒦ ᓴ ᐃᐃ ᐊᐲ ᐃᐃ ᑳᐃᔑ ᑖᔥᑮᑭᓭᒃ, ᐃᔥᐱᒥᕽ ᐁᑮᐅᒋ ᒫᒋᑖᔥᑭᓭᒃ ᐲᓂᔥ ᑕᐸᔒᔥ ᐁᑮᐃᔑ ᑖᔥᑮᑭᓭᒃ᙮ ᒦ ᑲᔦ ᐃ ᐊᐲ ᑳᑯᔥᑾᑲᒥᑭᓭᒃ᙮ ᐊᓯᓃᒃ ᑲᔦ ᑮᑖᑖᔥᑭᓭᐗᒃ᙮

27:52b.MAT.027.052 ᒌᐯᑲᒥᑰᓐ ᑲᔦ ᑮᐹᑭᓭᐗᓐ, ᓃᐳᐗᐞ ᑕᔥ ᑭᔐᒪᓂᑑ ᐅᑾᔭᒀᑎᓰᒪᐞ ᑳᑮᓂᐳᓂᐸᓐ ᑮᑮᐌᐱᒫᑎᓯᐋᐗᐞ,

27:53b.MAT.027.053 ᐁᑮ ᓵᑲᐊᒧᐙᒡ ᒌᐯᑲᒥᑯᕽ᙮ ᑮᑮᐌᐱᒫᑎᓯᐃᒥᓐᒡ ᒋᓴᓲᓐ ᑮᐃᔑ ᐲᑎᑫᐗᒃ ᐃᐃᒫ ᑭᔐᒪᓂᑑ ᐅᑑᑌᓈᒥᕽ᙮ ᑮᐹᑏᓄᐗᐞ ᑕᔥ ᑳᑮᐙᐸᒥᑯᐙᒡ᙮

27:54b.MAT.027.054 ᐊᐲ ᑕᔥ ᐊᐊ ᔑᒫᑲᓂᔒᐎᑭᒫ, ᐃᐃ ᑲᔦ ᐅᔑᒫᑲᓂᔒᒪᐞ ᑳᑮᐐᒌᐎᑯᒡ ᑳᑮ ᑲᓇᐌᓂᒫᓂᒡ ᒋᓴᓲᓐ ᐁᐙᐸᑕᒧᐙᒡ ᐊᑮᓂ ᐁᑯᔥᑯᓭᓂᒃ, ᑲᑭᓇ ᑫᑰᓂᓂ ᑲᔦ ᑳᑮᐃᔑᓭᓂᒃ, ᐐᑫ ᓴ ᑮᑭᒋᓭᑭᓯᐗᒃ, ᐁᑮᐃᑭᑐᐙᒡ: ᑌᐺ ᓴ ᑭᔐᒪᓂᑑ ᐃᓂ ᐅᑯᓯᓴᓐ!

27:55b.MAT.027.055 ᑮᐹᑏᓄᐗᒃ ᓴ ᑲᔦ ᐃᑴᐗᒃ ᐌᑎ ᐙᓴ ᐁᑮᐅᓵᐱᐙᒡ, ᑳᓬᐊᓬᐄᕽ ᑳᑮᐱᐅᒋ ᐱᒥᓂᔕᐙᐙᒡ ᒋᓴᓲᓐ ᐁᑮᐱ ᐱᒥᐐᒋᐋᐙᒡ᙮

27:56b.MAT.027.056 ᒦᐗᑭᓴ ᐅᑯ ᑳᑮ ᑕᑸᓄᐙᒡ ᐃᐃᒫ, ᒣᕒᐃ ᒫᑲᑕᓬᐊ ᐆᑌᓈᓯᕽ ᑳᐅᒌᒡ, ᔑᑾ ᑯᑕᒃ ᒣᕒᐃ ᑳᑮᐅᑯᓯᓯᒡ ᒌᒥᓴᓐ, ᒎᓴᐴᓐ ᑲᔦ᙮ ᓭᐸᑏ ᑕᔥ ᐐᐗᓐ ᑕᔥ ᑲᔦ ᐃᐃᒫ ᑮᐊᔮᐗᓐ᙮

27:57b.MAT.027.057 ᐊᐲ ᑕᔥ ᐁᐊᓂ ᐅᓈᑯᔑᓂᓂᒃ, ᑮᑕᑯᔑᓐ ᐁᐌᓅᑎᓯᒡ ᐃᓂᓂ ᒎᓴᑉ ᐁᑮᐃᔑᓂᑳᓱᒡ, ᐌᑎ ᐁᑮᐅᒌᒡ ᐆᑌᓈᕽ ᐁᕒᐊᒪᑏᔭ ᑳᑮᐃᒋᑳᑌᓂᒃ᙮

27:58b.MAT.027.058 ᐅᑮᓈᓯᑲᐙᓐ ᑕᔥ ᐹᐃᓬᐊᑑᓐ ᐁᑮ ᑲᑴᑗᒡ ᒋᒦᓂᓐᒡ ᐃᐃ ᒋᓴᓲᓐ ᐅᐐᔭᐎᓂ᙮ ᒦᑕᔥ ᑳᐃᑯᒡ ᐱᓵᓂᑯ ᒋᒦᓂᓐᒡ᙮

27:59b.MAT.027.059 ᐅᑮᐊᐎ ᐅᑖᐱᓈᓐ ᑕᔥ ᐐᔭᐎᓂ ᐁᑮ ᑕᑎᐸᐱᑑᒡ ᐅᔥᑭ ᐙᐱᔥᑮᑭᓅᓂ ᐁᑮᐋᐸᒋᑑᒡ᙮

27:60b.MAT.027.060 ᒦᑕᔥ ᐃᐃᒫ ᑳᑮᐃᔑ ᓇᐃᓇᕽ ᓇᐃᓂᑏᐎᑲᒥᑯᕽ ᐐᓐ ᓴ ᑳᑮᐊᓅᑮᑯᐸᓀᓐ ᒋᐅᔑᑕᒪᐎᓐᒡ ᐃᐃᒫ ᑮᔥᑳᐱᑳᕽ᙮ ᑭᒋᐊᓯᓃᓐ ᓴ ᐅᑮᐃᔑ ᑭᐱᑎᑎᐱᓈᓐ ᐃᐃᒫ ᐃᔥᒀᑌᕽ᙮ ᒦᑕᔥ ᑳᐃᔑ ᒫᒑᒡ᙮

27:61b.MAT.027.061 ᑮᐊᔮᐗᒃ ᐃᑕᔥ ᐃᐃᒫ ᒣᕒᐃ ᒫᑲᑕᓬᐊᐎᑴ ᐊᐊ ᑕᔥ ᑯᑕᒃ ᒣᕒᐃ ᐁᑮᐃᓈᓴᒪᐲᑕᒧᐙᒡ ᐃᐃ ᒌᐯᑲᒥᑯᓂ᙮

27:62b.MAT.027.062 ᐁᑮᐊᓂ ᐙᐸᓂᓂᒃ ᑕᔥ ᐁᐊᓉᐲᐎ ᑮᔑᑲᓂᓂᒃ, ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᐯᕒᐊᓰᒃ, ᐅᑮᓈᓯᑲᐙᐙᓐ ᐹᐃᓬᐊᑑᓐ,

27:63b.MAT.027.063 ᐁᑮᐃᓈᐙᒡ: ᑫᒋ ᐃᓀᑖᑯᓯᔭᓐ, ᓂᒫᒥᑲᐎᒥᓐ ᓴ ᐁᑮᐃᑭᑐᒡ ᐊᐊ ᐅᑲᑮᓇᐎᔥᒃ ᒣᒀ ᑮᐱᒫᑎᓯᒡ᙮ ᐅᐅ ᓴ ᑮᐃᑭᑐ: ᓂᓱᑮᔑᑾᑳᒃ 3 ᓴ ᓂᑲ ᑮᐌᐱᒫᑎᔅ᙮

27:64b.MAT.027.064 ᐃᓈᑯᓂᑫᓐ ᑕᔥ ᐋᐱᒋ ᐌᐌᓂ ᒋᑲᓇᐌᒋᑳᑌᒃ ᐃᐃ ᒌᐯᑲᒥᒃ ᐲᓂᔥ ᒋᓂᓱᑮᔑᑲᒃ᙮ ᒫᑭᔖ ᓴ ᐅᑭᑭᓄᐊᒪᐙᑲᓇᐞ ᑕᑭᒨᑎᐗᐞ ᐃᐃ ᐐᔭᐤ ᒋᐃᓈᒋᒧᓂᒡ ᓴ ᐁᑮ ᑮᐌᐱᒫᑎᓯᒡ᙮ ᐃᐃ ᑕᔥ ᑫᐃᔑ ᑮᐗᓂᒧᓂᒡ ᓇᐗᒡ ᐄᑐᒃ ᐃᐃ ᑕᒫᔑᐱᒋᑫᒪᑲᓂᓂ ᐊᐲᒡ ᐐᓐ ᓂᑕᒻ ᐃᐃ ᑳᑮᐃᓍᓂᑎᓱᑯᐸᓀᓐ ᐊᐊ ᐅᑲᑮᓇᐎᔥᒃ, ᑮᐃᑭᑐᐗᒃ᙮

27:65b.MAT.027.065 ᐹᐃᓬᐊᑦ ᓴ ᑮᐃᑭᑐ: ᐊᔮᐗᒃ ᐄᑐᒃ ᑳᑲᓇᐌᒋᑫᐙᒡ, ᒦᐗᑭᑭ ᐋᐸᒋᐃᑾᒃ ᒋᐋᔩᒋ ᑲᓇᐌᒋᑳᑌᒃ ᐋᓃᓐ ᐃᐃ ᑫᐊᑯᑲᔥᑭᒋᑳᑌᒃ, ᐅᑮᐃᓈᐞ᙮

27:66b.MAT.027.066 ᒦᑕᔥ ᑳᐃᔑ ᒫᒑᐙᒡ ᐁᑮᐊᑾᔅᑭᐗᓴᒧᐙᒡ ᐊᐎᔭᓐ ᒋᐹᑭᓇᓯᓂᒃ᙮ ᐃᑭ ᑕᔥ ᑳᑲᓇᐌᒋᑫᐙᒡ ᔑᒫᑲᓂᔕᒃ ᐌᐌᓂ ᐅᑮ ᑲᓇᐌᑖᓈᐙ᙮

28

28:1b.MAT.028.001 ᐁᐃᔥᒀ ᐊᓉᐲᐎ ᑮᔑᑲᓂᓂᒃ ᑕᔥ ᐁᐊᓂ ᐙᐸᓂᓂᒃ ᐁᐊᓇᒥᐁᑮᔑᑲᓂᓂᒃ, ᒣᕒᐃ ᒫᑲᑕᓬᐊᐎᑴ, ᐊᐊ ᑲᔦ ᑯᑕᒃ ᒣᕒᐃ ᑮᐃᔖᐗᒃ ᐁᑮᐊᑕᐙᐸᑕᒧᐙᒡ ᒌᐯᑲᒥᒃ᙮

28:2b.MAT.028.002 ᓭᓴᑰᒡ ᑕᔥ ᑮ ᑯᔥᑾᑲᒥᑭᓭᓂ᙮ ᑳᑎᐯᒋᑫᒡ ᐅᑌᒐᓬᐃᒪᓐ ᑭᒋᑮᔑᑯᕽ ᑮᐱ ᐅᒌᐗᓐ, ᓂᑯᒋ ᐅᑮᐃᔑ ᑎᑎᐱᓈᓂ ᐃᓂ ᐊᓯᓃᓐ, ᒦᑕᔥ ᐃᐃᒫ ᐊᓯᓃᕽ ᑳᐃᔑ ᓇᒪᑕᐱᓂᒡ᙮

28:3b.MAT.028.003 ᒦᓴ ᑖᐱᔥᑰ ᑳᐙᑌᓭᒃ ᑳᐊᐲᒋᐙᓭᓈᑯᓯᓂᒡ, ᐅᑭᑭᔥᑭᑲᓂᓂ ᑲᔦ ᑖᐱᔥᑰ ᑰᓂᕽ ᐁᑮᐊᐲᒋᐙᐱᔥᑭᓈᑾᓂᓂᑭᓐ᙮

28:4b.MAT.028.004 ᐃᑭ ᑕᔥ ᑳᑮ ᑲᓇᐌᒋᑫᐙᒡ ᔑᒫᑲᓂᔕᒃ ᐐᑫ ᑮᓂᓂᑳᓂᒥᓯᐗᒃ ᑳᐊᐲᒋ ᓭᑭᓯᐙᒡ, ᐁᑮ ᑲᐎᓭᐙᒡ, ᑖᐱᔥᑰ ᐁᑮᓂᐳᐙᒡ ᐁᑮᐃᔑᓈᑯᓯᐙᒡ᙮

28:5b.MAT.028.005 ᐊᐊ ᑕᔥ ᐁᒐᓬ ᐅᑮ ᑲᓅᓈᐞ ᐃᐃ ᐃᑴᐗᐞ: ᑫᑯ ᓭᑭᓯᑫᒃ, ᐅᑮᐃᓈᐞ᙮ ᑭᑭᑫᓂᒥᓂᓂᒻ ᐋᓃᔥ ᐁᓇᓈᑕᐙᐸᒣᒃ ᒋᓴᔅ ᑳᑮᐊᑯᓴᑲᐅᓐᒡ᙮

28:6b.MAT.028.006 ᑳᐐᓐ ᓴ ᐅᐅᒫ ᐊᔮᓰ᙮ ᑮᑮᐌᐱᒫᑎᓯ ᐅᔕ ᑖᐱᔥᑰ ᑳᑮᐃᑭᑐᒡ᙮

28:7b.MAT.028.007 ᐌᔩᑉ ᑕᔥ ᐊᑕ ᐐᑕᒪᐎᒥᒃ ᐅᑭᑭᓄᐊᒪᐙᑲᓇᐞ, ᐁᑮ ᑮᐌᐱᒫᑎᓯᒡ᙮ ᐋᔕ ᑕᔥ ᐌᑎ ᑳᓬᐊᓬᐄᕽ ᑭᑕᐎᐲᐃᑯᐙ᙮ ᒦ ᐃᒫ ᑫᔑ ᐙᐸᒣᒃ᙮ ᒫᒥᑲᐎᒃ ᑕᔥ ᐃᐃ ᑳᐃᓂᓇᑰᒃ, ᐅᑮᐃᑯᐙᓐ᙮

28:8b.MAT.028.008 ᒦᑕᔥ ᔐᒫᒃ ᑳᐃᔑ ᓇᑲᑕᒧᐙᒡ ᐃᐃ ᒌᐯᑲᒥᒃ ᐁᑮ ᑯᑖᒋᐙᒡ᙮ ᔖᑰᒡ ᐃᑕᔥ ᐐᑫ ᑮᒌᑫᑕᒨᒃ, ᐁᑮᐊᐸᑑᐙᒡ ᐁᐐᐐᑕᒪᐙᐙᒡ ᐃᐃ ᑭᑭᓄᐊᒪᐙᑲᓇᐞ᙮

28:9b.MAT.028.009 ᓭᓴᑰᒡ ᑕᔥ ᐅᑮᓇᑭᔥᑳᑯᐙᓐ ᒋᓴᓲᓐ: ᐴᔔ, ᐁᐃᑯᐙᒡ᙮ ᐅᑮ ᓴᑭᓯᑌᓈᐙᓐ ᓴ ᐁᑮᐅᒋᒌᑾᓃᑕᐙᐙᒡ᙮

28:10b.MAT.028.010 ᒦᑕᔥ ᑳᐃᑯᐙᒡ: ᑫᑯ ᓭᑭᓯᑫᒃ! ᒫᒑᒃ ᓴ, ᐊᐎᑲᓅᓂᑾᒃ ᓃᒋᑭᐌᔭᒃ ᒋᐃᔖᐙᒡ ᑳᓬᐊᓬᐄᕽ, ᒦᑕᔥ ᐌᑎ ᑫᔑ ᐙᐸᒥᐙᒡ, ᐅᑮᐃᑯᐙᓐ᙮

28:11b.MAT.028.011 ᒣᒀ ᑕᔥ ᐁᐊᓂ ᐱᒥᐊᔮᐙᒡ ᐃᑭ ᐃᑴᐗᒃ, ᐋᓂᑕ ᑕᔥ ᔑᒫᑲᓂᔕᒃ ᑳᑮ ᑲᓇᐌᑕᒧᐙᒡ ᒌᐯᑲᒥᒃ, ᑮᑮᐌᐃᔖᐗᒃ ᐌᑎ ᒉᕒᐆᓴᓬᐊᒥᕽ ᐁᑮᐐᑕᒪᐙᐙᒡ ᑭᒋᐊᓇᒥᐁᐎᑭᒫᐞ ᑲᑭᓇ ᑫᑰᓂᓂ ᑳᑮᐃᓇᑲᒥᑲᓂᓂᒃ᙮

28:12b.MAT.028.012 ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᓃᑳᓂᓯᐙᒡ ᒎᐗᒃ ᑮᐅᓀᑕᒨᒃ ᐋᓃᓐ ᑫᐃᔑᒋᑫᐙᒡ᙮ ᒦᑕᔥ ᑳᐃᔑ ᒦᓈᐙᑦ ᓃᐳᐗᐞ ᔔᓂᔮᓐ ᐃᓂ ᔑᒫᑲᓂᔕᐞ,

28:13b.MAT.028.013 ᐁᐃᓈᐙᒡ: ᐅᐅ ᓴ ᑭᑲ ᐃᑭᑐᒻ: ᐅᑭᑭᓄᐊᒪᐙᑲᓇᐞ ᑮᐱ ᑕᑯᔑᓅᐞ ᐁᑎᐱᑲᓂᓂᒃ ᒣᒀ ᐁᓂᐹᔮᕽ, ᒦᑕᔥ ᐄᓴᓐ ᑳᐃᔑ ᑭᒨᑎᓂᒡ ᐃᐃ ᐅᐐᔭᐤ᙮

28:14b.MAT.028.014 ᑮᔥᐱᓐ ᑕᔥ ᑭᒋᐅᓇᔓᐌᐎᑭᒫ ᓅᑕᕽ ᐅᐅᐌᓂ, ᓃᓇᐎᓐᑦ ᓴ ᓂᑲ ᑲᔥᑭᒫᓈᓐ ᑮᓇᐙ ᑫᑰᓐ ᒋᐸᑲᒥᔥᑳᑯᓯᐌᒃ, ᐅᑮᐃᓈᐙᐞ᙮

28:15b.MAT.028.015 ᐃᑭ ᑕᔥ ᐅᑲᓇᐌᒋᑫᒃ ᐅᑮᐅᑖᐱᓈᐙᓐ ᐃᓂ ᔔᓂᔮᓐ, ᐁᑮᐃᔑᒋᑫᐙᒡ ᑳᑮᐃᓂᑣ᙮ ᒦᑕᔥ ᒎᐗᒃ ᑫᔮᐱ ᓅᑯᒻ ᑳᑮᔑᑲᓂᓂᒃ ᐅᐅ ᐯᐹᐃᑭᑐᐙᒡ᙮

28:16b.MAT.028.016 ᐃᑭ ᑕᔥ ᒥᑖᔑᐯᔑᒃ 11 ᑭᑭᓄᐊᒪᐙᑲᓇᒃ ᑮᐃᔖᐗᒃ ᐌᑎ ᑳᐃᔑ ᐱᑾᑎᓈᓂᒃ ᑳᓬᐊᓬᐄᕽ ᑳᑮᐃᑯᐙᒡ ᒋᓴᓲᓐ ᒋᐃᔖᐙᒡ᙮

28:17b.MAT.028.017 ᐊᐲ ᑕᔥ ᐁᐙᐸᒫᐙᒡ ᐅᑮᐅᒋᒌᑾᓃᑕᐙᐙᓐ᙮ ᐋᓂᑕ ᑕᔥ ᑳᐐᓐ ᐅᑮ ᑾᔭᑴᓂᒫᓯᐙᐙᓐ᙮

28:18b.MAT.028.018 ᒋᓴᔅ ᐃᑕᔥ ᐯᔓ ᐅᑮ ᐱᓈᓯᑲᐙᐞ ᐁᑮᐃᓈᒡ: ᑲᑭᓇ ᓴ ᑲᔥᑭᐁᐎᓯᐎᓐ ᓂᑮᒦᓂᑰᐎᔅ ᑲᑭᓇ ᑫᑰᓐ ᒋᑎᐯᑕᒫᓐ ᑭᒋᑮᔑᑯᕽ, ᐊᑮᕽ ᑲᔦ᙮

28:19b.MAT.028.019 ᒫᒑᒃ ᑕᔥ, ᓈᓯᑲᐎᑾᒃ ᐃᑭ ᑲᑭᓇ ᑳᑕᓶᐙᓇᑭᓯᐙᒡ ᐯᒫᑎᓯᐙᒡ, ᑭᑭᓄᐊᒪᐎᑾᒃ ᒋᐱᒥᓂᔕᐅᐙᒡ᙮ ᓰᑲᐊᑕᐎᑾᒃ ᑲᔦ ᐅᑎᔑᓂᑳᓱᐎᓂᓃᕽ ᐃᓂ ᐌᔫᓯᒥᒥᓐᒡ, ᐃᓂ ᑲᔦ ᐌᑯᓯᓯᒥᒥᓐᒡ, ᐃᓂ ᑲᔦ ᑭᔐᒪᓂᑑ ᐅᑕᒑᑾᓐ᙮

28:20b.MAT.028.020 ᒋᑭᑭᓄᐊᒪᐌᒀ ᑲᔦ ᒋᑑᑕᒧᐙᒡ ᑲᑭᓇ ᑫᑰᓂᓂ ᑳᑮᐃᓂᓇᑰᒃ᙮ ᒨᔕᒃ ᑕᔥ ᐁᔮᑕᓱᑮᔑᒃ ᑭᑲ ᐐᒌᐎᓂᓂᒻ ᐲᓂᔥ ᐃᐃ ᐊᐲ ᒋᐃᔥᒀᓭᑭᓐ ᐅᓄ ᑳᐱᒥᓭᑭᓐ ᐅᐅᒫ ᐊᑮᕽ, ᑮᐃᑭᑐ᙮