Lamentations (Maori)

1

1:1b.LAM.001.001 Taukiri e! noho mokemoke ana te pa i ki nei i te tangata! Ano tona rite he pouaru! kua waiho hei hoatu takoha te mea i nui nei i roto i nga iwi, te rangatira i roto i nga kawanatanga

1:2b.LAM.001.002 Nui atu tana tangi i te po, a kei ona paparinga ona roimata: i roto i te hunga katoa i aroha ki a ia, kahore he kaiwhakamarie mona; kua tinihanga ona hoa ki a ia, kua meinga ratou hei hoariri mona

1:3b.LAM.001.003 Kua haere a Hura ki te whakarau, he tangi hoki, he whakamahinga nui; kei te noho ia i roto i nga tauiwi, kahore e kitea e ia he tanga manawa: kua hopukia ia e ona kaiwhai katoa i roto i nga wahi kuiti

1:4b.LAM.001.004 Kei te tangi nga ara o Hiona, no te mea kahore he tangata e haere mai ana ki te huihuinga nui; kua ururuatia ona kuwaha katoa, e aue ana ana tohunga, ko ana wahine kei te pouri, a ko ia, kei roto ia i te mamae

1:5b.LAM.001.005 Kua waiho ona hoariri hei upoko, kei te noho humarie ona hoa whawhai; no te mea kua whiua ia e Ihowa mo ona he maha: kua riro ana tamariki hei parau i te aroaro o te hoariri

1:6b.LAM.001.006 Kua wehe atu i te tamahine a Hiona tona nui katoa: kua rite ona rangatira ki nga hata kihai i pono ki te wahi kai, haere kahakore ana ratou i te aroaro o te kaiwhai

1:7b.LAM.001.007 E mahara ana a Hiruharama i nga ra o tona tangi, o ona wherutanga, ki ana mea ahuareka katoa o nga ra o mua: i te takanga o tona iwi ki roto ki te ringa o te hoariri, a kahore he kaiawhina mona, ka kite nga hoariri i a ia, ka kata ki ona mutunga

1:8b.LAM.001.008 Nui atu te hara o Hiruharama; na reira ia i meinga ai, ano hei mea poke: ko te hunga katoa i whakahonore i a ia, whakahawea ana ki a ia, no te mea kua kite ratou i tona tahangatanga: ae ra, kei te aue ia, kei te hoki ki muri

1:9b.LAM.001.009 Kei ona kurupatu tona poke, kahore ona mahara ki tona whakamutunga; na reira he hanga whakamiharo tona tukunga iho ki raro: kahore he kaiwhakamarie mona: e Ihowa, titiro mai ki toku mate: kua whakahirahira hoki te hoariri i a ia

1:10b.LAM.001.010 Kua wherahia atu te ringa o te hoariri ki runga ki ana mea ahuareka katoa; kua kite nei ia i nga iwi e tomo mai ana ki tona wahi tapu, era i ako ra koe kia kaua ratou e uru ki tau whakaminenga

1:11b.LAM.001.011 Kei te aue tona iwi katoa; kei te rapu taro ratou: e hoatu ana e ratou a ratou mea ahuareka hei utu kai, hei whakahauora ake mo te wairua: titiro mai, e Ihowa, whakaaro mai, kua whakahouhou hoki ahau

1:12b.LAM.001.012 He kahore noa iho tenei ki a koutou, e koutou e haere nei i te ara? Whakaaro mai, titiro mai, e rite ana ranei tetahi mamae ki toku mamae, e mahia nei moku, ki ta Ihowa nei whiu moku i te ra i mura ai tona riri

1:13b.LAM.001.013 Kua tukua iho nei e ia i runga, he ahi ki oku wheua, a e wera ana i tera: kua horahia e ia he kupenga mo oku waewae, kua whakahokia ahau ki muri; kua tukua ahau e ia ki te kahore, ki te whakaruhi, a pau noa te ra

1:14b.LAM.001.014 Ko te ioka o oku he herea iho e tona ringa, whiri rawa, kua eke ake ki runga ki toku kaki: kua he i a ia toku kaha, kua tukua ahau e te Ariki ki te ringa tangata, a kahore oku kaha ki te whakatika ake

1:15b.LAM.001.015 Kua kore noa iho i te Ariki oku marohirohi katoa i roto i ahau; kua karangatia e ia he huihui ki ahau hei wawahi i aku taitama: kua takatakahia e te Ariki te tamahine wahine a Hura, ano he takahanga waina

1:16b.LAM.001.016 Na enei mea ahau i tangi ai: ko toku kanohi, tarere ana te wai o toku kanohi: no te mea kei tawhiti atu i ahau te kaiwhakamarie hei whakahauora ake i toku wairua: ko aku tamariki kei te noho kau noa iho, no te mea kua kaha te hoariri

1:17b.LAM.001.017 Kua wherahia e Hiona ona ringa; kahore he kaiwhakamarie mona; na Ihowa te whakahau mo Hakopa, hei hoariri mona te hunga e karapoti ana i a ia: kua rite a Hiruharama i roto i a ratou ki te wahine e paheke ana

1:18b.LAM.001.018 He tika hoki a Ihowa; i whakakeke hoki ahau ki tana kupu: tena whakarongo mai, e nga iwi katoa, titiro mai hoki ki toku mamae; kua riro aku wahine, aku taitama, i te whakarau

1:19b.LAM.001.019 I karanga ahau ki te hunga i aroha ki ahau, heoi kei te tinihanga ki ahau; ko oku tohunga, ko oku kaumatua, hemo noa iho ratou i roto i te pa, i a ratou e rapu kai ana ma ratou hei whakahauora ake i o ratou wairua

1:20b.LAM.001.020 Titiro mai, e Ihowa, he mamae hoki toku, e ohooho ana oku whekau; ko toku ngakau hurikiko ana i roto i ahau: he nui noa atu hoki toku whakakeke: i waho ko te hoari ki te whakamoti, i roto kei te mate te rite

1:21b.LAM.001.021 Kua rongo ratou kei te aue ahau, te ai he kaiwhakamarie moku: kua rongo oku hoariri katoa ki toku matenga, koa ana ratou ki tau i mea ai: ka kawea mai e koe te ra i karangatia e koe, a ka rite ratou ki ahau

1:22b.LAM.001.022 Kia tae to ratou kino katoa ki tou aroaro: meatia ano ki a ratou tau i mea mai ai ki ahau mo oku he katoa: ka maha nei hoki oku auetanga; ko toku ngakau whakaruhi rawa

2

2:1b.LAM.002.001 Taukiri e! te taupokinga a Ihowa i te tamahine a Hiona ki te kapua, i a ia e riri ana! kua maka iho e ia te ataahua o Iharaira i runga i te rangi ki te whenua; kihai ano i mahara ki tona turanga waewae i te ra i riri ai ia

2:2b.LAM.002.002 Kua horomia e te Ariki nga nohoanga katoa o Hakopa, kihai i tohungia: i a ia i riri ra, wahia iho e ia nga pa kaha o te tamahine a Hura; tae tonu ki te whenua: poke iho i a ia te kingitanga me ona rangatira

2:3b.LAM.002.003 Poutoa katoatia atu ana e ia te hoana o Iharaira i tona riri e mura ana; whakahokia mai ana e ia ki muri tona ringa matau i te aroaro o te hoariri; ngiha mai ana ia ki a Hakopa, ano he mura ahi e kai ana i tetahi taha, i tetahi taha

2:4b.LAM.002.004 Kua piko i a ia tana kopere, koia ano kei ta te hoariri; ko tona ringa matau i a ia i tu ra, rite tonu ki to te hoa whawhai, tukitukia ana e ia te hunga katoa i ahuareka mai ki te titiro atu: i roto i te tapenakara o te tamahine a Hiona, ano he a hi tona riri e ringihia mai ana e ia

2:5b.LAM.002.005 Kua rite te Ariki ki te hoariri, kua horomia e ia a Iharaira; kua horomia e ia ona whare kingi katoa, kua whakamotitia e ia ona pa taiepa: a kua whakanuia e ia te tangi me te aue o te tamahine a Hura

2:6b.LAM.002.006 Kua takiritia e ia tona tihokahoka, ano no te kari: moti iho i a ia tona wahi whakaminenga: kua meinga e Ihowa te huihui nui me te hapati kia warewaretia i roto i Hiona, whakahaweatia iho e ia te kingi raua ko te tohunga i tona riri e aritarita a na

2:7b.LAM.002.007 Kua panga atu e te Ariki tana aata, kua weriweri ia ki tona wahi tapu, tukua atu ana e ia nga taiepa o o reira whare kingi ki roto ki te ringa o te hoariri; kua hamama ratou i roto i te whare o Ihowa, me te mea ko te ra o te hakari nui

2:8b.LAM.002.008 He whakaaro to Ihowa mo te whakamoti i te taiepa o te tamahine a Hiona; kua oti te aho te whakamaro atu e ia, kahore ano tona ringa i pepeke, whakangaro tonu ia; na reira tangi ana i a ia te pekerangi me te taiepa; raua ngatahi, ngohe kua

2:9b.LAM.002.009 Kua totohu ona keti ki roto ki te whenua; kua kore i a ia, kua whati hoki ona tutaki; kei roto tona kingi me ona rangatira i nga tauiwi, kahore nei o reira ture; ae ra, kahore ana poropiti e whiwhi ki te kite na Ihowa

2:10b.LAM.002.010 Kei runga i te whenua nga kaumatua o te tamahine a Hiona e noho ana, whakarongo kau ana: opehia ake e ratou he puehu ki runga ki o ratou mahunga; whitiki rawa te kakahu taratara; ko nga wahine o Hiruharama, tuohu tonu o ratou mahunga ki te whenu a

2:11b.LAM.002.011 Matawaia rawa oku kanohi i te roimata, e ohooho ana oku whekau, kua maringi toku ate ki runga ki te whenua, he meatanga ki te wawahanga o te tamahine a toku iwi; no te mea hemo ana nga kohungahunga me nga mea ngote u i nga huarahi o te pa

2:12b.LAM.002.012 Kei te ki atu ratou ki o ratou whaea, Kei hea he witi, he waina? I a ratou e hemo ana, e pera ana me te hunga kua patua ki nga huarahi o te pa, e maringi ana o ratou wairua ki nga uma o o ratou whaea

2:13b.LAM.002.013 Ko te aha taku hei whakaatu ki a koe? ko te aha e waiho e ahau hei ahua mou, e te tamahine a Hiruharama? Ko wai e waiho e ahau hei rite ki a koe, e whakamarie ai ahau i a koe, e te tamahine wahine a Hiona? He nui hoki tou pakaru, koia ano kei te moana; ko wai hei rongoa i a koe

2:14b.LAM.002.014 Ko nga mea i kitea e ou poropiti mou, he teka, he mea horihori; kihai ano i hurahia e ratou tou he, e hoki ai koe i te whakarau; heoi ano ta ratou i kite ai mou he poropititanga wairangi, he mea hei pana atu i a koe

2:15b.LAM.002.015 Kei te papaki ringa ki a koe te hunga katoa e tika ana i te ara, e hi ana, ruru ana o ratou mahunga ki te tamahine a Hiruharama; ko ta ratou kupu, Ko te pa ianei tenei i korerotia nei, Ko te tino o te ataahua, Ko te whakahari o te whenua katoa

2:16b.LAM.002.016 Hamama tonu ki a koe nga mangai o ou hoariri katoa; e hi ana, tete ana o ratou niho: e mea ana, Kua horomia ia e tatou: ko te rangi pu ano tenei i taria atu e tatou, kua tupono mai ki a tatou, kua kitea e tatou

2:17b.LAM.002.017 Kua oti i a Ihowa tana i whakaaro ai; kua whakaritea tana kupu i whakahaua e ia i nga ra o mua: wahia iho e ia, kihai hoki i tohungia; kua meinga e ia te hoariri kia koa ki a koe, kua ara i a ia te haona o ou hoariri

2:18b.LAM.002.018 I karanga o ratou ngakau ki te Ariki, E te taiepa o te tamahine a Hiona, kia rere iho nga roimata ano he awa, i te ao, i te po: kei whakata koe, kei mutu ta te whatu o tou kanohi

2:19b.LAM.002.019 Maranga, hamama i te po, i te timatanga o nga mataaratanga: ringihia atu tou ngakau ano he wai ki to te Ariki aroaro; kia ara ake ou ringa ki a ia, kia ora ai au kohungahunga e hemo nei i te kai i te ahunga mai o nga huarahi katoa

2:20b.LAM.002.020 Titiro mai, e Ihowa, whakaaroa ko wai i peneitia e koe! E kai ranei nga wahine i o ratou hua, i nga kohungahunga e hikihikitia ana? Kia patua koia te tohunga me te poropiti ki te wahi tapu o te Ariki

2:21b.LAM.002.021 Kei te takoto te taitama raua ko te koroheke i runga i te whenua i nga huarahi; kua hinga aku wahine, aku taitamariki, i te hoari; he mea whakamate nau i te ra i riri ai koe; tukitukia ana e koe, kihai hoki i tohungia

2:22b.LAM.002.022 Kua karanga koe ki oku whakawehi i nga taha katoa, pera i te ra o te huihuinga nui, a kahore tetahi i mawhiti, i mahue ranei i te ra i riri ai a Ihowa: ko aku i hikihiki ai, i whakatuputupu ai, poto ake i toku hoariri

3

3:1b.LAM.003.001 Ko ahau te tangata kua kite i te pouri, he mea na te rakau o tona riri

3:2b.LAM.003.002 I arahina e ia, i meinga kia haere i te pouri, kahore i te marama

3:3b.LAM.003.003 He pono kua tahuri mai ia ki ahau, kua anga mai tona ringa ki ahau, a pau noa te ra

3:4b.LAM.003.004 Kua meinga nei e ia oku kikokiko me toku kiri kia rite ki o te koroheke, mangungu kau i a ia oku wheua

3:5b.LAM.003.005 Kua hanga e ia he patu moku; karapotia ana ahau ki te wai kawa, ki te raruraru

3:6b.LAM.003.006 Kua meinga ahau e ia kia noho ki nga wahi pouri, kia pera me te hunga kua mate noa ake

3:7b.LAM.003.007 Kua oti ahau te taiepa mai e ia, te puta atu ahau; kua meinga e ia toku mekameka kia taimaha

3:8b.LAM.003.008 Ae ra, i ahau e karanga ana, e hamama ana kia awhinatia, ka araia mai e ia taku inoi

3:9b.LAM.003.009 Kua oti ano oku ara te taiepa mai e ia ki te kohatu tarai, whakakopikopikoa ake e ia oku ara

3:10b.LAM.003.010 Ko tona rite ki ahau kei te pea e whanga ana, kei te raiona i nga wahi ngaro

3:11b.LAM.003.011 Whakangaua ketia ana e ia oku ara, haehaea putia iho ahau; meinga ana ahau e ia kia noho kau noa iho

3:12b.LAM.003.012 Kua whakapikoa e ia tana kopere, a whakaturia ake ahau e ia hei koperenga pere

3:13b.LAM.003.013 Kua meinga e ia nga pere o tana papa pere kia ngoto ki oku whatumanawa

3:14b.LAM.003.014 Kua waiho ahau hei katanga ma toku iwi katoa; hei waiata ma ratou a pau noa te ra

3:15b.LAM.003.015 Kua whakakiia ahau e ia ki nga mea kawa, whakainumia rawatia ana ahau e ia ki te taru kawa

3:16b.LAM.003.016 Kua whatiwhatiia ano hoki e ia oku niho ki te kirikiri, hipokina ana ahau e ia ki te pungarehu

3:17b.LAM.003.017 Kua nekehia atu e koe toku wairua kei tata ki te rangimarie; i wareware ahau ki te pai

3:18b.LAM.003.018 Ki tonu ake ahau, kua pirau toku kaha, kahore he tumanakohanga maku ki a Ihowa

3:19b.LAM.003.019 Mahara ki toku ngakau mamae, ki toku pouri, ki te taru kawa, ki te wai kawa

3:20b.LAM.003.020 Maharahara tonu toku wairua ki a ratou, piko tonu iho i roto i ahau

3:21b.LAM.003.021 E whakahokia ake ana tenei e ahau ki toku ngakau, koia i tumanako ai ahau

3:22b.LAM.003.022 He mahi tohu na Ihowa te poto ai tatou, he kore no ana mahi aroha e mutu

3:23b.LAM.003.023 E hou tonu ana ratou i tenei ata, i tenei ata; he nui tou pono

3:24b.LAM.003.024 Ko Ihowa te wahi moku, e ai ta toku wairua; no reira ka tumanako ahau ki a ia

3:25b.LAM.003.025 He pai a Ihowa ki te hunga e tumanako ana ki a ia, ki te wairua e rapu ana i a ia

3:26b.LAM.003.026 He pai ano kia tumanako te tangata, kia tatari marie hoki ki ta Ihowa whakaora

3:27b.LAM.003.027 He pai ano mo te tangata kia amohia e ia te ioka i tona tamarikitanga

3:28b.LAM.003.028 Me noho ia, tona kotahi, me whakarongo puku hoki, no te mea nana i uta ki a ia

3:29b.LAM.003.029 Me tuku e ia tona mangai ki te puehu; mehemea pea tera he tumanakohanga

3:30b.LAM.003.030 Me hoatu e ia tona paparinga ki te tangata e papaki ana i a ia: kia ki tonu ia i te tawai

3:31b.LAM.003.031 E kore hoki e mau tonu ta Ihowa panga

3:32b.LAM.003.032 Ahakoa whakapouri ia, ka aroha ano ia, ka rite ki te nui o tana mahi tohu

3:33b.LAM.003.033 Kahore hoki ona ngakau whiu, whakapouri ranei, i nga tama a te tangata

3:34b.LAM.003.034 Ko te kuru i nga herehere katoa o te whenua ki raro i ona waewae

3:35b.LAM.003.035 Ko te whakapeau ke i te tika o te tangata ina whakawakia i te aroaro o te Runga Rawa

3:36b.LAM.003.036 Ko te whakariro ke i ta te tangata ina totohe, e kore tena e whakapaingia e te Ariki

3:37b.LAM.003.037 Ko wai tenei hei ki mai, a ka oti, i te mea kihai i whakahaua e te Ariki

3:38b.LAM.003.038 He teka ianei e puta mai ana te kino me te pai i roto i te mangai o te Runga Rawa

3:39b.LAM.003.039 He aha te tangata ora i amuamu ai, te tangata ina whiua mo ona hara

3:40b.LAM.003.040 E rapu tatou, e kimi i o tatou ara, a ka tahuri ano ki a Ihowa

3:41b.LAM.003.041 Kia ara atu o tatou ngakau me o tatou ringa ki te Atua i te rangi

3:42b.LAM.003.042 I he matou, i whakakeke; kihai ano koe i muru i to matou he

3:43b.LAM.003.043 Kua hipokina nei e koe ki te riri, tukinotia ana matou e koe: tukitukia ana e koe, kihai ano i tohungia e koe

3:44b.LAM.003.044 Hipokina ana e koe he kapua ki a koe, kei puta atu ta matou inoi

3:45b.LAM.003.045 Kua meinga matou e koe hei paru tahinga, hei mea akiri i waenga i nga iwi

3:46b.LAM.003.046 Kua hamama mai nga mangai o o matou hoariri katoa ki a matou

3:47b.LAM.003.047 Ko te wehi, ko te rua, kua tae mai kei a matou, te whakamoti me te wawahi

3:48b.LAM.003.048 Kei te tarere nei nga awa wai i toku kanohi, mo te wawahanga o te tamahine a toku iwi

3:49b.LAM.003.049 Maturuturu ana te wai i toku kanohi, kahore hoki e mutu, te ai he pariratanga

3:50b.LAM.003.050 Kia titiro mai ra ano a Ihowa, kia kite mai ra ano ia i runga i te rangi

3:51b.LAM.003.051 E meatia iho ana toku ngakau e toku kanohi, mo nga tamahine katoa o toku pa

3:52b.LAM.003.052 Kua whaia kinotia ahau ano he manu e ratou, e te hunga e hoariri ana ki ahau, kahore he take

3:53b.LAM.003.053 Ngaro iho i a ratou toku ara i roto i te poka, kua maka e ratou he kohatu ki runga ki ahau

3:54b.LAM.003.054 I rere nga wai i runga i toku mahunga: i mea ahau, kua motuhia ketia ahau

3:55b.LAM.003.055 I karanga ahau ki tou ingoa, e Ihowa, i roto i te poka i raro rawa

3:56b.LAM.003.056 I rongo koe ki toku reo; kaua e huna tou taringa ki te tanga o toku manawa, ki taku karanga

3:57b.LAM.003.057 I whakatata mai koe i te ra i karanga ai ahau ki a koe; i ki mai koe, Kaua e wehi

3:58b.LAM.003.058 Kua tohea e koe, e te Ariki, nga tohe a toku wairua; kua hokona e koe toku ora

3:59b.LAM.003.059 Kua kite koe, e Ihowa, i te he i mahia ki ahau: mau e whakarite taku whakawa

3:60b.LAM.003.060 Kua kite koe i to ratou mauahara katoa, i o ratou whakaaro katoa moku

3:61b.LAM.003.061 Kua rongo koe ki ta ratou tawai, e Ihowa, ki o ratou whakaaro katoa moku

3:62b.LAM.003.062 Ki nga ngutu o te hunga i whakatika mai ki ahau, ki ta ratou tikanga moku, a pau noa te ra

3:63b.LAM.003.063 Tirohia mai to ratou nohoanga iho, to ratou whakatikanga ake; ko ahau te waiatatia nei e ratou

3:64b.LAM.003.064 Hoatu he utu ki a ratou, e Ihowa, kia rite ki te mahi a o ratou ringa

3:65b.LAM.003.065 Hoatu ki a ratou he ngakau pakeke, tau kanga ki a ratou

3:66b.LAM.003.066 Whaia ratou i runga i te riri, whakangaromia atu ratou i raro i nga rangi o Ihowa

4

4:1b.LAM.004.001 Taukiri e! tona haumarurutanga o te koura! tona putanga ketanga o te koura parakore, tino pai! Kua ringihia nga kohatu o te wahi tapu ki te ahunga mai o nga ara katoa

4:2b.LAM.004.002 Ko nga tamariki a Hiona, ko nga mea papai, i rite nei ki te koura parakore, taukiri e! kua kiia ratou he haka oneone, he mea hanga na nga ringa o te kaipokepoke

4:3b.LAM.004.003 Ko nga kirehe mohoao nei hoki, e tukua iho ana te u e ratou, e whakangotea ana e ratou a ratou kuao: kua taikaha te tamahine a toku iwi, kua rite ki nga otereti o te koraha

4:4b.LAM.004.004 Piri ana te arero o te tamaiti ngote u ki te ngao o tona mangai i te hiainu: e tono ana nga kohungahunga i te taro ma ratou, heoi kahore he tangata hei whatiwhati atu ma ratou

4:5b.LAM.004.005 Ko te hunga i kai i nga mea papai, kei te noho mokemoke i nga ara: ko te hunga i whakatupuria i roto i nga kakahu ngangana, kei te awhi i nga puranga paru

4:6b.LAM.004.006 No te mea ko te he o te tamahine a toku iwi nui atu i te hara o Horoma, i hurihia ohoreretia ra i mua, kahore hoki he ringa i u ki a ia

4:7b.LAM.004.007 Ko ona rangatira pai atu i te hukarere te pokekore, ma atu hoki ratou i te waiu, puwhero ake o ratou tinana i nga rupi, orohina ake ratou ki te oro o te hapaira

4:8b.LAM.004.008 Mangu iho to ratou mata i tetahi ngarahu; kahore ratou e mohiotia i nga ara: piri tonu o ratou kiri ki o ratou wheua; kua memenge, kua rite ki te rakau

4:9b.LAM.004.009 Ko te hunga i patua e te hoari, pai ake to ratou i to te hunga i patua e te hemokai; no te mea ka honia noatia enei, ka werohia, he kore hoki no nga hua o te mara

4:10b.LAM.004.010 Ko nga wahine, ko te hunga aroha, kei te kohua i a ratou tamariki ki o ratou ringa: he kai era ma ratou i te wawahanga o te tamahine a toku iwi

4:11b.LAM.004.011 Kua whakapaua e Ihowa tona riri nui, kua ringihia mai e ia tona riri nui; kua tahuna hoki e ia he ahi ki Hiona, na reira i pau ai ona turanga

4:12b.LAM.004.012 Kihai i whakapono mai nga kingi o te whenua, kihai ano hoki nga tangata o te ao, tera te hoariri raua ko te hoa whawhai e tomo mai ki nga kuwaha o Hiruharama

4:13b.LAM.004.013 I pera ai he hara no ona poropiti, he he no ona tohunga kua whakaheke nei i nga toto o te hunga tika ki waenganui ona

4:14b.LAM.004.014 E kopikopiko ana ratou ano he matapo i nga ara; kua poke ratou i te toto, te pa ai te tangata ki o ratou kakahu

4:15b.LAM.004.015 I karanga ratou ki a ratou; Haere atu, e poke ana; haere atu, haere atu, kei pa; i to ratou whatinga, i a ratou e atiutiu noa atu ana, i ki nga tangata i roto i nga tauiwi, Kahore he nohoanga iho mo ratou ki konei

4:16b.LAM.004.016 Kua wehewehea ratou e te riri o Ihowa: e kore ia e titiro ki a ratou i muri nei: kihai ratou i whakaaro ki nga kanohi o nga tohunga, kihai i manako ki nga kaumatua

4:17b.LAM.004.017 E matawaia tonu ana o tatou kanohi i tatou e titiro ana ki te awhina tekateka noa mo tatou: i a tatou e tiaki atu ana, i whanga noa tatou ki te iwi e kore e whakaora

4:18b.LAM.004.018 E whaia ana e ratou o tatou hikoinga, te haere ai tatou i o tatou waharoa: kua tata to tatou whakamutunga, kua rite o tatou ra; no te mea kua tae mai to tatou whakamutunga

4:19b.LAM.004.019 Nui atu te tere o o tatou kaiwhai i to nga ekara o te rangi: i arumia tatou e ratou i runga i nga maunga; i whanga mai ano ratou ki a tatou i te koraha

4:20b.LAM.004.020 Ko te manawa o o tatou pongaponga, ko ta Ihowa i whakawahi ai, i mau ki roto ki a ratou rua; i ki ra tatou mona, Ma tona taumarumarunga iho ka ora ai tatou i roto i nga tauiwi

4:21b.LAM.004.021 Kia hari, kia koa, e te tamahine a Eroma e noho na i te whenua o Uhu; ka tae atu ano te kapu ki a koe; ka haurangi koe, ka whakarere ano koe i ou kakahu

4:22b.LAM.004.022 Kua rite te whiu mo tou he, e te tamahine a Hiona; heoi ano tana whakaraunga i a koe: ka whiua e ia tou he, e te tamahine a Eroma, ka hurahia ano e ia ou hara

5

5:1b.LAM.005.001 Kia mahara, e Ihowa, ki te mea kua pa nei ki a matou: tirohia mai, kia kite ai koe i to matou ingoa kino

5:2b.LAM.005.002 Kua riro to matou wahi tupu i nga tangata ke, o matou whare i nga tautangata

5:3b.LAM.005.003 He pani matou, kahore he matua, ko o matou whaea ano he pouaru

5:4b.LAM.005.004 Na te moni i inu wai ai matou; ko a matou wahie he mea hoko

5:5b.LAM.005.005 Kei runga kei o matou kaki o matou kaiwhai: e mauiui ana matou, kahore he tanga manawa mo matou

5:6b.LAM.005.006 Kua hoatu e matou te ringa ki nga Ihipiana, ki nga Ahiriana, kia makona ai matou i te taro

5:7b.LAM.005.007 I hara o matou matua, a kua kore; a kua whakawaha e matou o ratou he

5:8b.LAM.005.008 Ko nga pononga o matou rangatira: kahore he kaiwhakaora mo matou i o ratou ringa

5:9b.LAM.005.009 E tata mate matou ka whiwhi ai i te taro, i te hoari hoki o te koraha

5:10b.LAM.005.010 Mangu ana o matou kiri ano he oumu, i te wera ngau kino o te hemokai

5:11b.LAM.005.011 Taea ana e ratou nga wahine o Hiona, nga wahine i nga pa o Hura

5:12b.LAM.005.012 Ko nga rangatira, taronatia ake e to ratou ringa; kihai nga kanohi o nga kaumatua i whakahonoretia

5:13b.LAM.005.013 Ko nga taitama kei te waha i te huri, hinga ana nga tamariki i te pikaunga wahie

5:14b.LAM.005.014 Ko nga kaumatua i nga kuwaha kua kore, me te waiata hoki a nga taitama

5:15b.LAM.005.015 Kua mutu te koa o o matou ngakau, kua puta ke ta matou kanikani hei uhunga

5:16b.LAM.005.016 Kua taka te karauna o to matou mahunga; aue, te mate mo matou! kua hara hoki matou

5:17b.LAM.005.017 Na reira whakaruhi noa iho o matou ngakau; na enei mea pouriuri ana o matou kanohi

5:18b.LAM.005.018 Na te maunga hoki o Hiona kua ururuatia nei, e haereerea nei e nga pokiha

5:19b.LAM.005.019 Pumau tonu koe, ake ake, e Ihowa; ko tou torona kei tera whakatupuranga, kei tera whakatupuranga

5:20b.LAM.005.020 He aha koe i wareware tonu ai ki a matou? he aha koe i whakarere ai i a matou, a roa noa iho nga ra

5:21b.LAM.005.021 Whakatahuritia atu matou ki a koe, e Ihowa, a ka tahuri matou: whakahoutia o matou ra, kia rite ki o mua

5:22b.LAM.005.022 Otiia kua tino whakakahore rawa koe ki a matou, e tino nui ana tou riri ki a matou