Philemon (Icelandic)

1

1:1b.PHM.001.001 Páll, bandingi Krists Jesú, og Tímóteus bróðir vor, heilsa elskuðum vini okkar og samverkamanni Fílemon,

1:2b.PHM.001.002 svo og Appíu systur okkar og Arkippusi samherja okkar og söfnuðinum, sem kemur saman í húsi þínu.

1:3b.PHM.001.003 Náð sé með yður og friður frá Guði föður vorum og Drottni Jesú Kristi.

1:4b.PHM.001.004 Ég þakka Guði mínum ávallt, er ég minnist þín í bænum mínum.

1:5b.PHM.001.005 Því að ég heyri um trúna, sem þú hefur á Drottni Jesú, og um kærleika þinn til hinna heilögu.

1:6b.PHM.001.006 Ég bið þess, að trú þín, sem þú átt með oss, verði mikilvirk í þekkingunni á öllu því góða, sem tilheyrir Kristi.

1:7b.PHM.001.007 Ég hlaut mikla gleði og huggun af kærleika þínum, þar eð þú, bróðir, hefur endurnært hjörtu hinna heilögu.

1:8b.PHM.001.008 Því er það, að þótt ég gæti með fullri djörfung í Kristi boðið þér að gera það, sem skylt er,

1:9b.PHM.001.009 þá fer ég þó heldur bónarveg vegna kærleika þíns, þar sem ég er eins og ég er, hann Páll gamli, og nú líka bandingi Krists Jesú.

1:10b.PHM.001.010 Ég bið þig þá fyrir barnið mitt, sem ég hef getið í fjötrum mínum, hann Onesímus.

1:11b.PHM.001.011 Hann var þér áður óþarfur, en er nú þarfur bæði þér og mér.

1:12b.PHM.001.012 Ég sendi hann til þín aftur, og er hann þó sem hjartað í brjósti mér.

1:13b.PHM.001.013 Feginn vildi ég hafa haldið honum hjá mér, til þess að hann í þinn stað veitti mér þjónustu í fjötrum mínum vegna fagnaðarerindisins.

1:14b.PHM.001.014 En án þíns samþykkis vildi ég ekkert gjöra, til þess að velgjörð þín skyldi ekki koma eins og af nauðung, heldur af fúsum vilja.

1:15b.PHM.001.015 Vísast hefur hann þess vegna orðið viðskila við þig um stundarsakir, að þú síðan skyldir fá að halda honum eilíflega,

1:16b.PHM.001.016 ekki lengur eins og þræli, heldur þræli fremri, eins og elskuðum bróður. Mér er hann kær bróðir. Hve miklu fremur þó þér, bæði sem maður og kristinn.

1:17b.PHM.001.017 Ef þú því telur mig félaga þinn, þá tak þú á móti honum, eins og væri það ég sjálfur.

1:18b.PHM.001.018 En hafi hann eitthvað gjört á hluta þinn, eða sé hann í skuld við þig, þá fær þú það mér til reiknings.

1:19b.PHM.001.019 Ég, Páll, rita með eigin hendi: Ég mun gjalda. Að ég ekki nefni við þig, að þú ert jafnvel í skuld við mig um sjálfan þig.

1:20b.PHM.001.020 Já, bróðir, unn mér gagns af þér vegna Drottins, endurnær hjarta mitt sakir Krists.

1:21b.PHM.001.021 Í fullu trausti til hlýðni þinnar rita ég til þín og veit, að þú munt gjöra jafnvel fram yfir það, sem ég mælist til.

1:22b.PHM.001.022 En hafðu líka til gestaherbergi handa mér, því að ég vona, að ég vegna bæna yðar muni verða gefinn yður.

1:23b.PHM.001.023 Epafras, sambandingi minn vegna Krists Jesú, biður að heilsa þér. Sömuleiðis

1:24b.PHM.001.024 Markús, Aristarkus, Demas og Lúkas, samverkamenn mínir.

1:25b.PHM.001.025 Náðin Drottins vors Jesú Krists sé með anda yðar.