Galatians (Icelandic)

1

1:1b.GAL.001.001 Páll postuli - ekki sendur af mönnum né að tilhlutun manns, heldur að tilhlutun Jesú Krists og Guðs föður, sem uppvakti hann frá dauðum -

1:2b.GAL.001.002 og allir bræðurnir, sem með mér eru, heilsa söfnuðunum í Galatalandi.

1:3b.GAL.001.003 Náð sé með yður og friður frá Guði föður og Drottni vorum Jesú Kristi,

1:4b.GAL.001.004 sem gaf sjálfan sig fyrir syndir vorar, til þess að frelsa oss frá hinni yfirstandandi vondu öld, samkvæmt vilja Guðs vors og föður.

1:5b.GAL.001.005 Honum sé dýrð um aldir alda, amen.

1:6b.GAL.001.006 Mig furðar, að þér svo fljótt látið snúast frá honum, sem kallaði yður í náð Krists, til annars konar fagnaðarerindis,

1:7b.GAL.001.007 sem þó er ekki til; heldur eru einhverjir að trufla yður og vilja umhverfa fagnaðarerindinu um Krist.

1:8b.GAL.001.008 En þótt jafnvel vér eða engill frá himni færi að boða yður annað fagnaðarerindi en það, sem vér höfum boðað yður, þá sé hann bölvaður.

1:9b.GAL.001.009 Eins og vér höfum áður sagt, eins segi ég nú aftur: Ef nokkur boðar yður annað fagnaðarerindi en það, sem þér hafið veitt viðtöku, þá sé hann bölvaður.

1:10b.GAL.001.010 Er ég nú að reyna að sannfæra menn eða Guð? Er ég að leitast við að þóknast mönnum? Ef ég væri enn að þóknast mönnum, þá væri ég ekki þjónn Krists.

1:11b.GAL.001.011 Það læt ég yður vita, bræður, að fagnaðarerindið, sem ég hef boðað, er ekki mannaverk.

1:12b.GAL.001.012 Ekki hef ég tekið við því af manni né látið kenna mér það, heldur fengið það fyrir opinberun Jesú Krists.

1:13b.GAL.001.013 Þér hafið heyrt um háttsemi mína áður fyrri í Gyðingdóminum, hversu ákaflega ég ofsótti söfnuð Guðs og vildi eyða honum.

1:14b.GAL.001.014 Ég fór lengra í Gyðingdóminum en margir jafnaldrar mínir meðal þjóðar minnar og var miklu vandlætingasamari um erfikenningu forfeðra minna.

1:15b.GAL.001.015 En þegar Guði, sem hafði útvalið mig frá móðurlífi og af náð sinni kallað,

1:16b.GAL.001.016 þóknaðist að opinbera mér son sinn, til þess að ég boðaði fagnaðarerindið um hann meðal heiðingjanna, þá ráðgaðist ég eigi við neinn mann,

1:17b.GAL.001.017 ekki fór ég heldur upp til Jerúsalem til þeirra, sem voru postular á undan mér, heldur fór ég jafnskjótt til Arabíu og sneri svo aftur til Damaskus.

1:18b.GAL.001.018 Síðan fór ég eftir þrjú ár upp til Jerúsalem til að kynnast Kefasi og dvaldist hjá honum hálfan mánuð.

1:19b.GAL.001.019 Engan af hinum postulunum sá ég, heldur aðeins Jakob, bróður Drottins.

1:20b.GAL.001.020 Guð veit, að ég lýg því ekki, sem ég skrifa yður.

1:21b.GAL.001.021 Síðan kom ég í héruð Sýrlands og Kilikíu.

1:22b.GAL.001.022 Ég var persónulega ókunnur kristnu söfnuðunum í Júdeu.

1:23b.GAL.001.023 Þeir höfðu einungis heyrt sagt: "Sá sem áður ofsótti oss, boðar nú trúna, sem hann áður vildi eyða."

1:24b.GAL.001.024 Og þeir vegsömuðu Guð vegna mín.

2

2:1b.GAL.002.001 Síðan fór ég að fjórtán árum liðnum aftur upp til Jerúsalem ásamt Barnabasi og tók líka Títus með mér.

2:2b.GAL.002.002 Ég fór þangað eftir opinberun og lagði fram fyrir þá fagnaðarerindið, sem ég prédika meðal heiðingjanna. Ég lagði það einslega fyrir þá, sem í áliti voru; það mátti eigi henda, að ég hlypi og hefði hlaupið til einskis.

2:3b.GAL.002.003 En ekki var einu sinni Títus, sem með mér var og var grískur maður, neyddur til að láta umskerast.

2:4b.GAL.002.004 Það hefði þá verið fyrir tilverknað falsbræðranna, er illu heilli hafði verið hleypt inn og laumast höfðu inn til að njósna um frelsi vort, það er vér höfum í Kristi Jesú, til þess að þeir gætu hneppt oss í þrældóm.

2:5b.GAL.002.005 Undan þeim létum vér ekki einu sinni eitt andartak, til þess að sannleiki fagnaðarerindisins skyldi haldast við hjá yður.

2:6b.GAL.002.006 Og þeir, sem í áliti voru, - hvað þeir einu sinni voru, skiptir mig engu, Guð fer ekki í manngreinarálit, - þeir, sem í áliti voru, lögðu ekkert frekara fyrir mig.

2:7b.GAL.002.007 Þvert á móti, þeir sáu, að mér var trúað fyrir fagnaðarerindinu til óumskorinna manna, eins og Pétri til umskorinna,

2:8b.GAL.002.008 því að sá, sem hefur eflt Pétur til postuladóms meðal hinna umskornu, hefur einnig eflt mig til postuladóms meðal heiðingjanna.

2:9b.GAL.002.009 Og er þeir höfðu komist að raun um, hvílík náð mér var veitt, þá réttu þeir Jakob, Kefas og Jóhannes, sem álitnir voru máttarstólparnir, mér og Barnabasi hönd sína til bræðralags: Við skyldum fara til heiðingjanna, en þeir til hinna umskornu.

2:10b.GAL.002.010 Það eitt var til skilið, að við skyldum minnast hinna fátæku, og einmitt þetta hef ég líka kappkostað að gjöra.

2:11b.GAL.002.011 En þegar Kefas kom til Antíokkíu, andmælti ég honum upp í opið geðið, því hann var sannur að sök.

2:12b.GAL.002.012 Áður en menn nokkrir komu frá Jakob, hafði hann setið að borði með heiðingjunum, en er þeir komu, dró hann sig í hlé og tók sig út úr af ótta við þá, sem héldu fram umskurninni.

2:13b.GAL.002.013 Hinir Gyðingarnir tóku einnig að hræsna með honum, svo að jafnvel Barnabas lét dragast með af hræsni þeirra.

2:14b.GAL.002.014 En þegar ég sá, að þeir gengu ekki beint eftir sannleika fagnaðarerindisins, sagði ég við Kefas í allra áheyrn: "Úr því að þú, sem ert Gyðingur, lifir að heiðingja siðum, en eigi Gyðinga, hvernig ferst þér þá að neyða heiðingja til að lifa að Gyðinga siðum?"

2:15b.GAL.002.015 Vér erum fæddir Gyðingar, ekki syndarar af heiðnu bergi brotnir.

2:16b.GAL.002.016 En vér vitum, að maðurinn réttlætist ekki af lögmálsverkum, heldur fyrir trú á Jesú Krist. Og vér tókum trú á Krist Jesú, til þess að vér réttlættumst af trú á Krist, en ekki af lögmálsverkum. Enda réttlætist enginn lifandi maður af lögmálsverkum.

2:17b.GAL.002.017 En ef vér nú sjálfir reynumst syndarar þegar vér leitumst við að réttlætast í Kristi, er þá Kristur orðinn þjónn syndarinnar? Fjarri fer því.

2:18b.GAL.002.018 Fari ég að byggja upp aftur það, sem ég braut niður, þá sýni ég og sanna, að ég er sjálfur brotlegur.

2:19b.GAL.002.019 Því að af völdum lögmálsins er ég dáinn lögmálinu til þess að lifa Guði.

2:20b.GAL.002.020 Ég er krossfestur með Kristi. Sjálfur lifi ég ekki framar, heldur lifir Kristur í mér. Lífinu, sem ég lifi nú hér á jörð, lifi ég í trúnni á Guðs son, sem elskaði mig og lagði sjálfan sig í sölurnar fyrir mig.

2:21b.GAL.002.021 Ég ónýti ekki náð Guðs. Ef réttlæting fæst fyrir lögmál, þá hefur Kristur dáið til einskis.

3

3:1b.GAL.003.001 Þér óskynsömu Galatar! Hver hefur töfrað yður? Þér hafið þó fengið skýra mynd af Jesú Kristi á krossinum, málaða fyrir augum yðar.

3:2b.GAL.003.002 Um þetta eitt vil ég fræðast af yður: Öðluðust þér andann fyrir lögmálsverk eða við að hlýða á fagnaðarerindið og trúa?

3:3b.GAL.003.003 Eruð þér svo óskynsamir? Þér sem byrjuðuð í anda, ætlið þér nú að enda í holdi?

3:4b.GAL.003.004 Hafið þér til einskis reynt svo mikið? - ef það þá er til einskis!

3:5b.GAL.003.005 Hvað um það, - sá sem veitir yður andann og framkvæmir máttarverk meðal yðar, gjörir hann það vegna lögmálsverka yðar eða vegna þess að þér heyrið og trúið?

3:6b.GAL.003.006 Svo var og um Abraham, "hann trúði Guði, og það var honum til réttlætis reiknað."

3:7b.GAL.003.007 Þér sjáið þá, að þeir sem byggja á trúnni, þeir eru einmitt synir Abrahams.

3:8b.GAL.003.008 Ritningin sá það fyrir, að Guð mundi réttlæta heiðingjana fyrir trú, og því boðaði hún Abraham fyrirfram þann fagnaðarboðskap: "Af þér skulu allar þjóðir blessun hljóta."

3:9b.GAL.003.009 Þannig hljóta þeir, sem byggja á trúnni, blessun ásamt hinum trúaða Abraham.

3:10b.GAL.003.010 En bölvun hvílir á öllum þeim, sem byggja á lögmálsverkum, því að ritað er: "Bölvaður er sá, sem ekki heldur fast við allt það, sem í lögmálsbókinni er ritað, og breytir eftir því."

3:11b.GAL.003.011 En það er augljóst að fyrir Guði réttlætist enginn með lögmáli, því að "hinn réttláti mun lifa fyrir trú."

3:12b.GAL.003.012 En lögmálið spyr ekki um trú. Það segir: "Sá, sem breytir eftir boðum þess, mun lifa fyrir þau."

3:13b.GAL.003.013 Kristur keypti oss undan bölvun lögmálsins með því að verða bölvun fyrir oss, því að ritað er: "Bölvaður er hver sá, sem á tré hangir."

3:14b.GAL.003.014 Þannig skyldi heiðingjunum hlotnast blessun Abrahams í Kristi Jesú, og vér öðlast fyrir trúna andann, sem fyrirheitið var.

3:15b.GAL.003.015 Bræður, ég tek dæmi úr mannlegu lífi: Enginn ónýtir eða eykur við staðfesta arfleiðsluskrá, enda þótt hún sé aðeins af manni gjörð.

3:16b.GAL.003.016 Nú voru fyrirheitin gefin Abraham og afkvæmi hans, - þar stendur ekki "og afkvæmum", eins og margir ættu í hlut, heldur "og afkvæmi þínu", eins og þegar um einn er að ræða, og það er Kristur.

3:17b.GAL.003.017 Með þessu vildi ég sagt hafa: Sáttmála, sem áður var staðfestur af Guði, getur lögmálið, sem kom fjögur hundruð og þrjátíu árum síðar, ekki ónýtt, svo að það felli fyrirheitið úr gildi.

3:18b.GAL.003.018 Sé því þá svo farið, að arfurinn fáist með lögmáli, þá fæst hann ekki framar með fyrirheiti, en Guð veitti Abraham náð sína með fyrirheiti.

3:19b.GAL.003.019 Hvað er þá lögmálið? Vegna afbrotanna var því bætt við, þangað til afkvæmið kæmi, sem fyrirheitið hljóðaði um. Fyrir umsýslan engla er það til orðið, fyrir tilstilli meðalgangara.

3:20b.GAL.003.020 En meðalgangara gjörist ekki þörf þar sem einn á í hlut, en Guð er einn.

3:21b.GAL.003.021 Er þá lögmálið gegn fyrirheitum Guðs? Fjarri fer því. Ef vér hefðum fengið lögmál, sem veitt gæti líf, þá fengist réttlætið vissulega með lögmáli.

3:22b.GAL.003.022 En ritningin segir, að allt sé hneppt undir vald syndarinnar, til þess að fyrirheitið veitist þeim, sem trúa, fyrir trú á Jesú Krist.

3:23b.GAL.003.023 Áður en trúin kom, vorum vér í gæslu lögmálsins innilokaðir, þangað til trúin, sem í vændum var, opinberaðist.

3:24b.GAL.003.024 Þannig hefur lögmálið orðið tyftari vor, þangað til Kristur kom, til þess að vér réttlættumst af trú.

3:25b.GAL.003.025 En nú, eftir að trúin er komin, erum vér ekki lengur undir tyftara.

3:26b.GAL.003.026 Þér eruð allir Guðs börn fyrir trúna á Krist Jesú.

3:27b.GAL.003.027 Allir þér, sem eruð skírðir til samfélags við Krist, þér hafið íklæðst Kristi.

3:28b.GAL.003.028 Hér er enginn Gyðingur né grískur, þræll né frjáls maður, karl né kona. Þér eruð allir eitt í Kristi Jesú.

3:29b.GAL.003.029 En ef þér tilheyrið Kristi, þá eruð þér niðjar Abrahams, erfingjar eftir fyrirheitinu.

4

4:1b.GAL.004.001 Með öðrum orðum: Alla þá stund, sem erfinginn er ófullveðja, er enginn munur á honum og þræli, þótt hann eigi allt.

4:2b.GAL.004.002 Hann er undir fjárhaldsmönnum og ráðsmönnum til þess tíma, er faðirinn hefur ákveðið.

4:3b.GAL.004.003 Þannig vorum vér einnig, er vér vorum ófullveðja, þrælbundnir undir heimsvættirnar.

4:4b.GAL.004.004 En þegar fylling tímans kom, sendi Guð son sinn, fæddan af konu, fæddan undir lögmáli, -

4:5b.GAL.004.005 til þess að hann keypti lausa þá, sem voru undir lögmáli, - og vér fengjum barnaréttinn.

4:6b.GAL.004.006 En þar eð þér eruð börn, þá hefur Guð sent anda sonar síns í hjörtu vor, sem hrópar: "Abba, faðir!"

4:7b.GAL.004.007 Þú ert þá ekki framar þræll, heldur sonur. En ef þú ert sonur, þá ert þú líka erfingi að ráði Guðs.

4:8b.GAL.004.008 Forðum, er þér þekktuð ekki Guð, þá voruð þér þrælar þeirra, sem í eðli sínu eru ekki guðir.

4:9b.GAL.004.009 En nú, eftir að þér þekkið Guð, eða réttara sagt, eftir að Guð þekkir yður, hvernig getið þér snúið aftur til hinna veiku og fátæklegu vætta? Viljið þér þræla undir þeim að nýju?

4:10b.GAL.004.010 Þér hafið gætur á dögum og mánuðum, vissum tíðum og árum.

4:11b.GAL.004.011 Ég er hræddur um yður, að ég kunni að hafa haft erfiði fyrir yður til ónýtis.

4:12b.GAL.004.012 Ég bið yður, bræður: Verðið eins og ég, því að ég er orðinn eins og þér. Í engu hafið þér gjört á hluta minn.

4:13b.GAL.004.013 Þér vitið, að sjúkleiki minn varð tilefni til þess, að ég fyrst boðaði yður fagnaðarerindið.

4:14b.GAL.004.014 En þér létuð ekki líkamsásigkomulag mitt verða yður til ásteytingar og óvirtuð mig ekki né sýnduð mér óbeit, heldur tókuð þér á móti mér eins og engli Guðs, eins og Kristi Jesú sjálfum.

4:15b.GAL.004.015 Hvað er nú orðið úr blessunarbænum yðar? Það vitni ber ég yður, að augun hefðuð þér stungið úr yður og gefið mér, ef auðið hefði verið.

4:16b.GAL.004.016 Er ég þá orðinn óvinur yðar, vegna þess að ég segi yður sannleikann?

4:17b.GAL.004.017 Þeir láta sér annt um yður, en það er eigi af góðu, heldur vilja þeir einangra yður, til þess að þér látið yður annt um þá.

4:18b.GAL.004.018 Það er ávallt gott að láta sér annt um það, sem gott er, og ekki aðeins meðan ég er hjá yður,

4:19b.GAL.004.019 börn mín, sem ég að nýju el með harmkvælum, þangað til Kristur er myndaður í yður!

4:20b.GAL.004.020 Ég vildi ég væri nú hjá yður og gæti talað nýjum rómi, því að ég er ráðalaus með yður.

4:21b.GAL.004.021 Segið mér, þér sem viljið vera undir lögmáli, heyrið þér ekki hvað lögmálið segir?

4:22b.GAL.004.022 Ritað er, að Abraham átti tvo sonu, annan við ambáttinni, en hinn við frjálsu konunni.

4:23b.GAL.004.023 Sonurinn við ambáttinni var fæddur á náttúrlegan hátt, en sonurinn við frjálsu konunni var fæddur samkvæmt fyrirheiti.

4:24b.GAL.004.024 Þetta hefur óeiginlega merkingu: Konurnar merkja tvo sáttmála: Annar er sá frá Sínaífjalli og elur börn til ánauðar, það er Hagar;

4:25b.GAL.004.025 en Hagar merkir Sínaífjall í Arabíu og samsvarar hinni núverandi Jerúsalem, því að hún er í ánauð ásamt börnum sínum.

4:26b.GAL.004.026 En Jerúsalem, sem í hæðum er, er frjáls, og hún er móðir vor,

4:27b.GAL.004.027 því að ritað er: Ver glöð, óbyrja, sem ekkert barn hefur átt! Hrópa og kalla hátt, þú sem ekki hefur jóðsjúk orðið! Því að börn hinnar yfirgefnu eru fleiri en hinnar, sem manninn á.

4:28b.GAL.004.028 En þér, bræður, eruð fyrirheits börn eins og Ísak.

4:29b.GAL.004.029 En eins og sá, sem fæddur var á náttúrlegan hátt, ofsótti forðum þann, sem fæddur var á undursamlegan hátt, svo er það og nú.

4:30b.GAL.004.030 En hvað segir ritningin? "Rek burt ambáttina og son hennar, því að ekki skal ambáttarsonurinn taka arf með syni frjálsu konunnar."

4:31b.GAL.004.031 Þess vegna, bræður, erum vér ekki ambáttar börn, heldur börn frjálsu konunnar.

5

5:1b.GAL.005.001 Til frelsis frelsaði Kristur oss. Standið því stöðugir og látið ekki aftur leggja á yður ánauðarok.

5:2b.GAL.005.002 Takið eftir því, sem ég, Páll, segi yður: Ef þér látið umskerast, þá gagnar Kristur yður ekkert.

5:3b.GAL.005.003 Og enn vitna ég fyrir hverjum manni, sem lætur umskerast: Hann er skyldur til að halda allt lögmálið.

5:4b.GAL.005.004 Þér eruð orðnir viðskila við Krist, þér sem ætlið að réttlætast með lögmáli. Þér eruð fallnir úr náðinni.

5:5b.GAL.005.005 En vér væntum í andanum að öðlast af trúnni réttlætinguna, sem er von vor.

5:6b.GAL.005.006 Í Kristi Jesú er ekkert komið undir umskurn né yfirhúð, heldur undir trú, sem starfar í kærleika.

5:7b.GAL.005.007 Þér hlupuð vel. Hver hefur hindrað yður í að hlýða sannleikanum?

5:8b.GAL.005.008 Þær fortölur voru ekki frá honum, sem kallaði yður.

5:9b.GAL.005.009 Lítið súrdeig sýrir allt deigið.

5:10b.GAL.005.010 Ég hef það traust til yðar í Drottni, að þér verðið sama sinnis og ég. Sá sem truflar yður mun bera sinn dóm, hver sem hann svo er.

5:11b.GAL.005.011 En hvað mig snertir, bræður, ef ég er enn þá að prédika umskurn, hví er þá enn verið að ofsækja mig? Þá væri hneyksli krossins tekið burt.

5:12b.GAL.005.012 Vel mættu þeir, sem koma yður í uppnám, aflima sig.

5:13b.GAL.005.013 Þér voruð, bræður, kallaðir til frelsis. Notið aðeins ekki frelsið til færis fyrir holdið, heldur þjónið hver öðrum í kærleika.

5:14b.GAL.005.014 Allt lögmálið er uppfyllt með þessu eina boðorði: "Þú skalt elska náunga þinn eins og sjálfan þig."

5:15b.GAL.005.015 En ef þér bítist og etið hver annan upp, þá gætið þess, að þér tortímist ekki hver fyrir öðrum.

5:16b.GAL.005.016 En ég segi: Lifið í andanum, og þá fullnægið þér alls ekki girnd holdsins.

5:17b.GAL.005.017 Holdið girnist gegn andanum, og andinn gegn holdinu. Þau standa hvort gegn öðru, til þess að þér gjörið ekki það, sem þér viljið.

5:18b.GAL.005.018 En ef þér leiðist af andanum, þá eruð þér ekki undir lögmáli.

5:19b.GAL.005.019 Holdsins verk eru augljós: Frillulífi, óhreinleiki, saurlífi,

5:20b.GAL.005.020 skurðgoðadýrkun, fjölkynngi, fjandskapur, deilur, metingur, reiði, eigingirni, tvídrægni, flokkadráttur,

5:21b.GAL.005.021 öfund, ofdrykkja, svall og annað þessu líkt. Og það segi ég yður fyrir, eins og ég hef áður sagt, að þeir, sem slíkt gjöra, munu ekki erfa Guðs ríki.

5:22b.GAL.005.022 En ávöxtur andans er: Kærleiki, gleði, friður, langlyndi, gæska, góðvild, trúmennska,

5:23b.GAL.005.023 hógværð og bindindi. Gegn slíku er lögmálið ekki.

5:24b.GAL.005.024 En þeir, sem tilheyra Kristi Jesú, hafa krossfest holdið með ástríðum þess og girndum.

5:25b.GAL.005.025 Fyrst andinn er líf vort skulum vér lifa í andanum!

5:26b.GAL.005.026 Verum ekki hégómagjarnir, svo að vér áreitum hver annan og öfundum hver annan.

6

6:1b.GAL.006.001 Bræður! Ef einhver misgjörð kann að henda mann, þá leiðréttið þér, sem andlegir eruð, þann mann með hógværð. Og haf gát á sjálfum þér, að þú freistist ekki líka.

6:2b.GAL.006.002 Berið hver annars byrðar og uppfyllið þannig lögmál Krists.

6:3b.GAL.006.003 Sá sem þykist vera nokkuð, en er þó ekkert, dregur sjálfan sig á tálar.

6:4b.GAL.006.004 En sérhver rannsaki breytni sjálfs sín og þá mun hann hafa hrósunarefni í samanburði við sjálfan sig, en ekki miðað við aðra,

6:5b.GAL.006.005 því að sérhver mun verða að bera sína byrði.

6:6b.GAL.006.006 En sá, sem uppfræðist í orðinu, veiti þeim, sem uppfræðir, hlutdeild með sér í öllum gæðum.

6:7b.GAL.006.007 Villist ekki! Guð lætur ekki að sér hæða. Það sem maður sáir, það mun hann og uppskera.

6:8b.GAL.006.008 Sá sem sáir í hold sjálfs sín, mun af holdinu uppskera glötun, en sá sem sáir í andann, mun af andanum uppskera eilíft líf.

6:9b.GAL.006.009 Þreytumst ekki að gjöra það sem gott er, því að á sínum tíma munum vér uppskera, ef vér gefumst ekki upp.

6:10b.GAL.006.010 Þess vegna skulum vér, meðan tími er til, gjöra öllum gott og einkum trúbræðrum vorum.

6:11b.GAL.006.011 Sjáið, með hversu stórum stöfum ég skrifa yður með eigin hendi.

6:12b.GAL.006.012 Allir þeir, sem vilja líta vel út að holdinu til, það eru þeir, sem eru að þröngva yður til að láta umskerast, einungis til þess að þeir verði eigi ofsóttir vegna kross Krists.

6:13b.GAL.006.013 Því að ekki halda einu sinni sjálfir umskurnarmennirnir lögmálið, heldur vilja þeir að þér látið umskerast, til þess að þeir geti stært sig af holdi yðar.

6:14b.GAL.006.014 En það sé fjarri mér að hrósa mér af öðru en krossi Drottins vors Jesú Krists. Sakir hans er ég krossfestur heiminum og heimurinn mér.

6:15b.GAL.006.015 Umskurn eða yfirhúð skipta engu, heldur að vera ný sköpun.

6:16b.GAL.006.016 Og yfir öllum þeim, sem þessari reglu fylgja, sé friður og miskunn, og yfir Ísrael Guðs.

6:17b.GAL.006.017 Enginn mæði mig héðan í frá, því að ég ber merki Jesú á líkama mínum.

6:18b.GAL.006.018 Náðin Drottins vors Jesú Krists sé með yðar anda, bræður. Amen.