1 John (Hebrew)

1

1:1b.1JO.001.001 את אשר היה מראש אשר שמענו ובעינינו ראינו אשר הבטנו ואשר מששו ידינו על דבר החיים׃

1:2b.1JO.001.002 והחיים נגלו ונרא ומעידים אנחנו ומודיעים לכם את חיי העולם אשר היו עם האב ונגלו לנו׃

1:3b.1JO.001.003 את אשר ראינו ושמענו נודיעה לכם למען תתחברו לנו גם אתם והתחברותנו היא עם האב ועם בנו ישוע המשיח׃

1:4b.1JO.001.004 ואת זאת כתבים אנחנו לכם למען תהיה שמחתכם שלמה׃

1:5b.1JO.001.005 וזאת היא השמועה אשר שמענו ממנו ונגד לכם כי האלהים אור הוא וכל חשך אין בו׃

1:6b.1JO.001.006 אם נאמר כי יש לנו התחברות עמו ונתהלך בחשך הננו כזבים ופעלתנו איננה אמת׃

1:7b.1JO.001.007 אך אם באור נלך כאשר הוא באור הנה נתחברנו יחד ודם ישוע המשיח בנו יטהרנו מכל חטא׃

1:8b.1JO.001.008 אם נאמר כי אין בנו חטא הננו מתעים את נפשתינו והאמת אין בנו׃

1:9b.1JO.001.009 ואם נתודה את חטאתינו נאמן הוא וצדיק לסלח לנו את חטאתינו ולטהרנו מכל עון׃

1:10b.1JO.001.010 ואם נאמר כי לא חטאנו לכזב נשימנו ודברו אין בנו׃

2

2:1b.1JO.002.001 בני הנני כתב אליכם את זאת לבלתי תחטאו ואם יחטא איש יש לנו מליץ לפני אבינו ישוע המשיח הצדיק׃

2:2b.1JO.002.002 והוא כפרה על חטאתינו ולא על חטאתינו לבד כי גם על חטאת כל העולם׃

2:3b.1JO.002.003 ובזאת נדע כי הכרנו אותו אם נשמר את מצותיו׃

2:4b.1JO.002.004 האמר הכרתיו ואת מצותיו לא ישמר כזב הוא והאמת אין בו׃

2:5b.1JO.002.005 אבל השמר את דברו בו נשלמה באמת אהבת אלהים ובזאת נדע כי בו אנחנו׃

2:6b.1JO.002.006 האמר כי בו יעמד עליו להתהלך בדרך אשר גם הוא הלך׃

2:7b.1JO.002.007 אחי אינני כתב לכם מצוה חדשה כי אם מצוה ישנה אשר היתה לכם מראש והמצוה הישנה היא הדבר אשר שמעתם מראש׃

2:8b.1JO.002.008 ועוד מצוה חדשה אני כתב לכם אשר היא אמת גם בו גם בכם כי החשך עבר והאור האמתי כבר זורח׃

2:9b.1JO.002.009 האומר כי ישנו באור והוא שנא את אחיו עודנו בחשך׃

2:10b.1JO.002.010 האהב את אחיו יעמד באור ומכשול אין בו׃

2:11b.1JO.002.011 והשנא את אחיו בחשך הוא ובחשך יתהלך ולא ידע אנה הוא הלך כי החשך עור את עיניו׃

2:12b.1JO.002.012 הנני כתב אליכם הבנים יען כי נסלחו לכם חטאתיכם למען שמו׃

2:13b.1JO.002.013 כתב אני אליכם האבות יען כי הכרתם אתו אשר הוא מראש כתב אני אליכם הבחורים יען כי התגברתם על הרע כתב אני אליכם הילדים יען כי הכרתם את האב׃

2:14b.1JO.002.014 כתבתי אליכם האבות יען כי הכרתם אתו אשר הוא מראש כתבתי אליכם הבחורים יען כי חזקתם ודבר האלהים שכן בקרבכם והתגברתם על הרע׃

2:15b.1JO.002.015 אל תאהבו את החלד ואת דברי החלד אם יאהב איש את החלד אין בו אהבת האב׃

2:16b.1JO.002.016 כי כל אשר בחלד תאות הבשר ותאות העינים וגאות ההון איננו מן אבינו כי אם מן החלד׃

2:17b.1JO.002.017 והחלד עבור יעבר עם תאותיו והעשה רצון אלהים יעמד לעד׃

2:18b.1JO.002.018 ילדי הנה השעה האחרונה באה וכאשר שמעתם כי יבא צר המשיח כן עתה רבו צרי המשיח ובזאת נדע כי היא השעה האחרונה׃

2:19b.1JO.002.019 מאתנו יצאו אך לא משלנו היו כי אלו היו משלנו כי אז היו עמדים עמנו אבל למען יגלו כי לא כלם משלנו המה׃

2:20b.1JO.002.020 ואתם המשחה לכם מאת הקדוש וידעתם הכל׃

2:21b.1JO.002.021 לא כתבתי אליכם יען כי לא ידעתם את האמת אך יען כי ידעתם אתה ואשר כל כזב איננו מן האמת׃

2:22b.1JO.002.022 מי הוא הכזב אם לא המכחש בישוע לאמר כי איננו המשיח זה הוא צר המשיח המכחש באב ובבן׃

2:23b.1JO.002.023 כל המכחש בבן גם האב אין לו׃

2:24b.1JO.002.024 ואתם יקם נא בכם הדבר אשר שמעתם מראש ואם יקום בכם אשר שמעתם מראש אז גם אתם תקומו בבן ובאב׃

2:25b.1JO.002.025 וההבטחה אשר הבטיחנו היא חיי עולמים׃

2:26b.1JO.002.026 זאת כתבתי אליכם מפני המתעים אתכם׃

2:27b.1JO.002.027 ואתם המשחה אשר קבלתם מאתו עמדת בכם ולא תצטרכו לאיש אשר ילמדכם כי אם כאשר תלמד אתכם המשחה בכל דבר היא האמת ואיננה כזב וכאשר למדה אתכם כן תעמדו בו׃

2:28b.1JO.002.028 ועתה בנים עמדו בו למען יאמץ לבנו בהראותו ולא נבוש מפניו בבואו׃

2:29b.1JO.002.029 אם ידעתם כי צדיק הוא דעו כי כל עשה צדקה נולד ממנו׃

3

3:1b.1JO.003.001 ראו מה גדלה אהבת האב הנתונה לנו אשר נקרא בני האלהים על כן העולם איננו ידע אתנו יען כי אותו לא ידע׃

3:2b.1JO.003.002 אהובי עתה בנים לאלהים אנחנו ועוד לא נגלה מה נהיה אך ידענו כי בהגלותו נדמה לו כי נראהו כאשר הוא׃

3:3b.1JO.003.003 וכל אשר לו תקוה כזאת יטהר את עצמו כאשר טהור גם הוא׃

3:4b.1JO.003.004 כל העשה חטא גם פשע בתורה הוא והחטא הוא פשע בתורה׃

3:5b.1JO.003.005 וידעתם כי הוא נגלה לשאת את חטאינו ובו אין חטא׃

3:6b.1JO.003.006 כל העמד בו לא יחטא כל החוטא לא ראהו גם לא ידעו׃

3:7b.1JO.003.007 בני אל יתעה אתכם איש העשה צדקה צדיק הוא כאשר הוא צדיק׃

3:8b.1JO.003.008 והעשה חטא מן השטן הוא כי השטן חטא מראש לזאת נגלה בן האלהים להפר את פעלות השטן׃

3:9b.1JO.003.009 כל הנולד מאלהים לא יחטא כי זרעו בו יקום ולא יוכל לחטא כי מאלהים נולד׃

3:10b.1JO.003.010 ונודעו בזאת בני האלהים ובני השטן כל איש אשר לא יעשה צדקה איננו מאלהים וכן כל אשר לא יאהב את אחיו׃

3:11b.1JO.003.011 כי זאת היא השמועה אשר שמעתם מראש לאהבה איש את רעהו׃

3:12b.1JO.003.012 לא כקין אשר היה מן הרע והרג את אחיו ומדוע הרגו יען כי מעשיו היו רעים ומעשי אחיו מעשי צדק׃

3:13b.1JO.003.013 אל תתמהו אחי אם ישנא אתכם העולם׃

3:14b.1JO.003.014 אנחנו ידענו כי עברנו מן המות אל החיים על כי נאהב את אחינו איש אשר לא יאהב את אחיו ישאר במות׃

3:15b.1JO.003.015 כל השנא את אחיו רצח נפש הוא וידעתם כי כל רצח נפש לא יתקימו בו חיי עולמים׃

3:16b.1JO.003.016 בזאת הכרנו את האהבה כי הוא נתן את נפשו בעדנו גם אנחנו חיבים לתת את נפשתינו בעד אחינו׃

3:17b.1JO.003.017 ואיש אשר לו נכסי העולם והוא ראה את אחיו חסר לחם וקפץ את רחמיו ממנו איך תעמד בו אהבת אלהים׃

3:18b.1JO.003.018 בני אל נא נאהב במלין ובלשון כי אם בפעל ובאמת׃

3:19b.1JO.003.019 ובזאת נדעה כי מן האמת אנחנו ולפניו נשקיט את לבותינו׃

3:20b.1JO.003.020 כי אם לבבנו ירשיע אתנו האלהים נשגב הוא מלבבנו וידע את כל׃

3:21b.1JO.003.021 אהובי אם לבבנו לא ירשיענו בטחון לנו באלהים׃

3:22b.1JO.003.022 וכל אשר נשאל מאתו נקבל כי נשמר את מצותיו ונעשה את הרצוי לפניו׃

3:23b.1JO.003.023 וזאת היא מצותו להאמין בשם בנו ישוע המשיח ולאהבה איש את רעהו כאשר צונו׃

3:24b.1JO.003.024 והשמר את מצותיו יקום בו והוא בו ובזאת נדע כי הוא שכן בנו ברוח אשר נתן לנו׃

4

4:1b.1JO.004.001 אהובי אל תאמינו לכל רוח כי אם בחנו הרוחות אם מאלהים המה כי נביאי שקר רבים יצאו לעולם׃

4:2b.1JO.004.002 בזאת תכירו את רוח אלהים כל רוח המודה בישוע המשיח כי בא בבשר מאלהים הוא׃

4:3b.1JO.004.003 וכל רוח אשר איננו מודה בישוע האדון כי בא בבשר לא מאלהים הוא וזה הוא רוח צר המשיח אשר שמעתם עליו כי בוא יבא ועתה הנה הוא בעולם׃

4:4b.1JO.004.004 אתם הבנים הנכם מאלהים ונצחתם אתם כי אשר בכם גדול הוא מאשר בעולם׃

4:5b.1JO.004.005 המה מן העולם על כן מהעולם ידברו והעולם ישמע אליהם׃

4:6b.1JO.004.006 ואנחנו מאלהים הננו היודע את האלהים ישמע אלינו ואשר איננו מאלהים לא ישמע אלינו בזאת נכיר את רוח האמת ואת רוח התועה׃

4:7b.1JO.004.007 אהובי נאהב נא איש את רעהו כי האהבה מאלהים היא וכל אשר יאהב נולד מאלהים וידע את האלהים׃

4:8b.1JO.004.008 ואשר איננו אהב לא ידע את האלהים כי האלהים הוא אהבה׃

4:9b.1JO.004.009 בזאת נראתה אהבת האלהים לנו כי שלח האלהים את בנו את יחידו לעולם למען נחיה על ידו׃

4:10b.1JO.004.010 בזאת היא האהבה לא שאנחנו אהבנו את האלהים כי אם הוא אהב אותנו וישלח את בנו לכפרה על חטאתינו׃

4:11b.1JO.004.011 אהובי אם ככה אהב אתנו האלהים גם אנחנו חיבים לאהבה איש את רעהו׃

4:12b.1JO.004.012 את האלהים לא ראה איש מעולם ואם נאהב איש את רעהו האלהים יעמד בקרבנו ואהבתו נשלמה בנו׃

4:13b.1JO.004.013 בזאת נדע אשר בו נקום והוא בנו כי נתן לנו מרוחו׃

4:14b.1JO.004.014 ואנחנו חזינו ונעידה כי האב שלח את הבן מושיע העולם׃

4:15b.1JO.004.015 כל המודה כי ישוע הוא בן האלהים האלהים שכן בו והוא באלהים׃

4:16b.1JO.004.016 ואנחנו ידענו ונאמן באהבה אשר אלהים אהב אתנו האלהים הוא אהבה והעמד באהבה עמד באלהים והאלהים עמד בו׃

4:17b.1JO.004.017 ובזאת נשלמה בנו האהבה בהיות לנו בטחון ביום הדין כי כמהו כן גם אנחנו בעולם הזה׃

4:18b.1JO.004.018 אין אימה באהבה כי אם האהבה השלמה תגרש את האימה כי באימה מעצבה ואשר באימה איננו שלם באהבה׃

4:19b.1JO.004.019 אנחנו אהבים אתו כי הוא קדם לאהבה אתנו׃

4:20b.1JO.004.020 כי יאמר איש אהב אני את האלהים והוא שנא את אחיו כזב הוא כי אשר לא יאהב את אחיו אשר הוא ראה איככה יוכל לאהב את האלהים אשר איננו ראה אתו׃

4:21b.1JO.004.021 וזאת המצוה יש לנו מאתו כי האהב את האלהים יאהב גם את אחיו׃

5

5:1b.1JO.005.001 כל המאמין כי ישוע הוא המשיח הנה זה ילד מאלהים וכל האהב את מולידו יאהב גם את הנולד מאתו׃

5:2b.1JO.005.002 בזאת נדע כי נאהב את בני האלהים באהבתנו את האלהים ובשמרנו את מצותיו׃

5:3b.1JO.005.003 כי זאת אהבת אלהים היא אשר נשמר את מצותיו ומצותיו אינן כבדות׃

5:4b.1JO.005.004 כי כל הנולד מאת האלהים מנצח את העולם ואמונתנו הנצחון המנצח את העולם׃

5:5b.1JO.005.005 מי הוא זה המנצח את העולם אם לא המאמין בישוע שהוא בן האלהים׃

5:6b.1JO.005.006 זה הוא אשר בא במים ובדם ישוע המשיח לא במים לבד כי אם במים ובדם והרוח הוא המעיד כי הרוח הוא האמת׃

5:7b.1JO.005.007 כי שלשה המה המעידים בשמים האב הדבר ורוח הקדש ושלשתם אחד המה׃

5:8b.1JO.005.008 ושלשה המה המעידים בארץ הרוח המים והדם ושלשתם לאחת המה׃

5:9b.1JO.005.009 אם נקבל עדות בני אדם הנה עדות האלהים גדולה ממנה כי זאת היא עדות האלהים אשר העיד על בנו׃

5:10b.1JO.005.010 המאמין בבן האלהים יש לו העדות בנפשו ואשר לא יאמין לאלהים לכזב שמהו יען לא האמין בעדות אשר העיד האלהים על בנו׃

5:11b.1JO.005.011 וזאת היא העדות כי חיי עולמים נתן לנו האלהים והחיים האלה בבנו המה׃

5:12b.1JO.005.012 אשר יש לו הבן יש לו החיים ואשר אין לו בן האלהים אין לו החיים׃

5:13b.1JO.005.013 זאת כתבתי אליכם המאמינים בשם בן האלהים למען תדעון שיש לכם חיי עולם ולמען תאמינו בשם בן האלהים׃

5:14b.1JO.005.014 וזה הוא בטחוננו אליו אשר אם נשאל דבר כפי רצונו ישמענו׃

5:15b.1JO.005.015 ומדעתנו כי ישמענו לכל אשר נשאל נדע גם זאת כי נשיג את המשאלות אשר שאלנו ממנו׃

5:16b.1JO.005.016 איש כי יראה את אחיו חוטא חטאת אשר לא למות שאל ישאל בעדו ויתן לו חיים לכל אשר חטאו לא למות הן יש חטא למות על זה לא אמר לשאל בעדו׃

5:17b.1JO.005.017 כל מעשה שלא כמשפט חטא היא ויש חטא שלא למות׃

5:18b.1JO.005.018 ידענו כי כל הנולד מאת האלהים לא יחטא כי אשר ילד מאת האלהים ישמר את נפשו והרע לא יגע בו׃

5:19b.1JO.005.019 ידענו כי מאלהים אנחנו וכל העולם ברע הוא׃

5:20b.1JO.005.020 וידענו כי בא בן אלהים ויתן לנו בינה לדעת את האמתי ובאמתי אנחנו בבנו ישוע המשיח זה הוא האל האמתי וחיי העולם׃

5:21b.1JO.005.021 בני השמרו לכם מן האלילים אמן׃