1 Peter (Hebrew)

1

1:1b.1PE.001.001 פטרוס שליח ישוע המשיח אל תושבי תפוצות פנטוס גלטיא קפודקיא אסיא וביתוניא׃

1:2b.1PE.001.002 הנבחרים מקדם כפי דעת אלהים האב בקדוש הרוח אל משמעת ישוע המשיח ואל הזית דמו חסד ושלום למכביר יהיו לכם׃

1:3b.1PE.001.003 ברוך האלהים אבי אדנינו ישוע המשיח אשר כרב רחמיו שב והוליד אתנו לתקוה חיה בהקמת ישוע המשיח מעם המתים׃

1:4b.1PE.001.004 לנחלה אשר לא תשחת ולא תגאל ולא תבל הצפונה בשמים לכם׃

1:5b.1PE.001.005 הנשמרים בעז אלהים על יד האמונה לתשועה העתידה להגלות בעת קץ׃

1:6b.1PE.001.006 אשר בה תגילו אתם המתעצבים עתה מעט לפי הצרך במסת שנות׃

1:7b.1PE.001.007 למען תמצא אמונתכם המזקקה יקרה הרבה מן הזהב האבד הצרוף באש לתהלה ולכבוד ולתפארת בהתגלות ישוע המשיח׃

1:8b.1PE.001.008 אשר אהבתם ולא ראיתם ואשר עתה תאמינו בו בלא ראות אתו ובכן תגילו בשמחה מפארה עצמה מספר׃

1:9b.1PE.001.009 בקחתכם עקב אמונתכם תשועה לנפשתיכם׃

1:10b.1PE.001.010 את התשועה אשר עליה חקרו ודרשו הנביאים הנבאים על החסד השמור לכם׃

1:11b.1PE.001.011 בחקרם לדעת מתי ואיך תהיה העת אשר הודיעה רוח המשיח אשר בקרבם בהגידו מראש את ענויי המשיח ואת הגדלות אשר אחריהם׃

1:12b.1PE.001.012 ונגלה להם כי לא לפנשם כי אם לנו שרתו בדברים ההם אשר הגד לכם עתה על פי המבשרים אתכם ברוח הקדש השלוח משמים דברים אשר מלאכי אלהים חמדו להשקיף אל תוכם׃

1:13b.1PE.001.013 לכן חגרו מתני שכלכם התעוררו וקוו קוה לחסד אשר יבואכם בהתגלות ישוע המשיח׃

1:14b.1PE.001.014 כבני משמעת אל תתנהגו בתאות אשר התאויתם בעוד היותכם בבלי דעת׃

1:15b.1PE.001.015 כי אם היו קדשים בכל דרכיכם כאשר קדוש הוא אשר קרא אתכם׃

1:16b.1PE.001.016 כי על כן כתוב והייתם קדשים כי קדוש אני׃

1:17b.1PE.001.017 ואם אב תקראו לאלהים השפט בבלי משא פנים כפי מעללי איש ואיש התהלכו נא ביראה בימי מגוריכם׃

1:18b.1PE.001.018 מדעתכם כי לא בדבר נפסד בכסף או בזהב נפדיתם מדרך הבלכם אשר הנחלתם מאת אבותיכם׃

1:19b.1PE.001.019 כי אם בדם יקר של שה תמים ומום אין בו בדם המשיח׃

1:20b.1PE.001.020 הנודע מראש לפני מוסדות תבל ונגלה באחרית הימים למענכם׃

1:21b.1PE.001.021 המאמינים על פיו באלהים אשר הקים אתו מעם המתים ויתן לו כבוד למען היות אמונתכם גם תקוה לאלהים׃

1:22b.1PE.001.022 זכו את נפשתיכם על ידי הרוח בשמעכם בקול האמת לאהבת אחים בלא חנפה ואהבתם איש את רעהו אהבה חזקה בלב טהור׃

1:23b.1PE.001.023 כנולדים מחדש לא מזרע נשחת כי אם מזרע לא ישחת במאמר אלהים החי והקים לעולם׃

1:24b.1PE.001.024 כי כל בשר חציר וכל כבוד איש כציץ השדה יבש חציר נבל ציץ׃

1:25b.1PE.001.025 ודבר יהוה יקום לעולם וזה הוא הדבר אשר בשר לכם׃

2

2:1b.1PE.002.001 ועתה הסירו מכם כל רשע וכל מרמה וחנפה וקנאה וכל לשון רע׃

2:2b.1PE.002.002 וכעללים אשר מקרוב נולדו התאוו לחלב השכלי והזך למען תגדלו בו׃

2:3b.1PE.002.003 אם אמנם טעמתם כי טוב האדון׃

2:4b.1PE.002.004 אשר נגשתם אליו אל אבן חיה אשר מאסו בה בני האדם והיא נבחרה ויקרה לאלהים׃

2:5b.1PE.002.005 ונבניתם גם אתם כאבנים חיות לבית רוחני לכהנת קדש להעלות זבחי רוח לרצון לאלהים בישוע המשיח׃

2:6b.1PE.002.006 וזה הוא שאמר הכתוב הנני יסד בציון אבן פנה אבן בחן ויקרה והמאמין בה לא יבוש׃

2:7b.1PE.002.007 לכן לכם המאמינים היקר אבל לסוררים האבן אשר מאסו הבונים היתה לראש פנה ולאבן נגף ולצור מכשל׃

2:8b.1PE.002.008 והם נכשלו יען לא שמעו לדבר ולזאת גם נועדו׃

2:9b.1PE.002.009 ואתם הנכם זרע נבחר ממלכת כהנים וגוי קדוש ועם סגלה למען תספרו תהלות הקורא אתכם מחשך אל אורו הנפלא׃

2:10b.1PE.002.010 אשר לפנים לא עם הייתם ועתה עם אלהים ואשר לפנים לא רחמו ועתה מרחמים׃

2:11b.1PE.002.011 אהובים אזהירכם כגרים ותושבים הנזרו מתאות הבשר המתגרות בנפש׃

2:12b.1PE.002.012 והיטיבו דרככם בגוים למען יביטו אל מעשיכם הטובים והיה תחת אשר חרפו אתכם כפעלי און יכבדו את האלהים ביום הפקדה׃

2:13b.1PE.002.013 והכנעו לכל פקדת אדם בגלל האדון אם למלך כראוי לראש׃

2:14b.1PE.002.014 אם למשלים כראוי לשלוחים מאתו לנקמת פעלי און ולתהלת עשי טוב׃

2:15b.1PE.002.015 כי כן הוא חפץ אלהים אשר בעשותכם הטוב תסכרו את פי אולת האנשים אשר אין בם דעת׃

2:16b.1PE.002.016 כחפשים ולא כאלו היתה לכם החפשה למכסה הרעה כי אם כעבדי אלהים׃

2:17b.1PE.002.017 נהגו כבוד בכל איש אהבו את האחים יראו את אלהים כבדו את המלך׃

2:18b.1PE.002.018 העבדים הכנעו לפני אדניכם בכל יראה לא לפני הטובים והענוים לבד כי אם גם לפני העקשים׃

2:19b.1PE.002.019 כי חסד הוא לאיש אם ישבע ממררים ויענה חנם למען דעת האלהים׃

2:20b.1PE.002.020 כי אם חטא תחטאו וסבלתם מכות אגרוף מה תתהללו אך אם תענו וסבלתם בעשותכם הטוב חסד הוא מלפני אלהים׃

2:21b.1PE.002.021 כי לזאת נקראתם כי גם המשיח ענה בעבורכם והשאיר לכם מופת ללכת בעקבותיו׃

2:22b.1PE.002.022 אשר חטא לא עשה ולא מרמה בפיו׃

2:23b.1PE.002.023 אשר שמע חרפתו ולא השיב נענה ולא גער כי אם מסר דינו לשפט צדק ואת חטאתנו הוא נשא בגויתו על העץ׃

2:24b.1PE.002.024 למען נחיה לצדקה מאחר שנפטרנו מן החטאים׃

2:25b.1PE.002.025 אשר בחברתו נרפא לכם כי הייתם כצאן אבדות ועתה שבתם אל הרעה פקיד נפשתיכם׃

3

3:1b.1PE.003.001 וכן אתן הנשים הכנענה לפני בעליכן למען גם אם יש אשר אינם שמעים לדבר יקנו באין אמר ודברים על ידי מעשי הנשים׃

3:2b.1PE.003.002 בראותם כי תצנענה לכת ביראה׃

3:3b.1PE.003.003 ופארכן אל יהי מבחוץ במחלפות שער ועדי זהב ולבישת מחלצים׃

3:4b.1PE.003.004 כי אם האדם הצפון פנימה ברוח ענוה והשקט אשר לא יכלה ויקר הוא בעיני אלהים׃

3:5b.1PE.003.005 כי כן התקשטו לפנים גם הנשים הקדשות המיחלות לאלהים בהכנען לפני בעליהן׃

3:6b.1PE.003.006 כשרה אשר שמעה בקול אברהם ותקרא לו אדון אשר אתן הייתן לה לבנות בעשותכן הטוב ולא תיראנה מפחד׃

3:7b.1PE.003.007 וכן אתם האנשים שבו עמהן בתבונה כי כלי רפה האשה ותנו לה כבוד כי גם להן יש חלק בנחלת מתנת החיים פן תכלאו מתפלותיכם׃

3:8b.1PE.003.008 וסוף דבר היו כלכם לב אחד בעלי חמלה אהבי האחים רחמנים ומתקבלים על הבריות׃

3:9b.1PE.003.009 אל תשלמו רעה תחת רעה או חרפה תחת חרפה כי אם תברכו מדעתכם כי לזאת נקראתם למען תירשו את הברכה׃

3:10b.1PE.003.010 כי האיש החפץ חיים אהב ימים לראות טוב יצר לשונו מרע ושפתיו מדבר מרמה׃

3:11b.1PE.003.011 יסור מרע ויעשה טוב יבשק שלום וירדפהו׃

3:12b.1PE.003.012 כי עיני יהוה אל צדיקים ואזניו אל שועתם ופני יהוה בעשי רע׃

3:13b.1PE.003.013 ומי ירע לכם אם תקנאו לעשות הטוב׃

3:14b.1PE.003.014 אבל אשריכם גם אם תענו למען הצדקה אך מוראם לא תיראו ולא תעריצו׃

3:15b.1PE.003.015 את יהוה אלהים אתו תקדישו בלבבכם והיו נכנים תמיד להשיב דבר בענוה וביראה לכל שאל אתכם חשבון התוחלת אשר בקרבכם׃

3:16b.1PE.003.016 רוח שלמה תהי לכם למען יבשו המנאצים דרככם הטובה במשיח בהלשינם אתכם כפעלי און׃

3:17b.1PE.003.017 כי טוב לכם אם חפץ אלהים הוא אשר תענו בעשותכם הטוב משתענו בעשותכם רע׃

3:18b.1PE.003.018 כי גם המשיח ענה פעם אחת על חטאתינו הצדיק בעד הרשעים לקרב אתנו אל האלהים הומת לפי הבשר ויחי ברוח׃

3:19b.1PE.003.019 אשר בו הלך ויקרא גם לרוחות אשר במשמר׃

3:20b.1PE.003.020 אשר לפנים לא האמינו כאשר חכה אלהים בארך אפו בימי נח בהעשות התבה אשר נמלטו אליה מעטים והם שמנה נפשות במים׃

3:21b.1PE.003.021 וזה הוא אות הטבילה אשר כעת תושיע גם אתנו לא בהסיר טנוף הבשר כי אם בשאל לנו מאת אלהים רוח שלמה על ידי הקמת ישוע המשיח׃

3:22b.1PE.003.022 אשר הוא לימין אלהים אחרי אשר עבר השמימה ויכנעו לפניו המלאכים והרשיות והגבורות׃

4

4:1b.1PE.004.001 ועתה כאשר ענה המשיח בעדנו בבשר כן היו גם אתם מזינים במחשבה ההיא כי המענה בבשר חדל מחטוא׃

4:2b.1PE.004.002 למען אשר לא תחיו עוד לתאות בני אדם כי אם לרצון אלהים כל ימי היתכם עוד בבשר׃

4:3b.1PE.004.003 כי דינו עת החיים אשר עברה לעשות כחפץ הגוים בלכתנו בדרכי זמה ובתאות כסבאי יין וזללי בשר ורדפי שכר ותועבות עבדת האלילים׃

4:4b.1PE.004.004 ועל זאת תמהים המה ומגדפים כי לא תרוצו עמהם לשטף בזמה כמוהם׃

4:5b.1PE.004.005 אשר יתנו חשבון לפני העתיד לשפט החיים והמתים׃

4:6b.1PE.004.006 כי על כן התבשרו גם המתים למען ישפטו בבשר לפי דרך בני אדם ויחיו ברוח לפי דרך אלהים׃

4:7b.1PE.004.007 הן קץ הכל קרב לכן היו צנועים וערים להתפלל׃

4:8b.1PE.004.008 ולפני כל דבר אהבו איש את אחיו אהבה חזקה כי על רב פשעים תכסה האהבה׃

4:9b.1PE.004.009 היו מארחים איש את רעהו בבלי תלנות׃

4:10b.1PE.004.010 איש איש כמתן החסד אשר קבל תעזרו איש לרעהו כגזברים ממנים על חסדי אלהים הרבים׃

4:11b.1PE.004.011 איש כי ידבר יהי כאמרי אל ואיש כי יעזר תהי עזרתו מתוך החיל אשר חננו אלהים למען יכבד אלהים בכל על ידי ישוע המשיח אשר לו הכבוד והעז לעולמי עולמים אמן׃

4:12b.1PE.004.012 אהובים בבאכם בתוך כור עני למען נסתכם אל נא תתמהו כאלו קרה לכם דבר זר׃

4:13b.1PE.004.013 כי אם שמחו על אשר חלק לכם בענויי המשיח למען גם תשמחו ותעלצו בהגלות כבודו׃

4:14b.1PE.004.014 אם יחרפו אתכם למען שם המשיח אשריכם כי נחה עליכם רוח הכבוד רוח אלהים אצלם מנאץ הוא ואצלכם נכבד׃

4:15b.1PE.004.015 רק אל יענה איש מכם כרצח או כגנב או כפעל און או כנכנס בפקדת אחרים׃

4:16b.1PE.004.016 ואם יענה כאחד המשיחיים אל יבוש כי אם יודה לאלהים על הדבר הזה׃

4:17b.1PE.004.017 כי עת החל המשפט מבית אלהים ואם ממנו ראשנה מה אפוא תהיה אחרית הממרים את בשורת אלהים׃

4:18b.1PE.004.018 הן צדיק כמעט יושע אף כי רשע וחוטא׃

4:19b.1PE.004.019 לכן גם המענים כרצון אלהים יפקידו את נפשותם ביד אלהים הברא הנאמן ויוסיפו לעשות הטוב׃

5

5:1b.1PE.005.001 את הזקנים אשר בקרבכם אזהיר אנכי עמיתם הזקן ועד ענויי המשיח וגם חבר לכבוד העתיד להגלות׃

5:2b.1PE.005.002 רעו את עדר האלהים אשר בידכם והשגיחו עליהם לא באנס כי אם בנדבה אף לא עקב בצע כי אם בנפש חפצה׃

5:3b.1PE.005.003 גם לא כמתעמרים בנחלת יהוה כי אם בהיותכם מופת לצאן׃

5:4b.1PE.005.004 והיה בהגלות שר הרעים תשאו עטרת הכבוד אשר לא תבל׃

5:5b.1PE.005.005 וכן גם אתם הנערים הכנעו לפני הזקנים וחגרו כלכם שפלות רוח בהכנע איש לרעהו כי אלהים ללצים יליץ ולענוים יתן חן׃

5:6b.1PE.005.006 השפילו נפשכם תחת יד אלהים החזקה למען ירומם אתכם בעתו׃

5:7b.1PE.005.007 השליכו עליו כל יהבכם כי הוא ידאג לכם׃

5:8b.1PE.005.008 התעוררו שקדו כי מריבכם השטן משוטט כאריה שאג ומבקש את אשר יבלע׃

5:9b.1PE.005.009 ועמדתם נגדו חזקים באמונה ודעו כי ענוים כאלה באו גם על אחיכם אשר בעולם׃

5:10b.1PE.005.010 ואלהי כל החסד אשר קראנו לכבודו הנצחי במשיח ישוע אחרי ענותכם מעט הוא ישלים ויחזק ויגבר וייסד אתכם׃

5:11b.1PE.005.011 לו הכבוד והעז לעולמי עולמים אמן׃

5:12b.1PE.005.012 ביד סלונוס האח הנאמן לכם כאשר אחשב כתבתי אליכם בדברים מעטים להזהיר אתכם ולהעיד כי חסד האלהים הזה אשר עמדתם בו אמת הוא׃

5:13b.1PE.005.013 חברתכם אשר בבבל הנבחרה אתכם ומרקוס בני שאלים לשלומכם׃

5:14b.1PE.005.014 שאלו לשלום איש את רעהו בנשיקת אהבה שלום לכלכם אשר במשיח ישוע אמן׃