James (Hebrew)

1

1:1b.JAM.001.001 יעקב עבד אלהים ואדנינו ישוע המשיח שאל לשלום שנים עשר השבטים הנפוצים׃

1:2b.JAM.001.002 אך לשמחה חשבו לכם אחי כאשר תבאו בנסינות שונים׃

1:3b.JAM.001.003 בדעתכם כי בחן אמונתכם מביא לידי סבלנות׃

1:4b.JAM.001.004 והסבלנות שלמה תהיה בפעלה להיותכם שלמים ותמימים ולא תחסרו כל דבר׃

1:5b.JAM.001.005 ואיש מכם כי יחסר חכמה יבקשנה מאלהים הנותן לכל בנדיבה ובאין גערה ותנתן לו׃

1:6b.JAM.001.006 רק יבקש באמונה ובבלי ספק כי בעל ספק דומה לגלי הים הסער והנגרש׃

1:7b.JAM.001.007 והאיש ההוא אל ידמה בנפשו כי ישא דבר מאת יהוה׃

1:8b.JAM.001.008 איש אשר חלק לבו הפכפך הוא בכל דרכיו׃

1:9b.JAM.001.009 אבל האח השפל יתהלל ברוממתו׃

1:10b.JAM.001.010 והעשיר יתהלל בשפלותו כי יעבר כציץ החציר׃

1:11b.JAM.001.011 כי זרח השמש בחמתו וייבש את החציר ויבל ציצו וחסד מראהו אבד כן יבול העשיר בהליכותיו׃

1:12b.JAM.001.012 אשרי האיש העמד בנסיונו כי כאשר נבחן ישא עטרת החיים אשר הבטיח יהוה לאהביו׃

1:13b.JAM.001.013 אל יאמר המנסה האלהים נסני כי האלהים איננו מנסה ברע והוא לא ינסה איש׃

1:14b.JAM.001.014 כי אם ינסה כל איש בתאות נפשו אשר תסיתהו ותפתהו׃

1:15b.JAM.001.015 ואחרי כן הרתה התאות ותלד חטא והחטא כי נשלם יוליד את המות׃

1:16b.JAM.001.016 אל תתעו אחי אהובי׃

1:17b.JAM.001.017 כל מתנה טובה וכל מנחה שלמה תרד ממעל מאת אבי האורות אשר חלוף וכל צל שנוי אין עמו׃

1:18b.JAM.001.018 הוא בחפצו ילד אותנו בדבר האמת להיותנו כמו ראשית בכורי יצוריו׃

1:19b.JAM.001.019 על זאת אחי אהובי יהי כל איש מהיר לשמע קשה לדבר וקשה לכעוס׃

1:20b.JAM.001.020 כי כעס אדם לא יפעל צדקת אלהים׃

1:21b.JAM.001.021 לכן הסירו מעליכם כל טנוף ותרבות רעה וקבלו בענוה את הדבר הנטוע בכם אשר יכל להושיע את נפשתיכם׃

1:22b.JAM.001.022 והיו עשי הדבר ולא שמעיו לבד לרמות את נפשכם׃

1:23b.JAM.001.023 כי האיש אשר רק שמע את הדבר ולא עשהו נמשל לאיש מביט את תאר הויתו במראה׃

1:24b.JAM.001.024 כי הביט אל מראהו וילך לו וברגע שכח מה תארו׃

1:25b.JAM.001.025 אבל המשקיף בתורה השלמה תורת החרות ומחזיק בה אשר איננו שמע ושכח כי אם עשה בפעל אשרי האיש ההוא במעשהו׃

1:26b.JAM.001.026 איש מכם אם ידמה להיות עבד אלהים ואיננו שם רסן ללשנו כי אם מתעה הוא את לבבו עבדתו אך לריק תהיה׃

1:27b.JAM.001.027 זאת העבודה הטהורה והברה לפני האלהים אבינו לבקר את היתומים והאלמנות בלחצם ולשמר את עצמו נקי מחלאת העולם׃

2

2:1b.JAM.002.001 אחי אל יהי משא פנים באמונתכם בישוע המשיח אדנינו אדון הכבוד׃

2:2b.JAM.002.002 כי אם יבוא איש לבית כנסתכם וטבעת זהב על ידיו והוא לבוש לבשי מכלול וגם איש עני יבא שמה ובגדו מטנף׃

2:3b.JAM.002.003 ופניתם אל הלבוש לבשי מכלול ואמרתם לו שב לך הנה בטוב ולעני תאמרו עמד שם או שב פה מתחת להדם רגלי׃

2:4b.JAM.002.004 הלא בזאת נחלק לבכם והנכם שפטים בעלי מחשבות רעות׃

2:5b.JAM.002.005 שמעו אחי אהובי הלא בעניי העולם הזה בחר האלהים להיות עשירים באמונה וירשי המלכות אשר הבטיח לאהביו׃

2:6b.JAM.002.006 ואתם הכלמתם את העני הלא העשירים הם העשקים אתכם והם הסחבים אתכם אל בתי דין׃

2:7b.JAM.002.007 הלא הם המגדפים את השם הטוב הנקרא עליכם׃

2:8b.JAM.002.008 הן בקימכם את המצוה המלכת על כלן כפי הכתוב ואהבת לרעך כמוך תיטיבו לעשות׃

2:9b.JAM.002.009 אולם אם תשאו פנים תחטאו במעשיכם והתורה תוכיחכם כעברים אותה׃

2:10b.JAM.002.010 כי איש אשר יקים את כל התורה ונכשל בדבר אחד הוא אשם אשם בכלם׃

2:11b.JAM.002.011 כי האמר לא תנאף גם הוא אמר לא תרצח ואם אינך נאף ואתה רוצח היה נהיית לעבר התורה׃

2:12b.JAM.002.012 כן דברו וכן עשו כאנשים העתידים להשפט על פי תורת החרות׃

2:13b.JAM.002.013 כי אין חסד בדין לאשר לא עשה חסד והחסד יתגאה על הדין׃

2:14b.JAM.002.014 אחי מה יועיל לאיש אם יאמר כי יש לו אמונה ומעשים אין בו התוכל האמונה להושיעו׃

2:15b.JAM.002.015 אח או אחות אם יהיו בעירם ובחסר לחם יומם׃

2:16b.JAM.002.016 ואיש מכם יאמר אליהם לכו לשלום והתחממו ושבעו ולא תתנו להם די מחסור גופם מה תועיל זאת׃

2:17b.JAM.002.017 ככה גם האמונה אם אין בה מעשים מתה היא בעצמה׃

2:18b.JAM.002.018 אך יאמר איש אתה יש לך אמונה ואני יש לי מעשים הראני נא את אמונתך מתוך מעשיך ואני אראך מתוך מעשי את אמוני׃

2:19b.JAM.002.019 אתה מאמין כי האלהים אחד הוא הטיבות גם השדים מאמינים בו ורעדים׃

2:20b.JAM.002.020 ואתה איש בער התחפץ לדעת כי האמונה בבלי מעשים מתה היא׃

2:21b.JAM.002.021 אברהם אבינו הלא במעשיו נצדק בהעלתו את יצחק בנו על המזבח׃

2:22b.JAM.002.022 הנך ראה כי היתה האמונה עזרת למעשיו ומתוך המעשים השלמה האמונה׃

2:23b.JAM.002.023 וימלא הכתוב האמר והאמן אברהם ביהוה ותחשב לו לצדקה ויקרא אהב יהוה׃

2:24b.JAM.002.024 הנכם ראים כי במעשים יצדק האיש ולא באמונה לבדה׃

2:25b.JAM.002.025 וכן גם רחב הזונה הלא נצדקה במעשים באספה את המלאכים אל ביתה ותשלחם בדרך אחר׃

2:26b.JAM.002.026 כי כאשר הגוף בלי נשמה מת הוא כן גם האמונה בלי מעשים מתה היא׃

3

3:1b.JAM.003.001 אחי אל יהיו רבים מכם למורים באשר ידעתם כי בזאת נכביד עלינו את הדין׃

3:2b.JAM.003.002 כי כלנו מרבים להכשל ואשר לא יכשל בדבור הוא איש תמים וביכלתו לשום רסן גם לכל גופו׃

3:3b.JAM.003.003 הנה בפי הסוסים נשים את הרסן למען אשר ישמעו לנו ונהגנו בו את כל גויתם׃

3:4b.JAM.003.004 והנה האניות אף כי גדלות הנה ורוחות קשות יהדפום ינהג אתן משוט קטן אל כל אשר יחפץ החבל כן גם הלשון אבר קטן היא וגדלות תדבר׃

3:5b.JAM.003.005 ראה מה גדול היער ואש קטנה תבעירנו גם הלשון אש היא עולם מלא עולה׃

3:6b.JAM.003.006 כן הלשון נצבת בין אברינו המגאלת את כל הגוף ומלהטת את גלגל הויתנו והיא להוטה באש גיהנם׃

3:7b.JAM.003.007 כי מין כל בהמה ועוף ורמש וחיות הים יכבש ונכבשים הם על ידי מין האדם׃

3:8b.JAM.003.008 אבל הלשון אין אדם יכל לכבשה אין מעצור לרעה הזאת וסם המות מלאה׃

3:9b.JAM.003.009 בה נברך את האלהים אבינו ובה נקלל את האנשים העשוים בצלם אלהים׃

3:10b.JAM.003.010 מפה אחד יצאת ברכה וקללה וכן לא יעשה אחי׃

3:11b.JAM.003.011 היביע המעין מתוקים ומרים ממוצא אחד׃

3:12b.JAM.003.012 אחי היוכל עץ התאנה להוציא זיתים או התוכל הגפן להוציא תאנים כן גם מעין אחד לא יוכל נבע מים מלוחים ומתוקים׃

3:13b.JAM.003.013 מי בכם חכם ונבון יראה בדרכו הטובה את מעשיו בענות החכמה׃

3:14b.JAM.003.014 ואם קנאה מרה ומריבה בלבבכם אל תתהללו ואל תשקרו באמת׃

3:15b.JAM.003.015 אין זאת החכמה הירדת ממעל כי אם חכמת אדמה היא וחכמת היצר והשדים׃

3:16b.JAM.003.016 כי במקום קנאה ומריבה שם מהומה וכל מעשה רע׃

3:17b.JAM.003.017 אבל החכמה אשר ממעל בראשונה צנועה היא אף אהבת שלום ומכרעת לכף זכות ואיננה עמדת על דעתה ומלאה רחמים ופרי טוב בלא לב ולב ובלי חנפה׃

3:18b.JAM.003.018 ופרי הצדקה בשלום יזרע לעשי השלום׃

4

4:1b.JAM.004.001 מאין המלחמות והמדנים אשר ביניכם הלא מתוך התאות המתגרות באבריכם׃

4:2b.JAM.004.002 אתם מתאוים ואין לכם תרצחו ותקנאו והשג לא תשיגו תריבו ותלחמו ואין לכם יען אשר לא התפללתם׃

4:3b.JAM.004.003 הן אתם מבקשים ואינכם מקבלים על אשר תתפללו ברעה למען תבלו בתאותיכם׃

4:4b.JAM.004.004 הנאפים והמנאפות הלא ידעתם כי אהבת העולם איבת אלהים היא ועתה החפץ להיות אהב העולם יהיה איב לאלהים׃

4:5b.JAM.004.005 או התדמו בנפשכם כי לריק אמר הכתוב בקנאה יתאוה לרוח השכן בקרבנו׃

4:6b.JAM.004.006 וגם יגדיל לתת חן על כן אומר אלהים ללצים יליץ ולענוים יתן חן׃

4:7b.JAM.004.007 לכן הכנעו לאלהים התיצבו נגד השטן ויברח מפניכם׃

4:8b.JAM.004.008 קרבו לאלהים ויקרב אליכם רחצו ידיכם החטאים טהרו לבבכם חלוקי הלבב׃

4:9b.JAM.004.009 התענו והתאבלו ובכו שחקכם יהפך לאבל ושמחתכם ליגון׃

4:10b.JAM.004.010 הכנעו לפני יהוה והוא ירים אתכם׃

4:11b.JAM.004.011 אחי אל תחרפו איש את רעהו המחרף את רעהו ודן את אחיו הוא מחרף את התורה ודן את התורה ואם תדין את התורה אינך עשה התורה כי אם שפטה׃

4:12b.JAM.004.012 אחד הוא המחקק אשר יכול להושיע ולאבד ומי אתה כי תדין את עמיתך׃

4:13b.JAM.004.013 הוי האמרים נלכה היום ומחר לעיר פלונית אלמונית ונעשה שם שנה אחת לסחר בה ולהרבות רוח׃

4:14b.JAM.004.014 ולא תדעו מה ילד יום מחר כי מה חייכם עשן הם אשר נראה כמעט רגע ואחר כלה וילך׃

4:15b.JAM.004.015 תחת אשר תאמרו אם ירצה יהוה ונחיה נעשה כזה וכזה׃

4:16b.JAM.004.016 עתה תתגאו בפחזותכם וכל גאוה אשר כזאת רעה היא׃

4:17b.JAM.004.017 לכן היודע לעשות הטוב ולא יעשנו והיה בו חטא׃

5

5:1b.JAM.005.001 הוי העשירים בכו והילילו על הצרות אשר תבאנה עליכם׃

5:2b.JAM.005.002 עשרכם בלה ובגדיכם אכלם עש׃

5:3b.JAM.005.003 זהבכם וכספכם כסתם חלאה והיתה חלאתם בכם לעדות ואכלה כמו אש את בשרכם אצרתם לכם אוצרות בקץ הימים׃

5:4b.JAM.005.004 הנה שכר הפעלים אספי קציר שדתיכם אשר עשקתם צעק עליכם וצעקת הקוצרים באה באזני יהוה צבאות׃

5:5b.JAM.005.005 התעדנתם בארץ והתענגתם והשמנתם את לבכם כמו ליום טבחה׃

5:6b.JAM.005.006 הרשעתם והמתם את הצדיק והוא נענה לא יפתח פיו׃

5:7b.JAM.005.007 לכן אחי דמו והוחילו עד בוא האדון הנה האכר מחכה לטוב תבואת האדמה בהוחילו כי ירד עליה גשם יורה ומלקוש׃

5:8b.JAM.005.008 כן הוחילו גם אתם ואמצו לבבכם כי קרוב האדון לבא׃

5:9b.JAM.005.009 אחי אל תתאוננו איש על רעהו פן תשפטו הנה השופט עמד לפתח׃

5:10b.JAM.005.010 אחי הנביאים אשר דברו בשם יהוה הם יהיו לכם למופת העני והתוחלת׃

5:11b.JAM.005.011 הנה מאשרים אנחנו את הסבלים את סבלנות איוב שמעתכם ואת אחרית האדון ראיתם כי רחום וחנון יהוה׃

5:12b.JAM.005.012 וראש דבר אחי לא תשבעו לא בשמים ולא בארץ ולא בכל שבועה אחרת ויהי הן שלכם הן ולא שלכם לא פן תפלו בידי הדין׃

5:13b.JAM.005.013 כי יצר לאיש בכם הוא יתפלל ואשר ייטב לבו הוא יזמר׃

5:14b.JAM.005.014 איש כי יחלה בכם יקרא את זקני הקהלה ויתפללו בעדו ויסוכהו שמן בשם יהוה׃

5:15b.JAM.005.015 ותפלת האמונה תושיע את החולה ויהוה יקימנו ואשר חטא יסלח לו׃

5:16b.JAM.005.016 התודו עונותיכם איש לפני רעהו והתפללו איש בעד רעהו למען תרפאו כי גדול כח תפלת הצדיק הקרא אל אלהים בחזקה׃

5:17b.JAM.005.017 אליהו אנוש אנוש היה כמנו והתפלל תפלה שלא יהיה מטר ולא היה מטר בארץ שלש שנים וששה חדשים׃

5:18b.JAM.005.018 וישב ויתפלל והשמים נתנו מטר והארץ הצמיחה את פריה׃

5:19b.JAM.005.019 אחי כי יתעה איש בכם מן האמת ואיש אחר ישיבנו׃

5:20b.JAM.005.020 ידוע ידע כי המשיב את החוטא מעקשות דרכו הוא יושיע את נפשו ממות ויכסה על המון פשעים׃