1 Thessalonians (Hebrew)

1

1:1b.1TH.001.001 פולוס וסלונוס וטימותיוס אל קהלת התסלוניקים באלהים האב ובאדון ישוע המשיח חסד לכם ושלום מאת אלהים אבינו ואדנינו ישוע המשיח׃

1:2b.1TH.001.002 נודה לאלהים על כלכם בכל עת בהזכיר אתכם בתפלותינו׃

1:3b.1TH.001.003 בזכרנו תמיד לפני האלהים אבינו את פעל אמונתכם ויגיעת אהבתכם וסבלנות תקותכם לאדנינו ישוע המשיח׃

1:4b.1TH.001.004 כי ידענו אחי חביבי האלהים את אשר נבחרתם׃

1:5b.1TH.001.005 באשר בשורתנו לא היתה לכם בדבור לבד כי גם בגבורה וברוח הקדש ובדעת נאמנה מאד כאשר ידעתם גם אתם את אשר היינו בתוככם למענכם׃

1:6b.1TH.001.006 ואתם הייתם הלכים בעקבותינו ובעקבות אדנינו בקבלכם את הדבר בתוך עני רב עם חדות רוח הקדש׃

1:7b.1TH.001.007 עד היותכם מופת לכל המאמינים אשר במקדוניא ובאכיא׃

1:8b.1TH.001.008 כי מאתכם נשמע קול דבר יהוה לא לבד במקדוניא ואכיא כי אם בכל מקום יצאה אמונתכם באלהים עד שאין לנו צרך לדבר דבר׃

1:9b.1TH.001.009 כי פיהם המספר מה היה מבואנו אליכם ואיך פניתם מעבודת אלילים ושבתם לאלהים לעבד את אל חי ואמתי׃

1:10b.1TH.001.010 ולחכות לבנו מן השמים אשר העירו מן המתים לישוע מצילנו מן החרון הבא׃

2

2:1b.1TH.002.001 כי אתם אחי הנכם ידעים את מבואנו אליכם כי לא היה לריק׃

2:2b.1TH.002.002 אך אחרי אשר ענינו ולחרפות היינו בפילפי כאשר ידעתם התחזקנו באלהינו להגיד גם לכם את הבשורה בנפתולים רבים׃

2:3b.1TH.002.003 כי תוכחתנו איננה מתוך טעות וגם לא מתוך טמאה ולא ברמיה׃

2:4b.1TH.002.004 כי אם כאשר נחשבנו נאמנים לאלהים להפקיד בידנו את הבשורה כן נדבר ולא כחפצים להיות רצוים לבני אדם כי אם לאלהים הבחן לבותנו׃

2:5b.1TH.002.005 כי מעולם לא דברנו בשפת חלקות כאשר ידעתם וגם לא למען בצע בצע האלהים עד׃

2:6b.1TH.002.006 גם לא בקשנו מן האדם כבוד לא מכם ולא מאחרים אף כי היה לנו מקום להתכבד כשליחי המשיח׃

2:7b.1TH.002.007 אבל הלכנו לאט בתוככם כאמנת מפנקת את בניה׃

2:8b.1TH.002.008 ובחבבנו ככה אתכם חפצנו לתת לכם לא לבד את בשורת האלהים כי גם את נפשתינו יען כי הייתם חביבים עלינו׃

2:9b.1TH.002.009 הלא תזכרו אחי את יגיעתנו ואת תלאתנו אשר היינו עמלים לילה ויומם לבלתי היות למשא לאיש בבשרנו בקרבכם את בשורת האלהים׃

2:10b.1TH.002.010 עדים אתם ועד האלהים כי בקדש ובצדק ובתמים היינו עמכם המאמינים׃

2:11b.1TH.002.011 ואתם ידעתם כי כאב את בניו הזהרנו את כל אחד מכם ודברנו על לבו׃

2:12b.1TH.002.012 ונעד בכם ללכת כראוי לפני האלהים הקורא אתכם למלכותו ולכבודו׃

2:13b.1TH.002.013 בעבור זאת גם נודה תמיד לאלהים כי אתם בקבלכם מאתנו דבר שמועת האלהים לא קבלתם אותו כדבר בני אדם כי אם כמו שהוא באמת כדבר האלהים אשר הוא גם פעל בכם המאמינים׃

2:14b.1TH.002.014 כי אתם אחי הלכתם בעקבי קהלות האלהים אשר בארץ יהודה במשיח ישוע כי סבלתם גם אתם כאלה על ידי בני שבטכם כאשר סבלו גם המה על ידי היהודים׃

2:15b.1TH.002.015 אשר אף המיתו את האדון ישוע ואת נביאיהם ואותנו רדפו ואינם טובים בעיני אלהים ואיבים לכל אדם׃

2:16b.1TH.002.016 המנעים אתנו מדבר אל הגוים כי יושעו למען אשר ימלאו את חטאתיהם בכל עת וישיגם החרון עד לכלה׃

2:17b.1TH.002.017 ואנחנו אחי אחרי אשר שכלנו אתכם לזמן מעט בפנים ולא בלב השתדלנו ביותר לראות פניכם בתשוקה רבה׃

2:18b.1TH.002.018 ועל כן חפצנו לבוא אליכם אני פולוס פעם ושתים והשטן עצרנו׃

2:19b.1TH.002.019 כי מי תקותנו ומי שמחתנו ועטרת תפארתנו הלא גם אתם לפני אדנינו ישוע המשיח בבואו׃

2:20b.1TH.002.020 אמנם אתם כבודנו ושמחתנו׃

3

3:1b.1TH.003.001 ועל כן לא יכלנו עוד להתאפק ונועץ להותר לבדנו באתינס׃

3:2b.1TH.003.002 ונשלח את טימותיוס אחינו ומשרת האלהים ועזרנו בבשורת המשיח לחזק ולהזהיר אתכם על דבר אמונתכם׃

3:3b.1TH.003.003 שלא ימוט איש במצוקות האלה כי ידעתם אף אתם כי לזאת יעדנו׃

3:4b.1TH.003.004 הלא כבד אמרנו אליכם בהיותנו אצלכם כי עתידים אנחנו להלחץ כאשר גם היה ואתם ידעתם׃

3:5b.1TH.003.005 ובעבור כן לא יכלתי עוד להתאפק ואשלח לדעת אמונתכם כי אמרתי פן נסה אתכם המנסה והיתה לריק יגיעתנו׃

3:6b.1TH.003.006 ועתה כשוב אלינו טימותיוס מאתכם ויבשר אתנו את בשורת אמונתכם ואהבתכם ואת אשר אתם זכרים אתנו לטובה בכל עת ונכספים לראות אתנו כאשר גם אנחנו נכספים לכם׃

3:7b.1TH.003.007 אז נחמנו עליכם אחי בכל צרתנו ולחצנו על ידי אמונתכם׃

3:8b.1TH.003.008 כי עתה נחיה אם תעמדו אתם באדנינו׃

3:9b.1TH.003.009 כי מה נשיב לאלהים להודות לו בעבורכם על כל השמחה אשר שמחנו עליכם לפני אלהינו׃

3:10b.1TH.003.010 לילה ויומם מפילים אנחנו תחנתנו לראות את פניכם ולהשלים את מחסרי אמונתכם׃

3:11b.1TH.003.011 והוא האלהים אבינו ואדנינו ישוע המשיח יישר את דרכנו אליכם׃

3:12b.1TH.003.012 ואתכם ירבה ויותיר האדון לאהבה איש את רעהו ולאהבה כל אדם כאשר גם אנחנו אהבים אתכם׃

3:13b.1TH.003.013 ויכונן את לבבכם להיות תמים בקדשה לפני אלהינו אבינו בבוא ישוע המשיח אדנינו עם כל קדשיו׃

4

4:1b.1TH.004.001 ועוד נבקשה מכם אחי ונזהיר אתכם באדנינו ישוע כי כאשר קבלתם מאתנו איך לכם להתהלך ולמצא חן בעיני האלהים כן תוסיפו וכן תרבו עוד׃

4:2b.1TH.004.002 כי ידעתם את המצות אשר נתנו לכם בשם האדון ישוע׃

4:3b.1TH.004.003 כי רצון האלהים היא קדשתכם אשר תתרחקו מן הזנות׃

4:4b.1TH.004.004 וידע כל איש מכם לשמר את כליו בקדשה ויקר׃

4:5b.1TH.004.005 ולא בתאות זמה כדרך הגוים אשר אינם ידעים האלהים׃

4:6b.1TH.004.006 ולא יפרץ איש ויונה את אחיו בעשק כי נוקם יהוה על כל זאת כאשר כבר אמרנו והעידנו לכם׃

4:7b.1TH.004.007 כי לא קרא אותנו האלהים לטמאה כי אם לקדשה׃

4:8b.1TH.004.008 על כן הבוזה זאת לא אנשים הוא בוזה כי אם את האלהים אשר גם שם בקרבנו את רוח קדשו׃

4:9b.1TH.004.009 ועל אהבת האחים אין צרך לכתב אליכם הלא אף אתם למודי יהוה לאהבה איש את רעהו׃

4:10b.1TH.004.010 וגם עשים אתם כן לכל אחיכם אשר בכל מקדוניא אך נבקשה מכם אחי אשר תוסיפו ותרבו עוד׃

4:11b.1TH.004.011 ותשתדלו לשבת בנחת ותעשו איש מלאכתו בעמל ידיכם כאשר צוינו אתכם׃

4:12b.1TH.004.012 למען תתנהגו כהגן עם אשר בחוץ ולא תצטרכו לאדם׃

4:13b.1TH.004.013 ועל דבר הישנים אחי לא נכחד מכם דבר למען לא תעצבו כאחרים אשר אין להם תקוה׃

4:14b.1TH.004.014 כי אם נאמין אשר מת ישוע ויחי כן יביא האלהים על ידי ישוע גם את הישנים אתו׃

4:15b.1TH.004.015 כי את זאת נאמר לכם בדבר יהוה כי אנחנו החיים הנותרים עד בא האדון לא נקדם את הישנים׃

4:16b.1TH.004.016 כי הוא האדון ירד מן השמים בתרועה בקול שר המלאכים ובשופר אלהים ואז יקומו ראשונה המתים במשיח׃

4:17b.1TH.004.017 אחרי כן אנחנו החיים הנשארים נלקח אתם יחדו בעננים לקראת האדון לרקיע ובכן נהיה תמיד עם האדון׃

4:18b.1TH.004.018 לכן נחמו זה את זה בדברים האלה׃

5

5:1b.1TH.005.001 ועל דבר העתים והזמנים אין צרך לכתב אליכם אחי׃

5:2b.1TH.005.002 הלא אף אתם ידעתם היטב כי יום יהוה כגנב בלילה כן בוא יבוא׃

5:3b.1TH.005.003 כי בעת אמרם שלום ושלוה יבא עליהם השבר פתאם כחבלים על ההרה ולא יוכלו להמלט׃

5:4b.1TH.005.004 אבל אתם אחי אינכם בחשך שישיג אתכם היום כגנב׃

5:5b.1TH.005.005 אתם כלכם בני האור ובני היום לא בני הלילה אנחנו ולא בני החשך׃

5:6b.1TH.005.006 לכן אל נא נרדם כמו האחרים כי אם נשקד וננזר׃

5:7b.1TH.005.007 כי הנרדמים הם בלילה נרדמים והמשתכרים משתכרים בלילה׃

5:8b.1TH.005.008 ואנחנו בני היום ננזרה נא ונלבש את שריון האמונה והאהבה וככובע את תקות הישועה׃

5:9b.1TH.005.009 יען אשר לא יעדנו האלהים לחרון כי אם לנחל את הישועה על ידי אדנינו ישוע המשיח׃

5:10b.1TH.005.010 אשר מת בעדנו למען אם נשקד ואם נישן חיה נחיה עמו יחד׃

5:11b.1TH.005.011 על כן נחמו זה את זה ובנו איש את אחיו כאשר גם עשיתם׃

5:12b.1TH.005.012 והננו מבקשים מכם אחי להכיר את העמלים בכם ואשר הם נצבים עליכם באדון ומוכיחים אתכם׃

5:13b.1TH.005.013 אשר תנהגו בם כבוד עד למעלה באהבה למען פעלתם ויהי שלום ביניכם׃

5:14b.1TH.005.014 והננו מזהירים אתכם אחי הוכיחו את הסוררים אמצו את רכי הלבב תמכו את החלשים והאריכו רוח אל כל אדם׃

5:15b.1TH.005.015 וראו פן ישלם איש לאיש רעה תחת רעה כי אם רדפו בכל עת את הטוב הן לאיש איש מכם הן לכל אדם׃

5:16b.1TH.005.016 היו שמחים בכל עת׃

5:17b.1TH.005.017 התמידו בתפלה׃

5:18b.1TH.005.018 הודו על הכל כי זה רצון האלהים אליכם במשיח ישוע׃

5:19b.1TH.005.019 את הרוח לא תכבו׃

5:20b.1TH.005.020 את הנבואות לא תמאסו׃

5:21b.1TH.005.021 בחנו כל דבר ובטוב אחזו׃

5:22b.1TH.005.022 התרחקו מכל הדומה לרע׃

5:23b.1TH.005.023 והוא אלהי השלום יקדש אתכם קדשה שלמה וכל רוחכם ונפשכם וגופכם ישמר תמים בבוא אדנינו ישוע המשיח׃

5:24b.1TH.005.024 נאמן הקורא אתכם אשר גם יעשה׃

5:25b.1TH.005.025 אחי התפללו בעדנו׃

5:26b.1TH.005.026 שאלו לשלום כל האחים בנשיקה הקדשה׃

5:27b.1TH.005.027 הנני משביעכם באדון שתקרא האגרת הזאת באזני כל האחים הקדשים׃

5:28b.1TH.005.028 חסד ישוע המשיח אדנינו עמכם אמן׃