Ephesians (Hebrew)

1

1:1b.EPH.001.001 פולוס שליח ישוע המשיח ברצון אלהים אל הקדשים הנמצאים באפסוס ומאמינים במשיח ישוע׃

1:2b.EPH.001.002 חסד לכם ושלום מאת האלהים אבינו ואדנינו ישוע המשיח׃

1:3b.EPH.001.003 ברוך הוא האלהים ואבי אדנינו ישוע המשיח אשר ברכנו בכל ברכת רוח במרומים במשיח׃

1:4b.EPH.001.004 כאשר בחר אתנו בו לפני מוסדות תבל להיות קדשים ותמימים לפניו באהבה׃

1:5b.EPH.001.005 יעדנו לו לבנים על ידי ישוע המשיח כחפץ רצונו׃

1:6b.EPH.001.006 לתהלת כבוד חסדו אשר נתן אתנו בידידו׃

1:7b.EPH.001.007 אשר בו לנו הפדיום בדמו וסליחת הפשעים כרב חסדו׃

1:8b.EPH.001.008 אשר השפיעו עלינו בכל חכמה והשכל׃

1:9b.EPH.001.009 והודיענו את סוד רצונו כעצתו היעוצה בו׃

1:10b.EPH.001.010 על דבר הנהגתו במלאת העתים לקבץ את הכל תחת המשיח הן מה שבשמים הן מה שבארץ׃

1:11b.EPH.001.011 אשר גם לקחנו בו נחלתנו אנחנו המיעדים לה מאז במחשבת פעל הכל כעצת חפצו׃

1:12b.EPH.001.012 להיותנו לתהלת כבודו אנחנו אשר יחלנו אל המשיח מאז׃

1:13b.EPH.001.013 ואשר גם אתם נטועים בו אחרי שמעכם דבר האמת את בשורת ישועתכם ואשר בו כשהאמנתם גם נחתמתם ברוח ההבטחה רוח הקדש׃

1:14b.EPH.001.014 כי זה ערבון ירשתנו לפדות לו עם סגלה לתהלת כבודו׃

1:15b.EPH.001.015 בעבור זאת גם אנכי אחרי שמעי אמונתכם באדנינו ישוע והאהבה אשר אהבתם את כל הקדשים׃

1:16b.EPH.001.016 לא אחדל מהודות בעבורכם בהזכירי אתכם בתפלתי׃

1:17b.EPH.001.017 כי יתן לכם אלהי אדנינו ישוע המשיח אבי הכבוד את רוח החכמה והחזון לדעת אתו׃

1:18b.EPH.001.018 ויאר עיני לבבכם למען תדעו אי זו היא תוחלת קריאתו ואי זה הוא עשר כבוד נחלתו בקדשים׃

1:19b.EPH.001.019 ואי זה הוא יתרון גדלת גבורתו בנו המאמינים כפי פעלת עצת כחו׃

1:20b.EPH.001.020 אשר פעל במשיח בהעיר אתו מן המתים ויושיבנו לימינו במרומים׃

1:21b.EPH.001.021 ממעל לכל שררה ושלטן וגבורה וממשלה וכל הנקרא בשם לא לבד בעולם הזה כי אם גם בעולם הבא׃

1:22b.EPH.001.022 וישת כל תחת רגליו ויתן אתו לראש על הכל אל העדה׃

1:23b.EPH.001.023 אשר היא גופו מלוא הממלא את הכל בכל׃

2

2:1b.EPH.002.001 גם אתכם המתים לפנים בפשעיכם וחטאתיכם׃

2:2b.EPH.002.002 אשר התהלכתם בהם לפי דור העולם הזה כרצון שר ממשלת האויר והוא הרוח הפעל כעת בבני המרי׃

2:3b.EPH.002.003 וגם אנחנו כלנו בתוכם הלכנו לפנים בתאות הבשר לעשות חפצי בשרנו ומחשבותינו ונהי אך בני רגז בטבענו כאשר בני אדם׃

2:4b.EPH.002.004 אבל האלהים המלא רחמים ברב אהבתו אשר אהב אתנו׃

2:5b.EPH.002.005 אחרי היותנו מתים בפשעים החינו עם המשיח בחסד נושעתם׃

2:6b.EPH.002.006 ויעירנו אתו אף הושיבנו במרומים במשיח ישוע׃

2:7b.EPH.002.007 להראות בדרות הבאים את גדלת עשר חסדו בטובתו עלינו במשיח ישוע׃

2:8b.EPH.002.008 כי בחסד נושעתם על ידי האמונה ולא מידכם היתה זאת כי מתת אלהים היא׃

2:9b.EPH.002.009 לא מתוך המעשים שלא יתהלל איש׃

2:10b.EPH.002.010 כי פעל אלהים אנחנו נבראים במשיח ישוע למעשים טובים אשר הכין האלהים מקדם למען נתהלך בהם׃

2:11b.EPH.002.011 על כן זכרו כי אתם הגוים בבשר הנקראים ערלים בפי הנקראים בני המילה שהיא מעשה ידים בבשר׃

2:12b.EPH.002.012 כי אתם בעת ההיא הייתם בלי משיח מוזרים לעדת ישראל ונכרים לבריתות ההבטחה באין תקוה ובאין לכם אלהים בעולם׃

2:13b.EPH.002.013 ועתה בישוע המשיח אתם הרחוקים מאז הייתם קרובים בדם המשיח׃

2:14b.EPH.002.014 כי הוא שלומנו אשר עשה השנים לאחד והרס מחיצת הגדר׃

2:15b.EPH.002.015 בבטלו האיבה בבשרו את תורת המצות בגזרותיהן לברא בנפשו את השנים לאיש אחד חדש ויעש שלום׃

2:16b.EPH.002.016 וירצה את שניהם בגוף אחד לאלהים על ידי צליבתו בהמיתו בנפשו את האיבה׃

2:17b.EPH.002.017 ויבא ויבשר שלום לכם הרחוקים והקרובים׃

2:18b.EPH.002.018 כי על ידו יש לשנינו מבוא ברוח אחד אל אבינו׃

2:19b.EPH.002.019 לכן אינכם עוד גרים ותושבים כי אתם בני עיר אחת עם הקדשים ובני בית אלהים׃

2:20b.EPH.002.020 בנוים על יסוד השליחים והנביאים וישוע המשיח הוא אבן הפנה׃

2:21b.EPH.002.021 אשר חבר בו יחד הבנין כלו עדי יגבה להיכל קדש ליהוה׃

2:22b.EPH.002.022 ובו נבנים גם אתם להיות משכן אלהים ברוח׃

3

3:1b.EPH.003.001 בעבור זאת אני פולוס אסיר המשיח למענכם הגוים׃

3:2b.EPH.003.002 כי אמנם שמעתם הנהגת חסד האלהים אשר נתן לי אליכם׃

3:3b.EPH.003.003 כי בחזון גלה לי הסוד אשר למעלה כתבתי לכם במעט׃

3:4b.EPH.003.004 ובקראכם תוכלו להכיר בזאת את בינתי בסוד המשיח׃

3:5b.EPH.003.005 אשר בדורת הראשנים לא נודע לבני אדם כאשר נגלה עתה לשליחיו הקדשים ולנביאיו ברוח׃

3:6b.EPH.003.006 להיות הגוים גם הם בני ירשתו וגוף אחד אתו וחברי הבטחתו במשיח על ידי הבשרה׃

3:7b.EPH.003.007 אשר הייתי לה למשרת במתנת חסד אלהים הנתונה לי כפי פעלת גבורתו׃

3:8b.EPH.003.008 לי צעיר הצעירים שבכל הקדשים נתן החסד הזה לבשר בגוים את עשר המשיח אשר לא יחקר׃

3:9b.EPH.003.009 ולהאיר עיני כל מה היא הנהגת הסוד הנסתר מדרת עולם באלהים יוצר הכל על ידי ישוע המשיח׃

3:10b.EPH.003.010 למען אשר תודע עתה על ידי העדה לשרים לשליטים אשר במרומים חכמת אלהים המפליאה דתכיה׃

3:11b.EPH.003.011 על פי עצת עולמים אשר יעץ במשיח ישוע אדנינו׃

3:12b.EPH.003.012 אשר פתחון פינו ממנו וקרבתנו בבטחה על יד אמונתו׃

3:13b.EPH.003.013 בעבור זאת אבקש שלא תחתו בצרותי למענכם יען כי היא תפארתכם׃

3:14b.EPH.003.014 על כן אכרעה על ברכי לאבי אדנינו ישוע המשיח׃

3:15b.EPH.003.015 אשר נקרא על שמו כל בית אבות שבשמים ושבארץ׃

3:16b.EPH.003.016 לתת לכם לפי עשר כבודו להתחזק בגבורה על ידי רוחו לאדם הפנימי׃

3:17b.EPH.003.017 שישכן המשיח בלבבכם באמונה והייתם משרשים ומיסדים באהבה׃

3:18b.EPH.003.018 למען תוכלו להשיג עם כל הקדשים מה הוא הרחב והארך והעמק והגבה׃

3:19b.EPH.003.019 וידעתם את אהבת המשיח הנעלה על כל דעת ונמלאתם את כל מלוא האלהים׃

3:20b.EPH.003.020 ולו אשר יכל להרבות גמוליו עלינו יותר מכל משאלותינו ומחשבותינו לפי הכח הפעל בקרבנו׃

3:21b.EPH.003.021 לו הכבוד בקרב הקהל במשיח ישוע לדר ודר עד עולמי עולמים אמן׃

4

4:1b.EPH.004.001 לכן אזהירכם אני האסור באדון להתהלך כאשר יאתה למשמרתכם אשר נקראתם לה׃

4:2b.EPH.004.002 בכל נמיכות וענוה ובארך רוח לשאת איש את רעהו באהבה׃

4:3b.EPH.004.003 ושקדו לשמר את אחדות הרוח באגדת השלום׃

4:4b.EPH.004.004 גוף אחד ורוח אחד כאשר גם נקראתם בתקות משמרתכם האחת׃

4:5b.EPH.004.005 אדון אחד אמונה אחת טבילה אחת׃

4:6b.EPH.004.006 אל ואב אחד לכל שהוא על כל ובכל ובתוך כלכם׃

4:7b.EPH.004.007 אבל לכל אחד ואחד ממנו נתן החסד כמדת מתנת המשיח׃

4:8b.EPH.004.008 על כן הוא אומר עלה למרום שבה שבי ויתן מתנות לאדם׃

4:9b.EPH.004.009 ועלה שאמר מה הוא אם לא שירד ירד מקדם לתחתיות ארץ׃

4:10b.EPH.004.010 הירד הוא אשר גם עלה למעלה מכל השמים למען ימלא את הכל׃

4:11b.EPH.004.011 והוא נתן את אלה שליחים ואת אלה נביאים ואת אלה מבשרים ואת אלה רעים ומלמדים׃

4:12b.EPH.004.012 להשלים את הקדשים למעשה העבודה לבנין גוף המשיח׃

4:13b.EPH.004.013 עד כי נגיע כלנו לאחדות האמונה ודעת בן האלהים כאיש אחד שלם לשעור קומת מלוא המשיח׃

4:14b.EPH.004.014 ולא נהיה עוד ילדים נגרשים ונדפים בכל רוח הלמוד בתרמית בני אדם ומקשותם אשר שתו להתעות׃

4:15b.EPH.004.015 כי אם נדבר האמת באהבה ונגדלה בכל דבר לו למשיח שהוא הראש׃

4:16b.EPH.004.016 אשר ממנו כל הגוף בהיותו מרכב ומדבק בכל חבור השמוש כפי מדת הפעלה הנתונה לכל אבר ואבר ירבה ויגדל להשלמת בנינו באהבה׃

4:17b.EPH.004.017 והנה זאת אני אמר ומעיד באדון כי מעתה לא תלכו עוד כיתר הגוים ההלכים בהבלי שכלם׃

4:18b.EPH.004.018 חשכי הדעת ומוזרים לחיי אלהים מפני אולתם אשר בהם כי טח מהשכיל לבבם׃

4:19b.EPH.004.019 אשר השמינו ויתנו את נפשם לזמה לעשות כל תועבה באהבת הבצע׃

4:20b.EPH.004.020 ואתם לא כן למדתם את המשיח׃

4:21b.EPH.004.021 אם אמנם אתו שמעתם ובו למדתם כפי האמת בישוע׃

4:22b.EPH.004.022 אשר תסורו מדרכיכם הראשנים ותפשטו את האדם הישן הנשחת בתאות התרמית׃

4:23b.EPH.004.023 ותתחדשו ברוח שכלכם׃

4:24b.EPH.004.024 ותלבשו את האדם החדש הנברא כדמות אלהים בצדקה וקדשת האמת׃

4:25b.EPH.004.025 על כן הסירו מכם את השקר ודברו אמת איש את רעהו כי אברים כלנו יחד איש לאיש׃

4:26b.EPH.004.026 רגזו ואל תחטאו אל תשקע החמה על רגזכם׃

4:27b.EPH.004.027 גם לא תתנו מקום לשטן׃

4:28b.EPH.004.028 מי שגנב אל יסף לגנב כי אם ייגע ובידיו יעשה את הטוב למען יהיה לו לתת לאיש מחסור׃

4:29b.EPH.004.029 כל דבר נבול לא יצא מפיכם כי אם הטוב והמועיל לבנות לפי הצרך למען יתן חן לשמעיו׃

4:30b.EPH.004.030 ולא תעצבו את רוח הקדש של אלהים אשר נחתמתם בו אל יום הגאלה׃

4:31b.EPH.004.031 כל מרירות וחמה ורגז וצעקה וגדוף תסירו מכם עם כל הרשעה׃

4:32b.EPH.004.032 והיו טובים איש אל רעהו ורחמנים וסלחים איש לאחיו כאשר סלח לכם האלהים במשיח׃

5

5:1b.EPH.005.001 לכן לכו בדרך האלהים כבנים חביבים׃

5:2b.EPH.005.002 והתהלכו באהבה כאשר גם המשיח אהב אתנו והקריב את נפשו בעדנו לקרבן וזבח לאלהים לריח ניחוח׃

5:3b.EPH.005.003 אבל זנות וכל טמאה ואהבת בצע בל יזכר ביניכם כאשר נאוה לקדשים׃

5:4b.EPH.005.004 גם לא נבול פה ודברי סכלות ולעג אשר לא כהגן כי אם קול תודה׃

5:5b.EPH.005.005 כי זאת ידע תדעו כי כל זנה וטמא ואהב בצע שהוא עבד אלילים אין לו חלק ונחלה במלכות המשיח והאלהים׃

5:6b.EPH.005.006 אל ישיא איש אתכם בדברי ריק כי בגלל אלה חרון אלהים בא על בני המרי׃

5:7b.EPH.005.007 על כן אל יהי חלקכם עמהם׃

5:8b.EPH.005.008 כי מלפנים הייתם חשך ועתה הנכם אור באדנינו התהלכו נא כבני אור׃

5:9b.EPH.005.009 כי פרי הרוח כל מעשי חסד וצדק ואמת׃

5:10b.EPH.005.010 ובחנו מה הוא רצוי בעיני אדנינו׃

5:11b.EPH.005.011 ואל תשתתפו עם מעשי החשך אשר לא יעשו פרי כי אם הוכח תוכיחו אותם׃

5:12b.EPH.005.012 כי מה שהם עשים בסתר חרפה היא אך לספר׃

5:13b.EPH.005.013 אבל כל זאת יגלה כשיוכח על ידי האור כי כל הנגלה אור הוא׃

5:14b.EPH.005.014 על כן הוא אומר עורה הישן וקומה מן המתים ויאר לך המשיח׃

5:15b.EPH.005.015 ועתה ראו והזהרו להתהלך לא ככסילים כי אם כחכמים׃

5:16b.EPH.005.016 מוקירים העת כי הימים רעים המה׃

5:17b.EPH.005.017 על כן אל תהיו חסרי דעת כי אם מבינים לדעת מה הוא רצון אדנינו׃

5:18b.EPH.005.018 ואל תשתכרו מיין המביא לידי פריצות כי אם המלאו ברוח׃

5:19b.EPH.005.019 ושיחו איש לרעהו בתהלות ותשבחות ושירות רוחניות שירו וזמרו לאדני בלבבכם׃

5:20b.EPH.005.020 והודו בכל עת על הכל לאלהים אבינו בשם אדנינו ישוע המשיח׃

5:21b.EPH.005.021 הכנעו איש לאחיו ביראת אלהים׃

5:22b.EPH.005.022 הנשים הכנענה לבעליכן כמו לאדנינו׃

5:23b.EPH.005.023 כי האיש הוא ראש האשה כאשר המשיח הוא ראש העדה והוא מושיע של הגוף׃

5:24b.EPH.005.024 אבל כאשר תכנע העדה למשיח ככה גם הנשים לבעליהן בכל דבר׃

5:25b.EPH.005.025 האנשים אהבו את נשיכם כאשר גם המשיח אהב את העדה ויתן את נפשו בעדה׃

5:26b.EPH.005.026 למען קדשה בדברו אחרי אשר טהרה ברחיצת המים׃

5:27b.EPH.005.027 להקימה בכבוד לו לעדה אשר אין בה כתם וקמט וכדומה כי אם למען תהיה קדושה ותמימה׃

5:28b.EPH.005.028 כן האנשים חיבים לאהב את נשיהם כגופם כי האהב את אשתו אהב את עצמו׃

5:29b.EPH.005.029 כי מעולם לא שנא איש את בשרו כי אם זן ומכלכל אתו כאשר גם האדון את עדתו׃

5:30b.EPH.005.030 כי אברי גופו אנחנו משברו ומעצמיו׃

5:31b.EPH.005.031 על כן יעזב איש את אביו ואת אמו ודבק באשתו והיו שניהם לבשר אחד׃

5:32b.EPH.005.032 גדול הסוד הזה ואני מפרש אתו על המשיח ועל עדתו׃

5:33b.EPH.005.033 ואולם גם אתם כל איש מכם יאהב את אשתו כנפשו והאשה היא תזהר ותירא את בעלה׃

6

6:1b.EPH.006.001 שמעו בנים אל הוריכם באדנינו כי ארח ישר הוא׃

6:2b.EPH.006.002 כבד את אביך ואת אמך זאת היא המצוה הראשונה אשר לה ההבטחה׃

6:3b.EPH.006.003 למען ייטב לך ולמען יאריכן ימיך על האדמה׃

6:4b.EPH.006.004 ואתם האבות אל תכעיסו את בניכם אך גדלום במוסר אדנינו ובתוכחתו׃

6:5b.EPH.006.005 שמעו עבדים אל אדניכם לפי הבשר ביראה ורתת ובתם לבבכם כמו למשיח׃

6:6b.EPH.006.006 לא בעבדת מראה העין כמבקשי חן בני אדם כי אם כעבדי המשיח עשים רצון האלהים בכל נפשם׃

6:7b.EPH.006.007 ועבדים בנפש חפצה את האדון ולא בני אדם׃

6:8b.EPH.006.008 וידעתם כי כל דבר טוב אשר עשה האדם ישלמנו לו אדנינו אם עבד הוא או בן חורין׃

6:9b.EPH.006.009 ואתם האדנים ככה תעשו גם להם חדלו מגער בם וידעתם כי גם עליכם יש אדון בשמים ואין לפניו משא פנים׃

6:10b.EPH.006.010 סוף דבר אחי חזקו באדנינו ובעז גבורתו׃

6:11b.EPH.006.011 לבשו כלי נשק אלהים למען תוכלו עמד נגד נכלי השטן׃

6:12b.EPH.006.012 כי לא עם בשר ודם מלחמתנו כי עם שרים ושליטים עם המשלים בחשכת העולם הזה עם הרוחות הרעות אשר במרומים׃

6:13b.EPH.006.013 על כן אחזו בכלי נשק אלהים למען תוכלו לקום ביום הרע ולמלא צבאכם ולעמוד׃

6:14b.EPH.006.014 עמדו נא חגורי מתנים באמת ומלבשים בשריון הצדק׃

6:15b.EPH.006.015 ורגליכם מנעלות להיותכם מוכנים לבשורת השלום׃

6:16b.EPH.006.016 ועל כל אלה תפשו את מגן האמונה אשר תוכלו לכבות בו את חצי הרשע הבערים׃

6:17b.EPH.006.017 וקחו את כובע הישועה וחרב הרוח שהיא דבר האלהים׃

6:18b.EPH.006.018 והתפללו תמיד בכל עת בתפלה ותחנונים ברוח ושקדו והתאמצו על זאת להעתיר תמיד בעד כל הקדשים׃

6:19b.EPH.006.019 וגם בעדי למען ינתן לי הדבר בפתחי פי להגיד בבטחון את סוד הבשורה אשר אנכי ציר לה במוסרות׃

6:20b.EPH.006.020 למען אדבר בה בבטחה כאשר מטל עלי לדבר׃

6:21b.EPH.006.021 ולמען אשר תדעו גם אתם את קרתי ואת מעשי הנה את הכל יודיע אתכם טוכיקוס האח החביב והמשרת הנאמן באדנינו׃

6:22b.EPH.006.022 אשר לזאת שלחתיהו אליכם למען תדעו את קרתינו ולמען ינחם את לבבכם׃

6:23b.EPH.006.023 השלום לאחים והאהבה עם האמונה מאת האלהים האב ומאת האדון ישוע המשיח׃

6:24b.EPH.006.024 החסד עם כל האהבים את אדנינו ישוע המשיח באהבה אשר לא תכלה אמן׃