Haggai (Hebrew)

1

1:1b.HAG.001.001 בשנת שתים לדריוש המלך בחדש הששי ביום אחד לחדש היה דבר יהוה ביד חגי הנביא אל זרבבל בן שאלתיאל פחת יהודה ואל יהושע בן יהוצדק הכהן הגדול לאמר׃

1:2b.HAG.001.002 כה אמר יהוה צבאות לאמר העם הזה אמרו לא עת בא עת בית יהוה להבנות׃

1:3b.HAG.001.003 ויהי דבר יהוה ביד חגי הנביא לאמר׃

1:4b.HAG.001.004 העת לכם אתם לשבת בבתיכם ספונים והבית הזה חרב׃

1:5b.HAG.001.005 ועתה כה אמר יהוה צבאות שימו לבבכם על דרכיכם׃

1:6b.HAG.001.006 זרעתם הרבה והבא מעט אכול ואין לשבעה שתו ואין לשכרה לבוש ואין לחם לו והמשתכר משתכר אל צרור נקוב׃

1:7b.HAG.001.007 כה אמר יהוה צבאות שימו לבבכם על דרכיכם׃

1:8b.HAG.001.008 עלו ההר והבאתם עץ ובנו הבית וארצה בו ואכבד אמר יהוה׃

1:9b.HAG.001.009 פנה אל הרבה והנה למעט והבאתם הבית ונפחתי בו יען מה נאם יהוה צבאות יען ביתי אשר הוא חרב ואתם רצים איש לביתו׃

1:10b.HAG.001.010 על כן עליכם כלאו שמים מטל והארץ כלאה יבולה׃

1:11b.HAG.001.011 ואקרא חרב על הארץ ועל ההרים ועל הדגן ועל התירוש ועל היצהר ועל אשר תוציא האדמה ועל האדם ועל הבהמה ועל כל יגיע כפים׃

1:12b.HAG.001.012 וישמע זרבבל בן שלתיאל ויהושע בן יהוצדק הכהן הגדול וכל שארית העם בקול יהוה אלהיהם ועל דברי חגי הנביא כאשר שלחו יהוה אלהיהם וייראו העם מפני יהוה׃

1:13b.HAG.001.013 ויאמר חגי מלאך יהוה במלאכות יהוה לעם לאמר אני אתכם נאם יהוה׃

1:14b.HAG.001.014 ויער יהוה את רוח זרבבל בן שלתיאל פחת יהודה ואת רוח יהושע בן יהוצדק הכהן הגדול ואת רוח כל שארית העם ויבאו ויעשו מלאכה בבית יהוה צבאות אלהיהם׃

1:15b.HAG.001.015 ביום עשרים וארבעה לחדש בששי בשנת שתים לדריוש המלך׃

2

2:1b.HAG.002.001 בשביעי בעשרים ואחד לחדש היה דבר יהוה ביד חגי הנביא לאמר׃

2:2b.HAG.002.002 אמר נא אל זרבבל בן שלתיאל פחת יהודה ואל יהושע בן יהוצדק הכהן הגדול ואל שארית העם לאמר׃

2:3b.HAG.002.003 מי בכם הנשאר אשר ראה את הבית הזה בכבודו הראשון ומה אתם ראים אתו עתה הלוא כמהו כאין בעיניכם׃

2:4b.HAG.002.004 ועתה חזק זרבבל נאם יהוה וחזק יהושע בן יהוצדק הכהן הגדול וחזק כל עם הארץ נאם יהוה ועשו כי אני אתכם נאם יהוה צבאות׃

2:5b.HAG.002.005 את הדבר אשר כרתי אתכם בצאתכם ממצרים ורוחי עמדת בתוככם אל תיראו׃

2:6b.HAG.002.006 כי כה אמר יהוה צבאות עוד אחת מעט היא ואני מרעיש את השמים ואת הארץ ואת הים ואת החרבה׃

2:7b.HAG.002.007 והרעשתי את כל הגוים ובאו חמדת כל הגוים ומלאתי את הבית הזה כבוד אמר יהוה צבאות׃

2:8b.HAG.002.008 לי הכסף ולי הזהב נאם יהוה צבאות׃

2:9b.HAG.002.009 גדול יהיה כבוד הבית הזה האחרון מן הראשון אמר יהוה צבאות ובמקום הזה אתן שלום נאם יהוה צבאות׃

2:10b.HAG.002.010 בעשרים וארבעה לתשיעי בשנת שתים לדריוש היה דבר יהוה אל חגי הנביא לאמר׃

2:11b.HAG.002.011 כה אמר יהוה צבאות שאל נא את הכהנים תורה לאמר׃

2:12b.HAG.002.012 הן ישא איש בשר קדש בכנף בגדו ונגע בכנפו אל הלחם ואל הנזיד ואל היין ואל שמן ואל כל מאכל היקדש ויענו הכהנים ויאמרו לא׃

2:13b.HAG.002.013 ויאמר חגי אם יגע טמא נפש בכל אלה היטמא ויענו הכהנים ויאמרו יטמא׃

2:14b.HAG.002.014 ויען חגי ויאמר כן העם הזה וכן הגוי הזה לפני נאם יהוה וכן כל מעשה ידיהם ואשר יקריבו שם טמא הוא׃

2:15b.HAG.002.015 ועתה שימו נא לבבכם מן היום הזה ומעלה מטרם שום אבן אל אבן בהיכל יהוה׃

2:16b.HAG.002.016 מהיותם בא אל ערמת עשרים והיתה עשרה בא אל היקב לחשף חמשים פורה והיתה עשרים׃

2:17b.HAG.002.017 הכיתי אתכם בשדפון ובירקון ובברד את כל מעשה ידיכם ואין אתכם אלי נאם יהוה׃

2:18b.HAG.002.018 שימו נא לבבכם מן היום הזה ומעלה מיום עשרים וארבעה לתשיעי למן היום אשר יסד היכל יהוה שימו לבבכם׃

2:19b.HAG.002.019 העוד הזרע במגורה ועד הגפן והתאנה והרמון ועץ הזית לא נשא מן היום הזה אברך׃

2:20b.HAG.002.020 ויהי דבר יהוה שנית אל חגי בעשרים וארבעה לחדש לאמר׃

2:21b.HAG.002.021 אמר אל זרבבל פחת יהודה לאמר אני מרעיש את השמים ואת הארץ׃

2:22b.HAG.002.022 והפכתי כסא ממלכות והשמדתי חזק ממלכות הגוים והפכתי מרכבה ורכביה וירדו סוסים ורכביהם איש בחרב אחיו׃

2:23b.HAG.002.023 ביום ההוא נאם יהוה צבאות אקחך זרבבל בן שאלתיאל עבדי נאם יהוה ושמתיך כחותם כי בך בחרתי נאם יהוה צבאות׃