Zephaniah (Hebrew)

1

1:1b.ZEP.001.001 דבר יהוה אשר היה אל צפניה בן כושי בן גדליה בן אמריה בן חזקיה בימי יאשיהו בן אמון מלך יהודה׃

1:2b.ZEP.001.002 אסף אסף כל מעל פני האדמה נאם יהוה׃

1:3b.ZEP.001.003 אסף אדם ובהמה אסף עוף השמים ודגי הים והמכשלות את הרשעים והכרתי את האדם מעל פני האדמה נאם יהוה׃

1:4b.ZEP.001.004 ונטיתי ידי על יהודה ועל כל יושבי ירושלם והכרתי מן המקום הזה את שאר הבעל את שם הכמרים עם הכהנים׃

1:5b.ZEP.001.005 ואת המשתחוים על הגגות לצבא השמים ואת המשתחוים הנשבעים ליהוה והנשבעים במלכם׃

1:6b.ZEP.001.006 ואת הנסוגים מאחרי יהוה ואשר לא בקשו את יהוה ולא דרשהו׃

1:7b.ZEP.001.007 הס מפני אדני יהוה כי קרוב יום יהוה כי הכין יהוה זבח הקדיש קראיו׃

1:8b.ZEP.001.008 והיה ביום זבח יהוה ופקדתי על השרים ועל בני המלך ועל כל הלבשים מלבוש נכרי׃

1:9b.ZEP.001.009 ופקדתי על כל הדולג על המפתן ביום ההוא הממלאים בית אדניהם חמס ומרמה׃

1:10b.ZEP.001.010 והיה ביום ההוא נאם יהוה קול צעקה משער הדגים ויללה מן המשנה ושבר גדול מהגבעות׃

1:11b.ZEP.001.011 הילילו ישבי המכתש כי נדמה כל עם כנען נכרתו כל נטילי כסף׃

1:12b.ZEP.001.012 והיה בעת ההיא אחפש את ירושלם בנרות ופקדתי על האנשים הקפאים על שמריהם האמרים בלבבם לא ייטיב יהוה ולא ירע׃

1:13b.ZEP.001.013 והיה חילם למשסה ובתיהם לשממה ובנו בתים ולא ישבו ונטעו כרמים ולא ישתו את יינם׃

1:14b.ZEP.001.014 קרוב יום יהוה הגדול קרוב ומהר מאד קול יום יהוה מר צרח שם גבור׃

1:15b.ZEP.001.015 יום עברה היום ההוא יום צרה ומצוקה יום שאה ומשואה יום חשך ואפלה יום ענן וערפל׃

1:16b.ZEP.001.016 יום שופר ותרועה על הערים הבצרות ועל הפנות הגבהות׃

1:17b.ZEP.001.017 והצרתי לאדם והלכו כעורים כי ליהוה חטאו ושפך דמם כעפר ולחמם כגללים׃

1:18b.ZEP.001.018 גם כספם גם זהבם לא יוכל להצילם ביום עברת יהוה ובאש קנאתו תאכל כל הארץ כי כלה אך נבהלה יעשה את כל ישבי הארץ׃

2

2:1b.ZEP.002.001 התקוששו וקושו הגוי לא נכסף׃

2:2b.ZEP.002.002 בטרם לדת חק כמץ עבר יום בטרם לא יבוא עליכם חרון אף יהוה בטרם לא יבוא עליכם יום אף יהוה׃

2:3b.ZEP.002.003 בקשו את יהוה כל ענוי הארץ אשר משפטו פעלו בקשו צדק בקשו ענוה אולי תסתרו ביום אף יהוה׃

2:4b.ZEP.002.004 כי עזה עזובה תהיה ואשקלון לשממה אשדוד בצהרים יגרשוה ועקרון תעקר׃

2:5b.ZEP.002.005 הוי ישבי חבל הים גוי כרתים דבר יהוה עליכם כנען ארץ פלשתים והאבדתיך מאין יושב׃

2:6b.ZEP.002.006 והיתה חבל הים נות כרת רעים וגדרות צאן׃

2:7b.ZEP.002.007 והיה חבל לשארית בית יהודה עליהם ירעון בבתי אשקלון בערב ירבצון כי יפקדם יהוה אלהיהם ושב שבותם׃

2:8b.ZEP.002.008 שמעתי חרפת מואב וגדופי בני עמון אשר חרפו את עמי ויגדילו על גבולם׃

2:9b.ZEP.002.009 לכן חי אני נאם יהוה צבאות אלהי ישראל כי מואב כסדם תהיה ובני עמון כעמרה ממשק חרול ומכרה מלח ושממה עד עולם שארית עמי יבזום ויתר גוי ינחלום׃

2:10b.ZEP.002.010 זאת להם תחת גאונם כי חרפו ויגדלו על עם יהוה צבאות׃

2:11b.ZEP.002.011 נורא יהוה עליהם כי רזה את כל אלהי הארץ וישתחוו לו איש ממקומו כל איי הגוים׃

2:12b.ZEP.002.012 גם אתם כושים חללי חרבי המה׃

2:13b.ZEP.002.013 ויט ידו על צפון ויאבד את אשור וישם את נינוה לשממה ציה כמדבר׃

2:14b.ZEP.002.014 ורבצו בתוכה עדרים כל חיתו גוי גם קאת גם קפד בכפתריה ילינו קול ישורר בחלון חרב בסף כי ארזה ערה׃

2:15b.ZEP.002.015 זאת העיר העליזה היושבת לבטח האמרה בלבבה אני ואפסי עוד איך היתה לשמה מרבץ לחיה כל עובר עליה ישרק יניע ידו׃

3

3:1b.ZEP.003.001 הוי מראה ונגאלה העיר היונה׃

3:2b.ZEP.003.002 לא שמעה בקול לא לקחה מוסר ביהוה לא בטחה אל אלהיה לא קרבה׃

3:3b.ZEP.003.003 שריה בקרבה אריות שאגים שפטיה זאבי ערב לא גרמו לבקר׃

3:4b.ZEP.003.004 נביאיה פחזים אנשי בגדות כהניה חללו קדש חמסו תורה׃

3:5b.ZEP.003.005 יהוה צדיק בקרבה לא יעשה עולה בבקר בבקר משפטו יתן לאור לא נעדר ולא יודע עול בשת׃

3:6b.ZEP.003.006 הכרתי גוים נשמו פנותם החרבתי חוצותם מבלי עובר נצדו עריהם מבלי איש מאין יושב׃

3:7b.ZEP.003.007 אמרתי אך תיראי אותי תקחי מוסר ולא יכרת מעונה כל אשר פקדתי עליה אכן השכימו השחיתו כל עלילותם׃

3:8b.ZEP.003.008 לכן חכו לי נאם יהוה ליום קומי לעד כי משפטי לאסף גוים לקבצי ממלכות לשפך עליהם זעמי כל חרון אפי כי באש קנאתי תאכל כל הארץ׃

3:9b.ZEP.003.009 כי אז אהפך אל עמים שפה ברורה לקרא כלם בשם יהוה לעבדו שכם אחד׃

3:10b.ZEP.003.010 מעבר לנהרי כוש עתרי בת פוצי יובלון מנחתי׃

3:11b.ZEP.003.011 ביום ההוא לא תבושי מכל עלילתיך אשר פשעת בי כי אז אסיר מקרבך עליזי גאותך ולא תוספי לגבהה עוד בהר קדשי׃

3:12b.ZEP.003.012 והשארתי בקרבך עם עני ודל וחסו בשם יהוה׃

3:13b.ZEP.003.013 שארית ישראל לא יעשו עולה ולא ידברו כזב ולא ימצא בפיהם לשון תרמית כי המה ירעו ורבצו ואין מחריד׃

3:14b.ZEP.003.014 רני בת ציון הריעו ישראל שמחי ועלזי בכל לב בת ירושלם׃

3:15b.ZEP.003.015 הסיר יהוה משפטיך פנה איבך מלך ישראל יהוה בקרבך לא תיראי רע עוד׃

3:16b.ZEP.003.016 ביום ההוא יאמר לירושלם אל תיראי ציון אל ירפו ידיך׃

3:17b.ZEP.003.017 יהוה אלהיך בקרבך גבור יושיע ישיש עליך בשמחה יחריש באהבתו יגיל עליך ברנה׃

3:18b.ZEP.003.018 נוגי ממועד אספתי ממך היו משאת עליה חרפה׃

3:19b.ZEP.003.019 הנני עשה את כל מעניך בעת ההיא והושעתי את הצלעה והנדחה אקבץ ושמתים לתהלה ולשם בכל הארץ בשתם׃

3:20b.ZEP.003.020 בעת ההיא אביא אתכם ובעת קבצי אתכם כי אתן אתכם לשם ולתהלה בכל עמי הארץ בשובי את שבותיכם לעיניכם אמר יהוה׃