Habakkuk (Hebrew)

1

1:1b.HAB.001.001 המשא אשר חזה חבקוק הנביא׃

1:2b.HAB.001.002 עד אנה יהוה שועתי ולא תשמע אזעק אליך חמס ולא תושיע׃

1:3b.HAB.001.003 למה תראני און ועמל תביט ושד וחמס לנגדי ויהי ריב ומדון ישא׃

1:4b.HAB.001.004 על כן תפוג תורה ולא יצא לנצח משפט כי רשע מכתיר את הצדיק על כן יצא משפט מעקל׃

1:5b.HAB.001.005 ראו בגוים והביטו והתמהו תמהו כי פעל פעל בימיכם לא תאמינו כי יספר׃

1:6b.HAB.001.006 כי הנני מקים את הכשדים הגוי המר והנמהר ההולך למרחבי ארץ לרשת משכנות לא לו׃

1:7b.HAB.001.007 אים ונורא הוא ממנו משפטו ושאתו יצא׃

1:8b.HAB.001.008 וקלו מנמרים סוסיו וחדו מזאבי ערב ופשו פרשיו ופרשיו מרחוק יבאו יעפו כנשר חש לאכול׃

1:9b.HAB.001.009 כלה לחמס יבוא מגמת פניהם קדימה ויאסף כחול שבי׃

1:10b.HAB.001.010 והוא במלכים יתקלס ורזנים משחק לו הוא לכל מבצר ישחק ויצבר עפר וילכדה׃

1:11b.HAB.001.011 אז חלף רוח ויעבר ואשם זו כחו לאלהו׃

1:12b.HAB.001.012 הלוא אתה מקדם יהוה אלהי קדשי לא נמות יהוה למשפט שמתו וצור להוכיח יסדתו׃

1:13b.HAB.001.013 טהור עינים מראות רע והביט אל עמל לא תוכל למה תביט בוגדים תחריש בבלע רשע צדיק ממנו׃

1:14b.HAB.001.014 ותעשה אדם כדגי הים כרמש לא משל בו׃

1:15b.HAB.001.015 כלה בחכה העלה יגרהו בחרמו ויאספהו במכמרתו על כן ישמח ויגיל׃

1:16b.HAB.001.016 על כן יזבח לחרמו ויקטר למכמרתו כי בהמה שמן חלקו ומאכלו בראה׃

1:17b.HAB.001.017 העל כן יריק חרמו ותמיד להרג גוים לא יחמול׃

2

2:1b.HAB.002.001 על משמרתי אעמדה ואתיצבה על מצור ואצפה לראות מה ידבר בי ומה אשיב על תוכחתי׃

2:2b.HAB.002.002 ויענני יהוה ויאמר כתוב חזון ובאר על הלחות למען ירוץ קורא בו׃

2:3b.HAB.002.003 כי עוד חזון למועד ויפח לקץ ולא יכזב אם יתמהמה חכה לו כי בא יבא לא יאחר׃

2:4b.HAB.002.004 הנה עפלה לא ישרה נפשו בו וצדיק באמונתו יחיה׃

2:5b.HAB.002.005 ואף כי היין בוגד גבר יהיר ולא ינוה אשר הרחיב כשאול נפשו והוא כמות ולא ישבע ויאסף אליו כל הגוים ויקבץ אליו כל העמים׃

2:6b.HAB.002.006 הלוא אלה כלם עליו משל ישאו ומליצה חידות לו ויאמר הוי המרבה לא לו עד מתי ומכביד עליו עבטיט׃

2:7b.HAB.002.007 הלוא פתע יקומו נשכיך ויקצו מזעזעיך והיית למשסות למו׃

2:8b.HAB.002.008 כי אתה שלות גוים רבים ישלוך כל יתר עמים מדמי אדם וחמס ארץ קריה וכל ישבי בה׃

2:9b.HAB.002.009 הוי בצע בצע רע לביתו לשום במרום קנו להנצל מכף רע׃

2:10b.HAB.002.010 יעצת בשת לביתך קצות עמים רבים וחוטא נפשך׃

2:11b.HAB.002.011 כי אבן מקיר תזעק וכפיס מעץ יעננה׃

2:12b.HAB.002.012 הוי בנה עיר בדמים וכונן קריה בעולה׃

2:13b.HAB.002.013 הלוא הנה מאת יהוה צבאות וייגעו עמים בדי אש ולאמים בדי ריק יעפו׃

2:14b.HAB.002.014 כי תמלא הארץ לדעת את כבוד יהוה כמים יכסו על ים׃

2:15b.HAB.002.015 הוי משקה רעהו מספח חמתך ואף שכר למען הביט על מעוריהם׃

2:16b.HAB.002.016 שבעת קלון מכבוד שתה גם אתה והערל תסוב עליך כוס ימין יהוה וקיקלון על כבודך׃

2:17b.HAB.002.017 כי חמס לבנון יכסך ושד בהמות יחיתן מדמי אדם וחמס ארץ קריה וכל ישבי בה׃

2:18b.HAB.002.018 מה הועיל פסל כי פסלו יצרו מסכה ומורה שקר כי בטח יצר יצרו עליו לעשות אלילים אלמים׃

2:19b.HAB.002.019 הוי אמר לעץ הקיצה עורי לאבן דומם הוא יורה הנה הוא תפוש זהב וכסף וכל רוח אין בקרבו׃

2:20b.HAB.002.020 ויהוה בהיכל קדשו הס מפניו כל הארץ׃

3

3:1b.HAB.003.001 תפלה לחבקוק הנביא על שגינות׃

3:2b.HAB.003.002 יהוה שמעתי שמעך יראתי יהוה פעלך בקרב שנים חייהו בקרב שנים תודיע ברגז רחם תזכור׃

3:3b.HAB.003.003 אלוה מתימן יבוא וקדוש מהר פארן סלה כסה שמים הודו ותהלתו מלאה הארץ׃

3:4b.HAB.003.004 ונגה כאור תהיה קרנים מידו לו ושם חביון עזה׃

3:5b.HAB.003.005 לפניו ילך דבר ויצא רשף לרגליו׃

3:6b.HAB.003.006 עמד וימדד ארץ ראה ויתר גוים ויתפצצו הררי עד שחו גבעות עולם הליכות עולם לו׃

3:7b.HAB.003.007 תחת און ראיתי אהלי כושן ירגזון יריעות ארץ מדין׃

3:8b.HAB.003.008 הבנהרים חרה יהוה אם בנהרים אפך אם בים עברתך כי תרכב על סוסיך מרכבתיך ישועה׃

3:9b.HAB.003.009 עריה תעור קשתך שבעות מטות אמר סלה נהרות תבקע ארץ׃

3:10b.HAB.003.010 ראוך יחילו הרים זרם מים עבר נתן תהום קולו רום ידיהו נשא׃

3:11b.HAB.003.011 שמש ירח עמד זבלה לאור חציך יהלכו לנגה ברק חניתך׃

3:12b.HAB.003.012 בזעם תצעד ארץ באף תדוש גוים׃

3:13b.HAB.003.013 יצאת לישע עמך לישע את משיחך מחצת ראש מבית רשע ערות יסוד עד צואר סלה׃

3:14b.HAB.003.014 נקבת במטיו ראש פרזו יסערו להפיצני עליצתם כמו לאכל עני במסתר׃

3:15b.HAB.003.015 דרכת בים סוסיך חמר מים רבים׃

3:16b.HAB.003.016 שמעתי ותרגז בטני לקול צללו שפתי יבוא רקב בעצמי ותחתי ארגז אשר אנוח ליום צרה לעלות לעם יגודנו׃

3:17b.HAB.003.017 כי תאנה לא תפרח ואין יבול בגפנים כחש מעשה זית ושדמות לא עשה אכל גזר ממכלה צאן ואין בקר ברפתים׃

3:18b.HAB.003.018 ואני ביהוה אעלוזה אגילה באלהי ישעי׃

3:19b.HAB.003.019 יהוה אדני חילי וישם רגלי כאילות ועל במותי ידרכני למנצח בנגינותי׃