Nahum (Hebrew)

1

1:1b.NAH.001.001 משא נינוה ספר חזון נחום האלקשי׃

1:2b.NAH.001.002 אל קנוא ונקם יהוה נקם יהוה ובעל חמה נקם יהוה לצריו ונוטר הוא לאיביו׃

1:3b.NAH.001.003 יהוה ארך אפים וגדול כח ונקה לא ינקה יהוה בסופה ובשערה דרכו וענן אבק רגליו׃

1:4b.NAH.001.004 גוער בים ויבשהו וכל הנהרות החריב אמלל בשן וכרמל ופרח לבנון אמלל׃

1:5b.NAH.001.005 הרים רעשו ממנו והגבעות התמגגו ותשא הארץ מפניו ותבל וכל ישבי בה׃

1:6b.NAH.001.006 לפני זעמו מי יעמוד ומי יקום בחרון אפו חמתו נתכה כאש והצרים נתצו ממנו׃

1:7b.NAH.001.007 טוב יהוה למעוז ביום צרה וידע חסי בו׃

1:8b.NAH.001.008 ובשטף עבר כלה יעשה מקומה ואיביו ירדף חשך׃

1:9b.NAH.001.009 מה תחשבון אל יהוה כלה הוא עשה לא תקום פעמים צרה׃

1:10b.NAH.001.010 כי עד סירים סבכים וכסבאם סבואים אכלו כקש יבש מלא׃

1:11b.NAH.001.011 ממך יצא חשב על יהוה רעה יעץ בליעל׃

1:12b.NAH.001.012 כה אמר יהוה אם שלמים וכן רבים וכן נגזו ועבר וענתך לא אענך עוד׃

1:13b.NAH.001.013 ועתה אשבר מטהו מעליך ומוסרתיך אנתק׃

1:14b.NAH.001.014 וצוה עליך יהוה לא יזרע משמך עוד מבית אלהיך אכרית פסל ומסכה אשים קברך כי קלות׃

1:15b.NAH.001.015 הנה על ההרים רגלי מבשר משמיע שלום חגי יהודה חגיך שלמי נדריך כי לא יוסיף עוד לעבור בך בליעל כלה נכרת׃

2

2:1b.NAH.002.001 עלה מפיץ על פניך נצור מצרה צפה דרך חזק מתנים אמץ כח מאד׃

2:2b.NAH.002.002 כי שב יהוה את גאון יעקב כגאון ישראל כי בקקום בקקים וזמריהם שחתו׃

2:3b.NAH.002.003 מגן גבריהו מאדם אנשי חיל מתלעים באש פלדות הרכב ביום הכינו והברשים הרעלו׃

2:4b.NAH.002.004 בחוצות יתהוללו הרכב ישתקשקון ברחבות מראיהן כלפידם כברקים ירוצצו׃

2:5b.NAH.002.005 יזכר אדיריו יכשלו בהלכותם ימהרו חומתה והכן הסכך׃

2:6b.NAH.002.006 שערי הנהרות נפתחו וההיכל נמוג׃

2:7b.NAH.002.007 והצב גלתה העלתה ואמהתיה מנהגות כקול יונים מתפפת על לבבהן׃

2:8b.NAH.002.008 ונינוה כברכת מים מימי היא והמה נסים עמדו עמדו ואין מפנה׃

2:9b.NAH.002.009 בזו כסף בזו זהב ואין קצה לתכונה כבד מכל כלי חמדה׃

2:10b.NAH.002.010 בוקה ומבוקה ומבלקה ולב נמס ופק ברכים וחלחלה בכל מתנים ופני כלם קבצו פארור׃

2:11b.NAH.002.011 איה מעון אריות ומרעה הוא לכפרים אשר הלך אריה לביא שם גור אריה ואין מחריד׃

2:12b.NAH.002.012 אריה טרף בדי גרותיו ומחנק ללבאתיו וימלא טרף חריו ומענתיו טרפה׃

2:13b.NAH.002.013 הנני אליך נאם יהוה צבאות והבערתי בעשן רכבה וכפיריך תאכל חרב והכרתי מארץ טרפך ולא ישמע עוד קול מלאככה׃

3

3:1b.NAH.003.001 הוי עיר דמים כלה כחש פרק מלאה לא ימיש טרף׃

3:2b.NAH.003.002 קול שוט וקול רעש אופן וסוס דהר ומרכבה מרקדה׃

3:3b.NAH.003.003 פרש מעלה ולהב חרב וברק חנית ורב חלל וכבד פגר ואין קצה לגויה יכשלו בגויתם׃

3:4b.NAH.003.004 מרב זנוני זונה טובת חן בעלת כשפים המכרת גוים בזנוניה ומשפחות בכשפיה׃

3:5b.NAH.003.005 הנני אליך נאם יהוה צבאות וגליתי שוליך על פניך והראיתי גוים מערך וממלכות קלונך׃

3:6b.NAH.003.006 והשלכתי עליך שקצים ונבלתיך ושמתיך כראי׃

3:7b.NAH.003.007 והיה כל ראיך ידוד ממך ואמר שדדה נינוה מי ינוד לה מאין אבקש מנחמים לך׃

3:8b.NAH.003.008 התיטבי מנא אמון הישבה ביארים מים סביב לה אשר חיל ים מים חומתה׃

3:9b.NAH.003.009 כוש עצמה ומצרים ואין קצה פוט ולובים היו בעזרתך׃

3:10b.NAH.003.010 גם היא לגלה הלכה בשבי גם עלליה ירטשו בראש כל חוצות ועל נכבדיה ידו גורל וכל גדוליה רתקו בזקים׃

3:11b.NAH.003.011 גם את תשכרי תהי נעלמה גם את תבקשי מעוז מאויב׃

3:12b.NAH.003.012 כל מבצריך תאנים עם בכורים אם ינועו ונפלו על פי אוכל׃

3:13b.NAH.003.013 הנה עמך נשים בקרבך לאיביך פתוח נפתחו שערי ארצך אכלה אש בריחיך׃

3:14b.NAH.003.014 מי מצור שאבי לך חזקי מבצריך באי בטיט ורמסי בחמר החזיקי מלבן׃

3:15b.NAH.003.015 שם תאכלך אש תכריתך חרב תאכלך כילק התכבד כילק התכבדי כארבה׃

3:16b.NAH.003.016 הרבית רכליך מכוכבי השמים ילק פשט ויעף׃

3:17b.NAH.003.017 מנזריך כארבה וטפסריך כגוב גבי החונים בגדרות ביום קרה שמש זרחה ונודד ולא נודע מקומו אים׃

3:18b.NAH.003.018 נמו רעיך מלך אשור ישכנו אדיריך נפשו עמך על ההרים ואין מקבץ׃

3:19b.NAH.003.019 אין כהה לשברך נחלה מכתך כל שמעי שמעך תקעו כף עליך כי על מי לא עברה רעתך תמיד׃