Micah (Hebrew)

1

1:1b.MIC.001.001 דבר יהוה אשר היה אל מיכה המרשתי בימי יותם אחז יחזקיה מלכי יהודה אשר חזה על שמרון וירושלם׃

1:2b.MIC.001.002 שמעו עמים כלם הקשיבי ארץ ומלאה ויהי אדני יהוה בכם לעד אדני מהיכל קדשו׃

1:3b.MIC.001.003 כי הנה יהוה יצא ממקומו וירד ודרך על במותי ארץ׃

1:4b.MIC.001.004 ונמסו ההרים תחתיו והעמקים יתבקעו כדונג מפני האש כמים מגרים במורד׃

1:5b.MIC.001.005 בפשע יעקב כל זאת ובחטאות בית ישראל מי פשע יעקב הלוא שמרון ומי במות יהודה הלוא ירושלם׃

1:6b.MIC.001.006 ושמתי שמרון לעי השדה למטעי כרם והגרתי לגי אבניה ויסדיה אגלה׃

1:7b.MIC.001.007 וכל פסיליה יכתו וכל אתנניה ישרפו באש וכל עצביה אשים שממה כי מאתנן זונה קבצה ועד אתנן זונה ישובו׃

1:8b.MIC.001.008 על זאת אספדה ואילילה אילכה שילל וערום אעשה מספד כתנים ואבל כבנות יענה׃

1:9b.MIC.001.009 כי אנושה מכותיה כי באה עד יהודה נגע עד שער עמי עד ירושלם׃

1:10b.MIC.001.010 בגת אל תגידו בכו אל תבכו בבית לעפרה עפר התפלשתי׃

1:11b.MIC.001.011 עברי לכם יושבת שפיר עריה בשת לא יצאה יושבת צאנן מספד בית האצל יקח מכם עמדתו׃

1:12b.MIC.001.012 כי חלה לטוב יושבת מרות כי ירד רע מאת יהוה לשער ירושלם׃

1:13b.MIC.001.013 רתם המרכבה לרכש יושבת לכיש ראשית חטאת היא לבת ציון כי בך נמצאו פשעי ישראל׃

1:14b.MIC.001.014 לכן תתני שלוחים על מורשת גת בתי אכזיב לאכזב למלכי ישראל׃

1:15b.MIC.001.015 עד הירש אבי לך יושבת מרשה עד עדלם יבוא כבוד ישראל׃

1:16b.MIC.001.016 קרחי וגזי על בני תענוגיך הרחבי קרחתך כנשר כי גלו ממך׃

2

2:1b.MIC.002.001 הוי חשבי און ופעלי רע על משכבותם באור הבקר יעשוה כי יש לאל ידם׃

2:2b.MIC.002.002 וחמדו שדות וגזלו ובתים ונשאו ועשקו גבר וביתו ואיש ונחלתו׃

2:3b.MIC.002.003 לכן כה אמר יהוה הנני חשב על המשפחה הזאת רעה אשר לא תמישו משם צוארתיכם ולא תלכו רומה כי עת רעה היא׃

2:4b.MIC.002.004 ביום ההוא ישא עליכם משל ונהה נהי נהיה אמר שדוד נשדנו חלק עמי ימיר איך ימיש לי לשובב שדינו יחלק׃

2:5b.MIC.002.005 לכן לא יהיה לך משליך חבל בגורל בקהל יהוה׃

2:6b.MIC.002.006 אל תטפו יטיפון לא יטפו לאלה לא יסג כלמות׃

2:7b.MIC.002.007 האמור בית יעקב הקצר רוח יהוה אם אלה מעלליו הלוא דברי ייטיבו עם הישר הולך׃

2:8b.MIC.002.008 ואתמול עמי לאויב יקומם ממול שלמה אדר תפשטון מעברים בטח שובי מלחמה׃

2:9b.MIC.002.009 נשי עמי תגרשון מבית תענגיה מעל עלליה תקחו הדרי לעולם׃

2:10b.MIC.002.010 קומו ולכו כי לא זאת המנוחה בעבור טמאה תחבל וחבל נמרץ׃

2:11b.MIC.002.011 לו איש הלך רוח ושקר כזב אטף לך ליין ולשכר והיה מטיף העם הזה׃

2:12b.MIC.002.012 אסף אאסף יעקב כלך קבץ אקבץ שארית ישראל יחד אשימנו כצאן בצרה כעדר בתוך הדברו תהימנה מאדם׃

2:13b.MIC.002.013 עלה הפרץ לפניהם פרצו ויעברו שער ויצאו בו ויעבר מלכם לפניהם ויהוה בראשם׃

3

3:1b.MIC.003.001 ואמר שמעו נא ראשי יעקב וקציני בית ישראל הלוא לכם לדעת את המשפט׃

3:2b.MIC.003.002 שנאי טוב ואהבי רעה גזלי עורם מעליהם ושארם מעל עצמותם׃

3:3b.MIC.003.003 ואשר אכלו שאר עמי ועורם מעליהם הפשיטו ואת עצמתיהם פצחו ופרשו כאשר בסיר וכבשר בתוך קלחת׃

3:4b.MIC.003.004 אז יזעקו אל יהוה ולא יענה אותם ויסתר פניו מהם בעת ההיא כאשר הרעו מעלליהם׃

3:5b.MIC.003.005 כה אמר יהוה על הנביאים המתעים את עמי הנשכים בשניהם וקראו שלום ואשר לא יתן על פיהם וקדשו עליו מלחמה׃

3:6b.MIC.003.006 לכן לילה לכם מחזון וחשכה לכם מקסם ובאה השמש על הנביאים וקדר עליהם היום׃

3:7b.MIC.003.007 ובשו החזים וחפרו הקסמים ועטו על שפם כלם כי אין מענה אלהים׃

3:8b.MIC.003.008 ואולם אנכי מלאתי כח את רוח יהוה ומשפט וגבורה להגיד ליעקב פשעו ולישראל חטאתו׃

3:9b.MIC.003.009 שמעו נא זאת ראשי בית יעקב וקציני בית ישראל המתעבים משפט ואת כל הישרה יעקשו׃

3:10b.MIC.003.010 בנה ציון בדמים וירושלם בעולה׃

3:11b.MIC.003.011 ראשיה בשחד ישפטו וכהניה במחיר יורו ונביאיה בכסף יקסמו ועל יהוה ישענו לאמר הלוא יהוה בקרבנו לא תבוא עלינו רעה׃

3:12b.MIC.003.012 לכן בגללכם ציון שדה תחרש וירושלם עיין תהיה והר הבית לבמות יער׃

4

4:1b.MIC.004.001 והיה באחרית הימים יהיה הר בית יהוה נכון בראש ההרים ונשא הוא מגבעות ונהרו עליו עמים׃

4:2b.MIC.004.002 והלכו גוים רבים ואמרו לכו ונעלה אל הר יהוה ואל בית אלהי יעקב ויורנו מדרכיו ונלכה בארחתיו כי מציון תצא תורה ודבר יהוה מירושלם׃

4:3b.MIC.004.003 ושפט בין עמים רבים והוכיח לגוים עצמים עד רחוק וכתתו חרבתיהם לאתים וחניתתיהם למזמרות לא ישאו גוי אל גוי חרב ולא ילמדון עוד מלחמה׃

4:4b.MIC.004.004 וישבו איש תחת גפנו ותחת תאנתו ואין מחריד כי פי יהוה צבאות דבר׃

4:5b.MIC.004.005 כי כל העמים ילכו איש בשם אלהיו ואנחנו נלך בשם יהוה אלהינו לעולם ועד׃

4:6b.MIC.004.006 ביום ההוא נאם יהוה אספה הצלעה והנדחה אקבצה ואשר הרעתי׃

4:7b.MIC.004.007 ושמתי את הצלעה לשארית והנהלאה לגוי עצום ומלך יהוה עליהם בהר ציון מעתה ועד עולם׃

4:8b.MIC.004.008 ואתה מגדל עדר עפל בת ציון עדיך תאתה ובאה הממשלה הראשנה ממלכת לבת ירושלם׃

4:9b.MIC.004.009 עתה למה תריעי רע המלך אין בך אם יועצך אבד כי החזיקך חיל כיולדה׃

4:10b.MIC.004.010 חולי וגחי בת ציון כיולדה כי עתה תצאי מקריה ושכנת בשדה ובאת עד בבל שם תנצלי שם יגאלך יהוה מכף איביך׃

4:11b.MIC.004.011 ועתה נאספו עליך גוים רבים האמרים תחנף ותחז בציון עינינו׃

4:12b.MIC.004.012 והמה לא ידעו מחשבות יהוה ולא הבינו עצתו כי קבצם כעמיר גרנה׃

4:13b.MIC.004.013 קומי ודושי בת ציון כי קרנך אשים ברזל ופרסתיך אשים נחושה והדקות עמים רבים והחרמתי ליהוה בצעם וחילם לאדון כל הארץ׃

5

5:1b.MIC.005.001 עתה תתגדדי בת גדוד מצור שם עלינו בשבט יכו על הלחי את שפט ישראל׃

5:2b.MIC.005.002 ואתה בית לחם אפרתה צעיר להיות באלפי יהודה ממך לי יצא להיות מושל בישראל ומוצאתיו מקדם מימי עולם׃

5:3b.MIC.005.003 לכן יתנם עד עת יולדה ילדה ויתר אחיו ישובון על בני ישראל׃

5:4b.MIC.005.004 ועמד ורעה בעז יהוה בגאון שם יהוה אלהיו וישבו כי עתה יגדל עד אפסי ארץ׃

5:5b.MIC.005.005 והיה זה שלום אשור כי יבוא בארצנו וכי ידרך בארמנתינו והקמנו עליו שבעה רעים ושמנה נסיכי אדם׃

5:6b.MIC.005.006 ורעו את ארץ אשור בחרב ואת ארץ נמרד בפתחיה והציל מאשור כי יבוא בארצנו וכי ידרך בגבולנו׃

5:7b.MIC.005.007 והיה שארית יעקב בקרב עמים רבים כטל מאת יהוה כרביבים עלי עשב אשר לא יקוה לאיש ולא ייחל לבני אדם׃

5:8b.MIC.005.008 והיה שארית יעקב בגוים בקרב עמים רבים כאריה בבהמות יער ככפיר בעדרי צאן אשר אם עבר ורמס וטרף ואין מציל׃

5:9b.MIC.005.009 תרם ידך על צריך וכל איביך יכרתו׃

5:10b.MIC.005.010 והיה ביום ההוא נאם יהוה והכרתי סוסיך מקרבך והאבדתי מרכבתיך׃

5:11b.MIC.005.011 והכרתי ערי ארצך והרסתי כל מבצריך׃

5:12b.MIC.005.012 והכרתי כשפים מידך ומעוננים לא יהיו לך׃

5:13b.MIC.005.013 והכרתי פסיליך ומצבותיך מקרבך ולא תשתחוה עוד למעשה ידיך׃

5:14b.MIC.005.014 ונתשתי אשיריך מקרבך והשמדתי עריך׃

5:15b.MIC.005.015 ועשיתי באף ובחמה נקם את הגוים אשר לא שמעו׃

6

6:1b.MIC.006.001 שמעו נא את אשר יהוה אמר קום ריב את ההרים ותשמענה הגבעות קולך׃

6:2b.MIC.006.002 שמעו הרים את ריב יהוה והאתנים מסדי ארץ כי ריב ליהוה עם עמו ועם ישראל יתוכח׃

6:3b.MIC.006.003 עמי מה עשיתי לך ומה הלאתיך ענה בי׃

6:4b.MIC.006.004 כי העלתיך מארץ מצרים ומבית עבדים פדיתיך ואשלח לפניך את משה אהרן ומרים׃

6:5b.MIC.006.005 עמי זכר נא מה יעץ בלק מלך מואב ומה ענה אתו בלעם בן בעור מן השטים עד הגלגל למען דעת צדקות יהוה׃

6:6b.MIC.006.006 במה אקדם יהוה אכף לאלהי מרום האקדמנו בעולות בעגלים בני שנה׃

6:7b.MIC.006.007 הירצה יהוה באלפי אילים ברבבות נחלי שמן האתן בכורי פשעי פרי בטני חטאת נפשי׃

6:8b.MIC.006.008 הגיד לך אדם מה טוב ומה יהוה דורש ממך כי אם עשות משפט ואהבת חסד והצנע לכת עם אלהיך׃

6:9b.MIC.006.009 קול יהוה לעיר יקרא ותושיה יראה שמך שמעו מטה ומי יעדה׃

6:10b.MIC.006.010 עוד האש בית רשע אצרות רשע ואיפת רזון זעומה׃

6:11b.MIC.006.011 האזכה במאזני רשע ובכיס אבני מרמה׃

6:12b.MIC.006.012 אשר עשיריה מלאו חמס וישביה דברו שקר ולשונם רמיה בפיהם׃

6:13b.MIC.006.013 וגם אני החליתי הכותך השמם על חטאתך׃

6:14b.MIC.006.014 אתה תאכל ולא תשבע וישחך בקרבך ותסג ולא תפליט ואשר תפלט לחרב אתן׃

6:15b.MIC.006.015 אתה תזרע ולא תקצור אתה תדרך זית ולא תסוך שמן ותירוש ולא תשתה יין׃

6:16b.MIC.006.016 וישתמר חקות עמרי וכל מעשה בית אחאב ותלכו במעצותם למען תתי אתך לשמה וישביה לשרקה וחרפת עמי תשאו׃

7

7:1b.MIC.007.001 אללי לי כי הייתי כאספי קיץ כעללת בציר אין אשכול לאכול בכורה אותה נפשי׃

7:2b.MIC.007.002 אבד חסיד מן הארץ וישר באדם אין כלם לדמים יארבו איש את אחיהו יצודו חרם׃

7:3b.MIC.007.003 על הרע כפים להיטיב השר שאל והשפט בשלום והגדול דבר הות נפשו הוא ויעבתוה׃

7:4b.MIC.007.004 טובם כחדק ישר ממסוכה יום מצפיך פקדתך באה עתה תהיה מבוכתם׃

7:5b.MIC.007.005 אל תאמינו ברע אל תבטחו באלוף משכבת חיקך שמר פתחי פיך׃

7:6b.MIC.007.006 כי בן מנבל אב בת קמה באמה כלה בחמתה איבי איש אנשי ביתו׃

7:7b.MIC.007.007 ואני ביהוה אצפה אוחילה לאלהי ישעי ישמעני אלהי׃

7:8b.MIC.007.008 אל תשמחי איבתי לי כי נפלתי קמתי כי אשב בחשך יהוה אור לי׃

7:9b.MIC.007.009 זעף יהוה אשא כי חטאתי לו עד אשר יריב ריבי ועשה משפטי יוציאני לאור אראה בצדקתו׃

7:10b.MIC.007.010 ותרא איבתי ותכסה בושה האמרה אלי איו יהוה אלהיך עיני תראינה בה עתה תהיה למרמס כטיט חוצות׃

7:11b.MIC.007.011 יום לבנות גדריך יום ההוא ירחק חק׃

7:12b.MIC.007.012 יום הוא ועדיך יבוא למני אשור וערי מצור ולמני מצור ועד נהר וים מים והר ההר׃

7:13b.MIC.007.013 והיתה הארץ לשממה על ישביה מפרי מעלליהם׃

7:14b.MIC.007.014 רעה עמך בשבטך צאן נחלתך שכני לבדד יער בתוך כרמל ירעו בשן וגלעד כימי עולם׃

7:15b.MIC.007.015 כימי צאתך מארץ מצרים אראנו נפלאות׃

7:16b.MIC.007.016 יראו גוים ויבשו מכל גבורתם ישימו יד על פה אזניהם תחרשנה׃

7:17b.MIC.007.017 ילחכו עפר כנחש כזחלי ארץ ירגזו ממסגרתיהם אל יהוה אלהינו יפחדו ויראו ממך׃

7:18b.MIC.007.018 מי אל כמוך נשא עון ועבר על פשע לשארית נחלתו לא החזיק לעד אפו כי חפץ חסד הוא׃

7:19b.MIC.007.019 ישוב ירחמנו יכבש עונתינו ותשליך במצלות ים כל חטאותם׃

7:20b.MIC.007.020 תתן אמת ליעקב חסד לאברהם אשר נשבעת לאבתינו מימי קדם׃