Jonah (Hebrew)

1

1:1b.JON.001.001 ויהי דבר יהוה אל יונה בן אמתי לאמר׃

1:2b.JON.001.002 קום לך אל נינוה העיר הגדולה וקרא עליה כי עלתה רעתם לפני׃

1:3b.JON.001.003 ויקם יונה לברח תרשישה מלפני יהוה וירד יפו וימצא אניה באה תרשיש ויתן שכרה וירד בה לבוא עמהם תרשישה מלפני יהוה׃

1:4b.JON.001.004 ויהוה הטיל רוח גדולה אל הים ויהי סער גדול בים והאניה חשבה להשבר׃

1:5b.JON.001.005 וייראו המלחים ויזעקו איש אל אלהיו ויטלו את הכלים אשר באניה אל הים להקל מעליהם ויונה ירד אל ירכתי הספינה וישכב וירדם׃

1:6b.JON.001.006 ויקרב אליו רב החבל ויאמר לו מה לך נרדם קום קרא אל אלהיך אולי יתעשת האלהים לנו ולא נאבד׃

1:7b.JON.001.007 ויאמרו איש אל רעהו לכו ונפילה גורלות ונדעה בשלמי הרעה הזאת לנו ויפלו גורלות ויפל הגורל על יונה׃

1:8b.JON.001.008 ויאמרו אליו הגידה נא לנו באשר למי הרעה הזאת לנו מה מלאכתך ומאין תבוא מה ארצך ואי מזה עם אתה׃

1:9b.JON.001.009 ויאמר אליהם עברי אנכי ואת יהוה אלהי השמים אני ירא אשר עשה את הים ואת היבשה׃

1:10b.JON.001.010 וייראו האנשים יראה גדולה ויאמרו אליו מה זאת עשית כי ידעו האנשים כי מלפני יהוה הוא ברח כי הגיד להם׃

1:11b.JON.001.011 ויאמרו אליו מה נעשה לך וישתק הים מעלינו כי הים הולך וסער׃

1:12b.JON.001.012 ויאמר אליהם שאוני והטילני אל הים וישתק הים מעליכם כי יודע אני כי בשלי הסער הגדול הזה עליכם׃

1:13b.JON.001.013 ויחתרו האנשים להשיב אל היבשה ולא יכלו כי הים הולך וסער עליהם׃

1:14b.JON.001.014 ויקראו אל יהוה ויאמרו אנה יהוה אל נא נאבדה בנפש האיש הזה ואל תתן עלינו דם נקיא כי אתה יהוה כאשר חפצת עשית׃

1:15b.JON.001.015 וישאו את יונה ויטלהו אל הים ויעמד הים מזעפו׃

1:16b.JON.001.016 וייראו האנשים יראה גדולה את יהוה ויזבחו זבח ליהוה וידרו נדרים׃

1:17b.JON.001.017 וימן יהוה דג גדול לבלע את יונה ויהי יונה במעי הדג שלשה ימים ושלשה לילות׃

2

2:1b.JON.002.001 ויתפלל יונה אל יהוה אלהיו ממעי הדגה׃

2:2b.JON.002.002 ויאמר קראתי מצרה לי אל יהוה ויענני מבטן שאול שועתי שמעת קולי׃

2:3b.JON.002.003 ותשליכני מצולה בלבב ימים ונהר יסבבני כל משבריך וגליך עלי עברו׃

2:4b.JON.002.004 ואני אמרתי נגרשתי מנגד עיניך אך אוסיף להביט אל היכל קדשך׃

2:5b.JON.002.005 אפפוני מים עד נפש תהום יסבבני סוף חבוש לראשי׃

2:6b.JON.002.006 לקצבי הרים ירדתי הארץ ברחיה בעדי לעולם ותעל משחת חיי יהוה אלהי׃

2:7b.JON.002.007 בהתעטף עלי נפשי את יהוה זכרתי ותבוא אליך תפלתי אל היכל קדשך׃

2:8b.JON.002.008 משמרים הבלי שוא חסדם יעזבו׃

2:9b.JON.002.009 ואני בקול תודה אזבחה לך אשר נדרתי אשלמה ישועתה ליהוה׃

2:10b.JON.002.010 ויאמר יהוה לדג ויקא את יונה אל היבשה׃

3

3:1b.JON.003.001 ויהי דבר יהוה אל יונה שנית לאמר׃

3:2b.JON.003.002 קום לך אל נינוה העיר הגדולה וקרא אליה את הקריאה אשר אנכי דבר אליך׃

3:3b.JON.003.003 ויקם יונה וילך אל נינוה כדבר יהוה ונינוה היתה עיר גדולה לאלהים מהלך שלשת ימים׃

3:4b.JON.003.004 ויחל יונה לבוא בעיר מהלך יום אחד ויקרא ויאמר עוד ארבעים יום ונינוה נהפכת׃

3:5b.JON.003.005 ויאמינו אנשי נינוה באלהים ויקראו צום וילבשו שקים מגדולם ועד קטנם׃

3:6b.JON.003.006 ויגע הדבר אל מלך נינוה ויקם מכסאו ויעבר אדרתו מעליו ויכס שק וישב על האפר׃

3:7b.JON.003.007 ויזעק ויאמר בנינוה מטעם המלך וגדליו לאמר האדם והבהמה הבקר והצאן אל יטעמו מאומה אל ירעו ומים אל ישתו׃

3:8b.JON.003.008 ויתכסו שקים האדם והבהמה ויקראו אל אלהים בחזקה וישבו איש מדרכו הרעה ומן החמס אשר בכפיהם׃

3:9b.JON.003.009 מי יודע ישוב ונחם האלהים ושב מחרון אפו ולא נאבד׃

3:10b.JON.003.010 וירא האלהים את מעשיהם כי שבו מדרכם הרעה וינחם האלהים על הרעה אשר דבר לעשות להם ולא עשה׃

4

4:1b.JON.004.001 וירע אל יונה רעה גדולה ויחר לו׃

4:2b.JON.004.002 ויתפלל אל יהוה ויאמר אנה יהוה הלוא זה דברי עד היותי על אדמתי על כן קדמתי לברח תרשישה כי ידעתי כי אתה אל חנון ורחום ארך אפים ורב חסד ונחם על הרעה׃

4:3b.JON.004.003 ועתה יהוה קח נא את נפשי ממני כי טוב מותי מחיי׃

4:4b.JON.004.004 ויאמר יהוה ההיטב חרה לך׃

4:5b.JON.004.005 ויצא יונה מן העיר וישב מקדם לעיר ויעש לו שם סכה וישב תחתיה בצל עד אשר יראה מה יהיה בעיר׃

4:6b.JON.004.006 וימן יהוה אלהים קיקיון ויעל מעל ליונה להיות צל על ראשו להציל לו מרעתו וישמח יונה על הקיקיון שמחה גדולה׃

4:7b.JON.004.007 וימן האלהים תולעת בעלות השחר למחרת ותך את הקיקיון וייבש׃

4:8b.JON.004.008 ויהי כזרח השמש וימן אלהים רוח קדים חרישית ותך השמש על ראש יונה ויתעלף וישאל את נפשו למות ויאמר טוב מותי מחיי׃

4:9b.JON.004.009 ויאמר אלהים אל יונה ההיטב חרה לך על הקיקיון ויאמר היטב חרה לי עד מות׃

4:10b.JON.004.010 ויאמר יהוה אתה חסת על הקיקיון אשר לא עמלת בו ולא גדלתו שבן לילה היה ובן לילה אבד׃

4:11b.JON.004.011 ואני לא אחוס על נינוה העיר הגדולה אשר יש בה הרבה משתים עשרה רבו אדם אשר לא ידע בין ימינו לשמאלו ובהמה רבה׃