Obadiah (Hebrew)

1

1:1b.OBA.001.001 חזון עבדיה כה אמר אדני יהוה לאדום שמועה שמענו מאת יהוה וציר בגוים שלח קומו ונקומה עליה למלחמה׃

1:2b.OBA.001.002 הנה קטן נתתיך בגוים בזוי אתה מאד׃

1:3b.OBA.001.003 זדון לבך השיאך שכני בחגוי סלע מרום שבתו אמר בלבו מי יורדני ארץ׃

1:4b.OBA.001.004 אם תגביה כנשר ואם בין כוכבים שים קנך משם אורידך נאם יהוה׃

1:5b.OBA.001.005 אם גנבים באו לך אם שודדי לילה איך נדמיתה הלוא יגנבו דים אם בצרים באו לך הלוא ישאירו עללות׃

1:6b.OBA.001.006 איך נחפשו עשו נבעו מצפניו׃

1:7b.OBA.001.007 עד הגבול שלחוך כל אנשי בריתך השיאוך יכלו לך אנשי שלמך לחמך ישימו מזור תחתיך אין תבונה בו׃

1:8b.OBA.001.008 הלוא ביום ההוא נאם יהוה והאבדתי חכמים מאדום ותבונה מהר עשו׃

1:9b.OBA.001.009 וחתו גבוריך תימן למען יכרת איש מהר עשו מקטל׃

1:10b.OBA.001.010 מחמס אחיך יעקב תכסך בושה ונכרת לעולם׃

1:11b.OBA.001.011 ביום עמדך מנגד ביום שבות זרים חילו ונכרים באו שערו ועל ירושלם ידו גורל גם אתה כאחד מהם׃

1:12b.OBA.001.012 ואל תרא ביום אחיך ביום נכרו ואל תשמח לבני יהודה ביום אבדם ואל תגדל פיך ביום צרה׃

1:13b.OBA.001.013 אל תבוא בשער עמי ביום אידם אל תרא גם אתה ברעתו ביום אידו ואל תשלחנה בחילו ביום אידו׃

1:14b.OBA.001.014 ואל תעמד על הפרק להכרית את פליטיו ואל תסגר שרידיו ביום צרה׃

1:15b.OBA.001.015 כי קרוב יום יהוה על כל הגוים כאשר עשית יעשה לך גמלך ישוב בראשך׃

1:16b.OBA.001.016 כי כאשר שתיתם על הר קדשי ישתו כל הגוים תמיד ושתו ולעו והיו כלוא היו׃

1:17b.OBA.001.017 ובהר ציון תהיה פליטה והיה קדש וירשו בית יעקב את מורשיהם׃

1:18b.OBA.001.018 והיה בית יעקב אש ובית יוסף להבה ובית עשו לקש ודלקו בהם ואכלום ולא יהיה שריד לבית עשו כי יהוה דבר׃

1:19b.OBA.001.019 וירשו הנגב את הר עשו והשפלה את פלשתים וירשו את שדה אפרים ואת שדה שמרון ובנימן את הגלעד׃

1:20b.OBA.001.020 וגלת החל הזה לבני ישראל אשר כנענים עד צרפת וגלת ירושלם אשר בספרד ירשו את ערי הנגב׃

1:21b.OBA.001.021 ועלו מושעים בהר ציון לשפט את הר עשו והיתה ליהוה המלוכה׃