Amos (Hebrew)

1

1:1b.AMO.001.001 דברי עמוס אשר היה בנקדים מתקוע אשר חזה על ישראל בימי עזיה מלך יהודה ובימי ירבעם בן יואש מלך ישראל שנתים לפני הרעש׃

1:2b.AMO.001.002 ויאמר יהוה מציון ישאג ומירושלם יתן קולו ואבלו נאות הרעים ויבש ראש הכרמל׃

1:3b.AMO.001.003 כה אמר יהוה על שלשה פשעי דמשק ועל ארבעה לא אשיבנו על דושם בחרצות הברזל את הגלעד׃

1:4b.AMO.001.004 ושלחתי אש בבית חזאל ואכלה ארמנות בן הדד׃

1:5b.AMO.001.005 ושברתי בריח דמשק והכרתי יושב מבקעת און ותומך שבט מבית עדן וגלו עם ארם קירה אמר יהוה׃

1:6b.AMO.001.006 כה אמר יהוה על שלשה פשעי עזה ועל ארבעה לא אשיבנו על הגלותם גלות שלמה להסגיר לאדום׃

1:7b.AMO.001.007 ושלחתי אש בחומת עזה ואכלה ארמנתיה׃

1:8b.AMO.001.008 והכרתי יושב מאשדוד ותומך שבט מאשקלון והשיבותי ידי על עקרון ואבדו שארית פלשתים אמר אדני יהוה׃

1:9b.AMO.001.009 כה אמר יהוה על שלשה פשעי צר ועל ארבעה לא אשיבנו על הסגירם גלות שלמה לאדום ולא זכרו ברית אחים׃

1:10b.AMO.001.010 ושלחתי אש בחומת צר ואכלה ארמנותיה׃

1:11b.AMO.001.011 כה אמר יהוה על שלשה פשעי אדום ועל ארבעה לא אשיבנו על רדפו בחרב אחיו ושחת רחמיו ויטרף לעד אפו ועברתו שמרה נצח׃

1:12b.AMO.001.012 ושלחתי אש בתימן ואכלה ארמנות בצרה׃

1:13b.AMO.001.013 כה אמר יהוה על שלשה פשעי בני עמון ועל ארבעה לא אשיבנו על בקעם הרות הגלעד למען הרחיב את גבולם׃

1:14b.AMO.001.014 והצתי אש בחומת רבה ואכלה ארמנותיה בתרועה ביום מלחמה בסער ביום סופה׃

1:15b.AMO.001.015 והלך מלכם בגולה הוא ושריו יחדו אמר יהוה׃

2

2:1b.AMO.002.001 כה אמר יהוה על שלשה פשעי מואב ועל ארבעה לא אשיבנו על שרפו עצמות מלך אדום לשיד׃

2:2b.AMO.002.002 ושלחתי אש במואב ואכלה ארמנות הקריות ומת בשאון מואב בתרועה בקול שופר׃

2:3b.AMO.002.003 והכרתי שופט מקרבה וכל שריה אהרוג עמו אמר יהוה׃

2:4b.AMO.002.004 כה אמר יהוה על שלשה פשעי יהודה ועל ארבעה לא אשיבנו על מאסם את תורת יהוה וחקיו לא שמרו ויתעום כזביהם אשר הלכו אבותם אחריהם׃

2:5b.AMO.002.005 ושלחתי אש ביהודה ואכלה ארמנות ירושלם׃

2:6b.AMO.002.006 כה אמר יהוה על שלשה פשעי ישראל ועל ארבעה לא אשיבנו על מכרם בכסף צדיק ואביון בעבור נעלים׃

2:7b.AMO.002.007 השאפים על עפר ארץ בראש דלים ודרך ענוים יטו ואיש ואביו ילכו אל הנערה למען חלל את שם קדשי׃

2:8b.AMO.002.008 ועל בגדים חבלים יטו אצל כל מזבח ויין ענושים ישתו בית אלהיהם׃

2:9b.AMO.002.009 ואנכי השמדתי את האמרי מפניהם אשר כגבה ארזים גבהו וחסן הוא כאלונים ואשמיד פריו ממעל ושרשיו מתחת׃

2:10b.AMO.002.010 ואנכי העליתי אתכם מארץ מצרים ואולך אתכם במדבר ארבעים שנה לרשת את ארץ האמרי׃

2:11b.AMO.002.011 ואקים מבניכם לנביאים ומבחוריכם לנזרים האף אין זאת בני ישראל נאם יהוה׃

2:12b.AMO.002.012 ותשקו את הנזרים יין ועל הנביאים צויתם לאמר לא תנבאו׃

2:13b.AMO.002.013 הנה אנכי מעיק תחתיכם כאשר תעיק העגלה המלאה לה עמיר׃

2:14b.AMO.002.014 ואבד מנוס מקל וחזק לא יאמץ כחו וגבור לא ימלט נפשו׃

2:15b.AMO.002.015 ותפש הקשת לא יעמד וקל ברגליו לא ימלט ורכב הסוס לא ימלט נפשו׃

2:16b.AMO.002.016 ואמיץ לבו בגבורים ערום ינוס ביום ההוא נאם יהוה׃

3

3:1b.AMO.003.001 שמעו את הדבר הזה אשר דבר יהוה עליכם בני ישראל על כל המשפחה אשר העליתי מארץ מצרים לאמר׃

3:2b.AMO.003.002 רק אתכם ידעתי מכל משפחות האדמה על כן אפקד עליכם את כל עונתיכם׃

3:3b.AMO.003.003 הילכו שנים יחדו בלתי אם נועדו׃

3:4b.AMO.003.004 הישאג אריה ביער וטרף אין לו היתן כפיר קולו ממענתו בלתי אם לכד׃

3:5b.AMO.003.005 התפל צפור על פח הארץ ומוקש אין לה היעלה פח מן האדמה ולכוד לא ילכוד׃

3:6b.AMO.003.006 אם יתקע שופר בעיר ועם לא יחרדו אם תהיה רעה בעיר ויהוה לא עשה׃

3:7b.AMO.003.007 כי לא יעשה אדני יהוה דבר כי אם גלה סודו אל עבדיו הנביאים׃

3:8b.AMO.003.008 אריה שאג מי לא יירא אדני יהוה דבר מי לא ינבא׃

3:9b.AMO.003.009 השמיעו על ארמנות באשדוד ועל ארמנות בארץ מצרים ואמרו האספו על הרי שמרון וראו מהומת רבות בתוכה ועשוקים בקרבה׃

3:10b.AMO.003.010 ולא ידעו עשות נכחה נאם יהוה האוצרים חמס ושד בארמנותיהם׃

3:11b.AMO.003.011 לכן כה אמר אדני יהוה צר וסביב הארץ והורד ממך עזך ונבזו ארמנותיך׃

3:12b.AMO.003.012 כה אמר יהוה כאשר יציל הרעה מפי הארי שתי כרעים או בדל אזן כן ינצלו בני ישראל הישבים בשמרון בפאת מטה ובדמשק ערש׃

3:13b.AMO.003.013 שמעו והעידו בבית יעקב נאם אדני יהוה אלהי הצבאות׃

3:14b.AMO.003.014 כי ביום פקדי פשעי ישראל עליו ופקדתי על מזבחות בית אל ונגדעו קרנות המזבח ונפלו לארץ׃

3:15b.AMO.003.015 והכיתי בית החרף על בית הקיץ ואבדו בתי השן וספו בתים רבים נאם יהוה׃

4

4:1b.AMO.004.001 שמעו הדבר הזה פרות הבשן אשר בהר שמרון העשקות דלים הרצצות אביונים האמרת לאדניהם הביאה ונשתה׃

4:2b.AMO.004.002 נשבע אדני יהוה בקדשו כי הנה ימים באים עליכם ונשא אתכם בצנות ואחריתכן בסירות דוגה׃

4:3b.AMO.004.003 ופרצים תצאנה אשה נגדה והשלכתנה ההרמונה נאם יהוה׃

4:4b.AMO.004.004 באו בית אל ופשעו הגלגל הרבו לפשע והביאו לבקר זבחיכם לשלשת ימים מעשרתיכם׃

4:5b.AMO.004.005 וקטר מחמץ תודה וקראו נדבות השמיעו כי כן אהבתם בני ישראל נאם אדני יהוה׃

4:6b.AMO.004.006 וגם אני נתתי לכם נקיון שנים בכל עריכם וחסר לחם בכל מקומתיכם ולא שבתם עדי נאם יהוה׃

4:7b.AMO.004.007 וגם אנכי מנעתי מכם את הגשם בעוד שלשה חדשים לקציר והמטרתי על עיר אחת ועל עיר אחת לא אמטיר חלקה אחת תמטר וחלקה אשר לא תמטיר עליה תיבש׃

4:8b.AMO.004.008 ונעו שתים שלש ערים אל עיר אחת לשתות מים ולא ישבעו ולא שבתם עדי נאם יהוה׃

4:9b.AMO.004.009 הכיתי אתכם בשדפון ובירקון הרבות גנותיכם וכרמיכם ותאניכם וזיתיכם יאכל הגזם ולא שבתם עדי נאם יהוה׃

4:10b.AMO.004.010 שלחתי בכם דבר בדרך מצרים הרגתי בחרב בחוריכם עם שבי סוסיכם ואעלה באש מחניכם ובאפכם ולא שבתם עדי נאם יהוה׃

4:11b.AMO.004.011 הפכתי בכם כמהפכת אלהים את סדם ואת עמרה ותהיו כאוד מצל משרפה ולא שבתם עדי נאם יהוה׃

4:12b.AMO.004.012 לכן כה אעשה לך ישראל עקב כי זאת אעשה לך הכון לקראת אלהיך ישראל׃

4:13b.AMO.004.013 כי הנה יוצר הרים וברא רוח ומגיד לאדם מה שחו עשה שחר עיפה ודרך על במתי ארץ יהוה אלהי צבאות שמו׃

5

5:1b.AMO.005.001 שמעו את הדבר הזה אשר אנכי נשא עליכם קינה בית ישראל׃

5:2b.AMO.005.002 נפלה לא תוסיף קום בתולת ישראל נטשה על אדמתה אין מקימה׃

5:3b.AMO.005.003 כי כה אמר אדני יהוה העיר היצאת אלף תשאיר מאה והיוצאת מאה תשאיר עשרה לבית ישראל׃

5:4b.AMO.005.004 כי כה אמר יהוה לבית ישראל דרשוני וחיו׃

5:5b.AMO.005.005 ואל תדרשו בית אל והגלגל לא תבאו ובאר שבע לא תעברו כי הגלגל גלה יגלה ובית אל יהיה לאון׃

5:6b.AMO.005.006 דרשו את יהוה וחיו פן יצלח כאש בית יוסף ואכלה ואין מכבה לבית אל׃

5:7b.AMO.005.007 ההפכים ללענה משפט וצדקה לארץ הניחו׃

5:8b.AMO.005.008 עשה כימה וכסיל והפך לבקר צלמות ויום לילה החשיך הקורא למי הים וישפכם על פני הארץ יהוה שמו׃

5:9b.AMO.005.009 המבליג שד על עז ושד על מבצר יבוא׃

5:10b.AMO.005.010 שנאו בשער מוכיח ודבר תמים יתעבו׃

5:11b.AMO.005.011 לכן יען בושסכם על דל ומשאת בר תקחו ממנו בתי גזית בניתם ולא תשבו בם כרמי חמד נטעתם ולא תשתו את יינם׃

5:12b.AMO.005.012 כי ידעתי רבים פשעיכם ועצמים חטאתיכם צררי צדיק לקחי כפר ואביונים בשער הטו׃

5:13b.AMO.005.013 לכן המשכיל בעת ההיא ידם כי עת רעה היא׃

5:14b.AMO.005.014 דרשו טוב ואל רע למען תחיו ויהי כן יהוה אלהי צבאות אתכם כאשר אמרתם׃

5:15b.AMO.005.015 שנאו רע ואהבו טוב והציגו בשער משפט אולי יחנן יהוה אלהי צבאות שארית יוסף׃

5:16b.AMO.005.016 לכן כה אמר יהוה אלהי צבאות אדני בכל רחבות מספד ובכל חוצות יאמרו הו הו וקראו אכר אל אבל ומספד אל יודעי נהי׃

5:17b.AMO.005.017 ובכל כרמים מספד כי אעבר בקרבך אמר יהוה׃

5:18b.AMO.005.018 הוי המתאוים את יום יהוה למה זה לכם יום יהוה הוא חשך ולא אור׃

5:19b.AMO.005.019 כאשר ינוס איש מפני הארי ופגעו הדב ובא הבית וסמך ידו על הקיר ונשכו הנחש׃

5:20b.AMO.005.020 הלא חשך יום יהוה ולא אור ואפל ולא נגה לו׃

5:21b.AMO.005.021 שנאתי מאסתי חגיכם ולא אריח בעצרתיכם׃

5:22b.AMO.005.022 כי אם תעלו לי עלות ומנחתיכם לא ארצה ושלם מריאיכם לא אביט׃

5:23b.AMO.005.023 הסר מעלי המון שריך וזמרת נבליך לא אשמע׃

5:24b.AMO.005.024 ויגל כמים משפט וצדקה כנחל איתן׃

5:25b.AMO.005.025 הזבחים ומנחה הגשתם לי במדבר ארבעים שנה בית ישראל׃

5:26b.AMO.005.026 ונשאתם את סכות מלככם ואת כיון צלמיכם כוכב אלהיכם אשר עשיתם לכם׃

5:27b.AMO.005.027 והגליתי אתכם מהלאה לדמשק אמר יהוה אלהי צבאות שמו׃

6

6:1b.AMO.006.001 הוי השאננים בציון והבטחים בהר שמרון נקבי ראשית הגוים ובאו להם בית ישראל׃

6:2b.AMO.006.002 עברו כלנה וראו ולכו משם חמת רבה ורדו גת פלשתים הטובים מן הממלכות האלה אם רב גבולם מגבלכם׃

6:3b.AMO.006.003 המנדים ליום רע ותגישון שבת חמס׃

6:4b.AMO.006.004 השכבים על מטות שן וסרחים על ערשותם ואכלים כרים מצאן ועגלים מתוך מרבק׃

6:5b.AMO.006.005 הפרטים על פי הנבל כדויד חשבו להם כלי שיר׃

6:6b.AMO.006.006 השתים במזרקי יין וראשית שמנים ימשחו ולא נחלו על שבר יוסף׃

6:7b.AMO.006.007 לכן עתה יגלו בראש גלים וסר מרזח סרוחים׃

6:8b.AMO.006.008 נשבע אדני יהוה בנפשו נאם יהוה אלהי צבאות מתאב אנכי את גאון יעקב וארמנתיו שנאתי והסגרתי עיר ומלאה׃

6:9b.AMO.006.009 והיה אם יותרו עשרה אנשים בבית אחד ומתו׃

6:10b.AMO.006.010 ונשאו דודו ומסרפו להוציא עצמים מן הבית ואמר לאשר בירכתי הבית העוד עמך ואמר אפס ואמר הס כי לא להזכיר בשם יהוה׃

6:11b.AMO.006.011 כי הנה יהוה מצוה והכה הבית הגדול רסיסים והבית הקטן בקעים׃

6:12b.AMO.006.012 הירצון בסלע סוסים אם יחרוש בבקרים כי הפכתם לראש משפט ופרי צדקה ללענה׃

6:13b.AMO.006.013 השמחים ללא דבר האמרים הלוא בחזקנו לקחנו לנו קרנים׃

6:14b.AMO.006.014 כי הנני מקים עליכם בית ישראל נאם יהוה אלהי הצבאות גוי ולחצו אתכם מלבוא חמת עד נחל הערבה׃

7

7:1b.AMO.007.001 כה הראני אדני יהוה והנה יוצר גבי בתחלת עלות הלקש והנה לקש אחר גזי המלך׃

7:2b.AMO.007.002 והיה אם כלה לאכול את עשב הארץ ואמר אדני יהוה סלח נא מי יקום יעקב כי קטן הוא׃

7:3b.AMO.007.003 נחם יהוה על זאת לא תהיה אמר יהוה׃

7:4b.AMO.007.004 כה הראני אדני יהוה והנה קרא לרב באש אדני יהוה ותאכל את תהום רבה ואכלה את החלק׃

7:5b.AMO.007.005 ואמר אדני יהוה חדל נא מי יקום יעקב כי קטן הוא׃

7:6b.AMO.007.006 נחם יהוה על זאת גם היא לא תהיה אמר אדני יהוה׃

7:7b.AMO.007.007 כה הראני והנה אדני נצב על חומת אנך ובידו אנך׃

7:8b.AMO.007.008 ויאמר יהוה אלי מה אתה ראה עמוס ואמר אנך ויאמר אדני הנני שם אנך בקרב עמי ישראל לא אוסיף עוד עבור לו׃

7:9b.AMO.007.009 ונשמו במות ישחק ומקדשי ישראל יחרבו וקמתי על בית ירבעם בחרב׃

7:10b.AMO.007.010 וישלח אמציה כהן בית אל אל ירבעם מלך ישראל לאמר קשר עליך עמוס בקרב בית ישראל לא תוכל הארץ להכיל את כל דבריו׃

7:11b.AMO.007.011 כי כה אמר עמוס בחרב ימות ירבעם וישראל גלה יגלה מעל אדמתו׃

7:12b.AMO.007.012 ויאמר אמציה אל עמוס חזה לך ברח לך אל ארץ יהודה ואכל שם לחם ושם תנבא׃

7:13b.AMO.007.013 ובית אל לא תוסיף עוד להנבא כי מקדש מלך הוא ובית ממלכה הוא׃

7:14b.AMO.007.014 ויען עמוס ויאמר אל אמציה לא נביא אנכי ולא בן נביא אנכי כי בוקר אנכי ובולס שקמים׃

7:15b.AMO.007.015 ויקחני יהוה מאחרי הצאן ויאמר אלי יהוה לך הנבא אל עמי ישראל׃

7:16b.AMO.007.016 ועתה שמע דבר יהוה אתה אמר לא תנבא על ישראל ולא תטיף על בית ישחק׃

7:17b.AMO.007.017 לכן כה אמר יהוה אשתך בעיר תזנה ובניך ובנתיך בחרב יפלו ואדמתך בחבל תחלק ואתה על אדמה טמאה תמות וישראל גלה יגלה מעל אדמתו׃

8

8:1b.AMO.008.001 כה הראני אדני יהוה והנה כלוב קיץ׃

8:2b.AMO.008.002 ויאמר מה אתה ראה עמוס ואמר כלוב קיץ ויאמר יהוה אלי בא הקץ אל עמי ישראל לא אוסיף עוד עבור לו׃

8:3b.AMO.008.003 והילילו שירות היכל ביום ההוא נאם אדני יהוה רב הפגר בכל מקום השליך הס׃

8:4b.AMO.008.004 שמעו זאת השאפים אביון ולשבית ענוי ארץ׃

8:5b.AMO.008.005 לאמר מתי יעבר החדש ונשבירה שבר והשבת ונפתחה בר להקטין איפה ולהגדיל שקל ולעות מאזני מרמה׃

8:6b.AMO.008.006 לקנות בכסף דלים ואביון בעבור נעלים ומפל בר נשביר׃

8:7b.AMO.008.007 נשבע יהוה בגאון יעקב אם אשכח לנצח כל מעשיהם׃

8:8b.AMO.008.008 העל זאת לא תרגז הארץ ואבל כל יושב בה ועלתה כאר כלה ונגרשה ונשקה כיאור מצרים׃

8:9b.AMO.008.009 והיה ביום ההוא נאם אדני יהוה והבאתי השמש בצהרים והחשכתי לארץ ביום אור׃

8:10b.AMO.008.010 והפכתי חגיכם לאבל וכל שיריכם לקינה והעליתי על כל מתנים שק ועל כל ראש קרחה ושמתיה כאבל יחיד ואחריתה כיום מר׃

8:11b.AMO.008.011 הנה ימים באים נאם אדני יהוה והשלחתי רעב בארץ לא רעב ללחם ולא צמא למים כי אם לשמע את דברי יהוה׃

8:12b.AMO.008.012 ונעו מים עד ים ומצפון ועד מזרח ישוטטו לבקש את דבר יהוה ולא ימצאו׃

8:13b.AMO.008.013 ביום ההוא תתעלפנה הבתולת היפות והבחורים בצמא׃

8:14b.AMO.008.014 הנשבעים באשמת שמרון ואמרו חי אלהיך דן וחי דרך באר שבע ונפלו ולא יקומו עוד׃

9

9:1b.AMO.009.001 ראיתי את אדני נצב על המזבח ויאמר הך הכפתור וירעשו הספים ובצעם בראש כלם ואחריתם בחרב אהרג לא ינוס להם נס ולא ימלט להם פליט׃

9:2b.AMO.009.002 אם יחתרו בשאול משם ידי תקחם ואם יעלו השמים משם אורידם׃

9:3b.AMO.009.003 ואם יחבאו בראש הכרמל משם אחפש ולקחתים ואם יסתרו מנגד עיני בקרקע הים משם אצוה את הנחש ונשכם׃

9:4b.AMO.009.004 ואם ילכו בשבי לפני איביהם משם אצוה את החרב והרגתם ושמתי עיני עליהם לרעה ולא לטובה׃

9:5b.AMO.009.005 ואדני יהוה הצבאות הנוגע בארץ ותמוג ואבלו כל יושבי בה ועלתה כיאר כלה ושקעה כיאר מצרים׃

9:6b.AMO.009.006 הבונה בשמים מעלותו ואגדתו על ארץ יסדה הקרא למי הים וישפכם על פני הארץ יהוה שמו׃

9:7b.AMO.009.007 הלוא כבני כשיים אתם לי בני ישראל נאם יהוה הלוא את ישראל העליתי מארץ מצרים ופלשתיים מכפתור וארם מקיר׃

9:8b.AMO.009.008 הנה עיני אדני יהוה בממלכה החטאה והשמדתי אתה מעל פני האדמה אפס כי לא השמיד אשמיד את בית יעקב נאם יהוה׃

9:9b.AMO.009.009 כי הנה אנכי מצוה והנעותי בכל הגוים את בית ישראל כאשר ינוע בכברה ולא יפול צרור ארץ׃

9:10b.AMO.009.010 בחרב ימותו כל חטאי עמי האמרים לא תגיש ותקדים בעדינו הרעה׃

9:11b.AMO.009.011 ביום ההוא אקים את סכת דויד הנפלת וגדרתי את פרציהן והרסתיו אקים ובניתיה כימי עולם׃

9:12b.AMO.009.012 למען יירשו את שארית אדום וכל הגוים אשר נקרא שמי עליהם נאם יהוה עשה זאת׃

9:13b.AMO.009.013 הנה ימים באים נאם יהוה ונגש חורש בקצר ודרך ענבים במשך הזרע והטיפו ההרים עסיס וכל הגבעות תתמוגגנה׃

9:14b.AMO.009.014 ושבתי את שבות עמי ישראל ובנו ערים נשמות וישבו ונטעו כרמים ושתו את יינם ועשו גנות ואכלו את פריהם׃

9:15b.AMO.009.015 ונטעתים על אדמתם ולא ינתשו עוד מעל אדמתם אשר נתתי להם אמר יהוה אלהיך׃