Joel (Hebrew)

1

1:1b.JOE.001.001 דבר יהוה אשר היה אל יואל בן פתואל׃

1:2b.JOE.001.002 שמעו זאת הזקנים והאזינו כל יושבי הארץ ההיתה זאת בימיכם ואם בימי אבתיכם׃

1:3b.JOE.001.003 עליה לבניכם ספרו ובניכם לבניהם ובניהם לדור אחר׃

1:4b.JOE.001.004 יתר הגזם אכל הארבה ויתר הארבה אכל הילק ויתר הילק אכל החסיל׃

1:5b.JOE.001.005 הקיצו שכורים ובכו והיללו כל שתי יין על עסיס כי נכרת מפיכם׃

1:6b.JOE.001.006 כי גוי עלה על ארצי עצום ואין מספר שניו שני אריה ומתלעות לביא לו׃

1:7b.JOE.001.007 שם גפני לשמה ותאנתי לקצפה חשף חשפה והשליך הלבינו שריגיה׃

1:8b.JOE.001.008 אלי כבתולה חגרת שק על בעל נעוריה׃

1:9b.JOE.001.009 הכרת מנחה ונסך מבית יהוה אבלו הכהנים משרתי יהוה׃

1:10b.JOE.001.010 שדד שדה אבלה אדמה כי שדד דגן הוביש תירוש אמלל יצהר׃

1:11b.JOE.001.011 הבישו אכרים הילילו כרמים על חטה ועל שערה כי אבד קציר שדה׃

1:12b.JOE.001.012 הגפן הובישה והתאנה אמללה רמון גם תמר ותפוח כל עצי השדה יבשו כי הביש ששון מן בני אדם׃

1:13b.JOE.001.013 חגרו וספדו הכהנים הילילו משרתי מזבח באו לינו בשקים משרתי אלהי כי נמנע מבית אלהיכם מנחה ונסך׃

1:14b.JOE.001.014 קדשו צום קראו עצרה אספו זקנים כל ישבי הארץ בית יהוה אלהיכם וזעקו אל יהוה׃

1:15b.JOE.001.015 אהה ליום כי קרוב יום יהוה וכשד משדי יבוא׃

1:16b.JOE.001.016 הלוא נגד עינינו אכל נכרת מבית אלהינו שמחה וגיל׃

1:17b.JOE.001.017 עבשו פרדות תחת מגרפתיהם נשמו אצרות נהרסו ממגרות כי הביש דגן׃

1:18b.JOE.001.018 מה נאנחה בהמה נבכו עדרי בקר כי אין מרעה להם גם עדרי הצאן נאשמו׃

1:19b.JOE.001.019 אליך יהוה אקרא כי אש אכלה נאות מדבר ולהבה להטה כל עצי השדה׃

1:20b.JOE.001.020 גם בהמות שדה תערוג אליך כי יבשו אפיקי מים ואש אכלה נאות המדבר׃

2

2:1b.JOE.002.001 תקעו שופר בציון והריעו בהר קדשי ירגזו כל ישבי הארץ כי בא יום יהוה כי קרוב׃

2:2b.JOE.002.002 יום חשך ואפלה יום ענן וערפל כשחר פרש על ההרים עם רב ועצום כמהו לא נהיה מן העולם ואחריו לא יוסף עד שני דור ודור׃

2:3b.JOE.002.003 לפניו אכלה אש ואחריו תלהט להבה כגן עדן הארץ לפניו ואחריו מדבר שממה וגם פליטה לא היתה לו׃

2:4b.JOE.002.004 כמראה סוסים מראהו וכפרשים כן ירוצון׃

2:5b.JOE.002.005 כקול מרכבות על ראשי ההרים ירקדון כקול להב אש אכלה קש כעם עצום ערוך מלחמה׃

2:6b.JOE.002.006 מפניו יחילו עמים כל פנים קבצו פארור׃

2:7b.JOE.002.007 כגבורים ירצון כאנשי מלחמה יעלו חומה ואיש בדרכיו ילכון ולא יעבטון ארחותם׃

2:8b.JOE.002.008 ואיש אחיו לא ידחקון גבר במסלתו ילכון ובעד השלח יפלו לא יבצעו׃

2:9b.JOE.002.009 בעיר ישקו בחומה ירצון בבתים יעלו בעד החלונים יבאו כגנב׃

2:10b.JOE.002.010 לפניו רגזה ארץ רעשו שמים שמש וירח קדרו וכוכבים אספו נגהם׃

2:11b.JOE.002.011 ויהוה נתן קולו לפני חילו כי רב מאד מחנהו כי עצום עשה דברו כי גדול יום יהוה ונורא מאד ומי יכילנו׃

2:12b.JOE.002.012 וגם עתה נאם יהוה שבו עדי בכל לבבכם ובצום ובבכי ובמספד׃

2:13b.JOE.002.013 וקרעו לבבכם ואל בגדיכם ושובו אל יהוה אלהיכם כי חנון ורחום הוא ארך אפים ורב חסד ונחם על הרעה׃

2:14b.JOE.002.014 מי יודע ישוב ונחם והשאיר אחריו ברכה מנחה ונסך ליהוה אלהיכם׃

2:15b.JOE.002.015 תקעו שופר בציון קדשו צום קראו עצרה׃

2:16b.JOE.002.016 אספו עם קדשו קהל קבצו זקנים אספו עוללים וינקי שדים יצא חתן מחדרו וכלה מחפתה׃

2:17b.JOE.002.017 בין האולם ולמזבח יבכו הכהנים משרתי יהוה ויאמרו חוסה יהוה על עמך ואל תתן נחלתך לחרפה למשל בם גוים למה יאמרו בעמים איה אלהיהם׃

2:18b.JOE.002.018 ויקנא יהוה לארצו ויחמל על עמו׃

2:19b.JOE.002.019 ויען יהוה ויאמר לעמו הנני שלח לכם את הדגן והתירוש והיצהר ושבעתם אתו ולא אתן אתכם עוד חרפה בגוים׃

2:20b.JOE.002.020 ואת הצפוני ארחיק מעליכם והדחתיו אל ארץ ציה ושממה את פניו אל הים הקדמני וספו אל הים האחרון ועלה באשו ותעל צחנתו כי הגדיל לעשות׃

2:21b.JOE.002.021 אל תיראי אדמה גילי ושמחי כי הגדיל יהוה לעשות׃

2:22b.JOE.002.022 אל תיראו בהמות שדי כי דשאו נאות מדבר כי עץ נשא פריו תאנה וגפן נתנו חילם׃

2:23b.JOE.002.023 ובני ציון גילו ושמחו ביהוה אלהיכם כי נתן לכם את המורה לצדקה ויורד לכם גשם מורה ומלקוש בראשון׃

2:24b.JOE.002.024 ומלאו הגרנות בר והשיקו היקבים תירוש ויצהר׃

2:25b.JOE.002.025 ושלמתי לכם את השנים אשר אכל הארבה הילק והחסיל והגזם חילי הגדול אשר שלחתי בכם׃

2:26b.JOE.002.026 ואכלתם אכול ושבוע והללתם את שם יהוה אלהיכם אשר עשה עמכם להפליא ולא יבשו עמי לעולם׃

2:27b.JOE.002.027 וידעתם כי בקרב ישראל אני ואני יהוה אלהיכם ואין עוד ולא יבשו עמי לעולם׃

2:28b.JOE.002.028 והיה אחרי כן אשפוך את רוחי על כל בשר ונבאו בניכם ובנותיכם זקניכם חלמות יחלמון בחוריכם חזינות יראו׃

2:29b.JOE.002.029 וגם על העבדים ועל השפחות בימים ההמה אשפוך את רוחי׃

2:30b.JOE.002.030 ונתתי מופתים בשמים ובארץ דם ואש ותימרות עשן׃

2:31b.JOE.002.031 השמש יהפך לחשך והירח לדם לפני בוא יום יהוה הגדול והנורא׃

2:32b.JOE.002.032 והיה כל אשר יקרא בשם יהוה ימלט כי בהר ציון ובירושלם תהיה פליטה כאשר אמר יהוה ובשרידים אשר יהוה קרא׃

3

3:1b.JOE.003.001 כי הנה בימים ההמה ובעת ההיא אשר אשוב את שבות יהודה וירושלם׃

3:2b.JOE.003.002 וקבצתי את כל הגוים והורדתים אל עמק יהושפט ונשפטתי עמם שם על עמי ונחלתי ישראל אשר פזרו בגוים ואת ארצי חלקו׃

3:3b.JOE.003.003 ואל עמי ידו גורל ויתנו הילד בזונה והילדה מכרו ביין וישתו׃

3:4b.JOE.003.004 וגם מה אתם לי צר וצידון וכל גלילות פלשת הגמול אתם משלמים עלי ואם גמלים אתם עלי קל מהרה אשיב גמלכם בראשכם׃

3:5b.JOE.003.005 אשר כספי וזהבי לקחתם ומחמדי הטבים הבאתם להיכליכם׃

3:6b.JOE.003.006 ובני יהודה ובני ירושלם מכרתם לבני היונים למען הרחיקם מעל גבולם׃

3:7b.JOE.003.007 הנני מעירם מן המקום אשר מכרתם אתם שמה והשבתי גמלכם בראשכם׃

3:8b.JOE.003.008 ומכרתי את בניכם ואת בנותיכם ביד בני יהודה ומכרום לשבאים אל גוי רחוק כי יהוה דבר׃

3:9b.JOE.003.009 קראו זאת בגוים קדשו מלחמה העירו הגבורים יגשו יעלו כל אנשי המלחמה׃

3:10b.JOE.003.010 כתו אתיכם לחרבות ומזמרתיכם לרמחים החלש יאמר גבור אני׃

3:11b.JOE.003.011 עושו ובאו כל הגוים מסביב ונקבצו שמה הנחת יהוה גבוריך׃

3:12b.JOE.003.012 יעורו ויעלו הגוים אל עמק יהושפט כי שם אשב לשפט את כל הגוים מסביב׃

3:13b.JOE.003.013 שלחו מגל כי בשל קציר באו רדו כי מלאה גת השיקו היקבים כי רבה רעתם׃

3:14b.JOE.003.014 המונים המונים בעמק החרוץ כי קרוב יום יהוה בעמק החרוץ׃

3:15b.JOE.003.015 שמש וירח קדרו וכוכבים אספו נגהם׃

3:16b.JOE.003.016 ויהוה מציון ישאג ומירושלם יתן קולו ורעשו שמים וארץ ויהוה מחסה לעמו ומעוז לבני ישראל׃

3:17b.JOE.003.017 וידעתם כי אני יהוה אלהיכם שכן בציון הר קדשי והיתה ירושלם קדש וזרים לא יעברו בה עוד׃

3:18b.JOE.003.018 והיה ביום ההוא יטפו ההרים עסיס והגבעות תלכנה חלב וכל אפיקי יהודה ילכו מים ומעין מבית יהוה יצא והשקה את נחל השטים׃

3:19b.JOE.003.019 מצרים לשממה תהיה ואדום למדבר שממה תהיה מחמס בני יהודה אשר שפכו דם נקיא בארצם׃

3:20b.JOE.003.020 ויהודה לעולם תשב וירושלם לדור ודור׃

3:21b.JOE.003.021 ונקיתי דמם לא נקיתי ויהוה שכן בציון׃