Hosea (Hebrew)

1

1:1b.HOS.001.001 דבר יהוה אשר היה אל הושע בן בארי בימי עזיה יותם אחז יחזקיה מלכי יהודה ובימי ירבעם בן יואש מלך ישראל׃

1:2b.HOS.001.002 תחלת דבר יהוה בהושע ויאמר יהוה אל הושע לך קח לך אשת זנונים וילדי זנונים כי זנה תזנה הארץ מאחרי יהוה׃

1:3b.HOS.001.003 וילך ויקח את גמר בת דבלים ותהר ותלד לו בן׃

1:4b.HOS.001.004 ויאמר יהוה אליו קרא שמו יזרעאל כי עוד מעט ופקדתי את דמי יזרעאל על בית יהוא והשבתי ממלכות בית ישראל׃

1:5b.HOS.001.005 והיה ביום ההוא ושברתי את קשת ישראל בעמק יזרעאל׃

1:6b.HOS.001.006 ותהר עוד ותלד בת ויאמר לו קרא שמה לא רחמה כי לא אוסיף עוד ארחם את בית ישראל כי נשא אשא להם׃

1:7b.HOS.001.007 ואת בית יהודה ארחם והושעתים ביהוה אלהיהם ולא אושיעם בקשת ובחרב ובמלחמה בסוסים ובפרשים׃

1:8b.HOS.001.008 ותגמל את לא רחמה ותהר ותלד בן׃

1:9b.HOS.001.009 ויאמר קרא שמו לא עמי כי אתם לא עמי ואנכי לא אהיה לכם׃

1:10b.HOS.001.010 והיה מספר בני ישראל כחול הים אשר לא ימד ולא יספר והיה במקום אשר יאמר להם לא עמי אתם יאמר להם בני אל חי׃

1:11b.HOS.001.011 ונקבצו בני יהודה ובני ישראל יחדו ושמו להם ראש אחד ועלו מן הארץ כי גדול יום יזרעאל׃

2

2:1b.HOS.002.001 אמרו לאחיכם עמי ולאחותיכם רחמה׃

2:2b.HOS.002.002 ריבו באמכם ריבו כי היא לא אשתי ואנכי לא אישה ותסר זנוניה מפניה ונאפופיה מבין שדיה׃

2:3b.HOS.002.003 פן אפשיטנה ערמה והצגתיה כיום הולדה ושמתיה כמדבר ושתה כארץ ציה והמתיה בצמא׃

2:4b.HOS.002.004 ואת בניה לא ארחם כי בני זנונים המה׃

2:5b.HOS.002.005 כי זנתה אמם הבישה הורתם כי אמרה אלכה אחרי מאהבי נתני לחמי ומימי צמרי ופשתי שמני ושקויי׃

2:6b.HOS.002.006 לכן הנני שך את דרכך בסירים וגדרתי את גדרה ונתיבותיה לא תמצא׃

2:7b.HOS.002.007 ורדפה את מאהביה ולא תשיג אתם ובקשתם ולא תמצא ואמרה אלכה ואשובה אל אישי הראשון כי טוב לי אז מעתה׃

2:8b.HOS.002.008 והיא לא ידעה כי אנכי נתתי לה הדגן והתירוש והיצהר וכסף הרביתי לה וזהב עשו לבעל׃

2:9b.HOS.002.009 לכן אשוב ולקחתי דגני בעתו ותירושי במועדו והצלתי צמרי ופשתי לכסות את ערותה׃

2:10b.HOS.002.010 ועתה אגלה את נבלתה לעיני מאהביה ואיש לא יצילנה מידי׃

2:11b.HOS.002.011 והשבתי כל משושה חגה חדשה ושבתה וכל מועדה׃

2:12b.HOS.002.012 והשמתי גפנה ותאנתה אשר אמרה אתנה המה לי אשר נתנו לי מאהבי ושמתים ליער ואכלתם חית השדה׃

2:13b.HOS.002.013 ופקדתי עליה את ימי הבעלים אשר תקטיר להם ותעד נזמה וחליתה ותלך אחרי מאהביה ואתי שכחה נאם יהוה׃

2:14b.HOS.002.014 לכן הנה אנכי מפתיה והלכתיה המדבר ודברתי על לבה׃

2:15b.HOS.002.015 ונתתי לה את כרמיה משם ואת עמק עכור לפתח תקוה וענתה שמה כימי נעוריה וכיום עלתה מארץ מצרים׃

2:16b.HOS.002.016 והיה ביום ההוא נאם יהוה תקראי אישי ולא תקראי לי עוד בעלי׃

2:17b.HOS.002.017 והסרתי את שמות הבעלים מפיה ולא יזכרו עוד בשמם׃

2:18b.HOS.002.018 וכרתי להם ברית ביום ההוא עם חית השדה ועם עוף השמים ורמש האדמה וקשת וחרב ומלחמה אשבור מן הארץ והשכבתים לבטח׃

2:19b.HOS.002.019 וארשתיך לי לעולם וארשתיך לי בצדק ובמשפט ובחסד וברחמים׃

2:20b.HOS.002.020 וארשתיך לי באמונה וידעת את יהוה׃

2:21b.HOS.002.021 והיה ביום ההוא אענה נאם יהוה אענה את השמים והם יענו את הארץ׃

2:22b.HOS.002.022 והארץ תענה את הדגן ואת התירוש ואת היצהר והם יענו את יזרעאל׃

2:23b.HOS.002.023 וזרעתיה לי בארץ ורחמתי את לא רחמה ואמרתי ללא עמי עמי אתה והוא יאמר אלהי׃

3

3:1b.HOS.003.001 ויאמר יהוה אלי עוד לך אהב אשה אהבת רע ומנאפת כאהבת יהוה את בני ישראל והם פנים אל אלהים אחרים ואהבי אשישי ענבים׃

3:2b.HOS.003.002 ואכרה לי בחמשה עשר כסף וחמר שערים ולתך שערים׃

3:3b.HOS.003.003 ואמר אליה ימים רבים תשבי לי לא תזני ולא תהיי לאיש וגם אני אליך׃

3:4b.HOS.003.004 כי ימים רבים ישבו בני ישראל אין מלך ואין שר ואין זבח ואין מצבה ואין אפוד ותרפים׃

3:5b.HOS.003.005 אחר ישבו בני ישראל ובקשו את יהוה אלהיהם ואת דויד מלכם ופחדו אל יהוה ואל טובו באחרית הימים׃

4

4:1b.HOS.004.001 שמעו דבר יהוה בני ישראל כי ריב ליהוה עם יושבי הארץ כי אין אמת ואין חסד ואין דעת אלהים בארץ׃

4:2b.HOS.004.002 אלה וכחש ורצח וגנב ונאף פרצו ודמים בדמים נגעו׃

4:3b.HOS.004.003 על כן תאבל הארץ ואמלל כל יושב בה בחית השדה ובעוף השמים וגם דגי הים יאספו׃

4:4b.HOS.004.004 אך איש אל ירב ואל יוכח איש ועמך כמריבי כהן׃

4:5b.HOS.004.005 וכשלת היום וכשל גם נביא עמך לילה ודמיתי אמך׃

4:6b.HOS.004.006 נדמו עמי מבלי הדעת כי אתה הדעת מאסת ואמאסאך מכהן לי ותשכח תורת אלהיך אשכח בניך גם אני׃

4:7b.HOS.004.007 כרבם כן חטאו לי כבודם בקלון אמיר׃

4:8b.HOS.004.008 חטאת עמי יאכלו ואל עונם ישאו נפשו׃

4:9b.HOS.004.009 והיה כעם ככהן ופקדתי עליו דרכיו ומעלליו אשיב לו׃

4:10b.HOS.004.010 ואכלו ולא ישבעו הזנו ולא יפרצו כי את יהוה עזבו לשמר׃

4:11b.HOS.004.011 זנות ויין ותירוש יקח לב׃

4:12b.HOS.004.012 עמי בעצו ישאל ומקלו יגיד לו כי רוח זנונים התעה ויזנו מתחת אלהיהם׃

4:13b.HOS.004.013 על ראשי ההרים יזבחו ועל הגבעות יקטרו תחת אלון ולבנה ואלה כי טוב צלה על כן תזנינה בנותיכם וכלותיכם תנאפנה׃

4:14b.HOS.004.014 לא אפקוד על בנותיכם כי תזנינה ועל כלותיכם כי תנאפנה כי הם עם הזנות יפרדו ועם הקדשות יזבחו ועם לא יבין ילבט׃

4:15b.HOS.004.015 אם זנה אתה ישראל אל יאשם יהודה ואל תבאו הגלגל ואל תעלו בית און ואל תשבעו חי יהוה׃

4:16b.HOS.004.016 כי כפרה סררה סרר ישראל עתה ירעם יהוה ככבש במרחב׃

4:17b.HOS.004.017 חבור עצבים אפרים הנח לו׃

4:18b.HOS.004.018 סר סבאם הזנה הזנו אהבו הבו קלון מגניה׃

4:19b.HOS.004.019 צרר רוח אותה בכנפיה ויבשו מזבחותם׃

5

5:1b.HOS.005.001 שמעו זאת הכהנים והקשיבו בית ישראל ובית המלך האזינו כי לכם המשפט כי פח הייתם למצפה ורשת פרושה על תבור׃

5:2b.HOS.005.002 ושחטה שטים העמיקו ואני מוסר לכלם׃

5:3b.HOS.005.003 אני ידעתי אפרים וישראל לא נכחד ממני כי עתה הזנית אפרים נטמא ישראל׃

5:4b.HOS.005.004 לא יתנו מעלליהם לשוב אל אלהיהם כי רוח זנונים בקרבם ואת יהוה לא ידעו׃

5:5b.HOS.005.005 וענה גאון ישראל בפניו וישראל ואפרים יכשלו בעונם כשל גם יהודה עמם׃

5:6b.HOS.005.006 בצאנם ובבקרם ילכו לבקש את יהוה ולא ימצאו חלץ מהם׃

5:7b.HOS.005.007 ביהוה בגדו כי בנים זרים ילדו עתה יאכלם חדש את חלקיהם׃

5:8b.HOS.005.008 תקעו שופר בגבעה חצצרה ברמה הריעו בית און אחריך בנימין׃

5:9b.HOS.005.009 אפרים לשמה תהיה ביום תוכחה בשבטי ישראל הודעתי נאמנה׃

5:10b.HOS.005.010 היו שרי יהודה כמסיגי גבול עליהם אשפוך כמים עברתי׃

5:11b.HOS.005.011 עשוק אפרים רצוץ משפט כי הואיל הלך אחרי צו׃

5:12b.HOS.005.012 ואני כעש לאפרים וכרקב לבית יהודה׃

5:13b.HOS.005.013 וירא אפרים את חליו ויהודה את מזרו וילך אפרים אל אשור וישלח אל מלך ירב והוא לא יוכל לרפא לכם ולא יגהה מכם מזור׃

5:14b.HOS.005.014 כי אנכי כשחל לאפרים וככפיר לבית יהודה אני אני אטרף ואלך אשא ואין מציל׃

5:15b.HOS.005.015 אלך אשובה אל מקומי עד אשר יאשמו ובקשו פני בצר להם ישחרנני׃

6

6:1b.HOS.006.001 לכו ונשובה אל יהוה כי הוא טרף וירפאנו יך ויחבשנו׃

6:2b.HOS.006.002 יחינו מימים ביום השלישי יקמנו ונחיה לפניו׃

6:3b.HOS.006.003 ונדעה נרדפה לדעת את יהוה כשחר נכון מצאו ויבוא כגשם לנו כמלקוש יורה ארץ׃

6:4b.HOS.006.004 מה אעשה לך אפרים מה אעשה לך יהודה וחסדכם כענן בקר וכטל משכים הלך׃

6:5b.HOS.006.005 על כן חצבתי בנביאים הרגתים באמרי פי ומשפטיך אור יצא׃

6:6b.HOS.006.006 כי חסד חפצתי ולא זבח ודעת אלהים מעלות׃

6:7b.HOS.006.007 והמה כאדם עברו ברית שם בגדו בי׃

6:8b.HOS.006.008 גלעד קרית פעלי און עקבה מדם׃

6:9b.HOS.006.009 וכחכי איש גדודים חבר כהנים דרך ירצחו שכמה כי זמה עשו׃

6:10b.HOS.006.010 בבית ישראל ראיתי שעריריה שם זנות לאפרים נטמא ישראל׃

6:11b.HOS.006.011 גם יהודה שת קציר לך בשובי שבות עמי׃

7

7:1b.HOS.007.001 כרפאי לישראל ונגלה עון אפרים ורעות שמרון כי פעלו שקר וגנב יבוא פשט גדוד בחוץ׃

7:2b.HOS.007.002 ובל יאמרו ללבבם כל רעתם זכרתי עתה סבבום מעלליהם נגד פני היו׃

7:3b.HOS.007.003 ברעתם ישמחו מלך ובכחשיהם שרים׃

7:4b.HOS.007.004 כלם מנאפים כמו תנור בערה מאפה ישבות מעיר מלוש בצק עד חמצתו׃

7:5b.HOS.007.005 יום מלכנו החלו שרים חמת מיין משך ידו את לצצים׃

7:6b.HOS.007.006 כי קרבו כתנור לבם בארבם כל הלילה ישן אפהם בקר הוא בער כאש להבה׃

7:7b.HOS.007.007 כלם יחמו כתנור ואכלו את שפטיהם כל מלכיהם נפלו אין קרא בהם אלי׃

7:8b.HOS.007.008 אפרים בעמים הוא יתבולל אפרים היה עגה בלי הפוכה׃

7:9b.HOS.007.009 אכלו זרים כחו והוא לא ידע גם שיבה זרקה בו והוא לא ידע׃

7:10b.HOS.007.010 וענה גאון ישראל בפניו ולא שבו אל יהוה אלהיהם ולא בקשהו בכל זאת׃

7:11b.HOS.007.011 ויהי אפרים כיונה פותה אין לב מצרים קראו אשור הלכו׃

7:12b.HOS.007.012 כאשר ילכו אפרוש עליהם רשתי כעוף השמים אורידם איסרם כשמע לעדתם׃

7:13b.HOS.007.013 אוי להם כי נדדו ממני שד להם כי פשעו בי ואנכי אפדם והמה דברו עלי כזבים׃

7:14b.HOS.007.014 ולא זעקו אלי בלבם כי יילילו על משכבותם על דגן ותירוש יתגוררו יסורו בי׃

7:15b.HOS.007.015 ואני יסרתי חזקתי זרועתם ואלי יחשבו רע׃

7:16b.HOS.007.016 ישובו לא על היו כקשת רמיה יפלו בחרב שריהם מזעם לשונם זו לעגם בארץ מצרים׃

8

8:1b.HOS.008.001 אל חכך שפר כנשר על בית יהוה יען עברו בריתי ועל תורתי פשעו׃

8:2b.HOS.008.002 לי יזעקו אלהי ידענוך ישראל׃

8:3b.HOS.008.003 זנח ישראל טוב אויב ירדפו׃

8:4b.HOS.008.004 הם המליכו ולא ממני השירו ולא ידעתי כספם וזהבם עשו להם עצבים למען יכרת׃

8:5b.HOS.008.005 זנח עגלך שמרון חרה אפי בם עד מתי לא יוכלו נקין׃

8:6b.HOS.008.006 כי מישראל והוא חרש עשהו ולא אלהים הוא כי שבבים יהיה עגל שמרון׃

8:7b.HOS.008.007 כי רוח יזרעו וסופתה יקצרו קמה אין לו צמח בלי יעשה קמח אולי יעשה זרים יבלעהו׃

8:8b.HOS.008.008 נבלע ישראל עתה היו בגוים ככלי אין חפץ בו׃

8:9b.HOS.008.009 כי המה עלו אשור פרא בודד לו אפרים התנו אהבים׃

8:10b.HOS.008.010 גם כי יתנו בגוים עתה אקבצם ויחלו מעט ממשא מלך שרים׃

8:11b.HOS.008.011 כי הרבה אפרים מזבחת לחטא היו לו מזבחות לחטא׃

8:12b.HOS.008.012 אכתוב לו רבו תורתי כמו זר נחשבו׃

8:13b.HOS.008.013 זבחי הבהבי יזבחו בשר ויאכלו יהוה לא רצם עתה יזכר עונם ויפקד חטאותם המה מצרים ישובו׃

8:14b.HOS.008.014 וישכח ישראל את עשהו ויבן היכלות ויהודה הרבה ערים בצרות ושלחתי אש בעריו ואכלה ארמנתיה׃

9

9:1b.HOS.009.001 אל תשמח ישראל אל גיל כעמים כי זנית מעל אלהיך אהבת אתנן על כל גרנות דגן׃

9:2b.HOS.009.002 גרן ויקב לא ירעם ותירוש יכחש בה׃

9:3b.HOS.009.003 לא ישבו בארץ יהוה ושב אפרים מצרים ובאשור טמא יאכלו׃

9:4b.HOS.009.004 לא יסכו ליהוה יין ולא יערבו לו זבחיהם כלחם אונים להם כל אכליו יטמאו כי לחמם לנפשם לא יבוא בית יהוה׃

9:5b.HOS.009.005 מה תעשו ליום מועד וליום חג יהוה׃

9:6b.HOS.009.006 כי הנה הלכו משד מצרים תקבצם מף תקברם מחמד לכספם קמוש יירשם חוח באהליהם׃

9:7b.HOS.009.007 באו ימי הפקדה באו ימי השלם ידעו ישראל אויל הנביא משגע איש הרוח על רב עונך ורבה משטמה׃

9:8b.HOS.009.008 צפה אפרים עם אלהי נביא פח יקוש על כל דרכיו משטמה בבית אלהיו׃

9:9b.HOS.009.009 העמיקו שחתו כימי הגבעה יזכור עונם יפקוד חטאתם׃

9:10b.HOS.009.010 כענבים במדבר מצאתי ישראל כבכורה בתאנה בראשיתה ראיתי אבותיכם המה באו בעל פעור וינזרו לבשת ויהיו שקוצים כאהבם׃

9:11b.HOS.009.011 אפרים כעוף יתעופף כבודם מלדה ומבטן ומהריון׃

9:12b.HOS.009.012 כי אם יגדלו את בניהם ושכלתים מאדם כי גם אוי להם בשורי מהם׃

9:13b.HOS.009.013 אפרים כאשר ראיתי לצור שתולה בנוה ואפרים להוציא אל הורג בניו׃

9:14b.HOS.009.014 תן להם יהוה מה תתן תן להם רחם משכיל ושדים צמקים׃

9:15b.HOS.009.015 כל רעתם בגלגל כי שם שנאתים על רע מעלליהם מביתי אגרשם לא אוסף אהבתם כל שריהם סררים׃

9:16b.HOS.009.016 הכה אפרים שרשם יבש פרי בלי יעשון גם כי ילדון והמתי מחמדי בטנם׃

9:17b.HOS.009.017 ימאסם אלהי כי לא שמעו לו ויהיו נדדים בגוים׃

10

10:1b.HOS.010.001 גפן בוקק ישראל פרי ישוה לו כרב לפריו הרבה למזבחות כטוב לארצו היטיבו מצבות׃

10:2b.HOS.010.002 חלק לבם עתה יאשמו הוא יערף מזבחותם ישדד מצבותם׃

10:3b.HOS.010.003 כי עתה יאמרו אין מלך לנו כי לא יראנו את יהוה והמלך מה יעשה לנו׃

10:4b.HOS.010.004 דברו דברים אלות שוא כרת ברית ופרח כראש משפט על תלמי שדי׃

10:5b.HOS.010.005 לעגלות בית און יגורו שכן שמרון כי אבל עליו עמו וכמריו עליו יגילו על כבודו כי גלה ממנו׃

10:6b.HOS.010.006 גם אותו לאשור יובל מנחה למלך ירב בשנה אפרים יקח ויבוש ישראל מעצתו׃

10:7b.HOS.010.007 נדמה שמרון מלכה כקצף על פני מים׃

10:8b.HOS.010.008 ונשמדו במות און חטאת ישראל קוץ ודרדר יעלה על מזבחותם ואמרו להרים כסונו ולגבעות נפלו עלינו׃

10:9b.HOS.010.009 מימי הגבעה חטאת ישראל שם עמדו לא תשיגם בגבעה מלחמה על בני עלוה׃

10:10b.HOS.010.010 באותי ואסרם ואספו עליהם עמים באסרם לשתי עינתם׃

10:11b.HOS.010.011 ואפרים עגלה מלמדה אהבתי לדוש ואני עברתי על טוב צוארה ארכיב אפרים יחרוש יהודה ישדד לו יעקב׃

10:12b.HOS.010.012 זרעו לכם לצדקה קצרו לפי חסד נירו לכם ניר ועת לדרוש את יהוה עד יבוא וירה צדק לכם׃

10:13b.HOS.010.013 חרשתם רשע עולתה קצרתם אכלתם פרי כחש כי בטחת בדרכך ברב גבוריך׃

10:14b.HOS.010.014 וקאם שאון בעמך וכל מבצריך יושד כשד שלמן בית ארבאל ביום מלחמה אם על בנים רטשה׃

10:15b.HOS.010.015 ככה עשה לכם בית אל מפני רעת רעתכם בשחר נדמה נדמה מלך ישראל׃

11

11:1b.HOS.011.001 כי נער ישראל ואהבהו וממצרים קראתי לבני׃

11:2b.HOS.011.002 קראו להם כן הלכו מפניהם לבעלים יזבחו ולפסלים יקטרון׃

11:3b.HOS.011.003 ואנכי תרגלתי לאפרים קחם על זרועתיו ולא ידעו כי רפאתים׃

11:4b.HOS.011.004 בחבלי אדם אמשכם בעבתות אהבה ואהיה להם כמרימי על על לחיהם ואט אליו אוכיל׃

11:5b.HOS.011.005 לא ישוב אל ארץ מצרים ואשור הוא מלכו כי מאנו לשוב׃

11:6b.HOS.011.006 וחלה חרב בעריו וכלתה בדיו ואכלה ממעצותיהם׃

11:7b.HOS.011.007 ועמי תלואים למשובתי ואל על יקראהו יחד לא ירומם׃

11:8b.HOS.011.008 איך אתנך אפרים אמגנך ישראל איך אתנך כאדמה אשימך כצבאים נהפך עלי לבי יחד נכמרו נחומי׃

11:9b.HOS.011.009 לא אעשה חרון אפי לא אשוב לשחת אפרים כי אל אנכי ולא איש בקרבך קדוש ולא אבוא בעיר׃

11:10b.HOS.011.010 אחרי יהוה ילכו כאריה ישאג כי הוא ישאג ויחרדו בנים מים׃

11:11b.HOS.011.011 יחרדו כצפור ממצרים וכיונה מארץ אשור והושבתים על בתיהם נאם יהוה׃

11:12b.HOS.011.012 סבבני בכחש אפרים ובמרמה בית ישראל ויהודה עד רד עם אל ועם קדושים נאמן׃

12

12:1b.HOS.012.001 אפרים רעה רוח ורדף קדים כל היום כזב ושד ירבה וברית עם אשור יכרתו ושמן למצרים יובל׃

12:2b.HOS.012.002 וריב ליהוה עם יהודה ולפקד על יעקב כדרכיו כמעלליו ישיב לו׃

12:3b.HOS.012.003 בבטן עקב את אחיו ובאונו שרה את אלהים׃

12:4b.HOS.012.004 וישר אל מלאך ויכל בכה ויתחנן לו בית אל ימצאנו ושם ידבר עמנו׃

12:5b.HOS.012.005 ויהוה אלהי הצבאות יהוה זכרו׃

12:6b.HOS.012.006 ואתה באלהיך תשוב חסד ומשפט שמר וקוה אל אלהיך תמיד׃

12:7b.HOS.012.007 כנען בידו מאזני מרמה לעשק אהב׃

12:8b.HOS.012.008 ויאמר אפרים אך עשרתי מצאתי און לי כל יגיעי לא ימצאו לי עון אשר חטא׃

12:9b.HOS.012.009 ואנכי יהוה אלהיך מארץ מצרים עד אושיבך באהלים כימי מועד׃

12:10b.HOS.012.010 ודברתי על הנביאים ואנכי חזון הרביתי וביד הנביאים אדמה׃

12:11b.HOS.012.011 אם גלעד און אך שוא היו בגלגל שורים זבחו גם מזבחותם כגלים על תלמי שדי׃

12:12b.HOS.012.012 ויברח יעקב שדה ארם ויעבד ישראל באשה ובאשה שמר׃

12:13b.HOS.012.013 ובנביא העלה יהוה את ישראל ממצרים ובנביא נשמר׃

12:14b.HOS.012.014 הכעיס אפרים תמרורים ודמיו עליו יטוש וחרפתו ישיב לו אדניו׃

13

13:1b.HOS.013.001 כדבר אפרים רתת נשא הוא בישראל ויאשם בבעל וימת׃

13:2b.HOS.013.002 ועתה יוספו לחטא ויעשו להם מסכה מכספם כתבונם עצבים מעשה חרשים כלה להם הם אמרים זבחי אדם עגלים ישקון׃

13:3b.HOS.013.003 לכן יהיו כענן בקר וכטל משכים הלך כמץ יסער מגרן וכעשן מארבה׃

13:4b.HOS.013.004 ואנכי יהוה אלהיך מארץ מצרים ואלהים זולתי לא תדע ומושיע אין בלתי׃

13:5b.HOS.013.005 אני ידעתיך במדבר בארץ תלאבות׃

13:6b.HOS.013.006 כמרעיתם וישבעו שבעו וירם לבם על כן שכחוני׃

13:7b.HOS.013.007 ואהי להם כמו שחל כנמר על דרך אשור׃

13:8b.HOS.013.008 אפגשם כדב שכול ואקרע סגור לבם ואכלם שם כלביא חית השדה תבקעם׃

13:9b.HOS.013.009 שחתך ישראל כי בי בעזרך׃

13:10b.HOS.013.010 אהי מלכך אפוא ויושיעך בכל עריך ושפטיך אשר אמרת תנה לי מלך ושרים׃

13:11b.HOS.013.011 אתן לך מלך באפי ואקח בעברתי׃

13:12b.HOS.013.012 צרור עון אפרים צפונה חטאתו׃

13:13b.HOS.013.013 חבלי יולדה יבאו לו הוא בן לא חכם כי עת לא יעמד במשבר בנים׃

13:14b.HOS.013.014 מיד שאול אפדם ממות אגאלם אהי דבריך מות אהי קטבך שאול נחם יסתר מעיני׃

13:15b.HOS.013.015 כי הוא בין אחים יפריא יבוא קדים רוח יהוה ממדבר עלה ויבוש מקורו ויחרב מעינו הוא ישסה אוצר כל כלי חמדה׃

13:16b.HOS.013.016 תאשם שמרון כי מרתה באלהיה בחרב יפלו עלליהם ירטשו והריותיו יבקעו׃

14

14:1b.HOS.014.001 שובה ישראל עד יהוה אלהיך כי כשלת בעונך׃

14:2b.HOS.014.002 קחו עמכם דברים ושובו אל יהוה אמרו אליו כל תשא עון וקח טוב ונשלמה פרים שפתינו׃

14:3b.HOS.014.003 אשור לא יושיענו על סוס לא נרכב ולא נאמר עוד אלהינו למעשה ידינו אשר בך ירחם יתום׃

14:4b.HOS.014.004 ארפא משובתם אהבם נדבה כי שב אפי ממנו׃

14:5b.HOS.014.005 אהיה כטל לישראל יפרח כשושנה ויך שרשיו כלבנון׃

14:6b.HOS.014.006 ילכו ינקותיו ויהי כזית הודו וריח לו כלבנון׃

14:7b.HOS.014.007 ישבו ישבי בצלו יחיו דגן ויפרחו כגפן זכרו כיין לבנון׃

14:8b.HOS.014.008 אפרים מה לי עוד לעצבים אני עניתי ואשורנו אני כברוש רענן ממני פריך נמצא׃

14:9b.HOS.014.009 מי חכם ויבן אלה נבון וידעם כי ישרים דרכי יהוה וצדקים ילכו בם ופשעים יכשלו בם׃