Isaiah (Hebrew)

1

1:1b.ISA.001.001 חזון ישעיהו בן אמוץ אשר חזה על יהודה וירושלם בימי עזיהו יותם אחז יחזקיהו מלכי יהודה׃

1:2b.ISA.001.002 שמעו שמים והאזיני ארץ כי יהוה דבר בנים גדלתי ורוממתי והם פשעו בי׃

1:3b.ISA.001.003 ידע שור קנהו וחמור אבוס בעליו ישראל לא ידע עמי לא התבונן׃

1:4b.ISA.001.004 הוי גוי חטא עם כבד עון זרע מרעים בנים משחיתים עזבו את יהוה נאצו את קדוש ישראל נזרו אחור׃

1:5b.ISA.001.005 על מה תכו עוד תוסיפו סרה כל ראש לחלי וכל לבב דוי׃

1:6b.ISA.001.006 מכף רגל ועד ראש אין בו מתם פצע וחבורה ומכה טריה לא זרו ולא חבשו ולא רככה בשמן׃

1:7b.ISA.001.007 ארצכם שממה עריכם שרפות אש אדמתכם לנגדכם זרים אכלים אתה ושממה כמהפכת זרים׃

1:8b.ISA.001.008 ונותרה בת ציון כסכה בכרם כמלונה במקשה כעיר נצורה׃

1:9b.ISA.001.009 לולי יהוה צבאות הותיר לנו שריד כמעט כסדם היינו לעמרה דמינו׃

1:10b.ISA.001.010 שמעו דבר יהוה קציני סדם האזינו תורת אלהינו עם עמרה׃

1:11b.ISA.001.011 למה לי רב זבחיכם יאמר יהוה שבעתי עלות אילים וחלב מריאים ודם פרים וכבשים ועתודים לא חפצתי׃

1:12b.ISA.001.012 כי תבאו לראות פני מי בקש זאת מידכם רמס חצרי׃

1:13b.ISA.001.013 לא תוסיפו הביא מנחת שוא קטרת תועבה היא לי חדש ושבת קרא מקרא לא אוכל און ועצרה׃

1:14b.ISA.001.014 חדשיכם ומועדיכם שנאה נפשי היו עלי לטרח נלאיתי נשא׃

1:15b.ISA.001.015 ובפרשכם כפיכם אעלים עיני מכם גם כי תרבו תפלה אינני שמע ידיכם דמים מלאו׃

1:16b.ISA.001.016 רחצו הזכו הסירו רע מעלליכם מנגד עיני חדלו הרע׃

1:17b.ISA.001.017 למדו היטב דרשו משפט אשרו חמוץ שפטו יתום ריבו אלמנה׃

1:18b.ISA.001.018 לכו נא ונוכחה יאמר יהוה אם יהיו חטאיכם כשנים כשלג ילבינו אם יאדימו כתולע כצמר יהיו׃

1:19b.ISA.001.019 אם תאבו ושמעתם טוב הארץ תאכלו׃

1:20b.ISA.001.020 ואם תמאנו ומריתם חרב תאכלו כי פי יהוה דבר׃

1:21b.ISA.001.021 איכה היתה לזונה קריה נאמנה מלאתי משפט צדק ילין בה ועתה מרצחים׃

1:22b.ISA.001.022 כספך היה לסיגים סבאך מהול במים׃

1:23b.ISA.001.023 שריך סוררים וחברי גנבים כלו אהב שחד ורדף שלמנים יתום לא ישפטו וריב אלמנה לא יבוא אליהם׃

1:24b.ISA.001.024 לכן נאם האדון יהוה צבאות אביר ישראל הוי אנחם מצרי ואנקמה מאויבי׃

1:25b.ISA.001.025 ואשיבה ידי עליך ואצרף כבר סיגיך ואסירה כל בדיליך׃

1:26b.ISA.001.026 ואשיבה שפטיך כבראשנה ויעציך כבתחלה אחרי כן יקרא לך עיר הצדק קריה נאמנה׃

1:27b.ISA.001.027 ציון במשפט תפדה ושביה בצדקה׃

1:28b.ISA.001.028 ושבר פשעים וחטאים יחדו ועזבי יהוה יכלו׃

1:29b.ISA.001.029 כי יבשו מאילים אשר חמדתם ותחפרו מהגנות אשר בחרתם׃

1:30b.ISA.001.030 כי תהיו כאלה נבלת עלה וכגנה אשר מים אין לה׃

1:31b.ISA.001.031 והיה החסן לנערת ופעלו לניצוץ ובערו שניהם יחדו ואין מכבה׃

2

2:1b.ISA.002.001 הדבר אשר חזה ישעיהו בן אמוץ על יהודה וירושלם׃

2:2b.ISA.002.002 והיה באחרית הימים נכון יהיה הר בית יהוה בראש ההרים ונשא מגבעות ונהרו אליו כל הגוים׃

2:3b.ISA.002.003 והלכו עמים רבים ואמרו לכו ונעלה אל הר יהוה אל בית אלהי יעקב וירנו מדרכיו ונלכה בארחתיו כי מציון תצא תורה ודבר יהוה מירושלם׃

2:4b.ISA.002.004 ושפט בין הגוים והוכיח לעמים רבים וכתתו חרבותם לאתים וחניתותיהם למזמרות לא ישא גוי אל גוי חרב ולא ילמדו עוד מלחמה׃

2:5b.ISA.002.005 בית יעקב לכו ונלכה באור יהוה׃

2:6b.ISA.002.006 כי נטשתה עמך בית יעקב כי מלאו מקדם ועננים כפלשתים ובילדי נכרים ישפיקו׃

2:7b.ISA.002.007 ותמלא ארצו כסף וזהב ואין קצה לאצרתיו ותמלא ארצו סוסים ואין קצה למרכבתיו׃

2:8b.ISA.002.008 ותמלא ארצו אלילים למעשה ידיו ישתחוו לאשר עשו אצבעתיו׃

2:9b.ISA.002.009 וישח אדם וישפל איש ואל תשא להם׃

2:10b.ISA.002.010 בוא בצור והטמן בעפר מפני פחד יהוה ומהדר גאנו׃

2:11b.ISA.002.011 עיני גבהות אדם שפל ושח רום אנשים ונשגב יהוה לבדו ביום ההוא׃

2:12b.ISA.002.012 כי יום ליהוה צבאות על כל גאה ורם ועל כל נשא ושפל׃

2:13b.ISA.002.013 ועל כל ארזי הלבנון הרמים והנשאים ועל כל אלוני הבשן׃

2:14b.ISA.002.014 ועל כל ההרים הרמים ועל כל הגבעות הנשאות׃

2:15b.ISA.002.015 ועל כל מגדל גבה ועל כל חומה בצורה׃

2:16b.ISA.002.016 ועל כל אניות תרשיש ועל כל שכיות החמדה׃

2:17b.ISA.002.017 ושח גבהות האדם ושפל רום אנשים ונשגב יהוה לבדו ביום ההוא׃

2:18b.ISA.002.018 והאלילים כליל יחלף׃

2:19b.ISA.002.019 ובאו במערות צרים ובמחלות עפר מפני פחד יהוה ומהדר גאונו בקומו לערץ הארץ׃

2:20b.ISA.002.020 ביום ההוא ישליך האדם את אלילי כספו ואת אלילי זהבו אשר עשו לו להשתחות לחפר פרות ולעטלפים׃

2:21b.ISA.002.021 לבוא בנקרות הצרים ובסעפי הסלעים מפני פחד יהוה ומהדר גאונו בקומו לערץ הארץ׃

2:22b.ISA.002.022 חדלו לכם מן האדם אשר נשמה באפו כי במה נחשב הוא׃

3

3:1b.ISA.003.001 כי הנה האדון יהוה צבאות מסיר מירושלם ומיהודה משען ומשענה כל משען לחם וכל משען מים׃

3:2b.ISA.003.002 גבור ואיש מלחמה שופט ונביא וקסם וזקן׃

3:3b.ISA.003.003 שר חמשים ונשוא פנים ויועץ וחכם חרשים ונבון לחש׃

3:4b.ISA.003.004 ונתתי נערים שריהם ותעלולים ימשלו בם׃

3:5b.ISA.003.005 ונגש העם איש באיש ואיש ברעהו ירהבו הנער בזקן והנקלה בנכבד׃

3:6b.ISA.003.006 כי יתפש איש באחיו בית אביו שמלה לכה קצין תהיה לנו והמכשלה הזאת תחת ידך׃

3:7b.ISA.003.007 ישא ביום ההוא לאמר לא אהיה חבש ובביתי אין לחם ואין שמלה לא תשימני קצין עם׃

3:8b.ISA.003.008 כי כשלה ירושלם ויהודה נפל כי לשונם ומעלליהם אל יהוה למרות עני כבודו׃

3:9b.ISA.003.009 הכרת פניהם ענתה בם וחטאתם כסדם הגידו לא כחדו אוי לנפשם כי גמלו להם רעה׃

3:10b.ISA.003.010 אמרו צדיק כי טוב כי פרי מעלליהם יאכלו׃

3:11b.ISA.003.011 אוי לרשע רע כי גמול ידיו יעשה לו׃

3:12b.ISA.003.012 עמי נגשיו מעולל ונשים משלו בו עמי מאשריך מתעים ודרך ארחתיך בלעו׃

3:13b.ISA.003.013 נצב לריב יהוה ועמד לדין עמים׃

3:14b.ISA.003.014 יהוה במשפט יבוא עם זקני עמו ושריו ואתם בערתם הכרם גזלת העני בבתיכם׃

3:15b.ISA.003.015 מלכם תדכאו עמי ופני עניים תטחנו נאם אדני יהוה צבאות׃

3:16b.ISA.003.016 ויאמר יהוה יען כי גבהו בנות ציון ותלכנה נטוות גרון ומשקרות עינים הלוך וטפוף תלכנה וברגליהם תעכסנה׃

3:17b.ISA.003.017 ושפח אדני קדקד בנות ציון ויהוה פתהן יערה׃

3:18b.ISA.003.018 ביום ההוא יסיר אדני את תפארת העכסים והשביסים והשהרנים׃

3:19b.ISA.003.019 הנטפות והשרות והרעלות׃

3:20b.ISA.003.020 הפארים והצעדות והקשרים ובתי הנפש והלחשים׃

3:21b.ISA.003.021 הטבעות ונזמי האף׃

3:22b.ISA.003.022 המחלצות והמעטפות והמטפחות והחריטים׃

3:23b.ISA.003.023 הגלינים והסדינים והצניפות והרדידים׃

3:24b.ISA.003.024 והיה תחת בשם מק יהיה ותחת חגורה נקפה ותחת מעשה מקשה קרחה ותחת פתיגיל מחגרת שק כי תחת יפי׃

3:25b.ISA.003.025 מתיך בחרב יפלו וגבורתך במלחמה׃

3:26b.ISA.003.026 ואנו ואבלו פתחיה ונקתה לארץ תשב׃

4

4:1b.ISA.004.001 והחזיקו שבע נשים באיש אחד ביום ההוא לאמר לחמנו נאכל ושמלתנו נלבש רק יקרא שמך עלינו אסף חרפתנו׃

4:2b.ISA.004.002 ביום ההוא יהיה צמח יהוה לצבי ולכבוד ופרי הארץ לגאון ולתפארת לפליטת ישראל׃

4:3b.ISA.004.003 והיה הנשאר בציון והנותר בירושלם קדוש יאמר לו כל הכתוב לחיים בירושלם׃

4:4b.ISA.004.004 אם רחץ אדני את צאת בנות ציון ואת דמי ירושלם ידיח מקרבה ברוח משפט וברוח בער׃

4:5b.ISA.004.005 וברא יהוה על כל מכון הר ציון ועל מקראה ענן יומם ועשן ונגה אש להבה לילה כי על כל כבוד חפה׃

4:6b.ISA.004.006 וסכה תהיה לצל יומם מחרב ולמחסה ולמסתור מזרם וממטר׃

5

5:1b.ISA.005.001 אשירה נא לידידי שירת דודי לכרמו כרם היה לידידי בקרן בן שמן׃

5:2b.ISA.005.002 ויעזקהו ויסקלהו ויטעהו שרק ויבן מגדל בתוכו וגם יקב חצב בו ויקו לעשות ענבים ויעש באשים׃

5:3b.ISA.005.003 ועתה יושב ירושלם ואיש יהודה שפטו נא ביני ובין כרמי׃

5:4b.ISA.005.004 מה לעשות עוד לכרמי ולא עשיתי בו מדוע קויתי לעשות ענבים ויעש באשים׃

5:5b.ISA.005.005 ועתה אודיעה נא אתכם את אשר אני עשה לכרמי הסר משוכתו והיה לבער פרץ גדרו והיה למרמס׃

5:6b.ISA.005.006 ואשיתהו בתה לא יזמר ולא יעדר ועלה שמיר ושית ועל העבים אצוה מהמטיר עליו מטר׃

5:7b.ISA.005.007 כי כרם יהוה צבאות בית ישראל ואיש יהודה נטע שעשועיו ויקו למשפט והנה משפח לצדקה והנה צעקה׃

5:8b.ISA.005.008 הוי מגיעי בית בבית שדה בשדה יקריבו עד אפס מקום והושבתם לבדכם בקרב הארץ׃

5:9b.ISA.005.009 באזני יהוה צבאות אם לא בתים רבים לשמה יהיו גדלים וטובים מאין יושב׃

5:10b.ISA.005.010 כי עשרת צמדי כרם יעשו בת אחת וזרע חמר יעשה איפה׃

5:11b.ISA.005.011 הוי משכימי בבקר שכר ירדפו מאחרי בנשף יין ידליקם׃

5:12b.ISA.005.012 והיה כנור ונבל תף וחליל ויין משתיהם ואת פעל יהוה לא יביטו ומעשה ידיו לא ראו׃

5:13b.ISA.005.013 לכן גלה עמי מבלי דעת וכבודו מתי רעב והמונו צחה צמא׃

5:14b.ISA.005.014 לכן הרחיבה שאול נפשה ופערה פיה לבלי חק וירד הדרה והמונה ושאונה ועלז בה׃

5:15b.ISA.005.015 וישח אדם וישפל איש ועיני גבהים תשפלנה׃

5:16b.ISA.005.016 ויגבה יהוה צבאות במשפט והאל הקדוש נקדש בצדקה׃

5:17b.ISA.005.017 ורעו כבשים כדברם וחרבות מחים גרים יאכלו׃

5:18b.ISA.005.018 הוי משכי העון בחבלי השוא וכעבות העגלה חטאה׃

5:19b.ISA.005.019 האמרים ימהר יחישה מעשהו למען נראה ותקרב ותבואה עצת קדוש ישראל ונדעה׃

5:20b.ISA.005.020 הוי האמרים לרע טוב ולטוב רע שמים חשך לאור ואור לחשך שמים מר למתוק ומתוק למר׃

5:21b.ISA.005.021 הוי חכמים בעיניהם ונגד פניהם נבנים׃

5:22b.ISA.005.022 הוי גבורים לשתות יין ואנשי חיל למסך שכר׃

5:23b.ISA.005.023 מצדיקי רשע עקב שחד וצדקת צדיקים יסירו ממנו׃

5:24b.ISA.005.024 לכן כאכל קש לשון אש וחשש להבה ירפה שרשם כמק יהיה ופרחם כאבק יעלה כי מאסו את תורת יהוה צבאות ואת אמרת קדוש ישראל נאצו׃

5:25b.ISA.005.025 על כן חרה אף יהוה בעמו ויט ידו עליו ויכהו וירגזו ההרים ותהי נבלתם כסוחה בקרב חוצות בכל זאת לא שב אפו ועוד ידו נטויה׃

5:26b.ISA.005.026 ונשא נס לגוים מרחוק ושרק לו מקצה הארץ והנה מהרה קל יבוא׃

5:27b.ISA.005.027 אין עיף ואין כושל בו לא ינום ולא יישן ולא נפתח אזור חלציו ולא נתק שרוך נעליו׃

5:28b.ISA.005.028 אשר חציו שנונים וכל קשתתיו דרכות פרסות סוסיו כצר נחשבו וגלגליו כסופה׃

5:29b.ISA.005.029 שאגה לו כלביא ושאג ככפירים וינהם ויאחז טרף ויפליט ואין מציל׃

5:30b.ISA.005.030 וינהם עליו ביום ההוא כנהמת ים ונבט לארץ והנה חשך צר ואור חשך בעריפיה׃

6

6:1b.ISA.006.001 בשנת מות המלך עזיהו ואראה את אדני ישב על כסא רם ונשא ושוליו מלאים את ההיכל׃

6:2b.ISA.006.002 שרפים עמדים ממעל לו שש כנפים שש כנפים לאחד בשתים יכסה פניו ובשתים יכסה רגליו ובשתים יעופף׃

6:3b.ISA.006.003 וקרא זה אל זה ואמר קדוש קדוש קדוש יהוה צבאות מלא כל הארץ כבודו׃

6:4b.ISA.006.004 וינעו אמות הספים מקול הקורא והבית ימלא עשן׃

6:5b.ISA.006.005 ואמר אוי לי כי נדמיתי כי איש טמא שפתים אנכי ובתוך עם טמא שפתים אנכי יושב כי את המלך יהוה צבאות ראו עיני׃

6:6b.ISA.006.006 ויעף אלי אחד מן השרפים ובידו רצפה במלקחים לקח מעל המזבח׃

6:7b.ISA.006.007 ויגע על פי ויאמר הנה נגע זה על שפתיך וסר עונך וחטאתך תכפר׃

6:8b.ISA.006.008 ואשמע את קול אדני אמר את מי אשלח ומי ילך לנו ואמר הנני שלחני׃

6:9b.ISA.006.009 ויאמר לך ואמרת לעם הזה שמעו שמוע ואל תבינו וראו ראו ואל תדעו׃

6:10b.ISA.006.010 השמן לב העם הזה ואזניו הכבד ועיניו השע פן יראה בעיניו ובאזניו ישמע ולבבו יבין ושב ורפא לו׃

6:11b.ISA.006.011 ואמר עד מתי אדני ויאמר עד אשר אם שאו ערים מאין יושב ובתים מאין אדם והאדמה תשאה שממה׃

6:12b.ISA.006.012 ורחק יהוה את האדם ורבה העזובה בקרב הארץ׃

6:13b.ISA.006.013 ועוד בה עשריה ושבה והיתה לבער כאלה וכאלון אשר בשלכת מצבת בם זרע קדש מצבתה׃

7

7:1b.ISA.007.001 ויהי בימי אחז בן יותם בן עזיהו מלך יהודה עלה רצין מלך ארם ופקח בן רמליהו מלך ישראל ירושלם למלחמה עליה ולא יכל להלחם עליה׃

7:2b.ISA.007.002 ויגד לבית דוד לאמר נחה ארם על אפרים וינע לבבו ולבב עמו כנוע עצי יער מפני רוח׃

7:3b.ISA.007.003 ויאמר יהוה אל ישעיהו צא נא לקראת אחז אתה ושאר ישוב בנך אל קצה תעלת הברכה העליונה אל מסלת שדה כובס׃

7:4b.ISA.007.004 ואמרת אליו השמר והשקט אל תירא ולבבך אל ירך משני זנבות האודים העשנים האלה בחרי אף רצין וארם ובן רמליהו׃

7:5b.ISA.007.005 יען כי יעץ עליך ארם רעה אפרים ובן רמליהו לאמר׃

7:6b.ISA.007.006 נעלה ביהודה ונקיצנה ונבקענה אלינו ונמליך מלך בתוכה את בן טבאל׃

7:7b.ISA.007.007 כה אמר אדני יהוה לא תקום ולא תהיה׃

7:8b.ISA.007.008 כי ראש ארם דמשק וראש דמשק רצין ובעוד ששים וחמש שנה יחת אפרים מעם׃

7:9b.ISA.007.009 וראש אפרים שמרון וראש שמרון בן רמליהו אם לא תאמינו כי לא תאמנו׃

7:10b.ISA.007.010 ויוסף יהוה דבר אל אחז לאמר׃

7:11b.ISA.007.011 שאל לך אות מעם יהוה אלהיך העמק שאלה או הגבה למעלה׃

7:12b.ISA.007.012 ויאמר אחז לא אשאל ולא אנסה את יהוה׃

7:13b.ISA.007.013 ויאמר שמעו נא בית דוד המעט מכם הלאות אנשים כי תלאו גם את אלהי׃

7:14b.ISA.007.014 לכן יתן אדני הוא לכם אות הנה העלמה הרה וילדת בן וקראת שמו עמנו אל׃

7:15b.ISA.007.015 חמאה ודבש יאכל לדעתו מאוס ברע ובחור בטוב׃

7:16b.ISA.007.016 כי בטרם ידע הנער מאס ברע ובחר בטוב תעזב האדמה אשר אתה קץ מפני שני מלכיה׃

7:17b.ISA.007.017 יביא יהוה עליך ועל עמך ועל בית אביך ימים אשר לא באו למיום סור אפרים מעל יהודה את מלך אשור׃

7:18b.ISA.007.018 והיה ביום ההוא ישרק יהוה לזבוב אשר בקצה יארי מצרים ולדבורה אשר בארץ אשור׃

7:19b.ISA.007.019 ובאו ונחו כלם בנחלי הבתות ובנקיקי הסלעים ובכל הנעצוצים ובכל הנהללים׃

7:20b.ISA.007.020 ביום ההוא יגלח אדני בתער השכירה בעברי נהר במלך אשור את הראש ושער הרגלים וגם את הזקן תספה׃

7:21b.ISA.007.021 והיה ביום ההוא יחיה איש עגלת בקר ושתי צאן׃

7:22b.ISA.007.022 והיה מרב עשות חלב יאכל חמאה כי חמאה ודבש יאכל כל הנותר בקרב הארץ׃

7:23b.ISA.007.023 והיה ביום ההוא יהיה כל מקום אשר יהיה שם אלף גפן באלף כסף לשמיר ולשית יהיה׃

7:24b.ISA.007.024 בחצים ובקשת יבוא שמה כי שמיר ושית תהיה כל הארץ׃

7:25b.ISA.007.025 וכל ההרים אשר במעדר יעדרון לא תבוא שמה יראת שמיר ושית והיה למשלח שור ולמרמס שה׃

8

8:1b.ISA.008.001 ויאמר יהוה אלי קח לך גליון גדול וכתב עליו בחרט אנוש למהר שלל חש בז׃

8:2b.ISA.008.002 ואעידה לי עדים נאמנים את אוריה הכהן ואת זכריהו בן יברכיהו׃

8:3b.ISA.008.003 ואקרב אל הנביאה ותהר ותלד בן ויאמר יהוה אלי קרא שמו מהר שלל חש בז׃

8:4b.ISA.008.004 כי בטרם ידע הנער קרא אבי ואמי ישא את חיל דמשק ואת שלל שמרון לפני מלך אשור׃

8:5b.ISA.008.005 ויסף יהוה דבר אלי עוד לאמר׃

8:6b.ISA.008.006 יען כי מאס העם הזה את מי השלח ההלכים לאט ומשוש את רצין ובן רמליהו׃

8:7b.ISA.008.007 ולכן הנה אדני מעלה עליהם את מי הנהר העצומים והרבים את מלך אשור ואת כל כבודו ועלה על כל אפיקיו והלך על כל גדותיו׃

8:8b.ISA.008.008 וחלף ביהודה שטף ועבר עד צואר יגיע והיה מטות כנפיו מלא רחב ארצך עמנו אל׃

8:9b.ISA.008.009 רעו עמים וחתו והאזינו כל מרחקי ארץ התאזרו וחתו התאזרו וחתו׃

8:10b.ISA.008.010 עצו עצה ותפר דברו דבר ולא יקום כי עמנו אל׃

8:11b.ISA.008.011 כי כה אמר יהוה אלי בחזקת היד ויסרני מלכת בדרך העם הזה לאמר׃

8:12b.ISA.008.012 לא תאמרון קשר לכל אשר יאמר העם הזה קשר ואת מוראו לא תיראו ולא תעריצו׃

8:13b.ISA.008.013 את יהוה צבאות אתו תקדישו והוא מוראכם והוא מערצכם׃

8:14b.ISA.008.014 והיה למקדש ולאבן נגף ולצור מכשול לשני בתי ישראל לפח ולמוקש ליושב ירושלם׃

8:15b.ISA.008.015 וכשלו בם רבים ונפלו ונשברו ונוקשו ונלכדו׃

8:16b.ISA.008.016 צור תעודה חתום תורה בלמדי׃

8:17b.ISA.008.017 וחכיתי ליהוה המסתיר פניו מבית יעקב וקויתי לו׃

8:18b.ISA.008.018 הנה אנכי והילדים אשר נתן לי יהוה לאתות ולמופתים בישראל מעם יהוה צבאות השכן בהר ציון׃

8:19b.ISA.008.019 וכי יאמרו אליכם דרשו אל האבות ואל הידענים המצפצפים והמהגים הלוא עם אל אלהיו ידרש בעד החיים אל המתים׃

8:20b.ISA.008.020 לתורה ולתעודה אם לא יאמרו כדבר הזה אשר אין לו שחר׃

8:21b.ISA.008.021 ועבר בה נקשה ורעב והיה כי ירעב והתקצף וקלל במלכו ובאלהיו ופנה למעלה׃

8:22b.ISA.008.022 ואל ארץ יביט והנה צרה וחשכה מעוף צוקה ואפלה מנדח׃

9

9:1b.ISA.009.001 כי לא מועף לאשר מוצק לה כעת הראשון הקל ארצה זבלון וארצה נפתלי והאחרון הכביד דרך הים עבר הירדן גליל הגוים׃

9:2b.ISA.009.002 העם ההלכים בחשך ראו אור גדול ישבי בארץ צלמות אור נגה עליהם׃

9:3b.ISA.009.003 הרבית הגוי לא הגדלת השמחה שמחו לפניך כשמחת בקציר כאשר יגילו בחלקם שלל׃

9:4b.ISA.009.004 כי את על סבלו ואת מטה שכמו שבט הנגש בו החתת כיום מדין׃

9:5b.ISA.009.005 כי כל סאון סאן ברעש ושמלה מגוללה בדמים והיתה לשרפה מאכלת אש׃

9:6b.ISA.009.006 כי ילד ילד לנו בן נתן לנו ותהי המשרה על שכמו ויקרא שמו פלא יועץ אל גבור אביעד שר שלום׃

9:7b.ISA.009.007 למרבה המשרה ולשלום אין קץ על כסא דוד ועל ממלכתו להכין אתה ולסעדה במשפט ובצדקה מעתה ועד עולם קנאת יהוה צבאות תעשה זאת׃

9:8b.ISA.009.008 דבר שלח אדני ביעקב ונפל בישראל׃

9:9b.ISA.009.009 וידעו העם כלו אפרים ויושב שמרון בגאוה ובגדל לבב לאמר׃

9:10b.ISA.009.010 לבנים נפלו וגזית נבנה שקמים גדעו וארזים נחליף׃

9:11b.ISA.009.011 וישגב יהוה את צרי רצין עליו ואת איביו יסכסך׃

9:12b.ISA.009.012 ארם מקדם ופלשתים מאחור ויאכלו את ישראל בכל פה בכל זאת לא שב אפו ועוד ידו נטויה׃

9:13b.ISA.009.013 והעם לא שב עד המכהו ואת יהוה צבאות לא דרשו׃

9:14b.ISA.009.014 ויכרת יהוה מישראל ראש וזנב כפה ואגמון יום אחד׃

9:15b.ISA.009.015 זקן ונשוא פנים הוא הראש ונביא מורה שקר הוא הזנב׃

9:16b.ISA.009.016 ויהיו מאשרי העם הזה מתעים ומאשריו מבלעים׃

9:17b.ISA.009.017 על כן על בחוריו לא ישמח אדני ואת יתמיו ואת אלמנתיו לא ירחם כי כלו חנף ומרע וכל פה דבר נבלה בכל זאת לא שב אפו ועוד ידו נטויה׃

9:18b.ISA.009.018 כי בערה כאש רשעה שמיר ושית תאכל ותצת בסבכי היער ויתאבכו גאות עשן׃

9:19b.ISA.009.019 בעברת יהוה צבאות נעתם ארץ ויהי העם כמאכלת אש איש אל אחיו לא יחמלו׃

9:20b.ISA.009.020 ויגזר על ימין ורעב ויאכל על שמאול ולא שבעו איש בשר זרעו יאכלו׃

9:21b.ISA.009.021 מנשה את אפרים ואפרים את מנשה יחדו המה על יהודה בכל זאת לא שב אפו ועוד ידו נטויה׃

10

10:1b.ISA.010.001 הוי החקקים חקקי און ומכתבים עמל כתבו׃

10:2b.ISA.010.002 להטות מדין דלים ולגזל משפט עניי עמי להיות אלמנות שללם ואת יתומים יבזו׃

10:3b.ISA.010.003 ומה תעשו ליום פקדה ולשואה ממרחק תבוא על מי תנוסו לעזרה ואנה תעזבו כבודכם׃

10:4b.ISA.010.004 בלתי כרע תחת אסיר ותחת הרוגים יפלו בכל זאת לא שב אפו ועוד ידו נטויה׃

10:5b.ISA.010.005 הוי אשור שבט אפי ומטה הוא בידם זעמי׃

10:6b.ISA.010.006 בגוי חנף אשלחנו ועל עם עברתי אצונו לשלל שלל ולבז בז ולשימו מרמס כחמר חוצות׃

10:7b.ISA.010.007 והוא לא כן ידמה ולבבו לא כן יחשב כי להשמיד בלבבו ולהכרית גוים לא מעט׃

10:8b.ISA.010.008 כי יאמר הלא שרי יחדו מלכים׃

10:9b.ISA.010.009 הלא ככרכמיש כלנו אם לא כארפד חמת אם לא כדמשק שמרון׃

10:10b.ISA.010.010 כאשר מצאה ידי לממלכת האליל ופסיליהם מירושלם ומשמרון׃

10:11b.ISA.010.011 הלא כאשר עשיתי לשמרון ולאליליה כן אעשה לירושלם ולעצביה׃

10:12b.ISA.010.012 והיה כי יבצע אדני את כל מעשהו בהר ציון ובירושלם אפקד על פרי גדל לבב מלך אשור ועל תפארת רום עיניו׃

10:13b.ISA.010.013 כי אמר בכח ידי עשיתי ובחכמתי כי נבנותי ואסיר גבולת עמים ועתידתיהם שושתי ואוריד כאביר יושבים׃

10:14b.ISA.010.014 ותמצא כקן ידי לחיל העמים וכאסף ביצים עזבות כל הארץ אני אספתי ולא היה נדד כנף ופצה פה ומצפצף׃

10:15b.ISA.010.015 היתפאר הגרזן על החצב בו אם יתגדל המשור על מניפו כהניף שבט את מרימיו כהרים מטה לא עץ׃

10:16b.ISA.010.016 לכן ישלח האדון יהוה צבאות במשמניו רזון ותחת כבדו יקד יקד כיקוד אש׃

10:17b.ISA.010.017 והיה אור ישראל לאש וקדושו ללהבה ובערה ואכלה שיתו ושמירו ביום אחד׃

10:18b.ISA.010.018 וכבוד יערו וכרמלו מנפש ועד בשר יכלה והיה כמסס נסס׃

10:19b.ISA.010.019 ושאר עץ יערו מספר יהיו ונער יכתבם׃

10:20b.ISA.010.020 והיה ביום ההוא לא יוסיף עוד שאר ישראל ופליטת בית יעקב להשען על מכהו ונשען על יהוה קדוש ישראל באמת׃

10:21b.ISA.010.021 שאר ישוב שאר יעקב אל אל גבור׃

10:22b.ISA.010.022 כי אם יהיה עמך ישראל כחול הים שאר ישוב בו כליון חרוץ שוטף צדקה׃

10:23b.ISA.010.023 כי כלה ונחרצה אדני יהוה צבאות עשה בקרב כל הארץ׃

10:24b.ISA.010.024 לכן כה אמר אדני יהוה צבאות אל תירא עמי ישב ציון מאשור בשבט יככה ומטהו ישא עליך בדרך מצרים׃

10:25b.ISA.010.025 כי עוד מעט מזער וכלה זעם ואפי על תבליתם׃

10:26b.ISA.010.026 ועורר עליו יהוה צבאות שוט כמכת מדין בצור עורב ומטהו על הים ונשאו בדרך מצרים׃

10:27b.ISA.010.027 והיה ביום ההוא יסור סבלו מעל שכמך ועלו מעל צוארך וחבל על מפני שמן׃

10:28b.ISA.010.028 בא על עית עבר במגרון למכמש יפקיד כליו׃

10:29b.ISA.010.029 עברו מעברה גבע מלון לנו חרדה הרמה גבעת שאול נסה׃

10:30b.ISA.010.030 צהלי קולך בת גלים הקשיבי לישה עניה ענתות׃

10:31b.ISA.010.031 נדדה מדמנה ישבי הגבים העיזו׃

10:32b.ISA.010.032 עוד היום בנב לעמד ינפף ידו הר בית ציון גבעת ירושלם׃

10:33b.ISA.010.033 הנה האדון יהוה צבאות מסעף פארה במערצה ורמי הקומה גדועים והגבהים ישפלו׃

10:34b.ISA.010.034 ונקף סבכי היער בברזל והלבנון באדיר יפול׃

11

11:1b.ISA.011.001 ויצא חטר מגזע ישי ונצר משרשיו יפרה׃

11:2b.ISA.011.002 ונחה עליו רוח יהוה רוח חכמה ובינה רוח עצה וגבורה רוח דעת ויראת יהוה׃

11:3b.ISA.011.003 והריחו ביראת יהוה ולא למראה עיניו ישפוט ולא למשמע אזניו יוכיח׃

11:4b.ISA.011.004 ושפט בצדק דלים והוכיח במישור לענוי ארץ והכה ארץ בשבט פיו וברוח שפתיו ימית רשע׃

11:5b.ISA.011.005 והיה צדק אזור מתניו והאמונה אזור חלציו׃

11:6b.ISA.011.006 וגר זאב עם כבש ונמר עם גדי ירבץ ועגל וכפיר ומריא יחדו ונער קטן נהג בם׃

11:7b.ISA.011.007 ופרה ודב תרעינה יחדו ירבצו ילדיהן ואריה כבקר יאכל תבן׃

11:8b.ISA.011.008 ושעשע יונק על חר פתן ועל מאורת צפעוני גמול ידו הדה׃

11:9b.ISA.011.009 לא ירעו ולא ישחיתו בכל הר קדשי כי מלאה הארץ דעה את יהוה כמים לים מכסים׃

11:10b.ISA.011.010 והיה ביום ההוא שרש ישי אשר עמד לנס עמים אליו גוים ידרשו והיתה מנחתו כבוד׃

11:11b.ISA.011.011 והיה ביום ההוא יוסיף אדני שנית ידו לקנות את שאר עמו אשר ישאר מאשור וממצרים ומפתרוס ומכוש ומעילם ומשנער ומחמת ומאיי הים׃

11:12b.ISA.011.012 ונשא נס לגוים ואסף נדחי ישראל ונפצות יהודה יקבץ מארבע כנפות הארץ׃

11:13b.ISA.011.013 וסרה קנאת אפרים וצררי יהודה יכרתו אפרים לא יקנא את יהודה ויהודה לא יצר את אפרים׃

11:14b.ISA.011.014 ועפו בכתף פלשתים ימה יחדו יבזו את בני קדם אדום ומואב משלוח ידם ובני עמון משמעתם׃

11:15b.ISA.011.015 והחרים יהוה את לשון ים מצרים והניף ידו על הנהר בעים רוחו והכהו לשבעה נחלים והדריך בנעלים׃

11:16b.ISA.011.016 והיתה מסלה לשאר עמו אשר ישאר מאשור כאשר היתה לישראל ביום עלתו מארץ מצרים׃

12

12:1b.ISA.012.001 ואמרת ביום ההוא אודך יהוה כי אנפת בי ישב אפך ותנחמני׃

12:2b.ISA.012.002 הנה אל ישועתי אבטח ולא אפחד כי עזי וזמרת יה יהוה ויהי לי לישועה׃

12:3b.ISA.012.003 ושאבתם מים בששון ממעיני הישועה׃

12:4b.ISA.012.004 ואמרתם ביום ההוא הודו ליהוה קראו בשמו הודיעו בעמים עלילתיו הזכירו כי נשגב שמו׃

12:5b.ISA.012.005 זמרו יהוה כי גאות עשה מידעת זאת בכל הארץ׃

12:6b.ISA.012.006 צהלי ורני יושבת ציון כי גדול בקרבך קדוש ישראל׃

13

13:1b.ISA.013.001 משא בבל אשר חזה ישעיהו בן אמוץ׃

13:2b.ISA.013.002 על הר נשפה שאו נס הרימו קול להם הניפו יד ויבאו פתחי נדיבים׃

13:3b.ISA.013.003 אני צויתי למקדשי גם קראתי גבורי לאפי עליזי גאותי׃

13:4b.ISA.013.004 קול המון בהרים דמות עם רב קול שאון ממלכות גוים נאספים יהוה צבאות מפקד צבא מלחמה׃

13:5b.ISA.013.005 באים מארץ מרחק מקצה השמים יהוה וכלי זעמו לחבל כל הארץ׃

13:6b.ISA.013.006 הילילו כי קרוב יום יהוה כשד משדי יבוא׃

13:7b.ISA.013.007 על כן כל ידים תרפינה וכל לבב אנוש ימס׃

13:8b.ISA.013.008 ונבהלו צירים וחבלים יאחזון כיולדה יחילון איש אל רעהו יתמהו פני להבים פניהם׃

13:9b.ISA.013.009 הנה יום יהוה בא אכזרי ועברה וחרון אף לשום הארץ לשמה וחטאיה ישמיד ממנה׃

13:10b.ISA.013.010 כי כוכבי השמים וכסיליהם לא יהלו אורם חשך השמש בצאתו וירח לא יגיה אורו׃

13:11b.ISA.013.011 ופקדתי על תבל רעה ועל רשעים עונם והשבתי גאון זדים וגאות עריצים אשפיל׃

13:12b.ISA.013.012 אוקיר אנוש מפז ואדם מכתם אופיר׃

13:13b.ISA.013.013 על כן שמים ארגיז ותרעש הארץ ממקומה בעברת יהוה צבאות וביום חרון אפו׃

13:14b.ISA.013.014 והיה כצבי מדח וכצאן ואין מקבץ איש אל עמו יפנו ואיש אל ארצו ינוסו׃

13:15b.ISA.013.015 כל הנמצא ידקר וכל הנספה יפול בחרב׃

13:16b.ISA.013.016 ועלליהם ירטשו לעיניהם ישסו בתיהם ונשיהם תשגלנה׃

13:17b.ISA.013.017 הנני מעיר עליהם את מדי אשר כסף לא יחשבו וזהב לא יחפצו בו׃

13:18b.ISA.013.018 וקשתות נערים תרטשנה ופרי בטן לא ירחמו על בנים לא תחוס עינם׃

13:19b.ISA.013.019 והיתה בבל צבי ממלכות תפארת גאון כשדים כמהפכת אלהים את סדם ואת עמרה׃

13:20b.ISA.013.020 לא תשב לנצח ולא תשכן עד דור ודור ולא יהל שם ערבי ורעים לא ירבצו שם׃

13:21b.ISA.013.021 ורבצו שם ציים ומלאו בתיהם אחים ושכנו שם בנות יענה ושעירים ירקדו שם׃

13:22b.ISA.013.022 וענה איים באלמנותיו ותנים בהיכלי ענג וקרוב לבוא עתה וימיה לא ימשכו׃

14

14:1b.ISA.014.001 כי ירחם יהוה את יעקב ובחר עוד בישראל והניחם על אדמתם ונלוה הגר עליהם ונספחו על בית יעקב׃

14:2b.ISA.014.002 ולקחום עמים והביאום אל מקומם והתנחלום בית ישראל על אדמת יהוה לעבדים ולשפחות והיו שבים לשביהם ורדו בנגשיהם׃

14:3b.ISA.014.003 והיה ביום הניח יהוה לך מעצבך ומרגזך ומן העבדה הקשה אשר עבד בך׃

14:4b.ISA.014.004 ונשאת המשל הזה על מלך בבל ואמרת איך שבת נגש שבתה מדהבה׃

14:5b.ISA.014.005 שבר יהוה מטה רשעים שבט משלים׃

14:6b.ISA.014.006 מכה עמים בעברה מכת בלתי סרה רדה באף גוים מרדף בלי חשך׃

14:7b.ISA.014.007 נחה שקטה כל הארץ פצחו רנה׃

14:8b.ISA.014.008 גם ברושים שמחו לך ארזי לבנון מאז שכבת לא יעלה הכרת עלינו׃

14:9b.ISA.014.009 שאול מתחת רגזה לך לקראת בואך עורר לך רפאים כל עתודי ארץ הקים מכסאותם כל מלכי גוים׃

14:10b.ISA.014.010 כלם יענו ויאמרו אליך גם אתה חלית כמונו אלינו נמשלת׃

14:11b.ISA.014.011 הורד שאול גאונך המית נבליך תחתיך יצע רמה ומכסיך תולעה׃

14:12b.ISA.014.012 איך נפלת משמים הילל בן שחר נגדעת לארץ חולש על גוים׃

14:13b.ISA.014.013 ואתה אמרת בלבבך השמים אעלה ממעל לכוכבי אל ארים כסאי ואשב בהר מועד בירכתי צפון׃

14:14b.ISA.014.014 אעלה על במתי עב אדמה לעליון׃

14:15b.ISA.014.015 אך אל שאול תורד אל ירכתי בור׃

14:16b.ISA.014.016 ראיך אליך ישגיחו אליך יתבוננו הזה האיש מרגיז הארץ מרעיש ממלכות׃

14:17b.ISA.014.017 שם תבל כמדבר ועריו הרס אסיריו לא פתח ביתה׃

14:18b.ISA.014.018 כל מלכי גוים כלם שכבו בכבוד איש בביתו׃

14:19b.ISA.014.019 ואתה השלכת מקברך כנצר נתעב לבוש הרגים מטעני חרב יורדי אל אבני בור כפגר מובס׃

14:20b.ISA.014.020 לא תחד אתם בקבורה כי ארצך שחת עמך הרגת לא יקרא לעולם זרע מרעים׃

14:21b.ISA.014.021 הכינו לבניו מטבח בעון אבותם בל יקמו וירשו ארץ ומלאו פני תבל ערים׃

14:22b.ISA.014.022 וקמתי עליהם נאם יהוה צבאות והכרתי לבבל שם ושאר ונין ונכד נאם יהוה׃

14:23b.ISA.014.023 ושמתיה למורש קפד ואגמי מים וטאטאתיה במטאטא השמד נאם יהוה צבאות׃

14:24b.ISA.014.024 נשבע יהוה צבאות לאמר אם לא כאשר דמיתי כן היתה וכאשר יעצתי היא תקום׃

14:25b.ISA.014.025 לשבר אשור בארצי ועל הרי אבוסנו וסר מעליהם עלו וסבלו מעל שכמו יסור׃

14:26b.ISA.014.026 זאת העצה היעוצה על כל הארץ וזאת היד הנטויה על כל הגוים׃

14:27b.ISA.014.027 כי יהוה צבאות יעץ ומי יפר וידו הנטויה ומי ישיבנה׃

14:28b.ISA.014.028 בשנת מות המלך אחז היה המשא הזה׃

14:29b.ISA.014.029 אל תשמחי פלשת כלך כי נשבר שבט מכך כי משרש נחש יצא צפע ופריו שרף מעופף׃

14:30b.ISA.014.030 ורעו בכורי דלים ואביונים לבטח ירבצו והמתי ברעב שרשך ושאריתך יהרג׃

14:31b.ISA.014.031 הילילי שער זעקי עיר נמוג פלשת כלך כי מצפון עשן בא ואין בודד במועדיו׃

14:32b.ISA.014.032 ומה יענה מלאכי גוי כי יהוה יסד ציון ובה יחסו עניי עמו׃

15

15:1b.ISA.015.001 משא מואב כי בליל שדד ער מואב נדמה כי בליל שדד קיר מואב נדמה׃

15:2b.ISA.015.002 עלה הבית ודיבן הבמות לבכי על נבו ועל מידבא מואב ייליל בכל ראשיו קרחה כל זקן גרועה׃

15:3b.ISA.015.003 בחוצתיו חגרו שק על גגותיה וברחבתיה כלה ייליל ירד בבכי׃

15:4b.ISA.015.004 ותזעק חשבון ואלעלה עד יהץ נשמע קולם על כן חלצי מואב יריעו נפשו ירעה לו׃

15:5b.ISA.015.005 לבי למואב יזעק בריחה עד צער עגלת שלשיה כי מעלה הלוחית בבכי יעלה בו כי דרך חורנים זעקת שבר יעערו׃

15:6b.ISA.015.006 כי מי נמרים משמות יהיו כי יבש חציר כלה דשא ירק לא היה׃

15:7b.ISA.015.007 על כן יתרה עשה ופקדתם על נחל הערבים ישאום׃

15:8b.ISA.015.008 כי הקיפה הזעקה את גבול מואב עד אגלים יללתה ובאר אילים יללתה׃

15:9b.ISA.015.009 כי מי דימון מלאו דם כי אשית על דימון נוספות לפליטת מואב אריה ולשארית אדמה׃

16

16:1b.ISA.016.001 שלחו כר משל ארץ מסלע מדברה אל הר בת ציון׃

16:2b.ISA.016.002 והיה כעוף נודד קן משלח תהיינה בנות מואב מעברת לארנון׃

16:3b.ISA.016.003 הביאו עצה עשו פלילה שיתי כליל צלך בתוך צהרים סתרי נדחים נדד אל תגלי׃

16:4b.ISA.016.004 יגורו בך נדחי מואב הוי סתר למו מפני שודד כי אפס המץ כלה שד תמו רמס מן הארץ׃

16:5b.ISA.016.005 והוכן בחסד כסא וישב עליו באמת באהל דוד שפט ודרש משפט ומהר צדק׃

16:6b.ISA.016.006 שמענו גאון מואב גא מאד גאותו וגאונו ועברתו לא כן בדיו׃

16:7b.ISA.016.007 לכן ייליל מואב למואב כלה ייליל לאשישי קיר חרשת תהגו אך נכאים׃

16:8b.ISA.016.008 כי שדמות חשבון אמלל גפן שבמה בעלי גוים הלמו שרוקיה עד יעזר נגעו תעו מדבר שלחותיה נטשו עברו ים׃

16:9b.ISA.016.009 על כן אבכה בבכי יעזר גפן שבמה אריוך דמעתי חשבון ואלעלה כי על קיצך ועל קצירך הידד נפל׃

16:10b.ISA.016.010 ונאסף שמחה וגיל מן הכרמל ובכרמים לא ירנן לא ירעע יין ביקבים לא ידרך הדרך הידד השבתי׃

16:11b.ISA.016.011 על כן מעי למואב ככנור יהמו וקרבי לקיר חרש׃

16:12b.ISA.016.012 והיה כי נראה כי נלאה מואב על הבמה ובא אל מקדשו להתפלל ולא יוכל׃

16:13b.ISA.016.013 זה הדבר אשר דבר יהוה אל מואב מאז׃

16:14b.ISA.016.014 ועתה דבר יהוה לאמר בשלש שנים כשני שכיר ונקלה כבוד מואב בכל ההמון הרב ושאר מעט מזער לוא כביר׃

17

17:1b.ISA.017.001 משא דמשק הנה דמשק מוסר מעיר והיתה מעי מפלה׃

17:2b.ISA.017.002 עזבות ערי ערער לעדרים תהיינה ורבצו ואין מחריד׃

17:3b.ISA.017.003 ונשבת מבצר מאפרים וממלכה מדמשק ושאר ארם ככבוד בני ישראל יהיו נאם יהוה צבאות׃

17:4b.ISA.017.004 והיה ביום ההוא ידל כבוד יעקב ומשמן בשרו ירזה׃

17:5b.ISA.017.005 והיה כאסף קציר קמה וזרעו שבלים יקצור והיה כמלקט שבלים בעמק רפאים׃

17:6b.ISA.017.006 ונשאר בו עוללת כנקף זית שנים שלשה גרגרים בראש אמיר ארבעה חמשה בסעפיה פריה נאם יהוה אלהי ישראל׃

17:7b.ISA.017.007 ביום ההוא ישעה האדם על עשהו ועיניו אל קדוש ישראל תראינה׃

17:8b.ISA.017.008 ולא ישעה אל המזבחות מעשה ידיו ואשר עשו אצבעתיו לא יראה והאשרים והחמנים׃

17:9b.ISA.017.009 ביום ההוא יהיו ערי מעזו כעזובת החרש והאמיר אשר עזבו מפני בני ישראל והיתה שממה׃

17:10b.ISA.017.010 כי שכחת אלהי ישעך וצור מעזך לא זכרת על כן תטעי נטעי נעמנים וזמרת זר תזרענו׃

17:11b.ISA.017.011 ביום נטעך תשגשגי ובבקר זרעך תפריחי נד קציר ביום נחלה וכאב אנוש׃

17:12b.ISA.017.012 הוי המון עמים רבים כהמות ימים יהמיון ושאון לאמים כשאון מים כבירים ישאון׃

17:13b.ISA.017.013 לאמים כשאון מים רבים ישאון וגער בו ונס ממרחק ורדף כמץ הרים לפני רוח וכגלגל לפני סופה׃

17:14b.ISA.017.014 לעת ערב והנה בלהה בטרם בקר איננו זה חלק שוסינו וגורל לבזזינו׃

18

18:1b.ISA.018.001 הוי ארץ צלצל כנפים אשר מעבר לנהרי כוש׃

18:2b.ISA.018.002 השלח בים צירים ובכלי גמא על פני מים לכו מלאכים קלים אל גוי ממשך ומורט אל עם נורא מן הוא והלאה גוי קו קו ומבוסה אשר בזאו נהרים ארצו׃

18:3b.ISA.018.003 כל ישבי תבל ושכני ארץ כנשא נס הרים תראו וכתקע שופר תשמעו׃

18:4b.ISA.018.004 כי כה אמר יהוה אלי אשקוטה ואביטה במכוני כחם צח עלי אור כעב טל בחם קציר׃

18:5b.ISA.018.005 כי לפני קציר כתם פרח ובסר גמל יהיה נצה וכרת הזלזלים במזמרות ואת הנטישות הסיר התז׃

18:6b.ISA.018.006 יעזבו יחדו לעיט הרים ולבהמת הארץ וקץ עליו העיט וכל בהמת הארץ עליו תחרף׃

18:7b.ISA.018.007 בעת ההיא יובל שי ליהוה צבאות עם ממשך ומורט ומעם נורא מן הוא והלאה גוי קו קו ומבוסה אשר בזאו נהרים ארצו אל מקום שם יהוה צבאות הר ציון׃

19

19:1b.ISA.019.001 משא מצרים הנה יהוה רכב על עב קל ובא מצרים ונעו אלילי מצרים מפניו ולבב מצרים ימס בקרבו׃

19:2b.ISA.019.002 וסכסכתי מצרים במצרים ונלחמו איש באחיו ואיש ברעהו עיר בעיר ממלכה בממלכה׃

19:3b.ISA.019.003 ונבקה רוח מצרים בקרבו ועצתו אבלע ודרשו אל האלילים ואל האטים ואל האבות ואל הידענים׃

19:4b.ISA.019.004 וסכרתי את מצרים ביד אדנים קשה ומלך עז ימשל בם נאם האדון יהוה צבאות׃

19:5b.ISA.019.005 ונשתו מים מהים ונהר יחרב ויבש׃

19:6b.ISA.019.006 והאזניחו נהרות דללו וחרבו יארי מצור קנה וסוף קמלו׃

19:7b.ISA.019.007 ערות על יאור על פי יאור וכל מזרע יאור ייבש נדף ואיננו׃

19:8b.ISA.019.008 ואנו הדיגים ואבלו כל משליכי ביאור חכה ופרשי מכמרת על פני מים אמללו׃

19:9b.ISA.019.009 ובשו עבדי פשתים שריקות וארגים חורי׃

19:10b.ISA.019.010 והיו שתתיה מדכאים כל עשי שכר אגמי נפש׃

19:11b.ISA.019.011 אך אולים שרי צען חכמי יעצי פרעה עצה נבערה איך תאמרו אל פרעה בן חכמים אני בן מלכי קדם׃

19:12b.ISA.019.012 אים אפוא חכמיך ויגידו נא לך וידעו מה יעץ יהוה צבאות על מצרים׃

19:13b.ISA.019.013 נואלו שרי צען נשאו שרי נף התעו את מצרים פנת שבטיה׃

19:14b.ISA.019.014 יהוה מסך בקרבה רוח עועים והתעו את מצרים בכל מעשהו כהתעות שכור בקיאו׃

19:15b.ISA.019.015 ולא יהיה למצרים מעשה אשר יעשה ראש וזנב כפה ואגמון׃

19:16b.ISA.019.016 ביום ההוא יהיה מצרים כנשים וחרד ופחד מפני תנופת יד יהוה צבאות אשר הוא מניף עליו׃

19:17b.ISA.019.017 והיתה אדמת יהודה למצרים לחגא כל אשר יזכיר אתה אליו יפחד מפני עצת יהוה צבאות אשר הוא יועץ עליו׃

19:18b.ISA.019.018 ביום ההוא יהיו חמש ערים בארץ מצרים מדברות שפת כנען ונשבעות ליהוה צבאות עיר ההרס יאמר לאחת׃

19:19b.ISA.019.019 ביום ההוא יהיה מזבח ליהוה בתוך ארץ מצרים ומצבה אצל גבולה ליהוה׃

19:20b.ISA.019.020 והיה לאות ולעד ליהוה צבאות בארץ מצרים כי יצעקו אל יהוה מפני לחצים וישלח להם מושיע ורב והצילם׃

19:21b.ISA.019.021 ונודע יהוה למצרים וידעו מצרים את יהוה ביום ההוא ועבדו זבח ומנחה ונדרו נדר ליהוה ושלמו׃

19:22b.ISA.019.022 ונגף יהוה את מצרים נגף ורפוא ושבו עד יהוה ונעתר להם ורפאם׃

19:23b.ISA.019.023 ביום ההוא תהיה מסלה ממצרים אשורה ובא אשור במצרים ומצרים באשור ועבדו מצרים את אשור׃

19:24b.ISA.019.024 ביום ההוא יהיה ישראל שלישיה למצרים ולאשור ברכה בקרב הארץ׃

19:25b.ISA.019.025 אשר ברכו יהוה צבאות לאמר ברוך עמי מצרים ומעשה ידי אשור ונחלתי ישראל׃

20

20:1b.ISA.020.001 בשנת בא תרתן אשדודה בשלח אתו סרגון מלך אשור וילחם באשדוד וילכדה׃

20:2b.ISA.020.002 בעת ההיא דבר יהוה ביד ישעיהו בן אמוץ לאמר לך ופתחת השק מעל מתניך ונעלך תחלץ מעל רגליך ויעש כן הלך ערום ויחף׃

20:3b.ISA.020.003 ויאמר יהוה כאשר הלך עבדי ישעיהו ערום ויחף שלש שנים אות ומופת על מצרים ועל כוש׃

20:4b.ISA.020.004 כן ינהג מלך אשור את שבי מצרים ואת גלות כוש נערים וזקנים ערום ויחף וחשופי שת ערות מצרים׃

20:5b.ISA.020.005 וחתו ובשו מכוש מבטם ומן מצרים תפארתם׃

20:6b.ISA.020.006 ואמר ישב האי הזה ביום ההוא הנה כה מבטנו אשר נסנו שם לעזרה להנצל מפני מלך אשור ואיך נמלט אנחנו׃

21

21:1b.ISA.021.001 משא מדבר ים כסופות בנגב לחלף ממדבר בא מארץ נוראה׃

21:2b.ISA.021.002 חזות קשה הגד לי הבוגד בוגד והשודד שודד עלי עילם צורי מדי כל אנחתה השבתי׃

21:3b.ISA.021.003 על כן מלאו מתני חלחלה צירים אחזוני כצירי יולדה נעויתי משמע נבהלתי מראות׃

21:4b.ISA.021.004 תעה לבבי פלצות בעתתני את נשף חשקי שם לי לחרדה׃

21:5b.ISA.021.005 ערך השלחן צפה הצפית אכול שתה קומו השרים משחו מגן׃

21:6b.ISA.021.006 כי כה אמר אלי אדני לך העמד המצפה אשר יראה יגיד׃

21:7b.ISA.021.007 וראה רכב צמד פרשים רכב חמור רכב גמל והקשיב קשב רב קשב׃

21:8b.ISA.021.008 ויקרא אריה על מצפה אדני אנכי עמד תמיד יומם ועל משמרתי אנכי נצב כל הלילות׃

21:9b.ISA.021.009 והנה זה בא רכב איש צמד פרשים ויען ויאמר נפלה נפלה בבל וכל פסילי אלהיה שבר לארץ׃

21:10b.ISA.021.010 מדשתי ובן גרני אשר שמעתי מאת יהוה צבאות אלהי ישראל הגדתי לכם׃

21:11b.ISA.021.011 משא דומה אלי קרא משעיר שמר מה מלילה שמר מה מליל׃

21:12b.ISA.021.012 אמר שמר אתה בקר וגם לילה אם תבעיון בעיו שבו אתיו׃

21:13b.ISA.021.013 משא בערב ביער בערב תלינו ארחות דדנים׃

21:14b.ISA.021.014 לקראת צמא התיו מים ישבי ארץ תימא בלחמו קדמו נדד׃

21:15b.ISA.021.015 כי מפני חרבות נדדו מפני חרב נטושה ומפני קשת דרוכה ומפני כבד מלחמה׃

21:16b.ISA.021.016 כי כה אמר אדני אלי בעוד שנה כשני שכיר וכלה כל כבוד קדר׃

21:17b.ISA.021.017 ושאר מספר קשת גבורי בני קדר ימעטו כי יהוה אלהי ישראל דבר׃

22

22:1b.ISA.022.001 משא גיא חזיון מה לך אפוא כי עלית כלך לגגות׃

22:2b.ISA.022.002 תשאות מלאה עיר הומיה קריה עליזה חלליך לא חללי חרב ולא מתי מלחמה׃

22:3b.ISA.022.003 כל קציניך נדדו יחד מקשת אסרו כל נמצאיך אסרו יחדו מרחוק ברחו׃

22:4b.ISA.022.004 על כן אמרתי שעו מני אמרר בבכי אל תאיצו לנחמני על שד בת עמי׃

22:5b.ISA.022.005 כי יום מהומה ומבוסה ומבוכה לאדני יהוה צבאות בגיא חזיון מקרקר קר ושוע אל ההר׃

22:6b.ISA.022.006 ועילם נשא אשפה ברכב אדם פרשים וקיר ערה מגן׃

22:7b.ISA.022.007 ויהי מבחר עמקיך מלאו רכב והפרשים שת שתו השערה׃

22:8b.ISA.022.008 ויגל את מסך יהודה ותבט ביום ההוא אל נשק בית היער׃

22:9b.ISA.022.009 ואת בקיעי עיר דוד ראיתם כי רבו ותקבצו את מי הברכה התחתונה׃

22:10b.ISA.022.010 ואת בתי ירושלם ספרתם ותתצו הבתים לבצר החומה׃

22:11b.ISA.022.011 ומקוה עשיתם בין החמתים למי הברכה הישנה ולא הבטתם אל עשיה ויצרה מרחוק לא ראיתם׃

22:12b.ISA.022.012 ויקרא אדני יהוה צבאות ביום ההוא לבכי ולמספד ולקרחה ולחגר שק׃

22:13b.ISA.022.013 והנה ששון ושמחה הרג בקר ושחט צאן אכל בשר ושתות יין אכול ושתו כי מחר נמות׃

22:14b.ISA.022.014 ונגלה באזני יהוה צבאות אם יכפר העון הזה לכם עד תמתון אמר אדני יהוה צבאות׃

22:15b.ISA.022.015 כה אמר אדני יהוה צבאות לך בא אל הסכן הזה על שבנא אשר על הבית׃

22:16b.ISA.022.016 מה לך פה ומי לך פה כי חצבת לך פה קבר חצבי מרום קברו חקקי בסלע משכן לו׃

22:17b.ISA.022.017 הנה יהוה מטלטלך טלטלה גבר ועטך עטה׃

22:18b.ISA.022.018 צנוף יצנפך צנפה כדור אל ארץ רחבת ידים שמה תמות ושמה מרכבות כבודך קלון בית אדניך׃

22:19b.ISA.022.019 והדפתיך ממצבך וממעמדך יהרסך׃

22:20b.ISA.022.020 והיה ביום ההוא וקראתי לעבדי לאליקים בן חלקיהו׃

22:21b.ISA.022.021 והלבשתיו כתנתך ואבנטך אחזקנו וממשלתך אתן בידו והיה לאב ליושב ירושלם ולבית יהודה׃

22:22b.ISA.022.022 ונתתי מפתח בית דוד על שכמו ופתח ואין סגר וסגר ואין פתח׃

22:23b.ISA.022.023 ותקעתיו יתד במקום נאמן והיה לכסא כבוד לבית אביו׃

22:24b.ISA.022.024 ותלו עליו כל כבוד בית אביו הצאצאים והצפעות כל כלי הקטן מכלי האגנות ועד כל כלי הנבלים׃

22:25b.ISA.022.025 ביום ההוא נאם יהוה צבאות תמוש היתד התקועה במקום נאמן ונגדעה ונפלה ונכרת המשא אשר עליה כי יהוה דבר׃

23

23:1b.ISA.023.001 משא צר הילילו אניות תרשיש כי שדד מבית מבוא מארץ כתים נגלה למו׃

23:2b.ISA.023.002 דמו ישבי אי סחר צידון עבר ים מלאוך׃

23:3b.ISA.023.003 ובמים רבים זרע שחר קציר יאור תבואתה ותהי סחר גוים׃

23:4b.ISA.023.004 בושי צידון כי אמר ים מעוז הים לאמר לא חלתי ולא ילדתי ולא גדלתי בחורים רוממתי בתולות׃

23:5b.ISA.023.005 כאשר שמע למצרים יחילו כשמע צר׃

23:6b.ISA.023.006 עברו תרשישה הילילו ישבי אי׃

23:7b.ISA.023.007 הזאת לכם עליזה מימי קדם קדמתה יבלוה רגליה מרחוק לגור׃

23:8b.ISA.023.008 מי יעץ זאת על צר המעטירה אשר סחריה שרים כנעניה נכבדי ארץ׃

23:9b.ISA.023.009 יהוה צבאות יעצה לחלל גאון כל צבי להקל כל נכבדי ארץ׃

23:10b.ISA.023.010 עברי ארצך כיאר בת תרשיש אין מזח עוד׃

23:11b.ISA.023.011 ידו נטה על הים הרגיז ממלכות יהוה צוה אל כנען לשמד מעזניה׃

23:12b.ISA.023.012 ויאמר לא תוסיפי עוד לעלוז המעשקה בתולת בת צידון כתיים קומי עברי גם שם לא ינוח לך׃

23:13b.ISA.023.013 הן ארץ כשדים זה העם לא היה אשור יסדה לציים הקימו בחיניו עררו ארמנותיה שמה למפלה׃

23:14b.ISA.023.014 הילילו אניות תרשיש כי שדד מעזכן׃

23:15b.ISA.023.015 והיה ביום ההוא ונשכחת צר שבעים שנה כימי מלך אחד מקץ שבעים שנה יהיה לצר כשירת הזונה׃

23:16b.ISA.023.016 קחי כנור סבי עיר זונה נשכחה היטיבי נגן הרבי שיר למען תזכרי׃

23:17b.ISA.023.017 והיה מקץ שבעים שנה יפקד יהוה את צר ושבה לאתננה וזנתה את כל ממלכות הארץ על פני האדמה׃

23:18b.ISA.023.018 והיה סחרה ואתננה קדש ליהוה לא יאצר ולא יחסן כי לישבים לפני יהוה יהיה סחרה לאכל לשבעה ולמכסה עתיק׃

24

24:1b.ISA.024.001 הנה יהוה בוקק הארץ ובולקה ועוה פניה והפיץ ישביה׃

24:2b.ISA.024.002 והיה כעם ככהן כעבד כאדניו כשפחה כגברתה כקונה כמוכר כמלוה כלוה כנשה כאשר נשא בו׃

24:3b.ISA.024.003 הבוק תבוק הארץ והבוז תבוז כי יהוה דבר את הדבר הזה׃

24:4b.ISA.024.004 אבלה נבלה הארץ אמללה נבלה תבל אמללו מרום עם הארץ׃

24:5b.ISA.024.005 והארץ חנפה תחת ישביה כי עברו תורת חלפו חק הפרו ברית עולם׃

24:6b.ISA.024.006 על כן אלה אכלה ארץ ויאשמו ישבי בה על כן חרו ישבי ארץ ונשאר אנוש מזער׃

24:7b.ISA.024.007 אבל תירוש אמללה גפן נאנחו כל שמחי לב׃

24:8b.ISA.024.008 שבת משוש תפים חדל שאון עליזים שבת משוש כנור׃

24:9b.ISA.024.009 בשיר לא ישתו יין ימר שכר לשתיו׃

24:10b.ISA.024.010 נשברה קרית תהו סגר כל בית מבוא׃

24:11b.ISA.024.011 צוחה על היין בחוצות ערבה כל שמחה גלה משוש הארץ׃

24:12b.ISA.024.012 נשאר בעיר שמה ושאיה יכת שער׃

24:13b.ISA.024.013 כי כה יהיה בקרב הארץ בתוך העמים כנקף זית כעוללת אם כלה בציר׃

24:14b.ISA.024.014 המה ישאו קולם ירנו בגאון יהוה צהלו מים׃

24:15b.ISA.024.015 על כן בארים כבדו יהוה באיי הים שם יהוה אלהי ישראל׃

24:16b.ISA.024.016 מכנף הארץ זמרת שמענו צבי לצדיק ואמר רזי לי רזי לי אוי לי בגדים בגדו ובגד בוגדים בגדו׃

24:17b.ISA.024.017 פחד ופחת ופח עליך יושב הארץ׃

24:18b.ISA.024.018 והיה הנס מקול הפחד יפל אל הפחת והעולה מתוך הפחת ילכד בפח כי ארבות ממרום נפתחו וירעשו מוסדי ארץ׃

24:19b.ISA.024.019 רעה התרעעה הארץ פור התפוררה ארץ מוט התמוטטה ארץ׃

24:20b.ISA.024.020 נוע תנוע ארץ כשכור והתנודדה כמלונה וכבד עליה פשעה ונפלה ולא תסיף קום׃

24:21b.ISA.024.021 והיה ביום ההוא יפקד יהוה על צבא המרום במרום ועל מלכי האדמה על האדמה׃

24:22b.ISA.024.022 ואספו אספה אסיר על בור וסגרו על מסגר ומרב ימים יפקדו׃

24:23b.ISA.024.023 וחפרה הלבנה ובושה החמה כי מלך יהוה צבאות בהר ציון ובירושלם ונגד זקניו כבוד׃

25

25:1b.ISA.025.001 יהוה אלהי אתה ארוממך אודה שמך כי עשית פלא עצות מרחוק אמונה אמן׃

25:2b.ISA.025.002 כי שמת מעיר לגל קריה בצורה למפלה ארמון זרים מעיר לעולם לא יבנה׃

25:3b.ISA.025.003 על כן יכבדוך עם עז קרית גוים עריצים ייראוך׃

25:4b.ISA.025.004 כי היית מעוז לדל מעוז לאביון בצר לו מחסה מזרם צל מחרב כי רוח עריצים כזרם קיר׃

25:5b.ISA.025.005 כחרב בציון שאון זרים תכניע חרב בצל עב זמיר עריצים יענה׃

25:6b.ISA.025.006 ועשה יהוה צבאות לכל העמים בהר הזה משתה שמנים משתה שמרים שמנים ממחים שמרים מזקקים׃

25:7b.ISA.025.007 ובלע בהר הזה פני הלוט הלוט על כל העמים והמסכה הנסוכה על כל הגוים׃

25:8b.ISA.025.008 בלע המות לנצח ומחה אדני יהוה דמעה מעל כל פנים וחרפת עמו יסיר מעל כל הארץ כי יהוה דבר׃

25:9b.ISA.025.009 ואמר ביום ההוא הנה אלהינו זה קוינו לו ויושיענו זה יהוה קוינו לו נגילה ונשמחה בישועתו׃

25:10b.ISA.025.010 כי תנוח יד יהוה בהר הזה ונדוש מואב תחתיו כהדוש מתבן במי מדמנה׃

25:11b.ISA.025.011 ופרש ידיו בקרבו כאשר יפרש השחה לשחות והשפיל גאותו עם ארבות ידיו׃

25:12b.ISA.025.012 ומבצר משגב חומתיך השח השפיל הגיע לארץ עד עפר׃

26

26:1b.ISA.026.001 ביום ההוא יושר השיר הזה בארץ יהודה עיר עז לנו ישועה ישית חומות וחל׃

26:2b.ISA.026.002 פתחו שערים ויבא גוי צדיק שמר אמנים׃

26:3b.ISA.026.003 יצר סמוך תצר שלום שלום כי בך בטוח׃

26:4b.ISA.026.004 בטחו ביהוה עדי עד כי ביה יהוה צור עולמים׃

26:5b.ISA.026.005 כי השח ישבי מרום קריה נשגבה ישפילנה ישפילה עד ארץ יגיענה עד עפר׃

26:6b.ISA.026.006 תרמסנה רגל רגלי עני פעמי דלים׃

26:7b.ISA.026.007 ארח לצדיק מישרים ישר מעגל צדיק תפלס׃

26:8b.ISA.026.008 אף ארח משפטיך יהוה קוינוך לשמך ולזכרך תאות נפש׃

26:9b.ISA.026.009 נפשי אויתיך בלילה אף רוחי בקרבי אשחרך כי כאשר משפטיך לארץ צדק למדו ישבי תבל׃

26:10b.ISA.026.010 יחן רשע בל למד צדק בארץ נכחות יעול ובל יראה גאות יהוה׃

26:11b.ISA.026.011 יהוה רמה ידך בל יחזיון יחזו ויבשו קנאת עם אף אש צריך תאכלם׃

26:12b.ISA.026.012 יהוה תשפת שלום לנו כי גם כל מעשינו פעלת לנו׃

26:13b.ISA.026.013 יהוה אלהינו בעלונו אדנים זולתך לבד בך נזכיר שמך׃

26:14b.ISA.026.014 מתים בל יחיו רפאים בל יקמו לכן פקדת ותשמידם ותאבד כל זכר למו׃

26:15b.ISA.026.015 יספת לגוי יהוה יספת לגוי נכבדת רחקת כל קצוי ארץ׃

26:16b.ISA.026.016 יהוה בצר פקדוך צקון לחש מוסרך למו׃

26:17b.ISA.026.017 כמו הרה תקריב ללדת תחיל תזעק בחבליה כן היינו מפניך יהוה׃

26:18b.ISA.026.018 הרינו חלנו כמו ילדנו רוח ישועת בל נעשה ארץ ובל יפלו ישבי תבל׃

26:19b.ISA.026.019 יחיו מתיך נבלתי יקומון הקיצו ורננו שכני עפר כי טל אורת טלך וארץ רפאים תפיל׃

26:20b.ISA.026.020 לך עמי בא בחדריך וסגר דלתיך בעדך חבי כמעט רגע עד יעבור זעם׃

26:21b.ISA.026.021 כי הנה יהוה יצא ממקומו לפקד עון ישב הארץ עליו וגלתה הארץ את דמיה ולא תכסה עוד על הרוגיה׃

27

27:1b.ISA.027.001 ביום ההוא יפקד יהוה בחרבו הקשה והגדולה והחזקה על לויתן נחש ברח ועל לויתן נחש עקלתון והרג את התנין אשר בים׃

27:2b.ISA.027.002 ביום ההוא כרם חמד ענו לה׃

27:3b.ISA.027.003 אני יהוה נצרה לרגעים אשקנה פן יפקד עליה לילה ויום אצרנה׃

27:4b.ISA.027.004 חמה אין לי מי יתנני שמיר שית במלחמה אפשעה בה אציתנה יחד׃

27:5b.ISA.027.005 או יחזק במעוזי יעשה שלום לי שלום יעשה לי׃

27:6b.ISA.027.006 הבאים ישרש יעקב יציץ ופרח ישראל ומלאו פני תבל תנובה׃

27:7b.ISA.027.007 הכמכת מכהו הכהו אם כהרג הרגיו הרג׃

27:8b.ISA.027.008 בסאסאה בשלחה תריבנה הגה ברוחו הקשה ביום קדים׃

27:9b.ISA.027.009 לכן בזאת יכפר עון יעקב וזה כל פרי הסר חטאתו בשומו כל אבני מזבח כאבני גר מנפצות לא יקמו אשרים וחמנים׃

27:10b.ISA.027.010 כי עיר בצורה בדד נוה משלח ונעזב כמדבר שם ירעה עגל ושם ירבץ וכלה סעפיה׃

27:11b.ISA.027.011 ביבש קצירה תשברנה נשים באות מאירות אותה כי לא עם בינות הוא על כן לא ירחמנו עשהו ויצרו לא יחננו׃

27:12b.ISA.027.012 והיה ביום ההוא יחבט יהוה משבלת הנהר עד נחל מצרים ואתם תלקטו לאחד אחד בני ישראל׃

27:13b.ISA.027.013 והיה ביום ההוא יתקע בשופר גדול ובאו האבדים בארץ אשור והנדחים בארץ מצרים והשתחוו ליהוה בהר הקדש בירושלם׃

28

28:1b.ISA.028.001 הוי עטרת גאות שכרי אפרים וציץ נבל צבי תפארתו אשר על ראש גיא שמנים הלומי יין׃

28:2b.ISA.028.002 הנה חזק ואמץ לאדני כזרם ברד שער קטב כזרם מים כבירים שטפים הניח לארץ ביד׃

28:3b.ISA.028.003 ברגלים תרמסנה עטרת גאות שכורי אפרים׃

28:4b.ISA.028.004 והיתה ציצת נבל צבי תפארתו אשר על ראש גיא שמנים כבכורה בטרם קיץ אשר יראה הראה אותה בעודה בכפו יבלענה׃

28:5b.ISA.028.005 ביום ההוא יהיה יהוה צבאות לעטרת צבי ולצפירת תפארה לשאר עמו׃

28:6b.ISA.028.006 ולרוח משפט ליושב על המשפט ולגבורה משיבי מלחמה שערה׃

28:7b.ISA.028.007 וגם אלה ביין שגו ובשכר תעו כהן ונביא שגו בשכר נבלעו מן היין תעו מן השכר שגו בראה פקו פליליה׃

28:8b.ISA.028.008 כי כל שלחנות מלאו קיא צאה בלי מקום׃

28:9b.ISA.028.009 את מי יורה דעה ואת מי יבין שמועה גמולי מחלב עתיקי משדים׃

28:10b.ISA.028.010 כי צו לצו צו לצו קו לקו קו לקו זעיר שם זעיר שם׃

28:11b.ISA.028.011 כי בלעגי שפה ובלשון אחרת ידבר אל העם הזה׃

28:12b.ISA.028.012 אשר אמר אליהם זאת המנוחה הניחו לעיף וזאת המרגעה ולא אבוא שמוע׃

28:13b.ISA.028.013 והיה להם דבר יהוה צו לצו צו לצו קו לקו קו לקו זעיר שם זעיר שם למען ילכו וכשלו אחור ונשברו ונוקשו ונלכדו׃

28:14b.ISA.028.014 לכן שמעו דבר יהוה אנשי לצון משלי העם הזה אשר בירושלם׃

28:15b.ISA.028.015 כי אמרתם כרתנו ברית את מות ועם שאול עשינו חזה שיט שוטף כי עבר לא יבואנו כי שמנו כזב מחסנו ובשקר נסתרנו׃

28:16b.ISA.028.016 לכן כה אמר אדני יהוה הנני יסד בציון אבן אבן בחן פנת יקרת מוסד מוסד המאמין לא יחיש׃

28:17b.ISA.028.017 ושמתי משפט לקו וצדקה למשקלת ויעה ברד מחסה כזב וסתר מים ישטפו׃

28:18b.ISA.028.018 וכפר בריתכם את מות וחזותכם את שאול לא תקום שוט שוטף כי יעבר והייתם לו למרמס׃

28:19b.ISA.028.019 מדי עברו יקח אתכם כי בבקר בבקר יעבר ביום ובלילה והיה רק זועה הבין שמועה׃

28:20b.ISA.028.020 כי קצר המצע מהשתרע והמסכה צרה כהתכנס׃

28:21b.ISA.028.021 כי כהר פרצים יקום יהוה כעמק בגבעון ירגז לעשות מעשהו זר מעשהו ולעבד עבדתו נכריה עבדתו׃

28:22b.ISA.028.022 ועתה אל תתלוצצו פן יחזקו מוסריכם כי כלה ונחרצה שמעתי מאת אדני יהוה צבאות על כל הארץ׃

28:23b.ISA.028.023 האזינו ושמעו קולי הקשיבו ושמעו אמרתי׃

28:24b.ISA.028.024 הכל היום יחרש החרש לזרע יפתח וישדד אדמתו׃

28:25b.ISA.028.025 הלוא אם שוה פניה והפיץ קצח וכמן יזרק ושם חטה שורה ושערה נסמן וכסמת גבלתו׃

28:26b.ISA.028.026 ויסרו למשפט אלהיו יורנו׃

28:27b.ISA.028.027 כי לא בחרוץ יודש קצח ואופן עגלה על כמן יוסב כי במטה יחבט קצח וכמן בשבט׃

28:28b.ISA.028.028 לחם יודק כי לא לנצח אדוש ידושנו והמם גלגל עגלתו ופרשיו לא ידקנו׃

28:29b.ISA.028.029 גם זאת מעם יהוה צבאות יצאה הפליא עצה הגדיל תושיה׃

29

29:1b.ISA.029.001 הוי אריאל אריאל קרית חנה דוד ספו שנה על שנה חגים ינקפו׃

29:2b.ISA.029.002 והציקותי לאריאל והיתה תאניה ואניה והיתה לי כאריאל׃

29:3b.ISA.029.003 וחניתי כדור עליך וצרתי עליך מצב והקימתי עליך מצרת׃

29:4b.ISA.029.004 ושפלת מארץ תדברי ומעפר תשח אמרתך והיה כאוב מארץ קולך ומעפר אמרתך תצפצף׃

29:5b.ISA.029.005 והיה כאבק דק המון זריך וכמץ עבר המון עריצים והיה לפתע פתאם׃

29:6b.ISA.029.006 מעם יהוה צבאות תפקד ברעם וברעש וקול גדול סופה וסערה ולהב אש אוכלה׃

29:7b.ISA.029.007 והיה כחלום חזון לילה המון כל הגוים הצבאים על אריאל וכל צביה ומצדתה והמציקים לה׃

29:8b.ISA.029.008 והיה כאשר יחלם הרעב והנה אוכל והקיץ וריקה נפשו וכאשר יחלם הצמא והנה שתה והקיץ והנה עיף ונפשו שוקקה כן יהיה המון כל הגוים הצבאים על הר ציון׃

29:9b.ISA.029.009 התמהמהו ותמהו השתעשעו ושעו שכרו ולא יין נעו ולא שכר׃

29:10b.ISA.029.010 כי נסך עליכם יהוה רוח תרדמה ויעצם את עיניכם את הנביאים ואת ראשיכם החזים כסה׃

29:11b.ISA.029.011 ותהי לכם חזות הכל כדברי הספר החתום אשר יתנו אתו אל יודע הספר לאמר קרא נא זה ואמר לא אוכל כי חתום הוא׃

29:12b.ISA.029.012 ונתן הספר על אשר לא ידע ספר לאמר קרא נא זה ואמר לא ידעתי ספר׃

29:13b.ISA.029.013 ויאמר אדני יען כי נגש העם הזה בפיו ובשפתיו כבדוני ולבו רחק ממני ותהי יראתם אתי מצות אנשים מלמדה׃

29:14b.ISA.029.014 לכן הנני יוסף להפליא את העם הזה הפלא ופלא ואבדה חכמת חכמיו ובינת נבניו תסתתר׃

29:15b.ISA.029.015 הוי המעמיקים מיהוה לסתר עצה והיה במחשך מעשיהם ויאמרו מי ראנו ומי יודענו׃

29:16b.ISA.029.016 הפככם אם כחמר היצר יחשב כי יאמר מעשה לעשהו לא עשני ויצר אמר ליוצרו לא הבין׃

29:17b.ISA.029.017 הלוא עוד מעט מזער ושב לבנון לכרמל והכרמל ליער יחשב׃

29:18b.ISA.029.018 ושמעו ביום ההוא החרשים דברי ספר ומאפל ומחשך עיני עורים תראינה׃

29:19b.ISA.029.019 ויספו ענוים ביהוה שמחה ואביוני אדם בקדוש ישראל יגילו׃

29:20b.ISA.029.020 כי אפס עריץ וכלה לץ ונכרתו כל שקדי און׃

29:21b.ISA.029.021 מחטיאי אדם בדבר ולמוכיח בשער יקשון ויטו בתהו צדיק׃

29:22b.ISA.029.022 לכן כה אמר יהוה אל בית יעקב אשר פדה את אברהם לא עתה יבוש יעקב ולא עתה פניו יחורו׃

29:23b.ISA.029.023 כי בראתו ילדיו מעשה ידי בקרבו יקדישו שמי והקדישו את קדוש יעקב ואת אלהי ישראל יעריצו׃

29:24b.ISA.029.024 וידעו תעי רוח בינה ורוגנים ילמדו לקח׃

30

30:1b.ISA.030.001 הוי בנים סוררים נאם יהוה לעשות עצה ולא מני ולנסך מסכה ולא רוחי למען ספות חטאת על חטאת׃

30:2b.ISA.030.002 ההלכים לרדת מצרים ופי לא שאלו לעוז במעוז פרעה ולחסות בצל מצרים׃

30:3b.ISA.030.003 והיה לכם מעוז פרעה לבשת והחסות בצל מצרים לכלמה׃

30:4b.ISA.030.004 כי היו בצען שריו ומלאכיו חנס יגיעו׃

30:5b.ISA.030.005 כל הבאיש על עם לא יועילו למו לא לעזר ולא להועיל כי לבשת וגם לחרפה׃

30:6b.ISA.030.006 משא בהמות נגב בארץ צרה וצוקה לביא וליש מהם אפעה ושרף מעופף ישאו על כתף עירים חילהם ועל דבשת גמלים אוצרתם על עם לא יועילו׃

30:7b.ISA.030.007 ומצרים הבל וריק יעזרו לכן קראתי לזאת רהב הם שבת׃

30:8b.ISA.030.008 עתה בוא כתבה על לוח אתם ועל ספר חקה ותהי ליום אחרון לעד עד עולם׃

30:9b.ISA.030.009 כי עם מרי הוא בנים כחשים בנים לא אבו שמוע תורת יהוה׃

30:10b.ISA.030.010 אשר אמרו לראים לא תראו ולחזים לא תחזו לנו נכחות דברו לנו חלקות חזו מהתלות׃

30:11b.ISA.030.011 סורו מני דרך הטו מני ארח השביתו מפנינו את קדוש ישראל׃

30:12b.ISA.030.012 לכן כה אמר קדוש ישראל יען מאסכם בדבר הזה ותבטחו בעשק ונלוז ותשענו עליו׃

30:13b.ISA.030.013 לכן יהיה לכם העון הזה כפרץ נפל נבעה בחומה נשגבה אשר פתאם לפתע יבוא שברה׃

30:14b.ISA.030.014 ושברה כשבר נבל יוצרים כתות לא יחמל ולא ימצא במכתתו חרש לחתות אש מיקוד ולחשף מים מגבא׃

30:15b.ISA.030.015 כי כה אמר אדני יהוה קדוש ישראל בשובה ונחת תושעון בהשקט ובבטחה תהיה גבורתכם ולא אביתם׃

30:16b.ISA.030.016 ותאמרו לא כי על סוס ננוס על כן תנוסון ועל קל נרכב על כן יקלו רדפיכם׃

30:17b.ISA.030.017 אלף אחד מפני גערת אחד מפני גערת חמשה תנסו עד אם נותרתם כתרן על ראש ההר וכנס על הגבעה׃

30:18b.ISA.030.018 ולכן יחכה יהוה לחננכם ולכן ירום לרחמכם כי אלהי משפט יהוה אשרי כל חוכי לו׃

30:19b.ISA.030.019 כי עם בציון ישב בירושלם בכו לא תבכה חנון יחנך לקול זעקך כשמעתו ענך׃

30:20b.ISA.030.020 ונתן לכם אדני לחם צר ומים לחץ ולא יכנף עוד מוריך והיו עיניך ראות את מוריך׃

30:21b.ISA.030.021 ואזניך תשמענה דבר מאחריך לאמר זה הדרך לכו בו כי תאמינו וכי תשמאילו׃

30:22b.ISA.030.022 וטמאתם את צפוי פסילי כספך ואת אפדת מסכת זהבך תזרם כמו דוה צא תאמר לו׃

30:23b.ISA.030.023 ונתן מטר זרעך אשר תזרע את האדמה ולחם תבואת האדמה והיה דשן ושמן ירעה מקניך ביום ההוא כר נרחב׃

30:24b.ISA.030.024 והאלפים והעירים עבדי האדמה בליל חמיץ יאכלו אשר זרה ברחת ובמזרה׃

30:25b.ISA.030.025 והיה על כל הר גבה ועל כל גבעה נשאה פלגים יבלי מים ביום הרג רב בנפל מגדלים׃

30:26b.ISA.030.026 והיה אור הלבנה כאור החמה ואור החמה יהיה שבעתים כאור שבעת הימים ביום חבש יהוה את שבר עמו ומחץ מכתו ירפא׃

30:27b.ISA.030.027 הנה שם יהוה בא ממרחק בער אפו וכבד משאה שפתיו מלאו זעם ולשונו כאש אכלת׃

30:28b.ISA.030.028 ורוחו כנחל שוטף עד צואר יחצה להנפה גוים בנפת שוא ורסן מתעה על לחיי עמים׃

30:29b.ISA.030.029 השיר יהיה לכם כליל התקדש חג ושמחת לבב כהולך בחליל לבוא בהר יהוה אל צור ישראל׃

30:30b.ISA.030.030 והשמיע יהוה את הוד קולו ונחת זרועו יראה בזעף אף ולהב אש אוכלה נפץ וזרם ואבן ברד׃

30:31b.ISA.030.031 כי מקול יהוה יחת אשור בשבט יכה׃

30:32b.ISA.030.032 והיה כל מעבר מטה מוסדה אשר יניח יהוה עליו בתפים ובכנרות ובמלחמות תנופה נלחם בה׃

30:33b.ISA.030.033 כי ערוך מאתמול תפתה גם הוא למלך הוכן העמיק הרחב מדרתה אש ועצים הרבה נשמת יהוה כנחל גפרית בערה בה׃

31

31:1b.ISA.031.001 הוי הירדים מצרים לעזרה על סוסים ישענו ויבטחו על רכב כי רב ועל פרשים כי עצמו מאד ולא שעו על קדוש ישראל ואת יהוה לא דרשו׃

31:2b.ISA.031.002 וגם הוא חכם ויבא רע ואת דבריו לא הסיר וקם על בית מרעים ועל עזרת פעלי און׃

31:3b.ISA.031.003 ומצרים אדם ולא אל וסוסיהם בשר ולא רוח ויהוה יטה ידו וכשל עוזר ונפל עזר ויחדו כלם יכליון׃

31:4b.ISA.031.004 כי כה אמר יהוה אלי כאשר יהגה האריה והכפיר על טרפו אשר יקרא עליו מלא רעים מקולם לא יחת ומהמונם לא יענה כן ירד יהוה צבאות לצבא על הר ציון ועל גבעתה׃

31:5b.ISA.031.005 כצפרים עפות כן יגן יהוה צבאות על ירושלם גנון והציל פסח והמליט׃

31:6b.ISA.031.006 שובו לאשר העמיקו סרה בני ישראל׃

31:7b.ISA.031.007 כי ביום ההוא ימאסון איש אלילי כספו ואלילי זהבו אשר עשו לכם ידיכם חטא׃

31:8b.ISA.031.008 ונפל אשור בחרב לא איש וחרב לא אדם תאכלנו ונס לו מפני חרב ובחוריו למס יהיו׃

31:9b.ISA.031.009 וסלעו ממגור יעבור וחתו מנס שריו נאם יהוה אשר אור לו בציון ותנור לו בירושלם׃

32

32:1b.ISA.032.001 הן לצדק ימלך מלך ולשרים למשפט ישרו׃

32:2b.ISA.032.002 והיה איש כמחבא רוח וסתר זרם כפלגי מים בציון כצל סלע כבד בארץ עיפה׃

32:3b.ISA.032.003 ולא תשעינה עיני ראים ואזני שמעים תקשבנה׃

32:4b.ISA.032.004 ולבב נמהרים יבין לדעת ולשון עלגים תמהר לדבר צחות׃

32:5b.ISA.032.005 לא יקרא עוד לנבל נדיב ולכילי לא יאמר שוע׃

32:6b.ISA.032.006 כי נבל נבלה ידבר ולבו יעשה און לעשות חנף ולדבר אל יהוה תועה להריק נפש רעב ומשקה צמא יחסיר׃

32:7b.ISA.032.007 וכלי כליו רעים הוא זמות יעץ לחבל ענוים באמרי שקר ובדבר אביון משפט׃

32:8b.ISA.032.008 ונדיב נדיבות יעץ והוא על נדיבות יקום׃

32:9b.ISA.032.009 נשים שאננות קמנה שמענה קולי בנות בטחות האזנה אמרתי׃

32:10b.ISA.032.010 ימים על שנה תרגזנה בטחות כי כלה בציר אסף בלי יבוא׃

32:11b.ISA.032.011 חרדו שאננות רגזה בטחות פשטה וערה וחגורה על חלצים׃

32:12b.ISA.032.012 על שדים ספדים על שדי חמד על גפן פריה׃

32:13b.ISA.032.013 על אדמת עמי קוץ שמיר תעלה כי על כל בתי משוש קריה עליזה׃

32:14b.ISA.032.014 כי ארמון נטש המון עיר עזב עפל ובחן היה בעד מערות עד עולם משוש פראים מרעה עדרים׃

32:15b.ISA.032.015 עד יערה עלינו רוח ממרום והיה מדבר לכרמל וכרמל ליער יחשב׃

32:16b.ISA.032.016 ושכן במדבר משפט וצדקה בכרמל תשב׃

32:17b.ISA.032.017 והיה מעשה הצדקה שלום ועבדת הצדקה השקט ובטח עד עולם׃

32:18b.ISA.032.018 וישב עמי בנוה שלום ובמשכנות מבטחים ובמנוחת שאננות׃

32:19b.ISA.032.019 וברד ברדת היער ובשפלה תשפל העיר׃

32:20b.ISA.032.020 אשריכם זרעי על כל מים משלחי רגל השור והחמור׃

33

33:1b.ISA.033.001 הוי שודד ואתה לא שדוד ובוגד ולא בגדו בו כהתמך שודד תושד כנלתך לבגד יבגדו בך׃

33:2b.ISA.033.002 יהוה חננו לך קוינו היה זרעם לבקרים אף ישועתנו בעת צרה׃

33:3b.ISA.033.003 מקול המון נדדו עמים מרוממתך נפצו גוים׃

33:4b.ISA.033.004 ואסף שללכם אסף החסיל כמשק גבים שוקק בו׃

33:5b.ISA.033.005 נשגב יהוה כי שכן מרום מלא ציון משפט וצדקה׃

33:6b.ISA.033.006 והיה אמונת עתיך חסן ישועת חכמת ודעת יראת יהוה היא אוצרו׃

33:7b.ISA.033.007 הן אראלם צעקו חצה מלאכי שלום מר יבכיון׃

33:8b.ISA.033.008 נשמו מסלות שבת עבר ארח הפר ברית מאס ערים לא חשב אנוש׃

33:9b.ISA.033.009 אבל אמללה ארץ החפיר לבנון קמל היה השרון כערבה ונער בשן וכרמל׃

33:10b.ISA.033.010 עתה אקום יאמר יהוה עתה ארומם עתה אנשא׃

33:11b.ISA.033.011 תהרו חשש תלדו קש רוחכם אש תאכלכם׃

33:12b.ISA.033.012 והיו עמים משרפות שיד קוצים כסוחים באש יצתו׃

33:13b.ISA.033.013 שמעו רחוקים אשר עשיתי ודעו קרובים גברתי׃

33:14b.ISA.033.014 פחדו בציון חטאים אחזה רעדה חנפים מי יגור לנו אש אוכלה מי יגור לנו מוקדי עולם׃

33:15b.ISA.033.015 הלך צדקות ודבר מישרים מאס בבצע מעשקות נער כפיו מתמך בשחד אטם אזנו משמע דמים ועצם עיניו מראות ברע׃

33:16b.ISA.033.016 הוא מרומים ישכן מצדות סלעים משגבו לחמו נתן מימיו נאמנים׃

33:17b.ISA.033.017 מלך ביפיו תחזינה עיניך תראינה ארץ מרחקים׃

33:18b.ISA.033.018 לבך יהגה אימה איה ספר איה שקל איה ספר את המגדלים׃

33:19b.ISA.033.019 את עם נועז לא תראה עם עמקי שפה משמוע נלעג לשון אין בינה׃

33:20b.ISA.033.020 חזה ציון קרית מועדנו עיניך תראינה ירושלם נוה שאנן אהל בל יצען בל יסע יתדתיו לנצח וכל חבליו בל ינתקו׃

33:21b.ISA.033.021 כי אם שם אדיר יהוה לנו מקום נהרים יארים רחבי ידים בל תלך בו אני שיט וצי אדיר לא יעברנו׃

33:22b.ISA.033.022 כי יהוה שפטנו יהוה מחקקנו יהוה מלכנו הוא יושיענו׃

33:23b.ISA.033.023 נטשו חבליך בל יחזקו כן תרנם בל פרשו נס אז חלק עד שלל מרבה פסחים בזזו בז׃

33:24b.ISA.033.024 ובל יאמר שכן חליתי העם הישב בה נשא עון׃

34

34:1b.ISA.034.001 קרבו גוים לשמע ולאמים הקשיבו תשמע הארץ ומלאה תבל וכל צאצאיה׃

34:2b.ISA.034.002 כי קצף ליהוה על כל הגוים וחמה על כל צבאם החרימם נתנם לטבח׃

34:3b.ISA.034.003 וחלליהם ישלכו ופגריהם יעלה באשם ונמסו הרים מדמם׃

34:4b.ISA.034.004 ונמקו כל צבא השמים ונגלו כספר השמים וכל צבאם יבול כנבל עלה מגפן וכנבלת מתאנה׃

34:5b.ISA.034.005 כי רותה בשמים חרבי הנה על אדום תרד ועל עם חרמי למשפט׃

34:6b.ISA.034.006 חרב ליהוה מלאה דם הדשנה מחלב מדם כרים ועתודים מחלב כליות אילים כי זבח ליהוה בבצרה וטבח גדול בארץ אדום׃

34:7b.ISA.034.007 וירדו ראמים עמם ופרים עם אבירים ורותה ארצם מדם ועפרם מחלב ידשן׃

34:8b.ISA.034.008 כי יום נקם ליהוה שנת שלומים לריב ציון׃

34:9b.ISA.034.009 ונהפכו נחליה לזפת ועפרה לגפרית והיתה ארצה לזפת בערה׃

34:10b.ISA.034.010 לילה ויומם לא תכבה לעולם יעלה עשנה מדור לדור תחרב לנצח נצחים אין עבר בה׃

34:11b.ISA.034.011 וירשוה קאת וקפוד וינשוף וערב ישכנו בה ונטה עליה קו תהו ואבני בהו׃

34:12b.ISA.034.012 חריה ואין שם מלוכה יקראו וכל שריה יהיו אפס׃

34:13b.ISA.034.013 ועלתה ארמנתיה סירים קמוש וחוח במבצריה והיתה נוה תנים חציר לבנות יענה׃

34:14b.ISA.034.014 ופגשו ציים את איים ושעיר על רעהו יקרא אך שם הרגיעה לילית ומצאה לה מנוח׃

34:15b.ISA.034.015 שמה קננה קפוז ותמלט ובקעה ודגרה בצלה אך שם נקבצו דיות אשה רעותה׃

34:16b.ISA.034.016 דרשו מעל ספר יהוה וקראו אחת מהנה לא נעדרה אשה רעותה לא פקדו כי פי הוא צוה ורוחו הוא קבצן׃

34:17b.ISA.034.017 והוא הפיל להן גורל וידו חלקתה להם בקו עד עולם יירשוה לדור ודור ישכנו בה׃

35

35:1b.ISA.035.001 יששום מדבר וציה ותגל ערבה ותפרח כחבצלת׃

35:2b.ISA.035.002 פרח תפרח ותגל אף גילת ורנן כבוד הלבנון נתן לה הדר הכרמל והשרון המה יראו כבוד יהוה הדר אלהינו׃

35:3b.ISA.035.003 חזקו ידים רפות וברכים כשלות אמצו׃

35:4b.ISA.035.004 אמרו לנמהרי לב חזקו אל תיראו הנה אלהיכם נקם יבוא גמול אלהים הוא יבוא וישעכם׃

35:5b.ISA.035.005 אז תפקחנה עיני עורים ואזני חרשים תפתחנה׃

35:6b.ISA.035.006 אז ידלג כאיל פסח ותרן לשון אלם כי נבקעו במדבר מים ונחלים בערבה׃

35:7b.ISA.035.007 והיה השרב לאגם וצמאון למבועי מים בנוה תנים רבצה חציר לקנה וגמא׃

35:8b.ISA.035.008 והיה שם מסלול ודרך ודרך הקדש יקרא לה לא יעברנו טמא והוא למו הלך דרך ואוילים לא יתעו׃

35:9b.ISA.035.009 לא יהיה שם אריה ופריץ חיות בל יעלנה לא תמצא שם והלכו גאולים׃

35:10b.ISA.035.010 ופדויי יהוה ישבון ובאו ציון ברנה ושמחת עולם על ראשם ששון ושמחה ישיגו ונסו יגון ואנחה׃

36

36:1b.ISA.036.001 ויהי בארבע עשרה שנה למלך חזקיהו עלה סנחריב מלך אשור על כל ערי יהודה הבצרות ויתפשם׃

36:2b.ISA.036.002 וישלח מלך אשור את רב שקה מלכיש ירושלמה אל המלך חזקיהו בחיל כבד ויעמד בתעלת הברכה העליונה במסלת שדה כובס׃

36:3b.ISA.036.003 ויצא אליו אליקים בן חלקיהו אשר על הבית ושבנא הספר ויואח בן אסף המזכיר׃

36:4b.ISA.036.004 ויאמר אליהם רב שקה אמרו נא אל חזקיהו כה אמר המלך הגדול מלך אשור מה הבטחון הזה אשר בטחת׃

36:5b.ISA.036.005 אמרתי אך דבר שפתים עצה וגבורה למלחמה עתה על מי בטחת כי מרדת בי׃

36:6b.ISA.036.006 הנה בטחת על משענת הקנה הרצוץ הזה על מצרים אשר יסמך איש עליו ובא בכפו ונקבה כן פרעה מלך מצרים לכל הבטחים עליו׃

36:7b.ISA.036.007 וכי תאמר אלי אל יהוה אלהינו בטחנו הלוא הוא אשר הסיר חזקיהו את במתיו ואת מזבחתיו ויאמר ליהודה ולירושלם לפני המזבח הזה תשתחוו׃

36:8b.ISA.036.008 ועתה התערב נא את אדני המלך אשור ואתנה לך אלפים סוסים אם תוכל לתת לך רכבים עליהם׃

36:9b.ISA.036.009 ואיך תשיב את פני פחת אחד עבדי אדני הקטנים ותבטח לך על מצרים לרכב ולפרשים׃

36:10b.ISA.036.010 ועתה המבלעדי יהוה עליתי על הארץ הזאת להשחיתה יהוה אמר אלי עלה אל הארץ הזאת והשחיתה׃

36:11b.ISA.036.011 ויאמר אליקים ושבנא ויואח אל רב שקה דבר נא אל עבדיך ארמית כי שמעים אנחנו ואל תדבר אלינו יהודית באזני העם אשר על החומה׃

36:12b.ISA.036.012 ויאמר רב שקה האל אדניך ואליך שלחני אדני לדבר את הדברים האלה הלא על האנשים הישבים על החומה לאכל את חראיהם ולשתות את שיניהם עמכם׃

36:13b.ISA.036.013 ויעמד רב שקה ויקרא בקול גדול יהודית ויאמר שמעו את דברי המלך הגדול מלך אשור׃

36:14b.ISA.036.014 כה אמר המלך אל ישא לכם חזקיהו כי לא יוכל להציל אתכם׃

36:15b.ISA.036.015 ואל יבטח אתכם חזקיהו אל יהוה לאמר הצל יצילנו יהוה לא תנתן העיר הזאת ביד מלך אשור׃

36:16b.ISA.036.016 אל תשמעו אל חזקיהו כי כה אמר המלך אשור עשו אתי ברכה וצאו אלי ואכלו איש גפנו ואיש תאנתו ושתו איש מי בורו׃

36:17b.ISA.036.017 עד באי ולקחתי אתכם אל ארץ כארצכם ארץ דגן ותירוש ארץ לחם וכרמים׃

36:18b.ISA.036.018 פן יסית אתכם חזקיהו לאמר יהוה יצילנו ההצילו אלהי הגוים איש את ארצו מיד מלך אשור׃

36:19b.ISA.036.019 איה אלהי חמת וארפד איה אלהי ספרוים וכי הצילו את שמרון מידי׃

36:20b.ISA.036.020 מי בכל אלהי הארצות האלה אשר הצילו את ארצם מידי כי יציל יהוה את ירושלם מידי׃

36:21b.ISA.036.021 ויחרישו ולא ענו אתו דבר כי מצות המלך היא לאמר לא תענהו׃

36:22b.ISA.036.022 ויבא אליקים בן חלקיהו אשר על הבית ושבנא הסופר ויואח בן אסף המזכיר אל חזקיהו קרועי בגדים ויגידו לו את דברי רב שקה׃

37

37:1b.ISA.037.001 ויהי כשמע המלך חזקיהו ויקרע את בגדיו ויתכס בשק ויבא בית יהוה׃

37:2b.ISA.037.002 וישלח את אליקים אשר על הבית ואת שבנא הסופר ואת זקני הכהנים מתכסים בשקים אל ישעיהו בן אמוץ הנביא׃

37:3b.ISA.037.003 ויאמרו אליו כה אמר חזקיהו יום צרה ותוכחה ונאצה היום הזה כי באו בנים עד משבר וכח אין ללדה׃

37:4b.ISA.037.004 אולי ישמע יהוה אלהיך את דברי רב שקה אשר שלחו מלך אשור אדניו לחרף אלהים חי והוכיח בדברים אשר שמע יהוה אלהיך ונשאת תפלה בעד השארית הנמצאה׃

37:5b.ISA.037.005 ויבאו עבדי המלך חזקיהו אל ישעיהו׃

37:6b.ISA.037.006 ויאמר אליהם ישעיהו כה תאמרון אל אדניכם כה אמר יהוה אל תירא מפני הדברים אשר שמעת אשר גדפו נערי מלך אשור אותי׃

37:7b.ISA.037.007 הנני נותן בו רוח ושמע שמועה ושב אל ארצו והפלתיו בחרב בארצו׃

37:8b.ISA.037.008 וישב רב שקה וימצא את מלך אשור נלחם על לבנה כי שמע כי נסע מלכיש׃

37:9b.ISA.037.009 וישמע על תרהקה מלך כוש לאמר יצא להלחם אתך וישמע וישלח מלאכים אל חזקיהו לאמר׃

37:10b.ISA.037.010 כה תאמרון אל חזקיהו מלך יהודה לאמר אל ישאך אלהיך אשר אתה בוטח בו לאמר לא תנתן ירושלם ביד מלך אשור׃

37:11b.ISA.037.011 הנה אתה שמעת אשר עשו מלכי אשור לכל הארצות להחרימם ואתה תנצל׃

37:12b.ISA.037.012 ההצילו אותם אלהי הגוים אשר השחיתו אבותי את גוזן ואת חרן ורצף ובני עדן אשר בתלשר׃

37:13b.ISA.037.013 איה מלך חמת ומלך ארפד ומלך לעיר ספרוים הנע ועוה׃

37:14b.ISA.037.014 ויקח חזקיהו את הספרים מיד המלאכים ויקראהו ויעל בית יהוה ויפרשהו חזקיהו לפני יהוה׃

37:15b.ISA.037.015 ויתפלל חזקיהו אל יהוה לאמר׃

37:16b.ISA.037.016 יהוה צבאות אלהי ישראל ישב הכרבים אתה הוא האלהים לבדך לכל ממלכות הארץ אתה עשית את השמים ואת הארץ׃

37:17b.ISA.037.017 הטה יהוה אזנך ושמע פקח יהוה עינך וראה ושמע את כל דברי סנחריב אשר שלח לחרף אלהים חי׃

37:18b.ISA.037.018 אמנם יהוה החריבו מלכי אשור את כל הארצות ואת ארצם׃

37:19b.ISA.037.019 ונתן את אלהיהם באש כי לא אלהים המה כי אם מעשה ידי אדם עץ ואבן ויאבדום׃

37:20b.ISA.037.020 ועתה יהוה אלהינו הושיענו מידו וידעו כל ממלכות הארץ כי אתה יהוה לבדך׃

37:21b.ISA.037.021 וישלח ישעיהו בן אמוץ אל חזקיהו לאמר כה אמר יהוה אלהי ישראל אשר התפללת אלי אל סנחריב מלך אשור׃

37:22b.ISA.037.022 זה הדבר אשר דבר יהוה עליו בזה לך לעגה לך בתולת בת ציון אחריך ראש הניעה בת ירושלם׃

37:23b.ISA.037.023 את מי חרפת וגדפת ועל מי הרימותה קול ותשא מרום עיניך אל קדוש ישראל׃

37:24b.ISA.037.024 ביד עבדיך חרפת אדני ותאמר ברב רכבי אני עליתי מרום הרים ירכתי לבנון ואכרת קומת ארזיו מבחר ברשיו ואבוא מרום קצו יער כרמלו׃

37:25b.ISA.037.025 אני קרתי ושתיתי מים ואחרב בכף פעמי כל יארי מצור׃

37:26b.ISA.037.026 הלוא שמעת למרחוק אותה עשיתי מימי קדם ויצרתיה עתה הבאתיה ותהי להשאות גלים נצים ערים בצרות׃

37:27b.ISA.037.027 וישביהן קצרי יד חתו ובשו היו עשב שדה וירק דשא חציר גגות ושדמה לפני קמה׃

37:28b.ISA.037.028 ושבתך וצאתך ובואך ידעתי ואת התרגזך אלי׃

37:29b.ISA.037.029 יען התרגזך אלי ושאננך עלה באזני ושמתי חחי באפך ומתגי בשפתיך והשיבתיך בדרך אשר באת בה׃

37:30b.ISA.037.030 וזה לך האות אכול השנה ספיח ובשנה השנית שחיס ובשנה השלישית זרעו וקצרו ונטעו כרמים ואכול פרים׃

37:31b.ISA.037.031 ויספה פליטת בית יהודה הנשארה שרש למטה ועשה פרי למעלה׃

37:32b.ISA.037.032 כי מירושלם תצא שארית ופליטה מהר ציון קנאת יהוה צבאות תעשה זאת׃

37:33b.ISA.037.033 לכן כה אמר יהוה אל מלך אשור לא יבוא אל העיר הזאת ולא יורה שם חץ ולא יקדמנה מגן ולא ישפך עליה סללה׃

37:34b.ISA.037.034 בדרך אשר בא בה ישוב ואל העיר הזאת לא יבוא נאם יהוה׃

37:35b.ISA.037.035 וגנותי על העיר הזאת להושיעה למעני ולמען דוד עבדי׃

37:36b.ISA.037.036 ויצא מלאך יהוה ויכה במחנה אשור מאה ושמנים וחמשה אלף וישכימו בבקר והנה כלם פגרים מתים׃

37:37b.ISA.037.037 ויסע וילך וישב סנחריב מלך אשור וישב בנינוה׃

37:38b.ISA.037.038 ויהי הוא משתחוה בית נסרך אלהיו ואדרמלך ושראצר בניו הכהו בחרב והמה נמלטו ארץ אררט וימלך אסר חדן בנו תחתיו׃

38

38:1b.ISA.038.001 בימים ההם חלה חזקיהו למות ויבוא אליו ישעיהו בן אמוץ הנביא ויאמר אליו כה אמר יהוה צו לביתך כי מת אתה ולא תחיה׃

38:2b.ISA.038.002 ויסב חזקיהו פניו אל הקיר ויתפלל אל יהוה׃

38:3b.ISA.038.003 ויאמר אנה יהוה זכר נא את אשר התהלכתי לפניך באמת ובלב שלם והטוב בעיניך עשיתי ויבך חזקיהו בכי גדול׃

38:4b.ISA.038.004 ויהי דבר יהוה אל ישעיהו לאמר׃

38:5b.ISA.038.005 הלוך ואמרת אל חזקיהו כה אמר יהוה אלהי דוד אביך שמעתי את תפלתך ראיתי את דמעתך הנני יוסף על ימיך חמש עשרה שנה׃

38:6b.ISA.038.006 ומכף מלך אשור אצילך ואת העיר הזאת וגנותי על העיר הזאת׃

38:7b.ISA.038.007 וזה לך האות מאת יהוה אשר יעשה יהוה את הדבר הזה אשר דבר׃

38:8b.ISA.038.008 הנני משיב את צל המעלות אשר ירדה במעלות אחז בשמש אחרנית עשר מעלות ותשב השמש עשר מעלות במעלות אשר ירדה׃

38:9b.ISA.038.009 מכתב לחזקיהו מלך יהודה בחלתו ויחי מחליו׃

38:10b.ISA.038.010 אני אמרתי בדמי ימי אלכה בשערי שאול פקדתי יתר שנותי׃

38:11b.ISA.038.011 אמרתי לא אראה יה יה בארץ החיים לא אביט אדם עוד עם יושבי חדל׃

38:12b.ISA.038.012 דורי נסע ונגלה מני כאהל רעי קפדתי כארג חיי מדלה יבצעני מיום עד לילה תשלימני׃

38:13b.ISA.038.013 שויתי עד בקר כארי כן ישבר כל עצמותי מיום עד לילה תשלימני׃

38:14b.ISA.038.014 כסוס עגור כן אצפצף אהגה כיונה דלו עיני למרום אדני עשקה לי ערבני׃

38:15b.ISA.038.015 מה אדבר ואמר לי והוא עשה אדדה כל שנותי על מר נפשי׃

38:16b.ISA.038.016 אדני עליהם יחיו ולכל בהן חיי רוחי ותחלימני והחיני׃

38:17b.ISA.038.017 הנה לשלום מר לי מר ואתה חשקת נפשי משחת בלי כי השלכת אחרי גוך כל חטאי׃

38:18b.ISA.038.018 כי לא שאול תודך מות יהללך לא ישברו יורדי בור אל אמתך׃

38:19b.ISA.038.019 חי חי הוא יודך כמוני היום אב לבנים יודיע אל אמתך׃

38:20b.ISA.038.020 יהוה להושיעני ונגנותי ננגן כל ימי חיינו על בית יהוה׃

38:21b.ISA.038.021 ויאמר ישעיהו ישאו דבלת תאנים וימרחו על השחין ויחי׃

38:22b.ISA.038.022 ויאמר חזקיהו מה אות כי אעלה בית יהוה׃

39

39:1b.ISA.039.001 בעת ההיא שלח מרדך בלאדן בן בלאדן מלך בבל ספרים ומנחה אל חזקיהו וישמע כי חלה ויחזק׃

39:2b.ISA.039.002 וישמח עליהם חזקיהו ויראם את בית נכתה את הכסף ואת הזהב ואת הבשמים ואת השמן הטוב ואת כל בית כליו ואת כל אשר נמצא באצרתיו לא היה דבר אשר לא הראם חזקיהו בביתו ובכל ממשלתו׃

39:3b.ISA.039.003 ויבא ישעיהו הנביא אל המלך חזקיהו ויאמר אליו מה אמרו האנשים האלה ומאין יבאו אליך ויאמר חזקיהו מארץ רחוקה באו אלי מבבל׃

39:4b.ISA.039.004 ויאמר מה ראו בביתך ויאמר חזקיהו את כל אשר בביתי ראו לא היה דבר אשר לא הראיתים באוצרתי׃

39:5b.ISA.039.005 ויאמר ישעיהו אל חזקיהו שמע דבר יהוה צבאות׃

39:6b.ISA.039.006 הנה ימים באים ונשא כל אשר בביתך ואשר אצרו אבתיך עד היום הזה בבל לא יותר דבר אמר יהוה׃

39:7b.ISA.039.007 ומבניך אשר יצאו ממך אשר תוליד יקחו והיו סריסים בהיכל מלך בבל׃

39:8b.ISA.039.008 ויאמר חזקיהו אל ישעיהו טוב דבר יהוה אשר דברת ויאמר כי יהיה שלום ואמת בימי׃

40

40:1b.ISA.040.001 נחמו נחמו עמי יאמר אלהיכם׃

40:2b.ISA.040.002 דברו על לב ירושלם וקראו אליה כי מלאה צבאה כי נרצה עונה כי לקחה מיד יהוה כפלים בכל חטאתיה׃

40:3b.ISA.040.003 קול קורא במדבר פנו דרך יהוה ישרו בערבה מסלה לאלהינו׃

40:4b.ISA.040.004 כל גיא ינשא וכל הר וגבעה ישפלו והיה העקב למישור והרכסים לבקעה׃

40:5b.ISA.040.005 ונגלה כבוד יהוה וראו כל בשר יחדו כי פי יהוה דבר׃

40:6b.ISA.040.006 קול אמר קרא ואמר מה אקרא כל הבשר חציר וכל חסדו כציץ השדה׃

40:7b.ISA.040.007 יבש חציר נבל ציץ כי רוח יהוה נשבה בו אכן חציר העם׃

40:8b.ISA.040.008 יבש חציר נבל ציץ ודבר אלהינו יקום לעולם׃

40:9b.ISA.040.009 על הר גבה עלי לך מבשרת ציון הרימי בכח קולך מבשרת ירושלם הרימי אל תיראי אמרי לערי יהודה הנה אלהיכם׃

40:10b.ISA.040.010 הנה אדני יהוה בחזק יבוא וזרעו משלה לו הנה שכרו אתו ופעלתו לפניו׃

40:11b.ISA.040.011 כרעה עדרו ירעה בזרעו יקבץ טלאים ובחיקו ישא עלות ינהל׃

40:12b.ISA.040.012 מי מדד בשעלו מים ושמים בזרת תכן וכל בשלש עפר הארץ ושקל בפלס הרים וגבעות במאזנים׃

40:13b.ISA.040.013 מי תכן את רוח יהוה ואיש עצתו יודיענו׃

40:14b.ISA.040.014 את מי נועץ ויבינהו וילמדהו בארח משפט וילמדהו דעת ודרך תבונות יודיענו׃

40:15b.ISA.040.015 הן גוים כמר מדלי וכשחק מאזנים נחשבו הן איים כדק יטול׃

40:16b.ISA.040.016 ולבנון אין די בער וחיתו אין די עולה׃

40:17b.ISA.040.017 כל הגוים כאין נגדו מאפס ותהו נחשבו לו׃

40:18b.ISA.040.018 ואל מי תדמיון אל ומה דמות תערכו לו׃

40:19b.ISA.040.019 הפסל נסך חרש וצרף בזהב ירקענו ורתקות כסף צורף׃

40:20b.ISA.040.020 המסכן תרומה עץ לא ירקב יבחר חרש חכם יבקש לו להכין פסל לא ימוט׃

40:21b.ISA.040.021 הלוא תדעו הלוא תשמעו הלוא הגד מראש לכם הלוא הבינתם מוסדות הארץ׃

40:22b.ISA.040.022 הישב על חוג הארץ וישביה כחגבים הנוטה כדק שמים וימתחם כאהל לשבת׃

40:23b.ISA.040.023 הנותן רוזנים לאין שפטי ארץ כתהו עשה׃

40:24b.ISA.040.024 אף בל נטעו אף בל זרעו אף בל שרש בארץ גזעם וגם נשף בהם ויבשו וסערה כקש תשאם׃

40:25b.ISA.040.025 ואל מי תדמיוני ואשוה יאמר קדוש׃

40:26b.ISA.040.026 שאו מרום עיניכם וראו מי ברא אלה המוציא במספר צבאם לכלם בשם יקרא מרב אונים ואמיץ כח איש לא נעדר׃

40:27b.ISA.040.027 למה תאמר יעקב ותדבר ישראל נסתרה דרכי מיהוה ומאלהי משפטי יעבור׃

40:28b.ISA.040.028 הלוא ידעת אם לא שמעת אלהי עולם יהוה בורא קצות הארץ לא ייעף ולא ייגע אין חקר לתבונתו׃

40:29b.ISA.040.029 נתן ליעף כח ולאין אונים עצמה ירבה׃

40:30b.ISA.040.030 ויעפו נערים ויגעו ובחורים כשול יכשלו׃

40:31b.ISA.040.031 וקוי יהוה יחליפו כח יעלו אבר כנשרים ירוצו ולא ייגעו ילכו ולא ייעפו׃

41

41:1b.ISA.041.001 החרישו אלי איים ולאמים יחליפו כח יגשו אז ידברו יחדו למשפט נקרבה׃

41:2b.ISA.041.002 מי העיר ממזרח צדק יקראהו לרגלו יתן לפניו גוים ומלכים ירד יתן כעפר חרבו כקש נדף קשתו׃

41:3b.ISA.041.003 ירדפם יעבור שלום ארח ברגליו לא יבוא׃

41:4b.ISA.041.004 מי פעל ועשה קרא הדרות מראש אני יהוה ראשון ואת אחרנים אני הוא׃

41:5b.ISA.041.005 ראו איים וייראו קצות הארץ יחרדו קרבו ויאתיון׃

41:6b.ISA.041.006 איש את רעהו יעזרו ולאחיו יאמר חזק׃

41:7b.ISA.041.007 ויחזק חרש את צרף מחליק פטיש את הולם פעם אמר לדבק טוב הוא ויחזקהו במסמרים לא ימוט׃

41:8b.ISA.041.008 ואתה ישראל עבדי יעקב אשר בחרתיך זרע אברהם אהבי׃

41:9b.ISA.041.009 אשר החזקתיך מקצות הארץ ומאציליה קראתיך ואמר לך עבדי אתה בחרתיך ולא מאסתיך׃

41:10b.ISA.041.010 אל תירא כי עמך אני אל תשתע כי אני אלהיך אמצתיך אף עזרתיך אף תמכתיך בימין צדקי׃

41:11b.ISA.041.011 הן יבשו ויכלמו כל הנחרים בך יהיו כאין ויאבדו אנשי ריבך׃

41:12b.ISA.041.012 תבקשם ולא תמצאם אנשי מצתך יהיו כאין וכאפס אנשי מלחמתך׃

41:13b.ISA.041.013 כי אני יהוה אלהיך מחזיק ימינך האמר לך אל תירא אני עזרתיך׃

41:14b.ISA.041.014 אל תיראי תולעת יעקב מתי ישראל אני עזרתיך נאם יהוה וגאלך קדוש ישראל׃

41:15b.ISA.041.015 הנה שמתיך למורג חרוץ חדש בעל פיפיות תדוש הרים ותדק וגבעות כמץ תשים׃

41:16b.ISA.041.016 תזרם ורוח תשאם וסערה תפיץ אותם ואתה תגיל ביהוה בקדוש ישראל תתהלל׃

41:17b.ISA.041.017 העניים והאביונים מבקשים מים ואין לשונם בצמא נשתה אני יהוה אענם אלהי ישראל לא אעזבם׃

41:18b.ISA.041.018 אפתח על שפיים נהרות ובתוך בקעות מעינות אשים מדבר לאגם מים וארץ ציה למוצאי מים׃

41:19b.ISA.041.019 אתן במדבר ארז שטה והדס ועץ שמן אשים בערבה ברוש תדהר ותאשור יחדו׃

41:20b.ISA.041.020 למען יראו וידעו וישימו וישכילו יחדו כי יד יהוה עשתה זאת וקדוש ישראל בראה׃

41:21b.ISA.041.021 קרבו ריבכם יאמר יהוה הגישו עצמותיכם יאמר מלך יעקב׃

41:22b.ISA.041.022 יגישו ויגידו לנו את אשר תקרינה הראשנות מה הנה הגידו ונשימה לבנו ונדעה אחריתן או הבאות השמיענו׃

41:23b.ISA.041.023 הגידו האתיות לאחור ונדעה כי אלהים אתם אף תיטיבו ותרעו ונשתעה ונרא יחדו׃

41:24b.ISA.041.024 הן אתם מאין ופעלכם מאפע תועבה יבחר בכם׃

41:25b.ISA.041.025 העירותי מצפון ויאת ממזרח שמש יקרא בשמי ויבא סגנים כמו חמר וכמו יוצר ירמס טיט׃

41:26b.ISA.041.026 מי הגיד מראש ונדעה ומלפנים ונאמר צדיק אף אין מגיד אף אין משמיע אף אין שמע אמריכם׃

41:27b.ISA.041.027 ראשון לציון הנה הנם ולירושלם מבשר אתן׃

41:28b.ISA.041.028 וארא ואין איש ומאלה ואין יועץ ואשאלם וישיבו דבר׃

41:29b.ISA.041.029 הן כלם און אפס מעשיהם רוח ותהו נסכיהם׃

42

42:1b.ISA.042.001 הן עבדי אתמך בו בחירי רצתה נפשי נתתי רוחי עליו משפט לגוים יוציא׃

42:2b.ISA.042.002 לא יצעק ולא ישא ולא ישמיע בחוץ קולו׃

42:3b.ISA.042.003 קנה רצוץ לא ישבור ופשתה כהה לא יכבנה לאמת יוציא משפט׃

42:4b.ISA.042.004 לא יכהה ולא ירוץ עד ישים בארץ משפט ולתורתו איים ייחילו׃

42:5b.ISA.042.005 כה אמר האל יהוה בורא השמים ונוטיהם רקע הארץ וצאצאיה נתן נשמה לעם עליה ורוח להלכים בה׃

42:6b.ISA.042.006 אני יהוה קראתיך בצדק ואחזק בידך ואצרך ואתנך לברית עם לאור גוים׃

42:7b.ISA.042.007 לפקח עינים עורות להוציא ממסגר אסיר מבית כלא ישבי חשך׃

42:8b.ISA.042.008 אני יהוה הוא שמי וכבודי לאחר לא אתן ותהלתי לפסילים׃

42:9b.ISA.042.009 הראשנות הנה באו וחדשות אני מגיד בטרם תצמחנה אשמיע אתכם׃

42:10b.ISA.042.010 שירו ליהוה שיר חדש תהלתו מקצה הארץ יורדי הים ומלאו איים וישביהם׃

42:11b.ISA.042.011 ישאו מדבר ועריו חצרים תשב קדר ירנו ישבי סלע מראש הרים יצוחו׃

42:12b.ISA.042.012 ישימו ליהוה כבוד ותהלתו באיים יגידו׃

42:13b.ISA.042.013 יהוה כגבור יצא כאיש מלחמות יעיר קנאה יריע אף יצריח על איביו יתגבר׃

42:14b.ISA.042.014 החשיתי מעולם אחריש אתאפק כיולדה אפעה אשם ואשאף יחד׃

42:15b.ISA.042.015 אחריב הרים וגבעות וכל עשבם אוביש ושמתי נהרות לאיים ואגמים אוביש׃

42:16b.ISA.042.016 והולכתי עורים בדרך לא ידעו בנתיבות לא ידעו אדריכם אשים מחשך לפניהם לאור ומעקשים למישור אלה הדברים עשיתם ולא עזבתים׃

42:17b.ISA.042.017 נסגו אחור יבשו בשת הבטחים בפסל האמרים למסכה אתם אלהינו׃

42:18b.ISA.042.018 החרשים שמעו והעורים הביטו לראות׃

42:19b.ISA.042.019 מי עור כי אם עבדי וחרש כמלאכי אשלח מי עור כמשלם ועור כעבד יהוה׃

42:20b.ISA.042.020 ראית רבות ולא תשמר פקוח אזנים ולא ישמע׃

42:21b.ISA.042.021 יהוה חפץ למען צדקו יגדיל תורה ויאדיר׃

42:22b.ISA.042.022 והוא עם בזוז ושסוי הפח בחורים כלם ובבתי כלאים החבאו היו לבז ואין מציל משסה ואין אמר השב׃

42:23b.ISA.042.023 מי בכם יאזין זאת יקשב וישמע לאחור׃

42:24b.ISA.042.024 מי נתן למשוסה יעקב וישראל לבזזים הלוא יהוה זו חטאנו לו ולא אבו בדרכיו הלוך ולא שמעו בתורתו׃

42:25b.ISA.042.025 וישפך עליו חמה אפו ועזוז מלחמה ותלהטהו מסביב ולא ידע ותבער בו ולא ישים על לב׃

43

43:1b.ISA.043.001 ועתה כה אמר יהוה בראך יעקב ויצרך ישראל אל תירא כי גאלתיך קראתי בשמך לי אתה׃

43:2b.ISA.043.002 כי תעבר במים אתך אני ובנהרות לא ישטפוך כי תלך במו אש לא תכוה ולהבה לא תבער בך׃

43:3b.ISA.043.003 כי אני יהוה אלהיך קדוש ישראל מושיעך נתתי כפרך מצרים כוש וסבא תחתיך׃

43:4b.ISA.043.004 מאשר יקרת בעיני נכבדת ואני אהבתיך ואתן אדם תחתיך ולאמים תחת נפשך׃

43:5b.ISA.043.005 אל תירא כי אתך אני ממזרח אביא זרעך וממערב אקבצך׃

43:6b.ISA.043.006 אמר לצפון תני ולתימן אל תכלאי הביאי בני מרחוק ובנותי מקצה הארץ׃

43:7b.ISA.043.007 כל הנקרא בשמי ולכבודי בראתיו יצרתיו אף עשיתיו׃

43:8b.ISA.043.008 הוציא עם עור ועינים יש וחרשים ואזנים למו׃

43:9b.ISA.043.009 כל הגוים נקבצו יחדו ויאספו לאמים מי בהם יגיד זאת וראשנות ישמיענו יתנו עדיהם ויצדקו וישמעו ויאמרו אמת׃

43:10b.ISA.043.010 אתם עדי נאם יהוה ועבדי אשר בחרתי למען תדעו ותאמינו לי ותבינו כי אני הוא לפני לא נוצר אל ואחרי לא יהיה׃

43:11b.ISA.043.011 אנכי אנכי יהוה ואין מבלעדי מושיע׃

43:12b.ISA.043.012 אנכי הגדתי והושעתי והשמעתי ואין בכם זר ואתם עדי נאם יהוה ואני אל׃

43:13b.ISA.043.013 גם מיום אני הוא ואין מידי מציל אפעל ומי ישיבנה׃

43:14b.ISA.043.014 כה אמר יהוה גאלכם קדוש ישראל למענכם שלחתי בבלה והורדתי בריחים כלם וכשדים באניות רנתם׃

43:15b.ISA.043.015 אני יהוה קדושכם בורא ישראל מלככם׃

43:16b.ISA.043.016 כה אמר יהוה הנותן בים דרך ובמים עזים נתיבה׃

43:17b.ISA.043.017 המוציא רכב וסוס חיל ועזוז יחדו ישכבו בל יקומו דעכו כפשתה כבו׃

43:18b.ISA.043.018 אל תזכרו ראשנות וקדמניות אל תתבננו׃

43:19b.ISA.043.019 הנני עשה חדשה עתה תצמח הלוא תדעוה אף אשים במדבר דרך בישמון נהרות׃

43:20b.ISA.043.020 תכבדני חית השדה תנים ובנות יענה כי נתתי במדבר מים נהרות בישימן להשקות עמי בחירי׃

43:21b.ISA.043.021 עם זו יצרתי לי תהלתי יספרו׃

43:22b.ISA.043.022 ולא אתי קראת יעקב כי יגעת בי ישראל׃

43:23b.ISA.043.023 לא הביאת לי שה עלתיך וזבחיך לא כבדתני לא העבדתיך במנחה ולא הוגעתיך בלבונה׃

43:24b.ISA.043.024 לא קנית לי בכסף קנה וחלב זבחיך לא הרויתני אך העבדתני בחטאותיך הוגעתני בעונתיך׃

43:25b.ISA.043.025 אנכי אנכי הוא מחה פשעיך למעני וחטאתיך לא אזכר׃

43:26b.ISA.043.026 הזכירני נשפטה יחד ספר אתה למען תצדק׃

43:27b.ISA.043.027 אביך הראשון חטא ומליציך פשעו בי׃

43:28b.ISA.043.028 ואחלל שרי קדש ואתנה לחרם יעקב וישראל לגדופים׃

44

44:1b.ISA.044.001 ועתה שמע יעקב עבדי וישראל בחרתי בו׃

44:2b.ISA.044.002 כה אמר יהוה עשך ויצרך מבטן יעזרך אל תירא עבדי יעקב וישרון בחרתי בו׃

44:3b.ISA.044.003 כי אצק מים על צמא ונזלים על יבשה אצק רוחי על זרעך וברכתי על צאצאיך׃

44:4b.ISA.044.004 וצמחו בבין חציר כערבים על יבלי מים׃

44:5b.ISA.044.005 זה יאמר ליהוה אני וזה יקרא בשם יעקב וזה יכתב ידו ליהוה ובשם ישראל יכנה׃

44:6b.ISA.044.006 כה אמר יהוה מלך ישראל וגאלו יהוה צבאות אני ראשון ואני אחרון ומבלעדי אין אלהים׃

44:7b.ISA.044.007 ומי כמוני יקרא ויגידה ויערכה לי משומי עם עולם ואתיות ואשר תבאנה יגידו למו׃

44:8b.ISA.044.008 אל תפחדו ואל תרהו הלא מאז השמעתיך והגדתי ואתם עדי היש אלוה מבלעדי ואין צור בל ידעתי׃

44:9b.ISA.044.009 יצרי פסל כלם תהו וחמודיהם בל יועילו ועדיהם המה בל יראו ובל ידעו למען יבשו׃

44:10b.ISA.044.010 מי יצר אל ופסל נסך לבלתי הועיל׃

44:11b.ISA.044.011 הן כל חבריו יבשו וחרשים המה מאדם יתקבצו כלם יעמדו יפחדו יבשו יחד׃

44:12b.ISA.044.012 חרש ברזל מעצד ופעל בפחם ובמקבות יצרהו ויפעלהו בזרוע כחו גם רעב ואין כח לא שתה מים וייעף׃

44:13b.ISA.044.013 חרש עצים נטה קו יתארהו בשרד יעשהו במקצעות ובמחוגה יתארהו ויעשהו כתבנית איש כתפארת אדם לשבת בית׃

44:14b.ISA.044.014 לכרת לו ארזים ויקח תרזה ואלון ויאמץ לו בעצי יער נטע ארן וגשם יגדל׃

44:15b.ISA.044.015 והיה לאדם לבער ויקח מהם ויחם אף ישיק ואפה לחם אף יפעל אל וישתחו עשהו פסל ויסגד למו׃

44:16b.ISA.044.016 חציו שרף במו אש על חציו בשר יאכל יצלה צלי וישבע אף יחם ויאמר האח חמותי ראיתי אור׃

44:17b.ISA.044.017 ושאריתו לאל עשה לפסלו יסגוד לו וישתחו ויתפלל אליו ויאמר הצילני כי אלי אתה׃

44:18b.ISA.044.018 לא ידעו ולא יבינו כי טח מראות עיניהם מהשכיל לבתם׃

44:19b.ISA.044.019 ולא ישיב אל לבו ולא דעת ולא תבונה לאמר חציו שרפתי במו אש ואף אפיתי על גחליו לחם אצלה בשר ואכל ויתרו לתועבה אעשה לבול עץ אסגוד׃

44:20b.ISA.044.020 רעה אפר לב הותל הטהו ולא יציל את נפשו ולא יאמר הלוא שקר בימיני׃

44:21b.ISA.044.021 זכר אלה יעקב וישראל כי עבדי אתה יצרתיך עבד לי אתה ישראל לא תנשני׃

44:22b.ISA.044.022 מחיתי כעב פשעיך וכענן חטאותיך שובה אלי כי גאלתיך׃

44:23b.ISA.044.023 רנו שמים כי עשה יהוה הריעו תחתיות ארץ פצחו הרים רנה יער וכל עץ בו כי גאל יהוה יעקב ובישראל יתפאר׃

44:24b.ISA.044.024 כה אמר יהוה גאלך ויצרך מבטן אנכי יהוה עשה כל נטה שמים לבדי רקע הארץ מי אתי׃

44:25b.ISA.044.025 מפר אתות בדים וקסמים יהולל משיב חכמים אחור ודעתם ישכל׃

44:26b.ISA.044.026 מקים דבר עבדו ועצת מלאכיו ישלים האמר לירושלם תושב ולערי יהודה תבנינה וחרבותיה אקומם׃

44:27b.ISA.044.027 האמר לצולה חרבי ונהרתיך אוביש׃

44:28b.ISA.044.028 האמר לכורש רעי וכל חפצי ישלם ולאמר לירושלם תבנה והיכל תוסד׃

45

45:1b.ISA.045.001 כה אמר יהוה למשיחו לכורש אשר החזקתי בימינו לרד לפניו גוים ומתני מלכים אפתח לפתח לפניו דלתים ושערים לא יסגרו׃

45:2b.ISA.045.002 אני לפניך אלך והדורים אושר דלתות נחושה אשבר ובריחי ברזל אגדע׃

45:3b.ISA.045.003 ונתתי לך אוצרות חשך ומטמני מסתרים למען תדע כי אני יהוה הקורא בשמך אלהי ישראל׃

45:4b.ISA.045.004 למען עבדי יעקב וישראל בחירי ואקרא לך בשמך אכנך ולא ידעתני׃

45:5b.ISA.045.005 אני יהוה ואין עוד זולתי אין אלהים אאזרך ולא ידעתני׃

45:6b.ISA.045.006 למען ידעו ממזרח שמש וממערבה כי אפס בלעדי אני יהוה ואין עוד׃

45:7b.ISA.045.007 יוצר אור ובורא חשך עשה שלום ובורא רע אני יהוה עשה כל אלה׃

45:8b.ISA.045.008 הרעיפו שמים ממעל ושחקים יזלו צדק תפתח ארץ ויפרו ישע וצדקה תצמיח יחד אני יהוה בראתיו׃

45:9b.ISA.045.009 הוי רב את יצרו חרש את חרשי אדמה היאמר חמר ליצרו מה תעשה ופעלך אין ידים לו׃

45:10b.ISA.045.010 הוי אמר לאב מה תוליד ולאשה מה תחילין׃

45:11b.ISA.045.011 כה אמר יהוה קדוש ישראל ויצרו האתיות שאלוני על בני ועל פעל ידי תצוני׃

45:12b.ISA.045.012 אנכי עשיתי ארץ ואדם עליה בראתי אני ידי נטו שמים וכל צבאם צויתי׃

45:13b.ISA.045.013 אנכי העירתהו בצדק וכל דרכיו אישר הוא יבנה עירי וגלותי ישלח לא במחיר ולא בשחד אמר יהוה צבאות׃

45:14b.ISA.045.014 כה אמר יהוה יגיע מצרים וסחר כוש וסבאים אנשי מדה עליך יעברו ולך יהיו אחריך ילכו בזקים יעברו ואליך ישתחוו אליך יתפללו אך בך אל ואין עוד אפס אלהים׃

45:15b.ISA.045.015 אכן אתה אל מסתתר אלהי ישראל מושיע׃

45:16b.ISA.045.016 בושו וגם נכלמו כלם יחדו הלכו בכלמה חרשי צירים׃

45:17b.ISA.045.017 ישראל נושע ביהוה תשועת עולמים לא תבשו ולא תכלמו עד עולמי עד׃

45:18b.ISA.045.018 כי כה אמר יהוה בורא השמים הוא האלהים יצר הארץ ועשה הוא כוננה לא תהו בראה לשבת יצרה אני יהוה ואין עוד׃

45:19b.ISA.045.019 לא בסתר דברתי במקום ארץ חשך לא אמרתי לזרע יעקב תהו בקשוני אני יהוה דבר צדק מגיד מישרים׃

45:20b.ISA.045.020 הקבצו ובאו התנגשו יחדו פליטי הגוים לא ידעו הנשאים את עץ פסלם ומתפללים אל אל לא יושיע׃

45:21b.ISA.045.021 הגידו והגישו אף יועצו יחדו מי השמיע זאת מקדם מאז הגידה הלוא אני יהוה ואין עוד אלהים מבלעדי אל צדיק ומושיע אין זולתי׃

45:22b.ISA.045.022 פנו אלי והושעו כל אפסי ארץ כי אני אל ואין עוד׃

45:23b.ISA.045.023 בי נשבעתי יצא מפי צדקה דבר ולא ישוב כי לי תכרע כל ברך תשבע כל לשון׃

45:24b.ISA.045.024 אך ביהוה לי אמר צדקות ועז עדיו יבוא ויבשו כל הנחרים בו׃

45:25b.ISA.045.025 ביהוה יצדקו ויתהללו כל זרע ישראל׃

46

46:1b.ISA.046.001 כרע בל קרס נבו היו עצביהם לחיה ולבהמה נשאתיכם עמוסות משא לעיפה׃

46:2b.ISA.046.002 קרסו כרעו יחדו לא יכלו מלט משא ונפשם בשבי הלכה׃

46:3b.ISA.046.003 שמעו אלי בית יעקב וכל שארית בית ישראל העמסים מני בטן הנשאים מני רחם׃

46:4b.ISA.046.004 ועד זקנה אני הוא ועד שיבה אני אסבל אני עשיתי ואני אשא ואני אסבל ואמלט׃

46:5b.ISA.046.005 למי תדמיוני ותשוו ותמשלוני ונדמה׃

46:6b.ISA.046.006 הזלים זהב מכיס וכסף בקנה ישקלו ישכרו צורף ויעשהו אל יסגדו אף ישתחוו׃

46:7b.ISA.046.007 ישאהו על כתף יסבלהו ויניחהו תחתיו ויעמד ממקומו לא ימיש אף יצעק אליו ולא יענה מצרתו לא יושיענו׃

46:8b.ISA.046.008 זכרו זאת והתאששו השיבו פושעים על לב׃

46:9b.ISA.046.009 זכרו ראשנות מעולם כי אנכי אל ואין עוד אלהים ואפס כמוני׃

46:10b.ISA.046.010 מגיד מראשית אחרית ומקדם אשר לא נעשו אמר עצתי תקום וכל חפצי אעשה׃

46:11b.ISA.046.011 קרא ממזרח עיט מארץ מרחק איש עצתו אף דברתי אף אביאנה יצרתי אף אעשנה׃

46:12b.ISA.046.012 שמעו אלי אבירי לב הרחוקים מצדקה׃

46:13b.ISA.046.013 קרבתי צדקתי לא תרחק ותשועתי לא תאחר ונתתי בציון תשועה לישראל תפארתי׃

47

47:1b.ISA.047.001 רדי ושבי על עפר בתולת בת בבל שבי לארץ אין כסא בת כשדים כי לא תוסיפי יקראו לך רכה וענגה׃

47:2b.ISA.047.002 קחי רחים וטחני קמח גלי צמתך חשפי שבל גלי שוק עברי נהרות׃

47:3b.ISA.047.003 תגל ערותך גם תראה חרפתך נקם אקח ולא אפגע אדם׃

47:4b.ISA.047.004 גאלנו יהוה צבאות שמו קדוש ישראל׃

47:5b.ISA.047.005 שבי דומם ובאי בחשך בת כשדים כי לא תוסיפי יקראו לך גברת ממלכות׃

47:6b.ISA.047.006 קצפתי על עמי חללתי נחלתי ואתנם בידך לא שמת להם רחמים על זקן הכבדת עלך מאד׃

47:7b.ISA.047.007 ותאמרי לעולם אהיה גברת עד לא שמת אלה על לבך לא זכרת אחריתה׃

47:8b.ISA.047.008 ועתה שמעי זאת עדינה היושבת לבטח האמרה בלבבה אני ואפסי עוד לא אשב אלמנה ולא אדע שכול׃

47:9b.ISA.047.009 ותבאנה לך שתי אלה רגע ביום אחד שכול ואלמן כתמם באו עליך ברב כשפיך בעצמת חבריך מאד׃

47:10b.ISA.047.010 ותבטחי ברעתך אמרת אין ראני חכמתך ודעתך היא שובבתך ותאמרי בלבך אני ואפסי עוד׃

47:11b.ISA.047.011 ובא עליך רעה לא תדעי שחרה ותפל עליך הוה לא תוכלי כפרה ותבא עליך פתאם שואה לא תדעי׃

47:12b.ISA.047.012 עמדי נא בחבריך וברב כשפיך באשר יגעת מנעוריך אולי תוכלי הועיל אולי תערוצי׃

47:13b.ISA.047.013 נלאית ברב עצתיך יעמדו נא ויושיעך הברו שמים החזים בכוכבים מודיעם לחדשים מאשר יבאו עליך׃

47:14b.ISA.047.014 הנה היו כקש אש שרפתם לא יצילו את נפשם מיד להבה אין גחלת לחמם אור לשבת נגדו׃

47:15b.ISA.047.015 כן היו לך אשר יגעת סחריך מנעוריך איש לעברו תעו אין מושיעך׃

48

48:1b.ISA.048.001 שמעו זאת בית יעקב הנקראים בשם ישראל וממי יהודה יצאו הנשבעים בשם יהוה ובאלהי ישראל יזכירו לא באמת ולא בצדקה׃

48:2b.ISA.048.002 כי מעיר הקדש נקראו ועל אלהי ישראל נסמכו יהוה צבאות שמו׃

48:3b.ISA.048.003 הראשנות מאז הגדתי ומפי יצאו ואשמיעם פתאם עשיתי ותבאנה׃

48:4b.ISA.048.004 מדעתי כי קשה אתה וגיד ברזל ערפך ומצחך נחושה׃

48:5b.ISA.048.005 ואגיד לך מאז בטרם תבוא השמעתיך פן תאמר עצבי עשם ופסלי ונסכי צום׃

48:6b.ISA.048.006 שמעת חזה כלה ואתם הלוא תגידו השמעתיך חדשות מעתה ונצרות ולא ידעתם׃

48:7b.ISA.048.007 עתה נבראו ולא מאז ולפני יום ולא שמעתם פן תאמר הנה ידעתין׃

48:8b.ISA.048.008 גם לא שמעת גם לא ידעת גם מאז לא פתחה אזנך כי ידעתי בגוד תבגוד ופשע מבטן קרא לך׃

48:9b.ISA.048.009 למען שמי אאריך אפי ותהלתי אחטם לך לבלתי הכריתך׃

48:10b.ISA.048.010 הנה צרפתיך ולא בכסף בחרתיך בכור עני׃

48:11b.ISA.048.011 למעני למעני אעשה כי איך יחל וכבודי לאחר לא אתן׃

48:12b.ISA.048.012 שמע אלי יעקב וישראל מקראי אני הוא אני ראשון אף אני אחרון׃

48:13b.ISA.048.013 אף ידי יסדה ארץ וימיני טפחה שמים קרא אני אליהם יעמדו יחדו׃

48:14b.ISA.048.014 הקבצו כלכם ושמעו מי בהם הגיד את אלה יהוה אהבו יעשה חפצו בבבל וזרעו כשדים׃

48:15b.ISA.048.015 אני אני דברתי אף קראתיו הביאתיו והצליח דרכו׃

48:16b.ISA.048.016 קרבו אלי שמעו זאת לא מראש בסתר דברתי מעת היותה שם אני ועתה אדני יהוה שלחני ורוחו׃

48:17b.ISA.048.017 כה אמר יהוה גאלך קדוש ישראל אני יהוה אלהיך מלמדך להועיל מדריכך בדרך תלך׃

48:18b.ISA.048.018 לוא הקשבת למצותי ויהי כנהר שלומך וצדקתך כגלי הים׃

48:19b.ISA.048.019 ויהי כחול זרעך וצאצאי מעיך כמעתיו לא יכרת ולא ישמד שמו מלפני׃

48:20b.ISA.048.020 צאו מבבל ברחו מכשדים בקול רנה הגידו השמיעו זאת הוציאוה עד קצה הארץ אמרו גאל יהוה עבדו יעקב׃

48:21b.ISA.048.021 ולא צמאו בחרבות הוליכם מים מצור הזיל למו ויבקע צור ויזבו מים׃

48:22b.ISA.048.022 אין שלום אמר יהוה לרשעים׃

49

49:1b.ISA.049.001 שמעו איים אלי והקשיבו לאמים מרחוק יהוה מבטן קראני ממעי אמי הזכיר שמי׃

49:2b.ISA.049.002 וישם פי כחרב חדה בצל ידו החביאני וישימני לחץ ברור באשפתו הסתירני׃

49:3b.ISA.049.003 ויאמר לי עבדי אתה ישראל אשר בך אתפאר׃

49:4b.ISA.049.004 ואני אמרתי לריק יגעתי לתהו והבל כחי כליתי אכן משפטי את יהוה ופעלתי את אלהי׃

49:5b.ISA.049.005 ועתה אמר יהוה יצרי מבטן לעבד לו לשובב יעקב אליו וישראל לא יאסף ואכבד בעיני יהוה ואלהי היה עזי׃

49:6b.ISA.049.006 ויאמר נקל מהיותך לי עבד להקים את שבטי יעקב ונצירי ישראל להשיב ונתתיך לאור גוים להיות ישועתי עד קצה הארץ׃

49:7b.ISA.049.007 כה אמר יהוה גאל ישראל קדושו לבזה נפש למתעב גוי לעבד משלים מלכים יראו וקמו שרים וישתחוו למען יהוה אשר נאמן קדש ישראל ויבחרך׃

49:8b.ISA.049.008 כה אמר יהוה בעת רצון עניתיך וביום ישועה עזרתיך ואצרך ואתנך לברית עם להקים ארץ להנחיל נחלות שממות׃

49:9b.ISA.049.009 לאמר לאסורים צאו לאשר בחשך הגלו על דרכים ירעו ובכל שפיים מרעיתם׃

49:10b.ISA.049.010 לא ירעבו ולא יצמאו ולא יכם שרב ושמש כי מרחמם ינהגם ועל מבועי מים ינהלם׃

49:11b.ISA.049.011 ושמתי כל הרי לדרך ומסלתי ירמון׃

49:12b.ISA.049.012 הנה אלה מרחוק יבאו והנה אלה מצפון ומים ואלה מארץ סינים׃

49:13b.ISA.049.013 רנו שמים וגילי ארץ יפצחו הרים רנה כי נחם יהוה עמו ועניו ירחם׃

49:14b.ISA.049.014 ותאמר ציון עזבני יהוה ואדני שכחני׃

49:15b.ISA.049.015 התשכח אשה עולה מרחם בן בטנה גם אלה תשכחנה ואנכי לא אשכחך׃

49:16b.ISA.049.016 הן על כפים חקתיך חומתיך נגדי תמיד׃

49:17b.ISA.049.017 מהרו בניך מהרסיך ומחרביך ממך יצאו׃

49:18b.ISA.049.018 שאי סביב עיניך וראי כלם נקבצו באו לך חי אני נאם יהוה כי כלם כעדי תלבשי ותקשרים ככלה׃

49:19b.ISA.049.019 כי חרבתיך ושממתיך וארץ הרסתיך כי עתה תצרי מיושב ורחקו מבלעיך׃

49:20b.ISA.049.020 עוד יאמרו באזניך בני שכליך צר לי המקום גשה לי ואשבה׃

49:21b.ISA.049.021 ואמרת בלבבך מי ילד לי את אלה ואני שכולה וגלמודה גלה וסורה ואלה מי גדל הן אני נשארתי לבדי אלה איפה הם׃

49:22b.ISA.049.022 כה אמר אדני יהוה הנה אשא אל גוים ידי ואל עמים ארים נסי והביאו בניך בחצן ובנתיך על כתף תנשאנה׃

49:23b.ISA.049.023 והיו מלכים אמניך ושרותיהם מיניקתיך אפים ארץ ישתחוו לך ועפר רגליך ילחכו וידעת כי אני יהוה אשר לא יבשו קוי׃

49:24b.ISA.049.024 היקח מגבור מלקוח ואם שבי צדיק ימלט׃

49:25b.ISA.049.025 כי כה אמר יהוה גם שבי גבור יקח ומלקוח עריץ ימלט ואת יריבך אנכי אריב ואת בניך אנכי אושיע׃

49:26b.ISA.049.026 והאכלתי את מוניך את בשרם וכעסיס דמם ישכרון וידעו כל בשר כי אני יהוה מושיעך וגאלך אביר יעקב׃

50

50:1b.ISA.050.001 כה אמר יהוה אי זה ספר כריתות אמכם אשר שלחתיה או מי מנושי אשר מכרתי אתכם לו הן בעונתיכם נמכרתם ובפשעיכם שלחה אמכם׃

50:2b.ISA.050.002 מדוע באתי ואין איש קראתי ואין עונה הקצור קצרה ידי מפדות ואם אין בי כח להציל הן בגערתי אחריב ים אשים נהרות מדבר תבאש דגתם מאין מים ותמת בצמא׃

50:3b.ISA.050.003 אלביש שמים קדרות ושק אשים כסותם׃

50:4b.ISA.050.004 אדני יהוה נתן לי לשון למודים לדעת לעות את יעף דבר יעיר בבקר בבקר יעיר לי אזן לשמע כלמודים׃

50:5b.ISA.050.005 אדני יהוה פתח לי אזן ואנכי לא מריתי אחור לא נסוגתי׃

50:6b.ISA.050.006 גוי נתתי למכים ולחיי למרטים פני לא הסתרתי מכלמות ורק׃

50:7b.ISA.050.007 ואדני יהוה יעזר לי על כן לא נכלמתי על כן שמתי פני כחלמיש ואדע כי לא אבוש׃

50:8b.ISA.050.008 קרוב מצדיקי מי יריב אתי נעמדה יחד מי בעל משפטי יגש אלי׃

50:9b.ISA.050.009 הן אדני יהוה יעזר לי מי הוא ירשיעני הן כלם כבגד יבלו עש יאכלם׃

50:10b.ISA.050.010 מי בכם ירא יהוה שמע בקול עבדו אשר הלך חשכים ואין נגה לו יבטח בשם יהוה וישען באלהיו׃

50:11b.ISA.050.011 הן כלכם קדחי אש מאזרי זיקות לכו באור אשכם ובזיקות בערתם מידי היתה זאת לכם למעצבה תשכבון׃

51

51:1b.ISA.051.001 שמעו אלי רדפי צדק מבקשי יהוה הביטו אל צור חצבתם ואל מקבת בור נקרתם׃

51:2b.ISA.051.002 הביטו אל אברהם אביכם ואל שרה תחוללכם כי אחד קראתיו ואברכהו וארבהו׃

51:3b.ISA.051.003 כי נחם יהוה ציון נחם כל חרבתיה וישם מדברה כעדן וערבתה כגן יהוה ששון ושמחה ימצא בה תודה וקול זמרה׃

51:4b.ISA.051.004 הקשיבו אלי עמי ולאומי אלי האזינו כי תורה מאתי תצא ומשפטי לאור עמים ארגיע׃

51:5b.ISA.051.005 קרוב צדקי יצא ישעי וזרעי עמים ישפטו אלי איים יקוו ואל זרעי ייחלון׃

51:6b.ISA.051.006 שאו לשמים עיניכם והביטו אל הארץ מתחת כי שמים כעשן נמלחו והארץ כבגד תבלה וישביה כמו כן ימותון וישועתי לעולם תהיה וצדקתי לא תחת׃

51:7b.ISA.051.007 שמעו אלי ידעי צדק עם תורתי בלבם אל תיראו חרפת אנוש ומגדפתם אל תחתו׃

51:8b.ISA.051.008 כי כבגד יאכלם עש וכצמר יאכלם סס וצדקתי לעולם תהיה וישועתי לדור דורים׃

51:9b.ISA.051.009 עורי עורי לבשי עז זרוע יהוה עורי כימי קדם דרות עולמים הלוא את היא המחצבת רהב מחוללת תנין׃

51:10b.ISA.051.010 הלוא את היא המחרבת ים מי תהום רבה השמה מעמקי ים דרך לעבר גאולים׃

51:11b.ISA.051.011 ופדויי יהוה ישובון ובאו ציון ברנה ושמחת עולם על ראשם ששון ושמחה ישיגון נסו יגון ואנחה׃

51:12b.ISA.051.012 אנכי אנכי הוא מנחמכם מי את ותיראי מאנוש ימות ומבן אדם חציר ינתן׃

51:13b.ISA.051.013 ותשכח יהוה עשך נוטה שמים ויסד ארץ ותפחד תמיד כל היום מפני חמת המציק כאשר כונן להשחית ואיה חמת המציק׃

51:14b.ISA.051.014 מהר צעה להפתח ולא ימות לשחת ולא יחסר לחמו׃

51:15b.ISA.051.015 ואנכי יהוה אלהיך רגע הים ויהמו גליו יהוה צבאות שמו׃

51:16b.ISA.051.016 ואשים דברי בפיך ובצל ידי כסיתיך לנטע שמים וליסד ארץ ולאמר לציון עמי אתה׃

51:17b.ISA.051.017 התעוררי התעוררי קומי ירושלם אשר שתית מיד יהוה את כוס חמתו את קבעת כוס התרעלה שתית מצית׃

51:18b.ISA.051.018 אין מנהל לה מכל בנים ילדה ואין מחזיק בידה מכל בנים גדלה׃

51:19b.ISA.051.019 שתים הנה קראתיך מי ינוד לך השד והשבר והרעב והחרב מי אנחמך׃

51:20b.ISA.051.020 בניך עלפו שכבו בראש כל חוצות כתוא מכמר המלאים חמת יהוה גערת אלהיך׃

51:21b.ISA.051.021 לכן שמעי נא זאת עניה ושכרת ולא מיין׃

51:22b.ISA.051.022 כה אמר אדניך יהוה ואלהיך יריב עמו הנה לקחתי מידך את כוס התרעלה את קבעת כוס חמתי לא תוסיפי לשתותה עוד׃

51:23b.ISA.051.023 ושמתיה ביד מוגיך אשר אמרו לנפשך שחי ונעברה ותשימי כארץ גוך וכחוץ לעברים׃

52

52:1b.ISA.052.001 עורי עורי לבשי עזך ציון לבשי בגדי תפארתך ירושלם עיר הקדש כי לא יוסיף יבא בך עוד ערל וטמא׃

52:2b.ISA.052.002 התנערי מעפר קומי שבי ירושלם התפתחו מוסרי צוארך שביה בת ציון׃

52:3b.ISA.052.003 כי כה אמר יהוה חנם נמכרתם ולא בכסף תגאלו׃

52:4b.ISA.052.004 כי כה אמר אדני יהוה מצרים ירד עמי בראשנה לגור שם ואשור באפס עשקו׃

52:5b.ISA.052.005 ועתה מה לי פה נאם יהוה כי לקח עמי חנם משלו יהילילו נאם יהוה ותמיד כל היום שמי מנאץ׃

52:6b.ISA.052.006 לכן ידע עמי שמי לכן ביום ההוא כי אני הוא המדבר הנני׃

52:7b.ISA.052.007 מה נאוו על ההרים רגלי מבשר משמיע שלום מבשר טוב משמיע ישועה אמר לציון מלך אלהיך׃

52:8b.ISA.052.008 קול צפיך נשאו קול יחדו ירננו כי עין בעין יראו בשוב יהוה ציון׃

52:9b.ISA.052.009 פצחו רננו יחדו חרבות ירושלם כי נחם יהוה עמו גאל ירושלם׃

52:10b.ISA.052.010 חשף יהוה את זרוע קדשו לעיני כל הגוים וראו כל אפסי ארץ את ישועת אלהינו׃

52:11b.ISA.052.011 סורו סורו צאו משם טמא אל תגעו צאו מתוכה הברו נשאי כלי יהוה׃

52:12b.ISA.052.012 כי לא בחפזון תצאו ובמנוסה לא תלכון כי הלך לפניכם יהוה ומאספכם אלהי ישראל׃

52:13b.ISA.052.013 הנה ישכיל עבדי ירום ונשא וגבה מאד׃

52:14b.ISA.052.014 כאשר שממו עליך רבים כן משחת מאיש מראהו ותארו מבני אדם׃

52:15b.ISA.052.015 כן יזה גוים רבים עליו יקפצו מלכים פיהם כי אשר לא ספר להם ראו ואשר לא שמעו התבוננו׃

53

53:1b.ISA.053.001 מי האמין לשמעתנו וזרוע יהוה על מי נגלתה׃

53:2b.ISA.053.002 ויעל כיונק לפניו וכשרש מארץ ציה לא תאר לו ולא הדר ונראהו ולא מראה ונחמדהו׃

53:3b.ISA.053.003 נבזה וחדל אישים איש מכאבות וידוע חלי וכמסתר פנים ממנו נבזה ולא חשבנהו׃

53:4b.ISA.053.004 אכן חלינו הוא נשא ומכאבינו סבלם ואנחנו חשבנהו נגוע מכה אלהים ומענה׃

53:5b.ISA.053.005 והוא מחלל מפשענו מדכא מעונתינו מוסר שלומנו עליו ובחברתו נרפא לנו׃

53:6b.ISA.053.006 כלנו כצאן תעינו איש לדרכו פנינו ויהוה הפגיע בו את עון כלנו׃

53:7b.ISA.053.007 נגש והוא נענה ולא יפתח פיו כשה לטבח יובל וכרחל לפני גזזיה נאלמה ולא יפתח פיו׃

53:8b.ISA.053.008 מעצר וממשפט לקח ואת דורו מי ישוחח כי נגזר מארץ חיים מפשע עמי נגע למו׃

53:9b.ISA.053.009 ויתן את רשעים קברו ואת עשיר במתיו על לא חמס עשה ולא מרמה בפיו׃

53:10b.ISA.053.010 ויהוה חפץ דכאו החלי אם תשים אשם נפשו יראה זרע יאריך ימים וחפץ יהוה בידו יצלח׃

53:11b.ISA.053.011 מעמל נפשו יראה ישבע בדעתו יצדיק צדיק עבדי לרבים ועונתם הוא יסבל׃

53:12b.ISA.053.012 לכן אחלק לו ברבים ואת עצומים יחלק שלל תחת אשר הערה למות נפשו ואת פשעים נמנה והוא חטא רבים נשא ולפשעים יפגיע׃

54

54:1b.ISA.054.001 רני עקרה לא ילדה פצחי רנה וצהלי לא חלה כי רבים בני שוממה מבני בעולה אמר יהוה׃

54:2b.ISA.054.002 הרחיבי מקום אהלך ויריעות משכנותיך יטו אל תחשכי האריכי מיתריך ויתדתיך חזקי׃

54:3b.ISA.054.003 כי ימין ושמאול תפרצי וזרעך גוים יירש וערים נשמות יושיבו׃

54:4b.ISA.054.004 אל תיראי כי לא תבושי ואל תכלמי כי לא תחפירי כי בשת עלומיך תשכחי וחרפת אלמנותיך לא תזכרי עוד׃

54:5b.ISA.054.005 כי בעליך עשיך יהוה צבאות שמו וגאלך קדוש ישראל אלהי כל הארץ יקרא׃

54:6b.ISA.054.006 כי כאשה עזובה ועצובת רוח קראך יהוה ואשת נעורים כי תמאס אמר אלהיך׃

54:7b.ISA.054.007 ברגע קטן עזבתיך וברחמים גדלים אקבצך׃

54:8b.ISA.054.008 בשצף קצף הסתרתי פני רגע ממך ובחסד עולם רחמתיך אמר גאלך יהוה׃

54:9b.ISA.054.009 כי מי נח זאת לי אשר נשבעתי מעבר מי נח עוד על הארץ כן נשבעתי מקצף עליך ומגער בך׃

54:10b.ISA.054.010 כי ההרים ימושו והגבעות תמוטנה וחסדי מאתך לא ימוש וברית שלומי לא תמוט אמר מרחמך יהוה׃

54:11b.ISA.054.011 עניה סערה לא נחמה הנה אנכי מרביץ בפוך אבניך ויסדתיך בספירים׃

54:12b.ISA.054.012 ושמתי כדכד שמשתיך ושעריך לאבני אקדח וכל גבולך לאבני חפץ׃

54:13b.ISA.054.013 וכל בניך למודי יהוה ורב שלום בניך׃

54:14b.ISA.054.014 בצדקה תכונני רחקי מעשק כי לא תיראי וממחתה כי לא תקרב אליך׃

54:15b.ISA.054.015 הן גור יגור אפס מאותי מי גר אתך עליך יפול׃

54:16b.ISA.054.016 הן אנכי בראתי חרש נפח באש פחם ומוציא כלי למעשהו ואנכי בראתי משחית לחבל׃

54:17b.ISA.054.017 כל כלי יוצר עליך לא יצלח וכל לשון תקום אתך למשפט תרשיעי זאת נחלת עבדי יהוה וצדקתם מאתי נאם יהוה׃

55

55:1b.ISA.055.001 הוי כל צמא לכו למים ואשר אין לו כסף לכו שברו ואכלו ולכו שברו בלוא כסף ובלוא מחיר יין וחלב׃

55:2b.ISA.055.002 למה תשקלו כסף בלוא לחם ויגיעכם בלוא לשבעה שמעו שמוע אלי ואכלו טוב ותתענג בדשן נפשכם׃

55:3b.ISA.055.003 הטו אזנכם ולכו אלי שמעו ותחי נפשכם ואכרתה לכם ברית עולם חסדי דוד הנאמנים׃

55:4b.ISA.055.004 הן עד לאומים נתתיו נגיד ומצוה לאמים׃

55:5b.ISA.055.005 הן גוי לא תדע תקרא וגוי לא ידעוך אליך ירוצו למען יהוה אלהיך ולקדוש ישראל כי פארך׃

55:6b.ISA.055.006 דרשו יהוה בהמצאו קראהו בהיותו קרוב׃

55:7b.ISA.055.007 יעזב רשע דרכו ואיש און מחשבתיו וישב אל יהוה וירחמהו ואל אלהינו כי ירבה לסלוח׃

55:8b.ISA.055.008 כי לא מחשבותי מחשבותיכם ולא דרכיכם דרכי נאם יהוה׃

55:9b.ISA.055.009 כי גבהו שמים מארץ כן גבהו דרכי מדרכיכם ומחשבתי ממחשבתיכם׃

55:10b.ISA.055.010 כי כאשר ירד הגשם והשלג מן השמים ושמה לא ישוב כי אם הרוה את הארץ והולידה והצמיחה ונתן זרע לזרע ולחם לאכל׃

55:11b.ISA.055.011 כן יהיה דברי אשר יצא מפי לא ישוב אלי ריקם כי אם עשה את אשר חפצתי והצליח אשר שלחתיו׃

55:12b.ISA.055.012 כי בשמחה תצאו ובשלום תובלון ההרים והגבעות יפצחו לפניכם רנה וכל עצי השדה ימחאו כף׃

55:13b.ISA.055.013 תחת הנעצוץ יעלה ברוש תחת הסרפד יעלה הדס והיה ליהוה לשם לאות עולם לא יכרת׃

56

56:1b.ISA.056.001 כה אמר יהוה שמרו משפט ועשו צדקה כי קרובה ישועתי לבוא וצדקתי להגלות׃

56:2b.ISA.056.002 אשרי אנוש יעשה זאת ובן אדם יחזיק בה שמר שבת מחללו ושמר ידו מעשות כל רע׃

56:3b.ISA.056.003 ואל יאמר בן הנכר הנלוה אל יהוה לאמר הבדל יבדילני יהוה מעל עמו ואל יאמר הסריס הן אני עץ יבש׃

56:4b.ISA.056.004 כי כה אמר יהוה לסריסים אשר ישמרו את שבתותי ובחרו באשר חפצתי ומחזיקים בבריתי׃

56:5b.ISA.056.005 ונתתי להם בביתי ובחומתי יד ושם טוב מבנים ומבנות שם עולם אתן לו אשר לא יכרת׃

56:6b.ISA.056.006 ובני הנכר הנלוים על יהוה לשרתו ולאהבה את שם יהוה להיות לו לעבדים כל שמר שבת מחללו ומחזיקים בבריתי׃

56:7b.ISA.056.007 והביאותים אל הר קדשי ושמחתים בבית תפלתי עולתיהם וזבחיהם לרצון על מזבחי כי ביתי בית תפלה יקרא לכל העמים׃

56:8b.ISA.056.008 נאם אדני יהוה מקבץ נדחי ישראל עוד אקבץ עליו לנקבציו׃

56:9b.ISA.056.009 כל חיתו שדי אתיו לאכל כל חיתו ביער׃

56:10b.ISA.056.010 צפו עורים כלם לא ידעו כלם כלבים אלמים לא יוכלו לנבח הזים שכבים אהבי לנום׃

56:11b.ISA.056.011 והכלבים עזי נפש לא ידעו שבעה והמה רעים לא ידעו הבין כלם לדרכם פנו איש לבצעו מקצהו׃

56:12b.ISA.056.012 אתיו אקחה יין ונסבאה שכר והיה כזה יום מחר גדול יתר מאד׃

57

57:1b.ISA.057.001 הצדיק אבד ואין איש שם על לב ואנשי חסד נאספים באין מבין כי מפני הרעה נאסף הצדיק׃

57:2b.ISA.057.002 יבוא שלום ינוחו על משכבותם הלך נכחו׃

57:3b.ISA.057.003 ואתם קרבו הנה בני עננה זרע מנאף ותזנה׃

57:4b.ISA.057.004 על מי תתענגו על מי תרחיבו פה תאריכו לשון הלוא אתם ילדי פשע זרע שקר׃

57:5b.ISA.057.005 הנחמים באלים תחת כל עץ רענן שחטי הילדים בנחלים תחת סעפי הסלעים׃

57:6b.ISA.057.006 בחלקי נחל חלקך הם הם גורלך גם להם שפכת נסך העלית מנחה העל אלה אנחם׃

57:7b.ISA.057.007 על הר גבה ונשא שמת משכבך גם שם עלית לזבח זבח׃

57:8b.ISA.057.008 ואחר הדלת והמזוזה שמת זכרונך כי מאתי גלית ותעלי הרחבת משכבך ותכרת לך מהם אהבת משכבם יד חזית׃

57:9b.ISA.057.009 ותשרי למלך בשמן ותרבי רקחיך ותשלחי צריך עד מרחק ותשפילי עד שאול׃

57:10b.ISA.057.010 ברב דרכך יגעת לא אמרת נואש חית ידך מצאת על כן לא חלית׃

57:11b.ISA.057.011 ואת מי דאגת ותיראי כי תכזבי ואותי לא זכרת לא שמת על לבך הלא אני מחשה ומעלם ואותי לא תיראי׃

57:12b.ISA.057.012 אני אגיד צדקתך ואת מעשיך ולא יועילוך׃

57:13b.ISA.057.013 בזעקך יצילך קבוציך ואת כלם ישא רוח יקח הבל והחוסה בי ינחל ארץ ויירש הר קדשי׃

57:14b.ISA.057.014 ואמר סלו סלו פנו דרך הרימו מכשול מדרך עמי׃

57:15b.ISA.057.015 כי כה אמר רם ונשא שכן עד וקדוש שמו מרום וקדוש אשכון ואת דכא ושפל רוח להחיות רוח שפלים ולהחיות לב נדכאים׃

57:16b.ISA.057.016 כי לא לעולם אריב ולא לנצח אקצוף כי רוח מלפני יעטוף ונשמות אני עשיתי׃

57:17b.ISA.057.017 בעון בצעו קצפתי ואכהו הסתר ואקצף וילך שובב בדרך לבו׃

57:18b.ISA.057.018 דרכיו ראיתי וארפאהו ואנחהו ואשלם נחמים לו ולאבליו׃

57:19b.ISA.057.019 בורא נוב שפתים שלום שלום לרחוק ולקרוב אמר יהוה ורפאתיו׃

57:20b.ISA.057.020 והרשעים כים נגרש כי השקט לא יוכל ויגרשו מימיו רפש וטיט׃

57:21b.ISA.057.021 אין שלום אמר אלהי לרשעים׃

58

58:1b.ISA.058.001 קרא בגרון אל תחשך כשופר הרם קולך והגד לעמי פשעם ולבית יעקב חטאתם׃

58:2b.ISA.058.002 ואותי יום יום ידרשון ודעת דרכי יחפצון כגוי אשר צדקה עשה ומשפט אלהיו לא עזב ישאלוני משפטי צדק קרבת אלהים יחפצון׃

58:3b.ISA.058.003 למה צמנו ולא ראית ענינו נפשנו ולא תדע הן ביום צמכם תמצאו חפץ וכל עצביכם תנגשו׃

58:4b.ISA.058.004 הן לריב ומצה תצומו ולהכות באגרף רשע לא תצומו כיום להשמיע במרום קולכם׃

58:5b.ISA.058.005 הכזה יהיה צום אבחרהו יום ענות אדם נפשו הלכף כאגמן ראשו ושק ואפר יציע הלזה תקרא צום ויום רצון ליהוה׃

58:6b.ISA.058.006 הלוא זה צום אבחרהו פתח חרצבות רשע התר אגדות מוטה ושלח רצוצים חפשים וכל מוטה תנתקו׃

58:7b.ISA.058.007 הלוא פרס לרעב לחמך ועניים מרודים תביא בית כי תראה ערם וכסיתו ומבשרך לא תתעלם׃

58:8b.ISA.058.008 אז יבקע כשחר אורך וארכתך מהרה תצמח והלך לפניך צדקך כבוד יהוה יאספך׃

58:9b.ISA.058.009 אז תקרא ויהוה יענה תשוע ויאמר הנני אם תסיר מתוכך מוטה שלח אצבע ודבר און׃

58:10b.ISA.058.010 ותפק לרעב נפשך ונפש נענה תשביע וזרח בחשך אורך ואפלתך כצהרים׃

58:11b.ISA.058.011 ונחך יהוה תמיד והשביע בצחצחות נפשך ועצמתיך יחליץ והיית כגן רוה וכמוצא מים אשר לא יכזבו מימיו׃

58:12b.ISA.058.012 ובנו ממך חרבות עולם מוסדי דור ודור תקומם וקרא לך גדר פרץ משבב נתיבות לשבת׃

58:13b.ISA.058.013 אם תשיב משבת רגלך עשות חפציך ביום קדשי וקראת לשבת ענג לקדוש יהוה מכבד וכבדתו מעשות דרכיך ממצוא חפצך ודבר דבר׃

58:14b.ISA.058.014 אז תתענג על יהוה והרכבתיך על במותי ארץ והאכלתיך נחלת יעקב אביך כי פי יהוה דבר׃

59

59:1b.ISA.059.001 הן לא קצרה יד יהוה מהושיע ולא כבדה אזנו משמוע׃

59:2b.ISA.059.002 כי אם עונתיכם היו מבדלים בינכם לבין אלהיכם וחטאותיכם הסתירו פנים מכם משמוע׃

59:3b.ISA.059.003 כי כפיכם נגאלו בדם ואצבעותיכם בעון שפתותיכם דברו שקר לשונכם עולה תהגה׃

59:4b.ISA.059.004 אין קרא בצדק ואין נשפט באמונה בטוח על תהו ודבר שוא הרו עמל והוליד און׃

59:5b.ISA.059.005 ביצי צפעוני בקעו וקורי עכביש יארגו האכל מביציהם ימות והזורה תבקע אפעה׃

59:6b.ISA.059.006 קוריהם לא יהיו לבגד ולא יתכסו במעשיהם מעשיהם מעשי און ופעל חמס בכפיהם׃

59:7b.ISA.059.007 רגליהם לרע ירצו וימהרו לשפך דם נקי מחשבותיהם מחשבות און שד ושבר במסלותם׃

59:8b.ISA.059.008 דרך שלום לא ידעו ואין משפט במעגלותם נתיבותיהם עקשו להם כל דרך בה לא ידע שלום׃

59:9b.ISA.059.009 על כן רחק משפט ממנו ולא תשיגנו צדקה נקוה לאור והנה חשך לנגהות באפלות נהלך׃

59:10b.ISA.059.010 נגששה כעורים קיר וכאין עינים נגששה כשלנו בצהרים כנשף באשמנים כמתים׃

59:11b.ISA.059.011 נהמה כדבים כלנו וכיונים הגה נהגה נקוה למשפט ואין לישועה רחקה ממנו׃

59:12b.ISA.059.012 כי רבו פשעינו נגדך וחטאותינו ענתה בנו כי פשעינו אתנו ועונתינו ידענום׃

59:13b.ISA.059.013 פשע וכחש ביהוה ונסוג מאחר אלהינו דבר עשק וסרה הרו והגו מלב דברי שקר׃

59:14b.ISA.059.014 והסג אחור משפט וצדקה מרחוק תעמד כי כשלה ברחוב אמת ונכחה לא תוכל לבוא׃

59:15b.ISA.059.015 ותהי האמת נעדרת וסר מרע משתולל וירא יהוה וירע בעיניו כי אין משפט׃

59:16b.ISA.059.016 וירא כי אין איש וישתומם כי אין מפגיע ותושע לו זרעו וצדקתו היא סמכתהו׃

59:17b.ISA.059.017 וילבש צדקה כשרין וכובע ישועה בראשו וילבש בגדי נקם תלבשת ויעט כמעיל קנאה׃

59:18b.ISA.059.018 כעל גמלות כעל ישלם חמה לצריו גמול לאיביו לאיים גמול ישלם׃

59:19b.ISA.059.019 וייראו ממערב את שם יהוה וממזרח שמש את כבודו כי יבוא כנהר צר רוח יהוה נססה בו׃

59:20b.ISA.059.020 ובא לציון גואל ולשבי פשע ביעקב נאם יהוה׃

59:21b.ISA.059.021 ואני זאת בריתי אותם אמר יהוה רוחי אשר עליך ודברי אשר שמתי בפיך לא ימושו מפיך ומפי זרעך ומפי זרע זרעך אמר יהוה מעתה ועד עולם׃

60

60:1b.ISA.060.001 קומי אורי כי בא אורך וכבוד יהוה עליך זרח׃

60:2b.ISA.060.002 כי הנה החשך יכסה ארץ וערפל לאמים ועליך יזרח יהוה וכבודו עליך יראה׃

60:3b.ISA.060.003 והלכו גוים לאורך ומלכים לנגה זרחך׃

60:4b.ISA.060.004 שאי סביב עיניך וראי כלם נקבצו באו לך בניך מרחוק יבאו ובנתיך על צד תאמנה׃

60:5b.ISA.060.005 אז תראי ונהרת ופחד ורחב לבבך כי יהפך עליך המון ים חיל גוים יבאו לך׃

60:6b.ISA.060.006 שפעת גמלים תכסך בכרי מדין ועיפה כלם משבא יבאו זהב ולבונה ישאו ותהלת יהוה יבשרו׃

60:7b.ISA.060.007 כל צאן קדר יקבצו לך אילי נביות ישרתונך יעלו על רצון מזבחי ובית תפארתי אפאר׃

60:8b.ISA.060.008 מי אלה כעב תעופינה וכיונים אל ארבתיהם׃

60:9b.ISA.060.009 כי לי איים יקוו ואניות תרשיש בראשנה להביא בניך מרחוק כספם וזהבם אתם לשם יהוה אלהיך ולקדוש ישראל כי פארך׃

60:10b.ISA.060.010 ובנו בני נכר חמתיך ומלכיהם ישרתונך כי בקצפי הכיתיך וברצוני רחמתיך׃

60:11b.ISA.060.011 ופתחו שעריך תמיד יומם ולילה לא יסגרו להביא אליך חיל גוים ומלכיהם נהוגים׃

60:12b.ISA.060.012 כי הגוי והממלכה אשר לא יעבדוך יאבדו והגוים חרב יחרבו׃

60:13b.ISA.060.013 כבוד הלבנון אליך יבוא ברוש תדהר ותאשור יחדו לפאר מקום מקדשי ומקום רגלי אכבד׃

60:14b.ISA.060.014 והלכו אליך שחוח בני מעניך והשתחוו על כפות רגליך כל מנאציך וקראו לך עיר יהוה ציון קדוש ישראל׃

60:15b.ISA.060.015 תחת היותך עזובה ושנואה ואין עובר ושמתיך לגאון עולם משוש דור ודור׃

60:16b.ISA.060.016 וינקת חלב גוים ושד מלכים תינקי וידעת כי אני יהוה מושיעך וגאלך אביר יעקב׃

60:17b.ISA.060.017 תחת הנחשת אביא זהב ותחת הברזל אביא כסף ותחת העצים נחשת ותחת האבנים ברזל ושמתי פקדתך שלום ונגשיך צדקה׃

60:18b.ISA.060.018 לא ישמע עוד חמס בארצך שד ושבר בגבוליך וקראת ישועה חומתיך ושעריך תהלה׃

60:19b.ISA.060.019 לא יהיה לך עוד השמש לאור יומם ולנגה הירח לא יאיר לך והיה לך יהוה לאור עולם ואלהיך לתפארתך׃

60:20b.ISA.060.020 לא יבוא עוד שמשך וירחך לא יאסף כי יהוה יהיה לך לאור עולם ושלמו ימי אבלך׃

60:21b.ISA.060.021 ועמך כלם צדיקים לעולם יירשו ארץ נצר מטעו מעשה ידי להתפאר׃

60:22b.ISA.060.022 הקטן יהיה לאלף והצעיר לגוי עצום אני יהוה בעתה אחישנה׃

61

61:1b.ISA.061.001 רוח אדני יהוה עלי יען משח יהוה אתי לבשר ענוים שלחני לחבש לנשברי לב לקרא לשבוים דרור ולאסורים פקח קוח׃

61:2b.ISA.061.002 לקרא שנת רצון ליהוה ויום נקם לאלהינו לנחם כל אבלים׃

61:3b.ISA.061.003 לשום לאבלי ציון לתת להם פאר תחת אפר שמן ששון תחת אבל מעטה תהלה תחת רוח כהה וקרא להם אילי הצדק מטע יהוה להתפאר׃

61:4b.ISA.061.004 ובנו חרבות עולם שממות ראשנים יקוממו וחדשו ערי חרב שממות דור ודור׃

61:5b.ISA.061.005 ועמדו זרים ורעו צאנכם ובני נכר אכריכם וכרמיכם׃

61:6b.ISA.061.006 ואתם כהני יהוה תקראו משרתי אלהינו יאמר לכם חיל גוים תאכלו ובכבודם תתימרו׃

61:7b.ISA.061.007 תחת בשתכם משנה וכלמה ירנו חלקם לכן בארצם משנה יירשו שמחת עולם תהיה להם׃

61:8b.ISA.061.008 כי אני יהוה אהב משפט שנא גזל בעולה ונתתי פעלתם באמת וברית עולם אכרות להם׃

61:9b.ISA.061.009 ונודע בגוים זרעם וצאצאיהם בתוך העמים כל ראיהם יכירום כי הם זרע ברך יהוה׃

61:10b.ISA.061.010 שוש אשיש ביהוה תגל נפשי באלהי כי הלבישני בגדי ישע מעיל צדקה יעטני כחתן יכהן פאר וככלה תעדה כליה׃

61:11b.ISA.061.011 כי כארץ תוציא צמחה וכגנה זרועיה תצמיח כן אדני יהוה יצמיח צדקה ותהלה נגד כל הגוים׃

62

62:1b.ISA.062.001 למען ציון לא אחשה ולמען ירושלם לא אשקוט עד יצא כנגה צדקה וישועתה כלפיד יבער׃

62:2b.ISA.062.002 וראו גוים צדקך וכל מלכים כבודך וקרא לך שם חדש אשר פי יהוה יקבנו׃

62:3b.ISA.062.003 והיית עטרת תפארת ביד יהוה וצנוף מלוכה בכף אלהיך׃

62:4b.ISA.062.004 לא יאמר לך עוד עזובה ולארצך לא יאמר עוד שממה כי לך יקרא חפצי בה ולארצך בעולה כי חפץ יהוה בך וארצך תבעל׃

62:5b.ISA.062.005 כי יבעל בחור בתולה יבעלוך בניך ומשוש חתן על כלה ישיש עליך אלהיך׃

62:6b.ISA.062.006 על חומתיך ירושלם הפקדתי שמרים כל היום וכל הלילה תמיד לא יחשו המזכרים את יהוה אל דמי לכם׃

62:7b.ISA.062.007 ואל תתנו דמי לו עד יכונן ועד ישים את ירושלם תהלה בארץ׃

62:8b.ISA.062.008 נשבע יהוה בימינו ובזרוע עזו אם אתן את דגנך עוד מאכל לאיביך ואם ישתו בני נכר תירושך אשר יגעת בו׃

62:9b.ISA.062.009 כי מאספיו יאכלהו והללו את יהוה ומקבציו ישתהו בחצרות קדשי׃

62:10b.ISA.062.010 עברו עברו בשערים פנו דרך העם סלו סלו המסלה סקלו מאבן הרימו נס על העמים׃

62:11b.ISA.062.011 הנה יהוה השמיע אל קצה הארץ אמרו לבת ציון הנה ישעך בא הנה שכרו אתו ופעלתו לפניו׃

62:12b.ISA.062.012 וקראו להם עם הקדש גאולי יהוה ולך יקרא דרושה עיר לא נעזבה׃

63

63:1b.ISA.063.001 מי זה בא מאדום חמוץ בגדים מבצרה זה הדור בלבושו צעה ברב כחו אני מדבר בצדקה רב להושיע׃

63:2b.ISA.063.002 מדוע אדם ללבושך ובגדיך כדרך בגת׃

63:3b.ISA.063.003 פורה דרכתי לבדי ומעמים אין איש אתי ואדרכם באפי וארמסם בחמתי ויז נצחם על בגדי וכל מלבושי אגאלתי׃

63:4b.ISA.063.004 כי יום נקם בלבי ושנת גאולי באה׃

63:5b.ISA.063.005 ואביט ואין עזר ואשתומם ואין סומך ותושע לי זרעי וחמתי היא סמכתני׃

63:6b.ISA.063.006 ואבוס עמים באפי ואשכרם בחמתי ואוריד לארץ נצחם׃

63:7b.ISA.063.007 חסדי יהוה אזכיר תהלת יהוה כעל כל אשר גמלנו יהוה ורב טוב לבית ישראל אשר גמלם כרחמיו וכרב חסדיו׃

63:8b.ISA.063.008 ויאמר אך עמי המה בנים לא ישקרו ויהי להם למושיע׃

63:9b.ISA.063.009 בכל צרתם לא צר ומלאך פניו הושיעם באהבתו ובחמלתו הוא גאלם וינטלם וינשאם כל ימי עולם׃

63:10b.ISA.063.010 והמה מרו ועצבו את רוח קדשו ויהפך להם לאויב הוא נלחם בם׃

63:11b.ISA.063.011 ויזכר ימי עולם משה עמו איה המעלם מים את רעי צאנו איה השם בקרבו את רוח קדשו׃

63:12b.ISA.063.012 מוליך לימין משה זרוע תפארתו בוקע מים מפניהם לעשות לו שם עולם׃

63:13b.ISA.063.013 מוליכם בתהמות כסוס במדבר לא יכשלו׃

63:14b.ISA.063.014 כבהמה בבקעה תרד רוח יהוה תניחנו כן נהגת עמך לעשות לך שם תפארת׃

63:15b.ISA.063.015 הבט משמים וראה מזבל קדשך ותפארתך איה קנאתך וגבורתך המון מעיך ורחמיך אלי התאפקו׃

63:16b.ISA.063.016 כי אתה אבינו כי אברהם לא ידענו וישראל לא יכירנו אתה יהוה אבינו גאלנו מעולם שמך׃

63:17b.ISA.063.017 למה תתענו יהוה מדרכיך תקשיח לבנו מיראתך שוב למען עבדיך שבטי נחלתך׃

63:18b.ISA.063.018 למצער ירשו עם קדשך צרינו בוססו מקדשך׃

63:19b.ISA.063.019 היינו מעולם לא משלת בם לא נקרא שמך עליהם׃

64

64:1b.ISA.064.001 לוא קרעת שמים ירדת מפניך הרים נזלו׃

64:2b.ISA.064.002 כקדח אש המסים מים תבעה אש להודיע שמך לצריך מפניך גוים ירגזו׃

64:3b.ISA.064.003 בעשותך נוראות לא נקוה ירדת מפניך הרים נזלו׃

64:4b.ISA.064.004 ומעולם לא שמעו לא האזינו עין לא ראתה אלהים זולתך יעשה למחכה לו׃

64:5b.ISA.064.005 פגעת את שש ועשה צדק בדרכיך יזכרוך הן אתה קצפת ונחטא בהם עולם ונושע׃

64:6b.ISA.064.006 ונהי כטמא כלנו וכבגד עדים כל צדקתינו ונבל כעלה כלנו ועוננו כרוח ישאנו׃

64:7b.ISA.064.007 ואין קורא בשמך מתעורר להחזיק בך כי הסתרת פניך ממנו ותמוגנו ביד עוננו׃

64:8b.ISA.064.008 ועתה יהוה אבינו אתה אנחנו החמר ואתה יצרנו ומעשה ידך כלנו׃

64:9b.ISA.064.009 אל תקצף יהוה עד מאד ואל לעד תזכר עון הן הבט נא עמך כלנו׃

64:10b.ISA.064.010 ערי קדשך היו מדבר ציון מדבר היתה ירושלם שממה׃

64:11b.ISA.064.011 בית קדשנו ותפארתנו אשר הללוך אבתינו היה לשרפת אש וכל מחמדינו היה לחרבה׃

64:12b.ISA.064.012 העל אלה תתאפק יהוה תחשה ותעננו עד מאד׃

65

65:1b.ISA.065.001 נדרשתי ללוא שאלו נמצאתי ללא בקשני אמרתי הנני הנני אל גוי לא קרא בשמי׃

65:2b.ISA.065.002 פרשתי ידי כל היום אל עם סורר ההלכים הדרך לא טוב אחר מחשבתיהם׃

65:3b.ISA.065.003 העם המכעיסים אותי על פני תמיד זבחים בגנות ומקטרים על הלבנים׃

65:4b.ISA.065.004 הישבים בקברים ובנצורים ילינו האכלים בשר החזיר ופרק פגלים כליהם׃

65:5b.ISA.065.005 האמרים קרב אליך אל תגש בי כי קדשתיך אלה עשן באפי אש יקדת כל היום׃

65:6b.ISA.065.006 הנה כתובה לפני לא אחשה כי אם שלמתי ושלמתי על חיקם׃

65:7b.ISA.065.007 עונתיכם ועונת אבותיכם יחדו אמר יהוה אשר קטרו על ההרים ועל הגבעות חרפוני ומדתי פעלתם ראשנה על חיקם׃

65:8b.ISA.065.008 כה אמר יהוה כאשר ימצא התירוש באשכול ואמר אל תשחיתהו כי ברכה בו כן אעשה למען עבדי לבלתי השחית הכל׃

65:9b.ISA.065.009 והוצאתי מיעקב זרע ומיהודה יורש הרי וירשוה בחירי ועבדי ישכנו שמה׃

65:10b.ISA.065.010 והיה השרון לנוה צאן ועמק עכור לרבץ בקר לעמי אשר דרשוני׃

65:11b.ISA.065.011 ואתם עזבי יהוה השכחים את הר קדשי הערכים לגד שלחן והממלאים למני ממסך׃

65:12b.ISA.065.012 ומניתי אתכם לחרב וכלכם לטבח תכרעו יען קראתי ולא עניתם דברתי ולא שמעתם ותעשו הרע בעיני ובאשר לא חפצתי בחרתם׃

65:13b.ISA.065.013 לכן כה אמר אדני יהוה הנה עבדי יאכלו ואתם תרעבו הנה עבדי ישתו ואתם תצמאו הנה עבדי ישמחו ואתם תבשו׃

65:14b.ISA.065.014 הנה עבדי ירנו מטוב לב ואתם תצעקו מכאב לב ומשבר רוח תילילו׃

65:15b.ISA.065.015 והנחתם שמכם לשבועה לבחירי והמיתך אדני יהוה ולעבדיו יקרא שם אחר׃

65:16b.ISA.065.016 אשר המתברך בארץ יתברך באלהי אמן והנשבע בארץ ישבע באלהי אמן כי נשכחו הצרות הראשנות וכי נסתרו מעיני׃

65:17b.ISA.065.017 כי הנני בורא שמים חדשים וארץ חדשה ולא תזכרנה הראשנות ולא תעלינה על לב׃

65:18b.ISA.065.018 כי אם שישו וגילו עדי עד אשר אני בורא כי הנני בורא את ירושלם גילה ועמה משוש׃

65:19b.ISA.065.019 וגלתי בירושלם וששתי בעמי ולא ישמע בה עוד קול בכי וקול זעקה׃

65:20b.ISA.065.020 לא יהיה משם עוד עול ימים וזקן אשר לא ימלא את ימיו כי הנער בן מאה שנה ימות והחוטא בן מאה שנה יקלל׃

65:21b.ISA.065.021 ובנו בתים וישבו ונטעו כרמים ואכלו פרים׃

65:22b.ISA.065.022 לא יבנו ואחר ישב לא יטעו ואחר יאכל כי כימי העץ ימי עמי ומעשה ידיהם יבלו בחירי׃

65:23b.ISA.065.023 לא ייגעו לריק ולא ילדו לבהלה כי זרע ברוכי יהוה המה וצאצאיהם אתם׃

65:24b.ISA.065.024 והיה טרם יקראו ואני אענה עוד הם מדברים ואני אשמע׃

65:25b.ISA.065.025 זאב וטלה ירעו כאחד ואריה כבקר יאכל תבן ונחש עפר לחמו לא ירעו ולא ישחיתו בכל הר קדשי אמר יהוה׃

66

66:1b.ISA.066.001 כה אמר יהוה השמים כסאי והארץ הדם רגלי אי זה בית אשר תבנו לי ואי זה מקום מנוחתי׃

66:2b.ISA.066.002 ואת כל אלה ידי עשתה ויהיו כל אלה נאם יהוה ואל זה אביט אל עני ונכה רוח וחרד על דברי׃

66:3b.ISA.066.003 שוחט השור מכה איש זובח השה ערף כלב מעלה מנחה דם חזיר מזכיר לבנה מברך און גם המה בחרו בדרכיהם ובשקוציהם נפשם חפצה׃

66:4b.ISA.066.004 גם אני אבחר בתעלליהם ומגורתם אביא להם יען קראתי ואין עונה דברתי ולא שמעו ויעשו הרע בעיני ובאשר לא חפצתי בחרו׃

66:5b.ISA.066.005 שמעו דבר יהוה החרדים אל דברו אמרו אחיכם שנאיכם מנדיכם למען שמי יכבד יהוה ונראה בשמחתכם והם יבשו׃

66:6b.ISA.066.006 קול שאון מעיר קול מהיכל קול יהוה משלם גמול לאיביו׃

66:7b.ISA.066.007 בטרם תחיל ילדה בטרם יבוא חבל לה והמליטה זכר׃

66:8b.ISA.066.008 מי שמע כזאת מי ראה כאלה היוחל ארץ ביום אחד אם יולד גוי פעם אחת כי חלה גם ילדה ציון את בניה׃

66:9b.ISA.066.009 האני אשביר ולא אוליד יאמר יהוה אם אני המוליד ועצרתי אמר אלהיך׃

66:10b.ISA.066.010 שמחו את ירושלם וגילו בה כל אהביה שישו אתה משוש כל המתאבלים עליה׃

66:11b.ISA.066.011 למען תינקו ושבעתם משד תנחמיה למען תמצו והתענגתם מזיז כבודה׃

66:12b.ISA.066.012 כי כה אמר יהוה הנני נטה אליה כנהר שלום וכנחל שוטף כבוד גוים וינקתם על צד תנשאו ועל ברכים תשעשעו׃

66:13b.ISA.066.013 כאיש אשר אמו תנחמנו כן אנכי אנחמכם ובירושלם תנחמו׃

66:14b.ISA.066.014 וראיתם ושש לבכם ועצמותיכם כדשא תפרחנה ונודעה יד יהוה את עבדיו וזעם את איביו׃

66:15b.ISA.066.015 כי הנה יהוה באש יבוא וכסופה מרכבתיו להשיב בחמה אפו וגערתו בלהבי אש׃

66:16b.ISA.066.016 כי באש יהוה נשפט ובחרבו את כל בשר ורבו חללי יהוה׃

66:17b.ISA.066.017 המתקדשים והמטהרים אל הגנות אחר אחד בתוך אכלי בשר החזיר והשקץ והעכבר יחדו יספו נאם יהוה׃

66:18b.ISA.066.018 ואנכי מעשיהם ומחשבתיהם באה לקבץ את כל הגוים והלשנות ובאו וראו את כבודי׃

66:19b.ISA.066.019 ושמתי בהם אות ושלחתי מהם פליטים אל הגוים תרשיש פול ולוד משכי קשת תבל ויון האיים הרחקים אשר לא שמעו את שמעי ולא ראו את כבודי והגידו את כבודי בגוים׃

66:20b.ISA.066.020 והביאו את כל אחיכם מכל הגוים מנחה ליהוה בסוסים וברכב ובצבים ובפרדים ובכרכרות על הר קדשי ירושלם אמר יהוה כאשר יביאו בני ישראל את המנחה בכלי טהור בית יהוה׃

66:21b.ISA.066.021 וגם מהם אקח לכהנים ללוים אמר יהוה׃

66:22b.ISA.066.022 כי כאשר השמים החדשים והארץ החדשה אשר אני עשה עמדים לפני נאם יהוה כן יעמד זרעכם ושמכם׃

66:23b.ISA.066.023 והיה מדי חדש בחדשו ומדי שבת בשבתו יבוא כל בשר להשתחות לפני אמר יהוה׃

66:24b.ISA.066.024 ויצאו וראו בפגרי האנשים הפשעים בי כי תולעתם לא תמות ואשם לא תכבה והיו דראון לכל בשר׃