Ecclesiastes (Hebrew)

1

1:1b.ECC.001.001 דברי קהלת בן דוד מלך בירושלם׃

1:2b.ECC.001.002 הבל הבלים אמר קהלת הבל הבלים הכל הבל׃

1:3b.ECC.001.003 מה יתרון לאדם בכל עמלו שיעמל תחת השמש׃

1:4b.ECC.001.004 דור הלך ודור בא והארץ לעולם עמדת׃

1:5b.ECC.001.005 וזרח השמש ובא השמש ואל מקומו שואף זורח הוא שם׃

1:6b.ECC.001.006 הולך אל דרום וסובב אל צפון סובב סבב הולך הרוח ועל סביבתיו שב הרוח׃

1:7b.ECC.001.007 כל הנחלים הלכים אל הים והים איננו מלא אל מקום שהנחלים הלכים שם הם שבים ללכת׃

1:8b.ECC.001.008 כל הדברים יגעים לא יוכל איש לדבר לא תשבע עין לראות ולא תמלא אזן משמע׃

1:9b.ECC.001.009 מה שהיה הוא שיהיה ומה שנעשה הוא שיעשה ואין כל חדש תחת השמש׃

1:10b.ECC.001.010 יש דבר שיאמר ראה זה חדש הוא כבר היה לעלמים אשר היה מלפננו׃

1:11b.ECC.001.011 אין זכרון לראשנים וגם לאחרנים שיהיו לא יהיה להם זכרון עם שיהיו לאחרנה׃

1:12b.ECC.001.012 אני קהלת הייתי מלך על ישראל בירושלם׃

1:13b.ECC.001.013 ונתתי את לבי לדרוש ולתור בחכמה על כל אשר נעשה תחת השמים הוא ענין רע נתן אלהים לבני האדם לענות בו׃

1:14b.ECC.001.014 ראיתי את כל המעשים שנעשו תחת השמש והנה הכל הבל ורעות רוח׃

1:15b.ECC.001.015 מעות לא יוכל לתקן וחסרון לא יוכל להמנות׃

1:16b.ECC.001.016 דברתי אני עם לבי לאמר אני הנה הגדלתי והוספתי חכמה על כל אשר היה לפני על ירושלם ולבי ראה הרבה חכמה ודעת׃

1:17b.ECC.001.017 ואתנה לבי לדעת חכמה ודעת הוללות ושכלות ידעתי שגם זה הוא רעיון רוח׃

1:18b.ECC.001.018 כי ברב חכמה רב כעס ויוסיף דעת יוסיף מכאוב׃

2

2:1b.ECC.002.001 אמרתי אני בלבי לכה נא אנסכה בשמחה וראה בטוב והנה גם הוא הבל׃

2:2b.ECC.002.002 לשחוק אמרתי מהולל ולשמחה מה זה עשה׃

2:3b.ECC.002.003 תרתי בלבי למשוך ביין את בשרי ולבי נהג בחכמה ולאחז בסכלות עד אשר אראה אי זה טוב לבני האדם אשר יעשו תחת השמים מספר ימי חייהם׃

2:4b.ECC.002.004 הגדלתי מעשי בניתי לי בתים נטעתי לי כרמים׃

2:5b.ECC.002.005 עשיתי לי גנות ופרדסים ונטעתי בהם עץ כל פרי׃

2:6b.ECC.002.006 עשיתי לי ברכות מים להשקות מהם יער צומח עצים׃

2:7b.ECC.002.007 קניתי עבדים ושפחות ובני בית היה לי גם מקנה בקר וצאן הרבה היה לי מכל שהיו לפני בירושלם׃

2:8b.ECC.002.008 כנסתי לי גם כסף וזהב וסגלת מלכים והמדינות עשיתי לי שרים ושרות ותענוגת בני האדם שדה ושדות׃

2:9b.ECC.002.009 וגדלתי והוספתי מכל שהיה לפני בירושלם אף חכמתי עמדה לי׃

2:10b.ECC.002.010 וכל אשר שאלו עיני לא אצלתי מהם לא מנעתי את לבי מכל שמחה כי לבי שמח מכל עמלי וזה היה חלקי מכל עמלי׃

2:11b.ECC.002.011 ופניתי אני בכל מעשי שעשו ידי ובעמל שעמלתי לעשות והנה הכל הבל ורעות רוח ואין יתרון תחת השמש׃

2:12b.ECC.002.012 ופניתי אני לראות חכמה והוללות וסכלות כי מה האדם שיבוא אחרי המלך את אשר כבר עשוהו׃

2:13b.ECC.002.013 וראיתי אני שיש יתרון לחכמה מן הסכלות כיתרון האור מן החשך׃

2:14b.ECC.002.014 החכם עיניו בראשו והכסיל בחשך הולך וידעתי גם אני שמקרה אחד יקרה את כלם׃

2:15b.ECC.002.015 ואמרתי אני בלבי כמקרה הכסיל גם אני יקרני ולמה חכמתי אני אז יותר ודברתי בלבי שגם זה הבל׃

2:16b.ECC.002.016 כי אין זכרון לחכם עם הכסיל לעולם בשכבר הימים הבאים הכל נשכח ואיך ימות החכם עם הכסיל׃

2:17b.ECC.002.017 ושנאתי את החיים כי רע עלי המעשה שנעשה תחת השמש כי הכל הבל ורעות רוח׃

2:18b.ECC.002.018 ושנאתי אני את כל עמלי שאני עמל תחת השמש שאניחנו לאדם שיהיה אחרי׃

2:19b.ECC.002.019 ומי יודע החכם יהיה או סכל וישלט בכל עמלי שעמלתי ושחכמתי תחת השמש גם זה הבל׃

2:20b.ECC.002.020 וסבותי אני ליאש את לבי על כל העמל שעמלתי תחת השמש׃

2:21b.ECC.002.021 כי יש אדם שעמלו בחכמה ובדעת ובכשרון ולאדם שלא עמל בו יתננו חלקו גם זה הבל ורעה רבה׃

2:22b.ECC.002.022 כי מה הוה לאדם בכל עמלו וברעיון לבו שהוא עמל תחת השמש׃

2:23b.ECC.002.023 כי כל ימיו מכאבים וכעס ענינו גם בלילה לא שכב לבו גם זה הבל הוא׃

2:24b.ECC.002.024 אין טוב באדם שיאכל ושתה והראה את נפשו טוב בעמלו גם זה ראיתי אני כי מיד האלהים היא׃

2:25b.ECC.002.025 כי מי יאכל ומי יחוש חוץ ממני׃

2:26b.ECC.002.026 כי לאדם שטוב לפניו נתן חכמה ודעת ושמחה ולחוטא נתן ענין לאסוף ולכנוס לתת לטוב לפני האלהים גם זה הבל ורעות רוח׃

3

3:1b.ECC.003.001 לכל זמן ועת לכל חפץ תחת השמים׃

3:2b.ECC.003.002 עת ללדת ועת למות עת לטעת ועת לעקור נטוע׃

3:3b.ECC.003.003 עת להרוג ועת לרפוא עת לפרוץ ועת לבנות׃

3:4b.ECC.003.004 עת לבכות ועת לשחוק עת ספוד ועת רקוד׃

3:5b.ECC.003.005 עת להשליך אבנים ועת כנוס אבנים עת לחבוק ועת לרחק מחבק׃

3:6b.ECC.003.006 עת לבקש ועת לאבד עת לשמור ועת להשליך׃

3:7b.ECC.003.007 עת לקרוע ועת לתפור עת לחשות ועת לדבר׃

3:8b.ECC.003.008 עת לאהב ועת לשנא עת מלחמה ועת שלום׃

3:9b.ECC.003.009 מה יתרון העושה באשר הוא עמל׃

3:10b.ECC.003.010 ראיתי את הענין אשר נתן אלהים לבני האדם לענות בו׃

3:11b.ECC.003.011 את הכל עשה יפה בעתו גם את העלם נתן בלבם מבלי אשר לא ימצא האדם את המעשה אשר עשה האלהים מראש ועד סוף׃

3:12b.ECC.003.012 ידעתי כי אין טוב בם כי אם לשמוח ולעשות טוב בחייו׃

3:13b.ECC.003.013 וגם כל האדם שיאכל ושתה וראה טוב בכל עמלו מתת אלהים היא׃

3:14b.ECC.003.014 ידעתי כי כל אשר יעשה האלהים הוא יהיה לעולם עליו אין להוסיף וממנו אין לגרע והאלהים עשה שיראו מלפניו׃

3:15b.ECC.003.015 מה שהיה כבר הוא ואשר להיות כבר היה והאלהים יבקש את נרדף׃

3:16b.ECC.003.016 ועוד ראיתי תחת השמש מקום המשפט שמה הרשע ומקום הצדק שמה הרשע׃

3:17b.ECC.003.017 אמרתי אני בלבי את הצדיק ואת הרשע ישפט האלהים כי עת לכל חפץ ועל כל המעשה שם׃

3:18b.ECC.003.018 אמרתי אני בלבי על דברת בני האדם לברם האלהים ולראות שהם בהמה המה להם׃

3:19b.ECC.003.019 כי מקרה בני האדם ומקרה הבהמה ומקרה אחד להם כמות זה כן מות זה ורוח אחד לכל ומותר האדם מן הבהמה אין כי הכל הבל׃

3:20b.ECC.003.020 הכל הולך אל מקום אחד הכל היה מן העפר והכל שב אל העפר׃

3:21b.ECC.003.021 מי יודע רוח בני האדם העלה היא למעלה ורוח הבהמה הירדת היא למטה לארץ׃

3:22b.ECC.003.022 וראיתי כי אין טוב מאשר ישמח האדם במעשיו כי הוא חלקו כי מי יביאנו לראות במה שיהיה אחריו׃

4

4:1b.ECC.004.001 ושבתי אני ואראה את כל העשקים אשר נעשים תחת השמש והנה דמעת העשקים ואין להם מנחם ומיד עשקיהם כח ואין להם מנחם׃

4:2b.ECC.004.002 ושבח אני את המתים שכבר מתו מן החיים אשר המה חיים עדנה׃

4:3b.ECC.004.003 וטוב משניהם את אשר עדן לא היה אשר לא ראה את המעשה הרע אשר נעשה תחת השמש׃

4:4b.ECC.004.004 וראיתי אני את כל עמל ואת כל כשרון המעשה כי היא קנאת איש מרעהו גם זה הבל ורעות רוח׃

4:5b.ECC.004.005 הכסיל חבק את ידיו ואכל את בשרו׃

4:6b.ECC.004.006 טוב מלא כף נחת ממלא חפנים עמל ורעות רוח׃

4:7b.ECC.004.007 ושבתי אני ואראה הבל תחת השמש׃

4:8b.ECC.004.008 יש אחד ואין שני גם בן ואח אין לו ואין קץ לכל עמלו גם עיניו לא תשבע עשר ולמי אני עמל ומחסר את נפשי מטובה גם זה הבל וענין רע הוא׃

4:9b.ECC.004.009 טובים השנים מן האחד אשר יש להם שכר טוב בעמלם׃

4:10b.ECC.004.010 כי אם יפלו האחד יקים את חברו ואילו האחד שיפול ואין שני להקימו׃

4:11b.ECC.004.011 גם אם ישכבו שנים וחם להם ולאחד איך יחם׃

4:12b.ECC.004.012 ואם יתקפו האחד השנים יעמדו נגדו והחוט המשלש לא במהרה ינתק׃

4:13b.ECC.004.013 טוב ילד מסכן וחכם ממלך זקן וכסיל אשר לא ידע להזהר עוד׃

4:14b.ECC.004.014 כי מבית הסורים יצא למלך כי גם במלכותו נולד רש׃

4:15b.ECC.004.015 ראיתי את כל החיים המהלכים תחת השמש עם הילד השני אשר יעמד תחתיו׃

4:16b.ECC.004.016 אין קץ לכל העם לכל אשר היה לפניהם גם האחרונים לא ישמחו בו כי גם זה הבל ורעיון רוח׃

5

5:1b.ECC.005.001 שמר רגליך כאשר תלך אל בית האלהים וקרוב לשמע מתת הכסילים זבח כי אינם יודעים לעשות רע׃

5:2b.ECC.005.002 אל תבהל על פיך ולבך אל ימהר להוציא דבר לפני האלהים כי האלהים בשמים ואתה על הארץ על כן יהיו דבריך מעטים׃

5:3b.ECC.005.003 כי בא החלום ברב ענין וקול כסיל ברב דברים׃

5:4b.ECC.005.004 כאשר תדר נדר לאלהים אל תאחר לשלמו כי אין חפץ בכסילים את אשר תדר שלם׃

5:5b.ECC.005.005 טוב אשר לא תדר משתדור ולא תשלם׃

5:6b.ECC.005.006 אל תתן את פיך לחטיא את בשרך ואל תאמר לפני המלאך כי שגגה היא למה יקצף האלהים על קולך וחבל את מעשה ידיך׃

5:7b.ECC.005.007 כי ברב חלמות והבלים ודברים הרבה כי את האלהים ירא׃

5:8b.ECC.005.008 אם עשק רש וגזל משפט וצדק תראה במדינה אל תתמה על החפץ כי גבה מעל גבה שמר וגבהים עליהם׃

5:9b.ECC.005.009 ויתרון ארץ בכל היא מלך לשדה נעבד׃

5:10b.ECC.005.010 אהב כסף לא ישבע כסף ומי אהב בהמון לא תבואה גם זה הבל׃

5:11b.ECC.005.011 ברבות הטובה רבו אוכליה ומה כשרון לבעליה כי אם ראית עיניו׃

5:12b.ECC.005.012 מתוקה שנת העבד אם מעט ואם הרבה יאכל והשבע לעשיר איננו מניח לו לישון׃

5:13b.ECC.005.013 יש רעה חולה ראיתי תחת השמש עשר שמור לבעליו לרעתו׃

5:14b.ECC.005.014 ואבד העשר ההוא בענין רע והוליד בן ואין בידו מאומה׃

5:15b.ECC.005.015 כאשר יצא מבטן אמו ערום ישוב ללכת כשבא ומאומה לא ישא בעמלו שילך בידו׃

5:16b.ECC.005.016 וגם זה רעה חולה כל עמת שבא כן ילך ומה יתרון לו שיעמל לרוח׃

5:17b.ECC.005.017 גם כל ימיו בחשך יאכל וכעס הרבה וחליו וקצף׃

5:18b.ECC.005.018 הנה אשר ראיתי אני טוב אשר יפה לאכול ולשתות ולראות טובה בכל עמלו שיעמל תחת השמש מספר ימי חיו אשר נתן לו האלהים כי הוא חלקו׃

5:19b.ECC.005.019 גם כל האדם אשר נתן לו האלהים עשר ונכסים והשליטו לאכל ממנו ולשאת את חלקו ולשמח בעמלו זה מתת אלהים היא׃

5:20b.ECC.005.020 כי לא הרבה יזכר את ימי חייו כי האלהים מענה בשמחת לבו׃

6

6:1b.ECC.006.001 יש רעה אשר ראיתי תחת השמש ורבה היא על האדם׃

6:2b.ECC.006.002 איש אשר יתן לו האלהים עשר ונכסים וכבוד ואיננו חסר לנפשו מכל אשר יתאוה ולא ישליטנו האלהים לאכל ממנו כי איש נכרי יאכלנו זה הבל וחלי רע הוא׃

6:3b.ECC.006.003 אם יוליד איש מאה ושנים רבות יחיה ורב שיהיו ימי שניו ונפשו לא תשבע מן הטובה וגם קבורה לא היתה לו אמרתי טוב ממנו הנפל׃

6:4b.ECC.006.004 כי בהבל בא ובחשך ילך ובחשך שמו יכסה׃

6:5b.ECC.006.005 גם שמש לא ראה ולא ידע נחת לזה מזה׃

6:6b.ECC.006.006 ואלו חיה אלף שנים פעמים וטובה לא ראה הלא אל מקום אחד הכל הולך׃

6:7b.ECC.006.007 כל עמל האדם לפיהו וגם הנפש לא תמלא׃

6:8b.ECC.006.008 כי מה יותר לחכם מן הכסיל מה לעני יודע להלך נגד החיים׃

6:9b.ECC.006.009 טוב מראה עינים מהלך נפש גם זה הבל ורעות רוח׃

6:10b.ECC.006.010 מה שהיה כבר נקרא שמו ונודע אשר הוא אדם ולא יוכל לדין עם שהתקיף ממנו׃

6:11b.ECC.006.011 כי יש דברים הרבה מרבים הבל מה יתר לאדם׃

6:12b.ECC.006.012 כי מי יודע מה טוב לאדם בחיים מספר ימי חיי הבלו ויעשם כצל אשר מי יגיד לאדם מה יהיה אחריו תחת השמש׃

7

7:1b.ECC.007.001 טוב שם משמן טוב ויום המות מיום הולדו׃

7:2b.ECC.007.002 טוב ללכת אל בית אבל מלכת אל בית משתה באשר הוא סוף כל האדם והחי יתן אל לבו׃

7:3b.ECC.007.003 טוב כעס משחק כי ברע פנים ייטב לב׃

7:4b.ECC.007.004 לב חכמים בבית אבל ולב כסילים בבית שמחה׃

7:5b.ECC.007.005 טוב לשמע גערת חכם מאיש שמע שיר כסילים׃

7:6b.ECC.007.006 כי כקול הסירים תחת הסיר כן שחק הכסיל וגם זה הבל׃

7:7b.ECC.007.007 כי העשק יהולל חכם ויאבד את לב מתנה׃

7:8b.ECC.007.008 טוב אחרית דבר מראשיתו טוב ארך רוח מגבה רוח׃

7:9b.ECC.007.009 אל תבהל ברוחך לכעוס כי כעס בחיק כסילים ינוח׃

7:10b.ECC.007.010 אל תאמר מה היה שהימים הראשנים היו טובים מאלה כי לא מחכמה שאלת על זה׃

7:11b.ECC.007.011 טובה חכמה עם נחלה ויתר לראי השמש׃

7:12b.ECC.007.012 כי בצל החכמה בצל הכסף ויתרון דעת החכמה תחיה בעליה׃

7:13b.ECC.007.013 ראה את מעשה האלהים כי מי יוכל לתקן את אשר עותו׃

7:14b.ECC.007.014 ביום טובה היה בטוב וביום רעה ראה גם את זה לעמת זה עשה האלהים על דברת שלא ימצא האדם אחריו מאומה׃

7:15b.ECC.007.015 את הכל ראיתי בימי הבלי יש צדיק אבד בצדקו ויש רשע מאריך ברעתו׃

7:16b.ECC.007.016 אל תהי צדיק הרבה ואל תתחכם יותר למה תשומם׃

7:17b.ECC.007.017 אל תרשע הרבה ואל תהי סכל למה תמות בלא עתך׃

7:18b.ECC.007.018 טוב אשר תאחז בזה וגם מזה אל תנח את ידך כי ירא אלהים יצא את כלם׃

7:19b.ECC.007.019 החכמה תעז לחכם מעשרה שליטים אשר היו בעיר׃

7:20b.ECC.007.020 כי אדם אין צדיק בארץ אשר יעשה טוב ולא יחטא׃

7:21b.ECC.007.021 גם לכל הדברים אשר ידברו אל תתן לבך אשר לא תשמע את עבדך מקללך׃

7:22b.ECC.007.022 כי גם פעמים רבות ידע לבך אשר גם את קללת אחרים׃

7:23b.ECC.007.023 כל זה נסיתי בחכמה אמרתי אחכמה והיא רחוקה ממני׃

7:24b.ECC.007.024 רחוק מה שהיה ועמק עמק מי ימצאנו׃

7:25b.ECC.007.025 סבותי אני ולבי לדעת ולתור ובקש חכמה וחשבון ולדעת רשע כסל והסכלות הוללות׃

7:26b.ECC.007.026 ומוצא אני מר ממות את האשה אשר היא מצודים וחרמים לבה אסורים ידיה טוב לפני האלהים ימלט ממנה וחוטא ילכד בה׃

7:27b.ECC.007.027 ראה זה מצאתי אמרה קהלת אחת לאחת למצא חשבון׃

7:28b.ECC.007.028 אשר עוד בקשה נפשי ולא מצאתי אדם אחד מאלף מצאתי ואשה בכל אלה לא מצאתי׃

7:29b.ECC.007.029 לבד ראה זה מצאתי אשר עשה האלהים את האדם ישר והמה בקשו חשבנות רבים׃

8

8:1b.ECC.008.001 מי כהחכם ומי יודע פשר דבר חכמת אדם תאיר פניו ועז פניו ישנא׃

8:2b.ECC.008.002 אני פי מלך שמור ועל דברת שבועת אלהים׃

8:3b.ECC.008.003 אל תבהל מפניו תלך אל תעמד בדבר רע כי כל אשר יחפץ יעשה׃

8:4b.ECC.008.004 באשר דבר מלך שלטון ומי יאמר לו מה תעשה׃

8:5b.ECC.008.005 שומר מצוה לא ידע דבר רע ועת ומשפט ידע לב חכם׃

8:6b.ECC.008.006 כי לכל חפץ יש עת ומשפט כי רעת האדם רבה עליו׃

8:7b.ECC.008.007 כי איננו ידע מה שיהיה כי כאשר יהיה מי יגיד לו׃

8:8b.ECC.008.008 אין אדם שליט ברוח לכלוא את הרוח ואין שלטון ביום המות ואין משלחת במלחמה ולא ימלט רשע את בעליו׃

8:9b.ECC.008.009 את כל זה ראיתי ונתון את לבי לכל מעשה אשר נעשה תחת השמש עת אשר שלט האדם באדם לרע לו׃

8:10b.ECC.008.010 ובכן ראיתי רשעים קברים ובאו וממקום קדוש יהלכו וישתכחו בעיר אשר כן עשו גם זה הבל׃

8:11b.ECC.008.011 אשר אין נעשה פתגם מעשה הרעה מהרה על כן מלא לב בני האדם בהם לעשות רע׃

8:12b.ECC.008.012 אשר חטא עשה רע מאת ומאריך לו כי גם יודע אני אשר יהיה טוב ליראי האלהים אשר ייראו מלפניו׃

8:13b.ECC.008.013 וטוב לא יהיה לרשע ולא יאריך ימים כצל אשר איננו ירא מלפני אלהים׃

8:14b.ECC.008.014 יש הבל אשר נעשה על הארץ אשר יש צדיקים אשר מגיע אלהם כמעשה הרשעים ויש רשעים שמגיע אלהם כמעשה הצדיקים אמרתי שגם זה הבל׃

8:15b.ECC.008.015 ושבחתי אני את השמחה אשר אין טוב לאדם תחת השמש כי אם לאכול ולשתות ולשמוח והוא ילונו בעמלו ימי חייו אשר נתן לו האלהים תחת השמש׃

8:16b.ECC.008.016 כאשר נתתי את לבי לדעת חכמה ולראות את הענין אשר נעשה על הארץ כי גם ביום ובלילה שנה בעיניו איננו ראה׃

8:17b.ECC.008.017 וראיתי את כל מעשה האלהים כי לא יוכל האדם למצוא את המעשה אשר נעשה תחת השמש בשל אשר יעמל האדם לבקש ולא ימצא וגם אם יאמר החכם לדעת לא יוכל למצא׃

9

9:1b.ECC.009.001 כי את כל זה נתתי אל לבי ולבור את כל זה אשר הצדיקים והחכמים ועבדיהם ביד האלהים גם אהבה גם שנאה אין יודע האדם הכל לפניהם׃

9:2b.ECC.009.002 הכל כאשר לכל מקרה אחד לצדיק ולרשע לטוב ולטהור ולטמא ולזבח ולאשר איננו זבח כטוב כחטא הנשבע כאשר שבועה ירא׃

9:3b.ECC.009.003 זה רע בכל אשר נעשה תחת השמש כי מקרה אחד לכל וגם לב בני האדם מלא רע והוללות בלבבם בחייהם ואחריו אל המתים׃

9:4b.ECC.009.004 כי מי אשר יבחר אל כל החיים יש בטחון כי לכלב חי הוא טוב מן האריה המת׃

9:5b.ECC.009.005 כי החיים יודעים שימתו והמתים אינם יודעים מאומה ואין עוד להם שכר כי נשכח זכרם׃

9:6b.ECC.009.006 גם אהבתם גם שנאתם גם קנאתם כבר אבדה וחלק אין להם עוד לעולם בכל אשר נעשה תחת השמש׃

9:7b.ECC.009.007 לך אכל בשמחה לחמך ושתה בלב טוב יינך כי כבר רצה האלהים את מעשיך׃

9:8b.ECC.009.008 בכל עת יהיו בגדיך לבנים ושמן על ראשך אל יחסר׃

9:9b.ECC.009.009 ראה חיים עם אשה אשר אהבת כל ימי חיי הבלך אשר נתן לך תחת השמש כל ימי הבלך כי הוא חלקך בחיים ובעמלך אשר אתה עמל תחת השמש׃

9:10b.ECC.009.010 כל אשר תמצא ידך לעשות בכחך עשה כי אין מעשה וחשבון ודעת וחכמה בשאול אשר אתה הלך שמה׃

9:11b.ECC.009.011 שבתי וראה תחת השמש כי לא לקלים המרוץ ולא לגבורים המלחמה וגם לא לחכמים לחם וגם לא לנבנים עשר וגם לא לידעים חן כי עת ופגע יקרה את כלם׃

9:12b.ECC.009.012 כי גם לא ידע האדם את עתו כדגים שנאחזים במצודה רעה וכצפרים האחזות בפח כהם יוקשים בני האדם לעת רעה כשתפול עליהם פתאם׃

9:13b.ECC.009.013 גם זה ראיתי חכמה תחת השמש וגדולה היא אלי׃

9:14b.ECC.009.014 עיר קטנה ואנשים בה מעט ובא אליה מלך גדול וסבב אתה ובנה עליה מצודים גדלים׃

9:15b.ECC.009.015 ומצא בה איש מסכן חכם ומלט הוא את העיר בחכמתו ואדם לא זכר את האיש המסכן ההוא׃

9:16b.ECC.009.016 ואמרתי אני טובה חכמה מגבורה וחכמת המסכן בזויה ודבריו אינם נשמעים׃

9:17b.ECC.009.017 דברי חכמים בנחת נשמעים מזעקת מושל בכסילים׃

9:18b.ECC.009.018 טובה חכמה מכלי קרב וחוטא אחד יאבד טובה הרבה׃

10

10:1b.ECC.010.001 זבובי מות יבאיש יביע שמן רוקח יקר מחכמה מכבוד סכלות מעט׃

10:2b.ECC.010.002 לב חכם לימינו ולב כסיל לשמאלו׃

10:3b.ECC.010.003 וגם בדרך כשהסכל הלך לבו חסר ואמר לכל סכל הוא׃

10:4b.ECC.010.004 אם רוח המושל תעלה עליך מקומך אל תנח כי מרפא יניח חטאים גדולים׃

10:5b.ECC.010.005 יש רעה ראיתי תחת השמש כשגגה שיצא מלפני השליט׃

10:6b.ECC.010.006 נתן הסכל במרומים רבים ועשירים בשפל ישבו׃

10:7b.ECC.010.007 ראיתי עבדים על סוסים ושרים הלכים כעבדים על הארץ׃

10:8b.ECC.010.008 חפר גומץ בו יפול ופרץ גדר ישכנו נחש׃

10:9b.ECC.010.009 מסיע אבנים יעצב בהם בוקע עצים יסכן בם׃

10:10b.ECC.010.010 אם קהה הברזל והוא לא פנים קלקל וחילים יגבר ויתרון הכשיר חכמה׃

10:11b.ECC.010.011 אם ישך הנחש בלוא לחש ואין יתרון לבעל הלשון׃

10:12b.ECC.010.012 דברי פי חכם חן ושפתות כסיל תבלענו׃

10:13b.ECC.010.013 תחלת דברי פיהו סכלות ואחרית פיהו הוללות רעה׃

10:14b.ECC.010.014 והסכל ירבה דברים לא ידע האדם מה שיהיה ואשר יהיה מאחריו מי יגיד לו׃

10:15b.ECC.010.015 עמל הכסילים תיגענו אשר לא ידע ללכת אל עיר׃

10:16b.ECC.010.016 אי לך ארץ שמלכך נער ושריך בבקר יאכלו׃

10:17b.ECC.010.017 אשריך ארץ שמלכך בן חורים ושריך בעת יאכלו בגבורה ולא בשתי׃

10:18b.ECC.010.018 בעצלתים ימך המקרה ובשפלות ידים ידלף הבית׃

10:19b.ECC.010.019 לשחוק עשים לחם ויין ישמח חיים והכסף יענה את הכל׃

10:20b.ECC.010.020 גם במדעך מלך אל תקלל ובחדרי משכבך אל תקלל עשיר כי עוף השמים יוליך את הקול ובעל הכנפים יגיד דבר׃

11

11:1b.ECC.011.001 שלח לחמך על פני המים כי ברב הימים תמצאנו׃

11:2b.ECC.011.002 תן חלק לשבעה וגם לשמונה כי לא תדע מה יהיה רעה על הארץ׃

11:3b.ECC.011.003 אם ימלאו העבים גשם על הארץ יריקו ואם יפול עץ בדרום ואם בצפון מקום שיפול העץ שם יהוא׃

11:4b.ECC.011.004 שמר רוח לא יזרע וראה בעבים לא יקצור׃

11:5b.ECC.011.005 כאשר אינך יודע מה דרך הרוח כעצמים בבטן המלאה ככה לא תדע את מעשה האלהים אשר יעשה את הכל׃

11:6b.ECC.011.006 בבקר זרע את זרעך ולערב אל תנח ידך כי אינך יודע אי זה יכשר הזה או זה ואם שניהם כאחד טובים׃

11:7b.ECC.011.007 ומתוק האור וטוב לעינים לראות את השמש׃

11:8b.ECC.011.008 כי אם שנים הרבה יחיה האדם בכלם ישמח ויזכר את ימי החשך כי הרבה יהיו כל שבא הבל׃

11:9b.ECC.011.009 שמח בחור בילדותיך ויטיבך לבך בימי בחורותך והלך בדרכי לבך ובמראי עיניך ודע כי על כל אלה יביאך האלהים במשפט׃

11:10b.ECC.011.010 והסר כעס מלבך והעבר רעה מבשרך כי הילדות והשחרות הבל׃

12

12:1b.ECC.012.001 וזכר את בוראיך בימי בחורתיך עד אשר לא יבאו ימי הרעה והגיעו שנים אשר תאמר אין לי בהם חפץ׃

12:2b.ECC.012.002 עד אשר לא תחשך השמש והאור והירח והכוכבים ושבו העבים אחר הגשם׃

12:3b.ECC.012.003 ביום שיזעו שמרי הבית והתעותו אנשי החיל ובטלו הטחנות כי מעטו וחשכו הראות בארבות׃

12:4b.ECC.012.004 וסגרו דלתים בשוק בשפל קול הטחנה ויקום לקול הצפור וישחו כל בנות השיר׃

12:5b.ECC.012.005 גם מגבה יראו וחתחתים בדרך וינאץ השקד ויסתבל החגב ותפר האביונה כי הלך האדם אל בית עולמו וסבבו בשוק הספדים׃

12:6b.ECC.012.006 עד אשר לא ירחק חבל הכסף ותרץ גלת הזהב ותשבר כד על המבוע ונרץ הגלגל אל הבור׃

12:7b.ECC.012.007 וישב העפר על הארץ כשהיה והרוח תשוב אל האלהים אשר נתנה׃

12:8b.ECC.012.008 הבל הבלים אמר הקוהלת הכל הבל׃

12:9b.ECC.012.009 ויתר שהיה קהלת חכם עוד למד דעת את העם ואזן וחקר תקן משלים הרבה׃

12:10b.ECC.012.010 בקש קהלת למצא דברי חפץ וכתוב ישר דברי אמת׃

12:11b.ECC.012.011 דברי חכמים כדרבנות וכמשמרות נטועים בעלי אספות נתנו מרעה אחד׃

12:12b.ECC.012.012 ויתר מהמה בני הזהר עשות ספרים הרבה אין קץ ולהג הרבה יגעת בשר׃

12:13b.ECC.012.013 סוף דבר הכל נשמע את האלהים ירא ואת מצותיו שמור כי זה כל האדם׃

12:14b.ECC.012.014 כי את כל מעשה האלהים יבא במשפט על כל נעלם אם טוב ואם רע׃