Proverbs (Hebrew)

1

1:1b.PRO.001.001 משלי שלמה בן דוד מלך ישראל׃

1:2b.PRO.001.002 לדעת חכמה ומוסר להבין אמרי בינה׃

1:3b.PRO.001.003 לקחת מוסר השכל צדק ומשפט ומישרים׃

1:4b.PRO.001.004 לתת לפתאים ערמה לנער דעת ומזמה׃

1:5b.PRO.001.005 ישמע חכם ויוסף לקח ונבון תחבלות יקנה׃

1:6b.PRO.001.006 להבין משל ומליצה דברי חכמים וחידתם׃

1:7b.PRO.001.007 יראת יהוה ראשית דעת חכמה ומוסר אוילים בזו׃

1:8b.PRO.001.008 שמע בני מוסר אביך ואל תטש תורת אמך׃

1:9b.PRO.001.009 כי לוית חן הם לראשך וענקים לגרגרתיך׃

1:10b.PRO.001.010 בני אם יפתוך חטאים אל תבא׃

1:11b.PRO.001.011 אם יאמרו לכה אתנו נארבה לדם נצפנה לנקי חנם׃

1:12b.PRO.001.012 נבלעם כשאול חיים ותמימים כיורדי בור׃

1:13b.PRO.001.013 כל הון יקר נמצא נמלא בתינו שלל׃

1:14b.PRO.001.014 גורלך תפיל בתוכנו כיס אחד יהיה לכלנו׃

1:15b.PRO.001.015 בני אל תלך בדרך אתם מנע רגלך מנתיבתם׃

1:16b.PRO.001.016 כי רגליהם לרע ירוצו וימהרו לשפך דם׃

1:17b.PRO.001.017 כי חנם מזרה הרשת בעיני כל בעל כנף׃

1:18b.PRO.001.018 והם לדמם יארבו יצפנו לנפשתם׃

1:19b.PRO.001.019 כן ארחות כל בצע בצע את נפש בעליו יקח׃

1:20b.PRO.001.020 חכמות בחוץ תרנה ברחבות תתן קולה׃

1:21b.PRO.001.021 בראש המיות תקרא בפתחי שערים בעיר אמריה תאמר׃

1:22b.PRO.001.022 עד מתי פתים תאהבו פתי ולצים לצון חמדו להם וכסילים ישנאו דעת׃

1:23b.PRO.001.023 תשובו לתוכחתי הנה אביעה לכם רוחי אודיעה דברי אתכם׃

1:24b.PRO.001.024 יען קראתי ותמאנו נטיתי ידי ואין מקשיב׃

1:25b.PRO.001.025 ותפרעו כל עצתי ותוכחתי לא אביתם׃

1:26b.PRO.001.026 גם אני באידכם אשחק אלעג בבא פחדכם׃

1:27b.PRO.001.027 בבא כשאוה פחדכם ואידכם כסופה יאתה בבא עליכם צרה וצוקה׃

1:28b.PRO.001.028 אז יקראנני ולא אענה ישחרנני ולא ימצאנני׃

1:29b.PRO.001.029 תחת כי שנאו דעת ויראת יהוה לא בחרו׃

1:30b.PRO.001.030 לא אבו לעצתי נאצו כל תוכחתי׃

1:31b.PRO.001.031 ויאכלו מפרי דרכם וממעצתיהם ישבעו׃

1:32b.PRO.001.032 כי משובת פתים תהרגם ושלות כסילים תאבדם׃

1:33b.PRO.001.033 ושמע לי ישכן בטח ושאנן מפחד רעה׃

2

2:1b.PRO.002.001 בני אם תקח אמרי ומצותי תצפן אתך׃

2:2b.PRO.002.002 להקשיב לחכמה אזנך תטה לבך לתבונה׃

2:3b.PRO.002.003 כי אם לבינה תקרא לתבונה תתן קולך׃

2:4b.PRO.002.004 אם תבקשנה ככסף וכמטמונים תחפשנה׃

2:5b.PRO.002.005 אז תבין יראת יהוה ודעת אלהים תמצא׃

2:6b.PRO.002.006 כי יהוה יתן חכמה מפיו דעת ותבונה׃

2:7b.PRO.002.007 וצפן לישרים תושיה מגן להלכי תם׃

2:8b.PRO.002.008 לנצר ארחות משפט ודרך חסידו ישמר׃

2:9b.PRO.002.009 אז תבין צדק ומשפט ומישרים כל מעגל טוב׃

2:10b.PRO.002.010 כי תבוא חכמה בלבך ודעת לנפשך ינעם׃

2:11b.PRO.002.011 מזמה תשמר עליך תבונה תנצרכה׃

2:12b.PRO.002.012 להצילך מדרך רע מאיש מדבר תהפכות׃

2:13b.PRO.002.013 העזבים ארחות ישר ללכת בדרכי חשך׃

2:14b.PRO.002.014 השמחים לעשות רע יגילו בתהפכות רע׃

2:15b.PRO.002.015 אשר ארחתיהם עקשים ונלוזים במעגלותם׃

2:16b.PRO.002.016 להצילך מאשה זרה מנכריה אמריה החליקה׃

2:17b.PRO.002.017 העזבת אלוף נעוריה ואת ברית אלהיה שכחה׃

2:18b.PRO.002.018 כי שחה אל מות ביתה ואל רפאים מעגלתיה׃

2:19b.PRO.002.019 כל באיה לא ישובון ולא ישיגו ארחות חיים׃

2:20b.PRO.002.020 למען תלך בדרך טובים וארחות צדיקים תשמר׃

2:21b.PRO.002.021 כי ישרים ישכנו ארץ ותמימים יותרו בה׃

2:22b.PRO.002.022 ורשעים מארץ יכרתו ובוגדים יסחו ממנה׃

3

3:1b.PRO.003.001 בני תורתי אל תשכח ומצותי יצר לבך׃

3:2b.PRO.003.002 כי ארך ימים ושנות חיים ושלום יוסיפו לך׃

3:3b.PRO.003.003 חסד ואמת אל יעזבך קשרם על גרגרותיך כתבם על לוח לבך׃

3:4b.PRO.003.004 ומצא חן ושכל טוב בעיני אלהים ואדם׃

3:5b.PRO.003.005 בטח אל יהוה בכל לבך ואל בינתך אל תשען׃

3:6b.PRO.003.006 בכל דרכיך דעהו והוא יישר ארחתיך׃

3:7b.PRO.003.007 אל תהי חכם בעיניך ירא את יהוה וסור מרע׃

3:8b.PRO.003.008 רפאות תהי לשרך ושקוי לעצמותיך׃

3:9b.PRO.003.009 כבד את יהוה מהונך ומראשית כל תבואתך׃

3:10b.PRO.003.010 וימלאו אסמיך שבע ותירוש יקביך יפרצו׃

3:11b.PRO.003.011 מוסר יהוה בני אל תמאס ואל תקץ בתוכחתו׃

3:12b.PRO.003.012 כי את אשר יאהב יהוה יוכיח וכאב את בן ירצה׃

3:13b.PRO.003.013 אשרי אדם מצא חכמה ואדם יפיק תבונה׃

3:14b.PRO.003.014 כי טוב סחרה מסחר כסף ומחרוץ תבואתה׃

3:15b.PRO.003.015 יקרה היא מפניים וכל חפציך לא ישוו בה׃

3:16b.PRO.003.016 ארך ימים בימינה בשמאולה עשר וכבוד׃

3:17b.PRO.003.017 דרכיה דרכי נעם וכל נתיבותיה שלום׃

3:18b.PRO.003.018 עץ חיים היא למחזיקים בה ותמכיה מאשר׃

3:19b.PRO.003.019 יהוה בחכמה יסד ארץ כונן שמים בתבונה׃

3:20b.PRO.003.020 בדעתו תהומות נבקעו ושחקים ירעפו טל׃

3:21b.PRO.003.021 בני אל ילזו מעיניך נצר תשיה ומזמה׃

3:22b.PRO.003.022 ויהיו חיים לנפשך וחן לגרגרתיך׃

3:23b.PRO.003.023 אז תלך לבטח דרכך ורגלך לא תגוף׃

3:24b.PRO.003.024 אם תשכב לא תפחד ושכבת וערבה שנתך׃

3:25b.PRO.003.025 אל תירא מפחד פתאם ומשאת רשעים כי תבא׃

3:26b.PRO.003.026 כי יהוה יהיה בכסלך ושמר רגלך מלכד׃

3:27b.PRO.003.027 אל תמנע טוב מבעליו בהיות לאל ידיך לעשות׃

3:28b.PRO.003.028 אל תאמר לרעיך לך ושוב ומחר אתן ויש אתך׃

3:29b.PRO.003.029 אל תחרש על רעך רעה והוא יושב לבטח אתך׃

3:30b.PRO.003.030 אל תרוב עם אדם חנם אם לא גמלך רעה׃

3:31b.PRO.003.031 אל תקנא באיש חמס ואל תבחר בכל דרכיו׃

3:32b.PRO.003.032 כי תועבת יהוה נלוז ואת ישרים סודו׃

3:33b.PRO.003.033 מארת יהוה בבית רשע ונוה צדיקים יברך׃

3:34b.PRO.003.034 אם ללצים הוא יליץ ולעניים יתן חן׃

3:35b.PRO.003.035 כבוד חכמים ינחלו וכסילים מרים קלון׃

4

4:1b.PRO.004.001 שמעו בנים מוסר אב והקשיבו לדעת בינה׃

4:2b.PRO.004.002 כי לקח טוב נתתי לכם תורתי אל תעזבו׃

4:3b.PRO.004.003 כי בן הייתי לאבי רך ויחיד לפני אמי׃

4:4b.PRO.004.004 וירני ויאמר לי יתמך דברי לבך שמר מצותי וחיה׃

4:5b.PRO.004.005 קנה חכמה קנה בינה אל תשכח ואל תט מאמרי פי׃

4:6b.PRO.004.006 אל תעזבה ותשמרך אהבה ותצרך׃

4:7b.PRO.004.007 ראשית חכמה קנה חכמה ובכל קנינך קנה בינה׃

4:8b.PRO.004.008 סלסלה ותרוממך תכבדך כי תחבקנה׃

4:9b.PRO.004.009 תתן לראשך לוית חן עטרת תפארת תמגנך׃

4:10b.PRO.004.010 שמע בני וקח אמרי וירבו לך שנות חיים׃

4:11b.PRO.004.011 בדרך חכמה הרתיך הדרכתיך במעגלי ישר׃

4:12b.PRO.004.012 בלכתך לא יצר צעדך ואם תרוץ לא תכשל׃

4:13b.PRO.004.013 החזק במוסר אל תרף נצרה כי היא חייך׃

4:14b.PRO.004.014 בארח רשעים אל תבא ואל תאשר בדרך רעים׃

4:15b.PRO.004.015 פרעהו אל תעבר בו שטה מעליו ועבור׃

4:16b.PRO.004.016 כי לא ישנו אם לא ירעו ונגזלה שנתם אם לא יכשולו׃

4:17b.PRO.004.017 כי לחמו לחם רשע ויין חמסים ישתו׃

4:18b.PRO.004.018 וארח צדיקים כאור נגה הולך ואור עד נכון היום׃

4:19b.PRO.004.019 דרך רשעים כאפלה לא ידעו במה יכשלו׃

4:20b.PRO.004.020 בני לדברי הקשיבה לאמרי הט אזנך׃

4:21b.PRO.004.021 אל יליזו מעיניך שמרם בתוך לבבך׃

4:22b.PRO.004.022 כי חיים הם למצאיהם ולכל בשרו מרפא׃

4:23b.PRO.004.023 מכל משמר נצר לבך כי ממנו תוצאות חיים׃

4:24b.PRO.004.024 הסר ממך עקשות פה ולזות שפתים הרחק ממך׃

4:25b.PRO.004.025 עיניך לנכח יביטו ועפעפיך יישרו נגדך׃

4:26b.PRO.004.026 פלס מעגל רגלך וכל דרכיך יכנו׃

4:27b.PRO.004.027 אל תט ימין ושמאול הסר רגלך מרע׃

5

5:1b.PRO.005.001 בני לחכמתי הקשיבה לתבונתי הט אזנך׃

5:2b.PRO.005.002 לשמר מזמות ודעת שפתיך ינצרו׃

5:3b.PRO.005.003 כי נפת תטפנה שפתי זרה וחלק משמן חכה׃

5:4b.PRO.005.004 ואחריתה מרה כלענה חדה כחרב פיות׃

5:5b.PRO.005.005 רגליה ירדות מות שאול צעדיה יתמכו׃

5:6b.PRO.005.006 ארח חיים פן תפלס נעו מעגלתיה לא תדע׃

5:7b.PRO.005.007 ועתה בנים שמעו לי ואל תסורו מאמרי פי׃

5:8b.PRO.005.008 הרחק מעליה דרכך ואל תקרב אל פתח ביתה׃

5:9b.PRO.005.009 פן תתן לאחרים הודך ושנתיך לאכזרי׃

5:10b.PRO.005.010 פן ישבעו זרים כחך ועצביך בבית נכרי׃

5:11b.PRO.005.011 ונהמת באחריתך בכלות בשרך ושארך׃

5:12b.PRO.005.012 ואמרת איך שנאתי מוסר ותוכחת נאץ לבי׃

5:13b.PRO.005.013 ולא שמעתי בקול מורי ולמלמדי לא הטיתי אזני׃

5:14b.PRO.005.014 כמעט הייתי בכל רע בתוך קהל ועדה׃

5:15b.PRO.005.015 שתה מים מבורך ונזלים מתוך בארך׃

5:16b.PRO.005.016 יפוצו מעינתיך חוצה ברחבות פלגי מים׃

5:17b.PRO.005.017 יהיו לך לבדך ואין לזרים אתך׃

5:18b.PRO.005.018 יהי מקורך ברוך ושמח מאשת נעורך׃

5:19b.PRO.005.019 אילת אהבים ויעלת חן דדיה ירוך בכל עת באהבתה תשגה תמיד׃

5:20b.PRO.005.020 ולמה תשגה בני בזרה ותחבק חק נכריה׃

5:21b.PRO.005.021 כי נכח עיני יהוה דרכי איש וכל מעגלתיו מפלס׃

5:22b.PRO.005.022 עוונותיו ילכדנו את הרשע ובחבלי חטאתו יתמך׃

5:23b.PRO.005.023 הוא ימות באין מוסר וברב אולתו ישגה׃

6

6:1b.PRO.006.001 בני אם ערבת לרעך תקעת לזר כפיך׃

6:2b.PRO.006.002 נוקשת באמרי פיך נלכדת באמרי פיך׃

6:3b.PRO.006.003 עשה זאת אפוא בני והנצל כי באת בכף רעך לך התרפס ורהב רעיך׃

6:4b.PRO.006.004 אל תתן שנה לעיניך ותנומה לעפעפיך׃

6:5b.PRO.006.005 הנצל כצבי מיד וכצפור מיד יקוש׃

6:6b.PRO.006.006 לך אל נמלה עצל ראה דרכיה וחכם׃

6:7b.PRO.006.007 אשר אין לה קצין שטר ומשל׃

6:8b.PRO.006.008 תכין בקיץ לחמה אגרה בקציר מאכלה׃

6:9b.PRO.006.009 עד מתי עצל תשכב מתי תקום משנתך׃

6:10b.PRO.006.010 מעט שנות מעט תנומות מעט חבק ידים לשכב׃

6:11b.PRO.006.011 ובא כמהלך ראשך ומחסרך כאיש מגן׃

6:12b.PRO.006.012 אדם בליעל איש און הולך עקשות פה׃

6:13b.PRO.006.013 קרץ בעינו מלל ברגלו מרה באצבעתיו׃

6:14b.PRO.006.014 תהפכות בלבו חרש רע בכל עת מדנים ישלח׃

6:15b.PRO.006.015 על כן פתאם יבוא אידו פתע ישבר ואין מרפא׃

6:16b.PRO.006.016 שש הנה שנא יהוה ושבע תועבות נפשו׃

6:17b.PRO.006.017 עינים רמות לשון שקר וידים שפכות דם נקי׃

6:18b.PRO.006.018 לב חרש מחשבות און רגלים ממהרות לרוץ לרעה׃

6:19b.PRO.006.019 יפיח כזבים עד שקר ומשלח מדנים בין אחים׃

6:20b.PRO.006.020 נצר בני מצות אביך ואל תטש תורת אמך׃

6:21b.PRO.006.021 קשרם על לבך תמיד ענדם על גרגרתך׃

6:22b.PRO.006.022 בהתהלכך תנחה אתך בשכבך תשמר עליך והקיצות היא תשיחך׃

6:23b.PRO.006.023 כי נר מצוה ותורה אור ודרך חיים תוכחות מוסר׃

6:24b.PRO.006.024 לשמרך מאשת רע מחלקת לשון נכריה׃

6:25b.PRO.006.025 אל תחמד יפיה בלבבך ואל תקחך בעפעפיה׃

6:26b.PRO.006.026 כי בעד אשה זונה עד ככר לחם ואשת איש נפש יקרה תצוד׃

6:27b.PRO.006.027 היחתה איש אש בחיקו ובגדיו לא תשרפנה׃

6:28b.PRO.006.028 אם יהלך איש על הגחלים ורגליו לא תכוינה׃

6:29b.PRO.006.029 כן הבא אל אשת רעהו לא ינקה כל הנגע בה׃

6:30b.PRO.006.030 לא יבוזו לגנב כי יגנוב למלא נפשו כי ירעב׃

6:31b.PRO.006.031 ונמצא ישלם שבעתים את כל הון ביתו יתן׃

6:32b.PRO.006.032 נאף אשה חסר לב משחית נפשו הוא יעשנה׃

6:33b.PRO.006.033 נגע וקלון ימצא וחרפתו לא תמחה׃

6:34b.PRO.006.034 כי קנאה חמת גבר ולא יחמול ביום נקם׃

6:35b.PRO.006.035 לא ישא פני כל כפר ולא יאבה כי תרבה שחד׃

7

7:1b.PRO.007.001 בני שמר אמרי ומצותי תצפן אתך׃

7:2b.PRO.007.002 שמר מצותי וחיה ותורתי כאישון עיניך׃

7:3b.PRO.007.003 קשרם על אצבעתיך כתבם על לוח לבך׃

7:4b.PRO.007.004 אמר לחכמה אחתי את ומדע לבינה תקרא׃

7:5b.PRO.007.005 לשמרך מאשה זרה מנכריה אמריה החליקה׃

7:6b.PRO.007.006 כי בחלון ביתי בעד אשנבי נשקפתי׃

7:7b.PRO.007.007 וארא בפתאים אבינה בבנים נער חסר לב׃

7:8b.PRO.007.008 עבר בשוק אצל פנה ודרך ביתה יצעד׃

7:9b.PRO.007.009 בנשף בערב יום באישון לילה ואפלה׃

7:10b.PRO.007.010 והנה אשה לקראתו שית זונה ונצרת לב׃

7:11b.PRO.007.011 המיה היא וסררת בביתה לא ישכנו רגליה׃

7:12b.PRO.007.012 פעם בחוץ פעם ברחבות ואצל כל פנה תארב׃

7:13b.PRO.007.013 והחזיקה בו ונשקה לו העזה פניה ותאמר לו׃

7:14b.PRO.007.014 זבחי שלמים עלי היום שלמתי נדרי׃

7:15b.PRO.007.015 על כן יצאתי לקראתך לשחר פניך ואמצאך׃

7:16b.PRO.007.016 מרבדים רבדתי ערשי חטבות אטון מצרים׃

7:17b.PRO.007.017 נפתי משכבי מר אהלים וקנמון׃

7:18b.PRO.007.018 לכה נרוה דדים עד הבקר נתעלסה באהבים׃

7:19b.PRO.007.019 כי אין האיש בביתו הלך בדרך מרחוק׃

7:20b.PRO.007.020 צרור הכסף לקח בידו ליום הכסא יבא ביתו׃

7:21b.PRO.007.021 הטתו ברב לקחה בחלק שפתיה תדיחנו׃

7:22b.PRO.007.022 הולך אחריה פתאם כשור אל טבח יבוא וכעכס אל מוסר אויל׃

7:23b.PRO.007.023 עד יפלח חץ כבדו כמהר צפור אל פח ולא ידע כי בנפשו הוא׃

7:24b.PRO.007.024 ועתה בנים שמעו לי והקשיבו לאמרי פי׃

7:25b.PRO.007.025 אל ישט אל דרכיה לבך אל תתע בנתיבותיה׃

7:26b.PRO.007.026 כי רבים חללים הפילה ועצמים כל הרגיה׃

7:27b.PRO.007.027 דרכי שאול ביתה ירדות אל חדרי מות׃

8

8:1b.PRO.008.001 הלא חכמה תקרא ותבונה תתן קולה׃

8:2b.PRO.008.002 בראש מרומים עלי דרך בית נתיבות נצבה׃

8:3b.PRO.008.003 ליד שערים לפי קרת מבוא פתחים תרנה׃

8:4b.PRO.008.004 אליכם אישים אקרא וקולי אל בני אדם׃

8:5b.PRO.008.005 הבינו פתאים ערמה וכסילים הבינו לב׃

8:6b.PRO.008.006 שמעו כי נגידים אדבר ומפתח שפתי מישרים׃

8:7b.PRO.008.007 כי אמת יהגה חכי ותועבת שפתי רשע׃

8:8b.PRO.008.008 בצדק כל אמרי פי אין בהם נפתל ועקש׃

8:9b.PRO.008.009 כלם נכחים למבין וישרים למצאי דעת׃

8:10b.PRO.008.010 קחו מוסרי ואל כסף ודעת מחרוץ נבחר׃

8:11b.PRO.008.011 כי טובה חכמה מפנינים וכל חפצים לא ישוו בה׃

8:12b.PRO.008.012 אני חכמה שכנתי ערמה ודעת מזמות אמצא׃

8:13b.PRO.008.013 יראת יהוה שנאת רע גאה וגאון ודרך רע ופי תהפכות שנאתי׃

8:14b.PRO.008.014 לי עצה ותושיה אני בינה לי גבורה׃

8:15b.PRO.008.015 בי מלכים ימלכו ורוזנים יחקקו צדק׃

8:16b.PRO.008.016 בי שרים ישרו ונדיבים כל שפטי צדק׃

8:17b.PRO.008.017 אני אהביה אהב ומשחרי ימצאנני׃

8:18b.PRO.008.018 עשר וכבוד אתי הון עתק וצדקה׃

8:19b.PRO.008.019 טוב פריי מחרוץ ומפז ותבואתי מכסף נבחר׃

8:20b.PRO.008.020 בארח צדקה אהלך בתוך נתיבות משפט׃

8:21b.PRO.008.021 להנחיל אהבי יש ואצרתיהם אמלא׃

8:22b.PRO.008.022 יהוה קנני ראשית דרכו קדם מפעליו מאז׃

8:23b.PRO.008.023 מעולם נסכתי מראש מקדמי ארץ׃

8:24b.PRO.008.024 באין תהמות חוללתי באין מעינות נכבדי מים׃

8:25b.PRO.008.025 בטרם הרים הטבעו לפני גבעות חוללתי׃

8:26b.PRO.008.026 עד לא עשה ארץ וחוצות וראש עפרות תבל׃

8:27b.PRO.008.027 בהכינו שמים שם אני בחוקו חוג על פני תהום׃

8:28b.PRO.008.028 באמצו שחקים ממעל בעזוז עינות תהום׃

8:29b.PRO.008.029 בשומו לים חקו ומים לא יעברו פיו בחוקו מוסדי ארץ׃

8:30b.PRO.008.030 ואהיה אצלו אמון ואהיה שעשעים יום יום משחקת לפניו בכל עת׃

8:31b.PRO.008.031 משחקת בתבל ארצו ושעשעי את בני אדם׃

8:32b.PRO.008.032 ועתה בנים שמעו לי ואשרי דרכי ישמרו׃

8:33b.PRO.008.033 שמעו מוסר וחכמו ואל תפרעו׃

8:34b.PRO.008.034 אשרי אדם שמע לי לשקד על דלתתי יום יום לשמר מזוזת פתחי׃

8:35b.PRO.008.035 כי מצאי מצאי חיים ויפק רצון מיהוה׃

8:36b.PRO.008.036 וחטאי חמס נפשו כל משנאי אהבו מות׃

9

9:1b.PRO.009.001 חכמות בנתה ביתה חצבה עמודיה שבעה׃

9:2b.PRO.009.002 טבחה טבחה מסכה יינה אף ערכה שלחנה׃

9:3b.PRO.009.003 שלחה נערתיה תקרא על גפי מרמי קרת׃

9:4b.PRO.009.004 מי פתי יסר הנה חסר לב אמרה לו׃

9:5b.PRO.009.005 לכו לחמו בלחמי ושתו ביין מסכתי׃

9:6b.PRO.009.006 עזבו פתאים וחיו ואשרו בדרך בינה׃

9:7b.PRO.009.007 יסר לץ לקח לו קלון ומוכיח לרשע מומו׃

9:8b.PRO.009.008 אל תוכח לץ פן ישנאך הוכח לחכם ויאהבך׃

9:9b.PRO.009.009 תן לחכם ויחכם עוד הודע לצדיק ויוסף לקח׃

9:10b.PRO.009.010 תחלת חכמה יראת יהוה ודעת קדשים בינה׃

9:11b.PRO.009.011 כי בי ירבו ימיך ויוסיפו לך שנות חיים׃

9:12b.PRO.009.012 אם חכמת חכמת לך ולצת לבדך תשא׃

9:13b.PRO.009.013 אשת כסילות המיה פתיות ובל ידעה מה׃

9:14b.PRO.009.014 וישבה לפתח ביתה על כסא מרמי קרת׃

9:15b.PRO.009.015 לקרא לעברי דרך המישרים ארחותם׃

9:16b.PRO.009.016 מי פתי יסר הנה וחסר לב ואמרה לו׃

9:17b.PRO.009.017 מים גנובים ימתקו ולחם סתרים ינעם׃

9:18b.PRO.009.018 ולא ידע כי רפאים שם בעמקי שאול קראיה׃

10

10:1b.PRO.010.001 משלי שלמה בן חכם ישמח אב ובן כסיל תוגת אמו׃

10:2b.PRO.010.002 לא יועילו אוצרות רשע וצדקה תציל ממות׃

10:3b.PRO.010.003 לא ירעיב יהוה נפש צדיק והות רשעים יהדף׃

10:4b.PRO.010.004 ראש עשה כף רמיה ויד חרוצים תעשיר׃

10:5b.PRO.010.005 אגר בקיץ בן משכיל נרדם בקציר בן מביש׃

10:6b.PRO.010.006 ברכות לראש צדיק ופי רשעים יכסה חמס׃

10:7b.PRO.010.007 זכר צדיק לברכה ושם רשעים ירקב׃

10:8b.PRO.010.008 חכם לב יקח מצות ואויל שפתים ילבט׃

10:9b.PRO.010.009 הולך בתם ילך בטח ומעקש דרכיו יודע׃

10:10b.PRO.010.010 קרץ עין יתן עצבת ואויל שפתים ילבט׃

10:11b.PRO.010.011 מקור חיים פי צדיק ופי רשעים יכסה חמס׃

10:12b.PRO.010.012 שנאה תעורר מדנים ועל כל פשעים תכסה אהבה׃

10:13b.PRO.010.013 בשפתי נבון תמצא חכמה ושבט לגו חסר לב׃

10:14b.PRO.010.014 חכמים יצפנו דעת ופי אויל מחתה קרבה׃

10:15b.PRO.010.015 הון עשיר קרית עזו מחתת דלים רישם׃

10:16b.PRO.010.016 פעלת צדיק לחיים תבואת רשע לחטאת׃

10:17b.PRO.010.017 ארח לחיים שומר מוסר ועוזב תוכחת מתעה׃

10:18b.PRO.010.018 מכסה שנאה שפתי שקר ומוצא דבה הוא כסיל׃

10:19b.PRO.010.019 ברב דברים לא יחדל פשע וחשך שפתיו משכיל׃

10:20b.PRO.010.020 כסף נבחר לשון צדיק לב רשעים כמעט׃

10:21b.PRO.010.021 שפתי צדיק ירעו רבים ואוילים בחסר לב ימותו׃

10:22b.PRO.010.022 ברכת יהוה היא תעשיר ולא יוסף עצב עמה׃

10:23b.PRO.010.023 כשחוק לכסיל עשות זמה וחכמה לאיש תבונה׃

10:24b.PRO.010.024 מגורת רשע היא תבואנו ותאות צדיקים יתן׃

10:25b.PRO.010.025 כעבור סופה ואין רשע וצדיק יסוד עולם׃

10:26b.PRO.010.026 כחמץ לשנים וכעשן לעינים כן העצל לשלחיו׃

10:27b.PRO.010.027 יראת יהוה תוסיף ימים ושנות רשעים תקצרנה׃

10:28b.PRO.010.028 תוחלת צדיקים שמחה ותקות רשעים תאבד׃

10:29b.PRO.010.029 מעוז לתם דרך יהוה ומחתה לפעלי און׃

10:30b.PRO.010.030 צדיק לעולם בל ימוט ורשעים לא ישכנו ארץ׃

10:31b.PRO.010.031 פי צדיק ינוב חכמה ולשון תהפכות תכרת׃

10:32b.PRO.010.032 שפתי צדיק ידעון רצון ופי רשעים תהפכות׃

11

11:1b.PRO.011.001 מאזני מרמה תועבת יהוה ואבן שלמה רצונו׃

11:2b.PRO.011.002 בא זדון ויבא קלון ואת צנועים חכמה׃

11:3b.PRO.011.003 תמת ישרים תנחם וסלף בוגדים ושדם׃

11:4b.PRO.011.004 לא יועיל הון ביום עברה וצדקה תציל ממות׃

11:5b.PRO.011.005 צדקת תמים תישר דרכו וברשעתו יפל רשע׃

11:6b.PRO.011.006 צדקת ישרים תצילם ובהות בגדים ילכדו׃

11:7b.PRO.011.007 במות אדם רשע תאבד תקוה ותוחלת אונים אבדה׃

11:8b.PRO.011.008 צדיק מצרה נחלץ ויבא רשע תחתיו׃

11:9b.PRO.011.009 בפה חנף ישחת רעהו ובדעת צדיקים יחלצו׃

11:10b.PRO.011.010 בטוב צדיקים תעלץ קריה ובאבד רשעים רנה׃

11:11b.PRO.011.011 בברכת ישרים תרום קרת ובפי רשעים תהרס׃

11:12b.PRO.011.012 בז לרעהו חסר לב ואיש תבונות יחריש׃

11:13b.PRO.011.013 הולך רכיל מגלה סוד ונאמן רוח מכסה דבר׃

11:14b.PRO.011.014 באין תחבלות יפל עם ותשועה ברב יועץ׃

11:15b.PRO.011.015 רע ירוע כי ערב זר ושנא תקעים בוטח׃

11:16b.PRO.011.016 אשת חן תתמך כבוד ועריצים יתמכו עשר׃

11:17b.PRO.011.017 גמל נפשו איש חסד ועכר שארו אכזרי׃

11:18b.PRO.011.018 רשע עשה פעלת שקר וזרע צדקה שכר אמת׃

11:19b.PRO.011.019 כן צדקה לחיים ומרדף רעה למותו׃

11:20b.PRO.011.020 תועבת יהוה עקשי לב ורצונו תמימי דרך׃

11:21b.PRO.011.021 יד ליד לא ינקה רע וזרע צדיקים נמלט׃

11:22b.PRO.011.022 נזם זהב באף חזיר אשה יפה וסרת טעם׃

11:23b.PRO.011.023 תאות צדיקים אך טוב תקות רשעים עברה׃

11:24b.PRO.011.024 יש מפזר ונוסף עוד וחושך מישר אך למחסור׃

11:25b.PRO.011.025 נפש ברכה תדשן ומרוה גם הוא יורא׃

11:26b.PRO.011.026 מנע בר יקבהו לאום וברכה לראש משביר׃

11:27b.PRO.011.027 שחר טוב יבקש רצון ודרש רעה תבואנו׃

11:28b.PRO.011.028 בוטח בעשרו הוא יפל וכעלה צדיקים יפרחו׃

11:29b.PRO.011.029 עוכר ביתו ינחל רוח ועבד אויל לחכם לב׃

11:30b.PRO.011.030 פרי צדיק עץ חיים ולקח נפשות חכם׃

11:31b.PRO.011.031 הן צדיק בארץ ישלם אף כי רשע וחוטא׃

12

12:1b.PRO.012.001 אהב מוסר אהב דעת ושנא תוכחת בער׃

12:2b.PRO.012.002 טוב יפיק רצון מיהוה ואיש מזמות ירשיע׃

12:3b.PRO.012.003 לא יכון אדם ברשע ושרש צדיקים בל ימוט׃

12:4b.PRO.012.004 אשת חיל עטרת בעלה וכרקב בעצמותיו מבישה׃

12:5b.PRO.012.005 מחשבות צדיקים משפט תחבלות רשעים מרמה׃

12:6b.PRO.012.006 דברי רשעים ארב דם ופי ישרים יצילם׃

12:7b.PRO.012.007 הפוך רשעים ואינם ובית צדיקים יעמד׃

12:8b.PRO.012.008 לפי שכלו יהלל איש ונעוה לב יהיה לבוז׃

12:9b.PRO.012.009 טוב נקלה ועבד לו ממתכבד וחסר לחם׃

12:10b.PRO.012.010 יודע צדיק נפש בהמתו ורחמי רשעים אכזרי׃

12:11b.PRO.012.011 עבד אדמתו ישבע לחם ומרדף ריקים חסר לב׃

12:12b.PRO.012.012 חמד רשע מצוד רעים ושרש צדיקים יתן׃

12:13b.PRO.012.013 בפשע שפתים מוקש רע ויצא מצרה צדיק׃

12:14b.PRO.012.014 מפרי פי איש ישבע טוב וגמול ידי אדם ישוב לו׃

12:15b.PRO.012.015 דרך אויל ישר בעיניו ושמע לעצה חכם׃

12:16b.PRO.012.016 אויל ביום יודע כעסו וכסה קלון ערום׃

12:17b.PRO.012.017 יפיח אמונה יגיד צדק ועד שקרים מרמה׃

12:18b.PRO.012.018 יש בוטה כמדקרות חרב ולשון חכמים מרפא׃

12:19b.PRO.012.019 שפת אמת תכון לעד ועד ארגיעה לשון שקר׃

12:20b.PRO.012.020 מרמה בלב חרשי רע וליעצי שלום שמחה׃

12:21b.PRO.012.021 לא יאנה לצדיק כל און ורשעים מלאו רע׃

12:22b.PRO.012.022 תועבת יהוה שפתי שקר ועשי אמונה רצונו׃

12:23b.PRO.012.023 אדם ערום כסה דעת ולב כסילים יקרא אולת׃

12:24b.PRO.012.024 יד חרוצים תמשול ורמיה תהיה למס׃

12:25b.PRO.012.025 דאגה בלב איש ישחנה ודבר טוב ישמחנה׃

12:26b.PRO.012.026 יתר מרעהו צדיק ודרך רשעים תתעם׃

12:27b.PRO.012.027 לא יחרך רמיה צידו והון אדם יקר חרוץ׃

12:28b.PRO.012.028 בארח צדקה חיים ודרך נתיבה אל מות׃

13

13:1b.PRO.013.001 בן חכם מוסר אב ולץ לא שמע גערה׃

13:2b.PRO.013.002 מפרי פי איש יאכל טוב ונפש בגדים חמס׃

13:3b.PRO.013.003 נצר פיו שמר נפשו פשק שפתיו מחתה לו׃

13:4b.PRO.013.004 מתאוה ואין נפשו עצל ונפש חרצים תדשן׃

13:5b.PRO.013.005 דבר שקר ישנא צדיק ורשע יבאיש ויחפיר׃

13:6b.PRO.013.006 צדקה תצר תם דרך ורשעה תסלף חטאת׃

13:7b.PRO.013.007 יש מתעשר ואין כל מתרושש והון רב׃

13:8b.PRO.013.008 כפר נפש איש עשרו ורש לא שמע גערה׃

13:9b.PRO.013.009 אור צדיקים ישמח ונר רשעים ידעך׃

13:10b.PRO.013.010 רק בזדון יתן מצה ואת נועצים חכמה׃

13:11b.PRO.013.011 הון מהבל ימעט וקבץ על יד ירבה׃

13:12b.PRO.013.012 תוחלת ממשכה מחלה לב ועץ חיים תאוה באה׃

13:13b.PRO.013.013 בז לדבר יחבל לו וירא מצוה הוא ישלם׃

13:14b.PRO.013.014 תורת חכם מקור חיים לסור ממקשי מות׃

13:15b.PRO.013.015 שכל טוב יתן חן ודרך בגדים איתן׃

13:16b.PRO.013.016 כל ערום יעשה בדעת וכסיל יפרש אולת׃

13:17b.PRO.013.017 מלאך רשע יפל ברע וציר אמונים מרפא׃

13:18b.PRO.013.018 ריש וקלון פורע מוסר ושומר תוכחת יכבד׃

13:19b.PRO.013.019 תאוה נהיה תערב לנפש ותועבת כסילים סור מרע׃

13:20b.PRO.013.020 הלוך את חכמים וחכם ורעה כסילים ירוע׃

13:21b.PRO.013.021 חטאים תרדף רעה ואת צדיקים ישלם טוב׃

13:22b.PRO.013.022 טוב ינחיל בני בנים וצפון לצדיק חיל חוטא׃

13:23b.PRO.013.023 רב אכל ניר ראשים ויש נספה בלא משפט׃

13:24b.PRO.013.024 חושך שבטו שונא בנו ואהבו שחרו מוסר׃

13:25b.PRO.013.025 צדיק אכל לשבע נפשו ובטן רשעים תחסר׃

14

14:1b.PRO.014.001 חכמות נשים בנתה ביתה ואולת בידיה תהרסנו׃

14:2b.PRO.014.002 הולך בישרו ירא יהוה ונלוז דרכיו בוזהו׃

14:3b.PRO.014.003 בפי אויל חטר גאוה ושפתי חכמים תשמורם׃

14:4b.PRO.014.004 באין אלפים אבוס בר ורב תבואות בכח שור׃

14:5b.PRO.014.005 עד אמונים לא יכזב ויפיח כזבים עד שקר׃

14:6b.PRO.014.006 בקש לץ חכמה ואין ודעת לנבון נקל׃

14:7b.PRO.014.007 לך מנגד לאיש כסיל ובל ידעת שפתי דעת׃

14:8b.PRO.014.008 חכמת ערום הבין דרכו ואולת כסילים מרמה׃

14:9b.PRO.014.009 אולים יליץ אשם ובין ישרים רצון׃

14:10b.PRO.014.010 לב יודע מרת נפשו ובשמחתו לא יתערב זר׃

14:11b.PRO.014.011 בית רשעים ישמד ואהל ישרים יפריח׃

14:12b.PRO.014.012 יש דרך ישר לפני איש ואחריתה דרכי מות׃

14:13b.PRO.014.013 גם בשחוק יכאב לב ואחריתה שמחה תוגה׃

14:14b.PRO.014.014 מדרכיו ישבע סוג לב ומעליו איש טוב׃

14:15b.PRO.014.015 פתי יאמין לכל דבר וערום יבין לאשרו׃

14:16b.PRO.014.016 חכם ירא וסר מרע וכסיל מתעבר ובוטח׃

14:17b.PRO.014.017 קצר אפים יעשה אולת ואיש מזמות ישנא׃

14:18b.PRO.014.018 נחלו פתאים אולת וערומים יכתרו דעת׃

14:19b.PRO.014.019 שחו רעים לפני טובים ורשעים על שערי צדיק׃

14:20b.PRO.014.020 גם לרעהו ישנא רש ואהבי עשיר רבים׃

14:21b.PRO.014.021 בז לרעהו חוטא ומחונן עניים אשריו׃

14:22b.PRO.014.022 הלוא יתעו חרשי רע וחסד ואמת חרשי טוב׃

14:23b.PRO.014.023 בכל עצב יהיה מותר ודבר שפתים אך למחסור׃

14:24b.PRO.014.024 עטרת חכמים עשרם אולת כסילים אולת׃

14:25b.PRO.014.025 מציל נפשות עד אמת ויפח כזבים מרמה׃

14:26b.PRO.014.026 ביראת יהוה מבטח עז ולבניו יהיה מחסה׃

14:27b.PRO.014.027 יראת יהוה מקור חיים לסור ממקשי מות׃

14:28b.PRO.014.028 ברב עם הדרת מלך ובאפס לאם מחתת רזון׃

14:29b.PRO.014.029 ארך אפים רב תבונה וקצר רוח מרים אולת׃

14:30b.PRO.014.030 חיי בשרים לב מרפא ורקב עצמות קנאה׃

14:31b.PRO.014.031 עשק דל חרף עשהו ומכבדו חנן אביון׃

14:32b.PRO.014.032 ברעתו ידחה רשע וחסה במותו צדיק׃

14:33b.PRO.014.033 בלב נבון תנוח חכמה ובקרב כסילים תודע׃

14:34b.PRO.014.034 צדקה תרומם גוי וחסד לאמים חטאת׃

14:35b.PRO.014.035 רצון מלך לעבד משכיל ועברתו תהיה מביש׃

15

15:1b.PRO.015.001 מענה רך ישיב חמה ודבר עצב יעלה אף׃

15:2b.PRO.015.002 לשון חכמים תיטיב דעת ופי כסילים יביע אולת׃

15:3b.PRO.015.003 בכל מקום עיני יהוה צפות רעים וטובים׃

15:4b.PRO.015.004 מרפא לשון עץ חיים וסלף בה שבר ברוח׃

15:5b.PRO.015.005 אויל ינאץ מוסר אביו ושמר תוכחת יערם׃

15:6b.PRO.015.006 בית צדיק חסן רב ובתבואת רשע נעכרת׃

15:7b.PRO.015.007 שפתי חכמים יזרו דעת ולב כסילים לא כן׃

15:8b.PRO.015.008 זבח רשעים תועבת יהוה ותפלת ישרים רצונו׃

15:9b.PRO.015.009 תועבת יהוה דרך רשע ומרדף צדקה יאהב׃

15:10b.PRO.015.010 מוסר רע לעזב ארח שונא תוכחת ימות׃

15:11b.PRO.015.011 שאול ואבדון נגד יהוה אף כי לבות בני אדם׃

15:12b.PRO.015.012 לא יאהב לץ הוכח לו אל חכמים לא ילך׃

15:13b.PRO.015.013 לב שמח ייטב פנים ובעצבת לב רוח נכאה׃

15:14b.PRO.015.014 לב נבון יבקש דעת ופני כסילים ירעה אולת׃

15:15b.PRO.015.015 כל ימי עני רעים וטוב לב משתה תמיד׃

15:16b.PRO.015.016 טוב מעט ביראת יהוה מאוצר רב ומהומה בו׃

15:17b.PRO.015.017 טוב ארחת ירק ואהבה שם משור אבוס ושנאה בו׃

15:18b.PRO.015.018 איש חמה יגרה מדון וארך אפים ישקיט ריב׃

15:19b.PRO.015.019 דרך עצל כמשכת חדק וארח ישרים סללה׃

15:20b.PRO.015.020 בן חכם ישמח אב וכסיל אדם בוזה אמו׃

15:21b.PRO.015.021 אולת שמחה לחסר לב ואיש תבונה יישר לכת׃

15:22b.PRO.015.022 הפר מחשבות באין סוד וברב יועצים תקום׃

15:23b.PRO.015.023 שמחה לאיש במענה פיו ודבר בעתו מה טוב׃

15:24b.PRO.015.024 ארח חיים למעלה למשכיל למען סור משאול מטה׃

15:25b.PRO.015.025 בית גאים יסח יהוה ויצב גבול אלמנה׃

15:26b.PRO.015.026 תועבת יהוה מחשבות רע וטהרים אמרי נעם׃

15:27b.PRO.015.027 עכר ביתו בוצע בצע ושונא מתנת יחיה׃

15:28b.PRO.015.028 לב צדיק יהגה לענות ופי רשעים יביע רעות׃

15:29b.PRO.015.029 רחוק יהוה מרשעים ותפלת צדיקים ישמע׃

15:30b.PRO.015.030 מאור עינים ישמח לב שמועה טובה תדשן עצם׃

15:31b.PRO.015.031 אזן שמעת תוכחת חיים בקרב חכמים תלין׃

15:32b.PRO.015.032 פורע מוסר מואס נפשו ושומע תוכחת קונה לב׃

15:33b.PRO.015.033 יראת יהוה מוסר חכמה ולפני כבוד ענוה׃

16

16:1b.PRO.016.001 לאדם מערכי לב ומיהוה מענה לשון׃

16:2b.PRO.016.002 כל דרכי איש זך בעיניו ותכן רוחות יהוה׃

16:3b.PRO.016.003 גל אל יהוה מעשיך ויכנו מחשבתיך׃

16:4b.PRO.016.004 כל פעל יהוה למענהו וגם רשע ליום רעה׃

16:5b.PRO.016.005 תועבת יהוה כל גבה לב יד ליד לא ינקה׃

16:6b.PRO.016.006 בחסד ואמת יכפר עון וביראת יהוה סור מרע׃

16:7b.PRO.016.007 ברצות יהוה דרכי איש גם אויביו ישלם אתו׃

16:8b.PRO.016.008 טוב מעט בצדקה מרב תבואות בלא משפט׃

16:9b.PRO.016.009 לב אדם יחשב דרכו ויהוה יכין צעדו׃

16:10b.PRO.016.010 קסם על שפתי מלך במשפט לא ימעל פיו׃

16:11b.PRO.016.011 פלס ומאזני משפט ליהוה מעשהו כל אבני כיס׃

16:12b.PRO.016.012 תועבת מלכים עשות רשע כי בצדקה יכון כסא׃

16:13b.PRO.016.013 רצון מלכים שפתי צדק ודבר ישרים יאהב׃

16:14b.PRO.016.014 חמת מלך מלאכי מות ואיש חכם יכפרנה׃

16:15b.PRO.016.015 באור פני מלך חיים ורצונו כעב מלקוש׃

16:16b.PRO.016.016 קנה חכמה מה טוב מחרוץ וקנות בינה נבחר מכסף׃

16:17b.PRO.016.017 מסלת ישרים סור מרע שמר נפשו נצר דרכו׃

16:18b.PRO.016.018 לפני שבר גאון ולפני כשלון גבה רוח׃

16:19b.PRO.016.019 טוב שפל רוח את עניים מחלק שלל את גאים׃

16:20b.PRO.016.020 משכיל על דבר ימצא טוב ובוטח ביהוה אשריו׃

16:21b.PRO.016.021 לחכם לב יקרא נבון ומתק שפתים יסיף לקח׃

16:22b.PRO.016.022 מקור חיים שכל בעליו ומוסר אולים אולת׃

16:23b.PRO.016.023 לב חכם ישכיל פיהו ועל שפתיו יסיף לקח׃

16:24b.PRO.016.024 צוף דבש אמרי נעם מתוק לנפש ומרפא לעצם׃

16:25b.PRO.016.025 יש דרך ישר לפני איש ואחריתה דרכי מות׃

16:26b.PRO.016.026 נפש עמל עמלה לו כי אכף עליו פיהו׃

16:27b.PRO.016.027 איש בליעל כרה רעה ועל שפתיו כאש צרבת׃

16:28b.PRO.016.028 איש תהפכות ישלח מדון ונרגן מפריד אלוף׃

16:29b.PRO.016.029 איש חמס יפתה רעהו והוליכו בדרך לא טוב׃

16:30b.PRO.016.030 עצה עיניו לחשב תהפכות קרץ שפתיו כלה רעה׃

16:31b.PRO.016.031 עטרת תפארת שיבה בדרך צדקה תמצא׃

16:32b.PRO.016.032 טוב ארך אפים מגבור ומשל ברוחו מלכד עיר׃

16:33b.PRO.016.033 בחיק יוטל את הגורל ומיהוה כל משפטו׃

17

17:1b.PRO.017.001 טוב פת חרבה ושלוה בה מבית מלא זבחי ריב׃

17:2b.PRO.017.002 עבד משכיל ימשל בבן מביש ובתוך אחים יחלק נחלה׃

17:3b.PRO.017.003 מצרף לכסף וכור לזהב ובחן לבות יהוה׃

17:4b.PRO.017.004 מרע מקשיב על שפת און שקר מזין על לשון הות׃

17:5b.PRO.017.005 לעג לרש חרף עשהו שמח לאיד לא ינקה׃

17:6b.PRO.017.006 עטרת זקנים בני בנים ותפארת בנים אבותם׃

17:7b.PRO.017.007 לא נאוה לנבל שפת יתר אף כי לנדיב שפת שקר׃

17:8b.PRO.017.008 אבן חן השחד בעיני בעליו אל כל אשר יפנה ישכיל׃

17:9b.PRO.017.009 מכסה פשע מבקש אהבה ושנה בדבר מפריד אלוף׃

17:10b.PRO.017.010 תחת גערה במבין מהכות כסיל מאה׃

17:11b.PRO.017.011 אך מרי יבקש רע ומלאך אכזרי ישלח בו׃

17:12b.PRO.017.012 פגוש דב שכול באיש ואל כסיל באולתו׃

17:13b.PRO.017.013 משיב רעה תחת טובה לא תמיש רעה מביתו׃

17:14b.PRO.017.014 פוטר מים ראשית מדון ולפני התגלע הריב נטוש׃

17:15b.PRO.017.015 מצדיק רשע ומרשיע צדיק תועבת יהוה גם שניהם׃

17:16b.PRO.017.016 למה זה מחיר ביד כסיל לקנות חכמה ולב אין׃

17:17b.PRO.017.017 בכל עת אהב הרע ואח לצרה יולד׃

17:18b.PRO.017.018 אדם חסר לב תוקע כף ערב ערבה לפני רעהו׃

17:19b.PRO.017.019 אהב פשע אהב מצה מגביה פתחו מבקש שבר׃

17:20b.PRO.017.020 עקש לב לא ימצא טוב ונהפך בלשונו יפול ברעה׃

17:21b.PRO.017.021 ילד כסיל לתוגה לו ולא ישמח אבי נבל׃

17:22b.PRO.017.022 לב שמח ייטב גהה ורוח נכאה תיבש גרם׃

17:23b.PRO.017.023 שחד מחיק רשע יקח להטות ארחות משפט׃

17:24b.PRO.017.024 את פני מבין חכמה ועיני כסיל בקצה ארץ׃

17:25b.PRO.017.025 כעס לאביו בן כסיל וממר ליולדתו׃

17:26b.PRO.017.026 גם ענוש לצדיק לא טוב להכות נדיבים על ישר׃

17:27b.PRO.017.027 חושך אמריו יודע דעת וקר רוח איש תבונה׃

17:28b.PRO.017.028 גם אויל מחריש חכם יחשב אטם שפתיו נבון׃

18

18:1b.PRO.018.001 לתאוה יבקש נפרד בכל תושיה יתגלע׃

18:2b.PRO.018.002 לא יחפץ כסיל בתבונה כי אם בהתגלות לבו׃

18:3b.PRO.018.003 בבוא רשע בא גם בוז ועם קלון חרפה׃

18:4b.PRO.018.004 מים עמקים דברי פי איש נחל נבע מקור חכמה׃

18:5b.PRO.018.005 שאת פני רשע לא טוב להטות צדיק במשפט׃

18:6b.PRO.018.006 שפתי כסיל יבאו בריב ופיו למהלמות יקרא׃

18:7b.PRO.018.007 פי כסיל מחתה לו ושפתיו מוקש נפשו׃

18:8b.PRO.018.008 דברי נרגן כמתלהמים והם ירדו חדרי בטן׃

18:9b.PRO.018.009 גם מתרפה במלאכתו אח הוא לבעל משחית׃

18:10b.PRO.018.010 מגדל עז שם יהוה בו ירוץ צדיק ונשגב׃

18:11b.PRO.018.011 הון עשיר קרית עזו וכחומה נשגבה במשכיתו׃

18:12b.PRO.018.012 לפני שבר יגבה לב איש ולפני כבוד ענוה׃

18:13b.PRO.018.013 משיב דבר בטרם ישמע אולת היא לו וכלמה׃

18:14b.PRO.018.014 רוח איש יכלכל מחלהו ורוח נכאה מי ישאנה׃

18:15b.PRO.018.015 לב נבון יקנה דעת ואזן חכמים תבקש דעת׃

18:16b.PRO.018.016 מתן אדם ירחיב לו ולפני גדלים ינחנו׃

18:17b.PRO.018.017 צדיק הראשון בריבו יבא רעהו וחקרו׃

18:18b.PRO.018.018 מדינים ישבית הגורל ובין עצומים יפריד׃

18:19b.PRO.018.019 אח נפשע מקרית עז ומדונים כבריח ארמון׃

18:20b.PRO.018.020 מפרי פי איש תשבע בטנו תבואת שפתיו ישבע׃

18:21b.PRO.018.021 מות וחיים ביד לשון ואהביה יאכל פריה׃

18:22b.PRO.018.022 מצא אשה מצא טוב ויפק רצון מיהוה׃

18:23b.PRO.018.023 תחנונים ידבר רש ועשיר יענה עזות׃

18:24b.PRO.018.024 איש רעים להתרעע ויש אהב דבק מאח׃

19

19:1b.PRO.019.001 טוב רש הולך בתמו מעקש שפתיו והוא כסיל׃

19:2b.PRO.019.002 גם בלא דעת נפש לא טוב ואץ ברגלים חוטא׃

19:3b.PRO.019.003 אולת אדם תסלף דרכו ועל יהוה יזעף לבו׃

19:4b.PRO.019.004 הון יסיף רעים רבים ודל מרעהו יפרד׃

19:5b.PRO.019.005 עד שקרים לא ינקה ויפיח כזבים לא ימלט׃

19:6b.PRO.019.006 רבים יחלו פני נדיב וכל הרע לאיש מתן׃

19:7b.PRO.019.007 כל אחי רש שנאהו אף כי מרעהו רחקו ממנו מרדף אמרים לא המה׃

19:8b.PRO.019.008 קנה לב אהב נפשו שמר תבונה למצא טוב׃

19:9b.PRO.019.009 עד שקרים לא ינקה ויפיח כזבים יאבד׃

19:10b.PRO.019.010 לא נאוה לכסיל תענוג אף כי לעבד משל בשרים׃

19:11b.PRO.019.011 שכל אדם האריך אפו ותפארתו עבר על פשע׃

19:12b.PRO.019.012 נהם ככפיר זעף מלך וכטל על עשב רצונו׃

19:13b.PRO.019.013 הות לאביו בן כסיל ודלף טרד מדיני אשה׃

19:14b.PRO.019.014 בית והון נחלת אבות ומיהוה אשה משכלת׃

19:15b.PRO.019.015 עצלה תפיל תרדמה ונפש רמיה תרעב׃

19:16b.PRO.019.016 שמר מצוה שמר נפשו בוזה דרכיו יומת׃

19:17b.PRO.019.017 מלוה יהוה חונן דל וגמלו ישלם לו׃

19:18b.PRO.019.018 יסר בנך כי יש תקוה ואל המיתו אל תשא נפשך׃

19:19b.PRO.019.019 גרל חמה נשא ענש כי אם תציל ועוד תוסף׃

19:20b.PRO.019.020 שמע עצה וקבל מוסר למען תחכם באחריתך׃

19:21b.PRO.019.021 רבות מחשבות בלב איש ועצת יהוה היא תקום׃

19:22b.PRO.019.022 תאות אדם חסדו וטוב רש מאיש כזב׃

19:23b.PRO.019.023 יראת יהוה לחיים ושבע ילין בל יפקד רע׃

19:24b.PRO.019.024 טמן עצל ידו בצלחת גם אל פיהו לא ישיבנה׃

19:25b.PRO.019.025 לץ תכה ופתי יערם והוכיח לנבון יבין דעת׃

19:26b.PRO.019.026 משדד אב יבריח אם בן מביש ומחפיר׃

19:27b.PRO.019.027 חדל בני לשמע מוסר לשגות מאמרי דעת׃

19:28b.PRO.019.028 עד בליעל יליץ משפט ופי רשעים יבלע און׃

19:29b.PRO.019.029 נכונו ללצים שפטים ומהלמות לגו כסילים׃

20

20:1b.PRO.020.001 לץ היין המה שכר וכל שגה בו לא יחכם׃

20:2b.PRO.020.002 נהם ככפיר אימת מלך מתעברו חוטא נפשו׃

20:3b.PRO.020.003 כבוד לאיש שבת מריב וכל אויל יתגלע׃

20:4b.PRO.020.004 מחרף עצל לא יחרש ישאל בקציר ואין׃

20:5b.PRO.020.005 מים עמקים עצה בלב איש ואיש תבונה ידלנה׃

20:6b.PRO.020.006 רב אדם יקרא איש חסדו ואיש אמונים מי ימצא׃

20:7b.PRO.020.007 מתהלך בתמו צדיק אשרי בניו אחריו׃

20:8b.PRO.020.008 מלך יושב על כסא דין מזרה בעיניו כל רע׃

20:9b.PRO.020.009 מי יאמר זכיתי לבי טהרתי מחטאתי׃

20:10b.PRO.020.010 אבן ואבן איפה ואיפה תועבת יהוה גם שניהם׃

20:11b.PRO.020.011 גם במעלליו יתנכר נער אם זך ואם ישר פעלו׃

20:12b.PRO.020.012 אזן שמעת ועין ראה יהוה עשה גם שניהם׃

20:13b.PRO.020.013 אל תאהב שנה פן תורש פקח עיניך שבע לחם׃

20:14b.PRO.020.014 רע רע יאמר הקונה ואזל לו אז יתהלל׃

20:15b.PRO.020.015 יש זהב ורב פנינים וכלי יקר שפתי דעת׃

20:16b.PRO.020.016 לקח בגדו כי ערב זר ובעד נכרים חבלהו׃

20:17b.PRO.020.017 ערב לאיש לחם שקר ואחר ימלא פיהו חצץ׃

20:18b.PRO.020.018 מחשבות בעצה תכון ובתחבלות עשה מלחמה׃

20:19b.PRO.020.019 גולה סוד הולך רכיל ולפתה שפתיו לא תתערב׃

20:20b.PRO.020.020 מקלל אביו ואמו ידעך נרו באישון חשך׃

20:21b.PRO.020.021 נחלה מבחלת בראשנה ואחריתה לא תברך׃

20:22b.PRO.020.022 אל תאמר אשלמה רע קוה ליהוה וישע לך׃

20:23b.PRO.020.023 תועבת יהוה אבן ואבן ומאזני מרמה לא טוב׃

20:24b.PRO.020.024 מיהוה מצעדי גבר ואדם מה יבין דרכו׃

20:25b.PRO.020.025 מוקש אדם ילע קדש ואחר נדרים לבקר׃

20:26b.PRO.020.026 מזרה רשעים מלך חכם וישב עליהם אופן׃

20:27b.PRO.020.027 נר יהוה נשמת אדם חפש כל חדרי בטן׃

20:28b.PRO.020.028 חסד ואמת יצרו מלך וסעד בחסד כסאו׃

20:29b.PRO.020.029 תפארת בחורים כחם והדר זקנים שיבה׃

20:30b.PRO.020.030 חברות פצע תמריק ברע ומכות חדרי בטן׃

21

21:1b.PRO.021.001 פלגי מים לב מלך ביד יהוה על כל אשר יחפץ יטנו׃

21:2b.PRO.021.002 כל דרך איש ישר בעיניו ותכן לבות יהוה׃

21:3b.PRO.021.003 עשה צדקה ומשפט נבחר ליהוה מזבח׃

21:4b.PRO.021.004 רום עינים ורחב לב נר רשעים חטאת׃

21:5b.PRO.021.005 מחשבות חרוץ אך למותר וכל אץ אך למחסור׃

21:6b.PRO.021.006 פעל אוצרות בלשון שקר הבל נדף מבקשי מות׃

21:7b.PRO.021.007 שד רשעים יגורם כי מאנו לעשות משפט׃

21:8b.PRO.021.008 הפכפך דרך איש וזר וזך ישר פעלו׃

21:9b.PRO.021.009 טוב לשבת על פנת גג מאשת מדונים ובית חבר׃

21:10b.PRO.021.010 נפש רשע אותה רע לא יחן בעיניו רעהו׃

21:11b.PRO.021.011 בענש לץ יחכם פתי ובהשכיל לחכם יקח דעת׃

21:12b.PRO.021.012 משכיל צדיק לבית רשע מסלף רשעים לרע׃

21:13b.PRO.021.013 אטם אזנו מזעקת דל גם הוא יקרא ולא יענה׃

21:14b.PRO.021.014 מתן בסתר יכפה אף ושחד בחק חמה עזה׃

21:15b.PRO.021.015 שמחה לצדיק עשות משפט ומחתה לפעלי און׃

21:16b.PRO.021.016 אדם תועה מדרך השכל בקהל רפאים ינוח׃

21:17b.PRO.021.017 איש מחסור אהב שמחה אהב יין ושמן לא יעשיר׃

21:18b.PRO.021.018 כפר לצדיק רשע ותחת ישרים בוגד׃

21:19b.PRO.021.019 טוב שבת בארץ מדבר מאשת מדונים וכעס׃

21:20b.PRO.021.020 אוצר נחמד ושמן בנוה חכם וכסיל אדם יבלענו׃

21:21b.PRO.021.021 רדף צדקה וחסד ימצא חיים צדקה וכבוד׃

21:22b.PRO.021.022 עיר גברים עלה חכם וירד עז מבטחה׃

21:23b.PRO.021.023 שמר פיו ולשונו שמר מצרות נפשו׃

21:24b.PRO.021.024 זד יהיר לץ שמו עושה בעברת זדון׃

21:25b.PRO.021.025 תאות עצל תמיתנו כי מאנו ידיו לעשות׃

21:26b.PRO.021.026 כל היום התאוה תאוה וצדיק יתן ולא יחשך׃

21:27b.PRO.021.027 זבח רשעים תועבה אף כי בזמה יביאנו׃

21:28b.PRO.021.028 עד כזבים יאבד ואיש שומע לנצח ידבר׃

21:29b.PRO.021.029 העז איש רשע בפניו וישר הוא יכין דרכיו׃

21:30b.PRO.021.030 אין חכמה ואין תבונה ואין עצה לנגד יהוה׃

21:31b.PRO.021.031 סוס מוכן ליום מלחמה וליהוה התשועה׃

22

22:1b.PRO.022.001 נבחר שם מעשר רב מכסף ומזהב חן טוב׃

22:2b.PRO.022.002 עשיר ורש נפגשו עשה כלם יהוה׃

22:3b.PRO.022.003 ערום ראה רעה ויסתר ופתיים עברו ונענשו׃

22:4b.PRO.022.004 עקב ענוה יראת יהוה עשר וכבוד וחיים׃

22:5b.PRO.022.005 צנים פחים בדרך עקש שומר נפשו ירחק מהם׃

22:6b.PRO.022.006 חנך לנער על פי דרכו גם כי יזקין לא יסור ממנה׃

22:7b.PRO.022.007 עשיר ברשים ימשול ועבד לוה לאיש מלוה׃

22:8b.PRO.022.008 זורע עולה יקצור און ושבט עברתו יכלה׃

22:9b.PRO.022.009 טוב עין הוא יברך כי נתן מלחמו לדל׃

22:10b.PRO.022.010 גרש לץ ויצא מדון וישבת דין וקלון׃

22:11b.PRO.022.011 אהב טהור לב חן שפתיו רעהו מלך׃

22:12b.PRO.022.012 עיני יהוה נצרו דעת ויסלף דברי בגד׃

22:13b.PRO.022.013 אמר עצל ארי בחוץ בתוך רחבות ארצח׃

22:14b.PRO.022.014 שוחה עמקה פי זרות זעום יהוה יפול שם׃

22:15b.PRO.022.015 אולת קשורה בלב נער שבט מוסר ירחיקנה ממנו׃

22:16b.PRO.022.016 עשק דל להרבות לו נתן לעשיר אך למחסור׃

22:17b.PRO.022.017 הט אזנך ושמע דברי חכמים ולבך תשית לדעתי׃

22:18b.PRO.022.018 כי נעים כי תשמרם בבטנך יכנו יחדו על שפתיך׃

22:19b.PRO.022.019 להיות ביהוה מבטחך הודעתיך היום אף אתה׃

22:20b.PRO.022.020 הלא כתבתי לך שלשום במועצות ודעת׃

22:21b.PRO.022.021 להודיעך קשט אמרי אמת להשיב אמרים אמת לשלחיך׃

22:22b.PRO.022.022 אל תגזל דל כי דל הוא ואל תדכא עני בשער׃

22:23b.PRO.022.023 כי יהוה יריב ריבם וקבע את קבעיהם נפש׃

22:24b.PRO.022.024 אל תתרע את בעל אף ואת איש חמות לא תבוא׃

22:25b.PRO.022.025 פן תאלף ארחתו ולקחת מוקש לנפשך׃

22:26b.PRO.022.026 אל תהי בתקעי כף בערבים משאות׃

22:27b.PRO.022.027 אם אין לך לשלם למה יקח משכבך מתחתיך׃

22:28b.PRO.022.028 אל תסג גבול עולם אשר עשו אבותיך׃

22:29b.PRO.022.029 חזית איש מהיר במלאכתו לפני מלכים יתיצב בל יתיצב לפני חשכים׃

23

23:1b.PRO.023.001 כי תשב ללחום את מושל בין תבין את אשר לפניך׃

23:2b.PRO.023.002 ושמת שכין בלעך אם בעל נפש אתה׃

23:3b.PRO.023.003 אל תתאו למטעמותיו והוא לחם כזבים׃

23:4b.PRO.023.004 אל תיגע להעשיר מבינתך חדל׃

23:5b.PRO.023.005 התעוף עיניך בו ואיננו כי עשה יעשה לו כנפים כנשר ועיף השמים׃

23:6b.PRO.023.006 אל תלחם את לחם רע עין ואל תתאו למטעמתיו׃

23:7b.PRO.023.007 כי כמו שער בנפשו כן הוא אכל ושתה יאמר לך ולבו בל עמך׃

23:8b.PRO.023.008 פתך אכלת תקיאנה ושחת דבריך הנעימים׃

23:9b.PRO.023.009 באזני כסיל אל תדבר כי יבוז לשכל מליך׃

23:10b.PRO.023.010 אל תסג גבול עולם ובשדי יתומים אל תבא׃

23:11b.PRO.023.011 כי גאלם חזק הוא יריב את ריבם אתך׃

23:12b.PRO.023.012 הביאה למוסר לבך ואזנך לאמרי דעת׃

23:13b.PRO.023.013 אל תמנע מנער מוסר כי תכנו בשבט לא ימות׃

23:14b.PRO.023.014 אתה בשבט תכנו ונפשו משאול תציל׃

23:15b.PRO.023.015 בני אם חכם לבך ישמח לבי גם אני׃

23:16b.PRO.023.016 ותעלזנה כליותי בדבר שפתיך מישרים׃

23:17b.PRO.023.017 אל יקנא לבך בחטאים כי אם ביראת יהוה כל היום׃

23:18b.PRO.023.018 כי אם יש אחרית ותקותך לא תכרת׃

23:19b.PRO.023.019 שמע אתה בני וחכם ואשר בדרך לבך׃

23:20b.PRO.023.020 אל תהי בסבאי יין בזללי בשר למו׃

23:21b.PRO.023.021 כי סבא וזולל יורש וקרעים תלביש נומה׃

23:22b.PRO.023.022 שמע לאביך זה ילדך ואל תבוז כי זקנה אמך׃

23:23b.PRO.023.023 אמת קנה ואל תמכר חכמה ומוסר ובינה׃

23:24b.PRO.023.024 גול יגול אבי צדיק יולד חכם וישמח בו׃

23:25b.PRO.023.025 ישמח אביך ואמך ותגל יולדתך׃

23:26b.PRO.023.026 תנה בני לבך לי ועיניך דרכי תרצנה׃

23:27b.PRO.023.027 כי שוחה עמקה זונה ובאר צרה נכריה׃

23:28b.PRO.023.028 אף היא כחתף תארב ובוגדים באדם תוסף׃

23:29b.PRO.023.029 למי אוי למי אבוי למי מדונים למי שיח למי פצעים חנם למי חכללות עינים׃

23:30b.PRO.023.030 למאחרים על היין לבאים לחקר ממסך׃

23:31b.PRO.023.031 אל תרא יין כי יתאדם כי יתן בכיס עינו יתהלך במישרים׃

23:32b.PRO.023.032 אחריתו כנחש ישך וכצפעני יפרש׃

23:33b.PRO.023.033 עיניך יראו זרות ולבך ידבר תהפכות׃

23:34b.PRO.023.034 והיית כשכב בלב ים וכשכב בראש חבל׃

23:35b.PRO.023.035 הכוני בל חליתי הלמוני בל ידעתי מתי אקיץ אוסיף אבקשנו עוד׃

24

24:1b.PRO.024.001 אל תקנא באנשי רעה ואל תתאו להיות אתם׃

24:2b.PRO.024.002 כי שד יהגה לבם ועמל שפתיהם תדברנה׃

24:3b.PRO.024.003 בחכמה יבנה בית ובתבונה יתכונן׃

24:4b.PRO.024.004 ובדעת חדרים ימלאו כל הון יקר ונעים׃

24:5b.PRO.024.005 גבר חכם בעוז ואיש דעת מאמץ כח׃

24:6b.PRO.024.006 כי בתחבלות תעשה לך מלחמה ותשועה ברב יועץ׃

24:7b.PRO.024.007 ראמות לאויל חכמות בשער לא יפתח פיהו׃

24:8b.PRO.024.008 מחשב להרע לו בעל מזמות יקראו׃

24:9b.PRO.024.009 זמת אולת חטאת ותועבת לאדם לץ׃

24:10b.PRO.024.010 התרפית ביום צרה צר כחכה׃

24:11b.PRO.024.011 הצל לקחים למות ומטים להרג אם תחשוך׃

24:12b.PRO.024.012 כי תאמר הן לא ידענו זה הלא תכן לבות הוא יבין ונצר נפשך הוא ידע והשיב לאדם כפעלו׃

24:13b.PRO.024.013 אכל בני דבש כי טוב ונפת מתוק על חכך׃

24:14b.PRO.024.014 כן דעה חכמה לנפשך אם מצאת ויש אחרית ותקותך לא תכרת׃

24:15b.PRO.024.015 אל תארב רשע לנוה צדיק אל תשדד רבצו׃

24:16b.PRO.024.016 כי שבע יפול צדיק וקם ורשעים יכשלו ברעה׃

24:17b.PRO.024.017 בנפל אויביך אל תשמח ובכשלו אל יגל לבך׃

24:18b.PRO.024.018 פן יראה יהוה ורע בעיניו והשיב מעליו אפו׃

24:19b.PRO.024.019 אל תתחר במרעים אל תקנא ברשעים׃

24:20b.PRO.024.020 כי לא תהיה אחרית לרע נר רשעים ידעך׃

24:21b.PRO.024.021 ירא את יהוה בני ומלך עם שונים אל תתערב׃

24:22b.PRO.024.022 כי פתאם יקום אידם ופיד שניהם מי יודע׃

24:23b.PRO.024.023 גם אלה לחכמים הכר פנים במשפט בל טוב׃

24:24b.PRO.024.024 אמר לרשע צדיק אתה יקבהו עמים יזעמוהו לאמים׃

24:25b.PRO.024.025 ולמוכיחים ינעם ועליהם תבוא ברכת טוב׃

24:26b.PRO.024.026 שפתים ישק משיב דברים נכחים׃

24:27b.PRO.024.027 הכן בחוץ מלאכתך ועתדה בשדה לך אחר ובנית ביתך׃

24:28b.PRO.024.028 אל תהי עד חנם ברעך והפתית בשפתיך׃

24:29b.PRO.024.029 אל תאמר כאשר עשה לי כן אעשה לו אשיב לאיש כפעלו׃

24:30b.PRO.024.030 על שדה איש עצל עברתי ועל כרם אדם חסר לב׃

24:31b.PRO.024.031 והנה עלה כלו קמשנים כסו פניו חרלים וגדר אבניו נהרסה׃

24:32b.PRO.024.032 ואחזה אנכי אשית לבי ראיתי לקחתי מוסר׃

24:33b.PRO.024.033 מעט שנות מעט תנומות מעט חבק ידים לשכב׃

24:34b.PRO.024.034 ובא מתהלך רישך ומחסריך כאיש מגן׃

25

25:1b.PRO.025.001 גם אלה משלי שלמה אשר העתיקו אנשי חזקיה מלך יהודה׃

25:2b.PRO.025.002 כבד אלהים הסתר דבר וכבד מלכים חקר דבר׃

25:3b.PRO.025.003 שמים לרום וארץ לעמק ולב מלכים אין חקר׃

25:4b.PRO.025.004 הגו סיגים מכסף ויצא לצרף כלי׃

25:5b.PRO.025.005 הגו רשע לפני מלך ויכון בצדק כסאו׃

25:6b.PRO.025.006 אל תתהדר לפני מלך ובמקום גדלים אל תעמד׃

25:7b.PRO.025.007 כי טוב אמר לך עלה הנה מהשפילך לפני נדיב אשר ראו עיניך׃

25:8b.PRO.025.008 אל תצא לרב מהר פן מה תעשה באחריתה בהכלים אתך רעך׃

25:9b.PRO.025.009 ריבך ריב את רעך וסוד אחר אל תגל׃

25:10b.PRO.025.010 פן יחסדך שמע ודבתך לא תשוב׃

25:11b.PRO.025.011 תפוחי זהב במשכיות כסף דבר דבר על אפניו׃

25:12b.PRO.025.012 נזם זהב וחלי כתם מוכיח חכם על אזן שמעת׃

25:13b.PRO.025.013 כצנת שלג ביום קציר ציר נאמן לשלחיו ונפש אדניו ישיב׃

25:14b.PRO.025.014 נשיאים ורוח וגשם אין איש מתהלל במתת שקר׃

25:15b.PRO.025.015 בארך אפים יפתה קצין ולשון רכה תשבר גרם׃

25:16b.PRO.025.016 דבש מצאת אכל דיך פן תשבענו והקאתו׃

25:17b.PRO.025.017 הקר רגלך מבית רעך פן ישבעך ושנאך׃

25:18b.PRO.025.018 מפיץ וחרב וחץ שנון איש ענה ברעהו עד שקר׃

25:19b.PRO.025.019 שן רעה ורגל מועדת מבטח בוגד ביום צרה׃

25:20b.PRO.025.020 מעדה בגד ביום קרה חמץ על נתר ושר בשרים על לב רע׃

25:21b.PRO.025.021 אם רעב שנאך האכלהו לחם ואם צמא השקהו מים׃

25:22b.PRO.025.022 כי גחלים אתה חתה על ראשו ויהוה ישלם לך׃

25:23b.PRO.025.023 רוח צפון תחולל גשם ופנים נזעמים לשון סתר׃

25:24b.PRO.025.024 טוב שבת על פנת גג מאשת מדונים ובית חבר׃

25:25b.PRO.025.025 מים קרים על נפש עיפה ושמועה טובה מארץ מרחק׃

25:26b.PRO.025.026 מעין נרפש ומקור משחת צדיק מט לפני רשע׃

25:27b.PRO.025.027 אכל דבש הרבות לא טוב וחקר כבדם כבוד׃

25:28b.PRO.025.028 עיר פרוצה אין חומה איש אשר אין מעצר לרוחו׃

26

26:1b.PRO.026.001 כשלג בקיץ וכמטר בקציר כן לא נאוה לכסיל כבוד׃

26:2b.PRO.026.002 כצפור לנוד כדרור לעוף כן קללת חנם לא תבא׃

26:3b.PRO.026.003 שוט לסוס מתג לחמור ושבט לגו כסילים׃

26:4b.PRO.026.004 אל תען כסיל כאולתו פן תשוה לו גם אתה׃

26:5b.PRO.026.005 ענה כסיל כאולתו פן יהיה חכם בעיניו׃

26:6b.PRO.026.006 מקצה רגלים חמס שתה שלח דברים ביד כסיל׃

26:7b.PRO.026.007 דליו שקים מפסח ומשל בפי כסילים׃

26:8b.PRO.026.008 כצרור אבן במרגמה כן נותן לכסיל כבוד׃

26:9b.PRO.026.009 חוח עלה ביד שכור ומשל בפי כסילים׃

26:10b.PRO.026.010 רב מחולל כל ושכר כסיל ושכר עברים׃

26:11b.PRO.026.011 ככלב שב על קאו כסיל שונה באולתו׃

26:12b.PRO.026.012 ראית איש חכם בעיניו תקוה לכסיל ממנו׃

26:13b.PRO.026.013 אמר עצל שחל בדרך ארי בין הרחבות׃

26:14b.PRO.026.014 הדלת תסוב על צירה ועצל על מטתו׃

26:15b.PRO.026.015 טמן עצל ידו בצלחת נלאה להשיבה אל פיו׃

26:16b.PRO.026.016 חכם עצל בעיניו משבעה משיבי טעם׃

26:17b.PRO.026.017 מחזיק באזני כלב עבר מתעבר על ריב לא לו׃

26:18b.PRO.026.018 כמתלהלה הירה זקים חצים ומות׃

26:19b.PRO.026.019 כן איש רמה את רעהו ואמר הלא משחק אני׃

26:20b.PRO.026.020 באפס עצים תכבה אש ובאין נרגן ישתק מדון׃

26:21b.PRO.026.021 פחם לגחלים ועצים לאש ואיש מדונים לחרחר ריב׃

26:22b.PRO.026.022 דברי נרגן כמתלהמים והם ירדו חדרי בטן׃

26:23b.PRO.026.023 כסף סיגים מצפה על חרש שפתים דלקים ולב רע׃

26:24b.PRO.026.024 בשפתו ינכר שונא ובקרבו ישית מרמה׃

26:25b.PRO.026.025 כי יחנן קולו אל תאמן בו כי שבע תועבות בלבו׃

26:26b.PRO.026.026 תכסה שנאה במשאון תגלה רעתו בקהל׃

26:27b.PRO.026.027 כרה שחת בה יפל וגלל אבן אליו תשוב׃

26:28b.PRO.026.028 לשון שקר ישנא דכיו ופה חלק יעשה מדחה׃

27

27:1b.PRO.027.001 אל תתהלל ביום מחר כי לא תדע מה ילד יום׃

27:2b.PRO.027.002 יהללך זר ולא פיך נכרי ואל שפתיך׃

27:3b.PRO.027.003 כבד אבן ונטל החול וכעס אויל כבד משניהם׃

27:4b.PRO.027.004 אכזריות חמה ושטף אף ומי יעמד לפני קנאה׃

27:5b.PRO.027.005 טובה תוכחת מגלה מאהבה מסתרת׃

27:6b.PRO.027.006 נאמנים פצעי אוהב ונעתרות נשיקות שונא׃

27:7b.PRO.027.007 נפש שבעה תבוס נפת ונפש רעבה כל מר מתוק׃

27:8b.PRO.027.008 כצפור נודדת מן קנה כן איש נודד ממקומו׃

27:9b.PRO.027.009 שמן וקטרת ישמח לב ומתק רעהו מעצת נפש׃

27:10b.PRO.027.010 רעך ורעה אביך אל תעזב ובית אחיך אל תבוא ביום אידך טוב שכן קרוב מאח רחוק׃

27:11b.PRO.027.011 חכם בני ושמח לבי ואשיבה חרפי דבר׃

27:12b.PRO.027.012 ערום ראה רעה נסתר פתאים עברו נענשו׃

27:13b.PRO.027.013 קח בגדו כי ערב זר ובעד נכריה חבלהו׃

27:14b.PRO.027.014 מברך רעהו בקול גדול בבקר השכים קללה תחשב לו׃

27:15b.PRO.027.015 דלף טורד ביום סגריר ואשת מדונים נשתוה׃

27:16b.PRO.027.016 צפניה צפן רוח ושמן ימינו יקרא׃

27:17b.PRO.027.017 ברזל בברזל יחד ואיש יחד פני רעהו׃

27:18b.PRO.027.018 נצר תאנה יאכל פריה ושמר אדניו יכבד׃

27:19b.PRO.027.019 כמים הפנים לפנים כן לב האדם לאדם׃

27:20b.PRO.027.020 שאול ואבדה לא תשבענה ועיני האדם לא תשבענה׃

27:21b.PRO.027.021 מצרף לכסף וכור לזהב ואיש לפי מהללו׃

27:22b.PRO.027.022 אם תכתוש את האויל במכתש בתוך הריפות בעלי לא תסור מעליו אולתו׃

27:23b.PRO.027.023 ידע תדע פני צאנך שית לבך לעדרים׃

27:24b.PRO.027.024 כי לא לעולם חסן ואם נזר לדור דור׃

27:25b.PRO.027.025 גלה חציר ונראה דשא ונאספו עשבות הרים׃

27:26b.PRO.027.026 כבשים ללבושך ומחיר שדה עתודים׃

27:27b.PRO.027.027 ודי חלב עזים ללחמך ללחם ביתך וחיים לנערותיך׃

28

28:1b.PRO.028.001 נסו ואין רדף רשע וצדיקים ככפיר יבטח׃

28:2b.PRO.028.002 בפשע ארץ רבים שריה ובאדם מבין ידע כן יאריך׃

28:3b.PRO.028.003 גבר רש ועשק דלים מטר סחף ואין לחם׃

28:4b.PRO.028.004 עזבי תורה יהללו רשע ושמרי תורה יתגרו בם׃

28:5b.PRO.028.005 אנשי רע לא יבינו משפט ומבקשי יהוה יבינו כל׃

28:6b.PRO.028.006 טוב רש הולך בתמו מעקש דרכים והוא עשיר׃

28:7b.PRO.028.007 נוצר תורה בן מבין ורעה זוללים יכלים אביו׃

28:8b.PRO.028.008 מרבה הונו בנשך ובתרבית לחונן דלים יקבצנו׃

28:9b.PRO.028.009 מסיר אזנו משמע תורה גם תפלתו תועבה׃

28:10b.PRO.028.010 משגה ישרים בדרך רע בשחותו הוא יפול ותמימים ינחלו טוב׃

28:11b.PRO.028.011 חכם בעיניו איש עשיר ודל מבין יחקרנו׃

28:12b.PRO.028.012 בעלץ צדיקים רבה תפארת ובקום רשעים יחפש אדם׃

28:13b.PRO.028.013 מכסה פשעיו לא יצליח ומודה ועזב ירחם׃

28:14b.PRO.028.014 אשרי אדם מפחד תמיד ומקשה לבו יפול ברעה׃

28:15b.PRO.028.015 ארי נהם ודב שוקק משל רשע על עם דל׃

28:16b.PRO.028.016 נגיד חסר תבונות ורב מעשקות שנאי בצע יאריך ימים׃

28:17b.PRO.028.017 אדם עשק בדם נפש עד בור ינוס אל יתמכו בו׃

28:18b.PRO.028.018 הולך תמים יושע ונעקש דרכים יפול באחת׃

28:19b.PRO.028.019 עבד אדמתו ישבע לחם ומרדף רקים ישבע ריש׃

28:20b.PRO.028.020 איש אמונות רב ברכות ואץ להעשיר לא ינקה׃

28:21b.PRO.028.021 הכר פנים לא טוב ועל פת לחם יפשע גבר׃

28:22b.PRO.028.022 נבהל להון איש רע עין ולא ידע כי חסר יבאנו׃

28:23b.PRO.028.023 מוכיח אדם אחרי חן ימצא ממחליק לשון׃

28:24b.PRO.028.024 גוזל אביו ואמו ואמר אין פשע חבר הוא לאיש משחית׃

28:25b.PRO.028.025 רחב נפש יגרה מדון ובוטח על יהוה ידשן׃

28:26b.PRO.028.026 בוטח בלבו הוא כסיל והולך בחכמה הוא ימלט׃

28:27b.PRO.028.027 נותן לרש אין מחסור ומעלים עיניו רב מארות׃

28:28b.PRO.028.028 בקום רשעים יסתר אדם ובאבדם ירבו צדיקים׃

29

29:1b.PRO.029.001 איש תוכחות מקשה ערף פתע ישבר ואין מרפא׃

29:2b.PRO.029.002 ברבות צדיקים ישמח העם ובמשל רשע יאנח עם׃

29:3b.PRO.029.003 איש אהב חכמה ישמח אביו ורעה זונות יאבד הון׃

29:4b.PRO.029.004 מלך במשפט יעמיד ארץ ואיש תרומות יהרסנה׃

29:5b.PRO.029.005 גבר מחליק על רעהו רשת פורש על פעמיו׃

29:6b.PRO.029.006 בפשע איש רע מוקש וצדיק ירון ושמח׃

29:7b.PRO.029.007 ידע צדיק דין דלים רשע לא יבין דעת׃

29:8b.PRO.029.008 אנשי לצון יפיחו קריה וחכמים ישיבו אף׃

29:9b.PRO.029.009 איש חכם נשפט את איש אויל ורגז ושחק ואין נחת׃

29:10b.PRO.029.010 אנשי דמים ישנאו תם וישרים יבקשו נפשו׃

29:11b.PRO.029.011 כל רוחו יוציא כסיל וחכם באחור ישבחנה׃

29:12b.PRO.029.012 משל מקשיב על דבר שקר כל משרתיו רשעים׃

29:13b.PRO.029.013 רש ואיש תככים נפגשו מאיר עיני שניהם יהוה׃

29:14b.PRO.029.014 מלך שופט באמת דלים כסאו לעד יכון׃

29:15b.PRO.029.015 שבט ותוכחת יתן חכמה ונער משלח מביש אמו׃

29:16b.PRO.029.016 ברבות רשעים ירבה פשע וצדיקים במפלתם יראו׃

29:17b.PRO.029.017 יסר בנך ויניחך ויתן מעדנים לנפשך׃

29:18b.PRO.029.018 באין חזון יפרע עם ושמר תורה אשרהו׃

29:19b.PRO.029.019 בדברים לא יוסר עבד כי יבין ואין מענה׃

29:20b.PRO.029.020 חזית איש אץ בדבריו תקוה לכסיל ממנו׃

29:21b.PRO.029.021 מפנק מנער עבדו ואחריתו יהיה מנון׃

29:22b.PRO.029.022 איש אף יגרה מדון ובעל חמה רב פשע׃

29:23b.PRO.029.023 גאות אדם תשפילנו ושפל רוח יתמך כבוד׃

29:24b.PRO.029.024 חולק עם גנב שונא נפשו אלה ישמע ולא יגיד׃

29:25b.PRO.029.025 חרדת אדם יתן מוקש ובוטח ביהוה ישגב׃

29:26b.PRO.029.026 רבים מבקשים פני מושל ומיהוה משפט איש׃

29:27b.PRO.029.027 תועבת צדיקים איש עול ותועבת רשע ישר דרך׃

30

30:1b.PRO.030.001 דברי אגור בן יקה המשא נאם הגבר לאיתיאל לאיתיאל ואכל׃

30:2b.PRO.030.002 כי בער אנכי מאיש ולא בינת אדם לי׃

30:3b.PRO.030.003 ולא למדתי חכמה ודעת קדשים אדע׃

30:4b.PRO.030.004 מי עלה שמים וירד מי אסף רוח בחפניו מי צרר מים בשמלה מי הקים כל אפסי ארץ מה שמו ומה שם בנו כי תדע׃

30:5b.PRO.030.005 כל אמרת אלוה צרופה מגן הוא לחסים בו׃

30:6b.PRO.030.006 אל תוסף על דבריו פן יוכיח בך ונכזבת׃

30:7b.PRO.030.007 שתים שאלתי מאתך אל תמנע ממני בטרם אמות׃

30:8b.PRO.030.008 שוא ודבר כזב הרחק ממני ראש ועשר אל תתן לי הטריפני לחם חקי׃

30:9b.PRO.030.009 פן אשבע וכחשתי ואמרתי מי יהוה ופן אורש וגנבתי ותפשתי שם אלהי׃

30:10b.PRO.030.010 אל תלשן עבד אל אדנו פן יקללך ואשמת׃

30:11b.PRO.030.011 דור אביו יקלל ואת אמו לא יברך׃

30:12b.PRO.030.012 דור טהור בעיניו ומצאתו לא רחץ׃

30:13b.PRO.030.013 דור מה רמו עיניו ועפעפיו ינשאו׃

30:14b.PRO.030.014 דור חרבות שניו ומאכלות מתלעתיו לאכל עניים מארץ ואביונים מאדם׃

30:15b.PRO.030.015 לעלוקה שתי בנות הב הב שלוש הנה לא תשבענה ארבע לא אמרו הון׃

30:16b.PRO.030.016 שאול ועצר רחם ארץ לא שבעה מים ואש לא אמרה הון׃

30:17b.PRO.030.017 עין תלעג לאב ותבוז ליקהת אם יקרוה ערבי נחל ויאכלוה בני נשר׃

30:18b.PRO.030.018 שלשה המה נפלאו ממני וארבע לא ידעתים׃

30:19b.PRO.030.019 דרך הנשר בשמים דרך נחש עלי צור דרך אניה בלב ים ודרך גבר בעלמה׃

30:20b.PRO.030.020 כן דרך אשה מנאפת אכלה ומחתה פיה ואמרה לא פעלתי און׃

30:21b.PRO.030.021 תחת שלוש רגזה ארץ ותחת ארבע לא תוכל שאת׃

30:22b.PRO.030.022 תחת עבד כי ימלוך ונבל כי ישבע לחם׃

30:23b.PRO.030.023 תחת שנואה כי תבעל ושפחה כי תירש גברתה׃

30:24b.PRO.030.024 ארבעה הם קטני ארץ והמה חכמים מחכמים׃

30:25b.PRO.030.025 הנמלים עם לא עז ויכינו בקיץ לחמם׃

30:26b.PRO.030.026 שפנים עם לא עצום וישימו בסלע ביתם׃

30:27b.PRO.030.027 מלך אין לארבה ויצא חצץ כלו׃

30:28b.PRO.030.028 שממית בידים תתפש והיא בהיכלי מלך׃

30:29b.PRO.030.029 שלשה המה מיטיבי צעד וארבעה מיטבי לכת׃

30:30b.PRO.030.030 ליש גבור בבהמה ולא ישוב מפני כל׃

30:31b.PRO.030.031 זרזיר מתנים או תיש ומלך אלקום עמו׃

30:32b.PRO.030.032 אם נבלת בהתנשא ואם זמות יד לפה׃

30:33b.PRO.030.033 כי מיץ חלב יוציא חמאה ומיץ אף יוציא דם ומיץ אפים יוציא ריב׃

31

31:1b.PRO.031.001 דברי למואל מלך משא אשר יסרתו אמו׃

31:2b.PRO.031.002 מה ברי ומה בר בטני ומה בר נדרי׃

31:3b.PRO.031.003 אל תתן לנשים חילך ודרכיך למחות מלכין׃

31:4b.PRO.031.004 אל למלכים למואל אל למלכים שתו יין ולרוזנים או שכר׃

31:5b.PRO.031.005 פן ישתה וישכח מחקק וישנה דין כל בני עני׃

31:6b.PRO.031.006 תנו שכר לאובד ויין למרי נפש׃

31:7b.PRO.031.007 ישתה וישכח רישו ועמלו לא יזכר עוד׃

31:8b.PRO.031.008 פתח פיך לאלם אל דין כל בני חלוף׃

31:9b.PRO.031.009 פתח פיך שפט צדק ודין עני ואביון׃

31:10b.PRO.031.010 אשת חיל מי ימצא ורחק מפנינים מכרה׃

31:11b.PRO.031.011 בטח בה לב בעלה ושלל לא יחסר׃

31:12b.PRO.031.012 גמלתהו טוב ולא רע כל ימי חייה׃

31:13b.PRO.031.013 דרשה צמר ופשתים ותעש בחפץ כפיה׃

31:14b.PRO.031.014 היתה כאניות סוחר ממרחק תביא לחמה׃

31:15b.PRO.031.015 ותקם בעוד לילה ותתן טרף לביתה וחק לנערתיה׃

31:16b.PRO.031.016 זממה שדה ותקחהו מפרי כפיה נטע כרם׃

31:17b.PRO.031.017 חגרה בעוז מתניה ותאמץ זרעותיה׃

31:18b.PRO.031.018 טעמה כי טוב סחרה לא יכבה בליל נרה׃

31:19b.PRO.031.019 ידיה שלחה בכישור וכפיה תמכו פלך׃

31:20b.PRO.031.020 כפה פרשה לעני וידיה שלחה לאביון׃

31:21b.PRO.031.021 לא תירא לביתה משלג כי כל ביתה לבש שנים׃

31:22b.PRO.031.022 מרבדים עשתה לה שש וארגמן לבושה׃

31:23b.PRO.031.023 נודע בשערים בעלה בשבתו עם זקני ארץ׃

31:24b.PRO.031.024 סדין עשתה ותמכר וחגור נתנה לכנעני׃

31:25b.PRO.031.025 עז והדר לבושה ותשחק ליום אחרון׃

31:26b.PRO.031.026 פיה פתחה בחכמה ותורת חסד על לשונה׃

31:27b.PRO.031.027 צופיה הליכות ביתה ולחם עצלות לא תאכל׃

31:28b.PRO.031.028 קמו בניה ויאשרוה בעלה ויהללה׃

31:29b.PRO.031.029 רבות בנות עשו חיל ואת עלית על כלנה׃

31:30b.PRO.031.030 שקר החן והבל היפי אשה יראת יהוה היא תתהלל׃

31:31b.PRO.031.031 תנו לה מפרי ידיה ויהללוה בשערים מעשיה׃