Job (Hebrew)

1

1:1b.JOB.001.001 איש היה בארץ עוץ איוב שמו והיה האיש ההוא תם וישר וירא אלהים וסר מרע׃

1:2b.JOB.001.002 ויולדו לו שבעה בנים ושלוש בנות׃

1:3b.JOB.001.003 ויהי מקנהו שבעת אלפי צאן ושלשת אלפי גמלים וחמש מאות צמד בקר וחמש מאות אתונות ועבדה רבה מאד ויהי האיש ההוא גדול מכל בני קדם׃

1:4b.JOB.001.004 והלכו בניו ועשו משתה בית איש יומו ושלחו וקראו לשלשת אחיתיהם לאכל ולשתות עמהם׃

1:5b.JOB.001.005 ויהי כי הקיפו ימי המשתה וישלח איוב ויקדשם והשכים בבקר והעלה עלות מספר כלם כי אמר איוב אולי חטאו בני וברכו אלהים בלבבם ככה יעשה איוב כל הימים׃

1:6b.JOB.001.006 ויהי היום ויבאו בני האלהים להתיצב על יהוה ויבוא גם השטן בתוכם׃

1:7b.JOB.001.007 ויאמר יהוה אל השטן מאין תבא ויען השטן את יהוה ויאמר משוט בארץ ומהתהלך בה׃

1:8b.JOB.001.008 ויאמר יהוה אל השטן השמת לבך על עבדי איוב כי אין כמהו בארץ איש תם וישר ירא אלהים וסר מרע׃

1:9b.JOB.001.009 ויען השטן את יהוה ויאמר החנם ירא איוב אלהים׃

1:10b.JOB.001.010 הלא את שכת בעדו ובעד ביתו ובעד כל אשר לו מסביב מעשה ידיו ברכת ומקנהו פרץ בארץ׃

1:11b.JOB.001.011 ואולם שלח נא ידך וגע בכל אשר לו אם לא על פניך יברכך׃

1:12b.JOB.001.012 ויאמר יהוה אל השטן הנה כל אשר לו בידך רק אליו אל תשלח ידך ויצא השטן מעם פני יהוה׃

1:13b.JOB.001.013 ויהי היום ובניו ובנתיו אכלים ושתים יין בבית אחיהם הבכור׃

1:14b.JOB.001.014 ומלאך בא אל איוב ויאמר הבקר היו חרשות והאתנות רעות על ידיהם׃

1:15b.JOB.001.015 ותפל שבא ותקחם ואת הנערים הכו לפי חרב ואמלטה רק אני לבדי להגיד לך׃

1:16b.JOB.001.016 עוד זה מדבר וזה בא ויאמר אש אלהים נפלה מן השמים ותבער בצאן ובנערים ותאכלם ואמלטה רק אני לבדי להגיד לך׃

1:17b.JOB.001.017 עוד זה מדבר וזה בא ויאמר כשדים שמו שלשה ראשים ויפשטו על הגמלים ויקחום ואת הנערים הכו לפי חרב ואמלטה רק אני לבדי להגיד לך׃

1:18b.JOB.001.018 עד זה מדבר וזה בא ויאמר בניך ובנותיך אכלים ושתים יין בבית אחיהם הבכור׃

1:19b.JOB.001.019 והנה רוח גדולה באה מעבר המדבר ויגע בארבע פנות הבית ויפל על הנערים וימותו ואמלטה רק אני לבדי להגיד לך׃

1:20b.JOB.001.020 ויקם איוב ויקרע את מעלו ויגז את ראשו ויפל ארצה וישתחו׃

1:21b.JOB.001.021 ויאמר ערם יצתי מבטן אמי וערם אשוב שמה יהוה נתן ויהוה לקח יהי שם יהוה מברך׃

1:22b.JOB.001.022 בכל זאת לא חטא איוב ולא נתן תפלה לאלהים׃

2

2:1b.JOB.002.001 ויהי היום ויבאו בני האלהים להתיצב על יהוה ויבוא גם השטן בתכם להתיצב על יהוה׃

2:2b.JOB.002.002 ויאמר יהוה אל השטן אי מזה תבא ויען השטן את יהוה ויאמר משט בארץ ומהתהלך בה׃

2:3b.JOB.002.003 ויאמר יהוה אל השטן השמת לבך אל עבדי איוב כי אין כמהו בארץ איש תם וישר ירא אלהים וסר מרע ועדנו מחזיק בתמתו ותסיתני בו לבלעו חנם׃

2:4b.JOB.002.004 ויען השטן את יהוה ויאמר עור בעד עור וכל אשר לאיש יתן בעד נפשו׃

2:5b.JOB.002.005 אולם שלח נא ידך וגע אל עצמו ואל בשרו אם לא אל פניך יברכך׃

2:6b.JOB.002.006 ויאמר יהוה אל השטן הנו בידך אך את נפשו שמר׃

2:7b.JOB.002.007 ויצא השטן מאת פני יהוה ויך את איוב בשחין רע מכף רגלו עד קדקדו׃

2:8b.JOB.002.008 ויקח לו חרש להתגרד בו והוא ישב בתוך האפר׃

2:9b.JOB.002.009 ותאמר לו אשתו עדך מחזיק בתמתך ברך אלהים ומת׃

2:10b.JOB.002.010 ויאמר אליה כדבר אחת הנבלות תדברי גם את הטוב נקבל מאת האלהים ואת הרע לא נקבל בכל זאת לא חטא איוב בשפתיו׃

2:11b.JOB.002.011 וישמעו שלשת רעי איוב את כל הרעה הזאת הבאה עליו ויבאו איש ממקמו אליפז התימני ובלדד השוחי וצופר הנעמתי ויועדו יחדו לבוא לנוד לו ולנחמו׃

2:12b.JOB.002.012 וישאו את עיניהם מרחוק ולא הכירהו וישאו קולם ויבכו ויקרעו איש מעלו ויזרקו עפר על ראשיהם השמימה׃

2:13b.JOB.002.013 וישבו אתו לארץ שבעת ימים ושבעת לילות ואין דבר אליו דבר כי ראו כי גדל הכאב מאד׃

3

3:1b.JOB.003.001 אחרי כן פתח איוב את פיהו ויקלל את יומו׃

3:2b.JOB.003.002 ויען איוב ויאמר׃

3:3b.JOB.003.003 יאבד יום אולד בו והלילה אמר הרה גבר׃

3:4b.JOB.003.004 היום ההוא יהי חשך אל ידרשהו אלוה ממעל ואל תופע עליו נהרה׃

3:5b.JOB.003.005 יגאלהו חשך וצלמות תשכן עליו עננה יבעתהו כמרירי יום׃

3:6b.JOB.003.006 הלילה ההוא יקחהו אפל אל יחד בימי שנה במספר ירחים אל יבא׃

3:7b.JOB.003.007 הנה הלילה ההוא יהי גלמוד אל תבא רננה בו׃

3:8b.JOB.003.008 יקבהו אררי יום העתידים ערר לויתן׃

3:9b.JOB.003.009 יחשכו כוכבי נשפו יקו לאור ואין ואל יראה בעפעפי שחר׃

3:10b.JOB.003.010 כי לא סגר דלתי בטני ויסתר עמל מעיני׃

3:11b.JOB.003.011 למה לא מרחם אמות מבטן יצאתי ואגוע׃

3:12b.JOB.003.012 מדוע קדמוני ברכים ומה שדים כי אינק׃

3:13b.JOB.003.013 כי עתה שכבתי ואשקוט ישנתי אז ינוח לי׃

3:14b.JOB.003.014 עם מלכים ויעצי ארץ הבנים חרבות למו׃

3:15b.JOB.003.015 או עם שרים זהב להם הממלאים בתיהם כסף׃

3:16b.JOB.003.016 או כנפל טמון לא אהיה כעללים לא ראו אור׃

3:17b.JOB.003.017 שם רשעים חדלו רגז ושם ינוחו יגיעי כח׃

3:18b.JOB.003.018 יחד אסירים שאננו לא שמעו קול נגש׃

3:19b.JOB.003.019 קטן וגדול שם הוא ועבד חפשי מאדניו׃

3:20b.JOB.003.020 למה יתן לעמל אור וחיים למרי נפש׃

3:21b.JOB.003.021 המחכים למות ואיננו ויחפרהו ממטמונים׃

3:22b.JOB.003.022 השמחים אלי גיל ישישו כי ימצאו קבר׃

3:23b.JOB.003.023 לגבר אשר דרכו נסתרה ויסך אלוה בעדו׃

3:24b.JOB.003.024 כי לפני לחמי אנחתי תבא ויתכו כמים שאגתי׃

3:25b.JOB.003.025 כי פחד פחדתי ויאתיני ואשר יגרתי יבא לי׃

3:26b.JOB.003.026 לא שלותי ולא שקטתי ולא נחתי ויבא רגז׃

4

4:1b.JOB.004.001 ויען אליפז התימני ויאמר׃

4:2b.JOB.004.002 הנסה דבר אליך תלאה ועצר במלין מי יוכל׃

4:3b.JOB.004.003 הנה יסרת רבים וידים רפות תחזק׃

4:4b.JOB.004.004 כושל יקימון מליך וברכים כרעות תאמץ׃

4:5b.JOB.004.005 כי עתה תבוא אליך ותלא תגע עדיך ותבהל׃

4:6b.JOB.004.006 הלא יראתך כסלתך תקותך ותם דרכיך׃

4:7b.JOB.004.007 זכר נא מי הוא נקי אבד ואיפה ישרים נכחדו׃

4:8b.JOB.004.008 כאשר ראיתי חרשי און וזרעי עמל יקצרהו׃

4:9b.JOB.004.009 מנשמת אלוה יאבדו ומרוח אפו יכלו׃

4:10b.JOB.004.010 שאגת אריה וקול שחל ושני כפירים נתעו׃

4:11b.JOB.004.011 ליש אבד מבלי טרף ובני לביא יתפרדו׃

4:12b.JOB.004.012 ואלי דבר יגנב ותקח אזני שמץ מנהו׃

4:13b.JOB.004.013 בשעפים מחזינות לילה בנפל תרדמה על אנשים׃

4:14b.JOB.004.014 פחד קראני ורעדה ורב עצמותי הפחיד׃

4:15b.JOB.004.015 ורוח על פני יחלף תסמר שערת בשרי׃

4:16b.JOB.004.016 יעמד ולא אכיר מראהו תמונה לנגד עיני דממה וקול אשמע׃

4:17b.JOB.004.017 האנוש מאלוה יצדק אם מעשהו יטהר גבר׃

4:18b.JOB.004.018 הן בעבדיו לא יאמין ובמלאכיו ישים תהלה׃

4:19b.JOB.004.019 אף שכני בתי חמר אשר בעפר יסודם ידכאום לפני עש׃

4:20b.JOB.004.020 מבקר לערב יכתו מבלי משים לנצח יאבדו׃

4:21b.JOB.004.021 הלא נסע יתרם בם ימותו ולא בחכמה׃

5

5:1b.JOB.005.001 קרא נא היש עונך ואל מי מקדשים תפנה׃

5:2b.JOB.005.002 כי לאויל יהרג כעש ופתה תמית קנאה׃

5:3b.JOB.005.003 אני ראיתי אויל משריש ואקוב נוהו פתאם׃

5:4b.JOB.005.004 ירחקו בניו מישע וידכאו בשער ואין מציל׃

5:5b.JOB.005.005 אשר קצירו רעב יאכל ואל מצנים יקחהו ושאף צמים חילם׃

5:6b.JOB.005.006 כי לא יצא מעפר און ומאדמה לא יצמח עמל׃

5:7b.JOB.005.007 כי אדם לעמל יולד ובני רשף יגביהו עוף׃

5:8b.JOB.005.008 אולם אני אדרש אל אל ואל אלהים אשים דברתי׃

5:9b.JOB.005.009 עשה גדלות ואין חקר נפלאות עד אין מספר׃

5:10b.JOB.005.010 הנתן מטר על פני ארץ ושלח מים על פני חוצות׃

5:11b.JOB.005.011 לשום שפלים למרום וקדרים שגבו ישע׃

5:12b.JOB.005.012 מפר מחשבות ערומים ולא תעשינה ידיהם תושיה׃

5:13b.JOB.005.013 לכד חכמים בערמם ועצת נפתלים נמהרה׃

5:14b.JOB.005.014 יומם יפגשו חשך וכלילה ימששו בצהרים׃

5:15b.JOB.005.015 וישע מחרב מפיהם ומיד חזק אביון׃

5:16b.JOB.005.016 ותהי לדל תקוה ועלתה קפצה פיה׃

5:17b.JOB.005.017 הנה אשרי אנוש יוכחנו אלוה ומוסר שדי אל תמאס׃

5:18b.JOB.005.018 כי הוא יכאיב ויחבש ימחץ וידו תרפינה׃

5:19b.JOB.005.019 בשש צרות יצילך ובשבע לא יגע בך רע׃

5:20b.JOB.005.020 ברעב פדך ממות ובמלחמה מידי חרב׃

5:21b.JOB.005.021 בשוט לשון תחבא ולא תירא משד כי יבוא׃

5:22b.JOB.005.022 לשד ולכפן תשחק ומחית הארץ אל תירא׃

5:23b.JOB.005.023 כי עם אבני השדה בריתך וחית השדה השלמה לך׃

5:24b.JOB.005.024 וידעת כי שלום אהלך ופקדת נוך ולא תחטא׃

5:25b.JOB.005.025 וידעת כי רב זרעך וצאצאיך כעשב הארץ׃

5:26b.JOB.005.026 תבוא בכלח אלי קבר כעלות גדיש בעתו׃

5:27b.JOB.005.027 הנה זאת חקרנוה כן היא שמענה ואתה דע לך׃

6

6:1b.JOB.006.001 ויען איוב ויאמר׃

6:2b.JOB.006.002 לו שקול ישקל כעשי והיתי במאזנים ישאו יחד׃

6:3b.JOB.006.003 כי עתה מחול ימים יכבד על כן דברי לעו׃

6:4b.JOB.006.004 כי חצי שדי עמדי אשר חמתם שתה רוחי בעותי אלוה יערכוני׃

6:5b.JOB.006.005 הינהק פרא עלי דשא אם יגעה שור על בלילו׃

6:6b.JOB.006.006 היאכל תפל מבלי מלח אם יש טעם בריר חלמות׃

6:7b.JOB.006.007 מאנה לנגוע נפשי המה כדוי לחמי׃

6:8b.JOB.006.008 מי יתן תבוא שאלתי ותקותי יתן אלוה׃

6:9b.JOB.006.009 ויאל אלוה וידכאני יתר ידו ויבצעני׃

6:10b.JOB.006.010 ותהי עוד נחמתי ואסלדה בחילה לא יחמול כי לא כחדתי אמרי קדוש׃

6:11b.JOB.006.011 מה כחי כי איחל ומה קצי כי אאריך נפשי׃

6:12b.JOB.006.012 אם כח אבנים כחי אם בשרי נחוש׃

6:13b.JOB.006.013 האם אין עזרתי בי ותשיה נדחה ממני׃

6:14b.JOB.006.014 למס מרעהו חסד ויראת שדי יעזוב׃

6:15b.JOB.006.015 אחי בגדו כמו נחל כאפיק נחלים יעברו׃

6:16b.JOB.006.016 הקדרים מני קרח עלימו יתעלם שלג׃

6:17b.JOB.006.017 בעת יזרבו נצמתו בחמו נדעכו ממקומם׃

6:18b.JOB.006.018 ילפתו ארחות דרכם יעלו בתהו ויאבדו׃

6:19b.JOB.006.019 הביטו ארחות תמא הליכת שבא קוו למו׃

6:20b.JOB.006.020 בשו כי בטח באו עדיה ויחפרו׃

6:21b.JOB.006.021 כי עתה הייתם לא תראו חתת ותיראו׃

6:22b.JOB.006.022 הכי אמרתי הבו לי ומכחכם שחדו בעדי׃

6:23b.JOB.006.023 ומלטוני מיד צר ומיד עריצים תפדוני׃

6:24b.JOB.006.024 הורוני ואני אחריש ומה שגיתי הבינו לי׃

6:25b.JOB.006.025 מה נמרצו אמרי ישר ומה יוכיח הוכח מכם׃

6:26b.JOB.006.026 הלהוכח מלים תחשבו ולרוח אמרי נאש׃

6:27b.JOB.006.027 אף על יתום תפילו ותכרו על ריעכם׃

6:28b.JOB.006.028 ועתה הואילו פנו בי ועל פניכם אם אכזב׃

6:29b.JOB.006.029 שבו נא אל תהי עולה ושבי עוד צדקי בה׃

6:30b.JOB.006.030 היש בלשוני עולה אם חכי לא יבין הוות׃

7

7:1b.JOB.007.001 הלא צבא לאנוש על ארץ וכימי שכיר ימיו׃

7:2b.JOB.007.002 כעבד ישאף צל וכשכיר יקוה פעלו׃

7:3b.JOB.007.003 כן הנחלתי לי ירחי שוא ולילות עמל מנו לי׃

7:4b.JOB.007.004 אם שכבתי ואמרתי מתי אקום ומדד ערב ושבעתי נדדים עדי נשף׃

7:5b.JOB.007.005 לבש בשרי רמה וגיש עפר עורי רגע וימאס׃

7:6b.JOB.007.006 ימי קלו מני ארג ויכלו באפס תקוה׃

7:7b.JOB.007.007 זכר כי רוח חיי לא תשוב עיני לראות טוב׃

7:8b.JOB.007.008 לא תשורני עין ראי עיניך בי ואינני׃

7:9b.JOB.007.009 כלה ענן וילך כן יורד שאול לא יעלה׃

7:10b.JOB.007.010 לא ישוב עוד לביתו ולא יכירנו עוד מקמו׃

7:11b.JOB.007.011 גם אני לא אחשך פי אדברה בצר רוחי אשיחה במר נפשי׃

7:12b.JOB.007.012 הים אני אם תנין כי תשים עלי משמר׃

7:13b.JOB.007.013 כי אמרתי תנחמני ערשי ישא בשיחי משכבי׃

7:14b.JOB.007.014 וחתתני בחלמות ומחזינות תבעתני׃

7:15b.JOB.007.015 ותבחר מחנק נפשי מות מעצמותי׃

7:16b.JOB.007.016 מאסתי לא לעלם אחיה חדל ממני כי הבל ימי׃

7:17b.JOB.007.017 מה אנוש כי תגדלנו וכי תשית אליו לבך׃

7:18b.JOB.007.018 ותפקדנו לבקרים לרגעים תבחננו׃

7:19b.JOB.007.019 כמה לא תשעה ממני לא תרפני עד בלעי רקי׃

7:20b.JOB.007.020 חטאתי מה אפעל לך נצר האדם למה שמתני למפגע לך ואהיה עלי למשא׃

7:21b.JOB.007.021 ומה לא תשא פשעי ותעביר את עוני כי עתה לעפר אשכב ושחרתני ואינני׃

8

8:1b.JOB.008.001 ויען בלדד השוחי ויאמר׃

8:2b.JOB.008.002 עד אן תמלל אלה ורוח כביר אמרי פיך׃

8:3b.JOB.008.003 האל יעות משפט ואם שדי יעות צדק׃

8:4b.JOB.008.004 אם בניך חטאו לו וישלחם ביד פשעם׃

8:5b.JOB.008.005 אם אתה תשחר אל אל ואל שדי תתחנן׃

8:6b.JOB.008.006 אם זך וישר אתה כי עתה יעיר עליך ושלם נות צדקך׃

8:7b.JOB.008.007 והיה ראשיתך מצער ואחריתך ישגה מאד׃

8:8b.JOB.008.008 כי שאל נא לדר רישון וכונן לחקר אבותם׃

8:9b.JOB.008.009 כי תמול אנחנו ולא נדע כי צל ימינו עלי ארץ׃

8:10b.JOB.008.010 הלא הם יורוך יאמרו לך ומלבם יוצאו מלים׃

8:11b.JOB.008.011 היגאה גמא בלא בצה ישגה אחו בלי מים׃

8:12b.JOB.008.012 עדנו באבו לא יקטף ולפני כל חציר ייבש׃

8:13b.JOB.008.013 כן ארחות כל שכחי אל ותקות חנף תאבד׃

8:14b.JOB.008.014 אשר יקוט כסלו ובית עכביש מבטחו׃

8:15b.JOB.008.015 ישען על ביתו ולא יעמד יחזיק בו ולא יקום׃

8:16b.JOB.008.016 רטב הוא לפני שמש ועל גנתו ינקתו תצא׃

8:17b.JOB.008.017 על גל שרשיו יסבכו בית אבנים יחזה׃

8:18b.JOB.008.018 אם יבלענו ממקומו וכחש בו לא ראיתיך׃

8:19b.JOB.008.019 הן הוא משוש דרכו ומעפר אחר יצמחו׃

8:20b.JOB.008.020 הן אל לא ימאס תם ולא יחזיק ביד מרעים׃

8:21b.JOB.008.021 עד ימלה שחוק פיך ושפתיך תרועה׃

8:22b.JOB.008.022 שנאיך ילבשו בשת ואהל רשעים איננו׃

9

9:1b.JOB.009.001 ויען איוב ויאמר׃

9:2b.JOB.009.002 אמנם ידעתי כי כן ומה יצדק אנוש עם אל׃

9:3b.JOB.009.003 אם יחפץ לריב עמו לא יעננו אחת מני אלף׃

9:4b.JOB.009.004 חכם לבב ואמיץ כח מי הקשה אליו וישלם׃

9:5b.JOB.009.005 המעתיק הרים ולא ידעו אשר הפכם באפו׃

9:6b.JOB.009.006 המרגיז ארץ ממקומה ועמודיה יתפלצון׃

9:7b.JOB.009.007 האמר לחרס ולא יזרח ובעד כוכבים יחתם׃

9:8b.JOB.009.008 נטה שמים לבדו ודורך על במתי ים׃

9:9b.JOB.009.009 עשה עש כסיל וכימה וחדרי תמן׃

9:10b.JOB.009.010 עשה גדלות עד אין חקר ונפלאות עד אין מספר׃

9:11b.JOB.009.011 הן יעבר עלי ולא אראה ויחלף ולא אבין לו׃

9:12b.JOB.009.012 הן יחתף מי ישיבנו מי יאמר אליו מה תעשה׃

9:13b.JOB.009.013 אלוה לא ישיב אפו תחתו שחחו עזרי רהב׃

9:14b.JOB.009.014 אף כי אנכי אעננו אבחרה דברי עמו׃

9:15b.JOB.009.015 אשר אם צדקתי לא אענה למשפטי אתחנן׃

9:16b.JOB.009.016 אם קראתי ויענני לא אאמין כי יאזין קולי׃

9:17b.JOB.009.017 אשר בשערה ישופני והרבה פצעי חנם׃

9:18b.JOB.009.018 לא יתנני השב רוחי כי ישבעני ממררים׃

9:19b.JOB.009.019 אם לכח אמיץ הנה ואם למשפט מי יועידני׃

9:20b.JOB.009.020 אם אצדק פי ירשיעני תם אני ויעקשני׃

9:21b.JOB.009.021 תם אני לא אדע נפשי אמאס חיי׃

9:22b.JOB.009.022 אחת היא על כן אמרתי תם ורשע הוא מכלה׃

9:23b.JOB.009.023 אם שוט ימית פתאם למסת נקים ילעג׃

9:24b.JOB.009.024 ארץ נתנה ביד רשע פני שפטיה יכסה אם לא אפוא מי הוא׃

9:25b.JOB.009.025 וימי קלו מני רץ ברחו לא ראו טובה׃

9:26b.JOB.009.026 חלפו עם אניות אבה כנשר יטוש עלי אכל׃

9:27b.JOB.009.027 אם אמרי אשכחה שיחי אעזבה פני ואבליגה׃

9:28b.JOB.009.028 יגרתי כל עצבתי ידעתי כי לא תנקני׃

9:29b.JOB.009.029 אנכי ארשע למה זה הבל איגע׃

9:30b.JOB.009.030 אם התרחצתי במו שלג והזכותי בבר כפי׃

9:31b.JOB.009.031 אז בשחת תטבלני ותעבוני שלמותי׃

9:32b.JOB.009.032 כי לא איש כמני אעננו נבוא יחדו במשפט׃

9:33b.JOB.009.033 לא יש בינינו מוכיח ישת ידו על שנינו׃

9:34b.JOB.009.034 יסר מעלי שבטו ואמתו אל תבעתני׃

9:35b.JOB.009.035 אדברה ולא איראנו כי לא כן אנכי עמדי׃

10

10:1b.JOB.010.001 נקטה נפשי בחיי אעזבה עלי שיחי אדברה במר נפשי׃

10:2b.JOB.010.002 אמר אל אלוה אל תרשיעני הודיעני על מה תריבני׃

10:3b.JOB.010.003 הטוב לך כי תעשק כי תמאס יגיע כפיך ועל עצת רשעים הופעת׃

10:4b.JOB.010.004 העיני בשר לך אם כראות אנוש תראה׃

10:5b.JOB.010.005 הכימי אנוש ימיך אם שנותיך כימי גבר׃

10:6b.JOB.010.006 כי תבקש לעוני ולחטאתי תדרוש׃

10:7b.JOB.010.007 על דעתך כי לא ארשע ואין מידך מציל׃

10:8b.JOB.010.008 ידיך עצבוני ויעשוני יחד סביב ותבלעני׃

10:9b.JOB.010.009 זכר נא כי כחמר עשיתני ואל עפר תשיבני׃

10:10b.JOB.010.010 הלא כחלב תתיכני וכגבנה תקפיאני׃

10:11b.JOB.010.011 עור ובשר תלבישני ובעצמות וגידים תסככני׃

10:12b.JOB.010.012 חיים וחסד עשית עמדי ופקדתך שמרה רוחי׃

10:13b.JOB.010.013 ואלה צפנת בלבבך ידעתי כי זאת עמך׃

10:14b.JOB.010.014 אם חטאתי ושמרתני ומעוני לא תנקני׃

10:15b.JOB.010.015 אם רשעתי אללי לי וצדקתי לא אשא ראשי שבע קלון וראה עניי׃

10:16b.JOB.010.016 ויגאה כשחל תצודני ותשב תתפלא בי׃

10:17b.JOB.010.017 תחדש עדיך נגדי ותרב כעשך עמדי חליפות וצבא עמי׃

10:18b.JOB.010.018 ולמה מרחם הצאתני אגוע ועין לא תראני׃

10:19b.JOB.010.019 כאשר לא הייתי אהיה מבטן לקבר אובל׃

10:20b.JOB.010.020 הלא מעט ימי יחדל ישית ממני ואבליגה מעט׃

10:21b.JOB.010.021 בטרם אלך ולא אשוב אל ארץ חשך וצלמות׃

10:22b.JOB.010.022 ארץ עפתה כמו אפל צלמות ולא סדרים ותפע כמו אפל׃

11

11:1b.JOB.011.001 ויען צפר הנעמתי ויאמר׃

11:2b.JOB.011.002 הרב דברים לא יענה ואם איש שפתים יצדק׃

11:3b.JOB.011.003 בדיך מתים יחרישו ותלעג ואין מכלם׃

11:4b.JOB.011.004 ותאמר זך לקחי ובר הייתי בעיניך׃

11:5b.JOB.011.005 ואולם מי יתן אלוה דבר ויפתח שפתיו עמך׃

11:6b.JOB.011.006 ויגד לך תעלמות חכמה כי כפלים לתושיה ודע כי ישה לך אלוה מעונך׃

11:7b.JOB.011.007 החקר אלוה תמצא אם עד תכלית שדי תמצא׃

11:8b.JOB.011.008 גבהי שמים מה תפעל עמקה משאול מה תדע׃

11:9b.JOB.011.009 ארכה מארץ מדה ורחבה מני ים׃

11:10b.JOB.011.010 אם יחלף ויסגיר ויקהיל ומי ישיבנו׃

11:11b.JOB.011.011 כי הוא ידע מתי שוא וירא און ולא יתבונן׃

11:12b.JOB.011.012 ואיש נבוב ילבב ועיר פרא אדם יולד׃

11:13b.JOB.011.013 אם אתה הכינות לבך ופרשת אליו כפך׃

11:14b.JOB.011.014 אם און בידך הרחיקהו ואל תשכן באהליך עולה׃

11:15b.JOB.011.015 כי אז תשא פניך ממום והיית מצק ולא תירא׃

11:16b.JOB.011.016 כי אתה עמל תשכח כמים עברו תזכר׃

11:17b.JOB.011.017 ומצהרים יקום חלד תעפה כבקר תהיה׃

11:18b.JOB.011.018 ובטחת כי יש תקוה וחפרת לבטח תשכב׃

11:19b.JOB.011.019 ורבצת ואין מחריד וחלו פניך רבים׃

11:20b.JOB.011.020 ועיני רשעים תכלינה ומנוס אבד מנהם ותקותם מפח נפש׃

12

12:1b.JOB.012.001 ויען איוב ויאמר׃

12:2b.JOB.012.002 אמנם כי אתם עם ועמכם תמות חכמה׃

12:3b.JOB.012.003 גם לי לבב כמוכם לא נפל אנכי מכם ואת מי אין כמו אלה׃

12:4b.JOB.012.004 שחק לרעהו אהיה קרא לאלוה ויענהו שחוק צדיק תמים׃

12:5b.JOB.012.005 לפיד בוז לעשתות שאנן נכון למועדי רגל׃

12:6b.JOB.012.006 ישליו אהלים לשדדים ובטחות למרגיזי אל לאשר הביא אלוה בידו׃

12:7b.JOB.012.007 ואולם שאל נא בהמות ותרך ועוף השמים ויגד לך׃

12:8b.JOB.012.008 או שיח לארץ ותרך ויספרו לך דגי הים׃

12:9b.JOB.012.009 מי לא ידע בכל אלה כי יד יהוה עשתה זאת׃

12:10b.JOB.012.010 אשר בידו נפש כל חי ורוח כל בשר איש׃

12:11b.JOB.012.011 הלא אזן מלין תבחן וחך אכל יטעם לו׃

12:12b.JOB.012.012 בישישים חכמה וארך ימים תבונה׃

12:13b.JOB.012.013 עמו חכמה וגבורה לו עצה ותבונה׃

12:14b.JOB.012.014 הן יהרוס ולא יבנה יסגר על איש ולא יפתח׃

12:15b.JOB.012.015 הן יעצר במים ויבשו וישלחם ויהפכו ארץ׃

12:16b.JOB.012.016 עמו עז ותושיה לו שגג ומשגה׃

12:17b.JOB.012.017 מוליך יועצים שולל ושפטים יהולל׃

12:18b.JOB.012.018 מוסר מלכים פתח ויאסר אזור במתניהם׃

12:19b.JOB.012.019 מוליך כהנים שולל ואתנים יסלף׃

12:20b.JOB.012.020 מסיר שפה לנאמנים וטעם זקנים יקח׃

12:21b.JOB.012.021 שופך בוז על נדיבים ומזיח אפיקים רפה׃

12:22b.JOB.012.022 מגלה עמקות מני חשך ויצא לאור צלמות׃

12:23b.JOB.012.023 משגיא לגוים ויאבדם שטח לגוים וינחם׃

12:24b.JOB.012.024 מסיר לב ראשי עם הארץ ויתעם בתהו לא דרך׃

12:25b.JOB.012.025 ימששו חשך ולא אור ויתעם כשכור׃

13

13:1b.JOB.013.001 הן כל ראתה עיני שמעה אזני ותבן לה׃

13:2b.JOB.013.002 כדעתכם ידעתי גם אני לא נפל אנכי מכם׃

13:3b.JOB.013.003 אולם אני אל שדי אדבר והוכח אל אל אחפץ׃

13:4b.JOB.013.004 ואולם אתם טפלי שקר רפאי אלל כלכם׃

13:5b.JOB.013.005 מי יתן החרש תחרישון ותהי לכם לחכמה׃

13:6b.JOB.013.006 שמעו נא תוכחתי ורבות שפתי הקשיבו׃

13:7b.JOB.013.007 הלאל תדברו עולה ולו תדברו רמיה׃

13:8b.JOB.013.008 הפניו תשאון אם לאל תריבון׃

13:9b.JOB.013.009 הטוב כי יחקר אתכם אם כהתל באנוש תהתלו בו׃

13:10b.JOB.013.010 הוכח יוכיח אתכם אם בסתר פנים תשאון׃

13:11b.JOB.013.011 הלא שאתו תבעת אתכם ופחדו יפל עליכם׃

13:12b.JOB.013.012 זכרניכם משלי אפר לגבי חמר גביכם׃

13:13b.JOB.013.013 החרישו ממני ואדברה אני ויעבר עלי מה׃

13:14b.JOB.013.014 על מה אשא בשרי בשני ונפשי אשים בכפי׃

13:15b.JOB.013.015 הן יקטלני לא איחל אך דרכי אל פניו אוכיח׃

13:16b.JOB.013.016 גם הוא לי לישועה כי לא לפניו חנף יבוא׃

13:17b.JOB.013.017 שמעו שמוע מלתי ואחותי באזניכם׃

13:18b.JOB.013.018 הנה נא ערכתי משפט ידעתי כי אני אצדק׃

13:19b.JOB.013.019 מי הוא יריב עמדי כי עתה אחריש ואגוע׃

13:20b.JOB.013.020 אך שתים אל תעש עמדי אז מפניך לא אסתר׃

13:21b.JOB.013.021 כפך מעלי הרחק ואמתך אל תבעתני׃

13:22b.JOB.013.022 וקרא ואנכי אענה או אדבר והשיבני׃

13:23b.JOB.013.023 כמה לי עונות וחטאות פשעי וחטאתי הדיעני׃

13:24b.JOB.013.024 למה פניך תסתיר ותחשבני לאויב לך׃

13:25b.JOB.013.025 העלה נדף תערוץ ואת קש יבש תרדף׃

13:26b.JOB.013.026 כי תכתב עלי מררות ותורישני עונות נעורי׃

13:27b.JOB.013.027 ותשם בסד רגלי ותשמור כל ארחותי על שרשי רגלי תתחקה׃

13:28b.JOB.013.028 והוא כרקב יבלה כבגד אכלו עש׃

14

14:1b.JOB.014.001 אדם ילוד אשה קצר ימים ושבע רגז׃

14:2b.JOB.014.002 כציץ יצא וימל ויברח כצל ולא יעמוד׃

14:3b.JOB.014.003 אף על זה פקחת עינך ואתי תביא במשפט עמך׃

14:4b.JOB.014.004 מי יתן טהור מטמא לא אחד׃

14:5b.JOB.014.005 אם חרוצים ימיו מספר חדשיו אתך חקו עשית ולא יעבור׃

14:6b.JOB.014.006 שעה מעליו ויחדל עד ירצה כשכיר יומו׃

14:7b.JOB.014.007 כי יש לעץ תקוה אם יכרת ועוד יחליף וינקתו לא תחדל׃

14:8b.JOB.014.008 אם יזקין בארץ שרשו ובעפר ימות גזעו׃

14:9b.JOB.014.009 מריח מים יפרח ועשה קציר כמו נטע׃

14:10b.JOB.014.010 וגבר ימות ויחלש ויגוע אדם ואיו׃

14:11b.JOB.014.011 אזלו מים מני ים ונהר יחרב ויבש׃

14:12b.JOB.014.012 ואיש שכב ולא יקום עד בלתי שמים לא יקיצו ולא יערו משנתם׃

14:13b.JOB.014.013 מי יתן בשאול תצפנני תסתירני עד שוב אפך תשית לי חק ותזכרני׃

14:14b.JOB.014.014 אם ימות גבר היחיה כל ימי צבאי איחל עד בוא חליפתי׃

14:15b.JOB.014.015 תקרא ואנכי אענך למעשה ידיך תכסף׃

14:16b.JOB.014.016 כי עתה צעדי תספור לא תשמור על חטאתי׃

14:17b.JOB.014.017 חתם בצרור פשעי ותטפל על עוני׃

14:18b.JOB.014.018 ואולם הר נופל יבול וצור יעתק ממקמו׃

14:19b.JOB.014.019 אבנים שחקו מים תשטף ספיחיה עפר ארץ ותקות אנוש האבדת׃

14:20b.JOB.014.020 תתקפהו לנצח ויהלך משנה פניו ותשלחהו׃

14:21b.JOB.014.021 יכבדו בניו ולא ידע ויצערו ולא יבין למו׃

14:22b.JOB.014.022 אך בשרו עליו יכאב ונפשו עליו תאבל׃

15

15:1b.JOB.015.001 ויען אליפז התימני ויאמר׃

15:2b.JOB.015.002 החכם יענה דעת רוח וימלא קדים בטנו׃

15:3b.JOB.015.003 הוכח בדבר לא יסכון ומלים לא יועיל בם׃

15:4b.JOB.015.004 אף אתה תפר יראה ותגרע שיחה לפני אל׃

15:5b.JOB.015.005 כי יאלף עונך פיך ותבחר לשון ערומים׃

15:6b.JOB.015.006 ירשיעך פיך ולא אני ושפתיך יענו בך׃

15:7b.JOB.015.007 הראישון אדם תולד ולפני גבעות חוללת׃

15:8b.JOB.015.008 הבסוד אלוה תשמע ותגרע אליך חכמה׃

15:9b.JOB.015.009 מה ידעת ולא נדע תבין ולא עמנו הוא׃

15:10b.JOB.015.010 גם שב גם ישיש בנו כביר מאביך ימים׃

15:11b.JOB.015.011 המעט ממך תנחמות אל ודבר לאט עמך׃

15:12b.JOB.015.012 מה יקחך לבך ומה ירזמון עיניך׃

15:13b.JOB.015.013 כי תשיב אל אל רוחך והצאת מפיך מלין׃

15:14b.JOB.015.014 מה אנוש כי יזכה וכי יצדק ילוד אשה׃

15:15b.JOB.015.015 הן בקדשו לא יאמין ושמים לא זכו בעיניו׃

15:16b.JOB.015.016 אף כי נתעב ונאלח איש שתה כמים עולה׃

15:17b.JOB.015.017 אחוך שמע לי וזה חזיתי ואספרה׃

15:18b.JOB.015.018 אשר חכמים יגידו ולא כחדו מאבותם׃

15:19b.JOB.015.019 להם לבדם נתנה הארץ ולא עבר זר בתוכם׃

15:20b.JOB.015.020 כל ימי רשע הוא מתחולל ומספר שנים נצפנו לעריץ׃

15:21b.JOB.015.021 קול פחדים באזניו בשלום שודד יבואנו׃

15:22b.JOB.015.022 לא יאמין שוב מני חשך וצפו הוא אלי חרב׃

15:23b.JOB.015.023 נדד הוא ללחם איה ידע כי נכון בידו יום חשך׃

15:24b.JOB.015.024 יבעתהו צר ומצוקה תתקפהו כמלך עתיד לכידור׃

15:25b.JOB.015.025 כי נטה אל אל ידו ואל שדי יתגבר׃

15:26b.JOB.015.026 ירוץ אליו בצואר בעבי גבי מגניו׃

15:27b.JOB.015.027 כי כסה פניו בחלבו ויעש פימה עלי כסל׃

15:28b.JOB.015.028 וישכון ערים נכחדות בתים לא ישבו למו אשר התעתדו לגלים׃

15:29b.JOB.015.029 לא יעשר ולא יקום חילו ולא יטה לארץ מנלם׃

15:30b.JOB.015.030 לא יסור מני חשך ינקתו תיבש שלהבת ויסור ברוח פיו׃

15:31b.JOB.015.031 אל יאמן בשו נתעה כי שוא תהיה תמורתו׃

15:32b.JOB.015.032 בלא יומו תמלא וכפתו לא רעננה׃

15:33b.JOB.015.033 יחמס כגפן בסרו וישלך כזית נצתו׃

15:34b.JOB.015.034 כי עדת חנף גלמוד ואש אכלה אהלי שחד׃

15:35b.JOB.015.035 הרה עמל וילד און ובטנם תכין מרמה׃

16

16:1b.JOB.016.001 ויען איוב ויאמר׃

16:2b.JOB.016.002 שמעתי כאלה רבות מנחמי עמל כלכם׃

16:3b.JOB.016.003 הקץ לדברי רוח או מה ימריצך כי תענה׃

16:4b.JOB.016.004 גם אנכי ככם אדברה לו יש נפשכם תחת נפשי אחבירה עליכם במלים ואניעה עליכם במו ראשי׃

16:5b.JOB.016.005 אאמצכם במו פי וניד שפתי יחשך׃

16:6b.JOB.016.006 אם אדברה לא יחשך כאבי ואחדלה מה מני יהלך׃

16:7b.JOB.016.007 אך עתה הלאני השמות כל עדתי׃

16:8b.JOB.016.008 ותקמטני לעד היה ויקם בי כחשי בפני יענה׃

16:9b.JOB.016.009 אפו טרף וישטמני חרק עלי בשניו צרי ילטוש עיניו לי׃

16:10b.JOB.016.010 פערו עלי בפיהם בחרפה הכו לחיי יחד עלי יתמלאון׃

16:11b.JOB.016.011 יסגירני אל אל עויל ועל ידי רשעים ירטני׃

16:12b.JOB.016.012 שלו הייתי ויפרפרני ואחז בערפי ויפצפצני ויקימני לו למטרה׃

16:13b.JOB.016.013 יסבו עלי רביו יפלח כליותי ולא יחמול ישפך לארץ מררתי׃

16:14b.JOB.016.014 יפרצני פרץ על פני פרץ ירץ עלי כגבור׃

16:15b.JOB.016.015 שק תפרתי עלי גלדי ועללתי בעפר קרני׃

16:16b.JOB.016.016 פני חמרמרה מני בכי ועל עפעפי צלמות׃

16:17b.JOB.016.017 על לא חמס בכפי ותפלתי זכה׃

16:18b.JOB.016.018 ארץ אל תכסי דמי ואל יהי מקום לזעקתי׃

16:19b.JOB.016.019 גם עתה הנה בשמים עדי ושהדי במרומים׃

16:20b.JOB.016.020 מליצי רעי אל אלוה דלפה עיני׃

16:21b.JOB.016.021 ויוכח לגבר עם אלוה ובן אדם לרעהו׃

16:22b.JOB.016.022 כי שנות מספר יאתיו וארח לא אשוב אהלך׃

17

17:1b.JOB.017.001 רוחי חבלה ימי נזעכו קברים לי׃

17:2b.JOB.017.002 אם לא התלים עמדי ובהמרותם תלן עיני׃

17:3b.JOB.017.003 שימה נא ערבני עמך מי הוא לידי יתקע׃

17:4b.JOB.017.004 כי לבם צפנת משכל על כן לא תרמם׃

17:5b.JOB.017.005 לחלק יגיד רעים ועיני בניו תכלנה׃

17:6b.JOB.017.006 והצגני למשל עמים ותפת לפנים אהיה׃

17:7b.JOB.017.007 ותכה מכעש עיני ויצרי כצל כלם׃

17:8b.JOB.017.008 ישמו ישרים על זאת ונקי על חנף יתערר׃

17:9b.JOB.017.009 ויאחז צדיק דרכו וטהר ידים יסיף אמץ׃

17:10b.JOB.017.010 ואולם כלם תשבו ובאו נא ולא אמצא בכם חכם׃

17:11b.JOB.017.011 ימי עברו זמתי נתקו מורשי לבבי׃

17:12b.JOB.017.012 לילה ליום ישימו אור קרוב מפני חשך׃

17:13b.JOB.017.013 אם אקוה שאול ביתי בחשך רפדתי יצועי׃

17:14b.JOB.017.014 לשחת קראתי אבי אתה אמי ואחתי לרמה׃

17:15b.JOB.017.015 ואיה אפו תקותי ותקותי מי ישורנה׃

17:16b.JOB.017.016 בדי שאל תרדנה אם יחד על עפר נחת׃

18

18:1b.JOB.018.001 ויען בלדד השחי ויאמר׃

18:2b.JOB.018.002 עד אנה תשימון קנצי למלין תבינו ואחר נדבר׃

18:3b.JOB.018.003 מדוע נחשבנו כבהמה נטמינו בעיניכם׃

18:4b.JOB.018.004 טרף נפשו באפו הלמענך תעזב ארץ ויעתק צור ממקמו׃

18:5b.JOB.018.005 גם אור רשעים ידעך ולא יגה שביב אשו׃

18:6b.JOB.018.006 אור חשך באהלו ונרו עליו ידעך׃

18:7b.JOB.018.007 יצרו צעדי אונו ותשליכהו עצתו׃

18:8b.JOB.018.008 כי שלח ברשת ברגליו ועל שבכה יתהלך׃

18:9b.JOB.018.009 יאחז בעקב פח יחזק עליו צמים׃

18:10b.JOB.018.010 טמון בארץ חבלו ומלכדתו עלי נתיב׃

18:11b.JOB.018.011 סביב בעתהו בלהות והפיצהו לרגליו׃

18:12b.JOB.018.012 יהי רעב אנו ואיד נכון לצלעו׃

18:13b.JOB.018.013 יאכל בדי עורו יאכל בדיו בכור מות׃

18:14b.JOB.018.014 ינתק מאהלו מבטחו ותצעדהו למלך בלהות׃

18:15b.JOB.018.015 תשכון באהלו מבלי לו יזרה על נוהו גפרית׃

18:16b.JOB.018.016 מתחת שרשיו יבשו וממעל ימל קצירו׃

18:17b.JOB.018.017 זכרו אבד מני ארץ ולא שם לו על פני חוץ׃

18:18b.JOB.018.018 יהדפהו מאור אל חשך ומתבל ינדהו׃

18:19b.JOB.018.019 לא נין לו ולא נכד בעמו ואין שריד במגוריו׃

18:20b.JOB.018.020 על יומו נשמו אחרנים וקדמנים אחזו שער׃

18:21b.JOB.018.021 אך אלה משכנות עול וזה מקום לא ידע אל׃

19

19:1b.JOB.019.001 ויען איוב ויאמר׃

19:2b.JOB.019.002 עד אנה תוגיון נפשי ותדכאונני במלים׃

19:3b.JOB.019.003 זה עשר פעמים תכלימוני לא תבשו תהכרו לי׃

19:4b.JOB.019.004 ואף אמנם שגיתי אתי תלין משוגתי׃

19:5b.JOB.019.005 אם אמנם עלי תגדילו ותוכיחו עלי חרפתי׃

19:6b.JOB.019.006 דעו אפו כי אלוה עותני ומצודו עלי הקיף׃

19:7b.JOB.019.007 הן אצעק חמס ולא אענה אשוע ואין משפט׃

19:8b.JOB.019.008 ארחי גדר ולא אעבור ועל נתיבותי חשך ישים׃

19:9b.JOB.019.009 כבודי מעלי הפשיט ויסר עטרת ראשי׃

19:10b.JOB.019.010 יתצני סביב ואלך ויסע כעץ תקותי׃

19:11b.JOB.019.011 ויחר עלי אפו ויחשבני לו כצריו׃

19:12b.JOB.019.012 יחד יבאו גדודיו ויסלו עלי דרכם ויחנו סביב לאהלי׃

19:13b.JOB.019.013 אחי מעלי הרחיק וידעי אך זרו ממני׃

19:14b.JOB.019.014 חדלו קרובי ומידעי שכחוני׃

19:15b.JOB.019.015 גרי ביתי ואמהתי לזר תחשבני נכרי הייתי בעיניהם׃

19:16b.JOB.019.016 לעבדי קראתי ולא יענה במו פי אתחנן לו׃

19:17b.JOB.019.017 רוחי זרה לאשתי וחנתי לבני בטני׃

19:18b.JOB.019.018 גם עוילים מאסו בי אקומה וידברו בי׃

19:19b.JOB.019.019 תעבוני כל מתי סודי וזה אהבתי נהפכו בי׃

19:20b.JOB.019.020 בעורי ובבשרי דבקה עצמי ואתמלטה בעור שני׃

19:21b.JOB.019.021 חנני חנני אתם רעי כי יד אלוה נגעה בי׃

19:22b.JOB.019.022 למה תרדפני כמו אל ומבשרי לא תשבעו׃

19:23b.JOB.019.023 מי יתן אפו ויכתבון מלי מי יתן בספר ויחקו׃

19:24b.JOB.019.024 בעט ברזל ועפרת לעד בצור יחצבון׃

19:25b.JOB.019.025 ואני ידעתי גאלי חי ואחרון על עפר יקום׃

19:26b.JOB.019.026 ואחר עורי נקפו זאת ומבשרי אחזה אלוה׃

19:27b.JOB.019.027 אשר אני אחזה לי ועיני ראו ולא זר כלו כליתי בחקי׃

19:28b.JOB.019.028 כי תאמרו מה נרדף לו ושרש דבר נמצא בי׃

19:29b.JOB.019.029 גורו לכם מפני חרב כי חמה עונות חרב למען תדעון שדין׃

20

20:1b.JOB.020.001 ויען צפר הנעמתי ויאמר׃

20:2b.JOB.020.002 לכן שעפי ישיבוני ובעבור חושי בי׃

20:3b.JOB.020.003 מוסר כלמתי אשמע ורוח מבינתי יענני׃

20:4b.JOB.020.004 הזאת ידעת מני עד מני שים אדם עלי ארץ׃

20:5b.JOB.020.005 כי רננת רשעים מקרוב ושמחת חנף עדי רגע׃

20:6b.JOB.020.006 אם יעלה לשמים שיאו וראשו לעב יגיע׃

20:7b.JOB.020.007 כגללו לנצח יאבד ראיו יאמרו איו׃

20:8b.JOB.020.008 כחלום יעוף ולא ימצאוהו וידד כחזיון לילה׃

20:9b.JOB.020.009 עין שזפתו ולא תוסיף ולא עוד תשורנו מקומו׃

20:10b.JOB.020.010 בניו ירצו דלים וידיו תשבנה אונו׃

20:11b.JOB.020.011 עצמותיו מלאו עלומו ועמו על עפר תשכב׃

20:12b.JOB.020.012 אם תמתיק בפיו רעה יכחידנה תחת לשונו׃

20:13b.JOB.020.013 יחמל עליה ולא יעזבנה וימנענה בתוך חכו׃

20:14b.JOB.020.014 לחמו במעיו נהפך מרורת פתנים בקרבו׃

20:15b.JOB.020.015 חיל בלע ויקאנו מבטנו יורשנו אל׃

20:16b.JOB.020.016 ראש פתנים יינק תהרגהו לשון אפעה׃

20:17b.JOB.020.017 אל ירא בפלגות נהרי נחלי דבש וחמאה׃

20:18b.JOB.020.018 משיב יגע ולא יבלע כחיל תמורתו ולא יעלס׃

20:19b.JOB.020.019 כי רצץ עזב דלים בית גזל ולא יבנהו׃

20:20b.JOB.020.020 כי לא ידע שלו בבטנו בחמודו לא ימלט׃

20:21b.JOB.020.021 אין שריד לאכלו על כן לא יחיל טובו׃

20:22b.JOB.020.022 במלאות שפקו יצר לו כל יד עמל תבואנו׃

20:23b.JOB.020.023 יהי למלא בטנו ישלח בו חרון אפו וימטר עלימו בלחומו׃

20:24b.JOB.020.024 יברח מנשק ברזל תחלפהו קשת נחושה׃

20:25b.JOB.020.025 שלף ויצא מגוה וברק ממררתו יהלך עליו אמים׃

20:26b.JOB.020.026 כל חשך טמון לצפוניו תאכלהו אש לא נפח ירע שריד באהלו׃

20:27b.JOB.020.027 יגלו שמים עונו וארץ מתקוממה לו׃

20:28b.JOB.020.028 יגל יבול ביתו נגרות ביום אפו׃

20:29b.JOB.020.029 זה חלק אדם רשע מאלהים ונחלת אמרו מאל׃

21

21:1b.JOB.021.001 ויען איוב ויאמר׃

21:2b.JOB.021.002 שמעו שמוע מלתי ותהי זאת תנחומתיכם׃

21:3b.JOB.021.003 שאוני ואנכי אדבר ואחר דברי תלעיג׃

21:4b.JOB.021.004 האנכי לאדם שיחי ואם מדוע לא תקצר רוחי׃

21:5b.JOB.021.005 פנו אלי והשמו ושימו יד על פה׃

21:6b.JOB.021.006 ואם זכרתי ונבהלתי ואחז בשרי פלצות׃

21:7b.JOB.021.007 מדוע רשעים יחיו עתקו גם גברו חיל׃

21:8b.JOB.021.008 זרעם נכון לפניהם עמם וצאצאיהם לעיניהם׃

21:9b.JOB.021.009 בתיהם שלום מפחד ולא שבט אלוה עליהם׃

21:10b.JOB.021.010 שורו עבר ולא יגעל תפלט פרתו ולא תשכל׃

21:11b.JOB.021.011 ישלחו כצאן עויליהם וילדיהם ירקדון׃

21:12b.JOB.021.012 ישאו כתף וכנור וישמחו לקול עוגב׃

21:13b.JOB.021.013 יבלו בטוב ימיהם וברגע שאול יחתו׃

21:14b.JOB.021.014 ויאמרו לאל סור ממנו ודעת דרכיך לא חפצנו׃

21:15b.JOB.021.015 מה שדי כי נעבדנו ומה נועיל כי נפגע בו׃

21:16b.JOB.021.016 הן לא בידם טובם עצת רשעים רחקה מני׃

21:17b.JOB.021.017 כמה נר רשעים ידעך ויבא עלימו אידם חבלים יחלק באפו׃

21:18b.JOB.021.018 יהיו כתבן לפני רוח וכמץ גנבתו סופה׃

21:19b.JOB.021.019 אלוה יצפן לבניו אונו ישלם אליו וידע׃

21:20b.JOB.021.020 יראו עינו כידו ומחמת שדי ישתה׃

21:21b.JOB.021.021 כי מה חפצו בביתו אחריו ומספר חדשיו חצצו׃

21:22b.JOB.021.022 הלאל ילמד דעת והוא רמים ישפוט׃

21:23b.JOB.021.023 זה ימות בעצם תמו כלו שלאנן ושליו׃

21:24b.JOB.021.024 עטיניו מלאו חלב ומח עצמותיו ישקה׃

21:25b.JOB.021.025 וזה ימות בנפש מרה ולא אכל בטובה׃

21:26b.JOB.021.026 יחד על עפר ישכבו ורמה תכסה עליהם׃

21:27b.JOB.021.027 הן ידעתי מחשבותיכם ומזמות עלי תחמסו׃

21:28b.JOB.021.028 כי תאמרו איה בית נדיב ואיה אהל משכנות רשעים׃

21:29b.JOB.021.029 הלא שאלתם עוברי דרך ואתתם לא תנכרו׃

21:30b.JOB.021.030 כי ליום איד יחשך רע ליום עברות יובלו׃

21:31b.JOB.021.031 מי יגיד על פניו דרכו והוא עשה מי ישלם לו׃

21:32b.JOB.021.032 והוא לקברות יובל ועל גדיש ישקוד׃

21:33b.JOB.021.033 מתקו לו רגבי נחל ואחריו כל אדם ימשוך ולפניו אין מספר׃

21:34b.JOB.021.034 ואיך תנחמוני הבל ותשובתיכם נשאר מעל׃

22

22:1b.JOB.022.001 ויען אליפז התמני ויאמר׃

22:2b.JOB.022.002 הלאל יסכן גבר כי יסכן עלימו משכיל׃

22:3b.JOB.022.003 החפץ לשדי כי תצדק ואם בצע כי תתם דרכיך׃

22:4b.JOB.022.004 המיראתך יכיחך יבוא עמך במשפט׃

22:5b.JOB.022.005 הלא רעתך רבה ואין קץ לעונתיך׃

22:6b.JOB.022.006 כי תחבל אחיך חנם ובגדי ערומים תפשיט׃

22:7b.JOB.022.007 לא מים עיף תשקה ומרעב תמנע לחם׃

22:8b.JOB.022.008 ואיש זרוע לו הארץ ונשוא פנים ישב בה׃

22:9b.JOB.022.009 אלמנות שלחת ריקם וזרעות יתמים ידכא׃

22:10b.JOB.022.010 על כן סביבותיך פחים ויבהלך פחד פתאם׃

22:11b.JOB.022.011 או חשך לא תראה ושפעת מים תכסך׃

22:12b.JOB.022.012 הלא אלוה גבה שמים וראה ראש כוכבים כי רמו׃

22:13b.JOB.022.013 ואמרת מה ידע אל הבעד ערפל ישפוט׃

22:14b.JOB.022.014 עבים סתר לו ולא יראה וחוג שמים יתהלך׃

22:15b.JOB.022.015 הארח עולם תשמר אשר דרכו מתי און׃

22:16b.JOB.022.016 אשר קמטו ולא עת נהר יוצק יסודם׃

22:17b.JOB.022.017 האמרים לאל סור ממנו ומה יפעל שדי למו׃

22:18b.JOB.022.018 והוא מלא בתיהם טוב ועצת רשעים רחקה מני׃

22:19b.JOB.022.019 יראו צדיקים וישמחו ונקי ילעג למו׃

22:20b.JOB.022.020 אם לא נכחד קימנו ויתרם אכלה אש׃

22:21b.JOB.022.021 הסכן נא עמו ושלם בהם תבואתך טובה׃

22:22b.JOB.022.022 קח נא מפיו תורה ושים אמריו בלבבך׃

22:23b.JOB.022.023 אם תשוב עד שדי תבנה תרחיק עולה מאהלך׃

22:24b.JOB.022.024 ושית על עפר בצר ובצור נחלים אופיר׃

22:25b.JOB.022.025 והיה שדי בצריך וכסף תועפות לך׃

22:26b.JOB.022.026 כי אז על שדי תתענג ותשא אל אלוה פניך׃

22:27b.JOB.022.027 תעתיר אליו וישמעך ונדריך תשלם׃

22:28b.JOB.022.028 ותגזר אומר ויקם לך ועל דרכיך נגה אור׃

22:29b.JOB.022.029 כי השפילו ותאמר גוה ושח עינים יושע׃

22:30b.JOB.022.030 ימלט אי נקי ונמלט בבר כפיך׃

23

23:1b.JOB.023.001 ויען איוב ויאמר׃

23:2b.JOB.023.002 גם היום מרי שחי ידי כבדה על אנחתי׃

23:3b.JOB.023.003 מי יתן ידעתי ואמצאהו אבוא עד תכונתו׃

23:4b.JOB.023.004 אערכה לפניו משפט ופי אמלא תוכחות׃

23:5b.JOB.023.005 אדעה מלים יענני ואבינה מה יאמר לי׃

23:6b.JOB.023.006 הברב כח יריב עמדי לא אך הוא ישם בי׃

23:7b.JOB.023.007 שם ישר נוכח עמו ואפלטה לנצח משפטי׃

23:8b.JOB.023.008 הן קדם אהלך ואיננו ואחור ולא אבין לו׃

23:9b.JOB.023.009 שמאול בעשתו ולא אחז יעטף ימין ולא אראה׃

23:10b.JOB.023.010 כי ידע דרך עמדי בחנני כזהב אצא׃

23:11b.JOB.023.011 באשרו אחזה רגלי דרכו שמרתי ולא אט׃

23:12b.JOB.023.012 מצות שפתיו ולא אמיש מחקי צפנתי אמרי פיו׃

23:13b.JOB.023.013 והוא באחד ומי ישיבנו ונפשו אותה ויעש׃

23:14b.JOB.023.014 כי ישלים חקי וכהנה רבות עמו׃

23:15b.JOB.023.015 על כן מפניו אבהל אתבונן ואפחד ממנו׃

23:16b.JOB.023.016 ואל הרך לבי ושדי הבהילני׃

23:17b.JOB.023.017 כי לא נצמתי מפני חשך ומפני כסה אפל׃

24

24:1b.JOB.024.001 מדוע משדי לא נצפנו עתים וידעו לא חזו ימיו׃

24:2b.JOB.024.002 גבלות ישיגו עדר גזלו וירעו׃

24:3b.JOB.024.003 חמור יתומים ינהגו יחבלו שור אלמנה׃

24:4b.JOB.024.004 יטו אביונים מדרך יחד חבאו עניי ארץ׃

24:5b.JOB.024.005 הן פראים במדבר יצאו בפעלם משחרי לטרף ערבה לו לחם לנערים׃

24:6b.JOB.024.006 בשדה בלילו יקצירו וכרם רשע ילקשו׃

24:7b.JOB.024.007 ערום ילינו מבלי לבוש ואין כסות בקרה׃

24:8b.JOB.024.008 מזרם הרים ירטבו ומבלי מחסה חבקו צור׃

24:9b.JOB.024.009 יגזלו משד יתום ועל עני יחבלו׃

24:10b.JOB.024.010 ערום הלכו בלי לבוש ורעבים נשאו עמר׃

24:11b.JOB.024.011 בין שורתם יצהירו יקבים דרכו ויצמאו׃

24:12b.JOB.024.012 מעיר מתים ינאקו ונפש חללים תשוע ואלוה לא ישים תפלה׃

24:13b.JOB.024.013 המה היו במרדי אור לא הכירו דרכיו ולא ישבו בנתיבתיו׃

24:14b.JOB.024.014 לאור יקום רוצח יקטל עני ואביון ובלילה יהי כגנב׃

24:15b.JOB.024.015 ועין נאף שמרה נשף לאמר לא תשורני עין וסתר פנים ישים׃

24:16b.JOB.024.016 חתר בחשך בתים יומם חתמו למו לא ידעו אור׃

24:17b.JOB.024.017 כי יחדו בקר למו צלמות כי יכיר בלהות צלמות׃

24:18b.JOB.024.018 קל הוא על פני מים תקלל חלקתם בארץ לא יפנה דרך כרמים׃

24:19b.JOB.024.019 ציה גם חם יגזלו מימי שלג שאול חטאו׃

24:20b.JOB.024.020 ישכחהו רחם מתקו רמה עוד לא יזכר ותשבר כעץ עולה׃

24:21b.JOB.024.021 רעה עקרה לא תלד ואלמנה לא ייטיב׃

24:22b.JOB.024.022 ומשך אבירים בכחו יקום ולא יאמין בחיין׃

24:23b.JOB.024.023 יתן לו לבטח וישען ועיניהו על דרכיהם׃

24:24b.JOB.024.024 רומו מעט ואיננו והמכו ככל יקפצון וכראש שבלת ימלו׃

24:25b.JOB.024.025 ואם לא אפו מי יכזיבני וישם לאל מלתי׃

25

25:1b.JOB.025.001 ויען בלדד השחי ויאמר׃

25:2b.JOB.025.002 המשל ופחד עמו עשה שלום במרומיו׃

25:3b.JOB.025.003 היש מספר לגדודיו ועל מי לא יקום אורהו׃

25:4b.JOB.025.004 ומה יצדק אנוש עם אל ומה יזכה ילוד אשה׃

25:5b.JOB.025.005 הן עד ירח ולא יאהיל וכוכבים לא זכו בעיניו׃

25:6b.JOB.025.006 אף כי אנוש רמה ובן אדם תולעה׃

26

26:1b.JOB.026.001 ויען איוב ויאמר׃

26:2b.JOB.026.002 מה עזרת ללא כח הושעת זרוע לא עז׃

26:3b.JOB.026.003 מה יעצת ללא חכמה ותושיה לרב הודעת׃

26:4b.JOB.026.004 את מי הגדת מלין ונשמת מי יצאה ממך׃

26:5b.JOB.026.005 הרפאים יחוללו מתחת מים ושכניהם׃

26:6b.JOB.026.006 ערום שאול נגדו ואין כסות לאבדון׃

26:7b.JOB.026.007 נטה צפון על תהו תלה ארץ על בלי מה׃

26:8b.JOB.026.008 צרר מים בעביו ולא נבקע ענן תחתם׃

26:9b.JOB.026.009 מאחז פני כסה פרשז עליו עננו׃

26:10b.JOB.026.010 חק חג על פני מים עד תכלית אור עם חשך׃

26:11b.JOB.026.011 עמודי שמים ירופפו ויתמהו מגערתו׃

26:12b.JOB.026.012 בכחו רגע הים ובתובנתו מחץ רהב׃

26:13b.JOB.026.013 ברוחו שמים שפרה חללה ידו נחש בריח׃

26:14b.JOB.026.014 הן אלה קצות דרכו ומה שמץ דבר נשמע בו ורעם גבורתו מי יתבונן׃

27

27:1b.JOB.027.001 ויסף איוב שאת משלו ויאמר׃

27:2b.JOB.027.002 חי אל הסיר משפטי ושדי המר נפשי׃

27:3b.JOB.027.003 כי כל עוד נשמתי בי ורוח אלוה באפי׃

27:4b.JOB.027.004 אם תדברנה שפתי עולה ולשוני אם יהגה רמיה׃

27:5b.JOB.027.005 חלילה לי אם אצדיק אתכם עד אגוע לא אסיר תמתי ממני׃

27:6b.JOB.027.006 בצדקתי החזקתי ולא ארפה לא יחרף לבבי מימי׃

27:7b.JOB.027.007 יהי כרשע איבי ומתקוממי כעול׃

27:8b.JOB.027.008 כי מה תקות חנף כי יבצע כי ישל אלוה נפשו׃

27:9b.JOB.027.009 הצעקתו ישמע אל כי תבוא עליו צרה׃

27:10b.JOB.027.010 אם על שדי יתענג יקרא אלוה בכל עת׃

27:11b.JOB.027.011 אורה אתכם ביד אל אשר עם שדי לא אכחד׃

27:12b.JOB.027.012 הן אתם כלכם חזיתם ולמה זה הבל תהבלו׃

27:13b.JOB.027.013 זה חלק אדם רשע עם אל ונחלת עריצים משדי יקחו׃

27:14b.JOB.027.014 אם ירבו בניו למו חרב וצאצאיו לא ישבעו לחם׃

27:15b.JOB.027.015 שרידו במות יקברו ואלמנתיו לא תבכינה׃

27:16b.JOB.027.016 אם יצבר כעפר כסף וכחמר יכין מלבוש׃

27:17b.JOB.027.017 יכין וצדיק ילבש וכסף נקי יחלק׃

27:18b.JOB.027.018 בנה כעש ביתו וכסכה עשה נצר׃

27:19b.JOB.027.019 עשיר ישכב ולא יאסף עיניו פקח ואיננו׃

27:20b.JOB.027.020 תשיגהו כמים בלהות לילה גנבתו סופה׃

27:21b.JOB.027.021 ישאהו קדים וילך וישערהו ממקמו׃

27:22b.JOB.027.022 וישלך עליו ולא יחמל מידו ברוח יברח׃

27:23b.JOB.027.023 ישפק עלימו כפימו וישרק עליו ממקמו׃

28

28:1b.JOB.028.001 כי יש לכסף מוצא ומקום לזהב יזקו׃

28:2b.JOB.028.002 ברזל מעפר יקח ואבן יצוק נחושה׃

28:3b.JOB.028.003 קץ שם לחשך ולכל תכלית הוא חוקר אבן אפל וצלמות׃

28:4b.JOB.028.004 פרץ נחל מעם גר הנשכחים מני רגל דלו מאנוש נעו׃

28:5b.JOB.028.005 ארץ ממנה יצא לחם ותחתיה נהפך כמו אש׃

28:6b.JOB.028.006 מקום ספיר אבניה ועפרת זהב לו׃

28:7b.JOB.028.007 נתיב לא ידעו עיט ולא שזפתו עין איה׃

28:8b.JOB.028.008 לא הדריכהו בני שחץ לא עדה עליו שחל׃

28:9b.JOB.028.009 בחלמיש שלח ידו הפך משרש הרים׃

28:10b.JOB.028.010 בצורות יארים בקע וכל יקר ראתה עינו׃

28:11b.JOB.028.011 מבכי נהרות חבש ותעלמה יצא אור׃

28:12b.JOB.028.012 והחכמה מאין תמצא ואי זה מקום בינה׃

28:13b.JOB.028.013 לא ידע אנוש ערכה ולא תמצא בארץ החיים׃

28:14b.JOB.028.014 תהום אמר לא בי היא וים אמר אין עמדי׃

28:15b.JOB.028.015 לא יתן סגור תחתיה ולא ישקל כסף מחירה׃

28:16b.JOB.028.016 לא תסלה בכתם אופיר בשהם יקר וספיר׃

28:17b.JOB.028.017 לא יערכנה זהב וזכוכית ותמורתה כלי פז׃

28:18b.JOB.028.018 ראמות וגביש לא יזכר ומשך חכמה מפנינים׃

28:19b.JOB.028.019 לא יערכנה פטדת כוש בכתם טהור לא תסלה׃

28:20b.JOB.028.020 והחכמה מאין תבוא ואי זה מקום בינה׃

28:21b.JOB.028.021 ונעלמה מעיני כל חי ומעוף השמים נסתרה׃

28:22b.JOB.028.022 אבדון ומות אמרו באזנינו שמענו שמעה׃

28:23b.JOB.028.023 אלהים הבין דרכה והוא ידע את מקומה׃

28:24b.JOB.028.024 כי הוא לקצות הארץ יביט תחת כל השמים יראה׃

28:25b.JOB.028.025 לעשות לרוח משקל ומים תכן במדה׃

28:26b.JOB.028.026 בעשתו למטר חק ודרך לחזיז קלות׃

28:27b.JOB.028.027 אז ראה ויספרה הכינה וגם חקרה׃

28:28b.JOB.028.028 ויאמר לאדם הן יראת אדני היא חכמה וסור מרע בינה׃

29

29:1b.JOB.029.001 ויסף איוב שאת משלו ויאמר׃

29:2b.JOB.029.002 מי יתנני כירחי קדם כימי אלוה ישמרני׃

29:3b.JOB.029.003 בהלו נרו עלי ראשי לאורו אלך חשך׃

29:4b.JOB.029.004 כאשר הייתי בימי חרפי בסוד אלוה עלי אהלי׃

29:5b.JOB.029.005 בעוד שדי עמדי סביבותי נערי׃

29:6b.JOB.029.006 ברחץ הליכי בחמה וצור יצוק עמדי פלגי שמן׃

29:7b.JOB.029.007 בצאתי שער עלי קרת ברחוב אכין מושבי׃

29:8b.JOB.029.008 ראוני נערים ונחבאו וישישים קמו עמדו׃

29:9b.JOB.029.009 שרים עצרו במלים וכף ישימו לפיהם׃

29:10b.JOB.029.010 קול נגידים נחבאו ולשונם לחכם דבקה׃

29:11b.JOB.029.011 כי אזן שמעה ותאשרני ועין ראתה ותעידני׃

29:12b.JOB.029.012 כי אמלט עני משוע ויתום ולא עזר לו׃

29:13b.JOB.029.013 ברכת אבד עלי תבא ולב אלמנה ארנן׃

29:14b.JOB.029.014 צדק לבשתי וילבשני כמעיל וצניף משפטי׃

29:15b.JOB.029.015 עינים הייתי לעור ורגלים לפסח אני׃

29:16b.JOB.029.016 אב אנכי לאביונים ורב לא ידעתי אחקרהו׃

29:17b.JOB.029.017 ואשברה מתלעות עול ומשניו אשליך טרף׃

29:18b.JOB.029.018 ואמר עם קני אגוע וכחול ארבה ימים׃

29:19b.JOB.029.019 שרשי פתוח אלי מים וטל ילין בקצירי׃

29:20b.JOB.029.020 כבודי חדש עמדי וקשתי בידי תחליף׃

29:21b.JOB.029.021 לי שמעו ויחלו וידמו למו עצתי׃

29:22b.JOB.029.022 אחרי דברי לא ישנו ועלימו תטף מלתי׃

29:23b.JOB.029.023 ויחלו כמטר לי ופיהם פערו למלקוש׃

29:24b.JOB.029.024 אשחק אלהם לא יאמינו ואור פני לא יפילון׃

29:25b.JOB.029.025 אבחר דרכם ואשב ראש ואשכון כמלך בגדוד כאשר אבלים ינחם׃

30

30:1b.JOB.030.001 ועתה שחקו עלי צעירים ממני לימים אשר מאסתי אבותם לשית עם כלבי צאני׃

30:2b.JOB.030.002 גם כח ידיהם למה לי עלימו אבד כלח׃

30:3b.JOB.030.003 בחסר ובכפן גלמוד הערקים ציה אמש שואה ומשאה׃

30:4b.JOB.030.004 הקטפים מלוח עלי שיח ושרש רתמים לחמם׃

30:5b.JOB.030.005 מן גו יגרשו יריעו עלימו כגנב׃

30:6b.JOB.030.006 בערוץ נחלים לשכן חרי עפר וכפים׃

30:7b.JOB.030.007 בין שיחים ינהקו תחת חרול יספחו׃

30:8b.JOB.030.008 בני נבל גם בני בלי שם נכאו מן הארץ׃

30:9b.JOB.030.009 ועתה נגינתם הייתי ואהי להם למלה׃

30:10b.JOB.030.010 תעבוני רחקו מני ומפני לא חשכו רק׃

30:11b.JOB.030.011 כי יתרו פתח ויענני ורסן מפני שלחו׃

30:12b.JOB.030.012 על ימין פרחח יקומו רגלי שלחו ויסלו עלי ארחות אידם׃

30:13b.JOB.030.013 נתסו נתיבתי להותי יעילו לא עזר למו׃

30:14b.JOB.030.014 כפרץ רחב יאתיו תחת שאה התגלגלו׃

30:15b.JOB.030.015 ההפך עלי בלהות תרדף כרוח נדבתי וכעב עברה ישעתי׃

30:16b.JOB.030.016 ועתה עלי תשתפך נפשי יאחזוני ימי עני׃

30:17b.JOB.030.017 לילה עצמי נקר מעלי וערקי לא ישכבון׃

30:18b.JOB.030.018 ברב כח יתחפש לבושי כפי כתנתי יאזרני׃

30:19b.JOB.030.019 הרני לחמר ואתמשל כעפר ואפר׃

30:20b.JOB.030.020 אשוע אליך ולא תענני עמדתי ותתבנן בי׃

30:21b.JOB.030.021 תהפך לאכזר לי בעצם ידך תשטמני׃

30:22b.JOB.030.022 תשאני אל רוח תרכיבני ותמגגני תשוה׃

30:23b.JOB.030.023 כי ידעתי מות תשיבני ובית מועד לכל חי׃

30:24b.JOB.030.024 אך לא בעי ישלח יד אם בפידו להן שוע׃

30:25b.JOB.030.025 אם לא בכיתי לקשה יום עגמה נפשי לאביון׃

30:26b.JOB.030.026 כי טוב קויתי ויבא רע ואיחלה לאור ויבא אפל׃

30:27b.JOB.030.027 מעי רתחו ולא דמו קדמני ימי עני׃

30:28b.JOB.030.028 קדר הלכתי בלא חמה קמתי בקהל אשוע׃

30:29b.JOB.030.029 אח הייתי לתנים ורע לבנות יענה׃

30:30b.JOB.030.030 עורי שחר מעלי ועצמי חרה מני חרב׃

30:31b.JOB.030.031 ויהי לאבל כנרי ועגבי לקול בכים׃

31

31:1b.JOB.031.001 ברית כרתי לעיני ומה אתבונן על בתולה׃

31:2b.JOB.031.002 ומה חלק אלוה ממעל ונחלת שדי ממרמים׃

31:3b.JOB.031.003 הלא איד לעול ונכר לפעלי און׃

31:4b.JOB.031.004 הלא הוא יראה דרכי וכל צעדי יספור׃

31:5b.JOB.031.005 אם הלכתי עם שוא ותחש על מרמה רגלי׃

31:6b.JOB.031.006 ישקלני במאזני צדק וידע אלוה תמתי׃

31:7b.JOB.031.007 אם תטה אשרי מני הדרך ואחר עיני הלך לבי ובכפי דבק מאום׃

31:8b.JOB.031.008 אזרעה ואחר יאכל וצאצאי ישרשו׃

31:9b.JOB.031.009 אם נפתה לבי על אשה ועל פתח רעי ארבתי׃

31:10b.JOB.031.010 תטחן לאחר אשתי ועליה יכרעון אחרין׃

31:11b.JOB.031.011 כי הוא זמה והיא עון פלילים׃

31:12b.JOB.031.012 כי אש היא עד אבדון תאכל ובכל תבואתי תשרש׃

31:13b.JOB.031.013 אם אמאס משפט עבדי ואמתי ברבם עמדי׃

31:14b.JOB.031.014 ומה אעשה כי יקום אל וכי יפקד מה אשיבנו׃

31:15b.JOB.031.015 הלא בבטן עשני עשהו ויכננו ברחם אחד׃

31:16b.JOB.031.016 אם אמנע מחפץ דלים ועיני אלמנה אכלה׃

31:17b.JOB.031.017 ואכל פתי לבדי ולא אכל יתום ממנה׃

31:18b.JOB.031.018 כי מנעורי גדלני כאב ומבטן אמי אנחנה׃

31:19b.JOB.031.019 אם אראה אובד מבלי לבוש ואין כסות לאביון׃

31:20b.JOB.031.020 אם לא ברכוני חלצו ומגז כבשי יתחמם׃

31:21b.JOB.031.021 אם הניפותי על יתום ידי כי אראה בשער עזרתי׃

31:22b.JOB.031.022 כתפי משכמה תפול ואזרעי מקנה תשבר׃

31:23b.JOB.031.023 כי פחד אלי איד אל ומשאתו לא אוכל׃

31:24b.JOB.031.024 אם שמתי זהב כסלי ולכתם אמרתי מבטחי׃

31:25b.JOB.031.025 אם אשמח כי רב חילי וכי כביר מצאה ידי׃

31:26b.JOB.031.026 אם אראה אור כי יהל וירח יקר הלך׃

31:27b.JOB.031.027 ויפת בסתר לבי ותשק ידי לפי׃

31:28b.JOB.031.028 גם הוא עון פלילי כי כחשתי לאל ממעל׃

31:29b.JOB.031.029 אם אשמח בפיד משנאי והתעררתי כי מצאו רע׃

31:30b.JOB.031.030 ולא נתתי לחטא חכי לשאל באלה נפשו׃

31:31b.JOB.031.031 אם לא אמרו מתי אהלי מי יתן מבשרו לא נשבע׃

31:32b.JOB.031.032 בחוץ לא ילין גר דלתי לארח אפתח׃

31:33b.JOB.031.033 אם כסיתי כאדם פשעי לטמון בחבי עוני׃

31:34b.JOB.031.034 כי אערוץ המון רבה ובוז משפחות יחתני ואדם לא אצא פתח׃

31:35b.JOB.031.035 מי יתן לי שמע לי הן תוי שדי יענני וספר כתב איש ריבי׃

31:36b.JOB.031.036 אם לא על שכמי אשאנו אענדנו עטרות לי׃

31:37b.JOB.031.037 מספר צעדי אגידנו כמו נגיד אקרבנו׃

31:38b.JOB.031.038 אם עלי אדמתי תזעק ויחד תלמיה יבכיון׃

31:39b.JOB.031.039 אם כחה אכלתי בלי כסף ונפש בעליה הפחתי׃

31:40b.JOB.031.040 תחת חטה יצא חוח ותחת שערה באשה תמו דברי איוב׃

32

32:1b.JOB.032.001 וישבתו שלשת האנשים האלה מענות את איוב כי הוא צדיק בעיניו׃

32:2b.JOB.032.002 ויחר אף אליהוא בן ברכאל הבוזי ממשפחת רם באיוב חרה אפו על צדקו נפשו מאלהים׃

32:3b.JOB.032.003 ובשלשת רעיו חרה אפו על אשר לא מצאו מענה וירשיעו את איוב׃

32:4b.JOB.032.004 ואליהו חכה את איוב בדברים כי זקנים המה ממנו לימים׃

32:5b.JOB.032.005 וירא אליהוא כי אין מענה בפי שלשת האנשים ויחר אפו׃

32:6b.JOB.032.006 ויען אליהוא בן ברכאל הבוזי ויאמר צעיר אני לימים ואתם ישישים על כן זחלתי ואירא מחות דעי אתכם׃

32:7b.JOB.032.007 אמרתי ימים ידברו ורב שנים ידיעו חכמה׃

32:8b.JOB.032.008 אכן רוח היא באנוש ונשמת שדי תבינם׃

32:9b.JOB.032.009 לא רבים יחכמו וזקנים יבינו משפט׃

32:10b.JOB.032.010 לכן אמרתי שמעה לי אחוה דעי אף אני׃

32:11b.JOB.032.011 הן הוחלתי לדבריכם אזין עד תבונתיכם עד תחקרון מלין׃

32:12b.JOB.032.012 ועדיכם אתבונן והנה אין לאיוב מוכיח עונה אמריו מכם׃

32:13b.JOB.032.013 פן תאמרו מצאנו חכמה אל ידפנו לא איש׃

32:14b.JOB.032.014 ולא ערך אלי מלין ובאמריכם לא אשיבנו׃

32:15b.JOB.032.015 חתו לא ענו עוד העתיקו מהם מלים׃

32:16b.JOB.032.016 והוחלתי כי לא ידברו כי עמדו לא ענו עוד׃

32:17b.JOB.032.017 אענה אף אני חלקי אחוה דעי אף אני׃

32:18b.JOB.032.018 כי מלתי מלים הציקתני רוח בטני׃

32:19b.JOB.032.019 הנה בטני כיין לא יפתח כאבות חדשים יבקע׃

32:20b.JOB.032.020 אדברה וירוח לי אפתח שפתי ואענה׃

32:21b.JOB.032.021 אל נא אשא פני איש ואל אדם לא אכנה׃

32:22b.JOB.032.022 כי לא ידעתי אכנה כמעט ישאני עשני׃

33

33:1b.JOB.033.001 ואולם שמע נא איוב מלי וכל דברי האזינה׃

33:2b.JOB.033.002 הנה נא פתחתי פי דברה לשוני בחכי׃

33:3b.JOB.033.003 ישר לבי אמרי ודעת שפתי ברור מללו׃

33:4b.JOB.033.004 רוח אל עשתני ונשמת שדי תחיני׃

33:5b.JOB.033.005 אם תוכל השיבני ערכה לפני התיצבה׃

33:6b.JOB.033.006 הן אני כפיך לאל מחמר קרצתי גם אני׃

33:7b.JOB.033.007 הנה אמתי לא תבעתך ואכפי עליך לא יכבד׃

33:8b.JOB.033.008 אך אמרת באזני וקול מלין אשמע׃

33:9b.JOB.033.009 זך אני בלי פשע חף אנכי ולא עון לי׃

33:10b.JOB.033.010 הן תנואות עלי ימצא יחשבני לאויב לו׃

33:11b.JOB.033.011 ישם בסד רגלי ישמר כל ארחתי׃

33:12b.JOB.033.012 הן זאת לא צדקת אענך כי ירבה אלוה מאנוש׃

33:13b.JOB.033.013 מדוע אליו ריבות כי כל דבריו לא יענה׃

33:14b.JOB.033.014 כי באחת ידבר אל ובשתים לא ישורנה׃

33:15b.JOB.033.015 בחלום חזיון לילה בנפל תרדמה על אנשים בתנומות עלי משכב׃

33:16b.JOB.033.016 אז יגלה אזן אנשים ובמסרם יחתם׃

33:17b.JOB.033.017 להסיר אדם מעשה וגוה מגבר יכסה׃

33:18b.JOB.033.018 יחשך נפשו מני שחת וחיתו מעבר בשלח׃

33:19b.JOB.033.019 והוכח במכאוב על משכבו וריב עצמיו אתן׃

33:20b.JOB.033.020 וזהמתו חיתו לחם ונפשו מאכל תאוה׃

33:21b.JOB.033.021 יכל בשרו מראי ושפי עצמותיו לא ראו׃

33:22b.JOB.033.022 ותקרב לשחת נפשו וחיתו לממתים׃

33:23b.JOB.033.023 אם יש עליו מלאך מליץ אחד מני אלף להגיד לאדם ישרו׃

33:24b.JOB.033.024 ויחננו ויאמר פדעהו מרדת שחת מצאתי כפר׃

33:25b.JOB.033.025 רטפש בשרו מנער ישוב לימי עלומיו׃

33:26b.JOB.033.026 יעתר אל אלוה וירצהו וירא פניו בתרועה וישב לאנוש צדקתו׃

33:27b.JOB.033.027 ישר על אנשים ויאמר חטאתי וישר העויתי ולא שוה לי׃

33:28b.JOB.033.028 פדה נפשי מעבר בשחת וחיתי באור תראה׃

33:29b.JOB.033.029 הן כל אלה יפעל אל פעמים שלוש עם גבר׃

33:30b.JOB.033.030 להשיב נפשו מני שחת לאור באור החיים׃

33:31b.JOB.033.031 הקשב איוב שמע לי החרש ואנכי אדבר׃

33:32b.JOB.033.032 אם יש מלין השיבני דבר כי חפצתי צדקך׃

33:33b.JOB.033.033 אם אין אתה שמע לי החרש ואאלפך חכמה׃

34

34:1b.JOB.034.001 ויען אליהוא ויאמר׃

34:2b.JOB.034.002 שמעו חכמים מלי וידעים האזינו לי׃

34:3b.JOB.034.003 כי אזן מלין תבחן וחך יטעם לאכל׃

34:4b.JOB.034.004 משפט נבחרה לנו נדעה בינינו מה טוב׃

34:5b.JOB.034.005 כי אמר איוב צדקתי ואל הסיר משפטי׃

34:6b.JOB.034.006 על משפטי אכזב אנוש חצי בלי פשע׃

34:7b.JOB.034.007 מי גבר כאיוב ישתה לעג כמים׃

34:8b.JOB.034.008 וארח לחברה עם פעלי און וללכת עם אנשי רשע׃

34:9b.JOB.034.009 כי אמר לא יסכן גבר ברצתו עם אלהים׃

34:10b.JOB.034.010 לכן אנשי לבב שמעו לי חללה לאל מרשע ושדי מעול׃

34:11b.JOB.034.011 כי פעל אדם ישלם לו וכארח איש ימצאנו׃

34:12b.JOB.034.012 אף אמנם אל לא ירשיע ושדי לא יעות משפט׃

34:13b.JOB.034.013 מי פקד עליו ארצה ומי שם תבל כלה׃

34:14b.JOB.034.014 אם ישים אליו לבו רוחו ונשמתו אליו יאסף׃

34:15b.JOB.034.015 יגוע כל בשר יחד ואדם על עפר ישוב׃

34:16b.JOB.034.016 ואם בינה שמעה זאת האזינה לקול מלי׃

34:17b.JOB.034.017 האף שונא משפט יחבוש ואם צדיק כביר תרשיע׃

34:18b.JOB.034.018 האמר למלך בליעל רשע אל נדיבים׃

34:19b.JOB.034.019 אשר לא נשא פני שרים ולא נכר שוע לפני דל כי מעשה ידיו כלם׃

34:20b.JOB.034.020 רגע ימתו וחצות לילה יגעשו עם ויעברו ויסירו אביר לא ביד׃

34:21b.JOB.034.021 כי עיניו על דרכי איש וכל צעדיו יראה׃

34:22b.JOB.034.022 אין חשך ואין צלמות להסתר שם פעלי און׃

34:23b.JOB.034.023 כי לא על איש ישים עוד להלך אל אל במשפט׃

34:24b.JOB.034.024 ירע כבירים לא חקר ויעמד אחרים תחתם׃

34:25b.JOB.034.025 לכן יכיר מעבדיהם והפך לילה וידכאו׃

34:26b.JOB.034.026 תחת רשעים ספקם במקום ראים׃

34:27b.JOB.034.027 אשר על כן סרו מאחריו וכל דרכיו לא השכילו׃

34:28b.JOB.034.028 להביא עליו צעקת דל וצעקת עניים ישמע׃

34:29b.JOB.034.029 והוא ישקט ומי ירשע ויסתר פנים ומי ישורנו ועל גוי ועל אדם יחד׃

34:30b.JOB.034.030 ממלך אדם חנף ממקשי עם׃

34:31b.JOB.034.031 כי אל אל האמר נשאתי לא אחבל׃

34:32b.JOB.034.032 בלעדי אחזה אתה הרני אם עול פעלתי לא אסיף׃

34:33b.JOB.034.033 המעמך ישלמנה כי מאסת כי אתה תבחר ולא אני ומה ידעת דבר׃

34:34b.JOB.034.034 אנשי לבב יאמרו לי וגבר חכם שמע לי׃

34:35b.JOB.034.035 איוב לא בדעת ידבר ודבריו לא בהשכיל׃

34:36b.JOB.034.036 אבי יבחן איוב עד נצח על תשבת באנשי און׃

34:37b.JOB.034.037 כי יסיף על חטאתו פשע בינינו יספוק וירב אמריו לאל׃

35

35:1b.JOB.035.001 ויען אליהו ויאמר׃

35:2b.JOB.035.002 הזאת חשבת למשפט אמרת צדקי מאל׃

35:3b.JOB.035.003 כי תאמר מה יסכן לך מה אעיל מחטאתי׃

35:4b.JOB.035.004 אני אשיבך מלין ואת רעיך עמך׃

35:5b.JOB.035.005 הבט שמים וראה ושור שחקים גבהו ממך׃

35:6b.JOB.035.006 אם חטאת מה תפעל בו ורבו פשעיך מה תעשה לו׃

35:7b.JOB.035.007 אם צדקת מה תתן לו או מה מידך יקח׃

35:8b.JOB.035.008 לאיש כמוך רשעך ולבן אדם צדקתך׃

35:9b.JOB.035.009 מרב עשוקים יזעיקו ישועו מזרוע רבים׃

35:10b.JOB.035.010 ולא אמר איה אלוה עשי נתן זמרות בלילה׃

35:11b.JOB.035.011 מלפנו מבהמות ארץ ומעוף השמים יחכמנו׃

35:12b.JOB.035.012 שם יצעקו ולא יענה מפני גאון רעים׃

35:13b.JOB.035.013 אך שוא לא ישמע אל ושדי לא ישורנה׃

35:14b.JOB.035.014 אף כי תאמר לא תשורנו דין לפניו ותחולל לו׃

35:15b.JOB.035.015 ועתה כי אין פקד אפו ולא ידע בפש מאד׃

35:16b.JOB.035.016 ואיוב הבל יפצה פיהו בבלי דעת מלין יכבר׃

36

36:1b.JOB.036.001 ויסף אליהוא ויאמר׃

36:2b.JOB.036.002 כתר לי זעיר ואחוך כי עוד לאלוה מלים׃

36:3b.JOB.036.003 אשא דעי למרחוק ולפעלי אתן צדק׃

36:4b.JOB.036.004 כי אמנם לא שקר מלי תמים דעות עמך׃

36:5b.JOB.036.005 הן אל כביר ולא ימאס כביר כח לב׃

36:6b.JOB.036.006 לא יחיה רשע ומשפט עניים יתן׃

36:7b.JOB.036.007 לא יגרע מצדיק עיניו ואת מלכים לכסא וישיבם לנצח ויגבהו׃

36:8b.JOB.036.008 ואם אסורים בזקים ילכדון בחבלי עני׃

36:9b.JOB.036.009 ויגד להם פעלם ופשעיהם כי יתגברו׃

36:10b.JOB.036.010 ויגל אזנם למוסר ויאמר כי ישבון מאון׃

36:11b.JOB.036.011 אם ישמעו ויעבדו יכלו ימיהם בטוב ושניהם בנעימים׃

36:12b.JOB.036.012 ואם לא ישמעו בשלח יעברו ויגועו בבלי דעת׃

36:13b.JOB.036.013 וחנפי לב ישימו אף לא ישועו כי אסרם׃

36:14b.JOB.036.014 תמת בנער נפשם וחיתם בקדשים׃

36:15b.JOB.036.015 יחלץ עני בעניו ויגל בלחץ אזנם׃

36:16b.JOB.036.016 ואף הסיתך מפי צר רחב לא מוצק תחתיה ונחת שלחנך מלא דשן׃

36:17b.JOB.036.017 ודין רשע מלאת דין ומשפט יתמכו׃

36:18b.JOB.036.018 כי חמה פן יסיתך בספק ורב כפר אל יטך׃

36:19b.JOB.036.019 היערך שועך לא בצר וכל מאמצי כח׃

36:20b.JOB.036.020 אל תשאף הלילה לעלות עמים תחתם׃

36:21b.JOB.036.021 השמר אל תפן אל און כי על זה בחרת מעני׃

36:22b.JOB.036.022 הן אל ישגיב בכחו מי כמהו מורה׃

36:23b.JOB.036.023 מי פקד עליו דרכו ומי אמר פעלת עולה׃

36:24b.JOB.036.024 זכר כי תשגיא פעלו אשר שררו אנשים׃

36:25b.JOB.036.025 כל אדם חזו בו אנוש יביט מרחוק׃

36:26b.JOB.036.026 הן אל שגיא ולא נדע מספר שניו ולא חקר׃

36:27b.JOB.036.027 כי יגרע נטפי מים יזקו מטר לאדו׃

36:28b.JOB.036.028 אשר יזלו שחקים ירעפו עלי אדם רב׃

36:29b.JOB.036.029 אף אם יבין מפרשי עב תשאות סכתו׃

36:30b.JOB.036.030 הן פרש עליו אורו ושרשי הים כסה׃

36:31b.JOB.036.031 כי בם ידין עמים יתן אכל למכביר׃

36:32b.JOB.036.032 על כפים כסה אור ויצו עליה במפגיע׃

36:33b.JOB.036.033 יגיד עליו רעו מקנה אף על עולה׃

37

37:1b.JOB.037.001 אף לזאת יחרד לבי ויתר ממקומו׃

37:2b.JOB.037.002 שמעו שמוע ברגז קלו והגה מפיו יצא׃

37:3b.JOB.037.003 תחת כל השמים ישרהו ואורו על כנפות הארץ׃

37:4b.JOB.037.004 אחריו ישאג קול ירעם בקול גאונו ולא יעקבם כי ישמע קולו׃

37:5b.JOB.037.005 ירעם אל בקולו נפלאות עשה גדלות ולא נדע׃

37:6b.JOB.037.006 כי לשלג יאמר הוא ארץ וגשם מטר וגשם מטרות עזו׃

37:7b.JOB.037.007 ביד כל אדם יחתום לדעת כל אנשי מעשהו׃

37:8b.JOB.037.008 ותבא חיה במו ארב ובמעונתיה תשכן׃

37:9b.JOB.037.009 מן החדר תבוא סופה וממזרים קרה׃

37:10b.JOB.037.010 מנשמת אל יתן קרח ורחב מים במוצק׃

37:11b.JOB.037.011 אף ברי יטריח עב יפיץ ענן אורו׃

37:12b.JOB.037.012 והוא מסבות מתהפך בתחבולתו לפעלם כל אשר יצום על פני תבל ארצה׃

37:13b.JOB.037.013 אם לשבט אם לארצו אם לחסד ימצאהו׃

37:14b.JOB.037.014 האזינה זאת איוב עמד והתבונן נפלאות אל׃

37:15b.JOB.037.015 התדע בשום אלוה עליהם והופיע אור עננו׃

37:16b.JOB.037.016 התדע על מפלשי עב מפלאות תמים דעים׃

37:17b.JOB.037.017 אשר בגדיך חמים בהשקט ארץ מדרום׃

37:18b.JOB.037.018 תרקיע עמו לשחקים חזקים כראי מוצק׃

37:19b.JOB.037.019 הודיענו מה נאמר לו לא נערך מפני חשך׃

37:20b.JOB.037.020 היספר לו כי אדבר אם אמר איש כי יבלע׃

37:21b.JOB.037.021 ועתה לא ראו אור בהיר הוא בשחקים ורוח עברה ותטהרם׃

37:22b.JOB.037.022 מצפון זהב יאתה על אלוה נורא הוד׃

37:23b.JOB.037.023 שדי לא מצאנהו שגיא כח ומשפט ורב צדקה לא יענה׃

37:24b.JOB.037.024 לכן יראוהו אנשים לא יראה כל חכמי לב׃

38

38:1b.JOB.038.001 ויען יהוה את איוב מן הסערה ויאמר׃

38:2b.JOB.038.002 מי זה מחשיך עצה במלין בלי דעת׃

38:3b.JOB.038.003 אזר נא כגבר חלציך ואשאלך והודיעני׃

38:4b.JOB.038.004 איפה היית ביסדי ארץ הגד אם ידעת בינה׃

38:5b.JOB.038.005 מי שם ממדיה כי תדע או מי נטה עליה קו׃

38:6b.JOB.038.006 על מה אדניה הטבעו או מי ירה אבן פנתה׃

38:7b.JOB.038.007 ברן יחד כוכבי בקר ויריעו כל בני אלהים׃

38:8b.JOB.038.008 ויסך בדלתים ים בגיחו מרחם יצא׃

38:9b.JOB.038.009 בשומי ענן לבשו וערפל חתלתו׃

38:10b.JOB.038.010 ואשבר עליו חקי ואשים בריח ודלתים׃

38:11b.JOB.038.011 ואמר עד פה תבוא ולא תסיף ופא ישית בגאון גליך׃

38:12b.JOB.038.012 המימיך צוית בקר ידעתה שחר מקמו׃

38:13b.JOB.038.013 לאחז בכנפות הארץ וינערו רשעים ממנה׃

38:14b.JOB.038.014 תתהפך כחמר חותם ויתיצבו כמו לבוש׃

38:15b.JOB.038.015 וימנע מרשעים אורם וזרוע רמה תשבר׃

38:16b.JOB.038.016 הבאת עד נבכי ים ובחקר תהום התהלכת׃

38:17b.JOB.038.017 הנגלו לך שערי מות ושערי צלמות תראה׃

38:18b.JOB.038.018 התבננת עד רחבי ארץ הגד אם ידעת כלה׃

38:19b.JOB.038.019 אי זה הדרך ישכן אור וחשך אי זה מקמו׃

38:20b.JOB.038.020 כי תקחנו אל גבולו וכי תבין נתיבות ביתו׃

38:21b.JOB.038.021 ידעת כי אז תולד ומספר ימיך רבים׃

38:22b.JOB.038.022 הבאת אל אצרות שלג ואצרות ברד תראה׃

38:23b.JOB.038.023 אשר חשכתי לעת צר ליום קרב ומלחמה׃

38:24b.JOB.038.024 אי זה הדרך יחלק אור יפץ קדים עלי ארץ׃

38:25b.JOB.038.025 מי פלג לשטף תעלה ודרך לחזיז קלות׃

38:26b.JOB.038.026 להמטיר על ארץ לא איש מדבר לא אדם בו׃

38:27b.JOB.038.027 להשביע שאה ומשאה ולהצמיח מצא דשא׃

38:28b.JOB.038.028 היש למטר אב או מי הוליד אגלי טל׃

38:29b.JOB.038.029 מבטן מי יצא הקרח וכפר שמים מי ילדו׃

38:30b.JOB.038.030 כאבן מים יתחבאו ופני תהום יתלכדו׃

38:31b.JOB.038.031 התקשר מעדנות כימה או משכות כסיל תפתח׃

38:32b.JOB.038.032 התציא מזרות בעתו ועיש על בניה תנחם׃

38:33b.JOB.038.033 הידעת חקות שמים אם תשים משטרו בארץ׃

38:34b.JOB.038.034 התרים לעב קולך ושפעת מים תכסך׃

38:35b.JOB.038.035 התשלח ברקים וילכו ויאמרו לך הננו׃

38:36b.JOB.038.036 מי שת בטחות חכמה או מי נתן לשכוי בינה׃

38:37b.JOB.038.037 מי יספר שחקים בחכמה ונבלי שמים מי ישכיב׃

38:38b.JOB.038.038 בצקת עפר למוצק ורגבים ידבקו׃

38:39b.JOB.038.039 התצוד ללביא טרף וחית כפירים תמלא׃

38:40b.JOB.038.040 כי ישחו במעונות ישבו בסכה למו ארב׃

38:41b.JOB.038.041 מי יכין לערב צידו כי ילדו אל אל ישועו יתעו לבלי אכל׃

39

39:1b.JOB.039.001 הידעת עת לדת יעלי סלע חלל אילות תשמר׃

39:2b.JOB.039.002 תספר ירחים תמלאנה וידעת עת לדתנה׃

39:3b.JOB.039.003 תכרענה ילדיהן תפלחנה חבליהם תשלחנה׃

39:4b.JOB.039.004 יחלמו בניהם ירבו בבר יצאו ולא שבו למו׃

39:5b.JOB.039.005 מי שלח פרא חפשי ומסרות ערוד מי פתח׃

39:6b.JOB.039.006 אשר שמתי ערבה ביתו ומשכנותיו מלחה׃

39:7b.JOB.039.007 ישחק להמון קריה תשאות נוגש לא ישמע׃

39:8b.JOB.039.008 יתור הרים מרעהו ואחר כל ירוק ידרוש׃

39:9b.JOB.039.009 היאבה רים עבדך אם ילין על אבוסך׃

39:10b.JOB.039.010 התקשר רים בתלם עבתו אם ישדד עמקים אחריך׃

39:11b.JOB.039.011 התבטח בו כי רב כחו ותעזב אליו יגיעך׃

39:12b.JOB.039.012 התאמין בו כי ישוב זרעך וגרנך יאסף׃

39:13b.JOB.039.013 כנף רננים נעלסה אם אברה חסידה ונצה׃

39:14b.JOB.039.014 כי תעזב לארץ בציה ועל עפר תחמם׃

39:15b.JOB.039.015 ותשכח כי רגל תזורה וחית השדה תדושה׃

39:16b.JOB.039.016 הקשיח בניה ללא לה לריק יגיעה בלי פחד׃

39:17b.JOB.039.017 כי השה אלוה חכמה ולא חלק לה בבינה׃

39:18b.JOB.039.018 כעת במרום תמריא תשחק לסוס ולרכבו׃

39:19b.JOB.039.019 התתן לסוס גבורה התלביש צוארו רעמה׃

39:20b.JOB.039.020 התרעישנו כארבה הוד נחרו אימה׃

39:21b.JOB.039.021 יחפרו בעמק וישיש בכח יצא לקראת נשק׃

39:22b.JOB.039.022 ישחק לפחד ולא יחת ולא ישוב מפני חרב׃

39:23b.JOB.039.023 עליו תרנה אשפה להב חנית וכידון׃

39:24b.JOB.039.024 ברעש ורגז יגמא ארץ ולא יאמין כי קול שופר׃

39:25b.JOB.039.025 בדי שפר יאמר האח ומרחוק יריח מלחמה רעם שרים ותרועה׃

39:26b.JOB.039.026 המבינתך יאבר נץ יפרש כנפו לתימן׃

39:27b.JOB.039.027 אם על פיך יגביה נשר וכי ירים קנו׃

39:28b.JOB.039.028 סלע ישכן ויתלנן על שן סלע ומצודה׃

39:29b.JOB.039.029 משם חפר אכל למרחוק עיניו יביטו׃

39:30b.JOB.039.030 ואפרחו יעלעו דם ובאשר חללים שם הוא׃

40

40:1b.JOB.040.001 ויען יהוה את איוב ויאמר׃

40:2b.JOB.040.002 הרב עם שדי יסור מוכיח אלוה יעננה׃

40:3b.JOB.040.003 ויען איוב את יהוה ויאמר׃

40:4b.JOB.040.004 הן קלתי מה אשיבך ידי שמתי למו פי׃

40:5b.JOB.040.005 אחת דברתי ולא אענה ושתים ולא אוסיף׃

40:6b.JOB.040.006 ויען יהוה את איוב מן סערה ויאמר׃

40:7b.JOB.040.007 אזר נא כגבר חלציך אשאלך והודיעני׃

40:8b.JOB.040.008 האף תפר משפטי תרשיעני למען תצדק׃

40:9b.JOB.040.009 ואם זרוע כאל לך ובקול כמהו תרעם׃

40:10b.JOB.040.010 עדה נא גאון וגבה והוד והדר תלבש׃

40:11b.JOB.040.011 הפץ עברות אפך וראה כל גאה והשפילהו׃

40:12b.JOB.040.012 ראה כל גאה הכניעהו והדך רשעים תחתם׃

40:13b.JOB.040.013 טמנם בעפר יחד פניהם חבש בטמון׃

40:14b.JOB.040.014 וגם אני אודך כי תושע לך ימינך׃

40:15b.JOB.040.015 הנה נא בהמות אשר עשיתי עמך חציר כבקר יאכל׃

40:16b.JOB.040.016 הנה נא כחו במתניו ואנו בשרירי בטנו׃

40:17b.JOB.040.017 יחפץ זנבו כמו ארז גידי פחדו ישרגו׃

40:18b.JOB.040.018 עצמיו אפיקי נחושה גרמיו כמטיל ברזל׃

40:19b.JOB.040.019 הוא ראשית דרכי אל העשו יגש חרבו׃

40:20b.JOB.040.020 כי בול הרים ישאו לו וכל חית השדה ישחקו שם׃

40:21b.JOB.040.021 תחת צאלים ישכב בסתר קנה ובצה׃

40:22b.JOB.040.022 יסכהו צאלים צללו יסבוהו ערבי נחל׃

40:23b.JOB.040.023 הן יעשק נהר לא יחפוז יבטח כי יגיח ירדן אל פיהו׃

40:24b.JOB.040.024 בעיניו יקחנו במוקשים ינקב אף׃

41

41:1b.JOB.041.001 תמשך לויתן בחכה ובחבל תשקיע לשנו׃

41:2b.JOB.041.002 התשים אגמון באפו ובחוח תקוב לחיו׃

41:3b.JOB.041.003 הירבה אליך תחנונים אם ידבר אליך רכות׃

41:4b.JOB.041.004 היכרת ברית עמך תקחנו לעבד עולם׃

41:5b.JOB.041.005 התשחק בו כצפור ותקשרנו לנערותיך׃

41:6b.JOB.041.006 יכרו עליו חברים יחצוהו בין כנענים׃

41:7b.JOB.041.007 התמלא בשכות עורו ובצלצל דגים ראשו׃

41:8b.JOB.041.008 שים עליו כפך זכר מלחמה אל תוסף׃

41:9b.JOB.041.009 הן תחלתו נכזבה הגם אל מראיו יטל׃

41:10b.JOB.041.010 לא אכזר כי יעורנו ומי הוא לפני יתיצב׃

41:11b.JOB.041.011 מי הקדימני ואשלם תחת כל השמים לי הוא׃

41:12b.JOB.041.012 לא אחריש בדיו ודבר גבורות וחין ערכו׃

41:13b.JOB.041.013 מי גלה פני לבושו בכפל רסנו מי יבוא׃

41:14b.JOB.041.014 דלתי פניו מי פתח סביבות שניו אימה׃

41:15b.JOB.041.015 גאוה אפיקי מגנים סגור חותם צר׃

41:16b.JOB.041.016 אחד באחד יגשו ורוח לא יבוא ביניהם׃

41:17b.JOB.041.017 איש באחיהו ידבקו יתלכדו ולא יתפרדו׃

41:18b.JOB.041.018 עטישתיו תהל אור ועיניו כעפעפי שחר׃

41:19b.JOB.041.019 מפיו לפידים יהלכו כידודי אש יתמלטו׃

41:20b.JOB.041.020 מנחיריו יצא עשן כדוד נפוח ואגמן׃

41:21b.JOB.041.021 נפשו גחלים תלהט ולהב מפיו יצא׃

41:22b.JOB.041.022 בצוארו ילין עז ולפניו תדוץ דאבה׃

41:23b.JOB.041.023 מפלי בשרו דבקו יצוק עליו בל ימוט׃

41:24b.JOB.041.024 לבו יצוק כמו אבן ויצוק כפלח תחתית׃

41:25b.JOB.041.025 משתו יגורו אלים משברים יתחטאו׃

41:26b.JOB.041.026 משיגהו חרב בלי תקום חנית מסע ושריה׃

41:27b.JOB.041.027 יחשב לתבן ברזל לעץ רקבון נחושה׃

41:28b.JOB.041.028 לא יבריחנו בן קשת לקש נהפכו לו אבני קלע׃

41:29b.JOB.041.029 כקש נחשבו תותח וישחק לרעש כידון׃

41:30b.JOB.041.030 תחתיו חדודי חרש ירפד חרוץ עלי טיט׃

41:31b.JOB.041.031 ירתיח כסיר מצולה ים ישים כמרקחה׃

41:32b.JOB.041.032 אחריו יאיר נתיב יחשב תהום לשיבה׃

41:33b.JOB.041.033 אין על עפר משלו העשו לבלי חת׃

41:34b.JOB.041.034 את כל גבה יראה הוא מלך על כל בני שחץ׃

42

42:1b.JOB.042.001 ויען איוב את יהוה ויאמר׃

42:2b.JOB.042.002 ידעת כי כל תוכל ולא יבצר ממך מזמה׃

42:3b.JOB.042.003 מי זה מעלים עצה בלי דעת לכן הגדתי ולא אבין נפלאות ממני ולא אדע׃

42:4b.JOB.042.004 שמע נא ואנכי אדבר אשאלך והודיעני׃

42:5b.JOB.042.005 לשמע אזן שמעתיך ועתה עיני ראתך׃

42:6b.JOB.042.006 על כן אמאס ונחמתי על עפר ואפר׃

42:7b.JOB.042.007 ויהי אחר דבר יהוה את הדברים האלה אל איוב ויאמר יהוה אל אליפז התימני חרה אפי בך ובשני רעיך כי לא דברתם אלי נכונה כעבדי איוב׃

42:8b.JOB.042.008 ועתה קחו לכם שבעה פרים ושבעה אילים ולכו אל עבדי איוב והעליתם עולה בעדכם ואיוב עבדי יתפלל עליכם כי אם פניו אשא לבלתי עשות עמכם נבלה כי לא דברתם אלי נכונה כעבדי איוב׃

42:9b.JOB.042.009 וילכו אליפז התימני ובלדד השוחי צפר הנעמתי ויעשו כאשר דבר אליהם יהוה וישא יהוה את פני איוב׃

42:10b.JOB.042.010 ויהוה שב את שבית איוב בהתפללו בעד רעהו ויסף יהוה את כל אשר לאיוב למשנה׃

42:11b.JOB.042.011 ויבאו אליו כל אחיו וכל אחיתיו וכל ידעיו לפנים ויאכלו עמו לחם בביתו וינדו לו וינחמו אתו על כל הרעה אשר הביא יהוה עליו ויתנו לו איש קשיטה אחת ואיש נזם זהב אחד׃

42:12b.JOB.042.012 ויהוה ברך את אחרית איוב מראשתו ויהי לו ארבעה עשר אלף צאן וששת אלפים גמלים ואלף צמד בקר ואלף אתונות׃

42:13b.JOB.042.013 ויהי לו שבענה בנים ושלוש בנות׃

42:14b.JOB.042.014 ויקרא שם האחת ימימה ושם השנית קציעה ושם השלישית קרן הפוך׃

42:15b.JOB.042.015 ולא נמצא נשים יפות כבנות איוב בכל הארץ ויתן להם אביהם נחלה בתוך אחיהם׃

42:16b.JOB.042.016 ויחי איוב אחרי זאת מאה וארבעים שנה וירא את בניו ואת בני בניו ארבעה דרות׃

42:17b.JOB.042.017 וימת איוב זקן ושבע ימים׃