Nehemiah (Hebrew)

1

1:1b.NEH.001.001 דברי נחמיה בן חכליה ויהי בחדש כסלו שנת עשרים ואני הייתי בשושן הבירה׃

1:2b.NEH.001.002 ויבא חנני אחד מאחי הוא ואנשים מיהודה ואשאלם על היהודים הפליטה אשר נשארו מן השבי ועל ירושלם׃

1:3b.NEH.001.003 ויאמרו לי הנשארים אשר נשארו מן השבי שם במדינה ברעה גדלה ובחרפה וחומת ירושלם מפרצת ושעריה נצתו באש׃

1:4b.NEH.001.004 ויהי כשמעי את הדברים האלה ישבתי ואבכה ואתאבלה ימים ואהי צם ומתפלל לפני אלהי השמים׃

1:5b.NEH.001.005 ואמר אנא יהוה אלהי השמים האל הגדול והנורא שמר הברית וחסד לאהביו ולשמרי מצותיו׃

1:6b.NEH.001.006 תהי נא אזנך קשבת ועיניך פתוחות לשמע אל תפלת עבדך אשר אנכי מתפלל לפניך היום יומם ולילה על בני ישראל עבדיך ומתודה על חטאות בני ישראל אשר חטאנו לך ואני ובית אבי חטאנו׃

1:7b.NEH.001.007 חבל חבלנו לך ולא שמרנו את המצות ואת החקים ואת המשפטים אשר צוית את משה עבדך׃

1:8b.NEH.001.008 זכר נא את הדבר אשר צוית את משה עבדך לאמר אתם תמעלו אני אפיץ אתכם בעמים׃

1:9b.NEH.001.009 ושבתם אלי ושמרתם מצותי ועשיתם אתם אם יהיה נדחכם בקצה השמים משם אקבצם והבואתים אל המקום אשר בחרתי לשכן את שמי שם׃

1:10b.NEH.001.010 והם עבדיך ועמך אשר פדית בכחך הגדול ובידך החזקה׃

1:11b.NEH.001.011 אנא אדני תהי נא אזנך קשבת אל תפלת עבדך ואל תפלת עבדיך החפצים ליראה את שמך והצליחה נא לעבדך היום ותנהו לרחמים לפני האיש הזה ואני הייתי משקה למלך׃

2

2:1b.NEH.002.001 ויהי בחדש ניסן שנת עשרים לארתחשסתא המלך יין לפניו ואשא את היין ואתנה למלך ולא הייתי רע לפניו׃

2:2b.NEH.002.002 ויאמר לי המלך מדוע פניך רעים ואתה אינך חולה אין זה כי אם רע לב ואירא הרבה מאד׃

2:3b.NEH.002.003 ואמר למלך המלך לעולם יחיה מדוע לא ירעו פני אשר העיר בית קברות אבתי חרבה ושעריה אכלו באש׃

2:4b.NEH.002.004 ויאמר לי המלך על מה זה אתה מבקש ואתפלל אל אלהי השמים׃

2:5b.NEH.002.005 ואמר למלך אם על המלך טוב ואם ייטב עבדך לפניך אשר תשלחני אל יהודה אל עיר קברות אבתי ואבננה׃

2:6b.NEH.002.006 ויאמר לי המלך והשגל יושבת אצלו עד מתי יהיה מהלכך ומתי תשוב וייטב לפני המלך וישלחני ואתנה לו זמן׃

2:7b.NEH.002.007 ואומר למלך אם על המלך טוב אגרות יתנו לי על פחוות עבר הנהר אשר יעבירוני עד אשר אבוא אל יהודה׃

2:8b.NEH.002.008 ואגרת אל אסף שמר הפרדס אשר למלך אשר יתן לי עצים לקרות את שערי הבירה אשר לבית ולחומת העיר ולבית אשר אבוא אליו ויתן לי המלך כיד אלהי הטובה עלי׃

2:9b.NEH.002.009 ואבוא אל פחוות עבר הנהר ואתנה להם את אגרות המלך וישלח עמי המלך שרי חיל ופרשים׃

2:10b.NEH.002.010 וישמע סנבלט החרני וטוביה העבד העמני וירע להם רעה גדלה אשר בא אדם לבקש טובה לבני ישראל׃

2:11b.NEH.002.011 ואבוא אל ירושלם ואהי שם ימים שלשה׃

2:12b.NEH.002.012 ואקום לילה אני ואנשים מעט עמי ולא הגדתי לאדם מה אלהי נתן אל לבי לעשות לירושלם ובהמה אין עמי כי אם הבהמה אשר אני רכב בה׃

2:13b.NEH.002.013 ואצאה בשער הגיא לילה ואל פני עין התנין ואל שער האשפת ואהי שבר בחומת ירושלם אשר הם פרוצים ושעריה אכלו באש׃

2:14b.NEH.002.014 ואעבר אל שער העין ואל ברכת המלך ואין מקום לבהמה לעבר תחתי׃

2:15b.NEH.002.015 ואהי עלה בנחל לילה ואהי שבר בחומה ואשוב ואבוא בשער הגיא ואשוב׃

2:16b.NEH.002.016 והסגנים לא ידעו אנה הלכתי ומה אני עשה וליהודים ולכהנים ולחרים ולסגנים וליתר עשה המלאכה עד כן לא הגדתי׃

2:17b.NEH.002.017 ואומר אלהם אתם ראים הרעה אשר אנחנו בה אשר ירושלם חרבה ושעריה נצתו באש לכו ונבנה את חומת ירושלם ולא נהיה עוד חרפה׃

2:18b.NEH.002.018 ואגיד להם את יד אלהי אשר היא טובה עלי ואף דברי המלך אשר אמר לי ויאמרו נקום ובנינו ויחזקו ידיהם לטובה׃

2:19b.NEH.002.019 וישמע סנבלט החרני וטביה העבד העמוני וגשם הערבי וילעגו לנו ויבזו עלינו ויאמרו מה הדבר הזה אשר אתם עשים העל המלך אתם מרדים׃

2:20b.NEH.002.020 ואשיב אותם דבר ואומר להם אלהי השמים הוא יצליח לנו ואנחנו עבדיו נקום ובנינו ולכם אין חלק וצדקה וזכרון בירושלם׃

3

3:1b.NEH.003.001 ויקם אלישיב הכהן הגדול ואחיו הכהנים ויבנו את שער הצאן המה קדשוהו ויעמידו דלתתיו ועד מגדל המאה קדשוהו עד מגדל חננאל׃

3:2b.NEH.003.002 ועל ידו בנו אנשי ירחו ועל ידו בנה זכור בן אמרי׃

3:3b.NEH.003.003 ואת שער הדגים בנו בני הסנאה המה קרוהו ויעמידו דלתתיו מנעוליו ובריחיו׃

3:4b.NEH.003.004 ועל ידם החזיק מרמות בן אוריה בן הקוץ ועל ידם החזיק משלם בן ברכיה בן משיזבאל ועל ידם החזיק צדוק בן בענא׃

3:5b.NEH.003.005 ועל ידם החזיקו התקועים ואדיריהם לא הביאו צורם בעבדת אדניהם׃

3:6b.NEH.003.006 ואת שער הישנה החזיקו יוידע בן פסח ומשלם בן בסודיה המה קרוהו ויעמידו דלתתיו ומנעליו ובריחיו׃

3:7b.NEH.003.007 ועל ידם החזיק מלטיה הגבעני וידון המרנתי אנשי גבעון והמצפה לכסא פחת עבר הנהר׃

3:8b.NEH.003.008 על ידו החזיק עזיאל בן חרהיה צורפים ועל ידו החזיק חנניה בן הרקחים ויעזבו ירושלם עד החומה הרחבה׃

3:9b.NEH.003.009 ועל ידם החזיק רפיה בן חור שר חצי פלך ירושלם׃

3:10b.NEH.003.010 ועל ידם החזיק ידיה בן חרומף ונגד ביתו ועל ידו החזיק חטוש בן חשבניה׃

3:11b.NEH.003.011 מדה שנית החזיק מלכיה בן חרם וחשוב בן פחת מואב ואת מגדל התנורים׃

3:12b.NEH.003.012 ועל ידו החזיק שלום בן הלוחש שר חצי פלך ירושלם הוא ובנותיו׃

3:13b.NEH.003.013 את שער הגיא החזיק חנון וישבי זנוח המה בנוהו ויעמידו דלתתיו מנעליו ובריחיו ואלף אמה בחומה עד שער השפות׃

3:14b.NEH.003.014 ואת שער האשפות החזיק מלכיה בן רכב שר פלך בית הכרם הוא יבננו ויעמיד דלתתיו מנעליו ובריחיו׃

3:15b.NEH.003.015 ואת שער העין החזיק שלון בן כל חזה שר פלך המצפה הוא יבננו ויטללנו ויעמידו דלתתיו מנעליו ובריחיו ואת חומת ברכת השלח לגן המלך ועד המעלות היורדות מעיר דויד׃

3:16b.NEH.003.016 אחריו החזיק נחמיה בן עזבוק שר חצי פלך בית צור עד נגד קברי דויד ועד הברכה העשויה ועד בית הגברים׃

3:17b.NEH.003.017 אחריו החזיקו הלוים רחום בן בני על ידו החזיק חשביה שר חצי פלך קעילה לפלכו׃

3:18b.NEH.003.018 אחריו החזיקו אחיהם בוי בן חנדד שר חצי פלך קעילה׃

3:19b.NEH.003.019 ויחזק על ידו עזר בן ישוע שר המצפה מדה שנית מנגד עלת הנשק המקצע׃

3:20b.NEH.003.020 אחריו החרה החזיק ברוך בן זבי מדה שנית מן המקצוע עד פתח בית אלישיב הכהן הגדול׃

3:21b.NEH.003.021 אחריו החזיק מרמות בן אוריה בן הקוץ מדה שנית מפתח בית אלישיב ועד תכלית בית אלישיב׃

3:22b.NEH.003.022 ואחריו החזיקו הכהנים אנשי הככר׃

3:23b.NEH.003.023 אחריו החזיק בנימן וחשוב נגד ביתם אחריו החזיק עזריה בן מעשיה בן ענניה אצל ביתו׃

3:24b.NEH.003.024 אחריו החזיק בנוי בן חנדד מדה שנית מבית עזריה עד המקצוע ועד הפנה׃

3:25b.NEH.003.025 פלל בן אוזי מנגד המקצוע והמגדל היוצא מבית המלך העליון אשר לחצר המטרה אחריו פדיה בן פרעש׃

3:26b.NEH.003.026 והנתינים היו ישבים בעפל עד נגד שער המים למזרח והמגדל היוצא׃

3:27b.NEH.003.027 אחריו החזיקו התקעים מדה שנית מנגד המגדל הגדול היוצא ועד חומת העפל׃

3:28b.NEH.003.028 מעל שער הסוסים החזיקו הכהנים איש לנגד ביתו׃

3:29b.NEH.003.029 אחריו החזיק צדוק בן אמר נגד ביתו ואחריו החזיק שמעיה בן שכניה שמר שער המזרח׃

3:30b.NEH.003.030 אחרי החזיק חנניה בן שלמיה וחנון בן צלף הששי מדה שני אחריו החזיק משלם בן ברכיה נגד נשכתו׃

3:31b.NEH.003.031 אחרי החזיק מלכיה בן הצרפי עד בית הנתינים והרכלים נגד שער המפקד ועד עלית הפנה׃

3:32b.NEH.003.032 ובין עלית הפנה לשער הצאן החזיקו הצרפים והרכלים׃

4

4:1b.NEH.004.001 ויהי כאשר שמע סנבלט כי אנחנו בונים את החומה ויחר לו ויכעס הרבה וילעג על היהודים׃

4:2b.NEH.004.002 ויאמר לפני אחיו וחיל שמרון ויאמר מה היהודים האמללים עשים היעזבו להם היזבחו היכלו ביום היחיו את האבנים מערמות העפר והמה שרופות׃

4:3b.NEH.004.003 וטוביה העמני אצלו ויאמר גם אשר הם בונים אם יעלה שועל ופרץ חומת אבניהם׃

4:4b.NEH.004.004 שמע אלהינו כי היינו בוזה והשב חרפתם אל ראשם ותנם לבזה בארץ שביה׃

4:5b.NEH.004.005 ואל תכס על עונם וחטאתם מלפניך אל תמחה כי הכעיסו לנגד הבונים׃

4:6b.NEH.004.006 ונבנה את החומה ותקשר כל החומה עד חציה ויהי לב לעם לעשות׃

4:7b.NEH.004.007 ויהי כאשר שמע סנבלט וטוביה והערבים והעמנים והאשדודים כי עלתה ארוכה לחמות ירושלם כי החלו הפרצים להסתם ויחר להם מאד׃

4:8b.NEH.004.008 ויקשרו כלם יחדו לבוא להלחם בירושלם ולעשות לו תועה׃

4:9b.NEH.004.009 ונתפלל אל אלהינו ונעמיד משמר עליהם יומם ולילה מפניהם׃

4:10b.NEH.004.010 ויאמר יהודה כשל כח הסבל והעפר הרבה ואנחנו לא נוכל לבנות בחומה׃

4:11b.NEH.004.011 ויאמרו צרינו לא ידעו ולא יראו עד אשר נבוא אל תוכם והרגנום והשבתנו את המלאכה׃

4:12b.NEH.004.012 ויהי כאשר באו היהודים הישבים אצלם ויאמרו לנו עשר פעמים מכל המקמות אשר תשובו עלינו׃

4:13b.NEH.004.013 ואעמיד מתחתיות למקום מאחרי לחומה בצחחיים ואעמיד את העם למשפחות עם חרבתיהם רמחיהם וקשתתיהם׃

4:14b.NEH.004.014 וארא ואקום ואמר אל החרים ואל הסגנים ואל יתר העם אל תיראו מפניהם את אדני הגדול והנורא זכרו והלחמו על אחיכם בניכם ובנתיכם נשיכם ובתיכם׃

4:15b.NEH.004.015 ויהי כאשר שמעו אויבינו כי נודע לנו ויפר האלהים את עצתם ונשוב כלנו אל החומה איש אל מלאכתו׃

4:16b.NEH.004.016 ויהי מן היום ההוא חצי נערי עשים במלאכה וחצים מחזיקים והרמחים המגנים והקשתות והשרינים והשרים אחרי כל בית יהודה׃

4:17b.NEH.004.017 הבונים בחומה והנשאים בסבל עמשים באחת ידו עשה במלאכה ואחת מחזקת השלח׃

4:18b.NEH.004.018 והבונים איש חרבו אסורים על מתניו ובונים והתוקע בשופר אצלי׃

4:19b.NEH.004.019 ואמר אל החרים ואל הסגנים ואל יתר העם המלאכה הרבה ורחבה ואנחנו נפרדים על החומה רחוקים איש מאחיו׃

4:20b.NEH.004.020 במקום אשר תשמעו את קול השופר שמה תקבצו אלינו אלהינו ילחם לנו׃

4:21b.NEH.004.021 ואנחנו עשים במלאכה וחצים מחזיקים ברמחים מעלות השחר עד צאת הכוכבים׃

4:22b.NEH.004.022 גם בעת ההיא אמרתי לעם איש ונערו ילינו בתוך ירושלם והיו לנו הלילה משמר והיום מלאכה׃

4:23b.NEH.004.023 ואין אני ואחי ונערי ואנשי המשמר אשר אחרי אין אנחנו פשטים בגדינו איש שלחו המים׃

5

5:1b.NEH.005.001 ותהי צעקת העם ונשיהם גדולה אל אחיהם היהודים׃

5:2b.NEH.005.002 ויש אשר אמרים בנינו ובנתינו אנחנו רבים ונקחה דגן ונאכלה ונחיה׃

5:3b.NEH.005.003 ויש אשר אמרים שדתינו וכרמינו ובתינו אנחנו ערבים ונקחה דגן ברעב׃

5:4b.NEH.005.004 ויש אשר אמרים לוינו כסף למדת המלך שדתינו וכרמינו׃

5:5b.NEH.005.005 ועתה כבשר אחינו בשרנו כבניהם בנינו והנה אנחנו כבשים את בנינו ואת בנתינו לעבדים ויש מבנתינו נכבשות ואין לאל ידנו ושדתינו וכרמינו לאחרים׃

5:6b.NEH.005.006 ויחר לי מאד כאשר שמעתי את זעקתם ואת הדברים האלה׃

5:7b.NEH.005.007 וימלך לבי עלי ואריבה את החרים ואת הסגנים ואמרה להם משא איש באחיו אתם נשאים ואתן עליהם קהלה גדולה׃

5:8b.NEH.005.008 ואמרה להם אנחנו קנינו את אחינו היהודים הנמכרים לגוים כדי בנו וגם אתם תמכרו את אחיכם ונמכרו לנו ויחרישו ולא מצאו דבר׃

5:9b.NEH.005.009 ויאמר לא טוב הדבר אשר אתם עשים הלוא ביראת אלהינו תלכו מחרפת הגוים אויבינו׃

5:10b.NEH.005.010 וגם אני אחי ונערי נשים בהם כסף ודגן נעזבה נא את המשא הזה׃

5:11b.NEH.005.011 השיבו נא להם כהיום שדתיהם כרמיהם זיתיהם ובתיהם ומאת הכסף והדגן התירוש והיצהר אשר אתם נשים בהם׃

5:12b.NEH.005.012 ויאמרו נשיב ומהם לא נבקש כן נעשה כאשר אתה אומר ואקרא את הכהנים ואשביעם לעשות כדבר הזה׃

5:13b.NEH.005.013 גם חצני נערתי ואמרה ככה ינער האלהים את כל האיש אשר לא יקים את הדבר הזה מביתו ומיגיעו וככה יהיה נעור ורק ויאמרו כל הקהל אמן ויהללו את יהוה ויעש העם כדבר הזה׃

5:14b.NEH.005.014 גם מיום אשר צוה אתי להיות פחם בארץ יהודה משנת עשרים ועד שנת שלשים ושתים לארתחשסתא המלך שנים שתים עשרה אני ואחי לחם הפחה לא אכלתי׃

5:15b.NEH.005.015 והפחות הראשנים אשר לפני הכבידו על העם ויקחו מהם בלחם ויין אחר כסף שקלים ארבעים גם נעריהם שלטו על העם ואני לא עשיתי כן מפני יראת אלהים׃

5:16b.NEH.005.016 וגם במלאכת החומה הזאת החזקתי ושדה לא קנינו וכל נערי קבוצים שם על המלאכה׃

5:17b.NEH.005.017 והיהודים והסגנים מאה וחמשים איש והבאים אלינו מן הגוים אשר סביבתינו על שלחני׃

5:18b.NEH.005.018 ואשר היה נעשה ליום אחד שור אחד צאן שש בררות וצפרים נעשו לי ובין עשרת ימים בכל יין להרבה ועם זה לחם הפחה לא בקשתי כי כבדה העבדה על העם הזה׃

5:19b.NEH.005.019 זכרה לי אלהי לטובה כל אשר עשיתי על העם הזה׃

6

6:1b.NEH.006.001 ויהי כאשר נשמע לסנבלט וטוביה ולגשם הערבי וליתר איבינו כי בניתי את החומה ולא נותר בה פרץ גם עד העת ההיא דלתות לא העמדתי בשערים׃

6:2b.NEH.006.002 וישלח סנבלט וגשם אלי לאמר לכה ונועדה יחדו בכפירים בבקעת אונו והמה חשבים לעשות לי רעה׃

6:3b.NEH.006.003 ואשלחה עליהם מלאכים לאמר מלאכה גדולה אני עשה ולא אוכל לרדת למה תשבת המלאכה כאשר ארפה וירדתי אליכם׃

6:4b.NEH.006.004 וישלחו אלי כדבר הזה ארבע פעמים ואשיב אותם כדבר הזה׃

6:5b.NEH.006.005 וישלח אלי סנבלט כדבר הזה פעם חמישית את נערו ואגרת פתוחה בידו׃

6:6b.NEH.006.006 כתוב בה בגוים נשמע וגשמו אמר אתה והיהודים חשבים למרוד על כן אתה בונה החומה ואתה הוה להם למלך כדברים האלה׃

6:7b.NEH.006.007 וגם נביאים העמדת לקרא עליך בירושלם לאמר מלך ביהודה ועתה ישמע למלך כדברים האלה ועתה לכה ונועצה יחדו׃

6:8b.NEH.006.008 ואשלחה אליו לאמר לא נהיה כדברים האלה אשר אתה אומר כי מלבך אתה בודאם׃

6:9b.NEH.006.009 כי כלם מיראים אותנו לאמר ירפו ידיהם מן המלאכה ולא תעשה ועתה חזק את ידי׃

6:10b.NEH.006.010 ואני באתי בית שמעיה בן דליה בן מהיטבאל והוא עצור ויאמר נועד אל בית האלהים אל תוך ההיכל ונסגרה דלתות ההיכל כי באים להרגך ולילה באים להרגך׃

6:11b.NEH.006.011 ואמרה האיש כמוני יברח ומי כמוני אשר יבוא אל ההיכל וחי לא אבוא׃

6:12b.NEH.006.012 ואכירה והנה לא אלהים שלחו כי הנבואה דבר עלי וטוביה וסנבלט שכרו׃

6:13b.NEH.006.013 למען שכור הוא למען אירא ואעשה כן וחטאתי והיה להם לשם רע למען יחרפוני׃

6:14b.NEH.006.014 זכרה אלהי לטוביה ולסנבלט כמעשיו אלה וגם לנועדיה הנביאה וליתר הנביאים אשר היו מיראים אותי׃

6:15b.NEH.006.015 ותשלם החומה בעשרים וחמשה לאלול לחמשים ושנים יום׃

6:16b.NEH.006.016 ויהי כאשר שמעו כל אויבינו ויראו כל הגוים אשר סביבתינו ויפלו מאד בעיניהם וידעו כי מאת אלהינו נעשתה המלאכה הזאת׃

6:17b.NEH.006.017 גם בימים ההם מרבים חרי יהודה אגרתיהם הולכות על טוביה ואשר לטוביה באות אליהם׃

6:18b.NEH.006.018 כי רבים ביהודה בעלי שבועה לו כי חתן הוא לשכניה בן ארח ויהוחנן בנו לקח את בת משלם בן ברכיה׃

6:19b.NEH.006.019 גם טובתיו היו אמרים לפני ודברי היו מוציאים לו אגרות שלח טוביה ליראני׃

7

7:1b.NEH.007.001 ויהי כאשר נבנתה החומה ואעמיד הדלתות ויפקדו השוערים והמשררים והלוים׃

7:2b.NEH.007.002 ואצוה את חנני אחי ואת חנניה שר הבירה על ירושלם כי הוא כאיש אמת וירא את האלהים מרבים׃

7:3b.NEH.007.003 ויאמר להם לא יפתחו שערי ירושלם עד חם השמש ועד הם עמדים יגיפו הדלתות ואחזו והעמיד משמרות ישבי ירושלם איש במשמרו ואיש נגד ביתו׃

7:4b.NEH.007.004 והעיר רחבת ידים וגדולה והעם מעט בתוכה ואין בתים בנוים׃

7:5b.NEH.007.005 ויתן אלהי אל לבי ואקבצה את החרים ואת הסגנים ואת העם להתיחש ואמצא ספר היחש העולים בראשונה ואמצא כתוב בו׃

7:6b.NEH.007.006 אלה בני המדינה העלים משבי הגולה אשר הגלה נבוכדנצר מלך בבל וישובו לירושלם וליהודה איש לעירו׃

7:7b.NEH.007.007 הבאים עם זרבבל ישוע נחמיה עזריה רעמיה נחמני מרדכי בלשן מספרת בגוי נחום בענה מספר אנשי עם ישראל׃

7:8b.NEH.007.008 בני פרעש אלפים מאה ושבעים ושנים׃

7:9b.NEH.007.009 בני שפטיה שלש מאות שבעים ושנים׃

7:10b.NEH.007.010 בני ארח שש מאות חמשים ושנים׃

7:11b.NEH.007.011 בני פחת מואב לבני ישוע ויואב אלפים ושמנה מאות שמנה עשר׃

7:12b.NEH.007.012 בני עילם אלף מאתים חמשים וארבעה׃

7:13b.NEH.007.013 בני זתוא שמנה מאות ארבעים וחמשה׃

7:14b.NEH.007.014 בני זכי שבע מאות וששים׃

7:15b.NEH.007.015 בני בנוי שש מאות ארבעים ושמנה׃

7:16b.NEH.007.016 בני בבי שש מאות עשרים ושמנה׃

7:17b.NEH.007.017 בני עזגד אלפים שלש מאות עשרים ושנים׃

7:18b.NEH.007.018 בני אדניקם שש מאות ששים ושבעה׃

7:19b.NEH.007.019 בני בגוי אלפים ששים ושבעה׃

7:20b.NEH.007.020 בני עדין שש מאות חמשים וחמשה׃

7:21b.NEH.007.021 בני אטר לחזקיה תשעים ושמנה׃

7:22b.NEH.007.022 בני חשם שלש מאות עשרים ושמנה׃

7:23b.NEH.007.023 בני בצי שלש מאות עשרים וארבעה׃

7:24b.NEH.007.024 בני חריף מאה שנים עשר׃

7:25b.NEH.007.025 בני גבעון תשעים וחמשה׃

7:26b.NEH.007.026 אנשי בית לחם ונטפה מאה שמנים ושמנה׃

7:27b.NEH.007.027 אנשי ענתות מאה עשרים ושמנה׃

7:28b.NEH.007.028 אנשי בית עזמות ארבעים ושנים׃

7:29b.NEH.007.029 אנשי קרית יערים כפירה ובארות שבע מאות ארבעים ושלשה׃

7:30b.NEH.007.030 אנשי הרמה וגבע שש מאות עשרים ואחד׃

7:31b.NEH.007.031 אנשי מכמס מאה ועשרים ושנים׃

7:32b.NEH.007.032 אנשי בית אל והעי מאה עשרים ושלשה׃

7:33b.NEH.007.033 אנשי נבו אחר חמשים ושנים׃

7:34b.NEH.007.034 בני עילם אחר אלף מאתים חמשים וארבעה׃

7:35b.NEH.007.035 בני חרם שלש מאות ועשרים׃

7:36b.NEH.007.036 בני ירחו שלש מאות ארבעים וחמשה׃

7:37b.NEH.007.037 בני לד חדיד ואונו שבע מאות ועשרים ואחד׃

7:38b.NEH.007.038 בני סנאה שלשת אלפים תשע מאות ושלשים׃

7:39b.NEH.007.039 הכהנים בני ידעיה לבית ישוע תשע מאות שבעים ושלשה׃

7:40b.NEH.007.040 בני אמר אלף חמשים ושנים׃

7:41b.NEH.007.041 בני פשחור אלף מאתים ארבעים ושבעה׃

7:42b.NEH.007.042 בני חרם אלף שבעה עשר׃

7:43b.NEH.007.043 הלוים בני ישוע לקדמיאל לבני להודוה שבעים וארבעה׃

7:44b.NEH.007.044 המשררים בני אסף מאה ארבעים ושמנה׃

7:45b.NEH.007.045 השערים בני שלום בני אטר בני טלמן בני עקוב בני חטיטא בני שבי מאה שלשים ושמנה׃

7:46b.NEH.007.046 הנתינים בני צחא בני חשפא בני טבעות׃

7:47b.NEH.007.047 בני קירס בני סיעא בני פדון׃

7:48b.NEH.007.048 בני לבנה בני חגבה בני שלמי׃

7:49b.NEH.007.049 בני חנן בני גדל בני גחר׃

7:50b.NEH.007.050 בני ראיה בני רצין בני נקודא׃

7:51b.NEH.007.051 בני גזם בני עזא בני פסח׃

7:52b.NEH.007.052 בני בסי בני מעונים בני נפושסים׃

7:53b.NEH.007.053 בני בקבוק בני חקופא בני חרחור׃

7:54b.NEH.007.054 בני בצלית בני מחידא בני חרשא׃

7:55b.NEH.007.055 בני ברקוס בני סיסרא בני תמח׃

7:56b.NEH.007.056 בני נציח בני חטיפא׃

7:57b.NEH.007.057 בני עבדי שלמה בני סוטי בני סופרת בני פרידא׃

7:58b.NEH.007.058 בני יעלא בני דרקון בני גדל׃

7:59b.NEH.007.059 בני שפטיה בני חטיל בני פכרת הצביים בני אמון׃

7:60b.NEH.007.060 כל הנתינים ובני עבדי שלמה שלש מאות תשעים ושנים׃

7:61b.NEH.007.061 ואלה העולים מתל מלח תל חרשא כרוב אדון ואמר ולא יכלו להגיד בית אבותם וזרעם אם מישראל הם׃

7:62b.NEH.007.062 בני דליה בני טוביה בני נקודא שש מאות וארבעים ושנים׃

7:63b.NEH.007.063 ומן הכהנים בני חביה בני הקוץ בני ברזלי אשר לקח מבנות ברזלי הגלעדי אשה ויקרא על שמם׃

7:64b.NEH.007.064 אלה בקשו כתבם המתיחשים ולא נמצא ויגאלו מן הכהנה׃

7:65b.NEH.007.065 ויאמר התרשתא להם אשר לא יאכלו מקדש הקדשים עד עמד הכהן לאורים ותומים׃

7:66b.NEH.007.066 כל הקהל כאחד ארבע רבוא אלפים שלש מאות וששים׃

7:67b.NEH.007.067 מלבד עבדיהם ואמהתיהם אלה שבעת אלפים שלש מאות שלשים ושבעה ולהם משררים ומשררות מאתים וארבעים וחמשה׃

7:68b.NEH.007.068 סוסיהם שבע מאות שלשים וששה פרדיהם מאתים ארבעים וחמשה׃

7:69b.NEH.007.069 גמלים ארבע מאות שלשים וחמשה חמרים ששת אלפים שבע מאות ועשרים׃

7:70b.NEH.007.070 ומקצת ראשי האבות נתנו למלאכה התרשתא נתן לאוצר זהב דרכמנים אלף מזרקות חמשים כתנות כהנים שלשים וחמש מאות׃

7:71b.NEH.007.071 ומראשי האבות נתנו לאוצר המלאכה זהב דרכמונים שתי רבות וכסף מנים אלפים ומאתים׃

7:72b.NEH.007.072 ואשר נתנו שארית העם זהב דרכמונים שתי רבוא וכסף מנים אלפים וכתנת כהנים ששים ושבעה׃

7:73b.NEH.007.073 וישבו הכהנים והלוים והשוערים והמשררים ומן העם והנתינים וכל ישראל בעריהם ויגע החדש השביעי ובני ישראל בעריהם׃

8

8:1b.NEH.008.001 ויאספו כל העם כאיש אחד אל הרחוב אשר לפני שער המים ויאמרו לעזרא הספר להביא את ספר תורת משה אשר צוה יהוה את ישראל׃

8:2b.NEH.008.002 ויביא עזרא הכהן את התורה לפני הקהל מאיש ועד אשה וכל מבין לשמע ביום אחד לחדש השביעי׃

8:3b.NEH.008.003 ויקרא בו לפני הרחוב אשר לפני שער המים מן האור עד מחצית היום נגד האנשים והנשים והמבינים ואזני כל העם אל ספר התורה׃

8:4b.NEH.008.004 ויעמד עזרא הספר על מגדל עץ אשר עשו לדבר ויעמד אצלו מתתיה ושמע ועניה ואוריה וחלקיה ומעשיה על ימינו ומשמאלו פדיה ומישאל ומלכיה וחשם וחשבדנה זכריה משלם׃

8:5b.NEH.008.005 ויפתח עזרא הספר לעיני כל העם כי מעל כל העם היה וכפתחו עמדו כל העם׃

8:6b.NEH.008.006 ויברך עזרא את יהוה האלהים הגדול ויענו כל העם אמן אמן במעל ידיהם ויקדו וישתחו ליהוה אפים ארצה׃

8:7b.NEH.008.007 וישוע ובני ושרביה ימין עקוב שבתי הודיה מעשיה קליטא עזריה יוזבד חנן פלאיה והלוים מבינים את העם לתורה והעם על עמדם׃

8:8b.NEH.008.008 ויקראו בספר בתורת האלהים מפרש ושום שכל ויבינו במקרא׃

8:9b.NEH.008.009 ויאמר נחמיה הוא התרשתא ועזרא הכהן הספר והלוים המבינים את העם לכל העם היום קדש הוא ליהוה אלהיכם אל תתאבלו ואל תבכו כי בוכים כל העם כשמעם את דברי התורה׃

8:10b.NEH.008.010 ויאמר להם לכו אכלו משמנים ושתו ממתקים ושלחו מנות לאין נכון לו כי קדוש היום לאדנינו ואל תעצבו כי חדות יהוה היא מעזכם׃

8:11b.NEH.008.011 והלוים מחשים לכל העם לאמר הסו כי היום קדש ואל תעצבו׃

8:12b.NEH.008.012 וילכו כל העם לאכל ולשתות ולשלח מנות ולעשות שמחה גדולה כי הבינו בדברים אשר הודיעו להם׃

8:13b.NEH.008.013 וביום השני נאספו ראשי האבות לכל העם הכהנים והלוים אל עזרא הספר ולהשכיל אל דברי התורה׃

8:14b.NEH.008.014 וימצאו כתוב בתורה אשר צוה יהוה ביד משה אשר ישבו בני ישראל בסכות בחג בחדש השביעי׃

8:15b.NEH.008.015 ואשר ישמיעו ויעבירו קול בכל עריהם ובירושלם לאמר צאו ההר והביאו עלי זית ועלי עץ שמן ועלי הדס ועלי תמרים ועלי עץ עבת לעשת סכת ככתוב׃

8:16b.NEH.008.016 ויצאו העם ויביאו ויעשו להם סכות איש על גגו ובחצרתיהם ובחצרות בית האלהים וברחוב שער המים וברחוב שער אפרים׃

8:17b.NEH.008.017 ויעשו כל הקהל השבים מן השבי סכות וישבו בסכות כי לא עשו מימי ישוע בן נון כן בני ישראל עד היום ההוא ותהי שמחה גדולה מאד׃

8:18b.NEH.008.018 ויקרא בספר תורת האלהים יום ביום מן היום הראשון עד היום האחרון ויעשו חג שבעת ימים וביום השמיני עצרת כמשפט׃

9

9:1b.NEH.009.001 וביום עשרים וארבעה לחדש הזה נאספו בני ישראל בצום ובשקים ואדמה עליהם׃

9:2b.NEH.009.002 ויבדלו זרע ישראל מכל בני נכר ויעמדו ויתודו על חטאתיהם ועונות אבתיהם׃

9:3b.NEH.009.003 ויקומו על עמדם ויקראו בספר תורת יהוה אלהיהם רבעית היום ורבעית מתודים ומשתחוים ליהוה אלהיהם׃

9:4b.NEH.009.004 ויקם על מעלה הלוים ישוע ובני קדמיאל שבניה בני שרביה בני כנני ויזעקו בקול גדול אל יהוה אלהיהם׃

9:5b.NEH.009.005 ויאמרו הלוים ישוע וקדמיאל בני חשבניה שרביה הודיה שבניה פתחיה קומו ברכו את יהוה אלהיכם מן העולם עד העולם ויברכו שם כבודך ומרומם על כל ברכה ותהלה׃

9:6b.NEH.009.006 אתה הוא יהוה לבדך את עשית את השמים שמי השמים וכל צבאם הארץ וכל אשר עליה הימים וכל אשר בהם ואתה מחיה את כלם וצבא השמים לך משתחוים׃

9:7b.NEH.009.007 אתה הוא יהוה האלהים אשר בחרת באברם והוצאתו מאור כשדים ושמת שמו אברהם׃

9:8b.NEH.009.008 ומצאת את לבבו נאמן לפניך וכרות עמו הברית לתת את ארץ הכנעני החתי האמרי והפרזי והיבוסי והגרגשי לתת לזרעו ותקם את דבריך כי צדיק אתה׃

9:9b.NEH.009.009 ותרא את עני אבתינו במצרים ואת זעקתם שמעת על ים סוף׃

9:10b.NEH.009.010 ותתן אתת ומפתים בפרעה ובכל עבדיו ובכל עם ארצו כי ידעת כי הזידו עליהם ותעש לך שם כהיום הזה׃

9:11b.NEH.009.011 והים בקעת לפניהם ויעברו בתוך הים ביבשה ואת רדפיהם השלכת במצולת כמו אבן במים עזים׃

9:12b.NEH.009.012 ובעמוד ענן הנחיתם יומם ובעמוד אש לילה להאיר להם את הדרך אשר ילכו בה׃

9:13b.NEH.009.013 ועל הר סיני ירדת ודבר עמהם משמים ותתן להם משפטים ישרים ותורות אמת חקים ומצות טובים׃

9:14b.NEH.009.014 ואת שבת קדשך הודעת להם ומצוות וחקים ותורה צוית להם ביד משה עבדך׃

9:15b.NEH.009.015 ולחם משמים נתתה להם לרעבם ומים מסלע הוצאת להם לצמאם ותאמר להם לבוא לרשת את הארץ אשר נשאת את ידך לתת להם׃

9:16b.NEH.009.016 והם ואבתינו הזידו ויקשו את ערפם ולא שמעו אל מצותיך׃

9:17b.NEH.009.017 וימאנו לשמע ולא זכרו נפלאתיך אשר עשית עמהם ויקשו את ערפם ויתנו ראש לשוב לעבדתם במרים ואתה אלוה סליחות חנון ורחום ארך אפים ורב וחסד ולא עזבתם׃

9:18b.NEH.009.018 אף כי עשו להם עגל מסכה ויאמרו זה אלהיך אשר העלך ממצרים ויעשו נאצות גדלות׃

9:19b.NEH.009.019 ואתה ברחמיך הרבים לא עזבתם במדבר את עמוד הענן לא סר מעליהם ביומם להנחתם בהדרך ואת עמוד האש בלילה להאיר להם ואת הדרך אשר ילכו בה׃

9:20b.NEH.009.020 ורוחך הטובה נתת להשכילם ומנך לא מנעת מפיהם ומים נתתה להם לצמאם׃

9:21b.NEH.009.021 וארבעים שנה כלכלתם במדבר לא חסרו שלמתיהם לא בלו ורגליהם לא בצקו׃

9:22b.NEH.009.022 ותתן להם ממלכות ועממים ותחלקם לפאה ויירשו את ארץ סיחון ואת ארץ מלך חשבון ואת ארץ עוג מלך הבשן׃

9:23b.NEH.009.023 ובניהם הרבית כככבי השמים ותביאם אל הארץ אשר אמרת לאבתיהם לבוא לרשת׃

9:24b.NEH.009.024 ויבאו הבנים ויירשו את הארץ ותכנע לפניהם את ישבי הארץ הכנענים ותתנם בידם ואת מלכיהם ואת עממי הארץ לעשות בהם כרצונם׃

9:25b.NEH.009.025 וילכדו ערים בצרות ואדמה שמנה ויירשו בתים מלאים כל טוב ברות חצובים כרמים וזיתים ועץ מאכל לרב ויאכלו וישבעו וישמינו ויתעדנו בטובך הגדול׃

9:26b.NEH.009.026 וימרו וימרדו בך וישלכו את תורתך אחרי גום ואת נביאיך הרגו אשר העידו בם להשיבם אליך ויעשו נאצות גדולת׃

9:27b.NEH.009.027 ותתנם ביד צריהם ויצרו להם ובעת צרתם יצעקו אליך ואתה משמים תשמע וכרחמיך הרבים תתן להם מושיעים ויושיעום מיד צריהם׃

9:28b.NEH.009.028 וכנוח להם ישובו לעשות רע לפניך ותעזבם ביד איביהם וירדו בהם וישובו ויזעקוך ואתה משמים תשמע ותצילם כרחמיך רבות עתים׃

9:29b.NEH.009.029 ותעד בהם להשיבם אל תורתך והמה הזידו ולא שמעו למצותיך ובמשפטיך חטאו בם אשר יעשה אדם וחיה בהם ויתנו כתף סוררת וערפם הקשו ולא שמעו׃

9:30b.NEH.009.030 ותמשך עליהם שנים רבות ותעד בם ברוחך ביד נביאיך ולא האזינו ותתנם ביד עמי הארצת׃

9:31b.NEH.009.031 וברחמיך הרבים לא עשיתם כלה ולא עזבתם כי אל חנון ורחום אתה׃

9:32b.NEH.009.032 ועתה אלהינו האל הגדול הגבור והנורא שומר הברית והחסד אל ימעט לפניך את כל התלאה אשר מצאתנו למלכינו לשרינו ולכהנינו ולנביאנו ולאבתינו ולכל עמך מימי מלכי אשור עד היום הזה׃

9:33b.NEH.009.033 ואתה צדיק על כל הבא עלינו כי אמת עשית ואנחנו הרשענו׃

9:34b.NEH.009.034 ואת מלכינו שרינו כהנינו ואבתינו לא עשו תורתך ולא הקשיבו אל מצותיך ולעדותיך אשר העידת בהם׃

9:35b.NEH.009.035 והם במלכותם ובטובך הרב אשר נתת להם ובארץ הרחבה והשמנה אשר נתת לפניהם לא עבדוך ולא שבו ממעלליהם הרעים׃

9:36b.NEH.009.036 הנה אנחנו היום עבדים והארץ אשר נתתה לאבתינו לאכל את פריה ואת טובה הנה אנחנו עבדים עליה׃

9:37b.NEH.009.037 ותבואתה מרבה למלכים אשר נתתה עלינו בחטאותינו ועל גויתינו משלים ובבהמתנו כרצונם ובצרה גדולה אנחנו׃

9:38b.NEH.009.038 ובכל זאת אנחנו כרתים אמנה וכתבים ועל החתום שרינו לוינו כהנינו׃

10

10:1b.NEH.010.001 ועל החתומים נחמיה התרשתא בן חכליה וצדקיה׃

10:2b.NEH.010.002 שריה עזריה ירמיה׃

10:3b.NEH.010.003 פשחור אמריה מלכיה׃

10:4b.NEH.010.004 חטוש שבניה מלוך׃

10:5b.NEH.010.005 חרם מרמות עבדיה׃

10:6b.NEH.010.006 דניאל גנתון ברוך׃

10:7b.NEH.010.007 משלם אביה מימן׃

10:8b.NEH.010.008 מעזיה בלגי שמעיה אלה הכהנים׃

10:9b.NEH.010.009 והלוים וישוע בן אזניה בנוי מבני חנדד קדמיאל׃

10:10b.NEH.010.010 ואחיהם שבניה הודיה קליטא פלאיה חנן׃

10:11b.NEH.010.011 מיכא רחוב חשביה׃

10:12b.NEH.010.012 זכור שרביה שבניה׃

10:13b.NEH.010.013 הודיה בני בנינו׃

10:14b.NEH.010.014 ראשי העם פרעש פחת מואב עילם זתוא בני׃

10:15b.NEH.010.015 בני עזגד בבי׃

10:16b.NEH.010.016 אדניה בגוי עדין׃

10:17b.NEH.010.017 אטר חזקיה עזור׃

10:18b.NEH.010.018 הודיה חשם בצי׃

10:19b.NEH.010.019 חריף ענתות נובי׃

10:20b.NEH.010.020 מגפיעש משלם חזיר׃

10:21b.NEH.010.021 משיזבאל צדוק ידוע׃

10:22b.NEH.010.022 פלטיה חנן עניה׃

10:23b.NEH.010.023 הושע חנניה חשוב׃

10:24b.NEH.010.024 הלוחש פלחא שובק׃

10:25b.NEH.010.025 רחום חשבנה מעשיה׃

10:26b.NEH.010.026 ואחיה חנן ענן׃

10:27b.NEH.010.027 מלוך חרם בענה׃

10:28b.NEH.010.028 ושאר העם הכהנים הלוים השוערים המשררים הנתינים וכל הנבדל מעמי הארצות אל תורת האלהים נשיהם בניהם ובנתיהם כל יודע מבין׃

10:29b.NEH.010.029 מחזיקים על אחיהם אדיריהם ובאים באלה ובשבועה ללכת בתורת האלהים אשר נתנה ביד משה עבד האלהים ולשמור ולעשות את כל מצות יהוה אדנינו ומשפטיו וחקיו׃

10:30b.NEH.010.030 ואשר לא נתן בנתינו לעמי הארץ ואת בנתיהם לא נקח לבנינו׃

10:31b.NEH.010.031 ועמי הארץ המביאים את המקחות וכל שבר ביום השבת למכור לא נקח מהם בשבת וביום קדש ונטש את השנה השביעית ומשא כל יד׃

10:32b.NEH.010.032 והעמדנו עלינו מצות לתת עלינו שלשית השקל בשנה לעבדת בית אלהינו׃

10:33b.NEH.010.033 ללחם המערכת ומנחת התמיד ולעולת התמיד השבתות החדשים למועדים ולקדשים ולחטאות לכפר על ישראל וכל מלאכת בית אלהינו׃

10:34b.NEH.010.034 והגורלות הפלנו על קרבן העצים הכהנים הלוים והעם להביא לבית אלהינו לבית אבתינו לעתים מזמנים שנה בשנה לבער על מזבח יהוה אלהינו ככתוב בתורה׃

10:35b.NEH.010.035 ולהביא את בכורי אדמתנו ובכורי כל פרי כל עץ שנה בשנה לבית יהוה׃

10:36b.NEH.010.036 ואת בכרות בנינו ובהמתינו ככתוב בתורה ואת בכורי בקרינו וצאנינו להביא לבית אלהינו לכהנים המשרתים בבית אלהינו׃

10:37b.NEH.010.037 ואת ראשית עריסתינו ותרומתינו ופרי כל עץ תירוש ויצהר נביא לכהנים אל לשכות בית אלהינו ומעשר אדמתנו ללוים והם הלוים המעשרים בכל ערי עבדתנו׃

10:38b.NEH.010.038 והיה הכהן בן אהרן עם הלוים בעשר הלוים והלוים יעלו את מעשר המעשר לבית אלהינו אל הלשכות לבית האוצר׃

10:39b.NEH.010.039 כי אל הלשכות יביאו בני ישראל ובני הלוי את תרומת הדגן התירוש והיצהר ושם כלי המקדש והכהנים המשרתים והשוערים והמשררים ולא נעזב את בית אלהינו׃

11

11:1b.NEH.011.001 וישבו שרי העם בירושלם ושאר העם הפילו גורלות להביא אחד מן העשרה לשבת בירושלם עיר הקדש ותשע הידות בערים׃

11:2b.NEH.011.002 ויברכו העם לכל האנשים המתנדבים לשבת בירושלם׃

11:3b.NEH.011.003 ואלה ראשי המדינה אשר ישבו בירושלם ובערי יהודה ישבו איש באחזתו בעריהם ישראל הכהנים והלוים והנתינים ובני עבדי שלמה׃

11:4b.NEH.011.004 ובירושלם ישבו מבני יהודה ומבני בנימן מבני יהודה עתיה בן עזיה בן זכריה בן אמריה בן שפטיה בן מהללאל מבני פרץ׃

11:5b.NEH.011.005 ומעשיה בן ברוך בן כל חזה בן חזיה בן עדיה בן יויריב בן זכריה בן השלני׃

11:6b.NEH.011.006 כל בני פרץ הישבים בירושלם ארבע מאות ששים ושמנה אנשי חיל׃

11:7b.NEH.011.007 ואלה בני בנימן סלא בן משלם בן יועד בן פדיה בן קוליה בן מעשיה בן איתיאל בן ישעיה׃

11:8b.NEH.011.008 ואחריו גבי סלי תשע מאות עשרים ושמנה׃

11:9b.NEH.011.009 ויואל בן זכרי פקיד עליהם ויהודה בן הסנואה על העיר משנה׃

11:10b.NEH.011.010 מן הכהנים ידעיה בן יויריב יכין׃

11:11b.NEH.011.011 שריה בן חלקיה בן משלם בן צדוק בן מריות בן אחיטוב נגד בית האלהים׃

11:12b.NEH.011.012 ואחיהם עשי המלאכה לבית שמנה מאות עשרים ושנים ועדיה בן ירחם בן פלליה בן אמצי בן זכריה בן פשחור בן מלכיה׃

11:13b.NEH.011.013 ואחיו ראשים לאבות מאתים ארבעים ושנים ועמשסי בן עזראל בן אחזי בן משלמות בן אמר׃

11:14b.NEH.011.014 ואחיהם גבורי חיל מאה עשרים ושמנה ופקיד עליהם זבדיאל בן הגדולים׃

11:15b.NEH.011.015 ומן הלוים שמעיה בן חשוב בן עזריקם בן חשביה בן בוני׃

11:16b.NEH.011.016 ושבתי ויוזבד על המלאכה החיצנה לבית האלהים מראשי הלוים׃

11:17b.NEH.011.017 ומתניה בן מיכה בן זבדי בן אסף ראש התחלה יהודה לתפלה ובקבקיה משנה מאחיו ועבדא בן שמוע בן גלל בן ידיתון׃

11:18b.NEH.011.018 כל הלוים בעיר הקדש מאתים שמנים וארבעה׃

11:19b.NEH.011.019 והשוערים עקוב טלמון ואחיהם השמרים בשערים מאה שבעים ושנים׃

11:20b.NEH.011.020 ושאר ישראל הכהנים הלוים בכל ערי יהודה איש בנחלתו׃

11:21b.NEH.011.021 והנתינים ישבים בעפל וציחא וגשפא על הנתינים׃

11:22b.NEH.011.022 ופקיד הלוים בירושלם עזי בן בני בן חשביה בן מתניה בן מיכא מבני אסף המשררים לנגד מלאכת בית האלהים׃

11:23b.NEH.011.023 כי מצות המלך עליהם ואמנה על המשררים דבר יום ביומו׃

11:24b.NEH.011.024 ופתחיה בן משיזבאל מבני זרח בן יהודה ליד המלך לכל דבר לעם׃

11:25b.NEH.011.025 ואל החצרים בשדתם מבני יהודה ישבו בקרית הארבע ובנתיה ובדיבן ובנתיה וביקבצאל וחצריה׃

11:26b.NEH.011.026 ובישוע ובמולדה ובבית פלט׃

11:27b.NEH.011.027 ובחצר שועל ובבאר שבע ובנתיה׃

11:28b.NEH.011.028 ובצקלג ובמכנה ובבנתיה׃

11:29b.NEH.011.029 ובעין רמון ובצרעה ובירמות׃

11:30b.NEH.011.030 זנח עדלם וחצריהם לכיש ושדתיה עזקה ובנתיה ויחנו מבאר שבע עד גיא הנם׃

11:31b.NEH.011.031 ובני בנימן מגבע מכמש ועיה ובית אל ובנתיה׃

11:32b.NEH.011.032 ענתות נב ענניה׃

11:33b.NEH.011.033 חצור רמה גתים׃

11:34b.NEH.011.034 חדיד צבעים נבלט׃

11:35b.NEH.011.035 לד ואונו גי החרשים׃

11:36b.NEH.011.036 ומן הלוים מחלקות יהודה לבנימין׃

12

12:1b.NEH.012.001 ואלה הכהנים והלוים אשר עלו עם זרבבל בן שאלתיאל וישוע שריה ירמיה עזרא׃

12:2b.NEH.012.002 אמריה מלוך חטוש׃

12:3b.NEH.012.003 שכניה רחם מרמת׃

12:4b.NEH.012.004 עדוא גנתוי אביה׃

12:5b.NEH.012.005 מימין מעדיה בלגה׃

12:6b.NEH.012.006 שמעיה ויויריב ידעיה׃

12:7b.NEH.012.007 סלו עמוק חלקיה ידעיה אלה ראשי הכהנים ואחיהם בימי ישוע׃

12:8b.NEH.012.008 והלוים ישוע בנוי קדמיאל שרביה יהודה מתניה על הידות הוא ואחיו׃

12:9b.NEH.012.009 ובקבקיה וענו אחיהם לנגדם למשמרות׃

12:10b.NEH.012.010 וישוע הוליד את יויקים ויויקים הוליד את אלישיב ואלישיב את יוידע׃

12:11b.NEH.012.011 ויוידע הוליד את יונתן ויונתן הוליד את ידוע׃

12:12b.NEH.012.012 ובימי יויקים היו כהנים ראשי האבות לשריה מריה לירמיה חנניה׃

12:13b.NEH.012.013 לעזרא משלם לאמריה יהוחנן׃

12:14b.NEH.012.014 למלוכי יונתן לשבניה יוסף׃

12:15b.NEH.012.015 לחרם עדנא למריות חלקי׃

12:16b.NEH.012.016 לעדיא זכריה לגנתון משלם׃

12:17b.NEH.012.017 לאביה זכרי למנימין למועדיה פלטי׃

12:18b.NEH.012.018 לבלגה שמוע לשמעיה יהונתן׃

12:19b.NEH.012.019 וליויריב מתני לידעיה עזי׃

12:20b.NEH.012.020 לסלי קלי לעמוק עבר׃

12:21b.NEH.012.021 לחלקיה חשביה לידעיה נתנאל׃

12:22b.NEH.012.022 הלוים בימי אלישיב יוידע ויוחנן וידוע כתובים ראשי אבות והכהנים על מלכות דריוש הפרסי׃

12:23b.NEH.012.023 בני לוי ראשי האבות כתובים על ספר דברי הימים ועד ימי יוחנן בן אלישיב׃

12:24b.NEH.012.024 וראשי הלוים חשביה שרביה וישוע בן קדמיאל ואחיהם לנגדם להלל להודות במצות דויד איש האלהים משמר לעמת משמר׃

12:25b.NEH.012.025 מתניה ובקבקיה עבדיה משלם טלמון עקוב שמרים שוערים משמר באספי השערים׃

12:26b.NEH.012.026 אלה בימי יויקים בן ישוע בן יוצדק ובימי נחמיה הפחה ועזרא הכהן הסופר׃

12:27b.NEH.012.027 ובחנכת חומת ירושלם בקשו את הלוים מכל מקומתם להביאם לירושלם לעשת חנכה ושמחה ובתודות ובשיר מצלתים נבלים ובכנרות׃

12:28b.NEH.012.028 ויאספו בני המשררים ומן הככר סביבות ירושלם ומן חצרי נטפתי׃

12:29b.NEH.012.029 ומבית הגלגל ומשדות גבע ועזמות כי חצרים בנו להם המשררים סביבות ירושלם׃

12:30b.NEH.012.030 ויטהרו הכהנים והלוים ויטהרו את העם ואת השערים ואת החומה׃

12:31b.NEH.012.031 ואעלה את שרי יהודה מעל לחומה ואעמידה שתי תודת גדולת ותהלכת לימין מעל לחומה לשער האשפת׃

12:32b.NEH.012.032 וילך אחריהם הושעיה וחצי שרי יהודה׃

12:33b.NEH.012.033 ועזריה עזרא ומשלם׃

12:34b.NEH.012.034 יהודה ובנימן ושמעיה וירמיה׃

12:35b.NEH.012.035 ומבני הכהנים בחצצרות זכריה בן יונתן בן שמעיה בן מתניה בן מיכיה בן זכור בן אסף׃

12:36b.NEH.012.036 ואחיו שמעיה ועזראל מללי גללי מעי נתנאל ויהודה חנני בכלי שיר דויד איש האלהים ועזרא הסופר לפניהם׃

12:37b.NEH.012.037 ועל שער העין ונגדם עלו על מעלות עיר דויד במעלה לחומה מעל לבית דויד ועד שער המים מזרח׃

12:38b.NEH.012.038 והתודה השנית ההולכת למואל ואני אחריה וחצי העם מעל להחומה מעל למגדל התנורים ועד החומה הרחבה׃

12:39b.NEH.012.039 ומעל לשער אפרים ועל שער הישנה ועל שער הדגים ומגדל חננאל ומגדל המאה ועד שער הצאן ועמדו בשער המטרה׃

12:40b.NEH.012.040 ותעמדנה שתי התודת בבית האלהים ואני וחצי הסגנים עמי׃

12:41b.NEH.012.041 והכהנים אליקים מעשיה מנימין מיכיה אליועיני זכריה חנניה בחצצרות׃

12:42b.NEH.012.042 ומעשיה ושמעיה ואלעזר ועזי ויהוחנן ומלכיה ועילם ועזר וישמיעו המשררים ויזרחיה הפקיד׃

12:43b.NEH.012.043 ויזבחו ביום ההוא זבחים גדולים וישמחו כי האלהים שמחם שמחה גדולה וגם הנשים והילדים שמחו ותשמע שמחת ירושלם מרחוק׃

12:44b.NEH.012.044 ויפקדו ביום ההוא אנשים על הנשכות לאוצרות לתרומות לראשית ולמעשרות לכנוס בהם לשדי הערים מנאות התורה לכהנים וללוים כי שמחת יהודה על הכהנים ועל הלוים העמדים׃

12:45b.NEH.012.045 וישמרו משמרת אלהיהם ומשמרת הטהרה והמשררים והשערים כמצות דויד שלמה בנו׃

12:46b.NEH.012.046 כי בימי דויד ואסף מקדם ראש המשררים ושיר תהלה והדות לאלהים׃

12:47b.NEH.012.047 וכל ישראל בימי זרבבל ובימי נחמיה נתנים מניות המשררים והשערים דבר יום ביומו ומקדשים ללוים והלוים מקדשים לבני אהרן׃

13

13:1b.NEH.013.001 ביום ההוא נקרא בספר משה באזני העם ונמצא כתוב בו אשר לא יבוא עמני ומאבי בקהל האלהים עד עולם׃

13:2b.NEH.013.002 כי לא קדמו את בני ישראל בלחם ובמים וישכר עליו את בלעם לקללו ויהפך אלהינו הקללה לברכה׃

13:3b.NEH.013.003 ויהי כשמעם את התורה ויבדילו כל ערב מישראל׃

13:4b.NEH.013.004 ולפני מזה אלישיב הכהן נתון בלשכת בית אלהינו קרוב לטוביה׃

13:5b.NEH.013.005 ויעש לו לשכה גדולה ושם היו לפנים נתנים את המנחה הלבונה והכלים ומעשר הדגן התירוש והיצהר מצות הלוים והמשררים והשערים ותרומת הכהנים׃

13:6b.NEH.013.006 ובכל זה לא הייתי בירושלם כי בשנת שלשים ושתים לארתחשסתא מלך בבל באתי אל המלך ולקץ ימים נשאלתי מן המלך׃

13:7b.NEH.013.007 ואבוא לירושלם ואבינה ברעה אשר עשה אלישיב לטוביה לעשות לו נשכה בחצרי בית האלהים׃

13:8b.NEH.013.008 וירע לי מאד ואשליכה את כל כלי בית טוביה החוץ מן הלשכה׃

13:9b.NEH.013.009 ואמרה ויטהרו הלשכות ואשיבה שם כלי בית האלהים את המנחה והלבונה׃

13:10b.NEH.013.010 ואדעה כי מניות הלוים לא נתנה ויברחו איש לשדהו הלוים והמשררים עשי המלאכה׃

13:11b.NEH.013.011 ואריבה את הסגנים ואמרה מדוע נעזב בית האלהים ואקבצם ואעמדם על עמדם׃

13:12b.NEH.013.012 וכל יהודה הביאו מעשר הדגן והתירוש והיצהר לאוצרות׃

13:13b.NEH.013.013 ואוצרה על אוצרות שלמיה הכהן וצדוק הסופר ופדיה מן הלוים ועל ידם חנן בן זכור בן מתניה כי נאמנים נחשבו ועליהם לחלק לאחיהם׃

13:14b.NEH.013.014 זכרה לי אלהי על זאת ואל תמח חסדי אשר עשיתי בבית אלהי ובמשמריו׃

13:15b.NEH.013.015 בימים ההמה ראיתי ביהודה דרכים גתות בשבת ומביאים הערמות ועמסים על החמרים ואף יין ענבים ותאנים וכל משא ומביאים ירושלם ביום השבת ואעיד ביום מכרם ציד׃

13:16b.NEH.013.016 והצרים ישבו בה מביאים דאג וכל מכר ומכרים בשבת לבני יהודה ובירושלם׃

13:17b.NEH.013.017 ואריבה את חרי יהודה ואמרה להם מה הדבר הרע הזה אשר אתם עשים ומחללים את יום השבת׃

13:18b.NEH.013.018 הלוא כה עשו אבתיכם ויבא אלהינו עלינו את כל הרעה הזאת ועל העיר הזאת ואתם מוסיפים חרון על ישראל לחלל את השבת׃

13:19b.NEH.013.019 ויהי כאשר צללו שערי ירושלם לפני השבת ואמרה ויסגרו הדלתות ואמרה אשר לא יפתחום עד אחר השבת ומנערי העמדתי על השערים לא יבוא משא ביום השבת׃

13:20b.NEH.013.020 וילינו הרכלים ומכרי כל ממכר מחוץ לירושלם פעם ושתים׃

13:21b.NEH.013.021 ואעידה בהם ואמרה אליהם מדוע אתם לנים נגד החומה אם תשנו יד אשלח בכם מן העת ההיא לא באו בשבת׃

13:22b.NEH.013.022 ואמרה ללוים אשר יהיו מטהרים ובאים שמרים השערים לקדש את יום השבת גם זאת זכרה לי אלהי וחוסה עלי כרב חסדך׃

13:23b.NEH.013.023 גם בימים ההם ראיתי את היהודים השיבו נשים אשדודיות עמוניות מואביות׃

13:24b.NEH.013.024 ובניהם חצי מדבר אשדודית ואינם מכירים לדבר יהודית וכלשון עם ועם׃

13:25b.NEH.013.025 ואריב עמם ואקללם ואכה מהם אנשים ואמרטם ואשביעם באלהים אם תתנו בנתיכם לבניהם ואם תשאו מבנתיהם לבניכם ולכם׃

13:26b.NEH.013.026 הלוא על אלה חטא שלמה מלך ישראל ובגוים הרבים לא היה מלך כמהו ואהוב לאלהיו היה ויתנהו אלהים מלך על כל ישראל גם אותו החטיאו הנשים הנכריות׃

13:27b.NEH.013.027 ולכם הנשמע לעשת את כל הרעה הגדולה הזאת למעל באלהינו להשיב נשים נכריות׃

13:28b.NEH.013.028 ומבני יוידע בן אלישיב הכהן הגדול חתן לסנבלט החרני ואבריחהו מעלי׃

13:29b.NEH.013.029 זכרה להם אלהי על גאלי הכהנה וברית הכהנה והלוים׃

13:30b.NEH.013.030 וטהרתים מכל נכר ואעמידה משמרות לכהנים וללוים איש במלאכתו׃

13:31b.NEH.013.031 ולקרבן העצים בעתים מזמנות ולבכורים זכרה לי אלהי לטובה׃