1 Chronicles (Hebrew)

1

1:1b.1CH.001.001 אדם שת אנוש׃

1:2b.1CH.001.002 קינן מהללאל ירד׃

1:3b.1CH.001.003 חנוך מתושלח למך׃

1:4b.1CH.001.004 נח שם חם ויפת׃

1:5b.1CH.001.005 בני יפת גמר ומגוג ומדי ויון ותבל ומשך ותירס׃

1:6b.1CH.001.006 ובני גמר אשכנז ודיפת ותוגרמה׃

1:7b.1CH.001.007 ובני יון אלישה ותרשישה כתים ורודנים׃

1:8b.1CH.001.008 בני חם כוש ומצרים פוט וכנען׃

1:9b.1CH.001.009 ובני כוש סבא וחוילה וסבתא ורעמא וסבתכא ובני רעמא שבא ודדן׃

1:10b.1CH.001.010 וכוש ילד את נמרוד הוא החל להיות גבור בארץ׃

1:11b.1CH.001.011 ומצרים ילד את לודיים ואת ענמים ואת להבים ואת נפתחים׃

1:12b.1CH.001.012 ואת פתרסים ואת כסלחים אשר יצאו משם פלשתים ואת כפתרים׃

1:13b.1CH.001.013 וכנען ילד את צידון בכרו ואת חת׃

1:14b.1CH.001.014 ואת היבוסי ואת האמרי ואת הגרגשי׃

1:15b.1CH.001.015 ואת החוי ואת הערקי ואת הסיני׃

1:16b.1CH.001.016 ואת הארודי ואת הצמרי ואת החמתי׃

1:17b.1CH.001.017 בני שם עילם ואשור וארפכשד ולוד וארם ועוץ וחול וגתר ומשך׃

1:18b.1CH.001.018 וארפכשד ילד את שלח ושלח ילד את עבר׃

1:19b.1CH.001.019 ולעבר ילד שני בנים שם האחד פלג כי בימיו נפלגה הארץ ושם אחיו יקטן׃

1:20b.1CH.001.020 ויקטן ילד את אלמודד ואת שלף ואת חצרמות ואת ירח׃

1:21b.1CH.001.021 ואת הדורם ואת אוזל ואת דקלה׃

1:22b.1CH.001.022 ואת עיבל ואת אבימאל ואת שבא׃

1:23b.1CH.001.023 ואת אופיר ואת חוילה ואת יובב כל אלה בני יקטן׃

1:24b.1CH.001.024 שם ארפכשד שלח׃

1:25b.1CH.001.025 עבר פלג רעו׃

1:26b.1CH.001.026 שרוג נחור תרח׃

1:27b.1CH.001.027 אברם הוא אברהם׃

1:28b.1CH.001.028 בני אברהם יצחק וישמעאל׃

1:29b.1CH.001.029 אלה תלדותם בכור ישמעאל נביות וקדר ואדבאל ומבשם׃

1:30b.1CH.001.030 משמע ודומה משא חדד ותימא׃

1:31b.1CH.001.031 יטור נפיש וקדמה אלה הם בני ישמעאל׃

1:32b.1CH.001.032 ובני קטורה פילגש אברהם ילדה את זמרן ויקשן ומדן ומדין וישבק ושוח ובני יקשן שבא ודדן׃

1:33b.1CH.001.033 ובני מדין עיפה ועפר וחנוך ואבידע ואלדעה כל אלה בני קטורה׃

1:34b.1CH.001.034 ויולד אברהם את יצחק בני יצחק עשו וישראל׃

1:35b.1CH.001.035 בני עשו אליפז רעואל ויעוש ויעלם וקרח׃

1:36b.1CH.001.036 בני אליפז תימן ואומר צפי וגעתם קנז ותמנע ועמלק׃

1:37b.1CH.001.037 בני רעואל נחת זרח שמה ומזה׃

1:38b.1CH.001.038 ובני שעיר לוטן ושובל וצבעון וענה ודישן ואצר ודישן׃

1:39b.1CH.001.039 ובני לוטן חרי והומם ואחות לוטן תמנע׃

1:40b.1CH.001.040 בני שובל עלין ומנחת ועיבל שפי ואונם ובני צבעון איה וענה׃

1:41b.1CH.001.041 בני ענה דישון ובני דישון חמרן ואשבן ויתרן וכרן׃

1:42b.1CH.001.042 בני אצר בלהן וזעון יעקן בני דישון עוץ וארן׃

1:43b.1CH.001.043 ואלה המלכים אשר מלכו בארץ אדום לפני מלך מלך לבני ישראל בלע בן בעור ושם עירו דנהבה׃

1:44b.1CH.001.044 וימת בלע וימלך תחתיו יובב בן זרח מבצרה׃

1:45b.1CH.001.045 וימת יובב וימלך תחתיו חושם מארץ התימני׃

1:46b.1CH.001.046 וימת חושם וימלך תחתיו הדד בן בדד המכה את מדין בשדה מואב ושם עירו עיות׃

1:47b.1CH.001.047 וימת הדד וימלך תחתיו שמלה ממשרקה׃

1:48b.1CH.001.048 וימת שמלה וימלך תחתיו שאול מרחבות הנהר׃

1:49b.1CH.001.049 וימת שאול וימלך תחתיו בעל חנן בן עכבור׃

1:50b.1CH.001.050 וימת בעל חנן וימלך תחתיו הדד ושם עירו פעי ושם אשתו מהיטבאל בת מטרד בת מי זהב׃

1:51b.1CH.001.051 וימת הדד ויהיו אלופי אדום אלוף תמנע אלוף עליה אלוף יתת׃

1:52b.1CH.001.052 אלוף אהליבמה אלוף אלה אלוף פינן׃

1:53b.1CH.001.053 אלוף קנז אלוף תימן אלוף מבצר׃

1:54b.1CH.001.054 אלוף מגדיאל אלוף עירם אלה אלופי אדום׃

2

2:1b.1CH.002.001 אלה בני ישראל ראובן שמעון לוי ויהודה יששכר וזבלון׃

2:2b.1CH.002.002 דן יוסף ובנימן נפתלי גד ואשר׃

2:3b.1CH.002.003 בני יהודה ער ואונן ושלה שלושה נולד לו מבת שוע הכנענית ויהי ער בכור יהודה רע בעיני יהוה וימיתהו׃

2:4b.1CH.002.004 ותמר כלתו ילדה לו את פרץ ואת זרח כל בני יהודה חמשה׃

2:5b.1CH.002.005 בני פרץ חצרון וחמול׃

2:6b.1CH.002.006 ובני זרח זמרי ואיתן והימן וכלכל ודרע כלם חמשה׃

2:7b.1CH.002.007 ובני כרמי עכר עוכר ישראל אשר מעל בחרם׃

2:8b.1CH.002.008 ובני איתן עזריה׃

2:9b.1CH.002.009 ובני חצרון אשר נולד לו את ירחמאל ואת רם ואת כלובי׃

2:10b.1CH.002.010 ורם הוליד את עמינדב ועמינדב הוליד את נחשון נשיא בני יהודה׃

2:11b.1CH.002.011 ונחשון הוליד את שלמא ושלמא הוליד את בעז׃

2:12b.1CH.002.012 ובעז הוליד את עובד ועובד הוליד את ישי׃

2:13b.1CH.002.013 ואישי הוליד את בכרו את אליאב ואבינדב השני ושמעא השלישי׃

2:14b.1CH.002.014 נתנאל הרביעי רדי החמישי׃

2:15b.1CH.002.015 אצם הששי דויד השבעי׃

2:16b.1CH.002.016 ואחיתיהם צרויה ואביגיל ובני צרויה אבשי ויואב ועשה אל שלשה׃

2:17b.1CH.002.017 ואביגיל ילדה את עמשא ואבי עמשא יתר הישמעאלי׃

2:18b.1CH.002.018 וכלב בן חצרון הוליד את עזובה אשה ואת יריעות ואלה בניה ישר ושובב וארדון׃

2:19b.1CH.002.019 ותמת עזובה ויקח לו כלב את אפרת ותלד לו את חור׃

2:20b.1CH.002.020 וחור הוליד את אורי ואורי הוליד את בצלאל׃

2:21b.1CH.002.021 ואחר בא חצרון אל בת מכיר אבי גלעד והוא לקחה והוא בן ששים שנה ותלד לו את שגוב׃

2:22b.1CH.002.022 ושגוב הוליד את יאיר ויהי לו עשרים ושלוש ערים בארץ הגלעד׃

2:23b.1CH.002.023 ויקח גשור וארם את חות יאיר מאתם את קנת ואת בנתיה ששים עיר כל אלה בני מכיר אבי גלעד׃

2:24b.1CH.002.024 ואחר מות חצרון בכלב אפרתה ואשת חצרון אביה ותלד לו את אשחור אבי תקוע׃

2:25b.1CH.002.025 ויהיו בני ירחמאל בכור חצרון הבכור רם ובונה וארן ואצם אחיה׃

2:26b.1CH.002.026 ותהי אשה אחרת לירחמאל ושמה עטרה היא אם אונם׃

2:27b.1CH.002.027 ויהיו בני רם בכור ירחמאל מעץ וימין ועקר׃

2:28b.1CH.002.028 ויהיו בני אונם שמי וידע ובני שמי נדב ואבישור׃

2:29b.1CH.002.029 ושם אשת אבישור אביהיל ותלד לו את אחבן ואת מוליד׃

2:30b.1CH.002.030 ובני נדב סלד ואפים וימת סלד לא בנים׃

2:31b.1CH.002.031 ובני אפים ישעי ובני ישעי ששן ובני ששן אחלי׃

2:32b.1CH.002.032 ובני ידע אחי שמי יתר ויונתן וימת יתר לא בנים׃

2:33b.1CH.002.033 ובני יונתן פלת וזזא אלה היו בני ירחמאל׃

2:34b.1CH.002.034 ולא היה לששן בנים כי אם בנות ולששן עבד מצרי ושמו ירחע׃

2:35b.1CH.002.035 ויתן ששן את בתו לירחע עבדו לאשה ותלד לו את עתי׃

2:36b.1CH.002.036 ועתי הליד את נתן ונתן הוליד את זבד׃

2:37b.1CH.002.037 וזבד הוליד את אפלל ואפלל הוליד את עובד׃

2:38b.1CH.002.038 ועובד הוליד את יהוא ויהוא הוליד את עזריה׃

2:39b.1CH.002.039 ועזריה הליד את חלץ וחלץ הליד את אלעשה׃

2:40b.1CH.002.040 ואלעשה הליד את ססמי וססמי הליד את שלום׃

2:41b.1CH.002.041 ושלום הוליד את יקמיה ויקמיה הליד את אלישמע׃

2:42b.1CH.002.042 ובני כלב אחי ירחמאל מישע בכרו הוא אבי זיף ובני מרשה אבי חברון׃

2:43b.1CH.002.043 ובני חברון קרח ותפח ורקם ושמע׃

2:44b.1CH.002.044 ושמע הוליד את רחם אבי ירקעם ורקם הוליד את שמי׃

2:45b.1CH.002.045 ובן שמי מעון ומעון אבי בית צור׃

2:46b.1CH.002.046 ועיפה פילגש כלב ילדה את חרן ואת מוצא ואת גזז וחרן הליד את גזז׃

2:47b.1CH.002.047 ובני יהדי רגם ויותם וגישן ופלט ועיפה ושעף׃

2:48b.1CH.002.048 פלגש כלב מעכה ילד שבר ואת תרחנה׃

2:49b.1CH.002.049 ותלד שעף אבי מדמנה את שוא אבי מכבנה ואבי גבעא ובת כלב עכסה׃

2:50b.1CH.002.050 אלה היו בני כלב בן חור בכור אפרתה שובל אבי קרית יערים׃

2:51b.1CH.002.051 שלמא אבי בית לחם חרף אבי בית גדר׃

2:52b.1CH.002.052 ויהיו בנים לשובל אבי קרית יערים הראה חצי המנחות׃

2:53b.1CH.002.053 ומשפחות קרית יערים היתרי והפותי והשמתי והמשרעי מאלה יצאו הצרעתי והאשתאלי׃

2:54b.1CH.002.054 בני שלמא בית לחם ונטופתי עטרות בית יואב וחצי המנחתי הצרעי׃

2:55b.1CH.002.055 ומשפחות ספרים ישבו יעבץ תרעתים שמעתים שוכתים המה הקינים הבאים מחמת אבי בית רכב׃

3

3:1b.1CH.003.001 ואלה היו בני דויד אשר נולד לו בחברון הבכור אמנן לאחינעם היזרעאלית שני דניאל לאביגיל הכרמלית׃

3:2b.1CH.003.002 השלשי לאבשלום בן מעכה בת תלמי מלך גשור הרביעי אדניה בן חגית׃

3:3b.1CH.003.003 החמישי שפטיה לאביטל הששי יתרעם לעגלה אשתו׃

3:4b.1CH.003.004 ששה נולד לו בחברון וימלך שם שבע שנים וששה חדשים ושלשים ושלוש שנה מלך בירושלם׃

3:5b.1CH.003.005 ואלה נולדו לו בירושלים שמעא ושובב ונתן ושלמה ארבעה לבת שוע בת עמיאל׃

3:6b.1CH.003.006 ויבחר ואלישמע ואליפלט׃

3:7b.1CH.003.007 ונגה ונפג ויפיע׃

3:8b.1CH.003.008 ואלישמע ואלידע ואליפלט תשעה׃

3:9b.1CH.003.009 כל בני דויד מלבד בני פילגשים ותמר אחותם׃

3:10b.1CH.003.010 ובן שלמה רחבעם אביה בנו אסא בנו יהושפט בנו׃

3:11b.1CH.003.011 יורם בנו אחזיהו בנו יואש בנו׃

3:12b.1CH.003.012 אמציהו בנו עזריה בנו יותם בנו׃

3:13b.1CH.003.013 אחז בנו חזקיהו בנו מנשה בנו׃

3:14b.1CH.003.014 אמון בנו יאשיהו בנו׃

3:15b.1CH.003.015 ובני יאשיהו הבכור יוחנן השני יהויקים השלשי צדקיהו הרביעי שלום׃

3:16b.1CH.003.016 ובני יהויקים יכניה בנו צדקיה בנו׃

3:17b.1CH.003.017 ובני יכניה אסר שאלתיאל בנו׃

3:18b.1CH.003.018 ומלכירם ופדיה ושנאצר יקמיה הושמע ונדביה׃

3:19b.1CH.003.019 ובני פדיה זרבבל ושמעי ובן זרבבל משלם וחנניה ושלמית אחותם׃

3:20b.1CH.003.020 וחשבה ואהל וברכיה וחסדיה יושב חסד חמש׃

3:21b.1CH.003.021 ובן חנניה פלטיה וישעיה בני רפיה בני ארנן בני עבדיה בני שכניה׃

3:22b.1CH.003.022 ובני שכניה שמעיה ובני שמעיה חטוש ויגאל ובריח ונעריה ושפט ששה׃

3:23b.1CH.003.023 ובן נעריה אליועיני וחזקיה ועזריקם שלשה׃

3:24b.1CH.003.024 ובני אליועיני הודיוהו ואלישיב ופליה ועקוב ויוחנן ודליה וענני שבעה׃

4

4:1b.1CH.004.001 בני יהודה פרץ חצרון וכרמי וחור ושובל׃

4:2b.1CH.004.002 וראיה בן שובל הוליד את יחת ויחת הליד את אחומי ואת להד אלה משפחות הצרעתי׃

4:3b.1CH.004.003 ואלה אבי עיטם יזרעאל וישמא וידבש ושם אחותם הצללפוני׃

4:4b.1CH.004.004 ופנואל אבי גדר ועזר אבי חושה אלה בני חור בכור אפרתה אבי בית לחם׃

4:5b.1CH.004.005 ולאשחור אבי תקוע היו שתי נשים חלאה ונערה׃

4:6b.1CH.004.006 ותלד לו נערה את אחזם ואת חפר ואת תימני ואת האחשתרי אלה בני נערה׃

4:7b.1CH.004.007 ובני חלאה צרת יצחר ואתנן׃

4:8b.1CH.004.008 וקוץ הוליד את ענוב ואת הצבבה ומשפחות אחרחל בן הרום׃

4:9b.1CH.004.009 ויהי יעבץ נכבד מאחיו ואמו קראה שמו יעבץ לאמר כי ילדתי בעצב׃

4:10b.1CH.004.010 ויקרא יעבץ לאלהי ישראל לאמר אם ברך תברכני והרבית את גבולי והיתה ידך עמי ועשית מרעה לבלתי עצבי ויבא אלהים את אשר שאל׃

4:11b.1CH.004.011 וכלוב אחי שוחה הוליד את מחיר הוא אבי אשתון׃

4:12b.1CH.004.012 ואשתון הוליד את בית רפא ואת פסח ואת תחנה אבי עיר נחש אלה אנשי רכה׃

4:13b.1CH.004.013 ובני קנז עתניאל ושריה ובני עתניאל חתת׃

4:14b.1CH.004.014 ומעונתי הוליד את עפרה ושריה הוליד את יואב אבי גיא חרשים כי חרשים היו׃

4:15b.1CH.004.015 ובני כלב בן יפנה עירו אלה ונעם ובני אלה וקנז׃

4:16b.1CH.004.016 ובני יהללאל זיף וזיפה תיריא ואשראל׃

4:17b.1CH.004.017 ובן עזרה יתר ומרד ועפר וילון ותהר את מרים ואת שמי ואת ישבח אבי אשתמע׃

4:18b.1CH.004.018 ואשתו היהדיה ילדה את ירד אבי גדור ואת חבר אבי שוכו ואת יקותיאל אבי זנוח ואלה בני בתיה בת פרעה אשר לקח מרד׃

4:19b.1CH.004.019 ובני אשת הודיה אחות נחם אבי קעילה הגרמי ואשתמע המעכתי׃

4:20b.1CH.004.020 ובני שימון אמנון ורנה בן חנן ותולון ובני ישעי זוחת ובן זוחת׃

4:21b.1CH.004.021 בני שלה בן יהודה ער אבי לכה ולעדה אבי מרשה ומשפחות בית עבדת הבץ לבית אשבע׃

4:22b.1CH.004.022 ויוקים ואנשי כזבא ויואש ושרף אשר בעלו למואב וישבי לחם והדברים עתיקים׃

4:23b.1CH.004.023 המה היוצרים וישבי נטעים וגדרה עם המלך במלאכתו ישבו שם׃

4:24b.1CH.004.024 בני שמעון נמואל וימין יריב זרח שאול׃

4:25b.1CH.004.025 שלם בנו מבשם בנו משמע בנו׃

4:26b.1CH.004.026 ובני משמע חמואל בנו זכור בנו שמעי בנו׃

4:27b.1CH.004.027 ולשמעי בנים ששה עשר ובנות שש ולאחיו אין בנים רבים וכל משפחתם לא הרבו עד בני יהודה׃

4:28b.1CH.004.028 וישבו בבאר שבע ומולדה וחצר שועל׃

4:29b.1CH.004.029 ובבלהה ובעצם ובתולד׃

4:30b.1CH.004.030 ובבתואל ובחרמה ובציקלג׃

4:31b.1CH.004.031 ובבית מרכבות ובחצר סוסים ובבית בראי ובשערים אלה עריהם עד מלך דויד׃

4:32b.1CH.004.032 וחצריהם עיטם ועין רמון ותכן ועשן ערים חמש׃

4:33b.1CH.004.033 וכל חצריהם אשר סביבות הערים האלה עד בעל זאת מושבתם והתיחשם להם׃

4:34b.1CH.004.034 ומשובב וימלך ויושה בן אמציה׃

4:35b.1CH.004.035 ויואל ויהוא בן יושביה בן שריה בן עשיאל׃

4:36b.1CH.004.036 ואליועיני ויעקבה וישוחיה ועשיה ועדיאל וישימאל ובניה׃

4:37b.1CH.004.037 וזיזא בן שפעי בן אלון בן ידיה בן שמרי בן שמעיה׃

4:38b.1CH.004.038 אלה הבאים בשמות נשיאים במשפחותם ובית אבותיהם פרצו לרוב׃

4:39b.1CH.004.039 וילכו למבוא גדר עד למזרח הגיא לבקש מרעה לצאנם׃

4:40b.1CH.004.040 וימצאו מרעה שמן וטוב והארץ רחבת ידים ושקטת ושלוה כי מן חם הישבים שם לפנים׃

4:41b.1CH.004.041 ויבאו אלה הכתובים בשמות בימי יחזקיהו מלך יהודה ויכו את אהליהם ואת המעינים אשר נמצאו שמה ויחרימם עד היום הזה וישבו תחתיהם כי מרעה לצאנם שם׃

4:42b.1CH.004.042 ומהם מן בני שמעון הלכו להר שעיר אנשים חמש מאות ופלטיה ונעריה ורפיה ועזיאל בני ישעי בראשם׃

4:43b.1CH.004.043 ויכו את שארית הפלטה לעמלק וישבו שם עד היום הזה׃

5

5:1b.1CH.005.001 ובני ראובן בכור ישראל כי הוא הבכור ובחללו יצועי אביו נתנה בכרתו לבני יוסף בן ישראל ולא להתיחש לבכרה׃

5:2b.1CH.005.002 כי יהודה גבר באחיו ולנגיד ממנו והבכרה ליוסף׃

5:3b.1CH.005.003 בני ראובן בכור ישראל חנוך ופלוא חצרון וכרמי׃

5:4b.1CH.005.004 בני יואל שמעיה בנו גוג בנו שמעי בנו׃

5:5b.1CH.005.005 מיכה בנו ראיה בנו בעל בנו׃

5:6b.1CH.005.006 בארה בנו אשר הגלה תלגת פלנאסר מלך אשר הוא נשיא לראובני׃

5:7b.1CH.005.007 ואחיו למשפחתיו בהתיחש לתלדותם הראש יעיאל וזכריהו׃

5:8b.1CH.005.008 ובלע בן עזז בן שמע בן יואל הוא יושב בערער ועד נבו ובעל מעון׃

5:9b.1CH.005.009 ולמזרח ישב עד לבוא מדברה למן הנהר פרת כי מקניהם רבו בארץ גלעד׃

5:10b.1CH.005.010 ובימי שאול עשו מלחמה עם ההגראים ויפלו בידם וישבו באהליהם על כל פני מזרח לגלעד׃

5:11b.1CH.005.011 ובני גד לנגדם ישבו בארץ הבשן עד סלכה׃

5:12b.1CH.005.012 יואל הראש ושפם המשנה ויעני ושפט בבשן׃

5:13b.1CH.005.013 ואחיהם לבית אבותיהם מיכאל ומשלם ושבע ויורי ויעכן וזיע ועבר שבעה׃

5:14b.1CH.005.014 אלה בני אביחיל בן חורי בן ירוח בן גלעד בן מיכאל בן ישישי בן יחדו בן בוז׃

5:15b.1CH.005.015 אחי בן עבדיאל בן גוני ראש לבית אבותם׃

5:16b.1CH.005.016 וישבו בגלעד בבשן ובבנתיה ובכל מגרשי שרון על תוצאותם׃

5:17b.1CH.005.017 כלם התיחשו בימי יותם מלך יהודה ובימי ירבעם מלך ישראל׃

5:18b.1CH.005.018 בני ראובן וגדי וחצי שבט מנשה מן בני חיל אנשים נשאי מגן וחרב ודרכי קשת ולמודי מלחמה ארבעים וארבעה אלף ושבע מאות וששים יצאי צבא׃

5:19b.1CH.005.019 ויעשו מלחמה עם ההגריאים ויטור ונפיש ונודב׃

5:20b.1CH.005.020 ויעזרו עליהם וינתנו בידם ההגריאים וכל שעמהם כי לאלהים זעקו במלחמה ונעתור להם כי בטחו בו׃

5:21b.1CH.005.021 וישבו מקניהם גמליהם חמשים אלף וצאן מאתים וחמשים אלף וחמורים אלפים ונפש אדם מאה אלף׃

5:22b.1CH.005.022 כי חללים רבים נפלו כי מהאלהים המלחמה וישבו תחתיהם עד הגלה׃

5:23b.1CH.005.023 ובני חצי שבט מנשה ישבו בארץ מבשן עד בעל חרמון ושניר והר חרמון המה רבו׃

5:24b.1CH.005.024 ואלה ראשי בית אבותם ועפר וישעי ואליאל ועזריאל וירמיה והודויה ויחדיאל אנשים גבורי חיל אנשי שמות ראשים לבית אבותם׃

5:25b.1CH.005.025 וימעלו באלהי אבותיהם ויזנו אחרי אלהי עמי הארץ אשר השמיד אלהים מפניהם׃

5:26b.1CH.005.026 ויער אלהי ישראל את רוח פול מלך אשור ואת רוח תלגת פלנסר מלך אשור ויגלם לראובני ולגדי ולחצי שבט מנשה ויביאם לחלח וחבור והרא ונהר גוזן עד היום הזה׃

6

6:1b.1CH.006.001 בני לוי גרשון קהת ומררי׃

6:2b.1CH.006.002 ובני קהת עמרם יצהר וחברון ועזיאל׃

6:3b.1CH.006.003 ובני עמרם אהרן ומשה ומרים ובני אהרן נדב ואביהוא אלעזר ואיתמר׃

6:4b.1CH.006.004 אלעזר הוליד את פינחס פינחס הליד את אבישוע׃

6:5b.1CH.006.005 ואבישוע הוליד את בקי ובקי הוליד את עזי׃

6:6b.1CH.006.006 ועזי הוליד את זרחיה וזרחיה הוליד את מריות׃

6:7b.1CH.006.007 מריות הוליד את אמריה ואמריה הוליד את אחיטוב׃

6:8b.1CH.006.008 ואחיטוב הוליד את צדוק וצדוק הוליד את אחימעץ׃

6:9b.1CH.006.009 ואחימעץ הוליד את עזריה ועזריה הוליד את יוחנן׃

6:10b.1CH.006.010 ויוחנן הוליד את עזריה הוא אשר כהן בבית אשר בנה שלמה בירושלם׃

6:11b.1CH.006.011 ויולד עזריה את אמריה ואמריה הוליד את אחיטוב׃

6:12b.1CH.006.012 ואחיטוב הוליד את צדוק וצדוק הוליד את שלום׃

6:13b.1CH.006.013 ושלום הוליד את חלקיה וחלקיה הוליד את עזריה׃

6:14b.1CH.006.014 ועזריה הוליד את שריה ושריה הוליד את יהוצדק׃

6:15b.1CH.006.015 ויהוצדק הלך בהגלות יהוה את יהודה וירושלם ביד נבכדנאצר׃

6:16b.1CH.006.016 בני לוי גרשם קהת ומררי׃

6:17b.1CH.006.017 ואלה שמות בני גרשום לבני ושמעי׃

6:18b.1CH.006.018 ובני קהת עמרם ויצהר וחברון ועזיאל׃

6:19b.1CH.006.019 בני מררי מחלי ומשי ואלה משפחות הלוי לאבותיהם׃

6:20b.1CH.006.020 לגרשום לבני בנו יחת בנו זמה בנו׃

6:21b.1CH.006.021 יואח בנו עדו בנו זרח בנו יאתרי בנו׃

6:22b.1CH.006.022 בני קהת עמינדב בנו קרח בנו אסיר בנו׃

6:23b.1CH.006.023 אלקנה בנו ואביסף בנו ואסיר בנו׃

6:24b.1CH.006.024 תחת בנו אוריאל בנו עזיה בנו ושאול בנו׃

6:25b.1CH.006.025 ובני אלקנה עמשי ואחימות׃

6:26b.1CH.006.026 אלקנה בנו אלקנה צופי בנו ונחת בנו׃

6:27b.1CH.006.027 אליאב בנו ירחם בנו אלקנה בנו׃

6:28b.1CH.006.028 ובני שמואל הבכר ושני ואביה׃

6:29b.1CH.006.029 בני מררי מחלי לבני בנו שמעי בנו עזה בנו׃

6:30b.1CH.006.030 שמעא בנו חגיה בנו עשיה בנו׃

6:31b.1CH.006.031 ואלה אשר העמיד דויד על ידי שיר בית יהוה ממנוח הארון׃

6:32b.1CH.006.032 ויהיו משרתים לפני משכן אהל מועד בשיר עד בנות שלמה את בית יהוה בירושלם ויעמדו כמשפטם על עבודתם׃

6:33b.1CH.006.033 ואלה העמדים ובניהם מבני הקהתי הימן המשורר בן יואל בן שמואל׃

6:34b.1CH.006.034 בן אלקנה בן ירחם בן אליאל בן תוח׃

6:35b.1CH.006.035 בן ציף בן אלקנה בן מחת בן עמשי׃

6:36b.1CH.006.036 בן אלקנה בן יואל בן עזריה בן צפניה׃

6:37b.1CH.006.037 בן תחת בן אסיר בן אביסף בן קרח׃

6:38b.1CH.006.038 בן יצהר בן קהת בן לוי בן ישראל׃

6:39b.1CH.006.039 ואחיו אסף העמד על ימינו אסף בן ברכיהו בן שמעא׃

6:40b.1CH.006.040 בן מיכאל בן בעשיה בן מלכיה׃

6:41b.1CH.006.041 בן אתני בן זרח בן עדיה׃

6:42b.1CH.006.042 בן איתן בן זמה בן שמעי׃

6:43b.1CH.006.043 בן יחת בן גרשם בן לוי׃

6:44b.1CH.006.044 ובני מררי אחיהם על השמאול איתן בן קישי בן עבדי בן מלוך׃

6:45b.1CH.006.045 בן חשביה בן אמציה בן חלקיה׃

6:46b.1CH.006.046 בן אמצי בן בני בן שמר׃

6:47b.1CH.006.047 בן מחלי בן מושי בן מררי בן לוי׃

6:48b.1CH.006.048 ואחיהם הלוים נתונים לכל עבודת משכן בית האלהים׃

6:49b.1CH.006.049 ואהרן ובניו מקטירים על מזבח העולה ועל מזבח הקטרת לכל מלאכת קדש הקדשים ולכפר על ישראל ככל אשר צוה משה עבד האלהים׃

6:50b.1CH.006.050 ואלה בני אהרן אלעזר בנו פינחס בנו אבישוע בנו׃

6:51b.1CH.006.051 בקי בנו עזי בנו זרחיה בנו׃

6:52b.1CH.006.052 מריות בנו אמריה בנו אחיטוב בנו׃

6:53b.1CH.006.053 צדוק בנו אחימעץ בנו׃

6:54b.1CH.006.054 ואלה מושבותם לטירותם בגבולם לבני אהרן למשפחת הקהתי כי להם היה הגורל׃

6:55b.1CH.006.055 ויתנו להם את חברון בארץ יהודה ואת מגרשיה סביבתיה׃

6:56b.1CH.006.056 ואת שדה העיר ואת חצריה נתנו לכלב בן יפנה׃

6:57b.1CH.006.057 ולבני אהרן נתנו את ערי המקלט את חברון ואת לבנה ואת מגרשיה ואת יתר ואת אשתמע ואת מגרשיה׃

6:58b.1CH.006.058 ואת חילז ואת מגרשיה את דביר ואת מגרשיה׃

6:59b.1CH.006.059 ואת עשן ואת מגרשיה ואת בית שמש ואת מגרשיה׃

6:60b.1CH.006.060 וממטה בנימן את גבע ואת מגרשיה ואת עלמת ואת מגרשיה ואת ענתות ואת מגרשיה כל עריהם שלש עשרה עיר במשפחותיהם׃

6:61b.1CH.006.061 ולבני קהת הנותרים ממשפחת המטה ממחצית מטה חצי מנשה בגורל ערים עשר׃

6:62b.1CH.006.062 ולבני גרשום למשפחותם ממטה יששכר וממטה אשר וממטה נפתלי וממטה מנשה בבשן ערים שלש עשרה׃

6:63b.1CH.006.063 לבני מררי למשפחותם ממטה ראובן וממטה גד וממטה זבולן בגורל ערים שתים עשרה׃

6:64b.1CH.006.064 ויתנו בני ישראל ללוים את הערים ואת מגרשיהם׃

6:65b.1CH.006.065 ויתנו בגורל ממטה בני יהודה וממטה בני שמעון וממטה בני בנימן את הערים האלה אשר יקראו אתהם בשמות׃

6:66b.1CH.006.066 וממשפחות בני קהת ויהי ערי גבולם ממטה אפרים׃

6:67b.1CH.006.067 ויתנו להם את ערי המקלט את שכם ואת מגרשיה בהר אפרים ואת גזר ואת מגרשיה׃

6:68b.1CH.006.068 ואת יקמעם ואת מגרשיה ואת בית חורון ואת מגרשיה׃

6:69b.1CH.006.069 ואת אילון ואת מגרשיה ואת גת רמון ואת מגרשיה׃

6:70b.1CH.006.070 וממחצית מטה מנשה את ענר ואת מגרשיה ואת בלעם ואת מגרשיה למשפחת לבני קהת הנותרים׃

6:71b.1CH.006.071 לבני גרשום ממשפחת חצי מטה מנשה את גולן בבשן ואת מגרשיה ואת עשתרות ואת מגרשיה׃

6:72b.1CH.006.072 וממטה יששכר את קדש ואת מגרשיה את דברת ואת מגרשיה׃

6:73b.1CH.006.073 ואת ראמות ואת מגרשיה ואת ענם ואת מגרשיה׃

6:74b.1CH.006.074 וממטה אשר את משל ואת מגרשיה ואת עבדון ואת מגרשיה׃

6:75b.1CH.006.075 ואת חוקק ואת מגרשיה ואת רחב ואת מגרשיה׃

6:76b.1CH.006.076 וממטה נפתלי את קדש בגליל ואת מגרשיה ואת חמון ואת מגרשיה ואת קריתים ואת מגרשיה׃

6:77b.1CH.006.077 לבני מררי הנותרים ממטה זבולן את רמונו ואת מגרשיה את תבור ואת מגרשיה׃

6:78b.1CH.006.078 ומעבר לירדן ירחו למזרח הירדן ממטה ראובן את בצר במדבר ואת מגרשיה ואת יהצה ואת מגרשיה׃

6:79b.1CH.006.079 ואת קדמות ואת מגרשיה ואת מיפעת ואת מגרשיה׃

6:80b.1CH.006.080 וממטה גד את ראמות בגלעד ואת מגרשיה ואת מחנים ואת מגרשיה׃

6:81b.1CH.006.081 ואת חשבון ואת מגרשיה ואת יעזיר ואת מגרשיה׃

7

7:1b.1CH.007.001 ולבני יששכר תולע ופואה ישיב ושמרון ארבעה׃

7:2b.1CH.007.002 ובני תולע עזי ורפיה ויריאל ויחמי ויבשם ושמואל ראשים לבית אבותם לתולע גבורי חיל לתלדותם מספרם בימי דויד עשרים ושנים אלף ושש מאות׃

7:3b.1CH.007.003 ובני עזי יזרחיה ובני יזרחיה מיכאל ועבדיה ויואל ישיה חמשה ראשים כלם׃

7:4b.1CH.007.004 ועליהם לתלדותם לבית אבותם גדודי צבא מלחמה שלשים וששה אלף כי הרבו נשים ובנים׃

7:5b.1CH.007.005 ואחיהם לכל משפחות יששכר גבורי חילים שמונים ושבעה אלף התיחשם לכל׃

7:6b.1CH.007.006 בנימן בלע ובכר וידיעאל שלשה׃

7:7b.1CH.007.007 ובני בלע אצבון ועזי ועזיאל וירימות ועירי חמשה ראשי בית אבות גבורי חילים והתיחשם עשרים ושנים אלף ושלשים וארבעה׃

7:8b.1CH.007.008 ובני בכר זמירה ויועש ואליעזר ואליועיני ועמרי וירמות ואביה וענתות ועלמת כל אלה בני בכר׃

7:9b.1CH.007.009 והתיחשם לתלדותם ראשי בית אבותם גבורי חיל עשרים אלף ומאתים׃

7:10b.1CH.007.010 ובני ידיעאל בלהן ובני בלהן יעיש ובנימן ואהוד וכנענה וזיתן ותרשיש ואחישחר׃

7:11b.1CH.007.011 כל אלה בני ידיעאל לראשי האבות גבורי חילים שבעה עשר אלף ומאתים יצאי צבא למלחמה׃

7:12b.1CH.007.012 ושפם וחפם בני עיר חשם בני אחר׃

7:13b.1CH.007.013 בני נפתלי יחציאל וגוני ויצר ושלום בני בלהה׃

7:14b.1CH.007.014 בני מנשה אשריאל אשר ילדה פילגשו הארמיה ילדה את מכיר אבי גלעד׃

7:15b.1CH.007.015 ומכיר לקח אשה לחפים ולשפים ושם אחתו מעכה ושם השני צלפחד ותהינה לצלפחד בנות׃

7:16b.1CH.007.016 ותלד מעכה אשת מכיר בן ותקרא שמו פרש ושם אחיו שרש ובניו אולם ורקם׃

7:17b.1CH.007.017 ובני אולם בדן אלה בני גלעד בן מכיר בן מנשה׃

7:18b.1CH.007.018 ואחתו המלכת ילדה את אישהוד ואת אביעזר ואת מחלה׃

7:19b.1CH.007.019 ויהיו בני שמידע אחין ושכם ולקחי ואניעם׃

7:20b.1CH.007.020 ובני אפרים שותלח וברד בנו ותחת בנו ואלעדה בנו ותחת בנו׃

7:21b.1CH.007.021 וזבד בנו ושותלח בנו ועזר ואלעד והרגום אנשי גת הנולדים בארץ כי ירדו לקחת את מקניהם׃

7:22b.1CH.007.022 ויתאבל אפרים אביהם ימים רבים ויבאו אחיו לנחמו׃

7:23b.1CH.007.023 ויבא אל אשתו ותהר ותלד בן ויקרא את שמו בריעה כי ברעה היתה בביתו׃

7:24b.1CH.007.024 ובתו שארה ותבן את בית חורון התחתון ואת העליון ואת אזן שארה׃

7:25b.1CH.007.025 ורפח בנו ורשף ותלח בנו ותחן בנו׃

7:26b.1CH.007.026 לעדן בנו עמיהוד בנו אלישמע בנו׃

7:27b.1CH.007.027 נון בנו יהושע בנו׃

7:28b.1CH.007.028 ואחזתם ומשבותם בית אל ובנתיה ולמזרח נערן ולמערב גזר ובנתיה ושכם ובנתיה עד עיה ובנתיה׃

7:29b.1CH.007.029 ועל ידי בני מנשה בית שאן ובנתיה תענך ובנתיה מגדו ובנותיה דור ובנותיה באלה ישבו בני יוסף בן ישראל׃

7:30b.1CH.007.030 בני אשר ימנה וישוה וישוי ובריעה ושרח אחותם׃

7:31b.1CH.007.031 ובני בריעה חבר ומלכיאל הוא אבי ברזות׃

7:32b.1CH.007.032 וחבר הוליד את יפלט ואת שומר ואת חותם ואת שועא אחותם׃

7:33b.1CH.007.033 ובני יפלט פסך ובמהל ועשות אלה בני יפלט׃

7:34b.1CH.007.034 ובני שמר אחי ורוהגה יחבה וארם׃

7:35b.1CH.007.035 ובן הלם אחיו צופח וימנע ושלש ועמל׃

7:36b.1CH.007.036 בני צופח סוח וחרנפר ושועל וברי וימרה׃

7:37b.1CH.007.037 בצר והוד ושמא ושלשה ויתרן ובארא׃

7:38b.1CH.007.038 ובני יתר יפנה ופספה וארא׃

7:39b.1CH.007.039 ובני עלא ארח וחניאל ורציא׃

7:40b.1CH.007.040 כל אלה בני אשר ראשי בית האבות ברורים גבורי חילים ראשי הנשיאים והתיחשם בצבא במלחמה מספרם אנשים עשרים וששה אלף׃

8

8:1b.1CH.008.001 ובנימן הוליד את בלע בכרו אשבל השני ואחרח השלישי׃

8:2b.1CH.008.002 נוחה הרביעי ורפא החמישי׃

8:3b.1CH.008.003 ויהיו בנים לבלע אדר וגרא ואביהוד׃

8:4b.1CH.008.004 ואבישוע ונעמן ואחוח׃

8:5b.1CH.008.005 וגרא ושפופן וחורם׃

8:6b.1CH.008.006 ואלה בני אחוד אלה הם ראשי אבות ליושבי גבע ויגלום אל מנחת׃

8:7b.1CH.008.007 ונעמן ואחיה וגרא הוא הגלם והוליד את עזא ואת אחיחד׃

8:8b.1CH.008.008 ושחרים הוליד בשדה מואב מן שלחו אתם חושים ואת בערא נשיו׃

8:9b.1CH.008.009 ויולד מן חדש אשתו את יובב ואת צביא ואת מישא ואת מלכם׃

8:10b.1CH.008.010 ואת יעוץ ואת שכיה ואת מרמה אלה בניו ראשי אבות׃

8:11b.1CH.008.011 ומחשים הוליד את אביטוב ואת אלפעל׃

8:12b.1CH.008.012 ובני אלפעל עבר ומשעם ושמד הוא בנה את אונו ואת לד ובנתיה׃

8:13b.1CH.008.013 וברעה ושמע המה ראשי האבות ליושבי אילון המה הבריחו את יושבי גת׃

8:14b.1CH.008.014 ואחיו ששק וירמות׃

8:15b.1CH.008.015 וזבדיה וערד ועדר׃

8:16b.1CH.008.016 ומיכאל וישפה ויוחא בני בריעה׃

8:17b.1CH.008.017 וזבדיה ומשלם וחזקי וחבר׃

8:18b.1CH.008.018 וישמרי ויזליאה ויובב בני אלפעל׃

8:19b.1CH.008.019 ויקים וזכרי וזבדי׃

8:20b.1CH.008.020 ואליעני וצלתי ואליאל׃

8:21b.1CH.008.021 ועדיה ובראיה ושמרת בני שמעי׃

8:22b.1CH.008.022 וישפן ועבר ואליאל׃

8:23b.1CH.008.023 ועבדון וזכרי וחנן׃

8:24b.1CH.008.024 וחנניה ועילם וענתתיה׃

8:25b.1CH.008.025 ויפדיה ופניאל בני ששק׃

8:26b.1CH.008.026 ושמשרי ושחריה ועתליה׃

8:27b.1CH.008.027 ויערשיה ואליה וזכרי בני ירחם׃

8:28b.1CH.008.028 אלה ראשי אבות לתלדותם ראשים אלה ישבו בירושלם׃

8:29b.1CH.008.029 ובגבעון ישבו אבי גבעון ושם אשתו מעכה׃

8:30b.1CH.008.030 ובנו הבכור עבדון וצור וקיש ובעל ונדב׃

8:31b.1CH.008.031 וגדור ואחיו וזכר׃

8:32b.1CH.008.032 ומקלות הוליד את שמאה ואף המה נגד אחיהם ישבו בירושלם עם אחיהם׃

8:33b.1CH.008.033 ונר הוליד את קיש וקיש הוליד את שאול ושאול הוליד את יהונתן ואת מלכי שוע ואת אבינדב ואת אשבעל׃

8:34b.1CH.008.034 ובן יהונתן מריב בעל ומריב בעל הוליד את מיכה׃

8:35b.1CH.008.035 ובני מיכה פיתון ומלך ותארע ואחז׃

8:36b.1CH.008.036 ואחז הוליד את יהועדה ויהועדה הוליד את עלמת ואת עזמות ואת זמרי וזמרי הוליד את מוצא׃

8:37b.1CH.008.037 ומוצא הוליד את בנעא רפה בנו אלעשה בנו אצל בנו׃

8:38b.1CH.008.038 ולאצל ששה בנים ואלה שמותם עזריקם בכרו וישמעאל ושעריה ועבדיה וחנן כל אלה בני אצל׃

8:39b.1CH.008.039 ובני עשק אחיו אולם בכרו יעוש השני ואליפלט השלשי׃

8:40b.1CH.008.040 ויהיו בני אולם אנשים גברי חיל דרכי קשת ומרבים בנים ובני בנים מאה וחמשים כל אלה מבני בנימן׃

9

9:1b.1CH.009.001 וכל ישראל התיחשו והנם כתובים על ספר מלכי ישראל ויהודה הגלו לבבל במעלם׃

9:2b.1CH.009.002 והיושבים הראשנים אשר באחזתם בעריהם ישראל הכהנים הלוים והנתינים׃

9:3b.1CH.009.003 ובירושלם ישבו מן בני יהודה ומן בני בנימן ומן בני אפרים ומנשה׃

9:4b.1CH.009.004 עותי בן עמיהוד בן עמרי בן אמרי בן בנימן בני פרץ בן יהודה׃

9:5b.1CH.009.005 ומן השילוני עשיה הבכור ובניו׃

9:6b.1CH.009.006 ומן בני זרח יעואל ואחיהם שש מאות ותשעים׃

9:7b.1CH.009.007 ומן בני בנימן סלוא בן משלם בן הודויה בן הסנאה׃

9:8b.1CH.009.008 ויבניה בן ירחם ואלה בן עזי בן מכרי ומשלם בן שפטיה בן רעואל בן יבניה׃

9:9b.1CH.009.009 ואחיהם לתלדותם תשע מאות וחמשים וששה כל אלה אנשים ראשי אבות לבית אבתיהם׃

9:10b.1CH.009.010 ומן הכהנים ידעיה ויהויריב ויכין׃

9:11b.1CH.009.011 ועזריה בן חלקיה בן משלם בן צדוק בן מריות בן אחיטוב נגיד בית האלהים׃

9:12b.1CH.009.012 ועדיה בן ירחם בן פשחור בן מלכיה ומעשי בן עדיאל בן יחזרה בן משלם בן משלמית בן אמר׃

9:13b.1CH.009.013 ואחיהם ראשים לבית אבותם אלף ושבע מאות וששים גבורי חיל מלאכת עבודת בית האלהים׃

9:14b.1CH.009.014 ומן הלוים שמעיה בן חשוב בן עזריקם בן חשביה מן בני מררי׃

9:15b.1CH.009.015 ובקבקר חרש וגלל ומתניה בן מיכא בן זכרי בן אסף׃

9:16b.1CH.009.016 ועבדיה בן שמעיה בן גלל בן ידותון וברכיה בן אסא בן אלקנה היושב בחצרי נטופתי׃

9:17b.1CH.009.017 והשערים שלום ועקוב וטלמן ואחימן ואחיהם שלום הראש׃

9:18b.1CH.009.018 ועד הנה בשער המלך מזרחה המה השערים למחנות בני לוי׃

9:19b.1CH.009.019 ושלום בן קורא בן אביסף בן קרח ואחיו לבית אביו הקרחים על מלאכת העבודה שמרי הספים לאהל ואבתיהם על מחנה יהוה שמרי המבוא׃

9:20b.1CH.009.020 ופינחס בן אלעזר נגיד היה עליהם לפנים יהוה עמו׃

9:21b.1CH.009.021 זכריה בן משלמיה שער פתח לאהל מועד׃

9:22b.1CH.009.022 כלם הברורים לשערים בספים מאתים ושנים עשר המה בחצריהם התיחשם המה יסד דויד ושמואל הראה באמונתם׃

9:23b.1CH.009.023 והם ובניהם על השערים לבית יהוה לבית האהל למשמרות׃

9:24b.1CH.009.024 לארבע רוחות יהיו השערים מזרח ימה צפונה ונגבה׃

9:25b.1CH.009.025 ואחיהם בחצריהם לבוא לשבעת הימים מעת אל עת עם אלה׃

9:26b.1CH.009.026 כי באמונה המה ארבעת גברי השערים הם הלוים והיו על הלשכות ועל האצרות בית האלהים׃

9:27b.1CH.009.027 וסביבות בית האלהים ילינו כי עליהם משמרת והם על המפתח ולבקר לבקר׃

9:28b.1CH.009.028 ומהם על כלי העבודה כי במספר יביאום ובמספר יוציאום׃

9:29b.1CH.009.029 ומהם ממנים על הכלים ועל כל כלי הקדש ועל הסלת והיין והשמן והלבונה והבשמים׃

9:30b.1CH.009.030 ומן בני הכהנים רקחי המרקחת לבשמים׃

9:31b.1CH.009.031 ומתתיה מן הלוים הוא הבכור לשלם הקרחי באמונה על מעשה החבתים׃

9:32b.1CH.009.032 ומן בני הקהתי מן אחיהם על לחם המערכת להכין שבת שבת׃

9:33b.1CH.009.033 ואלה המשררים ראשי אבות ללוים בלשכת פטירים כי יומם ולילה עליהם במלאכה׃

9:34b.1CH.009.034 אלה ראשי האבות ללוים לתלדותם ראשים אלה ישבו בירושלם׃

9:35b.1CH.009.035 ובגבעון ישבו אבי גבעון יעואל ושם אשתו מעכה׃

9:36b.1CH.009.036 ובנו הבכור עבדון וצור וקיש ובעל ונר ונדב׃

9:37b.1CH.009.037 וגדור ואחיו וזכריה ומקלות׃

9:38b.1CH.009.038 ומקלות הוליד את שמאם ואף הם נגד אחיהם ישבו בירושלם עם אחיהם׃

9:39b.1CH.009.039 ונר הוליד את קיש וקיש הוליד את שאול ושאול הוליד את יהונתן ואת מלכי שוע ואת אבינדב ואת אשבעל׃

9:40b.1CH.009.040 ובן יהונתן מריב בעל ומרי בעל הוליד את מיכה׃

9:41b.1CH.009.041 ובני מיכה פיתון ומלך ותחרע׃

9:42b.1CH.009.042 ואחז הוליד את יערה ויערה הוליד את עלמת ואת עזמות ואת זמרי וזמרי הוליד את מוצא׃

9:43b.1CH.009.043 ומוצא הוליד את בנעא ורפיה בנו אלעשה בנו אצל בנו׃

9:44b.1CH.009.044 ולאצל ששה בנים ואלה שמותם עזריקם בכרו וישמעאל ושעריה ועבדיה וחנן אלה בני אצל׃

10

10:1b.1CH.010.001 ופלשתים נלחמו בישראל וינס איש ישראל מפני פלשתים ויפלו חללים בהר גלבע׃

10:2b.1CH.010.002 וידבקו פלשתים אחרי שאול ואחרי בניו ויכו פלשתים את יונתן ואת אבינדב ואת מלכי שוע בני שאול׃

10:3b.1CH.010.003 ותכבד המלחמה על שאול וימצאהו המורים בקשת ויחל מן היורים׃

10:4b.1CH.010.004 ויאמר שאול אל נשא כליו שלף חרבך ודקרני בה פן יבאו הערלים האלה והתעללו בי ולא אבה נשא כליו כי ירא מאד ויקח שאול את החרב ויפל עליה׃

10:5b.1CH.010.005 וירא נשא כליו כי מת שאול ויפל גם הוא על החרב וימת׃

10:6b.1CH.010.006 וימת שאול ושלשת בניו וכל ביתו יחדו מתו׃

10:7b.1CH.010.007 ויראו כל איש ישראל אשר בעמק כי נסו וכי מתו שאול ובניו ויעזבו עריהם וינסו ויבאו פלשתים וישבו בהם׃

10:8b.1CH.010.008 ויהי ממחרת ויבאו פלשתים לפשט את החללים וימצאו את שאול ואת בניו נפלים בהר גלבע׃

10:9b.1CH.010.009 ויפשיטהו וישאו את ראשו ואת כליו וישלחו בארץ פלשתים סביב לבשר את עצביהם ואת העם׃

10:10b.1CH.010.010 וישימו את כליו בית אלהיהם ואת גלגלתו תקעו בית דגון׃

10:11b.1CH.010.011 וישמעו כל יביש גלעד את כל אשר עשו פלשתים לשאול׃

10:12b.1CH.010.012 ויקומו כל איש חיל וישאו את גופת שאול ואת גופת בניו ויביאום יבישה ויקברו את עצמותיהם תחת האלה ביבש ויצומו שבעת ימים׃

10:13b.1CH.010.013 וימת שאול במעלו אשר מעל ביהוה על דבר יהוה אשר לא שמר וגם לשאול באוב לדרוש׃

10:14b.1CH.010.014 ולא דרש ביהוה וימיתהו ויסב את המלוכה לדויד בן ישי׃

11

11:1b.1CH.011.001 ויקבצו כל ישראל אל דויד חברונה לאמר הנה עצמך ובשרך אנחנו׃

11:2b.1CH.011.002 גם תמול גם שלשום גם בהיות שאול מלך אתה המוציא והמביא את ישראל ויאמר יהוה אלהיך לך אתה תרעה את עמי את ישראל ואתה תהיה נגיד על עמי ישראל׃

11:3b.1CH.011.003 ויבאו כל זקני ישראל אל המלך חברונה ויכרת להם דויד ברית בחברון לפני יהוה וימשחו את דויד למלך על ישראל כדבר יהוה ביד שמואל׃

11:4b.1CH.011.004 וילך דויד וכל ישראל ירושלם היא יבוס ושם היבוסי ישבי הארץ׃

11:5b.1CH.011.005 ויאמרו ישבי יבוס לדויד לא תבוא הנה וילכד דויד את מצדת ציון היא עיר דויד׃

11:6b.1CH.011.006 ויאמר דויד כל מכה יבוסי בראשונה יהיה לראש ולשר ויעל בראשונה יואב בן צרויה ויהי לראש׃

11:7b.1CH.011.007 וישב דויד במצד על כן קראו לו עיר דויד׃

11:8b.1CH.011.008 ויבן העיר מסביב מן המלוא ועד הסביב ויואב יחיה את שאר העיר׃

11:9b.1CH.011.009 וילך דויד הלוך וגדול ויהוה צבאות עמו׃

11:10b.1CH.011.010 ואלה ראשי הגבורים אשר לדויד המתחזקים עמו במלכותו עם כל ישראל להמליכו כדבר יהוה על ישראל׃

11:11b.1CH.011.011 ואלה מספר הגברים אשר לדויד ישבעם בן חכמוני ראש השלושים הוא עורר את חניתו על שלש מאות חלל בפעם אחת׃

11:12b.1CH.011.012 ואחריו אלעזר בן דודו האחוחי הוא בשלושה הגברים׃

11:13b.1CH.011.013 הוא היה עם דויד בפס דמים והפלשתים נאספו שם למלחמה ותהי חלקת השדה מלאה שעורים והעם נסו מפני פלשתים׃

11:14b.1CH.011.014 ויתיצבו בתוך החלקה ויצילוה ויכו את פלשתים ויושע יהוה תשועה גדולה׃

11:15b.1CH.011.015 וירדו שלושה מן השלושים ראש על הצר אל דויד אל מערת עדלם ומחנה פלשתים חנה בעמק רפאים׃

11:16b.1CH.011.016 ודויד אז במצודה ונציב פלשתים אז בבית לחם׃

11:17b.1CH.011.017 ויתאו דויד ויאמר מי ישקני מים מבור בית לחם אשר בשער׃

11:18b.1CH.011.018 ויבקעו השלשה במחנה פלשתים וישאבו מים מבור בית לחם אשר בשער וישאו ויבאו אל דויד ולא אבה דויד לשתותם וינסך אתם ליהוה׃

11:19b.1CH.011.019 ויאמר חלילה לי מאלהי מעשות זאת הדם האנשים האלה אשתה בנפשותם כי בנפשותם הביאום ולא אבה לשתותם אלה עשו שלשת הגבורים׃

11:20b.1CH.011.020 ואבשי אחי יואב הוא היה ראש השלושה והוא עורר את חניתו על שלש מאות חלל ולא שם בשלושה׃

11:21b.1CH.011.021 מן השלושה בשנים נכבד ויהי להם לשר ועד השלושה לא בא׃

11:22b.1CH.011.022 בניה בן יהוידע בן איש חיל רב פעלים מן קבצאל הוא הכה את שני אריאל מואב והוא ירד והכה את הארי בתוך הבור ביום השלג׃

11:23b.1CH.011.023 והוא הכה את האיש המצרי איש מדה חמש באמה וביד המצרי חנית כמנור ארגים וירד אליו בשבט ויגזל את החנית מיד המצרי ויהרגהו בחניתו׃

11:24b.1CH.011.024 אלה עשה בניהו בן יהוידע ולו שם בשלושה הגברים׃

11:25b.1CH.011.025 מן השלושים הנו נכבד הוא ואל השלושה לא בא וישימהו דויד על משמעתו׃

11:26b.1CH.011.026 וגבורי החילים עשה אל אחי יואב אלחנן בן דודו מבית לחם׃

11:27b.1CH.011.027 שמות ההרורי חלץ הפלוני׃

11:28b.1CH.011.028 עירא בן עקש התקועי אביעזר הענתותי׃

11:29b.1CH.011.029 סבכי החשתי עילי האחוחי׃

11:30b.1CH.011.030 מהרי הנטפתי חלד בן בענה הנטופתי׃

11:31b.1CH.011.031 איתי בן ריבי מגבעת בני בנימן בניה הפרעתני׃

11:32b.1CH.011.032 חורי מנחלי געש אביאל הערבתי׃

11:33b.1CH.011.033 עזמות הבחרומי אליחבא השעלבני׃

11:34b.1CH.011.034 בני השם הגזוני יונתן בן שגה ההררי׃

11:35b.1CH.011.035 אחיאם בן שכר ההררי אליפל בן אור׃

11:36b.1CH.011.036 חפר המכרתי אחיה הפלני׃

11:37b.1CH.011.037 חצרו הכרמלי נערי בן אזבי׃

11:38b.1CH.011.038 יואל אחי נתן מבחר בן הגרי׃

11:39b.1CH.011.039 צלק העמוני נחרי הברתי נשא כלי יואב בן צרויה׃

11:40b.1CH.011.040 עירא היתרי גרב היתרי׃

11:41b.1CH.011.041 אוריה החתי זבד בן אחלי׃

11:42b.1CH.011.042 עדינא בן שיזא הראובני ראש לראובני ועליו שלושים׃

11:43b.1CH.011.043 חנן בן מעכה ויושפט המתני׃

11:44b.1CH.011.044 עזיא העשתרתי שמע ויעואל בני חותם הערערי׃

11:45b.1CH.011.045 ידיעאל בן שמרי ויחא אחיו התיצי׃

11:46b.1CH.011.046 אליאל המחוים ויריבי ויושויה בני אלנעם ויתמה המואבי׃

11:47b.1CH.011.047 אליאל ועובד ויעשיאל המצביה׃

12

12:1b.1CH.012.001 ואלה הבאים אל דויד לציקלג עוד עצור מפני שאול בן קיש והמה בגבורים עזרי המלחמה׃

12:2b.1CH.012.002 נשקי קשת מימינים ומשמאלים באבנים ובחצים בקשת מאחי שאול מבנימן׃

12:3b.1CH.012.003 הראש אחיעזר ויואש בני השמעה הגבעתי ויזואל ופלט בני עזמות וברכה ויהוא הענתתי׃

12:4b.1CH.012.004 וישמעיה הגבעוני גבור בשלשים ועל השלשים וירמיה ויחזיאל ויוחנן ויוזבד הגדרתי׃

12:5b.1CH.012.005 אלעוזי וירימות ובעליה ושמריהו ושפטיהו החריפי׃

12:6b.1CH.012.006 אלקנה וישיהו ועזראל ויועזר וישבעם הקרחים׃

12:7b.1CH.012.007 ויועאלה וזבדיה בני ירחם מן הגדור׃

12:8b.1CH.012.008 ומן הגדי נבדלו אל דויד למצד מדברה גברי החיל אנשי צבא למלחמה ערכי צנה ורמח ופני אריה פניהם וכצבאים על ההרים למהר׃

12:9b.1CH.012.009 עזר הראש עבדיה השני אליאב השלשי׃

12:10b.1CH.012.010 משמנה הרביעי ירמיה החמשי׃

12:11b.1CH.012.011 עתי הששי אליאל השבעי׃

12:12b.1CH.012.012 יוחנן השמיני אלזבד התשיעי׃

12:13b.1CH.012.013 ירמיהו העשירי מכבני עשתי עשר׃

12:14b.1CH.012.014 אלה מבני גד ראשי הצבא אחד למאה הקטן והגדול לאלף׃

12:15b.1CH.012.015 אלה הם אשר עברו את הירדן בחדש הראשון והוא ממלא על כל גדיתיו ויבריחו את כל העמקים למזרח ולמערב׃

12:16b.1CH.012.016 ויבאו מן בני בנימן ויהודה עד למצד לדויד׃

12:17b.1CH.012.017 ויצא דויד לפניהם ויען ויאמר להם אם לשלום באתם אלי לעזרני יהיה לי עליכם לבב ליחד ואם לרמותני לצרי בלא חמס בכפי ירא אלהי אבותינו ויוכח׃

12:18b.1CH.012.018 ורוח לבשה את עמשי ראש השלושים לך דויד ועמך בן ישי שלום שלום לך ושלום לעזרך כי עזרך אלהיך ויקבלם דויד ויתנם בראשי הגדוד׃

12:19b.1CH.012.019 וממנשה נפלו על דויד בבאו עם פלשתים על שאול למלחמה ולא עזרם כי בעצה שלחהו סרני פלשתים לאמר בראשינו יפול אל אדניו שאול׃

12:20b.1CH.012.020 בלכתו אל ציקלג נפלו עליו ממנשה עדנח ויוזבד וידיעאל ומיכאל ויוזבד ואליהוא וצלתי ראשי האלפים אשר למנשה׃

12:21b.1CH.012.021 והמה עזרו עם דויד על הגדוד כי גבורי חיל כלם ויהיו שרים בצבא׃

12:22b.1CH.012.022 כי לעת יום ביום יבאו על דויד לעזרו עד למחנה גדול כמחנה אלהים׃

12:23b.1CH.012.023 ואלה מספרי ראשי החלוץ לצבא באו על דויד חברונה להסב מלכות שאול אליו כפי יהוה׃

12:24b.1CH.012.024 בני יהודה נשאי צנה ורמח ששת אלפים ושמונה מאות חלוצי צבא׃

12:25b.1CH.012.025 מן בני שמעון גבורי חיל לצבא שבעת אלפים ומאה׃

12:26b.1CH.012.026 מן בני הלוי ארבעת אלפים ושש מאות׃

12:27b.1CH.012.027 ויהוידע הנגיד לאהרן ועמו שלשת אלפים ושבע מאות׃

12:28b.1CH.012.028 וצדוק נער גבור חיל ובית אביו שרים עשרים ושנים׃

12:29b.1CH.012.029 ומן בני בנימן אחי שאול שלשת אלפים ועד הנה מרביתם שמרים משמרת בית שאול׃

12:30b.1CH.012.030 ומן בני אפרים עשרים אלף ושמונה מאות גבורי חיל אנשי שמות לבית אבותם׃

12:31b.1CH.012.031 ומחצי מטה מנשה שמונה עשר אלף אשר נקבו בשמות לבוא להמליך את דויד׃

12:32b.1CH.012.032 ומבני יששכר יודעי בינה לעתים לדעת מה יעשה ישראל ראשיהם מאתים וכל אחיהם על פיהם׃

12:33b.1CH.012.033 מזבלון יוצאי צבא ערכי מלחמה בכל כלי מלחמה חמשים אלף ולעדר בלא לב ולב׃

12:34b.1CH.012.034 ומנפתלי שרים אלף ועמהם בצנה וחנית שלשים ושבעה אלף׃

12:35b.1CH.012.035 ומן הדני ערכי מלחמה עשרים ושמונה אלף ושש מאות׃

12:36b.1CH.012.036 ומאשר יוצאי צבא לערך מלחמה ארבעים אלף׃

12:37b.1CH.012.037 ומעבר לירדן מן הראובני והגדי וחצי שבט מנשה בכל כלי צבא מלחמה מאה ועשרים אלף׃

12:38b.1CH.012.038 כל אלה אנשי מלחמה עדרי מערכה בלבב שלם באו חברונה להמליך את דויד על כל ישראל וגם כל שרית ישראל לב אחד להמליך את דויד׃

12:39b.1CH.012.039 ויהיו שם עם דויד ימים שלושה אכלים ושותים כי הכינו להם אחיהם׃

12:40b.1CH.012.040 וגם הקרובים אליהם עד יששכר וזבלון ונפתלי מביאים לחם בחמורים ובגמלים ובפרדים ובבקר מאכל קמח דבלים וצמוקים ויין ושמן ובקר וצאן לרב כי שמחה בישראל׃

13

13:1b.1CH.013.001 ויועץ דויד עם שרי האלפים והמאות לכל נגיד׃

13:2b.1CH.013.002 ויאמר דויד לכל קהל ישראל אם עליכם טוב ומן יהוה אלהינו נפרצה נשלחה על אחינו הנשארים בכל ארצות ישראל ועמהם הכהנים והלוים בערי מגרשיהם ויקבצו אלינו׃

13:3b.1CH.013.003 ונסבה את ארון אלהינו אלינו כי לא דרשנהו בימי שאול׃

13:4b.1CH.013.004 ויאמרו כל הקהל לעשות כן כי ישר הדבר בעיני כל העם׃

13:5b.1CH.013.005 ויקהל דויד את כל ישראל מן שיחור מצרים ועד לבוא חמת להביא את ארון האלהים מקרית יערים׃

13:6b.1CH.013.006 ויעל דויד וכל ישראל בעלתה אל קרית יערים אשר ליהודה להעלות משם את ארון האלהים יהוה יושב הכרובים אשר נקרא שם׃

13:7b.1CH.013.007 וירכיבו את ארון האלהים על עגלה חדשה מבית אבינדב ועזא ואחיו נהגים בעגלה׃

13:8b.1CH.013.008 ודויד וכל ישראל משחקים לפני האלהים בכל עז ובשירים ובכנרות ובנבלים ובתפים ובמצלתים ובחצצרות׃

13:9b.1CH.013.009 ויבאו עד גרן כידן וישלח עזא את ידו לאחז את הארון כי שמטו הבקר׃

13:10b.1CH.013.010 ויחר אף יהוה בעזא ויכהו על אשר שלח ידו על הארון וימת שם לפני אלהים׃

13:11b.1CH.013.011 ויחר לדויד כי פרץ יהוה פרץ בעזא ויקרא למקום ההוא פרץ עזא עד היום הזה׃

13:12b.1CH.013.012 ויירא דויד את האלהים ביום ההוא לאמר היך אביא אלי את ארון האלהים׃

13:13b.1CH.013.013 ולא הסיר דויד את הארון אליו אל עיר דויד ויטהו אל בית עבד אדם הגתי׃

13:14b.1CH.013.014 וישב ארון האלהים עם בית עבד אדם בביתו שלשה חדשים ויברך יהוה את בית עבד אדם ואת כל אשר לו׃

14

14:1b.1CH.014.001 וישלח חירם מלך צר מלאכים אל דויד ועצי ארזים וחרשי קיר וחרשי עצים לבנות לו בית׃

14:2b.1CH.014.002 וידע דויד כי הכינו יהוה למלך על ישראל כי נשאת למעלה מלכותו בעבור עמו ישראל׃

14:3b.1CH.014.003 ויקח דויד עוד נשים בירושלם ויולד דויד עוד בנים ובנות׃

14:4b.1CH.014.004 ואלה שמות הילודים אשר היו לו בירושלם שמוע ושובב נתן ושלמה׃

14:5b.1CH.014.005 ויבחר ואלישוע ואלפלט׃

14:6b.1CH.014.006 ונגה ונפג ויפיע׃

14:7b.1CH.014.007 ואלישמע ובעלידע ואליפלט׃

14:8b.1CH.014.008 וישמעו פלשתים כי נמשח דויד למלך על כל ישראל ויעלו כל פלשתים לבקש את דויד וישמע דויד ויצא לפניהם׃

14:9b.1CH.014.009 ופלשתים באו ויפשטו בעמק רפאים׃

14:10b.1CH.014.010 וישאל דויד באלהים לאמר האעלה על פלשתיים ונתתם בידי ויאמר לו יהוה עלה ונתתים בידך׃

14:11b.1CH.014.011 ויעלו בבעל פרצים ויכם שם דויד ויאמר דויד פרץ האלהים את אויבי בידי כפרץ מים על כן קראו שם המקום ההוא בעל פרצים׃

14:12b.1CH.014.012 ויעזבו שם את אלהיהם ויאמר דויד וישרפו באש׃

14:13b.1CH.014.013 ויסיפו עוד פלשתים ויפשטו בעמק׃

14:14b.1CH.014.014 וישאל עוד דויד באלהים ויאמר לו האלהים לא תעלה אחריהם הסב מעליהם ובאת להם ממול הבכאים׃

14:15b.1CH.014.015 ויהי כשמעך את קול הצעדה בראשי הבכאים אז תצא במלחמה כי יצא האלהים לפניך להכות את מחנה פלשתים׃

14:16b.1CH.014.016 ויעש דויד כאשר צוהו האלהים ויכו את מחנה פלשתים מגבעון ועד גזרה׃

14:17b.1CH.014.017 ויצא שם דויד בכל הארצות ויהוה נתן את פחדו על כל הגוים׃

15

15:1b.1CH.015.001 ויעש לו בתים בעיר דויד ויכן מקום לארון האלהים ויט לו אהל׃

15:2b.1CH.015.002 אז אמר דויד לא לשאת את ארון האלהים כי אם הלוים כי בם בחר יהוה לשאת את ארון יהוה ולשרתו עד עולם׃

15:3b.1CH.015.003 ויקהל דויד את כל ישראל אל ירושלם להעלות את ארון יהוה אל מקומו אשר הכין לו׃

15:4b.1CH.015.004 ויאסף דויד את בני אהרן ואת הלוים׃

15:5b.1CH.015.005 לבני קהת אוריאל השר ואחיו מאה ועשרים׃

15:6b.1CH.015.006 לבני מררי עשיה השר ואחיו מאתים ועשרים׃

15:7b.1CH.015.007 לבני גרשום יואל השר ואחיו מאה ושלשים׃

15:8b.1CH.015.008 לבני אליצפן שמעיה השר ואחיו מאתים׃

15:9b.1CH.015.009 לבני חברון אליאל השר ואחיו שמונים׃

15:10b.1CH.015.010 לבני עזיאל עמינדב השר ואחיו מאה ושנים עשר׃

15:11b.1CH.015.011 ויקרא דויד לצדוק ולאביתר הכהנים וללוים לאוריאל עשיה ויואל שמעיה ואליאל ועמינדב׃

15:12b.1CH.015.012 ויאמר להם אתם ראשי האבות ללוים התקדשו אתם ואחיכם והעליתם את ארון יהוה אלהי ישראל אל הכינותי לו׃

15:13b.1CH.015.013 כי למבראשונה לא אתם פרץ יהוה אלהינו בנו כי לא דרשנהו כמשפט׃

15:14b.1CH.015.014 ויתקדשו הכהנים והלוים להעלות את ארון יהוה אלהי ישראל׃

15:15b.1CH.015.015 וישאו בני הלוים את ארון האלהים כאשר צוה משה כדבר יהוה בכתפם במטות עליהם׃

15:16b.1CH.015.016 ויאמר דויד לשרי הלוים להעמיד את אחיהם המשררים בכלי שיר נבלים וכנרות ומצלתים משמיעים להרים בקול לשמחה׃

15:17b.1CH.015.017 ויעמידו הלוים את הימן בן יואל ומן אחיו אסף בן ברכיהו ומן בני מררי אחיהם איתן בן קושיהו׃

15:18b.1CH.015.018 ועמהם אחיהם המשנים זכריהו בן ויעזיאל ושמירמות ויחיאל ועני אליאב ובניהו ומעשיהו ומתתיהו ואליפלהו ומקניהו ועבד אדם ויעיאל השערים׃

15:19b.1CH.015.019 והמשררים הימן אסף ואיתן במצלתים נחשת להשמיע׃

15:20b.1CH.015.020 וזכריה ועזיאל ושמירמות ויחיאל ועני ואליאב ומעשיהו ובניהו בנבלים על עלמות׃

15:21b.1CH.015.021 ומתתיהו ואליפלהו ומקניהו ועבד אדם ויעיאל ועזזיהו בכנרות על השמינית לנצח׃

15:22b.1CH.015.022 וכנניהו שר הלוים במשא יסר במשא כי מבין הוא׃

15:23b.1CH.015.023 וברכיה ואלקנה שערים לארון׃

15:24b.1CH.015.024 ושבניהו ויושפט ונתנאל ועמשי וזכריהו ובניהו ואליעזר הכהנים מחצצרים בחצצרות לפני ארון האלהים ועבד אדם ויחיה שערים לארון׃

15:25b.1CH.015.025 ויהי דויד וזקני ישראל ושרי האלפים ההלכים להעלות את ארון ברית יהוה מן בית עבד אדם בשמחה׃

15:26b.1CH.015.026 ויהי בעזר האלהים את הלוים נשאי ארון ברית יהוה ויזבחו שבעה פרים ושבעה אילים׃

15:27b.1CH.015.027 ודויד מכרבל במעיל בוץ וכל הלוים הנשאים את הארון והמשררים וכנניה השר המשא המשררים ועל דויד אפוד בד׃

15:28b.1CH.015.028 וכל ישראל מעלים את ארון ברית יהוה בתרועה ובקול שופר ובחצצרות ובמצלתים משמעים בנבלים וכנרות׃

15:29b.1CH.015.029 ויהי ארון ברית יהוה בא עד עיר דויד ומיכל בת שאול נשקפה בעד החלון ותרא את המלך דויד מרקד ומשחק ותבז לו בלבה׃

16

16:1b.1CH.016.001 ויביאו את ארון האלהים ויציגו אתו בתוך האהל אשר נטה לו דויד ויקריבו עלות ושלמים לפני האלהים׃

16:2b.1CH.016.002 ויכל דויד מהעלות העלה והשלמים ויברך את העם בשם יהוה׃

16:3b.1CH.016.003 ויחלק לכל איש ישראל מאיש ועד אשה לאיש ככר לחם ואשפר ואשישה׃

16:4b.1CH.016.004 ויתן לפני ארון יהוה מן הלוים משרתים ולהזכיר ולהודות ולהלל ליהוה אלהי ישראל׃

16:5b.1CH.016.005 אסף הראש ומשנהו זכריה יעיאל ושמירמות ויחיאל ומתתיה ואליאב ובניהו ועבד אדם ויעיאל בכלי נבלים ובכנרות ואסף במצלתים משמיע׃

16:6b.1CH.016.006 ובניהו ויחזיאל הכהנים בחצצרות תמיד לפני ארון ברית האלהים׃

16:7b.1CH.016.007 ביום ההוא אז נתן דויד בראש להדות ליהוה ביד אסף ואחיו׃

16:8b.1CH.016.008 הודו ליהוה קראו בשמו הודיעו בעמים עלילתיו׃

16:9b.1CH.016.009 שירו לו זמרו לו שיחו בכל נפלאתיו׃

16:10b.1CH.016.010 התהללו בשם קדשו ישמח לב מבקשי יהוה׃

16:11b.1CH.016.011 דרשו יהוה ועזו בקשו פניו תמיד׃

16:12b.1CH.016.012 זכרו נפלאתיו אשר עשה מפתיו ומשפטי פיהו׃

16:13b.1CH.016.013 זרע ישראל עבדו בני יעקב בחיריו׃

16:14b.1CH.016.014 הוא יהוה אלהינו בכל הארץ משפטיו׃

16:15b.1CH.016.015 זכרו לעולם בריתו דבר צוה לאלף דור׃

16:16b.1CH.016.016 אשר כרת את אברהם ושבועתו ליצחק׃

16:17b.1CH.016.017 ויעמידה ליעקב לחק לישראל ברית עולם׃

16:18b.1CH.016.018 לאמר לך אתן ארץ כנען חבל נחלתכם׃

16:19b.1CH.016.019 בהיותכם מתי מספר כמעט וגרים בה׃

16:20b.1CH.016.020 ויתהלכו מגוי אל גוי ומממלכה אל עם אחר׃

16:21b.1CH.016.021 לא הניח לאיש לעשקם ויוכח עליהם מלכים׃

16:22b.1CH.016.022 אל תגעו במשיחי ובנביאי אל תרעו׃

16:23b.1CH.016.023 שירו ליהוה כל הארץ בשרו מיום אל יום ישועתו׃

16:24b.1CH.016.024 ספרו בגוים את כבודו בכל העמים נפלאתיו׃

16:25b.1CH.016.025 כי גדול יהוה ומהלל מאד ונורא הוא על כל אלהים׃

16:26b.1CH.016.026 כי כל אלהי העמים אלילים ויהוה שמים עשה׃

16:27b.1CH.016.027 הוד והדר לפניו עז וחדוה במקמו׃

16:28b.1CH.016.028 הבו ליהוה משפחות עמים הבו ליהוה כבוד ועז׃

16:29b.1CH.016.029 הבו ליהוה כבוד שמו שאו מנחה ובאו לפניו השתחוו ליהוה בהדרת קדש׃

16:30b.1CH.016.030 חילו מלפניו כל הארץ אף תכון תבל בל תמוט׃

16:31b.1CH.016.031 ישמחו השמים ותגל הארץ ויאמרו בגוים יהוה מלך׃

16:32b.1CH.016.032 ירעם הים ומלואו יעלץ השדה וכל אשר בו׃

16:33b.1CH.016.033 אז ירננו עצי היער מלפני יהוה כי בא לשפוט את הארץ׃

16:34b.1CH.016.034 הודו ליהוה כי טוב כי לעולם חסדו׃

16:35b.1CH.016.035 ואמרו הושיענו אלהי ישענו וקבצנו והצילנו מן הגוים להדות לשם קדשך להשתבח בתהלתך׃

16:36b.1CH.016.036 ברוך יהוה אלהי ישראל מן העולם ועד העלם ויאמרו כל העם אמן והלל ליהוה׃

16:37b.1CH.016.037 ויעזב שם לפני ארון ברית יהוה לאסף ולאחיו לשרת לפני הארון תמיד לדבר יום ביומו׃

16:38b.1CH.016.038 ועבד אדם ואחיהם ששים ושמונה ועבד אדם בן ידיתון וחסה לשערים׃

16:39b.1CH.016.039 ואת צדוק הכהן ואחיו הכהנים לפני משכן יהוה בבמה אשר בגבעון׃

16:40b.1CH.016.040 להעלות עלות ליהוה על מזבח העלה תמיד לבקר ולערב ולכל הכתוב בתורת יהוה אשר צוה על ישראל׃

16:41b.1CH.016.041 ועמהם הימן וידותון ושאר הברורים אשר נקבו בשמות להדות ליהוה כי לעולם חסדו׃

16:42b.1CH.016.042 ועמהם הימן וידותון חצצרות ומצלתים למשמיעים וכלי שיר האלהים ובני ידותון לשער׃

16:43b.1CH.016.043 וילכו כל העם איש לביתו ויסב דויד לברך את ביתו׃

17

17:1b.1CH.017.001 ויהי כאשר ישב דויד בביתו ויאמר דויד אל נתן הנביא הנה אנכי יושב בבית הארזים וארון ברית יהוה תחת יריעות׃

17:2b.1CH.017.002 ויאמר נתן אל דויד כל אשר בלבבך עשה כי האלהים עמך׃

17:3b.1CH.017.003 ויהי בלילה ההוא ויהי דבר אלהים אל נתן לאמר׃

17:4b.1CH.017.004 לך ואמרת אל דויד עבדי כה אמר יהוה לא אתה תבנה לי הבית לשבת׃

17:5b.1CH.017.005 כי לא ישבתי בבית מן היום אשר העליתי את ישראל עד היום הזה ואהיה מאהל אל אהל וממשכן׃

17:6b.1CH.017.006 בכל אשר התהלכתי בכל ישראל הדבר דברתי את אחד שפטי ישראל אשר צויתי לרעות את עמי לאמר למה לא בניתם לי בית ארזים׃

17:7b.1CH.017.007 ועתה כה תאמר לעבדי לדויד כה אמר יהוה צבאות אני לקחתיך מן הנוה מן אחרי הצאן להיות נגיד על עמי ישראל׃

17:8b.1CH.017.008 ואהיה עמך בכל אשר הלכת ואכרית את כל אויביך מפניך ועשיתי לך שם כשם הגדולים אשר בארץ׃

17:9b.1CH.017.009 ושמתי מקום לעמי ישראל ונטעתיהו ושכן תחתיו ולא ירגז עוד ולא יוסיפו בני עולה לבלתו כאשר בראשונה׃

17:10b.1CH.017.010 ולמימים אשר צויתי שפטים על עמי ישראל והכנעתי את כל אויביך ואגד לך ובית יבנה לך יהוה׃

17:11b.1CH.017.011 והיה כי מלאו ימיך ללכת עם אבתיך והקימותי את זרעך אחריך אשר יהיה מבניך והכינותי את מלכותו׃

17:12b.1CH.017.012 הוא יבנה לי בית וכננתי את כסאו עד עולם׃

17:13b.1CH.017.013 אני אהיה לו לאב והוא יהיה לי לבן וחסדי לא אסיר מעמו כאשר הסירותי מאשר היה לפניך׃

17:14b.1CH.017.014 והעמדתיהו בביתי ובמלכותי עד העולם וכסאו יהיה נכון עד עולם׃

17:15b.1CH.017.015 ככל הדברים האלה וככל החזון הזה כן דבר נתן אל דויד׃

17:16b.1CH.017.016 ויבא המלך דויד וישב לפני יהוה ויאמר מי אני יהוה אלהים ומי ביתי כי הביאתני עד הלם׃

17:17b.1CH.017.017 ותקטן זאת בעיניך אלהים ותדבר על בית עבדך למרחוק וראיתני כתור האדם המעלה יהוה אלהים׃

17:18b.1CH.017.018 מה יוסיף עוד דויד אליך לכבוד את עבדך ואתה את עבדך ידעת׃

17:19b.1CH.017.019 יהוה בעבור עבדך וכלבך עשית את כל הגדולה הזאת להדיע את כל הגדלות׃

17:20b.1CH.017.020 יהוה אין כמוך ואין אלהים זולתך בכל אשר שמענו באזנינו׃

17:21b.1CH.017.021 ומי כעמך ישראל גוי אחד בארץ אשר הלך האלהים לפדות לו עם לשום לך שם גדלות ונראות לגרש מפני עמך אשר פדית ממצרים גוים׃

17:22b.1CH.017.022 ותתן את עמך ישראל לך לעם עד עולם ואתה יהוה היית להם לאלהים׃

17:23b.1CH.017.023 ועתה יהוה הדבר אשר דברת על עבדך ועל ביתו יאמן עד עולם ועשה כאשר דברת׃

17:24b.1CH.017.024 ויאמן ויגדל שמך עד עולם לאמר יהוה צבאות אלהי ישראל אלהים לישראל ובית דויד עבדך נכון לפניך׃

17:25b.1CH.017.025 כי אתה אלהי גלית את אזן עבדך לבנות לו בית על כן מצא עבדך להתפלל לפניך׃

17:26b.1CH.017.026 ועתה יהוה אתה הוא האלהים ותדבר על עבדך הטובה הזאת׃

17:27b.1CH.017.027 ועתה הואלת לברך את בית עבדך להיות לעולם לפניך כי אתה יהוה ברכת ומברך לעולם׃

18

18:1b.1CH.018.001 ויהי אחרי כן ויך דויד את פלשתים ויכניעם ויקח את גת ובנתיה מיד פלשתים׃

18:2b.1CH.018.002 ויך את מואב ויהיו מואב עבדים לדויד נשאי מנחה׃

18:3b.1CH.018.003 ויך דויד את הדדעזר מלך צובה חמתה בלכתו להציב ידו בנהר פרת׃

18:4b.1CH.018.004 וילכד דויד ממנו אלף רכב ושבעת אלפים פרשים ועשרים אלף איש רגלי ויעקר דויד את כל הרכב ויותר ממנו מאה רכב׃

18:5b.1CH.018.005 ויבא ארם דרמשק לעזור להדדעזר מלך צובה ויך דויד בארם עשרים ושנים אלף איש׃

18:6b.1CH.018.006 וישם דויד בארם דרמשק ויהי ארם לדויד עבדים נשאי מנחה ויושע יהוה לדויד בכל אשר הלך׃

18:7b.1CH.018.007 ויקח דויד את שלטי הזהב אשר היו על עבדי הדדעזר ויביאם ירושלם׃

18:8b.1CH.018.008 ומטבחת ומכון ערי הדדעזר לקח דויד נחשת רבה מאד בה עשה שלמה את ים הנחשת ואת העמודים ואת כלי הנחשת׃

18:9b.1CH.018.009 וישמע תעו מלך חמת כי הכה דויד את כל חיל הדדעזר מלך צובה׃

18:10b.1CH.018.010 וישלח את הדורם בנו אל המלך דויד לשאול לו לשלום ולברכו על אשר נלחם בהדדעזר ויכהו כי איש מלחמות תעו היה הדדעזר וכל כלי זהב וכסף ונחשת׃

18:11b.1CH.018.011 גם אתם הקדיש המלך דויד ליהוה עם הכסף והזהב אשר נשא מכל הגוים מאדום וממואב ומבני עמון ומפלשתים ומעמלק׃

18:12b.1CH.018.012 ואבשי בן צרויה הכה את אדום בגיא המלח שמונה עשר אלף׃

18:13b.1CH.018.013 וישם באדום נציבים ויהיו כל אדום עבדים לדויד ויושע יהוה את דויד בכל אשר הלך׃

18:14b.1CH.018.014 וימלך דויד על כל ישראל ויהי עשה משפט וצדקה לכל עמו׃

18:15b.1CH.018.015 ויואב בן צרויה על הצבא ויהושפט בן אחילוד מזכיר׃

18:16b.1CH.018.016 וצדוק בן אחיטוב ואבימלך בן אביתר כהנים ושושא סופר׃

18:17b.1CH.018.017 ובניהו בן יהוידע על הכרתי והפלתי ובני דויד הראשנים ליד המלך׃

19

19:1b.1CH.019.001 ויהי אחרי כן וימת נחש מלך בני עמון וימלך בנו תחתיו׃

19:2b.1CH.019.002 ויאמר דויד אעשה חסד עם חנון בן נחש כי עשה אביו עמי חסד וישלח דויד מלאכים לנחמו על אביו ויבאו עבדי דויד אל ארץ בני עמון אל חנון לנחמו׃

19:3b.1CH.019.003 ויאמרו שרי בני עמון לחנון המכבד דויד את אביך בעיניך כי שלח לך מנחמים הלא בעבור לחקר ולהפך ולרגל הארץ באו עבדיו אליך׃

19:4b.1CH.019.004 ויקח חנון את עבדי דויד ויגלחם ויכרת את מדויהם בחצי עד המפשעה וישלחם׃

19:5b.1CH.019.005 וילכו ויגידו לדויד על האנשים וישלח לקראתם כי היו האנשים נכלמים מאד ויאמר המלך שבו בירחו עד אשר יצמח זקנכם ושבתם׃

19:6b.1CH.019.006 ויראו בני עמון כי התבאשו עם דויד וישלח חנון ובני עמון אלף ככר כסף לשכר להם מן ארם נהרים ומן ארם מעכה ומצובה רכב ופרשים׃

19:7b.1CH.019.007 וישכרו להם שנים ושלשים אלף רכב ואת מלך מעכה ואת עמו ויבאו ויחנו לפני מידבא ובני עמון נאספו מעריהם ויבאו למלחמה׃

19:8b.1CH.019.008 וישמע דויד וישלח את יואב ואת כל צבא הגבורים׃

19:9b.1CH.019.009 ויצאו בני עמון ויערכו מלחמה פתח העיר והמלכים אשר באו לבדם בשדה׃

19:10b.1CH.019.010 וירא יואב כי היתה פני המלחמה אליו פנים ואחור ויבחר מכל בחור בישראל ויערך לקראת ארם׃

19:11b.1CH.019.011 ואת יתר העם נתן ביד אבשי אחיו ויערכו לקראת בני עמון׃

19:12b.1CH.019.012 ויאמר אם תחזק ממני ארם והיית לי לתשועה ואם בני עמון יחזקו ממך והושעתיך׃

19:13b.1CH.019.013 חזק ונתחזקה בעד עמנו ובעד ערי אלהינו ויהוה הטוב בעיניו יעשה׃

19:14b.1CH.019.014 ויגש יואב והעם אשר עמו לפני ארם למלחמה וינוסו מפניו׃

19:15b.1CH.019.015 ובני עמון ראו כי נס ארם וינוסו גם הם מפני אבשי אחיו ויבאו העירה ויבא יואב ירושלם׃

19:16b.1CH.019.016 וירא ארם כי נגפו לפני ישראל וישלחו מלאכים ויוציאו את ארם אשר מעבר הנהר ושופך שר צבא הדדעזר לפניהם׃

19:17b.1CH.019.017 ויגד לדויד ויאסף את כל ישראל ויעבר הירדן ויבא אלהם ויערך אלהם ויערך דויד לקראת ארם מלחמה וילחמו עמו׃

19:18b.1CH.019.018 וינס ארם מלפני ישראל ויהרג דויד מארם שבעת אלפים רכב וארבעים אלף איש רגלי ואת שופך שר הצבא המית׃

19:19b.1CH.019.019 ויראו עבדי הדדעזר כי נגפו לפני ישראל וישלימו עם דויד ויעבדהו ולא אבה ארם להושיע את בני עמון עוד׃

20

20:1b.1CH.020.001 ויהי לעת תשובת השנה לעת צאת המלכים וינהג יואב את חיל הצבא וישחת את ארץ בני עמון ויבא ויצר את רבה ודויד ישב בירושלם ויך יואב את רבה ויהרסה׃

20:2b.1CH.020.002 ויקח דויד את עטרת מלכם מעל ראשו וימצאה משקל ככר זהב ובה אבן יקרה ותהי על ראש דויד ושלל העיר הוציא הרבה מאד׃

20:3b.1CH.020.003 ואת העם אשר בה הוציא וישר במגרה ובחריצי הברזל ובמגרות וכן יעשה דויד לכל ערי בני עמון וישב דויד וכל העם ירושלם׃

20:4b.1CH.020.004 ויהי אחריכן ותעמד מלחמה בגזר עם פלשתים אז הכה סבכי החשתי את ספי מילדי הרפאים ויכנעו׃

20:5b.1CH.020.005 ותהי עוד מלחמה את פלשתים ויך אלחנן בן יעור את לחמי אחי גלית הגתי ועץ חניתו כמנור ארגים׃

20:6b.1CH.020.006 ותהי עוד מלחמה בגת ויהי איש מדה ואצבעתיו שש ושש עשרים וארבע וגם הוא נולד להרפא׃

20:7b.1CH.020.007 ויחרף את ישראל ויכהו יהונתן בן שמעא אחי דויד׃

20:8b.1CH.020.008 אל נולדו להרפא בגת ויפלו ביד דויד וביד עבדיו׃

21

21:1b.1CH.021.001 ויעמד שטן על ישראל ויסת את דויד למנות את ישראל׃

21:2b.1CH.021.002 ויאמר דויד אל יואב ואל שרי העם לכו ספרו את ישראל מבאר שבע ועד דן והביאו אלי ואדעה את מספרם׃

21:3b.1CH.021.003 ויאמר יואב יוסף יהוה על עמו כהם מאה פעמים הלא אדני המלך כלם לאדני לעבדים למה יבקש זאת אדני למה יהיה לאשמה לישראל׃

21:4b.1CH.021.004 ודבר המלך חזק על יואב ויצא יואב ויתהלך בכל ישראל ויבא ירושלם׃

21:5b.1CH.021.005 ויתן יואב את מספר מפקד העם אל דויד ויהי כל ישראל אלף אלפים ומאה אלף איש שלף חרב ויהודה ארבע מאות ושבעים אלף איש שלף חרב׃

21:6b.1CH.021.006 ולוי ובנימן לא פקד בתוכם כי נתעב דבר המלך את יואב׃

21:7b.1CH.021.007 וירע בעיני האלהים על הדבר הזה ויך את ישראל׃

21:8b.1CH.021.008 ויאמר דויד אל האלהים חטאתי מאד אשר עשיתי את הדבר הזה ועתה העבר נא את עוון עבדך כי נסכלתי מאד׃

21:9b.1CH.021.009 וידבר יהוה אל גד חזה דויד לאמר׃

21:10b.1CH.021.010 לך ודברת אל דויד לאמר כה אמר יהוה שלוש אני נטה עליך בחר לך אחת מהנה ואעשה לך׃

21:11b.1CH.021.011 ויבא גד אל דויד ויאמר לו כה אמר יהוה קבל לך׃

21:12b.1CH.021.012 אם שלוש שנים רעב ואם שלשה חדשים נספה מפני צריך וחרב אויבך למשגת ואם שלשת ימים חרב יהוה ודבר בארץ ומלאך יהוה משחית בכל גבול ישראל ועתה ראה מה אשיב את שלחי דבר׃

21:13b.1CH.021.013 ויאמר דויד אל גד צר לי מאד אפלה נא ביד יהוה כי רבים רחמיו מאד וביד אדם אל אפל׃

21:14b.1CH.021.014 ויתן יהוה דבר בישראל ויפל מישראל שבעים אלף איש׃

21:15b.1CH.021.015 וישלח האלהים מלאך לירושלם להשחיתה וכהשחית ראה יהוה וינחם על הרעה ויאמר למלאך המשחית רב עתה הרף ידך ומלאך יהוה עמד עם גרן ארנן היבוסי׃

21:16b.1CH.021.016 וישא דויד את עיניו וירא את מלאך יהוה עמד בין הארץ ובין השמים וחרבו שלופה בידו נטויה על ירושלם ויפל דויד והזקנים מכסים בשקים על פניהם׃

21:17b.1CH.021.017 ויאמר דויד אל האלהים הלא אני אמרתי למנות בעם ואני הוא אשר חטאתי והרע הרעותי ואלה הצאן מה עשו יהוה אלהי תהי נא ידך בי ובבית אבי ובעמך לא למגפה׃

21:18b.1CH.021.018 ומלאך יהוה אמר אל גד לאמר לדויד כי יעלה דויד להקים מזבח ליהוה בגרן ארנן היבסי׃

21:19b.1CH.021.019 ויעל דויד בדבר גד אשר דבר בשם יהוה׃

21:20b.1CH.021.020 וישב ארנן וירא את המלאך וארבעת בניו עמו מתחבאים וארנן דש חטים׃

21:21b.1CH.021.021 ויבא דויד עד ארנן ויבט ארנן וירא את דויד ויצא מן הגרן וישתחו לדויד אפים ארצה׃

21:22b.1CH.021.022 ויאמר דויד אל ארנן תנה לי מקום הגרן ואבנה בו מזבח ליהוה בכסף מלא תנהו לי ותעצר המגפה מעל העם׃

21:23b.1CH.021.023 ויאמר ארנן אל דויד קח לך ויעש אדני המלך הטוב בעיניו ראה נתתי הבקר לעלות והמורגים לעצים והחטים למנחה הכל נתתי׃

21:24b.1CH.021.024 ויאמר המלך דויד לארנן לא כי קנה אקנה בכסף מלא כי לא אשא אשר לך ליהוה והעלות עולה חנם׃

21:25b.1CH.021.025 ויתן דויד לארנן במקום שקלי זהב משקל שש מאות׃

21:26b.1CH.021.026 ויבן שם דויד מזבח ליהוה ויעל עלות ושלמים ויקרא אל יהוה ויענהו באש מן השמים על מזבח העלה׃

21:27b.1CH.021.027 ויאמר יהוה למלאך וישב חרבו אל נדנה׃

21:28b.1CH.021.028 בעת ההיא בראות דויד כי ענהו יהוה בגרן ארנן היבוסי ויזבח שם׃

21:29b.1CH.021.029 ומשכן יהוה אשר עשה משה במדבר ומזבח העולה בעת ההיא בבמה בגבעון׃

21:30b.1CH.021.030 ולא יכל דויד ללכת לפניו לדרש אלהים כי נבעת מפני חרב מלאך יהוה׃

22

22:1b.1CH.022.001 ויאמר דויד זה הוא בית יהוה האלהים וזה מזבח לעלה לישראל׃

22:2b.1CH.022.002 ויאמר דויד לכנוס את הגרים אשר בארץ ישראל ויעמד חצבים לחצוב אבני גזית לבנות בית האלהים׃

22:3b.1CH.022.003 וברזל לרב למסמרים לדלתות השערים ולמחברות הכין דויד ונחשת לרב אין משקל׃

22:4b.1CH.022.004 ועצי ארזים לאין מספר כי הביאו הצידנים והצרים עצי ארזים לרב לדויד׃

22:5b.1CH.022.005 ויאמר דויד שלמה בני נער ורך והבית לבנות ליהוה להגדיל למעלה לשם ולתפארת לכל הארצות אכינה נא לו ויכן דויד לרב לפני מותו׃

22:6b.1CH.022.006 ויקרא לשלמה בנו ויצוהו לבנות בית ליהוה אלהי ישראל׃

22:7b.1CH.022.007 ויאמר דויד לשלמה בנו אני היה עם לבבי לבנות בית לשם יהוה אלהי׃

22:8b.1CH.022.008 ויהי עלי דבר יהוה לאמר דם לרב שפכת ומלחמות גדלות עשית לא תבנה בית לשמי כי דמים רבים שפכת ארצה לפני׃

22:9b.1CH.022.009 הנה בן נולד לך הוא יהיה איש מנוחה והנחותי לו מכל אויביו מסביב כי שלמה יהיה שמו ושלום ושקט אתן על ישראל בימיו׃

22:10b.1CH.022.010 הוא יבנה בית לשמי והוא יהיה לי לבן ואני לו לאב והכינותי כסא מלכותו על ישראל עד עולם׃

22:11b.1CH.022.011 עתה בני יהי יהוה עמך והצלחת ובנית בית יהוה אלהיך כאשר דבר עליך׃

22:12b.1CH.022.012 אך יתן לך יהוה שכל ובינה ויצוך על ישראל ולשמור את תורת יהוה אלהיך׃

22:13b.1CH.022.013 אז תצליח אם תשמור לעשות את החקים ואת המשפטים אשר צוה יהוה את משה על ישראל חזק ואמץ אל תירא ואל תחת׃

22:14b.1CH.022.014 והנה בעניי הכינותי לבית יהוה זהב ככרים מאה אלף וכסף אלף אלפים ככרים ולנחשת ולברזל אין משקל כי לרב היה ועצים ואבנים הכינותי ועליהם תוסיף׃

22:15b.1CH.022.015 ועמך לרב עשי מלאכה חצבים וחרשי אבן ועץ וכל חכם בכל מלאכה׃

22:16b.1CH.022.016 לזהב לכסף ולנחשת ולברזל אין מספר קום ועשה ויהי יהוה עמך׃

22:17b.1CH.022.017 ויצו דויד לכל שרי ישראל לעזר לשלמה בנו׃

22:18b.1CH.022.018 הלא יהוה אלהיכם עמכם והניח לכם מסביב כי נתן בידי את ישבי הארץ ונכבשה הארץ לפני יהוה ולפני עמו׃

22:19b.1CH.022.019 עתה תנו לבבכם ונפשכם לדרוש ליהוה אלהיכם וקומו ובנו את מקדש יהוה האלהים להביא את ארון ברית יהוה וכלי קדש האלהים לבית הנבנה לשם יהוה׃

23

23:1b.1CH.023.001 ודויד זקן ושבע ימים וימלך את שלמה בנו על ישראל׃

23:2b.1CH.023.002 ויאסף את כל שרי ישראל והכהנים והלוים׃

23:3b.1CH.023.003 ויספרו הלוים מבן שלשים שנה ומעלה ויהי מספרם לגלגלתם לגברים שלשים ושמונה אלף׃

23:4b.1CH.023.004 מאלה לנצח על מלאכת בית יהוה עשרים וארבעה אלף ושטרים ושפטים ששת אלפים׃

23:5b.1CH.023.005 וארבעת אלפים שערים וארבעת אלפים מהללים ליהוה בכלים אשר עשיתי להלל׃

23:6b.1CH.023.006 ויחלקם דויד מחלקות לבני לוי לגרשון קהת ומררי׃

23:7b.1CH.023.007 לגרשני לעדן ושמעי׃

23:8b.1CH.023.008 בני לעדן הראש יחיאל וזתם ויואל שלשה׃

23:9b.1CH.023.009 בני שמעי שלמות וחזיאל והרן שלשה אלה ראשי האבות ללעדן׃

23:10b.1CH.023.010 ובני שמעי יחת זינא ויעוש ובריעה אלה בני שמעי ארבעה׃

23:11b.1CH.023.011 ויהי יחת הראש וזיזה השני ויעוש ובריעה לא הרבו בנים ויהיו לבית אב לפקדה אחת׃

23:12b.1CH.023.012 בני קהת עמרם יצהר חברון ועזיאל ארבעה׃

23:13b.1CH.023.013 בני עמרם אהרן ומשה ויבדל אהרן להקדישו קדש קדשים הוא ובניו עד עולם להקטיר לפני יהוה לשרתו ולברך בשמו עד עולם׃

23:14b.1CH.023.014 ומשה איש האלהים בניו יקראו על שבט הלוי׃

23:15b.1CH.023.015 בני משה גרשם ואליעזר׃

23:16b.1CH.023.016 בני גרשום שבואל הראש׃

23:17b.1CH.023.017 ויהיו בני אליעזר רחביה הראש ולא היה לאליעזר בנים אחרים ובני רחביה רבו למעלה׃

23:18b.1CH.023.018 בני יצהר שלמית הראש׃

23:19b.1CH.023.019 בני חברון יריהו הראש אמריה השני יחזיאל השלישי ויקמעם הרביעי׃

23:20b.1CH.023.020 בני עזיאל מיכה הראש וישיה השני׃

23:21b.1CH.023.021 בני מררי מחלי ומושי בני מחלי אלעזר וקיש׃

23:22b.1CH.023.022 וימת אלעזר ולא היו לו בנים כי אם בנות וישאום בני קיש אחיהם׃

23:23b.1CH.023.023 בני מושי מחלי ועדר וירמות שלשה׃

23:24b.1CH.023.024 אלה בני לוי לבית אבתיהם ראשי האבות לפקודיהם במספר שמות לגלגלתם עשה המלאכה לעבדת בית יהוה מבן עשרים שנה ומעלה׃

23:25b.1CH.023.025 כי אמר דויד הניח יהוה אלהי ישראל לעמו וישכן בירושלם עד לעולם׃

23:26b.1CH.023.026 וגם ללוים אין לשאת את המשכן ואת כל כליו לעבדתו׃

23:27b.1CH.023.027 כי בדברי דויד האחרנים המה מספר בני לוי מבן עשרים שנה ולמעלה׃

23:28b.1CH.023.028 כי מעמדם ליד בני אהרן לעבדת בית יהוה על החצרות ועל הלשכות ועל טהרת לכל קדש ומעשה עבדת בית האלהים׃

23:29b.1CH.023.029 וללחם המערכת ולסלת למנחה ולרקיקי המצות ולמחבת ולמרבכת ולכל משורה ומדה׃

23:30b.1CH.023.030 ולעמד בבקר בבקר להדות ולהלל ליהוה וכן לערב׃

23:31b.1CH.023.031 ולכל העלות עלות ליהוה לשבתות לחדשים ולמעדים במספר כמשפט עליהם תמיד לפני יהוה׃

23:32b.1CH.023.032 ושמרו את משמרת אהל מועד ואת משמרת הקדש ומשמרת בני אהרן אחיהם לעבדת בית יהוה׃

24

24:1b.1CH.024.001 ולבני אהרן מחלקותם בני אהרן נדב ואביהוא אלעזר ואיתמר׃

24:2b.1CH.024.002 וימת נדב ואביהוא לפני אביהם ובנים לא היו להם ויכהנו אלעזר ואיתמר׃

24:3b.1CH.024.003 ויחלקם דויד וצדוק מן בני אלעזר ואחימלך מן בני איתמר לפקדתם בעבדתם׃

24:4b.1CH.024.004 וימצאו בני אלעזר רבים לראשי הגברים מן בני איתמר ויחלקום לבני אלעזר ראשים לבית אבות ששה עשר ולבני איתמר לבית אבותם שמונה׃

24:5b.1CH.024.005 ויחלקום בגורלות אלה עם אלה כי היו שרי קדש ושרי האלהים מבני אלעזר ובבני איתמר׃

24:6b.1CH.024.006 ויכתבם שמעיה בן נתנאל הסופר מן הלוי לפני המלך והשרים וצדוק הכהן ואחימלך בן אביתר וראשי האבות לכהנים וללוים בית אב אחד אחז לאלעזר ואחז אחז לאיתמר׃

24:7b.1CH.024.007 ויצא הגורל הראשון ליהויריב לידעיה השני׃

24:8b.1CH.024.008 לחרם השלישי לשערים הרבעי׃

24:9b.1CH.024.009 למלכיה החמישי למימן הששי׃

24:10b.1CH.024.010 להקוץ השבעי לאביה השמיני׃

24:11b.1CH.024.011 לישוע התשעי לשכניהו העשרי׃

24:12b.1CH.024.012 לאלישיב עשתי עשר ליקים שנים עשר׃

24:13b.1CH.024.013 לחפה שלשה עשר לישבאב ארבעה עשר׃

24:14b.1CH.024.014 לבלגה חמשה עשר לאמר ששה עשר׃

24:15b.1CH.024.015 לחזיר שבעה עשר להפצץ שמונה עשר׃

24:16b.1CH.024.016 לפתחיה תשעה עשר ליחזקאל העשרים׃

24:17b.1CH.024.017 ליכין אחד ועשרים לגמול שנים ועשרים׃

24:18b.1CH.024.018 לדליהו שלשה ועשרים למעזיהו ארבעה ועשרים׃

24:19b.1CH.024.019 אלה פקדתם לעבדתם לבוא לבית יהוה כמשפטם ביד אהרן אביהם כאשר צוהו יהוה אלהי ישראל׃

24:20b.1CH.024.020 ולבני לוי הנותרים לבני עמרם שובאל לבני שובאל יחדיהו׃

24:21b.1CH.024.021 לרחביהו לבני רחביהו הראש ישיה׃

24:22b.1CH.024.022 ליצהרי שלמות לבני שלמות יחת׃

24:23b.1CH.024.023 ובני יריהו אמריהו השני יחזיאל השלישי יקמעם הרביעי׃

24:24b.1CH.024.024 בני עזיאל מיכה לבני מיכה שמור׃

24:25b.1CH.024.025 אחי מיכה ישיה לבני ישיה זכריהו׃

24:26b.1CH.024.026 בני מררי מחלי ומושי בני יעזיהו בנו׃

24:27b.1CH.024.027 בני מררי ליעזיהו בנו ושהם וזכור ועברי׃

24:28b.1CH.024.028 למחלי אלעזר ולא היה לו בנים׃

24:29b.1CH.024.029 לקיש בני קיש ירחמאל׃

24:30b.1CH.024.030 ובני מושי מחלי ועדר וירימות אלה בני הלוים לבית אבתיהם׃

24:31b.1CH.024.031 ויפילו גם הם גורלות לעמת אחיהם בני אהרן לפני דויד המלך וצדוק ואחימלך וראשי האבות לכהנים וללוים אבות הראש לעמת אחיו הקטן׃

25

25:1b.1CH.025.001 ויבדל דויד ושרי הצבא לעבדה לבני אסף והימן וידותון הנביאים בכנרות בנבלים ובמצלתים ויהי מספרם אנשי מלאכה לעבדתם׃

25:2b.1CH.025.002 לבני אסף זכור ויוסף ונתניה ואשראלה בני אסף על יד אסף הנבא על ידי המלך׃

25:3b.1CH.025.003 לידותון בני ידותון גדליהו וצרי וישעיהו חשביהו ומתתיהו ששה על ידי אביהם ידותון בכנור הנבא על הדות והלל ליהוה׃

25:4b.1CH.025.004 להימן בני הימן בקיהו מתניהו עזיאל שבואל וירימות חנניה חנני אליאתה גדלתי ורממתי עזר ישבקשה מלותי הותיר מחזיאות׃

25:5b.1CH.025.005 כל אלה בנים להימן חזה המלך בדברי האלהים להרים קרן ויתן האלהים להימן בנים ארבעה עשר ובנות שלוש׃

25:6b.1CH.025.006 כל אלה על ידי אביהם בשיר בית יהוה במצלתים נבלים וכנרות לעבדת בית האלהים על ידי המלך אסף וידותון והימן׃

25:7b.1CH.025.007 ויהי מספרם עם אחיהם מלמדי שיר ליהוה כל המבין מאתים שמונים ושמונה׃

25:8b.1CH.025.008 ויפילו גורלות משמרת לעמת כקטן כגדול מבין עם תלמיד׃

25:9b.1CH.025.009 ויצא הגורל הראשון לאסף ליוסף גדליהו השני הוא ואחיו ובניו שנים עשר׃

25:10b.1CH.025.010 השלשי זכור בניו ואחיו שנים עשר׃

25:11b.1CH.025.011 הרביעי ליצרי בניו ואחיו שנים עשר׃

25:12b.1CH.025.012 החמישי נתניהו בניו ואחיו שנים עשר׃

25:13b.1CH.025.013 הששי בקיהו בניו ואחיו שנים עשר׃

25:14b.1CH.025.014 השבעי ישראלה בניו ואחיו שנים עשר׃

25:15b.1CH.025.015 השמיני ישעיהו בניו ואחיו שנים עשר׃

25:16b.1CH.025.016 התשיעי מתניהו בניו ואחיו שנים עשר׃

25:17b.1CH.025.017 העשירי שמעי בניו ואחיו שנים עשר׃

25:18b.1CH.025.018 עשתי עשר עזראל בניו ואחיו שנים עשר׃

25:19b.1CH.025.019 השנים עשר לחשביה בניו ואחיו שנים עשר׃

25:20b.1CH.025.020 לשלשה עשר שובאל בניו ואחיו שנים עשר׃

25:21b.1CH.025.021 לארבעה עשר מתתיהו בניו ואחיו שנים עשר׃

25:22b.1CH.025.022 לחמשה עשר לירמות בניו ואחיו שנים עשר׃

25:23b.1CH.025.023 לששה עשר לחנניהו בניו ואחיו שנים עשר׃

25:24b.1CH.025.024 לשבעה עשר לישבקשה בניו ואחיו שנים עשר׃

25:25b.1CH.025.025 לשמונה עשר לחנני בניו ואחיו שנים עשר׃

25:26b.1CH.025.026 לתשעה עשר למלותי בניו ואחיו שנים עשר׃

25:27b.1CH.025.027 לעשרים לאליתה בניו ואחיו שנים עשר׃

25:28b.1CH.025.028 לאחד ועשרים להותיר בניו ואחיו שנים עשר׃

25:29b.1CH.025.029 לשנים ועשרים לגדלתי בניו ואחיו שנים עשר׃

25:30b.1CH.025.030 לשלשה ועשרים למחזיאות בניו ואחיו שנים עשר׃

25:31b.1CH.025.031 לארבעה ועשרים לרוממתי עזר בניו ואחיו שנים עשר׃

26

26:1b.1CH.026.001 למחלקות לשערים לקרחים משלמיהו בן קרא מן בני אסף׃

26:2b.1CH.026.002 ולמשלמיהו בנים זכריהו הבכור ידיעאל השני זבדיהו השלישי יתניאל הרביעי׃

26:3b.1CH.026.003 עילם החמישי יהוחנן הששי אליהועיני השביעי׃

26:4b.1CH.026.004 ולעבד אדם בנים שמעיה הבכור יהוזבד השני יואח השלשי ושכר הרביעי ונתנאל החמישי׃

26:5b.1CH.026.005 עמיאל הששי יששכר השביעי פעלתי השמיני כי ברכו אלהים׃

26:6b.1CH.026.006 ולשמעיה בנו נולד בנים הממשלים לבית אביהם כי גבורי חיל המה׃

26:7b.1CH.026.007 בני שמעיה עתני ורפאל ועובד אלזבד אחיו בני חיל אליהו וסמכיהו׃

26:8b.1CH.026.008 כל אלה מבני עבד אדם המה ובניהם ואחיהם איש חיל בכח לעבדה ששים ושנים לעבד אדם׃

26:9b.1CH.026.009 ולמשלמיהו בנים ואחים בני חיל שמונה עשר׃

26:10b.1CH.026.010 ולחסה מן בני מררי בנים שמרי הראש כי לא היה בכור וישימהו אביהו לראש׃

26:11b.1CH.026.011 חלקיהו השני טבליהו השלשי זכריהו הרבעי כל בנים ואחים לחסה שלשה עשר׃

26:12b.1CH.026.012 לאלה מחלקות השערים לראשי הגברים משמרות לעמת אחיהם לשרת בבית יהוה׃

26:13b.1CH.026.013 ויפילו גורלות כקטן כגדול לבית אבותם לשער ושער׃

26:14b.1CH.026.014 ויפל הגורל מזרחה לשלמיהו וזכריהו בנו יועץ בשכל הפילו גורלות ויצא גורלו צפונה׃

26:15b.1CH.026.015 לעבד אדם נגבה ולבניו בית האספים׃

26:16b.1CH.026.016 לשפים ולחסה למערב עם שער שלכת במסלה העולה משמר לעמת משמר׃

26:17b.1CH.026.017 למזרח הלוים ששה לצפונה ליום ארבעה לנגבה ליום ארבעה ולאספים שנים שנים׃

26:18b.1CH.026.018 לפרבר למערב ארבעה למסלה שנים לפרבר׃

26:19b.1CH.026.019 אלה מחלקות השערים לבני הקרחי ולבני מררי׃

26:20b.1CH.026.020 והלוים אחיה על אוצרות בית האלהים ולאצרות הקדשים׃

26:21b.1CH.026.021 בני לעדן בני הגרשני ללעדן ראשי האבות ללעדן הגרשני יחיאלי׃

26:22b.1CH.026.022 בני יחיאלי זתם ויואל אחיו על אצרות בית יהוה׃

26:23b.1CH.026.023 לעמרמי ליצהרי לחברוני לעזיאלי׃

26:24b.1CH.026.024 ושבאל בן גרשום בן משה נגיד על האצרות׃

26:25b.1CH.026.025 ואחיו לאליעזר רחביהו בנו וישעיהו בנו וירם בנו וזכרי בנו ושלמות בנו׃

26:26b.1CH.026.026 הוא שלמות ואחיו על כל אצרות הקדשים אשר הקדיש דויד המלך וראשי האבות לשרי האלפים והמאות ושרי הצבא׃

26:27b.1CH.026.027 מן המלחמות ומן השלל הקדישו לחזק לבית יהוה׃

26:28b.1CH.026.028 וכל ההקדיש שמואל הראה ושאול בן קיש ואבנר בן נר ויואב בן צרויה כל המקדיש על יד שלמית ואחיו׃

26:29b.1CH.026.029 ליצהרי כנניהו ובניו למלאכה החיצונה על ישראל לשטרים ולשפטים׃

26:30b.1CH.026.030 לחברוני חשביהו ואחיו בני חיל אלף ושבע מאות על פקדת ישראל מעבר לירדן מערבה לכל מלאכת יהוה ולעבדת המלך׃

26:31b.1CH.026.031 לחברוני יריה הראש לחברוני לתלדתיו לאבות בשנת הארבעים למלכות דויד נדרשו וימצא בהם גבורי חיל ביעזיר גלעד׃

26:32b.1CH.026.032 ואחיו בני חיל אלפים ושבע מאות ראשי האבות ויפקידם דויד המלך על הראובני והגדי וחצי שבט המנשי לכל דבר האלהים ודבר המלך׃

27

27:1b.1CH.027.001 ובני ישראל למספרם ראשי האבות ושרי האלפים והמאות ושטריהם המשרתים את המלך לכל דבר המחלקות הבאה והיצאת חדש בחדש לכל חדשי השנה המחלקת האחת עשרים וארבעה אלף׃

27:2b.1CH.027.002 על המחלקת הראשונה לחדש הראשון ישבעם בן זבדיאל ועל מחלקתו עשרים וארבעה אלף׃

27:3b.1CH.027.003 מן בני פרץ הראש לכל שרי הצבאות לחדש הראשון׃

27:4b.1CH.027.004 ועל מחלקת החדש השני דודי האחוחי ומחלקתו ומקלות הנגיד ועל מחלקתו עשרים וארבעה אלף׃

27:5b.1CH.027.005 שר הצבא השלישי לחדש השלישי בניהו בן יהוידע הכהן ראש ועל מחלקתו עשרים וארבעה אלף׃

27:6b.1CH.027.006 הוא בניהו גבור השלשים ועל השלשים ומחלקתו עמיזבד בנו׃

27:7b.1CH.027.007 הרביעי לחדש הרביעי עשה אל אחי יואב וזבדיה בנו אחריו ועל מחלקתו עשרים וארבעה אלף׃

27:8b.1CH.027.008 החמישי לחדש החמישי השר שמהות היזרח ועל מחלקתו עשרים וארבעה אלף׃

27:9b.1CH.027.009 הששי לחדש הששי עירא בן עקש התקועי ועל מחלקתו עשרים וארבעה אלף׃

27:10b.1CH.027.010 השביעי לחדש השביעי חלץ הפלוני מן בני אפרים ועל מחלקתו עשרים וארבעה אלף׃

27:11b.1CH.027.011 השמיני לחדש השמיני סבכי החשתי לזרחי ועל מחלקתו עשרים וארבעה אלף׃

27:12b.1CH.027.012 התשיעי לחדש התשיעי אביעזר הענתתי לבנימיני ועל מחלקתו עשרים וארבעה אלף׃

27:13b.1CH.027.013 העשירי לחדש העשירי מהרי הנטופתי לזרחי ועל מחלקתו עשרים וארבעה אלף׃

27:14b.1CH.027.014 עשתי עשר לעשתי עשר החדש בניה הפרעתוני מן בני אפרים ועל מחלקתו עשרים וארבעה אלף׃

27:15b.1CH.027.015 השנים עשר לשנים עשר החדש חלדי הנטופתי לעתניאל ועל מחלקתו עשרים וארבעה אלף׃

27:16b.1CH.027.016 ועל שבטי ישראל לראובני נגיד אליעזר בן זכרי לשמעוני שפטיהו בן מעכה׃

27:17b.1CH.027.017 ללוי חשביה בן קמואל לאהרן צדוק׃

27:18b.1CH.027.018 ליהודה אליהו מאחי דויד ליששכר עמרי בן מיכאל׃

27:19b.1CH.027.019 לזבולן ישמעיהו בן עבדיהו לנפתלי ירימות בן עזריאל׃

27:20b.1CH.027.020 לבני אפרים הושע בן עזזיהו לחצי שבט מנשה יואל בן פדיהו׃

27:21b.1CH.027.021 לחצי המנשה גלעדה ידו בן זכריהו לבנימן יעשיאל בן אבנר׃

27:22b.1CH.027.022 לדן עזראל בן ירחם אלה שרי שבטי ישראל׃

27:23b.1CH.027.023 ולא נשא דויד מספרם למבן עשרים שנה ולמטה כי אמר יהוה להרבות את ישראל ככוכבי השמים׃

27:24b.1CH.027.024 יואב בן צרויה החל למנות ולא כלה ויהי בזאת קצף על ישראל ולא עלה המספר במספר דברי הימים למלך דויד׃

27:25b.1CH.027.025 ועל אצרות המלך עזמות בן עדיאל ועל האצרות בשדה בערים ובכפרים ובמגדלות יהונתן בן עזיהו׃

27:26b.1CH.027.026 ועל עשי מלאכת השדה לעבדת האדמה עזרי בן כלוב׃

27:27b.1CH.027.027 ועל הכרמים שמעי הרמתי ועל שבכרמים לאצרות היין זבדי השפמי׃

27:28b.1CH.027.028 ועל הזיתים והשקמים אשר בשפלה בעל חנן הגדרי ועל אצרות השמן יועש׃

27:29b.1CH.027.029 ועל הבקר הרעים בשרון שטרי השרוני ועל הבקר בעמקים שפט בן עדלי׃

27:30b.1CH.027.030 ועל הגמלים אוביל הישמעלי ועל האתנות יחדיהו המרנתי׃

27:31b.1CH.027.031 ועל הצאן יזיז ההגרי כל אלה שרי הרכוש אשר למלך דויד׃

27:32b.1CH.027.032 ויהונתן דוד דויד יועץ איש מבין וסופר הוא ויחיאל בן חכמוני עם בני המלך׃

27:33b.1CH.027.033 ואחיתפל יועץ למלך וחושי הארכי רע המלך׃

27:34b.1CH.027.034 ואחרי אחיתפל יהוידע בן בניהו ואביתר ושר צבא למלך יואב׃

28

28:1b.1CH.028.001 ויקהל דויד את כל שרי ישראל שרי השבטים ושרי המחלקות המשרתים את המלך ושרי האלפים ושרי המאות ושרי כל רכוש ומקנה למלך ולבניו עם הסריסים והגבורים ולכל גבור חיל אל ירושלם׃

28:2b.1CH.028.002 ויקם דויד המלך על רגליו ויאמר שמעוני אחי ועמי אני עם לבבי לבנות בית מנוחה לארון ברית יהוה ולהדם רגלי אלהינו והכינותי לבנות׃

28:3b.1CH.028.003 והאלהים אמר לי לא תבנה בית לשמי כי איש מלחמות אתה ודמים שפכת׃

28:4b.1CH.028.004 ויבחר יהוה אלהי ישראל בי מכל בית אבי להיות למלך על ישראל לעולם כי ביהודה בחר לנגיד ובבית יהודה בית אבי ובבני אבי בי רצה להמליך על כל ישראל׃

28:5b.1CH.028.005 ומכל בני כי רבים בנים נתן לי יהוה ויבחר בשלמה בני לשבת על כסא מלכות יהוה על ישראל׃

28:6b.1CH.028.006 ויאמר לי שלמה בנך הוא יבנה ביתי וחצרותי כי בחרתי בו לי לבן ואני אהיה לו לאב׃

28:7b.1CH.028.007 והכינותי את מלכותו עד לעולם אם יחזק לעשות מצותי ומשפטי כיום הזה׃

28:8b.1CH.028.008 ועתה לעיני כל ישראל קהל יהוה ובאזני אלהינו שמרו ודרשו כל מצות יהוה אלהיכם למען תירשו את הארץ הטובה והנחלתם לבניכם אחריכם עד עולם׃

28:9b.1CH.028.009 ואתה שלמה בני דע את אלהי אביך ועבדהו בלב שלם ובנפש חפצה כי כל לבבות דורש יהוה וכל יצר מחשבות מבין אם תדרשנו ימצא לך ואם תעזבנו יזניחך לעד׃

28:10b.1CH.028.010 ראה עתה כי יהוה בחר בך לבנות בית למקדש חזק ועשה׃

28:11b.1CH.028.011 ויתן דויד לשלמה בנו את תבנית האולם ואת בתיו וגנזכיו ועליתיו וחדריו הפנימים ובית הכפרת׃

28:12b.1CH.028.012 ותבנית כל אשר היה ברוח עמו לחצרות בית יהוה ולכל הלשכות סביב לאצרות בית האלהים ולאצרות הקדשים׃

28:13b.1CH.028.013 ולמחלקות הכהנים והלוים ולכל מלאכת עבודת בית יהוה ולכל כלי עבודת בית יהוה׃

28:14b.1CH.028.014 לזהב במשקל לזהב לכל כלי עבודה ועבודה לכל כלי הכסף במשקל לכל כלי עבודה ועבודה׃

28:15b.1CH.028.015 ומשקל למנרות הזהב ונרתיהם זהב במשקל מנורה ומנורה ונרתיה ולמנרות הכסף במשקל למנורה ונרתיה כעבודת מנורה ומנורה׃

28:16b.1CH.028.016 ואת הזהב משקל לשלחנות המערכת לשלחן ושלחן וכסף לשלחנות הכסף׃

28:17b.1CH.028.017 והמזלגות והמזרקות והקשות זהב טהור ולכפורי הזהב במשקל לכפור וכפור ולכפורי הכסף במשקל לכפור וכפור׃

28:18b.1CH.028.018 ולמזבח הקטרת זהב מזקק במשקל ולתבנית המרכבה הכרבים זהב לפרשים וסככים על ארון ברית יהוה׃

28:19b.1CH.028.019 הכל בכתב מיד יהוה עלי השכיל כל מלאכות התבנית׃

28:20b.1CH.028.020 ויאמר דויד לשלמה בנו חזק ואמץ ועשה אל תירא ואל תחת כי יהוה אלהים אלהי עמך לא ירפך ולא יעזבך עד לכלות כל מלאכת עבודת בית יהוה׃

28:21b.1CH.028.021 והנה מחלקות הכהנים והלוים לכל עבודת בית האלהים ועמך בכל מלאכה לכל נדיב בחכמה לכל עבודה והשרים וכל העם לכל דבריך׃

29

29:1b.1CH.029.001 ויאמר דויד המלך לכל הקהל שלמה בני אחד בחר בו אלהים נער ורך והמלאכה גדולה כי לא לאדם הבירה כי ליהוה אלהים׃

29:2b.1CH.029.002 וככל כחי הכינותי לבית אלהי הזהב לזהב והכסף לכסף והנחשת לנחשת הברזל לברזל והעצים לעצים אבני שהם ומלואים אבני פוך ורקמה וכל אבן יקרה ואבני שיש לרב׃

29:3b.1CH.029.003 ועוד ברצותי בבית אלהי יש לי סגלה זהב וכסף נתתי לבית אלהי למעלה מכל הכינותי לבית הקדש׃

29:4b.1CH.029.004 שלשת אלפים ככרי זהב מזהב אופיר ושבעת אלפים ככר כסף מזקק לטוח קירות הבתים׃

29:5b.1CH.029.005 לזהב לזהב ולכסף לכסף ולכל מלאכה ביד חרשים ומי מתנדב למלאות ידו היום ליהוה׃

29:6b.1CH.029.006 ויתנדבו שרי האבות ושרי שבטי ישראל ושרי האלפים והמאות ולשרי מלאכת המלך׃

29:7b.1CH.029.007 ויתנו לעבודת בית האלהים זהב ככרים חמשת אלפים ואדרכנים רבו וכסף ככרים עשרת אלפים ונחשת רבו ושמונת אלפים ככרים וברזל מאה אלף ככרים׃

29:8b.1CH.029.008 והנמצא אתו אבנים נתנו לאוצר בית יהוה על יד יחיאל הגרשני׃

29:9b.1CH.029.009 וישמחו העם על התנדבם כי בלב שלם התנדבו ליהוה וגם דויד המלך שמח שמחה גדולה׃

29:10b.1CH.029.010 ויברך דויד את יהוה לעיני כל הקהל ויאמר דויד ברוך אתה יהוה אלהי ישראל אבינו מעולם ועד עולם׃

29:11b.1CH.029.011 לך יהוה הגדלה והגבורה והתפארת והנצח וההוד כי כל בשמים ובארץ לך יהוה הממלכה והמתנשא לכל לראש׃

29:12b.1CH.029.012 והעשר והכבוד מלפניך ואתה מושל בכל ובידך כח וגבורה ובידך לגדל ולחזק לכל׃

29:13b.1CH.029.013 ועתה אלהינו מודים אנחנו לך ומהללים לשם תפארתך׃

29:14b.1CH.029.014 וכי מי אני ומי עמי כי נעצר כח להתנדב כזאת כי ממך הכל ומידך נתנו לך׃

29:15b.1CH.029.015 כי גרים אנחנו לפניך ותושבים ככל אבתינו כצל ימינו על הארץ ואין מקוה׃

29:16b.1CH.029.016 יהוה אלהינו כל ההמון הזה אשר הכיננו לבנות לך בית לשם קדשך מידך היא ולך הכל׃

29:17b.1CH.029.017 וידעתי אלהי כי אתה בחן לבב ומישרים תרצה אני בישר לבבי התנדבתי כל אלה ועתה עמך הנמצאו פה ראיתי בשמחה להתנדב לך׃

29:18b.1CH.029.018 יהוה אלהי אברהם יצחק וישראל אבתינו שמרה זאת לעולם ליצר מחשבות לבב עמך והכן לבבם אליך׃

29:19b.1CH.029.019 ולשלמה בני תן לבב שלם לשמור מצותיך עדותיך וחקיך ולעשות הכל ולבנות הבירה אשר הכינותי׃

29:20b.1CH.029.020 ויאמר דויד לכל הקהל ברכו נא את יהוה אלהיכם ויברכו כל הקהל ליהוה אלהי אבתיהם ויקדו וישתחוו ליהוה ולמלך׃

29:21b.1CH.029.021 ויזבחו ליהוה זבחים ויעלו עלות ליהוה למחרת היום ההוא פרים אלף אילים אלף כבשים אלף ונסכיהם וזבחים לרב לכל ישראל׃

29:22b.1CH.029.022 ויאכלו וישתו לפני יהוה ביום ההוא בשמחה גדולה וימליכו שנית לשלמה בן דויד וימשחו ליהוה לנגיד ולצדוק לכהן׃

29:23b.1CH.029.023 וישב שלמה על כסא יהוה למלך תחת דויד אביו ויצלח וישמעו אליו כל ישראל׃

29:24b.1CH.029.024 וכל השרים והגברים וגם כל בני המלך דויד נתנו יד תחת שלמה המלך׃

29:25b.1CH.029.025 ויגדל יהוה את שלמה למעלה לעיני כל ישראל ויתן עליו הוד מלכות אשר לא היה על כל מלך לפניו על ישראל׃

29:26b.1CH.029.026 ודויד בן ישי מלך על כל ישראל׃

29:27b.1CH.029.027 והימים אשר מלך על ישראל ארבעים שנה בחברון מלך שבע שנים ובירושלם מלך שלשים ושלוש׃

29:28b.1CH.029.028 וימת בשיבה טובה שבע ימים עשר וכבוד וימלך שלמה בנו תחתיו׃

29:29b.1CH.029.029 ודברי דויד המלך הראשנים והאחרנים הנם כתובים על דברי שמואל הראה ועל דברי נתן הנביא ועל דברי גד החזה׃

29:30b.1CH.029.030 עם כל מלכותו וגבורתו והעתים אשר עברו עליו ועל ישראל ועל כל ממלכות הארצות׃