Deuteronomy (Hebrew)

1

1:1b.DEU.001.001 אלה הדברים אשר דבר משה אל כל ישראל בעבר הירדן במדבר בערבה מול סוף בין פארן ובין תפל ולבן וחצרת ודי זהב׃

1:2b.DEU.001.002 אחד עשר יום מחרב דרך הר שעיר עד קדש ברנע׃

1:3b.DEU.001.003 ויהי בארבעים שנה בעשתי עשר חדש באחד לחדש דבר משה אל בני ישראל ככל אשר צוה יהוה אתו אלהם׃

1:4b.DEU.001.004 אחרי הכתו את סיחן מלך האמרי אשר יושב בחשבון ואת עוג מלך הבשן אשר יושב בעשתרת באדרעי׃

1:5b.DEU.001.005 בעבר הירדן בארץ מואב הואיל משה באר את התורה הזאת לאמר׃

1:6b.DEU.001.006 יהוה אלהינו דבר אלינו בחרב לאמר רב לכם שבת בהר הזה׃

1:7b.DEU.001.007 פנו וסעו לכם ובאו הר האמרי ואל כל שכניו בערבה בהר ובשפלה ובנגב ובחוף הים ארץ הכנעני והלבנון עד הנהר הגדל נהר פרת׃

1:8b.DEU.001.008 ראה נתתי לפניכם את הארץ באו ורשו את הארץ אשר נשבע יהוה לאבתיכם לאברהם ליצחק וליעקב לתת להם ולזרעם אחריהם׃

1:9b.DEU.001.009 ואמר אלכם בעת ההוא לאמר לא אוכל לבדי שאת אתכם׃

1:10b.DEU.001.010 יהוה אלהיכם הרבה אתכם והנכם היום ככוכבי השמים לרב׃

1:11b.DEU.001.011 יהוה אלהי אבותכם יסף עליכם ככם אלף פעמים ויברך אתכם כאשר דבר לכם׃

1:12b.DEU.001.012 איכה אשא לבדי טרחכם ומשאכם וריבכם׃

1:13b.DEU.001.013 הבו לכם אנשים חכמים ונבנים וידעים לשבטיכם ואשימם בראשיכם׃

1:14b.DEU.001.014 ותענו אתי ותאמרו טוב הדבר אשר דברת לעשות׃

1:15b.DEU.001.015 ואקח את ראשי שבטיכם אנשים חכמים וידעים ואתן אתם ראשים עליכם שרי אלפים ושרי מאות ושרי חמשים ושרי עשרת ושטרים לשבטיכם׃

1:16b.DEU.001.016 ואצוה את שפטיכם בעת ההוא לאמר שמע בין אחיכם ושפטתם צדק בין איש ובין אחיו ובין גרו׃

1:17b.DEU.001.017 לא תכירו פנים במשפט כקטן כגדל תשמעון לא תגורו מפני איש כי המשפט לאלהים הוא והדבר אשר יקשה מכם תקרבון אלי ושמעתיו׃

1:18b.DEU.001.018 ואצוה אתכם בעת ההוא את כל הדברים אשר תעשון׃

1:19b.DEU.001.019 ונסע מחרב ונלך את כל המדבר הגדול והנורא ההוא אשר ראיתם דרך הר האמרי כאשר צוה יהוה אלהינו אתנו ונבא עד קדש ברנע׃

1:20b.DEU.001.020 ואמר אלכם באתם עד הר האמרי אשר יהוה אלהינו נתן לנו׃

1:21b.DEU.001.021 ראה נתן יהוה אלהיך לפניך את הארץ עלה רש כאשר דבר יהוה אלהי אבתיך לך אל תירא ואל תחת׃

1:22b.DEU.001.022 ותקרבון אלי כלכם ותאמרו נשלחה אנשים לפנינו ויחפרו לנו את הארץ וישבו אתנו דבר את הדרך אשר נעלה בה ואת הערים אשר נבא אליהן׃

1:23b.DEU.001.023 וייטב בעיני הדבר ואקח מכם שנים עשר אנשים איש אחד לשבט׃

1:24b.DEU.001.024 ויפנו ויעלו ההרה ויבאו עד נחל אשכל וירגלו אתה׃

1:25b.DEU.001.025 ויקחו בידם מפרי הארץ ויורדו אלינו וישבו אתנו דבר ויאמרו טובה הארץ אשר יהוה אלהינו נתן לנו׃

1:26b.DEU.001.026 ולא אביתם לעלת ותמרו את פי יהוה אלהיכם׃

1:27b.DEU.001.027 ותרגנו באהליכם ותאמרו בשנאת יהוה אתנו הוציאנו מארץ מצרים לתת אתנו ביד האמרי להשמידנו׃

1:28b.DEU.001.028 אנה אנחנו עלים אחינו המסו את לבבנו לאמר עם גדול ורם ממנו ערים גדלת ובצורת בשמים וגם בני ענקים ראינו שם׃

1:29b.DEU.001.029 ואמר אלכם לא תערצון ולא תיראון מהם׃

1:30b.DEU.001.030 יהוה אלהיכם ההלך לפניכם הוא ילחם לכם ככל אשר עשה אתכם במצרים לעיניכם׃

1:31b.DEU.001.031 ובמדבר אשר ראית אשר נשאך יהוה אלהיך כאשר ישא איש את בנו בכל הדרך אשר הלכתם עד באכם עד המקום הזה׃

1:32b.DEU.001.032 ובדבר הזה אינכם מאמינם ביהוה אלהיכם׃

1:33b.DEU.001.033 ההלך לפניכם בדרך לתור לכם מקום לחנתכם באש לילה לראתכם בדרך אשר תלכו בה ובענן יומם׃

1:34b.DEU.001.034 וישמע יהוה את קול דבריכם ויקצף וישבע לאמר׃

1:35b.DEU.001.035 אם יראה איש באנשים האלה הדור הרע הזה את הארץ הטובה אשר נשבעתי לתת לאבתיכם׃

1:36b.DEU.001.036 זולתי כלב בן יפנה הוא יראנה ולו אתן את הארץ אשר דרך בה ולבניו יען אשר מלא אחרי יהוה׃

1:37b.DEU.001.037 גם בי התאנף יהוה בגללכם לאמר גם אתה לא תבא שם׃

1:38b.DEU.001.038 יהושע בן נון העמד לפניך הוא יבא שמה אתו חזק כי הוא ינחלנה את ישראל׃

1:39b.DEU.001.039 וטפכם אשר אמרתם לבז יהיה ובניכם אשר לא ידעו היום טוב ורע המה יבאו שמה ולהם אתננה והם יירשוה׃

1:40b.DEU.001.040 ואתם פנו לכם וסעו המדברה דרך ים סוף׃

1:41b.DEU.001.041 ותענו ותאמרו אלי חטאנו ליהוה אנחנו נעלה ונלחמנו ככל אשר צונו יהוה אלהינו ותחגרו איש את כלי מלחמתו ותהינו לעלת ההרה׃

1:42b.DEU.001.042 ויאמר יהוה אלי אמר להם לא תעלו ולא תלחמו כי אינני בקרבכם ולא תנגפו לפני איביכם׃

1:43b.DEU.001.043 ואדבר אליכם ולא שמעתם ותמרו את פי יהוה ותזדו ותעלו ההרה׃

1:44b.DEU.001.044 ויצא האמרי הישב בהר ההוא לקראתכם וירדפו אתכם כאשר תעשינה הדברים ויכתו אתכם בשעיר עד חרמה׃

1:45b.DEU.001.045 ותשבו ותבכו לפני יהוה ולא שמע יהוה בקלכם ולא האזין אליכם׃

1:46b.DEU.001.046 ותשבו בקדש ימים רבים כימים אשר ישבתם׃

2

2:1b.DEU.002.001 ונפן ונסע המדברה דרך ים סוף כאשר דבר יהוה אלי ונסב את הר שעיר ימים רבים׃

2:2b.DEU.002.002 ויאמר יהוה אלי לאמר׃

2:3b.DEU.002.003 רב לכם סב את ההר הזה פנו לכם צפנה׃

2:4b.DEU.002.004 ואת העם צו לאמר אתם עברים בגבול אחיכם בני עשו הישבים בשעיר וייראו מכם ונשמרתם מאד׃

2:5b.DEU.002.005 אל תתגרו בם כי לא אתן לכם מארצם עד מדרך כף רגל כי ירשה לעשו נתתי את הר שעיר׃

2:6b.DEU.002.006 אכל תשברו מאתם בכסף ואכלתם וגם מים תכרו מאתם בכסף ושתיתם׃

2:7b.DEU.002.007 כי יהוה אלהיך ברכך בכל מעשה ידך ידע לכתך את המדבר הגדל הזה זה ארבעים שנה יהוה אלהיך עמך לא חסרת דבר׃

2:8b.DEU.002.008 ונעבר מאת אחינו בני עשו הישבים בשעיר מדרך הערבה מאילת ומעצין גבר ונפן ונעבר דרך מדבר מואב׃

2:9b.DEU.002.009 ויאמר יהוה אלי אל תצר את מואב ואל תתגר בם מלחמה כי לא אתן לך מארצו ירשה כי לבני לוט נתתי את ער ירשה׃

2:10b.DEU.002.010 האמים לפנים ישבו בה עם גדול ורב ורם כענקים׃

2:11b.DEU.002.011 רפאים יחשבו אף הם כענקים והמאבים יקראו להם אמים׃

2:12b.DEU.002.012 ובשעיר ישבו החרים לפנים ובני עשו יירשום וישמידום מפניהם וישבו תחתם כאשר עשה ישראל לארץ ירשתו אשר נתן יהוה להם׃

2:13b.DEU.002.013 עתה קמו ועברו לכם את נחל זרד ונעבר את נחל זרד׃

2:14b.DEU.002.014 והימים אשר הלכנו מקדש ברנע עד אשר עברנו את נחל זרד שלשים ושמנה שנה עד תם כל הדור אנשי המלחמה מקרב המחנה כאשר נשבע יהוה להם׃

2:15b.DEU.002.015 וגם יד יהוה היתה בם להמם מקרב המחנה עד תמם׃

2:16b.DEU.002.016 ויהי כאשר תמו כל אנשי המלחמה למות מקרב העם׃

2:17b.DEU.002.017 וידבר יהוה אלי לאמר׃

2:18b.DEU.002.018 אתה עבר היום את גבול מואב את ער׃

2:19b.DEU.002.019 וקרבת מול בני עמון אל תצרם ואל תתגר בם כי לא אתן מארץ בני עמון לך ירשה כי לבני לוט נתתיה ירשה׃

2:20b.DEU.002.020 ארץ רפאים תחשב אף הוא רפאים ישבו בה לפנים והעמנים יקראו להם זמזמים׃

2:21b.DEU.002.021 עם גדול ורב ורם כענקים וישמידם יהוה מפניהם ויירשם וישבו תחתם׃

2:22b.DEU.002.022 כאשר עשה לבני עשו הישבים בשעיר אשר השמיד את החרי מפניהם ויירשם וישבו תחתם עד היום הזה׃

2:23b.DEU.002.023 והעוים הישבים בחצרים עד עזה כפתרים היצאים מכפתור השמידם וישבו תחתם׃

2:24b.DEU.002.024 קומו סעו ועברו את נחל ארנן ראה נתתי בידך את סיחן מלך חשבון האמרי ואת ארצו החל רש והתגר בו מלחמה׃

2:25b.DEU.002.025 היום הזה אחל תת פחדך ויראתך על פני העמים תחת כל השמים אשר ישמעון שמעך ורגזו וחלו מפניך׃

2:26b.DEU.002.026 ואשלח מלאכים ממדבר קדמות אל סיחון מלך חשבון דברי שלום לאמר׃

2:27b.DEU.002.027 אעברה בארצך בדרך בדרך אלך לא אסור ימין ושמאול׃

2:28b.DEU.002.028 אכל בכסף תשברני ואכלתי ומים בכסף תתן לי ושתיתי רק אעברה ברגלי׃

2:29b.DEU.002.029 כאשר עשו לי בני עשו הישבים בשעיר והמואבים הישבים בער עד אשר אעבר את הירדן אל הארץ אשר יהוה אלהינו נתן לנו׃

2:30b.DEU.002.030 ולא אבה סיחן מלך חשבון העברנו בו כי הקשה יהוה אלהיך את רוחו ואמץ את לבבו למען תתו בידך כיום הזה׃

2:31b.DEU.002.031 ויאמר יהוה אלי ראה החלתי תת לפניך את סיחן ואת ארצו החל רש לרשת את ארצו׃

2:32b.DEU.002.032 ויצא סיחן לקראתנו הוא וכל עמו למלחמה יהצה׃

2:33b.DEU.002.033 ויתנהו יהוה אלהינו לפנינו ונך אתו ואת בנו ואת כל עמו׃

2:34b.DEU.002.034 ונלכד את כל עריו בעת ההוא ונחרם את כל עיר מתם והנשים והטף לא השארנו שריד׃

2:35b.DEU.002.035 רק הבהמה בזזנו לנו ושלל הערים אשר לכדנו׃

2:36b.DEU.002.036 מערער אשר על שפת נחל ארנן והעיר אשר בנחל ועד הגלעד לא היתה קריה אשר שגבה ממנו את הכל נתן יהוה אלהינו לפנינו׃

2:37b.DEU.002.037 רק אל ארץ בני עמון לא קרבת כל יד נחל יבק וערי ההר וכל אשר צוה יהוה אלהינו׃

3

3:1b.DEU.003.001 ונפן ונעל דרך הבשן ויצא עוג מלך הבשן לקראתנו הוא וכל עמו למלחמה אדרעי׃

3:2b.DEU.003.002 ויאמר יהוה אלי אל תירא אתו כי בידך נתתי אתו ואת כל עמו ואת ארצו ועשית לו כאשר עשית לסיחן מלך האמרי אשר יושב בחשבון׃

3:3b.DEU.003.003 ויתן יהוה אלהינו בידנו גם את עוג מלך הבשן ואת כל עמו ונכהו עד בלתי השאיר לו שריד׃

3:4b.DEU.003.004 ונלכד את כל עריו בעת ההוא לא היתה קריה אשר לא לקחנו מאתם ששים עיר כל חבל ארגב ממלכת עוג בבשן׃

3:5b.DEU.003.005 כל אלה ערים בצרות חומה גבהה דלתים ובריח לבד מערי הפרזי הרבה מאד׃

3:6b.DEU.003.006 ונחרם אותם כאשר עשינו לסיחן מלך חשבון החרם כל עיר מתם הנשים והטף׃

3:7b.DEU.003.007 וכל הבהמה ושלל הערים בזונו לנו׃

3:8b.DEU.003.008 ונקח בעת ההוא את הארץ מיד שני מלכי האמרי אשר בעבר הירדן מנחל ארנן עד הר חרמון׃

3:9b.DEU.003.009 צידנים יקראו לחרמון שרין והאמרי יקראו לו שניר׃

3:10b.DEU.003.010 כל ערי המישר וכל הגלעד וכל הבשן עד סלכה ואדרעי ערי ממלכת עוג בבשן׃

3:11b.DEU.003.011 כי רק עוג מלך הבשן נשאר מיתר הרפאים הנה ערשו ערש ברזל הלה הוא ברבת בני עמון תשע אמות ארכה וארבע אמות רחבה באמת איש׃

3:12b.DEU.003.012 ואת הארץ הזאת ירשנו בעת ההוא מערער אשר על נחל ארנן וחצי הר הגלעד ועריו נתתי לראובני ולגדי׃

3:13b.DEU.003.013 ויתר הגלעד וכל הבשן ממלכת עוג נתתי לחצי שבט המנשה כל חבל הארגב לכל הבשן ההוא יקרא ארץ רפאים׃

3:14b.DEU.003.014 יאיר בן מנשה לקח את כל חבל ארגב עד גבול הגשורי והמעכתי ויקרא אתם על שמו את הבשן חות יאיר עד היום הזה׃

3:15b.DEU.003.015 ולמכיר נתתי את הגלעד׃

3:16b.DEU.003.016 ולראובני ולגדי נתתי מן הגלעד ועד נחל ארנן תוך הנחל וגבל ועד יבק הנחל גבול בני עמון׃

3:17b.DEU.003.017 והערבה והירדן וגבל מכנרת ועד ים הערבה ים המלח תחת אשדת הפסגה מזרחה׃

3:18b.DEU.003.018 ואצו אתכם בעת ההוא לאמר יהוה אלהיכם נתן לכם את הארץ הזאת לרשתה חלוצים תעברו לפני אחיכם בני ישראל כל בני חיל׃

3:19b.DEU.003.019 רק נשיכם וטפכם ומקנכם ידעתי כי מקנה רב לכם ישבו בעריכם אשר נתתי לכם׃

3:20b.DEU.003.020 עד אשר יניח יהוה לאחיכם ככם וירשו גם הם את הארץ אשר יהוה אלהיכם נתן להם בעבר הירדן ושבתם איש לירשתו אשר נתתי לכם׃

3:21b.DEU.003.021 ואת יהושוע צויתי בעת ההוא לאמר עיניך הראת את כל אשר עשה יהוה אלהיכם לשני המלכים האלה כן יעשה יהוה לכל הממלכות אשר אתה עבר שמה׃

3:22b.DEU.003.022 לא תיראום כי יהוה אלהיכם הוא הנלחם לכם׃

3:23b.DEU.003.023 ואתחנן אל יהוה בעת ההוא לאמר׃

3:24b.DEU.003.024 אדני יהוה אתה החלות להראות את עבדך את גדלך ואת ידך החזקה אשר מי אל בשמים ובארץ אשר יעשה כמעשיך וכגבורתך׃

3:25b.DEU.003.025 אעברה נא ואראה את הארץ הטובה אשר בעבר הירדן ההר הטוב הזה והלבנון׃

3:26b.DEU.003.026 ויתעבר יהוה בי למענכם ולא שמע אלי ויאמר יהוה אלי רב לך אל תוסף דבר אלי עוד בדבר הזה׃

3:27b.DEU.003.027 עלה ראש הפסגה ושא עיניך ימה וצפנה ותימנה ומזרחה וראה בעיניך כי לא תעבר את הירדן הזה׃

3:28b.DEU.003.028 וצו את יהושע וחזקהו ואמצהו כי הוא יעבר לפני העם הזה והוא ינחיל אותם את הארץ אשר תראה׃

3:29b.DEU.003.029 ונשב בגיא מול בית פעור׃

4

4:1b.DEU.004.001 ועתה ישראל שמע אל החקים ואל המשפטים אשר אנכי מלמד אתכם לעשות למען תחיו ובאתם וירשתם את הארץ אשר יהוה אלהי אבתיכם נתן לכם׃

4:2b.DEU.004.002 לא תספו על הדבר אשר אנכי מצוה אתכם ולא תגרעו ממנו לשמר את מצות יהוה אלהיכם אשר אנכי מצוה אתכם׃

4:3b.DEU.004.003 עיניכם הראת את אשר עשה יהוה בבעל פעור כי כל האיש אשר הלך אחרי בעל פעור השמידו יהוה אלהיך מקרבך׃

4:4b.DEU.004.004 ואתם הדבקים ביהוה אלהיכם חיים כלכם היום׃

4:5b.DEU.004.005 ראה למדתי אתכם חקים ומשפטים כאשר צוני יהוה אלהי לעשות כן בקרב הארץ אשר אתם באים שמה לרשתה׃

4:6b.DEU.004.006 ושמרתם ועשיתם כי הוא חכמתכם ובינתכם לעיני העמים אשר ישמעון את כל החקים האלה ואמרו רק עם חכם ונבון הגוי הגדול הזה׃

4:7b.DEU.004.007 כי מי גוי גדול אשר לו אלהים קרבים אליו כיהוה אלהינו בכל קראנו אליו׃

4:8b.DEU.004.008 ומי גוי גדול אשר לו חקים ומשפטים צדיקם ככל התורה הזאת אשר אנכי נתן לפניכם היום׃

4:9b.DEU.004.009 רק השמר לך ושמר נפשך מאד פן תשכח את הדברים אשר ראו עיניך ופן יסורו מלבבך כל ימי חייך והודעתם לבניך ולבני בניך׃

4:10b.DEU.004.010 יום אשר עמדת לפני יהוה אלהיך בחרב באמר יהוה אלי הקהל לי את העם ואשמעם את דברי אשר ילמדון ליראה אתי כל הימים אשר הם חיים על האדמה ואת בניהם ילמדון׃

4:11b.DEU.004.011 ותקרבון ותעמדון תחת ההר וההר בער באש עד לב השמים חשך ענן וערפל׃

4:12b.DEU.004.012 וידבר יהוה אליכם מתוך האש קול דברים אתם שמעים ותמונה אינכם ראים זולתי קול׃

4:13b.DEU.004.013 ויגד לכם את בריתו אשר צוה אתכם לעשות עשרת הדברים ויכתבם על שני לחות אבנים׃

4:14b.DEU.004.014 ואתי צוה יהוה בעת ההוא ללמד אתכם חקים ומשפטים לעשתכם אתם בארץ אשר אתם עברים שמה לרשתה׃

4:15b.DEU.004.015 ונשמרתם מאד לנפשתיכם כי לא ראיתם כל תמונה ביום דבר יהוה אליכם בחרב מתוך האש׃

4:16b.DEU.004.016 פן תשחתון ועשיתם לכם פסל תמונת כל סמל תבנית זכר או נקבה׃

4:17b.DEU.004.017 תבנית כל בהמה אשר בארץ תבנית כל צפור כנף אשר תעוף בשמים׃

4:18b.DEU.004.018 תבנית כל רמש באדמה תבנית כל דגה אשר במים מתחת לארץ׃

4:19b.DEU.004.019 ופן תשא עיניך השמימה וראית את השמש ואת הירח ואת הכוכבים כל צבא השמים ונדחת והשתחוית להם ועבדתם אשר חלק יהוה אלהיך אתם לכל העמים תחת כל השמים׃

4:20b.DEU.004.020 ואתכם לקח יהוה ויוצא אתכם מכור הברזל ממצרים להיות לו לעם נחלה כיום הזה׃

4:21b.DEU.004.021 ויהוה התאנף בי על דבריכם וישבע לבלתי עברי את הירדן ולבלתי בא אל הארץ הטובה אשר יהוה אלהיך נתן לך נחלה׃

4:22b.DEU.004.022 כי אנכי מת בארץ הזאת אינני עבר את הירדן ואתם עברים וירשתם את הארץ הטובה הזאת׃

4:23b.DEU.004.023 השמרו לכם פן תשכחו את ברית יהוה אלהיכם אשר כרת עמכם ועשיתם לכם פסל תמונת כל אשר צוך יהוה אלהיך׃

4:24b.DEU.004.024 כי יהוה אלהיך אש אכלה הוא אל קנא׃

4:25b.DEU.004.025 כי תוליד בנים ובני בנים ונושנתם בארץ והשחתם ועשיתם פסל תמונת כל ועשיתם הרע בעיני יהוה אלהיך להכעיסו׃

4:26b.DEU.004.026 העידתי בכם היום את השמים ואת הארץ כי אבד תאבדון מהר מעל הארץ אשר אתם עברים את הירדן שמה לרשתה לא תאריכן ימים עליה כי השמד תשמדון׃

4:27b.DEU.004.027 והפיץ יהוה אתכם בעמים ונשארתם מתי מספר בגוים אשר ינהג יהוה אתכם שמה׃

4:28b.DEU.004.028 ועבדתם שם אלהים מעשה ידי אדם עץ ואבן אשר לא יראון ולא ישמעון ולא יאכלון ולא יריחן׃

4:29b.DEU.004.029 ובקשתם משם את יהוה אלהיך ומצאת כי תדרשנו בכל לבבך ובכל נפשך׃

4:30b.DEU.004.030 בצר לך ומצאוך כל הדברים האלה באחרית הימים ושבת עד יהוה אלהיך ושמעת בקלו׃

4:31b.DEU.004.031 כי אל רחום יהוה אלהיך לא ירפך ולא ישחיתך ולא ישכח את ברית אבתיך אשר נשבע להם׃

4:32b.DEU.004.032 כי שאל נא לימים ראשנים אשר היו לפניך למן היום אשר ברא אלהים אדם על הארץ ולמקצה השמים ועד קצה השמים הנהיה כדבר הגדול הזה או הנשמע כמהו׃

4:33b.DEU.004.033 השמע עם קול אלהים מדבר מתוך האש כאשר שמעת אתה ויחי׃

4:34b.DEU.004.034 או הנסה אלהים לבוא לקחת לו גוי מקרב גוי במסת באתת ובמופתים ובמלחמה וביד חזקה ובזרוע נטויה ובמוראים גדלים ככל אשר עשה לכם יהוה אלהיכם במצרים לעיניך׃

4:35b.DEU.004.035 אתה הראת לדעת כי יהוה הוא האלהים אין עוד מלבדו׃

4:36b.DEU.004.036 מן השמים השמיעך את קלו ליסרך ועל הארץ הראך את אשו הגדולה ודבריו שמעת מתוך האש׃

4:37b.DEU.004.037 ותחת כי אהב את אבתיך ויבחר בזרעו אחריו ויוצאך בפניו בכחו הגדל ממצרים׃

4:38b.DEU.004.038 להוריש גוים גדלים ועצמים ממך מפניך להביאך לתת לך את ארצם נחלה כיום הזה׃

4:39b.DEU.004.039 וידעת היום והשבת אל לבבך כי יהוה הוא האלהים בשמים ממעל ועל הארץ מתחת אין עוד׃

4:40b.DEU.004.040 ושמרת את חקיו ואת מצותיו אשר אנכי מצוך היום אשר ייטב לך ולבניך אחריך ולמען תאריך ימים על האדמה אשר יהוה אלהיך נתן לך כל הימים׃

4:41b.DEU.004.041 אז יבדיל משה שלש ערים בעבר הירדן מזרחה שמש׃

4:42b.DEU.004.042 לנס שמה רוצח אשר ירצח את רעהו בבלי דעת והוא לא שנא לו מתמול שלשום ונס אל אחת מן הערים האל וחי׃

4:43b.DEU.004.043 את בצר במדבר בארץ המישר לראובני ואת ראמת בגלעד לגדי ואת גולן בבשן למנשי׃

4:44b.DEU.004.044 וזאת התורה אשר שם משה לפני בני ישראל׃

4:45b.DEU.004.045 אלה העדת והחקים והמשפטים אשר דבר משה אל בני ישראל בצאתם ממצרים׃

4:46b.DEU.004.046 בעבר הירדן בגיא מול בית פעור בארץ סיחן מלך האמרי אשר יושב בחשבון אשר הכה משה ובני ישראל בצאתם ממצרים׃

4:47b.DEU.004.047 ויירשו את ארצו ואת ארץ עוג מלך הבשן שני מלכי האמרי אשר בעבר הירדן מזרח שמש׃

4:48b.DEU.004.048 מערער אשר על שפת נחל ארנן ועד הר שיאן הוא חרמון׃

4:49b.DEU.004.049 וכל הערבה עבר הירדן מזרחה ועד ים הערבה תחת אשדת הפסגה׃

5

5:1b.DEU.005.001 ויקרא משה אל כל ישראל ויאמר אלהם שמע ישראל את החקים ואת המשפטים אשר אנכי דבר באזניכם היום ולמדתם אתם ושמרתם לעשתם׃

5:2b.DEU.005.002 יהוה אלהינו כרת עמנו ברית בחרב׃

5:3b.DEU.005.003 לא את אבתינו כרת יהוה את הברית הזאת כי אתנו אנחנו אלה פה היום כלנו חיים׃

5:4b.DEU.005.004 פנים בפנים דבר יהוה עמכם בהר מתוך האש׃

5:5b.DEU.005.005 אנכי עמד בין יהוה וביניכם בעת ההוא להגיד לכם את דבר יהוה כי יראתם מפני האש ולא עליתם בהר לאמר׃

5:6b.DEU.005.006 אנכי יהוה אלהיך אשר הוצאתיך מארץ מצרים מבית עבדים׃

5:7b.DEU.005.007 לא יהיה לך אלהים אחרים על פני׃

5:8b.DEU.005.008 לא תעשה לך פסל כל תמונה אשר בשמים ממעל ואשר בארץ מתחת ואשר במים מתחת לארץ׃

5:9b.DEU.005.009 לא תשתחוה להם ולא תעבדם כי אנכי יהוה אלהיך אל קנא פקד עון אבות על בנים ועל שלשים ועל רבעים לשנאי׃

5:10b.DEU.005.010 ועשה חסד לאלפים לאהבי ולשמרי מצותו׃

5:11b.DEU.005.011 לא תשא את שם יהוה אלהיך לשוא כי לא ינקה יהוה את אשר ישא את שמו לשוא׃

5:12b.DEU.005.012 שמור את יום השבת לקדשו כאשר צוך יהוה אלהיך׃

5:13b.DEU.005.013 ששת ימים תעבד ועשית כל מלאכתך׃

5:14b.DEU.005.014 ויום השביעי שבת ליהוה אלהיך לא תעשה כל מלאכה אתה ובנך ובתך ועבדך ואמתך ושורך וחמרך וכל בהמתך וגרך אשר בשעריך למען ינוח עבדך ואמתך כמוך׃

5:15b.DEU.005.015 וזכרת כי עבד היית בארץ מצרים ויצאך יהוה אלהיך משם ביד חזקה ובזרע נטויה על כן צוך יהוה אלהיך לעשות את יום השבת׃

5:16b.DEU.005.016 כבד את אביך ואת אמך כאשר צוך יהוה אלהיך למען יאריכן ימיך ולמען ייטב לך על האדמה אשר יהוה אלהיך נתן לך׃

5:17b.DEU.005.017 לא תרצח׃

5:18b.DEU.005.018 ולא תנאף׃

5:19b.DEU.005.019 ולא תגנב׃

5:20b.DEU.005.020 ולא תענה ברעך עד שוא׃

5:21b.DEU.005.021 ולא תחמד אשת רעך ולא תתאוה בית רעך שדהו ועבדו ואמתו שורו וחמרו וכל אשר לרעך׃

5:22b.DEU.005.022 את הדברים האלה דבר יהוה אל כל קהלכם בהר מתוך האש הענן והערפל קול גדול ולא יסף ויכתבם על שני לחת אבנים ויתנם אלי׃

5:23b.DEU.005.023 ויהי כשמעכם את הקול מתוך החשך וההר בער באש ותקרבון אלי כל ראשי שבטיכם וזקניכם׃

5:24b.DEU.005.024 ותאמרו הן הראנו יהוה אלהינו את כבדו ואת גדלו ואת קלו שמענו מתוך האש היום הזה ראינו כי ידבר אלהים את האדם וחי׃

5:25b.DEU.005.025 ועתה למה נמות כי תאכלנו האש הגדלה הזאת אם יספים אנחנו לשמע את קול יהוה אלהינו עוד ומתנו׃

5:26b.DEU.005.026 כי מי כל בשר אשר שמע קול אלהים חיים מדבר מתוך האש כמנו ויחי׃

5:27b.DEU.005.027 קרב אתה ושמע את כל אשר יאמר יהוה אלהינו ואת תדבר אלינו את כל אשר ידבר יהוה אלהינו אליך ושמענו ועשינו׃

5:28b.DEU.005.028 וישמע יהוה את קול דבריכם בדברכם אלי ויאמר יהוה אלי שמעתי את קול דברי העם הזה אשר דברו אליך היטיבו כל אשר דברו׃

5:29b.DEU.005.029 מי יתן והיה לבבם זה להם ליראה אתי ולשמר את כל מצותי כל הימים למען ייטב להם ולבניהם לעלם׃

5:30b.DEU.005.030 לך אמר להם שובו לכם לאהליכם׃

5:31b.DEU.005.031 ואתה פה עמד עמדי ואדברה אליך את כל המצוה והחקים והמשפטים אשר תלמדם ועשו בארץ אשר אנכי נתן להם לרשתה׃

5:32b.DEU.005.032 ושמרתם לעשות כאשר צוה יהוה אלהיכם אתכם לא תסרו ימין ושמאל׃

5:33b.DEU.005.033 בכל הדרך אשר צוה יהוה אלהיכם אתכם תלכו למען תחיון וטוב לכם והארכתם ימים בארץ אשר תירשון׃

6

6:1b.DEU.006.001 וזאת המצוה החקים והמשפטים אשר צוה יהוה אלהיכם ללמד אתכם לעשות בארץ אשר אתם עברים שמה לרשתה׃

6:2b.DEU.006.002 למען תירא את יהוה אלהיך לשמר את כל חקתיו ומצותיו אשר אנכי מצוך אתה ובנך ובן בנך כל ימי חייך ולמען יארכן ימיך׃

6:3b.DEU.006.003 ושמעת ישראל ושמרת לעשות אשר ייטב לך ואשר תרבון מאד כאשר דבר יהוה אלהי אבתיך לך ארץ זבת חלב ודבש׃

6:4b.DEU.006.004 שמע ישראל יהוה אלהינו יהוה אחד׃

6:5b.DEU.006.005 ואהבת את יהוה אלהיך בכל לבבך ובכל נפשך ובכל מאדך׃

6:6b.DEU.006.006 והיו הדברים האלה אשר אנכי מצוך היום על לבבך׃

6:7b.DEU.006.007 ושננתם לבניך ודברת בם בשבתך בביתך ובלכתך בדרך ובשכבך ובקומך׃

6:8b.DEU.006.008 וקשרתם לאות על ידך והיו לטטפת בין עיניך׃

6:9b.DEU.006.009 וכתבתם על מזוזת ביתך ובשעריך׃

6:10b.DEU.006.010 והיה כי יביאך יהוה אלהיך אל הארץ אשר נשבע לאבתיך לאברהם ליצחק וליעקב לתת לך ערים גדלת וטבת אשר לא בנית׃

6:11b.DEU.006.011 ובתים מלאים כל טוב אשר לא מלאת וברת חצובים אשר לא חצבת כרמים וזיתים אשר לא נטעת ואכלת ושבעת׃

6:12b.DEU.006.012 השמר לך פן תשכח את יהוה אשר הוציאך מארץ מצרים מבית עבדים׃

6:13b.DEU.006.013 את יהוה אלהיך תירא ואתו תעבד ובשמו תשבע׃

6:14b.DEU.006.014 לא תלכון אחרי אלהים אחרים מאלהי העמים אשר סביבותיכם׃

6:15b.DEU.006.015 כי אל קנא יהוה אלהיך בקרבך פן יחרה אף יהוה אלהיך בך והשמידך מעל פני האדמה׃

6:16b.DEU.006.016 לא תנסו את יהוה אלהיכם כאשר נסיתם במסה׃

6:17b.DEU.006.017 שמור תשמרון את מצות יהוה אלהיכם ועדתיו וחקיו אשר צוך׃

6:18b.DEU.006.018 ועשית הישר והטוב בעיני יהוה למען ייטב לך ובאת וירשת את הארץ הטבה אשר נשבע יהוה לאבתיך׃

6:19b.DEU.006.019 להדף את כל איביך מפניך כאשר דבר יהוה׃

6:20b.DEU.006.020 כי ישאלך בנך מחר לאמר מה העדת והחקים והמשפטים אשר צוה יהוה אלהינו אתכם׃

6:21b.DEU.006.021 ואמרת לבנך עבדים היינו לפרעה במצרים ויוציאנו יהוה ממצרים ביד חזקה׃

6:22b.DEU.006.022 ויתן יהוה אותת ומפתים גדלים ורעים במצרים בפרעה ובכל ביתו לעינינו׃

6:23b.DEU.006.023 ואותנו הוציא משם למען הביא אתנו לתת לנו את הארץ אשר נשבע לאבתינו׃

6:24b.DEU.006.024 ויצונו יהוה לעשות את כל החקים האלה ליראה את יהוה אלהינו לטוב לנו כל הימים לחיתנו כהיום הזה׃

6:25b.DEU.006.025 וצדקה תהיה לנו כי נשמר לעשות את כל המצוה הזאת לפני יהוה אלהינו כאשר צונו׃

7

7:1b.DEU.007.001 כי יביאך יהוה אלהיך אל הארץ אשר אתה בא שמה לרשתה ונשל גוים רבים מפניך החתי והגרגשי והאמרי והכנעני והפרזי והחוי והיבוסי שבעה גוים רבים ועצומים ממך׃

7:2b.DEU.007.002 ונתנם יהוה אלהיך לפניך והכיתם החרם תחרים אתם לא תכרת להם ברית ולא תחנם׃

7:3b.DEU.007.003 ולא תתחתן בם בתך לא תתן לבנו ובתו לא תקח לבנך׃

7:4b.DEU.007.004 כי יסיר את בנך מאחרי ועבדו אלהים אחרים וחרה אף יהוה בכם והשמידך מהר׃

7:5b.DEU.007.005 כי אם כה תעשו להם מזבחתיהם תתצו ומצבתם תשברו ואשירהם תגדעון ופסיליהם תשרפון באש׃

7:6b.DEU.007.006 כי עם קדוש אתה ליהוה אלהיך בך בחר יהוה אלהיך להיות לו לעם סגלה מכל העמים אשר על פני האדמה׃

7:7b.DEU.007.007 לא מרבכם מכל העמים חשק יהוה בכם ויבחר בכם כי אתם המעט מכל העמים׃

7:8b.DEU.007.008 כי מאהבת יהוה אתכם ומשמרו את השבעה אשר נשבע לאבתיכם הוציא יהוה אתכם ביד חזקה ויפדך מבית עבדים מיד פרעה מלך מצרים׃

7:9b.DEU.007.009 וידעת כי יהוה אלהיך הוא האלהים האל הנאמן שמר הברית והחסד לאהביו ולשמרי מצותו לאלף דור׃

7:10b.DEU.007.010 ומשלם לשנאיו אל פניו להאבידו לא יאחר לשנאו אל פניו ישלם לו׃

7:11b.DEU.007.011 ושמרת את המצוה ואת החקים ואת המשפטים אשר אנכי מצוך היום לעשותם׃

7:12b.DEU.007.012 והיה עקב תשמעון את המשפטים האלה ושמרתם ועשיתם אתם ושמר יהוה אלהיך לך את הברית ואת החסד אשר נשבע לאבתיך׃

7:13b.DEU.007.013 ואהבך וברכך והרבך וברך פרי בטנך ופרי אדמתך דגנך ותירשך ויצהרך שגר אלפיך ועשתרת צאנך על האדמה אשר נשבע לאבתיך לתת לך׃

7:14b.DEU.007.014 ברוך תהיה מכל העמים לא יהיה בך עקר ועקרה ובבהמתך׃

7:15b.DEU.007.015 והסיר יהוה ממך כל חלי וכל מדוי מצרים הרעים אשר ידעת לא ישימם בך ונתנם בכל שנאיך׃

7:16b.DEU.007.016 ואכלת את כל העמים אשר יהוה אלהיך נתן לך לא תחס עינך עליהם ולא תעבד את אלהיהם כי מוקש הוא לך׃

7:17b.DEU.007.017 כי תאמר בלבבך רבים הגוים האלה ממני איכה אוכל להורישם׃

7:18b.DEU.007.018 לא תירא מהם זכר תזכר את אשר עשה יהוה אלהיך לפרעה ולכל מצרים׃

7:19b.DEU.007.019 המסת הגדלת אשר ראו עיניך והאתת והמפתים והיד החזקה והזרע הנטויה אשר הוצאך יהוה אלהיך כן יעשה יהוה אלהיך לכל העמים אשר אתה ירא מפניהם׃

7:20b.DEU.007.020 וגם את הצרעה ישלח יהוה אלהיך בם עד אבד הנשארים והנסתרים מפניך׃

7:21b.DEU.007.021 לא תערץ מפניהם כי יהוה אלהיך בקרבך אל גדול ונורא׃

7:22b.DEU.007.022 ונשל יהוה אלהיך את הגוים האל מפניך מעט מעט לא תוכל כלתם מהר פן תרבה עליך חית השדה׃

7:23b.DEU.007.023 ונתנם יהוה אלהיך לפניך והמם מהומה גדלה עד השמדם׃

7:24b.DEU.007.024 ונתן מלכיהם בידך והאבדת את שמם מתחת השמים לא יתיצב איש בפניך עד השמדך אתם׃

7:25b.DEU.007.025 פסילי אלהיהם תשרפון באש לא תחמד כסף וזהב עליהם ולקחת לך פן תוקש בו כי תועבת יהוה אלהיך הוא׃

7:26b.DEU.007.026 ולא תביא תועבה אל ביתך והיית חרם כמהו שקץ תשקצנו ותעב תתעבנו כי חרם הוא׃

8

8:1b.DEU.008.001 כל המצוה אשר אנכי מצוך היום תשמרון לעשות למען תחיון ורביתם ובאתם וירשתם את הארץ אשר נשבע יהוה לאבתיכם׃

8:2b.DEU.008.002 וזכרת את כל הדרך אשר הליכך יהוה אלהיך זה ארבעים שנה במדבר למען ענתך לנסתך לדעת את אשר בלבבך התשמר מצותו אם לא׃

8:3b.DEU.008.003 ויענך וירעבך ויאכלך את המן אשר לא ידעת ולא ידעון אבתיך למען הודעך כי לא על הלחם לבדו יחיה האדם כי על כל מוצא פי יהוה יחיה האדם׃

8:4b.DEU.008.004 שמלתך לא בלתה מעליך ורגלך לא בצקה זה ארבעים שנה׃

8:5b.DEU.008.005 וידעת עם לבבך כי כאשר ייסר איש את בנו יהוה אלהיך מיסרך׃

8:6b.DEU.008.006 ושמרת את מצות יהוה אלהיך ללכת בדרכיו וליראה אתו׃

8:7b.DEU.008.007 כי יהוה אלהיך מביאך אל ארץ טובה ארץ נחלי מים עינת ותהמת יצאים בבקעה ובהר׃

8:8b.DEU.008.008 ארץ חטה ושערה וגפן ותאנה ורמון ארץ זית שמן ודבש׃

8:9b.DEU.008.009 ארץ אשר לא במסכנת תאכל בה לחם לא תחסר כל בה ארץ אשר אבניה ברזל ומהרריה תחצב נחשת׃

8:10b.DEU.008.010 ואכלת ושבעת וברכת את יהוה אלהיך על הארץ הטבה אשר נתן לך׃

8:11b.DEU.008.011 השמר לך פן תשכח את יהוה אלהיך לבלתי שמר מצותיו ומשפטיו וחקתיו אשר אנכי מצוך היום׃

8:12b.DEU.008.012 פן תאכל ושבעת ובתים טובים תבנה וישבת׃

8:13b.DEU.008.013 ובקרך וצאנך ירבין וכסף וזהב ירבה לך וכל אשר לך ירבה׃

8:14b.DEU.008.014 ורם לבבך ושכחת את יהוה אלהיך המוציאך מארץ מצרים מבית עבדים׃

8:15b.DEU.008.015 המוליכך במדבר הגדל והנורא נחש שרף ועקרב וצמאון אשר אין מים המוציא לך מים מצור החלמיש׃

8:16b.DEU.008.016 המאכלך מן במדבר אשר לא ידעון אבתיך למען ענתך ולמען נסתך להיטבך באחריתך׃

8:17b.DEU.008.017 ואמרת בלבבך כחי ועצם ידי עשה לי את החיל הזה׃

8:18b.DEU.008.018 וזכרת את יהוה אלהיך כי הוא הנתן לך כח לעשות חיל למען הקים את בריתו אשר נשבע לאבתיך כיום הזה׃

8:19b.DEU.008.019 והיה אם שכח תשכח את יהוה אלהיך והלכת אחרי אלהים אחרים ועבדתם והשתחוית להם העדתי בכם היום כי אבד תאבדון׃

8:20b.DEU.008.020 כגוים אשר יהוה מאביד מפניכם כן תאבדון עקב לא תשמעון בקול יהוה אלהיכם׃

9

9:1b.DEU.009.001 שמע ישראל אתה עבר היום את הירדן לבא לרשת גוים גדלים ועצמים ממך ערים גדלת ובצרת בשמים׃

9:2b.DEU.009.002 עם גדול ורם בני ענקים אשר אתה ידעת ואתה שמעת מי יתיצב לפני בני ענק׃

9:3b.DEU.009.003 וידעת היום כי יהוה אלהיך הוא העבר לפניך אש אכלה הוא ישמידם והוא יכניעם לפניך והורשתם והאבדתם מהר כאשר דבר יהוה לך׃

9:4b.DEU.009.004 אל תאמר בלבבך בהדף יהוה אלהיך אתם מלפניך לאמר בצדקתי הביאני יהוה לרשת את הארץ הזאת וברשעת הגוים האלה יהוה מורישם מפניך׃

9:5b.DEU.009.005 לא בצדקתך ובישר לבבך אתה בא לרשת את ארצם כי ברשעת הגוים האלה יהוה אלהיך מורישם מפניך ולמען הקים את הדבר אשר נשבע יהוה לאבתיך לאברהם ליצחק וליעקב׃

9:6b.DEU.009.006 וידעת כי לא בצדקתך יהוה אלהיך נתן לך את הארץ הטובה הזאת לרשתה כי עם קשה ערף אתה׃

9:7b.DEU.009.007 זכר אל תשכח את אשר הקצפת את יהוה אלהיך במדבר למן היום אשר יצאת מארץ מצרים עד באכם עד המקום הזה ממרים הייתם עם יהוה׃

9:8b.DEU.009.008 ובחרב הקצפתם את יהוה ויתאנף יהוה בכם להשמיד אתכם׃

9:9b.DEU.009.009 בעלתי ההרה לקחת לוחת האבנים לוחת הברית אשר כרת יהוה עמכם ואשב בהר ארבעים יום וארבעים לילה לחם לא אכלתי ומים לא שתיתי׃

9:10b.DEU.009.010 ויתן יהוה אלי את שני לוחת האבנים כתבים באצבע אלהים ועליהם ככל הדברים אשר דבר יהוה עמכם בהר מתוך האש ביום הקהל׃

9:11b.DEU.009.011 ויהי מקץ ארבעים יום וארבעים לילה נתן יהוה אלי את שני לחת האבנים לחות הברית׃

9:12b.DEU.009.012 ויאמר יהוה אלי קום רד מהר מזה כי שחת עמך אשר הוצאת ממצרים סרו מהר מן הדרך אשר צויתם עשו להם מסכה׃

9:13b.DEU.009.013 ויאמר יהוה אלי לאמר ראיתי את העם הזה והנה עם קשה ערף הוא׃

9:14b.DEU.009.014 הרף ממני ואשמידם ואמחה את שמם מתחת השמים ואעשה אותך לגוי עצום ורב ממנו׃

9:15b.DEU.009.015 ואפן וארד מן ההר וההר בער באש ושני לחת הברית על שתי ידי׃

9:16b.DEU.009.016 וארא והנה חטאתם ליהוה אלהיכם עשיתם לכם עגל מסכה סרתם מהר מן הדרך אשר צוה יהוה אתכם׃

9:17b.DEU.009.017 ואתפש בשני הלחת ואשלכם מעל שתי ידי ואשברם לעיניכם׃

9:18b.DEU.009.018 ואתנפל לפני יהוה כראשנה ארבעים יום וארבעים לילה לחם לא אכלתי ומים לא שתיתי על כל חטאתכם אשר חטאתם לעשות הרע בעיני יהוה להכעיסו׃

9:19b.DEU.009.019 כי יגרתי מפני האף והחמה אשר קצף יהוה עליכם להשמיד אתכם וישמע יהוה אלי גם בפעם ההוא׃

9:20b.DEU.009.020 ובאהרן התאנף יהוה מאד להשמידו ואתפלל גם בעד אהרן בעת ההוא׃

9:21b.DEU.009.021 ואת חטאתכם אשר עשיתם את העגל לקחתי ואשרף אתו באש ואכת אתו טחון היטב עד אשר דק לעפר ואשלך את עפרו אל הנחל הירד מן ההר׃

9:22b.DEU.009.022 ובתבערה ובמסה ובקברת התאוה מקצפים הייתם את יהוה׃

9:23b.DEU.009.023 ובשלח יהוה אתכם מקדש ברנע לאמר עלו ורשו את הארץ אשר נתתי לכם ותמרו את פי יהוה אלהיכם ולא האמנתם לו ולא שמעתם בקלו׃

9:24b.DEU.009.024 ממרים הייתם עם יהוה מיום דעתי אתכם׃

9:25b.DEU.009.025 ואתנפל לפני יהוה את ארבעים היום ואת ארבעים הלילה אשר התנפלתי כי אמר יהוה להשמיד אתכם׃

9:26b.DEU.009.026 ואתפלל אל יהוה ואמר אדני יהוה אל תשחת עמך ונחלתך אשר פדית בגדלך אשר הוצאת ממצרים ביד חזקה׃

9:27b.DEU.009.027 זכר לעבדיך לאברהם ליצחק וליעקב אל תפן אל קשי העם הזה ואל רשעו ואל חטאתו׃

9:28b.DEU.009.028 פן יאמרו הארץ אשר הוצאתנו משם מבלי יכלת יהוה להביאם אל הארץ אשר דבר להם ומשנאתו אותם הוציאם להמתם במדבר׃

9:29b.DEU.009.029 והם עמך ונחלתך אשר הוצאת בכחך הגדל ובזרעך הנטויה׃

10

10:1b.DEU.010.001 בעת ההוא אמר יהוה אלי פסל לך שני לוחת אבנים כראשנים ועלה אלי ההרה ועשית לך ארון עץ׃

10:2b.DEU.010.002 ואכתב על הלחת את הדברים אשר היו על הלחת הראשנים אשר שברת ושמתם בארון׃

10:3b.DEU.010.003 ואעש ארון עצי שטים ואפסל שני לחת אבנים כראשנים ואעל ההרה ושני הלחת בידי׃

10:4b.DEU.010.004 ויכתב על הלחת כמכתב הראשון את עשרת הדברים אשר דבר יהוה אליכם בהר מתוך האש ביום הקהל ויתנם יהוה אלי׃

10:5b.DEU.010.005 ואפן וארד מן ההר ואשם את הלחת בארון אשר עשיתי ויהיו שם כאשר צוני יהוה׃

10:6b.DEU.010.006 ובני ישראל נסעו מבארת בני יעקן מוסרה שם מת אהרן ויקבר שם ויכהן אלעזר בנו תחתיו׃

10:7b.DEU.010.007 משם נסעו הגדגדה ומן הגדגדה יטבתה ארץ נחלי מים׃

10:8b.DEU.010.008 בעת ההוא הבדיל יהוה את שבט הלוי לשאת את ארון ברית יהוה לעמד לפני יהוה לשרתו ולברך בשמו עד היום הזה׃

10:9b.DEU.010.009 על כן לא היה ללוי חלק ונחלה עם אחיו יהוה הוא נחלתו כאשר דבר יהוה אלהיך לו׃

10:10b.DEU.010.010 ואנכי עמדתי בהר כימים הראשנים ארבעים יום וארבעים לילה וישמע יהוה אלי גם בפעם ההוא לא אבה יהוה השחיתך׃

10:11b.DEU.010.011 ויאמר יהוה אלי קום לך למסע לפני העם ויבאו וירשו את הארץ אשר נשבעתי לאבתם לתת להם׃

10:12b.DEU.010.012 ועתה ישראל מה יהוה אלהיך שאל מעמך כי אם ליראה את יהוה אלהיך ללכת בכל דרכיו ולאהבה אתו ולעבד את יהוה אלהיך בכל לבבך ובכל נפשך׃

10:13b.DEU.010.013 לשמר את מצות יהוה ואת חקתיו אשר אנכי מצוך היום לטוב לך׃

10:14b.DEU.010.014 הן ליהוה אלהיך השמים ושמי השמים הארץ וכל אשר בה׃

10:15b.DEU.010.015 רק באבתיך חשק יהוה לאהבה אותם ויבחר בזרעם אחריהם בכם מכל העמים כיום הזה׃

10:16b.DEU.010.016 ומלתם את ערלת לבבכם וערפכם לא תקשו עוד׃

10:17b.DEU.010.017 כי יהוה אלהיכם הוא אלהי האלהים ואדני האדנים האל הגדל הגבר והנורא אשר לא ישא פנים ולא יקח שחד׃

10:18b.DEU.010.018 עשה משפט יתום ואלמנה ואהב גר לתת לו לחם ושמלה׃

10:19b.DEU.010.019 ואהבתם את הגר כי גרים הייתם בארץ מצרים׃

10:20b.DEU.010.020 את יהוה אלהיך תירא אתו תעבד ובו תדבק ובשמו תשבע׃

10:21b.DEU.010.021 הוא תהלתך והוא אלהיך אשר עשה אתך את הגדלת ואת הנוראת האלה אשר ראו עיניך׃

10:22b.DEU.010.022 בשבעים נפש ירדו אבתיך מצרימה ועתה שמך יהוה אלהיך ככוכבי השמים לרב׃

11

11:1b.DEU.011.001 ואהבת את יהוה אלהיך ושמרת משמרתו וחקתיו ומשפטיו ומצותיו כל הימים׃

11:2b.DEU.011.002 וידעתם היום כי לא את בניכם אשר לא ידעו ואשר לא ראו את מוסר יהוה אלהיכם את גדלו את ידו החזקה וזרעו הנטויה׃

11:3b.DEU.011.003 ואת אתתיו ואת מעשיו אשר עשה בתוך מצרים לפרעה מלך מצרים ולכל ארצו׃

11:4b.DEU.011.004 ואשר עשה לחיל מצרים לסוסיו ולרכבו אשר הציף את מי ים סוף על פניהם ברדפם אחריכם ויאבדם יהוה עד היום הזה׃

11:5b.DEU.011.005 ואשר עשה לכם במדבר עד באכם עד המקום הזה׃

11:6b.DEU.011.006 ואשר עשה לדתן ולאבירם בני אליאב בן ראובן אשר פצתה הארץ את פיה ותבלעם ואת בתיהם ואת אהליהם ואת כל היקום אשר ברגליהם בקרב כל ישראל׃

11:7b.DEU.011.007 כי עיניכם הראת את כל מעשה יהוה הגדל אשר עשה׃

11:8b.DEU.011.008 ושמרתם את כל המצוה אשר אנכי מצוך היום למען תחזקו ובאתם וירשתם את הארץ אשר אתם עברים שמה לרשתה׃

11:9b.DEU.011.009 ולמען תאריכו ימים על האדמה אשר נשבע יהוה לאבתיכם לתת להם ולזרעם ארץ זבת חלב ודבש׃

11:10b.DEU.011.010 כי הארץ אשר אתה בא שמה לרשתה לא כארץ מצרים הוא אשר יצאתם משם אשר תזרע את זרעך והשקית ברגלך כגן הירק׃

11:11b.DEU.011.011 והארץ אשר אתם עברים שמה לרשתה ארץ הרים ובקעת למטר השמים תשתה מים׃

11:12b.DEU.011.012 ארץ אשר יהוה אלהיך דרש אתה תמיד עיני יהוה אלהיך בה מרשית השנה ועד אחרית שנה׃

11:13b.DEU.011.013 והיה אם שמע תשמעו אל מצותי אשר אנכי מצוה אתכם היום לאהבה את יהוה אלהיכם ולעבדו בכל לבבכם ובכל נפשכם׃

11:14b.DEU.011.014 ונתתי מטר ארצכם בעתו יורה ומלקוש ואספת דגנך ותירשך ויצהרך׃

11:15b.DEU.011.015 ונתתי עשב בשדך לבהמתך ואכלת ושבעת׃

11:16b.DEU.011.016 השמרו לכם פן יפתה לבבכם וסרתם ועבדתם אלהים אחרים והשתחויתם להם׃

11:17b.DEU.011.017 וחרה אף יהוה בכם ועצר את השמים ולא יהיה מטר והאדמה לא תתן את יבולה ואבדתם מהרה מעל הארץ הטבה אשר יהוה נתן לכם׃

11:18b.DEU.011.018 ושמתם את דברי אלה על לבבכם ועל נפשכם וקשרתם אתם לאות על ידכם והיו לטוטפת בין עיניכם׃

11:19b.DEU.011.019 ולמדתם אתם את בניכם לדבר בם בשבתך בביתך ובלכתך בדרך ובשכבך ובקומך׃

11:20b.DEU.011.020 וכתבתם על מזוזות ביתך ובשעריך׃

11:21b.DEU.011.021 למען ירבו ימיכם וימי בניכם על האדמה אשר נשבע יהוה לאבתיכם לתת להם כימי השמים על הארץ׃

11:22b.DEU.011.022 כי אם שמר תשמרון את כל המצוה הזאת אשר אנכי מצוה אתכם לעשתה לאהבה את יהוה אלהיכם ללכת בכל דרכיו ולדבקה בו׃

11:23b.DEU.011.023 והוריש יהוה את כל הגוים האלה מלפניכם וירשתם גוים גדלים ועצמים מכם׃

11:24b.DEU.011.024 כל המקום אשר תדרך כף רגלכם בו לכם יהיה מן המדבר והלבנון מן הנהר נהר פרת ועד הים האחרון יהיה גבלכם׃

11:25b.DEU.011.025 לא יתיצב איש בפניכם פחדכם ומוראכם יתן יהוה אלהיכם על פני כל הארץ אשר תדרכו בה כאשר דבר לכם׃

11:26b.DEU.011.026 ראה אנכי נתן לפניכם היום ברכה וקללה׃

11:27b.DEU.011.027 את הברכה אשר תשמעו אל מצות יהוה אלהיכם אשר אנכי מצוה אתכם היום׃

11:28b.DEU.011.028 והקללה אם לא תשמעו אל מצות יהוה אלהיכם וסרתם מן הדרך אשר אנכי מצוה אתכם היום ללכת אחרי אלהים אחרים אשר לא ידעתם׃

11:29b.DEU.011.029 והיה כי יביאך יהוה אלהיך אל הארץ אשר אתה בא שמה לרשתה ונתתה את הברכה על הר גרזים ואת הקללה על הר עיבל׃

11:30b.DEU.011.030 הלא המה בעבר הירדן אחרי דרך מבוא השמש בארץ הכנעני הישב בערבה מול הגלגל אצל אלוני מרה׃

11:31b.DEU.011.031 כי אתם עברים את הירדן לבא לרשת את הארץ אשר יהוה אלהיכם נתן לכם וירשתם אתה וישבתם בה׃

11:32b.DEU.011.032 ושמרתם לעשות את כל החקים ואת המשפטים אשר אנכי נתן לפניכם היום׃

12

12:1b.DEU.012.001 אלה החקים והמשפטים אשר תשמרון לעשות בארץ אשר נתן יהוה אלהי אבתיך לך לרשתה כל הימים אשר אתם חיים על האדמה׃

12:2b.DEU.012.002 אבד תאבדון את כל המקמות אשר עבדו שם הגוים אשר אתם ירשים אתם את אלהיהם על ההרים הרמים ועל הגבעות ותחת כל עץ רענן׃

12:3b.DEU.012.003 ונתצתם את מזבחתם ושברתם את מצבתם ואשריהם תשרפון באש ופסילי אלהיהם תגדעון ואבדתם את שמם מן המקום ההוא׃

12:4b.DEU.012.004 לא תעשון כן ליהוה אלהיכם׃

12:5b.DEU.012.005 כי אם אל המקום אשר יבחר יהוה אלהיכם מכל שבטיכם לשום את שמו שם לשכנו תדרשו ובאת שמה׃

12:6b.DEU.012.006 והבאתם שמה עלתיכם וזבחיכם ואת מעשרתיכם ואת תרומת ידכם ונדריכם ונדבתיכם ובכרת בקרכם וצאנכם׃

12:7b.DEU.012.007 ואכלתם שם לפני יהוה אלהיכם ושמחתם בכל משלח ידכם אתם ובתיכם אשר ברכך יהוה אלהיך׃

12:8b.DEU.012.008 לא תעשון ככל אשר אנחנו עשים פה היום איש כל הישר בעיניו׃

12:9b.DEU.012.009 כי לא באתם עד עתה אל המנוחה ואל הנחלה אשר יהוה אלהיך נתן לך׃

12:10b.DEU.012.010 ועברתם את הירדן וישבתם בארץ אשר יהוה אלהיכם מנחיל אתכם והניח לכם מכל איביכם מסביב וישבתם בטח׃

12:11b.DEU.012.011 והיה המקום אשר יבחר יהוה אלהיכם בו לשכן שמו שם שמה תביאו את כל אשר אנכי מצוה אתכם עולתיכם וזבחיכם מעשרתיכם ותרמת ידכם וכל מבחר נדריכם אשר תדרו ליהוה׃

12:12b.DEU.012.012 ושמחתם לפני יהוה אלהיכם אתם ובניכם ובנתיכם ועבדיכם ואמהתיכם והלוי אשר בשעריכם כי אין לו חלק ונחלה אתכם׃

12:13b.DEU.012.013 השמר לך פן תעלה עלתיך בכל מקום אשר תראה׃

12:14b.DEU.012.014 כי אם במקום אשר יבחר יהוה באחד שבטיך שם תעלה עלתיך ושם תעשה כל אשר אנכי מצוך׃

12:15b.DEU.012.015 רק בכל אות נפשך תזבח ואכלת בשר כברכת יהוה אלהיך אשר נתן לך בכל שעריך הטמא והטהור יאכלנו כצבי וכאיל׃

12:16b.DEU.012.016 רק הדם לא תאכלו על הארץ תשפכנו כמים׃

12:17b.DEU.012.017 לא תוכל לאכל בשעריך מעשר דגנך ותירשך ויצהרך ובכרת בקרך וצאנך וכל נדריך אשר תדר ונדבתיך ותרומת ידך׃

12:18b.DEU.012.018 כי אם לפני יהוה אלהיך תאכלנו במקום אשר יבחר יהוה אלהיך בו אתה ובנך ובתך ועבדך ואמתך והלוי אשר בשעריך ושמחת לפני יהוה אלהיך בכל משלח ידך׃

12:19b.DEU.012.019 השמר לך פן תעזב את הלוי כל ימיך על אדמתך׃

12:20b.DEU.012.020 כי ירחיב יהוה אלהיך את גבולך כאשר דבר לך ואמרת אכלה בשר כי תאוה נפשך לאכל בשר בכל אות נפשך תאכל בשר׃

12:21b.DEU.012.021 כי ירחק ממך המקום אשר יבחר יהוה אלהיך לשום שמו שם וזבחת מבקרך ומצאנך אשר נתן יהוה לך כאשר צויתך ואכלת בשעריך בכל אות נפשך׃

12:22b.DEU.012.022 אך כאשר יאכל את הצבי ואת האיל כן תאכלנו הטמא והטהור יחדו יאכלנו׃

12:23b.DEU.012.023 רק חזק לבלתי אכל הדם כי הדם הוא הנפש ולא תאכל הנפש עם הבשר׃

12:24b.DEU.012.024 לא תאכלנו על הארץ תשפכנו כמים׃

12:25b.DEU.012.025 לא תאכלנו למען ייטב לך ולבניך אחריך כי תעשה הישר בעיני יהוה׃

12:26b.DEU.012.026 רק קדשיך אשר יהיו לך ונדריך תשא ובאת אל המקום אשר יבחר יהוה׃

12:27b.DEU.012.027 ועשית עלתיך הבשר והדם על מזבח יהוה אלהיך ודם זבחיך ישפך על מזבח יהוה אלהיך והבשר תאכל׃

12:28b.DEU.012.028 שמר ושמעת את כל הדברים האלה אשר אנכי מצוך למען ייטב לך ולבניך אחריך עד עולם כי תעשה הטוב והישר בעיני יהוה אלהיך׃

12:29b.DEU.012.029 כי יכרית יהוה אלהיך את הגוים אשר אתה בא שמה לרשת אותם מפניך וירשת אתם וישבת בארצם׃

12:30b.DEU.012.030 השמר לך פן תנקש אחריהם אחרי השמדם מפניך ופן תדרש לאלהיהם לאמר איכה יעבדו הגוים האלה את אלהיהם ואעשה כן גם אני׃

12:31b.DEU.012.031 לא תעשה כן ליהוה אלהיך כי כל תועבת יהוה אשר שנא עשו לאלהיהם כי גם את בניהם ואת בנתיהם ישרפו באש לאלהיהם׃

12:32b.DEU.012.032 את כל הדבר אשר אנכי מצוה אתכם אתו תשמרו לעשות לא תסף עליו ולא תגרע ממנו׃

13

13:1b.DEU.013.001 כי יקום בקרבך נביא או חלם חלום ונתן אליך אות או מופת׃

13:2b.DEU.013.002 ובא האות והמופת אשר דבר אליך לאמר נלכה אחרי אלהים אחרים אשר לא ידעתם ונעבדם׃

13:3b.DEU.013.003 לא תשמע אל דברי הנביא ההוא או אל חולם החלום ההוא כי מנסה יהוה אלהיכם אתכם לדעת הישכם אהבים את יהוה אלהיכם בכל לבבכם ובכל נפשכם׃

13:4b.DEU.013.004 אחרי יהוה אלהיכם תלכו ואתו תיראו ואת מצותיו תשמרו ובקלו תשמעו ואתו תעבדו ובו תדבקון׃

13:5b.DEU.013.005 והנביא ההוא או חלם החלום ההוא יומת כי דבר סרה על יהוה אלהיכם המוציא אתכם מארץ מצרים והפדך מבית עבדים להדיחך מן הדרך אשר צוך יהוה אלהיך ללכת בה ובערת הרע מקרבך׃

13:6b.DEU.013.006 כי יסיתך אחיך בן אמך או בנך או בתך או אשת חיקך או רעך אשר כנפשך בסתר לאמר נלכה ונעבדה אלהים אחרים אשר לא ידעת אתה ואבתיך׃

13:7b.DEU.013.007 מאלהי העמים אשר סביבתיכם הקרבים אליך או הרחקים ממך מקצה הארץ ועד קצה הארץ׃

13:8b.DEU.013.008 לא תאבה לו ולא תשמע אליו ולא תחוס עינך עליו ולא תחמל ולא תכסה עליו׃

13:9b.DEU.013.009 כי הרג תהרגנו ידך תהיה בו בראשונה להמיתו ויד כל העם באחרנה׃

13:10b.DEU.013.010 וסקלתו באבנים ומת כי בקש להדיחך מעל יהוה אלהיך המוציאך מארץ מצרים מבית עבדים׃

13:11b.DEU.013.011 וכל ישראל ישמעו ויראון ולא יוספו לעשות כדבר הרע הזה בקרבך׃

13:12b.DEU.013.012 כי תשמע באחת עריך אשר יהוה אלהיך נתן לך לשבת שם לאמר׃

13:13b.DEU.013.013 יצאו אנשים בני בליעל מקרבך וידיחו את ישבי עירם לאמר נלכה ונעבדה אלהים אחרים אשר לא ידעתם׃

13:14b.DEU.013.014 ודרשת וחקרת ושאלת היטב והנה אמת נכון הדבר נעשתה התועבה הזאת בקרבך׃

13:15b.DEU.013.015 הכה תכה את ישבי העיר ההוא לפי חרב החרם אתה ואת כל אשר בה ואת בהמתה לפי חרב׃

13:16b.DEU.013.016 ואת כל שללה תקבץ אל תוך רחבה ושרפת באש את העיר ואת כל שללה כליל ליהוה אלהיך והיתה תל עולם לא תבנה עוד׃

13:17b.DEU.013.017 ולא ידבק בידך מאומה מן החרם למען ישוב יהוה מחרון אפו ונתן לך רחמים ורחמך והרבך כאשר נשבע לאבתיך׃

13:18b.DEU.013.018 כי תשמע בקול יהוה אלהיך לשמר את כל מצותיו אשר אנכי מצוך היום לעשות הישר בעיני יהוה אלהיך׃

14

14:1b.DEU.014.001 בנים אתם ליהוה אלהיכם לא תתגדדו ולא תשימו קרחה בין עיניכם למת׃

14:2b.DEU.014.002 כי עם קדוש אתה ליהוה אלהיך ובך בחר יהוה להיות לו לעם סגלה מכל העמים אשר על פני האדמה׃

14:3b.DEU.014.003 לא תאכל כל תועבה׃

14:4b.DEU.014.004 זאת הבהמה אשר תאכלו שור שה כשבים ושה עזים׃

14:5b.DEU.014.005 איל וצבי ויחמור ואקו ודישן ותאו וזמר׃

14:6b.DEU.014.006 וכל בהמה מפרסת פרסה ושסעת שסע שתי פרסות מעלת גרה בבהמה אתה תאכלו׃

14:7b.DEU.014.007 אך את זה לא תאכלו ממעלי הגרה וממפריסי הפרסה השסועה את הגמל ואת הארנבת ואת השפן כי מעלה גרה המה ופרסה לא הפריסו טמאים הם לכם׃

14:8b.DEU.014.008 ואת החזיר כי מפריס פרסה הוא ולא גרה טמא הוא לכם מבשרם לא תאכלו ובנבלתם לא תגעו׃

14:9b.DEU.014.009 את זה תאכלו מכל אשר במים כל אשר לו סנפיר וקשקשת תאכלו׃

14:10b.DEU.014.010 וכל אשר אין לו סנפיר וקשקשת לא תאכלו טמא הוא לכם׃

14:11b.DEU.014.011 כל צפור טהרה תאכלו׃

14:12b.DEU.014.012 וזה אשר לא תאכלו מהם הנשר והפרס והעזניה׃

14:13b.DEU.014.013 והראה ואת האיה והדיה למינה׃

14:14b.DEU.014.014 ואת כל ערב למינו׃

14:15b.DEU.014.015 ואת בת היענה ואת התחמס ואת השחף ואת הנץ למינהו׃

14:16b.DEU.014.016 את הכוס ואת הינשוף והתנשמת׃

14:17b.DEU.014.017 והקאת ואת הרחמה ואת השלך׃

14:18b.DEU.014.018 והחסידה והאנפה למינה והדוכיפת והעטלף׃

14:19b.DEU.014.019 וכל שרץ העוף טמא הוא לכם לא יאכלו׃

14:20b.DEU.014.020 כל עוף טהור תאכלו׃

14:21b.DEU.014.021 לא תאכלו כל נבלה לגר אשר בשעריך תתננה ואכלה או מכר לנכרי כי עם קדוש אתה ליהוה אלהיך לא תבשל גדי בחלב אמו׃

14:22b.DEU.014.022 עשר תעשר את כל תבואת זרעך היצא השדה שנה שנה׃

14:23b.DEU.014.023 ואכלת לפני יהוה אלהיך במקום אשר יבחר לשכן שמו שם מעשר דגנך תירשך ויצהרך ובכרת בקרך וצאנך למען תלמד ליראה את יהוה אלהיך כל הימים׃

14:24b.DEU.014.024 וכי ירבה ממך הדרך כי לא תוכל שאתו כי ירחק ממך המקום אשר יבחר יהוה אלהיך לשום שמו שם כי יברכך יהוה אלהיך׃

14:25b.DEU.014.025 ונתתה בכסף וצרת הכסף בידך והלכת אל המקום אשר יבחר יהוה אלהיך בו׃

14:26b.DEU.014.026 ונתתה הכסף בכל אשר תאוה נפשך בבקר ובצאן וביין ובשכר ובכל אשר תשאלך נפשך ואכלת שם לפני יהוה אלהיך ושמחת אתה וביתך׃

14:27b.DEU.014.027 והלוי אשר בשעריך לא תעזבנו כי אין לו חלק ונחלה עמך׃

14:28b.DEU.014.028 מקצה שלש שנים תוציא את כל מעשר תבואתך בשנה ההוא והנחת בשעריך׃

14:29b.DEU.014.029 ובא הלוי כי אין לו חלק ונחלה עמך והגר והיתום והאלמנה אשר בשעריך ואכלו ושבעו למען יברכך יהוה אלהיך בכל מעשה ידך אשר תעשה׃

15

15:1b.DEU.015.001 מקץ שבע שנים תעשה שמטה׃

15:2b.DEU.015.002 וזה דבר השמטה שמוט כל בעל משה ידו אשר ישה ברעהו לא יגש את רעהו ואת אחיו כי קרא שמטה ליהוה׃

15:3b.DEU.015.003 את הנכרי תגש ואשר יהיה לך את אחיך תשמט ידך׃

15:4b.DEU.015.004 אפס כי לא יהיה בך אביון כי ברך יברכך יהוה בארץ אשר יהוה אלהיך נתן לך נחלה לרשתה׃

15:5b.DEU.015.005 רק אם שמוע תשמע בקול יהוה אלהיך לשמר לעשות את כל המצוה הזאת אשר אנכי מצוך היום׃

15:6b.DEU.015.006 כי יהוה אלהיך ברכך כאשר דבר לך והעבטת גוים רבים ואתה לא תעבט ומשלת בגוים רבים ובך לא ימשלו׃

15:7b.DEU.015.007 כי יהיה בך אביון מאחד אחיך באחד שעריך בארצך אשר יהוה אלהיך נתן לך לא תאמץ את לבבך ולא תקפץ את ידך מאחיך האביון׃

15:8b.DEU.015.008 כי פתח תפתח את ידך לו והעבט תעביטנו די מחסרו אשר יחסר לו׃

15:9b.DEU.015.009 השמר לך פן יהיה דבר עם לבבך בליעל לאמר קרבה שנת השבע שנת השמטה ורעה עינך באחיך האביון ולא תתן לו וקרא עליך אל יהוה והיה בך חטא׃

15:10b.DEU.015.010 נתון תתן לו ולא ירע לבבך בתתך לו כי בגלל הדבר הזה יברכך יהוה אלהיך בכל מעשך ובכל משלח ידך׃

15:11b.DEU.015.011 כי לא יחדל אביון מקרב הארץ על כן אנכי מצוך לאמר פתח תפתח את ידך לאחיך לעניך ולאבינך בארצך׃

15:12b.DEU.015.012 כי ימכר לך אחיך העברי או העבריה ועבדך שש שנים ובשנה השביעת תשלחנו חפשי מעמך׃

15:13b.DEU.015.013 וכי תשלחנו חפשי מעמך לא תשלחנו ריקם׃

15:14b.DEU.015.014 העניק תעניק לו מצאנך ומגרנך ומיקבך אשר ברכך יהוה אלהיך תתן לו׃

15:15b.DEU.015.015 וזכרת כי עבד היית בארץ מצרים ויפדך יהוה אלהיך על כן אנכי מצוך את הדבר הזה היום׃

15:16b.DEU.015.016 והיה כי יאמר אליך לא אצא מעמך כי אהבך ואת ביתך כי טוב לו עמך׃

15:17b.DEU.015.017 ולקחת את המרצע ונתתה באזנו ובדלת והיה לך עבד עולם ואף לאמתך תעשה כן׃

15:18b.DEU.015.018 לא יקשה בעינך בשלחך אתו חפשי מעמך כי משנה שכר שכיר עבדך שש שנים וברכך יהוה אלהיך בכל אשר תעשה׃

15:19b.DEU.015.019 כל הבכור אשר יולד בבקרך ובצאנך הזכר תקדיש ליהוה אלהיך לא תעבד בבכר שורך ולא תגז בכור צאנך׃

15:20b.DEU.015.020 לפני יהוה אלהיך תאכלנו שנה בשנה במקום אשר יבחר יהוה אתה וביתך׃

15:21b.DEU.015.021 וכי יהיה בו מום פסח או עור כל מום רע לא תזבחנו ליהוה אלהיך׃

15:22b.DEU.015.022 בשעריך תאכלנו הטמא והטהור יחדו כצבי וכאיל׃

15:23b.DEU.015.023 רק את דמו לא תאכל על הארץ תשפכנו כמים׃

16

16:1b.DEU.016.001 שמור את חדש האביב ועשית פסח ליהוה אלהיך כי בחדש האביב הוציאך יהוה אלהיך ממצרים לילה׃

16:2b.DEU.016.002 וזבחת פסח ליהוה אלהיך צאן ובקר במקום אשר יבחר יהוה לשכן שמו שם׃

16:3b.DEU.016.003 לא תאכל עליו חמץ שבעת ימים תאכל עליו מצות לחם עני כי בחפזון יצאת מארץ מצרים למען תזכר את יום צאתך מארץ מצרים כל ימי חייך׃

16:4b.DEU.016.004 ולא יראה לך שאר בכל גבלך שבעת ימים ולא ילין מן הבשר אשר תזבח בערב ביום הראשון לבקר׃

16:5b.DEU.016.005 לא תוכל לזבח את הפסח באחד שעריך אשר יהוה אלהיך נתן לך׃

16:6b.DEU.016.006 כי אם אל המקום אשר יבחר יהוה אלהיך לשכן שמו שם תזבח את הפסח בערב כבוא השמש מועד צאתך ממצרים׃

16:7b.DEU.016.007 ובשלת ואכלת במקום אשר יבחר יהוה אלהיך בו ופנית בבקר והלכת לאהליך׃

16:8b.DEU.016.008 ששת ימים תאכל מצות וביום השביעי עצרת ליהוה אלהיך לא תעשה מלאכה׃

16:9b.DEU.016.009 שבעה שבעת תספר לך מהחל חרמש בקמה תחל לספר שבעה שבעות׃

16:10b.DEU.016.010 ועשית חג שבעות ליהוה אלהיך מסת נדבת ידך אשר תתן כאשר יברכך יהוה אלהיך׃

16:11b.DEU.016.011 ושמחת לפני יהוה אלהיך אתה ובנך ובתך ועבדך ואמתך והלוי אשר בשעריך והגר והיתום והאלמנה אשר בקרבך במקום אשר יבחר יהוה אלהיך לשכן שמו שם׃

16:12b.DEU.016.012 וזכרת כי עבד היית במצרים ושמרת ועשית את החקים האלה׃

16:13b.DEU.016.013 חג הסכת תעשה לך שבעת ימים באספך מגרנך ומיקבך׃

16:14b.DEU.016.014 ושמחת בחגך אתה ובנך ובתך ועבדך ואמתך והלוי והגר והיתום והאלמנה אשר בשעריך׃

16:15b.DEU.016.015 שבעת ימים תחג ליהוה אלהיך במקום אשר יבחר יהוה כי יברכך יהוה אלהיך בכל תבואתך ובכל מעשה ידיך והיית אך שמח׃

16:16b.DEU.016.016 שלוש פעמים בשנה יראה כל זכורך את פני יהוה אלהיך במקום אשר יבחר בחג המצות ובחג השבעות ובחג הסכות ולא יראה את פני יהוה ריקם׃

16:17b.DEU.016.017 איש כמתנת ידו כברכת יהוה אלהיך אשר נתן לך׃

16:18b.DEU.016.018 שפטים ושטרים תתן לך בכל שעריך אשר יהוה אלהיך נתן לך לשבטיך ושפטו את העם משפט צדק׃

16:19b.DEU.016.019 לא תטה משפט לא תכיר פנים ולא תקח שחד כי השחד יעור עיני חכמים ויסלף דברי צדיקם׃

16:20b.DEU.016.020 צדק צדק תרדף למען תחיה וירשת את הארץ אשר יהוה אלהיך נתן לך׃

16:21b.DEU.016.021 לא תטע לך אשרה כל עץ אצל מזבח יהוה אלהיך אשר תעשה לך׃

16:22b.DEU.016.022 ולא תקים לך מצבה אשר שנא יהוה אלהיך׃

17

17:1b.DEU.017.001 לא תזבח ליהוה אלהיך שור ושה אשר יהיה בו מום כל דבר רע כי תועבת יהוה אלהיך הוא׃

17:2b.DEU.017.002 כי ימצא בקרבך באחד שעריך אשר יהוה אלהיך נתן לך איש או אשה אשר יעשה את הרע בעיני יהוה אלהיך לעבר בריתו׃

17:3b.DEU.017.003 וילך ויעבד אלהים אחרים וישתחו להם ולשמש או לירח או לכל צבא השמים אשר לא צויתי׃

17:4b.DEU.017.004 והגד לך ושמעת ודרשת היטב והנה אמת נכון הדבר נעשתה התועבה הזאת בישראל׃

17:5b.DEU.017.005 והוצאת את האיש ההוא או את האשה ההוא אשר עשו את הדבר הרע הזה אל שעריך את האיש או את האשה וסקלתם באבנים ומתו׃

17:6b.DEU.017.006 על פי שנים עדים או שלשה עדים יומת המת לא יומת על פי עד אחד׃

17:7b.DEU.017.007 יד העדים תהיה בו בראשנה להמיתו ויד כל העם באחרנה ובערת הרע מקרבך׃

17:8b.DEU.017.008 כי יפלא ממך דבר למשפט בין דם לדם בין דין לדין ובין נגע לנגע דברי ריבת בשעריך וקמת ועלית אל המקום אשר יבחר יהוה אלהיך בו׃

17:9b.DEU.017.009 ובאת אל הכהנים הלוים ואל השפט אשר יהיה בימים ההם ודרשת והגידו לך את דבר המשפט׃

17:10b.DEU.017.010 ועשית על פי הדבר אשר יגידו לך מן המקום ההוא אשר יבחר יהוה ושמרת לעשות ככל אשר יורוך׃

17:11b.DEU.017.011 על פי התורה אשר יורוך ועל המשפט אשר יאמרו לך תעשה לא תסור מן הדבר אשר יגידו לך ימין ושמאל׃

17:12b.DEU.017.012 והאיש אשר יעשה בזדון לבלתי שמע אל הכהן העמד לשרת שם את יהוה אלהיך או אל השפט ומת האיש ההוא ובערת הרע מישראל׃

17:13b.DEU.017.013 וכל העם ישמעו ויראו ולא יזידון עוד׃

17:14b.DEU.017.014 כי תבא אל הארץ אשר יהוה אלהיך נתן לך וירשתה וישבתה בה ואמרת אשימה עלי מלך ככל הגוים אשר סביבתי׃

17:15b.DEU.017.015 שום תשים עליך מלך אשר יבחר יהוה אלהיך בו מקרב אחיך תשים עליך מלך לא תוכל לתת עליך איש נכרי אשר לא אחיך הוא׃

17:16b.DEU.017.016 רק לא ירבה לו סוסים ולא ישיב את העם מצרימה למען הרבות סוס ויהוה אמר לכם לא תספון לשוב בדרך הזה עוד׃

17:17b.DEU.017.017 ולא ירבה לו נשים ולא יסור לבבו וכסף וזהב לא ירבה לו מאד׃

17:18b.DEU.017.018 והיה כשבתו על כסא ממלכתו וכתב לו את משנה התורה הזאת על ספר מלפני הכהנים הלוים׃

17:19b.DEU.017.019 והיתה עמו וקרא בו כל ימי חייו למען ילמד ליראה את יהוה אלהיו לשמר את כל דברי התורה הזאת ואת החקים האלה לעשתם׃

17:20b.DEU.017.020 לבלתי רום לבבו מאחיו ולבלתי סור מן המצוה ימין ושמאול למען יאריך ימים על ממלכתו הוא ובניו בקרב ישראל׃

18

18:1b.DEU.018.001 לא יהיה לכהנים הלוים כל שבט לוי חלק ונחלה עם ישראל אשי יהוה ונחלתו יאכלון׃

18:2b.DEU.018.002 ונחלה לא יהיה לו בקרב אחיו יהוה הוא נחלתו כאשר דבר לו׃

18:3b.DEU.018.003 וזה יהיה משפט הכהנים מאת העם מאת זבחי הזבח אם שור אם שה ונתן לכהן הזרע והלחיים והקבה׃

18:4b.DEU.018.004 ראשית דגנך תירשך ויצהרך וראשית גז צאנך תתן לו׃

18:5b.DEU.018.005 כי בו בחר יהוה אלהיך מכל שבטיך לעמד לשרת בשם יהוה הוא ובניו כל הימים׃

18:6b.DEU.018.006 וכי יבא הלוי מאחד שעריך מכל ישראל אשר הוא גר שם ובא בכל אות נפשו אל המקום אשר יבחר יהוה׃

18:7b.DEU.018.007 ושרת בשם יהוה אלהיו ככל אחיו הלוים העמדים שם לפני יהוה׃

18:8b.DEU.018.008 חלק כחלק יאכלו לבד ממכריו על האבות׃

18:9b.DEU.018.009 כי אתה בא אל הארץ אשר יהוה אלהיך נתן לך לא תלמד לעשות כתועבת הגוים ההם׃

18:10b.DEU.018.010 לא ימצא בך מעביר בנו ובתו באש קסם קסמים מעונן ומנחש ומכשף׃

18:11b.DEU.018.011 וחבר חבר ושאל אוב וידעני ודרש אל המתים׃

18:12b.DEU.018.012 כי תועבת יהוה כל עשה אלה ובגלל התועבת האלה יהוה אלהיך מוריש אותם מפניך׃

18:13b.DEU.018.013 תמים תהיה עם יהוה אלהיך׃

18:14b.DEU.018.014 כי הגוים האלה אשר אתה יורש אותם אל מעננים ואל קסמים ישמעו ואתה לא כן נתן לך יהוה אלהיך׃

18:15b.DEU.018.015 נביא מקרבך מאחיך כמני יקים לך יהוה אלהיך אליו תשמעון׃

18:16b.DEU.018.016 ככל אשר שאלת מעם יהוה אלהיך בחרב ביום הקהל לאמר לא אסף לשמע את קול יהוה אלהי ואת האש הגדלה הזאת לא אראה עוד ולא אמות׃

18:17b.DEU.018.017 ויאמר יהוה אלי היטיבו אשר דברו׃

18:18b.DEU.018.018 נביא אקים להם מקרב אחיהם כמוך ונתתי דברי בפיו ודבר אליהם את כל אשר אצונו׃

18:19b.DEU.018.019 והיה האיש אשר לא ישמע אל דברי אשר ידבר בשמי אנכי אדרש מעמו׃

18:20b.DEU.018.020 אך הנביא אשר יזיד לדבר דבר בשמי את אשר לא צויתיו לדבר ואשר ידבר בשם אלהים אחרים ומת הנביא ההוא׃

18:21b.DEU.018.021 וכי תאמר בלבבך איכה נדע את הדבר אשר לא דברו יהוה׃

18:22b.DEU.018.022 אשר ידבר הנביא בשם יהוה ולא יהיה הדבר ולא יבוא הוא הדבר אשר לא דברו יהוה בזדון דברו הנביא לא תגור ממנו׃

19

19:1b.DEU.019.001 כי יכרית יהוה אלהיך את הגוים אשר יהוה אלהיך נתן לך את ארצם וירשתם וישבת בעריהם ובבתיהם׃

19:2b.DEU.019.002 שלוש ערים תבדיל לך בתוך ארצך אשר יהוה אלהיך נתן לך לרשתה׃

19:3b.DEU.019.003 תכין לך הדרך ושלשת את גבול ארצך אשר ינחילך יהוה אלהיך והיה לנוס שמה כל רצח׃

19:4b.DEU.019.004 וזה דבר הרצח אשר ינוס שמה וחי אשר יכה את רעהו בבלי דעת והוא לא שנא לו מתמל שלשם׃

19:5b.DEU.019.005 ואשר יבא את רעהו ביער לחטב עצים ונדחה ידו בגרזן לכרת העץ ונשל הברזל מן העץ ומצא את רעהו ומת הוא ינוס אל אחת הערים האלה וחי׃

19:6b.DEU.019.006 פן ירדף גאל הדם אחרי הרצח כי יחם לבבו והשיגו כי ירבה הדרך והכהו נפש ולו אין משפט מות כי לא שנא הוא לו מתמול שלשום׃

19:7b.DEU.019.007 על כן אנכי מצוך לאמר שלש ערים תבדיל לך׃

19:8b.DEU.019.008 ואם ירחיב יהוה אלהיך את גבלך כאשר נשבע לאבתיך ונתן לך את כל הארץ אשר דבר לתת לאבתיך׃

19:9b.DEU.019.009 כי תשמר את כל המצוה הזאת לעשתה אשר אנכי מצוך היום לאהבה את יהוה אלהיך וללכת בדרכיו כל הימים ויספת לך עוד שלש ערים על השלש האלה׃

19:10b.DEU.019.010 ולא ישפך דם נקי בקרב ארצך אשר יהוה אלהיך נתן לך נחלה והיה עליך דמים׃

19:11b.DEU.019.011 וכי יהיה איש שנא לרעהו וארב לו וקם עליו והכהו נפש ומת ונס אל אחת הערים האל׃

19:12b.DEU.019.012 ושלחו זקני עירו ולקחו אתו משם ונתנו אתו ביד גאל הדם ומת׃

19:13b.DEU.019.013 לא תחוס עינך עליו ובערת דם הנקי מישראל וטוב לך׃

19:14b.DEU.019.014 לא תסיג גבול רעך אשר גבלו ראשנים בנחלתך אשר תנחל בארץ אשר יהוה אלהיך נתן לך לרשתה׃

19:15b.DEU.019.015 לא יקום עד אחד באיש לכל עון ולכל חטאת בכל חטא אשר יחטא על פי שני עדים או על פי שלשה עדים יקום דבר׃

19:16b.DEU.019.016 כי יקום עד חמס באיש לענות בו סרה׃

19:17b.DEU.019.017 ועמדו שני האנשים אשר להם הריב לפני יהוה לפני הכהנים והשפטים אשר יהיו בימים ההם׃

19:18b.DEU.019.018 ודרשו השפטים היטב והנה עד שקר העד שקר ענה באחיו׃

19:19b.DEU.019.019 ועשיתם לו כאשר זמם לעשות לאחיו ובערת הרע מקרבך׃

19:20b.DEU.019.020 והנשארים ישמעו ויראו ולא יספו לעשות עוד כדבר הרע הזה בקרבך׃

19:21b.DEU.019.021 ולא תחוס עינך נפש בנפש עין בעין שן בשן יד ביד רגל ברגל׃

20

20:1b.DEU.020.001 כי תצא למלחמה על איביך וראית סוס ורכב עם רב ממך לא תירא מהם כי יהוה אלהיך עמך המעלך מארץ מצרים׃

20:2b.DEU.020.002 והיה כקרבכם אל המלחמה ונגש הכהן ודבר אל העם׃

20:3b.DEU.020.003 ואמר אלהם שמע ישראל אתם קרבים היום למלחמה על איביכם אל ירך לבבכם אל תיראו ואל תחפזו ואל תערצו מפניהם׃

20:4b.DEU.020.004 כי יהוה אלהיכם ההלך עמכם להלחם לכם עם איביכם להושיע אתכם׃

20:5b.DEU.020.005 ודברו השטרים אל העם לאמר מי האיש אשר בנה בית חדש ולא חנכו ילך וישב לביתו פן ימות במלחמה ואיש אחר יחנכנו׃

20:6b.DEU.020.006 ומי האיש אשר נטע כרם ולא חללו ילך וישב לביתו פן ימות במלחמה ואיש אחר יחללנו׃

20:7b.DEU.020.007 ומי האיש אשר ארש אשה ולא לקחה ילך וישב לביתו פן ימות במלחמה ואיש אחר יקחנה׃

20:8b.DEU.020.008 ויספו השטרים לדבר אל העם ואמרו מי האיש הירא ורך הלבב ילך וישב לביתו ולא ימס את לבב אחיו כלבבו׃

20:9b.DEU.020.009 והיה ככלת השטרים לדבר אל העם ופקדו שרי צבאות בראש העם׃

20:10b.DEU.020.010 כי תקרב אל עיר להלחם עליה וקראת אליה לשלום׃

20:11b.DEU.020.011 והיה אם שלום תענך ופתחה לך והיה כל העם הנמצא בה יהיו לך למס ועבדוך׃

20:12b.DEU.020.012 ואם לא תשלים עמך ועשתה עמך מלחמה וצרת עליה׃

20:13b.DEU.020.013 ונתנה יהוה אלהיך בידך והכית את כל זכורה לפי חרב׃

20:14b.DEU.020.014 רק הנשים והטף והבהמה וכל אשר יהיה בעיר כל שללה תבז לך ואכלת את שלל איביך אשר נתן יהוה אלהיך לך׃

20:15b.DEU.020.015 כן תעשה לכל הערים הרחקת ממך מאד אשר לא מערי הגוים האלה הנה׃

20:16b.DEU.020.016 רק מערי העמים האלה אשר יהוה אלהיך נתן לך נחלה לא תחיה כל נשמה׃

20:17b.DEU.020.017 כי החרם תחרימם החתי והאמרי הכנעני והפרזי החוי והיבוסי כאשר צוך יהוה אלהיך׃

20:18b.DEU.020.018 למען אשר לא ילמדו אתכם לעשות ככל תועבתם אשר עשו לאלהיהם וחטאתם ליהוה אלהיכם׃

20:19b.DEU.020.019 כי תצור אל עיר ימים רבים להלחם עליה לתפשה לא תשחית את עצה לנדח עליו גרזן כי ממנו תאכל ואתו לא תכרת כי האדם עץ השדה לבא מפניך במצור׃

20:20b.DEU.020.020 רק עץ אשר תדע כי לא עץ מאכל הוא אתו תשחית וכרת ובנית מצור על העיר אשר הוא עשה עמך מלחמה עד רדתה׃

21

21:1b.DEU.021.001 כי ימצא חלל באדמה אשר יהוה אלהיך נתן לך לרשתה נפל בשדה לא נודע מי הכהו׃

21:2b.DEU.021.002 ויצאו זקניך ושפטיך ומדדו אל הערים אשר סביבת החלל׃

21:3b.DEU.021.003 והיה העיר הקרבה אל החלל ולקחו זקני העיר ההוא עגלת בקר אשר לא עבד בה אשר לא משכה בעל׃

21:4b.DEU.021.004 והורדו זקני העיר ההוא את העגלה אל נחל איתן אשר לא יעבד בו ולא יזרע וערפו שם את העגלה בנחל׃

21:5b.DEU.021.005 ונגשו הכהנים בני לוי כי בם בחר יהוה אלהיך לשרתו ולברך בשם יהוה ועל פיהם יהיה כל ריב וכל נגע׃

21:6b.DEU.021.006 וכל זקני העיר ההוא הקרבים אל החלל ירחצו את ידיהם על העגלה הערופה בנחל׃

21:7b.DEU.021.007 וענו ואמרו ידינו לא שפכה את הדם הזה ועינינו לא ראו׃

21:8b.DEU.021.008 כפר לעמך ישראל אשר פדית יהוה ואל תתן דם נקי בקרב עמך ישראל ונכפר להם הדם׃

21:9b.DEU.021.009 ואתה תבער הדם הנקי מקרבך כי תעשה הישר בעיני יהוה׃

21:10b.DEU.021.010 כי תצא למלחמה על איביך ונתנו יהוה אלהיך בידך ושבית שביו׃

21:11b.DEU.021.011 וראית בשביה אשת יפת תאר וחשקת בה ולקחת לך לאשה׃

21:12b.DEU.021.012 והבאתה אל תוך ביתך וגלחה את ראשה ועשתה את צפרניה׃

21:13b.DEU.021.013 והסירה את שמלת שביה מעליה וישבה בביתך ובכתה את אביה ואת אמה ירח ימים ואחר כן תבוא אליה ובעלתה והיתה לך לאשה׃

21:14b.DEU.021.014 והיה אם לא חפצת בה ושלחתה לנפשה ומכר לא תמכרנה בכסף לא תתעמר בה תחת אשר עניתה׃

21:15b.DEU.021.015 כי תהיין לאיש שתי נשים האחת אהובה והאחת שנואה וילדו לו בנים האהובה והשנואה והיה הבן הבכור לשניאה׃

21:16b.DEU.021.016 והיה ביום הנחילו את בניו את אשר יהיה לו לא יוכל לבכר את בן האהובה על פני בן השנואה הבכר׃

21:17b.DEU.021.017 כי את הבכר בן השנואה יכיר לתת לו פי שנים בכל אשר ימצא לו כי הוא ראשית אנו לו משפט הבכרה׃

21:18b.DEU.021.018 כי יהיה לאיש בן סורר ומורה איננו שמע בקול אביו ובקול אמו ויסרו אתו ולא ישמע אליהם׃

21:19b.DEU.021.019 ותפשו בו אביו ואמו והוציאו אתו אל זקני עירו ואל שער מקמו׃

21:20b.DEU.021.020 ואמרו אל זקני עירו בננו זה סורר ומרה איננו שמע בקלנו זולל וסבא׃

21:21b.DEU.021.021 ורגמהו כל אנשי עירו באבנים ומת ובערת הרע מקרבך וכל ישראל ישמעו ויראו׃

21:22b.DEU.021.022 וכי יהיה באיש חטא משפט מות והומת ותלית אתו על עץ׃

21:23b.DEU.021.023 לא תלין נבלתו על העץ כי קבור תקברנו ביום ההוא כי קללת אלהים תלוי ולא תטמא את אדמתך אשר יהוה אלהיך נתן לך נחלה׃

22

22:1b.DEU.022.001 לא תראה את שור אחיך או את שיו נדחים והתעלמת מהם השב תשיבם לאחיך׃

22:2b.DEU.022.002 ואם לא קרוב אחיך אליך ולא ידעתו ואספתו אל תוך ביתך והיה עמך עד דרש אחיך אתו והשבתו לו׃

22:3b.DEU.022.003 וכן תעשה לחמרו וכן תעשה לשמלתו וכן תעשה לכל אבדת אחיך אשר תאבד ממנו ומצאתה לא תוכל להתעלם׃

22:4b.DEU.022.004 לא תראה את חמור אחיך או שורו נפלים בדרך והתעלמת מהם הקם תקים עמו׃

22:5b.DEU.022.005 לא יהיה כלי גבר על אשה ולא ילבש גבר שמלת אשה כי תועבת יהוה אלהיך כל עשה אלה׃

22:6b.DEU.022.006 כי יקרא קן צפור לפניך בדרך בכל עץ או על הארץ אפרחים או ביצים והאם רבצת על האפרחים או על הביצים לא תקח האם על הבנים׃

22:7b.DEU.022.007 שלח תשלח את האם ואת הבנים תקח לך למען ייטב לך והארכת ימים׃

22:8b.DEU.022.008 כי תבנה בית חדש ועשית מעקה לגגך ולא תשים דמים בביתך כי יפל הנפל ממנו׃

22:9b.DEU.022.009 לא תזרע כרמך כלאים פן תקדש המלאה הזרע אשר תזרע ותבואת הכרם׃

22:10b.DEU.022.010 לא תחרש בשור ובחמר יחדו׃

22:11b.DEU.022.011 לא תלבש שעטנז צמר ופשתים יחדו׃

22:12b.DEU.022.012 גדלים תעשה לך על ארבע כנפות כסותך אשר תכסה בה׃

22:13b.DEU.022.013 כי יקח איש אשה ובא אליה ושנאה׃

22:14b.DEU.022.014 ושם לה עלילת דברים והוציא עליה שם רע ואמר את האשה הזאת לקחתי ואקרב אליה ולא מצאתי לה בתולים׃

22:15b.DEU.022.015 ולקח אבי הנער ואמה והוציאו את בתולי הנער אל זקני העיר השערה׃

22:16b.DEU.022.016 ואמר אבי הנער אל הזקנים את בתי נתתי לאיש הזה לאשה וישנאה׃

22:17b.DEU.022.017 והנה הוא שם עלילת דברים לאמר לא מצאתי לבתך בתולים ואלה בתולי בתי ופרשו השמלה לפני זקני העיר׃

22:18b.DEU.022.018 ולקחו זקני העיר ההוא את האיש ויסרו אתו׃

22:19b.DEU.022.019 וענשו אתו מאה כסף ונתנו לאבי הנערה כי הוציא שם רע על בתולת ישראל ולו תהיה לאשה לא יוכל לשלחה כל ימיו׃

22:20b.DEU.022.020 ואם אמת היה הדבר הזה לא נמצאו בתולים לנער׃

22:21b.DEU.022.021 והוציאו את הנער אל פתח בית אביה וסקלוה אנשי עירה באבנים ומתה כי עשתה נבלה בישראל לזנות בית אביה ובערת הרע מקרבך׃

22:22b.DEU.022.022 כי ימצא איש שכב עם אשה בעלת בעל ומתו גם שניהם האיש השכב עם האשה והאשה ובערת הרע מישראל׃

22:23b.DEU.022.023 כי יהיה נער בתולה מארשה לאיש ומצאה איש בעיר ושכב עמה׃

22:24b.DEU.022.024 והוצאתם את שניהם אל שער העיר ההוא וסקלתם אתם באבנים ומתו את הנער על דבר אשר לא צעקה בעיר ואת האיש על דבר אשר ענה את אשת רעהו ובערת הרע מקרבך׃

22:25b.DEU.022.025 ואם בשדה ימצא האיש את הנער המארשה והחזיק בה האיש ושכב עמה ומת האיש אשר שכב עמה לבדו׃

22:26b.DEU.022.026 ולנער לא תעשה דבר אין לנער חטא מות כי כאשר יקום איש על רעהו ורצחו נפש כן הדבר הזה׃

22:27b.DEU.022.027 כי בשדה מצאה צעקה הנער המארשה ואין מושיע לה׃

22:28b.DEU.022.028 כי ימצא איש נער בתולה אשר לא ארשה ותפשה ושכב עמה ונמצאו׃

22:29b.DEU.022.029 ונתן האיש השכב עמה לאבי הנער חמשים כסף ולו תהיה לאשה תחת אשר ענה לא יוכל שלחה כל ימיו׃

22:30b.DEU.022.030 לא יקח איש את אשת אביו ולא יגלה כנף אביו׃

23

23:1b.DEU.023.001 לא יבא פצוע דכא וכרות שפכה בקהל יהוה׃

23:2b.DEU.023.002 לא יבא ממזר בקהל יהוה גם דור עשירי לא יבא לו בקהל יהוה׃

23:3b.DEU.023.003 לא יבא עמוני ומואבי בקהל יהוה גם דור עשירי לא יבא להם בקהל יהוה עד עולם׃

23:4b.DEU.023.004 על דבר אשר לא קדמו אתכם בלחם ובמים בדרך בצאתכם ממצרים ואשר שכר עליך את בלעם בן בעור מפתור ארם נהרים לקללך׃

23:5b.DEU.023.005 ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה כי אהבך יהוה אלהיך׃

23:6b.DEU.023.006 לא תדרש שלמם וטבתם כל ימיך לעולם׃

23:7b.DEU.023.007 לא תתעב אדמי כי אחיך הוא לא תתעב מצרי כי גר היית בארצו׃

23:8b.DEU.023.008 בנים אשר יולדו להם דור שלישי יבא להם בקהל יהוה׃

23:9b.DEU.023.009 כי תצא מחנה על איביך ונשמרת מכל דבר רע׃

23:10b.DEU.023.010 כי יהיה בך איש אשר לא יהיה טהור מקרה לילה ויצא אל מחוץ למחנה לא יבא אל תוך המחנה׃

23:11b.DEU.023.011 והיה לפנות ערב ירחץ במים וכבא השמש יבא אל תוך המחנה׃

23:12b.DEU.023.012 ויד תהיה לך מחוץ למחנה ויצאת שמה חוץ׃

23:13b.DEU.023.013 ויתד תהיה לך על אזנך והיה בשבתך חוץ וחפרתה בה ושבת וכסית את צאתך׃

23:14b.DEU.023.014 כי יהוה אלהיך מתהלך בקרב מחנך להצילך ולתת איביך לפניך והיה מחניך קדוש ולא יראה בך ערות דבר ושב מאחריך׃

23:15b.DEU.023.015 לא תסגיר עבד אל אדניו אשר ינצל אליך מעם אדניו׃

23:16b.DEU.023.016 עמך ישב בקרבך במקום אשר יבחר באחד שעריך בטוב לו לא תוננו׃

23:17b.DEU.023.017 לא תהיה קדשה מבנות ישראל ולא יהיה קדש מבני ישראל׃

23:18b.DEU.023.018 לא תביא אתנן זונה ומחיר כלב בית יהוה אלהיך לכל נדר כי תועבת יהוה אלהיך גם שניהם׃

23:19b.DEU.023.019 לא תשיך לאחיך נשך כסף נשך אכל נשך כל דבר אשר ישך׃

23:20b.DEU.023.020 לנכרי תשיך ולאחיך לא תשיך למען יברכך יהוה אלהיך בכל משלח ידך על הארץ אשר אתה בא שמה לרשתה׃

23:21b.DEU.023.021 כי תדר נדר ליהוה אלהיך לא תאחר לשלמו כי דרש ידרשנו יהוה אלהיך מעמך והיה בך חטא׃

23:22b.DEU.023.022 וכי תחדל לנדר לא יהיה בך חטא׃

23:23b.DEU.023.023 מוצא שפתיך תשמר ועשית כאשר נדרת ליהוה אלהיך נדבה אשר דברת בפיך׃

23:24b.DEU.023.024 כי תבא בכרם רעך ואכלת ענבים כנפשך שבעך ואל כליך לא תתן׃

23:25b.DEU.023.025 כי תבא בקמת רעך וקטפת מלילת בידך וחרמש לא תניף על קמת רעך׃

24

24:1b.DEU.024.001 כי יקח איש אשה ובעלה והיה אם לא תמצא חן בעיניו כי מצא בה ערות דבר וכתב לה ספר כריתת ונתן בידה ושלחה מביתו׃

24:2b.DEU.024.002 ויצאה מביתו והלכה והיתה לאיש אחר׃

24:3b.DEU.024.003 ושנאה האיש האחרון וכתב לה ספר כריתת ונתן בידה ושלחה מביתו או כי ימות האיש האחרון אשר לקחה לו לאשה׃

24:4b.DEU.024.004 לא יוכל בעלה הראשון אשר שלחה לשוב לקחתה להיות לו לאשה אחרי אשר הטמאה כי תועבה הוא לפני יהוה ולא תחטיא את הארץ אשר יהוה אלהיך נתן לך נחלה׃

24:5b.DEU.024.005 כי יקח איש אשה חדשה לא יצא בצבא ולא יעבר עליו לכל דבר נקי יהיה לביתו שנה אחת ושמח את אשתו אשר לקח׃

24:6b.DEU.024.006 לא יחבל רחים ורכב כי נפש הוא חבל׃

24:7b.DEU.024.007 כי ימצא איש גנב נפש מאחיו מבני ישראל והתעמר בו ומכרו ומת הגנב ההוא ובערת הרע מקרבך׃

24:8b.DEU.024.008 השמר בנגע הצרעת לשמר מאד ולעשות ככל אשר יורו אתכם הכהנים הלוים כאשר צויתם תשמרו לעשות׃

24:9b.DEU.024.009 זכור את אשר עשה יהוה אלהיך למרים בדרך בצאתכם ממצרים׃

24:10b.DEU.024.010 כי תשה ברעך משאת מאומה לא תבא אל ביתו לעבט עבטו׃

24:11b.DEU.024.011 בחוץ תעמד והאיש אשר אתה נשה בו יוציא אליך את העבוט החוצה׃

24:12b.DEU.024.012 ואם איש עני הוא לא תשכב בעבטו׃

24:13b.DEU.024.013 השב תשיב לו את העבוט כבא השמש ושכב בשלמתו וברכך ולך תהיה צדקה לפני יהוה אלהיך׃

24:14b.DEU.024.014 לא תעשק שכיר עני ואביון מאחיך או מגרך אשר בארצך בשעריך׃

24:15b.DEU.024.015 ביומו תתן שכרו ולא תבוא עליו השמש כי עני הוא ואליו הוא נשא את נפשו ולא יקרא עליך אל יהוה והיה בך חטא׃

24:16b.DEU.024.016 לא יומתו אבות על בנים ובנים לא יומתו על אבות איש בחטאו יומתו׃

24:17b.DEU.024.017 לא תטה משפט גר יתום ולא תחבל בגד אלמנה׃

24:18b.DEU.024.018 וזכרת כי עבד היית במצרים ויפדך יהוה אלהיך משם על כן אנכי מצוך לעשות את הדבר הזה׃

24:19b.DEU.024.019 כי תקצר קצירך בשדך ושכחת עמר בשדה לא תשוב לקחתו לגר ליתום ולאלמנה יהיה למען יברכך יהוה אלהיך בכל מעשה ידיך׃

24:20b.DEU.024.020 כי תחבט זיתך לא תפאר אחריך לגר ליתום ולאלמנה יהיה׃

24:21b.DEU.024.021 כי תבצר כרמך לא תעולל אחריך לגר ליתום ולאלמנה יהיה׃

24:22b.DEU.024.022 וזכרת כי עבד היית בארץ מצרים על כן אנכי מצוך לעשות את הדבר הזה׃

25

25:1b.DEU.025.001 כי יהיה ריב בין אנשים ונגשו אל המשפט ושפטום והצדיקו את הצדיק והרשיעו את הרשע׃

25:2b.DEU.025.002 והיה אם בן הכות הרשע והפילו השפט והכהו לפניו כדי רשעתו במספר׃

25:3b.DEU.025.003 ארבעים יכנו לא יסיף פן יסיף להכתו על אלה מכה רבה ונקלה אחיך לעיניך׃

25:4b.DEU.025.004 לא תחסם שור בדישו׃

25:5b.DEU.025.005 כי ישבו אחים יחדו ומת אחד מהם ובן אין לו לא תהיה אשת המת החוצה לאיש זר יבמה יבא עליה ולקחה לו לאשה ויבמה׃

25:6b.DEU.025.006 והיה הבכור אשר תלד יקום על שם אחיו המת ולא ימחה שמו מישראל׃

25:7b.DEU.025.007 ואם לא יחפץ האיש לקחת את יבמתו ועלתה יבמתו השערה אל הזקנים ואמרה מאן יבמי להקים לאחיו שם בישראל לא אבה יבמי׃

25:8b.DEU.025.008 וקראו לו זקני עירו ודברו אליו ועמד ואמר לא חפצתי לקחתה׃

25:9b.DEU.025.009 ונגשה יבמתו אליו לעיני הזקנים וחלצה נעלו מעל רגלו וירקה בפניו וענתה ואמרה ככה יעשה לאיש אשר לא יבנה את בית אחיו׃

25:10b.DEU.025.010 ונקרא שמו בישראל בית חלוץ הנעל׃

25:11b.DEU.025.011 כי ינצו אנשים יחדו איש ואחיו וקרבה אשת האחד להציל את אישה מיד מכהו ושלחה ידה והחזיקה במבשיו׃

25:12b.DEU.025.012 וקצתה את כפה לא תחוס עינך׃

25:13b.DEU.025.013 לא יהיה לך בכיסך אבן ואבן גדולה וקטנה׃

25:14b.DEU.025.014 לא יהיה לך בביתך איפה ואיפה גדולה וקטנה׃

25:15b.DEU.025.015 אבן שלמה וצדק יהיה לך איפה שלמה וצדק יהיה לך למען יאריכו ימיך על האדמה אשר יהוה אלהיך נתן לך׃

25:16b.DEU.025.016 כי תועבת יהוה אלהיך כל עשה אלה כל עשה עול׃

25:17b.DEU.025.017 זכור את אשר עשה לך עמלק בדרך בצאתכם ממצרים׃

25:18b.DEU.025.018 אשר קרך בדרך ויזנב בך כל הנחשלים אחריך ואתה עיף ויגע ולא ירא אלהים׃

25:19b.DEU.025.019 והיה בהניח יהוה אלהיך לך מכל איביך מסביב בארץ אשר יהוה אלהיך נתן לך נחלה לרשתה תמחה את זכר עמלק מתחת השמים לא תשכח׃

26

26:1b.DEU.026.001 והיה כי תבוא אל הארץ אשר יהוה אלהיך נתן לך נחלה וירשתה וישבת בה׃

26:2b.DEU.026.002 ולקחת מראשית כל פרי האדמה אשר תביא מארצך אשר יהוה אלהיך נתן לך ושמת בטנא והלכת אל המקום אשר יבחר יהוה אלהיך לשכן שמו שם׃

26:3b.DEU.026.003 ובאת אל הכהן אשר יהיה בימים ההם ואמרת אליו הגדתי היום ליהוה אלהיך כי באתי אל הארץ אשר נשבע יהוה לאבתינו לתת לנו׃

26:4b.DEU.026.004 ולקח הכהן הטנא מידך והניחו לפני מזבח יהוה אלהיך׃

26:5b.DEU.026.005 וענית ואמרת לפני יהוה אלהיך ארמי אבד אבי וירד מצרימה ויגר שם במתי מעט ויהי שם לגוי גדול עצום ורב׃

26:6b.DEU.026.006 וירעו אתנו המצרים ויענונו ויתנו עלינו עבדה קשה׃

26:7b.DEU.026.007 ונצעק אל יהוה אלהי אבתינו וישמע יהוה את קלנו וירא את ענינו ואת עמלנו ואת לחצנו׃

26:8b.DEU.026.008 ויוצאנו יהוה ממצרים ביד חזקה ובזרע נטויה ובמרא גדל ובאתות ובמפתים׃

26:9b.DEU.026.009 ויבאנו אל המקום הזה ויתן לנו את הארץ הזאת ארץ זבת חלב ודבש׃

26:10b.DEU.026.010 ועתה הנה הבאתי את ראשית פרי האדמה אשר נתתה לי יהוה והנחתו לפני יהוה אלהיך והשתחוית לפני יהוה אלהיך׃

26:11b.DEU.026.011 ושמחת בכל הטוב אשר נתן לך יהוה אלהיך ולביתך אתה והלוי והגר אשר בקרבך׃

26:12b.DEU.026.012 כי תכלה לעשר את כל מעשר תבואתך בשנה השלישת שנת המעשר ונתתה ללוי לגר ליתום ולאלמנה ואכלו בשעריך ושבעו׃

26:13b.DEU.026.013 ואמרת לפני יהוה אלהיך בערתי הקדש מן הבית וגם נתתיו ללוי ולגר ליתום ולאלמנה ככל מצותך אשר צויתני לא עברתי ממצותיך ולא שכחתי׃

26:14b.DEU.026.014 לא אכלתי באני ממנו ולא בערתי ממנו בטמא ולא נתתי ממנו למת שמעתי בקול יהוה אלהי עשיתי ככל אשר צויתני׃

26:15b.DEU.026.015 השקיפה ממעון קדשך מן השמים וברך את עמך את ישראל ואת האדמה אשר נתתה לנו כאשר נשבעת לאבתינו ארץ זבת חלב ודבש׃

26:16b.DEU.026.016 היום הזה יהוה אלהיך מצוך לעשות את החקים האלה ואת המשפטים ושמרת ועשית אותם בכל לבבך ובכל נפשך׃

26:17b.DEU.026.017 את יהוה האמרת היום להיות לך לאלהים וללכת בדרכיו ולשמר חקיו ומצותיו ומשפטיו ולשמע בקלו׃

26:18b.DEU.026.018 ויהוה האמירך היום להיות לו לעם סגלה כאשר דבר לך ולשמר כל מצותיו׃

26:19b.DEU.026.019 ולתתך עליון על כל הגוים אשר עשה לתהלה ולשם ולתפארת ולהיתך עם קדש ליהוה אלהיך כאשר דבר׃

27

27:1b.DEU.027.001 ויצו משה וזקני ישראל את העם לאמר שמר את כל המצוה אשר אנכי מצוה אתכם היום׃

27:2b.DEU.027.002 והיה ביום אשר תעברו את הירדן אל הארץ אשר יהוה אלהיך נתן לך והקמת לך אבנים גדלות ושדת אתם בשיד׃

27:3b.DEU.027.003 וכתבת עליהן את כל דברי התורה הזאת בעברך למען אשר תבא אל הארץ אשר יהוה אלהיך נתן לך ארץ זבת חלב ודבש כאשר דבר יהוה אלהי אבתיך לך׃

27:4b.DEU.027.004 והיה בעברכם את הירדן תקימו את האבנים האלה אשר אנכי מצוה אתכם היום בהר עיבל ושדת אותם בשיד׃

27:5b.DEU.027.005 ובנית שם מזבח ליהוה אלהיך מזבח אבנים לא תניף עליהם ברזל׃

27:6b.DEU.027.006 אבנים שלמות תבנה את מזבח יהוה אלהיך והעלית עליו עולת ליהוה אלהיך׃

27:7b.DEU.027.007 וזבחת שלמים ואכלת שם ושמחת לפני יהוה אלהיך׃

27:8b.DEU.027.008 וכתבת על האבנים את כל דברי התורה הזאת באר היטב׃

27:9b.DEU.027.009 וידבר משה והכהנים הלוים אל כל ישראל לאמר הסכת ושמע ישראל היום הזה נהיית לעם ליהוה אלהיך׃

27:10b.DEU.027.010 ושמעת בקול יהוה אלהיך ועשית את מצותו ואת חקיו אשר אנכי מצוך היום׃

27:11b.DEU.027.011 ויצו משה את העם ביום ההוא לאמר׃

27:12b.DEU.027.012 אלה יעמדו לברך את העם על הר גרזים בעברכם את הירדן שמעון ולוי ויהודה ויששכר ויוסף ובנימן׃

27:13b.DEU.027.013 ואלה יעמדו על הקללה בהר עיבל ראובן גד ואשר וזבולן דן ונפתלי׃

27:14b.DEU.027.014 וענו הלוים ואמרו אל כל איש ישראל קול רם׃

27:15b.DEU.027.015 ארור האיש אשר יעשה פסל ומסכה תועבת יהוה מעשה ידי חרש ושם בסתר וענו כל העם ואמרו אמן׃

27:16b.DEU.027.016 ארור מקלה אביו ואמו ואמר כל העם אמן׃

27:17b.DEU.027.017 ארור מסיג גבול רעהו ואמר כל העם אמן׃

27:18b.DEU.027.018 ארור משגה עור בדרך ואמר כל העם אמן׃

27:19b.DEU.027.019 ארור מטה משפט גר יתום ואלמנה ואמר כל העם אמן׃

27:20b.DEU.027.020 ארור שכב עם אשת אביו כי גלה כנף אביו ואמר כל העם אמן׃

27:21b.DEU.027.021 ארור שכב עם כל בהמה ואמר כל העם אמן׃

27:22b.DEU.027.022 ארור שכב עם אחתו בת אביו או בת אמו ואמר כל העם אמן׃

27:23b.DEU.027.023 ארור שכב עם חתנתו ואמר כל העם אמן׃

27:24b.DEU.027.024 ארור מכה רעהו בסתר ואמר כל העם אמן׃

27:25b.DEU.027.025 ארור לקח שחד להכות נפש דם נקי ואמר כל העם אמן׃

27:26b.DEU.027.026 ארור אשר לא יקים את דברי התורה הזאת לעשות אותם ואמר כל העם אמן׃

28

28:1b.DEU.028.001 והיה אם שמוע תשמע בקול יהוה אלהיך לשמר לעשות את כל מצותיו אשר אנכי מצוך היום ונתנך יהוה אלהיך עליון על כל גויי הארץ׃

28:2b.DEU.028.002 ובאו עליך כל הברכות האלה והשיגך כי תשמע בקול יהוה אלהיך׃

28:3b.DEU.028.003 ברוך אתה בעיר וברוך אתה בשדה׃

28:4b.DEU.028.004 ברוך פרי בטנך ופרי אדמתך ופרי בהמתך שגר אלפיך ועשתרות צאנך׃

28:5b.DEU.028.005 ברוך טנאך ומשארתך׃

28:6b.DEU.028.006 ברוך אתה בבאך וברוך אתה בצאתך׃

28:7b.DEU.028.007 יתן יהוה את איביך הקמים עליך נגפים לפניך בדרך אחד יצאו אליך ובשבעה דרכים ינוסו לפניך׃

28:8b.DEU.028.008 יצו יהוה אתך את הברכה באסמיך ובכל משלח ידך וברכך בארץ אשר יהוה אלהיך נתן לך׃

28:9b.DEU.028.009 יקימך יהוה לו לעם קדוש כאשר נשבע לך כי תשמר את מצות יהוה אלהיך והלכת בדרכיו׃

28:10b.DEU.028.010 וראו כל עמי הארץ כי שם יהוה נקרא עליך ויראו ממך׃

28:11b.DEU.028.011 והותרך יהוה לטובה בפרי בטנך ובפרי בהמתך ובפרי אדמתך על האדמה אשר נשבע יהוה לאבתיך לתת לך׃

28:12b.DEU.028.012 יפתח יהוה לך את אוצרו הטוב את השמים לתת מטר ארצך בעתו ולברך את כל מעשה ידך והלוית גוים רבים ואתה לא תלוה׃

28:13b.DEU.028.013 ונתנך יהוה לראש ולא לזנב והיית רק למעלה ולא תהיה למטה כי תשמע אל מצות יהוה אלהיך אשר אנכי מצוך היום לשמר ולעשות׃

28:14b.DEU.028.014 ולא תסור מכל הדברים אשר אנכי מצוה אתכם היום ימין ושמאול ללכת אחרי אלהים אחרים לעבדם׃

28:15b.DEU.028.015 והיה אם לא תשמע בקול יהוה אלהיך לשמר לעשות את כל מצותיו וחקתיו אשר אנכי מצוך היום ובאו עליך כל הקללות האלה והשיגוך׃

28:16b.DEU.028.016 ארור אתה בעיר וארור אתה בשדה׃

28:17b.DEU.028.017 ארור טנאך ומשארתך׃

28:18b.DEU.028.018 ארור פרי בטנך ופרי אדמתך שגר אלפיך ועשתרות צאנך׃

28:19b.DEU.028.019 ארור אתה בבאך וארור אתה בצאתך׃

28:20b.DEU.028.020 ישלח יהוה בך את המארה את המהומה ואת המגערת בכל משלח ידך אשר תעשה עד השמדך ועד אבדך מהר מפני רע מעלליך אשר עזבתני׃

28:21b.DEU.028.021 ידבק יהוה בך את הדבר עד כלתו אתך מעל האדמה אשר אתה בא שמה לרשתה׃

28:22b.DEU.028.022 יככה יהוה בשחפת ובקדחת ובדלקת ובחרחר ובחרב ובשדפון ובירקון ורדפוך עד אבדך׃

28:23b.DEU.028.023 והיו שמיך אשר על ראשך נחשת והארץ אשר תחתיך ברזל׃

28:24b.DEU.028.024 יתן יהוה את מטר ארצך אבק ועפר מן השמים ירד עליך עד השמדך׃

28:25b.DEU.028.025 יתנך יהוה נגף לפני איביך בדרך אחד תצא אליו ובשבעה דרכים תנוס לפניו והיית לזעוה לכל ממלכות הארץ׃

28:26b.DEU.028.026 והיתה נבלתך למאכל לכל עוף השמים ולבהמת הארץ ואין מחריד׃

28:27b.DEU.028.027 יככה יהוה בשחין מצרים ובעפלים ובגרב ובחרס אשר לא תוכל להרפא׃

28:28b.DEU.028.028 יככה יהוה בשגעון ובעורון ובתמהון לבב׃

28:29b.DEU.028.029 והיית ממשש בצהרים כאשר ימשש העור באפלה ולא תצליח את דרכיך והיית אך עשוק וגזול כל הימים ואין מושיע׃

28:30b.DEU.028.030 אשה תארש ואיש אחר ישגלנה בית תבנה ולא תשב בו כרם תטע ולא תחללנו׃

28:31b.DEU.028.031 שורך טבוח לעיניך ולא תאכל ממנו חמרך גזול מלפניך ולא ישוב לך צאנך נתנות לאיביך ואין לך מושיע׃

28:32b.DEU.028.032 בניך ובנתיך נתנים לעם אחר ועיניך ראות וכלות אליהם כל היום ואין לאל ידך׃

28:33b.DEU.028.033 פרי אדמתך וכל יגיעך יאכל עם אשר לא ידעת והיית רק עשוק ורצוץ כל הימים׃

28:34b.DEU.028.034 והיית משגע ממראה עיניך אשר תראה׃

28:35b.DEU.028.035 יככה יהוה בשחין רע על הברכים ועל השקים אשר לא תוכל להרפא מכף רגלך ועד קדקדך׃

28:36b.DEU.028.036 יולך יהוה אתך ואת מלכך אשר תקים עליך אל גוי אשר לא ידעת אתה ואבתיך ועבדת שם אלהים אחרים עץ ואבן׃

28:37b.DEU.028.037 והיית לשמה למשל ולשנינה בכל העמים אשר ינהגך יהוה שמה׃

28:38b.DEU.028.038 זרע רב תוציא השדה ומעט תאסף כי יחסלנו הארבה׃

28:39b.DEU.028.039 כרמים תטע ועבדת ויין לא תשתה ולא תאגר כי תאכלנו התלעת׃

28:40b.DEU.028.040 זיתים יהיו לך בכל גבולך ושמן לא תסוך כי ישל זיתך׃

28:41b.DEU.028.041 בנים ובנות תוליד ולא יהיו לך כי ילכו בשבי׃

28:42b.DEU.028.042 כל עצך ופרי אדמתך יירש הצלצל׃

28:43b.DEU.028.043 הגר אשר בקרבך יעלה עליך מעלה מעלה ואתה תרד מטה מטה׃

28:44b.DEU.028.044 הוא ילוך ואתה לא תלונו הוא יהיה לראש ואתה תהיה לזנב׃

28:45b.DEU.028.045 ובאו עליך כל הקללות האלה ורדפוך והשיגוך עד השמדך כי לא שמעת בקול יהוה אלהיך לשמר מצותיו וחקתיו אשר צוך׃

28:46b.DEU.028.046 והיו בך לאות ולמופת ובזרעך עד עולם׃

28:47b.DEU.028.047 תחת אשר לא עבדת את יהוה אלהיך בשמחה ובטוב לבב מרב כל׃

28:48b.DEU.028.048 ועבדת את איביך אשר ישלחנו יהוה בך ברעב ובצמא ובעירם ובחסר כל ונתן על ברזל על צוארך עד השמידו אתך׃

28:49b.DEU.028.049 ישא יהוה עליך גוי מרחוק מקצה הארץ כאשר ידאה הנשר גוי אשר לא תשמע לשנו׃

28:50b.DEU.028.050 גוי עז פנים אשר לא ישא פנים לזקן ונער לא יחן׃

28:51b.DEU.028.051 ואכל פרי בהמתך ופרי אדמתך עד השמדך אשר לא ישאיר לך דגן תירוש ויצהר שגר אלפיך ועשתרת צאנך עד האבידו אתך׃

28:52b.DEU.028.052 והצר לך בכל שעריך עד רדת חמתיך הגבהות והבצרות אשר אתה בטח בהן בכל ארצך והצר לך בכל שעריך בכל ארצך אשר נתן יהוה אלהיך לך׃

28:53b.DEU.028.053 ואכלת פרי בטנך בשר בניך ובנתיך אשר נתן לך יהוה אלהיך במצור ובמצוק אשר יציק לך איבך׃

28:54b.DEU.028.054 האיש הרך בך והענג מאד תרע עינו באחיו ובאשת חיקו וביתר בניו אשר יותיר׃

28:55b.DEU.028.055 מתת לאחד מהם מבשר בניו אשר יאכל מבלי השאיר לו כל במצור ובמצוק אשר יציק לך איבך בכל שעריך׃

28:56b.DEU.028.056 הרכה בך והענגה אשר לא נסתה כף רגלה הצג על הארץ מהתענג ומרך תרע עינה באיש חיקה ובבנה ובבתה׃

28:57b.DEU.028.057 ובשליתה היוצת מבין רגליה ובבניה אשר תלד כי תאכלם בחסר כל בסתר במצור ובמצוק אשר יציק לך איבך בשעריך׃

28:58b.DEU.028.058 אם לא תשמר לעשות את כל דברי התורה הזאת הכתובים בספר הזה ליראה את השם הנכבד והנורא הזה את יהוה אלהיך׃

28:59b.DEU.028.059 והפלא יהוה את מכתך ואת מכות זרעך מכות גדלות ונאמנות וחלים רעים ונאמנים׃

28:60b.DEU.028.060 והשיב בך את כל מדוה מצרים אשר יגרת מפניהם ודבקו בך׃

28:61b.DEU.028.061 גם כל חלי וכל מכה אשר לא כתוב בספר התורה הזאת יעלם יהוה עליך עד השמדך׃

28:62b.DEU.028.062 ונשארתם במתי מעט תחת אשר הייתם ככוכבי השמים לרב כי לא שמעת בקול יהוה אלהיך׃

28:63b.DEU.028.063 והיה כאשר שש יהוה עליכם להיטיב אתכם ולהרבות אתכם כן ישיש יהוה עליכם להאביד אתכם ולהשמיד אתכם ונסחתם מעל האדמה אשר אתה בא שמה לרשתה׃

28:64b.DEU.028.064 והפיצך יהוה בכל העמים מקצה הארץ ועד קצה הארץ ועבדת שם אלהים אחרים אשר לא ידעת אתה ואבתיך עץ ואבן׃

28:65b.DEU.028.065 ובגוים ההם לא תרגיע ולא יהיה מנוח לכף רגלך ונתן יהוה לך שם לב רגז וכליון עינים ודאבון נפש׃

28:66b.DEU.028.066 והיו חייך תלאים לך מנגד ופחדת לילה ויומם ולא תאמין בחייך׃

28:67b.DEU.028.067 בבקר תאמר מי יתן ערב ובערב תאמר מי יתן בקר מפחד לבבך אשר תפחד וממראה עיניך אשר תראה׃

28:68b.DEU.028.068 והשיבך יהוה מצרים באניות בדרך אשר אמרתי לך לא תסיף עוד לראתה והתמכרתם שם לאיביך לעבדים ולשפחות ואין קנה׃

29

29:1b.DEU.029.001 אלה דברי הברית אשר צוה יהוה את משה לכרת את בני ישראל בארץ מואב מלבד הברית אשר כרת אתם בחרב׃

29:2b.DEU.029.002 ויקרא משה אל כל ישראל ויאמר אלהם אתם ראיתם את כל אשר עשה יהוה לעיניכם בארץ מצרים לפרעה ולכל עבדיו ולכל ארצו׃

29:3b.DEU.029.003 המסות הגדלת אשר ראו עיניך האתת והמפתים הגדלים ההם׃

29:4b.DEU.029.004 ולא נתן יהוה לכם לב לדעת ועינים לראות ואזנים לשמע עד היום הזה׃

29:5b.DEU.029.005 ואולך אתכם ארבעים שנה במדבר לא בלו שלמתיכם מעליכם ונעלך לא בלתה מעל רגלך׃

29:6b.DEU.029.006 לחם לא אכלתם ויין ושכר לא שתיתם למען תדעו כי אני יהוה אלהיכם׃

29:7b.DEU.029.007 ותבאו אל המקום הזה ויצא סיחן מלך חשבון ועוג מלך הבשן לקראתנו למלחמה ונכם׃

29:8b.DEU.029.008 ונקח את ארצם ונתנה לנחלה לראובני ולגדי ולחצי שבט המנשי׃

29:9b.DEU.029.009 ושמרתם את דברי הברית הזאת ועשיתם אתם למען תשכילו את כל אשר תעשון׃

29:10b.DEU.029.010 אתם נצבים היום כלכם לפני יהוה אלהיכם ראשיכם שבטיכם זקניכם ושטריכם כל איש ישראל׃

29:11b.DEU.029.011 טפכם נשיכם וגרך אשר בקרב מחניך מחטב עציך עד שאב מימיך׃

29:12b.DEU.029.012 לעברך בברית יהוה אלהיך ובאלתו אשר יהוה אלהיך כרת עמך היום׃

29:13b.DEU.029.013 למען הקים אתך היום לו לעם והוא יהיה לך לאלהים כאשר דבר לך וכאשר נשבע לאבתיך לאברהם ליצחק וליעקב׃

29:14b.DEU.029.014 ולא אתכם לבדכם אנכי כרת את הברית הזאת ואת האלה הזאת׃

29:15b.DEU.029.015 כי את אשר ישנו פה עמנו עמד היום לפני יהוה אלהינו ואת אשר איננו פה עמנו היום׃

29:16b.DEU.029.016 כי אתם ידעתם את אשר ישבנו בארץ מצרים ואת אשר עברנו בקרב הגוים אשר עברתם׃

29:17b.DEU.029.017 ותראו את שקוציהם ואת גלליהם עץ ואבן כסף וזהב אשר עמהם׃

29:18b.DEU.029.018 פן יש בכם איש או אשה או משפחה או שבט אשר לבבו פנה היום מעם יהוה אלהינו ללכת לעבד את אלהי הגוים ההם פן יש בכם שרש פרה ראש ולענה׃

29:19b.DEU.029.019 והיה בשמעו את דברי האלה הזאת והתברך בלבבו לאמר שלום יהיה לי כי בשררות לבי אלך למען ספות הרוה את הצמאה׃

29:20b.DEU.029.020 לא יאבה יהוה סלח לו כי אז יעשן אף יהוה וקנאתו באיש ההוא ורבצה בו כל האלה הכתובה בספר הזה ומחה יהוה את שמו מתחת השמים׃

29:21b.DEU.029.021 והבדילו יהוה לרעה מכל שבטי ישראל ככל אלות הברית הכתובה בספר התורה הזה׃

29:22b.DEU.029.022 ואמר הדור האחרון בניכם אשר יקומו מאחריכם והנכרי אשר יבא מארץ רחוקה וראו את מכות הארץ ההוא ואת תחלאיה אשר חלה יהוה בה׃

29:23b.DEU.029.023 גפרית ומלח שרפה כל ארצה לא תזרע ולא תצמח ולא יעלה בה כל עשב כמהפכת סדם ועמרה אדמה וצביים אשר הפך יהוה באפו ובחמתו׃

29:24b.DEU.029.024 ואמרו כל הגוים על מה עשה יהוה ככה לארץ הזאת מה חרי האף הגדול הזה׃

29:25b.DEU.029.025 ואמרו על אשר עזבו את ברית יהוה אלהי אבתם אשר כרת עמם בהוציאו אתם מארץ מצרים׃

29:26b.DEU.029.026 וילכו ויעבדו אלהים אחרים וישתחוו להם אלהים אשר לא ידעום ולא חלק להם׃

29:27b.DEU.029.027 ויחר אף יהוה בארץ ההוא להביא עליה את כל הקללה הכתובה בספר הזה׃

29:28b.DEU.029.028 ויתשם יהוה מעל אדמתם באף ובחמה ובקצף גדול וישלכם אל ארץ אחרת כיום הזה׃

29:29b.DEU.029.029 הנסתרת ליהוה אלהינו והנגלת לנו ולבנינו עד עולם לעשות את כל דברי התורה הזאת׃

30

30:1b.DEU.030.001 והיה כי יבאו עליך כל הדברים האלה הברכה והקללה אשר נתתי לפניך והשבת אל לבבך בכל הגוים אשר הדיחך יהוה אלהיך שמה׃

30:2b.DEU.030.002 ושבת עד יהוה אלהיך ושמעת בקלו ככל אשר אנכי מצוך היום אתה ובניך בכל לבבך ובכל נפשך׃

30:3b.DEU.030.003 ושב יהוה אלהיך את שבותך ורחמך ושב וקבצך מכל העמים אשר הפיצך יהוה אלהיך שמה׃

30:4b.DEU.030.004 אם יהיה נדחך בקצה השמים משם יקבצך יהוה אלהיך ומשם יקחך׃

30:5b.DEU.030.005 והביאך יהוה אלהיך אל הארץ אשר ירשו אבתיך וירשתה והיטבך והרבך מאבתיך׃

30:6b.DEU.030.006 ומל יהוה אלהיך את לבבך ואת לבב זרעך לאהבה את יהוה אלהיך בכל לבבך ובכל נפשך למען חייך׃

30:7b.DEU.030.007 ונתן יהוה אלהיך את כל האלות האלה על איביך ועל שנאיך אשר רדפוך׃

30:8b.DEU.030.008 ואתה תשוב ושמעת בקול יהוה ועשית את כל מצותיו אשר אנכי מצוך היום׃

30:9b.DEU.030.009 והותירך יהוה אלהיך בכל מעשה ידך בפרי בטנך ובפרי בהמתך ובפרי אדמתך לטובה כי ישוב יהוה לשוש עליך לטוב כאשר שש על אבתיך׃

30:10b.DEU.030.010 כי תשמע בקול יהוה אלהיך לשמר מצותיו וחקתיו הכתובה בספר התורה הזה כי תשוב אל יהוה אלהיך בכל לבבך ובכל נפשך׃

30:11b.DEU.030.011 כי המצוה הזאת אשר אנכי מצוך היום לא נפלאת הוא ממך ולא רחקה הוא׃

30:12b.DEU.030.012 לא בשמים הוא לאמר מי יעלה לנו השמימה ויקחה לנו וישמענו אתה ונעשנה׃

30:13b.DEU.030.013 ולא מעבר לים הוא לאמר מי יעבר לנו אל עבר הים ויקחה לנו וישמענו אתה ונעשנה׃

30:14b.DEU.030.014 כי קרוב אליך הדבר מאד בפיך ובלבבך לעשתו׃

30:15b.DEU.030.015 ראה נתתי לפניך היום את החיים ואת הטוב ואת המות ואת הרע׃

30:16b.DEU.030.016 אשר אנכי מצוך היום לאהבה את יהוה אלהיך ללכת בדרכיו ולשמר מצותיו וחקתיו ומשפטיו וחיית ורבית וברכך יהוה אלהיך בארץ אשר אתה בא שמה לרשתה׃

30:17b.DEU.030.017 ואם יפנה לבבך ולא תשמע ונדחת והשתחוית לאלהים אחרים ועבדתם׃

30:18b.DEU.030.018 הגדתי לכם היום כי אבד תאבדון לא תאריכן ימים על האדמה אשר אתה עבר את הירדן לבא שמה לרשתה׃

30:19b.DEU.030.019 העידתי בכם היום את השמים ואת הארץ החיים והמות נתתי לפניך הברכה והקללה ובחרת בחיים למען תחיה אתה וזרעך׃

30:20b.DEU.030.020 לאהבה את יהוה אלהיך לשמע בקלו ולדבקה בו כי הוא חייך וארך ימיך לשבת על האדמה אשר נשבע יהוה לאבתיך לאברהם ליצחק וליעקב לתת להם׃

31

31:1b.DEU.031.001 וילך משה וידבר את הדברים האלה אל כל ישראל׃

31:2b.DEU.031.002 ויאמר אלהם בן מאה ועשרים שנה אנכי היום לא אוכל עוד לצאת ולבוא ויהוה אמר אלי לא תעבר את הירדן הזה׃

31:3b.DEU.031.003 יהוה אלהיך הוא עבר לפניך הוא ישמיד את הגוים האלה מלפניך וירשתם יהושע הוא עבר לפניך כאשר דבר יהוה׃

31:4b.DEU.031.004 ועשה יהוה להם כאשר עשה לסיחון ולעוג מלכי האמרי ולארצם אשר השמיד אתם׃

31:5b.DEU.031.005 ונתנם יהוה לפניכם ועשיתם להם ככל המצוה אשר צויתי אתכם׃

31:6b.DEU.031.006 חזקו ואמצו אל תיראו ואל תערצו מפניהם כי יהוה אלהיך הוא ההלך עמך לא ירפך ולא יעזבך׃

31:7b.DEU.031.007 ויקרא משה ליהושע ויאמר אליו לעיני כל ישראל חזק ואמץ כי אתה תבוא את העם הזה אל הארץ אשר נשבע יהוה לאבתם לתת להם ואתה תנחילנה אותם׃

31:8b.DEU.031.008 ויהוה הוא ההלך לפניך הוא יהיה עמך לא ירפך ולא יעזבך לא תירא ולא תחת׃

31:9b.DEU.031.009 ויכתב משה את התורה הזאת ויתנה אל הכהנים בני לוי הנשאים את ארון ברית יהוה ואל כל זקני ישראל׃

31:10b.DEU.031.010 ויצו משה אותם לאמר מקץ שבע שנים במעד שנת השמטה בחג הסכות׃

31:11b.DEU.031.011 בבוא כל ישראל לראות את פני יהוה אלהיך במקום אשר יבחר תקרא את התורה הזאת נגד כל ישראל באזניהם׃

31:12b.DEU.031.012 הקהל את העם האנשים והנשים והטף וגרך אשר בשעריך למען ישמעו ולמען ילמדו ויראו את יהוה אלהיכם ושמרו לעשות את כל דברי התורה הזאת׃

31:13b.DEU.031.013 ובניהם אשר לא ידעו ישמעו ולמדו ליראה את יהוה אלהיכם כל הימים אשר אתם חיים על האדמה אשר אתם עברים את הירדן שמה לרשתה׃

31:14b.DEU.031.014 ויאמר יהוה אל משה הן קרבו ימיך למות קרא את יהושע והתיצבו באהל מועד ואצונו וילך משה ויהושע ויתיצבו באהל מועד׃

31:15b.DEU.031.015 וירא יהוה באהל בעמוד ענן ויעמד עמוד הענן על פתח האהל׃

31:16b.DEU.031.016 ויאמר יהוה אל משה הנך שכב עם אבתיך וקם העם הזה וזנה אחרי אלהי נכר הארץ אשר הוא בא שמה בקרבו ועזבני והפר את בריתי אשר כרתי אתו׃

31:17b.DEU.031.017 וחרה אפי בו ביום ההוא ועזבתים והסתרתי פני מהם והיה לאכל ומצאהו רעות רבות וצרות ואמר ביום ההוא הלא על כי אין אלהי בקרבי מצאוני הרעות האלה׃

31:18b.DEU.031.018 ואנכי הסתר אסתיר פני ביום ההוא על כל הרעה אשר עשה כי פנה אל אלהים אחרים׃

31:19b.DEU.031.019 ועתה כתבו לכם את השירה הזאת ולמדה את בני ישראל שימה בפיהם למען תהיה לי השירה הזאת לעד בבני ישראל׃

31:20b.DEU.031.020 כי אביאנו אל האדמה אשר נשבעתי לאבתיו זבת חלב ודבש ואכל ושבע ודשן ופנה אל אלהים אחרים ועבדום ונאצוני והפר את בריתי׃

31:21b.DEU.031.021 והיה כי תמצאן אתו רעות רבות וצרות וענתה השירה הזאת לפניו לעד כי לא תשכח מפי זרעו כי ידעתי את יצרו אשר הוא עשה היום בטרם אביאנו אל הארץ אשר נשבעתי׃

31:22b.DEU.031.022 ויכתב משה את השירה הזאת ביום ההוא וילמדה את בני ישראל׃

31:23b.DEU.031.023 ויצו את יהושע בן נון ויאמר חזק ואמץ כי אתה תביא את בני ישראל אל הארץ אשר נשבעתי להם ואנכי אהיה עמך׃

31:24b.DEU.031.024 ויהי ככלות משה לכתב את דברי התורה הזאת על ספר עד תמם׃

31:25b.DEU.031.025 ויצו משה את הלוים נשאי ארון ברית יהוה לאמר׃

31:26b.DEU.031.026 לקח את ספר התורה הזה ושמתם אתו מצד ארון ברית יהוה אלהיכם והיה שם בך לעד׃

31:27b.DEU.031.027 כי אנכי ידעתי את מריך ואת ערפך הקשה הן בעודני חי עמכם היום ממרים היתם עם יהוה ואף כי אחרי מותי׃

31:28b.DEU.031.028 הקהילו אלי את כל זקני שבטיכם ושטריכם ואדברה באזניהם את הדברים האלה ואעידה בם את השמים ואת הארץ׃

31:29b.DEU.031.029 כי ידעתי אחרי מותי כי השחת תשחתון וסרתם מן הדרך אשר צויתי אתכם וקראת אתכם הרעה באחרית הימים כי תעשו את הרע בעיני יהוה להכעיסו במעשה ידיכם׃

31:30b.DEU.031.030 וידבר משה באזני כל קהל ישראל את דברי השירה הזאת עד תמם׃

32

32:1b.DEU.032.001 האזינו השמים ואדברה ותשמע הארץ אמרי פי׃

32:2b.DEU.032.002 יערף כמטר לקחי תזל כטל אמרתי כשעירם עלי דשא וכרביבים עלי עשב׃

32:3b.DEU.032.003 כי שם יהוה אקרא הבו גדל לאלהינו׃

32:4b.DEU.032.004 הצור תמים פעלו כי כל דרכיו משפט אל אמונה ואין עול צדיק וישר הוא׃

32:5b.DEU.032.005 שחת לו לא בניו מומם דור עקש ופתלתל׃

32:6b.DEU.032.006 ה ליהוה תגמלו זאת עם נבל ולא חכם הלוא הוא אביך קנך הוא עשך ויכננך׃

32:7b.DEU.032.007 זכר ימות עולם בינו שנות דור ודור שאל אביך ויגדך זקניך ויאמרו לך׃

32:8b.DEU.032.008 בהנחל עליון גוים בהפרידו בני אדם יצב גבלת עמים למספר בני ישראל׃

32:9b.DEU.032.009 כי חלק יהוה עמו יעקב חבל נחלתו׃

32:10b.DEU.032.010 ימצאהו בארץ מדבר ובתהו ילל ישמן יסבבנהו יבוננהו יצרנהו כאישון עינו׃

32:11b.DEU.032.011 כנשר יעיר קנו על גוזליו ירחף יפרש כנפיו יקחהו ישאהו על אברתו׃

32:12b.DEU.032.012 יהוה בדד ינחנו ואין עמו אל נכר׃

32:13b.DEU.032.013 ירכבהו על במותי ארץ ויאכל תנובת שדי וינקהו דבש מסלע ושמן מחלמיש צור׃

32:14b.DEU.032.014 חמאת בקר וחלב צאן עם חלב כרים ואילים בני בשן ועתודים עם חלב כליות חטה ודם ענב תשתה חמר׃

32:15b.DEU.032.015 וישמן ישרון ויבעט שמנת עבית כשית ויטש אלוה עשהו וינבל צור ישעתו׃

32:16b.DEU.032.016 יקנאהו בזרים בתועבת יכעיסהו׃

32:17b.DEU.032.017 יזבחו לשדים לא אלה אלהים לא ידעום חדשים מקרב באו לא שערום אבתיכם׃

32:18b.DEU.032.018 צור ילדך תשי ותשכח אל מחללך׃

32:19b.DEU.032.019 וירא יהוה וינאץ מכעס בניו ובנתיו׃

32:20b.DEU.032.020 ויאמר אסתירה פני מהם אראה מה אחריתם כי דור תהפכת המה בנים לא אמן בם׃

32:21b.DEU.032.021 הם קנאוני בלא אל כעסוני בהבליהם ואני אקניאם בלא עם בגוי נבל אכעיסם׃

32:22b.DEU.032.022 כי אש קדחה באפי ותיקד עד שאול תחתית ותאכל ארץ ויבלה ותלהט מוסדי הרים׃

32:23b.DEU.032.023 אספה עלימו רעות חצי אכלה בם׃

32:24b.DEU.032.024 מזי רעב ולחמי רשף וקטב מרירי ושן בהמות אשלח בם עם חמת זחלי עפר׃

32:25b.DEU.032.025 מחוץ תשכל חרב ומחדרים אימה גם בחור גם בתולה יונק עם איש שיבה׃

32:26b.DEU.032.026 אמרתי אפאיהם אשביתה מאנוש זכרם׃

32:27b.DEU.032.027 לולי כעס אויב אגור פן ינכרו צרימו פן יאמרו ידינו רמה ולא יהוה פעל כל זאת׃

32:28b.DEU.032.028 כי גוי אבד עצות המה ואין בהם תבונה׃

32:29b.DEU.032.029 לו חכמו ישכילו זאת יבינו לאחריתם׃

32:30b.DEU.032.030 איכה ירדף אחד אלף ושנים יניסו רבבה אם לא כי צורם מכרם ויהוה הסגירם׃

32:31b.DEU.032.031 כי לא כצורנו צורם ואיבינו פלילים׃

32:32b.DEU.032.032 כי מגפן סדם גפנם ומשדמת עמרה ענבמו ענבי רוש אשכלת מררת למו׃

32:33b.DEU.032.033 חמת תנינם יינם וראש פתנים אכזר׃

32:34b.DEU.032.034 הלא הוא כמס עמדי חתם באוצרתי׃

32:35b.DEU.032.035 לי נקם ושלם לעת תמוט רגלם כי קרוב יום אידם וחש עתדת למו׃

32:36b.DEU.032.036 כי ידין יהוה עמו ועל עבדיו יתנחם כי יראה כי אזלת יד ואפס עצור ועזוב׃

32:37b.DEU.032.037 ואמר אי אלהימו צור חסיו בו׃

32:38b.DEU.032.038 אשר חלב זבחימו יאכלו ישתו יין נסיכם יקומו ויעזרכם יהי עליכם סתרה׃

32:39b.DEU.032.039 ראו עתה כי אני אני הוא ואין אלהים עמדי אני אמית ואחיה מחצתי ואני ארפא ואין מידי מציל׃

32:40b.DEU.032.040 כי אשא אל שמים ידי ואמרתי חי אנכי לעלם׃

32:41b.DEU.032.041 אם שנותי ברק חרבי ותאחז במשפט ידי אשיב נקם לצרי ולמשנאי אשלם׃

32:42b.DEU.032.042 אשכיר חצי מדם וחרבי תאכל בשר מדם חלל ושביה מראש פרעות אויב׃

32:43b.DEU.032.043 הרנינו גוים עמו כי דם עבדיו יקום ונקם ישיב לצריו וכפר אדמתו עמו׃

32:44b.DEU.032.044 ויבא משה וידבר את כל דברי השירה הזאת באזני העם הוא והושע בן נון׃

32:45b.DEU.032.045 ויכל משה לדבר את כל הדברים האלה אל כל ישראל׃

32:46b.DEU.032.046 ויאמר אלהם שימו לבבכם לכל הדברים אשר אנכי מעיד בכם היום אשר תצום את בניכם לשמר לעשות את כל דברי התורה הזאת׃

32:47b.DEU.032.047 כי לא דבר רק הוא מכם כי הוא חייכם ובדבר הזה תאריכו ימים על האדמה אשר אתם עברים את הירדן שמה לרשתה׃

32:48b.DEU.032.048 וידבר יהוה אל משה בעצם היום הזה לאמר׃

32:49b.DEU.032.049 עלה אל הר העברים הזה הר נבו אשר בארץ מואב אשר על פני ירחו וראה את ארץ כנען אשר אני נתן לבני ישראל לאחזה׃

32:50b.DEU.032.050 ומת בהר אשר אתה עלה שמה והאסף אל עמיך כאשר מת אהרן אחיך בהר ההר ויאסף אל עמיו׃

32:51b.DEU.032.051 על אשר מעלתם בי בתוך בני ישראל במי מריבת קדש מדבר צן על אשר לא קדשתם אותי בתוך בני ישראל׃

32:52b.DEU.032.052 כי מנגד תראה את הארץ ושמה לא תבוא אל הארץ אשר אני נתן לבני ישראל׃

33

33:1b.DEU.033.001 וזאת הברכה אשר ברך משה איש האלהים את בני ישראל לפני מותו׃

33:2b.DEU.033.002 ויאמר יהוה מסיני בא וזרח משעיר למו הופיע מהר פארן ואתה מרבבת קדש מימינו אש דת למו׃

33:3b.DEU.033.003 אף חבב עמים כל קדשיו בידך והם תכו לרגלך ישא מדברתיך׃

33:4b.DEU.033.004 תורה צוה לנו משה מורשה קהלת יעקב׃

33:5b.DEU.033.005 ויהי בישרון מלך בהתאסף ראשי עם יחד שבטי ישראל׃

33:6b.DEU.033.006 יחי ראובן ואל ימת ויהי מתיו מספר׃

33:7b.DEU.033.007 וזאת ליהודה ויאמר שמע יהוה קול יהודה ואל עמו תביאנו ידיו רב לו ועזר מצריו תהיה׃

33:8b.DEU.033.008 וללוי אמר תמיך ואוריך לאיש חסידך אשר נסיתו במסה תריבהו על מי מריבה׃

33:9b.DEU.033.009 האמר לאביו ולאמו לא ראיתיו ואת אחיו לא הכיר ואת בנו לא ידע כי שמרו אמרתך ובריתך ינצרו׃

33:10b.DEU.033.010 יורו משפטיך ליעקב ותורתך לישראל ישימו קטורה באפך וכליל על מזבחך׃

33:11b.DEU.033.011 ברך יהוה חילו ופעל ידיו תרצה מחץ מתנים קמיו ומשנאיו מן יקומון׃

33:12b.DEU.033.012 לבנימן אמר ידיד יהוה ישכן לבטח עליו חפף עליו כל היום ובין כתיפיו שכן׃

33:13b.DEU.033.013 וליוסף אמר מברכת יהוה ארצו ממגד שמים מטל ומתהום רבצת תחת׃

33:14b.DEU.033.014 וממגד תבואת שמש וממגד גרש ירחים׃

33:15b.DEU.033.015 ומראש הררי קדם וממגד גבעות עולם׃

33:16b.DEU.033.016 וממגד ארץ ומלאה ורצון שכני סנה תבואתה לראש יוסף ולקדקד נזיר אחיו׃

33:17b.DEU.033.017 בכור שורו הדר לו וקרני ראם קרניו בהם עמים ינגח יחדו אפסי ארץ והם רבבות אפרים והם אלפי מנשה׃

33:18b.DEU.033.018 ולזבולן אמר שמח זבולן בצאתך ויששכר באהליך׃

33:19b.DEU.033.019 עמים הר יקראו שם יזבחו זבחי צדק כי שפע ימים יינקו ושפוני טמוני חול׃

33:20b.DEU.033.020 ולגד אמר ברוך מרחיב גד כלביא שכן וטרף זרוע אף קדקד׃

33:21b.DEU.033.021 וירא ראשית לו כי שם חלקת מחקק ספון ויתא ראשי עם צדקת יהוה עשה ומשפטיו עם ישראל׃

33:22b.DEU.033.022 ולדן אמר דן גור אריה יזנק מן הבשן׃

33:23b.DEU.033.023 ולנפתלי אמר נפתלי שבע רצון ומלא ברכת יהוה ים ודרום ירשה׃

33:24b.DEU.033.024 ולאשר אמר ברוך מבנים אשר יהי רצוי אחיו וטבל בשמן רגלו׃

33:25b.DEU.033.025 ברזל ונחשת מנעליך וכימיך דבאך׃

33:26b.DEU.033.026 אין כאל ישרון רכב שמים בעזרך ובגאותו שחקים׃

33:27b.DEU.033.027 מענה אלהי קדם ומתחת זרעת עולם ויגרש מפניך אויב ויאמר השמד׃

33:28b.DEU.033.028 וישכן ישראל בטח בדד עין יעקב אל ארץ דגן ותירוש אף שמיו יערפו טל׃

33:29b.DEU.033.029 אשריך ישראל מי כמוך עם נושע ביהוה מגן עזרך ואשר חרב גאותך ויכחשו איביך לך ואתה על במותימו תדרך׃

34

34:1b.DEU.034.001 ויעל משה מערבת מואב אל הר נבו ראש הפסגה אשר על פני ירחו ויראהו יהוה את כל הארץ את הגלעד עד דן׃

34:2b.DEU.034.002 ואת כל נפתלי ואת ארץ אפרים ומנשה ואת כל ארץ יהודה עד הים האחרון׃

34:3b.DEU.034.003 ואת הנגב ואת הככר בקעת ירחו עיר התמרים עד צער׃

34:4b.DEU.034.004 ויאמר יהוה אליו זאת הארץ אשר נשבעתי לאברהם ליצחק וליעקב לאמר לזרעך אתננה הראיתיך בעיניך ושמה לא תעבר׃

34:5b.DEU.034.005 וימת שם משה עבד יהוה בארץ מואב על פי יהוה׃

34:6b.DEU.034.006 ויקבר אתו בגי בארץ מואב מול בית פעור ולא ידע איש את קברתו עד היום הזה׃

34:7b.DEU.034.007 ומשה בן מאה ועשרים שנה במתו לא כהתה עינו ולא נס לחה׃

34:8b.DEU.034.008 ויבכו בני ישראל את משה בערבת מואב שלשים יום ויתמו ימי בכי אבל משה׃

34:9b.DEU.034.009 ויהושע בן נון מלא רוח חכמה כי סמך משה את ידיו עליו וישמעו אליו בני ישראל ויעשו כאשר צוה יהוה את משה׃

34:10b.DEU.034.010 ולא קם נביא עוד בישראל כמשה אשר ידעו יהוה פנים אל פנים׃

34:11b.DEU.034.011 לכל האתות והמופתים אשר שלחו יהוה לעשות בארץ מצרים לפרעה ולכל עבדיו ולכל ארצו׃

34:12b.DEU.034.012 ולכל היד החזקה ולכל המורא הגדול אשר עשה משה לעיני כל ישראל׃