Leviticus (Hebrew)

1

1:1b.LEV.001.001 ויקרא אל משה וידבר יהוה אליו מאהל מועד לאמר׃

1:2b.LEV.001.002 דבר אל בני ישראל ואמרת אלהם אדם כי יקריב מכם קרבן ליהוה מן הבהמה מן הבקר ומן הצאן תקריבו את קרבנכם׃

1:3b.LEV.001.003 אם עלה קרבנו מן הבקר זכר תמים יקריבנו אל פתח אהל מועד יקריב אתו לרצנו לפני יהוה׃

1:4b.LEV.001.004 וסמך ידו על ראש העלה ונרצה לו לכפר עליו׃

1:5b.LEV.001.005 ושחט את בן הבקר לפני יהוה והקריבו בני אהרן הכהנים את הדם וזרקו את הדם על המזבח סביב אשר פתח אהל מועד׃

1:6b.LEV.001.006 והפשיט את העלה ונתח אתה לנתחיה׃

1:7b.LEV.001.007 ונתנו בני אהרן הכהן אש על המזבח וערכו עצים על האש׃

1:8b.LEV.001.008 וערכו בני אהרן הכהנים את הנתחים את הראש ואת הפדר על העצים אשר על האש אשר על המזבח׃

1:9b.LEV.001.009 וקרבו וכרעיו ירחץ במים והקטיר הכהן את הכל המזבחה עלה אשה ריח ניחוח ליהוה׃

1:10b.LEV.001.010 ואם מן הצאן קרבנו מן הכשבים או מן העזים לעלה זכר תמים יקריבנו׃

1:11b.LEV.001.011 ושחט אתו על ירך המזבח צפנה לפני יהוה וזרקו בני אהרן הכהנים את דמו על המזבח סביב׃

1:12b.LEV.001.012 ונתח אתו לנתחיו ואת ראשו ואת פדרו וערך הכהן אתם על העצים אשר על האש אשר על המזבח׃

1:13b.LEV.001.013 והקרב והכרעים ירחץ במים והקריב הכהן את הכל והקטיר המזבחה עלה הוא אשה ריח ניחח ליהוה׃

1:14b.LEV.001.014 ואם מן העוף עלה קרבנו ליהוה והקריב מן התרים או מן בני היונה את קרבנו׃

1:15b.LEV.001.015 והקריבו הכהן אל המזבח ומלק את ראשו והקטיר המזבחה ונמצה דמו על קיר המזבח׃

1:16b.LEV.001.016 והסיר את מראתו בנצתה והשליך אתה אצל המזבח קדמה אל מקום הדשן׃

1:17b.LEV.001.017 ושסע אתו בכנפיו לא יבדיל והקטיר אתו הכהן המזבחה על העצים אשר על האש עלה הוא אשה ריח ניחח ליהוה׃

2

2:1b.LEV.002.001 ונפש כי תקריב קרבן מנחה ליהוה סלת יהיה קרבנו ויצק עליה שמן ונתן עליה לבנה׃

2:2b.LEV.002.002 והביאה אל בני אהרן הכהנים וקמץ משם מלא קמצו מסלתה ומשמנה על כל לבנתה והקטיר הכהן את אזכרתה המזבחה אשה ריח ניחח ליהוה׃

2:3b.LEV.002.003 והנותרת מן המנחה לאהרן ולבניו קדש קדשים מאשי יהוה׃

2:4b.LEV.002.004 וכי תקרב קרבן מנחה מאפה תנור סלת חלות מצת בלולת בשמן ורקיקי מצות משחים בשמן׃

2:5b.LEV.002.005 ואם מנחה על המחבת קרבנך סלת בלולה בשמן מצה תהיה׃

2:6b.LEV.002.006 פתות אתה פתים ויצקת עליה שמן מנחה הוא׃

2:7b.LEV.002.007 ואם מנחת מרחשת קרבנך סלת בשמן תעשה׃

2:8b.LEV.002.008 והבאת את המנחה אשר יעשה מאלה ליהוה והקריבה אל הכהן והגישה אל המזבח׃

2:9b.LEV.002.009 והרים הכהן מן המנחה את אזכרתה והקטיר המזבחה אשה ריח ניחח ליהוה׃

2:10b.LEV.002.010 והנותרת מן המנחה לאהרן ולבניו קדש קדשים מאשי יהוה׃

2:11b.LEV.002.011 כל המנחה אשר תקריבו ליהוה לא תעשה חמץ כי כל שאר וכל דבש לא תקטירו ממנו אשה ליהוה׃

2:12b.LEV.002.012 קרבן ראשית תקריבו אתם ליהוה ואל המזבח לא יעלו לריח ניחח׃

2:13b.LEV.002.013 וכל קרבן מנחתך במלח תמלח ולא תשבית מלח ברית אלהיך מעל מנחתך על כל קרבנך תקריב מלח׃

2:14b.LEV.002.014 ואם תקריב מנחת בכורים ליהוה אביב קלוי באש גרש כרמל תקריב את מנחת בכוריך׃

2:15b.LEV.002.015 ונתת עליה שמן ושמת עליה לבנה מנחה הוא׃

2:16b.LEV.002.016 והקטיר הכהן את אזכרתה מגרשה ומשמנה על כל לבנתה אשה ליהוה׃

3

3:1b.LEV.003.001 ואם זבח שלמים קרבנו אם מן הבקר הוא מקריב אם זכר אם נקבה תמים יקריבנו לפני יהוה׃

3:2b.LEV.003.002 וסמך ידו על ראש קרבנו ושחטו פתח אהל מועד וזרקו בני אהרן הכהנים את הדם על המזבח סביב׃

3:3b.LEV.003.003 והקריב מזבח השלמים אשה ליהוה את החלב המכסה את הקרב ואת כל החלב אשר על הקרב׃

3:4b.LEV.003.004 ואת שתי הכלית ואת החלב אשר עלהן אשר על הכסלים ואת היתרת על הכבד על הכליות יסירנה׃

3:5b.LEV.003.005 והקטירו אתו בני אהרן המזבחה על העלה אשר על העצים אשר על האש אשה ריח ניחח ליהוה׃

3:6b.LEV.003.006 ואם מן הצאן קרבנו לזבח שלמים ליהוה זכר או נקבה תמים יקריבנו׃

3:7b.LEV.003.007 אם כשב הוא מקריב את קרבנו והקריב אתו לפני יהוה׃

3:8b.LEV.003.008 וסמך את ידו על ראש קרבנו ושחט אתו לפני אהל מועד וזרקו בני אהרן את דמו על המזבח סביב׃

3:9b.LEV.003.009 והקריב מזבח השלמים אשה ליהוה חלבו האליה תמימה לעמת העצה יסירנה ואת החלב המכסה את הקרב ואת כל החלב אשר על הקרב׃

3:10b.LEV.003.010 ואת שתי הכלית ואת החלב אשר עלהן אשר על הכסלים ואת היתרת על הכבד על הכלית יסירנה׃

3:11b.LEV.003.011 והקטירו הכהן המזבחה לחם אשה ליהוה׃

3:12b.LEV.003.012 ואם עז קרבנו והקריבו לפני יהוה׃

3:13b.LEV.003.013 וסמך את ידו על ראשו ושחט אתו לפני אהל מועד וזרקו בני אהרן את דמו על המזבח סביב׃

3:14b.LEV.003.014 והקריב ממנו קרבנו אשה ליהוה את החלב המכסה את הקרב ואת כל החלב אשר על הקרב׃

3:15b.LEV.003.015 ואת שתי הכלית ואת החלב אשר עלהן אשר על הכסלים ואת היתרת על הכבד על הכלית יסירנה׃

3:16b.LEV.003.016 והקטירם הכהן המזבחה לחם אשה לריח ניחח כל חלב ליהוה׃

3:17b.LEV.003.017 חקת עולם לדרתיכם בכל מושבתיכם כל חלב וכל דם לא תאכלו׃

4

4:1b.LEV.004.001 וידבר יהוה אל משה לאמר׃

4:2b.LEV.004.002 דבר אל בני ישראל לאמר נפש כי תחטא בשגגה מכל מצות יהוה אשר לא תעשינה ועשה מאחת מהנה׃

4:3b.LEV.004.003 אם הכהן המשיח יחטא לאשמת העם והקריב על חטאתו אשר חטא פר בן בקר תמים ליהוה לחטאת׃

4:4b.LEV.004.004 והביא את הפר אל פתח אהל מועד לפני יהוה וסמך את ידו על ראש הפר ושחט את הפר לפני יהוה׃

4:5b.LEV.004.005 ולקח הכהן המשיח מדם הפר והביא אתו אל אהל מועד׃

4:6b.LEV.004.006 וטבל הכהן את אצבעו בדם והזה מן הדם שבע פעמים לפני יהוה את פני פרכת הקדש׃

4:7b.LEV.004.007 ונתן הכהן מן הדם על קרנות מזבח קטרת הסמים לפני יהוה אשר באהל מועד ואת כל דם הפר ישפך אל יסוד מזבח העלה אשר פתח אהל מועד׃

4:8b.LEV.004.008 ואת כל חלב פר החטאת ירים ממנו את החלב המכסה על הקרב ואת כל החלב אשר על הקרב׃

4:9b.LEV.004.009 ואת שתי הכלית ואת החלב אשר עליהן אשר על הכסלים ואת היתרת על הכבד על הכליות יסירנה׃

4:10b.LEV.004.010 כאשר יורם משור זבח השלמים והקטירם הכהן על מזבח העלה׃

4:11b.LEV.004.011 ואת עור הפר ואת כל בשרו על ראשו ועל כרעיו וקרבו ופרשו׃

4:12b.LEV.004.012 והוציא את כל הפר אל מחוץ למחנה אל מקום טהור אל שפך הדשן ושרף אתו על עצים באש על שפך הדשן ישרף׃

4:13b.LEV.004.013 ואם כל עדת ישראל ישגו ונעלם דבר מעיני הקהל ועשו אחת מכל מצות יהוה אשר לא תעשינה ואשמו׃

4:14b.LEV.004.014 ונודעה החטאת אשר חטאו עליה והקריבו הקהל פר בן בקר לחטאת והביאו אתו לפני אהל מועד׃

4:15b.LEV.004.015 וסמכו זקני העדה את ידיהם על ראש הפר לפני יהוה ושחט את הפר לפני יהוה׃

4:16b.LEV.004.016 והביא הכהן המשיח מדם הפר אל אהל מועד׃

4:17b.LEV.004.017 וטבל הכהן אצבעו מן הדם והזה שבע פעמים לפני יהוה את פני הפרכת׃

4:18b.LEV.004.018 ומן הדם יתן על קרנת המזבח אשר לפני יהוה אשר באהל מועד ואת כל הדם ישפך אל יסוד מזבח העלה אשר פתח אהל מועד׃

4:19b.LEV.004.019 ואת כל חלבו ירים ממנו והקטיר המזבחה׃

4:20b.LEV.004.020 ועשה לפר כאשר עשה לפר החטאת כן יעשה לו וכפר עלהם הכהן ונסלח להם׃

4:21b.LEV.004.021 והוציא את הפר אל מחוץ למחנה ושרף אתו כאשר שרף את הפר הראשון חטאת הקהל הוא׃

4:22b.LEV.004.022 אשר נשיא יחטא ועשה אחת מכל מצות יהוה אלהיו אשר לא תעשינה בשגגה ואשם׃

4:23b.LEV.004.023 או הודע אליו חטאתו אשר חטא בה והביא את קרבנו שעיר עזים זכר תמים׃

4:24b.LEV.004.024 וסמך ידו על ראש השעיר ושחט אתו במקום אשר ישחט את העלה לפני יהוה חטאת הוא׃

4:25b.LEV.004.025 ולקח הכהן מדם החטאת באצבעו ונתן על קרנת מזבח העלה ואת דמו ישפך אל יסוד מזבח העלה׃

4:26b.LEV.004.026 ואת כל חלבו יקטיר המזבחה כחלב זבח השלמים וכפר עליו הכהן מחטאתו ונסלח לו׃

4:27b.LEV.004.027 ואם נפש אחת תחטא בשגגה מעם הארץ בעשתה אחת ממצות יהוה אשר לא תעשינה ואשם׃

4:28b.LEV.004.028 או הודע אליו חטאתו אשר חטא והביא קרבנו שעירת עזים תמימה נקבה על חטאתו אשר חטא׃

4:29b.LEV.004.029 וסמך את ידו על ראש החטאת ושחט את החטאת במקום העלה׃

4:30b.LEV.004.030 ולקח הכהן מדמה באצבעו ונתן על קרנת מזבח העלה ואת כל דמה ישפך אל יסוד המזבח׃

4:31b.LEV.004.031 ואת כל חלבה יסיר כאשר הוסר חלב מעל זבח השלמים והקטיר הכהן המזבחה לריח ניחח ליהוה וכפר עליו הכהן ונסלח לו׃

4:32b.LEV.004.032 ואם כבש יביא קרבנו לחטאת נקבה תמימה יביאנה׃

4:33b.LEV.004.033 וסמך את ידו על ראש החטאת ושחט אתה לחטאת במקום אשר ישחט את העלה׃

4:34b.LEV.004.034 ולקח הכהן מדם החטאת באצבעו ונתן על קרנת מזבח העלה ואת כל דמה ישפך אל יסוד המזבח׃

4:35b.LEV.004.035 ואת כל חלבה יסיר כאשר יוסר חלב הכשב מזבח השלמים והקטיר הכהן אתם המזבחה על אשי יהוה וכפר עליו הכהן על חטאתו אשר חטא ונסלח לו׃

5

5:1b.LEV.005.001 ונפש כי תחטא ושמעה קול אלה והוא עד או ראה או ידע אם לוא יגיד ונשא עונו׃

5:2b.LEV.005.002 או נפש אשר תגע בכל דבר טמא או בנבלת חיה טמאה או בנבלת בהמה טמאה או בנבלת שרץ טמא ונעלם ממנו והוא טמא ואשם׃

5:3b.LEV.005.003 או כי יגע בטמאת אדם לכל טמאתו אשר יטמא בה ונעלם ממנו והוא ידע ואשם׃

5:4b.LEV.005.004 או נפש כי תשבע לבטא בשפתים להרע או להיטיב לכל אשר יבטא האדם בשבעה ונעלם ממנו והוא ידע ואשם לאחת מאלה׃

5:5b.LEV.005.005 והיה כי יאשם לאחת מאלה והתודה אשר חטא עליה׃

5:6b.LEV.005.006 והביא את אשמו ליהוה על חטאתו אשר חטא נקבה מן הצאן כשבה או שעירת עזים לחטאת וכפר עליו הכהן מחטאתו׃

5:7b.LEV.005.007 ואם לא תגיע ידו די שה והביא את אשמו אשר חטא שתי תרים או שני בני יונה ליהוה אחד לחטאת ואחד לעלה׃

5:8b.LEV.005.008 והביא אתם אל הכהן והקריב את אשר לחטאת ראשונה ומלק את ראשו ממול ערפו ולא יבדיל׃

5:9b.LEV.005.009 והזה מדם החטאת על קיר המזבח והנשאר בדם ימצה אל יסוד המזבח חטאת הוא׃

5:10b.LEV.005.010 ואת השני יעשה עלה כמשפט וכפר עליו הכהן מחטאתו אשר חטא ונסלח לו׃

5:11b.LEV.005.011 ואם לא תשיג ידו לשתי תרים או לשני בני יונה והביא את קרבנו אשר חטא עשירת האפה סלת לחטאת לא ישים עליה שמן ולא יתן עליה לבנה כי חטאת היא׃

5:12b.LEV.005.012 והביאה אל הכהן וקמץ הכהן ממנה מלוא קמצו את אזכרתה והקטיר המזבחה על אשי יהוה חטאת הוא׃

5:13b.LEV.005.013 וכפר עליו הכהן על חטאתו אשר חטא מאחת מאלה ונסלח לו והיתה לכהן כמנחה׃

5:14b.LEV.005.014 וידבר יהוה אל משה לאמר׃

5:15b.LEV.005.015 נפש כי תמעל מעל וחטאה בשגגה מקדשי יהוה והביא את אשמו ליהוה איל תמים מן הצאן בערכך כסף שקלים בשקל הקדש לאשם׃

5:16b.LEV.005.016 ואת אשר חטא מן הקדש ישלם ואת חמישתו יוסף עליו ונתן אתו לכהן והכהן יכפר עליו באיל האשם ונסלח לו׃

5:17b.LEV.005.017 ואם נפש כי תחטא ועשתה אחת מכל מצות יהוה אשר לא תעשינה ולא ידע ואשם ונשא עונו׃

5:18b.LEV.005.018 והביא איל תמים מן הצאן בערכך לאשם אל הכהן וכפר עליו הכהן על שגגתו אשר שגג והוא לא ידע ונסלח לו׃

5:19b.LEV.005.019 אשם הוא אשם אשם ליהוה׃

6

6:1b.LEV.006.001 וידבר יהוה אל משה לאמר׃

6:2b.LEV.006.002 נפש כי תחטא ומעלה מעל ביהוה וכחש בעמיתו בפקדון או בתשומת יד או בגזל או עשק את עמיתו׃

6:3b.LEV.006.003 או מצא אבדה וכחש בה ונשבע על שקר על אחת מכל אשר יעשה האדם לחטא בהנה׃

6:4b.LEV.006.004 והיה כי יחטא ואשם והשיב את הגזלה אשר גזל או את העשק אשר עשק או את הפקדון אשר הפקד אתו או את האבדה אשר מצא׃

6:5b.LEV.006.005 או מכל אשר ישבע עליו לשקר ושלם אתו בראשו וחמשתיו יסף עליו לאשר הוא לו יתננו ביום אשמתו׃

6:6b.LEV.006.006 ואת אשמו יביא ליהוה איל תמים מן הצאן בערכך לאשם אל הכהן׃

6:7b.LEV.006.007 וכפר עליו הכהן לפני יהוה ונסלח לו על אחת מכל אשר יעשה לאשמה בה׃

6:8b.LEV.006.008 וידבר יהוה אל משה לאמר׃

6:9b.LEV.006.009 צו את אהרן ואת בניו לאמר זאת תורת העלה הוא העלה על מוקדה על המזבח כל הלילה עד הבקר ואש המזבח תוקד בו׃

6:10b.LEV.006.010 ולבש הכהן מדו בד ומכנסי בד ילבש על בשרו והרים את הדשן אשר תאכל האש את העלה על המזבח ושמו אצל המזבח׃

6:11b.LEV.006.011 ופשט את בגדיו ולבש בגדים אחרים והוציא את הדשן אל מחוץ למחנה אל מקום טהור׃

6:12b.LEV.006.012 והאש על המזבח תוקד בו לא תכבה ובער עליה הכהן עצים בבקר בבקר וערך עליה העלה והקטיר עליה חלבי השלמים׃

6:13b.LEV.006.013 אש תמיד תוקד על המזבח לא תכבה׃

6:14b.LEV.006.014 וזאת תורת המנחה הקרב אתה בני אהרן לפני יהוה אל פני המזבח׃

6:15b.LEV.006.015 והרים ממנו בקמצו מסלת המנחה ומשמנה ואת כל הלבנה אשר על המנחה והקטיר המזבח ריח ניחח אזכרתה ליהוה׃

6:16b.LEV.006.016 והנותרת ממנה יאכלו אהרן ובניו מצות תאכל במקום קדש בחצר אהל מועד יאכלוה׃

6:17b.LEV.006.017 לא תאפה חמץ חלקם נתתי אתה מאשי קדש קדשים הוא כחטאת וכאשם׃

6:18b.LEV.006.018 כל זכר בבני אהרן יאכלנה חק עולם לדרתיכם מאשי יהוה כל אשר יגע בהם יקדש׃

6:19b.LEV.006.019 וידבר יהוה אל משה לאמר׃

6:20b.LEV.006.020 זה קרבן אהרן ובניו אשר יקריבו ליהוה ביום המשח אתו עשירת האפה סלת מנחה תמיד מחציתה בבקר ומחציתה בערב׃

6:21b.LEV.006.021 על מחבת בשמן תעשה מרבכת תביאנה תפיני מנחת פתים תקריב ריח ניחח ליהוה׃

6:22b.LEV.006.022 והכהן המשיח תחתיו מבניו יעשה אתה חק עולם ליהוה כליל תקטר׃

6:23b.LEV.006.023 וכל מנחת כהן כליל תהיה לא תאכל׃

6:24b.LEV.006.024 וידבר יהוה אל משה לאמר׃

6:25b.LEV.006.025 דבר אל אהרן ואל בניו לאמר זאת תורת החטאת במקום אשר תשחט העלה תשחט החטאת לפני יהוה קדש קדשים הוא׃

6:26b.LEV.006.026 הכהן המחטא אתה יאכלנה במקום קדש תאכל בחצר אהל מועד׃

6:27b.LEV.006.027 כל אשר יגע בבשרה יקדש ואשר יזה מדמה על הבגד אשר יזה עליה תכבס במקום קדש׃

6:28b.LEV.006.028 וכלי חרש אשר תבשל בו ישבר ואם בכלי נחשת בשלה ומרק ושטף במים׃

6:29b.LEV.006.029 כל זכר בכהנים יאכל אתה קדש קדשים הוא׃

6:30b.LEV.006.030 וכל חטאת אשר יובא מדמה אל אהל מועד לכפר בקדש לא תאכל באש תשרף׃

7

7:1b.LEV.007.001 וזאת תורת האשם קדש קדשים הוא׃

7:2b.LEV.007.002 במקום אשר ישחטו את העלה ישחטו את האשם ואת דמו יזרק על המזבח סביב׃

7:3b.LEV.007.003 ואת כל חלבו יקריב ממנו את האליה ואת החלב המכסה את הקרב׃

7:4b.LEV.007.004 ואת שתי הכלית ואת החלב אשר עליהן אשר על הכסלים ואת היתרת על הכבד על הכלית יסירנה׃

7:5b.LEV.007.005 והקטיר אתם הכהן המזבחה אשה ליהוה אשם הוא׃

7:6b.LEV.007.006 כל זכר בכהנים יאכלנו במקום קדוש יאכל קדש קדשים הוא׃

7:7b.LEV.007.007 כחטאת כאשם תורה אחת להם הכהן אשר יכפר בו לו יהיה׃

7:8b.LEV.007.008 והכהן המקריב את עלת איש עור העלה אשר הקריב לכהן לו יהיה׃

7:9b.LEV.007.009 וכל מנחה אשר תאפה בתנור וכל נעשה במרחשת ועל מחבת לכהן המקריב אתה לו תהיה׃

7:10b.LEV.007.010 וכל מנחה בלולה בשמן וחרבה לכל בני אהרן תהיה איש כאחיו׃

7:11b.LEV.007.011 וזאת תורת זבח השלמים אשר יקריב ליהוה׃

7:12b.LEV.007.012 אם על תודה יקריבנו והקריב על זבח התודה חלות מצות בלולת בשמן ורקיקי מצות משחים בשמן וסלת מרבכת חלת בלולת בשמן׃

7:13b.LEV.007.013 על חלת לחם חמץ יקריב קרבנו על זבח תודת שלמיו׃

7:14b.LEV.007.014 והקריב ממנו אחד מכל קרבן תרומה ליהוה לכהן הזרק את דם השלמים לו יהיה׃

7:15b.LEV.007.015 ובשר זבח תודת שלמיו ביום קרבנו יאכל לא יניח ממנו עד בקר׃

7:16b.LEV.007.016 ואם נדר או נדבה זבח קרבנו ביום הקריבו את זבחו יאכל וממחרת והנותר ממנו יאכל׃

7:17b.LEV.007.017 והנותר מבשר הזבח ביום השלישי באש ישרף׃

7:18b.LEV.007.018 ואם האכל יאכל מבשר זבח שלמיו ביום השלישי לא ירצה המקריב אתו לא יחשב לו פגול יהיה והנפש האכלת ממנו עונה תשא׃

7:19b.LEV.007.019 והבשר אשר יגע בכל טמא לא יאכל באש ישרף והבשר כל טהור יאכל בשר׃

7:20b.LEV.007.020 והנפש אשר תאכל בשר מזבח השלמים אשר ליהוה וטמאתו עליו ונכרתה הנפש ההוא מעמיה׃

7:21b.LEV.007.021 ונפש כי תגע בכל טמא בטמאת אדם או בבהמה טמאה או בכל שקץ טמא ואכל מבשר זבח השלמים אשר ליהוה ונכרתה הנפש ההוא מעמיה׃

7:22b.LEV.007.022 וידבר יהוה אל משה לאמר׃

7:23b.LEV.007.023 דבר אל בני ישראל לאמר כל חלב שור וכשב ועז לא תאכלו׃

7:24b.LEV.007.024 וחלב נבלה וחלב טרפה יעשה לכל מלאכה ואכל לא תאכלהו׃

7:25b.LEV.007.025 כי כל אכל חלב מן הבהמה אשר יקריב ממנה אשה ליהוה ונכרתה הנפש האכלת מעמיה׃

7:26b.LEV.007.026 וכל דם לא תאכלו בכל מושבתיכם לעוף ולבהמה׃

7:27b.LEV.007.027 כל נפש אשר תאכל כל דם ונכרתה הנפש ההוא מעמיה׃

7:28b.LEV.007.028 וידבר יהוה אל משה לאמר׃

7:29b.LEV.007.029 דבר אל בני ישראל לאמר המקריב את זבח שלמיו ליהוה יביא את קרבנו ליהוה מזבח שלמיו׃

7:30b.LEV.007.030 ידיו תביאינה את אשי יהוה את החלב על החזה יביאנו את החזה להניף אתו תנופה לפני יהוה׃

7:31b.LEV.007.031 והקטיר הכהן את החלב המזבחה והיה החזה לאהרן ולבניו׃

7:32b.LEV.007.032 ואת שוק הימין תתנו תרומה לכהן מזבחי שלמיכם׃

7:33b.LEV.007.033 המקריב את דם השלמים ואת החלב מבני אהרן לו תהיה שוק הימין למנה׃

7:34b.LEV.007.034 כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל׃

7:35b.LEV.007.035 זאת משחת אהרן ומשחת בניו מאשי יהוה ביום הקריב אתם לכהן ליהוה׃

7:36b.LEV.007.036 אשר צוה יהוה לתת להם ביום משחו אתם מאת בני ישראל חקת עולם לדרתם׃

7:37b.LEV.007.037 זאת התורה לעלה למנחה ולחטאת ולאשם ולמלואים ולזבח השלמים׃

7:38b.LEV.007.038 אשר צוה יהוה את משה בהר סיני ביום צותו את בני ישראל להקריב את קרבניהם ליהוה במדבר סיני׃

8

8:1b.LEV.008.001 וידבר יהוה אל משה לאמר׃

8:2b.LEV.008.002 קח את אהרן ואת בניו אתו ואת הבגדים ואת שמן המשחה ואת פר החטאת ואת שני האילים ואת סל המצות׃

8:3b.LEV.008.003 ואת כל העדה הקהל אל פתח אהל מועד׃

8:4b.LEV.008.004 ויעש משה כאשר צוה יהוה אתו ותקהל העדה אל פתח אהל מועד׃

8:5b.LEV.008.005 ויאמר משה אל העדה זה הדבר אשר צוה יהוה לעשות׃

8:6b.LEV.008.006 ויקרב משה את אהרן ואת בניו וירחץ אתם במים׃

8:7b.LEV.008.007 ויתן עליו את הכתנת ויחגר אתו באבנט וילבש אתו את המעיל ויתן עליו את האפד ויחגר אתו בחשב האפד ויאפד לו בו׃

8:8b.LEV.008.008 וישם עליו את החשן ויתן אל החשן את האורים ואת התמים׃

8:9b.LEV.008.009 וישם את המצנפת על ראשו וישם על המצנפת אל מול פניו את ציץ הזהב נזר הקדש כאשר צוה יהוה את משה׃

8:10b.LEV.008.010 ויקח משה את שמן המשחה וימשח את המשכן ואת כל אשר בו ויקדש אתם׃

8:11b.LEV.008.011 ויז ממנו על המזבח שבע פעמים וימשח את המזבח ואת כל כליו ואת הכיר ואת כנו לקדשם׃

8:12b.LEV.008.012 ויצק משמן המשחה על ראש אהרן וימשח אתו לקדשו׃

8:13b.LEV.008.013 ויקרב משה את בני אהרן וילבשם כתנת ויחגר אתם אבנט ויחבש להם מגבעות כאשר צוה יהוה את משה׃

8:14b.LEV.008.014 ויגש את פר החטאת ויסמך אהרן ובניו את ידיהם על ראש פר החטאת׃

8:15b.LEV.008.015 וישחט ויקח משה את הדם ויתן על קרנות המזבח סביב באצבעו ויחטא את המזבח ואת הדם יצק אל יסוד המזבח ויקדשהו לכפר עליו׃

8:16b.LEV.008.016 ויקח את כל החלב אשר על הקרב ואת יתרת הכבד ואת שתי הכלית ואת חלבהן ויקטר משה המזבחה׃

8:17b.LEV.008.017 ואת הפר ואת ערו ואת בשרו ואת פרשו שרף באש מחוץ למחנה כאשר צוה יהוה את משה׃

8:18b.LEV.008.018 ויקרב את איל העלה ויסמכו אהרן ובניו את ידיהם על ראש האיל׃

8:19b.LEV.008.019 וישחט ויזרק משה את הדם על המזבח סביב׃

8:20b.LEV.008.020 ואת האיל נתח לנתחיו ויקטר משה את הראש ואת הנתחים ואת הפדר׃

8:21b.LEV.008.021 ואת הקרב ואת הכרעים רחץ במים ויקטר משה את כל האיל המזבחה עלה הוא לריח ניחח אשה הוא ליהוה כאשר צוה יהוה את משה׃

8:22b.LEV.008.022 ויקרב את האיל השני איל המלאים ויסמכו אהרן ובניו את ידיהם על ראש האיל׃

8:23b.LEV.008.023 וישחט ויקח משה מדמו ויתן על תנוך אזן אהרן הימנית ועל בהן ידו הימנית ועל בהן רגלו הימנית׃

8:24b.LEV.008.024 ויקרב את בני אהרן ויתן משה מן הדם על תנוך אזנם הימנית ועל בהן ידם הימנית ועל בהן רגלם הימנית ויזרק משה את הדם על המזבח סביב׃

8:25b.LEV.008.025 ויקח את החלב ואת האליה ואת כל החלב אשר על הקרב ואת יתרת הכבד ואת שתי הכלית ואת חלבהן ואת שוק הימין׃

8:26b.LEV.008.026 ומסל המצות אשר לפני יהוה לקח חלת מצה אחת וחלת לחם שמן אחת ורקיק אחד וישם על החלבים ועל שוק הימין׃

8:27b.LEV.008.027 ויתן את הכל על כפי אהרן ועל כפי בניו וינף אתם תנופה לפני יהוה׃

8:28b.LEV.008.028 ויקח משה אתם מעל כפיהם ויקטר המזבחה על העלה מלאים הם לריח ניחח אשה הוא ליהוה׃

8:29b.LEV.008.029 ויקח משה את החזה ויניפהו תנופה לפני יהוה מאיל המלאים למשה היה למנה כאשר צוה יהוה את משה׃

8:30b.LEV.008.030 ויקח משה משמן המשחה ומן הדם אשר על המזבח ויז על אהרן על בגדיו ועל בניו ועל בגדי בניו אתו ויקדש את אהרן את בגדיו ואת בניו ואת בגדי בניו אתו׃

8:31b.LEV.008.031 ויאמר משה אל אהרן ואל בניו בשלו את הבשר פתח אהל מועד ושם תאכלו אתו ואת הלחם אשר בסל המלאים כאשר צויתי לאמר אהרן ובניו יאכלהו׃

8:32b.LEV.008.032 והנותר בבשר ובלחם באש תשרפו׃

8:33b.LEV.008.033 ומפתח אהל מועד לא תצאו שבעת ימים עד יום מלאת ימי מלאיכם כי שבעת ימים ימלא את ידכם׃

8:34b.LEV.008.034 כאשר עשה ביום הזה צוה יהוה לעשת לכפר עליכם׃

8:35b.LEV.008.035 ופתח אהל מועד תשבו יומם ולילה שבעת ימים ושמרתם את משמרת יהוה ולא תמותו כי כן צויתי׃

8:36b.LEV.008.036 ויעש אהרן ובניו את כל הדברים אשר צוה יהוה ביד משה׃

9

9:1b.LEV.009.001 ויהי ביום השמיני קרא משה לאהרן ולבניו ולזקני ישראל׃

9:2b.LEV.009.002 ויאמר אל אהרן קח לך עגל בן בקר לחטאת ואיל לעלה תמימם והקרב לפני יהוה׃

9:3b.LEV.009.003 ואל בני ישראל תדבר לאמר קחו שעיר עזים לחטאת ועגל וכבש בני שנה תמימם לעלה׃

9:4b.LEV.009.004 ושור ואיל לשלמים לזבח לפני יהוה ומנחה בלולה בשמן כי היום יהוה נראה אליכם׃

9:5b.LEV.009.005 ויקחו את אשר צוה משה אל פני אהל מועד ויקרבו כל העדה ויעמדו לפני יהוה׃

9:6b.LEV.009.006 ויאמר משה זה הדבר אשר צוה יהוה תעשו וירא אליכם כבוד יהוה׃

9:7b.LEV.009.007 ויאמר משה אל אהרן קרב אל המזבח ועשה את חטאתך ואת עלתך וכפר בעדך ובעד העם ועשה את קרבן העם וכפר בעדם כאשר צוה יהוה׃

9:8b.LEV.009.008 ויקרב אהרן אל המזבח וישחט את עגל החטאת אשר לו׃

9:9b.LEV.009.009 ויקרבו בני אהרן את הדם אליו ויטבל אצבעו בדם ויתן על קרנות המזבח ואת הדם יצק אל יסוד המזבח׃

9:10b.LEV.009.010 ואת החלב ואת הכלית ואת היתרת מן הכבד מן החטאת הקטיר המזבחה כאשר צוה יהוה את משה׃

9:11b.LEV.009.011 ואת הבשר ואת העור שרף באש מחוץ למחנה׃

9:12b.LEV.009.012 וישחט את העלה וימצאו בני אהרן אליו את הדם ויזרקהו על המזבח סביב׃

9:13b.LEV.009.013 ואת העלה המציאו אליו לנתחיה ואת הראש ויקטר על המזבח׃

9:14b.LEV.009.014 וירחץ את הקרב ואת הכרעים ויקטר על העלה המזבחה׃

9:15b.LEV.009.015 ויקרב את קרבן העם ויקח את שעיר החטאת אשר לעם וישחטהו ויחטאהו כראשון׃

9:16b.LEV.009.016 ויקרב את העלה ויעשה כמשפט׃

9:17b.LEV.009.017 ויקרב את המנחה וימלא כפו ממנה ויקטר על המזבח מלבד עלת הבקר׃

9:18b.LEV.009.018 וישחט את השור ואת האיל זבח השלמים אשר לעם וימצאו בני אהרן את הדם אליו ויזרקהו על המזבח סביב׃

9:19b.LEV.009.019 ואת החלבים מן השור ומן האיל האליה והמכסה והכלית ויתרת הכבד׃

9:20b.LEV.009.020 וישימו את החלבים על החזות ויקטר החלבים המזבחה׃

9:21b.LEV.009.021 ואת החזות ואת שוק הימין הניף אהרן תנופה לפני יהוה כאשר צוה משה׃

9:22b.LEV.009.022 וישא אהרן את ידו אל העם ויברכם וירד מעשת החטאת והעלה והשלמים׃

9:23b.LEV.009.023 ויבא משה ואהרן אל אהל מועד ויצאו ויברכו את העם וירא כבוד יהוה אל כל העם׃

9:24b.LEV.009.024 ותצא אש מלפני יהוה ותאכל על המזבח את העלה ואת החלבים וירא כל העם וירנו ויפלו על פניהם׃

10

10:1b.LEV.010.001 ויקחו בני אהרן נדב ואביהוא איש מחתתו ויתנו בהן אש וישימו עליה קטרת ויקרבו לפני יהוה אש זרה אשר לא צוה אתם׃

10:2b.LEV.010.002 ותצא אש מלפני יהוה ותאכל אותם וימתו לפני יהוה׃

10:3b.LEV.010.003 ויאמר משה אל אהרן הוא אשר דבר יהוה לאמר בקרבי אקדש ועל פני כל העם אכבד וידם אהרן׃

10:4b.LEV.010.004 ויקרא משה אל מישאל ואל אלצפן בני עזיאל דד אהרן ויאמר אלהם קרבו שאו את אחיכם מאת פני הקדש אל מחוץ למחנה׃

10:5b.LEV.010.005 ויקרבו וישאם בכתנתם אל מחוץ למחנה כאשר דבר משה׃

10:6b.LEV.010.006 ויאמר משה אל אהרן ולאלעזר ולאיתמר בניו ראשיכם אל תפרעו ובגדיכם לא תפרמו ולא תמתו ועל כל העדה יקצף ואחיכם כל בית ישראל יבכו את השרפה אשר שרף יהוה׃

10:7b.LEV.010.007 ומפתח אהל מועד לא תצאו פן תמתו כי שמן משחת יהוה עליכם ויעשו כדבר משה׃

10:8b.LEV.010.008 וידבר יהוה אל אהרן לאמר׃

10:9b.LEV.010.009 יין ושכר אל תשת אתה ובניך אתך בבאכם אל אהל מועד ולא תמתו חקת עולם לדרתיכם׃

10:10b.LEV.010.010 ולהבדיל בין הקדש ובין החל ובין הטמא ובין הטהור׃

10:11b.LEV.010.011 ולהורת את בני ישראל את כל החקים אשר דבר יהוה אליהם ביד משה׃

10:12b.LEV.010.012 וידבר משה אל אהרן ואל אלעזר ואל איתמר בניו הנותרים קחו את המנחה הנותרת מאשי יהוה ואכלוה מצות אצל המזבח כי קדש קדשים הוא׃

10:13b.LEV.010.013 ואכלתם אתה במקום קדש כי חקך וחק בניך הוא מאשי יהוה כי כן צויתי׃

10:14b.LEV.010.014 ואת חזה התנופה ואת שוק התרומה תאכלו במקום טהור אתה ובניך ובנתיך אתך כי חקך וחק בניך נתנו מזבחי שלמי בני ישראל׃

10:15b.LEV.010.015 שוק התרומה וחזה התנופה על אשי החלבים יביאו להניף תנופה לפני יהוה והיה לך ולבניך אתך לחק עולם כאשר צוה יהוה׃

10:16b.LEV.010.016 ואת שעיר החטאת דרש דרש משה והנה שרף ויקצף על אלעזר ועל איתמר בני אהרן הנותרם לאמר׃

10:17b.LEV.010.017 מדוע לא אכלתם את החטאת במקום הקדש כי קדש קדשים הוא ואתה נתן לכם לשאת את עון העדה לכפר עליהם לפני יהוה׃

10:18b.LEV.010.018 הן לא הובא את דמה אל הקדש פנימה אכול תאכלו אתה בקדש כאשר צויתי׃

10:19b.LEV.010.019 וידבר אהרן אל משה הן היום הקריבו את חטאתם ואת עלתם לפני יהוה ותקראנה אתי כאלה ואכלתי חטאת היום הייטב בעיני יהוה׃

10:20b.LEV.010.020 וישמע משה וייטב בעיניו׃

11

11:1b.LEV.011.001 וידבר יהוה אל משה ואל אהרן לאמר אלהם׃

11:2b.LEV.011.002 דברו אל בני ישראל לאמר זאת החיה אשר תאכלו מכל הבהמה אשר על הארץ׃

11:3b.LEV.011.003 כל מפרסת פרסה ושסעת שסע פרסת מעלת גרה בבהמה אתה תאכלו׃

11:4b.LEV.011.004 אך את זה לא תאכלו ממעלי הגרה וממפריסי הפרסה את הגמל כי מעלה גרה הוא ופרסה איננו מפריס טמא הוא לכם׃

11:5b.LEV.011.005 ואת השפן כי מעלה גרה הוא ופרסה לא יפריס טמא הוא לכם׃

11:6b.LEV.011.006 ואת הארנבת כי מעלת גרה הוא ופרסה לא הפריסה טמאה הוא לכם׃

11:7b.LEV.011.007 ואת החזיר כי מפריס פרסה הוא ושסע שסע פרסה והוא גרה לא יגר טמא הוא לכם׃

11:8b.LEV.011.008 מבשרם לא תאכלו ובנבלתם לא תגעו טמאים הם לכם׃

11:9b.LEV.011.009 את זה תאכלו מכל אשר במים כל אשר לו סנפיר וקשקשת במים בימים ובנחלים אתם תאכלו׃

11:10b.LEV.011.010 וכל אשר אין לו סנפיר וקשקשת בימים ובנחלים מכל שרץ המים ומכל נפש החיה אשר במים שקץ הם לכם׃

11:11b.LEV.011.011 ושקץ יהיו לכם מבשרם לא תאכלו ואת נבלתם תשקצו׃

11:12b.LEV.011.012 כל אשר אין לו סנפיר וקשקשת במים שקץ הוא לכם׃

11:13b.LEV.011.013 ואת אלה תשקצו מן העוף לא יאכלו שקץ הם את הנשר ואת הפרס ואת העזניה׃

11:14b.LEV.011.014 ואת הדאה ואת האיה למינה׃

11:15b.LEV.011.015 את כל ערב למינו׃

11:16b.LEV.011.016 ואת בת היענה ואת התחמס ואת השחף ואת הנץ למינהו׃

11:17b.LEV.011.017 ואת הכוס ואת השלך ואת הינשוף׃

11:18b.LEV.011.018 ואת התנשמת ואת הקאת ואת הרחם׃

11:19b.LEV.011.019 ואת החסידה האנפה למינה ואת הדוכיפת ואת העטלף׃

11:20b.LEV.011.020 כל שרץ העוף ההלך על ארבע שקץ הוא לכם׃

11:21b.LEV.011.021 אך את זה תאכלו מכל שרץ העוף ההלך על ארבע אשר לא כרעים ממעל לרגליו לנתר בהן על הארץ׃

11:22b.LEV.011.022 את אלה מהם תאכלו את הארבה למינו ואת הסלעם למינהו ואת החרגל למינהו ואת החגב למינהו׃

11:23b.LEV.011.023 וכל שרץ העוף אשר לו ארבע רגלים שקץ הוא לכם׃

11:24b.LEV.011.024 ולאלה תטמאו כל הנגע בנבלתם יטמא עד הערב׃

11:25b.LEV.011.025 וכל הנשא מנבלתם יכבס בגדיו וטמא עד הערב׃

11:26b.LEV.011.026 לכל הבהמה אשר הוא מפרסת פרסה ושסע איננה שסעת וגרה איננה מעלה טמאים הם לכם כל הנגע בהם יטמא׃

11:27b.LEV.011.027 וכל הולך על כפיו בכל החיה ההלכת על ארבע טמאים הם לכם כל הנגע בנבלתם יטמא עד הערב׃

11:28b.LEV.011.028 והנשא את נבלתם יכבס בגדיו וטמא עד הערב טמאים המה לכם׃

11:29b.LEV.011.029 וזה לכם הטמא בשרץ השרץ על הארץ החלד והעכבר והצב למינהו׃

11:30b.LEV.011.030 והאנקה והכח והלטאה והחמט והתנשמת׃

11:31b.LEV.011.031 אלה הטמאים לכם בכל השרץ כל הנגע בהם במתם יטמא עד הערב׃

11:32b.LEV.011.032 וכל אשר יפל עליו מהם במתם יטמא מכל כלי עץ או בגד או עור או שק כל כלי אשר יעשה מלאכה בהם במים יובא וטמא עד הערב וטהר׃

11:33b.LEV.011.033 וכל כלי חרש אשר יפל מהם אל תוכו כל אשר בתוכו יטמא ואתו תשברו׃

11:34b.LEV.011.034 מכל האכל אשר יאכל אשר יבוא עליו מים יטמא וכל משקה אשר ישתה בכל כלי יטמא׃

11:35b.LEV.011.035 וכל אשר יפל מנבלתם עליו יטמא תנור וכירים יתץ טמאים הם וטמאים יהיו לכם׃

11:36b.LEV.011.036 אך מעין ובור מקוה מים יהיה טהור ונגע בנבלתם יטמא׃

11:37b.LEV.011.037 וכי יפל מנבלתם על כל זרע זרוע אשר יזרע טהור הוא׃

11:38b.LEV.011.038 וכי יתן מים על זרע ונפל מנבלתם עליו טמא הוא לכם׃

11:39b.LEV.011.039 וכי ימות מן הבהמה אשר היא לכם לאכלה הנגע בנבלתה יטמא עד הערב׃

11:40b.LEV.011.040 והאכל מנבלתה יכבס בגדיו וטמא עד הערב והנשא את נבלתה יכבס בגדיו וטמא עד הערב׃

11:41b.LEV.011.041 וכל השרץ השרץ על הארץ שקץ הוא לא יאכל׃

11:42b.LEV.011.042 כל הולך על גחון וכל הולך על ארבע עד כל מרבה רגלים לכל השרץ השרץ על הארץ לא תאכלום כי שקץ הם׃

11:43b.LEV.011.043 אל תשקצו את נפשתיכם בכל השרץ השרץ ולא תטמאו בהם ונטמתם בם׃

11:44b.LEV.011.044 כי אני יהוה אלהיכם והתקדשתם והייתם קדשים כי קדוש אני ולא תטמאו את נפשתיכם בכל השרץ הרמש על הארץ׃

11:45b.LEV.011.045 כי אני יהוה המעלה אתכם מארץ מצרים להית לכם לאלהים והייתם קדשים כי קדוש אני׃

11:46b.LEV.011.046 זאת תורת הבהמה והעוף וכל נפש החיה הרמשת במים ולכל נפש השרצת על הארץ׃

11:47b.LEV.011.047 להבדיל בין הטמא ובין הטהר ובין החיה הנאכלת ובין החיה אשר לא תאכל׃

12

12:1b.LEV.012.001 וידבר יהוה אל משה לאמר׃

12:2b.LEV.012.002 דבר אל בני ישראל לאמר אשה כי תזריע וילדה זכר וטמאה שבעת ימים כימי נדת דותה תטמא׃

12:3b.LEV.012.003 וביום השמיני ימול בשר ערלתו׃

12:4b.LEV.012.004 ושלשים יום ושלשת ימים תשב בדמי טהרה בכל קדש לא תגע ואל המקדש לא תבא עד מלאת ימי טהרה׃

12:5b.LEV.012.005 ואם נקבה תלד וטמאה שבעים כנדתה וששים יום וששת ימים תשב על דמי טהרה׃

12:6b.LEV.012.006 ובמלאת ימי טהרה לבן או לבת תביא כבש בן שנתו לעלה ובן יונה או תר לחטאת אל פתח אהל מועד אל הכהן׃

12:7b.LEV.012.007 והקריבו לפני יהוה וכפר עליה וטהרה ממקר דמיה זאת תורת הילדת לזכר או לנקבה׃

12:8b.LEV.012.008 ואם לא תמצא ידה די שה ולקחה שתי תרים או שני בני יונה אחד לעלה ואחד לחטאת וכפר עליה הכהן וטהרה׃

13

13:1b.LEV.013.001 וידבר יהוה אל משה ואל אהרן לאמר׃

13:2b.LEV.013.002 אדם כי יהיה בעור בשרו שאת או ספחת או בהרת והיה בעור בשרו לנגע צרעת והובא אל אהרן הכהן או אל אחד מבניו הכהנים׃

13:3b.LEV.013.003 וראה הכהן את הנגע בעור הבשר ושער בנגע הפך לבן ומראה הנגע עמק מעור בשרו נגע צרעת הוא וראהו הכהן וטמא אתו׃

13:4b.LEV.013.004 ואם בהרת לבנה הוא בעור בשרו ועמק אין מראה מן העור ושערה לא הפך לבן והסגיר הכהן את הנגע שבעת ימים׃

13:5b.LEV.013.005 וראהו הכהן ביום השביעי והנה הנגע עמד בעיניו לא פשה הנגע בעור והסגירו הכהן שבעת ימים שנית׃

13:6b.LEV.013.006 וראה הכהן אתו ביום השביעי שנית והנה כהה הנגע ולא פשה הנגע בעור וטהרו הכהן מספחת היא וכבס בגדיו וטהר׃

13:7b.LEV.013.007 ואם פשה תפשה המספחת בעור אחרי הראתו אל הכהן לטהרתו ונראה שנית אל הכהן׃

13:8b.LEV.013.008 וראה הכהן והנה פשתה המספחת בעור וטמאו הכהן צרעת הוא׃

13:9b.LEV.013.009 נגע צרעת כי תהיה באדם והובא אל הכהן׃

13:10b.LEV.013.010 וראה הכהן והנה שאת לבנה בעור והיא הפכה שער לבן ומחית בשר חי בשאת׃

13:11b.LEV.013.011 צרעת נושנת הוא בעור בשרו וטמאו הכהן לא יסגרנו כי טמא הוא׃

13:12b.LEV.013.012 ואם פרוח תפרח הצרעת בעור וכסתה הצרעת את כל עור הנגע מראשו ועד רגליו לכל מראה עיני הכהן׃

13:13b.LEV.013.013 וראה הכהן והנה כסתה הצרעת את כל בשרו וטהר את הנגע כלו הפך לבן טהור הוא׃

13:14b.LEV.013.014 וביום הראות בו בשר חי יטמא׃

13:15b.LEV.013.015 וראה הכהן את הבשר החי וטמאו הבשר החי טמא הוא צרעת הוא׃

13:16b.LEV.013.016 או כי ישוב הבשר החי ונהפך ללבן ובא אל הכהן׃

13:17b.LEV.013.017 וראהו הכהן והנה נהפך הנגע ללבן וטהר הכהן את הנגע טהור הוא׃

13:18b.LEV.013.018 ובשר כי יהיה בו בערו שחין ונרפא׃

13:19b.LEV.013.019 והיה במקום השחין שאת לבנה או בהרת לבנה אדמדמת ונראה אל הכהן׃

13:20b.LEV.013.020 וראה הכהן והנה מראה שפל מן העור ושערה הפך לבן וטמאו הכהן נגע צרעת היא בשחין פרחה׃

13:21b.LEV.013.021 ואם יראנה הכהן והנה אין בה שער לבן ושפלה איננה מן העור והיא כהה והסגירו הכהן שבעת ימים׃

13:22b.LEV.013.022 ואם פשה תפשה בעור וטמא הכהן אתו נגע הוא׃

13:23b.LEV.013.023 ואם תחתיה תעמד הבהרת לא פשתה צרבת השחין הוא וטהרו הכהן׃

13:24b.LEV.013.024 או בשר כי יהיה בערו מכות אש והיתה מחית המכוה בהרת לבנה אדמדמת או לבנה׃

13:25b.LEV.013.025 וראה אתה הכהן והנה נהפך שער לבן בבהרת ומראה עמק מן העור צרעת הוא במכוה פרחה וטמא אתו הכהן נגע צרעת הוא׃

13:26b.LEV.013.026 ואם יראנה הכהן והנה אין בבהרת שער לבן ושפלה איננה מן העור והוא כהה והסגירו הכהן שבעת ימים׃

13:27b.LEV.013.027 וראהו הכהן ביום השביעי אם פשה תפשה בעור וטמא הכהן אתו נגע צרעת הוא׃

13:28b.LEV.013.028 ואם תחתיה תעמד הבהרת לא פשתה בעור והוא כהה שאת המכוה הוא וטהרו הכהן כי צרבת המכוה הוא׃

13:29b.LEV.013.029 ואיש או אשה כי יהיה בו נגע בראש או בזקן׃

13:30b.LEV.013.030 וראה הכהן את הנגע והנה מראהו עמק מן העור ובו שער צהב דק וטמא אתו הכהן נתק הוא צרעת הראש או הזקן הוא׃

13:31b.LEV.013.031 וכי יראה הכהן את נגע הנתק והנה אין מראהו עמק מן העור ושער שחר אין בו והסגיר הכהן את נגע הנתק שבעת ימים׃

13:32b.LEV.013.032 וראה הכהן את הנגע ביום השביעי והנה לא פשה הנתק ולא היה בו שער צהב ומראה הנתק אין עמק מן העור׃

13:33b.LEV.013.033 והתגלח ואת הנתק לא יגלח והסגיר הכהן את הנתק שבעת ימים שנית׃

13:34b.LEV.013.034 וראה הכהן את הנתק ביום השביעי והנה לא פשה הנתק בעור ומראהו איננו עמק מן העור וטהר אתו הכהן וכבס בגדיו וטהר׃

13:35b.LEV.013.035 ואם פשה יפשה הנתק בעור אחרי טהרתו׃

13:36b.LEV.013.036 וראהו הכהן והנה פשה הנתק בעור לא יבקר הכהן לשער הצהב טמא הוא׃

13:37b.LEV.013.037 ואם בעיניו עמד הנתק ושער שחר צמח בו נרפא הנתק טהור הוא וטהרו הכהן׃

13:38b.LEV.013.038 ואיש או אשה כי יהיה בעור בשרם בהרת בהרת לבנת׃

13:39b.LEV.013.039 וראה הכהן והנה בעור בשרם בהרת כהות לבנת בהק הוא פרח בעור טהור הוא׃

13:40b.LEV.013.040 ואיש כי ימרט ראשו קרח הוא טהור הוא׃

13:41b.LEV.013.041 ואם מפאת פניו ימרט ראשו גבח הוא טהור הוא׃

13:42b.LEV.013.042 וכי יהיה בקרחת או בגבחת נגע לבן אדמדם צרעת פרחת הוא בקרחתו או בגבחתו׃

13:43b.LEV.013.043 וראה אתו הכהן והנה שאת הנגע לבנה אדמדמת בקרחתו או בגבחתו כמראה צרעת עור בשר׃

13:44b.LEV.013.044 איש צרוע הוא טמא הוא טמא יטמאנו הכהן בראשו נגעו׃

13:45b.LEV.013.045 והצרוע אשר בו הנגע בגדיו יהיו פרמים וראשו יהיה פרוע ועל שפם יעטה וטמא טמא יקרא׃

13:46b.LEV.013.046 כל ימי אשר הנגע בו יטמא טמא הוא בדד ישב מחוץ למחנה מושבו׃

13:47b.LEV.013.047 והבגד כי יהיה בו נגע צרעת בבגד צמר או בבגד פשתים׃

13:48b.LEV.013.048 או בשתי או בערב לפשתים ולצמר או בעור או בכל מלאכת עור׃

13:49b.LEV.013.049 והיה הנגע ירקרק או אדמדם בבגד או בעור או בשתי או בערב או בכל כלי עור נגע צרעת הוא והראה את הכהן׃

13:50b.LEV.013.050 וראה הכהן את הנגע והסגיר את הנגע שבעת ימים׃

13:51b.LEV.013.051 וראה את הנגע ביום השביעי כי פשה הנגע בבגד או בשתי או בערב או בעור לכל אשר יעשה העור למלאכה צרעת ממארת הנגע טמא הוא׃

13:52b.LEV.013.052 ושרף את הבגד או את השתי או את הערב בצמר או בפשתים או את כל כלי העור אשר יהיה בו הנגע כי צרעת ממארת הוא באש תשרף׃

13:53b.LEV.013.053 ואם יראה הכהן והנה לא פשה הנגע בבגד או בשתי או בערב או בכל כלי עור׃

13:54b.LEV.013.054 וצוה הכהן וכבסו את אשר בו הנגע והסגירו שבעת ימים שנית׃

13:55b.LEV.013.055 וראה הכהן אחרי הכבס את הנגע והנה לא הפך הנגע את עינו והנגע לא פשה טמא הוא באש תשרפנו פחתת הוא בקרחתו או בגבחתו׃

13:56b.LEV.013.056 ואם ראה הכהן והנה כהה הנגע אחרי הכבס אתו וקרע אתו מן הבגד או מן העור או מן השתי או מן הערב׃

13:57b.LEV.013.057 ואם תראה עוד בבגד או בשתי או בערב או בכל כלי עור פרחת הוא באש תשרפנו את אשר בו הנגע׃

13:58b.LEV.013.058 והבגד או השתי או הערב או כל כלי העור אשר תכבס וסר מהם הנגע וכבס שנית וטהר׃

13:59b.LEV.013.059 זאת תורת נגע צרעת בגד הצמר או הפשתים או השתי או הערב או כל כלי עור לטהרו או לטמאו׃

14

14:1b.LEV.014.001 וידבר יהוה אל משה לאמר׃

14:2b.LEV.014.002 זאת תהיה תורת המצרע ביום טהרתו והובא אל הכהן׃

14:3b.LEV.014.003 ויצא הכהן אל מחוץ למחנה וראה הכהן והנה נרפא נגע הצרעת מן הצרוע׃

14:4b.LEV.014.004 וצוה הכהן ולקח למטהר שתי צפרים חיות טהרות ועץ ארז ושני תולעת ואזב׃

14:5b.LEV.014.005 וצוה הכהן ושחט את הצפור האחת אל כלי חרש על מים חיים׃

14:6b.LEV.014.006 את הצפר החיה יקח אתה ואת עץ הארז ואת שני התולעת ואת האזב וטבל אותם ואת הצפר החיה בדם הצפר השחטה על המים החיים׃

14:7b.LEV.014.007 והזה על המטהר מן הצרעת שבע פעמים וטהרו ושלח את הצפר החיה על פני השדה׃

14:8b.LEV.014.008 וכבס המטהר את בגדיו וגלח את כל שערו ורחץ במים וטהר ואחר יבוא אל המחנה וישב מחוץ לאהלו שבעת ימים׃

14:9b.LEV.014.009 והיה ביום השביעי יגלח את כל שערו את ראשו ואת זקנו ואת גבת עיניו ואת כל שערו יגלח וכבס את בגדיו ורחץ את בשרו במים וטהר׃

14:10b.LEV.014.010 וביום השמיני יקח שני כבשים תמימים וכבשה אחת בת שנתה תמימה ושלשה עשרנים סלת מנחה בלולה בשמן ולג אחד שמן׃

14:11b.LEV.014.011 והעמיד הכהן המטהר את האיש המטהר ואתם לפני יהוה פתח אהל מועד׃

14:12b.LEV.014.012 ולקח הכהן את הכבש האחד והקריב אתו לאשם ואת לג השמן והניף אתם תנופה לפני יהוה׃

14:13b.LEV.014.013 ושחט את הכבש במקום אשר ישחט את החטאת ואת העלה במקום הקדש כי כחטאת האשם הוא לכהן קדש קדשים הוא׃

14:14b.LEV.014.014 ולקח הכהן מדם האשם ונתן הכהן על תנוך אזן המטהר הימנית ועל בהן ידו הימנית ועל בהן רגלו הימנית׃

14:15b.LEV.014.015 ולקח הכהן מלג השמן ויצק על כף הכהן השמאלית׃

14:16b.LEV.014.016 וטבל הכהן את אצבעו הימנית מן השמן אשר על כפו השמאלית והזה מן השמן באצבעו שבע פעמים לפני יהוה׃

14:17b.LEV.014.017 ומיתר השמן אשר על כפו יתן הכהן על תנוך אזן המטהר הימנית ועל בהן ידו הימנית ועל בהן רגלו הימנית על דם האשם׃

14:18b.LEV.014.018 והנותר בשמן אשר על כף הכהן יתן על ראש המטהר וכפר עליו הכהן לפני יהוה׃

14:19b.LEV.014.019 ועשה הכהן את החטאת וכפר על המטהר מטמאתו ואחר ישחט את העלה׃

14:20b.LEV.014.020 והעלה הכהן את העלה ואת המנחה המזבחה וכפר עליו הכהן וטהר׃

14:21b.LEV.014.021 ואם דל הוא ואין ידו משגת ולקח כבש אחד אשם לתנופה לכפר עליו ועשרון סלת אחד בלול בשמן למנחה ולג שמן׃

14:22b.LEV.014.022 ושתי תרים או שני בני יונה אשר תשיג ידו והיה אחד חטאת והאחד עלה׃

14:23b.LEV.014.023 והביא אתם ביום השמיני לטהרתו אל הכהן אל פתח אהל מועד לפני יהוה׃

14:24b.LEV.014.024 ולקח הכהן את כבש האשם ואת לג השמן והניף אתם הכהן תנופה לפני יהוה׃

14:25b.LEV.014.025 ושחט את כבש האשם ולקח הכהן מדם האשם ונתן על תנוך אזן המטהר הימנית ועל בהן ידו הימנית ועל בהן רגלו הימנית׃

14:26b.LEV.014.026 ומן השמן יצק הכהן על כף הכהן השמאלית׃

14:27b.LEV.014.027 והזה הכהן באצבעו הימנית מן השמן אשר על כפו השמאלית שבע פעמים לפני יהוה׃

14:28b.LEV.014.028 ונתן הכהן מן השמן אשר על כפו על תנוך אזן המטהר הימנית ועל בהן ידו הימנית ועל בהן רגלו הימנית על מקום דם האשם׃

14:29b.LEV.014.029 והנותר מן השמן אשר על כף הכהן יתן על ראש המטהר לכפר עליו לפני יהוה׃

14:30b.LEV.014.030 ועשה את האחד מן התרים או מן בני היונה מאשר תשיג ידו׃

14:31b.LEV.014.031 את אשר תשיג ידו את האחד חטאת ואת האחד עלה על המנחה וכפר הכהן על המטהר לפני יהוה׃

14:32b.LEV.014.032 זאת תורת אשר בו נגע צרעת אשר לא תשיג ידו בטהרתו׃

14:33b.LEV.014.033 וידבר יהוה אל משה ואל אהרן לאמר׃

14:34b.LEV.014.034 כי תבאו אל ארץ כנען אשר אני נתן לכם לאחזה ונתתי נגע צרעת בבית ארץ אחזתכם׃

14:35b.LEV.014.035 ובא אשר לו הבית והגיד לכהן לאמר כנגע נראה לי בבית׃

14:36b.LEV.014.036 וצוה הכהן ופנו את הבית בטרם יבא הכהן לראות את הנגע ולא יטמא כל אשר בבית ואחר כן יבא הכהן לראות את הבית׃

14:37b.LEV.014.037 וראה את הנגע והנה הנגע בקירת הבית שקערורת ירקרקת או אדמדמת ומראיהן שפל מן הקיר׃

14:38b.LEV.014.038 ויצא הכהן מן הבית אל פתח הבית והסגיר את הבית שבעת ימים׃

14:39b.LEV.014.039 ושב הכהן ביום השביעי וראה והנה פשה הנגע בקירת הבית׃

14:40b.LEV.014.040 וצוה הכהן וחלצו את האבנים אשר בהן הנגע והשליכו אתהן אל מחוץ לעיר אל מקום טמא׃

14:41b.LEV.014.041 ואת הבית יקצע מבית סביב ושפכו את העפר אשר הקצו אל מחוץ לעיר אל מקום טמא׃

14:42b.LEV.014.042 ולקחו אבנים אחרות והביאו אל תחת האבנים ועפר אחר יקח וטח את הבית׃

14:43b.LEV.014.043 ואם ישוב הנגע ופרח בבית אחר חלץ את האבנים ואחרי הקצות את הבית ואחרי הטוח׃

14:44b.LEV.014.044 ובא הכהן וראה והנה פשה הנגע בבית צרעת ממארת הוא בבית טמא הוא׃

14:45b.LEV.014.045 ונתץ את הבית את אבניו ואת עציו ואת כל עפר הבית והוציא אל מחוץ לעיר אל מקום טמא׃

14:46b.LEV.014.046 והבא אל הבית כל ימי הסגיר אתו יטמא עד הערב׃

14:47b.LEV.014.047 והשכב בבית יכבס את בגדיו והאכל בבית יכבס את בגדיו׃

14:48b.LEV.014.048 ואם בא יבא הכהן וראה והנה לא פשה הנגע בבית אחרי הטח את הבית וטהר הכהן את הבית כי נרפא הנגע׃

14:49b.LEV.014.049 ולקח לחטא את הבית שתי צפרים ועץ ארז ושני תולעת ואזב׃

14:50b.LEV.014.050 ושחט את הצפר האחת אל כלי חרש על מים חיים׃

14:51b.LEV.014.051 ולקח את עץ הארז ואת האזב ואת שני התולעת ואת הצפר החיה וטבל אתם בדם הצפר השחוטה ובמים החיים והזה אל הבית שבע פעמים׃

14:52b.LEV.014.052 וחטא את הבית בדם הצפור ובמים החיים ובצפר החיה ובעץ הארז ובאזב ובשני התולעת׃

14:53b.LEV.014.053 ושלח את הצפר החיה אל מחוץ לעיר אל פני השדה וכפר על הבית וטהר׃

14:54b.LEV.014.054 זאת התורה לכל נגע הצרעת ולנתק׃

14:55b.LEV.014.055 ולצרעת הבגד ולבית׃

14:56b.LEV.014.056 ולשאת ולספחת ולבהרת׃

14:57b.LEV.014.057 להורת ביום הטמא וביום הטהר זאת תורת הצרעת׃

15

15:1b.LEV.015.001 וידבר יהוה אל משה ואל אהרן לאמר׃

15:2b.LEV.015.002 דברו אל בני ישראל ואמרתם אלהם איש איש כי יהיה זב מבשרו זובו טמא הוא׃

15:3b.LEV.015.003 וזאת תהיה טמאתו בזובו רר בשרו את זובו או החתים בשרו מזובו טמאתו הוא׃

15:4b.LEV.015.004 כל המשכב אשר ישכב עליו הזב יטמא וכל הכלי אשר ישב עליו יטמא׃

15:5b.LEV.015.005 ואיש אשר יגע במשכבו יכבס בגדיו ורחץ במים וטמא עד הערב׃

15:6b.LEV.015.006 והישב על הכלי אשר ישב עליו הזב יכבס בגדיו ורחץ במים וטמא עד הערב׃

15:7b.LEV.015.007 והנגע בבשר הזב יכבס בגדיו ורחץ במים וטמא עד הערב׃

15:8b.LEV.015.008 וכי ירק הזב בטהור וכבס בגדיו ורחץ במים וטמא עד הערב׃

15:9b.LEV.015.009 וכל המרכב אשר ירכב עליו הזב יטמא׃

15:10b.LEV.015.010 וכל הנגע בכל אשר יהיה תחתיו יטמא עד הערב והנושא אותם יכבס בגדיו ורחץ במים וטמא עד הערב׃

15:11b.LEV.015.011 וכל אשר יגע בו הזב וידיו לא שטף במים וכבס בגדיו ורחץ במים וטמא עד הערב׃

15:12b.LEV.015.012 וכלי חרש אשר יגע בו הזב ישבר וכל כלי עץ ישטף במים׃

15:13b.LEV.015.013 וכי יטהר הזב מזובו וספר לו שבעת ימים לטהרתו וכבס בגדיו ורחץ בשרו במים חיים וטהר׃

15:14b.LEV.015.014 וביום השמיני יקח לו שתי תרים או שני בני יונה ובא לפני יהוה אל פתח אהל מועד ונתנם אל הכהן׃

15:15b.LEV.015.015 ועשה אתם הכהן אחד חטאת והאחד עלה וכפר עליו הכהן לפני יהוה מזובו׃

15:16b.LEV.015.016 ואיש כי תצא ממנו שכבת זרע ורחץ במים את כל בשרו וטמא עד הערב׃

15:17b.LEV.015.017 וכל בגד וכל עור אשר יהיה עליו שכבת זרע וכבס במים וטמא עד הערב׃

15:18b.LEV.015.018 ואשה אשר ישכב איש אתה שכבת זרע ורחצו במים וטמאו עד הערב׃

15:19b.LEV.015.019 ואשה כי תהיה זבה דם יהיה זבה בבשרה שבעת ימים תהיה בנדתה וכל הנגע בה יטמא עד הערב׃

15:20b.LEV.015.020 וכל אשר תשכב עליו בנדתה יטמא וכל אשר תשב עליו יטמא׃

15:21b.LEV.015.021 וכל הנגע במשכבה יכבס בגדיו ורחץ במים וטמא עד הערב׃

15:22b.LEV.015.022 וכל הנגע בכל כלי אשר תשב עליו יכבס בגדיו ורחץ במים וטמא עד הערב׃

15:23b.LEV.015.023 ואם על המשכב הוא או על הכלי אשר הוא ישבת עליו בנגעו בו יטמא עד הערב׃

15:24b.LEV.015.024 ואם שכב ישכב איש אתה ותהי נדתה עליו וטמא שבעת ימים וכל המשכב אשר ישכב עליו יטמא׃

15:25b.LEV.015.025 ואשה כי יזוב זוב דמה ימים רבים בלא עת נדתה או כי תזוב על נדתה כל ימי זוב טמאתה כימי נדתה תהיה טמאה הוא׃

15:26b.LEV.015.026 כל המשכב אשר תשכב עליו כל ימי זובה כמשכב נדתה יהיה לה וכל הכלי אשר תשב עליו טמא יהיה כטמאת נדתה׃

15:27b.LEV.015.027 וכל הנוגע בם יטמא וכבס בגדיו ורחץ במים וטמא עד הערב׃

15:28b.LEV.015.028 ואם טהרה מזובה וספרה לה שבעת ימים ואחר תטהר׃

15:29b.LEV.015.029 וביום השמיני תקח לה שתי תרים או שני בני יונה והביאה אותם אל הכהן אל פתח אהל מועד׃

15:30b.LEV.015.030 ועשה הכהן את האחד חטאת ואת האחד עלה וכפר עליה הכהן לפני יהוה מזוב טמאתה׃

15:31b.LEV.015.031 והזרתם את בני ישראל מטמאתם ולא ימתו בטמאתם בטמאם את משכני אשר בתוכם׃

15:32b.LEV.015.032 זאת תורת הזב ואשר תצא ממנו שכבת זרע לטמאה בה׃

15:33b.LEV.015.033 והדוה בנדתה והזב את זובו לזכר ולנקבה ולאיש אשר ישכב עם טמאה׃

16

16:1b.LEV.016.001 וידבר יהוה אל משה אחרי מות שני בני אהרן בקרבתם לפני יהוה וימתו׃

16:2b.LEV.016.002 ויאמר יהוה אל משה דבר אל אהרן אחיך ואל יבא בכל עת אל הקדש מבית לפרכת אל פני הכפרת אשר על הארן ולא ימות כי בענן אראה על הכפרת׃

16:3b.LEV.016.003 בזאת יבא אהרן אל הקדש בפר בן בקר לחטאת ואיל לעלה׃

16:4b.LEV.016.004 כתנת בד קדש ילבש ומכנסי בד יהיו על בשרו ובאבנט בד יחגר ובמצנפת בד יצנף בגדי קדש הם ורחץ במים את בשרו ולבשם׃

16:5b.LEV.016.005 ומאת עדת בני ישראל יקח שני שעירי עזים לחטאת ואיל אחד לעלה׃

16:6b.LEV.016.006 והקריב אהרן את פר החטאת אשר לו וכפר בעדו ובעד ביתו׃

16:7b.LEV.016.007 ולקח את שני השעירם והעמיד אתם לפני יהוה פתח אהל מועד׃

16:8b.LEV.016.008 ונתן אהרן על שני השעירם גורלות גורל אחד ליהוה וגורל אחד לעזאזל׃

16:9b.LEV.016.009 והקריב אהרן את השעיר אשר עלה עליו הגורל ליהוה ועשהו חטאת׃

16:10b.LEV.016.010 והשעיר אשר עלה עליו הגורל לעזאזל יעמד חי לפני יהוה לכפר עליו לשלח אתו לעזאזל המדברה׃

16:11b.LEV.016.011 והקריב אהרן את פר החטאת אשר לו וכפר בעדו ובעד ביתו ושחט את פר החטאת אשר לו׃

16:12b.LEV.016.012 ולקח מלא המחתה גחלי אש מעל המזבח מלפני יהוה ומלא חפניו קטרת סמים דקה והביא מבית לפרכת׃

16:13b.LEV.016.013 ונתן את הקטרת על האש לפני יהוה וכסה ענן הקטרת את הכפרת אשר על העדות ולא ימות׃

16:14b.LEV.016.014 ולקח מדם הפר והזה באצבעו על פני הכפרת קדמה ולפני הכפרת יזה שבע פעמים מן הדם באצבעו׃

16:15b.LEV.016.015 ושחט את שעיר החטאת אשר לעם והביא את דמו אל מבית לפרכת ועשה את דמו כאשר עשה לדם הפר והזה אתו על הכפרת ולפני הכפרת׃

16:16b.LEV.016.016 וכפר על הקדש מטמאת בני ישראל ומפשעיהם לכל חטאתם וכן יעשה לאהל מועד השכן אתם בתוך טמאתם׃

16:17b.LEV.016.017 וכל אדם לא יהיה באהל מועד בבאו לכפר בקדש עד צאתו וכפר בעדו ובעד ביתו ובעד כל קהל ישראל׃

16:18b.LEV.016.018 ויצא אל המזבח אשר לפני יהוה וכפר עליו ולקח מדם הפר ומדם השעיר ונתן על קרנות המזבח סביב׃

16:19b.LEV.016.019 והזה עליו מן הדם באצבעו שבע פעמים וטהרו וקדשו מטמאת בני ישראל׃

16:20b.LEV.016.020 וכלה מכפר את הקדש ואת אהל מועד ואת המזבח והקריב את השעיר החי׃

16:21b.LEV.016.021 וסמך אהרן את שתי ידו על ראש השעיר החי והתודה עליו את כל עונת בני ישראל ואת כל פשעיהם לכל חטאתם ונתן אתם על ראש השעיר ושלח ביד איש עתי המדברה׃

16:22b.LEV.016.022 ונשא השעיר עליו את כל עונתם אל ארץ גזרה ושלח את השעיר במדבר׃

16:23b.LEV.016.023 ובא אהרן אל אהל מועד ופשט את בגדי הבד אשר לבש בבאו אל הקדש והניחם שם׃

16:24b.LEV.016.024 ורחץ את בשרו במים במקום קדוש ולבש את בגדיו ויצא ועשה את עלתו ואת עלת העם וכפר בעדו ובעד העם׃

16:25b.LEV.016.025 ואת חלב החטאת יקטיר המזבחה׃

16:26b.LEV.016.026 והמשלח את השעיר לעזאזל יכבס בגדיו ורחץ את בשרו במים ואחרי כן יבוא אל המחנה׃

16:27b.LEV.016.027 ואת פר החטאת ואת שעיר החטאת אשר הובא את דמם לכפר בקדש יוציא אל מחוץ למחנה ושרפו באש את ערתם ואת בשרם ואת פרשם׃

16:28b.LEV.016.028 והשרף אתם יכבס בגדיו ורחץ את בשרו במים ואחרי כן יבוא אל המחנה׃

16:29b.LEV.016.029 והיתה לכם לחקת עולם בחדש השביעי בעשור לחדש תענו את נפשתיכם וכל מלאכה לא תעשו האזרח והגר הגר בתוככם׃

16:30b.LEV.016.030 כי ביום הזה יכפר עליכם לטהר אתכם מכל חטאתיכם לפני יהוה תטהרו׃

16:31b.LEV.016.031 שבת שבתון היא לכם ועניתם את נפשתיכם חקת עולם׃

16:32b.LEV.016.032 וכפר הכהן אשר ימשח אתו ואשר ימלא את ידו לכהן תחת אביו ולבש את בגדי הבד בגדי הקדש׃

16:33b.LEV.016.033 וכפר את מקדש הקדש ואת אהל מועד ואת המזבח יכפר ועל הכהנים ועל כל עם הקהל יכפר׃

16:34b.LEV.016.034 והיתה זאת לכם לחקת עולם לכפר על בני ישראל מכל חטאתם אחת בשנה ויעש כאשר צוה יהוה את משה׃

17

17:1b.LEV.017.001 וידבר יהוה אל משה לאמר׃

17:2b.LEV.017.002 דבר אל אהרן ואל בניו ואל כל בני ישראל ואמרת אליהם זה הדבר אשר צוה יהוה לאמר׃

17:3b.LEV.017.003 איש איש מבית ישראל אשר ישחט שור או כשב או עז במחנה או אשר ישחט מחוץ למחנה׃

17:4b.LEV.017.004 ואל פתח אהל מועד לא הביאו להקריב קרבן ליהוה לפני משכן יהוה דם יחשב לאיש ההוא דם שפך ונכרת האיש ההוא מקרב עמו׃

17:5b.LEV.017.005 למען אשר יביאו בני ישראל את זבחיהם אשר הם זבחים על פני השדה והביאם ליהוה אל פתח אהל מועד אל הכהן וזבחו זבחי שלמים ליהוה אותם׃

17:6b.LEV.017.006 וזרק הכהן את הדם על מזבח יהוה פתח אהל מועד והקטיר החלב לריח ניחח ליהוה׃

17:7b.LEV.017.007 ולא יזבחו עוד את זבחיהם לשעירם אשר הם זנים אחריהם חקת עולם תהיה זאת להם לדרתם׃

17:8b.LEV.017.008 ואלהם תאמר איש איש מבית ישראל ומן הגר אשר יגור בתוכם אשר יעלה עלה או זבח׃

17:9b.LEV.017.009 ואל פתח אהל מועד לא יביאנו לעשות אתו ליהוה ונכרת האיש ההוא מעמיו׃

17:10b.LEV.017.010 ואיש איש מבית ישראל ומן הגר הגר בתוכם אשר יאכל כל דם ונתתי פני בנפש האכלת את הדם והכרתי אתה מקרב עמה׃

17:11b.LEV.017.011 כי נפש הבשר בדם הוא ואני נתתיו לכם על המזבח לכפר על נפשתיכם כי הדם הוא בנפש יכפר׃

17:12b.LEV.017.012 על כן אמרתי לבני ישראל כל נפש מכם לא תאכל דם והגר הגר בתוככם לא יאכל דם׃

17:13b.LEV.017.013 ואיש איש מבני ישראל ומן הגר הגר בתוכם אשר יצוד ציד חיה או עוף אשר יאכל ושפך את דמו וכסהו בעפר׃

17:14b.LEV.017.014 כי נפש כל בשר דמו בנפשו הוא ואמר לבני ישראל דם כל בשר לא תאכלו כי נפש כל בשר דמו הוא כל אכליו יכרת׃

17:15b.LEV.017.015 וכל נפש אשר תאכל נבלה וטרפה באזרח ובגר וכבס בגדיו ורחץ במים וטמא עד הערב וטהר׃

17:16b.LEV.017.016 ואם לא יכבס ובשרו לא ירחץ ונשא עונו׃

18

18:1b.LEV.018.001 וידבר יהוה אל משה לאמר׃

18:2b.LEV.018.002 דבר אל בני ישראל ואמרת אלהם אני יהוה אלהיכם׃

18:3b.LEV.018.003 כמעשה ארץ מצרים אשר ישבתם בה לא תעשו וכמעשה ארץ כנען אשר אני מביא אתכם שמה לא תעשו ובחקתיהם לא תלכו׃

18:4b.LEV.018.004 את משפטי תעשו ואת חקתי תשמרו ללכת בהם אני יהוה אלהיכם׃

18:5b.LEV.018.005 ושמרתם את חקתי ואת משפטי אשר יעשה אתם האדם וחי בהם אני יהוה׃

18:6b.LEV.018.006 איש איש אל כל שאר בשרו לא תקרבו לגלות ערוה אני יהוה׃

18:7b.LEV.018.007 ערות אביך וערות אמך לא תגלה אמך הוא לא תגלה ערותה׃

18:8b.LEV.018.008 ערות אשת אביך לא תגלה ערות אביך הוא׃

18:9b.LEV.018.009 ערות אחותך בת אביך או בת אמך מולדת בית או מולדת חוץ לא תגלה ערותן׃

18:10b.LEV.018.010 ערות בת בנך או בת בתך לא תגלה ערותן כי ערותך הנה׃

18:11b.LEV.018.011 ערות בת אשת אביך מולדת אביך אחותך הוא לא תגלה ערותה׃

18:12b.LEV.018.012 ערות אחות אביך לא תגלה שאר אביך הוא׃

18:13b.LEV.018.013 ערות אחות אמך לא תגלה כי שאר אמך הוא׃

18:14b.LEV.018.014 ערות אחי אביך לא תגלה אל אשתו לא תקרב דדתך הוא׃

18:15b.LEV.018.015 ערות כלתך לא תגלה אשת בנך הוא לא תגלה ערותה׃

18:16b.LEV.018.016 ערות אשת אחיך לא תגלה ערות אחיך הוא׃

18:17b.LEV.018.017 ערות אשה ובתה לא תגלה את בת בנה ואת בת בתה לא תקח לגלות ערותה שארה הנה זמה הוא׃

18:18b.LEV.018.018 ואשה אל אחתה לא תקח לצרר לגלות ערותה עליה בחייה׃

18:19b.LEV.018.019 ואל אשה בנדת טמאתה לא תקרב לגלות ערותה׃

18:20b.LEV.018.020 ואל אשת עמיתך לא תתן שכבתך לזרע לטמאה בה׃

18:21b.LEV.018.021 ומזרעך לא תתן להעביר למלך ולא תחלל את שם אלהיך אני יהוה׃

18:22b.LEV.018.022 ואת זכר לא תשכב משכבי אשה תועבה הוא׃

18:23b.LEV.018.023 ובכל בהמה לא תתן שכבתך לטמאה בה ואשה לא תעמד לפני בהמה לרבעה תבל הוא׃

18:24b.LEV.018.024 אל תטמאו בכל אלה כי בכל אלה נטמאו הגוים אשר אני משלח מפניכם׃

18:25b.LEV.018.025 ותטמא הארץ ואפקד עונה עליה ותקא הארץ את ישביה׃

18:26b.LEV.018.026 ושמרתם אתם את חקתי ואת משפטי ולא תעשו מכל התועבת האלה האזרח והגר הגר בתוככם׃

18:27b.LEV.018.027 כי את כל התועבת האל עשו אנשי הארץ אשר לפניכם ותטמא הארץ׃

18:28b.LEV.018.028 ולא תקיא הארץ אתכם בטמאכם אתה כאשר קאה את הגוי אשר לפניכם׃

18:29b.LEV.018.029 כי כל אשר יעשה מכל התועבות האלה ונכרתו הנפשות העשת מקרב עמם׃

18:30b.LEV.018.030 ושמרתם את משמרתי לבלתי עשות מחקות התועבת אשר נעשו לפניכם ולא תטמאו בהם אני יהוה אלהיכם׃

19

19:1b.LEV.019.001 וידבר יהוה אל משה לאמר׃

19:2b.LEV.019.002 דבר אל כל עדת בני ישראל ואמרת אלהם קדשים תהיו כי קדוש אני יהוה אלהיכם׃

19:3b.LEV.019.003 איש אמו ואביו תיראו ואת שבתתי תשמרו אני יהוה אלהיכם׃

19:4b.LEV.019.004 אל תפנו אל האלילים ואלהי מסכה לא תעשו לכם אני יהוה אלהיכם׃

19:5b.LEV.019.005 וכי תזבחו זבח שלמים ליהוה לרצנכם תזבחהו׃

19:6b.LEV.019.006 ביום זבחכם יאכל וממחרת והנותר עד יום השלישי באש ישרף׃

19:7b.LEV.019.007 ואם האכל יאכל ביום השלישי פגול הוא לא ירצה׃

19:8b.LEV.019.008 ואכליו עונו ישא כי את קדש יהוה חלל ונכרתה הנפש ההוא מעמיה׃

19:9b.LEV.019.009 ובקצרכם את קציר ארצכם לא תכלה פאת שדך לקצר ולקט קצירך לא תלקט׃

19:10b.LEV.019.010 וכרמך לא תעולל ופרט כרמך לא תלקט לעני ולגר תעזב אתם אני יהוה אלהיכם׃

19:11b.LEV.019.011 לא תגנבו ולא תכחשו ולא תשקרו איש בעמיתו׃

19:12b.LEV.019.012 ולא תשבעו בשמי לשקר וחללת את שם אלהיך אני יהוה׃

19:13b.LEV.019.013 לא תעשק את רעך ולא תגזל לא תלין פעלת שכיר אתך עד בקר׃

19:14b.LEV.019.014 לא תקלל חרש ולפני עור לא תתן מכשל ויראת מאלהיך אני יהוה׃

19:15b.LEV.019.015 לא תעשו עול במשפט לא תשא פני דל ולא תהדר פני גדול בצדק תשפט עמיתך׃

19:16b.LEV.019.016 לא תלך רכיל בעמיך לא תעמד על דם רעך אני יהוה׃

19:17b.LEV.019.017 לא תשנא את אחיך בלבבך הוכח תוכיח את עמיתך ולא תשא עליו חטא׃

19:18b.LEV.019.018 לא תקם ולא תטר את בני עמך ואהבת לרעך כמוך אני יהוה׃

19:19b.LEV.019.019 את חקתי תשמרו בהמתך לא תרביע כלאים שדך לא תזרע כלאים ובגד כלאים שעטנז לא יעלה עליך׃

19:20b.LEV.019.020 ואיש כי ישכב את אשה שכבת זרע והוא שפחה נחרפת לאיש והפדה לא נפדתה או חפשה לא נתן לה בקרת תהיה לא יומתו כי לא חפשה׃

19:21b.LEV.019.021 והביא את אשמו ליהוה אל פתח אהל מועד איל אשם׃

19:22b.LEV.019.022 וכפר עליו הכהן באיל האשם לפני יהוה על חטאתו אשר חטא ונסלח לו מחטאתו אשר חטא׃

19:23b.LEV.019.023 וכי תבאו אל הארץ ונטעתם כל עץ מאכל וערלתם ערלתו את פריו שלש שנים יהיה לכם ערלים לא יאכל׃

19:24b.LEV.019.024 ובשנה הרביעת יהיה כל פריו קדש הלולים ליהוה׃

19:25b.LEV.019.025 ובשנה החמישת תאכלו את פריו להוסיף לכם תבואתו אני יהוה אלהיכם׃

19:26b.LEV.019.026 לא תאכלו על הדם לא תנחשו ולא תעוננו׃

19:27b.LEV.019.027 לא תקפו פאת ראשכם ולא תשחית את פאת זקנך׃

19:28b.LEV.019.028 ושרט לנפש לא תתנו בבשרכם וכתבת קעקע לא תתנו בכם אני יהוה׃

19:29b.LEV.019.029 אל תחלל את בתך להזנותה ולא תזנה הארץ ומלאה הארץ זמה׃

19:30b.LEV.019.030 את שבתתי תשמרו ומקדשי תיראו אני יהוה׃

19:31b.LEV.019.031 אל תפנו אל האבת ואל הידענים אל תבקשו לטמאה בהם אני יהוה אלהיכם׃

19:32b.LEV.019.032 מפני שיבה תקום והדרת פני זקן ויראת מאלהיך אני יהוה׃

19:33b.LEV.019.033 וכי יגור אתך גר בארצכם לא תונו אתו׃

19:34b.LEV.019.034 כאזרח מכם יהיה לכם הגר הגר אתכם ואהבת לו כמוך כי גרים הייתם בארץ מצרים אני יהוה אלהיכם׃

19:35b.LEV.019.035 לא תעשו עול במשפט במדה במשקל ובמשורה׃

19:36b.LEV.019.036 מאזני צדק אבני צדק איפת צדק והין צדק יהיה לכם אני יהוה אלהיכם אשר הוצאתי אתכם מארץ מצרים׃

19:37b.LEV.019.037 ושמרתם את כל חקתי ואת כל משפטי ועשיתם אתם אני יהוה׃

20

20:1b.LEV.020.001 וידבר יהוה אל משה לאמר׃

20:2b.LEV.020.002 ואל בני ישראל תאמר איש איש מבני ישראל ומן הגר הגר בישראל אשר יתן מזרעו למלך מות יומת עם הארץ ירגמהו באבן׃

20:3b.LEV.020.003 ואני אתן את פני באיש ההוא והכרתי אתו מקרב עמו כי מזרעו נתן למלך למען טמא את מקדשי ולחלל את שם קדשי׃

20:4b.LEV.020.004 ואם העלם יעלימו עם הארץ את עיניהם מן האיש ההוא בתתו מזרעו למלך לבלתי המית אתו׃

20:5b.LEV.020.005 ושמתי אני את פני באיש ההוא ובמשפחתו והכרתי אתו ואת כל הזנים אחריו לזנות אחרי המלך מקרב עמם׃

20:6b.LEV.020.006 והנפש אשר תפנה אל האבת ואל הידענים לזנות אחריהם ונתתי את פני בנפש ההוא והכרתי אתו מקרב עמו׃

20:7b.LEV.020.007 והתקדשתם והייתם קדשים כי אני יהוה אלהיכם׃

20:8b.LEV.020.008 ושמרתם את חקתי ועשיתם אתם אני יהוה מקדשכם׃

20:9b.LEV.020.009 כי איש איש אשר יקלל את אביו ואת אמו מות יומת אביו ואמו קלל דמיו בו׃

20:10b.LEV.020.010 ואיש אשר ינאף את אשת איש אשר ינאף את אשת רעהו מות יומת הנאף והנאפת׃

20:11b.LEV.020.011 ואיש אשר ישכב את אשת אביו ערות אביו גלה מות יומתו שניהם דמיהם בם׃

20:12b.LEV.020.012 ואיש אשר ישכב את כלתו מות יומתו שניהם תבל עשו דמיהם בם׃

20:13b.LEV.020.013 ואיש אשר ישכב את זכר משכבי אשה תועבה עשו שניהם מות יומתו דמיהם בם׃

20:14b.LEV.020.014 ואיש אשר יקח את אשה ואת אמה זמה הוא באש ישרפו אתו ואתהן ולא תהיה זמה בתוככם׃

20:15b.LEV.020.015 ואיש אשר יתן שכבתו בבהמה מות יומת ואת הבהמה תהרגו׃

20:16b.LEV.020.016 ואשה אשר תקרב אל כל בהמה לרבעה אתה והרגת את האשה ואת הבהמה מות יומתו דמיהם בם׃

20:17b.LEV.020.017 ואיש אשר יקח את אחתו בת אביו או בת אמו וראה את ערותה והיא תראה את ערותו חסד הוא ונכרתו לעיני בני עמם ערות אחתו גלה עונו ישא׃

20:18b.LEV.020.018 ואיש אשר ישכב את אשה דוה וגלה את ערותה את מקרה הערה והיא גלתה את מקור דמיה ונכרתו שניהם מקרב עמם׃

20:19b.LEV.020.019 וערות אחות אמך ואחות אביך לא תגלה כי את שארו הערה עונם ישאו׃

20:20b.LEV.020.020 ואיש אשר ישכב את דדתו ערות דדו גלה חטאם ישאו ערירים ימתו׃

20:21b.LEV.020.021 ואיש אשר יקח את אשת אחיו נדה הוא ערות אחיו גלה ערירים יהיו׃

20:22b.LEV.020.022 ושמרתם את כל חקתי ואת כל משפטי ועשיתם אתם ולא תקיא אתכם הארץ אשר אני מביא אתכם שמה לשבת בה׃

20:23b.LEV.020.023 ולא תלכו בחקת הגוי אשר אני משלח מפניכם כי את כל אלה עשו ואקץ בם׃

20:24b.LEV.020.024 ואמר לכם אתם תירשו את אדמתם ואני אתננה לכם לרשת אתה ארץ זבת חלב ודבש אני יהוה אלהיכם אשר הבדלתי אתכם מן העמים׃

20:25b.LEV.020.025 והבדלתם בין הבהמה הטהרה לטמאה ובין העוף הטמא לטהר ולא תשקצו את נפשתיכם בבהמה ובעוף ובכל אשר תרמש האדמה אשר הבדלתי לכם לטמא׃

20:26b.LEV.020.026 והייתם לי קדשים כי קדוש אני יהוה ואבדל אתכם מן העמים להיות לי׃

20:27b.LEV.020.027 ואיש או אשה כי יהיה בהם אוב או ידעני מות יומתו באבן ירגמו אתם דמיהם בם׃

21

21:1b.LEV.021.001 ויאמר יהוה אל משה אמר אל הכהנים בני אהרן ואמרת אלהם לנפש לא יטמא בעמיו׃

21:2b.LEV.021.002 כי אם לשארו הקרב אליו לאמו ולאביו ולבנו ולבתו ולאחיו׃

21:3b.LEV.021.003 ולאחתו הבתולה הקרובה אליו אשר לא היתה לאיש לה יטמא׃

21:4b.LEV.021.004 לא יטמא בעל בעמיו להחלו׃

21:5b.LEV.021.005 לא יקרחה קרחה בראשם ופאת זקנם לא יגלחו ובבשרם לא ישרטו שרטת׃

21:6b.LEV.021.006 קדשים יהיו לאלהיהם ולא יחללו שם אלהיהם כי את אשי יהוה לחם אלהיהם הם מקריבם והיו קדש׃

21:7b.LEV.021.007 אשה זנה וחללה לא יקחו ואשה גרושה מאישה לא יקחו כי קדש הוא לאלהיו׃

21:8b.LEV.021.008 וקדשתו כי את לחם אלהיך הוא מקריב קדש יהיה לך כי קדוש אני יהוה מקדשכם׃

21:9b.LEV.021.009 ובת איש כהן כי תחל לזנות את אביה היא מחללת באש תשרף׃

21:10b.LEV.021.010 והכהן הגדול מאחיו אשר יוצק על ראשו שמן המשחה ומלא את ידו ללבש את הבגדים את ראשו לא יפרע ובגדיו לא יפרם׃

21:11b.LEV.021.011 ועל כל נפשת מת לא יבא לאביו ולאמו לא יטמא׃

21:12b.LEV.021.012 ומן המקדש לא יצא ולא יחלל את מקדש אלהיו כי נזר שמן משחת אלהיו עליו אני יהוה׃

21:13b.LEV.021.013 והוא אשה בבתוליה יקח׃

21:14b.LEV.021.014 אלמנה וגרושה וחללה זנה את אלה לא יקח כי אם בתולה מעמיו יקח אשה׃

21:15b.LEV.021.015 ולא יחלל זרעו בעמיו כי אני יהוה מקדשו׃

21:16b.LEV.021.016 וידבר יהוה אל משה לאמר׃

21:17b.LEV.021.017 דבר אל אהרן לאמר איש מזרעך לדרתם אשר יהיה בו מום לא יקרב להקריב לחם אלהיו׃

21:18b.LEV.021.018 כי כל איש אשר בו מום לא יקרב איש עור או פסח או חרם או שרוע׃

21:19b.LEV.021.019 או איש אשר יהיה בו שבר רגל או שבר יד׃

21:20b.LEV.021.020 או גבן או דק או תבלל בעינו או גרב או ילפת או מרוח אשך׃

21:21b.LEV.021.021 כל איש אשר בו מום מזרע אהרן הכהן לא יגש להקריב את אשי יהוה מום בו את לחם אלהיו לא יגש להקריב׃

21:22b.LEV.021.022 לחם אלהיו מקדשי הקדשים ומן הקדשים יאכל׃

21:23b.LEV.021.023 אך אל הפרכת לא יבא ואל המזבח לא יגש כי מום בו ולא יחלל את מקדשי כי אני יהוה מקדשם׃

21:24b.LEV.021.024 וידבר משה אל אהרן ואל בניו ואל כל בני ישראל׃

22

22:1b.LEV.022.001 וידבר יהוה אל משה לאמר׃

22:2b.LEV.022.002 דבר אל אהרן ואל בניו וינזרו מקדשי בני ישראל ולא יחללו את שם קדשי אשר הם מקדשים לי אני יהוה׃

22:3b.LEV.022.003 אמר אלהם לדרתיכם כל איש אשר יקרב מכל זרעכם אל הקדשים אשר יקדישו בני ישראל ליהוה וטמאתו עליו ונכרתה הנפש ההוא מלפני אני יהוה׃

22:4b.LEV.022.004 איש איש מזרע אהרן והוא צרוע או זב בקדשים לא יאכל עד אשר יטהר והנגע בכל טמא נפש או איש אשר תצא ממנו שכבת זרע׃

22:5b.LEV.022.005 או איש אשר יגע בכל שרץ אשר יטמא לו או באדם אשר יטמא לו לכל טמאתו׃

22:6b.LEV.022.006 נפש אשר תגע בו וטמאה עד הערב ולא יאכל מן הקדשים כי אם רחץ בשרו במים׃

22:7b.LEV.022.007 ובא השמש וטהר ואחר יאכל מן הקדשים כי לחמו הוא׃

22:8b.LEV.022.008 נבלה וטרפה לא יאכל לטמאה בה אני יהוה׃

22:9b.LEV.022.009 ושמרו את משמרתי ולא ישאו עליו חטא ומתו בו כי יחללהו אני יהוה מקדשם׃

22:10b.LEV.022.010 וכל זר לא יאכל קדש תושב כהן ושכיר לא יאכל קדש׃

22:11b.LEV.022.011 וכהן כי יקנה נפש קנין כספו הוא יאכל בו ויליד ביתו הם יאכלו בלחמו׃

22:12b.LEV.022.012 ובת כהן כי תהיה לאיש זר הוא בתרומת הקדשים לא תאכל׃

22:13b.LEV.022.013 ובת כהן כי תהיה אלמנה וגרושה וזרע אין לה ושבה אל בית אביה כנעוריה מלחם אביה תאכל וכל זר לא יאכל בו׃

22:14b.LEV.022.014 ואיש כי יאכל קדש בשגגה ויסף חמשיתו עליו ונתן לכהן את הקדש׃

22:15b.LEV.022.015 ולא יחללו את קדשי בני ישראל את אשר ירימו ליהוה׃

22:16b.LEV.022.016 והשיאו אותם עון אשמה באכלם את קדשיהם כי אני יהוה מקדשם׃

22:17b.LEV.022.017 וידבר יהוה אל משה לאמר׃

22:18b.LEV.022.018 דבר אל אהרן ואל בניו ואל כל בני ישראל ואמרת אלהם איש איש מבית ישראל ומן הגר בישראל אשר יקריב קרבנו לכל נדריהם ולכל נדבותם אשר יקריבו ליהוה לעלה׃

22:19b.LEV.022.019 לרצנכם תמים זכר בבקר בכשבים ובעזים׃

22:20b.LEV.022.020 כל אשר בו מום לא תקריבו כי לא לרצון יהיה לכם׃

22:21b.LEV.022.021 ואיש כי יקריב זבח שלמים ליהוה לפלא נדר או לנדבה בבקר או בצאן תמים יהיה לרצון כל מום לא יהיה בו׃

22:22b.LEV.022.022 עורת או שבור או חרוץ או יבלת או גרב או ילפת לא תקריבו אלה ליהוה ואשה לא תתנו מהם על המזבח ליהוה׃

22:23b.LEV.022.023 ושור ושה שרוע וקלוט נדבה תעשה אתו ולנדר לא ירצה׃

22:24b.LEV.022.024 ומעוך וכתות ונתוק וכרות לא תקריבו ליהוה ובארצכם לא תעשו׃

22:25b.LEV.022.025 ומיד בן נכר לא תקריבו את לחם אלהיכם מכל אלה כי משחתם בהם מום בם לא ירצו לכם׃

22:26b.LEV.022.026 וידבר יהוה אל משה לאמר׃

22:27b.LEV.022.027 שור או כשב או עז כי יולד והיה שבעת ימים תחת אמו ומיום השמיני והלאה ירצה לקרבן אשה ליהוה׃

22:28b.LEV.022.028 ושור או שה אתו ואת בנו לא תשחטו ביום אחד׃

22:29b.LEV.022.029 וכי תזבחו זבח תודה ליהוה לרצנכם תזבחו׃

22:30b.LEV.022.030 ביום ההוא יאכל לא תותירו ממנו עד בקר אני יהוה׃

22:31b.LEV.022.031 ושמרתם מצותי ועשיתם אתם אני יהוה׃

22:32b.LEV.022.032 ולא תחללו את שם קדשי ונקדשתי בתוך בני ישראל אני יהוה מקדשכם׃

22:33b.LEV.022.033 המוציא אתכם מארץ מצרים להיות לכם לאלהים אני יהוה׃

23

23:1b.LEV.023.001 וידבר יהוה אל משה לאמר׃

23:2b.LEV.023.002 דבר אל בני ישראל ואמרת אלהם מועדי יהוה אשר תקראו אתם מקראי קדש אלה הם מועדי׃

23:3b.LEV.023.003 ששת ימים תעשה מלאכה וביום השביעי שבת שבתון מקרא קדש כל מלאכה לא תעשו שבת הוא ליהוה בכל מושבתיכם׃

23:4b.LEV.023.004 אלה מועדי יהוה מקראי קדש אשר תקראו אתם במועדם׃

23:5b.LEV.023.005 בחדש הראשון בארבעה עשר לחדש בין הערבים פסח ליהוה׃

23:6b.LEV.023.006 ובחמשה עשר יום לחדש הזה חג המצות ליהוה שבעת ימים מצות תאכלו׃

23:7b.LEV.023.007 ביום הראשון מקרא קדש יהיה לכם כל מלאכת עבדה לא תעשו׃

23:8b.LEV.023.008 והקרבתם אשה ליהוה שבעת ימים ביום השביעי מקרא קדש כל מלאכת עבדה לא תעשו׃

23:9b.LEV.023.009 וידבר יהוה אל משה לאמר׃

23:10b.LEV.023.010 דבר אל בני ישראל ואמרת אלהם כי תבאו אל הארץ אשר אני נתן לכם וקצרתם את קצירה והבאתם את עמר ראשית קצירכם אל הכהן׃

23:11b.LEV.023.011 והניף את העמר לפני יהוה לרצנכם ממחרת השבת יניפנו הכהן׃

23:12b.LEV.023.012 ועשיתם ביום הניפכם את העמר כבש תמים בן שנתו לעלה ליהוה׃

23:13b.LEV.023.013 ומנחתו שני עשרנים סלת בלולה בשמן אשה ליהוה ריח ניחח ונסכה יין רביעת ההין׃

23:14b.LEV.023.014 ולחם וקלי וכרמל לא תאכלו עד עצם היום הזה עד הביאכם את קרבן אלהיכם חקת עולם לדרתיכם בכל משבתיכם׃

23:15b.LEV.023.015 וספרתם לכם ממחרת השבת מיום הביאכם את עמר התנופה שבע שבתות תמימת תהיינה׃

23:16b.LEV.023.016 עד ממחרת השבת השביעת תספרו חמשים יום והקרבתם מנחה חדשה ליהוה׃

23:17b.LEV.023.017 ממושבתיכם תביאו לחם תנופה שתים שני עשרנים סלת תהיינה חמץ תאפינה בכורים ליהוה׃

23:18b.LEV.023.018 והקרבתם על הלחם שבעת כבשים תמימם בני שנה ופר בן בקר אחד ואילם שנים יהיו עלה ליהוה ומנחתם ונסכיהם אשה ריח ניחח ליהוה׃

23:19b.LEV.023.019 ועשיתם שעיר עזים אחד לחטאת ושני כבשים בני שנה לזבח שלמים׃

23:20b.LEV.023.020 והניף הכהן אתם על לחם הבכורים תנופה לפני יהוה על שני כבשים קדש יהיו ליהוה לכהן׃

23:21b.LEV.023.021 וקראתם בעצם היום הזה מקרא קדש יהיה לכם כל מלאכת עבדה לא תעשו חקת עולם בכל מושבתיכם לדרתיכם׃

23:22b.LEV.023.022 ובקצרכם את קציר ארצכם לא תכלה פאת שדך בקצרך ולקט קצירך לא תלקט לעני ולגר תעזב אתם אני יהוה אלהיכם׃

23:23b.LEV.023.023 וידבר יהוה אל משה לאמר׃

23:24b.LEV.023.024 דבר אל בני ישראל לאמר בחדש השביעי באחד לחדש יהיה לכם שבתון זכרון תרועה מקרא קדש׃

23:25b.LEV.023.025 כל מלאכת עבדה לא תעשו והקרבתם אשה ליהוה׃

23:26b.LEV.023.026 וידבר יהוה אל משה לאמר׃

23:27b.LEV.023.027 אך בעשור לחדש השביעי הזה יום הכפרים הוא מקרא קדש יהיה לכם ועניתם את נפשתיכם והקרבתם אשה ליהוה׃

23:28b.LEV.023.028 וכל מלאכה לא תעשו בעצם היום הזה כי יום כפרים הוא לכפר עליכם לפני יהוה אלהיכם׃

23:29b.LEV.023.029 כי כל הנפש אשר לא תענה בעצם היום הזה ונכרתה מעמיה׃

23:30b.LEV.023.030 וכל הנפש אשר תעשה כל מלאכה בעצם היום הזה והאבדתי את הנפש ההוא מקרב עמה׃

23:31b.LEV.023.031 כל מלאכה לא תעשו חקת עולם לדרתיכם בכל משבתיכם׃

23:32b.LEV.023.032 שבת שבתון הוא לכם ועניתם את נפשתיכם בתשעה לחדש בערב מערב עד ערב תשבתו שבתכם׃

23:33b.LEV.023.033 וידבר יהוה אל משה לאמר׃

23:34b.LEV.023.034 דבר אל בני ישראל לאמר בחמשה עשר יום לחדש השביעי הזה חג הסכות שבעת ימים ליהוה׃

23:35b.LEV.023.035 ביום הראשון מקרא קדש כל מלאכת עבדה לא תעשו׃

23:36b.LEV.023.036 שבעת ימים תקריבו אשה ליהוה ביום השמיני מקרא קדש יהיה לכם והקרבתם אשה ליהוה עצרת הוא כל מלאכת עבדה לא תעשו׃

23:37b.LEV.023.037 אלה מועדי יהוה אשר תקראו אתם מקראי קדש להקריב אשה ליהוה עלה ומנחה זבח ונסכים דבר יום ביומו׃

23:38b.LEV.023.038 מלבד שבתת יהוה ומלבד מתנותיכם ומלבד כל נדריכם ומלבד כל נדבותיכם אשר תתנו ליהוה׃

23:39b.LEV.023.039 אך בחמשה עשר יום לחדש השביעי באספכם את תבואת הארץ תחגו את חג יהוה שבעת ימים ביום הראשון שבתון וביום השמיני שבתון׃

23:40b.LEV.023.040 ולקחתם לכם ביום הראשון פרי עץ הדר כפת תמרים וענף עץ עבת וערבי נחל ושמחתם לפני יהוה אלהיכם שבעת ימים׃

23:41b.LEV.023.041 וחגתם אתו חג ליהוה שבעת ימים בשנה חקת עולם לדרתיכם בחדש השביעי תחגו אתו׃

23:42b.LEV.023.042 בסכת תשבו שבעת ימים כל האזרח בישראל ישבו בסכת׃

23:43b.LEV.023.043 למען ידעו דרתיכם כי בסכות הושבתי את בני ישראל בהוציאי אותם מארץ מצרים אני יהוה אלהיכם׃

23:44b.LEV.023.044 וידבר משה את מעדי יהוה אל בני ישראל׃

24

24:1b.LEV.024.001 וידבר יהוה אל משה לאמר׃

24:2b.LEV.024.002 צו את בני ישראל ויקחו אליך שמן זית זך כתית למאור להעלת נר תמיד׃

24:3b.LEV.024.003 מחוץ לפרכת העדת באהל מועד יערך אתו אהרן מערב עד בקר לפני יהוה תמיד חקת עולם לדרתיכם׃

24:4b.LEV.024.004 על המנרה הטהרה יערך את הנרות לפני יהוה תמיד׃

24:5b.LEV.024.005 ולקחת סלת ואפית אתה שתים עשרה חלות שני עשרנים יהיה החלה האחת׃

24:6b.LEV.024.006 ושמת אותם שתים מערכות שש המערכת על השלחן הטהר לפני יהוה׃

24:7b.LEV.024.007 ונתת על המערכת לבנה זכה והיתה ללחם לאזכרה אשה ליהוה׃

24:8b.LEV.024.008 ביום השבת ביום השבת יערכנו לפני יהוה תמיד מאת בני ישראל ברית עולם׃

24:9b.LEV.024.009 והיתה לאהרן ולבניו ואכלהו במקום קדש כי קדש קדשים הוא לו מאשי יהוה חק עולם׃

24:10b.LEV.024.010 ויצא בן אשה ישראלית והוא בן איש מצרי בתוך בני ישראל וינצו במחנה בן הישראלית ואיש הישראלי׃

24:11b.LEV.024.011 ויקב בן האשה הישראלית את השם ויקלל ויביאו אתו אל משה ושם אמו שלמית בת דברי למטה דן׃

24:12b.LEV.024.012 ויניחהו במשמר לפרש להם על פי יהוה׃

24:13b.LEV.024.013 וידבר יהוה אל משה לאמר׃

24:14b.LEV.024.014 הוצא את המקלל אל מחוץ למחנה וסמכו כל השמעים את ידיהם על ראשו ורגמו אתו כל העדה׃

24:15b.LEV.024.015 ואל בני ישראל תדבר לאמר איש איש כי יקלל אלהיו ונשא חטאו׃

24:16b.LEV.024.016 ונקב שם יהוה מות יומת רגום ירגמו בו כל העדה כגר כאזרח בנקבו שם יומת׃

24:17b.LEV.024.017 ואיש כי יכה כל נפש אדם מות יומת׃

24:18b.LEV.024.018 ומכה נפש בהמה ישלמנה נפש תחת נפש׃

24:19b.LEV.024.019 ואיש כי יתן מום בעמיתו כאשר עשה כן יעשה לו׃

24:20b.LEV.024.020 שבר תחת שבר עין תחת עין שן תחת שן כאשר יתן מום באדם כן ינתן בו׃

24:21b.LEV.024.021 ומכה בהמה ישלמנה ומכה אדם יומת׃

24:22b.LEV.024.022 משפט אחד יהיה לכם כגר כאזרח יהיה כי אני יהוה אלהיכם׃

24:23b.LEV.024.023 וידבר משה אל בני ישראל ויוציאו את המקלל אל מחוץ למחנה וירגמו אתו אבן ובני ישראל עשו כאשר צוה יהוה את משה׃

25

25:1b.LEV.025.001 וידבר יהוה אל משה בהר סיני לאמר׃

25:2b.LEV.025.002 דבר אל בני ישראל ואמרת אלהם כי תבאו אל הארץ אשר אני נתן לכם ושבתה הארץ שבת ליהוה׃

25:3b.LEV.025.003 שש שנים תזרע שדך ושש שנים תזמר כרמך ואספת את תבואתה׃

25:4b.LEV.025.004 ובשנה השביעת שבת שבתון יהיה לארץ שבת ליהוה שדך לא תזרע וכרמך לא תזמר׃

25:5b.LEV.025.005 את ספיח קצירך לא תקצור ואת ענבי נזירך לא תבצר שנת שבתון יהיה לארץ׃

25:6b.LEV.025.006 והיתה שבת הארץ לכם לאכלה לך ולעבדך ולאמתך ולשכירך ולתושבך הגרים עמך׃

25:7b.LEV.025.007 ולבהמתך ולחיה אשר בארצך תהיה כל תבואתה לאכל׃

25:8b.LEV.025.008 וספרת לך שבע שבתת שנים שבע שנים שבע פעמים והיו לך ימי שבע שבתת השנים תשע וארבעים שנה׃

25:9b.LEV.025.009 והעברת שופר תרועה בחדש השבעי בעשור לחדש ביום הכפרים תעבירו שופר בכל ארצכם׃

25:10b.LEV.025.010 וקדשתם את שנת החמשים שנה וקראתם דרור בארץ לכל ישביה יובל הוא תהיה לכם ושבתם איש אל אחזתו ואיש אל משפחתו תשבו׃

25:11b.LEV.025.011 יובל הוא שנת החמשים שנה תהיה לכם לא תזרעו ולא תקצרו את ספיחיה ולא תבצרו את נזריה׃

25:12b.LEV.025.012 כי יובל הוא קדש תהיה לכם מן השדה תאכלו את תבואתה׃

25:13b.LEV.025.013 בשנת היובל הזאת תשבו איש אל אחזתו׃

25:14b.LEV.025.014 וכי תמכרו ממכר לעמיתך או קנה מיד עמיתך אל תונו איש את אחיו׃

25:15b.LEV.025.015 במספר שנים אחר היובל תקנה מאת עמיתך במספר שני תבואת ימכר לך׃

25:16b.LEV.025.016 לפי רב השנים תרבה מקנתו ולפי מעט השנים תמעיט מקנתו כי מספר תבואת הוא מכר לך׃

25:17b.LEV.025.017 ולא תונו איש את עמיתו ויראת מאלהיך כי אני יהוה אלהיכם׃

25:18b.LEV.025.018 ועשיתם את חקתי ואת משפטי תשמרו ועשיתם אתם וישבתם על הארץ לבטח׃

25:19b.LEV.025.019 ונתנה הארץ פריה ואכלתם לשבע וישבתם לבטח עליה׃

25:20b.LEV.025.020 וכי תאמרו מה נאכל בשנה השביעת הן לא נזרע ולא נאסף את תבואתנו׃

25:21b.LEV.025.021 וצויתי את ברכתי לכם בשנה הששית ועשת את התבואה לשלש השנים׃

25:22b.LEV.025.022 וזרעתם את השנה השמינת ואכלתם מן התבואה ישן עד השנה התשיעת עד בוא תבואתה תאכלו ישן׃

25:23b.LEV.025.023 והארץ לא תמכר לצמתת כי לי הארץ כי גרים ותושבים אתם עמדי׃

25:24b.LEV.025.024 ובכל ארץ אחזתכם גאלה תתנו לארץ׃

25:25b.LEV.025.025 כי ימוך אחיך ומכר מאחזתו ובא גאלו הקרב אליו וגאל את ממכר אחיו׃

25:26b.LEV.025.026 ואיש כי לא יהיה לו גאל והשיגה ידו ומצא כדי גאלתו׃

25:27b.LEV.025.027 וחשב את שני ממכרו והשיב את העדף לאיש אשר מכר לו ושב לאחזתו׃

25:28b.LEV.025.028 ואם לא מצאה ידו די השיב לו והיה ממכרו ביד הקנה אתו עד שנת היובל ויצא ביבל ושב לאחזתו׃

25:29b.LEV.025.029 ואיש כי ימכר בית מושב עיר חומה והיתה גאלתו עד תם שנת ממכרו ימים תהיה גאלתו׃

25:30b.LEV.025.030 ואם לא יגאל עד מלאת לו שנה תמימה וקם הבית אשר בעיר אשר לא חמה לצמיתת לקנה אתו לדרתיו לא יצא ביבל׃

25:31b.LEV.025.031 ובתי החצרים אשר אין להם חמה סביב על שדה הארץ יחשב גאלה תהיה לו וביבל יצא׃

25:32b.LEV.025.032 וערי הלוים בתי ערי אחזתם גאלת עולם תהיה ללוים׃

25:33b.LEV.025.033 ואשר יגאל מן הלוים ויצא ממכר בית ועיר אחזתו ביבל כי בתי ערי הלוים הוא אחזתם בתוך בני ישראל׃

25:34b.LEV.025.034 ושדה מגרש עריהם לא ימכר כי אחזת עולם הוא להם׃

25:35b.LEV.025.035 וכי ימוך אחיך ומטה ידו עמך והחזקת בו גר ותושב וחי עמך׃

25:36b.LEV.025.036 אל תקח מאתו נשך ותרבית ויראת מאלהיך וחי אחיך עמך׃

25:37b.LEV.025.037 את כספך לא תתן לו בנשך ובמרבית לא תתן אכלך׃

25:38b.LEV.025.038 אני יהוה אלהיכם אשר הוצאתי אתכם מארץ מצרים לתת לכם את ארץ כנען להיות לכם לאלהים׃

25:39b.LEV.025.039 וכי ימוך אחיך עמך ונמכר לך לא תעבד בו עבדת עבד׃

25:40b.LEV.025.040 כשכיר כתושב יהיה עמך עד שנת היבל יעבד עמך׃

25:41b.LEV.025.041 ויצא מעמך הוא ובניו עמו ושב אל משפחתו ואל אחזת אבתיו ישוב׃

25:42b.LEV.025.042 כי עבדי הם אשר הוצאתי אתם מארץ מצרים לא ימכרו ממכרת עבד׃

25:43b.LEV.025.043 לא תרדה בו בפרך ויראת מאלהיך׃

25:44b.LEV.025.044 ועבדך ואמתך אשר יהיו לך מאת הגוים אשר סביבתיכם מהם תקנו עבד ואמה׃

25:45b.LEV.025.045 וגם מבני התושבים הגרים עמכם מהם תקנו וממשפחתם אשר עמכם אשר הולידו בארצכם והיו לכם לאחזה׃

25:46b.LEV.025.046 והתנחלתם אתם לבניכם אחריכם לרשת אחזה לעלם בהם תעבדו ובאחיכם בני ישראל איש באחיו לא תרדה בו בפרך׃

25:47b.LEV.025.047 וכי תשיג יד גר ותושב עמך ומך אחיך עמו ונמכר לגר תושב עמך או לעקר משפחת גר׃

25:48b.LEV.025.048 אחרי נמכר גאלה תהיה לו אחד מאחיו יגאלנו׃

25:49b.LEV.025.049 או דדו או בן דדו יגאלנו או משאר בשרו ממשפחתו יגאלנו או השיגה ידו ונגאל׃

25:50b.LEV.025.050 וחשב עם קנהו משנת המכרו לו עד שנת היבל והיה כסף ממכרו במספר שנים כימי שכיר יהיה עמו׃

25:51b.LEV.025.051 אם עוד רבות בשנים לפיהן ישיב גאלתו מכסף מקנתו׃

25:52b.LEV.025.052 ואם מעט נשאר בשנים עד שנת היבל וחשב לו כפי שניו ישיב את גאלתו׃

25:53b.LEV.025.053 כשכיר שנה בשנה יהיה עמו לא ירדנו בפרך לעיניך׃

25:54b.LEV.025.054 ואם לא יגאל באלה ויצא בשנת היבל הוא ובניו עמו׃

25:55b.LEV.025.055 כי לי בני ישראל עבדים עבדי הם אשר הוצאתי אותם מארץ מצרים אני יהוה אלהיכם׃

26

26:1b.LEV.026.001 לא תעשו לכם אלילם ופסל ומצבה לא תקימו לכם ואבן משכית לא תתנו בארצכם להשתחות עליה כי אני יהוה אלהיכם׃

26:2b.LEV.026.002 את שבתתי תשמרו ומקדשי תיראו אני יהוה׃

26:3b.LEV.026.003 אם בחקתי תלכו ואת מצותי תשמרו ועשיתם אתם׃

26:4b.LEV.026.004 ונתתי גשמיכם בעתם ונתנה הארץ יבולה ועץ השדה יתן פריו׃

26:5b.LEV.026.005 והשיג לכם דיש את בציר ובציר ישיג את זרע ואכלתם לחמכם לשבע וישבתם לבטח בארצכם׃

26:6b.LEV.026.006 ונתתי שלום בארץ ושכבתם ואין מחריד והשבתי חיה רעה מן הארץ וחרב לא תעבר בארצכם׃

26:7b.LEV.026.007 ורדפתם את איביכם ונפלו לפניכם לחרב׃

26:8b.LEV.026.008 ורדפו מכם חמשה מאה ומאה מכם רבבה ירדפו ונפלו איביכם לפניכם לחרב׃

26:9b.LEV.026.009 ופניתי אליכם והפריתי אתכם והרביתי אתכם והקימתי את בריתי אתכם׃

26:10b.LEV.026.010 ואכלתם ישן נושן וישן מפני חדש תוציאו׃

26:11b.LEV.026.011 ונתתי משכני בתוככם ולא תגעל נפשי אתכם׃

26:12b.LEV.026.012 והתהלכתי בתוככם והייתי לכם לאלהים ואתם תהיו לי לעם׃

26:13b.LEV.026.013 אני יהוה אלהיכם אשר הוצאתי אתכם מארץ מצרים מהית להם עבדים ואשבר מטת עלכם ואולך אתכם קוממיות׃

26:14b.LEV.026.014 ואם לא תשמעו לי ולא תעשו את כל המצות האלה׃

26:15b.LEV.026.015 ואם בחקתי תמאסו ואם את משפטי תגעל נפשכם לבלתי עשות את כל מצותי להפרכם את בריתי׃

26:16b.LEV.026.016 אף אני אעשה זאת לכם והפקדתי עליכם בהלה את השחפת ואת הקדחת מכלות עינים ומדיבת נפש וזרעתם לריק זרעכם ואכלהו איביכם׃

26:17b.LEV.026.017 ונתתי פני בכם ונגפתם לפני איביכם ורדו בכם שנאיכם ונסתם ואין רדף אתכם׃

26:18b.LEV.026.018 ואם עד אלה לא תשמעו לי ויספתי ליסרה אתכם שבע על חטאתיכם׃

26:19b.LEV.026.019 ושברתי את גאון עזכם ונתתי את שמיכם כברזל ואת ארצכם כנחשה׃

26:20b.LEV.026.020 ותם לריק כחכם ולא תתן ארצכם את יבולה ועץ הארץ לא יתן פריו׃

26:21b.LEV.026.021 ואם תלכו עמי קרי ולא תאבו לשמע לי ויספתי עליכם מכה שבע כחטאתיכם׃

26:22b.LEV.026.022 והשלחתי בכם את חית השדה ושכלה אתכם והכריתה את בהמתכם והמעיטה אתכם ונשמו דרכיכם׃

26:23b.LEV.026.023 ואם באלה לא תוסרו לי והלכתם עמי קרי׃

26:24b.LEV.026.024 והלכתי אף אני עמכם בקרי והכיתי אתכם גם אני שבע על חטאתיכם׃

26:25b.LEV.026.025 והבאתי עליכם חרב נקמת נקם ברית ונאספתם אל עריכם ושלחתי דבר בתוככם ונתתם ביד אויב׃

26:26b.LEV.026.026 בשברי לכם מטה לחם ואפו עשר נשים לחמכם בתנור אחד והשיבו לחמכם במשקל ואכלתם ולא תשבעו׃

26:27b.LEV.026.027 ואם בזאת לא תשמעו לי והלכתם עמי בקרי׃

26:28b.LEV.026.028 והלכתי עמכם בחמת קרי ויסרתי אתכם אף אני שבע על חטאתיכם׃

26:29b.LEV.026.029 ואכלתם בשר בניכם ובשר בנתיכם תאכלו׃

26:30b.LEV.026.030 והשמדתי את במתיכם והכרתי את חמניכם ונתתי את פגריכם על פגרי גלוליכם וגעלה נפשי אתכם׃

26:31b.LEV.026.031 ונתתי את עריכם חרבה והשמותי את מקדשיכם ולא אריח בריח ניחחכם׃

26:32b.LEV.026.032 והשמתי אני את הארץ ושממו עליה איביכם הישבים בה׃

26:33b.LEV.026.033 ואתכם אזרה בגוים והריקתי אחריכם חרב והיתה ארצכם שממה ועריכם יהיו חרבה׃

26:34b.LEV.026.034 אז תרצה הארץ את שבתתיה כל ימי השמה ואתם בארץ איביכם אז תשבת הארץ והרצת את שבתתיה׃

26:35b.LEV.026.035 כל ימי השמה תשבת את אשר לא שבתה בשבתתיכם בשבתכם עליה׃

26:36b.LEV.026.036 והנשארים בכם והבאתי מרך בלבבם בארצת איביהם ורדף אתם קול עלה נדף ונסו מנסת חרב ונפלו ואין רדף׃

26:37b.LEV.026.037 וכשלו איש באחיו כמפני חרב ורדף אין ולא תהיה לכם תקומה לפני איביכם׃

26:38b.LEV.026.038 ואבדתם בגוים ואכלה אתכם ארץ איביכם׃

26:39b.LEV.026.039 והנשארים בכם ימקו בעונם בארצת איביכם ואף בעונת אבתם אתם ימקו׃

26:40b.LEV.026.040 והתודו את עונם ואת עון אבתם במעלם אשר מעלו בי ואף אשר הלכו עמי בקרי׃

26:41b.LEV.026.041 אף אני אלך עמם בקרי והבאתי אתם בארץ איביהם או אז יכנע לבבם הערל ואז ירצו את עונם׃

26:42b.LEV.026.042 וזכרתי את בריתי יעקוב ואף את בריתי יצחק ואף את בריתי אברהם אזכר והארץ אזכר׃

26:43b.LEV.026.043 והארץ תעזב מהם ותרץ את שבתתיה בהשמה מהם והם ירצו את עונם יען וביען במשפטי מאסו ואת חקתי געלה נפשם׃

26:44b.LEV.026.044 ואף גם זאת בהיותם בארץ איביהם לא מאסתים ולא געלתים לכלתם להפר בריתי אתם כי אני יהוה אלהיהם׃

26:45b.LEV.026.045 וזכרתי להם ברית ראשנים אשר הוצאתי אתם מארץ מצרים לעיני הגוים להית להם לאלהים אני יהוה׃

26:46b.LEV.026.046 אלה החקים והמשפטים והתורת אשר נתן יהוה בינו ובין בני ישראל בהר סיני ביד משה׃

27

27:1b.LEV.027.001 וידבר יהוה אל משה לאמר׃

27:2b.LEV.027.002 דבר אל בני ישראל ואמרת אלהם איש כי יפלא נדר בערכך נפשת ליהוה׃

27:3b.LEV.027.003 והיה ערכך הזכר מבן עשרים שנה ועד בן ששים שנה והיה ערכך חמשים שקל כסף בשקל הקדש׃

27:4b.LEV.027.004 ואם נקבה הוא והיה ערכך שלשים שקל׃

27:5b.LEV.027.005 ואם מבן חמש שנים ועד בן עשרים שנה והיה ערכך הזכר עשרים שקלים ולנקבה עשרת שקלים׃

27:6b.LEV.027.006 ואם מבן חדש ועד בן חמש שנים והיה ערכך הזכר חמשה שקלים כסף ולנקבה ערכך שלשת שקלים כסף׃

27:7b.LEV.027.007 ואם מבן ששים שנה ומעלה אם זכר והיה ערכך חמשה עשר שקל ולנקבה עשרה שקלים׃

27:8b.LEV.027.008 ואם מך הוא מערכך והעמידו לפני הכהן והעריך אתו הכהן על פי אשר תשיג יד הנדר יעריכנו הכהן׃

27:9b.LEV.027.009 ואם בהמה אשר יקריבו ממנה קרבן ליהוה כל אשר יתן ממנו ליהוה יהיה קדש׃

27:10b.LEV.027.010 לא יחליפנו ולא ימיר אתו טוב ברע או רע בטוב ואם המר ימיר בהמה בבהמה והיה הוא ותמורתו יהיה קדש׃

27:11b.LEV.027.011 ואם כל בהמה טמאה אשר לא יקריבו ממנה קרבן ליהוה והעמיד את הבהמה לפני הכהן׃

27:12b.LEV.027.012 והעריך הכהן אתה בין טוב ובין רע כערכך הכהן כן יהיה׃

27:13b.LEV.027.013 ואם גאל יגאלנה ויסף חמישתו על ערכך׃

27:14b.LEV.027.014 ואיש כי יקדש את ביתו קדש ליהוה והעריכו הכהן בין טוב ובין רע כאשר יעריך אתו הכהן כן יקום׃

27:15b.LEV.027.015 ואם המקדיש יגאל את ביתו ויסף חמישית כסף ערכך עליו והיה לו׃

27:16b.LEV.027.016 ואם משדה אחזתו יקדיש איש ליהוה והיה ערכך לפי זרעו זרע חמר שערים בחמשים שקל כסף׃

27:17b.LEV.027.017 אם משנת היבל יקדיש שדהו כערכך יקום׃

27:18b.LEV.027.018 ואם אחר היבל יקדיש שדהו וחשב לו הכהן את הכסף על פי השנים הנותרת עד שנת היבל ונגרע מערכך׃

27:19b.LEV.027.019 ואם גאל יגאל את השדה המקדיש אתו ויסף חמשית כסף ערכך עליו וקם לו׃

27:20b.LEV.027.020 ואם לא יגאל את השדה ואם מכר את השדה לאיש אחר לא יגאל עוד׃

27:21b.LEV.027.021 והיה השדה בצאתו ביבל קדש ליהוה כשדה החרם לכהן תהיה אחזתו׃

27:22b.LEV.027.022 ואם את שדה מקנתו אשר לא משדה אחזתו יקדיש ליהוה׃

27:23b.LEV.027.023 וחשב לו הכהן את מכסת הערכך עד שנת היבל ונתן את הערכך ביום ההוא קדש ליהוה׃

27:24b.LEV.027.024 בשנת היובל ישוב השדה לאשר קנהו מאתו לאשר לו אחזת הארץ׃

27:25b.LEV.027.025 וכל ערכך יהיה בשקל הקדש עשרים גרה יהיה השקל׃

27:26b.LEV.027.026 אך בכור אשר יבכר ליהוה בבהמה לא יקדיש איש אתו אם שור אם שה ליהוה הוא׃

27:27b.LEV.027.027 ואם בבהמה הטמאה ופדה בערכך ויסף חמשתו עליו ואם לא יגאל ונמכר בערכך׃

27:28b.LEV.027.028 אך כל חרם אשר יחרם איש ליהוה מכל אשר לו מאדם ובהמה ומשדה אחזתו לא ימכר ולא יגאל כל חרם קדש קדשים הוא ליהוה׃

27:29b.LEV.027.029 כל חרם אשר יחרם מן האדם לא יפדה מות יומת׃

27:30b.LEV.027.030 וכל מעשר הארץ מזרע הארץ מפרי העץ ליהוה הוא קדש ליהוה׃

27:31b.LEV.027.031 ואם גאל יגאל איש ממעשרו חמשיתו יסף עליו׃

27:32b.LEV.027.032 וכל מעשר בקר וצאן כל אשר יעבר תחת השבט העשירי יהיה קדש ליהוה׃

27:33b.LEV.027.033 לא יבקר בין טוב לרע ולא ימירנו ואם המר ימירנו והיה הוא ותמורתו יהיה קדש לא יגאל׃

27:34b.LEV.027.034 אלה המצות אשר צוה יהוה את משה אל בני ישראל בהר סיני׃