Exodus (Hebrew)

1

1:1b.EXO.001.001 ואלה שמות בני ישראל הבאים מצרימה את יעקב איש וביתו באו׃

1:2b.EXO.001.002 ראובן שמעון לוי ויהודה׃

1:3b.EXO.001.003 יששכר זבולן ובנימן׃

1:4b.EXO.001.004 דן ונפתלי גד ואשר׃

1:5b.EXO.001.005 ויהי כל נפש יצאי ירך יעקב שבעים נפש ויוסף היה במצרים׃

1:6b.EXO.001.006 וימת יוסף וכל אחיו וכל הדור ההוא׃

1:7b.EXO.001.007 ובני ישראל פרו וישרצו וירבו ויעצמו במאד מאד ותמלא הארץ אתם׃

1:8b.EXO.001.008 ויקם מלך חדש על מצרים אשר לא ידע את יוסף׃

1:9b.EXO.001.009 ויאמר אל עמו הנה עם בני ישראל רב ועצום ממנו׃

1:10b.EXO.001.010 הבה נתחכמה לו פן ירבה והיה כי תקראנה מלחמה ונוסף גם הוא על שנאינו ונלחם בנו ועלה מן הארץ׃

1:11b.EXO.001.011 וישימו עליו שרי מסים למען ענתו בסבלתם ויבן ערי מסכנות לפרעה את פתם ואת רעמסס׃

1:12b.EXO.001.012 וכאשר יענו אתו כן ירבה וכן יפרץ ויקצו מפני בני ישראל׃

1:13b.EXO.001.013 ויעבדו מצרים את בני ישראל בפרך׃

1:14b.EXO.001.014 וימררו את חייהם בעבדה קשה בחמר ובלבנים ובכל עבדה בשדה את כל עבדתם אשר עבדו בהם בפרך׃

1:15b.EXO.001.015 ויאמר מלך מצרים למילדת העברית אשר שם האחת שפרה ושם השנית פועה׃

1:16b.EXO.001.016 ויאמר בילדכן את העבריות וראיתן על האבנים אם בן הוא והמתן אתו ואם בת היא וחיה׃

1:17b.EXO.001.017 ותיראן המילדת את האלהים ולא עשו כאשר דבר אליהן מלך מצרים ותחיין את הילדים׃

1:18b.EXO.001.018 ויקרא מלך מצרים למילדת ויאמר להן מדוע עשיתן הדבר הזה ותחיין את הילדים׃

1:19b.EXO.001.019 ותאמרן המילדת אל פרעה כי לא כנשים המצרית העברית כי חיות הנה בטרם תבוא אלהן המילדת וילדו׃

1:20b.EXO.001.020 וייטב אלהים למילדת וירב העם ויעצמו מאד׃

1:21b.EXO.001.021 ויהי כי יראו המילדת את האלהים ויעש להם בתים׃

1:22b.EXO.001.022 ויצו פרעה לכל עמו לאמר כל הבן הילוד היארה תשליכהו וכל הבת תחיון׃

2

2:1b.EXO.002.001 וילך איש מבית לוי ויקח את בת לוי׃

2:2b.EXO.002.002 ותהר האשה ותלד בן ותרא אתו כי טוב הוא ותצפנהו שלשה ירחים׃

2:3b.EXO.002.003 ולא יכלה עוד הצפינו ותקח לו תבת גמא ותחמרה בחמר ובזפת ותשם בה את הילד ותשם בסוף על שפת היאר׃

2:4b.EXO.002.004 ותתצב אחתו מרחק לדעה מה יעשה לו׃

2:5b.EXO.002.005 ותרד בת פרעה לרחץ על היאר ונערתיה הלכת על יד היאר ותרא את התבה בתוך הסוף ותשלח את אמתה ותקחה׃

2:6b.EXO.002.006 ותפתח ותראהו את הילד והנה נער בכה ותחמל עליו ותאמר מילדי העברים זה׃

2:7b.EXO.002.007 ותאמר אחתו אל בת פרעה האלך וקראתי לך אשה מינקת מן העברית ותינק לך את הילד׃

2:8b.EXO.002.008 ותאמר לה בת פרעה לכי ותלך העלמה ותקרא את אם הילד׃

2:9b.EXO.002.009 ותאמר לה בת פרעה היליכי את הילד הזה והינקהו לי ואני אתן את שכרך ותקח האשה הילד ותניקהו׃

2:10b.EXO.002.010 ויגדל הילד ותבאהו לבת פרעה ויהי לה לבן ותקרא שמו משה ותאמר כי מן המים משיתהו׃

2:11b.EXO.002.011 ויהי בימים ההם ויגדל משה ויצא אל אחיו וירא בסבלתם וירא איש מצרי מכה איש עברי מאחיו׃

2:12b.EXO.002.012 ויפן כה וכה וירא כי אין איש ויך את המצרי ויטמנהו בחול׃

2:13b.EXO.002.013 ויצא ביום השני והנה שני אנשים עברים נצים ויאמר לרשע למה תכה רעך׃

2:14b.EXO.002.014 ויאמר מי שמך לאיש שר ושפט עלינו הלהרגני אתה אמר כאשר הרגת את המצרי ויירא משה ויאמר אכן נודע הדבר׃

2:15b.EXO.002.015 וישמע פרעה את הדבר הזה ויבקש להרג את משה ויברח משה מפני פרעה וישב בארץ מדין וישב על הבאר׃

2:16b.EXO.002.016 ולכהן מדין שבע בנות ותבאנה ותדלנה ותמלאנה את הרהטים להשקות צאן אביהן׃

2:17b.EXO.002.017 ויבאו הרעים ויגרשום ויקם משה ויושען וישק את צאנם׃

2:18b.EXO.002.018 ותבאנה אל רעואל אביהן ויאמר מדוע מהרתן בא היום׃

2:19b.EXO.002.019 ותאמרן איש מצרי הצילנו מיד הרעים וגם דלה דלה לנו וישק את הצאן׃

2:20b.EXO.002.020 ויאמר אל בנתיו ואיו למה זה עזבתן את האיש קראן לו ויאכל לחם׃

2:21b.EXO.002.021 ויואל משה לשבת את האיש ויתן את צפרה בתו למשה׃

2:22b.EXO.002.022 ותלד בן ויקרא את שמו גרשם כי אמר גר הייתי בארץ נכריה׃

2:23b.EXO.002.023 ויהי בימים הרבים ההם וימת מלך מצרים ויאנחו בני ישראל מן העבדה ויזעקו ותעל שועתם אל האלהים מן העבדה׃

2:24b.EXO.002.024 וישמע אלהים את נאקתם ויזכר אלהים את בריתו את אברהם את יצחק ואת יעקב׃

2:25b.EXO.002.025 וירא אלהים את בני ישראל וידע אלהים׃

3

3:1b.EXO.003.001 ומשה היה רעה את צאן יתרו חתנו כהן מדין וינהג את הצאן אחר המדבר ויבא אל הר האלהים חרבה׃

3:2b.EXO.003.002 וירא מלאך יהוה אליו בלבת אש מתוך הסנה וירא והנה הסנה בער באש והסנה איננו אכל׃

3:3b.EXO.003.003 ויאמר משה אסרה נא ואראה את המראה הגדל הזה מדוע לא יבער הסנה׃

3:4b.EXO.003.004 וירא יהוה כי סר לראות ויקרא אליו אלהים מתוך הסנה ויאמר משה משה ויאמר הנני׃

3:5b.EXO.003.005 ויאמר אל תקרב הלם של נעליך מעל רגליך כי המקום אשר אתה עומד עליו אדמת קדש הוא׃

3:6b.EXO.003.006 ויאמר אנכי אלהי אביך אלהי אברהם אלהי יצחק ואלהי יעקב ויסתר משה פניו כי ירא מהביט אל האלהים׃

3:7b.EXO.003.007 ויאמר יהוה ראה ראיתי את עני עמי אשר במצרים ואת צעקתם שמעתי מפני נגשיו כי ידעתי את מכאביו׃

3:8b.EXO.003.008 וארד להצילו מיד מצרים ולהעלתו מן הארץ ההוא אל ארץ טובה ורחבה אל ארץ זבת חלב ודבש אל מקום הכנעני והחתי והאמרי והפרזי והחוי והיבוסי׃

3:9b.EXO.003.009 ועתה הנה צעקת בני ישראל באה אלי וגם ראיתי את הלחץ אשר מצרים לחצים אתם׃

3:10b.EXO.003.010 ועתה לכה ואשלחך אל פרעה והוצא את עמי בני ישראל ממצרים׃

3:11b.EXO.003.011 ויאמר משה אל האלהים מי אנכי כי אלך אל פרעה וכי אוציא את בני ישראל ממצרים׃

3:12b.EXO.003.012 ויאמר כי אהיה עמך וזה לך האות כי אנכי שלחתיך בהוציאך את העם ממצרים תעבדון את האלהים על ההר הזה׃

3:13b.EXO.003.013 ויאמר משה אל האלהים הנה אנכי בא אל בני ישראל ואמרתי להם אלהי אבותיכם שלחני אליכם ואמרו לי מה שמו מה אמר אלהם׃

3:14b.EXO.003.014 ויאמר אלהים אל משה אהיה אשר אהיה ויאמר כה תאמר לבני ישראל אהיה שלחני אליכם׃

3:15b.EXO.003.015 ויאמר עוד אלהים אל משה כה תאמר אל בני ישראל יהוה אלהי אבתיכם אלהי אברהם אלהי יצחק ואלהי יעקב שלחני אליכם זה שמי לעלם וזה זכרי לדר דר׃

3:16b.EXO.003.016 לך ואספת את זקני ישראל ואמרת אלהם יהוה אלהי אבתיכם נראה אלי אלהי אברהם יצחק ויעקב לאמר פקד פקדתי אתכם ואת העשוי לכם במצרים׃

3:17b.EXO.003.017 ואמר אעלה אתכם מעני מצרים אל ארץ הכנעני והחתי והאמרי והפרזי והחוי והיבוסי אל ארץ זבת חלב ודבש׃

3:18b.EXO.003.018 ושמעו לקלך ובאת אתה וזקני ישראל אל מלך מצרים ואמרתם אליו יהוה אלהי העבריים נקרה עלינו ועתה נלכה נא דרך שלשת ימים במדבר ונזבחה ליהוה אלהינו׃

3:19b.EXO.003.019 ואני ידעתי כי לא יתן אתכם מלך מצרים להלך ולא ביד חזקה׃

3:20b.EXO.003.020 ושלחתי את ידי והכיתי את מצרים בכל נפלאתי אשר אעשה בקרבו ואחרי כן ישלח אתכם׃

3:21b.EXO.003.021 ונתתי את חן העם הזה בעיני מצרים והיה כי תלכון לא תלכו ריקם׃

3:22b.EXO.003.022 ושאלה אשה משכנתה ומגרת ביתה כלי כסף וכלי זהב ושמלת ושמתם על בניכם ועל בנתיכם ונצלתם את מצרים׃

4

4:1b.EXO.004.001 ויען משה ויאמר והן לא יאמינו לי ולא ישמעו בקלי כי יאמרו לא נראה אליך יהוה׃

4:2b.EXO.004.002 ויאמר אליו יהוה מזה בידך ויאמר מטה׃

4:3b.EXO.004.003 ויאמר השליכהו ארצה וישליכהו ארצה ויהי לנחש וינס משה מפניו׃

4:4b.EXO.004.004 ויאמר יהוה אל משה שלח ידך ואחז בזנבו וישלח ידו ויחזק בו ויהי למטה בכפו׃

4:5b.EXO.004.005 למען יאמינו כי נראה אליך יהוה אלהי אבתם אלהי אברהם אלהי יצחק ואלהי יעקב׃

4:6b.EXO.004.006 ויאמר יהוה לו עוד הבא נא ידך בחיקך ויבא ידו בחיקו ויוצאה והנה ידו מצרעת כשלג׃

4:7b.EXO.004.007 ויאמר השב ידך אל חיקך וישב ידו אל חיקו ויוצאה מחיקו והנה שבה כבשרו׃

4:8b.EXO.004.008 והיה אם לא יאמינו לך ולא ישמעו לקל האת הראשון והאמינו לקל האת האחרון׃

4:9b.EXO.004.009 והיה אם לא יאמינו גם לשני האתות האלה ולא ישמעון לקלך ולקחת ממימי היאר ושפכת היבשה והיו המים אשר תקח מן היאר והיו לדם ביבשת׃

4:10b.EXO.004.010 ויאמר משה אל יהוה בי אדני לא איש דברים אנכי גם מתמול גם משלשם גם מאז דברך אל עבדך כי כבד פה וכבד לשון אנכי׃

4:11b.EXO.004.011 ויאמר יהוה אליו מי שם פה לאדם או מי ישום אלם או חרש או פקח או עור הלא אנכי יהוה׃

4:12b.EXO.004.012 ועתה לך ואנכי אהיה עם פיך והוריתיך אשר תדבר׃

4:13b.EXO.004.013 ויאמר בי אדני שלח נא ביד תשלח׃

4:14b.EXO.004.014 ויחר אף יהוה במשה ויאמר הלא אהרן אחיך הלוי ידעתי כי דבר ידבר הוא וגם הנה הוא יצא לקראתך וראך ושמח בלבו׃

4:15b.EXO.004.015 ודברת אליו ושמת את הדברים בפיו ואנכי אהיה עם פיך ועם פיהו והוריתי אתכם את אשר תעשון׃

4:16b.EXO.004.016 ודבר הוא לך אל העם והיה הוא יהיה לך לפה ואתה תהיה לו לאלהים׃

4:17b.EXO.004.017 ואת המטה הזה תקח בידך אשר תעשה בו את האתת׃

4:18b.EXO.004.018 וילך משה וישב אל יתר חתנו ויאמר לו אלכה נא ואשובה אל אחי אשר במצרים ואראה העודם חיים ויאמר יתרו למשה לך לשלום׃

4:19b.EXO.004.019 ויאמר יהוה אל משה במדין לך שב מצרים כי מתו כל האנשים המבקשים את נפשך׃

4:20b.EXO.004.020 ויקח משה את אשתו ואת בניו וירכבם על החמר וישב ארצה מצרים ויקח משה את מטה האלהים בידו׃

4:21b.EXO.004.021 ויאמר יהוה אל משה בלכתך לשוב מצרימה ראה כל המפתים אשר שמתי בידך ועשיתם לפני פרעה ואני אחזק את לבו ולא ישלח את העם׃

4:22b.EXO.004.022 ואמרת אל פרעה כה אמר יהוה בני בכרי ישראל׃

4:23b.EXO.004.023 ואמר אליך שלח את בני ויעבדני ותמאן לשלחו הנה אנכי הרג את בנך בכרך׃

4:24b.EXO.004.024 ויהי בדרך במלון ויפגשהו יהוה ויבקש המיתו׃

4:25b.EXO.004.025 ותקח צפרה צר ותכרת את ערלת בנה ותגע לרגליו ותאמר כי חתן דמים אתה לי׃

4:26b.EXO.004.026 וירף ממנו אז אמרה חתן דמים למולת׃

4:27b.EXO.004.027 ויאמר יהוה אל אהרן לך לקראת משה המדברה וילך ויפגשהו בהר האלהים וישק לו׃

4:28b.EXO.004.028 ויגד משה לאהרן את כל דברי יהוה אשר שלחו ואת כל האתת אשר צוהו׃

4:29b.EXO.004.029 וילך משה ואהרן ויאספו את כל זקני בני ישראל׃

4:30b.EXO.004.030 וידבר אהרן את כל הדברים אשר דבר יהוה אל משה ויעש האתת לעיני העם׃

4:31b.EXO.004.031 ויאמן העם וישמעו כי פקד יהוה את בני ישראל וכי ראה את ענים ויקדו וישתחוו׃

5

5:1b.EXO.005.001 ואחר באו משה ואהרן ויאמרו אל פרעה כה אמר יהוה אלהי ישראל שלח את עמי ויחגו לי במדבר׃

5:2b.EXO.005.002 ויאמר פרעה מי יהוה אשר אשמע בקלו לשלח את ישראל לא ידעתי את יהוה וגם את ישראל לא אשלח׃

5:3b.EXO.005.003 ויאמרו אלהי העברים נקרא עלינו נלכה נא דרך שלשת ימים במדבר ונזבחה ליהוה אלהינו פן יפגענו בדבר או בחרב׃

5:4b.EXO.005.004 ויאמר אלהם מלך מצרים למה משה ואהרן תפריעו את העם ממעשיו לכו לסבלתיכם׃

5:5b.EXO.005.005 ויאמר פרעה הן רבים עתה עם הארץ והשבתם אתם מסבלתם׃

5:6b.EXO.005.006 ויצו פרעה ביום ההוא את הנגשים בעם ואת שטריו לאמר׃

5:7b.EXO.005.007 לא תאספון לתת תבן לעם ללבן הלבנים כתמול שלשם הם ילכו וקששו להם תבן׃

5:8b.EXO.005.008 ואת מתכנת הלבנים אשר הם עשים תמול שלשם תשימו עליהם לא תגרעו ממנו כי נרפים הם על כן הם צעקים לאמר נלכה נזבחה לאלהינו׃

5:9b.EXO.005.009 תכבד העבדה על האנשים ויעשו בה ואל ישעו בדברי שקר׃

5:10b.EXO.005.010 ויצאו נגשי העם ושטריו ויאמרו אל העם לאמר כה אמר פרעה אינני נתן לכם תבן׃

5:11b.EXO.005.011 אתם לכו קחו לכם תבן מאשר תמצאו כי אין נגרע מעבדתכם דבר׃

5:12b.EXO.005.012 ויפץ העם בכל ארץ מצרים לקשש קש לתבן׃

5:13b.EXO.005.013 והנגשים אצים לאמר כלו מעשיכם דבר יום ביומו כאשר בהיות התבן׃

5:14b.EXO.005.014 ויכו שטרי בני ישראל אשר שמו עלהם נגשי פרעה לאמר מדוע לא כליתם חקכם ללבן כתמול שלשם גם תמול גם היום׃

5:15b.EXO.005.015 ויבאו שטרי בני ישראל ויצעקו אל פרעה לאמר למה תעשה כה לעבדיך׃

5:16b.EXO.005.016 תבן אין נתן לעבדיך ולבנים אמרים לנו עשו והנה עבדיך מכים וחטאת עמך׃

5:17b.EXO.005.017 ויאמר נרפים אתם נרפים על כן אתם אמרים נלכה נזבחה ליהוה׃

5:18b.EXO.005.018 ועתה לכו עבדו ותבן לא ינתן לכם ותכן לבנים תתנו׃

5:19b.EXO.005.019 ויראו שטרי בני ישראל אתם ברע לאמר לא תגרעו מלבניכם דבר יום ביומו׃

5:20b.EXO.005.020 ויפגעו את משה ואת אהרן נצבים לקראתם בצאתם מאת פרעה׃

5:21b.EXO.005.021 ויאמרו אלהם ירא יהוה עליכם וישפט אשר הבאשתם את ריחנו בעיני פרעה ובעיני עבדיו לתת חרב בידם להרגנו׃

5:22b.EXO.005.022 וישב משה אל יהוה ויאמר אדני למה הרעתה לעם הזה למה זה שלחתני׃

5:23b.EXO.005.023 ומאז באתי אל פרעה לדבר בשמך הרע לעם הזה והצל לא הצלת את עמך׃

6

6:1b.EXO.006.001 ויאמר יהוה אל משה עתה תראה אשר אעשה לפרעה כי ביד חזקה ישלחם וביד חזקה יגרשם מארצו׃

6:2b.EXO.006.002 וידבר אלהים אל משה ויאמר אליו אני יהוה׃

6:3b.EXO.006.003 וארא אל אברהם אל יצחק ואל יעקב באל שדי ושמי יהוה לא נודעתי להם׃

6:4b.EXO.006.004 וגם הקמתי את בריתי אתם לתת להם את ארץ כנען את ארץ מגריהם אשר גרו בה׃

6:5b.EXO.006.005 וגם אני שמעתי את נאקת בני ישראל אשר מצרים מעבדים אתם ואזכר את בריתי׃

6:6b.EXO.006.006 לכן אמר לבני ישראל אני יהוה והוצאתי אתכם מתחת סבלת מצרים והצלתי אתכם מעבדתם וגאלתי אתכם בזרוע נטויה ובשפטים גדלים׃

6:7b.EXO.006.007 ולקחתי אתכם לי לעם והייתי לכם לאלהים וידעתם כי אני יהוה אלהיכם המוציא אתכם מתחת סבלות מצרים׃

6:8b.EXO.006.008 והבאתי אתכם אל הארץ אשר נשאתי את ידי לתת אתה לאברהם ליצחק וליעקב ונתתי אתה לכם מורשה אני יהוה׃

6:9b.EXO.006.009 וידבר משה כן אל בני ישראל ולא שמעו אל משה מקצר רוח ומעבדה קשה׃

6:10b.EXO.006.010 וידבר יהוה אל משה לאמר׃

6:11b.EXO.006.011 בא דבר אל פרעה מלך מצרים וישלח את בני ישראל מארצו׃

6:12b.EXO.006.012 וידבר משה לפני יהוה לאמר הן בני ישראל לא שמעו אלי ואיך ישמעני פרעה ואני ערל שפתים׃

6:13b.EXO.006.013 וידבר יהוה אל משה ואל אהרן ויצום אל בני ישראל ואל פרעה מלך מצרים להוציא את בני ישראל מארץ מצרים׃

6:14b.EXO.006.014 אלה ראשי בית אבתם בני ראובן בכר ישראל חנוך ופלוא חצרון וכרמי אלה משפחת ראובן׃

6:15b.EXO.006.015 ובני שמעון ימואל וימין ואהד ויכין וצחר ושאול בן הכנענית אלה משפחת שמעון׃

6:16b.EXO.006.016 ואלה שמות בני לוי לתלדתם גרשון וקהת ומררי ושני חיי לוי שבע ושלשים ומאת שנה׃

6:17b.EXO.006.017 בני גרשון לבני ושמעי למשפחתם׃

6:18b.EXO.006.018 ובני קהת עמרם ויצהר וחברון ועזיאל ושני חיי קהת שלש ושלשים ומאת שנה׃

6:19b.EXO.006.019 ובני מררי מחלי ומושי אלה משפחת הלוי לתלדתם׃

6:20b.EXO.006.020 ויקח עמרם את יוכבד דדתו לו לאשה ותלד לו את אהרן ואת משה ושני חיי עמרם שבע ושלשים ומאת שנה׃

6:21b.EXO.006.021 ובני יצהר קרח ונפג וזכרי׃

6:22b.EXO.006.022 ובני עזיאל מישאל ואלצפן וסתרי׃

6:23b.EXO.006.023 ויקח אהרן את אלישבע בת עמינדב אחות נחשון לו לאשה ותלד לו את נדב ואת אביהוא את אלעזר ואת איתמר׃

6:24b.EXO.006.024 ובני קרח אסיר ואלקנה ואביאסף אלה משפחת הקרחי׃

6:25b.EXO.006.025 ואלעזר בן אהרן לקח לו מבנות פוטיאל לו לאשה ותלד לו את פינחס אלה ראשי אבות הלוים למשפחתם׃

6:26b.EXO.006.026 הוא אהרן ומשה אשר אמר יהוה להם הוציאו את בני ישראל מארץ מצרים על צבאתם׃

6:27b.EXO.006.027 הם המדברים אל פרעה מלך מצרים להוציא את בני ישראל ממצרים הוא משה ואהרן׃

6:28b.EXO.006.028 ויהי ביום דבר יהוה אל משה בארץ מצרים׃

6:29b.EXO.006.029 וידבר יהוה אל משה לאמר אני יהוה דבר אל פרעה מלך מצרים את כל אשר אני דבר אליך׃

6:30b.EXO.006.030 ויאמר משה לפני יהוה הן אני ערל שפתים ואיך ישמע אלי פרעה׃

7

7:1b.EXO.007.001 ויאמר יהוה אל משה ראה נתתיך אלהים לפרעה ואהרן אחיך יהיה נביאך׃

7:2b.EXO.007.002 אתה תדבר את כל אשר אצוך ואהרן אחיך ידבר אל פרעה ושלח את בני ישראל מארצו׃

7:3b.EXO.007.003 ואני אקשה את לב פרעה והרביתי את אתתי ואת מופתי בארץ מצרים׃

7:4b.EXO.007.004 ולא ישמע אלכם פרעה ונתתי את ידי במצרים והוצאתי את צבאתי את עמי בני ישראל מארץ מצרים בשפטים גדלים׃

7:5b.EXO.007.005 וידעו מצרים כי אני יהוה בנטתי את ידי על מצרים והוצאתי את בני ישראל מתוכם׃

7:6b.EXO.007.006 ויעש משה ואהרן כאשר צוה יהוה אתם כן עשו׃

7:7b.EXO.007.007 ומשה בן שמנים שנה ואהרן בן שלש ושמנים שנה בדברם אל פרעה׃

7:8b.EXO.007.008 ויאמר יהוה אל משה ואל אהרן לאמר׃

7:9b.EXO.007.009 כי ידבר אלכם פרעה לאמר תנו לכם מופת ואמרת אל אהרן קח את מטך והשלך לפני פרעה יהי לתנין׃

7:10b.EXO.007.010 ויבא משה ואהרן אל פרעה ויעשו כן כאשר צוה יהוה וישלך אהרן את מטהו לפני פרעה ולפני עבדיו ויהי לתנין׃

7:11b.EXO.007.011 ויקרא גם פרעה לחכמים ולמכשפים ויעשו גם הם חרטמי מצרים בלהטיהם כן׃

7:12b.EXO.007.012 וישליכו איש מטהו ויהיו לתנינם ויבלע מטה אהרן את מטתם׃

7:13b.EXO.007.013 ויחזק לב פרעה ולא שמע אלהם כאשר דבר יהוה׃

7:14b.EXO.007.014 ויאמר יהוה אל משה כבד לב פרעה מאן לשלח העם׃

7:15b.EXO.007.015 לך אל פרעה בבקר הנה יצא המימה ונצבת לקראתו על שפת היאר והמטה אשר נהפך לנחש תקח בידך׃

7:16b.EXO.007.016 ואמרת אליו יהוה אלהי העברים שלחני אליך לאמר שלח את עמי ויעבדני במדבר והנה לא שמעת עד כה׃

7:17b.EXO.007.017 כה אמר יהוה בזאת תדע כי אני יהוה הנה אנכי מכה במטה אשר בידי על המים אשר ביאר ונהפכו לדם׃

7:18b.EXO.007.018 והדגה אשר ביאר תמות ובאש היאר ונלאו מצרים לשתות מים מן היאר׃

7:19b.EXO.007.019 ויאמר יהוה אל משה אמר אל אהרן קח מטך ונטה ידך על מימי מצרים על נהרתם על יאריהם ועל אגמיהם ועל כל מקוה מימיהם ויהיו דם והיה דם בכל ארץ מצרים ובעצים ובאבנים׃

7:20b.EXO.007.020 ויעשו כן משה ואהרן כאשר צוה יהוה וירם במטה ויך את המים אשר ביאר לעיני פרעה ולעיני עבדיו ויהפכו כל המים אשר ביאר לדם׃

7:21b.EXO.007.021 והדגה אשר ביאר מתה ויבאש היאר ולא יכלו מצרים לשתות מים מן היאר ויהי הדם בכל ארץ מצרים׃

7:22b.EXO.007.022 ויעשו כן חרטמי מצרים בלטיהם ויחזק לב פרעה ולא שמע אלהם כאשר דבר יהוה׃

7:23b.EXO.007.023 ויפן פרעה ויבא אל ביתו ולא שת לבו גם לזאת׃

7:24b.EXO.007.024 ויחפרו כל מצרים סביבת היאר מים לשתות כי לא יכלו לשתת ממימי היאר׃

7:25b.EXO.007.025 וימלא שבעת ימים אחרי הכות יהוה את היאר׃

8

8:1b.EXO.008.001 ויאמר יהוה אל משה בא אל פרעה ואמרת אליו כה אמר יהוה שלח את עמי ויעבדני׃

8:2b.EXO.008.002 ואם מאן אתה לשלח הנה אנכי נגף את כל גבולך בצפרדעים׃

8:3b.EXO.008.003 ושרץ היאר צפרדעים ועלו ובאו בביתך ובחדר משכבך ועל מטתך ובבית עבדיך ובעמך ובתנוריך ובמשארותיך׃

8:4b.EXO.008.004 ובכה ובעמך ובכל עבדיך יעלו הצפרדעים׃

8:5b.EXO.008.005 ויאמר יהוה אל משה אמר אל אהרן נטה את ידך במטך על הנהרת על היארים ועל האגמים והעל את הצפרדעים על ארץ מצרים׃

8:6b.EXO.008.006 ויט אהרן את ידו על מימי מצרים ותעל הצפרדע ותכס את ארץ מצרים׃

8:7b.EXO.008.007 ויעשו כן החרטמים בלטיהם ויעלו את הצפרדעים על ארץ מצרים׃

8:8b.EXO.008.008 ויקרא פרעה למשה ולאהרן ויאמר העתירו אל יהוה ויסר הצפרדעים ממני ומעמי ואשלחה את העם ויזבחו ליהוה׃

8:9b.EXO.008.009 ויאמר משה לפרעה התפאר עלי למתי אעתיר לך ולעבדיך ולעמך להכרית הצפרדעים ממך ומבתיך רק ביאר תשארנה׃

8:10b.EXO.008.010 ויאמר למחר ויאמר כדברך למען תדע כי אין כיהוה אלהינו׃

8:11b.EXO.008.011 וסרו הצפרדעים ממך ומבתיך ומעבדיך ומעמך רק ביאר תשארנה׃

8:12b.EXO.008.012 ויצא משה ואהרן מעם פרעה ויצעק משה אל יהוה על דבר הצפרדעים אשר שם לפרעה׃

8:13b.EXO.008.013 ויעש יהוה כדבר משה וימתו הצפרדעים מן הבתים מן החצרת ומן השדת׃

8:14b.EXO.008.014 ויצברו אתם חמרם חמרם ותבאש הארץ׃

8:15b.EXO.008.015 וירא פרעה כי היתה הרוחה והכבד את לבו ולא שמע אלהם כאשר דבר יהוה׃

8:16b.EXO.008.016 ויאמר יהוה אל משה אמר אל אהרן נטה את מטך והך את עפר הארץ והיה לכנם בכל ארץ מצרים׃

8:17b.EXO.008.017 ויעשו כן ויט אהרן את ידו במטהו ויך את עפר הארץ ותהי הכנם באדם ובבהמה כל עפר הארץ היה כנים בכל ארץ מצרים׃

8:18b.EXO.008.018 ויעשו כן החרטמים בלטיהם להוציא את הכנים ולא יכלו ותהי הכנם באדם ובבהמה׃

8:19b.EXO.008.019 ויאמרו החרטמים אל פרעה אצבע אלהים הוא ויחזק לב פרעה ולא שמע אלהם כאשר דבר יהוה׃

8:20b.EXO.008.020 ויאמר יהוה אל משה השכם בבקר והתיצב לפני פרעה הנה יוצא המימה ואמרת אליו כה אמר יהוה שלח עמי ויעבדני׃

8:21b.EXO.008.021 כי אם אינך משלח את עמי הנני משליח בך ובעבדיך ובעמך ובבתיך את הערב ומלאו בתי מצרים את הערב וגם האדמה אשר הם עליה׃

8:22b.EXO.008.022 והפליתי ביום ההוא את ארץ גשן אשר עמי עמד עליה לבלתי היות שם ערב למען תדע כי אני יהוה בקרב הארץ׃

8:23b.EXO.008.023 ושמתי פדת בין עמי ובין עמך למחר יהיה האת הזה׃

8:24b.EXO.008.024 ויעש יהוה כן ויבא ערב כבד ביתה פרעה ובית עבדיו ובכל ארץ מצרים תשחת הארץ מפני הערב׃

8:25b.EXO.008.025 ויקרא פרעה אל משה ולאהרן ויאמר לכו זבחו לאלהיכם בארץ׃

8:26b.EXO.008.026 ויאמר משה לא נכון לעשות כן כי תועבת מצרים נזבח ליהוה אלהינו הן נזבח את תועבת מצרים לעיניהם ולא יסקלנו׃

8:27b.EXO.008.027 דרך שלשת ימים נלך במדבר וזבחנו ליהוה אלהינו כאשר יאמר אלינו׃

8:28b.EXO.008.028 ויאמר פרעה אנכי אשלח אתכם וזבחתם ליהוה אלהיכם במדבר רק הרחק לא תרחיקו ללכת העתירו בעדי׃

8:29b.EXO.008.029 ויאמר משה הנה אנכי יוצא מעמך והעתרתי אל יהוה וסר הערב מפרעה מעבדיו ומעמו מחר רק אל יסף פרעה התל לבלתי שלח את העם לזבח ליהוה׃

8:30b.EXO.008.030 ויצא משה מעם פרעה ויעתר אל יהוה׃

8:31b.EXO.008.031 ויעש יהוה כדבר משה ויסר הערב מפרעה מעבדיו ומעמו לא נשאר אחד׃

8:32b.EXO.008.032 ויכבד פרעה את לבו גם בפעם הזאת ולא שלח את העם׃

9

9:1b.EXO.009.001 ויאמר יהוה אל משה בא אל פרעה ודברת אליו כה אמר יהוה אלהי העברים שלח את עמי ויעבדני׃

9:2b.EXO.009.002 כי אם מאן אתה לשלח ועודך מחזיק בם׃

9:3b.EXO.009.003 הנה יד יהוה הויה במקנך אשר בשדה בסוסים בחמרים בגמלים בבקר ובצאן דבר כבד מאד׃

9:4b.EXO.009.004 והפלה יהוה בין מקנה ישראל ובין מקנה מצרים ולא ימות מכל לבני ישראל דבר׃

9:5b.EXO.009.005 וישם יהוה מועד לאמר מחר יעשה יהוה הדבר הזה בארץ׃

9:6b.EXO.009.006 ויעש יהוה את הדבר הזה ממחרת וימת כל מקנה מצרים וממקנה בני ישראל לא מת אחד׃

9:7b.EXO.009.007 וישלח פרעה והנה לא מת ממקנה ישראל עד אחד ויכבד לב פרעה ולא שלח את העם׃

9:8b.EXO.009.008 ויאמר יהוה אל משה ואל אהרן קחו לכם מלא חפניכם פיח כבשן וזרקו משה השמימה לעיני פרעה׃

9:9b.EXO.009.009 והיה לאבק על כל ארץ מצרים והיה על האדם ועל הבהמה לשחין פרח אבעבעת בכל ארץ מצרים׃

9:10b.EXO.009.010 ויקחו את פיח הכבשן ויעמדו לפני פרעה ויזרק אתו משה השמימה ויהי שחין אבעבעת פרח באדם ובבהמה׃

9:11b.EXO.009.011 ולא יכלו החרטמים לעמד לפני משה מפני השחין כי היה השחין בחרטמם ובכל מצרים׃

9:12b.EXO.009.012 ויחזק יהוה את לב פרעה ולא שמע אלהם כאשר דבר יהוה אל משה׃

9:13b.EXO.009.013 ויאמר יהוה אל משה השכם בבקר והתיצב לפני פרעה ואמרת אליו כה אמר יהוה אלהי העברים שלח את עמי ויעבדני׃

9:14b.EXO.009.014 כי בפעם הזאת אני שלח את כל מגפתי אל לבך ובעבדיך ובעמך בעבור תדע כי אין כמני בכל הארץ׃

9:15b.EXO.009.015 כי עתה שלחתי את ידי ואך אותך ואת עמך בדבר ותכחד מן הארץ׃

9:16b.EXO.009.016 ואולם בעבור זאת העמדתיך בעבור הראתך את כחי ולמען ספר שמי בכל הארץ׃

9:17b.EXO.009.017 עודך מסתולל בעמי לבלתי שלחם׃

9:18b.EXO.009.018 הנני ממטיר כעת מחר ברד כבד מאד אשר לא היה כמהו במצרים למן היום הוסדה ועד עתה׃

9:19b.EXO.009.019 ועתה שלח העז את מקנך ואת כל אשר לך בשדה כל האדם והבהמה אשר ימצא בשדה ולא יאסף הביתה וירד עלהם הברד ומתו׃

9:20b.EXO.009.020 הירא את דבר יהוה מעבדי פרעה הניס את עבדיו ואת מקנהו אל הבתים׃

9:21b.EXO.009.021 ואשר לא שם לבו אל דבר יהוה ויעזב את עבדיו ואת מקנהו בשדה׃

9:22b.EXO.009.022 ויאמר יהוה אל משה נטה את ידך על השמים ויהי ברד בכל ארץ מצרים על האדם ועל הבהמה ועל כל עשב השדה בארץ מצרים׃

9:23b.EXO.009.023 ויט משה את מטהו על השמים ויהוה נתן קלת וברד ותהלך אש ארצה וימטר יהוה ברד על ארץ מצרים׃

9:24b.EXO.009.024 ויהי ברד ואש מתלקחת בתוך הברד כבד מאד אשר לא היה כמהו בכל ארץ מצרים מאז היתה לגוי׃

9:25b.EXO.009.025 ויך הברד בכל ארץ מצרים את כל אשר בשדה מאדם ועד בהמה ואת כל עשב השדה הכה הברד ואת כל עץ השדה שבר׃

9:26b.EXO.009.026 רק בארץ גשן אשר שם בני ישראל לא היה ברד׃

9:27b.EXO.009.027 וישלח פרעה ויקרא למשה ולאהרן ויאמר אלהם חטאתי הפעם יהוה הצדיק ואני ועמי הרשעים׃

9:28b.EXO.009.028 העתירו אל יהוה ורב מהית קלת אלהים וברד ואשלחה אתכם ולא תספון לעמד׃

9:29b.EXO.009.029 ויאמר אליו משה כצאתי את העיר אפרש את כפי אל יהוה הקלות יחדלון והברד לא יהיה עוד למען תדע כי ליהוה הארץ׃

9:30b.EXO.009.030 ואתה ועבדיך ידעתי כי טרם תיראון מפני יהוה אלהים׃

9:31b.EXO.009.031 והפשתה והשערה נכתה כי השערה אביב והפשתה גבעל׃

9:32b.EXO.009.032 והחטה והכסמת לא נכו כי אפילת הנה׃

9:33b.EXO.009.033 ויצא משה מעם פרעה את העיר ויפרש כפיו אל יהוה ויחדלו הקלות והברד ומטר לא נתך ארצה׃

9:34b.EXO.009.034 וירא פרעה כי חדל המטר והברד והקלת ויסף לחטא ויכבד לבו הוא ועבדיו׃

9:35b.EXO.009.035 ויחזק לב פרעה ולא שלח את בני ישראל כאשר דבר יהוה ביד משה׃

10

10:1b.EXO.010.001 ויאמר יהוה אל משה בא אל פרעה כי אני הכבדתי את לבו ואת לב עבדיו למען שתי אתתי אלה בקרבו׃

10:2b.EXO.010.002 ולמען תספר באזני בנך ובן בנך את אשר התעללתי במצרים ואת אתתי אשר שמתי בם וידעתם כי אני יהוה׃

10:3b.EXO.010.003 ויבא משה ואהרן אל פרעה ויאמרו אליו כה אמר יהוה אלהי העברים עד מתי מאנת לענת מפני שלח עמי ויעבדני׃

10:4b.EXO.010.004 כי אם מאן אתה לשלח את עמי הנני מביא מחר ארבה בגבלך׃

10:5b.EXO.010.005 וכסה את עין הארץ ולא יוכל לראת את הארץ ואכל את יתר הפלטה הנשארת לכם מן הברד ואכל את כל העץ הצמח לכם מן השדה׃

10:6b.EXO.010.006 ומלאו בתיך ובתי כל עבדיך ובתי כל מצרים אשר לא ראו אבתיך ואבות אבתיך מיום היותם על האדמה עד היום הזה ויפן ויצא מעם פרעה׃

10:7b.EXO.010.007 ויאמרו עבדי פרעה אליו עד מתי יהיה זה לנו למוקש שלח את האנשים ויעבדו את יהוה אלהיהם הטרם תדע כי אבדה מצרים׃

10:8b.EXO.010.008 ויושב את משה ואת אהרן אל פרעה ויאמר אלהם לכו עבדו את יהוה אלהיכם מי ומי ההלכים׃

10:9b.EXO.010.009 ויאמר משה בנערינו ובזקנינו נלך בבנינו ובבנותנו בצאננו ובבקרנו נלך כי חג יהוה לנו׃

10:10b.EXO.010.010 ויאמר אלהם יהי כן יהוה עמכם כאשר אשלח אתכם ואת טפכם ראו כי רעה נגד פניכם׃

10:11b.EXO.010.011 לא כן לכו נא הגברים ועבדו את יהוה כי אתה אתם מבקשים ויגרש אתם מאת פני פרעה׃

10:12b.EXO.010.012 ויאמר יהוה אל משה נטה ידך על ארץ מצרים בארבה ויעל על ארץ מצרים ויאכל את כל עשב הארץ את כל אשר השאיר הברד׃

10:13b.EXO.010.013 ויט משה את מטהו על ארץ מצרים ויהוה נהג רוח קדים בארץ כל היום ההוא וכל הלילה הבקר היה ורוח הקדים נשא את הארבה׃

10:14b.EXO.010.014 ויעל הארבה על כל ארץ מצרים וינח בכל גבול מצרים כבד מאד לפניו לא היה כן ארבה כמהו ואחריו לא יהיה כן׃

10:15b.EXO.010.015 ויכס את עין כל הארץ ותחשך הארץ ויאכל את כל עשב הארץ ואת כל פרי העץ אשר הותיר הברד ולא נותר כל ירק בעץ ובעשב השדה בכל ארץ מצרים׃

10:16b.EXO.010.016 וימהר פרעה לקרא למשה ולאהרן ויאמר חטאתי ליהוה אלהיכם ולכם׃

10:17b.EXO.010.017 ועתה שא נא חטאתי אך הפעם והעתירו ליהוה אלהיכם ויסר מעלי רק את המות הזה׃

10:18b.EXO.010.018 ויצא מעם פרעה ויעתר אל יהוה׃

10:19b.EXO.010.019 ויהפך יהוה רוח ים חזק מאד וישא את הארבה ויתקעהו ימה סוף לא נשאר ארבה אחד בכל גבול מצרים׃

10:20b.EXO.010.020 ויחזק יהוה את לב פרעה ולא שלח את בני ישראל׃

10:21b.EXO.010.021 ויאמר יהוה אל משה נטה ידך על השמים ויהי חשך על ארץ מצרים וימש חשך׃

10:22b.EXO.010.022 ויט משה את ידו על השמים ויהי חשך אפלה בכל ארץ מצרים שלשת ימים׃

10:23b.EXO.010.023 לא ראו איש את אחיו ולא קמו איש מתחתיו שלשת ימים ולכל בני ישראל היה אור במושבתם׃

10:24b.EXO.010.024 ויקרא פרעה אל משה ויאמר לכו עבדו את יהוה רק צאנכם ובקרכם יצג גם טפכם ילך עמכם׃

10:25b.EXO.010.025 ויאמר משה גם אתה תתן בידנו זבחים ועלות ועשינו ליהוה אלהינו׃

10:26b.EXO.010.026 וגם מקננו ילך עמנו לא תשאר פרסה כי ממנו נקח לעבד את יהוה אלהינו ואנחנו לא נדע מה נעבד את יהוה עד באנו שמה׃

10:27b.EXO.010.027 ויחזק יהוה את לב פרעה ולא אבה לשלחם׃

10:28b.EXO.010.028 ויאמר לו פרעה לך מעלי השמר לך אל תסף ראות פני כי ביום ראתך פני תמות׃

10:29b.EXO.010.029 ויאמר משה כן דברת לא אסף עוד ראות פניך׃

11

11:1b.EXO.011.001 ויאמר יהוה אל משה עוד נגע אחד אביא על פרעה ועל מצרים אחרי כן ישלח אתכם מזה כשלחו כלה גרש יגרש אתכם מזה׃

11:2b.EXO.011.002 דבר נא באזני העם וישאלו איש מאת רעהו ואשה מאת רעותה כלי כסף וכלי זהב׃

11:3b.EXO.011.003 ויתן יהוה את חן העם בעיני מצרים גם האיש משה גדול מאד בארץ מצרים בעיני עבדי פרעה ובעיני העם׃

11:4b.EXO.011.004 ויאמר משה כה אמר יהוה כחצת הלילה אני יוצא בתוך מצרים׃

11:5b.EXO.011.005 ומת כל בכור בארץ מצרים מבכור פרעה הישב על כסאו עד בכור השפחה אשר אחר הרחים וכל בכור בהמה׃

11:6b.EXO.011.006 והיתה צעקה גדלה בכל ארץ מצרים אשר כמהו לא נהיתה וכמהו לא תסף׃

11:7b.EXO.011.007 ולכל בני ישראל לא יחרץ כלב לשנו למאיש ועד בהמה למען תדעון אשר יפלה יהוה בין מצרים ובין ישראל׃

11:8b.EXO.011.008 וירדו כל עבדיך אלה אלי והשתחוו לי לאמר צא אתה וכל העם אשר ברגליך ואחרי כן אצא ויצא מעם פרעה בחרי אף׃

11:9b.EXO.011.009 ויאמר יהוה אל משה לא ישמע אליכם פרעה למען רבות מופתי בארץ מצרים׃

11:10b.EXO.011.010 ומשה ואהרן עשו את כל המפתים האלה לפני פרעה ויחזק יהוה את לב פרעה ולא שלח את בני ישראל מארצו׃

12

12:1b.EXO.012.001 ויאמר יהוה אל משה ואל אהרן בארץ מצרים לאמר׃

12:2b.EXO.012.002 החדש הזה לכם ראש חדשים ראשון הוא לכם לחדשי השנה׃

12:3b.EXO.012.003 דברו אל כל עדת ישראל לאמר בעשר לחדש הזה ויקחו להם איש שה לבית אבת שה לבית׃

12:4b.EXO.012.004 ואם ימעט הבית מהית משה ולקח הוא ושכנו הקרב אל ביתו במכסת נפשת איש לפי אכלו תכסו על השה׃

12:5b.EXO.012.005 שה תמים זכר בן שנה יהיה לכם מן הכבשים ומן העזים תקחו׃

12:6b.EXO.012.006 והיה לכם למשמרת עד ארבעה עשר יום לחדש הזה ושחטו אתו כל קהל עדת ישראל בין הערבים׃

12:7b.EXO.012.007 ולקחו מן הדם ונתנו על שתי המזוזת ועל המשקוף על הבתים אשר יאכלו אתו בהם׃

12:8b.EXO.012.008 ואכלו את הבשר בלילה הזה צלי אש ומצות על מררים יאכלהו׃

12:9b.EXO.012.009 אל תאכלו ממנו נא ובשל מבשל במים כי אם צלי אש ראשו על כרעיו ועל קרבו׃

12:10b.EXO.012.010 ולא תותירו ממנו עד בקר והנתר ממנו עד בקר באש תשרפו׃

12:11b.EXO.012.011 וככה תאכלו אתו מתניכם חגרים נעליכם ברגליכם ומקלכם בידכם ואכלתם אתו בחפזון פסח הוא ליהוה׃

12:12b.EXO.012.012 ועברתי בארץ מצרים בלילה הזה והכיתי כל בכור בארץ מצרים מאדם ועד בהמה ובכל אלהי מצרים אעשה שפטים אני יהוה׃

12:13b.EXO.012.013 והיה הדם לכם לאת על הבתים אשר אתם שם וראיתי את הדם ופסחתי עלכם ולא יהיה בכם נגף למשחית בהכתי בארץ מצרים׃

12:14b.EXO.012.014 והיה היום הזה לכם לזכרון וחגתם אתו חג ליהוה לדרתיכם חקת עולם תחגהו׃

12:15b.EXO.012.015 שבעת ימים מצות תאכלו אך ביום הראשון תשביתו שאר מבתיכם כי כל אכל חמץ ונכרתה הנפש ההוא מישראל מיום הראשן עד יום השבעי׃

12:16b.EXO.012.016 וביום הראשון מקרא קדש וביום השביעי מקרא קדש יהיה לכם כל מלאכה לא יעשה בהם אך אשר יאכל לכל נפש הוא לבדו יעשה לכם׃

12:17b.EXO.012.017 ושמרתם את המצות כי בעצם היום הזה הוצאתי את צבאותיכם מארץ מצרים ושמרתם את היום הזה לדרתיכם חקת עולם׃

12:18b.EXO.012.018 בראשן בארבעה עשר יום לחדש בערב תאכלו מצת עד יום האחד ועשרים לחדש בערב׃

12:19b.EXO.012.019 שבעת ימים שאר לא ימצא בבתיכם כי כל אכל מחמצת ונכרתה הנפש ההוא מעדת ישראל בגר ובאזרח הארץ׃

12:20b.EXO.012.020 כל מחמצת לא תאכלו בכל מושבתיכם תאכלו מצות׃

12:21b.EXO.012.021 ויקרא משה לכל זקני ישראל ויאמר אלהם משכו וקחו לכם צאן למשפחתיכם ושחטו הפסח׃

12:22b.EXO.012.022 ולקחתם אגדת אזוב וטבלתם בדם אשר בסף והגעתם אל המשקוף ואל שתי המזוזת מן הדם אשר בסף ואתם לא תצאו איש מפתח ביתו עד בקר׃

12:23b.EXO.012.023 ועבר יהוה לנגף את מצרים וראה את הדם על המשקוף ועל שתי המזוזת ופסח יהוה על הפתח ולא יתן המשחית לבא אל בתיכם לנגף׃

12:24b.EXO.012.024 ושמרתם את הדבר הזה לחק לך ולבניך עד עולם׃

12:25b.EXO.012.025 והיה כי תבאו אל הארץ אשר יתן יהוה לכם כאשר דבר ושמרתם את העבדה הזאת׃

12:26b.EXO.012.026 והיה כי יאמרו אליכם בניכם מה העבדה הזאת לכם׃

12:27b.EXO.012.027 ואמרתם זבח פסח הוא ליהוה אשר פסח על בתי בני ישראל במצרים בנגפו את מצרים ואת בתינו הציל ויקד העם וישתחוו׃

12:28b.EXO.012.028 וילכו ויעשו בני ישראל כאשר צוה יהוה את משה ואהרן כן עשו׃

12:29b.EXO.012.029 ויהי בחצי הלילה ויהוה הכה כל בכור בארץ מצרים מבכר פרעה הישב על כסאו עד בכור השבי אשר בבית הבור וכל בכור בהמה׃

12:30b.EXO.012.030 ויקם פרעה לילה הוא וכל עבדיו וכל מצרים ותהי צעקה גדלה במצרים כי אין בית אשר אין שם מת׃

12:31b.EXO.012.031 ויקרא למשה ולאהרן לילה ויאמר קומו צאו מתוך עמי גם אתם גם בני ישראל ולכו עבדו את יהוה כדברכם׃

12:32b.EXO.012.032 גם צאנכם גם בקרכם קחו כאשר דברתם ולכו וברכתם גם אתי׃

12:33b.EXO.012.033 ותחזק מצרים על העם למהר לשלחם מן הארץ כי אמרו כלנו מתים׃

12:34b.EXO.012.034 וישא העם את בצקו טרם יחמץ משארתם צררת בשמלתם על שכמם׃

12:35b.EXO.012.035 ובני ישראל עשו כדבר משה וישאלו ממצרים כלי כסף וכלי זהב ושמלת׃

12:36b.EXO.012.036 ויהוה נתן את חן העם בעיני מצרים וישאלום וינצלו את מצרים׃

12:37b.EXO.012.037 ויסעו בני ישראל מרעמסס סכתה כשש מאות אלף רגלי הגברים לבד מטף׃

12:38b.EXO.012.038 וגם ערב רב עלה אתם וצאן ובקר מקנה כבד מאד׃

12:39b.EXO.012.039 ויאפו את הבצק אשר הוציאו ממצרים עגת מצות כי לא חמץ כי גרשו ממצרים ולא יכלו להתמהמה וגם צדה לא עשו להם׃

12:40b.EXO.012.040 ומושב בני ישראל אשר ישבו במצרים שלשים שנה וארבע מאות שנה׃

12:41b.EXO.012.041 ויהי מקץ שלשים שנה וארבע מאות שנה ויהי בעצם היום הזה יצאו כל צבאות יהוה מארץ מצרים׃

12:42b.EXO.012.042 ליל שמרים הוא ליהוה להוציאם מארץ מצרים הוא הלילה הזה ליהוה שמרים לכל בני ישראל לדרתם׃

12:43b.EXO.012.043 ויאמר יהוה אל משה ואהרן זאת חקת הפסח כל בן נכר לא יאכל בו׃

12:44b.EXO.012.044 וכל עבד איש מקנת כסף ומלתה אתו אז יאכל בו׃

12:45b.EXO.012.045 תושב ושכיר לא יאכל בו׃

12:46b.EXO.012.046 בבית אחד יאכל לא תוציא מן הבית מן הבשר חוצה ועצם לא תשברו בו׃

12:47b.EXO.012.047 כל עדת ישראל יעשו אתו׃

12:48b.EXO.012.048 וכי יגור אתך גר ועשה פסח ליהוה המול לו כל זכר ואז יקרב לעשתו והיה כאזרח הארץ וכל ערל לא יאכל בו׃

12:49b.EXO.012.049 תורה אחת יהיה לאזרח ולגר הגר בתוככם׃

12:50b.EXO.012.050 ויעשו כל בני ישראל כאשר צוה יהוה את משה ואת אהרן כן עשו׃

12:51b.EXO.012.051 ויהי בעצם היום הזה הוציא יהוה את בני ישראל מארץ מצרים על צבאתם׃

13

13:1b.EXO.013.001 וידבר יהוה אל משה לאמר׃

13:2b.EXO.013.002 קדש לי כל בכור פטר כל רחם בבני ישראל באדם ובבהמה לי הוא׃

13:3b.EXO.013.003 ויאמר משה אל העם זכור את היום הזה אשר יצאתם ממצרים מבית עבדים כי בחזק יד הוציא יהוה אתכם מזה ולא יאכל חמץ׃

13:4b.EXO.013.004 היום אתם יצאים בחדש האביב׃

13:5b.EXO.013.005 והיה כי יביאך יהוה אל ארץ הכנעני והחתי והאמרי והחוי והיבוסי אשר נשבע לאבתיך לתת לך ארץ זבת חלב ודבש ועבדת את העבדה הזאת בחדש הזה׃

13:6b.EXO.013.006 שבעת ימים תאכל מצת וביום השביעי חג ליהוה׃

13:7b.EXO.013.007 מצות יאכל את שבעת הימים ולא יראה לך חמץ ולא יראה לך שאר בכל גבלך׃

13:8b.EXO.013.008 והגדת לבנך ביום ההוא לאמר בעבור זה עשה יהוה לי בצאתי ממצרים׃

13:9b.EXO.013.009 והיה לך לאות על ידך ולזכרון בין עיניך למען תהיה תורת יהוה בפיך כי ביד חזקה הוצאך יהוה ממצרים׃

13:10b.EXO.013.010 ושמרת את החקה הזאת למועדה מימים ימימה׃

13:11b.EXO.013.011 והיה כי יבאך יהוה אל ארץ הכנעני כאשר נשבע לך ולאבתיך ונתנה לך׃

13:12b.EXO.013.012 והעברת כל פטר רחם ליהוה וכל פטר שגר בהמה אשר יהיה לך הזכרים ליהוה׃

13:13b.EXO.013.013 וכל פטר חמר תפדה בשה ואם לא תפדה וערפתו וכל בכור אדם בבניך תפדה׃

13:14b.EXO.013.014 והיה כי ישאלך בנך מחר לאמר מה זאת ואמרת אליו בחזק יד הוציאנו יהוה ממצרים מבית עבדים׃

13:15b.EXO.013.015 ויהי כי הקשה פרעה לשלחנו ויהרג יהוה כל בכור בארץ מצרים מבכר אדם ועד בכור בהמה על כן אני זבח ליהוה כל פטר רחם הזכרים וכל בכור בני אפדה׃

13:16b.EXO.013.016 והיה לאות על ידכה ולטוטפת בין עיניך כי בחזק יד הוציאנו יהוה ממצרים׃

13:17b.EXO.013.017 ויהי בשלח פרעה את העם ולא נחם אלהים דרך ארץ פלשתים כי קרוב הוא כי אמר אלהים פן ינחם העם בראתם מלחמה ושבו מצרימה׃

13:18b.EXO.013.018 ויסב אלהים את העם דרך המדבר ים סוף וחמשים עלו בני ישראל מארץ מצרים׃

13:19b.EXO.013.019 ויקח משה את עצמות יוסף עמו כי השבע השביע את בני ישראל לאמר פקד יפקד אלהים אתכם והעליתם את עצמתי מזה אתכם׃

13:20b.EXO.013.020 ויסעו מסכת ויחנו באתם בקצה המדבר׃

13:21b.EXO.013.021 ויהוה הלך לפניהם יומם בעמוד ענן לנחתם הדרך ולילה בעמוד אש להאיר להם ללכת יומם ולילה׃

13:22b.EXO.013.022 לא ימיש עמוד הענן יומם ועמוד האש לילה לפני העם׃

14

14:1b.EXO.014.001 וידבר יהוה אל משה לאמר׃

14:2b.EXO.014.002 דבר אל בני ישראל וישבו ויחנו לפני פי החירת בין מגדל ובין הים לפני בעל צפן נכחו תחנו על הים׃

14:3b.EXO.014.003 ואמר פרעה לבני ישראל נבכים הם בארץ סגר עליהם המדבר׃

14:4b.EXO.014.004 וחזקתי את לב פרעה ורדף אחריהם ואכבדה בפרעה ובכל חילו וידעו מצרים כי אני יהוה ויעשו כן׃

14:5b.EXO.014.005 ויגד למלך מצרים כי ברח העם ויהפך לבב פרעה ועבדיו אל העם ויאמרו מה זאת עשינו כי שלחנו את ישראל מעבדנו׃

14:6b.EXO.014.006 ויאסר את רכבו ואת עמו לקח עמו׃

14:7b.EXO.014.007 ויקח שש מאות רכב בחור וכל רכב מצרים ושלשם על כלו׃

14:8b.EXO.014.008 ויחזק יהוה את לב פרעה מלך מצרים וירדף אחרי בני ישראל ובני ישראל יצאים ביד רמה׃

14:9b.EXO.014.009 וירדפו מצרים אחריהם וישיגו אותם חנים על הים כל סוס רכב פרעה ופרשיו וחילו על פי החירת לפני בעל צפן׃

14:10b.EXO.014.010 ופרעה הקריב וישאו בני ישראל את עיניהם והנה מצרים נסע אחריהם וייראו מאד ויצעקו בני ישראל אל יהוה׃

14:11b.EXO.014.011 ויאמרו אל משה המבלי אין קברים במצרים לקחתנו למות במדבר מה זאת עשית לנו להוציאנו ממצרים׃

14:12b.EXO.014.012 הלא זה הדבר אשר דברנו אליך במצרים לאמר חדל ממנו ונעבדה את מצרים כי טוב לנו עבד את מצרים ממתנו במדבר׃

14:13b.EXO.014.013 ויאמר משה אל העם אל תיראו התיצבו וראו את ישועת יהוה אשר יעשה לכם היום כי אשר ראיתם את מצרים היום לא תסיפו לראתם עוד עד עולם׃

14:14b.EXO.014.014 יהוה ילחם לכם ואתם תחרישון׃

14:15b.EXO.014.015 ויאמר יהוה אל משה מה תצעק אלי דבר אל בני ישראל ויסעו׃

14:16b.EXO.014.016 ואתה הרם את מטך ונטה את ידך על הים ובקעהו ויבאו בני ישראל בתוך הים ביבשה׃

14:17b.EXO.014.017 ואני הנני מחזק את לב מצרים ויבאו אחריהם ואכבדה בפרעה ובכל חילו ברכבו ובפרשיו׃

14:18b.EXO.014.018 וידעו מצרים כי אני יהוה בהכבדי בפרעה ברכבו ובפרשיו׃

14:19b.EXO.014.019 ויסע מלאך האלהים ההלך לפני מחנה ישראל וילך מאחריהם ויסע עמוד הענן מפניהם ויעמד מאחריהם׃

14:20b.EXO.014.020 ויבא בין מחנה מצרים ובין מחנה ישראל ויהי הענן והחשך ויאר את הלילה ולא קרב זה אל זה כל הלילה׃

14:21b.EXO.014.021 ויט משה את ידו על הים ויולך יהוה את הים ברוח קדים עזה כל הלילה וישם את הים לחרבה ויבקעו המים׃

14:22b.EXO.014.022 ויבאו בני ישראל בתוך הים ביבשה והמים להם חמה מימינם ומשמאלם׃

14:23b.EXO.014.023 וירדפו מצרים ויבאו אחריהם כל סוס פרעה רכבו ופרשיו אל תוך הים׃

14:24b.EXO.014.024 ויהי באשמרת הבקר וישקף יהוה אל מחנה מצרים בעמוד אש וענן ויהם את מחנה מצרים׃

14:25b.EXO.014.025 ויסר את אפן מרכבתיו וינהגהו בכבדת ויאמר מצרים אנוסה מפני ישראל כי יהוה נלחם להם במצרים׃

14:26b.EXO.014.026 ויאמר יהוה אל משה נטה את ידך על הים וישבו המים על מצרים על רכבו ועל פרשיו׃

14:27b.EXO.014.027 ויט משה את ידו על הים וישב הים לפנות בקר לאיתנו ומצרים נסים לקראתו וינער יהוה את מצרים בתוך הים׃

14:28b.EXO.014.028 וישבו המים ויכסו את הרכב ואת הפרשים לכל חיל פרעה הבאים אחריהם בים לא נשאר בהם עד אחד׃

14:29b.EXO.014.029 ובני ישראל הלכו ביבשה בתוך הים והמים להם חמה מימינם ומשמאלם׃

14:30b.EXO.014.030 ויושע יהוה ביום ההוא את ישראל מיד מצרים וירא ישראל את מצרים מת על שפת הים׃

14:31b.EXO.014.031 וירא ישראל את היד הגדלה אשר עשה יהוה במצרים וייראו העם את יהוה ויאמינו ביהוה ובמשה עבדו׃

15

15:1b.EXO.015.001 אז ישיר משה ובני ישראל את השירה הזאת ליהוה ויאמרו לאמר אשירה ליהוה כי גאה גאה סוס ורכבו רמה בים׃

15:2b.EXO.015.002 עזי וזמרת יה ויהי לי לישועה זה אלי ואנוהו אלהי אבי וארממנהו׃

15:3b.EXO.015.003 יהוה איש מלחמה יהוה שמו׃

15:4b.EXO.015.004 מרכבת פרעה וחילו ירה בים ומבחר שלשיו טבעו בים סוף׃

15:5b.EXO.015.005 תהמת יכסימו ירדו במצולת כמו אבן׃

15:6b.EXO.015.006 ימינך יהוה נאדרי בכח ימינך יהוה תרעץ אויב׃

15:7b.EXO.015.007 וברב גאונך תהרס קמיך תשלח חרנך יאכלמו כקש׃

15:8b.EXO.015.008 וברוח אפיך נערמו מים נצבו כמו נד נזלים קפאו תהמת בלב ים׃

15:9b.EXO.015.009 אמר אויב ארדף אשיג אחלק שלל תמלאמו נפשי אריק חרבי תורישמו ידי׃

15:10b.EXO.015.010 נשפת ברוחך כסמו ים צללו כעופרת במים אדירים׃

15:11b.EXO.015.011 מי כמכה באלם יהוה מי כמכה נאדר בקדש נורא תהלת עשה פלא׃

15:12b.EXO.015.012 נטית ימינך תבלעמו ארץ׃

15:13b.EXO.015.013 נחית בחסדך עם זו גאלת נהלת בעזך אל נוה קדשך׃

15:14b.EXO.015.014 שמעו עמים ירגזון חיל אחז ישבי פלשת׃

15:15b.EXO.015.015 אז נבהלו אלופי אדום אילי מואב יאחזמו רעד נמגו כל ישבי כנען׃

15:16b.EXO.015.016 תפל עליהם אימתה ופחד בגדל זרועך ידמו כאבן עד יעבר עמך יהוה עד יעבר עם זו קנית׃

15:17b.EXO.015.017 תבאמו ותטעמו בהר נחלתך מכון לשבתך פעלת יהוה מקדש אדני כוננו ידיך׃

15:18b.EXO.015.018 יהוה ימלך לעלם ועד׃

15:19b.EXO.015.019 כי בא סוס פרעה ברכבו ובפרשיו בים וישב יהוה עלהם את מי הים ובני ישראל הלכו ביבשה בתוך הים׃

15:20b.EXO.015.020 ותקח מרים הנביאה אחות אהרן את התף בידה ותצאן כל הנשים אחריה בתפים ובמחלת׃

15:21b.EXO.015.021 ותען להם מרים שירו ליהוה כי גאה גאה סוס ורכבו רמה בים׃

15:22b.EXO.015.022 ויסע משה את ישראל מים סוף ויצאו אל מדבר שור וילכו שלשת ימים במדבר ולא מצאו מים׃

15:23b.EXO.015.023 ויבאו מרתה ולא יכלו לשתת מים ממרה כי מרים הם על כן קרא שמה מרה׃

15:24b.EXO.015.024 וילנו העם על משה לאמר מה נשתה׃

15:25b.EXO.015.025 ויצעק אל יהוה ויורהו יהוה עץ וישלך אל המים וימתקו המים שם שם לו חק ומשפט ושם נסהו׃

15:26b.EXO.015.026 ויאמר אם שמוע תשמע לקול יהוה אלהיך והישר בעיניו תעשה והאזנת למצותיו ושמרת כל חקיו כל המחלה אשר שמתי במצרים לא אשים עליך כי אני יהוה רפאך׃

15:27b.EXO.015.027 ויבאו אילמה ושם שתים עשרה עינת מים ושבעים תמרים ויחנו שם על המים׃

16

16:1b.EXO.016.001 ויסעו מאילם ויבאו כל עדת בני ישראל אל מדבר סין אשר בין אילם ובין סיני בחמשה עשר יום לחדש השני לצאתם מארץ מצרים׃

16:2b.EXO.016.002 וילינו כל עדת בני ישראל על משה ועל אהרן במדבר׃

16:3b.EXO.016.003 ויאמרו אלהם בני ישראל מי יתן מותנו ביד יהוה בארץ מצרים בשבתנו על סיר הבשר באכלנו לחם לשבע כי הוצאתם אתנו אל המדבר הזה להמית את כל הקהל הזה ברעב׃

16:4b.EXO.016.004 ויאמר יהוה אל משה הנני ממטיר לכם לחם מן השמים ויצא העם ולקטו דבר יום ביומו למען אנסנו הילך בתורתי אם לא׃

16:5b.EXO.016.005 והיה ביום הששי והכינו את אשר יביאו והיה משנה על אשר ילקטו יום יום׃

16:6b.EXO.016.006 ויאמר משה ואהרן אל כל בני ישראל ערב וידעתם כי יהוה הוציא אתכם מארץ מצרים׃

16:7b.EXO.016.007 ובקר וראיתם את כבוד יהוה בשמעו את תלנתיכם על יהוה ונחנו מה כי תלונו עלינו׃

16:8b.EXO.016.008 ויאמר משה בתת יהוה לכם בערב בשר לאכל ולחם בבקר לשבע בשמע יהוה את תלנתיכם אשר אתם מלינם עליו ונחנו מה לא עלינו תלנתיכם כי על יהוה׃

16:9b.EXO.016.009 ויאמר משה אל אהרן אמר אל כל עדת בני ישראל קרבו לפני יהוה כי שמע את תלנתיכם׃

16:10b.EXO.016.010 ויהי כדבר אהרן אל כל עדת בני ישראל ויפנו אל המדבר והנה כבוד יהוה נראה בענן׃

16:11b.EXO.016.011 וידבר יהוה אל משה לאמר׃

16:12b.EXO.016.012 שמעתי את תלונת בני ישראל דבר אלהם לאמר בין הערבים תאכלו בשר ובבקר תשבעו לחם וידעתם כי אני יהוה אלהיכם׃

16:13b.EXO.016.013 ויהי בערב ותעל השלו ותכס את המחנה ובבקר היתה שכבת הטל סביב למחנה׃

16:14b.EXO.016.014 ותעל שכבת הטל והנה על פני המדבר דק מחספס דק ככפר על הארץ׃

16:15b.EXO.016.015 ויראו בני ישראל ויאמרו איש אל אחיו מן הוא כי לא ידעו מה הוא ויאמר משה אלהם הוא הלחם אשר נתן יהוה לכם לאכלה׃

16:16b.EXO.016.016 זה הדבר אשר צוה יהוה לקטו ממנו איש לפי אכלו עמר לגלגלת מספר נפשתיכם איש לאשר באהלו תקחו׃

16:17b.EXO.016.017 ויעשו כן בני ישראל וילקטו המרבה והממעיט׃

16:18b.EXO.016.018 וימדו בעמר ולא העדיף המרבה והממעיט לא החסיר איש לפי אכלו לקטו׃

16:19b.EXO.016.019 ויאמר משה אלהם איש אל יותר ממנו עד בקר׃

16:20b.EXO.016.020 ולא שמעו אל משה ויותרו אנשים ממנו עד בקר וירם תולעים ויבאש ויקצף עלהם משה׃

16:21b.EXO.016.021 וילקטו אתו בבקר בבקר איש כפי אכלו וחם השמש ונמס׃

16:22b.EXO.016.022 ויהי ביום הששי לקטו לחם משנה שני העמר לאחד ויבאו כל נשיאי העדה ויגידו למשה׃

16:23b.EXO.016.023 ויאמר אלהם הוא אשר דבר יהוה שבתון שבת קדש ליהוה מחר את אשר תאפו אפו ואת אשר תבשלו בשלו ואת כל העדף הניחו לכם למשמרת עד הבקר׃

16:24b.EXO.016.024 ויניחו אתו עד הבקר כאשר צוה משה ולא הבאיש ורמה לא היתה בו׃

16:25b.EXO.016.025 ויאמר משה אכלהו היום כי שבת היום ליהוה היום לא תמצאהו בשדה׃

16:26b.EXO.016.026 ששת ימים תלקטהו וביום השביעי שבת לא יהיה בו׃

16:27b.EXO.016.027 ויהי ביום השביעי יצאו מן העם ללקט ולא מצאו׃

16:28b.EXO.016.028 ויאמר יהוה אל משה עד אנה מאנתם לשמר מצותי ותורתי׃

16:29b.EXO.016.029 ראו כי יהוה נתן לכם השבת על כן הוא נתן לכם ביום הששי לחם יומים שבו איש תחתיו אל יצא איש ממקמו ביום השביעי׃

16:30b.EXO.016.030 וישבתו העם ביום השבעי׃

16:31b.EXO.016.031 ויקראו בית ישראל את שמו מן והוא כזרע גד לבן וטעמו כצפיחת בדבש׃

16:32b.EXO.016.032 ויאמר משה זה הדבר אשר צוה יהוה מלא העמר ממנו למשמרת לדרתיכם למען יראו את הלחם אשר האכלתי אתכם במדבר בהוציאי אתכם מארץ מצרים׃

16:33b.EXO.016.033 ויאמר משה אל אהרן קח צנצנת אחת ותן שמה מלא העמר מן והנח אתו לפני יהוה למשמרת לדרתיכם׃

16:34b.EXO.016.034 כאשר צוה יהוה אל משה ויניחהו אהרן לפני העדת למשמרת׃

16:35b.EXO.016.035 ובני ישראל אכלו את המן ארבעים שנה עד באם אל ארץ נושבת את המן אכלו עד באם אל קצה ארץ כנען׃

16:36b.EXO.016.036 והעמר עשרית האיפה הוא׃

17

17:1b.EXO.017.001 ויסעו כל עדת בני ישראל ממדבר סין למסעיהם על פי יהוה ויחנו ברפידים ואין מים לשתת העם׃

17:2b.EXO.017.002 וירב העם עם משה ויאמרו תנו לנו מים ונשתה ויאמר להם משה מה תריבון עמדי מה תנסון את יהוה׃

17:3b.EXO.017.003 ויצמא שם העם למים וילן העם על משה ויאמר למה זה העליתנו ממצרים להמית אתי ואת בני ואת מקני בצמא׃

17:4b.EXO.017.004 ויצעק משה אל יהוה לאמר מה אעשה לעם הזה עוד מעט וסקלני׃

17:5b.EXO.017.005 ויאמר יהוה אל משה עבר לפני העם וקח אתך מזקני ישראל ומטך אשר הכית בו את היאר קח בידך והלכת׃

17:6b.EXO.017.006 הנני עמד לפניך שם על הצור בחרב והכית בצור ויצאו ממנו מים ושתה העם ויעש כן משה לעיני זקני ישראל׃

17:7b.EXO.017.007 ויקרא שם המקום מסה ומריבה על ריב בני ישראל ועל נסתם את יהוה לאמר היש יהוה בקרבנו אם אין׃

17:8b.EXO.017.008 ויבא עמלק וילחם עם ישראל ברפידם׃

17:9b.EXO.017.009 ויאמר משה אל יהושע בחר לנו אנשים וצא הלחם בעמלק מחר אנכי נצב על ראש הגבעה ומטה האלהים בידי׃

17:10b.EXO.017.010 ויעש יהושע כאשר אמר לו משה להלחם בעמלק ומשה אהרן וחור עלו ראש הגבעה׃

17:11b.EXO.017.011 והיה כאשר ירים משה ידו וגבר ישראל וכאשר יניח ידו וגבר עמלק׃

17:12b.EXO.017.012 וידי משה כבדים ויקחו אבן וישימו תחתיו וישב עליה ואהרן וחור תמכו בידיו מזה אחד ומזה אחד ויהי ידיו אמונה עד בא השמש׃

17:13b.EXO.017.013 ויחלש יהושע את עמלק ואת עמו לפי חרב׃

17:14b.EXO.017.014 ויאמר יהוה אל משה כתב זאת זכרון בספר ושים באזני יהושע כי מחה אמחה את זכר עמלק מתחת השמים׃

17:15b.EXO.017.015 ויבן משה מזבח ויקרא שמו יהוה נסי׃

17:16b.EXO.017.016 ויאמר כי יד על כס יה מלחמה ליהוה בעמלק מדר דר׃

18

18:1b.EXO.018.001 וישמע יתרו כהן מדין חתן משה את כל אשר עשה אלהים למשה ולישראל עמו כי הוציא יהוה את ישראל ממצרים׃

18:2b.EXO.018.002 ויקח יתרו חתן משה את צפרה אשת משה אחר שלוחיה׃

18:3b.EXO.018.003 ואת שני בניה אשר שם האחד גרשם כי אמר גר הייתי בארץ נכריה׃

18:4b.EXO.018.004 ושם האחד אליעזר כי אלהי אבי בעזרי ויצלני מחרב פרעה׃

18:5b.EXO.018.005 ויבא יתרו חתן משה ובניו ואשתו אל משה אל המדבר אשר הוא חנה שם הר האלהים׃

18:6b.EXO.018.006 ויאמר אל משה אני חתנך יתרו בא אליך ואשתך ושני בניה עמה׃

18:7b.EXO.018.007 ויצא משה לקראת חתנו וישתחו וישק לו וישאלו איש לרעהו לשלום ויבאו האהלה׃

18:8b.EXO.018.008 ויספר משה לחתנו את כל אשר עשה יהוה לפרעה ולמצרים על אודת ישראל את כל התלאה אשר מצאתם בדרך ויצלם יהוה׃

18:9b.EXO.018.009 ויחד יתרו על כל הטובה אשר עשה יהוה לישראל אשר הצילו מיד מצרים׃

18:10b.EXO.018.010 ויאמר יתרו ברוך יהוה אשר הציל אתכם מיד מצרים ומיד פרעה אשר הציל את העם מתחת יד מצרים׃

18:11b.EXO.018.011 עתה ידעתי כי גדול יהוה מכל האלהים כי בדבר אשר זדו עליהם׃

18:12b.EXO.018.012 ויקח יתרו חתן משה עלה וזבחים לאלהים ויבא אהרן וכל זקני ישראל לאכל לחם עם חתן משה לפני האלהים׃

18:13b.EXO.018.013 ויהי ממחרת וישב משה לשפט את העם ויעמד העם על משה מן הבקר עד הערב׃

18:14b.EXO.018.014 וירא חתן משה את כל אשר הוא עשה לעם ויאמר מה הדבר הזה אשר אתה עשה לעם מדוע אתה יושב לבדך וכל העם נצב עליך מן בקר עד ערב׃

18:15b.EXO.018.015 ויאמר משה לחתנו כי יבא אלי העם לדרש אלהים׃

18:16b.EXO.018.016 כי יהיה להם דבר בא אלי ושפטתי בין איש ובין רעהו והודעתי את חקי האלהים ואת תורתיו׃

18:17b.EXO.018.017 ויאמר חתן משה אליו לא טוב הדבר אשר אתה עשה׃

18:18b.EXO.018.018 נבל תבל גם אתה גם העם הזה אשר עמך כי כבד ממך הדבר לא תוכל עשהו לבדך׃

18:19b.EXO.018.019 עתה שמע בקלי איעצך ויהי אלהים עמך היה אתה לעם מול האלהים והבאת אתה את הדברים אל האלהים׃

18:20b.EXO.018.020 והזהרתה אתהם את החקים ואת התורת והודעת להם את הדרך ילכו בה ואת המעשה אשר יעשון׃

18:21b.EXO.018.021 ואתה תחזה מכל העם אנשי חיל יראי אלהים אנשי אמת שנאי בצע ושמת עלהם שרי אלפים שרי מאות שרי חמשים ושרי עשרת׃

18:22b.EXO.018.022 ושפטו את העם בכל עת והיה כל הדבר הגדל יביאו אליך וכל הדבר הקטן ישפטו הם והקל מעליך ונשאו אתך׃

18:23b.EXO.018.023 אם את הדבר הזה תעשה וצוך אלהים ויכלת עמד וגם כל העם הזה על מקמו יבא בשלום׃

18:24b.EXO.018.024 וישמע משה לקול חתנו ויעש כל אשר אמר׃

18:25b.EXO.018.025 ויבחר משה אנשי חיל מכל ישראל ויתן אתם ראשים על העם שרי אלפים שרי מאות שרי חמשים ושרי עשרת׃

18:26b.EXO.018.026 ושפטו את העם בכל עת את הדבר הקשה יביאון אל משה וכל הדבר הקטן ישפוטו הם׃

18:27b.EXO.018.027 וישלח משה את חתנו וילך לו אל ארצו׃

19

19:1b.EXO.019.001 בחדש השלישי לצאת בני ישראל מארץ מצרים ביום הזה באו מדבר סיני׃

19:2b.EXO.019.002 ויסעו מרפידים ויבאו מדבר סיני ויחנו במדבר ויחן שם ישראל נגד ההר׃

19:3b.EXO.019.003 ומשה עלה אל האלהים ויקרא אליו יהוה מן ההר לאמר כה תאמר לבית יעקב ותגיד לבני ישראל׃

19:4b.EXO.019.004 אתם ראיתם אשר עשיתי למצרים ואשא אתכם על כנפי נשרים ואבא אתכם אלי׃

19:5b.EXO.019.005 ועתה אם שמוע תשמעו בקלי ושמרתם את בריתי והייתם לי סגלה מכל העמים כי לי כל הארץ׃

19:6b.EXO.019.006 ואתם תהיו לי ממלכת כהנים וגוי קדוש אלה הדברים אשר תדבר אל בני ישראל׃

19:7b.EXO.019.007 ויבא משה ויקרא לזקני העם וישם לפניהם את כל הדברים האלה אשר צוהו יהוה׃

19:8b.EXO.019.008 ויענו כל העם יחדו ויאמרו כל אשר דבר יהוה נעשה וישב משה את דברי העם אל יהוה׃

19:9b.EXO.019.009 ויאמר יהוה אל משה הנה אנכי בא אליך בעב הענן בעבור ישמע העם בדברי עמך וגם בך יאמינו לעולם ויגד משה את דברי העם אל יהוה׃

19:10b.EXO.019.010 ויאמר יהוה אל משה לך אל העם וקדשתם היום ומחר וכבסו שמלתם׃

19:11b.EXO.019.011 והיו נכנים ליום השלישי כי ביום השלישי ירד יהוה לעיני כל העם על הר סיני׃

19:12b.EXO.019.012 והגבלת את העם סביב לאמר השמרו לכם עלות בהר ונגע בקצהו כל הנגע בהר מות יומת׃

19:13b.EXO.019.013 לא תגע בו יד כי סקול יסקל או ירה יירה אם בהמה אם איש לא יחיה במשך היבל המה יעלו בהר׃

19:14b.EXO.019.014 וירד משה מן ההר אל העם ויקדש את העם ויכבסו שמלתם׃

19:15b.EXO.019.015 ויאמר אל העם היו נכנים לשלשת ימים אל תגשו אל אשה׃

19:16b.EXO.019.016 ויהי ביום השלישי בהית הבקר ויהי קלת וברקים וענן כבד על ההר וקל שפר חזק מאד ויחרד כל העם אשר במחנה׃

19:17b.EXO.019.017 ויוצא משה את העם לקראת האלהים מן המחנה ויתיצבו בתחתית ההר׃

19:18b.EXO.019.018 והר סיני עשן כלו מפני אשר ירד עליו יהוה באש ויעל עשנו כעשן הכבשן ויחרד כל ההר מאד׃

19:19b.EXO.019.019 ויהי קול השופר הולך וחזק מאד משה ידבר והאלהים יעננו בקול׃

19:20b.EXO.019.020 וירד יהוה על הר סיני אל ראש ההר ויקרא יהוה למשה אל ראש ההר ויעל משה׃

19:21b.EXO.019.021 ויאמר יהוה אל משה רד העד בעם פן יהרסו אל יהוה לראות ונפל ממנו רב׃

19:22b.EXO.019.022 וגם הכהנים הנגשים אל יהוה יתקדשו פן יפרץ בהם יהוה׃

19:23b.EXO.019.023 ויאמר משה אל יהוה לא יוכל העם לעלת אל הר סיני כי אתה העדתה בנו לאמר הגבל את ההר וקדשתו׃

19:24b.EXO.019.024 ויאמר אליו יהוה לך רד ועלית אתה ואהרן עמך והכהנים והעם אל יהרסו לעלת אל יהוה פן יפרץ בם׃

19:25b.EXO.019.025 וירד משה אל העם ויאמר אלהם׃

20

20:1b.EXO.020.001 וידבר אלהים את כל הדברים האלה לאמר׃

20:2b.EXO.020.002 אנכי יהוה אלהיך אשר הוצאתיך מארץ מצרים מבית עבדים׃

20:3b.EXO.020.003 לא יהיה לך אלהים אחרים על פני׃

20:4b.EXO.020.004 לא תעשה לך פסל וכל תמונה אשר בשמים ממעל ואשר בארץ מתחת ואשר במים מתחת לארץ׃

20:5b.EXO.020.005 לא תשתחוה להם ולא תעבדם כי אנכי יהוה אלהיך אל קנא פקד עון אבת על בנים על שלשים ועל רבעים לשנאי׃

20:6b.EXO.020.006 ועשה חסד לאלפים לאהבי ולשמרי מצותי׃

20:7b.EXO.020.007 לא תשא את שם יהוה אלהיך לשוא כי לא ינקה יהוה את אשר ישא את שמו לשוא׃

20:8b.EXO.020.008 זכור את יום השבת לקדשו׃

20:9b.EXO.020.009 ששת ימים תעבד ועשית כל מלאכתך׃

20:10b.EXO.020.010 ויום השביעי שבת ליהוה אלהיך לא תעשה כל מלאכה אתה ובנך ובתך עבדך ואמתך ובהמתך וגרך אשר בשעריך׃

20:11b.EXO.020.011 כי ששת ימים עשה יהוה את השמים ואת הארץ את הים ואת כל אשר בם וינח ביום השביעי על כן ברך יהוה את יום השבת ויקדשהו׃

20:12b.EXO.020.012 כבד את אביך ואת אמך למען יארכון ימיך על האדמה אשר יהוה אלהיך נתן לך׃

20:13b.EXO.020.013 לא תרצח׃

20:14b.EXO.020.014 לא תנאף׃

20:15b.EXO.020.015 לא תגנב׃

20:16b.EXO.020.016 לא תענה ברעך עד שקר׃

20:17b.EXO.020.017 לא תחמד בית רעך לא תחמד אשת רעך ועבדו ואמתו ושורו וחמרו וכל אשר לרעך׃

20:18b.EXO.020.018 וכל העם ראים את הקולת ואת הלפידם ואת קול השפר ואת ההר עשן וירא העם וינעו ויעמדו מרחק׃

20:19b.EXO.020.019 ויאמרו אל משה דבר אתה עמנו ונשמעה ואל ידבר עמנו אלהים פן נמות׃

20:20b.EXO.020.020 ויאמר משה אל העם אל תיראו כי לבעבור נסות אתכם בא האלהים ובעבור תהיה יראתו על פניכם לבלתי תחטאו׃

20:21b.EXO.020.021 ויעמד העם מרחק ומשה נגש אל הערפל אשר שם האלהים׃

20:22b.EXO.020.022 ויאמר יהוה אל משה כה תאמר אל בני ישראל אתם ראיתם כי מן השמים דברתי עמכם׃

20:23b.EXO.020.023 לא תעשון אתי אלהי כסף ואלהי זהב לא תעשו לכם׃

20:24b.EXO.020.024 מזבח אדמה תעשה לי וזבחת עליו את עלתיך ואת שלמיך את צאנך ואת בקרך בכל המקום אשר אזכיר את שמי אבוא אליך וברכתיך׃

20:25b.EXO.020.025 ואם מזבח אבנים תעשה לי לא תבנה אתהן גזית כי חרבך הנפת עליה ותחללה׃

20:26b.EXO.020.026 ולא תעלה במעלת על מזבחי אשר לא תגלה ערותך עליו׃

21

21:1b.EXO.021.001 ואלה המשפטים אשר תשים לפניהם׃

21:2b.EXO.021.002 כי תקנה עבד עברי שש שנים יעבד ובשבעת יצא לחפשי חנם׃

21:3b.EXO.021.003 אם בגפו יבא בגפו יצא אם בעל אשה הוא ויצאה אשתו עמו׃

21:4b.EXO.021.004 אם אדניו יתן לו אשה וילדה לו בנים או בנות האשה וילדיה תהיה לאדניה והוא יצא בגפו׃

21:5b.EXO.021.005 ואם אמר יאמר העבד אהבתי את אדני את אשתי ואת בני לא אצא חפשי׃

21:6b.EXO.021.006 והגישו אדניו אל האלהים והגישו אל הדלת או אל המזוזה ורצע אדניו את אזנו במרצע ועבדו לעלם׃

21:7b.EXO.021.007 וכי ימכר איש את בתו לאמה לא תצא כצאת העבדים׃

21:8b.EXO.021.008 אם רעה בעיני אדניה אשר לא יעדה והפדה לעם נכרי לא ימשל למכרה בבגדו בה׃

21:9b.EXO.021.009 ואם לבנו ייעדנה כמשפט הבנות יעשה לה׃

21:10b.EXO.021.010 אם אחרת יקח לו שארה כסותה וענתה לא יגרע׃

21:11b.EXO.021.011 ואם שלש אלה לא יעשה לה ויצאה חנם אין כסף׃

21:12b.EXO.021.012 מכה איש ומת מות יומת׃

21:13b.EXO.021.013 ואשר לא צדה והאלהים אנה לידו ושמתי לך מקום אשר ינוס שמה׃

21:14b.EXO.021.014 וכי יזד איש על רעהו להרגו בערמה מעם מזבחי תקחנו למות׃

21:15b.EXO.021.015 ומכה אביו ואמו מות יומת׃

21:16b.EXO.021.016 וגנב איש ומכרו ונמצא בידו מות יומת׃

21:17b.EXO.021.017 ומקלל אביו ואמו מות יומת׃

21:18b.EXO.021.018 וכי יריבן אנשים והכה איש את רעהו באבן או באגרף ולא ימות ונפל למשכב׃

21:19b.EXO.021.019 אם יקום והתהלך בחוץ על משענתו ונקה המכה רק שבתו יתן ורפא ירפא׃

21:20b.EXO.021.020 וכי יכה איש את עבדו או את אמתו בשבט ומת תחת ידו נקם ינקם׃

21:21b.EXO.021.021 אך אם יום או יומים יעמד לא יקם כי כספו הוא׃

21:22b.EXO.021.022 וכי ינצו אנשים ונגפו אשה הרה ויצאו ילדיה ולא יהיה אסון ענוש יענש כאשר ישית עליו בעל האשה ונתן בפללים׃

21:23b.EXO.021.023 ואם אסון יהיה ונתתה נפש תחת נפש׃

21:24b.EXO.021.024 עין תחת עין שן תחת שן יד תחת יד רגל תחת רגל׃

21:25b.EXO.021.025 כויה תחת כויה פצע תחת פצע חבורה תחת חבורה׃

21:26b.EXO.021.026 וכי יכה איש את עין עבדו או את עין אמתו ושחתה לחפשי ישלחנו תחת עינו׃

21:27b.EXO.021.027 ואם שן עבדו או שן אמתו יפיל לחפשי ישלחנו תחת שנו׃

21:28b.EXO.021.028 וכי יגח שור את איש או את אשה ומת סקול יסקל השור ולא יאכל את בשרו ובעל השור נקי׃

21:29b.EXO.021.029 ואם שור נגח הוא מתמל שלשם והועד בבעליו ולא ישמרנו והמית איש או אשה השור יסקל וגם בעליו יומת׃

21:30b.EXO.021.030 אם כפר יושת עליו ונתן פדין נפשו ככל אשר יושת עליו׃

21:31b.EXO.021.031 או בן יגח או בת יגח כמשפט הזה יעשה לו׃

21:32b.EXO.021.032 אם עבד יגח השור או אמה כסף שלשים שקלים יתן לאדניו והשור יסקל׃

21:33b.EXO.021.033 וכי יפתח איש בור או כי יכרה איש בר ולא יכסנו ונפל שמה שור או חמור׃

21:34b.EXO.021.034 בעל הבור ישלם כסף ישיב לבעליו והמת יהיה לו׃

21:35b.EXO.021.035 וכי יגף שור איש את שור רעהו ומת ומכרו את השור החי וחצו את כספו וגם את המת יחצון׃

21:36b.EXO.021.036 או נודע כי שור נגח הוא מתמול שלשם ולא ישמרנו בעליו שלם ישלם שור תחת השור והמת יהיה לו׃

22

22:1b.EXO.022.001 כי יגנב איש שור או שה וטבחו או מכרו חמשה בקר ישלם תחת השור וארבע צאן תחת השה׃

22:2b.EXO.022.002 אם במחתרת ימצא הגנב והכה ומת אין לו דמים׃

22:3b.EXO.022.003 אם זרחה השמש עליו דמים לו שלם ישלם אם אין לו ונמכר בגנבתו׃

22:4b.EXO.022.004 אם המצא תמצא בידו הגנבה משור עד חמור עד שה חיים שנים ישלם׃

22:5b.EXO.022.005 כי יבער איש שדה או כרם ושלח את בעירה ובער בשדה אחר מיטב שדהו ומיטב כרמו ישלם׃

22:6b.EXO.022.006 כי תצא אש ומצאה קצים ונאכל גדיש או הקמה או השדה שלם ישלם המבער את הבערה׃

22:7b.EXO.022.007 כי יתן איש אל רעהו כסף או כלים לשמר וגנב מבית האיש אם ימצא הגנב ישלם שנים׃

22:8b.EXO.022.008 אם לא ימצא הגנב ונקרב בעל הבית אל האלהים אם לא שלח ידו במלאכת רעהו׃

22:9b.EXO.022.009 על כל דבר פשע על שור על חמור על שה על שלמה על כל אבדה אשר יאמר כי הוא זה עד האלהים יבא דבר שניהם אשר ירשיען אלהים ישלם שנים לרעהו׃

22:10b.EXO.022.010 כי יתן איש אל רעהו חמור או שור או שה וכל בהמה לשמר ומת או נשבר או נשבה אין ראה׃

22:11b.EXO.022.011 שבעת יהוה תהיה בין שניהם אם לא שלח ידו במלאכת רעהו ולקח בעליו ולא ישלם׃

22:12b.EXO.022.012 ואם גנב יגנב מעמו ישלם לבעליו׃

22:13b.EXO.022.013 אם טרף יטרף יבאהו עד הטרפה לא ישלם׃

22:14b.EXO.022.014 וכי ישאל איש מעם רעהו ונשבר או מת בעליו אין עמו שלם ישלם׃

22:15b.EXO.022.015 אם בעליו עמו לא ישלם אם שכיר הוא בא בשכרו׃

22:16b.EXO.022.016 וכי יפתה איש בתולה אשר לא ארשה ושכב עמה מהר ימהרנה לו לאשה׃

22:17b.EXO.022.017 אם מאן ימאן אביה לתתה לו כסף ישקל כמהר הבתולת׃

22:18b.EXO.022.018 מכשפה לא תחיה׃

22:19b.EXO.022.019 כל שכב עם בהמה מות יומת׃

22:20b.EXO.022.020 זבח לאלהים יחרם בלתי ליהוה לבדו׃

22:21b.EXO.022.021 וגר לא תונה ולא תלחצנו כי גרים הייתם בארץ מצרים׃

22:22b.EXO.022.022 כל אלמנה ויתום לא תענון׃

22:23b.EXO.022.023 אם ענה תענה אתו כי אם צעק יצעק אלי שמע אשמע צעקתו׃

22:24b.EXO.022.024 וחרה אפי והרגתי אתכם בחרב והיו נשיכם אלמנות ובניכם יתמים׃

22:25b.EXO.022.025 אם כסף תלוה את עמי את העני עמך לא תהיה לו כנשה לא תשימון עליו נשך׃

22:26b.EXO.022.026 אם חבל תחבל שלמת רעך עד בא השמש תשיבנו לו׃

22:27b.EXO.022.027 כי הוא כסותה לבדה הוא שמלתו לערו במה ישכב והיה כי יצעק אלי ושמעתי כי חנון אני׃

22:28b.EXO.022.028 אלהים לא תקלל ונשיא בעמך לא תאר׃

22:29b.EXO.022.029 מלאתך ודמעך לא תאחר בכור בניך תתן לי׃

22:30b.EXO.022.030 כן תעשה לשרך לצאנך שבעת ימים יהיה עם אמו ביום השמיני תתנו לי׃

22:31b.EXO.022.031 ואנשי קדש תהיון לי ובשר בשדה טרפה לא תאכלו לכלב תשלכון אתו׃

23

23:1b.EXO.023.001 לא תשא שמע שוא אל תשת ידך עם רשע להית עד חמס׃

23:2b.EXO.023.002 לא תהיה אחרי רבים לרעת ולא תענה על רב לנטת אחרי רבים להטת׃

23:3b.EXO.023.003 ודל לא תהדר בריבו׃

23:4b.EXO.023.004 כי תפגע שור איבך או חמרו תעה השב תשיבנו לו׃

23:5b.EXO.023.005 כי תראה חמור שנאך רבץ תחת משאו וחדלת מעזב לו עזב תעזב עמו׃

23:6b.EXO.023.006 לא תטה משפט אבינך בריבו׃

23:7b.EXO.023.007 מדבר שקר תרחק ונקי וצדיק אל תהרג כי לא אצדיק רשע׃

23:8b.EXO.023.008 ושחד לא תקח כי השחד יעור פקחים ויסלף דברי צדיקים׃

23:9b.EXO.023.009 וגר לא תלחץ ואתם ידעתם את נפש הגר כי גרים הייתם בארץ מצרים׃

23:10b.EXO.023.010 ושש שנים תזרע את ארצך ואספת את תבואתה׃

23:11b.EXO.023.011 והשביעת תשמטנה ונטשתה ואכלו אביני עמך ויתרם תאכל חית השדה כן תעשה לכרמך לזיתך׃

23:12b.EXO.023.012 ששת ימים תעשה מעשיך וביום השביעי תשבת למען ינוח שורך וחמרך וינפש בן אמתך והגר׃

23:13b.EXO.023.013 ובכל אשר אמרתי אליכם תשמרו ושם אלהים אחרים לא תזכירו לא ישמע על פיך׃

23:14b.EXO.023.014 שלש רגלים תחג לי בשנה׃

23:15b.EXO.023.015 את חג המצות תשמר שבעת ימים תאכל מצות כאשר צויתך למועד חדש האביב כי בו יצאת ממצרים ולא יראו פני ריקם׃

23:16b.EXO.023.016 וחג הקציר בכורי מעשיך אשר תזרע בשדה וחג האסף בצאת השנה באספך את מעשיך מן השדה׃

23:17b.EXO.023.017 שלש פעמים בשנה יראה כל זכורך אל פני האדן יהוה׃

23:18b.EXO.023.018 לא תזבח על חמץ דם זבחי ולא ילין חלב חגי עד בקר׃

23:19b.EXO.023.019 ראשית בכורי אדמתך תביא בית יהוה אלהיך לא תבשל גדי בחלב אמו׃

23:20b.EXO.023.020 הנה אנכי שלח מלאך לפניך לשמרך בדרך ולהביאך אל המקום אשר הכנתי׃

23:21b.EXO.023.021 השמר מפניו ושמע בקלו אל תמר בו כי לא ישא לפשעכם כי שמי בקרבו׃

23:22b.EXO.023.022 כי אם שמע תשמע בקלו ועשית כל אשר אדבר ואיבתי את איביך וצרתי את צרריך׃

23:23b.EXO.023.023 כי ילך מלאכי לפניך והביאך אל האמרי והחתי והפרזי והכנעני החוי והיבוסי והכחדתיו׃

23:24b.EXO.023.024 לא תשתחוה לאלהיהם ולא תעבדם ולא תעשה כמעשיהם כי הרס תהרסם ושבר תשבר מצבתיהם׃

23:25b.EXO.023.025 ועבדתם את יהוה אלהיכם וברך את לחמך ואת מימיך והסרתי מחלה מקרבך׃

23:26b.EXO.023.026 לא תהיה משכלה ועקרה בארצך את מספר ימיך אמלא׃

23:27b.EXO.023.027 את אימתי אשלח לפניך והמתי את כל העם אשר תבא בהם ונתתי את כל איביך אליך ערף׃

23:28b.EXO.023.028 ושלחתי את הצרעה לפניך וגרשה את החוי את הכנעני ואת החתי מלפניך׃

23:29b.EXO.023.029 לא אגרשנו מפניך בשנה אחת פן תהיה הארץ שממה ורבה עליך חית השדה׃

23:30b.EXO.023.030 מעט מעט אגרשנו מפניך עד אשר תפרה ונחלת את הארץ׃

23:31b.EXO.023.031 ושתי את גבלך מים סוף ועד ים פלשתים וממדבר עד הנהר כי אתן בידכם את ישבי הארץ וגרשתמו מפניך׃

23:32b.EXO.023.032 לא תכרת להם ולאלהיהם ברית׃

23:33b.EXO.023.033 לא ישבו בארצך פן יחטיאו אתך לי כי תעבד את אלהיהם כי יהיה לך למוקש׃

24

24:1b.EXO.024.001 ואל משה אמר עלה אל יהוה אתה ואהרן נדב ואביהוא ושבעים מזקני ישראל והשתחויתם מרחק׃

24:2b.EXO.024.002 ונגש משה לבדו אל יהוה והם לא יגשו והעם לא יעלו עמו׃

24:3b.EXO.024.003 ויבא משה ויספר לעם את כל דברי יהוה ואת כל המשפטים ויען כל העם קול אחד ויאמרו כל הדברים אשר דבר יהוה נעשה׃

24:4b.EXO.024.004 ויכתב משה את כל דברי יהוה וישכם בבקר ויבן מזבח תחת ההר ושתים עשרה מצבה לשנים עשר שבטי ישראל׃

24:5b.EXO.024.005 וישלח את נערי בני ישראל ויעלו עלת ויזבחו זבחים שלמים ליהוה פרים׃

24:6b.EXO.024.006 ויקח משה חצי הדם וישם באגנת וחצי הדם זרק על המזבח׃

24:7b.EXO.024.007 ויקח ספר הברית ויקרא באזני העם ויאמרו כל אשר דבר יהוה נעשה ונשמע׃

24:8b.EXO.024.008 ויקח משה את הדם ויזרק על העם ויאמר הנה דם הברית אשר כרת יהוה עמכם על כל הדברים האלה׃

24:9b.EXO.024.009 ויעל משה ואהרן נדב ואביהוא ושבעים מזקני ישראל׃

24:10b.EXO.024.010 ויראו את אלהי ישראל ותחת רגליו כמעשה לבנת הספיר וכעצם השמים לטהר׃

24:11b.EXO.024.011 ואל אצילי בני ישראל לא שלח ידו ויחזו את האלהים ויאכלו וישתו׃

24:12b.EXO.024.012 ויאמר יהוה אל משה עלה אלי ההרה והיה שם ואתנה לך את לחת האבן והתורה והמצוה אשר כתבתי להורתם׃

24:13b.EXO.024.013 ויקם משה ויהושע משרתו ויעל משה אל הר האלהים׃

24:14b.EXO.024.014 ואל הזקנים אמר שבו לנו בזה עד אשר נשוב אליכם והנה אהרן וחור עמכם מי בעל דברים יגש אלהם׃

24:15b.EXO.024.015 ויעל משה אל ההר ויכס הענן את ההר׃

24:16b.EXO.024.016 וישכן כבוד יהוה על הר סיני ויכסהו הענן ששת ימים ויקרא אל משה ביום השביעי מתוך הענן׃

24:17b.EXO.024.017 ומראה כבוד יהוה כאש אכלת בראש ההר לעיני בני ישראל׃

24:18b.EXO.024.018 ויבא משה בתוך הענן ויעל אל ההר ויהי משה בהר ארבעים יום וארבעים לילה׃

25

25:1b.EXO.025.001 וידבר יהוה אל משה לאמר׃

25:2b.EXO.025.002 דבר אל בני ישראל ויקחו לי תרומה מאת כל איש אשר ידבנו לבו תקחו את תרומתי׃

25:3b.EXO.025.003 וזאת התרומה אשר תקחו מאתם זהב וכסף ונחשת׃

25:4b.EXO.025.004 ותכלת וארגמן ותולעת שני ושש ועזים׃

25:5b.EXO.025.005 וערת אילם מאדמים וערת תחשים ועצי שטים׃

25:6b.EXO.025.006 שמן למאר בשמים לשמן המשחה ולקטרת הסמים׃

25:7b.EXO.025.007 אבני שהם ואבני מלאים לאפד ולחשן׃

25:8b.EXO.025.008 ועשו לי מקדש ושכנתי בתוכם׃

25:9b.EXO.025.009 ככל אשר אני מראה אותך את תבנית המשכן ואת תבנית כל כליו וכן תעשו׃

25:10b.EXO.025.010 ועשו ארון עצי שטים אמתים וחצי ארכו ואמה וחצי רחבו ואמה וחצי קמתו׃

25:11b.EXO.025.011 וצפית אתו זהב טהור מבית ומחוץ תצפנו ועשית עליו זר זהב סביב׃

25:12b.EXO.025.012 ויצקת לו ארבע טבעת זהב ונתתה על ארבע פעמתיו ושתי טבעת על צלעו האחת ושתי טבעת על צלעו השנית׃

25:13b.EXO.025.013 ועשית בדי עצי שטים וצפית אתם זהב׃

25:14b.EXO.025.014 והבאת את הבדים בטבעת על צלעת הארן לשאת את הארן בהם׃

25:15b.EXO.025.015 בטבעת הארן יהיו הבדים לא יסרו ממנו׃

25:16b.EXO.025.016 ונתת אל הארן את העדת אשר אתן אליך׃

25:17b.EXO.025.017 ועשית כפרת זהב טהור אמתים וחצי ארכה ואמה וחצי רחבה׃

25:18b.EXO.025.018 ועשית שנים כרבים זהב מקשה תעשה אתם משני קצות הכפרת׃

25:19b.EXO.025.019 ועשה כרוב אחד מקצה מזה וכרוב אחד מקצה מזה מן הכפרת תעשו את הכרבים על שני קצותיו׃

25:20b.EXO.025.020 והיו הכרבים פרשי כנפים למעלה סככים בכנפיהם על הכפרת ופניהם איש אל אחיו אל הכפרת יהיו פני הכרבים׃

25:21b.EXO.025.021 ונתת את הכפרת על הארן מלמעלה ואל הארן תתן את העדת אשר אתן אליך׃

25:22b.EXO.025.022 ונועדתי לך שם ודברתי אתך מעל הכפרת מבין שני הכרבים אשר על ארן העדת את כל אשר אצוה אותך אל בני ישראל׃

25:23b.EXO.025.023 ועשית שלחן עצי שטים אמתים ארכו ואמה רחבו ואמה וחצי קמתו׃

25:24b.EXO.025.024 וצפית אתו זהב טהור ועשית לו זר זהב סביב׃

25:25b.EXO.025.025 ועשית לו מסגרת טפח סביב ועשית זר זהב למסגרתו סביב׃

25:26b.EXO.025.026 ועשית לו ארבע טבעת זהב ונתת את הטבעת על ארבע הפאת אשר לארבע רגליו׃

25:27b.EXO.025.027 לעמת המסגרת תהיין הטבעת לבתים לבדים לשאת את השלחן׃

25:28b.EXO.025.028 ועשית את הבדים עצי שטים וצפית אתם זהב ונשא בם את השלחן׃

25:29b.EXO.025.029 ועשית קערתיו וכפתיו וקשותיו ומנקיתיו אשר יסך בהן זהב טהור תעשה אתם׃

25:30b.EXO.025.030 ונתת על השלחן לחם פנים לפני תמיד׃

25:31b.EXO.025.031 ועשית מנרת זהב טהור מקשה תעשה המנורה ירכה וקנה גביעיה כפתריה ופרחיה ממנה יהיו׃

25:32b.EXO.025.032 וששה קנים יצאים מצדיה שלשה קני מנרה מצדה האחד ושלשה קני מנרה מצדה השני׃

25:33b.EXO.025.033 שלשה גבעים משקדים בקנה האחד כפתר ופרח ושלשה גבעים משקדים בקנה האחד כפתר ופרח כן לששת הקנים היצאים מן המנרה׃

25:34b.EXO.025.034 ובמנרה ארבעה גבעים משקדים כפתריה ופרחיה׃

25:35b.EXO.025.035 וכפתר תחת שני הקנים ממנה וכפתר תחת שני הקנים ממנה וכפתר תחת שני הקנים ממנה לששת הקנים היצאים מן המנרה׃

25:36b.EXO.025.036 כפתריהם וקנתם ממנה יהיו כלה מקשה אחת זהב טהור׃

25:37b.EXO.025.037 ועשית את נרתיה שבעה והעלה את נרתיה והאיר על עבר פניה׃

25:38b.EXO.025.038 ומלקחיה ומחתתיה זהב טהור׃

25:39b.EXO.025.039 ככר זהב טהור יעשה אתה את כל הכלים האלה׃

25:40b.EXO.025.040 וראה ועשה בתבניתם אשר אתה מראה בהר׃

26

26:1b.EXO.026.001 ואת המשכן תעשה עשר יריעת שש משזר ותכלת וארגמן ותלעת שני כרבים מעשה חשב תעשה אתם׃

26:2b.EXO.026.002 ארך היריעה האחת שמנה ועשרים באמה ורחב ארבע באמה היריעה האחת מדה אחת לכל היריעת׃

26:3b.EXO.026.003 חמש היריעת תהיין חברת אשה אל אחתה וחמש יריעת חברת אשה אל אחתה׃

26:4b.EXO.026.004 ועשית ללאת תכלת על שפת היריעה האחת מקצה בחברת וכן תעשה בשפת היריעה הקיצונה במחברת השנית׃

26:5b.EXO.026.005 חמשים ללאת תעשה ביריעה האחת וחמשים ללאת תעשה בקצה היריעה אשר במחברת השנית מקבילת הללאת אשה אל אחתה׃

26:6b.EXO.026.006 ועשית חמשים קרסי זהב וחברת את היריעת אשה אל אחתה בקרסים והיה המשכן אחד׃

26:7b.EXO.026.007 ועשית יריעת עזים לאהל על המשכן עשתי עשרה יריעת תעשה אתם׃

26:8b.EXO.026.008 ארך היריעה האחת שלשים באמה ורחב ארבע באמה היריעה האחת מדה אחת לעשתי עשרה יריעת׃

26:9b.EXO.026.009 וחברת את חמש היריעת לבד ואת שש היריעת לבד וכפלת את היריעה הששית אל מול פני האהל׃

26:10b.EXO.026.010 ועשית חמשים ללאת על שפת היריעה האחת הקיצנה בחברת וחמשים ללאת על שפת היריעה החברת השנית׃

26:11b.EXO.026.011 ועשית קרסי נחשת חמשים והבאת את הקרסים בללאת וחברת את האהל והיה אחד׃

26:12b.EXO.026.012 וסרח העדף ביריעת האהל חצי היריעה העדפת תסרח על אחרי המשכן׃

26:13b.EXO.026.013 והאמה מזה והאמה מזה בעדף בארך יריעת האהל יהיה סרוח על צדי המשכן מזה ומזה לכסתו׃

26:14b.EXO.026.014 ועשית מכסה לאהל ערת אילם מאדמים ומכסה ערת תחשים מלמעלה׃

26:15b.EXO.026.015 ועשית את הקרשים למשכן עצי שטים עמדים׃

26:16b.EXO.026.016 עשר אמות ארך הקרש ואמה וחצי האמה רחב הקרש האחד׃

26:17b.EXO.026.017 שתי ידות לקרש האחד משלבת אשה אל אחתה כן תעשה לכל קרשי המשכן׃

26:18b.EXO.026.018 ועשית את הקרשים למשכן עשרים קרש לפאת נגבה תימנה׃

26:19b.EXO.026.019 וארבעים אדני כסף תעשה תחת עשרים הקרש שני אדנים תחת הקרש האחד לשתי ידתיו ושני אדנים תחת הקרש האחד לשתי ידתיו׃

26:20b.EXO.026.020 ולצלע המשכן השנית לפאת צפון עשרים קרש׃

26:21b.EXO.026.021 וארבעים אדניהם כסף שני אדנים תחת הקרש האחד ושני אדנים תחת הקרש האחד׃

26:22b.EXO.026.022 ולירכתי המשכן ימה תעשה ששה קרשים׃

26:23b.EXO.026.023 ושני קרשים תעשה למקצעת המשכן בירכתים׃

26:24b.EXO.026.024 ויהיו תאמים מלמטה ויחדו יהיו תמים על ראשו אל הטבעת האחת כן יהיה לשניהם לשני המקצעת יהיו׃

26:25b.EXO.026.025 והיו שמנה קרשים ואדניהם כסף ששה עשר אדנים שני אדנים תחת הקרש האחד ושני אדנים תחת הקרש האחד׃

26:26b.EXO.026.026 ועשית בריחם עצי שטים חמשה לקרשי צלע המשכן האחד׃

26:27b.EXO.026.027 וחמשה בריחם לקרשי צלע המשכן השנית וחמשה בריחם לקרשי צלע המשכן לירכתים ימה׃

26:28b.EXO.026.028 והבריח התיכן בתוך הקרשים מברח מן הקצה אל הקצה׃

26:29b.EXO.026.029 ואת הקרשים תצפה זהב ואת טבעתיהם תעשה זהב בתים לבריחם וצפית את הבריחם זהב׃

26:30b.EXO.026.030 והקמת את המשכן כמשפטו אשר הראית בהר׃

26:31b.EXO.026.031 ועשית פרכת תכלת וארגמן ותולעת שני ושש משזר מעשה חשב יעשה אתה כרבים׃

26:32b.EXO.026.032 ונתתה אתה על ארבעה עמודי שטים מצפים זהב וויהם זהב על ארבעה אדני כסף׃

26:33b.EXO.026.033 ונתתה את הפרכת תחת הקרסים והבאת שמה מבית לפרכת את ארון העדות והבדילה הפרכת לכם בין הקדש ובין קדש הקדשים׃

26:34b.EXO.026.034 ונתת את הכפרת על ארון העדת בקדש הקדשים׃

26:35b.EXO.026.035 ושמת את השלחן מחוץ לפרכת ואת המנרה נכח השלחן על צלע המשכן תימנה והשלחן תתן על צלע צפון׃

26:36b.EXO.026.036 ועשית מסך לפתח האהל תכלת וארגמן ותולעת שני ושש משזר מעשה רקם׃

26:37b.EXO.026.037 ועשית למסך חמשה עמודי שטים וצפית אתם זהב וויהם זהב ויצקת להם חמשה אדני נחשת׃

27

27:1b.EXO.027.001 ועשית את המזבח עצי שטים חמש אמות ארך וחמש אמות רחב רבוע יהיה המזבח ושלש אמות קמתו׃

27:2b.EXO.027.002 ועשית קרנתיו על ארבע פנתיו ממנו תהיין קרנתיו וצפית אתו נחשת׃

27:3b.EXO.027.003 ועשית סירתיו לדשנו ויעיו ומזרקתיו ומזלגתיו ומחתתיו לכל כליו תעשה נחשת׃

27:4b.EXO.027.004 ועשית לו מכבר מעשה רשת נחשת ועשית על הרשת ארבע טבעת נחשת על ארבע קצותיו׃

27:5b.EXO.027.005 ונתתה אתה תחת כרכב המזבח מלמטה והיתה הרשת עד חצי המזבח׃

27:6b.EXO.027.006 ועשית בדים למזבח בדי עצי שטים וצפית אתם נחשת׃

27:7b.EXO.027.007 והובא את בדיו בטבעת והיו הבדים על שתי צלעת המזבח בשאת אתו׃

27:8b.EXO.027.008 נבוב לחת תעשה אתו כאשר הראה אתך בהר כן יעשו׃

27:9b.EXO.027.009 ועשית את חצר המשכן לפאת נגב תימנה קלעים לחצר שש משזר מאה באמה ארך לפאה האחת׃

27:10b.EXO.027.010 ועמדיו עשרים ואדניהם עשרים נחשת ווי העמדים וחשקיהם כסף׃

27:11b.EXO.027.011 וכן לפאת צפון בארך קלעים מאה ארך ועמדו עשרים ואדניהם עשרים נחשת ווי העמדים וחשקיהם כסף׃

27:12b.EXO.027.012 ורחב החצר לפאת ים קלעים חמשים אמה עמדיהם עשרה ואדניהם עשרה׃

27:13b.EXO.027.013 ורחב החצר לפאת קדמה מזרחה חמשים אמה׃

27:14b.EXO.027.014 וחמש עשרה אמה קלעים לכתף עמדיהם שלשה ואדניהם שלשה׃

27:15b.EXO.027.015 ולכתף השנית חמש עשרה קלעים עמדיהם שלשה ואדניהם שלשה׃

27:16b.EXO.027.016 ולשער החצר מסך עשרים אמה תכלת וארגמן ותולעת שני ושש משזר מעשה רקם עמדיהם ארבעה ואדניהם ארבעה׃

27:17b.EXO.027.017 כל עמודי החצר סביב מחשקים כסף וויהם כסף ואדניהם נחשת׃

27:18b.EXO.027.018 ארך החצר מאה באמה ורחב חמשים בחמשים וקמה חמש אמות שש משזר ואדניהם נחשת׃

27:19b.EXO.027.019 לכל כלי המשכן בכל עבדתו וכל יתדתיו וכל יתדת החצר נחשת׃

27:20b.EXO.027.020 ואתה תצוה את בני ישראל ויקחו אליך שמן זית זך כתית למאור להעלת נר תמיד׃

27:21b.EXO.027.021 באהל מועד מחוץ לפרכת אשר על העדת יערך אתו אהרן ובניו מערב עד בקר לפני יהוה חקת עולם לדרתם מאת בני ישראל׃

28

28:1b.EXO.028.001 ואתה הקרב אליך את אהרן אחיך ואת בניו אתו מתוך בני ישראל לכהנו לי אהרן נדב ואביהוא אלעזר ואיתמר בני אהרן׃

28:2b.EXO.028.002 ועשית בגדי קדש לאהרן אחיך לכבוד ולתפארת׃

28:3b.EXO.028.003 ואתה תדבר אל כל חכמי לב אשר מלאתיו רוח חכמה ועשו את בגדי אהרן לקדשו לכהנו לי׃

28:4b.EXO.028.004 ואלה הבגדים אשר יעשו חשן ואפוד ומעיל וכתנת תשבץ מצנפת ואבנט ועשו בגדי קדש לאהרן אחיך ולבניו לכהנו לי׃

28:5b.EXO.028.005 והם יקחו את הזהב ואת התכלת ואת הארגמן ואת תולעת השני ואת השש׃

28:6b.EXO.028.006 ועשו את האפד זהב תכלת וארגמן תולעת שני ושש משזר מעשה חשב׃

28:7b.EXO.028.007 שתי כתפת חברת יהיה לו אל שני קצותיו וחבר׃

28:8b.EXO.028.008 וחשב אפדתו אשר עליו כמעשהו ממנו יהיה זהב תכלת וארגמן ותולעת שני ושש משזר׃

28:9b.EXO.028.009 ולקחת את שתי אבני שהם ופתחת עליהם שמות בני ישראל׃

28:10b.EXO.028.010 ששה משמתם על האבן האחת ואת שמות הששה הנותרים על האבן השנית כתולדתם׃

28:11b.EXO.028.011 מעשה חרש אבן פתוחי חתם תפתח את שתי האבנים על שמת בני ישראל מסבת משבצות זהב תעשה אתם׃

28:12b.EXO.028.012 ושמת את שתי האבנים על כתפת האפד אבני זכרן לבני ישראל ונשא אהרן את שמותם לפני יהוה על שתי כתפיו לזכרן׃

28:13b.EXO.028.013 ועשית משבצת זהב׃

28:14b.EXO.028.014 ושתי שרשרת זהב טהור מגבלת תעשה אתם מעשה עבת ונתתה את שרשרת העבתת על המשבצת׃

28:15b.EXO.028.015 ועשית חשן משפט מעשה חשב כמעשה אפד תעשנו זהב תכלת וארגמן ותולעת שני ושש משזר תעשה אתו׃

28:16b.EXO.028.016 רבוע יהיה כפול זרת ארכו וזרת רחבו׃

28:17b.EXO.028.017 ומלאת בו מלאת אבן ארבעה טורים אבן טור אדם פטדה וברקת הטור האחד׃

28:18b.EXO.028.018 והטור השני נפך ספיר ויהלם׃

28:19b.EXO.028.019 והטור השלישי לשם שבו ואחלמה׃

28:20b.EXO.028.020 והטור הרביעי תרשיש ושהם וישפה משבצים זהב יהיו במלואתם׃

28:21b.EXO.028.021 והאבנים תהיין על שמת בני ישראל שתים עשרה על שמתם פתוחי חותם איש על שמו תהיין לשני עשר שבט׃

28:22b.EXO.028.022 ועשית על החשן שרשת גבלת מעשה עבת זהב טהור׃

28:23b.EXO.028.023 ועשית על החשן שתי טבעות זהב ונתת את שתי הטבעות על שני קצות החשן׃

28:24b.EXO.028.024 ונתתה את שתי עבתת הזהב על שתי הטבעת אל קצות החשן׃

28:25b.EXO.028.025 ואת שתי קצות שתי העבתת תתן על שתי המשבצות ונתתה על כתפות האפד אל מול פניו׃

28:26b.EXO.028.026 ועשית שתי טבעות זהב ושמת אתם על שני קצות החשן על שפתו אשר אל עבר האפד ביתה׃

28:27b.EXO.028.027 ועשית שתי טבעות זהב ונתתה אתם על שתי כתפות האפוד מלמטה ממול פניו לעמת מחברתו ממעל לחשב האפוד׃

28:28b.EXO.028.028 וירכסו את החשן מטבעתו אל טבעת האפד בפתיל תכלת להיות על חשב האפוד ולא יזח החשן מעל האפוד׃

28:29b.EXO.028.029 ונשא אהרן את שמות בני ישראל בחשן המשפט על לבו בבאו אל הקדש לזכרן לפני יהוה תמיד׃

28:30b.EXO.028.030 ונתת אל חשן המשפט את האורים ואת התמים והיו על לב אהרן בבאו לפני יהוה ונשא אהרן את משפט בני ישראל על לבו לפני יהוה תמיד׃

28:31b.EXO.028.031 ועשית את מעיל האפוד כליל תכלת׃

28:32b.EXO.028.032 והיה פי ראשו בתוכו שפה יהיה לפיו סביב מעשה ארג כפי תחרא יהיה לו לא יקרע׃

28:33b.EXO.028.033 ועשית על שוליו רמני תכלת וארגמן ותולעת שני על שוליו סביב ופעמני זהב בתוכם סביב׃

28:34b.EXO.028.034 פעמן זהב ורמון פעמן זהב ורמון על שולי המעיל סביב׃

28:35b.EXO.028.035 והיה על אהרן לשרת ונשמע קולו בבאו אל הקדש לפני יהוה ובצאתו ולא ימות׃

28:36b.EXO.028.036 ועשית ציץ זהב טהור ופתחת עליו פתוחי חתם קדש ליהוה׃

28:37b.EXO.028.037 ושמת אתו על פתיל תכלת והיה על המצנפת אל מול פני המצנפת יהיה׃

28:38b.EXO.028.038 והיה על מצח אהרן ונשא אהרן את עון הקדשים אשר יקדישו בני ישראל לכל מתנת קדשיהם והיה על מצחו תמיד לרצון להם לפני יהוה׃

28:39b.EXO.028.039 ושבצת הכתנת שש ועשית מצנפת שש ואבנט תעשה מעשה רקם׃

28:40b.EXO.028.040 ולבני אהרן תעשה כתנת ועשית להם אבנטים ומגבעות תעשה להם לכבוד ולתפארת׃

28:41b.EXO.028.041 והלבשת אתם את אהרן אחיך ואת בניו אתו ומשחת אתם ומלאת את ידם וקדשת אתם וכהנו לי׃

28:42b.EXO.028.042 ועשה להם מכנסי בד לכסות בשר ערוה ממתנים ועד ירכים יהיו׃

28:43b.EXO.028.043 והיו על אהרן ועל בניו בבאם אל אהל מועד או בגשתם אל המזבח לשרת בקדש ולא ישאו עון ומתו חקת עולם לו ולזרעו אחריו׃

29

29:1b.EXO.029.001 וזה הדבר אשר תעשה להם לקדש אתם לכהן לי לקח פר אחד בן בקר ואילם שנים תמימם׃

29:2b.EXO.029.002 ולחם מצות וחלת מצת בלולת בשמן ורקיקי מצות משחים בשמן סלת חטים תעשה אתם׃

29:3b.EXO.029.003 ונתת אותם על סל אחד והקרבת אתם בסל ואת הפר ואת שני האילם׃

29:4b.EXO.029.004 ואת אהרן ואת בניו תקריב אל פתח אהל מועד ורחצת אתם במים׃

29:5b.EXO.029.005 ולקחת את הבגדים והלבשת את אהרן את הכתנת ואת מעיל האפד ואת האפד ואת החשן ואפדת לו בחשב האפד׃

29:6b.EXO.029.006 ושמת המצנפת על ראשו ונתת את נזר הקדש על המצנפת׃

29:7b.EXO.029.007 ולקחת את שמן המשחה ויצקת על ראשו ומשחת אתו׃

29:8b.EXO.029.008 ואת בניו תקריב והלבשתם כתנת׃

29:9b.EXO.029.009 וחגרת אתם אבנט אהרן ובניו וחבשת להם מגבעת והיתה להם כהנה לחקת עולם ומלאת יד אהרן ויד בניו׃

29:10b.EXO.029.010 והקרבת את הפר לפני אהל מועד וסמך אהרן ובניו את ידיהם על ראש הפר׃

29:11b.EXO.029.011 ושחטת את הפר לפני יהוה פתח אהל מועד׃

29:12b.EXO.029.012 ולקחת מדם הפר ונתתה על קרנת המזבח באצבעך ואת כל הדם תשפך אל יסוד המזבח׃

29:13b.EXO.029.013 ולקחת את כל החלב המכסה את הקרב ואת היתרת על הכבד ואת שתי הכלית ואת החלב אשר עליהן והקטרת המזבחה׃

29:14b.EXO.029.014 ואת בשר הפר ואת ערו ואת פרשו תשרף באש מחוץ למחנה חטאת הוא׃

29:15b.EXO.029.015 ואת האיל האחד תקח וסמכו אהרן ובניו את ידיהם על ראש האיל׃

29:16b.EXO.029.016 ושחטת את האיל ולקחת את דמו וזרקת על המזבח סביב׃

29:17b.EXO.029.017 ואת האיל תנתח לנתחיו ורחצת קרבו וכרעיו ונתת על נתחיו ועל ראשו׃

29:18b.EXO.029.018 והקטרת את כל האיל המזבחה עלה הוא ליהוה ריח ניחוח אשה ליהוה הוא׃

29:19b.EXO.029.019 ולקחת את האיל השני וסמך אהרן ובניו את ידיהם על ראש האיל׃

29:20b.EXO.029.020 ושחטת את האיל ולקחת מדמו ונתתה על תנוך אזן אהרן ועל תנוך אזן בניו הימנית ועל בהן ידם הימנית ועל בהן רגלם הימנית וזרקת את הדם על המזבח סביב׃

29:21b.EXO.029.021 ולקחת מן הדם אשר על המזבח ומשמן המשחה והזית על אהרן ועל בגדיו ועל בניו ועל בגדי בניו אתו וקדש הוא ובגדיו ובניו ובגדי בניו אתו׃

29:22b.EXO.029.022 ולקחת מן האיל החלב והאליה ואת החלב המכסה את הקרב ואת יתרת הכבד ואת שתי הכלית ואת החלב אשר עליהן ואת שוק הימין כי איל מלאים הוא׃

29:23b.EXO.029.023 וככר לחם אחת וחלת לחם שמן אחת ורקיק אחד מסל המצות אשר לפני יהוה׃

29:24b.EXO.029.024 ושמת הכל על כפי אהרן ועל כפי בניו והנפת אתם תנופה לפני יהוה׃

29:25b.EXO.029.025 ולקחת אתם מידם והקטרת המזבחה על העלה לריח ניחוח לפני יהוה אשה הוא ליהוה׃

29:26b.EXO.029.026 ולקחת את החזה מאיל המלאים אשר לאהרן והנפת אתו תנופה לפני יהוה והיה לך למנה׃

29:27b.EXO.029.027 וקדשת את חזה התנופה ואת שוק התרומה אשר הונף ואשר הורם מאיל המלאים מאשר לאהרן ומאשר לבניו׃

29:28b.EXO.029.028 והיה לאהרן ולבניו לחק עולם מאת בני ישראל כי תרומה הוא ותרומה יהיה מאת בני ישראל מזבחי שלמיהם תרומתם ליהוה׃

29:29b.EXO.029.029 ובגדי הקדש אשר לאהרן יהיו לבניו אחריו למשחה בהם ולמלא בם את ידם׃

29:30b.EXO.029.030 שבעת ימים ילבשם הכהן תחתיו מבניו אשר יבא אל אהל מועד לשרת בקדש׃

29:31b.EXO.029.031 ואת איל המלאים תקח ובשלת את בשרו במקם קדש׃

29:32b.EXO.029.032 ואכל אהרן ובניו את בשר האיל ואת הלחם אשר בסל פתח אהל מועד׃

29:33b.EXO.029.033 ואכלו אתם אשר כפר בהם למלא את ידם לקדש אתם וזר לא יאכל כי קדש הם׃

29:34b.EXO.029.034 ואם יותר מבשר המלאים ומן הלחם עד הבקר ושרפת את הנותר באש לא יאכל כי קדש הוא׃

29:35b.EXO.029.035 ועשית לאהרן ולבניו ככה ככל אשר צויתי אתכה שבעת ימים תמלא ידם׃

29:36b.EXO.029.036 ופר חטאת תעשה ליום על הכפרים וחטאת על המזבח בכפרך עליו ומשחת אתו לקדשו׃

29:37b.EXO.029.037 שבעת ימים תכפר על המזבח וקדשת אתו והיה המזבח קדש קדשים כל הנגע במזבח יקדש׃

29:38b.EXO.029.038 וזה אשר תעשה על המזבח כבשים בני שנה שנים ליום תמיד׃

29:39b.EXO.029.039 את הכבש האחד תעשה בבקר ואת הכבש השני תעשה בין הערבים׃

29:40b.EXO.029.040 ועשרן סלת בלול בשמן כתית רבע ההין ונסך רבעית ההין יין לכבש האחד׃

29:41b.EXO.029.041 ואת הכבש השני תעשה בין הערבים כמנחת הבקר וכנסכה תעשה לה לריח ניחח אשה ליהוה׃

29:42b.EXO.029.042 עלת תמיד לדרתיכם פתח אהל מועד לפני יהוה אשר אועד לכם שמה לדבר אליך שם׃

29:43b.EXO.029.043 ונעדתי שמה לבני ישראל ונקדש בכבדי׃

29:44b.EXO.029.044 וקדשתי את אהל מועד ואת המזבח ואת אהרן ואת בניו אקדש לכהן לי׃

29:45b.EXO.029.045 ושכנתי בתוך בני ישראל והייתי להם לאלהים׃

29:46b.EXO.029.046 וידעו כי אני יהוה אלהיהם אשר הוצאתי אתם מארץ מצרים לשכני בתוכם אני יהוה אלהיהם׃

30

30:1b.EXO.030.001 ועשית מזבח מקטר קטרת עצי שטים תעשה אתו׃

30:2b.EXO.030.002 אמה ארכו ואמה רחבו רבוע יהיה ואמתים קמתו ממנו קרנתיו׃

30:3b.EXO.030.003 וצפית אתו זהב טהור את גגו ואת קירתיו סביב ואת קרנתיו ועשית לו זר זהב סביב׃

30:4b.EXO.030.004 ושתי טבעת זהב תעשה לו מתחת לזרו על שתי צלעתיו תעשה על שני צדיו והיה לבתים לבדים לשאת אתו בהמה׃

30:5b.EXO.030.005 ועשית את הבדים עצי שטים וצפית אתם זהב׃

30:6b.EXO.030.006 ונתתה אתו לפני הפרכת אשר על ארן העדת לפני הכפרת אשר על העדת אשר אועד לך שמה׃

30:7b.EXO.030.007 והקטיר עליו אהרן קטרת סמים בבקר בבקר בהיטיבו את הנרת יקטירנה׃

30:8b.EXO.030.008 ובהעלת אהרן את הנרת בין הערבים יקטירנה קטרת תמיד לפני יהוה לדרתיכם׃

30:9b.EXO.030.009 לא תעלו עליו קטרת זרה ועלה ומנחה ונסך לא תסכו עליו׃

30:10b.EXO.030.010 וכפר אהרן על קרנתיו אחת בשנה מדם חטאת הכפרים אחת בשנה יכפר עליו לדרתיכם קדש קדשים הוא ליהוה׃

30:11b.EXO.030.011 וידבר יהוה אל משה לאמר׃

30:12b.EXO.030.012 כי תשא את ראש בני ישראל לפקדיהם ונתנו איש כפר נפשו ליהוה בפקד אתם ולא יהיה בהם נגף בפקד אתם׃

30:13b.EXO.030.013 זה יתנו כל העבר על הפקדים מחצית השקל בשקל הקדש עשרים גרה השקל מחצית השקל תרומה ליהוה׃

30:14b.EXO.030.014 כל העבר על הפקדים מבן עשרים שנה ומעלה יתן תרומת יהוה׃

30:15b.EXO.030.015 העשיר לא ירבה והדל לא ימעיט ממחצית השקל לתת את תרומת יהוה לכפר על נפשתיכם׃

30:16b.EXO.030.016 ולקחת את כסף הכפרים מאת בני ישראל ונתת אתו על עבדת אהל מועד והיה לבני ישראל לזכרון לפני יהוה לכפר על נפשתיכם׃

30:17b.EXO.030.017 וידבר יהוה אל משה לאמר׃

30:18b.EXO.030.018 ועשית כיור נחשת וכנו נחשת לרחצה ונתת אתו בין אהל מועד ובין המזבח ונתת שמה מים׃

30:19b.EXO.030.019 ורחצו אהרן ובניו ממנו את ידיהם ואת רגליהם׃

30:20b.EXO.030.020 בבאם אל אהל מועד ירחצו מים ולא ימתו או בגשתם אל המזבח לשרת להקטיר אשה ליהוה׃

30:21b.EXO.030.021 ורחצו ידיהם ורגליהם ולא ימתו והיתה להם חק עולם לו ולזרעו לדרתם׃

30:22b.EXO.030.022 וידבר יהוה אל משה לאמר׃

30:23b.EXO.030.023 ואתה קח לך בשמים ראש מר דרור חמש מאות וקנמן בשם מחציתו חמשים ומאתים וקנה בשם חמשים ומאתים׃

30:24b.EXO.030.024 וקדה חמש מאות בשקל הקדש ושמן זית הין׃

30:25b.EXO.030.025 ועשית אתו שמן משחת קדש רקח מרקחת מעשה רקח שמן משחת קדש יהיה׃

30:26b.EXO.030.026 ומשחת בו את אהל מועד ואת ארון העדת׃

30:27b.EXO.030.027 ואת השלחן ואת כל כליו ואת המנרה ואת כליה ואת מזבח הקטרת׃

30:28b.EXO.030.028 ואת מזבח העלה ואת כל כליו ואת הכיר ואת כנו׃

30:29b.EXO.030.029 וקדשת אתם והיו קדש קדשים כל הנגע בהם יקדש׃

30:30b.EXO.030.030 ואת אהרן ואת בניו תמשח וקדשת אתם לכהן לי׃

30:31b.EXO.030.031 ואל בני ישראל תדבר לאמר שמן משחת קדש יהיה זה לי לדרתיכם׃

30:32b.EXO.030.032 על בשר אדם לא ייסך ובמתכנתו לא תעשו כמהו קדש הוא קדש יהיה לכם׃

30:33b.EXO.030.033 איש אשר ירקח כמהו ואשר יתן ממנו על זר ונכרת מעמיו׃

30:34b.EXO.030.034 ויאמר יהוה אל משה קח לך סמים נטף ושחלת וחלבנה סמים ולבנה זכה בד בבד יהיה׃

30:35b.EXO.030.035 ועשית אתה קטרת רקח מעשה רוקח ממלח טהור קדש׃

30:36b.EXO.030.036 ושחקת ממנה הדק ונתתה ממנה לפני העדת באהל מועד אשר אועד לך שמה קדש קדשים תהיה לכם׃

30:37b.EXO.030.037 והקטרת אשר תעשה במתכנתה לא תעשו לכם קדש תהיה לך ליהוה׃

30:38b.EXO.030.038 איש אשר יעשה כמוה להריח בה ונכרת מעמיו׃

31

31:1b.EXO.031.001 וידבר יהוה אל משה לאמר׃

31:2b.EXO.031.002 ראה קראתי בשם בצלאל בן אורי בן חור למטה יהודה׃

31:3b.EXO.031.003 ואמלא אתו רוח אלהים בחכמה ובתבונה ובדעת ובכל מלאכה׃

31:4b.EXO.031.004 לחשב מחשבת לעשות בזהב ובכסף ובנחשת׃

31:5b.EXO.031.005 ובחרשת אבן למלאת ובחרשת עץ לעשות בכל מלאכה׃

31:6b.EXO.031.006 ואני הנה נתתי אתו את אהליאב בן אחיסמך למטה דן ובלב כל חכם לב נתתי חכמה ועשו את כל אשר צויתך׃

31:7b.EXO.031.007 את אהל מועד ואת הארן לעדת ואת הכפרת אשר עליו ואת כל כלי האהל׃

31:8b.EXO.031.008 ואת השלחן ואת כליו ואת המנרה הטהרה ואת כל כליה ואת מזבח הקטרת׃

31:9b.EXO.031.009 ואת מזבח העלה ואת כל כליו ואת הכיור ואת כנו׃

31:10b.EXO.031.010 ואת בגדי השרד ואת בגדי הקדש לאהרן הכהן ואת בגדי בניו לכהן׃

31:11b.EXO.031.011 ואת שמן המשחה ואת קטרת הסמים לקדש ככל אשר צויתך יעשו׃

31:12b.EXO.031.012 ויאמר יהוה אל משה לאמר׃

31:13b.EXO.031.013 ואתה דבר אל בני ישראל לאמר אך את שבתתי תשמרו כי אות הוא ביני וביניכם לדרתיכם לדעת כי אני יהוה מקדשכם׃

31:14b.EXO.031.014 ושמרתם את השבת כי קדש הוא לכם מחלליה מות יומת כי כל העשה בה מלאכה ונכרתה הנפש ההוא מקרב עמיה׃

31:15b.EXO.031.015 ששת ימים יעשה מלאכה וביום השביעי שבת שבתון קדש ליהוה כל העשה מלאכה ביום השבת מות יומת׃

31:16b.EXO.031.016 ושמרו בני ישראל את השבת לעשות את השבת לדרתם ברית עולם׃

31:17b.EXO.031.017 ביני ובין בני ישראל אות הוא לעלם כי ששת ימים עשה יהוה את השמים ואת הארץ וביום השביעי שבת וינפש׃

31:18b.EXO.031.018 ויתן אל משה ככלתו לדבר אתו בהר סיני שני לחת העדת לחת אבן כתבים באצבע אלהים׃

32

32:1b.EXO.032.001 וירא העם כי בשש משה לרדת מן ההר ויקהל העם על אהרן ויאמרו אליו קום עשה לנו אלהים אשר ילכו לפנינו כי זה משה האיש אשר העלנו מארץ מצרים לא ידענו מה היה לו׃

32:2b.EXO.032.002 ויאמר אלהם אהרן פרקו נזמי הזהב אשר באזני נשיכם בניכם ובנתיכם והביאו אלי׃

32:3b.EXO.032.003 ויתפרקו כל העם את נזמי הזהב אשר באזניהם ויביאו אל אהרן׃

32:4b.EXO.032.004 ויקח מידם ויצר אתו בחרט ויעשהו עגל מסכה ויאמרו אלה אלהיך ישראל אשר העלוך מארץ מצרים׃

32:5b.EXO.032.005 וירא אהרן ויבן מזבח לפניו ויקרא אהרן ויאמר חג ליהוה מחר׃

32:6b.EXO.032.006 וישכימו ממחרת ויעלו עלת ויגשו שלמים וישב העם לאכל ושתו ויקמו לצחק׃

32:7b.EXO.032.007 וידבר יהוה אל משה לך רד כי שחת עמך אשר העלית מארץ מצרים׃

32:8b.EXO.032.008 סרו מהר מן הדרך אשר צויתם עשו להם עגל מסכה וישתחוו לו ויזבחו לו ויאמרו אלה אלהיך ישראל אשר העלוך מארץ מצרים׃

32:9b.EXO.032.009 ויאמר יהוה אל משה ראיתי את העם הזה והנה עם קשה ערף הוא׃

32:10b.EXO.032.010 ועתה הניחה לי ויחר אפי בהם ואכלם ואעשה אותך לגוי גדול׃

32:11b.EXO.032.011 ויחל משה את פני יהוה אלהיו ויאמר למה יהוה יחרה אפך בעמך אשר הוצאת מארץ מצרים בכח גדול וביד חזקה׃

32:12b.EXO.032.012 למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שוב מחרון אפך והנחם על הרעה לעמך׃

32:13b.EXO.032.013 זכר לאברהם ליצחק ולישראל עבדיך אשר נשבעת להם בך ותדבר אלהם ארבה את זרעכם ככוכבי השמים וכל הארץ הזאת אשר אמרתי אתן לזרעכם ונחלו לעלם׃

32:14b.EXO.032.014 וינחם יהוה על הרעה אשר דבר לעשות לעמו׃

32:15b.EXO.032.015 ויפן וירד משה מן ההר ושני לחת העדת בידו לחת כתבים משני עבריהם מזה ומזה הם כתבים׃

32:16b.EXO.032.016 והלחת מעשה אלהים המה והמכתב מכתב אלהים הוא חרות על הלחת׃

32:17b.EXO.032.017 וישמע יהושע את קול העם ברעה ויאמר אל משה קול מלחמה במחנה׃

32:18b.EXO.032.018 ויאמר אין קול ענות גבורה ואין קול ענות חלושה קול ענות אנכי שמע׃

32:19b.EXO.032.019 ויהי כאשר קרב אל המחנה וירא את העגל ומחלת ויחר אף משה וישלך מידו את הלחת וישבר אתם תחת ההר׃

32:20b.EXO.032.020 ויקח את העגל אשר עשו וישרף באש ויטחן עד אשר דק ויזר על פני המים וישק את בני ישראל׃

32:21b.EXO.032.021 ויאמר משה אל אהרן מה עשה לך העם הזה כי הבאת עליו חטאה גדלה׃

32:22b.EXO.032.022 ויאמר אהרן אל יחר אף אדני אתה ידעת את העם כי ברע הוא׃

32:23b.EXO.032.023 ויאמרו לי עשה לנו אלהים אשר ילכו לפנינו כי זה משה האיש אשר העלנו מארץ מצרים לא ידענו מה היה לו׃

32:24b.EXO.032.024 ואמר להם למי זהב התפרקו ויתנו לי ואשלכהו באש ויצא העגל הזה׃

32:25b.EXO.032.025 וירא משה את העם כי פרע הוא כי פרעה אהרן לשמצה בקמיהם׃

32:26b.EXO.032.026 ויעמד משה בשער המחנה ויאמר מי ליהוה אלי ויאספו אליו כל בני לוי׃

32:27b.EXO.032.027 ויאמר להם כה אמר יהוה אלהי ישראל שימו איש חרבו על ירכו עברו ושובו משער לשער במחנה והרגו איש את אחיו ואיש את רעהו ואיש את קרבו׃

32:28b.EXO.032.028 ויעשו בני לוי כדבר משה ויפל מן העם ביום ההוא כשלשת אלפי איש׃

32:29b.EXO.032.029 ויאמר משה מלאו ידכם היום ליהוה כי איש בבנו ובאחיו ולתת עליכם היום ברכה׃

32:30b.EXO.032.030 ויהי ממחרת ויאמר משה אל העם אתם חטאתם חטאה גדלה ועתה אעלה אל יהוה אולי אכפרה בעד חטאתכם׃

32:31b.EXO.032.031 וישב משה אל יהוה ויאמר אנא חטא העם הזה חטאה גדלה ויעשו להם אלהי זהב׃

32:32b.EXO.032.032 ועתה אם תשא חטאתם ואם אין מחני נא מספרך אשר כתבת׃

32:33b.EXO.032.033 ויאמר יהוה אל משה מי אשר חטא לי אמחנו מספרי׃

32:34b.EXO.032.034 ועתה לך נחה את העם אל אשר דברתי לך הנה מלאכי ילך לפניך וביום פקדי ופקדתי עליהם חטאתם׃

32:35b.EXO.032.035 ויגף יהוה את העם על אשר עשו את העגל אשר עשה אהרן׃

33

33:1b.EXO.033.001 וידבר יהוה אל משה לך עלה מזה אתה והעם אשר העלית מארץ מצרים אל הארץ אשר נשבעתי לאברהם ליצחק וליעקב לאמר לזרעך אתננה׃

33:2b.EXO.033.002 ושלחתי לפניך מלאך וגרשתי את הכנעני האמרי והחתי והפרזי החוי והיבוסי׃

33:3b.EXO.033.003 אל ארץ זבת חלב ודבש כי לא אעלה בקרבך כי עם קשה ערף אתה פן אכלך בדרך׃

33:4b.EXO.033.004 וישמע העם את הדבר הרע הזה ויתאבלו ולא שתו איש עדיו עליו׃

33:5b.EXO.033.005 ויאמר יהוה אל משה אמר אל בני ישראל אתם עם קשה ערף רגע אחד אעלה בקרבך וכליתיך ועתה הורד עדיך מעליך ואדעה מה אעשה לך׃

33:6b.EXO.033.006 ויתנצלו בני ישראל את עדים מהר חורב׃

33:7b.EXO.033.007 ומשה יקח את האהל ונטה לו מחוץ למחנה הרחק מן המחנה וקרא לו אהל מועד והיה כל מבקש יהוה יצא אל אהל מועד אשר מחוץ למחנה׃

33:8b.EXO.033.008 והיה כצאת משה אל האהל יקומו כל העם ונצבו איש פתח אהלו והביטו אחרי משה עד באו האהלה׃

33:9b.EXO.033.009 והיה כבא משה האהלה ירד עמוד הענן ועמד פתח האהל ודבר עם משה׃

33:10b.EXO.033.010 וראה כל העם את עמוד הענן עמד פתח האהל וקם כל העם והשתחוו איש פתח אהלו׃

33:11b.EXO.033.011 ודבר יהוה אל משה פנים אל פנים כאשר ידבר איש אל רעהו ושב אל המחנה ומשרתו יהושע בן נון נער לא ימיש מתוך האהל׃

33:12b.EXO.033.012 ויאמר משה אל יהוה ראה אתה אמר אלי העל את העם הזה ואתה לא הודעתני את אשר תשלח עמי ואתה אמרת ידעתיך בשם וגם מצאת חן בעיני׃

33:13b.EXO.033.013 ועתה אם נא מצאתי חן בעיניך הודעני נא את דרכך ואדעך למען אמצא חן בעיניך וראה כי עמך הגוי הזה׃

33:14b.EXO.033.014 ויאמר פני ילכו והנחתי לך׃

33:15b.EXO.033.015 ויאמר אליו אם אין פניך הלכים אל תעלנו מזה׃

33:16b.EXO.033.016 ובמה יודע אפוא כי מצאתי חן בעיניך אני ועמך הלוא בלכתך עמנו ונפלינו אני ועמך מכל העם אשר על פני האדמה׃

33:17b.EXO.033.017 ויאמר יהוה אל משה גם את הדבר הזה אשר דברת אעשה כי מצאת חן בעיני ואדעך בשם׃

33:18b.EXO.033.018 ויאמר הראני נא את כבדך׃

33:19b.EXO.033.019 ויאמר אני אעביר כל טובי על פניך וקראתי בשם יהוה לפניך וחנתי את אשר אחן ורחמתי את אשר ארחם׃

33:20b.EXO.033.020 ויאמר לא תוכל לראת את פני כי לא יראני האדם וחי׃

33:21b.EXO.033.021 ויאמר יהוה הנה מקום אתי ונצבת על הצור׃

33:22b.EXO.033.022 והיה בעבר כבדי ושמתיך בנקרת הצור ושכתי כפי עליך עד עברי׃

33:23b.EXO.033.023 והסרתי את כפי וראית את אחרי ופני לא יראו׃

34

34:1b.EXO.034.001 ויאמר יהוה אל משה פסל לך שני לחת אבנים כראשנים וכתבתי על הלחת את הדברים אשר היו על הלחת הראשנים אשר שברת׃

34:2b.EXO.034.002 והיה נכון לבקר ועלית בבקר אל הר סיני ונצבת לי שם על ראש ההר׃

34:3b.EXO.034.003 ואיש לא יעלה עמך וגם איש אל ירא בכל ההר גם הצאן והבקר אל ירעו אל מול ההר ההוא׃

34:4b.EXO.034.004 ויפסל שני לחת אבנים כראשנים וישכם משה בבקר ויעל אל הר סיני כאשר צוה יהוה אתו ויקח בידו שני לחת אבנים׃

34:5b.EXO.034.005 וירד יהוה בענן ויתיצב עמו שם ויקרא בשם יהוה׃

34:6b.EXO.034.006 ויעבר יהוה על פניו ויקרא יהוה יהוה אל רחום וחנון ארך אפים ורב חסד ואמת׃

34:7b.EXO.034.007 נצר חסד לאלפים נשא עון ופשע וחטאה ונקה לא ינקה פקד עון אבות על בנים ועל בני בנים על שלשים ועל רבעים׃

34:8b.EXO.034.008 וימהר משה ויקד ארצה וישתחו׃

34:9b.EXO.034.009 ויאמר אם נא מצאתי חן בעיניך אדני ילך נא אדני בקרבנו כי עם קשה ערף הוא וסלחת לעוננו ולחטאתנו ונחלתנו׃

34:10b.EXO.034.010 ויאמר הנה אנכי כרת ברית נגד כל עמך אעשה נפלאת אשר לא נבראו בכל הארץ ובכל הגוים וראה כל העם אשר אתה בקרבו את מעשה יהוה כי נורא הוא אשר אני עשה עמך׃

34:11b.EXO.034.011 שמר לך את אשר אנכי מצוך היום הנני גרש מפניך את האמרי והכנעני והחתי והפרזי והחוי והיבוסי׃

34:12b.EXO.034.012 השמר לך פן תכרת ברית ליושב הארץ אשר אתה בא עליה פן יהיה למוקש בקרבך׃

34:13b.EXO.034.013 כי את מזבחתם תתצון ואת מצבתם תשברון ואת אשריו תכרתון׃

34:14b.EXO.034.014 כי לא תשתחוה לאל אחר כי יהוה קנא שמו אל קנא הוא׃

34:15b.EXO.034.015 פן תכרת ברית ליושב הארץ וזנו אחרי אלהיהם וזבחו לאלהיהם וקרא לך ואכלת מזבחו׃

34:16b.EXO.034.016 ולקחת מבנתיו לבניך וזנו בנתיו אחרי אלהיהן והזנו את בניך אחרי אלהיהן׃

34:17b.EXO.034.017 אלהי מסכה לא תעשה לך׃

34:18b.EXO.034.018 את חג המצות תשמר שבעת ימים תאכל מצות אשר צויתך למועד חדש האביב כי בחדש האביב יצאת ממצרים׃

34:19b.EXO.034.019 כל פטר רחם לי וכל מקנך תזכר פטר שור ושה׃

34:20b.EXO.034.020 ופטר חמור תפדה בשה ואם לא תפדה וערפתו כל בכור בניך תפדה ולא יראו פני ריקם׃

34:21b.EXO.034.021 ששת ימים תעבד וביום השביעי תשבת בחריש ובקציר תשבת׃

34:22b.EXO.034.022 וחג שבעת תעשה לך בכורי קציר חטים וחג האסיף תקופת השנה׃

34:23b.EXO.034.023 שלש פעמים בשנה יראה כל זכורך את פני האדן יהוה אלהי ישראל׃

34:24b.EXO.034.024 כי אוריש גוים מפניך והרחבתי את גבולך ולא יחמד איש את ארצך בעלתך לראות את פני יהוה אלהיך שלש פעמים בשנה׃

34:25b.EXO.034.025 לא תשחט על חמץ דם זבחי ולא ילין לבקר זבח חג הפסח׃

34:26b.EXO.034.026 ראשית בכורי אדמתך תביא בית יהוה אלהיך לא תבשל גדי בחלב אמו׃

34:27b.EXO.034.027 ויאמר יהוה אל משה כתב לך את הדברים האלה כי על פי הדברים האלה כרתי אתך ברית ואת ישראל׃

34:28b.EXO.034.028 ויהי שם עם יהוה ארבעים יום וארבעים לילה לחם לא אכל ומים לא שתה ויכתב על הלחת את דברי הברית עשרת הדברים׃

34:29b.EXO.034.029 ויהי ברדת משה מהר סיני ושני לחת העדת ביד משה ברדתו מן ההר ומשה לא ידע כי קרן עור פניו בדברו אתו׃

34:30b.EXO.034.030 וירא אהרן וכל בני ישראל את משה והנה קרן עור פניו וייראו מגשת אליו׃

34:31b.EXO.034.031 ויקרא אלהם משה וישבו אליו אהרן וכל הנשאים בעדה וידבר משה אלהם׃

34:32b.EXO.034.032 ואחרי כן נגשו כל בני ישראל ויצום את כל אשר דבר יהוה אתו בהר סיני׃

34:33b.EXO.034.033 ויכל משה מדבר אתם ויתן על פניו מסוה׃

34:34b.EXO.034.034 ובבא משה לפני יהוה לדבר אתו יסיר את המסוה עד צאתו ויצא ודבר אל בני ישראל את אשר יצוה׃

34:35b.EXO.034.035 וראו בני ישראל את פני משה כי קרן עור פני משה והשיב משה את המסוה על פניו עד באו לדבר אתו׃

35

35:1b.EXO.035.001 ויקהל משה את כל עדת בני ישראל ויאמר אלהם אלה הדברים אשר צוה יהוה לעשת אתם׃

35:2b.EXO.035.002 ששת ימים תעשה מלאכה וביום השביעי יהיה לכם קדש שבת שבתון ליהוה כל העשה בו מלאכה יומת׃

35:3b.EXO.035.003 לא תבערו אש בכל משבתיכם ביום השבת׃

35:4b.EXO.035.004 ויאמר משה אל כל עדת בני ישראל לאמר זה הדבר אשר צוה יהוה לאמר׃

35:5b.EXO.035.005 קחו מאתכם תרומה ליהוה כל נדיב לבו יביאה את תרומת יהוה זהב וכסף ונחשת׃

35:6b.EXO.035.006 ותכלת וארגמן ותולעת שני ושש ועזים׃

35:7b.EXO.035.007 וערת אילם מאדמים וערת תחשים ועצי שטים׃

35:8b.EXO.035.008 ושמן למאור ובשמים לשמן המשחה ולקטרת הסמים׃

35:9b.EXO.035.009 ואבני שהם ואבני מלאים לאפוד ולחשן׃

35:10b.EXO.035.010 וכל חכם לב בכם יבאו ויעשו את כל אשר צוה יהוה׃

35:11b.EXO.035.011 את המשכן את אהלו ואת מכסהו את קרסיו ואת קרשיו את בריחו את עמדיו ואת אדניו׃

35:12b.EXO.035.012 את הארן ואת בדיו את הכפרת ואת פרכת המסך׃

35:13b.EXO.035.013 את השלחן ואת בדיו ואת כל כליו ואת לחם הפנים׃

35:14b.EXO.035.014 ואת מנרת המאור ואת כליה ואת נרתיה ואת שמן המאור׃

35:15b.EXO.035.015 ואת מזבח הקטרת ואת בדיו ואת שמן המשחה ואת קטרת הסמים ואת מסך הפתח לפתח המשכן׃

35:16b.EXO.035.016 את מזבח העלה ואת מכבר הנחשת אשר לו את בדיו ואת כל כליו את הכיר ואת כנו׃

35:17b.EXO.035.017 את קלעי החצר את עמדיו ואת אדניה ואת מסך שער החצר׃

35:18b.EXO.035.018 את יתדת המשכן ואת יתדת החצר ואת מיתריהם׃

35:19b.EXO.035.019 את בגדי השרד לשרת בקדש את בגדי הקדש לאהרן הכהן ואת בגדי בניו לכהן׃

35:20b.EXO.035.020 ויצאו כל עדת בני ישראל מלפני משה׃

35:21b.EXO.035.021 ויבאו כל איש אשר נשאו לבו וכל אשר נדבה רוחו אתו הביאו את תרומת יהוה למלאכת אהל מועד ולכל עבדתו ולבגדי הקדש׃

35:22b.EXO.035.022 ויבאו האנשים על הנשים כל נדיב לב הביאו חח ונזם וטבעת וכומז כל כלי זהב וכל איש אשר הניף תנופת זהב ליהוה׃

35:23b.EXO.035.023 וכל איש אשר נמצא אתו תכלת וארגמן ותולעת שני ושש ועזים וערת אילם מאדמים וערת תחשים הביאו׃

35:24b.EXO.035.024 כל מרים תרומת כסף ונחשת הביאו את תרומת יהוה וכל אשר נמצא אתו עצי שטים לכל מלאכת העבדה הביאו׃

35:25b.EXO.035.025 וכל אשה חכמת לב בידיה טוו ויביאו מטוה את התכלת ואת הארגמן את תולעת השני ואת השש׃

35:26b.EXO.035.026 וכל הנשים אשר נשא לבן אתנה בחכמה טוו את העזים׃

35:27b.EXO.035.027 והנשאם הביאו את אבני השהם ואת אבני המלאים לאפוד ולחשן׃

35:28b.EXO.035.028 ואת הבשם ואת השמן למאור ולשמן המשחה ולקטרת הסמים׃

35:29b.EXO.035.029 כל איש ואשה אשר נדב לבם אתם להביא לכל המלאכה אשר צוה יהוה לעשות ביד משה הביאו בני ישראל נדבה ליהוה׃

35:30b.EXO.035.030 ויאמר משה אל בני ישראל ראו קרא יהוה בשם בצלאל בן אורי בן חור למטה יהודה׃

35:31b.EXO.035.031 וימלא אתו רוח אלהים בחכמה בתבונה ובדעת ובכל מלאכה׃

35:32b.EXO.035.032 ולחשב מחשבת לעשת בזהב ובכסף ובנחשת׃

35:33b.EXO.035.033 ובחרשת אבן למלאת ובחרשת עץ לעשות בכל מלאכת מחשבת׃

35:34b.EXO.035.034 ולהורת נתן בלבו הוא ואהליאב בן אחיסמך למטה דן׃

35:35b.EXO.035.035 מלא אתם חכמת לב לעשות כל מלאכת חרש וחשב ורקם בתכלת ובארגמן בתולעת השני ובשש וארג עשי כל מלאכה וחשבי מחשבת׃

36

36:1b.EXO.036.001 ועשה בצלאל ואהליאב וכל איש חכם לב אשר נתן יהוה חכמה ותבונה בהמה לדעת לעשת את כל מלאכת עבדת הקדש לכל אשר צוה יהוה׃

36:2b.EXO.036.002 ויקרא משה אל בצלאל ואל אהליאב ואל כל איש חכם לב אשר נתן יהוה חכמה בלבו כל אשר נשאו לבו לקרבה אל המלאכה לעשת אתה׃

36:3b.EXO.036.003 ויקחו מלפני משה את כל התרומה אשר הביאו בני ישראל למלאכת עבדת הקדש לעשת אתה והם הביאו אליו עוד נדבה בבקר בבקר׃

36:4b.EXO.036.004 ויבאו כל החכמים העשים את כל מלאכת הקדש איש איש ממלאכתו אשר המה עשים׃

36:5b.EXO.036.005 ויאמרו אל משה לאמר מרבים העם להביא מדי העבדה למלאכה אשר צוה יהוה לעשת אתה׃

36:6b.EXO.036.006 ויצו משה ויעבירו קול במחנה לאמר איש ואשה אל יעשו עוד מלאכה לתרומת הקדש ויכלא העם מהביא׃

36:7b.EXO.036.007 והמלאכה היתה דים לכל המלאכה לעשות אתה והותר׃

36:8b.EXO.036.008 ויעשו כל חכם לב בעשי המלאכה את המשכן עשר יריעת שש משזר ותכלת וארגמן ותולעת שני כרבים מעשה חשב עשה אתם׃

36:9b.EXO.036.009 ארך היריעה האחת שמנה ועשרים באמה ורחב ארבע באמה היריעה האחת מדה אחת לכל היריעת׃

36:10b.EXO.036.010 ויחבר את חמש היריעת אחת אל אחת וחמש יריעת חבר אחת אל אחת׃

36:11b.EXO.036.011 ויעש ללאת תכלת על שפת היריעה האחת מקצה במחברת כן עשה בשפת היריעה הקיצונה במחברת השנית׃

36:12b.EXO.036.012 חמשים ללאת עשה ביריעה האחת וחמשים ללאת עשה בקצה היריעה אשר במחברת השנית מקבילת הללאת אחת אל אחת׃

36:13b.EXO.036.013 ויעש חמשים קרסי זהב ויחבר את הירעת אחת אל אחת בקרסים ויהי המשכן אחד׃

36:14b.EXO.036.014 ויעש יריעת עזים לאהל על המשכן עשתי עשרה יריעת עשה אתם׃

36:15b.EXO.036.015 ארך היריעה האחת שלשים באמה וארבע אמות רחב היריעה האחת מדה אחת לעשתי עשרה יריעת׃

36:16b.EXO.036.016 ויחבר את חמש היריעת לבד ואת שש היריעת לבד׃

36:17b.EXO.036.017 ויעש ללאת חמשים על שפת היריעה הקיצנה במחברת וחמשים ללאת עשה על שפת היריעה החברת השנית׃

36:18b.EXO.036.018 ויעש קרסי נחשת חמשים לחבר את האהל להית אחד׃

36:19b.EXO.036.019 ויעש מכסה לאהל ערת אלים מאדמים ומכסה ערת תחשים מלמעלה׃

36:20b.EXO.036.020 ויעש את הקרשים למשכן עצי שטים עמדים׃

36:21b.EXO.036.021 עשר אמת ארך הקרש ואמה וחצי האמה רחב הקרש האחד׃

36:22b.EXO.036.022 שתי ידת לקרש האחד משלבת אחת אל אחת כן עשה לכל קרשי המשכן׃

36:23b.EXO.036.023 ויעש את הקרשים למשכן עשרים קרשים לפאת נגב תימנה׃

36:24b.EXO.036.024 וארבעים אדני כסף עשה תחת עשרים הקרשים שני אדנים תחת הקרש האחד לשתי ידתיו ושני אדנים תחת הקרש האחד לשתי ידתיו׃

36:25b.EXO.036.025 ולצלע המשכן השנית לפאת צפון עשה עשרים קרשים׃

36:26b.EXO.036.026 וארבעים אדניהם כסף שני אדנים תחת הקרש האחד ושני אדנים תחת הקרש האחד׃

36:27b.EXO.036.027 ולירכתי המשכן ימה עשה ששה קרשים׃

36:28b.EXO.036.028 ושני קרשים עשה למקצעת המשכן בירכתים׃

36:29b.EXO.036.029 והיו תואמם מלמטה ויחדו יהיו תמים אל ראשו אל הטבעת האחת כן עשה לשניהם לשני המקצעת׃

36:30b.EXO.036.030 והיו שמנה קרשים ואדניהם כסף ששה עשר אדנים שני אדנים שני אדנים תחת הקרש האחד׃

36:31b.EXO.036.031 ויעש בריחי עצי שטים חמשה לקרשי צלע המשכן האחת׃

36:32b.EXO.036.032 וחמשה בריחם לקרשי צלע המשכן השנית וחמשה בריחם לקרשי המשכן לירכתים ימה׃

36:33b.EXO.036.033 ויעש את הבריח התיכן לברח בתוך הקרשים מן הקצה אל הקצה׃

36:34b.EXO.036.034 ואת הקרשים צפה זהב ואת טבעתם עשה זהב בתים לבריחם ויצף את הבריחם זהב׃

36:35b.EXO.036.035 ויעש את הפרכת תכלת וארגמן ותולעת שני ושש משזר מעשה חשב עשה אתה כרבים׃

36:36b.EXO.036.036 ויעש לה ארבעה עמודי שטים ויצפם זהב וויהם זהב ויצק להם ארבעה אדני כסף׃

36:37b.EXO.036.037 ויעש מסך לפתח האהל תכלת וארגמן ותולעת שני ושש משזר מעשה רקם׃

36:38b.EXO.036.038 ואת עמודיו חמשה ואת וויהם וצפה ראשיהם וחשקיהם זהב ואדניהם חמשה נחשת׃

37

37:1b.EXO.037.001 ויעש בצלאל את הארן עצי שטים אמתים וחצי ארכו ואמה וחצי רחבו ואמה וחצי קמתו׃

37:2b.EXO.037.002 ויצפהו זהב טהור מבית ומחוץ ויעש לו זר זהב סביב׃

37:3b.EXO.037.003 ויצק לו ארבע טבעת זהב על ארבע פעמתיו ושתי טבעת על צלעו האחת ושתי טבעות על צלעו השנית׃

37:4b.EXO.037.004 ויעש בדי עצי שטים ויצף אתם זהב׃

37:5b.EXO.037.005 ויבא את הבדים בטבעת על צלעת הארן לשאת את הארן׃

37:6b.EXO.037.006 ויעש כפרת זהב טהור אמתים וחצי ארכה ואמה וחצי רחבה׃

37:7b.EXO.037.007 ויעש שני כרבים זהב מקשה עשה אתם משני קצות הכפרת׃

37:8b.EXO.037.008 כרוב אחד מקצה מזה וכרוב אחד מקצה מזה מן הכפרת עשה את הכרבים משני קצוותו׃

37:9b.EXO.037.009 ויהיו הכרבים פרשי כנפים למעלה סככים בכנפיהם על הכפרת ופניהם איש אל אחיו אל הכפרת היו פני הכרבים׃

37:10b.EXO.037.010 ויעש את השלחן עצי שטים אמתים ארכו ואמה רחבו ואמה וחצי קמתו׃

37:11b.EXO.037.011 ויצף אתו זהב טהור ויעש לו זר זהב סביב׃

37:12b.EXO.037.012 ויעש לו מסגרת טפח סביב ויעש זר זהב למסגרתו סביב׃

37:13b.EXO.037.013 ויצק לו ארבע טבעת זהב ויתן את הטבעת על ארבע הפאת אשר לארבע רגליו׃

37:14b.EXO.037.014 לעמת המסגרת היו הטבעת בתים לבדים לשאת את השלחן׃

37:15b.EXO.037.015 ויעש את הבדים עצי שטים ויצף אתם זהב לשאת את השלחן׃

37:16b.EXO.037.016 ויעש את הכלים אשר על השלחן את קערתיו ואת כפתיו ואת מנקיתיו ואת הקשות אשר יסך בהן זהב טהור׃

37:17b.EXO.037.017 ויעש את המנרה זהב טהור מקשה עשה את המנרה ירכה וקנה גביעיה כפתריה ופרחיה ממנה היו׃

37:18b.EXO.037.018 וששה קנים יצאים מצדיה שלשה קני מנרה מצדה האחד ושלשה קני מנרה מצדה השני׃

37:19b.EXO.037.019 שלשה גבעים משקדים בקנה האחד כפתר ופרח ושלשה גבעים משקדים בקנה אחד כפתר ופרח כן לששת הקנים היצאים מן המנרה׃

37:20b.EXO.037.020 ובמנרה ארבעה גבעים משקדים כפתריה ופרחיה׃

37:21b.EXO.037.021 וכפתר תחת שני הקנים ממנה וכפתר תחת שני הקנים ממנה וכפתר תחת שני הקנים ממנה לששת הקנים היצאים ממנה׃

37:22b.EXO.037.022 כפתריהם וקנתם ממנה היו כלה מקשה אחת זהב טהור׃

37:23b.EXO.037.023 ויעש את נרתיה שבעה ומלקחיה ומחתתיה זהב טהור׃

37:24b.EXO.037.024 ככר זהב טהור עשה אתה ואת כל כליה׃

37:25b.EXO.037.025 ויעש את מזבח הקטרת עצי שטים אמה ארכו ואמה רחבו רבוע ואמתים קמתו ממנו היו קרנתיו׃

37:26b.EXO.037.026 ויצף אתו זהב טהור את גגו ואת קירתיו סביב ואת קרנתיו ויעש לו זר זהב סביב׃

37:27b.EXO.037.027 ושתי טבעת זהב עשה לו מתחת לזרו על שתי צלעתיו על שני צדיו לבתים לבדים לשאת אתו בהם׃

37:28b.EXO.037.028 ויעש את הבדים עצי שטים ויצף אתם זהב׃

37:29b.EXO.037.029 ויעש את שמן המשחה קדש ואת קטרת הסמים טהור מעשה רקח׃

38

38:1b.EXO.038.001 ויעש את מזבח העלה עצי שטים חמש אמות ארכו וחמש אמות רחבו רבוע ושלש אמות קמתו׃

38:2b.EXO.038.002 ויעש קרנתיו על ארבע פנתיו ממנו היו קרנתיו ויצף אתו נחשת׃

38:3b.EXO.038.003 ויעש את כל כלי המזבח את הסירת ואת היעים ואת המזרקת את המזלגת ואת המחתת כל כליו עשה נחשת׃

38:4b.EXO.038.004 ויעש למזבח מכבר מעשה רשת נחשת תחת כרכבו מלמטה עד חציו׃

38:5b.EXO.038.005 ויצק ארבע טבעת בארבע הקצות למכבר הנחשת בתים לבדים׃

38:6b.EXO.038.006 ויעש את הבדים עצי שטים ויצף אתם נחשת׃

38:7b.EXO.038.007 ויבא את הבדים בטבעת על צלעת המזבח לשאת אתו בהם נבוב לחת עשה אתו׃

38:8b.EXO.038.008 ויעש את הכיור נחשת ואת כנו נחשת במראת הצבאת אשר צבאו פתח אהל מועד׃

38:9b.EXO.038.009 ויעש את החצר לפאת נגב תימנה קלעי החצר שש משזר מאה באמה׃

38:10b.EXO.038.010 עמודיהם עשרים ואדניהם עשרים נחשת ווי העמדים וחשקיהם כסף׃

38:11b.EXO.038.011 ולפאת צפון מאה באמה עמודיהם עשרים ואדניהם עשרים נחשת ווי העמודים וחשקיהם כסף׃

38:12b.EXO.038.012 ולפאת ים קלעים חמשים באמה עמודיהם עשרה ואדניהם עשרה ווי העמדים וחשוקיהם כסף׃

38:13b.EXO.038.013 ולפאת קדמה מזרחה חמשים אמה׃

38:14b.EXO.038.014 קלעים חמש עשרה אמה אל הכתף עמודיהם שלשה ואדניהם שלשה׃

38:15b.EXO.038.015 ולכתף השנית מזה ומזה לשער החצר קלעים חמש עשרה אמה עמדיהם שלשה ואדניהם שלשה׃

38:16b.EXO.038.016 כל קלעי החצר סביב שש משזר׃

38:17b.EXO.038.017 והאדנים לעמדים נחשת ווי העמודים וחשוקיהם כסף וצפוי ראשיהם כסף והם מחשקים כסף כל עמדי החצר׃

38:18b.EXO.038.018 ומסך שער החצר מעשה רקם תכלת וארגמן ותולעת שני ושש משזר ועשרים אמה ארך וקומה ברחב חמש אמות לעמת קלעי החצר׃

38:19b.EXO.038.019 ועמדיהם ארבעה ואדניהם ארבעה נחשת וויהם כסף וצפוי ראשיהם וחשקיהם כסף׃

38:20b.EXO.038.020 וכל היתדת למשכן ולחצר סביב נחשת׃

38:21b.EXO.038.021 אלה פקודי המשכן משכן העדת אשר פקד על פי משה עבדת הלוים ביד איתמר בן אהרן הכהן׃

38:22b.EXO.038.022 ובצלאל בן אורי בן חור למטה יהודה עשה את כל אשר צוה יהוה את משה׃

38:23b.EXO.038.023 ואתו אהליאב בן אחיסמך למטה דן חרש וחשב ורקם בתכלת ובארגמן ובתולעת השני ובשש׃

38:24b.EXO.038.024 כל הזהב העשוי למלאכה בכל מלאכת הקדש ויהי זהב התנופה תשע ועשרים ככר ושבע מאות ושלשים שקל בשקל הקדש׃

38:25b.EXO.038.025 וכסף פקודי העדה מאת ככר ואלף ושבע מאות וחמשה ושבעים שקל בשקל הקדש׃

38:26b.EXO.038.026 בקע לגלגלת מחצית השקל בשקל הקדש לכל העבר על הפקדים מבן עשרים שנה ומעלה לשש מאות אלף ושלשת אלפים וחמש מאות וחמשים׃

38:27b.EXO.038.027 ויהי מאת ככר הכסף לצקת את אדני הקדש ואת אדני הפרכת מאת אדנים למאת הככר ככר לאדן׃

38:28b.EXO.038.028 ואת האלף ושבע המאות וחמשה ושבעים עשה ווים לעמודים וצפה ראשיהם וחשק אתם׃

38:29b.EXO.038.029 ונחשת התנופה שבעים ככר ואלפים וארבע מאות שקל׃

38:30b.EXO.038.030 ויעש בה את אדני פתח אהל מועד ואת מזבח הנחשת ואת מכבר הנחשת אשר לו ואת כל כלי המזבח׃

38:31b.EXO.038.031 ואת אדני החצר סביב ואת אדני שער החצר ואת כל יתדת המשכן ואת כל יתדת החצר סביב׃

39

39:1b.EXO.039.001 ומן התכלת והארגמן ותולעת השני עשו בגדי שרד לשרת בקדש ויעשו את בגדי הקדש אשר לאהרן כאשר צוה יהוה את משה׃

39:2b.EXO.039.002 ויעש את האפד זהב תכלת וארגמן ותולעת שני ושש משזר׃

39:3b.EXO.039.003 וירקעו את פחי הזהב וקצץ פתילם לעשות בתוך התכלת ובתוך הארגמן ובתוך תולעת השני ובתוך השש מעשה חשב׃

39:4b.EXO.039.004 כתפת עשו לו חברת על שני קצוותו חבר׃

39:5b.EXO.039.005 וחשב אפדתו אשר עליו ממנו הוא כמעשהו זהב תכלת וארגמן ותולעת שני ושש משזר כאשר צוה יהוה את משה׃

39:6b.EXO.039.006 ויעשו את אבני השהם מסבת משבצת זהב מפתחת פתוחי חותם על שמות בני ישראל׃

39:7b.EXO.039.007 וישם אתם על כתפת האפד אבני זכרון לבני ישראל כאשר צוה יהוה את משה׃

39:8b.EXO.039.008 ויעש את החשן מעשה חשב כמעשה אפד זהב תכלת וארגמן ותולעת שני ושש משזר׃

39:9b.EXO.039.009 רבוע היה כפול עשו את החשן זרת ארכו וזרת רחבו כפול׃

39:10b.EXO.039.010 וימלאו בו ארבעה טורי אבן טור אדם פטדה וברקת הטור האחד׃

39:11b.EXO.039.011 והטור השני נפך ספיר ויהלם׃

39:12b.EXO.039.012 והטור השלישי לשם שבו ואחלמה׃

39:13b.EXO.039.013 והטור הרביעי תרשיש שהם וישפה מוסבת משבצות זהב במלאתם׃

39:14b.EXO.039.014 והאבנים על שמת בני ישראל הנה שתים עשרה על שמתם פתוחי חתם איש על שמו לשנים עשר שבט׃

39:15b.EXO.039.015 ויעשו על החשן שרשרת גבלת מעשה עבת זהב טהור׃

39:16b.EXO.039.016 ויעשו שתי משבצת זהב ושתי טבעת זהב ויתנו את שתי הטבעת על שני קצות החשן׃

39:17b.EXO.039.017 ויתנו שתי העבתת הזהב על שתי הטבעת על קצות החשן׃

39:18b.EXO.039.018 ואת שתי קצות שתי העבתת נתנו על שתי המשבצת ויתנם על כתפת האפד אל מול פניו׃

39:19b.EXO.039.019 ויעשו שתי טבעת זהב וישימו על שני קצות החשן על שפתו אשר אל עבר האפד ביתה׃

39:20b.EXO.039.020 ויעשו שתי טבעת זהב ויתנם על שתי כתפת האפד מלמטה ממול פניו לעמת מחברתו ממעל לחשב האפד׃

39:21b.EXO.039.021 וירכסו את החשן מטבעתיו אל טבעת האפד בפתיל תכלת להית על חשב האפד ולא יזח החשן מעל האפד כאשר צוה יהוה את משה׃

39:22b.EXO.039.022 ויעש את מעיל האפד מעשה ארג כליל תכלת׃

39:23b.EXO.039.023 ופי המעיל בתוכו כפי תחרא שפה לפיו סביב לא יקרע׃

39:24b.EXO.039.024 ויעשו על שולי המעיל רמוני תכלת וארגמן ותולעת שני משזר׃

39:25b.EXO.039.025 ויעשו פעמני זהב טהור ויתנו את הפעמנים בתוך הרמנים על שולי המעיל סביב בתוך הרמנים׃

39:26b.EXO.039.026 פעמן ורמן פעמן ורמן על שולי המעיל סביב לשרת כאשר צוה יהוה את משה׃

39:27b.EXO.039.027 ויעשו את הכתנת שש מעשה ארג לאהרן ולבניו׃

39:28b.EXO.039.028 ואת המצנפת שש ואת פארי המגבעת שש ואת מכנסי הבד שש משזר׃

39:29b.EXO.039.029 ואת האבנט שש משזר ותכלת וארגמן ותולעת שני מעשה רקם כאשר צוה יהוה את משה׃

39:30b.EXO.039.030 ויעשו את ציץ נזר הקדש זהב טהור ויכתבו עליו מכתב פתוחי חותם קדש ליהוה׃

39:31b.EXO.039.031 ויתנו עליו פתיל תכלת לתת על המצנפת מלמעלה כאשר צוה יהוה את משה׃

39:32b.EXO.039.032 ותכל כל עבדת משכן אהל מועד ויעשו בני ישראל ככל אשר צוה יהוה את משה כן עשו׃

39:33b.EXO.039.033 ויביאו את המשכן אל משה את האהל ואת כל כליו קרסיו קרשיו בריחו ועמדיו ואדניו׃

39:34b.EXO.039.034 ואת מכסה עורת האילם המאדמים ואת מכסה ערת התחשים ואת פרכת המסך׃

39:35b.EXO.039.035 את ארן העדת ואת בדיו ואת הכפרת׃

39:36b.EXO.039.036 את השלחן את כל כליו ואת לחם הפנים׃

39:37b.EXO.039.037 את המנרה הטהרה את נרתיה נרת המערכה ואת כל כליה ואת שמן המאור׃

39:38b.EXO.039.038 ואת מזבח הזהב ואת שמן המשחה ואת קטרת הסמים ואת מסך פתח האהל׃

39:39b.EXO.039.039 את מזבח הנחשת ואת מכבר הנחשת אשר לו את בדיו ואת כל כליו את הכיר ואת כנו׃

39:40b.EXO.039.040 את קלעי החצר את עמדיה ואת אדניה ואת המסך לשער החצר את מיתריו ויתדתיה ואת כל כלי עבדת המשכן לאהל מועד׃

39:41b.EXO.039.041 את בגדי השרד לשרת בקדש את בגדי הקדש לאהרן הכהן ואת בגדי בניו לכהן׃

39:42b.EXO.039.042 ככל אשר צוה יהוה את משה כן עשו בני ישראל את כל העבדה׃

39:43b.EXO.039.043 וירא משה את כל המלאכה והנה עשו אתה כאשר צוה יהוה כן עשו ויברך אתם משה׃

40

40:1b.EXO.040.001 וידבר יהוה אל משה לאמר׃

40:2b.EXO.040.002 ביום החדש הראשון באחד לחדש תקים את משכן אהל מועד׃

40:3b.EXO.040.003 ושמת שם את ארון העדות וסכת על הארן את הפרכת׃

40:4b.EXO.040.004 והבאת את השלחן וערכת את ערכו והבאת את המנרה והעלית את נרתיה׃

40:5b.EXO.040.005 ונתתה את מזבח הזהב לקטרת לפני ארון העדת ושמת את מסך הפתח למשכן׃

40:6b.EXO.040.006 ונתתה את מזבח העלה לפני פתח משכן אהל מועד׃

40:7b.EXO.040.007 ונתת את הכיר בין אהל מועד ובין המזבח ונתת שם מים׃

40:8b.EXO.040.008 ושמת את החצר סביב ונתת את מסך שער החצר׃

40:9b.EXO.040.009 ולקחת את שמן המשחה ומשחת את המשכן ואת כל אשר בו וקדשת אתו ואת כל כליו והיה קדש׃

40:10b.EXO.040.010 ומשחת את מזבח העלה ואת כל כליו וקדשת את המזבח והיה המזבח קדש קדשים׃

40:11b.EXO.040.011 ומשחת את הכיר ואת כנו וקדשת אתו׃

40:12b.EXO.040.012 והקרבת את אהרן ואת בניו אל פתח אהל מועד ורחצת אתם במים׃

40:13b.EXO.040.013 והלבשת את אהרן את בגדי הקדש ומשחת אתו וקדשת אתו וכהן לי׃

40:14b.EXO.040.014 ואת בניו תקריב והלבשת אתם כתנת׃

40:15b.EXO.040.015 ומשחת אתם כאשר משחת את אביהם וכהנו לי והיתה להית להם משחתם לכהנת עולם לדרתם׃

40:16b.EXO.040.016 ויעש משה ככל אשר צוה יהוה אתו כן עשה׃

40:17b.EXO.040.017 ויהי בחדש הראשון בשנה השנית באחד לחדש הוקם המשכן׃

40:18b.EXO.040.018 ויקם משה את המשכן ויתן את אדניו וישם את קרשיו ויתן את בריחיו ויקם את עמודיו׃

40:19b.EXO.040.019 ויפרש את האהל על המשכן וישם את מכסה האהל עליו מלמעלה כאשר צוה יהוה את משה׃

40:20b.EXO.040.020 ויקח ויתן את העדת אל הארן וישם את הבדים על הארן ויתן את הכפרת על הארן מלמעלה׃

40:21b.EXO.040.021 ויבא את הארן אל המשכן וישם את פרכת המסך ויסך על ארון העדות כאשר צוה יהוה את משה׃

40:22b.EXO.040.022 ויתן את השלחן באהל מועד על ירך המשכן צפנה מחוץ לפרכת׃

40:23b.EXO.040.023 ויערך עליו ערך לחם לפני יהוה כאשר צוה יהוה את משה׃

40:24b.EXO.040.024 וישם את המנרה באהל מועד נכח השלחן על ירך המשכן נגבה׃

40:25b.EXO.040.025 ויעל הנרת לפני יהוה כאשר צוה יהוה את משה׃

40:26b.EXO.040.026 וישם את מזבח הזהב באהל מועד לפני הפרכת׃

40:27b.EXO.040.027 ויקטר עליו קטרת סמים כאשר צוה יהוה את משה׃

40:28b.EXO.040.028 וישם את מסך הפתח למשכן׃

40:29b.EXO.040.029 ואת מזבח העלה שם פתח משכן אהל מועד ויעל עליו את העלה ואת המנחה כאשר צוה יהוה את משה׃

40:30b.EXO.040.030 וישם את הכיר בין אהל מועד ובין המזבח ויתן שמה מים לרחצה׃

40:31b.EXO.040.031 ורחצו ממנו משה ואהרן ובניו את ידיהם ואת רגליהם׃

40:32b.EXO.040.032 בבאם אל אהל מועד ובקרבתם אל המזבח ירחצו כאשר צוה יהוה את משה׃

40:33b.EXO.040.033 ויקם את החצר סביב למשכן ולמזבח ויתן את מסך שער החצר ויכל משה את המלאכה׃

40:34b.EXO.040.034 ויכס הענן את אהל מועד וכבוד יהוה מלא את המשכן׃

40:35b.EXO.040.035 ולא יכל משה לבוא אל אהל מועד כי שכן עליו הענן וכבוד יהוה מלא את המשכן׃

40:36b.EXO.040.036 ובהעלות הענן מעל המשכן יסעו בני ישראל בכל מסעיהם׃

40:37b.EXO.040.037 ואם לא יעלה הענן ולא יסעו עד יום העלתו׃

40:38b.EXO.040.038 כי ענן יהוה על המשכן יומם ואש תהיה לילה בו לעיני כל בית ישראל בכל מסעיהם׃