1 John (Dinka)

11

11:1b.1JO.011.001 Ke e nu ɣɔn thɛɛr gɔle kaŋ, ke cuk piŋ, ke cuk tiŋ e wonyiin, ke cuk woi, ke cuk dɔm e wocin, kede jam de piir

11:2b.1JO.011.002 (ku piir aci tic egɔk, ka cuk tiŋ, ku yok caatɔɔ ne kede, agoku week aa guieer piir athɛɛre, piir e nu ke Waada, ku ci nyuoth wook);

11:3b.1JO.011.003 ke cuk tiŋ ku piŋku, en a guiirku week, ke we bi abarɔ aa mat ne wook etok ayadaŋ: ku eyin abarɔdan yok mat yen aye abarɔ de Waada keke Wendɛn Yecu Kritho:

11:4b.1JO.011.004 ku kake kek a gaarku, ke wo bi piɔth miɛt abuk piɔth a yum.

11:5b.1JO.011.005 Ku kene ee thon cuk piŋ tede yen, ku guiirku week, yan, Nhialic ee ɣɛɛrepiny, ku acin cuɔl cath ke yen etaitai.

11:6b.1JO.011.006 Na luelku yen, an, yok abarɔ mat ne yen, ku ciɛthku tecol, ke wo ye lueth toor, ku cuku yin e looi:

11:7b.1JO.011.007 ku na ciɛthku teɣer, cit man nu yen teɣer, ke wok ee abarɔ mat wapac, ago riɛm e Yecu Kritho Wende wook aa waak ne kerac ebɛn.

11:8b.1JO.011.008 Te lueel wok en, an, cin kerɛɛc cath ke wook, ke wok e ro math, ku acin yin cath ke wook.

11:9b.1JO.011.009 Ku na gamku cawooc, ke yen Raan adot ku piɛthpiɔu, ka bi wo pal karɛckuɔ, ku jɔ wo waak piɔth ne racdepiɔu ebɛn.

11:10b.1JO.011.010 Na luelku yen, an, cin kerɛɛc cuk looi, ka cuk tɔ ye alueeth, ku jamde aliu tede wook.

12

12:1b.1JO.012.001 Wek niithkienthiike, kake a gaar ke week, ke we cii kerac bi aa looi. Ku na de raan loi kerac, ke wo de Raan e keda kuɔny e guieer e Waada nɔm, yen aye Yecu Kritho raan piɛthpiɔu:

12:2b.1JO.012.002 ku yen aye ke ci Nhialic luk ne baŋ de karɛckuɔ; ku acie karɛckuɔ wapac, ee karɛc ke piny nɔm ebɛn ayadaŋ.

12:3b.1JO.012.003 Ku don ee wo looŋke dot, en a ŋic wok en nɔn ci wok e ŋic.

12:4b.1JO.012.004 Raan luel en, an, ŋic, ku cii looŋke e dot, ka ye alueeth, ku yin aliu tede yen:

12:5b.1JO.012.005 ku na de raan e jamde dot, ka nhieer e Nhialic aci tɔ ye dikedik eyic e yeyic. Yen aŋicku ye nɔn nu wok e yeyic:

12:6b.1JO.012.006 raan luel en, an, reer e yeyic, abi dhil tɔu e tau man ɣɔn ee yen tɔu.

12:7b.1JO.012.007 We kɔc nhiaar, acin loŋ ci piac cak loŋ gaar week, ee loŋ thɛɛr loŋ e cath ke week ɣɔn gɔle jam: loŋ thɛɛr en aye jam cak piŋ ɣɔn thɛɛr gɔle jam.

12:8b.1JO.012.008 Ku ye loŋ e piac cak ayadaŋ en gaar week, loŋ yic e yeyic ku weyiic; luɔi kɔɔr cuɔlepiny jal, ku jɔ ɣɛɛr yic de piny guɔ riau.

12:9b.1JO.012.009 Raan luel en, an, tɔu teɣer, ku mɛɛn mɛnhkene, ka tɔu tecol aɣet ci enɔɔne.

12:10b.1JO.012.010 Raan nhiaar mɛnhkene, ka rɛɛr teɣer, ku acin ke cath ke ye ke bi ye tɔ kɔth.

12:11b.1JO.012.011 Ku raan man mɛnhkene, ka tɔu tecol, ku ciɛth tecol, ke kuc te le yen thin, e luɔi ci cuɔlepiny ye tɔ cɔɔr.

12:12b.1JO.012.012 Wek gaar, wek niiththiiakaŋ, e luɔi ci karɛckun pal week ne baŋ de rinke.

12:13b.1JO.012.013 Wek gaar, wek warken e mith, luɔi ca wek Raan ŋic Raan e nu te ɣɔn gɔle kaŋ. Wek gaar, wek dhuok, e luɔi ca wek raan rɛɛce tiaam. Aca gaar week, wek miththiiakaŋ, e luɔi ŋiɛc wek Waada.

12:14b.1JO.012.014 Aca gaar week, wek warken e mith, e luɔi ŋiɛc wek Raan e nu te ɣɔn gɔle kaŋ. Aca gaar week, wek dhuok, luɔi riɛl wek, ku luɔi tɔuwe jam e Nhialic e weyiic, ku cak raan rɛɛce tiaam.

12:15b.1JO.012.015 Duoki piny nɔm nhiaar, ayi ka nu thin duoki ke nhiaar. Na de raan nhiaar piny nɔm, ke nhieer e Nhialic acii cath ke ye.

12:16b.1JO.012.016 Kerieec nu e piny nɔm, yi ŋɔɔŋ de guop, ku ŋɔɔŋ de nyin, ku dit ee raan rot tɔ dit e ka ke piir, aciki e ka ke Waada, ayek ka ke piny nɔm.

12:17b.1JO.012.017 Ku piny nɔm akɔɔr jal, ayi ŋɔɔŋde aya: ku raan e kede piɔn e Nhialic looi ee tɔu athɛɛr.

12:18b.1JO.012.018 Wek miththiiakaŋ, thaar e thok de piny ki: ku acit man ca wek e kɔn piŋ nɔn bi raan man Kritho bɛn, en a ci kɔc juec man Kritho ro guɔ yok enɔɔne; ku yen a ŋicku ye nɔn ee yen thaar e thok de piny.

12:19b.1JO.012.019 Aake jel e woyiic, ku aake cii raan ne wook: te e ke raan ne wook, adi ŋootki ke ke rɛɛr ne wook; e luɔi bi kek lɔ gɔk nɔn e cii kek raan ne wook kek kedhie, en aa jel kek.

12:20b.1JO.012.020 Ku we de tony ci we tɔc, tony e bɔ tede Raan Ɣerpiɔu, ku we ŋic kaŋ kedhie.

12:21b.1JO.012.021 Acie kuny kuoc wek yic, yen e gaar ɛn week, e luɔi ŋiɛc wek yic, ku ŋiɛcki nɔn cin en luenh e bɔ tede yic.

12:22b.1JO.012.022 Eeŋa ye alueeth? Cie raan e jai, an, cii Yecu e Kritho? Raan man Kritho ka, raan e jai Waada keke Wende.

12:23b.1JO.012.023 Raan ebɛn raan jai Wende, ka Waada acii cath ke yen aya: ku raan gam Wende, ka cath ke Waada aya.

12:24b.1JO.012.024 Ku na week, ke cak kɔn piŋ te ɣɔn gɔle jam, taki tɔu e weyiic. Na tɔu ke cak kɔn piŋ te ɣɔn gɔle jam, na tɔu e weyiic, ke we bi tɔu e Wendeyic, ku tauki e Waadayic aya.

12:25b.1JO.012.025 Ku kene ee ke ci kɔn lueel, an, bi gam wook, yen piir athɛɛr.

12:26b.1JO.012.026 Ku kake aca ke gaar week ne kede kɔc e week math.

12:27b.1JO.012.027 Ku na week, tony cak yok tede yen atɔu e weyiic, ku acin raan daŋ kaarki raan dueer we wɛɛt; ku acit man ee tony mane we wɛɛt ne kerieec ebɛn, ku ye yic, ku cie lueth, ke we bi tɔu e yeyic, cit man e weet en week.

12:28b.1JO.012.028 Ku enɔɔne, we niiththiiakaŋ, yak tɔu e yeyin; na miak, ci tuol, ke wo dueer nyiin riɛl, ku cuku yaar e yenɔm e bɛnde.

12:29b.1JO.012.029 Te ŋiɛc wek en nɔn piɛth en piɔu, ka ŋiɛcki aya nɔn ee yen e dhieth raan ebɛn raan e kede piathepiɔu looi.

13

13:1b.1JO.013.001 Tieŋki nhieer diit cii Waada wo nhiaar, bi wo ya cɔɔl mith ke Nhialic; ku kee wook. Yen a kuce kɔc ke piny nɔm wook, luɔi e kuc kek en.

13:2b.1JO.013.002 We kɔc nhiaar, wok ee mith ke Nhialic enɔɔne, ku taudan bi wok tɔu rial aken guɔ tic. Ku aŋicku nɔn bi wo ciet en, kool bi en tuol; ne tiŋ bi wok e tiŋ tau tɔu en.

13:3b.1JO.013.003 Ku raan ebɛn raan cath ke aŋɔthe aŋɔth ŋɛɛth en en, ee yepiɔu tɔ lɔ wai cit man le en piɔu wai.

13:4b.1JO.013.004 Raan ebɛn raan e kerac looi ka ye loŋ dhɔŋic aya: kerac yen aye dhaŋ de loŋic.

13:5b.1JO.013.005 Ku aŋiɛcki nɔn ci en tuol bi karɛckuɔ bɛn nyaai; ku acin kerɛɛc cath keke yen.

13:6b.1JO.013.006 Raan e tɔu e yeyin, ka cii kerac e looi: ku raan e kerac looi, ka ken tiŋ, ku cii ŋic aya.

13:7b.1JO.013.007 Wek miththiiakaŋ, duoki rot e tɔ mɛthe raan: raan e kede piathepiɔu looi, ka piɛthpiɔu, cit man piɛth en piɔu:

13:8b.1JO.013.008 raan e kerac looi, ka ye kede jɔŋdiit rac; jɔŋdiit rac yen aa gɔl luɔi e kerac ɣɔn ciɛke kaŋ. Yen aa tule Wen e Nhialic, bi luɔi de jɔŋdiit rac bɛn riɔɔk.

13:9b.1JO.013.009 Raan ci dhieeth e Nhialic acii kerac e looi, luɔi tɔuwe kau de wun e yeyic: ku acii kerac dueer aa looi, ne dhienh ci Nhialic e dhieeth.

13:10b.1JO.013.010 Ken ee mith ke Nhialic lɔ dhek ki, ku lɔ mith ke jɔŋdiit rac dhek: raan cii kede piathepiɔu e looi, ka cie kede Nhialic, ayi raan cii mɛnhkene e nhiaar.

13:11b.1JO.013.011 Ku kene ee thoŋ cak piŋ te ɣɔn gɔle jam, yan, buk rot aa nhiaar;

13:12b.1JO.013.012 Ku cuku bi ciet Kain, raan e bɔ tede jɔŋdiit rɛɛce, raan ci mɛnhkene nɔk. Ku eeŋo e nɛk en en? E luɔi rɛɛce luɔide, ku piɛth luɔi de mɛnhkene.

13:13b.1JO.013.013 Duoki e gai, wek mithekɔekuɔ, te mɛɛne kɔc ke piny nɔm week.

13:14b.1JO.013.014 Aŋicku nɔn ci wo bɛn bei e thuɔɔuwic lok te nu piir, ne nhieer nhiɛɛr wok mithekɔckuɔ. Raan cii kɔc e nhiaar, ka tɔu e thuɔɔuyic.

13:15b.1JO.013.015 Raan ebɛn raan man mɛnhkene, ka ye raan e kɔc nɔk: ku aŋicku, yan, acin raan e kɔc nɔk cath ke piir athɛɛr.

13:16b.1JO.013.016 Ke ŋicku nhieer ki, gɛm ci en weike gaam ne biakda: ku wo dueer weikuɔ dhil gaam ne biak de mithekɔckuɔ.

13:17b.1JO.013.017 Ku na de raan cath ke ka piire kɔc ke, ke jɔ mɛnhkene tiŋ aci kaŋ dak, go yic riɛl ke yen, ke nhieer e Nhialic cath ke yen adi?

13:18b.1JO.013.018 Wek miththiiakaŋ, duku kɔc e nhiaar ne jam tei, ku ne liep tei; yok kɔc nhiaar ne luɔi ku ne yic.

13:19b.1JO.013.019 Kee ŋic wok en nɔn rɛɛn wok ne yic ki, ku yen abi wok wopiɔth pal piny e yenɔm,

13:20b.1JO.013.020 te de en ke jieenye piɔthkuɔ wook; luɔi diite Nhialic awar piɔthkuɔ, ku aŋic kaŋ kedhie.

13:21b.1JO.013.021 Wek kɔc nhiaar, te ken piɔthkuɔ wo jɔɔny, ke wo dueer nyiin riɛl e Nhialic nɔm;

13:22b.1JO.013.022 ku te de en ke lipku, ka yok yok tede yen, luɔi ee wo looŋke dot, ku yok kamit e yepiɔu looi.

13:23b.1JO.013.023 Ku loŋde ki, gam bi wo rin ke Wendɛn Yecu Kritho gam, ku nhieer bi wok rot aa nhiaar, cit man ci en wo yien loŋ.

13:24b.1JO.013.024 Ku raan e looŋke dot, ka ye reer e yeyic, ku yen e yeyic. Ku Weidit ci gam wook, yen aŋic wok en nɔn reer en e woyiic.

14

14:1b.1JO.014.001 Wek kɔc nhiaar, duoki wei gam kedhie, ku yak wei them, nɔn e bi kek tede Nhialic: ade nebii aluɛth juec ci lɔ e piny nɔm.

14:2b.1JO.014.002 Niny ŋiɛc wek Weidit ke Nhialic ki: yan, wei ebɛn wei e gam nɔn ci Yecu Kritho bɛn ke ye raan guop, ka ye ke bɔ tede Nhialic;

14:3b.1JO.014.003 ku wei ebɛn wei cii Yecu Kritho gam, ka ye ke cii bɔ tede Nhialic: wei ke raan man Kritho ka, raan ca we kede piŋ nɔn bi en bɛn; ku ye ki e guɔ nu e piny nɔme.

14:4b.1JO.014.004 Wek ee kɔc ke Nhialic, wek miththiaakaŋ, ku acak ke tiaam: luɔi diite Raan nu e weyiic awar raan nu e piny nɔm.

14:5b.1JO.014.005 Kɔcke ayek kɔc ke piny nɔm; yen a jiɛɛm kek ne kede piny nɔm, ago kɔc ke piny nɔm keden piŋ.

14:6b.1JO.014.006 Wok ee kɔc ke Nhialic: raan ŋic Nhialic ka ye keda piŋ; ku raan cie kede Nhialic ka cii keda e piŋ. Niny ŋic wok wei ke yic, ku wei ke lueth ki.

14:7b.1JO.014.007 Wek kɔc nhiaar, yok rot nhiaar: nhieer yen aye kede Nhialic; ku raan ebɛn raan cath ke nhieer ee Nhialic en e dhieth en, ku ŋic Nhialic.

14:8b.1JO.014.008 Raan cii cath ke nhieer ka kuc Nhialic; Nhialic yen aye nhieer.

14:9b.1JO.014.009 Ecooke yen aa le nhieer e Nhialic dhek tede wook, tuoc ci Nhialic Wendɛn toŋ ci dhieeth tuooc e piny nɔm, luɔi bi wo piir ne yen.

14:10b.1JO.014.010 Nhieer ki ekene, acie luɔi e nhiɛɛr wo Nhialic, ee luɔi nhiɛɛr en wook, ago Wende tuooc abi aa ke bi Nhialic luk ne karɛc cuk looi.

14:11b.1JO.014.011 Wek kɔc nhiaar, te ci Nhialic wo nhiaar e nhieer cit ekene, ke wo dueer rot dhil nhiaar aya.

14:12b.1JO.014.012 Acin raan ci Nhialic kɔn tiŋ anande: te nhiɛɛr wok rot, ke Nhialic arɛɛr e woyiic, go nhieerde tɔ ye dikedik e woyiic:

14:13b.1JO.014.013 ŋiny ŋic wok en nɔn reer wok e yeyic, ku nɔn reer en e woyiic, ki, miɔc ci en wo miɔɔc ne Weike.

14:14b.1JO.014.014 Ku acuk tiŋ ku yok caatɔɔ ne tuoc ci Waada Wende tuooc bi aa Kony bi kɔc ke piny nɔm kony wei.

14:15b.1JO.014.015 Te de en raan luel gamde, an, Yecu yen aye Wen e Nhialic, ke Nhialic arɛɛr e yeyic, ku reer e Nhialicic.

14:16b.1JO.014.016 Ku nhieer nhiɛɛre Nhialic wook acuk ŋic ku acuk gam. Nhialic ee nhieer; ku raan e reer e nhieeric ka ye reer e Nhialicic, ku rɛɛr Nhialic e yeyic.

14:17b.1JO.014.017 Yen aye nhieerda tɔ ye dikedik, luɔi bi wo nyiin riɛl ekool e guieereloŋ: luɔi tɔu wok e pinye nɔm, acit man tɔu en.

14:18b.1JO.014.018 Riɔɔc aliu e nhieeric: ku nhieer ci dikedik ee riɔɔc ciɛɛc wei, ne luɔi ee riɔɔc raan cuil guop; ku raan e riɔɔc aŋoot ke kene tɔ ye dikedik e nhieeric.

14:19b.1JO.014.019 Nhieer ci en wo kɔn nhiaar, en a nhiɛɛr wok en.

14:20b.1JO.014.020 Te lueele raan en, an, Yɛn nhiaar Nhialic, ku mɛɛn mɛnhkene, ka ye alueeth: raan cii mɛnhkene e nhiaar raan ci tiŋ guop, ke dueer Nhialic nhiaar adi, Raan ken tiŋ guop?

14:21b.1JO.014.021 Ku loŋe a yokku tede yen, yan, Raan nhiaar Nhialic ke nhiaar mɛnhkene aya.

15

15:1b.1JO.015.001 Raan ebɛn raan e Yecu gam, an, ee Kritho, ka ye dhieeth Nhialic; ku raan ebɛn raan nhiaar raan e dhieth meth ke nhiaar mɛnh e dhieeth aya.

15:2b.1JO.015.002 Te nhiɛɛr wok Nhialic, ku dotku looŋke, yen aŋicku yen nɔn nhiɛɛr wok mith ke Nhialic.

15:3b.1JO.015.003 Nhieer e Nhialic ki, don ee wok looŋke dot: ku looŋke aciki ril.

15:4b.1JO.015.004 Ku ke ci dhieeth e Nhialic ebɛn ee ka ke piny nɔm tiaam: ku ye gamda yen tiem e ka ke piny nɔm tiaam.

15:5b.1JO.015.005 Ku eeŋa raan e piny tiaam? cie yen raan ci Yecu gam, an, ee Wen e Nhialic?

15:6b.1JO.015.006 Kene ee raan e bɔ ne piu keke riɛm, yen aye Yecu Kritho; aa cii bɔ ne piu kapac, ee piu ku riɛm.

15:7b.1JO.015.007 Ku Weidit kek aye caatɔ, luɔi ee kek yith kek Wei. Ku caatɔɔ nu paannhial ayek diak, Waada, ku Jam, ku Weidit Ɣer: ku dieŋke ayek tok.

15:8b.1JO.015.008 Ku caatɔɔ anuki kadiak e piny nɔm, Weidit, ku piu, ku riɛm: ku dieŋke amɛtki etok.

15:9b.1JO.015.009 Te ye wok ke lueel kɔc gam kɔc ci aa caatɔɔ, ke ke lueel Nhialic yen adit e ke lueel kɔc: ku kene ee ke lueel Nhialic, ɣɔn ci en aa caatɔ ne kede Wende.

15:10b.1JO.015.010 Raan gam Wen e Nhialic ke jam lueel caatɔɔ acath keke yen: raan reec Nhialic gam ka ye Nhialic tɔ ye alueeth; luɔi e reec en jam lueel Nhialic ne kede Wende.

15:11b.1JO.015.011 Jam lueel caatɔ ki: yan, Nhialic aci wo gam piir athɛɛr, ku piire anu e Wendeyic.

15:12b.1JO.015.012 Raan cath ke Wende ka cath ke piir; ku raan cii cath ke Wen e Nhialic ka cii cath ke piir.

15:13b.1JO.015.013 Kake aca ke gaar week, ke bak ŋic nɔn cath wek ne piir athɛɛr, wek kɔc ci rin ke Wen e Nhialic gam.

15:14b.1JO.015.014 Riɛl ee wo nyiin riɛl e yenɔm ki, yan, Te de en ke yok lip, ke roŋ ke kede yenpiɔu, ka ye keda piŋ:

15:15b.1JO.015.015 ku te ŋic wok en nɔn ee yen keda piŋ, te de en ke yok lip, ka ŋicku nɔn e wo kaŋ yok ka yok lip tede yen.

15:16b.1JO.015.016 Na de raan tiŋ mɛnhkene ke loi kerac, ku cie kerɛɛc e thuɔɔu bɛɛi, ke lip, ka bi gam piir ne kede kɔc loi kerɛɛc cii thuɔɔu e bɛɛi. Kerɛɛc e thuɔɔu bɛɛi anu: aca luel nɔn bi en lɔŋ ne kede.

15:17b.1JO.015.017 Luɔi de kerac ebɛn ee kerac: ku kerɛɛc cii thuɔɔu e bɛɛi anu.

15:18b.1JO.015.018 Cooke aŋicku, yan, Raan ebɛn raan e dhieeth Nhialic acii kerac e looi; raan e dhieeth Nhialic e ro dot, ke cii jɔŋ rɛɛce bi jak.

15:19b.1JO.015.019 Aŋicku nɔn ee wok kɔc ke Nhialic, ku nɔn tɔuwe piny nɔm ebɛn e keracic.

15:20b.1JO.015.020 Ku aŋicku nɔn ci Wen e Nhialic bɛn, bi ku gɛm wook ŋinydekaŋ, buk raan yin ŋic, ku wok tɔu e raan yicic, yen aye Wendɛn Yecu Kritho. Nhialic yic ki, ku piir athɛɛr ka.

15:21b.1JO.015.021 Wek miththiiakaŋ, yak ro tiit ne eidool, (ka ye lam ku ciki e Nhialic). Amen.